ADVERTISEMENT

ADVERTISEMENT

വിദ്യാർഥികളെ ആദരിച്ചു

നെടിയശാല: പബ്ലിക് ലൈബ്രറിയുടെ ആഭിമുഖ്യത്തിൽ എസ്എസ്എൽസി, പ്ലസ് ടു പരീക്ഷകളിൽ ഉന്നത വിജയം നേടിയ വിദ്യാർഥികളെ ആദരിച്ചു. നെടിയശാല പള്ളി വികാരി റവ. ഡോ. ജോസഫ് അത്തിക്കൽ കാഷ് അവാർഡും മെമന്‍റോയും സമ്മാനിച്ചു. ലൈബ്രറി കൗണ്‍സിൽ താലൂക്ക് സെക്രട്ടറി വി.വി. ഷാജി, ലൈബ്രറി പ്രസിഡന്‍റ് ജോസഫ് മൂലശേരി, സെക്രട്ടറി ഷാജു തോമസ് എന്നിവർ പ്രസംഗിച്ചു.

ADVERTISEMENT

ഒഴിപ്പിച്ചാലും ഒഴിയില്ല: നഗരം കീഴടക്കി വഴിയോര കച്ചവടം

തൊടുപുഴ: നഗരത്തിൽ പാതയോരങ്ങൾ കൈയേറിയുള്ള വഴിയോരക്കച്ചവടം വ്യാപകം. കാൽനട യാത്രക്കാർക്കുപോലും ബുദ്ധിമുട്ടാവുന്ന രീതിയിലാണ് പല ഭാഗത്തും വഴിയോര കച്ചവടം തകൃതിയാകുന്നത്. റോഡിന് അല്പം വീതിയുണ്ടെങ്കിൽ അവിടെ താത്കാലിക സംവിധാനമൊരുക്കി കച്ചവടം ആരംഭിക്കുന്നതാണ് നഗരത്തിൽ പതിവായി കണ്ടു വരുന്നത്. അനുദിനം പെരുകുന്ന വഴിയോര കച്ചവടത്തിനെതിരേ കാര്യമായ നടപടികൾ അധികൃതർ സ്വീകരിക്കാത്തതാണ് ഓരോ ദിവസവും പുതിയ കടകൾ രംഗത്തു വരുന്നതിനു കാരണം. മുനിസിപ്പിൽ അധികൃതർ, പിഡബ്ല്യുഡി, പോലീസ് എന്നിവരുടെ നേതൃത്വത്തിൽ ഇതിനു മുന്പ് പലതവണ ഒഴിപ്പിക്കൽ നടത്തിയിട്ടുണ്ടെങ്കിലും ചുരുങ്ങിയ ദിവസങ്ങൾക്കുള്ളിൽ ഈ മേഖലകളിലെല്ലാം വഴിയോര കച്ചവടക്കാർ വീണ്ടും കൈയടക്കും. കാഞ്ഞിരമറ്റം -മങ്ങാട്ടുകവല ബൈപാസ്, അന്പലം ബൈപാസ്, കാരിക്കോട് -ന്യൂമാൻ കോളജ് റോഡ്, തൊടുപുഴ -വെങ്ങല്ലൂർ റോഡ് എന്നിവിടങ്ങളിലെല്ലാം വഴിയോര കച്ചവടം വ്യാപകമാണ്. കാരിക്കോട് - ന്യൂമാൻ കോളജ് റോഡിൽ ഏതാനും വർഷം മുൻപ് കെട്ടിട ഉടമകളുടെ സഹകരണത്തോടെ റോഡിനു വീതി കൂട്ടിയിരുന്നു. ഇതോടെ ഇതുവഴിയുള്ള ഗതാഗതം സുഗമമാകുകയും വ്യാപാര സ്ഥാപനങ്ങളിൽ കയറുന്നതിനും വാഹനം റോഡരികിൽ പാർക്ക് ചെയ്യുന്നതിനുള്ള സൗകര്യവും ഉണ്ടായിരുന്നു. എന്നാൽ ഇപ്പോൾ വീതി കൂട്ടിയ ഭാഗത്ത് വഴിയോര കച്ചവട വാഹനങ്ങളും ലോട്ടറി ബങ്കുകളും ഇടം പിടിച്ചു . ഇത്തരം ബങ്കുകളുടെ മുന്നിൽ വാഹനം നിർത്തുന്നവരോട് മോശമായി പെരുമാറുന്ന സംഭവങ്ങളും ഉണ്ടാകുന്നുണ്ട്. മങ്ങാട്ടുകവലയിൽ റോഡിനു വീതികൂട്ടിയ ഭാഗം മുഴുവനും ടാക്സി വാഹനങ്ങൾ പാർക്ക് ചെയ്യുന്നതിനും വഴിയോര കച്ചവടത്തിനുമായി കൈയേറിയ സാഹചര്യമാണ്. മങ്ങാട്ടുകവല ബസ് സ്റ്റാൻഡിനു മുൻഭാഗം പൂർണമായും വിവിധ വഴിയോര കച്ചവടക്കാരുടെ കൈവശമാണ്. വഴിയോര കച്ചടവടവും ഓട്ടോ സ്റ്റാൻഡുംകൂടിയായതോടെ ഇവിടം പൂർണമായും തടസപ്പെട്ട നിലയിലാണ്. ബസ് സ്റ്റാൻഡിനു മുന്നിൽ ഒരു വാഹനംപോലും നിർത്താൻ കഴിയാത്ത സ്ഥിതിയാണ്. പ്രാദേശിക രാഷ്‌ട്രീയ നേതാക്കളുടെയും ചില ജനപ്രതിനിധികളുടെയും ഒത്താശയോടെയാണ് പല ഭാഗത്തും വഴിയോര കച്ചവടം നടക്കുന്നതെന്ന ആരോപണം കാലങ്ങളായുണ്ട്. ഇതാണ് ഒഴിപ്പിച്ചാലും വീണ്ടും വഴിയോര കച്ചവടക്കാർ പാതയോരങ്ങൾ കൈയേറുന്നതിനു കാരണം. തൊടുപുഴയെ സംബന്ധിച്ച് വാഹന പാർക്കിംഗിന് ഏറെ ബുദ്ധിമുട്ടു നേരിടുന്ന നഗരമാണ്. എന്നാൽ വാഹന പാർക്കിംഗിന് അല്പം ഇടമുള്ള പാതയോരങ്ങളെല്ലാം വഴിയോരകച്ചവടക്കാരുടെ കൈവശമാണ്.

വായനദിനാചരണം ജില്ലാതല ഉദ്ഘാടനം നടത്തി

ഇടുക്കി: വായനാപക്ഷാചരണത്തിന്‍റെ ജില്ലാതല ഉദ്ഘാടനം പൈനാവ് എംആർഎസ് സ്കൂളിൽ ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാകുന്നേൽ ഉദ്ഘാടനം ചെയ്തു. ഡെപ്യൂട്ടി കളക്ടർ അതുൽ സ്വാമിനാഥൻ അധ്യക്ഷത വഹിച്ചു. ജില്ലാ ഭരണകൂടം, പബ്ലിക് റിലേഷൻസ് വകുപ്പ്, പി.എൻ. പണിക്കർ ഫൗണ്ടേഷൻ, സാക്ഷരത മിഷൻ ജില്ലാ ഓഫീസ് എന്നിവയുടെ ആഭിമുഖ്യത്തിലാണ് വായനപക്ഷാചരണം സംഘടിപ്പിച്ചത്. പി.എൻ. പണിക്കർ ഫൗണ്ടേഷൻ പ്രസിഡന്‍റ് ജോയി കാട്ടുവള്ളി പ്രതിജ്ഞ ചൊല്ലിക്കൊടുത്തു. റവ.ഡോ. മനോജ് ക്ലാസ് നയിച്ചു. ബ്ലോക്ക് പഞ്ചായത്ത് പ്രസിഡന്‍റ് ആൻസി തോമസ്, ജില്ലാ ഇൻഫർമേഷൻ ഓഫീസർ ജി.എസ്. വിനോദ്, സാക്ഷരത മിഷൻ ജില്ലാ കോ-ഓർഡിനേറ്റർ പി.എം. അബ്ദുൾ കരീം, ഐടിഡിപി പ്രോജക്ട് ഓഫീസർ ജി. അനിൽകുമാർ എന്നിവർ പ്രസംഗിച്ചു.

പ്രതിഭാ സംഗമവും അവാർഡ് വിതരണവും

തൊടുപുഴ: റൈസ് പദ്ധതിയുടെ ഭാഗമായി ഡീൻ കുര്യാക്കോസ് എംപിയുടെ നേതൃത്വത്തിൽ ഈ വർഷം എസ്എസ്എൽസി, പ്ലസ്ടു പരീക്ഷകളിൽ എല്ലാ വിഷയങ്ങൾക്കും എ പ്ലസ് നേടിയ വിദ്യാർഥികൾക്ക് അവാർഡുകൾ വിതരണം ചെയ്യും. ദേവികുളം നിയോജകമണ്ഡലത്തിൽ ഉൾപ്പെടുന്ന അടിമാലി, വെള്ളത്തൂവൽ, പള്ളിവാസൽ, മാങ്കുളം, ബൈസണ്‍വാലി, ചിന്നക്കനാൽ, മൂന്നാർ, മറയൂർ, കാന്തല്ലൂർ, വട്ടവട എന്നീ പഞ്ചായത്തുകളുടെ പരിധിയിൽവരുന്ന സിബിഎസ്ഇ ഉൾപ്പെടെയുള്ള സ്കൂളുകളിൽനിന്നുള്ള വിദ്യാർഥികൾക്കുള്ള അവാർഡ് വിതരണം നാളെ ഉച്ചകഴിഞ്ഞ് രണ്ടിന് കൂന്പൻപാറ ഫാത്തിമ മാതാ ഗേൾസ് ഹയർ സെക്കൻഡറി സ്കൂളിൽ നടക്കും. ഉടുന്പൻചോല നിയമസഭാ മണ്ഡലത്തിലുൾപ്പെടുന്ന ഇരട്ടയാർ, കരുണാപുരം, നെടുംകണ്ടം, പാന്പാടുംപാറ, രാജാക്കാട്, രാജകുമാരി, ശാന്തൻപാറ, സേനാപതി, ഉടുന്പൻചോല, വണ്ടൻമേട് പഞ്ചായത്തുകളിലെ കുട്ടികൾക്കുള്ള അവാർഡ് വിതരണം 22നു രാവിലെ 10ന് നെടുങ്കണ്ടം ഗവ. ഹയർ സെക്കൻഡറി സ്കൂളിലും പീരുമേട് നിയമസഭാ മണ്ഡലത്തിലുൾപ്പെടുന്ന ഏലപ്പാറ, കൊക്കയാർ, കുമളി, പീരുമേട്, പെരുവന്താനം, ഉപ്പുതറ, വണ്ടിപ്പെരിയാർ, അയ്യപ്പൻകോവിൽ, ചക്കുപള്ളം പഞ്ചായത്തുകളുടെ പരിധിയിൽ വരുന്ന കുട്ടികൾക്കുള്ള മെരിറ്റ് അവാർഡ് വിതരണം 22ന് ഉച്ചകഴിഞ്ഞ് രണ്ടിന് പീരുമേട് മരിയഗിരി ഇംഗ്ലീഷ് മീഡിയം സ്കൂളിലും നടക്കും. കുട്ടികൾക്ക് എത്തിച്ചേരാനാവാത്ത സാഹചര്യത്തിൽ രക്ഷിതാക്കൾക്ക് അവാർഡ് കൈപ്പറ്റാമെന്ന് എംപി അറിയിച്ചു.

പോക്സോ ആക്ട്: സ്കൂളുകളിൽ പ്രചാരണ പദ്ധതിക്ക് ഇന്നു തുടക്കം

തൊടുപുഴ: ജില്ലാ ലീഗൽ സർവീസസ് അഥോറിട്ടിയുടെ നേതൃത്വത്തിൽ വിദ്യാഭ്യാസ വകുപ്പ്, വനിതാ ശിശു വികസന വകുപ്പ് എന്നിവയുടെ സഹകരണത്തോടെ ജില്ലയിലെ മുഴുവൻ സ്കൂളുകളിലും പോക്സോ ആക്ട്-2012ന്‍റെ കോപ്പികൾ വിതരണം ചെയ്യുന്നതിന്‍റെ ജില്ലാ തല ഉദ്ഘാടനം ഇന്നു രാവിലെ 9.30ന് കുമാരമംഗലം വില്ലേജ് ഇന്‍റർനാഷണൽ സ്കൂളിൽ നടക്കുമെന്ന് തൊടുപുഴ കുടുംബകോടതി ജഡ്ജി ജോഷി ജോണ്‍, എൻഡിപിഎസ് കോടതി ജഡ്ജി പി.കെ. ജയകൃഷ്ണൻ, ജില്ലാ ലീഗൽ സർവീസസ് അഥോറിറ്റി സെക്രട്ടറി എൻ.എൻ. സിജി എന്നിവർ പത്രസമ്മേളനത്തിൽ അറിയിച്ചു. ചൈൽഡ് സേഫ് ഇടുക്കി-2025 എന്ന പേരിലാണ് പദ്ധതി നടപ്പാക്കുന്നത്. രാജ്യത്ത് ആദ്യമായാണ് ഇത്തരത്തിലുള്ള പദ്ധതി നടപ്പാക്കുന്നതെന്നും അധികൃതർ പറഞ്ഞു. ജില്ലയിലെ എൽപി, യുപി, എച്ച്എസ്, എച്ച്എസ്എസ് സ്കൂളുകളിലായി 500 കോപ്പികൾ വിതരണം ചെയ്യും. ജില്ലാ ജഡ്ജി ആഷ് കെ. ബാൽ അധ്യക്ഷത വഹിക്കും. പ്രിൻസിപ്പൽ ജില്ലാ ജഡ്ജി പി.എസ്. ശശികുമാർ ഉദ്ഘാടനം ചെയ്യും. ജില്ലാ കളക്ടർ വി. വിഗ്നേശ്വരി മുഖ്യപ്രഭാഷണം നടത്തും. ജില്ലാ പോലീസ് മേധാവി ടി.കെ. വിഷ്ണുപ്രദീപ് സന്ദേശം നൽകും. ചടങ്ങിൽ ചൈൽഡ് വെൽഫയർ കമ്മിറ്റി ചെയർമാൻ ജയശീലൻ പോൾ പോക്സോ ആക്ട് കോപ്പി തൊടുപുഴ ഡിഇഒ ഷീബ മുഹമ്മദിന് കൈമാറും. തൊടുപുഴ ചീഫ് ജുഡീഷ്യൽ മജിസ്ട്രേറ്റ് സിന്ധു തങ്കം, ജില്ലാ ഗവ. പ്ലീഡർ അഡ്വ. എസ്.എസ്. അനീഷ്, പോക്സോ കോടതി പബ്ലിക് പ്രോസിക്യൂട്ടർ പി.വി. വാഹിദ, ജില്ലാ ശിശുക്ഷേമസമിതി ഓഫീസർ പി.ജി. മഞ്ജു എന്നിവർ പ്രസംഗിക്കും. ഡിഎൽഎസ്എ സെക്രട്ടറി എൻ.എൻ. സിജി സ്വാഗതവും വില്ലേജ് ഇന്‍റർനാഷണൽ സ്കൂൾ പ്രിൻസിപ്പൽ സജി വർഗീസ് നന്ദിയും പറയും. പദ്ധതിയുടെ ആദ്യ ഘട്ടമായി അധ്യാപകർക്ക് പോക്സോ നിയമത്തെ സംബന്ധിച്ച് വ്യക്തമായ ധാരണയുണ്ടാക്കുന്നതിനാണ് എല്ലാ സ്കൂളുകളിലും കോപ്പികൾ വിതരണം ചെയ്യുന്നത്. പദ്ധതിയുടെ രണ്ടാം ഘട്ടമായി സ്കൂളുകളിൽ പോക്സോ നിയമത്തെ സംബന്ധിച്ച ബോധവത്കരണ ക്ലാസുകളും ജില്ലാ ലീഗൽ സർവീസസ് അഥോറിറ്റിയുടെ നേതൃത്വത്തിൽ നടത്തുമെന്നും അധികൃതർ അറിയിച്ചു.

നാല് വില്ലേജ് ഓഫീസുകൾകൂടി സ്മാർട്ടാകുന്നു

ഇടുക്കി: ജില്ലയിലെ നാല് വില്ലേജ് ഓഫീസുകൾകൂടി സ്മാർട്ടാകുന്നു. വില്ലേജ് ഓഫീസുകളുടെ കെട്ടിട നിർമാണ ഉദ്ഘാടനം മന്ത്രി കെ. രാജൻ ഇന്ന് വൈകുന്നേരം മൂന്നിന് ഓണ്‍ലൈനായി നിർവഹിക്കും. പാന്പാടുംപാറ, കുടയത്തൂർ, കരിമണ്ണൂർ, പള്ളിവാസൽ വില്ലേജ് ഓഫീസുകളാണ് സ്മാർട്ട് വില്ലേജ് ഓഫീസുകളായി മാറുന്നത്. സ്പെഷൽ അസിസ്റ്റൻസ് ടു സ്റ്റേറ്റ് ഫോർ ക്യാപ്പിറ്റൽ ഇൻവെസ്റ്റ്മെന്‍റ് പദ്ധതി പ്രകാരം നിർമിക്കുന്ന കെട്ടിടങ്ങളുടെ നിർമാണ നിർവഹണ ഏജൻസി പൊതുമരാമത്ത് വകുപ്പാണ്. ഓരോ കെട്ടിടത്തിനും 45 ലക്ഷം വീതം 1.8 കോടി ചെലവിട്ടാണ് സ്മാർട്ട് വില്ലേജ് ഓഫീസുകൾ യാഥാർഥ്യമാക്കുന്നത്. കുടയത്തൂർ സഹകരണ ബാങ്ക് ഓഡിറ്റോറിയത്തിൽ നടക്കുന്ന കുടയത്തൂർ സ്മാർട്ട് വില്ലേജ് ഓഫീസ് കെട്ടിട നിർമാണ ഉദ്ഘാടന ചടങ്ങിൽ മന്ത്രി റോഷി അഗസ്റ്റിൻ അധ്യക്ഷത വഹിക്കും. ബ്ലോക്ക് പഞ്ചായത്ത് പ്രസിഡന്‍റ് ടോമി കാവാലം, പഞ്ചായത്ത് പ്രസിഡന്‍റ് കെ.എൻ. ഷിയാസ്, ജില്ലാ പഞ്ചായത്തംഗം പ്രഫ. എം.ജെ. ജേക്കബ്, ബ്ലോക്ക് പഞ്ചായത്തംഗം മിനി ആന്‍റണി, ഇടുക്കി സബ് കളക്ടർ അനൂപ് ഗാർഗ് എന്നിവർ പ്രസംഗിക്കും. പാന്പാടുംപാറ സ്മാർട്ട് വില്ലേജ് ഓഫീസ് കെട്ടിട നിർമാണ ഉദ്ഘാടനം മുണ്ടിയെരുമ പഞ്ചായത്ത് കമ്യൂണിറ്റി ഹാളിൽ നടക്കും. എം.എം. മണി എംഎൽഎ അധ്യക്ഷത വഹിക്കും. ബ്ലോക്ക് പഞ്ചായത്ത് പ്രസിഡന്‍റ് കെ.ടി. കുഞ്ഞ്, വൈസ് പ്രസിഡന്‍റ് ശ്രീദേവി എസ്. ലാൽ, പഞ്ചായത്ത് പ്രസിഡന്‍റ് ജോസ് ജോസഫ്, വൈസ് പ്രസിഡന്‍റ് സരിതാ രാജേഷ്, ജില്ലാ പഞ്ചായത്തംഗം ജിജി കെ. ഫിലിപ്പ് എന്നിവർ പ്രസംഗിക്കും. പള്ളിവാസൽ പഞ്ചായത്ത് ഓഡിറ്റോറിയത്തിൽ നടക്കുന്ന ചടങ്ങിൽ എ. രാജ എംഎൽഎ അധ്യക്ഷത വഹിക്കും. ബ്ലോക്ക് പഞ്ചായത്ത് പ്രസിഡന്‍റ് സോമൻ ചെല്ലപ്പൻ, പഞ്ചായത്ത് പ്രസിഡന്‍റ് വി.ജി. പ്രതീഷ്കുമാർ, ജില്ലാ പഞ്ചായത്തംഗം ഭവ്യ കണ്ണൻ, അടിമാലി ബ്ലോക്ക് പഞ്ചായത്തംഗം മിനി ലാലു എന്നിവർ പ്രസംഗിക്കും. കരിമണ്ണൂർ പഞ്ചായത്ത് കമ്യൂണിറ്റി ഹാളിൽ നടക്കുന്ന ചടങ്ങിൽ പി.ജെ. ജോസഫ് എംഎൽഎ അധ്യക്ഷത വഹിക്കും. ബ്ലോക്ക് പഞ്ചായത്ത് പ്രസിഡന്‍റ് ടോമി കാവാലം, പഞ്ചായത്ത് പ്രസിഡന്‍റ് നിസാമോൾ ഷാജി, ജില്ലാ പഞ്ചായത്തംഗം ഇന്ദു സുധാകരൻ, പഞ്ചായത്തംഗം ജീസ് ആയത്തുപാടം എന്നിവർ പ്രസംഗിക്കും.

