ADVERTISEMENT

ADVERTISEMENT

സർവീസ് പ്രോജക്ടുകളുടെ ഉദ്ഘാടനം നടത്തി

തൊടുപുഴ: ലയണ്‍സ് ക്ലബ് തൊടുപുഴ എലൈറ്റിന്‍റെ പുതിയ ഭാരവാഹികളുടെ സ്ഥാനാരോഹണവും വിവിധ പദ്ധതികളുടെ ഉദ്ഘാടനവും നടത്തി. സർവീസ് പ്രോജക്ടുകളുടെ ഉദ്ഘാടനം മുനിസിപ്പൽ ചെയർമാൻ കെ. ദീപക് നിർവഹിച്ചു. കെ.പി. പീറ്റർ അടുത്ത വർഷത്തേക്കുള്ള ഭാരവാഹികളുടെ സ്ഥാനാരോഹണം നടത്തി.

ബിസിനസ് എക്സലൻസ് അവാർഡ് തൊടുപുഴ ജെയ്കോ ജ്വല്ലറി ഉടമ ഡോ. ജയ്മോൻ വർഗീസിനു സമ്മാനിച്ചു.

ഡോ. വി.എൻ. ഷാജി- പ്രസിഡന്‍റ്, കെ.വി. റെജി -സെക്രട്ടറി, ബോബി എം. വിൻസെന്‍റ്- ട്രഷറർ എന്നിവർ ചുമതലയേറ്റു. ജെയിസ് ജോണ്‍, ഷൈജൻ സ്റ്റീഫൻ, ഡോ. പ്രേംകുമാർ കാവാലം, ഷിജു തോമസ്, ടി.എസ്. സിനിമോൾ, ബിലീഷ് സുകുമാരൻ, റോയ് ലൂക്ക്, ലിബോ ജോണ്‍, ബോബി ജോർജ്, ബാബു കെ. ജോർജ്, പി.കെ. സന്തോഷ് എന്നിവർ പ്രസംഗിച്ചു.

ADVERTISEMENT

ലോറിക്ക് പിന്നിൽ ബൈക്കിടിച്ചു യുവാവ് മരിച്ചു

ചെറുതോണി: നിർത്തിയിട്ടിരുന്ന തടി ലോറിക്കു പിന്നിൽ ബൈക്കിടിച്ച് യുവാവ് മരിച്ചു. പാണ്ടിപ്പാറ കരിക്കുംതോളം സ്വദേശി ഇടയാടികുന്നുംപുറത്ത് മോഹനന്‍റെ മകൻ രാഹുൽ (26) ആണ് മരിച്ചത്. ഇന്നലെ രാത്രി 7.15ഓടെയാണ് അപകടം. പാണ്ടിപ്പാറ സെന്‍റ് ജോസഫ് പള്ളിയുടെ മുന്നിലുള്ള ഭണ്ഡാരത്തിൽ നേർച്ചയിടാനായി ലോറി നിർത്തിയിട്ടിരിക്കുകയായിരുന്നു. രാഹുൽ സഞ്ചിരിച്ചിരുന്ന ബൈക്ക് നിയന്ത്രണംവിട്ട് ലോറിക്ക് പിന്നിലിടിക്കുകയായിരുന്നു. ഗുരുതരമായി പരിക്കേറ്റ യുവാവിനെ തങ്കമണിയിലെ സ്വകാര്യ ആശുപത്രിയിൽ പ്രാഥമിക ശുശ്രൂഷ നൽകിയ ശേഷം കട്ടപ്പനയിലെ സ്വകാര്യ ആശുപത്രിയിലേക്ക് കൊണ്ടുപോയെങ്കിലും രക്ഷിക്കാനായില്ല. മൃതദേഹം കട്ടപ്പനയിലെ സ്വകാര്യ ആശുപത്രി മോർച്ചറിയിൽ സൂക്ഷിച്ചിരിക്കുന്നു. അമ്മ: മിനി. സഹോദരൻ: രാഹിൽ.

കുഞ്ചിത്തണ്ണി ടൗണിനു ഭീഷണിയായി മലമുകളിൽ അനധികൃത റിസോർട്ട് നിർമാണം

കുഞ്ചിത്തണ്ണി: റെഡ് സോണിൽപ്പെട്ട സ്ഥലത്ത് അനധികൃതമായി നടത്തുന്ന റിസോർട്ട് നിർമാണം കുഞ്ചിത്തണ്ണി ടൗണിന് ഭീഷണിയാകുന്നു. കുഞ്ചിത്തണ്ണി ടൗണിന് മുകൾഭാഗത്ത് മലയിലാണ് വൻ റിസോർട്ട് നിർമാണം നടക്കുന്നത്. ഇതോടെ മഴക്കാലത്ത് കുഞ്ചിത്തണ്ണി ടൗണിൽ ഏതു സമയവും മണ്ണിടിയാനും ഉരുൾപൊട്ടലിനുമുള്ള സാധ്യതയേറി. അധികൃതരുടെ ഒത്താശയോടെയാണ് റെഡ് സോണിൽ അനധികൃത നിർമാണം നടക്കുന്നതെന്നു നാട്ടുകാർ ആരോപിച്ചു. കുഞ്ചിത്തണ്ണി ടൗണിലെ നിരവധി വ്യാപാര സ്ഥാപനങ്ങൾക്കും കുടുംബങ്ങൾക്കും ഒരേപോലെ ഭീഷണി ഉയർത്തിയാണ് അനധികൃത നിർമാണം നടക്കുന്നത്. ഇതിനു സമാനമായ രീതിയിൽ 2013-ൽ മലയുടെ മറ്റൊരു ഭാഗത്ത് റിസോർട്ട് നിർമാണത്തിനായി മണ്ണിടിച്ചു നികത്തിയതാണ് 2013 ഓഗസ്റ്റ് ആറിന് കുഞ്ചിത്തണ്ണി ടൗണിന്‍റെ പകുതിഭാഗം ഇല്ലാതാക്കിയ ഉരുൾപൊട്ടലിന് കാരണമായത്. ഇക്കഴിഞ്ഞ മേയിൽ കനത്ത മഴയിൽ അനധികൃത നിർമാണം നടക്കുന്ന ഭാഗത്തെ മണ്ണ് ഒലിച്ചുവന്ന് കുഞ്ചിത്തണ്ണി ടൗണിൽ ഗതാഗത തടസമുണ്ടാക്കിയിരുന്നു. അന്ന് മണ്ണിടിഞ്ഞ ഭാഗത്ത് പടുതയിട്ടു മൂടിയാണ് ഇപ്പോൾ നിർമാണം തകൃതിയായി പുരോഗമിക്കുന്നത്. കനത്ത മഴക്കാലം വരാനിരിക്കുന്ന സാഹചര്യത്തിൽ അനധികൃത നിർമാണം തുടർന്നാൽ അവിടെ വെള്ളമിറങ്ങി വൻ മണ്ണിടിച്ചിലിനും ഉരുൾപൊട്ടലിനും കാരണമാകും.

സാംസ്കാരിക വകുപ്പിന്‍റെ ചെണ്ടപരിശീലനത്തിൽ പങ്കാളിയായി ഫാ. ജോമോൻ വട്ടത്തറ

കട്ടപ്പന: സാംസ്കാരിക വകുപ്പിന്‍റെ സൗജന്യ കലാപരിശീലന പദ്ധതിയായ വജ്രജൂബിലി ഫെലോഷിപ്പിന്‍റെ ഭാഗമാകാൻ ഇനി ഫാ. ജോമോൻ വട്ടത്തറയും. കാഞ്ചിയാർ കോവിൽമല സെന്‍റ് ജോസഫ് പള്ളി വികാരി ഫാ. ജോമോൻ വട്ടത്തറയാണ് സാംസ്കാരിക വകുപ്പിന്‍റെ സൗജന്യ കലാപരിശീലന പദ്ധതിയിൽ ചെണ്ടപരിശീലനം ആരംഭിച്ചത്. അരുണാചൽപ്രദേശ് ഡാമിൻ സെന്‍റ് പീറ്റേഴ്സ് പള്ളി വികാരിയായിരുന്ന ഫാ. ജോമോൻ ഒരു മാസം മുന്പാണ് കോവിൽമല സെന്‍റ് ജോസഫ് പള്ളി വികാരിയായി ചാർജെടുത്തത്. ഇതിനിടയിൽ മാധ്യമങ്ങളിലൂടെ സാംസ്കാരിക വകുപ്പിന്‍റെ സൗജന്യ കലാപരിശീലന പദ്ധതിയെക്കുറിച്ചറിയുകയും പദ്ധതിയുടെ കോ-ഓർഡിനേറ്റർ എസ്. സൂര്യലാലുമായി ബന്ധപ്പെടുകയുമായിരുന്നു. തുടർന്ന് ചെണ്ടയിൽ ഫെലോഷിപ്പ് ലഭിച്ച ബാബു മാത്യുവിനെ ഫാ. ജോമോന്‍റെ പരിശീലകനായി നിയോഗിച്ചു. പള്ളി വികാരിക്കൊപ്പം ഇടവകയിലെ നിരവധിപ്പേർ ചെണ്ടപരിശീലനം ആരംഭിച്ചിട്ടുണ്ട്. കുട്ടിക്കാലം മുതൽ ചെണ്ടമേളം തന്നെ ഏറെ ആകർഷിച്ചതായും പള്ളിയിലെ തിരുനാളിന് ചെണ്ടമേളം അവതരിപ്പിക്കാനുള്ള ശ്രമത്തിലാണെന്നും ഫാ. ജോമോൻ വട്ടത്തറ പറഞ്ഞു. ഇരട്ടയാർ സെന്‍റ് തോമസ് പള്ളിയിലും തങ്കമണി സെന്‍റ് തോമസ് പള്ളിയിലും സഹവികാരിയായിരുന്ന ഫാ. ജോമോൻ ബഥേൽ വട്ടത്തറ ജോസഫിന്‍റെയും പരേതയായ ലീലാമ്മയുടെയും മകനാണ്. പ്രായഭേദമന്യേ സ്ത്രീ-പുരുഷ വ്യത്യാസമില്ലാതെ എല്ലാവർക്കും സൗജന്യമായി കല പരിശീലിക്കാനുള്ള അവസരമാണ് വജ്രജൂബിലി ഫെലോഷിപ്പ് പദ്ധതിയിലൂടെ നടപ്പിലാക്കുന്നത്. സൗജന്യ കലാപരിശീലന പദ്ധതിയിൽ ലളിതകലകൾ, ക്ലാസിക്കൽ കലകൾ, അഭിനയകല, നാടോടിക്കലകൾ എന്നീ വിഭാഗങ്ങളിൽ നാൽപ്പതിലധികം കലാവിഷയങ്ങളിലാണ് പരിശീലനം നൽകുന്നത്. ജില്ലയിൽ കട്ടപ്പന, തൊടുപുഴ, നെടുങ്കണ്ടം, അടിമാലി ബ്ലോക്ക് പഞ്ചായത്തുകൾക്കു കീഴിലാണ് പദ്ധതി നടപ്പിലാക്കി വരുന്നത്.

ബേക്കറിയുടെ അടുക്കളയിൽ തീപിടിച്ചു

തൊടുപുഴ: വെങ്ങല്ലൂരിനു സമീപം ഷാപ്പുംപടിയിൽ ബേക്കറിയുടെ അടുക്കളയിൽ തീപിടിച്ചു. ഇന്നലെ വൈകുന്നേരം അഞ്ചരയോടെയായിരുന്നു സംഭവം. കാരിക്കോട് കുന്നുംപുറത്ത് മിധിലാജിന്‍റെ ഉടമസ്ഥതയിലുള്ള അൽമത്ത് എന്ന ബേക്കറിയുടെ അടുക്കളയിൽ ഉപയോഗത്തിലിരുന്ന സിലിണ്ടറിൽനിന്നും പാചകവാതകം ചോർന്നാണ് തീപിടിത്തമുണ്ടായത്. തീപിടിച്ചതോടെ പരിഭ്രാന്തരായ ജീവനക്കാർ പുറത്തേക്ക് ഓടി. തുടർന്ന് അഗ്നിരക്ഷാസേനയെ വിവരം അറിയിക്കുകയായിരുന്നു. ഉടൻതന്നെ തൊടുപുഴയിൽനിന്ന് സീനിയർ ഫയർ ആൻഡ് റെസ്ക്യു ഓഫീസർ എം.എൻ. വിനോദ് കുമാറിന്‍റെ നേതൃത്വത്തിൽ സേന സ്ഥലത്തെത്തി. സിലിണ്ടറിന്‍റെ ട്യൂബിലും സമീപത്തുമായി കത്തിക്കൊണ്ടിരുന്ന തീ അണയ്ക്കുകയും അതോടൊപ്പം സിലിണ്ടർ പുറത്തേക്ക് മാറ്റി ചോർച്ച പരിഹരിച്ച് സുരക്ഷ ഉറപ്പാക്കുകയും ചെയ്തു. സമീപത്തുതന്നെ കടകളും പെട്ടെന്ന് തീപിടിക്കാവുന്ന വസ്തുക്കളും ഉണ്ടായിരുന്നെങ്കിലും അതിലേക്ക് പടരുന്നതിനുമുൻപ് തീ അണയ്ക്കാൻ സാധിച്ചു. പതിനായിരം രൂപയുടെ നഷ്ടമാണ് കണക്കാക്കുന്നത്.

വീട്ടിൽ പ്രസവിച്ച യുവതിക്കും കുഞ്ഞിനും കരുതലായി കട്ടപ്പന താലൂക്ക് ആശുപത്രി

കട്ടപ്പന: വീട്ടിൽ പ്രസവിച്ച യുവതിക്കും കുഞ്ഞിനും അവസരോചിതമായ ഇടപെടലിലൂടെ ആരോഗ്യസ്ഥിതി മെച്ചപ്പെടുത്തി കട്ടപ്പന താലൂക്ക് ആശുപത്രിയിലെ ഡോക്ടർമാരായ വി.എസ്. ബെറ്റിയും ഗ്രീഷ്മ മത്തച്ചനും. ഗൈനക്കോളജി വിഭാഗമില്ലാത്ത താലൂക്ക് ആശുപത്രിയിലാണ് ഗുരുതരാവസ്ഥയിൽ എത്തിയ അമ്മയ്ക്കും കുഞ്ഞിനും ശുശ്രൂഷകൾ നൽകി ഡോക്ടർമാർ കരുതലായത്. ഞായറാഴ്ച രാവിലെ ഒൻപതോടെയാണ് കാഞ്ചിയാർ സ്വദേശിനിയായ സ്ത്രീയെ വീട്ടിൽ പ്രസവിച്ചതിനെത്തുടർന്ന് കട്ടപ്പന താലൂക്ക് ആശുപത്രിയിൽ എത്തിച്ചത്. ഉടൻതന്നെ അത്യാഹിതവിഭാഗത്തിലുണ്ടായിരുന്ന ശിശുരോഗ വിദഗ്ധ ഡോ. ഗ്രീഷ്മ മത്തച്ചൻ പ്രാഥമിക ചികിത്സ നൽകുകയും തുടർന്ന് ആശുപത്രി ആർഎംഒ ഇൻ-ചാർജായ ഇഎൻടി ഡോക്ടർ ബെറ്റിയെ വിളിച്ചുവരുത്തുകയുമായിരുന്നു. ഗൈനക്കോളജിയുടെ സേവനം ലഭ്യമല്ലാത്ത കട്ടപ്പന താലൂക്കാശുപത്രിയിൽ ഡോ. ബെറ്റിയുടെയും ഡോ. ഗ്രീഷ്മയുടെയും അവസരോചിതമായ ഇടപെടൽമൂലമാണ് കുട്ടിയെ പൂർണ ആരോഗ്യത്തോടെ സംരക്ഷിക്കാൻ കഴിഞ്ഞത്. കാഞ്ചിയാർ സ്വദേശിയായ യുവതിക്ക് ജൂലൈ ഏഴിനാണ് പ്രസവത്തിന്‍റെ തീയതി നൽകിയത്. ഇതിനിടയിലാണ് വീട്ടിൽ പ്രസവം നടന്നത്. തുടർന്ന് പരിഭ്രാന്തരായ വീട്ടുകാർ ഉടൻതന്നെ കട്ടപ്പന താലൂക്കാശുപത്രിയിൽ എത്തിക്കുകയായിരുന്നു. ആശുപത്രിയിൽ ഗൈനക്കോളജിസ്റ്റോ മറ്റു സൗകര്യങ്ങളോ ഉണ്ടായിരുന്നില്ല. എന്നാൽ, അടിയന്തര ചികിത്സ വേണ്ടിയിരുന്ന അമ്മയ്ക്കും കുഞ്ഞിനും പ്രാഥമിക ചികിത്സ നൽകിയശേഷം ഡോക്ടർമാരായ വി.എസ്. ബെറ്റിയും ഗ്രീഷ്മ മത്തച്ചനും ഇവരെ ഇടുക്കി മെഡിക്കൽ കോളജിലേക്ക് തുടർചികിത്സകൾക്കായി അയച്ചു.

പരിശ്രമങ്ങൾ ഫലം കണ്ടു; ജിനു ഇന്നെത്തും ഷാനറ്റിന്‍റെ സംസ്കാരം നാളെ

കട്ടപ്പന: ചെല്ലാർകോവിലിൽ ബൈക്കും ജീപ്പും ഇടിച്ചുണ്ടായ അപകടത്തിൽ മരിച്ച അണക്കര വെള്ളറ ഷൈജുവിന്‍റെ മകൻ ഷാനറ്റിന്‍റെ മൃതദേഹം നാളെ നാലിന് അണക്കര ഏഴാംമൈൽ ഒലിവുമല സെന്‍റ് ജോണ്‍സ് യാക്കോബായ പള്ളിയിൽ സംസ്കരിക്കും. ഷാനറ്റിന്‍റെ മാതാവ് ജിനു ഇന്നു നാട്ടിലെത്തും. കഴിഞ്ഞ 17നുണ്ടായ അപകടത്തിൽ മരിച്ച ഷാനറ്റിന്‍റെ മൃതദേഹം കുവൈറ്റിലായിരുന്ന മാതാവ് ജിനു നാട്ടിലെത്തുന്നതിനായി കട്ടപ്പന സെന്‍റ് ജോണ്‍സ് ആശുപത്രി മോർച്ചറിയിൽ സൂക്ഷിച്ചിരിക്കുകയാണ്. അപകടം നടന്ന നാൾമുതൽ ജിനുവിനെ നാട്ടിലെത്തിക്കുന്നതിനുള്ള ശ്രമം നടക്കുകയായിരുന്നു. മകന്‍റെ മരണവിവരം അറിയാതെയാണ് ജിനു എത്തുന്നത്. ഇന്നു രാവിലെ 11ന് നെടുന്പാശേരി വിമാനത്താവളത്തിൽ എത്തുമെന്നാണ് ജിനുവിനെ നാട്ടിലെത്തിക്കാൻ ശ്രമിച്ചുകൊണ്ടിരുന്ന കുവൈറ്റിലെ മലയാളി അസോസിയേഷനും കുവൈറ്റ് ഇടുക്കി അസോസിയേഷൻ ഭാരവാഹികളും അറിയിച്ചിരിക്കുന്നത്. നെടുന്പാശേരിയിൽനിന്ന് അണക്കരയിൽ വൈകുന്നേരത്തോടെ ജിനു എത്തും. മൂന്നുമാസം മുന്പാണ് ജിനു കുവൈറ്റിലേക്കു പോയത്.

റോഡ് ശുചീകരിച്ച് എൻഎസ്എസ് വോളണ്ടിയർമാർ

മൂലമറ്റം: സെന്‍റ് ജോസഫ്സ് കോളജിലെ എൻഎസ്എസ് വോളണ്ടിയർമാർ ആനക്കയം-കാഞ്ഞാർ റോഡരികിലെ കാടുംപടലും വെട്ടിനീക്കി. പ്രോഗ്രാം ഓഫീസർമാരായ ഡോ. ജോബി കൊടിയൻ, അഖില മരിയ റീഗൽ, വോളണ്ടിയർ സെക്രട്ടറി ഡെയ്സ് തോംസണ്‍ എന്നിവരുടെ നേതൃത്വത്തിലാണ് വിദ്യാർഥികൾ ശുചീകരണം നടത്തിയത്. പ്രിൻസിപ്പൽ ഡോ. ജോസഫ് ജോർജ്, സിഎഫ്ഒ റവ. ഡോ. അലക്സ് ലൂയിസ്, പഞ്ചായത്തംഗം എൻ.ജെ. ജോസഫ് എന്നിവർ പ്രസംഗിച്ചു.

