ADVERTISEMENT

ADVERTISEMENT

സിബിഎസ്ഇ മലബാര്‍ സഹോദയ കലോത്സവം മൂന്നാംഘട്ടം ഇന്നുമുതൽ

താമരശേരി: സിബിഎസ്ഇ സ്‌കൂളുകളുടെ കൂട്ടായ്മയായ മലബാര്‍ സഹോദയ കോഴിക്കോട് ജില്ലാ കലോത്സവത്തിന്‍റെ മൂന്നാംഘട്ട മത്സരങ്ങള്‍ക്ക് ഇന്ന് തുടക്കമാകും. താമരശേരി അല്‍ഫോന്‍സ സ്‌കൂളില്‍ രാവിലെ എട്ടിന് മത്സരങ്ങള്‍ ആരംഭിക്കും.

മലബാര്‍ സഹോദയയുടെ കീഴിലുള്ള കോഴിക്കോട് ജില്ലയിലെ 67 സിബിഎസ്ഇ സ്‌കൂളുകളില്‍ നിന്നായി ഏകദേശം 4,000 വിദ്യാര്‍ഥികളാണ് കലോത്സവത്തില്‍ പങ്കെടുക്കുന്നത്. അവസാന ഘട്ടമായ നാലാംഘട്ട മത്സരങ്ങള്‍ 25, 26 തീയതികളില്‍ കുന്നമംഗലത്തെ കെപിസിഎം ശ്രീനാരായണ വിദ്യാലയത്തില്‍ നടക്കും.

ADVERTISEMENT

കോഴിക്കോടിന്‍റെ "വൈബ്' മാറുന്നു

സ്വന്തം ലേഖകന്‍ കോഴിക്കോട്: എന്തും കിട്ടും എങ്ങനെയും കിട്ടും...അതായിരുന്നു കോഴിക്കോട്ടെ പാളയം മാര്‍ക്കറ്റ്. ചരിത്രമുറങ്ങുന്ന സ്ഥലം. "പാളയത്തേക്ക് പേകാം' എന്ന് ഒരിക്കലെങ്കിലും പറയാത്ത കോഴിക്കോട്ടുകാരുണ്ടാവില്ല. സംസ്ഥാനത്തിനകത്തും പുറത്തും നിന്നുമുള്ള നൂറുകണക്കിന് പേര്‍ വന്നുപോകുന്ന സ്ഥലം. പാളയത്തെ തിരക്കില്‍പെട്ടുപോകാത്ത കോഴിക്കോട്ടുകാരുണ്ടാകില്ല. ആ തിരക്ക് തന്നെയാണ് പാളയത്തിന്‍റെ ഗുണവും ദോഷവും. ഒടുവില്‍ പാളയവും പരിസരവും " കാലിയാകുമ്പോള്‍' ഒരു കാലഘട്ടം തന്നെയാണ് പിന്നോട്ടുപോകുന്നത്. പാളയത്തെ തിരക്ക് കോഴിക്കോട്ടുകാരുടെ വൈബായിരുന്നു. ഏറ്റവും കൂടുതല്‍ പേര്‍ എത്തിയിരുന്ന പച്ചക്കറി-പഴം മാര്‍ക്കറ്റുകള്‍ ഇവിടെ നിന്നും മാറുമ്പോള്‍ അനുബന്ധ കച്ചവടങ്ങളെയും അത് ബാധിക്കും. ഏറെ ചിന്തിച്ചെടുത്ത തീരുമാനമെന്ന് കോര്‍പറേഷന്‍ അധികാരികള്‍ പറയുമ്പോള്‍ പ്രതീക്ഷകളും ഏറെയാണ്. 24 മണിക്കൂറും തിരക്ക്... ഉത്സവകാലങ്ങളില്‍ പാളയത്തെ തിരക്ക് ഒന്നുവേറെ തന്നെയാണ് പഴം , പച്ചക്കറി മാര്‍ക്കറ്റ്, മൊത്ത വ്യാപാര കടകള്‍ , ചെറിയ ഷോപ്പുകള്‍, ഹോട്ടലുകള്‍, ലോഡ്ജുകള്‍, തട്ടുകടകള്‍, ബസ് സ്റ്റാന്‍ഡ്, ഒട്ടോ പാര്‍ക്കിംഗ് എന്നിവയെല്ലാം ഒരു കിലോമീറ്ററിനുള്ളില്‍ സംഗമിച്ചാല്‍ എങ്ങിനെയിരിക്കും. അതാണ് പാളയം മാര്‍ക്കറ്റിന്‍റെ പ്രൗഢി. ആ പ്രൗഢി ഇതേ സൗകര്യങ്ങളോടെ മറ്റൊരിടത്ത് കിട്ടുമെന്നുറപ്പില്ല. പാളയം മാര്‍ക്കറ്റ് ഇവിടെനിന്നും മാറ്റിയെന്ന് വിശ്വസിക്കാന്‍ തന്നെ കോഴിക്കോട്ടുകാര്‍ക്ക് ഏറെ സമയം വേണ്ടിവരും.യാത്രക്കാര്‍ ഉള്‍പ്പെടുന്ന ഒരു ഫ്‌ളോട്ടിംഗ് പോപ്പുലേഷനായിരുന്നു പാളയത്തേത്. ആളുകള്‍ പ്രധാനമായും ദൈനംദിന വാങ്ങലിനായി പാളയം വിപണിയെയായിരുന്നു ആശ്രയിച്ചിരുന്നത്. സ്ഥലംമാറ്റം അവരുടെ വാങ്ങലിന് അറുതി വരുത്തുമെന്ന ആശങ്ക ഒരു ഭാഗത്ത് ഉയരുന്നുണ്ട്. പക്ഷെ ആശങ്കയ്ക്കുമപ്പുറത്താണ് പാളയം ഇതിനകം പകര്‍ന്ന് നല്‍കിയിരിക്കുന്ന കാഴ്ചകള്‍ എന്നതാണ് സത്യം. ഇരുപത്തിനാല് മണിക്കൂറും ഗതാഗതകുരുക്കില്‍ വീര്‍പ്പ് മുട്ടിയിരുന്ന പാളയം ഇനി തിരക്കൊഴിഞ്ഞ വ്യാപാരമേഖലയായി മാറും. പാതയോരത്ത് ഉന്തുവണ്ടിയില്‍ പഴവര്‍ഗങ്ങള്‍ വിറ്റിരുന്നവരെല്ലാം ഇതിനകം കളമൊഴിഞ്ഞു. കോഴിക്കോട് മിഠായിത്തെരുവ് ഉത്സവകാലങ്ങളില്‍ തിരക്കിലമരുമ്പോള്‍ പാളയത്ത് എല്ലാ കാലത്തും തിരക്കാണ്. രാവിലെ ഗ്രാമ പ്രദേശങ്ങളില്‍ നിന്നും കച്ചവടക്കാര്‍ എത്തി പാളയത്തുനിന്നും സാധനങ്ങള്‍ വാങ്ങി മടങ്ങും. ഈ സമയത്താണ് ഇവിടെ ഏറ്റവും കൂടുതല്‍ തിരക്ക് അനുഭവപ്പെടാറുള്ളത്. ഉന്തുവണ്ടികള്‍ റോഡ് മുറിച്ചുകടന്നുപോകുന്നതും പതിവുകാഴ്ചയാണ്. ആ തിരക്ക് രാത്രി വൈകും വരെ തുടരുകയും ചെയ്യും. ഒപ്പം ട്രാവല്‍ ഏജന്‍സികളിലും മറ്റും എത്തുന്നവരും യാത്രക്കാരും പാളയത്തെ സദാ സമയവും സജീവമാക്കുമായിരുന്നു. പച്ചക്കറി മാര്‍ക്കറ്റിലാകട്ടെ രാത്രി വൈകിയാല്‍ വില കുറച്ചുപേശിവാങ്ങാം എന്നതിനാല്‍ കൂടുതല്‍ പേര്‍ എത്താറുണ്ട്. മുന്പ് ക്രിമിനല്‍ സ്വഭാവമുള്ളവരുടെയും മോഷ്ടാക്കളുടെയും വലിയ കേന്ദ്രമായിരുന്ന പാളയം. പോലീസ് ഇടപെടലിലൂടെയാണ് ഇപ്പോഴത്തെ അവസ്ഥയിലേക്ക് എത്തിയത്. ഇത് നിലനിര്‍ത്തികൊണ്ടുപോകുക എന്നതും അധികാരികള്‍ക്ക് മുന്നിലുള്ള വെല്ലുവിളിയാണ്. സ്ഥിരം കസ്റ്റമേഴ്‌സ്... പച്ചക്കറിമാര്‍ക്കറ്റ് മാത്രമായിരുന്നില്ല പാളയത്തേക്ക് ആളുകളെ എത്തിച്ചിരുന്നത്. ഓട്ടോ ഡ്രൈവര്‍മാരും പോര്‍ട്ടര്‍മാരും കച്ചവടക്കാരും ബസ് സ്റ്റാന്‍ഡും എല്ലാം പാളയത്തെ തിരക്കിലമര്‍ത്തി. രാത്രിസമയങ്ങളില്‍ ദൂരെ ദിക്കുകളില്‍ നിന്ന് എത്തുന്നവരും ഇവിടെ ലോഡ്ജുകളില്‍ താമസിക്കുന്നത് പതിവാണ്. സ്ഥിരം കസ്റ്റമേഴ്‌സ് ഉള്ള സ്ഥലം കൂടിയായിരുന്നു പാളയം മാര്‍ക്കറ്റും പരിസരവും. ചരക്കുവാഹനങ്ങള്‍ രാത്രി എത്തി പുലര്‍ച്ചെ തിരിച്ചുപോകാറായിരുന്നു പതിവ്. പോര്‍ട്ടര്‍മാരും ഓട്ടോ തൊഴിലാളികളും യാത്രക്കാരും എല്ലാവരും ചേരുമ്പോള്‍ പാളയത്ത് ബഹളമയമായിരുന്നു. എത് വാഹനങ്ങള്‍ക്കും എളുപ്പം എത്താന്‍ കഴിയും എന്നതാണ് മറ്റൊരു പ്രത്യേകതയായി ഉണ്ടായിരുന്നത്. മിക്ക ദിവസങ്ങളില്‍ പോലീസ് പട്രോളിംഗ് നടത്താറുള്ള സ്ഥലങ്ങളില്‍ ഒന്നുകൂടിയാണിത്. പല ദേശത്തുനിന്നുള്ള, സ്വഭാവങ്ങളുള്ള ആളുകള്‍ ദിനംപ്രതി ഇവിടെ വന്നുപോകാറുണ്ട്. മാര്‍ക്കറ്റ് ഇവിടെ നിന്നും മാറുന്നതോടെ വലിയ രീതിയലുള്ള ജനത്തിരക്കാണ് ഒഴിയുക. മായുന്നത് വാണിജ്യ പ്രതാപത്തിന്‍റെ പ്രതീകം കോഴിക്കോട്: കോഴിക്കോടിന്‍റെ വാണിജ്യപ്രതാപത്തിന്‍റെ പ്രതീകങ്ങളാണ് പാളയം പച്ചക്കറി മാര്‍ക്കറ്റും മിഠായിത്തെരുവും വലിയങ്ങാടിയും. ഒരു ചെണ്ടിലെ മൂന്നു പൂക്കള്‍പോലെ ഇവ പരസ്പരം ബന്ധപ്പെട്ടു കിടക്കുന്നു. വലിയങ്ങാടിയില്‍ എത്തുന്ന കച്ചവടക്കാര്‍ മിഠായിത്തെരുവിലും പാളയത്തുമെല്ലാം വന്ന് സാധനങ്ങള്‍ വാങ്ങിയിരുന്നതാണ് പതിവ്.

കച്ചവടക്കാര്‍ മാത്രമല്ല നഗരത്തില്‍ സാധനങ്ങള്‍ വാങ്ങാന്‍ എത്തുന്നവരും പാളയത്തും മിഠായിത്തെരുവിലും കടകളില്‍ കയറിയാണ് മടങ്ങാറുള്ളത്. കോര്‍പറേഷന്‍റെ പുതിയ തീരുമാനത്തോടെ വലിയങ്ങാടിയോടും മിഠായിത്തെരുവിനോടും വിടപറഞ്ഞ് പാളയം പച്ചക്കറി മാര്‍ക്കറ്റ് ഇനി കല്ലുത്താന്‍കടവിലേക്ക് ചേക്കേറുകയാണ്. പാളയത്തുനിന്ന് നടന്നെത്താവുന്ന ദൂരമാണ് മിഠായിത്തെരുവിലേക്കുള്ളത്. മിഠായിത്തെരുവില്‍ നിന്ന് വസ്ത്രങ്ങളും ഉടുപ്പും ചെരിപ്പും പാത്രങ്ങളുമെല്ലാം വാങ്ങി നടന്നുനീങ്ങിയാല്‍ പാളയത്ത് എത്താം. അവിടെനിന്ന് പഴവര്‍ഗങ്ങളും പച്ചക്കറികളും വാങ്ങി വീട്ടിലേക്കു മടങ്ങാം. പാളയം മാര്‍ക്കറ്റിന്‍റെ പ്രത്യേകത കണക്ടിവിറ്റിയാണ്. പ്രധാനപ്പെട്ട വാണിജ്യകേന്ദ്രങ്ങളുമായുള്ള കണക്ടിവിറ്റി. പച്ചക്കറിയടക്കമുള്ള സാധനങ്ങള്‍ വാങ്ങി സാധാരണക്കാരനു ബസില്‍ കയറി പോകാമെന്നതാണ് ഏറ്റവും വലിയ പ്രത്യേകത. പാളയം ബസ് സ്റ്റാന്‍ഡില്‍നിന്ന് മുക്കം, കുന്നമംഗലം, താമരശേരി, ആര്‍ഇസി, മാവൂര്‍, അരീക്കോട്, ചെറുവാടി, കൊടുവള്ളി ഭാഗങ്ങളിലേക്ക് ബസുകള്‍ ഉണ്ട്. ഇവിടെ നിന്ന് ബസില്‍ കയറി പത്തു രൂപ കൊടുത്താല്‍ മൊഫ്യൂസില്‍ ബസ് സ്റ്റാന്‍ഡില്‍ എത്താം.അവിടെ നിന്ന് ബാലുശേരി, കുറ്റ്യാടി, നാദാപുരം, വടകര, പേരാമ്പ്ര, അത്തോളി, കൊയിലാണ്ടി, താമരശേരി, നരിക്കുനി തുടങ്ങിയ ഭാഗങ്ങളിലേക്കുള്ള ബസുകള്‍ കിട്ടും. ഇല്ലെങ്കില്‍ പാളയത്തുനിന്ന് 30 രുപ കൊടുത്താല്‍ ഓട്ടോറിക്ഷയില്‍ പുതിയ സ്റ്റാന്‍ഡിലെത്താം. ഇത്തരത്തിലുള്ള യാത്രാസൗകര്യം സാധാരണക്കാര്‍ക്ക് ഏറെ പ്രയോജനം ചെയ്തിരുന്നു. പാളയത്തു നിന്ന് പച്ചക്കറി വാങ്ങി സ്വകാര്യ ബസുകളില്‍ കൊണ്ടുപോകുന്ന ധാരാളം കച്ചവടക്കാര്‍ ഇപ്പോഴുമുണ്ട്. രാവിലെ പാളയത്തുനിന്ന് പുറപ്പെടുന്ന ബസുകളുടെ മുന്‍ ഭാഗത്ത് ഡ്രൈവറുടെ ക്യാബിനു സമീപവും പിന്‍ഭാഗത്തുമെല്ലാം പച്ചക്കറി ചാക്കുകള്‍ കാണാം. നാട്ടിന്‍ പ്രദേശങ്ങളില്‍ പച്ചക്കറി മൊത്തവിലയില്‍ കിട്ടുന്നതിനാല്‍ കച്ചവടത്തിനു അല്പം കുറവുനേരിട്ടുവെങ്കിലും പാളയത്തിന്‍റെ പ്രതാപം കുറഞ്ഞിട്ടേയില്ല. എല്ലാതരം പഴങ്ങളും പാളയം മാര്‍ക്കറ്റില്‍ കിട്ടുമെന്നതാണ് ശ്രദ്ധേയം. നമ്മുടെ നാട്ടിലെ പഴങ്ങള്‍ മാത്രമല്ല വിദേശ പഴങ്ങളും ലഭ്യം. വിലപേശി വാങ്ങാനുള്ള അവസരങ്ങളും ഉണ്ട്. ഉന്തുവണ്ടികളില്‍ എല്ലാതരം പഴവര്‍ഗങ്ങളും വില്‍ക്കുന്ന കച്ചവടക്കാരുമുണ്ട്. കല്ലുത്താന്‍ കടവിലേക്കാണ് മാര്‍ക്കറ്റ് മാറ്റുന്നത്. അവിടേക്ക് എത്തിപ്പെടുകയെന്നത് സാധാരണക്കാരെ സംബന്ധിച്ചിടത്തോളം പ്രയാസകരമാണ്. പൊതുവേ തിരക്കുള്ള റൂട്ടാണ് മിനി ബൈപാസ്. കോഴിക്കോടുനിന്ന് തൃശൂര്‍, എറണാകുളം, മലപ്പുറം, മഞ്ചേരി, പാലക്കാട്, പെരിന്തല്‍മണ്ണ, എറണാകുളം, തിരുവനന്തപുരം, കോട്ടയം ഭാഗങ്ങളിലേക്കുള്ള ബസുകളെല്ലാം കടന്നുപോകുന്നത് കല്ലുത്താന്‍കടവ് വഴിയാണ്. നൂറുകണക്കിനു ബസുകള്‍. മിംസ് ആശുപത്രിയിലേക്കും ലുലു മാളിലേക്കും യാത്ര ചെയ്യുന്ന ആയിരങ്ങള്‍ വേറെ. നൂറുകണക്കിനു കാറുകളും അതിലേറെ ഇരുചക്രവാഹനങ്ങളും കടന്നുപോകുന്ന റോഡ്. അതിനിടയിലേക്കാണ് പാളയം പച്ചക്കറി മര്‍ക്കറ്റുകൂടി വരുന്നത്. കൂനിന്‍മേല്‍ കുരുവെന്ന പോലെ ഗതാഗതകുരുക്ക് ഈ ഭാഗത്ത് വലിയ പ്രതിസന്ധി സൃഷ്ടിക്കും. ദീര്‍ഘദൂര ബസുകളാണ് ഇതുവഴി കടന്നുപോകുന്നതില്‍ അധികവും. അതുകൊണ്ടുതന്നെ മാര്‍ക്കറ്റിലേക്ക് ബസില്‍ കറയി വരുന്നതും സാധനങ്ങള്‍ വാങ്ങി ബസില്‍ തിരികെ പോകുന്നതും സാധാരണക്കാര്‍ക്ക് ഏറെ ബുദ്ധിമുട്ട് സൃഷ്ടിക്കും. ചുരുക്കിപറഞ്ഞാല്‍ പാളയത്തു നിന്ന് പറിച്ചുനടപ്പെടുന്ന വ്യാപാരികള്‍ക്ക് കച്ചവടം നാലിലൊന്നായി കുറയാനാണ് സാധ്യത. ഇതാണ് ഈ സംരംഭത്തെ കച്ചവടക്കാര്‍ നഖശിഖാന്തം എതിര്‍ക്കാന്‍ കാരണം.

