ADVERTISEMENT

ADVERTISEMENT

എസ്കവേറ്റർ വർക്കേഴ്സ് ഫെഡറേഷൻ കണ്‍വൻഷൻ

തരിയോട്: എസ്കവേറ്റർ വർക്കേഴ്സ് ഫെഡറേഷൻ ജില്ലാ കണ്‍വൻഷൻ കാവുമന്ദത്ത് നടത്തി. ജില്ലാ പ്രസിഡന്‍റ് എബിൻ മുട്ടപ്പള്ളി ഉദ്ഘാടനം ചെയ്തു. സെക്രട്ടറി കെ.എസ്. ജോസഫ് അധ്യക്ഷത വഹിച്ചു. ട്രഷറർ ഇ.എൽ. ഷാജി എന്നിവർ പ്രസംഗിച്ചു.

ADVERTISEMENT

വനപാതയിലൂടെ ടൂറിസ്റ്റുകളുമായി നടത്തുന്ന നൈറ്റ്സഫാരി നിയന്ത്രിക്കണമെന്ന്

മാനന്തവാടി: റിസോർട്ടുകാർ ടൂറിസ്റ്റുകളേയുമായി വനപാതയിലൂടെ നടത്തുന്ന നൈറ്റ്സഫാരി നിയന്ത്രിക്കണമെന്ന് ജനകീയ സമിതി ആവശ്യപ്പെട്ടു. രാത്രികാലങ്ങളിൽ റിസോട്ട് ഉടമകൾ അവരുടെ ടൂറിസ്റ്റുകളേയും കൊണ്ട് വനപാതയിയിലുടെ നടത്തുന്ന നൈറ്റ് സഫാരി ആനകളേയും മറ്റും പ്രകോപിതരിക്കുന്നു. അത്തരം ആനകൾ കൃഷിസ്ഥലത്ത് ഇറങ്ങിയതറിഞ്ഞ് ടോർച്ചടിച്ചാൽ പാഞ്ഞു വന്ന് ആക്രമിക്കയാണ്. കഴിഞ്ഞ ദിവസം ചേലൂർ ചിന്നന്‍റെ തോട്ടത്തിൽ ഇത്തരം അനുഭവമുണ്ടായി. തലനാരിഴക്ക് രക്ഷപെട്ട് ഗുരുതര പരിക്കുകളോടെ മെഡിക്കൽ കോളജിൽ ചികിത്സയിലാണ്. ആനയും കാട്ടുപോത്തും കടുവയും യാത്ര വാഹനങ്ങളെ പിന്തുടർന്ന് ആക്രമിക്കുന്നത് നിത്യസംഭവമായി. ടൂറിസത്തിന്‍റെ മറവിൽ നടത്തുന്ന നൈറ്റ്സഫാരി ഉത്തരവാദപ്പെട്ടവർ നിയന്ത്രിച്ചില്ലെങ്കിൽ ജനകീയസമിതി ഇടപെടും. ഈ വിഷയ ബത്തേരിയിൽ ഫോറസ്റ്റ് ഡിപ്പാർട്ടുമെന്‍റ് നടത്തിയ "വിഷൻ 2031' സെമിനാറിൽ അവതരിപ്പിച്ചിരുന്നു. വനം മന്ത്രി, മന്ത്രി ഒ.ആർ. കേളു, ജില്ലാ കളക്ടർ, വയനാട് പോലീസ് സൂപ്രണ്ട് എന്നവർക്ക് കൂടി പരാതി കൊടുക്കാൻ വന്യമൃഗശല്യ പ്രതിരോധ ആക്ഷൻ കമ്മറ്റിയോഗം തീരുമാനിച്ചു. ചെയർമാൻ ടി.സി. ജോസഫ് അധ്യക്ഷത വഹിച്ചു. ടി. സന്തോഷ്കുമാർ, വി.എ. ജയചന്ദ്രൻ, ഇ.എ. നാസർ, സന്തോഷ് തോൽപ്പെട്ടി എന്നിവർ പ്രസംഗിച്ചു.

തൊണ്ടർനാട് പഞ്ചായത്ത് വികസന സദസ് : ഓപ്പണ്‍ ഫോറത്തിൽ നിർദേശങ്ങളുമായി പൊതുജനം

മക്കിയാട്: തൊണ്ടർനാട് പഞ്ചായത്ത് വികസന സദസ് കോറോം ദോഹ പാലസിൽ നടത്തി. മാനന്തവാടി ബ്ലോക്ക് പഞ്ചായത്ത് പ്രസിഡന്‍റ് ജസ്റ്റിൻ ബേബി ഉദ്ഘാടനം ചെയ്തു. ആരോഗ്യ, വിദ്യാഭ്യാസ മേഖലകളിൽ പഞ്ചായത്തിന്‍റെ ഇടപെടൽ പൊതുജനങ്ങൾക്ക് ഏറെ പ്രയോജനകരമാണെന്നും സ്ത്രീകളുടെ ആരോഗ്യ പരിരക്ഷയ്ക്ക് പഞ്ചായത്ത് വിവിധ പദ്ധതികൾ ആവിഷ്കരിക്കുന്നുണ്ടെന്നും അദ്ദേഹം പറഞ്ഞു. പഞ്ചായത്ത് പ്രസിഡന്‍റ് അംബിക ഷാജി അധ്യക്ഷത വഹിച്ചു. ജില്ലാ പഞ്ചായത്ത് അംഗം എ. വിജയൻ, ബ്ലോക്ക് പഞ്ചായത്ത് അംഗം രമ്യ താരേഷ്, പഞ്ചായത്ത് അംഗങ്ങളായ വി.ടി. അരവിന്ദാക്ഷൻ, രവികുമാർ, പി.പി. മൊയ്തീൻ, പി.എ. കുര്യാക്കോസ്, ചന്തു, സെക്രട്ടറി ബീന വർഗീസ്, അസി. സെക്രട്ടറി ടി. ബിജു, ആസൂത്രണ സമിതി ഉപാധ്യക്ഷൻ സത്യൻ, സാക്ഷരത പ്രേരക് എം.ആർ. ഷാജുമോൻ എന്നിവർ പ്രസംഗിച്ചു. അഞ്ച് വർഷത്തിനിടെ പഞ്ചായത്ത് നടപ്പാക്കിയ വികസന പദ്ധതികൾ സദസിൽ അവതരിപ്പിച്ചു. വിദ്യാലയങ്ങളിൽനിന്നു പട്ടികവിഭാഗം കുട്ടികൾ കൊഴിയുന്നത് തടയുന്നതിന് പദ്ധതികൾ ആവിഷ്കരിക്കുക, തൊഴിലുറപ്പ് പദ്ധതിയിൽ തൊഴിൽദിനങ്ങളും കൂലിയും വർധിപ്പിക്കുക, കോറോം പിഎച്ച്സിയിൽ കിടത്തിച്ചികിത്സ ആരംഭിക്കുക, നിരവിൽപ്പുഴ ടൗണ്‍ ഹരിതവത്കരിക്കുക, ഇരുന്പകം കടവ് ലിഫ്റ്റ് ഇറിഗേഷൻ പദ്ധതി നടപ്പാക്കുക, ഇണ്ട്യേരിക്കുന്ന് ചെക്ക് ഡാമിൽ ഇരുന്പുഷട്ടർ സ്ഥാപിക്കുക, വെള്ളമുണ്ട, തൊണ്ടർനാട് പഞ്ചായത്തുക്കളെ ബന്ധിപ്പിക്കുന്ന ഇണ്ട്യേരിക്കുന്ന്-പഴഞ്ചന പാലം റോഡ് പുനർനിർമിക്കുക, വന്യമൃഗശല്യത്തിന് പരിഹാരം കാണുക, ക്ഷീരഗ്രാമം പദ്ധതി നടപ്പാക്കുക തുടങ്ങിയ നിർദേശങ്ങൾ ഓപ്പണ്‍ ഫോറത്തിൽ ഉയർന്നു.

സ്റ്റുഡന്‍റ്സ് കൗണ്‍സിൽ-2025 ശ്രദ്ധേയമായി

സുൽത്താൻ ബത്തേരി: പതിനാലാം പഞ്ചവത്സര പദ്ധതിയുടെ ഭാഗമായി നഗരസഭയിൽ വിദ്യാഭ്യാസ മേഖലയിലെ പദ്ധതികൾക്ക് ആശയരൂപീകരണം നടത്തുന്നതിന് സംഘടിപ്പിച്ച "സ്റ്റുഡന്‍റ്സ് കൗണ്‍സിൽ- 2025’ ശ്രദ്ധേയമായി. വിദ്യാർഥികളുടെ അഭിപ്രായങ്ങൾക്കും നിർദേശങ്ങൾക്കും പ്രാധാന്യം നൽകിയാണ് പരിപാടി സംഘടിപ്പിച്ചത്. വിദ്യാലയങ്ങളിൽ വരുത്തേണ്ട മാറ്റങ്ങൾ, ഇപ്പോഴത്തെ അവസ്ഥ, അടുത്ത 10 വർഷത്തിനിടെ കൈവരിക്കേണ്ട നേട്ടങ്ങൾ, അക്കാദമിക-ഭൗതിക പദ്ധതികൾ എന്നിവ വിദ്യാർഥികൾ നഗരസഭാ ഭരണസമിതി മുന്പാകെ അവതരിപ്പിച്ചു. എൽപി വിഭാഗത്തിൽ ഏഴും യുപി വിഭാഗത്തിൽ ആറും ഹൈസ്കൂൾ വിഭാഗത്തിൽ ഏഴും ഹയർ സെക്കൻഡറി വിഭാഗത്തിൽനിന്ന് നാലും പ്രോജക്ടുകൾ കൗണ്‍സിലിൽ അവതരിപ്പിച്ചു. വിദ്യാർഥികളിൽനിന്ന് ലഭിക്കുന്ന മികച്ച ആശയങ്ങൾ സ്കൂളുകളിൽ നടപ്പാക്കുന്നതിനു നഗരസഭ പ്രത്യേക സാന്പത്തിക സഹായം പ്രഖ്യാപിച്ചിട്ടുണ്ട്. എൽപി-10,000 രൂപ, യുപി-20,000, എച്ച്എസ്-30,000, എച്ച്എസ്എസ്-40,000 രൂപ എന്നിങ്ങനെയാണ് സഹായം. മുനിസിപ്പൽ ചെയർമാൻ ടി.കെ. രമേശ് ഉദ്ഘാടനം ചെയ്തു. ജനപ്രതിനിധികളായ ടോം ജോസ്, പി.എസ്. ലിഷ, കെ. റഷീദ്, സാലി പൗലോസ്, പൊതുപ്രവർത്തകരായ എം. ആരിഫ്, കെ.സി. യോഹന്നാൻ, ഡിഇഒ സി.വി. മൻമോഹൻ, എസ്എസ്കെ ഡിപിസി അനിൽകുമാർ, ഹയർ സെക്കൻഡറി കോ ഓർഡിനേറ്റർ ഷിവി കൃഷ്ണൻ, ഡെപ്യൂട്ടി പ്ലാനിംഗ് ഓഫീസർ കെ.എസ്. ശ്രീജിത്ത്, എഇഒ ബി.എസ്. ഷിജിത, ബിപിസി ടി. രാജൻ എന്നിവർ പ്രസംഗിച്ചു. മികച്ച പ്രോജക്ടുകൾ അവതരിപ്പിച്ചവർക്കുള്ള സമ്മാനം ജില്ലാ പ്ലാനിംഗ് ഓഫീസർ എം. കമാലുദ്ദീൻ നിർവഹിച്ചു. നിർവഹണ ഉദ്യോഗസ്ഥൻ പി.എ. അബ്ദുൾ നാസർ കോ ഓർഡിനേറ്റർ ടി.ജി. സജി എന്നിവർ സംസാരിച്ചു.

ജനറേറ്ററും ട്രാൻസ്ഫോർമറും പി.ടി. ഉഷ ഉദ്ഘാടനം ചെയ്തു

സുൽത്താൻ ബത്തേരി: നൂൽപ്പുഴ കുടുംബാരോഗ്യ കേന്ദ്രത്തിലെ ജനറേറ്ററും ട്രാൻസ്ഫോർമറും സ്പോർട്സ് ഇൻജുറി ക്ലിനിക്കും ഇന്ത്യൻ ഒളിന്പിക്സ് അസോസിയേഷൻ പ്രസിഡന്‍റും രാജ്യസഭാംഗവുമായ പദ്മശ്രീ പിടി ഉഷ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് ഷീജ സതീഷ് അധ്യക്ഷത വഹിച്ചു. വൈസ് പ്രസിഡന്‍റ് എൻ.എ. ഉസ്മാൻ, ജില്ലാ പഞ്ചായത്ത് അംഗം അമൽ ജോയ്, കുടുംബാരോഗ്യകേന്ദ്രം ജനറൽ സർജൻ ഡോ. ദാഹർ മുഹമ്മദ്, പ്രശാന്ത് മലവയൽ, ആരോഗ്യപ്രവർത്തകർ, ജനപ്രതിനിധികൾ എന്നിവർ പങ്കെടുത്തു. എംപി ഫണ്ടിൽനിന്ന് ലഭ്യമാക്കിയ 30 ലക്ഷം രൂപ ചെലവഴിച്ചാണ് 58.5 കെവി ജനറേറ്ററും 100 കെവിഎ ട്രാൻസ്ഫോർമറും സ്ഥാപിച്ചത്.

ജനവാസ മേഖലയിൽ കാട്ടുപോത്ത്

മാനന്തവാടി: തലപ്പുഴ വെണ്‍മണി കൊളങ്ങോട് ജനവാസ മേഖലയിൽ കാട്ടുപോത്ത് ഇറങ്ങി. ഇന്നലെ ഉച്ചയ്ക്ക് ശേഷമാണ് അഞ്ച് കാട്ടുപോത്തുകൾ ജലവാസ മേഖലയിൽ ഇറങ്ങിയത്. ഏതാനും മാസം മുന്പ് കാട്ടുപോത്തുകൾ പ്രദേശത്തെ പുളിക്കൽ അപ്പച്ചന്‍റെ വാഴകൾ നശിപ്പിച്ചിരുന്നു. കാട്ടുപോത്തുകൾ വീണ്ടും എത്തിയതോടെ പ്രദേശത്തെ വാഴക്കർഷകർ ആശങ്കയിലാണ്. വനപാലകർ കാട്ടുപോത്തുകളെ സമീപത്തെ വനത്തിലേക്ക് ഓടിച്ചു. പ്രദേശത്തെ വന്യമൃഗ ശല്യത്തിന് പരിഹാരം ഉണ്ടാക്കണമെന്നാണ് നാട്ടുകാർ ആവശ്യപ്പെടുന്നത്.

ഫുട്ബോൾ പരിശീലകന് സ്വീകരണം നൽകി

കൽപ്പറ്റ: സന്തോഷ് ട്രോഫി ഫുട്ബോൾ ടൂർണമെന്‍റിനുള്ള കേരള ഫുട്ബോൾ ടീം പരിശീലകനായി നിയമിതനായ വയനാട് സ്വദേശി ഷെഫീഖ് ഹസന് സ്പോർട്സ് ആൻഡ് കൾച്ചറൽ പ്രമോഷൻ കൗണ്‍സിൽ (എസ്‌സിപിസി) ഹോട്ടൽ ഹോളിഡെയ്സിൽ സംഘടിപ്പിച്ച ചടങ്ങിൽ സ്വീകരണം നൽകി. വയനാട്ടുകാരൻ ആദ്യമായാണ് കേരള ഫുട്ബോൾ ടീമിന്‍റെ മുഖ്യ പരിശീലക സ്ഥാനത്ത് എത്തുന്നത്. കൗണ്‍സിൽ പ്രസിഡന്‍റ് പോക്കു മുണ്ടോളി അധ്യക്ഷത വഹിച്ചു. സെക്രട്ടറി പി. കബീർ, ട്രഷറർ യു.കെ. ഹാഷിം, ടി. നിയാസ് തൈവളപ്പിൽ, സി.കെ. നൗഷാദ്, അയ്യൂബ് പാലക്കുന്നൻ, റിയാസ് അഫാസ്, എ.കെ. ഹർഷൽ, വി.വി. സലിം, അസീസ് അന്പിലേരി, കെ.പി. ഷാജഹാൻ, ജസൽ ജഐഫ്സി, റൗഫ് ഒലീവ്സ്, ഷാഹുൽ അബി എന്നിവർ പ്രസംഗിച്ചു.

ഡോ. യൂസഫ് നദ്‌വിക്ക് ഭാരത് സേവക് സമാജം പുരസ്കാരം

കൽപ്പറ്റ: ഭാരത് സേവക് സമാജത്തിന്‍റെ ദേശീയ പുരസ്കാരത്തിന് മുട്ടിൽ ഡബ്ല്യുഎംഒ കോളജിലെ അറബി വിഭാഗം അസി. പ്രാഫ.ഡോ.യൂസഫ് മുഹമ്മദ് നദ്‌വി ഏറ്റുവാങ്ങി. തിരുവനന്തപുരം ഭാരത് സേവക് സമാജം സദ്ഭാവന ഓഡിറ്റോറിയത്തിൽ നടന്ന ചടങ്ങിൽ അഖിലേന്ത്യ ചെയർമാൻ ബി.എസ്. ബാലചന്ദ്രനിൽനിന്നാണ് പുരസ്കാരം സ്വീകരിച്ചത്. അക്കാദമിക പ്രവർത്തനങ്ങളിലൂടെ രാജ്യത്തിന് നൽകിയ സംഭാവനകൾ പരിഗണിച്ചാണ് ഡോ. നദ്‌വിയെ പുരസ്കാരത്തിന് തെരഞ്ഞെടുത്തത്. ഡോ.കെ.കെ.എൻ. കുറുപ്പാണ് പുരസ്കാരത്തിനു നാമനിർദേശം ചെയ്തത്. വിദ്യാഭ്യാസം, ഭാഷ, സാഹിത്യം, ചരിത്രം, മതം, ശാസ്ത്രം തുടങ്ങിയ വിഷയങ്ങളിൽ രാജ്യത്തിനകത്തും പുറത്തുമായി നൂറിൽപരം സെമിനാറുകളിലും സമ്മേളനങ്ങളിലും ഡോ.നദ്‌വി പ്രബന്ധങ്ങൾ അവതരിപ്പിക്കുകയും പ്രഭാഷണം നടത്തുകയും ചെയ്തിട്ടുണ്ട്. കഴിഞ്ഞവർഷം ദുബായിൽ നടന്ന അന്താരാഷ്ട്ര അറബിക് ഭാഷാ സെമിനാറിൽ ഡോ.നദ്വിയുടെ പ്രബന്ധം "ശൈഖ് മുഹമ്മദ് ബിൻ റാഷിദ് അൽ മഖ്ദൂം’ അവാർഡ് നേടിയിരുന്നു.