എഴുപത്തിയഞ്ചുകാരെ ആദരിച്ച് പാലാ രൂപത, ഉണര്‍വേകി സമ്മേളനം

പാലാ: പാലാ രൂപത ജന്മംകൊണ്ട വര്‍ഷം ഭൂജാതരായ രൂപതാംഗങ്ങളുടെ സംഗമം 'ലിഫ്‌ഗോഷ് 75' ആത്മീയ ഉണര്‍വേകി. രൂപതയുടെ പാരമ്പര്യവും സംസ്‌കാരവും കൈമുതലാക്കി വളര്‍ന്ന നൂറുകണക്കിന് വയോജനങ്ങളെ രൂപത ആദരിച്ചു. രൂപതയുടെ ആത്മീയവും ഭൗതികവുമായ വളര്‍ച്ചയില്‍ സാക്ഷ്യം വഹിക്കുകയും വിദ്യാഭ്യാസ, ആതുര, വികസന മേഖലകളിലെ നേട്ടങ്ങളില്‍ അഭിമാനിക്കുകയും ചെയ്യുന്ന വയോജനങ്ങളാണ് ഇന്നലെ പാലാ ളാലം പഴയപള്ളി ഓഡിറ്റോറിയത്തില്‍ ഒത്തുചേര്‍ന്നത്. തങ്ങളുടെയും കുടുംബാഗങ്ങളുടെയും വളര്‍ച്ചയില്‍ രൂപത വഹിച്ച പങ്കിന് നന്ദി അര്‍പ്പിക്കാനുള്ള അവസരമായാണ് രൂപതാംഗങ്ങളായ വയോജനങ്ങള്‍ സമ്മേളനത്തെ നോക്കിക്കണ്ടത്. എല്ലാ ഇടവകകളില്‍നിന്നും രൂപതാംഗങ്ങള്‍ എത്തിച്ചേര്‍ന്നിരുന്നു. ചിട്ടയായ സംഘാടനമാണ് പാലാ രൂപത ഫാമിലി അപ്പൊസ്തലേറ്റും മാതൃവേദി, പിതൃവേദി, പ്രോലൈഫ് സമിതികളും നടത്തിയത്. രൂപതാധ്യക്ഷന്‍റെ കൈയൊപ്പു പതിഞ്ഞ കപ്പും ഭാരതത്തിന്‍റെ ആദ്യ വിശുദ്ധ അല്‍ഫോന്‍സാമ്മയുടെ കവര്‍ചിത്രം അടങ്ങിയ കൊന്തയും ഭക്ത്യാദരപൂര്‍വമാണ് സമ്മേളനത്തിനെത്തിയവര്‍ ഏറ്റുവാങ്ങിയത്. സ്വത്വബോധവും സ്വന്തമെന്ന ബോധവും വളര്‍ത്തണം: മാര്‍ കല്ലറങ്ങാട്ട് പാലാ: രൂപതയോടൊപ്പം പിറന്ന ആളുകളുടെ ഒത്തുചേരല്‍ ദൈവപരിപാലനയുടെ അനാവരണമാണെന്നും സ്വത്വബോധവും സ്വന്തമെന്ന ബോധവും വളര്‍ത്താന്‍ ഇത്തരം കൂട്ടായ്മകള്‍ക്ക് സാധിക്കുമെന്നും ബിഷപ് മാര്‍ ജോസഫ് കല്ലറങ്ങാട്ട് ഉദ്ഘാടനപ്രസംഗത്തില്‍ പറഞ്ഞു. ഇഴയടുപ്പത്തിന്‍റെ വേദിയാണിത്. അറിവുകൊണ്ടും ആത്മീയതകൊണ്ടും പാകപ്പെട്ടവരാണ് ഇവിടെ കൂടിയിരിക്കുന്നവര്‍. നാം പഠിച്ചത് വിശാലസമൂഹത്തിനുവേണ്ടിയാണ്. പാടശേഖരമായ ഈ കൂട്ടായ്മയിലെ അംഗങ്ങള്‍ വിതച്ചത് മക്കളും കൊച്ചുമക്കളും കൊയ്‌തെടുക്കുന്നു. വിളവെടുപ്പ് കാലമാണിത്. ആത്മീയബലം നഷ്ടപ്പെടരുതെന്നും സമൂഹത്തില്‍ നന്മ ചെയ്യാന്‍ മുന്നിട്ടിറങ്ങണമെന്നും ബിഷപ് ഉദ്‌ബോധിപ്പിച്ചു. മാതൃകാ കുടുംബത്തിലെ അപ്പന്‍റെ റോള്‍ അമ്മയോടു ചേര്‍ന്ന് മക്കള്‍ക്കും കുടുംബത്തിനും വേണ്ടതെല്ലാം ചെയ്തു കൊടുക്കുക എന്നതാണ്. സഭയോടും സഭാ സംവിധാനങ്ങളോടും യോജിച്ച് നില്‍ക്കാനുള്ള ഉത്തരവാദിത്വം വര്‍ധിച്ചുവരുന്ന കാലഘട്ടമാണെന്നും ബിഷപ് പറഞ്ഞു. കുടുംബചരിത്രങ്ങള്‍ എഴുതണമെന്നും ഇത് സഭയുടെ സ്വത്താണെന്നും ഉറവിടങ്ങളിലേക്കുള്ള തിരിഞ്ഞുനോട്ടം നമ്മെ വളര്‍ത്തുമെന്നും ബിഷപ് കൂട്ടിച്ചേര്‍ത്തു. എഴുപത്തിയഞാം വയസിലെത്തിയ ഫാ.ജോസഫ് കോട്ടയില്‍, ഫാ. ജോസഫ് വടകര, ഫാ. ജോണ്‍ പൊതീട്ടേല്‍ എന്നീ വൈദികരും 26 സന്യസ്തരും നൂറുകണക്കിന് അല്മായരും ആദരവ് ഏറ്റുവാങ്ങാന്‍ എത്തിയിരുന്നു. സംഘടനാ പ്രതിനിധികളായ ടോമി തുരുത്തിക്കര, മാത്യു പൈലോ, ബിന്‍സ് ജോസ് തൊടുകയില്‍, ജോസുകുട്ടി ജോസഫ് അറയ്ക്കപ്പറമ്പില്‍, ഡോ. ഫെലിക്‌സ് വെട്ടുകാട്ടില്‍, സബീന സക്കറിയാസ് മഠത്തിപ്പറമ്പില്‍, മേഴ്സി മാണി ചെറുകര, ലൗലി ബിനു വള്ളോംപുരയിടത്തില്‍, ഡയാന രാജു ഓലിക്കല്‍ എന്നിവര്‍ പരിപാടികള്‍ക്ക് നേതൃത്വം നല്‍കി. 75 കിലോയുടെ കേക്ക് പാലാ: രൂപതയുടെ പ്ലാറ്റിനം ജൂബിലി ആഘോഷത്തോടനുബന്ധിച്ച് ഇന്നലെ ളാലം സെന്‍റ് മേരീസ് ഹാളില്‍ നടന്ന എഴുപത്തിയഞ്ചു വയസുകാരുടെ സംഗമത്തില്‍ മുറിച്ചത് എഴുപത്തഞ്ചു കിലോയുടെ കേക്ക്. ബിഷപ് മാര്‍ ജോസഫ് കല്ലറങ്ങാട്ട് കേക്ക് മുറിച്ച് സമ്മേളനം ഉദ്ഘാടനം ചെയ്തു. പാലാ ബേക്കേഴ്‌സാണ് കേക്ക് സംഭാവന ചെയ്തത്.

ചരിത്രവും ഐതിഹ്യവും ഇഴകൾ തീർത്ത് 33 മലകൾ

ജോയി കിഴക്കേൽ തൊടുപുഴ: കേട്ടാൽ ദൃശ്യചാരുത ആസ്വദിക്കണമെന്ന് തോന്നും. കണ്ടാൽ അദ്ഭുതം കൂറി ഒരു നിമിഷം നിന്നുപോകും. പിന്നെ അറിയാതെ പറഞ്ഞുപോകും ചരിത്രവും ഐതിഹ്യവും ഇഴപാകിയ ഇടുക്കിയിലെ സ്ഥലനാമം പേറുന്ന 33 മലകൾ എത്ര ഹൃദ്യവും മനോഹരവുമെന്ന്. ആകാശത്തെ ചുംബിച്ച് മഞ്ഞണിഞ്ഞു നിൽക്കുന്ന ഓരോ മലയ്ക്കും പറയാനുള്ളത് വേറിട്ട കഥകൾ. നാമവും ചരിത്രവും പേറി കുടയത്തൂർ വിന്ധ്യൻ മല, മുതിയാമല, നെല്ലിക്കമല, മാങ്കുന്നുമല, കാത്തുമല, ഇരവിമല, ചെണ്ടുവരൈമല, കൊളുക്കുമല, ദേവിമല, പെരുമാൾമല, ഗുഡൂർമല, കബുല മല, കരിമല, ആനമല, ശിവഗിരി മല, മേഘമല, വെള്ളിമല, മംഗളഗിരിമല, കരിങ്കുളംമല, കുറവൻ കുറത്തിമല, കുമരിക്കൽമല, കരിങ്കുളംമല, മഞ്ചുമല, പട്ടുമല, നാടുകാണിമല, വലകെട്ടിമല, കോട്ടമല, തുന്പച്ചിമല, രാജമല, കോവിൽമല, വാഴമല എന്നിവയെല്ലാം നാടിന്‍റെ തനിമയും പാരന്പര്യവും വിളിച്ചോതുന്നു. ഏഷ്യയിലെ ഏറ്റവും വലിയ ആർച്ച് ഡാമായ ഇടുക്കി അണക്കെട്ടിന്‍റെ നിർമാണത്തിന് കാരണമായത് കുറവൻ - കുറത്തി മലകളാണ്. കേരളത്തിന്‍റെ കെടാവിളക്ക് എന്നറിയപ്പെടുന്ന മൂലമറ്റം പവർഹൗസിലേക്ക് കുളമാവ് ഡാമിൽനിന്ന് വെള്ളമെത്തിക്കുന്നത് നാടുകാണി മല തുരന്ന് പെൻസ്റ്റോക്ക് പൈപ്പിലൂടെയാണ്. കോട്ടപോലെ നിൽക്കുന്ന വലകെട്ടി മലയുടെയും നാടുകാണി മലയുടെയും നടുവിലാണ് ഭൂഗർഭ വൈദ്യുതി നിലയം സ്ഥിതി ചെയ്യുന്നത്. രാജമുദ്രയുമായി കോവിൽമല കേരളത്തിൽ രാജഭരണം ജനാധിപത്യത്തിന് വഴിമാറിയെങ്കിലും ഇടുക്കിയിൽ അതിന്‍റെ ശേഷിപ്പ് ഇപ്പോഴുമുണ്ട്. ജില്ലയിലെ പ്രബല ഗോത്രവർഗ വിഭാഗമായ മന്നാൻ സമുദായം പിന്തുടർന്നു വരുന്നത് രാജഭരണമാണ്. കാഞ്ചിയാർ പഞ്ചായത്തിലെ കോവിൽ മലയിലാണ് രാജാവിന്‍റെ ആസ്ഥാനമന്ദിരം. രാമൻ രാജമന്നാനാണ് നിലവിലെ രാജാവ്. ജില്ലയിലെ എല്ലാ മന്നാന്മാരും രാജാവിന്‍റെ പ്രജകളായാണ് കരുതപ്പെടുന്നത്. രാജാവ് മരിച്ചാൽ സഹോദരീപുത്രനെ പ്രത്യേക ചടങ്ങ് നടത്തി രാജാവായി വാഴിക്കുകയാണ് പതിവ്. വിളവെടുപ്പ് മഹോത്സവമായ കാലാവൂട്ടും കൂത്തുമാണ് ഇവരുടെ പ്രധാന ആഘോഷം. സ്ത്രീവേഷം കെട്ടിയാണ് പുരുഷന്മാർ കൂത്ത് നടത്തുന്നത്. വിളവ് നൽകിയ പ്രകൃതിയോടുള്ള നന്ദിപ്രകാശനമാണ് കാലാവൂട്ട്. കാഴ്ചയുടെ വിരുന്നും ഐതിഹ്യപ്പെരുമയും ജില്ലയിലെ മലകളിൽ രാമക്കൽമേടിനുള്ള സ്ഥാനം അദ്വിതീയമാണ്. കേരള - തമിഴ്നാട് അതിർത്തിയിൽ സ്ഥിതിചെയ്യുന്ന ഈ മലയിൽ എത്തിയാൽ ദൃശ്യവിരുന്ന് ആസ്വദിക്കാം. തമിഴ്നാട്ടിലെ കന്പം, ഗൂഡല്ലൂർ, തേവാരം, തേനി തുടങ്ങിയ പട്ടണങ്ങൾ ഇവിടെ നിന്നാൽ കാണാം. ശ്രീരാമനും സീതയും വനവാസത്തിനു പോയപ്പോൾ ഇവിടെയെത്തിയെന്നാണ് ഐതിഹ്യം. ശക്തമായി കാറ്റു വീശുന്ന പ്രദേശമാണിവിടം. മലയുടെ നെറുകയിൽ എത്തിയാൽ രാമക്കല്ല് മുകളിലേക്ക് തലയുയർത്തി നിൽക്കുന്നതും ദർശിക്കാം. ഇതുപോലെ കുടയത്തൂർ വിന്ധ്യൻ മലയുടെ ഭാഗമായ ഇലവീഴാപ്പൂഞ്ചിറയിൽ നിന്നാൽ ചേതോഹരമായ സൂര്യാസ്തമയ ദൃശ്യവും മലങ്കര ജലാശയത്തിന്‍റെ ദൃശ്യവും നുകരാനാകും. ജലസ്രോതസും വന്യജീവി കേന്ദ്രവും ഇടുക്കിയിലെ മലകൾ പ്രധാന ജലസ്രോതസുകളുടെ ഉത്ഭവകേന്ദ്രം കൂടിയാണ്. പെരിയാർ, മീനച്ചിലാർ, മണിമലയാർ, മൂവാറ്റുപുഴയാർ എന്നിവയുടെ ഉത്ഭവം മലകളിൽനിന്ന് പൊട്ടിയൊഴുകുന്ന നീർച്ചാലുകളാണ്. കേരളത്തിലെ ഏറ്റവും വലിയ കൊടുമുടിയായ ആനമുടിക്കു സമീപമാണ് ലോകത്ത് അപൂർവമായി കാണുന്ന വരയാടുകളുള്ള രാജമല. ഇരവികുളം ദേശീയോദ്യാനത്തിന്‍റെ ഭാഗമാണിത്. സംസ്ഥാനത്തെ പ്രധാന വന്യജീവി സംരക്ഷണ കേന്ദ്രങ്ങൾ സ്ഥിതിചെയ്യുന്നത് പശ്ചിമഘട്ട മലനിരകളിലാണ്. 7,754 ഹെക്ടർ വിസ്തീർണമുള്ള പെരിയാർ ടൈഗർ റിസർവ്, 9,700 ഹെക്ടർ വരുന്ന ഇരവികുളം ദേശീയ പാർക്ക്, 7,760 ഹെക്ടർ വിസ്തീർണമുള്ള ഇടുക്കി വന്യമൃഗസംരക്ഷണകേന്ദ്രം, 9,044 ഹെക്ടറുള്ള ചിന്നാർ വന്യമൃഗ സംരക്ഷണകേന്ദ്രം എന്നിവ ജൈവവൈവിധ്യത്തിന്‍റെ കലവറയാണ്.

ലിവർ ഫൗണ്ടേഷൻ കുടുംബസംഗമം നടത്തി

തൊടുപുഴ: ലിവർ ഫൗണ്ടേഷൻ ഓഫ് കേരള ജില്ലാ കുടുംബസംഗമം ഡീൻ കുര്യാക്കോസ് എംപി ഉദ്ഘാടനം ചെയ്തു. ജില്ലാ പ്രസിഡന്‍റ് ജയചന്ദ്രൻ നായർ അധ്യക്ഷത വഹിച്ചു. ഡോ. നിബു ഡൊമിനിക് ക്ലാസ് നയിച്ചു. നഗരസഭാ ചെയർമാൻ കെ. ദീപക്, ഫൗണ്ടേഷൻ ജില്ലാ വൈസ് പ്രസിഡന്‍റ് സോണി തോമസ്, കോ-ഓർഡിനേറ്റർ എം.കെ. മനോജ് കുമാർ, സംസ്ഥാന ട്രഷറർ ബാബു കുരുവിള, സെക്രട്ടറി വിനു വി. നായർ, രക്ഷാധികാരി എസ്. സത്യമൂർത്തി, ജോസ് തോമസ് കളരിക്കൽ, വി.പി. ബഷീർ, കെ.എ. രാജേഷ് എന്നിവർ പ്രസംഗിച്ചു.

മന്ത്രി പി. രാജീവ് ഇന്ന് ജില്ലയിൽ

ഇടുക്കി: മന്ത്രി പി. രാജീവ് ഇന്നു ജില്ലയിൽ വിവിധ പരിപാടികളിൽ പങ്കെടുക്കും. രാവിലെ ഒൻപതിന് മുരിക്കാശേരിയിലെ വ്യവസായ യൂണിറ്റ് ഉദ്ഘാടനം ചെയ്യും. പത്തിന് കട്ടപ്പനയിൽ നടക്കുന്ന പ്ലാന്‍റേഴ്സ് മീറ്റിൽ പങ്കെടുക്കും. ഇതോടൊപ്പം തോട്ടംതൊഴിലാളികൾക്കായുള്ള ലയം ഹൗസിംഗ് സ്കീം പദ്ധതി ഉദ്ഘാടനവും നിർവഹിക്കും. വൈകുന്നേരം മൂന്നിന് കട്ടപ്പന കുന്തളംപാറയിൽ ആംഭിക്കുന്ന വ്യവസായ യൂണിറ്റ് ഉദ്ഘാടനം ചെയ്യും. നാലിന് പീരുമേട്ടിൽ എവിടി പ്ലാന്‍റേഷനിലെ തൊഴിലാളിലയങ്ങളിൽ സന്ദർശനം നടത്തും. തോട്ടംതൊഴിലാളികൾക്കായുള്ള ലയം ഹൗസിംഗ് സ്കീം പദ്ധതി സംസ്ഥാനത്ത് നടപ്പാക്കുന്ന ആദ്യജില്ലയാണ് ഇടുക്കി. മന്ത്രി റോഷി അഗസ്റ്റിൻ അധ്യക്ഷത വഹിക്കും. ഉദ്ഘാടനത്തിനു ശേഷം വിവിധ മേഖലകളിലെ തോട്ടം ഉടമകളുമായി മന്ത്രി ആശയവിനിമയം നടത്തും. രാവിലെ ഏലത്തോട്ടം ഉടമകളുമായും ഉച്ചയ്ക്ക് 1.30 മുതൽ തേയില, റബർ, കാപ്പിത്തോട്ടം ഉടമകളുമായും മന്ത്രി ചർച്ച നടത്തും.

