ADVERTISEMENT

ADVERTISEMENT

പോലീസിനെ രാഷ്‌ട്രീയവത്കരിച്ചത് മുഖ്യമന്ത്രിക്ക് ആപത്തായി മാറി: സണ്ണി ജോസഫ് എംഎൽഎ

കൊല്ലം : മർദന വീരന്മാരായ പോലീസിനെ നിയന്ത്രിക്കുവാൻ കഴിയാത്ത അവസ്ഥയിൽ മുഖ്യമന്ത്രി പിണറായി വിജയൻ എത്തി ചേർന്നുവെന്നും പോലീസിനെ രാഷ്‌ട്രീയവത്കരിക്കുവാൻ കൂട്ടുനിന്നതിന്‍റെ ഫലമാണ് പോലീസ് ഈ അവസ്ഥയിലായതെന്നും കെപിസിസി പ്രസിഡന്‍റ് സണ്ണിജോസഫ് എംഎൽഎ. ജില്ലാ കോൺഗ്രസ് കമ്മിറ്റിയുടെ നേതൃയോഗം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം.

ഡി സി സി പ്രസിഡന്‍റ് പി. രാജേന്ദ്രപ്രസാദ് അധ്യക്ഷത വഹിച്ചു. കെപിസിസി രാഷ്‌ട്രീയകാര്യ സമിതി അംഗം ബിന്ദുകൃഷ്ണ, കെപിസിസി ജന. സെക്രട്ടറിമാരായ പഴകുളംമധു, എം.എം. നസീർ, യുഡിഎഫ് ജില്ലാ ചെയർമാൻ കെ.സി .രാജൻ, ചിറ്റുമൂല നാസർ, വാളത്തുംഗൽ രാജഗോപാൽ തുടങ്ങിയവർ പ്രസംഗിച്ചു.

ADVERTISEMENT

കരുനാഗപ്പള്ളിയിലും ഓച്ചിറയിലും കൂടുതല്‍ ട്രെയിനുകള്‍ക്ക് സ്റ്റോപ്പ് അനുവദിക്കണം: കെ.സി. വേണുഗോപാല്‍ എംപി

കരുനാഗപ്പള്ളി, ഓച്ചിറ റെയില്‍വേ സ്റ്റേഷനുകളില്‍ കൂടുതല്‍ ട്രെയിനുകള്‍ക്ക് സ്റ്റോപ്പ് അനുവദിക്കണമെന്ന് കെ.സി. വേണുഗോപാല്‍ എം പി കേന്ദ്ര റെയില്‍വേ മന്ത്രിയോട് ആവശ്യപ്പെട്ടു. അതോടൊപ്പം ഈ സ്റ്റേഷനുകളിൽ കോവിഡിന് മുന്‍പ് ഉണ്ടായിരുന്ന ട്രെിനുകളുടെ സ്റ്റോപ്പ് അടിയന്തരമായി പുനസ്ഥാപിക്കണമെന്ന ആവശ്യവും കെ.സി. വേണുഗോപാല്‍ ഉന്നയിച്ചു. രാജ്യറാണി എക്സ്പ്രസ്, മംഗളൂരു സെന്‍ട്രല്‍ - തിരുവനന്തപുരം സെന്‍ട്രല്‍ എക്സ്പ്രസ്, ചെന്നൈ സെന്‍ട്രല്‍ - തിരുവനന്തപുരം മെയില്‍ സൂപ്പര്‍ഫാസ്റ്റ് എക്സ്പ്രസ്, മൈസൂരു - തിരുവനന്തപുരം (കൊച്ചുവേളി) എക്സ്പ്രസ്, മുംബൈ കൊച്ചുവേളി ഫെസ്റ്റിവല്‍ സ്പെഷ്യല്‍, തിരുവനന്തപുരം നോര്‍ത്ത് എസ് എം വി ടി ബെംഗളൂരു എസി എക്സ്പ്രസ്, എസ് എം വി ബി തിരുവനന്തപുരം സ്പെഷ്യല്‍ എന്നിവയ്ക്ക് കരുനാഗപ്പള്ളിയിലും, മധുര- ഗുരുവായൂര്‍ എക്സ്പ്രസിന് ഓച്ചിറയിലും സ്റ്റോപ്പ് അനുവദിക്കണമെന്നും എംപി ആവശ്യപ്പെട്ടു. പൂജാ,ദീപാവലി തിരക്കു കണക്കിലെടുത്ത് ബെംഗളൂരുവിലേക്കുള്ള സ്പെഷ്യല്‍ ട്രെയിനുകളുടെ സര്‍വീസുകള്‍ ഡിസംബര്‍ വരെ നീട്ടിയ സാഹചര്യത്തില്‍ ഇവയ്ക്കും കരുനാഗപ്പള്ളിയില്‍ സ്റ്റോപ് അനുവദിക്കണം. വെള്ളി, ഞായര്‍, തിങ്കള്‍, ബുധന്‍ ദിവസങ്ങളില്‍ തിരുവനന്തപുരത്ത് നിന്ന് ബെംഗളൂരിവിലേക്കും അവിടെന്ന് ഇങ്ങോട്ടും പുറപ്പെടുന്ന ട്രെയിനുകള്‍ക്ക് സ്റ്റോപ്പ് അനുവദിക്കണമെന്ന ആവശ്യവും കെ.സി. വേണുഗോപാല്‍ ഉന്നയിച്ചു.

ശബ്‌ദമലിനീകരണം : ഒരു മാസത്തിനകം നടപടിയെടുക്കണമെന്ന്

കൊല്ലം : കൊട്ടാരക്കര വാളകത്തുള്ള എസ്എൻഡിപിബ്രാഞ്ച്ഗുരുമന്ദിരത്തിൽ നിന്നുള്ള ശബ്ദമലിനീകരണം ഒരു മാസത്തിനകം പരിഹരിക്കണമെന്നും തുടർന്ന് രേഖാമുലം റിപ്പോർട്ട് സമർപ്പിക്കണമെന്നും മനുഷ്യാവകാശ കമ്മീഷൻ അംഗം വി. ഗീത കൊല്ലം റൂറൽ ജില്ലാ പോലീസ് മേധാവിക്ക് നിർദേശം നൽകി. തന്‍റെ വീടിന് സമീപമുള്ള ഗുരുമന്ദിരത്തിൽ സുപ്രീം കോടതി ഉത്തരവ് ലംഘിച്ച് ഹോൺ സ്പീക്കർ ഉപയോഗിക്കുകയാണെന്നും തനിക്ക് പഠിക്കാനോ രക്ഷാകർത്താക്കൾക്ക് സമാധാനപൂർണമായ ജീവിതം നയിക്കാനോ കഴിയുന്നില്ലെന്നാണ് പരാതി. കൊല്ലം റൂറൽ ജില്ലാ പോലീസ് മേധാവിയിൽ നിന്നും കമ്മീഷൻ റിപ്പോർട്ട് വാങ്ങി. ഗുരുമന്ദിരത്തിന്‍റെ ഭാരവാഹികളോട് ശബ്ദമലിനീകരണം അവസാനിപ്പിക്കാൻ നിർദ്ദേശം നൽകിയിട്ടുണ്ടെന്ന് റിപ്പോർട്ടിൽ പറയുന്നു. പരാതിക്കാരന്‍റെ വീടിന്‍റെ ഭാഗത്ത് സ്ഥാപിച്ചിരിക്കുന്ന സൗണ്ട് ബോക്സ് മാറ്റി സ്ഥാപിക്കാൻ നിർദേശം നൽകിയിട്ടുണ്ടെന്നും റിപ്പോർട്ടിൽ പറയുന്നു. എന്നാൽ നിരോധിക്കപ്പെട്ട കോളാമ്പി മൈക്കാണ് ഉപയോഗിക്കുന്നതെന്നും ശബ്ദമലിനീകരണം അവസാനിപ്പിക്കാൻ നടപടിയെടുക്കണമെന്നും പരാതിക്കാരൻ ആവശ്യപ്പെട്ടു.

മത്സ്യത്തൊഴിലാളികളുടെ സെക്രട്ടേറിയറ്റ് മാർച്ച് ഇന്ന്

കൊല്ലം: കണ്ടെയ്നറുകളിൽ തട്ടി വലയും മൽസ്യബന്ധനോപകരങ്ങളും നഷ്ടമായ മൽസ്യ തൊഴിലാളികൾക്ക് നഷ്ടപരിഹാരം നൽകുക, കടൽ മണൽ ഖനനം ഉപേക്ഷിക്കുക, വൻകിട കപ്പലുകൾക്ക് ആഴക്കടൽ മത്സ്യബന്ധനത്തിനു അനുമതി നൽകുന്ന കേന്ദ്ര സർക്കാർ നടപടി അവസാനിപ്പിക്കുക തുടങ്ങിയ ആവശ്യം ഉന്നയിച്ചു കൊണ്ട് മത്സ്യത്തൊഴിലാളി കോൺഗ്രസ് ഇന്ന് രാവിലെ 10 ന് സെക്രട്ടറിയേറ്റിലേക്ക് മാർച്ചും ധർണയും നടത്തും. മത്സ്യത്തൊഴിലാളി കോൺഗ്രസ് സംസ്ഥാന പ്രസിഡന്‍റ് ജി. ലീലകൃഷ്ണന്‍റെ അധ്യക്ഷതയിൽ കെപിസിസി പ്രസിഡന്‌റ് സണ്ണി ജോസഫ് മാർച്ച് ഉദ്ഘാടനം ചെയ്യും. കൊല്ലം പരപ്പിലെ ഖനന നീക്കത്തിനെതിരെ സമരപരിപാടികൾ ആരംഭിക്കാനിരിക്കെയാണ് മത്സ്യത്തൊഴിലാളി കോൺഗ്രസ് ഇന്ന് പ്രതിഷേധ മാർച്ച് നടത്തുന്നത്. കൊല്ലത്ത് വാടി, നീണ്ടകര, ശക്തികുളങ്ങര, കരുനാഗപ്പള്ളി ഭാഗത്തെ നിരവധി നിരവധി മത്സ്യത്തൊഴിലാളികളുടെ വലകളും മത്സ്യ ബന്ധനോപകരങ്ങളുമാണ് കണ്ടെയ്നറുകളിൽ തട്ടി കേടുപാടുകൾ ഉണ്ടായിട്ടുള്ളത്. മത്സ്യത്തൊഴിലാളികൾക്ക് ഉണ്ടായ നാശ നഷ്ടങ്ങൾക്ക് നഷ്ടപരിഹാരം നൽകുന്ന കാര്യത്തിൽ സർക്കാർ മുഖംതിരിക്കുന്ന സമീപനമാണ് സ്വീകരിച്ചിരിക്കുന്നത്. പരിസ്ഥിതി ആഘാത പഠനങ്ങള്‍ നടത്താതെ കൊല്ലം പരപ്പിനോട് ചേർന്ന് ആഴക്കടല്‍ ഖനനം നടത്തരുതെന്നാണ് മൽസ്യ തൊഴിലാളി കോൺഗ്രസ് ആവശ്യപ്പെടുന്നത്. സർക്കാരിന്റെ ഭാഗത്ത് നിന്നുള്ള ഖനന നീക്കത്തിനെതിരെ സമരപരിപാടികൾ ആരംഭിക്കുമെന്ന് മൽസ്യ തൊഴിലാളി കോൺഗ്രസ് നേതാക്കൾ മുന്നറിയിപ്പ് നൽകുന്നു. കൊല്ലം പരപ്പിനോട് ചേർന്ന് ഏത് കമ്പനി ടെൻഡർ എടുത്താലും ആഴക്കടൽ ഖനനത്തിന് അനുവദിക്കുകയില്ലെന്ന് മത്സ്യത്തൊഴിലാളി കോൺഗ്രസ് സംസ്ഥാന സെക്രട്ടറി എഫ്. അലക്സാണ്ടറും ജില്ലാ പ്രസിഡന്‍റ് യേശുദാസൻ എസ്. ഫെർണാണ്ടസും ജില്ലാ വൈസ് പ്രസിഡന്‍റ് റീന നന്ദിനി വലിയത്ത് എന്നിവർ പ്രസ്താവനയിൽ അറിയിച്ചു.

വന്യജീവി സംഘർഷ ലഘൂകരണ തീവ്രയജ്ഞ പരിപാടി ആരംഭിച്ചു

കുളത്തൂപ്പുഴ : അതിതീവ്ര മനുഷ്യ വന്യജീവി സംഘർഷം അനുഭവപ്പെടുന്ന പഞ്ചായത്തുകളിൽ വന്യജീവി സംഘർഷ ലഘൂകരണ തീവ്രയജ്ഞ പരിപാടിയുടെ ഭാഗമായി സംസ്ഥാന സർക്കാർ നടപ്പിലാക്കുന്ന കർമപദ്ധതിയുടെ ഒന്നാംഘട്ടം കുളത്തൂപ്പുഴ പഞ്ചായത്തിൽ ആരംഭിച്ചു. ആദ്യഘട്ടത്തിൽ പഞ്ചായത്ത് പരിധിയിലെ കർഷകർ അടക്കമുള്ള പൊതു ജനങ്ങളിൽ നിന്നും പരാതികളും നിർദേശങ്ങളും ശേഖരിക്കുന്നതിനായി പഞ്ചായത്ത്‌ ഓഫീസിലും സമീപ പ്രദേശങ്ങളിലെ വനം വകുപ്പ് ഓഫീസുകളിലുമാണ് പരാതി പെട്ടികളും ഹെല്പ് ഡെസ്കും സ്ഥാപിച്ചിട്ടുള്ളത്. കുളത്തൂപ്പുഴ, തെന്മല, ശെന്തുരുണി, അഞ്ചൽ റേഞ്ച് പരിധിയിലെ പ്രാദേശിക തലത്തിലുള്ള പ്രശ്നങ്ങൾക്കാണ് ഒന്നാം ഘട്ടത്തിൽ പരിഹാരം കാണുക. ഒന്നാംഘട്ടത്തിൽ പരിഹരിക്കാൻ കഴിയാത്ത പ്രശ്നങ്ങൾ പരിഹരിക്കാൻ രണ്ടാംഘട്ടം ഒക്‌ടോബർ ഒന്ന് മുതൽ 15 വരെ ജില്ലാതലത്തിലും മൂന്നാം ഘട്ടം ഒക്ടോബർ 16 മുതൽ 30 വരെ സംസ്ഥാന തലത്തിലുമായി നടക്കും. കുളത്തൂപ്പുഴ പഞ്ചായത്ത് ഓഫീസിൽ സ്ഥാപിച്ച പരാതിപ്പെട്ടിയുടെയും ആരംഭിച്ച ഹെല്പ് ഡെസ്കിന്‍റെയും ഉദ്ഘാടനം കഴിഞ്ഞദിവസം രാവിലെ കുളത്തുപ്പുഴ പഞ്ചായത്ത് പ്രസിഡന്‍റ് പി. ലൈലബീവി നിർവഹിച്ചു. പഞ്ചായത്ത് വൈസ് പ്രസിഡന്‍റ് അടക്കമുള്ള ജനപ്രതിനിധികളും കുളത്തൂപ്പുഴ റേഞ്ച് ഓഫീസർ ആർ.എസ്. അരുൺ, തെന്മല റേഞ്ച് ഓഫീസർ സെൽവരാജ്, അഞ്ചൽ റേഞ്ച് ഓഫീസർ ദിവ്യ, ശെന്തുരുണി അസി.വൈൽഡ് ലൈഫ് വാർഡൻ ടി.എസ്. സജു, സെക്ഷൻ ഫോറസ്റ്റ് ഓഫീസർ ശ്യം കുമാർ എന്നിവർ പങ്കെടുത്തു. 30 വരെ പരാതിപ്പെട്ടിയിൽ വനം വകുപ്പുമായി ബന്ധപ്പെട്ട് പൊതുജനങ്ങൾ നേരിടുന്ന വിവിധങ്ങളായ പ്രശ്നങ്ങളും പരാതികളും നിർദേശങ്ങളും നൽകി മനുഷ്യവന്യജീവി സംഘർഷങ്ങൾ ലഘുകരിക്കുന്നതിനായി നടപ്പിലാക്കുന്ന തീവ്രയജ്ഞപരിപാടിയില്‍ പ്രദേശത്തെ എല്ലാ കർഷകർക്കും പങ്കെടുക്കാവുന്നതാണ്.

അലയമണ്‍ പഞ്ചായത്തില്‍ പോഷക തോട്ടം പദ്ധതിക്കു തുടക്കമായി

അഞ്ചല്‍ : അലയമണ്‍ പഞ്ചായത്തില്‍ പോഷക തോട്ടം പദ്ധതിക്കു തുടക്കമായി. ജനകീയാസൂത്രണം 2025 – 26 സാമ്പത്തിക വര്‍ഷത്തില്‍ ഉള്‍പ്പെടുത്തി പഞ്ചായത്തുകളിലെ സ്കൂളുകള്‍, അങ്കണവാടികള്‍, ബഡ്സ്കൂള്‍ ഉള്‍പ്പെടെയുള്ള ഇടങ്ങളില്‍ പച്ചക്കറി കൃഷി നടത്തുകയാണ് പദ്ധതി കൊണ്ട് ലക്ഷ്യമിടുന്നത്. ഇതിനായി ഒരു സ്ഥാപനത്തിന് 25 ചട്ടികള്‍, പോര്‍ട്ടീന്‍ മിശ്രിതം, പച്ചക്കറി തൈകള്‍ എന്നിവ പദ്ധതിയുടെ ഭാഗമായി നല്‍കും. കൃഷി ഭവന്‍ വഴി നടപ്പിലാക്കുന്ന പദ്ധതിയിലൂടെ ഒരു യൂണിറ്റിന് 5,000 രൂപയാണ് ചിലവഴിക്കുക. ആകെ രണ്ടുലക്ഷത്തോളം രൂപ പദ്ധതിക്കായി ചിലവിടും. വിഷരഹിത പച്ചക്കറി ഉത്പാദനത്തോടൊപ്പം കുട്ടികളില്‍ കൃഷിയുടെ പ്രധാന്യം മനസിലാക്കി നല്‍കുക എന്നതും ലക്ഷ്യമിടുന്നുണ്ട്. ചണ്ണപ്പേട്ട മൂങ്ങോട് സെന്‍റ് മേരീസ് സ്കൂളി വച്ച് സംഘടിപ്പിച്ച പദ്ധതിയുടെ ഉദ്ഘാടനം പഞ്ചായത്ത് പ്രസിഡന്‍റ് എം. ജയശ്രീ നിര്‍വഹിച്ചു. വൈസ് പ്രസിഡന്‍റ് ജി. പ്രമോദ്, സ്ഥിരം സമിതി അദ്ധ്യക്ഷന്‍മാരായ എം. മുരളി, ഗീതാകുമാരി, കൃഷി ഓഫീസര്‍ അഞ്ജന ജെ മധു, സ്കൂള്‍ എച്ച്എം സോണിയ, പഞ്ചായത്ത് അംഗങ്ങള്‍, പൊതുപ്രവര്‍ത്തകര്‍, കൃഷിവകുപ്പ്, ഐസിഡിസി ഉദ്യോഗസ്ഥര്‍ അടക്കം നിരവധിപേര്‍ പങ്കെടുത്തു.

ലോക മുളദിനം ആഘോഷിച്ചു

കൊല്ലം: ഫാത്തിമ മാതാ നാഷണൽ കോളജിലെ ബോട്ടണി ഡിപ്പാർട്ട്മെന്‍റിന്‍റെ ആഭിമുഖ്യത്തിൽ ലോക മുളദിനം ആഘോഷിച്ചു. വിദ്യാർഥികൾക്കായി പോസ്റ്റർ മത്സരം സംഘടിപ്പിച്ചു. ഒന്നാം സ്ഥാനം ബിരുദാനന്തര ബിരുദ വിദ്യാർഥി ബി.ലക്ഷ്മിക്കും രണ്ടാം സ്ഥാനം രണ്ടാം വർഷ ബിരുദ വിദ്യാർഥികളായ ബി. അനാമിക,അനുജഎന്നിവർക്കും മൂന്നാം സ്ഥാനം ബിരുദാനന്തര ബിരുദ വിദ്യാർഥി വൈഷ്ണവ് ജെ.നായർക്കും ലഭിച്ചു. വിജയികൾക്കുള്ള സമ്മാനദാനം പ്രിൻസിപ്പൽ പ്രഫ. ഡോ. സിന്ത്യ കാതറിൻ മൈക്കിൾ നിർവഹിച്ചു. ഡോ.സിനിലാൽ.ബി, ഡോ.ഡിന്‍റുഎന്നിവർ മുള നട്ടു വളർത്തേണ്ടതിന്‍റെ ആവശ്യകതയെക്കുറിച്ച് പ്രസംഗിച്ചു. തുടർന്ന്കാന്പസിലെ മുളമുത്തശിയെ ആദരിക്കുകയും ചെയ്തു.

