ADVERTISEMENT

ADVERTISEMENT

ലൈഫ് ഭവനപദ്ധതി പ്രഖ്യാപനം നടത്തി

കുമാരമംഗലം: പഞ്ചായത്ത് ലൈഫ് ഭവനപദ്ധതിയുടെ പൂർത്തീകരണ പ്രഖ്യാപനവും കുടുംബസംഗമവും നടത്തി. പി.ജെ. ജോസഫ് എംഎൽഎ ഉദ്ഘാടനം ചെയ്തു. ഭവന നിർമാണ പൂർത്തീകരണ പ്രഖ്യാപനവും താക്കോൽദാനവും ഡീൻ കുര്യാക്കോസ് എംപി നിർവഹിച്ചു.

പഞ്ചായത്തു പ്രസിഡന്‍റ് ഗ്രേസി തോമസ് അധ്യക്ഷത വഹിച്ചു. ലൈഫ് മിഷൻ ജില്ലാ കോ -ഓർഡിനേറ്റർ എസ്.സബൂറാ ബീവി മുഖ്യപ്രഭാഷണം നടത്തി. ബ്ലോക്ക് പഞ്ചായത്ത് പ്രസിഡന്‍റ് സുനി സാബു, ജില്ലാ പഞ്ചായത്ത് മെംബർ ഇന്ദു സുധാകരൻ, പഞ്ചായത്ത് വൈസ് പ്രസിഡന്‍റ് സിബിൻ വർഗീസ്, സ്റ്റാൻഡിംഗ് കമ്മിറ്റി ചെയർപേഴ്സണ്‍മാരായ ഷെമീന നാസർ, സാജൻ ചിമ്മിനിക്കാട്ട്, ഉഷാ രാജശേഖരൻ , ബ്ലോക്ക് പഞ്ചായത്ത് മെംബർമാരായ ബിന്ദു ഷാജി, നീതുമോൾ ഫ്രാൻസിസ്, എൽഎസ്ജിഡി ഇടുക്കി ജോയിന്‍റ് ഡയറക്ടർ ട്രീസ ജോസ്, എൽഎസ്ജി ഡി പ്രോജക്ട് ഡയറക്ടർ ജെയ് പി.ബാൽ, കെ.എം. മുഹമ്മദ് എന്നിവർ പ്രസംഗിച്ചു.

ADVERTISEMENT

ആയുര്‍വേദ ആശുപത്രിയുടെ ജനല്‍ച്ചില്ലുകള്‍ എറിഞ്ഞുതകര്‍ത്തു

നെടുങ്കണ്ടം: മരുന്നു വാങ്ങാനെത്തിയ യുവാവ് ആശുപത്രി ആക്രമിക്കുകയും വനിതാ ജീവനക്കാരെ അസഭ്യം പറയുകയും ചെയ്തതായി പരാതി. സംഭവത്തില്‍ ചാറല്‍മേട് കല്ലേലുങ്കല്‍ ബിജുമോന്‍ ബാബു(29)വിനെ നെടുങ്കണ്ടം പോലീസ് അറസ്റ്റ് ചെയ്തു. നെടുങ്കണ്ടം പഞ്ചായത്തിന്‍റെ ചാറല്‍മേട്ടിലുള്ള ഗവ.ആയുര്‍വേദ ആശുപത്രിയില്‍ ഇന്നലെ രാവിലെ 11 നാണ് സംഭവം. ശരീരവേദനയ്ക്ക് മരുന്നുവാങ്ങാനായി ആശുപത്രിയിലെത്തിയ യുവാവ് ഡോക്ടറെ കാണണമെന്ന് ആവശ്യപ്പെട്ടു. ഈ സമയം ഡോക്ടര്‍ മീറ്റിംഗില്‍ പങ്കെടുക്കാന്‍ പോയിരുന്നു. തുടർന്ന് തനിക്ക് മരുന്ന് നല്‍കണമെന്ന് ആവശ്യപ്പെട്ട് ബിജുമോന്‍ പ്രശ്‌നങ്ങള്‍ സൃഷ്ടിക്കുകയായിരുന്നു. ജീവനക്കാര്‍ ഇയാള്‍ക്ക് കുഴമ്പ് നല്‍കി. കുഴമ്പ് വാങ്ങി പുറത്തിറങ്ങിയ ബിജുമോന്‍ വനിതാ ജീവനക്കാരെ അസഭ്യം പറയുകയും റോഡിൽനിന്നു വലിയ കല്ലുകള്‍ പെറുക്കി ജനല്‍ ചില്ലുകള്‍ എറിഞ്ഞുതകര്‍ക്കുകയും ചെയ്തു. ആശുപത്രി കെട്ടിടത്തിന്‍റെ പത്തോളം ജനല്‍ച്ചില്ലുകളാണ് ഇയാള്‍ തകര്‍ത്തത്. മുകളിലത്തെ നിലയിലെ യോഗ ഹാളില്‍ കല്ലുകളും ചില്ലും നിരന്നുകിടക്കുകയാണ്. അക്രമം കണ്ട് ഭയന്ന ജീവനക്കാരും രോഗികളും ആശുപത്രിക്കുള്ളില്‍ കയറി വാതിലടച്ചു. തുടര്‍ന്ന് ഇവര്‍ പഞ്ചായത്തില്‍ വിളിച്ച് കാര്യം അറിയിച്ചു. പഞ്ചായത്ത് അധികൃതര്‍ അറിയിച്ചതനുസരിച്ച് സ്ഥലത്തെത്തിയ പോലീസ് ഇയാളെ പിടികൂടി. മദ്യലഹരിയിലായിരുന്നു ആക്രമണമെന്നും ഇയാള്‍ മദ്യപിച്ച് പ്രശ്നമുണ്ടാക്കുന്നത് പതിവാണെന്നും നാട്ടുകാര്‍ പറഞ്ഞു. സ്ഥിരം മദ്യപാനിയും ലഹരിക്ക് അടിമയുമായ ഇയാള്‍ മേഖലയില്‍ ഭീകരാന്തരീക്ഷം സൃഷ്ടിക്കുന്നത് പതിവാണ്. സ്ത്രീകള്‍ മാത്രമുള്ളപ്പോള്‍ വീടുകളിലെത്തി ബഹളം വയ്ക്കുകയും അസഭ്യം പറയുകയും ചെയ്യുന്നതിനാല്‍ സ്വയരക്ഷയ്ക്കായി മുളക് കലക്കിയ വെള്ളം വീടുകളില്‍ സൂക്ഷിക്കുകയാണെന്നും നാട്ടുകാര്‍ പറഞ്ഞു. സ്ത്രീകള്‍ക്കു നേരേ ഇയാള്‍ നഗ്നതാ പ്രദര്‍ശനവും നടത്താറുണ്ടെന്നും ആരോപണമുണ്ട്. സംഭവമറിഞ്ഞ് പഞ്ചായത്ത് പ്രസിഡന്‍റ് പ്രീമി ലാലിച്ചന്‍, പഞ്ചായത്തംഗങ്ങളായ ഡി. വിജയകുമാര്‍, എം.എസ്. മഹേശ്വരന്‍ തുടങ്ങിയവര്‍ സ്ഥലത്തെത്തി.

മകളെ ലൈംഗികമായി പീഡിപ്പിച്ച പിതാവിന് ട്രിപ്പിൾ ജീവപര്യന്തം തടവും മൂന്നുലക്ഷം രൂപ പിഴയും

ചെറുതോണി: സ്വന്തം മകളെ അഞ്ചു വയസു മുതൽ എട്ടു വയസുവരെ ലൈംഗിക പീഡനത്തിന് ഇരയാക്കിയ കേസിൽ പിതാവിന് മൂന്നു ജീവപര്യന്തം തടവും മൂന്നു ലക്ഷം രൂപ പിഴയും വിധിച്ചു. ഇടുക്കി പൈനാവ് അതിവേഗ കോടതിയുടെ അധിക ചുമതല വഹിക്കുന്ന ജഡ്ജ് വി. മഞ്ജുവാണ് ശിക്ഷ വിധിച്ചത്. 2020 ൽ കുട്ടിക്ക് എട്ടു വയസ് പ്രായമുള്ളപ്പോഴാണ് സംഭവം പുറത്തറിയുന്നത്. പെൺകുട്ടി ഒന്നാം ക്ലാസിൽ പഠിക്കുന്ന കാലം മുതൽ പിതാവ് വീട്ടിൽവച്ച് നിരന്തരമായി ലൈംഗിക പീഡനത്തിന് ഇരയാക്കിയതായാണ് കുട്ടിയുടെ മൊഴി. സ്ഥിരമായി വയറുവേദന അനുഭവപ്പെട്ടിരുന്ന കുട്ടി നിരന്തരമായി ചികിത്സയിലായിരുന്നു. 2020 ൽ ഒരു ദിവസം അമ്മ കുട്ടിയുമായി ആശുപത്രിയിൽ പോകാൻ ബസ് കാത്തു നിൽകുമ്പോഴാണ് കുട്ടി അമ്മയോട് സംഭവം പറയുന്നത്. തുടർന്നു നടന്ന കൗൺസലിംഗിലാണ് പീഡനവിവരം പുറത്തുവന്നത്. തുടർന്ന് കരിമണ്ണൂർ പോലീസ് കേസ് രജിസ്റ്റർ ചെയ്ത് അന്വേഷണം നടത്തി പ്രതിക്കെതിരേ അന്തിമ റിപ്പോർട്ട്‌ നൽകി. സ്വന്തം പിതാവിൽനിന്ന് മകൾക്ക് ഏൽക്കേണ്ടിവന്ന ക്രൂരമായ ലൈംഗികാതിക്രമത്തിനു പരമാവധി ശിക്ഷ നൽകണമെന്ന പ്രോസിക്യൂഷൻ വാദം കോടതി അംഗീകരിക്കുകയായിരുന്നു. പ്രതിയും കുടുംബവും വാടകയ്ക്കു താമസിച്ചിരുന്ന രണ്ടു വീടുകളിൽ വച്ചും സംഭവം ഉണ്ടായി എന്നാണ് കുട്ടിയുടെ മൊഴി. കോടതിയിൽ മൊഴി പറയാൻ വന്ന ദിവസം കുട്ടിയുടെ അമ്മ കോടതിയിൽ ബോധരഹിതയായി വീണിരുന്നു. പിഴ ഒടുക്കുന്നപക്ഷം കുട്ടിക്ക് നൽകണമെന്നും അല്ലാത്തപക്ഷം ആറു വർഷം അധിക തടവിനും കോടതി വിധിച്ചു. കൂടാതെ കുട്ടിക്ക് മതിയായ നഷ്ടപരിഹാരം നൽകാൻ ജില്ലാ ലീഗൽ സർവീസ് അഥോറിറ്റിയോടും കോടതി നിർദേശിച്ചു. സമീപകാലത്ത് ഇതേ കോടതിയിൽനിന്ന് ഇത്തരം കേസുകളിൽ രണ്ടുപേർക്ക് ഇരട്ട ജീവപര്യന്തവും മറ്റൊരാൾക്ക്‌ ഈ കേസ് കൂടാതെ ട്രിപ്പിൾ ജീവപര്യന്തവും ശിക്ഷ വിധിച്ചിരുന്നു. പ്രോസിക്യൂഷനുവേണ്ടി സ്‌പെഷ്യൽ പബ്ലിക് പ്രോസിക്യൂട്ടർ ഷിജോമോൻ ജോസഫ് കണ്ടത്തിങ്കരയിൽ കോടതിയിൽ ഹാജരായി.

3.8 കിലോ കഞ്ചാവുമായി യുവാവ് പിടിയിൽ

തൊടുപുഴ: ആലക്കോട് മീൻമുട്ടിൽ 3.8 കിലോ ഉണക്ക കഞ്ചാവുമായി യുവാവ് എക്സൈസിന്‍റെ പിടിയിലായി. ആലക്കോട് മീൻമുട്ടി മേക്കുന്നൽ മിഥുൻ ജയിംസി (27) നെയാണ് മൂലമറ്റം എക്സൈസ് റേഞ്ച് ഇൻസ്പെക്ടർ അർജുൻ ഷാജുവിന്‍റെ നേതൃത്വത്തിൽ അറസ്റ്റ് ചെയ്തത്. ആലക്കോട് കേന്ദ്രീകരിച്ച് ലഹരി കച്ചവടം നടക്കുന്നതായി എക്സൈസ് ഉദ്യോഗസ്ഥർക്ക് രഹസ്യവിവരം ലഭിച്ചിരുന്നു. ഇതിന്‍റെ അടിസ്ഥാനത്തിൽ നടത്തിയ പരിശോധനയിലാണ് ഇയാൾ കുടുങ്ങിയത്. വിൽപ്പനയ്ക്കായാണ് കഞ്ചാവ് എത്തിച്ചതെന്നും ഇയാൾക്ക് കഞ്ചാവ് ലഭിച്ച ഉറവിടത്തെക്കുറിച്ചും കഞ്ചാവ് വിതരണത്തെക്കുറിച്ചും അന്വേഷിച്ചുവരികയാണെന്ന് ഉദ്യോഗസ്ഥർ പറഞ്ഞു. പരിശോധനയിൽ മൂലമറ്റം എക്സൈസ് അസിസ്റ്റന്‍റ് ഇൻസ്പെക്ടർമാരായ വി.എസ്.നിസാർ, അജിത് കുമാർ, പ്രിവന്‍റീവ് ഓഫീസർമാരായ പി.ആർ. അനുരാജ് , സുബൈർ, വി.ആർ. രാജേഷ്, സുരേന്ദ്രൻ, എ.കെ. ദിലീപ്, സിവിൽ എക്സൈസ് ഓഫീസറായ ടി.എസ്. സുനിൽ, വനിത സിവിൽ എക്സൈസ് ഓഫീസർ എം.ടി. ബിന്ദു എന്നിവർ പങ്കെടുത്തു.

ചിന്നാർ വനത്തിന്‍റെ കാവൽക്കാരൻ സുധാകരൻ ചാപ്ലി അന്തരിച്ചു

മറയൂർ: ചിന്നാർ വന്യജീവി സങ്കേതത്തിന്‍റെ അടയാളമായിരുന്ന ചന്പക്കാട് ഉന്നതി സ്വദേശി സുധാകരൻ ചാപ്ലി (53) അന്തരിച്ചു. ചിന്നാറിന്‍റെ മുക്കും മൂലയും അറിയാവുന്ന വനസംരക്ഷണ സേനയിലെ പ്രമുഖനായിരുന്നു. ചാപ്ലി കനകമ്മയുടെ മകനായ ഇദ്ദേഹം, 20 വർഷത്തിലധികം സേവനമനുഷ്ഠിച്ചതിനാൽ സർക്കാരിന്‍റെ സ്പെഷൽ റിക്രൂട്ട്മെന്‍റ്‌വഴി ട്രൈബൽ വാച്ചറായും പ്രവർത്തിച്ചു. തിരുവനന്തപുരം മെഡിക്കൽ കോളജിൽ ചികിത്സയിലിരിക്കെയാണ്അന്ത്യം. വനംവകുപ്പ് ഉദ്യോഗസ്ഥർ മൂന്നാർ വൈൽഡ് ലൈഫ് വാർഡൻ, ചിന്നാർ അസി. വൈൽഡ്‌ലൈഫ് വാർഡൻ എന്നിവരെത്തി ഗാർഡ് ഓഫ് ഓണർ നൽകി സംസ്കാര ചടങ്ങുകൾക്ക് നേതൃത്വം നൽകി. ഭാര്യ: പാപ്പ. മക്കൾ: സുഭാഷ്, സുവർണ. സംസ്കാരം നടത്തി.

