ADVERTISEMENT

ADVERTISEMENT

പ്രഭാത ഭക്ഷണ പദ്ധതി

നെടുമങ്ങാട്: നഗരസഭ നടപ്പിലാക്കുന്ന സ്കൂൾ കുട്ടികൾക്കായുള്ള പ്രഭാത ഭക്ഷണ പദ്ധതി നെടുമങ്ങാട് ടൗൺ എൽപിഎസിൽ നഗരസഭ ചെയർപേഴ്സൺ സി.എസ്. ശ്രീജ ഉദ്ഘാടനം ചെയ്തു. വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സൺ പി. വസന്തകുമാരി അധ്യക്ഷത വഹിച്ചു.
ഹെഡ്മാസ്റ്റർ സനൽകുമാർ സ്വാഗതം പറഞ്ഞു. വാർഡ് കൗൺസിലർ ആദിത്യ വിജയകുമാർ, പിടിഎ പ്രസിഡന്‍റ് ബിനീഷ് തുടങ്ങിയവർ പ്രസംഗിച്ചു.

ADVERTISEMENT

ജി. ശങ്കരപ്പിള്ള പുരസ്കാരം

വെഞ്ഞാറമൂട് : പ്രഫ. ജി. ശങ്കരപിള്ള മെമ്മോറിയൽ സെന്‍റർ ഓഫ് പെർഫോമിംഗ് ആർട്സും രംഗപ്രഭാതും സംയുക്തമായി സംഘടിപ്പിച്ച പ്രഫ. ജി. ശങ്കരപ്പിള്ള സ്മാരക പുരസ്കാരം അന്തർദേശീയ നാടക പ്രതിഭ പ്രഫ. ബി. അനന്തകൃഷ്ണന് സമർപ്പിച്ചു. രംഗപ്രഭാത് നാടക ഗ്രാമത്തിൽ നടന്ന ചടങ്ങിൽ അഡ്വ. ഡി.കെ. മുരളി എംഎൽഎ പുരസ്‌കാരം സമർപ്പിച്ചു. ഡോ. എൻ. രാധാകൃഷ്ണൻ അധ്യക്ഷത വഹിച്ചു. സ്റ്റേറ്റ് ലൈബ്രറി കൗൺസിൽ സെക്രട്ടറി വി.കെ. മധു. വിശിഷ്ട അതിഥിയായി പങ്കെടുത്തു. നാടക സിനിമ മാധ്യമപ്രവർത്തകൻ ജോൺ സാമുവൽ, പ്രഫ.ജി ശങ്കരപ്പിള്ള സ്മാരക പ്രഭാഷണം നടത്തി. കെ. ശശികുമാർ സിത്താര സ്വാഗതം പറഞ്ഞു. കെ. എസ്. വിപിനചന്ദ്രൻ, പി.കെ. വേണുഗോപാൽ, എസ്. ഹരികൃഷ്ണൻ, കെ.എസ്. ഗീത, രാജീവ് വെഞ്ഞാറമൂട്, എസ്. അനിൽകുമാർ, എസ്. ഹരീഷ് എന്നിവർ പങ്കെടുത്തു. തുടർന്ന് പ്രഫ. ജി. ശങ്കരപ്പിള്ള രചിച്ച് എസ്. അനിൽകുമാർ സംവിധാനം നിർവഹിച്ച ഇരുളിൽ അലിയുന്ന സന്ധ്യ എന്ന നാടകം പ്രഫ. ജി ശങ്കരപ്പിള്ള മെമ്മോറിയൽ സെന്‍റർ ഓഫ് പെർഫോമിംഗ് ആർട്സ് അവതരിപ്പിച്ചു. ചിത്രലേഖ, വിഷ്ണു മോഹൻ, അമൽ ജി. നാഥ് എന്നിവർ മുഖ്യ കഥാപാത്രങ്ങളെ അവതരിപ്പിച്ചു.

തിരുവല്ലത്തെ മോഷണം: പ്രതി പിടിയിൽ

തിരുവല്ലം: പരശുരാമസ്വാമി ക്ഷേത്രത്തില്‍ കഴിഞ്ഞ കര്‍ക്കടക വാവുബലി ദിവസം ബലി തര്‍പ്പണത്തിനെത്തിയ ആളുടെ സ്‌കൂട്ടറില്‍ സൂക്ഷിച്ച പണം കവര്‍ന്ന കേസിലെ പ്രതിയെ തിരുവല്ലം പോലീസ് അറസ്റ്റ് ചെയ്തു. പാലോട് കരുമന്‍കോട് ചിപ്പന്‍ച്ചിറ സന്ധ്യകോട്ടെജില്‍ സനോഷ് ഗോപി (48) ആണ് പിടിയിലായത്. ശ്രീകാര്യം സ്വദേശിയുടെ സ്‌കൂട്ടറില്‍ നിന്നും 6,000 രൂപ മോഷ്ടിച്ച കേസിലാണ് പോലീസ് സനോഷിനെ അറസ്റ്റ് ചെയ്തതെന്ന് തിരുവല്ലം എസ്എച്ച്ഒ ജെ. പ്രദീപ് അറിയിച്ചു. പ്രതി പാലക്കാടുഭാഗത്തുണ്ടെന്നറിഞ്ഞ് അവിടെനിന്നുളള പോലീസിന്റെ സഹോയത്തോടുകൂടിയാണ് സനോഷിനെ പിടികൂടിയത്. കഴിഞ്ഞദിവസം കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.

നേമം റെയില്‍വേ ടെര്‍മിനലിന്‍റെ നിർമാണം പുരോഗമിക്കുന്നു

നേമം: നേമം റെയില്‍വേ വികസനവുമായി ബന്ധപ്പെട്ട് ആദ്യഘട്ടത്തിലെ നിർമാണം പുരോഗമിക്കുന്നു. മൂന്നു സ്റ്റേബ്ലിംഗ് ലൈനുകള്‍, രണ്ട് പിറ്റ് ലൈനുകള്‍, രണ്ട് സിക്ക് ലൈനുകള്‍, പുതിയ സ്റ്റേഷന്‍ കെട്ടിടം, അടിപ്പാത, മേല്‍പ്പാലം തുടങ്ങിയവയാണു ടെര്‍മിനലിന്‍റെ ഭാഗമായി ആദ്യഘട്ടത്തിലെ പദ്ധതികള്‍. 117 കോടി രൂപയാണു നിർമാണ പ്രവര്‍ത്തനങ്ങള്‍ക്ക് റെയില്‍വേ അനുവദിച്ചിരിക്കുന്നത്. നിലവില്‍ രണ്ട് പിറ്റ് ലൈനുകളുടെയും മൂന്ന് സ്റ്റേബിളിംഗ് ലൈനുകളുടെയും നിര്‍മാണം നേമത്ത് നടന്നുവരികയാണ്. പുതിയ സ്റ്റേഷന്‍ കെട്ടിടത്തിനുള്ള നിർമാണ പ്രക്രിയകളും ആരംഭിച്ചിട്ടുണ്ട്. പ്ലാറ്റ്‌ഫോം നിർമാണത്തിന്‍റെ ഭാഗമായുള്ള ഷെല്‍ട്ടറുകളുടെ പണികളും പൂര്‍ത്തിയായി വരുന്നു. തിരുവനന്തപുരം മുതല്‍ കന്യാകുമാരി വരെയുള്ള രണ്ടാംപാതയുടെ നിര്‍മ്മാണവും പുരോഗമിക്കുകയാണ്. തമ്പാനൂര്‍ മുതല്‍ നേമം വരെ മൂന്നാം പാതയും പരിഗണനയിലുണ്ട്. പലഭാഗങ്ങളിലുള്ള മേല്‍പ്പാല നിർമാണവും പുരോഗമിക്കുകയാണ്. നേമം റെയില്‍വേ സ്റ്റേഷനു സമീപത്തുള്ള സ്റ്റുഡിയോ റോഡ് മേല്‍പ്പാലത്തിന്‍റെ പണി അന്തിമഘട്ടത്തിലാണ്. പാത ഇരട്ടിപ്പിക്കലിന്‍റെ ഭാഗമായി ഭൂമി ഏറ്റെടുത്ത സമയത്തുതന്നെ മൂന്നാം പാതയ്ക്കുകൂടി ചേര്‍ത്താണു ഭൂമി എടുത്തത്. ആദ്യ ഘട്ടത്തില്‍ മൂന്നാം പാതയുടെ സിവില്‍ ജോലികള്‍ പൂര്‍ത്തിയാക്കും. ട്രാക്ക് ഇടുന്നതു പിന്നീടായിരിക്കും. നേമം ടെര്‍മിനല്‍ യാഥാർഥ്യമാകുമ്പോള്‍ തമ്പാനൂര്‍ സെന്‍ട്രല്‍ സ്റ്റേഷനില്‍നിന്നും അടിയന്തരമായി വണ്ടികള്‍ക്കു നേമത്തേയ്ക്കുവന്നു പോകുന്നതിന് ഈ പാത ഉപയോഗിക്കും. മേല്‍പ്പാലങ്ങളുടെ നിർമാണം പൂര്‍ത്തിയായാല്‍ പിന്നീട് മൂന്നാം പാതയുടെ പണികള്‍ ചെയ്യാന്‍ കഴിയില്ല. അതിനാല്‍ പാത ഇരട്ടിപ്പിക്കലിനോടൊപ്പം മൂന്നാം പാതയുടെ അടിസ്ഥാന നിർമാണ പ്രവര്‍ത്തനങ്ങള്‍കൂടി ചെയ്യും. മൂന്ന് പിറ്റ് ലൈനുകളും ഏഴ് സ്റ്റേബളിംഗ് ലൈനുകളും ഉള്‍പ്പെടുന്നതാണു രണ്ടാം ഘട്ടത്തില്‍ റെയില്‍വേയുടെ പരിഗണനയിലുള്ളത്. ഈ പദ്ധതി നടപ്പിലായാല്‍ കൂടുതല്‍ തീവണ്ടികള്‍ ഓടിക്കാന്‍ കഴിയും. ടെര്‍മിനല്‍ നിർമാണം പുരോഗമിക്കുന്ന തിരുവനന്തപുരം സൗത്തായി മാറിയ നേമം റെയില്‍വേ സ്റ്റേഷനില്‍ സംസ്ഥാനങ്ങളുടെ ചുമതലയുള്ള റെയില്‍വേ മന്ത്രി വി. സോമണ്ണ രണ്ട് മാസം മുമ്പ് സന്ദര്‍ശനം നടത്തി പണികളുടെ പുരോഗതി വിലയിരുത്തിയിരുന്നു.

നഗരസഭയുടെ ആര്‍ആര്‍എഫില്‍ ഹരിതകർമ സേനാംഗങ്ങളുടെ പരിശീലനം

നെയ്യാറ്റിൻകര : അമരവിളയില്‍ ആരംഭിച്ച നെയ്യാറ്റിൻകര നഗരസഭയുടെ റിസോഴ്സ് റിക്കവറി ഫെസിലിറ്റി (ആര്‍ആര്‍എഫ്) യൂണിറ്റില്‍ ഹരിതകര്‍മസേനാംഗങ്ങള്‍ക്കുള്ള പരിശീലനം പുരോഗമിക്കുന്നു. അടുത്ത മാസം ഒന്നാം തീയതിയോടെ പ്രവര്‍ത്തനം പൂര്‍ണതോതില്‍ ആരംഭിക്കാനുള്ള ശ്രമത്തിലാണ് അധികൃതര്‍. റിസോഴ്സ് റിക്കവറി ഫെസിലിറ്റി യൂണിറ്റില്‍ എത്തിക്കുന്ന അജൈവ മാലിന്യം കൺവെയർ ബെൽറ്റിന്‍റെ സഹായത്തോടെ ശാസ്ത്രീയമായി വേര്‍തിരിക്കുകയും തരംതിരിച്ച മാലിന്യം പിന്നീട് ബൈലിംഗ് മെഷീനിൽ ബയിൽ ചെയ്ത് ക്ലീന്‍ കേരള കന്പനിക്ക് കൈമാറുകയുമാണ് ചെയ്യുന്നത്. നഗരസഭയിലെ വാര്‍ഡുകളിലേയ്ക്ക് നിയോഗിച്ചിട്ടുള്ള ഹരിത കര്‍മ സേനാംഗങ്ങളെ ക്ലസ്റ്റര്‍ അടിസ്ഥാനത്തില്‍ നാലായി വേര്‍തിരിച്ചിട്ടുണ്ട്. ഓരോ ദിവസവും 22 പേര്‍ വീതം ആര്‍ആര്‍എഫിലെ വിവിധപ്രവൃത്തികള്‍ ചെയ്യും. നഗരസഭയുടെ ഏക ആര്‍ ആര്‍എഫ് യൂണിറ്റാണ് അമരവിളയില്‍ ഈയിടെ ഉദ്ഘാടനം ചെയ്യപ്പെട്ടത്. ഇവിടെ നേരത്തെ മെറ്റീരിയല്‍ കളക്ഷന്‍ ഫെസിലിറ്റി (എംസിഎഫ്)യൂണിറ്റ് പ്രവര്‍ത്തിച്ചു വരികയായിരുന്നു. നഗരസഭയുടെ നിയന്ത്രണത്തില്‍ അമരവിള ഉള്‍പ്പെടെ മൂന്നു എംസിഎഫ് യൂണിറ്റുകളാണുള്ളത്. ആറാലുംമൂട്, തൊഴുക്കല്‍ എന്നിവിടങ്ങളിലാണ് മറ്റുള്ള രണ്ടെണ്ണം. വാർഡുകളിൽനിന്നും ഹരിതകര്‍മസേന ശേഖരിക്കുന്ന പ്ലാസ്റ്റിക് നേരത്തെ അതാത് വാര്‍ഡുകളില്‍ തന്നെ തരംതിരിക്കുമായിരുന്നു. മിനി എംസിഎഫുകളില്‍ നിന്നും അവ എംസിഎഫുകളില്‍ എത്തിക്കും. ആര്‍ആര്‍എഫ് യാഥാര്‍ഥ്യമായതോടെ, ഇനി ശേഖരിക്കുന്ന അജൈവ മാലിന്യം ആര്‍ആര്‍എഫില്‍ നേരിട്ട് എത്തിക്കാവുന്നതാണ്.

