ADVERTISEMENT

ADVERTISEMENT

മഹാരക്തദാന യജ്‌ഞം തുടങ്ങി

തിരുവനന്തപുരം: സ്റ്റേറ്റ് ബാങ്ക് ഓഫ് ഇന്ത്യയുടെ പ്ലാറ്റിനം ജൂബിലി ആഘോഷങ്ങളോടനുബന്ധിച്ചു കേരളത്തിലെ 40 ഇൽ പരം ഗവ. ബ്ലഡ്‌ ബാങ്കുകളുമായി സഹകരിച്ചു 25 വരെ നീളുന്ന മഹാരക്‌തദാന യജ്‌ഞം ആരംഭിച്ചു.

തിരുവനന്തപുരം റീജണൽ ഓഫീസിന്‍റെ നേതൃത്വത്തിൽ ആദ്യക്യാമ്പ് തൈക്കാട് പോലീസ് ട്രെയിനിംഗ് കോളജിൽ പിടിസി പ്രിൻസിപ്പൽ പി.എൻ. രമേശ്‌ കുമാർ ഉദ്ഘാടനം ചെയ്തു. എസ്ബിഐ റീജിയണൽ മാനേജർ ജി.എസ്. റോഷൻ അധ്യക്ഷത വഹിച്ചു.

ചീഫ് മാനേജർ രാംജിത്ത് സ്വാഗതം പറഞ്ഞു. ജനറൽ ഹോസ്പിറ്റൽ മെഡിക്കൽ ഓഫീസർ സീന വി. നെറ്റോ ആശംസ നേർന്നു.

ADVERTISEMENT

മാന്നാനം സുരേഷ് ഗുരുദേവ സർവീസ് സൊസൈറ്റി ദേശീയ വർക്കിംഗ് പ്രസിഡന്‍റ്

വെഞ്ഞാറമൂട്: ഗുരുദേവ സർവീസ് സൊസൈറ്റി ദേശീയ വർക്കിംഗ് പ്രസിഡന്‍റായി മാന്നാനം സുരേഷിനെ തെരഞ്ഞെടുത്തതായി ദേശീയ പ്രസിഡന്‍റ് ആർ.സി. രാജീവ് ദാസ് അറിയിച്ചു. രാഷ്ട്രീയ ജനതാദൾ നേതാവും, പത്രപ്രവർത്തകനും, ലോഹ്യ കർമസമിതി, സോഷ്യലിസ്റ്റ് അലയൻസ് ഫോറം, ഗാന്ധി ദർശന വേദി എന്നീപ്രസ്ഥാനങ്ങളുടെ അഖിലേന്ത്യ പ്രസിഡന്‍റുമാണ് മാന്നാനം സുരേഷ്. ഫിലിം കോ ഡയറക്ടറർ, ശ്രീ ഗോകുലം മെഡിക്കൽ കോളജ് പേഷ്യന്‍റ് റിലേഷൻ ഓഫീസറായും പ്രവർത്തിക്കുന്നു. കോട്ടയം, മാന്നാനം കൊക്കപ്പള്ളിൽ വീട്ടിൽ കെ.എം. പവിത്രന്‍റെയും സാവിത്രി പവിത്രന്‍റെയും മകനാണ്. ഭാര്യ: ഷീജ സുരേഷ് (പ്രഫസർ, ശ്രീ ഗോകുലം നഴ്സിംഗ് കോളജ് വെഞ്ഞാറമൂട്, തിരുവനന്തപുരം). വിദ്യാർത്ഥികളായ സവിധൻ സുരേഷ്, സരിധൻ സുരേഷ് മക്കളാണ്.

കനത്ത മഴ: കോവളത്ത് ഇരുനിലക്കെട്ടിടം ചരിഞ്ഞു

വിഴിഞ്ഞം: ലക്ഷങ്ങൾ മുടക്കി നിർമിച്ച ഇരുനില ആഡംബര കെട്ടിടം ശക്തമായ മഴയിലുണ്ടായ വെള്ളക്കെട്ടിൽ ചരിഞ്ഞു. ഒരു ഭാഗം തകർന്നുവീണ് അപകടാവസ്ഥയിലായ കെട്ടിടത്തിൽനിന്ന് താമസക്കാരോട് മറ്റൊരിടത്തേക്കു മാറാൻ നിർദേശിച്ച് ഫയർ ഫോഴ്‌സ്. കെട്ടിടം തകരുന്ന സമയത്തും താമസക്കാരുണ്ടായിരുന്നെങ്കിലും അപകടം കൂടാതെ രക്ഷപ്പെട്ടു. ഇന്നലെ രാവിലെ മുതൽ പെയ്ത മഴയിൽ വെങ്ങാനൂർ വെണ്ണിയൂർ വീടാണ് തകർന്ന് ഉപയോഗശൂന്യമായത്. ആയൂർവേദ ഡോക്ടറായ മഹേഷ് 60 ലക്ഷം രൂപ മുടക്കി അടുത്ത കാലത്താണ് വീടു വിലയ്ക്കു വാങ്ങിയത്. ഒരു നിലയിൽ കോവളം തുണ്ടിൽ വീട്ടിൽ വിപിൻ രാജ് എന്നയാളും വാടകയ്ക്ക് താമസിക്കുന്നുണ്ട്. ഇവരെല്ലാം വീട്ടിൽ ഉണ്ടായിരുന്ന സമയത്താണ് ഒരു വശത്തേക്കു ചരിഞ്ഞത്. അതോടൊപ്പം അടുക്കളവരുന്ന ഭാഗം തകർന്നും വീണു. താഴ്ന്ന സ്ഥലത്തു മണ്ണു നിറച്ചു വീട് നിർമിച്ചതാണ് അപകടത്തിനു വഴിതെളിച്ചതെന്നു ഫയർഫോഴ്സ് അധികൃതർ പറയുന്നു. വീടുവച്ച് വില്പന നടത്തുന്ന വ്യക്തികളിൽ നിന്നു മഹേഷ് വിലക്ക് വാങ്ങിയ വീടാണിത്. ചരിവിനൊപ്പം വിള്ളലുകളുണ്ടായ വീടു പൂർണമായി ഉപയോഗശൂന്യമായതായും അധികൃതർ അറിയിച്ചു. അപകടാവസ്ഥയറിഞ്ഞു വിഴിഞ്ഞം ഫയർ ഫോഴ്സ് അസിസ്റ്റന്‍റ് സ്റ്റേഷൻ ഓഫീസർ ഷാജിയുടെ നേതൃത്വത്തിലുള്ള സംഘമെത്തിയാണു താമസക്കാരോടു മാറിത്താമസിക്കാനുള്ള നിർദേശം നൽകിയത്.

കാർഷിക സർവകലാശാലയും കൃഷി വകുപ്പും ഒന്നിച്ചുപ്രവർത്തിക്കേണ്ടത് അനിവാര്യം: ആര്‌. സിന്ധു

നേമം: ദക്ഷിണ മേഖല പ്രാദേശിക കാർഷിക ഗവേഷണ കേന്ദ്രത്തിന്‍റെ നേതൃത്വത്തിൽ 41-മത് പ്രാദേശിക ഗവേഷണ വിജ്ഞാനവ്യാപന ഉപദേശക ശില്പശാലയും കർഷക- ശാസ്ത്രജ്ഞ മുഖാമുഖവും വെള്ളായണി കാർഷിക കോളേജിൽ നടന്നു. കാർഷിക വികസന കർഷക ക്ഷേമ വകുപ്പ് അഡീഷണൽ ഡയറക്ടർ ആർ. സിന്ധു ശിൽപ്പശാല ഉദ്ഘാടനം ചെയ്തു. കര്‍ഷകരുടെ വരുമാനം വര്‍ധിപ്പിക്കുന്നതിനായി കാർഷിക സർവകലാശാലയും കൃഷി വകുപ്പും ഏകോപിതമായി പ്രവർത്തിക്കേണ്ടത് അനിവാര്യമാണെന്ന് അവർ ചൂണ്ടിക്കാട്ടി. കേരള സംസ്ഥാന ആസൂത്രണ ബോർഡ് അഗ്രി ചീഫ് എസ്.എസ്. നാഗേഷ് മുഖ്യപ്രഭാഷണം നടത്തി. കർഷക ശാസ്ത്രജ്ഞ മുഖാമുഖം പരിപാടിയിലൂടെ കർഷകർ അവതരിപ്പിച്ച പ്രശ്നങ്ങൾക്ക് സർവകലാശാലയിലെ വിദഗ്ധർ പരിഹാരമാർഗങ്ങൾ നിർദേശിച്ചു. കാർഷിക സർവകലാശാല വൈസ് ചാൻസിലർ ഡോ. ബി. അശോക് അധ്യക്ഷത വഹിച്ചു. കൂടാതെ കാർഷിക മേഖലയിലെ നൂതന സാങ്കേതിക വിദ്യകളുടെ പ്രദർശനവും ഉൽപ്പന്നങ്ങളുടെ വിപണനവും നടത്തി. കാർഷിക സർവകലാശാല ഗവേഷണ മേധാവി ഡോ. അനിത് കെ.എൻ, ഡീൻ ഓഫ് ഫാക്കൽറ്റി ഡോ. റോയ് സ്റ്റീഫൻ, പത്തനംതിട്ട ജില്ല പ്രിൻസിപ്പൽ കൃഷി ഓഫീസർ ഷേർലി സക്കറിയാസ്, ആത്മ കൊല്ലം പ്രോഗ്രാം ഡയറക്ടർ കെ.വി. ബിന്ദു, തിരുവനന്തപുരം ജില്ല കൃഷി ഡെപ്യൂട്ടി ഡയറക്ടർ ആർ. ലത, ദക്ഷിണ മേഖല കാർഷിക ഗവേഷണ കേന്ദ്രം മേധാവി ഡോ. ശാലിനിപിള്ള, കാർഷിക കോളേജ് അസിസ്റ്റന്‍റ് പ്രഫ. ഡോ. ജി. ഗായത്രി എന്നിവർ സംസാരിച്ചു. കാർഷികമേഖലയിലെ വിവിധ വിഷയങ്ങൾ പ്രതിപാദിക്കുന്ന ഇരുപതോളം ലഘുലേഖകളുടേയും കൈപ്പുസ്തകങ്ങളുടേയും പ്രകാശനം നടത്തി. കൃഷിവകുപ്പ് ഉദ്യോഗസ്ഥർ, അധ്യാപകർ, വിദ്യാർഥികൾ എന്നിങ്ങനെ 150 ലധികം ആളുകൾ പരിപാടിയിൽ പങ്കെടുത്തു.

പണം, സ്വര്‍ണാഭരണ തട്ടിപ്പ് : ഫോര്‍ട്ട് സ്റ്റേഷനില്‍ ജ്വല്ലറിക്കെതിരേ ഇതുവരെ ലഭിച്ചത് 130 പരാതികള്‍

പേരൂര്‍ക്കട: പണം തട്ടിപ്പുമായി ബന്ധപ്പെട്ട് ജ്വല്ലറിക്കെതിരേ തിരുവനന്തപുരം സിറ്റിയിലും റൂറല്‍ ഭാഗത്തുമായി താമസിക്കുന്ന കൂടുതല്‍ പേര്‍ ഫോര്‍ട്ട് സ്റ്റേഷനില്‍ പരാതി നല്‍കി. മേലേ പഴവങ്ങാടിയില്‍ പ്രവര്‍ത്തിച്ചുവന്ന ജ്വല്ലറിക്കെതിരേയാണ് പരാതി നല്‍കിയിരിക്കുന്നത്. കസ്റ്റമേഴ്‌സ് നല്‍കുന്ന പഴയ സ്വര്‍ണാഭരണങ്ങളും പണവും നിശ്ചിത വര്‍ഷത്തേക്ക് ഫിക്‌സഡ് ഡപ്പോസിറ്റായി സ്വീകരിക്കുമെന്നും അവര്‍ക്ക് ആകര്‍ഷകമായ പലിശ നല്‍കുമെന്നുമായിരുന്നു ജ്വല്ലറിയുടെ വാഗ്ദാനം. ഇങ്ങനെ ഒരു നിശ്ചിത കാലാവധിയിലേക്ക് ഡെപ്പോസിറ്റ് ചെയ്യുന്നവര്‍ സ്വര്‍ണാഭരണങ്ങള്‍ വാങ്ങാനെത്തുമ്പോള്‍ അവര്‍ക്കു പലിശ നല്‍കുമെന്നും പുതിയ ആഭരണങ്ങള്‍ക്ക് പണിക്കൂലി ഈടാക്കില്ലെന്നുമായിരുന്നു വാഗ്ദാനം. പണം സ്ഥിരനിക്ഷേപം നടത്തുന്നവര്‍ക്ക് 12.5 ശതമാനം മുതല്‍ 19 ശതമാനം വരെ പലിശയാണ് ജ്വല്ലറി വാഗ്ദാനം ചെയ്തിരുന്നത്..! ചിലര്‍ക്ക് ഇത്തരത്തില്‍ ആറുമാസം വരെ പലിശ ലഭിച്ചതായി പറയുന്നുണ്ട്. ഒടുവില്‍ വിശ്വാസംമൂത്ത ഇവര്‍ പണവും പലിശയും ഉള്‍പ്പെടെ വീണ്ടും നിക്ഷേപിച്ച് കബളിപ്പിക്കപ്പെട്ടിട്ടുമുണ്ട്. കഴിഞ്ഞ ഒന്നരമാസത്തിനിടെ 130-ഓളം പരാതികളാണ് ഫോര്‍ട്ട് പോലീസിന് ജ്വല്ലറിക്കെതിരേ ലഭിച്ചത്. ഇതില്‍ 25 പരാതികളിന്മേല്‍ എഫ് ഐആര്‍ രേഖപ്പെടുത്തിക്കഴിഞ്ഞതായി ഫോര്‍ട്ട് സിഐ ശിവകുമാര്‍ അറിയിച്ചു. ഇപ്പോഴും വിവിധ സ്ഥലങ്ങളില്‍നിന്നു പരാതികള്‍ വന്നുകൊണ്ടിരിക്കുകയാണ്. തട്ടിപ്പിനെതിരേ ജ്വല്ലറി ഉടമയുടെ പൂജപ്പുരയിലെ വസതിക്കുമുന്നില്‍ കൊല്ലം സ്വദേശിയായ വയോധികന്‍ കഴിഞ്ഞ ഏപ്രില്‍ മാസത്തില്‍ സമരമിരിക്കുകയും കരമന സ്വദേശികളായ നാലുപേര്‍ ആത്മഹത്യാ ശ്രമം നടത്തുകയും ചെയ്തിരുന്നു. ഇതുമായി ബന്ധപ്പെട്ട് പൂജപ്പുര പോലീസ് കേസുകള്‍ രജിസ്റ്റര്‍ ചെയ്തിട്ടുള്ളതാണ്. മേലേ പഴവങ്ങാടിയിലെ ജ്വല്ലറി ഷോറൂം കഴിഞ്ഞ രണ്ടുമാസമായി അടഞ്ഞുകിടക്കുകയാണ്.

വിമാനാപകടം; മരണപ്പെട്ടവർക്ക് വെള്ളനാടിന്‍റെ ആദരാഞ്ജലി

നെടുമങ്ങാട്: അഹമ്മദാബാദ് വിമാനാപകടത്തിൽ മരണപ്പെട്ടവർക്ക് വെള്ളനാടിന്‍റെ ആദരാഞ്ജലി. വെള്ളനാട്ടുകാരൻ ജനകീയ കൂട്ടായ്മയുടെ നേതൃത്വത്തിൽ ജംഗ്ഷനിൽ ദീപം തെളിയിച്ചാണ് ആദരാഞ്ജലി അർപ്പിച്ചത്. പഞ്ചായത്തംഗം വാളിയറ സന്തോഷ്, വെള്ളനാട്ടുകാരൻ ജനകീയ കൂട്ടായ്മ രക്ഷാധികാരി ആർ. മണികണ്ഠൻ, പ്രസിഡന്‍റ് കെ.എസ്. പ്രവീൺകുമാർ, സെക്രട്ടറി സി.എസ്. സച്ചിൻ, വൈസ് പ്രസിഡന്‍റ് വെള്ളനാട് രാജേഷ്, ജോയിന്‍റ് സെക്രട്ടറിമാരായ ആർ. പ്രമോദ്, സാരംഗ്, ശ്രീകിരൺ, ദേവനാരായണൻ തുടങ്ങിയവർ പങ്കെടുത്തു.

ആശമാരുടെ സമരം സർക്കാരിന് ശാപമാകും: കെ. മുരളീധരൻ

നെടുമങ്ങാട്: ആശാവർക്കർമാർ അതിജീവനത്തിനായി നടത്തുന്ന സമരം ഇടതു സർക്കാരിന് ശാപമായി മാറുമെന്നും, ജനകീയ കോടതിയിൽ ഈ സർക്കാർ ഒലിച്ചുപോകുമെന്നും മുൻ കെപിസിസി പ്രസിഡന്‍റ് കെ. മുരളീധരൻ അഭിപ്രായപ്പെട്ടു. ആശാവർക്കർമാരുടെ സമരത്തിന് പിന്തുണ തേടിയുള്ള ആശാവർക്കർമാരുടെ സമരസന്ദേശയാത്രയുടെ തിരുവനന്തപുരം ജില്ലയിലെ ഒന്നാമത്തെ സമാപന സമ്മേളനം നെടുമങ്ങാട്ട് ഉദ്ഘാടനം ചെ യ്യുകയായിരുന്നു കെ. മുരളീധരൻ. ജനകീയ സമരങ്ങൾ സർക്കാറുകൾ കാണാതിരുന്നാൽ കാലം കണക്കു ചോദിക്കും എന്നും അദ്ദേഹം അഭിപ്രായപ്പെട്ടു. നെടുമങ്ങാട് കച്ചേരി ജംഗ്ഷനിൽ നടന്ന സ്വീകരണ യോഗത്തിൽ സമരജാഥാ ക്യാപ്റ്റൻ എം.എ. ബിന്ദു സ്വീകരണം ഏറ്റുവാങ്ങി. സമരസമിതി നേതാക്കളായ എസ്. മിനി, റോസമ്മ, ഉഷ കുമാരി, സ്വാഗതസംഘം ഭാരവാഹികളായ വട്ടപ്പാറ ചന്ദ്രൻ, പൂങ്കുമൂട് അജി, സംഗീതാ രാജേഷ്, അബ്ദുൽ കലാം, അഡ്വ. ഫാത്തിമ, തുടങ്ങിയവർ പ്രസംഗിച്ചു.

