ADVERTISEMENT

ADVERTISEMENT

കട്ടപ്പന നഗരസഭയുടെ നവീകരിച്ച ടൗണ്‍ഹാൾ നാളെ തുറക്കും

കട്ടപ്പന: കട്ടപ്പന നഗരസഭ 2025 - 26 വാർഷികപദ്ധതിയിൽപ്പെടുത്തി നവീകരിച്ച നഗരസഭ ടൗണ്‍ഹാൾ ഉദ്ഘാടനം നാളെ രാവിലെ 10ന് അഡ്വ. ഡീൻ കുര്യാക്കോസ് എംപി നിർവഹിക്കും. നഗരസഭാ അധ്യക്ഷ ബീന ടോമി അധ്യക്ഷത വഹിക്കും.

പൊതുമരാമത്ത് സ്റ്റാന്‍ഡിംഗ് കമ്മിറ്റി ചെയർമാൻ സിബി പാറപ്പായിൽ, അഡ്വ. കെ.ജെ. ബെന്നി, ജാൻസി ബേബി, മനോജ് മുരളി, ലീലാമ്മ ബേബി, ഐബിമോൾ രാജൻ, സോണിയ ജെയ്ബി തുടങ്ങിയവർ പ്രസംഗിക്കും.

ADVERTISEMENT

വനംവകുപ്പിന്‍റെ മെല്ലെപ്പോക്ക്; പാലം നിർമാണം വൈകുന്നു

തൊടുപുഴ: തൊമ്മൻകുത്തിൽ കണ്ണാടിപുഴയ്ക്കു കുറുകെ പാലം നിർമിക്കാൻ ആവശ്യമായ ഭൂമി വിട്ടുകിട്ടാൻ പരിവേഷ് പേർട്ടൽ വഴി അപേക്ഷ നൽകി വനംവകുപ്പ് ആവശ്യപ്പെട്ട തുക കെട്ടിവച്ചിട്ടും നിർമാണം തുടങ്ങാനാവാതെ കെഎസ്ടിപി. വിട്ടുനൽകേണ്ട ഭൂമി വനംവകുപ്പ് ഉദ്യോഗസ്ഥർ കഴിഞ്ഞ ദിവസം അളന്നു തിരിച്ചു കെഎസ്ടിപിക്കു കൈമാറിയിയിരുന്നു. എന്നാൽ, ഇതിന്‍റെ മഹസർ തയാറാക്കി കോതമംഗലം ഡിഎഫ്ഒ ഓഫീസിൽനിന്ന് ഉത്തരവ് കൈമാറിയില്ല. ഇതാണ് നിർമാണം വൈകുന്നതിനു കാരണമായി പറയുന്നത്. മരമില്ല പക്ഷേ, വില നൽകണം ഇതിനിടെ, കൈമാറിയ ഭൂമിയിൽ മരങ്ങൾ ഇല്ലെങ്കിലും അവിടെ നട്ടു പരിപാലിക്കാൻ കഴിയുന്ന മരങ്ങളുടെ വിലകൂടി നൽകണമെന്ന ചട്ടം വനനിയമത്തിലുണ്ടെന്ന നിലപാടിലാണ് വനംവകുപ്പ്. നഷ്ടപ്പെട്ട ഭൂമിക്കു പകരമുള്ള സ്ഥലത്തു വനം വച്ചുപിടിപ്പിക്കാൻ ചെലവാകുന്ന തുകകൂടി കെഎസ്ടിപി അടയ്ക്കണമെന്നാണ് വനം വകുപ്പ് ഉന്നയിക്കുന്ന പുതിയ ആവശ്യം. ഇതിനാവശ്യമായ തുക കണക്കാക്കി കാളിയാർ റേഞ്ച് ഓഫീസിൽനിന്നു നൽകിയിട്ടുണ്ടെന്നും അടയ്ക്കേണ്ട തുക സംബന്ധിച്ച അറിയിപ്പ് ഉടൻ കെസ്ടിപിക്കു കൈമാറുമെന്നും കോതമംഗലം ഡിഎഫ്ഒ ഓഫീസ് അധികൃതർ പറഞ്ഞു. അടയ്ക്കേണ്ട തുക സംബന്ധിച്ച അറിയിപ്പു കിട്ടിയാൽ ഇതു കെഎസ്ടിപി ഉന്നതതല ഓഫീസിൽ നൽകി അവിടെനിന്നു തുക അടയ്ക്കാനുള്ള ഉത്തരവ് കിട്ടിയാലെ ഇനി വനംവകുപ്പിൽ തുക അടയ്ക്കാൻ കഴിയുകയുള്ളു എന്നാണ് കെഎസ്ടിപി അധികൃതർ പറയുന്നത്. നിർമാണം ഇനിയും വൈകുമോ? പാലം നിർമിക്കാനായി ഭൂമിവിട്ടു കിട്ടാൻതന്നെ ഒരു വർഷത്തോളമെടുത്തു. വനംവകുപ്പ് ഇപ്പോൾ ആവശ്യപ്പെടുന്ന തുക അടയ്ക്കാനും ഇതോടനുബന്ധിച്ചുള്ള നടപടിക്രമങ്ങളിലും കാലതാമസം നേരിട്ടാൽ നിർമാണം വീണ്ടും വൈകും. നിലവിൽ മഴ പെയ്താൽ വെള്ളത്തിൽ മുങ്ങുന്ന പാലത്തിലൂടെയാണ് വാഹനങ്ങൾ കടന്നുപോകുന്നത്. കരിമണ്ണൂർ-വണ്ണപ്പുറം പഞ്ചായത്തുകളെ ബന്ധിപ്പിക്കുന്ന പാലം മഴക്കാലത്ത് മുങ്ങുന്നതു പതിവാണ്. നിസാര കാരണങ്ങൾ ഉന്നയിച്ചു റോഡിന്‍റെയും പാലത്തിന്‍റെയും നിർമാണം വൈകിപ്പിക്കുന്ന നടപടിയാണ് വനംവകുപ്പിന്‍റെ ഭാഗത്തുനിന്നുണ്ടാകുന്നതെന്നു നാട്ടുകാർ കുറ്റപ്പെടുത്തുന്നു. വനം മന്ത്രിയും ജനപ്രതിനിധികളും ഇക്കാര്യത്തിൽ അടിയന്തരമായി ഇടപെടണമെന്നും നാട്ടുകാർ ആവശ്യപ്പെട്ടു.

റോഡിന്‍റെ തകർച്ച: 48 മണിക്കൂർ നിരാഹാരം ആരംഭിച്ചു

തൊടുപുഴ: മുട്ടം കോടതി റോഡിന്‍റെ ശോചനീയാവസ്ഥ പരിഹരിക്കണമെന്നാവശ്യപ്പെട്ട് നാഷണലിസ്റ്റ് ലോയേഴ്സ് കോണ്‍ഗ്രസ് സംസ്ഥാന പ്രസിഡന്‍റും എൻസിപി സംസ്ഥാന ജനറൽ സെക്രട്ടറിയുമായ അഡ്വ. ഷാജി തെങ്ങുംപിള്ളി മുട്ടം കോടതി ജംഗ്ഷനിൽ 48 മണിക്കൂർ നിരാഹാര സമരം ആരംഭിച്ചു. പാർട്ടി സംസ്ഥാന പ്രസിഡന്‍റ് എൻ.എ. മുഹമ്മദ്കുട്ടി ഉദ്ഘാടനം ചെയ്തു. എൻസിപി ജില്ലാ പ്രസിഡന്‍റ് സിയാദ് പറന്പിൽ അധ്യക്ഷത വഹിച്ചു. സംസ്ഥാന വൈസ് പ്രസിഡന്‍റ് കെ.എ. ജബാർ മുഖ്യ പ്രഭാഷണം നടത്തി. ബ്ലോക്ക് പ്രസിഡന്‍റ് കുര്യാച്ചൻ കണ്ടത്തിൽ, ബേബി വരിക്കമാക്കൽ, ഷൈജു അട്ടക്കുളത്ത്, പ്രിയ അനിൽ കുമാർ, കെ.കെ. സിൽവി, കെ.കെ. ഷംസുദ്ദീൻ തുടങ്ങിയവർ പ്രസംഗിച്ചു. റോഡ്നിർമാണം വൈകില്ല: കേരള കോണ്‍ഗ്രസ് മുട്ടം: കോടതി ജംഗ്ഷൻ പന്പ് ഹൗസ് റോഡ് ടാറിംഗിനായി ഫണ്ട് അനുവദിച്ചെന്നും ഉടൻ നിർമാണം ആരംഭിക്കുമെന്നും കേരള കോണ്‍ഗ്രസ് മുട്ടം മണ്ഡലം കമ്മിറ്റി. റോഡ് ഗതാഗതയോഗ്യമല്ലാത്തതിനാൽ പുനരുദ്ധാരണത്തിനായി ഫണ്ട് അനുവദിക്കണമെന്ന് ആവശ്യപ്പെട്ട് കേരള കോണ്‍ഗ്രസ് മുട്ടം മണ്ഡലം കമ്മിറ്റി പി.ജെ. ജോസഫിന് നിവേദനം നൽകിയതിന്‍റെ അടിസ്ഥാനത്തിൽ 25 ലക്ഷം രൂപ സർക്കാർ അനുവദിച്ചിരുന്നു. തദ്ദേശവകുപ്പ് തദ്ദേശറോഡ് പുനരുദ്ധാരണ പദ്ധതി 2024-2025 ൽ ഉൾപ്പെടുത്തി ഭരണാനുമതിയും ലഭിച്ചു. ഇതിന്‍റെ ഭാഗമായി പഞ്ചായത്തിൽ ടെൻഡർ ക്ഷണിച്ച് കരാർ വയ്ക്കുകയും ചെയ്തിട്ടുണ്ട്. പ്രതികൂല കാലാവസ്ഥയിൽ ടാറിംഗ് നടത്താൻ കഴിയാത്തതിനാലാണ് നിർമാണം ആരംഭിക്കാത്തതെന്നും മഴ മാറിയാൽ ഉടൻ നിർമാണം ആരംഭിക്കുമെന്നും മണ്ഡലം പ്രസിഡന്‍റ് അഗസ്റ്റിൻ കള്ളികാട്ട്, സെക്രട്ടറി ജോസഫ് തൊട്ടിത്താഴത്ത് എന്നിവർ അറിയിച്ചു.

സി.വി. വർഗീസിന് സ്ഥാപിത താത്പര്യം: യൂത്ത് കോണ്‍ഗ്രസ്

തൊടുപുഴ: സിപിഎമ്മിന്‍റെ നേതൃത്വത്തിൽ ജില്ലയിൽ പ്രവർത്തിക്കുന്ന സെൽഫ് ഫിനാൻസിംഗ് നഴ്സിംഗ് കോളജുകൾക്ക് വേണ്ടിയാണ് ജില്ലാ സെക്രട്ടറി സി.വി. വർഗീസ് സർക്കാർ നഴ്സിംഗ് കോളജിനെതിരേ ഇറങ്ങിത്തിരിച്ചിരിക്കുന്നതെന്ന് യൂത്ത് കോണ്‍ഗ്രസ് ജില്ലാ പ്രസിഡന്‍റ് ഫ്രാൻസിസ് അറയ്ക്കപ്പറന്പിൽ ആരോപിച്ചു. കളക്ടറുടെ നേതൃത്വത്തിൽ നടക്കേണ്ടിയിരുന്ന യോഗം മാറ്റി വയ്പ്പിച്ചാണ് സിപിഎം ഓഫിസിൽ യോഗം നടത്തിച്ചത്. വിദ്യാർഥികൾ പഠനം നിർത്തിപ്പോകണമെന്ന ഉദ്ദേശ്യത്തോടെയാണ് മാതാപിതാക്കളെ ഭീഷണിപ്പെടുത്തിയത്. സ്വന്തം മണ്ഡലത്തിലെ നഴ്സിംഗ് കോളജിലെ വിദ്യാർഥികളുടെ പ്രശ്നം പരിഹരിക്കാൻ സിപിഎം ജില്ലാ സെക്രട്ടറിയുടെ ഓഫിസിൽ യോഗം ചേർന്ന വിവരം ജില്ലയിലെ മറ്റ് വിഷയങ്ങൾപോലെ മന്ത്രി റോഷി അഗസ്റ്റിൻ അറിഞ്ഞില്ലെന്ന് വേണം കരുതാൻ. സർക്കാർ നഴ്സിംഗ് കോളജിനെതിരേ നടക്കുന്ന നീക്കങ്ങളെ യൂത്ത് കോണ്‍ഗ്രസ് ശക്തമായി ചെറുക്കുമെന്ന് ജില്ലാ പ്രസിഡന്‍റ് പറഞ്ഞു.

ഹെൽത്ത് ഇൻസ്പെക്ടേഴ്സ് യൂണിയൻ സംസ്ഥാന സമ്മേളനം രാമക്കൽമേട്ടിൽ

നെടുങ്കണ്ടം: കേരള ഹെൽത്ത് ഇൻസ്പെക്ടേഴ്സ് യൂണിയൻ സംസ്ഥാന സമ്മേളനം ഇന്നും നാളെയുമായി രാമക്കൽമേട്ടിൽ നടക്കുമെന്ന് ഭാരവാഹികൾ പത്രസമ്മേളനത്തിൽ അറിയിച്ചു. 18 വർഷങ്ങൾക്ക് ശേഷമാണ് സംസ്ഥാന സമ്മേളനം ജില്ലയിൽ നടക്കുന്നത്. ഇന്ന് രാവിലെ ഒന്പതിന് പതാക ഉയർത്തലോടെ സമ്മേളനം ആരംഭിക്കും. തുടർന്ന് സംസ്ഥാന കൗണ്‍സിൽ യോഗം, ഹെൽത്ത് ഇൻസ്പെക്ടർ വിഭാഗം അഭിമുഖീകരിക്കുന്ന വിവിധ പ്രശ്നങ്ങൾ സംബന്ധിച്ചുള്ള ചർച്ച, മുൻകാല പ്രവർത്തകരെ ആദരിക്കൽ എന്നിവയാണ് നടക്കുന്നത്. നാളെ രാവിലെ പത്തിന് നടക്കുന്ന പൊതുസമ്മേളനം എം.എം. മണി എംഎൽഎയും പ്രതിനിധി സമ്മേളനം ഡീൻ കുര്യാക്കോസ് എംപിയും ഉദ്ഘാടനം ചെയ്യും. തുടർന്ന് ’കേരള മോഡൽ പൊതുജനാരോഗ്യം - പ്രതീക്ഷകളും വെല്ലുവിളികളും’ എന്ന വിഷയത്തിൽ സെമിനാർ നടക്കും. വൈകുന്നേരം നടക്കുന്ന സമാപന സമ്മേളനം മന്ത്രി റോഷി അഗസ്റ്റിൻ ഉദ്ഘാടനം ചെയ്യും. 14ജില്ലകളിൽനിന്നായി 500 ഓളം പ്രതിനിധികൾ സമ്മേളനത്തിൽ പങ്കെടുക്കുമെന്ന് കേരള ഹെൽത്ത് ഇൻസ്പെക്ടേഴ്സ് യൂണിയൻ രക്ഷാധികാരി കെ.എസ്. ജോയി, സംസ്ഥാന പ്രസിഡന്‍റ് എം.എം. സക്കീർ, വൈസ് പ്രസിഡന്‍റ് ജോർജുകുട്ടി, ട്രഷറർ കെ. ജയരാജൻ, സ്വാഗതസംഘം ജന. കണ്‍വീനർ ആർ. സന്തോഷ് രവീന്ദ്രൻ എന്നിവർ അറിയിച്ചു.

സ്പോർട്സ് ആയുർവേദയിൽ ഫിസിയോതെറാപ്പി യൂണിറ്റ്

തൊടുപുഴ: ജില്ലാ ആയുർവേദ ആശുപത്രിയിൽ നാഷണൽ ആയുഷ് മിഷന്‍റെ സഹകരണത്തോടെ പ്രവർത്തിച്ചുവരുന്ന സ്പോർട്സ് ആയുർവേദ വിഭാഗത്തിൽ പുതിയ ഫിസിയോതെറാപ്പി യൂണിറ്റ് പ്രവർത്തനം തുടങ്ങി. സംസ്ഥാനത്തെ ആയുഷ് ചികിത്സാകേന്ദ്രങ്ങളിലേക്ക് അനുവദിച്ച ഫിസിയോതെറാപ്പി യൂണിറ്റുകളുടെ സംസ്ഥാനതല പ്രവർത്തന ഉദ്ഘാടനം മന്ത്രി വീണ ജോർജ് നിർവഹിച്ചു. തൊടുപുഴ സ്പോർട്സ് ആയുർവേദ ഹാളിൽ സംഘടിപ്പിച്ച പ്രാദേശിക ചടങ്ങ് പി.ജെ. ജോസഫ് എംഎൽഎ ഉദ്ഘാടനം ചെയ്തു. ഭാരതീയ ചികിത്സാവകുപ്പ് ജില്ലാ മെഡിക്കൽ ഓഫീസർ ഡോ. ജെറോം വി. കുര്യൻ പദ്ധതി വിശദീകരിച്ചു. ജില്ലാ ആയുർവേദ ആശുപത്രി സൂപ്രണ്ട് ഡോ. പി.ആർ. സലിം, ചീഫ് മെഡിക്കൽ ഓഫീസർ ഡോ. യു.ബി. ഷീജ, എച്ച്എംസി അംഗങ്ങളായ പി.എ. സലീം കുട്ടി, സി.എസ്. മഹേഷ്, പി.പി. ജോയി, എസ്.എം. ഷെരീഫ്, വി.എസ്. അബാസ് തുടങ്ങിയവർ പ്രസംഗിച്ചു. പുതിയ ഫിസിയോ തെറാപ്പി യൂണിറ്റിൽ ഐഎഫ്ടി ടെൻസ് കോംബോ യൂണിറ്റ്, ഇലക‌്ട്രിക്കൽ മസിൽ സ്റ്റിമുലേറ്റർ, ഷോൾഡർ വീൽ, ട്രാക്‌ഷൻ യൂണിറ്റ്, ഇലക‌്ട്രിക് നേർവ് സ്റ്റിമുലേറ്റർ, ഇൻഫ്രാ റെഡ് റേഡിയേഷൻ തുടങ്ങി വിപുലമായ സൗകര്യങ്ങളാണ് സജ്ജമാക്കിയിരിക്കുന്നത്. കൂടാതെ ഡ്രൈ നീഡിലിംഗ്, കൈനസിയോളജി ടേപ്പിംഗ് എന്നീ സേവനങ്ങളും ലഭിക്കും. സ്പോർട്സ് ആയുർവേദ റിസർച്ച് സെൽ കണ്‍വീനറെ കൂടാതെ ഒരു സ്പെഷലിസ്റ്റ് മെഡിക്കൽ ഓഫീസർ, രണ്ട് മെഡിക്കൽ ഓഫീസർമാർ, ഒരു ഫിസിയോ തെറാപ്പിസ്റ്റ്, മൂന്ന് പഞ്ചകർമ്മ തെറാപ്പിസ്റ്റുകൾ എന്നിവർ അടങ്ങുന്ന ടീമാണ് സ്പോർട്സ് ആയുർവേദയിലുള്ളത്.

