റിസർച്ച് ആൻഡ് സ്കിൽ സെന്‍ററും മീഡിയ റൂമും ഉദ്ഘാടനം ചെയ്തു

ചെറുപുഴ: മാത്തിൽ ഗുരുദേവ് ആർട്സ് ആൻഡ് സയൻസ് കോളജിൽ റിസർച്ച് ആൻഡ് സ്കിൽ സെന്‍ററും മീഡിയ റൂമും ടി.ഐ. മധുസൂദനൻ എംഎൽഎ ഉദ്ഘാടനം ചെയ്തു. ഗുരുദേവ് ന്യൂസ്‌ ലെറ്ററിന്‍റെ സ്വിച്ച്ഓൺ കർമവും എംഎൽഎ നിർവഹിച്ചു.

കാങ്കോൽ ആലപ്പടമ്പ് പഞ്ചായത്ത് പ്രസിഡന്‍റ് എം.വി. സുനിൽകുമാർ, കോളജ് പ്രിൻസിപ്പൽ റവ. ഡോ. സാമുവൽ പുതുപ്പാടി, കോളജ് ചീഫ് ബർസാർ റവ. ഡോ. വർഗീസ് താന്നിക്കാകുഴി, യുഎസ്എ ആസ്ഥാനമായി പ്രവർത്തിക്കുന്ന ഗ്ലോബൽ യംഗ് റിസേർച്ചേഴ്സ് അക്കാദമിയിലെ ഡോ. വിപിൻദേവ്, മാധ്യമ പ്രവർത്തകൻ ഹരിഹരൻ, കോളജ് വൈസ് പ്രിൻസിപ്പൽ പി. വിനോദ് കുമാർ എന്നിവർ പ്രസംഗിച്ചു.

ADVERTISEMENT

റെയിൽവേ സ്‌റ്റേഷൻ റോഡ് അടിപ്പാത: ഡെപ്യൂട്ടി കളക്ടർ സന്ദർശനം നടത്തി

ചെറുവത്തൂർ: റെയിൽവേ സ്റ്റേഷൻ റോഡിൽ അടിപ്പാത നിർമിക്കണമെന്ന ആവശ്യത്തിൽ കർമസമിതിയുടെ നിവേദനത്തെത്തുടർന്ന് ജില്ലാ കളക്ടറുടെ നിർദേശത്തിൽ ഡെപ്യൂട്ടി കളക്ടർ റമീസ് രാജ് സ്ഥലം സന്ദർശിച്ചു.ഓട്ടോറിക്ഷ പോലും കടന്നു പോകൻ കഴിയാത്ത തരത്തിൽ നിർമിച്ച അടിപ്പാതക്കെതിരെ വ്യാപക വിമർശനമുയർന്നതോടെയാണ് നാട്ടുകാർ കർമ സമിതിക്ക് രൂപം നൽകിയത്. അടിപ്പാതയുടെ ആവശ്യകത ജില്ല ഭരണ കൂടത്തെ കർമ സമിതി ഭാരവാഹികൾ ബോധ്യപ്പെടുത്തി. കർമ സമിതി അധ്യക്ഷയും ഗ്രാമ പഞ്ചായത്ത് പ്രസിഡന്‍റുമായ സി.വി.പ്രമീള, കൺവീനർ മുകേഷ് ബാലകൃഷ്ണൻ, കെ.കെ.കുമാരൻ, ടി.രാജൻ, സി.വി.രാജൻ, പി.വി.രഘൂത്തമൻ, എം.അമ്പുജാക്ഷൻ, സി. രഞ്ജിത്ത്, പി.വി.രാഘവൻ, പി.പദ്മിനി, സി.വി.ഗിരീശൻ, എ.വി.ദാമോദരൻ, കെ. ജാബിർ, സുരാജ് മയിച്ച, സനിഷ നിഷാന്ത്, പ്രവീൺ പ്രകാശ്, കെ.സി.സതീശൻ, കെ.സി.ഗിരീശൻ, സന്ദീപ് മുണ്ടക്കണ്ടം എന്നിവർ പങ്കെടുത്തു.

കെസിസിപിഎൽ പെട്രോൾ പമ്പ് ഉദ്ഘാടനം 27 ന്

കരിന്തളം: പൊതുമേഖലാ സ്ഥാപനമായ കേരള ക്ലേയ്സ് ആന്‍ഡ് സെറാമിക്സ് പ്രൊഡക്ട്സ് ലിമിറ്റഡ് (കെസിസിപിഎൽ) കരിന്തളം തലയടുക്കത്ത് ആരംഭിക്കുന്ന പെട്രോൾ പമ്പിന്‍റെ ഉദ്ഘാടനം 27ന് ഉച്ചകഴിഞ്ഞ് മൂന്നിനു നിയമസഭാ സ്പീക്കർ എ.എൻ.ഷംസീർ നിർവഹിക്കും. ഇ.ചന്ദ്രശേഖരൻ എംഎൽഎ അധ്യക്ഷതവഹിക്കും. സംസ്ഥാനതലത്തിൽ കെസിസിപിഎലിന്‍റെ ഉടമസ്ഥതയിൽ ആരംഭിക്കുന്ന നാലാമത്തെ പെട്രോൾ പമ്പാണിത്. സംഘാടകസമിതി രൂപീകരണയോഗം 18ന് ഉച്ചകഴിഞ്ഞ് മൂന്നിനു കിനാനൂർ - കരിന്തളം പഞ്ചായത്ത് ഹാളിൽ ചേരും. കേന്ദ്ര പൊതുമേഖലാ സ്ഥാപനമായ ബിപിസിഎലുമായി സഹകരിച്ചാണ് പെട്രോൾ പമ്പ് ആരംഭിക്കുന്നത്. പെട്രോൾ, ഡീസൽ എന്നിവയ്ക്ക് പുറമേ ഓയിൽ ചെയ്ഞ്ച്, ഫ്രീ എയർ സർവീസ് തുടങ്ങിയ അനുബന്ധ സൗകര്യങ്ങളും ഒരുക്കിയിട്ടുണ്ട്. മറ്റു പൊതുമേഖലാ സ്ഥാപനങ്ങളുടെ ഉത്പന്നങ്ങൾക്കായി സ്റ്റാളുകൾ തുറക്കാനും പദ്ധതിയുണ്ട്. പെട്രോൾ പമ്പിനോടു ചേർന്ന് റിഫ്രഷ്മെന്‍റ് സെന്‍റർ, സ്റ്റോർ സൗകര്യങ്ങളും ഒരുക്കുമെന്ന് കമ്പനി ചെയർമാൻ ടി.വി.രാജേഷും എംഡി ഡോ.ആനക്കൈ ബാലകൃഷ്ണനും പറഞ്ഞു.

എംഡിഎംഎയും കഞ്ചാവുമായി അറസ്റ്റില്‍

പാണത്തൂര്‍: 790 മില്ലിഗ്രാം എംഡിഎംഎയും .740 ഗ്രം കഞ്ചാവുമായി യുവാവ് അറസ്റ്റില്‍. പാണത്തൂര്‍ നെല്ലിക്കുന്ന് സ്വദേശി സജല്‍ ഷാജിയെയാണ് (23) രാജപുരം പോലീസ് അറസ്റ്റ് ചെയ്തത്. വ്യാഴാഴ്ച രാത്രി 9.15ഓടെ പാണത്തൂര്‍ ബസ് സ്റ്റാന്‍ഡിനു സമീപമാണ് ഇയാളെ പിടികൂടിയത്. രാത്രികാല പെട്രോളിംഗിനെത്തിയ പോലീസ് വാഹനം കണ്ട് പരിഭ്രമിച്ച സജലിനെ പരിശോധിച്ചപ്പോള്‍ സിഗരറ്റ് പായ്ക്കറ്റില്‍ സൂക്ഷിച്ച ലഹരിവസ്തുക്കള്‍ പിടികൂടുകയായിരുന്നു. ഇന്‍സ്പെക്ടര്‍ പി.രാജേഷിന്റെ നേതൃത്വത്തില്‍ എസ്‌ഐ കെ.ലതീഷ്, കരുണാകരന്‍, എഎസ്‌ഐ ഓമനക്കുട്ടന്‍, ജിഎസ്‌സിപിഒ രൂപേഷ്, ഡ്രൈവര്‍ സിപിഒ വിനോദ്, ബേക്കല്‍ സബ്ഡിവിഷന്‍ സ്‌ക്വാഡും ചേര്‍ന്നാണ് പ്രതിയെ പിടികൂടിയത്.

പനത്തടി പഞ്ചായത്തിലെ വികസന സദസിനെതിരേ പ്രതിപക്ഷം

പനത്തടി: പഞ്ചായത്തിന്‍റെ വിവിധ ഗ്രാമീണ പ്രദേശങ്ങളിൽ പുതിയ തെരുവ് വിളക്കുകൾ സ്ഥാപിക്കുന്നതിനോ എംപി, എംഎൽഎ എന്നിവരുടെ ആസ്തി വികസന ഫണ്ടിൽ നിന്നും അനുവദിച്ച കാലാവധി കഴിഞ്ഞ വിവിധ ചെറുതും വലുതുമായ വിളക്കുകൾ അറ്റകുറ്റപ്പണി നടത്തുന്നതിനോ ആവശ്യമായ തനതു ഫണ്ട് ഇല്ലാതെ വിഷമിക്കുന്ന പനത്തടി പഞ്ചായത്തിൽ ലക്ഷങ്ങൾ മുടക്കി സംസ്ഥാന സർക്കാരിന്റെ വികസന സദസ് സംഘടിപ്പിക്കുന്നതിനെതിരെ പഞ്ചായത്ത് ഭരണസമിതി യോഗത്തിൽ പ്രതിപക്ഷ അംഗങ്ങളുടെ വിയോജനക്കുറിപ്പ്. കഴിഞ്ഞ നാലുവർഷമായി ഗ്രാമീണ റോഡുകളുടെ വികസനത്തിന് ഒരു തുകയും വകയിരുത്താത്ത പഞ്ചായത്തിൽ ലക്ഷങ്ങൾ മുടക്കി വികസന സദസുകൾ സംഘടിപ്പിക്കുന്നത് ജനങ്ങളോടുള്ള വെല്ലുവിളിയാണെന്ന് പ്രതിപക്ഷ അംഗങ്ങൾ ചൂണ്ടിക്കാട്ടി. കഴിഞ്ഞ വർഷം സംഘടിപ്പിച്ച നവ കേരള സദസ്സിൽ നിരവധി നിവേദനങ്ങളും നിർദ്ദേശങ്ങളു മാണ് സദസ്സിനു മുൻപാകെ എത്തിയത് . എന്നാൽ നവകേരള സദസ്സിന് മുൻപാകെ വന്ന നിർദ്ദേശങ്ങളിൽ ഒന്ന് പോലും പരിഗണിക്കപ്പെട്ടിട്ടില്ലെന്ന് ഇവർ ചൂണ്ടിക്കാട്ടുന്നു. കോൺഗ്രസ് ഭരണസമിതി അംഗങ്ങളായ കെ.ജെ.ജയിംസ്, എൻ.വിൻസെന്റ്, രാധ സുകുമാരൻ എന്നിവർ യോഗത്തിൽ വിയോജനക്കുറിപ്പ് രേഖപ്പെടുത്തി.

സ്‌കൂളുകളിലെ കുടിവെള്ളം സുരക്ഷിതമെന്ന് ഉറപ്പാക്കണം

കാസര്‍ഗോഡ്: ജില്ലയിലെ സ്‌കൂളുകളിലെ കുടിവെള്ളം സുരക്ഷിതമാണെന്ന് ഉറപ്പാക്കേണ്ടതുണ്ടെന്ന് സംസ്ഥാന ഭക്ഷ്യ സുരക്ഷ കമ്മീഷന്‍ ചെയര്‍പേഴ്സണ്‍ ജിനു സക്കറിയ ഉമ്മന്‍. ഭക്ഷ്യ ഭദ്രത നിയമം 2013 ജില്ലയിലെ പ്രവര്‍ത്തനങ്ങളുമായി ബന്ധപ്പെട്ട് നായന്മാര്‍മൂല ടിഐഎച്ച്എസ്എസില്‍ കമ്മീഷന്‍ പരിശോധന നടത്തി. ഉച്ചഭക്ഷണ പദ്ധതിയുമായി ബന്ധപ്പെട്ട രജിസ്റ്ററുകള്‍ പരിശോധിക്കുകയും പാചകപ്പുര സന്ദര്‍ശിക്കുകയും ചെയ്തു. ഓഫീസ് പരിസരത്തും പാചകപ്പുരയ്ക്ക് സമീപവും ഭക്ഷ്യ മെനു പ്രദര്‍ശിപ്പിച്ചുണ്ടോയെന്നു പരിശോധിച്ച കമ്മീഷന്‍ സ്‌കൂളിലെ ഭക്ഷണമുറിയുടെ സൗകര്യങ്ങള്‍ തൃപ്തികരമെന്ന് വിലയിരുത്തി. മധ്യവേനലവധിക്ക് ശേഷം സ്‌കൂള്‍ തുറക്കുന്നതിന് മുന്പ്് ജില്ലയിലെ എല്ലാ സ്‌കൂളുകളിലും കുടിവെള്ള ശുദ്ധി ഉറപ്പുവരുത്തിയ വിദ്യാഭ്യാസ വകുപ്പിന്‍റെ പ്രവര്‍ത്തനത്തെ അഭിനന്ദിച്ചു. തുടര്‍ന്ന് 106-ാം നമ്പര്‍ തെക്കില്‍ ഫെറിയിലെ കെ-സ്റ്റോറിന്റെ പ്രവര്‍ത്തനങ്ങള്‍ വിലയിരുത്തി. കാസര്‍ഗോഡ് താലൂക്ക് സപ്ലൈ ഓഫീസര്‍ ബി.കൃഷ്ണ നായിക്, ജില്ലാ വിദ്യാഭാസ ഉപ ഡയറക്ടറുടെ കാര്യാലയത്തിലെ നൂണ്‍ ഫീഡിംഗ് സൂപ്പര്‍വൈസര്‍ ഇ.പി ഉഷ, ഉപജില്ല വിദ്യാഭാസ ഓഫീസിലെ നൂണ്‍ മീല്‍ ഓഫീസര്‍ സച്ചിന്‍ എന്നിവര്‍ സംഘത്തിനൊപ്പമുണ്ടായിരുന്നു.

പുരസ്‌കാര നിറവില്‍ കയ്യൂര്‍-ചീമേനി പഞ്ചായത്ത്

ചീമേനി: ആരോഗ്യമേഖലയില്‍ മികച്ച പ്രവര്‍ത്തനങ്ങള്‍ നടത്തിയ തദ്ദേശസ്വയംഭരണസ്ഥാപനങ്ങള്‍ക്കുള്ള ആര്‍ദ്രകേരളം പുരസ്‌കാരത്തില്‍ കാസര്‍ഗോഡ് ജില്ലയില്‍ ഒന്നാംസ്ഥാനം കയ്യൂര്‍- ചീമേനി പഞ്ചായത്തിന്. വയോജനാരോഗ്യ സംരക്ഷണത്തിന് സ്നേഹസ്പര്‍ശം, കൗമാരക്കാരുടെ ആരോഗ്യവളര്‍ച്ചയ്ക്ക് മുകുളം, സംസ്ഥാനാതീത തൊഴിലാളികള്‍ക്കായി ഹമാര മെഹ്‌മാന്‍, ജീവിതശൈലി രോഗങ്ങള്‍ തടയാന്‍ മിടിപ്പ് വ്യായാമ ക്ലബ്, പട്ടികജാതി, പട്ടികവര്‍ഗ മേഖലകളിലെ ആരോഗ്യപരിരക്ഷയ്ക്കായി കൈത്താങ്ങ്, ക്ഷയരോഗ ചികിത്സക്കാര്‍ക്ക് ആത്മവിശ്വാസം നല്‍കാന്‍ ഉണര്‍വ് എന്നീ പദ്ധതികള്‍ സമൂഹത്തില്‍ മികച്ച സ്വാധീനം ചെലുത്തി. 2023-2024 വര്‍ഷം ആരോഗ്യമേഖലയില്‍ പഞ്ചായത്ത് 89,42,778 രൂപയുടെ പദ്ധതി പ്രവര്‍ത്തനങ്ങള്‍ നടത്തി. കയ്യൂര്‍ - കുടുംബാരോഗ്യ കേന്ദ്രത്തിന്‍റെ നേതൃത്വത്തില്‍ 24 പദ്ധതികളിലൂടെ 55,79,722 രൂപ ചെലവഴിച്ചു. ആയുര്‍വേദ ആശുപത്രി വഴി 27,46,788 രൂപയും ഹോമിയോ ആശുപതരി വഴ 6,16,268 രൂപയും ചെലവഴിച്ചു.

സംസ്ഥാനത്തെ മികച്ച രണ്ടാമത്തെ ബ്ലോക്ക് പഞ്ചായത്തായി നീലേശ്വരം

നീലേശ്വരം: ആരോഗ്യമേഖലയില്‍ മികച്ച പ്രവര്‍ത്തനങ്ങള്‍ നടത്തിയ തദ്ദേശ സ്വയംഭരണ സ്ഥാപനങ്ങള്‍ക്കുള്ള ആര്‍ദ്രകേരളം പുരസ്‌കാരത്തില്‍ നീലേശ്വരം ബ്ലോക്ക് പഞ്ചായത്ത് സംസ്ഥാനത്തെ മികച്ച രണ്ടാമത്തെ ബ്ലോക്ക് പഞ്ചായത്ത് ആയി തെരഞ്ഞെടുക്കപ്പെട്ടു. തദ്ദേശ സ്വയംഭരണ സ്ഥാപനങ്ങള്‍ ആരോഗ്യ മേഖലയില്‍ ചെലവഴിച്ച തക സാന്ത്വന പരിചരണ പരിപാടികള്‍, കായകല്‍പ്പ് സ്‌കോര്‍, ഹെല്‍ത്ത് ഗ്രാന്റ് വിനിയോഗം, ആരോഗ്യ മേഖലയുമായി ബന്ധപ്പെട്ട മറ്റ് പ്രവര്‍ത്തനങ്ങള്‍ എന്നിവ പരിഗണിച്ച് മുന്‍ഗണനാ പട്ടിക തയ്യാറാക്കുകയും, പുരസ്‌കാരത്തിനായി തെരഞ്ഞെടുക്കുകയും ചെയ്യുന്നു. ഇത് കൂടാതെ പ്രതിരോധ കുത്തിവെപ്പ്, വാര്‍ഡുതല പ്രവര്‍ത്തനങ്ങള്‍, പ്രാദേശിക ആരോഗ്യ ആവശ്യങ്ങള്‍ക്ക് അനുസൃതമായ നൂതന ഇടപെടലുകള്‍ സാമൂഹിക ഘടകങ്ങളായ ശുചിത്വം, മാലിന്യ പരിപാലനം, പ്രാണി നിയന്ത്രണം, ജീവിത ശൈലി ക്രമീകരണത്തിനുള്ള ഭൗതിക സാഹചര്യങ്ങള്‍ ഒരുക്കല്‍, മോഡേണ്‍ മെഡിസിന്‍, ആയുര്‍വേദ, ഹോമിയോ മേഖലകളിലുള്ള ദേശീയ സംസ്ഥാന ആരോഗ്യ പദ്ധതിയുടെ ഫലപ്രദമായ നടത്തിപ്പ് എന്നിവയും പുരസ്‌കാരത്തിന് വേണ്ടി വിലയിരുത്തുന്ന ഘടകങ്ങളാണ്. കൗമാരക്കാരുടെ ശാരീരിക-മാനസിക വളര്‍ച്ച ലക്ഷ്യമാക്കി നടപ്പിലാക്കിയ തളിര്‍ പദ്ധതി, മാനസികാരോഗ്യ രംഗത്ത് പുതിയൊരു മാതൃകയായി മാറിയ ആത്മഹത്യാ പ്രതിരോധ ക്ലിനിക്ക്, ഭിന്നശേഷിക്കാര്‍ക്ക് സ്വയംപര്യാപ്തത ഒരുക്കിയ സ്‌കൂട്ടി വിതരണം, സ്ഥിര ചികിത്സ ഉറപ്പാക്കി പ്രവര്‍ത്തിക്കുന്ന ഡയാലിസിസ് സെന്റര്‍ എന്നിവ ബ്ലോക്ക് പഞ്ചായത്തിലെ ആരോഗ്യ മേഖലയില്‍ വലിയ പിന്തുണ നേടി. രോഗകളടെ വീട്ടുവാതില്‍ക്കല്‍ തന്നെ ചികിത്സ എത്തിച്ച സ്നേഹപഥം സഞ്ചരിക്കുന്ന ആതുരാലയം, ചെറുവത്തൂര്‍ സിഎച്ച്എസ്‌സിയിലെ രാത്രികാല ഒപി, ആറു പഞ്ചായത്തുകളെയും ഉള്‍പ്പെടുത്തി ശുചിത്വ രംഗത്ത് കൈവരിച്ച നേട്ടങ്ങള്‍, ബ്ലോക്ക് പഞ്ചായത്ത് പ്രസിഡന്‍റിന്‍റെ ദുരിതാശ്വാസനിധിയില്‍ നിന്നും സ്പര്‍ശം എന്ന പേരില്‍ നിര്‍ധന രോഗികള്‍ക്ക് നല്‍കിയ ധനസഹായ വിതരണം എന്നിവയും ബ്ലോക്ക് പഞ്ചായത്തിന് സംസ്ഥാനതല അംഗീകാരം നേടിക്കൊടുത്തു. ജനങ്ങളുടെ ആരോഗ്യത്തിനും ജീവിത നിലവാരത്തിനും മുന്‍ഗണന നല്‍കി പഞ്ചായത്തിന്റെ നേതൃത്വത്തില്‍ നടപ്പിലാക്കിയ കൂട്ടായ പ്രവര്‍ത്തനങ്ങളാണ് ആര്‍ദ്രകേരളം പുരസ്‌കാരത്തിലേക്ക് എത്തിച്ചതെന്ന് ബ്ലാക്ക് പഞ്ചായത്ത് പ്രസിഡന്‍റ് മാധവന്‍ മണിയറ പറഞ്ഞു.