റോഡുകൾ തകർന്നു; ആദിവാസി ഊരുകൾ ഒറ്റപ്പെട്ടു

തകർന്നത് അഞ്ചിലധികം റോഡുകൾ നെയ്യാർഡാം: റോഡുകൾ തകർന്നു. ആദിവാസി ഊരുകൾ ഒറ്റപ്പെട്ടു. കനത്ത മഴയിൽ അഗസ്ത്യവനത്തിലെ ആദിവാസി കോളനികളാണ് ഒറ്റപ്പെട്ടത്. നിർമിച്ചതും നിർമാണത്തിലിരുന്നതുമായ റോഡുകളാണ് കനത്ത മഴ വെള്ളപാച്ചിലിൽ കുത്തിയൊലിച്ചുപോയത്. അഗസ്ത്യവനത്തിലെ കുറ്റിച്ചൽ പഞ്ചായത്തിലെ ചോനംപാറ മുതൽ വാലിപ്പാറ, മണ്ണാംകോണം, മുക്കോത്തിവയൽ എന്നിവിടങ്ങളിലെ റോഡുകളാണ് തകർന്നത്. പുറം നാട്ടിൽ പെയ്യുന്ന മഴയേക്കാൾ ഇരട്ടിയിലാണ് വനത്തിൽ മഴ പെയ്യുന്നത്. ഈ ജലപ്രവാഹം കാരണം റോഡുകൾ ഇല്ലാതായ അവസ്ഥയായി. പാറക്കല്ലും തടികളും ഈ റോഡുകളിൽ നിറഞ്ഞിരിക്കുകയാണ്. പുറംനാട്ടിൽ നിന്നും 25 കിലോ മീറ്റർ അകലെയാണ് ഈ ഊരുകൾ. ഇവിടെ എത്താൻ ഉതുകുന്ന റോഡുകൾ തകർന്നതോടെ ഏതാണ്ട് പൂർണമായും ഒറ്റപ്പെട്ട നിലയിലായി ആദിവാസികളായ കാണിക്കാർ. പട്ടികവർഗ ഫണ്ടിൽനിന്നം കേന്ദ്രസർക്കാരിന്‍റെ ഫണ്ടിൽ നിന്നും പണിത റോഡുകളാണ് ഇവിടെയുള്ളത്. റോഡുകളുടെ നിർമാണത്തിൽ തന്നെ അപാകതകളും അശാസ്ത്രിയതയും ഉയർന്നിരുന്നതാണ്. പേരിന് ടാറും മെറ്റലും മാത്രമിട്ടു നിർമിച്ച റോഡുകളാണ് തകർന്ന് ഇല്ലാതെയായത്. ഇങ്ങിനെ നിർമിച്ച റോഡുകളാണ് ഈ മഴക്കാലത്ത് തകർന്നത്. വനത്തിൽ നിർമിക്കുന്ന റോഡുകൾ ചില ശാസ്ത്രീയ വശങ്ങൾകൂടി പരിഗണിച്ച് നിർമിക്കണമെന്ന ചട്ടംപോലും പാടെ അവഗണിച്ചതുമൂലം വനത്തിലെ അഞ്ചോളം റോഡുകളാണ് തകർന്നത്. ഊരുകളിലേക്ക് റേഷൻ സാധനങ്ങളും മെഡിക്കൽ സംഘങ്ങളും മറ്റും എത്തുന്നതും ഈ റോഡുകളിലൂടെയാണ്. മാത്രമല്ല ആദിവാസികൾ പുറം നാട്ടിലെത്തുന്നതും സ്‌കൂൾ തുറക്കുന്നതോടെ കുട്ടികൾ എത്തുന്നതും ഇപ്പോൾ നടക്കാത്ത സ്ഥിതിയായി മാറി. റോഡുകൾ ആദിവാസികൾ തന്നെ മിനുക്കുപണികൾ നടത്തിയെങ്കിലും അടുത്ത മഴ വന്നതോടെ അതും ഒലിച്ചുപോയി.

ഇന്‍റര്‍നാഷണല്‍ ഷോര്‍ട്ട് ഫിലിം ഫെസ്റ്റിവല്‍: പുരസ്‌കാരങ്ങള്‍ വിതരണം

വെള്ളറട: അസോസിയേഷന്‍ ഓഫ് ഷോര്‍ട്ട് ഫിലിം മൂവി മേക്കേഴ്‌സ് ആര്‍ട്ടിസ്റ്റും സംസ്‌കാരസാഹിതി ജില്ലാ കമ്മിറ്റിയും സംയുക്തമായി സംഘടിപ്പിച്ച ഇന്‍റര്‍നാഷണല്‍ ഷോര്‍ട്ട് ഫിലിം ഫെസ്റ്റിവല്‍ സമാപിച്ചു. സംസ്‌കാരസാഹിതി സംസ്ഥാന ചെയര്‍മാന്‍ സി.ആര്‍. മഹേഷ് എംഎല്‍എയുടെ അധ്യക്ഷതയില്‍ പ്രതിപക്ഷ നേതാവ് വി.ഡി. സതീശന്‍ ഉദ്ഘാടനം ചെയ്തു. മുന്‍ സ്പീക്കര്‍ എന്‍. ശക്തന്‍ മുഖ്യപ്രഭാഷണം നടത്തി. സൂര്യ കൃഷ്ണമൂര്‍ത്തി, കാവാലം ശ്രീകുമാര്‍, രാജീമേനോന്‍, ഡോക്ടര്‍ ആര്‍.എസ്. പ്രദീപ്, എന്‍.വി. പ്രദീപ് കുമാര്‍, അനി വര്‍ഗീസ്, മനേഷ്, പുഴനാട് ഗോപന്‍, അനീഷ് മേനോന്‍, ശ്രീകാന്ത് ടി.ആര്‍. നായര്‍, യവനിക ഗോപാലകൃഷ്ണന്‍, മോഹനന്‍ അയിരൂര്‍, കെ.എം. ഉണ്ണികൃഷ്ണന്‍, എന്നിവര്‍ പുരസ്‌കാരങ്ങള്‍ വിതരണം ചെയ്തു.

അഞ്ചുമാസത്തിനിടെ പൊട്ടിയതു നാലുതവണ; വില്ലനായി എസി പൈപ്പ്

ശനിയാഴ്ച രാവിലെ മുതല്‍ കുടിവെള്ളം മുടങ്ങി പേരൂര്‍ക്കട: ഈ വര്‍ഷം അഞ്ചുമാസത്തിനിടെ നാലാംതവണയും എസി പൈപ്പ് പൊട്ടിയതോടെ കുടപ്പനക്കുന്ന് നിവാസികളുടെ കുടിവെള്ളം പൂര്‍ണമായും മുടങ്ങി. ശനിയാഴ്ച രാവിലെയാണ് പാതിരിപ്പള്ളി-കുടപ്പനക്കുന്ന് റോഡില്‍ 200 എംഎം എസി (ആസ്ബസ്‌റ്റോസ് സിമന്‍റ്) പൈപ്പ് പൊട്ടിയത്. കഷ്ടിച്ച് 40 വര്‍ഷം കാലാവധി പറയുന്ന പൈപ്പ് 1980-കളിലാണ് സ്ഥാപിക്കപ്പെട്ടത്. പേരൂര്‍ക്കട ടാങ്കില്‍നിന്ന് ഊന്നംപാറ, കുടപ്പനക്കുന്ന്, എംഎല്‍എ റോഡ്, പാതിരിപ്പള്ളി, ബ്രീസ് ഗാര്‍ഡന്‍സ് വഴി പുല്ലിപ്ര വരെയുള്ള ഏകദേശം മൂന്നര കിലോമീറ്റര്‍ ദൈര്‍ഘ്യമാണ് പൈപ്പിനുള്ളത്. ഈ വര്‍ഷം ഫെബ്രുവരി, മാര്‍ച്ച്, ഏപ്രില്‍ മാസങ്ങളില്‍ കുടപ്പനക്കുന്ന് ജംഗ്ഷനില്‍ ഇതേ പൈപ്പ് പൊട്ടി ദിവസങ്ങളോളം ജനങ്ങളുടെ കുടിവെള്ളം മുടങ്ങിയിരുന്നു. മേയ്മാസത്തില്‍ പൈപ്പ് പൊട്ടാത്തത് ജനങ്ങള്‍ക്ക് ആശ്വാസമായി. അതിനിടെയാണ് ജൂണ്‍ മാസത്തില്‍ വീണ്ടും പൊട്ടിയിരിക്കുന്നത്. പൈപ്പിന്‍റെ കാലാവധി കഴിഞ്ഞുവെന്നു സൂചിപ്പിക്കുന്ന വിധത്തില്‍ പൊട്ടിയ എസി പൈപ്പ് പൊളിഞ്ഞിളകുന്ന വിധത്തിലായിരുന്നു. മണിക്കൂറുകളോളം തൊഴിലാളികള്‍ പൈപ്പിന്‍റെ പണിയിലേര്‍പ്പെട്ടുവെങ്കിലും ഊറ്റുവെള്ളവും പൈപ്പിലെ ജലമൊഴുക്കുമാണ് പണി ദീര്‍ഘിപ്പിച്ചത്. പഴയ പൈപ്പും വിളക്കിച്ചേര്‍ക്കുന്ന റിംഗുകളും നീക്കിയശേഷമാണ് പുതിയ പൈപ്പ് സ്ഥാപിച്ചത്. വൈകുന്നേരം ആറുമണിയോടുകൂടി അറ്റകുറ്റപ്പണി പൂര്‍ത്തീകരിച്ചശേഷമാണ് പമ്പിംഗ് പുനരാരംഭിച്ചത്. ഉയര്‍ന്ന സ്ഥലങ്ങളില്‍ രാത്രി 11 മണിയോടുകൂടിയാണ് കുടിവെള്ളം എത്തിയത്. പൈപ്പ് പൊട്ടിയതോടെ പേരൂര്‍ക്കട, കുടപ്പനക്കുന്ന്, ഊന്നംപാറ, ദര്‍ശന്‍ നഗര്‍, ഹരിത നഗര്‍, സിവില്‍സ്റ്റേഷന്‍ റോഡ്, എംഎല്‍എ റോഡ്, മരിയനഗര്‍, പാതിരിപ്പള്ളി, ബ്രീസ് ഗാര്‍ഡന്‍സ്, ഭഗത്‌സിംഗ് നഗര്‍, പുല്ലിപ്ര തുടങ്ങിയ നിരവധി സ്ഥലങ്ങളില്‍ കുടിവെള്ളം പൂര്‍ണമായും മുടങ്ങുകയായിരുന്നു. പുതിയ പൈപ്പ്: ടെന്‍ഡര്‍ നടപടിയിലേക്ക് എത്തിയതായി വാട്ടര്‍ അഥോറിറ്റി പേരൂര്‍ക്കട: പേരൂര്‍ക്കട മുതല്‍ പുല്ലിപ്ര വരെയുള്ള എസി പൈപ്പ് മാറ്റി പുതിയ പൈപ്പ് സ്ഥാപിക്കുന്ന പ്രൊപ്രോസല്‍ 2024-ല്‍ സമര്‍പ്പിച്ചതാണെന്നും ഇതു ടെന്‍ഡര്‍ നടപടികളിലേക്ക് എത്തിനില്‍ക്കുകയാണെന്നും വാട്ടര്‍ അഥോറിറ്റി സൂചിപ്പിച്ചു. മൂന്നര കിലോമീറ്ററോളം വരുന്ന പൈപ്പാണ് അമൃത് പദ്ധതിയില്‍ ഉള്‍പ്പെടുത്തി മാറ്റിസ്ഥാപിക്കുന്നത്. ഇതില്‍ കേന്ദ്രത്തിന്‍റെയും സംസ്ഥാനത്തിന്‍റെയും തിരുവനന്തപുരം നഗരസഭയുടെയും ഇടപെടലുകളുണ്ട്. രണ്ടു കോടി രൂപയ്ക്കു മുകളില്‍ പ്രതീക്ഷിക്കുന്നതാണ് പുതിയ പ്രോജക്ട്. രണ്ടു പ്രോജക്ടുകളാണ് ഇതുമായി ബന്ധപ്പെട്ടു നടപ്പാക്കുന്നത്. അതില്‍ ഒന്നാണ് പേരൂര്‍ക്കട-പുല്ലിപ്ര എസി പൈപ്പ് മാറ്റിസ്ഥാപിക്കല്‍. രണ്ടുപ്രോജക്ടും ഒന്നിച്ചു നടപ്പാക്കാനാണ് ലക്ഷ്യമിടുന്നത്. ഇതിന് 5 കോടിയോളം രൂപ ചെലവു പ്രതീക്ഷിക്കുന്നുണ്ട്.

പള്ളിയിലെ മോഷണം: കള്ളനെ പിടികൂടി പോലീസിൽ ഏൽപ്പിച്ചു

കുറ്റിച്ചൽ: പള്ളിയിലെ ലെ മോഷണത്തിനിടെ കള്ളനെ കൈ യോടെ പിടികൂടി വിശ്വാസികൾ പോലീസിൽ ഏൽപ്പിച്ചു. തമിഴ്നാട് സ്വദേശി സെന്തിൽ എന്നു പറയുന്ന ആളെയാണ് പോലീസിന് കൈമാറിയത്. കുറ്റിച്ചൽ തച്ചൻകോട് വിശുദ്ധ യോവാക്കീം പള്ളിയിൽ ശനിയാഴ്ച പുലർച്ചെ നാലുമണിയോടൊയിരുന്നു സംഭവം. പള്ളിയുടെ പരിസരത്ത് അപരിചിതനായ ആളെക്കണ്ടു വിശ്വാസികൾ ഓടികൂടി ഇയാളെ തടഞ്ഞുവച്ചു പരിശോധിച്ചപ്പോഴാണ് മോഷണമാണ് എന്നു കണ്ടെത്തിയത്. ഇയാളുടെ പക്കൽനിന്നും നാണയത്തുട്ടുകൾ, നോട്ടുകൾ എന്നിവ കണ്ടെത്തി. തുടർന്നു നടത്തിയ പരിശോധനയിൽ കാണിക്കവഞ്ചി പൊട്ടിച്ച നിലയിലും കണ്ടെത്തി. ഇതോടെ ഇയാളെ നെയ്യാർ ഡാം പോലിസിനെ വരുത്തി കൈമാറി. മുമ്പ് കുറ്റിച്ചൽ ആർകെ ഓഡിറ്റോറിയത്തിൽ വിവാഹത്തിനുവന്ന കുട്ടിയെ മിഠായി കാണിച്ചു വിളിച്ചു പുറത്തേക്ക് കൊണ്ടുപോകാൻ ശ്രമിച്ചതിന് ഇയാളെ പിടിച്ചുവച്ചു പോലിസിനെ കൈമാറിയിരുന്നു. നെയ്യാർ ഡാം പോലീസിന്‍റെ കസ്റ്റഡിയിലായിരുന്ന ഇയാളെ പരാതി ഒത്തുതീർപ്പാക്കി തമിഴ്നാട് ബസിൽ കയറ്റി വിട്ടു. മുൻപും ഇയാളെകെതിരെയുള്ള കേസിൽ പരാതി പിൻവലിച്ചതോടെ തമിഴ്നാട്ടിലേക്ക് കയറ്റി അയച്ചിരുന്നു.

ശബ്ദ ഹിയറിംഗ് പട്ടത്ത് പ്രവർത്തനം തുടങ്ങി

തിരുവനന്തപുരം: കേള്‍വിക്കുറവ് അനുഭവിക്കുന്നവര്‍ക്കു ശാശ്വത പരിഹാരമായി നിലകൊള്ളുന്ന ശബ്ദ ഹിയറിംഗ് എയ്ഡ് സെന്‍റര്‍ എല്‍എല്‍പി (രജി.) തിരുവനന്തപുരം ഈസ്റ്റ് പട്ടത്തുള്ള റ്റികെഡി റോഡില്‍ ഐഎസ്ആര്‍ഒ പോളിക്ലിനിക്കിനു സമീപം പ്രവര്‍ത്തനമാരംഭിച്ചു. പരിചയസമ്പന്നരും വിദഗ്ധരുമായ ഓഡിയോളജിസ്റ്റുകളുടെയും അതിനൂതന സാങ്കേതിക വിദ്യയുടെയും സഹായത്തോടെ കുട്ടികള്‍ക്കും മുതിര്‍ന്നവര്‍ക്കുമായി കേള്‍വി പരിശോധനയും ശ്രവണ സഹായികളുടെ ട്രയലും ജൂണ്‍ 30 വരെ പട്ടത്തുള്ള ക്ലിനിക്കില്‍ ഉണ്ടായിരിക്കും. പുറത്തു കാണാത്ത രീതിയില്‍ ചെവിക്കുള്ളില്‍ വയ്ക്കുന്ന ജര്‍മന്‍ നിര്‍മിത ബ്രാന്‍ഡഡ് ശ്രവണ സഹായികള്‍ പ്രത്യേക ഡിസ്കൗണ്ടിലും പഴയ ശ്രവണ സഹായികള്‍ എക്സ്ചേഞ്ച് ഓഫറിലും ഉദ്ഘാടന ഓഫറായി നല്‍കുന്നതാണ്. ബാറ്ററി ശ്രവണ സഹായികള്‍ മാറ്റി പുതിയ റീചാര്‍ജിംഗ് ശ്രവണസഹായികളായി മാറ്റിയെടുക്കാനും അവസരമുണ്ട്. തിരുവനന്തപുരം ലൂര്‍ദ് ഫൊറോന പള്ളി വികാരി ഫാ. ജോണ്‍ തെക്കേക്കര ക്ലീനിക്കിന്‍റെ ആശീര്‍വാദകര്‍മം നടത്തി. നോവലിസ്റ്റ് ജോര്‍ജ് ഓണക്കൂര്‍ ഉദ്ഘാടനം ചെയ്തു. പെരുങ്കടവിള പഞ്ചായത്ത് പ്രസിഡന്‍റ് എസ്. സുരേന്ദ്രന്‍, ജെ.ആര്‍. പദ്മകുമാര്‍, ഐ.പി. ബിനു, വിനോദ് തിരുമൂലപുരം, കോട്ടത്തല മോഹനന്‍, ഡോ.ഡി. ഹരിപ്രസാദ്, ബില്‍ജിന്‍ തോമസ്, സാന്‍ന്താ ജോസ്, ഡെയ്സി ജേക്കബ്, അമ്പിളി ജേക്കബ് പ്രസംഗിച്ചു.