ഗ്രാമങ്ങള്‍ പാളയത്തേക്ക് ഒഴുകിയ കാലം

കോഴിക്കോട്: ഉള്‍നാടന്‍ ഗ്രാമങ്ങളിൽ നിന്ന് ആളുകള്‍ പാളയം പച്ചക്കറി മാര്‍ക്കറ്റിലേക്ക് ഒഴുകിയ ഒരു കാലമുണ്ടായിരുന്നു. കാര്‍ഷിക വിഭവങ്ങള്‍ വില്‍ക്കാനും വാങ്ങാനും ഗ്രാമങ്ങളില്‍ നിന്നും ആളുകള്‍ എത്തിയിരുന്നത് പാളയത്തേക്കാണ്. ചേന, ചേമ്പ്, മലഞ്ചരക്കുകള്‍, പച്ചക്കറികള്‍, നേന്ത്രവാഴക്കുലകള്‍ എന്നിവയെല്ലാം പാളയം ലക്ഷ്യമാക്കിയാണ് ഗ്രാമങ്ങളില്‍ നിന്നെത്തിയത്. കാര്‍ഷിക രംഗത്ത് ഉണ്ടായ പ്രതിസന്ധിയും അയല്‍സംസ്ഥാനങ്ങളില്‍ നിന്നുള്ള ഉത്പന്നങ്ങളുടെ കടന്നുവരവുമാണ് പാളയത്തെ കച്ചവടത്തിനു തിരിച്ചടിയായത്. സ്വകാര്യബസുകള്‍ക്കു മുകളില്‍ കയറ്റിയാണ് അക്കാലത്ത് ചരക്ക് എത്തിയിരുന്നതെന്ന് 1962-ല്‍ കച്ചവട ആവശ്യത്തിനു കോഴിക്കോട്ട് എത്തിയ പ്രമുഖ വ്യവസായി ഷെവലിയര്‍ സി.ഇ. ചാക്കുണ്ണി പറഞ്ഞു. കൊയിലാണ്ടി, വടകര, പേരാമ്പ്ര, മുക്കം, താമരശേരി ഭാഗത്തുനിന്നെല്ലാം ബസിലാണ് ചരക്ക് എത്തിയിരുന്നത്. പാളയത്ത് ഒരു ബസ് സ്റ്റോപ്പാണ് ഉണ്ടായിരുന്നത്. പിന്നീടാണ് ജയന്തി ബില്‍ഡിംഗ് അവിടെ വന്നത്. അതോടെ പാളയത്തിന്‍റെ മുഖച്ഛായ മാറി. മുനിസിപ്പാലിറ്റിയായിരുന്ന കോഴിക്കോട് കോര്‍പറേഷനായതോടെ വികസന കുതിപ്പുണ്ടായി. ഗ്രാമങ്ങള്‍ വികസിച്ചതോടെ പാളയത്തേക്കുള്ള ചരക്ക് വരവ് കുറഞ്ഞു. മൊത്തവ്യാപാര കടകളും മാളുകളും ഗ്രാമങ്ങളുടെ ഭാഗമായതോടെ കച്ചവടം കുറഞ്ഞു. ഇതരസംസ്ഥാനങ്ങളില്‍ നിന്നുള്ള പച്ചക്കറികള്‍ പാളയത്തിന്‍റെ ഹൃദയം കവര്‍ന്നു. പുലര്‍ച്ചെ മുതല്‍ പാളയത്ത് തമിഴനാട്ടിലെയും കര്‍ണാടകത്തിലെയും ലോറികള്‍ ഊഴമിട്ടു കാത്തുകിടന്നു. പത്തും പതിനാറും ചക്രമുള്ള ലോറികള്‍ വരെ പാളയം ലക്ഷ്യമാക്കി എത്തി. ഇതോടെ പാളയത്ത് രൂക്ഷമായ ഗതാഗത തടസമുണ്ടായി. മണിക്കൂറുകളുടെ ഗതാഗതക്കുരുക്കില്‍ രാവിലെ പാളയം വഴിയുള്ള യാത്ര പേടിസ്വപ്നമായി. പാളയത്തിനകത്ത് പച്ചക്കറി കച്ചവടം പൊടിപൊടിച്ചപ്പോള്‍ പുറത്ത് പഴം വിപണിയും സജീവമായി. ഇതോടെ നിന്നുതിരിയാന്‍ ഇടമില്ലാത്ത വിധം പാളയം മാര്‍ക്കറ്റ് വീര്‍പ്പുമുട്ടി. ഇതോടെയാണ് പുതിയ മാര്‍ക്കറ്റ് എന്ന ആശയം ഉയര്‍ന്നുവന്നത്. സ്വന്തം ലേഖകന്‍

എതിര്‍പ്പിനിടെ പുതിയ പച്ചക്കറി മാര്‍ക്കറ്റ് ഉദ്ഘാടനം ഇന്ന്; മുഖ്യമന്ത്രിയെത്തും

കോഴിക്കോട്: വ്യപാരികളുടെയും തൊഴിലാളികളുടെയും ശക്തമായ എതിര്‍പ്പിനിടെ പാളയം പച്ചക്കറി മാര്‍ക്കറ്റ് ഇന്ന് കല്ലുത്താന്‍കടവിലേക്ക് മാറ്റും.അത്യാധുനിക സംവിധാനങ്ങളോടെ കല്ലുത്താന്‍ കടവില്‍ നിര്‍മാണം പൂര്‍ത്തിയാക്കിയ "ന്യൂ പാളയം വെജിറ്റബിള്‍ ആന്‍ഡ് ഫ്രൂട്ട് മാര്‍ക്കറ്റ്' രാവിലെ ഒമ്പതിന് മുഖ്യമന്ത്രി നാടിന് സമര്‍പ്പിക്കും. പച്ചക്കറി മാര്‍ക്കറ്റിലെ മള്‍ട്ടി ലെവല്‍ മാര്‍ക്കറ്റിന്‍റെ ഉദ്ഘാടനം മന്ത്രി എം.ബി. രാജേഷും ഹോള്‍സെയില്‍ ആന്‍ഡ് ഓപ്പണ്‍ മാര്‍ക്കറ്റിന്‍റെ ഉദ്ഘാടനം മന്ത്രി പി.എ. മുഹമ്മദ് റിയാസും നിര്‍വഹിക്കും. മേയര്‍ ഡോ. ബീന ഫിലിപ്പ് അധ്യക്ഷത വഹിക്കും. എം.കെ. രാഘവന്‍ എം പി, തോട്ടത്തില്‍ രവീന്ദ്രന്‍ എംഎല്‍എ, അഹമ്മദ് ദേവര്‍കോവില്‍ എംഎല്‍എ, ഡെപ്യൂട്ടി മേയര്‍ സി.പി. മുസാഫിര്‍ അഹമ്മദ്, ജില്ല കളക്ടര്‍ സ്‌നേഹില്‍കുമാര്‍ സിംഗ് എന്നിവര്‍ പങ്കെടുക്കും. കല്ലുത്താന്‍കടവിലെ അഞ്ചര ഏക്കര്‍ സ്ഥലത്താണ് അത്യാധുനിക സൗകര്യങ്ങളോടെ പുതിയ മാര്‍ക്കറ്റ് നിര്‍മിച്ചത്. കോര്‍പറേഷന്‍റെ പിപിപി മാതൃകയിലുള്ള പദ്ധതിയില്‍ ബിഒടി അടിസ്ഥാനത്തില്‍ നിര്‍മാണം നടത്തിയത് കല്ലുത്താന്‍കടവ് ഏരിയ ഡവലപ്‌മെന്‍റ് കമ്പനി (കാഡ്‌കോ) ആണ്. 2009-ല്‍ തറക്കല്ലിട്ട പദ്ധതിക്ക് കോര്‍പറേഷന്‍ 30 കോടി രൂപ ചെലവില്‍ സ്ഥലം നല്‍കി. 100 കോടി രൂപ ചെലവഴിച്ചാണ് മാര്‍ക്കറ്റ് നിര്‍മാണം പൂര്‍ത്തിയാക്കിയത്. ആറ് ബ്ലോക്കുകളായി നിര്‍മിച്ച മാര്‍ക്കറ്റില്‍ പ്രധാന ബ്ലോക്കിന്‍റെ മുകള്‍ ഭാഗത്തുള്‍പ്പെടെ അഞ്ഞൂറോളം വാഹനങ്ങള്‍ക്ക് പാര്‍ക്ക് ചെയ്യാന്‍ സൗകര്യമുണ്ട്. മൂന്നര ലക്ഷം സ്‌ക്വയര്‍ ഫീറ്റില്‍ നിര്‍മിച്ച കെട്ടിടത്തില്‍ 310 പഴം-പച്ചക്കറി കടകള്‍ക്ക് സൗകര്യമുണ്ട്. കെട്ടിടത്തിന്‍റെ ഒന്നാം നിലയിലേക്ക് മീഞ്ചന്ത-അരയിടത്തുപാലം ബൈപാസില്‍ നിന്ന് നേരിട്ട് വാഹനങ്ങള്‍ക്ക് കയറാം. കെട്ടിടത്തിനു മുകളിലേക്ക് ഓട്ടോ, ഗുഡ്‌സ് വാഹനങ്ങള്‍ക്ക് കയറാന്‍ മൂന്ന് റാംപുകള്‍ ഉണ്ട്. പാളയത്ത് കച്ചവടം നടത്തുന്നതിന് ലൈസന്‍സുള്ള 153 കച്ചവടക്കാര്‍ക്ക് ന്യൂ മാര്‍ക്കറ്റില്‍ മുറികളും ഒരുക്കി. പുതിയ മാര്‍ക്കറ്റിന്‍റെ ഉദ്ഘാടനം കച്ചവടക്കാരുടെയും ഉന്തുവണ്ടി തൊഴിലാളികളുടെയും ശക്തമായ എതിര്‍പ്പുകള്‍ അവഗണിച്ചാണ്. പാളയം മാര്‍ക്കറ്റ് നിലവിലുള്ള സ്ഥലത്തുവേണമെന്നാണ് ഇവരുടെ ആവശ്യം. പാളയത്തെ കച്ചവടക്കാരും തൊഴിലാളികളും ഇന്ന് മനുഷ്യച്ചങ്ങല തീര്‍ക്കും കോഴിക്കോട്: പാളയം പച്ചക്കറി മാര്‍ക്കറ്റ് കല്ലുത്താന്‍കടവിലേക്കു മാറ്റുന്നതിനെതിരേ വ്യാപാരികളും തൊഴിലാളികളും ഇന്ന് കരിദിനമാചരിക്കും. പാളയത്ത് രാവിലെ മനുഷ്യച്ചങ്ങല തീര്‍ക്കാനും തീരുമാനിച്ചിട്ടുണ്ട്. പളയം പച്ചക്കറി മാര്‍ക്കറ്റ് സംരക്ഷണത്തിനായി രൂപീകരിച്ച കോ-ഓര്‍ഡിനേഷന്‍ കമ്മിറ്റിയുടെ ആഭിമുഖ്യത്തിലാണ് സമരം. രാവിലെ ഒമ്പതിന് അളകാപുരി മുതല്‍ പാളയം ബസ്‌സ്റ്റാന്‍ഡ് ഗേറ്റുവരെയാണ് മനുഷ്യച്ചങ്ങല. പാളയത്തെ പഴം, പച്ചക്കറി വ്യാപാരികള്‍, എസ്ടിയു, ഐഎന്‍ടിയുസി, എഐടിയുസി തുടങ്ങിയ ട്രേഡ് യുണിയനുകള്‍, ഫുട്പാത്ത് കച്ചവടത്തൊഴിലാളകിള്‍ തുടങ്ങിയവര്‍ സമരത്തിന്‍റെ ഭാഗമാകും. സിഐടിയു സമരത്തില്‍ പങ്കെടുക്കുന്നില്ല.കല്ലുത്താന്‍കടവില്‍ നിര്‍മിച്ച കെട്ടിടം ശാസ്ത്രീയമായി നിര്‍മിച്ചതല്ലെന്നും കച്ചവടത്തിനു പറ്റില്ലെന്നുമാണ് വ്യാപാരികള്‍ പറയുന്നത്.

38 ലക്ഷത്തിന്‍റെ ഓണ്‍ലൈന്‍ തൊഴില്‍ തട്ടിപ്പ്: പ്രധാന കണ്ണികളില്‍ ഒരാള്‍ അറസ്റ്റില്‍

കോഴിക്കോട്: ഓണ്‍ലൈന്‍ തൊഴിലിലൂടെ പണം സമ്പാദിക്കാമെന്ന് പറഞ്ഞ് വിശ്വസിപ്പിച്ച് കോഴിക്കോട് സ്വദേശിയില്‍ നിന്ന് 38 ലക്ഷത്തിലധികം രൂപ തട്ടിയെടുത്ത കേസിലെ സൈബര്‍ തട്ടിപ്പ് ശൃംഖലയിലെ പ്രധാന കണ്ണികളില്‍ ഒരാളായ ആലപ്പുഴ സ്വദേശിയെ കോഴിക്കോട് സിറ്റി സൈബര്‍ ക്രൈം പോലീസ് അറസ്റ്റ് ചെയ്തു. ആലപ്പുഴ കീരിക്കാട് സ്വദേശി എസ്. മുഹ്‌സിന്‍ (28) ആണ് അറസ്റ്റിലായത്. നാട്ടില്‍ സ്വകാര്യ സ്ഥാപനം നടത്തി വരുന്ന പരാതിക്കാരന് കഴിഞ്ഞ ജൂലൈ മാസത്തില്‍ ഓണ്‍ലൈന്‍ തൊഴിൽ മുഖേന പ്രതിദിന വരുമാനം ലഭിക്കുമെന്ന് വാട്‌സ്ആപ്പ് സന്ദേശം ലഭിച്ചതിനെ തുടര്‍ന്ന് അവരുമായി ബന്ധപ്പെടുകയായിരുന്നു. ആദ്യം ലളിതമായ ഓണ്‍ലൈന്‍ ടാസ്‌ക്കുകള്‍ ചെയ്യാന്‍ ആവശ്യപ്പെട്ടു. ചെറിയ തുകകള്‍ ലാഭമായി അയച്ചു വിശ്വാസം നേടി. തുടര്‍ന്ന് കൂടുതല്‍ ലാഭം വാഗ്ദാനം ചെയ്ത് വലിയ തുകകള്‍ നിക്ഷേപിക്കാന്‍ ആവശ്യപ്പെട്ടു. നിക്ഷേപങ്ങള്‍ വിവിധ ഘട്ടങ്ങളിലായി "ലെവല്‍ ടാസ്‌ക്കുകള്‍' എന്ന പേരില്‍ നടത്താന്‍ ആവശ്യപ്പെട്ടതോടൊപ്പം വെബ്സൈറ്റിലെ അക്കൗണ്ടില്‍ ലാഭം അടങ്ങിയ തുക കാണിച്ചുകൊണ്ട് പരാതിക്കാരനെ കൂടുതല്‍ പണം അയയ്ക്കാന്‍ പ്രേരിപ്പിച്ചു. ടെലഗ്രാം പോലുള്ള സോഷ്യല്‍ മീഡിയ പ്ലാറ്റ്‌ഫോം വഴിയാണ് പ്രതികള്‍ ബന്ധം നിലനിര്‍ത്തിയത്. ഈ രീതിയില്‍ ഓണ്‍ലൈന്‍ ജോബ്, നിക്ഷേപ വാഗ്ദാനങ്ങള്‍ എന്നിവയുടെ പേരില്‍ പരാതിക്കാരനെ വഞ്ചിച്ച് 38,12,882 രൂപ വിവിധ ബാങ്ക് അക്കൗണ്ടുകളിലേക്ക് അയപ്പിച്ചാണ് തട്ടിയെടുത്തത്. അറസ്റ്റ് ചെയ്ത പ്രതിയെ 14 ദിവസത്തേക്ക് റിമാൻഡ് ചെയ്തു.