മാതാഅമൃതാനന്ദമയിയുടെ ജന്മദിനാഘോഷം: മെഗാ ശുചീകരണ യജ്ഞം 20ന്

കരുനാഗപ്പള്ളി: മാതാ അമൃതാനന്ദമയിയുടെ 72-ാം ജന്മദിനാഘോഷപരിപാടിയുടെ ഭാഗമായി ലോക ശുചീകരണ ദിനമായ നാളെ ആഗോളതലത്തിൽ മെഗാ ശുചീകരണ യജ്‌ഞം നടത്താൻ അമൃതാനന്ദമയി മഠം തീരുമാനിച്ചതായി അധികൃതർ പത്രസമ്മേളനത്തിൽഅറിയിച്ചു. ജന്മദിനമായ 27നാണ് വിവിധ പരിപാടികളോടെ ആഘോഷിക്കുന്നത്. ഗുരുപാദപൂജ, ജന്മദിന സന്ദേശം നൽകൽ, വിശ്വശാന്തി പ്രാർഥന, ഭജന, സത്സംഗം, പ്രസാദ വിതരണം എന്നിവ നടക്കും. ലോകത്തിന്‍റെ നാനാഭാഗങ്ങളിൽ നിന്നുള്ള പ്രമുഖർ പങ്കെടുക്കുന്ന ചടങ്ങിൽ നൃത്താർച്ചന, സംഗീതാർച്ചന എന്നിവയുൾപ്പെടെയുള്ള കലാസാംസ്കാരിക പരിപാടികൾ അരങ്ങേറും. അമൃതാനന്ദമയി മഠം ഏർപ്പെടുത്തി വരുന്ന അമൃതകീർത്തി പുരസ്കാരം വേദിയിൽ വച്ച് വിതരണം ചെയ്യും. കൂടാതെ നിർധനരായ യുവതീ യുവാക്കളുടെ സമൂഹ വിവാഹം, ആശ്രമത്തിലെ പുതിയ പ്രസിദ്ധീകരണങ്ങളുടെ പ്രകാശനനം എന്നിവയും നടക്കും. ജന്മദിനത്തിന്‍റെ ഭാഗമായി വിദേശികൾ ഉൾപ്പെടെയുള്ള ലക്ഷക്കണക്കിനു പേർ ആഘോഷങ്ങൾക്കായി ഇത്തവണ അമൃതപുരിയിലെത്തുമെന്നും മഠം അധികൃതർ അറിയിച്ചു. ജന്മദിനാഘോഷങ്ങളുടെ ഭാഗമായി ജീവകാരുണ്യ പ്രവർത്തനങ്ങൾക്കും ശ്രമദാന പദ്ധതികൾക്കും ഇത്തവണ തുടക്കമിടും. കൊച്ചി, ഫരീദാബാദ് അമൃത ആശുപത്രികളിലെ വിവിധ വിഭാഗങ്ങളിലായാണ് വിദഗ്ധരായ ഡോക്ടർമാരുടെ നേതൃത്വത്തിൽ ശസ്ത്രക്രിയ ചെയ്തു നൽകുന്നത്. 18 വയസിനു താഴെയുള്ള കുട്ടികൾക്കായി തയാറാക്കിയ ഹൃദയ ശസ്ത്രക്രിയാ ക്യാമ്പ് കൊച്ചി അമൃത ആശുപത്രിയിൽ ഇതിനോടകം തന്നെ ആരംഭിച്ചിട്ടുണ്ട്. കേരളത്തിനകത്തും പുറത്തുമുള്ള നാന്നൂറോളം കുട്ടികളാണ് ഈ പദ്ധതിയുടെ ഗുണഭോക്താക്കൾ. ഐക്യരാഷ്ട്രസഭയിൽ ആദ്യമായി മലയാളം മുഴങ്ങിയ രജതജൂബിലി ആഘോഷത്തോടും, ജന്മദിനത്തോടും അനുബന്ധിച്ച് ഒരു ലോകം, ഒരു ഹൃദയo എന്ന വിഷയത്തെ അധികരിച്ച് സ്‌കൂൾ വിദ്യാർത്ഥികൾക്കായി നടത്തുന്ന ഉപന്യാസരചന, ചിത്രരചന, ക്വിസ് മത്സരങ്ങൾ എന്നിവ സംഘടിപ്പിക്കും. വിജയികൾക്ക് മികച്ച സമ്മാനത്തുകകളും ഏർപ്പെടുത്തിയിട്ടുണ്ട്. ആധ്യാത്മിക, വൈജ്ഞാനിക, ശാസ്ത്ര രംഗങ്ങളിലെ പ്രഗത്ഭർക്ക് 2001 മുതൽ അമൃതകീർത്തി പുരസ്‌കാരത്തിന് 1,23, 456 രൂപയും ആർട്ടിസ്റ്റ് നമ്പൂതിരി രൂപകൽപന ചെയ്ത സരസ്വതി ശിൽപവും പ്രശസ്തി പത്രവും സമ്മാനിക്കുമെന്നു അമൃതാനന്ദമയി മഠം വൈസ് ചെയർമാൻ സ്വാമി അമൃത സ്വരൂപാനന്ദപുരി അറിയിച്ചു.

പ്രകൃതിദുരന്ത മുന്നറിയിപ്പ് സംവിധാനം ഒരുക്കാൻ സർക്കാർ സഹകരിക്കുന്നില്ല: അമൃതാനന്ദമയി മഠം

കൊല്ലം: വയനാട് ഉരുൾപ്പൊട്ടൽ ദുരന്ത പശ്ചാത്തലത്തിൽ കഴിഞ്ഞ വർഷം അമൃതാനന്ദമയി മഠം പ്രഖ്യാപിച്ച പ്രകൃതി ദുരന്തമുന്നറിയിപ്പ് സംവിധാനം ഒരുക്കുന്ന കാര്യത്തിൽ സർക്കാർ സഹകരിക്കുന്നില്ലന്നു മഠം അധികൃതർ പറഞ്ഞു. 15 കോടി ചെലവഴിച്ചു വയനാട്ടിലെ 14 ഇടങ്ങളിൽ സംവിധാനം ഒരുക്കാനായി പഠനം നടത്തി പദ്ധതി സർക്കാരിൽ സമർപ്പിച്ചെങ്കിലും സർക്കാർ അനാവശ്യമായ നിബന്ധനകൾ വച്ച് തടസങ്ങളുന്നയിക്കുകയാണന്ന് അമൃത വിശ്വവിദ്യാപീഠം അധ്യക്ഷ ഡോ.മനീഷ വി.രമേശ് പറഞ്ഞു. അമൃതാനന്ദമയിയുടെ 72-ാം ജന്മദിനാഘോഷം വിശദമാക്കാൻ ചേർന്ന പത്രസമ്മേളനത്തിൽ സംസാരിക്കുകയായിരുന്നു അവർ. അമൃതാനന്ദമയിയുടെ 71-ാം ജന്മദിന ഭാഗമായാണ് വയനാട്ടിൽ ദുരന്തമുന്നറിയിപ്പ് സംവിധാനം സ്ഥാപിക്കുമെന്ന് പ്രഖ്യാപിച്ചത്. അതിനുള്ള ഫണ്ടിംങ് ഏജൻസിയെ കണ്ടെത്തുകയും പ്രാഥമിക നടപടികൾ പൂർത്തിയാക്കുകയും ചെയ്തശേഷമാണ് സർക്കാരിന്‍റെ അനുമതിതേടിയത്. എന്നാൽ ഡേറ്റ ഷെയർ ചെയ്യുന്ന കാര്യത്തിലാണ് സർക്കാർ തടസമുന്നയിക്കുന്നത്. ഇക്കാര്യത്തിൽ ഫണ്ടിംഗ് ഏജൻസിയുടെ താത്പര്യം കൂടി പരിഗണിക്കാതെ കരാറിൽ ഒപ്പിടാനാവില്ല. അതാണ് നിയമവും. ഇപ്പോൾ ഇത്തരത്തിലെ മുന്നറിയിപ്പ് സംവിധാനം അമൃതയുടെ കീഴിൽ ഒരുക്കിയിട്ടുള്ള മൂന്നാറിലും ആസാമിലുമൊക്കെ ചെയ്യുന്നതുപോലെ മാത്രമേ വയനാടിന്‍റെ കാര്യത്തിലും സാധ്യമാവുകയുള്ളു. മൂന്നാറിൽ പലതവണ മുന്നറിയിപ്പ് നൽകി ജീവാപായം ഒഴിവാക്കാൻ കഴിഞ്ഞു. വയനാടിന്‍റെ കാര്യത്തിൽ മൂന്നു തവണ സർക്കാരിന് കത്തു നൽകിയിട്ടും ഒരേ മറുപടിയാണ് ലഭിച്ചതെന്നും മനീഷ വ്യക്തമാക്കി. അമൃതാനന്ദമഠം വൈസ് ചെയർമാൻ സ്വാമി അമൃതസ്വരൂപാനന്ദപുരിയും പത്രസമ്മേളനത്തിൽ പങ്കെടുത്തു.

വികാസിന്‍റെ മനം നിറയ്ക്കും കൃഷിത്തോട്ടം

ജിജുമോൻ മത്തായി കുണ്ടറ: അമ്പലത്തുംകാല ഈലിയോട് ചിറയിൽ വികാസ് സുകുമാരന്‍റെ ജീവിതത്തിൽ കഠിനാധ്വാനത്തിന്‍റെയും വിയർപ്പിന്‍റെയും മണ്ണിന്‍റെയും മണമുണ്ട്. മണ്ണിൽ പൊന്നുവിളയിച്ചു പച്ചപ്പ് ജീവിതത്തിലും പ്രകൃതിയിലും നിറയ്ക്കുകയാണ് വികാസ്. 20 വർഷത്തെ പ്രവാസജീവിതത്തിനോടു വിട പറഞ്ഞെത്തിയ വികാസിനെ മണ്ണ് ചതിച്ചില്ല. 2016 മുതൽ തനി കൃഷിക്കാരനായി രാപകൽ അധ്വാനിക്കുന്ന യുവാവിനു തിരിഞ്ഞുനോക്കേണ്ടി വന്നിട്ടില്ല. കൃഷിയിടത്തിൽ തിങ്ങിനിറഞ്ഞുനിൽക്കുന്ന പയറും പപ്പായയും മറ്റു കൃഷികളും കാണുന്പോൾ വികാസിന്‍റെ മനം നിറയും. വിഷരഹിത പച്ചക്കറി ചെയ്യണമെന്നാഗ്രഹത്തോടെയാണ് കൃഷിയിടത്തിലേക്ക് യുവ കർഷകൻ ഇറങ്ങിയത്. അതു പാഴായിപോയില്ലെന്നു ജീവിതവിജയത്തിലൂടെ തെളിയിക്കുന്നു. ആർക്കും അസൂയയുളവാക്കുന്ന രീതിയിൽ കൃഷിഭൂമിയിൽ തന്‍റെ വിജയഗാഥ രചിക്കാൻ ഇതിനകം കഴിഞ്ഞു. എത്രയേറെ അവാർഡുകൾ വികാസിനെ തേടിയെത്തി. പ്രാരംഭഘട്ടത്തിൽ ഏറെ വെല്ലുവിളികൾ നേരിട്ടുവെങ്കിലും എഴുകോൺ കൃഷിഭവന്‍റെ അകമഴിഞ്ഞ സഹകരണവും നെടുമ്പായിക്കുളം വിഎഫ് പിസികെയുടെ പിന്തുണയും ഈ മേഖലയിൽ ഉറച്ചുനിൽക്കാൻ മനസിനു പകർന്നു. ഏകദേശം ഒരേക്കറിൽ തുടങ്ങിയ കൃഷി ഇന്ന് നാലേക്കറോളം വിസ്തൃതിയിലായി. ഇതിൽ വെള്ളരി, പാവൽ, പയർ, പടവലങ്ങ, പപ്പായ തുടങ്ങിയ കൃഷികളാണ് കൂടുതലായി നട്ടിരിക്കുന്നത്. ഈയിടെയായി പപ്പായ പച്ചയ്ക്കു ധാരാളമായി ബേക്കറി ആവശ്യങ്ങൾക്കായി പോകുന്നുണ്ട്. ജില്ലാതലം മുതൽ അനവധി നിരവധി പുരസ്കാരങ്ങൾ വികാസിനെ തേടി എത്തിയിട്ടുണ്ടെന്നു മാത്രമല്ല, അഗ്രികൾച്ചർ ഗവേഷണ വിദ്യാർഥികൾ, അധ്യാപകർ എന്നിവർ മിക്കപ്പോഴും നേരിട്ടുള്ള പഠനത്തിനായി ഇവിടെ എത്താറുണ്ട്, മലയാളികളായ സഹായികളെ കിട്ടുന്നതിൽ വെല്ലുവിളി നേരിടുന്നതിനാൽ, ഇപ്പോൾ ഇതരസംസ്ഥാന തൊഴിലാളികളാണ് സഹായികളായുള്ളത്. സ്പ്രിംഗ്ലർ, ഡ്രിപ്ലർ , തുടങ്ങി എല്ലാ ആധുനിക രീതികളോടൊപ്പം മെഷീനുകളുടെ സഹായത്താലും, അയൺ സ്ട്രക്ച്ച റിലുള്ള പന്തലിന്‍റെ സഹായത്തോടേയുമാണ് കൃഷി മുമ്പോട്ടു കൊണ്ടുപോകുന്നത്. സ്വന്തം വാഹനത്തിലാണ് കാർഷിക ഉത്പന്നങ്ങളുടെ വിതരണം നടത്തുന്നത് , കൃഷിഭവന്‍റെ ആഴ്ച ചന്തയിലും കാർഷിക വിപണിയിലും കൊടുത്തശേഷം ബാക്കിയുള്ളവ നാട്ടിൻപുറത്തെ സ്ഥിരമായി വാങ്ങുന്ന പച്ചക്കറി കടക്കാർക്കാണ് നൽകുന്നത്. ഈ സാമ്പത്തിക വർഷം കാർഷിക വിപണിയിൽ മാത്രം നൽകിയത് പത്തര ലക്ഷം രൂപയുടെ കാർഷിക ഉൽപ്പന്ന ങ്ങളാണ്. ഏകദേശം 20 ലക്ഷത്തിലേറെ രൂപവാർഷിക വരുമാനം ഇപ്പോൾ ലഭിക്കുന്നതായി വികാസ് പറഞ്ഞു. ജില്ലാതലത്തിൽ ഉൾപ്പെടെ 100 കണക്കിന് പുരസ്കാരങ്ങളാണ് വികാസിനെ തേടിയെത്തിയത്. കൃഷി സംബന്ധമായ സംശയനിവാരണത്തിന് ആരു സമീപിച്ചാലും ഒരു സങ്കോചവും കൂടാതെ തനിക്ക് അറിയാവുന്നവ അവരവർക്ക് മനസിലാകത്തക്ക രീതിയിൽ പറഞ്ഞുകൊടുക്കാനുള്ള ഒരു നല്ല മനസും വികാസിന്‍റെ വ്യക്തിപ്രഭാവം വർധിപ്പിക്കുന്നു.

ഗതാഗതക്കുരുക്കും പ്രശ്നങ്ങളും നേരിട്ടെത്തി വിലയിരുത്തി കളക്‌ടർ

കൊട്ടിയം:അയത്തിൽ ജംഗ്ഷനിലെ ഗതാഗതക്കുരുക്കും നിലവിലെ പ്രശ്നങ്ങളും നേരിൽ കണ്ട് മനസിലാക്കുന്നതിനായി ജില്ലാ കളക്ടർ എത്തി.കഴിഞ്ഞദിവസം വൈകുന്നേരമാണ് ജില്ലാ കളക്ടർ എൻ.ദേവിദാസ് സംസ്ഥാന ഹൈവേയിലെ അയത്തിൽ ജംഗ്ഷനിൽ ഉദ്യോഗസ്ഥ സംഘത്തോടൊപ്പം സന്ദർശനം നടത്തിയത്.ദേശീയപാത സ്ഥലമെടുപ്പ് ഭാഗം ഡപ്യൂട്ടി കളക്ടർ,സ്ഥലമെടുപ്പ് വിഭാഗം തഹസീൽദാർ ,നാഷണൽ ഹൈവേ പ്രൊജക്റ്റ് ഡയറക്ടർ,കരാർ കമ്പനി അധികൃതർ എന്നിവരോടൊപ്പമാണ് കളക്ടർ സ്ഥലം സന്ദർശിക്കാൻ എത്തിയത്. കളക്ടർ സ്ഥലത്ത് എത്തുന്നതറിഞ്ഞ് ജനകീയ സമിതിയുടെ നേതൃത്വത്തിൽ നാട്ടുകാർ കളക്ടർക്ക് മുന്നിൽ പരാതികളുടെ കെട്ടഴിച്ചു. എല്ലാവരുടെയും പരാതി കേട്ട കളക്ടർ രണ്ടു സർവീസസ് റോഡുകളിലുമുള്ളനിലവിലെ സ്ഥിതി മനസിലാക്കി.ജംഗ്ഷന്‍റെ തെക്കും വടക്കുമായി രണ്ട് അണ്ടർ പാസേജുകൾ വേണമെന്നതായിരുന്നു ജനകീയ സമിതിയുടെ പ്രധാന ആവശ്യം.ഗതാഗതക്കുരുക്ക് മൂലം സ്വകാര്യ ബസുകൾക്ക് സർവീസ് നടത്താൻ കഴിയുന്നില്ലെന്ന ആവശ്യവുമായികൊല്ലം - കണ്ണനല്ലൂർ ബസ് കൂട്ടായ്മയുടെ ഭാരവാഹികളും എത്തിയിരുന്നു. അയത്തിൽ ജംഗ്ഷനിലെ പ്രശ്നങ്ങൾ നേരിട്ടറിയാൻ എത്തിയ ജില്ലാ കളക്ടർ എൻ. ദേവിദാസ് നാഷണൽ ഹൈവേ പ്രോജക്ട് ഡയറക്ടർ ദേവപ്രസാദ് സാഹുവുമായി കാര്യങ്ങൾ ചർച്ച ചെയ്തു. അയത്തിൽ ജംഗ്ഷനിൽ നിന്നും പള്ളിമുക്കിലേക്ക് പോകണമെങ്കിൽ നിലവിൽ കിലോമീറ്ററുകൾചുറ്റേണ്ട സ്ഥിതിയാണുള്ളത് എന്ന് ജനകീയ സമിതി ഭാരവാഹികൾ കളക്ടർക്ക് കാട്ടിക്കൊടുത്തു. അയത്തിൽ ജംഗ്ഷന് വടക്കുവശം ഉള്ളവർക്ക് റോഡിന്‍റെ കിഴക്ക് കണ്ണനല്ലൂർ ഭാഗത്തേക്ക് പോകണമെങ്കിലും പാൽക്കുളങ്ങര പോയി ചുറ്റിവരേണ്ട സ്ഥിതിയാണ് നിലനിൽക്കുന്നത്. ഇതെല്ലാം നേരിൽ കണ്ട് മനസിലാക്കിയ കളക്ടർപ്രശ്നപരിഹാരത്തിന് ഉദ്യോഗസ്ഥരെ ചുമതലപ്പെടുത്തി. കൊല്ലം ഭാഗത്തേക്കുള്ള ചെറിയ വാഹനങ്ങൾ രണ്ടാം നമ്പർ പുന്തലത്താഴം എന്നിവിടങ്ങളിൽ നിന്നും തിരിഞ്ഞ് ബൈപ്പാസ് റോഡിൽ കയറി പോകണമെന്നായിരുന്നു സ്വകാര്യ ബസ് കൂട്ടായ്മയിലെ ഹാഷിം ആവശ്യപ്പെട്ടത്. ഇതിന് പരിഹാരം ഉണ്ടാക്കാമെന്ന് തഹസിൽദാർ ഉറപ്പ് നൽകി.ജംഗ്ഷനിൽ നിലവിലുള്ള പ്രശ്നങ്ങൾ സംബന്ധിച്ചും പരിഹാരമാർഗങ്ങൾ സംബന്ധിച്ചും പുതിയ പരാതി നൽകുവാൻ ജനകീയ സമിതിയോട് ഉദ്യോഗസ്ഥർ നിർദേശിച്ചു. പാലത്തിനടിയിലൂടെ ബസുകൾ കടത്തിവിടുന്ന കാര്യം പരിഗണിക്കാമെന്ന് കരാർ കമ്പനി ഉദ്യോഗസ്ഥ അറിയിച്ചു. റോഡ് ടാർ ചെയ്യുന്ന മുറയ്ക്ക് അതിനുള്ള നടപടി ഉണ്ടാകും. കഴിഞ്ഞ രണ്ടു ദിവസം മുമ്പ് പൊതുപ്രവർത്തകനായ അയത്തിൽ നിസാം,സ്വകാര്യ ബസ് കൂട്ടായ്മ പ്രതിനിധി ഹാഷിം എന്നിവർ കളക്ടറെ നേരിൽകണ്ട് നിവേദനം നൽകിയിരുന്നു അതിന്‍റെ അടിസ്ഥാനത്തിലാണ് ജില്ലാ കളക്ടർ വ്യാഴാഴ്ച അയത്തിൽ ജംഗ്ഷനിൽ സന്ദർശനം നടത്തിയത്. നാഷണൽ ഹൈവേ പ്രോജക്‌ട് ഡയറക്ടർ ദേവപ്രസാദ് സാഹു ,എൻഎച്ച് സ്ഥലം ഏറ്റെടുപ്പ് വിഭാഗം ഡപ്യൂട്ടി കളക്ടർ അനിൽ ഫിലിപ്പ്,തഹസിൽദാർ ലിജി ജോർജ്, ഡപ്യൂട്ടി തഹസിൽദാ ർ ഹരീഷ്എന്നിവരിൽ നിന്നും ജില്ലാ കളക്ടർ കാര്യങ്ങൾ ചോദിച്ചറിഞ്ഞ ശേഷമാണ് മടങ്ങി യത്.

‘ധ്വനി 25’ കലോത്സവത്തിന് തുടക്കം

കുളത്തൂപ്പുഴ : ബിഎംജി എച്ച് എസ് സ്കൂൾ ധ്വനി 25 എന്ന പേരിൽ നാമകരണം എന്ന പേരിൽ കലോത്സവത്തിന് തുടക്കമായി. കുളത്തുപ്പുഴപഞ്ചായത്ത് അംഗം പി.ആർ. സന്തോഷ്‌കുമാർ ഉദ്ഘാടനം ചെയ്തു. സ്കൂൾ ഹെഡ്മാസ്റ്റർ കെ. ഷാജുമോൻ അധ്യക്ഷത വഹിച്ചു. ലോക്കൽ മാനേജർ ഫാ. മാത്യു ചരിവുകാലായിൽ മുഖ്യസന്ദേശം നൽകി. പിടിഎ വൈസ് പ്രസിഡന്‍റ് സാനു ജോർജ്, രാധാകൃഷ്ണൻ, ഫാ വിൽ‌സൺ ചരുവിള, എം.സീനത്ത്, ടി. എസ്. അപർണ, ജി. ലീനാമോൾ, സ്റ്റാഫ് സെക്രട്ടറി ജെ.ജോസ്മോൻ, സ്കൂൾ ചെയർപേഴ്സൺ അലീഷ മേരി സാബു, വൈസ് ചെയർമാൻ എസ്. അർജുൻഎന്നിവർ പ്രസംഗിച്ചു.