ചിറ്റാരിക്കാൽ ഉപജില്ല കായികമേള ഒക്‌ടോബർ ആറുമുതൽ

വെള്ളരിക്കുണ്ട്: ചിറ്റാരിക്കാൽ ഉപജില്ലാ കായികമേള ഒക്ടോബർ ആറ്, ഏഴ്, എട്ട് തീയതികളിൽ വെള്ളരിക്കുണ്ട് സെന്‍റ് ജൂഡ്സ് എച്ച്എസ്എസിൽ നടക്കും. സംഘാടകസമിതി രൂപീകരണയോഗം പഞ്ചായത്ത് പ്രസിഡന്‍റ് രാജു കട്ടക്കയം ഉദ്ഘാടനം ചെയ്തു. ഉപജില്ലാ വിദ്യാഭ്യാസ ഓഫീസർ ജസീന്ത ജോൺ അധ്യക്ഷത വഹിച്ചു. സ്കൂൾ മാനേജർ റവ.ഡോ. ജോൺസൺ അന്ത്യാകുളം അനുഗ്രഹ പ്രഭാഷണം നടത്തി.പ്രിൻസിപ്പൽ റവ.ഡോ.സന്തോഷ് കെ.പീറ്റർ, പിടിഎ പ്രസിഡൻ്റ് പി.സി.ബിനോയ്, മുഖ്യാധ്യാപകൻ എം.യു.ജോസ്കുട്ടി എന്നിവർ പ്രസംഗിച്ചു.

തെരഞ്ഞെടുപ്പ് ഒരുക്കങ്ങൾക്കിടെ ജില്ലയിലെ തദ്ദേശസ്ഥാപനങ്ങളിൽ പുതിയ സെക്രട്ടറിമാർ

കാസർഗോഡ്: തെരഞ്ഞെടുപ്പ് ഒരുക്കങ്ങൾ അവസാനഘട്ടത്തിലെത്തി നിൽക്കേ ജില്ലയിലെ 15 പഞ്ചായത്തുകളിൽ പിഎസ് സി റാങ്ക് പട്ടികയിൽ നിന്ന് പുതിയ സെക്രട്ടറിമാരെ നിയമിച്ചു. വെസ്റ്റ് എളേരി, പനത്തടി, ബേഡഡുക്ക, ഉദുമ, ചെങ്കള, കാറഡുക്ക, പുല്ലൂർ-പെരിയ, ബദിയടുക്ക, കുംബഡാജെ, മധൂർ, കുമ്പള, പുത്തിഗെ, മീഞ്ച, ചെറുവത്തൂർ, പടന്ന പഞ്ചായത്തുകളിലാണ് പുതിയ സെക്രട്ടറിമാരെ നിയമിച്ചത്. ഇതിൽ പല പഞ്ചായത്തുകളിലും മാസങ്ങളോളമായി സെക്രട്ടറിയുടെ തസ്തിക ഒഴിഞ്ഞുകിടക്കുകയായിരുന്നു. മധൂരിലും കുമ്പളയിലും നേരത്തേയുണ്ടായിരുന്ന സെക്രട്ടറിമാർ പല വിവാദങ്ങളിലും പെട്ടതാണ്. ബദിയടുക്കയിൽ ഏറെക്കാലമായി സെക്രട്ടറിയില്ലാത്തതും ജീവനക്കാരുടെ ക്ഷാമവും മൂലം പഞ്ചായത്ത് ഓഫീസ് അടച്ചിട്ട് ഭരണസമിതി അംഗങ്ങൾ പ്രതിഷേധം നടത്തിയിരുന്നു. തെരഞ്ഞെടുപ്പുകാലത്തും പഞ്ചായത്തുകളിൽ സെക്രട്ടറിമാരില്ലാത്ത സാഹചര്യം ഒഴിവാക്കാനാണ് അവസാനനിമിഷത്തിൽ നിയമനം നടത്തിയത്. എന്നാൽ ഏറെ ഉത്തരവാദിത്വവും ശ്രദ്ധയും ജോലിഭാരവും വേണ്ടിവരുന്ന തെരഞ്ഞെടുപ്പുകാലം പുതുതായി ജോലിയിൽ പ്രവേശിക്കുന്നവർക്ക് തികഞ്ഞ വെല്ലുവിളിയാകുമെന്നുറപ്പാണ്. ചെറിയ പിഴവുകളും സമ്മർദങ്ങളും പോലും വലിയ വിവാദങ്ങളിലേക്ക് വഴിതെളിക്കാനും ഇടയുണ്ട്. പഞ്ചായത്തുകളിലെ ജോലിയുടെ സ്വഭാവം പോലും മനസിലാക്കാൻ കഴിയുന്നതിനു മുമ്പാണ് പുതിയ സെക്രട്ടറിമാർ തെരഞ്ഞെടുപ്പിന്‍റെ തിരക്കുകളിലേക്ക് എത്തിപ്പെടുന്നത്. മുതിർന്ന അസി.സെക്രട്ടറിമാരുടെയോ സീനിയർ ക്ലാർക്കുമാരുടെയോ സഹായമില്ലാതെ ഇവർക്ക് കാര്യങ്ങൾ നിർവഹിക്കാൻ ബുദ്ധിമുട്ടാകും. സെക്രട്ടറിമാരില്ലാതിരുന്ന മിക്ക പഞ്ചായത്തുകളിലും ഇതുവരെ അസി.സെക്രട്ടറിമാർ തന്നെയാണ് ചുമതല വഹിച്ചിരുന്നത്. തെരഞ്ഞെടുപ്പ് ഒരുക്കങ്ങൾക്കുപുറമേ പദ്ധതി നിർവഹണം, തൊഴിലുറപ്പ് പദ്ധതി, വിവരാവകാശം തുടങ്ങിയവയുടെ ഉത്തരവാദിത്വങ്ങളും ഇവർക്ക് കടുത്ത ജോലിഭാരം സൃഷ്ടിച്ചിരുന്നു. ഭരണസമിതികളുടെ കാലാവധി തീരാറായ സാഹചര്യത്തിൽ പദ്ധതികൾ പെട്ടെന്ന് പൂർത്തിയാക്കുന്നതുമായി ബന്ധപ്പെട്ട സമ്മർദവും ഏറെയാണ്. പല പഞ്ചായത്തുകളിലും ഇതുവരെ മഴ മൂലം തുടങ്ങാൻ കഴിയാതിരുന്ന റോഡുകളുടെ റീടാറിംഗ് ജോലികൾ പെട്ടെന്ന് തുടങ്ങാൻ ഭരണസമിതി അംഗങ്ങളുടെ ഭാഗത്തുനിന്നുതന്നെ വലിയ സമ്മർദമുണ്ട്. തകർന്ന് താറുമാറായി കിടക്കുന്ന റോഡുകൾ തെരഞ്ഞെടുപ്പിനു മുമ്പ് നന്നാക്കാനായില്ലെങ്കിൽ അതുവഴി വോട്ടുചോദിച്ചുപോകാൻ തന്നെ ബുദ്ധിമുട്ടാകും. ഭവന നിർമാണ, പുനരുദ്ധാരണ പദ്ധതിൾക്ക് പണമനുവദിക്കുന്ന കാര്യത്തിലും സമ്മർദമേറെയാണ്. ചുമതലയേറ്റെടുക്കുന്ന പുതിയ സെക്രട്ടറിമാർക്ക് പെട്ടെന്നുതന്നെ ഇക്കാര്യങ്ങളിലെല്ലാം തീരുമാനമെടുക്കേണ്ടിവരും. തൃക്കരിപ്പൂർ, ബെള്ളൂർ പഞ്ചായത്തുകളിൽ സ്ഥലംമാറ്റത്തിലൂടെ പുതിയ സെക്രട്ടറിമാരെ നിയമിച്ചിട്ടുണ്ടെങ്കിലും അവർ ചുമതലയേൽക്കാൻ വൈകുന്നത് പ്രതിസന്ധിയായിട്ടുണ്ട്. ബളാലിലും നിലവിലുള്ള സെക്രട്ടറി സ്ഥാനക്കയറ്റം ലഭിച്ച് പോവുകയാണ്. നീലേശ്വരം, കാസർഗോഡ് നഗരസഭകളിലും നിലവിലുള്ള സെക്രട്ടറിമാർക്ക് സ്ഥലംമാറ്റം ലഭിച്ചിട്ടുണ്ട്. ജീവനക്കാരുടെ അഭാവവും ജില്ലയിലെ പല തദ്ദേശസ്ഥാപനങ്ങളിലും കടുത്ത ജോലിഭാരവും സമ്മർദവുമുണ്ടാക്കുന്നുണ്ട്.

സര്‍വീസ് വയര്‍ പൊട്ടിവീണ് ഗതാഗതം തടസപ്പെട്ടു

കാസര്‍ഗോഡ്: കെഎസ്ഇബിയുടെ സര്‍വീസ് വയര്‍ പൊട്ടിവീണു കാസര്‍ഗോഡ് മാര്‍ക്കറ്റ് റോഡില്‍ ഗതാഗതം തടസപ്പെട്ടു. ഇന്നലെ രാവിലെ 6.30ഓടെയാണ് സംഭവം. കെഎസ്ഇബിയുടെ പോസ്റ്റില്‍ നിന്നും സര്‍വീസ് വയര്‍ പൊട്ടി റോഡിന് കുറുകെ വീണതോടെ മുക്കാല്‍ മണിക്കൂറോളം താഗതം തടസ്പെടുകയായിരുന്നു. നാട്ടുകാര്‍ കെഎസ്ഇബിയെ വിവരം അറിയിച്ചു എങ്കിലും അവര്‍ എത്താന്‍ വൈകിയതിനാല്‍ കാസര്‍ഗോഡ് അഗ്‌നിരക്ഷാസേനയെ വിവരം അറിയിക്കുകയായിരുന്നു. സീനിയര്‍ ഫയര്‍ ആന്‍ഡ് ഓഫീസര്‍ വി.എന്‍.വേണുഗോപാലിന്റെ നേതൃത്വത്തില്‍ റോഡിന് കുറുകെ പൊട്ടിയതും തൂങ്ങിക്കിടക്കുന്നത് കിടന്നിരുന്നതുമായ സര്‍വീസ് വയറുകള്‍ ഉയര്‍ത്തി കെട്ടുകയും അപ്പോഴേക്കും കെഎസ്ഇബി ജീവനക്കാര്‍ എത്തി പൊട്ടിയ സര്‍വീസ് വയറുകള്‍ സുരക്ഷിതമായി കെട്ടി നിര്‍ത്താന്‍ സഹായിക്കുകയും ചെയ്തു. പാര്‍സല്‍ ലോറി പോകുമ്പോള്‍ താഴ്ന്നു നിന്നിരുന്ന സര്‍വീസ് വയര്‍ ലോറിയുടെ കാബിനില്‍ തട്ടിയാണ് വയര്‍ പൊട്ടിയത്. സേനാഗങ്ങളായ കെ.ആര്‍.അജേഷ്, എസ്.അഭിലാഷ്, കെ.വി.ജിതിന്‍ കൃഷ്ണന്‍ ഹോംഗാര്‍ഡ് എന്‍.പി.രാകേഷ് എന്നിവര്‍ സംഘത്തില്‍ ഉണ്ടായിരുന്നു.

ഫർണിച്ചറുകൾ വിതരണം ചെയ്തു

ചെറുവത്തൂർ: മത്സ്യത്തൊഴിലാളികളുടെ മക്കളുടെ പഠനനിലവാരം മെച്ചപ്പെടുത്തുന്നതിന്‍റെ ഭാഗമായി ചെറുവത്തൂർ പഞ്ചായത്ത് 2024-25 വർഷ പദ്ധതിയിൽ ഉൾപ്പെടുത്തി ഫർണിച്ചറുകൾ വിതരണം ചെയ്തു. പ്രൈമറി, ഹൈസ്കൂൾ വിഭാഗങ്ങളിൽ പഠിക്കുന്ന വിദ്യാർഥികൾക്ക് 6000 രൂപ വിലവരുന്ന മേശയും കസേരയുമാണ് വിതരണം ചെയ്തത്. ആദ്യഘട്ടത്തിൽ 13 വിദ്യാർഥികൾക്കും കസേരയും മേശയും നൽകിയിരുന്നു. രണ്ടാം ഘട്ടത്തിൽ 12 വിദ്യാർഥികൾക്കാണ് ഫർണിച്ചർ വിതരണം നടത്തിയത്. രണ്ടാംഘട്ട വിതരണത്തിന്‍റെ ഉദ്ഘാടനം സ്ഥിരം സമിതി അധ്യക്ഷ പി. പദ്മിനി നിർവഹിച്ചു. പഞ്ചായത്തംഗം ഡി.എം. കുഞ്ഞിക്കണ്ണൻ അധ്യക്ഷത വഹിച്ചു. ഫിഷറീസ് എക്സ്റ്റൻഷൻ ഓഫീസർ എസ്. ഐശ്വര്യ, അക്വാ‌കൾച്ചർ പ്രമോട്ടർ ടി.വി. സുജിത്ത്, സാഗരമിത്ര ശ്രുതിരാജ്, ഫിഷറീസ് വർക്കിംഗ് ഗ്രൂപ് ചെയർമാൻ കെ. അബ്ദുൾ മുനീർ, അംഗം പ്രദീപൻ തുരുത്തി എന്നിവർ പ്രസംഗിച്ചു.

കാഞ്ഞങ്ങാട് ബസ്‌സ്റ്റാന്‍ഡ് 19നു തുറക്കും

കാഞ്ഞങ്ങാട്: അറ്റകുറ്റപ്പണികള്‍ക്കായി അഞ്ചുമാസത്തിലധികമായി പൂട്ടിക്കിടന്ന കോട്ടച്ചേരി പഴയ ബസ്‌സ്റ്റാന്‍ഡ് 19നു തുറക്കും. ബസ്‌സ്റ്റാന്‍ഡ് പൂട്ടിക്കിടക്കുന്നതിനെതിരെ വ്യാപക പരാതി ഉയരുന്നതിനിടെയാണ് തുറക്കാനുള്ള തീരുമാനം. സ്റ്റാന്‍ഡ് പരിസരത്ത് അഞ്ചുമാസത്തിലധികമായി അനുഭവപ്പെടുന്ന രൂക്ഷമായ ഗതാഗതക്കുരുക്കിന് ഇതോടെ പരിഹാരമാകും. ബസ്‌സ്റ്റാന്‍ഡ് യാര്‍ഡ് കോണ്‍ക്രീറ്റ് ചെയ്യുന്നതിനാണ് ഏപ്രില്‍ ഒന്നു മുതല്‍ സ്റ്റാന്‍ഡിലേക്കുള്ള പ്രവേശനം പൂര്‍ണമായും നിരോധിച്ചത്. എന്നാല്‍, പരമാവധി ഒരുമാസം കൊണ്ട് തീര്‍ക്കേണ്ടുന്ന പണി അനന്തമായി നീട്ടിക്കൊണ്ടുപോയ നഗരസഭയുടെ നടപടി കടുത്ത വിമര്‍ശനം ഏറ്റുവാങ്ങിയിരുന്നു. ആദ്യത്തെ ഒന്നരമാസം വരെ ഒരു പ്രവൃത്തിയും ചെയ്യാതെ വെറുതെ അടഞ്ഞു കിടക്കുകയായിരുന്നു. പിന്നീട് മേയ് പകുതിയോടെ ടാറിംഗ് ഇളക്കുന്ന ജോലിയും ഡ്രെയിനേജിനുള്ള കുഴിയുമെടുത്തു. പിന്നാലെ മഴ വന്നതോടെ കുഴിയില്‍ വെള്ളം നിറഞ്ഞ് യാത്രക്കാരന് വീണ് പരുക്കേറ്റിരുന്നു. ഇതോടെ മനുഷ്യാവകാശ കമ്മീഷന് പരാതി നല്‍കുകയും കേസെടുക്കുകയും ചെയ്തു. ഇതേതുടര്‍ന്ന് ദിവസങ്ങളോളം നിലച്ച ജോലി പുനരാരംഭിച്ച് കോണ്‍ക്രീറ്റിന് മുന്നോടിയായുള്ള പ്രവൃത്തി തുടങ്ങി. വീണ്ടും പ്രവര്‍ത്തി ഇഴഞ്ഞു നീങ്ങിയതായി ആരോപണമുയര്‍ന്നിരുന്നു. പിന്നാലെ വിഷു-പെരുന്നാള്‍ തിരക്ക് വന്നതോടെ ബസ്‌സ്റ്റാന്‍ഡ് പരിസരം ഗതാഗതക്കുരുക്കില്‍ വീര്‍പ്പുമുട്ടി. കടുത്ത വേനലില്‍ ജോലിയൊന്നും ചെയ്യാതെ പിന്നീട് പെരുമഴയത്താണ് കോണ്‍ക്രീറ്റ് പ്രവൃത്തി നടന്നത്. ഓണവും നബിദിനവും വന്നതോടെ വീണ്ടും ജനത്തിരക്കില്‍ ബസ്‌സ്റ്റാന്‍ഡ് വീര്‍പ്പുമുട്ടി. സെപ്റ്റംബര്‍ ആറിനകം സ്റ്റാന്‍ഡ് പൂര്‍ണ തോതില്‍ തുറന്നു കൊടുക്കണമെന്ന് മനുഷ്യാവകാശ കമ്മീഷന്‍ ഉത്തരവിട്ടെങ്കിലും അതും നടപ്പിലായില്ല. കടമുറി ലേലനടപടികള്‍ പൂര്‍ത്തിയാക്കിയ ആലാമിപ്പള്ളി പുതിയ ബസ്‌സ്റ്റാന്‍ഡ് സജീവമാക്കുന്നതിനായി കോട്ടച്ചേരി സ്റ്റാന്‍ഡ് എന്നെന്നേക്കുമായി അടച്ചിടാനുള്ള നീക്കത്തിന്‍റെ ഭാഗമാണ് നഗരസഭയുടെ ഭാഗത്തു നിന്നുള്ളതെന്നും വലിയ പ്രചരണമുണ്ടായിരുന്നു. എന്നാല്‍, തദ്ദേശതെരഞ്ഞെടുപ്പ് ആസന്നമായിരിക്കുന്നവേളില്‍ ഇതു വലിയ ജനകീയപ്രക്ഷോഭങ്ങള്‍ക്ക് തിരികൊളുത്തുമെന്ന് മനസിലായതോടെ അധികൃതര്‍ ഈ നീക്കത്തില്‍ നിന്നും പിന്മാറിയെന്നാണ് സൂചന. ബസ്‌സ്റ്റാന്‍ഡ് തുറക്കാനുള്ള തീരുമാനം ജനങ്ങള്‍ക്കും വ്യാപാരികള്‍ക്കും ഏറെ ആശ്വാസം പകരുന്നതാണ്.