മലബാര്‍ ഗ്രൂപ്പിന്‍റെ രണ്ടാമത്തെ "ഗ്രാന്‍റ്മാ ഹോം' തൃശൂരില്‍ തുടങ്ങി

കോഴിക്കോട്: മലബാര്‍ ഗ്രൂപ്പിന്‍റെ ആഭിമുഖ്യത്തില്‍ അഗതികളായ അമ്മമാരെ സംരക്ഷിക്കുന്നതിനായി കേരളത്തിലെ രണ്ടാമത്തെ "ഗ്രാന്‍റ്മാ ഹോം' തൃശൂരിലെ വരന്തരപ്പിള്ളിയില്‍ പ്രവര്‍ത്തനം തുടങ്ങി. മലബാര്‍ ഗ്രൂപ്പിന്‍റെ സിഎസ്ആര്‍ പ്രവര്‍ത്തനങ്ങളുടെ ഭാഗമായാണ് ഗ്രാന്‍റ്മാ ഹോമുകള്‍ സ്ഥാപിക്കുന്നത്. കോഴിക്കോട് ആസ്ഥാനമായുള്ള "തണല്‍' സന്നദ്ധ സംഘടനയുമായി സഹകരിച്ചാണ് പദ്ധതി നടപ്പാക്കുന്നത്. വരന്തരപ്പിള്ളിയിലെ വടക്കുംമുറിയിലാണ് ഗ്രാന്‍റ്മാ ഹോം. കഴിഞ്ഞ ദിവസം നെടുമ്പാശേരിയിലെ ശ്രീമുലനഗരത്തില്‍ കേരളത്തിലെ ആദ്യത്തെ ഗ്രാന്‍റ്മാ ഹോം ആരംഭിച്ചിരുന്നു. ബംഗളുരുവിലും ഹൈദരാബാദിലും ഗ്രാന്‍റ്മാ ഹോമുകള്‍ പ്രവര്‍ത്തിക്കുന്നുണ്ട്. വയനാട്ടിലും കോഴിക്കോട്ടെ കൊടുവള്ളിയിലും ഫറോക്കിലും ഗ്രാന്‍റ്മാ ഹോമുകളുടെ നിര്‍മാണം നടന്നുവരികയാണ്. ഇന്ത്യയിലെ മറ്റ് പ്രധാന നഗരങ്ങളിലും ഗ്രാന്‍റ്മാ ഹോം പദ്ധതി നടപ്പാക്കും. റവന്യു മന്ത്രി കെ.രാജന്‍ തൃശൂരിലെ ഗ്രാന്‍റ്മാ ഹോമിന്‍റെ ഉദ്ഘാടനം നിര്‍വഹിച്ചു. മലബാര്‍ ഗ്രൂപ്പ് ചെയര്‍മാന്‍ എം.പി. അഹമ്മദ് മുഖ്യപ്രഭാഷണം നടത്തി. തണല്‍ ചെയര്‍മാന്‍ ഡോ.വി. ഇദ്‌രീസ് ചടങ്ങില്‍ അധ്യക്ഷത വഹിച്ചു. വരന്തരപ്പിള്ളി പഞ്ചായത്ത് പ്രസിഡന്‍റ് കലാപ്രിയ സുരേഷ്, കല്യാണ്‍ സില്‍ക്‌സ് സിഎംഡിയും തൃശൂര്‍ ചേംബര്‍ ഓഫ് കോമേഴ്‌സ് പ്രസിഡന്‍റുമായ ടി.എസ്. പട്ടാഭിരാമന്‍, ഷൈജു പട്ടിക്കാട്ടുകാരന്‍, കെ.എസ്. അനില്‍, മലബാര്‍ ഗ്രൂപ്പ് റീട്ടെയില്‍ ഓപറേഷന്‍സ് ഹെഡ് ആര്‍. അബ്ദുള്‍ ജലീല്‍, സോളിഡിറ്റി ആൻഡ് പ്രോജക്ട് ഹെഡ് യാഷിര്‍ ആദിരാജ, ഗ്രൂപ്പ് ഹെഡ് (മാനുഫാക്ച്വറിംഗ്) എ. ഇളങ്കോവന്‍, റീജണല്‍ ഹെഡ് (കേരള) എം.പി.സുബൈര്‍, എം.എ. മുഹമ്മദ്, പി.കെ. ജലീല്‍, സി.പി. സാലിഹ്, ബക്കര്‍, അബ്ദുള്‍ ജബ്ബാര്‍, പി.എ. അബ്ദുള്‍ റഹ്‌മാന്‍, പി.ബി. നവാസ് ഖാന്‍, വി.എ. ഹസന്‍, നൗഷാദ്, എന്‍ജീനിയര്‍ പി.കെ. ബഷീര്‍, എ.കെ. മണ്‍സൂര്‍, എം.എം. മൊയ്തീനുണ്ണി, സി.എ.സലീം, സി.എ. ബഷീര്‍ തുടങ്ങിയവര്‍ പങ്കെടുത്തു.

കുപ്രസിദ്ധ വാഹന മോഷ്ടാവ് മുള്ളന്‍ അനസ് പിടിയില്‍

കോഴിക്കോട്: കുപ്രസിദ്ധ വാഹന മോഷ്ടാവ് കണ്ണൂര്‍ അഴീക്കല്‍ സ്വദേശി അനസ് എന്ന മുള്ളന്‍ അനസിനെ (25) കോഴിക്കോട് സിറ്റിക്രൈം സ്‌ക്വാഡും ടൗണ്‍ എസിപി ടി.കെ. അഷ്റഫിന്‍റെ നേതൃത്വത്തിലുള്ള ടൗണ്‍ പോലീസും ചേര്‍ന്ന് പിടികൂടി. ഇന്നലെ രാവിലെ റെയില്‍വേ സ്റ്റേഷന്‍ പരിസരത്ത് നിര്‍ത്തിയിട്ട കാസര്‍ഗോഡ് സ്വദേശിയുടെ സ്‌കൂട്ടറാണ് അനസ് മോഷിച്ചത്. വാഹന മോഷ്ടാവ് അനസ് കോഴിക്കോട് എത്തിയെന്ന് സിറ്റി ക്രൈം സ്‌ക്വാഡിന് രഹസ്യ വിവരം ലഭിക്കുകയായിരുന്നു. ഇയാളെ പിന്തുടര്‍ന്ന് നിരീക്ഷിച്ചതില്‍ സില്‍വര്‍ കളര്‍ സ്‌കൂട്ടറില്‍ കറങ്ങുന്നതായി സിറ്റി ക്രൈം സ്‌ക്വാഡിന്‍റെ ശ്രദ്ധയില്‍ പെട്ടു. പിടികൂടി ചോദ്യം ചെയ്തപ്പോള്‍ കുറ്റം സമ്മതിക്കുകയായിരുന്നു. ഇയാള്‍ക്കെതിരേ കണ്ണൂര്‍, എറണാകുളം ജില്ലകളിലെ വിവിധ സ്റ്റേഷനുകളില്‍ കേസുകളുണ്ട്. ലഹരി ഉപയോഗത്തിന് പണം കണ്ടെത്തുന്നതിനാണ് മോഷണം പതിവാക്കിയത്. ഒന്നര വര്‍ഷം മുമ്പ് കണ്ണൂരില്‍ നിന്നും മോഷ്ടിച്ച വാഹനവുമായി കറങ്ങുന്നതിനിടെ കോഴിക്കോട്ട് വച്ച് പോലീസിന്‍റെ കയ്യില്‍പെട്ടിരുന്നു. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.

മഴയില്‍ റോഡ് ഒലിച്ചു പോയി

ചക്കിട്ടപാറ: തകര്‍ന്ന് കുണ്ടും കുഴിയുമായി കിടന്ന റോഡ് ഇന്നലെ വൈകുന്നേരം പെയ്ത കനത്ത മഴയെ തുടര്‍ന്ന് ഒലിച്ചു പോയി. ഒഴുകി റോഡില്‍ പരന്ന മെറ്റല്‍ ശേഖരം വാരിക്കൂട്ടാനെത്തിയ ജെസിബി നാട്ടുകാര്‍ തടഞ്ഞ് പ്രതിഷേധമറിയിച്ചു. പെരുവണ്ണാമൂഴി ടൂറിസ്റ്റ് കേന്ദ്രത്തിനുള്ളിലൂടെ പൊന്മലപ്പാറ വഴി ചക്കിട്ടപാറക്ക് പോകുന്ന റോഡാണ് കനത്ത മഴയില്‍ ഒലിച്ചുപോയത്. റോഡ് നന്നാക്കാന്‍ നടപടി സ്വീകരിക്കണമെന്നാണ് ജനങ്ങളുടെ ആവശ്യം. ‌റോഡ് തകര്‍ന്നതു കണക്കിലെടുത്ത് അധികൃതര്‍ക്ക് മുന്നറിയിപ്പ് നല്‍കിയ ശേഷം ഈ റൂട്ടില്‍ ഓട്ടോറിക്ഷകളുടെ ഓട്ടം 13 മുതല്‍ നിര്‍ത്തിവച്ചിരിക്കുകയാണ്. പെരുവണ്ണാമൂഴി ഓട്ടോ കോര്‍ഡിനേഷന്‍ കമ്മറ്റിയാണ് തീരുമാനം നടപ്പിലാക്കിയത്. ജലസേചന വകുപ്പിന്‍റെ അധീനതയില്‍പെടുന്നതാണ് റോഡ്. ജലജീവന്‍ പദ്ധതിക്കു വേണ്ടി പൈപ്പിടാനാണ് കരാറുകാര്‍ റോഡ് പൊളിച്ചത്. പിന്നീട് യഥാവിധം കുഴിയടക്കുന്നതിനു പകരം ധൃതി പിടിച്ച് പ്രവൃത്തി നടത്തിയതാണ് റോഡ് തകരാന്‍ ഇടയാക്കിയത്. വാട്ടര്‍ അഥോറിറ്റിയാണ് റോഡ് നന്നാക്കേണ്ടതെന്നാണ് ജലസേചന വകുപ്പ് പറയുന്നത്. റോഡിന്‍റെ തകര്‍ച്ച കാരണം ഓട്ടോറിക്ഷകള്‍ ഓട്ടം നിര്‍ത്തിയ റോഡില്‍ പാറപ്പൊടി വിതറിയിട്ടും ഫലമുണ്ടായില്ല. നാട്ടുകാര്‍ പ്രതിഷേധിച്ചിട്ടും റോഡില്‍ അപകടകരമാം വിധം പരന്നു കിടക്കുന്ന മെറ്റല്‍ ശേഖരം വാട്ടര്‍ അഥോറിറ്റി കരാറുകാര്‍ ജെസിബി ഉപയോഗിച്ച് ഇന്നലെ വൈകീട്ടും കോരി നീക്കല്‍ തുടര്‍ന്നു. റോഡ് നന്നാക്കാന്‍ നടപടിയില്ലാത്തത് പ്രദേശവാസികളില്‍ കടുത്ത പ്രതിഷേധത്തിനിടയാക്കിയിട്ടുണ്ട്. ഓട്ടോ സര്‍വീസ് നിലച്ചത് നാട്ടുകാരെ ബുദ്ധിമുട്ടിലാക്കിയിട്ടുണ്ട്. യാത്രാക്ലേശം രൂക്ഷമായതോടെ പ്രക്ഷോഭം സംഘടിപ്പിക്കാനുള്ള ഒരുക്കത്തിലാണ് നാട്ടുകാര്‍.

ഇടിമിന്നല്‍: കടിയങ്ങാട് വീടുകള്‍ക്ക് നാശനഷ്ടം

പേരാമ്പ്ര : ഇന്നലെ വൈകുന്നേരം തുലാവര്‍ഷ മഴയോടൊപ്പം ഉണ്ടായ ശക്തമായ മിന്നലില്‍ ചങ്ങരോത്ത് പഞ്ചായത്തില്‍ പെട്ട കടിയങ്ങാട് വീടുകള്‍ക്ക് നാശനഷ്ടം. കടിയങ്ങാട് മഹിമയില്‍ കുഴിച്ചാലില്‍ ഗോവിന്ദന്‍, മകന്‍ സുധീഷ് എന്നിവരുടെ വീടുകള്‍ക്കാണ് കേടുപാടുകള്‍ സംഭവിച്ചത്. വൈകുന്നേരം നാലോടെയാണ് ഇടിമിന്നലുണ്ടായത്. ഗോവിന്ദന്‍റെ വീടിന്‍റെ വയറിംഗ് പൂര്‍ണ്ണമായും കത്തിനശിച്ചു. വീടിന്‍റെ തറ ഇളകി കരിങ്കല്ലുകള്‍ ചിതറിത്തെറിച്ചു. കോണ്‍ക്രീറ്റ് ബീം മിന്നലില്‍ പൊട്ടിയ നിലയിലുമാണ്. ചുമരുകള്‍ക്ക് വിള്ളലും സംഭവിച്ചു. ഈ സമയം ഗോവിന്ദനും ഭാര്യയും മക്കളും വീട്ടിലുണ്ടായിരുന്നെങ്കിലും ആര്‍ക്കും പരുക്കേറ്റില്ല. സമീപത്തു തന്നെയുള്ള സുധീഷിന്‍റെ വീടിനും ഇടിമിന്നലേറ്റു. വീടിന്‍റെ ജനല്‍ ചില്ലുകള്‍ തകര്‍ന്നു. വരാന്തയിലുണ്ടായിരുന്ന കുട കത്തി നശിച്ചു. വീട്ടിലുണ്ടായിരുന്ന സുധീഷിന്‍റെ മകള്‍ ശീതള്‍ പരിക്കേല്‍ക്കാതെ രക്ഷപെട്ടു. സുധീഷിന്‍റെ കാലിന് ചെറിയതോതില്‍ പൊള്ളലേറ്റു.

പറപ്പറ്റ പാലം മന്ത്രി ഉദ്ഘാടനം ചെയ്തു

കോടഞ്ചേരി: വികസന പ്രവൃത്തികള്‍ അതിവേഗം പൂര്‍ത്തിയാക്കുന്ന സംസ്ഥാനമായി കേരളം മാറിയെന്ന് മന്ത്രി എം.ബി.രാജേഷ്. മുഖ്യമന്ത്രിയുടെ തദ്ദേശ റോഡ് പുനരുദ്ധാരണ പദ്ധതിയുടെ ഭാഗമായി മൂന്ന് കോടി രൂപ ചെലവിട്ട് നിര്‍മിച്ച കോടഞ്ചേരി പഞ്ചായത്തിലെ പറപ്പറ്റ പാലത്തിന്റെ ഉദ്ഘാടനം നിര്‍വഹിക്കുകയായിരുന്നു മന്ത്രി. കോടഞ്ചേരിയെയും ചെമ്പുകടവിനെയും ബന്ധിപ്പിച്ച് ചാലിപ്പുഴക്ക് കുറുകെയാണ് പാലം നിര്‍മിച്ചിരിക്കുന്നത്. ജലസേചന വകുപ്പ് നിര്‍മിച്ച വി.സി.ബിയാണ് ഇവിടെ യാത്രക്കായി ഉപയോഗിച്ചിരുന്നത്. 2018, 2019 വര്‍ഷങ്ങളിലെ പ്രളയത്തില്‍ ഇതിന് കേടുപാട് സംഭവിക്കുകയും ജലസേചനത്തിനും യാത്രക്കും ഭീഷണിയാവുകയും ചെയ്തു. തുടര്‍ന്നാണ് കാലപ്പഴക്കം ചെന്ന പറപ്പറ്റ ബണ്ട് പാലം പൊളിച്ചു നീക്കി പുതിയ പാലം നിര്‍മിക്കാന്‍ തീരുമാനിച്ചത്. 32.70 മീറ്റര്‍ നീളവും 6 മീറ്റര്‍ വീതിയുമുള്ള പാലത്തില്‍ 5.50 മീറ്റര്‍ കാര്യേജ് വേ ആണ് നല്‍കിയിട്ടുള്ളത്. കോടഞ്ചേരി ഭാഗത്ത് 144.50 മീറ്ററും ചെമ്പുകടവ് ഭാഗത്ത് 57.30 മീറ്ററും അപ്രോച്ച് റോഡും പ്രവൃത്തിയില്‍ ഉള്‍പ്പെടുന്നു. പാലത്തിന്റെ അപ്രോച്ച് റോഡ് നിര്‍മാണത്തിനുളള സ്ഥലം പഞ്ചായത്ത് ഭരണസമിതിയുടെ ശ്രമഫലമായി ഉടമകള്‍ സൗജന്യമായി ലഭ്യമാക്കുകയായിരുന്നു. പാലത്തിന്‍റെ ചെമ്പുകടവ് ഭാഗത്ത് അനുബന്ധ റോഡ് വീതികുട്ടി ഇന്‍റര്‍ലോക്ക് നിരത്തി. മെറ്റല്‍ കൈവരികള്‍ സ്ഥാപിച്ച് പുഴയോരം ഭംഗിയാക്കി. പഞ്ചായത്ത് ഭരണ സമിതിയുടെയും പഞ്ചായത്ത് എന്‍ജിനീയര്‍ വിഭാഗത്തിന്‍റെയും മേല്‍നോട്ടത്തിലാണ് പാലം നിര്‍മാണം പൂര്‍ത്തീകരിച്ചത്. ഊരാളുങ്കല്‍ ലേബര്‍ കോണ്‍ട്രാക്ട് സൊസൈറ്റിയാണ് കരാറുകാര്‍. ചടങ്ങില്‍ ലിന്‍റോ ജോസഫ് എംഎല്‍എ അധ്യക്ഷനായി. കോടഞ്ചേരി ഗ്രാമപഞ്ചായത്ത് പ്രസിഡന്‍റ് അലക്സ് തോമസ് ചെമ്പകശേരി, വൈസ് പ്രസിഡന്‍റ് ജമീല അസീസ്, ജില്ലാ പഞ്ചായത്ത് അംഗം ബോസ് ജേക്കബ്, ബ്ലോക്ക് പഞ്ചായത്ത് അംഗം റോയ് കുന്നപ്പള്ളി, പഞ്ചായത്ത് വികസന സ്ഥിരം സമിതി അധ്യക്ഷന്‍ ജോസ് പെരുമ്പള്ളി, സംഘാടക സമിതി ചെയര്‍മാന്‍ കെ.എം. ജോസഫ് എന്നിവര്‍ പങ്കെടുത്തു.

വികസന കാഴ്ചപ്പാടുകള്‍ പങ്കുവച്ച് പേരാമ്പ്ര പഞ്ചായത്ത് വികസന സദസ്

പേരാമ്പ്ര: സംസ്ഥാന സര്‍ക്കാരിന്‍റെയും പഞ്ചായത്തിന്‍റെയും വികസന നേട്ടങ്ങള്‍ അവതരിപ്പിച്ചും ഭാവി വികസന കാഴ്ചപ്പാടുകള്‍ പങ്കുവച്ചും പേരാമ്പ്ര പഞ്ചായത്ത് വികസന സദസ്. ടി.പി.രാമകൃഷ്ണന്‍ എംഎല്‍എ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് വി.കെ. പ്രമോദ് അധ്യക്ഷനായി. ജില്ലാ പഞ്ചായത്ത് പ്രസിഡന്‍റ് ഷീജ ശശി മുഖ്യാതിഥിയായി. വികസന നേട്ടങ്ങളുടെ അവതരണം, ചര്‍ച്ച, തൊഴില്‍ മേള, ഹരിതകര്‍മ സേന അംഗങ്ങളെ ആദരിക്കലും യൂണിഫോം വിതരണവും എന്നിവ വികസന സദസിനോടനുബന്ധിച്ച് നടന്നു. അനധികൃത കെട്ടിട നിര്‍മാണങ്ങള്‍ കണ്ടെത്തി പിഴ ചുമത്തുക, നമ്പറില്ലാത്ത കെട്ടിടങ്ങള്‍ കണ്ടെത്തി നികുതി ചുമത്തി വരുമാനം വര്‍ധിപ്പിക്കുക, ഓഫീസുകള്‍ ഹൈടെക്കാക്കുക, ഓഫീസുകളില്‍ പൊതുജനങ്ങള്‍ക്ക് സൗജന്യ ഇന്‍റര്‍നെറ്റ് സൗകര്യം ലഭ്യമാക്കുക, പഞ്ചായത്തിലെ എല്ലാ റോഡുകളുടെയും സൗകര്യം മെച്ചപ്പെടുത്തുക, ജല്‍ ജീവന്‍ പദ്ധതി വഴി എല്ലായിടങ്ങളിലും ജലലഭ്യത ഉറപ്പുവരുത്തുക, പേരാമ്പ്ര കേന്ദ്രീകരിച്ച് ഇലക്ട്രിക് ശ്മശാനം നിര്‍മിക്കുക തുടങ്ങിയ വിഷയങ്ങള്‍ ചര്‍ച്ചയില്‍ ഉയര്‍ന്നു. ചടങ്ങില്‍ പേരാമ്പ്ര ഗ്രാമപഞ്ചായത്ത് വൈസ് പ്രസിഡന്‍റ് കെ.എം. റീന, സെക്രട്ടറി ഒ. മനോജ്, അസി. സെക്രട്ടറി സുകുമാരന്‍, റിസോഴ്സ് പേഴ്സണ്‍ പി.എം. ബാബു, ബ്ലോക്ക് പഞ്ചായത്ത് പ്രസിഡന്‍റ് എന്‍.പി.ബാബു, മുന്‍ എംഎല്‍എ കുഞ്ഞമ്മദ്, ജില്ലാ പഞ്ചായത്ത് അംഗം സി.എം. ബാബു തുടങ്ങിയവര്‍ പങ്കെടുത്തു.