നെൽക്കതിരിട്ടു: കാവൽ മാടങ്ങൾ ഒരുക്കി കർഷകർ

സുൽത്താൻ ബത്തേരി: വന്യജീവിശല്യം രൂക്ഷമായ നൂൽപ്പുഴ പഞ്ചായത്തിലെ വനയോര ഗ്രാമങ്ങളിലെല്ലാം നഞ്ചപ്പാടങ്ങൾ കതിരിട്ടതോടെ വന്യമൃഗങ്ങളിൽ നിന്ന് കൃഷിയെ സംരക്ഷിക്കാൻ കർഷകർ കാവൽ മാടങ്ങൾ ഒരുക്കി. കാട്ടാന, പന്നി, കുരങ്ങ്, മാൻ, മയിൽ, പക്ഷികൾ അടക്കമുള്ള വന്യജീവികൾ കൂട്ടത്തോടെ നെൽകൃഷി നശിപ്പിക്കുമെന്നതിനാലാണ് രാവും പകലും കാവലിരിക്കാൻ ഏറുമാടങ്ങൾ ഒരുക്കുന്നത്. ഏക്കർ കണക്കിന് വരുന്ന നെൽപ്പാടങ്ങളിൽ നടുവിലായി. മരക്കൊന്പുകളും പുല്ലും ഉപയോഗിച്ച് രണ്ടുപേർക്ക് ഇരിക്കാവുന്ന രീതിയിലാണ് ഏറുമാടങ്ങൾ നിർമിക്കുന്നത്. നെല്ല് കതിരായതോടുകൂടി പക്ഷികൾ കൂട്ടത്തോടെ എത്തുന്നതും രാത്രിയിൽ ആന അടക്കമുള്ളവ പാടത്തിറങ്ങുന്നതും തടയാനാണ് പ്രദേശത്തെ കർഷകർ രാത്രിയും പകലും കാവൽ ഇരിക്കുന്നത്. വനത്തിനോട് ചേർന്ന് വയലുകളിൽ അടുത്തടുത്തായി ഏറുമാടങ്ങൾ കാണാൻ സാധിക്കും. വന്യജീവിയെ പ്രതിരോധിക്കാൻ ഈ പ്രദേശങ്ങളിൽ ഇപ്പോഴും ഏറുമാടങ്ങൾ അടക്കമുള്ളവയാണ് പ്രതിരോധ സംവിധാനങ്ങൾ. നെല്ല് കൊയ്ത്തിനു പാകമായി തുടങ്ങിയതോടുകൂടി ഏത് നിമിഷവും വന്യജീവികൾ വയലിൽ എത്തുമെന്ന അവസ്ഥയാണ്. ഇതിനെ പ്രതിരോധിക്കേണ്ടത് കർഷകരുടെ അന്നത്തിന്‍റെയും അതിജീവനത്തിന്‍റെയും ഭാഗമാണ്.

തയ്യൽ മെഷീൻ വിതരണം ചെയ്തു

സുൽത്താൻ ബത്തേരി: വൈഎംസിഎയുടെ സുവർണ ജൂബിലി ആഘോഷത്തിന്‍റെ ഭാഗമായി നിർധനരായ തയ്യൽ ഉപജീവനമാക്കിയ പതിനഞ്ച് വ്യക്തികൾക്കാണ് ഹൈ സ്പീഡ് തയ്യൽ മിഷീൻ വിതരണം ചെയ്തത്. ഒന്നാംഘട്ടത്തിൽ തെരഞ്ഞെടുത്ത പതിനഞ്ച് പേരെ കൂടാതെ പത്ത് പേർക്ക് കൂടി അടുത്ത ഘട്ടത്തിൽ വിതരണം ചെയ്യും. വിതരണോദ്ഘാടനം വൈഎംസിഎ നാണഷൽ പ്രസിഡന്‍റ് ഡോ. വിൻസെന്‍റ് ജോർജ് നിർവഹിച്ചു. യോഗത്തിൽ വൈഎംസിഎ പ്രസിഡന്‍റ് സി.ഇ. ഫിലിപ്പ് അധ്യക്ഷത വഹിച്ചു. പ്രോഗ്രാം കോഓർഡിനേറ്റർ പ്രഫ.എ.വി. തരിയത്ത്, വൈഎംസിഎ നാഷണൽ എക്സിക്യുട്ടീവ് അംഗം വി.എം. മത്തായി, കേരള റീജണൽൻ പ്രോഗ്രാം ബോർഡ് ചെയർമാൻ രാജൻ തോമസ്, വൈഎംസിഎ സെക്രട്ടറി ബ്രിജിത്ത് ജോസഫ്, കെ.ജെ. ജോണി, എം.ജെ. മത്തായി, ട്രഷറർ ഒ.കെ. മത്തായി, റോസ്മേരി, സന്ധ്യ വർഗീസ് എന്നിവർ പ്രസംഗിച്ചു.

വൈത്തിരിയിലും നല്ലൂർനാടിലും പുനർജനി ക്യാന്പ് നടത്തി

കൽപ്പറ്റ: മേപ്പാടി ഗവ.പോളിടെക്നിക് കോളജിലെ എൻഎസ്എസ് വോളന്‍റിയർമാരുടെ നേതൃത്വത്തിൽ വൈത്തിരി ഗവ.താലൂക്ക് ആശുപത്രിയിൽ പുനർജനി ക്യാന്പ് സംഘടിപ്പിച്ചു. 80 വോളന്‍റിയർമാർ പങ്കെടുത്ത ചതുർദിന ക്യാന്പ് വൈത്തിരി പഞ്ചായത്ത് പ്രസിഡന്‍റ് എം.വി. വിജേഷ് ഉദ്ഘാടനം ചെയ്തു. ഹോസ്പിറ്റൽ സൂപ്രണ്ട് പ്രിയ സേനൻ അധ്യക്ഷത വഹിച്ചു. ഡെപ്യൂട്ടി നഴ്സിംഗ് സൂപ്രണ്ട് ആനിയമ്മ മാത്യു, കോളജ് പ്രിൻസിപ്പൽ ബി.എസ്. ജവഹറലി, ഇലക്ട്രോണിക്സ് വിഭാഗം തലവൻ കെ.പി. സുരേഷ്, എൻഎസ്എസ് പ്രോഗ്രാം ഓഫീസർ കെ.ടി. സ്മിനിമോൾ, കെ.എസ്. പ്രകാശ്ബാബു, വോളന്‍റിയർ സെക്രട്ടറി ലിയ അന്ന ഫ്രാൻസിസ് എന്നിവർ പ്രസംഗിച്ചു. സർക്കാർ സ്ഥാപനങ്ങളിലെ തകരാറിലായ ഉപകരണങ്ങൾ സ്റ്റേറ്റ് ടെക്നിക്കൽ സെല്ലിന്‍റെ നേതൃത്വത്തിൽ എൻഎസ്എസ് ഏറ്റെടുത്ത് ഉപയോഗയോഗ്യമാക്കുന്ന പദ്ധതിയാണ് പുനർജനി ക്യാന്പ്. മാനന്തവാടി: ഗവ. പോളിടെക്നിക്ക് കോളജിലെ എൻഎസ്എസ് വോളന്‍റിയർമാരുടെ നേതൃത്വത്തിൽ നല്ലൂർനാട് അംബേദ്കർ കാൻസർ സെന്‍ററിൽ നടത്തിയ മൂന്നു ദിവസത്തെ പുനർജനി ക്യാന്പിൽ വീൽ ചെയറുകൾ, സ്ട്രക്ചറുകൾ, കസേരകൾ, ട്രോളികൾ എന്നിവ ഉപയോഗയോഗ്യമാക്കി ബ്ലോക്ക് പഞ്ചായത്ത് പ്രസിഡന്‍റ് ജസ്റ്റിൻ ബേബി ഉദ്ഘാടനം ചെയ്തു. എൻഎസ്എസ് പ്രോഗ്രാം ഓഫീസർ ജ്യോതിസ് പോൾ അധ്യക്ഷത വഹിച്ചു. മെഡിക്കൽ ഓഫീസർ ഡോ.പി.എച്ച്. സൂര്യ, ഹെഡ് നഴ്സ് ആലീസ് മാത്യു, അസിസ്റ്റന്‍റ് പ്രോഗ്രാം ഓഫീസർ എം.എ. ധനിത, സ്റ്റാഫ് അംഗങ്ങളായ ജിഷ്ണു ജയാനന്ദൻ, ഒ.ജി. സന്ദീപ്, അബ്ദുൾ റഷീദ്, വി.എസ്. ശ്രീജിത്ത്, പി.ടി. സുബാഷ്, ജിഷ്ണു ജയാനന്ദൻ, ശ്രിയ, കെ.ജെ. അബിൻ എന്നിവർ പ്രസംഗിച്ചു.

വന പരിപാലന നയങ്ങൾ ചർച്ച ചെയ്ത് വിഷൻ 2031 സെമിനാർ

കൽപ്പറ്റ: അസന്തുലിത വനമേഖലകളെ സ്വാഭാവിക വനപ്രദേശങ്ങളാക്കി മാറ്റാനുള്ള ക്രിയാത്മകമായ ഇടപെടൽ ആവശ്യമാണെന്ന് വിഷൻ 2031 സംസ്ഥാനതല സെമിനാറിലെ ചർച്ചയിൽ നിർദേശം. കാടും നാടും വേർതിരിക്കുന്നതിൽ പ്രായോഗിക ബുദ്ധിമുട്ടുകൾ ഉണ്ടെങ്കിലും വനത്തെ സംരക്ഷിച്ച് വന്യജീവികൾ ജനവാസ കേന്ദ്രങ്ങളിലേക്ക് എത്താതിരിക്കാനുള്ള നടപടികൾ ഉണ്ടാകണമെന്നും ചർച്ചയിൽ നിർദേശിച്ചു. വന മേഖലകളിലെ സെന്ന, തേക്ക് തുടങ്ങിയ അശാസ്ത്രീയ അധിനിവേശ സസ്യങ്ങൾ പരിപാലിക്കുന്നതിന് പകരമായി ദീർഘ വീക്ഷണത്തോടെയുള്ള വന സംരക്ഷണ മാസ്റ്റർ പ്ലാൻ തയാറാക്കണം. ആക്രമകാരികളായ വന്യമൃഗങ്ങളെ പിടികൂടാനുള്ള കാലതാമസം ഒഴിവാക്കണം. വന്യജീവി ആക്രമണത്തിന് നൽകുന്ന നഷ്ടപരിഹാര തുക വർധിപ്പിക്കാൻ നടപടി സ്വീകരിക്കാനും ചർച്ചയിൽ ആവശ്യമുയർന്നു. വനമേഖലകളിലെ അധിനിവേശ സസ്യങ്ങളുടെ കൃത്യമായ വിവര ശേഖരണങ്ങൾ ലഭ്യമാക്കണം. പ്രതിരോധ സംവിധാനങ്ങൾ സമാന്തരമായി നടപ്പാക്കണം. കാർഷിക വിളകൾ നശിപ്പിക്കുന്ന കാട്ടുപന്നികളെ ഇല്ലായ്മ ചെയ്യാൻ പഞ്ചായത്ത് തലത്തിൽ നടപടി ഉണ്ടെങ്കിലും നിയമം നടപ്പാക്കാൻ പ്രായോഗിക ഇടപെടൽ സ്വീകരിക്കണമെന്നും ചർച്ചയിൽ അഭിപ്രായപ്പെട്ടു. വന്യമൃഗങ്ങൾക്കായി ഉൾവനങ്ങളിൽ വൈവിധ്യമാർന്ന ഭക്ഷ്യവിഭവങ്ങൾ ഉത്പാദിപ്പിക്കപ്പെടാൻ ഫ്രൂട്ട് ഫോറസ്റ്റ് ആശയം നടപ്പാക്കണമെന്ന ആശയവും ചർച്ചയിൽ ഉയർന്നു. ചർച്ചയിൽ ഉരുത്തിരിഞ്ഞ ആശയങ്ങൾ സർക്കാരിന്‍റെ ശ്രദ്ധയിൽപ്പെടുത്തുകയും ഭാവി വനപരിപാലന, വനസംരക്ഷണ പ്രവർത്തനങ്ങൾക്കായുള്ള കരട് നയരേഖയിൽ ഉൾപ്പെടുത്തി നൂതന ആശയങ്ങൾ രൂപീകരിക്കുമെന്ന് അഡിഷണൽ പ്രിൻസിപ്പൽ ചീഫ് ഫോറസ്റ്റ് കണ്‍സർവേറ്റർ ഡോ.പി. പുകഴേന്തി അറിയിച്ചു. വനവത്കരണം സ്വാഭാവിക വനങ്ങളുടെ പുനഃസ്ഥാപനവും വനസംരക്ഷണവും, വന്യജീവി സംരക്ഷണം, വന്യജീവി ആക്രമണം ലഘൂകരണം, കാലാവസ്ഥ വ്യതിയാനവും വനം വന്യജീവി സംരക്ഷണത്തിന്‍റെ ഭാവിയും, പങ്കാളിത്ത വനപരിപാലനവും വനാശ്രിത സമൂഹങ്ങളുടെ ഉന്നമനവും, സാമൂഹിക വനവത്കരണവും സാധ്യതകളും, ഇക്കോ ടൂറിസം സുസ്ഥിര സമീപനം, ആധുനിക വനവത്കരണവും കാര്യക്ഷമമായ പൊതുജന സേവനവും, അടിസ്ഥാന സൗകര്യ വികസനവും മാനവ വിഭവ ശേഷി വികസനവും എന്നീ വിഷയങ്ങളിൽ വിഷയ വിദഗ്ധർ, രാഷ്ട്രീയ സാമൂഹിക പരിസ്ഥിതി പ്രവർത്തകർ, പൊതുജനങ്ങൾ, വിദ്യാർഥികൾ എന്നിവർ ചർച്ചയിൽ പങ്കെടുത്തു. സംസ്ഥാന ചീഫ് വൈൽഡ് വാർഡൻ ഡോ. പ്രമോദ് ജി. കൃഷ്ണൻ, ഫോറസ്റ്റ് മാനേജ്മെന്‍റ് അഡീഷണൽ പ്രിൻസിപ്പൽ ചീഫ് ഫോറസ്റ്റ് കണ്‍സർവേറ്റർ ഡോ.എൻ. ചന്ദ്രശേഖരൻ, ഇക്കോ ഡെവലപ്മെന്‍റ് ആൻഡ് ട്രൈബൽ വെൽഫെയർ അഡീഷണൽ പ്രിൻസിപ്പൽ ചീഫ് ഫോറസ്റ്റ് കണ്‍സർവേറ്റർ ഡോ.ജെ. ജസ്റ്റിൻ മോഹൻ എന്നിവർ ചെയർമാൻമാരും മാനന്തവാടി ബ്ലോക്ക് പഞ്ചായത്ത് പ്രസിഡന്‍റ് ജസ്റ്റിൻ ബേബി, ബത്തേരി നഗരസഭാ പൊതുമരാമത്ത് സ്റ്റാൻഡിംഗ് കമ്മിറ്റി ചെയർമാൻ കെ. റഷീദ് എന്നിവർ കോ ചെയർമാൻമാരായ പാനലാണ് ചർച്ചയ്ക്ക് നേതൃത്വം നൽകിയത്.

സംസ്ഥാന മേളയിൽ അഭിനവ് ആധുനിക പോളിൽ മത്സരിക്കും

കൽപ്പറ്റ: വയനാട് ജില്ലാ സ്കൂൾ കായികമേളയിൽ മുള ഉപയോഗിച്ച് പോൾവോൾട്ട് മത്സരത്തിൽ പങ്കെടുത്ത് ഒന്നാം സ്ഥാനം നേടിയ അഭിനവ് സംസ്ഥാന സ്കൂൾ കായിക മേളയിൽ ആധുനിക പോളിൽ മത്സരിക്കും. സംസ്ഥാനതല കായിക മത്സരത്തിൽ പങ്കെടുക്കാൻ അഭിനവിന് ആധുനിക പോൾ ലഭ്യമാക്കുമെന്ന് പട്ടികജാതി-വർഗ-പിന്നാക്ക ക്ഷേമ മന്ത്രി ഒ.ആർ. കേളു അറിയിച്ചു. ജൂണിയർ ആണ്‍കുട്ടികളുടെ പോൾവോൾട്ടിലാണ് മാനന്തവാടി ഗവ. വൊക്കേഷണൻ ഹയർ സെക്കൻഡറി സ്കൂളിലെ പത്താംക്ലാസ് വിദ്യാർഥി അഭിനവ് സ്വർണം നേടിയത്. സ്കൂൾ പരിസരത്തുനിന്നു വെട്ടിയെടുത്ത മുള ഉപയോഗിച്ച് 2.50 മീറ്റർ ഉയരത്തിൽ ചാടിയാണ് അഭിനവ് സംസ്ഥാനതല മത്സരത്തിനു യോഗ്യത നേടിയത്. 2024ൽ സംസ്ഥാന സ്കൂൾ കായികമേളയിൽ പോൾവോൾട്ടിൽ 2.20 മീറ്റർ ഉയരത്തിൽ ചാടിയ അഭിനവ് നാലാംസ്ഥാനം കരസ്ഥമാക്കിയിരുന്നു. മാനന്തവാടി അഗ്രഹാരം ഉന്നതിയിലെ മണി-ഉഷ ദന്പതികളുടെ മകനാണ് അഭിനവ്. കായികധ്യാപകൻ മൊതക്കര കെ.വി സജിയാണ് പരിശീലകൻ.

ജീവിതോത്സവം: എം. സിദ്ധാർഥ് ജില്ലാതല വിജയി

കൽപ്പറ്റ: ഹയർ സെക്കൻഡറി നാഷണൽ സർവീസ് സ്കീം നടത്തിയ ജീവിതോത്സവം ചലഞ്ചിലെ ജില്ലാതല വിജയിയായി മാനന്തവാടി ഹയർ സെക്കൻഡറി സ്കൂളിലെ എം. സിദ്ധാർഥിനെ തെരഞ്ഞെടുത്തു. 21, 22 തീയതികളിൽ തിരുവനന്തപുരം കനകക്കുന്ന് കൊട്ടാരത്തിൽ നടക്കുന്ന ജീവിതോത്സവം സംസ്ഥാന കാർണിവലിൽ സിദ്ധാർഥ് ജില്ലയെ പ്രതിനിധാനം ചെയ്യും. എൻഎസ്എസ് ജില്ലാ മീഡിയ വിംഗ് ലീഡറാണ് സിദ്ധാർഥ്.

ഐഎൻടിയുസി മുള്ളൻകൊല്ലി മണ്ഡലം കണ്‍വൻഷൻ

പുൽപ്പള്ളി: ഐഎൻടിയുസി മുള്ളൻകൊല്ലി മണ്ഡലം കണ്‍വൻഷൻ പെരിക്കല്ലൂർ വ്യാപാര ഭവനിൽ നടത്തി. ജില്ലാ പ്രസിഡന്‍റ് പി.പി. ആലി ഉദ്ഘാടനം ചെയ്തു. കേന്ദ്ര, സംസ്ഥാന സർക്കാരുകളുടെ തെറ്റായ നയങ്ങൾമൂലം കർഷകരും തൊഴിലാളികളും കടുത്ത പ്രതിസന്ധിയാണ് നേരിടുന്നതെന്നു അദ്ദേഹം പറഞ്ഞു. നയങ്ങൾ തൊഴിലാളി സൗഹൃദമാക്കാൻ സർക്കാരുകൾ തയാറാകണമെന്ന് ആവശ്യപ്പെട്ടു. മണ്ഡലം പ്രസിഡന്‍റ് മനോജ് ഉതുപ്പാൻ അധ്യക്ഷത വഹിച്ചു. ഡിസിസി ജനറൽ സെക്രട്ടറി ബീന ജോസ്, മഹിളാ കോണ്‍ഗ്രസ് ജില്ലാ പ്രസിഡന്‍റ് ജിനി തോമസ്, പി.എൻ. ശിവൻ, മണി പാന്പനാൽ, സി.എ. ഗോപി, തങ്കച്ചൻ കാനാട്ടുമല എന്നിവർ പ്രസംഗിച്ചു.