നടപ്പാത തകർന്നു

കൊട്ടാരക്കര: ഇരുമ്പ് പൈപ്പ് കൊണ്ടുള്ള നടപ്പാത തകർന്നു. നെടുവത്തൂർ കശുവണ്ടി ഫാക്ടറി ജംഗ്ഷന് സമീപമാണ് നടപ്പാതയുടെ ഇരുമ്പ് പൈപ്പുകൾ പൊട്ടിയടർന്ന നിലയിൽ കാണപ്പെട്ടത്. വില്ലേജ് ഓഫീസ്, സ്കൂൾ, ആരാധനാലയങ്ങൾ, ഫാക്ടറി. തുടങ്ങിയ സ്ഥലത്തേയ്ക്കുള്ള റോഡ് ആരംഭിക്കുന്ന ഭാഗത്തുള്ള ഇരുമ്പ് പൈപ്പ് കൊണ്ടുള്ള നടപ്പാത പൊതുമരാമത്ത് അധികൃതർ വർഷങ്ങൾക്ക് മുൻപ് സ്ഥാപിച്ചത്. വർഷത്തിൽ നാല് തവണയാണ് ഇരുമ്പ് ഗ്രിൽ അറ്റകുറ്റപണി നടത്തി പുനസ്ഥാപിച്ചത്. പൊട്ടിയ ഭാഗം അടർത്തി മാറ്റിയതിന് ശേഷം വീണ്ടും ഇതേ പൈപ്പ് തന്നെയാണ് വീണ്ടും കാൽ നടയാത്രയ്ക്കായി നടപ്പാതയിൽ സ്ഥാപിക്കുന്നത്. ഇതിന് രണ്ട് മാസത്തിൽ കൂടുതൽ ആയുസ് ഉണ്ടാവാറില്ല. ഇരുമ്പ് നടപ്പാതയുടെ മധ്യത്തിൽ ഉള്ള കമ്പി ദ്രവിച്ച് കാൽനട യാത്രക്കാർക്ക് പരിക്കേറ്റിട്ടുണ്ട്. ഇരുചക്ര വാഹനങ്ങളും അപകടത്തിൽപ്പെടുന്നത് പതിവാണ് മരാമത്ത് അധികാരികളെയും, താലൂക്ക് വികസന സമിതിയിലും നിരവധി തവണ പരാതികൾ നൽകിയെങ്കിലും നടപ്പാതയ്ക്കായി പുതിയ ഇരുമ്പ് പൈപ്പുകൾ സ്ഥാപിക്കാൻ അധികൃതർ തയാറാകുന്നില്ല.

യുവജന കമ്മീഷന്‍ ജില്ലാതല അദാലത്ത്; 22 പരാതികള്‍ തീര്‍പ്പാക്കി

കൊല്ലം: യുവജനങ്ങള്‍നേരിടുന്ന പ്രശ്‌നങ്ങള്‍ക്കു പരിഹാരങ്ങള്‍ ലഭ്യമാക്കുന്നതിനുള്ള സൗജന്യനിയമസഹായത്തിനായി 18001235310 ടോള്‍ഫ്രീ നമ്പര്‍ ഒരുക്കിയിട്ടുണ്ടെന്ന് കളക്ടറേറ്റ് കോണ്‍ഫറന്‍സ് ഹാളില്‍ നടത്തിയ സിറ്റിംഗില്‍ യുവജന കമ്മീഷന്‍ ചെയര്‍പേഴ്‌സണ്‍ എം.ഷാജര്‍. വിദേശ തൊഴില്‍ തട്ടിപ്പുകള്‍ കൂടിവരുന്ന സാഹചര്യത്തില്‍ ജാഗ്രതവേണം. യുവജനങ്ങളുടെ മാനസികാരോഗ്യം ഉറപ്പാക്കാനും ലഹരിക്കെതിരായി നടക്കുന്ന ക്യാമ്പയിനുകളില്‍ പരമാവധി പങ്കാളിത്തം അനിവാര്യമെന്നും പറഞ്ഞു.22 പരാതികള്‍ പരിഹരിച്ചു. 42 പരാതികളാണ് പരിഗണിച്ചത്. 20 എണ്ണം അടുത്ത സിറ്റിങ്ങിലേക്ക് മാറ്റി. പുതുതായി ആറ് പരാതികള്‍ സ്വീകരിച്ചു. സ്വകാര്യ കോളജിലെ താത്കാലിക അധ്യാപികയുടെ വേതനം അനുവദിക്കല്‍, നോണ്‍ക്രീമിലെയര്‍ സര്‍ട്ടിഫിക്കറ്റ് ലഭിക്കുന്നതിനുള്ള തടസം, കരിത്തുറയിലെ മൈതാനം നിലനിര്‍ത്തുന്നത് സംബന്ധിച്ച് യുവജന ക്ലബുകള്‍ നല്‍കിയ പരാതി, സാമ്പത്തിക തട്ടിപ്പ്, ജില്ലയിലെ സ്വകാര്യ കണ്‍സള്‍ട്ടന്‍സി സ്ഥാപനത്തില്‍ നിന്ന് കോഴ്‌സ് ഫീസ് തിരികെ ലഭിക്കാത്തത്, സര്‍ട്ടിഫിക്കറ്റ് തടഞ്ഞുവയ്ക്കല്‍, സാമൂഹ്യ മാധ്യമങ്ങളിലൂടെ അപകീര്‍ത്തിപ്പെടുത്തല്‍, തൊഴില്‍-വിസ തട്ടിപ്പ്, മോട്ടര്‍ വാഹന വകുപ്പിലെ അധിക തസ്തിക സൃഷ്ടിക്കുന്നത് തുടങ്ങിയവുമായി ബന്ധപ്പെട്ട പരാതികളാണ് പരിഗണിച്ചത്. കമ്മീഷന്‍ അംഗം എച്ച്. ശ്രീജിത്ത്, സെക്രട്ടറി ദീപാ സുരേന്ദ്രന്‍, അസിസ്റ്റന്‍റ് പി. അഭിഷേക് എന്നിവര്‍ പങ്കെടുത്തു.

വനിതകള്‍ക്കും കുട്ടികള്‍ക്കുമായി ചിറ്റുമല ബ്ലോക്കിൽ ജാഗ്രതസമിതികള്‍

കൊല്ലം:വനിതകളുടെയും കുട്ടികളുടെയും ക്ഷേമത്തിനും ഉന്നമനത്തിനുമായി ചിറ്റുമല ബ്ലോക്കില്‍ ജാഗ്രതസമിതി. സ്ത്രീകള്‍നേരിടുന്ന പ്രശ്‌നങ്ങള്‍ക്ക് പരിഹാരംകണ്ടെത്തി സുരക്ഷ ഒരുക്കുകയാണ് ലക്ഷ്യം. പഞ്ചായത്ത്-ബ്ലോക്ക്തലങ്ങളില്‍ ജാഗ്രതസമിതികളും ശിശുസംരക്ഷണസമിതിയും മൂന്നുമാസത്തില്‍ ഒരിക്കല്‍ പ്രവര്‍ത്തനങ്ങള്‍ വിലയിരുത്തും. ഗാര്‍ഹികപീഡനം, വസ്തുതര്‍ക്കം, കുടിവെള്ളപ്രശ്‌നം, കുട്ടികള്‍ക്കെതിരെയുള്ളഅതിക്രമം തുടങ്ങിവയില്‍ നിയമസഹായവും ലഭ്യമാക്കും. പ്രവര്‍ത്തനങ്ങളുടെ ഏകോപനത്തിന് സോഷ്യല്‍ വര്‍ക്കില്‍ ബിരുദാനന്തര ബിരുദമുള്ള കമ്മ്യൂണിറ്റി വുമണ്‍ ഫെസിലിറ്റേറ്ററുണ്ട്. സ്ത്രീകള്‍ക്കു നേരിട്ടും കമ്യൂണിറ്റി വുമണ്‍ ഫെസിലിറ്റേറ്റര്‍ വഴിയും പരാതി നല്‍കാം. കുടുംബ പ്രശ്‌നങ്ങളില്‍ കൗണ്‍സിലിംഗും പോക്സോ കേസുകളില്‍ അതിജീവിതര്‍ക്ക് കൗണ്‍സിലിംഗും നിയമപരിരക്ഷയും ലഭ്യമാക്കും. പഞ്ചായത്ത്തലത്തില്‍ കമ്യൂണിറ്റി വുമണ്‍ ഫെസിലിറ്റേറ്റര്‍ക്ക് പരിഹരിക്കാന്‍ കഴിയാത്ത പ്രശ്‌നങ്ങള്‍ ബ്ലോക്ക്തല ജാഗ്രതസമിതിയുടെ പരിഗണനയ്ക്ക് വിടും. ബ്ലോക്ക് പഞ്ചായത്ത് പ്രസിഡന്‍റ് ചെയര്‍പേഴ്‌സനും ബ്ലോക്ക് സെക്രട്ടറി കണ്‍വീനറും പഞ്ചായത്ത് പ്രസിഡന്‍റുമാരും ഐസിഡിഎസ് ഓഫീസര്‍മാരും അടങ്ങുന്നതാണ് ബ്ലോക്ക്തല ജാഗ്രത സമിതി. പഞ്ചായത്ത് ജാഗ്രതസമിതിയുടെ പ്രവര്‍ത്തനം നിരീക്ഷിക്കുന്നത് ബ്ലോക്ക്തല ജാഗ്രത സമിതിയാണ്. ലഭിച്ച പരാതികള്‍, സമയോചിതമായ ഇടപെടല്‍, ശിശുസംരക്ഷണസമിതി രൂപീകരണവും നടത്തിപ്പും തുടങ്ങിയവ ഉറപ്പുവരുത്തും. പഞ്ചായത്ത് പ്രസിഡന്‍റ് ചെയര്‍പേഴ്സണും വൈസ് പ്രസിഡന്‍റ് വൈസ് ചെയര്‍പേഴ്‌സനും ഐസിഡിഎസ് സൂപ്പര്‍വൈസര്‍ കണ്‍വീനറും പോലീസ്, അഭിഭാഷകര്‍ തുടങ്ങിയവരുമാണ് സമിതിയെ നയിക്കുന്നത്. ക്രിമിനല്‍പശ്ചാത്തലമുള്ള പരാതികള്‍ പോലീസിന് കൈമാറും. പരാതിക്കാരുടെ സ്വകാര്യത ഉറപ്പാക്കുമെന്ന് ചിറ്റുമല ബ്ലോക്ക് പഞ്ചായത്ത് പ്രസിഡന്‍റ് ജയദേവി മോഹന്‍ പറഞ്ഞു.

സെന്‍റ് ആൻഡ്രൂസ് ദേവാലയത്തിൽ കൊൺഫ്രിയ തിരുനാളിന് കൊടിയേറി

ചവറ : കോവിൽത്തോട്ടം സെന്‍റ് ആൻഡ്രൂസ് പള്ളിയിലെ പരിശുദ്ധ ഉപഹാര മാതാവിന്‍റെ കൊൺഫ്രിയ തിരുനാളിന് കൊടിയേറി. ഇടവക വികാരി ഫാ. ജോസഫ് ഡാനിയേൽ കൊടിയേറ്റ് കർമം നിർവഹിച്ചു. തുടർന്ന് നടന്ന തിരുനാൾ സമാരംഭ ദിവ്യബലിക്ക് മോൺ.വിൻസന്‍റ് മച്ചാഡോ മുഖ്യകാർമികത്വം വഹിച്ചു. ഫാ. ജാക്സൺ ജെയിംസ് വചന സന്ദേശം നിർവഹിച്ചു. ഫാ.പ്ളേറ്റോ, ഫാ. ജോസഫ് ആംബ്രോസ്, ഫാ. നിക്കോളാസ്,ഫാ. എബിൻ, ഫാ. ജോസഫ് ഡാനിയേൽ എന്നിവർ സഹ കാർമികരായി. 28 ന് രാവിലെ ആറിന്ദിവ്യബലി. രാവിലെ 9.30 നുള്ള ആഘോഷമായ പൊന്തിഫിക്കൽ ദിവ്യബലിക്ക് ബിഷപ് ഡോ.സ്റ്റാൻലി റോമൻ മുഖ്യകാർമികത്വം വഹിക്കും. ഫാ. സെബാസ്റ്റ്യൻ തൊബിയാസ് തിരുനാൾദിന വചന സന്ദേശം നൽകും. രൂപത ചാൻസിലർ ഫാ. ജോൺ ജെറി ഐസക്ക്, ഇടവക വികാരി ഫാ. ജോസഫ് ഡാനിയൽ എന്നിവർ സഹകാർമികരായിരിക്കും. ഫാ.അഗസ്റ്റിൻ സേവ്യർ വചനപ്രഘോഷണം നടത്തും. തുടർന്ന് കൊടിയിറക്കോട് കൂടി തിരുനാൾ സമാപിക്കും.

പുനലൂർ ടൗൺ ജിഎൽപിഎസിൽ ദീപിക നമ്മുടെ ഭാഷ പദ്ധതി

പുനലൂർ: അറിവിന്‍റെ വഴികളിലൂടെ ജീവിത വിജയം നേടാൻ പത്രവായനയിലൂടെ സാധ്യമാവുമെന്നു കവിയും മാധ്യമ പ്രവർത്തകനുമായ അനിൽ പന്തപ്ലാവ്. പുനലൂർ ടൗൺ ജിഎൽപിഎസിൽ ദീപിക നമ്മുടെ ഭാഷ പദ്ധതി ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. ഇന്ന് ലോകത്ത് സംഭവിക്കുന്ന ഓരോ കാര്യങ്ങളും വാർത്തകളായി പത്രങ്ങളിലൂടെ കൃത്യമായി നമ്മളിലെത്തുന്നു. പത്രവായനയിലൂടെയും പുസ്തക വായനയിലൂടെയും ശരിയായ അറിവുകൾ നമ്മളിലേയ്ക്ക് എത്തുകയാണ്. സ്കൂൾ ഹെഡ്മിസ്ട്രസ് എം.കെ. ബിന്ദു , ദീപിക ഏരിയ മാനേജർ വർഗീസ് ജോസഫ്, അധ്യാപകരായ പ്രിയ, ആരതി, ആമിന, സുജാത, സുധീന, നന്ദു എന്നിവർ ചടങ്ങിൽ പങ്കെടുത്തു.

അഷ്‌ടമുടി കായലിലെ കണ്ടൽക്കാടുകൾ നാശത്തിലേക്ക്

അജി വള്ളിക്കീഴ് കൊല്ലം: നീർത്തടങ്ങളിലെ ആവാസ വ്യവസ്ഥയെ സംരക്ഷിക്കുന്നതിൽ മുഖ്യപങ്കു വഹിക്കുന്ന കണ്ടൽക്കാടുകൾ കൊല്ലത്ത് സർവ നാശത്തിലേക്ക്. കണ്ടൽക്കാടുകളുടെ വിസ്തൃതി ജില്ലയിൽ ഓരോ വർഷം തോറും കുറയുകയാണ്. അഷ്ടമുടിക്കായലിലെ കണ്ടൽക്കാടുകൾ മറിമായമെന്നോണം ഇരുട്ടി വെളുക്കുമ്പോൾ അപ്രത്യക്ഷമാവുകയാണ്. ജലത്തിലെ താപനില നിലനിർത്തി മത്സ്യ പ്രജനനത്തിനു കാരണമാകുന്നതിൽ കണ്ടൽക്കാടുകൾ വഹിക്കുന്ന പങ്ക് വളരെ വലുതാണ്. അവർണനീയമായ സൗന്ദര്യം കൊണ്ട് അനുഗ്രഹീതമായ ഒരു ജൈവ ആവാസവ്യവസ്ഥയാണ് കണ്ടൽക്കാടുകൾ. ഓരു കലർന്ന പുഴയുടെയും കടലിന്‍റെയും ചതുപ്പുകളിൽ, ഏറ്റ - ഇറക്ക പ്രക്രിയയുടെ നിലയ്ക്കാത്ത ചലനങ്ങളിൽ ലയിച്ച് വേരുകൾ ഊന്നി വളരുന്ന കണ്ടൽ സാമ്രാജ്യം എന്നത് ജീവലോകത്തെ അത്ഭുതകരമായ ഒരു പ്രതിഭാസം തന്നെയാണ്. ആഗോളതാപനത്തിന്‍റെ ഫലമായി അന്തരീക്ഷ താപനില ഉയരുമ്പോൾ വെള്ളം ചൂടാകുന്നതോടെ കണ്ടൽക്കാടുകളുടെ വളർച്ച മുരടിക്കുന്നു. കാലാവസ്ഥ വ്യതിയാനവും കൈയേറ്റങ്ങളും കണ്ടൽക്കാടുകളുടെ വളർച്ചയ്ക്കു വിലങ്ങുതടിയാവുന്നു. മണ്ണൊലിപ്പ് തടഞ്ഞ് തീര സംരക്ഷണം ഉറപ്പു വരുത്തുന്ന കണ്ടലുകളുടെ സംരക്ഷണത്തിനായി രാജ്യാന്തര തലത്തിൽ വൻകിട പദ്ധതികൾ നടപ്പിലാക്കുമ്പോഴാണ് കൊല്ലത്തെ കണ്ടൽ കാടുകൾ സർവ നാശത്തിലേക്ക് കൂപ്പു കുത്തുന്നത്. കെഎസ്ആർടിസി, ആശ്രാമം മുതൽ അഷ്ടമുടിയിലെ പെരുമൺ വരെയുള്ള തീരങ്ങളിൽ നിന്ന് കണ്ടൽ കാടുകൾ ഇതിനകം തുടച്ചു നീക്കപ്പെട്ടു എന്ന് തന്നെ പറയണം. ഈ മേഖലയിൽ കണ്ടലുകളുടെ നാശത്തിനു കാരണമായത് ജലമലിനീകരണവും കടന്നു കയറ്റങ്ങളും ആണെന്നതാണ് എടുത്ത് പറയേണ്ടത്. നിലവിലുള്ള പഠന റിപ്പോർട്ടുകൾ പ്രകാരം കേരളത്തിൽ 18 തരം കണ്ടൽചെടികൾ ഉള്ളതായാണ് ശാസ്ത്ര ലോകം പറയുന്നത്. ഇവയിൽ നക്ഷത്ര കണ്ടൽ, ചാരകണ്ടൽ, മഞ്ഞ കണ്ടൽ എന്നീ ഇനങ്ങൾ ലോകത്ത് തന്നെ അതി വിരളമാണ്. ഇത്തരത്തിൽ പെട്ട വൈവിധ്യമാർന്ന കണ്ടൽ ചെടികൾ കാണപ്പെടുന്നത് കൊല്ലം ജില്ലയിൽ ആണ്. 15 തരം കണ്ടൽ ഇനങ്ങളാണ് കൊല്ലത്തുള്ളത്. ഉപ്പ് ഊറ്റിക്കളയുന്നതുകൊണ്ട് ഉപ്പട്ടി എന്ന് പേരുള്ള കണ്ടലും തഴച്ചുവളരുന്ന പ്രാന്തൻ കണ്ടലും തീക്കണ്ടലുമെല്ലാം ജില്ലയിൽ യഥേഷ്‌ടം കണ്ടുവരുന്നു. വള്ളിക്കണ്ടൽ, പരുവക്കണ്ടൽ, പൂക്കണ്ടൽ, കുറ്റിക്കണ്ടൽ, ചെറുകണ്ടൽ, പേനക്കണ്ടൽ, സ്വർണക്കണ്ടൽ, മഞ്ഞക്കണ്ടൽ, ആപ്പിൾ കണ്ടൽ എന്നിങ്ങനെ വിവിധയിനം കണ്ടലുകൾ കൊല്ലത്ത് കണ്ടെത്തിയിട്ടുണ്ട്. കണ്ടൽ കാടുകൾ കൊതുകിന്‍റെയും പാമ്പുകളുടെയും പ്രജനന കേന്ദ്രമെന്ന തെറ്റായ പൊതുജന കാഴ്ചപ്പാട് അതി പ്രധാനപ്പെട്ട ഈ ആവാസവ്യവസ്ഥയുടെ വ്യാപകമായ നശീകരണത്തിന് ഏറെക്കുറെ കാരണമായിട്ടുണ്ട്. അശാസ്ത്രീയമായ ഭൂവിനിയോഗം, വ്യാപക ഭൂമി കച്ചവടം, വികസന ടൂറിസം പദ്ധതികൾ എന്നിവയും കണ്ടൽ നശീകരണത്തിൽ തുല്യമായ സംഭാവന നൽകി എന്നും പറയണം. തീരദേശങ്ങളെ ഭീതിയിലാഴ്ത്തിയ സുനാമിയുടെ വരവിനുശേഷമാണ് കണ്ടലുകളുടെ പ്രാധാന്യം പൊതുസമൂഹം സത്യത്തിൽ തിരിച്ചറിയുന്നത്. അതിൽ പിന്നെയാണ് കണ്ടൽ കാടുകളെക്കുറിച്ചുള്ള ശാസ്ത്രീയ പഠനങ്ങൾ വിവിധ സർവകലാശാലകളിലും മറ്റ് ഗവേഷണ സ്ഥാപനങ്ങളിലും നടക്കുന്നത്. തീരദേശങ്ങളിൽ വ്യാപകമായി കണ്ടൽ വനവത്കരണം ആവശ്യമാണെന്ന കണ്ടെത്തലുകളും അതിനായുള്ള തീരുമാനങ്ങളും ഉണ്ടായി. അതേസമയം, കണ്ടൽ വനവത്കരണം കാര്യമായി ഗുണം ചെയ്യുകയോ, വിജയിക്കുകയോ ചെയ്തില്ല. കണ്ടൽ വനവൽക്കരണം വിജയകരം ആകണമെങ്കിൽ അത് ആ പ്രദേശത്തെ വെള്ളത്തിലെ ഉപ്പുരസം, മണ്ണിന്‍റെ അടിസ്ഥാന ഘടന, പോഷകങ്ങൾ എന്നിവയെക്കുറിച്ചു ശാസ്ത്രീയ പഠനങ്ങൾ നടത്തിയ ശേഷമായിരിക്കണം നടത്തേണ്ടത്. അത്തരം പഠനങ്ങളിലൂടെ മാത്രമേ ആ പ്രദേശത്തെ പാരിസ്ഥിതിക സാഹചര്യത്തിനനുസരിച്ച് വളരുവാൻ കഴിയുന്ന ഏറ്റവും അനുയോജ്യമായ കണ്ടൽ ഇനത്തെ കണ്ടെത്താനാവൂ. തുടർന്നത് നട്ടു പരിപാലിക്കുമ്പോഴാണ് കണ്ടൽ വനവത്കരണം യാഥാർഥ്യമാകൂ. പരവൂർ കായലിൽ കണ്ടൽച്ചെടികൾ നട്ടുപിടിപ്പിച്ചിരുന്നു. സ്വാഭാവിക കണ്ടലുകൾക്കു പുറമേ അതിവേഗം വളരുന്ന ചെടികളും നട്ടു വളർത്താൻ ശ്രമമുണ്ടായി. മൺറോതുരുത്ത് ഉൾപ്പെടെയുള്ള മേഖലയിലാണ് കൂടുതൽ സ്വാഭാവിക കണ്ടലുകൾ ഇന്നും വളരുന്നത്. എന്നാൽ, അഷ്ടമുടിക്കായലിലെ കൈയേറ്റങ്ങൾ സ്വാഭാവിക കണ്ടലുകൾക്കും അതിന്‍റെ വളർച്ചക്കും മരണമണി മുഴക്കുകയാണ്. തീരത്തോട് ചേർന്നുള്ള നിർമാണ പ്രവർത്തനങ്ങളാണ് കണ്ടൽ വളർച്ചയ്ക്കു അഷ്ടമുടിക്കായലിൽ തടസങ്ങൾ ഉണ്ടാക്കുന്നത്. ഭൂമി കൈയേറ്റം, ജല മലിനീകരണം തുടങ്ങിയവയാണ് കണ്ടൽക്കാടുകളുടെ ശത്രുക്കൾ. റാംസർ സൈറ്റിൽപെട്ട അഷ്ടമുടിക്കായലിന്‍റെ ഉൾഭാഗങ്ങളിലെ ദ്വീപുകളിൽ വൻ കൈയേറ്റം നടന്നിട്ടും അധികൃതർ അതെല്ലാം കണ്ടില്ലെന്നു നടിക്കുകയായിരുന്നു. ദ്വീപുകളിൽ അനധികൃത നിർമാണപ്രവർത്തനങ്ങൾ അരങ്ങു തകർത്തപ്പോഴും അപൂർവ ഇനത്തിൽപെട്ട കണ്ടൽക്കാടുകൾ അപ്പാടെ വെട്ടി നശിപ്പിക്കപെട്ടപ്പോഴും സർക്കാർ വകുപ്പുകൾ ഒരക്ഷരം മിണ്ടിയില്ല. അഷ്ടമുടിക്കായലിലെ കൈ യേറ്റത്തെക്കുറിച്ചു വ്യാപക പരാതി ഉയർന്ന ഇരുപത് വർഷങ്ങൾക്ക് മുൻപ് അന്നത്തെ ജില്ലാ കലക്ടർ ബി. ശ്രീനിവാസ് നേരിട്ടു നടത്തിയ അന്വേഷണത്തിൽ വിവിധ ഭാഗങ്ങളിലായി 107 ഏക്കർ ഭൂമിയുടെ കൈയേറ്റങ്ങളാണ് കണ്ടെത്തി റിപ്പോർട്ട് ചെയ്തത്. തുടർന്ന് നടന്ന അന്വേഷണങ്ങളിൽ കളക്ടറുടെ റിപ്പോർട്ടിൽ റവന്യൂ വകുപ്പ് ഉദ്യോഗസ്ഥർ തന്നെ വെള്ളം ചേർക്കുകയായിരുന്നു. അഷ്ടമുടിയിൽ വ്യാപകമായി നടന്ന കൈയേറ്റങ്ങൾ വിവാദമായതോടെയാണ് വെറ്റ് ലാൻഡ് അഥോറിറ്റി രൂപീകരണത്തിൽ വരെ എത്തിയ കോടതി ഇടപെടലുകൾ ഒടുവിൽ ഉണ്ടാവുന്നത്.

