ADVERTISEMENT

ADVERTISEMENT

രക്തസാക്ഷി അനുസ്മരണം

കട്ടപ്പന: കൂത്തുപറമ്പ് രക്തസാക്ഷി അനുസ്മരണ റാലിയും യോഗവും നടത്തി. മിനി സ്റ്റേഡിയത്തില്‍ നടന്ന ദിനാചരണം കര്‍ഷക സംഘം ജില്ലാ സെക്രട്ടറി റോമിയോ സെബാസ്റ്റ്യന്‍ ഉദ്ഘാടനം ചെയ്തു. ഡിവൈഎഫ്‌ഐ ബ്ലോക്ക് പ്രസിഡന്‍റ് ശ്രീജിത്ത് രാജേന്ദ്രന്‍, ഫൈസല്‍ ജാഫര്‍, ജോ. സെക്രട്ടറി ജനീഷ രാജന്‍, നിയാസ് അബു, ജോബി ഏബ്രഹാം, ലിജോ ജോസ്, ഷിനു ജോണ്‍സണ്‍, ദിവ്യേഷ് രാജന്‍ എന്നിവര്‍ പ്രസംഗിച്ചു.

ADVERTISEMENT

രാജകുമാരി കുടുംബാരോഗ്യ കേന്ദ്രത്തിന്‍റെ പുതിയ ബ്ലോക്ക് തുറന്നു

രാജകുമാരി: രാജകുമാരി കുടുംബാരോഗ്യ കേന്ദ്രത്തിൽ നിർമിച്ച പുതിയ ബ്ലോക്കിന്‍റെയും ജില്ലാ പഞ്ചായത്ത് ഫണ്ട് ഉപയോഗിച്ച് നിർമിച്ച ടോയ്‌ലറ്റിന്‍റെയും ഉദ്ഘാടനം എം.എം. മണി നിർവഹിച്ചു. എംഎൽഎ യുടെ പ്രാദേശിക വികസന ഫണ്ടിൽനിന്ന് 70 ലക്ഷം രൂപ മുടക്കിയാണ് ബ്ലോക്ക് നിർമാണം പൂർത്തിയാക്കിയത്. 2021-22 വർഷത്തിൽ 40 ലക്ഷം രൂപയും, 2024-25ൽ 30 ലക്ഷവും മുടക്കിയാണ് നിലവിലുള്ള ആശുപത്രി കെട്ടിടത്തിന്‍റെ മുകൾനിലയിൽ 3300 ചതുരശ്ര അടിയിൽ റാമ്പോടുകൂടിയ ബ്ലോക്ക് നിർമിച്ചത്. ഇതിന്‍റെ ഭാഗമായി നിർമിച്ച വെയിറ്റിംഗ് ഷെഡിന്‍റെ ഉദ്ഘാടനവും നടന്നു. ജില്ലാ പഞ്ചായത്ത്, ടോയ്‌ലറ്റ് കോംപ്ലക്സിനായി 21 ലക്ഷം രൂപയാണ് അനുവദിച്ചത്. 1974ൽ ഡിസ്പെൻസറിയായി വാടകക്കെട്ടിടത്തിൽ ആരംഭിച്ച ആരോഗ്യകേന്ദ്രം 2020ലാണ് കുടുംബാരോഗ്യ കേന്ദ്രമായി ഉയർത്തിയത്. ഇപ്പോൾ മൂന്നു ഡോക്ടർമാരുടെ സേവനം ലഭിക്കുന്ന ആരോഗ്യ കേന്ദ്രത്തിൽ എല്ലാ വിഭാഗത്തിലും ജീവനക്കാരുമുണ്ട്. ഗ്രാമ പഞ്ചായത്ത് പ്രസിഡന്‍റ് സുമ ബിജു ചടങ്ങിൽ അധ്യക്ഷത വഹിച്ചു. മെഡിക്കൽ ഓഫീസർ ഡോ. ലിൻഡാ സാറാ കുര്യൻ, സംഘാടകസമിതി കൺവീനർ എം.എൻ. ഹരിക്കുട്ടൻ, പഞ്ചായത്ത് വൈസ് പ്രസിഡന്‍റ് അജേഷ് മുകളേൽ എന്നിവർ പ്രസംഗിച്ചു. റാങ്ക് ജേതാക്കളേയും എസ്‌എസ്‌എൽ സി, പ്ലസ് ടു പരീക്ഷകളിൽ ഫുൾ എ പ്ലസ് നേടിയ കുട്ടികളെയും ചടങ്ങിൽആദരിച്ചു.

കിഴുകാനം കാട്ടിറച്ചിക്കേസ് - പോലീസ് നൽകിയ കുറ്റപത്രം കോടതി സ്വീകരിച്ചു

ഉപ്പുതറ: കാട്ടിറച്ചി കടത്തിയെന്നാരോപിച്ച് ആദിവാസി യുവാവിനെ കള്ളക്കേസിൽ കുടുക്കിയെന്ന കേസിൽ പോലീസ് നൽകിയ കുറ്റപത്രം തൊടുപുഴ ജില്ലാ കോടതി ഫയലിൽ സ്വീകരിച്ചു. ഉപ്പുതറ പോലീസ് രജിസ്റ്റർ ചെയ്ത ( ക്രൈം 703/2003) കേസിൽ അന്വേഷണം പൂർത്തിയാക്കി പീരുമേട് ഡിവൈഎസ്പിയാണ് കഴിഞ്ഞ 13ന് കോടതിയിൽ കുറ്റപത്രം സമർപ്പിച്ചത്. കിഴുകാനം മുൻ സെക്‌ഷൻ ഫോറസ്റ്റർ ടി. അനിൽകുമാർ ഒന്നാം പ്രതിയും, ഇടുക്കി മുൻ വൈൽഡ് ലൈഫ് വാർഡൻ (ഡിഎഫ്ഒ) ബി. രാഹുൽ 11-ാം പ്രതിയായുമാണ് പോലീസ് കുറ്റപത്രം നൽകിയത്. അന്വേഷണം നടക്കുന്നതിനിടെ മരിച്ച വനം വകുപ്പ് വാച്ചർ ഭാസ്കരൻ ഒൻപതാം പ്രതിയായി പട്ടികയിലുണ്ട്. ഐപിസിയിൽ 15 ഉം, പട്ടികജാതി - പട്ടിക വർഗ പീഡന നിരോധന നിയമപ്രകാരം അഞ്ചും വകുപ്പുകൾ ചേർത്താണ് പോലീസ് കുറ്റപത്രം തയാറാക്കിയത്. 2022 സെപ്റ്റംബർ 20നാണ് കേസിന് ആസ്പദമായ സംഭവം ഉണ്ടായത്. സരുണിന്‍റെ ഓട്ടോറിക്ഷയിൽനിന്ന് കാട്ടിറച്ചി പിടിച്ചെന്നായിരുന്നു ഉദ്യോഗസ്ഥരുടെ വാദം. സ്ഥലത്തില്ലാതിരുന്ന സരുണിനെ വിളിച്ചു വരുത്തിയാണ് ഉദ്യോഗസ്ഥർ അറസ്റ്റ് ചെയ്തത്. ദേഹോപദ്രവം ഏൽപ്പിക്കുകയും ഓട്ടോറിക്ഷ പിടിച്ചെടുക്കുകയും ചെയ്തിരുന്നു. 10 ദിവസത്തിനുശേഷം ജയിലിൽനിന്ന്പുറത്തിറങ്ങിയ സരുൺ കേരള ഉള്ളാട മഹാസഭയുടെ സഹായത്തോടെ വനം വകുപ്പ് ഉദ്യോഗസ്ഥർക്കെതിരേ നിയമ പോരാട്ടം തുടങ്ങി. അന്വേഷണം ആവശ്യപ്പെട്ട് കിഴുക്കാനം ഫോറസ്റ്റ് ഓഫിസിനുമുന്നിൽ സരുണും കുടുംബവും സമരം ചെയ്യുകയും വനം വകുപ്പ് ഓഫീസിനു മുന്നിലെ മരത്തിനു മുകളിൽ കയറി ആത്മഹത്യാ ഭീഷണി മുഴക്കുകയും ചെയ്തു. സംഭവത്തിൽ ഗോത്രവർഗ കമ്മീഷനും മനുഷ്യാവകാശ കമ്മീഷനും ഇടപെട്ടു. വിജിലൻസ് ആൻഡ് ഫോറസ്റ്റ് ഇന്‍റലിജൻസ് വിഭാഗം ചീഫ് ഫോറസ്റ്റ് കൺസർവേറ്റർ നീതു ലക്ഷ്മിയെ വനം വകുപ്പ് അന്വേഷണത്തിന് ചുമതലപ്പെടുത്തി. ഇവരുടെ അന്വേഷണത്തിൽ സരുണിനെതിരേയുള്ള കേസ് കെട്ടിച്ചമച്ചതാണെന്ന് കണ്ടെത്തി. സംഭവം ആദിവാസികൾക്കിടയിൽ വനം വകുപ്പിന് അവമതിപ്പുണ്ടാക്കിയെന്നും അവർ റിപ്പോർട്ട് നൽകി. ഇതോടെ ഡിഎഫ്ഒ ഉൾപ്പെടെ 13 പേരെ വനം വകുപ്പ് സസ്പെൻഡ് ചെയ്യുകയും പട്ടികജാതി- പട്ടികവർഗ പീഡന നിരോധന നിയമപ്രകാരം ഉപ്പുതറ പോലീസ് കേസെടുക്കുകയും ചെയ്തു. സുപ്രീം കോടതിയിൽനിന്ന് ജാമ്യം നേടിയ ഡിഎഫ്ഒ ഒഴികെയുള്ള 12 പേരെയും പോലീസ് അറസ്റ്റ് ചെയ്തു. അതിനിടെ വനംവകുപ്പ് പിടിച്ചെടുത്ത മാംസം കാട്ടിറച്ചിയല്ലെന്ന ശാസ്ത്രീയ പരിശോധാന ഫലം വന്നു. തുടർന്ന് സരുണിനെതിരേയെടുത്ത കേസ് വനം വകുപ്പ് പിൻവലിക്കുകയും ചെയ്തു. നീതി കിട്ടുമെന്ന് സരുൺ ഉപ്പുതറ: കോടതിയിൽനിന്ന് നീതി ലഭിക്കുമെന്ന് സരുൺ സജി പറഞ്ഞു. അടുത്ത കാലം വരെ കേസിൽനിന്ന് പിൻമാറാൻ പ്രലോഭനങ്ങളും ഭീഷണിയും ഉണ്ടായിരുന്നു. പാവപ്പെട്ട ആദിവാസികളെ കേസിൽ കുടുക്കാൻ വനം വകുപ്പ് ഉദ്യോഗസ്ഥർ ഇപ്പോഴും ശ്രമിക്കുന്നുണ്ട്. കഴിഞ്ഞ ദിവസം വാഹനം തടഞ്ഞുനിർത്തി ആദിവാസിയായ മറ്റൊരു യുവാവിന്‍റെ ഭക്ഷണപ്പൊതി ഉൾപ്പെടെ പരിശോധിച്ച സംഭവവുമുണ്ടായി. കേരള ഉള്ളാട മഹാസഭയുടെയും സൗജന്യ നിയമ സഹായം നൽകിയ അഭിഭാഷകരുടെയും പിന്തുണ തനിക്കുണ്ടെന്നും ഉദ്യോഗസ്ഥർക്ക് ശിക്ഷ ലഭിക്കുന്നതുവരെ പോരാട്ടം തുടരുമെന്നും സരുൺ പറഞ്ഞു. 10-ാം പ്രതിയെ ചെക്ക് പോസ്റ്റിൽനിന്ന് മാറ്റണം; ഉള്ളാട മഹാസഭ ഉപ്പുതറ: സരുൺ സജിയുടെ കേസിലെ പത്താം പ്രതിയായ വാച്ചറെ കിഴുകാനം ഫോറസ്റ്റ് ചെക്ക് പോസ്റ്റിൽനിന്ന് മാറ്റണമെന്ന് കേരള ഉള്ളാട മഹാസഭ ആവശ്യപ്പെട്ടു. സസ്പെൻഷനുശേഷം ഇവരെ ഇവിടെത്തന്നെ നിയമിച്ചത് സാക്ഷികളെ സ്വാധീനിക്കാനാണെന്നും അടിയന്തരമായി ഇവരെ സ്ഥലം മാറ്റണമെന്നും കേരള ഉള്ളാട മഹാസഭ സംസ്ഥാന അസി. സെക്രട്ടറി എൻ.ആർ. മോഹനൻ ആവശ്യപ്പെട്ടു.

ജില്ലാ ഭരണസിരാകേന്ദ്രത്തിനു മുന്നിലും കെഎസ്ഇബിയുടെ അനാസ്ഥ

ചെറുതോണി: ജില്ലാ ഭരണസിരാ കേന്ദ്രത്തിനു മുന്നിൽപോലും കെഎസ്ഇബിയുടെ അനാസ്ഥ വെളിവാകുന്നു. കളക്‌ടറേറ്റിന് മുന്നിലെ ത്രീ ഫെയ്സ് വൈദ്യുതി ക്കമ്പിക്കിടയിലൂടെ വളർന്നുനിൽക്കുന്ന മുളകൾ മുറിച്ചു മാറ്റാൻപോലും നടപടിയില്ല. അടുത്തടുത്ത് രണ്ടിടത്തായി ഇത്തരത്തിൽ മുളകൾ വളർന്നുനിന്നിട്ടും പതിവായി ഇവിടെയെത്തുന്ന വൈദ്യുതിവകുപ്പ് ജീവനക്കാർ കണ്ടതായിപ്പോലും നടിക്കുന്നില്ലത്രെ. വൈദ്യുതി വകുപ്പിലെ ജില്ലയിലെ ഉയർന്ന ഉദ്യോഗസ്ഥൻ മുതൽ ഏറ്റവും താഴെതട്ടിലെ ജീവനക്കാരൻ വരെ മാസം പല പ്രാവശ്യം കളക്‌ടറേറ്റിലെത്താറുള്ളതാണ്. ആർക്കെങ്കിലും അപകടമുണ്ടായാൽ മാത്രമേ കെഎസ്ഇബി ഉണരുകയുള്ളുവെന്നാണ് പൊതുജനങ്ങളുടെ ആക്ഷേപം. മുളകൾ വളർന്നുനിൽക്കുന്നതിനടുത്ത് ജില്ലാ ഇൻഫർമേഷൻ ഓഫീസിനോടുചേർന്ന് രണ്ട് വൈദ്യുതിത്തൂണുകളിൽ സ്റ്റേ വയറിലൂടെ കാട്ടുവള്ളികൾ വളർന്ന് വൈദ്യുതിക്കമ്പിയിലെത്തിയിട്ടും വെട്ടി മാറ്റാൻ തയാറാകാത്തതും കെഎസ്ഇബി യുടെ അനാസ്ഥ വ്യക്തമാക്കുന്നതാണ്.

വിനോദ യാത്രാ സംഘം സഞ്ചരിച്ച ജീപ്പ് മറിഞ്ഞ് തമിഴ്നാട് സ്വദേശി മരിച്ചു

മൂന്നാർ: വിനോദയാത്രാ സംഘം സഞ്ചരിച്ച ജീപ്പ് മറിഞ്ഞ് തമിഴ്നാട് സ്വദേശി മരിച്ചു. ചെന്നൈ ഊരന്പാക്കം സ്വദേശി പ്രകാശൻ (58) ആണ് മരിച്ചത്. ഡ്രൈവർ അടക്കം 12 പേരാണ് വാഹനത്തിൽ ഉണ്ടായിരുന്നത്. കോയന്പേട് സ്വദേശികളായ മണിരത്നം (33), പ്രീതി (25), തേൻമൊഴി (53), ചെല്ലം (45), കാവേരി (27), സതീഷ് (32), ശിവപ്രിയ (30), ഊരന്പാക്കം സ്വദേശികളായ ദിയ (51), വരലക്ഷ്മി (47) എന്നിവർക്ക് ഗുരുതരമായി പരിക്കേറ്റു. ഇവരെ കൂടാതെ ഒരു കുട്ടിയും വാഹനത്തിൽ ഉണ്ടായിരുന്നു. പരിക്കേറ്റവരെ തമിഴ്നാട് തേനി മെഡിക്കൽ കോളജിലും മറ്റിടങ്ങളിലെ ആശുപത്രികളിലും പ്രവേശിപ്പിച്ചു. ആത്തുകാട് സ്വദേശിയായ അശ്വിനാണ് വാഹനം ഓടിച്ചിരുന്നത്. കഴിഞ്ഞ ദിവസം രാവിലെ 10ന് മൂന്നാറിലെ പോതമേടിൽനിന്ന് ആത്തുക്കാട് പോകുന്ന വഴിയിൽ ടീവാലി ജംഗ്ഷനു സമീപമാണ് അപകടം ഉണ്ടായത്. കയറ്റം കയറിവരുന്നതിനിടെ വളവു തിരിക്കുന്നതിയായി പിന്നോട്ട് എടുക്കവേ വാഹനത്തിന്‍റെ നിയന്ത്രണം നഷ്ടമായി അമിതവേഗത്തിൽ പിന്നോട്ടുവന്ന ജീപ്പ് തേയിലത്തോട്ടത്തിലേക്ക് മറിയുകയായിരുന്നു. അന്പതടിയോളം താഴ്ചയിലേക്ക് മറിഞ്ഞ വാഹനം നിരവധി തവണ കരണം മറിഞ്ഞ ശേഷമാണ് നിന്നത്. ജീപ്പ് പൂർണമായും തകർന്നു. മൂന്നാർ സന്ദർശനത്തിനായി കഴിഞ്ഞ ദിവസമാണ് രണ്ടു കുടുംബങ്ങളിലുള്ള ചെന്നൈ സ്വദേശികൾ മൂന്നാറിൽ എത്തിയത്. പോതമേടിന് അടുത്തുള്ള റിസോർട്ടിലായിരുന്നു താമസം. രാവിലെ മൂന്നാറിലുള്ള വിനോദ സഞ്ചാര കേന്ദ്രങ്ങൾ സന്ദർശിക്കാൻ ടാക്സി വിളിച്ച ജീപ്പാണ് അപകടത്തിൽ പ്പെട്ടത്. തേയിലത്തോട്ടത്തിലെ തൊഴിലാളികളും നാട്ടുകാരും ചേർന്നാണ് പരിക്കേറ്റവരെ റോഡിൽ എത്തിച്ച് വിവിധ വാഹനങ്ങളിലായി മൂന്നാറിലെ സ്വകാര്യ ആശുപത്രിയിൽ എത്തിച്ചത്. അവിടെ നിന്നുമാണ് മറ്റിടങ്ങളിലേക്കു മാറ്റിയത്.

സീതയുടെ മരണം നെഞ്ചിലും കഴുത്തിലും ഏറ്റ പരുക്കുകൾ മൂലമെന്ന് പോസ്റ്റുമോർട്ടം റിപ്പോർട്ട്

പീരുമേട്: തോട്ടാപ്പുരയിലെ ആദിവാസി സ്ത്രീ സീത(42)യുടെ മരണം നെഞ്ചിലും കഴുത്തിലും ഏറ്റ പരിക്കുകൾ മൂലമെന്ന് പോസ്റ്റുമോർട്ടം റിപ്പോർട്ട്. ഒരു ഡസനിലധികം പരിക്കുകൾ സീതയുടെ ശരീരത്തിൽ കാണപ്പെട്ടതായി റിപ്പോർട്ടിൽ പറയുന്നു. പോസ്റ്റുമോർട്ടം റിപ്പോർട്ട് വിശദമായി പഠിച്ചശേഷം തുടർ അന്വേഷണത്തിലേക്കു കടക്കാനാണ് പോലീസിന്‍റെ തീരുമാനം. സീതയുടെ നാഭിക്കു തൊഴിയേറ്റതിന്‍റെ പരിക്കും തലയുടെ രണ്ടു വശങ്ങളും പരുക്കൻ പ്രതലത്തിൽ ഇടിച്ചതിന്‍റെ ലക്ഷണങ്ങളും ഉണ്ട്. മുഖത്ത് അടിയേറ്റിട്ടുണ്ട്. ഇടതു - വലതു വശത്തെ വാരിയല്ലുകളിൽ പൊട്ടലുകളുണ്ട്. ഇവയിൽ ചിലതു ശ്വാസകോശത്തിലേക്കു തുളഞ്ഞു കയറി. ഇത്തരം കണ്ടെത്തലുകളും റിപ്പോർട്ടിലുണ്ട്. കഴിഞ്ഞ 13ന് ശബരിമല വനമേഖലയുടെ ഭാഗമായ മീൻമുട്ടിയിൽവച്ചാണ് സീതക്കു പരിക്കേറ്റത്. ഭർത്താവിനോടും രണ്ടു മക്കളോടും ഒപ്പം വനവിഭവങ്ങൾ ശേഖരിക്കാൻ പോയപ്പോൾ കാട്ടാന തുമ്പിക്കൈകൊണ്ട് എടുത്തെറിഞ്ഞെന്നാണ് ഭർത്താവ് ബിനു പോലീസിനോടു പറഞ്ഞത്. പരിക്കേറ്റ സീതയെ പീരുമേട് താലൂക്ക് ആശുപത്രി എത്തിക്കുകയായിരുന്നു. പോസ്റ്റുമോർട്ടത്തിനു പിന്നാലെ സീതയുടെ ശരീരത്തിൽ കാണപ്പെട്ട പരിക്കുകളിൽ സംശയമുണ്ടെന്ന് ഫോറൻസിക് സർജൻ ഡോ. ആദർശ് രാധാകൃഷ്ണൻ പോലീസ്, വനം വകുപ്പ് ഉദ്യോഗസ്ഥരെ അറിയിച്ചിരുന്നു. കേസിൽ ബിനുവിന്‍റെയും മക്കളുടെയും മൊഴികൾ രണ്ടു തവണ പോലീസ് ശേഖരിച്ചിട്ടുണ്ട്. എന്നാൽ, അന്വേഷണത്തെ ബാധിക്കുമെന്നതിനാൽ ഇപ്പോൾ ഒന്നും പറയാനില്ലെന്ന നിലപാടിലാണ് പോലീസ്.

മൈലക്കൊന്പ് പള്ളിയിൽ ദുക്റാന തിരുനാൾ നാളെ

മൈലക്കൊന്പ്: കിഴക്കിന്‍റെ തീർഥാടന കേന്ദ്രമായ മൈലക്കൊന്പ് സെന്‍റ് തോമസ് ഫൊറോനപള്ളിയിൽ ദുക്റാന തിരുനാൾ നാളെ ആഘോഷിക്കും. ഇന്നു രാവിലെ ആറിന് വിശുദ്ധകുർബാന, നൊവേന, ദിവ്യകാരുണ്യ ആശിർവാദം. ഏഴിന് വിശുദ്ധകുർബാന. വൈകുന്നേരം അഞ്ചിന് ലദീഞ്ഞ്, നൊവേന. 5.15ന് തിരുനാൾ കുർബാന-ഫാ.ജോസ് കൂനാനിക്കൽ. സന്ദേശം-ഫാ. ജെയിൻ കോക്കാപ്പിള്ളിൽ. ഏഴിന് തിരിപ്രദക്ഷിണം. ദുക്റാന തിരുനാൾ ദിനമായ നാളെ രാവിലെ ആറിനും 7.15നും 8.30നും വിശുദ്ധകുർബാന. പത്തിന് തിരുനാൾ കുർബാന-ഫാ. ജയിംസ് പറയ്ക്കനാൽ. സന്ദേശം-ഫാ. മാത്യു പുത്തൻകുളം. 12ന് പ്രദക്ഷിണം. ഒന്നിന് ഊട്ടുനേർച്ച വെഞ്ചരിപ്പ് എന്നിവയാണ് പരിപാടികളെന്നു വികാരി ഫാ. മാത്യൂസ് മാളിയേക്കൽ, അസി. വികാരി ഫാ. ജോസഫ് കുന്നുംപുറത്ത് എന്നിവർ അറിയിച്ചു.