മുട്ടിൽ പഞ്ചായത്ത് വികസന സദസ് നടത്തി

മുട്ടിൽ: പഞ്ചായത്ത് വികസന സദസ് മന്ത്രി ഒ.ആർ. കേളു ഉദ്ഘാടനം ചെയ്തു. 1996ൽനിന്ന് 2025ൽ എത്തിയപ്പോൾ തദ്ദേശസ്വയംഭരണ മേഖലയിൽ കാതലായ മാറ്റങ്ങൾ ഉണ്ടായതായി അദ്ദേഹം പറഞ്ഞു. പഞ്ചായത്ത് പ്രസിഡന്‍റ് ശ്രീദേവി ബാബു അധ്യക്ഷത വഹിച്ചു. വൈസ് പ്രസിഡന്‍റ് അഷ്റഫ് ചിറക്കൽ, ജനപ്രതിനിധികളായ നസീമ മങ്ങാടൻ, പി.എം. സന്തോഷ്കുമാർ, എൽഎസ്ജിഡി ജോയിന്‍റ് ഡയറക്ടർ വിമൽ രാജ്, വി.കെ. രുക്മിണി എന്നിവർ പ്രസംഗിച്ചു. എക്സ് ഒഫീഷ്യോ സെക്രട്ടറി മുഹമ്മദ് ഷഫീഖ് പ്രോഗ്രസ് റിപ്പോർട്ട് അവതരിപ്പിച്ചു. വിവിധ പദ്ധതികൾക്ക് ഭൂമി സൗജന്യമായി നൽകിയ ഓമന, മോഹനൻ നങ്ങേലി, അച്ചപ്പൻ മാണ്ടാട് എന്നിവരെ ആദരിച്ചു. ഓപ്പണ്‍ ഫോറത്തിൽ ഇംപ്ലിമെന്‍റിംഗ് ഓഫീസർ പി.എസ്. ഗിരീഷ്കുമാർ മോഡറേറ്ററായി.

ഗോത്രകലകളുടെ ആഘോഷമായി തുടിതാളം

പയ്യന്പള്ളി: ഗോത്രകലകളുടെ പ്രാധാന്യവും പൈതൃകവും സമൂഹത്തിനു പകരുകയെന്ന ലക്ഷ്യത്തോടെ സെന്‍റ് കാതറിൻസ് ഹൈസ്കൂളിൽ ‘തുടി താളം’ എന്ന പേരിൽ ഗോത്ര ഫെസ്റ്റ് സംഘടിപ്പിച്ചു. തനത് ഗോത്ര കലാരൂപങ്ങളായ ഇരുളനൃത്തം, മംഗലംകളി, മലപ്പുലയാട്ടം, വട്ടക്കളി തുടങ്ങിയവ അരങ്ങേറി. മാനന്തവാടി മുനിസിപ്പൽ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സണ്‍ അഡ്വ.സിന്ധു സെബാസ്റ്റ്യൻ ഉദ്ഘാടനം ചെയ്തു. സ്കൂൾ അസിസ്റ്റന്‍റ് മാനേജർ ഫാ.ജിജോ പല്ലാട്ടുകുന്നേൽ അധ്യക്ഷത വഹിച്ചു. വാർഡ് കൗണ്‍സിലർമാരായ ലൈല സജി, വിപിൻ വേണുഗോപാൽ, പിടിഎ പ്രസിഡന്‍റ് ജോബി ജോസഫ്, എംപിടിഎ പ്രസിഡന്‍റ് സുനിത ലാൽസണ്‍, അധ്യാപിക മഞ്ജുഷ ദേവി എന്നിവർ പ്രസംഗിച്ചു. വിദ്യാർഥികളെയും പരിശീലകൻ എം. സുധീഷിനെയും മെമന്േ‍റാ നൽകി ആദരിച്ചു. ഹെഡ്മാസ്റ്റർ ഫിലിപ്പ് ജോസഫ് സ്വാഗതം പറഞ്ഞു.

പോത്തുവളർത്തൽ പദ്ധതിയുമായി പുൽപ്പള്ളി പഞ്ചായത്ത്

പുൽപ്പള്ളി: പഞ്ചായത്തിലെ പട്ടികവർഗ സങ്കേതങ്ങളിൽ ഭക്ഷ്യസുരക്ഷാ പദ്ധതികൾ നടപ്പാക്കുന്നതിന്‍റെ ഭാഗമായി പോത്തുവളർത്തൽ യൂണിറ്റുകൾ ആരംഭിക്കുന്നു. പഞ്ചായത്ത് വാർഷിക പദ്ധതിയിൽ 30 ലക്ഷത്തോളം രൂപ ഇതിന് നീക്കിവച്ചു. തെരഞ്ഞെടുത്ത 20 പട്ടികവർഗ വനിതാ സംഘങ്ങൾക്ക് 171 പോത്തു കുട്ടികളെ സൗജന്യമായി നൽകും. പോത്തുകുട്ടി ഒന്നിന് 17,000 രൂപയാണ് വില. മൃഗാശുപത്രി മുഖേനയാണ് പദ്ധതി പ്രാവർത്തികമാക്കുന്നത്. പോത്തുകുട്ടി വിതരണം ആദ്യഘട്ടം പഞ്ചായത്ത് പ്രസിഡന്‍റ് ടി.എസ്. ദിലീപ്കുമാർ ഉദ്ഘാടനം ചെയ്തു. വൈസ് പ്രസിഡന്‍റ് ശോഭന സുകു അധ്യക്ഷത വഹിച്ചു എം.ടി. കരുണാകരൻ, ശ്രീദേവി മുല്ലക്കൽ, ഉഷ ബേബി, ഉഷ സത്യൻ, രജിത്ര ബാബുരാജ് എന്നിവർ പ്രസംഗിച്ചു. പദ്ധതി കോഓർഡിനേറ്റർ എ.കെ. രമേശൻ, ലൈവ്സ്റ്റോക്ക് ഇൻസ്പെക്ടർ ബിനോയി ജയിംസ്, അസിസ്റ്റന്‍റ് ഫീൽഡ് ഓഫീസർമാരായ സി.ഡി. റോഷ്ന, ജ്യോതി രാജു, എം.ആർ. ബിന്ദു, ജീവനക്കാരായ വി.എം. ജോസഫ്, പി.ആർ. സന്തോഷ്കുമാർ, ജയ സുരേഷ്,കെ.എം. ഷമീർ, പി.എസ്. മനോജ്കുമാർ എന്നിവർ പോത്തുകുട്ടികൾക്കുള്ള കുളന്പുരോഗ പ്രതിരോധ കുത്തിവയ്പ്പ്, മരുന്നുവിതരണം, ഇൻഷ്വറൻസ് പ്രവർത്തനങ്ങൾക്ക് നേതൃത്വം നൽകി.

നഗരസഭകളിലെ സംവരണ ഡിവിഷനുകളുടെ നറുക്കെടുപ്പ്

കൽപ്പറ്റ: ജില്ലയിലെ നഗരസഭകളിലെ സംവരണ ഡിവിഷനുകളുടെ നറുക്കെടുപ്പ് പൂർത്തിയായി. കളക്ടറേറ്റ് കോണ്‍ഫറൻസ് ഹാളിൽ തദ്ദേശ സ്വയംഭരണ ജില്ലാ ജോയിന്‍റ് ഡയറക്ടർ കെ.കെ. വിമൽരാജിന്‍റെ നേത്വത്തിലായിരുന്നു നറുക്കെടുപ്പ്. ഇലക്ഷൻ ഡെപ്യൂട്ടി കളക്ടർ നിജു കുര്യൻ, ഡെപ്യൂട്ടി ഡയറക്ടർ പി. ബൈജു, അസിസ്റ്റന്‍റ് ഡയറക്ടർ ജോമോൻ ജോർജ്, കെ.ടി. പ്രജുകുമാർ, സീനിയർ സൂപ്രണ്ട് ശ്രീജിത്ത് കരിങ്ങാളി എന്നിവർ പങ്കെടുത്തു. സംവരണ ഡിവിഷനുകൾ കൽപ്പറ്റ മുനിസിപ്പാലിറ്റി: മൂന്ന്-ഗവ.ഹൈസ്കൂൾ-പട്ടികജാതി സ്ത്രീ, എട്ട്-സിവിൽസ്റ്റേഷൻ, 21-മടിയൂർക്കുനി-പട്ടികവർഗ സ്ത്രീ, 18-റാട്ടക്കൊല്ലി-പട്ടികജാതി, 23-വെള്ളാരംകുന്ന്-പട്ടികവർഗം, ഒന്ന്-മണിയങ്കോട്, നാല്-നെടുങ്ങോട്, അഞ്ച്-എമിലി, 10-ചത്തോത്തുവയൽ, 11-മുനിസിപ്പൽ ഓഫീസ്, 12-എമിലിതടം, 15- ഗ്രാമത്തുവയൽ, 19-പുത്തൂർവയൽ, 24-അഡ്ലെഡ്, 26-തുർക്കി, 27-കേന്ദ്രീയവിദ്യാലയം, 29-മുണ്ടേരി-സ്ത്രീ. സുൽത്താൻ ബത്തേരി മുനിസിപ്പാലിറ്റി: 19-തൊടുവട്ടി, 22-ഫെയർലാൻഡ്-പട്ടികവർഗ സ്ത്രീ, ഒന്ന്- ആറാംമൈൽ-പട്ടികജാതി, എട്ട്-കരുവള്ളിക്കുന്ന്, 29-പൂമല-പട്ടികവർഗം, രണ്ട്-ചെതലയം, ഒന്പത്-ആർമാട്, 10-കോട്ടക്കുന്ന്, 12-കുപ്പാടി, 14-മന്തണ്ടിക്കുന്ന്, 20-കൈപ്പഞ്ചേരി, 21-മൈതാനിക്കുന്ന്, 23-സി കുന്ന്, 24-കട്ടയാട്, 25-സുൽത്താൻ ബത്തേരി, 26-പള്ളിക്കണ്ടി, 27-മണിച്ചിറ, 28-കല്ലുവയൽ, 32-പൂതിക്കാട്, 34-മന്തംകൊല്ലി, 36-കൈവട്ടമൂല-സ്ത്രീ. മാനന്തവാടി മുനിസിപ്പാലിറ്റി: ഏഴ്-ചോയിമൂല, 11-മുദ്രമൂല, 12-ചേറൂർ-പട്ടികവർഗ സ്ത്രീ, 35-പുത്തൻപുര-പട്ടികജാതി, രണ്ട്-ജസി, മൂന്ന്-പിലാക്കാവ്, 23-ആറാട്ടുതറ-പട്ടികവർഗം, നാല്-കല്ലിയോട്ട്, അഞ്ച്-കല്ലുമൊട്ടംകുന്ന്, ആറ്-അന്പുകുത്തി, ഒന്പത്-വിൻസന്‍റ്ഗിരി, 13-കുറുക്കൻമൂല, 15-കാടൻകൊല്ലി, 17-പുതിയിടം, 18-കൊയിലേരി, 19-താന്നിക്കൽ, 20-വള്ളിയൂർക്കാവ്, 21-മൈത്രിനഗർ, 26-മാനന്തവാടി ടൗണ്‍-സ്ത്രീ സംവരണം,28-എരുമത്തെരുവ്, 29-ക്ലബ്കുന്ന്, 32-പാലക്കുളി, 36-കുറ്റിമൂല-സ്ത്രീ. ബ്ലോക്ക് പഞ്ചായത്ത് സംവരണ വാർഡുകളുടെ നറുക്കെടുപ്പ് നടത്തി കൽപ്പറ്റ: ജില്ലയിലെ ബ്ലോക്ക് പഞ്ചായത്ത് സംവരണ ഡിവിഷനുകളിലേക്കു നറുക്കെടുപ്പ് പൂർത്തിയായി. കളക്ടറേറ്റ് റൗണ്ട് കോണ്‍ഫറൻസ് ഹാളിൽ ജില്ലാ കളക്റ്റർ ഡി.ആർ. മേഘശ്രീയുടെ നേതൃത്വത്തിലായിരുന്നു നറുക്കെടുപ്പ്. മാനന്തവാടി ബ്ലോക്ക് പഞ്ചായത്ത്: നാല്-തിരുനെല്ലി, എട്ട്-പള്ളിക്കൽ- പട്ടികവർഗ സ്ത്രീ, ഏഴ്-തോണിച്ചാൽ-പട്ടികവർഗം, രണ്ട്-വാളാട്, മൂന്ന്-തലപ്പുഴ, ഒന്പത്-കല്ലോടി, 10-തരുവണ, 13-തേറ്റമല-സ്ത്രീ. പനമരം ബ്ലോക്ക് പഞ്ചായത്ത്: ഒന്ന്-അഞ്ചുകുന്ന്, അഞ്ച്-മുള്ളൻകൊല്ലി-പട്ടികവർഗ സ്ത്രീ, മൂന്ന്-ആനപ്പാറ-പട്ടികവർഗം, ഏഴ്-ഇരുളം, എട്ട്-വാകേരി,10-നടവയൽ, 13-പച്ചിലക്കാട്, 14-പനമരം, 15-വിളന്പുകണ്ടം-സ്ത്രീ. കൽപ്പറ്റ ബ്ലോക്ക് പഞ്ചായത്ത്: ഒന്ന്-പടിഞ്ഞാറത്തറ-പട്ടികവർഗ സ്ത്രീ, 10-മൂപ്പൈനാട്-പട്ടികജാതി, ആറ്-മുട്ടിൽ-പട്ടികവർഗം, രണ്ട്-കുപ്പാടിത്തറ, മൂന്ന്-കോട്ടത്തറ, നാല്-വെങ്ങപ്പള്ളി, ഏഴ്-വാഴവറ്റ, ഒന്പത്-അരപ്പറ്റ, 13-ചാരിറ്റി, 16-തരിയോട്-സ്ത്രീ. ബത്തേരി ബ്ലോക്ക് പഞ്ചായത്ത്: രണ്ട്-മീനങ്ങാടി, 14-കുന്പളേരി-പട്ടികവർഗ സ്ത്രീ, നാല്-മൂലങ്കാവ്-പട്ടികവർഗം, ആറ്-നൂൽപ്പഴ, എട്ട്-കോളിയാടി, 10-അന്പുകുത്തി, 11-അന്പലവയൽ, 13-നെല്ലാറച്ചാൽ-സ്ത്രീ.

നൂൽപ്പുഴ കുടുംബാരോഗ്യ കേന്ദ്രത്തിൽ റോബോട്ടിക് ഗെയ്റ്റ് ട്രെയിനർ സംവിധാനമായി

സുൽത്താൻ ബത്തേരി: നൂൽപ്പുഴ കുടുംബാരോഗ്യ കേന്ദ്രത്തിൽ റോബോട്ടിക് ഗെയ്റ്റ് ട്രെയിനറും സിക്കിൾ ആൻഡ് പാലിയേറ്റീവ് ബ്ലോക്കും ആരോഗ്യമന്ത്രി വീണാ ജോർജ് ഉദ്ഘാടനം ചെയ്തു. ഐ.സി. ബാലകൃഷ്ണൻ എംഎൽഎ അധ്യക്ഷത വഹിച്ചു. ബത്തേരി ബ്ലോക്ക് പഞ്ചായത്ത് പ്രസിഡന്‍റ് സി. അസൈനാർ, നൂൽപ്പുഴ പഞ്ചായത്ത് പ്രസിഡന്‍റ് ഷീജ സതീഷ്, ജില്ലാ മെഡിക്കൽ ഓഫീസർ ഡോ.ടി മോഹൻദാസ്, അസിസ്റ്റന്‍റ് കളക്ടർ പി.പി. അർച്ചന, ജില്ലാ പഞ്ചായത്ത് അംഗം അമൽ ജോയ്, ആരോഗ്യ കേരളം ജില്ലാ പ്രോഗ്രാം മാനേജർ ഡോ.സമീഹ സെയ്തലവി തുടങ്ങിയവർ പങ്കെടുത്തു. മസ്തിഷാകാഘാതവും അപകടങ്ങളും ഉൾപ്പെടെ കാരണങ്ങൾമൂലം ശരീരം തളർന്നുപോകുന്നവർക്ക് ഫിസിയോതെറാപ്പിയിലൂടെ എഴുന്നേറ്റുനിൽക്കാനും നടക്കാനും പരിശീലനം നൽകുന്ന സംവിധാനമാണ് റോബോട്ടിക് ഗെയിറ്റ് ട്രെയിനർ. വയനാട് പാക്കേജിൽ അനുവദിച്ച 2.5 കോടി രൂപയാണ് ഇതിനു വിനിയോഗിച്ചത്. രാജ്യത്ത് ആദ്യമാണ് കുടുംബാരോഗ്യ കേന്ദ്രത്തിൽ ഈ സംവിധാനംസ്ഥാപിക്കുന്നത്.അരിവാൾകോശ രോഗികൾക്കുള്ള വാർഡും പെയിൻ ആൻഡ് റിഹാബിലിറ്റേഷൻ സെന്‍ററും ഉൾപ്പെടുന്നതാണ് സിക്കിൾ സെൽ ബ്ലോക്ക്. 10 കിടക്കകളുള്ള റിഹാബ് സെന്‍ററും കണ്‍സൾട്ടിംഗ് റൂമുകളും ഫിസിയോതെറാപ്പി, സ്പീച്ച് തെറാപ്പി മുറികളും വാർഡുകളും ബ്ലോക്കിലുണ്ട്.

ഡീസൽ പ്രതിസന്ധി: ടി. സിദ്ദിഖ് എംഎൽഎ കത്ത് നൽകി

കൽപ്പറ്റ: ഡീസൽ ക്ഷാമം അടിയന്തരമായി പരിഹരിച്ച് ജില്ലയിൽ കഐസ്ആർടിസിയുടെ മുഴുവൻ സർവീസുകളും നടത്തണമെന്ന് ആവശ്യപ്പെട്ട് ടി. സിദ്ദിഖ് എംഎൽഎ ഗതാഗതമന്ത്രി കെ.ബി. ഗണേഷ്കുമാറിന് കത്ത് നൽകി. ഡീസൽ ക്ഷാമം ജില്ലയിൽ കഐസ്ആർടിസി സർവീസിനെ ബാധിച്ചു. മൂന്നു ദിവസമായി നിരവധി ബസുകൾ നിർത്തിയിട്ടിരിക്കയാണ്. ചില റൂട്ടുകളിൽ ഭാഗികമാണ് സർവീസ്. ഇത് വിദ്യാർഥികളടക്കം യാത്രക്കാർക്ക് ബുദ്ധിമുട്ട് സൃഷ്ടിക്കുകയാണെന്ന് കത്തിൽ ചൂണ്ടിക്കാട്ടി.

ഏലമണ്ണയിലെ ആദിവാസി കുടുംബങ്ങൾക്ക് വൈദ്യുതി ലഭിച്ചു

പന്തല്ലൂർ: ഏലമണ്ണയിലെ ആദിവാസി കുടുംബങ്ങൾക്ക് വൈദ്യുതി ലഭിച്ചു. ഒരുവർഷത്തെ കാത്തിരിപ്പിനുശേഷമാണ് ഉന്നതിയിൽ വൈദ്യുതി എത്തിയത്. ഒരു വർഷം മുന്പാണ് ഗൂഡല്ലൂർ പഞ്ചായത്ത് യൂണിയൻ ഏലമണ്ണയിലെ പട്ടികവർഗ കുടുംബങ്ങൾക്ക് വീട് നിർമിച്ചു നൽകിയത്. വീടുകളിൽ വൈദ്യുതി ലഭ്യമാക്കിയിരുന്നില്ല. ഇത് വിദ്യാർഥികളുടെ പഠനത്തെയടക്കം ബാധിച്ചത് പരാതികൾക്കു കാരണമായിരുന്നു. ഇതേത്തുടർന്ന് ജില്ലാ കളക്ടറുടെ നിർദേശമനുസരിച്ച് ഉദ്യോഗസ്ഥർ ഉന്നതിയിലെത്തി നടത്തിയ പരിശോധനയാണ് കണക്ഷൻ ലഭിക്കുന്നതിന് സഹായകമായത്. വൈദ്യുതീകരണവുമായി ബന്ധപ്പെട്ടു നടത്തിയ ചടങ്ങിൽ ഗൂഡല്ലൂർ ആർഡിഒ ഗുണശേഖരൻ, വൈദ്യുതി ബോർഡ് ഉദ്യോഗസ്ഥരായ നിർമൽകുമാർ, മുത്തുകുമാർ, തഹസിൽദാർ സിറാജുന്നീസ, സ്പെഷൽ തഹസിൽദാർ കൃഷ്ണമൂർത്തി, ആ ഐശിവകുമാർ, വാർഡ് കൗണ്‍സിലർ മുരളീധരൻ തുടങ്ങിയവർ പങ്കെടുത്തു.

