ADVERTISEMENT

ADVERTISEMENT

മഹാത്മാഗാന്ധിയും ശ്രീനാരായണഗുരുവും ആദ്യമായി കണ്ടതിന്‍റെ നൂറാം വാര്‍ഷികം ആഘോഷിച്ചു

കട്ടപ്പന: കോണ്‍ഗ്രസ് കട്ടപ്പന ബ്ലോക്ക് കമ്മിറ്റി ചരിത്ര സെമിനാര്‍ നടത്തി. രാഷ്‌ട്രപിതാവ് മഹാത്മാഗാന്ധിയും ശ്രീനാരായണ ഗുരുവും ആദ്യമായി കണ്ടതിന്‍റെ നൂറാം വാര്‍ഷികത്തോടനുബന്ധിച്ചാണ് സെമിനാര്‍ നടത്തിയത്. കട്ടപ്പന മീഡിയ ഹാളില്‍ എഐസിസി അംഗം ഇ.എം. ആഗസ്തി പരിപാടി ഉദ്ഘാടനം ചെയ്തു.

ബ്ലോക്ക് പ്രസിഡന്‍റ് തോമസ് മൈക്കിള്‍ അധ്യക്ഷത വഹിച്ചു. മലനാട് എസ്എന്‍ഡിപി യൂണിയൻ പ്രസിഡന്‍റ് ബിജു മാധവന്‍ വിഷയാവതരണം നടത്തി. ഡിസിസി വൈസ് പ്രസിഡന്‍റ് ജോര്‍ജ് ജോസഫ് പടവന്‍, ഇ. കെ. വാസു, ജോയി പൊരുന്നോലി, സിജു ചക്കുംമൂട്ടില്‍, സിബി പാറപ്പായി, എ.എം. സന്തോഷ് തുടങ്ങിയവര്‍ പ്രസംഗിച്ചു.

ADVERTISEMENT

നാരങ്ങാനത്ത് റവന്യു, വനംവകുപ്പ് സംയുക്ത പരിശോധന

തൊടുപുഴ: തൊമ്മൻകുത്ത് സെന്‍റ് തോമസ് പള്ളിയുടെ നേതൃത്വത്തിൽ നാരങ്ങാനത്ത് കുരിശ് സ്ഥാപിച്ച പ്രദേശം ഡെപ്യൂട്ടി കളക്ടറുടെ നേതൃത്വത്തിൽ റവന്യു, വനം അധികൃതർ സന്ദർശിച്ചു. കുരിശ് സ്ഥാപിച്ച വണ്ണപ്പുറം പഞ്ചായത്തിലെ ആറാം വാർഡിലുൾപ്പെടെയുള്ള പ്രദേശങ്ങളിൽ പട്ടയം നൽകുന്നതുമായി ബന്ധപ്പെട്ടാണ് വനം, റവന്യു ഉദ്യോഗസ്ഥർ സംയുക്ത പരിശോധന നടത്തിയത്. വനഭൂമിയോടു ചേർന്നുള്ള പ്രദേശങ്ങളിൽ പട്ടയം നൽകുന്നതിനു തടസമില്ലെന്നാണ് റവന്യു വകുപ്പിന്‍റെ നിലപാട്. കഴിഞ്ഞ ദിവസം കളക്ടറേറ്റിൽ ജില്ലാ കളക്ടറുടെ നേതൃത്വത്തിൽ ഇതുമായി ബന്ധപ്പെട്ട് കമ്മിറ്റി രൂപീകരിച്ചിരുന്നു. കമ്മിറ്റി തീരുമാനത്തിന്‍റെ അടിസ്ഥാനത്തിലാണ് ഡെപ്യൂട്ടി കളക്ടർ കെ.എം. ജോസുകുട്ടിയുടെ നേതൃത്വത്തിൽ ഉദ്യോഗസ്ഥസംഘം സന്ദർശനം നടത്തിയത്. കുരിശ് സ്ഥാപിച്ചിരിക്കുന്ന സ്ഥലം വനംവകുപ്പ് സ്ഥാപിച്ച ജണ്ടയ്ക്കുള്ളിലാണോ പുറത്താണോ എന്ന കാര്യത്തിൽ വ്യക്തത വരുത്താനാണ് സന്ദർശനം നടത്തിയതെന്ന് ഡെപ്യൂട്ടി കളക്ടർ പറഞ്ഞു. ജണ്ടയുടെ കാര്യത്തിൽ ചില അവ്യക്തതകൾ ഉള്ളതിനാൽ വീണ്ടും ഡിജിറ്റൽ സർവേ നടത്തി ഇക്കാര്യത്തിലുള്ള സംശയങ്ങൾ നീക്കും. സ്ഥലത്തിന്‍റെ സ്കെച്ചും പരിശോധിക്കേണ്ടിവരും. പ്രദേശത്ത് പതിറ്റാണ്ടുകളായി കൃഷി ചെയ്തുപോരുന്ന കൈവശഭൂമിക്കു പട്ടയം നൽകുന്ന നടപടികൾ തുടർന്നുവരികയാണെന്നും അദ്ദേഹം പറഞ്ഞു. ഡെപ്യൂട്ടി കളക്ടർക്കു പുറമേ എൽഎ തഹസിൽദാർ ബിപിൻ ഭാസ്കർ, ഡെപ്യൂട്ടി തഹസിൽദാർ സിജോയി, ജൂണിയർ സൂപ്രണ്ട് എം.എസ്. സ്മിത, ഹെഡ് സർവേയർ ബിനു ആനന്ദ്, താലൂക്ക് സർവേയർ ജിഷ, തൊടുപുഴ ഡിവൈഎസ്പി പി.കെ. സാബു, കരിമണ്ണൂർ എസ്എച്ച്ഒ വി.സി. വിഷ്ണുകുമാർ, കാളിയാർ റേഞ്ച് ഓഫീസർ ടോമിൻ ജെ. അരഞ്ഞാണി എന്നിവരും സംഘത്തിലുണ്ടായിരുന്നു. പ്രകോപനവുമായി വീണ്ടും വനംവകുപ്പ് തൊമ്മൻകുത്ത്: നാരങ്ങാനത്ത് കുരിശ് സ്ഥാപിച്ച സ്ഥലത്തേക്കു കയറുന്നതിനായി നെയ്യശേരി - തോക്കുന്പൻ സാഡിൽ റോഡിൽനിന്നു നിർമിച്ച താത്കാലിക വഴിയിടിച്ച് കരാർ കന്പനി. വനംവകുപ്പ് നിർദേശപ്രകാരമാണ് ഇത്തരത്തിൽ റോഡ് ഇടിച്ചതെന്നാണ് കന്പനി അധികൃതരുടെ വിശദീകരണം. ഇതോടെ ഇവിടെ പ്രവേശിക്കണമെങ്കിൽ വലിയ ഗോവണി വയ്ക്കേണ്ട സ്ഥിതിയാണ്. നെയ്യശേരി-തോക്കുന്പൻ സാഡിൽ റോഡിനോടു ചേർന്നാണ് വിവാദ ഭൂമി. റോഡ് നിർമാണത്തിനായി ഈ ഭാഗം താഴ്ത്തിയപ്പോൾ കുരിശ് നിന്ന സ്ഥലം ഉയരത്തിലായി. ഇവിടേക്കു കയറാൻ കന്പനി തൊഴിലാളികൾ മണ്ണുമാന്തിയന്ത്രം ഉപയോഗിച്ച് ചെരിച്ച് പാത വെട്ടിയിരുന്നു. ഇത് വനംവകുപ്പ് ഉദ്യോഗസ്ഥർ അനുവദിച്ചില്ല. മണ്ണുമാന്തിയന്ത്രം ഉപയോഗിച്ച് ഈ ഭാഗം ഇടിച്ചുതാഴ്ത്തിയതോടെ കുരിശു സ്ഥാപിച്ച സ്ഥലം വീണ്ടും ഉയരത്തിലായി. വെള്ളിയാഴ്ച വൈകുന്നേരമാണ് വനംവകുപ്പ് ജീവനക്കാരുടെ സാന്നിധ്യത്തിൽ ജോലി പൂർത്തിയാക്കിയത്. കഴിഞ്ഞ ഏപ്രിൽ 12നാണ് തൊമ്മൻകുത്ത് സെന്‍റ് തോമസ് പള്ളി നാരങ്ങാനത്ത് സ്ഥാപിച്ചിരുന്ന കുരിശ് വനംവകുപ്പ് പിഴുതുമാറ്റിയത്. വനംവകുപ്പിന്‍റെ നടപടിക്കെതിരേ വലിയ പ്രതിഷേധമാണ് ഭരണ, പ്രതിപക്ഷ ഭേദമന്യേ ഉയർന്നത്. പ്രശ്നം പരിഹരിക്കാൻ ശ്രമങ്ങൾ നടക്കുന്നതിനിടെയാണ് വനംവകുപ്പിന്‍റെ പ്രകോപനപരമായ പുതിയ നടപടി. റോഡ് നിർമാണം മാത്രമേ വനംവകുപ്പ് അനുവദിക്കുന്നുള്ളൂ എന്നും വീടുകൾക്കും സ്ഥാപനങ്ങൾക്കുമായി അപ്രോച്ച് റോഡ് തീർക്കാൻ ഇവർ അനുവദിക്കുന്നില്ലെന്നും കന്പനി അധികൃതർ പറഞ്ഞു. കെഎസ്ടിപി നിർദേശിച്ചാൽ കുരിശ് സ്ഥാപിച്ചയിടത്തേക്ക് റോഡ് നിർമിക്കുമെന്ന് ഇവർ പറയുന്നു. റോഡ് നിർമിച്ചപ്പോൾ കുരിശ് നിന്ന ഭാഗം ഉയരത്തിലായതാണെന്നും പ്രശ്നത്തിൽ വനംവകുപ്പ് ഇടപെട്ടില്ലെന്നുമാണ് കാളിയാർ റേഞ്ച് ഓഫീസറുടെ വിശദീകരണം. നടപടി പ്രതിഷേധാർഹം: ജാഗ്രതാ സമിതി തൊമ്മൻകുത്ത്: റോഡ് നിർമിച്ചപ്പോൾ നാരങ്ങാനത്തെ വീടുകളിലേക്കും തൊമ്മൻകുത്ത് സെന്‍റ് തോമസ് പള്ളിയുടെ കുരിശടിയിലേക്കും കയറാനുള്ള പ്രവേശനവഴി തടയുന്ന വനംവകുപ്പിന്‍റെ നടപടി മനുഷ്യത്വരഹിതവും സഞ്ചാരസ്വാതന്ത്ര്യത്തിൻമേലുള്ള കടന്നുകയറ്റവുമാണെന്ന് തൊമ്മൻകുത്ത് നാരങ്ങാനം ജാഗ്രതാ സമിതി കുറ്റപ്പെടുത്തി. റോഡ് നിർമിച്ചപ്പോൾ കുരിശടിയിലേക്കു പ്രവേശിക്കാനായി കരാർ കന്പനി ജീവനക്കാർ തീർത്ത നടപ്പുവഴി വനംവകുപ്പ് ഉദ്യോഗസ്ഥർ നിർബന്ധിച്ച് ഇല്ലാതാക്കിയത് അംഗീകരിക്കില്ലെന്നും ഉടൻ പുനഃസ്ഥാപിച്ചില്ലെങ്കിൽ വനംവകുപ്പ് ഓഫീസിലേക്കു പ്രതിഷേധമാർച്ച് സംഘടിപ്പിക്കുമെന്നും നേതാക്കളായ ഫാ. ജയിംസ് ഐക്കരമറ്റം, നിസാം പള്ളിമുക്കിൽ, മനോജ് മാമല, രാജീവ് പുളിക്കൽ, ഫ്രാങ്ക്ളിൻ പാലക്കാട്ട് എന്നിവർ പറഞ്ഞു.

ഭൂമി പ്രശ്നങ്ങൾ പരിഹരിക്കാൻ യോഗം ചേരും: കളക്ടർ

ഇടുക്കി: ജില്ലയിലെ ഭൂമി സംബന്ധിച്ച പ്രശ്നങ്ങൾ 15 ദിവസത്തിനകം ബന്ധപ്പെട്ട വകുപ്പുകൾ റിപ്പോർട്ട് ചെയ്യണമെന്നും ഇവ പരിഹരിക്കുന്നതിനായി എല്ലാ മാസവും മൂന്നാമത്തെ ശനിയാഴ്ച യോഗം ചേരുമെന്നും ജില്ലാ കളക്ടർ വി. വിഗ്നേശ്വരി ജില്ലാ വികസനസമിതി യോഗത്തിൽ അറിയിച്ചു. സ്കൂൾ അധ്യയനസമയം കഴിഞ്ഞ് കുട്ടികളുടെ സംരക്ഷണത്തിനായി കൂട് പദ്ധതി നടപ്പാക്കും. ജില്ലയെ ശിശുസൗഹൃദ ജില്ലയായി മാറ്റുന്നതിനുള്ള പ്രവർത്തനങ്ങളും പദ്ധതിയുടെ ഭാഗമായി നടപ്പാക്കും. അടിമാലി ഗവ. ഹൈസ്കൂൾ ഹയർ സെക്കൻഡറി സ്കൂളായി ഉയർത്തുന്നതിനുവേണ്ട നടപടികൾ കൈക്കൊള്ളണമെന്ന് വിദ്യാഭ്യാസ ഡെപ്യൂട്ടി ഡയറക്ടറോട് കളക്ടർ നിർദേശിച്ചു. 1949-ൽ ആരംഭിച്ച സ്കൂൾ ഹയർ സെക്കൻഡറിയായി ഉയർത്തണമെന്നും അടിസ്ഥാന സൗകര്യങ്ങൾ ഏർപ്പെടുത്തണമെന്നും ഡീൻ കുര്യാക്കോസ് എംപി ആവശ്യപ്പെട്ടിരുന്നു. ജില്ലയിൽ തെരുവുനായ ശല്യം രൂക്ഷമാകുന്ന സാഹചര്യത്തിൽ എബിസി സെന്‍റർ സ്ഥാപിക്കുന്നതിന് ജില്ലാ പഞ്ചായത്തിനു നിർദേശം നൽകി. ജില്ലയിൽ ഈ വർഷം 2,777 പേർക്കാണ് തെരുവുനായയുടെ കടിയേറ്റത്. ഇടമലക്കുടിയിൽ ആരോഗ്യസംബന്ധമായ ക്ഷേമപ്രവർത്തനങ്ങൾക്ക് ഇടമലനഗർ ആരോഗ്യനഗർ പദ്ധതി നടപ്പിലാക്കും. ഇതിനായി സ്ഥലം വിട്ടുനൽകുന്നതിനു വേണ്ട നടപടികൾ സ്വീകരിക്കാൻ മൂന്നാർ ഡിഎഫ്ഒയെ ചുമതലപ്പെടുത്തി. അനധികൃതമായി പ്രവർത്തിക്കുന്ന അറവുശാലകൾ നിർത്തലാക്കുന്നതിനും എല്ലാ തദ്ദേശ സ്ഥാപനങ്ങളിലും ആധുനിക അറവുശാലകൾ സ്ഥാപിക്കുന്നതു സംബന്ധിച്ച് തീരുമാനമെടുക്കുന്നതിനും കളക്ടർ നിർദേശം നൽകി. 26 അനധികൃത അറവുശാലകൾ പൂട്ടിയതായും നടത്തിപ്പുകാർക്ക് നോട്ടീസ് നൽകാൻ നിർദേശം നൽകിയിട്ടുണ്ടെന്നും എൽഎസ്ജിഡി ജോയിന്‍റ് ഡയറക്ടർ യോഗത്തിൽ അറിയിച്ചു. ജില്ലയിൽ 24,980 ഇതര സംസ്ഥാന തൊഴിലാളികളുടെ രജിസ്ട്രേഷൻ ഇതിനകം പൂർത്തിയായി. ബാക്കിയുള്ളവരുടെ രജിസ്ട്രേഷൻ നടപടികൾ തുടരുകയാണ്. പാഞ്ചാലിമേട്ടിൽ പോലീസ് ഔട്ട് പോസ്റ്റ് സ്ഥാപിക്കുന്നതിനു കെട്ടിടം ലഭ്യമാക്കാനുള്ള നടപടി സ്വീകരിക്കുമെന്നും കളക്ടർ അറിയിച്ചു.

വീട്ടിൽനിന്നു സ്വർണം മോഷ്ടിച്ച പതിനഞ്ചുകാരന്‍റെ സുഹൃത്ത് അറസ്റ്റിൽ

അടിമാലി: പതിനഞ്ചുകാരൻ വീട്ടുകാരറിയാതെ വീട്ടില്‍നിന്ന് സ്വര്‍ണം കൈക്കലാക്കുകയും സുഹൃത്ത് ഈ സ്വര്‍ണം വില്‍പ്പന നടത്തി പണമാക്കുകയും ചെയ്ത സംഭവത്തില്‍ സുഹൃത്തായ അടിമാലി മന്നാങ്കാല സ്വദേശി ചൂരനാനിക്കൽ ആഷിഷിനെ (21) അടിമാലി പോലീസ് അറസ്റ്റ് ചെയ്തു. അലമാരയില്‍ സൂക്ഷിച്ചിരുന്ന സ്വര്‍ണം കാണാതായതിനെത്തുടര്‍ന്ന് അടിമാലി ഇരുനൂറേക്കര്‍ സ്വദേശിനി നല്‍കിയ പരാതിയുടെ അടിസ്ഥാനത്തിലാണ് പോലീസ് നടപടി. പരാതിക്കാരിയായ വീട്ടമ്മയുടെ പതിനഞ്ചുകാരനായ മകന്‍ വീട്ടുകാരറിയാതെ സ്വര്‍ണം കൈക്കലാക്കി സുഹൃത്തിനെ ഏൽപ്പിക്കുകയായിരുന്നു. രണ്ടു ദിവസങ്ങളിലായി 24 ഗ്രാം സ്വര്‍ണമാണ് പതിനഞ്ചുകാരന്‍ കൈക്കലാക്കി ആഷിഷിനു കൈമാറിയത്. സുഹൃത്ത് ഈ സ്വര്‍ണം രണ്ടു ലക്ഷം രൂപയ്ക്ക് അടിമാലിയിലെ ജ്വല്ലറിയില്‍ വില്‍പ്പന നടത്തി. ഇതില്‍ അറുപതിനായിരത്തോളം രൂപ പതിനഞ്ചുകാരന് നല്‍കിയതായി പോലീസ് പറഞ്ഞു. ബാക്കി തുക ആഷിഷ് എന്തു ചെയ്തുവെന്ന കാര്യത്തില്‍ പോലീസ് അന്വേഷണം നടത്തുന്നുണ്ട്. പരിശോധനയില്‍ പ്രതി വില്‍പ്പന നടത്തിയ സ്വര്‍ണം പോലീസ് കണ്ടെടുത്തു.

മെഡിക്കൽ കോളജിലെ ടെറസിൽ മലിനജലം കെട്ടിക്കിടക്കുന്നു

ചെറുതോണി: ഇടുക്കി മെഡിക്കൽ കോളജ് അത്യാഹിത വിഭാഗത്തിന്‍റെ ടെറസിൽ നൂറുകണക്കിന് ലിറ്റർ മലിനജലം കെട്ടിക്കിടക്കുന്നു. ഇവിടെ പായലും ചെടികളും വളർന്ന് കൊതുക് വളരുകയാണ്. ഇടുക്കി മെഡിക്കൽ കോളജിൽ ചികിത്സ തേടിയെത്തുന്നവർക്ക് സാംക്രമിക രോഗങ്ങൾ ബാധിക്കുന്ന സ്ഥിതിയാണ്. ടെറസിലെ ഓവുചാലുകൾ തുറന്നുവിടാത്തതും വൃത്തിയാക്കാത്തതുമാണ് ഇത്രയധികം വെള്ളം കെട്ടിനിൽക്കാൻ കാരണം. ദീർഘനാൾ വെള്ളം കെട്ടിക്കിടന്നാൽ കെട്ടിടത്തിന് ബലക്ഷയം ഉണ്ടാകാനുമിടയുണ്ട്. കാലവർഷം ശക്തമായതോടെ ജില്ലയിൽ ഡെങ്കിപ്പനിയുൾപ്പെടെയുള്ള കൊതുക് പരത്തുന്ന രോഗങ്ങൾ പടർന്നുപിടിക്കുമ്പോഴാണ് മെഡിക്കൽ കോളജ് ആശുപത്രിയിൽ മലിനജലം കെട്ടിനിൽക്കുന്നത്. അടിയന്തരമായി ആശുപത്രിയുടെ ടെറസ് വൃത്തിയാക്കി കെട്ടിനിൽക്കുന്ന ജലം നീക്കം ചെയ്യണമെന്ന് നാട്ടുകാർ ആവശ്യപ്പെട്ടു.