പെരുമാംകണ്ടം സെന്‍റ് ജൂഡ് നഗറിൽ തിരുനാൾ

തഴുവംകുന്ന്: പെരുമാംകണ്ടം സെന്‍റ് ജൂഡ് നഗറിൽ വിശുദ്ധ യൂദാശ്ലീഹയുടെ തിരുനാൾ നാളെ മുതൽ 26 വരെ ആഘോഷിക്കുമെന്ന് വികാരി ഫാ. ജോസ് കിഴക്കേയിൽ അറിയിച്ചു. തിരുനാളിനൊരുക്കമായുള്ള ബൈബിൾ കണ്‍വൻഷൻ ഇന്നു സമാപിക്കും. ഇന്നു രാവിലെ 5.30ന് വിശുദ്ധ കുർബാന, നൊവേന, വൈകുന്നേരം നാലിന് ജപമാല സമർപ്പണം, 4.30ന് വിശുദ്ധ കുർബാന, നൊവേന -റവ.ഡോ. സ്റ്റാൻലി കുന്നേൽ, ബൈബിൾ കണ്‍വൻഷൻ - ഫാ. ജയിംസ് കക്കുഴി. നാളെ രാവിലെ 5.30ന് വിശുദ്ധ കുർബാന, നൊവേന, വൈകുന്നേരം 4.30ന് ജപമാല സമർപ്പണം, കൊടിയേറ്റ്, തിരുനാൾ കുർബാന, നൊവേന, സന്ദേശം - മാർ ജോർജ് പുന്നക്കോട്ടിൽ. 25ന് രാവിലെ 5.30നും 10നും വിശുദ്ധ കുർബാന, നൊവേന, 11 മുതൽ 12.30 വരെ ദിവ്യകാരുണ്യ സന്നിധിയിൽ ജപമാല രഹസ്യങ്ങളുടെ ധ്യാനവും ആരാധനയും -തഴുവംകുന്ന് എസ്എച്ച് സിസ്റ്റേഴ്സ്, 12.30ന് പാൽക്കഞ്ഞി നേർച്ച, വൈകുന്നേരം 4.30ന് വാഹന വെഞ്ചരിപ്പ്, അഞ്ചിന് തിരുനാൾ കുർബാന, സന്ദേശം -ഫാ. റോയി കണ്ണഞ്ചിറ, ഏഴിന് ജപമാല, തിരിപ്രദക്ഷിണം. 26ന് രാവിലെ 5.30ന് വിശുദ്ധ കുർബാന, സന്ദേശം, നൊവേന, രശ്മിക്കിരീടം എഴുന്നള്ളിക്കൽ, ഏഴിന് വിശുദ്ധ കുർബാന, 10.30ന് വിശുദ്ധ കുർബാന, സന്ദേശം, നൊവേന, 11.30നും വൈകുന്നേരം നാലിനും രശ്മിക്കിരീടം എഴുന്നള്ളിക്കൽ, അഞ്ചിന് തിരുനാൾ കുർബാന - ഫാ. മാത്യു ചെറുപറന്പിൽ, സന്ദേശം - റവ. ഡോ. ബെന്നോ പുതിയാപറന്പിൽ, പ്രദക്ഷിണം, സമാപന ആശീർവാദം, തിരുശേഷിപ്പ് വണക്കം.

ശാസ്ത്രവിസ്മയം ഇന്ന് ഇതൾ വിരിയും

തൊടുപുഴ: കൗമാര ശാസ്ത്ര വിസ്മയങ്ങൾ ഇന്നും നാളെയുമായി തൊടുപുഴയിൽ ഇതൾ വിരിയും. റവന്യു ജില്ലാ സ്കൂൾ ശാസ്ത്ര, ഗണിതശാസ്ത്ര, സാമൂഹ്യശാസ്ത്ര, ഐടി, പ്രവൃത്തിപരിചയ മേളകൾക്ക് ഇന്നു തുടക്കമാകും. ശാസ്ത്രബോധവും അറിവും പ്രായോഗികതലത്തിൽ പരീക്ഷിക്കപ്പെടുന്ന വേദിയിൽ കുട്ടി ശാസ്ത്രജ്ഞരുടെ പുത്തനാശയങ്ങളും കണ്ടുപിടിത്തങ്ങളും കാണാനും അവസരമുണ്ടാകും. ഇന്നു രാവിലെ 10ന് ഡോ. എപിജെ അബ്ദുൾ കലാം ഗവ. എച്ച്എസ്എസിൽ ഡീൻ കുര്യാക്കോസ് എംപി ശാസ്ത്രോത്സവം ഉദ്ഘാടനം ചെയ്യും. മുനിസിപ്പൽ കൗണ്‍സിലർ ജയലക്ഷ്മി ഗോപൻ അധ്യക്ഷത വഹിക്കും. കോട്ടയം ആർഡിഡി പി.എൻ.വിജി മുഖ്യപ്രഭാഷണം നടത്തും. ജില്ലാ വിദ്യാഭ്യാസ ഉപ ഡയറക്ടർ പി.സി. ഗീത സ്വാഗതം പറയും. നാളെ വൈകുന്നേരം നാലിന് നടക്കുന്ന സമാപന സമ്മേളനം മുനിസിപ്പൽ ചെയർമാൻ കെ. ദീപക് ഉദ്ഘാടനം ചെയ്യും. നഗരസഭാ സ്റ്റാൻഡിംഗ് കമ്മിറ്റി ചെയർമാൻ പി.ജി. രാജശേഖരൻ അധ്യക്ഷത വഹിക്കും. തൊടുപുഴ ഉപജില്ലയിലെ വിവിധ സ്കൂളുകളിലാണ് മത്സരങ്ങൾ. ശാസ്ത്രമേള, പ്രവൃത്തി പരിചയമേള എന്നിവ തൊടുപുഴ ഡോ. എപിജെ അബ്ദുൾ കലാം ഗവ. എച്ച്എസ്എസിലും ഗണിത ശാസ്ത്രമേള സെന്‍റ് സെബാസ്റ്റ്യൻസ് ഹൈസ്കൂളിലും സാമൂഹ്യ ശാസ്ത്രമേള ഗവ. വൊക്കേഷണൽ ഹയർ സെക്കൻഡറി സ്കൂളിലും ഐടി മേള മുതലക്കോടം സെന്‍റ് ജോർജ് ഹൈസ്കൂളിലും നടക്കും. വിവിധ ഉപജില്ലകളിൽനിന്ന് 2200ഓളം മത്സരാർഥികൾ പങ്കെടുക്കും. ഇന്നു രാവിലെ 10ന് ഡോ. എപിജെ അബ്ദുൾ കലാം ഗവ. എച്ച്എസ്എസിൽ ഡീൻ കുര്യാക്കോസ് എംപി ശാസ്ത്രോത്സവം ഉദ്ഘാടനം ചെയ്യും. പ്രവൃത്തി പരിചയ മേള നാളെ നടക്കും. മേളയുടെ ഒരുക്കങ്ങൾ പൂർത്തിയായതായി സംഘാടകർ അറിയിച്ചു.

റോഡിന്‍റെ കരാറായി: നിർമാണം ഉടനെന്ന് സിപിഎം

മുട്ടം: കോടതി റോഡ് ടാറിംഗുമായി ബന്ധപ്പെട്ട് ചില രാഷ‌്ട്രീയ പ്രവർത്തകർ ജനത്തെ തെറ്റിദ്ധരിപ്പിക്കുകയാണെന്ന് സിപിഎം മുട്ടം വെസ്റ്റ് ലോക്കൽ കമ്മിറ്റി ആരോപിച്ചു. കോടതി ജീവനക്കാരും വിദ്യാർഥികളുമടക്കം നിരവധിപേർ ദിവസേന യാത്ര ചെയ്യുന്ന റോഡ് ദീർഘകാലമായി അറ്റകുറ്റപ്പണികൾ നടത്താതെ തകർന്ന അവസ്ഥയിലായിരുന്നു. മുഖ്യമന്ത്രി പിണറായി വിജയന് ജനുവരിയിൽ നിവേദനം നൽകിയതിനെ ലോക്കൽ റോഡ് ആന്‍ഡ് റീബിൽഡ് പദ്ധതിയിൽ ഉൾപ്പെടുത്തി റീ ടാറിംഗിന് 25 ലക്ഷം രൂപ അനുവദിച്ചു. ടെൻഡർ പൂർത്തിയാക്കി കരാറുകാരൻ ജോലി ഏറ്റെടുക്കുകയും ചെയ്തു. മഴ കാരണമാണ് പ്രവൃത്തികൾ തുടങ്ങാൻ വൈകുന്നത്. വസ്തുത ഇതായിരിക്കെയാണ് ചിലർ ജനങ്ങളെ തെറ്റിദ്ധരിപ്പിക്കുന്നതെന്ന് ലോക്കൽ സെക്രട്ടറി ആൽബിൻ വടശേരി പറഞ്ഞു.

എകെപിഎ ഇടുക്കി മേഖലാ സമ്മേളനം

ചെറുതോണി: ഓൾ കേരള ഫോട്ടോഗ്രാഫേഴ്സ് അസോസിയേഷൻ ഇടുക്കി മേഖലാ സമ്മേളനം ചെറുതോണി വ്യാപാര ഭവൻ ഹാളിൽ നടന്നു. സമ്മേളനം ജില്ലാ പ്രസിഡന്‍റ് ആതിര ഉദ്ഘാടനം ചെയ്തു. മേഖലാ പ്രസിഡനന്‍റ് എൻ.ജെ. വർഗീസ് അധ്യക്ഷത വഹിച്ചു. ഫോട്ടോഗ്രഫി മേഖല നേരിടുന്ന വിവിധ വിഷയങ്ങളെക്കുറിച്ച് സമ്മേളനം ചർച്ച ചെയ്തു. സംസ്ഥാന സെക്രട്ടറി കെ.എം. മാണി, സംസ്ഥാന കമ്മിറ്റി അംഗം റോബിൻ ജോസഫ്, ജില്ലാ സെക്രട്ടറി സുനിൽ കളർഗേറ്റ്, ജില്ലാ ട്രഷറർ ബിജോ മങ്ങാട്ട്, മേഖല നിരീക്ഷകൻ കമൽ സന്തോഷ് എന്നിവർ പ്രസംഗിച്ചു. മേഖലാ സെക്രട്ടറി ബിനോജ് വി. രാജ് വാർഷിക റിപ്പോർട്ടും മേഖലാ ട്രഷറർ റോയി റോയ്സ് വാർഷിക കണക്കും അവതരിപ്പിച്ചു. സമ്മേളനത്തിൽ അടുത്ത വർഷത്തെ ഭാരവാഹികളെ തെരഞ്ഞെടുത്തു. എൻ.ജെ. വർഗീസ് - പ്രസിഡന്‍റായും ബിനോജ് വി. രാജ് സെക്രട്ടറിയായും ബിബിൻ സെബാസ്റ്റ്യൻ ട്രഷററായും തെരഞ്ഞെടുക്കപ്പെട്ടു.

മെഗാ തൊഴിൽമേളയുമായി ചിറക്കടവ് പഞ്ചായത്ത്

പൊൻകുന്നം: യുവജനങ്ങൾക്ക് തൊഴിലവസരമൊരുക്കി ചിറക്കടവ് പഞ്ചായത്ത്. നാല്പതിലേറെ കമ്പനികളുടെ തൊഴിലവസരങ്ങളിലേക്ക് അഭിമുഖത്തിന് അവസരം നൽകും. 25നു രാവിലെ ഒന്പതുമുതൽ പൊൻകുന്നം ടൗണിലെ അഗ്രികൾച്ചർ മാർക്കറ്റിംഗ് കോംപ്ലക്‌സിലാണ് മെഗാ തൊഴിൽമേള. വിജ്ഞാനകേരളം പദ്ധതിയുടെ ഭാഗമായി 2025-26 സാമ്പത്തിക വർഷത്തെ പദ്ധതിയിൽ ഉൾപ്പെടുത്തി കുടുംബശ്രീ മിഷൻ, യൂത്ത് മിഷൻ എന്നിവയുടെ സഹകരണത്തോടെയാണ് മേള നടത്തുന്നതെന്ന് പഞ്ചായത്ത് അധികൃതർ പത്രസമ്മേളനത്തിൽ പറഞ്ഞു. അപേക്ഷകർ ചിറക്കടവ് പഞ്ചായത്ത് നിവാസികളാകണമെന്നില്ല. എസ്എസ്എൽസി മുതൽ ഉന്നത വിദ്യാഭ്യാസ യോഗ്യത നേടിയ ഉദ്യോഗാർഥികൾക്കുവരെ പങ്കെടുക്കാം. ഒരാൾക്ക് അഞ്ചു കമ്പനികളുടെ അഭിമുഖത്തിൽ വരെ പങ്കെടുക്കാം. സ്ട്രീം പെർഫെക്‌ട്, ലുലു, ഒലീവിയ, ജിഐസിഇ, മെഡ്പ്ലസ്, കല്യാൺ, നിപ്പോൺ ടൊയോട്ട, ബെൽസ്റ്റാർ, മാക്‌സ് വാല്യു, പോപ്പുലർ വെഹിക്കിൾസ്, കെഎൽഎം ആക്‌സിവ, ജിയോജിത്, മിഗ് ഗ്രൂപ്പ്, ആൻസൺ ഗ്രൂപ്പ്, രാംരാജ്, പോപ്പുലർ ഹ്യൂണ്ടായ്, ഓട്ടോബാൻ, ടെക് മഹീന്ദ്ര തുടങ്ങി നാല്പതിലേറെ തൊഴിൽദാതാക്കളെത്തും. ‌ക്യുആർ കോഡ് മുഖേനയും ഗൂഗിൾഫോം മുഖേനയും മുൻകൂട്ടി രജിസ്റ്റർ ചെയ്യാം. കൂടാതെ 25ന് സ്‌പോട്ട് രജിസ്‌ട്രേഷനിലൂടെയും പങ്കെടുക്കാം. മുൻകൂർ രജിസ്‌ട്രേഷന് വാട്‌സാപ്പ് നമ്പർ - 9656557054. രാവിലെ ഒന്പതിന് ചീഫ് വിപ്പ് ഡോ. എൻ. ജയരാജ് ഉദ്ഘാടനം ചെയ്യും. പഞ്ചായത്ത് പ്രസിഡന്‍റ് സി.ആർ. ശ്രീകുമാർ അധ്യക്ഷത വഹിക്കും. ആന്‍റോ ആന്‍റണി എംപി മുഖ്യപ്രഭാഷണം നടത്തും. വിജ്ഞാനകേരളം സ്റ്റേറ്റ് കോ-ഓർഡിനേറ്ററായ മുൻ മന്ത്രി ഡോ. ടി.എം. തോമസ് ഐസക് പദ്ധതി വിശദീകരിക്കും. പത്രസമ്മേളനത്തിൽ പ്രസിഡന്‍റ് സി.ആർ. ശ്രീകുമാർ, വൈസ്പ്രസിഡന്‍റ് സതി സുരേന്ദ്രൻ, പഞ്ചായത്തംഗങ്ങളായ സുമേഷ് ആൻഡ്രൂസ്, ലീന കൃഷ്ണകുമാർ, ഷാക്കി സജീവ്, അമ്പിളി ശിവദാസ്, ശ്രീലത സന്തോഷ്, എസ്. സിന്ധുദേവി, സി. ഗോപാലൻ, അസിസ്റ്റന്‍റ് സെക്രട്ടറി എസ്. സിന്ധുമോൾ, സിഡിഎസ് ചെയർപേഴ്‌സൺ ഉഷാ പ്രകാശ് എന്നിവർ പങ്കെടുത്തു.

മുന്‍ പഞ്ചായത്ത് പ്രസിഡന്‍റിന് കുടിവെള്ളം നിഷേധിക്കുന്നതായി ആരോപണം

നെടുങ്കണ്ടം: പട്ടികജാതി വിഭാഗത്തില്‍പ്പെട്ട പഞ്ചായത്ത് മുന്‍ പ്രസിഡന്‍റ്് ഉള്‍പ്പെടെയുള്ളവര്‍ക്ക് കുടിവെള്ളം നിഷേധിക്കുന്നതായി ആക്ഷേപം. പട്ടികജാതി വിഭാഗക്കാര്‍ക്കായി ആരംഭിച്ച നെടുങ്കണ്ടം പഞ്ചായത്ത് പതിനഞ്ചാം വാര്‍ഡ് കല്ലാര്‍പാറയില്‍ പ്രവര്‍ത്തിക്കുന്ന കുടിവെള്ള പദ്ധതിയുടെ നടത്തിപ്പില്‍ അഴിമതി നടന്നതായും പദ്ധതിയുടെ സെക്രട്ടറി പി.ഡി. സജീവ് ആരോപിച്ചു. മുന്‍ പഞ്ചായത്ത് പ്രസിഡന്റും പൊതുപ്രവര്‍ത്തകനുമായ വ്യക്തിക്ക് പദ്ധതിയില്‍ നിന്നും കുടിവെള്ളം നല്‍കണമെന്ന ജില്ലാ കളക്ടറുടെ ഉത്തരവ് ഉണ്ടായിട്ടും കണക്ഷന്‍ നല്‍കാന്‍ തയാറാകുന്നില്ല. വാര്‍ഡ് മെംബറുടെയും സിപിഎമ്മിലെ ചിലരുടെയും സ്ഥാപിത താത്‍പര്യങ്ങള്‍ക്കുവേണ്ടി പദ്ധതി ദുരുപയോഗം ചെയ്യുകയാണെന്നാണ് ആരോപണം. അര്‍ഹതപ്പെട്ടവര്‍ക്ക് കുടിവെള്ളം ലഭിക്കാനും നിയമാനുസൃതമല്ലാതെ നടത്തിയ പൊതുയോഗത്തിനെതിരേയും നിയമനടപടികള്‍ സ്വീകരിക്കുമെന്ന് സജീവ് ആവശ്യപ്പെട്ടു.

ഷോപ്പ്സൈറ്റ് പട്ടയം: കോണ്‍ഗ്രസ് പ്രചാരണം അടിസ്ഥാനരഹിതം: കേരള കോണ്‍ഗ്രസ്-എം

കട്ടപ്പന: ഷോപ്പ്സൈറ്റ് പട്ടയം നൽകുന്നതിന് നിയമതടസമുണ്ടെന്ന കോണ്‍ഗ്രസ് പ്രചാരണം വാസ്തവവിരുദ്ധമെന്ന് കേരള കോണ്‍ഗ്രസ്-എം. കേന്ദ്ര വനം-പരിസ്ഥിതി വകുപ്പിന്‍റെ അനുമതി പ്രകാരം സിഎച്ച്ആറിൽനിന്ന് ഒഴിവാക്കപ്പെട്ട 28,000ൽപ്പരം ഹെക്ടർ സ്ഥലത്താണ് 1993ലെ വനം കുടിയേറ്റം ക്രമീകരിക്കൽ നിയമപ്രകാരം പട്ടയം നൽകുന്നത്. ഇത് നിയമാനുസൃതമാണെന്ന് ഹൈക്കോടതിയും സുപ്രീംകോടതിയും അംഗീകരിച്ചിട്ടുള്ളതാണ്. ഈ ഭൂമിയിൽ പട്ടയ നടപടികൾ പാടില്ലെന്ന് ഒരുകോടതിയും പറഞ്ഞിട്ടില്ല. 1993ലെ ചട്ടപ്രകാരം നൽകുന്ന പട്ടയങ്ങൾ നിയമവിധേയമാണെന്ന് സുപ്രീംകോടതിയും പറഞ്ഞിട്ടുണ്ട്. സുപ്രീംകോടതി നിയമവിധേയമെന്ന് കണ്ടെത്തിയ ഭൂമിയിൽ പട്ടയം നൽകാൻ നിയമപ്രശ്നമില്ല. 1964ലെ ചട്ടപ്രകാരം പട്ടയം നൽകിയ ഭൂമിയിൽ വാണിജ്യാടിസ്ഥാനത്തിലുള്ള നിർമാണം നിയമവിരുദ്ധമാണെന്ന പരാതി നൽകിയത് ഡിസിസി ജനറൽ സെക്രട്ടറി ബിജോ മാണിയാണ്. ഇതോടെ ആ പട്ടയം റദ്ദാക്കപ്പെട്ടു. പരാതിയുടെ തിക്തഫലം ജനം അനുഭവിക്കുകയാണ്. പുതിയ വിവാദമുണ്ടാക്കി കുടിയേറ്റ കർഷകരെ ദ്രോഹിക്കാനുള്ള ശ്രമമാണിപ്പോൾ നടത്തുന്നത്. രാഷ‌്ട്രീയ ലാഭത്തിനുവേണ്ടി തെറ്റായ പ്രചാരണം നടത്തുന്നത് കുടിയേറ്റ കർഷകർക്ക് തിരിച്ചടിയാകും. നിയമസാധുത വിലയിരുത്തി കർഷകന് പട്ടയം നൽകാൻ സർക്കാർ തീരുമാനമെടുക്കുന്പോൾ വിവാദങ്ങൾ ഉയർത്തി ഇല്ലാതാക്കാൻ ശ്രമിക്കുന്നത് കർഷക താത്പര്യത്തിന് എതിരാണ്. വിവാദമുണ്ടാക്കി പട്ടയ നടപടി ഇല്ലാതാക്കാനുള്ള കോണ്‍ഗ്രസ് നയം തിരുത്തണമെന്നും പാർട്ടി സംസ്ഥാന സ്റ്റിയറിംഗ് കമ്മിറ്റിയംഗം അഡ്വ. മനോജ് എം. തോമസ്, കർഷക യൂണിയൻ ജില്ലാ പ്രസിഡന്‍റ് ബിജു ഐക്കര, സംസ്ഥാന കമ്മിറ്റിയംഗം ജോസ് എട്ടിയിൽ എന്നിവർ ആവശ്യപ്പെട്ടു.