വന്യമൃഗ പ്രതിരോധ സംവിധാനങ്ങൾ മെച്ചപ്പെടുത്തണമെന്ന്

തിരുനെല്ലി പഞ്ചായത്ത് വികസന സദസിൽ നിർദേശം കാട്ടിക്കുളം: തിരുനെല്ലി പഞ്ചായത്ത് വികസന സദസ് പഞ്ചായത്ത് ഹാളിൽ നടത്തി. പ്രസിഡന്‍റ് പി.വി. ബാലകൃഷ്ണൻ ഉദ്ഘാടനം ചെയ്തു. വികസനകാര്യ സ്റ്റാൻഡിംഗ് കമ്മിറ്റി ചെയർമാൻ രാധാകൃഷ്ണൻ അധ്യക്ഷത വഹിച്ചു. ജില്ലാ പഞ്ചായത്ത് അംഗം എ.എൻ. സുശീല, പഞ്ചായത്ത് വൈസ് പ്രസിഡന്‍റ് വത്സലകുമാരി, സ്റ്റാൻഡിംഗ് കമ്മിറ്റി ചെയർപേഴ്സണ്‍മാരായ പി.എൻ. ഹരീന്ദ്രൻ, റുഖിയ സൈനുദ്ദീൻ, ബ്ലോക്ക് പഞ്ചായത്ത് അംഗം വിമല, പഞ്ചായത്ത് അംഗങ്ങളായ കെ. സിജിത്ത്, ബേബി, പ്രഭാകരൻ, വസന്തകുമാരി, തിരുനെല്ലി സർവീസ് സഹകരണ ബാങ്ക് പ്രസിഡന്‍റ് സി.കെ. ശങ്കരൻ, പഞ്ചായത്ത് സെക്രട്ടറി കെ. ഉണ്ണിക്കൃഷ്ണൻ, അസിസ്റ്റന്‍റ് സെക്രട്ടറി ഹരികുമാർ, സിഡിഎസ് ചെയർപേഴ്സണ്‍ പി. സൗമിനി, കുടുംബശ്രീ പ്രവർത്തകർ, ഹരിതകർമസേനാംഗങ്ങൾ, നാട്ടുകാർ തുടങ്ങിയവർ പങ്കെടുത്തു. പഞ്ചായത്തിൽ കഴിഞ്ഞ അഞ്ചു വർഷം നടപ്പാക്കിയ വികസന പദ്ധതികളുടെ അവതരണം സദസിൽ നടന്നു.വന്യമൃഗപ്രതിരോധ സംവിധാനങ്ങൾ മെച്ചപ്പെടുത്തുക, ഷെൽട്ടർ ഹോം സ്ഥാപിക്കുക, ക്ഷീരസംഘങ്ങളുടെ സഹകരണത്തോടെ മൂല്യവർധിത പാൽ ഉത്പന്നങ്ങൾ ബ്രാൻഡ് ചെയ്ത് വിപണിയിൽ എത്തിക്കുക, വനവിഭവങ്ങളുടെ സംസ്കരണത്തിന് ഫാക്ടറി ആരംഭിക്കുക, ചെറുകിട ജലസേചന പദ്ധതികൾ ആരംഭിക്കുക, തോട്ടവിള കൃഷിക്ക് സബ്സിഡി ലഭ്യമാക്കുക, നീർത്തട പരിപാലനം കാര്യക്ഷമമാക്കുക അഭ്യസ്തവിദ്യരായ ഗോത്രവർഗക്കാർക്കിടയിലെ തൊഴിലില്ലായ്മ പരിഹരിക്കുക, മൃഗസംരക്ഷണമേഖലയിൽ കൂടുതൽ ഡോക്ടർമാരെ നിയമിക്കുക, വയോജനങ്ങൾക്ക് പകൽവിടുകളിലേക്ക് വാഹനസൗകര്യം ഏർപ്പെടുത്തുക, 24 മണിക്കൂർ ആംബുലൻസ് സംവിധാനം ഒരുക്കുക തുടങ്ങിയ നിർദേശങ്ങൾ ഉയർന്നു.

തദ്ദേശ തെരഞ്ഞെടുപ്പ് വിജ്ഞാപനം ചെയ്യുംമുന്പേ സ്ഥാനാർഥി പ്രഖ്യാപനം

പുൽപ്പള്ളി: തദ്ദേശ തെരഞ്ഞടുപ്പ് വിജ്ഞാപനം ചെയ്യുംമുന്പേ സ്ഥാനാർഥി പ്രഖ്യാപനം. മുള്ളൻകൊല്ലി പഞ്ചായത്തിലെ 18-ാം വാർഡിൽ(പട്ടാണിക്കൂപ്പ്)മുസ്ലിം ലീഗാണ് സ്ഥാനാർഥിയെ പ്രഖ്യാപിച്ചത്. പാടിച്ചിറ ലീഡ്സ് അക്കാദമി നടത്തുന്ന ലിബിനാണ് സ്ഥാനാർഥി. മുസ്ലിംലീഗിന്‍റെ ശക്തികേന്ദ്രമാണ് പട്ടാണിക്കൂപ്പ്. സ്ഥാനാർഥി പ്രഖ്യാപനവുമായി ബന്ധപ്പെട്ട് പട്ടാണിക്കൂപ്പിൽ കണ്‍വൻഷൻ നടത്തി. മുസ്ലിംലീഗ് പഞ്ചായത്ത് കമ്മിറ്റി പ്രസിഡന്‍റ് എം.എ. അസീസ് ഉദ്ഘാടനം ചെയ്തു. കോണ്‍ഗ്രസ് ബൂത്ത് പ്രസിഡന്‍റ് ബിജു പാറക്കൽ അധ്യക്ഷത വഹിച്ചു. മുസ്ലിംലീഗ് ദേശീയ സെക്രട്ടറി ജയന്തി രാജൻ സ്ഥാനാർഥി പ്രഖ്യാപനം നിർവഹിച്ചു. ജോമേഷ് മണ്ടാനത്ത്, ജിസ്റ മുനീർ, ജോസ് കുന്നത്ത്, ബെന്നി വെങ്ങച്ചേരി, മുനീർ ആച്ചിക്കുളത്ത്, സി.പി. അഷ്റഫ് എന്നിവർ പ്രസംഗിച്ചു.

വനം-വന്യജീവി, മാനുഷിക സംരക്ഷണം ഉറപ്പാക്കും: മന്ത്രി എ.കെ. ശശീന്ദ്രൻ

വിഷൻ-2031: സംസ്ഥാനതല സെമിനാർ നടത്തി സുൽത്താൻ ബത്തേരി: വനം-വന്യജീവി, മാനുഷിക സംരക്ഷണം ഉറപ്പുവരുത്തുക സർക്കാർ ലക്ഷ്യമാണെന്ന് മന്ത്രി എ.കെ. ശശീന്ദ്രൻ. ‘കാടിന് സംരക്ഷണം, നാടിന് വികസനം’ എന്ന പേരിൽ വനംവന്യജീവി സംരക്ഷണ വകുപ്പ് നഗരസഭാ ഹാളിൽ സംഘടിപ്പിച്ച വിഷൻ-2031 സംസ്ഥാനതല സെമിനാർ ഉദ്ഘാടനം ചെയ്യുകയായിരുന്നു അദ്ദേഹം. വനമേഖലയോടുചേർന്ന് താമസിക്കുന്ന ജനങ്ങളുടെ പ്രശ്നങ്ങൾക്ക് പരിഹാരമാർഗങ്ങൾ ചർച്ച ചെയ്യുന്നതിനു സംഘടിപ്പിച്ചതാണ് സെമിനാർ. വന്യജീവി ശല്യം ലഘൂകരിക്കുന്നതിന് കേന്ദ്ര വന നിയമങ്ങളിൽ കാലോചിതമായ ഭേദഗതി ആവശ്യമാണ്. വനം കൈയേറ്റം, വന്യമൃഗവേട്ട എന്നിവ രൂക്ഷമായിരുന്ന കാലത്ത് ആഗോളതലത്തിൽ പ്രതികൂല കാലാവസ്ഥാ പ്രതിഭാസങ്ങൾ ഉണ്ടായിരുന്നു. പാരിസ്ഥിതിക പ്രതികൂല സാഹചര്യങ്ങൾ നേരിടുന്നതിന് നടപ്പാക്കിയ കേന്ദ്ര നിയമങ്ങൾ 2016ൽ കേരളം സ്വീകരിച്ചതാണ്. നിലവിൽ വനം വകുപ്പ് അഭിമുഖീകരിക്കുന്ന പ്രധാന പ്രശ്നങ്ങളുടെ പരിഹാരത്തിന് കേന്ദ്ര നിയമങ്ങളിൽ ഭേദഗതി ഉണ്ടാകണം. ഒരു നാടിനെ ബാധിക്കുന്ന പ്രശ്നങ്ങൾ പരിഹരിക്കാനാണ് നിയമങ്ങൾ രൂപപ്പെടേണ്ടത്. വന നിയമങ്ങളിൽ ജനങ്ങൾക്ക് പ്രയോജനകരമാകുംവിധം ഇളവുകൾ നൽകണം. മനുഷ്യന്‍റെ ജീവനും സ്വത്തിനും സംരക്ഷണം, വന സംരക്ഷണം, വന്യമൃഗ സംരക്ഷണം എന്നീ ലക്ഷ്യങ്ങളോടെയാണ് സർക്കാർ മുന്നോട്ടുപോകുന്നതെന്നും മന്ത്രി പറഞ്ഞു. ചടങ്ങിൽ ഐസിഐസിഐ ബാങ്ക് കോർപറേറ്റ് സോഷ്യൽ റസ്പോണ്‍സിബിലിറ്റി വിഭാഗം 200 കാമറ ട്രാപ്പുകൾ മന്ത്രിക്ക് കൈമാറി. വന്യമൃഗശല്യ ലഘൂകരണത്തിന് വനം വകുപ്പ് കാര്യക്ഷമമായ ഇടപെടലാണ് നടത്തുന്നതെന്ന് സെമിനാറിൽ പ്രസംഗിക്കവേ പട്ടികജാതി-വർഗ-പിന്നാക്ക ക്ഷേമ മന്ത്രി ഒ.ആർ. കേളു പറഞ്ഞു. വനത്തോടുചേർന്നുള്ള പ്രദേശങ്ങളിൽ ജനപങ്കാളിത്തത്തോടെയാണ് വനം വകുപ്പിന്‍റെ ഇടപെടലെന്ന് അദ്ദേഹം ചൂണ്ടിക്കാട്ടി. മുനിസിപ്പൽ ചെയർമാൻ ടി.കെ. രമേശ് അധ്യക്ഷത വഹിച്ചു. പ്രിൻസിപ്പൽ ചീഫ് ഫോറസ്റ്റ് കണ്‍സർവേറ്റർ രാജേഷ് രവീന്ദ്രൻ, അഡീഷണൽ പ്രിൻസിപ്പൽ ചീഫ് ഫോറസ്റ്റ് കണ്‍സർവേറ്റർ ഡോ.പി. പുകഴേന്തി, എഡിഎം കെ. ദേവകി, ജനപ്രതിനിധികളായ സി. അസൈനാർ, ജസ്റ്റിൻ ബേബി, പി.വി. ബാലകൃഷ്ണൻ, മിനി പ്രകാശ്, ചീഫ് വൈൽഡ് ലൈഫ് വാർഡൻ ഡോ.പ്രമോദ് ജി. കൃഷ്ണൻ, അഡീഷണൽ പ്രിൻസിപ്പൽ ചീഫ് ഫോറസ്റ്റ് കണ്‍സർവേറ്റർ ഡോ.ജസ്റ്റിൻ മോഹൻ, ചീഫ് ഫോറസ്റ്റ് കണ്‍സർവേറ്റർ ബി.എൻ. അഞ്ജൻകുമാർ തുടങ്ങിയവർ പങ്കെടുത്തു.

കെഒഎ സ്പോർട്സ് ഇ മാഗസിൻ വയനാട് ജില്ലാതല പ്രകാശനം നടത്തി

സുൽത്താൻ ബത്തേരി: കേരള ഒളിന്പിക് അസോസിയേഷന്‍റെ(കെഒഎ) ഇ സ്പോർട്സ് മാഗസിൻ വയനാട് ജില്ലാതല പ്രകാശനം പൂമല മക്ലോഡ്സ് ഇംഗ്ലീഷ് മീഡിയം സ്കൂളിൽ ഇന്ത്യൻ ഒളിന്പിക് അസോസിയേഷൻ പ്രസിഡന്‍റും രാജ്യസഭാംഗവുമായ പദ്മശ്രീ പി.ടി. ഉഷ നിർവഹിച്ചു. മക്ലോഡ്സ് സ്കൂളുമായി സഹകരിച്ച് കെഒഎ സംഘടിപ്പിച്ച ‘മീറ്റ് ദ ഗോൾഡൻ ഗേൾ’ പരിപാടിക്കിടെയായിരുന്നു മാഗസിൻ പ്രകാശനം. ജില്ലാ ഒളിന്പിക് അസോസിയേഷന്‍റെ പിന്തുണയോടെ മക്ലോഡ്സ് ഇംഗ്ലീഷ് സ്കൂൾ ആരംഭിക്കുന്ന സ്പോർട്സ് അക്കാഡമിയുടെ ലോഗോ പ്രകാശനവും ഉഷ നിർവഹിച്ചു. ജില്ലാ ഒളിന്പിക് അസോസിയേഷൻ പ്രസിഡന്‍റ് ഗോപകുമാർ വർമ അധ്യക്ഷത വഹിച്ചു. സ്കൂൾ മാനേജർ ഷിംജിത് ദാമു, സംസ്ഥാന വോളിബോൾ അസോസിയേഷൻ വൈസ് പ്രസിഡന്‍റ് പി.ബി ശിവൻ, ഒളിന്പിക് അസോസിയേഷൻ ജില്ലാ ജോയിന്‍റ് സെക്രട്ടറി സുബൈർ ഇളകുളം, എൻ.സി. സാജിദ്, ഗിരീഷ് പെരുന്തട്ട, ഷറഫുദ്ദീൻ, ടി. സതീഷ്കുമാർ, ടോം ജോസഫ്, അർജുൻ തോമസ്, ദീപേഷ്, തോമസ്, സിജോ മാത്യു എന്നിവർ പ്രസംഗിച്ചു. ജില്ലാ ഒളിന്പിക് അസോസിയേഷൻ സെക്രട്ടറി സലിം കടവൻ സ്വാഗതം പറഞ്ഞു. വിവിധ സ്പോർട്സ് അസോസിയേഷൻ ഭാരവാഹികൾ, കായികതാരങ്ങൾ, വിദ്യാർഥികൾ എന്നിവരുമായി ഉഷ സംവദിച്ചു.

കവിതാസമാഹാരവുമായി ഇരട്ടസഹോദരിമാർ

കൽപ്പറ്റ: കവിതാസമാഹാരവുമായി ഇരട്ടസഹോദരിമാർ. പുൽപ്പള്ളി ജയശ്രീ ഹയർസെക്കൻഡറി സ്കൂളിലെ പത്താംക്ലാസ് വിദ്യാർഥികളായ എ.എസ്. വൈഗ, എ.എസ്. വൈഖരി എന്നിവരാണ് ‘നവേന്ദുകിരണങ്ങൾ’ എന്ന ശീർഷകത്തിൽ കവിതാസമാഹാരം തയാറാക്കിയത്. വിദ്യാലയത്തിന്‍റെ സുവർണ ജൂബിലി ആഘോഷത്തിന്‍റെ ഭാഗമായി ഒരുക്കിയ സമാഹാരത്തിന്‍റെ പ്രകാശനം കഴിഞ്ഞദിവസം തിരുവനന്തപുരത്ത് വിദ്യാഭ്യാസമന്ത്രി വി. ശിവൻകുട്ടി നിർവഹിച്ചു. പുസ്തകത്തിന്‍റെ ആദ്യപാതിയിൽ വൈഗയും മറുപാതിയിൽ വൈഖരിയുമാണ് എഴുതിയിരിക്കുന്നത്. മഴയോടും ഭൂമിയോടുമുള്ള പ്രണയത്തിൽ തുടങ്ങി വർത്തമാനകാലത്തിലേക്കും അതിന്‍റെ വിഹ്വലതകളിലേക്കും ഇരുവരും ആഴത്തിൽ കടന്നുചെല്ലുന്നുണ്ട്. സാഹിത്യകാരി പ്രീത ജെ. പ്രിയദർശനിയാണ് സമാഹാരത്തിന് അവതാരിക എഴുതിയത്. ‘നവേന്ദുകിരണങ്ങൾ’ എന്ന പേരിൽപോലും പ്രതീക്ഷയുടെ നാന്പുകൾ മുളയ്ക്കുന്ന അനുഭൂതിയുണ്ടെന്ന് അവതാരികയിൽ പ്രീത കുറിക്കുന്നു. സ്കൂളിലെ ഇംഗ്ലീഷ് അധ്യാപകൻ വി. രവീന്ദ്രനും മലയാളം അധ്യാപകൻ ടി.എസ്. ഷിജുവുമാണ് വൈഗ-വൈഖരി ഇരട്ടകളിലെ കവയിത്രികളെ കണ്ടെത്തി രചനയിൽ പ്രോത്സാഹനം നൽകിയതും സമാഹാരം തയാറാക്കുന്നതിലേക്ക് നയിച്ചതും. പുൽപ്പള്ളി ആളാകടവിൽ എ.എസ്.സുനിൽകുമാർ-കെ.ആർ. പ്രിയ ദന്പതികളുടെ മക്കളാണ് വൈഗയും വൈഖരിയും.

വിദ്യാർഥികളെ അനുമോദിച്ചു

പഴൂർ: ബത്തേരി ഉപജില്ലാ ശാസ്ത്രമേളയിൽ യുപി വിഭാഗത്തിൽ രണ്ടാം സ്ഥാനവും പ്രവൃത്തിപരിചയമേളയിൽ നാലാം സ്ഥാനവും നേടുകയും സാമൂഹികശാസ്ത്ര, ഗണിതശാസ്ത്ര, ഐടി മേളകളിൽ മികച്ച പ്രകടനം കാഴ്ചവയ്ക്കുകയും ചെയ്ത സെന്‍റ് ആന്‍റണീസ് യുപി സ്കൂൾ വിദ്യാർഥികളെ മാനേജ്മെന്‍റും പിടിഎയും സംയുക്തമായി സംഘടിപ്പിച്ച ചടങ്ങിൽ അനുമോദിച്ചു. മാനേജർ ഫാ. ജോസ് മേച്ചേരിൽ അധ്യക്ഷത വഹിച്ചു. കുട്ടികൾക്കുള്ള സമ്മാനങ്ങൾ അദ്ദേഹം വിതരണം ചെയ്തു. പിടിഎ പ്രസിഡന്‍റ് ചാൾസ്, ഹെഡ്മാസ്റ്റർ കെ.ജി. ജോണ്‍സണ്‍, സീനിയർ അധ്യാപകൻ അലക്സ് മാത്യു, കെ.എസ്. ഷിൽന, ജോയ്സ് ജോസഫ്, ദീപ എൻ. മാത്യു, ടി.ഒ. സാന്ദ്ര, കെ.എ. ആയിഷ, സിസ്റ്റർ എം.എം. സിനി, സ്കൂൾ ലീഡർ സഞ്ജിത്ത് സാജൻ എന്നിവർ പ്രസംഗിച്ചു.