സ്കൂൾ ഉച്ചഭക്ഷണത്തിലെ പരിഷ്കരണം: മെനു നടപ്പാകുമോയെന്ന് ആശങ്ക

തൊടുപുഴ: സ്കൂൾ ഉച്ചഭക്ഷണത്തിനായുള്ള മെനു സർക്കാർ പരിഷ്കരിച്ചതോടെ വെട്ടിലായി പ്രധാനാധ്യാപകരും സ്കൂൾ അധികൃതരും. സർക്കാർ നൽകിവരുന്ന തുകകൊണ്ട് നിലവിൽ കുട്ടികൾക്കു നൽകിവന്നിരുന്ന ഉച്ചഭക്ഷണ വിതരണത്തിനുള്ള ചെലവ് കണ്ടെത്താൻ കഴിയാതിരിക്കുന്പോഴാണ് മെനു സർക്കാർ പരിഷ്കരിച്ചതെന്നു പ്രതിപക്ഷ അധ്യാപകസംഘടനകളും പ്രധാനാധ്യാപകരും പറയുന്നു. എഗ് ഫ്രൈഡ് റൈസ്, ലെമണ്‍ റൈസ്, കാരറ്റ് റൈസ്, മുട്ട അവിയൽ, മുട്ട റോസ്റ്റ് ഉൾപ്പെടെയുള്ള പുതിയ മെനുവാണ് സർക്കാർ പുറത്തിറക്കിയിരിക്കുന്നത്. എല്ലാ ദിവസവും ഇത്തരത്തിൽ ഉച്ചഭക്ഷണം തയാറാക്കി നൽകണമെങ്കിൽ അധ്യാപകരുടെ പോക്കറ്റ് കാലിയാകുമെന്നതാണ് അവസ്ഥ. നിലവിൽ കുട്ടികൾക്ക് ഉച്ചഭക്ഷണം നൽകിയതിന്‍റെ പേരിൽ പല പ്രധാനാധ്യാപകരും ഇപ്പോൾത്തന്നെ കടക്കെണിയിലാണ്. പലപ്പോഴും അധ്യാപകർ വ്യാപാര സ്ഥാപനങ്ങളിൽനിന്നും കടമായിട്ടാണ് സാധനങ്ങൾ വാങ്ങുന്നതുതന്നെ. ഇതിനിടെയാണ് പരിഷ്കരിച്ച മെനു അനുസരിച്ചുള്ള ഭക്ഷണം കുട്ടികൾക്ക് നൽകണമെന്ന നിർദേശം വന്നത്. കുറഞ്ഞ സമയത്തിനുള്ളിൽ ഇത്രയും വിഭവങ്ങൾ തയാറാക്കുക എന്നതുതന്നെ വെല്ലുവിളിയാണ്. നിലവിൽ 500 കുട്ടികൾക്ക് ഭക്ഷണം തയാറാക്കാൻ ഒരു പാചകത്തൊഴിലാളി മാത്രമാണുള്ളത്. ഒരു കുട്ടിക്ക് എൽപി ക്ലാസിൽ 6.78 രൂപയും യുപി മുതൽ 10.17 രൂപയുമാണ് ഉച്ചഭക്ഷണത്തിന് ഒരു ദിവസം സർക്കാർ അനുവദിക്കുന്നത്. വിദ്യാർഥികളുടെ എണ്ണത്തിന് അനുസരിച്ച് നിരക്കിൽ മാറ്റം വരാം. അരി മാവേലി സ്റ്റോറുകളിൽനിന്ന് ലഭിക്കും. പാചകക്കൂലിയും സർക്കാർ നൽകും. പാചകവാതകം, പച്ചക്കറികൾ ഇവ എത്തിക്കാനുള്ള വാഹനക്കൂലിയും ചേർത്താണ് സർക്കാർ വിഹിതം നിശ്ചയിച്ചിരിക്കുന്നത്. ഈ തുക ഉപയോഗിച്ച് കഴിഞ്ഞകാലങ്ങളിൽ ഭക്ഷണ വിതരണം കുറ്റമറ്റതാക്കാൻ അധ്യാപകർ ഏറെ ബുദ്ധിമുട്ടിയിരുന്നു. എങ്കിലും പ്രതിസന്ധികൾക്കിടയിലും കുട്ടികൾക്ക് ഉച്ചഭക്ഷണം മുടങ്ങാതെ നൽകാൻ അധ്യാപകർ പരമാവധി ശ്രമിക്കുകയും ചെയ്തു. ഇതിനിടെ, സർക്കാർ വിഹിതം കുടിശികയായതോടെ പ്രതിപക്ഷ അധ്യാപക സംഘടന ഹൈക്കോടതിയെ സമീപിച്ചു. കോടതി നിർദേശത്തെത്തുടർന്നാണ് മൂന്നു മാസത്തെ കുടിശിക സർക്കാർ അനുവദിച്ചത്. മെനു പരിഷ്കരണത്തോടെ ഉച്ചഭക്ഷണ വിതരണത്തിന് ചെലവേറുമെന്ന കാര്യം വ്യക്തമാണ്. കഴിഞ്ഞ വർഷം പ്രൈമറി ക്ലാസുകളിലെ കുട്ടികൾക്ക് 60 പൈസയുടെ നാമമാത്ര വർധന മാത്രമാണ് സർക്കാർ നടപ്പാക്കിയത്. സർക്കാർ ഫണ്ട് വർധിപ്പിക്കാൻ തയാറായില്ലെങ്കിൽ ഉച്ചഭക്ഷണ വിതരണ പദ്ധതി വീണ്ടും കോടതി കയറാനും സാധ്യതയേറെയാണ്. ഉച്ചഭക്ഷണ പദ്ധതി നടപ്പാക്കുന്നതുമായി ബന്ധപ്പെട്ട് അഞ്ചു തലത്തിൽ കമ്മിറ്റികൾ രൂപീകരിച്ചു പ്രവർത്തിക്കണമെന്നാണ് നിബന്ധന. ഏറ്റവും താഴെ വിദ്യാലയതലത്തിലുള്ള കമ്മിറ്റി മുതൽ ബ്ലോക്ക്, ജില്ലാ, സംസ്ഥാനതല കമ്മിറ്റികൾ രൂപീകരിക്കുകയും യോഗം ചേരുകയും വേണം. എന്നാൽ വിദ്യാലയ കമ്മിറ്റികൾ മാത്രമാണ് ഇക്കാര്യത്തിൽ പതിവായി ചേരാറുള്ളതെങ്കിലും ബാധ്യത പലപ്പോഴും പ്രധാനാധ്യാപകന്‍റെ ചുമലിൽ മാത്രമാണ് വന്നുചേരുക. മന്ത്രിയുടെ പ്രസ്താവന അപഹാസ്യം: കെപിഎസ്ടിഎ തൊടുപുഴ: പ്രധാനാധ്യാപകർക്ക് ശന്പളം കൊടുക്കുന്നത് സ്കൂളുകളിൽ ഉച്ചഭക്ഷണം കൊടുക്കാനാണെന്ന് പറയുന്ന മന്ത്രി വിദ്യാഭ്യാസ വകുപ്പിനുതന്നെ നാണക്കേടാണെന്ന് കെപിഎസ്ടിഎ ആരോപിച്ചു. കേരളത്തിലെ പൊതുവിദ്യാലയങ്ങളിൽ ഉച്ചഭക്ഷണത്തോടൊപ്പം പോഷകാഹാരങ്ങളായി മുട്ട, പാൽ എന്നിവ നൽകി വരികയും എന്നാൽ അതിന്‍റെ തുക പ്രത്യേകം നൽകാതിരിക്കുകയും സർക്കാർ അനുവദിച്ച നാമമാത്രമായ തുകപോലും മാസങ്ങളോളം കുടിശിക വരുത്തുകയും ചെയ്തതോടെ കെപിഎസ്ടിഎ ഹൈക്കോടതിയെ സമീപിച്ചിരുന്നു. കുടിശിക ഉടൻ അനുവദിച്ചില്ലെങ്കിൽ ഉച്ചഭക്ഷണവിതരണം നിർത്തിവയ്ക്കാൻ ഉത്തരവിടേണ്ടി വരുമെന്നാണ് കോടതി വ്യക്തമാക്കിയത്. ഇതേത്തുടർന്ന് മൂന്നു മാസത്തെ കുടിശിക അനുവദിക്കാൻ സർക്കാർ നിർബന്ധിതമായി. സംസ്ഥാന സർക്കാർ കേന്ദ്രത്തെ പഴിചാരി പ്രഥമാധ്യാപകർക്ക് ഉച്ചഭക്ഷണത്തുക നൽകുന്നതിൽ വരുത്തിയ വീഴ്ചയെ ന്യായീകരിക്കാൻ ശ്രമിച്ചെങ്കിലും കോടതി കർശനമായ നിലപാട് സ്വീകരിക്കുകയും തുക അനുവദിക്കാൻ കഴിയില്ലെങ്കിൽ കേന്ദ്രത്തിന്‍റെ പദ്ധതി നടത്തേണ്ട ബാധ്യത സംസ്ഥാന സർക്കാരിന് എന്താണെന്ന് ചോദിക്കുകയും ചെയ്തു. മുട്ട, പാൽ എന്നിവയ്ക്ക് പ്രത്യേക തുക അനുവദിക്കണമെന്നും കോടതി ഉത്തരവിട്ടു. 2024 ജൂണ്‍ മുതൽ മുട്ട, പാൽ എന്നിവയ്ക്ക് യഥാക്രമം ആറ് രൂപ, ലിറ്ററിന് 52 രൂപ എന്ന ക്രമത്തിൽ അനുവദിക്കാൻ സർക്കാർ നിർബന്ധിതമായി. 2017 മുതൽ 2023 മാർച്ച് വരെയുള്ള ഏഴു വർഷം മുട്ട, പാൽ എന്നിവയ്ക്ക് ഒരു രൂപപോലും അധ്യാപകരുടെ ചെലവിൽ ഇതു നടത്തിക്കൊണ്ടുപോയി മേനി നടിക്കുകയാണ് സർക്കാർ ചെയ്തത്. പരിഷ്കരിച്ച മെനു വിദ്യാലയങ്ങളിൽ നടപ്പാക്കി അതു സർക്കാരിന്‍റെ ഭരണനേട്ടമായി അവതരിപ്പിക്കാമെന്ന ധാരണ ഇനി കേരളത്തിൽ നടപ്പാകില്ലെന്നും സംഘടനാ നേതാക്കൾ പറഞ്ഞു.

മുള്ളരിങ്ങാടിന് അഭിമാനനേട്ടം സമ്മാനിച്ച് അശ്വിനി

വണ്ണപ്പുറം: മുള്ളരിങ്ങാട് മലയോര ഗ്രാമത്തിൽനിന്ന് ആദ്യമായി ഒരു ഡോക്ടർ. മുള്ളരിങ്ങാട് വെള്ളക്കയം പുത്തൻപുരയ്ക്കൽ അശ്വിനി ദിവാകരനാണ് എംബിബിഎസ് പഠനം പൂർത്തിയാക്കി മുള്ളരിങ്ങാട് ആദിവാസി സെറ്റിൽമെന്‍റിൽനിന്നുള്ള ആദ്യ ഡോക്ടറായത്. ഏറെ വെല്ലുവിളികൾ അതിജീവിച്ചാണ് പിന്നാക്ക മേഖലയിൽനിന്നുള്ള ഈ പെണ്‍കുട്ടി ചരിത്രനേട്ടത്തിനുടമയായത്. വീട്ടിൽനിന്നും നാലു കിലോമീറ്റർ അകലെയുള്ള പഞ്ചായത്ത് എൽപി സ്കൂളിലായിരുന്നു പ്രാഥമിക വിദ്യാഭ്യാസം. വിദ്യാലയത്തിലേക്ക് നടന്നായിരുന്നു അശ്വനിയുടെ യാത്ര. മഴക്കാലത്ത് യാത്ര വളരെ ബുദ്ധിമുട്ടായിരുന്നു. കാറ്റും മഴയും ഉണ്ടെങ്കിൽ സ്കൂളിൽ എത്തുന്പോഴേക്കും ആകെ നനഞ്ഞിരിക്കുമെങ്കിലും മുടങ്ങാതെ സ്കൂളിലെത്താൻ ശ്രമിക്കും. നന്നായി പഠിക്കണമെന്ന മകളുടെ താത്പര്യം മനസിലാക്കിയ മാതാപിതാക്കൾ മകളെ ഇംഗ്ലീഷ് മീഡിയം സ്കൂളിൽ ചേർക്കാനാഗ്രഹിച്ചെങ്കിലും സമീപത്തെങ്ങും ഇംഗ്ലീഷ് മീഡിയം സ്കൂളുകളില്ല. മുള്ളരിങ്ങാട് ഗവ. സ്കൂളിൽ ഇംഗ്ലീഷ് മീഡിയം ഡിവിഷൻ ഇല്ല. സ്വകാര്യ സ്കൂളിൽ വിടാനുള്ള സാന്പത്തികശേഷിയും ഉണ്ടായിരുന്നില്ല. തുടർന്ന് 25 കിലോമീറ്റർ അകലെയുള്ള കലൂർ ഐപ്പ് മെമ്മോറിയൽ സ്കൂളിലെ ഇംഗ്ലീഷ് മീഡിയം ഡിവിഷനിൽ ചേർത്തു. ദിവസവും ബസിലാണ് യാത്ര. പുലർച്ചെതന്നെ വീട്ടിൽനിന്നിറങ്ങിയാലേ ബസ് കിട്ടൂ. തിരികെ വീട്ടിൽ എത്തുന്പോഴും നേരം വൈകും. പ്ലസ് ടു പഠനം ചാത്തമറ്റം സർക്കാർ ഹയർ സെക്കൻഡറി സ്കൂളിലായിരുന്നു. നീറ്റ് പരീക്ഷയിൽ മികച്ച റാങ്ക് നേടിയതോടെ കോഴിക്കോട് മലബാർ മെഡിക്കൽ കോളജിൽ പ്രവേശനം കിട്ടി. കഴിഞ്ഞ ദിവസമായിരുന്നു ബിരുദദാന ചടങ്ങ് നടന്നത്. കർഷകരായ മുള്ളരിങ്ങാട് പി.എ. ദിവാകരന്‍റെയും ജി.എൻ. രജനിയുടെയുടെയും മകളാണ് അശ്വിനി. ഇവർക്ക് ഇരട്ടി സന്തോഷമായി സഹോദരൻ അമലിന് കഴിഞ്ഞ ദിവസം കേരള ഗ്രാമീണ്‍ ബാങ്കിൽ ജോലി ലഭിച്ചിരുന്നു.

ഇരവികുളത്ത് പ്രകൃതിപഠന ക്യാന്പുകൾക്ക് ഇന്നു തുടക്കം

മറയൂർ: ഇരവികുളം ദേശീയോദ്യാനത്തിന്‍റെ അൻപതാം വാർഷികാഘോഷ പരിപാടികളുടെ ഭാഗമായി മൂന്നാർ മേഖലയിലുള്ള 50 സ്കൂളുകളിലെ കുട്ടികൾക്കായി നടക്കുന്ന ഏകദിന പ്രകൃതിപഠന ക്യാന്പുകൾക്ക് ഇന്നു തുടക്കമാവും. മൂന്നാർ മേഖലയിലെ തെരഞ്ഞെടുത്ത 50 സ്കൂളുകളിൽനിന്നുള്ള വിദ്യാർഥികളാണ് പ്രകൃതിപഠന ക്യാന്പിൽ പങ്കെടുക്കുന്നത്. ഇരവികുളം ടൂറിസം സോണ്‍ സന്ദർശനം, ട്രക്കിംഗ്, പ്രകൃതിപഠന ക്ലാസ് എന്നിവ അടങ്ങുന്നതാണ് ഏകദിന പഠനക്യാന്പ്. പരിസ്ഥിതി സംരക്ഷണ പ്രവർത്തനങ്ങളെക്കുറിച്ച് അവബോധം സൃഷ്ടിക്കുകയും വനനശീകരണം, വന്യജീവി സംരക്ഷണം, കാലാവസ്ഥാ വ്യതിയാനം തുടങ്ങിയവയെക്കുറിച്ചുള്ള അറിവ് പകർന്നുനൽകുകയും ചെയ്ത് പ്രകൃതിസംരക്ഷണ യത്നത്തിൽ യുവതലമുറയെ പ്രാപ്തരാക്കുക എന്ന ഉദ്ദേശ്യത്തോടെയാണ് പ്രകൃതിപഠന ക്ലാസുകൾ സംഘടിപ്പിക്കുന്നത്. വംശനാശഭീഷണി നേരിടുന്ന വരയാടുകൾ അടക്കമുള്ള മൃഗങ്ങളെ നേരിട്ട് കാണാനും ചോലവനങ്ങളും പുൽമേടുകളും അപൂർവമായ ഓർക്കിഡുകളും നീലക്കുറിഞ്ഞിയും നിറഞ്ഞ പ്രകൃതിയുടെ മനോഹാരിത ആസ്വദിക്കാനും ക്യാന്പ് വഴിയൊരുക്കും. ക്യാന്പുകൾ 2026 മാർച്ച് വരെ തുടരും.

കൊലക്കേസ് പ്രതിയെ മാരിയപ്പൻ തേടിയത് ‘ബേങ്ക് സാർ’ റോളിൽ

കുമളി: കുമളി പോലീസ് സ്റ്റേഷനിലെ സിവിൽ പോലീസ് ഓഫീസർ എം. മാരിയപ്പൻ കൊലക്കേസ് പ്രതിയിലേക്കെത്തുന്നതിന് തെരഞ്ഞെടുത്തത് തമിഴ് നാട്ടിലെ ബാങ്ക് ജോലിക്കാരനായി. ബാങ്ക് ലോണ്‍ കർഷകർക്ക് തരപ്പെടുത്തിക്കൊടുക്കാമെന്ന് പറഞ്ഞ് വനമേഖലയിലെ ആളുകളുടെ ഇടയിൽ ഒരാളായി മാറി. തമിഴിൽ ബാങ്ക് ’ ബേങ്കാണ്’. പെരിയാർ ടൈഗർ റിസർവിനോട് ചേർന്നുള്ള തൊട്ടടുത്ത വനമേഖലയാണ് വരശനാട്. ഫോറസ്റ്റ് ചെക്ക്പോസ്റ്റ് കഴിഞ്ഞ് ചിന്നമന്നൂരിൽനിന്നും കിലോമീറ്റർ താണ്ടിവേണം വരശനാടെത്താൻ. നിരപ്പായ കൃഷിയിടങ്ങളിൽ ഉടനീളം കൃഷിയെന്ന വിധം വൈദ്യുതിക്കായി കൂറ്റൻ കാറ്റാടി യന്ത്രങ്ങളുണ്ട്. അവിടെയും ഇവിടെയുമായി ചെറിയ കടകൾ മാത്രമാണിവിടെയുള്ളത്. വരശനാട് ചെറിയ ടൗണാണ്. ഇവിടെനിന്നു കാൽനടയായി വനത്തിലൂടെ പെരിയാർ ടൈഗർ റിസർവിലെത്താൻ അധിക ദൂരമില്ല. വരശനാടുനിന്നു പത്ത് കിലോമീറ്റർ ഉള്ളിലേക്ക് മാറിയാണ് കൊലക്കേസ് പ്രതി ഗണേശൻ ഒളിവിൽ കഴിഞ്ഞിരുന്നത്. റോഡില്ല, മൊബൈൽ ഫോണ്‍ റേഞ്ചില്ല, ലാൻഡ് ഫോണ്‍ സംവിധാനമില്ല, വൈദ്യുതി ഇല്ല ആകെ ധർമരാജപുരത്തുള്ളത് ഷീറ്റും ഓലയുംമേഞ്ഞ ഒരു ചെറിയ ചായക്കട മാത്രം. ധർമരാജപുരത്ത് ബ്രാണ്ടി, വാറ്റ്, കഞ്ചാവ് എല്ലാം സുലഭം. പ്രതി ഗണേശൻ ധർമരാജപുരം വിട്ട് ഒരിടത്തും പോകില്ല. അവിടെ നിറയെ കശുവണ്ടിത്തോട്ടമാണ്. ’ബേങ്ക് സാറിന്’ വരശനാട് നല്ല പരിചയമുള്ള സ്ഥലമാണ്. അവിടെ ഫോറസ്റ്റ് വാച്ചറായിരുന്നു. തമിഴ് ഭാഷയും തമിഴ്നാട്ടിലെ കാര്യങ്ങളും നന്നായി അറിയാം. നാലു മാസം മാരിയപ്പൻ പ്രതിയുടെ പിന്നാലെ ഉണ്ടായിരുന്നു. ഒരു സ്നേഹിതന്‍റെ വീട്ടിൽ താമസിച്ചായിരുന്നു അന്വേഷണം. ഫോണ്‍ സൗകര്യത്തിനായി ലാൻഡ് ഫോണ്‍ കണക്ഷനുള്ള ഒരാളുടെ പക്കൽനിന്നും വൈഫൈ കണക്‌ഷനെടുത്തു. ഈ കണക്‌ഷൻ വഴിയാണ് മേലുദ്യോഗസ്ഥരുമായി ബന്ധപ്പെട്ടിരുന്നത്. സിനിമയെ വെല്ലുന്ന ഓപ്പറേഷന്‍റെ അവസാനം തമിഴ്നാട് പോലീസ്, ഫോറസ്റ്റ് ഉദ്യോഗസ്ഥരുടെ സഹായത്തോടെയാണ് പ്രതിയെ കീഴടക്കിയത്. വേഷം മാറിയെത്തിയത് പോലീസാണെന്ന് തിരിച്ചറിഞ്ഞതോടെ നാട്ടുകാരും തിരിഞ്ഞു. ബലപ്രയോഗം വേണ്ടി വന്നു കേരള പോലീസിന്. മാരിയപ്പൻ വണ്ടിപ്പെരിയാർ സത്രം സ്വദേശിയാണ്.

28 വർഷത്തിനുശേഷം കൊലക്കേസ് പ്രതി പിടിയിൽ

കുമളി: കുമളിക്ക് സമീപം ചെങ്കരയിൽ യുവാവിനെ കൊലപ്പെടുത്തിയ കേസിൽ ഒളിവിൽപ്പോയ പ്രതിയെ കുമളി പോലീസ് 28 വർഷത്തിനുശേഷം തമിഴ്നാട്ടിൽനിന്നു പിടികൂടി. തമിഴ്നാട്ടിലെ തേനി വരശനാട് ധർമരാജപുരം സ്വദേശി മഹാദേവൻ (44) ആണ് അറസ്റ്റിലായത്. ചെങ്കര ആറുമുക്ക് സ്വദേശി ഗണേശൻ (18) കൊല്ലപ്പെട്ട കേസിലെ നാലാം പ്രതിയാണ് മഹാദേവൻ. ദുർഘടമായ വനമേഖലയിൽ ഭാര്യയും രണ്ടു കുട്ടികളുമൊത്താണ് ഇയാൾ കഴിഞ്ഞിരുന്നത്. കൊല്ലപ്പെട്ട ഗണേശന്‍റെ മൂത്ത സഹോദരനായ ലിംഗം, അടുത്ത ബന്ധുക്കളായ ധനരാജ്, ബാലചന്ദ്രർ എന്നിവരാണ് ഒന്നും രണ്ടും മൂന്നും പ്രതികൾ. ഇവർ നേരത്തേ പിടിയിലായിരുന്നെങ്കിലും നാലാം പ്രതിയായ മഹാദേവൻ ഒളിവിലായിരുന്നു. മഹാദേവനടക്കം പ്രതികളെല്ലാം അടുത്ത ബന്ധുക്കളാണ്. ചെങ്കരയിലെ സ്വത്ത് സംബന്ധിച്ചുള്ള തർക്കമാണ് കൊലപാതകത്തിനു കാരണം. 1997 ജൂണ്‍ ഏഴിന് വൈകുന്നേരം ഏഴോടെ ചെങ്കര ഭാഗത്തായിരുന്നു സംഭവം. പ്രതികളെല്ലാവരും ചേർന്ന് ഗണേശനെ അടിച്ചും കത്തിക്ക് കുത്തിയും കൊലപ്പെടുത്തിയെന്നാണ് കേസ്. സംഭവസമയത്ത് പ്രതികൾക്കെല്ലാം ഇരുപതിനോടടുത്ത പ്രായമുണ്ടായിരുന്നു. ജില്ലാ പോലീസ് മേധാവി ടി.കെ. വിഷ്ണു പ്രദീപിന്‍റെ നിർദേശപ്രകാരം പീരുമേട് ഡിവൈഎസ്പി വിശാൽ ജോണ്‍സണ്‍, കുമളി സ്റ്റേഷൻ ഹൗസ് ഓഫീസർ പി.എസ്. സുജിത് എന്നിവരുടെ മേൽനോട്ടത്തിലായിരുന്നു പ്രതിക്കുവേണ്ടിയുള്ള തെരച്ചിൽ ആരംഭിച്ചത്. കുമളി സീനിയർ എസ്ഐ ജെഫി ജോർജ്, എസ്ഐ അനന്തു, പോലീസുകാരായ സി.പി. രതീഷ്, എം. മാരിയപ്പൻ എന്നിവർ ചേർന്നാണ് പ്രതിയെ പിടികൂടിയത്. പ്രതിയെ പീരുമേട് കോടതി റിമാൻഡ് ചെയ്തു.