കാട്ടാനയിൽനിന്ന് വ്യാപാരി രക്ഷപ്പെട്ടത് തലനാരിഴയ്ക്ക്

തൊടുപുഴ: കാട്ടാനയുടെ മുന്നിൽപ്പെട്ട വ്യാപാരി അദ്ഭുതകരമായി രക്ഷപ്പെട്ടു. മുങ്ങരിങ്ങാട് കൂറ്റപ്പിള്ളിൽ ജോയിയാണ് ആനയുടെ മുന്നിൽനിന്ന് തലനാരിഴയ്ക്കു രക്ഷപ്പെട്ടത്. ഇന്നലെ പുലർച്ചെ അഞ്ചോടെയായിരുന്നു സംഭവം. വലിയ കണ്ടംചാലിൽ ബേക്കറിയും ചായക്കടയും നടത്തുന്ന ജോയി കടയിലേക്കു പോകാനായി വീട്ടിൽനിന്ന് ബൈക്കിൽ വരുന്നതിനിടെ കാട്ടാന തൊട്ടടുത്ത പുരയിടത്തിൽനിന്ന് റോഡിലേക്ക് ഇറങ്ങുകയായിരുന്നു. ഒരു ആന മാത്രമാണ് ഉണ്ടായിരുന്നത്. ആന തൊട്ടുമുന്നിലെത്തിയതോടെ ബൈക്ക് ഉപേക്ഷിച്ച് ജോയി ഓടി രക്ഷപ്പെടുകയായിരുന്നു. ആന പിന്നാലെ എത്താത്തതിനാലാണ് രക്ഷപ്പെടാനായതെന്നും ജോയി പറഞ്ഞു. മുള്ളരിങ്ങാട് മേഖലയിലെ ജനങ്ങൾ ഇപ്പോൾ അതീവ ഭീതിയോടെയാണ് കഴിയുന്നത്. മുള്ളരിങ്ങാട് അമയൽതൊട്ടിയിൽ യുവാവിനെ കാട്ടാന ആക്രമിച്ചു കൊലപ്പെടുത്തിയതിനു ശേഷമാണ് ഇവിടെ ഭീതിയും ആശങ്കയും ശക്തമായത്. മേഖലയിൽനിന്ന് കാട്ടാനകളെ തുരത്തുന്നതു നിത്യ സംഭവമായി മാറിയിരിക്കുകയാണെന്ന് നാട്ടുകാർ പറഞ്ഞു. പലപ്പോഴും കാട്ടാനകൾ തന്പടിക്കുന്നത് പാതയോരത്താണ്. എന്നാൽ ഇവിടെ വെളിച്ചമില്ലാത്തതിനാൽ ആനകളെ കാണാൻ കഴിയില്ല. അതിനാൽ അപകടം ഉണ്ടാകാൻ സാധ്യതയേറെയാണ്. റോഡിനോട് ചേർന്നുള്ള വനമേഖലയിൽ അടിക്കാടുകൾ വെട്ടിക്കളയാത്തതും അപകട സാധ്യത വർധിപ്പിക്കുന്നുണ്ട്. അമയൽതൊട്ടിയിലെ കാട്ടാന ആക്രമണത്തിനു ശേഷം ജനവാസ മേഖലയിൽ സ്ഥാപിക്കുമെന്നു പ്രഖ്യാപിച്ച വൈദ്യുതി വേലിയുടെ കാര്യത്തിലും നടപടിയൊന്നും ഉണ്ടായിട്ടില്ല. അടിയന്തരമായി ഇത്തരം കാര്യങ്ങളിൽ അധികൃതർ ഇടപെടണമെന്നാണ് പ്രദേശവാസികൾ ആവശ്യപ്പെടുന്നത്.

ആറു മാസത്തിനിടെ നിരത്തിൽ പൊലിഞ്ഞത് 62 ജീവനുകൾ

തൊടുപുഴ: ജില്ലയിൽ ഈ വർഷവും റോഡപകടങ്ങളിൽ വൻ വർധന. ജനുവരി ഒന്നു മുതൽ ജൂണ്‍ 30 വരെ ജില്ലയിൽ ചെറുതും വലുതുമായ 552 റോഡപകടങ്ങളാണ് റിപ്പോർട്ട് ചെയ്തത്. ഇന്നലെ തമിഴ്നാട് സ്വദേശികളായ വിനോദസഞ്ചാരികളുമായി ട്രക്കിംഗിനുപോയ ജീപ്പ് പോതമേട് വ്യൂ പോയിന്‍റിന് താഴ്ഭാഗത്തുവച്ച് നിയന്ത്രണംവിട്ടു മറിഞ്ഞ് തമിഴ്നാട് സ്വദേശി മരിച്ചതാണ് ഒടുവിലത്തെ സംഭവം. ആറു മാസത്തിനിടെ റോഡപകടങ്ങളിൽ മരിച്ചത് 62 പേരാണ്. ഒരു മാസം ശരാശരി 10 പേർ ജില്ലയിൽ വാഹനാപകടങ്ങളിൽ മരിക്കുന്നുണ്ടെന്നാണ് കണക്കുകൾ വ്യക്തമാക്കുന്നത്. അപകടങ്ങളിൽ 793 പേർക്കാണ് പരിക്കേറ്റത്. ഇതിൽ 53 അപകടങ്ങളിലായാണ് 61 പേർ മരിച്ചത്. ഇതിനു പുറമേ കേസെടുക്കാതെ ഒത്തുതീർപ്പിലെത്തുന്നതും നിസാര പരിക്കുകളോടെ രക്ഷപ്പെടുന്ന അപകടങ്ങളുമുണ്ട്. അപകടത്തിൽപ്പെടുന്നതിൽ ഏറെയും ഇരുചക്ര വാഹനങ്ങളാണ്. മോട്ടോർ വാഹനവകുപ്പും പോലീസും പരിശോധനകളും ബോധവത്കരണവും ശക്തമാക്കുന്പോഴും ജില്ലയിലെ റോഡുകളിൽ അപകടങ്ങളും ഇതുമൂലമുള്ള മരണനിരക്കും ഉയർന്നു നിൽക്കുകയാണ്. അമിതവേഗം, അശ്രദ്ധ എന്നിവയാണ് അപകടങ്ങൾക്കു പ്രധാന കാരണം. മലയോര പാതകളിലൂടെ വാഹനമോടിക്കുന്നതിലുള്ള പരിചയക്കുറവും അപകടങ്ങൾക്കിടയാക്കുന്നുണ്ട്. പലപ്പോഴും അപകടങ്ങൾ ക്ഷണിച്ചു വരുത്തുന്നതിലേറെയും യുവാക്കളാണ്. വളവുകളും തിരിവുകളും നിറഞ്ഞതാണു ജില്ലയിലെ റോഡുകളിൽ ഭൂരിഭാഗവും. ഇത്തരം റോഡുകളിലൂടെ അമിത വേഗത്തിൽ വാഹനമോടിക്കുന്നത് അപകടങ്ങൾക്ക് വഴിവയ്ക്കുമെന്ന് മോട്ടോർ വാഹന വകുപ്പധികൃതർ പറയുന്നു. മതിയായ വിശ്രമം ഇല്ലാതെ ഡ്രൈവർമാർ വാഹനമോടിക്കുന്നത്, ലഹരി ഉപയോഗിച്ചുള്ള ഡ്രൈവിംഗ്, രാത്രി ഹെഡ്‌ലൈറ്റ് ഡിം ചെയ്യാത്തത്, ഡ്രൈവിംഗിനിടയിലെ മൊബൈൽ ഫോണ്‍ ഉപയോഗം എന്നിവയെല്ലാം അപകടങ്ങൾക്കു വഴിതെളിക്കുന്നു. വാഹനപ്പെരുപ്പവും റോഡുകളുടെ അടിസ്ഥാന സൗകര്യങ്ങളുടെ അപര്യാപ്തതയും അപകടങ്ങൾക്കു കാരണമാകുന്നുണ്ട്. ഹൈറേഞ്ചിലെ പല റോഡുകൾക്കും ആവശ്യമായ വീതിയോ പാതയോരങ്ങളിൽ സംരക്ഷണ ഭിത്തിയോ ഇല്ല. കുണ്ടുംകുഴിയുമായി കിടക്കുന്ന റോഡുകളുടെ ശോച്യാവസ്ഥയാണ് മറ്റൊരു കാരണം. ഈർപ്പമുള്ള റോഡും, കാഴ്ച മങ്ങുന്ന വിധത്തിലുള്ള കനത്ത മഴയും മൂടൽമഞ്ഞും അപരിചിതമായ റോഡുകളിലെ കുഴികളും മഴക്കാലത്ത് അപകടസാധ്യത വർധിപ്പിക്കുന്നു. മഴയിലും കാറ്റിലും വാഹനങ്ങൾക്കു മുകളിലേക്ക് മരം ഒടിഞ്ഞുവീണും ജില്ലയിൽ അപകടങ്ങൾ ഉണ്ടാകാറുണ്ട്.

തിന്മയുടെ അടിമത്തം വിജയം ഇല്ലാതാക്കും: മാർ മഠത്തിക്കണ്ടത്തിൽ

തൊടുപുഴ: തെറ്റായ ബന്ധങ്ങളും തിന്മയോടുള്ള അടിമത്തവും വിജയം ഇല്ലാതാക്കുമെന്ന് കോതമംഗലം ബിഷപ് മാർ ജോർജ് മഠത്തിക്കണ്ടത്തിൽ. ന്യൂമാൻ കോളജിൽ അക്കാദമിക വർഷത്തിന്‍റെ ഉദ്ഘാടനം നിർവഹിക്കുകയായിരുന്നു അദ്ദേഹം. നല്ല ബന്ധങ്ങൾ വളർത്തിയെടുത്താൽ വിജയത്തിന് കരുത്തായി മാറും. കുടുംബത്തോടും അധ്യാപകരോടും കൂട്ടുകാരോടും സമൂഹത്തിൽ ഉന്നതതലങ്ങളിൽ പ്രവർത്തിക്കുന്നവരോടുമുള്ള അടുപ്പം നമുക്ക് പ്രചോദനവും ഉയരങ്ങളിലേക്ക് കുതിക്കാനും സഹായകരമാകുമെന്നും അദ്ദേഹം പറഞ്ഞു. യുജി പ്രോഗ്രാമിന്‍റെ ഉദ്ഘാടനം എംജി സർവകലാശാല മുൻ വൈസ് ചാൻസലർ ഡോ. സാബു തോമസ് നിർവഹിച്ചു. പുതിയ ആശയങ്ങളും കണ്ടെത്തലുകളുംവഴി നാടിന്‍റെ പുരോഗതിക്ക് മികച്ച സംഭാവനകൾ നൽകുന്നവരായി വിദ്യാർഥികൾ മാറണമെന്ന് അദ്ദേഹം പറഞ്ഞു. വായനയും ഗവേഷണവും ഇതിന് പുത്തൻ ഊർജം പകരുമെന്നും സാബു തോമസ് ചൂണ്ടിക്കാട്ടി. കോതമംഗലം കോർപറേറ്റ് എഡ്യൂക്കേഷണൽ ഏജൻസി മാനേജർ മോണ്‍. പയസ് മലേക്കണ്ടത്തിൽ മുഖ്യപ്രഭാഷണം നടത്തി. പ്രിൻസിപ്പൽ ഡോ. ജെന്നി കെ. അലക്സ്, വൈസ് പ്രിൻസിപ്പൽമാരായ ഡോ. സാജു ഏബ്രഹാം, പ്രഫ. ബിജു പീറ്റർ, പിടിഎ വൈസ് പ്രസിഡന്‍റ് ജോയി കിഴക്കേൽ എന്നിവർ പ്രസംഗിച്ചു. ബർസാർ ഫാ. ബെൻസണ്‍ ആന്‍റണി സ്വാഗതവും കണ്‍വീനർ സേവ്യർ കുര്യൻ നന്ദിയും പറഞ്ഞു. ചടങ്ങിൽ വിവിധ മേഖലകളിൽ വിജയിച്ചവരെയും പ്രതിഭ തെളിയിച്ചവരെയും ബിഷപ് മാർ ജോർജ് മഠത്തിക്കണ്ടത്തിലും ഡോ. സാബു തോമസും ആദരിച്ചു.

പടികയറി വലഞ്ഞ് ഡയാലിസിസ് രോഗികൾ

തൊടുപുഴ: നൂറുകണക്കിന് രോഗികൾ ചികിൽസതേടിയെത്തുന്ന തൊടുപുഴ ജില്ലാ ആശുപത്രിയിലെ ലിഫ്റ്റ് തകരാറിലാകുന്നത് രോഗികളെ കടുത്ത ദുരിതത്തിലാക്കുന്നു. ചികിത്സാർഥം മുകൾ നിലകളിലേക്കു പോകേണ്ട രോഗികളാണ് ലിഫ്റ്റ് തകരാർ മൂലം വലയുന്നത്. പലപ്പോഴും രോഗികളെ കസേരയിലിരുത്തി മുകളിലെ നിലകളിലേക്ക് ബന്ധുക്കൾ ചുമന്ന് കയറ്റേണ്ട സാഹചര്യമാണുള്ളത്. ഇന്നലെ ആശുപത്രിയുടെ പഴയ കെട്ടിടത്തിലെ ലിഫ്റ്റ് തകരാറിലായത് നിരവധി രോഗികൾക്കും കൂടെ വന്നവർക്കും വലിയ ബുദ്ധിമുട്ടാണുണ്ടാക്കിയത്. ഡയാലിസിസ് ചെയ്യേണ്ട രോഗികളും ബന്ധുക്കളുമാണ് ഏറെ ദുരിതമനുഭവിക്കുന്നത്. വൃക്ക രോഗികൾക്കുള്ള ഒപി പ്രവർത്തിക്കുന്നത് താഴെത്ത നിലയിലാണ്. ഇവിടെ പഞ്ച് ചെയ്ത ശേഷം അഞ്ചാം നിലയിലെത്തി വേണം ഡയാലിസിസിന് വിധേയമാകാൻ. പ്രായാധിക്യത്താൽ വലയുന്ന പലർക്കും പടികൾ കയറി അഞ്ചാം നിലയിൽ എത്താനുള്ള ശാരീരിക സ്ഥിതിയില്ല. ഇതേത്തുടർന്ന് ബന്ധുക്കളും ഒപ്പമുള്ളവരും കസേരയിലിരുത്തി അഞ്ചാം നിലയിലേക്ക് രോഗികളെ ചുമന്ന് കയറ്റുകയും ഡയാലിസിസ് കഴിഞ്ഞ് തിരികെ ഇതേരീതിയിൽ ചുമന്ന് താഴെ ഇറക്കുകയും വേണം. ചിലർ ഏറെ സമയമെടുത്ത് പടികൾ കയറിയാണ് മുകളിൽ എത്തുന്നത്. ഇതിനിടെ ഇവർക്ക് ശ്വാസതടസം അനുഭവപ്പെടുകയും ചെയ്യാറുണ്ട്. ഓങ്കോളജി ഒപിയും ഇതേ രീതിയിൽ താഴത്തെ നിലയിലാണ് പ്രവർത്തിക്കുന്നത്. ഇത് കാൻസർ രോഗികൾക്കും വലിയ ബുദ്ധിമുട്ട് സൃഷ്ടിക്കുന്നുണ്ട്. ലിഫ്റ്റ് തകരാറിലായി രോഗികൾ ദുരിതത്തിലായതോടെ പരാതിയും പ്രതിഷേധവും ശക്തമായി. ഇതോടെ ലിഫ്റ്റിന്‍റെ അറ്റുകുറ്റ പണികൾ നടത്തുന്നവരെ വിളിച്ചു വരുത്തി ഉച്ചക്ക് ശേഷം തകരാർ പരിഹരിച്ചു. സെൻസറുമായി ബന്ധപ്പെട്ട തകരാർ മൂലമാണ് ലിഫ്റ്റിന്‍റെ പ്രവർത്തനം നിലച്ചത്. ഉള്ളിൽ പ്രവേശിക്കുന്നതിനു മുന്പ് തകരാറിലായതിനാൽ ലിഫ്റ്റിൽ കുടുങ്ങാതെ തലനാരിഴയ്ക്കാണ് രോഗികൾ ഉൾപ്പെടെയുള്ളവർ രക്ഷപ്പെട്ടത്. രണ്ടാഴ്ച മുന്പ് പുതിയ കെട്ടിടത്തിലേയും ലിഫ്റ്റ് തകരാറിലായിരുന്നു. അന്നും ദിവസങ്ങളോളം രോഗികളെ മുകൾ നിലകളിലേക്ക് ചുമന്നാണ് എത്തിച്ചത്. ഇതു സ്ഥാപിച്ച കന്പനിതന്നെ പിന്നീട് തകരാർ പരിഹരിക്കുകയായിരുന്നു. പഴയ കെട്ടിടത്തിലെ ലിഫ്റ്റ് തകരാറിലാകുന്നത് പതിവു സംഭവമാണ്. ചിലപ്പോൾ ദിവസങ്ങളോളം ലിഫ്റ്റ് പ്രവർത്തനരഹിതമായി കിടക്കും. ഇത് സ്ഥാപിച്ചതിനു ശേഷം ഇത്തരത്തിൽ തകരാർ പരിഹരിക്കാനുള്ള അറ്റകുറ്റപ്പണികൾക്കായി ലക്ഷക്കണക്കിന് രൂപയാണ് ചെലവഴിച്ചത്. ഈ തുക ഉപയോഗിച്ച് പുതിയ ലിഫ്റ്റ് സ്ഥാപിക്കാമായിരുന്നുവെന്നാണ് നാട്ടുകാർ ചൂണ്ടിക്കാട്ടുന്നത്. ഡയാലിസിസ് ചെയ്യുന്നതിന് താഴത്തെ നിലയിൽ തന്നെ സൗകര്യം ഏർപ്പെടുത്തണമെന്ന ആവശ്യവും ശക്തമായിട്ടുണ്ട്. ഡയാലിസിസ് ചെയ്യുന്നത് മുകൾ നിലയിലായതിനാൽ ലിഫ്റ്റ് ഉണ്ടെങ്കിൽ പോലും ഒന്നിൽ കൂടുതൽ സഹായികളുമായി വരേണ്ട അവസ്ഥയാണുള്ളത്. ഒപി റൂമിനോട് ചേർന്നുതന്നെ ഡയാലിസിസിന് സൗകര്യം ഏർപ്പെടുത്തിയാൽ ശാരീരിക ബുദ്ധിമുട്ടനുഭവിക്കുന്ന നിരവധി രോഗികൾക്ക് അത് ഉപകാരമാകുമെന്നും ചൂണ്ടിക്കാണിക്കപ്പെടുന്നു. ഇതോടൊപ്പം ഓങ്കോളജി ഒപിക്കു സമീപത്തായി കാൻസർ രോഗികളെ ചികിത്സിക്കുന്നതിനുള്ള മുറിയും സജ്ജീകരിക്കണമെന്ന ആവശ്യവും ഉയർന്നിട്ടുണ്ട്.

മൂന്നാർ ബസിലിക്കയിൽ ഇതരസംസ്ഥാന തൊളിലാളികൾക്കായി പ്രത്യേക ശുശ്രൂഷ

മൂന്നാർ: മൗണ്ട് കാർമൽ ബസിലിക്കിയിൽ ഇതരസംസ്ഥാന തൊഴിലാളികൾക്കായി പ്രത്യേക ശുശ്രൂഷ ആരംഭിച്ചു. ജില്ലയിൽ ആദ്യമായാണ് ഇതരസംസ്ഥാന തൊഴിലാളികൾക്കു മാത്രമായി ശുശ്രൂഷകൾ നടത്തുന്നത്. വിജയപുരം രൂപത മെത്രാൻ ഡോ. സെബാസ്റ്റ്യൻ തെക്കത്തേച്ചേരിൽ ശുശ്രൂഷകൾക്ക് നേതൃത്വം നൽകി. ഹിന്ദി ഭാഷയിൽ വിശുദ്ധകുർബാനയില്ലാത്തതു മൂലം നൂറു കണക്കിനുഇതരസംസ്ഥാന തൊഴിലാളികൾക്ക് ഇതിനുള്ള അവസരം ലഭിച്ചിരുന്നില്ല. ഈ സാഹചര്യത്തിലാണ് തൊഴിലാളികൾക്കായി ശുശ്രൂഷകൾ ആരംഭിച്ചത്. പാഷനിസ്റ്റ് വൈദികനായ ഫാ. ക്രിസ്തുദാസ് ഹിന്ദിയിൽ വിശുദ്ധകുർബാന അർപ്പിച്ചു. തുടർന്നു സ്നേഹവിരുന്നും പ്രത്യേക സമ്മാനങ്ങളും നൽകി. നൂറുകണക്കിന് തൊഴിലാളികൾ ശുശ്രൂഷകളിൽ പങ്കെടുത്തു. കെഡിഎച്ച്പി കന്പനിയുടെ മൂന്നാറിലെ തേയിലത്തോട്ടങ്ങളിൽ ജോലിചെയ്യുന്നതിനായി അന്യസംസ്ഥാനങ്ങളിൽനിന്നു നിരവധി തൊഴിലാളികളാണ് ഇവിടെയെത്തുന്നത്. ഫാ. ലിജോ ലോറൻസ്, സിസ്റ്റർ സുവർണ എന്നിവർ പ്രസംഗിച്ചു.ഇതരസംസ്ഥാന തൊഴിലാളികളുടെ ആത്മീയ ശുശ്രൂഷകൾക്ക് കൂടുതൽ പരിപാടികൾ സംഘടിപ്പിക്കുമെന്ന് ബസിലിക്ക റെക്ടർ ഫാ. മൈക്കിൾ വലയിഞ്ചിയിൽ അറിയിച്ചു.

വിത്തൂട്ട് പദ്ധതി ഉദ്ഘാടനം ചെയ്തു

ഇടുക്കി: മിഷൻ ഫുഡ് ഫോഡർ ആൻഡ് വാട്ടർ പദ്ധതിയുടെ ഭാഗമായി ഇടുക്കി വന്യജീവി സങ്കേതത്തിൽ നടപ്പാക്കുന്ന വിത്തൂട്ട് പദ്ധതിയുടെ ഉദ്ഘാടനം വാഴൂർ സോമൻ എംഎൽഎ നിർവഹിച്ചു. ഉപ്പുതറ പഞ്ചായത്ത് പ്രസിഡന്‍റ് ജെയിംസ് കെ.ജേക്കബ് അധ്യക്ഷത വഹിച്ചു. പഞ്ചായത്ത് മെംബർ ഷീബ സത്യനാഥ്, ഇടുക്കി വൈൽഡ് ലൈഫ് വാർഡൻ ജി.ജയചന്ദ്രൻ, അസിസ്റ്റന്‍റ് വൈൽഡ് ലൈഫ് വാർഡൻ ബി.പ്രസാദ് കുമാർ, ഇഡിസി ചെയർമാൻമാർ, ഉൗര് മൂപ്പന്മാർ എന്നിവർ പങ്കെടുത്തു.