കാപ്പ നിയമപ്രകാരം ഒമ്പതാം തവണയും പിടിയിൽ

പേരൂർക്കട: കാപ്പ നിയമപ്രകാരം രണ്ടുപേരെ പൂജപ്പുര പോലീസ് പിടികൂടി. ഇതിൽ ഒരാൾക്കെതിരേ കാപ്പ നിയമം പ്രയോഗിക്കുന്നത് ഇത് ഒമ്പതാം തവണ. തിരുമല പുന്നക്കാമുകൾ കല്ലറമഠം ക്ഷേത്രത്തിനു സമീപം ഉണ്ണി എന്നു വിളിക്കുന്ന ശ്രീജിത്ത് (34) ആണ് ഒമ്പതാം തവണ പിടിയിൽ ആയിരിക്കുന്നത്. പുന്നയ്ക്കാമുകൾഇലക്ട്രിസിറ്റി ബോർഡിനു സമീപം നെടും ുറത്ത് വീട്ടിൽ മുഹമ്മദ് റെെസ് (19) എന്നയാളും കാപ്പ നിയമം പ്രകാരം പിടിയിലായിട്ടുണ്ട്. കൊലപാതക ശ്രമം, കഞ്ചാവ് കൈവശം വയ്ക്കൽ, മോഷണം, അടിപിടി തുടങ്ങിയ നിരവധി ക്രിമിനൽ കേസുകളിലെ പ്രതികളാണ് ഇരുവരും. ശ്രീജിത്ത് കഴിഞ്ഞ മാർച്ച് മാസത്തിലാണ് എട്ടാമത്തെ കരുതൽ തടങ്കലിനു ശേഷം പുറത്തിറങ്ങിയത്. ഏറ്റവും ഒടുവിൽ പൂജപ്പുര എസ്ഐ സുധീഷിനെ കുത്തി പ്പരിക്കേൽപ്പിച്ചശേഷം രക്ഷപ്പെട്ടതോടുകൂടിയാണ് ഇയാൾക്കെതിരേ വീണ്ടും കാപ്പ നിയമം പ്രയോഗിക്കാൻ ജില്ലാ കളക്ടർ ഉത്തരവിട്ടത്. ഇതിന്‍റെ അടിസ്ഥാനത്തിൽ സിറ്റി പോലീസ് കമ്മീഷണർ തോംസൺ ജോസിന്‍റെ നിർദേശപ്രകാരം പ്രതികളെ പിടികൂടുകയായിരുന്നു. ഇരുവരേയും പൂജപ്പുര സെൻട്രൽ ജയിലിൽ കരുതൽ തടങ്കലിൽ പാർപ്പിച്ചിട്ടുണ്ട്.

സാൽവേഷൻ ആർമി സംസ്ഥാന നേതാക്കൾക്ക് യാത്രയയപ്പ്

തിരുവനന്തപുരം: സാൽവേഷൻ ആർമി ഇന്ത്യാ വെസ്റ്റേണ്‍ (മുംബൈ) ടെറിട്ടോറിയൽ കമാൻഡറായി സ്ഥലം മാറി പോകുന്ന സംസ്ഥാനാധിപൻ കേണൽ ജോണ്‍ വില്യം പൊളിമെറ്റ്‌ല, വനിതാ ശുശ്രൂഷകളുടെ സംസ്ഥാന പ്രസിഡന്‍റായി പോകുന്ന കേണൽ രത്നസുന്ദരി, ഇന്ത്യാ സെൻട്രൽ ടെറിട്ടറിയുടെ (ചെന്നൈ) മുഖ്യകാര്യദർശിയായി നിയമിതനാകുന്ന ലെഫ്. കേണൽ ഗുർണം മസി, വനിത ശുശ്രൂഷകളുടെ സംസ്ഥാന സെക്രട്ടറിയായി പോകുന്ന ലെഫ്. കേണൽ റസിയാ ഗുർണം എന്നിവർക്ക് യാത്രയയപ്പു നൽകി. കവടിയാർ കമ്മീഷണർ പി. ഇ. ജോർജ് മെമ്മോറിയൽ ചർച്ചിൽ നടന്ന യോഗത്തിൽ പേഴ്സണൽ സെക്രട്ടറി ലെഫ്. കേണൽ ജോസ് പി. മാത്യു അധ്യക്ഷനായി. ബിലീവേഴ്സ് ഈസ്റ്റേണ്‍ ചർച്ച് തിരുവനന്തപുരം അതിരൂപത ബിഷപ്പ് റൈറ്റ് റവ. ഡോ. മാത്യൂസ് മോർ സിൽവാനിയോസ്, കെസിസി ജനറൽ സെക്രട്ടറി ഡോ. പ്രകാശ് പി തോമസ്, ഇന്ത്യാ ഇവാഞ്ചലിക്കൽ ലൂഥറണ്‍ ചർച്ച് സിനഡ് പ്രസിഡന്‍റ് റവ.മോഹനൻ മാനുവേൽ, ആക്ട്സ് ട്രഷറർ സാജൻ വേളൂർ, ലെഫ്.കേണൽ സജു ഡാനിയേൽ, ലെഫ്. കേണൽ എൻ.ഡി. ജോഷ്വാ, ലെഫ്. കേണൽ സി.ജെ. ബെന്നി മോൻ, കെസിസി ജില്ലാ സെക്രട്ടറി റവ. ഡോ. എൽ.ടി. പവിത്ര സിങ്ങ്, അടൂർ ഡിവിഷണൽ കമാൻഡർ ലെഫ്. കേണൽ യോഹന്നാൻ ജോസഫ്, കെസിസി വനിതാ കമ്മീഷൻ ജില്ലാ ചെയർപേഴ്സണ്‍ വിനീതാ ജോർജ്, ലെഫ്.കേണൽ മോളമ്മ ഗബ്രിയേൽ, ജെയ്സൻ പി. ജോണ്‍സണ്‍ കൊട്ടാരക്കര, ജോസിന ജോസ് തിരുവല്ല, മേജർ എബനേസർ യോന, മേജർ റോസമ്മ ഇസ്രായേൽ, മേജർ ഷേർളി കനകരാജ്, എന്നിവർ പ്രസംഗിച്ചു. ലെഫ്. കേണൽ റസിയാ ഗുർണം, ലെഫ്. കേണൽ ഗുർണം മസി, കേണൽ രത്നസുന്ദരി എന്നിവർ മറുപടി പ്രസംഗം നടത്തി. സംസ്ഥാനാധിപൻ കേണൽ ജോണ്‍ വില്യം പൊളിമെറ്റ്‌ല സന്ദേശം നൽകി. കമ്മീഷണർ എം.സി. ജെയിംസ് പ്രാർഥിച്ച് ആശീർവദിച്ചു.

കടലാക്രമണം അതിരൂക്ഷം; തീരദേശത്ത നൂറുകണക്കിനു വീടുകൾ ഭീഷണിയിൽ

തിരുവനന്തപുരം: ജില്ലയുടെ തീരപ്രദേശങ്ങളിൽ കഴിഞ്ഞ രണ്ടു ദിവസങ്ങളിലായി കടലാക്രമണം അതിരൂക്ഷം. 10 മീറ്ററോളം ദൂരത്തിൽ തീരം കവർന്നു കടൽ കയറിയതോടെ തീരദേശവാസികൾ ഭീതിയിലാണ്. അധികൃതർ തിരിഞ്ഞു നോക്കാത്തതിനെ തുടർന്ന് തീരദേശവാസികളും മത്സ്യത്തൊഴിലാളി സംഘടനാ നേതാക്കളും മണൽ ചാക്കുകളിൽ നിറച്ചു പ്രതിരോധ പ്രവർത്തനം നടത്തുകയാണ്. വെട്ടുകാട്, ശംഖുംമുഖം, വലിയതുറ മേഖലകളിലാണ് കടലാക്രമണം അതി രൂക്ഷമായത്. ചിലയിടങ്ങളിൽ അടുക്കിയിരുന്ന ജിയോബാഗുകൾ തകർത്താണു തീരത്തേയ്ക്ക് കടൽ കയറുന്നത്. ജനപ്രതിനിധികൾ അടക്കം ആരും തിരിഞ്ഞു നോക്കാത്തതിനെ തുടർന്നു സർക്കാർ തലത്തിലെ പ്രതിരോധ പ്രവർത്തനങ്ങൾ ഒന്നും നടക്കുന്നില്ലെന്നു മത്സ്യത്തൊഴിലാളികൾ ആരോപിച്ചു. ഇംഗ്ലീഷ് ഇന്ത്യൻ ക്ലേ കന്പനി നൽകുന്ന മണൽ ചാക്കുകളിൽ നിറച്ചാണു കടലാക്രമണത്തിൽനിന്നു വീടുകൾക്കു പ്രതിരോധ കവചമൊരുക്കുന്നതെന്നു സ്വതന്ത്ര മത്സ്യത്തൊഴിലാളി ഫെഡറേഷൻ സംസ്ഥാന പ്രസിഡന്‍റ് പി. സ്റ്റെല്ലസ് ദീപികയോടു പറഞ്ഞു. കപ്പൽ മുങ്ങിയ അപകടത്തിനുശേഷം കടലാക്രമണം തുടങ്ങിയിരുന്നു. മഴ ശക്തമായതോടെ കഴിഞ്ഞ രണ്ടുദിവസമായി കടലാക്രമണം അതിരൂക്ഷമായി. തീരപ്രദേശങ്ങളിലെ ആയിരക്കണക്കിനു വീടുകളാണ് നിലനിൽപ്പു ഭീഷണി നേരിടുന്നത്. കൂറ്റൻ തിരമാലകളിൽനിന്നു വീടുകളുടെ അടിസ്ഥാനം സംരക്ഷിക്കുന്നതിനായി മത്സ്യത്തൊഴിലാളികൾ സ്വന്തമായി മണൽ ചാക്കുകൾ അടുക്കുകയാണെന്നും അദ്ദേഹം പറഞ്ഞു. കടലാക്രമണം തടയാൻ ആവശ്യമായ സംവിധാനങ്ങൾ ഒരുക്കുന്നതിൽ സർക്കാരിന് ഇനിയും കഴിയാത്തതാണ് വലിയ നാശനഷ്ടങ്ങളിലേക്കും ഭീഷണിയിലേക്കും നയിക്കുന്നതെന്നു തീരദേശവാസികൾ പറയുന്നു. കപ്പൽ അപകടത്തെ തുടർന്നുള്ള പ്ലാസ്റ്റിക് തരികൾ പൂർണമായി നീക്കം ചെയ്യാത്തതിനെ തുടർന്നു തീരമേഖല ദുരിതം നേരിടുന്നതിനിടെയാണ് കടലാക്രമണവും അതിരൂക്ഷമായി തുടരുന്നത്.

കഠിനാധ്വാനത്തിലൂടെ ജീവിതവിജയം നേടണം: ആന്‍റണി രാജു എംഎല്‍എ

ഉന്നത വിജയം നേടിയ വിദ്യാര്‍ഥികള്‍ക്ക് ദീപികയുടെ ആദരം തിരുവനന്തപുരം: ആത്മാര്‍ഥമായ പരിശ്രമത്തിലൂടെയും കഠിനാധ്വാനത്തിലൂടെയും ജീവിത വിജയം നേടണമെന്നു മുന്‍ മന്ത്രി ആന്‍റണി രാജു എംഎല്‍എ. എസ്എസ്എല്‍സി, പ്ലസ്ടു പരീക്ഷകളില്‍ ഉന്നത വിജയം നേടിയ വിദ്യാര്‍ഥികളെ ദീപികയുടെ നേതൃത്വത്തില്‍ ആദരിക്കുന്ന പരിപാടി പട്ടം സെന്‍റ് മേരീസ് ഹയര്‍ സെക്കന്‍ഡറി സ്‌കൂളില്‍ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ത്യാഗത്തിനു സന്നദ്ധതയുണ്ടെങ്കില്‍ ജീവിതത്തില്‍ എന്തും നേടാന്‍ സാധിക്കും. സൂര്യനേപ്പോലെ പ്രകാശിക്കണമെങ്കില്‍ സൂര്യനേപ്പോലെ കത്തിജ്വലിക്കണം. വിദ്യാര്‍ഥികള്‍ക്കിടയിലെ മൊബൈല്‍ ഫോണിന്‍റെ അമിത ഉപയോഗവും ലഹരി ഉപയോഗവും ഇല്ലായ്മ ചെയ്യണമെന്നും അദ്ദേഹം പറഞ്ഞു. മൊബൈല്‍ ഫോണ്‍ ഇല്ലാതെ ജീവിക്കാനാകാത്ത അവസ്ഥ ഇന്നുണ്ട്. വളരെ സൂക്ഷിച്ച് ഉപയോഗിക്കേണ്ട ഒന്നാണ് മൊബൈല്‍ ഫോണ്‍. ഉന്നത വിജയം നേടിയ വിദ്യാര്‍ഥികളെ ആദരിക്കുന്നതിനു മുന്നോട്ടു വന്ന ദീപികയെ അഭിനന്ദിക്കുന്നു. ഈ ആദരവ് നേടിയ വിദ്യാര്‍ഥികള്‍ക്ക് സമൂഹത്തോട് ഒരു ഉത്തരവാദിത്തമുണ്ടെന്നും അദ്ദേഹം പറഞ്ഞു. ഇന്നലെ ഉച്ചകഴിഞ്ഞ് 1.30ന് പട്ടം സെന്‍റ് മേരീസ് ഹയര്‍ സെക്കന്‍ഡറി സ്‌കൂളില്‍ സംഘടിപ്പിച്ച ആദരവ് പരിപാടിക്ക് ദീപിക റസിഡന്‍റ്് മാനേജര്‍ മോണ്‍. ഡോ. വര്‍ക്കി ആറ്റുപുറത്ത് കോര്‍ എപ്പിസ്‌കോപ്പ സ്വാഗതം ആശംസിച്ചു. രാഷ്ട്രദീപിക ലിമിറ്റഡ് ചെയര്‍മാന്‍ ഡോ. ഫ്രാന്‍സിസ് ക്ലീറ്റസ് അധ്യക്ഷത വഹിച്ച ചടങ്ങില്‍ മലങ്കര കത്തോലിക്കാ സഭ കൂരിയ മെത്രാന്‍ ഡോ. ആന്‍റണി മാര്‍ സില്‍വാനോസ് അനുഗ്രഹ പ്രഭാഷണം നടത്തി. പട്ടം സെന്‍റ് മേരീസ് എച്ച്എസ്എസ് പ്രിന്‍സിപ്പല്‍ ഫാ. നെല്‍സണ്‍ വലിയവീട്ടില്‍, വൈസ് പ്രിന്‍സിപ്പല്‍ റെജി ലൂക്കോസ് എന്നിവര്‍ ആശംസകള്‍ അര്‍പ്പിച്ചു പ്രസംഗിച്ചു. ദീപിക തിരുവനന്തപുരം ബ്യൂറോ ചീഫ് സാബു ജോണ്‍ നന്ദി പറഞ്ഞു. എസ്എസ്എല്‍സി, പ്ലസ്ടു പരീക്ഷകളില്‍ ഉന്നത വിജയം നേടിയ വിദ്യാര്‍ഥികളെ ദീപികയും മാര്‍ത്താണ്ഡം മാര്‍ അപ്രേം കോളജ് ഓഫ് എന്‍ജിനിയറിംഗ് ആന്‍ഡ് ടെക്‌നോളജിയും ചേര്‍ന്നാണ് ആദരിച്ചത്. മേഖല അടിസ്ഥാനത്തില്‍ ദീപിക സംഘടിപ്പിക്കുന്ന പരിപാടികളുടെ ഭാഗമായാണ് ഉന്നത വിജയികളെ തിരുവനന്തപുരത്ത് രണ്ടു വേദികളിലായി ആദരിച്ചത്. ഇന്നലെ നെല്ലിമൂട് സെന്‍റ് ക്രിസോസ്റ്റം ഹയര്‍ സെക്കന്‍ഡറി സ്‌കൂളില്‍ സംഘടിപ്പിച്ച ആദരവ് പരിപാടിയില്‍ പാറശാല രൂപതാധ്യക്ഷന്‍ തോമസ് മാര്‍ യൗസേബിയൂസ് അധ്യക്ഷനായിരുന്നു. ദീപിക തിരുവനന്തപുരം റസിഡന്‍റ് മാനേജര്‍ മോണ്‍.ഡോ. വര്‍ക്കി ആറ്റുപുറത്ത് കോര്‍ എപ്പിസ്‌കോപ്പ ആമുഖപ്രസംഗം നടത്തി. നെയ്യാറ്റിന്‍കര ഡിവൈഎസ്പി എസ്. ചന്ദ്രദാസ് ഉദ്ഘാടനം ചെയ്തു. ദീപിക നെയ്യാറ്റിന്‍കര രൂപത കോ-ഓര്‍ഡിനേറ്റര്‍ ഫാ. ജിബിന്‍രാജ്, നെല്ലിമൂട് സെന്‍റ് ക്രിസോസ്റ്റം ഹയര്‍ സെക്കന്‍ഡറി സ്‌കൂള്‍ പ്രിന്‍സിപ്പല്‍ സിസ്റ്റര്‍ ശോബിത ഡിഎം, അതിയന്നൂര്‍ പഞ്ചായത്ത് വിദ്യാഭ്യാസ ആരോഗ്യ സ്റ്റാന്‍ഡിംഗ് കമ്മിറ്റി ചെയര്‍മാന്‍ കൊടുങ്ങാവിള ജയകുമാര്‍ എന്നിവര്‍ ആശംസകള്‍ അര്‍പ്പിച്ചു. ദീപിക സര്‍ക്കുലേഷന്‍ മാനേജര്‍ ഇ.വി. വര്‍ക്കി സ്വാഗതവും നെയ്യാറ്റിന്‍കര ഏരിയ മാനേജര്‍ രാജീവ് നന്ദിയും പറഞ്ഞു. എസ്എസ്എല്‍സിക്ക് ഒന്‍പത് വിഷയങ്ങള്‍ക്ക് എപ്ലസ് നേടിയവര്‍, സിബിഎസ്ഇ, ഐസിഎസ്ഇ വിഭാഗങ്ങളില്‍ 90 ശതമാനത്തില്‍ അധികം മാര്‍ക്ക് നേടിയവര്‍, പ്ലസ്ടു കേരള സിലബസില്‍ അഞ്ചോ അതിലധികമോ വിഷയങ്ങള്‍ക്ക് എ പ്ലസ് നേടിയവര്‍, സിബിഎസ്ഇ, ഐഎസ്‌സി വിഭാഗങ്ങളില്‍ 90 ശതമാനത്തിലധികം മാര്‍ക്ക് നേടിയവര്‍ എന്നിവരെയാണ് ഇന്നലെ ദീപിക ആദരിച്ചത്. സര്‍ട്ടിഫിക്കറ്റുകളും വിതരണം ചെയ്തു.