വന്യജീവിശല്യം: വനം മന്ത്രിയോടൊപ്പം റോഷി അഗസ്റ്റിനും മൗനം പാലിക്കുന്നെന്ന്

ചെറുതോണി: വന്യമൃഗശല്യവും തെരുവുനായ്ക്കളുടെ ആക്രമണവും വ്യാപകമായിട്ടും വിദ്യാർഥികൾക്ക് സ്കൂളുകളിലും കോളജുകളിലും എത്താൻ കഴിയാത്ത സാഹചര്യമുണ്ടായിട്ടും വനംവകുപ്പ് മന്ത്രിയെപ്പോലെ മന്ത്രി റോഷി അഗസ്റ്റിനും മൗനം പാലിക്കുകയാണെന്ന് കെഎസ്‌സി സംസ്ഥാന പ്രസിഡന്‍റ് ജോൺസ് ജോർജ് കുന്നപ്പിള്ളിൽ ആരോപിച്ചു. വന്യമൃഗശല്യംമൂലം വിദ്യാർഥികളുടെ പഠനം മുടങ്ങുന്നതിൽ സർക്കാർ നടപടി സ്വീകരിക്കുക, മലയോര മേഖലയിലെ ഭാവിതലമുറയെ ഇല്ലാതാക്കുന്ന രീതിയിലുള്ള സർക്കാർ നയങ്ങൾ തിരുത്തുക, വിദ്യാഭ്യാസ വായ്പ വാങ്ങി പഠനം പൂർത്തിയാക്കിയിട്ടും ജോലി ലഭിക്കാത്തതിനാൽ വായ്പ തിരിച്ചടയ്ക്കാൻ കഴിയാതെ പോയവരുടെ പേരിലുള്ള ജപ്തി നടപടികൾ നിർത്തിവയ്ക്കുക തുടങ്ങിയ ആവശ്യങ്ങളുന്നയിച്ച് കെഎസ്‌സി ജില്ലാ കമ്മിറ്റിയുടെ നേതൃത്വത്തിൽ വിദ്യാർഥികൾ നഗരംപാറ ഫോറസ്റ്റ് ഓഫീസ് പടിക്കൽ നടത്തിയ ഉപരോധ സമരം ഉദ്ഘാടനം ചെയ്യുകയായിരുന്നു അദ്ദേഹം. കെഎസ്‌സി ജില്ലാ പ്രസിഡന്‍റ് തോമസ് അലക്സ് പവ്വത്ത് അധ്യക്ഷത വഹിച്ചു. സംസ്ഥാന സെക്രട്ടേറിയറ്റംഗം ആൽബിൻ ആൻഡ്രൂസ്, കേരള കോൺഗ്രസ് സംസ്ഥാന ഉന്നതാധികാര സമിതിയംഗങ്ങളായ അഡ്വ. തോമസ് പെരുമന, നോബിൾ ജോസഫ്, കേരള കർഷക യൂണിയൻ സംസ്ഥാന പ്രസിഡന്‍റ് വർഗീസ് വെട്ടിയാങ്കൽ, യൂത്ത് ഫ്രണ്ട് ജില്ലാ പ്രസിഡന്‍റ് അഡ്വ. എബി തോമസ്, കെഎസ്‌സി സംസ്ഥാന-ജില്ലാ ഭാരവാഹികളായ സ്റ്റീഫൻ പ്ലാക്കുട്ടത്തിൽ, അരവിന്ദ് ജോൺ, അദ്വൈത് ജയ്മോൻ, ജോർജ് മാത്യു, അൽത്താഫ് നൗഷാദ്, സെബാസ്റ്റ്യൻ ജോസഫ്, അലൻ അലക്സ്, കെ.എം. ശ്യാം, ഗ്ലെൻ ക്രിസ്റ്റോ, ജയിംസ് തോമസ് തുടങ്ങിയവർ പ്രസംഗിച്ചു.

വാഹനാപകടത്തിൽ മരിച്ച വിദ്യാർഥിയുടെ സംസ്കാരം നാളെ നടന്നേക്കും

കട്ടപ്പന: ചെല്ലാർകോവിലിൽ കഴിഞ്ഞ ചൊവ്വാഴ്ചയുണ്ടായ വാഹനാപകടത്തിൽ മരിച്ച വിദ്യാർഥി അണക്കര വെള്ളറ ഷാനറ്റ് ഷൈജുവിന്‍റെ മൃതദേഹം നാളെ സംസ്കരിച്ചേക്കും. കുവൈറ്റിലുള്ള മാതാവ് ജിനു ഇന്ന് അവിടെനിന്നു വിമാനം കയറുമെന്ന നിഗമനത്തിലാണ് സം സ്കാരം നാളെ നടത്താൻ തീരുമാനിച്ചി രിക്കുന്നത്. വെള്ളി, ശനി ദിവസങ്ങളിൽ കുവൈറ്റിൽ പൊതു അവധി ദിവസങ്ങളായിരുന്നതിനാൽ ജിനുവിന്‍റെ യാത്രാനടപടികൾ പൂർത്തിയായില്ല. ഇന്നു നടപടികൾ ഉണ്ടാകുമെന്നാണു പ്രതീക്ഷിക്കുന്നതെന്ന് ജിനുവിന്‍റെ മടക്കയാത്രയ്ക്കുള്ള കാര്യങ്ങൾ ഏകോപിപ്പിക്കുന്ന അണക്കര ഏഴാംമൈൽ ഒലിവുമല യാക്കോബായ പള്ളി ട്രസ്റ്റി ഷിബു തോമസ് കരിന്പിൽ പറഞ്ഞു. വൈറ്റ് പാസ്പോർട്ട് (പാസ്പോർട്ട് നഷ്ടമായാൽ തിരിച്ചു വരവിനായി നൽകുന്ന താത്കാലിക പാസ്പോർട്ട്) ലഭിച്ചിട്ടുണ്ട്. മൂന്നു മാസംമുന്പ് കുവൈറ്റിൽ വീട്ടുജോലിക്കായി പോയതാണ് ജിനു. അവിടെ വാഗ്ദാനം ചെയ്തിരുന്ന ജോലി ലഭിച്ചില്ല. പകരം ഒരു വീട്ടിൽ കഠിനമായ ജോലിയാണ് ലഭിച്ചത്. 45,000 രൂപ ശന്പളം പറഞ്ഞ് പത്തനംതിട്ടയിലുള്ള ഏജൻസിയാണ് ജിനുവിനെ കൊണ്ടുപോയത്. അവിടെ എത്തിച്ചശേഷം ഏജൻസിയെക്കുറിച്ച് വിവരമൊന്നുമില്ല. ഒരുമാസം അവിടെ ജോലിചെയ്തു. 26,000 രൂപ ശന്പളം ലഭിച്ചു. അതിൽ 20,000 രൂപ വീട്ടിലേക്ക് അയച്ചുകൊടുത്തു. പിന്നീട് വീട്ടുകാർക്ക് ജിനുവിനെപ്പറ്റി വിവരങ്ങൾ ഒന്നും ലഭിച്ചിട്ടില്ല. ജോലിചെയ്തിരുന്ന വീട്ടിൽനിന്നും രക്ഷപ്പെട്ട ജിനു ഇന്ത്യൻ എംബസിയിൽ അഭയം തേടുകയായിരുന്നെന്നാണ് ഇപ്പോൾ വീട്ടുകാർക്ക് ലഭിക്കുന്ന വിവരം. സ്പോണ്‍സർ നൽകിയ പരാതിയെത്തുടർന്ന് ജിനു സർക്കാരിന്‍റെ കസ്റ്റഡിയിലായി. കോടതി മൂന്നു തവണ കേസ് പരിഗണിച്ചപ്പോഴും പരാതിക്കാരൻ എത്തിയില്ല. അതിനെത്തുടർന്ന് മടക്കയാത്രയ്ക്കുള്ള വൈറ്റ് പാസ്പോർട്ട് അനുവദിക്കുകയായിരുന്നു. മകന്‍റെ മരണവിവരം ജിനു അറിഞ്ഞിട്ടില്ലെന്ന് വീട്ടുകാർ പറയുന്നു. ജിനുവിനെ പരമാവധി ബുധനാഴ്ചവരെ കാക്കുമെന്നും വീട്ടുകാർ പറഞ്ഞു. ഷാനെറ്റിനോടൊപ്പം അപകടത്തിൽ മരിച്ച അലന്‍റെ മൃതദേഹം നേരത്തേ സംസ്കരിച്ചു. കുട്ടികൾ സഞ്ചരിച്ചിരുന്ന ബൈക്ക് തോട്ടംതൊഴിലാളികളുമായിപ്പോയ ജീപ്പുമായി ഇടിച്ചാണ് അപകടമുണ്ടായത്. ഇരുവരും സംഭവസ്ഥലത്തുതന്നെ മരിച്ചു. പ്ലസ്ടു കഴിഞ്ഞ് ഉപരിപഠനത്തിനു തയാറെടുക്കുകയായിരുന്നു കുട്ടികൾ രണ്ടും. ഷാനെറ്റിന് പാലാ സെന്‍റ് തോമസ് കോളജിൽ പ്രവേശനം ലഭിച്ച് ബുധനാഴ്ച കോളജിലേക്കു പോകാനിരിക്കെയാണ് ചൊവ്വാ ഴ്ച അപകടമണ്ടായത്.

കെഎസ്ഇബി കരാര്‍ ജീവനക്കാര്‍ക്കുനേരേ ഭീഷണിമുഴക്കിയ ഫാം ഉടമ അറസ്റ്റില്‍

കട്ടപ്പന: കെഎസ്ഇബി കരാര്‍ ജീവനക്കാര്‍ക്കുനേരേ തോക്കുചൂണ്ടി ഭീഷണിമുഴക്കിയ ഫാം ഉടമ അറസ്റ്റില്‍. പന്നിഫാം ഉടമയായ പുളിയന്‍മല വെട്ടിക്കല്‍ നിധിനെയാണ് (41) വണ്ടന്‍മേട് പോലീസ് അറസ്റ്റ് ചെയ്തത്. വെള്ളിയാഴ്ച വൈകുന്നേരം പുളിയന്‍മലയിലായിരുന്നു സംഭവം. പോസ്റ്റ് മാറാന്‍ പുളിയന്‍മലയിലെത്തിയ കെഎസ്ഇബി കരാര്‍ ജീവനക്കാരും നിധിനും തമ്മില്‍ തര്‍ക്കം ഉണ്ടാകുകയും ഇതിനിടെ തോക്കുചൂണ്ടി ഭീഷണിപ്പെടുത്തുകയുമായിരുന്നു. പ്രദേശത്ത് പോസ്റ്റ് മാറുന്നതിനിടെ കരാര്‍ തൊഴിലാളിയായ അഭിലാഷ് ജോര്‍ജിന് മര്‍ദനമേറ്റതായും തോക്കുചൂണ്ടി ഭീഷണിപ്പെടുത്തിയെന്നും നല്‍കിയ പരാതിയിലാണ് അറസ്റ്റ്. വാഹനം മാറ്റാന്‍ സമ്മതിക്കാതെ ഇരുമ്പുവടി ഉള്‍പ്പെടെയുള്ളവയുമായി ആക്രമിച്ചെന്ന് അഭിലാഷ് പറയുന്നു. പരാതിയുടെ അടിസ്ഥാനത്തില്‍ നിധിനെ അറസ്റ്റ് ചെയ്ത പോലീസ് എയര്‍ പിസ്റ്റളും പിടിച്ചെടുത്തിട്ടുണ്ട്. എന്നാല്‍, കരാര്‍ ജീവനക്കാര്‍ കൂട്ടംചേര്‍ന്ന് തന്നെ ആക്രമിക്കുകയായിരുന്നു എന്നും സ്വയരക്ഷാര്‍ഥമാണ് തോക്കുചൂണ്ടിയതെന്നും നിധിനും പരാതി നല്‍കി. സംഭവത്തില്‍ വിശദമായ അന്വേഷണം നടത്തുമെന്ന് വണ്ടന്‍മേട് പോലീസ് അറിയിച്ചു.

ചാരായവും കഞ്ചാവുമായി രണ്ടുപേര്‍ എക്‌സൈസ് പിടിയില്‍

നെടുങ്കണ്ടം: ശ്ലീവാമല മാവറസിറ്റിയില്‍ ഉടുമ്പന്‍ചോല എക്‌സൈസ് സര്‍ക്കിള്‍ സംഘം നടത്തിയ പരിശോധനയില്‍ 10 ലിറ്റര്‍ ചാരായവുമായി ഒരാളെ പിടികൂടി. മാവറസിറ്റി ചെമ്പാരിയില്‍ ബേബി (50) ആണ് പിടിയിലായത്. മുമ്പും ഇയാള്‍ അബ്കാരി കേസുകളില്‍ പ്രതിയായിട്ടുണ്ട്. എക്‌സൈസ് സിഐ ജി. വിജയകുമാറിന്‍റെ നേതൃത്വത്തിലുള്ള സംഘമാണ് പരിശോധന നടത്തിയത്. ഉടുമ്പന്‍ചോല എക്‌സൈസ് സംഘം പൂപ്പാറയില്‍ നടത്തിയ പരിശോധനയില്‍ 125 ഗ്രാം കഞ്ചാവുമായി തമിഴ്‌നാട് സ്വദേശിയെ പിടികൂടി. ബോഡി സ്വദേശി വടിവേലു(44) ആണ് പിടിയിലായത്. ഇയാള്‍ നെടുങ്കണ്ടത്ത് കഞ്ചാവ് ചില്ലറ വില്‍പ്പന നടത്തിവന്നിരുന്നതായി എക്‌സൈസ് പറഞ്ഞു. എക്‌സൈസ് ഇന്‍സ്‌പെക്ടര്‍ എം.പി. പ്രമോദിന്‍റെ നേതൃത്വത്തിലുള്ള സംഘമാണ് പ്രതിയെ പിടികൂടിയത്.

സെക്രട്ടറിക്കെതിരേ കണ്ടെത്തിയത് ലക്ഷങ്ങളുടെ അഴിമതി; ഗ്രാമപഞ്ചായത്ത് സെക്രട്ടറിയെ സസ്പെൻഡ് ചെയ്തു

രാജാക്കാട്: അഴിമതി ആരോപണത്തെത്തുടര്‍ന്ന് ചിന്നക്കനാല്‍ ഗ്രാമപഞ്ചായത്ത് അസിസ്റ്റന്‍റ് സെക്രട്ടറി ബനേഷ്ഖാനെ അന്വേഷണവിധേയമായി സസ്പെൻഡ് ചെയ്തു. തദ്ദേശ സ്വയംഭരണ വകുപ്പ് പ്രിന്‍സിപ്പൽ ഡയറക്ടറുടേതാണ് നടപടി. സെക്രട്ടറിയുടെ ചുമതയലുള്ള അസിസ്റ്റന്‍റ് സെക്രട്ടറി തൊഴിലുറപ്പ് പദ്ധതിയിലും മറ്റ് പദ്ധതികളിലുമായി അഴിമതി നടത്തിയത് ചൂണ്ടിക്കാട്ടി പഞ്ചായത്ത് പ്രസിഡന്‍റ് എന്‍.എം. ശ്രീകുമാര്‍ പരാതി നല്‍കിയിരുന്നു. ഇതിന്‍റെ അടിസ്ഥാനത്തിലാണ് അന്വേഷണ വിധേയമായി ബനേഷ്ഖാനെ സസ്പെൻഡ് ചെയ്തത്. ചിന്നക്കനാല്‍ മുന്‍ ഗ്രാമ പഞ്ചായത്ത് സെക്രട്ടറി മധുസൂദനന്‍ ഉണ്ണിത്താനെ സസ്പെൻഡ് ചെയ്തതിനുശേഷം അസിസ്റ്റന്‍റ് സെക്രട്ടറിയായിരുന്ന ബനേഷ്ഖാന് സെക്രട്ടറിയുടെ അധികചുമതല നല്‍കിയിരുന്നു. പഞ്ചായത്തിന്‍റെ പദ്ധതി തുക ഉപയോഗിച്ചുള്ള പ്രവൃത്തികൾക്ക് ഇ - ടെൻഡർ സ്വീകരിച്ചിരുന്നില്ല. അഞ്ച് ലക്ഷം രൂപക്ക് മുകളിലുള്ള പദ്ധതികള്‍ക്കുപോലും ക്വട്ടേഷനായിരുന്നു ക്ഷണിച്ചത്. ലഭിച്ച ക്വട്ടേഷന്‍ പഞ്ചായത്ത് കമ്മിറ്റിയില്‍ വയ്ക്കുകയോ അംഗീകരിക്കുകയോ ചെയ്തിട്ടില്ല. സോളാര്‍ സ്ട്രീറ്റ് ലൈറ്റ് സ്ഥാപിക്കല്‍, മിനിഹൈമാസ്റ്റ് ലൈറ്റ് സ്ഥാപിക്കല്‍ എന്നിവയ്ക്കായി വാങ്ങിയത് നിലവാരം കുറഞ്ഞ ഉപകരണങ്ങളാണ്. അധിക നിരക്കിലുമാണ് സാധനങ്ങള്‍ വാങ്ങിയത്. ഇത്തരത്തില്‍ ഇയാള്‍ നടത്തിയ അഴിമതി അക്കമിട്ട് നിരത്തി പദ്ധതിയുടെ പട്ടിക സഹിതം പഞ്ചായത്ത് പ്രസിഡന്‍റ് പരാതി നല്‍കുകയായിരുന്നു. ഇതിന്‍റെ അടിസ്ഥാനത്തിലാണ് തദ്ദേശ സ്വയംഭരണ വകുപ്പ് പ്രിന്‍സിപ്പൽ ഡയറക്ടര്‍ നടപടി സ്വീകരിച്ചത്. അതേസമയം, അഴിമതി ചൂണ്ടിക്കാട്ടി കോണ്‍ഗ്രസ് പ്രതിഷേധവുമായി രംഗത്തെത്തിയിരുന്നു. പഞ്ചായത്ത് പ്രസിഡന്‍റിനും അഴിമതിയില്‍ പങ്കുണ്ടെന്ന ആരോപണമാണ് കോണ്‍ഗ്രസ് ഉന്നയിച്ചത്. എന്നാല്‍, കോണ്‍ഗ്രസിന്‍റെ ആരോപണം രാഷ്ട്രീയ മുതലെടുപ്പിന്‍റെ ഭാഗമെന്ന് തെളിഞ്ഞെന്നും തന്‍റെ പരാതിയിലാണ് നടപടിയെന്ന് ഉത്തരവില്‍ വ്യക്തമാണെന്നും പ്രസിഡന്‍റ് പറഞ്ഞു.

ദുരന്തനിവാരണസേന രൂപീകരിക്കണം: ഡീൻ

തൊടുപുഴ: സംസ്ഥാന ദുരന്തനിവാരണസേന ഉടൻ രൂപീകരിക്കണമെന്ന് ഡീൻ കുര്യാക്കോസ് എംപി ആവശ്യപ്പെട്ടു. ആഭ്യന്തരവകുപ്പിൽ പോലീസ് സേനയുടെ കീഴീൽ ദുരന്തനിവാരണ സേനയ്ക്കായി 100 തസ്തികകൾ സർക്കാർ സൃഷ്ടിച്ചിട്ടുണ്ടങ്കിലും ഈ സംവിധാനം ഇതുവരെ പ്രവർത്തന സജ്ജമായിട്ടില്ല. ഉദ്യോഗസ്ഥരുടെ പരിശീലനം ഉൾപ്പെടെ യാതൊരു പ്രവർത്തനങ്ങളും നടന്നിട്ടില്ല. പ്രകൃതിദുരന്തങ്ങളും മറ്റ് അപകടങ്ങളും കൂടുകയും ജനസംഖ്യാനുപാതികമായി ഫയർ ആൻഡ് റെസ്ക്യൂ സ്റ്റേഷനുകളുടെ എണ്ണം കുറവായിരിക്കുകയും ചെയ്യുന്ന സാഹചര്യത്തിൽ എസ്ഡിആർഎഫ് പ്രവർത്തനസജ്ജമാകേണ്ടത് അനിവാര്യമാണെന്ന് എംപി ചൂണ്ടിക്കാട്ടി. മിക്ക സംസ്ഥാനങ്ങളിലും ഇതിനോടകം എസ്ഡിആർഎഫ് പ്രവർത്തനം ആരംഭിച്ചിട്ടുണ്ട്. ജില്ലയ്ക്ക് ഏറ്റവും പ്രയോജനകരമായ ഇക്കാര്യത്തിൽ നടപടി സ്വീകരിക്കണമെന്നാവശ്യപ്പെട്ട് മുഖ്യമന്ത്രിക്ക് കത്തയച്ചതായും എംപി അറിയിച്ചു.