ദേശീയപാത-85ന്‍റെ നിർമാണത്തിൽ സർക്കാർ അടിയന്തരമായി ഇടപെടണം: ഇടുക്കി രൂപത

ചെറുതോണി: കൊച്ചി - ധനുഷ്കോടി ദേശീയപാതയിൽ നേര്യമംഗലം മുതൽ വാളറവരെയുള്ള 14.5 കി.മീ. പ്രദേശത്തെ നിർമാണ പ്രവർത്തനങ്ങൾ നിർത്തിവച്ച കേരള ഹൈക്കോടതി വിധി അത്യന്തം ദൗർഭാഗ്യകരമാണെന്ന് ഇടുക്കി രൂപത മീഡിയാ കമ്മീഷൻ ഡയറക്ടർ ഫാ. ജിൻസ് കാരയ്ക്കാട്ട് വാർത്താക്കുറിപ്പിൽ അറിയിച്ചു. കേരള സർക്കാരിനുവേണ്ടി വനം വകുപ്പ് അഡീഷണൽ സെക്രട്ടറി കൊടുത്ത റിപ്പോർട്ടിന്‍റെ അടിസ്ഥാനത്തിലാണ് ചീഫ് ജസ്റ്റീസ് ഉൾപ്പെട്ട ഡിവിഷൻ ബെഞ്ച് വിധി പറഞ്ഞത്. എം.എൻ. ജയചന്ദ്രൻ എന്നയാൾ 2024ൽ കേരള ഹൈക്കോടതിയിൽ സമർപ്പിച്ച പൊതുതാൽപര്യ ഹർജിയിൽ റോഡ് നവീകരണം നടക്കുന്ന നേര്യമംഗലം മുതൽ വാളറ വരെയുള്ള 14.5 കി.മീ. ഭാഗം മലയാറ്റൂർ - ഇടിയറ റിസർവ് വനഭൂമിയാണെന്നും എൻഎച്ച് - 85ൽ അനുമതിയില്ലാതെ നടക്കുന്ന നിർമാണ പ്രവർത്തനങ്ങൾ അടിയന്തരമായി നിർത്തിവയ്ക്കണമെന്നുമാണ് ആവശ്യപ്പെട്ടത്. 1932ലെ രാജഭരണകാലത്തെ ഉത്തരവിന്‍റെയും 1996ലെ സംസ്ഥാന സർക്കാരിന്‍റെ ഉത്തരവിന്‍റെയും അടിസ്ഥാനത്തിൽ കിരണ്‍ സിജു / സ്റ്റേറ്റ് ഓഫ് കേരള കേസിൽ റോഡിന്‍റെ മധ്യഭാഗത്തുനിന്ന് 50 അടി വീതം ഇരുവശത്തേക്കും റോഡ് പുറന്പോക്ക് ആണെന്നും ആയത് പൊതുമരാമത്ത് വകുപ്പിന് അവകാശപ്പെട്ടതാണെന്നും റോഡിന്‍റെ യാതൊരുവിധ നിർമാണ പ്രവർത്തനങ്ങളും വനംവകുപ്പ് തടസ്‌സപ്പെടുത്തരുതെന്നും ഹൈക്കോടതി ഡിവിഷൻ ബെഞ്ച് 28-05-2024ൽ ഉത്തരവിട്ടിട്ടുള്ളതാണ്. ഹൈക്കോടതി ഡിവിഷൻ ബെഞ്ചിന്‍റെ ഉത്തരവിനെതിരേ എം.എൻ. ജയചന്ദ്രൻ റിവ്യൂ പെറ്റീഷൻ നൽകിയെങ്കിലും അതും തള്ളിയിരുന്നു. പിന്നീട് എം.എൻ. ജയചന്ദ്രൻ വീണ്ടും നൽകിയ പൊതു താത്പര്യ ഹർജിയിൽ ഹൈക്കോടതിയുടെ 07/07/2025ലെ സിറ്റിംഗിൽ നേര്യമംഗലം മുതൽ വാളറ വരെ വനമേഖലയാണെന്ന് വനം വകുപ്പ് അഡീഷണൽ സെക്രട്ടറി സത്യവാങ്മൂലം സമർപ്പിക്കുകയായിരുന്നു. രാജഭരണ കാലത്ത് റോഡിനായി നീക്കിയിട്ടിട്ടുള്ള 100 അടി വീതിയിലുള്ള സ്ഥലം വനംവകുപ്പിന്‍റേതല്ലെന്ന് റവന്യൂ രേഖകൾ പ്രകാരം വ്യക്തമായിട്ടുള്ള സാഹചര്യത്തിൽ സംസ്ഥാന സർക്കാരിന്‍റെ താത്പര്യത്തിന് വിരുദ്ധമായി തെറ്റായ സത്യവാങ്മൂലം വനം വകുപ്പ് സെക്രട്ടറി നൽകിയിട്ടുണ്ടെങ്കിൽ അത് തിരുത്തിക്കുന്നതിന് സർക്കാ ർ അടിയന്തരമായി ഇടപെടണം. മലയോര മേഖലകളിൽ (റോളിംഗ് ടെറയിൻ) അപകടരഹിതമായി എങ്ങനെ റോഡ് നിർമിക്കാമെന്ന് വിദഗ്ധ പഠനം നടത്തിയതിന്‍റെ അടിസ്ഥാനത്തിൽ സെൻട്രൽ ഗവണ്‍മെന്‍റ് നിഷ്കർഷിച്ചിട്ടുള്ള മാനദണ്ഡങ്ങൾ പാലിച്ചും വാലി സൈഡിലും കട്ടിംഗ് സൈഡിലും ബലവത്തായ സംരക്ഷണഭിത്തികൾ നിർമിച്ചുമാണ് റോഡ് വികസന പ്രവർത്തനങ്ങൾ നടന്നു വരുന്നതെന്നും അതിനായി ചുമതലപ്പെടുത്തിയ സമിതികൾ റിപ്പോർട്ട് നൽകിയിട്ടുള്ളതുമാണ്. ചില സ്വാർഥ താത്പര്യങ്ങൾക്കായി പ്രവർത്തിക്കുന്ന ഉദ്യോഗസ്ഥരുടെ പ്രവർത്തനങ്ങൾകൊണ്ട് ഹൈറേഞ്ച് മേഖല പ്രതിസന്ധി നേരിടുന്ന ഈ കാലഘട്ടത്തിൽ സർക്കാർ നിലപാടുകൾക്കു വിരുദ്ധമായി പ്രവർത്തിക്കുന്ന ഉദ്യോഗസ്ഥരെ നിയന്ത്രിക്കണമെന്നും ജനത്തിനും നാടിനും ഉപകാരപ്രദമായ തീരുമാനങ്ങളെടുത്ത് ദേശീയപാതയുടെ നിർമാണം പുനരാരംഭിക്കാൻ സംസ്ഥാന സർക്കാർ നടപടി സ്വീകരിക്കണമെന്നും രൂപത മീഡിയാ കമ്മീഷൻ ഡയറക്ടർ ഫാ. ജിൻസ് കാരയ്ക്കാട്ട് ആവശ്യപ്പെട്ടു.

മികവിന്‍റെ കേന്ദ്രങ്ങളാകാൻ കുടുംബശ്രീ സിഡിഎസുകൾ

തൊടുപുഴ: ജില്ലയിൽ കുടുംബശ്രീ സിഡിഎസുകൾ മികവിന്‍റെ കേന്ദ്രങ്ങളാകാനൊരുങ്ങുന്നു. സംസ്ഥാന തലത്തിൽ കുടുംബശ്രീയും കിലയും ചേർന്ന് സിഡിഎസുകളെ ഐഎസ്ഒ നിലവാരത്തിലേക്ക് ഉയർത്തുന്നതിന്‍റെ ഭാഗമായി ജില്ലയിൽ പരിശീലനം തുടങ്ങി. ആദ്യ ഘട്ടത്തിൽ ജില്ലയിലെ തെരഞ്ഞെടുത്ത 23 സിഡിഎസുകളെയാണ് ഐഎസ്ഒ നിലവാരത്തിലെത്തിക്കുകയെന്ന് അധികൃതർ പറഞ്ഞു. 22 ഗ്രാമ സിഡിഎസുകളും ഒരു നഗര സിഡിഎസുമാണ് തെരഞ്ഞെടുക്കപ്പെട്ടത്. കില ഐഎസ്ഒ മാനേജർ ദീപ്തി ചന്ദ്രന്‍റെ മേൽനോട്ടത്തിൽ ജില്ലയിൽ മൂന്ന് ഘട്ടം പരിശീലനം പൂർത്തിയായി. കരിമണ്ണൂർ, ഇരട്ടയാർ, ശാന്തൻപാറ എന്നിവിടങ്ങളിലാണ് പരിശീലനം നടത്തുന്നത്. ജില്ലയിലെ സിഡിഎസുകളെ മൂന്ന് ബാച്ചുകളായി തിരിച്ചാണ് പരിശീലനം. ഓരോ പരിശീലനത്തിന് ശേഷവും ഗുണനിലവാരം ഉയർത്താൻ ആവശ്യമായ ക്രമീകരണങ്ങൾ സിഡിഎസുകളിൽ നടപ്പാക്കുന്നുണ്ട്. ചെയർപേഴ്സണ്‍, മെംബർ സെക്രട്ടറി, വൈസ് ചെയർപേഴ്സണ്‍, അക്കൗണ്ടന്‍റ് എന്നിങ്ങനെ ഒരു സിഡിഎസിൽനിന്ന് നാലുപേർക്ക് വീതമാണ് പരിശീലനം നൽകുന്നത്. ഗുണമേന്മാ നയം കൃത്യമായി നടപ്പാക്കിയാണ് ഐഎസ്ഒ സർട്ടിഫിക്കേഷൻ നൽകുന്നത്. സിഡിഎസ് ഓഫീസ് സംവിധാനത്തിന്‍റെയും വിഭവങ്ങളുടെയും കാര്യക്ഷമതയും ഫലപ്രാപ്തിയും ഗുണനിലവാരവും ഉറപ്പാക്കണം. തദ്ദേശ സ്വയംഭരണ വകുപ്പ് അംഗീകരിച്ച ബൈലോ പ്രകാരം ചെയ്യേണ്ട പ്രവർത്തനങ്ങൾ പൂർത്തിയാക്കണം. സേവനങ്ങൾ സമയബന്ധിതമായി നൽകണം. പശ്ചാത്തല സൗകര്യങ്ങളുടെയും സംവിധാനങ്ങളുടെയും നിലവാരം നിർണയിച്ച് നിലനിർത്തണം. സ്ത്രീകൾ, ഭിന്നശേഷിയുള്ളവർ, കുട്ടികൾ, വയോജനങ്ങൾ, സാമൂഹ്യസാന്പത്തിക പിന്നാക്കാവസ്ഥയുള്ളവർ ഉൾപ്പെടെ എല്ലാ വിഭാഗങ്ങൾക്കും സമത്വം ഉറപ്പാക്കണം. ഇവയ്ക്കു പുറമേ ജനങ്ങളിൽനിന്ന് അഭിപ്രായം ശേഖരിക്കാൻ സിറ്റിസണ്‍ സർവേയും പുരോഗമിക്കുകയാണ്. സിഡിഎസിനെക്കുറിച്ചും സേവനങ്ങളെക്കുറിച്ചും മികവും പോരായ്മകളും ചോദിച്ചറിയും. പോരായ്മകൾ പരിഹരിക്കും. സർട്ടിഫിക്കേഷൻ ലഭിച്ചാൽ അതാത് കാലാകാലങ്ങളിൽ പുതുക്കുകയും വേണമെന്നും അധികൃതർ പറഞ്ഞു.

അനധികൃത മദ്യവില്പന: രണ്ടു പേർ പിടിയിൽ

രാജകുമാരി: ഖജനാപ്പാറ മേഖലയിൽ അനധികൃത മദ്യവില്പന നടത്തിയ രണ്ടു പേർ പിടിയിൽ. ഉടുമ്പൻചോല എക്സൈസ് റേഞ്ച് ഇൻസ്പെക്ടർ എം.പി. പ്രമോദിന്‍റെ നേതൃത്വത്തിൽ രാജകുമാരി, ഖജനാപ്പാറ ഭാഗത്ത് നടത്തിയ പരിശോധനയിലാണ് ഖജനാപ്പാറ വെള്ളിവെളുന്താൻ ചാലുവരമ്പിൽ സുരേഷി(60)നെ 3.100 ലിറ്റർ മദ്യവുമായി പിടികൂടിയത്. തുടർന്നു നടന്ന പരിശോധനയിൽ 25 ലിറ്റർ മദ്യവുമായി ഖജനാപാറ ജയമന്ദിരം ബോധുരാജി(50)നെയും അറസ്റ്റ് ചെയ്തു. പരിശോധനകളിൽ അസിസ്റ്റൻറ് എക്സൈസ് ഇൻസ്പെക്ടർമാരായ പി.ഡി. സേവ്യർ,കെ.എൻ. രാജൻ, പ്രിവന്‍റീവ് ഓഫീസർമാരായ കെ. രാധാകൃഷ്ണൻ, വി.ജെ. ജോഷി, സിവിൽ എക്സൈസ് ഓഫീസർ ടിൽസ് ജോസഫ് , കെ. പി. അരുൺ,വനിത സിവിൽ എക്സൈസ് ഓഫീസർ ചിത്രാഭായി, ഡ്രൈവർ ഷിബു ജോസഫ് എന്നിവർ പങ്കെടുത്തു.

ദേശീയപാത വികസനം തടസപ്പെട്ടത് സംസ്ഥാന സർക്കാരിന്‍റെ കെടുകാര്യസ്ഥതയെന്ന് ബിജെപി

കട്ടപ്പന: കൊച്ചി - ധനുഷ്കോടി ദേശീയ പാതയുടെ നേര്യമംഗലം മുതൽ വാളറ വരെയുള്ള നിർമാണ തടസപ്പെടാൻ കാരണം സംസ്ഥാന സർക്കാരിന്‍റെ കെടുകാര്യസ്ഥതയാണെന്ന് ബിജെപി സൗത്ത് ജില്ലാ കമ്മിറ്റി ആരോപിച്ചു. കേന്ദ്ര സർക്കാരിന്‍റെ ഭാരതിമാല പദ്ധതി പ്രകാരം 5000 കോടി രൂപ അനുവദിച്ചു നിർമാണം നടക്കുന്ന പദ്ധതിയാണ് കൊച്ചി-ധനുഷ്കോടി പാത. 590 കിലോ മീറ്റർ നീളമുള്ള കേരളത്തിനും തമിഴ്നാടിനും ഒരുപോലെ ഗുണം ചെയ്യുന്ന റോഡ് വികസനമാണ് തടസപ്പെട്ടിരിക്കുന്നത്. കെ. എൻ. ജ്യോതിലാൽ, അഡീഷണൽ ചീഫ് സെക്രട്ടറിക്കുവേണ്ടി ഹൈക്കോടതിയിൽ സമർപ്പിച്ച സത്യവാങ്മൂലമാണ് നിലവിലെ തടസത്തിനു കാരണം. ഇത് മറച്ചു വച്ച് ബിജെപിയെ കുറ്റപ്പെടുത്താൻ ചിലർ ശ്രമിക്കുകയാണെന്ന് ബിജെപി സൗത്ത് ജില്ലാ പ്രസിഡന്‍റ് വി.സി.വർഗീസ്, ജില്ലാ ജനറൽ സെക്രട്ടറി സുനിൽ കുരുവിക്കാട്ട്, കട്ടപ്പന മണ്ഡലം പ്രസിഡന്‍റ് അഡ്വ.സുജിത് ശശി, മുൻ മണ്ഡലം പ്രസിഡന്‍റ് പി.എൻ. പ്രസാദ് എന്നിവർ ആരോപിച്ചു.

അഞ്ചുരുളി റോഡിന് 1.47 കോടി: മന്ത്രി റോഷി

കട്ടപ്പന: കാഞ്ചിയാർ പഞ്ചായത്തിലെ അഞ്ചുരുളി നഗറിലേക്കുള്ള കക്കാട്ടുകട - അഞ്ചുരുളി റോഡ് നിർമാണത്തിനായി 1.47 ലക്ഷം അനുവദിച്ചതായി മന്ത്രി റോഷി അഗസ്റ്റിൻ അറിയിച്ചു. 3.024 കീലോമീറ്റർ ദൈർഘ്യമാണ് റോഡിനുള്ളത് . ആറു മീറ്റർ വീതിയുള്ള ഗ്രാമീണ റോഡാണ് നിലവിലുള്ളത് .പട്ടിക വർഗ വിഭാഗത്തിൽപ്പെടുന്ന അൻപതിലധികം കുടുംബങ്ങളാണ് ഈ മേഖലയിലുള്ളത്. നേരത്തേ അംബേദ്കർ ഗ്രാമവികസന പദ്ധതിയിൽ ഉൾപ്പെടുത്തി ഒരു കോടിയുടെ വികസന പ്രവർത്തനങ്ങൾ നടത്തിയിരുന്നു . റോഡിന്‍റെ ടാറിംഗ്, കലുങ്കുകളുടെ നിർമാണം, ഓട നിർമാണം തുടങ്ങിയ പ്രവർത്തനങ്ങളാണ് പദ്ധതിയിൽ ഉൾപ്പെടുത്തിയത്. ജില്ലയിലെ പട്ടികജാതി പട്ടികവർഗ ഉന്നതികളുടെ വികസനത്തിന് കാഞ്ചിയാർ പഞ്ചായത്തിൽ വിവിധ ഇടങ്ങളിൽ അംബേദ്കർ ഗ്രാമവികസന പദ്ധതിയിൽ ഉൾപ്പെടുത്തി ഇതിനോടകം തുക അനുവദിച്ചതായും മന്ത്രി പറഞ്ഞു.

മരം മുറിക്കാൻ വൈദ്യുതി ലൈൻ അഴിച്ചുമാറ്റുന്നില്ലെന്ന് പരാതി

കാഞ്ഞാർ: ജില്ലാ കളക്ടർ ഉത്തരവിട്ടതിനെത്തുടർന്ന് കാഞ്ഞാർ ടൗണിൽ അപകടാവസ്ഥയിൽ നിൽക്കുന്ന മരങ്ങൾ വെട്ടിമാറ്റാൻ പൊതുമരാമത്ത് അധികൃതർ എത്തിയപ്പോൾ വൈദ്യുതി വകുപ്പ് ജീവനക്കാർ ലൈൻ മാറ്റിക്കൊടുക്കാൻ തയാറായില്ലെന്ന് ആക്ഷേപം. ലൈൻ അഴിച്ചുമാറ്റി വൈദ്യുതി ബന്ധം വിച്ഛേദിച്ചാൽ മാത്രമേ മരംവെട്ടാൻ കഴിയൂ. മരം മുറിക്കുന്ന വിവരം രണ്ടു ദിവസം മുന്പ് വൈദ്യുതി വകുപ്പ് ഓഫീസിൽ അറിയിച്ച ശേഷം ഇന്നലെ മരം മുറിക്കാൻ പൊതുമരാമത്ത് വകുപ്പ് നിയോഗിച്ച ജോലിക്കാർ വന്നപ്പോഴാണ് വൈദ്യുതി ലൈൻ അഴിച്ചുമാറ്റി നൽകാതിരുന്നത്. ഇതോടെ ജോലിക്കാർ മരം മുറിക്കാതെ തിരിച്ചുപോയി. തൊടുപുഴ- ഇടുക്കി റോഡിൽ നിരവധി സ്ഥലങ്ങളിൽ അപകടാവസ്ഥയിലുള്ള മരങ്ങളുണ്ട്. ഇവയ്ക്കു സമീപത്തുകൂടെയാണ് വൈദ്യുതിലൈൻ കടന്നു പോകുന്നത്. ലൈൻ അഴിച്ചുമാറ്റാതെ ഈ മരങ്ങൾ മുറിക്കാനാവില്ല. വാഹനങ്ങൾക്കും യാത്രക്കാർക്കും ഭീഷണിയായി നിൽക്കുന്ന മരങ്ങൾ വെട്ടിമാറ്റാൻ ജില്ലാ ദുരന്തനിവാരണ അഥോറിറ്റി ചെയർപേഴ്സണ്‍ കൂടിയായ ജില്ലാ കളക്ടർ ഉത്തരവിട്ടെങ്കിലും ഇത് അവഗണിക്കുന്ന നിലപാടാണ് വൈദ്യുതി ബോർഡ് സ്വീകരിക്കുന്നതെന്ന് നാട്ടുകാർ പറയുന്നു.