രാഹുൽ ഗാന്ധിയുടെ ജൻമദിനത്തിൽ രക്തദാനവുമായി ഡിസിസി

തൊടുപുഴ: രാഹുൽ ഗാന്ധിയുടെ ജൻമദിനത്തിൽ രക്തദാനം നടത്തി ഡിസിസി പ്രസിഡന്‍റ് സി.പി. മാത്യു ഉദ്ഘാടനം ചെയ്തു. രാഹുൽ ഗാന്ധിയുടെ ജൻമദിനത്തിൽ തുടക്കം കുറിച്ച രക്തദാനം തുടർന്ന് നടത്തുന്നതിന് രക്തദാനസേനയ്ക്ക് ജില്ലാ തലത്തിൽ രൂപം നൽകുമെന്ന് അദ്ദേഹം പറഞ്ഞു. അൽ അസർ മെഡിക്കൽ കോളേജ് ചീഫ് ഓപ്പറേറ്റിംഗ് ഓഫീസർ സുധീർ ഭാസുരി അധ്യക്ഷത വഹിച്ചു. ടി.ജെ. പീറ്റർ, ജോസ് അഗസ്റ്റിൻ, എം.എച്ച്. സജീവ്, ഷാനു ഷാഹുൽ, എബി മുണ്ടയ്ക്കൽ എന്നിവർ പ്രസംഗിച്ചു.

പെരിയാർ കടുവ സങ്കേതത്തിൽ ഉഭയ-ഉരഗജീവി സർവേ പൂർത്തിയായി

കുമളി: പശ്ചിമഘട്ടത്തിലെ പ്രധാന ജൈവവൈവിധ്യ ഹോട്സ്പോട്ടുകളിലൊന്നായ പെരിയാർ കടുവ സങ്കേതത്തിൽ ആദ്യഘട്ട ഉഭയ-ഉരഗജീവി സർവേയിൽ 149 ഇനങ്ങൾ രേഖപ്പെടുത്തി. ഏഴു മുതൽ 10 വരെ പെരിയാർ ടൈഗർ കണ്‍സർവേഷൻ ഫൗണ്ടേഷനും ആരണ്യകം നേച്ചർ ഫൗണ്ടേഷനും ചേർന്ന് സർവേ നടത്തിയത്. സർവേയിൽ 67 ഉഭയജീവി ഇനങ്ങളെയും 82 ഉരഗജീവി ഇനങ്ങളെയുമാണ് കണ്ടെത്തിയത്. വിവിധ ആവാസവ്യവസ്ഥകളെ പ്രതിനിധികരിക്കുന്ന 21 സ്ഥലങ്ങളിലാണ് സർവേ നടന്നത്. സർവേയിൽ കേരളത്തിലെ പ്രമുഖ വിദ്യാഭ്യാസ, ഗവേഷണ സ്ഥാപനങ്ങളായ കാലിക്കറ്റ് യൂണിവേഴ്സിറ്റി, കണ്ണൂർ യൂണിവേഴ്സിറ്റി, കേരള ഫോറസ്റ്റ് റിസർച് ഇൻസ്റ്റിറ്റ്യൂട്ട്, ഏട്രീ-ബാംഗ്ലൂർ തുടങ്ങിയവരും മലബാർ നാച്വുറൽ ഹിസ്റ്ററി സൊസൈറ്റി, സർപ്പ, സ്നേക്ക്പീഡിയ തുടങ്ങിയ പ്രാദേശിക സംഘടനകളെ പ്രതിനിധീകരിച്ച് 73 വോളണ്ടിയർമാരും പങ്കെടുത്തു. പെരിയാർ കടുവ സങ്കേതം അസി. ഫീൽഡ് ഡയറക്ടർ ആർ. ലക്ഷ്മി, പെരിയാർ വെസ്റ്റ് ഡിവിഷൻ ഡെപ്യൂട്ടി ഡയറക്ടർ എസ്. സന്ദീപ് എന്നിവർ ചേർന്ന് സർവേ ഉദ്ഘാടനം ചെയ്തു. ചടങ്ങിൽ തേക്കടി റേഞ്ച് ഫോറസ്റ്റ് ഓഫീസർ കെ.ഇ. സിബി, വള്ളക്കടവ് റേഞ്ച് ഫോറസ്റ്റ് ഓഫീസർ അരുണ്‍ കെ. നായർ, റിസർച്ച് റേഞ്ച് ഫോറസ്റ്റ് ഓഫീസർ ലിബിൻ ജോണ്‍, ഫ്ലയിംഗ് സ്ക്വാഡ് റേഞ്ച് ഫോറസ്റ്റ് ഓഫീസർ പ്രിയ ടി. ജോസഫ്, കണ്‍സർവേഷൻ ബയോളജിസ്റ്റ്മാരായ രമേശ്ബാബു, ആൽബി ജെ. മറ്റത്തിൽ, നേച്ചർ എഡ്യൂക്കേഷൻ ഓഫീസർ സേതുപാർവതി തുടങ്ങിയവർ പങ്കെടുത്തു. ഡോ. സന്ദീപ്ദാസ്, ഡോ. രാജ്കുമാർ എന്നിവർ നയിച്ച സർവേയിൽ നിരവധി അപൂർവ ഇനങ്ങളെ കണ്ടെത്തി. ചൂരലാമ എന്ന കെയിൻ ടർട്ടിൽ, കാട്ടാമ എന്ന ട്രാവൻകൂർ ടോർട്ടോയിസ്, ഷോർട്ട് ടെയ്ൽഡ് കുക്രി എന്ന കുട്ടിവാലൻ ചുരുട്ട എന്നിവ ഉൾപ്പെടെ ഐയുസിഎൻ ചുവപ്പുപട്ടികയിൽപ്പെടുന്ന 12 ഇനങ്ങളെ രേഖപ്പെടുത്തി. മുൻ സർവേകളിൽ രേഖപ്പെടുത്താത്ത ഡറെലി കുറിമൂക്കൻ, കേരള ചാട്ടക്കാരൻ, ജലധാര ചാട്ടക്കാരൻ, തുടങ്ങിയ അഞ്ചിനം ഉഭയജീവികളും റാഷിദി പല്ലി, മേഘമല ദ്രാവിഡഗെക്കോ തുടങ്ങിയ മൂന്നിനം ഉരഗങ്ങളെയും അടക്കം എട്ടിനങ്ങളെ പെരിയാർ കടുവ സങ്കേതത്തിന്‍റെ ഉഭയ - ഉരഗജീവി പട്ടികയിലേക്ക് അധികമായി ചേർത്തു. സർവേയിൽ രേഖപ്പെടുത്തിയ അറുപത്തിയേഴിൽ അൻപത്തിമൂന്നും (എണ്‍പത് ശതമാനം ഉഭയജീവികളും) ലോകത്തിൽ പശ്ചിമഘട്ടത്തിൽമാത്രം കാണപ്പെടുന്നവയാണെന്നത് പെരിയാറിന്‍റെ ഉഭയജീവി വൈവിധ്യത്തിന്‍റെ പ്രത്യേകതകൂടിയാണെന്ന് ഡോ. സന്ദീപ്ദാസ് പറഞ്ഞു.

വാഴത്തോപ്പ് സെന്‍റ് ജോർജ് ഹയർസെക്കൻഡറിയിൽ എക്സലൻസ് മീറ്റ്

ചെറുതോണി: വാഴത്തോപ്പ് സെന്‍റ് ജോർജ് ഹയർ സെക്കൻഡറി സ്കൂളിൽ എക്സലൻസ് മീറ്റ് നടത്തി. ഇടുക്കി രൂപത വിദ്യാഭ്യാസ സെക്രട്ടറി റവ.ഡോ. ജോർജ് തകടിയേൽ എക്സലൻസ് മീറ്റ് ഉദ്ഘാടനം ചെയ്തു. സ്കൂൾ മാനേജർ ഫാ. ലൂക്ക് ആനിക്കുഴിക്കാട്ടിൽ അധ്യക്ഷത വഹിച്ചു. ഉന്നത വിജയം കൈവരിച്ച വിദ്യാർഥികളെയും നീറ്റ് പരീക്ഷയിലെ റാങ്ക് ജേതാക്കളെയും അഡ്വ. ഡീൻ കുര്യാക്കോസ് എംപി ആദരിച്ചു. സ്കൂൾ പ്രിൻസിപ്പൽ ജിജോ ജോർജ്, പഞ്ചായത്തംഗം ആലീസ് ജോസ്, പിടിഎ പ്രസിഡന്‍റ് ജോളി ജോൺ, അസി. മാനേജർ ഫാ. ജോയൽ വള്ളിക്കാട്ട്, എംപിടിഎ പ്രസിഡന്‍റ് സോണിയ ബിനോജ്, സ്കൂൾ ഹെഡ്മിസ്ട്രസ് അർച്ചന തോമസ്, സീനിയർ അസിസ്റ്റന്‍റ് റീന ചെറിയാൻ എന്നിവർ പ്രസംഗിച്ചു.

വന്യജീവിശല്യം; കെഎസ്‌സി വിദ്യാർഥികളുടെ ഫോറസ്റ്റ് സ്റ്റഷൻ മാർച്ചും ഉപരോധവും നാളെ

ചെറുതോണി: വന്യമൃഗശല്യത്താൽ വിദ്യാർഥികളുടെ പഠനം മുടങ്ങുന്നതിൽ നടപടി സ്വീകരിക്കുക, മലയോര മേഖലയിലെ ഭാവി തലമുറയെ ഇല്ലാതാക്കുന്ന സർക്കാർ നയങ്ങൾ തിരുത്തുക, വിവിധ കാരണങ്ങളാൽ വിദ്യാഭ്യാസ വായ്പകൾ തടയുന്ന ബാങ്കുകളുടെ നയങ്ങൾ തിരുത്തുവാൻ സർക്കാർ ഇടപെടുക തുടങ്ങിയ ആവശ്യങ്ങളുന്നയിച്ച് കെഎസ്‌സി ജില്ലാക്കമ്മിറ്റിയുടെ നേതൃത്വത്തിൽ നാളെ ചെറുതോണി നഗരംപാറ ഫോറസ്റ്റ് ഓഫീസിലേക്ക് വിദ്യാർഥികൾ മാർച്ചും ഉപരോധവും നടത്തുമെന്ന് ജില്ലാ പ്രസിഡന്‍റ് തോമസ് അലക്സ് പൗവ്വത്ത് അറിയിച്ചു. രാവിലെ 11ന് ചെറുതോണിയിലെ കേരള കോൺഗ്രസ് ഓഫീസ്പടിക്കൽനിന്ന് പ്രതിഷേധ മാർച്ച് ആരംഭിക്കും. കേരള കോൺഗ്രസ് ജില്ലാ പ്രസിഡന്‍റ് പ്രഫ. എം.ജെ. ജേക്കബ് ഉപരോധ സമരം ഉദ്ഘാടനം ചെയ്യും. കെഎസ്‌സി ജില്ലാ പ്രസിഡന്‍റ് തോമസ് അലക്സ് അധ്യക്ഷത വഹിക്കും. കെഎസ്‌സി സംസ്ഥാന പ്രസിഡന്‍റ് ജോൺസ് ജോർജ് മുഖ്യപ്രഭാഷണം നടത്തും. കെഎസ്‌സി നേതാക്കളായ ജെൻസ് എൻ. ജോസ്, സ്റ്റീഫൻ പ്ലാക്കുട്ടത്തിൽ, അരവിന്ദ് ജോൺ , ആൽബിൻ ആൻഡ്രൂസ്, ജോർജ് മാത്യു, കേരള കോൺഗ്രസ് നേതാക്കളായ നോബിൾ ജോസഫ്, വർഗീസ് വെട്ടിയാങ്കൽ, ജോയി കൊച്ചു കരോട്ട് തുടങ്ങിയവർ പ്രസംഗിക്കും.

ഹെൽത്ത് സ്ക്വാഡ് പരിശോധന നടത്തി

തൊടുപുഴ: നഗരത്തിലെ ഹോട്ടലുകളിൽ ഹെൽത്ത് സ്ക്വാഡ് മിന്നൽ പരിശോധന നടത്തി. പരാതിയുടെ അടിസ്ഥാനത്തിലാണ് തൊടുപുഴ നഗരസഭ ഹെൽത്ത് സ്ക്വാഡിന്‍റെ നേതൃത്വത്തിൽ തൊടുപുഴയിലെ വിവിധ പ്രദേശങ്ങളിൽ പരിശോധന നടത്തിയത്. പല സ്ഥാപങ്ങളിലും ഭക്ഷണം പാചകം ചെയ്യുന്നവർ ഹെയർ ക്യാപ് ധരിച്ചിട്ടില്ലെന്നും ഫ്രിഡ്ജിൽ സൂക്ഷിച്ചിരിക്കുന്ന ഭക്ഷണ സാധനങ്ങളിൽ തിയതി കൃത്യമായി രേഖപ്പെടുത്താതും അടുക്കളയുടെ പരിസരം വൃത്തിയില്ലാതെ സൂക്ഷിക്കുന്നതായും കണ്ടെത്തി. ഇവർക്ക് നോട്ടീസ് നൽകി. പഴകിയ മാംസം മീറ്റ് സ്റ്റാളുകളിൽ വില്പന നടത്തുന്നുണ്ടോ എന്നറിയുന്നതിനായി മങ്ങാട്ടുകവല, മുതലക്കോടം എന്നിവിടങ്ങളിലുള്ള സ്റ്റാളുകളിൽ പരിശോധന നടത്തി. നഗരസഭാ ചെയർമാൻ കെ. ദീപക് സെക്രട്ടറി ബിജു ജേക്കബ് എന്നിവരുടെ നിർദേശ പ്രകാരം സീനിയർ ഹെൽത്ത് ഇൻസ്പെക്ടർ മാരായ ബിജോ മാത്യു, ജി.എസ്. ദേവസേനൻ, പബ്ലിക് ഹെൽത്ത് ഇൻസ്പെക്ടർമാരായ വി.പി. സതീശൻ, പി.വി. ദീപ എന്നിവരാണ് പരിശോധന നടത്തിയത്.

ആറു മാസത്തിനിടെ നായ്ക്കൾ ആക്രമിച്ചത് 3379 പേരെ

തൊടുപുഴ: ജില്ലയിൽ തെരുവുനായകളുടെ കടിയേൽക്കുന്നവരുടെ എണ്ണം അനിയന്ത്രിതമായി വർധിക്കുന്പോഴും ഇക്കാര്യത്തിൽ നടപടിയെടുക്കാതെ അധികൃതർ. കുട്ടികളാണ് തെരുവു നായ്ക്കളുടെ ആക്രമണത്തിൽ കൂടുതലും ഇരകളാകുന്നത്. പല നഗരത്തിലും നൂറുകണക്കിന് നായ്ക്കളാണ് ചുറ്റിത്തിരിയുന്നത്. ഭീതിയോടെയാണ് ഇപ്പോൾ ജനങ്ങൾ നിരത്തുകളിലൂടെ സഞ്ചരിക്കുന്നത്. സംസ്ഥാനത്ത് തെരുവു നായ്ക്കളുടെ ആക്രമണം കൂടുകയും പേ വിഷബാധയേറ്റുള്ള മരണങ്ങൾ റിപ്പോർട്ട് ചെയ്യപ്പെടുകയും ചെയ്തതോടെയാണ് ജനങ്ങൾ അതീവ ഭീതിയിലായത്. അലഞ്ഞുതിരിയുന്ന നായ്ക്കളെ പിടികൂടി വന്ധ്യംകരണം നടത്തി വംശവർധന കുറയ്ക്കാൻ വിഭാവനം ചെയ്ത എബിസി സെന്‍റർ നിർമാണവും എങ്ങുമെത്തിയില്ല. മൂന്നാറിൽ ഇന്നലെ കുട്ടികൾക്കു നേരേ തെരുവു നായ്ക്കളുടെ ആക്രമണമുണ്ടായി. ദേവികുളം തമിഴ് ഹയർസെക്കൻഡറി സ്കൂളിലെ ആറു കുട്ടികളെയാണ് തെരുവുനായ ആക്രമിച്ച് പരിക്കേൽപ്പിച്ചത്. കുട്ടികൾ ഇന്നലെ രാവിലെ സ്കൂളിലേക്ക് വരുന്നവഴിയാണ് നായ ആക്രമിച്ചത്. രണ്ടാഴ്ച മുന്പ് മൂന്നാർ മേഖലയിൽ വിനോദ സഞ്ചാരികളടക്കം 16 പേർക്ക് തെരുവുനായ്ക്കളുടെ കടിയേറ്റിരുന്നു. ഏതാനും മാസം മുന്പ് വണ്ടിപ്പെരിയാറ്റിൽ രണ്ടു കുട്ടികൾക്ക് തെരുവു നായയുടെ കടിയേറ്റിരുന്നു. അരണക്കൽ എസ്റ്റേറ്റ് സ്വദേശികളുടെ മക്കൾക്കാണ് നായയുടെ കടിയേറ്റത്. കുട്ടികൾ കളിക്കുന്നതിനിടെയാണ് തെരുവു നായ ഓടിയെത്തി കടിച്ചത്. ഇന്നലെ മാത്രം ജില്ലയിൽ 29 പേർക്ക് നായ്ക്കളുടെ കടിയേറ്റതായാണ് കണക്ക്. ഈ മാസം 333 പേർ നായ്ക്കളുടെ ആക്രമണത്തിനിരയായി ചികിൽസ തേടി. ഈ വർഷം ജനുവരി മുതൽ ജൂണ്‍ വരെ 3379 പേരാണ് നായ്ക്കളുടെ കടിയേറ്റ് ചികിൽസ തേടിയത്. നായ്ക്കളുടെ ആക്രമണത്തിനിരയാകുന്നവരുടെ എണ്ണം ഇത്രയും ഭീതിജനകമായി വർധിച്ചിട്ടും ഇവയുടെ നിയന്ത്രണത്തിൽ അധികൃതർ മെല്ലെപ്പോക്ക് കാട്ടുന്നത് ജനങ്ങൾക്കിടയിൽ കടുത്ത പ്രതിഷേധത്തിനിടയാക്കിയിട്ടുണ്ട്. തെരുവു നായ്ക്കളുടെ ശല്യം ക്രമാതീതമായി കൂടുന്പോഴും ആരോട് പരാതി പറയുമെന്നാണ് ജനങ്ങളുടെ ചോദ്യം. നേരത്തെ നായ്ക്കളെ കൊല്ലാൻ തദ്ദേശ സ്ഥാപനങ്ങൾക്ക് അനുമതിയുണ്ടായിരുന്നു. എന്നാൽ മൃഗങ്ങളോടുള്ള ക്രൂരത തടയൽ നിയമ പ്രകാരം ഇതിനു തടയിട്ടു. നിലവിൽ തെരുവുനായ്ക്കളെ കൊല്ലാൻ നിയമം അനുവദിക്കുന്നില്ല. ഇതാണ് തെരുവു നായ്ക്കളുടെ എണ്ണം വൻതോതിൽ വർധിയ്ക്കാൻ കാരണം. ജില്ലയിൽ നഗര, ഗ്രാമീണ മേഖലകൾ കൂടാതെ വിനോദ സഞ്ചാര കേന്ദ്രങ്ങളിലും തെരുവു നായകളുടെ ശല്യം അനിയന്ത്രിതമാണ്. പല പഞ്ചായത്തുകളുടെയും നിരത്തുകളിൽ നായ്ശല്യം വർധിക്കുന്പോൾ നാട്ടുകാർ അധികൃതരുടെ ശ്രദ്ധയിൽ ഇക്കാര്യം കൊണ്ടു വരുമെങ്കിലും തങ്ങൾ നിസഹായരാണെന്നു പറഞ്ഞ് ഇവർ കൈയൊഴിയും. തെരുവു നായ നിയന്ത്രണത്തിന് ജില്ലയിൽ ഒരു നടപടിയും ഉണ്ടാകാത്തതാണ് ഇവ പെരുകാൻ കാരണമെന്നാണ് ആക്ഷേപം. 2022-ൽ തദ്ദേശ സ്ഥാപനങ്ങളുടെ ഫണ്ട് ഉപയോഗിച്ച് നായ്ക്കളുടെ ആനിമൽ ബർത്ത് കണ്‍ട്രോൾ പ്രകാരം വന്ധ്യംകരണ പദ്ധതി നടപ്പാക്കാൻ ലക്ഷ്യമിട്ടിരുന്നു. ഇതിനായി എല്ലാ തദ്ദേശ സ്ഥാപനങ്ങളിലും എബിസി സെന്‍റർ ഒരുക്കാനായിരുന്നു നിർദേശം. എന്നാൽ പദ്ധതി നടപ്പാകാത്തതിനാൽ രണ്ട് ബ്ലോക്കുകൾക്കായി ഒരു എബിസി സെന്‍റർ തുടങ്ങാൻ ലക്ഷ്യമിട്ടെങ്കിലും പ്രാദേശിക എതിർപ്പു മൂലം പദ്ധതി പാളി. പിന്നീടാണ് ത്രിതല പഞ്ചായത്തുകളുടെ ഫണ്ട് വിനിയോഗിച്ച് ജില്ലാ ആസ്ഥാനത്ത് ജില്ലാ പഞ്ചായത്തിന്‍റെ നേതൃത്വത്തിൽ എബിസി സെന്‍റർ നിർമിക്കാൻ തീരുമാനിച്ചത്. കുയിലിമലയിൽ ജില്ലാ പഞ്ചായത്ത് വിട്ടു നൽകിയ അരയേക്കർ സ്ഥലത്താണ് നായ്ക്കളുടെ വന്ധ്യംകരണത്തിനും മറ്റുമായുള്ള എബിസി സെന്‍റർ നിർമിക്കുന്നത്. ഇതിനായി മൂന്നര കോടിയാണ് വകയിരുത്തിയിരിക്കുന്നത്. എന്നാൽ പദ്ധതി ഇപ്പോഴും പ്രാരംഭ ഘട്ടത്തിൽത്തന്നെ നിൽക്കുകയാണ്. സംസ്ഥാനത്ത് എബിസി സെന്‍റർ ഇല്ലാത്ത ഏക ജില്ലയാണ് ഇടുക്കി. പദ്ധതി വേഗത്തിലാക്കും: ജില്ലാ പഞ്ചായത്ത് പ്രസിഡന്‍റ് കുയിലിമലയിൽ എബിസി സെന്‍ററിന്‍റെ പ്രവർത്തനങ്ങളുമായി ജില്ലാ പഞ്ചായത്ത് മുന്നോട്ട് പോകുകയാണെന്ന് പ്രസിഡന്‍റ് രാരിച്ചൻ നീറണാക്കുന്നേൽ പറഞ്ഞു. മൂന്നരക്കോടിയുടെ പദ്ധതിയാണ് വിഭാവനം ചെയ്തിരിക്കുന്നത്. ജില്ലാ പഞ്ചായത്തിന്‍റെ മേൽനോട്ടത്തിൽ കുയിലിമലയിൽ സ്ഥലം കണ്ടെത്തിയാണ് പദ്ധതി നടപ്പാക്കുന്നത്. 52 പഞ്ചായത്തുകൾ, രണ്ട് മുനിസിപ്പാലിറ്റി, ബ്ലോക്ക് പഞ്ചായത്തുകൾ എന്നിവരുടെ ഫണ്ടുകൾ ഉൾപ്പെടുത്തിയാണ് സെന്‍ററിന്‍റെ നിർമാണം. സെന്‍റർ സ്ഥാപിക്കുന്നതിനായുള്ള നടപടികൾ വേഗത്തിലായിട്ടുണ്ടെന്നും ജില്ലാ പഞ്ചായത്ത് പ്രസിഡന്‍റ് പറഞ്ഞു.