കൗതുകമായി കൈതച്ചക്ക

പാലോട് : നാട്ടുകാർക്ക് കൗതുകമായി കൈതച്ചക്ക. പച്ച പാലുവള്ളി രമ്യാഭവനിൽ സുമതിയുടെ പറമ്പിൽ വിളയിച്ച അത്ഭുതകരമായ കൈതച്ചക്കയാണ് നാട്ടുകാർക്ക് കൗതുകമായി മാറിയത്. ഒരു കൈതച്ചെടിയിൽ സാധാരണയായി ഒരു ചക്കയാണ് ഉണ്ടാകുന്നത്. എന്നാൽ ഈ കൈതച്ചക്കയിൽ പാകമായ ഒരു ചക്കയും അതോടൊപ്പം ഏഴു കുഞ്ഞു ചക്കകളും ആണ് ഉള്ളത്. ചക്കയുടെ മുകൾഭാഗത്ത് കാണുന്ന ഇലകളും ഇവയ്ക്കില്ല. പച്ച മുടുമ്പിലെ രാമചന്ദ്രന്‍റെ കടയിൽ പ്രദർശിപ്പിച്ചിരിക്കുന്ന കൈതച്ചക്കനാട്ടുകാരെ ഏറെ ആകർഷിച്ചു കൊണ്ടിരിക്കുന്നു.

പോലീസിൽ പരാതി നൽകിയിട്ടും നടപടിയില്ലെന്ന് ആക്ഷേപം : അയല്‍വാസിയുടെ ആക്രമണത്തില്‍ പരിക്കേറ്റ വീട്ടമ്മ ആശുപതിയില്‍

വെള്ളറട: പെരുങ്കടവിള പഞ്ചായത്തിലെ പാല്‍ക്കുളങ്ങര വാര്‍ഡില്‍ സാബു ഭവനില്‍ ജെ.ഷിബു മദ്യലഹരിയില്‍ അയല്‍വാസിയായ വീട്ടമ്മയെ കല്ല് കൊണ്ട് ഇടിച്ച് തലയ്ക്കു മാരകമായ മുറിവേല്‍പ്പിച്ചു. കഴിഞ്ഞ അഞ്ചു വര്‍ഷത്തിലധികമായി മദ്യപിച്ചെത്തുന്ന ഷിബു പിതാവിനേയും ഭാര്യയേയും ഉപദ്രവിക്കുന്നത് പതിവാണ്. സഹികെട്ട ഭാര്യയും രണ്ടു മക്കളും പിരിഞ്ഞു കഴിയുകയാണ്. സ്ഥിരമായി മദ്യപിച്ചെന്തി അയല്‍വാസികളെ അസഭ്യം പറയുകയും ചോദ്യം ചെയ്യുന്നവരെ മാരകായുധങ്ങളുമായെത്തി അക്രമിക്കുകയാണ് പതിവ്. നാട്ടുകാര്‍ ഒപ്പിട്ട നിരവധി പരാതികള്‍ മാരായുട്ടം പോലീസില്‍ നല്‍കിയിട്ടുണ്ട്. മദ്യപ്പിച്ച് അസഭ്യം പറയുന്നതു നിത്യസംഭവമായതിനെ തുടർന്നു പഞ്ചായത്ത് ജാഗ്രതാ സമിതി ഇടപ്പെട്ട് പഞ്ചായത്ത് പ്രസിഡന്‍റ് എസ്. സുരേന്ദ്രന്‍, പഞ്ചായത്ത് അംഗം കാനക്കോട് ബാലരാജ് എന്നിവരുടെ നേതൃത്വത്തില്‍ പ്രശ്‌നപരിഹാരത്തിന് ശ്രമിച്ചിരുന്നു. രാസലഹരിക്കക്ക് അടിമപ്പെട്ട യുവാവ് പുരുഷന്‍മാര്‍ ഇല്ലാത്ത സമയത്തു വീട്ടില്‍ അതിക്രമിച്ചു കയറി കൈയിലുണ്ടായിരുന്ന കരിങ്കല്‍ ചീളി ഉപയോഗിച്ച് തലക്ക് ഇടിച്ച് മാരകമായ മുറിവേല്‍പ്പിക്കുകയായിരുന്നു. കുഴഞ്ഞു വീണ വത്സലയെ വീട്ടുകാർ നെയ്യാറ്റിന്‍കര ജില്ലാ ആശുപത്രിയിലും തുടര്‍ ചികിത്സക്കായി കാരക്കോണം സിഎസ്ഐ മെഡിക്കല്‍ കോളേജിലും പ്രവേശിപ്പിച്ചു. നാട്ടില്‍ ഭീതിപരത്തി അക്രമംനടത്തി അഴിഞ്ഞാടുന്ന പ്രതിയെ അറസ്റ്റ് ചെയ്യണമെന്ന് നാട്ടുകാര്‍ ആവശ്യപ്പെട്ടു .

ദക്ഷിണ കേരള മഹായിടവക സ്ത്രീജനസഖ്യം വനിതാ സംഗമം

തിരുവനന്തപുരം: ദക്ഷിണകേരള മഹായടവക ആസ്ഥാനമായ എല്‍എംഎസ് കോമ്പൗണ്ടില്‍ ഇന്നലെ വനിതാ സംഗമം 2025 സംഘടിപ്പിച്ചു. സിഎസ്ഐ കോയമ്പത്തൂര്‍ ഡയോസിസ് ബിഷപ്പും, ദക്ഷിണ കേരള മഹായിടവക മോഡറേറ്റര്‍ കമ്മീസറിയുമായ റവ. തീമത്തി രവീന്ദ്രന്‍, ആനി രവീന്ദ്രൻ ബിഷപ്പ് അമ്മയും യോഗത്തില്‍ മുഖ്യാതിഥികള്‍ ആയിരുന്നു. വൈസ് പ്രസിഡന്‍റ് ജയ എസ്. ബാലന്‍ അധ്യക്ഷത വഹിച്ചു. യോഗത്തില്‍ സെക്രട്ടറി ധന്യ ജോസ് സ്വാഗതം പറഞ്ഞു. മഹായിടവക അഡ്മിനിസ്‌ട്രേറ്റീവ് സെക്രട്ടറി ടി. ടി. പ്രവീണ്‍, ട്രഷറര്‍ നിബു ജേക്കബ് വര്‍ക്കി, റവ. ഡോ. ജയരാജ് എന്നിവര്‍ മുഖ്യസന്ദേശം നല്‍കി. കൗണ്‍സിലിംഗിൽ ഡോക്ടറേറ്റു നേടിയ ഡോ. ഡയാന വില്‍സിയെ ആദരിച്ചു. ശാഖ ഡിസ്ട്രിക്ട് ഏരിയാതല സ്ത്രീ ജനസഖ്യ ഭാരവാഹികള്‍ പങ്കെടുത്തു.

തോടുകള്‍ മാലിന്യവാഹിനികള്‍; തിരിഞ്ഞുനോക്കാതെ അധികൃതര്‍

നെയ്യാറ്റിന്‍കര: കാര്‍ഷികനേട്ടങ്ങളാലും ജലസന്പത്താലും അനുഗ്രഹീതമായ തലസ്ഥാനജില്ലയുടെ തെക്കന്‍ പ്രദേശങ്ങളിലെ തോടുകള്‍ പലതും മാലിന്യവാഹിനികളായിരിക്കുന്നു. മാലിന്യമുക്ത കേരളം എന്നു നൂറുവട്ടം ആവര്‍ത്തിക്കുന്നുണ്ടെങ്കിലും ബന്ധപ്പെട്ട അധികൃതരെ സംബന്ധിച്ചിടത്തോളം ഈ പരിസ്ഥി തിനാശ കാഴ്ചകള്‍ ആരും മുഖവിലയ്ക്കെടുക്കുന്നില്ലെന്നും ആക്ഷേപമുണ്ട്. നെയ്യാറ്റിന്‍കര താലൂക്കിലും സമീപപ്രദേശങ്ങളിലും നിരവധി ചെറുതും വലുതുമായ കുളങ്ങളും തോടുകളുമുണ്ട്. ജനസാന്നിധ്യമുണ്ടായിരുന്ന ഈ ജലാശയ പരിസരങ്ങള്‍ മിക്കവയും കേവലം നോക്കുകുത്തികളായി. വെള്ളം ഒഴുകാതിരുന്ന ചാനലുകള്‍ നാട്ടിന്‍പുറങ്ങളിലെ ഇളംതലമുറക്കാര്‍ക്ക് കളിക്കളങ്ങളായി പരിണമിച്ചു. ഡിജിറ്റല്‍ യുഗമായതോടെ പ്രാദേശിക കളിക്കാര്‍ പോലും ഈ ചാനലുകളുമായുള്ള അടുപ്പം അവസാനിപ്പിച്ചു. കുളങ്ങളിലും തോടുകളിലുമൊക്കെ ചിലയിടങ്ങളില്‍ കാര്യമായ കൈയേറ്റമുണ്ടായതായും പരാതിയുണ്ട്. തോടുകളിലേക്കു മദ്യക്കുപ്പികളും ഗ്ലാസുകളും മാത്രമല്ല, മാലിന്യക്കിറ്റുകള്‍ വരെ വലിച്ചെറിയുന്ന പ്രവണത ഇപ്പോഴും തുടരുന്നു. വരണ്ട തോടുകളില്‍ കൂടിക്കിടക്കുന്ന മാലിന്യങ്ങള്‍ തെരുവു നായ്ക്കള്‍ക്കും കാക്കകള്‍ മുതലായവയ്ക്കും ആഹാരമാകുന്നുമുണ്ട്. പേരിനു വെള്ളമുള്ള തോടുകളിലും സ്ഥിതി വ്യത്യസ്ഥമല്ല. എന്നാല്‍ അവയൊന്നും നായ്ക്കളും കാക്കകളും ഉപയോഗിക്കുന്നില്ലായെന്നു മാത്രം. തോടുകളുടെ സമീപത്തിരുന്നു മദ്യപിച്ചാലും ഇല്ലെങ്കിലും ഒഴിഞ്ഞ കുപ്പികള്‍ തോടുകളിലേയ്ക്കു തന്നെ ഉപേക്ഷിക്കുന്നതായാണ് പരാതി. തദ്ദേശ സ്വയംഭരണ സ്ഥാപനങ്ങള്‍ ബജറ്റ് തയാറാക്കുന്പോള്‍ ജലാശയ നവീകരണത്തിനും അനുബന്ധ പ്രവൃത്തികള്‍ക്കും തുക അനുവദിക്കാറുണ്ടെങ്കിലും പലയിടത്തും അതൊക്കെ കടലാസില്‍ ഒതുങ്ങുന്നുവെന്നും പറയപ്പെടുന്നു. തോടുകളുടെ ദുരവസ്ഥയ്ക്കു പരിഹാരം കാണേണ്ട യാതൊരു നടപടിയും പൊതുവേ അധികൃതര്‍ സ്വീകരിക്കുന്നില്ലെന്നും പരാതിയുണ്ട്.

സ്കൂൾ തെരഞ്ഞെടുപ്പ്

മാറനല്ലൂർ: ക്രൈസ്റ്റ് നഗർ പബ്ലിക് സ്കൂൾ സീനിയർ സെക്കൻഡറിയിൽ ആദ്യമായി സ്കൂൾ തെരഞ്ഞെടുപ്പ് നടത്തി. പ്ലസ്ടു വിദ്യാർഥിയായ ഗൗതം കൃഷ്ണയുടെ സഹായത്തോടെ വികസിപ്പിച്ചെടുത്ത പ്രത്യേക സോഫ്റ്റ്‌വേറിലൂടെ കമ്പ്യൂട്ടറിൽ "ഹെഡ് ബോയ് "ഹെഡ് ഗേൾ", വിവിധ ഹൗസുകളുടെ ക്യാപ്റ്റൻ, വൈസ് ക്യാപ്റ്റൻ എന്നിവരെ കുട്ടികൾ തെരഞ്ഞെടുത്തു. പ്രിൻസിപ്പൽ ഫാ. ചാക്കോ പുതുകുളം സിഎംഐ നേതൃത്വം നൽകി. അജിൻ എസ്. അജയ്, എസ്. ലോലേന എന്നിവരെ യഥാക്രമം ഹെഡ് ബോയായും ഹെഡ് ഗേളായും തെരഞ്ഞെടുത്തു.

എസ്എടിയിലെ അമ്മയും കുഞ്ഞും ബ്ലോക്ക് പ്രവർത്തനരഹിതം: ന്യൂനപക്ഷ കമ്മീഷൻ സ്വമേധയാ കേസെടുത്തു

തിരുവനന്തപുരം: ഉദ്ഘാടനം കഴിഞ്ഞ് ഒന്പതു വർഷം പിന്നിട്ടിട്ടും എസ്എടി ആശുപത്രിയിലെ അമ്മയും കുഞ്ഞും ബ്ലോക്ക് പ്രവർത്തന സജ്ജമായില്ലെന്ന വാർത്തയെത്തുടർന്നു കേരള സംസ്ഥാന ന്യൂനപക്ഷ കമ്മീഷൻ സ്വമേധയാ കേസെടുത്തു. കമ്മീഷൻ ചെയർമാൻ അഡ്വ. എ.എ. റഷീദാണ് വിഷയത്തിൽ അടിയന്തര റിപ്പോർട്ട് സമർപ്പിക്കാൻ അധികൃതർക്ക് നിർദ്ദേശം നൽകിയത്. 30 കോടി രൂപ ചെലവഴിച്ച് 66,000 ചതുരശ്ര അടിയിൽ നിർമിച്ച കെട്ടിടത്തിന്‍റെ പ്രവർത്തനോദ്ഘാടനം 2017 മേയ് 24നാണു മുഖ്യമന്ത്രി നിർവഹിച്ചത്. മൂന്നു നിലകളിൽ പൂർത്തിയായ കെട്ടിടം പൂർണസജമായിട്ടും പ്രവർത്തനം തുടങ്ങാത്തതിന്‍റെ കാരണം അജ്ഞാതമാണ്. ജൂലൈ അഞ്ചിനകം റിപ്പോർട്ട് സമർപ്പിക്കാൻ ആരോഗ്യവകുപ്പ് സെക്രട്ടറി, ജില്ലാ കളക്ടർ, എന്നിവർക്ക് കമ്മീഷൻ നിർദേശം നൽകി.