പാലത്തിനാൽ വീട്ടിൽ ആഘോഷം ലളിതം, മധുരതരം

തൊടുപുഴ: പുറപ്പുഴയിലെ പാലത്തിനാൽ വീട്ടിലേക്ക് ഇന്നലെ രാവിലെതന്നെ കേരള കോണ്‍ഗ്രസ് പ്രവർത്തകരുടെ ഒഴുക്കായിരുന്നു. തങ്ങളുടെ പ്രിയനേതാവിന്‍റെ 84-ാം ജന്മദിനത്തിൽ, ശക്തമായി പെയ്ത മഴയെ അവഗണിച്ചാണ് തൊടുപുഴ നിവാസികളും പാർട്ടി പ്രവർത്തകരും ഉൾപ്പെടെ വലിയൊരു ജനാവലി ആശംസ നേരാനെത്തിയത്. ആഘോഷങ്ങളില്ലെന്ന് പി.ജെ. ജോസഫ് അറിയിച്ചിരുന്നെങ്കിലും തൊടുപുഴയുടെ സ്വന്തം ജോസഫ് സാറിന് പിറന്നാൾ ദിനത്തിൽ ആശംസ നേരാനെത്തിയവരെക്കൊണ്ട് രാവിലെതന്നെ വീട് നിറഞ്ഞു. പിറന്നാൾ ദിനത്തിൽ വിവിധ പരിപാടികളിലും അദ്ദേഹം പങ്കെടുത്തു. രാവിലെ പുറപ്പുഴ പള്ളിയിൽ വിശുദ്ധ കുർബാനയിൽ പങ്കെടുത്തശേഷം എട്ടോടെ സൗമ്യമായ ചിരിയുമായി പി.ജെ. ജോസഫ് പ്രവർത്തകർക്കരികിലെത്തി. മകൻ അപു ജോണ്‍ ജോസഫും കുടുംബാംഗങ്ങളും അദ്ദേഹത്തോടൊപ്പം ഉണ്ടായിരുന്നു. കേരള കോണ്‍ഗ്രസ് നേതാക്കളെല്ലാംതന്നെ രാവിലെ ആശംസ അറിയിക്കാനെത്തി. നേതാക്കളായ പി.സി. തോമസ്, മോൻസ് ജോസഫ് എംഎൽഎ, ജോയി ഏബ്രഹാം, ഫ്രാൻസിസ് ജോർജ് എംപി, ടി.യു. കുരുവിള, തോമസ് ഉണ്ണിയാടൻ ഉൾപ്പെടെയുള്ള നേതാക്കൾ അദ്ദേഹത്തിന് ബൊക്കെ സമ്മാനിച്ചു. തുടർന്ന് നേതാക്കളുടെയും പ്രവർത്തകരുടെയും സാന്നിധ്യത്തിൽ പി.ജെ. ജോസഫ് കേക്ക് മുറിച്ചു. കോതമംഗലം രൂപതാധ്യക്ഷൻ മാർ ജോർജ് മഠത്തിക്കണ്ടത്തിൽ പുറപ്പുഴയിലെ വീട്ടിലെത്തി ആശംസ നേർന്നു. അദ്ദേഹത്തിന്‍റെ ആരോഗ്യത്തിനായി സർവേശ്വരനോട് പ്രാർഥിക്കുന്നുവെന്നു പറഞ്ഞ് പിറന്നാൾ സമ്മാനമായി ജപമാല അണിയിച്ചു. ഡീൻ കുര്യാക്കോസ് എംപി, മുനിസിപ്പൽ ചെയർമാൻ കെ. ദീപക്, ഡിസിസി പ്രസിഡന്‍റ് സി.പി. മാത്യു, മർച്ചന്‍റ്സ് അസോ. പ്രസിഡന്‍റ് ടി.സി. രാജു തരണിയിൽ, കേരള കോണ്‍ഗ്രസ് നേതാക്കളായ ജോസഫ് എം. പുതുശേരി, ഡി.കെ. ജോണ്‍, ഏബ്രഹാം കലമണ്ണിൽ, കുഞ്ഞുകോശി പോൾ, സേവി കുരിശുവീട്ടിൽ, ഷീല സ്റ്റീഫൻ, എം. മോനിച്ചൻ, വർഗീസ് വെട്ടിയാങ്കൽ, കെ.വി. കണ്ണൻ, ജോണ്‍സ് ജോർജ്, ജെയ്സണ്‍ ജോസഫ്, ബ്ലെയ്സ് ജി. വാഴയിൽ എന്നിവർ ആശംസ അറിയിച്ചു. മാത്യു കുഴൽനാടൻ, റോയ് കെ. പൗലോസ് എന്നിവർ ഫോണിലൂടെ ആശംസ അറിയിച്ചു. ലളിതമായ ചടങ്ങുകൾക്കുശേഷം മൂവാറ്റുപുഴ ഹോളി മാഗി ഫൊറോന പള്ളിയിൽ നടന്ന ഫാ. മാത്യു പൂനാട്ടിന്‍റെ നവതിയാഘോഷത്തിൽ പങ്കെടുത്ത അദ്ദേഹം പിന്നീട് തൃശൂരിൽ ബന്ധുവിന്‍റെ വിവാഹച്ചടങ്ങിലും പങ്കെടുത്തു. വൈകുന്നേരം ലയണ്‍സ് ക്ലബ്ബിന്‍റെ പരിപാടിയിലും പങ്കെടുത്താണു പി.ജെ. ജോസ ഫ് വീട്ടിൽ മടങ്ങിയെത്തിയത്. പൂർണചന്ദ്രരൂപം നൽകി ആദരിച്ചു തൊടുപുഴ: ശതാഭിഷേക നിറവിൽ ജന്മദിനമാഘോഷിച്ച കേരള കോണ്‍ഗ്രസ് ചെയർമാൻ പി.ജെ. ജോസഫ് എംഎൽഎയ്ക്ക് പാർട്ടി സംസ്ഥാന ജനറൽ സെക്രട്ടറി എം. മോനിച്ചൻ പ്രതീകാത്മക പൂർണചന്ദ്രരൂപം സമ്മാനിച്ചു. പൂർണചന്ദ്രരൂപത്തോടൊപ്പം അദ്ദേഹത്തിന്‍റെ ചിത്രം പതിച്ച മെമന്‍റോയും നൽകിയാണ് അദ്ദേഹം പ്രിയ നേതാവിനെ ആദരിച്ചത്. മർച്ചന്‍റ്സ് അസോ. തൊടുപുഴ: പി.ജെ. ജോസഫിന്‍റെ 84 -ാം ജന്മദിനത്തോടനുബന്ധിച്ച് തൊടുപുഴ മർച്ചന്‍റ്സ് അസോസിയേഷന്‍റെ നേതൃത്വത്തിൽ അദ്ദേഹത്തെ പൊന്നാട അണിയിച്ച് ആദരിച്ചു. പ്രസിഡന്‍റ് രാജു തരണിയിലാണ് പൊന്നാട അണിയിച്ചത്. ഭാരവാഹികളായ ടി.എൻ. പ്രസന്നകുമാർ, സി.കെ. നവാസ്, അനിൽ പീടികപ്പറന്പിൽ, ജോസ് കളരിക്കൽ, ഷെരീഫ് സർഗം, കെ.പി. ശിവദാസ്, നാസർ സൈര, എം.എച്ച്. ഷിയാസ്, ലിജോണ്‍സ് സെബാസ്റ്റ്യൻ, ജഗൻ ജോർജ് എന്നിവർ പങ്കെടുത്തു.

വിശ്വാസപൈതൃകം വിളിച്ചോതി രൂപതാ ദിനാഘോഷം

കാളിയാർ: വിശ്വാസപൈതൃകം വിളിച്ചോതി, കൃതജ്ഞതാ സ്തോത്രം ആലപിച്ച്, കൂട്ടായ്മയുടെ ഇഴകൾ നെയ്ത് കാളിയാർ സെന്‍റ് റീത്താസ് ഫൊറോനാ പള്ളി പാരിഷ് ഹാളിൽ നടന്ന കോതമംഗലം രൂപതാ ദിനാഘോഷം പ്രൗഢഗംഭീരമായി. ബിഷപ് മാർ ജോർജ് മഠത്തിക്കണ്ടത്തിലിന്‍റെ മുഖ്യകാർമികത്വത്തിൽ നടന്ന വിശുദ്ധ കുർബാനയോടെ ആയിരുന്നു ദിനാഘോഷത്തിനു തുടക്കംകുറിച്ചത്. തുടർന്ന് പ്രാർഥനാമന്ത്രങ്ങളോടെ ചടങ്ങ് ആരംഭിച്ചു. മാർ ജോർജ് മഠത്തിക്കണ്ടത്തിൽ അധ്യക്ഷത വഹിച്ച യോഗത്തിൽ കാഞ്ഞിരപ്പള്ളി രൂപതാധ്യക്ഷൻ മാർ ജോസ് പുളിക്കൽ രൂപതാദിന സന്ദേശം നൽകി. രൂപതാ വികാരി ജനറാൾ മോണ്‍ വിൻസെന്‍റ് നെടുങ്ങാട്ട് അവാർഡ് ജേതാക്കളെ പരിചയപ്പെടുത്തി. ഫാ. ആന്‍റണി ഉരുളിയാനിക്കൽ, സിസ്റ്റർ ആർക്കേഞ്ചൽ എസ്എബിഎസ്, ഡോ. ഇ.വി. ജോർജ് എന്നിവരെ മാർ ജോർജ് മഠത്തിക്കണ്ടത്തിൽ ആദരിച്ചു. ഡോ. ഇ.വി. ജോർജിനുവേണ്ടി ഭാര്യ വത്സമ്മ ജോർജ് മെമന്‍റോ ഏറ്റുവാങ്ങി. രൂപതാ വികാരി ജനറാൾ മോണ്‍ പയസ് മലേക്കണ്ടത്തിൽ, ഡീൻ കുര്യാക്കോസ് എംപി, ആന്‍റണി ജോണ്‍ എംഎൽഎ എന്നിവർ പ്രസംഗിച്ചു. വികാരി ഫാ. ജോസഫ് മുണ്ടുനടയിൽ സ്വാഗതവും പിആർഒ ജോർജ് കേളകം നന്ദിയും പറഞ്ഞു. ഫാ. മാത്യു മഞ്ഞക്കുന്നേൽ, കത്തോലിക്ക കോണ്‍ഗ്രസ് രൂപതാ പ്രസിഡന്‍റ് സണ്ണി കടൂത്താഴെ, മാതൃവേദി രൂപതാ പ്രസിഡന്‍റ് ജാൻസി മാത്യു, കെസിവൈഎം രൂപതാ പ്രസിഡന്‍റ് സാവിയോ ജിജി, സിഎംഎൽ രൂപതാ പ്രസിഡന്‍റ് സജിൽ ജോർജ് എന്നിവർ നേതൃത്വം നൽകി. "പ്രത്യാശയിൽ ഒരുമയോടെ മുന്നേറാം' എന്ന ആപ്തവാക്യം അനുസ്മരിച്ചായിരുന്നു സമ്മേളനം ആരംഭിച്ചത്. രൂപതയുടെ വിവിധ ഇടവകകളിൽനിന്നുള്ള വൈദികർ, മിഷനറി വൈദികർ, കന്യാസ്ത്രീകൾ, ഭക്തസംഘടനാ ഭാരവാഹികൾ, വിശ്വാസപരിശീലകർ ഉൾപ്പെടെ നൂറുകണക്കിനു വിശ്വാസികൾ ദിനാഘോഷത്തിൽ അണിചേരാനെത്തി. പാരീഷ് ഹാളും പരിസരവും നിറഞ്ഞ സദസിനെ സാക്ഷിനിർത്തിയാണ് സമ്മേളനം നടന്നത്. തിന്മയ്ക്കെതിരേ പോരാടണം: മാർ മഠത്തിക്കണ്ടത്തിൽ കാളിയാർ: സമൂഹത്തിൽ വർധിച്ചുവരുന്ന ലഹരിവസ്തുക്കളുടെ ഉപയോഗത്തിനും അരാജകത്വത്തിനും എതിരേ ഒന്നിച്ചുനിന്ന് പോരാടണമെന്ന് കോതമംഗലം ബിഷപ് മാർ ജോർജ് മഠത്തിക്കണ്ടത്തിൽ പറഞ്ഞു. കാളിയാർ സെന്‍റ് റീത്താസ് പാരിഷ് ഹാളിൽ കോതമംഗലം രൂപതാ ദിനാഘോഷത്തിൽ അധ്യക്ഷത വഹിച്ച് പ്രസംഗിക്കുകയായിരുന്നു അദ്ദേഹം. കാടിറങ്ങിവരുന്നു, കടൽ കയറിവരുന്നു എന്ന ഗുരുതരമായ സ്ഥിതിയാണ് ഇന്നു നാട്ടിലുള്ളത്. തൊമ്മൻകുത്തിൽ കുരിശ് തകർത്ത സംഭവം എല്ലാവരും ഒരുമിച്ചു നിൽക്കേണ്ടതിന്‍റെ ആവശ്യകതയാണ് ചൂണ്ടിക്കാട്ടുന്നത്. തിന്മ നിറഞ്ഞ സമൂഹത്തിൽ യഥാർഥ സാക്ഷ്യം നൽകാൻ വിശ്വാസികൾ മുന്നോട്ടുവരണമെന്നും അദ്ദേഹം ആഹ്വാനം ചെയ്തു. പ്രത്യാശയുടെ തീർഥാടകരായി മാറുകയാണ് കാലഘട്ടത്തിന്‍റെ ആവശ്യം. 120 ഇടവകകളും 14 ഫൊറോനകളുമുള്ള കോതമംഗലം രൂപതയിലൂടെ ആത്മീയ, ഭൗതിക മേഖലകളിൽ ഒട്ടേറെ നേട്ടങ്ങൾ കൈവരിക്കാൻ കഴിഞ്ഞുവെന്നും ബിഷപ് പറഞ്ഞു.

അശരണർക്ക് കരുതലാകണം: മാർ പുളിക്കൽ

കാളിയാർ: സമൂഹത്തിൽ അവഗണിക്കപ്പെട്ടവർക്കും അശരണർക്കും കാവലും കരുതലുമാകണമെന്ന് കാഞ്ഞിരപ്പള്ളി രൂപതാ ബിഷപ് മാർ ജോസ് പുളിക്കൽ. കാളിയാർ സെന്‍റ് റീത്താസ് പാരിഷ് ഹാളിൽ കോതമംഗലം രൂപതാ ദിനാഘോഷത്തോടനുബന്ധിച്ചു നടന്ന സമ്മേളനത്തിൽ രൂപതാദിന സന്ദേശം നൽകുകയായിരുന്നു അദ്ദേഹം. സാമൂഹിക മാറ്റത്തിന്‍റെ ചാലകശക്തിയായി നാം മാറണം. വർഗീയതയും ലഹരിവസ്തുക്കളുടെ ഉപയോഗവും വർധിച്ചുവരുന്ന കാലഘട്ടത്തിൽ ഇതിനെതിരേ ഒന്നിച്ചുനിന്ന് പോരാടണം. വന്യമൃഗ ആക്രമണം വർധിക്കുന്പോൾ കുടിയേറ്റ ജനതയെ സംരക്ഷിക്കാൻ ഒരുമിച്ചുനിൽക്കണം. മറ്റുള്ളവരുടെ വേദനയിൽ പങ്കുപറ്റുന്നതിനൊപ്പം അവരെ വളർത്തുന്നവരായും നാം മാറണം. വിശുദ്ധ കുർബാനയിൽനിന്നും ശക്തി സ്വീകരിച്ച് കൂട്ടായ്മയിൽ വളർന്നാലേ ഇതിനു കഴിയൂ എന്ന് ബിഷപ് പറഞ്ഞു. വിദ്യാഭ്യാസ, സാമൂഹ്യക്ഷേമ, ആരോഗ്യ, ജീവകാരുണ്യ മേഖലയിൽ കോതമംഗലം രൂപത ചെയ്യുന്ന സേവനങ്ങൾ അമൂല്യമാണെന്നും അദ്ദേഹം പറഞ്ഞു.

പീരുമേട്ടിൽ പുലിയുടെ ആക്രമണത്തിൽനിന്ന് ഭിന്നശേഷിക്കാരനായ ലോട്ടറി വിൽപ്പനക്കാരൻ അദ്ഭുതകരമായി രക്ഷപ്പെട്ടു

പീരുമേട്: പീരുമേട്ടിൽ പുലിയുടെ ആക്രമണത്തിൽനിന്നു ഭിന്നശേഷിക്കാരനായ ലോട്ടറി വിൽപ്പനക്കാരൻ അദ്ഭുതകരമായി രക്ഷപ്പെട്ടു. ശനിയാഴ്ച രാവിലെ 11നാണ് സംഭവം. പീരുമേട് റാണികോവിൽ പുതുവൽ മണിഭവനിൽ മണികണ്ഠനു നേരേയാണ് പുലിയുടെ ആക്രമണമുണ്ടായത്. പ്രദേശത്ത് പുലിയുടെ സാന്നിധ്യമുണ്ടെന്ന് അയൽവാസികൾ അറിയിച്ചതിനെത്തുടർന്ന് മക്കളുടെ അടുത്തേക്ക് എത്തിയ മണികണ്ഠനെയാണ് പുലി ആക്രമിക്കാൻ ശ്രമിച്ചത്. വീടിന്‍റെ ഗേറ്റ് കടന്ന് ഉള്ളിൽ പ്രവേശിച്ച മണികണ്ഠന്‍റെ തൊട്ടുപിന്നിലായി പുലി എത്തുകയായിരുന്നു. രണ്ടു പുലികൾ ഉണ്ടായിരുന്നു എന്നാണ് പറയുന്നത്. ഭയന്ന മണികണ്ഠൻ ഇയാൾ സഞ്ചരിച്ചിരുന്ന മുച്ചക്ര വാഹനത്തിന്‍റെ ഹോൺ അടിക്കുകയും മക്കളെ അലറിവിളിക്കുകയും ചെയ്തു. മൂത്തമകളുടെ സമയോചിതമായ ഇടപെടൽമൂലം മണികണ്ഠന്‍റെ ജീവൻ രക്ഷിക്കാനായി. കഴിഞ്ഞ കുറച്ചു ദിവസങ്ങളായി പീരുമേട് പഞ്ചായത്തിലെ പട്ടുമല, ചൂളപ്പിരട്ട് പ്രദേശങ്ങളിലും പുലിയുടെ സാന്നിധ്യമുണ്ടായിരുന്നു. ഈ പ്രദേശത്ത് വനപാലകർ കാമറ സ്ഥാപിച്ചിരിക്കുകയാണ്. ഇതിനിടെയാണ് പീരുമേട് പഞ്ചായത്തിലെ കുരിശുമോട്ട റാണികോവിൽ പുതുവൽ പ്രദേശങ്ങളിൽ പുലി എത്തിയത്. കുരിശുമോട്ട പ്രദേശത്ത് കണ്ടത്തിൽ വീട്ടിൽ ഭാനുപ്രസാദിന്‍റെ വീട്ടിലെ നായയെ പുലി ആക്രമിച്ചു. ഇതേ പ്രദേശത്ത് ആരോഗ്യം എന്നയാളുടെ നായയെ കൊന്നു ഭക്ഷിച്ച് പകുതി ഉപേക്ഷിച്ച നിലയിലും കണ്ടെത്തി. പ്രദേശത്ത് വനപാലകരുടെ നിരീക്ഷണം കർശനമാക്കണമെന്നും ജനങ്ങളുടെ സുരക്ഷ ഉറപ്പുവരുത്തണമെന്നും നാട്ടുകാർ ആവശ്യപ്പെട്ടു.

ഭിന്നശേഷിക്കാരി യുവതിയെ പീഡിപ്പിച്ച മധ്യവയസ്കൻ അറസ്റ്റിൽ

ചെറുതോണി: ഭിന്നശേ ഷിക്കാരിയും ഊമയുമാ യ യുവതിയെ പീഡിപ്പിച്ച മധ്യവയസ്കനെ മുതലക്കോടത്തുനിന്നു കഞ്ഞിക്കുഴി പോലീസ് അറസ്റ്റ് ചെയ്തു. ചേലച്ചുവട് ചുരുളി സ്വദേശി കിഴക്കേക്കരയിൽ ജോയി (68 )ആണ് പിടിയിലായത്. യുവതിയുടെ മാതാപിതാക്കളുടെ പരാതിയിൽ കഞ്ഞിക്കുഴി സർക്കിൾ ഇൻസ്പെക്ടർ ജി. അനൂപ്, സബ് ഇൻസ്പെക്ടർ നിസാർ, പോലീസ് ഉദ്യോഗസ്ഥരായ എം.ആർ. അനീഷ്, എൻ.എസ്. അനീഷ് എന്നിവർ ചേർന്നാണ് പ്രതിയെ അറസ്റ്റ് ചെയ്തത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

മാലിന്യം വലിച്ചെറിയൽ; 5.5 ലക്ഷം രൂപ പിഴ ഈടാക്കി

കുമളി: മാലിന്യം നിയമാനുസൃതമല്ലാതെ കൈകാര്യം ചെയ്ത വകയിൽ വിവിധ സ്ഥാപനങ്ങൾ, വ്യക്തികൾ എന്നിവരിൽനിന്നും പിഴയായി ഈടാക്കിയത് 5,39,000 രൂപ . കഴിഞ്ഞ ആറു മാസത്തിനുള്ളിൽ 16,000 രൂപ പിഴ ഇനത്തിൽ പഞ്ചായത്ത് ഈടാക്കി. മാലിന്യവുമായി ബന്ധപ്പെട്ട നിയമലംഘനങ്ങൾക്കെതിരേ കർശന നടപടികളാണ് സ്വീകരിച്ചുവരുന്നതെന്ന് പഞ്ചായത്ത് സെക്രട്ടറി ആർ. അശോക്‌കുമാർ പറഞ്ഞു. മാലിന്യം തരംതിരിക്കാതിരിക്കുക, പൊതുസ്ഥലങ്ങളിൽ തള്ളുക, യൂസർ ഫീ നൽകാതിരിക്കുക തുടങ്ങിയ കാര്യങ്ങൾക്കാണ് പഞ്ചായത്ത് നിയമനടപടി സ്വീകരിക്കുന്നത്. നിയമലംഘനങ്ങൾക്ക് കുമളിയിലെ ആനന്ദ് ടെക്സ്റ്റയിൽസിന് പതിനായിരം രൂപ പിഴ ഈടാക്കി നോട്ടീസ് നൽകി. പിഴ ഒടുക്കാതിരിക്കുകയും നിയമലംഘനം ആവർത്തിക്കുകയും ചെയ്താൽ പ്രോസിക്യൂഷൻ, റവന്യു റിക്കവറി, സ്ഥാപനത്തിന്‍റെ ലൈസൻസ് റദ്ദാക്കൽ, നടപടികൾക്കുള്ള ചെലവ് ഈടാക്കൽ തുടങ്ങിയ നടപടികളിലേക്ക് കടക്കുമെന്ന് നോട്ടീസിലുണ്ട്. മാലിന്യം പൊതുസ്ഥലങ്ങളിൽ തള്ളുന്നതിന്‍റെ വീഡിയോയോ ഫോട്ടോയോ പഞ്ചായത്തിന് കൈമാറുന്നവർക്ക് 2500 രൂപ അവരുടെ അക്കൗണ്ടിലേക്ക് ഉടനടി നല്കും. പിന്നാലെ നിയമലംഘകർക്ക് പിഴയും എത്തും.