ലോറി വീടിനു മുകളിലേക്ക് മറിഞ്ഞു

നെടുങ്കണ്ടം: മഞ്ഞപ്പാറയിൽ നിയന്ത്രണം നഷ്ടപ്പെട്ട ലോറി വീടിനു മുകളിലേക്ക് മറിഞ്ഞു. വീട്ടിൽ ആളുകൾ ഇല്ലാതിരുന്നതിനാൽ വൻ ദുരന്തം ഒഴിവായി. ഞായറാഴ്ച രാത്രി എട്ടോടെയാണ് അപകടം. നെടുങ്കണ്ടത്തുനിന്ന് എറണാകുളത്തേക്ക് മാങ്ങയുമായി പോയ ലോറിയാണ് മഞ്ഞപ്പാറയ്ക്ക് സമീപത്തെ കൊടുംവളവിൽ നിയന്ത്രണംവിട്ട് മറിഞ്ഞത്. അപകടത്തിൽ ലോറി ഡ്രൈവറായ ഇതരസംസ്ഥാന തൊഴിലാളിക്ക് പരിക്കേറ്റു. മഞ്ഞപ്പാറ പള്ളത്ത് സിനുവിന്‍റെ വീടിനു മുകളിലേക്കാണ് ലോറി മറിഞ്ഞത്. ഈ സമയം വീട്ടിൽ ആളില്ലായിരുന്നു. അപകടത്തിൽ വീടിന്‍റെ ഒരു ഭാഗം പൂർണമായും തകർന്നു.

പോലീസ് സ്റ്റേഷനിൽ അതിക്രമം നടത്തിയ പ്രതി 24 വർഷത്തിനു ശേഷം പിടിയിൽ

വണ്ടിപ്പെരിയാർ: പോലീസ് സ്റ്റേഷനിൽ കയറി അതിക്രമം നടത്തിയ കേസിലെ പ്രതി ഇരുപത്തിനാല് വർഷങ്ങൾക്കു ശേഷം പോലീസിന്‍റെ പിടിയിലായി. വണ്ടിപ്പെരിയാർ മേലേ ഗൂഡല്ലൂർ സ്വദേശി ബിലാൽ മൊയ്തീനെ(45) യാണ് വണ്ടിപ്പെരിയാർ എസ്ഐ ടി.എസ്. ജയകൃഷ്ണനും സംഘവും തമിഴ്നാട്ടിലെ പുതുപ്പെട്ടിയിൽനിന്ന് പിടികൂടിയത്. 2001ൽ ബിലാൽ വണ്ടിപ്പെരിയാർ പോലീസ് സ്റ്റേഷനിൽ അതിക്രമിച്ചു കയറി ബഹളംവയ്ക്കുകയും ഉപകരണങ്ങൾക്കു കേടുപാടുകൾ വരുത്തുകയും ചെയ്തു. പിന്നീട് ജാമ്യത്തലിറങ്ങിയ ഇയാൾ തമിഴ്നാട്ടിലേക്കു കടക്കുകയായിരുന്നു. വാറന്‍റായതിനെത്തുടർന്ന് പലതവണ പോലീസ് അന്വേഷിച്ചെങ്കിലും ഇയാളെ കണ്ടെത്താനയില്ല. എസ്ഐ ടി.എസ്. ജയ കൃഷണന്‍റെ നേതൃത്വത്തിൽ പിന്നീട് നടത്തിയ ഊർജിതമായ അന്വേഷണത്തിലാണ് തമിഴ്നാട്ടിൽനിന്ന് പ്രതിയെ പിടികൂടിയത്. പ്രതിയെ കോടതിയിൽ ഹാജരാക്കി.

നിർത്താതെ പോയ ഓട്ടോറിക്ഷയെ പിന്തുടർന്ന് 36 ലിറ്റർ മദ്യം പിടികൂടി

നെടുംകണ്ടം: വാഹന പരിശോധനയ്ക്കിടെ നിർത്താതെ പോയ ഓട്ടോറിക്ഷ പിന്തുടർന്ന് ഉടുന്പൻചോല എക്സൈസ് സംഘം 36 ലിറ്റർ മദ്യം പിടികൂടി. ഒരാൾ അറസ്റ്റിൽ. വാഹനം ഓടിച്ചിരുന്ന കടശിക്കടവ് മണി ഭവനിൽ രാജേഷ് (37) ആണ് പിടിയിലാത്. എക്സൈസ് ഇൻസ്പെക്ടർ ജി. വിജയകുമാറിന്‍റെ നേതൃത്വത്തിൽ കൊച്ചറ കടുക്കാസിറ്റിയിൽ വാഹന പരിശോധന നടത്തുന്നതിനിടെ കൊച്ചറ ഭാഗത്തുനിന്നു വരികയായിരുന്ന ഓട്ടോറിക്ഷയ്ക്ക് കൈ കാണിച്ചെങ്കിലും നിർത്താതെ പോകുകയായിരുന്നു. തുടർന്ന് വാഹനം പിന്തുടർന്ന് മൈലാടുംപാറയിൽ വാഹനം തടഞ്ഞുനിർത്തി പരിശോധിച്ചപ്പോഴാണ് 500 മില്ലിലിറ്റർ വീതമുള്ള 72 കുപ്പികളിലായി വിവിധ ഇനത്തിൽപ്പെട്ട 36 ലിറ്റർ മദ്യം കണ്ടെത്തിയത്. മദ്യം കടശിക്കടവിലും പരിസര പ്രദേശങ്ങളിലും ചില്ലറ വിൽപ്പനയ്ക്കായി കടത്തിക്കൊണ്ടുവന്നതാണന്ന് എക്സൈസ് പറഞ്ഞു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. ഓട്ടോറിക്ഷയും കസ്റ്റഡിയിലെടുത്തു. റെയ്ഡിൽ അസിസ്റ്റന്‍റ് എക്സൈസ് ഇൻസ്പെക്ടർ കെ.എസ്. അസീസ്, പ്രിവന്‍റീവ് ഓഫീസർ എം. നൗഷാദ്, സിവിൽ എക്സൈസ് ഓഫീസർമാരായ അരുണ്‍രാജ്, അരുണ്‍ മുരളീധരൻ ഡ്രൈവർ പി.സി. റെജി എന്നിവർ പങ്കെടുത്തു.

മണക്കാട് വില്ലേജ് ഓഫീസ് ഇനി സ്മാർട്ട്

തൊടുപുഴ: വിവിധ ആവശ്യങ്ങൾക്കായി മണക്കാട് വില്ലേജ് ഓഫീസിൽ എത്തുന്നവർക്ക് ഇനി സേവനങ്ങൾ കൂടുതൽ സ്മാർട്ടായി ലഭിക്കും. ആധുനിക സൗകര്യങ്ങളോടെ നിർമിച്ച മണക്കാട് സ്മാർട്ട് വില്ലേജ് ഓഫീസിന്‍റെ ഉദ്ഘാടനം ഇന്ന് മന്ത്രി കെ.രാജൻ ഓണ്‍ ലൈനായി നിർവഹിക്കും. പ്ലാൻ സ്കീം പദ്ധതിയിൽ ഉൾപ്പെടുത്തി 50 ലക്ഷം രൂപ ചെലവഴിച്ചാണ് സ്മാർട്ട് വില്ലേജ് ഓഫീസ് നിർമിച്ചത്. പുതിയ കെട്ടിടത്തിൽ പ്രത്യേക കാബിനുകൾ, ഫ്രണ്ട് ഓഫീസ്, പൊതുജനങ്ങൾക്കുള്ള വിശ്രമമുറി, റിക്കാർഡ് റൂം, ജീവനക്കാർക്ക് ഭക്ഷണം കഴിക്കുന്നതിനുള്ള സൗകര്യം, ഭിന്നശേഷി സൗഹൃദ ടോയ്‌ലറ്റ്, ഭിന്നശേഷിക്കാർക്കായി റാന്പോട് കൂടിയ വരാന്ത എന്നീ സൗകര്യങ്ങൾ ഒരുക്കിയിട്ടുണ്ട്. യോഗത്തിൽ പി.ജെ.ജോസഫ് എംഎൽഎ അധ്യക്ഷത വഹിക്കും. ഡീൻ കുര്യാക്കോസ് എംപി മുഖ്യാതിഥിയാകും. ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാകുന്നേൽ, കളക്ടർ വി. വിഗ്നേശ്വരി, തൊടുപുഴ നഗരസഭ ചെയർമാൻ കെ. ദീപക്, എഡിഎം ഷൈജു പി. ജേക്കബ്, സബ് കളക്ടർ അനുപ് ഗാർഗ്, ബ്ലോക്ക് പഞ്ചായത്ത് പ്രസിഡന്‍റ് സുനി സാബു, പഞ്ചായത്ത് പ്രസിഡന്‍റ് പി. എസ്. ജേക്കബ് എന്നിവർ പ്രസംഗിക്കും.

കല്ലാർ ഗവ. എച്ച്എസ് സപ്തതി നിറവിൽ

നെടുങ്കണ്ടം: കല്ലാർ ഗവ. ഹയർ സെക്കൻഡറി സ്കൂൾ സപ്തതി നിറവിൽ. ഒരു വർഷം നീണ്ടുനിൽക്കുന്ന സപ്തതി ആഘോഷത്തിന് 17നു തുടക്കമാകും. പട്ടംകോളനി രൂപീകരണത്തിന് ശേഷം 1956 ജൂലൈ 17നു ഏകാധ്യാപക വിദ്യാലയമായി ആരംഭിച്ച പട്ടംകോളനിയിലെ ആദ്യത്തെ വിദ്യാഭാസ സ്ഥാപനം പിന്നീട് ഹൈസ്കൂളായും ഹയർ സെക്കൻഡറിയായും ഉയർത്തുകയായിരുന്നു. സപ്തതി ആഘോഷങ്ങളുടെ ഭാഗമായി സ്വാഗത സംഘം രൂപീകരണ യോഗം നടന്നു. ജില്ലാ പഞ്ചായത്തംഗം ജിജി കെ. ഫിലിപ്പ് ഉദ്ഘാടനം ചെയ്തു. പിടിഎ പ്രസിഡന്‍റ് രമേശ് കൃഷ്ണൻ അധ്യക്ഷത വഹിച്ചു. പാന്പാടുംപാറ പഞ്ചായത്ത് വൈസ് പ്രസിഡന്‍റ് സരിത രാജേഷ്, വിജയൻ പിള്ള, സിറാജ് കല്ലാർ, റസാഖ് മൗലവി, ഷിജിമോൻ ഐപ്പ്, കെ.എം. ഷാജി, ശ്യാം സുന്ദരപ്രസാദ്, ജോമോൻ താന്നിക്കൽ എന്നിവർ പ്രസംഗിച്ചു. രമേശ് കൃഷ്ണൻ ചെയർമാനായും വിജയൻ പിള്ള വർക്കിംഗ് ചെയർമാനായും കെ.വി. ഹെല്ലോക്ക് ജനറൽ കണ്‍വീനറായും 251 അംഗ സ്വാഗതസംഘവും രൂപീകരിച്ചു.

മാലിന്യം തള്ളിയവരെ തടഞ്ഞുവച്ച് പോലീസിനു കൈമാറി

കരിമണ്ണൂർ: ജനവാസ മേഖലയിൽ മാലിന്യം തള്ളിയവരെ നാട്ടുകാർ തടഞ്ഞുവച്ച് പോലീസിനു കൈമാറി. കരിമണ്ണൂർ-വണ്ടമറ്റം റോഡിൽ നെയ്യശേരി ഭാഗത്ത് മാലിന്യം തള്ളിയവരെയാണ് നാട്ടുകാർ പിടി കൂടിയത്. കരാർ അടിസ്ഥാനത്തിൽ മാലിന്യം തള്ളുന്ന സംഘത്തെയാണ് നാട്ടുകാർ തടഞ്ഞത്. ഞായറാഴ്ച വൈകുന്നേരം അഞ്ചിനാണ് സംഭവം. കരിഓയിൽ ഉൾപ്പെടെയുള്ള മാലിന്യം രണ്ടു ലോഡ് തള്ളുകയും മൂന്നാമത്തെ ലോഡിറക്കുന്നതിന് എത്തിയപ്പോൾ പ്രദേശവാസികൾ തടഞ്ഞ് പഞ്ചായത്ത് അധികൃതരെയും പോലീസിനെയും അറിയിക്കുകയുമായിരുന്നു. തുടർന്ന് വാർഡ് മെംബർ ഷേർളി സെബാസ്റ്റ്യനും പഞ്ചായത്ത് പ്രസിഡന്‍റ് നിസാമോൾ ഷാജിയും സ്ഥലത്തെത്തി. കരിമണ്ണൂർ പോലീസും എത്തി. വേസ്റ്റ് അവിടെനിന്ന് നീക്കം ചെയ്യണമെന്ന് കരാറുകാരനോട് എസ്ഐ നിർദേശിച്ചെങ്കിലും ഇവർ വഴങ്ങിയില്ല. തുടർന്ന് പ്രദേശവാസികൾ ഉയർന്ന റവന്യു, പോലീസ് അധികൃതരെ വിവരം അറിയിച്ചു. കരാറുകാരൻ ഉൾപ്പെടെ അഞ്ചു പേർക്കെതിരേ കേസെടുത്തതായി പോലീസ് പറഞ്ഞു. ഉടുന്പന്നൂരും ഇടവെട്ടിയിലും വണ്ണപ്പുറത്തും പുറപ്പുഴയിലും സമാന സംഭവങ്ങൾ അടുത്ത നാളുകളിൽ ഉണ്ടായിരുന്നു.

പേവിഷബാധയ്ക്കെതിരേ പ്രതിജ്ഞ അപഹാസ്യം: കെപിഎസ്ടിഎ

തൊടുപുഴ: പ്രതിരോധ കുത്തിവയ്പ് എടുത്ത വിദ്യാർഥി പേ വിഷബാധയേറ്റു മരിക്കാനിടയായ സംഭവം അന്വേഷിക്കണമെന്ന് കെപിഎസ്ടിഎ ജില്ലാ കമ്മിറ്റി ആവശ്യപ്പെട്ടു. സ്വന്തം വീട്ടുമുറ്റത്ത് കളിച്ചുകൊണ്ടിരുന്നപ്പോഴാണ് കുട്ടിക്ക് പേവിഷബാധയേറ്റതെന്നത് അത്യന്തം ദുഃഖകരമായ കാര്യമാണ്. ഈ സാഹചര്യത്തിൽ ആരോഗ്യവകുപ്പ് അവരുടെ ചികിത്സാ പ്രോട്ടോകോൾ പരിശോധിച്ച് ഇത്തരം ദൗർഭാഗ്യകരമായ സംഭവങ്ങൾ ഉണ്ടാകില്ലെന്ന് ഉറപ്പുവരുത്തേണ്ടതിനു പകരം കുട്ടികളെക്കൊണ്ട് പ്രതിജ്ഞ ചൊല്ലിച്ച് പേ വിഷബാധ അകറ്റാമെന്ന നിർദേശം നൽകിയത് അപഹാസ്യമാണ്. തെരുവുനായ്ക്കളെ യഥാസമയം വന്ധ്യംകരിച്ച് കുട്ടികൾക്കും സമൂഹത്തിനും ഉപദ്രവം വരാതെ നോക്കേണ്ട തദ്ദേശ സ്വയം ഭരണ സ്ഥാപനങ്ങൾക്ക് ഇതിന്‍റെ ഉത്തരവാദിത്വത്തിൽനിന്ന് ഒഴിഞ്ഞു മാറാനാവില്ല. ആരോഗ്യ, തദ്ദേശ വകുപ്പുകളെ ഏകോപിപ്പിച്ച് കുട്ടികൾക്കും സമൂഹത്തിനും നായ്ക്കളിൽനിന്നു സംരക്ഷണം ഏർപ്പെടുത്തണമെന്ന് കെപിഎസ്ടിഎ ആവശ്യപ്പെട്ടു.

ചെക്ക് ഡാം കം ബ്രിഡ്ജ് നിർമാണത്തിന് 7.44 കോടി

ചെറുതോണി: വാഴത്തോപ്പ് പഞ്ചായത്തിലെ സെമിനാരി പടിക്കു സമീപം പാൽകുളം തോടിന് കുറുകെ ചെക്ക് ഡാം കം ബ്രിഡ്ജ് നിർമാണത്തിനും ജലസേചന പദ്ധതിക്കുമായി 7.44 കോടി രൂപ അനുവദിച്ചു. 2.89 കോടി രൂപയ്ക്കാണ് ചെക്ക് ഡാമും പാലവും അപ്രോച്ച് റോഡും നിർമിക്കുന്നത്. ശേഷിക്കുന്ന തുക ജലസേചന പദ്ധതിക്കായി നീക്കി വയ്ക്കും. 25 മീറ്റർ നീളവും 6.4 മീറ്റർ വീതിയുമുള്ള പാലവും 5.5 മീറ്റർ വീതിയുള്ള അപ്രോച്ച് റോഡുമാണ് ഇവിടെ നിർമിക്കുന്നത്. ചെക്ക് ഡാമിൽ ജലം ശേഖരിച്ച് പ്രദേശത്ത് ഡ്രിപ്പ് ഇറിഗേഷൻ നടത്തുന്നതിനും ഗതാഗതം സുഗമമാക്കുന്നതിന് പാലം ഉയർത്തി നിർമിക്കുകയുമാണ് ലക്ഷ്യമിട്ടിട്ടുള്ളത്.വലിയ വാഹനങ്ങൾക്കും ഭാര വാഹനങ്ങൾക്കും സുഗഗമായി സഞ്ചരിക്കതക്ക രീതിയിലാണ് പാലം നിർമിക്കുന്നത്. ടെൻഡർ നടപടികൾ പൂർത്തീകരിച്ചു കഴിഞ്ഞു. ഇതേത്തുടർന്നു പഞ്ചായത്തിന്‍റെ അനുമതിയോടെ നിലവിലുണ്ടായിരുന്ന പാലം പൊളിച്ചു നീക്കുന്നതിനുള്ള നടപടികളുമായിട്ടുണ്ട്. ഇതിന്‍റെ ഭാഗമായി പാലം പൊളിച്ച് നീക്കി മഴക്കാലം ആരംഭിക്കുന്നതിനു മുന്പ് ജോലികൾ ആരംഭിക്കാനായിരുന്നു ശ്രമം. എന്നാൽ, നേരത്തേ മഴ ആരംഭിച്ചതോടെ തോട്ടിൽ ജലനിരപ്പ് ഉയർന്നതും നിർമാണം ആരംഭിക്കുന്നതിന് തടസമായി. മഴ കുറയുന്നതോടെ നിർമാണ പ്രവർത്തനങ്ങൾ ആരംഭിക്കാമെന്ന പ്രതീക്ഷയിലാണ് അധികൃതർ. കേരള ഇറിഗേഷൻ ഇൻഫ്രാസ്ട്രക്ചർ ഡവലപ്മെന്‍റ് കോർപ്പറേഷൻ ലിമിറ്റഡിനാണ് നിർമാണ ചുമതല.

കരിമണ്ണൂർ പഞ്ചാ. വൈസ് പ്രസിഡന്‍റ് രാജിവയ്ക്കണം: യുഡിഎഫ്

കരിമണ്ണൂർ: പഞ്ചായത്ത് പ്രസിഡന്‍റ് നിസാമോൾ ഷാജിക്കെതിരേ യുഡിഎഫ് കൊണ്ടുവന്ന അവിശ്വാസം പിന്തുണയ്ക്കാത്ത പഞ്ചായത്ത് വൈസ് പ്രസിഡന്‍റ് ലിയോ കുന്നപ്പള്ളിൽ രാജി വയ്ക്കണമെന്ന് യുഡിഎഫ് ആവശ്യപ്പെട്ടു. 14 അംഗ ഭരണസമിതിയിൽ യുഡിഎഫിലെ ഏഴംഗങ്ങൾ പ്രമേയത്തെ അനുകൂലിച്ചു.എൽഡിഎഫ് മെംബർമാരും യുഡിഎഫ് പിന്തുണയോടെ വൈസ് പ്രസിഡന്‍റായ ലിയോ കുന്നപ്പിള്ളിയും യോഗത്തിൽ പങ്കെടുത്തില്ല. യുഡിഎഫ് മെംബർമാരായ ബൈജു വറുവങ്കൽ, എ.എൻ. ദിലീപ് കുമാർ, ആൻസി സിറിയക്ക്, ബിബിൻ അഗസ്റ്റിൻ, ടെസി വിൽസണ്‍, ഷേർലി സെബാസ്റ്റ്യൻ, ജീസ് ആയത്തുപാടം എന്നിവരാണ് യോഗത്തിനെത്തിയത്. ഭരണസമിതിയിൽ അവിശ്വാസം പാസാകുന്നതിന് എട്ടംഗങ്ങളുടെ പിന്തുണയാണ് വേണ്ടിയിരുന്നത്. ലിയോ കുന്നപ്പള്ളി പ്രമേയത്തെ അനുകൂലിക്കുമെന്നുള്ള വിശ്വാസത്തിലാണ് യുഡിഎഫ് അവിശ്വാസപ്രമേയം കൊണ്ടുവന്നത്. എന്നാൽ, ലിയോ കുന്നപ്പിള്ളി അവിശ്വാസപ്രമേയം ചർച്ചയ്ക്ക് എടുക്കുന്പോൾ ആ യോഗത്തിൽ പങ്കെടുക്കുകയോ അവിശ്വാസപ്രമേയത്തിന് അനുകൂലമായി വോട്ട് ചെയ്യുകയോ ചെയ്തില്ല .ഇത് അദ്ദേഹം യുഡിഎഫിനോട് കാണിച്ച കൊടും വഞ്ചനയാണ്. യുഡിഎഫിന്‍റെ പിന്തുണയിൽ വൈസ് പ്രസിഡന്‍റായി തുടരുന്ന അദ്ദേഹം രാജിവയ്ക്കണമെന്ന് കരിമണ്ണൂർ മണ്ഡലം ചെയർമാൻ പോൾ കുഴിപ്പിള്ളിൽ, കണ്‍വീനർ ടി.കെ. നാസർ, സെക്രട്ടറി സക്കീർ എന്നിവർ ആവശ്യപ്പെട്ടു.