ഓട മണ്ണിട്ട് നികത്തി മലിന ജലം കിണറിലേക്ക് ഒഴുക്കുന്നെന്ന് പരാതി

ചെറുതോണി: സ്വകാര്യവ്യക്തി റോഡിന്‍റെ ഐറിഷ് ഓട മണ്ണിട്ട് നികത്തി മഴ വെള്ളം കുടിവെള്ള സ്രോതസിലേക്ക് ഒഴുക്കുന്നെന്ന് പരാതി. വാഴത്തോപ്പ് പഞ്ചായത്തിൽ ലക്ഷംകവല - ഭൂമിയാംകുളം - മുളകുവള്ളി റോഡിലെ ഐറിഷ് ഓടയാണ് സ്വകാര്യ വ്യക്തി മണ്ണിട്ട് നികത്തിയതായി പറയുന്നത്. ഓടയിലൂടെ ഒഴുകിയെത്തുന്ന മഴവെള്ളം റോഡിന് കുറുകെ നിർമിച്ചിരിക്കുന്ന കലുങ്കിലൂടെ തോട്ടിലേക്ക് ചേരുന്നതാണ് ഇവിടെ തടഞ്ഞിരിക്കുന്നത്. റോഡിലൂടെ ഒഴുകുന്ന മലിനജലം നിരവധി ആളുകൾ കുടിവെള്ളം ശേഖരിക്കുന്ന പഞ്ചായത്ത് നിർമിച്ചിരിക്കുന്ന കുടിവെള്ള സ്രോതസിൽ കലരുന്നതായും നാട്ടുകാർ ആരോപിച്ചു. റോഡിന്‍റെ ഇരു വശത്തും മണ്ണിട്ട്, വെള്ളം തോട്ടിലേക്ക് ഒഴുകുന്നത് തടസപ്പെടുത്തിയിരിക്കുന്നതിനാൽ വെള്ളം റോഡിലൂടെ ഒഴുകി റോഡ് തകരുന്നതായും പരാതിയുണ്ട്. ഇതു സംബന്ധിച്ച് നൂറിലധികം പ്രദേശവാസികൾ ഒപ്പിട്ട പരാതി ജില്ലാ കളക്ടർക്ക് നൽകിയിട്ട് ആഴ്ചകൾ കഴിഞ്ഞിട്ടും നടപടിയുണ്ടായില്ലെന്ന് നാട്ടുകാർ ആരോപിച്ചു. കാലവർഷം കൂടുതൽ ശക്തമാകുന്നതോടെ വെള്ളം കുത്തിയൊഴുകി റോഡ് പൂർണമായും തകരുന്ന അവസ്ഥയാണ്. എത്രയും വേഗം അധികൃതർ പ്രശ്നത്തിന് പരിഹാരം കാണണമെന്ന് നാട്ടുകാർ ആവശ്യപ്പെട്ടു.

മഴയ്ക്കൊപ്പം കനത്ത മൂടല്‍മഞ്ഞും വാഹന യാത്രക്കാർ ശ്രദ്ധിക്കണമെന്ന് അധികൃതർ

രാജാക്കാട്: കാലവര്‍ഷം ശക്തമായതോടെ മഴയ്ക്കൊപ്പം ഹൈറേഞ്ചില്‍ കനത്ത മൂടല്‍ മഞ്ഞും. കൊച്ചി - ധനുഷ്കോടി ദേശീയപാതയിലെ മൂന്നാര്‍ മുതല്‍ ബോഡിമെട്ട് വരെയുള്ള ഭാഗത്തുകൂടി യാത്രചെയ്യുന്നവർ ജാഗ്രത പുലർത്തണമെന്ന് മോട്ടോര്‍ വാഹന വകുപ്പ് അധികൃതർ അറിയിച്ചു. ദേശീയപാതയിലെ മൂന്നാര്‍ മുതല്‍ ബോഡിമെട്ട് വരെയുള്ള ഭാഗത്താണ് എതിരേ വരുന്ന വാഹനങ്ങള്‍ കാണാന്‍ പോലും കഴിയാത്ത വിധം മഞ്ഞ് മൂടുന്നത്. കോടമഞ്ഞ് എന്നും മലയോരത്തിന്‍റെ മാറ്റ് കൂട്ടുന്നതാണെങ്കിലും മഴ കനത്തതോടെ അനുഭവപ്പെടുന്ന കനത്ത മൂടല്‍ അപകടഭീഷണി ഉയര്‍ത്തുന്നുണ്ട്. കൊടും വളവുകളും കുത്തിറക്കവും നിറഞ്ഞ റോഡില്‍ മഞ്ഞ് മൂടുന്നതോടെ എതിരേ വരുന്ന വാഹനങ്ങള്‍ തൊട്ടടുത്തെത്തിയാല്‍പോലും കാണാൻ സാധിക്കാത്ത സ്ഥിതിയുണ്ട്. പുലര്‍ച്ചെയും രാത്രികാലത്തുമാണ് ഏറ്റവും കടുതല്‍ മഞ്ഞുമൂടുന്നത്. ഈ സമയത്താണ് ഏറ്റവും കൂടുതല്‍ അപകടങ്ങള്‍ ഉണ്ടാകുന്നതും. ഈ അപകടങ്ങൾ പുറം ലോകമറിയുന്നത് മണിക്കൂറുകള്‍ കഴിഞ്ഞാകും. ഇത് പലരുടേയും ജീവന്‍ നഷ്ടമാകാനും കാരണമാകും.

ലഹരിവിരുദ്ധ സന്ദേശമുണർത്തി മാങ്കുളം സെന്‍റ് മേരീസ് ഹയർ സെക്കൻഡറി സ്കൂൾ

അടിമാലി: മാങ്കുളം സെന്‍റ് മേരീസ് ഹയർ സെക്കൻഡറി സ്കൂളിൽ ലഹരിക്കെതിരേ കുട്ടികളെയും മാതാപിതാക്കളെയും ബോധവത്കരിക്കുന്നതിനായി സെ നോട്ട് ഡ്രഗ്സ് മെഗാ സിഗ്നേച്ചർ കാമ്പെയ്ൻ സംഘടിപ്പിച്ചു. പരിപാടി മാങ്കുളം ഗ്രാമപഞ്ചായത്ത് പ്രസിഡന്‍റ് ഗീതാ ആനന്ദ് ഉദ്ഘാടനം ചെയ്തു. ദേവികുളം എക്സൈസ് ഇൻസ്പെക്ടർ വിഷ്ണു ടി.ജി. ബോധവത്കരണ ക്ലാസ് നയിച്ചു. സ്കൂൾ മാനേജർ ഫാ. ജോർജ് കൊല്ലംപറമ്പിൽ അധ്യക്ഷത വഹിച്ചു. പ്രിൻസിപ്പൽ സലോമി ജോസഫ് , പിടിഎ പ്രസിഡന്‍റ് മനോജ് കുര്യൻ, വാർഡ് മെംമ്പർ ഷൈനി മാത്യു തുടങ്ങിയവർ പ്രസംഗിച്ചു.

നവീകരണജോലികളുടെ ഭാഗമായി മണ്ണ് നീക്കി; നിരവധി വീടുകള്‍ അപകടാവസ്ഥയില്‍

അടിമാലി: മഴ കനത്തശേഷം ഏറ്റവുമധികം മണ്ണിടിച്ചിലുണ്ടായ ഇടങ്ങളിലൊന്നാണ് ദേശീയപാത 85ന്‍റെ നേര്യമംഗലം മുതല്‍ മൂന്നാര്‍വരെയുള്ള ഭാഗം. നവീകരണ ജോലികളുടെ ഭാഗമായി മണ്ണ് നീക്കിയതാണ് മണ്ണിടിച്ചിലിനും അടക്കടിയുള്ള മരംവീഴ്ചയ്ക്കും കാരണം. കഴിഞ്ഞ മഴക്കാലത്തും സ്ഥിതി സമാനമായിരുന്നു. നവീകരണജോലികളുടെ ഭാഗമായി മണ്ണ് നീക്കിയതിനെത്തുടര്‍ന്ന് അപകടാവസ്ഥയിലായ നിരവധി വീടുകളാണ് ഈ മേഖലയിലുള്ളത്. അടിമാലിക്കും രണ്ടാംമൈലിനും ഇടയിൽ പാതയോരത്ത് മണ്‍തിട്ടയ്ക്ക് മുകളില്‍ മണ്ണിടിച്ചില്‍ ഭീതിയിൽ നിരവധി കുടുംബങ്ങളാണ് കഴിയുന്നത്. മഴക്കാലമെത്തിയതോടെ പല വീടുകളും ബലക്ഷയം വന്ന് വാസയോഗ്യമല്ലാതായി. റോഡിന്‍റെ സംരക്ഷണഭിത്തി നിര്‍മാണത്തിനായി മണ്ണ് നീക്കിയ ഇടങ്ങളില്‍ മഴയ്ക്കു മുമ്പേ ഭിത്തിയുടെ നിര്‍മാണം പൂര്‍ത്തീകരിക്കാന്‍ കഴിയാതെവന്നതും ഓടയുടെ നിര്‍മാണത്തിന് പലയിടത്തും അശാസ്ത്രീയമായി മണ്ണ് നീക്കിയതും ഇപ്പോഴത്തെ പ്രതിസന്ധിക്ക് കാരണമായി. മണ്ണിടിച്ചില്‍ സാധ്യതയുള്ള പലയിടങ്ങളില്‍നിന്നും കുടുംബങ്ങള്‍ വീടുപേക്ഷിച്ച് പോകുകയാണ്.

ശക്തമായ മഴയില്‍ നടപ്പുവഴി ഒലിച്ചുപോയി

അടിമാലി: അടിമാലി അമ്പലപ്പടിക്ക് സമീപം ശക്തമായ മഴയില്‍ നടപ്പുവഴി ഒലിച്ചുപോയതോടെ സഞ്ചാരമാര്‍ഗമില്ലാതെ വലയുകയാണ് ഏതാനും കുടുംബങ്ങള്‍. അടിമാലി ഗ്രാമപഞ്ചായത്ത് ഏഴാം വാര്‍ഡ് അമ്പലപ്പടിക്ക് സമീപം താമസിക്കുന്ന നാലു കുടുംബങ്ങള്‍ ഉപയോഗിക്കുന്ന നടപ്പുവഴിയാണ് ഒലിച്ചുപോയത്. 3മണ്‍വഴി ഒലിച്ചുപോകുകയും കല്ലുകള്‍ വന്നടിഞ്ഞു വലിയ തോടായി മാറുകയും ചെയ്തിട്ടുണ്ട്. വഴി തോടിന് സമാനമായതോടെ ഇതിനരികില്‍ ഇരിക്കുന്ന വീടുകളും അപകടഭീഷണിയിലാണ്. റോഡ് പഞ്ചായത്തിന്‍റെ ആസ്തി രജിസ്റ്ററില്‍ ഉള്‍പ്പെടുത്തി തുക അനുവദിക്കാമെന്നും കോണ്‍ക്രീറ്റ് ചെയ്യാമെന്നുമൊക്കെ അറിയിച്ചിരുന്നെങ്കിലും മണ്ണിട്ട് നിര്‍മാണം നടത്തിയതല്ലാതെ മറ്റു നടപടികള്‍ ഉണ്ടാകാത്തതാണ് ഇപ്പോഴത്തെ പ്രതിസന്ധിക്കു കാരണമെന്നും കുടുംബങ്ങള്‍ ആരോപിക്കുന്നു.

ചിന്നാര്‍ സ്‌മോള്‍ ഹൈഡ്രോ ഇലക‌്ട്രിക് പ്രോജക്‌ട്; മണ്ണിടിച്ചില്‍ സാധ്യതയുള്ള ഭൂമികൂടി ഏറ്റെടുക്കണമെന്ന്

അടിമാലി: പനംകുട്ടിയില്‍ മുതിരപ്പുഴയാറിനോടു ചേര്‍ന്ന് നിർമിക്കുന്ന ചിന്നാര്‍ സ്‌മോള്‍ ഹൈഡ്രോ ഇലക്‌ട്രിക് പ്രോജക്ടിന്‍റെ പെന്‍സ്റ്റോക്ക് സ്ഥാപിക്കാനുള്ള നടപടികളും പവര്‍ഹൗസിന്‍റെ നിര്‍മാണ ജോലികളും നടക്കുന്നതിനു സമീപം മണ്ണിടിച്ചില്‍ ഭീഷണി നേരിടുന്ന ഭാഗത്തെ കുടുംബങ്ങളുടെ ഭൂമി കൂടി വൈദ്യുതി വകുപ്പ് ഏറ്റെടുക്കണമെന്ന് നാട്ടുകാർ ആവശ്യപ്പെട്ടു. വലിയ ചെരിവുള്ള പ്രദേശത്താണ് നിർമാണ ജോലികൾ നടക്കുന്നത്. ഈ ഭാഗത്ത് മണ്ണിന് കാര്യമായ ഉറപ്പില്ലെന്നും മണ്ണിടിച്ചില്‍ സാധ്യതയുണ്ടെന്നും നാട്ടുകാർ ചൂണ്ടിക്കാട്ടി. മണ്ണിടിച്ചില്‍ സാധ്യതയുള്ള പ്രദേശത്തെ പതിനൊന്നു കുടുംബങ്ങള്‍ ഈ വിഷയങ്ങള്‍ ചൂണ്ടിക്കാട്ടി ജില്ലാഭരണകൂടത്തിനടക്കം വിവിധയിടങ്ങളില്‍ പരാതികള്‍ സമര്‍പ്പിച്ചിരുന്നു. വിഷയത്തില്‍ ഇടപെടല്‍ ആവശ്യപ്പെട്ട് ഹൈക്കോടതിയെയും കുടുംബങ്ങള്‍ സമീപിച്ചിരുന്നു. കോടതി നിര്‍ദേശത്തിന്‍റെ അടിസ്ഥാനത്തില്‍ കോഴിക്കോട് എൻഐടിയിൽനിന്നുള്ള സംഘം പ്രദേശത്ത് സന്ദര്‍ശനം നടത്തി. റിപ്പോര്‍ട്ട് കോടതിയില്‍ സമര്‍പ്പിക്കുമെന്ന് സന്ദര്‍ശകസംഘം അറിയിച്ചു. മണ്ണിടിച്ചില്‍ സാധ്യതയുള്ള പ്രദേശത്ത് തുടര്‍ജീവിതം സാധ്യമല്ലെന്നാണ് നാട്ടുകാർ ചൂണ്ടിക്കാട്ടുന്നത്.

ദുരിതമായി നല്ലതണ്ണി-ആശുപത്രി റോഡ്

മൂന്നാർ: ആശുപത്രി റോഡ് തകർന്ന് യാത്ര ദുരിതമായി. അത്യാവശ്യ ഘട്ടങ്ങളിൽ മൂന്നാർ നിവാസികളുടെ ഏകാശ്രയമായ ഹൈറേഞ്ച് ആശുപത്രി റോഡാണ് തകർന്നത്. നല്ലതണ്ണി പാലത്തിനു സമീപത്തുനിന്ന് ആശുപത്രിയിലേയ്ക്ക് പോകുന്ന ഭാഗമാണ് കൂടുതൽ തകർന്നത്. രോഗികളുമായി ചെല്ലുന്ന ആംബുലൻസ് അടക്കമുള്ള വാഹനങ്ങൾ ഇതുമൂലം ബുദ്ധിമുട്ടിലാകുകയാണ്. വീതി കുറഞ്ഞ റോഡിൽ വാഹനങ്ങൾ അനധികൃതമായി പാർക്ക് ചെയ്യുന്നതും നാട്ടുകാർക്ക് ദുരിതമാകുകയാണ്. റോഡിന്‍റെ ദുരവസ്ഥയും പാർക്കിംഗും ഏറെ ദുരിതം നൽകിയിട്ടും ബന്ധപ്പെട്ട ഉദ്യോഗസ്ഥരും ജനപ്രതിനിധികളും നടപടികൾ സ്വീകരിക്കുന്നില്ലെന്ന് ആക്ഷേപമുണ്ട്. കഴിഞ്ഞ ദിവസം കോണ്‍ഗ്രസിന്‍റെ നേതൃത്വത്തിൽ റോഡിലെ കുഴിയിൽ വാഴ നട്ട് പ്രതിഷേധം സംഘടിപ്പിച്ചിരുന്നു. ബ്ലോക്ക് പഞ്ചായത്തിന്‍റെ നേതൃത്വത്തിൽ 2016-ൽ ഈ റോഡിന്‍റെ അറ്റകുറ്റപ്പണികൾക്കായി 4,35,000 രൂപ അനുവദിച്ച് പണികൾ നടത്തിയിരുന്നെങ്കിലും മഴക്കാലത്ത് മണ്ണിടിച്ചിലുണ്ടായതോടെ റോഡ് തകർന്നു. ശക്തമായ മഴയിൽ റോഡ് കൂടുതൽ തകരുന്ന നിലയിലാണ്. റോഡിന്‍റെ ശോച്യാവസ്ഥ എത്രയും പെട്ടെന്ന് പരിഹരിക്കണമെന്നു നാട്ടുകാർ ആവശ്യപ്പെട്ടു.

റോഡ് നിർമാണം: പ്രചാരണം വാസ്തവ വിരുദ്ധം -പ്രസിഡന്‍റ്

ഇടവെട്ടി: പഞ്ചായത്തിലെ മൂന്നാം വാർഡിൽ ഉൾപ്പെടുന്ന തൊണ്ടിക്കുഴ -നടയം റോഡിന്‍റെ നിർമാണം വൈകുന്നത് ഫണ്ടിന്‍റെ ലഭ്യതക്കുറവു മൂലമാണെന്ന് പഞ്ചായത്ത് പ്രസിഡന്‍റ് ബിൻസി മാർട്ടിൻ പറഞ്ഞു. പഞ്ചായത്തിലെ ഒന്ന്, മൂന്ന് വാർഡുകൾക്ക് മുഖ്യമന്ത്രിയുടെ ദുരിതാശ്വാസനിധിയിൽനിന്ന് അനുവദിച്ച തുക ആറാം വാർഡിൽ വിനിയോഗിച്ചെന്ന പ്രചാരണം വസ്തുതാവിരുദ്ധമാണ്. മുഖ്യമന്ത്രിയുടെ പ്രളയ ദുരിതാശ്വാസനിധിയിൽനിന്നും ഒന്ന്, മൂന്ന് വാർഡുകൾക്കായി ഫണ്ട് ആവശ്യപ്പെട്ടിരുന്നെങ്കിലും ഒരു രൂപപോലും പഞ്ചായത്തിന് ലഭ്യമായിട്ടില്ലെന്നും പ്രസിഡന്‍റ് പറഞ്ഞു. ജില്ലാ പഞ്ചായത്തിൽനിന്ന് ആദ്യഘട്ടത്തിൽ ലഭിച്ച 16 ലക്ഷം രൂപ മാർത്തോമ -മുല്ലക്കവല റോഡിനായും പിന്നീട് അനുവദിച്ച 15 ലക്ഷം നടയം -പ്രഭാകരൻകവല റോഡിനുമാണ് വിനിയോഗിച്ചത്. തൊണ്ടിക്കുഴ-നടയം റോഡിനായി 11 തവണ ടെൻഡർ ക്ഷണിച്ചെങ്കിലും നിർമാണം ഏറ്റെടുത്ത കരാറുകാരൻ ഇത് ഉപേക്ഷിച്ചുപോയതോടെയാണ് നിർമാണം തടസപ്പെട്ടത്. പഞ്ചായത്തിന് മെയിന്‍റൻസ് ഗ്രാന്‍റായി ലഭിച്ച 78 ലക്ഷം രൂപ 13 വാർഡുകൾക്കായി വീതിച്ചു നൽകുകയായിരുന്നു. ജില്ലാ പഞ്ചായത്തിൽ നിന്നും 10 ലക്ഷം രൂപ അനുവദിക്കണമെന്ന് ആവശ്യപ്പെട്ടിട്ടുണ്ടെന്നും ഫണ്ട് ലഭിക്കുന്ന മുറയ്ക്ക് റോഡ് നിർമാണം നടത്തുമെന്നും ബിൻസി മാർട്ടിൻ പറഞ്ഞു.