വിഷാദരോഗികള്‍ക്ക് താങ്ങായി ‘ആശ്വാസം’ ക്ലിനിക്കുകള്‍

കാസര്‍ഗോഡ്: കൃത്യമായി ചികിത്സിച്ചില്ലെങ്കില്‍ കടുത്ത മാനസികസമ്മര്‍ദത്തിലേക്കും അതുമൂലമുള്ള ആത്മഹത്യയിലേക്കും വഴിവ‌യ്ക്കുന്ന രോഗമണ് വിഷാദം. ഇങ്ങനെ വിഷാദരോഗത്താല്‍ ബുദ്ധിമുട്ടനുഭവിക്കുന്നവര്‍ക്ക് ആശ്വാസമാവുകയാണ് ആശ്വാസം ക്ലിനിക്കുകള്‍. സംസ്ഥാനത്തെ മുഴുവന്‍ ജില്ലകളിലും കുടുംബാരോഗ്യ കേന്ദ്രങ്ങളായി മാറിയിട്ടുള്ള പ്രാഥമിക ആരോഗ്യ കേന്ദ്രങ്ങള്‍ക്ക് കീഴിലാണ് ആശ്വാസം ക്ലിനിക്കുകള്‍ പ്രവര്‍ത്തിക്കുന്നത്. ആരോഗ്യവകുപ്പിന് കീഴില്‍ ജില്ലാ മാനസികാരോഗ്യ പരിപാടിയുടെ ഭാഗമായി 2017 മുതലാണ് ഈ ക്ലിനിക്കുകള്‍ പ്രവര്‍ത്തനം ആരംഭിച്ചത്. കുടുംബാരോഗ്യകേന്ദ്രങ്ങളുടെ ഭാഗമായി 38 ആശ്വാസം ക്ലിനിക്കുകളാണ് ജില്ലയില്‍ പ്രവര്‍ത്തിക്കുന്നത്. ആഴ്ചയില്‍ ഒരു ദിവസമാണ് ക്ലിനിക്കിന്‍റെ പ്രവര്‍ത്തനം. ഇതിന്‍റെ ഭാഗമായി മാസംതോറും അഞ്ഞൂറിലേറെ പേരെ പരിശോധനയ്ക്ക് വിധേയമാക്കാറുണ്ടെന്നും അതില്‍ അഞ്ചു ശതമാനത്തിലേറെ വ്യക്തികളിലും വിഷാദരോഗ ലക്ഷണങ്ങള്‍ കാണാറുണ്ടെന്നുമാണ് ആരോഗ്യ വിദഗ്ധര്‍ പറയുന്നു. മുന്‍കൂട്ടി തയാറാക്കിയ ഒമ്പതു ചോദ്യങ്ങളടങ്ങുന്ന ചോദ്യാവലികളുടെ അടിസ്ഥാനത്തില്‍ ആണ് രോഗനിര്‍ണയം നടത്തുന്നത്. ആരോഗ്യപ്രവര്‍ത്തകരുടെ ഗൃഹസന്ദര്‍ശന വേളയിലും കുടുംബരോഗ്യ കേന്ദ്രങ്ങളില്‍ മറ്റു ചികിത്സയ്ക്കായി എത്തുന്നവരിലും വിഷാദരോഗ ലക്ഷണങ്ങള്‍ കാണപ്പെടുന്നവരോട് ആരോഗ്യപ്രവര്‍ത്തകര്‍ ഈ ചോദ്യങ്ങള്‍ ചോദിക്കുകയും കിട്ടുന്ന ഉത്തരത്തിന്‍റെ അടിസ്ഥാനത്തില്‍ രോഗതീവ്രത നിര്‍ണയിക്കുകയും ചെയ്യുന്നു. തുടര്‍ന്ന് രോഗതീവ്രതയുടെ അടിസ്ഥാനത്തില്‍ ബന്ധപ്പെട്ട കുടുംബാരോഗ്യ കേന്ദ്രത്തിലും ജില്ല മാനസികാരോഗ്യ കേന്ദ്രങ്ങളിലുമായി അനുബന്ധ ടെസ്റ്റുകളും ചികിത്സകളും നല്‍കുന്നു. അതോടൊപ്പം അവര്‍ക്ക് വേണ്ട മാനസിക പിന്തുണയും ആരോഗ്യപ്രവര്‍ത്തകര്‍ ഉറപ്പുവരുത്തുന്നു. ശരീരികാരോഗ്യത്തോടൊപ്പം മനസിന്‍റെ ആരോഗ്യത്തെയും ചേര്‍ത്ത് പിടിക്കുകയാണ് ആശ്വാസം ക്ലിനിക്കുകള്‍.

ഉന്നതികളില്‍ സഞ്ചരിക്കുന്ന റേഷന്‍ കടകള്‍ ഉറപ്പാക്കണം: സംസ്ഥാന ഭക്ഷ്യ കമ്മീഷന്‍

വെള്ളരിക്കുണ്ട്: ഉന്നതികളില്‍ സഞ്ചരിക്കുന്ന റേഷന്‍ കടകള്‍ ഉറപ്പാക്കണമെന്ന് സംസ്ഥാന ഭക്ഷ്യ കമ്മീഷന്‍ ചെയര്‍പേഴ്സണ്‍ ഡോ. ജിനു സക്കറിയ ഉമ്മന്‍ പറഞ്ഞു. ഭക്ഷ്യകമ്മീഷന്‍ ചെയര്‍പേഴ്സന്‍റെ നേതൃത്വത്തിലുള്ള സംഘം വെള്ളരിക്കുണ്ട് താലൂക്കിലെ വിവിധ ഗോത്രവര്‍ഗ മേഖലകള്‍ സന്ദര്‍ശിച്ച് ദേശീയ ഭക്ഷ്യഭദ്രത നിയമം 2013 അനുശാസിയ്ക്കുന്ന പ്രവര്‍ത്തനങ്ങള്‍ വിലയിരുത്തി. അരിങ്കല്ല് ഉന്നതിയിലെ ഊര് നിവാസികളുമായി ചെയര്‍മാന്‍ സംവദിച്ചു. ഉന്നതികളില്‍ നിന്നും കിലോമീറ്ററുകള്‍ സഞ്ചരിച്ചാണ് പലരും ഭക്ഷ്യവസ്തുക്കള്‍ വാങ്ങുന്നതെന്നും യാത്രയ്ക്കായി തുക ചെലവാക്കേണ്ട സാഹചര്യം സാധാരണക്കാരായ കുടുംബങ്ങള്‍ക്ക് ബാധ്യതയായിത്തീരുന്നുവെന്നും കമ്മീഷന്‍റെ ശ്രദ്ധയില്‍പ്പെട്ടു. ഇത്തരം ഇടങ്ങളില്‍ സഞ്ചരിക്കുന്ന റേഷന്‍ കടകള്‍ ആരംഭിക്കേണ്ടതിന്‍റെ ആവശ്യകത സര്‍ക്കാറിന്‍റെ ശ്രദ്ധയില്‍പ്പെടുത്തുമെന്നും കമ്മീഷന്‍ ചെയര്‍പേഴ്സണ്‍ പറഞ്ഞു. അങ്കണവാടികളിലേക്ക് വിതരണം ചെയ്യുന്ന ഭക്ഷ്യ ഉത്പന്നങ്ങളില്‍ നിര്‍ബന്ധമായും രേഖപ്പെടുത്തേണ്ട ലേബല്‍ പതിപ്പിക്കാത്തതായി കണ്ടെത്തുകയും ബന്ധപ്പെട്ട അധികൃതരില്‍ നിന്ന് വിശദീകരണം ആവശ്യപ്പെടുകയും ചെയ്തു. പാത്തിക്കര റേഷന്‍കട, അടോട്ടുകയ ഗവ. വെല്‍ഫെയര്‍ എല്‍പി സ്‌കൂള്‍ എന്നിവിടങ്ങള്‍ സന്ദര്‍ശിച്ച് സ്ഥിതിഗതികള്‍ വിലയിരുത്തി. പരിശോധന ചുമതലയുള്ള ഉദ്യോഗസ്ഥര്‍ അങ്കണവാടികളിലെ പരിശോധനകള്‍ കൃത്യമായി നടത്താത്തത് ശ്രദ്ധയില്‍പ്പെടുകയും ബന്ധപ്പെട്ട ഉദ്യോഗസ്ഥരില്‍ നിന്ന് വിശദീകരണം തേടുന്നതിന് കമ്മീഷന്‍ ആവശ്യപ്പെടുകയും ചെയ്തു. ഭീമനടി ട്രൈബല്‍ എക്‌സ്റ്റെന്‍ഷന്‍ ഓഫീസര്‍ എ. ബാബു, വെള്ളരിക്കുണ്ട് താലൂക്ക് സപ്ലൈ ഓഫീസര്‍ എസ്. അജിത്ത്കുമാര്‍, ഐസിഡിഎസ് ജില്ലാ പ്രോഗ്രാം ഓഫീസര്‍ ജിജി ജോണ്‍, ചിറ്റാരിക്കാല്‍ ഉപജില്ല വിദ്യാഭ്യാസ ഓഫീസര്‍ ജെസീന്ത ജോണ്‍, പനത്തടി ട്രൈബല്‍ എക്‌സ്റ്റെന്‍ഷന്‍ ഓഫീസര്‍ സലീം എന്നിവര്‍ സംഘത്തിലുണ്ടായിരുന്നു.

ദേശീയപാതയിൽ ഈവർഷം പൊലിഞ്ഞത് 25 ജീവനുകൾ

കാസർഗോഡ്: ജില്ലയിൽ പുതിയ ദേശീയപാത നിർമാണം പൂർത്തിയാകുന്നതിനുമുമ്പേ ഈ വർഷം മാത്രം അതിലുണ്ടായ അപകടങ്ങളിൽ പൊലിഞ്ഞത് 25 ജീവനുകൾ. മുൻവർഷങ്ങളിൽ പണി നടക്കുന്നതിനിടെ പാതയോരത്തെ കുഴികളിലേക്ക് വാഹനങ്ങൾ മറിഞ്ഞും മറ്റുമുണ്ടായ അപകടങ്ങളിലും ഒട്ടേറെ പേർക്ക് ജീവൻ നഷ്ടപ്പെട്ടിരുന്നു. ഇന്നലെ സംഭവിച്ചതുൾപ്പെടെ നിർമാണ പ്രവൃത്തികൾക്കിടയിലുണ്ടായ അപകടങ്ങൾ ഇതിനു പുറമേയാണ്. ഈവർഷം മാത്രം തലപ്പാടി മുതൽ കാലിക്കടവ് വരെയുള്ള ഭാഗത്ത് ദേശീയപാതയിൽ ചെറുതും വലുതുമായ 119 വാഹനാപകടങ്ങൾ‌ നടന്നതായാണ് മോട്ടോർവാഹന വകുപ്പിന്‍റെ കണക്ക്. 61 പേർക്ക് ഗുരുതരമായും 93 പേർക്ക് സാരമായും പരിക്കേറ്റു. പുതിയ പാതയുടെ നിർമാണം പൂർത്തിയായ ഭാഗങ്ങളിൽ വാഹനങ്ങളുടെ അമിതവേഗതയും അതിവേഗ പാതയിലെ ട്രാഫിക് നിബന്ധനകൾ പാലിക്കാത്തതുമാണ് മിക്കപ്പോഴും അപകടങ്ങൾക്ക് കാരണമാകുന്നത്. പലയിടങ്ങളിലും സർവീസ് റോഡുകളിൽ നിന്ന് ദേശീയപാതയിലേക്കും തിരിച്ചും പ്രവേശിക്കുന്നതിനുള്ള കൃത്യമായ സ്ഥാനങ്ങൾ അടയാളപ്പെടുത്തിയിട്ടില്ലാത്തതിനാൽ വാഹനങ്ങൾ തോന്നുംപടി പ്രവേശിക്കുന്നത് പലപ്പോഴും അപകടങ്ങൾക്ക് വഴിയൊരുക്കുന്നുണ്ട്. പടന്നക്കാട് മേൽപ്പാലത്തിനു സമീപം അടുത്തിടെയുണ്ടായ രണ്ട് അപകടങ്ങളും ഇങ്ങനെയായിരുന്നു. അടിപ്പാതകളോ മേൽനടപ്പാതകളോ ഇല്ലാത്ത ഇടങ്ങളിൽ ഇപ്പോഴും കാൽനടയാത്രക്കാർ പഴയപടി ദേശീയപാത മുറിച്ചുകടക്കാൻ ശ്രമിക്കുന്നതും അപകടകാരണമാകുന്നു. ആറുവരിപ്പാതയുടെ ഒരു വശത്തിന്‍റെ മാത്രം പണി പൂർത്തിയായ പലയിടങ്ങളിലും ഇരുവശങ്ങളിലേക്കുമുള്ള വാഹനങ്ങൾ അമിതവേഗതയിൽ തന്നെ അതുവഴി കടന്നുപോകുന്നുണ്ട്. പ്രധാനപാതയിൽ ഇരുചക്രവാഹനങ്ങൾക്കും ഓട്ടോറിക്ഷകൾക്കും പ്രവേശനമില്ലെന്ന നിബന്ധനയും തത്കാലം പാലിക്കപ്പെടുന്നില്ല. ഇന്നലെ സംഭവിച്ചതുൾപ്പെടെ നിർമാണ പ്രവൃത്തികൾക്കിടയിലുണ്ടായ അപകടങ്ങളിലേറെയും കരാറുകാരുടെ അശ്രദ്ധയും പെട്ടെന്ന് പണിതീർത്തുപോകാനുള്ള ശ്രമങ്ങളും മൂലമുണ്ടായതാണ്. മേഘ എൻജിനിയറിംഗിനു കീഴിൽ നിർമാണ പ്രവൃത്തികൾ നടക്കുന്ന ഭാഗത്താണ് മാസങ്ങൾക്കുമുമ്പ് ചെറുവത്തൂർ മട്ടലായിക്കുന്നിൽ മണ്ണിടിഞ്ഞുവീണ് രണ്ടു തൊഴിലാളികളുടെ ജീവൻ നഷ്ടപ്പെട്ടത്. ഇന്നലത്തെ അപകടമുണ്ടായത് ഊരാളുങ്കൽ സൊസൈറ്റിക്കു കീഴിൽ നിർമാണ പ്രവൃത്തികൾ നടക്കുന്ന ഭാഗത്താണ്. മേൽപ്പാലങ്ങൾക്കു മുകളിൽനിന്ന് നിർമാണസാമഗ്രികൾ താഴെവീണും ക്രെയിനിന്‍റെ യന്ത്രക്കൈ വാഹനങ്ങൾക്കുമേൽ തട്ടിയും നേരത്തേ അപകടങ്ങളുണ്ടായിരുന്നു. മിക്കതിലും ഭാഗ്യംകൊണ്ടുമാത്രമാണ് ജീവാഭായം സംഭവിക്കാതിരുന്നത്.

ചെമ്മൺ പാതയല്ല , ഇതു മേലടുക്കം റോഡ്

കാഞ്ഞങ്ങാട്: ദേശീയപാതയുടെ സർവീസ് റോഡിനു സമീപത്തെ ഓവുചാലിന്‍റെ സ്ലാബിനു മുകളിൽ നിന്ന് കുത്തനെ താഴോട്ട് മണ്ണിട്ടൊരു വഴി. അതിനു താഴെ പഴയൊരു ടാർ റോഡ്. മുകളിലും വശങ്ങളിലും നിന്ന് മണ്ണ് ഒഴുകിപ്പരന്ന് ടാറിട്ട ഭാഗങ്ങൾ പലതും മൂടിപ്പോയ നിലയിലാണ്. മഴയത്ത് മണ്ണും ചെളിയും കൂടിക്കുഴയുന്ന ഈ റോഡിലൂടെ വാഹനയാത്ര തീർത്തും ദുഷ്കരമാണ്. മഴ മാറി എല്ലാം ഉണങ്ങിയാലും റോഡിന്‍റെ തുടക്കത്തിൽ കുത്തനെ ഇട്ടിരിക്കുന്ന ചരൽമണ്ണിൽ ഇരുചക്രവാഹനങ്ങൾ തെന്നിമറിയുന്നത് പതിവുകാഴ്ച. ഇത് കാഞ്ഞങ്ങാട് നഗരസഭയിൽ ഉൾപ്പെട്ട ക്രൈസ്റ്റ് സ്കൂൾ-മേലടുക്കം റോഡിന്‍റെ ഇപ്പോഴത്തെ അവസ്ഥയാണ്. റോഡിൽ റീടാറിംഗ് നടന്നിട്ട് 10 വർഷത്തോളമായി. ദേശീയപാതയിൽ നിന്ന് മേലടുക്കം ലൂർദ് മാതാ പള്ളിയിലേക്കും അങ്കണവാടിയിലേക്കും പോകാനുള്ളവരും സമീപത്തുള്ള നൂറുകണക്കിന് കുടുംബങ്ങളും ആശ്രയിക്കുന്ന റോഡിന്‍റെ അവസ്ഥ തീർത്തും പരിതാപകരമായത്, ദേശീയപാത നവീകരണ പ്രവൃത്തികൾ തുടങ്ങിയതോടെയാണ്. ദേശീയപാതയും സർവീസ് റോഡും കൂടുതൽ ഉയരത്തിലായതോടെയാണ് നിലവിലുള്ള റോഡിലേക്കിറങ്ങാൻ കുത്തനെ മണ്ണിട്ടത്. ദിവസേന നൂറുകണക്കിനാളുകളും സ്കൂൾ കുട്ടികളെയടക്കം കൊണ്ടുപോകുന്ന വാഹനങ്ങളും കടന്നുപോകുന്ന റോഡെന്ന നിലയിൽ അല്പംകൂടി ചരിവിൽ മണ്ണിട്ട് നിരപ്പാക്കി പാർശ്വഭിത്തി നിർമിച്ച് ടാറിംഗ് നടത്തേണ്ടതായിരുന്നു. പക്ഷേ ഒരുവർഷത്തിലധികമായിട്ടും അതൊന്നും നടന്നിട്ടില്ല. ദേശീയപാതയിലും ഇറക്കത്തിലും നിന്നുള്ള മണ്ണ് മഴക്കാലത്ത് താഴെയുള്ള റോഡിലുടനീളം ഒഴുകിപ്പരക്കുകയും ചെയ്തു. ഈ റോഡിനോട് നഗരസഭയും ദേശീയപാത അധികൃതരും കാണിക്കുന്ന അവഗണനയ്ക്കെതിരെ നാട്ടുകാർ ജനകീയ സമിതി രൂപീകരിച്ച് പ്രവർത്തനങ്ങൾ തുടങ്ങിയിട്ടുണ്ട്. മേലടുക്കം ലൂർദ് മാതാ പള്ളിയിൽ ചേർന്ന യോഗത്തിൽ ഫാ. പീറ്റർ പാറേക്കാട്ടിൽ അധ്യക്ഷത വഹിച്ചു. ജനകീയ സമിതി സെക്രട്ടറി സെബാസ്റ്റ്യൻ പള്ളിപ്പറമ്പിൽ, അഡ്വ. മാത്യു, റോയ് ജോർജ്, ഇമ്മാനുവേൽ ആംബ്രോസ് എന്നിവർ പ്രസംഗിച്ചു. ആദ്യപടിയെന്ന നിലയിൽ റോഡിന്‍റെ ശോചനീയാവസ്ഥ പരിഹരിക്കണമെന്നാവശ്യപ്പെട്ട് ജില്ലാ കളക്ടർക്കും നഗരസഭാ അധികൃതർക്കും നിവേദനം നൽകി.

കാറിടിച്ച് ഓട്ടോറിക്ഷ യാത്രക്കാരന്‍ മരിച്ചു

പെര്‍ള: കാറിടിച്ച് ഓട്ടോറിക്ഷ യാത്രക്കാരന്‍ മരിച്ചു. ഷേണി ബദറളയിലെ നാരായണമൂല്യ (67) ആണ് മരിച്ചത്. ബുധനാഴ്ച രാത്രി 8.30 ഓടെ ഷേണി സ്‌കൂളിന് സമീപമാണ് അപകടം. രോഗിയെ ആശുപത്രിയില്‍ എത്തിച്ച് മടങ്ങുകയായിരുന്നു. കാറിച്ച് ഓട്ടോറിക്ഷ മറിയുകയായിരുന്നു. ഉടന്‍തന്നെ കാസര്‍ഗോട്ടെ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. ഭാര്യ: ഗിരിജ. മക്കള്‍: യോഗേഷ്, സുരേന്ദ്ര, ഹരീഷ്. മരുമക്കള്‍: ശാരദ, പുഷ്പ, ഗീത.

മെഡിക്കല്‍ കോളജ് റൂട്ടില്‍ ബസുകള്‍ സർവീസ് നിര്‍ത്തുന്നു

ബദിയടുക്ക: ഉക്കിനടുക്കയിലെ ഗവ. മെഡിക്കല്‍ കോളജില്‍ എംബിബിഎസ് ആദ്യ ബാച്ചിന്‍റെ ക്ലാസുകള്‍ ആരംഭിക്കുന്നതിനുള്ള മുന്നൊരുക്കങ്ങള്‍ അവസാന ഘട്ടത്തിലെത്തിനില്‍ക്കേ കോളജിലേക്കുള്ള പ്രധാന റോഡ് കുഴികള്‍ നിറഞ്ഞ് താറുമാറായ നിലയില്‍. കാസര്‍ഗോഡ് നഗരത്തില്‍ നിന്ന് മെഡിക്കല്‍ കോളജില്‍ എത്താനുള്ള ചെര്‍ക്കള-കല്ലടുക്ക റോഡിലെ കുഴികള്‍ നികത്തി അറ്റകുറ്റപ്പണി നടത്താന്‍ കെആര്‍എഫ്ബി എട്ടുലക്ഷം രൂപ അനുവദിച്ചെങ്കിലും ടെന്‍ഡറെടുക്കാന്‍ ആരുമെത്തിയില്ല. ഈമാസം ഒന്നിനായിരുന്നു ടെന്‍ഡര്‍ നടപടികള്‍ പൂര്‍ത്തിയാക്കാന്‍ നിശ്ചയിച്ചിരുന്നത്. റോഡിന്‍റെ ശോചനീയാവസ്ഥ തുടരുന്ന സാഹചര്യത്തില്‍ ഈ മാസം 29 മുതല്‍ ഇതുവഴിയുള്ള സർവീസ് നിര്‍ത്തുമെന്ന് കാണിച്ച് ബസുടമകളുടെ സംഘടനകള്‍ എംഎല്‍എയ്ക്കും കെആര്‍എഫ്ബി, ആര്‍ടിഒ അധികൃതര്‍ക്കും കത്തു നല്‍കിയിട്ടുണ്ട്. മെഡിക്കല്‍ കോളജിന്‍റെ ടീച്ചിംഗ് ആശുപത്രിയായി നിശ്ചയിച്ചിട്ടുള്ള കാസര്‍ഗോഡ് ജനറല്‍ ആശുപത്രിയിലേക്ക് കോളജിന്‍റെ ബസില്‍ വിദ്യാര്‍ഥികളെ കൊണ്ടുപോകേണ്ടതും ഈ റോഡിലൂടെയാണ്. എടനീർ പാലം, പള്ളത്തടുക്ക, ചെർളടുക്കം, ബീജന്തടുക്ക തുടങ്ങിയ സ്ഥലങ്ങളില്‍ റോഡിൽ വലിയ കുഴികൾ രൂപപ്പെട്ട നിലയിലാണ്. കരാറുകാരുമായി ചര്‍ച്ച നടത്തി പെട്ടെന്നുതന്നെ പുതിയ ടെന്‍ഡര്‍ വിളിച്ച് പണി തുടങ്ങാനായില്ലെങ്കില്‍ വിദ്യാര്‍ഥികള്‍ തുടക്കം മുതല്‍തന്നെ ഇതിലൂടെയുള്ള യാത്രാദുരിതം സഹിക്കേണ്ടിവരും.