പി. പളനിവേൽ തൊഴിലാളികൾക്കായി നിലയുറപ്പിച്ച നേതാവ്

മൂന്നാർ: അന്തരിച്ച മുതിർന്ന സിപിഐ നേതാവ് പി. പളനിവേലിന്‍റെ വിയോഗത്തോടെ തൊഴിലാളികൾക്കുവേണ്ടി നിരന്തരം ഉയർന്നിരുന്ന ശബ്ദമാണ് നിലച്ചത്. ഹൈറേഞ്ചിലെ തോട്ടം മേഖലയിൽ പ്രത്യേകിച്ച് തേയിലത്തോട്ടത്തിൽ പണിയെടുക്കുന്ന ആയിരക്കണക്കിന് തൊഴിലാളികൾക്ക് ഏതു സമയത്തും സമീപിക്കാവുന്ന സൗമ്യ മുഖമായിരുന്നു. ദേവികുളത്തെ ട്രേഡ് യൂണിയനുകളിൽ ഏറ്റവും പ്രബലമായ എഐടിയുസിയുടെ ഭാഗമായി എന്നും സമരമുഖത്ത് ഉണ്ടായിരുന്ന പളനിവേൽ ഹൈറേഞ്ചിന്‍റെ കമ്യൂണിസ്റ്റ് മുഖമായിരുന്നു. തൊഴിലാളികളുടെ അവകാശ സമരങ്ങളിൽ എന്നും മുൻപന്തിയിൽ ഉണ്ടായിരുന്ന അദ്ദേഹം അവസാന സമയം വരെയും രാഷ്ട്രീയ മേഖലയിൽ സജീവമായിരുന്നു. വി.എസ്.അച്യുതാനന്ദൻ സർക്കാരിന്‍റെ കാലത്ത് മൂന്നാർ ഒഴിപ്പിക്കൽ നടപടിക്കെതിരേ ശക്തമായി രംഗത്തുവന്നിരുന്നു. സിപിഐ യുടെ ഓഫീസ് കെട്ടിടം അനധികൃതമായി നിർമിച്ചതാണെന്ന് ചൂണ്ടിക്കാണിച്ച് കെട്ടിടത്തിനെതിരേ നടപടി എടുത്തതോടെ ശക്തമായ പ്രതിരോധം ഒരുക്കുന്നതിൽ അദ്ദേഹം നേതൃത്വം നൽകി. പൊന്പുള ഒരുമൈ സമരത്തിലും തൊഴിലാളികൾക്കൊപ്പം നിലകൊണ്ടു. സമരമുഖങ്ങളിൽ അണിയറ നീക്കങ്ങൾ നടത്തുന്നതിൽ പ്രാഗത്ഭ്യം പുലർത്തിയിരുന്നു. ജില്ലാ പഞ്ചായത്ത് പ്രസിഡന്‍റായും മികവ് തെളിയിച്ചു.

സിപിഐ ജില്ലാ സമ്മേളനത്തിൽ മാറ്റം

തൊടുപുഴ : പി. പളനിവേലിന്‍റെ മരണത്തെത്തുടർന്നു കട്ടപ്പന ടൗണ്‍ഹാളിൽ ഇന്നലെ മുതൽ 20 വരെ നടത്താൻ നിശ്ചയിച്ചിരുന്ന ജില്ലാ സമ്മേളന പരിപാടികളിൽ മാറ്റംവരുത്തിയതായി ജില്ലാ സെക്രട്ടറി കെ.സലിംകുമാർ അറിയിച്ചു. ഇന്നലെ നടത്താനിരുന്ന പതാക, കൊടിമര, ദീപശിഖാ ജാഥകളും പൊതുസമ്മേളനവും ഉപേക്ഷിച്ചു. ഇന്ന് ആരംഭിക്കേണ്ട പ്രതിനിധി സമ്മേളനം നാളെ ആരംഭിച്ച് 20നു സമാപിക്കും. സിപിഐ ജില്ലാ അസി.സെക്രട്ടറിയും ദേവികുളം എസ്‌റ്റേറ്റ് വർക്കേഴ്സ് യൂണിയൻ ജനറൽ സെക്രട്ടറിയുമായിരുന്നു പളനിവേൽ. നേരത്തേ ജില്ലാ പഞ്ചായത്ത് പ്രസിഡന്‍റ്, ബ്ലോക്ക് പ്രസിഡന്‍റ് എന്നീ നിലകളിലും പ്രവർത്തിച്ചിട്ടുണ്ട്. ഇന്നലെ വൈകുന്നേരം നാലോടെ മൂന്നാറിലെ വസതിയിൽ എത്തിച്ച മൃതദേഹം ഇന്നു രാവിലെ ഒന്പതുമുതൽ ഉച്ചയ്ക്ക് ഒന്നുവരെ മൂന്നാറിലെ സിപിഐ ഓഫീസിൽ പൊതുദർശനത്തിനു വയ്ക്കും. ഉച്ചയക്ക് രണ്ടിന് സംസ്കാരം നടത്തും.

എംപി സത്യഗ്രഹം അനുഷ്ഠിക്കും

അടിമാലി: എൻഎച്ച് -85ന്‍റെ നിർമാണംനിരോധിച്ച ഹൈക്കോടതി വിധിക്ക് കാരണക്കാരായ കേന്ദ്ര- സംസ്ഥാന സർക്കാരുകൾക്കെതിരേ ആരംഭിക്കുന്ന ജനകീയ പ്രക്ഷോഭത്തിന്‍റെ ഭാഗമായി അഡ്വ.ഡീൻ കുര്യാക്കോസ് എംപി നാളെ അടിമാലിയിൽ സത്യഗ്രഹം അനുഷ്ഠിക്കും. ഹൈക്കോടതിയിൽ നേര്യമഗംലം മുതൽ വാളറ വരെ വനമാണെന്ന നിലപാടാണ് സർക്കാർ അഭിഭാഷകനും വനം അഡീഷണൽ ചീഫ് സെക്രട്ടറിയും സ്വീകരിച്ചത്. ഇതാണ് കോടതിവിധി എതിരാകാൻ മുഖ്യകാരണം. രാവിലെ 10ന് അഡ്വ. കെ.ഫ്രാൻസിസ് ജോർജ് എംപി സത്യഗ്രഹ സമരം ഉദ്ഘാടനം ചെയ്യും.വൈകുന്നേരം സമാപന സമ്മേളനം തിരുവഞ്ചൂർ രാധാകൃഷ്ണൻ എംഎൽഎ ഉദ്ഘാടനം ചെയ്യുമെന്ന് യുഡിഎഫ് ദേവികുളം നിയോജക മണ്ഡലം ചെയർമാൻ എം.ബി.സൈനുദീൻ, കൺവീനർ ഒ.ആർ.ശശി എന്നിവർ അറിയിച്ചു.

ദേശീയപാത നിർമാണം: പിന്തുണ അറിയിച്ച് യാക്കോബായ സഭ

അടിമാലി: ദേശീയപാത - 85ന്‍റെ നിർമാണ പ്രതിസന്ധിയിൽ പരസ്യ പ്രതിഷേധവുമായി യാക്കോബായ സഭ. 31ന് എൻ എച്ച് സംരക്ഷണ സമിതിയുടെ നേതൃത്വത്തിൽ നടക്കുന്ന പ്രതിഷേധ മാർച്ചിന് എല്ലാവിധ പിന്തണയുമുണ്ടാകുമെന്ന് യാക്കോബായ സഭ ഹൈറേഞ്ച് മേഖല മെത്രാപ്പോലീത്ത ഡോ. ഏലിയാസ് മോർ അത്താനാസിയോസ് അടിമാലിയിൽ അറിയിച്ചു. ദേവാലയങ്ങളിൽ പ്രതിഷേധ ധർണയുമായി ബന്ധപ്പെട്ട സർക്കുലർ വായിക്കുമെന്നും സമരസമിതിക്കൊപ്പം നിന്ന് പ്രതിഷേധത്തിനിറങ്ങുമെന്നും മെത്രാപ്പോലീത്ത വ്യക്തമാക്കി.വിഷയത്തിൽ രാഷ്‌ട്രീയ ഭിന്നത മറന്ന് എല്ലാവിഭാഗം ജനങ്ങളും പ്രതിഷേധിക്കണമെന്നും നിയമ സംവിധാനത്തെപോലും വനംവകുപ്പുദ്യോഗസ്ഥർ വെല്ലുവിളിക്കുന്നുവെന്നതിനു തെളിവാണ് ഇപ്പോഴത്തെ സംഭവവികാസങ്ങളെന്നും മെത്രാപ്പോലീത്ത അറിയിച്ചു.

രാജകുമാരി മാങ്ങാത്തൊട്ടി ജംഗ്ഷനിൽ റോഡിനു വീതി വർധിപ്പിക്കണമെന്ന്

രാജകുമാരി:ശാന്തൻപാറ - പൊട്ടൻകാട് റോഡിന്‍റെ ഭാഗമായുള്ള രാജകുമാരി കുരിശുപള്ളി ജംഗ്ഷനിൽ റോഡിനു വീതി വർധിപ്പിക്കണമെന്ന് സീനിയർ സിറ്റിസൺ വെൽഫെയർ ഫ്രണ്ട്സ് അസോസിയേഷൻ ഭാരവാഹികൾ ആവശ്യപ്പെട്ടു. ഇതു സംബന്ധിച്ച് പൊതുമരാമത്ത് വകുപ്പ് മന്ത്രിക്കും ഉദ്യോഗസ്ഥർക്കും നിവേദനം നൽകി. 40 വർഷം മുന്പ് പൊതുമരാമത്ത് ഏറ്റെടുത്ത റോഡാണ് ശാന്തൻപാറയിൽനിന്ന് ആരംഭിച്ച് സേനാപതി, രാജകുമാരി, കജനാപ്പാറ, ബൈസൺവാലിവഴി പൊട്ടൻകാട്ടിലെത്തുന്നത്. ജനപ്രതിനിധികൾ ഇടപെട്ട് മൂന്നു വർഷം മുമ്പ് റോഡ് എട്ടു മീറ്റർ വീതിയിൽ ടാർ ചെയ്തു. എന്നാൽ, രാജകുമാരി കുരിശുപള്ളി കവലയിൽ പ്രധാന റോഡിൽനിന്നു മാങ്ങാത്തൊട്ടിക്ക് തിരിയുന്ന ഭാഗത്ത് റോഡിനു നാലുമീറ്റർ മാത്രമാണ് വീതിയുള്ളത്.ഇതുമൂലം വലിയ വാഹനങ്ങൾ തിരിയുന്നതിനു വലിയ ബുദ്ധിമുട്ടാണ്. വീതിയേറിയ റോഡിൽനിന്നു വരുമ്പോൾ പെട്ടെന്ന് റോഡ് ഇടുങ്ങിവരുന്നതിനാൽ നിരവധി അപകടങ്ങൾ ഉണ്ടായിട്ടുണ്ട്. മൂന്നു വർഷം മുമ്പ് സ്കൂട്ടർ ഇടിച്ചുമറിഞ്ഞ് ഒരാൾ മരിച്ചിരുന്നു. ആവശ്യമായ സ്ഥലം നഷ്ടപരിഹാരം നൽകി ഏറ്റെടുത്ത് റോഡിന് വീതി കൂട്ടി അപകടസാധ്യത കുറയ്ക്കണമെന്ന് അസോസിയേഷൻ സെക്രട്ടറി മാത്യു കുത്തുകല്ലുങ്കൽ,ജോയിന്‍റ് സെക്രട്ടറി സണ്ണി തുമ്പനിരപ്പേൽ എന്നിവർ ആവശ്യപ്പെട്ടു.

പാലത്തിനു വീതിയില്ല; മൂലമറ്റം-ഇലപ്പള്ളി റോഡിൽ ദുരിതയാത്ര

മൂലമറ്റം: കെഎസ്ആർടിസിക്കു സമീപം മൂലമറ്റം - ഇലപ്പള്ളി റോഡിൽ വൈദ്യുതിബോർഡ് ജനറേഷൻ സർക്കിളിന്‍റെ മുന്നിലുള്ള പാലം വീതി കൂട്ടി നിർമിക്കണമെന്ന ആവശ്യം ശക്തമാകുന്നു. പാലത്തിലൂടെ ഒരു വാഹനം കടന്നുപോയ ശേഷമേ എതിർവശത്തുനിന്നുള്ള വാഹനത്തിനു പോകാൻ കഴിയൂ. പതിറ്റാണ്ടുകൾക്കു മുന്പ് ഇടുക്കി പദ്ധതിയുടെയും മൂലമറ്റം പവർ ഹൗസിന്‍റെയും നിർമാണം നടന്ന സമയത്ത് ജീവനക്കാർക്ക് താമസിക്കാനായി വനംവകുപ്പിൽനിന്ന് ഏറ്റെടുത്ത സ്ഥലത്താണ് ക്വാർട്ടേഴ്സും സർക്കിൾ ഓഫീസും നിർമിച്ചത്. അന്ന് വൈദ്യുതി ബോർഡിന്‍റെ ആവശ്യത്തിനായി നിർമിച്ച പാലമാണിത്. വീതി കുറച്ചാണ് പാലം നിർമിച്ചത്. വർഷങ്ങൾക്കു ശേഷം മണപ്പാടി, ഇലപ്പള്ളി, കണ്ണിക്കൽ, പുത്തേട്, മൂന്നുങ്കവയൽ, ഇടാട് തുടങ്ങിയ പ്രദേശങ്ങളിലേക്കുള്ള റോഡ് മുറിച്ച് കനാൽ നിർമിച്ചതോടെ മറ്റു യാത്രാമാർഗങ്ങൾ ഇല്ലാതായി. ഇതോടെ ഈ പാലത്തിലൂടെയാണ് വാഗമണ്‍, പതിപ്പള്ളി, കണ്ണിക്കൽ, പുത്തേട്, ഇലപ്പള്ളി തുടങ്ങിയ മേഖലകളിലേക്കുള്ള യാത്രക്കാർ സഞ്ചരിക്കുന്നത്. ബസുകൾ ഉൾപ്പെടെയുള്ള വാഹനങ്ങളും ഇതുവഴിയാണ് കടന്നുപോകുന്നത്. ഇപ്പോൾ എറണാകുളം - തേക്കടി സംസ്ഥാന പാതയുടെ ഭാഗമാണ് പാലം. പതിപ്പള്ളി ആദിവാസി മേഖലയിലേക്കും വാഗമണ്‍ റൂട്ടിലേക്കും ബസ് സർവീസുകൾ നടത്തിവരുന്നുണ്ട്. ഇതിനു പുറമേ കുമളി, തേക്കടി, വാഗമണ്‍ തുടങ്ങിയ പ്രദേശങ്ങളിലേക്കുള്ള നൂറു കണക്കിന് വിനോദ സഞ്ചാരികളുടെ വാഹനങ്ങളും ഇതു വഴിയാണ് സഞ്ചരിക്കുന്നത്. പാലത്തിന്‍റെ വീതി കുറവ് വാഹന ഗതാഗതത്തിനു തടസമുണ്ടാക്കുന്നു. വാഹനങ്ങൾ വർധിച്ചപ്പോഴും പാലത്തിന് വീതിയില്ലാത്തതാണ് ദുരിതം സൃഷ്ടിക്കുന്നത്. പഴയ റോഡ് വൈദ്യുതിബോർഡ് മുറിച്ചെടുത്തതോടെ പാലം വീതി കൂട്ടി നിർമിക്കേണ്ടത് വൈദ്യുതി ബോർഡിന്‍റെ ഉത്തരവാദിത്വമാണെന്ന് നാട്ടുകാർ പറയുന്നു. അടിയന്തരമായി പാലം വീതികൂട്ടി നിർമിക്കണമെന്നാണ് ആവശ്യം.

രാജഭരണകാലത്തെ തോട്ടാപ്പുര തകർന്നു

പീരുമേട്: രാജരണകാലത്തിന്‍റെ സ്മരണകൾ പേറുന്ന തോട്ടാപ്പുര തകർന്നുവീണു. തിരുവിതാംകൂർ രാജഭരണകാലത്ത് വെടിക്കോപ്പുകൾ സൂക്ഷിക്കാൻ നിർമിച്ച ഒറ്റമുറി കെട്ടിടമാണ് തോട്ടാപ്പുര എന്ന് അറിയിപ്പെട്ടിരുന്നത്. ഒരു നൂറ്റാണ്ടോളം പഴക്കംചെന്ന തോട്ടാപ്പുരയെ സംരക്ഷിച്ചിരുന്നത് കൂറ്റൻ ആൽമരത്തിന്‍റെ വേരുകളായിരുന്നു. ആൽമരം ഉണങ്ങിയതോടെ കെട്ടിടം തകർച്ചയുടെ വക്കിലായി. കഴിഞ്ഞദിവസത്തെ ശക്തമായ മഴയിൽ കെട്ടിടം പൂർണമായും ഇടിഞ്ഞുവീഴുകയായിരുന്നു. റാണി ലക്ഷ്മിഭായി തമ്പുരാട്ടിയുടെ കാലത്താണ് പീരുമേട്ടിൽ തോട്ടാപ്പുര നിർമിച്ചത്. ക്ഷേത്ര നിർമാണം, കെകെ റോഡ് നിർമാണം എന്നിവയ്ക്ക് ആവശ്യമുള്ള വെടിക്കോപ്പുകൾ സൂക്ഷിക്കുക എന്നതായിരുന്നു പ്രധാന ലക്ഷ്യം. കുമ്മായം ചേർത്ത മിശ്രിതമാണ് തോട്ടാപ്പുരയുടെ നിർമാണത്തിന് ഉപയോഗിച്ചത്. ജനവാസമില്ലാത്ത കാടായിരുന്ന പ്രദേശം തെരഞ്ഞെടുത്താണ് അന്ന് കെട്ടിടം പണികഴിപ്പിച്ചത്.സ്ഫോടകവസ്തുക്കളിൽ ഇടിമിന്നലിൽ ഏൽക്കാതിരിക്കാൻ മിന്നൽരക്ഷാകവചവും സ്ഥാപിച്ചിരുന്നു.

ഉമ്മൻ ചാണ്ടി അനുസ്മരണം

തൊടുപുഴ: ബ്ലോക്ക് കോണ്‍ഗ്രസ് കമ്മിറ്റിയുടെ നേതൃത്വത്തിൽ രാജീവ് ഭവനിൽ ഉമ്മൻചാണ്ടി അനുസ്മരണം നടത്തി. ഡിസിസി പ്രസിഡന്‍റ് സി.പി. മാത്യു ഉദ്ഘാടനം ചെയ്തു. ബ്ലോക്ക് കോണ്‍ഗ്രസ് കമ്മിറ്റി പ്രസിഡന്‍റ് ഷിബിലി സാഹിബ് അധ്യക്ഷത വഹിച്ചു. കെപിസിസി ജനറൽ സെക്രട്ടറി എസ്. അശോകൻ , ടി.ജെ.പീറ്റർ, ജോയി മൈലാടി, ജാഫർഖാൻ മുഹമ്മദ്, കെ.ജി. സജിമോൻ, പി.വി.അച്ചാമ്മ, സി.എസ്. മഹേഷ്, ബ്ലോക്ക് പഞ്ചായത്ത് പ്രസിഡന്‍റ് സുനി സാബു, റോബിൻ മൈലാടി എന്നിവർ പ്രസംഗിച്ചു. തൊടുപുഴ: മുനിസിപ്പൽ വൃദ്ധസദനത്തിൽ കോണ്‍ഗ്രസ് മുനിസിപ്പൽ ഈസ്റ്റ് മണ്ഡലം കമ്മിറ്റി നടത്തിയ ഉമ്മൻചാണ്ടി അനുസ്മരണം മുൻ ഡിസിസി പ്രസിഡന്‍റ് റോയ് കെ. പൗലോസ് ഉദ്ഘാടനം ചെയ്തു. മണ്ഡലം പ്രസിഡന്‍റ് എം.എച്ച്.സജീവ് അധ്യക്ഷത വഹിച്ചു. മുനിസിപ്പൽ ചെയർമാൻ കെ. ദീപക് മുഖ്യപ്രഭാഷണം നടത്തി. ടി.ജെ. പീറ്റർ, ചാർളി ആന്‍റണി, ജാഫർ ഖാൻ മുഹമ്മദ്, രാജു ഓടയ്ക്കൽ, ജോർജ് തന്നിക്കൽ, വി.ജി. സന്തോഷ് കുമാർ, കെ.എം. ഷാജഹാൻ, ജോർജ് ജോണ്‍, ടോണി തോമസ്, നിതിൻ ലൂക്കോസ് എന്നിവർ പ്രസംഗിച്ചു.

