ധന്യന്‍ മാര്‍ തോമസ് കുര്യാളശേരി അനുസ്മരണ സിന്പോസിയം നടത്തി
Thursday, May 29, 2025 1:35 AM IST
ചങ്ങനാശേരി: ധന്യന്‍ മാര്‍ തോമസ് കുര്യാളശേരി ചങ്ങനാശേരി അതിരൂപതയെ സമഗ്രതദര്‍ശനത്തില്‍ നയിച്ച അജപാലകനായിരുന്നുവെന്ന് ആര്‍ച്ച്ബിഷപ് മാര്‍ തോമസ് തറയില്‍.
ചങ്ങനാശേരി അതിരൂപതയുടെ പ്രഥമ മെത്രാനും ആരാധനാസന്യാസിനീ സമൂഹത്തിന്‍റെ സ്ഥാപകനുമായ ധന്യന്‍ മാര്‍ തോമസ് കുര്യാളശേരിയുടെ നൂറാം ചരമവാര്‍ഷികത്തോടനുബന്ധിച്ച് സെന്‍റ് മേരീസ് മെത്രാപ്പോലീത്തന്‍ പള്ളി പാരിഷ്ഹാളില്‍ ചങ്ങനാശേരി അതിരൂപത സംഘടിപ്പിച്ച അനുസ്മരണ സിമ്പോസിയം ഉദ്ഘാടനം നിര്‍വഹിച്ചു പ്രസംഗിക്കുകയായിരുന്നു ആര്‍ച്ച്ബിഷപ്.
ആത്മീയത പള്ളികളില്‍ ഒതുക്കി നിര്‍ത്താനുള്ളതല്ല, പള്ളികളില്‍ നിന്നും തുടങ്ങേണ്ടതാണെന്ന ദര്‍ശനം സഭയ്ക്കു പകര്‍ന്നുനല്‍കിയ മാര്‍ തോമസ് കുര്യാളശേരി സുറിയാനി കത്തോലിക്കര്‍ക്കിടയിലെ ആഡംബരങ്ങള്‍ക്കും വ്യവഹാരങ്ങള്‍ക്കുമെതിരേ ശബ്ദമുയര്‍ത്തി. ചങ്ങനാശേരി അതിരൂപതയ്ക്ക് കെട്ടുറപ്പും അച്ചടക്കവും പകര്‍ന്ന മാര്‍ കുര്യാളശേരിയുടെ ചരിത്രം അതിരൂപതയുടെ ചരിത്രംകൂടിയാണെന്നും മാര്‍ തോമസ് തറയില്‍ കൂട്ടിച്ചേര്‍ത്തു.
മോണ്‍. സ്‌കറിയ കന്യാകോണില്‍ ആമുഖപ്രസംഗം നടത്തി. ഡോ. കുര്യാസ് കുമ്പളക്കുഴി പ്രബന്ധം അവതരിപ്പിച്ചു. അതിരൂപത വികാരിജനറാള്‍ മോണ്‍. ആന്‍റണി എത്തക്കാട് മോഡറേറ്ററായിരുന്നു. എസ്എബിഎസ് സന്യാസിനീ സമൂഹത്തിന്‍റെ ചങ്ങനാശേരി പ്രൊവിന്ഷ്യല് സുപ്പീരിയര്‍ മദര്‍ ലില്ലി റോസ് കരോട്ടുവെമ്പേനിക്കല്‍ നന്ദി അര്‍പ്പിച്ചു.
അതിരൂപതയുടെ വിവിധ ഇടവകളിലെ വൈദികര്‍, സന്യസ്തര്‍, ഇടവക പ്രതിനിധികള്‍, പാസ്റ്റര്‍ കൗണ്‍സില്‍, ഫൊറോനാ കൗണ്‍സില്‍, പാരീഷ് കൗണ്‍സില്‍ അംഗങ്ങള്‍, കുടുംബ കൂട്ടായ്മ ലീഡേഴ്‌സ്, മതാധ്യാപകര്‍ തുടങ്ങിയവര്‍ പങ്കെടുത്തു. ജൂണ്‍ രണ്ടിനാണ് മാര്‍ തോമസ് കുര്യാളശേരിയുടെ ചരമവാര്‍ഷികം.