വെള്ളിക്കോത്തെ റോഡുകൾ താറുമാറായി

കാഞ്ഞങ്ങാട്: അഞ്ചു വര്‍ഷം മുമ്പാണ് ജില്ലയിലാദ്യമായി സിറ്റി ഗ്യാസ് പദ്ധതിക്കായി പൈപ്പ്‌ലൈനുകള്‍ വലിച്ചുതുടങ്ങിയത്. കോട്ടപ്പാറയിലെ നിര്‍ദിഷ്ട ഗ്യാസ് സ്റ്റേഷനില്‍ നിന്ന് തുടങ്ങി മാവുങ്കാല്‍, മൂലക്കണ്ടം, വെള്ളിക്കോത്ത് വഴി സംസ്ഥാനപാതയിലെ മഡിയന്‍ ജംഗ്ഷനിലേക്കാണ് ആദ്യമായി പൈപ്പ്‌ലൈന്‍ വലിച്ചത്. ഇതോടെ ദേശീയപാതയെയും സംസ്ഥാന പാതയെയും തമ്മില്‍ ബന്ധിപ്പിക്കുന്ന മൂലക്കണ്ടം-വെള്ളിക്കോത്ത്-മഡിയന്‍ റോഡ് മാസങ്ങളോളം പൂര്‍ണമായും താറുമാറായിരുന്നു. എല്ലാംകഴിഞ്ഞ് റോഡെല്ലാം വീണ്ടും ശരിയാക്കി മെക്കാഡം ടാറിംഗ് നടത്തിയതാണ്. അതുകഴിഞ്ഞ് ഏതാണ്ട് രണ്ടുവര്‍ഷം മുമ്പാണ് പദ്ധതിയില്‍നിന്ന് ഗാര്‍ഹിക കണക്‌ഷനുകള്‍ കൊടുക്കാന്‍ തുടങ്ങുകയാണെന്നും ആദ്യം പ്രധാന പൈപ്പ്‌ലൈന്‍ വലിച്ച വെള്ളിക്കോത്ത് നിന്നാണ് അതിനും തുടക്കം കുറിക്കുന്നതെന്നും അറിയിപ്പ് ലഭിച്ചത്. ഇതോടെ സിറ്റി ഗ്യാസിന്‍റെ കരാര്‍ ഏറ്റെടുത്ത അദാനി ഗ്യാസിന്‍റെ തൊഴിലാളികള്‍ ജെസിബിയുമായി വീണ്ടും വെള്ളിക്കോത്തെത്തി. നാട്ടിലെ ചെറുതും വലുതുമായ റോഡുകളെല്ലാം വെട്ടിക്കീറി പൈപ്പ് ലൈനുകള്‍ സ്ഥാപിച്ചു. ഇരുവശങ്ങളിലുമുള്ള വീടുകളിലേക്ക് ലൈന്‍ സ്ഥാപിക്കാനായി എല്ലാ റോഡുകളുടെയും കുറുകെയും വെട്ടിപ്പൊളിച്ചു. നെടുകെയും കുറുകെയും വെട്ടിപ്പിളര്‍ന്ന റോഡുകളെല്ലാം ചുരുങ്ങിയ സമയത്തിനുള്ളില്‍ കരാര്‍ കമ്പനി തന്നെ പൂര്‍വസ്ഥിതിയിലാക്കുമെന്നായാരുന്നു പ്രഖ്യാപനം. പക്ഷേ അത് പ്രതീക്ഷിച്ച വേഗത്തില്‍ നടന്നില്ല. അവിടവിടെ മണ്ണും കോണ്‍ക്രീറ്റും ടാറിംഗ് മിശ്രിതവുമൊക്കെ മാറിമാറി ഇട്ടതല്ലാതെ കുഴികളൊന്നും പൂര്‍ണമായും നികന്നില്ല. റോഡുകളൊന്നും പഴയപടിയായതുമില്ല. മഴ വന്നതോടെ മണ്ണിട്ടു നികത്തിയ ഭാഗങ്ങള്‍ ഇടിഞ്ഞുതാണും അവശേഷിച്ച കുഴികളില്‍ വെള്ളം നിറഞ്ഞും റോഡുകളുടെ സ്ഥിതി കൂടുതല്‍ പരിതാപകരമായി. അതിനൊപ്പം അവശേഷിച്ച ടാറിംഗ് കൂടി ഇളകിയതോടെ കിഴക്കുംകരയില്‍നിന്ന് വെള്ളിക്കോത്തേക്കുള്ള പ്രധാന റോഡുള്‍പ്പെടെ താറുമാറായി. ഇനി ഈ റോഡുകളെല്ലാം അറ്റകുറ്റപ്പണി നടത്തണമെങ്കില്‍ പഞ്ചായത്ത് വീണ്ടും കോടികള്‍ ചെലവഴിക്കേണ്ട സ്ഥിതിയാണ്. ഇത്രയൊക്കെയായിട്ടും നാമമാത്രമായ വീടുകളില്‍ മാത്രമാണ് ഇതുവരെ ഗ്യാസ് കണക്‌ഷന്‍ നല്‍കിയിട്ടുള്ളത്. കൂടുതല്‍ കണക്‌ഷനുകള്‍ നല്‍കുന്നതിന് ഇനിയും ലൈനുകള്‍ വലിക്കാനുണ്ട്. അപ്പോള്‍ ഇനിയും റോഡുകള്‍ പൊട്ടിപ്പൊളിയും. എല്ലാംകഴിഞ്ഞിട്ട് റീടാറിംഗ് നടത്താമെന്ന നിലയിലാണ് പഞ്ചായത്ത് കാത്തിരിക്കുന്നത്. ഇനി കാഞ്ഞങ്ങാട് നഗരമേഖലയുള്‍പ്പെടെ മറ്റു സ്ഥലങ്ങളില്‍ ഗ്യാസ് കണക്‌ഷനുകള്‍ കൊടുക്കാന്‍ തുടങ്ങുമ്പോള്‍ ഇതുതന്നെയാവില്ലേ അവിടുത്തെയും സ്ഥിതിയെന്നാണ് നാട്ടുകാര്‍ ചോദിക്കുന്നത്.

അജയന്‍റെ ചികിത്സയ്ക്കായി നാടൊന്നിക്കുന്നു

വെള്ളരിക്കുണ്ട്: വാഹനാപകടത്തിൽ ഗുരുതരമായി പരിക്കേറ്റ് ചികിത്സയിൽ കഴിയുന്ന പാത്തിക്കരയിലെ അജയൻ കൂട്ടക്കളത്തിന്‍റെ ചികിത്സാ ധനസഹായ കമ്മിറ്റി അവലോകന യോഗം വെള്ളരിക്കുണ്ട് വ്യാപര ഭവനിൽ ചേർന്നു. പഞ്ചായത്ത് പ്രസിഡന്‍റ് രാജു കട്ടക്കയം ഉദ്ഘാടനം ചെയ്തു. ഇതുവരെ 10 ലക്ഷത്തിന് മുകളിൽ ചികിത്സ ചെലവ് ആശുപത്രിയിൽ ആയതിനാൽ വ്യത്യസ്ത പരിപാടികളിലൂടെ പരമാവധി തുക സമാഹരിച്ചു നൽകാനുള്ള തയാറെടുപ്പിലാണ് ചികിത്സാ കമ്മിറ്റി. ചടങ്ങിൽ പുന്നക്കുന്ന് ഇടവക വികാരി റവ. ഡോ. ജേക്കബ് നെടുങ്ങാട്ട് വിശ്വാസികളിൽ നിന്നും നാട്ടുകാരിൽ നിന്നുമായി സമാഹരിച്ച ചികിത്സാ ധനസഹായം കമ്മിറ്റിക്ക് കൈമാറി. ബിരിയാണി ചലഞ്ച് നടത്തി അജയന്‍റെ ചികിത്സ സഹായത്തിനുവേണ്ടി എൽഡിഎഫിന്‍റെ നേതൃത്വത്തിൽ ബിരിയാണി ചലഞ്ച് നടത്തി. ജില്ലാ പഞ്ചായത്തംഗം ഷിനോജ് ചാക്കോ ഉദ്ഘാടനം ചെയ്തു. പഞ്ചായത്തംഗം കെ. വിഷ്ണു, ബിജു തുളുശേരി, ഹരീന്ദ്രൻ, കെ.യു. ജോയ്, ടി.എൻ. ഗിരീഷ്, ബേബി പുതുമന, മാമച്ചൻ, ജോജി പാലമറ്റം, ജോഷ്വാ ഒഴുകയിൽ, സൈമൺ മുട്ടയാനി, ജയിംസ്, മനോജ് ഒറീത്ത, ടോമി വട്ടക്കാട്ട്, ചന്ദ്രൻ വിളയിൽ, ബെന്നി വിലങ്ങാട്, അരുൺ, രമണി, കേശവൻ പാത്തിക്കര എന്നിവർ സംബന്ധിച്ചു.

പാര്‍ശ്വവത്കരിക്കപ്പെട്ടവരുടൈ ഭക്ഷ്യഭദ്രത ഉറപ്പുവരുത്തണം: സംസ്ഥാന ഭക്ഷ്യ കമ്മീഷന്‍

കാസര്‍ഗോഡ്: ഗോത്ര സമൂഹം ഉള്‍പ്പെടെ പാര്‍ശ്വവത്കരിക്കപ്പെട്ട വിഭാഗങ്ങളുടെ ഭക്ഷ്യഭദ്രത ഉറപ്പുവരുത്തണമെന്നും അങ്കണവാടികളിലും സ്‌കൂളുകളിലും ഉപയോഗിക്കുന്ന വെള്ളത്തിന്‍റെ ശുദ്ധി ഉറപ്പുവരുത്തണമെന്നും സംസ്ഥാന ഭക്ഷ്യകമ്മീഷന്‍ ചെയര്‍പേഴ്സണ്‍ ഡോ. ജിനു സക്കറിയ ഉമ്മന്‍ പറഞ്ഞു. ദേശീയ ഭക്ഷ്യ ഭദ്രതാ നിയമം 2013 പ്രകാരം ജില്ലയില്‍ നടപ്പിലാക്കി വരുന്ന വിവധ പദ്ധതികളുടെ നിര്‍വഹണ പുരോഗതി വിലയിരുത്തുന്നതിനായി കളക്ടറേറ്റ് കോണ്‍ഫറന്‍സ് ഹാളില്‍ ചേര്‍ന്ന അവലോകനയോഗത്തില്‍ സംസാരിക്കുകയായിരുന്നു അദ്ദേഹം. എഡിഎം പി. അഖില്‍ അധ്യക്ഷത വഹിച്ചു. യോഗത്തില്‍ ജില്ലാ സപ്ലൈ ഓഫീസര്‍ കെ.എന്‍. ബിന്ദു റിപ്പോര്‍ട്ട് അവതരിപ്പിച്ചു. കമ്മീഷന്‍ കോളിയടുക്കം ഗവ. യുപി സ്‌കൂളും ചെങ്കള പഞ്ചായത്തിലെ കല്ലക്കട്ട അങ്കണവാടിയും സന്ദര്‍ശിച്ചു.

കെജിസിഎഫ് ജില്ലാ സംഗമം

കാഞ്ഞങ്ങാട്: കേരള ഗവ. കോണ്‍ട്രാക്ടേഴ്‌സ് ഫെഡറേഷന്‍ (കെജിസിഎഫ്) ജില്ലാസംഗമം മേലാങ്കോട് ലയണ്‍സ് ഹാളില്‍ ജില്ലാ പഞ്ചായത്ത് പ്രസിഡന്‍റ് ബേബി ബാലകൃഷ്ണന്‍ ഉദ്ഘാടനം ചെയ്തു. ബി.എം. കൃഷ്ണന്‍ നായര്‍ അധ്യക്ഷത വഹിച്ചു. നഗരസഭ ചെയര്‍പേഴ്‌സണ്‍ കെ.വി. സുജാത, പി.വി. കൃഷ്ണന്‍, എ.വി. ശ്രീധരന്‍, പി.ബി. ദിനേശ്കുമാര്‍, ഇ.വി. കൃഷ്ണപൊതുവാള്‍, കെ.ജെ. വര്‍ഗീസ്, കെ.എം. സഹദേവന്‍, ഇ.കെ. ശശി, പി.വി. ജലാലുദ്ദീന്‍, പി. പ്രഭാകരന്‍, മധു പൊന്നന്‍ എന്നിവര്‍ സംബന്ധിച്ചു. വി. വേണുഗോപാലന്‍ ക്ലാസ് നയിച്ചു. ജി.എസ്. രാജീവ്, കെ. സുരേഷ്കുമാര്‍ എന്നിവർ പ്രസംഗിച്ചു.

പോലീസ് സ്റ്റേഷനുകൾക്കു മുന്നിൽ കോൺഗ്രസ് പ്രതിഷേധം

കാഞ്ഞങ്ങാട്: പോലീസ് സേനയില്‍ ഐപിഎസുകാരടക്കം ആയിരത്തോളം ക്രിമിനലുകളുണ്ടെന്നും മുഖ്യമന്ത്രിയുടെ ഓഫീസ് പോലും ക്രിമിനലുകള്‍ കൈയടക്കിയിരിക്കുകയാണെന്നും രാജ്‌മോഹന്‍ ഉണ്ണിത്താന്‍ എംപി. കെപിസിസി ആഹ്വാനപ്രകാരം പോലീസ് സ്റ്റേഷനുകൾക്ക് മുന്നില്‍ നടത്തുന്ന ജനകീയ പ്രതിഷേധ സദസിന്‍റെ ജില്ലാതല ഉദ്ഘാടനം ഹൊസ്ദുര്‍ഗില്‍ നിര്‍വഹിച്ചു പ്രസംഗിക്കുകയായിരുന്നു അദ്ദേഹം. ഉമേശന്‍ വേളൂര്‍ അധ്യക്ഷത വഹിച്ചു. സുരേഷ് കൊട്രച്ചാല്‍, പി.വി. സുരേഷ്, ബാലകൃഷ്ണന്‍ പെരിയ, പി.സി. സുരേന്ദ്രന്‍ നായര്‍, വിനോദ് ആവിക്കര, യു.വി.എ. റഹ്‌മാന്‍, അശോക് ഹെഗ്‌ഡെ, പി.വി. തമ്പാന്‍, ടിറ്റോ ജോസഫ്, കെ.പി. മോഹനന്‍, സിജോ അമ്പാട്ട്, പ്രവീണ്‍ തോയമ്മല്‍, എന്‍.കെ. രത്‌നാകരന്‍, പ്രമോദ് കെ. റാം, സുരേഷ്ബാബു, പി.വി. വേണുഗോപാല്‍, വി. നാരായണന്‍, നാരായണന്‍ കീക്കാംകോട്ട്, ചന്ദ്രന്‍ ഞാണിക്കടവ്, ഷിബിന്‍ ഉപ്പിലിക്കൈ, വിജയലക്ഷ്മി, വിമല കുഞ്ഞികൃഷ്ണന്‍, രമ വെള്ളിക്കോത്ത്, എക്കാല്‍ കുഞ്ഞിരാമന്‍ എന്നിവര്‍ പ്രസംഗിച്ചു. കാസര്‍ഗോഡ്: കാസര്‍ഗോഡ്, ചെങ്കള, മധൂര്‍, മൊഗ്രാല്‍പുത്തൂര്‍ മണ്ഡലം കോണ്‍ഗ്രസ് കമ്മിറ്റികളുടെ നേതൃത്വത്തില്‍ കാസര്‍ഗോഡ് ടൗണ്‍ പോലീസ് സ്റ്റേഷന് മുന്നില്‍ നടത്തിയ ജനകീയ പ്രതിഷേധസദസ് ഡിസിസി പ്രസിഡന്‍റ് പി.കെ.ഫൈസൽ ഉദ്ഘാടനം ചെയ്തു. അബ്ദുള്‍ റസാഖ് അധ്യക്ഷത വഹിച്ചു. മഹമൂദ് വട്ടയക്കാട്, സി.വി. ജയിംസ്, ആര്‍. ഗംഗാധരന്‍, കെ. ഖാലിദ്, എം. രാജീവന്‍ നമ്പ്യാര്‍, മനാഫ് നുള്ളിപ്പാടി, ജി. നാരായണന്‍, ബി.എ. ഇസ്മയില്‍, കെ.പി. നാരായണന്‍ നായര്‍, കെ.ടി. സുഭാഷ് നാരായണന്‍, ഹനീഫ ചേരങ്കൈ, എ. ഷാഹുല്‍ ഹമീദ്, മുനീര്‍ ബാങ്കോട്, ഖാന്‍ പൈക്ക, കമലാക്ഷ സുവര്‍ണ, വസന്തന്‍ അജക്കോട്, ഉസ്മാന്‍ അണങ്കൂര്‍, ഇ. ശാന്തകുമാരി, ജമീല അഹമ്മദ്, ഉഷ അര്‍ജുനന്‍, കുസുമം ചേനക്കോട്, ആബിദ് ഇടച്ചേരി, പി.കെ. വിജയന്‍, പി. കുഞ്ഞികൃഷ്ണന്‍ നായര്‍, അഷ്‌റഫ് സിലോണ്‍, അബ്ദുള്‍ സമദ്, ബാലകൃഷ്ണന്‍ പറങ്കിത്തൊട്ടി, എം. ധര്‍മ്മധീര, ഹനീഫ കാട്ടുകൊച്ചി, ഹരീന്ദ്രന്‍ ഇറക്കോട് , ബി. ശശികല, കെ.വി. ജോഷി, ബാബു അജക്കോട്, സലിം ഇടനീര്‍, അഹമ്മദ് ചൗക്കി, യു. വേലായുധന്‍ എന്നിവര്‍ പ്രസംഗിച്ചു. ചിറ്റാരിക്കാൽ: കോൺഗ്രസ് ഈസ്റ്റ് എളേരി മണ്ഡലം കമ്മറ്റിയുടെയും ഭീമനടി മണ്ഡലം കമ്മറ്റിയുടെയും നേതൃത്വത്തിൽ ചിറ്റാരിക്കാൽ പോലീസ് സ്റ്റേഷൻ മുന്നിൽ നടന്ന പ്രതിഷേധസദസ് ഡിസിസി വൈസ് പ്രസിഡന്‍റ് പി.ജി. ദേവ് ഉദ്ഘാടനം ചെയ്തു. ഈസ്റ്റ് എളേരി മണ്ഡലം പ്രസിഡന്‍റ് ജോർജ് കരിമഠം അധ്യക്ഷത വഹിച്ചു. ശാന്തമ്മ ഫിലിപ്പ്, ജോസഫ് മുത്തോലി, മാത്യു പടിഞ്ഞാറയിൽ, എം.കെ. ഗോപാലകൃഷ്ണ, സി.എ. ബാബു, ജോയി മാരൂർ, ജോസ് കുത്തിയതോട്ടിൽ എന്നിവർ പ്രസംഗിച്ചു. രാജപുരം: കള്ളാർ, പനത്തടി മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ രാജപുരം പോലീസ് സ്റ്റേഷന് മുന്നിൽ നടന്ന ജനകീയ പ്രതിഷേധ സദസ് ഡിസിസി വൈസ് പ്രസിഡന്‍റ് ജയിംസ് പന്തമ്മാക്കൽ ഉദ്ഘാടനം ചെയ്തു. എം.എം. സൈമൺ അധ്യക്ഷത വഹിച്ചു. സി.വി. ഭാവനൻ മുഖ്യപ്രഭാഷണം നടത്തി. കെ.ജെ. ജയിംസ്, ജോണി തോലമ്പുഴ, സജി പ്ലാച്ചേരി, പി. ഗീത എന്നിവർ പ്രസംഗിച്ചു. വെള്ളരിക്കുണ്ട്: ബളാൽ, വെസ്റ്റ് എളേരി മണ്ഡലം കോൺഗ്രസ് കമ്മിറ്റികളുടെ നേതൃത്വത്തിൽ വെള്ളരിക്കുണ്ട് പോലീസ് സ്റ്റേഷനു മുന്നിൽ നടന്ന ജനകീയ പ്രതിഷേധസദസ് കർഷക കോൺഗ്രസ് ജില്ലാ പ്രസിഡന്‍റ് രാജു കട്ടക്കയം ഉദ്ഘാടനം ചെയ്തു. ജോയി ജോസഫ് അധ്യക്ഷത വഹിച്ചു. ജോമോൻ ജോസ് മുഖ്യപ്രഭാഷണം നടത്തി. എം.പി. ജോസഫ്, ഭാസ്കരൻ, ഷോബി ജോസഫ്, രാജേഷ് തമ്പാൻ, മാർട്ടിൻ ജോർജ്, എം. രാധാമണി, അലക്സ് നെടിയകാല, മോൻസി ജോയി, ബിൻസി ജെയിൻ, മാധവൻ നായർ, പി.സി. രഘുനാഥൻ, പദ്മിനി, കെ.ആർ. വിനു, രാഘവൻ അരിങ്കല്ല്, വി.വി. രാഘവൻ, ജിമ്മി ഇടപ്പാടി, സാജൻ പൂവന്നിക്കുന്നേൽ, ജോസ് മണിയങ്ങാട്ട് എന്നിവർ പ്രസംഗിച്ചു. പിലിക്കോട്: തൃക്കരിപ്പൂർ, പിലിക്കോട്, വലിയപറമ്പ്, പടന്ന മണ്ഡലം കോൺഗ്രസ് കമ്മിറ്റികളുടെ നേതൃത്വത്തിൽ ചന്തേര പോലീസ് സ്റ്റേഷൻ പരിസരത്ത് നടത്തിയ ജനകീയ പ്രതിഷേധ സദസ് കെപിസിസി സെക്രട്ടറി എം. അസിനാർ ഉദ്ഘാടനം ചെയ്തു. എം.പി. മനോഹരൻ അധ്യക്ഷത വഹിച്ചു. കെ.കെ. രാജേന്ദ്രൻ, കെ.പി. പ്രകാശൻ, കെ.വി. വിജയൻ, സി. രവി, എം. രജീഷ് ബാബു, കെ. സിന്ധു, കെ. അശോകൻ, കെ. സജീവൻ, കെ.വി. ജതീന്ദ്രൻ, പി.വി. കണ്ണൻ, കെ. ശ്രീധരൻ, കെ.പി. ദിനേശൻ, രാഘവൻ കുളങ്ങര എന്നിവർ പ്രസംഗിച്ചു.