ചിലവ്-മാരാന്പാറ റോഡ്: ആരോപണം അടിസ്ഥാനരഹിതമെന്ന്

തൊടുപുഴ: ഇളംദേശം ബ്ലോക്ക് പഞ്ചായത്ത് പരിധിയിൽ ആലക്കോട് പഞ്ചായത്തിന്‍റെ ആസ്തി രജിസ്റ്ററിലുള്ള ചിലവ്-മാരാന്പാറ റോഡ് നിർമാണത്തിൽ ത്രിതല പഞ്ചായത്തുകൾ അനാസ്ഥ കാണിക്കുന്നതായ ആരോപണം അടിസ്ഥാനരഹിതമാണെന്ന് ബ്ലോക്ക് പഞ്ചായത്ത് പ്രസിഡന്‍റ് ടോമി കാവാലം, ബ്ലോക്ക് ഡിവിഷനംഗം മാത്യു കെ. ജോണ്‍, വാർഡംഗം ജാൻസി മാത്യു എന്നിവർ അറിയിച്ചു. റോഡ് സഞ്ചാരയോഗ്യമല്ലാതായതോടെ ത്രിതല പഞ്ചായത്തംഗങ്ങൾ ഇടപെട്ട് നിർമാണത്തിന് ഫണ്ട് അനുവദിച്ചിരുന്നു. പി.ജെ. ജോസഫ് എംഎൽഎ 20 ലക്ഷവും ബ്ലോക്ക് പഞ്ചായത്ത് 10 ലക്ഷവും ആലക്കോട് പഞ്ചായത്ത് 13 ലക്ഷവും വീതം അനുവദിച്ച തുക ഉപയോഗിച്ച് റോഡിന്‍റെ ഭൂരിഭാഗം ജോലികളും പൂർത്തിയാക്കിയിരുന്നു. ശേഷിക്കുന്ന ഭാഗത്തെ നിർമാണത്തിനായി ജില്ലാ പഞ്ചായത്തംഗം പ്രഫ. എം.ജെ. ജേക്കബ് 10 ലക്ഷവുംകൂടി അനുവദിച്ച് പ്രവൃത്തി ടെൻഡർ ചെയ്തിട്ടുള്ളതാണ്. കാലാവസ്ഥ പ്രതികൂലമായതിനാലാണ് കരാറുകാരൻ നിർമാണം തുടങ്ങാൻ താമസിക്കുന്നത്. റോഡ് പൊതുമരാമത്ത് വകുപ്പ് ഏറ്റെടുക്കണമെന്നാവശ്യപ്പെട്ട് ബ്ലോക്ക് പഞ്ചായത്ത് ഭരണസമിതി പ്രമേയം പാസാക്കി പൊതുമരാമത്ത് മന്ത്രിക്കും തദ്ദേശവകുപ്പ് മന്ത്രിക്കും എംപി, എംഎൽഎ, പൊതുമരാമത്ത് വകുപ്പ് അസി. എക്സിക്യൂട്ടീവ് എൻജിനിയർ എന്നിവർക്കും കത്ത് നൽകിയിട്ടുള്ളതാണ്. കാലാവസ്ഥ അനുകൂലമാകുന്നതോടെ റോഡിന്‍റെ നിർമാണ ജോലി ആരംഭിക്കുമെന്ന് ബ്ലോക്ക് ഡിവിഷൻ മെംബർ മാത്യു കെ. ജോണ്‍ അറിയിച്ചു.

തെരുവുവിളക്കുകൾ മിഴിയടച്ചു

കാഞ്ഞാർ: കുടയത്തൂർ മങ്കൊന്പുകാവിന് മുന്നിലൂടെ ഗവ. ന്യൂ എൽപി സ്കൂളിനു സമീപത്തേക്കുള്ള റോഡിലെ വഴിവിളക്കുകൾ തെളിയുന്നില്ലെന്ന് പരാതി. നിരവധി വീടുകളുള്ള ഈ ഭാഗത്ത് വഴിവിളക്കുകൾ പ്രകാശിക്കാതായിട്ട് നാളുകളായി. ഗുണനിലവാരം കുറഞ്ഞ ലൈറ്റുകളാണ് പലപ്പോഴും സ്ഥാപിക്കുന്നത്. ഇതാണ് ലൈറ്റുകൾ പെട്ടെന്ന് തകരാറിലാകാൻ കാരണം. മലങ്കര ജലസംഭരണിയോട് ചേർന്നാണ് റോഡ് കടന്നുപോകുന്നത്. അതിനാൽ ഈ ഭാഗങ്ങളിൽ ഇഴജന്തുക്കളുടെ ശല്യം രൂക്ഷമാണ്. തെരുവുവിളക്കുകൾ പ്രകാശിക്കാതായതോടെ നാട്ടുകാർ ഭീതിയോടെയാണ് ഇതുവഴി സഞ്ചരിക്കുന്നത്. തകരാറിലായ വൈദ്യുതി വിളക്കുകൾ മാറ്റി ഗുണനിലവാരമുള്ളവ സ്ഥാപിച്ച് ഇവിടെ വെളിച്ചമെത്തിക്കണമെന്ന് നാട്ടുകാർ ആവശ്യപ്പെട്ടു.

അനധികൃതമായി മണ്ണ് കടത്തിയ ലോറി കസ്റ്റഡിയിലെടുത്തു

ശാന്തൻപാറ: അനധികൃതമായി മണ്ണ് കടത്തിയ ലോറി കസ്റ്റഡിയിലെടുത്തു. ശാന്തൻപാറ പോലീസാണ് ലോറി പിടികൂടിയത്.കഴിഞ്ഞ രാത്രി കരമണ്ണ് കടത്തിയ ലോറി ശാന്തൻപാറ ഭാഗത്തുനിന്നാണ് എസ്ഐ ഹാഷിം കസ്റ്റഡിയിലെടുത്തത്. പിടിച്ചെടുത്ത ലോറി ജില്ലാ കളക്ടർക്ക് കൈമാറി.

റോഡ് ഉപരോധിച്ചു

രാജാക്കാട്: ഐഎൻടിയുസി ഡ്രൈവേഴ്സ് യൂണിയൻ രാജാക്കാട് യൂണിറ്റിന്‍റെ നേതൃത്വത്തിൽ റോഡ് ഉപരോധിച്ചു. രാജാക്കാട് ടൗണിനു സമീപം മലയോര ഹൈവേയുടെ ഭാഗമായ റോഡിന്‍റെ വശമിടിഞ്ഞിട്ട് ഒരു വർഷമായിട്ടും നന്നാക്കാത്തതിൽ പ്രതിഷേധിച്ചായിരുന്നു സമരം. ചെമ്മണ്ണാർ ഗ്യാപ് റോഡിൽ രാജാക്കാട് ടൗണിനു സമീപം കളിയിക്കൽ പടിയിൽ റോഡ് വശമിടിഞ്ഞ് അപകടാവസ്ഥയിലായിട്ട് ഒരു വർഷം പിന്നിടുമ്പോഴും സംരക്ഷണഭിത്തി നിര്‍മിച്ച് റോഡ് ഗതാഗതയോഗ്യമാക്കാന്‍ നടപടി ഉണ്ടായിട്ടില്ല. റോഡിന്‍റെ ബാക്കി ഭാഗത്തും വിള്ളല്‍ രൂപപ്പെട്ടിട്ടുണ്ട്. മഴ ശക്തമാകുന്നതോടെ റോഡ് പൂര്‍ണമായി ഇടിഞ്ഞുതാഴാനുള്ള സാധ്യതയും നിലനില്‍ക്കുന്നു.ദിവസേന നൂറുകണക്കിനു വിനോദസഞ്ചാരികളും സ്കൂള്‍ ബസുകളും ഇതര വാഹനങ്ങളും കടുന്നുപോകുന്ന ജില്ലയിലെ പ്രധാന റോഡാണ് അധികൃതരുടെ അനാസ്ഥയില്‍ അപകടക്കെണിയായി മാറിയിരിക്കുന്നത്. ടൗണിൽനിന്നു പ്രകടനമായി എത്തിയ പ്രവർത്തകർ അരമണിക്കൂറോളം റോഡ് ഉപരോധിച്ചു.ഐഎൻടിയുസി ജില്ലാ ജനറൽ സെക്രട്ടറി ജോഷി കന്യാക്കുഴി ഉപരോധ സമരം ഉദ്ഘാടനം ചെയ്‌തു. സമരത്തെത്തുടർന്ന് ഗതാഗതം തടസപ്പെട്ടതോടെ രാജാക്കാട് പോലീസ് പ്രവർത്തകരെ ബലം പ്രയോഗിച്ചു മാറ്റി. ഭാരവാഹികളായ അജി കാട്ടുമന,ജേക്കബ് മച്ചാനിക്കൽ, അനീഷ് പുത്തൻപുരയ്ക്കൽ, ബിനു ഊന്നാരംകല്ലേൽ, അലിയാർ, ഷിനോ കന്യാക്കുഴിയിൽ, സി.ഐ ജോർജ് എന്നിവർ നേതൃത്വം നൽകി.

വിദ്യാരംഗം കലാസാഹിത്യവേദി ഉദ്ഘാടനം

ഏഴല്ലൂർ: സെന്‍റ് സെബാസ്റ്റ്യൻസ് യുപി സ്കൂളിൽ വിദ്യാരംഗം കലാസാഹിത്യവേദിയുടെ പ്രവർത്തനോദ്ഘാടനവും ലഹരിവിരുദ്ധ ബോധവത്കരണ ക്ലാസും നടത്തി. സാജൻ ചിമ്മിണിക്കാട്ട് അധ്യക്ഷത വഹിച്ചു. പൂർവ വിദ്യാർഥിയും സൗണ്ട് എൻജിനിയറുമായ ബേബിച്ചൻ പോൾ ഉദ്ഘാടനം ചെയ്തു. തൊടുപുഴ സബ് ഇൻസ്പെക്ടർ വി.എ. ബിജു ക്ലാസ് നയിച്ചു.പ്രധാനാധ്യാപിക സൗമ്യ എസ്. നെടുങ്ങാട്ട്, പിടിഎ പ്രസിഡന്‍റ് ജോർജ് തണ്ടേൽ, സ്കൂൾ വിദ്യാരംഗം ക്ലബ് കോ-ഓർഡിനേറ്റർ റിയ മാത്യു എന്നിവർ പ്രസംഗിച്ചു.

ചെക്ക് കേസ്: പ്രതിയെ വെറുതേവിട്ടു

തൊടുപുഴ: കടം വാങ്ങിയ എട്ടു ലക്ഷം രൂപ തിരികെ ചോദിച്ചപ്പോൾ തൊടുപുഴ ഐഡിബിഐ ബാങ്കിന്‍റെ എട്ടുലക്ഷം രൂപയുടെ വണ്ടിച്ചെക്ക് നൽകി കബളിപ്പിച്ചുവെന്ന് ആരോപിച്ച് കുമാരമംഗലം സ്വദേശി രജീഷിനെതിരേ കരിങ്കുന്നം സ്വദേശി മഠത്തുംകാട്ടിൽ മോഹനൻ തൊടുപുഴ മജിസ്ട്രേറ്റ് കോടതിയിൽ ഫയൽ ചെയ്ത കേസിൽ പ്രതി കുറ്റക്കാരനല്ലെന്ന് കണ്ട് തൊടുപുഴ ജുഡീഷൽ ഫസ്റ്റ് ക്ലാസ് മജിസ്ട്രേറ്റ് നിമിഷ അരുണ്‍ വെറുതേവിട്ടു. വാദി പണം പലിശയ്ക്ക് കൊടുക്കുന്ന ആളാണെന്നും ബ്ലാങ്ക് ചെക്ക് ദുരുപയോഗം ചെയ്ത് ഫയൽ ചെയ്തിട്ടുള്ള കള്ളക്കേസാണെന്നുമുള്ള പ്രതിഭാഗം വാദം പരിഗണിച്ചാണ് വെറുതേവിട്ടത്. പ്രതിക്കുവേണ്ടി അഭിഭാഷകരായ ബിജു പറയന്നിലം, ജെറിൻ തോമസ്, ഡെൽവിൻ പറയന്നിലം എന്നിവർ ഹാജരായി.

സഹോദരനെ തേടി ഈശ്വർ മുർമു സ്നേഹമന്ദിരത്തിൽ

ചെറുതോണി: അടിമാലി പ്രദേശത്തുകൂടി അലഞ്ഞുനടന്നിരുന്ന ഈശ്വർ മുർമുവിനെ അടിമാലി പോലീസ് പടമുഖം സ്നേഹമന്ദിരത്തിലെത്തിച്ചു. മാനസികാസ്വാസ്ഥ്യം പ്രകടിപ്പിക്കുന്ന ഏകദേശം 40 വയസ് പ്രായം തോന്നിക്കുന്ന ഈശ്വർ മുർമു സ്നേഹമന്ദിരത്തിലെത്തുമ്പോൾ തീർത്തും അവശനിലയിലായിരുന്നു. കാലിനു സാരമായ പരിക്കുണ്ട്. ജാർബണ്ഡ് സ്വദേശിയാണന്ന് കരുതുന്നു. ഹിന്ദിയാണ് സംസാരിക്കുന്നത്.നാടിനെക്കുറിച്ചോ വീടിനെക്കുറിച്ചോ വ്യക്തതയില്ല. അടിമാലിയിലെ ബസ് സ്റ്റോപ്പുകളിലും കടത്തിണ്ണയിലുമാണ് നാളുകളായി അന്തിയുറങ്ങിയിരുന്നത്. നാട്ടുകാർ പോലീസിൽ അറിയിച്ചതിനെത്തുടർന്ന് അടിമാലി പോലീസ് ഇയാളെ സ്നേഹമന്ദിരത്തിൽ എത്തിക്കുകയായിരുന്നു. സ്നേഹമന്ദിരം ഡയറക്ടർ വി.സി.രാജു യുവാവിനെ ഏറ്റെടുത്തു. ഈശ്വറിന്‍റെ സഹോദരൻ കട്ടപ്പന പ്രദേശത്തുണ്ടെന്നു പറയപ്പെടുന്നു. ഇയാളെക്കുറിച്ച് എന്തെങ്കിലും വിവരങ്ങൾ അറിയുന്നവർ സ്നേഹമന്ദിരവുമായി ബന്ധപ്പെടണമെന്ന് ഡയറക്ടർ വി.സി. രാജു അറിയിച്ചു. ഫോൺ : 9447463933, 9744287214.

ട്രാവലറിനു മുകളിൽ മരം വീണു

തൊടുപുഴ: കാറ്റിലും മഴയിലും പാതയോരത്തു നിന്നിരുന്ന മരം ഒടിഞ്ഞ് ട്രാവലറിനു മുകളിലേയ്ക്ക് വീണു. തൊടുപുഴ കോതായിക്കുന്ന് ബൈപാസിൽ ഇന്നലെ രാവിലെ 6.15 ഓടെയായിരുന്നു സംഭവം. മരം ഒടിഞ്ഞ് വൈദ്യുതി ലൈനിലേക്കും വാഹനത്തിനു മുകളിലേക്കും വീഴുകയായിരുന്നു. വാഹനത്തിന്‍റെ ചില്ലിനു കേടുപാടു സംഭവിച്ചു. തൊടുപുഴ അഗ്നിരക്ഷാ സേനയെത്തി മരം വെട്ടി നീക്കിയ ശേഷമാണ് വാഹനം മാറ്റി ഗതാഗതം പുനഃസ്ഥാപിച്ചത്.

ജില്ലയിൽ വീണ്ടും മഴ കനത്തു

തൊടുപുഴ: ജില്ലയിൽ ഇന്നലെ മുതൽ മഴ വീണ്ടും ശക്തി പ്രാപിച്ചു. കഴിഞ്ഞ ദിവസങ്ങളിൽ ഇടവിട്ടുള്ള മഴ ലഭിച്ചിരുന്നെങ്കിലും ഇന്നലെ മുതൽ കനത്ത മഴയാണ് ജില്ലയുടെ വിവിധ മേഖലകളിൽ ലഭിച്ചത്. ഇന്നലെ ജില്ലയിൽ കാലാവസ്ഥാവകുപ്പ് ഓറഞ്ച് അലർട്ട് പ്രഖ്യാപിച്ചിരുന്നു. തൊടുപുഴ ഉൾപ്പെടെ ലോറേഞ്ച് മേഖലകളിൽ ഇടവേളയില്ലാതെ ശക്തമായ മഴയാണ് പെയ്തത്. ഹൈറേഞ്ചിന്‍റെ വിവിധ ഭാഗങ്ങളിലും ഇടവിട്ട് ശക്തമായ മഴ ലഭിച്ചു. കാര്യമായ കെടുതികൾ ഇന്നലെ റിപ്പോർട്ട് ചെയ്തിട്ടില്ലെങ്കിലും കനത്ത മഴ തുടരുന്നതിനാൽ പല പ്രദേശങ്ങളിലും ആശങ്ക നിലനിൽക്കുന്നുണ്ട്. ജില്ലയിൽ ഇന്നു മുതൽ 19 വരെ യെലോ അലർട്ടുണ്ട്. ഒറ്റപ്പെട്ട ശക്തമായ മഴ തുടരുമെന്നാണ് കാലാവസ്ഥാ പ്രവചനം. മഴയ്ക്കൊപ്പം കാറ്റിനും സാധ്യതയുണ്ട്. ഈ സാഹചര്യത്തിൽ ജനങ്ങൾ ജാഗ്രത പാലിക്കണമെന്ന് നിർദേശമുണ്ട്. ജൂണ്‍ ഒന്നു മുതൽ ഇന്നലെ രാവിലെ വരെ ജില്ലയിൽ 738.6 മില്ലിമീറ്റർ മഴയാണ് ലഭിച്ചത്. സാധാരണ ലഭിക്കാറുള്ളത് 1149 മില്ലിമീറ്ററാണ്. കാലവർഷത്തിൽ നിലവിൽ 36 ശതമാനം മഴക്കുറവാണ് രേഖപ്പെടുത്തിയത്. കാറ്റും മഴയും ശക്തമായതോടെ വൈദ്യുതി മുടക്കവും പതിവായിട്ടുണ്ട്. മരങ്ങൾ ലൈനിൽ വീണാണ് കൂടുതലായും വൈദ്യുതിത്തകരാറുകൾ സംഭവിക്കുന്നത്. കഴിഞ്ഞ ദിവസം വിവിധ മേഖലകളിൽ വൈദ്യുതി മുടങ്ങിയിരുന്നു. എന്നാൽ വൈദ്യുതി മുടങ്ങുന്നതോടെ ഉപഭോക്താക്കൾ കെഎസ്ഇബി ഓഫീസിൽ വിളിച്ചു പറയുമെങ്കിലും സമയബന്ധിതമായി തകരാർ പരിഹരിക്കുന്നില്ലെന്ന് പരാതി ഉയരുന്നുണ്ട്. പരാതി ലഭിച്ചാലും കെഎസ്ഇബി അധികൃതർ എത്തുന്നത് ഏറെ സമയം കഴിഞ്ഞായിരിക്കും. ചിലപ്പോൾ അടുത്ത ദിവസമായിരിക്കും ഇവർ എത്തുക. എന്നാൽ ജീവനക്കാരുടെ കുറവു മൂലമാണ് തകരാർ പരിഹരിക്കൽ വൈകുന്നതെന്നാണ് കെഎസ്ഇബിയുടെ വിശദീകരണം.