ഏലം പട്ടയഭൂമിയിലെ നിര്‍മാണ നിരോധനം പിന്‍വലിക്കണമെന്ന്

നെടുങ്കണ്ടം: ഏലം പട്ടയഭൂമിയില്‍ ഒരു നിര്‍മാണത്തിനും അനുമതി നല്‍കാന്‍ പാടില്ലന്ന ഒന്നാം പിണറായി സര്‍ക്കാരിന്‍റെ 2019 നവംബര്‍19 ലെ ഉത്തരവ് റദ്ദ് ചെയ്യണമെന്ന് ഡിസിസി ജനറല്‍ സെക്രട്ടറി ബിജോ മാണി ആവശ്യപ്പെട്ടു. ഈ ഉത്തരവിന്‍റെ പേരിൽ വീട് പണിയാന്‍ അനുമതി ലഭിക്കാത്ത നൂറുകണക്കിന് കുടുംബങ്ങൾ ജില്ലയിലുണ്ട്. ആറ് ഗ്രാമപഞ്ചായത്തുകളിലായി പിഎംഎവൈ, ലൈഫ് ഭവന പദ്ധതികളുടെ ഗുണഭോക്തൃ ലിസ്റ്റിലുള്ള 69 കുടുംബങ്ങള്‍ക്ക് ഈ ഉത്തരവ് മൂലം വീടു പണിയാൻ എന്‍ഒസി ലഭിച്ചിട്ടില്ല. മറ്റൊരിടത്തും ഭൂമിയില്ലാത്തവരാണ് ഈ 69 കുടുംബങ്ങളും. 2019ല്‍ ആനവിരട്ടി വില്ലേജിലെ ഒരു വ്യക്തിക്ക് കുടുംബ വിഹിതമായി ലഭിച്ച 14 സെന്‍റ് ഭൂമിയില്‍ 723 സ്‌ക്വയര്‍ഫീറ്റുള്ള വീട് നിര്‍മാണത്തിന് എന്‍ഒസി നല്‍കാമോയെന്നു ചോദിച്ച് റവന്യു പ്രിന്‍സിപ്പല്‍ സെക്രട്ടറിക്ക്, ജില്ലാ കളക്ടര്‍ കത്ത് നല്‍കിയതോടെയാണ് നിര്‍മാണ നിരോധനം ഉണ്ടായത്. ഏലപ്പട്ടയ ഭൂമിയില്‍ ഒരു നിര്‍മാണത്തിനും അനുമതി നല്‍കാന്‍ പാടില്ലെന്ന് റവന്യു അണ്ടര്‍ സെക്രട്ടറി ഉത്തരവിറക്കുകയായിരുന്നു. റിസോര്‍ട്ട് മാഫിയ ഫാം ഹൗസ് എന്ന പേരില്‍ ദുരുപയോഗം ചെയ്യുമെന്ന കണ്ടെത്തലാണ് സര്‍ക്കാര്‍ ഉന്നയിക്കുന്നത്. ഏലം പട്ടയഭൂമിയില്‍ മാത്രമുള്ള നിര്‍മാണ നിരോധനം സിഎച്ച്ആര്‍ മേഖലയിലാകെ വ്യാപിപ്പിക്കാനുള്ള നീക്കത്തിലാണ് സര്‍ക്കാര്‍. 26 വില്ലേജുകളാണ് നിലവില്‍ സിഎച്ച്ആറിന്‍റെ പരിധിയിലുള്ളത്. എന്നാല്‍, സംസ്ഥാന സര്‍ക്കാര്‍ സുപ്രീം കോടതിയില്‍ നല്‍കിയ സത്യവാങ് മൂലത്തില്‍ ഈ വില്ലേജുകള്‍ കൂടാതെ 49,000 ഏക്കര്‍ ഭൂമി കൂടി സിഎച്ച്ആറിന്‍റെ പരിധിയിലാണെന്ന് തെറ്റായി ഉള്‍പ്പെടുത്തിയിട്ടുണ്ട്. ഭൂവിഷയത്തില്‍ തനിക്കെതിരേ ഇടതുപക്ഷം ഉന്നയിക്കുന്ന ആരോപണങ്ങള്‍ വസ്തുതാ വിരുദ്ധമാണ്. ഇതുമായി ബന്ധപ്പെട്ട് ഏതെങ്കിലും കോടതിയില്‍ താന്‍ കേസ് നല്‍കി എന്ന് തെളിയിച്ചാല്‍ പരസ്യമായി മാപ്പ് പറഞ്ഞ് പൊതു പ്രവര്‍ത്തനം അവസാനിപ്പിക്കുമെന്നും ബിജോ മാണി പറഞ്ഞു. ഡിസിസി വൈസ്പ്രസിഡന്‍റ് മുകേഷ് മോഹന്‍, മണ്ഡലം പ്രസിഡന്‍റുമാരായ എം.എസ്. മഹേശ്വരന്‍, രാജേഷ് ജോസഫ്, ഡിസിസി മെംബര്‍ കെ.ആര്‍. രാമചന്ദ്രന്‍, യൂത്ത് കോണ്‍ഗ്രസ് നിയോജക മണ്ഡലം പ്രസിഡന്‍റ് ആനന്ദ് തോമസ് എന്നിവരും പത്രസമ്മേളനത്തില്‍ പങ്കെടുത്തു.

കോഫിബോർഡ് സബ്സിഡി: അപേക്ഷ ക്ഷണിച്ചു

കട്ടപ്പന: സംയോജിത കാപ്പിവികസന പദ്ധതിയുടെ ഭാഗമായി കാപ്പിത്തോട്ടങ്ങളുടെ സമഗ്ര ഉന്നമനത്തിനായി കോഫി ബോർഡ് വിവിധ പദ്ധതികൾക്കായി സബ്സിഡി നൽകും. കിണർ/കുളം നിർമാണം, ജലസേചന സാമഗ്രികൾ (സ്പ്രിങ്ക്ളർ/ഡ്രിപ്പ്) വാങ്ങുന്നതിന്, പുനർകൃഷി , കാപ്പി ഗോഡൗണ്‍ നിർമാണം, കാപ്പിക്കളം നിർമാണം, യന്ത്രവത്കൃത ഡ്രയറുകൾ സ്ഥാപിക്കൽ, പൾപ്പിംഗ് യുണിറ്റ് സ്ഥാപിക്കൽ എന്നിവയ്ക്കായാണ് ധനസഹായം അനുവദിക്കുന്നത്. കാപ്പിത്തോട്ടങ്ങളുടെ യന്ത്രവത്കരണത്തിനും ഇക്കോപൾപ്പർ സ്ഥാപിക്കുന്നതിനും കാപ്പിക്കർഷകർക്ക് പാരിസ്ഥിതിക സാക്ഷ്യപത്രം (എക്കോ സർട്ടിഫിക്കറ്റ്) ലഭിക്കുന്നതിനുള്ള ധനസഹായ പദ്ധതിയും നിലവിൽ വന്നിട്ടുണ്ട്. പരമാവധി 40 ശതമാനമാണ് പൊതുവിഭാഗത്തിന് ലഭ്യമാകുന്ന സബ്സിഡി. പട്ടികജാതി പട്ടിക വർഗത്തിൽ പെട്ടവർക്ക് 75-90 ശതമാനം നിരക്കിൽ സബ്സിഡി ലഭിക്കും. ധനസഹായത്തിനു അപേക്ഷിക്കുന്ന പൊതു വിഭാഗത്തിൽപ്പെട്ടവർക്ക് കുറഞ്ഞത് ഒരു ഏക്കർ കാപ്പിത്തോട്ടവും പട്ടികജാതി/ പട്ടികവർഗ വിഭാഗത്തിൽപ്പെട്ടവർക്ക് കുറഞ്ഞത് അര ഏക്കർ കാപ്പിത്തോട്ടവും ഉണ്ടായിരിക്കണം. വ്യക്തികൾക്ക് പുറമേ ചുരുങ്ങിയത് 100 കാപ്പി കർഷകരെങ്കിലും അംഗങ്ങളയുള്ള ഫാർമേഴ്സ് പ്രൊഡ്യൂസർ ഓർഗനൈസേഷനുകൾക്കും ധനസഹായം ലഭിക്കും. കന്പനി നിയമപ്രകാരമോ സഹകരണ നിയമപ്രകാരമോ രജിസ്റ്റർ ചെയ്ത കുറഞ്ഞത് രണ്ടു വർഷമെങ്കിലും പ്രവർത്തനത്തിലുള്ള സംഘങ്ങൾക്കു മാത്രമേ അപേക്ഷിക്കാൻ സാധിക്കൂ. അപേക്ഷിക്കുന്നവർ പ്രവൃത്തി തുടങ്ങുന്നതിനുമുന്പ് കോഫി ബോർഡിന്‍റെ ലൈസണ്‍ ഓഫീസുകളിൽനിന്നു മുൻകൂർ അനുമതി വാങ്ങണം. അപേക്ഷ നൽകാൻ ആഗ്രഹിക്കുന്നവർ 28നകം "ഇന്ത്യ കോഫീ ആപ്പ്’ (മൊബൈൽ ആപ്പ്) / കോഫീ ബോർഡ് വെബ്സൈറ്റ് vsskäv (https://coffeeboard.gov.in) വഴി ഓണ്‍ലൈൻ ആയി സമർപ്പിക്കുന്ന അപേക്ഷകൾ മാത്രമേ പരിഗണിക്കൂ. കൂടുതൽ വിവരങ്ങൾക്ക് തൊട്ടടുത്ത കോഫീ ബോർഡ് ഓഫീസുമായി ബന്ധപ്പെടണമെന്ന് കോഫീ ബോർഡ് ഡെപ്യൂട്ടി ഡയറക്ടർ അറിയിച്ചു. വിശദവിവരങ്ങൾക്ക് അടുത്തുള്ള കോഫി ബോർഡ് ഓഫീസുമായി ബന്ധപ്പെടണം. വാഴവര: 04868 278025, 94955 61600, വണ്ടിപ്പെരിയാർ : 8547315205, അടിമാലി: 82770 66286.

"ചാണകം ഉണക്കാനിട്ടതിനു പിഴയടിച്ചതു പഞ്ചായത്തല്ല എൻഫോഴ്സ്മെന്‍റ്'

കട്ടപ്പന: അണക്കര കുരുവിക്കാട്ടുപാറയിലെ റവന്യു പാറപ്പുറത്ത് ചാണകം ഉണക്കാനിട്ടതിനു ക്ഷീരകർഷകനു പഞ്ചായത്ത് പിഴ ചുമത്തിയെന്ന ആരോപണം അടിസ്ഥാനരഹിതമാണെന്നും എൻഫോഴ്മെന്‍റാണ് പിഴ ഇട്ടതെന്നും ചക്കുപള്ളം പഞ്ചായത്തു ഭരണസമിതി പത്രസമ്മേളനത്തിൽ അറിയിച്ചു. വർഷങ്ങളായി മേഖലയിലെ നിരവധി ക്ഷീരകർഷകർ പാറപ്പുറത്താണ് ചാണകം ഉണക്കുന്നത്. ഏതാനും നാളുകളായി ഒരു ഫാമിലെ പച്ചച്ചാണകം പാറപ്പുറത്തു കൂട്ടിയിട്ടിരുന്നു. മഴക്കാലത്തു ചാണകം തോട്ടിലേക്ക് ഒലിച്ചെത്തി വെള്ളം മലിനമായതോടെ നാട്ടുകാർ പ്രതിഷേധവുമായി രംഗത്തെത്തി. തോട്ടിലെ വെള്ളം ദൈനംദിന ആവശ്യങ്ങൾക്കു നിരവധി കുടുംബങ്ങൾ ഉപയോഗിക്കുന്നതാണ്. ദുർഗന്ധം അസഹ്യമായതോടെ സമീപത്തെ അന്പലത്തിലും പള്ളിയിലുമെത്തുന്നവരും എതിർപ്പ് പ്രകടിപ്പിച്ചിരുന്നു. സാംക്രമിക രോഗങ്ങൾ പിടിപെടാനുള്ള സാധ്യത കണക്കിലെടുത്ത് ആരോഗ്യവകുപ്പ് പാറയിൽ ചാണകം തള്ളരുതെന്ന് നിർദേശിച്ചിരുന്നു. എന്നാൽ, വീണ്ടും ചാണകം തള്ളിയതോടെ നാട്ടുകാരിൽ ചിലർ ജില്ലാ കളക്‌ടർക്കും എൻഫോഴ്സ്മെന്‍റിനും പരാതി നൽകി. എൻഫോഴ്സ്മെന്‍റ് പരിശോധന നടത്തിയാണ് ഫാം ഉടമ ഓലിക്കര ബിജുവിനെതിരേ 10,000 രൂപ പിഴ ചുമത്തിയത്. തുടർന്നാണ് പഞ്ചായത്തിൽനിന്നു നോട്ടീസ് നൽകിയതനുസരിച്ചു പിഴയൊടുക്കി ചാണകം നീക്കിയത്. ഇതേ പാറപ്പുറത്ത് ചാണകം തള്ളുന്ന മൂന്നുപേർക്കുകൂടി നോട്ടീസ് നൽകിയിരുന്നു. വണ്ടൻമേട് പഞ്ചായത്തിന്‍റെ പരിധിയിലുള്ള ഒരു പാറപ്പുറത്ത് ചാണകം ഇട്ട മറ്റൊരാൾക്കും പിഴ ചുമത്തിയിരുന്നു. എന്നാൽ, ചക്കുപള്ളം പഞ്ചായത്ത് ക്ഷീരകർഷകർക്കെതിരാണെന്ന് വരുത്താനുള്ള ശ്രമമാണിപ്പോൾ നടക്കുന്നത്. പാലിന് ഇൻസെന്‍റീവ് നൽകാൻ 10 ലക്ഷവും കാലിത്തീറ്റ സബ്സിഡിയായി അഞ്ച് ലക്ഷവും എല്ലാവർഷം ക്ഷീരസംഘങ്ങൾ വഴി പഞ്ചായത്ത് നൽകിവരുന്നുണ്ട്. കഴിഞ്ഞ വർഷങ്ങളിൽ കന്നുകുട്ടികളെയും വിതരണം ചെയ്തിരുന്നു. ക്ഷീരകർഷകർക്കു ചാണകം ഉണങ്ങി സംസ്കരിക്കാൻ ക്ഷീരസംഘവും ശുചിത്വ മിഷനും ചേർന്നു പദ്ധതി രൂപീകരിച്ചിട്ടുണ്ടെന്നും തെരഞ്ഞെടുപ്പ് മുന്നിൽകണ്ടുള്ള വ്യാജപ്രചാരണമാണ് നടക്കുന്നതെന്നും ഭരണസമിതി അംഗങ്ങളായ പ്രസിഡന്‍റ് ജോസ് പുതുമന, മുൻ പ്രസിഡന്‍റുമാരായ പി.കെ. രാമചന്ദ്രൻ, വി.ജെ. രാജപ്പൻ, പഞ്ചായത്തംഗം സൂസൻ മാത്യു എന്നിവർ അറിയിച്ചു.

ജില്ലാ സെക്രട്ടറിക്കെതിരായുള്ള നീക്കം രാഷ‌്ട്രീയ ഗൂഢാലോചനയെന്ന്

ചെറുതോണി: സിപിഎം ജില്ലാ സെക്രട്ടറി സി.വി. വര്‍ഗീസിനെതിരേ നടക്കുന്ന പ്രചാരണങ്ങള്‍ രാഷ‌്ട്രീയ ഗൂഢാലോചനയുടെ ഭാഗമാണെന്ന് സിപിഎം ഇടുക്കി ഏരിയാ കമ്മിറ്റി ഭാരവാഹികള്‍ പത്രസമ്മേളനത്തില്‍ പറഞ്ഞു. ജില്ലാ ആസ്ഥാന വികസനരംഗത്തും ആരോഗ്യ വിദ്യാഭ്യാസ മേഖലയിലും ദീര്‍ഘകാലമായി കരുത്തുറ്റ സംഭാവനകള്‍ നല്‍കി പ്രവര്‍ത്തിച്ചുവരുന്ന നേതൃത്വത്തെ അപകീര്‍ത്തിപ്പെടുത്താന്‍ മെനഞ്ഞെടുത്ത രാഷ‌്ട്രീയ ഗൂഢാലോചനയാണ് നഴ്സിംഗ് കോളജുമായി ബന്ധപ്പെട്ട വിവാദത്തിന് പിന്നിലുള്ളത്. ജില്ലാ സെക്രട്ടേറിയറ്റംഗം റോമിയോ സെബാസ്റ്റ്യന്‍, ഇടുക്കി ഏരിയാ സെക്രട്ടറി പി.ബി. സബീഷ്, ജില്ലാ കമ്മിറ്റിയംഗം കെ.ജി. സത്യന്‍ എന്നിവര്‍ പറഞ്ഞു. ഹോസ്റ്റൽ സൗകര്യം ഉടൻ ലഭ്യമാക്കണം: കെഎസ്‌യു ചെറുതോണി: ഇടുക്കി മെഡിക്കൽ കോളജിനെ തകർക്കുന്നതിനു വേണ്ടി ഇടതുപക്ഷ സർക്കാരും സിപിഎം നേതാക്കന്മാരും ശ്രമിക്കുകയാണെന്ന് കെഎസ്‌യു ആരോപിച്ചു. ഉമ്മൻ ചാണ്ടി സർക്കാർ ജില്ലയ്ക്ക് അനുവദിച്ച മെഡിക്കൽ കോളജിൽ ഇടതുപക്ഷ സർക്കാർ അധികാരത്തിൽ വന്ന് 10 വർഷമായിട്ടും അടിസ്ഥാന സൗകര്യങ്ങളൊന്നും ഒരുക്കിയിട്ടില്ല. ഹോസ്റ്റൽ സൗകര്യമില്ലാത്തുന്നതിന് ജില്ലാ കളക്ടറുടെ ചേംബറിൽ വിളിക്കേണ്ട മീറ്റിംഗ് സിപിഎം ജില്ലാ സെക്രട്ടറിയുടെ ഓഫീസിൽ വിളിച്ചുചേർത്തത് എന്തിനാണെന്ന് അധികൃതർ വ്യക്തമാക്കണമെന്നും ജില്ലാ പ്രസിഡന്‍റ്് നിതിൻ ലൂക്കോസ് ആവശ്യപ്പെട്ടു.

കാഞ്ഞിരപ്പള്ളി രൂപത ബൈബിൾ കണ്‍വൻഷൻ കട്ടപ്പനയിൽ

കട്ടപ്പന: അണക്കര മരിയൻ ധ്യാനകേന്ദ്രം ഡയറക്ടർ ഫാ. ഡോമിനിക് വാളന്മനാൽ നയിക്കുന്ന കഞ്ഞിരപ്പള്ളി രൂപത ബൈബിൾ കണ്‍വെൻഷൻ-2025 "കൃപാഭിഷേകം’കട്ടപ്പന സെന്‍റ് ജോർജ് ഫെറോന ദേവാലയത്തിൽ ഡിസംബർ 10 മുതൽ 14 വരെ നടക്കും. കണ്‍വൻഷന് മുന്നോടിയായുള്ള ഒരുക്കം തുടങ്ങി. ജില്ലയുടെ വിവിധ ഭാഗങ്ങളിൽനിന്നു കാൽ ലക്ഷത്തോളം ആളുകൾ പങ്കെടക്കുന്ന കണ്‍വൻഷന് ഒരുക്കമായുള്ള ഏകദിന ധ്യാനം കട്ടപ്പന സെന്‍റ് ജോർജ് ഫെറോന ദൈവാലയത്തിൽ നടന്നു. ജപമാല, വചനപ്രാഘോഷണം, വിശുദ്ധ കുർബാന, ദിവ്യ കാരുണ്യ ആരാധന എന്നീ ശുശ്രുഷകൾ നടന്നു. അണക്കര മരിയൻ ധ്യാനകേന്ദ്രം അസി. ഡയറക്ടർ ഫാ. റോബിൻസ് മറ്റത്തിൽ വചന പ്രഘോഷണം നടത്തി. കാഞ്ഞിരപ്പള്ളി രൂപത കരിസ്മാറ്റിക് ഡയറക്ടർ ഫാ. കുര്യാക്കോസ് വടക്കേടത്തു വിശുദ്ധ കുർബാന അർപ്പിച്ചു. ജനറൽ കണ്‍വീനർ ഫാ. ജോസ് മംഗലത്തിൽ വോളണ്ടിയേഴ്സ് മീറ്റിംഗ് ഉദ്ഘാടനം ചെയ്തു. ഫാ. കുര്യാക്കോസ് വടക്കേടത്തു അധ്യഷത വഹിച്ചു. ഫാ. മജു നിരവത്ത്, ഫാ. രാജേഷ് പുല്ലാന്തനാൽ, ഫാ. അനൂപ് കരിങ്ങാട് എന്നിവർ പ്രസംഗിച്ചു. കണ്‍വൻഷൻ നടത്തിപ്പിനായി ഫെറോന വികാരി ജനറൽ കണ്‍വീനർ ആയി 300 പേരടങ്ങുന്ന കമ്മിറ്റിക്ക് യോഗം രൂപം നൽകി.