തൊഴിൽ പരിശീലനകേന്ദ്രം ഉദ്ഘാടനം ചെയ്തു

കട്ടപ്പന: സ്വാമി വിവേകാനന്ദ മെഡിക്കൽ മിഷന്‍റെയും ഗുരുകുലം എഡ്യുക്കേഷൻ ആൻഡ് ചാരിറ്റബിൾ ട്രസ്റ്റിന്‍റെയും ആഭിമുഖ്യത്തിൽ എ.പി.ജെ. അബ്ദുൾ കലാം സെന്‍റർ ഫോർ സ്കിൽ ആൻഡ് എക്സലൻസ് എന്ന പേരിൽ തൊഴിൽ പരിശീലനകേന്ദ്രം ആരംഭിച്ചു. സെന്‍ററിന്‍റെ ഉദ്ഘാടനം കട്ടപ്പന ദൈവദശകം ശതാബ്ദി ഹാളിൽ കട്ടപ്പന മർച്ചന്‍റ്സ് അസോസിയേഷൻ പ്രസിഡന്‍റ് സാജൻ ജോർജ് നിർവഹിച്ചു. പരിശീലനകേന്ദ്രം പ്രസിഡന്‍റ് എം.പി. ശശികുമാർ അധ്യക്ഷത വഹിച്ചു. മരിയൻ ഇൻസ്റ്റിറ്റ്യൂട്ട് ഓഫ് മാനേജ്മെന്‍റ് ഡയറക്ടർ ഡോ. ടി.വി. മുരളീവല്ലഭൻ മുഖ്യപ്രഭാഷണം നടത്തി. അമൃതാനന്ദമയി മഠം സ്വാമി ജ്ഞാനാമൃതാനന്ദ പുരി അനുഗ്രഹപ്രഭാഷണം നടത്തി.

ഭൂപ്രശ്നങ്ങൾ പരിഹരിക്കണമെന്ന്

അണക്കര: കേരള കോണ്‍ഗ്രസ് പീരുമേട് നിയോജകമണ്ഡലം കമ്മിറ്റിയുടെ നേതൃത്വത്തിൽ ഇടുക്കി ജില്ലയിലെ ഭൂപ്രശ്നങ്ങൾക്ക് ശാശ്വതപരിഹാരം കാണണമെന്നാവശ്യപ്പെട്ട് അണക്കരയിൽ സമരസംഗമം നടത്തി. പാർട്ടി ഉന്നതാധികാരസമിതി അംഗം ആന്‍റണി ആലഞ്ചേരി ഉദ്ഘാടനം ചെയ്തു. ഇടുക്കി പാക്കേജിൽ ഉൾപ്പെടുത്തി ജില്ലയിലെ കർഷകന്‍റെ ജീവനും സ്വത്തും കാർഷികമേഖലയും സംരക്ഷിക്കുന്നതിന് സർക്കാർ നടപടി സ്വീകരിക്കണമെന്ന് അദ്ദേഹം ആവശ്യപ്പെട്ടു. നിയോജകമണ്ഡലം പ്രസിഡന്‍റ് ബിജു പോൾ അധ്യക്ഷത വഹിച്ചു. കെട്ടിടങ്ങളുടെ ക്രമവത്കരണത്തിനു ഫീസ് ഏർപ്പെടുത്താനുള്ള നിയമം പിൻവലിക്കുക, ജില്ലയിലെ സങ്കീർണമായ കാർഷിക ഭൂപ്രശ്നങ്ങൾ പരിഹരിക്കുക തുടങ്ങിയ ആവശ്യങ്ങളും സമ്മേളനം ഉന്നയിച്ചു. കർഷകയൂണിയൻ ജില്ലാ പ്രസിഡന്‍റ് ബിനു ഇലവുമൂട്ടിൽ, ജോസുകുട്ടി തകിടിപ്പുറം, സണ്ണി കാരിമുട്ടം, ബാലകൃഷ്ണൻ വണ്ടിപ്പെരിയാർ, സണ്ണി ജോർജ്, ശശിധരൻ മാടപ്പള്ളി, ജോസഫ് കൊട്ടുപള്ളി, ജയ്സണ്‍ ഏബ്രഹാം എന്നിവർ പ്രസംഗിച്ചു.

വിനോദസഞ്ചാരകേന്ദ്രങ്ങൾ പൂട്ടിയതിനെതിരേ മഴ നനഞ്ഞ് സമരം

ചെറുതോണി: ജില്ലാ ആസ്ഥാനമേഖലയിലെ പ്രധാന വിനോദസഞ്ചാരകേന്ദ്രങ്ങൾ അടച്ചുപൂട്ടിയതിനെതിരേ മഴ നനഞ്ഞ് സമരം വായനദിനമായ ഇന്ന് ഉച്ചകഴിഞ്ഞ് രണ്ടു മുതൽ ചെറുതോണി ട്രാഫിക് ജംഗ്ഷനിൽ നടക്കും. വനംവകുപ്പ് വിനോദസഞ്ചാരകേന്ദ്രങ്ങൾ അടച്ചുപൂട്ടുമ്പോഴും അതിനെതിരേ പ്രസ്താവനയിൽക്കൂടെപ്പോലും പ്രതികരിക്കാത്ത അധികാരികളുടെ നിലപാടിനെതിരേയാണ് സോഷ്യൽ ഹ്യൂമൻ ജസ്റ്റീസ് ആൻഡ് നേച്ചർ ചെയർമാൻ പി.എൽ. നിസാമുദീൻ മഴ നനഞ്ഞ് പ്രധിഷേധസമരം നടത്തുന്നത്. ഓൾ കേരള ഫോട്ടോഗ്രാഫേഴ്സ് അസോസിയേഷൻ ജില്ലാ വൈസ് പ്രസിഡന്‍റ് എൻ.ജെ. വർഗീസ് സമരം ഉദ്ഘാടനം ചെയ്യും. ജില്ലാ ആസ്ഥാനമായ പൈനാവ്, ചെറുതോണി ഉൾപ്പെടുന്നപ്രദേശങ്ങളിൽ ഒമ്പതിലധികം വിനോദസഞ്ചാരകേന്ദ്രങ്ങളുണ്ട്. ഇതെല്ലാം ഈ പ്രദേശത്തെ വനഭൂമികളിലാണ് സ്ഥിതിചെയ്യുന്നത്. ഫീസ് ഈടാക്കി പരിസ്ഥിതി സൗഹൃദരീതിയിൽ സന്ദർശനസൗകര്യവും സംരക്ഷണവും ഒരുക്കുന്നതിനുപകരം ഈ പ്രദേശങ്ങൾ സന്ദർശിക്കുന്നവർക്കെതിരേ കേസെടുക്കുന്ന നിലപാടാണ് വനംവകുപ്പ് സ്വീകരിക്കുന്നത്. ഇടുക്കി - ചെറുതോണി അണക്കെട്ടുകൾ സഞ്ചാരികൾക്ക് ഇപ്പോൾ കാണാൻ അനുമതിയില്ല. ചെറുതോണി ഡാമിൽ പ്രവേശിച്ച ഒരാൾ അണക്കെട്ടിലെ ഷട്ടറിന്‍റെ വടത്തിൽ ഗ്രീസ് ഒഴിക്കുകയും വിളക്കുകാലുകളിൽ താഴിട്ട് പൂട്ടുകയും ചെയ്തതോടെ പ്രവേശനത്തിനു കർശന നിയന്ത്രണമേർപ്പെടുത്തി. സന്ദർശനം അനുവദിക്കുന്ന നാളിൽ ഓൺലൈൻവഴി ബുക്ക് ചെയ്യുന്ന എണ്ണൂറോളം പേർക്ക് മാത്രമേ പ്രവേശനം അനുവദിക്കുകയുള്ളൂ. ഇക്കാര്യമറിയാതെ ഇവിടെയെത്തുന്ന ആയിരക്കണക്കിന് ആളുകളാണ് അണക്കെട്ട് കാണാൻ കഴിയാതെ നിരാശരായി മടങ്ങുന്നത്. ഇക്കാര്യങ്ങൾ ഭരണകൂടം അടിയന്തരമായി പരിഗണിച്ച് നടപടികൾ സ്വീകരിക്കണം. നിരോധിക്കപ്പെട്ട എല്ലാ ടൂറിസ്റ്റ് കേന്ദ്രങ്ങളും കാണാൻ കഴിയുന്ന സാഹചര്യമുണ്ടാക്കണം. ചെറുതോണി ട്രാഫിക് ജംഗ്ഷനിൽ നടക്കുന്ന സമരത്തിൽ വിവിധ സാമൂഹ്യ, സന്നദ്ധ, പരിസ്ഥിതി പ്രവർത്തകർ പങ്കെടുക്കും.

വാഹനാപകടത്തിൽ മരിച്ച വിദ്യാർഥികളിൽ ഒരാളുടെ സംസ്കാരം ഇന്ന്

അണക്കര: ചെല്ലാർകോവിൽ ബൈക്കും ജീപ്പും കൂട്ടിയിടിച്ചുണ്ടായ അപകടത്തിൽ മരിച്ച രണ്ടു വിദ്യാർഥികളിൽ ഒരാളായ അണക്കര കൊടുവേലിക്കുന്നേൽ അലൻ കെ. ഷിബുവിന്‍റെ സംസ്കാര ശുശ്രൂഷകൾ ഇന്നു രാവിലെ ഒൻപതിന് വീട്ടിൽ ആരംഭിച്ച് കുങ്കിരിപ്പെട്ടി സെന്‍റ് തോമസ് ഓർത്തഡോക്സ് പള്ളിയിൽ മൃതദേഹം സംസ്കരിക്കും. മരിച്ച അണക്കര വെള്ളറ ഷാനെറ്റ് ഷൈജുവിന്‍റെ മൃതദേഹം കട്ടപ്പന സെന്‍റ് ജോണ്‍സ് ആശുപത്രി മോർച്ചറിയിൽ സൂക്ഷിച്ചിരിക്കുകയാണ്. വിദേശത്തുള്ള മാതാവ് എത്തിയശേഷം സംസ്കരിക്കും. ചൊവ്വാഴ്ച ഉച്ചകഴിഞ്ഞ് മൂന്നോടെയാണ് കുട്ടികൾ സഞ്ചരിച്ചിരുന്ന ബൈക്ക് തൊഴിലാളികളുമായി പോയ ജീപ്പുമായി ഇടിച്ച് ഇരുവരും മരിച്ചത്. മൃതദേഹങ്ങൾ ഇടുക്കി മെഡിക്കൽ കോളജിൽ ഇന്നലെ പോസ്റ്റ്മോർട്ടം നടത്തി. മരിച്ച കുട്ടികൾ പ്ലസ്ടു പഠനത്തിനുശേഷം ഉപരിപഠനത്തിനു തയാറെടുക്കുകയായിരുന്നു.

വാഹന പരിശോധനയ്ക്കിടെ എസ്ഐയെ വാഹനമിടിപ്പിച്ചു കൊലപ്പെടുത്താൻ ശ്രമിച്ച പ്രതി കീഴടങ്ങി

മൂവാറ്റുപുഴ: വാഹന പരിശോധനയ്ക്കിടെ എസ്ഐയെ വാഹനമിടിപ്പിച്ചു കൊലപ്പെടുത്താൻ ശ്രമിച്ച കേസിലെ ഒന്നാംപ്രതി കോടതിയിൽ കീഴടങ്ങി. ആനിക്കാട് കന്പനിപ്പടിയിൽ വാടകയ്ക്കു താമസിക്കുന്ന വാഴത്തോപ്പ് മണിയാറംകുടി മുഹമ്മദ് ഷെറീഫ് ഷംസുദീനാണ് (25) മൂവാറ്റുപുഴ ജുഡീഷൽ ഫസ്റ്റ് ക്ലാസ് മജിസ്ട്രേറ്റ് കോടതിയിൽ ഇന്നലെ രാവിലെ കീഴടങ്ങിയത്. ഇയാളെ രണ്ടാഴ്ചത്തേക്ക് കോടതി റിമാൻഡ് ചെയ്തു. കല്ലൂർക്കാട് പോലീസ് സ്റ്റേഷനിലെ ഗ്രേഡ് എസ്ഐ ഇ.എം. മുഹമ്മദിനെയാണ് കഴിഞ്ഞ ശനിയാഴ്ച വൈകുന്നേരം കല്ലൂർക്കാട് വഴിയാഞ്ചിറ ഭാഗത്തു പരിശോധനയ്ക്കിടെ വാഹനം കയറ്റി കൊലപ്പെടുത്താൻ ശ്രമിച്ചത്. പതിവു വാഹന പരിശോധന നടത്തുന്നതിനിടയിലാണ് വഴിയാഞ്ചിറ ഭാഗത്ത് വഴിയരികിൽ സംശയാസ്പദമായ സാഹചര്യത്തിൽ കാർ നിർത്തിയിട്ടിരിക്കുന്നത് എസ്ഐയുടെ ശ്രദ്ധയിൽപ്പെട്ടത്. തുടർന്ന് കാറിനടുത്തെത്തി ചോദ്യം ചെയ്തതോടെ മുഹമ്മദ് ഷെറീഫ് കാറെടുത്ത് എസ്ഐയെ അപായപ്പെടുത്താൻ ശ്രമിച്ചശേഷം രക്ഷപ്പെടുകയായിരുന്നു. പ്രതിയെ രക്ഷപ്പെടാൻ സഹായിച്ച സുഹൃത്തുക്കളായ ഈരാറ്റുപേട്ട സ്വദേശികളായ ഷാഹിദ്, റഫ്സൽ എന്നിവരെ പോലീസ് കഴിഞ്ഞ ദിവസം അറസ്റ്റ് ചെയ്തിരുന്നു. അപകടമുണ്ടാക്കിയ കാറിൽ മുഹമ്മദ് ഷെറീഫിനൊപ്പമുണ്ടായിരുന്ന തൊടുപുഴ സ്വദേശി ആസിഫിനായി പോലീസ് അന്വേഷണം ഊർജിതമാക്കി.

നിലന്പൂരിൽ യുഡിഎഫ് ഉജ്വല വിജയം നേടും: പി.ജെ. ജോസഫ്

പന്നിമറ്റം: നിലന്പൂർ ഉപതെരഞ്ഞെടുപ്പിൽ യുഡിഎഫ് സ്ഥാനാർഥി ആര്യാടൻ ഷൗക്കത്ത് ഉജ്വല വിജയം നേടുമെന്ന് കേരള കോണ്‍ഗ്രസ് ചെയർമാൻ പി.ജെ. ജോസഫ്എംഎൽഎ. കേരള കോണ്‍ഗ്രസ് വെള്ളിയാമറ്റം മണ്ഡലം കണ്‍വൻഷൻ പന്നിമറ്റത്ത് ഉദ്ഘാടനം ചെയ്യുകയായിരുന്നു അദ്ദേഹം. സർക്കാരിന്‍റെ സാന്പത്തിക ഭദ്രതയില്ലായ്മയും ധൂർത്തും അഴിമതിയുമെല്ലാം ചർച്ചാവിഷയമാകുന്ന തെരഞ്ഞെടുപ്പാണ് നടക്കുന്നത്. വന്യജീവി ആക്രമണവും വനംവകുപ്പിന്‍റെ കെടുകാര്യസ്ഥതയും തെരെഞ്ഞെടുപ്പിൽ പ്രതിഫലിക്കും. ന്യായമായ ആവശ്യങ്ങൾക്കായി സമരമുഖത്തു വന്ന ആശ വർക്കർമാർ, പിഎസ്‌സി റാങ്ക് ഹോൾഡേഴ്സ് തുടങ്ങിയവരെ ആക്ഷേപിക്കുന്ന ഭരണ ധാർഷ്ട്യത്തിനുള്ള മറുപടിയായിരിക്കും തെരഞ്ഞെടുപ്പ് ഫലമെന്നും അദ്ദേഹം പറഞ്ഞു. ചടങ്ങിൽ ആദ്യകാല പാർട്ടി പ്രവർത്തകരെയും വിദ്യാർഥി പ്രതിഭകളെയും ആദരിച്ചു. കെ. ഫ്രാൻസിസ് ജോർജ് എംപി മുഖ്യപ്രഭാഷണം നടത്തി. മണ്ഡലം പ്രസിഡന്‍റ് റെജി ഓടയ്ക്കൽ അധ്യക്ഷത വഹിച്ചു. പ്രഫ. എം.ജെ. ജേക്കബ്, അപു ജോണ്‍ ജോസഫ്, പ്രഫ. ഷീല സ്റ്റീഫൻ, എം. മോനിച്ചൻ, ബ്ലെയിസ് ജി. വാഴയിൽ, ടോമി കാവാലം, ക്ലമന്‍റ് ഇമ്മാനുവൽ, ജോണ്‍സ് ജോർജ്, ജോസ് മാത്യു, പ്രദീപ് ആക്കപ്പറന്പിൽ, ജസ്റ്റിൻ ചെന്പകത്തിനാൽ, ഷേർളി അഗസ്റ്റിൻ, മർട്ടിൽ മാത്യു, വി.സി. ജോസഫ് എന്നിവർ പ്രസംഗിച്ചു.

വിദ്യാർഥികൾ പഠിക്കുന്നത് പരീക്ഷയിൽ ജയിക്കാൻവേണ്ടി മാത്രമാകരുത്: വി. വിഗ്‌നേശ്വരി

ചെറുതോണി: വിദ്യാർഥികൾ പഠിക്കുന്നത് പരീക്ഷയിൽ ജയിക്കാൻവേണ്ടി മാത്രമാകരുത്, കാര്യങ്ങൾ അറിയാൻവേണ്ടി പഠിക്കണമെന്ന് ഇടുക്കി ജില്ലാ കളക്ടർ വി. വിഗ്‌നേശ്വരി. വാഴത്തോപ്പ് സെന്‍റ് ജോർജ് ഹയർ സെക്കൻഡറി സ്കൂളിൽ പ്ലസ് വൺ കുട്ടികളുടെ പ്രവേശനോത്സവം ഉദ്ഘാടനം ചെയ്തു പ്രസംഗിക്കുകയായിരുന്നു കളക്‌ടർ. പ്ലസ് ടു കഴിയുമ്പോഴേക്കും വിദ്യാർഥികളുടെ ലക്ഷ്യമെന്താണെന്ന് തിരിച്ചറിയണം. മറ്റുളളവരുടെ നേട്ടങ്ങൾ കണ്ട് നിങ്ങളുടെ ലക്ഷ്യം അതാണെന്ന് ധരിക്കരുത്. നിങ്ങൾ എന്താവണമെന്ന് സ്വയം തീരുമാനിക്കണം. അതിന് എന്തു ചെയ്യണം. അതിനുള്ള മാർഗമെന്താണ് എന്നുള്ള ചിന്തയാണ് ഉണ്ടാവേണ്ടത്. സോഷ്യൽ മീഡിയകൾ വിവേകത്തോടെ കൈകാര്യം ചെയ്യാൻ കുട്ടികൾ‌ പ്രാപ്തരാകണമെന്നും കളക്ടകർ പറഞ്ഞു. സ്കൂൾ മാനേജർ ഫാ. ടോമി ആനിക്കുഴിക്കാട്ടിൽ അധ്യക്ഷത വഹിച്ചു. സ്കൂൾ പ്രിൻസിപ്പൽ ജിജോ ജോർജ്, പിടിഎ പ്രസിഡന്‍റ് ജോളി ആലപ്പുരക്കൽ, അസി. മാനേജർ ഫാ. ജോയൽ വള്ളിക്കാട്ട്, എംപിടിഎ പ്രസിഡന്‍റ് സോണിയ ബിനോജ്, ഹെഡ്മിസ്ട്രസ് അർച്ചന തോമസ്, സ്റ്റാഫ് സെക്രട്ടറി ഫ്രാൻസിസ് സെബാസ്റ്റ്യൻ എന്നിവർ പ്രസംഗിച്ചു.

