ADVERTISEMENT

ADVERTISEMENT

താലൂക്കുതല വായനപക്ഷാചരണം

മണ്ണാർക്കാട്: താലൂക്കുതല വായനപക്ഷാചരണം ലൈബ്രറി കൗൺസിൽ സെക്രട്ടറി എം. കൃഷ്ണദാസ് ഉദ്ഘാടനം ചെയ്തു. തച്ചമ്പാറ ദേശീയ ഗ്രന്ഥശാലയിൽ നടന്ന പരിപാടിയിൽ പി.എൻ. പണിക്കരേയും ഞെരളത്ത് രാമപ്പൊതുവാളേയും അനുസ്മരിച്ചു. എം.എൻ. രാമകൃഷ്ണപിള്ള അധ്യക്ഷനായി.

കെ. ഹരിദാസൻ, കെ.കെ. നാരായണൻ, മുഹമ്മദാലി ബുസ്താനി, അബുബക്കർ മാണി പറമ്പിൽ, ചന്ദ്രൻ തച്ചമ്പാറ, കെ. സൈനബ, സി.കെ. കുഞ്ഞുമുഹമ്മദ്, കെ.സി. മത്തായി, എം. സൗദാമിനി, പി. സുജാത, ദേവസേന എന്നിവർ പ്രസംഗിച്ചു. പ്രമോദ് കുമാർ കവിത ചൊല്ലി. എം. ഉഷ വായനപ്രതിജ്ഞചൊല്ലി. യോഗത്തിൽ വി. ഉണ്ണികൃഷ്ണൻ സ്വാഗതവും ഒ. നൗഷാദ് നന്ദിയും പറഞ്ഞു.

ADVERTISEMENT

വിദ്യാഭ്യാസവായ്പ നൽകുന്നതിൽ ബാങ്കുകൾ ഉദാരസമീപനം പുലർത്തണം: വി.കെ. ശ്രീകണ്ഠൻ എംപി

പാലക്കാട്: വിദ്യാഭ്യാസ വായ്പ നൽകുന്നതിൽ ബാങ്കുകൾ ഉദാര സമീപനം പുലർത്തണമെന്ന് വി.കെ. ശ്രീകണ്ഠൻ എംപി. വ്യാവസായിക ഇടനാഴിയുമായി ബന്ധപ്പെട്ട് പാലക്കാട് പ്രതീക്ഷിക്കുന്ന വികസനത്തിൽ ബാങ്കുകൾ സുപ്രധാന പങ്ക് വഹിക്കണമെന്നും അദ്ദേഹം അഭിപ്രായപ്പെട്ടു. ജില്ലാതല ബാങ്കിംഗ് അവലോകനസമിതി യോഗം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. നെൽകൃഷിക്കാർക്ക് പിആർഎസ് ലോണുകൾ ലഭിക്കുന്നതിലെ കാലതാമസം ഒഴിവാക്കണം. ബാങ്കുകളിലെ ജീവനക്കാരുടെ ഒഴിവുകൾ നികത്തണമെന്നും എംപി നിർദേശിച്ചു. 2024-2025 സാന്പത്തിക വർഷത്തിലെ നാലാംപാദത്തിൽ ജില്ലയിലെ ബാങ്കുകൾ ആകെ 33000 കോടി രൂപ വായ്പ നൽകിയതായി യോഗം വിലയിരുത്തി. ഇത് വാർഷിക ക്രെഡിറ്റ് പദ്ധതിയുടെ 116.32% ആണ്. 2025 മാർച്ച് 31 വരെയുള്ള ബാങ്കുകളുടെ വായ്പ നീക്കിയിരിപ്പ് 44149 കോടി രൂപയും നിക്ഷേപം 60405 കോടിയുമാണ്. ജില്ലയിലെ വായ്പാ നിക്ഷേപ അനുപാതം 73.08 ശതമാനം ആണ്. കഴിഞ്ഞ പാദത്തിൽ ഇത് 74 ശതമാനമായിരുന്നു. വിദ്യാഭ്യാസ വായ്പകളുടെ കാര്യത്തിൽ ഇനിയും മുന്നോട്ട് പോകാനുണ്ടെന്ന് യോഗം വിലയിരുത്തി. 159 കോടി രൂപയുടെ ലക്ഷ്യത്തിൽ 90 കോടി രൂപ മാത്രമാണ് ഈ മേഖലയിൽ വിതരണം ചെയ്തത്. വിവിധ കേന്ദ്ര സർക്കാർ പദ്ധതികളുടെ പുരോഗതിയും യോഗം അവലോകനം ചെയ്തു. വായ്പ നിരസിക്കലുമായി ബന്ധപ്പെട്ട പരാതികൾ, ചില ബ്രാഞ്ചുകളിലെ അടിസ്ഥാന സൗകര്യങ്ങളുടെ അപര്യാപ്തത, സ്വാശ്രയ സംഘങ്ങൾക്കുള്ള വായ്പകളിലെ ആർബിഐ മാർഗനിർദേശങ്ങൾ പാലിക്കാത്ത സാഹചര്യങ്ങൾ തുടങ്ങിയ കാര്യങ്ങളിൽ ബാങ്കുകൾ ജാഗ്രത പുലർത്തണം. വായ്പാ അംഗീകാര പ്രക്രിയകൾ ലളിതമാക്കാനും സുതാര്യത ഉറപ്പാക്കാനും, സാന്പത്തിക സാക്ഷരതാ കേന്ദ്രങ്ങളിലെ ഒഴിവുകൾ നികത്താനും ബാങ്കുകൾക്ക് നിർദേശം നൽകി. ആർബിഐ ലീഡ് ഡിസ്ട്രിക്റ്റ് ഓഫീസർ മുത്തുകുമാർ യോഗത്തിൽ അധ്യക്ഷത വഹിച്ചു. നബാർഡ് ജില്ലാ അസിസ്റ്റന്‍റ് ജനറൽ മാനേജർ കവിത റാം, കനറാ ബാങ്ക് അസിസ്റ്റന്‍റ് ജനറൽ മാനേജർ എച്ച്.എസ്. ആനന്ദ, ലീഡ് ഡിസ്ട്രിക്ട് മാനേജർ പി.ടി. അനിൽകുമാർ, ലീഡ് ബാങ്ക് ഓഫീസർ രൂപലേഖ എന്നിവർ പ്രസംഗിച്ചു.

ഒറ്റപ്പാലം റെയിൽവേ സ്റ്റേഷനു വികസനത്തിന്‍റെ പച്ചവെളിച്ചം

ഒറ്റപ്പാലം: അമൃത്‌ഭാരത് പദ്ധതിയിൽ ഒറ്റപ്പാലം റെയിൽവേസ്റ്റേഷന് പുതു മുഖശ്രീ. ഒട്ടേറെ വികസന പദ്ധതികളാണ് സ്‌റ്റേഷനിൽ വരാനിരിക്കുന്നത്. പ്ലാറ്റ്ഫോം വിപുലീകരണത്തിനു പുറമേയാണിത്. സ്റ്റേഷന്‍റെ മുഖഛായ തന്നെ മാറുന്ന പദ്ധതികൾ അന്തിമഘട്ടത്തിലാണ്. സ്റ്റേഷനിലെ പ്ലാറ്റ്ഫോമുകളിൽ മേൽക്കൂരകളുടെ വിപുലീകരണം, കൂടുതൽ ഇരിപ്പിടങ്ങൾ സ്ഥാപിക്കൽ, പ്രവേശനകവാടത്തിന്‍റെയും നടപ്പാതകളുടെയും നവീകരണം, വിശ്രമകേന്ദ്രങ്ങളുടെയും ടിക്കറ്റ് കൗണ്ടറിന്‍റെയും ആധുനികവത്കരണം, ആവശ്യമായ ഇലക്ട്രിക്കൽ ജോലികൾ, പാർക്കിംഗ് കേന്ദ്രവും മറ്റ് അടിസ്ഥാന സൗകര്യങ്ങളും ഒരുക്കൽ എന്നിവയടക്കമുള്ളവയാണ് നടക്കാനിരിക്കുന്നത് നേരത്തെ കൂടുതൽ കംപാർട്ട്മെന്‍റുകളുള്ള ദീർഘദൂര ട്രെയിനുകൾ സ്റ്റേഷനിൽ നിർത്തുമ്പോൾ ഇവയുടെ പിന്നിലെ ബോഗികൾ പ്ലാറ്റ്ഫോമിന് പുറത്താകുന്ന സാഹചര്യമായിരുന്നു. ഇവിടെ ട്രെയിൻ കയറാനും ഇറങ്ങാനും യാത്രക്കാർ ഏറെ ബുദ്ധിമുട്ടിയിരുന്നു. സാഹസികയാത്ര പലപ്പോഴും അപകടഭീഷണിയും ഉയർത്തി. സ്റ്റേഷൻ എത്തിയെന്ന് ട്രെയിനിനുള്ളിലെ യാത്രക്കാർക്കു മനസ്സിലാകാത്ത സാഹചര്യവും ഉണ്ടായിരുന്നു. സിഗ്നൽ ലഭിക്കാതെ പുറത്തു നിർത്തിയിട്ടിരിക്കുകയാണെന്നു കരുതി ഇറങ്ങാതിരുന്നതു സംബന്ധിച്ച പരാതികളും യാത്രക്കാർ ഉയർന്നിരുന്നു. സ്റ്റേഷനു പുറത്താണെന്നു ധരിച്ച് ഇറങ്ങാതിരുന്ന യുവതിയും രണ്ടും മക്കളും പിന്നീട് ഒറ്റപ്പാലമെത്തിയെന്നു മനസിലാക്കി ഓടിത്തുടങ്ങിയ ട്രെയിനിൽ നിന്നു ചാടി ഇറങ്ങിയപ്പോൾ അപകടത്തിൽപെട്ടു പരിക്കേറ്റ സംഭവവും ഒരു വർഷം മുൻപുണ്ടായി. ദിവസവും ഒട്ടേറെ യാത്രക്കാർ ആശ്രയിക്കുന്ന സ്റ്റേഷനിൽ നിലനിന്നിരുന്ന പരാതികൾക്കു പരിഹാരമായാണു പ്ലാറ്റ്ഫോം വിപുലീകരിക്കുന്നത്. ഒന്നാം നമ്പർ പ്ലാറ്റ്ഫോമിന്‍റെ അതിർത്തിയിൽ മതിലും നിർമിക്കുന്നുണ്ട്. അതേസമയം, കോവിഡ് കാലത്ത് നിർത്തലാക്കിയ ട്രെയി നുകളുടെ സ്റ്റോപ്പ് ഇവിടെ പുനഃ ക്രമീകരിക്കണമെന്ന ആവശ്യം മാത്രം റെയിൽവേ ചെവിക്കൊ ള്ളുന്നില്ല.

സ്നേഹക്കൂട്ടുകളിൽ 48 വർഷം പിന്നിട്ട് പ്രഭാകരൻനായരുടെ ചായക്കട

വടക്കഞ്ചേരി: ആകർഷണീയമായ ബോർഡുകളോ ആകാരഭംഗിയോ ഈ ചായക്കടയ്ക്ക് ഇല്ല. അപൂർവമാകുന്ന ചെമ്പിന്‍റെ ബോയ്‌ലറും പതിറ്റാണ്ടുകളേറെ പഴക്കമുള്ള റേഡിയോയുമാണ് എടുത്തുപറയാനുള്ളത്.മരബെഞ്ചിന്‍റെ ഇരിപ്പിടങ്ങൾക്കും അരനൂറ്റാണ്ടിന്‍റെ പഴക്കം കാണും. ഇതൊക്കെയാണെങ്കിലും മുടപ്പല്ലൂർ ക്ഷേത്രത്തിനു മുന്നിലെ 78 വയസുള്ള പ്രഭാകരൻനായരുടെ ചായക്കടയിൽ ആളൊഴിഞ്ഞ സമയമുണ്ടാകില്ല. പ്രദേശത്തുകാർ ചായകുടിച്ച് നാട്ടുവിശേഷങ്ങൾ കൈമാറുന്നത് ഇവിടെയാണ്. പഴയകാല വാർത്താവിനിമയ സംവിധാനങ്ങളെ ഓർമപ്പെടുത്തുന്നതാണ് ഈ നാട്ടുകൂട്ടത്തിന്‍റെ കൂടിച്ചേരൽ. പരിചിതമുഖങ്ങളുടെ സ്നേഹം പങ്കുവയ്ക്കലും വീട്ടുകാര്യങ്ങൾ കൈമാറുന്നതും ഇവിടെവച്ചാണ്. മുപ്പതും നാല്‌പ്പതും വർഷമായി ഇവിടെ ചായ കുടിക്കാനെത്തുന്ന കസ്റ്റമേഴ്‌സുണ്ടെന്നു പ്രഭാകരൻനായർ പറഞ്ഞു. വരുന്നവർക്ക് കടയുടെ വലിപ്പചെറുപ്പമൊന്നും പ്രശ്നമല്ല. കൈപ്പുണ്യത്തിന്‍റെ രുചിക്കൂട്ടുകളിൽ ഒരുക്കുന്ന ലഘുഭക്ഷണവും ചായയും കിട്ടിയാൽ മതി. അതെല്ലാം ഉറപ്പുവരുത്തിയാണ് പ്രഭാകരൻനായരുടെ നാടൻചായയും കാപ്പിയും മറ്റു പലഹാരങ്ങളും റെഡിയാക്കുന്നത്. വീടിനുമുന്നിൽതന്നെയാണ് കട. സഹായികളായി ആരുമില്ല. ഭാര്യ ദേവി മരിച്ചതോടെ പ്രഭാകരൻ നായർ മാത്രമായി നടത്തിപ്പുകാരനും ജീവനക്കാരനുമൊക്കെ. മകൻ രമേഷും കുടുംബവുമാണ് ഒപ്പമുള്ളത്. അവർ ജോലിക്കുപോകും. പ്രഭാകരൻനായർ പുലർച്ചെ രണ്ടുമണിക്ക് ഉണരും. തൊട്ടുമുന്നിലുള്ള ക്ഷേത്രത്തിൽ വിളക്ക് വച്ചാണ് ദിവസം തുടങ്ങുക. അഞ്ചുമണിയാകുമ്പോഴേക്കും ആളുകൾ ചായയ്ക്കായി എത്താൻ തുടങ്ങും. സമീപത്തെ ആളുകൾതന്നെയാവും കൂടുതലും. ഉച്ചയ്ക്ക് ഒരു മണിക്കൂർ വിശ്രമമുണ്ട്. വൈകുന്നേരം ഏഴുവരെ കട പ്രവർത്തിക്കും. സാധിക്കാവുന്ന കാലം ചായക്കട നടത്തക്കൊണ്ടുപോകണമെന്നാണ് ആഗ്രഹമെന്നു പ്രഭാകരൻനായർ പറഞ്ഞു. ഫ്രാൻസിസ് തയ്യൂർ‌

ജില്ലയിൽ അന്താരാഷ്ട്ര യോഗ ദിനം ആചരിച്ചു

സെന്‍റ് ഡൊമിനിക് സ്കൂൾ മണ്ണാർക്കാട് മണ്ണാർക്കാട്: സെന്‍റ് ഡൊമിനിക് ഇംഗ്ലീഷ് മീഡിയം സ്കൂളിൽ യോഗദിനത്തിൽ വായനദിനാചരണവും വിവിധ ക്ലബ്ബുകളുടെ ഉദ്ഘാടനവും സാഹിത്യകാരനും അധ്യാപകനുമായ ഡോ. രാജേഷ് മോൻജി നിർവഹിച്ചു. വായനയുടെ പ്രാധാന്യത്തെ കുറിച്ച് ക്ലാസ് നടത്തി. ഇന്ത്യ നടത്തിയ ഓപ്പറേഷൻ സിന്ദൂരിൽ പങ്കെടുത്ത് നാടിന്‍റെ അഭിമാനമായി മാറിയ എൻബി സുബേദാർ സി. ഹസൈനാറിനെ ആദരിച്ചു. പ്രിൻസിപ്പൽ സിസ്റ്റർ ജോഫി ഒപി യോഗദിനത്തിന്‍റെയും വായനദിനത്തിന്‍റെയും സന്ദേശം നൽകി. അധ്യാപിക പ്രസന്ന പരിപാടിക്ക് ആശംസ അർപ്പിച്ചു. തുടർന്ന് വിവിധ ക്ലബ്ബുകളുടെ ആഭിമുഖ്യത്തിൽ കലാപരിപാടികളും നടത്തി. സാൻജോ സെൻട്രൽ സ്കൂൾ പാലക്കാട്: അന്താരാഷ്ട്ര യോഗ ദിനത്തിന്‍റെയും ലോക സംഗീത ദിനത്തിന്‍റെയും ആഘോഷം സാൻജോ സെൻട്രൽ സ്കൂളിൽ നടന്നു. ഭാരതത്തിന്‍റെ തനതായ പാരന്പര്യം വിളിച്ചോതുന്ന യോഗദിനത്തിൽ യോഗാസനങ്ങളുടെ പ്രദർശനം മിഴിവേകി. ലോക സംഗീതദിനത്തിന്‍റെ പരിപാടികളിൽ സംഗീതവുമായി ബന്ധപ്പെട്ട ചോദ്യോത്തരസദസും സംഗീതവിരുന്നും കൂടി ഇഴചേർന്നു. സ്കൂൾ മാനേജ്മെന്‍റും അധ്യാപകരും കുട്ടികളും ചേർന്നാണ് പരിപാടികൾ ഒരുക്കിയത്. സെന്‍റ്് മേരീസ് ഇംഗ്ലീഷ് മീഡിയം സ്കൂൾ പുതുനഗരം പുതുനഗരം: സെന്‍റ്് മേരീസ് ഇംഗ്ലീഷ് മീഡിയം സ്കൂളിൽ ജില്ലാ ആയുർവേദ മെഡിക്കൽ അസോസിയേഷന്‍റെ നേതൃത്വത്തിൽ യോഗദിനം ആചരിച്ചു. ജില്ലാ പ്രസിഡന്‍റ് ഡോ. ടോണി കല്ലന്പള്ളിൽ, അസിസ്റ്റന്‍റ് മാനേജർ ഫാ. സൈമണ്‍ കൊള്ളന്നൂർ, സ്കൂൾ പ്രിൻസിപ്പൽ സിസ്റ്റർ ഷെറിൻ എന്നിവർ നേതൃത്വം നൽകി. സാൻജോ ഫാർമസി കോളജ് വെള്ളപ്പാറ പാലക്കാട്: വെള്ളപ്പാറ സാൻജോ ഫാർമസി കോളജിൽ ലോക സംഗീതദിനവും യോഗദിനാചരണവും സംയുക്തമായി ആഘോഷിച്ചു. സാൻജോ ഫാർമസി കോളജിൽ മാനേജ്മെന്‍റിന്‍റെയും അധ്യാപകരുടെയും നേതൃത്വത്തിൽ ലോകസംഗീത ദിനം ആചരിച്ചു. പ്രിൻസിപ്പൽ ഡോ. കെ.ആർ. വിനോദ് സന്ദേശം നൽകി. യുവക്ഷേത്ര കോളജ് മുണ്ടൂർ മുണ്ടൂർ: അന്താരാഷ്ട്ര യോഗാദിനത്തോടനുബന്ധിച്ച് യുവക്ഷേത്ര കോളജ് എൻഎസ്എസ് യൂണിറ്റുകളും കായിക വിഭാഗവും ചേർന്ന് സംഘടിപ്പിച്ച യോഗപരിശീലനം ട്രെയ്നിംഗ് ആൻഡ് പ്ലേസ്മെന്‍റ് കോ-ഓർഡിനേറ്ററും അസി.ഡയറക്ടറുമായ റവ.ഡോ. ലിനോ സ്റ്റീഫൻ ഇമ്മട്ടി ഉദ്ഘാടനം ചെയ്തു. എൻഎസ്എസ് അസി. പ്രോഗ്രാം ഓഫീസർ കെ. ദീപിക സ്വാഗതവും ഫിസിക്കൽ എഡ്യുക്കേഷൻ വിഭാഗം മേധാവി എം. മുകുന്ദൻ നന്ദിയും പറഞ്ഞു. തുടർന്ന് വിദ്യാർഥികൾ യോഗ പരിശീലിച്ചു.