ദേശീയപാതയിൽ ദുരിതമായി വളർത്തുമൃഗങ്ങളുടെ മാർച്ച്

രാജാക്കാട്: അഴിച്ചു വിട്ടിരിക്കുന്ന വളര്‍ത്തു മൃഗങ്ങള്‍ റോഡില്‍ തമ്പടിച്ച് ഗതാഗത തടസമുണ്ടാക്കുന്നതു ദുരിതമാകുന്നു. ദിവസേന ആയിരക്കണക്കിനു വിനോദ സഞ്ചാരികളുടെ വാഹനങ്ങളും ബസും ചരക്ക് വാഹനങ്ങളുമടക്കം കടന്നുപോകുന്ന കൊച്ചി - ധനുഷ്കോടി ദേശീയപാതയില്‍ ആനയിറങ്കലിനു സമീപമാണ് നിരവധി വളര്‍ത്തു മൃഗങ്ങളെ ഉടമകള്‍ കെട്ടഴിച്ചു വിട്ടിരിക്കുന്നത്. തീറ്റ തേടി അലഞ്ഞുതിരിയുന്ന ഇവ കൂട്ടത്തോടെ റോഡില്‍ തമ്പടിക്കുകയാണ്. വാഹനങ്ങള്‍ ഹോണ്‍ മുഴക്കിയാല്‍ പോലും ഇവ റോഡില്‍നിന്നു മാറാതെ നില്‍ക്കുന്ന സാഹചര്യമാണ്. അപകട ഭീഷണി ‌ഏറ്റവും കൂടുതല്‍ പ്രതിസന്ധി നേരിടുന്നത് ഇരുചക്ര വാഹന യാത്രികരും കാല്‍നടയാത്രികരുമാണ്. വളവുള്ള പ്രദേശത്ത് തമ്പടിക്കുന്ന ഇവയെ കാണാതെയെത്തുന്ന ഇരുചക്ര വാഹന യാത്രികര്‍ നിരവധിപേര്‍ അപകടത്തില്‍പെട്ടിട്ടുണ്ട്. പലതവണ അധികൃതരോടു പരാതിപ്പെട്ടെങ്കിലും പ്രശ്നപരിഹാരമില്ലെന്ന് സ്ഥിരം യാത്ര ചെയ്യുന്നവര്‍ പറയുന്നു. എസ്റ്റേറ്റ് മേഖലയിലുള്ള തൊഴിലാളികളുടെ അടക്കം പശുക്കളെയാണ് ഇത്തരത്തില്‍ കയറൂരി വിട്ടിരിക്കുന്നത്. കുത്തിറക്കവും കൊടും വളവുകളും നിറഞ്ഞ ദേശീയപാതയില്‍ വലിയ അപകടത്തിനു വഴിയൊരുക്കുന്ന തരത്തില്‍ വളര്‍ത്തു മൃഗങ്ങള്‍ തമ്പടിക്കുന്നത് തടയണം. ഇത്തരത്തില്‍ വളര്‍ത്തു മൃഗങ്ങളെ അഴിച്ചുവിടുന്ന ഉടമകള്‍ക്കെതിരേ നിയമ നടപടി സ്വീകരിക്കണമെന്നും യാത്രക്കാര്‍ ആവശ്യപ്പെടുന്നു.

വനംവകുപ്പ് റോഡ് കെട്ടിയടച്ചു; മനുഷ്യാവകാശ കമ്മീഷനെ സമീപിച്ച് കാന്തല്ലൂർ പഞ്ചായത്ത്

തൊടുപുഴ: കാന്തല്ലൂർ-കുണ്ടള റോഡിന്‍റെ ഭാഗമായ സേതുപാർവതിപുരം പിഡബ്ല്യുഡി റോഡ് അടിയന്തരമായി തുറന്നുനൽകണമെന്ന് കാന്തല്ലൂർ പഞ്ചായത്ത് പ്രസിഡന്‍റ് പി.ടി. തങ്കച്ചൻ, പൊതുപ്രവർത്തകൻ സിജോ ജോസഫ് എന്നിവർ പത്രസമ്മേളനത്തിൽ ആവശ്യപ്പെട്ടു. സുപ്രീംകോടതി നിയോഗിച്ച സെൻട്രൽ എംപവേർഡ് കമ്മിറ്റി നിർദേശം തെറ്റായി വ്യാഖ്യാനിച്ചാണ് ആദിവാസി കുടികളിലേക്കടക്കം നിരവധി പേർ സഞ്ചരിക്കുന്ന കുണ്ടള-കാന്തല്ലൂർ പിഡബ്ല്യുഡി റോഡ് വനം വകുപ്പ് അടച്ചത്. ഈ വഴി തുറന്നുനൽകിയാൽ ആയിരക്കണക്കിനു സഞ്ചാരികൾ എത്തുന്ന മൂന്നാർ-രാജമല റോഡിലെ ഗതാഗതക്കുരുക്കിന് ഒരുപരിധിവരെ പരിഹാരമാകും. ഈ ആവശ്യം ഉന്നയിച്ച് മനുഷ്യാവകാശ കമ്മീഷനെ സമീപിച്ചതായും കമ്മീഷൻ കേസ് ഇന്നു പരിഗണിക്കുമെന്നും ഇവർ പറഞ്ഞു. ഇതുമൂലം കാന്തല്ലൂർ നിവാസികൾക്ക് വട്ടവട, കോവിലൂർ, മാട്ടുപ്പെട്ടി, മൂന്നാർ എന്നിവിടങ്ങളിൽ എത്തണമെങ്കിൽ 58 കിലോമീറ്ററോളം ചുറ്റിസഞ്ചരിക്കണം. സേതുപാർവതിപുരം റോഡിലൂടെ 35 കിലോമീറ്റർ സഞ്ചരിച്ചാൽ മൂന്നാറിലെത്താമായിരുന്നു. 14 കിലോമീറ്റർ ദൂരമുള്ള റോഡിന്‍റെ പെരുമല ചെക്ക്പോസ്റ്റ്മുതൽ മെത്താപ്പ് വരെയുള്ള ആറു കിലോമീറ്റർ ഭാഗമാണ് കെട്ടിയടച്ചത്. മന്നവൻചോല റിസർവ് വനത്തിലൂടെ കടന്നുപോകുന്നുവെന്ന് ചൂണ്ടിക്കാട്ടി 1980ലെ വനനിയമ പ്രകാരമാണ് വൈൽഡ് ലൈഫ് വാർഡൻ നാലു മീറ്റർ വീതിയുണ്ടായിരുന്ന ടാറിംഗ് റോഡിലൂടെയുള്ള ഗതാഗതം വിലക്കിയത്. പെരുമല, മെത്താപ്പ് എന്നിവിടങ്ങളിൽ ചെക്ക്പോസ്റ്റും ഗേറ്റും സ്ഥാപിക്കുകയും ചെയ്തു. ഇതിനെതിരേ നാട്ടുകാർ സമർപ്പിച്ച ഹർജിയിലാണ് 200 സെപ്റ്റംബർ 30ന് സെൻട്രൽ എംപവേർഡ് കമ്മിറ്റി റോഡിനു വീതികൂട്ടുന്നതു വിലക്കി ഉത്തരവിറക്കിയത്. എന്നാൽ, ഇതിനെ ഗതാഗതവിലക്കായി വ്യാഖ്യാനിച്ച് 2007ൽ വനംവകുപ്പ് വഴി അടയ്ക്കുകയായിരുന്നു. ഈ ഭാഗത്ത് ടേക്ക് എ ബ്രേക്ക് വിശ്രമ കേന്ദ്രം സ്ഥാപിക്കാനുള്ള പഞ്ചായത്തിന്‍റെ നീക്കം തടഞ്ഞ വനം വകുപ്പ് 13 പഞ്ചായത്തംഗങ്ങൾക്കെതിരേ വനനിയമം ലംഘിച്ചതിന് കേസെടുക്കുകയും ചെയ്തു. തുടർന്നു നാട്ടുകാർ മനുഷ്യാവകാശ കമ്മീഷനെ സമീപിക്കുകയായിരുന്നു. കമ്മീഷൻ റോഡിന്‍റെ നിജസ്ഥിതി സംബന്ധിച്ച് വനംവകുപ്പിനോട് റിപ്പോർട്ട് ആവശ്യപ്പെട്ടെങ്കിലും ഉദ്യോഗസ്ഥർ നൽകിയിട്ടില്ല. ഇതിനിടെ, പഞ്ചായത്ത് പ്രസിഡന്‍റിന്‍റെ നേതൃത്വത്തിൽ വിവരാവകാശ നിയമപ്രകാരം ലഭിച്ച മറുപടിയിൽ വനംവകുപ്പ് തെറ്റിദ്ധരിപ്പിച്ചാണ് റോഡ് കൈവശപ്പെടുത്തിയിരിക്കുന്നതെന്നു കണ്ടെത്തിയത്. പതിറ്റാണ്ടുകൾക്ക് മുന്പ് ഈ റോഡിനായി റവന്യുവകുപ്പ് പത്തേക്കർ സ്ഥലം വനംവകുപ്പിന് വിട്ടുനൽകിയിട്ടുള്ളതായും രേഖകളിൽനിന്നു വ്യക്തമായതായും ഇവർ പറഞ്ഞു.

ഗതാഗത വകുപ്പിന്‍റെ എയർഹോൺ "കൂട്ടക്കുരുതി'

തൊടുപുഴ: വാഹനങ്ങളിൽനിന്ന് പിടിച്ചെടുത്ത അമിത ശബ്ദത്തിൽ മുഴങ്ങുന്ന എയർഹോണുകൾ മോട്ടോർ വാഹനവകുപ്പ് റോഡ് റോളർ കയറ്റി നശിപ്പിച്ചു. ഇന്നലെ തൊടുപുഴയിലാണ് എയർഹോണുകൾ നശിപ്പിച്ചത്. വാഹനങ്ങൾ പരിശോധിച്ച് എയർഹോണുകൾ പിടിച്ചെടുക്കണമെന്നും ഇവ റോഡ് റോളർ കയറ്റി നശിപ്പിക്കണമെന്നും കോടതി നിർദേശം നൽകിയിരുന്നു. ഇതുസംബ ന്ധിച്ച ഗതാഗതമന്ത്രിയുടെ ഉത്തരവാണ് ഉദ്യോഗസ്ഥർ നടപ്പാക്കിയത്. കഴിഞ്ഞ 13 മുതൽ 19 വരെയായിരുന്നു വാഹനങ്ങളിലെ എയർഹോണ്‍ കണ്ടെത്തുന്നതിനായി മോട്ടോർ വാഹനവകുപ്പിന്‍റെ നേതൃത്വത്തിൽ പ്രത്യേക പരിശോധന നടത്തിയത്. പരിശോധനയിൽ ജില്ലയിൽ 96 വാഹനങ്ങൾക്കെതിരേ നടപടിയെടുത്തു. രണ്ടു ലക്ഷം രൂപ പിഴ ചുമത്തി. സ്വകാര്യ ബസുകൾ, കോണ്‍ട്രാക്ട് കാരേജ് വാഹനങ്ങൾ, ഗുഡ്സ് വാഹനങ്ങൾ തുടങ്ങി ഹെവി വാഹനങ്ങളിൽനിന്നാണ് എയർഹോണുകൾ പിടികൂടിയത്. പരിശോധനകൾ പൂർത്തിയായതിനു പിന്നാലെയാണ് മോട്ടോർ വാഹനവകുപ്പ് എൻഫോഴ്സ്മെന്‍റ് വിഭാഗം പിടിച്ചെടുത്ത ഹോണുകൾ ഇന്നലെ രാവിലെ തൊടുപുഴ പുഴയോരം ബൈപാസിൽ നിരത്തിവച്ച് റോഡ് റോളർ കയറ്റി നശിപ്പിച്ചത്. തുടർന്ന് അവശിഷ്ടങ്ങൾ ഉദ്യോഗസ്ഥർ ശേഖരിച്ച് ഓഫീസിലേക്കു മാറ്റി.

അതിതീവ്ര മഴ സാധ്യത: ജാഗ്രതാ നിർദേശം

തൊടുപുഴ: ഇന്ന് അതി തീവ്രമഴയ്ക്ക് സാധ്യത പ്രവചിച്ചിരിക്കുന്നതിനാൽ ജില്ലയിൽ ജാഗ്രതാ നിർദേശം. ഏതാനും ദിവസങ്ങളായി ജില്ലയിൽ ശക്തമായ മഴ തുടരുകയാണ്. ഓറഞ്ച് അലർട്ട് പ്രഖ്യാപിച്ച കഴിഞ്ഞ ദിവസങ്ങളിൽ പെയ്ത മഴയിൽ ഹൈറേഞ്ച് മേഖലയിൽ വൻ നാശനഷ്ടമാണ് ഉണ്ടായത്. കുമളി, കട്ടപ്പന, നെടുങ്കണ്ടം മേഖലകളിൽ വെള്ളപ്പൊക്കത്തിലും ഉരുൾപൊട്ടൽ , മണ്ണിടിച്ചിൽ എന്നിവ മൂലം വലിയ തോതിൽ നാശമുണ്ടായി. ഇന്നു ജില്ലയിൽ റെഡ് അലർട്ട് പ്രഖ്യാപിച്ചിട്ടുണ്ട്. കഴിഞ്ഞ ദിവസം ഒട്ടേറെ വീടുകളും വ്യാപാര സ്ഥാപനങ്ങളും മഴക്കെടുതിക്കിരയായി. വാഹനങ്ങളും വളർത്തുമൃഗങ്ങളും മലവെള്ളപ്പാച്ചിലിൽ ഒഴുകിപ്പോയും നഷ്ടമുണ്ടായി. നഷ്ടക്കണക്കുകൾ ജില്ലാ ഭരണകൂടം തിട്ടപ്പെടുത്തി വരുന്നതേയുള്ളു. ദുരിതത്തിനിരയായവർക്ക് അടിയന്തര സഹായം എത്തിക്കണമെന്നും വിവിധ മേഖലകളിൽനിന്ന് ആവശ്യമുയരുന്നുണ്ട്. ട്രക്കിംഗിനും ബോട്ടിംഗിനും നിരോധനം ഇന്ന് റെഡ് അലർട്ട് പ്രഖ്യാപിച്ച സാഹചര്യത്തിൽ ജില്ലയിലെ ജലാശയങ്ങളിലെ ബോട്ടിംഗ്, കയാക്കിംഗ്, റാഫ്റ്റിംഗ്, കുട്ടവഞ്ചി സവാരി ഉൾപ്പെടെയുള്ള എല്ലാവിധ ജലവിനോദങ്ങളും നിരോധിച്ചു. ദുരന്ത സാധ്യതയുളള മേഖലകളിലെ വിനോദ സഞ്ചാരങ്ങളും മണ്ണിടിച്ചിൽ, ഉരുൾപൊട്ടൽ സാധ്യതയുള്ള മലയോര മേഖലകളിലെ ട്രക്കിംഗും മറ്റെല്ലാ സാഹസിക വിനോദങ്ങളും റെഡ് അലർട്ട് പിൻവലിക്കുന്നതുവരെ നിർത്തിവയ്ക്കണം. മലയോര മേഖലയിൽ വൈകുന്നേരം ഏഴു മുതൽ രാവിലെ ആറു വരെയുള്ള യാത്ര നിരോധിച്ചു. കൂടാതെ ദുരന്ത നിവാരണ പ്രവർത്തനങ്ങൾക്ക് ഒഴികെയുള്ള എല്ലാവിധ ഖനന പ്രവർത്തനങ്ങളും മണ്ണെടുപ്പും ജില്ലാ കളക്ടർ നിരോധിച്ചു. വൻ കൃഷിനാശം കഴിഞ്ഞ ദിവസങ്ങളിൽ ഉണ്ടായ കാറ്റിലും മഴയിലും വ്യാപക കൃഷിനാശമാണ് ജില്ലയിലുണ്ടായത്. 81.44 ഹെക്ടർ സ്ഥലത്തെ കൃഷി നശിച്ചതായാണ് കൃഷി വകുപ്പിന്‍റെ കണക്ക്. 1.47 കോടിയുടെ നഷ്ടമുണ്ടായി. ഏലമാണ് വ്യാപകമായി നശിച്ചത്. 57.82 ഹെക്ടർ സ്ഥലത്തെ ഏലച്ചെടികൾ കാറ്റിലും മഴയിലും വെള്ളം കയറിയും നിലംപൊത്തി. 44.7 ലക്ഷം രൂപയുടെ നഷ്ടമാണ് ഏലം മേഖലയിലുണ്ടായത്. ഇതിനു പുറമെ കുരുമുളക്, പച്ചക്കറി, നെല്ല്, ജാതി എന്നിവയും നശിച്ചു. നെടുങ്കണ്ടം, കരുണാപുരം, ഉടുന്പൻചോല, ചക്കുപള്ളം, കുമളി, ഇരട്ടയാർ, വണ്ടൻമേട്, കാഞ്ചിയാർ, വാത്തിക്കുടി, ഇടവെട്ടി പഞ്ചായത്തുകളിലും കട്ടപ്പന മുനിസിപ്പാലിറ്റിയിലുമാണ് കൂടുതൽ കൃഷിനാശമുണ്ടായത്. വിദ്യാഭ്യാസ സ്ഥാപനങ്ങൾക്ക് ഇന്ന് അവധി ഇടുക്കി: ജില്ലയിൽ റെഡ് അലർട്ട് പ്രഖ്യാപിച്ച സാഹചര്യത്തിൽ അപകടങ്ങൾ ഒഴിവാക്കാനായി പ്രഫഷണൽ കോളജുകൾ ഉൾപ്പെടെയുള്ള എല്ലാ വിദ്യാഭ്യാസ സ്ഥാപനങ്ങൾക്കും ഇന്നു ജില്ലാ കളക്ടർ അവധി പ്രഖ്യാപിച്ചു. പ്രഫഷണൽ കോളജുകൾ, അങ്കണവാടികൾ, നഴ്സറികൾ, കേന്ദ്രീയ വിദ്യാലയങ്ങൾ, സിബിഎസ്ഇ, ഐസിഎസ്ഇ സ്കൂളുകൾ, മദ്രസകൾ, ഉൾപ്പെടെ എല്ലാ വിദ്യാഭ്യാസ സ്ഥാപനങ്ങൾക്കും അവധി ബാധകമാണ്. മുൻകൂട്ടി നിശ്ചയിച്ച പരീക്ഷകൾക്കും ഇന്‍റർവ്യൂകൾക്കും മാറ്റമില്ല. വിദ്യാർഥികൾ താമസിച്ചു പഠിക്കുന്ന റസിഡൻഷ്യൽ വിദ്യാഭ്യാസ സ്ഥാപനങ്ങൾക്ക് അവധി ബാധകമല്ല.