കരിങ്കല്ല് ഉത്പന്നങ്ങളുമായി തമിഴ്നാട്ടിൽനിന്നു വരുന്ന വാഹനങ്ങൾ തടഞ്ഞുനിർത്തി ഗുണ്ടാപ്പിരിവെന്ന് പരാതി

നെടുങ്കണ്ടം: തമിഴ്നാട്ടിൽനിന്നു കരിങ്കല്ല് ഉത്പന്നങ്ങളുമായി വരുന്ന കേരള രജിസ്ട്രേഷൻ വാഹനങ്ങൾ തടഞ്ഞുനിർത്തി ഗുണ്ടാ പിരിവെന്ന് പരാതി. ഹൈറേഞ്ചിൽ നിലവിൽ ക്വാറികൾ പ്രവർത്തിക്കുന്നില്ലാത്തിനാൽ തമിഴ്നാട്ടിലെ ക്വാറികളെ ആശ്രയിച്ചാണ് ഇവിടെ നിർമാണപ്രവർത്തങ്ങൾ നടക്കുന്നത്. നൂറിലധികം കേരള രജിസ്ട്രേഷൻ വാഹനങ്ങൾ മേഖലയിൽ സർവീസ് നടത്തുന്നുണ്ട്. ഇവ കൂടാതെ തമിഴ്നാട്ടിൽനിന്നുള്ള വാഹനങ്ങളും ഉണ്ട്. അംഗീകൃത പാസും എല്ലാവിധ രേഖകളുമായി ലോഡ് എടുക്കുന്ന കേരള രജിസ്ട്രേഷൻ വാഹനങ്ങളാണ് കൊള്ളയടിപ്പിക്കപ്പെടുന്നത്. ഒരു ലോഡിന് 3000 മുതൽ 5000 രൂപ വരെ ആവശ്യപ്പെട്ടാണ് ഉദ്യോഗസ്ഥർ എന്ന വ്യാജേന ഗുണ്ടാസംഘം പിരിവ് നടത്തുന്നത് .കമ്പംമെട്ട്, ബോഡിമെട്ട്, കുമളി പാതകളിലൂടെ അതിർത്തി കടക്കുന്ന വാഹനങ്ങൾ തടയുന്നുണ്ട്. കേരളത്തിൽനിന്നുള്ള വാഹനങ്ങൾ അംഗീകൃത പാസുമായി സർവീസ് നടത്തുമ്പോൾ തമിഴ്നാട് വാഹനങ്ങളിൽ പലതിനും പാസ് ഉണ്ടാവാറില്ല. കേരളത്തിലെ ചെക്ക് പോസ്റ്റുകളിൽ ഇവരുടെ വാഹനങ്ങൾ പരിശോധിക്കാത്തതിനാൽ നടപടിയും ഉണ്ടാകുന്നില്ല. ഏതെങ്കിലും വാഹനം കേരള ചെക്ക് പോസ്റ്റിൽ തടഞ്ഞാൽ ഉപരോധം അടക്കമുള്ള സമരങ്ങൾ നടത്തി വാഹനങ്ങൾ കൊണ്ടുപോവുകയാണ് പതിവ്. പാസ് സംവിധാനത്തെ തടസപ്പെടുത്തി മുഴുവൻ വാഹനങ്ങളും അനധികൃതമായി ലോഡ് കടത്താനുള്ള നീക്കമാണ് തമിഴ്നാട് കേന്ദ്രീകരിച്ചു നടത്തുന്നതെന്നാണ് സൂചന. വിഷയത്തിൽ ഇടുക്കി, തേനി കളക്ടർമാർ ഇടപെട്ട് പരിഹാരം കണ്ടെത്തണമെന്നാണ് ആവശ്യം. കേരളത്തിൽനിന്നുള്ള വാഹങ്ങൾക്കു നേരെ ആക്രമണങ്ങളും നടക്കുന്നതായി പരാതി ഉണ്ട്. ഓടിക്കൊണ്ടിരിക്കുന്ന വാഹനങ്ങൾക്കു നേരേ കല്ല് എറിയുന്നതടക്കമുള്ള ആക്രമണങ്ങൾ ഉണ്ടായിട്ടുള്ളതിനാൽ ഡ്രൈവർമാരും ആശങ്കയിലാണ്.

ദേശീയപാത വികസനത്തിൽ സർക്കാർ നടപടി സ്വീകരിക്കണം: ബിജെപി

തൊടുപുഴ: ദേശീയപാത-85ന്‍റെ ഭാഗമായ നേര്യമംഗലം-വാളറ റോഡിന്‍റെ വികസനപ്രവർത്തനം തടഞ്ഞ ഹൈക്കോടതി ഇടക്കാല ഉത്തരവിനെതിരേ റിവ്യുഹർജി നൽകി നിർമാണം പൂർത്തീകരിക്കാൻ ആവശ്യമായ നടപടി സ്വീകരിക്കണമെന്ന് ബിജെപി സംസ്ഥാന സെക്രട്ടറി അഡ്വ. പന്തളം പ്രതാപൻ പത്രസമ്മേളനത്തിൽ ആവശ്യപ്പെട്ടു. വികസനപ്രവർത്തനങ്ങൾക്ക് പാർട്ടി എതിരല്ല. ബിജെപിയുടെ മുൻ ജില്ലാ അധ്യക്ഷൻ എം.എൻ.ജയചന്ദ്രൻ ഹൈക്കോടതിയിൽ നൽകിയ ഹർജി സംബന്ധിച്ച് ജില്ലാ കമ്മിറ്റി സംസ്ഥാന കമ്മിറ്റിക്ക് റിപ്പോർട്ട് നൽകിയിട്ടുണ്ട്. അദ്ദേഹത്തിന്‍റെ ഭരണഘടനാപരമായ അവകാശത്തെ ചോദ്യം ചെയ്യാനാവില്ല. ഹൈക്കോടതിയെ കാര്യങ്ങൾ ബോധ്യപ്പെടുത്താൻ സർക്കാരിനുണ്ടായ വീഴ്ചയാണ് പാതയുടെ നിർമാണം നിർത്തിവയ്ക്കേണ്ട സാഹചര്യം സൃഷ്ടിച്ചത്. ഇതു ബന്ധപ്പെട്ട ഉദ്യോഗസ്ഥരുടെ ഭാഗത്തെ ഗുരുതരമായ വീഴ്ചയാണ്. നിർമാണം പൂർത്തീകരിക്കാൻ ദേശീയപാത അഥോറിറ്റിയും ആവശ്യമായ നടപടികൾ സ്വീകരിക്കണമെന്നും അദ്ദേഹം ആവശ്യപ്പെട്ടു. ബിജെപി നോർത്ത് ജില്ലാ പ്രസിഡന്‍റ് പി.പി.സാനു, വൈസ് പ്രസിഡന്‍റുമാരായ പി.ജി.രാജശേഖരൻ, കെ.പി.രാജേന്ദ്രൻ, മീഡിയ കണ്‍വീനർ ഗോപി പഴുക്കാകുളം എന്നിവരും പത്രസമ്മേളനത്തിൽ പങ്കെടുത്തു.

മാണി വിഭാഗവുമായി ചർച്ച നടത്തിയിട്ടില്ല: അപു ജോൺ ജോസഫ്

തൊടുപുഴ: കേരള കോണ്‍ഗ്രസ് മാണി വിഭാഗവുമായി യുഡിഎഫ് ചർച്ച നടത്തിയിട്ടില്ലെന്ന് കേരള കോണ്‍ഗ്രസ് സംസ്ഥാന കോ-ഓർഡിനേറ്റർ അപു ജോണ്‍ ജോസഫ്. യുഡിഎഫ് ജില്ലാ കമ്മിറ്റിയുടെ നേതൃത്വത്തിൽ സേവ്യേഴ്സ് ഹോമിൽ സംഘടിപ്പിച്ച മുൻ മുഖ്യമന്ത്രി ഉമ്മൻചാണ്ടിയുടെ രണ്ടാമത് അനുസ്മരണ സമ്മേളനത്തിൽ പങ്കെടുക്കാനെത്തിയ അദ്ദേഹം മാധ്യമങ്ങളോട് പ്രതികരിക്കുകയായിരുന്നു. മാണി വിഭാഗം യുഡിഎഫ് വിട്ടപ്പോഴുള്ള സാഹചര്യം ഇപ്പോഴും നിലനിൽക്കുകയാണ്. എൽഡിഎഫിൽ സന്തോഷവനാണെന്നു ജോസ് കെ.മാണിതന്നെ പറയുന്നു. യുഡിഎഫ് ശക്തിപ്പെടുത്തുന്ന തീരുമാനങ്ങളിൽ ജോസഫ് വിഭാഗത്തിന് എതിർപ്പില്ല. തൊടുപുഴയിൽ താൻ മത്സരിക്കുമോ എന്നത് പാർട്ടിയാണ് തീരുമാനിക്കേണ്ടതെന്നും അദ്ദേഹം പറഞ്ഞു.

പുരസ്കാര നിറവിൽ ജില്ലയിലെ ആയുഷ് കേന്ദ്രങ്ങൾ

ഇടുക്കി: പ്രഥമ സംസ്ഥാന ആയുഷ്, കായകൽപ് അവാർഡിന്‍റെ നിറവിൽ ജില്ലയിലെ പത്ത് ആയുഷ് സ്ഥാപനങ്ങൾ. ആയുഷ് ഹെൽത്ത് ആന്‍ഡ് വെൽനസ് സെന്‍ററുകളിൽ കുടയത്തൂർ ഗവ. ആയുർവേദ ഡിസ്പെൻസറിയും ഹോമിയോപ്പതി വിഭാഗത്തിൽ പഴയരിക്കണ്ടം ഗവ. ഹോമിയോപതി ഡിസ്പെൻസറിയും ജില്ലയിൽ ഒന്നാം സ്ഥാനം നേടി. ആലക്കോട്, വഴിത്തല, കോടിക്കുളം ആയുർവേദ ഡിസ്പെൻസറികൾക്കും ചുരുളി, ചില്ലിത്തോട്, കൊന്നത്തടി ഹോമിയോപതി ഡിസ്പെൻസറികൾക്കും 30,000 രൂപ വീതവും ജില്ലാ ഹോമിയോപ്പതി ആശുപത്രിക്ക് 1.5 ലക്ഷം രൂപയും പുഷ്പകണ്ടം സബ് ജില്ലാ ഹോമിയോപ്പതി ആശുപത്രിക്ക് ഒരു ലക്ഷം രൂപയും കമാൻഡേഷനായി പ്രഖ്യാപിച്ചു. ജില്ലയിലെ 18 ആയുഷ് ഹെൽത്ത് ആൻഡ് വെൽനസ് സ്ഥാപനങ്ങൾക്ക് എൻഎബിഎച്ച് അംഗീകാരം ലഭിക്കാനായി പ്രയത്നിച്ച 150 ജീവനക്കാരെ ആദരിച്ചു. ജില്ലാ കളക്ടർ വി. വിഗ്നേശ്വരി യോഗം ഉദ്ഘാടനം ചെയ്തു. ജില്ലാ ഹോമിയോപ്പതി വകുപ്പ് മേധാവി ഡോ. വിനീത ആർ.പുഷ്കരൻ അധ്യക്ഷത വഹിച്ചു. ജില്ലാ പ്രോഗ്രാം മാനേജർ ഡോ. കെ.എസ്. ശ്രീദർശൻ, ജില്ലാ പഞ്ചായത്ത് സ്റ്റാൻഡിംഗ് കമ്മിറ്റി ചെയർമാൻമാരായ കെ. ജി.സത്യൻ, എം. ഭവ്യ, ഡോ. കെ.കെ. ജീന, ഡോ.ഇ.കെ. ഖയസ്, ഡോ. എം.എസ്. നൗഷാദ് , വി.എസ്. പ്രവീണ്‍ വി.എസ് എന്നിവർ പ്രസംഗിച്ചു.

ഇ-മാലിന്യശേഖരണ പദ്ധതിക്ക് ജില്ലയിൽ തുടക്കം

തൊടുപുഴ: വീടുകളിൽനിന്നും സ്ഥാപനങ്ങളിൽനിന്നും ഇ-മാലിന്യങ്ങൾ ശേഖരിക്കുന്ന പദ്ധതി ജില്ലയിൽ ആരംഭിച്ചു. ആധുനിക കാലഘട്ടത്തിൽ വെല്ലുവിളിയാകുന്ന ഇ- മാലിന്യങ്ങൾ (ഇലക്‌ട്രോണിക് മാലിന്യം) വില നിശ്ചയിച്ചായിരിക്കും ശേഖരിക്കുക. ആദ്യഘട്ടത്തിൽ ഹരിതകർമസേനവഴി തൊടുപുഴ, കട്ടപ്പന നഗരസഭകളിലാണ് മാലിന്യം ശേഖരിക്കുക. ഇതിന്‍റെ ഭാഗമായി കഴിഞ്ഞ ദിവസം രണ്ടു നഗരസഭകളിലെയും ഹരിതകർമസേനാംഗങ്ങൾക്ക് പരിശീലനം നൽകി. 43 ഇനങ്ങളാണ് ശേഖരിക്കുന്നത്. ഫ്രിഡ്ജ്, ലാപ്ടോപ്പ്, എൽസിഡി, എൽഇഡി ടിവി, വാഷിംഗ് മെഷീൻ, സീലിംഗ് ഫാൻ, മെബൈൽ ഫോണ്‍, സ്വിച്ച് ബോർഡ്, എയർകണ്ടീഷണർ, മിക്സർ ഗ്രൈൻഡർ, ടേബിൾ ഫാൻ, കന്പ്യൂട്ടർ സിപിയു, മോണിറ്റർ, മൗസ്, കീ ബോർഡ്, മോഡം, എൽസിഡി മോണിറ്റർ, പ്രിന്‍റർ, ഫോട്ടോസ്റ്റാറ്റ് മെഷീൻ, അയണ്‍ബോക്സ്, മോട്ടോർ, ടെലിഫോണ്‍, റേഡിയോ, ഇലക്‌ട്രിക് കേബിൾ, ബാറ്ററി, ഇൻവർട്ടർ, യുപിഎസ്, സ്റ്റെബിലൈസർ, വാട്ടർ ഹീറ്റർ, വാട്ടർ കൂളർ, ഇൻഡക്ഷൻ കുക്കർ, മൈക്രോവേവ് ഓവൻ, എസ്എംപിഎസ്, ഹാർഡ് ഡിസ്ക്, സിഡി ഡ്രൈവ്, സ്പീക്കർ, ഹെഡ്ഫോണ്‍, പിസിബി ബോർഡ്, എമർജൻസി ലാംപ് എന്നിവ ശേഖരിക്കുന്നവയിൽ ഉൾപ്പെടും. ശേഖരിക്കുന്ന സാധനങ്ങളുടെ വില ഇനം തിരിച്ച് കണക്കാക്കി ഹരിതകർമസേന നൽകും. ഇതിനു പുറമേയുള്ളവ പലവക വിഭാഗത്തിൽപ്പെടുത്തി നിശ്ചിത തുക നൽകും. ക്ലീൻ കേരള കന്പനിയുമായി സഹകരിച്ചാണ് പദ്ധതി നടപ്പാക്കുന്നത്. ശുചിത്വമിഷൻ, തദ്ദേശ സ്ഥാപനങ്ങൾ, ഹരിതകർമസേന, കുടുംബശ്രീ, സ്കൂളുകൾ, കോളജുകൾ, റസിഡന്‍റ്സ് അസോസിയേഷനുകൾ, ഇലക്‌ട്രോണിക് റീട്ടെയിലർമാർ എന്നിവരും പദ്ധതിയുമായി സഹകരിക്കും. ശേഖരിക്കുന്ന മാലിന്യങ്ങൾ ക്ലീൻ കേരളയ്ക്ക് നൽകും. പുനഃചംക്രമണം ചെയ്യാൻ സാധിക്കുന്ന ഇ-മാലിന്യങ്ങൾക്ക് ക്ലീൻ കേരള കന്പനി നിശ്ചയിച്ച വിലയും ലഭിക്കും. വർഷത്തിൽ രണ്ട് തവണയാണ് ഇ-മാലിന്യ ശേഖരണം. ഈ മാസം 31 വരെ ആദ്യതവണത്തെ ശേഖരണമുണ്ടാകും. വാർഡുകളിൽനിന്നു ശേഖരിക്കുന്നവ ഏതെങ്കിലും ഒരു സെന്‍ററിൽ സംഭരിച്ച് സുരക്ഷിതമായി സൂക്ഷിക്കും. ഇത്തരത്തിൽ മൂന്നോ, നാലോ വാർഡുകൾ ചേർന്നതാകും ഒരു സെന്‍റർ. ഇവിടെനിന്ന് കന്പനി നേരിട്ടെത്തി ഇവ കൊണ്ടുപോകും. മുന്പും ഹരിതകർമസേന ഇ-മാലിന്യം ശേഖരിച്ചിരുന്നെങ്കിലും ഏറ്റെടുക്കാൻ ആരും വരാഞ്ഞതിനാൽ പദ്ധതി വിജയകരമായില്ല. എന്നാൽ ഇത്തവണ ക്ലീൻ കേരള ഏറ്റെടുക്കുന്നതിനാൽ അത്തരമൊരു പ്രശ്നമുണ്ടാകില്ല. ഇ-മാലിന്യങ്ങളിലുള്ള മാരകമായ ചില രാസ പദാർഥങ്ങൾ ജലാശയങ്ങളിലും മറ്റും കലരുന്നത് ഗുരുതരമായ ആരോഗ്യപ്രശ്നങ്ങൾക്കിടയാക്കിയിരുന്നു. ഇത്തരം പാരിസ്ഥിതിക പ്രശ്നങ്ങൾ ഒഴിവാക്കുകയെന്നതും പദ്ധതിയുടെ ലക്ഷ്യമാണ്.