അജ്ഞാതജീവിയുടെ ആക്രമണത്തിൽ പരിക്കേറ്റ പശുക്കിടാവ് ചത്തു

ഉപ്പുതറ: ചപ്പാത്ത് മരുതുംപേട്ടയിൽ രണ്ടു മാസം പ്രായമായ പശുക്കിടാവിനെ അജ്ഞാതജീവി ആക്രമിച്ചു.കണ്ണാടിശേരിൽ വിൻസ്മോന്‍റെ തൊഴുത്തിൽ കെട്ടിയിരുന്ന പശുക്കിടാവിനെയാണ് വെള്ളിയാഴ്ച രാത്രി അജ്ഞാതജീവി ആക്രമിച്ചത്. ഇന്നലെ വൈകുന്നേരത്തോടെ പശുക്കിടാവ് ചത്തു. ശനിയാഴ്ച രാവിലെ പരിചരിക്കാൻ തൊഴുത്തിൽ എത്തിയപ്പോഴാണ് പരിക്കേറ്റ് അവശനിലയിൽ പശുക്കിടാവിനെ കണ്ടത്. പശുക്കിടാവിന്‍റെ പിൻഭാഗം കടിച്ചു മുറിച്ച പാടുകളും കാണപ്പെട്ടു. വേറെ രണ്ടു പശുക്കൾ തൊഴുത്തിലുണ്ടായിരുന്നെങ്കിലും ഇവയെ ആക്രമിച്ചിട്ടില്ല. മാട്ടുക്കട്ടയിലെ വെറ്ററിനറി സർജൻ ഡോ. റോസ് മേരി സ്ഥലത്തെത്തി ശുശ്രൂഷ നൽകിയിരുന്നു. വന്യമൃഗത്തിന്‍റെ ആക്രമണമാണ് ഉണ്ടായതെന്നു വീട്ടുകാർ പറയുന്നു. പഞ്ചായത്തംഗം ബി. ബിനു അറിയിച്ചതിനെത്തുടർന്ന് സ്ഥലത്തെത്തിയ വനംവകുപ്പ് ഉദ്യോഗസ്ഥർ ഇതു നിഷേധിച്ചു. തെരുവുനായ്ക്കളുടെ ആക്രമണമാണെന്ന വാദത്തിൽ വനംവകുപ്പ് ഉറച്ചുനിൽക്കുകയാണ്. എന്നാൽ, രണ്ടുദിവസം പ്രദേശത്ത് നിരീക്ഷണം നടത്തുമെന്ന് ഉദ്യോഗസ്ഥർ പറഞ്ഞു.

സഹകരണസംഘം ഓഫീസ് ഉദ്ഘാടനം നാളെ

തൊടുപുഴ: താലൂക്ക് റീജണൽ സാമൂഹ്യക്ഷേമ സഹകരണസംഘത്തിന്‍റെ പുതിയ ഓഫീസ് ഉദ്ഘാടനം നാളെ രാവിലെ 10ന് നടക്കുമെന്ന് പ്രസിഡന്‍റ് അഡ്വ. എസ്. പ്രവീണ്‍ പത്രസമ്മേളനത്തിൽ അറിയിച്ചു. തൊടുപുഴ അന്പലം ബൈപാസ് റോഡിൽ പാഞ്ചജന്യം കോംപ്ലക്സിലാണ് ഓഫീസ് പ്രവർത്തനം ആരംഭിക്കുന്നത്. മന്ത്രി റോഷി അഗസ്റ്റിൻ ഉദ്ഘാടനം നിർവഹിക്കും. പി.ജെ. ജോസഫ് എംഎൽഎ അധ്യക്ഷത വഹിക്കും. എസ്എൻഡിപി യോഗം തൊടുപുഴ യൂണിയൻ ചെയർമാൻ ബിജു മാധവൻ മുഖ്യപ്രഭാഷണം നടത്തും. നഗരസഭാ ചെയർമാൻ കെ. ദീപക് സഹകരണ സന്ദേശം നൽകും. ജോയിന്‍റ് രജിസ്ട്രാർ റെയ്നു തോമസ് ആദ്യനിക്ഷേപം ജോസ് കളരിക്കലിൽനിന്ന് ഏറ്റുവാങ്ങും. ആദ്യ വായ്പാവിതരണം അസി. രജിസ്ട്രാർ വി.എൻ. ഗീത നിർവഹിക്കും, സഹകരണ ഓഡിറ്റ് അസി. ഡയറക്ടർ പി.ആർ. ശാലിനി, വാർഡ് കൗണ്‍സിലർ ജയലക്ഷ്മി ഗോപൻ എന്നിവർ റിസ്ക് ഫണ്ട് വിതരണം നിർവഹിക്കും. സർക്കിൾ സഹകരണ യൂണിയൻ ചെയർപേഴ്സണ്‍ ഇന്ദു സുധാകരൻ എംഎംബിഎസ് സ്കീമിന്‍റെയും, മർച്ചന്‍റ്സ് അസോസിയേഷൻ പ്രസിഡന്‍റ് ടി.സി. രാജു തരണിയിൽ റെക്കറിംഗ് നിക്ഷേപത്തിന്‍റെയും, വൈക്കം ബെന്നി ശാന്തി സ്വർണപ്പണയ വായ്പാവിതരണത്തിന്‍റെയും ഭരണസമിതി അംഗം ആർ. ബാബുരാജ് പുതിയ സോഫ്റ്റ്‌വെയറിന്‍റെയും ഉദ്ഘാടനം നിർവഹിക്കും. സിപിഐ ജില്ലാ സെക്രട്ടറി കെ. സലിംകുമാർ, ബിജെപി ജില്ലാ പ്രസിഡന്‍റ് പി.പി. സാനു, കേരള കോണ്‍ഗ്രസ് ജില്ലാ പ്രസിഡന്‍റ് പ്രഫ. എം.ജെ. ജേക്കബ്, ലിനു കെ. ജോസ്, അഡ്വ. കെ.ടി. മാത്യു, കെ.കെ. പുഷ്പാംഗദൻ, കെ. സുരേഷ് ബാബു, ഡി. ദീപ, പി.ടി. ഷിബു, ഗീത ബാബുരാജ് എന്നിവർ പ്രസംഗിക്കും. പത്രസമ്മേളനത്തിൽ സെക്രട്ടറി അഞ്ജിത് റെജി, ഭരണസമിതിയംഗങ്ങളായ സ്മിത ഉല്ലാസ്, കെ.എസ്. ജോയി, എൻ.എസ്. സുരേന്ദ്രൻ, ഒ.യു. ദാമോദരൻ എന്നിവരും പങ്കെടുത്തു.

ഇടുക്കി നഴ്സിംഗ് കോളജ് പ്രവർത്തനം അംഗീകാരത്തോടെ: മന്ത്രി റോഷി

ചെറുതോണി: പുതുതായി ആരംഭിച്ച ഇടുക്കി ഗവ. നഴ്സിംഗ് കോളജ് പ്രവർത്തിക്കുന്നത് ഇന്ത്യൻ മെഡിക്കൽ കൗണ്‍സിലിന്‍റെ അംഗീകാരത്തോടെ ആണെന്നും ഇത് സംബന്ധിച്ച് പുറത്തുവരുന്ന അഭ്യൂഹങ്ങൾ തികച്ചും വസ്തുതാ വിരുദ്ധമാണെന്നും മന്ത്രി റോഷി അഗസ്റ്റിൻ അറിയിച്ചു. 2023-24 വർഷത്തിൽ കോളജ് അനുവദിച്ച സമയത്ത് മെഡിക്കൽ കൗണ്‍സിലിന്‍റെ പരിശോധനകൾ പൂർത്തിയായിരുന്നില്ല. സർക്കാർ നഴ്സിംഗ് കോളജ് അനുവദിച്ചതോടെ പരിശോധനകൾ അടിയന്തരമായി നടത്തുകയും 2023 സെപ്റ്റംബറിൽ 60 വിദ്യാർഥികൾക്ക് പ്രവേശനം നൽകി പ്രവർത്തനം ആരംഭിക്കുകയും ചെയ്തു. തുടർന്ന് 2024-25ലും അടുത്ത ബാച്ചിലേക്ക് 60 കുട്ടികൾക്ക് പ്രവേശനം നൽകി പഠനം നടന്നുവരികയാണ്. സംസ്ഥാനത്ത് പുതുതായി ആരംഭിച്ച നഴ്സിംഗ് കോളജുകൾക്കെല്ലാം ബാധകമായ വിഷയമായതിനാൽ ഡയറക്ടർ ഓഫ് മെഡിക്കൽ എഡ്യുക്കേഷൻ റീ റെഗുലറൈസ് ചെയ്ത് കത്ത് നൽകണം എന്നു മാത്രമാണ് നിർദേശിച്ചിട്ടുള്ളത്. അതിനാവശ്യമായ നടപടികൾ ഇതിനോടകം സ്വീകരിച്ചുകഴിഞ്ഞു .ഇത് സ്വഭാവിക നടപടിക്രമങ്ങൾ മാത്രമാണ്. നഴ്സിംഗ് കോളജിനാവശ്യമായ ലബോറട്ടറി സൗകര്യങ്ങൾ ഒരുക്കുന്നതിന് മെഡിക്കൽ കോളജിന്‍റെ സ്ഥലസൗകര്യങ്ങൾ താത്കാലികമായി അനുവദിച്ചു നൽകുന്നതിന് ഇന്നലെ ചേർന്ന മെഡിക്കൽ കോളജ് എച്ച്എംസി എക്സിക്യൂട്ടീവ് യോഗം തീരുമാനിച്ചിട്ടുണ്ട്. നിർമാണം നടത്തേണ്ട സ്ഥലസൗകര്യങ്ങൾ വിലയിരുത്തുന്നതിനായി സബ് കളക്ടറെ ചുമതലപ്പെടുത്തി .ഇതോടൊപ്പം കോളജിന് ആവശ്യമായ ബസ് നൽകുന്നതിനും നടപടി സ്വീകരിച്ചിട്ടുള്ളതായി മന്ത്രി റോഷി അഗസ്റ്റിൻ അറിയിച്ചു.

സ്നേഹവീടുകളുടെ താക്കോൽദാനം നടത്തി

നെടുങ്കണ്ടം: ലയണ്‍സ് ക്ലബ് നെടുങ്കണ്ടം ഗ്രേറ്റർ ക്ലബ്ബിന്‍റെ പുതിയ ഭാരവാഹികളുടെ സ്ഥാനാരോഹണവും കുടുബസംഗമവും സ്നേഹവീടുകളുടെ താക്കോൽ ദാനവും നടത്തി. ഡിസ്ട്രിക്ട് ഫസ്റ്റ് വൈസ് പ്രസിഡന്‍റ് വി.എ. ജയേഷ്, സെക്കൻഡ് വൈസ് പ്രസിഡന്‍റ് കെ.വി. പീറ്റർ എന്നിവർ വീടുകളുടെ താക്കോൽദാനം നിർവഹിച്ചു. റെജി ജോസഫ്, എം. സാബു എന്നിവർ പ്രസംഗിച്ചു. പ്രസിഡന്‍റായി അനുപ് എസ്. ചന്ദ്രനെയും സെക്രട്ടറിയായി സജി തോമസിനെയും ട്രഷററായി ടോമി ജോസഫിനെയും തെരഞ്ഞെടുത്തു.

ഭൂനിയമ ഭേദഗതി: വ്യാപാരിസംഘടന സമരത്തിലേക്ക്

തൊടുപുഴ: ജനങ്ങൾക്ക് സാന്പത്തിക ബാധ്യതയും സാങ്കേതിക ബുദ്ധിമുട്ടും ഉണ്ടാകാത്ത തരത്തിൽ ഭൂനിയമ ഭേദഗതിക്ക് അടിയന്തരമായി ചട്ടങ്ങൾ ഉണ്ടാക്കണമെന്ന് കേരള വ്യാപാരി വ്യവസായി ഏകോപന സമിതി ജില്ലാ കമ്മിറ്റി പത്രസമ്മേളനത്തിൽ ആവശ്യപ്പെട്ടു. 2023 സെപ്റ്റംബറിൽ പാസാക്കിയ ഭൂനിയമ ഭേദഗതിക്ക് ഇനിയും ചട്ടങ്ങൾ ഉണ്ടാക്കാൻ കഴിഞ്ഞിട്ടില്ല എന്നതിനാൽ ജനങ്ങൾക്ക് യാതൊരു പ്രയോജനവും ഉണ്ടായിട്ടില്ലെന്നു ഭാരവാഹികൾ പറഞ്ഞു. നിയമ ഭേദഗതിയിൽ ഗവർണർ ഒപ്പിട്ടിട്ട് ഒരു വർഷം പിന്നിട്ടു. 2016 മുതൽ സർക്കാർ സങ്കീർണമാക്കിയ ഭൂവിഷയങ്ങൾ പരിഹരിക്കാൻ കഴിയുന്ന തരത്തിൽ ചട്ടങ്ങളുണ്ടാക്കാൻ കഴിയാത്തപക്ഷം 2023ലെ ഭൂനിയമ ഭേദഗതി പിൻവലിച്ച് 1964ലെ ചട്ടം 4, വീടിനും കൃഷിക്കും മറ്റ് ആവശ്യങ്ങൾക്കും എന്നു ചേർത്ത് ഭേദഗതി ചെയ്ത് പ്രശ്നം പരിഹരിക്കണം. ജില്ലയിലെ എട്ടു വില്ലേജുകളിൽ ഉൾപ്പെടെ വിവിധ മേഖലകളിൽ നിലനിൽക്കുന്ന നിർമാണനിരോധനം പൂർണമായി പിൻവലിക്കണം. ഷോപ്പ് സൈറ്റുകൾക്ക് പട്ടയം നൽകാൻ ചട്ടങ്ങളിൽ വ്യവസ്ഥയുണ്ടാകണം. വിഷയത്തിൽ അനുകൂലമായ നടപടികൾ ഉണ്ടാകാത്തപക്ഷം ശക്തമായ സമരപരിപാടികളുമായി മുന്നോട്ടു പോകുമെന്ന് ജില്ലാ പ്രസിഡന്‍റ് സണ്ണി പൈന്പിള്ളിൽ മുന്നറിയിപ്പ് നൽകി. പത്രസമ്മേളനത്തിൽ ജനറൽ സെക്രട്ടറി നജീബ് ഇല്ലത്തുപറന്പിൽ, വർക്കിംഗ് പ്രസിഡന്‍റ് കെ.ആർ. വിനോദ്, വൈസ് പ്രസിഡന്‍റ് പി.എം. ബേബി, തൊടുപുഴ യൂണിറ്റ് പ്രസിഡന്‍റ് ടി.സി. രാജു എന്നിവരും പങ്കെടുത്തു.

സെൻസറിംഗ് റൂമിന്‍റെ ഉദ്ഘാടനവും സ്കൂൾ ബസിന്‍റെ ഫ്ളാഗ് ഓഫും

കട്ടപ്പന: വെള്ളയാംകുടി അസീസി സ്പെഷൽ സ്കൂളിലെ സെൻസറിംഗ് റൂമിന്‍റെ ഉദ്ഘാടനവും സ്കൂൾ ബസിന്‍റെ ഫ്ളാഗ് ഓഫും ജൂലൈ ഒന്നിനു രാവിലെ 11.30ന് നടക്കും. മന്ത്രി റോഷി അഗസ്റ്റിൻ യോഗം ഉദ്ഘാടനം ചെയ്യും. മാനേജർ സിസ്റ്റർ റോസിൻ അധ്യക്ഷത വഹിക്കും. കെഎസ്എഫ്ഇ ചെയർമാൻ കെ. വരദരാജൻ ബസ് ഫ്ളാഗ് ഓഫ് ചെയ്യും. എക്സപ്ഷണൽ ലേണിംഗ് സിഇഒ ഡോ. ജിനോ അരുഷി ഡിജിറ്റൽ ടാബുകളും കട്ടപ്പന നഗരസഭാ കൗണ്‍സിലർ ബീന സിബി സെൻസറിംഗ് മുറിയും ഉദ്ഘാടനം ചെയ്യും. ഇടുക്കി രൂപത വികാരി ജനറാൾ മോണ്‍. ഏബ്രഹാം പുറയാറ്റ് അനുഗ്രഹ പ്രഭാഷണം നടത്തും. 104 കുട്ടികളാണ് സ്കൂളിൽ പഠിക്കുന്നത്. കെഎസ്എഫ്ഇ സിഎസ്ആർ ഫണ്ട് വിനിയോഗിച്ചാണ് ബസ് വാങ്ങിയതെന്നും പ്രിൻസിപ്പൽ സിസ്റ്റർ ടെസി തോമസ്, സിസ്റ്റർ ബെന്നോ, പിടിഎ പ്രസിഡന്‍റ് സൈമണ്‍ തോമസ്, എംപിടിഎ പ്രസിഡന്‍റ് ജാൻസി തോമസ് എന്നിവർ അറിയിച്ചു.

റേഷന്‍ മണ്ണെണ്ണ: വാതില്‍പ്പടി സേവനം നടപ്പിലാക്കണമെന്ന് ജില്ലാ റേഷന്‍ വ്യാപാരി സംയുക്ത സമിതി

നെടുങ്കണ്ടം: ജില്ലയില്‍ ഹൈറേഞ്ച് മേഖലകളിലെ താലൂക്കുകളില്‍ മണ്ണെണ്ണ വാതില്‍പ്പടി വിതരണം നടപ്പിലാക്കണമെന്ന് ജില്ലാ റേഷന്‍ വ്യാപാരി സംയുക്ത സമിതി ആവശ്യപ്പെട്ടു. ജില്ലയില്‍ തൊടുപുഴയിലും മൂന്നാറിലും മാത്രമാണ് മണ്ണെണ്ണ ഡിപ്പോകള്‍ പ്രവര്‍ത്തിക്കുന്നത്. വളരെ വിസ്തൃതമായ ഉടുമ്പന്‍ചോല, പീരുമേട്, ഇടുക്കി താലൂക്കുകളിലെ 500 ഓളം റേഷന്‍ വ്യാപാരികള്‍ 50 മുതല്‍ 100 കിലോമീറ്ററുകള്‍ സഞ്ചരിച്ച് മറ്റു താലൂക്കുകളില്‍നിന്നും മണ്ണെണ്ണ എടുക്കുന്നതിനാണ് നിര്‍ദേശം. ഇതുമൂലം വാഹനക്കൂലിയിനത്തില്‍ വ്യാപാരികള്‍ക്കു ഭീമമായ നഷ്ടമാണുണ്ടാകുന്നത്. ഡിപ്പോയില്‍നിന്നു മണ്ണെണ്ണ ഏറ്റെടുക്കുന്നതിനും വിതരണം ചെയ്യുന്നതിനുള്ള കമ്മീഷനടക്കം ലിറ്ററൊന്നിന് ആറു രൂപ മാത്രമാണ് അനുവദിച്ചിരിക്കുന്നത്. ഇത് മണ്ണെണ്ണ എടുക്കുന്ന വാഹനങ്ങള്‍ക്ക് നല്‍കാന്‍ മാത്രമേ തികയൂ. പാലക്കാട്, കൊല്ലം അടക്കമുള്ള ജില്ലകളില്‍ മണ്ണെണ്ണ വാതില്‍പ്പടിയായി നല്‍കുന്നുണ്ട്. ഇവിടെയും അടിയന്തരമായി അതേ രീതി നടപ്പിലാക്കണമെന്ന് ഭാരവാഹികള്‍ ആവശ്യപ്പെട്ടു. യോഗത്തില്‍ ജില്ലാ ചെയര്‍മാന്‍ എ.ഡി. വര്‍ഗീസ്, എ.വി. ജോര്‍ജ്, എ. മണി, സോണി കൈതാരം, പി.ഇ. മുഹമ്മദ് ബഷീര്‍, കെ.സി. സോമന്‍, സണ്ണി സേവ്യര്‍, അബ്ദുള്‍ റഷീദ്, അബ്ദുള്‍ നിയാസ്, വി.എം. തോമസുകുട്ടി തുടങ്ങിയവര്‍ പ്രസംഗിച്ചു.

അതിഥിമന്ദിരം നവീകരണം: 1.12 കോടി രൂപ അനുവദിച്ചു

ഇടുക്കി: ടൂറിസം വകുപ്പിനു കീഴിലുള്ള മൂന്നാർ, ദേവികുളം എന്നിവിടങ്ങളിലെ സർക്കാർ അതിഥിമന്ദിരങ്ങൾ നവീകരിക്കുന്നതിന് 1,12,75,000 രൂപ അനുവദിച്ചു. മൂന്നാറിൽ 58.3 ലക്ഷം രൂപയും ദേവികുളത്ത് 54.45 ലക്ഷം രൂപയുമാണ് നവീകരണത്തിനായി അനുവദിച്ചത്. ലോകത്തിലെതന്നെ മികച്ച ടൂറിസം ഡെസ്റ്റിനേഷനുകളായ മൂന്നാറിലും ദേവികുളത്തും കുറഞ്ഞ ചെലവിൽ സാധാരണക്കാർക്ക് ആധുനിക സൗകര്യങ്ങളിൽ താമസിച്ച് ഒഴിവുകാലം ആസ്വദിക്കാൻ ഈ നവീകരണ പ്രവൃത്തികളിലൂടെ സാധിക്കുമെന്ന് മന്ത്രി പി.എ. മുഹമ്മദ് റിയാസ് പറഞ്ഞു. കേരള ഇറിഗേഷൻ ഇൻഫ്രാസ്ട്രക്ചർ ഡെവലപ്മെന്‍റ് കോർപറേഷൻ ലിമിറ്റഡാണ് മൂന്നാറിലെയും ദേവികുളത്തെയും നവീകരണത്തിനുള്ള എസ്റ്റിമേറ്റ് തയാറാക്കിയത്. മൂന്നാറിൽ നിലവിലുള്ള കെട്ടിടത്തിന്‍റെ നവീകരണം, ഗാർഡ് റൂം, വൈദ്യുതീകരണം, സൂചകങ്ങൾ എന്നിവയാണ് പ്രധാന പ്രവൃത്തികൾ. ദേവികുളത്ത് കെട്ടിടനിർമാണം, ഭൂഗർഭ ജലസംഭരണി, പൊതു ശൗചാലയങ്ങൾ, വൈദ്യുത അറ്റകുറ്റപ്പണികൾ എന്നിവയാണ് നടത്തുന്നത്.