പ്ലസ് വൺ വിദ്യാർഥി കിണറ്റിൽ മരിച്ചനിലയിൽ

കുണ്ടറ: പ്ലസ് വൺ വിദ്യാർഥിയെ കിണറ്റിൽ വീണു മരിച്ചനിലയിൽ കണ്ടെത്തി. പെരുമ്പുഴ പനവിള കിഴക്കതിൽ അനിൽകുമാർ- ദീപാ ദമ്പതികളുടെ മകൻ അഖിലാണ് (16) മരിച്ചത്. ഇളമ്പള്ളൂർ എസ്എൻ എസ് എം സ്കൂളിലെ പ്ലസ് വൺ വിദ്യാർഥിയായിരുന്നു. സ്കൂളിലെ സഹപാഠിയുമായുള്ള ബന്ധത്തിനെ ചൊല്ലി ബുധനാഴ്ച രാത്രി മൂന്നുപേർ അഖിലിന്‍റെ വീട്ടിലെത്തി ഭീഷണിപ്പെടുത്തിയിരുന്നതായി ബന്ധുക്കൾ ആരോപിക്കുന്നു. മരണകാരണം വീട്ടിലെത്തിയ സംഘത്തിന്‍റെ ഭീഷണിയാണെന്നു കാട്ടി അഖിലിന്‍റെ പിതാവ് കുണ്ടറ പോലീസിൽ പരാതി നൽകി.

മലയാളി യുവാവ് ഒമാനിൽ മരിച്ച നിലയിൽ

ചാത്തന്നൂർ: ആദിച്ചനല്ലൂർ കൈതക്കഴി വെളിച്ചിക്കാലമിഷൻ വില്ലയിൽ ഷാജി വിഷ്ണു (26) വിനെ ഒമാനിലെ ഇബ്രാ സഫാലയിൽ മരിച്ചനിലയിൽ കണ്ടെത്തി. കുടിവെള്ള വിതരണ കമ്പിനിയിലെ ജീവനക്കാരനായിരുന്നു. രണ്ടു വർഷം മുമ്പാണ് ഷാജീ വിഷ്ണു ഗൾഫിൽ എത്തിയത്. നാട്ടിലേയ്ക്ക് വരാനിരിക്കേയാണ് മരണം. പിതാവ് : ഷാജി. അമ്മ : ബിന്ദു.

മിഖായേൽ മാലാഖയുടെ തിരുനാളാഘോഷം 20 മുതൽ

പുനലൂർ: കേരളത്തിൽ നിന്നും നിരവധി തീർഥാടകർ എത്തുന്ന തെങ്കാശി സെന്‍റ് മൈക്കിൾ കത്തോലിക്കാ പള്ളിയിലെ വിശുദ്ധ മിഖായേൽ മാലാഖയുടെ തിരുനാളാഘോഷം 20 മുതൽ 30 വരെ നടക്കുമെന്ന് ഇടവക വികാരി ഫാ.എ. ജയിംസ്, ഫാ. ജോയി കല്ലറക്കൽ, പാരിഷ് കൗൺസിൽ അംഗം ജെ .ക്ലീറ്റസ് എന്നിവർ പത്ര സമ്മേളനത്തിൽ അറിയിച്ചു. 20ന് വൈകുന്നേരം 5.30ന് കോടിയേറ്റ്, തുടർന്ന് 26 വരെ വൈകുന്നേരം ആറിന് കുർബാന. 27ന് രാവിലെ 11 ന് ഫാ .ജോയി കല്ലറക്കലിന്‍റെമുഖ്യ കർമികത്വത്തിൽ മലയാളത്തിൽ കുർബാന, വൈകുന്നേരം 6. 30 ന് ഫാ. വി.കെ.എസ് അരുൾ രാജ് പാളയംകോട്ടയുടെ മുഖ്യ കാർമികത്വത്തിൽ തമിഴിൽ കുർബാന, തുടർന്ന് ദിവ്യകാരുണ്യ പ്രദക്ഷിണം. 28ന് രാവിലെ 11ന് സേവ്യർ തൈപാടത്തിന്‍റെ നേതൃത്വത്തിൽ മലയാളത്തിൽ കുർബാന, വൈകുന്നേരം 6.30ന് ശിവഗംഗ ബിഷപ് ഡോ .ലൂർദ് ആനന്ദത്തിന്‍റെ കർമികത്വത്തിൽ തമിഴിൽ കുർബാന. തുടർന്ന് വിശുദ്ധ മിഖായേൽ മാലാഖയുടെ സ്വരൂപം വഹിച്ചുകൊണ്ടുള്ള തേരെടുപ്പ്. 29ന് രാവിലെ 7.30ന് സമൂഹബലി. മധുര ആർച്ച് ബിഷപ് റവ .ഡോ .അന്തോണി സ്വാമി മുഖ്യ കാർമികനാകും. 10.30 ന് തിരുവനന്തപുരം അതിരൂപത സഹായ മെത്രാൻ റവ .ഡോ. ക്രിസ്തുദാസ് രാജപ്പന്‍റെ മുഖ്യകാർമികത്വത്തിൽ സമൂഹബലി. 12ന് ഫാ .അലോഷ്യസ് ദുരൈരാജിന്‍റെ കാർമികത്വത്തിൽ രോഗികൾക്കായുള്ള കുർബാന. സമാപനദിവസമായ 30ന് രാവിലെ ആറിന് ചേട്ടിക്കുളം വികാരി ഫാ .ജോമിക്സിന്‍റെ കാർമികത്വത്തിൽ കുർബാന, കൊടിയിറക്ക് .

താലൂക്ക് ആശുപത്രിയിലെ സിടി സ്‌കാനിംഗ് ഉടന്‍ പുനരാരംഭിക്കും

പുനലൂര്‍ : താലൂക്ക് ആശുപത്രിയില്‍ തകരാറിലായ സിടി സ്‌കാന്‍ യന്ത്രം ഉടന്‍ പ്രവര്‍ത്തിപ്പിക്കുമെന്ന് നഗരസഭാ ചെയര്‍പേഴ്‌സണ്‍ കെ. പുഷ്പലത, ആശുപത്രി സൂപ്രണ്ട് ഡോ. കെ.ആര്‍. സുനില്‍ കുമാര്‍ എന്നിവര്‍ അറിയിച്ചു. സ്വകാര്യ ലാബുകളെ അപേക്ഷിച്ച് തുച്ഛമായ തുകയാണ് ആശുപത്രിയില്‍ സ്‌കാനിംഗിന് ഈടാക്കുന്നത്. അതുകൊണ്ട് തന്നെ പുനലൂരിലെയും സമീപ പ്രദേശങ്ങളിലെയും ജനങ്ങള്‍ സ്‌കാനിംഗിനായി താലൂക്ക് ആശുപത്രിയെ ആണ് ആശ്രയിക്കുന്നത്. യന്ത്രത്തിന്‍റെ ഏറ്റവും പ്രധാനപ്പെട്ട ട്യൂബിനും ബോര്‍ഡിനുമാണ് തകരാര്‍ ഉണ്ടായത്. ഈ യന്ത്രഭാഗങ്ങള്‍ക്ക് മാത്രമായി ഏകദേശം ഒരു കോടി രൂപ ചെലവ് വരും. വാര്‍ഷിക മെയിന്‍റനന്‍സ് കരാറില്‍ ഏര്‍പ്പെട്ടിട്ടുള്ളതിനാല്‍ സൗജന്യമായി ഇത് മാറ്റിലഭിക്കും. പൂര്‍ണമായും ഇറക്കുമതി ചെയ്ത യന്ത്രമാണിത്. അതുകൊണ്ട് തന്നെ യന്ത്രഭാഗങ്ങള്‍ ഒന്നും തന്നെ ഇന്ത്യയില്‍ ലഭ്യമല്ല. ട്യൂബ് ലഭിക്കേണ്ടത് സിംഗപ്പൂരില്‍ നിന്നാണ്. യന്ത്രം തകരാറിലായ ഉടന്‍ വാര്‍ഷിക മെയിന്‍റനന്‍സ് കരാര്‍ നല്‍കിയിട്ടുള്ള കമ്പനിയെ അറിയിച്ചിരുന്നു. ഈ ആഴ്ചയുടെ അവസാനം യന്ത്രഭാഗങ്ങള്‍ സിംഗപ്പൂരില്‍ നിന്നും എത്തും. വരുന്ന ആഴ്ചയില്‍ ട്യൂബും ബോര്‍ഡും മാറ്റി വച്ച് സ്‌കാനിംഗ് യന്ത്രം പ്രവര്‍ത്തിപ്പിക്കാന്‍ കഴിയും. സ്വാഭാവികമായി യന്ത്രങ്ങള്‍ക്ക് ഉണ്ടാകുന്ന തകരാര്‍ മാത്രമാണ് ഇവിടെയും സംഭവിച്ചത്. യന്ത്രഭാഗങ്ങള്‍ ഇറക്കുമതി ചെയ്യപ്പെടേണ്ടതുള്ളതിനാല്‍ മാത്രമാണ് തകരാര്‍ പരിഹരിക്കാന്‍ ചെറിയ കാലതാമസം ഉണ്ടായതെന്ന് മനസിലാക്കണമെന്നും വസ്തുതകള്‍ മനസിലാക്കാതെ ആശുപത്രി അധികൃതരെയും നഗരസഭാ അധികാരികളെയും കുറ്റപ്പെടുത്തുന്നവരെ തിരിച്ചറിയണമെന്നും ചെയര്‍പേഴ്‌സണ്‍ പറഞ്ഞു.

റോഡുകളുടെ അറ്റകുറ്റപ്പണികള്‍ക്ക് 1.95 കോടി രൂപ അനുവദിച്ചു

കരുനാഗപ്പള്ളി: നിയോജക മണ്ഡലത്തിലെ വിവിധ റോഡുകളുടെ അറ്റകുറ്റപണികള്‍ക്ക് 1.95 കോടി രൂപ അനുവദിച്ചതായി സി.ആര്‍. മഹേഷ് എംഎല്‍എ അറിയിച്ചു. പുതിയകാവ് - കാട്ടില്‍ക്കടവ് റോഡിന് 71 ലക്ഷം രൂപയും, മണപ്പള്ളി - ആനയടി, വവ്വാക്കാവ് - തഴവ, നാലുവിള – പാവുമ്പ, ചങ്ങൻകുളങ്ങര – വള്ളിക്കുന്നം, ചങ്ങന്‍കുളങ്ങര – വള്ളിക്കാവ്, എവിഎച്ച്എസ്. - കണ്ണംപ്പള്ളി പടിയിറ്റതില്‍ എന്നീ റോഡുകള്‍ക്ക് 49 ലക്ഷം രൂപയും, എന്‍എച്ച് എസ്ആര്‍വി മാര്‍ക്കറ്റ് , പടനായാര്‍കുളങ്ങര – കാരൂര്‍ക്കടവ് , കരുനാഗപ്പള്ളി - ബ്ലോക്ക് ഹെഡ് ക്വാര്‍ട്ടേസ് , കുറ്റിപ്പുറം - മാലുമ്മേല്‍, ചിറ്റുമൂല – മാലുമ്മേല്‍ തുടങ്ങിയ റോഡുകള്‍ക്ക് 74.5 ലക്ഷം രൂപയുമാണ് അനുവദിച്ചത്. മണ്ഡലത്തിലെ നിരവധി റോഡുകളുടെ ദയനീയാവസ്ഥ ‍ നിരന്തരം പൊതുമരാമത്ത് വകുപ്പ് മന്ത്രിയുടെ ശ്രദ്ധയില്‍പ്പെടുത്തിയതിന്‍റെഅടിസ്ഥാനത്തിലാണ് റോഡുകളുടെ അറ്റകുറ്റപണികള്‍ക്ക് തുക അനുവദിച്ചതെന്ന് എംഎല്‍എ അറിയിച്ചു.

കുളത്തൂപ്പുഴ പഞ്ചായത്തിന് മുഖ്യമന്ത്രിയുടെ പുരസ്കാരം

കുളത്തൂപ്പുഴ: സംസ്ഥാന സർക്കാർ ഹരിതകേരളം മിഷന്‍റെ ഭാഗമായി സംഘടിപ്പിച്ച പച്ചതുരുത്ത് പ്രവർത്തനങ്ങൾ മികച്ച നിലയിൽ സംഘടിപ്പിച്ചതിനുള്ള മുഖ്യമന്ത്രിയുടെ പുരസ്കാരം കുളത്തൂപ്പുഴ പഞ്ചായത്തിന്. മികച്ച സ്ഥാപനതല പച്ചതുരത്തുകളുടെ കാറ്റഗറിയിൽ കുളത്തൂപ്പുഴ പോസ്റ്റ്ഓഫീസ് പരിസരത്ത് നടന്നുവരുന്ന പച്ചതുരുത്തിനാണ് പുരസ്കാരം ലഭിച്ചത്. കുളത്തൂപ്പുഴ പോസ്റ്റ്ഓഫീസ് പരിസരത്തെ അരഏക്കർ സ്ഥലം ഏറ്റെടുത്ത് 217 ഫലവൃക്ഷങ്ങളും 13 ഔഷധ സസ്യങ്ങളും നട്ട് കഴിഞ്ഞ അഞ്ച് വർഷമായി പരിരക്ഷിച്ചാണ് ഈ മികച്ച നേട്ടത്തിന് പ്രാപ്തമായത്. സംസ്ഥാന സർക്കാർ പച്ചതുരുത്ത് പ്രവർത്തനങ്ങളിലൂടെ നടത്തിയ പരിസ്ഥിതി വീണ്ടെടുക്കൽ പ്രവർത്തനങ്ങളിൽ സംസ്ഥാനത്ത് മികവ് പുലർത്തിയവർക്കാണ് മുഖ്യമന്ത്രിയുടെ പുരസ്കാരം ഏർപ്പെടുത്തിയത്. പുരസ്കാര സമർപ്പണം കഴിഞ്ഞദിവസം തിരുവനന്തപുരം ടാഗോർ തീയറ്ററിൽ മുഖ്യമന്ത്രി പിണറായി വിജയൻ ഉദ്ഘാടനം ചെയ്തു. സംസ്ഥാന മന്ത്രിമാർ മറ്റ് ജനപ്രതിനിധികൾ ഉദ്യോഗസ്ഥർ തുടങ്ങിയവർ പങ്കെടുത്ത ചടങ്ങിൽ കുളത്തൂപ്പുഴ പഞ്ചായത്തിന് വേണ്ടി പ്രസിഡന്‍റ് ് പി.ലൈലാബീവി, മുൻ പ്രസിഡന്‍റ് പി.അനിൽകുമാർ, സ്റ്റാൻഡിംഗ് കമ്മിറ്റി ചെയർമാൻ ചന്ദ്രകുമാർ, ഗ്രാമപഞ്ചായത്ത് അംഗം നദീറാ സെയ്ഫുദിൻ, ഹരിതകേരളം മിഷൻ ജില്ലാ കോഡിനേറ്റർ ഐസക്ക്, ആർ.പി.സ്മിത, ഇന്‍റോൻ മുംതാസ്, തൊഴിലുപ്പ് എൻജിനീയർ സിന്ധു എന്നിവർ ചേർന്ന് ഏറ്റുവാങ്ങി. വിലവൂർക്കോണത്തെ പച്ചതുരുത്തിന് ജില്ലയിൽ മൂന്നാം സ്ഥാനം പാരിപ്പള്ളി: ഹരിതകേരളം മിഷൻ സംസ്ഥാനതലത്തിൽ സംഘടിപ്പിച്ച പച്ചത്തുരുത്ത് പുരസ്കാര നിർണയത്തിൽ കല്ലുവാതുക്കൽ ഗ്രാമപഞ്ചായത്തിലെ വിലവൂർകോണം വാർഡിൽ സ്ഥാപിച്ചിട്ടുള്ള പച്ചത്തുരുത്ത് തദ്ദേശ സ്വയംഭരണ സ്ഥാപന വിഭാഗത്തിൽ ജില്ലയിലെ മികച്ച മൂന്നാമത്തെ പച്ചത്തുരുത്തായി തെരഞ്ഞെടുക്കപ്പെട്ടു. തിരുവനന്തപുരം ടാഗോർ തിയേറ്ററിൽ നടന്ന ചടങ്ങിൽ പഞ്ചായത്ത് പ്രസിഡന്‍റ് എൻ.ശാന്തിനി, വൈസ് പ്രസിഡന്‍റ് പി.പ്രതീഷ് കുമാർ, ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ ഡി.സുഭദ്രാമ്മ, ഗ്രാമപഞ്ചായത്ത് സെക്രട്ടറി എസ്.എൻ.അജിത്, ജിപ്സൺ, ജനപ്രതിനിധികളായഅജയകുമാർ,സുദീപ, പ്രമീള, റീനമംഗലത്ത്, മേഴ്സി , ചന്ദ്രിക, ഉഷാകുമാരി, ശുചിത്വ മിഷൻ കോർഡിറ്റർ ഷീല തൊഴിലുറപ്പ് വിഭാഗം ജീവനക്കാർ, മറ്റ് പഞ്ചായത്ത് ജീവനക്കാർ എന്നിവർ ചേർന്ന് പുരസ്കാരം ഏറ്റുവാങ്ങി. വിലവൂർകോണം വാർഡിൽ കാട് പിടിച്ച് കിടന്ന രണ്ടര ഏക്കർ സ്ഥലത്താണ്പച്ചത്തുരുത്ത് യാഥാർഥ്യമാക്കിയത്.

കൊട്ടിയത്ത് എംഡിഎംഎയുമായി മൂന്നുപേർ പിടിയിൽ

കൊട്ടിയം: എംഡിഎംഎ കടത്ത് സംഘാംഗങ്ങളായ മൂന്നു പേരെ കൊട്ടിയം പോലീസ് അറസ്റ്റ് ചെയ്തു. ഇവരിൽ നിന്നും 14.23 ഗ്രാം എംഡിഎംഎ പിടിച്ചെടുത്തു. മുഖത്തല ഡീസന്‍റ് ജംഗ്ഷൻ വെറ്റിലത്താഴം മുരളി സദനത്തിൽ അനന്തു കൃഷ്ണൻ (29)നെ 2.45ഗ്രാം എം ഡി എം എ യുമായി കോടാലി മുക്കിൽ നിന്നും ആണ് അറസ്റ്റ് ചെയ്തത്. ഇയാൾ ലഹരി ഉപയോഗിച്ചു കൊണ്ടിരിക്കുകയായിരുന്നു. തുടർന്ന് അനന്തു കൃഷ്ണന് ഇത് നൽകിയ മുഖത്തല കിഴവൂർ കിഴക്കേവിള വീട്ടിൽ അരുൺ (27), പുന്തലത്താഴം വടക്കേവിള ചരുവിള വീട്ടിൽ ശരത് മോഹൻ (30) എന്നിവരെ രാത്രി കിഴവൂർ മദ്രസയ്ക്ക് സമീപത്തു നിന്നും11.78ഗ്രാം എം ഡി എം എ യുമായി പോലീസ് പിടികൂടുകയായിരുന്നു. അരുണും ശരത് മോഹനും രാസ ലഹരി കച്ചവടക്കാരാണ്. സിറ്റി പോലീസ് കമ്മീഷണർ കിരൺ നാരായണന് ലഭിച്ച വിവരത്തെ തുടർന്ന് കൊട്ടിയം എസ്എച്ച്ഒ പ്രദീപിന്‍റെ നേതൃത്വത്തിലായിരുന്നു അന്വേഷണവും അറസ്റ്റും. എസ്ഐ രഘുനാഥ്, സിപിഒ മാരായ പ്രശാന്ത്, ശംഭൂ, ഹരീഷ്, വിനോദ് എന്നിവർക്കൊപ്പം ഡാൻസാഫ് ടീംഅംഗങ്ങളുമുണ്ടായിരുന്നു. വൈദ്യ പരിശോധനയ്ക്ക് ശേഷം പ്രതികളെ കോടതിയിൽ ഹാജരാക്കി.