ജാമ്യത്തിൽ ഇറങ്ങി മുങ്ങിയ പ്രതി പിടിയിൽ

ശാന്തൻപാറ: ഭാര്യയെ ഉപദ്രവിച്ച കേസിൽ അറസ്റ്റിലായി ജാമ്യത്തിൽ ഇറങ്ങി മുങ്ങിയ പ്രതി പിടിയിൽ. ഭാര്യയെ വാക്കത്തികൊണ്ട് ഉപദ്രവിച്ച കേസിൽ ജാമ്യത്തിൽ ഇറങ്ങി കോടതിയിൽ ഹാജരാകാതെ 13 വർഷമായി മുങ്ങിനടന്ന പ്രതിയെ ശാന്തൻപാറ പോലീസ് പിടികൂടി കോടതിയിൽ ഹാജരാക്കി. രാജകുമാരി മുട്ടുകാട് കൊങ്ങിണിസിറ്റി പവൻരാജി(52)നെയാണ് ശാന്തൻപാറ സി ഐ ശരലാലിന്‍റെ നിർദേശാനുസരണം ഗ്രേഡ് എസ്ഐ രാജ് നാരായണൻ, എഎസ്ഐ സുരേഷ്, സിവിൽ പോലീസ് ഓഫീസർമാരായ അനീഷ്, മഹേഷ് എന്നിവർ ഉൾപ്പെട്ട സ്ക്വാഡ് ഇന്ന് പുലർച്ചെ പിടികൂടിയത്.പ്രതിയെ കോടതിയിൽ ഹാജരാക്കി.

രണ്ടു മഹാപ്രളയം കണ്ട മുത്തശി യാത്രയായി

ചെറുതോണി: രണ്ട് മഹാപ്രളയങ്ങൾക്ക് സാക്ഷ്യം വഹിച്ച മുത്തശി യാത്രയായി. കഞ്ഞിക്കുഴി പഞ്ചായത്തിലെ ഏറ്റവും പ്രായം കൂടിയ വനിതയാണ് വിടവാങ്ങിയത്. ചേലച്ചുവട് പുത്തൂക്കുടിയിൽ പരേതനായ ശങ്കരൻ കുടിയുടെ ഭാര്യ കുട്ടിയമ്മ (108) യാണ് വിടവാങ്ങിയത്. 1917ൽ ജനിച്ച കുട്ടിയമ്മക്ക് 99ലെ (1924)വെള്ളപ്പൊക്കം നല്ല ഓർമയുണ്ടായിരുന്നു. 99ലെയും 2018ലെയും വെള്ളപ്പൊക്കം ഓർമിക്കുന്ന അപൂർവം വ്യക്തികളിലൊരാളായിരുന്നു കുട്ടിയമ്മ. ഇടയ്ക്കിടെ പ്രളയകാലത്തെ വിശേഷങ്ങൾ കുട്ടിയമ്മ പറയുമായിരുന്നെന്ന് മാധ്യമ പ്രവർത്തകൻ കൂടിയായ മകൻ ധനപാലൻ മങ്കുവ പറഞ്ഞു. കൊല്ലവർഷം 1099-ലെ വെള്ളപ്പൊക്കത്തിന്‍റെ 101-ാം വാർഷികമാണ് ഇന്ന്. പ്രളയകാലത്തെ ഓർമകളുമായി പ്രളയ വാർഷികത്തലേന്ന് കുട്ടിയമ്മ യാത്രയായി. 108 വയസുണ്ടെങ്കിലും ഒരാഴ്ച മുമ്പുവരെ പരസഹായമില്ലാതെ സ്വന്തം കാര്യങ്ങൾ നിർവഹിക്കുമായിരുന്നു. കോതമംഗലം തൃക്കാരിയൂർ സ്വദേശിനിയായ കുട്ടിയമ്മ ഹൈറേഞ്ചിലെത്തിയിട്ട് 80 വർഷങ്ങൾ കഴിഞ്ഞു. ഭർത്താവ് ശങ്കരൻകുട്ടി 40 വർഷം മുമ്പ് മരണമടഞ്ഞു.

ഭാര്യാമാതാവിനെ യുവാവ് തലയ്ക്കടിച്ച് കൊലപ്പെടുത്തി

മുക്കൂട്ടുതറ: വെച്ചൂച്ചിറയിൽ ഭാര്യാമാതാവിനെ യുവാവ് തലയ്ക്കടിച്ച് കൊലപ്പെടുത്തി. അഴുത കോളനിയിലെ താമസക്കാരി ഉഷാമണി (54) യാണ് കൊല്ലപ്പെട്ടത്. സംഭവവുമായി ബന്ധപ്പെട്ട് ഉഷയുടെ മരുമകൻ സുനിലിനെ വെച്ചൂച്ചിറ പോലീസ് കസ്റ്റഡിയിലെടുത്തു. കുടുംബപ്രശ്നമാണ് തർക്കത്തിലേക്കും കൊലപാതകത്തിലേക്കും നയിച്ചതെന്നാണ് പ്രാഥമികവിവരം. മൺവെട്ടി ഉപയോഗിച്ചാണ് കൊലപാതകം നടത്തിയത്. ഇന്നലെ ഉച്ചകഴിഞ്ഞ് മൂന്നോടെയാണ് സംഭവം. എരുമേലി എലിവാലിക്കര സ്വദേശിയായസുനിൽ നാലുവർഷ മായി ഭാര്യയുമായി അകന്നു കഴിയുകയായിരുന്നു. ഇരുവരും തമ്മിലുള്ള പ്രശ്നങ്ങളാണ് ഭാര്യാമാതാവിന്‍റെ കൊലപാതകത്തിലേക്ക് നയിച്ചതെന്ന് പോലീസ് പറയുന്നു. അമ്മ ഉഷയോടൊപ്പമാണ് ഭാര്യയും രണ്ടുമക്കളും കഴിഞ്ഞിരുന്നത്. ഇന്നലെ ഉച്ചയോടെ, കുട്ടികളെ കാണണമെന്ന ആവശ്യവുമായാണ് സുനിൽ ഉഷയുടെ വീട്ടിലെത്തിയത്. വൈകാതെ ഇരുവരും തമ്മിൽ വഴക്കായി. പിന്നാലെ സുനിൽ മൺവെട്ടികൊണ്ട് ഉഷയുടെ തലയ്ക്കടിക്കുകയായിരുന്നു. തലയ്ക്ക് മാരകമായി മുറിവേറ്റ് രക്തം വാർന്ന് മരിച്ച നിലയിൽ വീടിന്‍റെ പരിസരത്തുതന്നെയാണ് ഉഷയുടെ മൃതദേഹം കിടന്നത്. ഇവിടെനിന്നു മാറാൻ സുനിൽ തയാറായിരുന്നില്ലെന്ന് പരിസരവാസികൾ പറയുന്നു. തന്‍റെ സ്വത്തുക്കൾ ഉഷാമണി കൈക്കലാക്കിയെന്നും ഇവർ മരിക്കുന്നതാണ് നല്ലതെന്നും സുനിൽ പറഞ്ഞതായി നാട്ടുകാർ പറയുന്നു. പോലീസ് എത്തിയാണ് സുനിലിനെ സംഭവസ്ഥലത്തുനിന്നു കസ്റ്റഡിയിൽ എടുത്തത്. സംഭവം നടക്കുന്ന സമയത്ത് സുനിലിന്‍റെ ഭാര്യ ജോലിക്ക് പോയിരിക്കുകയായിരുന്നു.

കായികാധ്യാപകർ ധർണ നടത്തി

തൊടുപുഴ: കായിക മേഖലയിലെ പ്രശ്നങ്ങൾക്ക് ശാശ്വത പരിഹാരം കാണണമെന്ന് ആവശ്യപ്പെട്ട് കായികാധ്യാപകർ ജില്ലാ വിദ്യാഭ്യാസ ഓഫീസിനു മുന്നിൽ ധർണ നടത്തി. കായികാധ്യാപക സംരക്ഷണ ഉത്തരവ് പുനഃസ്ഥാപിക്കുക, നിയമന മാനദണ്ഡങ്ങൾ കാലോചിതവും ശാസ്ത്രീയവുമായി പരിഷ്കരിക്കുക, ഹയർ സെക്കൻഡറിയിൽ നിയമനം നടത്തുക, യോഗ്യത പരിഷ്കരിക്കുക, തുല്യ ജോലിക്ക് തുല്യവേതനം ഉറപ്പാക്കുക എന്നീ ആവശ്യങ്ങൾ ഉന്നയിച്ചായിരുന്നു സമരം. ഡിപിഇടിഎ സംസ്ഥാന വൈസ് പ്രസിഡന്‍റ് ഡോ.സജീവ് സി.നായർ അധ്യക്ഷത വഹിച്ചു. ദേശീയ കായികാധ്യാപക അവാർഡ് ജേതാവ് കെ.വി.ദേവസ്യ ഉദ്ഘാടനം ചെയ്തു. ജില്ലാ പ്രസിഡന്‍റ് ഇ.ജെ. ഫ്രാൻസിസ്, മുൻ സംസ്ഥാന പ്രസിഡന്‍റ് റെജി ഇട്ടൂപ്പ്, ജില്ലാ സ്പോർട്സ് കോ-ഓർഡിനേറ്റർ കെ.ജി. ബിജു, നോബിൾ ജോസ്, എം.എസ്.അജോ എന്നിവർ പ്രസംഗിച്ചു.

തപാൽ ജീവനക്കാരിയെ ശല്യം ചെയ്ത യുവാവ് അറസ്റ്റിൽ

തൊടുപുഴ: തപാൽ വകുപ്പ് ജീവനക്കാരിയെ അപമാനിക്കാൻ ശ്രമിച്ച കേസിൽ യുവാവിനെ പോലീസ് അറസ്റ്റ് ചെയ്തു. മടക്കത്താനം ഇലവുംതറയ്ക്കൽ ഷാബിൻ ഹനീഫ(36) യെയാണ് മണക്കാട് സ്വദേശിനിയായ യുവതിയുടെ പരാതിയിൽ തൊടുപുഴ പോലീസ് അറസ്റ്റ് ചെയ്തത്. ഇയാൾ നിരന്തരമായി യുവതിയെ ശല്യപ്പെടുത്തുകയും ലൈംഗികചുവയോടെ സംസാരിച്ചതായും പരാതിയിൽ പറയുന്നു. പലതവണ ഇയാൾക്ക് മുന്നറിയിപ്പ് നൽകിയിട്ടും ശല്യപ്പെടുത്തുന്നത് തുടർന്നതോടെയാണ് യുവതി പരാതി നൽകിയത്. യുവതിയുടെ പരാതിയിൽ കഴിഞ്ഞ ഏഴിന് ഷാബിനെതിരേ കേസടുത്തു. ചൊവ്വാഴ്ച ഇയാളുടെ അറസ്റ്റ് രേഖപ്പെടുത്തി ഇന്നലെ കോടതിയിൽ ഹാജരാക്കി റിമാൻഡ് ചെയ്തു.

മുള്ളരിങ്ങാട്ട് കാട്ടാന കൃഷി നശിപ്പിച്ചു

വണ്ണപ്പുറം: മുള്ളരിങ്ങാട് കാട്ടാനകൾ വീണ്ടും വ്യാപകമായി കൃഷി നശിപ്പിച്ചു. മുള്ളരിങ്ങാട് സെറ്റിൽമെന്‍റിലെ മോഹനൻ പുലിയനാനിക്കൽ, മൂത്താശേരിൽ ബാലകൃഷ്ണൻ, മുരിയ്ക്കനാനിക്കൽ മനോജ് എന്നിവരുടെ കൃഷിയിടത്തിലാണ് ആനയുടെ ആക്രമണം ഉണ്ടായത്. തെങ്ങ്, കമുക്, വാഴ, പ്ലാവ് ഉൾപ്പെടെയാണ് കാട്ടാനകൾ നശിപ്പിച്ചത്. ചൊവ്വാഴ്ച രാത്രി ഏഴോടെ കൃഷിയിടത്തിൽ എത്തിയ കാട്ടാനക്കൂട്ടം ഇന്നലെ പുലർച്ചെ നാലോടെയാണ് മടങ്ങിയത്. കാട്ടാനകൾ പുരയിടത്തിൽ എത്തുന്പോൾ വനംവകുപ്പ് അധികൃതരെ വിവരം അറിയിച്ചാലും ഇവർ എത്താറില്ലെന്ന് പ്രദേശവാസികൾ പറഞ്ഞു. സന്ധ്യ കഴിയുന്നതോടെ തലക്കോട്- വെള്ളക്കയം റോഡിൽ പതിവായി കാട്ടാനകൾ ഇറങ്ങുന്നത് മൂലം ഭീതിയോടെയാണ് നാട്ടുകാർ ഇതുവഴി സഞ്ചരിക്കുന്നത്.

ജീവനക്കാരില്ല; തൊടുപുഴ നഗരസഭാ ഭരണം പ്രതിസന്ധിയിൽ

തൊടുപുഴ: ജീവനക്കാരില്ലാത്തതു മൂലം തൊടുപുഴ നഗരസഭാ ഭരണം പ്രതിസന്ധിയിലായതോടെ അടിയന്തരമായി ഒഴിവുകൾ നികത്തണമെന്നാവശ്യപ്പെട്ട് ചെയർമാൻ കെ. ദീപക് തദ്ദേശ വകുപ്പ് മന്ത്രി, മുനിസിപ്പൽ ഡയറക്ടർ, അഡീഷണൽ ഡയറക്ടർ എന്നിവർക്ക് നിവേദനം നൽകി. നഗരസഭയുടെ നിരന്തരമായ ആവശ്യപ്രകാരം ഒരു അസിസ്റ്റന്‍റ് എൻജിനിയറെ നിയമിച്ചതായി ചെയർമാൻ അറിയിച്ചു. ഇദ്ദേഹം 21ന് ചാർജെടുക്കും. നഗരസഭയിൽ രണ്ട് ഫസ്റ്റ് ഗ്രേഡ് ഓവർസിയർമാരുടെയും രണ്ട് തേർഡ് ഗ്രേഡ് ഓവർസിയർമാരുടെയും ഒഴിവാണുള്ളത്. എൻജനിയർമാരുടെയും ഓവർസിയർമാരുടെയും തസ്തിക ഒഴിഞ്ഞുകിടക്കുന്നത് നഗരസഭയിലെ നിർമാണ പ്രവർത്തനങ്ങൾ പ്രതിസന്ധിയിലാക്കുന്നു. നഗരസഭ ആരോഗ്യ വിഭാഗത്തിലും ഉദ്യോഗസ്ഥരുടെ കുറവുണ്ട്. ഇതിനു പുറമേ അസിസ്റ്റന്‍റ് സെക്രട്ടറി, റവന്യു ഇൻസ്പെക്ടർ എന്നീ തസ്തികകളിലും ജീവനക്കാരില്ലാത്ത സ്ഥിതിയാണ്. പഞ്ചായത്തുകളിൽപോലും ഇത്തരത്തിലുള്ള തസ്തികകൾ ഒഴിവില്ലാത്തപ്പോഴാണ് ജില്ലയിൽ ഏറ്റവും കൂടുതൽ ജനസാന്ദ്രതയേറിയ നഗരസഭയായ തൊടുപുഴ ആവശ്യത്തിന് ഉദ്യോഗസ്ഥരുടെ കുറവുമൂലം വീർപ്പുമുട്ടുന്നത്. 1978-ലെ സ്റ്റാഫ് പാറ്റേണ്‍ ആണ് ഇപ്പോഴും നഗരസഭയ്ക്കുള്ളത്. 2015-ൽ തൊടുപുഴയെ ഒന്നാം ഗ്രേഡ് നഗരസഭയായി ഉയർത്തിയിരുന്നു. എന്നാൽ ഇതിന് ആനുപാതികമായ ജീവനക്കാരെ നഗരസഭയിൽ ഇതുവരെയും വിന്യസിച്ചിട്ടില്ല. ആരോഗ്യവിഭാഗത്തിലും ജനറൽ വിഭാഗത്തിലും നിലവിലുള്ള ഒഴിവുകൾ അടിയന്തരമായി നികത്തണമെന്ന് നിവേദനത്തിൽ ആവശ്യപ്പെട്ടെന്നും എത്രയും വേഗം നടപടി ഉണ്ടാകുമെന്ന് അധികൃതർ ഉറപ്പ് നൽകിയതായും ചെയർമാൻ അറിയിച്ചു.

ദൃശ്യവിരുന്നായി ശ്രീലങ്കൻ നൃത്താവിഷ്കാരം

തൊടുപുഴ: ശ്രീലങ്കൻ സംസ്കാരം പ്രചരിപ്പിക്കുന്നതിന്‍റെ ഭാഗമായി തൊടുപുഴ വെങ്ങല്ലൂർ ടിഎംയുപി സ്കൂളിൽ ശ്രീലങ്കയിൽ നിന്നെത്തിയ കലാസംഘം നൃത്തവിരുന്ന് അവതരിപ്പിച്ചു. തൊടുപുഴ മർച്ചന്‍റ്സ് അസോസിയേഷനും മൂവാറ്റുപുഴ സൈറക്സ് എഡ്യൂക്കേഷനും ചേർന്നാണ് പരിപാടി സംഘടിപ്പിച്ചത്. മർച്ചന്‍റ്സ് അസോസിയേഷൻ പ്രസിഡന്‍റ് രാജു തരണിയിൽ ഉദ്ഘാടനം ചെയ്തു. സ്കൂൾ പ്രധാനാധ്യാപിക എം.ആർ. സ്വപ്ന, സൈറസ് എഡ്യുക്കേഷൻ ഡയറക്ടർ അരുണ്‍ രാധാകൃഷ്ണ, മർച്ചന്‍റ്സ് അസോസിയേഷൻ ജനറൽ സെക്രട്ടറി സി.കെ.നവാസ്, വൈസ് പ്രസിഡന്‍റ് കെ.പി.ശിവദാസ്, സെക്രട്ടറി ലിജോണ്‍സ് ഹിന്ദുസ്ഥാൻ എന്നിവർ പ്രസംഗിച്ചു.