665 സ്ഥാപനങ്ങളിൽ പരിശോധന; 32 പേർക്ക് നോട്ടീസ് നൽകി

തൊടുപുഴ: പകർച്ചവ്യാധികൾക്കെതിരേയുള്ള മുന്നൊരുക്കത്തിന്‍റെ ഭാഗമായി പരിശോധനകൾ ശക്തമാക്കി ആരോഗ്യവകുപ്പ്. ജില്ലയിലെ വിവിധ ഹോട്ടലുകൾ, തട്ടുകടകൾ, ബേക്കറികൾ, ജ്യൂസ് പാർലറുകൾ, കാറ്ററിംഗ് സെന്‍ററുകൾ,ശീതളപാനീയ നിർമാണ യൂണിറ്റുകൾ, മത്സ്യ-മാംസ വിപണനകേന്ദ്രങ്ങൾ എന്നിവിടങ്ങളിലാണ് ആരോഗ്യവകുപ്പ് ഉദ്യോഗസ്ഥർ പരിശോധന നടത്തിയത്. ആരോഗ്യവകുപ്പ് ജില്ലയിൽ നടത്തിയ പരിശോധനയിൽ ശുചിത്വ മാനദണ്ഡങ്ങൾ പാലിക്കാത്ത 32 സ്ഥാപനങ്ങൾക്കു നോട്ടീസ് നൽകി. 665 സ്ഥാപനങ്ങളിൽ പരിശോധന നടത്തി. ഗുണനിലവാരമില്ലാത്ത ഭക്ഷണസാധനങ്ങൾ വിൽക്കുന്നുവെന്ന പരാതിയെത്തുടർന്ന് തൊടുപുഴ നഗരസഭ ആരോഗ്യ വിഭാഗത്തിന്‍റെ നേതൃത്വത്തിലും വിവിധ കേന്ദ്രങ്ങളിൽ പരിശോധന നടത്തി. വൃത്തിഹീനമായി പ്രവർത്തിക്കുന്ന സ്ഥാപനങ്ങളും പഴകിയ ഭക്ഷണവുമടക്കം പരിശോധനയിൽ കണ്ടെത്തിയിട്ടുണ്ട്. പല സ്ഥാപനങ്ങളുടെയും ഫ്രീസർ വൃത്തിഹീനമായിരുന്നുവെന്ന് ഉദ്യോഗസ്ഥർ പറഞ്ഞു. വൃത്തിഹീനമായ സാഹചര്യത്തിൽ ഭക്ഷണം പാകംചെയ്ത ഒൻപതു സ്ഥാപനങ്ങളും ലൈസൻസില്ലാതെ പ്രവർത്തിച്ച 18 സ്ഥാപനങ്ങളും മലിനജലം പുറത്തേക്കൊഴുക്കുന്ന ഒൻപതു സ്ഥാപനങ്ങളും പകർച്ചവ്യാധി പരത്തുന്ന ഒരു സ്ഥാപനവുമടക്കം മാനദണ്ഡങ്ങൾ പാലിക്കാതെ പ്രവർത്തിച്ച 32 സ്ഥാപനങ്ങൾക്ക് നോട്ടീസ് നൽകി. ഒരു സ്ഥാപനം അടപ്പിക്കുകയും ചെയ്തു. ജില്ലയിലെ ഭക്ഷണശാലകളിൽ ഹെൽത്ത് കാർഡില്ലെന്നു കണ്ടെത്തിയ ജീവനക്കാരോട് അടിയന്തരമായി ഹെൽത്ത് കാർഡ് എടുത്തശേഷമേ ജോലി ചെയ്യാവു എന്നു നിർദേശം നൽകിയിട്ടുണ്ട്. പുകയില നിരോധന നിയമപ്രകാരം രണ്ട് സ്ഥാപനങ്ങളിൽനിന്നു പിഴ ഈടാക്കിയിട്ടുണ്ട്. പരിശോധന തുടരുമെന്ന് ആരോഗ്യവകുപ്പ് അറിയിച്ചു. നോട്ടീസ് ലഭിച്ചവർ നിശ്ചിത കാലാവധിക്കുള്ളിൽ പോരായ്മ പരിഹരിച്ചില്ലെങ്കിൽ കർശന നടപടി സ്വീകരിക്കുമെന്നും അധികൃതർ പറഞ്ഞു. ആരോഗ്യവകുപ്പിന്‍റെ 55 ടീമുകളാണ് പരിശോധനയിൽ പങ്കെടുത്തത്. ഭക്ഷണ വിൽപ്പന കേന്ദ്രങ്ങളിലും നിർമാണ യൂണിറ്റുകളിലും പരിശോധനകളിൽ കണ്ടെത്തിയ പ്രധാന പ്രശ്നം ശുചിത്വമില്ലായ്മയാണെന്ന് ഉദ്യോഗസ്ഥർ പറഞ്ഞു. ശുചിത്വ മാനദണ്ഡങ്ങൾ പാലിക്കാതെയാണ് പല സ്ഥാപനങ്ങളുടെയും പ്രവർത്തനമെന്ന് കണ്ടത്തി. ഇതോടൊപ്പം ശരിയായ രീതിയിൽ മാലിന്യസംസ്കരണ സംവിധാനങ്ങളില്ലാതെയും ജീവനക്കാർക്ക് ഹെൽത്ത് കാർഡില്ലാതെയുമാണ് പല സ്ഥാപനങ്ങളും പ്രവർത്തിക്കുന്നതെന്ന് വ്യക്തമായി. പഴകിയ മാംസ, മത്സ്യ വിപണനവും വ്യാപകം തൊടുപുഴ നഗരത്തിലും ജില്ലയുടെ വിവിധ ഭാഗങ്ങളിലും പഴകിയ മാംസവും മത്സ്യവും വിൽപ്പന നടത്തുന്നുവെന്ന പരാതി വ്യാപകമാണ്. കഴിഞ്ഞ ദിവസം രണ്ടു കേന്ദ്രങ്ങളിൽ നഗരസഭാ ആരോഗ്യവിഭാഗം പരിശോധന നടത്തി. എന്നാൽ ഇവിടങ്ങളിൽ ക്രമക്കേട് കണ്ടെത്തിയില്ല. തൊടുപുഴയിൽ കഴിഞ്ഞ ദിവസം പഴകിയ പന്നിയിറച്ചി വിൽപ്പനയ്ക്കെത്തിച്ചെന്ന പരാതിയുയർന്നിരുന്നു. പഴകിയ മത്സ്യവും മാംസവും തിരിച്ചറിയുന്നതിലെ പരിമിതി ഉദ്യോഗസ്ഥർക്ക് തിരിച്ചടിയാണ്. പിടിച്ചെടുക്കുന്ന സാധനങ്ങളുടെ പരിശോധനാ റിപ്പോർട്ട് വരുന്നതിലെ കാലതാമസവും പ്രതിസന്ധി സൃഷ്ടിക്കുന്നുണ്ട്. മത്സ്യവില കുതിച്ചുയർന്നതോടെയാണ് മായം ചേർന്നതും പഴകിയതുമായ മീൻ വിവിധ കേന്ദ്രങ്ങളിൽ വിൽപ്പന നടത്തുന്നതായി ആക്ഷേപമുയർന്നിരുന്നത്. വരും ദിവസങ്ങളിലും ശക്തമായ പരിശോധന നടത്താനാണ് ഉദ്യോഗസ്ഥരുടെ തീരുമാനം.

ഒളിന്പിക് ഡേ റണ്‍ നാളെ

തൊടുപുഴ: അന്താരാഷ്‌ട്ര ഒളിന്പിക് ദിനാചരണത്തോടനുബന്ധിച്ച് ജില്ലാ ഒളിന്പിക് അസോസിയേഷൻ, ജില്ലാ സ്പോർട്സ് കൗണ്‍സിൽ എന്നിവയുടെ ആഭിമുഖ്യത്തിൽ നാളെ തൊടുപുഴയിൽ ഒളിന്പിക് ഡേ റണ്‍ സംഘടിപ്പിക്കും. രാവിലെ എട്ടിന് ഗാന്ധിസ്ക്വയറിൽനിന്ന് ആരംഭിക്കുന്ന ഒളിന്പിക് ഡേ റണ്‍ തൊടുപുഴ ഡിവൈഎസ്പി പി.കെ. സാബു ഫ്ളാഗ് ഓഫ് ചെയ്യും. ജില്ലാ സ്പോർട്സ് കൗണ്‍സിൽ പ്രസിഡന്‍റ് റോമിയോ സെബാസ്റ്റ്യൻ ദീപശിഖ നീന്തൽ താരം ബേബി വർഗീസിനു കൈമാറും. ഒളിന്പിക് അസോസിയേഷൻ പ്രസിഡന്‍റ് ഡോ. കെ.എം. തോമസ് റോണി അധ്യക്ഷത വഹിക്കും. മനോജ് കോക്കാട്ട്, ഡോ. പ്രിൻസ് കെമറ്റം, കെ.എൽ. ജോസഫ്, ശരത് യു. നായർ, രാജു തരണിയിൽ, സൈജൻ സ്റ്റീഫൻ എന്നിവർ പ്രസംഗിക്കും. ഒളിന്പിക് ഡേ റണ്‍ തൊടുപുഴ സെന്‍റ് സെബാസ്റ്റ്യൻസ് യുപി സ്കൂളിൽ എത്തുന്പോൾ ഫൊറോനാ വികാരി ഫാ. ജോസ് പുതൂർ ഒളിന്പിക് ദിന സന്ദേശം നൽകും.

ഭാരതാംബ വിവാദം സിപിഎമ്മിന്‍റെ തട്ടിപ്പ്: രാഹുൽ മാങ്കൂട്ടത്തിൽ

തൊടുപുഴ: ഭാരതാംബ വിവാദം സിപിഎമ്മിന്‍റെ തട്ടിപ്പാണെന്ന് രാഹുൽ മാങ്കൂട്ടത്തിൽ എംഎൽഎ. ആർഎസ്എസ് ഗവർണർമാർക്ക് ചായസൽക്കാരം നടത്തിയത് മുഖ്യമന്ത്രിയാണ്. എന്തിനാണ് ആർഎസ്എസ് ഗവർണർക്ക് സിപിഎം ഇത്ര പ്രാധാന്യം നൽകുന്നത്. കുടുംബത്തെ സംരക്ഷിക്കാൻ മുഖ്യമന്ത്രി കേരളത്തിന്‍റെ മതേതര പാരന്പര്യത്തെ ഹോമിക്കുകയാണ്. ഗവർണർമാർക്ക് മറ്റ് ദക്ഷിണേന്ത്യൻ സംസ്ഥാനത്ത് ഇല്ലാത്ത പ്രാധാന്യം കേരളത്തിൽ ലഭിക്കുന്നു. ഗവർണർ ആർഎസ്എസ് അജണ്ട നടപ്പാക്കുമെന്നത് സ്വാഭാവികം. ഗാന്ധിയെ കൊന്നവർ കൊണ്ടുവരുന്ന ബിംബങ്ങൾ ഒന്നും ഭാരതത്തിന്‍റേതല്ല. അതിനെ ജനങ്ങൾ തള്ളിക്കളയും.

മായംകലർന്ന തേയില വിപണിയിൽ വ്യാപകം

തൊടുപുഴ: ജില്ലയിലെ വിവിധ ഭാഗങ്ങളിൽ മായംകലർന്ന തേയില വിറ്റഴിക്കുന്നതായി ആക്ഷേപം ഉയരുന്നു. ഉപയോഗിച്ച തേയില സമാഹരിച്ച് ഇതിൽ കളർ ചേർത്താണ് വിൽപ്പന നടത്തുന്നത്. ഗ്രാമപ്രദേശങ്ങളിലാണ് ഇവയുടെ വിൽപ്പന കൂടുതലായും നടക്കുന്നത്. വിലക്കുറവും കൂടുതൽ കടുപ്പംലഭിക്കുകയും ചെയ്യുന്നതിനാൽ കടക്കാർ ഇതാണ് വാങ്ങുന്നത്. എന്നാൽ ഇത് ഉപയോഗിക്കുന്നതു കാൻസർ ഉൾപ്പെടെ ഗുരുതരമായ ആരോഗ്യപ്രശ്നങ്ങൾക്ക് ഇടയാക്കുമെന്ന് ചൂണ്ടിക്കാണിക്കപ്പെടുന്നു. ഭക്ഷ്യസുരക്ഷാ വകുപ്പ് കൃത്യമായി പരിശോധന നടത്താത്തതുമൂലം ഇവയുടെ വിൽപ്പന വർധിച്ചിട്ടുണ്ട്. നേരത്തേ ഇത്തരം തേയില പരിശോധനയിൽ പിടിച്ചെടുത്തിട്ടുണ്ട്. എന്നാൽ പരിശോധന കുറഞ്ഞതോടെ വീണ്ടും വ്യാജ തേയിലനിർമാണവും വിൽപ്പനയും വർധിച്ചിരിക്കുകയാണ്. നിർമാണം നടത്തുന്ന കന്പനിയുടെ പേരോ മറ്റു വിവരങ്ങളോ പായ്ക്കറ്റിൽ ചേർക്കാതെയാണ് വിൽപ്പനയെന്നും പറയപ്പെടുന്നു. ഇതിനു പുറമേ ഗുണനിലവാരം കുറഞ്ഞ പല ഉത്പന്നങ്ങളും കാലാവധി കഴിഞ്ഞതുൾപ്പെടെ പായ്ക്കറ്റുകളുടെ കവർ നീക്കംചെയ്ത് പുതിയ പായ്ക്കറ്റുകളിലാക്കി വിൽപ്പന നടത്തുന്നതായും ആക്ഷേപമുയർന്നിട്ടുണ്ട്. ഭക്ഷ്യസുരക്ഷാ വകുപ്പ് യഥാസമയം പരിശോധന നടത്തി ഇത്തരം ഉത്പന്നങ്ങൾ വിൽപ്പന നടത്തുന്നവർക്കെതിരേ കർശന നടപടി സ്വീകരിക്കണമെന്ന ആവശ്യം ശക്തമായിരിക്കുകയാണ്.

ചാലാശേരിയിൽ മോഷണം പതിവാകുന്നു

കരിമണ്ണൂർ: ചാലാശേരി ഭാഗത്ത് മോഷ്ടാക്കളുടെ ശല്യം വർധിക്കുന്നതായി പരാതി. റബർപാൽ ഉറ ഒഴിക്കുന്ന ഡിഷ് ഉൾപ്പെടെയുള്ള വസ്തുക്കളാണ് അപഹരിക്കുന്നത്. കഴിഞ്ഞ ദിവസം പാറത്താഴത്ത് ജോളിയുടെ റബർത്തോട്ടത്തിലെ വീട്ടിൽ മോഷണം നടന്നു. 25-ഓളം ഡിഷുകൾ,ബക്കറ്റുകൾ, പാത്രങ്ങൾ തുടങ്ങിയവയാണ് അപഹരിച്ചത്. ആൾതാമസം കുറവുള്ള പ്രദേശമായതിനാൽ മോഷണത്തിന് സൗകര്യമാണ്. സമീപ പ്രദേശങ്ങളിലും മോഷണം വർധിച്ചിട്ടുണ്ട്. കരിമണ്ണൂർ പോലീസ് അന്വേഷണം ആരംഭിച്ചു.

സബ് രജിസ്ട്രാർ ഓഫീസ് കരിമണ്ണൂരിലേക്ക് മാറ്റണം: കേരള കോണ്‍ഗ്രസ്

കരിമണ്ണൂർ: ജില്ലയിലെ കാരിക്കോട് രജിസ്ട്രാർ ഓഫീസ് കരിമണ്ണൂർ പഞ്ചായത്തിലേക്ക് മാറ്റി സ്ഥാപിക്കണമെന്നുള്ള ആവശ്യം ശക്തമാകുന്നു. സബ് രജിസ്ട്രാർ ഓഫീസ് അവിടെനിന്നു മാറ്റുന്നതിനുള്ള നീക്കം നടക്കുന്നതായി സൂചനയുണ്ട്. കാരിക്കോട് സബ് രജിസ്ടാർ ഓഫീസിന് ഏറ്റവും അനുയോജ്യവും സൗകര്യപ്രദവുമായ സ്ഥലം കരിമണ്ണൂരിലാണ്. കരിമണ്ണൂരിൽ ഇതിനായി കെട്ടിടം നിർമിക്കുന്നതിനാവശ്യമായ സ്ഥലം സൗജന്യമായി ലഭിക്കുകയും ചെയ്യും. ഇതോടൊപ്പം പുതിയ കെട്ടിടം നിർമിക്കുന്നതുവരെ സബ് രജിസ്ട്രാർ ഓഫീസ് പ്രവർത്തിക്കുന്നതിന് കരിമണ്ണൂർ ടൗണിലുള്ള ബ്ലോക്ക് പഞ്ചായത്തിന്‍റെ അധീനതയിലുള്ള കെട്ടിടം വിട്ടുനൽകാമെന്ന് ബ്ലോക്ക് പഞ്ചായത്ത് രേഖാമൂലം കരിമണ്ണൂർ പഞ്ചായത്തിനെ അറിയിച്ചിട്ടുണ്ട്. കാരിക്കോട് സബ് രജിസ്ട്രാർ ഓഫീസിന്‍റെ അധികാരപരിധിയിൽ വരുന്ന എല്ലാ വില്ലേജുകളിലുള്ളവർക്കും എളുപ്പത്തിൽ എത്തിച്ചേരാനും കഴിയും. നിരവധി നാളുകളായി കരിമണ്ണൂരിലെയും സമീപപ്രദേശങ്ങളിലെയും ആളുകളുടെ നിരന്തരമായ ആവശ്യം നടപ്പാക്കണമെന്നാവശ്യപ്പെട്ട് മണ്ഡലം പ്രസിഡന്‍റ് പോൾ കുഴിപ്പിള്ളിലിന്‍റെ നേതൃത്വത്തിൽ പി.ജെ. ജോസഫ് എംഎൽഎക്ക് നിവേദനം നൽകി. ജയിംസ് നന്ദലത്ത്, ജോണ്‍സ് ജോർജ്, ബൈജു വറവുങ്കൽ, ജീസ് ആയത്തുപാടം, കെ.വി. തോമസ്, ജോസ് മാത്യു, ടോജോ പോൾ, ടെസി വിൽസണ്‍, ഷേർലി സെബാസ്റ്റ്യൻ, ജോണ്‍ ആക്കാന്തിരി, ജോസ്മി സോജൻ, വിൽസണ്‍ പള്ളിക്കുന്നേൽ, ജിൻസ് ജോണ്‍ എന്നിവർ പ്രസംഗിച്ചു.

ആദിവാസി വീട്ടമ്മയുടെ മരണം: പ്രത്യേക സംഘം അന്വേഷിക്കും

തൊടുപുഴ: പീരുമേട് തോട്ടാപുരയിൽ ആദിവാസി വീട്ടമ്മ സീത (42)യുടെ മരണത്തിലെ ദുരൂഹത നീക്കാൻ പ്രത്യേക അന്വേഷണസംഘത്തെ നിയോഗിക്കുമെന്ന് ഇടുക്കി എസ്പി ടി.കെ. വിഷ്ണു പ്രദീപ് പറഞ്ഞു. പോസ്റ്റ്മോർട്ടം റിപ്പോർട്ട് ഇതുവരെ ലഭിച്ചിട്ടില്ല. ഇതു ലഭിച്ചാൽ എല്ലാ വശവും വിശദമായി അന്വേഷിക്കും. കാട്ടാന ആക്രമണമല്ലെന്ന് കോട്ടയം ഡിഎഫ്ഒ പറഞ്ഞത് എന്തുകൊണ്ടാണെന്ന് അറിയില്ല. ഭർത്താവിനോടും മക്കളോടുമൊപ്പം വനവിഭവങ്ങൾ ശേഖരിക്കാൻ കാട്ടിലേക്കുപോയ സീതയെ കാട്ടാന ആക്രമിച്ചു കൊലപ്പെടുത്തിയെന്നാണ് ഭർത്താവ് ബിനുവും മക്കളും മൊഴി നൽകിയിരിക്കുന്നത്. എന്നാൽ, പോസ്റ്റ്മോർട്ടത്തിൽ കൊലപാതകത്തിനു കാരണമായ തെളിവുകളുണ്ടെന്ന സർജന്‍റെ വെളിപ്പെടുത്തലിനെത്തുടർന്നാണ് സംഭവം വിവാദമായത്. അതേസമയം ഭർത്താവ് ബിനുവും മക്കളും കാട്ടാന ആക്രമണത്തിലാണ് സീത മരിച്ചതെന്ന മൊഴിയിൽ ഇപ്പോഴും ഉറച്ചുനിൽക്കുകയാണ്. സീതയുടെ വിശദമായ പോസ്റ്റ്മോർട്ടം റിപ്പോർട്ട് ലഭിച്ചാലേ ഇതുസംബന്ധിച്ച ദുരൂഹത നീക്കാനാകൂ എന്ന വിലയിരുത്തലിലാണ് പോലീസ്.

ഏഴംഗ കുടുംബം താമസിക്കുന്ന വീട് അപകടാവസ്ഥയിൽ

പീരുമേട്: ഏഴംഗ കുടുംബം താമസിക്കുന്ന വീട് അപകടാവസ്ഥയിൽ. കരടിക്കുഴി ഒമ്പതാം വാർഡ് പുതുവൽ ഭാഗത്ത് രാജു ഭവനിൽ രാജു, ഭാര്യ ഇവരുടെ മകൻ ആനന്ദും കുടുംബവും ഉൾപ്പെടെ ഏഴ് അംഗങ്ങൾ താമസിക്കുന്ന വീടാണ് അപകടാവസ്ഥയിലായിരിക്കുന്നത്. ബുധനാഴ്ച വെളുപ്പിന് രണ്ടോടെ ഉണ്ടായ ശക്തമായ മഴയെത്തുടർന്ന് വീടിന്‍റെ സംരക്ഷണ ഭിത്തി ഇടിഞ്ഞു വീട്ടിലേക്ക് വീഴുകയായിരുന്നു. ആനന്ദ് - വിജി ദമ്പതികളും ഇവരുടെ രണ്ട് മക്കളും ഉറങ്ങിക്കിടന്ന മുറിയുടെ മുകളിലേക്ക് മണ്ണും കല്ലും ഇടിഞ്ഞുവീഴുകയായിരുന്നു. ഉരുള് പൊട്ടിയതാണോ എന്ന സംശയത്തിൽ ഞെട്ടി എഴുന്നേറ്റ ഇവർ കുട്ടികളുമായി വീടിന് വെളിയിലേക്ക് ഓടി രക്ഷപ്പെടുകയായിരുന്നു. സംഭവം കഴിഞ്ഞ രണ്ട് ദിവസം കഴിഞ്ഞിട്ടും വാർഡ് മെംബർ അല്ലാതെ റവന്യു ഡിപ്പാർട്ട്മെന്‍റ് അധികൃതരോ മറ്റ് പഞ്ചായത്ത് അധികൃതരോ സ്ഥലത്ത് വരികയോ വേണ്ട നടപടികൾ സ്വീകരിക്കുകയോ ചെയ്തിട്ടില്ല .ഏഴംഗ കുടുംബം ഇപ്പോൾ തൊട്ടടുത്തുള്ള എസ്റ്റേറ്റ് ലയത്തിലാണ് താമസിച്ചു വരുന്നത്. അടിയന്തരമായി ബന്ധപ്പെട്ട ഉദ്യോഗസ്ഥർ സ്ഥലത്തെത്തി വേണ്ട നടപടികൾ സ്വീകരിക്കണമെന്നാണ് കുടുംബത്തിന്‍റെ ആവശ്യം.