ലഹരിക്കേതിരേ സെമിനാർ നടത്തി

കോടിക്കുളം: സെന്‍റ് മേരീസ് ഹൈസ്കൂളിൽ ലഹരിവിരുദ്ധ ദിനത്തോടനുബന്ധിച്ച് വിദ്യാർഥികൾക്ക് ബോധവത്കരണ ക്ലാസ് സംഘടിപ്പിച്ചു. സിവിൽ എക്സൈസ് ഓഫീസർമാരായ എസ്. വിദ്യാലക്ഷ്മി, എസ്. കൃഷ്ണനുണ്ണി, പി.എസ്. പ്രിയ എന്നിവർ ക്ലാസ് നയിച്ചു. പ്രധാനാധ്യാപിക ടെസി തോമസ്, സ്റ്റാഫ് സെക്രട്ടറി കെ.ജെ. മൈക്കിൾ എന്നിവർ പ്രസംഗിച്ചു. കാന്പസ് ബീറ്റ്സ് പദ്ധതിയുടെ ഭാഗമായി പ്രസംഗമത്സരവും സംഘടിപ്പിച്ചു. അറക്കുളം: ലഹരിവിരുദ്ധ ദിനത്തോടനുബന്ധിച്ച് മൂലമറ്റം സെന്‍റ് ജോസഫ് അക്കാദമിയിൽ ആന്‍റി നർക്കോട്ടിക് സെല്ലിന്‍റെ നേതൃത്വത്തിൽ ലഹരിവിരുദ്ധ സന്ദേശ യാത്രയും കൂട്ടയോട്ടവും സംഘടിപ്പിച്ചു. കാഞ്ഞാർ എസ്ഐ നജീബ് ഫ്ളാഗ് ഓഫ് ചെയ്ത് ഉദ്ഘാടനം നിർവഹിച്ചു. സെന്‍റ് ജോസഫ് അക്കാദമി ഡയറക്ടർ റവ. ഡോ. തോമസ് പുതുശേരി സിഎംഐ ലഹരിവിരുദ്ധദിന സന്ദേശം നൽകി. പ്രിൻസിപ്പൽ ഡോ. തോംസണ്‍ ജോസ്, ബർസാർ ഫാ. ബോബിൻ ജോസ്, നർക്കോട്ടിക് സെൽ കോ-ഓർഡിനേറ്റർ ഗോപു എം. വിജയൻ എന്നിവർ നേതൃത്വം നൽകി.

പുലിയെ കണ്ടതായി നാട്ടുകാർ; വനംവകുപ്പിന്‍റെ നേതൃത്വത്തിൽ തെരച്ചിൽ നടത്തി

മൂന്നാർ: ജനവാസമേഖലയിൽ പുലിയെ കണ്ടതായി നാട്ടുകാർ അറിയിച്ചതോടെ വനംവകുപ്പിന്‍റെ നേതൃത്വത്തിൽ പ്രദേശത്ത് തെരച്ചിൽ നടത്തി. ജനങ്ങൾ തിങ്ങിപ്പാർക്കുന്ന പഴയ മൂന്നാറിലെ മൂലക്കട ഭാഗത്തോടു ചേർന്നുള്ള മലഞ്ചെരിവിലാണ് പുലിയെ നാട്ടുകാർ കണ്ടത്. മൂന്നാർ റെയിഞ്ച് ഓഫീസർ ബിജു സോമന്‍റെ നേതൃത്വത്തിലുള്ള സംഘം തെരച്ചിൽ നടത്തിയെങ്കിലും പുലിയെ കണ്ടെത്താനായില്ല. കാൽപ്പാടുകൾ കണ്ടതോടെ മേഖലയിൽ പുലി ഇറങ്ങിയതായി വനംവകുപ്പ് സ്ഥിരീകരിച്ചിട്ടുണ്ട്. ഒരു മാസം മുന്പ് ഇതേ സ്ഥലത്തു നാട്ടുകാർ പുലിയെ കണ്ടിരുന്നു. മൂന്നാർ ടൗണിനോടു ചേർന്നുള്ള ജനവാസ മേഖലകളിൽ പുലിസാന്നിധ്യം പതിവായി. നാളുകൾക്കു മുന്പ് മൂന്നാർ ടൗണിനോട് ചേർന്നുള്ള മൂന്നാർ ഫോറസ്റ്റ് റെയിഞ്ച് ഓഫീസിനു സമീപവും പുലിസാന്നിധ്യം സ്ഥിരീകരിച്ചിരുന്നു.

യാത്രക്കാരൻ ബസിൽനിന്നു വീണു മരിച്ച സംഭവം: ബസ് ജീവനക്കാരെ ശിക്ഷിച്ചു

രാജാക്കാട്: ഓടിക്കൊണ്ടിരുന്ന ബസിൽനിന്ന് ഗൃഹനാഥൻ വീണു മരിച്ച സംഭവത്തിൽ ഡ്രൈവർക്കും കണ്ടക്ടർക്കും നെടുങ്കണ്ടം ഗ്രാമ ന്യായാലയ കോടതി തടവുശിക്ഷയും പിഴയും വിധിച്ചു. 2016 ഒക്ടോബർ 18-ന് രാജാക്കാട് എൻആർ സിറ്റി പാറമട ഭാഗത്തുവച്ച് അടിമാലി-പൂപ്പാറ റോഡിൽ സർവീസ് നടത്തിയിരുന്ന മരിയ മോട്ടോഴ്സിന്‍റെ വാതിൽ തുറന്നു കിടന്നതുമൂലം യാത്രക്കാരനായ മംഗലത്ത് ചാക്കോ (58) പുറത്തേക്ക് തെറിച്ചുവീണ് മരിക്കുകയായിരുന്നു. അശ്രദ്ധമായും അപകടമുണ്ടാക്കുന്ന വിധത്തിലും ബസിന്‍റെ വാതിൽ തുറന്നുവച്ചിരുന്നതിനാലാണ് അപകടമുണ്ടായതെന്നു കണ്ടെത്തിയാണ് ഡ്രൈവർ ജിതിൻ (32), കണ്ടക്ടർ മനു ജോയി (26) എന്നിവർക്ക് നെടുങ്കണ്ടം ഗ്രാമ ന്യായാലയ കോടതി ന്യായാധികാരി അനൂപ് പി. ഏബ്രഹാം ആറു മാസം തടവുശിക്ഷയും 11,500 രൂപ പിഴയും വിധിച്ചത്. രാജാക്കാട് പോലീസ് അന്വേഷണം നടത്തി കുറ്റപത്രം സമർപ്പിച്ച കേസിൽ 16 സാക്ഷികളെ വിസ്തരിച്ച് 16 രേഖകളും ഹാജരാക്കി. പ്രോസിക്യൂഷനുവേണ്ടി അസി. പബ്ലിക് പ്രോസിക്യൂട്ടർ ഗോകുൽ കൃഷ്ണൻ ഹാജരായി.

കഞ്ചാവുമായി ഇതര സംസ്ഥാന തൊഴിലാളികൾ പിടിയിൽ

തൊടുപുഴ: കഞ്ചാവുമായി രണ്ട് ഇതരസംസ്ഥാന തൊഴിലാളികൾ പിടിയിൽ. പശ്ചിമ ബംഗാൾ മൂർഷിദാബാദ് സ്വദേശികളായ എസ്.കെ. സുനിറുൾ (26), എസ്.കെ. രാഹുൽ (27) എന്നിവരെയാണ് ഡിവൈഎസ്പിയുടെ എൻഡിപിഎസ് സ്ക്വാഡും പോലീസും ചേർന്ന് ഇന്നലെ ഉച്ചയോടെ പിടികൂടിയത്. ഇവരിൽനിന്നും 1.2 കിലോ ഉണക്കക്കഞ്ചാവ് പിടികൂടി. നഗരത്തിലെ മാർത്തോമാ പള്ളിക്കു സമീപം ഇതര സംസ്ഥാന തൊഴിലാളികൾ താമസിക്കുന്ന വീടിനു സമീപത്തുനിന്നാണ് രഹസ്യവിവരത്തെത്തുടർന്ന് ഇരുവരെയും പിടികൂടിയത്. കഞ്ചാവ് തൊഴിലാളികൾക്കിടയിൽ വിതരണം ചെയ്യാനെത്തിച്ചതാണെന്ന് പോലീസ് പറഞ്ഞു. ഇരുവരും തൊടുപുഴ മേഖലയിലാണ് ജോലി ചെയ്യുന്നതെങ്കിലും ഒരു കോണ്‍ട്രാക്ടറുടെയും കീഴിൽ സ്ഥിരമായി നിൽക്കാറില്ല. എസ്ഐമാരായ അനീഷ് കെ. ജോണ്‍, സി.വി. ശ്രീജിത്ത്, എഎസ്ഐ വിജയാനന്ദ് സോമൻ, സിപിഒമാരായ മുജീബ് റഹ്മാൻ, ഡാലു പി. ജോണ്‍, സുധീഷ് കൃഷ്ണൻകുട്ടി എന്നിവരടങ്ങുന്ന സംഘമാണ് പ്രതികളെ പിടികൂടിയത്. ഇവരെ ഇന്നു കോടതിയിൽ ഹാജരാക്കും.

പോളിംഗ് ബൂത്തുകളുടെ എണ്ണം കുറയ്ക്കാനുള്ള തീരുമാനം പിൻവലിക്കണം: യുഡിഎഫ്

ഉടുന്പന്നൂർ: അടുത്ത തദ്ദേശ സ്വയംഭരണ തെരഞ്ഞെടുപ്പിൽ തെരഞ്ഞെടുപ്പു കമ്മീഷൻ പുറപ്പെടുവിച്ച മാനദണ്ഡങ്ങൾ വോട്ടർമാരുടെ സമ്മതിദാന അവകാശം നിഷേധിക്കുന്നതിനു തുല്യമാണന്ന് യുഡിഎഫ് ഉടുന്പന്നൂർ മണ്ഡലം കമ്മിറ്റി ആരോപിച്ചു. പുതിയ മാനദണ്ഡപ്രകാരം ഒരു ബൂത്തിൽ 1,300 വോട്ടർമാരും, 1,300 വോട്ടർമാർക്ക് മുകളിലുള്ള സ്ഥലങ്ങളിൽ ഓക്സിലറി ബൂത്തും ഏർപ്പെടുത്താനാണ് തീരുമാനം. ബൂത്തുകൾ ക്രമീകരിച്ച് പോളിംഗ് സ്റ്റേഷനുകളുടെ ലിസ്റ്റ് നൽകാൻ പഞ്ചായത്ത് സെക്രട്ടറിമാരോട് ആവശ്യപ്പെട്ടിരിക്കുകയാണ്. വിസ്തൃതി കൂടിയ ഉടുന്പന്നൂർ പഞ്ചായത്ത് പോലുള്ള സ്ഥലങ്ങളിൽ ഈ തീരുമാനം പോളിംഗ് ശതമാനത്തെ കാര്യമായി ബാധിക്കും. ഭൂരിപക്ഷം വാർഡുകളുടെയും ദൂരപരിധിയും യാത്രാസൗകര്യങ്ങളും പരിഗണിക്കുന്പോൾ ഈ തീരുമാനം വോട്ടർമാർക്ക് ഏറെ ബുദ്ധിമുട്ട് സൃഷ്ടിക്കുന്നതും വോട്ടിംഗ് ശതമാനത്തെ ബാധിക്കുന്നതുമാണ്. മുനിസിപ്പൽ, കോർപറേഷനുകളെ അപേക്ഷിച്ച് പഞ്ചായത്തുകളിലെ വോട്ടർമാർ ബ്ലോക്ക് പഞ്ചായത്ത്, ജില്ലാ പഞ്ചായത്ത് എന്നിവിടങ്ങളിലേക്കുകൂടി വോട്ടുകൾ രേഖപ്പെടുത്തേണ്ടതുള്ളതിനാൽ വോട്ട് രേഖപ്പെടുത്തുന്ന സമയം മൂന്നിരട്ടിയാണ്. ഇതുമൂലം പഞ്ചായത്തുകളിലെ ബൂത്തുകളിൽ സാധാരണ നീണ്ട ക്യൂ പ്രത്യക്ഷപ്പെടാറുണ്ട്. ഇത് ഇരട്ടിയായി വർധിക്കും. ഉടുന്പന്നൂർ പഞ്ചായത്തിൽ 34 ബൂത്തുകൾ വേണ്ട സ്ഥാനത്ത് ഈ തീരുമാനപ്രകാരം 17 വാർഡുകളിലായി 18 ബൂത്തുകൾ മാത്രമായി ചുരുങ്ങും. ഇതു വോട്ടെടുപ്പിനെ കാര്യമായി ബാധിക്കും. തീരുമാനം എത്രയും വേഗം പിൻവലിച്ച് വോട്ടേഴ്സ് ലിസ്റ്റ് ക്രമപ്പെടുത്തി കരട് പ്രസിദ്ധീകരിച്ച് വോട്ടർമാർക്ക് വോട്ടുകൾ ചേർക്കാനുള്ള അവസരം ഏർപ്പെടുത്തണമെന്ന് യുഡിഎഫ് മണ്ഡലം ചെയർമാൻ പി.എൻ. നൗഷാദ്, കണ്‍വീനർ മനോജ് തങ്കപ്പൻ, സെക്രട്ടറി ബിജോ ജേക്കബ് എന്നിവർ ആവശ്യപ്പെട്ടു.

കോതമംഗലം രൂപതദിനം ഇന്നു കാളിയാറിൽ

കാളിയാർ: കോതമംഗലം രൂപത ദിനാഘോഷം ഇന്നു കാളിയാർ സെന്‍റ് റീത്താസ് ഫൊറോനാ പള്ളിയിൽ നടക്കും. ഉച്ചകഴിഞ്ഞ് 2.30നു സമൂഹബലിയോടെ ആഘോഷപരിപാടികൾ ആരംഭിക്കും. കോതമംഗലം ബിഷപ് മാർ ജോർജ് മഠത്തിക്കണ്ടത്തിൽ മുഖ്യകാർമികത്വം വഹിക്കും. തുടർന്നു പാരിഷ്ഹാളിൽ നടക്കുന്ന സമ്മേളനത്തിൽ മാർ ജോർജ് മഠത്തിക്കണ്ടത്തിൽ അധ്യക്ഷത വഹിക്കും. കാഞ്ഞിരപ്പള്ളി ബിഷപ് മാർ ജോസ് പുളിക്കൽ രൂപതാദിന സന്ദേശം നൽകും. മാർ ജോർജ് പുന്നക്കോട്ടിൽ അനുഗ്രഹപ്രഭാഷണം നടത്തും. രൂപത വികാരി ജനറാൾ മോണ്‍. വിൻസെന്‍റ് നെടുങ്ങാട്ട് അവാർഡ് ജേതാക്കളെ പരിചയപ്പെടുത്തും. ഡീൻ കുര്യാക്കോസ് എംപി, ആന്‍റണി ജോണ്‍ എംഎൽഎ എന്നിവർ പ്രസംഗിക്കും. വിവിധ രംഗങ്ങളിൽ പ്രാഗത്ഭ്യം തെളിയിച്ച ഫാ. ആന്‍റണി ഉരുളിയാനിക്കൽ സിഎംഐ, മുതലക്കോടം ഹോളിഫാമിലി ആശുപത്രി മുൻ സൂപ്രണ്ട് ഡോ. ഇ.വി. ജോർജ്, സിസ്റ്റർ ആർക്കെയ്ഞ്ചൽ എസ്എബിഎസ് എന്നിവരെ ചടങ്ങിൽ ആദരിക്കും. കാളിയാർ സെന്‍റ് റീത്താസ് ഫൊറോനാ പള്ളി വികാരി ഫാ. ജോസഫ് മുണ്ടുനടയിൽ സ്വാഗതവും കോതമംഗലം രൂപത പിആർഒ ജോർജ് ജോസഫ് കേളകം നന്ദിയും പറയും. രൂപതയിലെ വൈദികർ, കൈക്കാരന്മാർ, ഭക്തസംഘടനാ പ്രതിനിധികൾ, സന്യസ്തർ ഉൾപ്പെടെയുള്ളവർ പങ്കെടുക്കും.

പാതിവില തട്ടിപ്പ് സിബിഐ അന്വേഷിക്കണമെന്ന്

തൊടുപുഴ: പാതിവില തട്ടിപ്പു കേസിൽ സിബിഐ അന്വേഷണത്തിനായി മുറവിളി ശക്തം. എറണാകുളത്ത് വോയ്സ് ഫോർ വുമണ്‍ എന്ന സംഘടനയുടെ നേതൃത്വത്തിൽ ചേർന്ന യോഗത്തിലാണ് തട്ടിപ്പ് സംബന്ധിച്ച അന്വേഷണം സിബിഐക്ക് വിടണമെന്ന ആവശ്യം ഉന്നയിച്ചത്. 50 ശതമാനം തുക അടച്ചാൽ സ്കൂട്ടർ, ലാപ്ടോപ്, തയ്യൽ മെഷീൻ, മൊബൈൽ ഫോണ്‍, വാഷിംഗ് മെഷീൻ തുടങ്ങിയവ ലഭിക്കുമെന്നായിരുന്നു തട്ടിപ്പ് നടത്തിയ അനന്തു കൃഷ്ണന്‍റെയും സംഘാംഗങ്ങളുടെയും വാഗ്ദാനം. സിഎസ്ആർ ഫണ്ട് ലഭിക്കുന്നതുവഴിയാണ് ഇളവ് ലഭിക്കുന്നതെന്നായിരുന്നു ഇവരുടെ പ്രചാരണം. വുമണ്‍ ഓണ്‍ വീൽസ് പ്രോഗ്രാം പദ്ധതി പ്രകാരം വനിതകൾക്ക് 50 ശതമാനം ഇളവ് ലഭിക്കുമെന്നും ഇവർ വാഗ്ദാനം ചെയ്തിരുന്നു. പദ്ധതിയിൽ ചേരുന്നവർക്ക്100 ദിവസത്തിനുള്ളിൽ വാഹനമോ ഉപകരണങ്ങളോ ലഭിക്കുമെന്നായിരുന്നു അറിയിപ്പ്. രണ്ടു ലക്ഷത്തോളം പേർ തട്ടിപ്പിനിരയായ സംഭവത്തിൽ 1,000 കോടിയോളം രൂപയാണ് പദ്ധതിയിൽ ചേർന്നവർക്ക് നഷ്ടമായത്. എത്രയും വേഗം കുറ്റപത്രം സമർപ്പിക്കുക, തട്ടിപ്പിനിരയായവർക്ക് പണം മടക്കി നൽകാൻ നടപടി സ്വീകരിക്കുക, പോലീസ് കണ്ടെത്തിയ 23 അക്കൗണ്ടുകളുടെ കൈമാറ്റം പരിശോധിച്ച് നടപടി സ്വീകരിക്കുക, തട്ടിപ്പിൽ പങ്കുചേർന്നവരെ അന്വേഷണത്തിന്‍റെ പരിധിയിൽ ഉൾപ്പെടുത്തുക എന്നീ ആവശ്യങ്ങൾ യോഗം ഉന്നയിച്ചു. കേസിൽ സമഗ്ര അന്വേഷണം നടത്തി നടപടി സ്വീകരിച്ചില്ലെങ്കിൽ പ്രതികളുടെ വീടിനു മുന്നിലേക്കും അന്വേഷണ ഏജൻസി ഓഫീസുകളിലേക്കും തട്ടിപ്പ് പണം സ്വീകരിച്ച ബാങ്കിനു മുന്നിലേക്കും സെക്രട്ടേറിയറ്റിനു മുന്നിലേക്കും പ്രതിഷേധ സമരം നടത്തുന്നതിനും തീരുമാനിച്ചു. യോഗത്തിൽ വോയ്സ് ഫോർ വുമണ്‍ രക്ഷാധികാരി അഡ്വ. ബേസിൽ ജോണ്‍, അഡ്വ. ബീന, പ്രമീള ഗിരീഷ്, സജിത ഷിബു, പ്രഫ. സെലിൻ ഫിലിപ്പ്, വേണുകുമാർ, ലിസി ബാബു എന്നിവർ പ്രസംഗിച്ചു.

നെല്ലാപ്പാറ മടക്കത്താനം ബൈപാസ്: കാത്തിരിപ്പിന് കാൽ നൂറ്റാണ്ട്

തൊടുപുഴ: കാൽ നൂറ്റാണ്ടായി കാത്തിരിക്കുന്ന നെല്ലാപ്പാറ-മടക്കത്താനം ബൈപാസ് എത്രയും വേഗം പൂർത്തിയാക്കണമെന്ന മുറവിളി ശക്തമാകുന്നു. ശബരി റെയിൽവേ പദ്ധതിക്കു വീണ്ടും ജീവൻവച്ചതോടെ ഈ ബൈപാസിന്‍റെ പ്രസക്തിയും ആവശ്യവും വർധിച്ചു. ആറു കിലോമീറ്റർ വരുന്ന നിർദിഷ്ട പാതയിൽ തൊടുപുഴയാറിനു കുറുകെയുള്ള പാലം അടക്കം അങ്കംവെട്ടി-മടക്കത്താനം മൂന്നാം റീച്ചിലെ ഒന്നര കിലോമീറ്ററിലാണ് സ്ഥലം ഏറ്റെടുത്തു നിർമാണം നടത്തേണ്ടത്. ഇതിനു 38 കോടി രൂപ എസ്റ്റിമേറ്റ് കണക്കാക്കിയിരുന്നു. ഭൂമി സർവേ നടത്തി കല്ലിട്ടിട്ടു വർഷങ്ങളായി. മുൻ മന്ത്രി പി.ജെ. ജോസഫും വിവിധ രാഷ്‌ട്രീയകക്ഷികളും നടത്തിയ സമ്മർദഫലമായി 2001-ൽ സർക്കാർ പ്രഖ്യാപിച്ച ഈ ബൈപാസ് 2002 മുതൽ ബജറ്റിൽ സ്ഥാനം പിടിച്ചിട്ടുണ്ട്. അഞ്ച് സ്റ്റേറ്റ് ഹൈവേകളെ ബന്ധിപ്പിക്കുന്ന ഇത് റബർതടി അടക്കമുള്ളവ കടത്തുന്ന ഭാരവണ്ടികൾക്ക് കുറഞ്ഞ ദൂരത്തിൽ പടിഞ്ഞാറോട്ടുള്ള യാത്ര സാധ്യമാക്കും. ശബരിപാത വരുന്പോൾ ഉണ്ടാകുന്ന ലെവൽ ക്രോസുകൾ, ഓവർ ബ്രിഡ്ജുകൾ, അണ്ടർ ബ്രിഡ്ജുകൾ തുടങ്ങിയവ ഒഴിവാക്കി യാത്ര സുഗമമാക്കാനുമാകും. മടക്കത്താനം-നെല്ലാപ്പാറ ദൂരം ഏഴു കിലോമീറ്റർ കുറയുകയും ചെയ്യും. മടക്കത്താനത്തുനിന്നു തൊടുപുഴ-ഊന്നുകൽ റോഡിലേക്ക് നീട്ടിയാൽ മൂന്നാറിനും മറ്റും പോകുന്നവർക്കു കൂടുതൽ സൗകര്യപ്രദമാകും. ബൈപാസിന്‍റെ ഒന്നാം റീച്ച് നെല്ലാപ്പാറ-പുറപ്പുഴ ഭാഗം നിർമാണം പൂർത്തീകരിച്ചതാണ്. രണ്ടാം റീച്ച് പുറപ്പുഴ-അങ്കംവെട്ടി ഭാഗത്ത നിലവിലെ റോഡ് വീതി കൂട്ടേണ്ട കാര്യമേയുള്ളൂ. മൂന്നാം റീച്ച് രണ്ടു ജില്ലകളിലാണ്. അങ്കംവെട്ടി മുതൽ പുഴവരെ ഇടുക്കി ജില്ലയിലും പുഴ മുതൽ മടക്കത്താനംവരെ എറണാകുളം ജില്ലയിലുമാണ്. എറണാകുളം ജില്ലയിൽ സാമൂഹിക പരിസ്ഥിതി ആഘാത പഠനം പൂർത്തിയാക്കി ഭൂമി ഏറ്റെടുക്കാൻ 11 (1) നോട്ടിഫിക്കേഷന്‍റെ അനുമതിക്കു സമർപ്പിച്ചു കഴിഞ്ഞു. ഇടുക്കി ജില്ലയിൽ സാമൂഹിക പരിസ്ഥിതി ആഘാത പഠനത്തിനുള്ള ഫണ്ട് ലഭിച്ചാൽ മറ്റു നടപടികളിലേക്കു കടക്കാനാകും. പാലംപണിക്കു ടെൻഡർ നൽകി തൂണുകളുടെ ഫൗണ്ടേഷൻ നിർമിച്ചിട്ടുണ്ട്. തുടർനിർമാണം വർഷങ്ങളായി മുടങ്ങിക്കിടക്കുകയാണ്. മൂന്നാം റീച്ച് നിർമാണത്തിന് 2011-ൽ G0 (Rt) 1540/2011/pwd പ്രകാരം ഭരണാനുമതി ലഭിച്ചത് 2021-ൽ പുതുക്കി നൽകി. 2025-26 ലെ ബജറ്റിലും പദ്ധതി സ്ഥാനം പിടിച്ചിട്ടുണ്ട്. ഇനി വേണ്ടത് അടിയന്തരമായി പണം അനുവദിക്കലാണ്. ധനമന്ത്രി ഇതിനു പ്രത്യേക താത്പര്യം എടുക്കണമെന്നാണ് ജനങ്ങളുടെ ആവശ്യം.