റോഡ് ടൂറിസം വികസനത്തിന് ബൃഹത് പദ്ധതി: മന്ത്രി റോഷി

ഇടുക്കി: ജില്ലയുടെ അടിസ്ഥാന സൗകര്യ വികസനത്തിനും റോഡുകളുടെ നിർമാണത്തിനും ടൂറിസം വികസനത്തിനും മുന്തിയ പരിഗണന നൽകുമെന്ന് മന്ത്രി റോഷി അഗസ്റ്റിൻ പറഞ്ഞു. കേരള കോണ്‍ഗ്രസ്-എം ഇടുക്കി നിയോജക മണ്ഡലം സമ്മേളനം വാഴത്തോപ്പിൽ ഉദ്ഘാടനം ചെയ്യുകയായിരുന്നു അദ്ദേഹം. മലയോര ഹൈവേ പൂർത്തിയാകുന്നതിലൂടെ ആധുനിക നിലവാരത്തിലുള്ള സുഗമമായ പാത സജ്ജമാകും. കാർഷിക മേഖലയുടെ നിലനിൽപ്പിനൊപ്പം ടൂറിസം രംഗത്തും മികച്ച മുന്നേറ്റം കുറിക്കുന്ന വിവിധ ടൂറിസം പദ്ധതികൾ അന്തിമഘട്ടത്തിലാണ്. ജില്ലയുടെ നിർമാണനിരോധനം പരിഹരിക്കുന്നതിനായി നിയമഭേദഗതിക്കൊപ്പം ചട്ടരൂപീകരണവുംകൂടി നടപ്പാക്കി മലയോര ജനത നേരിടുന്ന നിർമാണനിരോധനം മറികടക്കാൻ കഴിയുമെന്നും മന്ത്രി പറഞ്ഞു. ജില്ലാ പ്രസിഡന്‍റ് ജോസ് പാലത്തിനാൽ മുഖ്യപ്രഭാഷണം നടത്തി. നിയോജകമണ്ഡലം പ്രസിഡന്‍റ് ഷാജി കാഞ്ഞമല അധ്യക്ഷത വഹിച്ചു. യോഗത്തിൽ നേതാക്കളായ അഡ്വ. അലക്സ് കോഴിമല, പ്രഫ.കെ.ഐ. ആന്‍റണി, ജില്ലാ പഞ്ചായത്ത് പ്രസിഡന്‍റ് രാരിച്ചൻ നീർണാകുന്നേൽ, റെജി കുന്നംകോട്ട്, അഡ്വ. മനോജ് എം. തോമസ്, സിബിച്ചൻ തോമസ്, സിജി ചാക്കോ, ഫ്രാൻസിസ് കരിന്പാനിയിൽ ,സി.കെ. രാജു, ജോയി കുഴിപ്പള്ളിൽ, മിനി ജേക്കബ്, പ്രിന്‍റോ ചെറിയാൻ, ഷിജോ തടത്തിൽ, ജയിംസ് മ്ലാക്കുഴി, ടി.പി. മൽക്ക, കെ.എൻ. മുരളി, ടോമി കുന്നേൽ, ജോമോൻ പൊടിപാറ,ജോർജ് അന്പഴം തുടങ്ങിയവർ പ്രസംഗിച്ചു.

സജീവം സണ്‍ഡേ ലഹരിവിരുദ്ധ കാന്പയിനു തുടക്കം

തൊടുപുഴ: സജീവം സണ്‍ഡേ ലഹരിവിരുദ്ധ കാന്പയിന് തുടക്കമായി. കേരള സോഷ്യൽ സർവീസ് ഫോറവും കാരിത്താസ് ഇന്ത്യയും ചേർന്ന് കേരളത്തിലെ 32 രൂപതകളിൽ നടപ്പാക്കുന്ന സജീവം ലഹരി വിരുദ്ധ കാന്പയിന്‍റെ ഭാഗമായുള്ള സജീവം സണ്‍ഡേ യുടെ സംസ്ഥാനതല ഉദ്ഘാടനം നെടിയകാട് ലിറ്റിൽ ഫ്ളവർ പള്ളിയിൽ നടന്നു. കോതമംഗലം രൂപത സോഷ്യൽ സർവീസ് സൊസൈറ്റിയുടെ നേതൃത്വത്തിൽ നെടിയകാട് ലിറ്റിൽ ഫ്ലവർ സണ്‍ഡേ സ്കൂളിന്‍റ സഹകരണത്തോടെയാണ് പരിപാടി സംഘടിപ്പിച്ചത്. ഇതിനു മുന്നോടിയായി ലഹരിവിരുദ്ധ റാലിയും സംഘടിപ്പിച്ചു. കേരള സോഷ്യൽ സർവീസ് ഫോറം ഡയറക്ടർ ഫാ. ജേക്കബ് മാവുങ്കൽ കാന്പയിൻ സംസ്ഥാനതല ഉദ്ഘാടനം നിർവഹിച്ചു. മദ്യം, മയക്കുമരുന്ന്, രാസ ലഹരി തുടങ്ങിയവയ്ക്കെതിരേ സമൂഹം ഒറ്റക്കെട്ടായി പ്രവർത്തിക്കണമെന്ന് അദ്ദേഹം പറഞ്ഞു. വികാരി ഫാ. തോമസ് പൂവത്തുങ്കൽ അധ്യക്ഷത വഹിച്ചു. കോതമംഗലം സോഷ്യൽ സർവീസ് സൊസൈറ്റി ഡയറക്ടർ ഫാ. ജോസഫ് കൊച്ചുപറന്പിൽ മുഖ്യപ്രഭാഷണം നടത്തി. പ്രശസ്ത മജീഷ്യൻ ജോയിസ് മുക്കുടം മാജിക്കിലൂടെ ലഹരിവിരുദ്ധ ബോധവത്കരണം നടത്തി. അസി.വികാരി ഫാ.ജോസഫ് വെട്ടിക്കുഴിച്ചാലിൽ ലഹരിവിരുദ്ധ പ്രതിജ്ഞ ചൊല്ലിക്കൊടുത്തു. സജീവം പ്രോജക് സംസ്ഥാന കോ-ഓർഡിനേറ്റർ സജോ ജോയി സന്ദേശം നൽകി. കെസിവൈ എം ടീം അവതരിപ്പിച്ച മൈം ഷോ പരിപാടിക്ക് മിഴിവേകി. സണ്‍ഡേ സ്കൂൾ ഹെഡ്മാസ്റ്റർ തങ്കച്ചൻ ഏരിമറ്റം സ്വാഗതവും സജീവം രൂപത കോ-ഓഡിനേറ്റർ ജോണ്‍സൻ കറുകപ്പിള്ളിൽ നന്ദിയും പറഞ്ഞു.

ആദിവാസി മേഖലയിൽ വായനശാലകൾ തുറന്നു

ഇടുക്കി: ആദിവാസി വിഭാഗത്തിലെ യുവജനങ്ങളെയും കുട്ടികളെയും വായനയിലേയ്ക്ക് ആകർഷിക്കാൻ സംസ്ഥാന വന വികസന ഏജൻസിയുടെ ധനസഹായത്തോടെ ഇടുക്കി വന്യജീവി സങ്കേതത്തിലെ കണ്ണംപടി ട്രൈബൽ സെറ്റിൽമെന്‍റിൽ ഉൾപ്പെടുന്ന കൊല്ലത്തിക്കാവ്, മേമാരി, കത്തിതേപ്പൻ ഉന്നതികളിൽ ആരംഭിച്ച വായനശാലകളുടെ ഉദ്ഘാടനം വാഴൂർ സോമൻ എംഎൽഎ നിർവഹിച്ചു. ഇവിടെ പ്രവർത്തിച്ചുവരുന്ന ഇക്കോ ഡെവലപ്മെന്‍റ് കമ്മിറ്റികളുടെ മേൽനോട്ടത്തിലാണ് വായനശാലകളുടെ പ്രവർത്തനം. ഉപ്പുതറ പഞ്ചായത്ത് പ്രസിഡന്‍റ് ജയിംസ് കെ.ജേക്കബ് അധ്യക്ഷത വഹിച്ചു. ഇടുക്കി വൈൽഡ് ലൈഫ് വാർഡൻ ജി.ജയചന്ദ്രൻ, അസിസ്റ്റന്‍റ് വൈൽഡ് ലൈഫ് വാർഡൻ ബി. പ്രസാദ് കുമാർ, പഞ്ചായത്ത് മെംബർ ഷീബ സത്യനാഥ് എന്നിവർ പ്രസംഗിച്ചു. തളിര് എന്ന പേരിൽ ഇടുക്കി വൈൽഡ് ലൈഫ് ഡിവിഷനാണ് വവായനശാലകൾ ആരംഭിക്കാൻ മുൻകൈയെടുത്തത്. ഇഡിസികൾക്ക് സ്വന്തമായുള്ള കെട്ടിടങ്ങളിലാണ് വായനശാലകൾ ഒരുക്കിയിരിക്കുന്നത്. യാത്രാ വിവരണങ്ങൾ, വൈജ്ഞാനിക ഗ്രന്ഥങ്ങൾ, ബാലസാഹിത്യ കൃതികൾ, കഥകൾ, നോവലുകൾ, ബാലസാഹിത്യ കൃതികൾ എന്നീ വിഭാഗങ്ങൾക്കു പുറമേ പിഎസ്‌സി പരീക്ഷയ്ക്കും പ്രയോജനപ്പെടുന്ന പുസ്തകങ്ങളും വായനശാലയിൽ ഒരുക്കിയിട്ടുണ്ട്.

വരയാടുകളുടെ അപൂർവ ഇടമായ ഇരവികുളം മികച്ച ദേശീയോദ്യാനം

മൂന്നാർ: സുവർണജൂബിലി നിറവിലെത്തിയ ഇരവികുളം രാജ്യത്തെ ഏറ്റവും മികച്ച ദേശീയോദ്യാനമെന്ന നേട്ടം കൈവരിച്ചതോടെ അഭിമാനത്തിന്‍റെ നിറവിൽ. കേന്ദ്ര പരിസ്ഥിതി, വനം, കാലാവസ്ഥാ വ്യതിയാന മന്ത്രാലയം 2020 മുതൽ 2025 വരെ സംരക്ഷിത വനമേഖലകളിൽ നടത്തിയ മാനേജ്മെന്‍റ് എഫക്ടീവ് ഇവാല്യൂവേഷന്‍റെ അടിസ്ഥാനത്തിലാണ് ഈ നേട്ടത്തിന് മൂന്നാർ വന്യജീവി ഡിവിഷനു കീഴിലുള്ള ഇരവികുളം തെരഞ്ഞെടുക്കപ്പെട്ടത്. വരയാടുകളുടെയും നീലക്കുറിഞ്ഞികളുടെയും പേരിൽ പ്രശസ്തമായ ഇരവികുളം വിനോദസഞ്ചാരികളുടെ പ്രിയപ്പെട്ട ഇടമാണ്. രാജ്യത്തെ 438 സംരക്ഷിത വനമേഖലകളിൽ പലഘട്ടങ്ങളിലായി വിദഗ്ധസമിതി നടത്തിയ പരിശോധനകളുടെയും വിലയിരുത്തലുകളുടെയും അടിസ്ഥാനത്തിലാണ് 92.97 ശതമാനം സ്കോർ നേടി ഇരവികുളം ദേശീയോദ്യാനം ഒന്നാം സ്ഥാനം കരസ്ഥമാക്കിയത്. ഇന്‍റർനാഷണൽ യൂണിയൻ ഫോർ കണ്‍സർവേഷൻ ഓഫ് നേച്ചർ, വേൾഡ് കമ്മീഷൻ ഓണ്‍ പ്രൊട്ടക്ടഡ് ഏരിയ എന്നിവയുടെ മൂല്യനിർണയ ചട്ടക്കൂട് അടിസ്ഥാനമാക്കിയാണ് സ്കോർ നിർണയിച്ചത്. ആറു പ്രധാനസംരക്ഷണ ഘടകങ്ങളെ വിലയിരുത്തുന്നതിനായി 32 മാനദണ്ഡങ്ങൾ അടിസ്ഥാനപ്പെടുത്തിയാണ് സ്കോർ നൽകിയത്. 90.63 ശതമാനം സ്കോറോടെ മൂന്നാർ വന്യജീവി ഡിവിഷനിലെ മതികെട്ടാൻ ചോല നാഷണൽ പാർക്കും 89.84 ശതമാനം സ്കോറോടെ ചിന്നാർ വന്യജീവി സങ്കേതവും മികച്ച സംരക്ഷിത വനമേഖലകളായി ഇരവികുളം ദേശീയോദ്യാനത്തിന്‍റെ തൊട്ടു പിന്നിൽ ഇടം നേടി. പശ്ചിമഘട്ട മലനിരകളിൽ 97 ചതുരശ്ര കീലോമീറ്ററാണ് ഇരവികുളം ദേശീയോദ്യാനത്തിന്‍റെ വിസ്തീർണം. പുൽമേടും, ചോലവനങ്ങളും നിറഞ്ഞ ജൈവ സന്പന്നമായ അതീവ പരിസ്ഥിതി പ്രാധാന്യമുള്ള മേഖലയാണ് ഈ ദേശീയോദ്യാനം. ലോകത്ത് ഏറ്റവും അധികം വരയാടുകൾ കാണപ്പെടുന്ന പ്രദേശം കൂടിയാണ് ഇവിടം. ഇതിനു പുറമേ 12 വർഷത്തിലൊരിക്കൽ പൂക്കുന്ന അപൂർവയിനത്തിൽപ്പെടുന്ന നീലക്കുറിഞ്ഞി ഉൾപ്പെടെ 20 ഓളം കുറിഞ്ഞി ഇനങ്ങളും ഇവിടെയുണ്ട്. രാജ്യത്തെ ഏറ്റവും വൃത്തിയുള്ള നാഷണൽ പാർക്കുകളിൽ ഒന്നായി അറിയപ്പെടുന്ന ഇരവികുളം പ്രാദേശിക ജന വിഭാഗങ്ങളുടെ പങ്കാളിത്തത്തോടെയുള്ള ഇക്കോടൂറിസത്തിന്‍റെ ഏറ്റവും മികച്ച മാതൃകയാണെന്ന് മാനേജ്മെന്‍റ് എഫക്ടീവ് ഇവാല്യൂവേഷൻ റിപ്പോർട്ടിൽ വ്യക്തമാക്കുന്നു. കേരളത്തിലും തമിഴ്നാട്ടിലുമുള്ള നിരവധി സംരക്ഷിത മേഖലകളേയും റിസർവ് ഫോറസ്റ്റുകളേയും ബന്ധിപ്പിക്കുന്ന ജൈവ വൈവിധ്യമേഖലയാണ് ഈ പ്രദേശം. ഉഷ്ണമേഖലാ പർവത ആവാസവ്യവസ്ഥയ്ക്ക് അനുയോജ്യമായ രീതിയിൽ സസ്യജന്തു ജാലങ്ങളുടെ വിപുലമായ പട്ടിക രൂപപ്പെടുത്തി, ദേശീയോദ്യാനത്തിൽ സംരക്ഷിച്ചു വരുന്നതായും റിപ്പോർട്ടിലുണ്ട്. സംരക്ഷിത വനമേഖലയ്ക്ക് കോട്ടം തട്ടാത്ത രീതിയിൽ വേർതിരിക്കപ്പെട്ടതും നിയന്ത്രിതവുമായ ടൂറിസം സോണ്‍, ഇന്‍റർപ്രട്ടേഷൻ സെന്‍റർ, ഓർക്കിഡേറിയം, ഫേണറി, ആവാസവ്യവസ്ഥയിൽ കടന്നുകയറാതെ ജൈവവൈവിധ്യം ആസ്വദിക്കുന്നതിനുള്ള വെർച്വൽ റിയാലിറ്റി എക്സ്പീരിയൻസ് സെന്‍റർ, നേച്ചർ എഡ്യൂക്കേഷൻ സെന്‍റർ എന്നിവ ഇരവികുളത്തിന്‍റെ പ്രത്യേകതകളാണ്. ഡോ. എസ്.വി. കുമാർ ചെയർമാനായിട്ടുള്ള ഡോ. ജ്യോതി കശ്യപ്, ഡോ. ജി. അരീന്ദ്രൻ, ഡോ. ജെ.എ. ജോണ്‍സണ്‍ എന്നിവരടങ്ങുന്ന വിദഗ്ധസംഘമാണ് മാനേജ്മെന്‍റ് ഇഫക്ടീവ് ഇവാല്യൂവേഷനായി ഇരവികുളം ദേശീയോദ്യാനത്തിൽ പരിശോധന നടത്തിയത്.

പാലം പണിയാൻ ചെക്ക് ഡാം പൊളിച്ചു; ഇപ്പോൾ പാലവും ചെക്ക്ഡാമുമില്ല

ചെറുതോണി: കനത്ത മഴയിൽ വെള്ളം കവിഞ്ഞൊഴുകുന്ന ചെക്ക് ഡാം പാലം നിർമിക്കാനായി പൊളിച്ചുമാറ്റി. കാലവർഷം ആരംഭിച്ചതിനാൽ പാലം നിർമാണം തുടങ്ങാനായില്ല. പ്രദേശവാസികൾ ദുരിതക്കയത്തിൽ. പാൽക്കുളം തോടിന് കുറുകെ മഞ്ഞപ്പാറയിൽ ഇടുക്കി രൂപതയുടെ മൈനർ സെമിനാരിക്കു സമീപമുള്ള ചെക്ക് ഡാമാണ് പൊളിച്ചുനീക്കിയത്. മഴ പെയ്താൽ തോട്ടിലെ വെള്ളം ചെക്ക്ഡാമിന് മുകളിലൂടെ കവിഞ്ഞൊഴുകുന്നത് പതിവായിരുന്നു. വെള്ളം താഴുന്നതുവരെ വാഹനങ്ങൾക്കോ ജനങ്ങൾക്കോ മറുകര എത്താൻ സാധിച്ചിരുന്നില്ല. നാട്ടുകാരുടെ വർഷങ്ങളായുള്ള ആവശ്യപ്രകാരമാണ് ഇവിടെ പാലം നിർമിക്കാനുള്ള അനുമതിയായത്. മന്ത്രി റോഷി അഗസ്റ്റിൻ ഇറിഗേഷൻ വകുപ്പിൽനിന്ന് കോടികൾ ഇതിനായി അനുവദിപ്പിച്ചു. 26 മീറ്ററോളം നീളമുള്ള പാലമാണ് ഇവിടെ രൂപകല്പന ചെയ്തിരിക്കുന്നത്. പാലം നിർമിക്കാൻ പ്രദേശവാസികളെ ഉൾപ്പെടുത്തി കമ്മിറ്റിയും രൂപീകരിച്ചു. മേയ് പകുതി കഴിഞ്ഞ് കരാറുകാരൻ ചെക്ക്ഡാം പൊളിച്ചു. തോടിന് ആഴവും വീതിയും കൂട്ടി. എന്നാൽ, ദിവസങ്ങൾക്കകം കാലവർഷമാരംഭിച്ചതോടെ പാലംപണി മുടങ്ങി. കരാറുകാരൻ യന്ത്രങ്ങളുമായി മടങ്ങുകയും ചെയ്തു. ഇപ്പോൾ നാട്ടുകാർക്ക് മറുകര കടക്കാൻ മാർഗമില്ലാതായിരിക്കുകയാണ്. ഇരുകരയിലും സ്ഥലമുള്ളവരും സ്കൂൾ വിദ്യാർഥികളുമാണ് പ്രതിസന്ധിയിലായിരിക്കുന്നത്. തോടിനു സമീപമുള്ള മൃഗാശുപത്രിയിലും അങ്കണവാടിയിലും വാഴത്തോപ്പ് സ്കൂളിലുമെല്ലാം എത്തണമെങ്കിൽ കിലോമീറ്റർ ചുറ്റിക്കറങ്ങേണ്ട അവസ്ഥയാണ്. യാതൊരുവിധ ആലോചനയുമില്ലാതെ ചെക്ക്ഡാം പൊളിച്ചതിനാൽ ഇനി മാസങ്ങളോളം നാട്ടുകാർക്കു ദുരിതയാത്രതന്നെ.

മലയോര ഹൈവേ നിർമാണം: മണ്ണിടിച്ചിൽ ഭീഷണിയിൽ കുടുംബം

കട്ടപ്പന: മലയോര ഹൈവേ നിർമാണത്തിന്‍റെ ഭാഗമായി കാഞ്ചിയാർ സ്വരാജിൽ വ്യാപകമായി മൺതിട്ട ഇടിച്ചുനിരത്തിയതിനെത്തുടർന്ന് മേഖലയിൽ വ്യാപക മണ്ണിടിഞ്ഞ് നിരവധി വീടുകൾ അപകട ഭീഷണിയിലായി. മണ്ണെടുത്ത ഭാഗങ്ങളിൽ വേണ്ടത്ര സുരക്ഷയില്ലാതെയാണ് കൽക്കെട്ടുകൾ നിർമിച്ചിരിക്കുന്നത്. പലയിടങ്ങളിലും കൽക്കെട്ട് നിർമാണം പൂർത്തീകരിച്ചിട്ടുമില്ല. ഇതോടെയാണ് മേഖലയിൽ വീണ്ടും മണ്ണിടിച്ചിൽ ഉണ്ടാകുന്നത്. കഴിഞ്ഞദിവസമുണ്ടായ മണ്ണിടിച്ചിലിൽ വീടുകൾ ഉൾപ്പെടെയാണ് അപകടാവസ്ഥയിൽ ആയിരിക്കുന്നത്. ഇടിഞ്ഞ ഭാഗത്ത് വീണ്ടും വിള്ളലുകൾ രൂപപ്പെട്ടിട്ടുണ്ട്. പത്താഴപുരയ്ക്കൽ റോജേഷിന്‍റെ വീടും പുലിക്കുന്നേൽമുകളിൽ അനിൽകുമാറിന്‍റെ വീടും അപകടാവസ്ഥയിലാണ്. മണ്ണ് നീക്കിയതോടെ വീടുകളിലേക്കുള്ള വഴിയും നഷ്ടപ്പെട്ടു. ഇതിൽ ഒരു വീട്ടിലേക്കുള്ള വഴി മാത്രമാണ് നിലവിൽ കരാറുകാരൻ നിർമിച്ചു നൽകിയിട്ടുള്ളത്. സ്കൂൾ വിദ്യാർഥികളടക്കമുള്ളവർ ജീവൻ പണയം വച്ചാണ് നടപ്പുവഴി ഉപയോഗിക്കുന്നത്. നിലവിൽ വിള്ളലുണ്ടായ ഭാഗങ്ങളിൽ പ്ലാസ്റ്റിക് ചാക്കുകൾവച്ച് വെള്ളം ഇറങ്ങാതെ സുരക്ഷ ഒരുക്കേണ്ട ഗതികേടിലാണ് കുടുംബങ്ങൾ.