സെന്‍റ് തോമസ് ഐടിഐയിൽ സിൽവർ ജൂബിലി ഉദ്ഘാടനം

കാഞ്ഞിരപ്പുഴ: സെന്‍റ് തോമസ് ഐടിഐയുടെ ആനുവൽ ഡേയും സിൽവർ ജൂബിലി ഉദ്ഘാടനവും 25 ഇന കർമ പദ്ധതികളുടെ ഉദ്ഘാടനവും നടന്നു. സെന്‍റ് തോമസ് ഐടിഐ ഡയറക്ടർ ഫാ. ഐബിൻ കളത്താര സ്വാഗതം ആശംസിച്ചു. മണ്ണാർക്കാട് ബ്ലോക്ക് പഞ്ചായത്ത് പ്രസിഡന്‍റ് വി. പ്രീത അധ്യക്ഷത വഹിച്ച പരിപാടിയിൽ സിൽവർ ജൂബിലി വർഷത്തിന്‍റെ ഉദ്ഘാടനം മോണ്‍ ജീജോ ചാലക്കൽ നിർവഹിച്ചു. സിൽവർ ജൂബിലി വർഷത്തിന് സിൽവേറിയ എന്ന നെയിം ലോഞ്ചിംഗും നടത്തി. ഐടിഐയിൽ ആരംഭിക്കുന്ന മൂന്ന് ട്രേഡുകളുടേയും പ്രൊഡക്ഷൻ യൂണിറ്റുകളുടെയും ഉദ്ഘാടനം കാഞ്ഞിരപ്പുഴ ഗ്രാമപഞ്ചായത്ത് പ്രസിഡന്‍റ് സതി രാമരാജൻ നിർവഹിച്ചു. കർമപദ്ധതികളുടെ ഉദ്ഘാടനം മണ്ണാർക്കാട് ബ്ലോക്ക് പഞ്ചായത്ത് പ്രസിഡന്‍റ് വി. പ്രീത നിർവഹിച്ചു. സെന്‍റ് തോമസ് ഫൊറോന ചർച്ച് വികാരി ഫാ. ബിജു കല്ലിങ്കൽ മുഖ്യപ്രഭാഷണം നടത്തി. സെന്‍റ് തോമസ് ഐടിഐ പ്രിൻസിപ്പൽ ഫാ. ബെറ്റ്സണ്‍ തുക്കുപറന്പിൽ ജെഎസ്എസിന്‍റെ ആഭിമുഖ്യത്തിൽ വനിതകൾക്കും യുവാക്കൾക്കുമായി നടത്തിയ ഹ്രസ്വകാല കോഴ്സുകളുടെ സർട്ടിഫിക്കറ്റ് വിതരണം നിർവഹിച്ചു. ഗ്രൂപ്പ് ഇൻസ്ട്രക്ടർ ഇ.എ. റോജി വാർഷിക റിപ്പോർട്ട് അവതരിപ്പിച്ചു. വാർഡ് മെംബറും ഐടിഐ ഇൻസ്ട്രക്ടറുമായ എം.പി. പ്രിയ, സ്റ്റാഫ് സെക്രട്ടറി കെ. സുജയ് പ്രസംഗിച്ചു. വിദ്യാർഥികളുടെ കലാസന്ധ്യയും നടന്നു.

കഞ്ചിക്കോട് നല്ലിടയൻ പള്ളിയിൽ ദിവ്യകാരുണ്യ തീർഥാടകസംഗമം

കഞ്ചിക്കോട്: നല്ലിടയൻ ദേവാലയത്തിൽ ക്രിസ്തുജയന്തി മഹാജൂബിലി വർഷത്തിൽ നടന്ന ദിവ്യകാരുണ്യ തീർഥാടക സംഗമത്തിൽ പൂർണ ദണ്ഡവിമോചനം തേടി വിശ്വാസികൾ ഒഴുകിയെത്തി. ഇന്നലെ രാവിലെ വികാരി ഫാ. തോം കിഴക്കേടത്ത് ജൂബിലി കവാടം തുറന്നു. ഏകദിന തീർഥാടന കേന്ദ്രമായി ബിഷപ് മാർ പീറ്റർ കൊച്ചുപുരയ്ക്കൽ പ്രഖ്യാപിച്ച നല്ലിടയൻ ദേവാലയത്തിൽ ദിവ്യകാരുണ്യ തീർഥാടക സംഗമം നടന്നു. പാലക്കാട്, ഒലവക്കോട്, തത്തമംഗലം ഫൊറോനകളിൽ നിന്നുള്ള വൈദികരും സന്യസ്തരും ഭക്തജനങ്ങളും പങ്കെടുത്തു. മാർ പീറ്റർ കൊച്ചുപുരയ്ക്കൽ മുഖ്യകാർമികനായി. ലോകത്തെ വിമലീകരിക്കാനുള്ള ദൈവത്തിന്‍റെ ഇടപെടലാണ് വിശുദ്ധ കുർബാനയെന്ന് ബിഷപ് ഓർമിപ്പിച്ചു. ഫൊറോന വികാരിമാരായ ഫാ. ജോഷി പുലിക്കോട്ടിൽ (പാലക്കാട്), ഫാ. സണ്ണി വാഴേപറന്പിൽ (ഒറ്റപ്പാലം), ഫാ. ഷാജു അങ്ങേവീട്ടിൽ (ഒലവക്കോട്), ഫാ. ബെറ്റ്സൻ തുക്കുപറന്പിൽ (തത്തമംഗലം), കഞ്ചിക്കോട് വികാരി ഫാ. തോം കിഴക്കേടത്ത് എന്നിവർ സഹകാർമികരായി. ഫാ. ജസ്റ്റിൻ തടത്തിൽ ദിവ്യകാരുണ്യ പ്രഭാഷണം നടത്തി. ദിവ്യകാരുണ്യപ്രദക്ഷിണവും ആരാധനയും നടന്നു.അഡോറേഷൻ സിസ്റ്റേഴ്സിന്‍റെ നേതൃത്വത്തിൽ ഒരുക്കിയ ദിവ്യകാരുണ്യ അത്ഭുതങ്ങളുടെ പ്രദർശനവും ശ്രദ്ധേയമായി.

കെസിവൈഎമ്മിന്‍റെ നേതൃത്വത്തിൽ സംരംഭകരുടെ സംസ്ഥാനസംഗമം

പാലക്കാട്: കെസിവൈഎം സംസ്ഥാനസമിതിയുടെ നേതൃത്വത്തിൽ സംരംഭകരുടെ സംസ്ഥാനസംഗമം സുൽത്താൻപേട്ട രൂപതയുടെ ആതിഥേയത്വത്തിൽ അട്ടപ്പള്ളം സെന്‍റ് ജോണ്‍ ദി ബാപ്റ്റിസ്റ്റ് ഇടവകയിൽ നടത്തി. സമ്മേളനത്തിൽ സംസ്ഥാന സെക്രട്ടറി സനു സാജൻ പടിയറയിൽ സ്വാഗതം പറഞ്ഞു. സംസ്ഥാന ഡയറക്ടർ ഫാ. ഡിറ്റോ കൂള ആമുഖപ്രഭാഷണം നടത്തി. സംസ്ഥാന പ്രസിഡന്‍റ് എബിൻ കണിവയലിൽ അധ്യക്ഷനായ യോഗം സുൽത്താൻപേട്ട രൂപത അധ്യക്ഷൻ ഡോ. അന്തോണിസാമി പീറ്റർ അബീർ ഉദ്ഘാടനം ചെയ്തു. സുൽത്താൻപേട്ട രൂപത ഡയറക്ടർ ഫാ. അമൽ ചാൾസ്, മുൻരൂപത ഡയറക്ടർ ഫാ. പ്രബിൻ സൂസടിമൈ, രൂപത പ്രസിഡന്‍റ് റെക്സ് സ്റ്റാനിഷ്, അട്ടപ്പള്ളം യൂണിറ്റ് ഡയറക്ടർ ഫാ. വിജയ്, ചന്ദ്രപുരം വാർഡ് മെംബർ സനൂപ്, വാളയാർ ഇടവകാംഗം ജോസ് എന്നിവർ പ്രസംഗിച്ചു. സംസ്ഥാന വൈസ് പ്രസിഡന്‍റ് ജെ.ആർ. അനൂപ് നന്ദി പറഞ്ഞു.

തകർച്ചയിലുള്ള കല്ലഞ്ചിറ റോഡ് സഞ്ചാരയോഗ്യമാക്കണം

തത്തമംഗലം: കല്ലഞ്ചിററോഡ് തകർന്ന് ഗർത്തങ്ങൾ രൂപപ്പെട്ട് വാഹനയാത്ര അതീവദുഷ്കരം. ഗർത്തങ്ങളിൽ കെട്ടിനിൽക്കുന്ന വെള്ളത്തിൽ ഇടിച്ചിറങ്ങി ഇരുചക്രവാഹനങ്ങൾ മറിഞ്ഞ് യാത്രക്കാർ ക്ക് പരിക്കേൽക്കുന്നത് പതിവായി. തത്തമംഗലം, മേട്ടുപ്പാളയം അത്തിമണി, കൊല്ലൻകുളമ്പ്, കൂമൻകാട്, പട്ടഞ്ചേരി, ചുള്ളിപ്പെരുക്കമേട്, തണ്ണീർപന്തൽ ഉൾപ്പെടെയുള്ള പ്രദേശങ്ങളിലെ വാഹനയാത്രക്കാർ ദൂരക്കുറവുള്ള വെള്ളപ്പന - കല്ലഞ്ചിറ പാതയിലാണ് സഞ്ചാരം. ചരക്കുലോറി ഉൾപ്പെടെയുള്ള വാഹനങ്ങൾക്ക് യന്ത്രതകരാറുണ്ടാകുന്നതും പതിവാണ്. രാത്രിസമയങ്ങളിൽ സഞ്ചരിക്കുന്ന ഇരുചക്രവാഹന യാത്രികരാണ് കൂടുതലായും അപകടത്തിൽപ്പെടുന്നത്. ഗർത്തങ്ങൾ രൂപപ്പെട്ട് ഒരു വർഷം കഴിഞ്ഞിട്ടും പൊതുമരാമത്ത് നവീകരണ ജോലികൾ ചെയ്യാത്തതിൽ നാട്ടുകാരുടെ പ്രതിഷേധവുമുണ്ട്. പാതയിലെ ഗർത്തങ്ങൾ കാരണം നിലവിൽ പുതുനഗരം വഴിയാണ് പാലക്കാട് യാത്ര ചെയ്യുന്നത്.

ഓണാഘോഷം ലക്ഷ്യമിട്ട് ചെണ്ടുമല്ലിത്തൈ വിതരണം നടത്തി

ചിറ്റൂർ: ഗവ. ടെക്നിക്കൽ ഹൈസ്കൂൾ കാർഷിക വിഭാഗത്തിന്‍റെ നേതൃത്വത്തിൽ ഓണത്തിനോടനുബന്ധിച്ച് ചിറ്റൂരിന്‍റെ ചുറ്റുപാടുമുള്ള പത്ത് വിദ്യാലയങ്ങൾക്ക് സൗജന്യമായി ചെണ്ടുമല്ലിതൈ വിതരണം ചെയ്തു. പരിപാടി ചിറ്റൂർ ബ്ലോക്ക് പഞ്ചായത്ത് പ്രസിഡന്‍റ് സുജാത ഉദ്ഘാടനം ചെയ്തു. നല്ലേപ്പിള്ളി ഗ്രാമ പഞ്ചായത്ത് പ്രസിഡന്‍റ് എസ്. അനീഷ അധ്യക്ഷയായി. ടെക്നിക്കൽ ഹൈസ്കൂൾ സൂപ്രണ്ട് പി.എസ്. ലിബുകുമാർ എസ്. മനോജ്, ആർ. സജിമോൻ, മുഹമ്മദ് കാസിം, എൻ.ശാലിനി, എന്നിവർ പ്രസംഗിച്ചു.

പാലക്കാട് -കുളപ്പുള്ളി പാതയിലെ കുഴികൾ അടച്ചു

ഒറ്റപ്പാലം: പാലക്കാട്-കുളപ്പുള്ളി പാതയിലെ അപകടഭീഷണിയായ കുഴികൾ താത്കാലികമായി അടച്ചു. കുളപ്പുള്ളിമുതൽ പത്തിരിപ്പാലവരെയുള്ള ഭാഗത്തെ നൂറിലേറെ കുഴികളാണ് അടച്ചത്. മഴമൂലം കുഴികളിൽ വെള്ളം നിൽക്കുന്നതുകാരണം ജിഎസ്‌പി മിശ്രിതം ഉപയോഗിച്ചാണ് താത്കാലികമായി പരിഹരിച്ചത്. മഴമാറിയാൽ ശാശ്വതമായി പരിഹരിക്കുമെന്ന് പൊതുമരാമത്ത് വിഭാഗം അധികൃതർ അറിയിച്ചു. കഴിഞ്ഞദിവസം വാണിയംകുളംതെരുവിലെ കുഴിയിൽമാത്രം ആറ് ഇരുചക്രവാഹന യാത്രികരാണ് വീണത്.

ലിസ്യു സ്കൂളിൽ അന്താരാഷ്ട്ര യോഗ ദിനാചരണം

കോയമ്പത്തൂർ: സായിബാബ കോളനി ഭാരതി പാർക്ക് റോഡിലുള്ള ലിസ്യു മെട്രിക് ഹയർ സെക്കൻഡറി സ്കൂളിൽ അന്താരാഷ്ട്ര യോഗദിനം ആഘോഷിച്ചു. പ്രിൻസിപ്പൽ റവ.ഡോ.ജോയ് അറയ്ക്കലിന്‍റെ നേതൃത്വത്തിൽ ഫിസിക്കൽ എഡ്യൂക്കേഷൻ വകുപ്പ് പരിപാടി സംഘടിപ്പിച്ചു. യോഗയുടെ പ്രാധാന്യത്തെക്കുറിച്ച് വിദ്യാർഥികളെ ബോധവത്കരിച്ചു. വ്യക്തിഗത ആരോഗ്യവും നമ്മുടെ ഗ്രഹത്തിന്‍റെ ആരോഗ്യവും തമ്മിലുള്ള ബന്ധം പകർത്തുന്ന 2025 ലെ ‘ഭൂമിക്ക് യോഗ, ഒരു ആരോഗ്യം’ എന്ന വിഷയത്തെക്കുറിച്ചുള്ള ഉൾക്കാഴ്ചയും നൽകി. യോഗ ദിനാചരണം കോയന്പത്തൂർ: ഡബ്ലിയുഎംസി കോയമ്പത്തൂർ പ്രോവിൻസ് അന്തർദേശീയ യോഗ ദിനം ആചരിച്ചു. പരിശീലനയജ്ഞം ഡബ്ലിയുസി കോയമ്പത്തൂർ പ്രോവിൻസ് പ്രസിഡന്‍റ് രാജൻ ആറുമുഖം ഉദ്ഘാടനം ചെയ്തു. തുടർന്ന് അക്ഷയ അന്തർജനം എന്ന യോഗ പരിശീലകയുടെ നേതൃത്വത്തിൽ ലോക യോഗദിനം കോയമ്പത്തൂരിലെ റേസ് കോഴ്സിലുള്ള സീമ ഓഡിറ്റോറിയത്തിൽ നടത്തി.

സർക്കാർ സ്കൂളിൽ പുതിയ ക്ലാസ് മുറികളുടെ ഉദ്ഘാടനം

കോയമ്പത്തൂർ: കിണത്തുകടവിലെ അരസംപാളയത്തുള്ള ഗവ. ഹയർ സെക്കൻഡറി സ്കൂളിലെ നാല് പുതിയ ക്ലാസ് മുറികളുടെ നിർമാണത്തിന് റോട്ടറി ക്ലബ് ഓഫ് കോയമ്പത്തൂർ മെട്രോപൊളിസും ശ്രീകൃഷ്ണ സ്വീറ്റ്സും സംയുക്തമായി ധനസഹായം നൽകി. 50 ലക്ഷം രൂപയാണ് ഈ പദ്ധതിക്ക് സ്പോൺസർ ചെയ്തത്. പുതിയ കെട്ടിടം തമിഴ്നാട് സ്കൂൾ വിദ്യാഭ്യാസ വകുപ്പ് പ്രിൻസിപ്പൽ സെക്രട്ടറി ചന്ദ്രമോഹൻ ഉദ്ഘാടനം നിർവഹിച്ചു. കോയമ്പത്തൂർ ജില്ലാ കളക്ടർ പവൻ കുമാർ ചടങ്ങിൽ അധ്യക്ഷത വഹിച്ചു. ശ്രീകൃഷ്ണ സ്വീറ്റ്സ് ചെയർമാൻ കൃഷ്ണൻ, റോട്ടറി ക്ലബ് ഓഫ് കോയമ്പത്തൂർ മെട്രോപൊളിസിന്‍റെ പ്രസിഡന്‍റ് വരദരാജൻ; ക്ലബ് അംഗങ്ങൾ, സ്കൂൾ ഹെഡ്മാസ്റ്റർ, അധ്യാപകർ, വിദ്യാർഥികൾ എന്നിവർ പങ്കെടുത്തു.