മരച്ചില്ലകള്‍ വെട്ടിമാറ്റാനുള്ള ഉത്തരവ് മറയാക്കി മരങ്ങള്‍ വെട്ടി കടത്തുന്നതായി ആക്ഷേപം

നെടുങ്കണ്ടം: പൊതുസ്ഥലങ്ങളില്‍ നില്‍ക്കുന്ന അപകടാവസ്ഥയിലുള്ള മരങ്ങളുടെ ചില്ലകള്‍ വെട്ടിമാറ്റാനുള്ള ഉത്തരവ് മറയാക്കി തടികടത്തുകാരും വനംവകുപ്പ് അധികൃതരുമടങ്ങുന്ന ലോബി ലക്ഷങ്ങള്‍ വില മതിക്കുന്ന മരങ്ങള്‍ മുറിച്ചുകടത്തിയതായി പരാതി. പാതയോരങ്ങളിലും ബസ് സ്റ്റാൻഡുകളിലും സ്‌കൂള്‍, കോളജ്, ആശുപത്രികള്‍ അടക്കമുള്ള സര്‍ക്കാര്‍ സ്ഥാപനങ്ങളുടെ വളപ്പുകളിലുംനിന്ന് നിരവധി വന്‍മരങ്ങളാണ് ഇത്തരത്തില്‍ വെട്ടിയത്. വാഹനങ്ങള്‍ക്കും വഴിയാത്രക്കാര്‍ക്കും ഭീഷണിയായി മാറിയേക്കാവുന്ന ചില്ലകള്‍ മുറിച്ചുമാറ്റുന്നതിനുപകരം തടികടത്തുകാര്‍ അവര്‍ക്ക് വന്‍ലാഭമുണ്ടാക്കാനുതകുന്ന മരങ്ങളുടെ ലിസ്റ്റ് തയാറാക്കി നല്‍കുകയും അവ മൂടോടെ വെട്ടിമാറ്റുവാന്‍ വനംവകുപ്പ് ഉദ്യോഗസ്ഥര്‍ അനുമതി നല്‍കുകയുമായിരുന്നു. പരിസ്ഥിതി ദിനാചരണ പരിപാടികളുടെ ഭാഗമായി വനംവകുപ്പ് മുന്‍കൈയെടുത്ത് നട്ടുപിടിപ്പിച്ചും നാട്ടുകാര്‍ പരിപാലിച്ചതുമായ മരങ്ങള്‍ മുറിച്ചുമാറ്റുകയാണ്. കൊടുംവേനലില്‍ തണലായി നിന്നിരുന്ന നിരവധി മരങ്ങളാണ് ഇത്തരത്തില്‍ വെട്ടിമാറ്റപ്പെട്ടത്. ഇതുസംബന്ധിച്ച് വനംവകുപ്പ് ഉന്നതതല അന്വേഷണം നടത്തണമെന്ന് കോണ്‍ഗ്രസ് ബ്ലോക്ക് പ്രസിഡന്‍റ് സി.എസ്. യശോധരന്‍ ആവശ്യപ്പെട്ടു.

റോഡരികിലെ തണല്‍മരം അപകടാവസ്ഥയില്‍

കട്ടപ്പന: ഇടുക്കിക്കവല ബൈപ്പാസ് റോഡരികിലെ തണല്‍മരം അപകടാവസ്ഥയില്‍. ചുവട്ടിലെ മണ്ണ് ഒലിച്ചുപോയതോടെ മരം ഒരുവശത്തേക്ക് ചരിഞ്ഞുനില്‍ക്കുകയാണ്. കാറ്റും മഴയും തുടരുന്നതിനാല്‍ ഏതുസമയവും നിലംപൊത്താന്‍ സാധ്യതയുണ്ട്. ഇക്കാര്യം നഗരസഭയില്‍ അറിയിച്ചിട്ടും മരം മുറിക്കാന്‍ നടപടിയില്ലെന്ന് വ്യാപാരികള്‍ ആരോപിച്ചു. പിഡബ്ല്യുഡിയാണ് വിഷയത്തില്‍ നടപടിയെടുക്കേണ്ടതെന്നാണ് നഗരസഭയുടെ നിലപാട്. നഗരത്തിലെ ഏറെ തിരക്കുള്ള പാതയാണിത്. വിദ്യാര്‍ഥികള്‍ ഉള്‍പ്പെടെയുള്ള കാല്‍നട യാത്രികരും ഇതുവഴി കടന്നുപോകുന്നു.

നടുവൊടിക്കും റോഡ്

നെടുങ്കണ്ടം: പാമ്പാടുംപാറ പ്രാഥമികാരോഗ്യകേന്ദ്രത്തിലേക്കുള്ള റോഡ് രോഗികളുടെ നടുവൊടിക്കും. വർഷങ്ങളായി ചെളിക്കുണ്ടായി താറുമാറായി കിടക്കുകയാണ് ഈ റോഡ്. വലിയതോവാളയ്ക്കുള്ള റോഡിൽ പ്രധാനമായും പാമ്പാടുംപാറ മുതൽ പാമ്പാടുംപാറ പ്രാഥമികാരോഗ്യ കേന്ദ്രം വരെയാണ് തകർന്നു കിടക്കുന്നത്. റോഡ് ഏറ്റവും കൂടുതൽ ഉപയോഗപ്പെടുത്തുന്നതും പ്രാഥമികാരോഗ്യ കേന്ദ്രത്തിലെത്തുന്ന രോഗികളാണ്. വർഷങ്ങളായി തകർന്നുകിടക്കുന്ന റോഡ് നിലവിൽ പൊതുമരാമത്ത് ഏറ്റെടുത്ത് കരാർ നൽകിയിട്ടുണ്ടെങ്കിലും നിർമാണം അനന്തമായി നീളുകയാണ്. ഏതാനും വർഷം മുന്പുവരെ പഞ്ചായത്ത്‌ റോഡായിരുന്ന ഇവിടെ നിരവധി പരാതികൾക്കും പ്രതിഷേധങ്ങൾക്കുമൊടുവിലാണ് വർഷങ്ങൾക്ക് മുന്പ് അറ്റകുറ്റപ്പണികൾ നടത്തിയത്. പിന്നീട് റോഡ് പൊതുമരാമത്ത് വകുപ്പ് ഏറ്റെടുത്തതോടെ പഞ്ചായത്ത്‌, റോഡിനെ ഉപേക്ഷിച്ചു. പിന്നീടിതുവരെ റോഡിൽ അറ്റകുറ്റപ്പണികൾ നടത്തിയിട്ടില്ല. ചെളിക്കുണ്ടിൽ ഓരോ ദിവസവും ഇരുചക്ര വാഹനങ്ങൾ അപകടത്തിൽപ്പെടുകയാണ്. രാമക്കൽമേട് വിനോദ സഞ്ചാര കേന്ദ്രത്തിലേക്ക് ഗൂഗിൾ മാപ്പ് നോക്കിയെത്തുന്ന സഞ്ചാരികളും കൃത്യമായി പാമ്പാടുംപാറയിലെ കുഴിയിൽ വീഴും. ബിഎംബിസി നിലവാരത്തിൽ ഉടൻതന്നെ റോഡ് നിർമാണം ആരംഭിക്കുമെന്നും ടെൻഡർ നടപടികൾ പൂർത്തിയാക്കുമെന്നുമാണ് അധികൃതരുടെ അവകാശവാദം. എന്തായാലും ഇക്കൊല്ലത്തെ മഴക്കാലംകൂടി നാട്ടുകാരുടെ നടുവൊടിയുമെന്നത് ഏതാണ്ടുറപ്പാണ്.

ഉപ്പുതറ കൂപ്പ്പാറയിൽ കാട്ടാന ദേഹണ്ഡങ്ങൾ നശിപ്പിച്ചു

ഉപ്പുതറ: ഒരു മാസത്തെ ഇടവേളയ്ക്ക് ശേഷം കൂപ്പുപാറയിൽ കാട്ടാന കൃഷി നശിപ്പിച്ചു. പാറയിൽ ശോഭന, മുഖാലയിൽ ടോമി ജോസഫ്, മക്കപ്പുഴ എം.എസ്. ബിജു, പറത്താനം ആർ. വിജയൻ, മനയ്ക്കപ്പറമ്പിൽ രോഹിണി എന്നിവരുടെ കൃഷിയാണ് കാട്ടാന നശിപ്പിച്ചത്. തെങ്ങ്, ഏലം, കുരുമുളക്, വാഴ തുടങ്ങിയവ വ്യാപകമായി കാട്ടാന നശിപ്പിച്ചു. വെള്ളിയാഴ്ച പുലർച്ചെ ഒന്നരയോടെ ശോഭനയുടെ മുറ്റത്തിനു സമീപംനിന്ന തെങ്ങ് മറിഞ്ഞു വീഴുന്ന ശബ്ദം കേട്ടാണ് ഇവർ ഉണർന്നത്. ജനലിലൂടെ ആനയെ കണ്ടതോടെ ഭയന്നു വിറച്ചു. താമസിയാതെ ആന അടുത്ത പറമ്പിലേക്ക് പോയെങ്കിലും നേരം വെളുക്കുംവരെ ഉറങ്ങിയില്ല. നേരം പുലർന്ന ശേഷമാണ് കാട്ടാന തങ്ങളുടെ കൃഷിയും നശിപ്പിച്ച വിവരം മറ്റുള്ളവർ അറിഞ്ഞത്. കഴിഞ്ഞ രണ്ടാഴ്ച മുന്പ് കാട്ടാന കൃഷിനശിപ്പിച്ച കാക്കത്തോട്, മാക്കപ്പതാൽ പ്രദേശത്തിന് സമീപമാണ് കൂപ്പുപാറ. ആറ് കിലോമീറ്റർ ദൂരം സൗരവേലി നിർമാണം നടക്കുന്നതിന്‍റെ പരിധിയിലാണ് വെള്ളിയാഴ്ച പുലർച്ചെ കാട്ടാന കയറിയത്. ബുധനാഴ്ച രാത്രിയിലും ഈ പ്രദേശത്ത് കാട്ടാന കയറിയെങ്കിലും കാര്യമായ കൃഷി നാശം ഉണ്ടായില്ല. നിർമാണം പൂർത്തിയായ കാക്കത്തോട് പ്രദേശത്തെ സൗര വേലിയിൽ ഇപ്പോഴും വൈദ്യുതി പ്രവഹിക്കുന്നില്ല. വർധിച്ചുവരുന്ന കാട്ടാന ശല്യത്തിന് പരിഹാരം കാണുന്നതിൽ വനം വകുപ്പ് അനാസ്ഥ കാട്ടുന്നതായി കർഷകർ ആരോപിച്ചു. കാട്ടാന ശല്യത്തിന് പരിഹാരം ആവശ്യപ്പെട്ട് സിപിഎം ഉപ്പുതറ ലോക്കൽ കമ്മിറ്റിയുടെ നേതൃത്വത്തിൽ ശനിയാഴ്ച കാക്കത്തോട് ഫോറസ്റ്റ് ഓഫീസ് ഉപരോധിക്കും. രാവിലെ 10ന് ജില്ലാ കമ്മിറ്റിയംഗം എം.ജെ. വാവച്ചൻ ഉദ്ഘാടനം ചെയ്യും.

സംസ്ഥാന ജൂണിയർ ഫുട്ബോൾ ചാന്പ്യൻഷിപ്പ് ആരംഭിച്ചു

തൊടുപുഴ: സംസ്ഥാന ജൂണിയർ ഫുട്ബോൾ ചാന്പ്യൻഷിപ്പ് വെങ്ങല്ലൂർ സോക്കർ സ്കൂൾ ഗ്രൗണ്ടിൽ ആരംഭിച്ചു. ഡീൻ കുര്യാക്കോസ് എംപി ഉദ്ഘാടനം ചെയ്തു. ജില്ലാ ഫുട്ബോൾ അസോസിയേഷൻ പ്രസിഡന്‍റ് പി.എ. സലിംകുട്ടി അധ്യക്ഷത വഹിച്ചു. കേരള ഫുട്ബോൾ അസോസിയേഷൻ പ്രസിഡന്‍റ് നവാസ് മീരാൻ, ഹോണററി പ്രസിഡന്‍റ് ടോം ജോസ് കുന്നേൽ, മഞ്ഞള്ളൂർ പഞ്ചായത്ത് മെംബർ വി.കെ. സുനിൽ, അൽ അസ്ഹർ ആശുപത്രി സിഇഒ സുധീർ, ജോസ് പുളിക്കൻ, റഫീക്ക് പള്ളത്തു പറന്പിൽ, കെ. ഏബ്രഹാം, എം.എച്ച്. സജീവ് എന്നിവർ പ്രസംഗിച്ചു. ഉദ്ഘാടന മത്സരത്തിൽ പത്തനംതിട്ടയെ പാലക്കാട് പരാജയപ്പെടുത്തി. രണ്ടാമത്തെ മത്സരത്തിൽ കൊല്ലവും കോഴിക്കോടും സമനില പാലിച്ചു. പൂൾ അടിസ്ഥാനത്തിലാണ് മത്സരം സംഘടിപ്പിച്ചിരിക്കുന്നത്. ചാന്പ്യൻഷിപ്പ് 26ന് സമാപിക്കും.

മെരിറ്റ് ഡേ നടത്തി

വഴിത്തല: സെന്‍റ് സെബാസ്റ്റ്യൻസ് ഹയർ സെക്കൻഡറി സ്കൂളിൽ മെറിറ്റ് ഡേ നടത്തി. എസ്എസ്എൽസി, പ്ലസ് ടു പരീക്ഷകളിൽ മികച്ച വിജയം നേടിയ വിദ്യാർഥികളെ ആദരിച്ചു. മൂവാറ്റുപുഴ നിർമല കോളജ് പ്രിൻസിപ്പൽ റവ. ഡോ. ഫ്രാൻസിസ് കണ്ണാടൻ ഉദ്ഘാടനം ചെയ്തു. സ്കൂൾ മാനേജർ ഫാ. മാത്യു കോണിക്കൽ അധ്യക്ഷത വഹിച്ചു. മണക്കാട് പഞ്ചായത്തംഗം ടിസി ജോബ്, ഹെഡ്മിസ്ട്രസ് ജിജി ജയിംസ്, പിടിഎ പ്രസിഡന്‍റ് ജയ്മോൾ സന്തോഷ്, എംപിടിഎ പ്രസിഡന്‍റ് ലിൻസി ജോണ്‍, അധ്യാപക പ്രതിനിധി സിജോ ജോസ് എന്നിവർ പ്രസംഗിച്ചു. കരിങ്കുന്നം: സെന്‍റ് അഗസ്റ്റിൻസ് ഹയർ സെക്കൻഡറി സ്കൂളിൽ പ്ലസ് വണ്‍ വിദ്യാർഥികളുടെ പ്രവേശനോത്സവം നടത്തി. സെന്‍റ് അഗസ്റ്റിൻസ് പാരിഷ് ഹാളിൽ നടന്ന യോഗത്തിൽ സ്കൂൾ മാനേജർ ഫാ. ജയിംസ് വടക്കേകണ്ടങ്കരി അധ്യക്ഷത വഹിച്ചു. കരിങ്കുന്നം പഞ്ചായത്ത് പ്രസിഡന്‍റ് കെ.കെ. തോമസ് ഉദ്ഘാടനം ചെയ്തു. കരിങ്കുന്നം എസ് ഐ പി.കെ. ലിജുമോൻ സന്ദേശം നൽകി. പിടിഎ പ്രസിഡന്‍റ് ജോസ് കളരിക്കൽ, പഞ്ചായത്തംഗം സ്വപ്ന ജോയൽ, പ്രിൻസിപ്പൽ ഒ.എ. ഏബ്രഹാം, പ്രോഗ്രാം കമ്മിറ്റി കണ്‍വീനർ സുജി തോമസ് എന്നിവർ പ്രസംഗിച്ചു. സീനിയർ അധ്യാപകൻ ഡോ. നിമ്മിച്ചൻ ജേക്കബ് വിഷയാവതരണം നടത്തി. പരീക്ഷയിൽ ഉന്നത വിജയം നേടിയ വിദ്യാർഥികൾക്ക് പുരസ്കാരങ്ങൾ സമ്മാനിച്ചു.സൗഹൃദ ക്ലബ് കോ-ഓർഡിനേറ്റർ പ്രിയ സ്റ്റീഫൻ, എൻഎസ്എസ് പ്രോഗ്രാം ഓഫീസർ ലിജിയ ജോസ് എന്നിവർ സെമിനാർ നയിച്ചു. കലയന്താനി: സെന്‍റ് ജോർജ്സ് ഹയർസെക്കൻണ്ടറി സ്കൂളിൽ എസ്എസ്എൽസി പരീക്ഷയിലും പൊതു പരീക്ഷകളിലും ഉന്നത വിജയം നേടിയ കുട്ടികളെ അനുമോദിച്ചു. തൊടുപുഴ ന്യൂമാൻ കോളേജ് പ്രിൻസിപ്പൽ ഡോ. ജെന്നി കെ. അലക്സ് ഉദ്ഘാടനം ചെയ്തു. സ്കൂൾ മാനേജർ റവ.ഡോ. ജോർജ് താനത്തുപറന്പിൽ അധ്യക്ഷത വഹിച്ചു. ഹെഡ്മാസ്റ്റർ ഫാ. ആന്‍റണി പുലിമലയിൽ, പിടിഎ പ്രസിഡന്‍റ് പ്രദീപ് പോൾ, വിദ്യാർഥി പ്രതിനിധി അമീന സുബൈർ, സ്റ്റാഫ് പ്രതിനിധി പോൾ സേവ്യർ എന്നിവർ പ്രസംഗിച്ചു.

പോക്സോ നിയമ പുസ്തക വിതരണ പദ്ധതിക്ക് തുടക്കമായി

തൊടുപുഴ: ജില്ലയിലെ എല്ലാ സ്കൂളുകളിലും പോക്സോ അടിസ്ഥാന നിയമ പുസ്തകം വിതരണം ചെയ്യുന്ന പദ്ധതിക്ക് തുടക്കമായി. കുമാരമംഗലം വില്ലേജ് ഇന്‍റർനാഷണൽ സ്കൂളിൽ നടന്ന ചടങ്ങിൽ ജില്ലാ ജഡ്ജിയും ജില്ലാ ലീഗൽ സർവീസസ് അഥോറിറ്റി ചെയർമാനുമായ പി.എസ്. ശശികുമാർ ഉദ്ഘാടനം ചെയ്തു. പോക്സോ നിയമത്തെക്കുറിച്ച് അവബോധം നൽകുകയെന്ന ലക്ഷ്യത്തോടെയാണ് നിയമ പുസ്തകം തയാറാക്കിയിരിക്കുന്നത്. സേഫ് ചൈൽഡ് പദ്ധതിയുടെ ഭാഗമായി ജില്ലാ ലീഗൽ സർവീസസ് അഥോറിറ്റി, വിദ്യാഭ്യാസ വകുപ്പും വനിതാ ശിശു വികസന വകുപ്പും കേരള സ്റ്റേറ്റ് ലീഗൽ സർവീസുമായി സഹകരിച്ചാണ് പദ്ധതി നടപ്പാക്കുന്നത്. ലൈംഗികാതിക്രമങ്ങളിൽനിന്ന് കുട്ടികൾക്ക് സംരക്ഷണം നൽകുന്നതിനായി 2012 ലാണ് പോക്സോ നിയമം പാസാക്കിയത്. പോക്സോ പ്രത്യേക കോടതി ജില്ലാ ജഡ്ജി ആഷ് കെ. ബാൽ യോഗത്തിൽ അധ്യക്ഷത വഹിച്ചു. ജില്ലാ പോലീസ് മേധാവി ടി.കെ. വിഷ്ണു പ്രദീപ് മുഖ്യാതിഥിയായിരുന്നു. ചൈൽഡ് വെൽഫെയർ കമ്മിറ്റി ചെയർമാൻ ജയശീലൻ പോൾ ഡിഇഒ ഷീബ മുഹമ്മദിന് പോക്സോ നിയമ പുസ്തകം കൈമാറി.

തോട്ടം മേഖലയിലെ പ്രതിസന്ധി: ചർച്ച ഇന്ന്

ഇടുക്കി: ജില്ലയിലെ തോട്ടം മേഖല നേരിടുന്ന പ്രശ്നങ്ങൾ മനസിലാക്കാനും പരിഹാരമാർഗങ്ങൾ കണ്ടെത്താനുമായി ജില്ലാ ഭരണകൂടം പദ്ധതി തയാറാക്കുന്നു. ഇതിന് മുന്നോടിയായി മേഖലയിൽനിന്നുള്ള പ്രതിനിധികളുമായി ഇന്ന് ഉച്ചയ്ക്ക് രണ്ടിന് ജില്ലാ കളക്ടർ വി. വിഗ്നേശ്വരി ചർച്ച നടത്തും. ജില്ലയുടെ പ്ലാന്‍റേഷൻ സന്പദ് വ്യവസ്ഥയെ ശക്തിപ്പെടുത്തുന്നതിന് സമഗ്രമായ ഇടപെടലും കൂട്ടായ പ്രശ്നപരിഹാരവും വളർത്തിയെടുക്കുക എന്നതാണ് ലക്ഷ്യമെന്ന് കളക്ടർ പറഞ്ഞു. പ്ലാന്‍റേഷൻ മാനേജ്മെന്‍റുകൾ, അഗ്രഗേറ്റർമാർ, കർഷകർ , തോട്ടം തൊഴിലാളികൾ, എഫ്പിഒകൾ, വളം, ഇൻപുട്ട് വിതരണക്കാർ, ലോജിസ്റ്റിക്സ്, ഗതാഗത ദാതാക്കൾ, പാക്കേജിംഗ്, ബ്രാൻഡിംഗ് പ്രഫഷണലുകൾ, തേയില, ഏലം, കാപ്പി, റബർ, അനുബന്ധ വിളകൾ എന്നീ മേഖലകളിൽ നിന്നുള്ളവർ പങ്കെടുക്കും.