സ്വർണക്കപ്പിന് സ്വീകരണം നൽകി

കൽപ്പറ്റ: സംസ്ഥാന സ്കൂൾ കായികമേളയുടെ ഭാഗമായി എസ്കെഎംജെ ഹയർ സെക്കൻഡറി സ്കൂളിൽ സ്വർണക്കപ്പുമായി എത്തിയ ദീപശിഖ പ്രയാണത്തിന് സ്വീകരണം നൽകി. പരീക്ഷാഭവൻജോയിന്‍റ് സെക്രട്ടറി ഗിരീഷ് ചോലയിൽ, ഡിഡിഇ ശശീന്ദ്രവ്യാസ്, എഇഒ മാരായ സുനിൽ കുമാർ, ബാബു എന്നിവർ നേതൃത്വം നൽകി. സ്കൂൾ പ്രിൻസിപ്പൽ വിവേകാനന്ദൻ, ഹെഡ്മാസ്റ്റർ എം.പി. കൃഷ്ണകുമാർ, അധ്യാപകർ, വിദ്യാർഥികൾ, രക്ഷിതാക്കൾ എന്നിവർ പങ്കെടുത്തു.

മാനസികാരോഗ്യ ബോധവത്കരണം നടത്തി

സുൽത്താൻ ബത്തേരി: ലോക മാനസികാരോഗ്യ ദിനാഘോഷത്തിന്‍റെ ഭാഗമായി മേപ്പാടി ഡോ. മൂപ്പൻസ് നഴ്സിങ് കോളജും ആസ്റ്റർ വോളന്‍റിയേഴ്സും സംയുക്തമായി വാലുമ്മൽ ടീച്ചർ ട്രെയിനിംഗ് കോളജിൽ മാനസികാരോഗ്യ ബോധവത്കരണം നടത്തി. ഡോ. മൂപ്പൻസ് മെഡിക്കൽ കോളജിലെ സൈക്യാട്രി വിഭാഗം അസി. പ്രഫസർ ഡോ. ജിഷ്ണു ജനാർദനൻ ക്ലാസെടുത്തു. മാനസികാരോഗ്യവിജ്ഞാനം നേടേണ്ടതിന്‍റെ ആവശ്യകത വിശദമാക്കി ഡോ. മൂപ്പൻസ് നഴ്സിംഗ് കോളജ് വിദ്യാർഥികൾ പാവകളി അവതരിപ്പിച്ചു. വാലുമ്മൽ ടീച്ചർ ട്രെയിനിംഗ് കോളജ് പ്രിൻസിപ്പൽ ബിനോജ്, ഡോ. മൂപ്പൻസ് നഴ്സിംഗ് കോളജ് അധ്യാപകരായ ട്രീറ്റി ജോർജ്, സിസ്റ്റർ കൊച്ചുറാണി തുടങ്ങിയവർ നേതൃത്വം നൽകി.

വായ്പാ തട്ടിപ്പ്: സാറാക്കുട്ടി നിരാഹാര സമരം അവസാനിപ്പിച്ചു

പുൽപ്പള്ളി: പുൽപ്പള്ളി സർവീസ് സഹകരണ ബാങ്ക് വായ്പത്തട്ടിപ്പിനിരയായവർക്ക് നീതി ലഭ്യമാക്കണമെന്നാവശ്യപ്പെട്ട് നിരാഹാര സമരം നടത്തിവന്ന പറന്പേക്കാട്ട് ഡാനിയേലിന്‍റെ ഭാര്യ സാറാക്കുട്ടിയുടെ ആരോഗ്യനില മോശമായതോടെ പോലീസ് ആശുപത്രിയിലേക്ക് മാറ്റി. സമരം മൂന്ന് ദിവസം പിന്നിട്ടതോടെ അവശയായ സാറാക്കുട്ടിയെ ഡോക്ടറുടെ നിർദേശപ്രകാരമാണ് ഇന്നലെ വൈകുന്നേരത്തോടെ ആശുപത്രിയിലേക്ക് മാറ്റിയത്. ഇതോടെ വായ്പത്തട്ടിപ്പിനിരയായി ജീവനൊടുക്കിയ രാജേന്ദ്രൻ നായരുടെ ഭാര്യ ജലജ സമരം ഏറ്റെടുത്തു. സത്യഗ്രഹ സമരമായാണ് ഇനി തുടരുക. പുൽപ്പള്ളി പഞ്ചായത്ത് ബസ് സ്റ്റാൻഡ് പരിസരത്ത് കഴിഞ്ഞ ബുധനാഴ്ചയാണ് തട്ടിപ്പിനിരയായവരുടെ നേതൃത്വത്തിൽ സമരം തുടങ്ങിയത്.

ജില്ലാ ശാസ്ത്രോത്സവം: ഓവറോൾ കിരീടം ദ്വാരക സേക്രഡ് ഹാർട്ട് എച്ച്എസ്എസിന്

മുട്ടിൽ: ജില്ലാ സ്കൂൾ ശാസ്ത്രമേളയിൽ ഓവറോൾ കിരീടം ചൂടി ദ്വാരക സേക്രഡ് ഹാർട്ട് എച്ച്എസ്എസ്. പിണങ്ങോട് ഡബ്ല്യുഒ എച്ച്എസ്എസ് നാണ് രണ്ടാംസ്ഥാനം. ഐടി മേളയിൽ മാനന്തവാടി ഉപജില്ലയ്ക്കാണ് ഓവറോൾ. ഐടി മേളയിൽ ഹയർസെക്കൻഡറി വിഭാഗത്തിൽ ദ്വാരക എസ്എച്ച്എസ്എസ് ഒന്നാംസ്ഥാനവും പിണങ്ങോട് ഡബ്ല്യുഒ എച്ച്എസ്എസ് രണ്ടാം സ്ഥാനവും നേടി. ഹൈസ്കൂൾ വിഭാഗത്തിൽ മാനന്തവാടി എംജിഎം എച്ച്എസ്എസ് ഒന്നും നടവയൽ സെന്‍റ് തോമസ് എച്ച്എസ് രണ്ടും സ്ഥാനങ്ങൾ നേടി. മാത്തമാറ്റിക്സ് ഫെയറിലും ഉപജില്ലയിൽ മാനന്തവാടിക്കാണ് കിരീടം. ഹയർസെക്കൻഡറിയിൽ ദ്വാരക ഒന്നാംസ്ഥാനവും പിണങ്ങോട് രണ്ടാംസ്ഥാനവും നേടി. ഹൈസ്കൂളിൽ മാനന്തവാടി ജിവിഎച്ച്എസ്എസ് ഒന്നാംസ്ഥാനവും കണിയാരം ഫാ. ജികെഎം എച്ച്എസ്എസ് രണ്ടാംസ്ഥാനവും നേടി. പ്രവൃത്തിപരിചയമേളയിൽ സുൽത്താൻ ബത്തേരി ഉപജില്ലയ്ക്കാണ് കിരീടം. ഹയർസെക്കൻഡറി വിഭാഗത്തിൽ ദ്വാരക ഒന്നാമതെത്തിയപ്പോൾ പൂതാടി എസ്എൻ എച്ച്എസ്എസ് രണ്ടാമതെത്തി. ഹൈസ്കൂൾ വിഭാഗത്തിൽ തരിയോട് നിർമ്മല എച്ച്എസ് ഒന്നാംസ്ഥാനത്തും സെന്‍റ് തോമസ് എച്ച്എസ് നടവയൽ രണ്ടാംസ്ഥാനത്തുമെത്തി. സോഷ്യൽ സയൻസ് ഫെയറിൽ വൈത്തിരി ഉപജില്ല കിരീടം ചൂടി. ഹയർസെക്കൻഡറി വിഭാഗത്തിൽ ദ്വാരക സേക്രഡ് ഹാർട്ട് എച്ച്എസ്എസിനാണ് ഒന്നാംസ്ഥാനം. കൽപ്പറ്റ എസ്കെഎംജെ എച്ച്എസ്എസ് രണ്ടാംസ്ഥാനത്തുമെത്തി. ഹൈസ്കൂൾ വിഭാഗത്തിൽ പിണങ്ങോട് ഡബ്ല്യുഒ എച്ച്എസ്എസ് കിരീടം ചൂടി. ബീനാച്ചി ജിഎച്ച്എസ് നാണ് റണ്ണർഅപ്പ്. സയൻസ് ഫെയറിൽ മാനന്തവാടി ഉപജില്ലയ്ക്കാണ് കിരീടം. ഹയർസെക്കൻഡറിയിൽ ദ്വാരക സേക്രഡ് ഹാർട്ട് എച്ച്എസ്എസ് ഒന്നാമതെത്തിയപ്പോൾ മൂലങ്കാവ് ജിഎച്ച്എസ്എസ് രണ്ടാംസ്ഥാനം നേടി. ഹൈസ്കൂൾ വിഭാഗത്തിൽ എച്ചോം സർവോദയ ഒന്നാംസ്ഥാനം നേടിയപ്പോൾ കാക്കവയൽ ജിഎച്ച്എസ്എസ്, തരുവണ ജിഎച്ച്എസ്, നടവയൽ സെന്‍റ് തോമസ് എന്നിവർ രണ്ടാംസ്ഥാനം പങ്കിട്ടു.

നിസഹായർക്ക് സർക്കാർ സൗജന്യ ചികിത്സ ഉറപ്പാക്കി: മന്ത്രി വീണാ ജോർജ്

സുൽത്താൻ ബത്തേരി: ചെലവേറിയ ചികിത്സകൾക്കായി ബുദ്ധിമുട്ടുന്ന നിസഹായരായവർക്ക് സൗജന്യ ചികിത്സ ഉറപ്പാക്കുകയാണ് സർക്കാരെന്ന് ആരോഗ്യവനിതാ ശിശു വികസന മന്ത്രി വീണാ ജോർജ്. ബത്തേരി താലൂക്ക് ആശുപത്രിയിൽ സ്ത്രീകളുടെയും കുട്ടികളുടെയും ആശുപത്രിയുടെ ഉദ്ഘാടനം നിർവഹിച്ച് പ്രസംഗിക്കുകയായിരുന്നു മന്ത്രി. സംസ്ഥാന സർക്കാർ 1500 കോടി രൂപയാണ് സൗജന്യ ചികിത്സയ്ക്കായി ഇതുവരെ വിനിയോഗിച്ചത്. ആവശ്യമായ ചികിത്സ ലഭിക്കാതെ ഒരാളും നിസഹായരാകാൻ പാടില്ലെന്ന ലക്ഷ്യത്തോടെയാണ് സംസ്ഥാന സർക്കാരും ആരോഗ്യ വകുപ്പും മുന്നോട്ട് പോകുന്നത്. ബത്തേരി താലൂക്ക് ആശുപത്രിയിൽ കൂടുതൽ തസ്തികകൾ അനുവദിക്കുമെന്നും മന്ത്രി അറിയിച്ചു. താലൂക്ക് ആശുപത്രിയിലെ 360 ഡിഗ്രി മെറ്റബോളിക് ഡിസീസ് മാനേജ്മെന്‍റ് സെന്‍റർ, പോളി ഡെന്‍റൽ ക്ലിനിക്, വയോജന വാർഡ്, ഫിസിയോതെറാപ്പി ഹാബിലിറ്റേഷൻ യൂണിറ്റുകൾ, ഫേക്കോ എമൽസിഫിക്കേഷൻ മെഷീൻ, വയോജന വിഭിന്ന ശേഷി സൗഹൃദ കേന്ദ്രങ്ങൾ എന്നിവയും മന്ത്രി ഉദ്ഘാടനം ചെയ്തു. ബത്തേരി താലൂക്ക് ആശുപത്രിയിൽ നടന്ന പരിപാടിയിൽ പട്ടികജാതി-വർഗ-പിന്നാക്കക്ഷേമ മന്ത്രി ഒ.ആർ. കേളു അധ്യക്ഷത വഹിച്ചു. ഐ.സി. ബാലകൃഷ്ണൻ എംഎൽഎ, നഗരസഭാ ചെയർമാൻ ടി.കെ. രമേശ്, ബ്ലോക്ക് പഞ്ചായത്ത് പ്രസിഡന്‍റ് സി. അസൈനാർ, അസിസ്റ്റന്‍റ് കളക്ടർ പി.പി. അർച്ചന, ബ്ലോക്ക് പഞ്ചായത്ത് വൈസ് പ്രസിഡന്‍റ് അന്പിളി സുധി, ഡെപ്യൂട്ടി ചെയർപേഴ്സണ്‍ എൽസി പൗലോസ്, ജില്ലാ മെഡിക്കൽ ഓഫീസർ ഡോ.ടി. മോഹൻ ദാസ്, ആരോഗ്യ കേരളം ജില്ലാ പ്രോഗ്രാം മാനേജർ ഡോ. സമീഹ സൈതലവി, താലൂക്ക് ആശുപത്രി സൂപ്രണ്ട് ഡോ.കെ.വി. സിന്ധു, നഗരസഭാ സ്ഥിരം സമിതി ചെയർമാൻമാരായ അനീഷ് ബി. നായർ, ലത ശശി, ഷാമില ജുനൈസ്, ഷമീർ മഠത്തിൽ, വിവിധ രാഷ്ട്രീയ പാർട്ടി പ്രതിനിധികൾ എന്നിവർ പങ്കെടുത്തു.

ജില്ലാ ശാസ്ത്രോത്സവത്തിന് സമാപനം

മുട്ടിൽ: നവ സൃഷ്ടികൾക്കും കണ്ടുപിടിത്തങ്ങൾക്കും വേദിയൊരുക്കിയ ജില്ലാ ശാസ്ത്രോത്സവം സമാപിച്ചു. മുട്ടിൽ വയനാട് ഓർഫനേജ് വൊക്കേഷണൽ ഹയർ സെക്കൻഡറി സ്കൂളിൽ രണ്ട് ദിവസങ്ങളിലായി നടന്ന ശാസ്ത്രമേളയുടെ സമാപനം ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ ഉദ്ഘാടനം ചെയ്തു. ജില്ലാ പഞ്ചായത്ത് ക്ഷേമകാര്യ സ്ഥിരം സമിതി അധ്യക്ഷൻ ജുനൈദ് കൈപ്പാണി അധ്യക്ഷത വഹിച്ചു. ജില്ലാ കളക്ടർ ഡോ. മേഘശ്രീ മുഖ്യപ്രഭാഷണം നടത്തി. ലോഗോ ഡിസൈൻ ചെയ്ത കെ.എം.സി. നിസാർ അഹമ്മദ്, മേളയിൽ പങ്കെടുത്തവർക്ക് ഭക്ഷണം പാചകം ചെയ്യാൻ നേതൃത്വം നൽകിയ ഡബ്ല്യുഎംഒ ചീഫ് കുക്ക് കെ.പി. ബഷീർ എന്നിവരെ ജില്ലാ പഞ്ചായത്ത് പ്രസിഡന്‍റ് ചടങ്ങിൽ ഉപഹാരം നൽകി ആദരിച്ചു. ജില്ലാ പഞ്ചായത്ത് വികസനകാര്യ സ്റ്റാൻഡിംഗ് കമ്മിറ്റി അധ്യക്ഷ ഉഷ തന്പി, ജില്ലാ പഞ്ചായത്തംഗം കെ.ബി. നസീമ, ജില്ലാ വിദ്യാഭ്യാസ ഉപഡയറക്ടർ വി.എ. ശശീന്ദ്രവ്യാസ്, ഡബ്ല്യുഎംഒ പ്രസിഡന്‍റ് പി.പി. അബ്ദുൾ ഖാദർ, ജോയിന്‍റ് സെക്രട്ടറി കെ. മുഹമ്മദ് ഷാ, ജില്ലാ വിദ്യാഭ്യാസ ഓഫിസർ സി.വി. മൻമോഹൻ, പഞ്ചായത്തംഗം ബി. മുഹമ്മദ് ബഷീർ, ഡയറ്റ് പ്രിൻസിപ്പൽ കെ.എം. സെബാസ്റ്റ്യൻ, എഇഒ സുനിൽകുമാർ, പിടിഎ പ്രസിഡന്‍റ് അഷ്റഫ് കൊട്ടാരം, ഡബ്ല്യുഒവി എച്ച്എസ്എസ് പ്രിൻസിപ്പൽ എൻ.യു. അൻവർഗൗസ് എന്നിവർ പ്രസംഗിച്ചു. വിജയികൾക്ക് ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ, ക്ഷേമകാര്യ സ്ഥിരം സമിതി അധ്യക്ഷൻ ജുനൈദ് കൈപ്പാണി എന്നിവർ ട്രോഫികൾ സമ്മാനിച്ചു.

തരിയോട് സെന്‍റ് മേരീസ് യുപി സ്കൂൾ പ്ലാറ്റിനം ജൂബിലി: സ്വാഗതസംഘം രൂപീകരിച്ചു

തരിയോട്: സെന്‍റ് മേരീസ് യുപി സ്കൂൾ പ്ലാറ്റിനും ജൂബിലി ആഘോഷ നടത്തിപ്പിന് 75 അംഗ സ്വാഗതസംഘം രൂപീകരിച്ചു. ഇതിനുചേർന്ന യോഗം പഞ്ചായത്ത് വൈസ് പ്രസിഡന്‍റ് പുഷ്പ മനോജ് ഉദ്ഘാടനം നിർവഹിക്കുകയും ചെയ്തു. സ്കൂൾ മാനേജർ ഫാ. തോമസ് പ്ലാശനാൽ അധ്യക്ഷത വഹിച്ചു. മുൻ പ്രധാനാധ്യാപകരായ ഏബ്രാഹം കെ. മാത്യു, ബെന്നി ആന്‍റണി, പിടിഎ പ്രസിഡന്‍റ് പയസ മാത്യു, എംപിടിഎ പ്രസിഡന്‍റ് ഷബാന അബ്ബാസ്, നിർമല ഹൈസ്കൂൾ പ്രിൻസിപ്പൽ ജോബി മാനുവൽ എന്നിവർ പ്രസംഗിച്ചു. കണ്‍വീനറായി ഏബ്രഹാം കെ. മാത്യുവിനെ തെരഞ്ഞെടുത്തു. 75 ഇന കർമപരിപാടികൾ ആസൂത്രണം ചെയ്തു. പ്രധാനാധ്യാപകൻ സജി ജോണ്‍ സ്റ്റാഫ് സെക്രട്ടറി പി. അജീഷ് എന്നിവർ സംസാരിച്ചു. 1951ൽ ആരംഭിച്ചതാണ് സ്കൂൾ. മാനന്തവാടി രൂപത കോർപറേറ്റ് എഡ്യുക്കേഷൻ ഏജൻസിക്കു കീഴിലാണ് പ്രവർത്തനം.