ഹരിതവർണമൊരുക്കി ഒന്പത് പച്ചത്തുരുത്തുകൾ

പുരസ്കാരം നൽകി മുഖ്യമന്ത്രി കൊല്ലം : പരിസ്ഥിതി പുനഃസ്ഥാപന പ്രവർത്തനവുമായി ബന്ധപ്പെട്ടു ഹരിത കേരളം മിഷന്‍റെ ഏകോപനത്തിൽ ആരംഭിച്ച മികച്ച ഒന്പത്‌ പച്ചത്തുരുത്തുകൾക്ക് മുഖ്യമന്ത്രിയുടെ പുരസ്‌കാരം. പുരസ്‌കാര വിതരണം മുഖ്യമന്ത്രി പിണറായി വിജയൻ നിർവഹിച്ചു. സംസ്ഥാന തലത്തിൽ തദ്ദേശ സ്ഥാപനങ്ങൾക്കുള്ള പച്ചത്തുരുത്തിൽ കൊല്ലം കോർപറേഷനിൽ സ്ഥാപിച്ച തീരദേശ പച്ചത്തുരുത്തിനാണ് മൂന്നാം സ്ഥാനം. ജില്ലാ തലത്തിൽ തദ്ദേശസ്ഥാപന തലത്തിൽ ഒന്നും രണ്ടും മൂന്നും സ്ഥാനങ്ങൾ കൊല്ലം കോർപറേഷനിലെ തീരദേശം, വേളിയം പഞ്ചായത്തിലെ ഓടനാവട്ടം കല്ലുവാതുക്കലിലെ വിളവൂർകോണം പച്ചത്തുരുത്തുകൾക്കാണ്. സ്കൂളിൽ നിർമിച്ചവയിൽ മൈലം എൻഎസ്എസ്‌കെ എൽപിഎസിനും കലാലയങ്ങളിൽ ഗവ. ഐടിഐ ചന്ദനത്തോപ്പിനുമാണ് പുരസ്‌കാരങ്ങൾ. ദേവഹരിതം പച്ചത്തുരുത്ത് ഇനത്തിൽ തലവൂർ തൃക്കൊന്നമർക്കോട് ദേവസ്വം പച്ചത്തുരുത്തിനും. മറ്റ് സ്ഥാപനങ്ങളുടെ ഇനത്തിൽ ചവറ ഇന്ത്യൻ റെയർ എർത്ത് ലിമിറ്റഡ്, കുളത്തൂപ്പുഴ പോസ്റ്റ് ഓഫീസ് എന്നിവയ്ക്കുമാണ്. സ്വകാര്യ വ്യക്തികളുടെ ഉടമസ്ഥതയിൽ ശൂരനാട് തെക്ക് പഞ്ചായത്തിൽ കുമരംചിറയിൽ 28 സെന്‍റിൽ കെ.വി.സക്കീന ആരംഭിച്ച മനോഹരമായ പച്ചത്തുരുത്തിന് പ്രത്യേക പുരസ്‌കാരവും നൽകുന്നുണ്ട്. തദ്ദേശഭരണ സ്ഥാപനങ്ങൾ, സ്കൂൾ, കോളജ്, മറ്റ് സ്ഥാപനങ്ങൾ, ദേവഹരിതം പച്ചത്തുരുത്ത്, മുളത്തുരുത്ത്, കണ്ടൽ പച്ചത്തുരുത്ത്, കാവുകൾ എന്നീ വിഭാഗങ്ങളിലായി സംസ്ഥാനത്ത് 145 പച്ചത്തുരുത്തുകളാണ് തെരഞ്ഞെടുത്തത്. ജില്ലയിൽ പ്രത്യേക ജൂറികളുടെ നേതൃത്വത്തിൽ 11 ഇടങ്ങൾ സന്ദർശിച്ച് വിലയിരുത്തിയാണ് സംസ്ഥാനതല പുരസ്‌കാര നിർണയത്തിനായി തെരഞ്ഞെടുത്തത്. കഴിഞ്ഞ ഒന്പതു വർഷക്കാലത്ത് ഹരിത കേരളം മിഷൻ തദ്ദേശസ്ഥാപനങ്ങളുടെ നേതൃത്വത്തിൽ വിവിധ വകുപ്പുകൾ ഏജൻസികൾ, വിവിധ സ്ഥാപനങ്ങൾ എന്നിവയുടെ സഹകരണത്തോടെ ജലസംരക്ഷണം, മാലിന്യ സംസ്‌കരണം, കൃഷി, പരിസ്ഥിതി പുനഃസ്ഥാപനം എന്നീ മേഖലകളിലായി സമഗ്ര പ്രവർത്തനങ്ങളാണ് ഏറ്റെടുത്തത്. പൊതുഭൂമിയിലും സ്വകാര്യ ഭൂമിയിലും ഒഴിഞ്ഞു കിടക്കുന്ന സ്ഥലങ്ങളിൽ വൃക്ഷവൽക്കരണം നടത്തി ജൈവ വൈവിധ്യത്തിന്‍റെ ചെറുതുരുത്തുകൾ സൃഷ്ടിക്കുന്ന പദ്ധതിയാണ് പച്ചത്തുരുത്ത്. ജില്ലയിൽ 76.11 ഏക്കറിലായി 286 എണ്ണമാണ് സ്ഥാപിച്ചിട്ടുള്ളത്.

കുണ്ടറയിൽ കഞ്ചാവ് പിടികൂടി

കുണ്ടറ : കുണ്ടറയിൽ നാലുപേരിൽ നിന്നായി എട്ടു കിലോയോളം കഞ്ചാവ് പിടികൂടി. ഇന്നലെ വൈകുന്നേരം 4.30 ഓടെ കേരളപുരം ഇഎസ്ഐക്ക് സമീപം വേ ബ്രിഡ്ജിനു മുമ്പിൽ സംശയകരമായ സാഹചര്യത്തിൽ കണ്ട യുവതിയുടെയും മൂന്നു യുവാക്കളുടെയും ബാഗ് പരിശോധിച്ചപ്പോഴാണ് രണ്ട് കിലോയോളം വരുന്ന നാല് കഞ്ചാവ് പൊതികൾ കണ്ടെടുക്കുന്നത്. എസ്ഐ പ്രദീപിന്‍റെ നേതൃത്വത്തിൽ കുണ്ടറ പോലീസ് ആണ് കഞ്ചാവ് പിടികൂടിയത്. പ്രബേഷൻ എസ് ഐ അതുൽ വസന്ത്, സി പി ഒ മാരായ അനീഷ്, റിയാസ്, സി പി ഒ രാജേഷ്, ഡബ്ലിയു സി പി ഒ ശരണ്യ എന്നിവരായിരുന്നു പോലീസ് സംഘത്തിൽ ഉണ്ടായിരുന്നത്.

ജിഎസ്ടി നിരക്കിളവ്: വ്യാപാരികൾക്ക് വമ്പൻ ഓഫറുകളുമായി കമ്പനികൾ

പരവൂർ: ജിഎസ്ടി നിരക്കിളവ് പ്രാബല്യത്തിൽ വരുന്ന 22 ന് മുമ്പ് സ്റ്റോക്കുകൾ പരമാവധി വിറ്റഴിക്കാൻ വ്യാപാരികൾക്ക് വമ്പൻ ഓഫറുകളുമായി എഫ്എംസിജി കമ്പനികൾ. സോപ്പ്, ടൂത്ത് പേസ്റ്റ്, ഷാംപൂ, ഹെയർ ഓയിൽ തുടങ്ങി നിരവധി നിത്യോപയോഗ സാധനങ്ങൾക്ക് അമ്പരപ്പിക്കുന്ന വിലക്കുറവാണ് കമ്പനികൾ വാഗ്ദാനം ചെയ്തിട്ടുള്ളത്. ചില ഉത്പന്നങ്ങൾക്ക് ചില്ലറ വിൽപ്പനക്കാർക്ക് അടക്കം 20 ശതമാനം വരെ വിലയിൽ ഡിസ്കൗണ്ട് ഏർപ്പെടുത്തിയിട്ടുണ്ട്. ഇപ്പോൾ 12 മുതൽ 18 ശതമാനം വരെയുള്ള പല ഉത്പന്നങ്ങളുടെയും ജിഎസ്ടി അഞ്ച് ശതമാനമായി കുറയ്ക്കാനാണ് ജിഎസ്ടി കൗൺസിൽ തീരുമാനിച്ചിട്ടുള്ളത്. ഇക്കാരണത്താൽ പ്രോക്ടർ ആന്‍റ്ഗാംബിൾ ഇന്ത്യ, ഹിന്ദുസ്ഥാൻ യൂണിലിവർ, ഡാബർ ഇന്ത്യ, ലോറിയൽ ഇന്ത്യ, ഹിമാലയ വെൽനെസ് തുടങ്ങിയ നിരവധി പ്രമുഖ കമ്പനികൾ അവരുടെ കൈവശം സ്റ്റോക്കുള്ള ഉയർന്ന ജിഎസ്ടി രേഖപ്പെടുത്തിയ ഉത്പന്നങ്ങൾ പൂർണമായും വിറ്റഴിക്കാൻ കഴിയാത്ത അവസ്ഥയിലാണ്. ഇക്കാരണത്താലാണ് കമ്പനികൾ അവിശ്വസനീയമായ രീതിയിൽ വമ്പൻ ഡിസ്കൗണ്ടുകൾ നൽകി സ്റ്റോക്കുകൾ വിറ്റഴിക്കുന്നത്. ജിഎസ്ടിയിൽ ഇളവ് ഏർപ്പെടുത്തിയിട്ടുള്ള നിരവധി ഉത്പന്നങ്ങൾക്ക് ഇത്തരത്തിൽ വിലക്കുറവ് ലഭിക്കും.

കണക്ട് കുണ്ടറ' പദ്ധതിയുടെ നാലാംഘട്ട ഉദ്ഘാടനവും കോമേഴ്‌സ് കരിയർ കോൺക്ലേവും

കുണ്ടറ: കുണ്ടറ നിയോജക മണ്ഡലത്തിലെ വിദ്യാർഥികളുടെ സമഗ്ര വിദ്യാഭ്യാസ വികസനം ലക്ഷ്യമിട്ടു കഴിഞ്ഞ മൂന്ന് വർഷമായി പി. സി. വിഷ്ണുനാഥ് എംഎൽഎ യുടെ നേതൃത്വത്തിൽ നടപ്പിലാക്കി വരുന്ന 'കണക്ട് കുണ്ടറ' പദ്ധതിയുടെ നാലാംഘട്ട ഉദ്ഘാടനം കുണ്ടറ എം ജി ഡി ഹയർ സെക്കൻഡറി സ്കൂളിൽ നടന്ന ചടങ്ങിൽ രാജു നാരായണസ്വാമി നിർവഹിച്ചു. പി .സി .വിഷ്ണുനാഥ് എം എൽ എ അധ്യക്ഷത വഹിച്ച ചടങ്ങിൽ സാമൂഹിക, വിദ്യാഭ്യാസ രംഗത്തെ പ്രമുഖർ പങ്കെടുത്തു. കേവലം പണം നേടാനുള്ള കരിയർ വളർത്തിയെടുക്കാനുള്ള ഒരു വഴിയായി മാത്രം വിദ്യാഭ്യാസത്തെ കാണാതെ, സ്വന്തം പ്രതിഭ കണ്ടെത്തുന്നതിനുള്ള, അതിനെ പരിപോഷിപ്പിക്കുന്നതിനുള്ള അചഞ്ചലമായ അടിസ്ഥാനമായി വിദ്യാഭ്യാസത്തെ മാറ്റണമെന്ന സന്ദേശം ഉദ്ഘടന പ്രസംഗത്തിൽ രാജു നാരായണസ്വാമി പറഞ്ഞു. കുണ്ടറയിലെ എല്ലാ വിദ്യാർഥികളെയും ലോകത്തിനുമുഴുവൻ മാതൃകയാകുന്ന ഭാവി വാഗ്ദാനങ്ങളാക്കി മാറ്റണം എന്ന സ്വപ്നയാത്രയുടെ കപ്പിത്താന്മാർ തന്‍റെ മുന്നിലുള്ള വിദ്യാർഥികളാണെന്നും അവരിലുള്ള തന്‍റെ വിശ്വാസത്തിന്‍റെയും പ്രതീക്ഷയുടെയും പ്രതിഫലനമാണ് പദ്ധതി നാലാം ഘട്ടത്തിലേക്ക് പ്രവേശിക്കുന്നതിലൂടെ വ്യക്തമാകുന്നതെന്നും എംഎൽഎ അഭിപ്രായപ്പെട്ടു. മണ്ഡലത്തിലെ ഓരോ വിദ്യാലയങ്ങളിൽ നിന്നും തെരഞ്ഞെടുക്കപ്പെട്ട ഹയർ സെക്കൻഡറി കോമേഴ്‌സ് വിദ്യാർഥികൾക്കായുള്ള കോമേഴ്സ് കരിയർ കോൺക്ലേവിലൂടെ 2025-2026 അധ്യയന വർഷത്തെ പ്രവർത്തനങ്ങൾക്കും തുടക്കം കുറിച്ചു. കോമേഴ്‌സ് മേഖലയിലെ ഭാവിസാധ്യതകളെക്കുറിച്ചും, യുവാക്കളുടെ പങ്കിനെക്കുറിച്ചും, ഉന്നത വിദ്യാഭ്യാസ അവസരങ്ങളെ കുറിച്ചുമുള്ള വിവരങ്ങൾ ഉൾക്കൊള്ളിച്ചുകൊണ്ട് നടത്തിയ കോൺക്ലേവിൽ 180ലധികം വിദ്യാർഥികൾ പങ്കെടുത്തു. കൊല്ലം ജില്ലാ ഹയർ സെക്കൻഡറി സ്കൂൾ ടീച്ചേർസ് കോർഡിനേറ്റർ പോൾ ആന്‍റണി, സ്കൂൾ പ്രിൻസിപ്പൾ സജി വറുഗീസ്, പ്രധാനാധ്യാപകൻ ഫിലിപ് എം. ഏലിയാസ്, പബ്ലിക് പോളിസി അനലിസ്റ്റ് അഖിൽ കുര്യൻ, ഷെറിൻ കളത്തിൽ, കണക്ട് കുണ്ടറ പ്രൊജക്റ്റ്‌ കോർഡിനേറ്റർ അതുൽകൃഷ്ണ എന്നിവർ പ്രസംഗിച്ചു.

കൊല്ലം സ്വദേശിനി ആതിര റാമിന് 26.38 കോടിയുടെ യുകെ ഫെലോഷിപ്പ്

കൊല്ലം : വയോധികരുടെ അസ്ഥിരോഗ ചികിത്സയുമായി ബന്ധപ്പെട്ടു നാനോ ടെക്നോളജിയിലെ ഗവേഷണത്തിനു കൊല്ലം സ്വദേശിനിക്ക് 26.38 കോടി രൂപയുടെ യുകെ റിസർച് ആൻഡ് ഇന്നവേഷൻ ഫ്യൂച്ചർ ലീഡേഴ്സ് ഫെലോഷിപ്പ്. പാരിപ്പള്ളി കിഴക്കനേല സ്വദേശിനി ആരതി രാം ആണ് ഫെലോഷിപ്പിന് അർഹയായിരിക്കുന്നത്. നാല് വർഷത്തേക്ക് ഉള്ള ഗവേഷണത്തിന് 2.2 മില്യൻ പൗണ്ട് ( 26.38 കോടി രൂപ) യാണ് ആരതിക്ക് ലഭിക്കുക. യുകെ ബ്രാഡ്ഫഡ് സർവകലാശാലയിൽ ലൈഫ് സയൻസ് അസിസ്റ്റന്‍റ് പ്രഫസറായ ആരതി റാം 2020ൽ 2.70 കോടി രൂപയുടെ മേരി ക്യൂറി ഫെലോഷിപ്പ് നേടിയിട്ടുണ്ട്. കിഴക്കനേല ഗവ. എൽപി സ്കൂൾ, കടമ്പാട്ടുകോണം എസ്കെവി എച്ച്എസ്, പാളയംകുന്ന് എച്ച്എസ്എസ് എന്നിവിടങ്ങളിലായിരുന്നു ആരതി റാമിന്‍റെ സ്കൂൾ പഠനം. കേരള സർവകലാശാലയിൽ നിന്ന് എംഎസ്‌സി ഫിസിക്സ്, കുസാറ്റിൽ നിന്ന് എംഫിൽ,‍ സൗത്ത് കൊറിയയിൽ നിന്നു പിഎച്ച്ഡി എന്നിവ നേടിയ ശേഷമാണ് ആരതി യുകെയിൽ എത്തുന്നത്. പാരിപ്പള്ളി കിഴക്കനേല അയോധ്യയിൽ റിട്ട. സുബേദാർ മേജർ പരേതനായ രാമചന്ദ്രക്കുറുപ്പിന്‍റെ യും ശശികലയുടെയും മകളാണ്. ഭർത്താവ് അഭീഷ് രാജൻ ഉണ്ണിത്താൻ ബ്രാഡ്ഫഡ് സർവകലാശാലയിൽ ലക്ചററാണ്. മകൾ ആരുഷി.

ഹെഡ് പോസ്റ്റ് ഓഫീസുകളിൽ തപാൽ ബുക്കിംഗ് സമയം ദീർഘിപ്പിച്ചു

കൊല്ലം: കൊല്ലം പോസ്റ്റൽ ഡിവിഷന് കീഴിലുള്ള കൊല്ലം, കരുനാഗപ്പള്ളി, കൊട്ടാരക്കര എന്നീ ഹെഡ് പോസ്റ്റ് ഓഫീസുകളുടെ തപാൽ ബുക്കിംഗ് സമയം ജനങ്ങളുടെ സൗകര്യാർഥം ദീർഘിപ്പിച്ചതായി കൊല്ലം പോസ്റ്റൽ സൂപ്രണ്ട് അറിയിച്ചു. കൊല്ലം ഹെഡ് പോസ്റ്റ് ഓഫീസിൽ തിങ്കൾ മുതൽ ശനി വരെ രാവിലെ 8.30 മുതൽ രാത്രി 9.30 വരെയും ഞായർ രാവിലെ 10.00 മുതൽ വൈകുന്നേരം നാലുവരെയും ആണ് പുതുക്കിയ തപാൽ ബുക്കിംഗ് സമയം. കരുനാഗപ്പള്ളി ഹെഡ് പോസ്റ്റ് ഓഫീസിൽ തിങ്കൾ മുതൽ ശനിവരെ രാവിലെ ഒന്പതുമുതൽ മുതൽ രാത്രി ഏഴുവരെയും, കൊട്ടാരക്കര ഹെഡ് പോസ്റ്റ് ഓഫീസിൽ തിങ്കൾ മുതൽ ശനി വരെ രാവിലെഒന്പതുമുതൽ രാത്രി ഏഴുവരെയുമാണ് പുതുക്കിയ സമയം.