പ്ലാന്‍റേഷൻ സബ്സിഡിക്ക് അപേക്ഷ നൽകാം: പ്രൊഡക്ഷൻ കമ്മീഷണർ

വടക്കഞ്ചേരി: ഈവർഷം റബർകൃഷി ചെയ്യുന്ന കർഷകർക്ക് പ്ലാന്‍റേഷൻ സബ്സിഡിക്ക് അപേക്ഷ നൽകാൻ കഴിയുമെന്ന് റബർ ബോർഡ് ഡെപ്യൂട്ടി പ്രൊഡക്ഷൻ കമ്മീഷണർ മധു പറഞ്ഞു. എളവമ്പാടം മാതൃകാ റബർ ഉത്പാദക സംഘത്തിന്‍റെ വാർഷിക ജനറൽ ബോഡി യോഗം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. ഇതിനായി റബർബോർഡ് അംഗീകത നഴ്സറിയിൽ നിന്നും റബർ തൈകൾ വാങ്ങിയതിന്‍റെ ബില്ല്, സ്ഥലത്തിന്‍റെ പൊസഷൻ സർട്ടിഫിക്കറ്റ്, പ്ലോട്ട് പ്ലാൻ, ഉടമയുടെ ആധാർ കാർഡ് കോപ്പി, ബാങ്ക് അക്കൗണ്ട് വിവരം എന്നിവ നിർദിഷ്ട സൈറ്റിൽ അപ് ലോഡ് ചെയ്യണം. ഒരു ഹെക്ടറിന് 40,000 രൂപ സബ്സിഡിയായി ലഭിക്കും. സംഘം പ്രസിഡന്‍റ് പി.വി. ബാബു അധ്യക്ഷത വഹിച്ചു. എഡിഒ ഗീത, ഭാരതപ്പുഴ റബേഴ്സ് എംഡി ഷിബു, സംഘം ഡയറക്ടർ ഡെന്നി തെങ്ങുംപള്ളി, കെ.എസ്. ബാബു രാജൻ എന്നിവർ പ്രസംഗിച്ചു. റബർ ഉത്പാദക സംഘങ്ങൾക്കുള്ള സ്കീമിൽ കൂടി കർഷകർക്ക് മഴമറ ഇടുന്നതിനും സ്പ്രേയിംഗിനും സബ്‌സിഡി ലഭിക്കും. സംഘങ്ങൾക്ക് സമൂഹ പുകപ്പുര നിർമിക്കുന്നതിനും ധനസഹായം ലഭിക്കുമെന്നും ഡെപ്യുട്ടി കമ്മീഷണർ അറിയിച്ചു. മെംബർമാരുടെ കുടുംബത്തിൽ നിന്ന് പരീക്ഷകളിൽ എപ്ലസ് നേടിയ കുട്ടികളെ അനുമോദിച്ചു. കൃഷിയിടത്തിൽ ഉപയോഗിക്കാവുന്ന വിവിധ തരം മെഷീനുകളുടെ പ്രദർശനവും നടന്നു.

ജനപ്രതിനിധികളും ഉദ്യോഗസ്ഥരുമില്ലാതെ പ്രഹസനമായി ചിറ്റൂർ താലൂക്ക് വികസനയോഗം

ചിറ്റൂർ: താലൂക്ക് വികസന സമിതിയോഗത്തിൽ ജനപ്രതിനിധികളും സർക്കാർ ജീവനക്കാരും പങ്കെടുക്കാത്തതിൽ പൊതു പ്രവർത്തകരുടെ രൂക്ഷവിമർശനം. നിർബന്ധമായും യോഗത്തിൽ ഹാജരാവേണ്ട ജീവനക്കാർ എത്തിയില്ലെങ്കിൽ ഇവർക്കെതിരെ ഷോകോസും തുടർനടപടികളും സ്വീകരിക്കാമെങ്കിലും അതുണ്ടാവാത്തതിനാൽ ഓരോ മാസവും ജീവിക്കാരുടെ സാനിധ്യം കുറഞ്ഞുവരികയാണ്. മുന്പ് എംഎൽഎമാരായ കെ. അച്യുതൻ, കെ. കൃഷ്ണൻകുട്ടി, കെ. ബാബു എന്നിവർ യോഗത്തിൽ പങ്കെടുത്തിരുന്നപ്പോൾ കോടതി വ്യവഹാരങ്ങൾ ഒഴിച്ചുള്ള പരാതികൾക്ക് അടിയന്തര തീർപ്പ് കൽപ്പിച്ചിരുന്നു. നിലവിൽ വികസനസമിതി യോഗം തീർത്തും പ്രഹസനമാവുന്നതായി ആരോപണം ഉയർന്നിരിക്കുകയാണ്. നല്ലേപ്പിള്ളി സ്വദേശി പള്ളിമേട് ഗണേഷ് ബാബു കനാൽ വെള്ളം വീടിനു മുൻപിൽ കയറുകയും താമസിക്കാൻ കഴിയാത്ത വിധം ദുർഘടമായിരിക്കുന്നതായി വികസന സമിതി യോഗത്തിൽ പരാതി നൽകി. കനാൽ ബണ്ടിന്‍റെ അടിഭാഗം ദുർബലതകാരണം തകർന്ന് ചോർന്നതാണ് വീട്ടിൽ വെള്ളം കയറുന്നതെന്നാണ് പരാതിയിൽ സൂചിപ്പിരിക്കുന്നത്. മഴക്കാലം ആരംഭിച്ചാൽ രണ്ടു വയസുള്ള കുട്ടിയും ഭാര്യയുമായി ബന്ധു വീട്ടിൽ മാറി താമസിക്കുകയാണ് പതിവ്. പലതവണ ബന്ധപ്പെട്ട നല്ലേപ്പിള്ളി പഞ്ചായത്ത് സെക്രട്ടറിക്ക് കനാൽ ബണ്ട് ശരിയാക്കാൻ അപേക്ഷ നൽകിയിട്ടും നടപടികൾ ഉണ്ടാവുന്നില്ലെന്നും ഗണേഷ് ബാബുവിന്‍റെ പരാതിയിൽ പറഞ്ഞു. കൊഴിഞ്ഞാമ്പാറ പന്ത്രണ്ടാം വാർഡ് തരകൻചള്ള പാത കഴിഞ്ഞ 30 വർഷമായി നവീകരി ക്കാതെ യാത്രാദുരിതത്തിലാണെന്ന് ജെ. ശിവകുമാർ വികസന സമിതി ചെയർമാനു പരാതി നൽകി. ഒരു കിലോമീറ്റർ വയൽവരമ്പുകൾക്ക് നടവിലൂടെ സഞ്ചരിക്കുന്ന പാതയിൽ വാഹന സഞ്ചാരം ഭീതി ജനകമാണ്. രണ്ടു വർഷം മുൻപ് പെയ്ത മഴയിൽ റോഡിന്‍റെ മിക്ക ഭാഗങ്ങളും സഞ്ചാരയോഗ്യമല്ലാതായിരിക്കുകയാണ്. ഹരിജൻ കോളനിവാസികൾ ഉൾപ്പെടെ അമ്പതോളം പേർ ഇവിടെ താമസക്കാരായുണ്ട്. നാട്ടുകാർ പരാതികൾ അറിയിക്കുമ്പോഴെല്ലാം സാമ്പത്തികകുറവാണ് നവീകരണം നീളുന്നതിനു കാരണമെന്ന് അറിയിക്കുന്നതായും ശിവകുമാർ പരാതിപ്പെട്ടു .യോഗത്തിൽ പെരുമാട്ടി ഗ്രാമപഞ്ചായത്ത് പ്രസിഡന്‍റ് ഷീബ രാധാകൃഷ്ണൻ, തഹസിൽദാർ എം.പി. അനന്തകൃഷ്ണൻ എന്നിവർ പങ്കെടുത്തു. ഡിസിസി വൈസ് പ്രസിഡന്‍റ് സുമേഷ് അച്യുതൻ, പെരുമാട്ടി പഞ്ചായത്തംഗം വിനോദ്ബാബു എന്നിവർ പ്രസംഗിച്ചു.

പകൽവീട് പ്രവേശനോത്സവം

ആലത്തൂർ: പഞ്ചായത്തിന്‍റെ പകൽവീടിന്‍റെ പ്രവേശനോത്സവം ആഘോഷിച്ചു. കെ.ഡി. പ്രസേനൻ എംഎൽഎ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് എ. ഷൈനി അധ്യക്ഷയായി. വൈസ് പ്രസിഡന്‍റ് ചന്ദ്രൻ പരുവക്കൽ, പഞ്ചായത്തംഗം ഐ. നജീബ്, നന്മ മാനേജിംഗ് ട്രസ്റ്റി കെ. സുകുമാരൻ എന്നിവർ പ്രസംഗിച്ചു. ആലത്തൂർ പഞ്ചായത്തിന്‍റെ ഉടമസ്ഥതയിലുള്ള പകൽ വീടിന്‍റെ നടത്തിപ്പ് ചുമതല നന്മ ചാരിറ്റബിൾ സൊസൈറ്റിക്കാണ്. ആദ്യഘട്ടത്തിൽ 20 വയോജനങ്ങൾക്കാണ് പ്രവേശനം. രാവിലെ 9. 30 മുതൽ 4.30 വരെ ഇവിടെ ചെലവഴിക്കാം. ചായ, ലഘുഭക്ഷണം, ഉച്ചഭക്ഷണം എന്നിവ നൽകും. ഇതിനാവശ്യമായ തുക സ്പോൺസർഷിപ്പിലൂടെ കണ്ടെത്തും. വയോജനങ്ങൾക്ക് വിശ്രമം, വിനോദം, വായന, പഠന -ചർച്ച ക്ലാസുകൾ, അടിയന്തര ചികിത്സ ആവശ്യം തുടങ്ങിയവ പകൽ വീടിലൂടെ നൽകി വയോജനങ്ങളുടെ ശാരീരിക മാനസിക നിലവാരം മെച്ചപ്പെടുത്താനുള്ള പ്രവർത്തനം നന്മ ചാരിറ്റബൾ സൊസൈറ്റി ഏറ്റെടുക്കും.

വായനപക്ഷാചരണം

അഗളി: ഗ്രാമപഞ്ചായത്ത് പബ്ലിക് ലൈബ്രറിയുടെ ആഭിമുഖ്യത്തിൽ അട്ടപ്പാടി മേഖലാതല വായനപക്ഷാചരണം ജില്ലാ ലൈബ്രറി കൗണ്‍സിൽ സെക്രട്ടറി പി.എൻ. മോഹനൻ ഉദ്ഘാടനം ചെയ്തു. വായനപക്ഷാചരണത്തിന്‍റെ ഭാഗമായി ജൂലൈ ഏഴ് വരെ പബ്ലിക് ലൈബ്രറിയിൽ രാവിലെ പത്ത് മുതൽ ഉച്ചയ്ക്ക് 12 വരെ വിവിധ പുസ്തകങ്ങളുടെ പ്രദർശനവും നടക്കും. അതോടൊപ്പം പുസ്തകപ്രകാശനവും എസ്എസ്എൽസി പരീക്ഷയിൽ വിജയിച്ച വിദ്യാർഥികളെയും എൽഎസ്എസ് സ്കോളർഷിപ്പ് നേടിയ വിദ്യാർഥികളെയും അനുമോദിക്കും. ഗ്രാമപഞ്ചായത്ത് കോണ്‍ഫറൻസ് ഹാളിൽ നടന്ന പരിപാടിയിൽ പഞ്ചായത്ത് അംഗം കെ.ടി.ബെന്നി അധ്യക്ഷനായി.

കാട്ടാന ആക്രമണത്തിൽ അടിയന്തര നടപടിവേണം: കത്തോലിക്ക കോൺഗ്രസ്‌

പാലക്കാട്‌:‌ ജില്ലയിലെ മലയോര മേഖലയിൽ സ്ഥിരമായുണ്ടാകുന്ന കാട്ടാനകളുടെ ആക്രമണം തടയാൻ അടിയന്തരനടപടി സ്വീകരിക്കണമെന്ന് കത്തോലിക്ക കോൺഗ്രസ്‌ രൂപത കൺവൻഷൻ ആവശ്യപ്പെട്ടു. സ്വന്തം കൃഷിയിടത്തിലും വീട്ടുമുറ്റത്തും കർഷകർ ആക്രമിക്കപ്പെടുന്നതു ന്യായീകരിക്കാനാവില്ല. നാട്ടിൽ ഇറങ്ങുന്ന കാട്ടാനകളെ നാട്ടാനകളായി പരിഗണിച്ച്‌ നാടുകടത്തണമെന്നും കർഷകരുടെ ജീവനും സ്വത്തിനും സംരക്ഷണം നൽകാൻ സർക്കാർ തയാറാകണമെന്നും വന്യമൃഗങ്ങൾ കൃഷിയിടങ്ങളിലും ജനവാസമേഖലകളിലും ഇറങ്ങാതെ തടയാൻ വനംവകുപ്പ്‌ പദ്ധതികൾ ആവിഷ്കരിക്കണമെന്നും കൺവൻഷൻ ആവശ്യപ്പെട്ടു. കത്തോലിക്ക കോൺഗ്രസ്‌ ഗ്ലോബൽ പ്രസിഡന്‍റ് പ്രഫ. രാജീവ്‌ കൊച്ചുപറമ്പിൽ കൺവൻഷൻ ഉദ്ഘാടനംചെയ്തു. രൂപത പ്രസിഡന്‍റ് ബോബി പൂവത്തിങ്കൽ അധ്യക്ഷത വഹിച്ചു. ഗ്ലോബൽ ജനറൽ സെക്രട്ടറി പ്രഫ. ജോസുകുട്ടി ഒഴുകയിൽ, വൈസ്‌ പ്രസിഡന്‍റുമാരായ ബെന്നി ആന്‍റണി, ട്രീസ ലിസ്‌ സെബാസ്റ്റ്യൻ, തോമസ്‌ ആന്‍റണി, ഡെന്നി തെങ്ങുംപള്ളിൽ, ജോസ്‌ മുക്കട, ജീജോ അറയ്ക്കൽ, ജോസ്‌ വടക്കേക്കര, രൂപത ഡയറക്ടർ ഫാ. ചെറിയാൻ ആഞ്ഞിലിമൂട്ടിൽ തുടങ്ങിയവർ പ്രസംഗിച്ചു.

വ്യാജവീഡിയോ പ്രചാരണത്തിനെതിരേ വനംവകുപ്പ് പോലീസിൽ പരാതി നൽകി

മംഗലംഡാം: വണ്ടാഴിയിൽ പുലിയെ കണ്ടെന്ന് നവമാധ്യമങ്ങളിലൂടെ വ്യാജപ്രചാരണം നടത്തുന്നതിനെതിരേ വനംവകുപ്പ് പോലീസിൽ പരാതി നല്കി. വണ്ടാഴി മംഗലംഡാം റോഡിൽ പുലിയെ കണ്ടെന്ന രീതിയിൽ കടുവയുടെ ദൃശ്യങ്ങൾ ഉപയോഗിച്ച് വ്യാജപ്രചാരണം നടത്തിയതിനെതിരെയാണ് മംഗലംഡാം ഫോറസ്റ്റ് ഡെപ്യൂട്ടി റേഞ്ച് ഓഫീസർ കെ.എ. മുഹമ്മദ് ഹാഷിം മംഗലംഡാം പോലീസിൽ പരാതി നല്കിയിട്ടുള്ളത്. റോഡരികിലെ പാലത്തിനുമുകളിൽ കടുവ ഇരിക്കുന്ന വീഡിയോയാണ് വണ്ടാഴിയിൽ കണ്ടതെന്ന നിലയിൽ വ്യാജമായി പ്രചരിക്കുന്നത്. ഇതു സംബന്ധിച്ച് ഇന്നലെ ദീപികയിൽ വാർത്ത നൽകിയിരുന്നു. ജനങ്ങളെ തെറ്റിദ്ധരിപ്പിക്കുകയും ഭീതിയിലാക്കുകയും ചെയ്യുന്ന ഇത്തരം വീഡിയോകൾ പ്രചരിപ്പിക്കുന്നവർക്കെതിരെ നടപടി എടുക്കണമെന്നാവശ്യപ്പെട്ടാണ് പരാതി. കർണാടകയിലൊ മറ്റൊ ഉള്ള വീഡിയോ ആണ് വണ്ടാഴിയിൽ കണ്ടെന്ന നിലയിൽ പ്രചരിക്കുന്നത്. സംഭവത്തിൽ പോലീസ് അന്വേഷണം ആരംഭിച്ചു.

മലന്പുഴ നിർമലമാത സ്കൂളിൽ അധ്യാപകസെമിനാർ

മലന്പുഴ: വിമൽറാണി പ്രൊവിൻസിന്‍റെ കീഴിൽ പ്രവർത്തിക്കുന്ന നിർമലമാത കോണ്‍വന്‍റ് സ്കൂളിലെ അധ്യാപകർക്കായി ‘ഇരുപത്തിയൊന്നാം നൂറ്റാണ്ടിലെ സഹാനുഭൂതി അധിഷ്ഠിത വിദ്യാഭ്യാസം’ എന്ന വിഷയത്തിൽ സെമിനാർ സംഘടിപ്പിച്ചു. മലന്പുഴ നിർമലമാത സ്കൂൾ പരിപാടിയുടെ ആതിഥേയത്വം വഹിച്ചു. ഉദ്ഘാടനം പ്രൊവിൻഷ്യൽ സുപ്പീരിയർ മദർ ലിൻസ ആട്ടോക്കാരൻ നിർവഹിച്ചു. മലന്പുഴ നിർമലമാത കോണ്‍വന്‍റ് സ്കൂൾ പ്രിൻസിപ്പൽ സിസ്റ്റർ സൂന മടയപ്പള്ളി സ്വാഗതം പറഞ്ഞു. എഡ്യുക്കേഷണൽ കൗണ്‍സിലർ സിസ്റ്റർ റോസ്‌ലിൻ പുല്ലേലി പങ്കെടുത്തു. സെമിനാറിൽ കുമാർ നായർ ക്ലാസെടുത്തു. വിവിധ നിർമലമാത സ്കൂളിലെ പ്രിൻസിപ്പൽമാർ പരിപാടിയിൽ പങ്കെടുത്തു.

സംസ്ഥാനപാതയിലെ കുഴികളിൽ ഇറങ്ങിനിന്ന് കോൺഗ്രസ് പ്രവർത്തകരുടെ പ്രതിഷേധം

വടക്കഞ്ചേരി: തകർന്നുകിടക്കുന്ന മംഗലം ബൈപാസ് ജംഗ്ഷന്‍റെയും മംഗലം - ഗോവിന്ദാപുരം സംസ്ഥാനപാതയുടെയും ശോചനീയാവസ്ഥ പരിഹരിക്കണമെന്നാവശ്യപ്പെട്ട് കോൺഗ്രസ് ബ്ലോക്ക് കമ്മിറ്റിയുടെ നേതൃത്വത്തിൽ കൊക്കർണി പോലെയുള്ള റോഡിലെ കുഴികളിൽ ഇറങ്ങിനിന്ന് പ്രതിഷേധിച്ചു. അപകടഭീതി ഉണർത്തുന്ന റോഡുകളിലെ വൻഗർത്തങ്ങളും വശങ്ങളിലെ വീഴാറായ വൻമരങ്ങളും ജീവഹാനി ക്ഷണിച്ചുവരുത്തുന്നതാണെന്നും അലഞ്ഞുതിരിയുന്ന തെരുവുനായ് ഭീഷണി ഇല്ലാതാക്കണമെന്നും ആവശ്യപ്പെട്ടായിരുന്നു പ്രതിഷേധപരിപാടികൾ. കെപിസിസി അംഗം പാളയം പ്രദീപ് സമരം ഉദ്ഘാടനം ചെയ്തു. ബ്ലോക്ക് പ്രസിഡന്‍റ് അഡ്വ.എം. ദിലീപ് അധ്യക്ഷത വഹിച്ചു. കാരയങ്കാട്ട് ശിവരാമകൃഷ്ണൻ, വി. സജീഷ്, എ. ഭാസ്കരൻ, വി.എ. മൊയ്തു, ബാബു മാധവൻ, പഞ്ചായത്ത് മെംബർമാരായ ജി. സതീഷ്, ശ്രീനാഥ് വെട്ടത്ത്, സുരേഷ് കുറുവായ്, വി. കൃഷ്ണദാസ്, സി. മണി, സി. പ്രകാശ്, ബി. രമേഷ്, സി. ഹരി, അബ്ദുൾസത്താർ, സതീഷ് രാജൻ തുടങ്ങിയവർ പ്രസംഗിച്ചു.