റീൽസ് കണ്ടിട്ടെങ്കിലും അധികൃതർ കണ്ണുതുറക്കുമോ?

തൊടുപുഴ: പന്ത്രണ്ടു വർഷമായി തകർന്നുകിടക്കുന്ന റോഡ് അറ്റകുറ്റപ്പണി നടത്തി ഗതാഗത യോഗ്യമാക്കാത്തതിനെത്തുടർന്ന് വ്യത്യസ്ത സമരമുറയുമായി നാട്ടുകാർ രംഗത്ത്. കുണ്ടും കുഴിയുമായി കിടക്കുന്ന റോഡിൽ റീൽസ് ചിത്രീകരിച്ച് ഇതു സമൂഹമാധ്യമ പേജുകളിൽ പോസ്റ്റു ചെയ്താണ് ഇവരുടെ വ്യത്യസ്തമായ പ്രതിഷേധം. നൂറുകണക്കിന് കുടുംബങ്ങൾ യാത്രചെയ്യുന്ന ചിലവ്-മാരാംപാറ റോഡിന്‍റെ ദുരവസ്ഥയ്ക്കു പരിഹാരം കാണണമെന്നാവശ്യപ്പെട്ടാണ് റീൽസ് ചിത്രീകരണം. ആലക്കോട്, കരിമണ്ണൂർ പഞ്ചായത്തുകളിലൂടെയാണ് റോഡ് കടന്നുപോകുന്നത്. വർഷങ്ങൾക്കു മുന്പ് പൊതുമരാമത്ത് വകുപ്പിനു കീഴിലായിരുന്ന റോഡ് പിന്നീട് ആലക്കോട് പഞ്ചായത്തിന്‍റെ ആസ്തി രജിസ്റ്ററിൽ ഉൾപ്പെടുത്തി. പന്ത്രണ്ടു വർഷം മുന്പ് പിഡബ്ല്യുഡി റോഡിൽ ടാറിംഗ് നടത്തിയതിനു ശേഷം ഇതുവരെ നിർമാണ ജോലികൾ ഒന്നും പൂർണമായി നടത്തിയിട്ടില്ല. ഇതിനിടെ എംഎൽഎ ഫണ്ടിൽനിന്ന് 24 ലക്ഷവും ബ്ലോക്ക് പഞ്ചായത്തിന്‍റെ 10 ലക്ഷവും വിനിയോഗിച്ച് 2023-ൽ 900 മീറ്റർ ടാറിംഗ് നടത്തി. ബാക്കിവരുന്ന ഒരു കിലോമീറ്ററോളം ദൂരമാണ് പൂർണമായും തകർന്നുകിടക്കുന്നത്. മാരാംപാറ മുതൽ ഓലിക്കാമറ്റം ജംഗ്ഷൻ വരെയുള്ള 1.55 കിലോമീറ്റർ ദൂരവും തകർന്ന നിലയിലാണ്. വെള്ളിയാമറ്റം, അറക്കുളം, ആലക്കോട് പഞ്ചായത്തുകളിൽനിന്നുള്ളവർക്ക് തൊടുപുഴയിൽ എത്താതെ കരിമണ്ണൂർ, ഉടുന്പന്നൂർ , വണ്ണപ്പുറം ഭാഗത്തേക്ക് എത്താനുള്ള എളുപ്പവഴിയാണ് ഇത്. അഞ്ഞൂറോളം കുട്ടികളും 13 സ്കൂൾ വാഹനങ്ങളും നൂറുകണക്കിന് യാത്രക്കാരും വാഹനങ്ങളും ദിനംപ്രതി ഇതുവഴി സഞ്ചരിക്കുന്നുണ്ട്. റോഡ് പൊതുമരാമത്ത് വകുപ്പ് ഏറ്റെടുത്ത് ബിഎംബിസി നിലവാരത്തിൽ നിർമിക്കണമെന്നും ഐറിഷ് ഓട നിർമിക്കണമെന്നുമാണ് നാട്ടുകാരുടെ ആവശ്യം. റോഡിന്‍റെ ശോച്യാവസ്ഥ ചൂണ്ടിക്കാട്ടി നിരവധി നിവേദനങ്ങൾ അധികൃതർക്ക് നൽകിയിട്ടും നടപടിയുണ്ടായിട്ടില്ലെന്ന് ചിലവ് ക്രിസ്തുരാജ് പള്ളി വികാരി ഫാ. ജോസഫ് താന്നിക്കൽ പറഞ്ഞു. ഇതേത്തുടർന്നാണ് ഇടവക പരിധിയിലെ റോഡിന്‍റെ അവസ്ഥ എന്ന വിഷയം ആസ്പദമാക്കി റീൽസ് മത്സരം സംഘടിപ്പിച്ചത്. ഇതു പള്ളിയുടെ ഇൻസ്റ്റഗ്രാം പേജിൽ പോസ്റ്റ് ചെയ്തു. ഇന്നലെ വരെയുള്ള വ്യൂസിന്‍റെ എണ്ണവും ആശയവും കണക്കിലെടുത്തായിരിക്കും സമ്മാനാർഹരെ തെരഞ്ഞെടുക്കുക. റോഡിലൂടെ ദുരിതയാത്ര നടത്തി പൊറുതിമുട്ടിയ നാട്ടുകാരുടെ ദുരവസ്ഥ റീൽസിലൂടെയെങ്കിലും അധികൃതരുടെ കണ്ണുതുറപ്പിക്കുമെന്നാണ് ഇവരുടെ പ്രതീക്ഷ.

പഴമയുടെ പാരന്പര്യം മുറുകെപ്പിടിച്ച് പച്ചപ്പിന്‍റെ പരവതാനി വിരിച്ച് കാരയൂർ

ജിതേഷ് ചെറുവള്ളിൽ മറയൂർ: കാന്തല്ലൂർ, മറയൂർ മേഖലകളിൽ നെൽകൃഷിയിലൂടെ നാടിന്‍റെ പച്ചപ്പ് വീണ്ടും പുനർജനിക്കുന്നു. പച്ചപ്പിന്‍റെ പരവതാനിവിരിച്ച പാടങ്ങൾ ഗ്രാമീണജനതയുടെ ജീവിതതാളമായിരുന്നു. പിന്നീട് കരിന്പുകൃഷി ഈ പ്രദേശത്ത് വ്യാപകമായതോടെ നെൽപ്പാടങ്ങൾ അപ്രത്യക്ഷമായി. ഭൂരിഭാഗം കർഷകരും കൂടുതൽ വരുമാനം പ്രതീക്ഷിച്ച് കരിന്പുകൃഷിയിലേക്കു തിരിഞ്ഞതാണ് നെൽകൃഷി അന്യമാകാൻ കാരണം. എന്നാൽ, തങ്ങളെ അന്നമൂട്ടുന്ന നെൽകൃഷി തുടരാൻ ഏതാനും കർഷകർ രംഗത്തുവന്നതോടെയാണ് വീണ്ടും ഇവിടെ പച്ചപ്പ് പ്രത്യക്ഷപ്പെട്ടുതുടങ്ങിയത്. പഴയ കൃഷിരീതികൾ കൈവിടാതെ, മണ്ണിനോടും പ്രകൃതിയോടും ചേർന്നാണ് ഇവരുടെ കൃഷി. നെൽകൃഷി ചെയ്യുന്നതിനുള്ള പാടം ഉഴുതുമറിക്കലും മറ്റും കാരയൂരിന്‍റെ ചരിത്രത്തിന്‍റെ ഭാഗമാണ്. പാടങ്ങൾ ഒരുക്കുന്നതിന്‍റെ ഭാഗമായി നിലം ഉഴുത്, വിത്ത് തയാറാക്കി, പരന്പരാഗതരീതിയിൽ കൃഷിചെയ്യുകയാണ് പതിവ്. ഇതു ഗ്രാമത്തിലെ ജനങ്ങൾ തമ്മിലുള്ള ഐക്യവും കൂട്ടായ്മയും ഊട്ടിയുറപ്പിക്കുന്നു. നെൽകൃഷി കാരയൂരിന്‍റെ ഭക്ഷ്യസുരക്ഷ ഉറപ്പാക്കുക മാത്രമല്ല, സാംസ്കാരിക പൈതൃകം കാത്തുസൂക്ഷിക്കുകയും ചെയ്യുന്നു. ഇവിടത്തെ മറ്റു ഗ്രാമങ്ങൾ കരിന്പുകൃഷിയിലേക്ക് തിരിഞ്ഞപ്പോൾ കാരയൂർ മാത്രം പഴമവിടാതെ പിടിച്ചുനിന്നു. ഇവിടം മണ്ണിന്‍റെ മണമുള്ള പഴമയുടെ ശീലുകൾ ഏറ്റുപാടുന്ന കർഷകഗ്രാമമായി ഇന്നും നിലകൊള്ളുന്നു. കർഷകർ ഒരുമിച്ച് പാടങ്ങൾ ഒരുക്കുകയും വിളവെടുപ്പ് വലിയ ആഘോഷമായി നടത്തുകയും ചെയ്യുന്ന പതിവാണ് ഇവിടെയുള്ളത്. എന്നാൽ, കരിന്പ് കൃഷിയിലേക്കുള്ള മാറ്റം ഈ കൂട്ടായ്മയെ ദുർബലപ്പെടുത്തിയിരുന്നു. മറ്റു കൃഷിയുടെ രംഗപ്രവേശത്തോടെ പരന്പരാഗത കൃഷിരീതികളും ഗ്രാമീണ സംസ്കാരവും കാലത്തിന്‍റെ കുത്തൊഴുക്കിൽ മണ്‍മറയാൻ കാരണമായി. എന്നാൽ, കാരയൂർ ഉൾപ്പെടെയുള്ള അപൂർവം ചില ഗ്രാമങ്ങൾ നെൽകൃഷിയിലേക്ക് മടങ്ങിയതോടെ കണ്ണിലെ കൃഷ്ണമണിപോലെ ഇവിടുത്തെ സാംസ്കാരിക പൈതൃകം കാത്തുസൂക്ഷിക്കാനുള്ള പരിശ്രമത്തിനാണ് തുടക്കംകുറിച്ചിരിക്കുന്നത്.

ബാംബൂനഗറിൽ കാട്ടാന ആക്രമണം രൂക്ഷം

മറയൂർ: ജനവാസ മേഖലയിൽ കാട്ടാന ആക്രമണം വീണ്ടും രൂക്ഷമായി. കഴിഞ്ഞ രാത്രി ഒരു കാട്ടാന ഈ പ്രദേശത്ത് ഇറങ്ങി വീടുകൾക്കും വിളകൾക്കും വലിയ നാശം വരുത്തി. വനം വകുപ്പ് കാട്ടന ശല്യം തടയാൻ പദ്ധതികൾ ആവിഷ്കരിച്ചിട്ടുണ്ടെങ്കിലും ഫലപ്രദമാകുന്നില്ല. കൃഷിസ്ഥലങ്ങളിൽനിന്ന് മൃഗങ്ങളെ അകറ്റാൻ ശ്രമിക്കുന്നുണ്ടെങ്കിലും അവയുടെ സഞ്ചാര പാതകൾ മാറ്റാൻ കഴിയുന്നില്ലെന്ന് വനം വകുപ്പ് ഉദ്യോഗസ്ഥർ പറയുന്നു. ദേശീയ പാതയോടു ചേർന്നുള്ള മേഖലകളിൽ പോലും കാട്ടാനകൾ ഇറങ്ങി യാത്രക്കാർക്കും പ്രദേശവാസികൾക്കും അപകടം സൃഷ്ടിക്കുകയാണ്. സമീപത്തെ വനത്തിൽനിന്ന് ഭക്ഷണത്തിനായാണ് വന്യമൃഗങ്ങൾ മനുഷ്യവാസ മേഖലയിലേക്ക് എത്തുന്നത്. വനത്തിലെ ഭക്ഷണസ്രോതസ്‌സുകൾ കുറയുന്പോൾ ദീർഘകാല പരിഹാരമായി കൂടുതൽ ഫലപ്രദമായ പദ്ധതികൾ ഒരുക്കണമെന്നാണ് നാട്ടുകാർ ആവശ്യപ്പെടുന്നത്. നാട്ടുകാർ സ്വയം സംരക്ഷണത്തിനായി രാത്രി പട്രോൾ നടത്തുന്നുണ്ട്. ഇത് അപകടകരവും അപര്യാപ്തവുമാണെന്ന് അവർ പറയുന്നു.

27 ഗ്രാം എംഡിഎംഎയുമായി യുവാവ് പിടിയിൽ

കട്ടപ്പന: 27 ഗ്രാം എംഡിഎംഎയുമായി ബംഗളൂരുവില്‍നിന്ന് കട്ടപ്പനയിലെത്തിയ യുവാവ് പിടിയിൽ. കോഴിക്കോട് കൊയിലാണ്ടി പയാറ്റുവളപ്പില്‍ ഷാലീന ഹൗസില്‍ ഫാരിസ് മുഹമ്മദി (31) നെയാണ് കട്ടപ്പന ഡിവൈഎസ്പി വി.എ. നിഷാദ്‌മോനും സംഘവും പിടികൂടിയത്. പോലീസിനു ലഭിച്ച രഹസ്യവിവരത്തെത്തുടര്‍ന്ന് കട്ടപ്പന ബൈപാസ് റോഡില്‍ നടത്തിയ പരിശോധനയിൽ സംശയാസ്പദമായ സാഹചര്യത്തില്‍ കണ്ട യുവാവിനെ പരിശോധിച്ചപ്പോഴാണ് ദേഹത്ത് ഒളിപ്പിച്ചുവച്ചിരുന്ന എംഡിഎംഎ കണ്ടെടുത്തത്. ചൊവ്വാഴ്ച രാവിലെ ബംഗളൂരുവില്‍നിന്ന് എത്തിയ യുവാവ് മറ്റാര്‍ക്കോ നല്‍കാനാണ് രാസലഹരി എത്തിച്ചത്. ലഹരിയുടെ ഉറവിടവും ആര്‍ക്കാണ് വില്‍ക്കാന്‍ കൊണ്ടുവന്നതെന്നും ഉള്‍പ്പെടെയുള്ള വിവരങ്ങള്‍ അറിയാന്‍ പോലീസ് ചോദ്യംചെയ്യല്‍ ആരംഭിച്ചു. കോഴിക്കോട് സ്വദേശിയായ ഫാരിസ് മുഹമ്മദ് അന്തര്‍ സംസ്ഥാന ലഹരിക്കടത്ത് സംഘത്തില്‍പ്പെട്ടയാളാണെന്നും പോലീസ് സംശയിക്കുന്നു. കോഴിക്കോട് പോലീസുമായി ബന്ധപ്പെട്ട് ഇയാളെക്കുറിച്ചുള്ള കൂടുതല്‍ വിവരങ്ങള്‍ അന്വേഷണസംഘം ശേഖരിച്ചുവരുന്നു. ജില്ലാ പോലീസ് മേധാവി ടി.കെ. വിഷ്ണുപ്രദീപിന്‍റെ കീഴിലുള്ള ഡാന്‍സാഫ് ടീമും കട്ടപ്പന ഡിവൈഎസ്പി വി.എ. നിഷാദ്‌മോന്‍, എസ്‌ഐമാരായ ഷാജി ഏബ്രഹാം, ബെര്‍ട്ടിന്‍ ജോസ്, പി.വി. മഹേഷ്, എസ് സിപിഒ ഷെമീര്‍, സിപിഒമാരായ ബിബിന്‍ മാത്യു, ആര്‍. ഗണേഷ്, സിനോജ് ജോസഫ് എന്നിവരും ചേര്‍ന്നാണ് പ്രതിയെ അറസ്റ്റ് ചെയ്തത്.

മറയൂർ ചന്ദനം മൗറിഷ്യസിൽ സുഗന്ധം പരത്തും; 1000 കിലോ വിത്തുകൾ കടൽകടന്നു

മറയൂർ: കേരളത്തിന്‍റെ ചന്ദനസുഗന്ധം ഇനി മൗറിഷ്യസിന്‍റെ മണ്ണിലും പരക്കും. മറയൂർ ചന്ദനത്തിന്‍റെ മഹിമയിൽ ആകൃഷ്ടരായ മൗറിഷ്യസിലെ സൗത്ത് ആഫ്രിക്കൻ കന്പനിയായ ഓഷ്യൻ അരോമാറ്റിക്സ് ആൻഡ് എസൻഷൽ ഓയിൽസ് ലിമിറ്റഡ് മറയൂരിൽനിന്ന് 1000 കിലോ ചന്ദനവിത്തുകൾ സ്വന്തമാക്കി. മറയൂരിന്‍റെ തനതായ ചന്ദനക്കാടിന്‍റെ പ്രത്യേകതകളും വളർച്ചാരീതികളും മനസിലാക്കാൻ മാസങ്ങൾക്ക് മുൻപ് കന്പനി പ്രതിനിധികൾ മറയൂർ സന്ദർശിച്ചിരുന്നു. മറയൂർ ചന്ദന ഡിവിഷൻ മുൻ ഡിഎഫ്ഒ എം.ജി. വിനോദ് കുമാറുമായി നടത്തിയ ചർച്ചയിൽ മൗറിഷ്യസിന്‍റെ കാലാവസ്ഥയും മണ്ണിന്‍റെ ഘടനയും മറയൂരിനോട് സാമ്യമുള്ളതാണെന്ന് കന്പനി അധികൃതർ വ്യക്തമാക്കി. രണ്ടു മാസം മുന്പ് വീണ്ടും മറയൂരിലെത്തിയ സംഘം ചന്ദനവിത്തുകൾ ശേഖരിച്ച് മൗറിഷ്യസിലേക്ക് കൊണ്ടുപോയി. മറയൂർ പള്ളനാട് സ്വദേശിയും വനംവകുപ്പിലെ താത്കാലിക ജീവനക്കാരനുമായ എൽ. പ്രഭാകരന്‍റെ വൈദഗ്ധ്യം തിരിച്ചറിഞ്ഞ സംഘം അദ്ദേഹത്തെ ചന്ദനവിത്തുകൾ മുളപ്പിക്കുന്നതിനായി മൗറിഷ്യസിലേക്ക് കൊണ്ടുപോയിരുന്നു. അവിടെയെത്തി കാടുപിടിച്ചു കിടന്ന സ്ഥലം ഒരുക്കിയ പ്രഭാകരൻ 1000 കിലോ ചന്ദനവിത്തുകൾ മണ്ണു നിറച്ച പാക്കറ്റുകളിൽ നട്ടു. രണ്ടു മാസത്തിനുള്ളിൽ തൈകൾ മുളച്ച് എട്ട് ഇലകൾ വരെ വളർന്നുതുടങ്ങി. ഏഴ്-എട്ട് മാസത്തിനു ശേഷം ഈ തൈകൾ പറിച്ചു നടാൻ പദ്ധതിയിട്ടിരിക്കുകയാണ്.