അമീബിക് മസ്തിഷ്‌ക ജ്വരം: സ്‌കൂളുകളിലെ കുടിവെള്ള പരിശോധന ഉറപ്പാക്കണം

കാസര്‍ഗോഡ്: അമീബിക് മസ്തിഷ്‌ക ജ്വരത്തിനെതിരെ തികഞ്ഞ ജാഗ്രത വേണമെന്നും കാമ്പയിനില്‍ പങ്കാളികളായി ജില്ലയിലെ മുഴുവന്‍ കുടുംബങ്ങളും കിണറുകളിലെയും കുടിവെള്ള സ്രോതസുകളലെയും ജലം വിവിധ വിദ്യാലയങ്ങളില്‍ സജ്ജീകരിച്ച ജല ഗുണനിലവാര പരിശോധന ലാബുകളില്‍ പരിശോധിക്കണമെന്നും ജില്ലാ പഞ്ചായത്ത് പ്രസിഡന്‍റ് ബേബി ബാലകൃഷ്ണന്‍. നവകേരളം കര്‍മപദ്ധതി-2 ജില്ലാ മിഷന്‍ യോഗത്തില്‍ അധ്യക്ഷത വഹിക്കുകയായിരുന്നു അവര്‍. നിലവില്‍ ജില്ലയിലെ 12 വിദ്യാലയങ്ങളിലാണ് ജല ഗുണനിലവാര പരിശോധന ലാബുകളുള്ളത്. ഇതുവരെ ഈ ലാബുകളില്‍ 1179 സാമ്പിളുകള്‍ പരിശോധിച്ചു കഴിഞ്ഞു. കയ്യൂര്‍ ജിവിഎച്ച്എസ്എസ്, മടിക്കൈ രണ്ട് ജിവിഎച്ച്എസ്എസ്, ബളാല്‍ ജിഎച്ച്എസ്എസ്, പട്‌ല ജിഎച്ച്എസ്എസ്, പിലിക്കോട് സികെഎന്‍എസ് ജിഎച്ച്എസ്എസ്, ഉദുമ ജിഎച്ച്എസ്എസ്, ബങ്കര മഞ്ചേശ്വരം ജിഎച്ച്എസ്എസ്, കുണ്ടംകുഴി ജിഎച്ച്എസ്എസ്, മൊഗ്രാല്‍ ജിവിഎച്ച്എസ്എസ്, മുള്ളേരിയ ജിവിഎച്ച്എസ്എസ്, ബളാംതോട് ജിഎച്ച്എസ്എസ്, പൈവളിഗെ ജിഎച്ച്എസ്എസ് എന്നീ വിദ്യാലയങ്ങളിലാണ് ജലഗുണനിലവാര പരിശോധനാ ലാബുകളുള്ളത്. പൊതുജനങ്ങള്‍ ഈ സൗകര്യം പരമാവധി ഉപയോഗിക്കണമെന്നും ജില്ലാ പഞ്ചായത്ത് പ്രസിഡന്‍റ് പറഞ്ഞു. ജില്ലാ കളക്ടര്‍ കെ. ഇമ്പശേഖര്‍ മുഖ്യപ്രഭാഷണം നടത്തി. ലൈഫ് മിഷന്‍ പദ്ധതിയില്‍ അതിദരിദ്ര വിഭാഗത്തില്‍ ഉള്‍പ്പെട്ട ആളുകളുമായി കരാറില്‍ ഏര്‍പ്പെട്ട് ആദ്യ ഗഡു അനുവദിച്ചുവെന്ന് ഉറപ്പാക്കാന്‍ ലൈഫ് മിഷന്‍ ജില്ലാ കോ-ഓര്‍ഡിനേറ്ററോട് നിര്‍ദേശിച്ചു. വിദ്യാകിരണം പദ്ധതിയില്‍ തടസങ്ങള്‍ കണ്ടെത്തി വേഗത്തില്‍ പരിഹരിക്കുന്നതിനുള്ള നടപടികള്‍ സ്വീകരിക്കുന്നതിനായി കളക്ടറുടെ ചേംബറില്‍ യോഗം ചേരാൻ തീരുമാനിച്ചു. ഒരു തൈനടാം കാമ്പയിനില്‍ ജില്ലയില്‍ ആകെ 2,80,592 തൈകള്‍ നട്ടു പിടിപ്പിച്ചു. അമീബിക് മസ്തിഷ്‌ക ജ്വരത്തിനെതിരായുള്ള ജലമാണ് ജീവന്‍ കാമ്പയിന്‍റെ ഭാഗമായി ജില്ലയിലെ 5619 പൊതു കിണറുകള്‍ ശുദ്ധീകരിച്ചു. 12 മാലിന്യ മുക്തം നവകേരളം കാമ്പയിന്‍റെ ഭാഗമായി 656 ഹരിത വിദ്യാലയങ്ങളിലും 2537 ഹരിത സ്ഥാപനങ്ങളിലും 65 ഹരിത കലാലയങ്ങളിലും 34 ഹരിത ടൗണുകളിലും 182 ഹരിത പത സ്ഥലങ്ങളിലും 12,175 ഹരിത അയല്‍ക്കൂട്ടങ്ങളിലും 14 ഹരിത ടൂറിസം കേന്ദ്രങ്ങളിലും 14 ഹരിത കെഎസ്ആര്‍ടിസികളിലും 284 ഹരിത ഗ്രന്ഥശാലകളിലും പ്രഖ്യാപനം നടത്തി. ജില്ലാ ജലബജറ്റ് പ്രകാശനം ചെയ്തു. ജില്ലയിലെ മുഴുവന്‍ പഞ്ചയത്തുകളും നഗരസഭകളും ബ്ലോക്ക് പഞ്ചായത്തുകളും ജലബജറ്റ് റിപ്പോര്‍ട്ട് തയാറാക്കി. ലൈഫ് മിഷന്‍ പദ്ധതിയില്‍ ആകെ 18,106 വീടുകള്‍ പൂര്‍ത്തിയായി. ലൈഫ് 2020 ഭൂമിയുള്ള ഭവന രഹിതരായവരുടെ വിഭാഗത്തില്‍ 2734 വീടുകള്‍ പൂര്‍ത്തിയായി. 'മനസോടിത്തിരി മണ്ണ്' കാമ്പയിനില്‍ സുമനസുകളില്‍ നിന്നും 2.8 ഏക്കര്‍ ഭൂമി ലഭിച്ചു. ജില്ലാ ആസൂത്രണ സമിതി ഹാളില്‍ ചേര്‍ന്ന യോഗത്തില്‍ ജില്ലാ പഞ്ചായത്ത് സ്ഥിരംസമിതി അധ്യക്ഷ എസ്.എന്‍. സരിത, ഡിപിസി സര്‍ക്കാര്‍ നോമിനി സി.ആര്‍. രാചനദ്രന്‍, നഗരസഭ അധ്യക്ഷരായ കെ.വി. സുജാത, ടി.വി. ശാന്ത, ദേലമ്പാടി പഞ്ചായത്ത് പ്രസിഡന്‍റ് എ.പി. ഉഷ എന്നിവര്‍ സംസാരിച്ചു. ആര്‍ദ്രം മിഷന്‍ നോഡല്‍ ഓഫീസര്‍ ഡോ. പി.വി. അരുണ്‍, വിദ്യാകിരണം മിഷന്‍ ജില്ലാ കോ-ഓര്‍ഡിനേറ്റര്‍ ടി. പ്രകാശന്‍, ലൈഫ് മിഷന്‍ കോ-ഓര്‍ഡിനേറ്റര്‍ എം. വത്സന്‍, ചെറുകിട ജലസേചനം എക്സിക്യൂട്ടീവ് എന്‍ജിനിയര്‍ ലാലി ജോര്‍ജ്, ഹരിതകേരളം മിഷന്‍ ജില്ലാ കോ-ഓര്‍ഡിനേറ്റര്‍ കെ. ബാലകൃഷ്ണന്‍ എന്നിവര്‍ പ്രവര്‍ത്തന റിപ്പോര്‍ട്ട് അവതരിപ്പിച്ചു.

ഐഐപിഡി ലോകത്തിന് മുന്നില്‍ കേരളം അവതരിപ്പിക്കുന്ന മാതൃകാപ്രസ്ഥാനം: അടൂര്‍ ഗോപാലകൃഷ്ണന്‍

കാഞ്ഞങ്ങാട്: ലോകത്തിന് മുന്നില്‍ നമ്മുടെ നാട് അവതരിപ്പിക്കുന്ന ഒരു മാതൃക പ്രസ്ഥാനമാണ് ഇന്‍റര്‍നാഷണല്‍ ഇന്‍സ്റ്റിറ്റ്യൂട്ട് ഫോര്‍ പീപ്പിള്‍ വിത്ത് ഡിസെബിലിറ്റീസ് എന്ന് ചലച്ചിത്ര സംവിധായകന്‍ അടൂര്‍ ഗോപാലകൃഷ്ണന്‍. ഭിന്നശേഷിക്കാരുടെ സമഗ്ര വികസനത്തിനായി തിരുവനന്തപുരം ഡിഫറന്‍റ് ആര്‍ട് സെന്‍ററിന്‍റെ നേതൃത്വത്തില്‍ മടിക്കൈ അടുക്കത്തുപറമ്പില്‍ നിര്‍മിക്കുന്ന ഐഐപിഡിയുടെ നിര്‍മാണോദ്ഘാടന ചടങ്ങില്‍ പ്രസംഗിക്കുകയായിരുന്നു അദ്ദേഹം. ഐഐപിഡിയുടെ വിജയം സമൂഹത്തിന്‍റെ സാംസ്‌കാരികവും മാനുഷികവുമായ പുരോഗതിക്ക് നിര്‍ണായകമാണെന്ന് അദ്ദേഹം കൂട്ടിച്ചേര്‍ത്തു. ‘അന്യജീവനുതകി സ്വജീവിതം ധന്യമാക്കുമമലേ വിവേകികള്‍’ എന്ന കുമാരനാശാന്‍റെ വാക്കുകള്‍ ജീവിതത്തില്‍ പകര്‍ത്തി കാണിക്കുന്ന വ്യക്തിയാണ് ഗോപിനാഥ് മുതുകാടെന്ന് കഥാകൃത്ത് ടി. പദ്മനാഭന്‍ പറഞ്ഞു. അദ്ദേഹം ഏറ്റെടുത്ത കാര്യം പൂര്‍ത്തിയാകാതെ നിന്നിട്ടില്ല. തന്‍റെ കാലം കഴിയുന്നതിനുമുമ്പ് തന്നെ ഈയൊരു ബൃഹദ്പദ്ധതി സഫലമായി കാണുവാന്‍ കഴിയുമെന്ന ദൃഢവിശ്വാസമുണ്ടെന്നും അദ്ദേഹം പറഞ്ഞു. സ്ഥലം വാങ്ങാന്‍ സംഭാവന ചെയ്ത അന്തരിച്ച പ്രഫ. എം.കെ. ലൂക്കയുടെ ചിത്രത്തിന് മുന്നില്‍ പുഷ്പാര്‍ച്ചന നടത്തിയാണ് ചടങ്ങുകള്‍ ആരംഭിച്ചത്. ഊരാളുങ്കൽ സൊസൈറ്റിയാണ് നിര്‍മാണ പ്രവര്‍ത്തനങ്ങള്‍ നടത്തുന്നത്. എഗ്രിമെന്‍റും ആദ്യഗഡുവും ഗോപിനാഥ് മുതുകാട് ഊരാളുങ്കല്‍ ലേബര്‍ കോണ്‍ട്രാക്ട് കോ-ഓപ്പറേറ്റീവ് സൊസൈറ്റി ചെയര്‍മാന്‍ രമേശന്‍ പാലേരിക്ക് കൈമാറി. ഡിഎസി ചെയര്‍മാനും മുന്‍ ചീഫ് സെക്രട്ടറിയുമായ ജിജി തോംസണ്‍ അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്‍റ് ബേബി ബാലകൃഷ്ണന്‍, പഞ്ചായത്ത് പ്രസിഡന്‍റ് എസ്. പ്രീത, ദാമോദര്‍ ആര്‍ക്കിടെക്ട് സിഇഒ കെ. ദാമോദരന്‍, മനോജ് ഒറ്റപ്പാലം, തങ്കമ്മ, ശശീന്ദ്രന്‍ മടിക്കൈ എന്നിവര്‍ പങ്കെടുത്തു. ഡബ്ല്യുഎച്ച്ഒ ഇന്ത്യന്‍ നാഷണല്‍ പ്രഫഷണല്‍ ഓഫീസര്‍ ഡോ. മുഹമ്മദ് അഷീല്‍ പദ്ധതി വിശദീകരണം നടത്തി.

ശാസ്ത്രജ്ഞനുമായി സംവദിച്ച് വിദ്യാർഥികൾ

തൃക്കരിപ്പൂർ: ഗ്ലോബൽ യംഗ് റിസർച്ചേഴ്സ് അക്കാദമി സെക്രട്ടറിയും മസാച്ചുസെറ്റ്സ് ഇൻസ്റ്റിറ്റ്യൂട്ട് ഓഫ് ടെക്നോളജിയിലെ ശാസ്ത്രജ്ഞനുമായ മലപ്പുറം എടപ്പാൾ സ്വദേശി ഡോ. വിപിൻദേവ് വസുദേവുമായി സംവദിച്ച് സെന്‍റ് പോൾസ് എയുപി സ്കൂൾ വിദ്യാർഥികൾ. ചെറുപ്പം മുതൽ ശാസ്ത്രീയ ചിന്ത വളർത്തിയെടുക്കേണ്ടതിന്‍റെ പ്രാധാന്യം അദ്ദേഹം ചൂണ്ടിക്കാട്ടി. പിടിഎ പ്രസിഡന്‍റ് കരീം ചന്തേര അധ്യക്ഷതവഹിച്ചു. മുഖ്യാധ്യാപിക സിസ്റ്റർ ഷീന ജോർജ്, അധ്യാപകരായ സി. നിഷ, കെ.പി. ഷിജിന, വിദ്യാർഥികളായ ഉണ്ണിമാധവ്, എ. അഫ്രീദ്, യു.കെ. അലോക് എന്നിവർ പ്രസംഗിച്ചു.

തൃക്കരിപ്പൂര്‍ പഞ്ചായത്ത് ലൈഫ് പിഎംഎവൈയില്‍ 62 വീടുകള്‍ കൈമാറി

തൃക്കരിപ്പൂര്‍: ലൈഫ് പിഎംഎവൈ പദ്ധതികളുടെ ഭാഗമായി തൃക്കരിപ്പൂര്‍ പഞ്ചായത്തില്‍ നിര്‍മാണം പൂര്‍ത്തിയായ 62 ഭവനങ്ങളുടെ താക്കോല്‍ദാനം സി.എച്ച്. മുഹമ്മദ്‌കോയ മെമ്മോറിയല്‍ ടൗണ്‍ ഹാളില്‍ ജില്ലാ പഞ്ചായത്ത് പ്രസിഡന്‍റ് ബേബി ബാലകൃഷ്ണന്‍ നിര്‍വഹിച്ചു. പഞ്ചായത്ത് പ്രസിഡന്‍റ് വി.കെ. ബാവ അധ്യക്ഷത വഹിച്ചു. ലൈഫ് മിഷന്‍ ജില്ലാ കോ-ഓര്‍ഡിനേറ്റര്‍ എം. വത്സന്‍ പദ്ധതി വിശദീകരണം നടത്തി. ജില്ലാ പഞ്ചായത്ത് ക്ഷേമകാര്യ സ്ഥിരംസമിതി അധ്യക്ഷന്‍ എം. മനു, പഞ്ചായത്ത് വൈസ് പ്രസിഡന്‍റ് ഇ.എം. ആനന്ദവല്ലി, സ്ഥിരംസമിതി അധ്യക്ഷന്‍ ഷംസുദീന്‍ ആയിറ്റി, ബ്ലോക്ക് പഞ്ചായത്തംഗം സി. ചന്ദ്രമതി, സത്താര്‍ വടക്കുമ്പാട്, കെ.വി. കാര്‍ത്യായനി, ഇ. ശശിധരന്‍, എം. രജീഷ് ബാബു, ഫായിസ് ബീരിച്ചേരി, സീത ഗണേഷ്, കെ.വി. രാധ, കെ.എന്‍. വിഭാര്‍ഗവി, എ.കെ. സുജ, എം.കെ. ഹാജി, എം. അബ്ദുള്‍ ഷുക്കൂര്‍, ഫരീദ ബീവി, സാജിദ സഫറുള്ള, വി.പി. സുനീറ, എം. ഷൈമ, സിബി ജോര്‍ജ്, രജിഷ കൃഷ്ണന്‍, എസ്. പ്രസൂണ്‍, അസ്ഹറുദീന്‍, വി.വി. വിജയന്‍, എം.ഡി. സേതുമാധവന്‍, എല്‍.കെ. യൂസഫ്, എം. മാലതി എന്നിവര്‍ സംസാരിച്ചു.

ചിറ്റാരിക്കാൽ ഉപജില്ലാ കലോത്സവം ഒക്‌ടോബർ 14 മുതൽ

പാലാവയൽ: ചിറ്റാരിക്കാൽ ഉപജില്ലാ സ്കൂൾ കലോത്സവം ഒക്‌ടോബർ 14 മുതൽ 17 വരെ പാലാവയൽ സെന്‍റ് ജോൺസ് ഹയർസെക്കൻഡറി സ്കൂളിൽ നടക്കും. സംഘാടകസമിതി രൂപീകരണയോഗം പഞ്ചായത്ത് പ്രസിഡന്‍റ് ജോസഫ് മുത്തോലി ഉദ്ഘാടനം ചെയ്തു. ഉപജില്ലാ വിദ്യാഭ്യാസ ഓഫീസർ ജസീന്ത ജോൺ അധ്യക്ഷതവഹിച്ചു. സ്കൂൾ മാനേജർ ഫാ. ജോസ് മാണിക്കത്താഴെ മുഖ്യപ്രഭാഷണം നടത്തി. പഞ്ചായത്ത് വൈസ് പ്രസിഡന്‍റ് ഫിലോമിന ജോണി ആക്കാട്ട്, വിദ്യാഭ്യാസ സ്ഥിരംസമിതി അധ്യക്ഷൻ പ്രശാന്ത് പാറേക്കുടിയിൽ, സ്കൂൾ അസി. മാനേജർ ഫാ. അമൽ ചെമ്പകശേരിൽ, പഞ്ചായത്തംഗങ്ങളായ മേഴ്സി മാണി, വി.ബി. ബാലചന്ദ്രൻ, തേജസ് ഷിന്‍റോ, പ്രിൻസിപ്പൽ ഫോറം പ്രസിഡന്‍റ് ഫാ. സന്തോഷ് പീറ്റർ, പ്രിൻസിപ്പൽ ഡോ. മെന്‍റലിൻ മാത്യു, എൽപി സ്കൂൾ മുഖ്യാധ്യാപിക എം.വി. ഗീതമ്മ, പിടിഎ പ്രസിഡന്‍റ് സോമി അറയ്ക്കൽ, ഹെഡ്മാസ്റ്റർ ഫോറം പ്രസിഡന്‍റ് മാർട്ടിൻ ജോസഫ്, ബിപിസി ഷൈജു, കമ്പല്ലൂർ ജിഎച്ച്എസ്എസ് പ്രിൻസിപ്പൽ മനോജ്, മുഖ്യാധ്യാപകൻ ജനാർദ്ദനൻ, അലോഷ്യസ്, റോഷി ജോസ് എന്നിവർ പ്രസംഗിച്ചു. ജനറൽ കമ്മറ്റിയും 16 സബ്കമ്മറ്റികളും രുപീകരിച്ചു.