യുവതി ഭർതൃ വീട്ടിൽ തൂങ്ങി മരിച്ച നിലയിൽ

നെടുമങ്ങാട്: യുവതി ഭർതൃ വീട്ടിൽ തൂങ്ങി മരിച്ച നിലയിൽ. തോളൂർ മേരിഗിരി മരിയ നഗർ ഹൗസ് നമ്പർ ഒൻപതിൽ അപർണ(24) യെയാണ് കിടപ്പുമുറിയിൽ തൂങ്ങി മരിച്ച നിലയിൽ കണ്ടെത്തിയത്. വെള്ളിയാഴ്ച രാത്രി 9.30 ഓടെ അപർണ മുറി അടച്ചിരിക്കുന്നത് കണ്ടു സംശയം തോന്നിയ ഭർതൃവീട്ടുകാർ ഫോൺ വിളിച്ചെങ്കിലും എടുക്കാത്തതിനെ തുടർന്ന് വാതിൽ ചവിട്ടി തുറന്ന് അകത്ത് കടന്നപ്പോഴാണ് മരിച്ച നിലയിൽ കണ്ടത്. ഭർത്താവ് അക്ഷയുമായി അപർണയുടെ വിവാഹം കഴിഞ്ഞിട്ട് ഒരു വർഷത്തോളമായി.അക്ഷയ് വിദേശത്ത് സൗണ്ട് എൻജിനീയറായി ജോലി ചെയ്യുകയാണ്. മരണ കാരണത്തെ കുറിച്ച് അന്വേഷണം നടത്തുമെന്ന് പോലീസ് പറഞ്ഞു. ശശിധരൻ നായരുടെയും രമാകുമാരിയുടെയും മകളാണ്. സഹോദരി: അശ്വതി..

സിപിഎമ്മിന് ചവറ്റുകുട്ട സംസ്കാരം: ചെറിയാൻ ഫിലിപ്പ്

തിരുവനന്തപുരം: കോണ്‍ഗ്രസിൽ നിന്നും ആരെയും സ്വീകരിക്കുകയും ഉപയോഗം കഴിഞ്ഞാൽ വലിച്ചെറിയുകയും ചെയ്യുന്ന ചവറ്റുകുട്ട സംസ്കാരമാണ് സിപിഎം ഇപ്പോൾ പുലർത്തുന്നതെന്ന് കോണ്‍ഗ്രസ് നേതാവ് ചെറിയാൻഫിലിപ്പ്. സമ്മോഹനം സംഘടിപ്പിച്ച സോളമൻ അലക്സിന്‍റെ രണ്ടാം ചരമദിനാചരണം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. ഒട്ടേറെ വാഗ്ദാനം നൽകി പ്രലോഭിപ്പിച്ചാണ് കെപിസിസി സെക്രട്ടറിയായിരുന്നസോളമൻ അലക്സിനെ സിപിഎമ്മിലേക്ക് ആനയിച്ചത്. പിന്നീട് അസുഖബാധിത നായ സോളമനെ തിരിഞ്ഞുനോക്കാൻ പോലും സിപിഎം നേതാക്കൾ തയാറായില്ല. വളരെ ദുഃഖിതനായാണ് അദ്ദേഹം മരണത്തെ നേരിട്ടത്. ഭാരത് സേവക് സമാജ് ദേശീയ ചെയർ മാൻ ബി.എസ്. ബാലചന്ദ്രൻ മുഖ്യ പ്രഭാഷണം നടത്തി. സമ്മോഹനം ചെയർമാൻ വിതുര ശശിയുടെ അധ്യക്ഷതയിൽ ചേർന്ന ചടങ്ങിൽ ജനറൽ കണ്‍വീനർ പിരപ്പൻകോട് സുഭാഷ്, നിനോ അലക്സ്, സി.കെ. വത്സലകുമാർ, കെ.കെ. ഗോപകുമാർ, ഡോ. എ.കെ. വഹീദാബീഗം, എസ്. മനോഹരൻനായർ, ബി. രാജൻ തുടങ്ങിയവർ പ്രസംഗിച്ചു.

മികച്ച യുവ കര്‍ഷകനെ യൂത്ത് കോണ്‍ഗ്രസ് ആദരിച്ചു

വെള്ളറട: 2024- 25 സംസ്ഥാന സര്‍ക്കാരിന്‍റെ കാര്‍ഷിക വിപണിയുടെ മികച്ച യുവ കര്‍ഷകനുള്ള അവാര്‍ഡ് നേടിയ കുന്നത്തുകാലില്‍ കോട്ടുക്കോണത്തെ വിമല്‍ രാജിനെയാണ് കോട്ടുകോണം യൂത്ത് കോണ്‍ഗ്രസ് യൂണിറ്റ് കമ്മിറ്റിയുടെ നേതൃത്വത്തില്‍ ആദരിച്ചത്. യൂത്ത് കോണ്‍ഗ്രസ് പാറശാല നിയോജക മണ്ഡലം പ്രസിഡന്‍റ് ബ്രമിന്‍ ചന്ദ്രന്‍, സതീഷ് കോട്ടുക്കോണം, ജി. അനില്‍കുമാര്‍, ബ്ലോക്ക് സെക്രട്ടറി എസ്.സലിം, കര്‍ഷക കോണ്‍ഗ്രസ് കുന്നത്തുകാല്‍ മണ്ഡലം പ്രസിഡന്‍റ് അനില്‍കുമാര്‍, വാര്‍ഡ് വൈസ് പ്രസിഡന്‍റ് തുടങ്ങിയവര്‍ പങ്കെടുത്തു.

ഉന്നത വിജയം നേടിയ വിദ്യാര്‍ഥികള്‍ക്ക് ദീപികയുടെ ആദരം ഇന്ന്

തിരുവനന്തപുരം: എസ്എസ്എല്‍സി, പ്ലസ്ടു പരീക്ഷകളില്‍ ഉന്നത വിജയം നേടിയ വിദ്യാര്‍ഥികൾക്ക് ദീപികയും മാര്‍ത്താണ്ഡം മാര്‍ അപ്രേം കോളജ് ഓഫ് എന്‍ജിനിയറിംഗ് ആന്‍ഡ് ടെക്‌നോളജിയും ചേര്‍ന്ന് നൽകുന്ന ആദരം ഇന്നു നടക്കും. എസ്എസ്എല്‍സിക്ക് ഒന്‍പത്, പത്ത് എ പ്ലസ് നേടിയവര്‍, സിബിഎസ്ഇ, ഐസിഎസ്ഇ പത്താംക്ലാസില്‍ 90 ശതമാനത്തില്‍ അധികം മാര്‍ക്ക് നേടിയവർ, പ്ലസ്ടു കേരള സിലബസില്‍ അഞ്ചോ അതിലധികമോ വിഷയങ്ങള്‍ക്ക് എ പ്ലസ് നേടിയവര്‍, സിബിഎസ്ഇ, ഐഎസ്‌സി വിഭാഗങ്ങളില്‍ 12-ാം ക്ലാസിൽ 90 ശതമാനത്തിലധികം മാര്‍ക്ക് നേടിയവര്‍ എന്നിവരെയാണ് ആദരിക്കുന്നത്. ചടങ്ങില്‍ വിദ്യാര്‍ഥികള്‍ക്ക് മെഡലുകളും സര്‍ട്ടിഫിക്കറ്റുകളും നല്‍കും. ഇന്നു രാവിലെ പത്തിന് നെല്ലിമൂട് സെന്‍റ് ക്രിസോസ്റ്റം ഹയര്‍ സെക്കന്‍ഡറി സ്‌കൂളില്‍ സംഘടിപ്പിക്കുന്ന പരിപാടിയില്‍ ദീപിക തിരുവനന്തപുരം റസിഡന്‍റ് മാനേജര്‍ മോണ്‍.ഡോ. വര്‍ക്കി ആറ്റുപുറത്ത് കോര്‍ എപ്പിസ്‌കോപ്പ ആമുഖ പ്രസംഗം നടത്തും. പാറശാല രൂപതാധ്യക്ഷന്‍ തോമസ് മാര്‍ യൗസേബിയോസ് അധ്യക്ഷത വഹിക്കുന്ന ചടങ്ങ് നെയ്യാറ്റിന്‍കര ഡിവൈഎസ്പി എസ്.ചന്ദ്രദാസ് ഉദ്ഘാടനം ചെയ്യും. ഇന്ന് ഉച്ചകഴിഞ്ഞ് 1.30ന് പട്ടം സെന്‍റ് മേരീസ് ഹയര്‍ സെക്കന്‍ഡറി സ്‌കൂളില്‍ രജിസ്ട്രേഷൻ, തുടർന്ന് കരിയർ ഗൈഡൻസ് സെമിനാർ നടക്കും. രണ്ടിനു നടക്കുന്ന ആദരവ് പരിപാടിയിൽ ദീപിക റസിഡന്‍റ് മാനേജര്‍ മോണ്‍.ഡോ. വര്‍ക്കി ആറ്റുപുറത്ത് കോര്‍ എപ്പിസ്‌കോപ്പ സ്വാഗതം ആശംസിക്കും. രാഷ്‌ട്രദീപിക ലിമിറ്റഡ് ചെയര്‍മാന്‍ ഡോ. ഫ്രാന്‍സിസ് ക്ലീറ്റസ് അധ്യക്ഷത വഹിക്കുന്ന ചടങ്ങ് മുന്‍ ഗതാഗതമന്ത്രി ആന്‍റണി രാജു എംഎല്‍എ ഉദ്ഘാടനം ചെയ്യും. മലങ്കര കത്തോലിക്കാ സഭ കൂരിയ മെത്രാന്‍ ഡോ.ആന്‍റണി മാര്‍ സില്‍വാനോസ് അനുഗ്രഹപ്രഭാഷണം നടത്തും. വിദ്യാർഥികൾ തങ്ങൾ രജിസ്റ്റർ ചെയ്ത (നെല്ലിമൂട് സെന്‍റ് ക്രിസോസ്റ്റം ഹയര്‍സെക്കന്‍ഡറി സ്‌കൂൾ, പട്ടം സെന്‍റ് മേരീസ് ഹയര്‍ സെക്കന്‍ഡറി സ്‌കൂൾ)സ്കൂളിൽ കൃത്യസമയത്ത് എത്തിച്ചേരണം. വിദ്യാര്‍ഥികള്‍ക്ക് മെഡലുകളും സര്‍ട്ടിഫിക്കറ്റുകളും വിതരണം ചെയ്യും.

തെരുവ് നായകളെകൊണ്ട് പൊറുതിമുട്ടി നാട്ടുകാർ

വിതുര: തെരുവു നായകൾ റോഡുകൾ കൈയടക്കിയതോടെ വിദ്യാർഥികൾ ഉൾപ്പടെയുള്ള യാത്രക്കാർ ദുരിതത്തിൽ. നിരത്തുകളും കാത്തിരിപ്പു കേന്ദ്രങ്ങളും സ്കൂൾ പരിസരങ്ങളും മാത്രമല്ല സർക്കാർ ഓഫീസ് വളപ്പുകളും കട വരാന്തകളും ഉൾപ്പടെ നായകളുടെ വിഹാരകേന്ദ്രങ്ങളായി. അലഞ്ഞു തിരിയുന്ന നായക്കൂട്ടം സ്കൂളിലേക്ക് നടന്നു പോകുന്ന വിദ്യാർഥികളെ ഉപദ്രവിക്കുന്നത് പതിവാണ്. ബസ് കാത്തു നിൽക്കുന്ന കുട്ടികളെയും നായകൾ ശല്യം ചെയ്യുന്നുണ്ടെന്ന് രക്ഷിതാക്കൾ പറയുന്നു. ഇരുചക്ര വാഹന യാത്രക്കാരും കാൽനടക്കാരുമാണ് നായകളുടെ ഉപദ്രവം നേരിടുന്ന മറ്റു വിഭാഗങ്ങൾ. ഇടവഴികളിൽ നിന്ന് പ്രധാന നിരത്തിലേക്ക് ഓടിയിറങ്ങുന്ന നായകളാണ് സ്കൂട്ടർ യാത്രക്കാർക്ക് ഭീഷണി. വാഹനങ്ങൾക്കു പുറകെ ഓടിയെത്തി ആക്രമിക്കാൻ ശ്രമിക്കുന്നതും അപകടത്തിനു കാരണമാകുന്നു. മലയോരത്തെറോഡരികുകളിലെ മാലിന്യ നിക്ഷേപമാണ് നായശല്യത്തിനു പ്രധാന കാരണമെന്ന് നാട്ടുകാർ പറയുന്നത്. അറവു മാലിന്യങ്ങൾ തിന്നാനെത്തുന്നവയാണ് ഏറെയും. പ്രധാന ജംഗ്ഷനുകളിലെ വഴിയോര കച്ചവടവും നായ ശല്യത്തിനു കാരണമാകുന്നു. വാഹനങ്ങളിൽ കൊണ്ടുവന്ന് ആളൊഴിഞ്ഞ സ്ഥലങ്ങളിൽ കൂട്ടത്തോടെ ഇറക്കി വിടുന്ന നായകൾ ജനവാസ കേന്ദ്രങ്ങളും കാത്തിരിപ്പു കേന്ദ്രങ്ങളും റോഡുകളും താവളമാക്കുന്നു. നായകളെ വന്ധ്യംകരണം നടത്താൻ പഞ്ചായത്തുകൾ ആവിഷ്കരിച്ച പദ്ധതി നിലച്ച മട്ടാണ്.

19ന് ജലവിതരണം തടസപ്പെടും

നേമം: അരുവിക്കരയിലെ വാട്ടർ അഥോറിറ്റിയുടെ 75 എംഎൽഡി ജലശുദ്ധീകരണശാലയിലെ തകരാറിലായ വാൽവ് മാറ്റി സ്ഥാപിക്കുന്നതുൾപ്പെടെയുള്ള അറ്റകുറ്റപ്പണികൾ നടത്തേണ്ടതിനാൽ വ്യാഴാഴ്ച രാവിലെ 10 മുതൽ വൈകിട്ട് നാല് വരെ ജലശുദ്ധീകരണശാലയുടെ പ്രവർത്തനം തടസപ്പെടുന്നതുകൊണ്ട് തിരുവനന്തപുരം കോർപ്പറേഷനിലെ പേരൂർക്കട, കുടപ്പനക്കുന്ന് , അമ്പലമുക്ക്, മുട്ടട, പരുത്തിപ്പാറ, കേശവദാസപുരം, പട്ടം, ഉള്ളൂർ, കൊച്ചുള്ളൂർ, കവടിയാർ, കുറവൻകോണം, മരപ്പാലം, ഊളൻപാറ , പൈപ്പിന്മൂട് , പേട്ട, എംജി റോഡ്, ജനറൽ ആശുപത്രി പ്രദേശം, വലിയശാല, വഴുതക്കാട്, വെള്ളയമ്പലം, പി എം ജി, തൈക്കാട്, കാഞ്ഞിരംപാറ, പാങ്ങോട്‌, വട്ടിയൂര്‍ക്കാവ്‌, നെട്ടയം, കാച്ചാണി, കൊടുങ്ങാനൂര്‍, തിരുമല, വലിയവിള, പിടി.പി നഗർ, വാഴോട്ടുകോണം, പുന്നയ്ക്കാമുകള്‍, തൃക്കണ്ണാപുരം, പൂജപ്പുര, ആറന്നൂര്‍, കരമന, മുടവന്‍മുകള്‍, നെടുംകാട്‌, കാലടി, പാപ്പനംകോട്‌, പൊന്നുമംഗലം, മേലാംകോട്‌, നേമം, എസ്റ്റേറ്റ്‌, ചാല, കമലേശ്വരം, കുര്യാത്തി, മണക്കാട്, ശ്രീവരാഹം, ആറ്റുകാൽ, അമ്പലത്തറ, കളിപ്പാംകുളം, പുത്തൻപള്ളി,മാണിക്യവിളാകം, ബീമാപള്ളി, ബീമാപള്ളി ഈസ്റ്റ്, മുട്ടത്തറ, വള്ളക്കടവ്, പൂന്തുറ, വലിയതുറ, തിരുവല്ലം,പുഞ്ചക്കരി,പൂങ്കുളം, വെള്ളാർ വാര്‍ഡുകളിലെയും, കല്ലിയൂര്‍ പഞ്ചായത്തിലെ വെള്ളായണി, തെന്നൂര്‍, അപ്പുക്കുട്ടന്‍ നായര്‍ റോഡ്‌, ശാന്തിവിള, സർവ്വോദയം, പള്ളിച്ചല്‍ പഞ്ചായത്തിലെ പ്രസാദ്‌ നഗര്‍ എന്നീ പ്രദേശങ്ങളിലെയും ഉയർന്ന സ്ഥലങ്ങളിൽ ജലവിതരണം തടസപ്പെടാൻ സാധ്യതയുണ്ട്. ഉപഭോക്താക്കൾ വേണ്ട മുൻകരുതൽ സ്വീകരിക്കേണ്ടതാണെന്ന് വാട്ടർ അഥോറിറ്റി അറിയിച്ചു.