റോഡ് നിര്‍മാണത്തിനായെടുത്തു കൂട്ടിയ മണ്ണ് ഉരുള്‍പൊട്ടലിനു സമാനമായി ഇടിഞ്ഞെത്തി

രാജാക്കാട്: മലയോര ഹൈവേയുടെ നിര്‍മാണത്തിനായി എടുത്തുകൂട്ടിയ മണ്ണ് ഉരുള്‍പൊട്ടലിനു സമാനമായ രീതിയില്‍ ഇടിഞ്ഞ് വ്യാപകമായി കൃഷി നശിച്ചു. ബാക്കിനില്‍ക്കുന്ന ഭാഗം വിണ്ടുകീറി ഏതു നിമിഷവും ഇടിഞ്ഞുവീഴാവുന്ന അവസ്ഥയിലാണ്. താഴ്ഭാഗത്തുള്ള നാലു വീടുകളും കൃഷിയിടവും അപകട ഭീതിയിലാണ്. മലയോര ഹൈവേയുടെ ഭാഗമായി രാജാക്കാട് മുല്ലക്കാനത്തിനു സമീപം എടുത്തിട്ട മണ്ണാണ് മലയിടിച്ചിലിനു സമാനമായി കുത്തിയൊലിച്ചെത്തിയത്. കരാര്‍ കമ്പനിയായ ഇകെകെ ഇൻഫ്രാസ്ട്രക്ചർ മണ്ണ് നീക്കം ചെയ്യുന്നതിന് നടപടി സ്വീകരിക്കാത്തതാണ് അപകടത്തിനു കാരണം. മലയോര ഹൈവേ കടന്നുപോകുന്ന രാജാക്കാട് ഗ്രാമപഞ്ചായത്തിലെ രണ്ടാം വാര്‍ഡില്‍ മുല്ലക്കാനത്തിന് സമീപമാണ് നാലു കുടുംബങ്ങള്‍ മണ്ണിടിച്ചില്‍ ഭീതിയില്‍ കഴിയുന്നത്. കഴിഞ്ഞ ദിവസങ്ങളില്‍ ശക്തമായി പെയ്ത മഴയില്‍ മണ്ണ് വലിയ ഉരുള്‍പൊട്ടലിന് സമാനമായ രീതിയിലാണ് കൃഷിയിടത്തിലൂടെ കുത്തിയൊലിച്ചെത്തിയത്. വ്യാപകമായി കൃഷിയിടം മണ്ണുമൂടി നശിക്കുകയും ചെയ്തു. പനിച്ചിക്കല്‍ പുഷ്പാംഗതന്‍, കൊല്ലംപറമ്പില്‍ ദേവസ്യ അടക്കമുള്ളവരുടെ വീടുകള്‍ക്കും മൺകൂന ഭീഷണിയായി മാറിയിരിക്കുകയാണ്.

കൊന്നത്തടി-ബീനാമോൾ റോഡ് അപകടാവസ്ഥയിൽ

അടിമാലി: മഴയെത്തുടർന്ന് കൊന്നത്തടി - പണിക്കൻകുടി ബീനാമോൾ റോഡിൽ കൊന്നത്തടി പഞ്ചായത്ത് യുപി സ്കൂളിനു സമീപം റോഡിൽ വിള്ളൽ വീണു. കഴിഞ്ഞ വർഷവും മഴയെത്തുടർന്ന് റോഡിൽ ഇത്തരത്തിൽ വിള്ളൽ വീണിരുന്നു. റോഡിനോട് ചേർന്നൊഴുകുന്ന മരക്കാനം - കൊന്നത്തടി തോട് നിറഞ്ഞൊഴുകുന്ന സമയത്താണ് റോഡിൽ വിള്ളൽ വീഴുന്നത്. മുൻപും പ്രദേശവാസികൾ പരാതികൾ നൽകിയിട്ടുണ്ടെങ്കിലും ശാശ്വതമായ പരിഹാരം കാണാൻ കഴിഞ്ഞിട്ടില്ല. സ്കൂളിനു സമീപമാണ് റോഡ് അപകടാവസ്ഥയിലായിരിക്കുന്നത്. തോടിന് സംരക്ഷണഭിത്തി നിർമിച്ച് സംരക്ഷിക്കണമെന്നാണ് പ്രദേശവാസികളുടെ ആവശ്യം.

മറയൂർ ശർക്കരയുടെ ഉത്പാദനം പ്രതിസന്ധിയിലേക്ക്

അടിമാലി: സ്വാദിനു പേരുകേട്ട മറയൂരിലെ കരിമ്പുകൃഷി പ്രതിസന്ധി നേരിടുന്നു. മറയൂര്‍ ശര്‍ക്കരയ്ക്ക് ഭൗമസൂചിക പദവി ലഭിച്ചിട്ടുണ്ടെങ്കിലും കരിമ്പിന്‍തോട്ടത്തില്‍ കൃഷിജോലികള്‍ക്കായി തൊഴിലാളികളെ കിട്ടാനില്ലെന്ന് കര്‍ഷകര്‍ പറയുന്നു. തമിഴ്‌നാട് ശര്‍ക്കരയുടെ കടന്നുവരവ് നിയന്ത്രിക്കാനാവാത്തതാണ് മറ്റൊരു പ്രതിസന്ധി. ഇതുമൂലം മറയൂര്‍ ശര്‍ക്കരയെന്ന പേരില്‍ വ്യാജശര്‍ക്കര വിപണിയില്‍ എത്തുന്നുവെന്നും ഇതു വിലയിടിവിനും യഥാര്‍ഥ ശര്‍ക്കരയുടെ വില്‍പ്പനക്കുറവിനും ഇടവരുത്തുന്നുവെന്നും കര്‍ഷകര്‍ പറഞ്ഞു. കാലാവസ്ഥാ വ്യതിയാനമാണ് കരിമ്പ് കര്‍ഷകര്‍ നേരിടുന്ന മറ്റൊരു ഭീഷണി. മണ്ണിലെ വളക്കൂറ് നഷ്ടമായതും കാട്ടുമൃഗശല്യവും കരിമ്പുകര്‍ഷകര്‍ക്കു തിരിച്ചടിയാകുന്നുണ്ട്. പ്രതികൂല സാഹചര്യങ്ങള്‍മൂലം കരിമ്പുകൃഷി ചെയ്തിരുന്ന കര്‍ഷകരില്‍ പലരും കൃഷിയില്‍നിന്നു പിന്‍വാങ്ങിയിട്ടുണ്ട്. ഇതോടെ മുന്‍കാലങ്ങളെ അപേക്ഷിച്ച് മറയൂരില്‍ കരിമ്പുകൃഷി കുറഞ്ഞു. കരിമ്പുകൃഷി ചെയ്തുപോന്നിരുന്ന ഭൂമി തരിശായി മാറുകയോ ടൂറിസവുമായി ബന്ധപ്പെട്ട മറ്റ് ആവശ്യങ്ങള്‍ക്കുവേണ്ടി വിനിയോഗിക്കപ്പെടുകയോ ചെയ്യുന്ന സാഹചര്യമാണ്. നിലവിലെ സ്ഥിതി തുടര്‍ന്നാല്‍ കൂടുതല്‍ കര്‍ഷകര്‍ കരിമ്പ് കൃഷിയില്‍നിന്നു പിന്‍വാങ്ങിയേക്കാം.

റിട്ട. എസ്ഐ സൈക്കിൾ ചവിട്ടുകയാണ് ലഹരിവിരുദ്ധ പ്രചാരണത്തിനായി

അടിമാലി: ഔദ്യോഗിക ജീവിതത്തില്‍നിന്നു വിരമിച്ചിട്ടും വീട്ടില്‍ വിശ്രമിക്കാതെ ജനനന്മക്കായി സൈക്കിള്‍ ചവിട്ടുകയാണ് ഒരു പോലീസ് ഉദ്യോഗസ്ഥന്‍. കൊല്ലം വെസ്റ്റ് പോലീസ് സ്റ്റേഷനില്‍നിന്ന് എസ്‌ഐയായി വിരമിച്ച ഷാജഹാനാണ് ലഹരിക്കെതിരേയുള്ള പ്രചാരണവുമായി 2025 കിലോമീറ്റര്‍ സൈക്കിള്‍ യാത്ര നടത്തുന്നത്. ഷാജഹാന്‍റെ സൈക്കിള്‍ യാത്ര ഇടുക്കിയുടെ മലമടക്കുകളിലും എത്തി. 2025 മേയ് 31നാണ് 31 വര്‍ഷത്തെ പോലീസ് ജീവിതത്തില്‍നിന്നു കൊല്ലം പള്ളിമണ്‍ സ്വദേശി എ. ഷാജഹാന്‍ വിരമിച്ചത്. റിട്ടയറായ ദിവസം കൊല്ലം വെസ്റ്റ് പോലീസ് സ്റ്റേഷനില്‍നിന്നു ലഹരിക്കെതിരേയുള്ള പോരാട്ടത്തിനായി ഈ ഉദ്യോഗസ്ഥന്‍ സൈക്കിള്‍ ചവിട്ടാന്‍ ഇറങ്ങി. കേരളത്തിലെ മുഴുവന്‍ ജില്ലകളിലൂടെയും സൈക്കിള്‍ പ്രയാണം നടത്തിയും ഓരോ പ്രദേശത്തെയും സ്കൂളുകളിലും പൊതു ഇടങ്ങളിലും ലഹരിക്കെതിരേ ബോധവത്കരണ ക്ലാസുകൾ നടത്തിയുമാണ് സൈക്കിൾ പ്രയാണം. യാത്ര ആരംഭിച്ച് 11 ദിവസം കൊണ്ട് ഷാജഹാന്‍ മുഴുവന്‍ ജില്ലകളിലൂടെയും സഞ്ചരിച്ച് കാസര്‍ഗോട് മഞ്ചേശ്വരത്ത് എത്തി. സംസ്ഥാനത്തെ മലയോര മേഖലയിലൂടെയായി അടുത്ത ദിവസങ്ങളിലെ യാത്ര. അട്ടപ്പാടിയിലെയും വയനാട്ടിലെയും ഇടുക്കിയിലെയും മലയോര പ്രദേശങ്ങളിലൂടെ ഇദ്ദേഹം ഇപ്പോള്‍ യാത്ര തുടരുകയാണ്. ഇതിനോടകം 80 സ്‌കൂളുകളിലും 40 പൊതുസ്ഥലങ്ങളിലും ഷാജഹാന്‍ ലഹരിവിരുദ്ധ ക്ലാസുകള്‍ നയിച്ചു. 2019-ല്‍ സേവനത്തിലിരിക്കെ "ഹെല്‍മറ്റ് ഉപയോഗിക്കൂ, ജീവന്‍ രക്ഷിക്കൂ' എന്ന മുദ്രവാക്യമുയര്‍ത്തി 1,700 കിലോമീറ്റര്‍ ഇദ്ദേഹം സൈക്കിള്‍ പ്രയാണം നടത്തിയിരുന്നു. ഇതിനു പിന്നാലെയാണ് ഇപ്പോള്‍ 2025 കിലോമീറ്റര്‍ സൈക്കിള്‍ പ്രയാണം നടത്തുന്നത്. ഭാര്യ ഷഹബാനെയും മക്കളായ തസ്‌ലീമ, തസ്‌ലീന, ഷാരൂഖ് എന്നിവരും പോലീസ് സുഹൃത്തുക്കളും "റൈഡ് വിത്ത് ഷാജഹാന്‍' വാട്‌സ്ആപ്പ് ഗ്രൂപ്പിലെ അംഗങ്ങളും ഷാജഹാന് പിന്തുണയുമായി ഒപ്പമുണ്ട്. ജനനന്മയ്ക്കായി ഇനിയും ഏറെ കിലോമീറ്ററുകള്‍ താണ്ടാനുണ്ടെന്നാണ് ഷാജഹാന്‍ പറയുന്നത്.

ജാതിക്കാ പൊഴിയുന്നതിനു കാരണം കുമിൾരോഗബാധ

തൊടുപുഴ: കനത്ത മഴയിൽ പാകമാകാത്ത ജാതിക്കാ വ്യാപകമായി പൊഴിയുന്നതിനു കാരണം കുമിൾരോഗബാധയാണെന്ന് കൃഷിവകുപ്പ് അധികൃതർ അറിയിച്ചു. കുഞ്ചിത്തണ്ണിയിലെ ജാതിത്തോട്ടങ്ങളിൽ ഫൈറ്റോഫ്തോറ കുമിൾബാധയും ബോറോണ്‍ അപര്യാപ്തതയും ശ്രദ്ധയിൽപ്പെട്ടിട്ടുണ്ട്. ജാതിക്കൃഷിയെ ബാധിക്കുന്ന ഗുരുതരമായ ഇലക്കായ പൊഴിച്ചിലിനു കാരണമാകുന്ന പ്രശ്നമാണ് ഫൈറ്റോഫ്ത്തോറ കുമിൾബാധ. മേയ് അവസാനം മുതലുണ്ടായ തുടർച്ചയായ കനത്ത മഴമൂലം കർഷകർക്ക് കുമിളിനെ പ്രതിരോധിക്കുന്നതിനുള്ള ബോർഡോ മിശ്രിതം തളിക്കാൻ സാധിച്ചിരുന്നില്ല. ഇതും രോഗവ്യാപനത്തിന് പ്രധാന കാരണമായി. രോഗം ബാധിച്ച കൊഴിഞ്ഞ കായകളും ഇലകളും നീക്കം ചെയ്തതിനുശേഷം ട്രൈക്കോഡെർമ, സന്പുഷ്ട ചാണകം മരമൊന്നിന് അഞ്ചു കിലോ എന്നതോതിൽ കടയ്ക്കൽ ഇട്ടുകൊടുക്കണം.സ്യുടോമോനാസ് 30 ഗ്രാം ഒരു ലിറ്റർ വെള്ളത്തിൽ കലക്കി മരത്തിൽ തളിക്കണം. കൂടാതെ നീർവാർച സൗകര്യം ഉറപ്പാക്കുകയും വേണമെന്ന് അധികൃതർ അറിയിച്ചു. ഒരു ശതമാനം ബോർഡോ മിശ്രിതം അല്ലെങ്കിൽ കോപ്പർ ഹൈഡ്രോക്സൈഡ് ലിറ്ററിന് 2.5 ഗ്രാം എന്നിവയിലേതെങ്കിലും കുമിൾനാശിനി ഇലകളിലും കായ്കളിലും തണ്ടിലും വീഴത്തക്ക വിധത്തിൽ പശ ചേർത്ത് തളിക്കുക. മരത്തിനു ചുറ്റും തടമെടുത്ത് കോപ്പർ ഹൈഡ്രോക്സൈഡ് ലിറ്ററിന് 2.5 ഗ്രാം, അല്ലെങ്കിൽ കോപ്പർ ഓക്സി ക്ലോറൈഡ് ലിറ്ററിന് മൂന്ന് ഗ്രാം, മരം ഒന്നിന് 1020 ലിറ്റർ എന്ന തോതിൽ ഒഴിച്ചുകൊടുക്കണം. കൂടാതെ വെള്ളനിറത്തിൽ പത്രിയോടുകൂടി കായ് പൊട്ടി വീഴുകയാണെങ്കിൽ ബോറോണിന്‍റെ അപര്യാപ്തതയുണ്ടാകും. ബോറിക് ആസിഡ് ലിറ്ററിന് രണ്ടു ഗ്രാം ചേർത്ത് ഇലകളിൽ തളിക്കുകയോ 50 ഗ്രാം ബോറാക്സ് മണ്ണിൽ ചേർത്ത് കൊടുക്കുകയോ ചെയ്യണം.

ഓപ്പറേഷന്‍ സിന്ദൂറിന്‍റെ ഭാഗമായ സൈനികന് ആദരവൊരുക്കി ഗ്രാമസഭ

അടിമാലി: പാക്കിസ്ഥാനിലെ തീവ്രവാദ കേന്ദ്രങ്ങള്‍ക്കെതിരേ ഇന്ത്യ നടത്തിയ നീക്കമായ ഓപ്പറേഷന്‍ സിന്ദൂറിന്‍റെ ഭാഗമായ സൈനികന് ആദരവൊരുക്കി ഗ്രാമസഭ. അടിമാലി സ്വദേശിയും സൈനികനുമായ അഭിരാം സോമനാണ് പഞ്ചായത്തിലെ പന്ത്രണ്ടാം വാര്‍ഡ് ഗ്രാമസഭ ആദരവ് നൽകിയത്. കാശ്മീരിലെ റെജോറിയിലാണ് നിലവില്‍ അഭിരാം സോമന്‍ സേവനം അനുഷ്ഠിക്കുന്നത്. എട്ടു വര്‍ഷം മുമ്പാണ് അഭിരാം ഇന്ത്യന്‍ സേനയുടെ ഭാഗമായത്. അടിമാലി പൊളിഞ്ഞപാലം തെക്കേമുറിയില്‍ സോമന്‍ - ഓമന ദമ്പതികളുടെ മകനാണ് അഭിരാം. യുദ്ധമുഖത്തെ അനുഭവങ്ങള്‍ അഭിരാം നാട്ടുകാരുമായി പങ്കുവച്ചു. ഗ്രാമപഞ്ചായത്തംഗം കെ.കെ. രാജു അധ്യക്ഷത വഹിച്ചു. അടിമാലി ഗ്രാമപഞ്ചായത്ത് സെക്രട്ടറി നന്ദകുമാര്‍ ചടങ്ങ് ഉദ്ഘാടനം ചെയ്തു. മാത്യു ഫിലിപ്പ്, സി.ഡി. അഗസ്റ്റിന്‍, മിനി ബിജു, തങ്കമ്മ ജയന്‍, എം.ജെ. ഷേര്‍ളി, രാജേഷ്, നിസ തുടങ്ങിയവര്‍ പ്രസംഗിച്ചു.

ഡോ. ആനന്ദിന് 6.5 കോടിയുടെ ഫെലോഷിപ്

രാജാക്കാട്: ഡോ. ആനന്ദിന് അയർലൻഡ് സർക്കാരിന്‍റെ ആറരക്കോടിയുടെ ഫെലോഷിപ്. യുവ ഗവേഷകർക്കായി റിസേർച്ച് അയർലൻഡിന്‍റെ പാത്ത്‌വേ ഫെലോഷിപ്പിനാണ് ഡോ. വി.ആർ. ആനന്ദ് അർഹനായത്. ടെക്നോളജിക്കൽ യൂണിവേഴ്‌സിറ്റി ഓഫ് ഡബ്ലിനിലെ ഫോട്ടോണിക്സ് റിസേർച്ച് സെന്‍ററിലും നാനോ റിസേർച്ച് സെന്‍ററിലുമായാണ് ഗവേഷണം നടക്കുന്നത്. കാൻസർ രോഗനിർണയത്തിനായുള്ള അതിനൂതന ഫോട്ടോണിക്‌സ് സെൻസറുകൾ വികസിപ്പിക്കുന്നതിനാണ്ഫെലോഷിപ്. സ്വതന്ത്ര ഗവേഷകരെ വാർത്തെടുക്കാനുള്ള ഈ പദ്ധതിയിൽ ഡോ. ആനന്ദിന്‍റെ പ്രാഥമികമായ മേൽനോട്ടത്തിൽ ഒരു ഗവേഷക വിദ്യാർഥിക്കുകൂടി ഗവേഷണം നടത്താനാകും. രാജകുമാരി എൻഎസ്എസ് കോളജിൽനിന്ന് ഇലക്‌ട്രോണിക്സിൽ ബിരുദവും കൊച്ചി ശാസ്ത്ര സാങ്കേതിക സർവകലാശാലയിൽനിന്ന് ഇലക്‌ട്രോണിക് സയൻസിൽ ബിരുദാനന്തര ബിരുദവും പൂർത്തിയാക്കിയശേഷമാണ് ആനന്ദ് ഗവേഷണത്തിൽ ശ്രദ്ധ പതിപ്പിക്കുന്നത്. ഗവേഷണത്തിനായി കേരള സർക്കാർ നൽകിവരുന്ന കെഎസ്‌സിഎസ്ടിഇ റിസർച്ച് ഫെലോഷിപ്പും യുജിസി-നെറ്റ് യോഗ്യതയും നേടിയാണ് ആനന്ദ് കുസാറ്റിലെ ഫോട്ടോണിക്‌സ് വകുപ്പിൽനിന്നും ഗവേഷണ ബിരുദം പൂർത്തിയാക്കിയത്. തുടർന്ന് കൊച്ചി ഡിആർഡിഒയിൽ ഒപ്റ്റിക്സ് എൻജിനിയർ ആയി ജോലി ചെയ്തു. ബംഗളൂരു ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസിൽ, ടെക്നോളജിക്കൽ യൂണിവേഴ്‌സിറ്റി ഓഫ് ഡബ്ലിൻ എന്നിവിടങ്ങളിൽ പോസ്റ്റ് ഡോക്ടറൽ ഗവേഷകനായും ഡോ. ആനന്ദ് ജോലി ചെയ്തിട്ടുണ്ട്. ബൈസൺവാലി വടക്കേടത്ത് രവീന്ദ്രന്‍റെയും അംബികയുടെയും മകനാണ്.കേരള യൂണിവേഴ്സിറ്റിയുടെ കീഴിൽ ഫിസിക്സ്‌ വിഭാഗത്തിൽ ഗവേഷണ വിദ്യാർഥിനിയായ മലപ്പുറം വണ്ടൂർ കാപ്പിൽ ആനന്ദസൗധത്തിൽ അഞ്ജനയാണ് ഭാര്യ.

പുലിപ്പേടിയിൽ കൊങ്ങാട്: ഉറക്കം നഷ്ടപ്പെട്ട് നാട്ടുകാർ

പെരുവന്താനം: പെരുവന്താനം പഞ്ചായത്തിലെ കൊങ്ങാട് മേഖലയും പുലിപ്പേടിയിലേക്ക്. മേഖലയിൽ പുലിയിറങ്ങിയതായി സംശയം. കഴിഞ്ഞ ദിവസം പ്രദേശവാസിയായ മുണ്ടത്താനം ഫിലിപ്പിന്‍റെ ആടിനെ അജ്ഞാത ജീവി കടിച്ചുകൊന്നനിലയിൽ കണ്ടെത്തി. രാത്രിയിൽ വീടിനോടു ചേർന്ന് കെട്ടിയിരുന്ന ആടിനെ കടിച്ചുകൊന്ന് പാതി ഭക്ഷിച്ചനിലയിലാണ് കണ്ടെത്തിയത്. തുടർന്ന് നാട്ടുകാർ വനംവകുപ്പിനെ വിവരം അറിയിച്ചു. സംഭവസ്ഥലത്ത് എത്തിയ വനപാലകർ സ്ഥലം നിരീക്ഷിച്ച് കാമറകൾ സ്ഥാപിച്ചു. പുലിയോ പുലിക്ക് സമാനമായ മറ്റു മൃഗങ്ങളോ ആകാം ആടിനെ കടിച്ചു കൊന്നതെന്നാണ് വനംവകുപ്പിന്‍റെ വിലയിരുത്തൽ. സാധാരണക്കാരായ കർഷക കുടുംബങ്ങൾ മാത്രം അധിവസിക്കുന്ന മേഖലയാണ് കൊങ്ങാട്. പെരുവന്താനം പഞ്ചായത്തിലെ യാത്രാക്ലേശം രൂക്ഷമായ സ്ഥലങ്ങളിലൊന്നുമാണ്. റോഡിന്‍റെ ദുരവസ്ഥമൂലം യാത്രാദുരിതം അനുഭവിക്കുന്ന പെരുവന്താനം ആനചാരി നിവാസികൾക്ക് യാതൊരു സഹായവും അധികാരികളുടെ ഭാഗത്തുനിന്നും ലഭിക്കുന്നില്ലെന്ന ആക്ഷേപം നിലനിൽക്കുമ്പോഴാണ് പുലിഭീതികൂടി എത്തുന്നത്. ആടിനെയും പശുവിനെയും വളർത്തുന്ന നിരവധി കർഷകർ പ്രദേശത്തുണ്ട്. കൊങ്ങാട് പുലിയിറങ്ങിയെന്ന പ്രചാരണത്തിന് പിന്നാലെ സമീപസ്ഥലങ്ങളായ ആനചാരി, അമലഗിരി, അഴങ്ങാട് പ്രദേശങ്ങളിലുള്ളവരും ഭീതിയിലാണ്. സമീപത്തെങ്ങും വനമേഖലയില്ലാത്ത ഇവിടെ പുലി എങ്ങനെ എത്തിയെന്ന ചോദ്യവും ബാക്കിയാവുകയാണ്. പെരിയാർ വന്യജീവി സങ്കേതത്തിൽനിന്നു കണയങ്കവയൽ അമലഗിരി പ്രദേശത്തുകൂടി എത്തിയതാണെന്ന നിഗമനവുമുണ്ട്. ഏതാനും മാസം മുമ്പ് അമലഗിരിയിൽ ജനവാസ മേഖലയിൽ കാട്ടാന എത്തിയിരുന്നു. പിന്നീട് വനംവകുപ്പ് തുരത്തി ഓടിക്കുകയായിരുന്നു. മേഖലയിൽ അജ്ഞാത ജീവിയുടെ ആക്രമണം ഉണ്ടായതോടെ ജനങ്ങൾ കടുത്ത ഭീതിയിലാണ്.