കേരള കോൺഗ്രസ്-എം പ്രവർത്തക കൺവൻഷൻ ഇന്ന് വാഴത്തോപ്പിൽ

ചെറുതോണി: കേരള കോൺഗ്രസ്-എം ഇടുക്കി നിയോജകമണ്ഡലം പ്രവർത്തക കൺവൻഷൻ ഇന്നു രാവിലെ പത്തിന് വാഴത്തോപ്പ് പാപ്പൻസ് ഓഡിറ്റോറിയത്തിൽ നടക്കും. കൺവൻഷൻ പാർട്ടി ചെയർമാൻ ജോസ് കെ. മാണി എംപി ഉദ്ഘാടനം ചെയ്യും. നിയോജകമണ്ഡലം പ്രസിഡന്‍റ് ഷാജി കാഞ്ഞമല അധ്യക്ഷത വഹിക്കും. മന്ത്രി റോഷി അഗസ്റ്റിൻ മുഖ്യപ്രഭാഷണം നടത്തും. പാർട്ടി ജില്ലാ പ്രസിഡന്‍റ് ജോസ് പാലത്തിനാൽ, ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാക്കുന്നേൽ, നേതാക്കളായ അഡ്വ. അലക്സ് കോഴിമല, പ്രഫ. കെ.ഐ. ആന്‍റണി, റെജി കുന്നംകോട്ട്, അഡ്വ. മനോജ് എം.തോമസ്, ജോസ് കുഴികണ്ടത്തിൽ, ടി.പി. മൽക്ക, ജോമോൻ പൊടിപാറ, കെ.എൻ. മുരളി, ടോമി കുന്നേൽ, അഡ്വ. ജോണി പുളിക്കൽ, റെജി മുക്കാട്ട്, ഷിജോ തടത്തിൽ, ജയിംസ് മാക്കുഴി തുടങ്ങിയവർ പങ്കെടുക്കും. കൺവൻഷനിൽ വിവിധ മണ്ഡലങ്ങളിൽനിന്നായി തെരഞ്ഞെടുക്കപ്പെട്ട പ്രതിനിധികൾ പങ്കെടുക്കും. ജില്ലയുടെ വികസന പ്രവർത്തനങ്ങളുമായി ബന്ധപ്പെട്ട വിവിധ വകുപ്പുകളുടെ പ്രവർത്തനങ്ങൾ വിലയിരുത്തുന്നതിനും ഭേദഗതികൾ നിർദേശിക്കുന്നതിനും കൺവൻഷൻ വേദിയാകും. നിയോജകമണ്ഡലത്തിലെ ഉന്നതവിജയം നേടിയ പ്രതിഭകളെയും മികച്ച കർഷകരെയും യോഗത്തിൽ ആദരിക്കും.

അതിശക്തമായ മഴസാധ്യത: ഇന്നും ഓറഞ്ച് അലർട്ട്

തൊടുപുഴ: ജില്ലയിൽ മഴയ്ക്ക് നേരിയ ശമനം ഉണ്ടെങ്കിലും ഇടവിട്ടുള്ള ശക്തമായ മഴ തുടരുന്നു. ഇന്ന് അതിശക്തമായ മഴയ്ക്ക് സാധ്യതയുളളതിനാൽ കേന്ദ്ര കാലാവസ്ഥാ വകുപ്പ് ജില്ലയിൽ ഓറഞ്ച് അലർട്ട് പ്രഖ്യാപിച്ചിട്ടുണ്ട്. ജില്ലയിലെ ജലാശയങ്ങളിൽ ബോട്ടിംഗ്, കയാക്കിംഗ്, റാഫ്റ്റിംഗ്, കുട്ടവഞ്ചി സവാരി ഉൾപ്പെടെയുള്ള ജലവിനോദങ്ങളും മണ്ണിടിച്ചിൽ, ഉരുൾപൊട്ടൽ സാധ്യതയുള്ള മലയോര മേഖലകളിലെ ട്രക്കിഗും നിരോധിച്ചിട്ടുണ്ട്. ഒറ്റപ്പെട്ടയിടങ്ങളിൽ അതിശക്തമായ മഴയ്ക്കുള്ള സാധ്യതയാണ് പ്രവചിച്ചിരിക്കുന്നത്. ഇന്നലെ 45.76 മില്ലിമീറ്റർ മഴയാണ് ജില്ലയിൽ പെയ്തത്. പീരുമേട് താലൂക്കിലാണ് കൂടുതൽ മഴ -63.4 മില്ലിമീറ്റർ. ദേവികുളം -44.2, തൊടുപുഴ-57, ഇടുക്കി -45.8, ഉടുന്പഞ്ചോല - 18.4 മില്ലിമീറ്റർ എന്നിങ്ങനെയാണ് മറ്റു താലൂക്കുകളിൽ പെയ്ത മഴയുടെ കണക്ക്. ഇന്ന് ശക്തമായ മഴയ്ക്കു സാധ്യതയുള്ളതിനാൽ ഉരുൾപൊട്ടൽ, മണ്ണിടിച്ചിൽ, മലവെള്ളപ്പാച്ചിൽ സാധ്യതാ പ്രദേശങ്ങളിൽ താമസിക്കുന്നവരും നദിക്കരകൾ, അണക്കെട്ടുകളുടെ കീഴ്പ്രദേശങ്ങൾ എന്നിവിടങ്ങളിൽ താമസിക്കുന്നവരും അപകടസാധ്യത മുൻകൂട്ടിക്കണ്ട് മാറിത്താമസിക്കണമെന്ന് നിർദേശിച്ചിട്ടുണ്ട്. ശക്തമായ കാറ്റിനു സാധ്യതയുള്ളതിനാൽ അടച്ചുറപ്പില്ലാത്ത വീടുകളിൽ താമസിക്കുന്നവരും മേൽക്കൂര ശക്തമല്ലാത്ത വീടുകളിൽ താമസിക്കുന്നവരും പ്രത്യേക ജാഗ്രത പാലിക്കണം. കാറ്റിൽ മരങ്ങൾ കടപുഴകി വീണും പോസ്റ്റുകൾ തകർന്നുവീണും ഉണ്ടാകാനിടയുള്ള അപകടങ്ങളിലും സുരക്ഷാ മുൻകരുതലുകൾ സ്വീകരിക്കണം. വെള്ളച്ചാട്ടങ്ങൾ, ജലാശയങ്ങൾ, മലയോര മേഖലകൾ എന്നിവിടങ്ങളിലേക്കുള്ള വിനോദയാത്രകൾ മഴമുന്നറിയിപ്പ് മാറുന്നതുവരെ പൂർണമായി ഒഴിവാക്കണമെന്നും അധികൃതർ അറിയിച്ചു.

യാത്രക്കാർക്ക് ദുരിതമായി റോഡിലെ വെളളക്കെട്ട്

തൊടുപുഴ: ഇടവെട്ടി - തെക്കുംഭാഗം പിഡബ്ല്യുഡി റോഡിലെ വെള്ളക്കെട്ട് യാത്രക്കാരെ വലയ്ക്കുന്നു. ഇടവെട്ടി പെട്രോൾ പന്പിന് സമീപത്ത് റോഡ് തുടങ്ങുന്ന ഭാഗത്തുനിന്നു 100 മീറ്റർ പിന്നിടുന്പോഴാണ് റോഡ് വെളളത്തിൽ മുങ്ങുന്നത്. സമീപവാസി വഴിയോരം അനധികൃതമായി കെട്ടിയടച്ചതോടെ വെള്ളം ഒഴുകിപ്പോകാത്തതാണ് നൂറുകണക്കിന് ആളുകളെ വലയ്ക്കുന്ന വെള്ളക്കെട്ടിനു കാരണമായത്. വിദ്യാർഥികളടക്കമുളള കാൽനടക്കാർക്കും സ്കൂൾ ബസുകൾ ഉൾപ്പെടെയുളള വാഹനങ്ങൾക്കും കടന്നുപോകാൻ ഏറെ ബുദ്ധിമുട്ടാണ്. ഇരുചക്രവാഹന യാത്രക്കാർ അപകടത്തിൽപ്പെടുന്നതും പതിവാണ്. ജനപ്രതിനിധികളെ അറിയിച്ചിട്ടും നടപടിയുണ്ടായില്ലെന്ന് ആരോപണമുണ്ട്. വെള്ളക്കെട്ടിന് കാരണമായ അനധികൃത കെട്ട് പൊളിച്ചുനീക്കണമെന്നാവശ്യപ്പെട്ട് നാട്ടുകാർ പൊതുമരാമത്ത് വകുപ്പ് അധികൃതർക്ക് പരാതി നൽകി.

കാട്ടാനക്കൂട്ടം ഒരേക്കർ സ്ഥലത്തെ ഏലക്കൃഷി നശിപ്പിച്ചു

പീരുമേട്: കാട്ടാനക്കൂട്ടം ഒരേക്കർ സ്ഥലത്തെ ഏലക്കൃഷി നശിപ്പിച്ചു. കഴിഞ്ഞ രാത്രി പീരുമേട് തോട്ടാപ്പുരയ്ക്കു സമീപമെത്തിയ രണ്ടു കാട്ടാനകളാണ് നാശംവിതച്ചത്. ചങ്ങനാശേരി അതിരൂപതയുടെ ലവീഞ്ഞ് മൗണ്ട് വില്ലയുടെ കീഴിലുള്ള സ്ഥലത്തെ കൃഷിയാണ് നശിപ്പിച്ചത്. സ്ഥലം പാട്ടത്തിനെടുത്ത് കൊച്ചിനാട്ട് വർഗീസ് ഏബ്രഹാമാണ് ഇവിടെ കൃഷിയിറക്കിയിരുന്നത്. വർഗീസിന്‍റെ ഭാര്യ ലാസി കാട്ടാനയുടെ മുൻപിൽനിന്ന് തലനാരിഴയ്ക്കാണ് രക്ഷപ്പെട്ടത്. കാട്ടാനകൾ പക്കത്ത് മോഹന്‍റെ പുരയിടത്തിലിറങ്ങി ഇവിടെയും വിളകൾ നശിപ്പിച്ചു. തറമറ്റത്തിൽ അഡ്വ. ജോഷി പോളിന്‍റെ വീട്ടുമുറ്റത്തും ആനയെത്തി. പീരുമേട് തോട്ടാപുര, പ്ലാക്കത്തടം, കച്ചേരിക്കുന്ന്, സിവിൽ സ്റ്റേഷൻ പരിസരപ്രദേശങ്ങൾ എന്നിവിടങ്ങളിൽ കാട്ടാനയുടെ സാന്നിധ്യം കഴിഞ്ഞ കുറച്ചു ദിവസങ്ങളായിട്ടുണ്ട്.

കുളക്കോഴിച്ചാൽ റോഡ് തകർന്നു

രാജാക്കാട്: കനത്ത മഴയെത്തുടർന്ന് സേനാപതി - രാജകുമാരി പഞ്ചായത്തുകളെ തമ്മിൽ ബന്ധിപ്പിക്കുന്ന ആവണക്കുംചാൽ പാലം - കുളക്കോഴിച്ചാൽ റോഡിന്‍റെ ഒരു ഭാഗം ഇടിഞ്ഞു താഴ്ന്ന് അപകടാവസ്ഥയിലായി. സേനാപതി പഞ്ചായത്ത് മൂന്നാം വാർഡിലുൾപ്പെടുന്ന അൻപതോളം വീട്ടുകാർ ഉപയോഗിക്കുന്ന റോഡാണ് വാഹനയാത്ര സാധ്യമല്ലാത്തവിധം അപകടാവസ്ഥയിലായത്. 2018-ലെ പ്രളയത്തിലും ഈ റോഡ് ഇടിഞ്ഞു താഴ്ന്നിരുന്നു. നാട്ടുകാർ മണ്ണിട്ടു നികത്തിയാണ് അന്ന് ഇതു വഴിയുള്ള ഗതാഗതം പുനഃസ്ഥാപിച്ചത്. നിരവധി സ്കൂൾ ബസുകൾ ഉൾപ്പെടെ കടന്നുപോകുന്ന റോഡ് ബ്ലോക്കായതോടെ നാട്ടുകാർ ദുരിതത്തിലായി. സമീപത്തെ ഇഞ്ചപ്ലാക്കൽ സിബി, കൊച്ചുവീട്ടിൽ ബിജു എന്നിവരുടെ വീടുകളും അപകടാവസ്ഥയിലായി. പഞ്ചായത്ത് അധികൃതരെ വിവരമറിയിച്ചെങ്കിലും തത്കാലം അറ്റകുറ്റപ്പണി നടത്താനുള്ള ഫണ്ട് ഇല്ലെന്നാണ് അറിയിച്ചതെന്ന് നാട്ടുകാർ പറയുന്നു.

പീരുമേട് ഡിവൈഎസ്പി ഓഫീസിലേക്ക് മാർച്ച് നടത്തി

പീരുമേട്: തോട്ടാപ്പുര സ്വദേശി സീതയുടെ മരണത്തിലെ ദുരൂഹത നീക്കണമെന്നാവശ്യപ്പെട്ട് കോൺഗ്രസ് പീരുമേട് മണ്ഡലം കമ്മിറ്റിയുടെ നേതൃത്വത്തിൽ പീരുമേട് ഡിവൈഎസ്പി ഓഫീസിലേക്ക് മാർച്ച് നടത്തി. മരണകാരണം ഇനിയും കണ്ടെത്താൻ പോലീസിനു കഴിഞ്ഞിട്ടില്ല. വനംവകുപ്പും പോലീസും രണ്ടു തട്ടിൽ നിൽക്കുന്നതാണ് ഇതിനു കാരണമെന്ന് സമരക്കാർ ആരോപിച്ചു. പ്രശ്നത്തിൽ സിപിഎം കപടരാഷ്‌ട്രീയം കളിക്കുകയാണ്. കാട്ടാന ആക്രമണത്തിലാണ് സീത മരണപ്പെട്ടതെങ്കിൽ കുടുംബത്തിന് അർഹമായ നഷ്ടപരിഹാരം നൽകണം. കുടുംബത്തിലെ ഒരംഗത്തിന് സർക്കാർ ജോലി ഉറപ്പുവരുത്തണം. ആവശ്യമെങ്കിൽ റീ പോസ്റ്റ്മോർട്ടം നടത്തണമെന്നും സമരക്കാർ ആവശ്യപ്പെട്ടു. സമരം കോൺഗ്രസ് ബ്ലോക്ക് പ്രസിഡന്‍റ് റോബിൻ കാരയ്ക്കാട്ട് ഉദ്ഘാടനം ചെയ്തു. മണ്ഡലം പ്രസിഡന്‍റ് കെ. രാജൻ അധ്യക്ഷത വഹിച്ചു. എം. ഷാഹുൽ ഹമീദ്, ശാന്തി രമേശ്, പി.കെ. ചന്ദ്രശേഖരൻ, പി.പി. റഹിം, ഫ്രാൻസിസ് അറയ്ക്കപ്പറമ്പിൽ, നിക്സൺ ജോർജ്, പി.കെ. രാജൻ, മനോജ് രാജൻ, ഹൈദ്രോസ് മീരാൻ, പി.ടി.വർഗീസ്, കെ.എ. സിദ്ദിഖ്, തമ്പി വരയന്നൂർ, മജോ കാരിമുട്ടം, ശാരി ബിനു ശങ്കർ എന്നിവർ പ്രസംഗിച്ചു.

കലിയടങ്ങാതെ കാലവർഷം; ജില്ല അതീവ ജാഗ്രതയിൽ

തൊടുപുഴ: ജില്ലയിൽ ഇടതടവില്ലാതെ കാലവർഷം തിമിർത്ത് പെയ്തതോടെ പലഭാഗങ്ങളും മഴക്കെടുതികളുടെ പിടിയിലായി. ബുധനാഴ്ച വൈകുന്നേരം ശക്തമായി തുടങ്ങിയ മഴ ഇന്നലെ പുലർച്ചയോടെ തെല്ല് ശമിച്ചെങ്കിലും വീണ്ടും ശക്തി പ്രാപിക്കുകയായിരുന്നു. കനത്ത മഴ തുടരുന്ന സാഹചര്യത്തിൽ ജില്ലയിൽ ഇന്നും നാളെയും കേന്ദ്ര കാലാവസ്ഥാ വകുപ്പിന്‍റെ മുന്നറിയിപ്പ് പ്രകാരം ഓറഞ്ച് അലർട്ട് പ്രഖ്യാപിച്ചു. ശക്തമോ അതിശക്തമോ ആയ മഴ തുടരുമെന്നാണ് കാലാവസ്ഥാ വകുപ്പിന്‍റെ പ്രവചനം. ഇന്നലെ ജില്ലയിൽ റെഡ് അലർട്ട് പ്രഖ്യാപിച്ചിരുന്നു. കഴിഞ്ഞ ദിവസം ശക്തമായ തോതിൽ മഴ പെയ്തതായാണ് കണക്ക്. ഇന്നലെ രാവിലെ വരെയുള്ള 24 മണിക്കൂറിൽ ശരാശരി 111.66 മില്ലിമീറ്റർ മഴയാണ് ജില്ലയിലാകെ ലഭിച്ചത്. പീരുമേട് താലൂക്കിലാണ് ഏറ്റവും ഉയർന്ന തോതിൽ മഴ പെയ്തത്. 148.1 മില്ലിമീറ്റർ. കുറവ് ഉടുന്പൻചോലയിലും. ഇവിടെ 45 മില്ലിമീറ്റർ മഴ ലഭിച്ചു. ദുരന്തനിവാരണവുമായി ബന്ധപ്പെട്ട് അടിയന്തര സാഹചര്യങ്ങൾ കണക്കിലെടുത്ത് ബന്ധപ്പെട്ട എല്ലാ വകുപ്പുകളിലെയും ജീവനക്കാർ അലർട്ടുകൾ പിൻവലിക്കുന്നതുവരെ ആസ്ഥാനം വിട്ടുപോകാൻ പാടില്ലെന്ന് ജില്ലാ കളക്ടർ നിർദേശിച്ചിട്ടുണ്ട്. മലങ്കര അണക്കെട്ടിന്‍റെ അഞ്ച് ഷട്ടറുകളും തുറന്നിരിക്കുകയാണ്. വിവിധയിടങ്ങളിൽ കനത്ത കാറ്റിലും മഴയിലും മരം വീണ് നാശനഷ്ടമുണ്ടായി. മഴ അതിശക്തമായതോടെ തൊടുപുഴയാർ നിറഞ്ഞൊഴുകുകയാണ്. തൊടുപുഴ കെഎസ്ആർടിസി ഡിപ്പോയിലെ താഴത്തെ നിലയിലെ പാർക്കിംഗ് ഏരിയായിൽ വെള്ളം കയറി. ജലനിരപ്പ് ഉയർന്നതോടെ ഇവിടെ പാർക്ക് ചെയ്തിരുന്ന വാഹനങ്ങൾ നീക്കി. തൊടുപുഴ സെൻട്രൽ ജുമാ മസ്ജിദ്, കാഞ്ഞിരമറ്റം - മുതലിയാർമഠം റോഡ്, ആനക്കൂട് ഭാഗത്തെ റോഡ് എന്നിവിടങ്ങളിൽ വെള്ളം കയറി. അരിക്കുഴ മൂഴിക്കൽ ക്ഷേത്രത്തിന് സമീപവും വലിയ വെള്ളക്കെട്ടുണ്ടായി. മുതലിയാർമഠത്ത് അഞ്ചു വീടുകളിൽ രാവിലെ വെള്ളം കയറി. ഇവിടെ താമസിച്ചിരുന്നവരെ മുതലിയാർ മഠം ക്ഷേത്രത്തിന്‍റെ ഓഡിറ്റോറിയത്തിലേക്ക് മാറ്റി പാർപ്പിച്ചു. വെങ്ങല്ലൂർ നടയിൽക്കാവ് ക്ഷേത്രത്തിന് സമീപത്തെ വീടുകളിലും കാരിക്കോട് തോടിന് സമീപത്തെ വീടുകളിലും വെള്ളം കയറി.