കരിന്പൻ ചപ്പാത്ത് റോഡ് ഉദ്ഘാടനം ചെയ്തു

ഇടുക്കി: ജില്ലയിലെ ടൗണുകളുടെ വികസനത്തിന് സർക്കാർ മുന്തിയ പരിഗണന നൽകുന്നുണ്ടെന്ന് മന്ത്രി റോഷി അഗസ്റ്റിൻ. കരിന്പൻ ചപ്പാത്ത് റോഡിന്‍റെ ഉദ്ഘാടനം നിർവഹിക്കുകയായിരുന്നു അദ്ദേഹം. ജില്ലാ ആസ്ഥാനത്ത് ഇറിഗേഷൻ മ്യൂസിയം, ഇക്കോ ലോഡ്ജ്, സാംസ്കാരിക തിയറ്റർ തുടങ്ങിയ പദ്ധതികൾ പൂർത്തിയാകുന്നതോടെ ചെറുതോണിയും ഇടുക്കിയും ബന്ധിച്ച് ടൗണ്‍ഷിപ്പായി മാറും. ജില്ലാ ആസ്ഥാനത്തോടനുബന്ധിച്ച് എയർ സ്ട്രിപ്പ് ആരംഭിക്കുന്നതിന്‍റെ പഠനം നടക്കുകയാണെന്നും കരിന്പൻ, തടിയന്പാട് ടൗണുകൾ സൗന്ദര്യവത്കരിക്കുമെന്നും മന്ത്രി പറഞ്ഞു. പഞ്ചായത്ത് പ്രസിഡന്‍റ് ജോർജ് പോൾ അധ്യക്ഷത വഹിച്ചു. ജില്ലാ ആസൂത്രണ സമിതി ഉപാധ്യക്ഷൻ സി.വി. വർഗീസ്, പഞ്ചായത്ത് വൈസ് പ്രസിഡന്‍റ് മിനി ജേക്കബ്, സ്റ്റാൻഡിംഗ് കമ്മിറ്റി ചെയർമാൻ സിജി ചാക്കോ, അംഗങ്ങളായ നിമ്മി ജയൻ, വി.എം. വിൻസന്‍റ് , സഹകരണ ബാങ്ക് അംഗങ്ങളായ ഓമന ശ്രീധരൻ, ജേക്കബ് പിണക്കാട്ട് തുടങ്ങിയവർ പ്രസംഗിച്ചു.

സ്വകാര്യ ബസും കാറും കൂട്ടിയിടിച്ചു

മൂലമറ്റം: തൊടുപുഴ-പുളിയൻമല സംസ്ഥാന പാതയിൽ സ്വകാര്യ ബസും കാറും കൂട്ടിയിടിച്ചു. ഇന്നലെ രാവിലെ ഒൻപതോടെ തുന്പിച്ചിക്കു സമീപമായിരുന്നു അപകടം. തൊടുപുഴയിൽനിന്ന് കട്ടപ്പനയ്ക്കു പോയ സ്വകാര്യ ബസും തൊടുപുഴ ഭാഗത്തേക്കുപോയ കാറുമാണ് കൂട്ടിയിടിച്ചത്. രണ്ട് വാഹനങ്ങൾക്കും തകരാർ സംഭവിച്ചെങ്കിലും യാത്രക്കാർക്ക് പരിക്കില്ല. സംസ്ഥാന പാതയിൽ ഒരു മണിക്കൂറോളം ഗതാഗതം തടസപ്പെട്ടു. കുളമാവ് പോലീസ് സ്ഥലത്തെത്തി ഗതാഗതം പുനഃസ്ഥാപിച്ചു.

ഡിജിറ്റൽ റവന്യു കാർഡ് സംവിധാനം നവംബറിൽ: മന്ത്രി രാജൻ

ഇടുക്കി: ഡിജിറ്റൽ റീസർവേ പൂർത്തിയാക്കിയ വില്ലേജുകളിൽ ഡിജിറ്റൽ റവന്യു കാർഡ് സംവിധാനം നവംബറിൽ നടപ്പാക്കുമെന്ന് മന്ത്രി കെ. രാജൻ. കുടയത്തൂർ, കരിമണ്ണൂർ, പാന്പാടുംപാറ, പള്ളിവാസൽ സ്മാർട്ട് വില്ലേജ് ഓഫീസുകളുടെ നിർമാണോദ്ഘാടനം ഓണ്‍ലൈൻ വഴി നിർവഹിക്കുകയായിരുന്നു മന്ത്രി. വില്ലേജ് ഓഫീസിൽനിന്നുള്ള സേവനങ്ങൾ, ഭൂമിയുടെ വിശദാംശങ്ങൾ, ഭൂമിയിലെ കെട്ടിടത്തിന്‍റെ വിശദാംശങ്ങൾ, ഭൂമി ക്രയവിക്രയം ചെയ്തതിന്‍റെ വിവരങ്ങൾ തുടങ്ങിയവ ക്യു ആർ കോഡ് ഘടിപ്പിച്ച 10 അക്ക നന്പരുള്ള കാർഡ് വഴി അറിയാം. ഈ വർഷം നവംബർ മുതൽ കാർഡ് പ്രവർത്തനം ആരംഭിക്കും. ഇതിന്‍റെ ഭാഗമായി കേരളത്തിലെ എല്ലാ വില്ലേജ് ഓഫീസുകളും സ്മാർട്ട് ഓഫീസുകളാക്കുകയാണ് സർക്കാരിന്‍റെ ലക്ഷ്യമെന്നും അദ്ദേഹം പറഞ്ഞു. കുടയത്തൂരിൽനടന്ന ചടങ്ങിൽ മന്ത്രി റോഷി അഗസ്റ്റിൻ അധ്യക്ഷത വഹിച്ചു. കെട്ടിടത്തിന്‍റെ ശിലാസ്ഥാപനം മന്ത്രി ചടങ്ങിൽ നിർവഹിച്ചു. പഞ്ചായത്ത് പ്രസിഡന്‍റ് കെ.എൻ. ഷിയാസ്, ഡെപ്യൂട്ടി കളക്ടർ കെ.എം. ജോസുകുട്ടി, തൊടുപുഴ തഹസിൽദാർ യു. രാജീവ്, കുടയത്തൂർ വില്ലേജ് ഓഫീസർ മജേഷ് എന്നിവർ പ്രസംഗിച്ചു. പള്ളിവാസൽ സ്മാർട്ട് വില്ലേജ് ഓഫീസ് കെട്ടിടനിർമാണ ഉദ്ഘാടന യോഗത്തിൽ എ. രാജ എംഎൽഎ അധ്യക്ഷത വഹിച്ചു. എഡിഎം ഷൈജു പി. ജേക്കബ്, ബ്ലോക്ക് പഞ്ചായത്ത് പ്രസിഡന്‍റ് സോമൻ ചെല്ലപ്പൻ, പഞ്ചായത്ത് പ്രസിഡന്‍റ് വി.ജി. പ്രതീഷ്കുമാർ, ത്രിതല പഞ്ചായത്തംഗങ്ങളായ ഭവ്യ കണ്ണൻ, മിനി ലാലു, ശശികുമാർ, ദേവികുളം തഹസിൽദാർ എൽ.എസ്. സന്തോഷ് കുമാർ, വില്ലേജ് ഓഫീസർ വി.എ. അൻസിൽ എന്നിവർ പ്രസംഗിച്ചു. പാന്പാടുംപാറ സ്മാർട്ട് വില്ലേജ് ഓഫീസിന്‍റെ നിർമാണ ഉദ്ഘാടനം മുണ്ടിയെരുമ പഞ്ചായത്ത് കമ്യൂണിറ്റി ഹാളിൽ നടന്നു. എം.എം. മണി എംഎൽഎ അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാകുന്നേൽ, ബ്ലോക്ക് പഞ്ചായത്ത് പ്രസിഡന്‍റ് കെ.ടി. കുഞ്ഞ്, പഞ്ചായത്ത് പ്രസിഡന്‍റ് ജോസ് ജോസഫ്, വൈസ് പ്രസിഡന്‍റ് സരിതാ രാജേഷ്, ത്രിതല പഞ്ചായത്തംഗങ്ങളായ കുര്യാക്കോസ് ചിന്താർമണിയിൽ, സി.എസ്. യശോധരൻ, പി.ടി. ഷിഹാബ്, മിനി മനോജ്, ഡെപ്യൂട്ടി കളക്ടർ എ. സുഹ്റ, വില്ലേജ് ഓഫീസർ കെ.എൻ. രാജശ്രീ എന്നിവർ പ്രസംഗിച്ചു. കരിമണ്ണൂർ പഞ്ചായത്ത് കമ്യൂണിറ്റി ഹാളിൽ നടന്ന യോഗത്തിൽ പി. ജെ. ജോസഫ് എംഎൽഎ അധ്യക്ഷത വഹിച്ചു. ജില്ലാ കളക്ടർ വി. വിഗ്നേശ്വരി, ബ്ലോക്ക് പഞ്ചായത്ത് പ്രസിഡന്‍റ് ടോമി കാവാലം, പഞ്ചായത്ത് പ്രസിഡന്‍റ് നിസാമോൾ ഷാജി, ജില്ലാ പഞ്ചായത്തംഗം ഇന്ദു സുധാകരൻ, പഞ്ചായത്തംഗം ജീസ് ആയത്തുപാടം, തൊടുപുഴ ഡെപ്യൂട്ടി തഹസിൽദാർ ശരത് ചന്ദ്ര ബോസ് എന്നിവർ പ്രസംഗിച്ചു.

സിസ്റ്റർ ഇൻഫന്‍റ് ട്രീസയുടെ പിൻമുറക്കാരിയായി ശശികല

ടി.പി. സന്തോഷ്കുമാർ തൊടുപുഴ: ശരീരത്തിനും മനസിനും ആരോഗ്യം പ്രദാനം ചെയ്യുന്ന യോഗയിലൂടെ നൂറുകണക്കിനാളുകൾക്ക് ആശ്വാസം പകരുകയാണ് യോഗ പരിശീലകയായ തൊടുപുഴ ചുങ്കം പുത്തൻവീട്ടിൽ എ.എസ്. ശശികല. പത്തു വയസു മുതൽ 85 വയസു വരെ പ്രായമുള്ളവരാണ് ശശികലയുടെ കീഴിൽ യോഗ അഭ്യസിക്കുന്നത്. തൊടുപുഴ സെന്‍റ് അൽഫോണ്‍സ യോഗ സെന്‍ററിൽ യോഗ ഗുരുവായ സിസ്റ്റർ ഇൻഫന്‍റ് ട്രീസയ്ക്കു കീഴിൽ 2013- മുതൽ പരിശീലനം നേടിയ ശശികല ഇപ്പോൾ ഒട്ടേറെ പേർക്ക് യോഗയുടെ പാഠങ്ങൾ പകർന്നു നൽകുന്നു. യോഗ ടീച്ചേഴ്സ് ട്രെയിനിംഗ് കോഴ്സ് പൂർത്തിയാക്കിയ ശേഷം ഇപ്പോൾ കോലാനി ആയുഷ് ഹെൽത്ത് ആൻഡ് വെൽനസ് സെന്‍ററിലെ യോഗ പരിശീലകയാണ്. ഭർത്താവിനെ ബിസിനസിൽ സഹായിച്ചിരുന്ന ശശികല യോഗയോടുള്ള ആഭിമുഖ്യം മൂലമാണ് ഇതിന്‍റെ പരിശീലകയും പ്രചാരകയുമായി മാറിയത്. ആയിരക്കണക്കിന് പേർക്ക് യോഗ പരീശിലനം നൽകിയ ഗുരുവാണ് എഫ്സിസി സഭാംഗമായ സിസ്റ്റർ ഇൻഫന്‍റ് ട്രീസ. ഇപ്പോൾ മൂവാറ്റുപുഴയിൽ സേവനമനുഷ്ഠിക്കുന്ന സിസ്റ്ററിനു കീഴിൽ യോഗയോടുള്ള അതീവ താത്പര്യം കൊണ്ടാണ് ശശികല പഠിക്കാനെത്തിയത്. പരിശീലനം പൂർത്തിയാക്കിയ ശേഷം ഈ രംഗത്തുതന്നെ നിലയുറപ്പിക്കാനായിരുന്നു തീരുമാനം. അതിന്‍റെ ഭാഗമായാണ് ടീച്ചേഴ്സ് ട്രെയിനിംഗ് കോഴ്സ് പഠിച്ചത്. ഹോമിയോയും ആയുർവേദവും സമന്വയിപ്പിച്ച ആയുഷ് ഹെൽത്ത് ആന്‍ഡ് വെൽനസ് സെന്‍ററുകളിൽ ഇപ്പോൾ യോഗ മുഖ്യഘടകമാണ്. ഇവിടുത്തെ ആദ്യ നിയമനത്തിൽ ശശികലയ്ക്കും ജോലി ലഭിച്ചു. മുട്ടം ജില്ലാ ഹോമിയോ ആശുപത്രിയിലെ സേവനത്തിനു ശേഷമാണ് കോലാനിയിലെ സെന്‍ററിലേയ്ക്ക് മാറുന്നത്. രാവിലെ ആറരയോടെയാണ് യോഗ പരിശീലനം ആരംഭിക്കുന്നത്. സ്ഥലപരിമിതി മൂലം രാവിലെ 30 ഓളം പേർക്കാണ് കോലാനിയിൽ പരിശീലനം നൽകുന്നത്. ജീവിത ശൈലീ രോഗങ്ങളുള്ളവരും അല്ലാത്തവരുമെല്ലാം യോഗ ചെയ്യുന്നവരിലുൾപ്പെടും. ആഴ്ചയിൽ രണ്ടു ദിവസം പാറക്കടവിലെ പകൽവീട്ടിൽ വയോജനങ്ങളെ യോഗ അഭ്യസിപ്പിക്കുന്നുണ്ട്. സ്കൂളുകളിൽ കുട്ടികളെയും യോഗ പരിശീലിപ്പിക്കുന്നുണ്ട്. എല്ലാ ദിവസവും വൈകുന്നേരം കാഞ്ഞിരമറ്റത്ത് ജോലിക്കാരും വീട്ടമ്മമരുമായ വനിതകളെയും യോഗ പരിശീലിപ്പിക്കുന്നു. മാറി വരുന്ന ജീവിത സാഹചര്യങ്ങളും ജോലി സ്ഥലത്തെ സമ്മർദവും മൂലം മാനസിക സംഘർഷമനുഭവിക്കുന്നവരും ജീവിത ശൈലി രോഗങ്ങളുള്ളവരും ഇപ്പോൾ യോഗയിലൂടെ ആശ്വാസം കണ്ടെത്തുന്നുണ്ടെന്ന് ശശികല പറയുന്നു. ബിസിനസുകാരനായ ബിജുവാണ് ശശികലയുടെ ഭർത്താവ്. മക്കൾ ആദർശ്, ആവണി.

ഒഴിപ്പിച്ചാലും ഒഴിയില്ല: നഗരം കീഴടക്കി വഴിയോര കച്ചവടം

തൊടുപുഴ: നഗരത്തിൽ പാതയോരങ്ങൾ കൈയേറിയുള്ള വഴിയോരക്കച്ചവടം വ്യാപകം. കാൽനട യാത്രക്കാർക്കുപോലും ബുദ്ധിമുട്ടാവുന്ന രീതിയിലാണ് പല ഭാഗത്തും വഴിയോര കച്ചവടം തകൃതിയാകുന്നത്. റോഡിന് അല്പം വീതിയുണ്ടെങ്കിൽ അവിടെ താത്കാലിക സംവിധാനമൊരുക്കി കച്ചവടം ആരംഭിക്കുന്നതാണ് നഗരത്തിൽ പതിവായി കണ്ടു വരുന്നത്. അനുദിനം പെരുകുന്ന വഴിയോര കച്ചവടത്തിനെതിരേ കാര്യമായ നടപടികൾ അധികൃതർ സ്വീകരിക്കാത്തതാണ് ഓരോ ദിവസവും പുതിയ കടകൾ രംഗത്തു വരുന്നതിനു കാരണം. മുനിസിപ്പിൽ അധികൃതർ, പിഡബ്ല്യുഡി, പോലീസ് എന്നിവരുടെ നേതൃത്വത്തിൽ ഇതിനു മുന്പ് പലതവണ ഒഴിപ്പിക്കൽ നടത്തിയിട്ടുണ്ടെങ്കിലും ചുരുങ്ങിയ ദിവസങ്ങൾക്കുള്ളിൽ ഈ മേഖലകളിലെല്ലാം വഴിയോര കച്ചവടക്കാർ വീണ്ടും കൈയടക്കും. കാഞ്ഞിരമറ്റം -മങ്ങാട്ടുകവല ബൈപാസ്, അന്പലം ബൈപാസ്, കാരിക്കോട് -ന്യൂമാൻ കോളജ് റോഡ്, തൊടുപുഴ -വെങ്ങല്ലൂർ റോഡ് എന്നിവിടങ്ങളിലെല്ലാം വഴിയോര കച്ചവടം വ്യാപകമാണ്. കാരിക്കോട് - ന്യൂമാൻ കോളജ് റോഡിൽ ഏതാനും വർഷം മുൻപ് കെട്ടിട ഉടമകളുടെ സഹകരണത്തോടെ റോഡിനു വീതി കൂട്ടിയിരുന്നു. ഇതോടെ ഇതുവഴിയുള്ള ഗതാഗതം സുഗമമാകുകയും വ്യാപാര സ്ഥാപനങ്ങളിൽ കയറുന്നതിനും വാഹനം റോഡരികിൽ പാർക്ക് ചെയ്യുന്നതിനുള്ള സൗകര്യവും ഉണ്ടായിരുന്നു. എന്നാൽ ഇപ്പോൾ വീതി കൂട്ടിയ ഭാഗത്ത് വഴിയോര കച്ചവട വാഹനങ്ങളും ലോട്ടറി ബങ്കുകളും ഇടം പിടിച്ചു . ഇത്തരം ബങ്കുകളുടെ മുന്നിൽ വാഹനം നിർത്തുന്നവരോട് മോശമായി പെരുമാറുന്ന സംഭവങ്ങളും ഉണ്ടാകുന്നുണ്ട്. മങ്ങാട്ടുകവലയിൽ റോഡിനു വീതികൂട്ടിയ ഭാഗം മുഴുവനും ടാക്സി വാഹനങ്ങൾ പാർക്ക് ചെയ്യുന്നതിനും വഴിയോര കച്ചവടത്തിനുമായി കൈയേറിയ സാഹചര്യമാണ്. മങ്ങാട്ടുകവല ബസ് സ്റ്റാൻഡിനു മുൻഭാഗം പൂർണമായും വിവിധ വഴിയോര കച്ചവടക്കാരുടെ കൈവശമാണ്. വഴിയോര കച്ചടവടവും ഓട്ടോ സ്റ്റാൻഡുംകൂടിയായതോടെ ഇവിടം പൂർണമായും തടസപ്പെട്ട നിലയിലാണ്. ബസ് സ്റ്റാൻഡിനു മുന്നിൽ ഒരു വാഹനംപോലും നിർത്താൻ കഴിയാത്ത സ്ഥിതിയാണ്. പ്രാദേശിക രാഷ്‌ട്രീയ നേതാക്കളുടെയും ചില ജനപ്രതിനിധികളുടെയും ഒത്താശയോടെയാണ് പല ഭാഗത്തും വഴിയോര കച്ചവടം നടക്കുന്നതെന്ന ആരോപണം കാലങ്ങളായുണ്ട്. ഇതാണ് ഒഴിപ്പിച്ചാലും വീണ്ടും വഴിയോര കച്ചവടക്കാർ പാതയോരങ്ങൾ കൈയേറുന്നതിനു കാരണം. തൊടുപുഴയെ സംബന്ധിച്ച് വാഹന പാർക്കിംഗിന് ഏറെ ബുദ്ധിമുട്ടു നേരിടുന്ന നഗരമാണ്. എന്നാൽ വാഹന പാർക്കിംഗിന് അല്പം ഇടമുള്ള പാതയോരങ്ങളെല്ലാം വഴിയോരകച്ചവടക്കാരുടെ കൈവശമാണ്.

വായനദിനാചരണം ജില്ലാതല ഉദ്ഘാടനം നടത്തി

ഇടുക്കി: വായനാപക്ഷാചരണത്തിന്‍റെ ജില്ലാതല ഉദ്ഘാടനം പൈനാവ് എംആർഎസ് സ്കൂളിൽ ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാകുന്നേൽ ഉദ്ഘാടനം ചെയ്തു. ഡെപ്യൂട്ടി കളക്ടർ അതുൽ സ്വാമിനാഥൻ അധ്യക്ഷത വഹിച്ചു. ജില്ലാ ഭരണകൂടം, പബ്ലിക് റിലേഷൻസ് വകുപ്പ്, പി.എൻ. പണിക്കർ ഫൗണ്ടേഷൻ, സാക്ഷരത മിഷൻ ജില്ലാ ഓഫീസ് എന്നിവയുടെ ആഭിമുഖ്യത്തിലാണ് വായനപക്ഷാചരണം സംഘടിപ്പിച്ചത്. പി.എൻ. പണിക്കർ ഫൗണ്ടേഷൻ പ്രസിഡന്‍റ് ജോയി കാട്ടുവള്ളി പ്രതിജ്ഞ ചൊല്ലിക്കൊടുത്തു. റവ.ഡോ. മനോജ് ക്ലാസ് നയിച്ചു. ബ്ലോക്ക് പഞ്ചായത്ത് പ്രസിഡന്‍റ് ആൻസി തോമസ്, ജില്ലാ ഇൻഫർമേഷൻ ഓഫീസർ ജി.എസ്. വിനോദ്, സാക്ഷരത മിഷൻ ജില്ലാ കോ-ഓർഡിനേറ്റർ പി.എം. അബ്ദുൾ കരീം, ഐടിഡിപി പ്രോജക്ട് ഓഫീസർ ജി. അനിൽകുമാർ എന്നിവർ പ്രസംഗിച്ചു.