സെന്‍റ് സെബാസ്റ്റ്യൻസിൽ പിറന്നാൾ പുസ്തകം പദ്ധതി

തൊടുപുഴ: സെന്‍റ് സെബാസ്റ്റ്യൻസ് യുപി സ്കൂളിൽ വായനാ ദിനത്തോടനുബന്ധിച്ച് പിറന്നാൾ പുസ്തകം പദ്ധതിക്ക് തുടക്കമായി. സ്കൂളിലെ കുട്ടികളുടെ ജന്മദിനത്തിന് മധുരപലഹാരങ്ങൾ വിതരണം ചെയ്യുന്നതിനു പകരം പുസ്തകങ്ങൾ ക്ലാസ് ലൈബ്രറിയിലേക്ക് നൽകുന്ന പദ്ധതിക്കാണു തുടക്കം കുറിച്ചത്. പുസ്തകത്തിൽ വിദ്യാർഥിയുടെ പേരും ജന്മദിന ദിവസവും രേഖപ്പെടുത്തും. പ്ലാസ്റ്റിക് ഒഴിവാക്കുന്നതോടൊപ്പം കുട്ടികളിൽ വായനാശീലം വളർത്താനും കൂടുതൽ അറിവ് നേടാനും പദ്ധതിയിലൂടെ സാധിക്കുമെന്ന് അധ്യാപകർ പറഞ്ഞു. ഓരോ ക്ലാസിലും പുതിയ പുസ്തകങ്ങൾ ഉൾപ്പെടുത്തി ക്ലാസ് ലൈബ്രറി വിപുലപ്പെടുത്താനും ഇതിലൂടെ ലക്ഷ്യമിടുന്നു. പ്ലാസ്റ്റിക് വിരുദ്ധ സംസ്കാരം രൂപപ്പെടുത്താനും മൊബൈൽ ഉപയോഗത്തിൽനിന്നും പുസ്തകത്തിലേക്ക് എന്ന ആശയം കുട്ടികൾക്ക് നൽകാനുമാണ് പിറന്നാൾ പുസ്തകം പദ്ധതിക്ക് തുടക്കം കുറിച്ചത്. ഹെഡ്മാസ്റ്റർ ഷിന്‍റോ ജോർജ്, അധ്യാപകരായ അമൂല്യ റാണി പോൾ, അൽഫോൻസ വർഗീസ്, ലീന ചെറിയാൻ, രേഖ കെ. രാജൻ എന്നിവരാണ് പദ്ധതിക്കു നേതൃത്വം നൽകുന്നത്.

അഞ്ചുനാടിന് അറിവിന്‍റെ കലവറയായി യുവത വായനശാല

മറയൂർ: അഞ്ചുനാട് യുവത ആരംഭിച്ച വായനശാല അറിവിന്‍റെ കലവറയായി മാറുന്നു. കാന്തല്ലൂർ പുത്തൂർ സ്വദേശിനിയായ വിദ്യാർഥിനി ജയപ്രിയ മുരുകേശൻ പ്രദേശത്ത് വായനശാലയില്ലെന്നു കാണിച്ച് 2023-ൽ മുഖ്യമന്ത്രിക്ക് പരാതി നൽകിയിരുന്നു. ഇതിന്‍റെ അടിസ്ഥാനത്തിൽ കുട്ടിയെ മുഖ്യമന്ത്രി നേരിട്ട് വിളിക്കുകയും ഇവിടെ ഉടൻ വായനശാല തുറക്കുമെന്ന് ഉറപ്പ് നൽകുകയും ചെയ്തു. തുടർന്ന് മുഖ്യമന്ത്രിയുടെ പ്രത്യേക നിർദേശമനുസരിച്ച് സംസ്ഥാന ലൈബ്രറി കൗണ്‍സിൽ പഞ്ചായത്ത് അധികൃതരുമായി ബന്ധപ്പെട്ട് വായനശാല തുടങ്ങാനുള്ള അടിസ്ഥാനസൗകര്യങ്ങൾ ഒരുക്കുകയായിരുന്നു. കെട്ടിടവും മറ്റ് അടിസ്ഥാന സൗകര്യങ്ങളും നിർമിക്കുന്നത് പഞ്ചായത്താണ്. കെ. മോഹനൻ സെക്രട്ടറിയും ജി. ബാലൻ പ്രസിഡന്‍റുമായ വായനശാലയുടെ ലൈബ്രറേറിയൻ സുന്ദരി സുബ്ബരാജാണ്. ഇവിടെ നടത്തുന്ന പരിപാടികൾക്ക് വൃന്ദാവൻ മിസ്റ്റ് സിറ്റി മാനേജരും പാലക്കാട് സ്വദേശിയുമായ ഗോവിന്ദരാജുമുണ്ട്. ആയിരത്തിലധികം പുസ്തകങ്ങൾ ലൈബ്രറിയിലുണ്ട്. ഇവിടെ സ്ഥാപിച്ചിരിക്കുന്ന എഴുത്തുപെട്ടിയിലൂടെ ആസ്വാദന കുറിപ്പുകളും ധാരാളം ലഭിക്കുന്നുണ്ട്. ലഹരിക്കെതിരേ വായനശാലയുടെ നേതൃത്വത്തിൽ പൊതുജനങ്ങളെ സംഘടിപ്പിച്ച് റാലിയും നടത്തിയിരുന്നു. വായനശാലയിലൂടെ കുട്ടികളുടെ പ്രതികരണശേഷിയും ചിന്താശേഷിയും വർധിപ്പിക്കാനും വ്യക്തിത്വ വികസനത്തിനും അവസരമൊരുക്കുന്നു.

വായനയുടെ വാതിൽ തുറന്ന് നാടും നഗരവും

തൊടുപുഴ: ലോക വായനാദിനാചരണത്തിന്‍റെ ഭാഗമായി ഇന്ന് ജില്ലയിലെ കലാലയങ്ങൾ, ലൈബ്രറികൾ, റെസിഡന്‍റ്സ് അസോസിയേഷനുകൾ, സന്നദ്ധസംഘടനകൾ എന്നിവയുടെ ആഭിമുഖ്യത്തിൽ വിവിധ പരിപാടികൾ നടത്തും. വാരാചരണത്തിന്‍റെ ഭാഗമായി ക്വിസ്, പ്രസംഗം, ഉപന്യാസം തുടങ്ങി വിവിധ മത്സരങ്ങളും സംഘടിപ്പിക്കും. ലൈബ്രറികളുടെ നേതൃത്വത്തിൽ പുതിയ പുസ്തകങ്ങൾ ശേഖരിച്ച് വായനയുടെ ലോകം വിപുലീകരിക്കാനുള്ള പദ്ധതികളും തയാറാക്കിയിട്ടുണ്ട്. ഗ്രന്ഥശാലാ പ്രസ്ഥാനത്തിന്‍റെ സ്ഥാപകൻ പി.എൻ. പണിക്കരുടെ ചരമവാർഷിക ദിനമായ ഇന്നു മുതൽ ഐ.വി. ദാസ് അനുസ്മരണ ദിനമായ ജൂലൈ ഏഴുവരെയാണ് വായനപക്ഷാചരണം സംഘടിപ്പിക്കുന്നത്. ജില്ലാതല ഉദ്ഘാടനം ഇന്ന് ഇടുക്കി: വായന പക്ഷാചരണത്തിന്‍റെ ജില്ലാതല ഉദ്ഘാടനം ഇന്നു രാവിലെ 10.30ന് പൈനാവ് മോഡൽ റസിഡൻഷ്യൽ സ്കൂളിൽ മന്ത്രി റോഷി അഗസ്റ്റിൻ നിർവഹിക്കും. ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാകുന്നേൽ അധ്യക്ഷത വഹിക്കും. പി.എൻ. പണിക്കർ ഫൗണ്ടേഷൻ പ്രസിഡന്‍റ് ജോയി കാട്ടുവള്ളി വായനദിന പ്രതിജ്ഞ ചൊല്ലിക്കൊടുക്കും. ക്വിസ് മത്സരത്തിൽ വിജയികളായവർക്ക് സമ്മാനവിതരണവും നടത്തും. ജില്ലാ കളക്ടർ വി. വിഗ്നേശ്വരി, ബ്ലോക്ക് പഞ്ചായത്ത് പ്രസിഡന്‍റ് ആൻസി തോമസ്, വാഴത്തോപ്പ് പഞ്ചായത്ത് പ്രസിഡന്‍റ് ജോർജ് പോൾ, ജില്ലാ പഞ്ചായത്തംഗം കെ.ജി. സത്യൻ, ബ്ലോക്ക് പഞ്ചായത്തംഗം ഡിറ്റാജ് ജോസഫ്, പഞ്ചായത്തംഗം രാജു ജോസഫ്, ജില്ലാ ഇൻഫർമേഷൻ ഓഫീസർ ജി.എസ്. വിനോദ് എന്നിവർ പ്രസംഗിക്കും. വഴിത്തല: പി.എൻ. പണിക്കർ ഫൗണ്ടേഷന്‍റെ ആഭിമുഖ്യത്തിൽ ഇന്നു രാവിലെ 11നു വഴിത്തല സെന്‍റ് സെബാസ്റ്റ്യൻസ് എച്ച്എസ്എസ് ഓഡിറ്റോറിയത്തിൽ വായനദിന ജില്ലാതല ഉദ്ഘാടനം നടക്കും. രാവിലെ 11നു നടക്കുന്ന സമ്മേളനം പി.ജെ. ജോസഫ് എംഎൽഎ ഉദ്ഘാടനം ചെയ്യും. ഫൗണ്ടേഷൻ ജില്ലാ വൈസ് ചെയർമാൻ ജോസ് വഴുതനപ്പിള്ളി അധ്യക്ഷത വഹിക്കും. ഡീൻ കുര്യാക്കോസ് എംപി മുഖ്യപ്രഭാഷണം നടത്തും. ലാലു ചകനാൽ ലഹരിവിരുദ്ധ പ്രതിജ്ഞ ചൊല്ലിക്കൊടുക്കും. സ്വാമി അയ്യപ്പദാസ് ലഹരിവിരുദ്ധ സന്ദേശം നൽകും. പ്രിൻസിപ്പൽ ടോമി ഫിലിപ്പ്, പഞ്ചായത്ത് പ്രസിഡന്‍റ് പി.എസ്. ജേക്കബ്, മർച്ചന്‍റ്സ് അസോസിയേഷൻ പ്രസിഡന്‍റ് തോമസ് കുരുവിള, ലൈബ്രറി കൗണ്‍സിൽ താലൂക്ക് പ്രസിഡന്‍റ് ജോർജ് അഗസ്റ്റിൻ, ഫൗണ്ടേഷൻ പ്രസിഡന്‍റ് ജോയി കാട്ടുവള്ളി, സ്കൂൾ ഹെഡ്മാസ്റ്റർ ജിജി ജയിംസ് എന്നിവർ പ്രസംഗിക്കും. ചടങ്ങിൽ അവാർഡ് ജേതാക്കളെ ആദരിക്കും.

കാടിന്‍റെ പച്ചപ്പിൽ ഇനി വായനയുടെ മധുരം

ടി.പി. സന്തോഷ്കുമാർ തൊടുപുഴ: ആദിവാസി വിഭാഗത്തിലെ യുവജനങ്ങളെയും കുട്ടികളെയും വായനയുടെ പുതുലോകത്തേയ്ക്ക് അടുപ്പിക്കാൻ വനമേഖലയിലെ ഗോത്രവർഗ സങ്കേതങ്ങളിൽ വായനശാലകൾ ഒരുക്കി വനംവകുപ്പ്. ഇടുക്കി വന്യജീവി സങ്കേതത്തിലെ കണ്ണംപടി ട്രൈബൽ സെറ്റിൽമെന്‍റിൽ ഉൾപ്പെടുന്ന മേമാരി, കൊല്ലത്തിക്കാവ്, കത്തിതേപ്പൻ എന്നിവിടങ്ങളിലാണ് "തളിര് ' എന്ന പേരിൽ വനംവകുപ്പിന്‍റെ വായനശാലകൾ ആരംഭിക്കുന്നത്. കാട്ടാനകൾ ഉൾപ്പെടെയുള്ള വന്യമൃഗങ്ങൾ വിഹരിക്കുന്ന ഉൾവനത്തിലെ ആദിവാസി കോളനികളിൽ ഇനി വായനയുടെ വാതായനങ്ങൾ തുറക്കും. വായനയാണ് ലഹരി എന്ന സന്ദേശത്തോടെയാണ് വനംവകുപ്പ് ഉൾനാടൻ ആദിവാസി മേഖലകളിൽ ഇതിനായി പ്രത്യേക ഇടങ്ങളൊരുക്കുന്നത്. സംസ്ഥാന വനവികസന ഏജൻസിയിൽനിന്നു ലഭ്യമായ ഫണ്ട് ഉപയോഗിച്ച് ഇടുക്കി വൈൽഡ് ലൈഫ് ഡിവിഷനാണ് വായനയുടെ ഉദാത്തമായ സന്ദേശം ആദിവാസി ജനവിഭാഗങ്ങളിലേയ്ക്ക് എത്തിക്കുന്നത്. ആദിവാസി വിഭാഗത്തിൽ ഉൾപ്പെടുന്ന കുട്ടികൾ ഇപ്പോൾ പഠനത്തിൽ മികവു പുലർത്തി ഉന്നത വിദ്യാഭ്യാസവും മറ്റും നേടിവരുന്നുണ്ട്. വായനശാലകൾ അരക്ഷിതമായ വനാന്തരീക്ഷത്തിൽ കഴിയുന്ന ആദിവാസി ജനവിഭാഗത്തിന് നൂതന അനുഭവമാകുമെന്നാണ് പ്രതീക്ഷ. കണ്ണംപടി ട്രൈബൽ സെറ്റിൽമെന്‍റിലെ മൂന്ന് ഇഡിസികളുടെ കീഴിലാണ് വായനശാലകൾ ആരംഭിക്കുന്നത്. ഇഡിസികൾക്ക് സ്വന്തമായുള്ള കെട്ടിടങ്ങളിലാണ് വായനശാലകൾ ഒരുക്കിയിരിക്കുന്നത്. മൂന്നു വായനശാലകളിലായി കുട്ടികൾ മുതൽ മുതിർന്നവർവരെയുള്ള 200-ഓളം പേർക്ക് ഇവ അറിവിന്‍റെ വെളിച്ചം പകരും. യാത്രാവിവരണങ്ങൾ, വൈജ്ഞാനിക ഗ്രന്ഥങ്ങൾ, ബാലസാഹിത്യ കൃതികൾ, കഥകൾ, നോവലുകൾ എന്നീ വിഭാഗങ്ങളിലും പിഎസ്‌സി പരീക്ഷയ്ക്കും പ്രയോജനപ്പെടുന്ന പുസ്തകങ്ങളാണ് വായനശാലയിൽ സജ്ജീകരിച്ചിരിക്കുന്നത്. കുട്ടികളെ ചെറുപ്പത്തിൽത്തന്നെ വായനയിലേയ്ക്ക് ആകർഷിക്കാൻ ബാലസാഹിത്യ കൃതികളുടെ വലിയ ശേഖരവും ഒരുക്കിയിട്ടുണ്ട്. പുസ്തകങ്ങൾ ലൈബ്രറിയിൽ എത്തി വായിക്കുന്നതിനു സൗകര്യം ഒരുക്കുന്നതിനു പുറമേ വീടുകളിൽ കൊണ്ടുപോകാനും കഴിയും. വായനശാലയുടെ മേൽനോട്ടത്തിനും നടത്തിപ്പിനുമായി ഇഡിസി അംഗങ്ങളിൽ വിദ്യാസന്പന്നരായ യുവതീയുവാക്കളെ കണ്ടെത്തി ഇവർക്ക് പരിശീലനം നൽകി ലൈബ്രറേറിയന്മാരായി നിയമിക്കും. വായനശാലയിൽ മാത്രം ഒതുങ്ങി നിൽക്കുന്നതല്ല വനംവകുപ്പിന്‍റെ ഈ പദ്ധതി. വായനയിലൂടെ നേടുന്ന അറിവുകളും കണ്ടെത്തലുകളും വിലയിരുത്തുന്നതിന്‍റെ ഭാഗമായി പ്രസംഗം, ഉപന്യാസം, ക്വിസ്, കവിത, കഥാരചനാ മത്സരങ്ങളും നടത്തും. ഗ്രന്ഥശാല സംഘത്തിന്‍റെ സഹകരണത്തോടെ ഇവരുടെ അഭിരുചികൾക്ക് അനുയോജ്യമായ കൂടുതൽ പുസ്തകങ്ങൾ സമാഹരിച്ച് വായനശാലകൾ വിപുലീകരിക്കാനും പദ്ധതി വിഭാവനം ചെയ്യുന്നു. പുസ്തകങ്ങൾ എത്തിച്ച് പൂർണ സജ്ജമാക്കിയ വായനശാലകൾ 28ന് വാഴൂർ സോമൻ എംഎൽഎ തുറന്നു നൽകും. ഇടുക്കി വൈൽഡ് ലൈഫ് വാർഡൻ ജി. ജയചന്ദ്രൻ, അസിസ്റ്റന്‍റ് വൈൽഡ് ലൈഫ് വാർഡൻ ബി. പ്രസാദ് കുമാർ എന്നിവരുടെ നേതൃത്വത്തിലാണ് പദ്ധതി യാഥാർഥ്യമാക്കിയത്.

12 വയസുകാരനെ ചെരിപ്പുകൊണ്ടു മർദിച്ച ‌പ്രതിയെ ഇതുവരെ അറസ്റ്റ് ചെയ്തില്ല

വണ്ടിപ്പെരിയാർ: 12 വയസുകാരനെ ചെരിപ്പുകൊണ്ട് മർദിച്ച സംഭവത്തിൽ ഇതുവരെ പ്രതിയെ അറസ്റ്റ് ചെയ്തില്ല. ബാലാവകാശ കമ്മീഷനും ഇടുക്കി എസ്പിക്കും പട്ടികജാതി വകുപ്പിനും കുട്ടിയുടെ പിതാവ് പരാതി നൽകി. കഴിഞ്ഞമാസം പതിനാലിനു നടന്ന സംഭവത്തിൽ പ്രതിയെ ഇതുവരെ അറസ്റ്റ് ചെയ്യാത്തതിനെതിരേയാണ് പരാതി നൽകിയിരിക്കുന്നത്. എട്ടാം ക്ലാസ് വിദ്യാർഥിയെ അയൽവാസി ചെരുപ്പുകൊണ്ട് തലയ്ക്കും കഴുത്തിനും അടിച്ച് പരിക്കേൽപ്പിക്കുകയായിരുന്നു. സംഭവത്തെത്തുടർന്ന് തേനി മെഡിക്കൽ കോളജ് ആശുപത്രിയിൽ കുട്ടി ചികിത്സയിലായിരുന്നു. വണ്ടിപ്പെരിയാർ പോലീസിലും ഇടുക്കി ചൈൽഡ് ലൈനിലും പരാതി നൽകിയിരുന്നു. പ്രതിയെ സംരക്ഷിക്കാനാണ് പോലീസ് ശ്രമിക്കുന്നതെന്നും പരാതിയുണ്ട്. കഴിഞ്ഞദിവസംവരെ പ്രതി ഒളിവിലാണെന്നാണ് പോലീസ് പറഞ്ഞിരുന്നത്. എന്നാൽ, രണ്ടു ദിവസം മുമ്പും പ്രതി പരാതിക്കാരന്‍റെ വീട്ടുമുറ്റത്ത് എത്തിയിരുന്നതായും പറയുന്നു.

ഇതരസംസ്ഥാന തൊഴിലാളി ദുരൂഹസാഹചര്യത്തില്‍ മരിച്ച നിലയില്‍

നെടുങ്കണ്ടം: ഇതര സംസ്ഥാന തൊഴിലാളിയെ ദുരൂഹസാഹചര്യത്തില്‍ മരിച്ചനിലയില്‍ കണ്ടെത്തി. ഒപ്പം താമസിച്ചിരുന്നവര്‍ പോലീസ് കസ്റ്റഡിയില്‍. എഴുകുംവയലിലെ വീട്ടിലാണ് ഝാര്‍ഖണ്ഡ് സ്വദേശി മന്‍സൂറിനെ(37) ഇന്നലെ രാവിലെ മരിച്ച നിലയില്‍ കണ്ടെത്തിയത്. ഇയാള്‍ക്കൊപ്പം താമസിച്ചിരുന്ന ഝാര്‍ഖണ്ഡ് സ്വദേശികളായ സുനില്‍(40), മാണ്ഡി (36) എന്നിവരെയാണ് നെടുങ്കണ്ടം പോലീസ് കസ്റ്റഡിയിലെടുത്തത്. കണ്ണൂര്‍ സ്വദേശിയുടെ ഉടമസ്ഥതയിലുള്ള ഏലത്തോട്ടത്തിലെ ജോലിക്കാരായിരുന്നു മൂവരും. ഒരു വീടിന്‍റെ ഇരു മുറികളിലായിരുന്നു ഇവര്‍ താമസിച്ചിരുന്നത്. ഇന്നലെ രാവിലെ മറ്റു തൊഴിലാളികളാണ് തുറന്നുകിടന്ന മുറിയില്‍ മന്‍സൂറിനെ മരിച്ചനിലയില്‍ കണ്ടെത്തിയത്. ഒപ്പം താമസിച്ചിരുന്ന ദമ്പതികളെ കാണാതായതോടെ ഇവരുടെ മൊബൈല്‍ നമ്പര്‍ കേന്ദ്രീകരിച്ചു നടത്തിയ അന്വേഷണത്തില്‍ ഇരുവരെയും ഉപ്പുതറ പരപ്പില്‍വച്ച് കോട്ടയത്തേക്കുള്ള ബസില്‍നിന്നും പിടികൂടുകയായിരുന്നു. നെടുങ്കണ്ടത്തെ സ്വകാര്യ ആശുപത്രിയില്‍ സൂക്ഷിച്ചിരിക്കുന്ന മന്‍സൂറിന്‍റെ മൃതദേഹം ഇന്ന് പോസ്റ്റ്മോര്‍ട്ടം നടത്തും. പോസ്റ്റ്മോര്‍ട്ടത്തിന് ശേഷം മാത്രമേ മരണകാരണം വ്യക്തമാകൂ എന്ന് പോലീസ് അറിയിച്ചു. മന്‍സൂര്‍ മരിച്ചുകിടക്കുന്നത് കണ്ടു ഭയന്നാണ് കോട്ടയത്തേക്കു പോയതെന്നാണ് ദമ്പതികള്‍ മൊഴി നല്‍കിയതെന്നാണ് വിവരം.