മുട്ടം, മൂലമറ്റം മേഖലകളിൽ വ്യാപക നാശം

മുട്ടം: കനത്ത മഴയെ തുടർന്ന് വീട് ഇടിഞ്ഞുതാഴ്ന്നു. മുട്ടം പഞ്ചായത്തിൽ മാത്തപ്പാറ ഐഎച്ച്ഡിപി കോളനിയിൽ വട്ടക്കുഴിയിൽ വി. സി. പീറ്ററിന്‍റെ വീടാണ് ഇടിഞ്ഞുതാഴ്ന്നത്. ബുധനാഴ്ച രാത്രിയോടെയാണ് സംഭവം. പീറ്ററും ഭാര്യ സുജിയും മക്കളും വീടിനുള്ളിൽ കിടന്നുറങ്ങുന്നതിനിടെ ഉച്ചത്തിലുള്ള ശബ്ദം കേട്ട് ഞെട്ടിയുണർന്നപ്പോൾ അടുക്കള ഭാഗം ഇടിഞ്ഞു താഴേക്ക് വീഴുന്നതാണ് കണ്ടത്. തുടർന്ന് മുറിയും മുൻവശവും ഇടിഞ്ഞുതാഴ്ന്നു. പ്രദേശവാസികൾ സ്ഥലത്തെത്തി രക്ഷാ ്രവർത്തനം നടത്തി. മുട്ടം വില്ലേജ്, പോലീസ് അധികൃതരും സ്ഥലത്തെത്തി. അറക്കുളം അശോക കവലയിൽ സുഭദ്ര ബാലചന്ദ്രന്‍റെ വീട്ടിൽ വെള്ളം കയറി നശിച്ചു. അടുക്കളയിലും വീടിനകത്തും വെള്ളം കയറി അടുക്കളയും അതിനോട് ചേർന്നുള്ള സംരക്ഷണഭിത്തിയും തകർന്നു. സമീപ പ്രദേശങ്ങളിലുള്ള വീടുകളിലും നാശ നഷ്ടംസംഭവിച്ചു. കുളമാവിന് സമീപം തൊടുപുഴ-പുളിയൻമല സംസ്ഥാന പാതയിലേക്ക് മരം വീണ് ഗതാഗതം മുടങ്ങി. മൂലമറ്റം അഗ്നിരക്ഷാ സേനയെത്തി മരം വെട്ടിമാറ്റി. പന്നിമറ്റം ചപ്പാത്തിൽ വെള്ളം കയറിയതിനെ തുടർന്ന് ഇതു വഴിയുള്ള ഗതാഗതം മുടങ്ങി. കനത്ത മഴയെ തുടർന്ന് കുടയത്തൂർ പാലയ്ക്കാത്തൊട്ടിയിൽ തങ്കമ്മ കൃഷ്ണന്‍റെ വീട്ടിൽ വെള്ളം കയറി. സമീപത്തെ തോട്ടിൽ നിന്നാണ് വെള്ളം വീട്ടിലേക്ക് എത്തിയത്. വീടിന്‍റെ അടുക്കള വരെ വെള്ളമെത്തി. വീട്ടുപകരണങ്ങൾ എല്ലാം മാറ്റിയതിനാൽ അവയ്ക്ക് നാശം സംഭവിച്ചില്ല. വെള്ളിയാമറ്റം പഞ്ചായത്തിലെ നാളിയാനി - കുളമാവ് റേഡിൽ മണ്ണിടിഞ്ഞ് കൂറ്റൻ പാറയും മണ്ണും റോഡിൽ പതിച്ച് ഗതാഗതം പൂർണമായി നിലച്ചു. ദേശീയപാതയിൽ മണ്ണിടിഞ്ഞ് ഗതാഗതം തടസപ്പെട്ടു ചെറുതോണി: അടിമാലി - കുമളി ദേശീയപാതയിൽ ഇടുക്കി ഡാം ടോപ്പിന് സമീപം വെള്ളക്കുത്തിൽ മണ്ണിടിഞ്ഞ് ഗതാഗതം തടസപ്പെട്ടു. വന്മരം ഉൾപ്പെടെ കടപുഴകി ഇടിഞ്ഞുവീണ മണ്ണിനൊപ്പം റോഡിൽ പതിക്കുകയായിരുന്നു. മണ്ണിടിഞ്ഞതിനെ തുടർന്ന് രണ്ടു മണിക്കൂർ ഗതാഗതം തടസപെട്ടു. ഇടുക്കി അഗ്നിരക്ഷാസേന എത്തി മരം മുറിച്ചുമാറ്റി ഗതാഗതം പുനഃസ്ഥാപിച്ചെങ്കിലും ഇടിഞ്ഞുവീണ മണ്ണ് മാറ്റാൻ സാധിച്ചില്ല. വാഹനങ്ങൾ കടന്നുപോകുന്നുണ്ടെങ്കിലും ഇവിടെ അപകട ഭീഷണി നിലനിൽക്കുകയാണ്. വീടിന്‍റെ സംരക്ഷണഭിത്തി തകർന്നു കട്ടപ്പന : കട്ടപ്പന റേഷൻകട കുന്തളംപാറയിൽ വീടിന്‍റെ സംരക്ഷണഭിത്തി തകർന്ന് അയൽവാസിയുടെ വീട്ടിലേക്ക് പതിച്ചു. രാമനാട്ട് സനോജ് ജോസഫിന്‍റെ വീടിന്‍റെ സംരക്ഷണഭിത്തിയാണ് ഇടിഞ്ഞത്. വ്യാഴാഴ്ച ഉച്ചയ്ക്ക് ഒന്നോടെയാണ് സംഭവം ഉണ്ടായത്. കൽക്കെട്ടും മണ്ണും സനോജിന്‍റെ വീടിന് താഴ്ഭാഗത്ത് സ്ഥിതിചെയ്യുന്ന സിബി ജോസഫിന്‍റെ വീട്ടിലേക്കാണ് പതിച്ചത്. ഈ സമയം വീട്ടുകാർ ഉണ്ടായിരുന്നെങ്കിലും ശബ്ദം കേട്ട് വീട്ടിൽ നിന്നും ആളുകൾ ഓടിമാറുകയായിരുന്നു.ഇടിഞ്ഞുവന്ന കൽക്കെട്ടും കോൺക്രീറ്റ് വസ്തുക്കളും സിബി ജോസഫിന്‍റെ വീടിന്‍റെ ഭിത്തിയിൽ പതിച്ചു നിൽക്കുകയാണ്. ജനൽചില്ലുകൾ തകർന്നതല്ലാതെ മറ്റു വലിയ നാശനഷ്ടങ്ങൾ ഉണ്ടായില്ല. എന്നാൽ, വീണ്ടും മണ്ണിടിച്ചിൽ ഉണ്ടായാൽ ഇരു വീടുകൾക്കും വലിയ അപകടം ഉണ്ടായേക്കും. നിലവിൽ പ്ലാസ്റ്റിക് ഷീറ്റുകൾ ഉപയോഗിച്ച് മണ്ണിടിഞ്ഞ ഭാഗം മൂടി, ഇടിച്ചിൽ തടയാനുള്ള ശ്രമങ്ങളാണ് നാട്ടുകാർ നടത്തിയത്.

ശക്തമായ മഴയിൽ പീരുമേട് മേഖലയിൽ വ്യാപകമായ മണ്ണിടിച്ചിൽ

വണ്ടിപ്പെരിയാർ: ശക്തമായ മഴയിൽ പീരുമേട് മേഖലയിൽ വ്യാപകമായ മണ്ണിടിച്ചിൽ. വണ്ടിപ്പെരിയാർ ടൗണിനോട് ചേർന്നുള്ള കോണിമാറ എസ്റ്റേറ്റ് വകസ്ഥലത്ത് 40 അടിയോളം ഉയരമുള്ള മൺതിട്ട ഇടിഞ്ഞുവീണു. ടൗണിൽ പ്രവർത്തിക്കുന്ന മുബാറക്ക് ബിൽഡിംഗിന്‍റെ ഒരു വശത്തേക്കാണ് മണ്ണ് ഇടിഞ്ഞു വീണത്. മൺതിട്ട ഇടിഞ്ഞുകൊണ്ടിരിക്കുന്ന സാഹചര്യത്തിൽ ഇവിടെ അപകടാവസ്ഥ നിലനിൽക്കുകയാണ്. വെളുപ്പിന് രണ്ടോടെ വള്ളക്കടവ് പ്ലാമൂട് പ്രദേശത്ത് മണ്ണിടിഞ്ഞ് റോഡിലേക്ക് വീണു. വ്യാഴാഴ്ച രാവിലെ ജെസിബി എത്തിച്ചാണ് റോഡിലെ മണ്ണ് പൂർണമായും എടുത്തുമാറ്റിയത്. 62 -ാം മൈൽ ലക്ഷംവീട് കോളനിയിലേക്കുള്ള വഴിയും ഇടിഞ്ഞുപോയി. പെരിയാർ നദിയിലും ചോറ്റുപാറ കൈത്തോട്ടിലും ജലനിരപ്പ് ഉയർന്നിട്ടുമുണ്ട്.

മാങ്കുളത്ത് കനത്ത നാശം

അടിമാലി: കഴിഞ്ഞ ദിവസങ്ങളില്‍ പെയ്ത മഴയില്‍ മാങ്കുളത്ത് കനത്ത നാശം. പഞ്ചായത്തിലെ പ്രധാന റോഡുകളില്‍ ഒന്നായ പെരുമ്പന്‍കുത്ത് - ആറാംമൈല്‍ - അമ്പതാംമൈല്‍ റോഡില്‍ കരിമുണ്ടസിറ്റിക്ക് സമീപം റോഡില്‍ വലിയ വിള്ളല്‍ രൂപപ്പെട്ടു. വിള്ളല്‍ രൂപംകൊണ്ട ഭാഗം താഴ്ന്ന് റോഡിന് ബലക്ഷയം വന്ന നിലയിലാണ്. നിലവില്‍ ചെറുവാഹനങ്ങള്‍ ഇതുവഴി കടന്നു പോകുന്നുണ്ട്. ഭാരവാഹനങ്ങള്‍ക്ക് നിയന്ത്രണം ഏർപ്പെടുത്തിയിരിക്കുകയാണ്. മഴ തുടരുകയും വിള്ളല്‍ രൂപംകൊണ്ട ഭാഗത്തുകൂടി കൂടുതല്‍ വെള്ളമിറങ്ങുകയും ചെയ്താല്‍ റോഡ് കൂടുതലായി ഇടിയാനുള്ള സാധ്യത ഉണ്ട്. അങ്ങനെ സംഭവിച്ചാല്‍ ആറാംമൈല്‍, അമ്പതാംമൈല്‍ തുടങ്ങിയ ജനവാസ മേഖലകളിലേക്കും ചിക്കണംകുടി, കള്ളക്കൂട്ടികുടി തുടങ്ങിയ വിവിധ ആദിവാസി ഇടങ്ങളിലേക്കുമുള്ള യാത്ര പ്രതിസന്ധിയിലാകും. മുമ്പും ഈ ഭാഗത്ത് സമാന രീതിയില്‍ റോഡില്‍ വിള്ളല്‍ രൂപംകൊണ്ടിട്ടുണ്ട്. ഏറെ നാളത്തെ ആവശ്യങ്ങള്‍ക്കൊടുവില്‍ ഏതാനും ദിവസങ്ങള്‍ക്ക് മുമ്പാണ് പെരുമ്പന്‍കുത്ത് ആറാംമൈല്‍ - അമ്പതാംമൈല്‍ റോഡില്‍ ടാറിംഗ് ജോലികള്‍ നടത്തിയത്. നിലവില്‍ വിള്ളല്‍ രൂപംകൊണ്ടിട്ടുള്ള ഭാഗത്ത് ടാറിംഗ് നടത്തിയിരുന്നില്ല. മാങ്കുളം - ആനക്കുളം റോഡില്‍ ബൈസണ്‍വാലി കയറ്റത്തിന് സമീപം ബുധനാഴ്ച രാത്രിയില്‍ മണ്ണിടിച്ചില്‍ ഉണ്ടായി ഗതാഗതം തടസപ്പെട്ടു. മാങ്കുളം റേഷന്‍കട സിറ്റി - വിരിഞ്ഞപാറ റോഡില്‍ തമ്പിക്കുന്ന് ഭാഗത്തും പെരുമ്പന്‍കുത്ത് - കുറത്തിക്കുടി റോഡിലും മണ്ണിടിഞ്ഞ് യാത്രാ തടസമുണ്ടായി. ബുധനാഴ്ച പകല്‍ പെയ്ത ശക്തമായ മഴയില്‍ കല്ലാര്‍ - മാങ്കുളം റോഡില്‍ തളികത്ത് റോഡില്‍ വെള്ളം കയറുകയും ചെറുവാഹനങ്ങളുടെ യാത്ര ദുഷ്‌കരമാകുകയും ചെയ്തിരുന്നു. മഴയുടെ ശക്തി കുറഞ്ഞതോടെ റോഡില്‍നിന്നും വെള്ളമിറങ്ങി. മഴ വീണ്ടും ശക്തമായി തുടര്‍ന്നാല്‍ റോഡിലേക്ക് വെള്ളം കയറുകയും യാത്ര പ്രതിസന്ധിയിലാവുകയും ചെയ്യും.

റോഡിന്‍റെ സംരക്ഷണഭിത്തിയിടിഞ്ഞ് പാലം അപകടത്തിൽ

ചെറുതോണി: പാലത്തിനോട് ചേർന്നുള്ള സംരക്ഷണ ഭിത്തിയിടിഞ്ഞ് പാലം അപകടത്തിലായി. ചെറുതോണി - വഞ്ചിക്കവല സ്വധറിന് സമീപത്തുനിന്നും പൈനാവ് - താന്നിക്കണ്ടം - അശോകകവല പാതയിലേക്കുള്ള റോഡിലാണ് പാലം അപകടത്തിലായിരിക്കുന്നത്. കഴിഞ്ഞ രാത്രിയുണ്ടായ ശക്തമായ മഴയിൽ പാലത്തിനോട് ചേർന്നുള്ള സംരക്ഷണഭിത്തി തകർന്നുവീണു. പാലത്തിന്‍റെ അടിയിലെ കരിങ്കൽകെട്ട് വർഷങ്ങൾക്ക് മുമ്പേ ഇടിഞ്ഞിരുന്നതാണ്. ഇതു വഴി സ്കൂൾ ബസുകൾ ഉൾപ്പെടെ നിരവധി വാഹങ്ങൾ കടന്നുപോകുന്നുണ്ട്. അടിയന്തരമായി റോഡ് ഗതാഗതയോഗ്യമാക്കണമെന്ന് നാട്ടുകാർ ആവശ്യപ്പെട്ടു.

വിദ്യാഭ്യാസ സ്ഥാപനങ്ങൾക്ക് അവധി: അങ്കണവാടി ജീവനക്കാർക്ക് അവധി നിഷേധിച്ചു

ചെറുതോണി : ജില്ലയിൽ കനത്ത മഴയും കാറ്റും തുടരുന്ന സാഹചര്യത്തിൽ അപകടങ്ങൾ ഒഴിവാക്കാനായി പ്രഫഷണൽ കോളജുകൾ ഉൾപ്പെടെയുള്ള എല്ലാ വിദ്യാഭ്യാസ സ്ഥാപനങ്ങൾക്കും ജില്ലാ കളക്ടർ അവധി പ്രഖ്യാപിച്ചെങ്കിലും അങ്കണവാടികൾ തുറക്കാനുള്ള സിഡിപിഒയുടെ നിർദേശം വിവാദമായി. വിദ്യാർത്ഥികൾ എത്തിയിരുന്നില്ലെങ്കിലും ജീവനക്കാർ അങ്കണവാടിയിലെത്തി. കനത്ത കാറ്റും മഴയും മൂലം അപകടങ്ങൾ ഉണ്ടാകാൻ സാധ്യതയുള്ളപ്പോൾ അങ്കണവാടികളിൽ തങ്ങൾ സുരക്ഷിതരല്ലെന്നാണ് ജീവനക്കാർ പറയുന്നത്. കഴിഞ്ഞ തവണ കളക്ടർ അവധി നല്കിയ ദിവസമാണ് കാമാക്ഷി പഞ്ചായത്തിലെ പുഷ്പഗിരി അങ്കണവാടി കെട്ടിടത്തിന്‍റെ സീലിംഗ് ഇളകിവീണ് ഹെൽപ്പർക്ക് പരിക്കേറ്റത്. മണ്ണിടിച്ചിലും അപകടസാധ്യതയുമുള്ള മേഖലകളിലാണ് ഹൈറേഞ്ചിലെ അങ്കണവാടികളിൽ ഏറിയപങ്കും സ്ഥിതി ചെയ്യുന്നത്. ഈ സാഹചര്യത്തിൽ ജീവൻ പണയം വച്ചാണ് ജീവനക്കാർ അങ്കണവാടിയിൽ എത്തുന്നത്. അപകടം പറ്റിയാൽ ചികിത്സയ്ക്കാവശ്യമായ ഇൻഷുറൻസ് സംവിധാനമോ മറ്റു സൗകര്യങ്ങളോ ഇവർക്ക് ഏർപ്പെടുത്തിയിട്ടില്ല. പ്രതികൂല സാഹചര്യങ്ങളിൽ അങ്കണവാടി ജീവനക്കാരെ സുരക്ഷിതമല്ലാത്ത സാഹചര്യത്തിൽ ജോലി ചെയ്യാൻ നിർബന്ധിക്കുന്ന മേലുദ്യോഗസ്ഥരുടെ നടപടി തിരുത്തണമെന്നാണ് ജീവനക്കാരും ജനങ്ങളും ആവശ്യപ്പെടുന്നത്

അപകടകരമായ മരങ്ങൾ മുറിച്ചുമാറ്റാത്തത് പ്രതിഷേധാർഹമെന്ന്

രാജാക്കാട്: കാലവര്‍ഷം വീണ്ടും ശക്തമായിട്ടും അപകടകരമായ രീതിയില്‍ റോഡരികില്‍ നില്‍ക്കുന്ന മരങ്ങള്‍ മുറിച്ച്മാറ്റാത്തത് പ്രതിഷേധാര്‍ഹമാണെന്ന് ഡിസിസി വൈസ് പ്രസിഡന്‍റ് കെ. എസ്. അരുൺ. തുടര്‍ച്ചയായി നിര്‍ദേശങ്ങള്‍ നല്‍കിയിട്ടും വനം വകുപ്പ് ഇപ്പോഴും അവരുടെ ഭൂമിയില്‍ നില്‍ക്കുന്ന മരങ്ങള്‍ മുറിച്ചുമാറ്റാനുള്ള നടപടി സ്വീകരിച്ചിട്ടില്ല. നൂറുകണക്കിന് ജനങ്ങള്‍ യാത്ര ചെയ്യുന്ന പഞ്ചായത്ത് റോഡുകള്‍ തുടങ്ങി ആയിരക്കണക്കിന് വാഹനങ്ങള്‍ കടന്ന് പോകുന്ന ഇടുക്കിയിലെ ഹൈവേകള്‍ വരെ നീളുന്നതാണ് ഈ ഭീഷണി. കാലവര്‍ഷത്തിന് മുന്നേ മരങ്ങള്‍ മുറിച്ച് അപകടം ഒഴിവാക്കണമെന്നായിരുന്നു വനം വകുപ്പിന് ദുരന്തനിവാരണ അഥോറിറ്റി നല്‍കിയ നിര്‍ദേശം. ഇതു പാലിക്കപ്പെട്ടില്ല. ഒരുമാസം മുന്പ് വന്‍തോതില്‍ മരങ്ങളും ശിഖിരങ്ങളും ഒടിഞ്ഞുവീണ് ജില്ലയാകെ ഇരുട്ടിലായതും കെഎസ്ഇബിക്ക് കോടിക്കണക്കിന് രൂപ നഷ്ടമുണ്ടാക്കിയതും ഇതിനാലാണെന്നും അരുണ്‍ ചൂണ്ടിക്കാട്ടി.

ചിന്നക്കനാലിലെ കൈയേറ്റഭൂമി സർക്കാർ ഏറ്റെടുത്തു

രാജാക്കാട്: ചിന്നക്കനാൽ വില്ലേജിൽ വെലക്ക് 70 ഏക്കർ റോഡിന് ഇരുവശത്തുമായി ഏഴ് ആളുകൾ കൈവശപ്പെടുത്തിയിരുന്ന സർക്കാർ ഭൂമിയും ചിന്നക്കനാൽ സൂര്യനെല്ലി റോഡിനോട് ചേർന്ന് അഞ്ച് ആളുകൾ കൈവശപ്പെടുത്തിയിരുന്ന ഭൂമിയും സർക്കാർ ഏറ്റെടുത്തു. വെലക്ക് 70 ഏക്കർ റോഡിന് സമീപം സർവേ നന്പർ 524 മുതൽ 529 വരെയുള്ള 2.88 ഏക്കറോളം ഭൂമി 2000 ൽ വ്യാജ പ്രമാണങ്ങൾ ചമച്ച് ഏഴു പേർ കൈവശപ്പെടുത്തിയതായാണ് റവന്യു അധികൃതർ പറയുന്നത്. വള്ളിയമ്മ എന്ന പേരിൽ ഈ ഭൂമിക്ക് പട്ടയവും സൃഷ്ടിച്ചു. മൂന്നാർ ദൗത്യകാലത്താണ് ഈ ഭൂമിയിലെ കൈയേറ്റം കണ്ടെത്തിയത്. എന്നാൽ, കൈവശക്കാർ ഹൈക്കോടതിയെ സമീപിച്ചതിനാൽ ഒഴിപ്പിക്കൽ നടപടികൾ വൈകി. കൈയേറ്റക്കാർക്ക് എതിരായി കോടതിയുടെ അന്തിമവിധി വന്നതോടെയാണ് സോണിയ എലിസബത്ത്, റാണി തങ്കച്ചൻ, ബോബി സക്കറിയ, പ്രമോദ് ജോസഫ്, ഗ്രേസ് തോമസ്, തോമസ് മാത്യു, ജോസ് ജോസഫ് എന്നിവർ കൈവശം വച്ചിരുന്ന ഭൂമി ഏറ്റെടുത്തത്. ചിന്നക്കനാൽ സൂര്യനെല്ലി റോഡിന് സമീപം സർവേ നമ്പർ 510ലും 517 ലും ഉൾപ്പെടുന്ന 9.53 ഏക്കറോളം ഭൂമിയിലെയും കൈയേറ്റം റവന്യു വിഭാഗം ഇന്നലെ ഒഴിപ്പിച്ചു. സിപിഎം ശാന്തൻപാറ ഏരിയ കമ്മിറ്റിയംഗം വി.എക്സ്. ആൽബിൻ കൈവശംവച്ചിരുന്ന 2.80 ഏക്കർ ഭൂമിയും ഇതിൽ ഉൾപ്പെടുന്നു. ചക്കുപള്ളം സ്വദേശിയായ സിബി തോമസ്, മുംബൈ സ്വദേശി അൻഷുൽ സിനോയ്, തിരുവനന്തപുരം സ്വദേശി ബാബുരാജ്, എറണാകുളം സ്വദേശി അനിൽ ജേക്കബ് എന്നിവരാണ് ഈ ഭൂമി കൈവശം വച്ചിരുന്ന മറ്റുള്ളവർ.