ബേക്കറി ഉടമയ്ക്ക് 10000 രൂപ പിഴ

കൊഴിഞ്ഞാമ്പാറ: മാനദണ്ഡങ്ങൾ പാലിക്കാതെ പ്രവർത്തിക്കുന്ന ഭക്ഷണ വ്യാപാരസ്ഥാപനങ്ങൾക്കെതിരെ കർശന നടപടിയുമായി ആരോഗ്യവകുപ്പ്. തുടർച്ചയായി നൽകിയ നിർദേശങ്ങളും മുന്നറിയിപ്പുകളും അവഗണിച്ച് വണ്ണാമടയിൽ പ്രവർത്തിച്ചുവന്ന സായി ശിവ ബേക്കറിയിൽ നിന്ന് 10,000 രൂപ പിഴയായി ഈടാക്കി. ഹെൽത്ത് കാർഡ് ഇല്ലാതെ ഭക്ഷണം കൈകാര്യംചെയ്യുക, പരിസരത്ത് മലിനജലം കെട്ടിനിൽക്കുന്ന സാഹചര്യം, മലിനമായ സാഹചര്യത്തിൽ ഭക്ഷണം തയാറാക്കുക, പ്ലാസ്റ്റിക് ഉൾപ്പെടെയുള്ള മാലിന്യങ്ങൾ കൂട്ടിയിട്ടു കത്തിക്കുക തുടങ്ങിയ വീഴ്ചകൾ കണ്ടെത്തിയതിനാലാണ് നടപടി കർശനമാക്കിയതെന്ന് അധികൃതർ അറിയിച്ചു.

വനിതാ കമ്മീഷൻ അദാലത്തിൽ 55 പരാതികൾ

പാലക്കാട്: വിവാഹത്തിനു മുന്പ് ദന്പതികൾ നിർബന്ധമായും പ്രീ മാരിറ്റൽ കൗണ്‍സിലിംഗിന് വിധേയമാവണമെന്ന് വനിതാ കമ്മീഷൻ അംഗം വി.ആർ. മഹിളാമണി പറഞ്ഞു. ഗസ്റ്റ് ഹൗസ് കോണ്‍ഫറൻസ് ഹാളിൽ നടത്തിയ വനിതാ കമ്മീഷൻ മെഗാ അദാലത്തിന് ശേഷം സംസാരിക്കുകയായിരുന്നു അവർ. മെച്ചപ്പെട്ട കുടുംബാന്തരീക്ഷം സൃഷ്ടിക്കാൻ എല്ലാവരും ശ്രമിക്കണം. കുടുംബപരമായ നിസാരപ്രശ്നങ്ങൾ കാരണം വിവാഹമോചനത്തിനായി നിരവധിപേരാണ് കമ്മീഷനു മുന്നിൽ വരുന്നത്. ഇത് ഗൗരവമായി എടുത്ത് ദന്പതികൾ വിവാഹപൂർവ കൗണ്‍സിലിംഗിനു വിധേയമാവണമെന്നും അവർ നിർദേശിച്ചു. 55 പരാതികളാണ് അദാലത്തിൽ സ്വീകരിച്ചത്. ഇതിൽ 12 പരാതികൾ പരിഹരിച്ചു. 43 പരാതികൾ അടുത്ത അദാലത്തിലേക്ക് മാറ്റി. വനിതാസെൽ എഎസ്ഐ ശ്രീപ്രിയ, വനിതാ സിപിഒ അനീഷ, അഡ്വ. കെ.ജി. സ്റ്റിനിയ, കൗണ്‍സിലർമാരായ സ്റ്റെഫി, ഡിംപിൾ എന്നിവരും അദാലത്തിൽ പങ്കെടുത്തു.

ആദിവാസിയുവതി ആംബുലൻസിൽ പ്രസവിച്ചു; കുഞ്ഞ് മരിച്ചു

മണ്ണാർക്കാട്: തിരുവഴാംകുന്ന് കരടിയോട് ആദിവാസി ഉന്നതിയിലെ മണികണ്ഠന്‍റെ ഭാര്യ ബിന്ദു(25) ആംബുലൻസിൽ പ്രസവിച്ചു. ആശുപത്രിയിൽ എത്തിച്ചപ്പോഴേക്കും കുഞ്ഞ് മരിച്ചു. വെള്ളിയാഴ്ച വൈകുന്നേരം ആറരയോടെയാണ് സംഭവം. ‌ ഇരട്ടവാരിയിലെ ഉന്നതിയിൽനിന്നും പ്രസവവേദന കൂടിയതിനെതുടർന്നാണ് ആംബുലൻസിൽ യുവതിയെ ബന്ധുക്കളും നാട്ടുകാരും ചേർന്ന് മണ്ണാർക്കാട് താലൂക്ക് ആശുപത്രിയിലേക്കു കൊണ്ടുവന്നത്. താലൂക്ക് ആശുപത്രിയിൽ എത്തുന്നതിനുമുമ്പേ ആംബുലൻസിൽ പ്രസവിക്കുകയായിരുന്നു. ആശുപത്രിയിലെത്തി പരിശോധിച്ചപ്പോഴാണ് കുഞ്ഞ് മരിച്ച വിവരം അറിയുന്നത്. ബിന്ദുവിന്‍റെ നാലാമത്തെ പ്രസവമായിരുന്നു.

അവധിക്കുവന്ന പ്രവാസി കുളത്തിൽ മുങ്ങിമരിച്ചു

പട്ടാന്പി: അവധിക്കു നാട്ടിൽവന്ന പ്രവാസിയുവാവ് കുളത്തിൽ മുങ്ങിമരിച്ചു. തൃത്താലയിലെ ഉള്ളന്നൂർ തച്ചറംകുന്നത്ത് അലിയുടെ മകൻ അനസ്(38) ആണ് മരിച്ചത്. ഖത്തറിൽ ജോലിചെയ്തിരുന്ന അനസ് വെള്ളിയാഴ്ച രാത്രിയാണ് നാട്ടിലെത്തിയത്. ഇന്നലെ രാവിലെ വീട്ടിലെ കുളത്തിൽ കുളിക്കാനിറങ്ങിയപ്പോൾ അപകടം സംഭവിക്കുകയായിരുന്നു. ഉടൻ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. മാതാവ്: ജമീല (റിട്ട. അധ്യാപിക).

വായനദിനാചരണവും പി.എൻ. പണിക്കർ അനുസ്മരണവും

പാലക്കാട്: കാണിക്കമാത കോണ്‍വന്‍റ് ഇംഗ്ലീഷ് മീഡിയം ഗേൾസ് ഹയർ സെക്കൻഡറി സ്കൂളിൽ പാലക്കാട് പീപ്പിൾസ് സർവീസ് സൊസൈറ്റിയുടെയും ഗ്രാമീണ ഗ്രന്ഥശാലയുടെയും നേതൃത്വത്തിൽ വായനപക്ഷാചരണം ഉദ്ഘാടനം ചെയ്തു. സ്കൂൾ പ്രിൻസിപ്പൽ ഡോ. സിസ്റ്റർ നിർമൽ അധ്യക്ഷത വഹിച്ചു. പാലക്കാട് താലൂക്ക് ലൈബ്രറി കൗണ്‍സിൽ പ്രസിഡന്‍റ് ജയപ്രകാശ് മാസ്റ്റർ ഉദ്ഘാടനം നിർവഹിച്ചു. സാങ്കേതിക യുഗത്തിൽ വായനയുടെ പ്രാധാന്യം എന്ന വിഷയത്തിൽ ശാസ്ത്രസാഹിത്യ പരിഷത്ത് പ്രവർത്തകയും അധ്യാപികയും ആയ വിജി മുഖ്യപ്രഭാഷണം നടത്തി. പീപ്പിൾസ് സർവീസ് സൊസൈറ്റി പ്രോഗ്രാം കോ-ഓർഡിനേറ്റർ ജോയ് അറയ്ക്കൽ, താലൂക്ക് ലൈബ്രറി കൗണ്‍സിൽ സെക്രട്ടറി വി. രവീന്ദ്രൻ എന്നിവർ പ്രസംഗിച്ചു. വായനദിനത്തോടനുബന്ധിച്ച് നടത്തിയ ഹൈസ്കൂൾ തല ഉപന്യാസമത്സരത്തിൽ വിജയികളായ കുട്ടികൾക്ക് പിഎസ്എസ്പി അസിസ്റ്റന്‍റ് ഡയറക്ടർ ഫാ. ജോണ്‍സണ്‍ സമ്മാനം നൽകി. അധ്യാപിക അഞ്ജു സ്വാഗതവും ശ്രീയ സുരേഷ് നന്ദിയും പറഞ്ഞു. പാലക്കാട്: ഭാരതമാത ഹയർസെക്കൻഡറി സ്കൂളിൽ വായനവാരത്തോടനുബന്ധിച്ച് നടത്തിയ പരിപാടികൾ എഴുത്തുകാരൻ പ്രഫ. പി. മുരളി ഉദ്ഘാടനം ചെയ്തു. പ്രിൻസിപ്പൽ ഫാ. ഫിലിപ്സ് പനയ്ക്കൽ അധ്യക്ഷത വഹിച്ചു. വിദ്യാർഥികളായ ഐറിൻ തെരേസ സ്വാഗതവും മാധവ് ശങ്കർ ആശംസയും ദൃശ്യ വിനോദ് നന്ദിയും പറഞ്ഞു. അഡ്മിനിസ്ട്രേറ്റർ ഫാ. ഫിജോ ചിറ്റിലപ്പള്ളി, സ്റ്റാഫ് കോ- ഓർഡിനേറ്റർ പി.ബി. ജയലക്ഷ്മി എന്നിവർ പരിപാടികൾക്ക് നേതൃത്വം നൽകി. കൊടുവായൂർ: ഗ്രാമപഞ്ചായത്ത് ലൈബ്രറിയുടെ ആഭിമുഖ്യത്തിൽ വായനപക്ഷാചരണം നടത്തി. കൊടുവായൂർ ഗ്രാമപഞ്ചായത്ത് പ്രസിഡന്‍റ് പ്രേമ സുകുമാരൻ ഉദ്ഘാടനം ചെയ്തു. അസിസ്റ്റന്‍റ് സെക്രട്ടറി വി. ശ്രീലേഖ സ്വാഗതം ആശംസിച്ചു. വൈസ് പ്രസിഡന്‍റ് ആറുമുഖൻ അധ്യക്ഷത വഹിച്ചു. പി.എൻ. സഹദേവൻ മുഖ്യപ്രഭാഷണം നടത്തി. ടി. ആന്‍റോ പീറ്റർ ആശംസാപ്രസംഗം നടത്തി. കെ. രജിത പ്രതിജ്ഞ ചൊല്ലിക്കൊടുത്തു. തുടർന്നു നടന്ന പരിപാടിയിൽ മികച്ച വായനപ്രതിഭകളായ പി. സുബ്രമണ്യൻ, എസ്. സഹദേവൻ, എസ്. സഞ്ജിത് എന്നിവരെ അനുമോദിച്ചു. എസ്. അക്ഷര നന്ദി പറഞ്ഞു. വടക്കഞ്ചേരി: കണ്ണമ്പ്ര കൊട്ടേക്കാട് വായനശാലയുടെയും എയുപി സ്കൂളിന്‍റെയും സംയുക്താഭിമുഖ്യത്തിൽ പി.എൻ. പണിക്കർ അനുസ്മരണവും പീച്ചംകോട് ചാമിയാർ എൻഡോവ്മെന്‍റ് വിതരണത്തിന്‍റെ ഉദ്ഘാടനവും നടന്നു. പഞ്ചായത്ത് സ്റ്റാൻഡിംഗ്‌ കമ്മിറ്റി ചെയർപേഴ്സൺ ജയന്തി പ്രകാശൻ ഉദ്ഘാടനം നിർവഹിച്ചു. വായനശാല പ്രസിഡന്‍റ് എ. രവീന്ദ്രൻ അധ്യക്ഷത വഹിച്ചു. താലൂക്ക് ലൈബ്രറി കൗൺസിൽ ജോയിന്‍റ് സെക്രട്ടറി സി.സി. ചന്ദ്രബോസ്, പിടിഎ പ്രസിഡന്‍റ് ഡി. രജിമോൻ, ഹെഡ്മിസ്ട്രസ് രജനി ടീച്ചർ, വായനശാല സെക്രട്ടറി കെ.ആർ. ഷൺമുഖൻ എന്നിവർ പ്രസംഗിച്ചു. കല്ലടിക്കോട്: കരിമ്പ ഗവ. ഹയർസെക്കൻഡറി സ്കൂളിലെ വായനപക്ഷാചരണത്തിന് തുടക്കമായി. വായനപക്ഷാചരണത്തിന്‍റേയും വിദ്യാരംഗം കലാസാഹിത്യവേദിയുടെയും ഉദ്ഘാടനം എഴുത്തുകാരൻ സുധീർ പെരുമ്പിലാവ് നിർവഹിച്ചു. പിടിഎ പ്രസിഡന്‍റ് കെ. രാധാകൃഷ്ണൻ അധ്യക്ഷത വഹിച്ചു. പ്രിൻസിപ്പൽ ബിനോയ്‌ എൻ. ജോൺ, ഹെഡ്മാസ്റ്റർ എം. ജമീർ, അധ്യാപകരായ കെ. ശ്രീജ, ഷീബശ്രീ, എം. അരുൺരാജ്, ശ്രീവിദ്യ തുടങ്ങിയവർ പ്രസംഗിച്ചു. തുടർന്ന് എഴുത്തുകാരനുമായുള്ള മുഖാമുഖം നടന്നു. വിദ്യാർഥികളായ ആൽവിൻ സിജു, പി.യു . ആനന്ദ്, അക്ഷയ എന്നിവർ നേതൃത്വം നൽകി. അഗളി: നെല്ലിപ്പതി മല്ലീശ്വര വിദ്യാനികേതനിൽ വായനദിനം ആചരിച്ചു. കവിയും എഴുത്തുകാരനുമായ രവീന്ദ്രദാസ് ഉദ്ഘാടനം ചെയ്തു. പ്രിൻസിപ്പൽ എ. ഷാജി വായനസന്ദേശം നൽകി.വായനയുമായി ബന്ധപ്പെട്ട പരിപാടികൾ നടത്തുന്നതിനും വായന കൂടുതൽ മെച്ചപ്പെടുത്തുന്നതിനുമായി അമ്മ മലയാളം നന്മ മലയാളം പദ്ധതിക്ക് തുടക്കമിട്ടു.കുമാരി സൗമ്യ വായനദിന പ്രതിജ്ഞ ചൊല്ലിക്കൊടുത്തു. വായനയുമായി ബന്ധപ്പെട്ട് കുട്ടികളുടെ വിവിധ കലാപരിപാടികളും നടന്നു. അധ്യാപകൻ ശാർങ്്ധരൻ സ്വാഗതവും അധ്യാപിക ദീപ്തി നന്ദിയും പറഞ്ഞു. നെന്മാറ: വായനവാരാചരണത്തിന് പല്ലാവൂർ ഗവ. എൽപി സ്കൂളിൽ തുടക്കമായി. ഹെഡ്മിസ്ട്രസ് ടി.ഇ. ഷൈമയുടെ അധ്യക്ഷതയിൽ ദേശീയ അധ്യാപക പുരസ്കാര ജേതാവ് എ. ഹാറൂൺ ഉദ്ഘാടനം ചെയ്തു. പഞ്ചായത്ത് മെംബർ ഡി. മനുപ്രസാദ്, ജില്ലാ ലൈബ്രറി കൗൺസിൽ അംഗം കെ.എസ്. ലക്ഷ്മണൻ, പിടിഎ ഭാരവാഹികളായ ടി.വി. പ്രമീള, കെ.മോഹനൻ, വിദ്യാരംഗം കൺവീനർ ഡി. പ്രിയസൂന, കെ. ശ്രീജമോൾ പ്രസംഗിച്ചു. വായനവാരാഘോഷത്തിൽ പി. എൻ. പണിക്കർ അനുസ്മരണം, വായനദിന പോസ്റ്ററുകൾ, വായന പ്രതിജ്, പുസ്തക പരിചയം, വായനമൂല നവീകരണം, വായനയിൽ നിന്ന് അരങ്ങത്തേക്ക്, റീഡേഴ്സ് തീയറ്റർ, രചന പരിചയക്കുറിപ്പ്, അതിഥി ക്ലാസ്, വായനമിഠായി എന്നിവ സംഘടിപ്പിക്കാൻ തീരുമാനിച്ചു. ആലത്തൂർ: വായനപക്ഷാചരണത്തിന്‍റെ താലൂക്ക്തല ഉദ്ഘാടനം റഫറൻസ് ലൈബ്രറിയിൽ നടന്നു. താലൂക്ക് ലൈബ്രറി കൗൺസിൽ പ്രസിഡന്‍റ് ടി. അശോക് കുമാർ ഉദ്ഘാടനം ചെയ്തു . ലൈബ്രറി പ്രസിഡന്‍റ് എം.എ. നാസർ അധ്യക്ഷത വഹിച്ചു. പുതിയ മെംബർഷിപ്പ് സ്വീകരിക്കൽ, പുതിയ പുസ്തകങ്ങൾ സ്വീകരിക്കൽ ഇതിനോടനുബന്ധിച്ചുണ്ടായിരുന്നു. ലീല കുട്ടായി സ്വാഗതവും വി. വാസുദേവൻ മാസ്റ്റർ നന്ദിയും പറഞ്ഞു. കാട്ടുശേരി ജിഎൽപി സ്കൂൾ, ആലത്തൂർ ഹാബിറ്റ് സ്കൂൾ എന്നിവിടങ്ങളിലെ വിദ്യാർഥികൾ ലൈബ്രറി സന്ദർശിച്ച് ലൈബ്രറി പ്രവർത്തനം പരിചയപ്പെട്ടു. പി.എൻ. പണിക്കർ അനുസ്മരണവും കുട്ടികളുമായി സംവാദവും ഉണ്ടായിരുന്നു.