കാഴ്ച മറച്ച് റോഡരികിലെ കാട്: മുപ്പതാംമൈല്‍ മേഖലയില്‍ അപകടസാധ്യതയേറി

കൂരാച്ചുണ്ട്: ജില്ലയിലെ തന്നെ അറിയപ്പെടുന്ന വിനോദസഞ്ചാര കേന്ദ്രങ്ങള്‍ പ്രവര്‍ത്തിക്കുന്ന കക്കയത്തേയ്ക്കുള്ള പിഡബ്ല്യുഡി അധീനതയിലുള്ള റോഡില്‍ മുപ്പതാം മൈല്‍ മേഖലയിൽ യാത്രക്കാരുടെയും വാഹന ഡ്രൈവര്‍മാരുടെയും കാഴ്ച മറയ്ക്കുന്ന വിധം റോഡരികില്‍ കാടുമൂടിയത് അപകടസാധ്യതയുയര്‍ത്തുന്നു. അനുദിനം ഒട്ടേറെ ബസുകളും മറ്റു വാഹനങ്ങളും വിനോദസഞ്ചാരികളുടെ വാഹനങ്ങളും സഞ്ചരിക്കുന്ന തിരക്കേറിയ റോഡാണിത്. കക്കയം മുതല്‍ ഇരുപത്തെട്ടാം മൈല്‍ വരെയുള്ള റോഡിന്‍റെ ഇരു ഭാഗങ്ങളിലും പലയിടങ്ങളിലായി വന്‍തോതില്‍ കാടുമൂടിയിട്ടുണ്ട്. പൊതുവേ വീതി കുറഞ്ഞ റോഡില്‍ ഇരുഭാഗവും കാടു മൂടിയതോടെ എതിരെ വരുന്ന വാഹനങ്ങളെ കാണാന്‍ കഴിയാത്തത് അപകട സാധ്യത വര്‍ധിപ്പിക്കുന്നുവെന്നാണ് ആക്ഷേപം. കക്കയത്ത് ജലവൈദ്യുത പദ്ധതികളും ഡാമും ഉള്ളതിനാല്‍ ഏറെ പ്രാധാന്യമര്‍ഹിക്കുന്ന റോഡാണിത്. റോഡരികിലെ കാടുവെട്ടി നീക്കാന്‍ പൊതുമരാമത്ത് വകുപ്പ് അധികൃതര്‍ നടപടി സ്വീകരിക്കണമെന്നാണ് നാട്ടുകാര്‍ ആവശ്യപ്പെടുന്നത്

പോത്ത് വിരണ്ടോടിയത് പരിഭ്രാന്തി പരത്തി

തിരുവമ്പാടി: കോടഞ്ചേരിയിലെ അറവുശാലയില്‍ നിന്ന് പോത്ത് വിരണ്ടോടിയത് നാട്ടില്‍ പരിഭ്രാന്തി സൃഷ്ടിച്ചു. പുലിക്കയം, തോട്ടുംമുഴി, അത്തിപ്പാറ, ഇരുമ്പകം, പാമ്പിഴഞ്ഞപാറ ഭാഗങ്ങളില്‍ പരിഭ്രാന്തി പരത്തി ഓടിയ പോത്തിനെ മുക്കം ഫയര്‍ഫോഴ്‌സിന്‍റെയും നാട്ടുകാരുടെയും സംയുക്ത ശ്രമത്തിനൊടുവില്‍ കറ്റിയാട് വാട്ടര്‍ സര്‍വീസ് സെന്‍ററിന് സമീപത്തെ വീട്ടുവളപ്പില്‍ വച്ച് സാഹസികമായി പിടിച്ചു കെട്ടി. തിരുവമ്പാടി പഞ്ചായത്ത് പ്രസിഡന്‍റ് ബിന്ദു ജോണ്‍സന്‍റെ നിര്‍ദേശപ്രകാരം ആവശ്യമെങ്കില്‍ പോത്തിനെ വെടിവയ്ക്കാനുള്ള സംഘവും സ്ഥലത്തെത്തിയിരുന്നു.

ബസ് ബ്രേക്കിട്ടു; യാത്രക്കാരിക്ക് പരിക്ക്

താമരശേരി: കെഎസ്ആര്‍ടിസി ബസ് സഡന്‍ ബ്രേക്കിട്ടപ്പോള്‍ ബസിനകത്തു തെറിച്ചു വീണതിനെതുടര്‍ന്ന് യാത്രക്കാരിക്ക് പരിക്ക്. യാത്രക്കാരിയുടെ തലയ്ക്കും കൈക്കും പരിക്കേറ്റു. താമരശേരി താലൂക്ക് ആശുപത്രിയ്ക്ക് മുന്നില്‍ വച്ചാണ് അപകടം ഉണ്ടായത്. കോതമംഗലത്ത് നിന്ന് ബത്തേരിയിലേക്ക് പോവുകയായിരുന്നു കെഎസ്ആര്‍ടിസി ബസ്. ഈ ബസിനെ കുന്നമംഗലം മുതല്‍ സ്വകാര്യ ബസ് മറികടക്കാന്‍ ശ്രമിച്ചിരുന്നതായി യാത്രക്കാര്‍ പറയുന്നു. താമരശേരിയിലെത്തിയപ്പോള്‍ അമിത വേഗതയില്‍ എത്തിയ സ്വകാര്യ ബസ് ഓവര്‍ടേക്ക് ചെയ്തപ്പോഴാണ് അപകടം ഒഴിവാക്കാന്‍ കെഎസ്ആര്‍ടിസി ബസ് സഡന്‍ ബ്രേക്കിട്ടത്. ഇതോടെ യാത്രക്കാരി സൗമിനി (75) ആണ് തെറിച്ചുവീഴുകയായിരുന്നു. ബസിന്‍റെ ഡോര്‍ അടച്ചിരുന്നതിനാല്‍ വലിയ അപകടം ഒഴിവായി. യാത്രക്കാരിയെ ആദ്യം താമരശേരി താലൂക്ക് ആശുപത്രിയിലും പിന്നീട് കോഴിക്കോട് മെഡിക്കല്‍ കോളജിലും പ്രവേശിപ്പിച്ചു.

പതിയില്‍ കപ്പേളയില്‍ തിരുനാള്‍ തുടങ്ങി

കൂരാച്ചുണ്ട്: കൂരാച്ചുണ്ട് സെന്‍റ് തോമസ് ഫൊറോന ഇടവകയുടെ കുരിശുപള്ളിയായ പതിയില്‍ കപ്പേളയില്‍ വിശുദ്ധ യൂദാ തദേവൂസിന്‍റെ ഒമ്പത് ദിവസം നീണ്ടുനില്‍ക്കുന്ന തിരുനാള്‍ ആഘോഷങ്ങള്‍ക്ക് തുടക്കം കുറിച്ചുകൊണ്ട് ഇടവക വികാരി ഫാ. വിന്‍സെന്‍റ് കണ്ടത്തില്‍ കൊടിയേറ്റി. തുടര്‍ന്നു നടന്ന വിശുദ്ധ കുര്‍ബാന, സന്ദേശം, നൊവേന എന്നിവയ്ക്ക് ഫാ. തോമസ് പതിയില്‍ സിഎംഐ കാര്‍മികത്വം വഹിച്ചു. അസിസ്റ്റന്‍റ് വികാരി ഫാ. മൈക്കിള്‍ നീലംപറമ്പില്‍ സഹകാര്‍മികത്വം വഹിച്ചു. ഇന്ന് വൈകുന്നേരം നാലിന് ജപമാല, 4.30ന് വിശുദ്ധ കുര്‍ബാന, സന്ദേശം, നൊവേന -ഫാ. ജോസ് പെണ്ണാപറമ്പില്‍ കാര്‍മികനാകും.

താഴക്കോട് ജിഎല്‍പിഎസ് കെട്ടിടോദ്ഘാടനം

മുക്കം: മുക്കം നഗരസഭയിലെ പൈതൃക വിദ്യാലയമായ താഴക്കോട് ജിഎല്‍പി സ്‌ക്കൂളിന് ലിന്‍റോ ജോസഫ് എംഎല്‍എയുടെ ആസ്തി വികസന ഫണ്ടില്‍ ഉള്‍പ്പെടുത്തി അനുവദിച്ച പുതിയ ഓഫീസ് റൂം, ടോയ്‌ലറ്റ് , കളിസ്ഥലം, ഗെയിറ്റ് എന്നിവ ലിന്‍റോ ജോസഫ് ഉദ്ഘാടനം ചെയ്തു. പി.ടി ബാബു അധ്യക്ഷത വഹിച്ചു. അഡ്വ. ചാന്ദ്‌നി, സത്യനാരായണന്‍, പ്രജിത പ്രദീപ്, പി.വി മുഹമ്മദ് റാഫി, കെ. ഫസീല, യൂനുസ്, സി.കെ. ജയതി സംസാരിച്ചു. എ.വി സുധാകരന്‍, കെ. അബ്ദുല്‍ മജീദ് എന്നിവര്‍ നേതൃത്വം നല്‍കി.

താമരശേരി താലൂക്ക് ആശുപത്രിയില്‍ കെഎസ് യു പ്രതിഷേധം

താമരശ്ശേരി: കോരങ്ങാട് ആനപ്പാറപ്പൊയില്‍ അനയ(9) മരിക്കാനിടയാക്കിയത് താമരശേരി ഗവ.താലൂക്ക് ആശുപത്രിയിലെ ചികിത്സപ്പിഴവാണെന്ന് ആരോപിച്ച് കെഎസ് യു പ്രവര്‍ത്തകരുടെ പ്രതിഷേധം. ആശുപത്രി സൂപ്രണ്ടിനെ ഉപരോധിക്കാനെത്തിയ പ്രവര്‍ത്തകരെ കാഷ്വാലിറ്റിക്ക് മുന്‍വശത്ത് താമരശേരി പോലീസ് തടഞ്ഞു. തുടര്‍ന്ന് പ്രവര്‍ത്തകര്‍ ആശുപത്രി കെട്ടിടത്തിന് മുന്നില്‍ കുത്തിയിരുന്ന് മുദ്രാവാക്യം വിളിച്ച് പ്രതിഷേധിച്ചു. ജില്ലാ പ്രസിഡന്‍റ് വി.ടി. സൂരജ്, വൈസ് പ്രസിഡന്‍റ് എം.പി. രാഗിന്‍, അഷ്‌കര്‍ അറക്കല്‍, ഫിലിപ്പ് ജോണ്‍, ടി.ടി. അഭിനന്ദ്, കെ.കെ. റിഷാം എന്നിവരാണ് പ്രതിഷേധിച്ചത്. ഇവരെ പോലീസ് ബലം പ്രയോഗിച്ച് അറസ്റ്റുചെയ്ത് നീക്കി. പിന്നീട് ജാമ്യത്തില്‍ വിട്ടയച്ചു.

പെരുമഴ: ചെമ്പുകടവില്‍ നാശനഷ്ടം

കോടഞ്ചേരി: ചെമ്പുകടവില്‍ ഇന്നലെ വൈകിട്ട് ഉണ്ടായ അതിശക്തമായ പെരുമഴയില്‍ കനത്ത നാശനഷ്ടം. കോഴിക്കോടന്‍ചാല്‍ തോടിന്‍റെ കെട്ട് ഇടിഞ്ഞ് ചീടികുഴി സുരേന്ദ്രന്‍റെ വീട് അപകടാവസ്ഥയിലായി. കുന്നുമ്മല്‍ മജീദിന്‍റെ വീടിന്‍റെ പുറകുവശത്തെ മണ്‍തിട്ട ഇടിഞ്ഞു. അഞ്ചാം വാര്‍ഡ് മീന്‍മുട്ടി ഭാഗത്ത് താമസിക്കുന്ന നരിക്കുംചാലില്‍ സുനില്‍ കുമാറിന്‍റെ വീടിന്‍റെ സംരക്ഷണ ഭിത്തിയും ഇടിഞ്ഞു.

മീന്‍മുട്ടിയില്‍ അജ്ഞാതജീവിയുടെ ആക്രമണം: വളര്‍ത്തുനായയ്ക്ക് പരിക്ക്

കൂരാച്ചുണ്ട്: കരിയാത്തുംപാറ മീന്‍മുട്ടി മേഖലയില്‍ അജ്ഞാത ജീവിയുടെ ആക്രമണത്തില്‍ വളര്‍ത്തു നായയ്ക്ക് പരിക്ക്. മീന്‍മുട്ടി മേഖലയില്‍ താമസിക്കുന്ന പുതുപ്പറമ്പില്‍ മാത്യുവിന്‍റെ വളര്‍ത്തുനായയ്ക്കാണ് അജ്ഞാത ജീവിയുടെ ആക്രമണത്തില്‍ പരിക്ക് പറ്റിയത്. കഴിഞ്ഞ ദിവസം രാത്രി 12 നാണ് സംഭവം. ശബ്ദം കേട്ട് മാത്യു ലൈറ്റ് തെളിച്ച് നോക്കിയപ്പോള്‍ കൂട്ടിലായിരുന്ന നായ കഴുത്തിന് മുറിവേറ്റ് അവശ നിലയില്‍ കിടക്കുന്നതാണ് കണ്ടത്. നായയുടെ കൂടിന് സമീപത്തും കൃഷിയിടത്തിലും അജ്ഞാത ജീവിയുടെ കാല്‍പ്പാടുകള്‍ മണ്ണില്‍ പതിഞ്ഞിട്ടുണ്ട്. കക്കയം ഫോറസ്റ്റ് ഉദ്യോഗസ്ഥര്‍ സംഭവസ്ഥലത്തെത്തി പരിശോധന നടത്തി. കാല്‍പ്പാടുകള്‍ കടുവയുടേത് അല്ലെന്നും പട്ടിപ്പുലിയാണെന്ന് വനം ഉദ്യോഗസ്ഥര്‍ അറിയിച്ചു. മാസങ്ങള്‍ക്ക് മുമ്പും പ്രദേശത്ത് സമാനമായ സംഭവങ്ങള്‍ ഉണ്ടായിട്ടുള്ളതിനാല്‍ പ്രദേശവാസികള്‍ പരിഭ്രാന്തിയിലാണ്. കക്കയം സ്റ്റേഷന്‍ ഫോറസ്റ്റ് ഓഫീസര്‍ കെ.കെ. ബൈജു, ബീറ്റ് ഫോറസ്റ്റ് ഓഫീസര്‍ കെ.ജി ബ്രിജേഷ് എന്നിവരാണ് സ്ഥലത്തെത്തി പരിശോധന നടത്തിയത്. മീന്‍മുട്ടി മേഖലയില്‍ രാത്രികാല നിരീക്ഷണം നടത്തുമെന്ന് ഡെപ്യൂട്ടി റെയിഞ്ച് ഫോറസ്റ്റ് ഓഫീസര്‍ സി.വിജിത്ത് അറിയിച്ചു.

ബാലവേദി ഉദ്ഘാടനം ചെയ്തു

കൂരാച്ചുണ്ട്: കല്ലാനോട് ഇരുപത്തെട്ടാംമൈല്‍ ധനശില്പി സ്വയം സഹായ സഹകരണ സംഘത്തിന്‍റെ നേതൃത്വത്തില്‍ രൂപീകരിച്ച ബാലവേദിയുടെ ഉദ്ഘാടനം കൂരാച്ചുണ്ട് സബ് ഇന്‍സ്‌പെക്ടര്‍ എസ്.ആര്‍. സൂരജ് നിര്‍വഹിച്ചു. സുനില്‍ ഫ്രാന്‍സീസ് അധ്യക്ഷത വഹിച്ചു. എഴുത്തുകാരന്‍ സജി എം. നരിക്കുഴി മുഖ്യപ്രഭാഷണം നടത്തി. രക്ഷാധികാരി ജെ. ബാവോസ് മാത്യു, പഞ്ചായത്തംഗം അരുണ്‍ ജോസ്, അബ്രഹാം കടുകമ്മാക്കല്‍, പി.എം. ഷനീഷ്, കെ.വി. വിനീഷ് എന്നിവര്‍ പ്രസംഗിച്ചു.

മിഷന്‍ ഞായര്‍ ആചരിച്ചു

ചക്കിട്ടപാറ: ചക്കിട്ടപാറ സെന്‍റ് ആന്‍റണീസ് പള്ളിയില്‍ മിഷന്‍ ഞായര്‍ ആചരിച്ചു. മിഷന്‍ ലീഗ് ചക്കിട്ടപാറ ശാഖ പ്രസിഡന്‍റ് ആന്‍ ജോണ്‍ പുലിക്കോട്ടില്‍ പതാക ഉയര്‍ത്തി. ഇടവക വികാരി ഫാ. തോമസ് തേവടിയില്‍ ഉദ്ഘാടനം ചെയ്തു. സണ്‍ഡേ സ്‌കൂള്‍ പ്രധാനാധ്യാപകന്‍ ഷിബു എടാട്ട് അധ്യക്ഷത വഹിച്ചു. സിസ്റ്റര്‍ ദീപ (എഫ്‌സിസി), അധ്യാപകരായ ജിയോ കുര്യന്‍, ഷാജി സ്റ്റീഫന്‍, ജോയല്‍ കുര്യന്‍, ജാസ്മിന്‍ വളയത്ത്, സോണിയ ചന്ദ്രന്‍കുന്നേല്‍ എന്നിവര്‍ നേതൃത്വം നല്‍കി.