നാടിന്‍റെ കരുതൽ; ഒരു കുരുന്നുകൂടി ജീവിതത്തിലേക്ക് ; കരള്‍ മാറ്റിവയ്ക്കാന്‍ ഏഴു വയസുകാരനായി 25 ദിവസം കൊണ്ട് 25 ലക്ഷം രൂപ

നെടുങ്കണ്ടം: ഏഴുവയസുകാരന്‍റെ കരള്‍ മാറ്റിവയ്ക്കൽ ശസ്ത്രക്രിയയ്ക്കായി 25 ദിവസംകൊണ്ട് 25 ലക്ഷം രൂപ സമാഹരിച്ചു. സുമനസുകൾ സഹായഹസ്തം നീട്ടിയതോടെ ഏഴുവയസുകാരനായ അഡോണ്‍ ജീവിതത്തിലേക്കു തിരികെയെത്താന്‍ തയാറെടുക്കുന്നു. പച്ചടി ഇലവുംകുന്നേല്‍ സിനോയിയുടെയും അനുമോളുടെയും മകൻ അഡോണിന് കരള്‍മാറ്റ ശസ്ത്രക്രിയയ്ക്കായി 25 ലക്ഷം രൂപയാണ് വേണ്ടിയിരുന്നത്. കരള്‍ നല്‍കാന്‍ അമ്മ തയാറായെങ്കിലും നിര്‍ധന കുടുംബത്തിന് ഇത്രയും വലിയ തുക കണ്ടെത്താന്‍ പ്രയാസമായിരുന്നു. ഈ സാഹചര്യത്തില്‍ നെടുങ്കണ്ടത്തെ പൊതുപ്രവര്‍ത്തകര്‍ ചേര്‍ന്ന് അഡോണ്‍ ചികിത്സാ സഹായ സമിതിക്കു രൂപം നല്‍കുകയായിരുന്നു. ഇവരുടെ അക്ഷീണ പരിശ്രമത്തെത്തുടര്‍ന്ന് സ്വദേശത്തെയും വിദേശത്തെയും ആളുകള്‍ കൈയയച്ച് സംഭാവനകള്‍ നല്‍കി. എറണാകുളത്തെ സ്വകാര്യ ആശുപത്രിയില്‍ കഴിയുന്ന അഡോണ്‍ 27ന് ശസ്ത്രക്രിയയ്ക്കു വിധേയനാകുമെന്ന് സമിതി ഭാരവാഹികള്‍ അറിയിച്ചു. ശസ്ത്രക്രിയയ്ക്കും തുടര്‍ചികിത്സകള്‍ക്കും ആവശ്യമായ പണം ലഭിച്ചതോടെ ഇതിനായി ആരംഭിച്ച ബാങ്ക് അക്കൗണ്ട് ക്ലോസ് ചെയ്തതായും ഭാരവാഹികള്‍ പറഞ്ഞു. നെടുങ്കണ്ടം കേന്ദ്രമായി പൊതുപ്രവര്‍ത്തകരുടെ കൂട്ടായ്മ രൂപീകരിച്ച് മുന്‍കാലങ്ങളിലും ഇത്തരത്തില്‍ ചികിത്സാസഹായങ്ങള്‍ സ്വരൂപിച്ചിട്ടുണ്ട്. ഇതുവഴി നിരവധി നിര്‍ധനകുടുംബങ്ങളാണ് ജീവിതത്തിലേക്ക് മടങ്ങിയെത്തിയിട്ടുള്ളത്.

മഴക്കെടുതി: ജില്ലയിൽ വൻ കൃഷിനാശം

തൊടുപുഴ: കഴിഞ്ഞ ഒരു മാസത്തിനിടെയുണ്ടായ കാലവർഷക്കെടുതികളിൽ കർഷകർക്കുണ്ടായത് വൻ നാശനഷ്ടം. ഓണം വിപണി ലക്ഷ്യമിട്ട് കൃഷി ചെയ്തിരുന്ന വാഴ ഉൾപ്പെടെയുള്ള വിളകളാണ് കാറ്റിലും മഴയിലും തകർന്നത്. കഴിഞ്ഞ മാസം 15 മുതൽ ഈ മാസം 16 വരെ ജില്ലയിൽ 6.14 കോടിയുടെ കൃഷിനാശമുണ്ടായതായാണ് പ്രാഥമിക കണക്ക്. 12,089 കർഷകരുടെ കൃഷിയാണ് ഇക്കാലയളവിൽ നശിച്ചത്. കനത്ത തോതിൽ മഴ പെയ്ത കഴിഞ്ഞ മാസം 15 മുതൽ 28 വരെ 2520 കർഷകർക്ക് വ്യാപക കൃഷി നാശമുണ്ടായി. ഇക്കാലയളവിൽ ജില്ലയിൽ 4.35 കോടി രൂപയുടെ കൃഷിനാശമാണ് പ്രാഥമികമായി റിപ്പോർട്ട് ചെയ്തത്. പിന്നീട് കഴിഞ്ഞ രണ്ടാഴ്ചയ്ക്കുള്ളിൽ 9569 കർഷകർക്കും കൃഷി നാശം മൂലം നഷ്ടമുണ്ടായി. 1.79 കോടിയുടെ നഷ്ടമാണ് കണക്കാക്കുന്നത്. കഴിഞ്ഞ 24 മുതൽ ഈ മാസം16 വരെ ഉണ്ടായ കാറ്റിലും മഴയിലും 1041 ഹെക്ടർ സ്ഥലത്താണ് കൃഷിനാശമുണ്ടായത്. കൂടുതൽ കർഷകർക്ക് നഷ്ടം നേരിട്ടത് പീരുമേട്, അടിമാലി, നെടുങ്കണ്ടം ബ്ലോക്കുകളിലാണ്. പീരുമേട്ടിൽ 2681 കർഷകരുടെ 333 ഹെക്ടർ സ്ഥലത്തെ കൃഷിയാണ് നശിച്ചത്. അടിമാലി ബ്ലോക്കിൽ 2164 കർഷകരുടെ 95.97 ഹെക്ടർ സ്ഥലത്തെ കൃഷി നശിച്ചു. നെടുങ്കണ്ടം ബ്ലോക്കിൽ 1886 കർഷകർക്ക് 438 ഹെക്ടർ സ്ഥലത്ത് കൃഷിനാശമുണ്ടായി. ദേവികുളത്ത് 635 കർഷകരുടെ 18 ഹെക്ടറിലും ഇളംദേശം ബ്ലോക്കിൽ 425 കർഷകരുടെ 49 ഹെക്ടറിലും ഇടുക്കി ബ്ലോക്കിൽ 886 കർഷകരുടെ 36 ഹെക്ടറിലുമാണ് കൃഷി നാശമുണ്ടായത്. കട്ടപ്പന ബ്ലോക്കിൽ 779 പേർക്ക് കൃഷിനാശം നേരിട്ടു. 67.92 ഹെക്ടർ കൃഷി നശിച്ചു. തൊടുപുഴയിൽ 113 കർഷകരുടെ 2.92 ഹെക്ടർ സ്ഥലത്തെ കൃഷിയാണ് നശിച്ചത്. വാഴ, മരച്ചീനി പോലെയുള്ള തന്നാണ്ടു വിളകളും കുരുമുളക്, റബർ എന്നിവയും വ്യാപകമായി നശിച്ചു. വിപണിയിലെത്തിക്കാറായ വാഴകൾ കാറ്റിലും മഴയിലും നിലംപൊത്തിയത് കർഷകർക്ക് വലിയ നഷ്ടമുണ്ടാക്കി. ഏലം, കൊക്കോ, ജാതി, ഗ്രാന്പു, തെങ്ങ്, കമുക്, പച്ചക്കറി എന്നിവയും വലിയ തോതിൽ നശിച്ചവയിലുൾപ്പെടും. പല കർഷകർക്കും ആയിരക്കണക്കിനു രൂപയുടെ നഷ്ടമുണ്ടായിട്ടുണ്ട്. നഷ്ടത്തിന്‍റെ പ്രാഥമിക കണക്കുകളാണ് കൃഷിവകുപ്പ് ശേഖരിച്ചിരിക്കുന്നത്. ഫീൽഡ് പരിശോധനകൾ പൂർത്തിയാകുന്നതോടെ നഷ്ടക്കണക്ക് ഇതിനു മേലെയായി ഉയരാനും സാധ്യതയുണ്ട്. കൃഷിനാശത്തിനുള്ള നഷ്ടപരിഹാരത്തിനായി നേരത്തേ കർഷകർ കൃഷിഭവനുകളിൽ നേരിട്ടെത്തി അപേക്ഷ നൽകുകയായിരുന്നു പതിവ്. എന്നാൽ ഇപ്പോൾ എയിംസ് പോർട്ടൽ വഴിയാണ് കർഷകർ കൃഷിനാശത്തിന് അപേക്ഷ നൽകേണ്ടത്. ഇതിനായി കർഷകർ എയിംസ് പോർട്ടലിൽ രജിസ്റ്റർ ചെയ്യണം. നഷ്ടം നേരിട്ട കൃഷിക്കാർ പേര്, വീട്ടുപേര്, വാർഡ്, കൃഷിഭൂമിയുടെ വിസ്തൃതി, കൃഷിനാശമുണ്ടായ വിളകളുടെ പേര്, എണ്ണം എന്നീ വിവരങ്ങൾക്കൊപ്പം നഷ്ടമുണ്ടായ കൃഷിയിടത്തിൽ കർഷകൻ നിൽക്കുന്ന ചിത്രം ഉൾപ്പെടെയാണ് അപേക്ഷിക്കേണ്ടത്. വിളകൾ ഇൻഷ്വർ ചെയ്ത കർഷകർ 15 ദിവസത്തിനകവും മറ്റു കർഷകർ 10 ദിവസത്തിനകവും അപേക്ഷിക്കണം. എന്നാൽ നഷ്ടപരിഹാരത്തിനായി അപേക്ഷ നൽകിയാലും ഇത് ലഭിക്കാൻ കാലങ്ങൾ കാത്തിരിക്കേണ്ടി വരുമെന്നാണ് കർഷകർ പറയുന്നത്. പലപ്പോഴും നാശനഷ്ടം ഉണ്ടായി മാസങ്ങൾ പിന്നിടുന്പോഴാണ് കർഷകർക്ക് തുച്ഛമായ നഷ്ടപരിഹാരത്തുക ലഭിക്കുക.

അതുലിന് അന്ത്യാഞ്ജലി അർപ്പിച്ച് മന്ത്രി റോഷി

മൂലമറ്റം: ത്രിവേണി സംഗമത്തിൽ മുങ്ങിമരിച്ച മൂലമറ്റം എകെജി കോളനിയിലെ നടുപ്പറന്പിൽ അതുൽ ബൈജുവിന് അന്ത്യാഞ്ജലിയർപ്പിക്കാൻ മന്ത്രി റോഷി അഗസ്റ്റിൻ വീട്ടിലെത്തി. മകന്‍റെ ആകസ്മിക വേർപാടിൽ വിങ്ങിപ്പൊട്ടിയ മാതാപിതാക്കളായ എം.ആർ. ബൈജുവിനെയും ബിന്ദുവിനെയും മന്ത്രി ആശ്വസിപ്പിച്ചു. തൊടുപുഴയിലെ വർക്‌ഷോപ്പിൽ ജോലി ചെയ്തുവരികയായിരുന്ന അതുൽ വിദേശത്ത് ജോലിക്കു പോകാനുള്ള ഒരുക്കത്തിലായിരുന്നു. ഈ മോഹം ബാക്കിവച്ചാണ് അതുൽ വിടപറഞ്ഞത്. തൊടുപുഴ ജില്ലാ ആശുപത്രിയിൽ പോസ്റ്റ്മോർട്ടം നടത്തിയ ശേഷം മൃതദേഹം വീട്ടിലെത്തിച്ചു. ജീവിതത്തിന്‍റെ നാനാതുറകളിൽപ്പെട്ടവർ അതുലിന് ആദരാഞ്ജലിയർപ്പിക്കാനെത്തി. ഇന്നലെ ഉച്ചകഴിഞ്ഞ് മൂന്നോടെ തൊടുപുഴ ശാന്തിതീരം ശ്മശാനത്തിൽ മൃതദേഹം സംസ്കരിച്ചു.

തെക്കുംഭാഗത്ത് വീട്ടിൽനിന്നു സ്വർണമാല കവർന്നു

തൊടുപുഴ: വീടിന്‍റെ പിൻഭാഗത്തെ പൂട്ടു പൊളിച്ച് അകത്തു കടന്ന മോഷ്ടാക്കൾ സ്വർണ മാല അപഹരിച്ചു. തെക്കുംഭാഗം വട്ടമറ്റം സദാനന്ദന്‍റെ വീട്ടിൽ കയറിയ മോഷ്ടാക്കൾ മൂന്നു പവന്‍റെ മാലയാണ് കവർന്നത്. ഞായറാഴ്ച രാത്രിയാണ് സംഭവം. സദാനന്ദന്‍റെ മകന്‍റെ ഭാര്യയുടെ മാലയാണ് നഷ്ടപ്പെട്ടത്. മാല ഉൗരി അലമാരയുടെ സമീപമാണ് വച്ചിരുന്നത്. രാത്രി വീടിന്‍റെ അടുക്കള ഭാഗത്തെ പൂട്ടു പൊളിച്ച് അകത്തു കയറിയ മോഷ്ടാക്കൾ മാല എടുത്ത് കടന്നു കളയുകയായിരുന്നു. രാവിലെയാണ് മാല നഷ്ടപ്പെട്ട വിവരം വീട്ടുകാർ അറിയുന്നത്. അടുത്ത വീട്ടിൽ നിന്നും വാക്കത്തിയും കന്പിപ്പാരയും എടുത്താണ് മോഷ്ടാക്കൾ വീടിന്‍റെ പൂട്ടു പൊളിച്ചത്. വിവരമറിഞ്ഞ് തൊടുപുഴ പോലീസ് സ്ഥലത്തത്തി പരിശോധന നടത്തി. വിരലടയാള വിദഗ്ധരും പോലീസ് നായയും എത്തി പരിശോധന നടത്തിയെങ്കിലും മോഷ്ടാക്കളെക്കുറിച്ച് സൂചനയൊന്നും ലഭിച്ചില്ല. മഴക്കാലമാരംഭിച്ചതോടെ പല മേഖലകളിലും മോഷ്ടാക്കളുടെ വിളയാട്ടമാണ്. അടുത്ത നാളുകളിൽ നടന്ന മോഷണങ്ങളിലൊന്നും പ്രതികളെ പിടികൂടാൻ പോലീസിനു കഴിഞ്ഞിട്ടില്ല.

യൂത്ത് കോണ്‍ഗ്രസ് നേതാക്കളെ കരുതൽ തടങ്കലിലാക്കി

തൊടുപുഴ: കേരള പോലീസ് അസോസിയേഷൻ സംസ്ഥാന കണ്‍വൻഷൻ ഉദ്ഘാടനം ചെയ്യാൻ മുഖ്യമന്ത്രി എത്തുന്നതിന്‍റെ ഭാഗമായി യൂത്ത് കോണ്‍ഗ്രസ് നേതാക്കളെ കരുതൽ തടങ്കലിലാക്കി പോലീസ്. തൊടുപുഴ നിയോജകമണ്ഡലം പ്രസിഡന്‍റ് ബിലാൽ സമദ്, യൂത്ത് കോണ്‍ഗ്രസ് ജില്ലാ സെക്രട്ടറി ഷാനു ഷാഹുൽ, തൊടുപുഴ നിയോജകമണ്ഡലം വൈസ് പ്രസിഡന്‍റ് എബി മുണ്ടയ്ക്കൻ എന്നിവരെയാണ് കരുതൽ തടങ്കലിലാക്കിയത്. മുഖ്യമന്ത്രി ചടങ്ങിൽ പങ്കെടുത്ത് മടങ്ങിയ ശേഷം ഇവരെ വിട്ടയച്ചു. മുഖ്യമന്ത്രിയുടെ സന്ദർശനത്തോടനുബന്ധിച്ച് കർശന സുരക്ഷയാണ് തിങ്കളാഴ്ച വൈകുന്നേരം മുതൽ തൊടുപുഴ നഗരത്തിൽ ഏർപ്പെടുത്തിയത്. തിങ്കളാഴ്ച രാത്രി ഏഴോടെ തൊടുപുഴയിലെത്തിയ അദ്ദേഹം മാടപ്പറന്പിൽ റിസോർട്ടിലാണ് താമസിച്ചത്. ഇന്നലെ രാവിലെ 10.30-ഓടെ സമ്മേളനം നടക്കുന്ന വെങ്ങല്ലൂർ ജോഷ് പവലിയനിലെത്തി.ഇവിടെയും പഴുതടച്ച സുരക്ഷ ഒരുക്കിയിരുന്നു. ഉദ്ഘാടന യോഗത്തിൽ മുക്കാൽ മണിക്കൂറോളം പ്രസംഗിച്ച അദ്ദേഹം എൽഡിഎഫ് സർക്കാരിന്‍റെ ഭരണനേട്ടവും ക്രമസമാധാന പാലനത്തിലും കുറ്റാന്വേഷണത്തിലും പോലീസിനെ പ്രശംസിച്ചുമാണ് പ്രസംഗം അവസാനിപ്പിച്ചത്.

സർക്കാർ കർഷകരെ ദ്രോഹിക്കുന്നു: പ്രഫ. എം.ജെ. ജേക്കബ്

മൂലമറ്റം: മലയോര കർഷകരെ ദ്രോഹിക്കുന്ന സമീപനമാണ് സർക്കാർ സ്വീകരിക്കുന്നതെന്നു കേരള കോണ്‍ഗ്രസ് ജില്ലാ പ്രസിഡന്‍റ് പ്രഫ.എം.ജെ. ജേക്കബ്. കർഷക സ്നേഹം വാക്കുകളിൽ മാത്രമാണുള്ളത്. സർക്കാരിന്‍റെ ജനദ്രോഹ നടപടികൾക്ക് ഏറ്റവും വലിയ ഉദാഹരണമാണ് ഹൈക്കോടതി കർഷകർക്ക് അനുകൂലമായി പുറപ്പെടുവിച്ച വിധിക്കെതിരേ സുപ്രീം കോടതിയിൽപോയി വിധി സന്പാദിച്ചത്. 1993-ലെ ചട്ടപ്രകാരം ലഭിച്ച പട്ടയ ഭൂമിയിൽ നട്ടുപരിപാലിച്ച മരം മുറിച്ചു വിൽക്കാൻ കർഷകന് അനുമതിയുണ്ടെന്നായിരുന്നു ഹൈക്കോടതി വിധി. ഇതിനെതിരേ സുപ്രീം കോടതിയിൽ അപ്പീൽ പോയ സർക്കാർ കർഷന്‍റെ പട്ടയ ഭൂമിയിലുള്ള അവകാശങ്ങൾ വനം വകുപ്പിന് അടിയറവച്ചതായും കുറ്റപ്പെടുത്തി. കുളമാവ് വൈരമണി ഫോറസ്റ്റ് സ്റ്റേഷൻ പരിധിയിൽപ്പെട്ട ജയകുമാർ എന്ന കർഷകൻ 1993-ലെ ചട്ടപ്രകാരം പട്ടയം ലഭിച്ച ഭൂമിയിൽനിൽക്കുന്ന ആഞ്ഞിലി വെട്ടിയതിനു വനം വകുപ്പ് കേസെടുത്തിരുന്നു. ഇടുക്കി ഫസ്റ്റ് ക്ലാസ് മജിസ്ട്രേറ്റ് കോടതിയിൽ ചാർജ് ചെയ്തിരുന്ന കേസ് ഒഴിവാക്കാനാണ് ഇദ്ദേഹം ഹൈക്കോടതിയെ സമീച്ചത്. 2022 മേയിൽ ജസ്റ്റീസ് മേരി ജോസഫ് ജയകുമാറിന് അനുകൂലമായി വിധി പുറപ്പെടുവിച്ചു. ഇതിനെതിരേയാണ് സർക്കാർ സുപ്രീംകോടതിയെ സമീപിച്ചതും അനുകൂല വിധി സന്പാദിച്ചതും. ഇതോടെ 1993 ചട്ട പ്രകാരം ലഭിച്ച പട്ടയങ്ങളിലുള്ള മരങ്ങൾ മുറിക്കാൻ കഴിയാത്ത സ്ഥിതിയായി. ഹൈക്കോടതി വിധിക്കെതിരേ സർക്കാർ അപ്പീൽ പോകാതിരുന്നെങ്കിൽ കേരളത്തിലെ ആയിരക്കണക്കിന് കർഷകർക്ക് തങ്ങൾ നട്ടു പരിപാലിച്ച മരങ്ങൾ മുറിച്ചുവിൽക്കാൻ സാധിക്കുമായിരുന്നു. ഇതിനുപുറമേ മുറിക്കുന്ന മരങ്ങൾക്ക് പകരം മരങ്ങൾ കർഷകർ നടുകയും ചെയ്യുമായിരുന്നു. ഇത് പരിസ്ഥിതിക്കും ഗുണകരമാകുമായിരുന്നു. വിവാഹം, വിദ്യാഭ്യാസം, ചികിത്സ എന്നിവയ്ക്ക് മരം മുറിച്ചുവിൽക്കാൻ കഴിയാത്ത സ്ഥിതിയാണ് നിലവിലുള്ളതെന്നും ജില്ലാ പ്രസിഡന്‍റ് പറഞ്ഞു. ജോസകുട്ടി തുടിയൻപ്ലാക്കൽ, എ.ഡി. മാത്യു, ജിൽസ് അഗസ്റ്റിൻ, ജോമോൻ മൈലാടൂർ എന്നിവർ പ്രസംഗിച്ചു.