ഗാന്ധിജയന്തിക്ക് ജില്ലയില്‍ വിപുലമായ പരിപാടികള്‍

കൊല്ലം: മഹാത്മാഗാന്ധി ജില്ല സന്ദര്‍ശിച്ചതിന്‍റെ 100-ാം വാര്‍ഷികത്തില്‍ ഗാന്ധിജയന്തി ആഘോഷങ്ങള്‍ ജില്ലയില്‍ വിപുലമായി സംഘടിപ്പിക്കുമെന്നു ജില്ലാ കളക്ടര്‍ എന്‍. ദേവിദാസ്. ജില്ലാ ഭരണകൂടം, ഇന്‍ഫര്‍മേഷന്‍ പബ്ലിക് റിലേഷന്‍സ് വകുപ്പ്, കൊല്ലം കോര്‍പ്പറേഷന്‍, ഗാന്ധി പീസ് ഫൗണ്ടേഷന്‍ എന്നിവയുടെ സംയുക്താഭിമുഖ്യത്തിലാണ് പരിപാടികള്‍. ഒക്ടോബര്‍ രണ്ടിനു രാവിലെ 7.30 ന് ചിന്നക്കട പൊതുമരാമത്ത് വിശ്രമകേന്ദ്രത്തില്‍നിന്ന് തുടങ്ങുന്ന പദയാത്ര ചിന്നക്കട അടിപാത-ബീച്ച് റോഡ് വഴി ഗാന്ധിപാര്‍ക്കില്‍ സമാപിക്കും. ഗാന്ധിപ്രതിമയില്‍ ഹാരാര്‍പ്പണവും സര്‍വമത പ്രാര്‍ഥനയും ദേശീയോദ്ഗ്രഥന പ്രതിജ്ഞയും ജില്ലാതല പരിപാടികള്‍ക്കും തുടക്കമാകും. മന്ത്രിമാരും ഇതര ജനപ്രതിനിധികളും പങ്കെടുക്കും. സ്‌കൂള്‍/കോളജ് വിദ്യാര്‍ഥികള്‍, എന്‍സിസി, എന്‍എസ്എസ്, വൊളന്‍റിയേഴ്‌സ്, അധ്യാപകര്‍, സന്നദ്ധസംഘടനകള്‍ ഉള്‍പ്പെടെ പങ്കെടുക്കും. ഹോട്ടല്‍ ആന്‍റ് റെസ്റ്റോറന്‍റ് അസോസിയേഷന്‍ പ്രഭാതഭക്ഷണം നല്‍കും. കൊല്ലം കോര്‍പ്പറേഷന്‍റെ പരിധിയില്‍ വരുന്ന സര്‍ക്കാര്‍ ഓഫീസുകളിലേയും ജീവനക്കാര്‍ പങ്കെടുക്കും. ഗാന്ധിപാര്‍ക്കും പരിസരവും വൃത്തിയാക്കുന്നതിനും അടിസ്ഥാന സൗകര്യങ്ങള്‍ ഉറപ്പാക്കുന്നതിനും കോര്‍പറേഷന്‍ സെക്രട്ടറിയെ ചുമതലപ്പെടുത്തി. ഹരിത പെരുമാറ്റചട്ടങ്ങള്‍ പാലിച്ചാകും പരിപാടി. ഒക്ടോബര്‍ രണ്ടിനു സ്‌കൂള്‍ വിദ്യാര്‍ഥികള്‍ക്കു കണ്‍സഷന്‍ ഉറപ്പാക്കാന്‍ ആര്‍ടിഒ യെ ചുമതലപ്പെടുത്തി. ആഘോഷങ്ങളുടെ ഭാഗമായി ഒക്ടോബര്‍ നാലിനു ഗാന്ധി കലോത്സവം സംഘടിപ്പിക്കും. ഹൈസ്‌കൂള്‍ വിഭാഗം വിദ്യാര്‍ഥികള്‍ക്കായി പ്രശ്‌നോത്തരി, എല്‍പി, യുപി, എച്ച്എസ് വിഭാഗക്കാര്‍ക്കായി ചിത്രരചന, യുപി, എച്ച്എസ് വിഭാഗത്തിന് കവിതാലാപന മത്സരങ്ങള്‍ എന്നിവയുണ്ടാകും. ഗാന്ധിജയന്തിദിനാചരണത്തിന് മുന്നോടിയായി 29, 30 തീയതികളില്‍ ജില്ലയിലെ വിവിധ സ്ഥാപനങ്ങളും സര്‍ക്കാര്‍ ഓഫീസുകളും ആരോഗ്യ വകുപ്പിന്‍റെയും ജില്ലാ ശുചിത്വമിഷന്‍റെയും നേതൃത്വത്തില്‍ ശുചിയാക്കുന്നതിനും തീരുമാനിച്ചു. എഡിഎം ജി.നിര്‍മല്‍കുമാര്‍, ഗാന്ധി പീസ് ഫൗണ്ടേഷന്‍ വര്‍ക്കിംഗ് ചെയര്‍മാന്‍ പോള്‍ മത്തായി, സെക്രട്ടറി ജി.ആര്‍.കൃഷ്ണകുമാര്‍, ഹോട്ടല്‍ ആന്‍റ് റെസ്റ്റോറന്‍റ് അസോസിയേഷൻ ജില്ലാ പ്രസിഡന്‍റ് ആര്‍. ചന്ദ്രശേഖരന്‍, സെക്രട്ടറി ഇ. ഷാജഹാന്‍, ടി.എസ്. ബാഹുലേയന്‍ തുടങ്ങിയവര്‍ പങ്കെടുത്തു.

കൊല്ലത്ത് യുഡിഎഫ് ജില്ലാ നേതൃയോഗം ബഹിഷ്‌കരിച്ച് മുസ്‌ലിം ലീഗ്

കൊല്ലം: യുഡിഎഫ് കൊല്ലം ജില്ലാ നേതൃയോഗത്തില്‍ മുസ്‌ലിം ലീഗ് പങ്കെടുത്തില്ല. പ്രതിപക്ഷ നേതാവും യുഡിഎഫ് കൺവീനറും പങ്കെടുക്കുന്ന യോഗത്തിൽ നിന്നാണ് ലീഗ് നേതാക്കൾ വിട്ടുനിന്നത്. ഏറെ നാളായി മുന്നണിയില്‍ കൊല്ലത്ത് നിലനില്‍ക്കുന്ന അസ്വാരസ്യങ്ങൾക്കിടയിലാണിത്. വരാനിരിക്കുന്ന നിയമസഭ തെരഞ്ഞെടുപ്പിൽ ജില്ലയിൽ രണ്ടു സീറ്റുകൾ വേണമെന്ന ആവശ്യം ലീഗ് മുന്നോട്ടു വെച്ചിട്ടുണ്ട്. ഇതിനിടെ, യുഡിഎഫ് നേതൃയോഗത്തിന്‍റെ പോസ്റ്ററില്‍ ജില്ലയിലെ ലീഗ് നേതാക്കളെ ഒരാളെ പോലും ഉള്‍പ്പെടുത്തിയിരുന്നില്ല. ഇത് ജില്ലാ ലീഗ് നേതൃത്വത്തിന്‍റെ പ്രതിഷേധത്തിന് ഇടയാക്കി. പ്രതിപക്ഷ നേതാവും യുഡിഎഫ് കണ്‍വീനറും പങ്കെടുക്കുന്ന യോഗത്തിൽ പങ്കെടുക്കാതെ പ്രതിഷേധം അറിയിക്കാൻ മുസ്‌ലീം ലീഗ് ജില്ലാ നേതൃത്വം തുടർന്ന് തീരുമാനം എടുക്കുകയായിരുന്നു. കോണ്‍ഗ്രസ് ജില്ലാ നേതൃത്വം ഏറെക്കാലമായി അവഗണിക്കുകയാണെന്ന് ലീഗ് കൊല്ലം ജില്ലാ ജനറല്‍ സെക്രട്ടറി സുല്‍ഫിക്കര്‍ പറഞ്ഞിട്ടുണ്ട്. രേഖാമൂലം ഇക്കാര്യത്തിൽ യു ഡി എഫ് ചെയര്‍മാനും കണ്‍വീനര്‍ക്കും പരാതി എഴുതി നൽകിയിട്ടുണ്ടെന്നും പ്രതിഷേധം തുടർന്നും ഉണ്ടാവുമെന്നും സുല്‍ഫിക്കര്‍ പറയുന്നു.

രാജ്യത്തെ ആദ്യ ഡിജിറ്റൽ കുടുംബക്കോടതി ശാസ്താംകോട്ടയിൽ ആരംഭിക്കുന്നു

ശാസ്താംകോട്ട: രാജ്യത്തെ ആദ്യത്തെ ഡിജിറ്റൽ കുടുംബക്കോടതി ശാസ്താംകോട്ടയിൽ 20 മുതൽ പ്രവർത്തനമാരംഭിക്കും. പൂർണമായും പേപ്പർലെസ് സംവിധാനത്തിലായിരിക്കും കോടതിയുടെ പ്രവർത്തനം. 24 മണിക്കൂറും പ്രവർത്തിക്കുമെന്നതിനാൽ ഏതു സമയത്തും കേസുകൾ ഫയൽ ചെയ്യുന്നതിനും വിവരങ്ങൾ അറിയാനുമുള്ള സംവിധാനവും ഉണ്ടായിരിക്കും. സാധാരണ കുടുംബക്കോടതികളിൽ 36 ജീവനക്കാർ വേണ്ടിടത്ത് ഡിജിറ്റൽ കോടതിയിൽ ഒന്പതു ജീവനക്കാർ മാത്രമേ ആവശ്യമായി വരുന്നുള്ളു. ചവറ കുടുംബ കോടതിയിൽ കുന്നത്തൂർ താലൂക്കിൽ നിന്നും നിലവിലുള്ള 2000 കേസുകൾ ശാസ്താംകോട്ടയിലേക്കു മാറ്റും. ഇതിനൊപ്പം കൊട്ടാരക്കര താലൂക്കിലെ പുത്തൂർ,പവിത്രേശ്വരം വില്ലേജുകളിലെയും കൊല്ലം താലൂക്കിലെ ഈസ്റ്റ് കല്ലടയിലെ കേസുകളും ഇവിടേക്കു മാറ്റപ്പെടും.ഇതോടെ മൂവായിരത്തിലധികം കേസുകൾ എത്തുമെന്നാണ് കരുതുതുന്നത്. രാജ്യത്തെ ആദ്യത്തെ മോഡൽ ഡിജിറ്റൽ കുടുംബ കോടതിയുടെ ഉദ്ഘാടനം ഹൈക്കോടതി ജഡ്ജി ജസ്റ്റിസ് എ.മുഹമ്മദ് മുഷ്താഖ് നിർവഹിക്കും. ധനകാര്യ മന്ത്രി കെ.എൻ. ബാലഗോപാൽ സമ്മേളനം ഉദ്ഘാടനം ചെയ്യും. ഡിജിറ്റൽ സാങ്കേതികയുടെ സ്വിച്ച് ഓൺ കർമം ജില്ലയുടെ ചുമതല വഹിക്കുന്ന ഹൈക്കോടതി ജഡ്ജി ജസ്റ്റിസ് സതീഷ് നൈനാൻ നിർവഹിക്കും. ചടങ്ങിൽ കോവൂർ കുഞ്ഞുമോൻ എംഎൽഎ അധ്യക്ഷത വഹിക്കും. കൊടിക്കുന്നിൽ സുരേഷ് എംപി,സംസ്ഥാന വയോജന കമ്മീഷൻ ചെയർമാൻ കെ.സോമപ്രസാദ് എന്നിവർ മുഖ്യ പ്രഭാഷണം നടത്തും.കൊല്ലം ജില്ലാ പ്രിൻസിപ്പൽ ജഡ്ജി എൻ.വി രാജു സ്വാഗതവും ശാസ്താംകോട്ട മോഡൽ ഡിജിറ്റൽ ഫാമിലി കോടതി ജഡ്ജ് നന്ദിയും പറയും.

പിണറായിസം പാർട്ടിയിൽ നടപ്പാക്കിയാൽ മതി : ജെബി മേത്തർ എംപി

ചാത്തന്നൂർ : പിണറായിസം സംസ്ഥാനത്ത് നടപ്പാക്കാമെന്ന് വ്യാമോഹിക്കേണ്ടെന്നും അത് സ്വന്തം പാർട്ടിയിൽ നടപ്പാക്കിയാൽ മതിയെന്നും മഹിളാ കോൺഗ്രസ് സംസ്ഥാന പ്രസിഡന്‍റ് ജെബി മേത്തർ എംപി. മഹിളാ സാഹസ് യാത്രയ്ക്ക് ചാത്തന്നൂരിൽ നല്കിയ സ്വീകരണത്തിൽ സംസാരിക്കുകയായിരുന്നു ജെബി മേത്തർ. കേരളത്തിലെ സമസ്ത മേഖലകളിലും അഴിമതിയും സ്വജന പക്ഷപാതവും നടപ്പാക്കി വരുന്ന പിണറായി വിജയൻ സംസ്ഥാന സർക്കാരിനെ കുത്തഴിഞ്ഞ നിലയിലെത്തിച്ചു. സംസ്ഥാനത്തെ ആഭ്യന്തര വകുപ്പ് ഇന്ന് ആരാണ് കൈകാര്യം ചെയ്യുന്നതെന്ന് ഇടതുപക്ഷ മന്ത്രിമാർക്ക് പോലും അറിയാത്ത അവസ്‌ഥയാണ്.പോലീസ് അതിക്രമങ്ങൾ ചൂണ്ടി കാട്ടിയാൽ അത് ഒറ്റപ്പെട്ട സംഭവമെന്ന് പറഞ്ഞു പൊതു സമൂഹത്തെ അവഹേളിക്കുന്ന ഒരു മുഖ്യമന്ത്രിയും സിസ്റ്റത്തിന്‍റെ തകരാറാണെന്ന് പറയുന്ന മന്ത്രിമാരുമാണിന്ന് സംസ്ഥാനം ഭരിക്കുന്നതെന്ന് ജെബി മേത്തർ കുറ്റപ്പെടുത്തി. കെപിസിസി സെക്രട്ടറി തൊടിയൂർ രാമചന്ദ്രൻ ഉദ്ഘാടനം ചെയ്തു. മണ്ഡലം പ്രസിഡന്‍റ് അമ്പിളി രത്‌നകുമാർ അധ്യക്ഷത വഹിച്ചു. മഹിളാ കോൺഗ്രസ് ജില്ലാ പ്രസിഡന്‍റ് അഡ്വ.ഫേബ സുദർശനൻ, ചാത്തന്നൂർ ബ്ലോക്ക് കോൺഗ്രസ് കമ്മിറ്റി പ്രസിഡന്‍റ് ബിജുവിശ്വരാജൻ, സിസിലി സ്റ്റീഫൻ, പി.പ്രദീഷ് കുമാർ, മഹിളാ കോൺഗ്രസ് സംസ്ഥാന വൈസ് പ്രസിഡന്‍റുമാരായ അഡ്വ.വാഹിദ, ജയലക്ഷ്മി ദത്തൻ, ലക്ഷ്മി അനിൽ, ലാലീരാജീസ്, ജില്ലാ ജനറൽ സെക്രട്ടറിമാരായ അഡ്വ.സിന്ധു വിനോദ്, ഷീല ബിനു, രേഖ എസ്.ചന്ദ്രൻ, പൂയപ്പള്ളി പഞ്ചായത്ത് പ്രസിഡന്‍റ് എസ്.മായ തുടങ്ങിയവർ പ്രസംഗിച്ചു.

എംഡിഎംഎയുമായി യുവാവ് പിടിയിൽ

നീണ്ടകര : നീലേശ്വരം തോപ്പ് ഭാഗത്ത് എക്സൈസ് സംഘം നടത്തിയ പരിശോധനയിൽ 6.408 ഗ്രാം എംഡിഎംഎയുമായി യുവാവ് പിടിയിൽ. സ്കൂൾ -കോളജ് വിദ്യാർഥികൾക്ക് രാസലഹരി വിൽപ്പന നടത്തിവന്ന നീണ്ടകര നീലേശ്വരം തോപ്പ് കുരിശടി പുതുവൽവീട്ടിൽ അപ്പു എന്ന് വിളിക്കുന്ന റോഷനെ (24) ആണ് അറസ്റ്റ് ചെയ്തത്. ഇയാളിൽ നിന്ന് ഒമ്പത് ഗ്രാം കഞ്ചാവും കണ്ടെടുത്തു. കരുനാഗപ്പള്ളി എക്സൈസ് സർക്കിൾ ഇൻസ്പെക്ടർ പി. അനിൽ കുമാറിന്‍റെ നേതൃത്വത്തിൽ നടന്ന പരിശോധനയിൽ അസിസ്റ്റന്‍റ് എക്സൈസ് ഇൻസ്പെക്ടർ എ. അജിത് കുമാർ, പ്രിവന്‍റീവ് ഓഫീസർ ആർ.മനു , സിവിൽ എക്സൈസ് ഓഫീസർമാരായ എസ്.അൻഷാദ്, എസ്. സഫേഴ്സൻ, എസ്. ശ്രീവാസ്, വനിതാ സിവിൽ എക്സൈസ് ഓഫീസർ വി. മോളി, ഡ്രൈവർ പി.എം. മൻസൂർ എന്നിവർ പങ്കെടുത്തു.

വധശ്രമക്കേസിലെ പ്രതികളെ വെറുതെവിട്ടു

കൊല്ലം: വീട്ടിൽ അതിക്രമിച്ചു കയറി കന്പി വടി, വടിവാൾ എന്നീ മാരകായുധങ്ങൾ കൊണ്ട് ആക്രമിച്ച് മാരകമായി പരിക്കേൽപിച്ച് കൊലപ്പെടുത്താൻ ശ്രമിച്ചുവെന്ന കേസിലെ പ്രതികളെ വെറുതെവിട്ട് കരുനാഗപ്പള്ളി അഡീഷണൽ അസിസ്റ്റന്‍റ് സെഷൻസ് കോടതി ജഡ്ജി സന്തോഷ്ദാസ് ഉത്തരവായി. വള്ളികുന്നം ഇലിപ്പക്കുളം മനുലാൽ, അഖിൽദേവ് എന്നിവരെയാണ് വെറുതെ വിട്ടത്. 2015 ഡിസംബറിലാണ് കേസിനസ്പദമായ സംഭവംനടന്നത്. പ്രതികൾക്കുവേണ്ടി അഭിഭാഷകരായ എ. നൗഷാദ്, എം. ഷാനവാസ്,എം. ഇബ്രാഹിംകുട്ടി, കെ.സൈഫുദ്ദീൻ എന്നിവരാണ് ഹാജരായി.

സെന്‍റ്‌ മാർക്ക് സിഎസ്ഐ പള്ളിയിൽ മോഷണം

കുളത്തുപ്പുഴ : ചന്ദനക്കാവ് എ പി എൻഎം സിഎംഎസ് യുപി സ്കൂളിലും സെന്‍റ്്‌ മാർക്ക് സി എസ് ഐ പള്ളിയിലും കഴിഞ്ഞദിവസം രാത്രി മോഷണം നടന്നു. സ്കൂളിലെ ഓഫീസ് റൂം, സ്റ്റാഫ് റൂം, സ്റ്റോർ എന്നിവയുടെ പൂട്ട് പൊളിക്കപ്പെട്ടു. അലമാരകളും മേശകളും കുത്തിത്തുറന്ന നിലയിലാണ് കണ്ടെത്തിയത്. രാവിലെ സ്കൂൾ പരിസരം വൃത്തിയാക്കാൻ എത്തിയ ജീവനക്കാരാണ് ഓഫീസിന്‍റെ പൂട്ട് കുത്തിപ്പൊളിച്ച നിലയിൽ കാണുന്നത്. സ്കൂൾ മാനേജർ റവ. ബിൻ ജോസഫ് മാത്യു അറിയിച്ചതനുസരിച്ച് കുളത്തൂപ്പുഴ പോലീസ് സ്ഥലത്തെത്തി അന്വേഷണം നടത്തിയെങ്കിലും വിലപിടിപ്പുള്ള ഒന്നും നഷ്ടപ്പെട്ടില്ല എന്ന് സ്ഥിരീകരിച്ചു. പള്ളിയുടെ സെമിത്തേരി ഭാഗത്തുള്ള വാതിൽ കുത്തി പൊളിച്ച് അകത്തുകളന്ന മോഷ്ടാവ് ചാരിറ്റി ബോക്സിൽ ഉണ്ടായിരുന്ന പണം അപഹരിച്ചു. കുളത്തുപ്പുഴ പോലീസ് കേസ് എടുത്തു. സിസിടിവി ദൃശ്യങ്ങൾ പരിശോധിച്ചു വേണ്ട നടപടികൾ സ്വീകരിക്കുമെന്ന് കുളത്തൂപ്പുഴ എച്ച് എസ് ഒ പറഞ്ഞു. ഏതാനും മാസങ്ങൾക്ക് മുമ്പ് പോലീസ് സ്റ്റേഷന് സമീപത്തുള്ള മലങ്കര പള്ളിയുടെ കുരിശടിയിൽ മോഷണം ശ്രമം നടന്നിരുന്നു.

ഇടമുളക്കല്‍ ജവഹര്‍ ഹൈസ്‌കൂളിൽ മഞ്ഞപ്പിത്തം : കുട്ടികള്‍ക്കു രോഗബാധയില്ലെന്ന് ഉറപ്പാക്കിയ ശേഷം സ്‌കൂള്‍ തുറക്കാന്‍ തീരുമാനം

അഞ്ചല്‍ : ഇരുപതോളം കുട്ടികള്‍ക്കു മഞ്ഞപ്പിത്ത ബാധ സ്ഥിരീകരിച്ചതിന് തുടര്‍ന്ന് അടച്ചിട്ട ഇടമുളക്കല്‍ ജവഹര്‍ ഹൈസ്‌കൂളിലെ കുട്ടികള്‍ക്കു രോഗബാധ ഇല്ലെന്നുറപ്പാക്കിയശേഷം പൂര്‍ണമായും തുറക്കാന്‍ തീരുമാനം. പി.എസ്.സുപാല്‍ എം എല്‍ എ യുടെ അധ്യക്ഷതയില്‍ ചേര്‍ന്ന യോഗത്തിലാണു തീരുമാനം. നിലവില്‍ ക്ലോറിനേറ്റ് ചെയ്തിട്ടുള്ള കിണറിലെ ജലം ആരോഗ്യവകുപ്പ് ഉദ്യോഗസ്ഥര്‍ ശേഖരിച്ചു തിരുവനന്തപുരം പബ്ലിക് ഹെല്‍ത്ത് ലാബിലും വാട്ടര്‍ അഥോറിട്ടിയുടെ വാളകം ലാബിലും പരിശോധനയ്ക്ക് അയക്കാനും ഇതിന്‍റെ പരിശോധന വരുന്ന 20 വരെ സ്‌കൂളിന് അവധി നല്‍കുന്നതിന് ഡിഡിയോടും ഡിഇഒ യോടും അനുമതി വാങ്ങാനും തീരുമാനിച്ചു. എംഎല്‍എ ഫണ്ടില്‍ ഉള്‍പ്പെടുത്തി പുതിയ ടോയ്‌ലറ്റ് ബ്ലോക്ക് അനുവദിക്കുമെന്ന് എംഎല്‍എ ഉറപ്പ് നല്‍കി. കുടിവെള്ള പൈപ്പ് ലൈന്‍ അടുത്ത ദിവസങ്ങള്‍ക്കുള്ളില്‍ സ്ഥാപിക്കും. ചികിത്സയിലുള്ള കുട്ടികളുടെ ക്ഷേമം ഉറപ്പുവരുത്തുന്നതിനും മുഴുവന്‍ കുട്ടികള്‍ക്കും സ്‌കൂളില്‍ ആരോഗ്യവിദഗ്ധരുടെ സാന്നിധ്യത്തില്‍ മെഡിക്കല്‍ ക്യാമ്പ് സംഘടിപ്പിക്കാനും യോഗം തീരുമാനിച്ചു. ക്യാമ്പില്‍ മുഴുവന്‍ കുട്ടികളുടെ യും പങ്കാളിത്തം ഉറപ്പാക്കും. മെഡിക്കല്‍ ക്യാമ്പിനൊപ്പം ബോധവല്‍ക്കരണം, ശുചീകരണം ഉള്‍പ്പടെയുള്ളവ നടത്തും. യോഗത്തില്‍ ഇടമുളക്കല്‍ ഗ്രാമപഞ്ചായത്ത് പ്രസിഡന്‍റ് ആര്യലാല്‍, ഇടമുളക്കല്‍ പി എച്ച്‌സി മെഡിക്കല്‍ ഓഫീസര്‍ ഡോ. ഷമീര്‍ സലാം, വാര്‍ഡ് മെമ്പര്‍, പിടിഎ ഭാരവാഹികള്‍, രക്ഷിതാക്കള്‍, സ്‌കൂള്‍ ഹെഡ്മാസ്റ്റര്‍ ,അധ്യാപകര്‍ ഉള്‍പ്പെടെയുള്ളവര്‍ പങ്കെടുത്തു.