ഷീ ഗാര്‍ഡ് വിംഗ് ഉദ്ഘാടനം ചെയ്തു

പേരാമ്പ്ര: ദുരന്ത മുഖത്ത് വേദന പേറുന്നവരെ ചേര്‍ത്തു പിടിക്കാനും ആശ്വാസമരുളാനും സദാ സജ്ജരാണെന്ന സന്ദേശമാണ് ഷീ ഗാര്‍ഡ് സമൂഹത്തിന് നല്‍കുന്നതെന്നു മുസ്‌ലീം ലീഗ് സംസ്ഥാന ജനറല്‍ സെക്രട്ടറി അഡ്വ. പി.എം.എ സലാം. പേരാമ്പ്ര മണ്ഡലം വനിതാ ലീഗിന്‍റെ നേതൃത്വത്തില്‍ പരിശീലനം നേടിയ ഷീ ഗാര്‍ഡ് സന്നദ്ധ സേന വളണ്ടിയര്‍ വിംഗിന്‍റെ സമര്‍പ്പണം നിര്‍വഹിക്കുകയായിരുന്നു അദേഹം. മണ്ഡലം വനിതാ ലീഗ് പ്രസിഡന്‍റ് ഷര്‍മിന കോമത്ത് അധ്യക്ഷത വഹിച്ചു. വനിതാലീഗ് ദേശീയ പ്രസിഡന്‍റ് ഫാത്തിമ മുസാഫര്‍, അഡ്വ.പി. കുല്‍സു, എസ്.പി കുഞ്ഞമ്മദ്, സി.പി.എ അസീസ്, സി.എച്ച് ഇബ്രാഹീം കുട്ടി, ആര്‍.കെ മുനീര്‍, ടി.കെ.എ ലത്തീഫ്, എം.കെ.സി കുട്ട്യാലി, കെ. മറിയം, എ. ആമിന, പി.ടി.എം ഷറഫുന്നിസ, വഹീദ പാറേമ്മല്‍, സൗഫി താഴെകണ്ടി, മിസ്ഹബ് കീഴരിയൂര്‍, സല്‍മ നന്‍മനക്കണ്ടി, ഇ. ഷാഹി തുടങ്ങിയവര്‍ പ്രസംഗിച്ചു.

മാലിന്യം വലിച്ചെറിയല്‍: അഞ്ചുമാസംകൊണ്ട് ഈടാക്കിയ പിഴ 8.55 കോടി രൂപ

കോഴിക്കോട്: കഴിഞ്ഞ അഞ്ച് മാസത്തിനിടയില്‍ പൊതുയിടത്തില്‍ മാലിന്യം വലിച്ചെറിഞ്ഞതിന്‍റെ പിഴയായി വകുപ്പ് ഈടാക്കിയത് 8.55 കോടി രൂപയാണെന്ന് കോഴിക്കോട് ബീച്ച് വെന്‍റിംഗ് മാര്‍ക്കറ്റ് കം ഫുഡ് സ്ട്രീറ്റ് ഉദ്ഘാടനം ചെയ്തുകൊണ്ട് തദ്ദേശസ്വയംഭരണ മന്ത്രി എം.ബി. രാജേഷ് പറഞ്ഞു. ദേശീയ നഗര ഉപജീവന ദൗത്യം, ദേശീയ ആരോഗ്യ ഉപജീവന ദൗത്യം എന്നീ പദ്ധതികളുമായി സംയോജിപ്പിച്ചാണ് കോര്‍പറേഷന്‍ ബീച്ചില്‍ ഫുഡ് സ്ട്രീറ്റ് സ്ഥാപിച്ചത്. 3.44 കോടി രൂപ ചെലവഴിച്ച് നിര്‍മിച്ച ഫുഡ് സ്ട്രീറ്റില്‍ 90 കച്ചവടക്കാരെയാണ് പുനരധിവസിപ്പിക്കുന്നത്. ചടങ്ങില്‍ മേയര്‍ ഡോ. ബീന ഫിലിപ്പ് അധ്യക്ഷത വഹിച്ചു. എംഎല്‍എമാരായ തോട്ടത്തില്‍ രവീന്ദ്രന്‍, അഹമ്മദ് ദേവര്‍കോവില്‍, ഡെപ്യൂട്ടി മേയര്‍ സി.പി. മുസാഫിര്‍ അഹമ്മദ്, പി. ദിവാകരന്‍, ഡോ. എസ്. ജയശ്രീ, പി.സി. രാജന്‍, കൃഷ്ണകുമാരി, പി.കെ. നാസര്‍, സി. രേഖ, വാര്‍ഡ് കൗണ്‍സിലര്‍മാരായ മോയിന്‍കുട്ടി, റെനീഷ്, എം.എസ്. തുഷാര, സെക്രട്ടറി കെ.യു. ബിനി തുടങ്ങിയവര്‍ പങ്കെടുത്തു.

‘പിഎം ശ്രീ പദ്ധതി വിദ്യാഭ്യാസ അവകാശനിയമം അട്ടിമറിക്കാന്‍’

കോഴിക്കോട്: പാര്‍ലമെന്‍റ് പാസാക്കിയ വിദ്യാഭ്യാസ അവകാശ നിയമത്തെ അട്ടിമറിക്കാന്‍ നരേന്ദ്ര മോദി കൊണ്ടുവന്നതാണ് പിഎം ശ്രീ പദ്ധതിയെന്ന് സിപിഐ ദേശീയ സെക്രട്ടേറിയറ്റ് അംഗം അഡ്വ. കെ. പ്രകാശ് ബാബു. സിപിഐ രൂപീകരണത്തിന്‍റെ നൂറാം വാര്‍ഷികത്തിന്‍റെ ഭാഗമായുള്ള ശതാബ്ദി ആഘോഷ പരിപാടികളോടനുബന്ധിച്ചുള്ള ചരിത്രപ്രദര്‍ശനം മുതലക്കുളത്ത് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ദേശീയ വിദ്യാഭ്യാസ നയത്തിന്‍റെ ഭാഗം മാത്രമാണ് പിഎം ശ്രീ പദ്ധതി. ഇതിന്‍റെ അടിസ്ഥാനം തന്നെ ബിജെപിയുടെയും ആര്‍എസ്എസിന്‍റെയും ആശയങ്ങളാണ്. ഫെഡറല്‍ സംവിധാനം നിലനില്‍ക്കുന്ന ഇന്ത്യയില്‍ പാര്‍ലമെന്‍റ് പാസാക്കിയ വിദ്യാഭ്യാസ അവകാശ നിയമത്തിനാണോ അതോ കേന്ദ്രാവിഷ്‌കൃത പദ്ധതിക്കാണോ സംസ്ഥാന സര്‍ക്കാരുകള്‍ വില കല്‍പ്പിക്കേണ്ടതെന്ന് സ്വയം ചിന്തിക്കണം. കേന്ദ്ര സര്‍ക്കാരിന്‍റെ പിഎം ശ്രീ പദ്ധതിയല്ല മറിച്ച് എല്ലാവര്‍ക്കും വിദ്യാഭ്യാസത്തിനുള്ള അവകാശമാണ് ഇന്ത്യയില്‍ നടപ്പിലാകേണ്ടത്. പിഎം ശ്രീയില്‍ ചേരാത്തതിന്‍റെ പേരില്‍ സംസ്ഥാനങ്ങള്‍ക്കുള്ള ഫണ്ട് തടഞ്ഞുവയ്ക്കുന്ന കേന്ദ്ര നിലപാട് പ്രതിഷേധാര്‍ഹമാണ്. ഫണ്ട് തടഞ്ഞുവയ്ക്കുന്നതിലൂടെ പാര്‍ലമെന്‍റ് പാസാക്കിയ നിയമത്തെ തന്നെയാണ് അട്ടിമറിക്കുന്നത്. ഇത്തരം നയങ്ങള്‍ക്കെതിരേ ശക്തമായ നിലപാടുകള്‍ സ്വീകരിക്കണമെന്നും പ്രകാശ്ബാബു ആവശ്യപ്പെട്ടു. ഇ.കെ. വിജയന്‍ എംഎല്‍എ അധ്യക്ഷത വഹിച്ചു. സിപിഐ സംസ്ഥാന അസി. സെക്രട്ടറി സത്യന്‍ മൊകേരി, ആര്‍. സത്യന്‍, അഡ്വ. എ.കെ.സുകുമാരന്‍, ഹസീന വിജയന്‍ എന്നിവര്‍ പ്രസംഗിച്ചു.

മഞ്ചയില്‍ക്കടവ് അക്വാടൂറിസം പദ്ധതി നാടിനു സമര്‍പ്പിച്ചു

വടകര: മണിയൂര്‍ ഗ്രാമപഞ്ചായത്തിലെ മഞ്ചയില്‍ക്കടവ് അക്വാടൂറിസം പദ്ധതി നാടിനു സമര്‍പ്പിച്ച് ടൂറിസം മന്ത്രി പി.എ.മുഹമ്മദ് റിയാസ്. വിനോദ സഞ്ചാരികളുടെ എണ്ണത്തില്‍ സംസ്ഥാനവും കോഴിക്കോട് ജില്ലയും സര്‍വകാല റിക്കാര്‍ഡിലെത്തിയതായി മന്ത്രി പറഞ്ഞു. ചടങ്ങില്‍ കെ.പി. കുഞ്ഞമ്മദ് കുട്ടി എംഎല്‍എ അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്‍റ് ഷീജ ശശി, കെടിഐഎല്‍ ചെയര്‍മാന്‍ എസ്.കെ. സജീഷ്, ജില്ലാ പഞ്ചായത്ത് പൊതുമരാമത്ത് സ്റ്റാന്‍ഡിംഗ് കമ്മിറ്റി ചെയര്‍പേഴ്സണ്‍ കെ.വി. റീന, മണിയൂര്‍ പഞ്ചായത്ത് പ്രസിഡന്‍റ് ടി.കെ. അഷ്റഫ്, ഫിഷറീസ് ഡെപ്യൂട്ടി ഡയറക്ടര്‍ പി. അനീഷ് തുടങ്ങിയവര്‍ പങ്കെടുത്തു. പ്രകൃതി മനോഹരമായ മണിയൂര്‍ പഞ്ചായത്തിലെ പതിയാരക്കരയിലാണ് മത്സ്യസഞ്ചാരി പദ്ധതിയുടെ ഭാഗമായി ഫിഷറീസ് വകുപ്പിന്‍റെ ആഭിമുഖ്യത്തില്‍ ഗ്രാമപഞ്ചായത്തിന്‍റെ ഒരു ലക്ഷം രൂപയും ജില്ലാ പഞ്ചായത്തിന്‍റെ രണ്ട് ലക്ഷം രൂപയും ചെലവിട്ട് തൊഴില്‍രഹിതരായ യുവാക്കളെ ഉള്‍പ്പെടുത്തി മഞ്ചയില്‍ക്കടവ് അക്വാടൂറിസം പദ്ധതി യാഥാര്‍ഥ്യമാക്കിയത്.

അക്ഷരയാത്ര: മുഖാമുഖം നടത്തി

കോഴിക്കോട്: എരഞ്ഞിപ്പാലം ശ്രീ വാഗ്ഭടാനന്ദ ഗുരുദേവര്‍ സ്മാരക വായനശാലയുടെയും പോസിറ്റീവ് കമ്യൂണ്‍ ഗ്രൂപ്പിന്‍റെയും സംയുക്താഭിമുഖ്യത്തില്‍ അക്ഷര യാത്ര 2025 എന്ന പരിപാടിയുടെ ഭാഗമായി സാഹിത്യകാരി ജാനമ്മ കുഞ്ഞുണ്ണിയുമായി മുഖാമുഖം സംഘടിപ്പിച്ചു. വായനശാല പ്രസിഡന്‍റ് പി.എസ്. വിപിന്‍ അധ്യക്ഷത വഹിച്ച ചടങ്ങില്‍ സെക്രട്ടറി കെ.ശൈലേഷ്, വി.പി.സുമതി, സഞ്ജയ് ശിവന്‍, പ്രശാന്ത് പടനിലം, ടി.കെ. അംബിക, എം.സുനില്‍കുമാര്‍, ഷനീഷ ലത്തീഫ്, സി.കെ.മനോജ്, സി.പി. മോളി എന്നിവര്‍ പ്രസംഗിച്ചു.

കുറ്റവിചാരണ സദസ് നടത്തി

മരുതോങ്കര: മണ്ഡലം കോൺഗ്രസ് കമ്മിറ്റി സംഘടിപ്പിച്ച കുറ്റവിചാരണ സദസും പ്രതിഷേധ യോഗവും കെപിസിസി മെമ്പർ കെ.ടി. ജയിംസ് ഉദ്ഘാടനം ചെയ്തു. ബ്ലോക്ക് പ്രസിഡന്‍റ് കോരംകോട്ട് ജമാൽ മുഖ്യപ്രഭാഷണം നടത്തി. മണ്ഡലം പ്രസിഡന്‍റ് ശ്രീധരൻ അധ്യക്ഷത വഹിച്ചു. ഡിസിസി മെമ്പർ കോരംകോട്ട് മൊയ്തു, കെ.കെ. പാർത്ഥൻ, മുകുന്ദൻ മരുതോങ്കര, കോവുമ്മൽ അമ്മദ്, കെ.സി. കൃഷ്ണൻ, കാഞ്ഞിരം തോമാച്ചൻ, ബിന്ദു കൂരാറ, സനൽ വക്കത്ത്, വിനയകുമാർ പാലോത്തുകുളങ്ങര, രാഹുൽ ചാലിൽ തുടങ്ങിയവർ നേതൃത്വം നൽകി.

കുരുവട്ടൂര്‍ പഞ്ചായത്ത് വികസന സദസ്

കോഴിക്കോട്: വികസനത്തിന്‍റെ ഗുണഫലങ്ങള്‍ എല്ലാവര്‍ക്കും ലഭ്യമാക്കാന്‍ സര്‍ക്കാറിന് സാധിച്ചതായി മന്ത്രി എ.കെ. ശശീന്ദ്രന്‍. കുരുവട്ടൂര്‍ ഗ്രാമപഞ്ചായത്ത് വികസന സദസ് ഉദ്ഘാടനം ചെയ്യുകയായിരുന്നു മന്ത്രി. തദ്ദേശ സ്ഥാപനങ്ങളെ അകറ്റിനിര്‍ത്താതെ വികസന ആവശ്യങ്ങള്‍ കണ്ടറിഞ്ഞ് നിറവേറ്റാന്‍ സര്‍ക്കാറിന് സാധിച്ചു. ഇത്തരം വികസന കാഴ്ചപ്പാടുകളിലൂടെ സര്‍ക്കാര്‍ കൂടുതല്‍ ജനകീയമാകുകയാണ്. വിവിധ മേഖലകളില്‍ കേരളം കൈവരിച്ച നേട്ടങ്ങളിലൂടെ നവകേരളം യാഥാര്‍ഥ്യമാകുകയാണെന്നും മന്ത്രി പറഞ്ഞു. ഗ്രാമപഞ്ചായത്തിന്‍റെ വികസന രേഖ സെക്രട്ടറി ആര്‍. ഗോപീകൃഷ്ണന്‍ പ്രകാശനം ചെയ്തു. സംസ്ഥാന സര്‍ക്കാറിന്‍റെയും ഗ്രാമപഞ്ചായത്തിന്‍റെയും ഭരണനേട്ടങ്ങളുടെ അവതരണം, തദ്ദേശ സ്വയംഭരണ വകുപ്പ് മന്ത്രി എം.ബി. രാജേഷിന്റെ വീഡിയോ സന്ദേശം, കെ സ്മാര്‍ട്ട് ക്ലിനിക്ക്, തൊഴില്‍ മേള, ചര്‍ച്ച എന്നിവ സദസിന്‍റെ ഭാഗമായി നടന്നു. ഹരിത കര്‍മസേന, തൊഴിലുറപ്പ് തൊഴിലാളികള്‍ എന്നിവരെ ചടങ്ങില്‍ ആദരിച്ചു. പഞ്ചായത്തിന്‍റെ മിനി സ്റ്റേഡിയം സംരക്ഷിക്കുക, പറമ്പില്‍ ബസാര്‍ അങ്ങാടിയില്‍ കൂടുതല്‍ വികസനം കൊണ്ടുവരുക, റോഡിന്‍റെ വശങ്ങളില്‍ കലുങ്കുകള്‍ നിര്‍മിക്കുക, റോഡ് നിര്‍മാണത്തിനുള്ള സ്ഥലം ഏറ്റെടുക്കല്‍ വേഗത്തിലാക്കുക, ഉന്നതികളിലെ വീടുകള്‍ നവീകരിക്കുക, റോഡിന്‍റെ ശോച്യാവസ്ഥ പരിഹരിക്കുക, പാറത്തോടും പൂനൂര്‍ പുഴയും സംരക്ഷിക്കുക തുടങ്ങിയ നിര്‍ദേശങ്ങള്‍ ചര്‍ച്ചയില്‍ ഉയര്‍ന്നു. പറമ്പില്‍ എഎം എല്‍പി സ്‌കൂളില്‍ നടന്ന പരിപാടിയില്‍ പഞ്ചായത്ത് പ്രസിഡന്‍റ് എ. സരിത അധ്യക്ഷയായി.

വടകര-വില്ല്യാപ്പള്ളി-ചേലക്കാട് റോഡ്; അസത്യം പ്രചരിപ്പിക്കുന്നുവെന്ന്

കോഴിക്കോട്: വടകര-വില്ല്യാപ്പള്ളി-ചേലക്കാട് റോഡിന്‍റെ വടകര റീച്ചിൽ സ്ഥലം അടയാളപ്പെടുത്തലുമായി ബന്ധപ്പെട്ട് സ്ഥലം എംഎൽഎ കെ.കെ. രമയും മറ്റ് ജനപ്രതിനിധികളും നടത്തുന്ന പ്രസ്താവനകൾ തെറ്റിദ്ധാരണാജനകവും അസത്യവുമാണെന്ന് റോഡ് ആക്ഷൻ കമ്മിറ്റിയോഗം അഭിപ്രായപ്പെട്ടു. ഭൂമിയും സ്ഥാപനങ്ങളും നഷ്ടപ്പെടുന്നവരിൽ നല്ലൊരു ശതമാനം പേർ കേരളാ ഹൈക്കോടതിയെ സമീപിച്ച് അനുകൂല ഉത്തരവ് നേടിയവരും, അതിലധികം പേർ സമ്മതപ്രതം നൽകാത്തവരുമാണെന്നിരിക്കേ ഇവരുടെ അനുവാദം പോലുമില്ലാതെ വികസന പ്രവർത്തനത്തിന് സ്ഥലം അളവെടുക്കുന്ന നിയമവിരുദ്ധമായ പ്രവൃത്തി നടത്തുകയും ഇവർ സമ്മതിച്ചുവെന്ന് മാധ്യമങ്ങളോട് ഇല്ലാക്കഥ പ്രചരിപ്പിക്കുകയും ചെയ്‌ത എംഎൽഎയുടെ നടപടി തെറ്റായ രീതിയാണെന്ന് യോഗം അഭിപ്രായപ്പെട്ടു. നടക്കുതാഴ ജെബി സ്‌കൂളിൽ ചേർന്ന യോഗം കൺവീനർ കെ. ചന്ദ്രൻ അധ്യക്ഷത വഹിച്ചു. കെ.പി. ശ്രീധരൻ, സജിത്ത്‌കുമാർ പുത്തർ, പി.എം. ഹരീന്ദ്രൻ എന്നിവർ പ്രസംഗിച്ചു.