ഒന്നരക്കിലോ കഞ്ചാവുമായി പി‌ടിയിൽ

പോത്തൻകോട്: ഒന്നരക്കിലോ കഞ്ചാവുമായി രണ്ടുപേർ പിടിയിൽ. മംഗലപുരം കുടവൂർ സ്വദേശികളായ ആദർശ് (27), ശ്രീജിത്ത് (23) എന്നിവരെയാണ് ഡാൻസാഫ് സംഘം പിടികൂടിയത്. ചില്ലറ വിൽപ്പന നടത്തുന്നതിനായി കുടവൂരിൽ ഇരുചക്ര വാഹനത്തിൽ കഞ്ചാവ് എത്തിച്ചപ്പോഴാണ് രഹസ്യത്തിന്‍റെ അടിസ്ഥാനത്തിൽ ഡാൻസാഫ് സംഘം ഇരുവരെയും പിടികൂടിയത്. സ്കൂൾ-കോളജുകൾ കേന്ദ്രീകരിച്ച് വില്പനയ്ക്കായി കൊണ്ടുവന്നതാണ് കഞ്ചാവെന്ന് ഇവർ പോലീസിനു മൊഴി നൽകി.ആറ്റിങ്ങലിൽ നിന്നാണ് കഞ്ചാവ് ഇവർക്ക് ലഭിച്ചതെന്നാണു വിവരം. നിരവധി കേസുകളിൽ പ്രതികളാണ് ഇരുവരും.

നാണക്കേട് മാറാതെ തിരുപുറം പഞ്ചായത്ത് : ചൂടുവെള്ളം ഒഴിക്കൽ, അസഭ്യവർഷം; പരാതികളിൽ പോലീസ് കേസെടുത്തു

പൂവാർ: ചൂടുവെള്ളംദേഹത്ത് ഒഴിച്ചതായ വൈസ് പ്രസിഡന്‍റിന്‍റെ പരാതിയിൽ പഞ്ചായത്ത് പ്രസിഡന്‍റിനെതിരെയും അസഭ്യം പറഞ്ഞു ദേഹോപദ്രവം ചെയ്യാൻ വൈസ് പ്രസിഡന്‍റ് ശ്രമിച്ചെന്ന പ്രസിഡന്‍റി ന്‍റെ പരാതിയിലും പൂവാർ പോലീസ് കേസെടുത്തു. ചേരിപ്പോര് തുടരുമ്പോൾ തിരുപുറം പഞ്ചായത്ത് ഭരണം പ്രതിസന്ധിയിലായി. പ്രസിഡന്‍റ് ഷീനാ ആൽബിനും വൈസ് പ്രസിഡന്‍റ് തിരുപുറം സുരേഷും തമ്മിലുള്ള തർക്കമാണ് ഒടുവിൽ പോലീസ് സ്റ്റേഷൻ വരെയെത്തിയത്. ലൈഫ് മിഷൻ പദ്ധതിയുമായി ബന്ധപ്പെട്ട അഴിമതിയാരോപണം കമ്മിറ്റിയിൽ അവതരിപ്പിക്കുന്നതിനിടയിലെ തർക്കമാണ് ചൂടുവെള്ളമൊഴിക്കൽ വരെയെത്തിയത്. ദേഹം പൊള്ളിയ വൈസ് പ്രസിഡന്‍റ് ആശുപത്രിയിൽ ചികിത്സയും തേടിയിരുന്നു. എന്നാൽ കമ്മിറ്റി സമയത്ത് ഗ്ലാസിൽ മുന്നിൽ വച്ചിരുന്ന ചൂടുവെള്ളം അബദ്ധത്തിൽ തട്ടി വീണതാണെന്നു പ്രസിഡന്‍റും പറയുന്നു. ദേഹം പൊള്ളിയതോടെ വംശീയ ആക്ഷേപം ഉൾപ്പെടെയുള്ള ആക്ഷേപങ്ങൾ ഉന്നയിച്ച് വൈസ് പ്രസിഡന്‍റ് നൽകിയ പരാതിയെ കൗണ്ടർ ചെയ്തു കഴിഞ്ഞ ദിവസം പ്രസിഡന്‍റും പൂവാർ പോലീസിൽ പരാതി നൽകി. ഇരുവരുടെയും പരാതി കിട്ടിയ പാടെ പോലീസ് കേസുകളും രജിസ്റ്റർ ചെയ്തു. സ്വതന്ത്രരായി ജയിച്ചു വന്ന ഇരുവരും തുടക്കത്തിൽ ഇടതു പാളയത്തിൽ ചേർന്നു പ്രസിഡന്‍റും വൈസ് പ്രസിഡന്‍റുമായി ഭരണം തുടർന്നു. ഇതിനിടയിലുണ്ടായ ചില സംഭവവികാസങ്ങൾ പ്രസിഡന്‍റിനെ മറുകണ്ടം ചാടാൻ പ്രേരിപ്പിച്ചു. അങ്ങനെ കോൺഗ്രസിൽ ചേർന്നപ്പോഴും ഷീന പ്രസിഡന്‍റായി തുടർന്നു. പഞ്ചായത്തിൽ ആകെയുള്ള 14 സീറ്റിൽ ബിജെപിക്ക് രണ്ടും യുഡിഎഫിന് ആറും ഇടതുപക്ഷത്തിനു നാലും സ്വതന്ത്രരായി രണ്ടു പേരുമാണുള്ളത്. രണ്ടു സ്വതന്ത്രൻമാരെയും ചാക്കിലാക്കി ഭരണം പിടിക്കാൻ മത്സരത്തിനിറങ്ങിയ ഇടതുപക്ഷത്തിന് ഒരുകോൺഗ്രസ് അംഗത്തിന്‍റെ വോട്ട് അസാധുവായത് ഷീനക്ക് തുണയായി. ബിജെപി വോട്ടെടുപ്പിൽനിന്നു വിട്ടുനിന്നു. എന്നാൽ വൈസ് പ്രസിഡന്‍റ് തെരഞ്ഞെടുപ്പ് തുല്യമായി വന്നു. ഒടുവിൽ നടന്ന നറുക്കെടുപ്പിൽ ഭാഗ്യം സ്വതന്ത്രനായി വന്ന സുരേഷിനെത്തന്നെ തുണച്ചു. എന്നാൽ പ്രസിഡന്‍റ് തെരഞ്ഞെടുപ്പിൽ വോട്ട് അസാധുവായ അംഗം കോടതിയെ സമീപിച്ച് അനുകൂല വിധി സമ്പാദിച്ചു. ഇതോടെ പ്രസിഡന്‍റിനു താല്കാലിക മാറ്റമുണ്ടാവുകയും പകരം ചാർജ് വൈസ് പ്രസിഡന്‍റിന്‍റെ കൈയിലെത്തുകയും ചെയ്തു. ഇതിനിടയിൽ സ്റ്റേയും മറ്റുമായുള്ള കോടതി കയറലും ഒരു വർഷത്തോളം നീണ്ടുപോകുന്നതിനിടയിൽ ഒത്തുതീർപ്പു ശ്രമം തുടങ്ങി. ഒത്തുതീർപ്പ് കഴിഞ്ഞതോടെ ഇടതുപക്ഷംവിട്ട പ്രസിഡന്‍റ് കോൺഗ്രസിൽ ചേർന്നു. അവിശ്വാസത്തിനുശേഷം പിന്നെ നടന്ന തെരഞ്ഞെടുപ്പിൽ ഭരണം പിടിച്ചെടുത്ത കോൺഗ്രസിന്‍റെ പ്രസിഡന്‍റെയും ഷീനാ ആൽബിൻ വന്നു. ഇടതുപക്ഷത്തിനൊപ്പം വൈസ് പ്രസിഡന്‍റ് സുരേഷ് ഉറച്ച് നിന്നു. പിന്നെ നടന്ന അഭിപ്രായവ്യത്യാസങ്ങൾ പഞ്ചായത്തിനെ നാണക്കേടിന്‍റെ വക്കിലെത്തിച്ചു.

വൈസ്മെൻ ഇന്‍റർനാഷണൽ കണ്‍വൻഷൻ നടത്തി

തിരുവനന്തപുരം: വൈസ്മെൻ ഇന്‍റർനാഷണൽ സൗത്ത് വെസ്റ്റ് ഇന്ത്യാ റീജണൽ കണ്‍വൻഷൻ നടന്നു. തിരുവനന്തപുരം ശ്രീമൂലം ക്ലബിൽ നടന്ന ചടങ്ങിൽ കന്യാകുമാരി മുതൽ കരുനാഗപ്പള്ളി വരെയുള്ള പ്രദേശങ്ങൾ ഉൾപ്പെട്ട സൗത്ത് വെസ്റ്റ് ഇന്ത്യാ റീജണിലെ 156 ക്ലബുകളിൽ നിന്നും അറുനൂറോളം പ്രതിനിധികൾ പങ്കെടുത്തു. കണ്‍വൻഷൻ ഇന്ത്യ ഏരിയ പ്രസിഡന്‍റ് വി.എസ്. രാധാകൃഷ്ണൻ ഉദ്ഘാടനം ചെയ് തു. ചടങ്ങിൽ അഡീഷണൽ അഡ്വക്കറ്റ് ജനറൽ കെ.പി. ജയചന്ദ്രൻ മുഖ്യാതിഥി ആയിരുന്നു. കന്യാകുമാരി, തിരുവനന്തപുരം, കൊല്ലം ജില്ലകളിലെ നൂറോളം വരുന്ന ഗവണ്മെന്‍റ് ആശുപത്രികളുമായി ചേർന്നു കഴിഞ്ഞ ഒരു വർഷക്കാലമായി നടപ്പിലാക്കി വരുന്ന "വായോജന പരിപാലനം' പ്രോജക്ടിന്‍റെ ഭാഗമായി ഇന്നലെ പത്തു ഹെൽത്ത് സെന്‍ററുകൾക്കാവശ്യമായ ഡയപ്പേഴ് സ്, കന്പിളി പുതപ്പുകൾ, വീൽ ചെയറുകൾ മുതലായവ വിതരണം ചെയ്തു. കഴിഞ്ഞ ഒരു വർഷം വിവിധ ക്ലബുകളുടെ സഹായത്താൽ മൂന്നുകോടിയോളം രൂപയുടെ സഹായം വയോജന പരിപാലനം പദ്ധതിയിലൂടെ നൽകിയെന്നു റീജണൽ ഡയറക്ടർ ഷാജി മാത്യു അറിയിച്ചു. മികച്ച സാമൂഹിക സേവനത്തിനുള്ള കർമയോഗി അവാർഡ് ഡോ. ബാബു സ്റ്റീഫനും കർമശ്രേഷ്ഠ അവാർഡ് സുരേന്ദ്രൻ കണ്ണാട്ടിനും നൽകി. മികച്ച ഡിസ്ട്രിക്ട് ഗവർണറായി ഡോ. എം.കെ. ഷീജയും മികച്ച പ്രസിഡന്‍റുമാരായി സാലു പതാലിൽ, സുമ തരകൻ എന്നിവർ ഉൾപ്പെടെ വിവിധ ക്ലബുകളിൽ മികച്ച പ്രവർത്തനങ്ങൾ കാഴ്ച വച്ച നൂറോളം അംഗങ്ങൾക്ക് അവാർഡ് നൽകി. 2025-26 വർഷത്തേക്കു റീജണൽ ഡയറക്ടറായി തെരഞ്ഞെടുത്ത അഡ്വ. തോമസ് ജോർജിനെ ഷാജി മാത്യു ഒൗദ്യോഗിക കോളർ അണിയിച്ചു. ചടങ്ങിൽ രാജൻ പണിക്കർ, തോമസ് ലൂക്കോസ്, സെക്രട്ടറി വിനോദ് രാജശേഖരൻ, ട്രഷറർ ജയകുമാർ, മുഹമ്മദ് അഷ്റഫ്, അഡ്വ. വിനീത് കുമാർ, തുടങ്ങിയവർ സംബന്ധിച്ചു.

നല്ല സാഹിത്യം മികച്ച വ്യക്തിത്വങ്ങളെ രൂപപ്പെടുത്തുന്നു: റവ. ഡോ. തോമസ് കുഴിനാപ്പുറത്ത്

നെടുമങ്ങാട്: മികച്ച വ്യക്തിത്വങ്ങളെ രൂപപ്പെടുത്തുന്നതിൽ നല്ല സാഹിത്യസൃഷ്ടികൾക്കു വലിയ പങ്കു വഹിക്കാൻ കഴിയുമെന്നു റവ. ഡോ. തോമസ് കുഴിനാപ്പുറത്ത്. വായന ദിനത്തോടനുബന്ധിച്ചു വെള്ളൂർക്കോണം ലാ സലേത്ത് മാതാ മലങ്കര കത്തോലിക്കാ ഇടവകയിൽ സംഘടിപ്പിച്ച സാഹിത്യ സെമിനാർ ഉദ്ഘാടനം ചെയ്യുകയായിരുന്നു അദ്ദേഹം. ഷൈജു വാമനപുരം സെമിനാറിനു നേതൃത്വം നൽകി. അനുഭവങ്ങളാണ് സാഹിത്യ സൃഷ്ടികളുടെ നിർമാണശാല എന്ന് ഷൈജു പറഞ്ഞു. മദർ ഫെലിസിറ്റ ഡിഎം, സോനു സതീഷ്, എം. ജിജോ, പ്രീതി എസ്. ചന്ദ്രൻ തുടങ്ങിയവർ പ്രസംഗിച്ചു.