മുട്ടം കോടതി റോഡ്: 48 മണിക്കൂർ എൻസിപി നിരാഹാര സമരം ഇന്ന്

തൊടുപുഴ: മുട്ടം കോടതി റോഡിന്‍റെ ശോചനീയാവസ്ഥയിൽ പ്രതിഷേധിച്ച് നാഷണലിസ്റ്റ് ലോയേഴ്സ് കോണ്‍ഗ്രസ് സംസ്ഥാന പ്രസിഡന്‍റും എൻസിപി സംസ്ഥാന ജനറൽ സെക്രട്ടറിയുമായ അഡ്വ. ഷാജി തെങ്ങുംപിള്ളി മുട്ടം കോടതി ജംഗ്ഷനിൽ 48 മണിക്കൂർ നിരാഹാര സമരം നടത്തുമെന്ന് ഭാരവാഹികൾ പത്രസമ്മേളനത്തിൽ അറിയിച്ചു. ഇന്ന് ഉച്ചകഴിഞ്ഞ് മൂന്നിന് ആരംഭിക്കുന്ന സമരം പാർട്ടി സംസ്ഥാന പ്രസിഡന്‍റ് എൻ.എ. മുഹമ്മദ്കുട്ടി ഉദ്ഘാടനം ചെയ്യും. കോടതി റോഡ് തകർന്നിട്ടും അധികൃതരും ജനപ്രതിനിധികളും യാതൊരു നടപടിയും സ്വീകരിക്കുന്നില്ല. ഇതുമൂലം നൂറുകണക്കിന് അഭിഭാഷകരും പൊതുജനങ്ങളും ഏറെ ബുദ്ധിമുട്ടുകയാണ്. ഐഎച്ച്ആർഡി സ്കൂൾ, കോളജ്, പോളിടെക്നിക് എന്നിവിടങ്ങളിലെ വിദ്യാർഥികളും ഇതുമൂലം ദുരിതത്തിലാണ്. കോടതിക്കുപുറമേ വർക്കിംഗ് വിമൻസ് ഹോസ്റ്റൽ, ജില്ലാ ഹോമിയോ ആശുപത്രി, നിർമിതി കേന്ദ്രം, ഇടുക്കി വിജിലൻസ് ആന്‍ഡ് ആന്‍റി കറപ്ഷൻ ബ്യൂറോ യൂണിറ്റ്, ജില്ലാ ജയിൽ തുടങ്ങി നിരവധി സ്ഥാപനങ്ങളും ഇവിടെയാണ് പ്രവർത്തിക്കുന്നത്. റോഡ് അടിയന്തരമായി ടാറിംഗ് നടത്തി ഗതാഗതയോഗ്യമാക്കണമെന്നാവശ്യപ്പെട്ടാണ് സമരം. സാമൂഹിക, സാമുദായിക, രാഷ‌്ട്രീയ, സാംസ്കാരിക മേഖലകളിലുള്ളവർ സമരത്തിന് പിന്തുണയുമായി എത്തുമെന്നും നേതാക്കൾ അറിയിച്ചു. പത്രസമ്മേളനത്തിൽ പാർട്ടി സംസ്ഥാന ജനറൽ സെക്രട്ടറി അഡ്വ. ഷാജി തെങ്ങുംപിള്ളിൽ, സമരസമിതി കോ-ഓർഡിനേറ്റർ കെ.കെ. ഷംസുദീൻ, നാഷണലിസ്റ്റ് കിസാൻസഭ സംസ്ഥാന പ്രസിഡന്‍റ് ബേബി വരിക്കമാക്കൽ, എൻസിപി ജില്ലാ പ്രസിഡന്‍റ് സിയാദ് പറന്പിൽ, ജില്ലാ ജനറൽ സെക്രട്ടറി അനിൽകുമാർ പാറയിൽ എന്നിവർ പങ്കെടുത്തു.

ജില്ലാ ക്ഷീരകർഷക സംഗമം ഇരട്ടയാറിൽ 24ന് തുടക്കം

തൊടുപുഴ: ക്ഷീരവികസന വകുപ്പിന്‍റെയും ജില്ലയിലെ ക്ഷീരസഹകരണ സംഘങ്ങളുടെയും സംയുക്താഭിമുഖ്യത്തിൽ നടത്തുന്ന ജില്ലാ ക്ഷീരകർഷക സംഗമം 24, 25 തീയതികളിൽ ഇരട്ടയാർ സെന്‍റ് തോമസ് പാരിഷ്ഹാളിൽ നടക്കുമെന്ന് അധികൃതർ പത്രസമ്മേളനത്തിൽ അറിയിച്ചു. നാങ്കുതൊട്ടി ക്ഷീര സഹകരണസംഘത്തിന്‍റെ ആതിഥേയത്വത്തിലാണ് സംഗമം നടത്തുന്നത്. 24നു രാവിലെ എട്ടിന് പതാക ഉയർത്തൽ, ഒന്പതിന് ഡെയറി എക്സ്പോ കട്ടപ്പന ബ്ലോക്ക് പഞ്ചായത്ത് പ്രസിഡന്‍റ് വി.പി. ജോണ്‍ ഉദ്ഘാടനം ചെയ്യും. തുടർന്നു വിരമിച്ച ക്ഷീര സഹകരണസംഘം ജീവനക്കാരെ ആദരിക്കും. 9.30നു ക്ഷീരസംഘം പ്രതിനിധികൾക്കുള്ള ശില്പശാല ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാക്കുന്നേൽ ഉദ്ഘാടനം ചെയ്യും. 10ന് ക്ഷീരസഹകരണ സംഘം പ്രതിനിധികൾക്കുള്ള ശില്പശാല. തുടർന്ന് ഡെയറി ക്വിസ്. മൂന്നിന് ക്ഷീരസംഘം ജീവനക്കാരെയും ഭരണസമിതി അംഗങ്ങളെയും ക്ഷീരകർഷകരെയും കുട്ടികളെയും ഉൾപ്പെടുത്തിയുള്ള കലാകായിക മത്സരം ഇരട്ടയാർ പഞ്ചായത്ത് പ്രസിഡന്‍റ് ആനന്ദ് സുനിൽകുമാർ ഉദ്ഘാടനം ചെയ്യും. വൈകുന്നേരം ആറു മുതൽ വിവിധ കലാപരിപാടികൾ. 25നു രാവിലെ 10നു പൊതുസമ്മേളനം ഉദ്ഘാടനവും ജില്ലാ, ബ്ലോക്ക് പഞ്ചായത്തുകൾ നടപ്പാക്കുന്ന ക്ഷീരമേഖലയിലെ നൂതന പദ്ധതികളുടെ ഉദ്ഘാടനവും മന്ത്രി ജെ. ചിഞ്ചുറാണി നിർവഹിക്കും. മന്ത്രി റോഷി അഗസ്റ്റിൻ അധ്യക്ഷത വഹിക്കും. ഡീൻ കുര്യാക്കോസ് എംപി, എംഎൽഎമാരായ എം.എം. മണി, പി.ജെ. ജോസഫ്, എ. രാജ, ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാക്കുന്നേൽ, ക്ഷീരവികസന വകുപ്പ് ഡയറക്ടർ ശാലിനി ഗോപിനാഥ്, ജില്ലാ കളക്ടർ ഡോ. ദിനേശൻ ചെറുവാട്ട്, സംസ്ഥാന ക്ഷീരകർഷക ക്ഷേമനിധി ചെയർമാൻ വി.പി. ഉണ്ണികൃഷ്ണൻ, എറണാകുളം മിൽമ മേഖലാ യൂണിയൻ ചെയർമാൻ സി.എൻ. വത്സലൻ പിള്ള എന്നിവർ പ്രസംഗിക്കും. 25നു രാവിലെ ഒന്പതിന് പാലുത്പന്ന നിർമാണ പ്രദർശനവും വിപണനവും എന്ന വിഷയത്തിൽ കോലാഹലമേട് ബി ടെക് കോളജ് ഓഫ് ഡെയറി സയൻസ് ടീച്ചിംഗ് അസിസ്റ്റന്‍റ് കെ.എസ്. അനുഗ്രഹ ക്ഷീരവികസന സെമിനാർ നടത്തും. തുടർന്ന് നടക്കുന്ന പൊതുസമ്മേളനത്തിൽ ക്ഷീരമേഖലയ്ക്ക് കൂടുതൽ തുക വകയിരുത്തിയ ത്രിതല പഞ്ചായത്തുകളെ ആദരിക്കൽ, ജില്ലയിലെ മികച്ച കർഷകരെയും ക്ഷീരസഹകരണ സംഘങ്ങളെയും ആദരിക്കൽ, സംസ്ഥാന ആസൂത്രണ ബോർഡിന്‍റെ ഇടുക്കി വികസന പദ്ധതിയിൽ ഉൾപ്പെടുത്തിയ ക്ഷീരവികസന പദ്ധതികളുടെ ഉദ്ഘാടനം, മികച്ച ക്ഷീരസംഘം ജീവനക്കാർക്കുള്ള ആദരം, വിവിധ മത്സരങ്ങളിൽ വിജയികളായവർക്കുള്ള സമ്മാനവിതരണം എന്നിവ നടക്കും. തുടർന്ന് കോലാഹലമേട് ഡെയറി സയൻസ് കോളേജ് അസി. പ്രഫ. ലിജിമോൾ ജയിംസ് മാലിന്യ സൂക്ഷ്മാണു ശാസ്ത്രം എന്ന വിഷയത്തിൽ സെമിനാർ നയിക്കും. ജില്ലയിലെ ഇരുനൂറോളം സംഘങ്ങളിൽനിന്ന് 1500-ഓളം ക്ഷീരകർഷകർ സംഗമത്തിൽ പങ്കെടുക്കും. പത്രസമ്മേളനത്തിൽ സ്വാഗതസംഘം ചെയർമാൻ കെ.കെ. ജയൻ, ജനറൽ കണ്‍വീനർ ബെറ്റി ജോഷ്വ, ജോയിന്‍റ് കണ്‍വീനർമാരായ ജിസ ജോസഫ്, അഞ്ജു കുര്യൻ, പി. ശ്രീജിത്ത്, ജോണി മുണ്ടയ്ക്കാമറ്റത്തിൽ എന്നിവർ പങ്കെടുത്തു.

കല്ലാനിക്കൽ സ്കൂളിന് പുതിയ ബസ്

തൊടുപുഴ: കല്ലാനിക്കൽ സെന്‍റ് ജോർജ് ഹയർ സെക്കൻഡറി സ്കൂളിന്‍റെ പുതിയ സ്കൂൾ ബസിന്‍റെ ഫ്ളാഗ് ഓഫ് ഡീൻ കുര്യാക്കോസ് എംപി നിർവഹിച്ചു. എംപിയുടെ പ്രാദേശിക വികസന ഫണ്ടിൽനിന്നു 18 ലക്ഷം രൂപ വിനിയോഗിച്ചാണ് ബസ് വാങ്ങിയത്. സ്കൂൾ മാനേജർ ഫാ. സോട്ടർ പെരിങ്ങാരപ്പിള്ളിൽ അധ്യക്ഷത വഹിച്ചു. പഞ്ചായത്ത് പ്രസിഡന്‍റ് ബിൻസി മാർട്ടിൻ മെറിറ്റ് ഡേ ഉദ്ഘാടനം ചെയ്തു. പ്രിൻസിപ്പൽ ഡോ. സാജൻ മാത്യു, യുപി സ്കൂൾ ഹെഡ്മാസ്റ്റർ ലിന്‍റോ ജോർജ്, പഞ്ചായത്തംഗങ്ങളായ മോളി ബിജു, എ.കെ. സുഭാഷ് കുമാർ, പിടിഎ പ്രസിഡന്‍റ് സിബി ജോർജ് എന്നിവർ പ്രസംഗിച്ചു.

ജില്ലാ ശാസ്ത്രോത്സവം നാളെമുതൽ തൊടുപുഴയിൽ

തൊടുപുഴ: റവന്യു ജില്ലാ ശാസ്ത്രോത്സവം 23, 24 തീയതികളിൽ തൊടുപുഴയിലെ വിവിധ സ്കൂളുകളിൽ നടക്കും. ശാസ്ത്രമേള - തൊടുപുഴ എപിജെ അബ്ദുൾ കലാം ഹയർ സെക്കൻഡറി സ്കൂൾ, ഗണിത ശാസ്ത്രമേള - തൊടുപുഴ സെന്‍റ് സെബാസ്റ്റ്യൻസ് ഹൈസ്കൂൾ, സാമൂഹ്യ ശാസ്ത്രമേള - തൊടുപുഴ ഗവ. വൊക്കേഷണൽ ഹയർ സെക്കൻഡറി സ്കൂൾ, ഐടി മേള - മുതലക്കോടം സെന്‍റ് ജോർജ് ഹൈസ്കൂൾ എന്നിവിടങ്ങളിൽ നടക്കും. പ്രവൃത്തി പരിചയമേള 24ന് എപിജെ അബ്ദുൾ കലാം ഹയർ സെക്കൻഡറി സ്കൂൾ, ഗവ. വൊക്കേഷണൽ ഹയർ സെക്കൻഡറി സ്കൂൾ എന്നിവിടങ്ങളിലാണ് നടക്കുന്നത്. വിവിധ ഉപജില്ലകളിൽനിന്നായി 2,200-ഓളം വിദ്യാർഥികൾ പങ്കെടുക്കും. നാളെ രാവിലെ 10ന് ഡീൻ കുര്യാക്കോസ് എംപി ശാസ്ത്രോത്സവം ഉദ്ഘാടനം ചെയ്യും.

സിപിഎം ജില്ലാ ഓഫീസിലെ ഇടുക്കി ഗവ. നഴ്സിംഗ് കോളജ് യോഗം

ചെറുതോണി: ഇടുക്കി ഗവ. നഴ്സിംഗ് കോളജിലെ അടിസ്ഥാന സൗകര്യ വികസന കാര്യങ്ങൾ ചർച്ച ചെയ്യാൻ വിളിച്ച യോഗം സിപിഎം ജില്ലാ ഓഫീസിലേക്ക് മാറ്റിയ നടപടി അപലപനീയവും കേട്ടുകേൾവിയില്ലാത്തതുമാണെന്ന് കെ എസ്‌സി സംസ്ഥാന പ്രസിഡന്‍റ് ജോൺസ് ജോർജ് കുന്നപ്പള്ളിൽ. ജില്ലാ കളക്ടർ ചുമതലപ്പെടുത്തുന്ന ഉദ്യോഗസ്ഥന്‍റെ സാന്നിധ്യത്തിൽ കളക‌്ടറേറ്റിലോ മെഡിക്കൽ കോളജിലോ നടക്കേണ്ട യോഗം പാർട്ടി ഓഫീസിലേക്ക് മാറ്റിയത് അംഗീകരിക്കാനാവില്ല. വിദ്യാർഥികളെയും പിടിഎ പ്രതിനിധികളയും സിപിഎം ജില്ലാ സെക്രട്ടറി അവഹേളിച്ചുവിട്ടത് ഇടുക്കി നഴ്സിംഗ് കോളജിലെ പ്രശ്നങ്ങൾ പരിഹരിക്കുമെന്ന് ഉറപ്പ് നൽകിയ മന്ത്രി റോഷി അഗസ്റ്റിനോടുള്ള വെല്ലുവിളിയാണെന്നും ജോൺസ്‌ ജോർജ് ആരോപിച്ചു. പ്രശ്നങ്ങളിൽ വകുപ്പ് മന്ത്രി ഇടപെടണമെന്ന് കെഎസ്‌സി പ്രസിഡന്‍റ് ആവശ്യപ്പെട്ടു. നടപടി അപഹാസ്യം: റോയി കെ. പൗലോസ് തൊടുപുഴ: ഇടുക്കി മെഡിക്കൽ കോളജുമായി ബന്ധപ്പെട്ടുള്ള വിഷയങ്ങൾ പരിഹരിക്കുന്നതിനും ചർച്ച ചെയ്യുന്നതിനുമായി ജില്ലാ കളക്ടറുടെ അധ്യക്ഷതയിൽ ചേരേണ്ട യോഗം പാർട്ടി ഓഫീസിൽ ചേരാൻ സിപിഎം ജില്ലാ സെക്രട്ടറിയെ ചുമതലപ്പെടുത്തിയതാരാണെന്ന് കെപിസിസി വൈസ് പ്രസിഡന്‍റ് റോയി കെ. പൗലോസ്. നഴ്സിംഗ് കോളജ് പ്രിൻസിപ്പൽ, അധ്യാപക, വിദ്യാർഥി പ്രതിനിധികൾ, പിടിഎ പ്രസിഡന്‍റ്, പിടിഎ എക്സിക്യൂട്ടീവ് കമ്മിറ്റി അംഗങ്ങൾ എന്നിവരുടെ സംയുക്ത യോഗമാണ് കളക്ടർ വിളിച്ചത്. എന്നാൽ ഈ യോഗം അദ്ദേഹത്തിന്‍റെ അഭാവത്തിൽ സിപിഎം ജില്ലാ കമ്മിറ്റി ഓഫീസിൽ ജില്ലാ സെക്രട്ടറിയുടെ അധ്യക്ഷതയിൽ ചേരുകയായിരുന്നു. കളക്ടറും ഡിഎംഒയും ഇടപെട്ട് അടിയന്തരമായി പരിഹാരം കാണേണ്ട ഒരു വിഷയത്തിൽ അർഹതയില്ലാതെ യോഗം ചേരുകയും വിദ്യാർഥികളെയും രക്ഷിതാക്കളെയും പരിഹസിക്കുകയും ഭീഷണിപ്പെടുത്തുകയും ചെയ്ത സിപിഎം ജില്ലാ സെക്രട്ടറിയുടെ നടപടി അപഹാസ്യവും പ്രതിഷേധാർഹവുമാണ്. ഉമ്മൻചാണ്ടി സർക്കാർ ജില്ലയ്ക്ക് സമ്മാനിച്ച മെഡിക്കൽ കോളജിനെ തകർക്കുന്ന സമീപനങ്ങളിൽനിന്ന് സർക്കാർ പിന്തിരിയണമെന്നും മന്ത്രി റോഷി അഗസ്റ്റിൻ ഉൾപ്പെടെ നൽകിയ ഉറപ്പുകൾ പാലിച്ച് നഴ്സിംഗ് കോളജിലെ വിദ്യാർഥികളുടെ പരാതികൾക്ക് പരിഹാരം കാണണമെന്നും അദ്ദേഹം ആവശ്യപ്പെട്ടു.

അപകടത്തിൽ പരിക്കേറ്റ വീട്ടമ്മ മരിച്ചു

വണ്ണപ്പുറം: ബസ് ദേഹത്തുകൂടി കയറിയിറങ്ങി കോട്ടയം മെഡിക്കൽ കോളജിൽ ചികിത്സയിലിരുന്ന വീട്ടമ്മ മരിച്ചു. ഒറകണ്ണി ചെറ്റയിൽ പരേതനായ ശിവരാമന്‍റെ ഭാര്യ ലീല (76) യാണ് മരിച്ചത്. കഴിഞ്ഞ ഓഗസ്റ്റ് 21ന് രാവിലെ ഒൻപതോടെയാണ് അപകടം. അന്പലപ്പടി സ്റ്റാൻഡിൽനിന്ന് ഇറങ്ങിവന്ന സ്വകാര്യ ബസ് ലീലയുടെ ദേഹത്തു കൂടി കയറിയിറങ്ങുകയായിരുന്നു. സംസ്കാരം നടത്തി. മക്കൾ: ലത, അജി, ബിജി, സജി.

ഉപ്പുതറയിൽ‌ പോക്കുവരവിന്‍റെ പോക്ക് തടഞ്ഞ് തഹസിൽദാർ

ഉപ്പുതറ: ഉപ്പുതറയിലെ 12 സർവേ നമ്പരുകളിലെ പട്ടയഭൂമിയുടെ ആധാരം പോക്കുവരവ് ചെയ്യരുതെന്ന് വില്ലേജ് ഓഫീസർക്കു പീരുമേട് ഭൂരേഖാ തഹസിൽദാർ നിർദേശം നൽകി. സർവേ നന്പർ 338, 274/1, 274/2 , 274/3, 274/4. 274/5B ,274 /5 D , 274/6, 274/7, 274 /9. 274/10, 274 / 11 എന്നീ സർവേ നമ്പറുകളിലെ ഭൂമിയിലാണ് പോക്കുവരവ് തടഞ്ഞു വാക്കാൽ നിർദേശം നൽകിയിരിക്കുന്നത്. രാജമാണിക്യം കമ്മീഷൻ റിപ്പോർട്ടിന്‍റെ അടിസ്ഥാനത്തിൽ ജില്ലാ കളക്ടർ കട്ടപ്പന സബ് കോടതിയിൽ നൽകിയ പരാതിയെത്തുടർന്നാണ് നടപടി. രാജമാണിക്യം കമ്മീഷന്‍റെ റിപ്പോർട്ടിൻമേൽ വില്ലേജിലെ ആറ് സർവേ നമ്പറിലെ കരം സ്വീകരിക്കുന്നതു റവന്യൂ വകുപ്പ് നേരത്തേ തടഞ്ഞിരുന്നു. പീരുമേട് ടീ കമ്പനിയുടെ അടിയാധാരത്തിൽ ഉൾപ്പെട്ട സ്ഥലങ്ങളാണ് ഇതെന്നും തോട്ടം ഉടമകളിൽനിന്നു കർഷകർ വിലയ്ക്കു വാങ്ങിയതാണെന്നും രാജമാണിക്യം കമ്മീഷൻ റിപ്പോർട്ടിൽ പരാമർശിച്ചിരുന്നു. വിനയായ പരാമർശം ഇതു തോട്ടം ഭൂമി തരംമാറ്റിയതാണെന്നും റിപ്പോർട്ടിലുണ്ട്. തോട്ടവും തോട്ടം തരംമാറ്റിയ ഭൂമിയും സർക്കാർ തിരിച്ചുപിടിക്കണമെന്നും റിപ്പോർട്ടിലുണ്ടായിരുന്നു. റിപ്പോർട്ടിലെ ഈ പരാമർശമാണ് കർഷകർക്കു വിനയായത്. എന്നാൽ, 115 വർഷം മുൻപ് കുടിയേറിയ കർഷകരാണ് ഇവിടെ താമസിക്കുന്നത്. രാജഭരണ കാലത്തെ ചെമ്പ് പട്ടയങ്ങൾ ഉൾപ്പെടെ ഈ പ്രദേശത്തുണ്ട്. മുമ്പ് എസ്റ്റേറ്റിനോടു ചേർന്നുകിടന്ന വിരിവ് പ്രദേശം കമ്പനിയുടെ അടിയാധാരത്തിൽ ഉൾപ്പെട്ടതാണ് പ്രശ്നമായത്. ഈ ഭൂമിയും തോട്ടം ഭൂമിയായി കണക്കാക്കപ്പെട്ടു. രാജമാണിക്യം കമ്മീഷൻ റിപ്പോർട്ടിനെത്തുടർന്ന് ഈ സർവേ നമ്പറിലെ കരം സ്വീകരിക്കുന്നതു തടഞ്ഞ് 2015 ഫെബ്രുവരി 22ന് ലാൻഡ് റവന്യു സെക്രട്ടറി ഉത്തരവിട്ടു. ഇതോടെ ഭൂമിയുടെ നിയമപരമായ എല്ലാ ക്രയവിക്രയങ്ങളും നിലച്ചു. നിജസ്ഥിതി സർട്ടിഫിക്കറ്റ് ലഭിക്കാതായി. വായ്പ എടുക്കാനോ പുതുക്കാനോ കഴിയാത്ത അവസ്ഥയാണ്.