പോലീസിന്‍റെ പെറ്റിയടി: പ്രതിഷേധം ശക്തം

തൊടുപുഴ: നഗരത്തിൽ പാതയോരങ്ങളിൽ പാർക്ക് ചെയ്യുന്ന വാഹനങ്ങൾക്ക് അനാവശ്യമായി പെറ്റിയടിക്കുന്ന ട്രാഫിക് പോലീസിനെതിരേ പ്രതിഷേധം ശക്തമായി. തൊടുപുഴ ടൗണിൽ വാഹന പാർക്കിംഗിന് ഏറെ ബുദ്ധിമുട്ട് നേരിടുന്നതിനാൽ വാഹനയുടമകൾ പലപ്പോഴും പാതയോരങ്ങളിൽ വാഹനം പാർക്ക് ചെയ്യേണ്ടി വരും. പലപ്പോഴും വ്യാപാര സ്ഥാപനങ്ങളിലും മറ്റും എത്തുന്നവരാണ് ഇത്തരത്തിൽ വാഹനങ്ങൾ പാർക്ക് ചെയ്യുന്നത്. എന്നാൽ ഇത്തരത്തിൽ പാർക്ക് ചെയ്യുന്നവർക്കാണ് പെറ്റിയുടെ രൂപത്തിൽ ട്രാഫിക് പോലീസിന്‍റെ ഇരുട്ടടി. ട്രാഫിക് പോലീസിന്‍റെ വാഹനത്തിൽ ഇരുന്നുതന്നെ മൊബൈലിൽ ഫോട്ടോയെടുത്ത് ഉടമകൾക്ക് ഗതാഗത നിയമലംഘനം നടത്തിയെന്ന പേരിൽ നോട്ടീസ് അയയ്ക്കുകയാണ് പോലീസ് ചെയ്യുന്നത്. ഇത്തരത്തിൽ മൊബൈലിൽ ഫോട്ടോയെടുത്ത് വാഹനയുടമകൾക്ക് പെറ്റിക്കേസ് രജിസ്റ്റർ ചെയ്യരുതെന്നാണ് നിർദേശം. എന്നാൽ ഇതു മറികടന്നാണ് ഉടമകൾക്ക് പെറ്റിക്കേസ് നൽകുന്നതെന്നാണ് ആക്ഷേപം. ഒട്ടേറെ പേർക്കാണ് കഴിഞ്ഞ ദിവസങ്ങളിൽ ട്രാഫിക് പോലീസിന്‍റെ പിഴയടയ്ക്കാനുള്ള നോട്ടീസ് ലഭിച്ചത്. മർച്ചന്‍റ്സ് അസോസിയേഷൻ വ്യാപാരികൾ പ്രതിസന്ധിമൂലം നട്ടം തിരിയുന്ന സാഹചര്യത്തിൽ കടയിൽ വരുന്നവരുടെ വാഹനങ്ങളുടെ ഫോട്ടോ മൊബൈലിൽ പകർത്തി പെറ്റിക്കേസ് എടുക്കുന്ന ട്രാഫിക് പോലീസിന്‍റെ നടപടിക്കെതിരേ തൊടുപുഴ മർച്ചന്‍റ്സ് അസോസിയേഷൻ പ്രതിഷേധിച്ചു. പോലീസും വ്യാപാരികളും തമ്മിൽ നല്ല ബന്ധമാണ് നിലനിന്നു പോരുന്നത്. പക്ഷേ ചില പോലീസ് ഉദ്യോഗസ്ഥരുടെ നടപടി വ്യാപാരികൾക്ക് വളരെയധികം ബുദ്ധിമുട്ട് ഉണ്ടാക്കുന്നുണ്ട്. ഇക്കാര്യത്തിൽ നടപടി സ്വീകരിക്കണമെന്നാവശ്യപ്പെട്ട് അസോസിയേഷൻ പ്രസിഡന്‍റ് രാജു തരണിയിലിന്‍റെ നേതൃത്വത്തിൽ ഡിവൈഎസ്പി പി.കെ. സാബുവിന് നിവേദനം നൽകി. വിഷയം ശ്രദ്ധയിൽപ്പെട്ടിട്ടുണ്ടെന്നും ആവശ്യമായ നടപടി സ്വീകരിക്കാമെന്നും ഡിവൈഎസ്പി ഉറപ്പ് നൽകി. അസോസിയേഷൻ ജനറൽ സെക്രട്ടറി സി.കെ. നവാസ്, ഭാരവാഹികളായ അനിൽ പീടികപ്പറന്പിൽ, ഷെരീഫ് സർഗം, കെ.പി. ശിവദാസ്, ജോസ് തോമസ് കളരിക്കൽ, എം.എച്ച്. ഷിയാസ്, ലിജോണ്‍സ് സെബാസ്റ്റ്യൻ എന്നിവർ ചേർന്നാണ് നിവേദനം നൽകിയത്.

ഇടുക്കി മെഡിക്കൽ കോളജിൽ രോഗികൾ നിന്നു വലയുന്നു

ചെറുതോണി: ഇടുക്കി മെഡിക്കൽ കോളജ് ആശുപത്രിയിൽ ചികിത്സ തേടിയെത്തുന്ന രോഗികൾ ഇരിക്കാൻ കസേരകളില്ലാതെ വലയുന്നു. ഓരോ പരിശോധനാ മുറികൾക്കു മുന്നിലും നൂറുകണക്കിന് രോഗികളാണ് ഊഴംകാത്ത് മണിക്കൂറുകൾ നിൽക്കുന്നത്. ഇവരിൽ പ്രായമായവരും കൈക്കുഞ്ഞുമായുളളവരും നിൽക്കാൻ ബുദ്ധിമുട്ടുള്ളവരുമെല്ലാമുണ്ട്. ക്യൂവിൽ നിന്നു മാറിയാൽ അവസരം നഷ്ടപ്പെടുമെന്നതിനാൽ എത്ര കഷ്ടപ്പെട്ടും ഇവർ ഒപിക്ക് മുന്നിൽതന്നെ നിൽക്കുകയാണ്. ചീട്ടെടുക്കുമ്പോൾ ഡോക്ടറെ കാണാനുള്ള ക്രമനമ്പറിടാറുണ്ടെങ്കിലും ഒപിക്ക് മുന്നിലെ ക്യൂ തന്നെയാണ് ശരണം. ഒപിക്ക് മുന്നിൽ അഞ്ചോ, ആറോ പേർക്ക് ഇരിക്കാനുള്ള സൗകര്യമേ ഉള്ളൂ. ബാക്കിയുള്ള രോഗികൾ മുഴുവൻ നേരവും നിൽക്കണം. അവശരായ രോഗികൾക്കെങ്കിലും ഇരിക്കാനുള്ള സൗകര്യമൊരുക്കാൻ ആശുപത്രി അധികൃതരും ആശുപത്രി വികസനസമിതിയും തയാറാകണമെന്നാണ് രോഗികൾ അവശ്യപ്പെടുന്നത്. ചീട്ടെടുക്കുമ്പോൾ രേഖപ്പെടുത്തുന്ന ക്രമമനുസരിച്ച് രോഗികൾക്ക് ഡോക്ടറെ കാണാനുള്ള ക്രമീകരണവും ഒരുക്കണമെന്നും രോഗികൾ ആവശ്യപ്പെട്ടു.

ആരോഗ്യവകുപ്പിൽ മെന്‍റർമാരായി കരാർ നിയമനം വേണ്ടെന്ന് ഉത്തരവ്

തൊടുപുഴ: ലോക ബാങ്ക് സഹായത്തോടെ നടപ്പാക്കുന്ന ഏകാരോഗ്യപദ്ധതിയിൽ ജില്ലാ മെന്‍റർമാരായി കരാർ നിയമനം നൽകിയവരുടെ കരാർ പുതുക്കേണ്ടെന്ന് സർക്കാർ തീരുമാനിച്ചു. ഇടുക്കി, ആലപ്പുഴ, കോട്ടയം, പത്തനംതിട്ട ജില്ലകളിലായിരുന്നു മെന്‍റർമാരായി ആരോഗ്യ വകുപ്പിൽ വിരമിച്ച ജീവനക്കാരെ കരാറടിസ്ഥാനത്തിൽ നിയമിച്ചത്. ഇവരുടെ നിയമനം സംബന്ധിച്ച് വലിയ ആക്ഷേപം ഉയർന്നിരുന്നു. യുവജനങ്ങളുടെ തൊഴിൽസാധ്യത നഷ്ടപ്പെടുത്തി വിരമിച്ചവർക്ക് വലിയ തുക ശന്പളം നൽകി നിയമനം നടത്തിയെന്നും നിയമിക്കപ്പെട്ടവർ സർവീസ് കാലഘട്ടത്തിൽ ഒരു പ്രത്യേക സംഘടനയിൽ മാത്രം പ്രവർത്തിച്ചവർ ആണെന്നുമായിരുന്നു ആക്ഷേപം. ജില്ലാ മെന്‍റർമാരുടെ കരാർ പുതുക്കണമെന്നാവശ്യപ്പെട്ട് ഇവർ നൽകിയ അപേക്ഷയിൽ തീരുമാനമെടുക്കാൻ അഡീഷണൽ ചീഫ് സെക്രട്ടറിയുമായി ഏകാരോഗ്യ പദ്ധതി ഉദ്യോഗസ്ഥർ നടത്തിയ ചർച്ചയിലാണ് കരാർ പുതുക്കേണ്ടതില്ലെന്ന തീരുമാനം ഉണ്ടായത്. മെന്‍റർമാരുടെ ജോലികൾ താത്കാലികമായി പഞ്ചായത്തുകളിലെ പ്രാഥമികാരോഗ്യകേന്ദ്രങ്ങളിലെ ജീവനക്കാരായ ഹെൽത്ത് ഇൻസ്പെക്ടർ, ജൂണിയർ ഹെൽത്ത് ഇൻസ്പെക്ടർ, ജൂണിയർ പബ്ലിക് ഹെൽത്ത് നഴ്സ്, എംഎൽഎസ്പി നഴ്സുമാർ എന്നിവരിൽ ആർക്കെങ്കിലും നൽകാനും ഉത്തരവിൽ വ്യക്തമാക്കിയിട്ടുണ്ട്. എന്നാൽ തൊഴിൽരഹിതരായ യോഗ്യരായ ഉദ്യോഗാർഥികളെ പരിഗണിക്കുന്ന കാര്യത്തിൽ ഉത്തരവിൽ നിർദേശമില്ല.

ഗവ. ആശുപത്രി വളപ്പിൽനിന്ന് ചന്ദനം മോഷണം പോയി

മറയൂർ: സർക്കാർ ആശുപത്രി വളപ്പിൽനിന്ന് അഞ്ചു ലക്ഷം രൂപ വിലമതിക്കുന്ന ചന്ദനമരം മോഷണം പോയി. ആശുപത്രിയുടെ പിൻവശത്ത് വനംവകുപ്പിന്‍റെ ഓഫീസിന് സമീപമുള്ള പ്രദേശത്തുനിന്നാണ് മരം മോഷ്ടിച്ചത്. രാത്രി മുഴുവൻ വാച്ചർമാരുടെ നിരീക്ഷണത്തിലുള്ള സുരക്ഷിത മേഖലയിൽനിന്നാണ് ചന്ദനം ആരുമറിയാതെ മോഷ്ടാക്കൾ കടത്തിയത്. വനംവകുപ്പിന്‍റെ നിയമമനുസരിച്ച് റിസർവ് വനമേഖലയിൽനിന്നു മാത്രമാണ് ചന്ദന മോഷണവുമായി ബന്ധപ്പെട്ട് കേസെടുക്കുകയും അന്വേഷണം നടത്തുകയും ചെയ്യുന്നത്. സ്വകാര്യ ഭൂമിയിലോ പൊതുസ്ഥലങ്ങളിലോനിന്ന് ചന്ദനം മോഷണം പോയാൽ അന്വേഷണച്ചുമതല പോലീസിനാണ്. ഇക്കാരണത്താൽ ആശുപത്രി വളപ്പിലെ മോഷണത്തിൽ വനംവകുപ്പ് ഇടപെടാൻ സാധ്യത കുറവാണ്. സ്വകാര്യ ഭൂമിയിലും പൊതുസ്ഥലങ്ങളിലും ചന്ദനമോഷണം പതിവായിട്ടുണ്ടെങ്കിലും ഫലപ്രദമായ അന്വേഷണം നടക്കാത്തത് ആശങ്ക ഉയർത്തിയിട്ടുണ്ട്. വനംവകുപ്പിന്‍റെ ഓഫീസിന് തൊട്ടടുത്തുള്ള വാച്ചർമാരുടെ നിരന്തര നിരീക്ഷണത്തിലുള്ള പ്രദേശത്തു നടന്ന ചന്ദനമോഷണം സുരക്ഷാ വ്യവസ്ഥകളിലെ വീഴ്ചയാണ് ചൂണ്ടിക്കാട്ടുന്നത്. സംഭവത്തിൽ പോലീസ് അന്വേഷണം ആരംഭിച്ചിട്ടുണ്ട്. കുറ്റവാളികളെ കണ്ടെത്തുന്നതിനായി സമീപത്തെ സിസിടിവി ദൃശ്യങ്ങൾ പരിശോധിക്കുന്നതുൾപ്പെടെ നടപടികൾ സ്വീകരിക്കുമെന്ന് അധികൃതർ അറിയിച്ചു.

കരിമുട്ടിയിൽ കാട്ടാനശല്യം: കർഷകസ്വപ്നങ്ങൾ തകരുന്നു

മറയൂർ: കരിമുട്ടി മേഖലയിൽ കാട്ടാനശല്യം അതിരൂക്ഷമായി. ചിന്നാർ വന്യജീവി സങ്കേതത്തിന്‍റെ അതിർത്തിയോടു ചേർന്നുള്ള മേഖലയിൽ കർഷകരുടെ അധ്വാനവും സ്വപ്നങ്ങളും കാട്ടാനകൾ ചവിട്ടിമെതിക്കുകയാണ്. കഴിഞ്ഞ ദിവസം വട്ടവയലിൽ ജോണ്‍സന്‍റെ കൃഷിഭൂമിയിലെ തെങ്ങ്, വാഴ, കമുക്, കരിന്പ് തുടങ്ങിയവ കാട്ടാനകൾ നശിപ്പിച്ചു. മറയൂർ ശർക്കരയ്ക്ക് ഭൗമസൂചിക പദവി ലഭിക്കാനിടയാക്കിയ കരിന്പുകൃഷി ഇതുമൂലം ഏറെ പ്രതിസന്ധിയിലാണ്. കഴിഞ്ഞ ഏഴു വർഷത്തിനിടെ 3,500 ഏക്കറിൽനിന്ന് 400 ഏക്കറായാണ് കരിന്പ് കൃഷി ചുരുങ്ങിയത്. ഇതിൽ പ്രധാന കാരണമായത് കാട്ടാനശല്യമാണ്. ഒറ്റ രാത്രികൊണ്ടാണ് കാട്ടാനകൾ കൃഷിഭൂമി തകർത്തതെന്ന് വട്ടവയലിൽ ജോണ്‍സണ്‍ പറഞ്ഞു. കാട്ടാനകൾ കൂട്ടമായി ജനവാസ മേഖലകളിലേക്ക് ഇറങ്ങുന്നത് കർഷകരെ ഭീതിയിലാഴ്ത്തുന്നുമുണ്ട്. കാട്ടാനകൾ കൂട്ടത്തോടെയെത്തുന്പോൾ ഒന്നും ചെയ്യാനാകാതെ നിസഹായരായി നിൽക്കേണ്ട അവസ്ഥയിലാണ് കർഷകർ. വനംവകുപ്പ് സോളർ വേലികളും മറ്റു സംവിധാനങ്ങളും സ്ഥാപിച്ചിട്ടുണ്ടെങ്കിലും അവ പലപ്പോഴും പ്രവർത്തനക്ഷമമല്ലെന്ന് നാട്ടുകാർ ആരോപിക്കുന്നു. മരങ്ങൾ വെട്ടിമാറ്റലും ഇടവിളകൾ കൃഷിചെയ്യലും ചക്ക പോലുള്ള പഴവർഗങ്ങൾ വ്യാപകമായതും കാട്ടാനശല്യത്തിനു കാരണമാകുന്നതായി വനംവകുപ്പ് ഉദ്യോഗസ്ഥർ ചൂണ്ടിക്കാട്ടി. 2024 മാർച്ചിൽ മന്ത്രി പി. രാജീവിന്‍റെ അധ്യക്ഷതയിൽ ചേർന്ന യോഗം കാട്ടാനശല്യത്തിന് പരിഹാരം കാണാൻ തീരുമാനിച്ചിരുന്നു. വാച്ചർമാർക്ക് ഉപകരണങ്ങൾ, സോളർ ലൈറ്റ്, സിഎസ്ആർ ഫണ്ട് ഉപയോഗം തുടങ്ങിയവ ഉൾപ്പെടുത്തിയെങ്കിലും ഈ നടപടികൾ പൂർണമായി ഫലപ്രദമല്ലെന്ന് കർഷകർ പറയുന്നു. സർക്കാരും വനംവകുപ്പും ഫലപ്രദമായ നടപടികളിലൂടെ ശാശ്വത പരിഹാരം കാണാത്തപക്ഷം മറയൂർ കരിമുട്ടിയിലെ കർഷകരുടെ സ്വപ്നങ്ങൾ കാട്ടാനകൾ ചവിട്ടി മെതിക്കുന്നത് തുടർക്കഥയായി മാറും.

മുല്ലപ്പെരിയാറിൽ മേൽനോട്ടസമിതി സന്ദർശനം നടത്തണം

തൊടുപുഴ: മുല്ലപ്പെരിയാറിൽ മേൽനോട്ട സമിതി അടിയന്തര സന്ദർശനം നടത്തണമെന്നും ജലനിരപ്പ് സംബന്ധിച്ച യഥാർഥ വസ്തുത വെളിപ്പെടുത്തണമെന്നും മുല്ലപ്പെരിയാർ ജനസംരക്ഷണസമിതി യോഗം ആവശ്യപ്പെട്ടു. ഇപ്പോൾ തമിഴ്നാട് സർക്കാർ ജലനിരപ്പ് സംബന്ധിച്ച് പുറത്തുവിടുന്ന വസ്തുതകൾ വിശ്വസനീയമല്ല. ജലനിരപ്പ് സംബന്ധിച്ച് തമിഴ്നാട് സർക്കാർ പറയുന്ന അറിവ് മാത്രമാണ് കേരള സർക്കാരിനുള്ളത്. ഇത് ശരിയാണോ എന്ന് പരിശോധിക്കാനുള്ള ഒരു സംവിധാനവും നിലവിലില്ല. വസ്തുത മനസിലാക്കാൻ കേരളത്തിലെ ഉദ്യോഗസ്ഥർക്കും മാധ്യമപ്രവർത്തകർക്കും അണക്കെട്ട് സന്ദർശിക്കാൻ അനുമതി നൽകണം. അപകടസാധ്യതാ മേഖലകളിൽ വഴിവിളക്കുകൾ സ്ഥാപിക്കാനും അപകടാവസ്ഥ ഉണ്ടായാൽ മുന്നറിയിപ്പ് നൽകാനും മോക് ഡ്രിൽ നടത്താനും സർക്കാർ നടപടി സ്വീകരിക്കണം. ജലനിരപ്പ് കുറയുന്നതുവരെ സാഹചര്യങ്ങൾ വിലയിരുത്താൻ മന്ത്രിമാരും ഉന്നത ഉദ്യോഗസ്ഥരും അടങ്ങുന്ന സമിതി മേഖലയിൽ ക്യാന്പ് ചെയ്യണമെന്നും അപകടാവസ്ഥ സംബന്ധിച്ച ജനങ്ങളുടെ ആശങ്കയും ഭയവും ഇല്ലാതാക്കാൻ സർക്കാർ അടിയന്തര നടപടി സ്വീകരിക്കണമെന്നും ആവശ്യപ്പെട്ട് മുഖ്യമന്ത്രി, റവന്യു, ജലവിഭവ വകുപ്പ് മന്ത്രിമാർ, ജില്ലാ കളക്ടർ എന്നിവർക്ക് ജനസംരക്ഷണ സമിതി നിവേദനം നൽകി. അണക്കെട്ട് ഡി കമ്മിഷൻ ചെയ്യണമെന്നാവശ്യപ്പെട്ട് ജൂലൈ 19ന് സെക്രട്ടേറിയറ്റ് മാർച്ച് നടത്താനും സമിതി തീരുമാനിച്ചു. യോഗത്തിൽ ചെയർമാൻ അഡ്വ. റോയ് വാരികാട്ട് അധ്യക്ഷത വഹിച്ചു. ജനറൽ കണ്‍വീനർ പിടി. ശ്രീകുമാർ, പിആർഒ ഷിബു കെ. തന്പി, കെ.പി. ചന്ദ്രൻ, തോമസ് വൈദ്യൻ, ശ്രീരാജ് ചിറ്റക്കാട്ട്, ബി. കൃഷ്ണകുമാർ എന്നിവർ പ്രസംഗിച്ചു.