കിക്ക് ഡ്രഗ്സ് മിനി മാരത്തൺ വിജയികൾക്ക് നാലുമാസം കഴിഞ്ഞിട്ടും സമ്മാനതുക നൽകാതെ സർക്കാർ

കാസർഗോഡ്: ലഹരിവിരുദ്ധ പ്രചാരണങ്ങളുടെ ഭാഗമായി സംസ്ഥാന കായികവകുപ്പിന്‍റെ നേതൃത്വത്തിൽ സംഘടിപ്പിച്ച കിക്ക് ഡ്രഗ്സ് മിനി മാരത്തണിലെ വിജയികൾക്ക് സർക്കാരിന്‍റെ സമ്മാനം നാലുമാസം കഴിഞ്ഞിട്ടും ഡമ്മി ചെക്കിലൊതുങ്ങുന്നു. പുരുഷ, വനിതാ വിഭാഗങ്ങളിലെ ഒന്നും രണ്ടും മൂന്നും സ്ഥാനക്കാർക്ക് യഥാക്രമം 15,000, 10,000, 7500 വീതം രൂപയും നാലു മുതൽ ഏഴു വരെ സ്ഥാനക്കാർക്ക് 2000 രൂപ വീതവും സമ്മാനമായി നൽകുമെന്നാണ് സർക്കാർ പ്രഖ്യാപിച്ചിരുന്നത്. സംസ്ഥാനതലത്തിൽ സംഘടിപ്പിച്ച പരിപാടിയുടെ ഉദ്ഘാടനം നടന്നത് കഴിഞ്ഞ മെയ് അഞ്ചിന് കാസർഗോഡ് ജില്ലയിലായിരുന്നു. മന്ത്രി വി. അബ്ദുറഹിമാനാണ് ഉദ്ഘാടനം നിർവഹിച്ചത്. പാലക്കുന്നിൽ നിന്ന് കാസർഗോഡ് കളക്ടറേറ്റ് പരിസരം വരെയായിരുന്നു മാരത്തൺ ഓട്ടമത്സരം സംഘടിപ്പിച്ചത്. കളക്ടറേറ്റ് പരിസരത്ത് ഓടിയെത്തിയ വിജയികൾക്ക് അപ്പോൾത്തന്നെ സമ്മാനത്തുകയ്ക്കുള്ള ഡമ്മി ചെക്കുകൾ മന്ത്രി സമ്മാനിച്ചതാണ്. യഥാർഥ തുക അവരവരുടെ ബാങ്ക് അക്കൗണ്ടുകളിൽ ഇടുന്നതിനായി അക്കൗണ്ട് വിവരങ്ങൾ ജില്ലാ സ്പോർട്സ് കൗൺസിലിൽ നൽകാനും ആവശ്യപ്പെട്ടു. എല്ലാവരും അന്നുതന്നെ അക്കൗണ്ട് വിവരങ്ങൾ നൽകിയെങ്കിലും സമ്മാനത്തുക ഇതുവരെ ആരുടെയും അക്കൗണ്ടിലെത്തിയില്ല. ഇതുമായി ബന്ധപ്പെട്ട ഫണ്ട് ഇതുവരെ സർക്കാരിൽനിന്നും പാസായിട്ടില്ലെന്നാണ് ജില്ലാ സ്പോർട്സ് കൗൺസിലിന്‍റെ വിശദീകരണം. ഫണ്ട് കിട്ടിയാലുടൻ എല്ലാവരുടെയും അക്കൗണ്ടിൽ തുക ലഭ്യമാക്കുമെന്നും സ് പോർട്സ് കൗൺസിൽ അധികൃതർ പറയുന്നു. പക്ഷേ ഫണ്ട് പാസാകാൻ ഇനി എത്രനാൾ കാത്തിരിക്കേണ്ടിവരുമെന്ന് വ്യക്തമല്ല. അധികം വൈകിയാൽ തദ്ദേശ തെരഞ്ഞെടുപ്പും പിന്നാലെ നിയമസഭാ തെരഞ്ഞെടുപ്പും ബന്ധപ്പെട്ട പെരുമാറ്റച്ചട്ടങ്ങളുമൊക്കെ വരുമെന്നതിനാൽ സമ്മാനത്തുക കിട്ടാതെ പോകുമോ എന്ന ആശങ്കയും ഉയർന്നിട്ടുണ്ട്. ലഹരിവിരുദ്ധ പ്രചാരണത്തിന്‍റെ ഭാഗമായി എല്ലാ ജില്ലകളിലും കായികവകുപ്പിനു കീഴിൽ മിനി മാരത്തണും വാക്കത്തണുമൊക്കെ സംഘടിപ്പിച്ചിരുന്നു. എവിടെയും ഇതുവരെ സമ്മാനത്തുക ലഭ്യമായിട്ടില്ലെന്നാണ് വിവരം.

നാലുമാസത്തിനുള്ളില്‍ 3000 പേര്‍ക്ക് അക്ഷരവെളിച്ചം പകരാനൊരുങ്ങി സാക്ഷരത മിഷന്‍

കാസര്‍ഗോഡ്: ലോക സാക്ഷരത ദിനത്തിന്‍റെ ഭാഗമായി സെപ്റ്റംബര്‍ എട്ടു മുതല്‍ 15 വരെ ഒരാഴ്ചക്കാലം നീണ്ടുനില്‍ക്കുന്ന സാക്ഷരത വാരാചരണത്തിനോടനുബന്ധിച്ച് വിപുലമായ പരിപാടികള്‍ സംഘടിപ്പിക്കും. അടുത്ത നാലുമാസത്തിനുള്ളില്‍ ജില്ലയിലെ 3000 നിരക്ഷരരെ സാക്ഷരരാക്കുന്നതിനുള്ള പ്രവര്‍ത്തനങ്ങളുമായി മുന്നോട്ടുപോകുമെന്ന് ജില്ലാ സാക്ഷരതാ മിഷന്‍ കോ-ഓര്‍ഡിനേറ്റര്‍ പി.എന്‍. ബാബു പറഞ്ഞു. ജില്ലാ പഞ്ചായത്ത് പ്രസിഡന്‍റ് ബേബി ബാലകൃഷ്ണന്‍ അടക്കമുള്ള 1991 കാലഘട്ടത്തിലെ മുതിര്‍ന്ന സാക്ഷരതാ പ്രവര്‍ത്തകരേയും മുതിര്‍ന്ന പഠിതാക്കളേയും ആദരിക്കും. ഹയര്‍ സെക്കണ്ടറി തുല്യതാ ക്ലാസ്സുകള്‍, പച്ചമലയാളം ക്ലാസുകള്‍ എന്നിവ ആരംഭിക്കും, ബ്രെയില്‍ പഠിതാക്കളുടെ സംഗമം മറ്റ് കലാ സാംസ്‌കാരിക പരിപാടികളും സാക്ഷരതാ വാരാചരണത്തില്‍ നടത്തുന്നതാണ്.

പള്ളിക്കരയിലെ അന്തിമ വോട്ടര്‍പട്ടികയില്‍ വന്‍ തിരിമറിയെന്ന് യുഡിഎഫ്

കാസര്‍ഗോഡ്: പള്ളിക്കര പഞ്ചായത്തില്‍ തദ്ദേശ സ്വയംഭരണസ്ഥാപനങ്ങളിലേക്കുള്ള തെരഞ്ഞടുപ്പിന്‍റെ അന്തിമ വോട്ടര്‍ പട്ടികയില്‍ വന്‍ തിരിമറിയാണ് നടത്തിയിരിക്കുന്നതെന്ന് യുഡിഎഫ് പളളിക്കര പഞ്ചായത്ത് കമ്മിറ്റി ഭാരവാഹികള്‍ പത്രസമ്മേളനത്തില്‍ ആരോപിച്ചു. അശാസ്ത്രീയമായ വാര്‍ഡ് വിഭജനം നടത്തിയതിനെതിരെ യുഡിഎഫിന്‍റെ പരാതി പരിഗണിക്കാതെയാണ് വാര്‍ഡ് വിഭജനം പൂര്‍ത്തിയാക്കിയത്. തെരഞ്ഞെടുപ്പ് കമ്മീഷന്‍ അന്തിമമായി പ്രസിദ്ധീ കരിച്ച ക്യൂഫീല്‍ഡ് മാപ്പില്‍ രേഖപ്പെടുത്തിയിരിക്കുന്ന അതിരുകള്‍ക്കുള്ളില്‍ വരേണ്ടതും പുതിയ വാര്‍ഡ് രൂപീകരിക്കുമ്പോള്‍ ഡീലിമിറ്റേഷന്‍ കമ്മീഷന്‍ നല്‍കുന്ന നിര്‍ദേശങ്ങള്‍ ഉള്‍ക്കൊള്ളുന്ന അനുബന്ധങ്ങളില്‍ പറയുന്നതുമായ വോട്ടര്‍മാരെ ഒഴിവാക്കിയാണ് ആറാംവാര്‍ഡായ അരവത്ത്, പത്തൊമ്പതാം വാര്‍ഡായ കീക്കാന്‍ എന്നിവിടങ്ങളില്‍ അന്തിമ വോട്ടര്‍പട്ടിക തയാറാ ക്കിയത്. അരവത്ത് വാര്‍ഡിന്‍റെ അതിര്‍ത്തിക്കുള്ളില്‍ വരേണ്ട 383 വോട്ടുകളും കീക്കാന്‍ വാര്‍ഡിന്‍റെ അതിര്‍ത്തിക്കുള്ളില്‍ വരേണ്ട 94 വോട്ടുകളും ഒരു മാനദണ്ഡവും ഇല്ലാതെ ഒഴിവാക്കിയാണ് അന്തിമ പട്ടിക പ്രസിദ്ധീകരിച്ചിരിക്കുന്നത്. ഇതു തെരഞ്ഞെടുപ്പ് മാനദണ്ഡങ്ങള്‍ക്കെതിരാണ്. ക്യൂ ഫീല്‍ഡ് മാപ്പില്‍ പറഞ്ഞ അതിരുകളില്‍ മാറ്റം വരുത്തണമെങ്കില്‍ ഡീലിമിറ്റേഷന്‍ കമ്മീഷന്‍റെ ഉത്തരവ് വേണമെന്നിരിക്കെ അങ്ങനെ യൊരു ഉത്തരവ് ഇല്ലാതെ അതിര്‍ത്തിയില്‍ മാറ്റം വരുത്തിയത് തെരഞ്ഞെടുപ്പ് അട്ടിമറിക്കുന്നതിന്‍റെ ഭാഗമാണ്. തികച്ചും യുഡിഎഫിന്‍റെ വോട്ടര്‍മാരെ ഒഴിവാക്കുന്നതിനായി സിപിഎം നേതൃത്വത്തിന്‍റെ നിര്‍ദേശപ്രകാരമാണ് ഇത്തരത്തില്‍ ഒരു നീക്കത്തിന് തെരഞ്ഞെടുപ്പ് ഓഫീസറായ പള്ളിക്കര പഞ്ചായത്ത് സെക്രട്ടറി നേതൃത്വം കൊടുത്തതെന്നും ജനവിധിയെ അധികാരമുപയോഗിച്ച് മാറ്റിമറിക്കാനാണ് സിപിഎം ഇതിലൂടെ ശ്രമിക്കുന്നതെന്നും യുഡിഎഫ് ആരോപിച്ചു. ഇതില്‍ പ്രതിഷേധിച്ച് 15നു യുഡിഎഫ് പഞ്ചായത്ത് കമ്മിറ്റിയുടെ നേതൃത്വത്തില്‍ പഞ്ചായത്ത് ഓഫീസ് കാര്യാലയം ഉപരോധിക്കും. പത്രസമ്മേളനത്തില്‍ മുസ് ലിംലീഗ് ജില്ലാ വൈസ് പ്രസിഡന്‍റ് കെ.ഇ.എ. ബക്കര്‍, ഡിസിസി വൈസ്പ്രസിഡന്‍റ് സാജിദ് മൗവ്വല്‍, പള്ളിക്കര പഞ്ചായത്ത് യുഡിഎഫ് കമ്മിറ്റി ചെയര്‍മാന്‍ സിദ്ദിഖ് പള്ളിപ്പുഴ, മുസ്‌ലിം ലീഗ് ഉദുമ നിയോജകമണ്ഡലം വൈസ് പ്രസിഡന്‍റ് ഹനീഫ കുന്നില്‍, ഉദുമ ബ്ലോക്ക് കോണ്‍ഗ്രസ് വൈസ് പ്രസിഡന്‍റ് സുകുമാരന്‍ പൂച്ചക്കാട്, പള്ളിക്കര മണ്ഡലം കോണ്‍ഗ്രസ് പ്രസിഡന്‍റ് രവീന്ദ്രന്‍ കരിച്ചേരി എന്നിവര്‍ പങ്കെടുത്തു.

ഒന്നരമാസമായി പെരിയയില്‍ വില്ലേജ് ഓഫീസറില്ല

പെരിയ: പെരിയ വില്ലേജ് ഓഫീസിലെത്തുന്ന പെരിയയിലെ ജനങ്ങള്‍ക്ക് വില്ലേജ് ഓഫീസറുടെ സേവനത്തിനായി ഇനിയും കാത്തിരിക്കണം. നിരവധി ഉന്നതവിദ്യാഭ്യാസസ്ഥാപനങ്ങളും ആരോഗ്യ കേന്ദ്രങ്ങളും എണ്ണമറ്റ കച്ചവടസ്ഥാപനങ്ങളുമുള്ള പെരിയയില്‍ വില്ലേജ് ഓഫീസര്‍ ഇല്ലാതായിട്ട് ഒന്നരമാസം പിന്നിട്ടു. സ്പെഷല്‍ വില്ലേജ് ഓഫീറാകട്ടെ വര്‍ധിച്ചുവരുന്ന ജോലിഭാരം കാരണം നട്ടംതിരിയുകയാണ്. വില്ലേജ് അസിസ്റ്റന്‍റിന്‍റെ തസ്തിക ഒഴിഞ്ഞുകിടക്കാന്‍ തുടങ്ങിയിട്ട് വര്‍ഷം രണ്ടുകഴിഞ്ഞു. സ്ഥലം മാറിപ്പോയ വില്ലേജ് അസിസ്റ്റന്‍റിന് പകരം നിയമനം നടത്താത്തതും നിലവില്‍ പ്രശ്നങ്ങള്‍ രൂക്ഷമാക്കുന്നുണ്ട്. ആവശ്യങ്ങള്‍ നിറവേറ്റാനാവാതെ ഓരോപ്രാവശ്യവും ഓഫീസ് കയറിയിറങ്ങുന്ന നാട്ടുകാര്‍ക്കുമുന്നില്‍ തന്‍റെ നിസഹയാവസ്ഥ പറയാന്‍പോലുമാവാതെ കുഴങ്ങുകയാണ് സ്പെഷല്‍ വില്ലേജ് ഓഫീസര്‍.

വന്യജീവി ആക്രമണം നേരിടുന്ന പ്രദേശങ്ങൾ; പട്ടികയിൽ ജില്ലയിലെ ആറു പഞ്ചായത്തുകൾ

കാസർഗോഡ്: സംസ്ഥാനത്ത് വന്യജീവി ആക്രമണങ്ങൾ നേരിടുന്ന പ്രദേശങ്ങളെ ഉൾപ്പെടുത്തി വനംവകുപ്പ് തയ്യാറാക്കിയ പട്ടികയിൽ ജില്ലയിലെ ആറു പഞ്ചായത്തുകൾ. മുളിയാർ, കാറഡുക്ക, ദേലംപാടി, പനത്തടി, ബളാൽ, ഈസ്റ്റ് എളേരി പഞ്ചായത്തുകളാണ് പട്ടികയിൽ ഉൾപ്പെട്ടത്. എന്നാൽ ഇവയൊന്നും തീവ്രമായ സംഘർഷം നേരിടുന്ന ഹോട്ട്സ്പോട്ടുകളിൽ ഉൾപ്പെട്ടിട്ടില്ല. സംസ്ഥാനതലത്തിൽ 30 ഹോട്ട്സ്പോട്ടുകളാണ് വനംവകുപ്പ് തയ്യാറാക്കിയ പട്ടികയിൽ അടയാളപ്പെടുത്തിയിട്ടുള്ളത്. ഇവയിൽ ഒൻപതെണ്ണം അതിതീവ്ര സംഘർഷ മേഖലയായും അടയാളപ്പെടുത്തിയിട്ടുണ്ട്. ഇതിൽ ഏഴും വയനാട് ജില്ലയിലാണ്. കണ്ണൂർ ജില്ലയിലെ ആറളം, കേളകം, കൊട്ടിയൂർ, പയ്യാവൂർ പഞ്ചായത്തുകൾ ഹോട്ട്സ്പോട്ടുകളിൽ ഉൾപ്പെട്ടിട്ടുണ്ട്. സംഘർഷത്തിന്‍റെ രീതി, തോത്‌, നാശനഷ്ടം, സംഘർഷ സാധ്യത, മരണം തുടങ്ങി വിവിധ ഘടകങ്ങൾ വിലയിരുത്തിയാണ്‌ ഹോട്ട്സ്പോട്ടുകൾ നിർണയിച്ചത്. ഈ മാനദണ്ഡങ്ങൾ പ്രകാരമുള്ള തീവ്ര സംഘർഷാവസ്ഥ കാസർഗോഡ് ജില്ലയിൽ ഒരു പഞ്ചായത്തിലും ഇല്ലെന്നാണ് വനംവകുപ്പിന്‍റെ വിലയിരുത്തൽ. അതേസമയം സാരമായ വന്യജീവിശല്യം ഉണ്ടെന്നതിന്‍റെ അടിസ്ഥാനത്തിലാണ് ആറു പഞ്ചായത്തുകളെ ഹോട്ട്സ്പോട്ടുകൾക്ക് തൊട്ടുതാഴെയുള്ള പട്ടികയിൽ ഉൾപ്പെടുത്തിയിട്ടുള്ളത്. മറ്റ് 21 പഞ്ചായത്തുകളിൽ വന്യജീവികളുടെ ഭീഷണിയുള്ളതായും വിലയിരുത്തിട്ടുണ്ട്. എല്ലായിടങ്ങളിലും ജനവാസമേഖലകളിൽ കാട്ടുപന്നി, കുരങ്ങ്‌, മയിൽ, കുറുനരി തുടങ്ങിയവയുടെ സാന്നിധ്യം വർധിച്ചതായും കണ്ടെത്തിയിട്ടുണ്ട്. ജില്ലയിൽ പലയിടങ്ങളിലും സൗരോർജ തൂക്കുവേലികൾ സ്ഥാപിച്ചത് വന്യജീവി ആക്രമണങ്ങൾ കുറയാൻ കാരണമായിട്ടുണ്ടെന്നും വനംവകുപ്പ് വിലയിരുത്തിയിട്ടുണ്ട്.