ചീനിക്കുഴി കൂട്ടക്കൊല: വിധി ഇന്ന്

തൊടുപുഴ: ചീനിക്കുഴിയിൽ മകനെയും മകന്‍റെ ഭാര്യയെയും രണ്ട് കൊച്ചുമക്കളെയും വീട്ടിൽ പൂട്ടിയിട്ട് തീകൊളുത്തി കൊലപ്പെടുത്തിയ കേസിൽ ഇന്ന് തൊടുപുഴ മുട്ടം ഒന്നാം അഡീഷണൽ സെഷൻസ് കോടതി ജഡ്ജി ആഷ് കെ. ബാൽ വിധി പറയും. അർധരാത്രിയിൽ ഉറങ്ങിക്കിടന്ന മകനുൾപ്പെടെ നാലംഗ കുടുംബത്തെ തൊടുപുഴ ചീനിക്കുഴി ആലിയക്കുന്നേൽ ഹമീദ് (79) ജനൽ വഴി കിടപ്പുമുറിയിലേക്ക് പെട്രോൾ നിറച്ച കുപ്പിയെറിഞ്ഞ് തീകൊളുത്തി ക്രൂരമായി കൊലപ്പെടുത്തിയെന്നാണ് കേസ്. ഹമീദിന്‍റെ മകൻ മുഹമ്മദ് ഫൈസൽ (ഷിബു - 45), ഭാര്യ ഷീബ (40), പെണ്‍മക്കളായ മെഹ്റിൻ (16), അസ്ന (13) എന്നിവരാണ് അതിദാരുണമായി കൊല്ലപ്പെട്ടത്. സ്വത്തു തർക്കത്തെത്തുടർന്നാണ് ഹമീദ് കരുതിക്കൂട്ടി കൂട്ടക്കൊല നടത്തിയത്. 2022 മാർച്ച് 19ന് പുലച്ചെ 12.30നാണ് നാടിനെ നടുക്കിയ അരുംകൊല നടന്നത്.

അർധരാത്രി ഫൈസലും ഭാര്യയും മക്കളും ഉറങ്ങിയെന്ന് ഉറപ്പാക്കിയ ശേഷം കിടപ്പുമുറിയുടെ വാതിൽ പുറത്തുനിന്ന് പൂട്ടി രണ്ട് പെട്രോൾ കുപ്പികൾ തീകൊളുത്തി ജനൽ വഴി അകത്തേക്ക് എറിയുകയായിരുന്നു. നിലവിളിയും പൊട്ടിത്തെറി ശബ്ദവും കേട്ട് ഉറക്കമുണർന്ന് ഓടിയെത്തിയ അയൽവാസികൾക്ക് അകത്തേക്ക് കടക്കാനായില്ല. രക്ഷപ്പെടാനാവാതെ നാലുപേരും മുറിക്കുളിൽ വെന്തു മരിക്കുകയായിരുന്നു. വെള്ളം കിട്ടാതിരിക്കാനായി ടാങ്കിലെ വെള്ളം ചോർത്തിക്കളയുകയും പൈപ്പ് പൂട്ടുകയും ചെയ്തിരുന്നു. ഹമീദിനെ പോലീസ് സംഭവദിവസം തന്നെ അറസ്റ്റ് ചെയ്തിരുന്നു. നിർണായക സാക്ഷിമൊഴികൾക്കും സാഹചര്യത്തെളിവുകൾക്കും പുറമേ പ്രതി കുറ്റം സമ്മതിക്കുക കൂടി ചെയ്തതോടെ നടപടികൾ വേഗത്തിൽ പൂർത്തിയാക്കി കുറ്റപത്രം സമർപ്പിക്കുകയായിരുന്നു. പ്രോസിക്യൂഷന് വേണ്ടി എം. സുനിൽ മഹേശ്വരൻ പിള്ള ഹാജരാകും. പ്രോസിക്യൂഷൻ 71 സാക്ഷികളെയും പ്രതിഭാഗം മൂന്ന് സാക്ഷികളെയും വിസ്തരിച്ചു. തെളിവായി പ്രോസിക്യൂഷൻ 137 തെളിവുകളും കോടതിയിൽ ഹാജരാക്കി.

ദേശീയ മാസ്റ്റേഴ്സ് നീന്തൽ: ബേബി വർഗീസിന് നാല് സ്വർണം

തൊടുപുഴ: മാസ്റ്റേഴ്സ് അക്വാറ്റിക് ഫെഡറേഷൻ ഓഫ് ഇന്ത്യ വിജയവാഡയിൽ നടത്തിയ ദേശീയ മാസ്റ്റേഴ്സ് നീന്തൽ ചാന്പ്യൻഷിപ്പിൽ ബേബി വർഗീസ് നാല് സ്വർണവും രണ്ട് വെള്ളിയും കരസ്ഥമാക്കി. സംസ്ഥാന - ദേശീയ മാസ്റ്റേഴ്സ് നീന്തൽ മത്സരങ്ങളിൽ തുടർച്ചയായി പങ്കെടുത്തു മെഡലുകൾ നേടുന്ന ബേബി വർഗീസ് ഓഷ്യൻ മാൻ ഏഷ്യൻ ചാന്പ്യനും വണ്ടമറ്റം അക്വാറ്റിക് സെന്‍ററിലെ മുഖ്യ പരിശീലകനുമാണ്. പഞ്ചായത്തു വകുപ്പിൽനിന്നു സീനിയർ സൂപ്രണ്ടായിരുന്നു. ദേശീയ സിവിൽ സർവീസ് നീന്തൽ താരമായിരുന്ന അദ്ദേഹം സ്വന്തം പരിശീലനത്തിനായി വീട്ടുമുറ്റത്തു നിർമിച്ച നീന്തൽ കുളത്തിൽ ഇതിനോടകം കുട്ടികളും മുതിർന്നവരുമായി നൂറുകണക്കിനു പേർക്ക് പരിശീലനം നല്കിക്കഴിഞ്ഞു. കേരള അക്വാറ്റിക് അസോസിയേഷൻ വൈസ് പ്രസിഡന്‍റ്, ജില്ലാ ഒളിന്പിക് അസോസിയേഷൻ വൈസ് പ്രസിഡന്‍റ്, ജില്ലാ സ്പോർട്സ് കൗണ്‍സിൽ അംഗം എന്നീ നിലകളിലും പ്രവർത്തിച്ചുവരുന്നു.

പുരപ്പുറം സൗരോർജ പദ്ധതി: സമ്മാനവിതരണവും രണ്ടാംഘട്ട ഉദ്ഘാടനവും

ചെറുതോണി: ഹൈറേഞ്ച് ഡെവലപ്‌മെന്‍റ് സൊസൈറ്റി സവിത്ര് സോളാർ സൊലൂഷൻസ് പബ്ലിക് ലിമിറ്റഡ് കമ്പനിയുമായി ചേർന്ന് ജില്ലയിൽ നടപ്പാക്കുന്ന പുരപ്പുറം സോളാർ പദ്ധതിയുടെ രണ്ടാംഘട്ട ഉദ്ഘാടനവും സമ്മാനവിതരണവും ബിഷപ് മാർ ജോൺ നെല്ലിക്കുന്നേൽ നിർവഹിച്ചു. ഒന്നാം ഘട്ട പദ്ധതിയുടെ ഭാഗമായി ഉപഭോക്താക്കൾക്കുള്ള സമ്മാന പദ്ധതിയുടെ നറുക്കെടുപ്പിലൂടെ വിജയിയായ ജോണി നെടുംകല്ലേലിന് ഇലക്‌ട്രിക് സ്കൂട്ടറാണ് സമ്മാനമായി നൽകിയത്. മറ്റ് ഉപഭോക്താക്കൾക്ക് 150 ലിറ്ററിന്‍റെ സോളാർ വാട്ടർ ഹീറ്ററുകളും സമ്മാനമായി നൽകി. ഒന്നാംഘട്ടത്തിൽ 25 പുരപ്പുറം സോളാർ പദ്ധതികൾ പൂർത്തിയാക്കി. രണ്ടാം ഘട്ടത്തിൽ ചെലവു കുറഞ്ഞ 1.7 കിലോവാട്ടിന്‍റെ പുരപ്പുറം സോളാർ പദ്ധതിയുടെ ലോഞ്ചിംഗ് ബിഷപ് നിർവഹിച്ചു. 1,37,000 രൂപ ചെലവ് വരുന്ന ഈ പദ്ധതിയിൽ ഉപഭോക്താക്കൾക്ക് 52,000 രൂപ സബ്സിഡിയായി ലഭിക്കും. ഉപഭോക്താവ് മുടക്കേണ്ടി വരുന്നത് 85,000 രൂപയാണ്. ഈ തുകയ്ക്ക് കുറഞ്ഞ പലിശയിൽ വായ്പാ സൗകര്യവും ലഭ്യമാണ്. എച്ച്ഡിഎസ് ഡയറക്ടർ റവ. ഡോ. ജോസഫ് കൊച്ചുകുന്നേൽ, സവിത്ര് സോളാർ സൊല്യൂഷൻസ ലിമിറ്റഡ് മാനേജിംഗ് ഡയറക്ടർ രാജേഷ് വെങ്കിലാട്ട്, ജിജി തോമസ്, വിലാസ് വർഗീസ്, അനുരാഗ്, തോമസ് ജോർജ്, ലിറ്റിൽ മരിയ, ബിജോ മാത്യു തുടങ്ങിയവർ നേതൃത്വം നൽകി.

അന്തര്‍സംസ്ഥാന ലഹരിക്കടത്ത്: കട്ടപ്പന സ്വദേശി അറസ്റ്റില്‍

കട്ടപ്പന: അന്തര്‍സംസ്ഥാന ലഹരിക്കടത്ത് സംഘത്തില്‍പ്പെട്ട യുവാവിനെ 39.7 ഗ്രം എംഡിഎംഎയുമായി പോലീസ് അറസ്റ്റ് ചെയ്തു. കട്ടപ്പന മുളകരമേട് എകെജി പടി ടോപ്പ് കാഞ്ഞിരത്തുംമൂട്ടില്‍ സുധീഷ് അശോകന്‍ (28) ആണ് പിടിയിലായത്. രഹസ്യവിവരത്തെത്തുടര്‍ന്ന് തിങ്കളാഴ്ച കട്ടപ്പന പോലീസ് സുധീഷിന്‍റെ വീട്ടില്‍ നടത്തിയ പരശോധനയില്‍ രാസലഹരി പിടിച്ചെടുത്തു. ബംഗളുരുവില്‍നിന്ന് രാസലഹരി കേരളത്തിലെത്തിച്ച് ചില്ലറ വില്‍പ്പന നടത്തുന്നയാളാണ് സുധീഷ് എന്ന് പോലീസ് പറഞ്ഞു. സംഘത്തില്‍പ്പെട്ട മറ്റുള്ളവരെക്കുറിച്ച് വിവരം ലഭിച്ചതായും അന്വേഷണം പുരോഗമിക്കുകയാണെന്നും പോലീസ് പറഞ്ഞു. ജില്ലാ പൊലീസ് മേധാവി സാബു മാത്യുവിന്‍റെ നിര്‍ദേശപ്രകാരം കട്ടപ്പന ഡിവൈഎസ്പി വി.എ. നിഷാദ്‌മോന്‍, എസ്എച്ച്ഒ ടി.സി. മുരുകന്‍, എസ്‌ഐമാരായ ബേബി ബിജു, മഹേഷ്, എസ്‌സിപിഒമാരായ ജോബിന്‍ ജോസ്, അനുമോന്‍ അയ്യപ്പന്‍, സിപിഒമാരായ അല്‍ബാഷ്, ബിജിന്‍, സബീന, ജില്ലാ ഡാന്‍സാഫ് ടീം എന്നിവരാണ് പരിശോധന നടത്തിയത്.

ജില്ലാ സെക്രട്ടറിക്കെതിരായ പ്രചാരണം അസംബന്ധമെന്ന്

ചെറുതോണി: ഇടുക്കി ഗവ. നഴ്സിംഗ് കോളജില്‍ സൗകര്യങ്ങള്‍ ഏര്‍പ്പെടുത്തുന്നത് സംബന്ധിച്ച് സിപിഎം ജില്ലാ സെക്രട്ടറിക്കെതിരായുള്ള പ്രചാരണം അസംബന്ധമെന്ന് സിപിഎം ജില്ലാ സെക്രട്ടേറിയറ്റ്. ജില്ലാ കളക്ടറുടെ ചേംബറില്‍ കൂടാന്‍ നിശ്ചയിച്ചിരുന്ന യോഗം സിപിഎം ജില്ലാ കമ്മിറ്റി ഓഫീസിലേക്ക് മാറ്റിയെന്ന് പ്രചരിപ്പിക്കുന്നത് സിപിഎമ്മനേയും ജില്ലാ സെക്രട്ടറിയേയും അപകീര്‍ത്തിപ്പെടുത്താനാണ്. നഴ്സിംഗ് കോളജ് പ്രിന്‍സിപ്പലും പിടിഎ ഭാരവാഹികളും ജില്ലാ സെക്രട്ടറി, ഓഫീസില്‍ ഉണ്ടോ എന്ന് അന്വേഷിച്ച ശേഷം നേരില്‍ക്കണ്ടു സംസാരിക്കാനായി വന്നതാണ്. ഇടുക്കി മെഡിക്കല്‍ കോളജ് വികസനസമിതിയില്‍ ആരോഗ്യ വകുപ്പ് മന്ത്രിയുടെ പ്രതിനിധിയായി സിപിഎം ജില്ലാ സെക്രട്ടറിയെ നിയോഗിച്ച് സര്‍ക്കാര്‍ തീരുമാനം ഉള്ളതിന്‍റെ അടിസ്ഥാനത്തിലാണ് കോളജ് അധികൃതർ ജില്ലാ സെക്രട്ടറിയെ കാണാനെത്തിയത്. കഴിഞ്ഞ ആഴ്ച ജില്ലാ കളക്ടറുടെ അധ്യക്ഷതയില്‍ കളക്‌ടറേറ്റില്‍ ചേര്‍ന്ന യോഗം പുതിയ അധ്യയന വര്‍ഷത്തില്‍ കുട്ടികള്‍ക്ക് താമസസൗകര്യം കണ്ടെത്താന്‍ സര്‍ക്കാര്‍ നോമിനികളായ സി.വി. വര്‍ഗീസ്, ഷിജോ തടത്തില്‍ എന്നിവരെ ചുമതലപ്പെടുത്തിയിരുന്നു. ഈ സാഹചര്യത്തിലാണ് പിടിഎ ഭാരവാഹികളും വിദ്യാര്‍ഥി പ്രതിനിധികളും ജില്ലാ സെക്രട്ടറിയെ കാണാനെത്തിയത്. ആദ്യ ബാച്ചിലെ വിദ്യാര്‍ഥികള്‍ക്ക് താമസ സൗകര്യം ഒരുക്കിയതും ജില്ലാ സെക്രട്ടറി നേരിട്ട് ഇടപെട്ടാണ്. വിദ്യാധിരാജ സ്കൂള്‍ മാനേജ്മെന്‍റുമായി സി.വി. വര്‍ഗീസ് സ്വന്തം നിലയില്‍ എഗ്രിമെന്‍റ് വച്ചാണ് കെട്ടിടം എടുത്ത് വിദ്യാര്‍ഥികള്‍ക്ക് താമസസൗകര്യം ഒരുക്കിയത്. ഇപ്പോള്‍ കണ്ടെത്തിയ ഹോസ്റ്റലിനെ സംബന്ധിച്ച് ചര്‍ച്ച ചെയ്യാനാണ് പ്രതിനിധികള്‍ ജില്ലാ കമ്മിറ്റി ഓഫീസില്‍ എത്തിയത്. പിടിഎ കമ്മിറ്റിയില്‍ ബിജെപി, കോണ്‍ഗ്രസ് പ്രവര്‍ത്തകരുണ്ട്. വസ്തുത ഇതായിരിക്കെ രാ‌ഷ്‌ട്രീയ ലക്ഷ്യം വച്ച് ജില്ലാ സെക്രട്ടറിയെ അപകീര്‍ത്തിപ്പെടുത്താന്‍ നടത്തുന്ന വ്യാജ പ്രാചരണങ്ങള്‍ അപലപനീയമാണെന്ന് സെക്രട്ടേറിയറ്റ് വ്യക്തമാക്കി.

മമ്മട്ടിക്കാനം മേഖലയിൽ പുലിയെ കണ്ടെന്ന്

രാജാക്കാട്: രാജാക്കാട് മമ്മട്ടിക്കാനം മേഖല പുലിപ്പേടിയിൽ. മമ്മട്ടിക്കാനം കവലയിൽ പ്രദേശവാസി പുലിയെ നേരിൽ കണ്ടതായി അറിയിച്ചതോടെയാണ് നാട്ടുകാർ ഭീതിയിലായിരിക്കുന്നത്. കഴിഞ്ഞ രാത്രിയാണ് മമ്മട്ടിക്കാനം മൂലംകുഴി കവലയിൽ പ്രദേശവാസിയായ മൂലംകുഴിയിൽ ഷാജിയുടെ മകൻ പുലിയെ കണ്ടതായി പറയുന്നത്. രാത്രിതന്നെ വനംവകുപ്പ് ഉദ്യോഗസ്ഥർ സ്ഥലത്തെത്തി പരിശോധന നടത്തി. രാവിലെ പൊന്മുടി ഫോറസ്റ്റ് ഓഫീസർ പി.എ. ജോണ്‍സണ്‍ന്‍റെ നേതൃത്വത്തിലും സ്ഥലത്തെത്തി പരിശോധന നടത്തി.

ബൈക്കും ലോറിയും കൂട്ടിയിടിച്ച് യുവാവ് മരിച്ചു

കട്ടപ്പന: കുട്ടിക്കാനത്തിനു സമീപം മുറിഞ്ഞപുഴയ്ക്കും വളഞ്ഞങ്ങാനത്തിനുമിടയിൽ ബുള്ളറ്റും ലോറിയും കൂട്ടിയിടിച്ച് യുവാവ് മരിച്ചു. ബുള്ളറ്റ് യാത്രികൻ കട്ടപ്പന വാഴവര രാമപുരത്ത് അതുൽ സണ്ണി (23) ആണ് മരിച്ചത്. ചൊവ്വാഴ്ച ഉച്ചക്ക് രണ്ടിനാണ് അപകടം. മുണ്ടക്കയം ഭാഗത്തുനിന്നു വന്ന ലോറിയും കട്ടപ്പനയിൽനിന്നു വന്ന ബൈക്കുമാണ് അപകടത്തിൽപ്പെട്ടത്. റോഡിൽനിന്ന് തെന്നിമാറിയ ബുള്ളറ്റ് ലോറിയിൽ ഇടിക്കുകയായിരുന്നെന്നു പറയുന്നു. ഗുരുതരമായി പരിക്കേറ്റ യുവാവിനെ മറ്റ് വാഹനങ്ങളിലെ യാത്രികരും പ്രദേശവാസികളും ചേർന്ന് പിന്നാലെ വന്ന കെഎസ്ആർടിസി ബസിൽ കയറ്റി മുണ്ടക്കയത്തെ സ്വകാര്യ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. അതുൽ തിരുവനന്തപുരത്തേക്കു പോകുകയായിരുന്നു. സംസ്കാരം പിന്നീട്. തിരുവനന്തപുരം ഐഎസ്ആർഒയിലെ ട്രെയിനിയാണ് അതുൽ. പിതാവ്: സണ്ണി. അമ്മ: മിനി. സഹോദരങ്ങൾ: സ്റ്റെമിൻ, ആൽബി.