കോയമ്പത്തൂർ മെട്രോ റെയിൽ: ഭൂമി സർവേ പൂർത്തിയാകുന്നു

കോയമ്പത്തൂർ: മെട്രോ റെയിൽ പദ്ധതിയുടെ ഒന്നാംഘട്ടത്തിനായുള്ള ഭൂമി സർവേ 75% പൂർത്തിയായി. കോയമ്പത്തൂർ മെട്രോ റെയിൽ പദ്ധതിയുടെ ആദ്യഘട്ടം അവിനാശി ശാലൈ, കോയമ്പത്തൂർ സതി ശാലൈ പ്രദേശങ്ങളിലാണ് നടപ്പിലാക്കുക. ചെന്നൈ മെട്രോ റെയിൽ കോർപറേഷനാണ് പദ്ധതി നടപ്പിലാക്കുന്നത്. ഇതിനായി കോയമ്പത്തൂർ കോർപറേഷനാണ് ഭൂമി സർവേ പ്രവർത്തനങ്ങൾ നടത്തുന്നത്. ഉക്കടം ബസ് സ്റ്റാൻഡിൽ നിന്ന് കോയമ്പത്തൂർ വിമാനത്താവളം വഴി നീലംപൂരിലേക്ക് 20.4 കിലോമീറ്റർ ദൂരമുള്ള അവിനാശി ശാലൈ റൂട്ടും, കോയമ്പത്തൂർ റെയിൽവേ സ്റ്റേഷനിൽ നിന്ന് വലിയമ്പാലയം ഭാഗത്തേക്ക് 14.4 കിലോമീറ്റർ ദൂരമുള്ള സതി റൂട്ടും ഉണ്ട്. ഈ രണ്ട് റൂട്ടുകളിലെയും ഭൂമിയിൽ വൈദ്യുതി വയറുകൾ, ടെലികമ്മ്യൂണിക്കേഷൻ വയറുകൾ, ഭൂഗർഭ മലിനജല സംവിധാനങ്ങൾ, ഗ്യാസ് പൈപ്പുകൾ എന്നിവ എവിടെയാണെന്ന് കണ്ടെത്തുന്നതിനുള്ള പഠനം പൂർത്തിയായി. സതി ശാലൈ ഉൾപ്പെടെ ഈ രണ്ട് റൂട്ടുകളിലെയും ഭൂമി സർവേ ജോലികളുടെ 75% പൂർത്തിയായതായി റിപ്പോർട്ട് ചെയ്യപ്പെട്ടിട്ടുണ്ട്. കോയമ്പത്തൂർ കോർപറേഷൻ ഇപ്പോൾ ഭൂമി സർവേ റിപ്പോർട്ട് ചെന്നൈ മെട്രോ റെയിൽ കോർപറേഷന് അയച്ചിട്ടുണ്ട്. ഈ റിപ്പോർട്ട് തൃപ്തികരമാണെങ്കിൽ ഒരു ലക്ഷം രൂപയുടെ പ്രാരംഭ ഗ്രാൻഡ് സതി റോഡിലെ ടെക്സ്റ്റൂൾ പാലം മുതൽ സൂര്യ ആശുപത്രി പ്രദേശം വരെ 154 കോടി രൂപ ചെലവിൽ ഭൂമി ഏറ്റെടുക്കൽ പ്രവർത്തനങ്ങൾ നടത്തും. അവിനാശി റോഡ് റൂട്ടിൽ ഉപ്പിലിപ്പാലയം മുതൽ ഗോൾഡ് വിൻസ് വരെയുള്ള ഇടതുവശത്ത് ഭൂമി ഏറ്റെടുക്കുമെന്ന് അറിയുന്നു.

അപകടഭീഷണി നേരിടുന്ന ചിറ്റൂർ വില്ലേജ് ഓഫീസ് കെട്ടിടത്തിനു ശാപമോക്ഷമായില്ല

ചിറ്റൂർ: മഴയിൽ മേൽക്കൂര നശിച്ച് ചോർന്നൊലിച്ച് ഫയലുകൾക്ക് സംരക്ഷണമില്ലാത്ത ചിറ്റൂർ വില്ലേജ് ഓഫീസ് കെട്ടിടം ഉടൻനവീകരിക്കണമെന്ന് പൊതുജനങ്ങൾ. 80 വർഷത്തിനു മുമ്പ് നിർമിച്ച കെട്ടിടത്തിന്‍റെ മേൽക്കൂരയും മൺഭിത്തികൾക്കും ബലക്ഷയമുണ്ടായിരിക്കുകയാണ്. വില്ലേജ് ഓഫീസിൽ ജീവനക്കാർ ജോലി ചെയ്യുന്നതും അപകട ഭീഷണിയിലാണ്. വിവിധ ആവശ്യങ്ങൾക്കായി ഓഫീസിലെത്തുന്നവർക്കും സുരക്ഷിതമല്ലാതായിരിക്കുകയാണ്. ഈ കെട്ടിടത്തിനു സമീപത്തായി നിർമിച്ച കെട്ടിടവും ഉപയോഗപ്രദമല്ലാത്ത അവസ്ഥയിലാണുള്ളത്. ഏകദേശം 70 വർഷം മുമ്പ് ഈ കെട്ടിടത്തിൽ പ്രവർത്തിച്ചിരുന്ന പള്ളിക്കൂടം അണിക്കോട്ടിലേക്ക് മാറ്റിയശേഷമാണ് ഇവിടെ വില്ലേജ് ഓഫീസ് ആരംഭിച്ചത്. വിവിധ പ്രധാനപ്പെട്ട രേഖകൾ മേശപ്പുറത്താണ് നിരത്തിവെച്ചിരിക്കുന്നത്. മുന്പ് സംരക്ഷണമില്ലാത്തതിനാൽ ഇഴജന്തുക്കളുടെ സാന്നിധ്യവും കാണപ്പെട്ടിരുന്നു. വില്ലേജ് ഓഫീസുകൾ സ്മാർട്ട് കെട്ടിടങ്ങളായി മാറി വരുന്നുണ്ടെങ്കിലും ചിറ്റൂരിലെ ആദ്യകാല വില്ലേജ് ഓഫീസ് ഇപ്പോഴും നവീകരണമില്ലാതെ പതനം കാത്തുകഴിയുകയാണ്. വിവിധ ആവശ്യങ്ങൾക്കായി ഈ ഓഫീസിലെത്തുന്നവര്‌ മഴയോ കാറ്റോ വീശിയാൽ പുറത്തിറങ്ങി മാറിനില്‌ക്കേണ്ടതായ ഗതികേടിലാണുള്ളത്. ഈ കെട്ടിടത്തിന്‍റെ പഴയകാല പ്രഭാവം നിലനിർത്തിക്കൊണ്ട് തന്നെ പുതിയ കെട്ടിട നിർമാണം നടത്തണമെന്നാവശ്യവും ഉയർന്നിട്ടുണ്ട്. കനത്ത മഴയേയോ കാറ്റിനേയോ പ്രതിരോധിക്കാൻ കെട്ടിടത്തിനു കഴിയില്ലെന്നത് ആശങ്കകൂട്ടുന്നുമുണ്ട്. വില്ലേജ് ഓഫീസ് രേഖകൾക്കും ജീവനക്കാർക്കും സംരക്ഷണം ലഭിക്കുംവിധം മറ്റൊരു കെട്ടിടം കണ്ടെത്തുകയും കെട്ടിട നിർമാണം പൂർത്തിയായശേഷം പുനഃസ്ഥാപിക്കണമെന്നതുമാണ് പൊതുജന ആവശ്യം.

നിർമാണത്തൊഴിലാളി ക്ഷേമനിധി ബോർഡിൽ ആനുകൂല്യങ്ങൾ സമയബന്ധിതമായി നൽകണം: മനുഷ്യാവകാശ കമ്മീഷൻ

പാലക്കാട്: കെട്ടിടനിർമാണ തൊഴിലാളി ക്ഷേമനിധി ബോർഡിൽ അംഗമായ തൊഴിലാളികൾക്ക് അർഹതപ്പെട്ട ആനുകൂല്യങ്ങൾ സമബന്ധിതമായി വിതരണം ചെയ്യുന്നതിനുള്ള നടപടികൾ സ്വീകരിക്കണമെന്ന് മനുഷ്യാവകാശകമ്മീഷൻ ചെയർപേഴ്സണ്‍ ജസ്റ്റിസ് അലക്സാണ്ടർ തോമസ് ചീഫ് എക്സിക്യൂട്ടീവ് ഓഫീസർക്ക് നിർദേശം നൽകി. കഴിഞ്ഞ 20 മാസമായി ആനുകൂല്യങ്ങൾ വിതരണം ചെയ്യുന്നില്ലെന്ന് ആരോപിച്ച് സമർപ്പിച്ച പരാതിയിലാണ് നടപടി. കെട്ടിട നിർമാണ തൊഴിലാളി ക്ഷേമനിധി ബോർഡ് ജില്ലാ എക്സിക്യൂട്ടീവ് ഓഫീസറിൽ നിന്നും കമ്മീഷൻ റിപ്പോർട്ട് വാങ്ങി. ഓരോ മാസവും ലഭിക്കുന്ന അപേക്ഷകൾ പരിഹരിക്കണമെങ്കിൽ മാസം 20 കോടി ആവശ്യമാണെന്ന് റിപ്പോർട്ടിൽ പറയുന്നു. പെൻഷൻ വിതരണത്തിനായി ഒരു മാസം ഏകദേശം 50 കോടി ആവശ്യമാണ്. ബോർഡ് അംഗമായ ഒരു തൊഴിലാളി ഒരു മാസം 50 രൂപയാണ് അംശാദായം അടയ്ക്കുന്നത്. ബോർഡിന്‍റെ പ്രധാന വരുമാനം ലേബർ ഓഫീസുകൾ വഴി പിരിക്കുന്ന സെസാണ്. കോവിഡിനെ തുടർന്ന് സെസ് പിരിവിൽ കുറവുണ്ടായി. ഇത് ബോർഡിന്‍റെ പ്രവർത്തനങ്ങളെ കാര്യമായി ബാധിച്ചിട്ടുണ്ട്. എന്നിട്ടും ന്യൂനതകൾ ഇല്ലാത്ത അപേക്ഷകളിൽ ആനുകൂല്യം അനുവദിക്കുന്നുണ്ട്. ബോർഡിന്‍റെ പ്രതിസന്ധി പരിഹരിക്കുന്നതിനായി സെസ് പിരിക്കാൻ തദ്ദേശ സ്ഥാപനങ്ങളെ ചുമതലപ്പെടുത്തിയിട്ടുണ്ട്. അതിനുള്ള നടപടികൾ സർക്കാർതലത്തിൽ നടന്നുവരികയാണ്. ഇത് സാധ്യമാകുന്പോൾ പെൻഷനും മറ്റ് ആനുകൂല്യങ്ങളും കുടിശിക സഹിതം സമയബന്ധിതമായി നൽകാനാവുമെന്ന് റിപ്പോർട്ടിൽ പറയുന്നു. പൊതുപ്രവർത്തകനായ കെ.എ. ബാലകൃഷ്ണൻ സമർപ്പിച്ച പരാതിയിലാണ് നടപടി.

വണ്ടാഴിയിൽ കടുവയിറങ്ങിയെന്നു തെറ്റായ പ്രചാരണം; നടപടിയെടുക്കുമെന്ന് വനംവകുപ്പ്

മംഗലംഡാം: വണ്ടാഴി-മംഗലംഡാം മെയിൻ റോഡിൽ കടുവയിറങ്ങിയെന്ന് തെറ്റായ പ്രചാരണം നടത്തുന്നവർക്കെതിരെ നിയമനടപടി സ്വീകരിക്കുമെന്ന് മംഗലംഡാം ഫോറസ്റ്റ് ഡെപ്യൂട്ടി റേഞ്ച് ഓഫീസർ ഹാഷിം പറഞ്ഞു. എവിടെയോ നിൽക്കുന്ന കടുവയുടെ പടം നൽകി അത് മംഗലംഡാം മെയിൻ റോഡിലാണെന്നാണ് ഓൺലൈനിൽ വിവരണം വരുന്നത്. എന്നാൽ അങ്ങനെയൊരു റോഡു പോലും മംഗലംഡാം ഉൾപ്പെടുന്ന വണ്ടാഴി പഞ്ചായത്തിലില്ല. ആളുകളെ പരിഭ്രാന്തരാക്കുന്ന ഇത്തരം സാമൂഹ്യ വിരുദ്ധ പ്രവർത്തനത്തിനെതിരെ ഇന്ന് നടക്കുന്ന ജനജാഗ്രതാ സമിതിയിൽ ചർച്ച ചെയ്ത് തുടർനടപടി സ്വീകരിക്കുമെന്ന് ഡെപ്യൂട്ടി റേഞ്ച് ഓഫീസർ അറിയിച്ചു. കടുവയുടെ പടം കൊടുത്ത് പുലിയാണെന്നാണ് വീഡിയോയിൽ പറയുന്നത്. കടുവയെയും പുലിയേയും തിരിച്ചറിയാത്തയാളാണ് വാർത്ത സൃഷ്ടിച്ചിട്ടുള്ളത്. തെറ്റായ വീഡിയോ ഫോർവേഡ് ചെയ്യുന്നവർക്കെതിരെയും വീഡിയോ നിർമിച്ചവർക്കെതിരെയും നടപടിക്കാണ് ആലോചന. കടുവയുടെ പടം സഹിതമുള്ള വീഡിയോ പരന്നതോടെ വാർത്ത തെറ്റാണെന്നും പേടിക്കേണ്ടതില്ലെന്നും പറഞ്ഞ് വനപാലകർ പലയിടത്തും പോയി ആളുകളെ സമാധാനിപ്പിക്കുന്ന തിരക്കിലാണിപ്പോൾ. ഒരാഴ്ച മുമ്പ് മംഗലംഡാം, പൊൻ കണ്ടം, കടപ്പാറ, നേർച്ചപ്പാറ പ്രദേശങ്ങളിൽ കടുവയെ കണ്ടിരുന്നു.എന്നാൽ ഏറ്റവും ഒടുവിൽ കാടിനോട് ചേർന്ന നേർച്ചപ്പാറയിലാണ് കടുവയെ കണ്ടത്. പിന്നീട് ഒരാഴ്ചയായി കണ്ടിട്ടില്ല. ഈ ഭയപ്പാടിൽ കഴിയുന്നതിനിടെയാണ് വ്യാജ വീഡിയോ പ്രചരിക്കുന്നത്.

കഞ്ചിക്കോട്ടെ മാലിന്യ സംസ്കരണപ്ലാന്‍റ് ഡിസംബറിൽ കമ്മീഷൻ ചെയ്യും: മന്ത്രി എം.ബി. രാജേഷ്

പാലക്കാട്: മാലിന്യത്തിൽ നിന്ന് ഉൗർജം (വേസ്റ്റ് ടു എനർജി) ഉത്പാദിപ്പിക്കുന്ന സംസ്ഥാനത്തെ ആദ്യ കേന്ദ്രീകൃത മാലിന്യ സംസ്കരണപ്ലാന്‍റ് കഞ്ചിക്കോട്ട് ഡിസംബറിൽ കമ്മീഷൻ ചെയ്യും. പദ്ധതിയുടെ അറുപത് ശതമാനം ജോലികളും ഇതിനകം പൂർത്തീകരിച്ചതായി മന്ത്രി എം.ബി . രാജേഷ് പറഞ്ഞു. പ്ലാന്‍റിലേക്കാവശ്യമായ മാലിന്യശേഖരണം സംയോജിപ്പിക്കുന്നതുമായി ബന്ധപ്പെട്ട കാര്യങ്ങൾ ചർച്ച ചെയ്യുന്നതിനായി കളക്ടറേറ്റിൽ വിളിച്ചുചേർത്ത വിവിധ തദ്ദേശസ്ഥാപന പ്രതിനിധികളുടെ യോഗത്തിൽ അധ്യക്ഷത വഹിച്ചു സംസാരിക്കുകയായിരുന്നു മന്ത്രി. പ്രതിദിനം 200 ടണ്‍ ജൈവ, അജൈവ മാലിന്യങ്ങൾ സംസ്കരിക്കാനുള്ള ശേഷിയാണ് പ്ലാന്‍റിനുണ്ടാവുക. 150 കോടി രൂപ ചെലവഴിച്ച് നിർമിക്കുന്ന പ്ലാന്‍റിൽ ജില്ലയിലെ ഏഴു നഗരസഭകളുടെയും 22 ഗ്രാമപഞ്ചായത്തുകളുടെയും മാലിന്യം സംസ്കരിക്കും. കംപ്രസ്ഡ് ബയോഗ്യാസ് ഉത്പാദനമാണ് ഇവിടെ പ്രധാനമായും നടക്കുക. പ്ലാന്‍റിന്‍റെ പ്രവർത്തനവുമായി ബന്ധപ്പെട്ട് ആശങ്കകളുണ്ടെങ്കിൽ അത് പരിഹരിക്കും. ഹരിതകർമസേനയുടെ പ്രവർത്തനം തടസപ്പെടുകയല്ല മറിച്ച് കൂടുതൽ ശക്തിയാർജിക്കുകയാണ് പ്ലാന്‍റ് പ്രവർത്തനം തുടങ്ങുന്നതോടെയുണ്ടാവുക. പ്ലാന്‍റ് വരുന്നതോടെ ഹരിതകർമസേനയ്ക്ക് കൂടുതൽ വരുമാനം നേടാൻ കഴിയും. കേന്ദ്രീകൃത പ്ലാന്‍റുകൾ കാലഘട്ടത്തിന്‍റെ ആവശ്യമാണ്. വൻതോതിലുള്ള മാലിന്യം ഉത്പാദിപ്പിക്കുന്നവരെയാണ് പ്രധാനമായും പ്ലാന്‍റ് ഉദ്ദേശിക്കുന്നത്. ജില്ലയിലെ കൂടുതൽ തദ്ദേശസ്ഥാപനങ്ങളിൽ നിന്നുള്ള മാലിന്യം ഇവിടെ സംസ്കരിക്കുന്നതിനുള്ള നടപടികൾ സ്വീകരിക്കുമെന്നും മന്ത്രി പറഞ്ഞു. കഞ്ചിക്കോട് വ്യവസായ മേഖലയിലെ 11.5 ഏക്കർ സ്ഥലത്താണ് പ്ലാന്‍റ് സ്ഥാപിക്കുന്നത്. പബ്ലിക് പ്രൈവറ്റ് പാർട്ണർഷിപ്പ് പദ്ധതിയായാണ് ഇത് നടപ്പിലാക്കുന്നത്. കേരള സ്റ്റേറ്റ് ഇൻഡസ്ട്രിയൽ ഡെവലപ്മെന്‍റ് കോർപറേഷൻ ആണ് ഈ പദ്ധതിയുടെ നോഡൽ ഏജൻസി. ബ്ലൂപ്ലാനറ്റ് ബേസ് സൊല്യൂഷൻസ് എന്ന കന്പനിയാണ് പ്ലാന്‍റിന്‍റെ സാങ്കേതികപരമായ കാര്യങ്ങൾ കൈകാര്യം ചെയ്യുന്നത്. ഈ പ്ലാന്‍റ് വരുന്നതോടെ ജില്ലയിലെ മാലിന്യ പ്രശ്നങ്ങൾക്ക് വലിയൊരു പരിഹാരമാകുമെന്നാണ് പ്രതീക്ഷിക്കുന്നത്. തദ്ദേശ സ്വയംഭരണ സ്ഥാപനങ്ങൾക്ക് മാലിന്യ സംസ്കരണത്തിനായി വരുന്ന വലിയ ചെലവ് കുറയ്ക്കാനും ഇത് സഹായിക്കും. കളക്ടറേറ്റ് കോണ്‍ഫറൻസ് ഹാളിൽ ചേർന്ന യോഗത്തിൽ തദ്ദേശ വകുപ്പ് സ്പെഷൽ സെക്രട്ടറി ടി.വി. അനുപമ, ജില്ലാ കളക്ടർ ജി. പ്രിയങ്ക, ശുചിത്വമിഷൻ എക്സിക്യൂട്ടീവ് ഡയറക്ടർ യു.വി. ജോസ്, വിവിധ തദ്ദേശ സ്ഥാപന അധ്യക്ഷർ, വിവിധ വകുപ്പ് ഉദ്യോഗസ്ഥർ തുടങ്ങിയവർ പങ്കെടുത്തു.