വിദ്യാർഥികളെ ആദരിച്ചു

നെടിയശാല: പബ്ലിക് ലൈബ്രറിയുടെ ആഭിമുഖ്യത്തിൽ എസ്എസ്എൽസി, പ്ലസ് ടു പരീക്ഷകളിൽ ഉന്നത വിജയം നേടിയ വിദ്യാർഥികളെ ആദരിച്ചു. നെടിയശാല പള്ളി വികാരി റവ. ഡോ. ജോസഫ് അത്തിക്കൽ കാഷ് അവാർഡും മെമന്‍റോയും സമ്മാനിച്ചു. ലൈബ്രറി കൗണ്‍സിൽ താലൂക്ക് സെക്രട്ടറി വി.വി. ഷാജി, ലൈബ്രറി പ്രസിഡന്‍റ് ജോസഫ് മൂലശേരി, സെക്രട്ടറി ഷാജു തോമസ് എന്നിവർ പ്രസംഗിച്ചു.

പ്രതിഭാ സംഗമവും അവാർഡ് വിതരണവും

തൊടുപുഴ: റൈസ് പദ്ധതിയുടെ ഭാഗമായി ഡീൻ കുര്യാക്കോസ് എംപിയുടെ നേതൃത്വത്തിൽ ഈ വർഷം എസ്എസ്എൽസി, പ്ലസ്ടു പരീക്ഷകളിൽ എല്ലാ വിഷയങ്ങൾക്കും എ പ്ലസ് നേടിയ വിദ്യാർഥികൾക്ക് അവാർഡുകൾ വിതരണം ചെയ്യും. ദേവികുളം നിയോജകമണ്ഡലത്തിൽ ഉൾപ്പെടുന്ന അടിമാലി, വെള്ളത്തൂവൽ, പള്ളിവാസൽ, മാങ്കുളം, ബൈസണ്‍വാലി, ചിന്നക്കനാൽ, മൂന്നാർ, മറയൂർ, കാന്തല്ലൂർ, വട്ടവട എന്നീ പഞ്ചായത്തുകളുടെ പരിധിയിൽവരുന്ന സിബിഎസ്ഇ ഉൾപ്പെടെയുള്ള സ്കൂളുകളിൽനിന്നുള്ള വിദ്യാർഥികൾക്കുള്ള അവാർഡ് വിതരണം നാളെ ഉച്ചകഴിഞ്ഞ് രണ്ടിന് കൂന്പൻപാറ ഫാത്തിമ മാതാ ഗേൾസ് ഹയർ സെക്കൻഡറി സ്കൂളിൽ നടക്കും. ഉടുന്പൻചോല നിയമസഭാ മണ്ഡലത്തിലുൾപ്പെടുന്ന ഇരട്ടയാർ, കരുണാപുരം, നെടുംകണ്ടം, പാന്പാടുംപാറ, രാജാക്കാട്, രാജകുമാരി, ശാന്തൻപാറ, സേനാപതി, ഉടുന്പൻചോല, വണ്ടൻമേട് പഞ്ചായത്തുകളിലെ കുട്ടികൾക്കുള്ള അവാർഡ് വിതരണം 22നു രാവിലെ 10ന് നെടുങ്കണ്ടം ഗവ. ഹയർ സെക്കൻഡറി സ്കൂളിലും പീരുമേട് നിയമസഭാ മണ്ഡലത്തിലുൾപ്പെടുന്ന ഏലപ്പാറ, കൊക്കയാർ, കുമളി, പീരുമേട്, പെരുവന്താനം, ഉപ്പുതറ, വണ്ടിപ്പെരിയാർ, അയ്യപ്പൻകോവിൽ, ചക്കുപള്ളം പഞ്ചായത്തുകളുടെ പരിധിയിൽ വരുന്ന കുട്ടികൾക്കുള്ള മെരിറ്റ് അവാർഡ് വിതരണം 22ന് ഉച്ചകഴിഞ്ഞ് രണ്ടിന് പീരുമേട് മരിയഗിരി ഇംഗ്ലീഷ് മീഡിയം സ്കൂളിലും നടക്കും. കുട്ടികൾക്ക് എത്തിച്ചേരാനാവാത്ത സാഹചര്യത്തിൽ രക്ഷിതാക്കൾക്ക് അവാർഡ് കൈപ്പറ്റാമെന്ന് എംപി അറിയിച്ചു.

പോക്സോ ആക്ട്: സ്കൂളുകളിൽ പ്രചാരണ പദ്ധതിക്ക് ഇന്നു തുടക്കം

തൊടുപുഴ: ജില്ലാ ലീഗൽ സർവീസസ് അഥോറിട്ടിയുടെ നേതൃത്വത്തിൽ വിദ്യാഭ്യാസ വകുപ്പ്, വനിതാ ശിശു വികസന വകുപ്പ് എന്നിവയുടെ സഹകരണത്തോടെ ജില്ലയിലെ മുഴുവൻ സ്കൂളുകളിലും പോക്സോ ആക്ട്-2012ന്‍റെ കോപ്പികൾ വിതരണം ചെയ്യുന്നതിന്‍റെ ജില്ലാ തല ഉദ്ഘാടനം ഇന്നു രാവിലെ 9.30ന് കുമാരമംഗലം വില്ലേജ് ഇന്‍റർനാഷണൽ സ്കൂളിൽ നടക്കുമെന്ന് തൊടുപുഴ കുടുംബകോടതി ജഡ്ജി ജോഷി ജോണ്‍, എൻഡിപിഎസ് കോടതി ജഡ്ജി പി.കെ. ജയകൃഷ്ണൻ, ജില്ലാ ലീഗൽ സർവീസസ് അഥോറിറ്റി സെക്രട്ടറി എൻ.എൻ. സിജി എന്നിവർ പത്രസമ്മേളനത്തിൽ അറിയിച്ചു. ചൈൽഡ് സേഫ് ഇടുക്കി-2025 എന്ന പേരിലാണ് പദ്ധതി നടപ്പാക്കുന്നത്. രാജ്യത്ത് ആദ്യമായാണ് ഇത്തരത്തിലുള്ള പദ്ധതി നടപ്പാക്കുന്നതെന്നും അധികൃതർ പറഞ്ഞു. ജില്ലയിലെ എൽപി, യുപി, എച്ച്എസ്, എച്ച്എസ്എസ് സ്കൂളുകളിലായി 500 കോപ്പികൾ വിതരണം ചെയ്യും. ജില്ലാ ജഡ്ജി ആഷ് കെ. ബാൽ അധ്യക്ഷത വഹിക്കും. പ്രിൻസിപ്പൽ ജില്ലാ ജഡ്ജി പി.എസ്. ശശികുമാർ ഉദ്ഘാടനം ചെയ്യും. ജില്ലാ കളക്ടർ വി. വിഗ്നേശ്വരി മുഖ്യപ്രഭാഷണം നടത്തും. ജില്ലാ പോലീസ് മേധാവി ടി.കെ. വിഷ്ണുപ്രദീപ് സന്ദേശം നൽകും. ചടങ്ങിൽ ചൈൽഡ് വെൽഫയർ കമ്മിറ്റി ചെയർമാൻ ജയശീലൻ പോൾ പോക്സോ ആക്ട് കോപ്പി തൊടുപുഴ ഡിഇഒ ഷീബ മുഹമ്മദിന് കൈമാറും. തൊടുപുഴ ചീഫ് ജുഡീഷ്യൽ മജിസ്ട്രേറ്റ് സിന്ധു തങ്കം, ജില്ലാ ഗവ. പ്ലീഡർ അഡ്വ. എസ്.എസ്. അനീഷ്, പോക്സോ കോടതി പബ്ലിക് പ്രോസിക്യൂട്ടർ പി.വി. വാഹിദ, ജില്ലാ ശിശുക്ഷേമസമിതി ഓഫീസർ പി.ജി. മഞ്ജു എന്നിവർ പ്രസംഗിക്കും. ഡിഎൽഎസ്എ സെക്രട്ടറി എൻ.എൻ. സിജി സ്വാഗതവും വില്ലേജ് ഇന്‍റർനാഷണൽ സ്കൂൾ പ്രിൻസിപ്പൽ സജി വർഗീസ് നന്ദിയും പറയും. പദ്ധതിയുടെ ആദ്യ ഘട്ടമായി അധ്യാപകർക്ക് പോക്സോ നിയമത്തെ സംബന്ധിച്ച് വ്യക്തമായ ധാരണയുണ്ടാക്കുന്നതിനാണ് എല്ലാ സ്കൂളുകളിലും കോപ്പികൾ വിതരണം ചെയ്യുന്നത്. പദ്ധതിയുടെ രണ്ടാം ഘട്ടമായി സ്കൂളുകളിൽ പോക്സോ നിയമത്തെ സംബന്ധിച്ച ബോധവത്കരണ ക്ലാസുകളും ജില്ലാ ലീഗൽ സർവീസസ് അഥോറിറ്റിയുടെ നേതൃത്വത്തിൽ നടത്തുമെന്നും അധികൃതർ അറിയിച്ചു.

നാല് വില്ലേജ് ഓഫീസുകൾകൂടി സ്മാർട്ടാകുന്നു

ഇടുക്കി: ജില്ലയിലെ നാല് വില്ലേജ് ഓഫീസുകൾകൂടി സ്മാർട്ടാകുന്നു. വില്ലേജ് ഓഫീസുകളുടെ കെട്ടിട നിർമാണ ഉദ്ഘാടനം മന്ത്രി കെ. രാജൻ ഇന്ന് വൈകുന്നേരം മൂന്നിന് ഓണ്‍ലൈനായി നിർവഹിക്കും. പാന്പാടുംപാറ, കുടയത്തൂർ, കരിമണ്ണൂർ, പള്ളിവാസൽ വില്ലേജ് ഓഫീസുകളാണ് സ്മാർട്ട് വില്ലേജ് ഓഫീസുകളായി മാറുന്നത്. സ്പെഷൽ അസിസ്റ്റൻസ് ടു സ്റ്റേറ്റ് ഫോർ ക്യാപ്പിറ്റൽ ഇൻവെസ്റ്റ്മെന്‍റ് പദ്ധതി പ്രകാരം നിർമിക്കുന്ന കെട്ടിടങ്ങളുടെ നിർമാണ നിർവഹണ ഏജൻസി പൊതുമരാമത്ത് വകുപ്പാണ്. ഓരോ കെട്ടിടത്തിനും 45 ലക്ഷം വീതം 1.8 കോടി ചെലവിട്ടാണ് സ്മാർട്ട് വില്ലേജ് ഓഫീസുകൾ യാഥാർഥ്യമാക്കുന്നത്. കുടയത്തൂർ സഹകരണ ബാങ്ക് ഓഡിറ്റോറിയത്തിൽ നടക്കുന്ന കുടയത്തൂർ സ്മാർട്ട് വില്ലേജ് ഓഫീസ് കെട്ടിട നിർമാണ ഉദ്ഘാടന ചടങ്ങിൽ മന്ത്രി റോഷി അഗസ്റ്റിൻ അധ്യക്ഷത വഹിക്കും. ബ്ലോക്ക് പഞ്ചായത്ത് പ്രസിഡന്‍റ് ടോമി കാവാലം, പഞ്ചായത്ത് പ്രസിഡന്‍റ് കെ.എൻ. ഷിയാസ്, ജില്ലാ പഞ്ചായത്തംഗം പ്രഫ. എം.ജെ. ജേക്കബ്, ബ്ലോക്ക് പഞ്ചായത്തംഗം മിനി ആന്‍റണി, ഇടുക്കി സബ് കളക്ടർ അനൂപ് ഗാർഗ് എന്നിവർ പ്രസംഗിക്കും. പാന്പാടുംപാറ സ്മാർട്ട് വില്ലേജ് ഓഫീസ് കെട്ടിട നിർമാണ ഉദ്ഘാടനം മുണ്ടിയെരുമ പഞ്ചായത്ത് കമ്യൂണിറ്റി ഹാളിൽ നടക്കും. എം.എം. മണി എംഎൽഎ അധ്യക്ഷത വഹിക്കും. ബ്ലോക്ക് പഞ്ചായത്ത് പ്രസിഡന്‍റ് കെ.ടി. കുഞ്ഞ്, വൈസ് പ്രസിഡന്‍റ് ശ്രീദേവി എസ്. ലാൽ, പഞ്ചായത്ത് പ്രസിഡന്‍റ് ജോസ് ജോസഫ്, വൈസ് പ്രസിഡന്‍റ് സരിതാ രാജേഷ്, ജില്ലാ പഞ്ചായത്തംഗം ജിജി കെ. ഫിലിപ്പ് എന്നിവർ പ്രസംഗിക്കും. പള്ളിവാസൽ പഞ്ചായത്ത് ഓഡിറ്റോറിയത്തിൽ നടക്കുന്ന ചടങ്ങിൽ എ. രാജ എംഎൽഎ അധ്യക്ഷത വഹിക്കും. ബ്ലോക്ക് പഞ്ചായത്ത് പ്രസിഡന്‍റ് സോമൻ ചെല്ലപ്പൻ, പഞ്ചായത്ത് പ്രസിഡന്‍റ് വി.ജി. പ്രതീഷ്കുമാർ, ജില്ലാ പഞ്ചായത്തംഗം ഭവ്യ കണ്ണൻ, അടിമാലി ബ്ലോക്ക് പഞ്ചായത്തംഗം മിനി ലാലു എന്നിവർ പ്രസംഗിക്കും. കരിമണ്ണൂർ പഞ്ചായത്ത് കമ്യൂണിറ്റി ഹാളിൽ നടക്കുന്ന ചടങ്ങിൽ പി.ജെ. ജോസഫ് എംഎൽഎ അധ്യക്ഷത വഹിക്കും. ബ്ലോക്ക് പഞ്ചായത്ത് പ്രസിഡന്‍റ് ടോമി കാവാലം, പഞ്ചായത്ത് പ്രസിഡന്‍റ് നിസാമോൾ ഷാജി, ജില്ലാ പഞ്ചായത്തംഗം ഇന്ദു സുധാകരൻ, പഞ്ചായത്തംഗം ജീസ് ആയത്തുപാടം എന്നിവർ പ്രസംഗിക്കും.

രാഹുൽ ഗാന്ധിയുടെ ജൻമദിനത്തിൽ രക്തദാനവുമായി ഡിസിസി

തൊടുപുഴ: രാഹുൽ ഗാന്ധിയുടെ ജൻമദിനത്തിൽ രക്തദാനം നടത്തി ഡിസിസി പ്രസിഡന്‍റ് സി.പി. മാത്യു ഉദ്ഘാടനം ചെയ്തു. രാഹുൽ ഗാന്ധിയുടെ ജൻമദിനത്തിൽ തുടക്കം കുറിച്ച രക്തദാനം തുടർന്ന് നടത്തുന്നതിന് രക്തദാനസേനയ്ക്ക് ജില്ലാ തലത്തിൽ രൂപം നൽകുമെന്ന് അദ്ദേഹം പറഞ്ഞു. അൽ അസർ മെഡിക്കൽ കോളേജ് ചീഫ് ഓപ്പറേറ്റിംഗ് ഓഫീസർ സുധീർ ഭാസുരി അധ്യക്ഷത വഹിച്ചു. ടി.ജെ. പീറ്റർ, ജോസ് അഗസ്റ്റിൻ, എം.എച്ച്. സജീവ്, ഷാനു ഷാഹുൽ, എബി മുണ്ടയ്ക്കൽ എന്നിവർ പ്രസംഗിച്ചു.

പെരിയാർ കടുവ സങ്കേതത്തിൽ ഉഭയ-ഉരഗജീവി സർവേ പൂർത്തിയായി

കുമളി: പശ്ചിമഘട്ടത്തിലെ പ്രധാന ജൈവവൈവിധ്യ ഹോട്സ്പോട്ടുകളിലൊന്നായ പെരിയാർ കടുവ സങ്കേതത്തിൽ ആദ്യഘട്ട ഉഭയ-ഉരഗജീവി സർവേയിൽ 149 ഇനങ്ങൾ രേഖപ്പെടുത്തി. ഏഴു മുതൽ 10 വരെ പെരിയാർ ടൈഗർ കണ്‍സർവേഷൻ ഫൗണ്ടേഷനും ആരണ്യകം നേച്ചർ ഫൗണ്ടേഷനും ചേർന്ന് സർവേ നടത്തിയത്. സർവേയിൽ 67 ഉഭയജീവി ഇനങ്ങളെയും 82 ഉരഗജീവി ഇനങ്ങളെയുമാണ് കണ്ടെത്തിയത്. വിവിധ ആവാസവ്യവസ്ഥകളെ പ്രതിനിധികരിക്കുന്ന 21 സ്ഥലങ്ങളിലാണ് സർവേ നടന്നത്. സർവേയിൽ കേരളത്തിലെ പ്രമുഖ വിദ്യാഭ്യാസ, ഗവേഷണ സ്ഥാപനങ്ങളായ കാലിക്കറ്റ് യൂണിവേഴ്സിറ്റി, കണ്ണൂർ യൂണിവേഴ്സിറ്റി, കേരള ഫോറസ്റ്റ് റിസർച് ഇൻസ്റ്റിറ്റ്യൂട്ട്, ഏട്രീ-ബാംഗ്ലൂർ തുടങ്ങിയവരും മലബാർ നാച്വുറൽ ഹിസ്റ്ററി സൊസൈറ്റി, സർപ്പ, സ്നേക്ക്പീഡിയ തുടങ്ങിയ പ്രാദേശിക സംഘടനകളെ പ്രതിനിധീകരിച്ച് 73 വോളണ്ടിയർമാരും പങ്കെടുത്തു. പെരിയാർ കടുവ സങ്കേതം അസി. ഫീൽഡ് ഡയറക്ടർ ആർ. ലക്ഷ്മി, പെരിയാർ വെസ്റ്റ് ഡിവിഷൻ ഡെപ്യൂട്ടി ഡയറക്ടർ എസ്. സന്ദീപ് എന്നിവർ ചേർന്ന് സർവേ ഉദ്ഘാടനം ചെയ്തു. ചടങ്ങിൽ തേക്കടി റേഞ്ച് ഫോറസ്റ്റ് ഓഫീസർ കെ.ഇ. സിബി, വള്ളക്കടവ് റേഞ്ച് ഫോറസ്റ്റ് ഓഫീസർ അരുണ്‍ കെ. നായർ, റിസർച്ച് റേഞ്ച് ഫോറസ്റ്റ് ഓഫീസർ ലിബിൻ ജോണ്‍, ഫ്ലയിംഗ് സ്ക്വാഡ് റേഞ്ച് ഫോറസ്റ്റ് ഓഫീസർ പ്രിയ ടി. ജോസഫ്, കണ്‍സർവേഷൻ ബയോളജിസ്റ്റ്മാരായ രമേശ്ബാബു, ആൽബി ജെ. മറ്റത്തിൽ, നേച്ചർ എഡ്യൂക്കേഷൻ ഓഫീസർ സേതുപാർവതി തുടങ്ങിയവർ പങ്കെടുത്തു. ഡോ. സന്ദീപ്ദാസ്, ഡോ. രാജ്കുമാർ എന്നിവർ നയിച്ച സർവേയിൽ നിരവധി അപൂർവ ഇനങ്ങളെ കണ്ടെത്തി. ചൂരലാമ എന്ന കെയിൻ ടർട്ടിൽ, കാട്ടാമ എന്ന ട്രാവൻകൂർ ടോർട്ടോയിസ്, ഷോർട്ട് ടെയ്ൽഡ് കുക്രി എന്ന കുട്ടിവാലൻ ചുരുട്ട എന്നിവ ഉൾപ്പെടെ ഐയുസിഎൻ ചുവപ്പുപട്ടികയിൽപ്പെടുന്ന 12 ഇനങ്ങളെ രേഖപ്പെടുത്തി. മുൻ സർവേകളിൽ രേഖപ്പെടുത്താത്ത ഡറെലി കുറിമൂക്കൻ, കേരള ചാട്ടക്കാരൻ, ജലധാര ചാട്ടക്കാരൻ, തുടങ്ങിയ അഞ്ചിനം ഉഭയജീവികളും റാഷിദി പല്ലി, മേഘമല ദ്രാവിഡഗെക്കോ തുടങ്ങിയ മൂന്നിനം ഉരഗങ്ങളെയും അടക്കം എട്ടിനങ്ങളെ പെരിയാർ കടുവ സങ്കേതത്തിന്‍റെ ഉഭയ - ഉരഗജീവി പട്ടികയിലേക്ക് അധികമായി ചേർത്തു. സർവേയിൽ രേഖപ്പെടുത്തിയ അറുപത്തിയേഴിൽ അൻപത്തിമൂന്നും (എണ്‍പത് ശതമാനം ഉഭയജീവികളും) ലോകത്തിൽ പശ്ചിമഘട്ടത്തിൽമാത്രം കാണപ്പെടുന്നവയാണെന്നത് പെരിയാറിന്‍റെ ഉഭയജീവി വൈവിധ്യത്തിന്‍റെ പ്രത്യേകതകൂടിയാണെന്ന് ഡോ. സന്ദീപ്ദാസ് പറഞ്ഞു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]