കുഞ്ഞിന്‍റെ മുതുകില്‍ മുറിവേറ്റ അടയാളങ്ങള്‍; പരാതി നൽകി

പേരൂര്‍ക്കട: ഡേ കെയറില്‍ നിന്നു വീട്ടിലേക്കു വന്ന കുഞ്ഞിന്‍റെ മുതുകില്‍ മുറിവേറ്റ പാടുകൾ‍ കണ്ടെത്തിയ സംഭവത്തില്‍ വീട്ടുകാര്‍ സിറ്റി പോലീസ് കമ്മീഷണര്‍ക്കു പരാതി നല്‍കി. പേരൂര്‍ക്കട പോലീസില്‍ നിന്നുള്ള അന്വേഷണം തൃപ്തികരമല്ലാത്തതിനാലാണ് കമ്മീഷണര്‍ക്ക് പരാതി നല്‍കിയത്. തിരുവനന്തപുരം നഗരസഭയ്ക്കു പരാതി നല്‍കിയതിന്‍റെ അടിസ്ഥാനത്തില്‍ ഡേ കെയറിന് സ്റ്റോപ്പ് മെമ്മോ നല്‍കിയെങ്കിലും സ്ഥാപനം ഇപ്പോഴും പ്രവര്‍ത്തിക്കുന്നുണ്ട്. തുരുത്തുമ്മൂല എം.ജി നഗര്‍ സ്വദേശിനി വിബി വില്ലി (36)യാണ് പരാതി നല്‍കിയിരിക്കുന്നത്. ഏപ്രില്‍ 17-നാണ് കേസിന്നാസ്പദമായ സംഭവം. അന്നുവൈകുന്നേരം ഇളയമകളെ ഡേ കെയറില്‍ നിന്നു കൂട്ടിക്കൊണ്ടു വരുമ്പോഴാണ് കുട്ടിയുടെ മുഖഭാവം ശ്രദ്ധിച്ച മാതാവ് ശരീരമാകെ പരിശോധിച്ചപ്പോള്‍ മുറി വേറ്റ പാടുകൾ‍ കണ്ടെത്തിയത്.

ഐബി ഉദ്യോഗസ്ഥയുടെ ആത്മഹത്യ പ്രതിയെ ഒന്പതു ദിവസത്തേക്കു കസ്റ്റഡിയിൽ നൽകി

തിരുവനന്തപുരം: തിരുവനന്തപുരം വിമാനത്താവളത്തിലെ ഐബി ഉദ്യോഗസ്ഥ ആത്മഹത്യ ചെയ്ത കേസിലെ പ്രതി സുകാന്തിനെ ഒന്പതു ദിവസത്തെ പോലീസ് കസ്റ്റഡിയിൽ നൽകി. പ്രതിയെ ഉധംപൂർ, ചെന്നൈ എന്നീ സ്ഥലങ്ങളിൽ കൊണ്ടുപോയി തെളിവെടുപ്പ് നടത്തുന്നതിനാണ് കസ്റ്റഡിയിൽ നൽകിയത്. ഇവിടെയുള്ള ഹോട്ടലുകളിൽ ഇവർ ഒരുമിച്ചു താമസിച്ചിരുന്നു. 21 വരെയാണ് കസ്റ്റഡി. ഇതിനു ശേഷം വീണ്ടും കസ്റ്റഡിയിൽ വാങ്ങും അത് മറ്റു സംസ്ഥാനങ്ങളിൽ പ്രതി മരണപ്പെട്ട പെണ്‍കുട്ടിയുമായി പോയിരുന്ന സ്ഥലങ്ങളിൽ അന്വേഷണം നടത്താനാണെന്നു പോലീസ് കോടതിയെ അറിയിച്ചു. ഇപ്പോൾ പ്രതി റിമാൻഡിലാണ്. അഡീഷണൽ ചീഫ് ജുഡീഷൽ മജിസ്ട്രേറ്റ് കോടതിയാണ് കേസ് പരിഗണിക്കുന്നത്.

കരമന -കളിയിക്കാവിള പാത : വികസനം ത്വരിതഗതിയിലാക്കണമെന്ന് നാട്ടുകാർ

നെയ്യാറ്റിന്‍കര: പാത വികസനത്തില്‍ പ്രതീക്ഷയോടെ നാട്ടുകാരും യാത്രക്കാരും. മണിക്കൂറുകള്‍ നീളുന്ന ഗതാഗതക്കുരുക്കിന് പരിഹാരം എത്രയും വേഗം സാധ്യമായെങ്കില്‍ എന്ന ആവശ്യം വീണ്ടും ശക്തമാകുന്നു. പുതിയ അധ്യയന വര്‍ഷം ആരംഭിച്ചതോടെ കരമന -കളിയിക്കാവിള പാതയില്‍ ബാലരാമപുരം, ടി ബി ജംഗ്ഷന്‍‌, ആശുപത്രി ജംഗ്ഷന്‍‌, ആലുംമൂട് ജംഗ്ഷന്‍ എന്നിവിടങ്ങളില്‍ രാവിലെയും വൈകുന്നേരവും ഗതാഗതക്കുരുക്ക് പതിവായിരിക്കുന്നു. ബാലരാമപുരത്തെ ഗതാഗതകുരുക്ക് അതി രൂക്ഷമാണ്. പതിറ്റാണ്ടുകളായി ഇവിടെ ഗതാഗതക്കുരുക്ക് രൂക്ഷമാണ്. ബാലരാമപുരത്തിനു സമീപം കൊടിനട വരെ മാത്രമേ കരമന- കളിയിക്കാവിള പാത വികസിച്ചിട്ടുള്ളൂ. കൊടിനട മുതല്‍ വഴിമുക്ക് വരെയുള്ള ഒന്നര കിലോമീറ്റര്‍ ദൂരത്തെ റോഡാണ് അടുത്ത ഘട്ടം. പാത വികസനത്തിനായി ഭൂമി വിട്ടുനല്‍കിയവര്‍ക്കുള്ള നഷ്ടപരിഹാര തുക വിതരണം ചെയ്യുന്നതോടെ തുടര്‍നടപടികളും വേഗത്തിലാകുമെന്ന് തദ്ദേശീയരും യാത്രക്കാരും ഒരുപോലെ പ്രതീക്ഷിക്കുന്നു. വഴിമുക്ക് മുതല്‍ നെയ്യാറ്റിന്‍കരയിലേയ്ക്കുള്ള പാതയോരത്തെ കെട്ടിടങ്ങള്‍ പൊളിച്ച് നീക്കം ചെയ്യുന്ന പ്രവൃത്തി നടന്നുവരികയാണ്. െ നഷ്ടപരിഹാരം ലഭിച്ചവരുടെ കെട്ടിടങ്ങള്‍ പൊളിക്കുന്ന പ്രവൃത്തി ബാലരാമപുരത്തും പുരോഗമിക്കുന്നുണ്ട്. പാത യാഥാര്‍ഥ്യമാകുന്നതോടെ ആംബുലന്‍സ് ഉള്‍പ്പെടെയുള്ള വാഹനങ്ങള്‍ അകപ്പെടുന്ന ഗതാഗതക്കുരുക്ക് ഒഴിവാകുമെന്ന ആശ്വാസത്തിലാണ് നല്ലൊരു ശതമാനം യാത്രക്കാരും.

മസ്തിഷ്‌ക മരണ സ്ഥിരീകരണം: ഡോക്ടര്‍മാര്‍ക്ക് പരിശീലനം നല്‍കി

മെഡിക്കല്‍കോളജ്: മസ്തിഷ്‌ക മരണം സ്ഥിരീകരിക്കുന്നതിനുള്ള സാങ്കേതികവും നിയമപരവുമായ കാര്യങ്ങളില്‍ സര്‍ക്കാര്‍ ഡോക്ടര്‍മാര്‍ക്ക് പ്രത്യേക പരിശീലനം നല്‍കി. കേരള സ്റ്റേറ്റ് ഓര്‍ഗന്‍ ആന്‍ഡ് ടിഷ്യു ട്രാന്‍സ്പ്ലാന്‍റ് ഓര്‍ഗനൈസേഷന്‍റെ (കെ-സോട്ടോ) നേതൃത്വത്തില്‍ തിരുവനന്തപുരം തൈക്കാട് ഗസ്റ്റ് ഹൗസില്‍ നടന്ന പരിശീലന പരിപാടി മെഡിക്കല്‍ വിദ്യാഭ്യാസ ഡയറക്ടര്‍ ഡോ. കെ.വി വിശ്വനാഥന്‍ ഉദ്ഘാടനം ചെയ്തു. കെ-സോട്ടോ എക്‌സിക്യൂട്ടീവ് ഡയറക്ടര്‍ ഡോ. എസ്.എസ് നോബിള്‍ ഗ്രേഷ്യസ്, അഡ്മിനിസ്‌ട്രേറ്റീവ് ഓഫീസര്‍ ബിനോയ് മാത്യു എന്നിവരും പരിപാടിയില്‍ പങ്കെടുത്തു. പ്രമുഖ ഡോക്ടര്‍മാര്‍ വിവിധ വിഷയങ്ങളില്‍ ക്ലാസുകള്‍ നയിച്ചു.

എം.എ. രവിക്ക് നാളെ പൗരാവലിയുടെ സ്നേഹാദരം

നെയ്യാറ്റിന്‍കര: സമാന്തര വിദ്യാഭ്യാസ രംഗത്ത് എഴുപതു വര്‍ഷം പൂര്‍ത്തിയാക്കിയ എം.എ. രവിക്ക് ശിഷ്യരും സുഹൃത്തുക്കളുമുള്‍പ്പെടുന്ന ബാലരാമപുരം പൗരാവലിയുടെ സ്നേഹാദരം നാളെ. ബാലരാമപുരം തലയൽ ശ്രീഭദ്ര കൺവെൻഷൻ സെന്‍ററിൽ നാളെ വൈകുന്നേരം മൂന്നിന് സംഘടിപ്പിച്ചിരിക്കുന്ന സ്നേഹാദര ചടങ്ങില്‍ ജനപ്രതിനിധികളും സാമൂഹ്യ, സാംസ്കാരിക, രാഷ്ട്രീയ രംഗത്തെ നിരവധി പേരും സംബന്ധിക്കുമെന്ന് സംഘാടകര്‍ അറിയിച്ചു.

ഹിന്ദു മതവും ഹിന്ദുത്വവാദവും രണ്ട്: ബിനോയ് വിശ്വം

നെടുമങ്ങാട് : ഹിന്ദു മതവും ഹിന്ദുത്വ വാദവും രണ്ടാണെന്നും ഹിന്ദുത്വ വാദം ഫാസിസ്റ്റ് രാഷ്‌ട്രീയത്തിന്‍റെ ഇന്ത്യൻ പേരാണെന്നും ഭൂരിപക്ഷ-ന്യൂനപക്ഷ വ്യത്യാസമില്ലാതെ എല്ലാത്തരം തീവ്രവാദത്തിനും കമ്മ്യൂണിസ്റ്റുകാർ എതിരാണെന്നും സിപിഐ സംസ്ഥാന സെക്രട്ടറി ബിനോയ് വിശ്വം. സിപിഐ നെടുമങ്ങാട് മണ്ഡലം സമ്മേളത്തിന്‍റെ ഭാഗമായുള്ള പ്രതിനിധി സമ്മേളനം വെമ്പായം സി. കൃഷ്ണൻനായർ നഗറിൽ ഉദ്‌ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. പൊതുസമ്മേളനവും ബഹുജനറാലിയും റെഡ് വോളന്‍റിയർ പരേഡും മന്ത്രി ജി.ആർ.അനിൽ ഉദ്‌ഘാടനം ചെയ്തു. സംസ്ഥാന കൗൺസിൽ അംഗം വി.പി.ഉണ്ണികൃഷ്ണൻ രാഷ്‌ട്രീയ റിപ്പോർട്ട് അവതരിപ്പിച്ചു. മുൻ മന്ത്രി സി.ദിവാകരൻ,സിപിഐ ജില്ലാ സെക്രട്ടറി മാങ്കോട് രാധാകൃഷ്ണൻ, വേണുഗോപാലൻ നായർ, പള്ളിച്ചൽ വിജയൻ, മീനാങ്കൽ കുമാർ,പി.എസ്.ഷൗക്കത്ത്,ജോർജ് തോമസ്, മനോജ് ബി.ഇടമന,എംജി.രാഹുൽ,കെ.ദേവകി,രാഖി രവികുമാർ തുടങ്ങിയവർ പ്രസംഗിച്ചു. ഇന്ന് മണ്ഡലം സെക്രട്ടറി പി.എസ്.ഷെരീഫ് പ്രവർത്തന റിപ്പോർട്ട് അവതരിപ്പിക്കും.

പുത്തനമ്പലം അംബേദ്കർ ഗ്രാമം നവീകരണത്തിന് തുടക്കമായി

നെയ്യാറ്റിന്‍കര : നഗരസഭയിലെ പുത്തനമ്പലം അംബേദ്കർ ഗ്രാമം നവീകരണത്തിനു തുടക്കമായി. പട്ടികജാതി വികസന വകുപ്പ് വിഭാവനം ചെയ്ത അംബേദ്കർ ഗ്രാമം പദ്ധതിയിലൂടെ തെരഞ്ഞെടുക്കപ്പെട്ട ഗ്രാമങ്ങളിലെ വീടുകളുടെ നവീകരണം, റോഡ് ഉൾപ്പെടെയുള്ള അടിസ്ഥാന സൗകര്യങ്ങളുടെ മെച്ചപ്പെടുത്തൽ, മിനി മാസ്റ്റ് ലൈറ്റുകൾ സ്ഥാപിക്കൽ തുടങ്ങിയ വികസന പ്രവർത്തനങ്ങളാണ് നടപ്പിലാക്കുന്നത്. നവീകരണ പ്രവൃത്തികളുടെ ഉദ്ഘാടനം കെ. ആന്‍സലന്‍ എംഎല്‍എ നിര്‍വഹിച്ചു. നഗരസഭ സ്റ്റാന്‍ഡിംഗ് കമ്മിറ്റി ചെയര്‍മാന്മാരായ കെ.കെ ഷിബു, ഡോ. എം.എ സാദത്ത്, എന്‍.കെ അനിതകുമാരി, കൗണ്‍സിലര്‍ പ്രസന്നകുമാര്‍, മുന്‍ കൗണ്‍സിലര്‍ ബി.എസ് ചന്തു എന്നിവര്‍ സംബന്ധിച്ചു. നെയ്യാറ്റിന്‍കര നിയോജക മണ്ഡലത്തിലെ കാരോട് പഞ്ചായത്തിലെ വെട്ടുവിള അംബേദ്കർ ഗ്രാമം നവീകരണത്തിനും കഴിഞ്ഞ ദിവസം തുടക്കം കുറിച്ചു. നവീകരണ പ്രവൃത്തികള്‍ക്കായി 37 ലക്ഷം രൂപയാണ് അനുവദിച്ചത്.

ചുള്ളിമാനൂർ - കല്ലാർ റോഡ് നിർമാണം പാതി വഴിയിൽ

നെടുമങ്ങാട്: ചുള്ളിമാനൂർ - കല്ലാർ റോഡ് നിർമാണം പാതി വഴിയിൽ നിലച്ചതോടെ യാത്രക്കാർ ദുരിതത്തിൽ. നാല് വർഷം മുമ്പ് ആരംഭിച്ച 167 കോടി രൂപയുടെ നിർമാണ പ്രവർത്തനങ്ങൾ സ്ഥലമെടുപ്പ് ഘട്ടം പോലും പിന്നിട്ടിട്ടില്ല. ഓട,കലുങ്കുകൾ എന്നിവയും ബിഎം ആൻഡ് ബിസി ഒരു ലെയറും ആദ്യഘട്ടം പൂർത്തിയാക്കിയ കരാറുകാരൻ യഥാസമയം ബില്ല് മാറിക്കിട്ടാതെ ആത്മഹത്യയുടെ വക്കിലാണ്. ഒരു കോടിയിലധികം രൂപ ചെലവിട്ട് ഇരുത്തലമൂലയിൽ നിർമിച്ച ടാർ മിക്സിംഗ് പ്ലാന്‍റും ലോറികൾ ഉൾപ്പടെ നൂറിലേറെ വാഹനങ്ങളും ലക്ഷങ്ങൾ വിലപിടിപ്പുള്ള നിർമാണ സാമഗ്രികളും പൂർണമായി നശിച്ചു. ഓട നിർമാണം പാതിവഴിയിൽ ഉപേക്ഷിച്ച് തൊഴിലാളികൾ മടങ്ങിയതോടെ റോഡിന്‍റെ ഇരുവശങ്ങളിലും താമസിക്കുന്ന കുടുംബങ്ങൾ വീടിനു പുറത്തിറങ്ങാൻ കഴിയാതെ വിഷമവൃത്തത്തിലാണ്‌. വിനോദസഞ്ചാരികളും നാട്ടുകാരും നടുവൊടിഞ്ഞ് യാത്ര ചെയ്യേണ്ട ദുരവസ്ഥയിലും. അരുവിക്കര, വാമനപുരം നിയോജക മണ്ഡലങ്ങളുടെ പരിധിയിലാണ് റോഡ്. പൊന്മുടി മലയോര ഹൈവേയിൽ ജനസാന്ദ്രതയേറിയ 25 കി.മീറ്ററോളം പ്രദേശത്തെ നിർമാണ പ്രവർത്തനങ്ങളാണ് അനിശ്ചിതത്വത്തിലായത്.പലയിടങ്ങളിലും വലിയ കുഴികളും ഗട്ടറുകളും രൂപപ്പെട്ട് വാഹന ഗതാഗതം ദുരിതപൂർണമാണ്. മെറ്റലും മണ്ണും അടിഞ്ഞുകൂടിയ റോഡിൽ കാൽനടയും ഏറെ ക്ലേശകരം. ഇരുചക്രവാഹന യാത്രക്കാർ അപകടങ്ങളിൽപ്പെട്ട് പരിക്കേൽക്കുന്നത് നിത്യസംഭവമായി.പകുതിയിലേറെ ഭാഗവും വെള്ളക്കെട്ടാണ്. ഓടകൾ ശുചീകരിക്കാൻ തദ്ദേശ സ്ഥാപനങ്ങളും താത്പര്യമെടുക്കുന്നില്ല .