നാലാഞ്ചിറ സെന്‍റ് ജോൺസിൽ പ്രതീക്ഷ പദ്ധതി ഉദ്ഘാടനം

തിരുവനന്തപുരം: ജൂണിയർ ചെംമ്പർ ഇന്‍റർനാഷണൽ ട്രിവാൻഡ്രം റോയൽ സിറ്റിയുടെ ആഭിമുഖ്യത്തിൽ നടപ്പാക്കുന്ന പ്രതീക്ഷ പദ്ധതി നാലാഞ്ചിറ സെന്‍റ് ജോൺസ് മോഡൽ ഹയർ സെക്കൻഡറി സ്കൂളിൽ ഉദ്ഘാടനം ചെയ്തു. വിദ്യാർത്ഥികൾക്ക് പഠനോപകരണങ്ങൾ നൽകൽ, കപ്പാസിറ്റി ബിൽഡിംഗ്,നേതൃത്വശേഷി വർധിപ്പിക്കൽ, ലൈഫ് സ്കിൽ ഡവലപ്പ്മെന്‍റ് പരിപാടികൾ തുടങ്ങിയവയാണ് പദ്ധതിയിലൂടെ നടപ്പാക്കുന്ന പ്രധാന പരിപാടികൾ. പ്രിൻസിപ്പൽ ഫാ. ജോസ് ചരുവിൽ ഉദ്ഘാടനം നിർവഹിച്ചു. പ്രസിഡന്‍റ് സനു സർദാർ അധ്യക്ഷത വഹിച്ചു. വൈസ് പ്രിൻസിപ്പൽ അജീഷ് കുമാർ, പ്രീത, ഷമീർ, ബിജു, ബിന്നി സാഹിതി, ബീഗം ബുഷ്റ, ദിദ്യ, ശൈഖ എന്നിവർ പ്രസംഗിച്ചു. മൈഫ് സ്കിൽ പരിശീലന പരിപാടിക്ക് ട്രയിനർ ദിവ്യ നേതൃത്വം നൽകി.

സ്കൂളിനുനേരെ കാട്ടാന ആക്രമണം: ഉടൻ നടപടിയെന്ന് എംഎൽഎ

പേപ്പാറ: പേപ്പാറ വന്യ ജീവി സങ്കേതത്തിനു സമീപം തലത്തൂതക്കാവ് ട്രൈബൽ എൽപി സ്കൂളിന്‍റെ മതിൽ കാട്ടാനകൂട്ടം കുത്തിമറിച്ചു, പറമ്പിലെ തെങ്ങുകളും നശിപ്പിച്ചു. വനത്തിനോടു ചേർന്നാണു സ്കൂൾ പ്രവർത്തി ക്കുന്നത്. കാട്ടാന ആക്രമണമുണ്ടായ പ്രദേശം ജി. സ്റ്റീഫൻ എം എൽ എ സന്ദർശിച്ചു. അടിയന്തിരമായി സഹായം എത്തിക്കുമെന്ന് എംഎൽഎ അറിയിച്ചു. രണ്ടു വർഷം മുൻപ്‌ 24 ലക്ഷം രൂപ ചെലവഴിച്ചു നിർമിച്ച മതിലാണ് ആനകൾ കുത്തിമറിച്ചത്. സ്കൂൾ പാചകപ്പുരയുടെ സമീപത്തുനിന്ന തെങ്ങിൻതൈകളും കാട്ടാന നശിപ്പിച്ചിട്ടുണ്ട്. സ്കൂൾപരിസരത്ത് ആനശല്യം രൂക്ഷമാണെന്നു വിദ്യാർഥികളുടെ രക്ഷിതാക്കളും പറയുന്നു. മുൻപ്‌ സ്ഥിരമായി ആനക്കൂട്ടമിറങ്ങിയിരുന്നു. ചുറ്റുമതിൽ നിർമിച്ചശേഷമാണ് ഇതിനു ശമനമായത്. രണ്ട ദിവസം മുൻപ്‌ മണലി ആലുംമൂട് സ്വദേശി രാധയുടെ വീട് ആനകൾ തകർത്തിരുന്നു. മാസങ്ങൾക്കു മുൻപ്‌ കല്ലാർ ഗവ. എൽപി സ്കൂളിന്‍റെ മതിലും കാട്ടാന തകർത്തിരുന്നു. കാട്ടാനശല്യം രൂക്ഷമാകുമ്പോഴും വനംവകുപ്പിന്‍റെ ഭാഗത്തുനിന്നു കൃത്യമായ ഇടപെടലുണ്ടാകുന്നില്ലന്നും പരാതിയുണ്ട്. വർഷങ്ങളായി കാട്ടുമൃഗഭീതിയിലാണ് ഈ സ്കൂളുകളിലെ കുട്ടികളുടെ പഠനം. കാട്ടാനയും കാട്ടുപോത്തും ഉൾപ്പെടെ സ്കൂൾവളപ്പിൽ കടക്കുന്നതു പതിവാണ്. ഈ സംഭവത്തിൽ വനം വകുപ്പുമായി ബന്ധപ്പെട്ട് നടപടികൾ ഉണ്ടാക്കുമെന്ന് എംഎൽഎ അറിയിച്ചു.

കൈമനം-പ്രാവച്ചന്പലം ദേശീയപാത : അപകടങ്ങളിൽ റിപ്പോർട്ട് തേടി മനുഷ്യാവകാശ കമ്മീഷൻ

തിരുവനന്തപുരം: കൈമനം മുതൽ പ്രാവച്ചന്പലം വരെയുള്ള ദേശീയപാതയിൽ അപകടങ്ങൾ ഒഴിവാക്കാനുള്ള പരിഹാരമാർഗങ്ങൾ ചേർത്തു സമഗ്രമായ റിപ്പോർട്ട് പൊതുമരാമത്ത് എക്സിക്യൂട്ടീവ് എൻജിനീയർ ഒരു മാസത്തിനുള്ളിൽ സമർപ്പിക്കണമെന്നു മനുഷ്യാവകാശ കമ്മീഷൻ ചെയർപേഴ്സണ്‍ ജസ്റ്റീസ് അലക് സാണ്ടർ തോമസ്. ഓഗസ്റ്റ് ഏഴിനു രാവിലെ 10 ന് കമ്മീഷൻ ഓഫീസിൽ നടക്കുന്ന സിറ്റിംഗിൽ പൊതുമരാമത്ത് ദേശീയപാതാ വിഭാഗം എക്സിക്യൂട്ടീവ് എൻജിനീയർ നേരിട്ട് ഹാജരായി വസ്തുതകൾ ധരിപ്പിക്കണമെന്ന് ഉത്തരവിൽ പറയുന്നു. സീബ്രാ ക്രോസിംഗ് അനുവദിച്ചിട്ടില്ലാത്ത സ്ഥലങ്ങളിലൂടെ കാൽനടയാത്രക്കാർ അലക്ഷ്യമായി റോഡ് മുറിച്ചു കടക്കുന്ന സമയത്താണു വാഹനങ്ങൾ ഇടിച്ചു മരണം സംഭവിക്കുന്നതെന്നു നേമം പോലീസ് ഇൻസ്പെക്ടർ കമ്മീഷനിൽ സമർപ്പിച്ച വിശദീകരണത്തിൽ പറയുന്നു. അനധികൃതമായി റോഡ് മുറിച്ചുകടക്കുന്നത് ഒഴിവാക്കുന്നതിന് ഡിവൈഡറിൽ ഫെൻസിംഗ് സ്ഥാപിക്കാൻ തീരുമാനിച്ചു. തെരുവുവിളക്കുകൾ സ്ഥാപിക്കാനും തീരുമാനിച്ചു. 2020 ജനുവരി മുതൽ ഏകദേശം 459 കേസുകൾ രജിസ്റ്റർ ചെയ്തിട്ടുണ്ട്. ഹൈവേയിൽ ട്രാഫിക് സംവിധാനങ്ങൾ പരിഷ്കരിക്കേണ്ടതും മേൽപ്പാലങ്ങൾ നിർമിക്കേണ്ടതും സർക്കാരാണെന്നും റിപ്പോർട്ടിൽ പറയുന്നു. റോഡിൽ ഫെൻസിംഗും തെരുവുവിളക്കും പൂർണമായും സ്ഥാപിച്ചിട്ടുണ്ടോയെന്ന് എക്സിക്യൂട്ടീവ് എൻജിനീയർ പരിശോധിക്കണമെന്നു ജസ്റ്റീസ് അലക്സാണ്ടർ തോമസ് ആവശ്യപ്പെട്ടു. ജനങ്ങൾക്ക് സുരക്ഷിതമായി റോഡ് മുറുച്ചുകടക്കാൻ സീബ്രാ ലൈൻ വരച്ചിട്ടുണ്ടോ, ട്രാഫിക് സിഗ്നൽ കാര്യക്ഷമമാണോ തുടങ്ങിയ കാര്യങ്ങൾ എക്സിക്യൂട്ടീവ് എൻജി നീയർ പരിശോധിക്കണം. ‌സുരക്ഷാ സംവിധാനങ്ങൾ കാര്യക്ഷമമല്ലെങ്കിൽ അതിനു ചുമതലപ്പെട്ടവർ ആരൊക്കെയാണെന്നും അവരുടെ ഒൗദ്യോഗിക മേൽവിലാസം എന്താണെന്നും കമ്മീഷനെ അറിയിക്കണം. പൊതുപ്രവർത്തകനായ ശാന്തിവിള പദ്മകുമാർ സമർപ്പിച്ച പരാതിയിലാണ് ഉത്തരവ്.

പാളയം മാർക്കറ്റ് പുനരധിവാസത്തിൽ വൻ അഴിമതി : വ്യാപാരികളോടു കാണിക്കുന്നതു ക്രൂരതയെന്നു രമേശ് ചെന്നിത്തല

തിരുവനന്തപുരം: പാളയം കണ്ണിമാറ മാർക്കറ്റിലെ വ്യാപാരികളുടെ പുനരധിവാസ പദ്ധതിയിൽ കോടികളുടെ അഴിമതി നടന്നിട്ടുണ്ടെന്നും പാവപ്പെട്ട കച്ചവടക്കാരോട് സർക്കാർ കാണിക്കുന്നത് കടുത്ത വിവേചനവും ക്രൂരതയുമാണെന്നും മുതിർന്ന കോൺഗ്രസ് നേതാവ് രമേശ് ചെന്നിത്തല പറഞ്ഞു. വ്യാപാരികളെ പുനരധിവസിപ്പിക്കുന്നതിനായി നിർമിച്ച പുതിയ കെട്ടിട സമുച്ചയത്തിലെ അപാകതകൾ നേരിട്ടു വിലയിരുത്താൻ എത്തിയതായിരുന്നു അദ്ദേഹം. സന്ദർശനത്തിനു ശേഷം മാധ്യമങ്ങളോടു സംസാരിക്കവെ, "19 കോടി രൂപ ചെലവഴിച്ചു നിർമിച്ച ഈ കെട്ടിടത്തിൽ ശ്വാസം പോലും ലഭിക്കാത്ത അവസ്ഥയാണ്. വായുസഞ്ചാരമില്ലാത്ത ഇവിടെ പാവപ്പെട്ട കച്ചവടക്കാർ എങ്ങനെ കച്ചവടം നടത്തും..? ഇത് വലിയ അഴിമതിയുടെ ഉദാഹരണമാണ്,"എന്നു ചെന്നിത്തല ആരോപിച്ചു. നൂറ്റാണ്ടുകളായി കച്ചവടം നടത്തി ജീവിക്കുന്നവരെ മതിയായ സൗകര്യങ്ങളോ പുനരധിവാസമോ നൽകാതെ ബലം പ്രയോഗിച്ച് ഒഴിപ്പിക്കാനുള്ള നീക്കം ഗുണ്ടായിസമാണ്. വ്യാപാരികളുമായി ചർച്ച നടത്താനോ അവരുടെ പ്രശ്നങ്ങൾ കേൾക്കാനോ കോർപ്പറേഷനോ സർക്കാരോ തയാ റാകുന്നില്ല. താൽക്കാലികമായി നിർമിച്ച സ്ഥലത്തു കച്ചവടം നടക്കാത്തതിനാൽ വ്യാപാരികൾ ഇന്നു വലിയ ദുരിതത്തിലാണ്. ഇതൊരു രാഷ്ട്രീയ പ്രശ്നമല്ല, മറിച്ചു ജനകീയ പ്രശ്നമാണ്. സർക്കാർ അടിയന്തരമായി വിഷയത്തിൽ ഇടപെടുകയും വ്യാപാരികളുടെ ന്യായമായ ആവശ്യങ്ങൾ അംഗീകരിക്കുകയും വേണം. അവരുടെ പുനരധിവാസം ഉറപ്പാക്കിയ ശേഷം മാത്രമേ തുടർനടപടികൾ സ്വീകരിക്കാവൂ. വ്യാപാരികൾ നടത്തുന്ന നിയമപോരാട്ടത്തിന് എല്ലാവിധ പിന്തുണയും ഉണ്ടാകുമെന്നും അദ്ദേഹം ഉറപ്പുനൽകി. പാളയം ബ്ലോക്ക് പ്രസിഡന്‍റ് ആർ. ഹരികുമാർ, മണ്ഡലം പ്രസിഡന്‍റ് സുരേഷ് നരിവാമുട് ജോയി, പ്രാണകുമാർ, ബ്ലോക്ക് ഭാരവാഹികളായ വി. പത്മകുമാർ, കെ. കണ്ണൻ മുരളിധരൻ, ആർ.പി. സുധാകരൻ നായർ, രാജാജി നഗർ മഹേഷ്, ഷെർലി, മധു, നാരായണൻ, വേണുഗോപാൽ, ശ്യാം , സെൽവൻ അനിൽ പോറ്റി എന്നിവർ പങ്കെടുത്തു.