12 ലിറ്റർ ചാരായവുമായി രണ്ടു പേർ അറസ്റ്റിൽ

ചെറുതോണി: 12 ലിറ്റർ വാറ്റുചാരായവും വാറ്റുപകരണങ്ങളുമായി രണ്ടു പേരെ എക്സൈസ് അറസ്റ്റ് ചെയ്തു. പാണ്ടിപ്പാറ തോണിപ്പാറ രതീഷ് സത്യൻ, ഇയാളുടെ ഭാര്യാ സഹോദരൻ പാണ്ടിപ്പാറ ചാമക്കാലയിൽ പ്രദീഷ് ജോസഫ് എന്നിവരാണ് അറസ്റ്റിലായത്. തങ്കമണി എക്സൈസ് റേഞ്ചിലെ പ്രിവന്‍റീവ് ഓഫീസർ ജയൻ പി. ജോണും സംഘവും പാണ്ടിപ്പാറയിൽ നടത്തിയ പരിശോധനയിലാണ് പ്രതികൾ പിടിയിലായത്. പ്രതികളെ ഇന്നു കോടതിയിൽ ഹാജരാക്കും. റെയ്ഡിൽ പ്രിവന്‍റീവ് ഓഫീസർമാരായ പി.എ. ബിജു, ബിനു ജോസഫ്, വനിതാ എക്സൈസ് ഓഫീസർ കെ.ജെ. ബിജി, സിവിൽ എക്സൈസ് ഓഫീസർമാരായ ആൽബിൻ ജോസഫ്, എസ്. സുജിത്, ഡ്രൈവർ ബിലേഷ് എന്നിവർ പങ്കെടുത്തു.

ഉപ്പുതറ പഞ്ചായത്തിൽ ലൈഫ് ഭവനപദ്ധതി തട്ടിപ്പ്: റവന്യു റിക്കവറിക്കൊരുങ്ങി ഭരണസമിതി

ഉപ്പുതറ: ഉപ്പുതറ പഞ്ചായത്തിൽ ലൈഫ് ഭവനപദ്ധതിയിൽ മാനദണ്ഡങ്ങൾ ലംഘിച്ച് വീടു വാങ്ങി പണം തട്ടിയവർക്കെതിരേ റവന്യു റിക്കവറി നടത്താൻ പഞ്ചായത്ത് കമ്മിറ്റി തീരുമാനിച്ചു. ഇന്‍റേണൽ വിജിലൻസ് വിഭാഗം അന്വേഷണം ഊർജിതമാക്കിയതോടെ ചൊവ്വാഴ്ച ചേർന്ന അടിയന്തര പഞ്ചായത്ത് കമ്മിറ്റിയാണ് തീരുമാനമെടുത്തത്. ബ്ലോക്ക് പഞ്ചായത്ത് പ്രസിഡന്‍റ്, കോൺഗ്രസ് മണ്ഡലം കമ്മിറ്റി പ്രസിഡന്‍റ് ഉൾപ്പെടെ 27 പേർക്കെതിരേ റവന്യു റിക്കവറി നടത്തി സർക്കാരിന് നഷ്ടമായ തുക തിരിച്ചുപിടിക്കാനാണ് തീരുമാനം. അടിയന്തര നടപടി സ്വീകരിക്കാൻ പഞ്ചായത്ത് സെക്രട്ടറിയെ കമ്മിറ്റി ചുമതലപ്പെടുത്തി. ഏക്കർ കണക്കിന് പട്ടയഭൂമിയുള്ളവർ, രണ്ടും മൂന്നും വാഹനങ്ങളും വാസയോഗ്യമായ വീടും ഉള്ളവർ, ലൈഫ് പദ്ധതിയിൽ പണിത വീട് ഒരു വർഷം തികയും മുൻപ് മൂന്നിരട്ടി വിലയ്ക്കു വിറ്റവർ തുടങ്ങിയവർക്കെതിരേയാണ് നടപടി സ്വീകരിക്കുന്നത്. എൽഡിഎഫിന്‍റെ നേതൃത്വത്തിലുള്ള കഴിഞ്ഞ ഭരണസമിതിയുടെ കാലത്താണ് തട്ടിപ്പു നടന്നത്. വാസയോഗ്യമായ വീടുവയ്ക്കാൻ സ്വന്തമായി പണമില്ലാത്ത നൂറുകണക്കിന് പാവങ്ങൾ പുറത്തുനിൽക്കുമ്പോഴാണ് അനർഹരായവർ ഗുണഭോക്തൃ പട്ടികയിൽ കടന്നുകൂടി തട്ടിപ്പു നടത്തിയത്. ഒന്നാം ഗഡു വാങ്ങിയ ശേഷം ഒരു പണിയും ചെയ്യാതെ രണ്ടും മൂന്നും നാലും ഗഡു കൈപ്പറ്റിയ നിരവധി പേരുണ്ട്. പഴയ വീട് അറ്റകുറ്റപ്പണി നടത്തി പണം തട്ടിയവരും മറ്റുള്ളവരുടെ വീടിന്‍റെ ഫോട്ടോ നൽകി പണം തട്ടിയവരും പട്ടയ ഭൂമിയുടെ രേഖ നൽകി പട്ടയമില്ലാത്ത ( ഉപേക്ഷിക്കപ്പെട്ട എസ്റ്റേറ്റ്) ഭൂമിയിൽ വീടു വച്ചവരും ഇക്കൂട്ടത്തിലുണ്ട്. ഇതിന് അവസരമുണ്ടാക്കിയതിൽ അന്നത്തെ ഉദ്യോഗസ്ഥർക്കും വാർഡ് മെമ്പർമാർക്കും നിർണായക പങ്കുണ്ടെന്ന് വിജിലൻസ് കണ്ടെത്തിയിട്ടുണ്ട്. ഡിവിഷൻ മെമ്പറായിരിക്കുമ്പോഴാണ് കട്ടപ്പന ബ്ലോക്ക് പഞ്ചായത്ത് പ്രസിഡന്‍റ് വീട് സംഘടിപ്പിച്ചെടുത്തത്. മൂന്നു സെന്‍റ് ഭൂമിയേ സ്വന്തമായിട്ടുള്ളൂ എന്നു കാണിച്ചാണ് ബ്ലോക്കു പഞ്ചായത്ത് പ്രസിഡന്‍റ് വീടിനു പണം വാങ്ങിയത്. പരാതിയെ തുടർന്ന് നടത്തിയ അന്വേഷണത്തിൽ അദ്ദേഹത്തിന്‍റെ പേരിൽ ഒന്നരയേക്കർ പട്ടയ ഭൂമിയുണ്ടെന്ന് കണ്ടെത്തി. കോൺഗ്രസ് മണ്ഡലം പ്രസിഡന്‍റും മാനദണ്ഡങ്ങൾ ലംഘിച്ചാണ് മുഴുവൻ തുകയും കൈപ്പറ്റിയത്. 2022ലെ പ്രാഥമിക അന്വേഷണത്തിൽ 27 പേർ അനധികൃതമായി പണം കൈപ്പറ്റിയതായി കണ്ടെത്തിയിരുന്നു. തുടർന്ന് സർക്കാരിന് നഷ്ടമായ പണം തിരിച്ചടപ്പിക്കണമെന്ന് വിജിലൻസ് അന്ന് നിർദേശം നൽകിയിരുന്നു. രാഷ്ട്രീയ സമ്മർദം മൂലം നോട്ടീസയച്ച് നടപടി ലഘൂകരിക്കുകയാണ് പഞ്ചായത്ത് അന്നു ചെയ്തത്. കഴിഞ്ഞ ദിവസം പരിശോധനയ്ക്ക് എത്തിയ വിജിലൻസ് വിഭാഗം ഇതുവരെയുള്ള നടപടി സംബന്ധിച്ച് വിശദീകരണം തേടിയിരുന്നു. തുടർന്നാണ് ചൊവ്വാഴ്ച അടിയന്തര പഞ്ചായത്ത് കമ്മിറ്റി കൂടി റവന്യു റിക്കവറിയ്ക്ക് തീരുമാനമെടുത്തത്. ഒരു വീടിന് നാലു ലക്ഷം രൂപയും തൊഴിലുറപ്പു പദ്ധതിയിൽ 25,000 രൂപയുടെ തൊഴിൽദിനങ്ങളുമാണ് സർക്കാർ സഹായം നൽകിയത്. ക്രമക്കേടിലൂടെ ഇതുവരെയുള്ള കണക്ക് പ്രകാരം സർക്കാരിന് 1,19,75,000 രൂപ നഷ്ടമായിട്ടുണ്ട്. ഈ തക 18 ശതമാനം പലിശയോടെ തിരിച്ചുപിടിക്കാനാണ് വിജിലൻസ് നിർദേശം. ചൊവ്വാഴ്ച ചേർന്ന പഞ്ചായത്ത് കമ്മിറ്റിയിൽ ഒരു സിപിഎം അംഗവും കോൺഗ്രസ് അംഗവും പങ്കെടുത്തില്ല. ലൈഫിൽ പണിത വീട് ഉപയോഗിക്കാത്തവർ, വാടകയ്ക്കു നൽകിയവർ എന്നിവർക്കെതിരേ നടപടി സ്വീകരിക്കാനും കമ്മിറ്റി തീരുമാനിച്ചിട്ടുണ്ടെന്ന് പ്രസിഡന്‍റ് ജയിംസ് കെ. ജേക്കബ് അറിയിച്ചു.

മെറിറ്റ് ഡേ ആഘോഷിച്ചു

മുതലക്കോടം: സേക്രഡ് ഹാർട്ട് ഗേൾസ് ഹൈസ്കൂളിൽ മെറിറ്റ് ഡേയും വിദ്യാരംഗം കലാസാഹിത്യ വേദിയുടെയും വിവിധ ക്ലബ്ബുകളുടെയും ഉദ്ഘാടനവും നടത്തി. തൊടുപുഴ ന്യൂമാൻ കോളജ് പ്രിൻസിപ്പൽ ഡോ. ജെന്നി കെ. അലക്സ് ഉദ്ഘാടനം ചെയ്തു. കോതമംഗലം രൂപത വിദ്യാഭ്യാസ ഡയറക്ടർ ഫാ. മാത്യു മുണ്ടയ്ക്കൽ എസ്എസ്എൽസി പരീക്ഷയിൽ എല്ലാ വിഷയത്തിനും എ പ്ലസ് നേടിയ വിദ്യാർഥികളെ ആദരിച്ചു. എഇഒ ഷീബ മുഹമ്മദ്, സ്കൂൾ മാനേജർ ഫാ. സെബാസ്റ്റ്യൻ ആരോലിച്ചാലിൽ, കൗണ്‍സിലർ ഷഹനാ ജാഫർ, അസി. മാനേജർ ഫാ. ഡോണ്‍ കാരക്കുന്നേൽ, ഹെഡ്മിസ്ട്രസ് സുനി എം. കുര്യൻ , സ്റ്റാഫ് സെക്രട്ടറി മരിയറ്റ് ജോസ് , ജെബിൻ ജോസ് ജോണ്‍ എന്നിവർ പ്രസംഗിച്ചു.

കൂടുതൽ നഴ്സിംഗ് സീറ്റുകൾ അനുവദിക്കണം: കെഎസ്‌സി

തൊടുപുഴ: സംസ്ഥാനത്ത് കൂടുതൽ നഴ്സിംഗ് സീറ്റുകൾ അനുവദിക്കാൻ സർക്കാർ തയാറാകണമെന്ന് കെഎസ്‌സി സംസ്ഥാന പ്രസിഡന്‍റ് ജോണ്‍സ് ജോർജ് ആവശ്യപ്പെട്ടു. കേരളത്തിൽ നഴ്സിംഗ് സീറ്റുകളിലുള്ള കുറവു മൂലം വിദ്യാർഥികൾ ഇതര സംസ്ഥാനങ്ങളെയും വിദേശരാജ്യങ്ങളെയും തുടർപഠനത്തിനായി ആശ്രയിക്കേണ്ടി വരുന്നു. ഇതു മൂലം സാന്പത്തിക പിന്നാക്കാവസ്ഥയിലുള്ളവർ വളരെയധികം കഷ്ടപ്പെടുകയാണ്. ഈ സാഹചര്യം മുതലെടുത്ത് വിദേശ മെഡിക്കൽ സീറ്റുകളുമായി ബന്ധപ്പെട്ട് വൻ ലോബി പ്രവർത്തിക്കുന്നുണ്ട്. പ്രതിവർഷം 75000ഓളം വിദ്യാർഥികൾ നഴ്സിംഗ് വിദ്യാഭ്യാസത്തിനു വേണ്ട യോഗ്യത നേടി പുറത്തുവരുന്പോഴും 9000 സീറ്റുകൾ മാത്രമാണ് കേരളത്തിൽ നിലവിലുള്ളത്. ഈ സാഹചര്യത്തിൽ കൂടുതൽ നഴ്സിംഗ് സീറ്റുകൾ ഗവ.മെഡിക്കൽ കോളജുകളിലും മറ്റിതര ആരോഗ്യ വിദ്യാഭ്യാസ സ്ഥാപനങ്ങളിലും അനുവദിക്കാൻ നടപടി സ്വീകരിക്കണമെന്നും ഇക്കാര്യത്തിൽ ആരോഗ്യ മന്ത്രി ഇടപെടണമെന്നും അദ്ദേഹം ആവശ്യപ്പെട്ടു.

റബർ ബോർഡ് ജിയോ മാപ്പിംഗ് തുടങ്ങി

കാഞ്ഞിരപ്പള്ളി: ഇയുഡിആർ ചട്ടങ്ങൾ പാലിച്ച് ഇന്ത്യയിൽ നിന്ന് യൂറോപ്യൻ യൂണിയനിലേക്കുള്ള റബറിന്‍റെയും റബറുൽപന്നങ്ങളുടെയും കയറ്റുമതി ഉറപ്പാക്കുന്നതിനായി റബർബോർഡിന്‍റെ ആഭിമുഖ്യത്തിൽ റബർതോട്ടങ്ങളിൽ ജിയോ മാപ്പിംഗ് ആരംഭിച്ചു. ജിയോ മാപ്പിംഗിനായി ഹൈദരാബാദ് കേന്ദ്രമായി പ്രവർത്തിക്കുന്ന ട്രയമ്പു ടെക് സൊല്യൂഷൻസ് പ്രൈവറ്റ് ലിമിറ്റഡ് എന്ന സ്ഥാപനത്തെയാണ് റബർബോർഡ് നിയോഗിച്ചിട്ടുള്ളത്. ഭൂമിയുടെ ഉടമസ്ഥാവകാശം, വിസ്തൃതി, റബർതോട്ടങ്ങളുടെ അതിരുകൾ തുടങ്ങിയ വിശദാംശങ്ങൾ ശേഖരിച്ചുകൊണ്ടാണ് മാപ്പിംഗ് നടത്തുന്നത്. ഇതുമായി ബന്ധപ്പെട്ട് ശേഖരിക്കുന്ന വിവരങ്ങൾ റബർബോർഡിന്‍റെ കേന്ദ്രീകൃത ഡാറ്റാ ബേസിൽ സൂക്ഷിക്കുന്നതും വിവരങ്ങളുടെ രഹസ്യാത്മകത ഉറപ്പാക്കുകയും ചെയ്യുന്നതാണ്. ഇയുഡിആറുമായി ബന്ധപ്പെട്ട വിവരങ്ങൾ പങ്കുവയ്ക്കാനായി തോട്ടമുടമകൾക്കും റബർഡീലർമാർക്കും സംസ്കർത്താക്കൾക്കും വ്യവസായികൾക്കുമായി അവബോധനപരിപാടികൾ സംഘടിപ്പിച്ചുവരുന്നു. ഈ ഉദ്യമത്തോട് കർഷകർ സഹകരിക്കണമെന്ന് അസിസ്റ്റന്‍റ ഡയറക്ടർ അറിയിച്ചു.

തൊണ്ടിക്കുഴ-നടയം റോഡിൽ പോയാൽ കുഴിയിൽ വീണതുതന്നെ...

തൊടുപുഴ: ഇടവെട്ടി പഞ്ചായത്തിലെ മൂന്നാം വാർഡിലൂടെ കടന്നു പോകുന്ന തൊണ്ടിക്കുഴ-നടയം റോഡ് കാൽനട യാത്ര പോലും സാധ്യമല്ലാത്ത വിധം തകർന്നു. വർഷങ്ങളായി ഈ റോഡിലൂടെ ദുരിത യാത്ര നടത്തുകയാണ് പ്രദേശവാസികൾ. കുണ്ടും കുഴിയും രൂപപ്പെട്ട് പൂർണമായും തകർന്ന റോഡിന്‍റെ ദുരവസ്ഥ പരിഹരിക്കണമെന്ന് നാട്ടുകാർ കാലങ്ങളായി ആവശ്യപ്പെടുന്നുണ്ടെങ്കിലും ഇതൊന്നും കാണാത്ത മട്ടിലാണ് തദ്ദേശ സ്ഥാപന അധികൃതർ. തൊണ്ടിക്കുഴ, ശാസ്താംപാറ, പൂവേക്കുന്ന്, ശാരദക്കവല, മരവെട്ടിച്ചുവട്, നടയം എന്നിവിടങ്ങളിലേയ്ക്കുള്ള നൂറുകണക്കിന് യാത്രക്കാരും വാഹനങ്ങളും സഞ്ചരിക്കുന്ന പാതയാണ് തൊണ്ടിക്കുഴ-നടയം റോഡ്. മൂന്നു കിലോമീറ്റർ ദൂരമുള്ള റോഡിൽ തൊണ്ടിക്കുഴ പൂവേക്കുന്ന് ഭാഗമാണ് കൂടുതൽ തകർന്നിരിക്കുന്നത്. കുണ്ടും കുഴിയുമായി മാറിയ റോഡിൽ ടാറിംഗ് പേരിനു പോലുമില്ല. റോഡ് തകർന്നതിനാൽ ഇതു വഴി ഓട്ടോകളും മറ്റു വാഹനങ്ങളും കടന്നു വരാൻ പോലും മടികാണിക്കുന്നു. വർഷങ്ങൾക്കു മുന്പാണ് റോഡ് ടാറിംഗ് നടത്തിയത്. ഇപ്പോൾ അറ്റകുറ്റപ്പണി നടത്തിയിട്ടു തന്നെ മൂന്നു വർഷത്തോളമായി. ഇതിനിടെ റോഡ് നിർമാണത്തിനായി ജില്ലാ പഞ്ചായത്തിൽ നിന്നും 15 ലക്ഷം രൂപ അനുവദിച്ചിരുന്നു. എന്നാൽ, രണ്ടു തവണ ടെണ്ടർ ക്ഷണിച്ചെങ്കിലും ആരും കരാർ ഏറ്റെടുക്കാത്തതിനാൽ ഫണ്ട് ലാപ്സായി. പിന്നീട് മുഖ്യമന്ത്രിയുടെ ദുരിതാശ്വാസ നിധിയിൽ നിന്നും ഒന്ന്, മൂന്ന്, ആറു വാർഡുകൾക്ക് ഫണ്ടനുവദിച്ചെന്ന് അധികൃതർ അറിയിച്ചെങ്കിലും ആറാം വാർഡിനു മാത്രമാണ് തുക അനുവദിച്ചത്. എന്നാൽ മൂന്നാം വാർഡിന് അനുവദിച്ച തുക മറ്റു വാർഡിലേക്ക് മാറ്റി ചെലവഴിക്കുകയായിരുന്നെന്ന് ആരോപണമുയർന്നു. തുക വകമാറ്റി ചെലവഴിച്ചതല്ലെന്നും ഫണ്ടിന്‍റെ അപര്യാപ്തത മൂലമാണ് റോഡ് നിർമാണത്തിന് തുക ലഭിക്കാതിരുന്നതെന്നും വാർഡ് മെംബർ ബിന്ദു ശ്രീകാന്ത് പറഞ്ഞു. എന്നാൽ, പഞ്ചായത്ത് അടിയന്തരമായി ഇടപെട്ട് റോഡിന്‍റെ ദുരവസ്ഥയ്ക്കും നാട്ടുകാരുടെ ദുരിതയാത്രയ്ക്കും ഉടൻ പരിഹാരം കാണണമെന്നാണ് നാട്ടുകാരുടെ ആവശ്യം.