സ്വർണാഭരണവും പണവും കവർന്നയാൾ അറസ്റ്റിൽ

മെഡിക്കൽ കോളജ്: ചികിത്സയ്ക്കെത്തിയ ആളുടെ കൂട്ടിരിപ്പുകാരിയുടെ സ്വർണാഭരണവും പണവും അടങ്ങിയ പഴ്സ് മോഷ്ടിച്ചയാളെ മെഡിക്കൽ കോളജ് പോലീസ് അറസ്റ്റ് ചെയ്തു. അരുവിക്കര കുറുന്തോട്ടം വെമ്പന്നൂർ രേവതി ഭവനിൽ മധുസൂദനൻ നായർ (58) ആണ് അറസ്റ്റിലായത്. കഴിഞ്ഞ പത്തിനാണ് കേസിന് ആസ്പദമായ സംഭവം. വെങ്ങാനൂർ വെള്ളാർ ഒലിപ്പുവിള ശിവക്ഷേത്രത്തിന് സമീപം സായുജ്യ ഭവനിൽ വിജയകുമാരി അമ്മയുടെ മകൾ വി. സുജിതയുടെ (30) മൂന്നരപ്പവൻ വരുന്ന സ്വർണാഭരണവും പണവും സൂക്ഷിച്ചിരുന്ന പഴ്സാണ് പ്രതി കവർന്നത്. ആശുപത്രിയിൽ ഒരു രോഗിക്ക് കൂട്ടിരിപ്പുകാരനായി ഉണ്ടായിരുന്ന ഒരാളെ കാണാതായ സംഭവം ശ്രദ്ധയിൽപ്പെട്ടതോടെ നടത്തിയ അന്വേഷണത്തിലാണ് പ്രതി പിടിയിലാകുന്നത്. അറസ്റ്റിലായ പ്രതിയെ കോടതി റിമാൻഡ് ചെയ്തു.

ഉന്നതവിജയം നേടിയ വിദ്യാർഥികൾക്ക് അനുമോദനം അർപ്പിച്ച് ക്രൈസ്റ്റ് നഗർ സെൻട്രൽ സ്കൂൾ

തിരുവനന്തപുരം: ഹയർസെക്കൻഡറി പരീക്ഷയിൽ ഉന്നത വിജയം നേടിയ വിദ്യാർഥികൾക്ക് അനുമോദനം അർപ്പിച്ച് ക്രൈസ്റ്റ് നഗർ സെൻട്രൽ സ്കൂളിൽ എക്സലൻസ് ഡേ-2025 സംഘടിപ്പിച്ചു. സ്കൂൾ ഓഡിറ്റോറിയത്തിൽ നടന്ന ചടങ്ങിന്‍റെ ഉദ്ഘാടനം സബ് കളക്ടർ ഒ.വി. ആൽഫ്രഡ് നിർവഹിച്ചു. പാഠ്യപാഠ്യോതര പ്രവർത്തനങ്ങൾക്ക് പ്രാധാന്യം കൊടുത്തുകൊണ്ടുള്ള വിദ്യാഭ്യാസത്തിനായിരിക്കണം വിദ്യാർഥികൾ ഊന്നൽ നൽകേണ്ടതെന്ന് അദ്ദേഹം പറഞ്ഞു. അഖിലേന്ത്യാതലത്തിൽ രണ്ടാം സ്ഥാനവും സംസ്ഥാനതലത്തിൽ ഒന്നാം സ്ഥാനവും കരസ്ഥമാക്കിയ എസ്.എ. ഋതിക, ഹയർ സെക്കൻഡറി തലത്തിൽ ഒന്നാം സ്ഥാനം കരസ്ഥമാക്കിയ ജഗത് അജിത്, എല്ലാ വിഷയത്തിനും എ വണ്‍ നേടിയവർ, ഓരോ വിഷയത്തിനും മുഴുവൻ മാർക്ക് നേടിയവർ എന്നിവർക്കുള്ള ഉപഹാരവും ചടങ്ങിൽ സമ്മാനിച്ചു. അധ്യാപകരെയും ചടങ്ങിൽ അനുമോദിച്ചു. ക്രൈസ്റ്റ് നഗർ ഗ്രൂപ്പ് ഓഫ് ഇൻസ്റ്റിറ്റ്യൂഷൻസ് മാനേജർ ഫാ. പോൾ മങ്ങാട് സിഎംഐ അധ്യക്ഷത വഹിച്ചു. ഫാ.മാർട്ടിൻ മള്ളാത്ത് സിഎംഐ മുഖ്യപ്രഭാഷണം നടത്തി. വൈസ് പ്രിൻസിപ്പൽ ഫാ. റോബിൻ പതിനാറിൽചിറ സിഎംഐ ഉപഹാരങ്ങൾ കൈമാറി. ഫാ.സേവ്യർ അന്പാട്ട് സിഎംഐ, കുമാരി ദേവനന്ദന, ഉമ ശൈലേഷ് തുടങ്ങിയവർ പ്രസംഗിച്ചു. അക്കാദമിക് കോ-ഓർഡിനേറ്റർ ജയജേക്കബ് കോശി, പ്രോഗ്രാം കണ്‍വീനർമാരായ വിനീത ജോസഫ്, ഷീജ മേരി ജേക്കബ് എന്നിവർ നേതൃത്വം നൽകി.

ഓര്‍മയില്‍ എന്നെന്നും വിനോദിനി ടീച്ചര്‍ അനുസ്മരണ പരിപാടി സംഘടിപ്പിച്ചു

പാറശാല: ഗവ.വൊക്കേഷണല്‍ ഹയര്‍ സെക്കൻഡറി സ്‌കൂളില്‍ ഓര്‍മയില്‍ എന്നെന്നും വിനോദിനി ടീച്ചര്‍ എന്ന പേരിൽ അനുസ്മരണ യോഗം സംഘടിപ്പിച്ചു. ജില്ലാ പഞ്ചായത്ത് പ്രസിഡന്‍റ് അഡ്വ.ഡി.സുരേഷ് കുമാര്‍ ഉദ്ഘാടനം ചെയ്തു. പിടിഎ പ്രസിഡന്‍റ് ബിനില്‍കുമാര്‍ അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്‍റ് അഡ്വ. ബെന്‍ ഡാര്‍വിന്‍ടീച്ചറെ സംബന്ധിച്ച ഡോക്യുമെന്‍ററി സ്വിച്ച് ഓണ്‍ ചെയ്തു. കൈറ്റ് സിഇഒ അന്‍വര്‍ സാദത്ത് ടീച്ചറെ അനുസ്മരിച്ചു. കൈറ്റ് ജില്ലാ കോ -ഓര്‍ഡിനേറ്റര്‍ ബിന്ദു മുഖ്യതിഥിയായിരുന്നു. നെയ്യാറ്റിന്‍കര എ. ഇ. ഒ.ഷിബു പ്രേംലാല്‍ വിനോദിനി ടീച്ചര്‍ സ്മാരക ഗണിത പ്രതിഭാപുരസ്‌കാരം പ്രഖ്യാപിച്ചു. വിദ്യാലയത്തിലെ കമ്പ്യൂട്ടര്‍ ലാബിന് വിനോദിനിടീച്ചര്‍ സ്മാരക ലാബ് എന്ന് എച്ച്എം നാമകരണം നടത്തി. വിഎച്ച്എസ്ഇ പ്രിന്‍സിപ്പൽ ഡോ. വിശാഖ്,ബിജു, മോഹന്‍കുമാര്‍ , പ്രിന്‍സിൽ റാണി ടീച്ചര്‍, അഗസ്റ്റിന്‍ ജോസ് തുടങ്ങിയവര്‍ പ്രസംഗിച്ചു. പരിപാടിക്ക് മുന്നോടിയായി ടീച്ചറുടെ ഛായാചിത്രത്തിനു മുന്നില്‍ പുഷ്പാര്‍പ്പണം നടന്നു.

വട്ടിയൂര്‍ക്കാവ് ജംഗ്ഷന്‍ വികസനം; വ്യാപാരികള്‍ക്ക് നിരാശ

പേരൂര്‍ക്കട: വട്ടിയൂര്‍ക്കാവ് ജംഗ്ഷന്‍ വികസനവുമായി ബന്ധപ്പെട്ട് പേരൂര്‍ക്കട ജംഗ്ഷനിലെ നിരവധി കടകള്‍ പൊളിച്ചു തുടങ്ങിയെങ്കിലും നിർമാണം എങ്ങുമെത്താത്തത് വ്യാപാരികളെ ദുരിതത്തിലാക്കുന്നു. പേരൂര്‍ക്കട-മണ്ണറക്കോണം റോഡിലെ കടകള്‍ പൊളിക്കല്‍ രണ്ടാം റീച്ചിലാണ് ഉള്‍പ്പെട്ടിട്ടുള്ളത്. പുനരധിവാസം ഇതുവരെയും എങ്ങുമെത്തിയിട്ടില്ല. പേരൂര്‍ക്കട ജംഗഷ്‌നിലെ നാലഞ്ചുകടമുറികള്‍ പൊളിച്ചിട്ടിരിക്കുകയാണ്. ഇതില്‍ പതിറ്റാണ്ടുകളുടെ പാരമ്പര്യമുള്ള ഒരു വൈദ്യശാലയും ഉള്‍പ്പെടും. ട്രിഡയ്ക്കാണ് കെട്ടിടനിര്‍മ്മാണത്തിന്‍റെ ചുമതല. കടകള്‍ നഷ്ടപ്പെട്ടവര്‍ ഇപ്പോള്‍ പെരുവഴിയിലായിരിക്കുന്നു. കെട്ടിടം പൊളിച്ചപ്പോള്‍ കച്ചവടക്കാരെ ഒഴിപ്പിച്ചു. പകരം ഇവര്‍ക്ക് സംവിധാനം ഒരുക്കിനല്‍കിയിട്ടുമില്ല. സ്ഥലമേറ്റെടുത്ത് വര്‍ഷങ്ങള്‍ കഴിഞ്ഞിട്ടും നിർമാണം തുടങ്ങിയിട്ടില്ലാത്തതാണ് വട്ടിയൂര്‍ക്കാവ് ജംഗ്ഷനിലെ പ്രശ്‌നം. പുനരധിവാസത്തിനും കെട്ടിടനിർമാണത്തിനുമായി ഇനിയും വര്‍ഷങ്ങള്‍ വേണ്ടിവരും. അതുവരെ കടകള്‍ നഷ്ടമായവര്‍ അതു സഹിച്ചു കഴിയേണ്ടിവരും എന്നതാണ് അവസ്ഥ. സ്ഥലം വിട്ടുനല്‍കി പണം ലഭിച്ചവര്‍ സ്വന്തമായി സ്ഥാപനങ്ങള്‍ പുതുക്കിപ്പണിത് കച്ചവടം തുടങ്ങിയിട്ടുണ്ട്. അതേസമയം വ്യാപാരസ്ഥാപനങ്ങള്‍ നഷ്ടപ്പെട്ട കച്ചവടക്കാര്‍ കാത്തിരിപ്പ് തുടരുകയാണ്. ചില വ്യാപാരികള്‍ പുരരധിവാസം ഉടന്‍ നടക്കുമെന്നു സ്വപ്‌നം കണ്ട് കഴിയുന്നുണ്ട്. വട്ടിയൂര്‍ക്കാവ് ജംഗ്ഷന്‍ വികസനം എങ്ങുമെത്താതെ പേരൂര്‍ക്കടയിലെ കടകള്‍ പൊളിക്കേണ്ടതില്ലായിരുന്നുവെന്ന അഭിപ്രായം നിലനില്‍ക്കുന്നുണ്ട്. പൂക്കടകള്‍, ആയുർവേദ സ്ഥാപനങ്ങള്‍, പ്രൊഫഷണല്‍ സ്റ്റോറുകള്‍ എന്നിവ പൊളിച്ചു മാറ്റപ്പെട്ടവയില്‍ ഉള്‍പ്പെടുന്നു. വട്ടിയൂര്‍ക്കാവ് ജംഗ്ഷന്‍ വികസനം ഉടന്‍ നടപ്പാക്കുമെന്നു വി.കെ പ്രശാന്ത് എംഎല്‍എ പറയുന്നുണ്ട്. എന്നാല്‍ ഇതിനായുള്ള കാത്തിരിപ്പ് നീളുന്നതിന് ആരും വ്യക്തമായ ഉത്തരം നല്‍കുന്നുമില്ല. ഇത് വരും നാളുകളില്‍ വ്യാപാരികളുടെയും സ്ഥലം വിട്ടുനല്‍കിയവരില്‍ ചിലരുടെയും വന്‍ പ്രതിഷേധങ്ങള്‍ക്ക് ഇടയാക്കിയേക്കും. photo വട്ടിയൂര്‍ക്കാവ് ജംഗ്ഷന്‍ വികസനത്തിന്‍റെ ഭാഗമായി പേരൂര്‍ക്കട ജംഗ്ഷനിലെ കടമുറികള്‍ ഇടിച്ചുനിരത്തിയ നിലയില്‍.

മദ്യപിച്ച പോലീസുകാരൻ ഓടിച്ച കാറിടിച്ച് ബാങ്ക് ജീവനക്കാരിക്ക് പരിക്ക്

പൂവച്ചൽ: മദ്യപിച്ച് പോലീസുകാരൻ അലക്ഷ്യമായി ഓടിച്ച കാറിടിച്ച് ബാങ്ക് ജീവനക്കാരിക്ക് പരിക്ക്. സ്കൂട്ടറുമായി കാർ 10 മീറ്ററോളം മുന്നോട്ടുപോയി ഹൈമാസ്റ്റ് തൂണിൽ ഇടിച്ചാണ് നിന്നത്. പൂവച്ചൽ ഐഒബി ബാങ്ക് ജീവനക്കാരി ഒറ്റശേഖരമംഗലം സ്വദേശിനി രാജിക്കാണ് പരിക്കേറ്റത്. പൂവച്ചൽ പഞ്ചായത്ത് ഓഫീസിനും സ്കൂളിനും മദ്ധ്യേ ഇന്നലെ ഉച്ചകഴിഞ്ഞ് 2.30 ഓടെയായിരുന്നു അപകടം. വെള്ളനാട് ഭാഗത്ത് നിന്ന് കാട്ടാക്കടയിലേക്ക് വന്ന കാർ മുന്നിലൂടെ പോകുകയായിരുന്ന സ്കൂട്ടറിനെ ഇടിച്ചു തെറിപ്പിക്കുകയായിരുന്നു. ഡ്രൈവറും വട്ടിയൂർക്കാവ് പൊലിസ് സ്റ്റേഷനിൽ സിപി ആയ മനോജ്, ഇയാളുടെ സുഹൃത്ത് രതീഷ് എന്നിവർ മദ്യപിച്ച് ലക്ക് കെട്ട അവസ്ഥയിലായിരുന്നു വെന്നും വാഹനത്തിൽ മദ്യക്കുപ്പികൾ ഉണ്ടായിരുന്നതായും നാട്ടുകാർ പറയുന്നു.

വാഹനത്തിന് തീ പിടിച്ചു; ഡ്രൈവര്‍ ചാടി രക്ഷപ്പെട്ടു

മെഡിക്കല്‍കോളജ്: ഉള്ളൂര്‍ ജംഗ്ഷനില്‍ ഫുഡ് ഡെലിവറി വാഹനത്തിന് തീ പിടിച്ചു. ഡ്രൈവര്‍ ചാടി രക്ഷപ്പെട്ടു. ഇന്നലെ വൈകുന്നേരം 5.15നായിരുന്നു സംഭവം. മെഡിക്കല്‍കോളജില്‍ നിന്ന് ഉള്ളൂര്‍ ജംഗ്ഷന്‍ വഴി ആക്കുളത്തേക്ക് പോകുകയായിരുന്ന പിക് അപ് ഓട്ടോയ്ക്കാണ് തീ പിടിച്ചത്. സീബറി ഫുഡ്‌സ് പ്രൈവറ്റ് ലിമിറ്റഡ് എന്ന കമ്പനിയുടെ വാഹനത്തിനാണ് തീ പിടിച്ചത്. തിരുവനന്തപുരം സ്വദേശിയായ ഡ്രൈവര്‍ കിരണ്‍ ഓട്ടോയില്‍ നിന്ന് ചാടി രക്ഷപ്പെട്ടു. നാട്ടുകാരും ഡ്രൈവറും ചേര്‍ന്നു തീ കെടുത്തുകയിരുന്നു.

പാങ്ങോട് മിലിട്ടറി ക്യാമ്പില്‍ വീണ്ടും മരം വീണു

പേരൂര്‍ക്കട: പാങ്ങോട് മിലിട്ടറി ക്യാമ്പില്‍ വീണ്ടും മരം വീണു. ഇന്നലെ വൈകുന്നേരത്തെ മഴയിലാണ് സംഭവം. ഇതോടെ ക്യാമ്പിനുള്ളില്‍ വീണ തണല്‍മരങ്ങളുടെ എണ്ണം 10 കവിഞ്ഞു. ഇന്നലെ റോഡിനു തടസമായി വീണത് ഒരു യൂക്കാലിപ്റ്റസ് മരമാണ്. ഒരു ദിവസം കൂറ്റന്‍ തണല്‍മരം വീണ് മിലിറ്ററി ക്യാമ്പിലെ ക്വാര്‍ട്ടേഴ്‌സിന് കേടുപാടുകള്‍ ഉണ്ടായിരുന്നു.