ഷഹീനയുടെ കൊലപാതകം : സുഹൃത്തുക്കളുടെ മൊഴിയെടുത്തു; മുറിയെടുത്തത് ഒളിവില്‍ കഴിയാന്‍

പേരൂര്‍ക്കട: പോത്തന്‍കോട് സ്വദേശിനി ഷഹീന(32)യുടെ കൊലപാതകവുമായി ബന്ധപ്പെട്ട് സഹോദരന്‍ ഷംഷാദിന്‍റെ രണ്ടു സുഹൃത്തുക്കളുടെ മൊഴി രേഖപ്പെടുത്തി പോലീസ്. വട്ടപ്പാറ സ്വദേശികളായ ഷെഫിന്‍, ധനു എന്നിവരുടെ മൊഴികളാണു രേഖപ്പെടുത്തിയത്. ചെമ്പഴന്തി സ്വദേശിയായ മറ്റൊരാള്‍ മൊഴി നല്‍കാന്‍ എത്തിയിരുന്നില്ല. മരുതൂരില്‍ ഷഹീന മരിച്ചുകിടന്ന ആത്രക്കാട്ട് എന്‍ക്ലേവ് എന്ന ഹോംസ്റ്റേയിലെ സിസിടിവി ദൃശ്യങ്ങളുടെ സഹായത്തോടെയാണ് ഇവരെ തിരിച്ചറിഞ്ഞത്. ജൂണ്‍ 14നു ഷംഷാദിനും ഷഹീനയ്ക്കും താമസിക്കുന്നതിന് മുറിയെടുത്ത് നല്‍കിയത് മൂന്നു സുഹൃത്തുക്കള്‍ ചേര്‍ന്നാണ്. പിന്നീട് അവര്‍ ഇവിടേക്ക് വന്നിട്ടില്ല. ധനുഷ് എന്നയാളുമായി തമിഴ്‌നാട്ടിലെ മധുരയില്‍വച്ചു ഷംഷാദ് അടിപിടിയുണ്ടാക്കിയെന്നും അതിനുശേഷം ഒളിവില്‍ത്താമസിക്കുന്നതിനുവേണ്ടിയാണ് ഹോം സ്റ്റേ തെരഞ്ഞെടുത്തതെന്നുമാണ് അന്വേഷത്തില്‍ തെളിഞ്ഞത്. വട്ടപ്പാറയിലെ ഒരു ആശുപത്രിയില്‍ പല്ലിന്‍റെ ചികിത്സാര്‍ഥമാണു താന്‍ മുറിയെടുത്തതെന്നു പ്രതി പറയുന്നുണ്ടെങ്കിലും ആശുപത്രിയില്‍ ചികിത്സ നടത്തിയതിന്‍റെ രേഖകളൊന്നും ലഭിച്ചിട്ടില്ല. ഇതുമായി ബന്ധപ്പെട്ടും ഷഹീനയും ഷംഷാദും തമ്മില്‍ വാക്കുതര്‍ക്കം നിലനിന്നിരുന്നു. ഭര്‍ത്താവുമായി സംസാരിക്കാന്‍ ഷഹീനയെ ഒരിക്കലും ഷംഷാദ് അനുവദിച്ചിരുന്നില്ലെന്നും ബന്ധം വേര്‍പിരിയുന്നതിന് ഇതൊരു കാരണമായി എന്നും പോലീസ് പറഞ്ഞു. ഏഴുവയസുള്ളപ്പോള്‍ ഷഹീനയെ സഹോദരന്‍ വീടിന്‍റെ സ്റ്റെയര്‍കേസില്‍ നിന്നും ഷംഷാദ് എടുത്തെറിഞ്ഞിരുന്നുവെന്നും ഏറെ ചികിത്സകള്‍ക്കുശേഷമാണു രക്ഷപ്പെട്ടതെന്നും ഇവരുടെ മാതാവ് സലീന പോലീസിനോടു പറഞ്ഞു. കുറച്ചുനാള്‍ വിദേശത്തായിരുന്ന ഷംഷാദ് മദ്യപിച്ചാല്‍ അക്രമം കാട്ടുമെന്നും വീഡിയോ കോളിന്‍റെ പേരിലാണ് സംഭവദിവസം അടിപിടിയുണ്ടായതെന്നും തെളിഞ്ഞിട്ടുണ്ട്. വീട്ടില്‍നിന്നും ആഹാരം കഴിക്കാത്തതിനാല്‍ ഷംഷാദിന് ആഹാരം വച്ചുകൊടുക്കാനാണ് ഷഹീനയെ ഇയാള്‍ക്കൊപ്പം അയച്ചതെന്നാണ് അമ്മയുടെ മൊഴി. കൊലപാതകം നടന്ന ദിവസം വലിയ അടിപിടിയുണ്ടായിയെന്നും തന്നെ ആക്രമിക്കുന്നതില്‍നിന്നു രക്ഷപ്പെടാന്‍ ഷഹീന തിരികെ ആക്രമിച്ചതിനെത്തുടര്‍ന്നു ഷംഷാദിന്‍റെ വാരിയെല്ലിനു പൊട്ടലുണ്ടായിട്ടുണ്ടെന്നും മണ്ണന്തല എസ്ഐ ആര്‍.എസ്. വിപിന്‍ പറഞ്ഞു. സംഭവദിവസം ഷംഷാദ് സുഹൃത്തായ വിശാഖിനെ വിളിച്ചുവരുത്തിയത് മൃതദേഹം മറവുചെയ്യാനായിരുന്നുവെന്നും എന്നാല്‍ പദ്ധതി പൊളിയുകയായിരുന്നുവെന്നും പോലീസ് അറിയിച്ചു. photo ഷഹീനയും ഷംഷാദും താമസിച്ചിരുന്ന ഹോം സ്റ്റേയിലെ മുറി (വൃത്തത്തിനുള്ളിൽ)

നിയന്ത്രണംവിട്ട കാര്‍ കുഴിയില്‍ വീണു; ഏഴുപേര്‍ക്കു പരിക്ക്

വെള്ളറട: നിയന്ത്രണം നഷ്ടപ്പെട്ട കാര്‍ കുഴിയില്‍ പതിച്ചു ഏഴോളം പേര്‍ക്ക് ഗുരുതര പരിക്കേറ്റു. വെള്ളറട കൂട്ടപ്പൂവിനു സമീപത്താണ് നിയന്ത്രണംവിട്ട കാര്‍ കുഴിയില്‍ പതിച്ചത്. ഗുരുതര പരിക്കേറ്റ നാലുപേരെ തിരുവനന്തപുരം മെഡിക്കല്‍ കോളജില്‍ പ്രവേശിപ്പിച്ചു. മൂന്നുപേരെ വെള്ളറട സര്‍ക്കാര്‍ ആശുപത്രിയിലും പ്രവേശിപ്പിച്ചു. മണ്ണന്തല സ്വദേശി ആദിത്യന്‍ (19), പാളയം സ്വദേശി അഹ്‌ന (19), മരുതൂര്‍ സ്വദേശി അലീന്‍ (19) എന്നിവരാണ് വെള്ളറട സര്‍ക്കാര്‍ ആശുപത്രിയില്‍ ചികിത്സയിലുള്ളത്. ആറുകാണിയില്‍നിന്നു കുടപ്പനമൂടുവഴി തിരുവനന്തപുരത്തേക്കു വരികയായിരുന്നു അപകടത്തില്‍പ്പെട്ട കാര്‍. കൂട്ടപ്പു ഇറക്കം ഇറങ്ങവേ കയറ്റം കയറുകയായിരുന്ന ഓട്ടോറിക്ഷയില്‍ ഇടിക്കാതിരിക്കുന്നതിനുവേണ്ടി ഇടതുവശത്തേക്കു തിരിച്ച സമയത്ത് കാര്‍ നിയന്ത്രണം വിട്ട് കുഴിയില്‍ പതിക്കുകയായിരുന്നു. വീഴ്ചയില്‍ കാര്‍ തകര്‍ന്നു. യാത്രക്കാരായിരുന്ന എല്ലാവര്‍ക്കും ഗുരുതരമായി പരിക്കേറ്റിട്ടുണ്ട്. ഗ്ലാസ് തകര്‍ത്താണ് പരിക്കേറ്റവരെ പുറത്തെടുത്തത്. കീഴ്ക്കാംതൂക്കായ റോഡില്‍ പണി നടക്കുന്നതിനാല്‍ മെറ്റല്‍ ഇളകി കിടക്കുകയായിരുന്നു. മെറ്റലില്‍തെന്നിയാണ് കാർ ഏഴടിയോളം താഴ്ചയുള്ള വീട്ടുമുറ്റത്തേക്കു പതിച്ചത്. വെള്ളറട പോലീസ് സംഭവ സ്ഥലത്തെത്തി തെളിവെടുപ്പ് നടത്തി കേസ് രജിസ്റ്റര്‍ ചെയ്ത് അന്വേഷണം ആരംഭിച്ചിട്ടുണ്ട്.

കാപ്പ ഉത്തരവ് ലംഘിച്ച് നാട്ടിൽ വന്ന പ്രതി പിടിയിൽ

നെടുമങ്ങാട്: സാമൂഹ്യവിരുദ്ധ പ്രവർത്തനങ്ങൾ നടത്തിയതിനു നാടുകടത്തിയ വെള്ളനാട് ചാങ്ങ കടുവക്കുഴി കവിയാക്കോട് അനു ഭവനിൽ മനു (26) നെ ആര്യനാട് പോലീസ് കാപ്പ ഉത്തരവ് ലംഘിച്ചതിന് അറസ്റ്റ് ചെയ്തു. ആര്യനാട് പോലീസ് സ്റ്റേഷൻ പരിധിയിലും അടിപിടി അക്രമം തുടങ്ങി നിരവധി ക്രിമിനൽ കേസുകളിൽ ഉൾപ്പെട്ട പ്രതി വീണ്ടും കുറ്റകൃത്യങ്ങളിൽ ഏർപ്പെട്ടതിനെ തുടർന്ന് തിരുവനന്തപുരം റെയ്ഞ്ച് ഡിഐജി കാപ്പാ നിയമ പ്രകാരം തിരുവനന്തപുരം ജില്ലയിൽ ഒരു വർഷകാലത്തേക്ക് വിലക്ക് പുറപ്പെടുവിച്ചിരുന്നു. കാപ്പാ ഉത്തരവ് ലംഘിച്ച് തിരുവനന്തപുരം ജില്ലയിൽ പ്രവേശിച്ചതായി രഹസ്യ വിവരം ലഭിച്ചതിന്‍റെ അടിസ്ഥാനത്തിൽ ആര്യനാട് പോലീസ് സ്റ്റേഷൻ ഇൻസ്പെക്ടർ വി.എസ്. അജീഷ്, എഎസ്ഐ സുരേഷ് കുമാർ, സിപിഒമാരായ രഞ്ജിത്ത് ശരത്ത് എന്നിവരടങ്ങിയ സംഘം പ്രതിയെ അറസ്റ്റ് ചെയ്തു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

വാഹനങ്ങൾ പാതയോരത്ത്: വൻ അപകടഭീഷണി

മാറനല്ലൂർ: വാഹനങ്ങൾ പാതയോരത്ത്; വൻ അപകട ഭീഷണിയും. അപകടങ്ങളെത്തുടർന്നും തകരാറു കാരണവും നിന്നുപോയ വാഹനങ്ങൾ പാതയോരത്തുനിന്നു മാറ്റാതെ കിടക്കുന്നത് അപകടങ്ങൾക്കു കാരണമാകുന്നു. ഊരൂട്ടമ്പലം-തിരുവനന്തപുരം റോഡിൽ ഗവ. എൽപി സ്‌കൂളിനു സമീപത്തായാണ് ഒരു പിക്കപ്പ് ഓട്ടോയും രണ്ടു കാറുകളും വർഷങ്ങളായി ഉപേക്ഷിക്കപ്പെട്ട നിലയിൽ കിടക്കുന്നത്. വാഹനങ്ങൾ പാതയോരത്തോടു ചേർന്നുകിടക്കുന്നതു കാരണം കാൽനടയാത്രക്കാർക്ക് റോഡിലൂടെ മാത്രമേ സഞ്ചരിക്കാൻ കഴിയുന്നുള്ളൂ. പഞ്ചായത്തിനും പോലീസിനും നാട്ടുകാർ നിരവധി പരാതികൾ നൽകിയെങ്കിലും ഫലമുണ്ടാകുന്നില്ലെന്നാണ് ആക്ഷേപം. ഉപേക്ഷിക്കപ്പെട്ട വാഹനങ്ങളിൽ അടുത്തിടെയായി മാലിന്യം കൊണ്ടിടുന്നതും പതിവായിട്ടുണ്ട്. കോഴിമാലിന്യം ഉൾപ്പെടെ ചാക്കിൽകെട്ടി തള്ളുന്നതു കാരണം തെരുവുനായകളുടെ ശല്യവും പ്രദേശത്ത് വർധിച്ചിട്ടുണ്ട്. സ്‌കൂൾ അധ്യയനവർഷം ആരംഭിച്ചതോടെ കുട്ടികൾക്കുൾപ്പെടെ ഇപ്പോൾ റോഡിൽക്കയറി നടക്കേണ്ടിവരുന്നതും, തെരുവുനായകളുടെ ഭീഷണിയും കൂടുതൽ ബുദ്ധിമുട്ടാക്കുന്നതായാണ് പരാതി.

വീട്ടിലേക്കൊരു പുസ്തകം: പദ്ധതി ഉദ്ഘാടനം ചെയ്തു

വെഞ്ഞാറമൂട്: വീട്ടിലേക്കൊരു പുസ്തകം എന്ന പദ്ധതിയുടെ ഗ്രന്ഥശാലാതല ഉദ്ഘാടനം കലാലയ ഗ്രന്ഥശാലയിൽ നടന്നു. ജില്ലാ പഞ്ചായത്ത് മുൻ പ്രസിഡന്‍റ് രമണി പി. നായർ, നേതൃത്വ സമിതി കൺവീനർ നെല്ലനാട് മോഹനൻ, കവയിത്രി സോണി നായർ എന്നിവർ ചേർന്ന് ഉദ്ഘാടനം നിർവഹിച്ചു. കലാലയ പ്രസിസ്റ്റന്‍റ് ആർ. അജയകുമാർ, സെക്രട്ടറി എം.ബി. ബിജു, വൈസ് പ്രസിഡന്‍റ് അഡ്വ: എസ്. മോഹനൻ നായർ, പഞ്ചായത്ത് മെമ്പർ പി. പ്രസാദ്, ലൈബ്രറിയൻ ബി ശശിധരൻ നായർ, വർക്കിംഗ് കമ്മിറ്റി അംഗങ്ങളായ എസ്. രാജൻ, ജി.ആർ. ഷാജി, ബി. ഉഷ, . ബാലവേദി പ്രസിഡന്‍റ് വി.എം. വിനയ തുടങ്ങിയവർ പങ്കെടുത്തു.