സഹോദയ കലോത്സവം: മാനുവൽ പ്രകാശനം ചെയ്തു

തൊടുപുഴ: സെൻട്രൽ കേരള സഹോദയ കലോത്സവ് സർഗധ്വനി 2025ന്‍റെ മാനുവൽ പ്രകാശനം ചെയ്തു. സിനിമ -സീരിയൽ ആർട്ടിസ്റ്റ് ഡെല്ല ജോർജ് പ്രകാശനം നിർവഹിച്ചു. കലോത്സവ വേദിയായ തൊടുപുഴ വിമല പബ്ലിക് സ്കൂളിൽ ഒക്ടോബർ 16, 17, 18 തീയതികളിലാണ് കലോത്സവം. സെൻട്രൽ കേരള സഹോദയ പ്രസിഡന്‍റ് ഫാ. മാത്യു കരീത്തറ സിഎംഐ അധ്യക്ഷത വഹിച്ചു. സ്കൂൾ പ്രിൻസിപ്പലും ജനറൽ കണ്‍വീനറുമായ സിസ്റ്റർ എലൈസ് സിഎംസി, സഹോദയ കോ-ഓർഡിനേറ്റർ ഗിരീഷ് ബാലൻ, പിടിഎ പ്രസിഡന്‍റ് സിജോ ജെ. തൈച്ചേരിയിൽ, വൈസ് പ്രിൻസിപ്പൽ സിസ്റ്റർ ലിസ്ബത്ത്, അക്കാദമിക് കോ-ഓർഡിനേറ്റർ മഞ്ജു ജോസ് എന്നിവർ പ്രസംഗിച്ചു. ഇടുക്കി,എറണാകുളം, തൃശൂർ ജില്ലകളിലെ നൂറോളം സിബിഎസ്ഇ സ്കൂളുകളിൽനിന്നും 5,000ത്തിലധികം കുട്ടികൾ മൽസരത്തിൽ പങ്കെടുക്കും.

എംപിയുടെ കത്തിൽ നടപടി ആവശ്യപ്പെട്ട് ദേശീയ മനുഷ്യാവകാശ കമ്മീഷൻ

തൊടുപുഴ: ഡീൻ കുര്യാക്കോസ് എംപി നൽകിയ കത്തിന്‍റെ അടിസ്ഥാനത്തിൽ, വനംവകുപ്പിന്‍റെ അനാസ്ഥയിൽ ദേശീയ മനുഷ്യാവകാശ കമ്മീഷൻ വിശദീകരണം ആവശ്യപ്പെട്ടു. 2024 ഡിസംബർ 16ന് കുട്ടന്പുഴയിൽ കാട്ടാനയുടെ ആക്രമണത്തിൽ എൽദോസ് എന്ന 40കാരൻ മരിച്ച സംഭവത്തിലാണ് എംപി കമ്മീഷനെ സമീപിച്ചത്. കാട്ടാനയെ കണ്ട വിവരം അറിയിച്ചിട്ടും വനംവകുപ്പ് ഉദ്യോഗസ്ഥർ സ്ഥലത്തെത്താൻ തയാറായില്ലെന്ന് എംപി കത്തിൽ ആരോപിച്ചു. വാഹനത്തിൽ ഇന്ധനമില്ലെന്ന് പറഞ്ഞാണ് ഉദ്യോഗസ്ഥർ എത്താതിരുന്നത്. ഈ അനാസ്ഥയാണ് എൽദോസിന്‍റെ മരണത്തിന് കാരണമായതെന്നും ഇതു ക്രിമിനൽ അനാസ്ഥയാണെന്നും എംപി കത്തിൽ ചൂണ്ടിക്കാട്ടി. കേരളത്തിൽ വന്യജീവി ആക്രമണം വർധിച്ചുവരികയാണ്. ഇതിൽ സർക്കാർ അടിയന്തരമായി ഇടപെടണമെന്നും എംപി കത്തിൽ ആവശ്യപ്പെട്ടു. ഇതേ തുടർന്നു 2025 ഏപ്രിൽ 29ന് ചീഫ് ഫോറസ്റ്റ് കണ്‍സർവേറ്ററോട് ദേശീയ മനുഷ്യാവകാശ കമ്മീഷൻ റിപ്പോർട്ട് ആവശ്യപ്പെട്ടിരുന്നു. എന്നാൽ, ഇതുവരെ റിപ്പോർട്ട് ലഭിച്ചിട്ടില്ലെന്ന് കമ്മീഷൻ അറിയിച്ചു. റിപ്പോർട്ട് സമർപ്പിക്കാൻ ആറാഴ്ചത്തെ സമയം നൽകിയിട്ടുണ്ടെന്നും ഈ കാലയളവിനുള്ളിൽ റിപ്പോർട്ട് ലഭിച്ചില്ലെങ്കിൽ മനുഷ്യാവകാശ സംരക്ഷണ നിയമം സെക്ഷൻ 13 പ്രകാരം നിർബന്ധിത നടപടി സ്വീകരിക്കുമെന്നും കമ്മീഷൻ മുന്നറിയിപ്പു നൽകി.

ദേശീയപാത വികസനം അട്ടിമറിച്ചതിനു പിന്നിൽ സംസ്ഥാന സർക്കാർ: എംപി

തൊടുപുഴ: ദേശീയ പാത-85ന്‍റെ ഭാഗമായ നേര്യമംഗലം മുതൽ വാളറവരെയുള്ള റോഡിന്‍റെ വികസനം ഹൈക്കോടതി ഇടക്കാല ഉത്തരവിലൂടെ തടഞ്ഞ സംഭവത്തിൽ തങ്ങളുടെ ഭാഗത്തുനിന്നു വീഴ്ചസംഭവിച്ചിട്ടില്ലെന്ന് വരുത്തിത്തീർക്കാനുള്ള ശ്രമമാണ് സർക്കാർ നടത്തുന്നതെന്ന് ഡീൻ കുര്യാക്കോസ് എംപി പത്രസമ്മേളനത്തിൽ ആരോപിച്ചു. വനംവകുപ്പ് പറയുന്നതുപോലെ പ്രവർത്തിക്കുന്ന സർക്കാർ പാതയുടെ നിർമാണം തടസപ്പെടുത്താൻ ഒത്താശചെയ്യുകയായിരുന്നു. സർക്കാർ വീഴ്ച മറച്ചുവച്ച് മന്ത്രിമാരായ റോഷി അഗസ്റ്റിനും എ.കെ. ശശീന്ദ്രനും തെറ്റുചെയ്ത ഉദ്യോഗസ്ഥരെ ന്യായീകരിക്കുകയാണ്. ഇവർ ജനാധിപത്യത്തിന്‍റെ വില കളയുകയാണ്. ചീഫ് സെക്രട്ടറി തലത്തിൽ സ്വീകരിച്ച തീരുമാനം അട്ടിമറിച്ചതിൽ മന്ത്രിമാർക്കോ ഉന്നത ഉദ്യോഗസ്ഥർക്കോ പങ്കില്ലെങ്കിൽ തെറ്റു ചെയ്തവർക്കെതിരേ നടപടി സ്വീകരിക്കുകയാണു വേണ്ടത്. ഇതിനു കഴിയുന്നില്ലെങ്കിൽ രാജിവച്ചൊഴിയണം. അഡീഷണൽ ചീഫ് സെക്രട്ടറി കെ.ആർ. ജ്യോതിലാൽ ഹൈക്കോടതിയിൽ ചീഫ് സെക്രട്ടറിക്കുവേണ്ടിയെന്നു പറഞ്ഞ് നൽകിയ സത്യവാങ്മൂലം സർക്കാരിന്‍റെ നിലപാടായി മാറി. ഇതിലെ പരാമർശങ്ങൾ വസ്തുതകൾക്കു നിരക്കാത്തതും 2024 ഓഗസ്റ്റ് രണ്ടിനു ചീഫ്സെക്രട്ടറി വിളിച്ചുചേർത്ത യോഗത്തിൽ സ്വീകരിച്ച തീരുമാനത്തിന് കടകവിരുധവുമായിരുന്നു. ഇതേത്തുടർന്നു പുറപ്പെടുവിച്ച ഇടക്കാല വിധിയനുസരിച്ച് പരിവേഷ് പോർട്ടലിൽ നൽകിയ അപേക്ഷയ്ക്ക് പുറമേ നടക്കുന്ന നിർമാണപ്രവർത്തനങ്ങളെല്ലാം നിയമവിരുദ്ധവും നിർത്തിവയ്ക്കപ്പെടേണ്ടതുമാണെന്നായിരുന്നു കോടതിയുടെ നിരീക്ഷണം. ഇതേത്തുടർന്നു മരംമുറിയും റോഡ് നിർമാണപ്രവർത്തനങ്ങളും നിർത്തിവയ്ക്കേണ്ടി വന്നു. ചീഫ് സെക്രട്ടറി 2024 ഓഗസ്റ്റ് രണ്ടിനു വീഡിയോ കോണ്‍ഫറൻസ് മുഖേന കൂടിയ യോഗത്തിൽ വനംവകുപ്പ് സെക്രട്ടറിയായ കെ.ആർ. ജ്യോതിലാലും പങ്കെടുത്തിരുന്നു. ഈ യോഗതീരുമാനമനുസരിച്ച് റോഡ് വികസനവുമായി ബന്ധപ്പെട്ട് വനംവകുപ്പ് യാതൊരു തരത്തിലുള്ള തടസവും സൃഷ്ടിക്കാൻ പാടില്ലെന്ന് നിർദേശിച്ചിരുന്നു. സർക്കാരും കിരണ്‍ സിജുവും തമ്മിലുള്ള കേസുമായി ബന്ധപ്പെട്ട് പുറപ്പെടുവിച്ച വിധിയിൽ 30 മീറ്റർ വീതി റോഡിനുണ്ട്. ഇതു മറികടക്കാൻ സർക്കാർ അപ്പീലോ റിവ്യൂ പെറ്റീഷനോ നൽകേണ്ടതില്ല. ദേശീയപാത അഥോറിറ്റി പരിവേഷ് പോർട്ടലിൽ നൽകിയ അപേക്ഷയനുസരിച്ച് 0.95 ഹെക്ടർ സ്ഥലം ലഭ്യമാക്കുന്നതിനുള്ള നടപടികൾ തുടരാമെന്നും തീരുമാനിച്ചിരുന്നു. എന്നാൽ അഡീഷണൽ ചീഫ് സെക്രട്ടറി കോടതിയിൽ കഴിഞ്ഞ ദിവസം നൽകിയ സത്യവാങ്മൂലത്തിൽ ഈ മേഖല ഉൾപ്പെടുന്ന പ്രദേശം റവന്യു-പിഡബ്ല്യുഡി വകുപ്പുകളുടെ റിക്കാർഡ് പ്രകാരം പുറന്പോക്കാണെന്നിരിക്കേ ഈ പ്രദേശം മലയാറ്റൂർ റിസർവാണെന്നു സ്ഥാപിക്കാനായിരുന്നു ശ്രമം. ഇതിനിടെ ദേശീയപാത അഥോറിറ്റി ആവശ്യപ്പെട്ട സ്ഥലത്തിനു പകരമായും മനുഷ്യ-വന്യജീവി സംഘർഷം പരിഹരിക്കാനെന്ന പേരിലും വനംവകുപ്പ് 5.5 കോടി കൈപ്പറ്റിയെന്നും എംപി പറഞ്ഞു. ഈ തുക ഉപയോഗിച്ച് മനുഷ്യ-വന്യജീവി സംഘർഷം പരിഹരിക്കാൻ എന്ത് നടപടിയാണ് വനംവകുപ്പ് സ്വീകരിച്ചതെന്നു വ്യക്തമാക്കണം. വനം ഉദ്യോഗസ്ഥർക്ക് വാഹനവും, ഡ്രൈവർമാരുടെ ശന്പളവുമെല്ലാം ഈ ഇനത്തിൽ ആവശ്യപ്പെട്ട് പണം വാങ്ങിയെടുത്ത സംഭവം വിചിത്രമാണെന്നും എംപി പറഞ്ഞു. ജില്ലയെ ഗുരുതരമായി ബാധിക്കുന്ന വിഷയത്തിൽ മുഖ്യമന്ത്രി അടിയന്തര ഇടപെടൽ നടത്തി റോഡ് വികസനം സാധ്യമാക്കണമെന്ന് എംപി ആവശ്യപ്പെട്ടു. പൊതുപ്രവർത്തകൻ സിജുമോൻ ഫ്രാൻസിസും പത്രസമ്മേളനത്തിൽ പങ്കെടുത്തു.

കല്ലാര്‍ ഗവ. എച്ച്എസ്എസ് സപ്തതി ആഘോഷങ്ങളുടെ ഉദ്ഘാടനം നാളെ

നെടുങ്കണ്ടം: കല്ലാര്‍ ഗവ. ഹയര്‍ സെക്കൻഡറി സ്‌കൂളിന്‍റെ സപ്തതി ആഘോഷങ്ങളുടെ ഉദ്ഘാടനം നാളെ മന്ത്രി റോഷി അഗസ്റ്റിന്‍ നിര്‍വഹിക്കുമെന്ന് സംഘാടകസമിതി ഭാരവാഹികള്‍ അറിയിച്ചു. 1956 ജൂലൈ 17ന് ഏകാധ്യാപക വിദ്യാലയമായി ആരംഭിച്ച് ഇപ്പോള്‍ ഹയര്‍ സെക്കൻഡറിയായി പ്രവര്‍ത്തിക്കുന്ന സ്‌കൂള്‍ പൊതുവിദ്യാഭ്യാസ മേഖലയില്‍ ജില്ലയിലെ ഏറ്റവും വലിയ സ്‌കൂളാണ്. സപ്തതി ആഘോഷങ്ങളുടെ ഭാഗമായി ഒരു വര്‍ഷം നീണ്ടുനില്‍ക്കുന്ന പരിപാടികളാണ് ആസൂത്രണം ചെയ്തിരിക്കുന്നത്. പൂര്‍വ അധ്യാപക - വിദ്യാര്‍ത്ഥീ സംഗമം, ലഹരിവിരുദ്ധ കാമ്പയിന്‍, കലാകായിക മത്സരങ്ങള്‍, പഠനയാത്രകള്‍, പട്ടംകോളനി ചരിത്ര ഗവേഷണം, സാംസ്‌കാരിക കേന്ദ്രം സ്ഥാപിക്കല്‍, ടാലന്‍റ് ഹണ്ട്, അഗ്രി ഫെസ്റ്റ്, സ്‌നേഹവീട് നിര്‍മാണം തുടങ്ങിയവയാണ് പ്രധാനപ്പെട്ട പരിപാടികള്‍. നാളെ രാവിലെ 10ന് ലഹരിക്കെതിരേ രക്ഷിതാക്കളും വിദ്യാര്‍ഥികളും അധ്യാപകരും പൊതുജനങ്ങളും ചേര്‍ന്ന് മനുഷ്യച്ചങ്ങല തീര്‍ക്കും. ഉച്ചകഴിഞ്ഞ് രണ്ടിന് നടക്കുന്ന പൊതുസമ്മേളനത്തില്‍ പിടിഎ പ്രസിഡന്‍റ് രമേഷ് കൃഷ്ണന്‍ അധ്യക്ഷത വഹിക്കും. എം.എം. മണി എംഎല്‍എ സപ്തതി പദ്ധതി പ്രകാശനവും ഡീന്‍ കുര്യാക്കോസ് എംപി മുഖ്യപ്രഭാഷണവും നടത്തും. ത്രിതല പഞ്ചായത്ത് അംഗങ്ങള്‍, വിവിധ രാഷ്ട്രീയകക്ഷി പ്രതിനിധികള്‍ തുടങ്ങിയവര്‍ പങ്കെടുക്കുമെന്ന് പിടിഎ പ്രസിഡന്‍റ് രമേഷ് കൃഷ്ണന്‍, സിഎംസി ചെയര്‍മാന്‍ വിജയന്‍പിള്ള, പ്രിന്‍സിപ്പൽ കെ.വി. ഹല്ലോക്ക്, ഹെഡ്മാസ്റ്റര്‍ ജോണ്‍ മാത്യു, സിറാജ് മുണ്ടിയെരുമ, ഷംസുദീന്‍, എന്‍. അജിത, എന്‍. പ്രജിത, അംബുജാക്ഷന്‍ എന്നിവര്‍ അറിയിച്ചു.

കോവിൽക്കടവിലെ ഏക എടിഎം 20 ദിവസമായി പ്രവർത്തനരഹിതം

മറയൂർ: പ്രധാന വിനോദസഞ്ചാര കേന്ദ്രമായ കാന്തല്ലൂരിന്‍റെ കവാടമായ കോവിൽക്കടവിൽ സ്ഥിതിചെയ്യുന്ന ഏക എടിഎം കേന്ദ്രം കഴിഞ്ഞ 20 ദിവസമായി അടഞ്ഞുകിടക്കുന്നത് പ്രദേശവാസികൾക്കും ഇവിടെയെത്തുന്ന വിനോദസഞ്ചാരികൾക്കും വലിയ ബുദ്ധിമുട്ട് സൃഷ്ടിക്കുന്നു. എസ്ബിഐയുടെ ഉടമസ്ഥതയിലുള്ള എടിഎം, കരാറുകാരനും കെട്ടിടഉടമയും തമ്മിലുള്ള വാടകയുമായി ബന്ധപ്പെട്ട തർക്കം മൂലമാണ് പ്രവർത്തനരഹിതമായത്. കോവിൽക്കടവ്, കാന്തല്ലൂർ എന്നിവിടങ്ങളിലേക്ക് എത്തുന്ന സഞ്ചാരികൾക്ക് പണം പിൻവലിക്കാൻ ഈ എടിഎമ്മായിരുന്നു പ്രധാന ആശ്രയം. ഏറ്റവും അടുത്ത എടിഎം അഞ്ചു കിലോമീറ്റർ അകലെയുള്ള മറയൂർ ടൗണിലാണ്. എടിഎം അടഞ്ഞുകിടക്കുന്ന സാഹചര്യം മുതലെടുത്ത് സമീപത്തുള്ള ചില വ്യക്തികൾ കമ്മീഷൻ വാങ്ങി പണം നൽകുന്ന രീതി വ്യാപകമായിട്ടുണ്ട്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]