യുഡിഎഫ് മുക്കം മോചനയാത്ര തുടങ്ങി

മുക്കം: മുക്കം നഗരസഭയുടെ കെടുകാര്യസ്ഥതക്കെതിരേയും അഴിമതിക്കെതിരേയും എന്ന മുദ്രാവാക്യവുമായി യുഡിഎഫിന്‍റെ നേതൃത്വത്തിൽ നടക്കുന്ന കാൽനട പ്രചരണ ജാഥക്ക് തുടക്കമായി. ആലും തറയിൽ ഡിസിസി പ്രസിഡന്‍റ് അഡ്വ. കെ. പ്രവീൺ കുമാർ ഉദ്ഘാടനം ചെയ്തു. ജാഥാ ക്യാപ്റ്റൻ എം. മധു അധ്യക്ഷത വഹിച്ചു. ഇരട്ട കുളങ്ങര, തൂങ്ങും പുറം, മുത്താലം, മണാശേരി തുടങ്ങിയ കേന്ദ്രങ്ങളിൽ സ്വീകരണം നൽകി. കൗൺസിലർമാരായ ഗഫൂർ കല്ലുരുട്ടി, വേണു കല്ലുരുട്ടി, എ.എം. അബുബക്കർ, ഐ.പി. ഉമ്മർ, ബി.പി. റഷീദ്, ഷരീഫ് വെണ്ണക്കോട്, കരിമ്പനക്കൽ ബാലൻ തുടങ്ങിയവർ വിവിധ കേന്ദ്രങ്ങളിൽ പ്രസംഗിച്ചു. ആലിചേന്ദമംഗല്ലൂർ, രാജൻ വടക്കെക്കര, മുനീർ മുത്താലം, മൻസൂർ, ആലി അമ്പലത്തിങ്ങൽ തുടങ്ങിയവർ നേതൃത്വം നൽകി.

ട്രെയിനിൽ നിന്നെറിഞ്ഞ കുപ്പി കൊണ്ട് വിദ്യാർഥിക്ക് പരിക്ക്

കൊയിലാണ്ടി: ട്രെയിനിൽ നിന്നും വലിച്ചെറിഞ്ഞ കുപ്പി മുഖത്ത് കൊണ്ട് വിദ്യാർഥിക്ക് പരിക്ക്. പേരാമ്പ്ര നൊച്ചാട് അടിയോടി വീട്ടിൽ ആദിത്യൻ (18) നാണ് പരിക്കേറ്റത്. ഇന്നലെ വൈകീട്ട് അഞ്ചോടെയായിരുന്നു സംഭവം. മംഗലാപുരത്തേക്ക് പോകുന്ന ട്രെയിനിൽ നിന്നും ആരോ കുപ്പി വലിച്ചെറിയുകയായിരുന്നു. വിദ്യാർഥിയുടെ രണ്ടു പല്ലുകൾക്ക് പരിക്കേറ്റിട്ടുണ്ട്. കൊയിലാണ്ടി താലൂക്ക് ആശുപത്രിയിൽ കാണിച്ച ശേഷം കോഴിക്കോട് മെഡിക്കൽ കോളജിൽ പ്രവേശിപ്പിച്ചു. റെയിൽവെ പോലീസിൽ പരാതി നൽകിയിട്ടുണ്ട്.

മിനി മാസ്റ്റ് ലൈറ്റ് ഉദ്ഘാടനം ചെയ്തു

കോടഞ്ചേരി: പറപ്പറ്റ പാലത്തിനു സമീപം സ്ഥാപിച്ച മിനി മാസ്റ്റ് ലൈറ്റിന്‍റെ ഉദ്ഘാടനം പഞ്ചായത്ത് പ്രസിഡന്‍റ് അലക്സ് തോമസ് ചെമ്പകശേരി നിർവഹിച്ചു. പഞ്ചായത്തിന്‍റെ 2025 -26 വാർഷിക പദ്ധതിയിൽ ഉൾപ്പെടുത്തി ഒരു ലക്ഷത്തി അമ്പതിനായിരം രൂപ മുതൽ മുടക്കിലാണ് മിനി മാസ്റ്റ് ലൈറ്റ് സ്ഥാപിച്ചത്. ചടങ്ങിൽ ബ്ലോക്ക് മെമ്പർ റോയ് കുന്നപ്പള്ളി, പഞ്ചായത്ത് മെമ്പർമാരായ വാസുദേവൻ ഞാറ്റു കാലായിൽ, ചിന്ന അശോകൻ, മുൻ മെമ്പർ ജോബി ഇലന്തൂർ, സണ്ണി രാമറ്റത്തിൽ, കാഞ്ചന ഷാജി, ബോബി വെട്ടിക്കുഴി എന്നിവർ സംബന്ധിച്ചു.

ശാപമോക്ഷമില്ലാതെ രണ്ട് ഇടറോഡുകൾ

കോടഞ്ചേരി: അഗസ്ത്യാമുഴി- കൈതപ്പൊയിൽ റോഡിന്‍റെ നിർമാണവുമായി ബന്ധപ്പെട്ട് 2020 ൽ പൊളിച്ച പൂളപ്പാറ- പൂളവള്ളി റോഡിന്‍റെയും, വലിയകൊല്ലി റോഡിന്‍റെയും നിർമാണം പൂർത്തിയാകാത്ത നിലയിൽ. തുടക്കഭാഗത്ത് ഇന്‍റർലോക്കുകൾ പാകുകയോ ടാറിംഗ് ചെയ്ത് ഉയരം കൂട്ടി പുതിയ റോഡിനോട് ചേർക്കുകയോ ചെയ്തിട്ടില്ല. ബാക്കി എല്ലാ പോക്കറ്റ് റോഡുകളിലും കരാർ കമ്പനി ഇന്‍റർലോക്ക് പാകുകയും പ്രധാന റോഡുകൾ ടാർ ചെയ്തിട്ടുമുണ്ട്. എന്നാൽ ഈ രണ്ടു വഴികൾ കുഴികളായി നിലനിൽക്കുകയാണ്. നിരവധി വാഹനങ്ങൾ കടന്നു പോകുന്ന റോഡിനാണ് ഈ ദുർഗതി. എത്രയും പെട്ടെന്ന് റോഡ് പുനർ നിർമിക്കണമെന്നാണ് പ്രദേശവാസികളുടെ ആവശ്യം.

കാട്ടുപന്നി കപ്പ കൃഷി നശിപ്പിച്ചു

കൂരാച്ചുണ്ട്: കാട്ടുപന്നി കപ്പ കൃഷി നശിപ്പിച്ചു. കാളങ്ങാലി നാലു സെന്‍റ് കോളനിക്ക് സമീപം താമസിക്കുന്ന കർഷകൻ കൂരാപ്പള്ളിൽ ഷാജുവിന്‍റെ കപ്പ കൃഷിയാണ് കാട്ടുപന്നികൾ തകർത്തത്. 500 ഓളം ചുവട് കപ്പ നട്ടുപരിപാലിച്ചു വന്നതാണ്. പല ദിവസങ്ങളായി കാട്ടുപന്നികൾ വ്യാപകമായി കൃഷി നശിപ്പിക്കുകയാണ്. വർധിച്ചു വരുന്ന കാട്ടുപന്നി ശല്യം തടയാൻ അധികൃതർ തയാറാകണമെന്നാണ് കർഷകർ ആവശ്യപ്പെടുന്നത്. സന്ധ്യാ സമയമായാൽ കാട്ടുപന്നികളെ ഭയന്ന് യാത്രചെയ്യാൻ പോലും ഭയപ്പെടുകയാണെന്ന് നാട്ടുകാർ പറയുന്നു.

കെട്ടിട നിര്‍മാണം : നൂതന സാങ്കേതികവിദ്യകൾ ഉപയോഗപ്പെടുത്തും: മന്ത്രി റിയാസ്

കോഴിക്കോട്: കെട്ടിട നിര്‍മ്മാണത്തില്‍ നൂതന സാങ്കേതിക വിദ്യകള്‍ ഉപയോഗപ്പെടുത്തുന്നതിന് കാര്‍ബണ്‍ ട്രേഡിംഗ് സംവിധാനം കേരളത്തില്‍ നടപ്പാക്കണമെന്ന് സെമിനാറില്‍ ഉയര്‍ന്നുവന്ന നിര്‍ദേശം നയരേഖയില്‍ ഉള്‍പ്പെടുത്തുമെന്ന് മന്ത്രി പി.എ. മുഹമ്മദ് റിയാസ്. പൊതുമരാമത്ത് സംഘടിപ്പിച്ച വിഷന്‍ 2031 സംസ്ഥാനതല സെമിനാറില്‍ പാനല്‍ ചര്‍ച്ചകളില്‍ ഉയര്‍ന്നു വന്ന നിര്‍ദേശങ്ങള്‍ ക്രോഡീകരിച്ചു സംസാരിക്കുകയായിരുന്നു മന്ത്രി. സെമിനാറില്‍ ഉയര്‍ന്നുവന്ന ആശയങ്ങള്‍ ഗൗരവമായി കാണുന്നതായും നയരേഖയില്‍ ഉള്‍പ്പെടുത്തുമെന്നും മന്ത്രി പറഞ്ഞു. നയരേഖ രൂപീകരണത്തിനായി ആശയങ്ങള്‍ കൈമാറിയ വിവിധ രാഷ്ട്രീയ കക്ഷി നേതാക്കള്‍ക്കും മറ്റ് വിദഗ്ധര്‍ക്കും പൊതുജനങ്ങള്‍ക്കും മന്ത്രി നന്ദി അറയിച്ചു. നിര്‍മാണമേഖലയില്‍ ആറ് ഡി സാങ്കേതിക വിദ്യ നടപ്പിലാക്കാനൊരുങ്ങുകയാണ് പൊതുമരാമത്ത് വകുപ്പെന്ന് മന്ത്രി പറഞ്ഞു. നിലവില്‍ അഞ്ച് ഡി സംവിധാനത്തിലാണ് പ്രവര്‍ത്തിക്കുന്നത്. ആറ് ഡിയിലേക്ക് നിര്‍മാണ രീതികള്‍ മാറുന്ന ഘട്ടത്തില്‍ കാര്‍ബണ്‍ ട്രേഡിംഗ് സംവിധാനം പൊതുമരാമത്ത് വകുപ്പില്‍ നടപ്പിലാക്കുന്നത് പഠിച്ച് തീരുമാനമെടുക്കുമെന്നും വിഷയം നയരേഖയില്‍ ഉള്‍പ്പെടുത്തുമെന്നും മന്ത്രി പറഞ്ഞു. കോഴിക്കോട് ബീച്ചിലെ ആസ്പിന്‍ കോര്‍ട്ട് യാര്‍ഡില്‍ നടന്ന ചടങ്ങില്‍ ലിന്‍റോ ജോസഫ് എംഎല്‍എ അധ്യക്ഷനായി. തോട്ടത്തില്‍ രവീന്ദ്രന്‍ എംഎല്‍എ, പൊതുമരാമത്ത് വകുപ്പ് സെക്രട്ടറി കെ ബിജു, വകുപ്പ് ഉദ്യോഗസ്ഥര്‍ തുടങ്ങിയവര്‍ പങ്കെടുത്തു. പൊതുമരാമത്ത് വകുപ്പില്‍ ബിഐഎം നടപ്പിലാക്കണമെന്നും ഇതിനായി രൂപരേഖ ആവശ്യമാണെന്നും പൊതുവായി ഉയര്‍ന്നുവന്ന ആവശ്യം പരിഗണിക്കും. ആവശ്യമായ പരിശീലനം നല്‍കി, ഘട്ടം ഘട്ടമായി എല്ലാവര്‍ക്കും സംവിധാനം പരിചിതമാക്കും. ബിഐഎം നടപ്പിലാക്കുമ്പോള്‍ സുസ്ഥിര കെട്ടിട കോഡ് കൂടി ഉള്‍പ്പെടുത്തുന്ന കാര്യവും നയരേഖയുടെ ഭാഗമായി ഉള്‍പ്പെടുത്തുമെന്ന് മന്ത്രി പറഞ്ഞു. പൊതുമരാമത്ത് വകുപ്പ് നിര്‍മിക്കുന്ന കെട്ടിടങ്ങള്‍ക്ക് റേറ്റിംഗിനായി കെ - ഗ്രീന്‍ സംവിധാനം ഏര്‍പ്പെടുത്തും. ഇതിന്‍റെ കരട് ആര്‍ക്കിടെക്ചര്‍ വിഭാഗം തയാറാക്കിയിട്ടുണ്ടെന്നും മന്ത്രി വ്യക്തമാക്കി. ഇന്‍റഗ്രേറ്റഡ് ഡിസൈന്‍ പ്രോസസ് നിര്‍ബന്ധമാക്കുന്നതിന് ആവശ്യമായ ഡിസൈന്‍, ആര്‍ക്കിടെക്ചര്‍, കെട്ടിട വിഭാഗങ്ങളുടെ ഏകോപനം എന്നിവ സാധ്യമാക്കുന്നതിനുള്ള നടപടികള്‍ നല്ല രീതിയില്‍ പുരോഗമിക്കുകയാണെന്ന് മന്ത്രി വ്യക്തമാക്കി.

ജനങ്ങളുടെ ഉറക്കം കെടുത്തിയ പുലി കൂട്ടിലായി

കൂടരഞ്ഞി: പെരുമ്പൂളയിലെ കിണറിൽ വീണ പുലി വനംവകുപ്പിന്‍റെ കെണിയിൽ കുടുങ്ങി. ഇന്നലെ പുലർച്ചെ ഒന്നോടെയാണ് പുലി കെണിയിലകപ്പെട്ടത്. മണിക്കൂറുകള്‍ നീണ്ട പരിശ്രമത്തിനൊടുവിലാണ് പുലിയെ പുറത്തെത്തിച്ചത്. താമരശേരി ഫോറസ്റ്റ് ഓഫീസിലെത്തിച്ച് പരിശോധന പൂർത്തിയാക്കി പുലി ആരോഗ്യവാനാണെന്ന് വനംവകുപ്പ് അറിയിച്ചു. കിണറില്‍ ഇറക്കാവുന്ന തരത്തിലുള്ള ചെറിയ കൂടായിരുന്നു സ്ഥാപിച്ചിരുന്നത്. പുലിയെ കൂടുതല്‍ പരിശോധനയ്ക്കു ശേഷം ഉള്‍ക്കാട്ടില്‍ തുറന്നുവിടുന്ന കാര്യം പി ന്നീട് തീരുമാനിക്കുമെന്ന് താമരശേരി ഫോറസ്റ്റ് റേഞ്ച് ഓഫീസർ പ്രോം ഷമീർ അറിയിച്ചു. കഴിഞ്ഞ ചൊവ്വാഴ്ച രാത്രിയാണ് ആൾമറയില്ലാത്ത കിണറിൽ പുലി വീണത്. ഗുഹ കണക്കെയുള്ള കിണറിലെ പൊത്തിലായിരുന്നു പുലി ഒളിച്ചിരുന്നത്.

ഫുട്‌ബോളിനെ ജനപ്രിയമാക്കിയത് സെവന്‍സ് ടൂര്‍ണമെന്‍റ്: പദ്്മശ്രീ ഐ.എം. വിജയന്‍

കോഴിക്കോട്: ഫുട്‌ബോളിനെ കേരളത്തില്‍ ജനപ്രിയമാക്കിയത് സെവന്‍സ് ഫുട്‌ബോള്‍ ടൂര്‍ണമെന്‍റുകളാണെന്നും തന്നെപ്പോലുള്ള താരങ്ങള്‍ വളര്‍ന്നുവന്നത് സെവന്‍സിലൂടെയാണെന്നും പദ്്മശ്രീ ഐ.എം. വിജയന്‍. സെവന്‍സ് ഫുട്‌ബോള്‍ അസോസിയേഷന്‍ 26-ാമത് സംസ്ഥാന സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. എത്രയോ ഇന്ത്യന്‍ താരങ്ങളെ ആ പദവിയില്‍ എത്തിച്ചത് സെവന്‍സാണ്. താനടക്കമുള്ള കളിക്കാരുടെ ആദ്യകാലത്തെ ബ്രഡ് ആൻഡ് ബട്ടര്‍ സെവന്‍സായിരുന്നുവെന്നും കളിയിലെ ആദ്യ ബാലപാഠങ്ങള്‍ തങ്ങളെ പഠിപ്പിച്ചത് സെവന്‍സിന്‍റെ കളിയരങ്ങാണെന്നും അദ്ദേഹം കൂട്ടിച്ചേര്‍ത്തു. സെവന്‍സ് ഫുട്‌ബോള്‍ അസോസിയേഷന്‍ സംസ്ഥാന പ്രസിഡന്‍റ് കെ.എം. ലെനിന്‍ അധ്യക്ഷത വഹിച്ചു. ഇന്‍റര്‍നാഷണല്‍ ഫുട്‌ബോള്‍ താരങ്ങളായ എം. സുരേഷ്, എംഎസ്പി അസി.കമാന്‍ഡന്‍റ് ഹബീബ് റഹ്‌മാന്‍, മലപ്പുറം മുന്‍ എസ്പി യു.അബ്ദുൾ കരീം എന്നിവര്‍ മുഖ്യാതിഥികളായി. എസ്എഫ്എ സീനിയര്‍ വൈസ് പ്രസിഡന്‍റ് എളയടത്ത് അഷ്‌റഫ്, സംസ്ഥാന ജനറല്‍ സെക്രട്ടറി സൂപ്പര്‍ അഷ്‌റഫ് ബാവ, ട്രഷറര്‍ കെ.ടി. ഹംസ, വാഹിദ് കുപ്പൂത്ത് തുടങ്ങിയവര്‍ പ്രസംഗിച്ചു. 2025-26 സീസണിലേക്കുള്ള സെവന്‍സ് ടൂര്‍ണമെന്‍റുകളുടെ തീയതികള്‍ പ്രഖ്യാപിച്ചു. 2025 നവംബര്‍ അഞ്ചിന് പാലക്കാട് ജില്ലയിലെ ലിയോ സ്‌പോര്‍ട്ടിംഗ് കൊടക്കാട് ടൂര്‍ണമെന്‍റോടു കൂടി ഈ സീസണിലെ ടൂര്‍ണമെന്‍റുകള്‍ ആരംഭിക്കും.