കളക്ടർ വാക്കുപാലിച്ചില്ല ; പ്രതിഷേധവുമായി ആദിവാസി കുടുംബങ്ങൾ

പരപ്പ: വാഗ്ദാനം ചെയ്ത ഭൂമിയും വീടും നൽകണമെന്നാവശ്യപ്പെട്ട് ആദിവാസി കുടുംബങ്ങൾ പ്രക്ഷോ‌ഭത്തിലേക്ക്. ബളാൽ പഞ്ചായത്തിലെ ഒൻപതാം വാർഡിൽപെട്ട മൂത്താടി നഗറിലെ എട്ടു കുടുംബങ്ങളാണ് പ്രതിഷേധവുമായി രംഗത്തെത്തിയത്. 2024 ജൂണിൽ കനത്തമഴയിൽ അവർ താമസിക്കുന്ന ഭൂമിയിലെ പലയിടത്തായി വിള്ളലുകൾ രൂപപ്പെട്ടിരുന്നു. പ്രദേശത്ത് അപകടാവസ്ഥ നിലനിൽക്കുന്നതിനാൽ ജില്ലാ കളക്ടറുടെ നിർദേശപ്രകാരം പഞ്ചായത്ത് ഇടപെട്ട് മാലോത്ത് കസബ സ്കൂളിൽ ക്യാന്പ് തുറന്ന് അവരെ താമസിപ്പിച്ചു. പിന്നീട് ഇവരെ വാടകവീട്ടിലേക്ക് മാറ്റി. ഇവർക്ക് ഭൂമിയും വീടും അടിയന്തരമായി നൽകാമെന്ന് ജില്ലാ കളക്ടറും പട്ടികവികസന വകുപ്പും ഉറപ്പ് നൽകുകയും ചെയ്തു. എന്നാൽ നാളിതുവരെയായിട്ടും ഭൂമിയും വീടും നൽകാൻ യാതൊരു നടപടിയും സ്വീകരിച്ചിട്ടില്ല. ഈ പാവപെട്ട ആദിവാസി കുടുംബങ്ങൾ വാടക കൊടുത്താണ് ഇപ്പോഴും താമസിച്ച് വരുന്നത്. ജില്ലാ ഭരണകൂടത്തിന്‍റെ ഈ നടപടിയിൽ പ്രതിഷേധിച്ച് ബളാൽ പഞ്ചായത്ത് ഒൻപതാം വാർഡ് കോൺഗ്രസ് കമ്മിറ്റിയുടെ ആഭിമുഖ്യത്തിൽ പരപ്പ ട്രൈബൽ ഡെവലപ്മെന്‍റ് ഓഫീസിലേയ്ക്ക് മാർച്ച് നടത്തി. കർഷക കോൺഗ്രസ് ജില്ലാ പ്രസിഡന്‍റ് രാജു കട്ടക്കയം ഉദ്ഘാടനം ചെയ്തു. എം.പി. ജോസഫ് അധ്യക്ഷതവഹിച്ചു. എം. രാധാമണി, അലക്സ് നെടിയകാലായിൽ, ബിൻസി ജെയിൽ, മോൻസി ജോയി, പി.സി. രഘുനാഥൻ, മാർട്ടിൻ ജോർജ്, പി. രാഘവൻ, സുഷമ പോൾ, രഞ്ജു ബിജു, മോതിര, കാർത്യായനി, തന്പായി, ബിന്ദു എന്നിവർ പ്രസംഗിച്ചു.

സ്കൂട്ടര്‍ യാത്രികന്‍ ലോറിയിടിച്ച് മരിച്ചു

നീലേശ്വരം: പള്ളിക്കര മേല്‍പ്പാലത്തിന് സമീപം സ്കൂട്ടര്‍ യാത്രികന്‍ ലോറിയിടിച്ച് മരിച്ചു. പയ്യന്നൂരിലെ ഹോട്ടല്‍ ഉടമയും ചിത്താരി കൊട്ടിലങ്ങാട് ജുമാമസ്ജിദ് കമ്മിറ്റി പ്രസിഡന്‍റുമായ കെ. ഹംസയാണ്(52) മരിച്ചത്. ഇന്നലെ ഉച്ചയോടെ പയ്യന്നൂരിലെ ഹോട്ടലിൽ നിന്ന് കാഞ്ഞങ്ങാട്ടേക്ക് മടങ്ങുമ്പോഴായിരുന്നു അപകടം. മൃതദേഹം കാഞ്ഞങ്ങാട് ജില്ലാ ആശുപത്രിയിലേക്ക് മാറ്റി. ഭാര്യ: സമീറ. മക്കൾ: അബ്ദുള്ള, അഫ്രീദ്. സഹോദരങ്ങൾ: മുഹമ്മദ്കുഞ്ഞി, അബ്ദുൾ ഖാദർ, ഹമീദ്, സുഹറ, സൈനബ, അഷറഫ്, നാസർ, നസീമ.

കാസര്‍ഗോഡ് ഐഐപിഡി സെന്‍റര്‍ നിര്‍മാണോദ്ഘാടനം നാളെ

കാഞ്ഞങ്ങാട്: ഗോപിനാഥ് മുതുകാടിന്‍റെ നേതൃത്വത്തിലുള്ള തിരുവനന്തപുരം ഡിഫറന്‍റ് ആര്‍ട് സെന്‍ററിന്‍റെ ആഭിമുഖ്യത്തില്‍ ഭിന്നശേഷിക്കാരുടെ സമഗ്ര വികാസത്തിനായി ലോകോത്തര മാതൃകയില്‍ നിര്‍മിക്കുന്ന ഇന്‍റര്‍നാഷണല്‍ ഇന്‍സ്റ്റിറ്റ്യൂട്ട്ഫര്‍ പീപ്പിള്‍ വിത്ത് ഡിസബിലിറ്റീസ് (ഐഐപിഡി) സംരംഭത്തിന്‍റെ നിര്‍മാണോദ്ഘാടനം നാളെ നടക്കും. രാവിലെ 10.30ന് മടിക്കൈ അടുക്കത്തുപറമ്പിലെ 22 ഏക്കര്‍ സ്ഥലത്ത് ഒരുങ്ങുന്ന ഈ പദ്ധതിയുടെ നിര്‍മാണോദ്ഘാടന ചടങ്ങില്‍ ചലച്ചിത്രസംവിധായകനും ഡിഫറന്‍റ് ആര്‍ട് സെന്‍റര്‍ രക്ഷാധികാരിയുമായ അടൂര്‍ ഗോപാലകൃഷ്ണന്‍, സാഹിത്യകാരന്‍ ടി. പദ്മനാഭന്‍, ഗാനരചയിതാവും സംഗീത സംവിധായകനുമായ കൈതപ്രം ദാമോദരന്‍ നമ്പൂതിരി എന്നിവര്‍ പങ്കെടുക്കും. ഡിഎസി ചെയര്‍മാനും മുന്‍ ചീഫ് സെക്രട്ടറിയുമായ ജിജി തോംസണ്‍ അധ്യക്ഷതവഹിക്കും. ജില്ലാ പഞ്ചായത്ത് പ്രസിഡന്‍റ് ബേബി ബാലകൃഷ്ണന്‍, പഞ്ചായത്ത് പ്രസിഡന്‍റ് എസ്. പ്രീത, ഊരാളുങ്കല്‍ ലേബര്‍ കോണ്‍ട്രാക്ട് കോ-ഓപ്പറേറ്റീവ് സൊസൈറ്റി ചെയര്‍മാന്‍ രമേശന്‍ പാലേരി, ദാമോദര്‍ ആര്‍ക്കിടെക്ട് സിഇഒ കെ. ദാമോദരന്‍, ഡിഫറന്‍റ് ആര്‍ട് സെന്‍റര്‍ എക്സിക്യുട്ടീവ് ഡയറക്ടര്‍ ഗോപിനാഥ് മുതുകാട് എന്നിവര്‍ പങ്കെടുക്കും. ട്രെയിനിംഗ് സെന്‍റര്‍, തെറാപ്പി സെന്‍ററുകള്‍, ഏര്‍ളി ഇന്‍റര്‍വെന്‍ഷന്‍ സെന്‍ററുകള്‍ തുടങ്ങി എല്ലാ വിഭാഗങ്ങളുടെ ഒരുമിക്കുന്ന ഒരു സെന്‍റര്‍കൂടിയാണിത്. തിരുവനന്തപുരം ഡിഫറന്‍റ് ആര്‍ട് സെന്‍ററിന്‍റെ മാതൃകയെ ആസ്പദമാക്കി വിപുലീകരിച്ച സംവിധാനങ്ങളാണ് ഇവിടെ ഉള്ളത്. അന്തര്‍ദ്ദേശീയ നിലവാരത്തിലുള്ള കലാകായിക പരിശീലന സംവിധാനങ്ങള്‍, അത്യാധുനിക തെറാപ്പി സൗകര്യങ്ങള്‍, പേഴ്സണലൈസ്ഡ് അസിസ്റ്റീവ് ഡിവൈസ് യൂണിറ്റുകള്‍, തൊഴില്‍ പരിശീലന കേന്ദ്രങ്ങള്‍, മെഡിക്കല്‍ സൗകര്യങ്ങള്‍, ട്രയിനിംഗ് സെന്‍ററുകള്‍ തുടങ്ങിയവ കാസര്‍ഗോഡ് ഐഐപിഡിയില്‍ ഉണ്ടാകും. ഇന്ത്യയിലാദ്യമായാണ് ഇത്രയധികം വിഭാഗങ്ങള്‍ ഒരുമിച്ച് ചേരുന്ന സംരംഭം നടപ്പിലാകുന്നത്. എന്‍ഡോസള്‍ഫാന്‍ ദുരിതബാധിതരടക്കം ലോകമെമ്പാടുമുള്ള നിരവധി കുട്ടികള്‍ക്ക് ആശ്രയമാകുന്ന തരത്തിലാണ് സെന്‍റര്‍ നിര്‍മിക്കുന്നത്. 100 കോടി രൂപയുടെ പദ്ധതിയാണ് ആസൂത്രണം ചെയ്യുന്നത്. ആദ്യഘട്ട നിര്‍മാണ പ്രവര്‍ത്തനങ്ങള്‍ 2026ല്‍ പൂര്‍ത്തീകരിക്കുവാനാണ് ഉദ്ദേശിക്കുന്നത്. 2029ഓടുകൂടി പദ്ധതി പൂര്‍ണമായും പ്രവര്‍ത്തന സജ്ജമാകും. പദ്ധതി പൂര്‍ത്തിയാകുന്നതോടെ ഇന്ത്യയിലെ ഏറ്റവും വലിയ ഭിന്നശേഷിക്കാര്‍ക്കുള്ള സ്ഥാപനമായി ഐഐപിഡി മാറും. പദ്ധതി പൂര്‍ണമായും പ്രവര്‍ത്തനസജ്ജമാകുന്നതോടെ പ്രതിവര്‍ഷം 1000 ഭിന്നശേഷിക്കാര്‍ക്ക് വിവിധ മേഖലകളില്‍ പരിശീലനം നല്‍കുന്ന രീതിയിലാണ് കാമ്പസ് ക്രമീകരിച്ചിരിക്കുന്നത്. ലോകത്തെവിടെയുമുള്ള ഭിന്നശേഷിക്കാര്‍ക്ക് സെന്‍ററിലെ സേവനങ്ങൾ ലഭിക്കും.

കോടോം-ബേളൂര്‍ ഗവ. ഐടിഐ കെട്ടിടത്തിന്‍റെ ശിലാസ്ഥാപനം നടത്തി

ഒടയംചാല്‍: കോടോം-ബേളൂര്‍ ഗവ. ഐടിഐ കെട്ടിടത്തിന്‍റെ ശിലാസ്ഥാപനം ഇ. ചന്ദ്രശേഖരന്‍ എംഎല്‍എ നിര്‍വഹിച്ചു. ജില്ലാ പഞ്ചായത്ത് പ്രസിഡന്‍റ് ബേബി ബാലകൃഷ്ണന്‍ അധ്യക്ഷതവഹിച്ചു. ബ്ലോക്ക് പഞ്ചായത്ത് പ്രസിഡന്‍റ് എം. ലക്ഷ്മി, പഞ്ചായത്ത് പ്രസിഡന്‍റ് പി. ശ്രീജ എന്നിവര്‍ മുഖ്യാതിഥികളായി. അസി. എക്‌സിക്യൂട്ടീവ് എന്‍ജിനിയര്‍ പി.എം. യമുന റിപ്പോര്‍ട്ട് അവതരിപ്പിച്ചു. ജില്ലാ പഞ്ചായത്തംഗം ഷിനോജ് ചാക്കോ, ബ്ലോക്ക് പഞ്ചായത്തംഗം ടി.വി. ശ്രീലത, പഞ്ചായത്ത് വൈസ് പ്രസിഡന്‍റ് പി. ദാമോദരന്‍, പഞ്ചായത്തംഗങ്ങളായ പി. കുഞ്ഞികൃഷ്ണന്‍, സൂര്യ ഗോപാലന്‍, അഡീഷണല്‍ ഡയറക്ടര്‍ ഓഫ് ട്രെയിനിംഗ് പി. വാസുദേവന്‍, വി.കെ. അനൂപ്, ടി.പി. മധു, പി. ഗോവിന്ദന്‍, ടി.കെ. രാമചന്ദ്രന്‍, എ. രാമചന്ദ്രന്‍, പി. അനിത, വി. പങ്കജാക്ഷന്‍, എം. ശ്യാംജിത്ത് എന്നിവര്‍ സംസാരിച്ചു. എല്‍എസ്ജിഡി ജോയിന്‍റ് ഡയറക്ടര്‍ ആര്‍. സുധാശങ്കര്‍ സ്വാഗതവും പ്രിന്‍സിപ്പല്‍ ഇ.കെ. സുധീഷ്ബാബു നന്ദിയും പറഞ്ഞു. 6.9 കോടി രൂപയ്ക്ക് ഇരുനിലകളിലായി 1100 സ്‌ക്വയര്‍ ഫീറ്റ് വിസ്തീര്‍ണത്തില്‍ നിര്‍മിക്കുന്ന പുതിയ കെട്ടിടത്തില്‍ പ്ലംബിംഗ് ലാബ്, ഇലക്ട്രിക്കല്‍ വര്‍ക്ക്‌ഷോപ്പ്, കമ്പ്യൂട്ടര്‍ ലാബ്, രണ്ടു ക്ലാസ് മുറികള്‍, പ്രിന്‍സിപ്പല്‍ മുറി, ശുചിമുറികള്‍ എന്നി ഉള്‍പ്പെടുത്തിയിട്ടുണ്ട്.

പരിശീലന ക്യാമ്പ് സമാപിച്ചു

പാലാവയൽ:പാലാവയൽ ക്ലബിന്‍റെ നേതൃത്വത്തിൽ സെന്‍റ് ജോൺസ് നീന്തൽകുളത്തിലും തേജസ്വിനി പുഴയിലുമായി നടന്ന ലൈഫ് ഗാർഡ്, സ്വിമ്മിംഗ് ഇൻസ്ട്രക്ടർ, ഫസ്റ്റ് എയ്ഡ്, സിപിആർ കോഴ്സ് പരിശീലനം സമാപിച്ചു. സമാപന സമ്മേളനം പഞ്ചായത്ത് വിദ്യാഭ്യാസ സ്ഥിരംസമിതി അധ്യക്ഷൻ പ്രശാന്ത് പാറേക്കുടിലിൽ ഉദ്ഘാടനം ചെയ്തു. ക്ലബ് പ്രസിഡന്‍റ് ബിജു മാപ്പിളപറമ്പിൽ അധ്യക്ഷതവഹിച്ചു. വൈസ് പ്രസിഡന്‍റ് ജോസ് പ്രകാശ് സർട്ടിഫിക്കറ്റുകൾ വിതരണം ചെയ്തു. മുഖ്യ പരിശീലകൻ ഡോ.ബി. സനു, ക്ലബ് സെക്രട്ടറി പി.കെ. ജോസഫ്, നീന്തൽ പരിശീലകൻ ബിജു മാത്തശേരിൽ, ബിജു നെട്ടനൊഴുകയിൽ എന്നിവർ പ്രസംഗിച്ചു. തിരുവനന്തപുരം വിന്നർ ലാൻഡ് ഇന്‍റർനാഷണൽ സ്പോർട്സ് അക്കാദമി പരിശീലകരായ ഡോ.ബി. സനു, രമേശ് എന്നിവരാണ് കോച്ചിംഗ് നൽകിയത്.

കാഞ്ഞങ്ങാട് ഡിപ്പോയ്ക്ക് രണ്ടു സൂപ്പര്‍ഫാസ്റ്റ് പ്രീമിയം ബസുകള്‍

കാഞ്ഞങ്ങാട്: കെഎസ്ആര്‍ടിസി കാഞ്ഞങ്ങാട് സബ്ഡിപ്പോയ്ക്ക് ലഭിച്ച പുതിയ രണ്ടു സൂപ്പര്‍ ഫാസ്റ്റ് പ്രീമിയം ബസുകളുടെ ഫ്‌ളാഗ് ഓഫ് ഇ. ചന്ദ്രശേഖരന്‍ എംഎല്‍എ നിര്‍വഹിച്ചു. നഗരസഭ ചെയര്‍മാന്‍ കെ.വി. സുജാത, വാര്‍ഡ് കൗണ്‍സിലര്‍ കെ. ലത, കേരള കോണ്‍ഗ്രസ്-ബി ജില്ലാ പ്രസിഡന്‍റ് പി.ടി. നന്ദകുമാര്‍, അസി. ട്രാന്‍സ്‌പോര്‍ട്ട് ഓഫീസര്‍ ആല്‍വിന്‍ ടി. സേവ്യര്‍ എന്നിവര്‍ പ്രസംഗിച്ചു. വൈകുന്നേരം 5.10നു കാഞ്ഞങ്ങാട് നിന്നും പുറപ്പെടുന്ന ബസ് രാവിലെ 7.40നു പത്തനംതിട്ടയില്‍ എത്തിച്ചേരും. പത്തനംതിട്ടയില്‍ നിന്നു വൈകുന്നേരം ആറിനു പുറപ്പെടുന്ന ബസ് രാവിലെ 7.40നു കാഞ്ഞങ്ങാട് എത്തിച്ചേരും.

സ്നേഹഭവനത്തിന്‍റെ ആശീർവാദവും താക്കോൽ കൈമാറ്റവും നടന്നു

ചിറ്റാരിക്കാൽ: തലശേരി അതിരൂപത കോർപറേറ്റ് എഡ്യുക്കേഷണൽ ഏജൻസി ടീച്ചേഴ്സ് ഗിൽഡിന്‍റെ സ്നേഹത്തണൽ, പ്രോജക്ട് ഷെൽട്ടർ, ബിഷപ് വള്ളോപ്പള്ളി ഭവന നിർമാണ പദ്ധതികളിൽ ഉൾപ്പെടുത്തി തോമാപുരം സെന്‍റ് തോമസ് ഹയർ സെക്കൻഡറി സ്കൂളിന്‍റെ ആഭിമുഖ്യത്തിൽ ഗോക്കടവ് വെള്ളടുക്കത്ത് നിർമിച്ച സ്നേഹഭവനത്തിന്‍റെ ആശീർവാദ കർമവും താക്കോൽ കൈമാറ്റവും തലശേരി അതിരൂപത വികാരി ജനറാൾ മോൺ. സെബാസ്റ്റ്യൻ പാലാക്കുഴിയുടെ മുഖ്യകാർമികത്വത്തിൽ നടന്നു. പ്രോജക്ട് ഷെൽട്ടർ ഭവന പദ്ധതിയുടെ ഡയറക്ടർ ഫാ. ജോർജ് കണ്ണന്താനം, ബയോ മൗണ്ടൻ ഫാർമേർസ് പൊഡ്യൂസേർസ് കമ്പനി എംഡി ഫാ. ബെന്നി നിരപ്പേൽ, തോമാപുരം ഫൊറോന വികാരി റവ.ഡോ. മാണി മേൽവട്ടം, പഞ്ചായത്ത് പ്രസിഡന്‍റ് ജോസഫ് മുത്തോലി, സ്കൂൾ പ്രിൻസിപ്പൽ സിജോം സി. ജോയ്, പിടിഎ പ്രസിഡന്‍റ് ഷാജി തോണക്കര, ബിനു തോമസ് എന്നിവർ സംബന്ധിച്ചു.

റസിഡന്‍റ്സ് അസോസിയേഷൻ പ്രവർത്തകർ ദേശീയപാത ഉപരോധിച്ചു

നീലേശ്വരം: നീലേശ്വരം മന്ദംപുറത്തുനിന്ന് റെയിൽവേ സ്റ്റേഷൻ റോഡിലേക്ക് അടിപ്പാത അനുവദിക്കുക, മന്ദംപുറം റോഡ് നവീകരിച്ച് കലുങ്കു കെട്ടി ഗതാഗതയോഗ്യമാക്കുക എന്നീ ആവശ്യങ്ങൾ ഉന്നയിച്ച് മന്ദംപുറം റസിഡന്‍റ്സ് അസോസിയേഷന്‍റെ നേതൃത്വത്തിൽ ജനകീയ കൂട്ടായ്മ ദേശീയപാത ഉപരോധിച്ചു. നഗരസഭ സ്ഥിരം സമിതി ചെയർമാൻ ഷംസുദ്ദീൻ അരിഞ്ചിറ ഉദ്ഘാടനം ചെയ്തു. റസിഡന്‍റ്സ് അസോസിയേഷൻ രക്ഷാധികാരി കെ.കെ. കുമാരൻ അധ്യക്ഷത വഹിച്ചു. പ ്രഡിഡന്‍റ് ടി. വിജയൻ, സെക്രട്ടറി എം. ഗീത, അടുക്കം മുഹമ്മദ്‌കുഞ്ഞി, തെക്കുമ്പാടൻ ബാലകൃഷ്ണൻ, പി.എസ്.എസ്. കരുവാച്ചേരി, സുജാത വിജയൻ എന്നിവർ പ്രസംഗിച്ചു. തുടർന്ന് പോലീസെത്തി സമരക്കാരെ നീക്കി.