ഹൈവേ അഥോറിട്ടിക്കെതിരെ ജനരോഷം ഇരമ്പി; റിലേ സത്യഗ്രഹം ഇന്നുമുതൽ

ചാത്തന്നൂർ: തിരുമുക്കിലെ അശാസ്ത്രീയ അടിപ്പാത വിഷയത്തിൽ ഹൈവേ അഥോറിട്ടിയ്ക്കെതിരെ ജനരോഷം ഇരമ്പി . സ്ത്രീകളും വിദ്യാർഥികളും ഉൾപ്പെടെയുള്ളവർ മനുഷ്യ ചങ്ങലയിൽ കണ്ണികളായി. കടകമ്പോളങ്ങൾ അടഞ്ഞുകിടന്നു. വലിയ വാഹനങ്ങൾക്ക് കടന്നുപോകുവാൻ കഴിയുന്ന തരത്തിൽ പുനർനിർമിക്കണമെന്ന് ആവശ്യപ്പെട്ട് തിരുമുക്ക് അടിപ്പാത സമരസമിതി നേതൃത്വത്തിൽ സംഘടിപ്പിച്ച മനുഷ്യച്ചങ്ങല ജനപങ്കാളിത്തം കൊണ്ട് ശ്രദ്ധേയമായി. ചാത്തന്നൂർ, നെടുങ്ങോലം , പരവൂർ മേഖലകളിൽ വ്യാപാരി വ്യവസായി സംഘടനകൾ ആഹ്വാനം ചെയ്തിരുന്ന ഹർത്താൽ പൂർണമായിരുന്നു. കടകമ്പോളങ്ങൾ അടച്ച് വ്യാപാരികൾ മനുഷ്യച്ചങ്ങലയിൽ കണ്ണികളായി. വൈകുന്നേരം അഞ്ചിന് തിരുമുക്ക് മുതൽ ചാത്തന്നൂർ വരെയാണ് മനുഷ്യചങ്ങല തീർത്തത്.പരവൂർ മുനിസിപ്പൽ മുൻ ചെയർമാൻ കെ.പി.കുറുപ്പ് ആദ്യ കണ്ണിയായി. നാടിന്‍റെ പൊതുവായ ആവശ്യം നേടിയെടുക്കുന്നതിനായി ജനപ്രതിനിധികൾ ,രാഷ്ട്രീയ സാമൂഹ്യ -സാംസ്ക്കാരിക സംഘടനാ പ്രവർത്തകർ, വ്യാപാരി വ്യവസായികൾ, കുടുംബശ്രീ പ്രവർത്തകർ, യുവജന വിദ്യാർഥി, മഹിളാ സംഘടനകൾ, പൊതുജനങ്ങൾ, തുടങ്ങിയവരെല്ലാം ചങ്ങലയിൽ കണ്ണികളായി. ഇത്തിക്കര ബ്ലോക്ക് പഞ്ചായത്ത് പ്രസിഡന്‍റ് എം.കെ.ശ്രീകുമാർ പ്രതിജ്ഞാവാചകം ചൊല്ലിക്കൊടുക്കുകയും സർവകക്ഷി യോഗം ഉദ്ഘാടനം ചെയ്യുകയും ചെയ്തു. ചാത്തന്നൂർ വികസന സമിതി ചെയർമാൻ ജി.രാജശേഖരൻ അധ്യക്ഷത വഹിച്ചു. പരവൂർ പ്രൊട്ടക്ഷൻ ഫോറം പ്രസിഡന്‍റ് അഡ്വ.സത്ജിത് ആമുഖ പ്രഭാഷണം നടത്തി. പരവൂർ മുനിസിപ്പൽ ചെയർപേഴ്സൺ പി.ശ്രീജ, കൊല്ലം ജില്ലാ പഞ്ചായത്ത് വൈസ് പ്രസിഡന്‍റ് ശ്രീജാ ഹരീഷ്, ചാത്തന്നൂർ ഗ്രാമപഞ്ചായത്ത് പ്രസിഡന്‍റ് എസ്.കെ.ചന്ദ്രകുമാർ സി പി എം ജില്ലാ സെക്രട്ടറിയേറ്റംഗങ്ങളായ ബി.തുളസീധരക്കുറുപ്പ് ,കെ.സേതുമാധവൻ, സിപിഐ മണ്ഡലം സെക്രട്ടറി അഡ്വ.ആർ.ദിലീപ് കുമാർ, കെപിസിസി മെമ്പർ നെടുങ്ങോലം രഘു ,സി പിഎം ചാത്തന്നൂർ ഏരിയാ സെക്രട്ടറി പി.വി.സത്യൻ, ബിജെപി നേതാവ് സന്തോഷ് ,കോൺഗ്രസ്മണ്ഡലം കമ്മിറ്റി പ്രസിഡന്‍റ് ഇക്ബാൽ, സിപിഎം ചാത്തന്നൂർ ലോക്കൽ കമ്മിറ്റി സെക്രട്ടറി ടി.ദിജു, വ്യാപാരി വ്യവസായി ഏകോപന സമിതി പ്രസിഡന്‍റ്ശശിധരൻ , പരവൂർ കൂട്ടായ്മയുടെ സന്തോഷ് പാറയിൽ കാവ്, പരവൂർ യുവജന കൂട്ടായ്മയ്ക്ക് വേണ്ടി ഷൈൻ എസ് .കുറുപ്പ്, സുധീർ ചെല്ലപ്പൻ, എൻ സദാനന്ദൻ പിള്ള, എൻ.രവീന്ദ്രൻ, വി.സണ്ണി ,പി.കെ.മുരളീധരൻ തുടങ്ങിയവർ പ്രസംഗിച്ചു. പരവൂർ ഉണ്ണി കവിതാലാപനം നടത്തി. തിരുമുക്ക് അടിപ്പാത സമരസമിതി കൺവീനർ കെ.കെ.നിസാർ സ്വാഗതവും. ചാത്തന്നൂർ വികസന സമിതി കൺവീനർ ജി.പി.രാജേഷ് നന്ദിയും പറഞ്ഞു. തിരുമുക്കിൽ ആരംഭിക്കുന്ന റിലേ സത്യഗ്രഹ ആദ്യ ദിവസമായ ഇന്ന് സമരസമിതി ജനറൽ കൺവീനർ കെ.കെ.നിസാറും തുടർന്ന് സതീഷ് വാവറ, ഷിബിനാഥ് , ഷൈൻ എസ്.കുറുപ്പ് തുടങ്ങിയവരും സത്യഗ്രഹികളാകും. രാവിലെ 10 ന് ബിജെപി ദക്ഷിണമേഖലാ പ്രസിഡന്‍റ് ബി.ബി.ഗോപകുമാർ റിലേ സത്യഗ്രഹ സമരം ഉദ്ഘാടനം ചെയ്യും.

കാർ തോട്ടിലേക്ക് മറിഞ്ഞ് പരിക്കേറ്റ അഭിഭാഷകൻ മരിച്ചു

ആര്യനാട്: ഓടിക്കൊണ്ടിരുന്ന കാർ തോട്ടിലേക്ക് തലകീഴായി മറിഞ്ഞ് പരിക്കേറ്റ് ചികിത്സയിലായിരുന്നയാൾ മരിച്ചു. പറണ്ടോട് കീഴ്പാലൂർ രതീഷ് നഗർ ഉഷസിൽ വി. ഗംഗാധരന്‍റെയും പി. വസന്തകുമാരിയുടെയും മകൻ വഞ്ചിയൂർ കോടതിയിലെ അഭിഭാഷകൻ അഡ്വ. വി. ജി. ആനന്ദ് (44) ആണ് മരിച്ചത്. കഴിഞ്ഞദിവസം കീഴ്പാലൂരിൽ നിന്നും ആര്യനാട്ടേക്ക് പോകവെ ഉച്ചയ്ക്ക് 12ന് ഇറവൂർ ഏറപ്പുളിമൂട്ടിൽ വളവിനു സമീപം തോട്ടിലേക്ക് കാർ മറിയുകയായിരുന്നു. ശബ്ദം കേട്ട് ഓടിക്കൂടിയ നാട്ടുകാരും അതുവഴി വന്ന വനംവകുപ്പ് ആർ. ആർ. ടീമും കൂടി ആദ്യം ആര്യനാട് ഗവ. ആശുപത്രിയിലും തുടർന്ന് തിരുവനന്തപുരം കിംസ് ആശുപത്രിയിലും എത്തിച്ചെങ്കിലും ഇന്നലെ മരണമടഞ്ഞു. മൃതദേഹം രാത്രിയോടെ വീട്ടുവളപ്പിൽ സംസ്കരിച്ചു. ഭാര്യ: വി. ജി. അശ്വതി. മക്കൾ: വൈഗ ആനന്ദ്, നീരവ് ആനന്ദ്. സഞ്ചയനം ഞായർ രാവിലെ എട്ടിന്.

അതുല്യയുടെ മരണം: ക്രൈംബ്രാഞ്ചിന്‍റെ അപേക്ഷ 23ന് പരിഗണിക്കും

കൊല്ലം: ഷാര്‍ജയില്‍ മരിച്ച ചവറ തേവലക്കര കോയിവിള സ്വദേശിനി അതുല്യയുടെ കേസിൽ ഭര്‍ത്താവ് സതീഷ് ശങ്കറിന്‍റെ മുന്‍കൂര്‍ ജാമ്യം റദ്ദാക്കണമെന്ന് ആവശ്യപ്പെട്ടു ക്രൈംബ്രാഞ്ച് സമര്‍പ്പിച്ച അപേക്ഷയില്‍ കേസ് പരിഗണിക്കുന്നത് 23ലേക്കു മാറ്റി. അതുല്യയുടെ ശരീരത്തിലെ മുറിവുകളുടെ ചിത്രങ്ങളുടേയും സതീഷ് ഉപദ്രവിക്കുന്നതിന്‍റെ വിഡിയോ ദൃശ്യങ്ങളുടേയും ഫോറന്‍സിക് പരിശോധനാഫലം വൈകിയതിനെ തുടര്‍ന്നാണ് പ്രിന്‍സിപ്പല്‍ സെഷന്‍സ് ജഡ്ജി എന്‍.വി രാജു വാദം മാറ്റിവച്ചത്. 23ന് കേസ് പരിഗണിക്കുമ്പോൾ കേസ് ഡയറി ഹാജരാക്കാൻ കോടതി പ്രോസിക്യൂഷനോട് ആവശ്യപ്പെട്ടു. കഴിഞ്ഞ ജൂലൈ 19നാണ് അതുല്യയെ ഷാര്‍ജയിലെ ഫ്‌ളാറ്റില്‍ മരിച്ച നിലയില്‍ കണ്ടെത്തിയത്. അതുല്യ ഭർത്താവിന്‍റെ ശാരീരിക, മാനസിക പീഡനത്തെ തുടർന്നാണ് ജീവനൊടുക്കിയതെന്ന മാതാപിതാക്കളുടെ പരാതിയിൽ ആദ്യം ലോക്കൽ പോലീസ് ആണ് അന്വേഷണം തുടങ്ങിയത്. പിന്നീട് അന്വേഷണ ചുമതല ക്രൈംബ്രാഞ്ചിന് കൈമാറുകയായിരുന്നു. മുൻകൂർ ജാമ്യം നേടിയ സതീഷിനെ ഷാർജയിൽ നിന്ന് എത്തിയപ്പോൾ അറസ്റ്റ് ചെയ്തു വിട്ടയച്ചിരുന്നു.

‘ഗൃഹസമൃദ്ധി വീട്ടമ്മയ്ക്കൊരു കൈത്താങ്ങ് ’പദ്ധതിയുമായി പത്തനാപുരം ബ്ലോക്ക് പഞ്ചായത്ത്

പത്തനാപുരം: സ്ത്രീകള്‍ക്കു സാമ്പത്തിക ഭദ്രത ഉറപ്പാക്കാന്‍ ‘ഗൃഹസമൃദ്ധി വീട്ടമ്മയ്ക്കൊരു കൈത്താങ്ങ്' പദ്ധതിയുമായി പത്തനാപുരം ബ്ലോക്ക്പഞ്ചായത്ത്. പിറവന്തൂര്‍, പട്ടാഴി, പട്ടാഴി വടക്കേക്കര, വിളക്കുടി, പത്തനാപുരം, തലവൂര്‍ പഞ്ചായത്തുകളിലെ വനിതാ വ്യക്തിഗത ഉപഭോക്താക്കളുടെ ക്ലസ്റ്റര്‍ ബ്ലോക്ക് തലത്തില്‍ രൂപീകരിച്ച് ഒരു കറവപശുവും എട്ടുമാസം പ്രായമായ പെണ്ണാടും 10 മുട്ടക്കോഴികളും നല്‍കുന്ന പദ്ധതിയാണിത്. പശു വളര്‍ത്തലിനു പ്രോത്സാഹനം, സുരക്ഷിത ഭക്ഷ്യവസ്തുക്കളുടെ ഉല്‍പാദനവും വിപണനവും, ആട് - കോഴി വളര്‍ത്തലിലൂടെ അധികവരുമാനം, പുതിയ തലമുറയെ കാര്‍ഷിക വൃത്തിയിലേക്ക് ആകര്‍ഷിക്കുക തുടങ്ങിയവയാണ് ലക്ഷ്യം. ഗൃഹസമൃദ്ധി പദ്ധതിയിലൂടെ 60000 രൂപ വിലവരുന്ന ഒരു കറവപ്പശുവിനെയും 9000 രൂപ വിലവരുന്ന എട്ടുമാസം പ്രായമായ പെണ്ണാടിനെയും ബാങ്ക് ലോണ്‍ മുഖേനയാണ് നല്‍കുന്നത്. വികസനഫണ്ടില്‍ നിന്നും 9,45000 രൂപയാണ് വിനിയോഗിക്കുക. കറവ പശുവിനെ 30000 രൂപ സബ്സിഡിയിലും പെണ്ണാടിനെ 4500 രൂപ സബ്സിഡിയിലും മുട്ടക്കോഴി കുഞ്ഞുങ്ങളെ 500 രൂപ സബ്‌സിഡിയിലുമാണ് നല്‍കുന്നത്. പദ്ധതി പ്രകാരം ഒരു ഗുണഭോക്താവിന് ലഭിക്കുന്നത് 35,000 രൂപ സബ്‌സിഡിയാണ്. ക്ഷീരസംഘങ്ങള്‍ വഴി പാല്‍ വിപണത്തിന് സംവിധാനവും ഒരുക്കിയിട്ടുണ്ട്.2020-21 മുതല്‍ 2024-25 വരെയുള്ള അഞ്ചു വര്‍ഷങ്ങളിലായി 386 വനിതകള്‍ക്ക് കറവ പശുവിനെ വാങ്ങാനാണ് സഹായം നല്‍കിയത്. കഴിഞ്ഞ അഞ്ചു വര്‍ഷങ്ങളിലായി രണ്ടു കോടി എഴുപത് ലക്ഷം രൂപയുടെ ബാങ്ക് ലോണ്‍ നല്‍കി. എല്ലാ വര്‍ഷങ്ങളിലും ശരാശരി ഒരു കോടി രൂപയാണ് ക്ഷീര മേഖലയ്ക്കായി പഞ്ചായത്ത് മാറ്റി വയ്ക്കുന്നത്. പദ്ധതിയുടെ വിപുലീകരണമാണ് ഇനി ലക്ഷ്യമെന്ന് ബ്ലോക്ക് പഞ്ചായത്ത് പ്രസിഡന്‍റ് എ. ആനന്ദവല്ലി പറഞ്ഞു.

വയോധികയുടെ താലിമാല പൊട്ടിച്ച കേസ്: രണ്ടാം പ്രതി അറസ്റ്റില്‍

അഞ്ചല്‍ : ബൈക്കില്‍ എത്തി വഴി ചോദിക്കാന്‍ എന്ന വ്യാജേന നിര്‍ത്തുകയും വയോധികയുടെ രണ്ടരപവന്‍ തൂക്കം വരുന്ന താലിമാല പൊട്ടിച്ചു കടന്നുകളഞ്ഞ കേസിലെ രണ്ടാം പ്രതിയും അറസ്റ്റില്‍. കോഴിക്കോട് സ്വദേശി അനസാണ് പിടിയിലായത്. ഇടമുളക്കല്‍ നീറായിത്തോട് വീട്ടില്‍ ഗിരിജ ദേവിയുടെ മാലയും താലിയുമാണ് ഇപ്പോള്‍ പിടിയിലായ അനസ് ഉള്‍പ്പെട്ട രണ്ടംഗസംഘം ബൈക്കില്‍ എത്തി പൊട്ടിച്ചു കടന്നു കളഞ്ഞത്. ഇക്കഴിഞ്ഞ ഏപ്രിലിലായിരുന്നു സംഭവം. ഗിരിജയുടെ പരാതിയില്‍ കേസെടുത്ത അഞ്ചല്‍ പോലീസ് പ്രധാന പ്രതിയായ തിരുവനന്തപുരം സ്വദേശി അനസിനെ ജൂലൈ മാസത്തില്‍ പിടികൂടിയിരുന്നു. ഇയാളെ ചോദ്യം ചെയ്തതില്‍ നിന്നാണ് ഇപ്പോള്‍ പിടിയിലായ അനസിനെകുറിച്ചു വിവരം ലഭിക്കുന്നത്. ഇയാള്‍ക്കായി അന്വേഷണം തുടരുന്നതിനിടെ മറ്റൊരു കേസില്‍ അനസ് പൊന്നാനി പോലീസിന്‍റെ പിടിയിലായതായി അഞ്ചല്‍ പോലീസിന് വിവരം ലഭിക്കുന്നത്. ഇതോടെ പൊന്നാനിയില്‍ എത്തി കോടതിയുടെ അനുമതിയോടെ ഇയാളെ കസ്റ്റഡിയില്‍ എടുക്കുകയും അറസ്റ്റ് രേഖപ്പെടുത്തുകയുമായിരുന്നു.ബൈക്ക് കവര്‍ച്ച മാല പൊട്ടിക്കല്‍ ഉള്‍പ്പെടെ വിവിധ പോലീസ് സ്റ്റേഷനുകളില്‍ മുപ്പതിലധികം കേസുകളില്‍ പ്രതിയാണ് അനസ് എന്ന് എസ്ഐ പ്രജീഷ്കുമാര്‍ പറഞ്ഞു. അറസ്റ്റ് രേഖപ്പെടുത്തിയ പ്രതിയെ സ്ഥലത്തെത്തിച്ചു തെളിവെടുപ്പ് നടത്തി. താന്‍ ഈ സ്ഥലത്തു എത്തിയിട്ടേ ഇല്ലന്നു അനസ് പറഞ്ഞുവെങ്കിലും സമീപത്തെ വീട്ടില്‍ നിന്നും ലഭിച്ച സിസിടിവി ദൃശ്യങ്ങള്‍ അനസിന് കുരുക്കായി. വീട്ടമ്മ ഇയാളെ തിരിച്ചറിയുകയും ചെയ്തു. പിന്നീട് കോടതിയില്‍ ഹാജരാക്കിയ പ്രതിയെ റിമാൻഡ് ചെയ്തു. എസ്ഐ പ്രജീഷ് കുമാര്‍ സീനിയര്‍ സിവില്‍ പോലീസ് ഓഫീസര്‍മാരായ ബിബിന്‍, അഭിലാഷ്, സിവില്‍ പോലീസ് ഓഫീസര്‍ ജിജോ എന്നിവരടങ്ങുന്ന സംഘമാണ് പ്രതിയെ അറസ്റ്റ് ചെയ്തത്.

ഇടിമിന്നലിൽ വീടുകൾക്ക് നാശം

കൊട്ടാരക്കര: വെട്ടിക്കവല ഉളിയനാട് കിഴക്ക് ഇടിമിന്നലിൽ വീടുകൾക്കു നാശമുണ്ടായി. അലൻവില്ലയിൽ ബിജു യോഹന്നാന്‍റെ വീടിന്‍റെ ഭിത്തിയുടെ ഒരുഭാഗം തകർന്നു. ഹാളിലുണ്ടായിരുന്ന വൈദ്യുതോപകരണങ്ങൾ പൊട്ടിത്തെറിച്ചു. ബിജുവിന്‍റെ ഭാര്യ ഷീജ മാത്രമാണ് വീട്ടിലുണ്ടായിരുന്നത്. വീടിന്‍റെ പിൻഭാഗത്തുള്ള തെങ്ങിലും ഇടിയേറ്റു. സമീപവാസികളായ കുഞ്ഞേലി, ഉമ്മൻ ഇടിക്കുള എന്നിവരുടെ വീടുകളിലെ വൈദ്യുതോപകരണങ്ങളും നശിച്ചു. ഇന്നലെ ഉച്ചയ്ക്ക് ഒന്നോടെയായിരുന്നു സംഭവം. അലൻവില്ലയിൽ ഹാളിന്‍റെ ഭിത്തിതകർന്ന് കോൺക്രീറ്റ്ഭാഗങ്ങൾ ചിതറിത്തെറിച്ചു. ടിവിയുടെ സ്‌റ്റെബിലൈസർ പൊട്ടിത്തെറിച്ചു. മറ്റുമുറികളുടെ ഭിത്തികളും ഷെയ്ഡും വിണ്ടുകീറി. ഹാളിലുണ്ടായിരുന്ന ഷീജ അപകടത്തിനു തൊട്ടു മുമ്പ് അടുത്ത മുറിയിലേക്കു പോയതിനാൽ ആളപായമുണ്ടായില്ല.