കോൺഗ്രസ് കുറ്റവിചാരണ സദസ് ഇന്ന്

തങ്കമണി: കേന്ദ്ര, സംസ്ഥാന ഗവണ്‍മെന്‍റുകളുടെ ജനദ്രോഹ നടപടികളിലും കാമാക്ഷി ഗ്രാമ പഞ്ചായത്ത് ഭരണസമിതിയുടെ അഴിമതിയിലും വാഗ്ദാന ലംഘനങ്ങളിലും പ്രതിഷേധിച്ച് കോണ്‍ഗ്രസ് കാമാക്ഷി മണ്ഡലം കമ്മിറ്റിയുടെ നേതൃത്വത്തിൽ ഇന്ന് ഉച്ചകഴിഞ്ഞ് മൂന്നിന് തങ്കമണി യിൽ ജനകീയ പങ്കാളിത്തത്തോടെ കുറ്റ വിചാരണ സദസ് നടത്തും. കെപിസിസി വക്താവ് ഡോ. ജിന്‍റോ ജോണ്‍ ഉദ്ഘാടനം ചെയ്യും. മണ്ഡലം പ്രസിഡന്‍റ് പി.എം. ഫ്രാൻസിസ് അധ്യക്ഷത വഹിക്കും. യുഡിഎഫ് ജില്ലാ ചെയർമാൻ ജോയി വെട്ടിക്കുഴി, ഡിസിസി ജനറൽ സെക്രട്ടറിമാരായ എസ്.ടി. അഗസ്റ്റിൻ, ജെയ്സണ്‍ കെ. ആന്‍റണി, ജോസഫ് മാണി എന്നിവർ പ്രസംഗിക്കും.

ഗൃഹനാഥനെ തോട്ടില്‍ മരിച്ചനിലയില്‍ കണ്ടെത്തി

കാവുംകണ്ടം:കഴിഞ്ഞദിവസം കാണാതായ ഗൃഹനാഥന്‍റെ മൃതദേഹം തോട്ടില്‍ കണ്ടെത്തി. കണ്ടത്തിന്‍ തറയില്‍ ശ്രീനിവാസനെയാണ്(62) മരിച്ചനിലയിൽ കണ്ടെത്തിയത്. കഴിഞ്ഞ ദിവസം രാത്രി ഏഴിന് ശേഷം സമീപത്തെ കടയിലെത്തി ചെക്ക്ഡാമിന് മുകളിലൂടെ വീട്ടിലേയ്ക്ക് മടങ്ങുന്നതിനിടെ കാല്‍വഴുതി തോട്ടില്‍ വീഴുകയായിരുന്നുവെന്നാണ് നിഗമനം. ഈ വഴിയില്‍ നിന്നു മറ്റ് ഉപവഴികളില്ലാത്തതിനാലാണ് തോട്ടില്‍ വീണതാണെന്ന സംശയത്തെ തുടര്‍ന്നു തെരച്ചില്‍ നടത്തിയത്. മഴയെ തുടര്‍ന്ന് ചെക്ക്ഡാമിന് മുകളിലൂടെ വെള്ളമൊഴുകിയിരുന്നു. ഇന്നലെ രാവിലെ 10നു ചെക്ക്ഡാമിന് 500 മീറ്റര്‍ താഴെ നിന്നും മൃതദേഹം കണ്ടെത്തുകയായിരുന്നു. ഭാര്യ ബിന്ദു കാവുംകണ്ടം വെമ്പള്ളി കുടുംബാംഗം. മക്കള്‍:ശ്രീജിത്, ശ്രീരാജ്. സംസ്‌കാരം നടത്തി.

സി.വി. വർഗീസിന്‍റെ അടിമകളല്ല ഇടുക്കി നഴ്സിംഗ് കോളജ് വിദ്യാർഥികളെന്ന് കെഎസ്‌യു

തൊടുപുഴ: സിപിഎം ഇടുക്കി ജില്ലാ സെക്രട്ടറി സി.വി. വർഗീസിന്‍റെ അടിമകളല്ല ഇടുക്കി നഴ്സിംഗ് കോളജ് വിദ്യാർഥികളെന്ന് കെഎസ്‌യു സംസ്ഥാന കമ്മിറ്റി അംഗം ജോസ്കുട്ടി ജോസഫ്. മെറിറ്റിൽ അഡ്മിഷൻ ലഭിച്ച് ഉന്നത വിദ്യാഭ്യാസം പ്രതീക്ഷിച്ച് ഇടുക്കിയിലെത്തുന്ന വിദ്യാർഥികളെ സാമ്പത്തികമായി ചൂഷണം ചെയ്യുന്ന വർഗീസിന് നഴ്സിംഗ് കോളജ് പ്രിൻസിപ്പൽ ഒത്താശ ചെയ്യുകയാണ്. കളക്ടറുടെ അധ്യക്ഷതയിൽ ചേരേണ്ട യോഗമാണ് സിപിഎം ജില്ലാ സെക്രട്ടറിയുടെ മുറിയിലേക്ക് പ്രിൻസിപ്പൽ ഇടപെട്ട് മാറ്റിയത്. ഹോസ്റ്റലിൽ സൗകര്യമെന്ന ന്യായമായ ആവശ്യം മുന്നോട്ടുവയ്ക്കുന്ന വിദ്യാർഥികളെ ഭീഷണിപ്പെടുത്താനും അടിച്ചമർത്താനുമാണ് സിപിഎം ശ്രമമെങ്കിൽ വിദ്യാർഥികൾക്കായി കെഎസ്‌‌യു പ്രതിരോധം തീർക്കുമെന്നും ജോസ്കുട്ടി ജോസഫ് വ്യക്തമാക്കി.

യാത്രക്കാരുടെ പേടിസ്വപ്‌നമായി ശങ്കരപ്പള്ളി വളവ്

മുട്ടം: തൊടുപുഴ-പുളിയന്‍മല സംസ്ഥാനപാതയില്‍ മുട്ടം ശങ്കരപ്പള്ളി മേഖലയില്‍ അപകടങ്ങള്‍ പതിവാകുന്നു. ദിനംപ്രതിയുണ്ടാകുന്ന അപകടങ്ങളില്‍ നിരവധി ജീവന്‍ പൊലിയുകയും ഒട്ടേറെ പേര്‍ക്ക് പരിക്കേല്‍ക്കുകയും ചെയ്തിട്ടുണ്ട്. കഴിഞ്ഞ ദിവസം നിയന്ത്രണംവിട്ട കാര്‍ താഴ്ചയിലേക്കു മറിഞ്ഞ് പിഞ്ചുകുഞ്ഞടക്കം രണ്ടു പേരാണ് മരിച്ചത്. വെങ്ങല്ലൂര്‍ കരടിപ്പറമ്പില്‍ ആമിന ബീവി (58), കൊച്ചുമകള്‍ മിഷേല്‍ മറിയം (4 മാസം) എന്നിവരാണ് മരിച്ചത്. മിഷേലിന്‍റെ പിതാവും വെള്ളത്തൂവല്‍ പോലീസ് സ്റ്റേഷനിലെ സിവില്‍ പോലീസ് ഓഫീസറുമായ കെ.എസ്. ഷാമോന്‍, ഭാര്യ ഹസീന (29), ഇവരുടെ മകള്‍ നാലു വയസുകാരി ഐഷ എന്നിവര്‍ക്ക് പരിക്കേല്‍ക്കുകയും ചെയ്തിരുന്നു. തൊടുപുഴ ഭാഗത്തേക്കുവന്ന കാര്‍ ശങ്കരപ്പിള്ളി പാലത്തിന് സമീപം നിയന്ത്രണംവിട്ട് റോഡരികിലെ മരത്തില്‍ ഇടിച്ചശേഷം താഴ്ചയിലേക്ക് മറിഞ്ഞായിരുന്നു അപകടം. ശങ്കരപ്പള്ളി പാലവും പാലത്തോടു ചേര്‍ന്നുമുള്ള പ്രദേശവും നിരന്തര അപകട മേഖലയാണ്. ഇടത്തോട്ടും വലത്തോട്ടുമുള്ള വളവുകളും വീതി കുറവും പാലവും കൂടിച്ചേരുന്നിടത്താണ് അപകടം കൂടുതലായുണ്ടാകുന്നത്. ഏതാനും നാളുകള്‍ക്കുള്ളില്‍ പത്ത് അപകടങ്ങളാണ് ഈ പ്രദേശത്ത് മാത്രം സംഭവിച്ചിട്ടുള്ളത്. നാലു വാഹനങ്ങള്‍ കൂട്ടിയിടിച്ച് യാത്രക്കാർക്കു ഗുരുതര പരിക്കേറ്റത് മാസങ്ങള്‍ക്ക് മുമ്പാണ്. പിന്നീട് പിക്കപ്പ് ജീപ്പിടിച്ചും അപകടമുണ്ടായി. ഇതിന് മുന്‍പ് ട്രാവലറും അപകടത്തില്‍പ്പെട്ടു. റോഡിന്‍റെ അശാസ്ത്രീയ നിര്‍മാണമാണ് അപകടം തുടര്‍ക്കഥയാകാന്‍ കാരണമെന്ന് ചൂണ്ടിക്കാണിക്കപ്പെടുന്നു. മഴ പെയ്യുന്നതോടെ മിനുസമുള്ള റോഡില്‍ വാഹനങ്ങള്‍ തെന്നി നിയന്ത്രണം വിടാനുള്ള സാധ്യതയേറെയാണ്. പെട്ടെന്ന് ബ്രേക്ക് ചെയ്യാന്‍ ശ്രമിക്കുന്നതോടെയാണ് വാഹനങ്ങള്‍ അപകടത്തില്‍പ്പെടുന്നത്. ഇതിനിടെ അപകടങ്ങള്‍ വര്‍ധിച്ചതോടെ പൊതുമരാമത്ത് വകുപ്പ് സ്പീഡ് ബ്രേക്കറുകള്‍ സ്ഥാപിച്ചിരുന്നു. ഇത് അജ്ഞാത വാഹനങ്ങള്‍ ഇടിച്ചു തകര്‍ത്തതോടെ മുന്നറിയിപ്പ് സിഗ്‌നല്‍ സംവിധാനവും സ്ഥാപിച്ചു. എന്നാല്‍ ഇത്തരം സംവിധാനങ്ങള്‍ സ്ഥാപിച്ചെങ്കിലും അപകടത്തിന് കുറവു വന്നിട്ടില്ലെന്നതാണ് യാഥാര്‍ഥ്യം. ഇവിടെ റോഡിന്‍റെ അപകടാവസ്ഥ പരിഹരിക്കാന്‍ മോട്ടോര്‍ വാഹനവകുപ്പ് ഉള്‍പ്പെടെയുള്ള അധികൃതരടെ അടിയന്തര ഇടപെടല്‍ ഉണ്ടാവണമെന്ന് നാട്ടുകാര്‍ ആവശ്യപ്പെട്ടു.

എയര്‍ഹോണ്‍: ജില്ലയില്‍ 85 വാഹനങ്ങള്‍ക്കെതിരേ നടപടി

തൊടുപുഴ: വാഹനങ്ങളിലെ എയര്‍ഹോണുകള്‍ കണ്ടെത്താന്‍ മോട്ടോര്‍ വാഹനവകുപ്പ് ജില്ലയില്‍ നടത്തിയ പരിശോധനയില്‍ 85 വാഹനങ്ങള്‍ക്കെതിരേ നടപടി. വിവിധ മേഖലകളിലായാണ് അമിത ശബ്ദം മുഴക്കുന്ന എയര്‍ഹോണുകള്‍ കണ്ടെത്താന്‍ മോട്ടോര്‍ വാഹനവകുപ്പ് ഉദ്യോഗസ്ഥര്‍ പരിശോധന നടത്തിയത്. പിടികൂടിയ വാഹനങ്ങളുടെ ഉടമകളില്‍നിന്ന് 1,78,000 രൂപ പിഴ ഈടാക്കി. വാഹനങ്ങളില്‍നിന്ന് എയര്‍ഹോണുകള്‍ അഴിച്ചെടുത്തു. മോട്ടോര്‍ വാഹനവകുപ്പ് എന്‍ഫോഴ്‌സ്‌മെന്‍റ് ഓഫീസില്‍ സൂക്ഷിച്ചിരിക്കുന്ന എയര്‍ഹോണുകള്‍ ഇന്ന് റോഡ് റോളര്‍ കയറ്റി നശിപ്പിക്കും. സംസ്ഥാനത്താകെ നടക്കുന്ന പ്രത്യേക പരിശോധനയുടെ ഭാഗമായാണ് കഴിഞ്ഞ തിങ്കളാഴ്ച മുതല്‍ ജില്ലയിലും പരിശോധന ആരംഭിച്ചത്. 19 വരെയായിരുന്നു പരിശോധന. എയര്‍ഹോണുകള്‍ കൂടുതലായി ഘടിപ്പിക്കുന്ന ബസുകള്‍, ഗുഡ്‌സ് വാഹനങ്ങള്‍, ലോറികള്‍, അന്തര്‍ സംസ്ഥാന വാഹനങ്ങള്‍ എന്നിവയാണ് കൂടുതലായി പരിശോധിച്ചത്. ആര്‍ടിഒ ഓഫീസുകളുടെയും എന്‍ഫോഴ്‌സ്‌മെന്‍റ് വിഭാഗത്തിന്‍റെയും നേതൃത്വത്തിലാണ് പരിശോധന നടക്കുന്നത്. ഗതാഗതമന്ത്രി കെ.ബി. ഗണേഷ്‌കുമാറിന്‍റെ നിര്‍ദേശപ്രകാരമാണ് സംസ്ഥാനത്തുടനീളം പരിശോധന നടത്തിയത്. പിടികൂടുന്ന വാഹനങ്ങള്‍ക്ക് ആദ്യപടിയായി 2000 രൂപ വീതമാണ് പിഴയീടാക്കിയത്. വീണ്ടും നിയമലംഘനം ആവര്‍ത്തിച്ചാല്‍ 10,000 രൂപ വീതം പിഴയീടാക്കാനാണ് നിര്‍ദേശം.

സംസ്ഥാന സ്‌കൂള്‍ കായികമേള: പരിശീലന പദ്ധതിയുമായി "റൈസ്'

നെടുങ്കണ്ടം: സംസ്ഥാന സ്‌കൂള്‍ കായികമേളയില്‍ ഇടുക്കിയുടെ കായികമുന്നേറ്റം ലക്ഷ്യമിട്ട് ഡീന്‍ കുര്യാക്കോസ് എംപി റൈസ് പദ്ധതിയുടെ ഭാഗമായി നടപ്പിലാക്കുന്ന കായികപരിശീലനം നെടുങ്കണ്ടം പഞ്ചായത്ത് സിന്തറ്റിക് ട്രാക്ക് സ്റ്റേഡിയത്തില്‍ ആരംഭിച്ചു. ഇടുക്കി പാര്‍ലമെന്‍റ് മണ്ഡലത്തിലെ വിദ്യാര്‍ഥികളുടെ സമഗ്ര വളര്‍ച്ച ലക്ഷ്യമിട്ടാണ് റൈസ് പദ്ധതി നടപ്പിലാക്കുന്നത്. റവന്യു ജില്ലാ കായികമേളയില്‍ ഒന്നും രണ്ടും മൂന്നും സ്ഥാനങ്ങള്‍ നേടി സംസ്ഥാന സ്‌കൂള്‍ കായികമേളയ്ക്കു യോഗ്യത നേടിയ കായികതാരങ്ങള്‍ക്ക് രണ്ടു ദിവസത്തെ വിദഗ്ധ പരിശീലനമാണ് നല്‍കുന്നത്. 110 ഓളം കായികതാരങ്ങള്‍ പരിശീലനത്തില്‍ പങ്കെടുക്കുന്നുണ്ട്. ദേശീയ പരിശീലകരായ ഡോ. ജോര്‍ജ് ഇമ്മാനുവല്‍, എം.എ. ജോര്‍ജ് എന്നിവരാണ് പരിശീലനത്തിന് നേതൃത്വം നല്‍കുന്നത്. ജില്ലാ അത്‌ലറ്റിക് അസോസിയേഷനും ആര്‍ഡിഎസ്ജിഎയും മേല്‍നോട്ടം വഹിക്കും. കായികതാരങ്ങള്‍ക്ക് ലഭിക്കുന്ന വിദഗ്ധ പരിശീലനം സംസ്ഥാന കായികമേളയില്‍ മികച്ച പ്രകടനം കാഴ്ചവയ്ക്കുന്നതിന് വഴിയൊരുക്കുമെന്ന് ഡീന്‍ കുര്യാക്കോസ് എംപി പറഞ്ഞു. ടീം ഒരുമിച്ചുള്ള പരിശീലനത്തലൂടെ റിലേ പോലുള്ള ഇനങ്ങളില്‍ കോ-ഓര്‍ഡിനേഷന്‍ മെച്ചപ്പെടുത്താനും കൂടുതല്‍ നേട്ടങ്ങള്‍ സ്വന്തമാക്കാനും കഴിയും. പരിശീലനത്തില്‍ പങ്കെടുക്കുന്ന കായികതാരങ്ങള്‍ക്ക് ഭക്ഷണവും താമസസൗകര്യവും സൗജന്യമായി നല്‍കുന്നുണ്ട്. ഇതോടൊപ്പം ജില്ലാ ടീമിലെ മുഴുവന്‍ താരങ്ങള്‍ക്കും ജഴ്‌സിയും സൗജന്യമായി നല്‍കും. ജില്ലയിലെ കായികപരിശീലനരംഗത്തെ ആധുനിക സൗകര്യങ്ങളുടെയും വിദഗ്ധ കായികപരിശീലന ലഭ്യതയുടെയും അപര്യാപ്തത പരിഹരിക്കാന്‍ വരുംവര്‍ഷങ്ങളില്‍ കൂടുതല്‍ സൗകര്യങ്ങള്‍ ഒരുക്കാന്‍ റൈസ് പദ്ധതിയിലൂടെ ലക്ഷ്യമിടുന്നുണ്ടെന്ന് എംപി അറിയിച്ചു. പരിശീലന പരിപാടി ഡീന്‍ കുര്യാക്കോസ് എംപി ഉദ്ഘാടനം ചെയ്തു. ഗ്രാമപഞ്ചായത്ത് പ്രസിഡന്‍റ് പ്രിമി ലാലിച്ചന്‍ അധ്യക്ഷത വഹിച്ചു. അത്‌ലറ്റിക് അസോസിയേഷന്‍ പ്രസിഡന്‍റും റൈസ് കോ-ഓര്‍ഡിനേറ്ററുമായ വി.ഡി. ഏബ്രഹാം, ആര്‍ഡിഎസ്ജിഎ സെക്രട്ടറി പി.എ. സുനീഷ്, പരിശീലകന്‍ ഡോ. ജോര്‍ജ് ഇമ്മാനുവല്‍, റിട്ട. സായി കോച്ച് എം.എ. ജോര്‍ജ്, ജോയി തോമസ്, അത്‌ലറ്റിക് അസോസിയേഷന്‍ സെക്രട്ടറി കെ.കെ. ഷിജോ, ഗ്രാമപഞ്ചായത്ത് അംഗങ്ങള്‍ തുടങ്ങിയവര്‍ പ്രസംഗിച്ചു.