പൊട്ടിവീണു കിടന്ന സ്റ്റേ കമ്പിയിൽനിന്നു ഷോക്കേറ്റ് യുവാവിന് ഗുരുതര പരിക്ക്

നെടുംകണ്ടം: പൊട്ടിവീണു കിടന്ന സ്റ്റേ കമ്പിയിൽനിന്നു ഷോക്കേറ്റ് യുവാവിന് ഗുരുതര പരിക്ക്. നെടുങ്കണ്ടം താന്നിമൂട് വടക്കേകുന്നേൽ ഡോണി മാത്യു (27) വിനാണ് പൊള്ളലേറ്റത്. കാലുകൾക്കും കൈകൾക്കും വയറിനും പൊള്ളലേറ്റ യുവാവിനെ നെടുങ്കണ്ടം താലൂക്ക് ആശുപത്രിയിൽ പ്രവേശിപ്പിച്ചു. ഇന്നലെ രാവിലെ പത്തരയോടെ കല്ലാർ - ടണൽ റോഡിലാണ് അപകടം നടന്നത്. സഹായികൾക്കൊപ്പം പുല്ലു ചെത്തുന്നതിനിടെ റോഡിനോട് ചേർന്നുള്ള 33കെവി വൈദ്യുതി പോസ്റ്റിൽനിന്നു റോഡിലേക്ക് കിടന്നിരുന്ന സ്റ്റേ കമ്പിയിൽ അറിയാതെ തട്ടുകയായിരുന്നു. വൈദ്യുതാഘാതം ഏറ്റ ടോണി റോഡിലേക്ക് തെറിച്ചു വീഴുകയും ബോധം നഷ്ടപ്പെടുകയും ചെയ്തു. ഒപ്പമുള്ളവരും സമീപവാസിയും ചേർന്ന് ഇയാളെ ആശുപത്രിയില്‍ എത്തിക്കുകയായിരുന്നു. വയറിനും കൈകാലുകൾക്കും പൊള്ളലേറ്റ ടോണിയുടെ കാലില്‍ ധരിച്ചിരുന്ന ഷൂസടക്കം കത്തിപ്പോവുകയും ചെയ്തു. അദ്ഭുതകരമായിട്ടാണ് ഇയാള്‍ രക്ഷപ്പെട്ടത്. രാമക്കൽമേട്ടിലെ കാറ്റാടികളിൽനിന്ന് ഉത്പാദിപ്പിക്കുന്ന വൈദ്യുതി കല്ലാർ സബ് സ്റ്റേഷനിലേക്ക് എത്തിക്കുന്ന ഈ ലൈനിൽ പലയിടങ്ങളിലായി ഇത്തരത്തിൽ സ്റ്റേ കമ്പികൾ പൊട്ടിയ നിലയിലാണ്. ഇന്നലെ അപകടം ഉണ്ടായ സ്ഥലത്തെ സ്റ്റേ കമ്പി നാലു വർഷമായി പൊട്ടിക്കിടക്കുക്കുയിരുന്നു എന്ന് നാട്ടുകാർ പറഞ്ഞു. കെഎസ്ഇബിയുടെ വലിയ അനാസ്ഥയെ തുടർന്നാണ് അപകടമുണ്ടായതെന്ന് നാട്ടുകാര്‍ ആരോപിക്കുന്നു. അപകടത്തെ തുടർന്ന് വൈദ്യുതി വകുപ്പ് ജീവനക്കാർ എത്തി സ്റ്റേ കമ്പികൾ നന്നാക്കുകയും ചെയ്തു.

കൈതച്ചാല്‍ മേഖലയില്‍ കാട്ടാന ശല്യം രൂക്ഷം; പൊറുതിമുട്ടി കുടുംബങ്ങള്‍

അടിമാലി: വെള്ളത്തൂവല്‍ പഞ്ചായത്തിലെ പതിനാറാം വാര്‍ഡിലുള്‍പ്പെടുന്ന കൈതച്ചാല്‍ മേഖലയിൽ കാട്ടാന ശല്യം രൂക്ഷമായി. കൂട്ടമായി ജനവാസ മേഖലയില്‍ ഇറങ്ങിയ കാട്ടാനകള്‍ കൃഷിഭൂമിയില്‍ വ്യാപക നാശം വരുത്തി. കായ്ഫലമുള്ള ജാതി, ഏലം, കമുക്, വാഴ തുടങ്ങിയവ കാട്ടാനകള്‍ നശിപ്പിച്ചു. സ്ഥിരമായി കാട്ടാനകള്‍ ജനവാസമേഖലയില്‍ ഇറങ്ങുന്ന സ്ഥിതിയായതോടെ ജനങ്ങളുടെ ജീവിതം ദുഃസഹമായി. വനാതിര്‍ത്തിയോട് ചേര്‍ന്ന് പ്രദേശത്ത് കിടങ്ങ് തീര്‍ത്ത് കാട്ടാനശല്യം പ്രതിരോധിക്കണമെന്നാണ് പ്രദേശവാസികളുടെ ആവശ്യം. കാട്ടാന കൃഷിയിടത്തില്‍ നാശം വരുത്തിയതിനെ തുടര്‍ന്ന് പനംകുട്ടി ഡെപ്യൂട്ടി റെയിഞ്ചോഫീസിലെ എസ്എഫ്ഒ ബാബു രാജിന്‍റെ നേത്വത്തിലുള്ള വനപാലക സംഘം സ്ഥലത്തെത്തി സ്ഥിതി വിലയിരുത്തി. പഞ്ചായത്തംഗം റോയി പാലക്കല്‍, മനുഷ്യ വന്യജീവി സംഘര്‍ഷ ലഘൂകരണ കോ- ഓര്‍ഡിനേഷനംഗം കെ. ബുള്‍ബേന്ദ്രന്‍ എന്നിവരും സ്ഥലത്തെത്തിയിരുന്നു.

കെഎസ്ആർടിസി ബസിൽ ലൈംഗികാതിക്രമം: കണ്ടക്ടർ അറസ്റ്റിൽ

കാളിയാർ: കെഎസ്ആർടിസി ബസിൽ യാത്ര ചെയ്യുന്നതിനിടെ പെണ്‍കുട്ടിക്കുനേരേ ലൈംഗികാതിക്രമം നടത്തിയ കണ്ടക്ടറെ കഞ്ഞിക്കുഴി പോലീസ് അറസ്റ്റു ചെയ്തു. വെഞ്ഞാറമൂട് ജ്യോതിസ് നിവാസിൽ അരുണ്‍ വൈശാഖി (37) നെയാണ് അറസ്റ്റുചെയ്തത്. ബുധനാഴ്ച രാത്രി 11 ഓടെ തിരുവന്തപുരം- കട്ടപ്പന റൂട്ടിൽ സർവീസ് നടത്തുന്ന ബസിലാണ് സംഭവം. അടൂരിൽ നിന്നാണ് പെണ്‍കുട്ടി ബസിൽ കയറിയത്. ബസ് കാളിയാറിലെത്തിയപ്പോഴാണ് പെണ്‍കുട്ടിയോട് ഇയാൾ മോശമായി പെരുമാറിയത്. പെണ്‍കുട്ടി പോലീസ് കണ്‍ട്രോൾ റൂമിൽ അറിയിച്ചതിനെ തുടർന്ന് വിവരം കാളിയാർ സ്റ്റേഷനിൽ അറിയിക്കുകയായിരുന്നു. എന്നാൽ ഈ സമയം ബസ് കാളിയാർ പിന്നിട്ടിരുന്നു. തുടർന്ന് കാളിയാർ പോലീസ് കഞ്ഞിക്കുഴി സ്റ്റേഷനിൽ അറിയിച്ചതിനെതുടർന്ന് കഞ്ഞിക്കുഴിയിൽ ബസ് തടഞ്ഞുനിർത്തി ഇയാളെ കസ്റ്റഡിയിൽ എടുക്കുകയായിരുന്നു. പിന്നീട് ഇയാളെ കാളിയാർ പോലീസിനു കൈമാറി. കട്ടപ്പന കെഎസ്ആർടിസി ഡിപ്പോയിലെ കണ്ടക്ടറാണ് അരുണ്‍ വൈശാഖ്. സിഐ ബിജു ജോണ്‍ ലുക്കോസ്, എസ്ഐ സജി പി. ജോണ്‍ എന്നിവരുടെ നേതൃത്വത്തിൽ കസ്റ്റഡിയിലെടുത്ത ഇയാളുടെ അറസ്റ്റ് രേഖപ്പെടുത്തി കോടതിയിൽ ഹാജരാക്കും.

സൈക്കിൾ തിരികെ ലഭിച്ചു: പ്രണവിന്‍റെ സങ്കടം മാഞ്ഞു

തൊടുപുഴ: മോഷണംപോയ സൈക്കിൾ പ്രണവിന് തിരികെ ലഭിച്ചു. കാരിക്കോട് ആശാൻകുടിയിൽ പ്രദീപിന്‍റെ മകനും പത്താം ക്ലാസ് വിദ്യാർഥിയുമായ പ്രണവിന് സമ്മാനമായി ലഭിച്ച സൈക്കിളാണ് ആറാം ദിവസം മോഷ്ടാക്കൾ അപഹരിച്ചത്. ഈ സൈക്കിളാണ് സിസിടിവി പരിശോധനയിലൂടെ മോഷ്ടാക്കളെ കണ്ടെത്തി പോലീസ് വീണ്ടെടുത്തു നൽകിയത്. കല്ലാനിക്കൽ സെന്‍റ് ജോർജ് ഹൈസ്കൂളിൽ ഒൻപതാം ക്ലാസിൽനിന്നു പത്തിലേക്ക് വിജയിച്ചപ്പോൾ അയൽവാസിയും റിട്ട. ന്യൂമാൻ കോളജ് അധ്യാപകനുമായ കെ.ജെ. ദേവസ്യയാണ് പ്രണവിന് സൈക്കിൾ സമ്മാനിച്ചത്. കഴിഞ്ഞ 20ന് വൈകുന്നേരം കാരിക്കോടുള്ള ട്യൂഷൻ സെന്‍ററിൽ പഠിക്കാനെത്തിയ പ്രണവിന്‍റെ സൈക്കിൾ മോഷ്ടാക്കൾ കടത്തിക്കൊണ്ടു പോകുകയായിരുന്നു. പോലീസിൽ പരാതി നൽകിയതിനെ തുടർന്ന് സമീപത്തെ സിസിടിവി പരിശോധിച്ചപ്പോഴാണ് മോഷ്ടാക്കളുടെ ദൃശ്യം ലഭിച്ചത്. തുടർന്ന് ഇവരെ കണ്ടെത്തി പോലീസ് സൈക്കിൾ തിരികെയെത്തിച്ചപ്പോൾ പ്രണവിന്‍റെ മനം നിറഞ്ഞു. പോലീസ് സ്റ്റേഷനിലെത്തി പ്രണവ് സൈക്കിൾ ഏറ്റു വാങ്ങി. കുട്ടി മോഷ്ടാക്കളാണ് സൈക്കിൾ കടത്തിയതെന്ന് പോലീസ് പറഞ്ഞു.

കുഞ്ചിത്തണ്ണി ടൗണിനു മുകൾഭാഗത്തെ അനധികൃത നിർമാണം: തെറ്റിദ്ധരിപ്പിക്കാൻ ഒറ്റ ദിവസം കൊണ്ട് ഏലത്തോട്ടമാക്കി

കുഞ്ചിത്തണ്ണി: കുഞ്ചിത്തണ്ണി ടൗണിന് മുകൾ ഭാഗത്ത് കുമ്മിണിക്കുന്നിൽ അനധികൃതമായി നടന്ന റിസോർട്ട് നിർമാണത്തിന് സമീപം മണ്ണെടുത്ത സ്ഥലത്ത് ഒറ്റ ദിവസം കൊണ്ട് ഏലച്ചെടികൾ വച്ചുപിടിപ്പിച്ചു.1300 ചതുരശ്ര അടി വലിപ്പമുള്ള വീടിന് അനുമതി നൽകിയ സ്ഥലത്താണ് അനധികൃതമായി വൻ തോതിൽ മണ്ണെടുത്ത് വൻകിട കെട്ടിട നിർമാണം നടന്നത്. സംഭവം വിവാദമായതോടെ ജനപ്രതിനിധികളും ഉദ്യോഗസ്ഥരും സ്ഥലം സന്ദർശിക്കാൻ എത്തിയിരുന്നു. ഇവരെ തെറ്റിദ്ധരിപ്പിക്കുന്നതിനു വേണ്ടിയാണ് ഒറ്റ ദിവസം കൊണ്ട് നിർമാണത്തിന് വേണ്ടി മണ്ണെടുത്ത ഭാഗത്ത് ഏല ചെടികൾ വച്ചു പിടിപ്പിച്ചത്. മലമുകളിൽ നടക്കുന്ന നിർമാണം കുഞ്ചിത്തണ്ണി ടൗണിന് ഭീഷണി ആകുമെന്ന ഭീതിയിൽ കുഞ്ചിത്തണ്ണി ടൗൺ സംരക്ഷണ സമിതിയും രൂപീകരിച്ചിരുന്നു. അനധികൃത നിർമാണ പ്രവർത്തനങ്ങൾ പൊളിച്ചുനീക്കണമെന്ന് ഇവർ അധികൃതരോട് ആവശ്യപ്പെട്ടിരുന്നു. ടൗൺ സംരക്ഷണ സമിതിയിൽ പഞ്ചായത്ത് അംഗങ്ങൾ ഉൾപ്പെടെയുള്ളവർ ഉണ്ടായിട്ടും ഇതുവരെയും അനധികൃത കെട്ടിട നിർമാണത്തിന് പഞ്ചായത്തോ റവന്യു വകുപ്പോ നടപടി സ്വീകരിച്ചിട്ടില്ല. 2013ൽ സമാനരീതിയിൽ നടന്ന മണ്ണെടുപ്പാണ് കുഞ്ചിത്തണ്ണിയിൽ രണ്ട് പേരുടെ ജീവനെടുത്ത ഉരുൾപൊട്ടലിന് കാരണമായത്.

വഴിവിളക്കിനെ ചൊല്ലി ഭരണ -പ്രതിപക്ഷ പോര്

തൊടുപുഴ: വഴിവിളക്കുകളുടെ തകരാർ പരിഹരിക്കുന്നതുമായി ബന്ധപ്പെട്ടു നടന്ന ചർച്ചയ്ക്കിടയിൽ നഗരസഭ കൗണ്‍സിലിൽ ഭരണപ്രതിപക്ഷ അംഗങ്ങൾ തമ്മിൽ വാക്കേറ്റവും വെല്ലുവിളിയും. ഇന്നലെ ചേർന്ന അടിയന്തര കൗണ്‍സിലിൽ എൽഡിഎഫ് അംഗം സിജി റഷീദാണ് 60 ലക്ഷത്തോളം രൂപ വകയിരുത്തിയിട്ടും നഗരസഭയിൽ ഇപ്പോഴും വഴിവിളക്കുകൾ തെളിയാത്ത വിഷയം ഉന്നയിച്ചത്. കൗണ്‍സിലിൽ പ്രശ്നം അവതരിപ്പിക്കുന്നതിനിടെ യുഡിഎഫ് അംഗം സനു കൃഷ്ണൻ പ്രതിഷേധവുമായി രംഗത്തെത്തുകയായിരുന്നു. ഇതിനു മുന്പും ചെയർമാൻമാർ ഉണ്ടായിരുന്നെന്നും അന്നൊന്നും പ്രശ്നം പരിഹരിക്കാൻ കഴിഞ്ഞില്ലെന്നും സനു കൃഷണൻ പറഞ്ഞു. ഇതോടെ പ്രതിപക്ഷ കൗണ്‍സിലർമായ ഷീൻ വർഗീസ്, മുഹമ്മദ് അഫ്സൽ എന്നിവർ സനു കൃഷ്ണനെതിരേ തിരിയുകയായിരുന്നു. ചോദ്യത്തിനു ചെയർമാൻ മറുപടി പറയുമെന്നും സനു കൃഷ്ണൻ ഇടപെടേണ്ടെന്നും അതിരൂക്ഷമായ ഭാഷയിൽ ഇരുവരും തിരിച്ചടിച്ചു. ഇരു കൂട്ടരും തമ്മിൽ വാക്കേറ്റം രൂക്ഷമായതോടെ ചെയർമാൻ ഇടപെട്ട് പ്രശ്നം ശാന്തമാക്കി. വഴിവിളക്കുകളുടെ അറ്റകുറ്റപ്പണികൾ എല്ലാ വാർഡുകളിലും ആരംഭിച്ചിട്ടില്ലെന്നും 13, 34 വാർഡുകളിലാണ് ഇപ്പോൾ ജോലികൾ നടക്കുന്നതെന്നും ചെയർമാൻ പറഞ്ഞു. എന്നാൽ ശക്തമായ മഴ മൂലം അറ്റകുറ്റപ്പണി നിർത്തി വച്ചിരിക്കുകയാണെന്നും മഴ കുറയുന്ന മുറയ്ക്ക് പുനരാരംഭിക്കുമെന്നും അദ്ദേഹം പറഞ്ഞു. എന്നാൽ മുൻ നിശ്ചയിച്ച പ്രകാരമല്ല മെയിന്‍റനൻസ് പ്രവർത്തനങ്ങൾ നടക്കുന്നതെന്ന് മുൻ ചെയർമാൻ സനീഷ് ജോർജ് ചൂണ്ടിക്കാട്ടി. റോഡിലെ വെള്ളക്കെട്ട് പരിഹരിക്കുന്നതുമായി ബന്ധപ്പെട്ട് ബിജെപി കൗണ്‍സിലർമാർ തമ്മിലുണ്ടായ തർക്കം നഗരസഭ കൗണ്‍സിലിലും ചർച്ചയായി. 21-ാം വാർഡ് കൗണ്‍സിലർ ശ്രീലക്ഷ്മി സുദീപാണ് വിഷയം ഉന്നയിച്ചത്. 21, 23 വാർഡുകളിലൂടെ കടന്നുപോകുന്ന തൊടുപുഴ - മുതലിയാർമഠം റോഡിലെ വെള്ളക്കെട്ട് വിഷയത്തിൽ 22-ാം വാർഡ് കൗണ്‍സിലർ ഇടപെട്ടത് ഏതു നിയമത്തിന്‍റെ അടിസ്ഥാനത്തിലാണെന്നും അങ്ങനെയൊരു കീഴ്‌വഴക്കം ഉണ്ടെങ്കിൽ അത് വ്യക്തമാക്കണമെന്നുമായിരുന്നു ആവശ്യം. താനുമായും 23-ാം വാർഡ് കൗണ്‍സിലറുമായും ചർച്ച നടത്താനും കൗണ്‍സിലർ തയാറായില്ല. ഇക്കാര്യത്തിൽ ചെയർമാൻ മറുപടി നൽകിയെങ്കിലും വിഷയത്തിൽനിന്നു പിൻമാറാൻ ശ്രീലക്ഷ്മി കൂട്ടാക്കിയില്ല. ഇതോടെ പുകമറയുടെ ആവശ്യമില്ലെന്നും തന്‍റെ ചിത്രം ഉപയോഗിച്ച് സോഷ്യൽ മീഡിയയിൽ പ്രചാരണം നടത്തിയതോടെ എല്ലാം വ്യക്തമാണെന്നും പറഞ്ഞ് 22-ാം വാർഡ് കൗണ്‍സിലർ സി. ജിതേഷ് രംഗത്തെത്തി. ലക്ഷങ്ങളുടെ പ്രവൃത്തിയൊന്നും താൻ ചെയ്തിട്ടില്ലെന്നും മൂന്നു വർഷമായി തകർന്നു കിടന്ന റോഡിൽ വെള്ളക്കെട്ട് ഒഴിവാക്കുക മാത്രമാണ് ചെയ്തതെന്നും അദ്ദേഹം പറഞ്ഞു. നിയമം അനുസരിച്ച് മാത്രമാണ് പ്രവർത്തിച്ചതെന്നും അതിൽ തന്നെ അഭിനന്ദിച്ച് സുഹൃത്തുക്കൾ സമൂഹമാധ്യമത്തിൽ പോസ്റ്റ് ചെയ്തതിൽ ആർക്കാണ് വിഷമമെന്നും ചോദിച്ചു. ഇരുവരും തമ്മിൽ തർക്കം രൂക്ഷമായതോടെ ചെയർമാനും മറ്റു കൗണ്‍സിലർമാരും ഇടപെട്ടു. ഇക്കാര്യത്തിൽ സ്വയം നിയന്ത്രണങ്ങൾ ഉണ്ടാകണമെന്നും മേലിൽ ഇത്തരം സംഭവങ്ങൾ ആവർത്തിക്കാതിരിക്കണമെന്നും ചെയർമാൻ നിർദേശിച്ചു. ഇതേ സമയം 23-ാം വാർഡ് കൗണ്‍സിലർ പി.ജി. രാജശേഖരൻ വിഷയത്തിൽ പ്രതികരിക്കാതെ മൗനം പാലിച്ചതും ശ്രദ്ധേയമായി. നഗരസഭയിലെ തെരുവു നായശല്യം അതി രൂക്ഷമാണെന്നും എബിസി വിഷയത്തിൽ നഗരസഭ അടിയന്തരമായി നടപടി സ്വീകരിക്കണമെന്നും മുൻ ചെയർപേഴ്സണ്‍ സബീന ബിഞ്ചു ആവശ്യപ്പെട്ടു. ഇക്കാര്യം ജൂലൈ ഒന്നിനു ചേരുന്ന കൗണ്‍സിൽ പ്രത്യേക അജണ്ടയായി ചർച്ച ചെയ്യുമെന്ന് ചെയർമാൻ അറിയിച്ചു.