ആശ സമര യാത്ര ജില്ലയില്‍ ജനപ്രതിനിധി സഭ ഇന്ന്

തിരുവനന്തപുരം: 13 ജില്ലകളില്‍ പര്യടനം പൂര്‍ത്തിയാക്കിയ ആശ വര്‍ക്കര്‍മാരുടെ രാപകല്‍ സമരയാത്ര ഇന്ന് ജില്ലയിലെത്തും. 17 വരെ ജില്ലയില്‍ പര്യടനം നടത്തും. കേരള ആശ ഹെല്‍ത്ത് വര്‍ക്കേഴ്‌സ് അസോസിയേഷന്‍ സംസ്ഥാന ജനറല്‍ സെക്രട്ടറി എം.എ. ബിന്ദു നയിക്കുന്ന യാത്ര മേയ് അഞ്ചിന് കാസര്‍ഗോഡ് നിന്നാണ് ആരംഭിച്ചത്. തിരുവനന്തപുരം ജില്ലയില്‍ മൂന്നു ദിവസങ്ങളിലായി 12 കേന്ദ്രങ്ങളില്‍ യാത്രയ്ക്ക് സ്വീകരണം നല്‍കും. ഓരോ കേന്ദ്രങ്ങളിലും പ്രത്യേക സ്വാഗതസംഘങ്ങള്‍ രൂപീകരിച്ച് തയാറെടുപ്പുകള്‍ പൂര്‍ത്തിയാക്കിയതായി ജില്ലാ സ്വാഗതസംഘം ചെയര്‍മാന്‍ പ്രഫ.ബി. രാജീവന്‍, കണ്‍വീനര്‍ എസ്. മിനി എന്നിവര്‍ പറഞ്ഞു. ആശാവര്‍ക്കര്‍മാരുടെ ആവശ്യങ്ങള്‍ പരിഗണിക്കുന്നതിനായി തദ്ദേശസ്ഥാപനങ്ങളുടെ ജനപ്രതിനിധി സഭ ഇന്ന് വെഞ്ഞാറമൂട് സംഘടിപ്പിക്കും. ആശാവര്‍ക്കര്‍മാരുടെ രാപകല്‍ സമര യാത്രയുടെ സ്വീകരണത്തോടനുബന്ധിച്ച് നടക്കുന്ന പരിപാടിയില്‍ വിവിധ ഗ്രാമപഞ്ചായത്ത് പ്രതിനിധികള്‍ പങ്കെടുക്കും. ഉച്ചകഴിഞ്ഞ് രണ്ടു മുതല്‍ ആരംഭിക്കുന്ന സഭയില്‍ പാങ്ങോട് ഗ്രാമപഞ്ചായത്ത് പ്രസിഡന്‍റ് എം. ഷാഫി അധ്യക്ഷത വഹിക്കും. തുടര്‍ന്ന് ആശാവര്‍ക്കര്‍മാര്‍ സമരാവശ്യമായി ഉന്നയിച്ച വിഷയങ്ങള്‍ അജണ്ടയായി ചര്‍ച്ച ചെയ്യും. ആശാവര്‍ക്കര്‍മാരുടെ ആവശ്യങ്ങള്‍ അംഗീകരിക്കണം എന്നാവശ്യപ്പെട്ട് മുഖ്യമന്ത്രിക്ക് സമര്‍പ്പിക്കുന്നതിനുള്ള പ്രമേയം നെല്ലനാട് ഗ്രാമപഞ്ചായത്ത് പ്രസിഡന്‍റ് ബീന രാജേന്ദ്രന്‍ അവതരിപ്പിക്കും.

നിരോധിത മത്സ്യബന്ധന ഉപകരണങ്ങൾ പിടികൂടി

വിഴിഞ്ഞം : നിരോധിത ലൈറ്റ് ഫിഷിംഗിനായി ഉപകരണം സൂക്ഷിച്ച രണ്ട് വള്ളങ്ങൾ ഫിഷറീസ് വകുപ്പ് അധികൃതർ പിടികൂടി. പുല്ലുവിള സ്വദേശികളായ ബെഞ്ചമിൻ , ബൈജു എന്നിവരുടെ വള്ളങ്ങളാണ് അധികൃതർ കസ്റ്റഡിയിൽ എടുത്തത്. വിഴിഞ്ഞം ഹാർബറിൽ നടത്തിയ പരിശോധനയിലാണ് ആഴക്കടലിൽ കൃത്രിമ വെളിച്ചം സൃഷ്ടിച്ചു മത്സ്യ ബന്ധനം നടത്തുന്നതായി കണ്ടെത്തിയത്. വളത്തിലുണ്ടായിരുന്ന മത്സ്യങ്ങൾ രണ്ട് ലക്ഷത്തി നാല്പത്തി ഏഴായിരം രൂപയ്ക്ക് ലേലം ചെയ്ത് തുക സർക്കാരിലേക്ക് അടപ്പിച്ചു. അനധികൃതവും അശാസ്ത്രീയവുമായ മത്സ്യബന്ധനം തടയുന്നതിന്‍റെ ഭാഗമായിട്ടായിരുന്നു മിന്നൽ പരിശോന. രാത്രി അമിത വെളിച്ചം ഉപയോഗിച്ചു മത്സ്യക്കൂട്ടങ്ങളെ ആകർഷിച്ച് ചെറുമത്സ്യങ്ങൾ ഉൾപ്പെടെയാണു പിടിച്ചെടുക്കുന്നത്. പിടികൂടിയ വള്ളത്തിന്‍റെ ഉടമയ്ക്കെതിരേ കേരള മത്സ്യബന്ധന നിയന്ത്രണ നിയമ പ്രകാരം നടപടി സ്വീകരിക്കുമെന്നും കടലിൽ മത്സ്യസമ്പത്ത് കുറയാൻ കാരണമാകുന്ന നിയമവിരുദ്ധ പ്രവർത്തനങ്ങൾ നടത്തുന്ന ബോട്ടുകൾക്കെതിരേ നടപടി കർശനമാക്കുമെന്നും ഫിഷറീസ് അധികൃതർ അറിയിച്ചു.

പഴവങ്ങാടി-തകരപ്പറമ്പ് റോഡിൽ കേബിള്‍ കുരുക്ക്

തിരുവനന്തപുരം: പഴവങ്ങാടി-തകരപ്പറമ്പ് റോഡിലെ ഭീമന്‍ കേബിള്‍ക്കുരുക്ക് വാഹനയാത്രികര്‍ക്കും വഴിയാത്രികര്‍ക്കും ഒരുപോലെ ദുരിതം സൃഷ്ടിക്കുന്നു. റോഡിന് സമാന്തരമായി കടന്നുപോകുന്ന തോടിന്‍റെ വശത്തുകൂടിയാണ് കേബിളുകള്‍ പോകുന്നത്. ഇതാണ് വലിയ കുരുക്കായി റോഡിലേക്ക് വീണു കിടക്കുന്നത്. സ്വകാര്യ കേബിളുകളും ടെലിഫോണ്‍ കേബിളുകളും ഇന്‍റര്‍നെറ്റ് കണക്ഷന്‍ കേബിളുകളും ഉള്‍പ്പെടെയാണ് കുരുങ്ങിക്കിടക്കുന്നത്. റോഡിന് പൊതുവെ വീതി കുറവാണ്. വണ്‍വേ റോഡ് അല്ലാത്തതിനാല്‍ കാറുകള്‍ വരെ ഇതുവഴി കഷ്ടിച്ച് കടന്നുപോകുന്നുണ്ട്. എതിരേ വരുന്ന വാഹനങ്ങള്‍ക്ക് സൈഡ് കൊടുക്കുമ്പോഴാണ് കേബിള്‍ക്കുരുക്കില്‍ അകപ്പെടാനുള്ള സാദ്ധ്യത കൂടുതലുള്ളത്. കഴിഞ്ഞ ഒരാഴ്ചയ്ക്കിടെ 10 പേര്‍ ഇവിടെ അപകടത്തില്‍പ്പെട്ടതായി കടയുടമകള്‍ സാക്ഷ്യപ്പെടുത്തുന്നു. വാഹനങ്ങളുടെ ഹാന്‍ഡിലില്‍ കേബിള്‍ കുരുങ്ങിയാണ് ഭൂരിഭാഗം പേര്‍ക്കും അപകടം സംഭവിച്ചിരിക്കുന്നത്.

പാസ്റ്ററും സഹായിയായ സ്ത്രീയും ആശ്രമത്തിലെ കിണറ്റിൽ മരിച്ച നിലയിൽ

വിളപ്പിൽശാല : വിളപ്പിൽശാല ചൊവ്വള്ളൂർ പരുത്തൻപാറയിൽ പാസ്റ്ററെയും സഹായിയായ സ്ത്രീയേയും ആശ്രമത്തിലെ കിണറ്റിൽ മരിച്ച നിലയിൽ കണ്ടെത്തി. അന്തിയൂർക്കോണം സ്വദേശി ദാസയ്യൻ (85), സഹായിയായ ചെല്ലമ്മ (83) എന്നിവരാണ് മരിച്ചത്. ആശ്രമത്തിന്‍റെ ഉടമസ്ഥ തർക്കത്തെ ചൊല്ലി കേസ് നടക്കുന്നതിനിടെയായിരുന്നു മരണം. ആത്മഹത്യയെന്നാണ് പോലീസ് അറിയിക്കുന്നത്. പരുത്തൻപാറയിൽ 12 വർഷത്തിലേറെയായി ബദസ്ഥ എന്ന ആശ്രമം നടത്തിവരികെയാണ് പാസ്റ്റർ ദാസയ്യൻ. സഹായികളായി ചെല്ലമ്മ, ശാന്ത എന്നീ രണ്ട് വയോധികരുമുണ്ടായിരുന്നു. ഇന്നലെ രാവിലെ ആശ്രമത്തിന് സമീപത്തെ കിണറ്റിലാണ് ഇരുവരേയും മരിച്ചനിലയിൽ കണ്ടത്. ശാന്തയാണ് രാവിലെ മൃതദേഹം കണ്ടത്. കാട്ടാക്കട അഗ്നിരക്ഷാസേന എത്തിയാണ് മൃതദേഹങ്ങൾ പുറത്തെടുത്തത്. ആദ്യം വൃദ്ധയുടെ മൃതദേഹമാണ് ലഭിച്ചത് തുടർന്ന് പാസ്റ്ററുടെ മൃതദേഹവും കണ്ടെത്തുകയായിരുന്നു. പുലർച്ചെ മൂന്നരയ്ക്ക് പള്ളിയിൽ നിന്നും പ്രാർഥന കേട്ടിരുന്നതായി സമീപവാസികൾ പറയുന്നു. വിളപ്പിൽശാല പോലീസ് തുടർനടപടികൾ സ്വീകരിച്ചു. മുങ്ങിമരണമെന്നാണ് പോസ്റ്റുമോർട്ടത്തിലെ കണ്ടെത്തൽ. അതേസമയം മരണത്തിൽ ചില സംശയങ്ങൾ നിലനിൽക്കുന്നുണ്ട്. സാം എന്നയാൾ 12 വർഷം മുൻപ് സൗജന്യമായി നൽകിയ ഭൂമിയിലാണ് ദാസയ്യൻ ആശ്രമം നടത്തിയിരുന്നത്. ദാസയ്യന്‍റെ മരണശേഷം ഭൂമി സാമിന്‍റെ മക്കൾക്ക് തിരികെ കൊടുക്കണമെന്നായിരുന്നു ഉപാധി. എന്നാൽ അടുത്തിടെ ദാസയ്യൻ ഭൂമി വിൽക്കാൻ ശ്രമിച്ചു. ഇതറിഞ്ഞെത്തിയ സാം ഒന്നര ലക്ഷം രൂപ നൽകി ഭൂമി താൻ തന്നെ വാങ്ങിക്കാമെന്ന് അറിയിച്ചു. എന്നാൽ ഒന്നര ലക്ഷം പോര, നാല് ലക്ഷം കൂടി അധികം വേണമെന്ന് ദാസയ്യൻ അറിയിച്ചു. ഇതോടെ സാം കോടതിയെ സമീപിച്ചു. ഇതിന്മേലുള്ള തർക്കവും ഒത്തുതീർപ്പ് ചർച്ചകളും നടക്കുന്നതിനിടെയാണ് മരണം. മരണസമയത്ത് ശാന്ത ആശ്രമത്തിലുണ്ടായിരുന്നെങ്കിലും ഒന്നും അറിഞ്ഞില്ലെന്നാണ് മൊഴി ചൊവ്വള്ളൂരിലെ പെന്തക്കോസ്ത് പള്ളിക്കായി കഴക്കൂട്ടം കീഴായിക്കോണം സ്വദേശിയായ സാം എഡ്വേഡ് ദാസയ്യന്‍റെ ഓട്ടിസം ബാധിച്ച മകന്‍റെ പ്രാർഥനയ്ക്ക് വേണ്ടിയാണ് സ്ഥലം വാങ്ങി നൽകിയത്. എന്നാൽ ഇപ്പോൾ ആത്മഹത്യ ചെയ്തവരിൽ ഒരാളായ ചെല്ലമ്മയുടെ പയറ്റുവിളയിലുള്ള അഞ്ച് സെന്‍റിൽ പ്രാർഥനാലയം നിർമിക്കാനായി അമ്പതിനായിരം രൂപ മുൻകൂറായി നൽകിയിരുന്നു. ഈ വിഷയങ്ങൾ സംബന്ധിച്ച് ഇവരിൽ ചില തർക്കങ്ങൾ ഉണ്ടാവുകയും അത് കോടതിയിൽ എത്തുകയും ചെയ്തിരുന്നു. ഇതുസംബന്ധിച്ച് ഒത്തുതീർപ്പിനുള്ള കൂടിക്കാഴ്ച ഇന്നലെ രണ്ടുമണിക്ക് നടക്കാനിരിക്കെയാണ് പുലർച്ചെ ദാസയ്യനും ചെല്ലമ്മയും ജീവനൊടുക്കിയത്.

മൈലം ഷാലോം സിഎസ്ഐ ഇംഗ്ലീഷ് സ്കൂളിൽ പഠനോപകരണ വിതരണം

നെടുമങ്ങാട്: തിരുവനന്തപുരം വൈഎംസിഎയുടെ ആഭിമുഖ്യത്തിൽ മൈലം ഷാലോം സിഎസ്ഐ ഇംഗ്ലീഷ് മീഡിയം സ്കൂളിൽ പഠനോപകരണങ്ങൾ വിതരണം ചെയ്തു. വൈഎംസിഎ പ്രസിഡന്‍റ് അഡ്വ. ഇടിക്കുള സക്കറിയ ഉദ്ഘാടനം ചെയ്തു. റവ. ജി. സ്റ്റുവർട്ട് അധ്യക്ഷനായി. വൈഎംസിഎ ജനറൽ സെക്രട്ടറിമാരായ ജോൺ ബി. കൊട്ടറ, ടിബു ജോസഫ്, ട്രഷറർ ഡോ. തോമസ് ഫിലിപ്പ്, പ്രധാനാധ്യാപിക ബിന്ദു, സ്കൂൾ കൺവീനർ എ. ക്രിസ്തുധരൻ, പിടിഎ പ്രസിഡന്‍റ് ബിജുകുമാർ, വൈഎംസിഎ പ്രോജക്ട് മാനേജർ എസ്.വി.മോഹൻ എന്നിവർ പങ്കെടുത്തു.

ലഹരിയടങ്ങിയ മിഠായികളുടെ വിൽപന : എക്സൈസ്, ഫുഡ് സേഫ്റ്റി ഉദ്യോഗസ്ഥർ പരിശോധന നടത്തി

നെടുമങ്ങാട്: പാൻപരാഗിന്‍റെ രുചി അടങ്ങിയ മിഠായി വിൽക്കുന്നതായി പരാതിയെ തുടർന്ന് അരുവിക്കരയിലും പരിസര പ്രദേശങ്ങളിലും എക്സൈസ്, ഫുഡ് ആൻഡ് സേഫ്റ്റി, ഹെൽത്ത് വിഭാഗം ഉദ്യോഗസ്ഥർ സംയുക്ത പരിശോധന നടത്തി. അരുവിക്കര സ്കൂൾ പരിസരത്തും മുള്ളിലവിൻമൂട് ജംഗ്ഷനിലും പരിശോധന നടത്തിയെങ്കിലും പരാതിയിൽ പറയുന്ന മിന്‍റോപാൻ എന്ന മിഠായി കണ്ടെത്താനായില്ല. കഴിഞ്ഞ ദിവസം അരുവിക്കരയിൽ നടന്ന കല്യാണ സൽക്കാര ചടങ്ങിൽ മിഠായി കഴിച്ച പലർക്കും പാൻപരാഗിന്‍റെ രുചി അസ്വസ്തത പ്രകടിപ്പിക്കുകയും ചെയ്തിരുന്നു. അരുവിക്കരയിലും പരിസര പ്രദേശങ്ങളിലും ഇത്തരം അനധികൃത മിഠായികൾ വിൽപ്പന നടത്തുന്നതായും സ്കൂൾ കുട്ടികൾ ഉൾപ്പെടെയുള്ളവർ വാങ്ങി കഴിക്കുന്നതായും സോഷ്യൽ മീഡിയയിൽ വ്യാപക പ്രചാരണം ഉയർന്നിരുന്നു. തുടർന്നാണ് ഫുഡ് ആൻഡ് സേഫ്റ്റിയും എക് സൈസും ആരോഗ്യ വിഭാഗവും സംയുക്തമായി പരിശോധന നടത്തിയത്. പല കടകളും ലേബൽ ഇല്ലാത്തതും കാലാവധി കഴിഞ്ഞതുമായ മിഠായികൾ വിൽപ്പന നടത്തുന്നതായി കണ്ടെത്തി. ഉദ്യോഗസ്ഥർ കട ഉടമകൾക്ക് താക്കീത് നൽകി. ഫുഡ് ആൻഡ് സേഫ്റ്റി ഓഫീസർ പൂജ, അസിസ്റ്റന്‍റ് എക് സൈസ് ഇൻസ്പെക്ടർ വി. അനിൽകുമാർ, പ്രിവന്‍റീവ് ഓഫീസർമാരായ പ്രശാന്ത്, ദിലീപ് കുമാർ, സിവിൽ എക്സൈസ് ഓഫീസർമാരായ ആരോമൽ, ശ്രീജിത്ത് ഹെൽത്ത് ഇൻസ്പെക്ടർ മനോഹർ, ജൂണിയർ ഹെൽത്ത് ഇൻസ്പെക്ടർമാരായ പ്രസാദ്, അനു, വിനോദ്, സുനിൽരാജ് തുടങ്ങിയവർ സംയുക്ത പരിശോധനയിൽ പങ്കെടുത്തു. ലഹരി ഉപയോഗത്തിനെതിരെയുള്ള സന്ദേശമടങ്ങിയ നോട്ടീസുസുകൾ ഉദ്യോഗസ്ഥർ പൊതുജനങ്ങൾക്ക് കൈമാറി. തുടർന്നും പരിശോധന നടത്തുമെന്ന് ഉദ്യോഗസ്ഥർ അറിയിച്ചു.