പുതിയിടം കപ്പേളയിൽ തിരുനാൾ 20 മുതൽ 28 വരെ

പയ്യന്പള്ളി: സെന്‍റ് കാതറിൻസ് ഫൊറോന ദേവാലയത്തിനുകീഴിൽ പുതിയിടത്തുള്ള കപ്പേളയിൽ വിശുദ്ധ യൂദാശ്ലീഹായുടെ തിരുനാൾ 20 മുതൽ 28 വരെ ആഘോഷിക്കും. 20ന് വൈകുന്നേരം 4.15ന് ഫൊറോന വികാരി ഫാ. സെബാസ്റ്റ്യൻ ഏലംകുന്നേൽ കൊടിയേറ്റും. 26 വരെ വൈകുന്നേരം 4.20ന് ജപമാല, വിശുദ്ധ കുർബാന, സന്ദേശം, നൊവേന എന്നിവ ഉണ്ടാകും. യഥാക്രമം ഫൊറോന പള്ളി അസി. വികാരി ഫാ. ജിജോ പുല്ലാട്ടുകുന്നേൽ, ഫാ. വർഗീസ് മറ്റമന, ഫാ.ഫ്രാൻസിസ് നെല്ലിക്കുന്നേൽ, ഫാ. റോബിൻ പുല്ലാട്ട്, ഫാ. ലിജോ കരിപ്പാമറ്റത്തിൽ, ഫാ. നിധിൻ ആലക്കത്തടത്തിൽ എന്നിവർ ശുശ്രൂഷകളിൽ കാർമികരാകും. തിരുനാൾദിനമായ 27ന് വൈകുന്നേരം 4.20ന് ജപമാല. അഞ്ചിന് ദ്വാരക സെന്‍റ് അൽഫോൻസ ഫൊറോന വികാരി ഫാ. ബാബു മൂത്തേടത്ത് ആഘോഷമായ വിശുദ്ധകുർബാനയിൽ കാർമികനാകും. 6.30ന് കൊയിലേരി ടൗണിലേക്ക് പ്രദക്ഷിണം, ആശീർവാദം, മേളക്കാഴ്ചകൾ. പ്രധാനതിരുനാൾദിനമായ 28ന് രാവിലെ 8.30ന് നേർച്ചകാഴ്ചകൾ. 9.30ന് ജപമാല. 10ന് ബത്തേരി അസംപ്ഷൻ ഫൊറോന അസി. വികാരി ഫാ. ജൂഡ് വട്ടക്കുന്നേലിന്‍റെ കാർമികത്വത്തിൽ വിശുദ്ധ കുർബാന, സന്ദേശം, നൊവേന. 11.30ന് ലദീഞ്ഞ്, പ്രദക്ഷിണം, പരിശുദ്ധ കുർബാനയുടെ ആശീർവാദം, മേളക്കാഴ്ചകൾ, നേർച്ചഭക്ഷണം, കൊടിയിറക്ക്.

സുവർണ ജൂബിലി ആഘോഷവും, ജൂബിലി ഭവന നിർമാണത്തിന്‍റെ തറക്കല്ലിടൽ കർമവും നാളെ

ഇരുളം: ഇരുളം സെന്‍റ് സെബാസ്റ്റ്യൻസ് ഇടവക സുവർണ ജൂബിലി ആഘോഷങ്ങൾ നാളെ രാവിലെ മാനന്തവാടി രൂപത സഹായമെത്രാൻ മാർ അലക്സ് താരാമംഗലം ഉദ്ഘാടനം ചെയ്യും. ജൂബിലിയുടെ ഓർമയ്ക്കായി ഇടവകയിൽ ഒരു നിർധന കുടുംബത്തിന് വീട് നിർമിച്ചു നല്കുന്നതിന്‍റെ തറക്കല്ലിടൽ കർമവും സഹായമെത്രാൻ നിർവഹിക്കും. തുടർന്ന് രാവിലെ 10ന് ആഘോഷമായ വിശുദ്ധ കുർബാന, പൊതുസമ്മേളനം, സ്നേഹ വിരുന്ന് എന്നിവ നടക്കും. ചടങ്ങിൽ ആദ്യകാല കുടിയേറ്റക്കാരേയും വിവിധ മേഖലകളിൽ ഉന്നത വിജയം നേടിയവരേയും ആദരിക്കും. വിശുദ്ധ സെബസ്ത്യാനോസിന്‍റെ നാമധേയത്തിൽ 1974 - 1975 ൽ അങ്ങാടിശേരിയിൽ വിശുദ്ധകുർബാന ആരംഭിക്കുകയും തുടർന്ന് 1976 ഒക്ടോബർ 20ന് ഇരുളം ദേവാലയം സ്വതന്ത ഇടവകയായി മാറുകയും ആദ്യ വികാരിയായി ഫാ. മാത്യു കല്ലുങ്കൽ സിഎംജെ നിയമിതനാകുകയും ചെയ്തു. 2000 ജൂണ്‍ എട്ടിന് പുതിയ ദേവാലയം ഇരുളം ടൗണിൽ സ്ഥാപിച്ചു. ഇടവകയുടെ കീഴിൽ വളാഞ്ചേരി സെന്‍റ് മേരീസ് കുരിശുപള്ളിയിലും ഇരുളം മേഖലയിലുമായി 220 കുടുംബങ്ങളാണുള്ളത്. ഒരു വർഷം നീണ്ടുനിൽക്കുന്ന വിവിധ പരിപാടികളാണ് സുവർണ ജൂബിലിയോടനുബന്ധിച്ച് വിഭാവനം ചെയ്തിരിക്കുന്നതെന്ന് ഇടവക വികാരി ഫാ. റോയി വട്ടക്കാട്ട്, ആഘോഷ കമ്മിറ്റി കണ്‍വീനർ വി.ഡി. ജോസ്, ട്രസ്റ്റിമാരായ പി.ജെ. ഷാജി, ആൽബർട്ട് കച്ചിറമറ്റം, ജോയി കരോട്ട്, സിസ്റ്റർ ജെസി പോൾ എസ്കെഡി എന്നിവർ അറിയിച്ചു.

വോട്ടർ പ്രശ്നം: എഎപി അപേക്ഷ നൽകി

വെള്ളമുണ്ട: പഞ്ചായത്തിൽ പുതുതായി രൂപീകരിച്ച കാപ്പുംകുന്ന്(14)വാർഡിൽ വരേണ്ട നൂറോളം വോട്ടർമാർ പീച്ചങ്കോട്(10)വാർഡിൽ മാറിക്കിടക്കുന്ന പ്രശ്നം പരിഹരിക്കുവാൻ ആം ആദ്മി പാർട്ടി പഞ്ചായത്ത് കമ്മിറ്റി മാനന്തവാടി മണ്ഡലം ഇലക്ടറൽ ഓഫീസർക്ക് അപേക്ഷ നൽകി. പ്രശ്ന പരിഹാരത്തിനു നീക്കം പഞ്ചായത്ത് ഇലക്ടറൽ ഓഫീസറുടെ ഭാഗത്ത് ഉണ്ടാകാത്ത സാഹചര്യത്തിലാണ് മണ്ഡലം ഇലക്ടറൽ ഓഫീസർക്ക് അപേക്ഷ നൽകിയത്. അപേക്ഷയിൽ അന്വേഷണം നടത്തി നടപടി സ്വീകരിക്കുമെന്ന് അധികൃതർ അറിയിച്ചതായി എഎപി പഞ്ചായത്ത് കമ്മിറ്റി പ്രസിഡന്‍റ് മനോജ്കുമാർ, സെക്രട്ടറി പി.എ. ദേവസ്യ എന്നിവർ പറഞ്ഞു.

കെ.കെ. ഏബ്രഹാമിന്‍റെ വീടിനു മുന്പിൽ നടന്ന സത്യഗ്രഹത്തിനു പിന്നിൽ രാഷ്ട്രീയ താത്പര്യങ്ങളെന്ന് പൊതുപ്രവർത്തകൻ

കൽപ്പറ്റ: പുൽപ്പള്ളി സർവീസ് സഹകരണ ബാങ്കിൽ വായ്പ വിതരണത്തിൽ നടത്തിയ ക്രമക്കേടുകൾമൂലം കടക്കെണിയിലായെന്ന് അവകാശപ്പെട്ട് കേളക്കവല പറന്പേക്കാട്ടിൽ ഡാനിയേൽ-സാറാക്കുട്ടി ദന്പതികളും 2023ൽ ആത്മഹത്യ ചെയ്ത ചെന്പകമൂല കിഴക്കേ ഇളയിടത്ത് രാജേന്ദ്രൻ നായരുടെ കുടുംബവും കെപിസിസി മുൻ ജനറൽ സെക്രട്ടറി കെ.കെ. ഏബ്രഹാമിന്‍റെ ചുണ്ടക്കൊല്ലിയിലെ വസതിക്കുമുന്പിൽ നടത്തിയ സത്യഗ്രഹത്തിനു പിന്നിൽ രാഷ്ട്രീയ താത്പര്യങ്ങളെന്ന് പൊതുപ്രവർത്തകനും അഭിഭാഷകനുമായ പുൽപ്പള്ളി കാപ്പിക്കുന്ന് കെ.എം. മനോജ് വാർത്താസമ്മേളനത്തിലാണ് ഈ ആരോപണം ഉന്നയിച്ചത്. കെപിസിസി പുനഃസംഘടനയുടെയും തദ്ദേശസ്ഥാപനങ്ങളിലേക്കുള്ള തെരഞ്ഞെടുപ്പിന്‍റെയും പശ്ചാത്തലത്തിലായിരുന്നു ഏബ്രഹാമിന്‍റെ വീടിനു മുന്പിൽ പന്തൽ കെട്ടിയുള്ള സമരം. വായ്പ വിതരണത്തിലെ ക്രമക്കേടുകളുടെ പേരിൽ ബാങ്ക് മുൻ പ്രസിഡന്‍റ് കെ.കെ. ഏബ്രഹാം ഉൾപ്പെടെയുള്ളവർക്കെതിരേ വിജിലൻസും എൻഫോഴ്സ്മെന്‍റ് ഡയറക്ടറേറ്റും രജിസ്റ്റർ ചെയ്ത കേസുകൾ കോടതിയിൽ നടന്നുവരികയാണ്. ബാങ്കിനുണ്ടായതായി കണ്ടെത്തിയ നഷ്ടം നികത്തുന്നതിന് സഹകരണ വകുപ്പ് പുറപ്പെടുവിച്ച സർച്ചാർജ് ഉത്തരവ് ഹൈക്കോടതി സ്റ്റേ ചെയ്തിരിക്കയാണ്. രാജേന്ദ്രൻനായരുടെ ആത്മഹത്യയുമായി ബന്ധപ്പെട്ടും സ്വകാര്യ പരാതിയിലും ലോക്കൽ പോലീസ് രജിസ്റ്റർ ചെയ്ത കേസുകളും കോടതിയുടെ പരിഗണനയിലാണ്. കടങ്ങൾ എഴുതിത്തള്ളി പണയവസ്തുവിന്‍റെ പ്രമാണങ്ങൾ തിരികെ നൽകുക, ശാരീരിക, മാനസിക പീഡനത്തിന് നഷ്ടപരിഹാരം അനുവദിക്കുക, വായ്പ ക്രമക്കേടിലെ മുഴുവൻ ഇരകൾക്കും നീതി ലഭ്യമാക്കുക, രാജേന്ദ്രൻ നായരുടെ ആശ്രിതനു ബാങ്കിൽ ജോലി നൽകുമെന്ന വാഗ്ദാനം പാലിക്കുക തുടങ്ങിയ ആവശ്യങ്ങൾ ഉന്നയിച്ചാണ് ഏബ്രഹാമിന്‍റെ വീടിനു മുന്പിൽ സമരം സംഘടിപ്പിച്ചത്. ഈ ആവശ്യങ്ങളൊന്നും ബാങ്ക് മുൻ പ്രസിഡന്‍റു മാത്രമായ ഏബ്രഹാമിനു പരിഹരിക്കാൻ കഴിയുന്നതല്ല. കേസുകൾ കോടതിയിലിരിക്കേ സമരം പ്രശ്നപരിഹാരത്തിന് ഉതകുന്നല്ല. കുറ്റാരോപിതനെങ്കിലും ഏബ്രഹാമിന്‍റെ വീടിനു മുന്പിൽ നടന്ന സമരം അദ്ദേഹത്തിന്‍റെ സ്വകാര്യതയിലേക്കുള്ള കടന്നുകയറ്റമാണ്. നിയമവാഴ്ചയെ വെല്ലുവിളിക്കുകയാണ് സമരക്കാർ ചെയ്തത്. ആത്മഹത്യ ചെയ്ത രാജേന്ദ്രൻ നായർ തന്‍റെ ബന്ധുവാണ്. അദ്ദേഹത്തെ വിഷം അകത്തുചെന്നു മരിച്ചനിലയിൽ കണ്ടെത്തിയ ദിവസം മൃതദേഹം പോസ്റ്റുമോട്ടത്തിനു കൊണ്ടുപോകുന്നതിനുപോലും സഹകരിക്കാത്തവരാണ് കുടുംബത്തെ സമരത്തിന് ഇറക്കിയത്. കടക്കെണിയിൽ അകപ്പെട്ടതിലുള്ള മനോവ്യഥയാണോ രാജേന്ദ്രൻ നായരെ ആത്മഹത്യയിലേക്ക് നയിച്ചത് എന്നതിൽ തനിക്ക് വ്യക്തതയില്ല. രാജേന്ദ്രൻ നായരുടെ കടം എഴുതിത്തള്ളുമെന്നും ആശ്രിതന് ബാങ്കിൽ ജോലി നൽകുമെന്നും കുടുംബത്തിന് ആരെങ്കിലും ഉറപ്പുനൽകിയതായി അറിവില്ല. രാജേന്ദ്രൻ നായരുടെ മരണത്തെക്കുറിച്ച് മകൻ പോലീസിൽ വിവരം നൽകുന്പോഴോ തുടർന്നുള്ള ദിവസങ്ങളിലോ ഇല്ലാതിരുന്ന ആരോപണമാണ് പിന്നീട് ഏബ്രഹാമിനെതിരേ ഉന്നയിച്ചത്. ആത്മഹത്യ പ്രേരണയ്ക്കും 2022ൽ ഡാനിയേൽ ദന്പതികൾ നൽകിയ പരാതിയിലും ലോക്കൽ പോലീസ് രജിസ്റ്റർ ചെയ്ത കേസുകളിൽ അറസ്റ്റിലായ ഏബ്രഹാം 43 ദിവസം റിമാൻഡിൽ കഴിഞ്ഞതാണ്. ഡാനിയേൽ ദന്പതികളുടെ പരാതിയിൽ മാസങ്ങൾ കഴിഞ്ഞ് രാജേന്ദ്രൻ നായരുടെ ആത്മഹത്യ വിവാദമായശേഷമാണ് പോലീസ് കേസെടുത്തത്. ഇഡി കേസിൽ ഏബ്രഹാം ഒന്പത് മാസം റിമാൻഡിലായിരുന്നു. വായ്പ ക്രമക്കേട് ഇരകളിൽപ്പെട്ട പറന്പേക്കാട്ട് സാറാക്കുട്ടി പുൽപ്പള്ളി പഞ്ചായത്ത് ബസ്‌സ്റ്റാൻഡിൽ അനിശ്ചിതകാല നിരാഹാര സത്യഗ്രഹം നടത്തിവരികയാണ്. ഏബ്രഹാമിന്‍റെ വീടിനു മുന്പിലെ സമരം അവസാനിപ്പിച്ചശേഷമാണ് ഇവർ നിരാഹാര സത്യഗ്രഹം തുടങ്ങിയത്. രാഷ്ട്രീയ താത്പര്യത്തിനു കുതന്ത്രങ്ങൾ പയറ്റുന്നവരുടെ ബലിയാടാണ് ഇവർ. വായ്പ വിതരണത്തിൽ ക്രമക്കേട് നടത്തിയവർക്കെതിരേ നടപടിയും ഇരകൾക്ക് നീതിയും ആവശ്യപ്പെട്ട് മുന്പ് ജനകീയ സമിതിയുടെ നേതൃത്വത്തിൽ ബാങ്കിനു മുന്പിൽ നടന്ന സമരത്തിൽ 95 ദിവസം താൻ പങ്കെടുത്തിട്ടുണ്ട്. കേസെടുത്ത സാഹചര്യത്തിലാണ് സമരത്തിൽനിന്നു ഒഴിവായതെന്നും ബത്തേരി ബാർ അസോസിയേഷൻ മുൻ പ്രസിഡന്‍റുമായ മനോജ് പറഞ്ഞു.