മൂലമറ്റം കോളജിലെ ടെക്‌ഫെസ്റ്റ് വേറിട്ട അനുഭവമായി

അറക്കുളം: സെന്‍റ് ജോസഫ്‌സ് കോളജ് ഡേറ്റാ സയന്‍സ് വിഭാഗം സംഘടിപ്പിച്ച ടെക്‌ഫെസ്റ്റ് വേറിട്ട അനുഭവമായി. കോളജ് മാനേജര്‍ റവ. ഡോ. തോമസ് പുതുശേരി ഉദ്ഘാടനം ചെയ്തു.പ്രിന്‍സിപ്പല്‍ ഡോ. ജോസഫ് ജോര്‍ജ്, ഡേറ്റാ സയന്‍സ് വിഭാഗം മേധാവി സിസ്റ്റര്‍ ഡോ. ജിന്‍സി ജോസ് എന്നിവര്‍ പ്രസംഗിച്ചു. ഡേറ്റാ സയന്‍സ്, ആര്‍ട്ടിഫിഷല്‍ ഇന്‍റലിജന്‍സ്, റോബോട്ടിക്‌സ്, സൈബര്‍ സുരക്ഷ, ഗെയിം ഡെവലപ്‌മെന്‍റ് തുടങ്ങിയ മേഖലകളിലെ വിവിധ പ്രദര്‍ശനങ്ങളും മത്സരങ്ങളും നടത്തി. വിദ്യാര്‍ഥികള്‍ സ്വന്തമായി രൂപകല്പന ചെയ്ത വിവിധ തരത്തിലുള്ള റോബോട്ടുകളും പ്രദര്‍ശിപ്പിച്ചു. ഹഗ്ഗിംഗ് റോബോട്ടിനെ സ്പര്‍ശിച്ചാല്‍ പാട്ട് പ്ലേ ചെയ്യുന്ന സംവിധാനം, മുന്നിലുള്ള തടസങ്ങളെ സെന്‍സര്‍ വഴി തിരിച്ചറിഞ്ഞ് സ്വയം ദിശ മാറ്റി മുന്നോട്ട് നീങ്ങുന്ന റോബോട്ട്, ഉപയോക്താവിന്‍റെ ചോദ്യങ്ങള്‍ക്ക് കൃത്യമായ ഉത്തരങ്ങള്‍ നല്‍കുന്ന ആര്‍ട്ടിഫിഷല്‍ ഇന്‍റലിജന്‍സ് അടിസ്ഥാനത്തിലുള്ള റോബോട്ട്, സുരക്ഷാമേഖലയില്‍ നിര്‍ണായകമായി റഡാര്‍ സാങ്കേതികവിദ്യ ഉപയോഗിച്ച് ലോഹങ്ങള്‍ കണ്ടെത്തുന്ന റോബോട്ട് എന്നിവയെല്ലാം വിദ്യാര്‍ഥികളുടെ സാങ്കേതികജ്ഞാനം വെളിപ്പെടുത്തുന്നതായി. ‌സമാപനയോഗം കോളജ് സിഎഫ്ഒ റവ.ഡോ. അലക്‌സ് ലൂയിസ് ഉദ്ഘാടനം ചെയ്തു. ചടങ്ങില്‍ വിജയികള്‍ക്കുള്ള സമ്മാനങ്ങളും വിതരണം ചെയ്തു.

കുടുംബശ്രീ ദീപാവലി ട്രേഡ് ഫെയറിന് തുടക്കം

ഇടുക്കി: ദീപാവലി ആഘോഷങ്ങള്‍ക്ക് മധുരം പകര്‍ന്ന് കുടുംബശ്രീ ജില്ലാ മിഷന്‍ ഒരുക്കുന്ന മധുരവണ്ടി ദീപാവലി സ്‌പെഷല്‍ ട്രേഡ് ഫെയറിന് മൂന്നാറില്‍ തുടക്കമായി. എ. രാജ എംഎല്‍എ വാഹനം ഫ്‌ളാഗ് ഓഫ് ചെയ്തു. മൂന്നാറിലെ പ്രധാന ടൂറിസം കേന്ദ്രങ്ങളില്‍ സഞ്ചാരികള്‍ക്കും നാട്ടുകാര്‍ക്കും കുടുംബശ്രീ സംരംഭകരുടെ കൈപ്പുണ്യമുള്ള മധുരവിഭവങ്ങള്‍ വാഹനത്തില്‍ ലഭ്യമാക്കും. റീബില്‍ഡ് കേരള പദ്ധതിയുടെ ഭാഗമായാണ് പദ്ധതിയൊരുക്കുന്നത്. കുടുംബശ്രീ ജില്ലാ മിഷന്‍ കോ-ഓര്‍ഡിനേറ്റര്‍ എ. മണികണ്ഠന്‍, അസിസ്റ്റന്‍റ് കോ-ഓര്‍ഡിനേറ്റര്‍ ജി. ഷിബു എന്നിവര്‍ പ്രസംഗിച്ചു.

സ്പീക്ക് ആൻഡ് സ്പാർക്കിൾ ഇംഗ്ലീഷ് പ്രോഗ്രാം

മൂലമറ്റം: സെന്‍റ് ജോസഫ്‌സ് ഓട്ടോണമസ് കോളജിലെ എന്‍എസ്എസിന്‍റെ നേതൃത്വത്തില്‍ കാഞ്ഞാര്‍ സെന്‍റ് ജോസഫ്‌സ് സ്‌കൂളില്‍ ഇംഗ്ലീഷ് എൻ‌റിച്ച്മെന്‍റ് പ്രോഗ്രാമായ സ്പീക്ക് ആന്‍ഡ് സ്പാര്‍ക്കിളിന്‍റെ ഉദ്ഘാടനം ജില്ലാ പഞ്ചായത്തംഗം പ്രഫ. എം.ജെ. ജേക്കബ് നിര്‍വഹിച്ചു. ജില്ലയിലെ 250-ഓളം സ്‌കൂളുകളില്‍നിന്നു തെരഞ്ഞടുക്കപ്പെട്ട ഏഴു സ്‌കൂളുകളില്‍ സര്‍ക്കാര്‍ ധനസഹായത്തോടെ റിസോഴ്‌സ് അധ്യാപകരിലൂടെ നടപ്പാക്കുന്ന പദ്ധതിയാണിത്. ക്ലാസ് റൂം പഠനത്തിനുപുറമേ വിവിധ ഭാഷാപഠന പ്രവര്‍ത്തനങ്ങള്‍ അവതരിപ്പിച്ച് സജീവമായ സംവേദനാത്മക കഴിവുകളുടെ വികാസവും ആഹ്ലാദകരമായ പഠനാന്തരീക്ഷം സൃഷ്ടിച്ചും ആശയവിനിമയശേഷിയും ഭാഷാപരിജ്ഞാനവും വര്‍ധിപ്പിക്കുകയാണ് ലക്ഷ്യം. കോളജ് മാനേജര്‍ റവ. ഡോ. തോമസ് പുതുശേരി, പ്രിന്‍സിപ്പല്‍ ഡോ. ജോസഫ് ജോര്‍ജ്, സിഎഫ്ഒ റവ.ഡോ. അലക്‌സ് ലൂയിസ്, സ്‌കൂള്‍ മാനേജര്‍ ഫാ. ജോര്‍ജ് പാറേക്കുന്നേല്‍, ഹെഡ്മാസ്റ്റര്‍ ബിജുമോന്‍ മാത്യു, എഇഒ ആഷിമോള്‍ കുര്യാച്ചന്‍, പിടിഎ പ്രസിഡന്‍റ് ഷോബിന്‍ എന്നിവര്‍ പ്രസംഗിച്ചു. എന്‍എസ്എസ്‌ പ്രോഗ്രാം ഓഫീസര്‍മാരായ ഡോ. കെ.വി. ജോബി, അഖില മരിയ റീഗല്‍, അനു സാജു, എസ്. ഷൈജു, എന്‍എസ്എസ് വോളന്‍റിയര്‍മാരായ ജെറി മാത്യു, വൈശാഖി പിള്ള എന്നിവര്‍ നേതൃത്വം നല്‍കി.

ജില്ലാ റോഡ് സൈക്ലിംഗ് ചാമ്പ്യന്‍ഷിപ്

തൊടുപുഴ: ജില്ലാ സൈക്ലിംഗ് അസോസിയേഷന്‍റെ നേതൃത്വത്തില്‍ സ്‌പോര്‍ട്‌സ് കൗണ്‍സിലിന്‍റെ സഹകരണത്തോടെ നടത്തിയ ജില്ലാ റോഡ് സൈക്ലിംഗ് ചാമ്പ്യന്‍ഷിപ് സമാപിച്ചു. അസോസിയേഷന്‍ ജില്ലാ പ്രസിഡന്‍റ് അഡ്വ. ജോര്‍ലി കുര്യന്‍ ഫ്‌ളാഗ് ചെയ്തു. സംസ്ഥാന കൗണ്‍സില്‍ അംഗം എന്‍. രവീന്ദ്രന്‍, ഡോ. ബോബു ആന്‍റണി, എ.പി. മുഹമ്മദ് ബഷീര്‍, കെ.എം. അസീസ് തുടങ്ങിയവര്‍ പ്രസംഗിച്ചു. വിവിധ വിഭാഗങ്ങളില്‍ ആസിഫ് അസീസ് (സെന്‍റ് സെബാസ്റ്റ്യന്‍സ് യുപിഎസ്, തൊടുപുഴ, ഗോകുല്‍ സോമന്‍, നീരജ് സുനില്‍, ആദിത്യന്‍ ബി. നായര്‍, ഡി.കെ. അര്‍ജുന്‍, നിഖില്‍ പ്രദീപ് (എംകെഎന്‍എം എച്ച്എസ്എസ്, കുമാരമംഗലം, മിഷേല്‍ ആന്‍ കുരുവിള (ചാവറ ഇന്‍റര്‍നാഷണല്‍ സ്‌കൂള്‍, വാഴക്കുളം), ആന്‍മരിയ ബിജു (സെന്‍റ് സെബാസ്റ്റ്യന്‍സ് എച്ച്എസ്, തൊടുപുഴ, നസ്‌റിന്‍ കെ. മജീദ് (സെന്‍റ് ജോര്‍ജ് എച്ച്എസ്എസ്, മുതലക്കോടം), അര്‍ജുന്‍ ഗിരീഷ് (സെന്‍റ് ആന്‍റണീസ് എച്ച്എസ്, വണ്ടന്‍മേട്), അജോ ജോയി (സെന്‍റ് മേരീസ് എച്ച്എസ്എസ്, അറക്കുളം, അബിരാം വിനോദ് (സെന്‍റ് ജെറോംസ് എച്ച്എസ്എസ്, വെള്ളയാംകുടി), അഖില്‍ ഗിരീഷ് (നിര്‍മല കോളജ്, മൂവാറ്റുപുഴ) എന്നിവര്‍ സംസ്ഥാന ചാമ്പ്യന്‍ഷിപ്പിലേക്ക് തെരഞ്ഞെടുക്കപ്പെട്ടു.

കെജിഎംഒഎ മിഡ്‌സോണ്‍ കോണ്‍ഫറന്‍സ് നടത്തി

തൊടുപുഴ: കെജിഎംഒഎ മിഡ്‌സോണ്‍ കോണ്‍ഫറന്‍സ് സംഘടിപ്പിച്ചു. മിഡ്സോണ്‍ വൈസ് പ്രസിഡന്‍റ് ഡോ. എ.ബി. വിന്‍സെന്‍റ് അധ്യക്ഷത വഹിച്ചു. സംസ്ഥാന പ്രസിഡന്‍റ് ഡോ. പി.കെ. സുനില്‍ ഉദ്ഘാടനം ചെയ്തു. സെക്രട്ടറി ഡോ. ജോബിന്‍ ജി. ജോസഫ് സിഎംഇ സെഷനുകളുടെ ഉദ്ഘാടനം നടത്തി. ജില്ലാ പ്രസിഡന്‍റ് ഡോ. അന്‍സല്‍ നബി, സംസ്ഥാന ട്രഷറര്‍ ഡോ. ഡി. ശ്രീകാന്ത്, മാനേജിംഗ് എഡിറ്റര്‍ ഡോ. സി.പി. ബിജോയ്, ഡോ. ജെ. ആല്‍ബര്‍ട്ട്, ഡോ. ടോണി തോമസ്, ഡോ. കെ.ആര്‍. രജിത് എന്നിവര്‍ പ്രസംഗിച്ചു. ഡോക്ടര്‍മാര്‍ക്കുനേരേ വര്‍ധിച്ചുവരുന്ന ആക്രമണങ്ങള്‍ക്കെതിരേ യോഗം പ്രതിഷേധിച്ചു. കാഷ്വാലിറ്റികളില്‍ ഒരു ഷിഫ്റ്റില്‍ രണ്ട് സിഎംഒ ഡോക്ടര്‍മാര്‍ എന്ന രീതിയില്‍ ഒരാശുപത്രിയില്‍ ചുരുങ്ങിയത് എട്ട് ഡോക്ടര്‍മാര്‍ വേണമെന്നും ആരോഗ്യപ്രവര്‍ത്തകര്‍ക്ക് സുരക്ഷിതമായി ജോലി ചെയ്യാന്‍ അവസരമൊരുക്കണമെന്നും യോഗം ആവശ്യപ്പെട്ടു.

അച്ചായന്‍സ് ഗോള്‍ഡ് പുതിയ ഷോറൂം കട്ടപ്പനയിൽ

കട്ടപ്പന: അച്ചായന്‍സ് ഗോള്‍ഡ് 32-ാമത് ഷോറൂം കട്ടപ്പന വെള്ളയാംകുടി ടിജെകെ ബില്‍ഡിംഗില്‍ പ്രവര്‍ത്തനം ആരംഭിച്ചു. സിനിമാ താരങ്ങളായ ശ്വേത മേനോന്‍, അന്ന രാജന്‍, അച്ചായന്‍സ് ഗോള്‍ഡ് എംഡി ടോണി വര്‍ക്കിച്ചന്‍ എന്നിവര്‍ ചേര്‍ന്ന് ഉദ്ഘാടനം നിര്‍വഹിച്ചു. അച്ചായന്‍സ് ഗോള്‍ഡ് ജനറല്‍ മാനേജര്‍ ഷിനില്‍ കുര്യന്‍ അധ്യക്ഷത വഹിച്ചു.

ഇന്നോവയും ഓട്ടോറിക്ഷയും കൂട്ടിയിടിച്ച് ഓട്ടോ ഡ്രൈവർക്കു പരിക്ക്

വണ്ടിപ്പെരിയാർ: ഇന്നോവയും ഓട്ടോറിക്ഷയും കൂട്ടിയിടിച്ച് ഓട്ടോറിക്ഷാ ഡ്രൈവർക്ക് ഗുരുതരമായി പരിക്കേറ്റു. ഓട്ടോറിക്ഷാ ഡ്രൈവർ 59-ാം മൈലിൽ താമസിക്കുന്ന പരമശിവന്‍റെ (62) കാലിനും തലയ്ക്കും ഗുരുതരമായ പരിക്കേറ്റു. നാട്ടുകാർ ഇയാളെ പ്രാഥമികാരോഗ്യകേന്ദ്രത്തിലെത്തിച്ച് പ്രാഥമിക ചികിത്സ നൽകിയശേഷം കോട്ടയം മെഡിക്കൽ കോളജിലേക്ക് മാറ്റി. ‌ഞായറാഴ്ച രാത്രി എട്ടോടെ പോലീസ് സ്റ്റേഷന് സമീപമാണ് അപകടമുണ്ടായത്. കുമളിയിൽനിന്നു ചങ്ങനാശേരിയിലേക്ക് പോയ ഇന്നോവയും 59-ാംമൈലിൽനിന്നു വണ്ടിപ്പെരിയാറിലേക്ക് വരികയായിരുന്ന ഓട്ടോറിക്ഷയും തമ്മിലാണ് കൂട്ടിയിടിച്ചത്. അപകടത്തിൽ ഓട്ടോറിക്ഷ പൂർണമായും തകർന്നു. ഈ സമയത്ത് ബൈക്കിൽ യാത്ര ചെയ്ത രണ്ടുപേർക്കും അപകടത്തിൽ പരിക്കേറ്റു.

വനിതാ സംരംഭകരുടെ ബസ് മോട്ടോർ വാഹനവകുപ്പ് കന്നി ഓട്ടത്തിനു മുമ്പേ പിടികൂടി

നെടുങ്കണ്ടം: വനിതാ സംരംഭകരുടെ ബസ് കന്നിയാത്രയ്ക്കു മുമ്പേ മോട്ടോർ വാഹനവകുപ്പ് പിടികൂടി. ഇന്നലെയാണ് എഴുകുംവയൽ സ്വദേശികളായ വനിതകളുടെ നെടുങ്കണ്ടം-തിരുവനന്തപുരം റൂട്ടിൽ "മിടുക്കി' എന്ന പേരിൽ ബസ് സർവീസ് തുടങ്ങാനിരുന്നത്. എന്നാൽ, ബസ് സർവീസ് നിയമാനുസൃതമല്ലെന്ന പേരിൽ ഞായറാഴ്ച വൈകുന്നേരത്തോടെ മോട്ടോർ വാഹനവകുപ്പ് വാഹനം കസ്റ്റഡിയിലെടുക്കുകയായിരുന്നു. ഉടുമ്പൻചോല മോട്ടോർ വെഹിക്കിൾ ഇൻസ്‌പെക്‌ടറുടെ നേതൃത്വത്തിൽ പിടികൂടിയ വാഹനം നെടുങ്കണ്ടം പോലീസ് സ്റ്റേഷനിൽ സൂക്ഷിച്ചിരിക്കുകയാണ്. ഓൾ ഇന്ത്യ ടൂറിസ്റ്റ് പെർമിറ്റ് (എഐടിപി) പ്രകാരം പൂർണമായും നിയമാനുസൃതമായി പ്രവർത്തിക്കുന്നതിനാണ് തങ്ങൾ ശ്രമിക്കുന്നതെന്നും നിലവിലെ നിയമനടപടിക്കെതിരേ ഹൈക്കോടതിയെ സമീപിക്കുമെന്നും ഉടമകൾ പറഞ്ഞു. എഴുകുംവയൽ പ്ലാത്തറ ചാക്കോ തോമസിന്‍റെ ഉടമസ്ഥതയിലുള്ള മിടുക്കി ബസ് നോക്കിനടത്തുന്നത് മകൾ ജിലുവും മകൻ ജോമിന്‍റെ ഭാര്യ നീതുവും ചേർന്നാണ്. വനിതാ സംരംഭം എന്ന നിലയിൽ ഡ്രൈവർമാർ ഉൾപ്പെടെ വനിതകളെയാണ് ബസിന്‍റെ ജീവനക്കാരായി കണ്ടെത്തിയിരുന്നത്. തലസ്ഥാന നഗരത്തെയും ടൂറിസം സാധ്യതകൾ ഏറെയുള്ള ജില്ലയെയും തമ്മിൽ ബന്ധിപ്പിക്കുന്ന തരത്തിൽ ടുറിസം വികസനം കൂടി ലക്ഷ്യമിട്ടാണ് സർവീസ് ആരംഭിച്ചത്. സുരക്ഷിതത്വവും വിശ്വാസ്യതയുള്ളതുമായ യാത്രകൾ ഡൊമസ്റ്റിക് ആൻഡ് ഇന്‍റർനാഷണൽ ടൂർ പാക്കേജുകൾ, ടിക്കറ്റ് ബുക്കിംഗ്, വിസ പ്രൊസസിംഗ്, ട്രാവൽ ഇൻഷ്വറൻസ് തുടങ്ങിയവ ഉൾക്കൊള്ളിച്ച് സ്വയംതൊഴിൽ നേടുകയും കുറച്ചധികം ആളുകൾക്ക് ജോലി നൽകുകയും ചെയ്യുക എന്ന ഉദ്ദേശ്യത്തോടെയാണ് സംരംഭം ആരംഭിച്ചത്. ഇതിനായി ടൂറിസ്റ്റ് കണക്‌ടിവിറ്റിയായി ബസുകളും കാറുകളും വാഹനങ്ങളും വാങ്ങുന്നതിന്‍റെ ആദ്യ പടിയായാണ് ബസ് വാങ്ങിയതെന്നും ഉടമകൾ പറയുന്നു. ബസിന്‍റേത് ടൂറിസ്റ്റ് പെർമിറ്റ്: മോട്ടോർ വാഹനവകുപ്പ് ടൂറിസ്റ്റ് പെർമിറ്റ് സമ്പാദിച്ച ബസിന് സ്റ്റേജ് കാരിയേജ് പെർമിറ്റ് ബസുകൾക്ക് സമാനമായി ഓരോ പോയിന്‍റിൽനിന്നും തുക ഈടാക്കി ആളുകളെ കയറ്റിയിറക്കുന്നതിന് അനുമതി ഇല്ലാത്തതിനാലാണ് നടപടി സ്വീകരിച്ചിരിക്കുന്നതെന്നാണ് മോട്ടോർ വാഹനവകുപ്പ് അധികൃതർ പറയുന്നത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]