വീടുതകർന്ന് വയോധിക മരിച്ച സംഭവത്തിൽ അസി. സെക്രട്ടറിയെ ഉപരോധിച്ചു

മണ്ണാർക്കാട്: തെങ്കര ലക്ഷംവീട് കോളനിയിൽ വീട് തകർന്നുവീണ് വയോധിക മരിക്കാനിടയായ സംഭവത്തിൽ ഉദ്യോഗസ്ഥർക്ക് വീഴ്ച പറ്റിയിട്ടുണ്ടെന്നാരോപിച്ച് എൽഡിഎഫ് പഞ്ചായത്ത് ഉദ്യോഗസ്ഥരെ ഉപരോധിച്ചു. പദ്ധതിക്ക് എഗ്രിമെന്‍റ് മാത്രമാണ് വച്ചിട്ടുള്ളത്. വീട് നിർമാണത്തിന്‍റെ പ്രവൃത്തി ആകുന്നതിനു മുമ്പുതന്നെ ഇവരുടെ വീടു പൊളിച്ചുമാറ്റാൻ ആരാണ് ആവശ്യപ്പെട്ടതെന്ന് ഉദ്യോഗസ്ഥരോട് നേതാക്കൾ ചോദിച്ചു. വീട് പൊളിച്ചുമാറ്റാൻ ആവശ്യപ്പെട്ടവർ വീട് പൂർണമായും പൊളിക്കുന്നതിനുപകരം ഒരു ഭാഗത്തെ ചുമരുമാത്രം നിർത്തിയതും വീഴ്ചയാണെന്ന് നേതാക്കൾ ചൂണ്ടിക്കാണിച്ചു. ഈ ചുമർ ഇടിഞ്ഞുവീണാണ് വയോധിക മരിക്കാൻ ഇടയായത്. ഇത് രാഷ്ട്രീയ ഉപകരണമാക്കി മാറ്റുന്നതിനുള്ള സാഹചര്യമുണ്ടാക്കിയത് ഉദ്യോഗസ്ഥരാണെന്നും നേതാക്കൾ ആരോപിച്ചു. പഞ്ചായത്തിന് ഒരു ബന്ധവുമില്ലാത്തവർ ഇത്തരം കാര്യങ്ങൾക്ക് നേതൃത്വം നൽകുന്നത് ഉദ്യോഗസ്ഥർ നിർത്തണമെന്നും നേതാക്കൾ മുന്നറിയിപ്പു നൽകി. എൽഡിഎഫ് നേതാക്കളായ കെ. വിനോദ് കുമാർ, പി. അലവി, കെ. സുരേന്ദ്രൻ, നാസർ, ഭാസ്കരൻ മുണ്ടക്കണ്ണി തുടങ്ങിയവർ സമരത്തിന് നേതൃത്വം നൽകി.

റോഡിൽ ചൂണ്ടയിട്ടും കടലാസുതോണി ഒഴുക്കിയും യൂത്ത് കോൺഗ്രസ് പ്രതിഷേധം

തത്തമംഗലം: യൂത്ത് കോൺഗ്രസ് തത്തമംഗലം മണ്ഡലം കമ്മിറ്റിയുടെ നേതൃത്വത്തിൽ നീളിക്കാട്-പാവോടിപറമ്പ് റോഡിലെ വെള്ളക്കെട്ടിൽ കടലാസ് തോണി ഒഴുക്കിവിട്ടും പ്രതീകാത്മകമായി ചൂണ്ട ഇട്ട് മീൻപിടിച്ചും പ്രതിഷേധിച്ചു. വർഷങ്ങളായി ശോചനീയാവസ്ഥയിൽ കിടക്കുന്ന റോഡ് നന്നാക്കണമെന്ന് ചൂണ്ടിക്കാണിച്ചുകൊണ്ട് നഗരസഭ കൗൺസിൽ യോഗത്തിൽ പ്രതിപക്ഷം ആവശ്യം ഉന്നയിച്ചതാണ്. ഈ സ്ഥലത്ത് വാഹനസഞ്ചാരം അപകട ഭീഷണിയിലുമാണ്. യാത്രക്കാർക്ക് അനിഷ്ട സംഭവം ഉണ്ടാവുന്നതിന് മുൻപ് അടിയന്തര നടപടി എടുക്കേണ്ടത് അത്യാവശ്യമായിരിക്കുകയാണ്. ചിറ്റൂർ-തത്തമംഗലം നഗരസഭ മുൻ ചെയർമാൻ കെ. മധു, യൂത്ത് കോൺഗ്രസ് തത്തമംഗലം മണ്ഡലം പ്രസിഡന്‍റ് രാഹുൽ കൃഷ്ണ, വാർഡ് കൗൺസിലർ എം.ജി. ജയന്തി, അജിത് കുമാർ, അബ്ദുൾ റഷീക്, അക്ഷയ്, അനസ, ആർ. പ്രസാദ്, ശരവൺരാജ്, മീനാകുമാരി എന്നിവർ സമരത്തിനു നേതൃത്വം നൽകി.

വടക്കഞ്ചേരി സർക്കാർ ആശുപത്രിയിൽ മുടക്കമില്ലാതെ നടക്കുന്നതു കെട്ടിടനിർമാണംമാത്രം

വടക്കഞ്ചേരി: ആറ് പഞ്ചായത്തുകളുടെ സംഗമകേന്ദ്രമായ വടക്കഞ്ചേരിയിലെ കുടുംബാരോഗ്യ കേന്ദ്രത്തിൽ നടക്കുന്നത് ഇടയ്ക്കിടെയുള്ള കെട്ടിടനിർമാണം മാത്രം. രണ്ട് കോടി രൂപ ചെലവിൽ നിർമിച്ച പുതിയ കെട്ടിടത്തിന്‍റെ ഉദ്ഘാടനം കഴിഞ്ഞ മാസം നടന്നിരുന്നു. ബഹുനില കെട്ടിടത്തിനായി നല്ല ഉറപ്പുള്ള തറയിലാണ് കെട്ടിടം നിർമിച്ചിട്ടുള്ളതെന്ന് മന്ത്രി വീണാ ജോർജ് ഉദ്ഘാടന പ്രസംഗത്തിൽ പറഞ്ഞപ്പോൾ കെട്ടിട നിർമാണത്തിനായി ഇനിയും ആറ് കോടി രൂപയുടെ പ്രപ്പോസൽ കൊടുത്തിട്ടുണ്ടെന്നായിരുന്നു യോഗത്തിൽ അധ്യക്ഷനായിരുന്ന എംഎൽഎ പറഞ്ഞത്. അതായത് പുതിയ കെട്ടിടം കൂടി ഇനിയും വരും എന്നർഥം. എന്നാൽ വലിയ കാലപ്പഴക്കമില്ലാത്ത കെട്ടിടങ്ങൾ വരെ ഇടക്കിടെ പൊളിച്ച് പുതിയ കെട്ടിടനിർമാണം നടത്തുന്നതിലെ ചികിത്സാ സൗകര്യ വികസനം ജനത്തിന് പിടികിട്ടുന്നില്ല. വൈകുന്നേരം ആറുകഴിഞ്ഞാൽ ആശുപത്രി ഗേറ്റ് അടക്കും. പിന്നെ മറ്റു ആശുപത്രികളിലേക്ക് റഫർ ചെയ്യാൻ പോലും ബന്ധപ്പെട്ടവരുണ്ടാകില്ല. ഇങ്ങനെയുള്ള ആശുപത്രിക്കായി എന്തിനാണ് ഇത്രയേറെ കോടികൾ ചെലവഴിക്കുന്നത് എന്ന ന്യായമായ ചോദ്യമാണ് ജനങ്ങളിൽ നിന്നും ഉണ്ടാകുന്നത്. 34 ബെഡുകളുള്ള ആശുപത്രിയാണിത്. എന്നാൽ ഇതിൽ പകുതിപേർ പോലും ഐപിയിലില്ല. പല കെട്ടിടങ്ങളും ഉപയോഗിക്കാതെ പൂട്ടികിടക്കുകയാണ്. മറ്റു സർക്കാർ ആശുപത്രികളിൽ ചികിത്സാസൗകര്യങ്ങൾ വർധിപ്പിക്കുമ്പോൾ ഇവിടെ കെട്ടിടനിർമാണമാണ് തടസങ്ങളില്ലാതെ നടക്കുന്നത്. ഡോക്ടർമാരുടെയോ മറ്റു ജീവനക്കാരുടെയോ കുറവ് ആശുപത്രിയിലില്ലെന്ന് അധികൃതർ തന്നെ പറയുന്നു. പിന്നെ എന്തുകൊണ്ട് ആശുപത്രിപ്രവർത്തനം ആറുവരെ എന്ന് ചോദിച്ചാൽ അത്യാഹിത വിഭാഗം ഇല്ലാത്തതിനാലാണെന്നാണ് മറുപടി. വർഷങ്ങളേറെ മുമ്പ് പ്രസവം ഉൾപ്പെടെ നടന്നിരുന്ന ആശുപത്രിയാണ് ഇപ്പോൾ പ്രാഥമികചികിത്സ പോലും പരിമിതമായ സ്ഥിതിയിലായിട്ടുള്ളത്. ദിവസം ശരാശരി 350 ലേറെ പേർ ഇവിടെ ഒപിയിൽ ചികിത്സ തേടി എത്തുന്നുണ്ട്. വടക്കഞ്ചേരി മേഖലയിൽ സ്വകാര്യ മേഖലയിലും നല്ല ആശുപത്രികളില്ലാത്തതിനാൽ ജനങ്ങൾ ചികിത്സക്കായി ആശ്രയിക്കുന്നത് ഈ സർക്കാർ ആശുപത്രിയെയാണ്. എന്നാൽ ഇടക്കിടെയുള്ള പ്രഖ്യാപനങ്ങളല്ലാതെ മറ്റൊന്നും ഇവിടെ നടക്കുന്നില്ല. ആലത്തൂർ ബ്ലോക്ക് പഞ്ചായത്തിനു കീഴിൽ വരുന്നതാണ് ഈ ആശുപത്രി. കുറെ കെട്ടിടങ്ങൾക്കപ്പുറം ആശുപത്രി വികസനം ചികിത്സാ സൗകര്യങ്ങൾ വർധിപ്പിച്ചു കൊണ്ടാകണമെന്നാണ് ജനങ്ങൾ ആവശ്യപ്പെടുന്നത്. വൈകുന്നേരം ആറുമണിക്കു ശേഷവും പ്രാഥമിക ചികിത്സയെങ്കിലും ലഭ്യമാക്കാൻ സൗകര്യമുണ്ടാക്കണമെന്നാണ് ആവശ്യം.

വിദ്യാലയങ്ങളിൽ പാമ്പുകളുടെ സാന്നിധ്യം പരിശോധിച്ച് ടീം സർപ്പ

പാലക്കാട്: സോഷ്യൽ ഫോറസ്ട്രി ഡിവിഷന്‍റെ നേതൃത്വത്തിൽ പാലക്കാട് നഗരത്തിലും പരിസരങ്ങളിലുമുള്ള വിവിധ സ്കൂളുകളിൽ കേരള സർക്കാരിന്‍റെ മിഷൻ സർപ്പ പദ്ധതിയുടെ ഭാഗമായി പാമ്പ് വിഷബാധ അപകട രഹിത കേരളം എന്ന പേരിൽ സുരക്ഷാപരിശോധന നടത്തി . ഗവ. മോയൻസ് ഗേൾസ് ഹയർ സെക്കൻഡറി സ്കൂളിൽ പരിശോധനയുടെ ഉദ്ഘാടനം സോഷ്യൽ ഫോറസ്ട്രി റേഞ്ച് ഫോറസ്റ്റ് ഓഫീസർ ജെറിൻ ആന്‍റണി നിർവഹിച്ചു. പലസ്കൂളുകളിലും പരിസര ശുചിത്വം പാലിക്കാത്തത് പാമ്പുകൾ കാരണമുള്ള അപകടസാധ്യത വർധിക്കാൻ കാരണമാകുന്നുവെന്ന് പരിശോധനയിൽ കണ്ടെത്തി. അവ പരിഹരിക്കണമെന്ന് സ്കൂൾ അധികൃതർക്ക് നിർദേശം നൽകി. ചില വിദ്യാലയ കോമ്പൗണ്ടുകളിൽ പോലും പാമ്പുകളെ കാണാൻ കഴിഞ്ഞത് ആശങ്കാജനകമാണ്. വരും ദിവസങ്ങളിൽ ജില്ലയിലെ മുഴുവൻ വിദ്യാലയങ്ങളിലും മിഷൻ സർപ്പ പദ്ധതിയുടെ ഭാഗമായ പരിശോധന നടക്കുമെന്ന് സോഷ്യൽ ഫോറസ്ട്രി അസിസ്റ്റന്‍റ് ഫോറസ്റ്റ് കൺസർവേറ്റർ സുമു സ്കറിയ അറിയിച്ചു.

കാട്ടാനആക്രമണത്തിൽ കൊല്ലപ്പെട്ട കുമാരന്‍റെ വീട് മന്ത്രി സന്ദർശിച്ചു

പാലക്കാട്: കഴിഞ്ഞദിവസം കാട്ടാനയുടെ ആക്രമണത്തിൽ കൊല്ലപ്പെട്ട മുണ്ടൂർ ഞാറക്കോട് സ്വദേശി കുമാരന്‍റെ വീടും കുടുംബാംഗങ്ങളെയും മന്ത്രി എം.ബി. രാജേഷ് സന്ദർശിച്ചു. കുടുംബത്തിനു മന്ത്രി പിന്തുണ വാഗ്ദാനം ചെയ്തു. കുടുംബാംഗങ്ങളുമായി സംസാരിച്ച് അവരുടെ ആവശ്യങ്ങളും പ്രശ്നങ്ങളും മനസിലാക്കിയ മന്ത്രി വന്യമൃഗ ആക്രമണങ്ങൾ തടയുന്നതിനു കർശനനടപടികൾ സ്വീകരിക്കുമെന്നും പ്രദേശവാസികളുടെ പ്രധാന ആവശ്യങ്ങളായ സോളാർ ഫെൻസിംഗ് റെയിൽ ഫെൻസിംഗ്, സ്ട്രീറ്റ് ലൈറ്റ് എന്നിവ സ്ഥാപിക്കുന്നതിനു നടപടികൾ സ്വീകരിക്കുമെന്നും ഉറപ്പുനൽകി. സ്കൂൾബസുകൾ വിദ്യാർഥികളെ വീടുവരെ എത്തിക്കുന്നതിനു വേണ്ടിയുള്ള നടപടികൾ കൈകൊള്ളുമെന്നും അതിനായി ജില്ലാ കളക്ടറെ ചുമതലപ്പെടുത്തിയിട്ടുണ്ടെന്നും അറിയിച്ചു. പ്രദേശവാസികളുടെ സുരക്ഷ ഉറപ്പാക്കാൻ വനംവകുപ്പിന്‍റെ പ്രവർത്തനങ്ങൾ ശക്തിപ്പെടുത്തുമെന്നും മന്ത്രി പറഞ്ഞു. സന്ദർശനവേളയിൽ പ്രാദേശിക ജനപ്രതിനിധികളും വനംവകുപ്പ് ഉദ്യോഗസ്ഥരും, പോലീസ് ഉദ്യോഗസ്ഥരും, രാഷ്ട്രീയ കക്ഷി പ്രതിനിധികളും മന്ത്രിയോടൊപ്പമുണ്ടായിരുന്നു.

ഫ്ലെയിം എഡ്യു കോൺക്ലേവ്

മണ്ണാർക്കാട്: എൻ. ഷംസുദ്ദീൻ എംഎൽഎയുടെ ഫ്ലെയിം സമഗ്ര വിദ്യാഭ്യാസകർമ പദ്ധതി നാലാം എഡിഷന്‍റെ ഭാഗമായി സംഘടിപ്പിച്ച ഫ്ലെയിം എഡ്യു കോൺക്ലേവ് 2025 അക്കാദമിക മികവിന്‍റെ നേർകാഴ്ചയായി. എസ്എസ്എൽസി, പ്ലസ് ടു സമ്പൂർണ എ പ്ലസ്, നാഷണൽ മീൻസ് കം മെറിറ്റ് സ്കോളർഷിപ്പ് ജേതാക്കളായ എണ്ണൂറിൽപരം വിദ്യാർഥി പ്രതിഭകളും നൂറ് ശതമാനം വിജയം കൈവരിച്ച മുപ്പതോളം വിദ്യാലയങ്ങളും പങ്കെടുത്ത അനുമോദന സമ്മേളനം വി.കെ. ശ്രീകണ്ഠൻ എംപി ഉദ്ഘാടനം ചെയ്തു. എൻ. ഷംസുദ്ദീൻ എംഎൽഎ അധ്യക്ഷനായി. ഒറ്റപ്പാലം സബ് കളക്ടർ മിഥുൻ പ്രേംരാജ്, ദേശീയ ചലച്ചിത്ര പുരസ്കാര ജേതാവ് സുരഭി ലക്ഷ്മി എന്നിവർ വിദ്യാർഥികളുമായി സംവദിച്ചു. ഇന്ത്യൻ സായുധ സേനയുടെ ഓപ്പറേഷൻ സിന്ദൂർ ദൗത്യത്തിൽ പങ്കെടുത്ത മണ്ണാർക്കാട് സ്വദേശി എൻബി സുബേദാർ സി. ഹസൈനാർ, എൻഎംഎംഎസ് പരീക്ഷയിൽ സംസ്ഥാന തലത്തിൽ രണ്ടാംറാങ്ക് നേടിയ നെല്ലിപ്പുഴ ഡിഎച്ച്എസ് വിദ്യാർഥിനി എം.കെ. ഹിബ ഫാത്തിമ, പ്ലസ് ടു പരീക്ഷയിൽ മുഴുവൻ മാർക്കും നേടിയ എം. രമ്യശ്രീ, സമ്പൂർണ എ പ്ലസ് വിജയികൾ, സ്കോളർഷിപ്പ് ജേതാക്കൾ തുടങ്ങിയവർക്ക് ഫ്ലെയിം എക്സലൻസ് അവാർഡുകൾ ചടങ്ങിൽ സമ്മാനിച്ചു.