ഓലേഞ്ഞാലിക്കിളിയും പൂവൻ കോഴിയും ചങ്ങാത്തത്തിൽ

രാജാക്കാട്: സൗഹൃദങ്ങള്‍ സന്തോഷമുള്ള നിമിഷങ്ങള്‍ സമ്മാനിക്കും. ആഴമുള്ള സൗഹൃദങ്ങള്‍ മനുഷ്യര്‍ക്കിടയില്‍ മാത്രമല്ല പക്ഷികള്‍ക്കും മൃഗങ്ങള്‍ക്കുമിടയില്‍ കാണാന്‍ സാധിക്കും. അങ്ങനെ വ്യത്യസ്തമായ ഒരു സൗഹൃദ കാഴ്ചയാണ് സേനാപതി പള്ളിക്കുന്ന് ഇടക്കുടിയില്‍ അനുരാജിന്‍റെ വീട്ടുമുറ്റത്ത് എന്നും കാണാന്‍ സാധിക്കുന്നത്. പിരിയാന്‍ കഴിയാത്ത ആത്മസുഹൃത്തുക്കള്‍ എന്നും എവിടെ നിന്നോ പറന്നെത്തുന്ന ഓലേഞ്ഞാലി കിളിയും അനുരാജിന്‍റെ വീട്ടില്‍ വളര്‍ത്തുന്ന കറുത്ത പൂവന്‍ കോഴിയുമാണ്. ദിവസവും പുലർച്ചെ ഓലേഞ്ഞാലി കിളി വീട്ടുമുറ്റത്ത് എത്തും. പിന്നീട് വീട്ടിലെ കോഴികളുമൊത്ത് തീറ്റ തേടും. വെറുതെ കൊത്തിപ്പെറുക്കി തിന്ന് നടക്കുക മാത്രമല്ല, ഇരുവരും തമ്മില്‍ കളിക്കുന്നതും കാണാം. കോഴിയുടെ നെറുകയിലെ പൂവിലും താഴോട്ട് കിടക്കുന്ന താടിയിലുമൊക്കെ ഓലേഞ്ഞാലി കൊത്തി വലിക്കും. പുറത്ത് കയറി ഇരിക്കും ഒന്നിച്ച് ചേര്‍ന്നാല്‍ പിന്നെ അവരുടെ ലോകമെന്ന് പറയാം. ഈ സൗഹൃദത്തിന് കട്ട സപ്പോര്‍ട്ടെന്നോണം പൂവനൊപ്പം പിടക്കോഴിയുമുണ്ട്. മറ്റ് പക്ഷികളുമായും വളർത്തുമൃഗങ്ങളുമായും എളുപ്പം ഇണങ്ങുന്ന പ്രകൃതമാണ് ഓലഞ്ഞാലി കിളിക്കെന്നാണ് പക്ഷിനിരീക്ഷകർ പറയുന്നത്. പക്ഷേ കാക്കയെയും പരുന്തിനെയും ഒക്കെ ഇവ കൊത്തിയോടിക്കും. എന്താണെങ്കിലും പതിവായുള്ള ഈ കാഴ്ച ആസ്വദിക്കുകയാണ് അനുരാജും കുടുംബവും. ഈ സൗഹൃദ കാഴ്ച ഇങ്ങനെ തുടരട്ടേയെന്നാണ് ഈ കുടുംബം പറയുന്നത്. അതിനാൽതന്നെ ഇപ്പോള്‍ കോഴികൾക്കുള്ള തീറ്റയുടെ കൂടെ ഓലേഞ്ഞാലി കിളിക്കുള്ള തീറ്റ കൂടി ഇവർ എന്നും കരുതും.

മഴക്കെടുതി: വൈദ്യുതി ബോർഡിന് നഷ്ടം ആറു കോടി

തൊടുപുഴ: കഴിഞ്ഞ ഒരു മാസത്തിനിടെ ഉണ്ടായ മഴക്കെടുതികളിൽ ജില്ലയിൽ വൈദ്യുതി ബോർഡിനുണ്ടായത് 5.94 കോടിയുടെ നഷ്ടം. പ്രതികൂല കാലാവസ്ഥയിലും ജീവനക്കാർ മികച്ച പ്രവർത്തനം നടത്തിയതുകൊണ്ടാണ് പരാതികളുടെ എണ്ണം വലിയ തോതിൽ കുറയ്ക്കാനായതെന്ന് തൊടുപുഴ ഇലക്‌ട്രിക്കൽ സർക്കിൾ ഡെപ്യൂട്ടി ചീഫ് എൻജനിയർ കെ. ഇന്ദിര അറിയിച്ചു. മഴയിലും കാറ്റിലും ജില്ലയിലെ 1698 വൈദ്യുതി പോസ്റ്റുകൾക്ക് കേടുപാട് സംഭവിച്ചു. ഇതിൽ 1370 എണ്ണം എൽടി പോസ്റ്റുകളും 328 എണ്ണം എച്ച്ടി പോസ്റ്റുകളുമാണ്. മേയ് 23 മുതൽ ജൂണ്‍ 20 വരെയുള്ള വൈദ്യുതി ബോർഡിന്‍റെ കണക്കുകൾ പ്രകാരമാണിത്. 3175 ട്രാൻസ്ഫോർമറുകളുടെ പ്രവർത്തനത്തെയും മഴ ബാധിച്ചു. ഒരു ട്രാൻസ്ഫോർമർ വെള്ളം കയറി നശിച്ചു. 6,41,028 വൈദ്യുതി കണക്‌ഷനുകളിലെ വിതരണത്തെയും മഴയും കാറ്റും ബാധിച്ചു. വൈദ്യുത ലൈനുകളിൽ മരം വീണ് വൈദ്യുതി മുടക്കമുണ്ടാകുന്ന സന്ദർഭങ്ങളിൽ ഇവ നീക്കം ചെയ്ത് വൈദ്യുതി പുനഃസ്ഥാപിക്കാൻ അധികമായി ജീവനക്കാരെ വിന്യസിച്ചിരുന്നു. ഉത്പാദന വിതരണ വിഭാഗങ്ങളിൽനിന്നാണ് ജില്ലയിലാകെ ജീവനക്കാരെ നിയോഗിച്ചത്. ഇതിനു പുറമേ കരാർ തൊഴിലാളികളുടെ സേവനവും ഉപയോഗപ്പെടുത്തി. ഫയർഫോഴ്സ്, വനം തുടങ്ങിയ വകുപ്പുകളും നാട്ടുകാരും പ്രതിബന്ധങ്ങൾ നീക്കി വൈദ്യുതി വിതരണം പുനഃസ്ഥാപിക്കാൻ സഹകരിച്ചു. വൈദ്യുതി പുനഃസ്ഥാപിക്കൽ പ്രവർത്തനങ്ങൾക്ക് ജില്ലയുടെ ഭൂമിശാസ്ത്രപരമായ ഘടകങ്ങൾ പ്രതികൂലമാകാറുണ്ടെങ്കിലും വൈദ്യുതി മുടക്കം അനന്തമായി നീളുന്ന സ്ഥിതിവിശേഷം നിലവിലില്ലെന്നും അധികൃതർ വ്യക്തമാക്കി. ഉപഭോക്താക്കൾക്ക് പരാതികൾ അറിയിക്കാൻ 1912 എന്ന ടോൾ ഫ്രീ നന്പറിലേക്കു വിളിക്കാം. 9496001912 എന്ന നന്പരിൽ വിളിച്ചോ വാട്സാപ്പ് സന്ദേശമയച്ചോ പരാതി രേഖപ്പെടുത്താം. വൈദ്യുതി ലൈനുകൾ പൊട്ടിക്കിടക്കുന്നതോ മറ്റ് വൈദ്യുതി സംബന്ധമായ അപകടങ്ങളോ ശ്രദ്ധയിൽപ്പെട്ടാൽ പൊതുജനങ്ങൾക്ക് അധികൃതരെ 9496010101 എന്ന നന്പരിൽ അറിയിക്കാം. വൈദ്യുതി തടസം സംബന്ധിച്ച മുന്നറിയിപ്പുകൾ എസ്എംഎസ് മുഖേന ലഭ്യമാക്കുന്നതിനായി ഉപഭോക്താക്കൾക്ക് ssw.kseb.in എന്ന വെബ്സൈറ്റ് സന്ദർശിച്ച് സ്വന്തം മൊബൈൽ നന്പർ അപ്ഡേറ്റ് ചെയ്യാം.

കണ്ടുപഠിക്കാം, ചക്കച്ചുള വിൽപ്പനയിലൂടെ വിജയഗാഥ രചിക്കുന്ന കുടുംബങ്ങളെ

തൊടുപുഴ: ചക്കച്ചുള വിൽപ്പനയിലൂടെ മികച്ച വരുമാനം നേടുന്നതിനൊപ്പം കാർഷിക മേഖലയിൽ സ്വാശ്രയത്വത്തിന്‍റെ വഴിയിൽ വിജയഗാഥ രചിക്കുകയാണ് രണ്ടു കർഷക കുടുംബങ്ങൾ. കുണിഞ്ഞി തോണിക്കത്തടത്തിൽ ഡെന്നി ജോസഫ്, ആലക്കോട് കണ്ടത്തിൽ മോളി ആന്‍റണി എന്നിവരാണ് ചക്കച്ചുള വിൽപ്പനയിലൂടെ ഉയർന്ന വരുമാനം സന്പാദിക്കുന്നത്. ചക്കയുടെ സീസണ്‍ ആരംഭിക്കുന്ന ഡിസംബർ മുതൽ ജൂലൈ വരെയുള്ള കാലയളവിലാണ് ഇവർ ചക്കച്ചുള വിൽപ്പന നടത്തുന്നത്. സ്വന്തം പുരയിടത്തിലെ പ്ലാവിലുണ്ടാകുന്ന ചക്കമാത്രമാണ് ഇവർ വിറ്റഴിക്കുന്നത്. സീസണിൽ 3000- 5000 രൂപ വരെ ദിനംപ്രതി ലഭിക്കും. 25 മുതൽ 30 കിലോവരെ ഇവർ തൊടുപുഴ കാഡ്സ് ഓപ്പണ്‍ മാർക്കറ്റിൽ വിൽപ്പനയ്ക്കെത്തിക്കുന്നുണ്ട്. മറ്റ് ഓർഡറുകൾ ലഭിച്ചാലും ഇവ എത്തിച്ചു നൽകും. ഒരു കിലോയുടെ പായ്ക്കറ്റുകളാക്കിയാണ് നൽകുന്നത്. സ്വന്തം പുരയിടത്തിലെ റബർ ടാപ്പിംഗ് വേണ്ടെന്നുവച്ചാണ് ചക്കച്ചുള വിൽപ്പനയ്ക്കായി ഡെന്നി ജോസഫ് സമയം മാറ്റിവച്ചിരിക്കുന്നത്. ചക്കയുടെ സീസണ്‍ കഴിഞ്ഞുമാത്രമേ ടാപ്പിംഗ് പുനരാരംഭിക്കൂ. രാവിലെ പള്ളിയിൽ പോയി മടങ്ങിയെത്തിയാൽപ്പിന്നെ വലിയ ഏണിയുമെടുത്ത് പുരയിടത്തിലെ പ്ലാവിൻ ചുവട്ടിലേക്ക് നീങ്ങും. ആറരയേക്കർ പുരയിടത്തിൽ 90 നാടൻ പ്ലാവുകളുണ്ട്. ഇതിൽനിന്ന് ആവശ്യത്തിന് ചക്ക ലഭിക്കാറുണ്ട്. ചക്കയുടെ വലിപ്പമനുസരിച്ച് 10-15 എണ്ണം വരെ ഒരുദിവസം ശേഖരിക്കും. പിന്നീട് ഇത് വീട്ടിലെത്തിച്ച് വേഗത്തിൽ വെട്ടിയൊരുക്കി രാവിലെ പത്തിനു മുന്പായി കാഡ്സിന്‍റെ വിപണന കേന്ദ്രത്തിലും മറ്റു കടകളിലും എത്തിക്കും. ഭാര്യ നെസും സഹായത്തിനുണ്ട്. നഴ്സിംഗ് വിദ്യാർഥികളായ ദിവ്യയും ഷോണും വീട്ടിലുള്ളപ്പോൾ ഇരുവരും സഹായിക്കും. പാകമായ ചക്കയുടെ ചുള വെട്ടിയൊരുക്കി ചകിണി കളഞ്ഞ് കുരുവോടുകൂടിയും അല്ലാതെയും വിപണിയിലെത്തിച്ച് നൽകിയാണ് വരുമാനം സന്പാദിക്കുന്നത്. ഡിസംബർ മുതൽ ഓഗസ്റ്റ് വരെ മുടക്കം കൂടാതെ ചക്ക വിപണിയിലെത്തിക്കാൻ കഴിയാറുണ്ടെന്ന് ഡെന്നി പറഞ്ഞു. ചക്കയും ചക്ക ഉത്പന്നങ്ങളും കഴിക്കുന്നതാണ് തന്‍റെ ആരോഗ്യത്തിന്‍റെ രഹസ്യമെന്നും ഡെന്നി പറയുന്നു. വരുമാനം മാത്രമല്ല ആസ്വാദനവും മക്കളെല്ലാം വിദേശത്ത് കഴിയുന്ന മോളി-ആന്‍റണി ദന്പതികൾക്ക് ചക്കച്ചുള വ്യാപാരം വരുമാനം മാത്രമല്ല ജീവിതാസ്വാദനം കൂടിയാണ്. നാലേക്കർ വരുന്ന കൃഷിയിടത്തിൽ 100 പ്ലാവുകൾക്കു പുറമേ റംബുട്ടാൻ, തെങ്ങ് തുടങ്ങിയ കൃഷികളുമുണ്ട്. ഇരുവരും ചേർന്ന് രാവിലെതന്നെ ചക്ക വെട്ടിയൊരുക്കി വിപണിയിലെത്തിക്കും. കൂടുതൽ മൂല്യാധിഷ്ഠിത ഉത്പന്നങ്ങളിലൂടെ ഈ രംഗത്ത് സജീവമാകാനാണ് ഇരുവർക്കും ഇഷ്ടം. മക്കൾ മൂന്നുപേരും വിദേശത്ത് ജോലി ചെയ്യുകയാണ്. അതിനാൽ മറ്റുതിരക്കുകളില്ലാത്തതിനാൽ ചക്കച്ചുള വ്യാപാരവും യാത്രകളുമൊക്കെയായി ജീവിതം ആസ്വാദ്യകരമാക്കുകയാണ് ഇരുവരും. ചക്കപോലെ ഭക്ഷ്യയോഗ്യമായ മറ്റൊരു ഉത്പന്നം മറ്റുള്ളവർക്കുകൂടി ലഭിക്കണമെന്ന ചിന്തയാണ് വരുമാനത്തെക്കാൾ ഉപരി തങ്ങൾക്ക് ഈ ജോലിയുമായി മുന്നോട്ടുപോകാൻ പ്രചോദനമെന്നും മോളി ആന്‍റണി പറയുന്നു. യാതൊരു യന്ത്രസഹായവുമില്ലാതെ ചെറിയകത്തി മാത്രം ഉപയോഗിച്ച് വെട്ടിയൊരുക്കി വിപണിയിലെത്തിക്കാവുന്ന ഒരു മൂല്യവർധിത ഉത്പന്നമാണിത്. വരിക്കയോ കൂഴയോ എന്ന വേർതിരിവില്ലാതെ ചുളയ്ക്ക് വില ലഭിക്കുന്നുണ്ട്. ചക്ക ഉപയോഗിച്ചു പാകപ്പെടുത്തുന്ന ഉത്പന്നങ്ങൾ പ്രമേഹ രോഗികൾക്കും ഏറെ ഗുണകരമാണ്. സീസണിന്‍റെ ആരംഭത്തിൽ ഒരു കിലോ ചക്കച്ചുളയ്ക്ക് 100 രൂപ നിരക്കിലാണ് കർഷകരിൽനിന്ന് വാങ്ങിയിരുന്നതെന്നു കാഡ്സ് ചെയർമാൻ ആന്‍റണി കണ്ടിരിക്കൽ പറഞ്ഞു. ലഭ്യത കൂടുന്പോൾ വിലയിൽ നേരിയ വ്യത്യാസംവരുമെങ്കിലും കർഷകന് നല്ല വില ലഭിക്കാറുണ്ട്. ഇരുചക്രവാഹനത്തിൽ കൊണ്ടുവന്ന് വിപണിയിൽ നൽകി പോകാവുന്ന വിധം ലളിതമാണ് കച്ചവടം. വാങ്ങുന്ന ഉപഭോക്താക്കൾക്ക് കൈയിൽ അരക്കുപോലും പറ്റാതെ അരമണിക്കൂറിനുള്ളിൽ പാകപ്പെടുത്തി കഴിക്കാനും കഴിയും. കർഷകന്‍റെ അധ്വാനത്തിനനുസരിച്ചുള്ള വിലയും വിപണി സാധ്യതയും ലഭിച്ചാൽ ധാരാളം പേർ ഈ രംഗത്തേക്ക് കടന്നുവരികയും പാഴായി പോകുന്ന ഭക്ഷ്യോത്പന്നം അനേകർക്ക് വരുമാന സ്രോതസായി മാറുകയും ചെയ്യും.

ജില്ലയിൽ 40 പേർക്ക് ഡെങ്കിപ്പനി ; മുന്നറിയിപ്പുമായി ആരോഗ്യവകുപ്പ്

ഇടുക്കി: ജില്ലയിൽ ഡെങ്കിപ്പനിക്കേസുകൾ കൂടുതലായി റിപ്പോർട്ട് ചെയ്യപ്പെടുന്ന സാഹചര്യത്തിൽ ജനങ്ങൾ ജാഗ്രത പാലിക്കണമെന്ന് ആരോഗ്യവകുപ്പ് അധികൃതർ അറിയിച്ചു. ജില്ലയിൽ 40 പേർക്കാണ് ഡെങ്കിപ്പനി റിപ്പോർട്ട് ചെയ്തത്. വണ്ടിപ്പെരിയാർ -9, തൊടുപുഴ - 8, പുറപ്പുഴ - 7, കുമാരമംഗലം - 4, അറക്കുളം - 3, ദേവിയാർകോളനി- 3, കരിമണ്ണൂർ - 3, വാഴത്തോപ്പ് -3 എന്നിവിടങ്ങളിലാണ് ഡെങ്കിപ്പനി റിപ്പോർട്ട് ചെയ്തത്. പകൽ സമയം കടിക്കുന്ന ഈഡിസ് വിഭാഗത്തിൽപ്പെടുന്ന കൊതുകുകൾ പരത്തുന്ന വൈറസ് രോഗമാണ് ഇത്. ലക്ഷണങ്ങൾ പെട്ടെന്നുണ്ടാകുന്ന കടുത്തപനി, തലവേദന, പേശിവേദന, വിശപ്പില്ലായ്മ, മനംപുരട്ടൽ, ഛർദി, ക്ഷീണം, ചുമ, കണ്ണിനു പിറകിൽ ഉണ്ടാകുന്ന വേദന എന്നിവയാണ് ലക്ഷണങ്ങൾ. ഇവ കണ്ടാൽ ഉടൻതന്നെ വൈദ്യസഹായം തേടണം. രോഗി പരമാവധി സമയം കൊതുകുവലയ്ക്കുള്ളിൽത്തന്നെ കഴിയണം. ധാരാളം പാനീയങ്ങൾ കുടിക്കുക, ഡോക്ടർ നിർദേശിക്കുന്ന കാലയളവ് വരെ വിശ്രമിക്കുക, സ്വയം ചികിത്സ നടത്താതിരിക്കുക എന്നിവ പാലിക്കണം. പ്രതിരോധം ഈഡിസ് കൊതുകുകൾ മുട്ടയിട്ട് പെരുകുന്ന സ്ഥലങ്ങൾ കണ്ടെത്തി കൂത്താടികളെ നശിപ്പിക്കുക എന്നതാണ് ഫലപ്രദമായ മാർഗം. വീട്ടിലെ ഫ്രിഡ്ജിന്‍റെ പിറകിലെ ട്രേ, ചെടിച്ചട്ടി, പൂക്കൾ, ചെടികൾ എന്നിവ ഇട്ടുവയ്ക്കുന്ന പാത്രം, ടാങ്ക് മുതലായവയിൽനിന്ന് ആഴ്ചയിലൊരിക്കൽ വെള്ളം ഒഴുക്കിക്കളയുക. അക്വേറിയത്തിൽ കൂത്താടികളെ നശിപ്പിക്കുന്ന ഗപ്പി പോലെയുള്ള മത്സ്യങ്ങളെ നിക്ഷേപിക്കുക. വെള്ളമെടുക്കുന്ന പാത്രങ്ങൾ, വെള്ളം ശേഖരിക്കുന്ന പാത്രങ്ങൾ എന്നിവ ആഴ്ചയിൽ ഒരിക്കൽ ഉരച്ച് തേച്ചുകഴുകി ഉപയോഗിക്കണം. ചിരട്ട, ടിന്ന്, കുപ്പി, മുട്ടത്തോട്, ടയർ, പ്ലാസ്റ്റിക‌് കൂട്, കപ്പ്, ചെടിച്ചട്ടി, കേടായ കളിപ്പാട്ടങ്ങൾ എന്നിവയിൽ വെള്ളം കെട്ടി നിൽക്കുന്നത് ഒഴിവാക്കുക, സണ്‍ഷേഡിൽ കെട്ടിനിൽക്കുന്ന വെള്ളം ഒഴുക്കിക്കളയുക, ടാങ്കുകൾ കൊതുകുവല കൊണ്ട് മൂടുക, സ്ഥിരമായി ഉപയോഗിക്കാത്ത ഫ്‌ളഷ് ടാങ്ക്, ടോയ്‌ലറ്റ്, വാഴ, പൈനാപ്പിൾ എന്നിവയുടെ ഇലകളിലും കമുകിൻപാള എന്നിവയിലും ശേഖരിക്കുന്ന വെള്ളം ഒഴിവാക്കുക. റബർ പാൽ ശേഖരിക്കുന്ന ചിരട്ട, കപ്പ് എന്നിവ ഉപയോഗത്തിനുശേഷം കമഴ്ത്തിവയ്ക്കുക, സെപ്റ്റിക് ടാങ്കിന്‍റെ വെന്‍റ്പൈപ്പിന്‍റെ അഗ്രഭാഗത്ത് കൊതുകുവല ചുറ്റുക, സ്ലാബിന്‍റെ വിടവുകളിൽക്കൂടി കൊതുകു പുറത്തു വരാത്ത വിധം യഥാസമയം അറ്റകുറ്റപ്പണി നടത്തുക. വീടിന് ചുറ്റും കാണുന്ന പാഴ്ച്ചെടികൾ, ചപ്പുചവറുകൾ എന്നിവ നീക്കം ചെയ്യുക, കൊതുകുകടി ഏൽക്കാതിരിക്കാൻ ശരീരം നന്നായി മൂടുന്ന വസ്ത്രം ധരിക്കുക, കൊതുകിനെ അകറ്റാൻ കഴിവുള്ള ലേപനങ്ങൾ ദേഹത്ത് പുരട്ടുക, കിടക്കുന്പോൾ കൊതുകുവല ഉപയോഗിക്കുക എന്നീ കാര്യങ്ങൾ ശ്രദ്ധിക്കണം.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]