ദിവ്യരക്ഷാലയത്തിൽ പിറന്നാൾ മധുരം പങ്കിട്ട് പി.ജെ. ജോസഫ്

തൊടുപുഴ: ശതാഭിഷിക്തനായ പി.ജെ. ജോസഫ് എംഎൽഎ മൈലക്കൊന്പ് ദിവ്യരക്ഷാലയത്തിലെ അന്തേവാസികൾക്കൊപ്പം ജന്മദിനത്തിന്‍റെ മധുരം പങ്കിട്ടു. യൂത്ത് ഫ്രണ്ട് ജില്ലാ കമ്മിറ്റി ഒരുക്കിയ ജന്മദിനാഘോഷത്തിലാണ് മുന്നൂറോളം അന്തേവാസികൾക്കൊപ്പം പി.ജെ. ജോസഫ് സമയം ചെലവഴിച്ചത്. അന്തേവാസികൾക്ക് അദ്ദേഹം ഭക്ഷണം വിളന്പിനൽകി. കേരള യൂത്ത് ഫ്രണ്ട് ജില്ലാ പ്രസിഡന്‍റ് എബി തോമസ് അധ്യക്ഷത വഹിച്ചു. തോമസ് ഉണ്ണിയാടൻ, അപു ജോണ്‍ ജോസഫ്, തോമസ് പെരുമന, എം. മോനിച്ചൻ, വർഗീസ് വെട്ടിയാങ്കൻ, ബ്ലെയിസ് ജി. വാഴയിൽ, ജോയി കൊച്ചുകരോട്ട്, എം.ജെ. കുര്യൻ, ജെയിസ് ജോണ്‍, ക്ലമന്‍റ് ഇമ്മാനുവൽ, ജോബി പൊന്നാട്ട്, ബിനോയി മുണ്ടയ്ക്കാമറ്റം, ഷിബിൻ വർഗീസ്, ഷൈൻ വടക്കേക്കര, വർഗീസ് സഖറിയ, കെ.വി. ജോസ്, സലിം പടിഞ്ഞാറെക്കര എന്നിവർ പ്രസംഗിച്ചു. ഫാ. ജോസഫ് നന്പേരിയുടെ കാർമികത്വത്തിൽ നടന്ന ദിവ്യ ബലിക്കുശേഷം ചേർന്ന സമ്മേളനത്തിൽ ദിവ്യരക്ഷാലയം ഡയറക്ടർ ടോമി ഓടയ്ക്കലിനൊപ്പം പി.ജെ. ജോസഫ് ജന്മദിന കേക്ക് മുറിച്ചു. അന്തേവാസികൾ തയാറാക്കിയ മെമന്‍റോയും അദ്ദേഹത്തിനു നൽകി ആദരിച്ചു. പി.ജെ. ജോസഫിനെ ആദരിച്ചു തൊടുപുഴ: കേരള കോണ്‍ഗ്രസ് ജില്ലാ കമ്മിറ്റിയുടെ നേതൃത്വത്തിൽ പാർട്ടി ചെയർമാൻ പി.ജെ. ജോസഫ് എംഎൽഎയെ അദ്ദേഹത്തിന്‍റെ ജന്മദിനനാളിൽ ആദരിച്ചു. ജില്ലാ പ്രസിഡന്‍റ് ഇൻ-ചാർജ് എം.ജെ. കുര്യൻ പൊന്നാട അണിയിച്ചു. ഉന്നതാധികാര സമിതി അംഗങ്ങളായ അഡ്വ. തോമസ് പെരുമന, നോബിൾ ജോസഫ്, സംസ്ഥാന ജനറൽ സെക്രട്ടറി എം. മോനിച്ചൻ, നിയോജക മണ്ഡലം പ്രസിഡന്‍റുമാരായ ബ്ലെയിസ് ജി. വാഴയിൽ, ജോയി കൊച്ചുകരോട്ട് എന്നിവർ പ്രസംഗിച്ചു. തൊടുപുഴ: കേരള കോണ്‍ഗ്രസ് ചെയർമാനും കർഷക നേതാവുമായ പി.ജെ. ജോസഫ് എംഎൽഎയെ ജന്മദിനത്തിൽ കർഷക യൂണിയൻ സംസ്ഥാന കമ്മിറ്റി ആദരിച്ചു. സംസ്ഥാന പ്രസിഡന്‍റ് വർഗീസ് വെട്ടിയാങ്കൽ, സംസ്ഥാന ജനറൽ സെക്രട്ടറി ജോസ് ജയിംസ് എന്നിവർ ചേർന്ന് പൊന്നാട അണിയിച്ചു. പാർട്ടി സംസ്ഥാന ഡെപ്യൂട്ടി ചെയർമാൻമാരായ ഫ്രാൻസിസ് ജോർജ് എംപി, തോമസ് ഉണ്ണിയാടൻ, സംസ്ഥാന കോ-ഓർഡിനേറ്റർ അപു ജോണ്‍ ജോസഫ്, എം.മോനിച്ചൻ, ബ്ലെയിസ് ജി. വാഴയിൽ, ജോയി തെക്കേടത്ത്, സി.ടി. തോമസ്, ബേബിച്ചൻ കൊച്ചുകരൂർ, ടോമി കാവാലം, ബിനു ജോണ്‍, സണ്ണി തെങ്ങുംപള്ളി, വിനോദ് ജോണ്‍, സോജൻ ജോർജ്, ജോണി പുളിന്തടം എന്നിവർ പങ്കെടുത്തു.

കെട്ടിടം പൂർത്തിയായിട്ടും കുടുംബക്കോടതി മാറ്റുന്നില്ല

തൊടുപുഴ: കുടുംബക്കോടതിക്കായി മുട്ടത്ത് പുതിയ കെട്ടിടം നിർമിച്ചെങ്കിലും ഇവിടേക്കു തൊടുപുഴ മിനി സിവിൽ സ്റ്റേഷനിൽ പ്രവർത്തിക്കുന്ന കോടതി മാറ്റാനുള്ള നടപടി വൈകുന്നു. ഒരു വർഷം മുന്പ് ഉദ്ഘാടനം നടത്തിയെങ്കിലും ഇതുവരെയും കോടതി മാറ്റിസ്ഥാപിക്കാൻ തീരുമാനമായിട്ടില്ല. നിലവിൽ പരിമിതമായ സൗകര്യത്തിൽ മിനി സിവിൽ സ്റ്റേഷന്‍റെ താഴത്തെ നിലയിലാണ് കുടുംബക്കോടതി പ്രവർത്തിക്കുന്നത്. 2005 ജനുവരി 28 മുതലാണ് തൊടുപുഴ സിവിൽ സ്റ്റേഷനിൽ കുടുംബക്കോടതി പ്രവർത്തനമാരംഭിച്ചത്. ഇവിടെയെത്തുന്നവർ കോടതിക്കു മുന്നിലുള്ള വരാന്തയിലാണ് കൂട്ടംകൂടി നിൽക്കുന്നത്. സബ് ട്രഷറിയും മറ്റ് ഓഫീസുകളും ഉൾപ്പെടെ ഇവിടെ പ്രവർത്തിക്കുന്നതിനാൽ പലപ്പോഴും വലിയ തിരക്കും അനുഭവപ്പെടുന്നുണ്ട്. കൂടാതെ വാഹനപാർക്കിംഗിനും ഇവിടെ ഏറെ ബുദ്ധിമുട്ട് നേരിടുന്നുണ്ട്. ഇതിനു പുറമേ അഭിഭാഷകർക്ക് ഇവിടെ ഹാജരായതിനുശേഷം മുട്ടത്തെ കോടതിയിൽ എത്തേണ്ടി വരും. അതിനാൽ കോടതി മുട്ടത്തെ പുതിയ കെട്ടിടത്തിലേക്ക് മാറ്റണമെന്ന് അഭിഭാഷകർ ഏറെ നാളായി ആവശ്യപ്പെടുന്നുണ്ട്. പുതിയ കെട്ടിടനിർമാണത്തിനായി 2018 ജൂലൈ 31-നാണ് 6.50 കോടി രൂപയുടെ ഭരണാനുമതി സംസ്ഥാന സർക്കാരിൽനിന്ന് ലഭിച്ചത്. 2020 ഒക്‌ടോബർ 18ന് സാങ്കേതികാനുമതിയും ലഭിച്ചു. 2021 സെപ്റ്റംബറിലാണ് 2,730 ചതുരശ്ര മീറ്റർ വിസ്തീർണമുളള മൂന്നുനില കെട്ടിടം കുടുംബക്കോടതിക്കായി മുട്ടം ജില്ലാക്കോടതി വളപ്പിൽ 6.5 കോടി ചെലവഴിച്ച് നിർമാണം ആരംഭിച്ചത്. ഹൈക്കോടതി ജഡ്ജി സുനിൽ തോമസാണ് നിർമാണോദ്ഘാടനം നിർവഹിച്ചത്. താഴത്തെ നിലയിൽ വിശാലമായ പാർക്കിംഗ് ഏരിയ, ജനറേറ്റർ സെക്‌ഷൻ, കോർട്ട് ഹാൾ, ചേംബർ ഹാൾ, ശിരസ്തദാർ റൂം, പോലീസ് ഡ്യൂട്ടി റൂം, മീഡിയേഷൻ ഹാൾ, ലൈബ്രറി, കാത്തിരിപ്പ് കേന്ദ്രം, വിസ്താര സെക്‌ഷൻ, ടൈപ്പിംഗ് പൂൾ, ടോയ്‌ലറ്റുകൾ, റാന്പ്, കോണ്‍ഫറൻസ് ഹാൾ, കൗണ്‍സലിംഗ് സെക്‌ഷൻ, പുരുഷന്മാർക്കും സ്ത്രീകൾക്കും വിശ്രമമുറികൾ, തൊണ്ടിമുറി, സീലേഴ്സ് റൂം തുടങ്ങിയ സൗകര്യങ്ങളാണ് ഏർപ്പെടുത്തിയിരിക്കുന്നത്. നിർമാണം പൂർത്തിയാക്കിയ കെട്ടിടം 2024 മേയ് 25ന് ഹൈക്കോടതി ചീഫ് ജസ്റ്റീസായിരുന്ന ആഷിഷ് ജിതേന്ദ്ര ദേശായി ഉദ്ഘാടനം ചെയ്തു. എന്നാൽ, ലിഫ്റ്റിന്‍റെ നിർമാണം പൂർത്തിയാകാത്തതും അഗ്നിരക്ഷാ സേനയുടെ എൻഒസി ലഭിക്കാത്തതുമാണ് കോടതി പ്രവർത്തനമാരംഭിക്കുന്നതിനു തടസമായതെന്നാണ് പറയപ്പെടുന്നത്. ലിഫ്റ്റിന്‍റെ നിർമാണം പൂർത്തിയായിട്ടുണ്ട്. ഫയർ എൻഒസി ഉൾപ്പെടെയുള്ള നടപടികൾ പൂർത്തിയാക്കി കുടുംബക്കോടതി പുതിയ മന്ദിരത്തിൽ പ്രവർത്തനമാരംഭിക്കണമെന്നാണ് ആവശ്യം. ഇതിനിടെ കോടതി ഇവിടെനിന്നും മാറുന്ന മുറയ്ക്ക് കരിമണ്ണൂരിൽ പ്രവർത്തിക്കുന്ന ഭൂപതിവ് ഓഫീസ് ഇവിടേയ്ക്കു മാറ്റിസ്ഥാപിക്കാൻ ജില്ലാ കളക്ടർ ഉത്തരവിട്ടിരുന്നു. എന്നാൽ കോടതി മുട്ടത്തേയ്ക്ക് മാറ്റി പ്രവർത്തനം ആരംഭിക്കാത്തതിനാൽ കളക്ടറുടെ ഉത്തരവുണ്ടായിട്ടും വാടകക്കെട്ടിടത്തിൽ പ്രവർത്തിക്കുന്ന ഭൂപതിവ് ഓഫീസ് മാറ്റാനായിട്ടില്ല. ഭൂപതിവ് ഓഫീസ് തൊടുപുഴയിലേക്ക് മാറ്റണമെന്നത് പട്ടയ അപേക്ഷകരുടെ ഏറെ നാളത്തെ ആവശ്യമാണ്.

നാരങ്ങാനത്ത് റവന്യു, വനംവകുപ്പ് സംയുക്ത പരിശോധന

തൊടുപുഴ: തൊമ്മൻകുത്ത് സെന്‍റ് തോമസ് പള്ളിയുടെ നേതൃത്വത്തിൽ നാരങ്ങാനത്ത് കുരിശ് സ്ഥാപിച്ച പ്രദേശം ഡെപ്യൂട്ടി കളക്ടറുടെ നേതൃത്വത്തിൽ റവന്യു, വനം അധികൃതർ സന്ദർശിച്ചു. കുരിശ് സ്ഥാപിച്ച വണ്ണപ്പുറം പഞ്ചായത്തിലെ ആറാം വാർഡിലുൾപ്പെടെയുള്ള പ്രദേശങ്ങളിൽ പട്ടയം നൽകുന്നതുമായി ബന്ധപ്പെട്ടാണ് വനം, റവന്യു ഉദ്യോഗസ്ഥർ സംയുക്ത പരിശോധന നടത്തിയത്. വനഭൂമിയോടു ചേർന്നുള്ള പ്രദേശങ്ങളിൽ പട്ടയം നൽകുന്നതിനു തടസമില്ലെന്നാണ് റവന്യു വകുപ്പിന്‍റെ നിലപാട്. കഴിഞ്ഞ ദിവസം കളക്ടറേറ്റിൽ ജില്ലാ കളക്ടറുടെ നേതൃത്വത്തിൽ ഇതുമായി ബന്ധപ്പെട്ട് കമ്മിറ്റി രൂപീകരിച്ചിരുന്നു. കമ്മിറ്റി തീരുമാനത്തിന്‍റെ അടിസ്ഥാനത്തിലാണ് ഡെപ്യൂട്ടി കളക്ടർ കെ.എം. ജോസുകുട്ടിയുടെ നേതൃത്വത്തിൽ ഉദ്യോഗസ്ഥസംഘം സന്ദർശനം നടത്തിയത്. കുരിശ് സ്ഥാപിച്ചിരിക്കുന്ന സ്ഥലം വനംവകുപ്പ് സ്ഥാപിച്ച ജണ്ടയ്ക്കുള്ളിലാണോ പുറത്താണോ എന്ന കാര്യത്തിൽ വ്യക്തത വരുത്താനാണ് സന്ദർശനം നടത്തിയതെന്ന് ഡെപ്യൂട്ടി കളക്ടർ പറഞ്ഞു. ജണ്ടയുടെ കാര്യത്തിൽ ചില അവ്യക്തതകൾ ഉള്ളതിനാൽ വീണ്ടും ഡിജിറ്റൽ സർവേ നടത്തി ഇക്കാര്യത്തിലുള്ള സംശയങ്ങൾ നീക്കും. സ്ഥലത്തിന്‍റെ സ്കെച്ചും പരിശോധിക്കേണ്ടിവരും. പ്രദേശത്ത് പതിറ്റാണ്ടുകളായി കൃഷി ചെയ്തുപോരുന്ന കൈവശഭൂമിക്കു പട്ടയം നൽകുന്ന നടപടികൾ തുടർന്നുവരികയാണെന്നും അദ്ദേഹം പറഞ്ഞു. ഡെപ്യൂട്ടി കളക്ടർക്കു പുറമേ എൽഎ തഹസിൽദാർ ബിപിൻ ഭാസ്കർ, ഡെപ്യൂട്ടി തഹസിൽദാർ സിജോയി, ജൂണിയർ സൂപ്രണ്ട് എം.എസ്. സ്മിത, ഹെഡ് സർവേയർ ബിനു ആനന്ദ്, താലൂക്ക് സർവേയർ ജിഷ, തൊടുപുഴ ഡിവൈഎസ്പി പി.കെ. സാബു, കരിമണ്ണൂർ എസ്എച്ച്ഒ വി.സി. വിഷ്ണുകുമാർ, കാളിയാർ റേഞ്ച് ഓഫീസർ ടോമിൻ ജെ. അരഞ്ഞാണി എന്നിവരും സംഘത്തിലുണ്ടായിരുന്നു. പ്രകോപനവുമായി വീണ്ടും വനംവകുപ്പ് തൊമ്മൻകുത്ത്: നാരങ്ങാനത്ത് കുരിശ് സ്ഥാപിച്ച സ്ഥലത്തേക്കു കയറുന്നതിനായി നെയ്യശേരി - തോക്കുന്പൻ സാഡിൽ റോഡിൽനിന്നു നിർമിച്ച താത്കാലിക വഴിയിടിച്ച് കരാർ കന്പനി. വനംവകുപ്പ് നിർദേശപ്രകാരമാണ് ഇത്തരത്തിൽ റോഡ് ഇടിച്ചതെന്നാണ് കന്പനി അധികൃതരുടെ വിശദീകരണം. ഇതോടെ ഇവിടെ പ്രവേശിക്കണമെങ്കിൽ വലിയ ഗോവണി വയ്ക്കേണ്ട സ്ഥിതിയാണ്. നെയ്യശേരി-തോക്കുന്പൻ സാഡിൽ റോഡിനോടു ചേർന്നാണ് വിവാദ ഭൂമി. റോഡ് നിർമാണത്തിനായി ഈ ഭാഗം താഴ്ത്തിയപ്പോൾ കുരിശ് നിന്ന സ്ഥലം ഉയരത്തിലായി. ഇവിടേക്കു കയറാൻ കന്പനി തൊഴിലാളികൾ മണ്ണുമാന്തിയന്ത്രം ഉപയോഗിച്ച് ചെരിച്ച് പാത വെട്ടിയിരുന്നു. ഇത് വനംവകുപ്പ് ഉദ്യോഗസ്ഥർ അനുവദിച്ചില്ല. മണ്ണുമാന്തിയന്ത്രം ഉപയോഗിച്ച് ഈ ഭാഗം ഇടിച്ചുതാഴ്ത്തിയതോടെ കുരിശു സ്ഥാപിച്ച സ്ഥലം വീണ്ടും ഉയരത്തിലായി. വെള്ളിയാഴ്ച വൈകുന്നേരമാണ് വനംവകുപ്പ് ജീവനക്കാരുടെ സാന്നിധ്യത്തിൽ ജോലി പൂർത്തിയാക്കിയത്. കഴിഞ്ഞ ഏപ്രിൽ 12നാണ് തൊമ്മൻകുത്ത് സെന്‍റ് തോമസ് പള്ളി നാരങ്ങാനത്ത് സ്ഥാപിച്ചിരുന്ന കുരിശ് വനംവകുപ്പ് പിഴുതുമാറ്റിയത്. വനംവകുപ്പിന്‍റെ നടപടിക്കെതിരേ വലിയ പ്രതിഷേധമാണ് ഭരണ, പ്രതിപക്ഷ ഭേദമന്യേ ഉയർന്നത്. പ്രശ്നം പരിഹരിക്കാൻ ശ്രമങ്ങൾ നടക്കുന്നതിനിടെയാണ് വനംവകുപ്പിന്‍റെ പ്രകോപനപരമായ പുതിയ നടപടി. റോഡ് നിർമാണം മാത്രമേ വനംവകുപ്പ് അനുവദിക്കുന്നുള്ളൂ എന്നും വീടുകൾക്കും സ്ഥാപനങ്ങൾക്കുമായി അപ്രോച്ച് റോഡ് തീർക്കാൻ ഇവർ അനുവദിക്കുന്നില്ലെന്നും കന്പനി അധികൃതർ പറഞ്ഞു. കെഎസ്ടിപി നിർദേശിച്ചാൽ കുരിശ് സ്ഥാപിച്ചയിടത്തേക്ക് റോഡ് നിർമിക്കുമെന്ന് ഇവർ പറയുന്നു. റോഡ് നിർമിച്ചപ്പോൾ കുരിശ് നിന്ന ഭാഗം ഉയരത്തിലായതാണെന്നും പ്രശ്നത്തിൽ വനംവകുപ്പ് ഇടപെട്ടില്ലെന്നുമാണ് കാളിയാർ റേഞ്ച് ഓഫീസറുടെ വിശദീകരണം. നടപടി പ്രതിഷേധാർഹം: ജാഗ്രതാ സമിതി തൊമ്മൻകുത്ത്: റോഡ് നിർമിച്ചപ്പോൾ നാരങ്ങാനത്തെ വീടുകളിലേക്കും തൊമ്മൻകുത്ത് സെന്‍റ് തോമസ് പള്ളിയുടെ കുരിശടിയിലേക്കും കയറാനുള്ള പ്രവേശനവഴി തടയുന്ന വനംവകുപ്പിന്‍റെ നടപടി മനുഷ്യത്വരഹിതവും സഞ്ചാരസ്വാതന്ത്ര്യത്തിൻമേലുള്ള കടന്നുകയറ്റവുമാണെന്ന് തൊമ്മൻകുത്ത് നാരങ്ങാനം ജാഗ്രതാ സമിതി കുറ്റപ്പെടുത്തി. റോഡ് നിർമിച്ചപ്പോൾ കുരിശടിയിലേക്കു പ്രവേശിക്കാനായി കരാർ കന്പനി ജീവനക്കാർ തീർത്ത നടപ്പുവഴി വനംവകുപ്പ് ഉദ്യോഗസ്ഥർ നിർബന്ധിച്ച് ഇല്ലാതാക്കിയത് അംഗീകരിക്കില്ലെന്നും ഉടൻ പുനഃസ്ഥാപിച്ചില്ലെങ്കിൽ വനംവകുപ്പ് ഓഫീസിലേക്കു പ്രതിഷേധമാർച്ച് സംഘടിപ്പിക്കുമെന്നും നേതാക്കളായ ഫാ. ജയിംസ് ഐക്കരമറ്റം, നിസാം പള്ളിമുക്കിൽ, മനോജ് മാമല, രാജീവ് പുളിക്കൽ, ഫ്രാങ്ക്ളിൻ പാലക്കാട്ട് എന്നിവർ പറഞ്ഞു.