പന്നിക്കൂട്ടങ്ങൾ പെരുകി; പ്രഭാതസവാരിക്കുപകരം വ്യായാമത്തിനായി ആശ്രയിക്കുന്നതു യോഗ

മംഗലംഡാം: പന്നിക്കൂട്ടങ്ങൾ മനുഷ്യർക്ക് ഉണ്ടാക്കുന്ന ഉപദ്രവങ്ങൾ കുറച്ചൊന്നുമല്ല. രാവിലെയും വൈകുന്നേരവും വ്യായാമത്തിനായി കൂട്ടുകാരും അയൽക്കാരുമൊത്ത് വാഹനങ്ങളൊഴിഞ്ഞ വഴികളിലൂടെ നടക്കാമെന്നുവച്ചാൽപോലും ഇപ്പോൾ കാട്ടുപന്നിക്കൂട്ടങ്ങൾ പെരുകിയതോടെ അതിന് കഴിയാതായി. ഏത് സമയവും പന്നികളുടെ ആക്രമണമുണ്ടാകും. ഇതിനാൽ സുരക്ഷിത വ്യായാമം എന്ന നിലയിൽ യോഗയിലാണ് ആളുകളുടെ ആശ്രയം. ഇതും തുറന്ന സ്ഥലങ്ങളിൽ ചെയ്യാൻ കഴിയാത്ത സ്ഥിതിയാണുള്ളതെന്ന് ഒരു പതിറ്റാണ്ടിലേറെയായി മംഗലംഡാമിലും പരിസര പ്രദേശങ്ങളിലും യോഗപരിശീലനം നൽകുന്ന കെ. പ്രഭാകരൻ പറഞ്ഞു. യോഗ പരിശീലനവും കെട്ടിടങ്ങൾക്ക് മുകളിലാണ്. എന്നാൽ മാത്രമെ പന്നിക്കൂട്ടങ്ങളുടെ ആക്രമണത്തിൽ നിന്നും രക്ഷപ്പെടാനാകൂ. മുമ്പൊക്കെ ഡാമിന്‍റെ പല റോഡുകളിലും സ്ത്രീകൾ ഉൾപ്പെടെയുള്ള പ്രഭാത നടത്തക്കാരുടെ കൂട്ടങ്ങളുണ്ടായിരുന്നു. ഇപ്പോൾ പന്നികളെ പേടിച്ച് അതില്ലാതായി. വിനോദ സഞ്ചാരികളെത്തുന്ന ഡാമിന്‍റെ പല ഭാഗത്തും പന്നിക്കൂട്ടങ്ങളാണ്. ഇവ പെട്ടെന്നാണ് ആക്രമിക്കാൻ കുതിച്ചെത്തുക. കോവിഡിനു ശേഷം ഉറക്കകുറവ്, ഓർമക്കുറവ്, കിതപ്പ്, കഫക്കെട്ട് തുടങ്ങിയ ആരോഗ്യപ്രശ്നങ്ങൾ പലരിലും കാണപ്പെടുന്നുണ്ട്. ഇതിൽ നിന്നെല്ലാം മുക്തി നേടാൻ യോഗ ഏറെ ഗുണകരമാണെന്ന കണ്ടെത്തലും യോഗ സ്ഥിരമാക്കാൻ കാരണമാകുന്നുണ്ട്. മനസിനെ നിയന്ത്രിക്കാനായാൽ രോഗങ്ങളും നിയന്ത്രിക്കാം എന്ന അടിസ്ഥാനതത്വമാണ് യോഗ വഴി ലഭിക്കുന്നത്. ഇതിനാൽ പ്രായഭേദമന്യേ യോഗമുറകളിൽ പരിശീലനം നേടുന്നവർ കൂടിവരികയാണെന്നും പ്രഭാകരൻ പറഞ്ഞു. ആരോഗ്യമുള്ള മനസും ശരീരവും ഉണ്ടെങ്കിലെ വിദ്യാർഥികൾക്കും പഠനത്തിൽ ഉയരാനാകു. ഈ തിരിച്ചറിവിനെ തുടർന്ന് യോഗ ഇന്ന് നാട്ടിൻപുറങ്ങളിൽ പോലും സർവസാധാരണമായ വ്യായാമമായി മാറിയിട്ടുണ്ട്. വയർ ശൂന്യമായ അതിരാവിലെ യോഗ ചെയ്യുന്നതാണ് ഏറ്റവും നല്ലതെന്ന് പരിശീലകർ പറയുന്നു.യോഗാദിനമായ ഇന്ന് രാവിലെ പത്തരക്ക് വണ്ടാഴി ഗവ.ആശുപത്രിയിൽ വച്ച് യോഗയെ കുറിച്ചുള്ള ബോധവത്കരണ ക്ലാസും ലളിതമായ യോഗ മുറകളുടെ പ്രദർശനവും സംഘടിപ്പിച്ചിട്ടുണ്ട്. പരിപാടികൾ പഞ്ചായത്ത് പ്രസിഡന്‍റ് കെ.എൽ. രമേഷ് ഉദ്ഘാടനം ചെയ്യും. കെ.പ്രഭാകരൻ ക്ലാസ് നയിക്കും.

കോഴിപ്പാറയിൽ ഓലപ്പുര കത്തിനശിച്ചു

കൊഴിഞ്ഞാമ്പാറ: കോഴിപ്പാറയിൽ ഓലപ്പുര കത്തി ഗൃഹോപകരണങ്ങൾ നശിച്ചു. നീളിപ്പാറ പരേതനായ മാണിക്കന്‍റെ ഭാര്യ വിശ്വാസമേരിയുടേതാണ് വീട്. ബുധനാഴ്ച വൈകുന്നേരം അഞ്ചരയ്ക്കാണ് സംഭവം. സമീപവാസികൾ എത്തി തീ നിയന്ത്രണവിധേയമാക്കിയെങ്കിലും വസ്ത്രങ്ങൾ, വിവിധ രേഖകൾ, ഗൃഹോപകരണങ്ങൾ എന്നിവ നശിച്ചു. വിവരം അറിയിച്ചതിനെതുടർന്ന് ചിറ്റൂരിൽനിന്നും അഗ്നിരക്ഷാസേനയും സ്ഥലത്തെത്തിയിരുന്നു. വൈദ്യുതി ഷോർട്ട്സർക്യൂട്ടാണ് തീപിടിത്തകാരണമെന്നാണ് നിഗമനം. ഒരുലക്ഷം രൂപയുടെ നഷ്ടമുണ്ടായതായി കണക്കാക്കുന്നു.

ആശങ്കകൾ ചർച്ചചെയ്ത് സർവകക്ഷിയോഗം

കല്ലടിക്കോട്‌: ഞാറക്കോട്‌ കുമാരന്‍റെ മരണത്തിനിടയാക്കിയ സംഭവത്തിൽ വനംവകുപ്പ്‌ ഉദ്യോഗസ്ഥർ സർവകക്ഷിയോഗം ചേർന്ന് കർഷകരുടെ ആശങ്കകൾ ചർച്ചചെയ്തു. റെയിൽ ഫെൻസിംഗ്‌ സ്ഥാപിക്കും, അതിനാവശ്യമായ എസ്റ്റിമേറ്റ്‌ സർക്കാരിലേക്കു നൽകും. പടക്കംപൊട്ടിച്ച്‌ കയറ്റിവിടുന്നതിനു പകരം എയർഗൺ ഉപയോഗിച്ച്‌ ആനകളെ കാടുകയറ്റും. കുങ്കി ആനകളെ ഈ പ്രദേശത്ത്‌ എത്തിച്ച്‌ ജനങ്ങൾക്കു സംരക്ഷണം നൽകും. രണ്ടുമാസം ുമ്പ്‌ കൊല്ലപ്പെട്ട അലനെ ആക്രമിച്ചതും കുമാരനെ ആക്രമിച്ചതും ഒരേ ആന ആണോയെന്ന് പരിശോധിച്ച്‌ ആനയെ പ്രദേശത്തുനിന്ന് നാടുകടത്താനുള്ള നടപടികൾ സ്വീകരിക്കും. വഴിവെട്ടി തെരുവുവിളക്കുകൾ സ്ഥാപിക്കും. കൊല്ലപ്പെട്ടവരുടെ കുടുംബാംഗങ്ങൾക്ക്‌ ജോലി നൽകാൻ നടപടികൾ സ്വീകരിക്കും, രാത്രിയിൽ ആശുപത്രിയിൽ പോകുന്ന രോഗികൾക്ക്‌ദ്രുതകർമസേനയുടെ സഹായം ഉറപ്പുവരുത്താനും യോഗത്തിൽ തീരുമാനമായി.

ആക്രമണകാരിയായ കാട്ടാനയെ വെടിവെച്ചുകൊല്ലണം: കത്തോലിക്ക കോൺഗ്രസ്‌

കല്ലടിക്കോട്‌: മുണ്ടൂർ ഞാറക്കോട് കുമാരനെ കൊലപ്പെടുത്തിയ ആനയെ വെടിവെച്ചുകൊല്ലണമെന്ന് കത്തോലിക്ക കോൺഗ്രസ് പാലക്കാട് രൂപത സമിതി ആവശ്യപ്പെട്ടു. പ്രദേശത്ത് ഇതേ കാട്ടാന തന്നെയാണ് രണ്ടുമാസംമുമ്പ് അലൻ എന്ന ചെറുപ്പക്കാരനെ ചവിട്ടിക്കൊല്ലുകയും അലന്‍റെ അമ്മയ്ക്ക് ഗുരുതരമായ പരിക്ക് ഏൽപ്പിക്കുകയും ചെയ്തത്. എത്ര ഓടിച്ചുവിട്ടാലും ഈ ആന സ്ഥിരമായി ജനവാസമേഖലകളിൽ ഇറങ്ങി കൃഷി നശിപ്പിക്കുകയും ആളുകളെ കൊല്ലുകയും ചെയ്യുന്നതിനാൽ പ്രദേശത്തെ അനേകരുടെ ജീവൻ ഇനിയും നഷ്ടപ്പടാനും നിരവധി കുടുംബങ്ങൾ അനാഥമാകാനും ഇടയാകും. ഇനിയും ഇത്തരത്തിൽ മനുഷ്യക്കുരുതി അനുവദിക്കാൻ കഴിയില്ല. അതിനാൽ പ്രദേശവാസികളുടെ സുരക്ഷയെ കരുതി വന്യജീവി സംരക്ഷണ നിയമപ്രകാരം ആനയെ വെടിവച്ചുകൊല്ലാൻ വേണ്ട നടപടി സ്വീകരിക്കാൻ മുഖ്യമന്ത്രി ചീഫ് വൈൽഡ് ലൈഫ് വാർഡന് ഉത്തരവ് നൽകണമെന്ന് ആവശ്യപ്പെട്ടു. കേന്ദ്ര സർക്കാർ നിരന്തരം കേരള സർക്കാരിനോട് വന്യജീവി സംരക്ഷണ നിയമത്തിലെ അധികാരം ഉപയോഗിക്കണമെന്ന് ആവശ്യപ്പെടുന്നുണ്ട്. സം സ്ഥാനസർക്കാർ ഒന്നും ചെയ്യു ന്നില്ല. അടിയന്തരനടപടി ഉണ്ടായില്ലെങ്കിൽ കത്തോലിക്ക കോൺഗ്രസ് പൊതുജനങ്ങളെ അണിനിരത്തി ശക്തമായ സമരപരിപാടികൾ ആരംഭിക്കുമെന്നും രൂപതസമിതി പറഞ്ഞു. കത്തോലിക്ക കോൺഗ്രസ് രൂപത പ്രസിഡന്‍റ് ബോബി പൂവത്തുങ്കൽ, രൂപത ഡയറക്ടർ ഫാ. ചെറിയാൻ ആഞ്ഞിലിമൂട്ടിൽ, ഗ്ലോബൽ വൈസ് പ്രസിഡന്‍റ് തോമസ് ആന്‍റണി, പാലക്കയം യൂണിറ്റ് പ്രസിഡന്‍റ് സന്തോഷ് കാഞ്ഞിരപ്പാറ, ബിനു പൂതക്കുഴി എന്നിവർ കുമാരന്‍റെ ഭവനം സന്ദർശിച്ച് അനുശോചനം രേഖപ്പെടുത്തി.

വന്യമൃഗങ്ങൾക്കുമുന്നിൽ സ്വന്തം വീട്ടുമുറ്റംപോലും സുരക്ഷിതമല്ല: മാർ പീറ്റർ കൊച്ചുപുരയ്ക്കൽ

പാലക്കാട്‌: വന്യമൃഗങ്ങൾക്കുമുന്നിൽ സ്വന്തം വീട്ടുമുറ്റംപോലും സുരക്ഷിതമല്ലെന്ന് ബിഷപ് മാർ പീറ്റർ കൊച്ചുപുരയ്ക്കൽ പറഞ്ഞു. വീട്ടുമുറ്റത്ത്‌ കാട്ടാനയുടെ ആക്രമണത്തിൽ കൊല്ലപ്പെട്ട ഞാറക്കോട്‌ കുമാരന്‍റെ വീട്‌ സന്ദർശിച്ച്‌ സംസാരിക്കുകയായിരുന്നു ബിഷപ്. കർഷകർ വസിക്കുന്ന ഈ മേഖലയിൽ വന്യമൃഗങ്ങളുടെ ശല്യം അവസാനിപ്പിക്കാൻ അധികാരികൾ നടപടി സ്വീകരിക്കണം. മനുഷ്യരുടെ ജീവനും സ്വത്തിനും സംരക്ഷണം നൽകേണ്ട അധികാരികൾ വെറുതെ നോക്കിയിരിക്കുന്നത്‌ ആന നടത്തുന്ന ആക്രമണത്തെക്കാൾ ഭയാനകമാണ്. വനംവകുപ്പിന്‍റെ നിഷ്ക്രിയത്വം ഭീതികരമാണ്. വനത്തിനുള്ളിൽ കഴിയേണ്ട വന്യമൃഗങ്ങൾ കൃഷിയിടങ്ങളും കടന്ന് വീടുകൾവരെ എത്തിയെന്നതു വനം വകുപ്പിന്‍റെ നിസംഗതയാണെന്നും ജീവനും സ്വത്തിനും സംരക്ഷണം നൽകാനും ശാശ്വതപരിഹാരം കാണാനും അധികാരികൾ തയാറാകണമെന്നും മാർ കൊച്ചുപുരയ്ക്കൽ പറഞ്ഞു.

കിഫ പ്രതിഷേധപ്രകടനം നടത്തി

കാഞ്ഞിരപ്പുഴ: മുണ്ടൂർ ഞാറക്കോട് കുമാരനെ വീട്ടുമുറ്റത്ത് ആന ചവിട്ടിക്കൊന്നതിൽ കിഫ കാഞ്ഞിരപ്പുഴ പഞ്ചായത്ത് കമ്മിറ്റിയുടെ നേതൃത്വത്തിൽ പ്രതിഷേധപ്രകടനം നടത്തി. നിരന്തരമായി ജനങ്ങളെ ആക്രമിച്ചു കൊലപ്പെടുത്തുന്ന ആനയെ കൊലയാളിയാനയായി പ്രഖ്യാപിച്ച് വെടിവെച്ചുകൊല്ലണമെന്നും വനംവകുപ്പിന്‍റെ നിരുത്തരവാദപരമായ സമീപനം അവസാനിപ്പിക്കണമെന്നും പൂഞ്ചോലയിലും ഇരുന്പകച്ചോലയിലും നിരന്തരമായി ജനവാസമേഖലയിൽ ഇറങ്ങി വ്യാപകമായ കൃഷിനാശം വരുത്തുന്ന ആനകളെ ഉൾവനത്തിലേക്ക് തുരത്തണമെന്നും യോഗം ഉദ്ഘാടനംചെയ്ത കിഫ ജില്ലാ കോ- ഓർഡിനേറ്റർ ജോമി മാളിയേക്കൽ ആവശ്യപ്പെട്ടു . ജനവാസ മേഖലയിൽ ഇറങ്ങുന്ന ആനകൾ മനുഷ്യജീവനു ഭീഷണിയായാൽ അധികാരികൾ വലിയവില കൊടുക്കേണ്ടിവരുമെന്ന് അധ്യക്ഷത വഹിച്ച ജില്ലാ പ്രസിഡന്‍റ് സണ്ണി കിഴക്കേക്കര മുന്നറിയിപ്പ് നൽകി. ജാഥയ്ക്കു വിൻസെന്‍റ് ഇലവുങ്കൽ, സിറിയക് മാത്യു, ജിമ്മിച്ചൻ വട്ടവനാൽ, രഞ്ജിത്ത് ജോസ് എന്നിവർ നേതൃത്വം നൽകി.

വിപത്തിനെ മുൻകൂട്ടി തടയാൻ കഴിയണം: മാർ പീറ്റർ കൊച്ചുപുരയ്ക്കൽ

എലപ്പുള്ളി: എലപ്പുള്ളിയിൽ വരാൻപോകുന്ന വിപത്തിനെ മുൻകൂട്ടിക്കണ്ട്‌ തടയാൻ കഴിയണമെന്നും ഇത്തരം വിപത്തിനെതിരേ എല്ലാവരും ഒറ്റക്കെട്ടായി നിൽക്കണമെന്നും ബിഷപ് മാർ പീറ്റർ കൊച്ചുപുരയ്ക്കൽ പറഞ്ഞു. വിവിധ മതത്തിൽ വിശ്വസിക്കുന്ന നാം നന്മകൾമാത്രം ഉയർത്തിപ്പിടിക്കണമെന്നും ജനദ്രോഹപരമായ നിലപാടുകൾ തിരിച്ചറിയണമെന്നും ബിഷപ് പറഞ്ഞു. എലപ്പുള്ളി പഞ്ചായത്തിലെ ബ്രൂവറി കമ്പനിക്കെതിരായും മദ്യത്തിനും മയക്കുമരുന്നിനും എതിരായും എലപ്പുള്ളി പഞ്ചായത്ത്‌ കമ്യൂണിറ്റി ഹാളിൽ നടത്തിയ ഉപവാസസത്യഗ്രഹത്തിൽ സന്ദേശം നൽകി പ്രസംഗിക്കുകയായിരുന്നു മാർ കൊച്ചുപുരയ്ക്കൽ. മാവേലിക്കര മെത്രാൻ മാർ ജോഷ്വാ ഇഗ്നാത്തിയോസ്‌ ഉപവാസസമരം ഉദ്ഘാടനം ചെയ്തു. ഡോ. ജേക്കബ്‌ വടക്കുംചേരി അധ്യക്ഷത വഹിച്ചു. ഫാ. യൂജിൻ പെരേര, സ്വാമി സച്ചിദാനന്ദ, ഇയ്യച്ചേരി കുഞ്ഞികൃഷ്ണൻ, തമ്പാൻ തോമസ്‌, ശ്രീനിവാസൻ പുതുശേരി, വിളയോടി വേണുഗോപാൽ, ഡോ. മാത്യു കല്ലടിക്കോട്‌, ഖദീജ നർഗീസ്‌, ഇയ്യച്ചേരി പത്മിനി, ടി.എം. രവീന്ദ്രൻ, ടി. ബാലകൃഷ്ണൻ, സന്തോഷ്‌ മലമ്പുഴ, ജോൺ ജോസഫ്‌, ജോർജ്‌ സെബാസ്റ്റ്യൻ തുടങ്ങിയവർ പ്രസംഗിച്ചു.