നെയ്യാറ്റിന്‍കര നഗരസഭയില്‍ ആര്‍ആര്‍എഫ് ആരംഭിച്ചു

നെയ്യാറ്റിൻകര: നഗരസഭയുടെ റിസോഴ്സ് റിക്കവറി ഫെസിലിറ്റി (ആര്‍ആര്‍എഫ്) യൂണിറ്റ് അമരവിളയില്‍ യാഥാര്‍ഥ്യമായി. നഗരസഭയുടെ ഏക ആര്‍ആര്‍എഫ് യൂണിറ്റാണിത്. ഇവിടെ നേരത്തെ മെറ്റീരിയല്‍ കളക്ഷന്‍ ഫെസിലിറ്റി (എംസിഎഫ്)യൂണിറ്റ് പ്രവര്‍ത്തിച്ച് വരികയായിരുന്നു. നഗരസഭയുടെ നിയന്ത്രണത്തില്‍ അമരവിള ഉള്‍പ്പെടെ മൂന്നു എംസിഎഫ് യൂണിറ്റുകളാണുള്ളത്. ആറാലുംമൂട്, തൊഴുക്കല്‍ എന്നിവിടങ്ങളിലാണ് മറ്റുള്ള രണ്ടെണ്ണം. ക്ലസ്റ്റർ അടിസ്ഥാനത്തിലാണ് ആര്‍ആര്‍എഫിന്‍റെ പ്രവർത്തനം നിലവില്‍ ആസൂത്രണം ചെയ്തിട്ടുള്ളത്. നഗരസഭയുടെ ഹരിതകര്‍മ സേനാംഗങ്ങളാണ് ഈ പ്രവൃത്തികളില്‍ ഏര്‍പ്പെടുക. നിലവിൽ പരിശീലനവും ക്രമീകരണവും ആണ് നടക്കുന്നത്. ആര്‍ആര്‍എഫിന്‍റെ ഉദ്ഘാടനം കെ. ആന്‍സലന്‍ എംഎല്‍എ നിര്‍വഹിച്ചു. നെയ്യാറ്റിന്‍കര നഗരസഭ വൈസ് ചെയര്‍പേഴ്സണ്‍ പ്രിയാ സുരേഷ്, സ്റ്റാന്‍ഡിംഗ് കമ്മിറ്റി ചെയര്‍മാന്മാരായ കെ.കെ ഷിബു, ഡോ. എം.എ സാദത്ത്, എന്‍. കെ അനിതകുമാരി, ആര്‍. അജിത, കൗണ്‍സിലര്‍മാരായ ഷിബുരാജ് കൃഷ്ണ, കല, പ്രസന്നകുമാര്‍, ബിനു, അമാസ് കേരള ഡയറക്ടര്‍ ടോമി ജോണ്‍, ഹരിതകര്‍മ സേനാംഗങ്ങള്‍, നഗരസഭ ഉദ്യോഗസ്ഥര്‍ എന്നിവര്‍ സംബന്ധിച്ചു.

സാമ്പിള്‍ ശേഖരണത്തിനു വൈറോളജി വാഹനം എത്തി

മെഡിക്കല്‍ കോളജ്: തിരുവനന്തപുരം മെഡിക്കല്‍കോളജ് കാമ്പസിലെ ആശുപത്രികളില്‍ നിന്നും വൈറോളജി വിഭാഗത്തിലേയ്ക്കുള്ള സാമ്പിളുകള്‍ സ്വീകരിക്കാന്‍ ആശുപത്രിക്കുള്ളില്‍ സംവിധാനമായി. ഇതിനായി തോന്നയ്ക്കല്‍ ഇന്‍സ്റ്റിറ്റ്യൂട്ട് ഓഫ് അഡ്വാന്‍സ്ഡ് വൈറോളജിയുടെ സ്‌പെസിമെന്‍ കളക്ടിംഗ് വാന്‍ കാമ്പസിനുള്ളിലെത്തി സാമ്പിളുകള്‍ സ്വീകരിച്ചു തുടങ്ങി. മെഡിക്കല്‍ കോളജ് മള്‍ട്ടി ഡിസിപ്‌ളിനറി റിസര്‍ച്ച് ലാബില്‍ പരിശോധിക്കാത്ത വൈറല്‍ രോഗങ്ങളുടെ സാമ്പിളുകളാണ് വാനില്‍ സ്വീകരിക്കുന്നത്. ഈ സാമ്പിളുകള്‍ തോന്നയ്ക്കല്‍ ഇന്‍സ്റ്റിറ്റ്യൂട്ട് ഓഫ് അഡ്വാന്‍സ്ഡ് വൈറോളജിയില്‍ കൊണ്ടുപോയാണ് പരിശോധിക്കുന്നത്. പരിശോധനാഫലം രോഗിയെ ചികിത്സിക്കുന്ന ഡോക്ടര്‍മാര്‍ക്ക് അയച്ചു കൊടുക്കും. രോഗികളും ബന്ധുക്കളും സാമ്പിളുമായി തോന്നയ്ക്കല്‍ വരെ പോകേണ്ടതില്ല എന്നതാണ് ഈ സംവിധാനം കൊണ്ടുള്ള പ്രധാന നേട്ടം. മെഡിക്കല്‍ കോളജ് ക്യാമ്പസില്‍ എല്ലാ പ്രവൃത്തിദിനങ്ങളിലും രാവിലെ 9.30 മുതല്‍ 12.30 വരെ സാമ്പിളുകള്‍ സ്വീകരിക്കും.

യുവാവ് ഗുണ്ടാ നിയമപ്രകാരം അറസ്റ്റില്‍

പേരൂര്‍ക്കട: ഗുണ്ടാനിയമപ്രകാരം പ്രതിയെ പോലീസ് പിടികൂടി. മണക്കാട് കുര്യാത്തി തിട്ടക്കുടി വീട്ടില്‍ അനീഷ്‌കുമാര്‍ (31) ആണ് പിടിയിലായത്. നിരവധി ക്രിമിനല്‍ക്കേസുകളില്‍ ഏര്‍പ്പെട്ടതോടുകൂടിയാണ് ഇയാള്‍ക്കെതിരേ ഗുണ്ടാനിയമം പ്രയോഗിക്കാന്‍ ജില്ലാകളക്ടര്‍ ഉത്തരവിട്ടത്. തുടര്‍ന്ന് ഫോര്‍ട്ട് പോലീസ് ഇയാളുടെ അറസ്റ്റ് രേഖപ്പെടുത്തുകയായിരുന്നു. തിരുവനന്തപുരം സെന്‍ട്രല്‍ ജയിലില്‍പാര്‍പ്പിച്ച പ്രതിയെ തുടര്‍ന്ന് വിയ്യൂര്‍ സെന്‍ട്രല്‍ ജയിലിലേക്കു മാറ്റിയതായി ഫോര്‍ട്ട് സിഐ ശിവകുമാര്‍ അറിയിച്ചു.

മണലയം മലങ്കര കത്തോലിക്ക പള്ളിയിൽ തിരുനാൾ ആരംഭിച്ചു

തിരുവനന്തപുരം: മണലയം സെന്‍റ് ആന്‍റണീസ് മലങ്കര കത്തോലിക്കാ പള്ളിയിൽ ഇടവക തിരുനാൾ ആരംഭിച്ചു. ഇടവക വികാരി ഫാ. ജോണ്‍സണ്‍ പുതുവേലിൽ കൊടിയേറ്റ് കർമം നിർവഹിച്ചു. ഇന്നു വൈകുന്നേരം 5.30ന് സന്ധ്യാപ്രാർഥനയ്ക്കു ശേഷം വിശുദ്ധ കുർബാന. ഫാ. ബർണാർഡ് വലിയവിള കാർമികനായിരിക്കും. നാളെ വൈകുന്നരം അഞ്ചിന് സന്ധ്യാപ്രാർഥന. തുടർന്ന് ഫാ. ജോർജ് കുരക്കോട്ടിന്‍റെ കാർമികത്വത്തിൽ വിശുദ്ധ കുർബാന. 7.30ന് ഭക്തിനിർഭരമായ തിരുനാൾ റാസ. പള്ളിയിൽ നിന്ന് ആരംഭിച്ച് സെന്‍റ് ഷന്താൾ സ്കൂൾ വഴി പാലക്കുഴി, മലമുകൾ, മണലയം വഴി തിരികെ പള്ളിയിൽ എത്തിച്ചേരും. പ്രധാന തിരുനാൾ ദിനമായ ഞായറാഴ്ച വൈകുന്നേരം 5.30ന് ബിഷപ് തോമസ് മാർ യൗസേബിയോസിനു സ്വീകരണം. തുടർന്ന് ആഘോഷമായ തിരുനാൾ കുർബാന. സ്നേഹവിരുന്നിനു ശേഷം കൊടിയിറക്കുന്നതോടെ തിരുനാൾ സമാപിക്കും.

മുളമുക്ക്-മുല്ലശേരി റോഡിന്‍റെ ഇരുവശങ്ങളിലും ഗർത്തങ്ങൾ

നെടുമങ്ങാട്: മുളമുക്ക് -മുല്ലശേരി റോഡിന്‍റെ ഇരുവശങ്ങളിലുംഗർത്തങ്ങൾ രൂപപ്പെട്ടതാ യി പരാതി. വഴയില-പഴകുറ്റി നാലുവരി പാതയുടെ നിർമാ ണവുമായി ബന്ധപ്പെട്ട് മെയിൻ റോഡുകൾ അടച്ചതിന്‍റെ ഭാഗമായി ദിവസവും നിരവധി ചെറുതും വലുതുമായ നിരവധി വാഹനങ്ങളാണ് മുളമുക്ക് റോഡ് വഴി പോകുന്നത്. മുളമുക്ക് മുതൽ മുല്ലശേരി വരെ റോഡിന്‍റെ ഇരുവശങ്ങളിലാ ണു ഗർത്തങ്ങൾ രൂപപ്പെട്ടിരി ക്കുന്നത്. ഒരു വാഹനം വന്നാൽ മറ്റു വാഹനത്തിന് സൈഡ് നൽകാനോ കാൽനട യാത്ര ക്കാരനു മാറിനിൽക്കാനോ പോലും പറ്റാത്ത അവസ്ഥയാണ്. റോഡു വക്കിലെ കുഴിയിൽവീണു അപകടങ്ങൾ ഉണ്ടാകുന്നതും പതിവാണ്. റോഡ് സഞ്ചാരയോഗ്യമാക്കണമെ നുള്ള ആവശ്യവും ശക്തമായി.

ജില്ലയിൽ രണ്ടു മഹിളാപ്രധാൻ ഏജന്‍റുമാരെ സസ്പെന്‍റു ചെയ്തു

തിരുവനന്തപുരം: ജില്ലയിൽ മഹിളാപ്രധാൻ ഏജന്‍റായി ബാലരാമപുരം പോസ്റ്റോഫീസ് മുഖേന പ്രവർത്തിക്കുന്ന ഡി. അംബിക, പൂവാർ പോസ്റ്റോഫീസ് മുഖേന പ്രവർത്തിക്കുന്ന ജെ. ജയകുമാരി എന്നിവരെ സസ്പെന്‍റു ചെയ്തു. ഏജൻസി പ്രവർത്തനം തൃപ്തികരമല്ലാത്തതിനാലും ഏജൻസി ചട്ടപ്രകാരം നിക്ഷേപകരിൽ നിന്നും കൈപ്പറ്റിയ മാസത്തവണകൾ ഒടുക്കാത്തതിനാലും നിരവധി തവണ താക്കീത് നൽകിയിട്ടും വീഴ്ച ആവർത്തിക്കുന്നതിനാലുമാണ് അന്വേഷണ വിധേയമായി ‌ഇരുവരേയും സസ്‌പെൻഡ് ചെയ്തത്. ഈ ഏജന്‍റുമാർ മുഖേന പോസ്റ്റോഫീസിൽ ആർഡി നിക്ഷേപം നടത്തി വരുന്ന മുഴുവൻ നിക്ഷേപകരും അതാത് പോസ്റ്റോഫീസുമായി ബന്ധപ്പെട്ടു തങ്ങളുടെ നിക്ഷേപങ്ങളുടെ സുരക്ഷിതത്വം ഉറപ്പുവരുത്തണം. പരാതിയുള്ളവർ പാറശാല ബ്ലോക്ക് ഓഫീസുമായി ബന്ധപ്പെടണം. ദേശീയ സമ്പാദ്യ പദ്ധതിയുമായി ബന്ധപ്പെട്ട് യാതൊരുവിധ പണമിടപാടും ഈ മഹിളാപ്രധാൻ ഏജന്‍റുമാരുമായി നടത്താൻ പാടില്ലായെന്ന് ദേശീയ സമ്പാദ്യ പദ്ധതി ഡെപ്യൂട്ടി ഡയറക്ടർ അറിയിച്ചു. മഹിളാപ്രധാൻ ഏജന്‍റുമാരുമായി ബന്ധപ്പെട്ട എല്ലാവിധ പരാതികളും ദേശീയ സമ്പാദ്യ പദ്ധതി ജില്ലാ ഓഫീസറെ അറിയിക്കാവുന്നതാണ്. ഫോൺ നം. 0471-2478731.

ബോണക്കാട്ടെ ലയങ്ങളുടെ നവീകരണ പ്രവൃത്തി തുടങ്ങി

വിതുര: ബോണക്കാട്ടെ ശോച്യാവസ്ഥയിലായ ലയങ്ങളുടെ നവീകരണ പ്രവർത്തനങ്ങൾ ആരംഭിച്ചു. 43-കെട്ടിടങ്ങളിലെ ലയങ്ങളിലായി 187 കുടുംബങ്ങളാണ് ഇവിടെയുള്ളത്. രണ്ടുവർഷം മുമ്പ് ബോണക്കാട് സന്ദർശിച്ച മന്ത്രിമാരായ വി. ശിവൻകുട്ടി, കെ.എൻ.ബാലഗോപാൽ എന്നിവർ നൽകിയ ഉറപ്പാണ് നവീകരണത്തിലൂടെ യാഥാർഥ്യമാകുന്നത്. തോട്ടം പൂട്ടിയതോടെയുണ്ടായ തൊഴിൽ നഷ്ടത്തിനൊപ്പം വാസയോഗ്യമല്ലാത്ത ലയങ്ങളും തൊഴിലാളികളുടെ ജീവിതം ദുരിതത്തിലാക്കിയിരു ന്നു. തൊഴിലാളികൾ നയിക്കുന്ന ദുരിത ജീവിതത്തെക്കുറിച്ച് ജി. സ്റ്റീഫൻ എംഎൽഎ നിയമസഭയിൽ അവതരിപ്പിച്ച സബ്മിഷന്‍റെ അടിസ്ഥാനത്തിലായിരുന്നു മന്ത്രിമാരുടെ സന്ദർശനം. പൊട്ടിപ്പൊളിഞ്ഞ മേൽക്കൂരക്കു കീഴിൽ കഴിയുന്ന തൊഴിലാളികളെ സന്ദർശിച്ച ശേഷമാണു ശോച്യാവസ്ഥയിലായ ലയങ്ങൾ നവീകരിക്കാൻ തുക അനുവദിച്ചതായി മന്ത്രിമാർ അറിയിച്ചത് . നാലുകോടി രൂപയാണ് ചെലവ് പ്രതീക്ഷിക്കുന്നത്. 147 ലയങ്ങൾ പൂർണമായും നവീകരിക്കും. ബാക്കിയുള്ളവ അറ്റകുറ്റപ്പണി നടത്തും. മേൽക്കൂരയിൽ ഷീറ്റു പാകുന്നതിനൊപ്പം തറ സിമെന്‍റുചെയ്യും. വാതിൽ, ജനാല എന്നിവമാറ്റും. ചവിട്ടു പടികൾ നിർമിക്കും. ലയങ്ങളിൽ പുകയില്ലാത്ത അടുപ്പ് സ്ഥാപിക്കും. ലയങ്ങൾക്കൊപ്പം റേഷൻ കട, തപാലോഫീസ് എന്നിവയുടെ നവീകരണവും നടത്തും.

എൻസിസി "ലഹരി വിമുക്ത കേരളം' പരിപാടി സംഘടിപ്പിച്ചു

തിരുവനന്തപുരം: എൻസിസി ഗ്രൂപ്പ് ഹെഡ്ക്വാർട്ടേഴ്സിന്‍റെ ആഭിമുഖ്യത്തിൽ പാങ്ങോട് മിലിട്ടറി സ്റ്റേഷനിലെ കരിയപ്പ ഓഡിറ്റോറിയത്തിൽ "ലഹരി വിമുക്ത കേരളം' എന്ന പേരിൽ സിന്പോസിയം സംഘടിപ്പിച്ചു. ഗ്രൂപ്പ് കമാൻഡർ ബ്രിഗേഡിയർ ആനന്ദ് കുമാർ നേതൃത്വം നൽകി. എൻസി‌സി ഡയറക്ടറേറ്റ് (കേരളം ആൻഡ് ലക്ഷദ്വീപ്) അഡീഷണൽ ഡയറക്ടർ ജനറൽ മേജർ ജനറൽ ജി. രമേശ് ഷൺമുഖം അധ്യക്ഷത വഹിച്ചു. ധനവകുപ്പിലെ അഡീഷണൽ ചീഫ് സെക്രട്ടറി കെ ആർ ജ്യോതിലാൽ, എഡിജിപി എച്ച്. വെങ്കിടേഷ് എന്നിവർ പ്രഭാഷണം നടത്തി. ലഹരി വിരുദ്ധ കാമ്പയിന്‍റെ ഭാഗമായി കേഡറ്റുകൾ തെരുവു നാടകം, സ്കിറ്റ് എന്നിവ അവതരിപ്പിച്ചു. തിരുവനന്തപുരം ഗ്രൂപ്പിനു കീഴിലുള്ള ഓഫീസർമാർ, അസോസിയേറ്റ് എൻസിസി ഓഫീസർമാർ, പിഐ, സ്റ്റാഫുകൾ എന്നിവർ പങ്കെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]