ഓടിക്കൊണ്ടിരുന്ന വാഹനത്തിന് തീ പിടിച്ചു

പേരാമ്പ്ര: ചെറുവണ്ണൂർ കണ്ടി താഴെയിൽ ഓടിക്കൊണ്ടിരുന്ന വാനിന് തീ പിടിച്ചത് പരിഭ്രാന്തി പരത്തി. ഇന്നലെ രാവിലെയായിരുന്നു സംഭവം. ചെറുവണ്ണൂർ കോതങ്കോട്ട് പാറമ്മൽ അനിലാഷ് എന്നയാളുടെ വാഹനത്തിനാണ് തീപിടിച്ചത്. രാവിലെ വീട്ടിൽ നിന്നും വരുന്ന വഴിയാണ് ഡ്രൈവർ സീറ്റിന്‍റെ അടിയിൽ നിന്നും തീയും പുകയും ഉയർന്നത്. പേരാമ്പ്ര അഗ്നിരക്ഷാ നിലയത്തിൽ നിന്നും സീനിയർ ഫയർ ആൻഡ് റെസ്ക്യു ഓഫീസർ കെ.ടി. റഫീഖിന്‍റെ നേതൃത്വത്തിൽ എത്തിയ ഫയർ യൂണിറ്റും നാട്ടുകാരും ചേർന്ന് തീ അണച്ചു. നിലയത്തിലെ ഉദ്യോഗസ്ഥരായ പി. സജിത്ത്, വി. വിനീത്, സത്യനാഥ്, വിപിൻ, രഗിനേഷ്, ഹൃദിൻ, അശ്വിൻ, ഹോം ഗാർഡ് അനീഷ് കുമാർ, രതീഷ് എന്നിവർ രക്ഷാ പ്രവർത്തനത്തിൽ പങ്കെടുത്തു.

ഇന്ത്യന്‍ സൂപ്പര്‍ക്രോസ് റേസിംഗ് ലീഗ് ഗ്രാന്‍ഡ് ഫിനാലെയ്ക്ക് കോഴിക്കോട് വേദി

കോഴിക്കോട്: ഇന്ത്യന്‍ സൂപ്പര്‍ക്രോസ് റേസിംഗ് ലീഗ് ഗ്രാന്‍ഡ് ഫിനാലെയ്ക്ക് കോഴിക്കോട് വേദിയാകുന്നു. ഡിസംബര്‍ 20, 21 തീയതികളില്‍ കോര്‍പറേഷന്‍ ഇഎംഎസ് സ്റ്റേഡിയത്തില്‍ നടക്കുന്ന മത്സരത്തില്‍ പരിപാടിയുടെ ബ്രാന്‍ഡ് അംബാസഡര്‍ സല്‍മാന്‍ ഖാന്‍ ഉള്‍പ്പെടെ പങ്കെടുക്കും. വേദി പ്രഖ്യാപനം കോര്‍പറേഷന്‍ മേയര്‍ ഡോ. ബീന ഫിലിപ് നിര്‍വഹിച്ചു. അന്താരാഷ്ട്ര ശ്രദ്ധയുള്ള മത്സരത്തിന് കോഴിക്കോട് വേദിയാകുന്നതില്‍ സന്തോഷമുണ്ടെന്ന് അവര്‍ പറഞ്ഞു. ഐഎസ്ആര്‍എല്‍ സഹസ്ഥാപകന്‍ ഇഷാന്‍ ലോഖണ്ഡെ, മുര്‍ഷിദ് ബഷീര്‍ ബാന്‍ഡിഡോസ്, ജില്ലാ ഫുട്ബോള്‍ അസോസിയേഷന്‍ സെക്രട്ടറി കെ. ഷാജേഷ് കുമാര്‍, കേരള സ്‌പോര്‍ട്‌സ് ഫൗണ്ടേഷന്‍ ഡയറക്ടര്‍ ആഷിഖ് കൈനിക്കര, ജില്ലാ സ്പോര്‍ട്സ് കൗണ്‍സില്‍ പ്രസിഡന്‍റ് പി. നിഖില്‍ തുടങ്ങിയവര്‍ ചടങ്ങില്‍ പങ്കെടുത്തു. ലോകത്തിലെ ആദ്യത്തെ ഫ്രാഞ്ചൈസി അധിഷ്ഠിത സൂപ്പര്‍ക്രോസ് റേസിംഗ് ലീഗാണ് ഇന്ത്യന്‍ സൂപ്പര്‍ക്രോസ്. കഴിഞ്ഞ ദശകത്തില്‍ ഗ്രാസ്റൂട്ട് ഡേര്‍ട്ട് റേസുകള്‍, പ്രാദേശിക പരിശീലന പരിപാടികള്‍ അടക്കം തൃശൂര്‍, കൊച്ചി, കോഴിക്കോട് എന്നിവിടങ്ങളില്‍ ബാന്‍ഡിഡോസ് മോട്ടോര്‍ സ്‌പോര്‍ട്‌സ് സംഘടിപ്പിച്ചിട്ടുണ്ട്. ഈ മത്സരത്തോടെ കോഴിക്കോട് കോര്‍പറേഷന്‍ ഇഎംഎസ് സ്റ്റേഡിയം ലോകോത്തര മോട്ടോര്‍ സ്പോര്‍ട്ട് വേദിയായി മാറുമെന്നാണ് പ്രതീക്ഷ. അന്താരാഷ്ട്ര തലത്തില്‍ റൈഡര്‍മാര്‍ക്ക് പരിചയം നല്‍കുന്നതിനോടൊപ്പം ലോകത്തിലെ ഏറ്റവും മികച്ച അനുഭവം ആരാധകര്‍ക്ക് നല്‍കുന്നതിനാണ് ഐഎസ്ആര്‍എല്‍ രൂപകല്‍പ്പന ചെയ്തിരിക്കുന്നതെന്ന് സഹസ്ഥാപകന്‍ ഇഷാന്‍ ലോഖണ്ഡെ പറഞ്ഞു.

കനത്ത മഴ: കാര്‍ ഒഴുകിപ്പോയി, യാത്രക്കാര്‍ രക്ഷപെട്ടു

ഈങ്ങാപ്പുഴ: ശനിയാഴ്ച വൈകുന്നേരം പെയ്ത കനത്ത മഴയില്‍ കാര്‍ ഒഴുകിപ്പോയി. കാറിലുണ്ടായിരുന്നവര്‍ അത്ഭുതകരമായി രക്ഷപെട്ടു. ആനക്കാംപൊയിലില്‍ നിന്നും ഈങ്ങാപ്പുഴയ്ക്ക് വരികയായിരുന്ന ആനക്കാംപൊയില്‍ സ്വദേശിയുടെ കാറാണ് തട്ടൂര്‍പറമ്പില്‍ നിന്നും ഏലോക്കര വഴിയിലുള്ള ചപ്പാത്ത് മുറിച്ച് കടക്കുമ്പോള്‍ കനത്ത ഒഴുക്കില്‍പെട്ട് ഒഴുകിപ്പോയത്. കാര്‍ യാത്രികര്‍ നീന്തി രക്ഷപ്പെട്ടു. രാത്രി 11.30നായിരുന്നു സംഭവം. ക്രെയിന്‍ കൊണ്ടുവന്നാണ് കാര്‍ പൊക്കിയെടുത്തത്.

പിടിഎ എക്‌സിക്യൂട്ടീവ് തെരഞ്ഞെടുപ്പ് അട്ടിമറിച്ചതായി പരാതി

കോഴിക്കോട്: മാങ്കാവ് ആഴ്ചവട്ടം ഗവ. ഹയര്‍ സെക്കന്‍ഡറി സ്‌കൂള്‍ പിടിഎ എക്‌സിക്യൂട്ടീവ് കമ്മിറ്റി തെരഞ്ഞെടുപ്പ് അട്ടിമറിച്ചതായി പരാതി. പിടിഎ എക്‌സിക്യുട്ടീവ് അംഗങ്ങളെ തെരഞ്ഞെടുക്കുന്നതിന് രക്ഷിതാക്കള്‍ മാത്രം വോട്ടു ചെയ്യുന്നതാണ് കീഴ്വഴക്കം. അധ്യാപകരുടെ നേതൃത്വത്തില്‍ ഒരു വിഭാഗത്തെക്കൊണ്ട് പാനല്‍ അവതരിപ്പിച്ച് വോട്ടെടുപ്പ് അട്ടിമറിക്കുകയായിരുന്നു എന്നാണ് മറ്റൊരു വിഭാഗത്തിന്‍റെ ആരോപണം. ജനറല്‍ ബോഡി നടക്കുന്ന ദിവസം മറ്റു യോഗങ്ങള്‍ ഒന്നും വിളിച്ചുചേര്‍ക്കാന്‍ പാടില്ലെന്ന കീഴ്‌വഴക്കം നിലനില്‍ക്കെ തന്നെ പിടിഎ സെക്രട്ടറി കൂടിയായ പ്രിന്‍സിപ്പല്‍ അന്നേദിവസം അതേസമയം തന്നെ ക്ലാസ് പിടിഎ വിളിച്ചു ചേര്‍ക്കുകയും എക്‌സിക്യൂട്ടീവ് യോഗത്തിന് എത്തിയ രക്ഷിതാക്കളെ പുറത്തു നിര്‍ത്തുകയും ചെയ്തതായും പരാതിയുണ്ട്. സ്‌കൂളില്‍ ഉണ്ടാകുന്ന ഡിവിഷന്‍ ഫാള്‍, ബാലാവകാശ ലംഘനങ്ങള്‍, അക്കാദമിക രംഗത്ത് ഉണ്ടാകുന്ന വീഴ്ചകള്‍ തുടങ്ങിയവ ചൂണ്ടിക്കാട്ടുന്ന രക്ഷിതാക്കള്‍ പിടിഎ എക്‌സിക്യൂട്ടീവില്‍ ഉണ്ടാകരുതെന്ന ഉദ്ദേശത്തോടെയാണ് തെരഞ്ഞെടുപ്പ് അട്ടിമറിച്ചതെന്ന് ഒരു വിഭാഗം രക്ഷിതാക്കള്‍ പറയുന്നു. ഒരു മണിക്കൂറോളം കാത്തിരുന്ന ശേഷമാണ് ജനറല്‍ബോഡി ആരംഭിച്ചത്. ഈ വിഷയത്തില്‍ ഡിഡി, ആര്‍ഡിഡി, എംഎല്‍എ, വിദ്യാഭ്യാസ മന്ത്രി എന്നിവര്‍ക്ക് ചില രക്ഷിതാക്കൾ പരാതി നല്‍കിയിട്ടുണ്ട്.

ഊട്ടിയില്‍ ഒളിവില്‍ കഴിഞ്ഞ പീഡനക്കേസ് പ്രതി അറസ്റ്റിൽ

കോഴിക്കോട്: പ്രായപൂര്‍ത്തിയാകാത്ത പെണ്‍കുട്ടിയെ നിരവധി തവണ ലൈംഗിക അതിക്രമത്തിന് വിധേയമാക്കിയ കേസിലെ പ്രതിയെ ഒളിത്താവളത്തില്‍ നിന്ന് പോലീസ് പിടികൂടി. കേസില്‍ കോടതിയില്‍ നിന്നും ജാമ്യംനേടി ഒളിവില്‍ കഴിഞ്ഞുവരികയായിരുന്ന മക്കട കക്കടവത്ത് റോഡില്‍ പുളിയുള്ളതില്‍ താഴത്ത് ജനാര്‍ദനന്‍ എന്നയാളെയാണ് എലത്തൂര്‍ ഇന്‍സ്‌പെക്ടര്‍ കെ.ആര്‍. രഞ്ജിത്തിന്‍റെ നേതൃത്വത്തിലുള്ള പോലീസ് സംഘം അറസ്റ്റ് ചെയ്തത്. അഞ്ച് വര്‍ഷം മുമ്പ് 12 വയസ് പ്രായമുള്ള പെണ്‍കുട്ടിയെ ഉപദ്രവിച്ച കേസില്‍ ജാമ്യം എടുത്തശേഷം വിനയചന്ദ്രന്‍ എന്ന പേരില്‍ തമിഴ്‌നാട്ടിലും മറ്റു സംസ്ഥാനങ്ങളിലുമായി പോലീസിനെ വെട്ടിച്ച് ഒളിവില്‍ താമസിച്ചുവരികയായിരുന്നു പ്രതി. എലത്തൂര്‍ പോലീസ് ഇന്‍സ്‌പെക്ടറിന് ലഭിച്ച രഹസ്യ വിവരത്തിന്‍റെ അടിസ്ഥാനത്തില്‍ ഊട്ടി കോത്തഗിരി ഡാനിംഗ്ടണ്‍ എന്ന സ്ഥലത്തുനിന്നാണ് ജനാര്‍ദനനെ പോലീസ് പിടികൂടിയത്. എസ്‌ഐ ഹരീഷ് കുമാര്‍, സീനിയര്‍ സിവില്‍ പോലീസ് ഓഫീസര്‍ രൂപേഷ്, പ്രശാന്ത്, സിവില്‍ പോലീസ് ഓഫീസര്‍ മധുസൂദനന്‍ എന്നിവരും അന്വേഷണ സംഘത്തില്‍ ഉണ്ടായിരുന്നു.

"ഇരട്ട വോട്ടുള്ളവരുടെ പേരുവിവരങ്ങള്‍ ബൂത്തുകള്‍ക്കു മുന്പില്‍ പ്രദര്‍ശിപ്പിക്കും'

വ്യാജ വോട്ടുകാര്‍ക്ക് യുഡിഎഫിന്‍റെ മുന്നറിയിപ്പ് കോഴിക്കോട്: തദ്ദേശ സ്വയംഭരണ തെരഞ്ഞെടുപ്പ് ആസന്നമായിരിക്കെ കള്ളവോട്ട് തടയാനുള്ള ശ്രമവുമായി യുഡിഎഫ്. ഇരട്ടവോട്ടിനെ ജനകീയമായി പ്രതിരോധിക്കുമെന്നും ഇരട്ട വോട്ടുള്ളവരുടെ പേര് വിവരങ്ങള്‍ ബൂത്തുകള്‍ക്ക് മുന്നില്‍ പ്രദര്‍ശിപ്പിക്കുമെന്നും പ്രിസൈഡിംഗ് ഓഫീസര്‍മാര്‍ക്ക് വിവരം കൈമാറുമെന്നും കോഴിക്കോട് ഡിസിസി പ്രസിഡന്‍റ് അഡ്വ.കെ.പ്രവീണ്‍കുമാര്‍, മുസ്‌ലിം ലീഗ് ജില്ലാ പ്രസിഡന്‍റ് എം.എ. റസാഖ്, ജില്ലാ സെക്രട്ടറി ടി.ടി ഇസ്മയില്‍, യുഡിഎഫ് ജില്ലാ കണ്‍വീനര്‍ അഹമ്മദ് പുന്നക്കല്‍ എന്നിവര്‍ വാര്‍ത്താസമ്മേളനത്തില്‍ അറിയിച്ചു. ജില്ലയിലെ തദ്ദേശ സ്ഥാപനങ്ങളിലെ വോട്ടര്‍ പട്ടികയിലെ ക്രമക്കേട് സംബന്ധിച്ച് തെരഞ്ഞെടുപ്പ് കമ്മീഷനുള്‍പ്പെടെ നല്‍കിയ പരാതികളില്‍ നടപടിയുണ്ടായില്ലെന്നും ഇരട്ടവോട്ട് ഉന്നയിക്കപ്പെട്ട നമ്പറുകള്‍ക്ക് പുതിയ സീരിയില്‍ നമ്പര്‍ നല്‍കി നിലനിര്‍ത്തിയിരിക്കുകയാണെന്നും കെ. പ്രവീണ്‍കുമാര്‍ ആരോപിച്ചു. ഇരട്ട വോട്ടുകളില്‍ കേന്ദ്രതെരഞ്ഞെടുപ്പ് കമ്മീഷന്‍ നമ്പര്‍ മറച്ചുവച്ച് സംസ്ഥാന തെരഞ്ഞെടുപ്പ് കമ്മീഷന്‍റെ എസ്ഇസി നമ്പറുകളാണ് നല്‍കിയിരിക്കുന്നത്. പുതിയ വോട്ടര്‍പട്ടികയില്‍ പേര് വരുന്ന പതിനെട്ട് വയസ് പൂര്‍ത്തിയാകുന്നവര്‍ക്കുള്ള ഐഡിയാണ് എസ്ഇസി. എന്നാല്‍ എസ്ഇസി ഐഡി ദുരുപയോഗപ്പെടുത്തുകയാണ് സിപിഎമ്മെന്നും പ്രവീണ്‍കുമാര്‍ ആരോപിച്ചു. സീരിയല്‍ നമ്പര്‍ പോലും മാറ്റിയാണ് പലര്‍ക്കും വോട്ട് അനുവദിച്ചത്. കള്ളവോട്ടും ഇരട്ടവോട്ടും വ്യാപകമാക്കാനാണിത്. നാദാപുരം പഞ്ചായത്തിലെ വിഷ്ണുമംഗലത്ത് മൂന്നാം വാര്‍ഡിലെ വോട്ടര്‍മാര്‍ അവിടത്തെ വോട്ട് മാറ്റാതെ രണ്ടാം വാര്‍ഡിലേക്ക് പേര് മാറ്റാന്‍ അപേക്ഷ നല്‍കുകയും അവരുടെ പേര് വോട്ടര്‍പട്ടികയില്‍ ഇടം പിടിക്കുകയും ചെയ്തത് ദുരൂഹമാണ്. ഇങ്ങനെ നമ്പര്‍ നല്‍കിയാല്‍ ഇരട്ട വോട്ടുകള്‍ കണ്ടുപിടിക്കാന്‍ കഴിയില്ലെന്ന് യുഡിഎഫ് നേതാക്കള്‍ പറഞ്ഞു. കള്ളവോട്ടും ഇരട്ട വോട്ടും സാധൂകരിക്കാനുള്ള നടപടികളാണ് തെരഞ്ഞെടുപ്പ് കമ്മീഷന്‍ ചെയ്തത്. ജില്ലയില്‍ ഒരു ലക്ഷം കള്ളവോട്ട് ഉണ്ടെന്നാണ് യുഡിഎഫ് കണക്ക്. ഒരേ വോട്ടര്‍ ഐഡിയില്‍ രണ്ട് വോട്ട് ചേര്‍ക്കുന്ന സംഭവങ്ങള്‍ എല്ലാ സ്ഥലത്തും വ്യാപകമാണ്. കോഴിക്കോട് കോര്‍പറേഷനില്‍ 25,000 കള്ളവോട്ടുകളുണ്ടെന്ന് യുഡിഎഫ് നേരത്തെ തന്നെ പറഞ്ഞിരുന്നു. കോര്‍പറേഷന്‍ സെക്രട്ടറിക്ക് പരാതി നല്‍കിയിട്ടും നടപടിയുണ്ടായില്ലെന്നും നേതാക്കള്‍ പറഞ്ഞു. നാദാപുരം, ചെങ്ങോട്ട്കാവ് പഞ്ചായത്തുകളിലും കൊയിലാണ്ടി, ഫറോക്ക് നഗരസഭകളിലും ഇരട്ടവോട്ടുകള്‍ വ്യാപകമാണ്. സിപിഎം തോല്‍വി ഭയന്ന് വോട്ടര്‍പട്ടികയില്‍ ക്രമക്കേട് നടത്തുകയാണ്. വാര്‍ഡ് അതിര്‍ത്തി മറികടന്ന് വോട്ട് ചേര്‍ക്കാന്‍ തദ്ദേശ സ്ഥാപനങ്ങളിലെ സെക്രട്ടറിമാര്‍ കൂട്ടുനില്‍ക്കുകയാണെന്നും യുഡിഎഫ് നേതാക്കള്‍ ആരോപിച്ചു.