വള്ളുവനാടൻ പാടശേഖരങ്ങളിൽ കർഷകർ ഒന്നാംവിള ഉപേക്ഷിക്കുന്നു

ഷൊർണൂർ: നെൽപ്പാടങ്ങൾ തരിശിടാതെയും തരിശിട്ട നെൽപ്പാടങ്ങളിൽ കൃഷിയിറക്കിയും കാർഷികമേഖലയ്ക്ക് ഉണർവ് പകർന്ന ഇടക്കാലത്തിനു വിട. കർഷകർ വീണ്ടും നെൽകൃഷി ഉപേക്ഷിക്കുന്നു. കർഷകർക്ക് നെൽകൃഷി വീണ്ടും പഥ്യമല്ലാതായതിന്ന് കാരണങ്ങളിലൊന്ന് വിളവ് മോശവും സംഭരണവില ലഭിക്കാത്തതുമടക്കമുള്ള കാര്യങ്ങളാണ്. ഉത്പാദനചെലവ് കൂടിയതും വിളനാശവുമെല്ലാം നെൽകൃഷി ഉപേക്ഷിക്കാൻ കർഷകരെ നിർബന്ധിതരാക്കി. കടംവാങ്ങിയും പലിശയ്ക്ക് എടുത്തുമെല്ലാം നെൽകൃഷി ഇറക്കിയ കർഷകർക്ക് ബാക്കിപത്രം നഷ്ടത്തിന്‍റെ കണക്കുകൾ മാത്രമായതാണ് വീണ്ടും നെൽകൃഷിയിൽ നിന്നകലാൻ വള്ളുവനാടൻ പാടശേഖരങ്ങളിൽ കർഷകരെ നിർബന്ധിതരാക്കിയത്. നഷ്ടംകൂടിയതോടെ ഒന്നാംവിള നെൽകൃഷിയിൽനിന്ന് തന്നെ കർഷകർ പിന്മാറിക്കഴിഞ്ഞു. ഷൊർണൂർ ബ്ലോക്കിനു കീഴിൽ ഒന്നാംവിള നെൽകൃഷിയിൽ ഇത്തവണ 228 ഹെക്ടറാണു കുറഞ്ഞത്. കർഷകരെ സഹായിക്കാൻ പദ്ധതികൾ പലതുണ്ടെങ്കിലും ഇതൊന്നും കർഷകർക്കു വേണ്ട സമയങ്ങളിൽ ലഭിക്കാത്തത് കൃഷിനഷ്ടം കൂട്ടുന്നുവെന്നും ഇതോടെ പല കർഷകരും നെൽകൃഷിയിറക്കാൻ മടിക്കുകയാണെന്നുമാണ് അനുഭവസ്ഥർ പറയുന്നത്. പണ്ടൊക്കെ നെല്ലിന്‍റെ പച്ചപ്പിലായിരുന്നു പാടങ്ങളെങ്കിൽ ഇന്ന് പാടങ്ങളിൽ കളകൾ നിറഞ്ഞുനിൽക്കുകയാണ്. കാലാവസ്ഥാവ്യതിയാനവും കാട്ടുപന്നിശല്യവും കാരണം നഷ്ടം വർധിച്ചതാണ് ഇതിനു കാരണം. ഏപ്രിൽ അവസാനത്തോടെ തുടക്കംകുറിക്കുന്ന ഒന്നാംവിളയിറക്കുന്നതിന് കർഷകർ ഇപ്പോൾ തയ്യാറാകുന്നില്ല. രണ്ടാംവിള മാത്രമാണ് കൂടുതൽ കർഷകരും കൃഷി ചെയ്യുന്നത്. നഷ്ടങ്ങൾ വന്നാൽ നികത്തുന്നതിനു നഷ്ടപരിഹാരം ലഭിക്കാത്തതാണു കാരണമെന്ന് കർഷകർ പറയുന്നു. കഴിഞ്ഞ വർഷം ഷൊർണൂർ ബ്ലോക്കിൽ ഒന്നാംവിള നെൽകൃഷിയിൽ 177 ഹെക്ടർ നെൽകൃഷിയുടെ വർധനയുണ്ടായിരുന്നു. 797 ഹെക്ടറാണ് അന്ന് ഒന്നാംവിള കൃഷിയിറക്കിയിരുന്നത്. ഇന്ന് 569.75 ഹെക്ടർ മാത്രമാണ് കൃഷിയിറക്കിയതെന്ന് അധികൃതർ പറഞ്ഞു. ഷൊർണൂർ ബ്ലോക്കിനു കീഴിൽ 10 കൃഷിഭവനുകളാണുള്ളത്. ഇത്തവണ ഏറ്റവും കൂടുതൽ കൃഷിയിറക്കിയത് അമ്പലപ്പാറ കൃഷിഭവന്‍റെ കീഴിലാണ്-174 ഹെക്ടർ. കഴിഞ്ഞവർഷം ഇത് 230 ആയിരുന്നു. കഴിഞ്ഞവർഷം ഏറ്റവും കൂടുതൽ (275 ഹെക്ടർ) കൃഷിയിറക്കിയ ലക്കിടി-പേരൂർ കൃഷിഭവന്‍റെ കീഴിലെ പാടശേഖരങ്ങളിൽ ഇത്തവണ 140 ഹെക്ടർ മാത്രമാണ് കൃഷിയിറക്കിയിരിക്കുന്നത്. ഒറ്റപ്പാലം-65.05, ഷൊർണൂർ-87.6, വാണിയംകുളം-15, അനങ്ങനടി-28, വല്ലപ്പുഴ-45.5 ഹെക്ടറുകളിലും ഒന്നാംവിളയിറക്കി. ഇതിൽ കുറവ് നെല്ലായ, തൃക്കടീരി, ചളവറ കൃഷിഭവനുകൾക്കു കീഴിലുള്ള പാടശേഖരത്തിലാണ്. മൂന്ന് ഹെക്ടർ തൃക്കടീരിയിലും 5.6 ഹെക്ടർ ചളവറയിലും ആറ് ഹെക്ടർ നെല്ലായയിലും. മാറുന്നകാലാവസ്ഥയും കാട്ടുപന്നിശല്യവുമാണ് കൃഷിയിൽ കർഷകർക്ക് കൂടുതൽ നഷ്ടമുണ്ടാക്കുന്നത്. മേഖലയിൽ വേനൽമഴയിലും ഒന്നാംവിള നെൽകൃഷി നശിച്ചിരുന്നു. 53 ഏക്കർ കൃഷിയാണ് നശിച്ചത്. ഇത്തവണ ജില്ലയിൽ നെൽകൃഷിയുടെ അളവിൽ ഗണ്യമായ കുറവുണ്ടാകുമെന്നാണ് സൂചന. ഇത് നെല്ലുത്പാദനത്തിലും പ്രതിഫലിക്കും.

എൻട്രൻസ് പരീക്ഷാ ഉന്നതവിജയിയെ യൂത്ത് കോൺഗ്രസ് അനുമോദിച്ചു

മണ്ണാര്‍ക്കാട്: ഓള്‍ഇന്ത്യ മെഡിക്കല്‍ എന്‍ട്രന്‍സ്‌ എക്സാമിനേഷനില്‍ മികച്ചവിജയം നേടിയ തെങ്കര വാളക്കര വല്ലപ്പുഴ വീട്ടില്‍ വി.കെ. ഫാത്തിമ സനത്തെ യൂത്ത് കോണ്‍ഗ്രസ്, കെഎസ്‌യു പ്രവർത്തകർ ആദരിച്ചു. ബ്ലോക്ക് കോണ്‍ഗ്രസ് വൈസ് പ്രസിഡന്‍റ് ഗിരീഷ് ഗുപ്ത, തെങ്കര മണ്ഡലം കോണ്‍ഗ്രസ് പ്രസിഡന്‍റ് ആറ്റക്കര എന്നിവർ പൊന്നാട അണിയിച്ച് ഉപഹാരം കൈമാറി. ബ്ലോക്ക് കോണ്‍ഗ്രസ് വൈസ് പ്രസിഡന്‍റ് കുരിക്കള്‍ സെയ്ത്, പഞ്ചായത്ത് മെംബര്‍ സി.പി. അലി, യൂത്ത് കോണ്‍ഗ്രസ് തെങ്കര മണ്ഡലം പ്രസിഡന്‍റ് ഹാരിസ് തത്തേങ്ങലം, ശിവദാസന്‍, ടി.കെ. ഹംസക്കുട്ടി, നാസര്‍, അല്ലാബക്സ്, അബ്ദുല്‍ ബാസിത്, അസൈനാര്‍ പുഞ്ചക്കോട് തുടങ്ങിയവര്‍ പങ്കെടുത്തു.

സ്കൂളുകൾക്കു ഫർണിച്ചർ വിതരണം ജില്ലാതല ഉദ്ഘാടനം

കൊടുവായൂർ: ജില്ലാ പഞ്ചായത്തിന്‍റെ 2024 - 25 വാർഷിക പദ്ധതിയിലുൾപ്പെടുത്തി സ്കൂളുകൾക്ക് ഫർണിച്ചർ വിതരണം ചെയ്യുന്നതിന്‍റെ ജില്ലാതല ഉദ്ഘാടനം കൊടുവായൂർ ജിഎച്ച്എസ്എസിൽ ജില്ലാ പഞ്ചായത്ത്‌ പ്രസിഡന്‍റ് കെ. ബിനുമോൾ നിർവഹിച്ചു. രണ്ടുകോടിരൂപ ചെലവഴിച്ചാണ് പദ്ധതി നടപ്പിലാക്കുന്നത്. ജില്ലാ പഞ്ചായത്ത്‌ വൈസ് പ്രസിഡന്‍റ് സി. കെ. ചാമുണ്ണി അധ്യക്ഷത വഹിച്ചു. ജില്ലാ പഞ്ചായത്ത്‌ ആരോഗ്യ - വിദ്യാഭ്യാസ സ്റ്റാന്‍റിംഗ് കമ്മിറ്റി ചെയർപേഴ്സൺ ഷാബിറ ടീച്ചർ, കൊടുവായൂർ ഗ്രാമപഞ്ചായത്ത് പ്രസിഡന്‍റ് വി. പ്രേമ എന്നിവർ മുഖ്യാതിഥികളായി. പിടിഎ പ്രസിഡന്‍റ് കെ. രവിചന്ദ്രൻ, അധ്യാപകരായ അജിതകുമാരി, ടി. സുരേഷ്, സ്റ്റാഫ് സെക്രട്ടറി കെ. പ്രമോദ്‌, സ്കൂൾ പ്രിൻസിപ്പൽ ടി. ശോഭ, ജില്ലാ പഞ്ചായത്ത് സെക്രട്ടറി എം. രാമൻകുട്ടി, ഹെഡ്മിസ്ട്രസ് എം. വിനിത എന്നിവർ പങ്കെടുത്തു.

രാഹുൽഗാന്ധിയുടെ ജന്മദിനം ആഘോഷിച്ച് കോൺഗ്രസ്

കോയമ്പത്തൂർ: ജില്ലാ കോൺഗ്രസ് കമ്മിറ്റിയുടെ ആഭിമുഖ്യത്തിൽ രാഹുൽഗാന്ധിയുടെ ജന്മദിനം ആഘോഷിച്ചു. അവിനാശി റോഡിലുള്ള മാരിയമ്മൻ ക്ഷേത്രത്തിൽ പ്രത്യേകപൂജ നടന്നു. എഐസിസി സെക്രട്ടറി മയൂര ജയകുമാറിന്‍റെ നേതൃത്വത്തിൽ നടന്ന പൂജാപരിപാടിയിൽ ജില്ലാ കോൺഗ്രസ് പ്രസിഡന്‍റ് വക്കീൽ കറുപ്പുസാമി അധ്യക്ഷത വഹിച്ചു. ഗണപതി ശിവകുമാർ, കൗൺസിലർ സരള വസന്ത്, ഇരുക്കൂർ സുബ്രഹ്്മണ്യം, കോയമ്പത്തൂർ ബോസ്, ഗുരുസാമി, തമിഴ്സെൽവൻ, കാന്ത കുമാർ, കുറിച്ചി വസന്ത്, തുടങ്ങിയവർ പരിപാടിയിൽ പങ്കെടുത്തു. മയൂര ജയകുമാറിന്‍റെ നേതൃത്വത്തിൽ കോൺഗ്രസ് പ്രവർത്തകർ സർക്കാർ മെഡിക്കൽ കോളജ് ആശുപത്രിയിൽ രക്തദാനം ചെയ്തു.

കൗശിക നീർക്കരങ്ങൾ സംഘടനയും റോട്ടറി ക്ലബ്ബും കൈകോർക്കുന്നു

കോയന്പത്തൂർ: കൗശിക നദിയുടെ പുനരുജ്ജീവനത്തിനായി നാടൊട്ടാകെ കൈകോർക്കുന്നു. വിവിധ സംഘടനകൾ സാന്പത്തിക സഹായമടക്കമുളള വാഗ്ദാനമാണ് പദ്ധതിക്കു നൽകിവരുന്നത്. കഴിഞ്ഞദിവസം മാർട്ടിൻസ് ചാരിറ്റബിൾ ട്രസ്റ്റ് അന്പതുലക്ഷം രൂപയാണ് നൽകിയത്. റേസ് കോഴ്‌സിലെ റോട്ടറി സെക്രട്ടേറിയറ്റ് ഓഫീസിൽ റോട്ടറി ഡിസ്ട്രിക്റ്റ് 3201 ഭാരവാഹികളും കൗശിക നീർക്കരങ്ങളും സംഘടിപ്പിച്ച പത്രസമ്മേളനത്തിലായിരുന്നു ഔദ്യോഗിക പ്രഖ്യാപനം. വൈയംപാളയത്തിനും ദേവംപാളയത്തിനും ഇടയിലുള്ള ആറുകിലോമീറ്റർ ദൈർഘ്യമുള്ള നദിയുടെ പുനരുജ്ജീവനത്തിൽ ശ്രദ്ധ കേന്ദ്രീകരിക്കുന്ന പദ്ധതിയാണ് റോട്ടറി ക്ലബും ജലസംരക്ഷണ സംഘടനയായ കൗശിക നീർക്കരങ്ങളും സംയുക്തമായി നടത്തുന്നത്. ഇതിന്‍റെ പദ്ധതിരൂപീകരണവും പൂർത്തിയായിട്ടുണ്ട്. റോട്ടറി ഡിസ്ട്രിക്റ്റ് 3201 ഗവർണർ അഡ്വ.എൻ. സുന്ദരവടിവേലു, റോട്ടറി ക്ലബ് വികസനസമിതി ചെയർമാൻ ലീമ റോസ് മാർട്ടിൻ, കൗശിക നീർക്കരങ്ങൾ കോ- ഓർഡിനേറ്ററും കോവൈ റോട്ടറി ക്ലബ് അംഗവുമായ സൂര്യകുമാരി, റോട്ടറി ഡിസ്ട്രിക്ട് അസിസ്റ്റന്‍റ് ഗവർണർ കവിത ഗോപാലകൃഷ്ണൻ എന്നിവർ പത്രസമ്മേളനത്തിൽ പങ്കെടുത്തു.

മൂശാരി സമുദായസഭ ജില്ലാ കമ്മിറ്റി വിദ്യാർഥികളെ അനുമോദിച്ചു

പാലക്കാട്: മൂശാരി സമുദായസഭ ജില്ലാകമ്മിറ്റിയുടെ ആഭിമുഖ്യത്തിൽ ഉന്നതവിജയം നേടിയ വിദ്യാർഥികളെ അനുമോദിച്ചു. കദളീവനം ഓഡിറ്റോറിയത്തിൽ നടന്ന അനുമോദന ചടങ്ങ് സംഘടനയുടെ ജില്ലാ രക്ഷാധികാരി ജയകൃഷ്ണൻ ഉദ്ഘാടനം ചെയ്തു. എസ്എസ്എൽസി, പ്ലസ്ടു, എൽഎസ്എസ്, യുഎസ്എസ് പരീക്ഷകളിൽ ഉന്നതവിജയം നേടിയവരെയാണ് ആദരിച്ചത്. ജില്ലാ പ്രസിഡന്‍റ് വി.പി. മുരളീധരൻ അധ്യക്ഷത വഹിച്ചു. ചിറ്റൂർ മുൻ എഇഒ വി. കുഞ്ഞിലക്ഷ്മി മുഖ്യാതിഥിയായി സമ്മാനവിതരണം നടത്തി. സംസ്ഥാന പ്രസിഡന്‍റ് അപ്പുക്കുട്ടാചാര്യൻ മുഖ്യപ്രഭാഷണം നടത്തി. ജില്ലാ സെക്രട്ടറി എ. വികാസ് ബൽറാം, ജില്ലാ ഭാരവാഹികൾ പ്രസംഗിച്ചു.

ജില്ലാ പബ്ലിക് ലൈബ്രറിയിൽ വായനദിനാഘോഷം

പാലക്കാട്: ജില്ലാ പബ്ലിക് ലൈബ്രറിയുടെ വായന ദിനാഘോഷം ജില്ലാ കളക്ടർ ജി. പ്രിയങ്ക ഉദ്‌ഘാടനം ചെയ്തു. ലൈബ്രറി സെക്രട്ടറി ടി.ആർ. അജയൻ അധ്യക്ഷത വഹിച്ച പരിപാടി ആരംഭിച്ചത് ഒ.വി. വിജയന്‍റെ കടൽത്തീരത്ത് എന്ന പ്രശസ്തകഥയുടെ വായനയോടെയാണ്. എഴുത്തുകാരനും ചിറ്റൂർ- തത്തമംഗലം മുനിസിപ്പൽ കൗൺസിൽ വൈസ് ചെയർമാനുമായ എം. ശിവകുമാറാണ് കഥ വായിച്ചത്. മുണ്ടശേരി അവാർഡ് ജേതാവ് ഡോ.പി.ആർ. ജയശീലൻ പ്രഭാഷണം നടത്തി. കവയിത്രി ജ്യോതിബായ് പരിയാടത്ത്, ആർ.ശാന്തകുമാരൻ മാസ്റ്റർ എന്നിവർ സംസാരിച്ചു. ജില്ലാ പബ്ലിക് ലൈബ്രറി സെമിനാർ ഹാളിലെ നിറഞ്ഞ സദസിൽ വായനയുടെ സമകാലിക പ്രാധാന്യവും ചർച്ചചെയ്തു. കെ.ആർ.ഇന്ദു, പ്രഫ.കെ. മോഹൻദാസ്, മുരളി എസ്. കുമാർ പങ്കെടുത്തു. പത്തിരിപ്പാല മൗണ്ട് സീന പബ്ലിക് സ്‌കൂളിലെ 60 കുട്ടികൾ വായന ദിനത്തോടനുബന്ധിച്ച് പബ്ലിക് ലൈബ്രറി സന്ദർശിക്കുകയും ചെയ്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]