കോവിൽത്തോട്ടം സെന്‍റ് ആൻഡ്രൂസ് പള്ളിയിൽ കൊൺഫ്രിയ തിരുനാൾ 18 മുതൽ

ചവറ : കോവിൽത്തോട്ടം സെന്‍റ് ആൻഡ്രൂസ് പള്ളിയിൽ പരിശുദ്ധ ഉപഹാര മാതാവിന്‍റെ കൊൺഫ്രിയ തിരുനാൾ 18 മുതൽ 28 വരെ നടക്കും.രാവിലെ ഏഴിന് വികാരി ഫാ. ജോസഫ് ഡാനിയേൽ പതാക ഉയർത്തും. തുടർന്നുള്ള ദിവ്യബലിക്ക് മോൺ.വിൻസന്‍റ് മച്ചാഡോ മുഖ്യകാർമികത്വം വഹിക്കും. റവ.ഡോ. റോൾഡൻ ജേക്കബ് വചന സന്ദേശം നൽകും. തുടർന്ന് പരിശുദ്ധ ഉപഹാര മാതാവി െ ന്‍റതിരുസ്വരൂപം പരസ്യ വണക്കത്തിനായി പ്രതിഷ്ഠിക്കും.19 മുതൽ 23 വരെയുള്ള ദിവസങ്ങളിൽ രാവിലെ ആറിനും ഉച്ചയ്ക്ക് 12 നും ദിവ്യബലി. വൈകുന്നേരം 4.30 ന് ജപമാല, ലിറ്റിനി,ദിവ്യബലി, ദിവ്യകാരുണ്യ ആരാധന എന്നിവ ഉണ്ടായിരിക്കും. ഫാ. സൈജു സൈമൺ, ഫാ. മനോജ് ആന്‍റണി, ഫാ.പോൾ ആന്‍റണി, ഫാ. ജോസഫ് അംബ്രോസ്. ഫാ. ക്ലീറ്റസ്, ഫാ. ജോളി എബ്രഹാം, ഫാ. മാക്സ് വെൽ ജോസഫ്, ഫാ.അജയകുമാർ, ഫാ.ഡിക്സൺ ആന്‍റണി, ഫാ. സാജു വിൻസെന്‍റ് എന്നിവർ കർമ്മങ്ങൾക്ക് നേതൃത്വം നൽകും . 24ന് രാവിലെ ഏഴിനുള്ള ദിവ്യബലിക്ക് ഫാ. നിതിൻ ഫ്രാൻസിസും ഉച്ചയ്ക്ക് 12 നുള്ള ദിവ്യബലിക്ക് ഫാ. റൊമാൻസ് ആന്‍റണിയും വൈകുന്നേരം 4.30 നുള്ള ദിവ്യബലിക്കും വചനപ്രഘോഷണത്തിനും ഫാ. ഫെലിക്സും നേതൃത്വം നൽകും . 25, 26 തീയതികളിലെ തിരുകർമങ്ങൾക്ക് ഫാ. നിക്കോളസ് , ഫാ. ഫ്രാങ്ക്ളിൻ ഫ്രാൻസിസ്, ഫാ. ആന്‍റണി ഡിക്രൂസ് എന്നിവർ കാർമികത്വം വഹിക്കും. 26നു രാവിലെ 6.30 ന് ലത്തോർ പ്രദക്ഷിണവും വൈകുന്നേരം നാലിനു സന്തമേശയും നടക്കും. രാത്രി ഏഴിനു ഭക്തിനിർഭരമായ കായൽ പ്രദക്ഷിണം 27ന് രാവിലെഏഴിന് ഇടവകയിലെ കുട്ടികളുടെ പ്രഥമ ദിവ്യകാരുണ്യ സ്വീകരണം നടക്കും. ദിവ്യബലിക്ക് ഫാ. ബേണി വർഗീസ് മുഖ്യകാർമികത്വം വഹിക്കും. ഫാ.എബിൻ പാപ്പച്ചൻ വചന സന്ദേശം നൽകും . വൈകുന്നേരം 4.30 നുള്ള ആഘോഷമായ വേസ്പരയ്ക്കും ദിവ്യബലിക്കും ഫാ. ആൽഫോൺസ് മുഖ്യകാർമികത്വം വഹിക്കും. ഫാ.ജാക്സൺ ജെയിംസ് വചനപ്രഘോഷണം നടത്തും. തുടർന്ന് ഭക്തിസാന്ദ്രമായ തിരുനാൾ പ്രദക്ഷിണം. തിരുനാൾ സമാപന ദിനമായ 28ന് രാവിലെ ആറിനു ദിവ്യബലി. രാവിലെ 9.30 നുള്ള ആഘോഷമായ പൊന്തിഫിക്കൽ ദിവ്യബലിക്ക് ബിഷപ്പ് ഡോ.സ്റ്റാൻലി റോമൻ മുഖ്യകാർമികത്വം വഹിക്കും. ഫാ. സെബാസ്റ്റ്യൻ തൊബിയാസ് തിരുനാൾദിന വചന സന്ദേശം നൽകും. രൂപത ചാൻസിലർ ഫാ. ജോൺ ജെറി ഐസക്ക്, ഇടവക വികാരി ഫാ. ജോസഫ് ഡാനിയൽ എന്നിവർ സഹകാർമ്മികരായിരിക്കും. വൈകുന്നേരം നാലിനു ഫാ. ജോസഫ് ജോൺ കൃതജ്ഞതാ ബലിക്ക് നേതൃത്വം നൽകും . ഫാ.അഗസ്റ്റിൻ സേവ്യർ വചനപ്രഘോഷണം നടത്തും. തുടർന്ന് കൊടിയിറക്കോട് കൂടി തിരുനാൾ സമാപിക്കുമെന്ന് ഇടവക വികാരി ഫാ. ജോസഫ് ഡാനിയേൽ, തിരുനാൾ പ്രസിദേന്തി നെപ്പോളിയൻ ആന്‍റണി എന്നിവർ പറഞ്ഞു.

ബാർ ജീവനക്കാരനെ മർദിച്ചു കൊലപ്പെടുത്താൻ ശ്രമിച്ച സഹപ്രവർത്തകൻ അറസ്റ്റിൽ

കൊല്ലം: മുൻ വൈരാഗ്യത്തെ തുടർന്നു ബാർ ജീവനക്കാരനെ മർദിച്ചു കൊലപ്പെടുത്താൻ ശ്രമിച്ച കേസിൽ സഹപ്രവർത്തകൻ അറസ്റ്റിൽ. കൊല്ലം ആശ്രാമം പുളിമൂട്ടിൽ ഹൗസിൽ അനീഷ് എന്ന് വിളിക്കുന്ന നിതിനെ (37) യാണ് വെസ്റ്റ് പോലീസ് അറസ്റ്റ് ചെയ്തത്. കോട്ടയം കോരുത്തോട് കല്ലൂരത്ത് വീട്ടിൽ സാബു എന്നു വിളിക്കുന്ന കെ.വി. മാത്യുവിനാണ് (50) മർദനമേറ്റത്. ഇരുവരും കളക്ടറേറ്റിനു സമീപത്തെ ബാറിലെ ജീവനക്കാരാണ്. ഈ മാസം ആറിന് രാത്രി 11.30 ന് ബാറിൽ വച്ചായിരുന്നു ആക്രമം. പ്രതി മാത്യുവിനെ ക്രൂരമായി മർച്ചിച്ച ശേഷം തള്ളിയിട്ട് കൊലപ്പെടുത്താൻ ശ്രമിച്ചു എന്നാണ് കേസ്. പുറമേ പരിക്കുകൾ ഒന്നും ഇല്ലാതിരുന്ന മാത്യുവിനെ ശാരീരിക അസ്വസ്ഥതകൾ അനുഭവപ്പെട്ടതിനെ തുടർന്ന് 12ന് ഉച്ചകഴിഞ്ഞ് ബാറിലെ ജീവനക്കാർ നഗരത്തിലെ സ്വകാര്യ ആശുപത്രിയിൽ പ്രവേശിപ്പിച്ചു. പരിശോധനയിൽ തലയിൽ രക്തം കട്ടപിടിച്ചു കിടക്കുന്നതായി ബോധ്യപ്പെട്ടു. തുടർന്ന് ഇയാളെ തിരുവനന്തപുരം മെഡിക്കൽ കോളജ് ആശുപത്രിയിൽ എത്തിക്കുകയായിരുന്നു. ഇക്കാര്യം 12 നാണ് ബാറിലെ ജീവനക്കാർ മാത്യുവിന്‍റെ വീട്ടുകാരെ അറിയിച്ചത്. പിന്നീട് മാത്യുവിന്‍റെ ജ്യേഷ്ഠ സഹോദരൻ സിജോ എത്തിയാണ് വെസ്റ്റ് പോലീസ് സ്റ്റേഷനിൽ പരാതി നൽകിയത്. മാത്യു ഇപ്പോൾ തിരുവനന്തപുരം മെഡിക്കൽ കോളജ് ആശുപത്രിയിൽ പോസ്റ്റ് ഓപ്പറേറ്റീവ് വാർഡിൽ ചികിത്സയിലാണ്. ആശുപത്രിയിൽ വച്ച് തെന്നി വീണ് പരിക്കേറ്റു എന്നാണ് ബാർ ജീവനക്കാർ ആദ്യം ഇയാളുടെ ബന്ധുക്കളെ അറിയിച്ചത്. മാത്യുവിന്‍റെ പരിക്ക് ഗുരുതരമാണെന്ന് പോലീസ് പറഞ്ഞു. ഇയാളുടെ ശരീരത്തിന്‍റെ ഒരു ഭാഗത്തിന് ചലനശേഷിയില്ലാത്ത അവസ്ഥയാണ്.വെസ്റ്റ് സിഐ ആർ. ഫയാസ്, എസ്ഐ അൻസർ ഖാൻ, സീനിയർ സിവിൽ പോലീസ് ഓഫീസർമാരായ ദീപുദാസ്, സുജിത്ത് എന്നിവരടങ്ങിയ സംഘമാണ് പ്രതിയെ അറസ്റ്റ് ചെയ്തത്. ഇയാളെ കോടതിയിൽ ഹാജരാക്കി റിമാൻഡ് ചെയ്തു.

എംഎസ്‌സി എൽസ-3 കപ്പൽ ഉയർത്താനുള്ള ദൗത്യം ദുഷ്കരം

കൊല്ലം: കൊച്ചി തീരത്തിനടുത്ത് മുങ്ങിയ എംഎസ്‌സി എൽസ -3 കപ്പൽ ഉയർത്താനും അതിലെ വസ്തുക്കൾ കണ്ടെടുക്കാനുമുള്ള ദൗത്യം ദുഷ്കരം. ഒരു മാസം മുമ്പ് ആരംഭിച്ച ദൗത്യം അധികം മുന്നോട്ട് കൊണ്ടുപോകാനാവാതെ സംഘം നാലാം തവണയും മടങ്ങി. കൊല്ലം തുറമുഖത്തുനിന്ന് രണ്ടു കപ്പലുകളിലായി ഉൾകടലിലേക്കു പുറപ്പെട്ട സംഘമാണ് ഇന്നലെ വീണ്ടും മടങ്ങിയെത്തിയത്. ഉൾകടൽ പ്രക്ഷുബ്ദമായി തുടരുന്നതിനാൽ കാര്യമായ പ്രവർത്തനം സാധ്യമാകുന്നില്ലെന്നാണ് വിലയിരുത്തൽ. അതേസമയം വെള്ളവും ഡീസലുമടക്കം സമാഹരിക്കാനാണ് കപ്പലുകൾ എത്തിയതെന്നും അധികം വൈകാതെ അവർ കടലിലേക്ക് മടങ്ങുമെന്ന് കൊല്ലം തുറമുഖ അധികൃതർ പറഞ്ഞു.ഇനി എന്ന് അവർ വീണ്ടും കടലിലേക്ക് പോകുമെന്നത് സംബന്ധിച്ചു തീരുമാനമായില്ല. 105 അംഗങ്ങളാണ് സാൽവേജ് സംഘത്തിലുള്ളത്.

ബിഷപ്പ് ജെറോം ഇൻസ്റ്റിറ്റ്യൂട്ടിൽ ഐഇഡിസി കോൺക്ലേവ്

കൊല്ലം: ബിഷപ് ജെറോം ഇൻസ്റ്റിറ്റ്യൂട്ടിലെ ഐഇഡിസി സെൽ സംഘടിപ്പിക്കുന്ന ഐഇഡിസി സ്റ്റാർട്ടപ്പ് ആൻഡ് ഇന്നോവേഷൻ കോൺക്ലേവ് 2025 ബിഷപ് ജെറോം ഇൻസ്റ്റിറ്റ്യൂട്ട് കാമ്പസിൽ 20ന് രാവിലെ ഒന്പതിന് ആരംഭിച്ച് വൈകുന്നേരം നാലിനു സമാപിക്കുമെന്നു ഭാരവാഹികൾ പത്രസമ്മേളനത്തിൽ അറിയിച്ചു. കാമ്പസിൽ ഉരുത്തിരിയുന്ന ആശയങ്ങളെ ആഗോള തലത്തിലേക്ക് ഉയർത്തിക്കൊണ്ട് വരിക എന്നപ്രമേയത്തിലൂന്നിയാണ് കോൺക്ലേവ് സംഘടിപ്പിക്കപ്പെടുന്നത്.മുഖ്യ പ്രഭാഷണങ്ങൾ, സംവാദങ്ങൾ, വിജയകരമായ സ്റ്റാർട്ടപ്പ് സ്ഥാപകരുടെ അനുഭവ വിവരണങ്ങൾ എന്നിവയാണ് പരിപാടിയുടെ മുഖ്യആകർഷണം. കേരള സ്റ്റാർട്ടപ്പ് മിഷൻ അസി.മാനേജർ കൃഷ്‌ണകുമാർ എം. കോൺക്ലേവ് ഉദ്‌ഘാടനം ചെയ്യും. ജോയി സെബാസ്റ്റ്യൻ, എൽ.എസ്. ശ്രീക്കുട്ടൻ, എസ്. അനന്തു എന്നിവർ പ്രഭാഷണം നടത്തും. ട്രൈ ഇ വി ഡയറക്‌ടറും ടെക്നോളജി ചീഫ് ഓഫീസറുമായ ഡോ. എം.എ.എസ്. സെന്തിൽ ശരവണൻ ആണ് ചർച്ചകളുടെ മോഡറേറ്റർ. കേരളത്തിലെ സ്റ്റാർട്ടപ്പ് രംഗത്തെയുവസംരംഭകരായ അതുൽ മോഹൻ, അശ്വിൻ പി.കുമാർ ,നവദീപ് സതീഷ് , മുഹമ്മദ് റൈഹാൽ പി. ജോയൽ എറ്റെസ് അരുൺ , നന്ദു എസ്. നായർ തുടങ്ങിവയവർ പങ്കെടുക്കും. പത്രസമ്മേളനത്തിൽ കോളജ് പ്രിൻസിപ്പൽ ഡോ.എ.ആർ.അനിൽ, ഐഇഡിസി കോ-ഓർഡിനേറ്റർ പ്രഫ. നെവിൻ നെൽസൺ, അക്കാഡമിക് കോ-ഓർഡിനേറ്റർ പ്രഫ. എസ്. റോയി, പിആർഒ. ബിബി ഫിലിപ്പ് തുടങ്ങിയവർ പങ്കെടുത്തു.

തിരുമുക്കിലെ അശാസ്ത്രീയ അടിപ്പാത: ഹർത്താലും മനുഷ്യച്ചങ്ങലയും ഇന്ന്

ചാത്തന്നൂർ : തിരുമുക്കിലെ അശാസ്ത്രീയ അടിപ്പാത വലിയ വാഹനങ്ങൾക്ക് കടന്നുപോകുവാൻ കഴിയുന്ന തരത്തിൽ പുനർ നിർമിക്കണമെന്ന് ആവശ്യപ്പെട്ട് തിരുമുക്ക് അടിപ്പാത സമരസമിതി നേതൃത്വത്തിൽ സംഘടിപ്പിച്ചിട്ടുള്ള ഹർത്താലും മനുഷ്യച്ചങ്ങലയും ഇന്ന് നടക്കും. ഉച്ചയ്ക്ക് ഒന്നു മുതൽ ചാത്തന്നൂർ നെടുങ്ങോലം പരവൂർ മേഖലകളിലെ കടകമ്പോളങ്ങൾ അടച്ച് ഹർത്താൽ ആചരിക്കുവാൻ വ്യാപാരി വ്യവസായി സംഘടനകൾ ആഹ്വാനം ചെയ്തിട്ടുണ്ട്. വൈകുന്നേരം അഞ്ചിന് തിരുമുക്ക് മുതൽ ചാത്തന്നൂർ വരെയാണ് മനുഷ്യചങ്ങല തീർക്കുന്നത്. ജനപ്രതിനിധികൾ, രാഷ്‌ട്രീയ സാമൂഹ്യ സാംസ്കാരിക സംഘടനാ പ്രവർത്തകർ, വ്യാപാരി വ്യവസായികൾ, കുടുംബശ്രീ പ്രവർത്തകർ, യുവജന വിദ്യാർഥി, മഹിളാസംഘടനകൾ, പൊതുജനങ്ങൾ, തുടങ്ങിയവരെല്ലാം ചങ്ങലയിൽ കണ്ണികളാകും. തുടർന്ന് തിരുമുക്കിൽ നടക്കുന്നസർവകക്ഷി പൊതുയോഗത്തിൽ പരവൂർ മുനിസിപ്പൽ ചെയർപേഴ്സൺ പി.ശ്രീജ, കൊല്ലം ജില്ലാ പഞ്ചായത്ത് വൈസ് പ്രസിഡന്‍റ് ശ്രീജാ ഹരീഷ്,ഇത്തിക്കര ബ്ലോക്ക് പഞ്ചായത്ത് പ്രസിഡന്‍റ് എം.കെ.ശ്രീകുമാർ , ചാത്തന്നൂർ പഞ്ചായത്ത് പ്രസിഡന്‍റ് എസ്.കെ.ചന്ദ്രകുമാർ, സി പി എം ജില്ലാ സെക്രട്ടറിയേറ്റ് അംഗം കെ.സേതുമാധവൻ, സിപിഐ മണ്ഡലം സെക്രട്ടറി അഡ്വ.ആർ.ദിലീപ് കുമാർ, കെപിസിസി മെമ്പർ നെടുങ്ങോലം രഘു , സിപിഎം ചാത്തന്നൂർ ഏരിയാ സെക്രട്ടറി പി.വി.സത്യൻ, ബിജെപി സഹകരണ സെൽ ജില്ലാ പ്രസിഡന്‍റ് എസ്.വി.അനിത്ത് കുമാർ ,ആർഎസ്പി മണ്ഡലം കമ്മിറ്റി സെക്രട്ടറി ഷാലു .വി .ദാസ് പരവൂർ നഗരസഭാ സ്റ്റാൻഡിംഗ് കമ്മിറ്റി ചെയർമാൻ എസ്.ശ്രീലാൽ ,കോൺഗ്രസ് മണ്ഡലം കമ്മിറ്റി പ്രസിഡന്‍റ് ഇക്ബാൽ, സിപിഎം ചാത്തന്നൂർ ലോക്കൽ കമ്മിറ്റി സെക്രട്ടറി ടി.ദിജു,വ്യാപാരി വ്യവസായി ഏകോപന സമിതി നേതാക്കളായ ബി. പ്രേമാനന്ദ് ,ശശിധരൻ ,വ്യാപാരി വ്യവസായി സമിതി പ്രസിഡന്‍റ് ജയചന്ദ്രൻ തുടങ്ങിയവർ പങ്കെടുത്തു പ്രസംഗിക്കും. നിവേദനങ്ങൾ സമർപ്പിച്ചിട്ടും ബന്ധപ്പെട്ട അധികാരികളുമായി ചർച്ചകൾ നടന്നിട്ടും തിരുമുക്കിലെ അശാസ്ത്രിയ അടിപ്പാത സംബന്ധിച്ച് ഇതുവരെയും ദേശീയ പാത അഥോറിട്ടി കണ്ണ് തുറന്ന് ജനങ്ങൾക്ക് അനുകൂലമായ ഒരു തീരുമാനം ഉണ്ടാക്കാൻ തയ്യാറായിട്ടില്ല. ഹൈക്കോടതിയിൽ നിരവധി കേസുകൾ നിലനിൽക്കുകയും ചെയ്യുന്നുണ്ട്. ഈ സാഹചര്യത്തിൽ സമരം കൂടുതൽ ശക്തമാക്കുന്നതി െന്‍റ ഭാഗമായി അടുത്ത ദിവസം മുതൽ തിരുമുക്കിൽ റിലേ സത്യാഗ്രഹം ആരംഭിക്കുമെന്ന് തിരുമുക്ക് അടിപ്പാത സമരസമിതി ഭാരവാഹികൾ അറിയിച്ചു.

പോലീസ് മെഡൽ ജേതാവിനെ ആദരിച്ചു

കൊട്ടിയം : കൊട്ടിയം നിത്യസഹായമാതാ ദേവാലയത്തിൽ നടന്ന വേളാങ്കണ്ണി മാതാവി െ ന്‍റ തിരുനാൾ സമാപനത്തോട് അനുബന്ധിച്ച് ചേർന്ന ചടങ്ങിൽ മുഖ്യമന്ത്രിയുടെ പോലീസ് മെഡലിന് അർഹനായ വൈ.സാബുവിനെ ഇടവക ആദരിച്ചു. കൊല്ലം സിറ്റി ഹെഡ് ക്വാർട്ടറിലെ യൂണിറ്റ് സെക്രട്ടറിയും കൊട്ടിയം എൻ എസ് എം ജി എച്ച് എസി ലെ എസ് പി സി ഡ്രിൽ ഇൻസ്‌ട്രക്ടറുമാണ് ഇടവക അംഗമായ വൈ.സാബു. ഇടവക വികാരി ടോമി കമൻസി െ ന്‍റ നേതൃത്വത്തിൽ നടന്ന ചടങ്ങിൽ ഇടവക ജനങ്ങൾ അദ്ദേഹത്തിന് ആദരവ് അർപ്പിച്ചു. സഹവികാരി റോബിൻ ടൈറ്റസ്, ഫാ. ആഷ്ലിൻ ആൻധ്രു, ഫാ.ജിൻസൺ ഗ്രിഗറി, കൺവീനർ ഷാജി ബാബു, ടെസി അജിത്ത് എന്നിവരും ചടങ്ങിൽ പങ്കെടുത്തു. ഇടവക അംഗത്തിന്‍റെ ഈ നേട്ടം എല്ലാവർക്കും അഭിമാനകരമാണെന്ന് ഫാ. ടോമിൻ കമൻസ് പറഞ്ഞു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]