ചാത്തമംഗലം പഞ്ചായത്ത് വികസന സദസ് സംഘടിപ്പിച്ചു

ചാത്തമംഗലം: സംസ്ഥാന സര്‍ക്കാരിന്‍റെയും പഞ്ചായത്തിന്‍റെയും അഞ്ച് വര്‍ഷത്തെ വികസന നേട്ടങ്ങള്‍ അവതരിപ്പിച്ചും വിലയിരുത്തിയും ചാത്തമംഗലം പഞ്ചായത്ത് വികസന സദസ് ശ്രദ്ധേയമായി. പരിപാടി പി.ടി.എ. റഹീം എംഎല്‍എ ഉദ്ഘാടനം ചെയ്തു. പ്രസിഡന്‍റ് അബ്ദുൾ ഗഫൂര്‍ ഓളിക്കല്‍ അധ്യക്ഷത വഹിച്ചു. ഹരിത കര്‍മസേനയെയും വിവിധ മേഖലകളില്‍ നേട്ടം കൈവരിച്ചവരെയും ചടങ്ങില്‍ ആദരിച്ചു. മോയോട്ട് കടവ്പാലം വഴി ബസ്റൂട്ട് അനുവദിക്കുക, മോയോട്ട് കടവില്‍ കുളിക്കടവ് അനുവദിക്കുക, മുഴുവന്‍ സ്‌കൂളുകളിലും സ്മാര്‍ട്ട് ക്ലാസ് റൂം നിര്‍മിക്കുക, രക്ഷാകര്‍തൃ വിദ്യാഭ്യാസ പദ്ധതികള്‍ ആവിഷ്‌കരിക്കുക തുടങ്ങിയ നിര്‍ദേശങ്ങള്‍ ചര്‍ച്ചയില്‍ ഉയര്‍ന്നു. പഞ്ചായത്ത് സെക്രട്ടറി മിനി ജയ പ്രോഗ്രസ് റിപ്പോര്‍ട്ട് അവതരിപ്പിച്ചു.

സർക്കാരിന്‍റെ വാഗ്ദാന ലംഘനം തുടർക്കഥ: കെപിഎസ്ടിഎ

കോഴിക്കോട്: പൊതുവിദ്യാഭ്യാസ രംഗത്തെ കാതലായ പ്രശ്നങ്ങളിൽ നിന്ന് എൽഡിഎഫ് സർക്കാർ ഒഴിഞ്ഞ് മാറുകയാണെന്നും വാഗ്ദാനലംഘനം തുടർക്കഥയാക്കുകയാണെന്നും കെപിഎസ്ടിഎ സംസ്ഥാന ജനറൽ സെക്രട്ടറി പി.കെ. അരവിന്ദൻ പറഞ്ഞു. കെപിഎസ്ടിഎ കോഴിക്കോട് ജില്ലാ കമ്മിറ്റി സംഘടിപ്പിച്ച ഡിഡിഇ ഓഫീസ് മാർച്ച് ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. എൻപിഎസ് പിൻവലിച്ച് സ്റ്റാറ്റ്യൂട്ടറി പെൻഷൻ പദ്ധതി പുനഃസ്ഥാപിക്കുമെന്ന് ഒന്നും രണ്ടും പിണറായി സർക്കാരിന്‍റെ പ്രകടന പത്രികയിൽ വാഗ്ദാനം ചെയ്തിരുന്നു. എന്നാൽ ഇത് നടപ്പാക്കിയില്ല. ഭിന്നശേഷി വിഷയത്തിൽ കോടതി വിധി എല്ലാ സ്കൂളുകൾക്കും ബാധകമാക്കാൻ സർക്കാർ തയാറാകുന്നില്ലെന്നും അദ്ദേഹം പറഞ്ഞു. ജില്ലാ പ്രസിഡന്‍റ് ടി.ടി. ബിനു അധ്യക്ഷത വഹിച്ചു.

കളഞ്ഞുകിട്ടിയ സ്വർണമാല തിരിച്ചുനൽകി

കൂടരഞ്ഞി: കളഞ്ഞു കിട്ടിയ സ്വർണാഭരണം ഉടമസ്ഥയ്ക്കു തിരിച്ചുനൽകി മാതൃകയായി യുവതി. കൂടരഞ്ഞി അങ്ങാടിയിൽ സൽക്കല സ്റ്റുഡിയോയ്ക്ക് സമീപത്തുനിന്നും യാത്രികയായ മരഞ്ചാട്ടി സ്വദേശി ഹസീബ റസാക്കിനാണ് ഒരു പവനോളം തൂക്കം വരുന്ന സ്വർണമാല കളഞ്ഞു കിട്ടിയത്. തുടർന്ന് സൽക്കല സ്റ്റുഡിയോ ഉടമയായ ബെന്നിക്ക് കൈമാറി. പിന്നീട് കൂടരഞ്ഞിയിലെ ജനകീയ കൂട്ടായ്മയായ മൗണ്ട് ഹീറോസിലൂടെ സ്വർണാഭരണം കളഞ്ഞു കിട്ടിയ വിവരം ഉടമ അറിയുകയും ഇവരെ ബന്ധപ്പെടുകയുമായിരുന്നു. മാതൃകാപരമായ പ്രവൃത്തിക്ക് ഹസീബയെ കൂടരഞ്ഞി പഞ്ചായത്ത് കമ്മിറ്റിയുടെ നേതൃത്വത്തിൽ ആദരിച്ചു. പ്രസിഡന്‍റ് ആദർശ് ജോസഫ്, സെക്രട്ടറി സുരേഷ്, വാർഡ് മെമ്പർമാർ, സ്റ്റാഫ് അംഗങ്ങൾ എന്നിവർ ചേർന്ന് ഉപഹാരം നൽകി.

സംരംഭകത്വ പരിശീലനവും വായ്പമേളയും നടത്തി

കൂരാച്ചുണ്ട്: പിന്നോക്ക മതന്യൂനപക്ഷ വിഭാഗങ്ങളുടെ സമഗ്ര ഉന്നമനം ലക്ഷ്യംവച്ച് കേരള സംസ്ഥാന പിന്നോക്ക വിഭാഗം വികസന കോർപറേഷന്‍റെ ആഭിമുഖ്യത്തിൽ കൂരാച്ചുണ്ട് പഞ്ചായത്തിൽ സംരംഭകത്വ പരിശീലനവും വായ്പമേളയും സംഘ‌ിപ്പിച്ചു. പഞ്ചായത്ത് ഹാളിൽവച്ച് നടന്ന പരിപാടി ബ്ലോക്ക് പഞ്ചായത്ത് പ്രസിഡന്‍റ് വി.കെ. അനിത ഉദ്ഘാടനം ചെയ്തു. കൂരാച്ചുണ്ട് പഞ്ചായത്ത് പ്രസിഡന്‍റ് ഒ.കെ. അമ്മദ് അധ്യക്ഷത വഹിച്ചു. പഞ്ചായത്ത് വൈസ് പ്രസിഡന്‍റ് വിൻസി തോമസ്, സ്ഥിരംസമിതി അംഗങ്ങളായ ഡാർളി ഏബ്രഹാം, സിമിലി ബിജു, ബ്ലോക്ക് പഞ്ചായത്ത് അംഗം വി.കെ. ഹസീന, പഞ്ചായത്ത് അംഗം എൻ.ജെ ആന്‍സമ്മ, സിഡിഎസ് ചെയർപേഴ്സൺ കാർത്തിക വിജയൻ, പഞ്ചായത്ത് സെക്രട്ടറി ഫാത്തിമ നിഷാന, അസിസ്റ്റന്‍റ് സെക്രട്ടറി മനിൽ കുമാർ എന്നിവർ പ്രസംഗിച്ചു. വ്യവസായ വികസന ഓഫീസർ പി. വിപിൻദാസ്, കെഎസ്ബിസിഡിസി ഉദ്യോഗസ്ഥൻ കെ.പി ഗോകുൽദാസ്, കെ. ഷബീബ് എന്നിവർ ക്ലാസുകൾ നയിച്ചു.

കട്ടിപ്പാറ പഞ്ചായത്ത് വികസന സദസ് സംഘടിപ്പിച്ചു‌

താമരശേരി: സർക്കാരിന്‍റെയും ഗ്രാമപഞ്ചായത്തിന്‍റെയും വികസനക്ഷേമ പ്രവർത്തനങ്ങൾ ജനങ്ങൾക്ക് മുന്നിൽ അവതരിപ്പിച്ചും ഭാവി വികസന പ്രവർത്തനങ്ങൾക്കുള്ള അഭിപ്രായങ്ങൾ സ്വരൂപിച്ചും കട്ടിപ്പാറ പഞ്ചായത്ത് വികസന സദസ്. പഞ്ചായത്ത് കോൺഫറൻസ് ഹാളിൽ നടന്ന പരിപാടി ജില്ലാ പഞ്ചായത്ത് പ്രസിഡന്‍റ് ഷീജ ശശി ഉദ്ഘാടനം ചെയ്തു. വന്യമൃഗ ശല്യത്തിന് പരിഹാരം കാണുക, പഞ്ചായത്തിനെ വയോജന സൗഹൃദമാക്കുക, കാൻസർ കെയർ പദ്ധതി നടപ്പാക്കുക തുടങ്ങിയ നിർദേശങ്ങൾ സദസിൽ ഉയർന്നു. ചടങ്ങിൽ സ്ഥിരം സമിതി ചെയർപേഴ്സൺ ബേബി രവീന്ദ്രൻ അധ്യക്ഷത വഹിച്ചു. ബ്ലോക്ക്‌ പഞ്ചായത്ത് അംഗം നിധീഷ് കല്ലുള്ളതോട്, പഞ്ചായത്ത് അംഗങ്ങളായ സൈനബ നാസർ, വിഷ്ണു സി. വത്സൻ, അനിത രവീന്ദ്രൻ, സീന സുരേഷ്, വി.പി. സുരജ, പഞ്ചായത്ത് സെക്രട്ടറി എം.പി. നൗഷാദ് അലി, അസി. സെക്രട്ടറി ടി.വി. ശ്രീകുമാർ, റിസോഴ്സ് പേഴ്സൺ രൻജീഷ്, രാഷ്ട്രീയ പാർട്ടി പ്രതിനിധികൾ എന്നിവർ പങ്കെടുത്തു.

രാഷ്ട്രീയ ശാക്തീകരണത്തിലൂടെ മാത്രമേ ദളിതരുടെ പ്രശ്നങ്ങൾക്ക് പരിഹാരമുള്ളൂ: പി. രാമഭദ്രൻ

പേരാമ്പ്ര: രാഷ്ട്രീയ ശാക്തീകരണത്തിലൂടെ മാത്രമേ ദളിതരുടെയും പിന്നോക്ക വിഭാഗങ്ങളുടെയും മറ്റ് പാർശ്വവൽകൃത ജനവിഭാഗങ്ങളുടെയും അടിസ്ഥാന പ്രശ്നങ്ങൾക്ക് പരിഹാരം കാണാൻ കഴിയുകയുള്ളൂവെന്ന് കേരള ദളിത് ഫെഡറേഷൻ (കെഡിഎഫ്) സംസ്ഥാന പ്രസിഡന്‍റ് പി. രാമഭദ്രൻ പറഞ്ഞു. കെഡിഎഫ് ജില്ലാ കൺവൻഷൻ പേരാമ്പ്രയിൽ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. സമൂഹത്തിന്‍റെ അടിത്തട്ടിലുള്ള ജനങ്ങളുടെ ഒട്ടേറെ ജീവിത പ്രശ്നങ്ങൾക്ക് ഇനിയും പരിഹാരം തേടേണ്ടതായിട്ടുണ്ട്. ഇതിന് സാമൂഹ്യ മുന്നേറ്റത്തിലൂടെയുള്ള പ്രവർത്തനങ്ങളാണ് അനിവാര്യമായിട്ടുള്ളത്. സാമൂഹ്യ മുന്നേറ്റത്തിലൂടെ രാഷ്ട്രീയ ശാക്തീകരണം എന്ന ആശയം ശക്തിപ്പെട്ടുവരികയാണ്. എല്ലാ തലങ്ങളിൽ നിന്നും വമ്പിച്ച പിന്തുണയാണിതിന് ലഭിക്കുന്നതെന്ന് അദ്ദേഹം കൂട്ടിച്ചേർത്തു. കെ‌ഡി‌എഫ് സംസ്ഥാന വൈസ് പ്രസിഡന്‍റ് കെ.കെ. ബാലകൃഷ്ണൻ നമ്പ്യാർ അധ്യക്ഷത വഹിച്ചു. എൻ.എസ്. കുമാർ, അഡ്വ. സി. ഭാസ്കരൻ, കെ.പി. റൂഫാസ്, ശ്രീധരൻ മൂടാടി, ദാമോദരൻ കോഴഞ്ചേരി, എം.പി. ബാബു, പി.സി. തങ്കമ്മ, സി.കെ. മണി എന്നിവർ പ്രസംഗിച്ചു.

അനധികൃത മണല്‍ കടത്ത്; വാഹനങ്ങൾ പിടികൂടി

കോഴിക്കോട്: മാവൂർ പോലീസ് സ്റ്റേഷന്‍ പരിധിയിലെ കല്പള്ളി (വാലുമ്മല്‍) കടവില്‍ നിന്നും കായലം പള്ളിത്താഴം കടവില്‍നിന്നും അനധികൃതമായി കടത്തുകയായിരുന്ന മണല്‍ പിടികൂടി. രണ്ട് ടിപ്പര്‍ ലോറികള്‍ പിടിച്ചെടുത്തു. വാഴക്കാട് സ്വദേശിയായ മുഹമ്മദ് ഫായിസിന്‍റെ ഉടമസ്ഥതയിലുള്ള ടിപ്പര്‍ ലോറിയും മാവൂര്‍ സ്വദേശിയായ ജംഷീറലിയുടെ ഉടമസ്ഥതയിലുള്ള ടിപ്പര്‍ ലോറിയുമാണ് പിടികൂടിയത്. പോലീസിനെ കണ്ട് ലോറിയില്‍ ഉണ്ടായിരുന്നവര്‍ ഓടി രക്ഷപ്പെട്ടു.

കൂരാച്ചുണ്ടിലെ പൊതുശ്മശാനം; ടെൻഡർ നടപടികൾ വൈകുന്നു

ജനകീയ സമിതി വീണ്ടും സമരത്തിലേക്ക് കൂരാച്ചുണ്ട്: പൊന്നുണ്ടമലയിലെ നിർദിഷ്ട പൊതുശ്മശാന ഭൂമിയിൽ ആധുനിക വാതക ശ്മശാനം നിർമിക്കുന്നതിന് കിഫ്ബി മുഖേന രണ്ടരക്കോടിയോളം രൂപ സർക്കാർ ഭരണാനുമതി നൽകി ഉത്തരവ് പുറപ്പെടുവിച്ചിട്ടും പദ്ധതിയുടെ ടെൻഡറിന് ആവശ്യമായ നടപടികൾ വൈകിപ്പിക്കുന്ന പഞ്ചായത്ത് ഭരണസമിതിക്കെതിരേ വീണ്ടും പൊതുശ്മശാനം ജനകീയ സമരസമിതി രംഗത്തിറങ്ങുന്നു. 25ന് പഞ്ചായത്ത് ഓഫീസ് ഉപരോധിക്കാൻ തീരുമാനിച്ചതായി ഭാരവാഹികളായ അശോകൻ കുറുങ്ങോട്ട്, ഒ.ഡി തോമസ്, കെ.കെ.ബാലകൃഷ്ണൻ, ഗോപാലകൃഷ്ണൻ തോട്ടാത്ത്, എൻ.പി. ദാമോദരൻ എന്നിവർ വാർത്താ സമ്മേളനത്തിൽ അറിയിച്ചു. 2018-ൽ ശുചിത്വമിഷൻ രൂപകൽപ്പന ചെയ്ത വാതക ശ്മശാനം നിർമിക്കുന്നതിന് 60 ലക്ഷം രൂപയുടെ പ്രൊപ്പോസൽ സർക്കാരിന് പഞ്ചായത്ത് സമർപ്പിച്ചിരുന്നു. എന്നാൽ പ്രവൃത്തി തുടങ്ങിയെന്ന ഒരു ബോർഡ് നിർദിഷ്ട ഭൂമിയിൽ സ്ഥാപിച്ചതല്ലാതെ ഒരു പ്രവർത്തനവും നടത്തിയില്ല. തുടർന്ന് ജനകീയ സമരസമിതി എംഎൽഎ മുഖേന വകുപ്പ് മന്ത്രി, മുഖ്യമന്ത്രി എന്നിവരുമായി ബന്ധപ്പെട്ടതിനെ തുടർന്ന് ആധുനിക രീതിയിയുള്ള വാതക ശ്മശാനം നിർമിക്കാൻ രണ്ടരക്കോടിയോളം രൂപ അനുവദിച്ച് സർക്കാർ ഭരണാനുമതി നൽകുകയായിരുന്നു. ഇതിനായി ഊരാളുങ്കൽ ലേബർ കോൺട്രാക്ട് സൊസൈറ്റിക്ക് രണ്ട് ലക്ഷം രൂപ നൽകിയാണ് പദ്ധതിയുടെ ഡിപിആർ തയാറാക്കിയത്. പിന്നീട് പദ്ധതിക്ക് ആവശ്യമായ എല്ലാ രേഖകളും പഞ്ചായത്ത് കഴിഞ്ഞ മാർച്ചിൽ പ്രവൃത്തിയുടെ മേൽനോട്ടം വഹിക്കുന്ന ഇംപാക്ട് കേരളയ്ക്ക് സമർപ്പിച്ചിട്ടുണ്ടെന്ന് പഞ്ചായത്ത് സെക്രട്ടറി സമരസമിതിയെ അറിയിക്കുകയും ചെയ്തു. എന്നാൽ മാസങ്ങൾ പിന്നിട്ടിട്ടും ടെൻഡർ നടപടിയോ പ്രവൃത്തി ഉദ്ഘാടനമോ ചെയ്തിട്ടില്ല. പൊതുശ്മശാനം യാഥാർഥ്യമാകാൻ പഞ്ചായത്ത് അധികൃതർ മുന്നിട്ടിറങ്ങണമെന്നാണ് ജനകീയ സമര സമിതി ആവശ്യപ്പെടുന്നത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]