പ്ലസ് വണ്‍ പ്രവേശനത്തിന് ഇന്നു മുതൽ ഒന്പതുവരെ ഓണ്‍ലൈനായി അപേക്ഷിക്കാം : Deepika.com Kerala News |

Click here for detailed news of all items

പ്ലസ് വണ്‍ പ്രവേശനത്തിന് ഇന്നു മുതൽ ഒന്പതുവരെ ഓണ്‍ലൈനായി അപേക്ഷിക്കാം

Friday, June 2, 2023 1:07 AM IST

തിരുവനന്തപുരം: സംസ്ഥാനത്തെ സർക്കാർ, എയ്ഡഡ് ഹയർ സെക്കൻഡറി സ്കൂളുകളിലെ പ്ലസ് വണ്‍ പ്രവേശനത്തിന് ഇന്നു മുതൽ ജൂണ്‍ ഒന്പതുവരെ ഓണ്‍ലൈനായി അപേക്ഷിക്കാം. ഒരാൾക്ക് ഒന്നിലേറെ ജില്ലകളിൽ അപേക്ഷിക്കാനാകും. എസ്എസ്എൽസി/ പത്താം ക്ലാസ് തുല്യതാ പരീക്ഷയിൽ ഉപരിപഠന യോഗ്യത നേടിയവരെയും സിബിഎസ്ഇ പരീക്ഷയിൽ ജയിച്ചവരെയും മുഖ്യ അലോട്ട്മെന്‍റിൽ പരിഗണിക്കും. വെബ്സൈറ്റിലെ ഹയർ സെക്കൻഡറി അഡ്മിഷൻ ലിങ്കിലൂടെ അപേക്ഷിക്കണം.

പത്താം ക്ലാസിലെ മാർക്ക് കൂട്ടിയെടുത്ത് വെയ്റ്റഡ് ഗ്രേഡ് പോയിന്‍റ് ആവറേജ് അടിസ്ഥാനമാക്കി റാങ്ക് തീരുമാനിക്കും. റാങ്ക്, കുട്ടികൾ നൽകിയ ഓപ്ഷൻ, സീറ്റ് ലഭ്യത എന്നിവ പരിഗണിച്ച് കംപ്യൂട്ടർ പ്രോഗ്രാം വഴി സെലക്‌ഷനും അലോട്ട്മെന്‍റും നടക്കും. ട്രയലടക്കം നാല് അലോട്ട്മെന്‍റുണ്ടാകും. ആദ്യ അലോട്ട്മെന്‍റിൽ ഇഷ്ടപ്പെട്ട സ്കൂളും കോന്പിനേഷനും ലഭിച്ചവർക്കു സ്ഥിരപ്രവേശനം നേടാം. മറ്റുള്ളവർ താത്കാലിക പ്രവേശനം നേടണം. അലോട്ട്മെന്‍റിൽ വന്നിട്ടും സ്കൂളിൽ ചേരാതിരുന്നാൽ പ്രവേശനാവസരം നഷ്ടമാകും.

ഒന്നിലേറെ ജില്ലകളിൽ അപേക്ഷിച്ചവർ ഏതെങ്കിലുമൊരു ജില്ലയിൽ പ്രവേശിക്കുന്നതോടെ മറ്റ് ജില്ലയിലെ ഓപ്ഷൻ സ്വയം റദ്ദാകും. ട്രയൽ അലോട്ട്മെന്‍റ് 13നും ആദ്യ അലോട്ട്മെന്‍റ് 19നുമാണ്. മൂന്ന് അലോട്ട്മെന്‍റ് അടങ്ങുന്ന മുഖ്യ അലോട്ട്മെന്‍റ് ജൂലൈ ഒന്നുവരെ.

അപേക്ഷ സമർപ്പിക്കുന്പോൾ പിശകുവന്നാൽ തിരുത്താൻ അവസരമുണ്ട്. ഇത് പരിഗണിച്ചാകും ട്രയൽ അലോട്ട്മെന്‍റ്. സംസ്ഥാനത്തെ 389 വൊക്കേഷണൽ ഹയർ സെക്കൻഡറി സ്കൂളുകളിലേക്കും സമാന വ്യവസ്ഥകളനുസരിച്ചാണ് പ്രവേശനം. വെബ്സൈറ്റിലെ ക്ലിക് ഫോർ ഹയർ സെക്കൻഡറി വൊക്കേഷണൽ അഡ്മിഷൻ എന്ന ലിങ്കിൽ ക്ലിക്ക് ചെയ്യണം.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.