ആരോഗ്യ മേഖലയിൽ സമാനതകളില്ലാത്ത വികസന മുന്നേറ്റം നടപ്പാക്കി: മന്ത്രി വീണാ ജോർജ്

കൽപ്പറ്റ: ജില്ലയിലെ ആരോഗ്യ മേഖലയിൽ സമാനതകളില്ലാത്ത വികസന മുന്നേറ്റമാണ് നടപ്പാക്കുന്നതെന്നും ചികിത്സാ രംഗത്ത് ജില്ല സ്വയം പര്യാപ്തത കൈവരിക്കുന്നതായും ആരോഗ്യ വനിതാ ശിശു വികസന മന്ത്രി വീണാ ജോർജ്. വൈത്തിരി താലൂക്ക് ആശുപത്രിയിൽ സിഎസ്ആർ ഫണ്ടിൽ നിന്ന് 8.5 കോടി ചെലവഴിച്ച് നിർമിക്കുന്ന ലെവൽ മൂന്ന് ട്രോമ കെയർ സെന്‍ററിന്‍റെ നിർമാണോദ്ഘാടനം നിർവഹിച്ച് പ്രസംക്കുകയായിരുന്നു മന്ത്രി. ധനകാര്യ കമ്മീഷൻ ഫണ്ടിൽ നിന്നും 55.5 ലക്ഷം രൂപ ഉപയോഗപ്പെടുത്തി നിർമിക്കുന്ന മേപ്പാടി കടൂർ ജനകീയ ആരോഗ്യ കേന്ദ്രത്തിന്‍റെയും പൊഴുതന പാറക്കുന്ന് ജനകീയ ആരോഗ്യ കേന്ദ്രത്തിന്‍റെയും നിർമാണോദ്ഘാടനവും മന്ത്രി നിർവഹിച്ചു. വൈത്തിരി താലൂക്ക് ആശുപത്രിയിൽ മൂന്ന് നിലകളിലായാണ് ലെവൽ മൂന്ന് ട്രോമ കെയർ സെന്‍റർ നിർമിക്കുന്നത്. താഴത്തെ നിലയിൽ അഞ്ച് കിടക്കകളോടെ ട്രയാജ് ഏരിയ, മൈനർ പ്രൊസീജിയർ റൂം, റെസുസിറ്റേഷൻ മുറി, ഒന്നാം നിലയിൽ അഞ്ച് കിടക്കകളോടെ ഒബ്സർവേഷൻ റൂം, ബേണ്‍സ് റൂം, രണ്ടാമത്തെ നിലയിൽ രണ്ട് ഓപ്പറേഷൻ തിയേറ്റർ, മൂന്ന് കിടക്കകളോടു കൂടിയ ഐസിയു, രണ്ടു കിടക്കകളോടെ എച്ച്ഡിയു എന്നിവയും കെട്ടിടത്തിൽ ഉണ്ടാകും. ആശുപത്രിയിൽ ലാപ്രോസ്കോപ്പിക് സർജറി യൂണിറ്റ്, മോഡേണ്‍ ഓപ്പറേഷൻ തിയേറ്റർ പുതിയ മോർച്ചറി എന്നിവയും സജ്ജമാകും. ആശുപത്രി രോഗീ സൗഹൃദമാക്കുന്നതിന്‍റെ പ്രവർത്തികൾ അന്തിമ ഘട്ടത്തിലാണ്. ക്യാഷ്വാലിറ്റി ബ്ലോക്ക് നിർമാണത്തിനുള്ള വിശദ പദ്ധതിരേഖ തയാറാക്കി. സ്ത്രീകൾക്കും പുരുഷൻമാർക്കുമുള്ള മെഡിക്കൽ വാർഡുകൾ, മെഡിക്കൽ ഐസിയു, സ്ത്രീകൾക്കും പുരുഷൻമാർക്കുമുള്ള സൈക്യാട്രിക് വാർഡുകൾ അടങ്ങുന്ന മൾട്ടിപർപ്പസ് ബ്ലോക്ക് നിർമാണം, പുതിയ ഡയാലിസിസ് യൂണിറ്റ് നിർമാണം, ഐപി ബ്ലോക്ക് ശക്തീകരണ പ്രവൃത്തി എന്നിവയ്ക്ക് ഭരണാനുമതി ലഭിച്ചു. സീവേജ് ട്രീറ്റ്മെന്‍റ് പ്ലാന്‍റ് നിർമാണം പ്രാരംഭ ഘട്ടത്തിലാണ്. കൽപ്പറ്റ ജനറൽ ആശുപത്രിയിൽ സൗകര്യങ്ങൾ വിപുലപ്പെടുത്തുന്നതിനായി വിവിധ പദ്ധതികൾ നടപ്പാക്കുന്നതായും മന്ത്രി അറിയിച്ചു. എൻഎച്ച്എം ഫണ്ടിൽ നിന്ന് 32.70 ലക്ഷം രൂപ വിനിയോഗിച്ച് പീഡിയാട്രിക് ഐസിയു നിർമാണം പൂർത്തിയാക്കി. 89.70 ലക്ഷം രൂപ ചെലവിൽ ഒപിഡി ട്രാൻസ്ഫർമേഷൻ പ്രവൃത്തികൾ പൂർത്തിയായി. അഞ്ച് ലക്ഷം രൂപ ചെലവിൽ ആശുപത്രിയുടെ മാസ്റ്റർപ്ലാൻ തയാറാക്കി. എൻഎച്ച്എം ഫണ്ടിൽ നിന്ന് 1.5 കോടി രൂപ വിനിയോഗിച്ച് നടപ്പാക്കുന്ന സീവേജ് ട്രീറ്റ്മെന്‍റ് പ്ലാന്‍റിന് ഭരണാനുമതി ലഭിച്ചു. കോവിഡ് പാക്കേജിൽ ഉൾപ്പെടുത്തി 1.23 കോടി ചെലവിൽ ഓക്സിജൻ ജനറേറ്റർ സിസ്റ്റം പൂർത്തിയാക്കി. ബ്ലഡ് ബാങ്ക് പ്രവർത്തികൾ പൂർത്തിയായി. കിഫ്ബി ഫണ്ടിൽ നിന്ന് 9.65 കോടി രൂപ വിനിയോഗിച്ചുള്ള ക്യാഷ്വാലിറ്റി വികസനത്തിനും അനുബന്ധ പ്രവൃത്തികൾക്കും ഭരണാനുമതി ലഭിച്ചു. 23.75 കോടി രൂപ ചെലവിൽ 50 കിടക്കകളുള്ള ക്രിട്ടിക്കൽ കെയർ ബ്ലോക്ക് സജ്ജീകരിക്കുന്നതിനുള്ള നടപടികൾ പ്രാരംഭഘട്ടത്തിലാണ്. ഒപിഡി ബ്ലോക്ക് ശക്തീകരിക്കുന്നതിന് എൻഎച്ച്എം ഫണ്ടിൽ നിന്ന് 95 ലക്ഷം രൂപ വിനിയോഗിച്ചുള്ള പ്രവൃത്തികളുടെ ഡിപിആർ അന്തിമഘട്ടത്തിലാന്നെന്നും മന്ത്രി പറഞ്ഞു. പട്ടികജാതി-വർഗ-പിന്നാക്കക്ഷേമ മന്ത്രി ഒ.ആർ. കേളു അധ്യക്ഷത വഹിച്ചു. ടി. സിദ്ദിഖ് എംഎൽഎ, ജില്ലാ കളക്ടർ ഡി.ആർ. മേഘശ്രീ, കൽപ്പറ്റ ബ്ലോക്ക് പഞ്ചായത്ത് പ്രസിഡന്‍റ് ചന്ദ്രിക കൃഷ്ണൻ, വൈത്തിരി ഗ്രാമപ്പഞ്ചായത്ത് പ്രസിഡന്‍റ് എം.വി. വിജേഷ്, പൊഴുതന ഗ്രാമപ്പഞ്ചായത്ത് പ്രസിഡന്‍റ് അനസ് റോസ്ന സ്റ്റെഫി, ജില്ലാ മെഡിക്കൽ ഓഫീസർ ഡോ.ടി. മോഹൻദാസ്, ആരോഗ്യ കേരളം ജില്ലാ പ്രോഗ്രാം മാനേജർ ഡോ. സമീഹ സൈതലവി, കൽപ്പറ്റ ബ്ലോക്ക് പഞ്ചായത്ത് വൈസ് പ്രസിഡന്‍റ് ഫൗസിയ ബഷീർ, സ്റ്റാൻഡിംഗ് കമ്മിറ്റി ചെയർപേഴ്സണ്‍മാരായ ജഷീർ പള്ളിവയൽ, ബി. ആയിഷ, ബ്ലോക്ക് പഞ്ചായത്ത് അംഗം ഉഷാകുമാരി, വൈത്തിരി ഗ്രാമപ്പഞ്ചായത്ത് അംഗം ജിനിഷ, ടാറ്റ സസ്റ്റൈനബിലിറ്റി ഗ്രൂപ്പ് ഡിസാസ്റ്റർ റെസ്പോണ്‍സ് പ്രതിനിധി സുമേദ് പാട്ടീൽ, വൈത്തിരി താലൂക്ക് ആശുപത്രി സൂപ്രണ്ട് ഡോ. പ്രിയ സേനൻ, ടാറ്റ സസ്റ്റൈനബിലിറ്റി ഗ്രൂപ്പ് സോഷ്യൽ സർവീസസ് ക്ലസ്റ്റർ ഹെഡ് ശ്രീരംഗ് ധാവലെ, ടാറ്റ എൽക്സി സിഎസ്ആർ മേധാവി ശരത് നായർ, ജനപ്രതിനിധികൾ, വൈത്തിരി താലൂക്ക് ആശുപത്രി മാനേജ്മെന്‍റ് കമ്മിറ്റി അംഗങ്ങൾ, ആരോഗ്യ പ്രവർത്തകർ, രാഷ്ട്രീയപാർട്ടി പ്രതിനിധികൾ എന്നിവർ പങ്കെടുത്തു.

തെരുവുനായ ശല്യം: ന്യൂസ് പേപ്പർ ഏജന്‍റുമാർ ധർണ നടത്തി

കൽപ്പറ്റ: തെരുവുനായ ശല്യത്തിനു പരിഹാരം ആവശ്യപ്പെട്ട് ന്യൂസ്പേപ്പർ ഏജൻസീസ് അസോസിയേഷൻ(എൻപിഎഎ) ജില്ലാ കമ്മിറ്റിയുടെ നേതൃത്വത്തിൽ കളക്ടറേറ്റ് പടിക്കൽ ധർണ നടത്തി. സംസ്ഥാന പ്രസിഡന്‍റ് പി.കെ. സത്താർ ഉദ്ഘാടനം ചെയ്തു. തെരുവുനായ ശല്യം ഒഴിവാക്കുന്നതിന് ജില്ലാ ഭരണകൂടത്തിന്‍റെ ഇടപെടൽ അനിവാര്യതയാണെന്ന് അദ്ദേഹം പറഞ്ഞു. ജില്ലാ പ്രസിഡന്‍റ് വിശ്വനാഥൻ ചൂതുപാറ അധ്യക്ഷത വഹിച്ചു. സംസ്ഥാന കമ്മിറ്റി അംഗം അബു കന്പളക്കാട്, പൊതുപ്രവർത്തകൻ ബി. രാധാകൃഷ്ണപിള്ള എന്നിവർ പ്രസംഗിച്ചു. സാബു അതിരാറ്റുകുന്ന് സ്വാഗതവും ബിജു പുൽപ്പള്ളി നന്ദിയും പറഞ്ഞു.

പിന്നാക്ക വിഭാഗക്കാർ മുഖ്യധാരയിലെത്തണമെന്ന്

പനമരം: പിന്നാക്ക വിഭാഗക്കാർ ഉന്നത വിദ്യാഭ്യാസത്തിലൂടെ സമൂഹത്തിന്‍റെ മുഖ്യധാരയിലെത്തണമെന്ന് പട്ടികജാതി-വർഗ-പിന്നാക്ക ക്ഷേമ മന്ത്രി ഒ.ആർ കേളു. പഞ്ചായത്തിലെ കൂവമൂലക്കുന്ന് ഉന്നതിയിൽ സാംസ്കാരിക നിലയവും സാമൂഹിക പഠനമുറിയും ഉദ്ഘാടനം ചെയ്ത് പ്രസംഗിക്കുകയായിരുന്നു മന്ത്രി. പട്ടികവർഗ വികസന വകുപ്പ് കോർപസ് ഫണ്ടിൽനിന്നു അനുവദിച്ച 25 ലക്ഷം രൂപ ചെലവഴിച്ചാണ് സാംസ്കാരിക നിലയവും പഠനമുറിയും നിർമിച്ചത്. പട്ടികജാതിക്കാരുടെ സാംസ്കാരിക വളർച്ചയ്ക്കും കുട്ടികളുടെ വിദ്യാഭ്യാസ മുന്നേറ്റത്തിനും സാംസ്കാരിക നിലയം സഹായകമാകും. വിദ്യാർഥികൾ പഠനമുറി ഉപയോഗപ്പെടുത്തണം. സർക്കാർ നടപ്പാക്കുന്ന പദ്ധതികൾ വിദ്യാർഥികൾ പ്രയോജനപ്പെടുത്തണമെന്നും മന്ത്രി പറഞ്ഞു. പഞ്ചായത്ത് പ്രസിഡന്‍റ് ലക്ഷ്മി ആലക്കമുറ്റം അധ്യക്ഷത വഹിച്ചു. പഞ്ചായത്ത് വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സണ്‍ ഷീമ മാനുവൽ, പഞ്ചായത്ത് അംഗം ആയിഷ ഉമ്മർ, ഉന്നതി മൂപ്പൻ ബാബുരാജ്, എസ്ടി പ്രമോട്ടർ കെ.ആർ. മണികണ്ഠൻ, മാനന്തവാടി ട്രൈബൽ എക്സ്റ്റൻഷൻ ഓഫീസർ എം. മജീദ്, ജില്ലാ നിർമിതി കേന്ദ്രം എക്സിക്യുട്ടീവ് സെക്രട്ടറി ഒ.കെ. സാജിത്, പനമരം ട്രൈബൽ എക്സ്റ്റൻഷൻ ഓഫീസർ ഷില്ലി ജോർജ് എന്നിവർ പ്രസംഗിച്ചു.

സ്ത്രീകളുടെയും കുട്ടികളുടെയും ആശുപത്രി ഉദ്ഘാടനം ഇന്ന്

സുൽത്താൻ ബത്തേരി: നബാർഡ് അനുവദിച്ച 25 കോടി രൂപ ചെലവഴിച്ച് ഗവ.താലൂക്ക് ആശുപത്രി വളപ്പിൽ നിർമാണം പൂർത്തിയാക്കിയ സ്ത്രീകളുടെയും കുട്ടികളുടെയും ആശുപത്രിയുടെ ഉദ്ഘാടനം ഇന്ന് ഉച്ചകഴിഞ്ഞ് രണ്ടിന് ആരോഗ്യ-വനിതാശിശു വികസന മന്ത്രി വീണാ ജോർജ് നിർവഹിക്കും. തിമിര ശസ്ത്രക്രിയ പുതിയ സാങ്കേതികവിദ്യ ഉപയോഗിച്ച് നടത്തുന്നതിനു 20 ലക്ഷം രൂപ ചെലവഴിച്ച് ബ്ലോക്ക് പഞ്ചായത്ത് വാങ്ങിയ ഫെക്കോ എമൽസിഫിക്കേഷൻ മെഷീൻ, വയോജന സൗഹൃദ കേന്ദ്രം, ഭിന്നശേഷി സൗഹൃദ കേന്ദ്രം, ജീവിതശൈലി രോഗങ്ങളുടെ പ്രാരംഭ കണ്ടെത്തലും സമയബന്ധിത ഇടപെടലും ലക്ഷ്യമിട്ട് ആരംഭിച്ച 360ത്ഥ മെറ്റബോളിക് സെന്‍റർ, ദന്ത സംബന്ധമായ പ്രശ്നങ്ങൾക്ക് മികച്ച ചികിത്സ ലഭ്യമാക്കുന്ന ഡെന്‍റൽ പോളിക്ലിനിക്, വയോജനങ്ങൾക്കു പ്രത്യേകം ഫിസിയോതെറാപ്പി യൂണിറ്റ്, 10 ബെഡ് വാർഡ്, റീഹാബിലിറ്റേഷൻ സംവിധാനം എന്നിവയും മന്ത്രി ഉദ്ഘാടനം ചെയ്യും. മന്ത്രി ഒ.ആർ. കേളു അധ്യക്ഷത വഹിക്കും. ബ്ലോക്ക് പഞ്ചായത്ത് പ്രസിഡന്‍റ് സി. അസൈനാർ, ഐ.സി ബാലകൃഷ്ണൻ എംഎൽഎ, നഗരസഭാ ചെയർമാൻ ടി.കെ രമേശ്, വൈസ് ചെയർപേഴ്സണ്‍ എൽസി പൗലോസ്, ബ്ലോക്ക് വൈസ് ചെയർപേഴ്സണ്‍ അന്പിളി സുധി, ജനപ്രതിനിധികളായ അനീഷ് ബി. നായർ, ലത ശശി, എടക്കൽ മോഹനൻ, നഗരസഭാ സൈനിംഗ് കമ്മിറ്റി ചെയർപേഴ്സണ്‍ ഷാമില ജുനൈസ്, ആരോഗ്യകേരളം ജില്ലാ പ്രോഗ്രാം മാനേജർ ഡോ.സമീഹ സെയ്തലവി തുടങ്ങിയവർ പങ്കെടുക്കും. മീനങ്ങാടി: നാഷണൽ ഹെൽത്ത് മിഷൻ അനുവദിച്ച 6.30 കോടി രൂപ ചെലവഴിച്ച് സാമൂഹികാരോഗ്യ കേന്ദ്രത്തിൽ മാതൃശിശു ആരോഗ്യ സമുച്ചയത്തിനു നിർമിച്ച കെട്ടിടം ഇന്ന് ഉച്ചയ്ക്ക് 12.30ന് മന്ത്രി വീണാ ജോർജ് ഉദ്ഘാടനം ചെയ്യും. ആർദ്രം പദ്ധതിയിൽ നവീകരിച്ച ഫാർമസി, ബ്ലോക്ക് പൊതുജനാരോഗ്യ വിഭാഗം എന്നിവയുടെ ഉദ്ഘാടനവും മന്ത്രി നിർവഹിക്കും. മന്ത്രി ഒ.ആർ. കേളു അധ്യക്ഷത വഹിക്കും. ഐ.സി. ബാലകൃഷ്ണൻ എംഎൽഎ, ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ, ബത്തേരി ബ്ലോക്ക് പഞ്ചായത്ത് പ്രസിഡന്‍റ് സി. അസൈനാർ തുടങ്ങിയവർ പങ്കെടുക്കും.

ചുമട്ടുതൊഴിലാളികൾ ക്ഷേമനിധി ബോർഡ് ഓഫീസുകളിലേക്ക് മാർച്ച് നടത്തി

കൽപ്പറ്റ: ചുമട്ടുതൊഴിലാളി ഫെഡറേഷന്‍റെ(ഐഎൻടിയുസി)നേതൃത്വത്തിൽ കൽപ്പറ്റ, ബത്തേരി, മാനന്തവാടി, പനമരം, മീനങ്ങാടി, പുൽപ്പള്ളി ക്ഷേമനിധി ബോർഡ് ഓഫീസുകളിലേക്ക് മാർച്ചും തുടർന്ന് ധർണയും നടത്തി. ചുമട്ടുതൊഴിലുമായി ബന്ധപ്പെട്ട നിയമങ്ങൾ കലോചിതമാക്കുക, ക്ഷേമനിധി ആനുകൂല്യങ്ങൾ വർധിപ്പിക്കുക, തൊഴിൽ സുരക്ഷ ഉറപ്പുവരുത്തുക തുടങ്ങിയ ആവശ്യങ്ങൾ ഉന്നയിച്ചായിരുന്നു സമരം. പുൽപ്പള്ളിയിൽ ഐഎൻടിയുസി ജില്ലാ പ്രസിഡന്‍റ് പി.പി. ആലി ഉദ്ഘാടനം ചെയ്തു. മണി പാന്പനാൽ അധ്യക്ഷത വഹിച്ചു. എൻ.യു. ഉലഹന്നാൻ, പി.എൻ. ശിവൻ, സി.എ. ഗോപി, ജിനി തോമസ്, പി.ഡി. ജോണി, മനോജ് ഉതുപ്പാൻ, റെജു ഇരുളം, സുരേന്ദ്രൻ എന്നിവർ പ്രസംഗിച്ചു. മാനന്തവാടിയിൽ ടി.എ. റെജി ഉദ്ഘാടനം ചെയ്തു. കെ.വി. ഷിനോജ് അധ്യക്ഷത വഹിച്ചു. എം.പി. ശശികുമാർ, പി.ബി. മൊയ്തു, ജോർജ് പടകൂട്ടിൽ, മൊയ്തീൻകുട്ടി എന്നിവർ പ്രസംഗിച്ചു. ബത്തേരിയിൽ ഐഎൻടിയുസി സീനിയർ നേതാവ് സി.പി. വർഗീസ് ഉദ്ഘാടനം ചെയ്തു. പ്രതീഷ് വടക്കനാട് അധ്യക്ഷത വഹിച്ചു. ഐഎൻടിയുസി സംസ്ഥാന എക്സിക്യുട്ടീവ് കമ്മിറ്റിയംഗം ഉമ്മർ കുണ്ടാട്ടിൽ, വി.പി. മൊയ്തീൻ, ജിജി അലക്സ്, കെ. റിയാസ് എന്നിവർ പ്രസംഗിച്ചു. മീനങ്ങാടിയിൽ സലാം മീനങ്ങാടി ഉദ്ഘാടനം ചെയ്തു. ഷൈജു അധ്യക്ഷത വഹിച്ചു. എൽദോ കുന്പളേരി, ഉമ്മർ കാക്കവയൽ, പുരുഷോത്തമൻ എന്നിവർ പ്രസംഗിച്ചു. മീനങ്ങാടിയിൽ ബേബി തുരുത്തിയിൽ ഉദ്ഘാടനം ചെയ്തു. ഷാജി കോരൻകുന്നൻ അധ്യക്ഷത വഹിച്ചു. കൽപ്പറ്റയിൽ കെ. കെ. രാജേന്ദ്രൻ ഉദ്ഘാടനം ചെയ്തു. ലത്തീഫ് മാടായി അധ്യക്ഷത വഹിച്ചു. അഷ്റഫ് ഗൂഡലായി, മഹേഷ് കേളോത്ത്, കെ. നാസർ എന്നിവർ പ്രസംഗിച്ചു.

ജില്ലാ സ്പോർട്സ് കൗണ്‍സിൽ: കെ.എം. ഫ്രാൻസിസ് പ്രസിഡന്‍റ്

കൽപ്പറ്റ: ജില്ലാ സ്പോർട്സ് കൗണ്‍സിൽ പ്രസിഡന്‍റായി കെ.എം. ഫ്രാൻസിസിനെയും വൈസ് പ്രസിഡന്‍റായി കെ.പി. വിജയിയെയും തെരഞ്ഞെടുത്തു. എം. മധുവാണ് സംസ്ഥാന സ്പോർട്സ് കൗണ്‍സിൽ പ്രതിനിധി. ജില്ലാ സ്പോർട്സ് കൗണ്‍സിൽ രൂപീകരണത്തിന് ചേർന്ന പൊതുയോഗത്തിലായിരുന്നു തെരഞ്ഞെടുപ്പ്.അസിസ്റ്റന്‍റ് രജിസ്ട്രാർ ഷിജി വർഗീസ് തെരഞ്ഞെടുപ്പ് നിയന്ത്രിച്ചു.