ഭൂമി പ്രശ്നങ്ങൾ പരിഹരിക്കാൻ യോഗം ചേരും: കളക്ടർ

ഇടുക്കി: ജില്ലയിലെ ഭൂമി സംബന്ധിച്ച പ്രശ്നങ്ങൾ 15 ദിവസത്തിനകം ബന്ധപ്പെട്ട വകുപ്പുകൾ റിപ്പോർട്ട് ചെയ്യണമെന്നും ഇവ പരിഹരിക്കുന്നതിനായി എല്ലാ മാസവും മൂന്നാമത്തെ ശനിയാഴ്ച യോഗം ചേരുമെന്നും ജില്ലാ കളക്ടർ വി. വിഗ്നേശ്വരി ജില്ലാ വികസനസമിതി യോഗത്തിൽ അറിയിച്ചു. സ്കൂൾ അധ്യയനസമയം കഴിഞ്ഞ് കുട്ടികളുടെ സംരക്ഷണത്തിനായി കൂട് പദ്ധതി നടപ്പാക്കും. ജില്ലയെ ശിശുസൗഹൃദ ജില്ലയായി മാറ്റുന്നതിനുള്ള പ്രവർത്തനങ്ങളും പദ്ധതിയുടെ ഭാഗമായി നടപ്പാക്കും. അടിമാലി ഗവ. ഹൈസ്കൂൾ ഹയർ സെക്കൻഡറി സ്കൂളായി ഉയർത്തുന്നതിനുവേണ്ട നടപടികൾ കൈക്കൊള്ളണമെന്ന് വിദ്യാഭ്യാസ ഡെപ്യൂട്ടി ഡയറക്ടറോട് കളക്ടർ നിർദേശിച്ചു. 1949-ൽ ആരംഭിച്ച സ്കൂൾ ഹയർ സെക്കൻഡറിയായി ഉയർത്തണമെന്നും അടിസ്ഥാന സൗകര്യങ്ങൾ ഏർപ്പെടുത്തണമെന്നും ഡീൻ കുര്യാക്കോസ് എംപി ആവശ്യപ്പെട്ടിരുന്നു. ജില്ലയിൽ തെരുവുനായ ശല്യം രൂക്ഷമാകുന്ന സാഹചര്യത്തിൽ എബിസി സെന്‍റർ സ്ഥാപിക്കുന്നതിന് ജില്ലാ പഞ്ചായത്തിനു നിർദേശം നൽകി. ജില്ലയിൽ ഈ വർഷം 2,777 പേർക്കാണ് തെരുവുനായയുടെ കടിയേറ്റത്. ഇടമലക്കുടിയിൽ ആരോഗ്യസംബന്ധമായ ക്ഷേമപ്രവർത്തനങ്ങൾക്ക് ഇടമലനഗർ ആരോഗ്യനഗർ പദ്ധതി നടപ്പിലാക്കും. ഇതിനായി സ്ഥലം വിട്ടുനൽകുന്നതിനു വേണ്ട നടപടികൾ സ്വീകരിക്കാൻ മൂന്നാർ ഡിഎഫ്ഒയെ ചുമതലപ്പെടുത്തി. അനധികൃതമായി പ്രവർത്തിക്കുന്ന അറവുശാലകൾ നിർത്തലാക്കുന്നതിനും എല്ലാ തദ്ദേശ സ്ഥാപനങ്ങളിലും ആധുനിക അറവുശാലകൾ സ്ഥാപിക്കുന്നതു സംബന്ധിച്ച് തീരുമാനമെടുക്കുന്നതിനും കളക്ടർ നിർദേശം നൽകി. 26 അനധികൃത അറവുശാലകൾ പൂട്ടിയതായും നടത്തിപ്പുകാർക്ക് നോട്ടീസ് നൽകാൻ നിർദേശം നൽകിയിട്ടുണ്ടെന്നും എൽഎസ്ജിഡി ജോയിന്‍റ് ഡയറക്ടർ യോഗത്തിൽ അറിയിച്ചു. ജില്ലയിൽ 24,980 ഇതര സംസ്ഥാന തൊഴിലാളികളുടെ രജിസ്ട്രേഷൻ ഇതിനകം പൂർത്തിയായി. ബാക്കിയുള്ളവരുടെ രജിസ്ട്രേഷൻ നടപടികൾ തുടരുകയാണ്. പാഞ്ചാലിമേട്ടിൽ പോലീസ് ഔട്ട് പോസ്റ്റ് സ്ഥാപിക്കുന്നതിനു കെട്ടിടം ലഭ്യമാക്കാനുള്ള നടപടി സ്വീകരിക്കുമെന്നും കളക്ടർ അറിയിച്ചു.

വീട്ടിൽനിന്നു സ്വർണം മോഷ്ടിച്ച പതിനഞ്ചുകാരന്‍റെ സുഹൃത്ത് അറസ്റ്റിൽ

അടിമാലി: പതിനഞ്ചുകാരൻ വീട്ടുകാരറിയാതെ വീട്ടില്‍നിന്ന് സ്വര്‍ണം കൈക്കലാക്കുകയും സുഹൃത്ത് ഈ സ്വര്‍ണം വില്‍പ്പന നടത്തി പണമാക്കുകയും ചെയ്ത സംഭവത്തില്‍ സുഹൃത്തായ അടിമാലി മന്നാങ്കാല സ്വദേശി ചൂരനാനിക്കൽ ആഷിഷിനെ (21) അടിമാലി പോലീസ് അറസ്റ്റ് ചെയ്തു. അലമാരയില്‍ സൂക്ഷിച്ചിരുന്ന സ്വര്‍ണം കാണാതായതിനെത്തുടര്‍ന്ന് അടിമാലി ഇരുനൂറേക്കര്‍ സ്വദേശിനി നല്‍കിയ പരാതിയുടെ അടിസ്ഥാനത്തിലാണ് പോലീസ് നടപടി. പരാതിക്കാരിയായ വീട്ടമ്മയുടെ പതിനഞ്ചുകാരനായ മകന്‍ വീട്ടുകാരറിയാതെ സ്വര്‍ണം കൈക്കലാക്കി സുഹൃത്തിനെ ഏൽപ്പിക്കുകയായിരുന്നു. രണ്ടു ദിവസങ്ങളിലായി 24 ഗ്രാം സ്വര്‍ണമാണ് പതിനഞ്ചുകാരന്‍ കൈക്കലാക്കി ആഷിഷിനു കൈമാറിയത്. സുഹൃത്ത് ഈ സ്വര്‍ണം രണ്ടു ലക്ഷം രൂപയ്ക്ക് അടിമാലിയിലെ ജ്വല്ലറിയില്‍ വില്‍പ്പന നടത്തി. ഇതില്‍ അറുപതിനായിരത്തോളം രൂപ പതിനഞ്ചുകാരന് നല്‍കിയതായി പോലീസ് പറഞ്ഞു. ബാക്കി തുക ആഷിഷ് എന്തു ചെയ്തുവെന്ന കാര്യത്തില്‍ പോലീസ് അന്വേഷണം നടത്തുന്നുണ്ട്. പരിശോധനയില്‍ പ്രതി വില്‍പ്പന നടത്തിയ സ്വര്‍ണം പോലീസ് കണ്ടെടുത്തു.

മെഡിക്കൽ കോളജിലെ ടെറസിൽ മലിനജലം കെട്ടിക്കിടക്കുന്നു

ചെറുതോണി: ഇടുക്കി മെഡിക്കൽ കോളജ് അത്യാഹിത വിഭാഗത്തിന്‍റെ ടെറസിൽ നൂറുകണക്കിന് ലിറ്റർ മലിനജലം കെട്ടിക്കിടക്കുന്നു. ഇവിടെ പായലും ചെടികളും വളർന്ന് കൊതുക് വളരുകയാണ്. ഇടുക്കി മെഡിക്കൽ കോളജിൽ ചികിത്സ തേടിയെത്തുന്നവർക്ക് സാംക്രമിക രോഗങ്ങൾ ബാധിക്കുന്ന സ്ഥിതിയാണ്. ടെറസിലെ ഓവുചാലുകൾ തുറന്നുവിടാത്തതും വൃത്തിയാക്കാത്തതുമാണ് ഇത്രയധികം വെള്ളം കെട്ടിനിൽക്കാൻ കാരണം. ദീർഘനാൾ വെള്ളം കെട്ടിക്കിടന്നാൽ കെട്ടിടത്തിന് ബലക്ഷയം ഉണ്ടാകാനുമിടയുണ്ട്. കാലവർഷം ശക്തമായതോടെ ജില്ലയിൽ ഡെങ്കിപ്പനിയുൾപ്പെടെയുള്ള കൊതുക് പരത്തുന്ന രോഗങ്ങൾ പടർന്നുപിടിക്കുമ്പോഴാണ് മെഡിക്കൽ കോളജ് ആശുപത്രിയിൽ മലിനജലം കെട്ടിനിൽക്കുന്നത്. അടിയന്തരമായി ആശുപത്രിയുടെ ടെറസ് വൃത്തിയാക്കി കെട്ടിനിൽക്കുന്ന ജലം നീക്കം ചെയ്യണമെന്ന് നാട്ടുകാർ ആവശ്യപ്പെട്ടു.

പാലത്തിനാൽ വീട്ടിൽ ആഘോഷം ലളിതം, മധുരതരം

തൊടുപുഴ: പുറപ്പുഴയിലെ പാലത്തിനാൽ വീട്ടിലേക്ക് ഇന്നലെ രാവിലെതന്നെ കേരള കോണ്‍ഗ്രസ് പ്രവർത്തകരുടെ ഒഴുക്കായിരുന്നു. തങ്ങളുടെ പ്രിയനേതാവിന്‍റെ 84-ാം ജന്മദിനത്തിൽ, ശക്തമായി പെയ്ത മഴയെ അവഗണിച്ചാണ് തൊടുപുഴ നിവാസികളും പാർട്ടി പ്രവർത്തകരും ഉൾപ്പെടെ വലിയൊരു ജനാവലി ആശംസ നേരാനെത്തിയത്. ആഘോഷങ്ങളില്ലെന്ന് പി.ജെ. ജോസഫ് അറിയിച്ചിരുന്നെങ്കിലും തൊടുപുഴയുടെ സ്വന്തം ജോസഫ് സാറിന് പിറന്നാൾ ദിനത്തിൽ ആശംസ നേരാനെത്തിയവരെക്കൊണ്ട് രാവിലെതന്നെ വീട് നിറഞ്ഞു. പിറന്നാൾ ദിനത്തിൽ വിവിധ പരിപാടികളിലും അദ്ദേഹം പങ്കെടുത്തു. രാവിലെ പുറപ്പുഴ പള്ളിയിൽ വിശുദ്ധ കുർബാനയിൽ പങ്കെടുത്തശേഷം എട്ടോടെ സൗമ്യമായ ചിരിയുമായി പി.ജെ. ജോസഫ് പ്രവർത്തകർക്കരികിലെത്തി. മകൻ അപു ജോണ്‍ ജോസഫും കുടുംബാംഗങ്ങളും അദ്ദേഹത്തോടൊപ്പം ഉണ്ടായിരുന്നു. കേരള കോണ്‍ഗ്രസ് നേതാക്കളെല്ലാംതന്നെ രാവിലെ ആശംസ അറിയിക്കാനെത്തി. നേതാക്കളായ പി.സി. തോമസ്, മോൻസ് ജോസഫ് എംഎൽഎ, ജോയി ഏബ്രഹാം, ഫ്രാൻസിസ് ജോർജ് എംപി, ടി.യു. കുരുവിള, തോമസ് ഉണ്ണിയാടൻ ഉൾപ്പെടെയുള്ള നേതാക്കൾ അദ്ദേഹത്തിന് ബൊക്കെ സമ്മാനിച്ചു. തുടർന്ന് നേതാക്കളുടെയും പ്രവർത്തകരുടെയും സാന്നിധ്യത്തിൽ പി.ജെ. ജോസഫ് കേക്ക് മുറിച്ചു. കോതമംഗലം രൂപതാധ്യക്ഷൻ മാർ ജോർജ് മഠത്തിക്കണ്ടത്തിൽ പുറപ്പുഴയിലെ വീട്ടിലെത്തി ആശംസ നേർന്നു. അദ്ദേഹത്തിന്‍റെ ആരോഗ്യത്തിനായി സർവേശ്വരനോട് പ്രാർഥിക്കുന്നുവെന്നു പറഞ്ഞ് പിറന്നാൾ സമ്മാനമായി ജപമാല അണിയിച്ചു. ഡീൻ കുര്യാക്കോസ് എംപി, മുനിസിപ്പൽ ചെയർമാൻ കെ. ദീപക്, ഡിസിസി പ്രസിഡന്‍റ് സി.പി. മാത്യു, മർച്ചന്‍റ്സ് അസോ. പ്രസിഡന്‍റ് ടി.സി. രാജു തരണിയിൽ, കേരള കോണ്‍ഗ്രസ് നേതാക്കളായ ജോസഫ് എം. പുതുശേരി, ഡി.കെ. ജോണ്‍, ഏബ്രഹാം കലമണ്ണിൽ, കുഞ്ഞുകോശി പോൾ, സേവി കുരിശുവീട്ടിൽ, ഷീല സ്റ്റീഫൻ, എം. മോനിച്ചൻ, വർഗീസ് വെട്ടിയാങ്കൽ, കെ.വി. കണ്ണൻ, ജോണ്‍സ് ജോർജ്, ജെയ്സണ്‍ ജോസഫ്, ബ്ലെയ്സ് ജി. വാഴയിൽ എന്നിവർ ആശംസ അറിയിച്ചു. മാത്യു കുഴൽനാടൻ, റോയ് കെ. പൗലോസ് എന്നിവർ ഫോണിലൂടെ ആശംസ അറിയിച്ചു. ലളിതമായ ചടങ്ങുകൾക്കുശേഷം മൂവാറ്റുപുഴ ഹോളി മാഗി ഫൊറോന പള്ളിയിൽ നടന്ന ഫാ. മാത്യു പൂനാട്ടിന്‍റെ നവതിയാഘോഷത്തിൽ പങ്കെടുത്ത അദ്ദേഹം പിന്നീട് തൃശൂരിൽ ബന്ധുവിന്‍റെ വിവാഹച്ചടങ്ങിലും പങ്കെടുത്തു. വൈകുന്നേരം ലയണ്‍സ് ക്ലബ്ബിന്‍റെ പരിപാടിയിലും പങ്കെടുത്താണു പി.ജെ. ജോസ ഫ് വീട്ടിൽ മടങ്ങിയെത്തിയത്. പൂർണചന്ദ്രരൂപം നൽകി ആദരിച്ചു തൊടുപുഴ: ശതാഭിഷേക നിറവിൽ ജന്മദിനമാഘോഷിച്ച കേരള കോണ്‍ഗ്രസ് ചെയർമാൻ പി.ജെ. ജോസഫ് എംഎൽഎയ്ക്ക് പാർട്ടി സംസ്ഥാന ജനറൽ സെക്രട്ടറി എം. മോനിച്ചൻ പ്രതീകാത്മക പൂർണചന്ദ്രരൂപം സമ്മാനിച്ചു. പൂർണചന്ദ്രരൂപത്തോടൊപ്പം അദ്ദേഹത്തിന്‍റെ ചിത്രം പതിച്ച മെമന്‍റോയും നൽകിയാണ് അദ്ദേഹം പ്രിയ നേതാവിനെ ആദരിച്ചത്. മർച്ചന്‍റ്സ് അസോ. തൊടുപുഴ: പി.ജെ. ജോസഫിന്‍റെ 84 -ാം ജന്മദിനത്തോടനുബന്ധിച്ച് തൊടുപുഴ മർച്ചന്‍റ്സ് അസോസിയേഷന്‍റെ നേതൃത്വത്തിൽ അദ്ദേഹത്തെ പൊന്നാട അണിയിച്ച് ആദരിച്ചു. പ്രസിഡന്‍റ് രാജു തരണിയിലാണ് പൊന്നാട അണിയിച്ചത്. ഭാരവാഹികളായ ടി.എൻ. പ്രസന്നകുമാർ, സി.കെ. നവാസ്, അനിൽ പീടികപ്പറന്പിൽ, ജോസ് കളരിക്കൽ, ഷെരീഫ് സർഗം, കെ.പി. ശിവദാസ്, നാസർ സൈര, എം.എച്ച്. ഷിയാസ്, ലിജോണ്‍സ് സെബാസ്റ്റ്യൻ, ജഗൻ ജോർജ് എന്നിവർ പങ്കെടുത്തു.

വിശ്വാസപൈതൃകം വിളിച്ചോതി രൂപതാ ദിനാഘോഷം

കാളിയാർ: വിശ്വാസപൈതൃകം വിളിച്ചോതി, കൃതജ്ഞതാ സ്തോത്രം ആലപിച്ച്, കൂട്ടായ്മയുടെ ഇഴകൾ നെയ്ത് കാളിയാർ സെന്‍റ് റീത്താസ് ഫൊറോനാ പള്ളി പാരിഷ് ഹാളിൽ നടന്ന കോതമംഗലം രൂപതാ ദിനാഘോഷം പ്രൗഢഗംഭീരമായി. ബിഷപ് മാർ ജോർജ് മഠത്തിക്കണ്ടത്തിലിന്‍റെ മുഖ്യകാർമികത്വത്തിൽ നടന്ന വിശുദ്ധ കുർബാനയോടെ ആയിരുന്നു ദിനാഘോഷത്തിനു തുടക്കംകുറിച്ചത്. തുടർന്ന് പ്രാർഥനാമന്ത്രങ്ങളോടെ ചടങ്ങ് ആരംഭിച്ചു. മാർ ജോർജ് മഠത്തിക്കണ്ടത്തിൽ അധ്യക്ഷത വഹിച്ച യോഗത്തിൽ കാഞ്ഞിരപ്പള്ളി രൂപതാധ്യക്ഷൻ മാർ ജോസ് പുളിക്കൽ രൂപതാദിന സന്ദേശം നൽകി. രൂപതാ വികാരി ജനറാൾ മോണ്‍ വിൻസെന്‍റ് നെടുങ്ങാട്ട് അവാർഡ് ജേതാക്കളെ പരിചയപ്പെടുത്തി. ഫാ. ആന്‍റണി ഉരുളിയാനിക്കൽ, സിസ്റ്റർ ആർക്കേഞ്ചൽ എസ്എബിഎസ്, ഡോ. ഇ.വി. ജോർജ് എന്നിവരെ മാർ ജോർജ് മഠത്തിക്കണ്ടത്തിൽ ആദരിച്ചു. ഡോ. ഇ.വി. ജോർജിനുവേണ്ടി ഭാര്യ വത്സമ്മ ജോർജ് മെമന്‍റോ ഏറ്റുവാങ്ങി. രൂപതാ വികാരി ജനറാൾ മോണ്‍ പയസ് മലേക്കണ്ടത്തിൽ, ഡീൻ കുര്യാക്കോസ് എംപി, ആന്‍റണി ജോണ്‍ എംഎൽഎ എന്നിവർ പ്രസംഗിച്ചു. വികാരി ഫാ. ജോസഫ് മുണ്ടുനടയിൽ സ്വാഗതവും പിആർഒ ജോർജ് കേളകം നന്ദിയും പറഞ്ഞു. ഫാ. മാത്യു മഞ്ഞക്കുന്നേൽ, കത്തോലിക്ക കോണ്‍ഗ്രസ് രൂപതാ പ്രസിഡന്‍റ് സണ്ണി കടൂത്താഴെ, മാതൃവേദി രൂപതാ പ്രസിഡന്‍റ് ജാൻസി മാത്യു, കെസിവൈഎം രൂപതാ പ്രസിഡന്‍റ് സാവിയോ ജിജി, സിഎംഎൽ രൂപതാ പ്രസിഡന്‍റ് സജിൽ ജോർജ് എന്നിവർ നേതൃത്വം നൽകി. "പ്രത്യാശയിൽ ഒരുമയോടെ മുന്നേറാം' എന്ന ആപ്തവാക്യം അനുസ്മരിച്ചായിരുന്നു സമ്മേളനം ആരംഭിച്ചത്. രൂപതയുടെ വിവിധ ഇടവകകളിൽനിന്നുള്ള വൈദികർ, മിഷനറി വൈദികർ, കന്യാസ്ത്രീകൾ, ഭക്തസംഘടനാ ഭാരവാഹികൾ, വിശ്വാസപരിശീലകർ ഉൾപ്പെടെ നൂറുകണക്കിനു വിശ്വാസികൾ ദിനാഘോഷത്തിൽ അണിചേരാനെത്തി. പാരീഷ് ഹാളും പരിസരവും നിറഞ്ഞ സദസിനെ സാക്ഷിനിർത്തിയാണ് സമ്മേളനം നടന്നത്. തിന്മയ്ക്കെതിരേ പോരാടണം: മാർ മഠത്തിക്കണ്ടത്തിൽ കാളിയാർ: സമൂഹത്തിൽ വർധിച്ചുവരുന്ന ലഹരിവസ്തുക്കളുടെ ഉപയോഗത്തിനും അരാജകത്വത്തിനും എതിരേ ഒന്നിച്ചുനിന്ന് പോരാടണമെന്ന് കോതമംഗലം ബിഷപ് മാർ ജോർജ് മഠത്തിക്കണ്ടത്തിൽ പറഞ്ഞു. കാളിയാർ സെന്‍റ് റീത്താസ് പാരിഷ് ഹാളിൽ കോതമംഗലം രൂപതാ ദിനാഘോഷത്തിൽ അധ്യക്ഷത വഹിച്ച് പ്രസംഗിക്കുകയായിരുന്നു അദ്ദേഹം. കാടിറങ്ങിവരുന്നു, കടൽ കയറിവരുന്നു എന്ന ഗുരുതരമായ സ്ഥിതിയാണ് ഇന്നു നാട്ടിലുള്ളത്. തൊമ്മൻകുത്തിൽ കുരിശ് തകർത്ത സംഭവം എല്ലാവരും ഒരുമിച്ചു നിൽക്കേണ്ടതിന്‍റെ ആവശ്യകതയാണ് ചൂണ്ടിക്കാട്ടുന്നത്. തിന്മ നിറഞ്ഞ സമൂഹത്തിൽ യഥാർഥ സാക്ഷ്യം നൽകാൻ വിശ്വാസികൾ മുന്നോട്ടുവരണമെന്നും അദ്ദേഹം ആഹ്വാനം ചെയ്തു. പ്രത്യാശയുടെ തീർഥാടകരായി മാറുകയാണ് കാലഘട്ടത്തിന്‍റെ ആവശ്യം. 120 ഇടവകകളും 14 ഫൊറോനകളുമുള്ള കോതമംഗലം രൂപതയിലൂടെ ആത്മീയ, ഭൗതിക മേഖലകളിൽ ഒട്ടേറെ നേട്ടങ്ങൾ കൈവരിക്കാൻ കഴിഞ്ഞുവെന്നും ബിഷപ് പറഞ്ഞു.

അശരണർക്ക് കരുതലാകണം: മാർ പുളിക്കൽ

കാളിയാർ: സമൂഹത്തിൽ അവഗണിക്കപ്പെട്ടവർക്കും അശരണർക്കും കാവലും കരുതലുമാകണമെന്ന് കാഞ്ഞിരപ്പള്ളി രൂപതാ ബിഷപ് മാർ ജോസ് പുളിക്കൽ. കാളിയാർ സെന്‍റ് റീത്താസ് പാരിഷ് ഹാളിൽ കോതമംഗലം രൂപതാ ദിനാഘോഷത്തോടനുബന്ധിച്ചു നടന്ന സമ്മേളനത്തിൽ രൂപതാദിന സന്ദേശം നൽകുകയായിരുന്നു അദ്ദേഹം. സാമൂഹിക മാറ്റത്തിന്‍റെ ചാലകശക്തിയായി നാം മാറണം. വർഗീയതയും ലഹരിവസ്തുക്കളുടെ ഉപയോഗവും വർധിച്ചുവരുന്ന കാലഘട്ടത്തിൽ ഇതിനെതിരേ ഒന്നിച്ചുനിന്ന് പോരാടണം. വന്യമൃഗ ആക്രമണം വർധിക്കുന്പോൾ കുടിയേറ്റ ജനതയെ സംരക്ഷിക്കാൻ ഒരുമിച്ചുനിൽക്കണം. മറ്റുള്ളവരുടെ വേദനയിൽ പങ്കുപറ്റുന്നതിനൊപ്പം അവരെ വളർത്തുന്നവരായും നാം മാറണം. വിശുദ്ധ കുർബാനയിൽനിന്നും ശക്തി സ്വീകരിച്ച് കൂട്ടായ്മയിൽ വളർന്നാലേ ഇതിനു കഴിയൂ എന്ന് ബിഷപ് പറഞ്ഞു. വിദ്യാഭ്യാസ, സാമൂഹ്യക്ഷേമ, ആരോഗ്യ, ജീവകാരുണ്യ മേഖലയിൽ കോതമംഗലം രൂപത ചെയ്യുന്ന സേവനങ്ങൾ അമൂല്യമാണെന്നും അദ്ദേഹം പറഞ്ഞു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]