ശ്രീചിത്തിര തിരുനാൾ ട്രസ്റ്റ് കെ. ജയകുമാറിനെ ആദരിച്ചു

വെള്ളറട: 2024-ലെ കേന്ദ്ര സാഹിത്യ അക്കാദമി അവര്‍ഡ് നേടിയ കെ. ജയകുമാറിനെ ശ്രീ ചിത്തിര തിരുനാള്‍ റസിഡന്‍ഷ്യല്‍ സെന്‍ട്രല്‍ സ്‌കൂളും ശ്രീ ചിത്തിര തിരുനാള്‍ ട്രസ്റ്റും ചേർന്ന് ആദരിച്ചു. തമ്പാനൂരിലെ ഹോട്ടല്‍ ദിമോറയില്‍ നടന്ന സമ്മേളനത്തില്‍ പാട്‌ന ഹൈക്കോടതി മുന്‍ ചീഫ് ജസ്റ്റീസ് ജെ.ബി. കോശി മുഖ്യാഥിതിയായിരുന്നു. ട്രസ്റ്റ് ചെയര്‍മാനും മുന്‍ അംബാസിഡറുമായിരുന്ന ടി.പി. ശ്രീനിവാസന്‍ അധ്യക്ഷത വഹിച്ച ചടങ്ങില്‍ മാനേജിംഗ് ട്രസ്റ്റി സതീഷ് കുമാര്‍ സ്വാഗതം പറഞ്ഞു. തുടര്‍ന്ന് അവാര്‍ഡിനർഹമായ ജയകുമാറിന്‍റെ പിംഗളകേശിനി എന്ന കവിതാസമാഹാരത്തിന്‍റെ അവലോകനം പ്രഫ. ലേഖ നരേന്ദ്രന്‍ നിര്‍വഹിച്ചു. ജയകുമാറിന്‍റെ പുതിയ കവിതാസമാഹാരം - പ്രണയത്തിന്‍റെ അധര മുദ്രകളുടെ പ്രകാശനം ഭാഷാ ഇന്‍സ്റ്റിറ്റ്യൂട്ട് മുൻ ഡയറക്ടര്‍ ശ്രീകല നിര്‍വഹിക്കുകയും അതില്‍ ഉള്‍പെട്ട കവിതകളെ സദസിനു പരിചയപ്പെടുത്തുകയും ചെയ്തു. എന്‍എസ്എസ് കോളജ് അസിസ്റ്റന്‍റ് പ്രഫ. ലക്ഷ്മിദാസ്, അധ്യാപകനും യുവകവിയുമായ സുമേഷ്‌ കൃഷ്ണന്‍ എന്നിവര്‍ ജയകുമാര്‍ രചിച്ച കവിതകളുടെ ആലാപനം നടത്തി. ശ്രീ ചിത്തിര തിരുനാള്‍ സ്‌കൂള്‍ പ്രിന്‍സിപ്പാള്‍ എസ്. പുഷ്പവല്ലി നന്ദി പ്രകാശിപ്പിച്ചു.

"നമ്മുടെ ഓണം നമ്മുടെ പൂക്കൾ' പദ്ധതിയുമായി ക്രൈസ്റ്റ് നഗർ കോളജ്

മാറനല്ലൂർ: ക്രൈസ്റ്റ് നഗർ കോളജിലെ പരിസ്ഥിതി ക്ലബ്ബ് മാറനല്ലൂർ പഞ്ചായത്ത് കൃഷിഭവനുമായി സഹകരിച്ചുകൊണ്ട് "നമ്മുടെ ഓണം നമ്മുടെ പൂക്കൾ' എന്ന ലക്ഷ്യത്തോടുകൂടി കോളജ് കാമ്പസിൽ പുഷ്പക്കൃഷി ആരംഭിച്ചു. മാറനല്ലൂർ പഞ്ചായത്ത് പ്രസിഡന്‍റ് എസ്. സുരേഷ് കുമാർ പദ്ധതി ഉദ്ഘാടനം ചെയ്തു. മുപ്പത് സെന്‍റ് സ്ഥലത്ത് രണ്ടായിരം ജമന്തി തൈകളാണ് നട്ടത്. മാറനല്ലൂർ പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ എ.ആർ. സുധീർഖാൻ, കൃഷി ഓഫീസർ കെ.ജി. ബാബുരാജ്, കോളജ് മാനേജർ ഫാ. സിറിയക് മഠത്തിൽ സിഎംഐ, പ്രിൻസിപ്പൽ ഡോ. ജോളി ജേക്കബ്, കൊമേഴ്സ് വിഭാഗം മേധാവി പ്രഫ. ഡോ. പി.എസ്. ദേവകുമാർ എന്നിവർ സംസാരിച്ചു. അധ്യാപകരായ ഡോ. കെ.പി. ഷാനന്ദ്, ഡോ. കവിത ഗോപൻ എന്നിവർ നേതൃത്വം നൽകി.

കുടുബശ്രീ എഡിഎസ് വാർഷികം

നെടുമങ്ങാട്: നഗരസഭ സന്നഗർ വാർഡ് കുടുബശ്രീ എഡിഎസ് വാർഷികം നഗരസഭ ചെയർപേഴ്സൺ സി.എസ്. ശ്രീജ ഉദ്ഘാടനം ചെയ്തു. നഗരസഭ ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ ബി. സതീശൻ അധ്യക്ഷനായി. കൗൺസിലർ ശ്യാമള സ്വാഗതം പറഞ്ഞു. ആരോഗ്യ സ്റ്റാൻഡിംഗ് കമ്മിറ്റി ചെയർപേഴ്സൺ അജിത, സിഡിഎസ് ചെയർപേഴ്സൺ റീജ നസീർ എന്നിവർ പ്രസംഗിച്ചു. കുടുബശ്രീയിലെ മുതിർന്ന അംഗങ്ങൾ ഹരിത കർമസേന അംഗങ്ങളായ ലാലി, ഹാഷിത, ലത, സൗമ്യ എന്നിവരെയും ആശാ വർക്കർ ജയകുമാരി, തൊഴിലുറപ്പ് തൊഴിലാളി രാധ എന്നിവരെയും ഉന്നതവിദ്യാഭ്യാസം നേടിയ കുട്ടികളെയും ആദരിച്ചു.

ഫോണിൽ അസഭ്യവർഷം: യുവാവ് പിടിയിൽ

പോത്തൻ കോട്: ഉയർന്ന വനിതാ പോലീസ് ഉദ്യോഗസ്ഥരെയും വനിതാ ബറ്റാലിയൻ ഉദ്യോഗസ്ഥരെയും ഫോൺ വിളിച്ച് അശ്ലീലം പറയുന്ന യുവാവ് അറസ്റ്റിൽ. കഴക്കൂട്ടം മേനംകുളം സ്വദേശി ജോസ് (35) ആണ് പിടിയിലായത്. കഴക്കൂട്ടത്തെ വനിതാ ബറ്റാലിയനിൽ നിരന്തരം വനിതാ ഉദ്യോഗസ്ഥരെ വിളിച്ച് അശ്ലീലം പറഞ്ഞതിനാണ് കഴക്കൂട്ടം പോലീസ് എറണാകുളത്തു നിന്നും ഇയാളെ പിടികൂടിയത്.ഇന്‍റർനെറ്റിൽ പരതി ഐജി, ഡിവൈഎസ്പി റാങ്കിലുള്ള വനിതാ ഉദ്യോഗസ്ഥരുടെ നമ്പർ കണ്ടെത്തിയാണ് ഫോൺവിളി. ഇവരെ നിരന്തരം വിളിച്ച് അശ്ലീലം പറയലാണു ജോസിന്‍റെ പതിവുരീതി. കഴക്കൂട്ടത്ത് ഇത്തരത്തിലുള്ള 20 ഓളം കേസുകളിൽ പ്രതിയാണിയാൾ. മോഷണക്കേ സുകളുമുണ്ട്. പ്രതിയെ കോടതിയിൽ ഹാജരാക്കും.

കരവഴി ചരക്കുനീക്കത്തിന് ഇനിയും "മാർഗ'മില്ല

വിഴിഞ്ഞം: ലോകത്തിലെ വിവിധ രാജ്യങ്ങളിൽ നിന്നായി എത്തിയത് 363 കൂറ്റൻ ചരക്ക് കപ്പലുകൾ, കയറ്റിയിറക്കിയത് 7.78 ലക്ഷം കണ്ടെയ്നറുകൾ, പക്ഷെ വിഴിഞ്ഞം അന്താരാഷ്ട്ര തുറമുഖത്തു നിന്നു കരമാർഗം ഒരു കണ്ടെയ് നർ ലോറി കടന്നുപോകാൻ പാകത്തിൽ ഒരു റോഡ് എന്നു പൂർത്തിയാകുമെന്നറിയാതെ വിഴി ഞ്ഞം പ്രദേശവാസികൾ..! തുറമുഖകവാടമായ മുല്ലൂരിൽ നിന്ന് ബൈപ്പാസ് വരെ നീളുന്ന കഷ്ടിച്ചു രണ്ട് കിലോമീറ്റർ വരുന്ന റോഡ് പണി തുടങ്ങിയിട്ട് വർഷം പത്ത് തികയാൻ പോകു മ്പോഴും അവസാനം കാണത്തതാണ് നാട്ടുകാരുടെ സംശയം വർധിപ്പിച്ചിരിക്കുന്നത്. പ്രധാന റോഡ് എങ്ങുമെത്താതെ വന്നതോടെ കമ്മീഷനിംഗിനായി പ്രധാനമന്ത്രി വരുന്നതിനു മുൻപ് കരവഴി കണ്ടെയ്നർ സർവീസ് തുടങ്ങണമെന്ന് തീരുമാനിച്ച അധികൃതർ താല്കാലിക റോഡ്നിർമാണവും തുടങ്ങി. പക്ഷെ അതും ഇപ്പോൾ പാതിവഴിയിലായ മട്ടാണ്. പ്രധാനമന്ത്രി വരുന്നതുവരെ വേഗത്തിൽ പണി നടന്നെങ്കിലും പിന്നെയെല്ലാം പഴയപടിയായി. പ്രധാന റോഡ് ബൈപ്പാസിൽ കയറാൻ ഇനിയും ഒരു വർഷത്തോളം വേണ്ടി വരുമെന്നാണ് അധികൃതരുടെ വാദം. ഇതോടൊപ്പം താല്കാലിക റോഡിനും വേണം മാസങ്ങളുടെ നിർമാണം. താല്കാലികമായി പണിയുന്ന റോഡ് സർവീസ് റോഡിൽ നിന്ന് ബൈപ്പാസിൽ പ്രവേശിക്കുന്ന ഭാഗം വീതി കൂട്ടാൻ കൂടുതൽ ഭൂമി ഏറ്റെടുക്കേണ്ടിവന്നു. വാങ്ങിയ ഭൂമി തട്ടിനിരത്തിയുള്ള പണിയും ഒച്ചിഴയും പോലെ തുടരുകയാണ്. വിഴിഞ്ഞം വികസന കുതിപ്പിലെന്ന് അധികൃതർ മുറവിളി കൂട്ടുമ്പോഴാണ് ഒരു കണ്ടെയ്നർ ലോറി കരവഴി കടത്തിവിടാനുള്ള പെടാപ്പാട്. ഇനി എന്നെങ്കിലും ബൈപ്പാസ് വഴി കണ്ടെയ്നറുകളുമായി ഓടിയാലും തിരുവനന്തപുരം ഭാഗത്തേക്കു മാത്രമേ അതുണ്ടാകൂ. തമിഴ്നാട്ടിലേക്കു ചരക്കുകളുമായി ലോറികൾ കടക്കണമെങ്കിൽ കാരോട് -കന്യാകുമാരി ബൈപ്പാസ് റോഡ് തുറക്കണം. തുറമുഖത്തിന്‍റെ വികസനം വിഴിഞ്ഞത്തുകാരും ജില്ലക്കാരും കണി കാണണമെങ്കിൽ നാവായിക്കുളം റിംഗ് റോഡും ഭൂഗർഭ റെയിൽ പാതയും പൂർത്തിയാകണം. ആവശ്യത്തിനു ഭൂമി പോലും ഏറ്റെടുക്കാത്ത ഇവയുടെ നിർമാണം എന്നു പൂർത്തിയാകുമെന്ന് അധികൃതർക്കും നിശ്ചയമില്ല. പുറം ഭാഗത്തു ജനത്തിനു വേണ്ട വികസനത്തിന്‍റെ ഒരു കണിക പോലും കാണാനില്ലെങ്കിലും കടലിൽ കപ്പലുകളുടെ വൻ തിരക്കാണ്. 800 മീറ്റർ നീളം വരുന്ന ബർത്തിൽ നിർത്താവുന്നതിൽ പരമാവധി കപ്പലുകൾ ദിനംപ്രതി നങ്കൂരമിട്ട് ദൗത്യം പൂർത്തിയാക്കി മടങ്ങുന്നുണ്ട്. എന്നാൽ ഇവയിൽനിന്ന് ഇറക്കുന്ന കണ്ടെയ്നറുകൾ ഫീഡർ കപ്പലുകളിൽ കയറ്റി മറ്റ് തുറമുഖങ്ങളിലേക്ക് കൊണ്ടുപോവുകയാണു നിവലെ പതിവ്. ഇവയിൽനിന്ന് ലാഭം കൊയ്യുന്നവയിൽ തമിഴ് നാട് തൂത്തുക്കുടി ഉൾപ്പെടെയുള്ള അന്യ സംസ്ഥാന തുറമുഖങ്ങളും. ഇതിനെല്ലാം മാറ്റം വരണമെങ്കിൽ കരയിലെ അടിസ്ഥാന വികസനം സാധ്യമാണമെന്നും നാട്ടുകാർ പറയുന്നു. രാജേന്ദ്രകുമാർ

നിരാലംബരെ പരിചരിച്ചവര്‍ക്ക് ആദരവ്

മെഡിക്കല്‍ കോളജ്: തിരുവനന്തപുരം മെഡിക്കല്‍കോളജ് ആശുപത്രിയില്‍ ചികിത്സയില്‍ കഴിയുന്ന നിരാലംബരും നിര്‍ധനരുമായ രോഗികളെ പരിചരിക്കുന്ന ജീവനക്കാര്‍ക്ക് ആദരവ്. ആക്കുളം കേന്ദ്രീയ വിദ്യാലയത്തിലെ വിദ്യാര്‍ത്ഥികളും സന്നദ്ധ സംഘടനയായ ഹെല്‍പ്പിങ് ഹാര്‍ട്‌സ് അംഗങ്ങളുമാണ് ജീവനക്കാരെ ആദരിക്കാനെത്തിയത്. വര്‍ഷങ്ങളായി നിരാലംബരായ രോഗികള്‍ക്ക് ഭക്ഷണം നല്‍കുന്ന മൈത്രി ലത അനൂപിനെയും സോഷ്യല്‍ വര്‍ക്കര്‍മാരായ യേശുദാസ്, ഷിബു എന്നിവരെയും ആദരിച്ചു. കൂടാതെ കെ.ജി.എന്‍.എയുടെ ആഭിമുഖ്യത്തില്‍ പ്രവര്‍ത്തിക്കുന്ന സിസ്റ്റര്‍ ലിനി പുതുശ്ശേരി ഡ്രസ്സ് ബാങ്കിലേക്ക് ഡ്രെസ്സും ഡയപ്പറും ഇവര്‍ സംഭാവന ചെയ്തു. ആശുപത്രി സൂപ്രണ്ട് ഡോ. ബി.എസ് സുനില്‍കുമാര്‍ വസ്ത്രങ്ങള്‍ ഏറ്റുവാങ്ങി. മെഡിക്കല്‍ കോളജ് പ്രിന്‍സിപ്പല്‍ ഡോ. പി.കെ ജബ്ബാര്‍, ആശുപത്രി സൂപ്രണ്ട് ഡോ. ബി.എസ് നുനില്‍കുമാര്‍, ആര്‍.എം.ഒ ഡോ. കെ.പി ജയപ്രകാശന്‍, ലോ സെക്രട്ടറി അനില്‍കുമാര്‍, കെ.ജി.എന്‍.എ വെസ്റ്റ് ജില്ലാ സെക്രട്ടറി സുഷമ, സംസ്ഥാന കമ്മിറ്റി അംഗം ആശ, ട്രഷറര്‍ സുനിത, നഴ്‌സിംഗ് സൂപ്രണ്ട് ശ്യാമില, സീനിയര്‍ നഴ്‌സിംഗ് ഓഫീസര്‍ ഷാനിഫ, ഹെല്‍പ്പിങ് ഹാര്‍ട്‌സ് രക്ഷധികാരി ശ്രീലത, പ്രതീഷ് കേന്ദ്രീയ വിദ്യാലയം ഹെഡ്മാസ്റ്റര്‍ കെ.വി ഷിബു എന്നിവര്‍ പങ്കെടുത്തു.