തരിയോട് പഞ്ചായത്ത് ലൈഫ് പദ്ധതി: 75 വീടുകൾ കൂടി അനുവദിച്ചു

കാവുംമന്ദം: തരിയോട് പഞ്ചായത്തിൽ ജനറൽ വിഭാഗത്തിലെ 63 ഉം പട്ടികവർഗത്തിലെ 13 ഉം കുടുംബങ്ങൾക്കുകൂടി വീട് അനുവദിച്ചു. ഇതിന്‍റെ പ്രഖ്യാപനവും ഗുണഭോക്താക്കളുമായുള്ള കരാർ വയ്ക്കൽ ഉദ്ഘാടനവും പഞ്ചായത്ത് പ്രസിഡന്‍റ് ഷമീം പാറക്കണ്ടി നിർവഹിച്ചു. വൈസ് പ്രസിഡന്‍റ് പുഷ്പ മനോജ് അധ്യക്ഷത വഹിച്ചു. ലൈഫ്മിഷൻ ജില്ലാ കോർഓഡിനേറ്റർ ഒ.വി. മാലതി മുഖ്യാതിഥിയായി. പഞ്ചായത്ത് സ്റ്റാൻഡിംഗ് കമ്മിറ്റി അധ്യക്ഷരായ ഷീജ ആൻറണി, രാധ പുലിക്കോട്, വി.ജി. ഷിബു, അംഗങ്ങളായ കെ.വി. ഉണ്ണിക്കൃഷ്ണൻ, ചന്ദ്രൻ മടത്തുവയൽ, സൂന നവീൻ, ബീന റോബിൻസണ്‍, വിജയൻ തോട്ടുങ്കൽ, വത്സല നളിനാക്ഷൻ, സിബിൽ എഡ്വേർഡ്, കെ.എൻ. ഗോപിനാഥൻ, പഞ്ചായത്ത് സെക്രട്ടറി എം.പി. രാജേന്ദ്രൻ, അസി.സെക്രട്ടറി സി.കെ. റസാഖ് എന്നിവർ പ്രസംഗിച്ചു. വിഇഒമാരായ വി.എം. ശ്രീജിത്ത് സ്വാഗതവും ഫ്രാൻസിസ് ലോറൻസ് നന്ദിയും പറഞ്ഞു.

വൈത്തിരിയിലും നല്ലൂർനാടിലും പുനർജനി ക്യാന്പ് നടത്തി

കൽപ്പറ്റ: മേപ്പാടി ഗവ.പോളിടെക്നിക് കോളജിലെ എൻഎസ്എസ് വൊളന്‍റിയർമാരുടെ നേതൃത്വത്തിൽ വൈത്തിരി ഗവ.താലൂക്ക് ആശുപത്രിയിൽ പുനർജനി ക്യാന്പ് സംഘടിപ്പിച്ചു. 80 വൊളന്‍റിയർമാർ പങ്കെടുത്ത ചതുർദിന ക്യാന്പ് വൈത്തിരി പഞ്ചായത്ത് പ്രസിഡന്‍റ് എം.വി. വിജേഷ് ഉദ്ഘാടനം ചെയ്തു. ഹോസ്പിറ്റൽ സൂപ്രണ്ട് പ്രിയ സേനൻ അധ്യക്ഷത വഹിച്ചു. ഡെപ്യൂട്ടി നഴ്സിംഗ് സൂപ്രണ്ട് ആനിയമ്മ മാത്യു, കോളജ് പ്രിൻസിപ്പൽ ബി.എസ് ജവഹറലി, ഇലക്ട്രോണിക്സ് വിഭാഗം തലവൻ കെ.പി. സുരേഷ്, എൻഎസ്എസ് പ്രോഗ്രാം ഓഫീസർ കെ.ടി. സ്മിനിമോൾ, കെ.എസ്. പ്രകാശ്ബാബു, വൊളന്‍റിയർ സെക്രട്ടറി ലിയ അന്ന ഫ്രാൻസിസ് എന്നിവർ പ്രസംഗിച്ചു. സർക്കാർ സ്ഥാപനങ്ങളിലെ തകരാറിലായ ഉപകരണങ്ങൾ സ്റ്റേറ്റ് ടെക്നിക്കൽ സെല്ലിന്‍റെ നേതൃത്വത്തിൽ എൻഎസ്എസ് ഏറ്റെടുത്ത് ഉപയോഗയോഗ്യമാക്കുന്ന പദ്ധതിയാണ് പുനർജനി ക്യാന്പ്. മാനന്തവാടി: ഗവ.പോളിടെക്നിക്ക് കോളജിലെ എൻഎസ്എസ് വൊളന്‍റിയർമാരുടെ നേതൃത്വത്തിൽ നല്ലൂർനാട് അംബേദ്കർ കാൻസർ സെന്‍ററിൽ നടത്തിയ മൂന്നു ദിവസത്തെ പുനർജനി ക്യാന്പിൽ വീൽ ചെയറുകൾ, സ്ട്രക്ചറുകൾ, കസേരകൾ, ട്രോളികൾ എന്നിവ ഉപയോഗയോഗ്യമാക്കിബ്ലോക്ക് പഞ്ചായത്ത് പ്രസിഡന്‍റ് ജസ്റ്റിൻ ബേബി ഉദ്ഘാടനം ചെയ്തു. എൻഎസ്എസ് പ്രോഗ്രാം ഓഫീസർ ജ്യോതിസ് പോൾ അധ്യക്ഷത വഹിച്ചു. മെഡിക്കൽ ഓഫീസർ ഡോ.പി.എച്ച്. സൂര്യ, ഹെഡ് നഴ്സ് ആലീസ് മാത്യു, അസിസ്റ്റന്‍റ് പ്രോഗ്രാം ഓഫീസർ എം.എ. ധനിത, സ്റ്റാഫ് അംഗങ്ങളായ ജിഷ്ണു ജയാനന്ദൻ, ഒ.ജി. സന്ദീപ്, അബ്ദുൾ റഷീദ്, വി.എസ്. ശ്രീജിത്ത്, പി.ടി. സുബാഷ്, ജിഷ്ണു ജയാനന്ദൻ, ശ്രിയ, കെ.ജെ. അബിൻ എന്നിവർ പ്രസംഗിച്ചു.

ജില്ലാ സ്കൂൾശാസ്ത്രോത്സവം തുടങ്ങി

കൽപ്പറ്റ: ജില്ലാ സ്കൂൾ ശാസ്ത്രോത്സവം വയനാട് ഓർഫനേജിന് കീഴിൽ മുട്ടിൽ കാന്പസിൽ പ്രവർത്തിക്കുന്ന വൊക്കേഷണൽ ഹയർ സെക്കൻഡറി, ഹയർ സെക്കൻഡറി, ഹൈസ്കൂൾ, സ്പീച്ച് ആൻഡ് ഹിയറിംഗ്, യുപി സ്കൂളുകളിൽ ആരംഭിച്ചു. ക്ഷീരവികസന-മൃഗസംരക്ഷണ മന്ത്രി ജെ. ചിഞ്ചുറാണി ഉദ്ഘാടനം ചെയ്തു. ശാസ്ത്രപ്രതിഭകളുടെ അരങ്ങേറ്റമാണ് ശാസ്ത്രമേളകളിലൂടെ സംഭവിക്കുന്നതെന്ന് അവർ പറഞ്ഞു. കുട്ടികളുടെ കണ്ടെത്തലുകൾ പലപ്പോഴും സർക്കാർ വകുപ്പുകളുടെ തീരുമാനങ്ങളെപോലും സ്വാധീനിക്കുന്നുണ്ട്. വലിയ പ്രാധാന്യമാണ് സ്കൂൾ ശാസ്ത്രമേളകൾക്ക് സർക്കാർ നൽകുന്നത്. മറ്റു മേഖലകളിൽനിന്നു വ്യത്യസ്തമായി പഠനപ്രവർത്തനങ്ങളുടെ ഭാഗമായ കാര്യങ്ങളാണ് ശാസ്ത്രോത്സവങ്ങളിൽ നടക്കുന്നത്. കേരളത്തിനുപുറത്ത് സ്കൂൾ മേളകൾക്ക് ഇത്രയും പ്രാധാന്യം ലഭിക്കുന്നില്ലെന്നും മന്ത്രി പറഞ്ഞു. ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ അധ്യക്ഷത വഹിച്ചു. ജില്ലാ വിദ്യാഭ്യാസ ഉപഡയറക്ടർ വി.എ. ശശീന്ദ്രവ്യാസ്, ജില്ലാ പഞ്ചായത്ത് വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ എം. മുഹമ്മദ് ബഷീർ, ശ്രീജിത്ത് വാകേരി, ഡബ്ലിയു ഒവിഎച്ച്എസ്എസ് പ്രിൻസിപ്പൽ എൻ.യു. അൻവർഗൗസ്, പിടിഎ പ്രസിഡന്‍റ് അഷ്റഫ് കൊട്ടാരം, പ്രധാനാധ്യാപിക പി. ശ്രീജ, ബിനു മോൾ ജോസ്, നഫീസത്ത് എന്നിവർ പ്രസംഗിച്ചു. ശാസ്ത്രോത്സവത്തിൽ വിവിധ വിഭാഗങ്ങളിൽ 1,500 ഓളം പ്രതിഭകളാണ് മാറ്റുരയ്ക്കുന്നത്. തത്സമയ മത്സരങ്ങൾക്കാണ് മേളയിൽ കൂടുതൽ പ്രാധാന്യം. ശാസ്ത്രനാടകം, തത്സമയ നിർമാണം, പ്രാദേശിക ചരിത്രരചന, ഡിജിറ്റൽ പെയിന്‍റിംഗ് തുടങ്ങിയ മത്സരങ്ങൾ ഇന്നലെ നടന്നു. ഇന്നു വൈകുന്നേരം മേള സമാപന സമ്മേളനം പട്ടികജാതി-വർഗ-പിന്നാക്ക ക്ഷേമ മന്ത്രി ഒ.ആർ. കേളു ഉദ്ഘാടനം ചെയ്യും. ടി. സിദ്ദിഖ് എംഎൽഎ അധ്യക്ഷത വഹിക്കും.

പള്ളിച്ചിറ ചാത്തമംഗലത്ത് കാട്ടാനകൾ കൃഷി നശിപ്പിച്ചു

പുൽപ്പള്ളി: പഞ്ചായത്തിലെ പള്ളിച്ചിറ ചാത്തമംഗലത്ത് കാട്ടാനകൾ വൻതോതിൽ കൃഷി നശിപ്പിച്ചു. മാളപ്പുര സരോജിനി, കൈനികുടി ബേബി, സതീശൻ ചാത്തമംഗലം എന്നിവരുടെ കൃഷിയാണ് നശിച്ചത്. സതീശന്‍റെ കതിരിടാറായ അരയേക്കറോളം നെൽക്കകൃഷി നശിച്ചു. തെങ്ങ്, കമുങ്ങ് ഉൾപ്പെടെയുള്ള കൃഷികളും നശിച്ചതിൽ ഉൾപ്പെടും. വീട്ടിമൂല വനാതിർത്തിയിലെ തകരാറിലായ കിടങ്ങും വൈദ്യുത വേലിയും മറികടന്നാണ് ആനകൾ കൃഷിയിടങ്ങളിൽ ഇറങ്ങിയത്. ചാത്തമംഗലത്തും സമീപങ്ങളിലും ആനശല്യം കലശലാണ്. എന്നിട്ടും വേലിയും കിടങ്ങും നന്നാക്കുന്നതിന് നടപടിയില്ല. രാത്രി കാടിറങ്ങുന്ന ആനകൾ പലപ്പോഴും നേരം പുലർന്നശേഷമാണ് മടങ്ങുന്നത്. ആളുകൾ രാത്രിയിൽ മാത്രമല്ല, പുലർച്ചെയും വീടിനു പുറത്തിറങ്ങാൻ ഭയക്കുകയാണ്. ആനകളെ ഉൾവനത്തിലേക്ക് തുരത്തണമെന്നാണ് നാട്ടുകാരുടെ ആവശ്യം.

ആരോഗ്യമേഖലയിൽ ജില്ലയിൽ കുതിച്ചുചാട്ടം: മന്ത്രി ഒ.ആർ. കേളു

കൽപ്പറ്റ: ആരോഗ്യ മേഖലയിൽ ജില്ല പുരോഗതിയുടെ വഴിയിൽ കുതിച്ചുപായുകയാണെന്ന് പട്ടികജാതി-വർഗ-പിന്നാക്ക ക്ഷേമ മന്ത്രി ഒ.ആർ. കേളു പ്രസ്താവനയിൽ പറഞ്ഞു. ജില്ലയിൽ മെഡിക്കൽ കോളജ് സ്ഥാപിക്കണമെന്ന ഒന്നാം പിണറായി വിജയൻ സർക്കാരിന്‍റെ നിശ്ചയദാർഢ്യത്തിന്‍റെ ഫലമായാണ് മാനന്തവാടി ജില്ലാ ആശുപത്രി മെഡിക്കൽ കോളജാക്കിയത്. ഇവിടേക്ക് 125 അധ്യാപക തസ്തികകളും 15 അനധ്യാപക തസ്തികകളും ഉൾപ്പെടെ 140 തസ്തികകൾ സർക്കാർ അനുവദിച്ചു. ന്യൂറോളജി, ന്യൂറോ സർജറി, കാർഡിയോളജി, കാർഡിയോ തൊറാസിക് സർജറി, നെഫ്രോളജി സൂപ്പർ സ്പെഷാലിറ്റി വകുപ്പുകളിലായി അസോസിയറ്റ് പ്രഫസർ, അസിസ്റ്റന്‍റ് പ്രഫസർ, സീനിയർ റസിഡന്‍റ് ഉൾപ്പെടെ 15 തസ്തികകളും അനുവദിച്ചു. മാനന്തവാടിയിൽ നഴ്സിംഗ് കോളജ് അനുവദിച്ചത് ഉന്നത വിദ്യാഭ്യാസ മേഖലയിൽ നേട്ടമായി. മെഡിക്കൽ കോളജ് ആശുപത്രിയിൽ കാർഡിയോളജി വിഭാഗവും കാത്ത് ലാബും പ്രവർത്തനമാരംഭിച്ചതും സൂപ്പർ സ്പെഷാലിറ്റി തസ്തികകൾ അനുവദിച്ചതും എടുത്തുപറയേണ്ടതാണ്. മെഡിക്കൽ കോളജിൽ 50 എംബിബിഎസ് സീറ്റിന് നാഷണൽ മെഡിക്കൽ കമ്മീഷന്‍റെ അംഗീകാരം ലഭിച്ചത് വികസന നേട്ടമാണ്. മെഡിക്കൽ കോളജിൽ അടിസ്ഥാന സൗകര്യ വികസനത്തിന് എംഎൽഎഫണ്ടിൽനിന്നു ഒന്പത് വർഷത്തിനകം പത്ത് കോടി രൂപ ചെലവഴിച്ചു. നവകേരള സദസിന്‍റെ ഭാഗമായി അനുവദിച്ച ഏഴ് കോടി വിനിയോഗിച്ച് സിടി സ്കാനർ ഉൾപ്പെടെ ഉപകരണങ്ങൾ അടുത്തദിവസങ്ങളിൽ ആശുപത്രിയിൽ എത്തിക്കും. പോസ്റ്റ് ഓഫീസ് ജംഗ്ഷൻ മുതൽ പഴശികുടീരം വരെ റോഡുകളും ആശുപത്രി ഇന്േ‍റണൽ റോഡുകളും ആധുനിക രീതിയിൽ നവീകരിക്കുന്നതിന് രണ്ട് കോടി രൂപ അനുവദിച്ച് ടെൻഡർ നടപടികൾ പൂർത്തിയാക്കിയതായും മന്ത്രി പറഞ്ഞു.

ചുണ്ടേൽ പള്ളിയിൽ വിശുദ്ധ യൂദാ തദ്ദേവൂസിന്‍റെ തിരുനാൾ 19 മുതൽ

കൽപ്പറ്റ: ചൂണ്ടേൽ സെന്‍റ് ജൂഡ്സ് തീർഥാടനകേന്ദ്രത്തിൽ വിശുദ്ധ യൂദാ തദ്ദേവൂസിന്‍റെ രക്തസാക്ഷിത്വ തിരുനാൾ 19 മുതൽ 28 വരെ ആഘോഷിക്കും. 19ന് വൈകുന്നേരം നാലിന് ആരംഭിക്കുന്ന ജപമാലയ്ക്കുശേഷം വികാരി ഫാ.ഏബ്രഹാം ആകശാലയിൽ കൊടിയേറ്റും. 4.30ന് കോഴിക്കോട് രൂപത പ്രൊക്യുറേറ്റർ ഫാ.പോൾ പേഴ്സി ഡിസിൽവയുടെ മുഖ്യകാർമികത്വത്തിൽ ദിവ്യബലി, നൊവേന, തിരുശേഷിപ്പുവണക്കം. 20ന് രാവിലെ ഏഴിനും 10.30നും 4.30നും ദിവ്യബലി, നൊവേന, തിരുശേഷിപ്പുവണക്കം. യഥാക്രമം ഫാ.സനൽ ലോറൻസ്, കണ്ണൂർ രൂപത പ്രൊക്യുറേറ്റർ ഫാ.ജോർജ് പൈനാടത്ത് എന്നിവർ കാർമികരാകും. 21 മുതൽ 26 വരെ രാവിലെ 11നും വൈകുന്നേരം അഞ്ചിനും ദിവ്യബലി, നൊവേന, തിരുശേഷിപ്പുവണക്കം. യഥാക്രമം ഫാ.ഷാജൻ ജോസഫ്, ഫാ.ജോണ്‍സണ്‍ കൊച്ചുപറന്പിൽ, ഫാ.ജോസഫ് ഫെർണാണ്ടസ്, ഫാ.അജിത്ത് ആന്‍റണി ഫെർണാണ്ടസ്, ഫാ.സജീഷ് പുതിയവീട്ടിൽ, ഫാ.ജൂബി ചാക്കോ, ഫാ.ജോഷി പെരിഞ്ചേരി, ഫാ.തോമസ് കപ്പലുമാക്കൽ, ഫാ.ഷിജോയ് ഫ്രാൻസിസ്, ഫാ.വിൻസന്‍റ് പുളിക്കൽ, ഫാ. ഏബ്രഹാം ആകശാലയിൽ, ഫാ.റിജോയ് പാത്തിവയൽ എന്നിവർ കാർമികരാകും. 27ന് രാവിലെ ഏഴിനും 10.30നും വൈകുന്നേരം 4.30നും ദിവ്യബലി, നൊവേന, തിരുശേഷിപ്പുവണക്കം. യഥാക്രമം ഫാ.റോയ്സണ്‍ ആന്‍റണി, ഫാ.സാൻജോസ് അനിൽ എന്നിവർ മുഖ്യകാർമികരാകും. 28ന് രാവിലെ 11ന് ഫാ.ഡാനി ജോസഫ് പടിപറന്പിലിന്‍റെ കാർമികത്വത്തിൽ ദിവ്യബലി, നൊവേന, തിരുശേഷിപ്പുവണക്കം. വൈകുന്നേരം നാലിന് കോഴിക്കോട് അതിരൂപത ആർച്ച് ബിഷപ് ഡോ.വർഗീസ് ചക്കാലക്കലിനു സ്വീകരണം. 4.30ന് അതിരൂപതാധ്യക്ഷന്‍റെ മുഖ്യകാർമികത്വത്തിൽ സാഘോഷമായ തിരുനാൾ ദിവ്യബലി, നൊവേന, തിരുശേഷിപ്പുവണക്കം. 6.30ന് സ്നേഹവിരുന്ന്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]