വരഞ്ഞൂരും കാളിയാനത്തും വന്യമൃഗശല്യം രൂക്ഷം

കരിന്തളം: വരഞ്ഞൂരും കാളിയാനത്തും സമീപപ്രദേശങ്ങളിലും വന്യമൃഗശല്യം രൂക്ഷം. ബിരിക്കുളം പച്ചക്കറി ഉത്പാദക സംഘത്തിന്‍റെ നേതൃത്വത്തിൽ ഓണം വിപണിയിലേക്കായി നടത്തിയ പച്ചക്കറികൃഷിക്ക് കാട്ടുപന്നികൾ കനത്ത വെല്ലുവിളി സൃഷ്ടിച്ചിരുന്നു. മയിലുകളും കുരങ്ങുകളുമെല്ലാം കർഷകർക്ക് ഭീഷണിയാകുന്നുണ്ട്. വരഞ്ഞൂർ, ചെന്നക്കോട്, കരിയാംകൊടൽ, കാളിയാനം ഭാഗങ്ങളിലെല്ലാം കാട്ടുമൃഗങ്ങളുടെ വിളയാട്ടമാണ്. വരഞ്ഞൂരിലെ കെ.സത്യന്‍റെ വാഴകൃഷിയും കാളിയാനത്തെ കാര്യവീട്ടിൽ രാഘവന്‍റെ ചേമ്പ് കൃഷിയും കാട്ടുപന്നികൾ നശിപ്പിച്ചു. പലയിടത്തും കുരങ്ങുകൾ തെങ്ങിൽ കയറി പാകമാകാത്ത തേങ്ങകളും കരിക്കുകളും നശിപ്പിക്കുന്നു. വന്യമൃഗശല്യത്തിന് ശാശ്വത പരിഹാരമുണ്ടാകണമെന്ന് കർഷകർ നിരവധി തവണ ഗ്രാമസഭാ യോഗങ്ങളിൽ ആവശ്യപ്പെട്ടിരുന്നു. എന്നാൽ അധികൃതരുടെ ഭാഗത്തുനിന്ന് കാര്യമായ യാതൊരു നടപടിയും ഉണ്ടാകുന്നില്ലെന്നാണ് ഇവരുടെ പരാതി. വന്യമൃഗശല്യം കാരണം പൊറുതിമുട്ടിയ കർഷകരുടെ കൂടെ നിൽക്കാനും പരിഹാരമാർഗങ്ങൾ കണ്ടെത്താനും ബന്ധപ്പെട്ട അധികാരികൾ തയ്യാറാകണമെന്ന് ബിരിക്കുളം പച്ചക്കറി ഉത്പാദകസംഘം യോഗം ആവശ്യപ്പെട്ടു. പ്രസിഡന്‍റ് സി.കെ. ബാലചന്ദ്രൻ, സെക്രട്ടറി പി. ബാലഗോപാലൻ, ട്രഷറർ കെ. സത്യൻ, സുഗതൻ വരഞ്ഞൂർ, വി. സന്തോഷ്, കെ.പി.വി. സതീശൻ എന്നിവർ സംസാരിച്ചു.

നൈപുണ്യ പരിശീലനം: അപേക്ഷ ക്ഷണിച്ചു

കാസര്‍ഗോഡ്: ജില്ലാ പഞ്ചായത്ത് അസാപ് കേരളയുമായി ചേര്‍ന്ന് സംഘടിപ്പിക്കുന്ന നൈപുണ്യ പരിശീലന പരിപാടികള്‍ക്ക് അപേക്ഷ ക്ഷണിച്ചു.‍ ഡിജിറ്റല്‍ മാര്‍ക്കറ്റിംഗ്, ജിഎസ്ടി യൂസിംഗ് ടാലി, ഇലക്ട്രിക് വെഹിക്കിള്‍ സര്‍വീസ് ടെക്നീഷ്യന്‍, പവര്‍ ഇലക്ട്രോണിക്സ് സര്‍വീസ് ടെക്നീഷ്യന്‍ എന്നീ കോഴ്‌സുകളിലേക്കാണ് അപേക്ഷ ക്ഷണിച്ചത്. അഭ്യസ്തവിദ്യരായ 100 വനിതകള്‍ക്കാണ് ജിഎസ്ടി യൂസിംഗ് ടാലി കോഴ്‌സില്‍ പരിശീലനം നല്‍കുക. പൊതുവിഭാഗങ്ങള്‍ക്കായി ഡിജിറ്റല്‍ മാര്‍ക്കറ്റിംഗ് കോഴ്സില്‍ 40 സീറ്റും, ഇ.വി സര്‍വീസ് ടെക്നീഷ്യന്‍, പവര്‍ ഇലക്ട്രോണിക്സ് കോഴ്സുകളില്‍ 30 വീതം സീറ്റുകളും ഉണ്ടായിരിക്കും. കാസര്‍ഗോഡ് ജില്ലാ പഞ്ചായത്തിന് കീഴിലെ പഞ്ചായത്ത് പരിധികളില്‍ താമസിക്കുന്നവര്‍ക്ക് അപേക്ഷിക്കാം. പ്ലസ്ടു യോഗ്യതയുള്ള, അക്കൗണ്ടിംഗ് മേഖലയെ കുറിച്ച് പ്രാഥമിക ധരണയുള്ള വനിതകള്‍ക്ക് ജിഎസ്ടി യൂസിംഗ് ടാലി കോഴ്സിലേക്ക് അപേക്ഷിക്കാം. ഡിജിറ്റല്‍ മാര്‍ക്കറ്റിംഗ് കോഴ്സില്‍ പ്ലസ് ടൂ വിനോടൊപ്പം അടിസ്ഥാന കംപ്യുട്ടര്‍ പരിജ്ഞാനം ഉള്ളവര്‍ക്ക് അപേക്ഷിക്കാം. ഈ രണ്ടു കോഴ്‌സിലും വിദ്യാനഗറില്‍ ഉള്ള അസാപിന്‍റെ കമ്മ്യൂണിറ്റി സ്‌കില്‍ പാര്‍ക്കില്‍ ആയിരിക്കും പരിശീലനം. ഇലക്ട്രിക് വെഹിക്കിള്‍ സര്‍വീസ് ടെക്നീഷ്യന്‍, പവര്‍ ഇലക്ട്രോണിക്സ് സര്‍വീസ് ടെക്നീഷ്യന്‍ എന്നീ കോഴ്‌സുകളില്‍ പ്ലസ് ടു യോഗ്യതയുള്ളവര്‍ക്ക് അപേക്ഷിക്കാം. അസാപിന്‍റെ മലപ്പുറം ജില്ലയിലെ തവനൂര്‍ കമ്യൂണിറ്റി സ്‌കില്‍ പാര്‍ക്കിലും അസാപിന്‍റെ തൃശൂര്‍ ജില്ലയിലെ കുന്നംകുളം സ്‌കില്‍ പാര്‍ക്കിലും ആയിരിക്കും പ്രായോഗിക പരിശീലനം. കോഴ്സ് വിജയകരമായി പൂര്‍ത്തിയാക്കുന്നവര്‍ക്ക് നൂറുശതമാനം പ്ലേസ്മെന്‍റ് സഹായം ഉണ്ടായിരിക്കും. കോഴ്‌സിനൊപ്പം, ഉദ്യോഗാര്‍ഥികളെ ഇന്‍റര്‍വ്യൂ സജ്ജമാക്കുന്ന പ്ലേസ്മെന്‍റ് റെഡിനസ് പ്രോഗ്രാമില്‍ കൂടി പരിശീലനം നല്‍കും. ഫോണ്‍: +918593892913, 949599 9780. bit.ly/asap-gst എന്ന ലിങ്ക് വഴിയും അപേക്ഷിക്കാം.

കാഞ്ഞങ്ങാട് നഗരസഭയ്‌ക്കെതിരെ മനുഷ്യാവകാശ കമ്മീഷനെ സമീപിക്കാന്‍ കേരള കോണ്‍ഗ്രസ്

കാസര്‍ഗോഡ്: കാഞ്ഞങ്ങാട് പഴയ ബസ് സ്റ്റാന്‍ഡ് നിര്‍മ്മാണ ജോലികള്‍ പൂര്‍ത്തിയാക്കി സെപ്റ്റംബര്‍ ആറിനകം തുറന്നു കൊടുക്കണമെന്ന മനുഷ്യാവകാശ കമ്മീഷന്‍ ഉത്തരവിനെ കാറ്റില്‍ പറത്തിയ കാഞ്ഞങ്ങാട് നഗരസഭ അധികൃതരുടെ നടപടിക്കെതിരെ കമ്മീഷനെ സമീപിക്കുമെന്ന് കേരള കോണ്‍ഗ്രസ് ജില്ലാകമ്മിറ്റി അറിയിച്ചു. ഒരുമാസം കൊണ്ട് തീര്‍ക്കാവുന്ന ബസ് സ്റ്റാന്‍ഡ് നിര്‍മാണപ്രവര്‍ത്തികള്‍ മാസങ്ങള്‍ നീട്ടിക്കൊണ്ടുപോയി വ്യാപാരികളുടെ അന്നം മുട്ടിച്ച നഗരസഭയുടെ നടപടി പ്രതിഷേധാര്‍ഹമാണ്. മനുഷ്യാവകാശ കമ്മീഷന്‍ ഉത്തരവിട്ടിട്ട് പോലും ജോലികള്‍ പൂര്‍ത്തീകരിച്ച് പറഞ്ഞ തീയതിക്ക് തുറന്നു കൊടുക്കാത്ത നഗരസഭയുടെ നടപടി ഒരുതരത്തിലും അംഗീകരിക്കാനാവില്ല. ബസ് സ്റ്റാന്‍ഡില്‍ ഗതാഗതക്കുരുക്കു മൂലം പൊറുതിമുട്ടുന്നത് കണ്ടിട്ടു പോലും പ്രവര്‍ത്തികള്‍ വേഗത്തിലാക്കി ബസ് സ്റ്റാന്‍ഡ് തുറന്നു കൊടുക്കാത്ത നഗരസഭയുടെ നടപടി അങ്ങേയറ്റം പ്രതിഷേധാര്‍ഹമാണെന്ന് ജില്ലാ പ്രസിഡന്‍റ് ജെറ്റോ ജോസഫ്, ജനറല്‍ സെക്രട്ടറി പ്രിന്‍സ് ജോസഫ് എന്നിവര്‍ അറിയിച്ചു.

കെഎസ്ആർടിസിയുടെ കോയമ്പത്തൂർ സർവീസ് കോഴിക്കോട് വിമാനത്താവളം വഴിയാക്കണമെന്ന് ആവശ്യം

കാസർഗോഡ്: കാസർഗോഡ് നിന്ന് കോയമ്പത്തൂരിലേക്ക് രാത്രികാല സർവീസ് നടത്തുന്ന കെഎസ്ആർടിസിയുടെ സൂപ്പർ ഡീലക്സ് ബസ് കോഴിക്കോട് വിമാനത്താവളം വഴി തിരിച്ചുവിടണമെന്ന് ആവശ്യം. കോവിഡ് കാലം തുടങ്ങുന്നതുവരെ കാസർഗോഡ് നിന്ന് കോഴിക്കോട് വിമാനത്താവളത്തിലേക്ക് കെഎസ്ആർടിസിയുടെ രാത്രികാല ബസ് സർവീസുണ്ടായിരുന്നു. കാസർഗോഡ് ഡിപ്പോയുടെ ക്ലാസിക് സർവീസുകളിലൊന്നായിരുന്ന ഈ റൂട്ട് ജില്ലയിലെ പ്രവാസികളുടെ ഗൃഹാതുര സ്മരണകളിലൊന്നാണ്. കെഎസ്ആർടിസിക്ക് മികച്ച വരുമാനവും നേടിത്തന്നിരുന്ന ഈ ബസ് പക്ഷേ കോവിഡ് നിയന്ത്രണങ്ങൾ മാറിക്കഴിഞ്ഞ ശേഷം പുനരാരംഭിച്ചില്ല. കണ്ണൂർ വിമാനത്താവളം വന്നതോടെ കോഴിക്കോട്ടേക്കുള്ള സർവീസിന് പ്രസക്തിയും വരുമാനസാധ്യതയും നഷ്ടമായതായാണ് കെഎസ്ആർടിസി അധികൃതർ വിലയിരുത്തിയത്. എന്നാൽ ഇപ്പോഴും ഗൾഫ് രാജ്യങ്ങളിലേക്കുള്ള നല്ലൊരു ശതമാനം സർവീസുകൾക്ക് ജില്ലയിലെ പ്രവാസികൾ കോഴിക്കോട് വിമാനത്താവളത്തെ ആശ്രയിക്കുന്നുണ്ടെന്ന് യാത്രക്കാരുടെ സംഘടനകൾ ചൂണ്ടിക്കാട്ടുന്നു. ഇവർക്ക് സഹായകമാകുന്ന വിധത്തിലാണ് കോയമ്പത്തൂർ സർവീസിനെ കോഴിക്കോട് വിമാനത്താവളം വഴി തിരിച്ചുവിടണമെന്ന ആവശ്യമുയരുന്നത്. വിമാനത്താവളത്തിൽ നിന്ന് കഷ്ടിച്ച് ഒരു കിലോമീറ്റർ മാത്രം അകലെയുള്ള കോഴിക്കോട്-പാലക്കാട് റോഡിലൂടെയാണ് ഈ ബസ് സർവീസ് നടത്തുന്നത്. പുലർച്ചെ ഒന്നരയോടെയാണ് വിമാനത്താവളത്തിന് സമീപമെത്തുന്നത്. ഈ സമയത്ത് ബസിനെ വിമാനത്താവളം വഴി തിരിച്ചുവിട്ടാൽ അത് കാസർഗോഡ് ഭാഗത്തുനിന്നുള്ള വിമാനയാത്രക്കാർക്കും പാലക്കാട് ഭാഗത്തേക്കുപോകാൻ വിമാനമിറങ്ങുന്നവർക്കുമെല്ലാം ഒരുപോലെ പ്രയോജനം ചെയ്യുമെന്ന് ഇവർ ചൂണ്ടിക്കാട്ടുന്നു. ഈ ആവശ്യമുന്നയിച്ച് പാസഞ്ചേർസ് അസോസിയേഷൻ ബന്ധപ്പെട്ടവർക്ക് നിവേദനം നൽകിയിട്ടുണ്ട്.

ആശുപത്രി കെട്ടിടം പണിതിട്ട് മൂന്നുവർഷം; ചികിത്സ ഇപ്പോഴും വരാന്തയിൽ

മൗക്കോട്: വെസ്റ്റ് എളേരി പഞ്ചായത്തിലെ മൗക്കോട് കുടുംബാരോഗ്യകേന്ദ്രത്തിന്‍റെ നിലവിലുള്ള കെട്ടിടത്തിനു മുകളിൽ രണ്ടു നിലകൾ കൂടി കൂട്ടിയെടുത്തിട്ട് മൂന്നുവർഷമായി. കാസർഗോഡ് വികസന പാക്കേജിൽ ഉൾപ്പെടുത്തി 54 ലക്ഷം രൂപ ചെലവിലാണ് രണ്ടു നിലകൾ പണിതത്. പക്ഷേ പണി തീർത്ത് കരാറുകാർ അവരുടെ വഴിക്ക് പോയതല്ലാതെ കെട്ടിടം ഇതുവരെ ആശുപത്രിക്ക് പ്രയോജനപ്പെട്ടിട്ടില്ല. കുടുംബാരോഗ്യകേന്ദ്രത്തിന്‍റെ എല്ലാ പ്രവർത്തനങ്ങളും ഇപ്പോഴും താഴത്തെ നിലയിലെ മൂന്ന് മുറികളിലായാണ് നടക്കുന്നത്. ഇവിടെ സ്ഥലസൗകര്യത്തിന്‍റെ കുറവ് മൂലം വരാന്തയിൽ പോലും കട്ടിലുകളിട്ട് രോഗികളെ കിടത്തേണ്ടിവരുന്ന അവസ്ഥയാണ്. കൂട്ടിയെടുത്ത രണ്ട് നിലകളിലും ഓരോ ഹാളുകൾ മാത്രമാണ് ഇപ്പോൾ നിർമിച്ചിട്ടുള്ളത്. ഇവയെ ആശുപത്രിയുടെ ആവശ്യങ്ങൾക്കനുസരിച്ച് വിവിധ മുറികളായി തിരിക്കണം. ആവശ്യമായ ഫർണിച്ചറും മറ്റ് അടിസ്ഥാന സൗകര്യങ്ങളും ലഭ്യമാക്കണം. വൈദ്യുതി കണക്ഷനും ലഭിക്കേണ്ടതുണ്ട്. ഇത്രയും കാര്യങ്ങളിൽ മൂന്നുവർഷമായിട്ടും ഒരു തീരുമാനവും ഉണ്ടായിട്ടില്ല. ലക്ഷങ്ങൾ ചെലവഴിച്ച് കെട്ടിടങ്ങൾ നിർമിക്കാൻ അധികാരികൾ കാണിക്കുന്ന ആവേശം പിന്നീട് ചുരുങ്ങിയ ചെലവിൽ അടിസ്ഥാനസൗകര്യങ്ങളൊരുക്കി അവ ഉപയോഗിക്കുന്ന കാര്യത്തിൽ കാണാറില്ലെന്ന അനുഭവം ഇവിടെയും ആവർത്തിക്കുകയാണ്. അടിസ്ഥാനസൗകര്യങ്ങൾ ലഭ്യമാക്കി ഈ കെട്ടിടം എന്നേക്ക് തുറന്നുകൊടുക്കാനാകുമെന്ന കാര്യത്തിൽ ബന്ധപ്പെട്ടവർ ഇപ്പോഴും കൈമലർത്തുകയാണ്.

എൻജിനിയറായ യുവാവ് ബൈക്കപകടത്തിൽ മരിച്ചു

ഇരിയണ്ണി: ഓണാഘോഷത്തിനായി നാട്ടിലെത്തിയ യുവ എൻജിനിയർ ബൈക്കപകടത്തിൽ മരിച്ചു. ബേത്തൂർപാറ വട്ടംതട്ട തീർഥക്കരയിലെ വിജയന്‍റെയും ശാലിനിയുടെയും മകൻ ജിതേഷ് (22) ആണ് മരിച്ചത്. ഇന്നലെ ഉച്ചകഴിഞ്ഞ് 2.30ഓടെ ഇരിയണ്ണി മഞ്ചക്കല്ലിൽ ജിതേഷ് സഞ്ചരിച്ച ബൈക്ക് നിയന്ത്രണംവിട്ട് മറിയുകയായിരുന്നു. ബംഗളുരുവിൽ എയറോനോട്ടിക് എൻജിനിയറായിരുന്നു. സഹോദരൻ: ജിഷ്ണു.

കോളജ് വിദ്യാർഥി മരിച്ച നിലയിൽ

കാഞ്ഞങ്ങാട്: കോളജ് വിദ്യാർഥിയെ കിടപ്പുമുറിയിൽ തൂങ്ങിമരിച്ച നിലയിൽ കണ്ടെത്തി. പടന്നക്കാട് നെഹ്‌റു കോളജിലെ മൂന്നാംവർഷ ബിഎസ്‌സി മാത്തമാറ്റിക്സ് വിദ്യാർഥി പടന്നക്കാട് കരുവളം കാരക്കുണ്ട് റോഡ് ശ്രീനിലയത്തിലെ ശ്രീഹരി (21) ആണ് മരിച്ചത്. പ്ലസ്ടു വിദ്യാർഥിയായിരിക്കേ ഒരു കൈവിരലിൽ ഒരു മണിക്കൂർ നേരം നിർത്താതെ പുസ്‌തകം കറക്കി ഇന്ത്യാ ബുക്ക് ഓഫ് റിക്കാർഡ്സിൽ ഇടം നേടിയിരുന്നു. എസ്എഫ്ഐ പ്രവർത്തകനായിരുന്നു. കരുവളത്തെ അച്ചാംതുരുത്തി പവിത്രൻ-ശാന്തി ദമ്പതികളുടെ മകനാണ്. സഹോദരി: ശ്രീക്കുട്ടി.

പുഴയില്‍ ചാടിയ യുവാവിന്‍റെ മൃതദേഹം കണ്ടെത്തി

പെരിയ: തിരുവോണനാളില്‍ ആയംകടവ് പാലത്തില്‍നിന്നും പുഴയിലേക്ക് ചാടിയ യുവാവിന്‍റെ മൃതദേഹം കണ്ടെത്തി. കോടോം തടിയംവളപ്പിലെ കഴുങ്ങിനടി ബാലകൃഷ്ണന്‍-വിനോദിനി ദമ്പതികളുടെ മകന്‍ ബി. സജിത് ലാല്‍ (25) ആണ് മരിച്ചത്. ഇന്നലെ വൈകുന്നേരം പനയാല്‍ ബങ്ങാട് കായക്കുന്ന് പുഴയില്‍ അടുക്കം ഭാഗത്താണ് മൃതദേഹം കണ്ടെത്തിയത്. പ്രദേശത്ത് ദുര്‍ഗന്ധം വമിക്കുന്നത് അനുഭവപ്പെട്ട നാട്ടുകാര്‍ അന്വേഷിച്ചപ്പോഴാണ് മൃതദേഹം കണ്ടത്. കാണാതായ സ്ഥലത്തുനിന്നും ഒന്നരകിലോമീറ്റര്‍ അകലെയായി മരത്തില്‍ കുടുങ്ങിയ നിലയിലായിരുന്നു മൃതദേഹം. പെരിയ അമാന ടൊയോട്ട സെന്‍ററിലെ ജീവനക്കാരനാണ്. സഹോദരങ്ങള്‍: സനില, സജിന.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]