കളക്ടർ പൊടിയക്കാല സന്ദർശിച്ചു

വിതുര: വിതുര പഞ്ചായത്തിലെ പൊടിയക്കാല ആദിവാസി ഉന്നതിയിൽ ജില്ലാ കളക്ടർ അനു കുമാരി സന്ദർശനം നടത്തി. ഊരുമൂപ്പനുമായും ഉന്നതി നിവാസികളുമായും വിവിധ പ്രശ്നങ്ങൾ ചർച്ച ചെയ്യുകയും ആവശ്യമായ തുടർനടപടികൾ സ്വീകരിക്കുന്നതിനു ബന്ധപ്പെട്ട വകുപ്പുകൾക്കു നിർദേശം നൽകുകയും ചെയ്തു. പട്ടികവർഗ വികസന വകുപ്പിലെ ഉദ്യോഗസ്ഥരെ കൂടാതെ വനം, ആരോഗ്യം, തദ്ദേശ സ്വയംഭരണം വകുപ്പ് ഉദ്യോഗസ്ഥരും കളക്ടർക്കൊപ്പമുണ്ടായിരുന്നു.

മെഡിക്കല്‍ ക്യാമ്പ് സംഘടിപ്പിച്ചു

പാറശാല: പാറശാല ബ്ലോക്ക് പഞ്ചായത്തിന്‍റെ ആഭിമുഖ്യത്തില്‍ പൂവാര്‍ പിഎച്ച്സിയുടെ സഹകരണത്തോടുകൂടി ശാരീരിക വെല്ലുവിളികള്‍ നേരിടുന്നവര്‍ക്കായി ലെറ്റ്‌സ് ഫ്‌ലൈ പദ്ധതിയുടെ ഭാഗമായി മെഡിക്കല്‍ ക്യാമ്പ് സംഘടിപ്പിച്ചു. പാറശാല ജ്യാമഹേശ് ഓഡിറ്റോറിയത്തില്‍ സംഘടിപ്പിച്ച ക്യാമ്പ് ബ്ലോക്ക് പഞ്ചായത്ത് പ്രസിഡന്‍റ് അഡ്വ. എസ്. കെ. ബെന്‍ഡാര്‍വിന്‍ ഉദ്ഘാടനം ചെയ്തു. ‌ബ്ലോക്ക് പഞ്ചായത്ത് ക്ഷേമകാര്യ സ്ഥിരം സമിതി അധ്യക്ഷ വിനിതകുമാരി അധ്യക്ഷത വഹിച്ചു. ബ്ലോക്ക് പഞ്ചായത്ത് ആരോഗ്യ വിദ്യാഭ്യാസ സ്ഥിരംസമിതി അധ്യക്ഷന്‍ എസ്. ആര്യദേവന്‍, ബ്ലോക്ക് പഞ്ചായത്ത് അംഗം സോണിയ ആന്‍റണി, പൂവാര്‍ മെഡിക്കല്‍ ഓഫീസര്‍ ഡോ. ലത, പാറശാല സര്‍ക്കാര്‍ താലൂക്ക് ആശുപത്രി സൂപ്രണ്ട് ഡോ. നിത എസ്. നായര്‍, ഡോ. മണി, എച്ച്എസ് കെ.വി. ജെയിന്‍, ജോയിന്‍റ് ബിഡിഒ. ജയപ്രകാശ് തുടങ്ങിയവര്‍ പങ്കെടുത്തു .

ആലംപൊറ്റ സപ്താഹ യജ്ഞം

പാറശാല: ആലംപോറ്റ കൃഷ്ണകൃപ സേവാസമിതി ആലംപൊറ്റ സപ്താഹ യജ്ഞത്തിന് എഡിജിപി വെങ്കിടേഷ് ഭദ്രദീപം തെളിയിച്ചു. സപ്താഹരക്ഷാധികാരി ദീപു വെങ്കിട്ടറാം മുഖ്യകാര്‍മികത്വം വഹിച്ചു. തിരുവിതാംകൂര്‍ രാജകുടുംബാംഗം പൂയം തിരുനാള്‍ ഗൗരി പാര്‍വതി ഭായി മുഖ്യാതിഥിയായി. നാളെ രാവിലെ ഗുരുവായൂര്‍ മുന്‍മേല്‍ശാന്തി പഴയത്തുമന ഇല്ലം സുമേഷ് നമ്പൂതിരിയുടെ കാർമികത്വത്തില്‍ മഹാഗണപതിഹോമം, മഹായജ്ഞപൂജ, കലശപൂജ, കലശാഭിഷേകം എന്നിവ നടക്കും. 26നു മള്ളിയൂര്‍ പരമേശ്വരന്‍ നമ്പൂതിരിയുടെ സാന്നിധ്യത്തില്‍ മഹാഗണപതിഹോമവും മറ്റു പൂജകളും നടക്കും. വൈകുന്നേരം നാലിന് അവഭൃഥ സ്‌നാനം ഉണ്ടായിരിക്കും. തുടർന്നു വൈകുന്നേരം 6:30 മുതല്‍ പൊരുതല്‍ പാടിയില്‍ നാമനാദലയം അവതരിപ്പിക്കും.

നാലാഞ്ചിറ സെന്‍റ് ജോൺസ് സ്കൂളിൽ പുസ്തകോത്സവം

തിരുവനന്തപുരം: നാലാഞ്ചിറ സെന്‍റ് ജോൺസ് ഹയർ സെക്കൻഡറി സ്കൂളിൽ വായന മാസാചരണത്തിന്‍റെ ഭാഗമായി പുസ്തകോത്സവം സംഘടിപ്പിച്ചു. കേരള സർക്കാരിന്‍റെ സാംസ്കാരിക സ്ഥാപനമായ കേരള ബുക്ക് മാർക്കുമായി സഹകരിച്ചാണ് പുസ്തകോത്സവം സംഘടിപ്പിച്ചത്. പ്രിൻസിപ്പൽ ഫാ. ജോസ് ചരുവിലിന്‍റെ അധ്യക്ഷതയിൽ ബുക്ക് മാർക്ക് സെക്രട്ടറിയും എഴുത്തുകാരനുമായ ഏബ്രഹാം മാത്യു പുസ്തകോത്സവം ഉദ്ഘാടനം ചെയ്തു. വൈസ് പ്രിൻസിപ്പൽ അജീഷ് കുമാർ, ബിന്നി സാഹിതി, ബിജു ജോൺ, വിനോദിനി തുടങ്ങിയവർ നേതൃത്വം നൽകി.

ലയോള സ്കൂൾ മന്ദിരവും നവീകരിച്ച ലൈബ്രറിയും ഉദ്ഘാടനം ചെയ്തു

തിരുവനന്തപുരം: ശ്രീകാര്യം ലയോള സ്കൂളിലെ പുതിയ മന്ദിരമായ പോപ്പ്് ഫ്രാൻസിസ് കോംപ്ലക്സിന്‍റെ ഉദ്ഘാടനവും നവീകരിച്ച ഫാ. സി.പി. വർക്കി എസ് ജെ ലൈബ്രറിയുടെ ഉദ്ഘാടനവും നടന്നു. പുതിയ മന്ദിരത്തിന്‍റെ ഉദ്ഘാടനം മന്ത്രി റോഷി അഗസ്റ്റിൻ നിർവഹിച്ചു. കേരള ഈശോസഭ പ്രൊവിൻഷ്യൽ റവ. ഡോ. ഇ.പി. മാത്യു എസ്ജെ, ലയോള സ്കൂൾ മാനേജർ ഫാ. സണ്ണി തോമസ് കുന്നപ്പള്ളിൽ എസ്ജെ, കടകംപള്ളി സുരേന്ദ്രൻ എംഎൽഎ, ലയോള സ്കൂൾ ഡയറക്ടറും പ്രിൻസിപ്പലുമായ റവ. ഡോ. സാൽവിൻ അഗസ്റ്റിൻ എസ്ജെ, ലയോള കോളജ് പ്രിൻസിപ്പൽ റവ. ഡോ. സാബു തോമസ് എസ്ജെ, സിബിഎസ്ഇ പ്രിൻസിപ്പൽ ഫാ. റംലറ്റ് തോമസ് എസ് ജെ, എച്ച്എസ്ഇ പ്രിൻസിപ്പൽ സിസ്റ്റർ ജിജി തോമസ് ബർസാർ ഫാ. ജോസ് തൈപ്പറന്പിൽ എസ്ജെ, ലോബ പ്രസിഡന്‍റ് ജേക്കബ് മാത്തൻ, അഗസ്റ്റിൻ ചാണ്ടി എന്നിവർ പങ്കെടുത്തു. നവീകരിച്ച ലൈബ്രറിയുടെ ഉദ്ഘാടനം കൊൽക്കത്ത സെന്‍റ് സേവ്യേഴ്സ് യൂണിവേഴ്സിറ്റി വൈസ് ചാൻസലർ റവ. ഡോ. ജോണ്‍ ഫെലിക്സ് രാജ് എസ് ജെ നിർവഹിച്ചു. കേരള ഈശോ സഭ പ്രൊവിൻഷ്യൽ ഫാ. ഇ.പി. മാത്യു എസ്ജെ നവീകരിച്ച ഗ്രന്ഥശാല വെഞ്ചരിച്ചു. പോപ്പ് ഫ്രാൻസിസ് മന്ദിരത്തിൽ ലയോള സ്കൂളിന്‍റെ ചരിത്രം വിളിച്ചോതുന്ന മ്യൂസിയം, റോബോട്ടിക്സ് ലാബ്, ബുക്ക് സ്റ്റാൾ, റിക്കാഡിംഗ് സ്റ്റുഡിയോ, മാത്്സ്, ലാംഗ്വേജ് ലാബുകൾ, മൾട്ടി പർപ്പസ് ഹാൾ, കുട്ടികൾക്കുള്ള ഇൻഫേമറി, ലോബ ഓഫീസ്, ഭക്ഷണശാല, സ്പോർട്സ് പവലിയൻ എന്നിവ ഒരുക്കിയിരിക്കുന്നു.

നെയ്യാറ്റിൻകര ഫ്രാൻ പഠനോത്സവം സംഘടിപ്പിച്ചു

നെയ്യാറ്റിന്‍കര : നെയ്യാറ്റിന്‍കരയിലെ റസിഡന്‍റ്സ് അസോസിയേഷനുകളുടെ സംഘടനയായ ഫ്രാനിന്‍റെ ആഭിമുഖ്യത്തില്‍ ഗവ. ടൗണ്‍ എല്‍പിഎസില്‍ സംഘടിപ്പിച്ച പഠനോത്സവം നിംസ് എംഡി ഡോ. എം.എസ്. ഫൈസല്‍ഖാന്‍ ഉദ്ഘാടനം ചെയ്തു. എസ്.കെ. ജയകുമാര്‍ അധ്യക്ഷനായ ചടങ്ങില്‍ നഗരസഭ സ്റ്റാന്‍ഡിംഗ് കമ്മിറ്റി ചെയര്‍മാന്‍ കെ.കെ ഷിബു, കൗണ്‍സിലര്‍മാരായ ഷിബുരാജ് കൃഷ്ണ, കൂട്ടപ്പന മഹേഷ്, നെയ്യാറ്റിന്‍കര താലൂക്ക് ലൈബ്രറി കൗൺസിൽ എക്സി. അംഗം അഡ്വ. എസ്.എസ് ഷാജി, അഡ്വ. തലയല്‍ പ്രകാശ് എന്നിവര്‍ സംബന്ധിച്ചു.