ബൈക്കും ജീപ്പും കൂട്ടിയിടിച്ച് രണ്ടു യുവാക്കൾ മരിച്ചു

അണക്കര: ബൈക്ക് ജീപ്പുമായി ഇടിച്ച് ബൈക്ക് യാത്രക്കാരായ രണ്ടു യുവാക്കൾ മരിച്ചു. അണക്കര എട്ടാംമൈൽ വെള്ളറ ഷൈജുവിന്‍റെ മകൻ ഷാനെറ്റ് (18), കൊടുവേലിക്കുളത്ത് ഷിബുവിന്‍റെ മകൻ അലൻ (17) എന്നിവരാണു മരിച്ചത്. ഇന്നലെ ഉച്ചകഴിഞ്ഞ് മൂന്നോടെ ചെല്ലാർകോവിൽ-മൈലാടുംപാറ റോഡിലാണ് അപകടമുണ്ടായത്. കൊച്ചറയിൽനിന്ന് ചെല്ലാർകോവിലിലേക്കുവരുകയായിരുന്ന ബൈക്കും ചെല്ലാർകോവിൽനിന്ന് കന്പംമെട്ടു വഴി തമിഴ്നാട്ടിലേക്കു തൊഴിലാളികളുമായി പോയ ജീപ്പുമായി ഇടിക്കുകയായിരുന്നു. അമിത വേഗതയിലായിരുന്ന ബൈക്ക് നിയന്ത്രണംവിട്ടു മറിഞ്ഞ് ജീപ്പിലിടിക്കുകയായിരുന്നെന്ന് പോലീസ് പറഞ്ഞു. സംഭവ സ്ഥലത്തു വച്ചുതന്നെ ഒരാൾ മരിച്ചു. ഒരാൾ പുറ്റടി സർക്കാർ ആശുപത്രിയിലേക്കു കൊണ്ടുപോകുന്ന വഴി മധ്യയുമാണ് മരിച്ചത്. ഇരുവരും അണക്കര സർക്കാർ സ്കൂളിൽ പ്ലസ് ടു വിദ്യാർഥികളായിരുന്നു. പരീക്ഷാ ഫലം വന്ന് ഇരുവരും ഉപരി പഠനത്തിനു തയാറെടുക്കുകയായിരുന്നു. കുവൈറ്റിൽ ജോലി ചെയ്യുന്ന ജിനുവാണ് ഷാനെറ്റിന്‍റെ അമ്മ. ഇളയ സഹോദരൻ ഷിയോ (ആറ്). ബീനയാണ് അലന്‍റെ അമ്മ. വിദേശത്ത് ജോലിക്കാരിയാണ്. അക്ഷയാണ് സഹോദരി. മൃതദേഹങ്ങൾ പോസ്റ്റുമോർട്ടത്തിനായി ഇടുക്കി മെഡിക്കൽ കോളജ് ആശുപത്രിയിൽ സൂക്ഷിച്ചിരിക്കുകയാണ്.

ആലക്കോട് പഞ്ചായത്തിൽ വ്യാപക നാശം

തൊടുപുഴ: കഴിഞ്ഞദിവസം ഉണ്ടായ കാറ്റിലും മഴയിലും ആലക്കോട് പഞ്ചായത്തിൽ വ്യാപക നാശം. തലയനാട് പ്രദേശത്താണ് കൂടുതൽ നാശ നഷ്ടമുണ്ടായത്. തലയനാട് കോളപ്ര റൂട്ടിൽ പള്ളിക്ക് സമീപം തച്ചപ്പിള്ളിൽ ഓമനക്കുട്ടന്‍റെ വീടിന്‍റെ സംരക്ഷണഭിത്തി റോഡിലേക്ക് ഇടിഞ്ഞു വീണ് വീട് അപകടാവസ്ഥയിലായി. ഇത് മൂലം വീട് വിണ്ടു കീറി താമസ യോഗ്യമല്ലാതായി. അഞ്ചു ലക്ഷത്തോളം രൂപ മുടക്കി നിർമിച്ച കരിങ്കൽകെട്ടാണ് മഴയിൽ തകർന്നത്. ഇളംദേശം ബ്ലോക്ക് പഞ്ചായത്ത് പ്രസിഡന്‍റ് ടോമി കാവാലത്തിന്‍റെ നേതൃത്വത്തിൽ ഇവരെ മാറ്റി പാർപ്പിക്കാനുള്ള നടപടികൾ ആരംഭിച്ചു. കനത്ത കാറ്റിലും മഴയിലും മരങ്ങൾ കടപുഴകി വീണ് മുണ്ടയ്ക്കൽ ബെന്നിയുടെ 45 വർഷത്തോളം പഴക്കമുള്ള ജാതിമരങ്ങൾ നശിച്ചു. മരങ്ങളും വൈദ്യുതി പോസ്റ്റുകളും വീണ് തലയനാട്-കോളപ്ര റോഡിലെ ഗതാഗതവും പൂർണമായി നിലച്ചിരിക്കുകയാണ്.

പൊന്മുടി ഡാം രണ്ടാം തവണയും തുറന്നുവിട്ടു

രാജാക്കാട്: പൊന്മുടി ഡാം രണ്ടാം തവണയും തുറന്നു വിട്ടു. മൂന്നു ഷട്ടറുകൾ 60 സെന്‍റീമീറ്റർ വീതമാണ് ഉയർത്തിയത്. ഇന്നലെ വൈകുന്നേരം നാലിനാണ് ഷട്ടർ തുറന്ന് വെള്ളം പന്നിയാർ പുഴയിലേക്ക് ഒഴുക്കിവിട്ടത്. ഞായറാഴ്ച സംഭരണശേഷിയുടെ 83.7 ശതമാനം വെള്ളം ഡാമിലെത്തിയതിനെത്തുടർന്ന് ബ്ലൂ അലർട്ട് പ്രഖ്യാപിച്ചിരുന്നു. വൃഷ്ടിപ്രദേശത്ത് ശക്തമായ മഴയും നീരൊഴുക്കും തുടരുന്നതിനാലാണ് ഡാം വീണ്ടും തുറന്നത്. മേയ് അവസാനം ശക്തമായ മഴ പെയ്തതിനെത്തുടർന്ന് ഡാം തുറന്നിരുന്നു. പന്നിയാറിന്‍റെ ഇരു കരകളിലും താമസിക്കുന്നവർ ജാഗ്രത പുലർത്തണമെന്ന് ജില്ലാ കളക്ടർ അറിയിച്ചു.

റിട്ട. എസ്ഐ രക്ഷകനായി, നിതീഷിന് ജീവൻ തിരിച്ചുകിട്ടി

മൂലമറ്റം: ത്രിവേണി സംഗമത്തിൽ ഒഴുക്കിൽപ്പെട്ട് ജീവനുവേണ്ടി നിലവിളിച്ച നിതീഷിന്‍റെ ജീവൻ രക്ഷിച്ചത് റിട്ട.എസ്ഐ തോമസ് പുതുപ്പറന്പിലിന്‍റെ സമയോചിതമായ ഇടപെടൽ. ഇന്നലെ ഉച്ചകഴിഞ്ഞ് 3.15-ഓടെ എകെജി കോളനിയിലെ തോട്ടുങ്കരയിൽ നിതീഷ് രാജേഷ് (19) നടുപ്പറന്പിൽ അതുൽ ബൈജു (20) എന്നിവർ മറ്റുരണ്ടുപേരോടൊപ്പം ത്രിവേണി സംഗമത്തിൽ കുളിക്കാനിറങ്ങുകയായിരുന്നു. എന്നാൽ നിതീഷും അതുലും ചുഴിയിൽപ്പെട്ടു. ഒപ്പമുണ്ടായിരുന്ന രണ്ടുപേർ നീന്തിക്കയറി സമീപവീട്ടിലെത്തി രക്ഷിക്കണമെന്ന് ആവശ്യപ്പെട്ടപ്പോൾ തോമസ് പുതുപ്പറന്പിൽ കയറുമായി ഇവിടേക്ക് ഓടിയെത്തുകയായിരുന്നു. ചുഴിയിൽപ്പെട്ട നിതീഷ് രാജേഷിന് ആദ്യം കയറിൽ പിടികിട്ടിയെങ്കിലും കൈവിട്ടുപോയി. വീണ്ടും കയർ എറിഞ്ഞുകൊടുത്ത് കരയിലേക്ക് ഇദ്ദേഹം വലിച്ചുകയറ്റുകയായിരുന്നു. തുടർന്നു മൂലമറ്റം ബിഷപ് വയലിൽ ആശുപത്രിയിൽ എത്തിക്കുകയായിരുന്നു. നിതീഷിന്‍റെ ആരോഗ്യനില തൃപ്തികരമാണ്. എന്നാൽ കൂടെയുണ്ടായിരുന്ന അതുൽ ബൈജുവിനെ രക്ഷിക്കാനായില്ല. പിന്നീട് ഫയർഫോഴ്സെത്തി തെരച്ചിൽ നടത്തിയാണ് അതുലിന്‍റെ മൃതദേഹം പുറത്തെടുത്തത്. ഇന്നലെ മൂലമറ്റം പവർഹൗസിലെ അഞ്ചു ജനറേറ്ററുകൾ വൈദ്യുതി ഉത്പാദനത്തിനായി പ്രവർത്തിപ്പിച്ചിരുന്നു. ഇതുമൂലം ടെയിൽറേസ് കനാലിലൂടെ ഒഴുകിയെത്തുന്ന വെള്ളത്തിന്‍റെ അളവ് കൂടുതലായിരുന്നു. ഇതിനു പുറമേ മഴക്കാലമായതിനാൽ വലിയാറിലൂടെയും നാച്ചാറിലൂടെയും കൂടുതൽ വെള്ളം ഒഴുകിയെത്തിയിരുന്നു. ഇതുമൂന്നും കൂടിച്ചേരുന്ന ത്രിവേണി സംഗമത്തിൽ ശക്തമായ ഒഴുക്കും വിയർകെട്ടിനു താഴെ ശക്തമായ ചുഴിയുമുണ്ടായിരുന്നു. ഈ ചുഴിയിലാണ് കുളിക്കാനിറങ്ങിയ ഇവർ അപകടത്തിൽപ്പെട്ടത്. രണ്ടുവർഷം മുന്പ് എകെജി കോളനിയിൽ തന്നെയുള്ള ബിജു, സന്തോഷ് എന്നിവർ ഇവിടെ അപകടത്തിൽപ്പെട്ട് മരിച്ചിരുന്നു. മറ്റു ജില്ലകളിൽനിന്നുമുൾപ്പെടെയുള്ളവർ ത്രിവേണി സംഗമത്തിന്‍റെ മനോഹാരിത ദർശിക്കാനും ഇവിടെ കുളിക്കാനുമായി എത്താറുണ്ട്. കഴിഞ്ഞ അഞ്ചുവർഷത്തിനിടെ 30ലേറെപ്പേർ ഇവിടെ അപകടത്തിൽപ്പെട്ടിട്ടുണ്ട്. ഏതാനും വർഷങ്ങൾക്കിടെ നിരവധി അപകടങ്ങൾ ഇവിടെ ഉണ്ടായിട്ടുണ്ടെങ്കിലും മുന്നറിയിപ്പ് ബോർഡുപോലും ഇവിടെ അധികൃതർ സ്ഥാപിച്ചിട്ടില്ല. ചുഴിയുള്ള സ്ഥലത്ത് ഭിത്തിയിൽ അടയാളം സ്ഥാപിച്ചിരുന്നെങ്കിൽ ഈ ഭാഗത്തേക്ക് കുളിക്കാൻ ആളുകൾ ഇറങ്ങാതിരിക്കുകയും അപകടങ്ങൾ ഉണ്ടാകാതെ സുരക്ഷിതത്വം ഉറപ്പാക്കാനും കഴിയുമായിരുന്നു.

അനധികൃത മണ്ണെടുപ്പ്; വീടിന്‍റെ സംരക്ഷണഭിത്തി തകർന്നു

ചെറുതോണി: അതിർത്തിയിൽനിന്നു വേണ്ടത്ര അകലം പാലിക്കാതെ അയൽവാസി മണ്ണിടിച്ചു മാറ്റിയതിനെത്തുടർന്ന് വീടിന്‍റെ സംരക്ഷണഭിത്തി ഇടിഞ്ഞുവീണ് വീട് അപകടാവസ്ഥയിലായി. പതിനാറാംകണ്ടം ടൗണിനോടു ചേർന്ന് താമസിക്കുന്ന വരിക്കപ്ലാക്കൽ ജെസിയുടെ വീടിന്‍റെ പിൻഭാഗത്തെ സംരക്ഷണഭിത്തിയാണ് ഇടിഞ്ഞത്. അയൽവാസി മണ്ണെടുത്തുതുടങ്ങിയപ്പോൾത്തന്നെ വീട്ടുകാർ ഉപ്പുതോട് വില്ലേജ് ഓഫീസിലും മറ്റ് റവന്യൂ അധികൃതരെയും ഇക്കാര്യം അറിയിച്ചിരുന്നു. തുടർന്ന് വില്ലേജ് ഓഫീസർ സ്ഥലം സന്ദർശിച്ച് രണ്ടടി അകലം പാലിച്ച് മണ്ണെടുക്കാൻ ഇയാൾക്ക് നിർദ്ദേശം നൽകിയിരുന്നതാണ്. എന്നാൽ, വില്ലേജ് ഓഫീസർ പോയശേഷം നിർദേശം പാലിക്കാതെ പല സ്ഥലങ്ങളിലായി സംരക്ഷണ ഭിത്തിയോടു ചേർന്ന് മണ്ണിടിച്ചു നീക്കി. കല്ലുകെട്ടിനുള്ളിലേക്ക് വളർന്നിരുന്ന മരത്തിന്‍റെ വേരുകൾ മണ്ണുമാന്തിയന്ത്രം ഉപയോഗിച്ച് പറിച്ചുമാറ്റുകയും ചെയ്തു. ഇതേത്തുടർന്ന് തൊട്ടടുത്ത ദിവസംതന്നെ സംരക്ഷണഭിത്തിയുടെ ഒരു ഭാഗം നിലം പതിച്ചു. ഇതു സംബന്ധിച്ച് വീട്ടുകാർ മുരിക്കാശേരി പോലീസിലും ഉപ്പുതോട് വില്ലേജിലും ഇടുക്കി താലൂക്ക് ഓഫീസിലും ജില്ലാ കളക്ടർക്കും ഉൾപ്പെടെ പരാതി നൽകി. പരാതി നൽകിയ ശേഷം തിരികെ വീട്ടിൽ എത്തിയതോടെ ഉച്ചകഴിഞ്ഞ് പെയ്ത കനത്ത മഴയിൽ സംരഷണ ഭിത്തിയുടെ ബാക്കി ഭാഗം കൂടി ഇടിഞ്ഞു വീണു. ഇതോടെ വീട് ഏതു നിമിഷവും നിലംപതിക്കാമെന്ന അവസ്ഥയിലാണ്. കനത്ത മഴയിൽ ജില്ലാ കളക്ടർ പാറഖനനം, മണ്ണെടുപ്പ് ഉൾപ്പടെയുള്ള പ്രവൃത്തികൾക്ക് നിരോധനം ഏർപ്പെടുത്തിയിരുന്ന ദിവസങ്ങളിലാണ് അയൽവാസി മണ്ണുമാന്തിയന്ത്രം ഉപയോഗിച്ച് മണ്ണെടുത്തതെന്നും വീട്ടുകാർ പറഞ്ഞു. വീട്ടുടമ ജെസി ജോലിക്കായി വിദേശത്താണ്. കഴിഞ്ഞ മാസം നാട്ടിൽ വന്ന് തിരികെ പോയ ശേഷമാണ് അയൽവാസി വില്ലേജിൽനിന്നുള്ള അനുമതി പോലുമില്ലാതെ മണ്ണിടിച്ച് നീക്കിയത്. മഴ ശക്തമായി തുടരുന്ന സാഹചര്യത്തിൽ വീട് നിലം പതിക്കുമോയെന്ന ആശങ്കയിലാണ് വീട്ടുകാർ. അടിയന്തരമായി ജില്ലാ ഭരണകൂടം ഇടപെടണമെന്നും വീട്ടുകാർ ആവശ്യപ്പെട്ടു.

തൊമ്മൻകുത്തിൽ കർഷകരെ കുടിയിറക്കാനുള്ള ആസൂത്രിതനീക്കം: ബിജോ മാണി

തൊമ്മൻകുത്ത്: വണ്ണപ്പുറം വില്ലേജിലെ തൊമ്മൻകുത്ത് ഭാഗത്തെ 458 കുടുംബങ്ങളെ വനംവകുപ്പ് കൈയേറ്റക്കാരുടെ ലിസ്റ്റിൽ ഉൾപ്പെടുത്തിയതിന്‍റെ തുടർച്ചയായാണ് കൈവശഭൂമിയിൽ സ്ഥാപിച്ചിരുന്ന കുരിശ് പൊളിച്ചതെന്നും ഇതു കർഷകരെ കുടിയിറക്കാനുള്ള സർക്കാരിന്‍റെ ആസൂത്രിത നീക്കത്തിന്‍റെ ഭാഗമാണെന്നും ഡിസിസി ജനറൽ സെക്രട്ടറി ബിജോ മാണി പത്രസമ്മേളനത്തിൽ ആരോപിച്ചു. കൈവശഭൂമിയിൽനിന്ന് ആളുകളെ കുടിയിറക്കി വനമാക്കി മാറ്റാനാണ് സർക്കാർ ശ്രമിക്കുന്നത്. ജില്ലാ കളക്ടർക്കു തഹസിൽദാർ നൽകിയ റിപ്പോർട്ടിൽ പഴയരേഖയിൽ പ്രദേശംവനമാണെങ്കിലും നിലവിലുള്ള കൈവശം പരിശോധിച്ച് പട്ടയനടപടികൾ സ്വീകരിക്കേണ്ടതു കരിമണ്ണൂർ ലാന്‍റ് അസൈൻമെന്‍റ് ഓഫീസാണെന്നും വ്യക്തമാക്കിയിട്ടുണ്ട്. അതേ സമയം ജണ്ടയ്ക്കു പുറത്ത് പതിറ്റാണ്ടുകളായി താമസിക്കുന്ന 458 കുടുംബങ്ങളെയാണ് ഇപ്പോൾ കൈയേറ്റക്കാരാക്കിയിരിക്കുന്നത്. ഒരുവശത്ത് ഈ പ്രദേശം സന്ദർശിച്ച ഇടതുപക്ഷ നേതാക്കൾ ഇവിടം വനമല്ലന്നും ആളുകളുടെ കൈവശ ഭൂമിയാണെന്ന് പറയുകയും മറുവശത്ത് സർക്കാർ ഇവിടെ വനമാണെന്നു റിപ്പോർട്ട് തയാറാക്കുകയും ചെയ്തത് ആസൂത്രിതമാണ്. നാരങ്ങാനത്ത് ആളുകളുടെ കൈവശഭൂമിയും വന ഭൂമിയും തമ്മിൽ വേർതിരിക്കാൻ ജണ്ട സ്ഥാപിച്ചിട്ടുണ്ട് . നാരങ്ങാനത്ത് 1968 മുതൽ ആളുകളുടെ കൈവശം ഭൂമിയുണ്ടന്ന് തെളിയിക്കുന്ന നിരവധി രേഖകളാണ് പുറത്തുവന്നിട്ടുള്ളത്. 980-ലെ തൊടുപുഴ മുൻസിഫ് കോടതിയുടെ ഉത്തരവിൽ ഇക്കാര്യ ചൂണ്ടിക്കാട്ടിയിട്ടുമുണ്ട്. വണ്ണപ്പുറം വില്ലേജിൽ 3,846 പേരാണ് 2024 ലെ സർക്കാരിന്‍റെ പട്ടയത്തിന് അപേക്ഷ നൽകി കാത്തിരിക്കുന്നത്. ജില്ലയിൽ ഏറ്റവും കൂടുതൽ അപേക്ഷകരുള്ളതും ഈ പഞ്ചായത്തിൽ നിന്നാണ്. ഈ വസ്തുതകൾ നിലനിൽക്കേ ഈ പ്രദേശം വനമാക്കി മാറ്റാൻ വനം-റവന്യു വകുപ്പുകൾ നടത്തുന്ന നീക്കം അനുവദിക്കാനാവില്ലെന്നും അദ്ദേഹം പറഞ്ഞു. ഡിസിസി വൈസ് പ്രസിഡന്‍റ് മുകേഷ് മോഹൻ, ബ്ലോക്ക് കോണ്‍ഗ്രസ് പ്രസിഡന്‍റ് ഷിബിലി സാഹിബ്, മണ്ഡലം പ്രസിഡന്‍റ് രാജേഷ് ബാബു, ബ്ലോക്ക് കോണ്‍ഗ്രസ് ജനറൽ സെക്രട്ടറി അഡ്വ രാജീവ് പാടത്തിൽ, എന്നിവർ പങ്കെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]