എയര്‍ ഇന്ത്യ വിമാനത്തില്‍ പക്ഷി ഇടിച്ച സംഭവം; മടങ്ങിപോകേണ്ട യാത്രികരെ ഡല്‍ഹിയില്‍ എത്തിച്ചു

വലിയതുറ: ഞായറാഴ്ച വൈകുന്നേരം ഡല്‍ഹിയില്‍നിന്നും തിരുവനന്തപുരത്തെത്തിയ എയര്‍ ഇന്ത്യ വിമാനത്തില്‍ ലാന്‍ഡിംഗിനിടെ പക്ഷിയിടിച്ചതിനെത്തുടര്‍ന്നു വിമാനം സാഹസിഹമായി ലാന്‍ഡിംഗ് നടത്തിയിരുന്നു. എം.ഐ 2754 എന്ന വിമാനത്തിലാണ് പക്ഷിയിടിച്ചത്. വിമാനത്തിന്‍റെമുന്‍ ഭാഗത്തായിരുന്നു പക്ഷിയിടിച്ചത്. വിമാനം ലാന്‍ഡ് ചെയ്യാന്‍ 200 അടി ഉയരത്തില്‍ നില്‍ക്കുമ്പോഴായിരുന്നു പക്ഷിയിടിച്ചത്. തുടര്‍ന്നു വിമാനം സുരക്ഷിതമായി ലാന്‍ഡ് ചെയ്യുകയായിരുന്നു. പക്ഷിയിടിച്ചതിനെത്തുടര്‍ന്ന് മുന്‍വശത്തെ റഡാര്‍ സംവിധാനങ്ങള്‍ക്കു സാരമായ കേടുപാടുകള്‍ സംഭവിച്ചതായിട്ടാണ് വിവരം ലഭിച്ചത്. തകരാര്‍ പരിഹരിക്കാനാകാത്തതിനാല്‍ ഞായറാഴ്ച വൈകുന്നേരം 7.15ന് ഡല്‍ഹിയിലേയ്ക്ക്ക്കുളള മടക്കയാത്ര റദ്ദാക്കിയിരുന്നു. ഡല്‍ഹിയിലേയ്ക്ക് പോകേണ്ടിയിരുന്ന 183 യാത്രക്കാരേയും നഗരത്തിലുള്ള വിവിധയിടങ്ങളില്‍ പാര്‍പ്പിക്കുകയും ചെയ്തിരുന്നു. തുടര്‍ന്ന് തിങ്കളാഴ്ച രാവിലെയും ഉച്ചയ്ക്കുമായി എയര്‍ ഇന്ത്യയുടെ തന്നെ രണ്ടു വിമാനങ്ങളിലായി മുഴുവന്‍ യാത്രികരെയും ഡല്‍ഹിയില്‍ എത്തിക്കുകയായിരുന്നു.

മരുതൂരിലെ കൊലപാതകം: മലപ്പുറം സ്വദേശിയുടെ പേരിലും വീഡിയോകോളിന്‍റെ പേരിലും തര്‍ക്കം

പേരൂര്‍ക്കട: മരുതൂരില്‍ പോത്തന്‍കോട് സ്വദേശിനി ഷഹീനയുടെ മരണവുമായി ബന്ധപ്പെട്ടു വിശദമായ അന്വേഷണത്തിനൊരുങ്ങി മണ്ണന്തല പോലീസ്. ഇതിന്‍റെ ഭാഗമായി ബന്ധുക്കളുടെയും വ്യാപാരികളുടെയും വിശദമായ മൊഴി രേഖപ്പെടുത്തും. ഷഹീന മരിച്ചുകിടന്ന മരുതൂരിലെ ഹോംസ്റ്റേയില്‍ ഇവരുടെ മാതാപിതാക്കള്‍ എത്തുകയും മൃതദേഹം കണ്ടെത്തുകയും ചെയ്തിരുന്നു. ഷഹീനയുടെ സഹോദരന്‍ ഷംഷാദ് ഇവരുമായി നിരന്തരം വാക്കുതര്‍ക്കത്തിലേര്‍പ്പെട്ടുവന്നുവെന്നും അയാള്‍ക്കു സംശയമാണെന്നും അതാണ് കൊലപാതകത്തിലെത്തിച്ചതെന്നും ബന്ധുക്കള്‍ മൊഴി നല്‍കിയിരുന്നു. മലപ്പുറം സ്വദേശിയായ ഒരാളുമായി ഷഹീനയ്ക്ക് ബന്ധമുണ്ടായിരുന്നുവെന്നും അതു താന്‍ ചോദ്യം ചെയ് തിരുന്നുവെന്നും റിമാന്‍ഡിലാകുന്നതിനുമുമ്പ് ഷംഷാദ് പറഞ്ഞിരുന്നു. എന്നാല്‍ ഇതു വെറും ആരോപണമായാണ് ഷഹീനയുടെ ബന്ധുക്കള്‍ കാണുന്നത്. നിരന്തരം വീഡിയോ കോളില്‍ ഷഹീന വരുന്നതിനെതിരേയും ഷംഷാദ് പ്രതികരിച്ചിരുന്നു. ഈയാഴ്ച്ചതന്നെ ഷംഷാദിനെയും സുഹൃത്ത് വിശാഖിനെയും കസ്റ്റഡിയില്‍ വാങ്ങി തെളിവെടുക്കുമെന്നു പോലീസ് പറയുന്നു. സഹോദരങ്ങള്‍ താമസിച്ചിരുന്ന മരുതൂരിലെ ഹോംസ്റ്റേയിലായിൽ പ്രതികളെ എത്തി ച്ചായിരിക്കും പ്രധാനമായും തെളിവെടുക്കുന്നത്.

കെടിയുവിൽ ദേശീയ ഫാക്കൽറ്റി ഡവലപ്മെന്‍റ് പ്രോഗ്രാം തുടങ്ങി

തിരുവനന്തപുരം: സാങ്കേതിക സർവകലാശാലയിൽ ദേശീയ ഫാക്കൽറ്റി ഡെവലപ്മെന്‍റ് പ്രോഗ്രാം ആരംഭിച്ചു. വൈസ് ചാൻസലർ ഡോ. കെസിവപ്രസാദ് ഉദ്ഘാടനം ചെയ്തു. എഐസിടിഇ ട്രെയിനിംഗ് ആൻഡ് ലേണിംഗ് അക്കാദമിയുടെ സഹായത്തോ ടെ സർവകലാശാലാ സ്കൂളുകളും ഹ്യൂമൻ റിസോഴ്സ് ഡവലപ്മെന്‍റ് സെന്‍ററും സംയുക്തമായാണ് പരിപാടി സംഘടിപ്പിക്കുന്നത്. "ബയോമിമെറ്റിക്സ് ആൻഡ് നാനോട്രൈബോളജി' എന്ന വിഷയത്തിൽ ഈ മാസം 28 വരെയാണ് പ്രോഗ്രാം. ഡീൻ ഡോ. വിനു തോമസ് ചടങ്ങിൽ അധ്യക്ഷത വഹിച്ചു. സ് കൂൾ ഡയറക്ടർ ഡോ. ബോബി ഫിലിപ്പ്, എച്ച് ആർഡിസി ഡയറക്ടർ ഡോ. ബിജോയ് അബ്രഹാം, ഫിനാൻസ് ഓഫീസർ. അജി കുര്യൻ, ഡോ. ഷീജ പി. ജോർജ്, സർവകലാശാല സ്കൂൾസ് മെക്കാനിക്കൽ എൻനീയറിംഗ് വിഭാഗം അധ്യാപകൻ ഡോ. ചാക്കോ പ്രിനോ കോശി എന്നിവർ പ്രസംഗിച്ചു

പട്ടം എസ്‌യുടി ആശുപത്രിയില്‍ ലോക യോഗ ദിനം ആചരിച്ചു

തിരുവനന്തപുരം: എസ്‌യുടി ആശുപത്രിയില്‍ ലോക യോഗദിനം ആചാരിച്ചു. ആശുപത്രിയിലെ ജീവനക്കാര്‍ക്കും നഴ്‌സിംഗ് സ്‌കൂള്‍ വിദ്യാര്‍ഥികള്‍ക്കും പ്രത്യേക യോഗ ക്ലാസ് നടത്തിയായിരുന്നു യോഗ ദിനം ആചരിച്ചത്. ആശുപത്രിയുടെ മാനേജിംഗ് ഡയറക്ടറും ചീഫ് എക്സിക്യൂട്ടീവ് ഓഫീസറുമായ കേണല്‍ രാജീവ് മണ്ണാളി, എച്ച്ആര്‍ മാനേജര്‍ ദേവികൃഷ്ണ, ഓപ്പറേഷന്‍സ് മാനേജര്‍ ടിജു സാമുവല്‍, മറ്റു വകുപ്പ് മേധാവികള്‍, ജീവനക്കാര്‍, നഴ്‌സിംഗ് സ്‌കൂള്‍ വിദ്യാര്‍ഥികള്‍ എന്നിവര്‍ ഉള്‍പ്പെടെ 100-റോളം പേര്‍ പരിപാടിയില്‍ പങ്കെടുത്തു. ക്വാളിറ്റി മാനേജര്‍ ബിന്ദു കൃഷ്ണയുടെ നേതൃത്വത്തിലാണ് യോഗ പരിശീലനം നടന്നത്. മെച്ചപ്പെട്ട ശാരീരികവും മാനസികവുമായ ക്ഷേമത്തിനായി യോഗയെ ദൈനംദിന ജീവിതത്തില്‍ സംയോജിപ്പിക്കേണ്ടതിന്‍റെ പ്രാധാന്യം മനസിലാക്കാനാണ് പരിശീലനം സംഘടിപ്പിച്ചതെന്ന് കേണല്‍ രാജീവ് മണ്ണാളി പറഞ്ഞു.

അലോജനിക്ക് സ്റ്റെം സെല്‍ ട്രാന്‍സ്പ്ലാന്‍റില്‍ മികവുമായി കിംസ്ഹെല്‍ത്ത് കാന്‍സര്‍ സെന്‍റര്‍

തിരുവനന്തപുരം: തെക്കന്‍ കേരളത്തില്‍ രണ്ട് അലോജനിക് സ്റ്റെം സെല്‍ ട്രാന്‍സ്പ്ലാന്‍റുകള്‍ വിജയകരമായി പൂര്‍ത്തിയാക്കിയെന്ന നേട്ടവുമായി കിംസ്ഹെല്‍ത്ത് കാന്‍സര്‍ സെന്‍റര്‍. മൈലോയിഡ് സെല്ലുകളെ ബാധിക്കുന്ന രക്താര്‍ബുദമായ അക്യൂട്ട് മൈലോയിഡ് ലുക്കീമിയ ബാധിതയായ 37 കാരിയിലാണ് ഹാഫ് മാച്ച് പ്രൊസീജിയർ വിജയകരമായി നടത്തിയത്. അക്യൂട്ട് മൈലോയിഡ് ലുക്കീമിയ ബാധിതനായ 63 കാരനിലായിരുന്നു രണ്ടാമത്തെ വിജയകരമായ ട്രാന്‍സ്പ്ലാന്‍റ് നടത്തിയത്. ക്ലിനിക്കല്‍ ഹെമറ്റോളജി ആൻഡ് ബോണ്‍മാരോ ട്രാന്‍സ്പ്ലാന്‍റ് വിഭാഗം സീനിയര്‍ കണ്‍സള്‍ട്ടന്‍റ് ഡോ. ബിജയ് പി. നായര്‍, അസോസിയേറ്റ് കണ്‍സള്‍ട്ടന്‍റുമാരായ ഡോ. കെ.എസ്. ലക്ഷ്മണ്‍, ഡോ. അശ്വിന്‍ വി. നായര്‍ എന്നിവരും ട്രാന്‍സ്ഫ്യൂഷന്‍ മെഡിസിന്‍ വിഭാഗം ഡോ. സനൂജ പിങ്കിയും പ്രൊസീജ്യറുകളുടെ ഭാഗമായി. കണക്കുകള്‍ പ്രകാരം രാജ്യത്ത് ഏകദേശം രണ്ടായിരത്തോളം സ്റ്റെം സെല്‍ ട്രാന്‍സ്പ്ലാന്റുകള്‍ പ്രതിവര്‍ഷം നടക്കുന്നുണ്ട്.

ആര്യാടൻ ഷൗക്കത്തിന്‍റെ വിജയം: പായസ വിതരണം നടത്തി

നേമം: നിലമ്പൂർ ഉപതെരഞ്ഞെടുപ്പിൽ യുഡിഎഫ് സ്ഥാനാർഥി ആര്യാടൻ ഷൗക്കത്തിന്‍റെ വിജയത്തിൽ ആഹ്ലാദിച്ച് പാപ്പനംകോട് കോൺഗ്രസ് വാർഡ് കമ്മിറ്റിയുടെ നേതൃത്വത്തിൽ പായസ വിതരണം നടത്തി. കൈമനത്ത് നടന്ന വിജയാഹ്ലാദപരിപാടി ഡി സി സി ജനറൽ സെക്രട്ടറി കൈമനം പ്രഭാകരൻ ഉദ്ഘാടനം ചെയ്തു. വാർഡ് പ്രസിഡന്‍റ് സുജി സുരേഷ് അധ്യക്ഷത വഹിച്ചു.

സിപിഎം പ്രതിഷേധിച്ചു

നേമം: മന്ത്രി വി. ശിവന്‍കുട്ടിയുടെ പാപ്പനംകോട്ടെ എംഎല്‍എ ഓഫീസിലേയ്ക്കു ബിജെപി പ്രവര്‍ത്തകര്‍ കഴിഞ്ഞ ദിവസം നടത്തിയ മാര്‍ച്ചില്‍ പ്രതിഷേധിച്ചു സിപിഎം പാപ്പനംകോട്ട് പ്രതിഷേധ യോഗം സംഘടിപ്പിച്ചു. ജില്ലാ സെക്രട്ടറി വി. ജോയി എംഎല്‍എ ഉദ്ഘാടനം ചെയ്തു. മന്ത്രിയെ സംരക്ഷിക്കാന്‍ സിപിഎം, നേതൃത്വത്തിനു കഴിയുമെന്നും വി. ജോയി പറഞ്ഞു. നേമം ഏരിയാ സെക്രട്ടറി എ. പ്രതാപചന്ദ്രന്‍ അധ്യക്ഷനായി. മന്ത്രി വി.ശിവന്‍കുട്ടി, മേയര്‍ ആര്യാ രാജേന്ദ്രന്‍, കടകംപള്ളി സുരേന്ദ്രന്‍ എംഎല്‍എ, കരമന ഹരി, എസ്.കെ. പ്രീജ, എസ്. പുഷ്പലത, എം.എം. ബഷീര്‍ തുടങ്ങിയവര്‍ പങ്കെടുത്തു.

വയോജന മഹാസഭ രൂപീകരിച്ചു

പൂവച്ചൽ: പൂവച്ചൽ പഞ്ചായത്ത് വാർഡുകളിലെ വയോജന ക്ലബുകളുടെ പ്രതിനിധികളുടെ കൂട്ടായ്മയായ വയോജന മഹാസഭ രൂപീകരിച്ചു. പഞ്ചായത്തിനെ വയോസൗഹൃദമാക്കി മാറ്റാനും വയോജനങ്ങളുടെ പ്രശ്‌നങ്ങളറിഞ്ഞ് ഇടപെടുന്നതിനുമാണു വയോജന ക്ലബുകൾ രൂപീകരിച്ചത്. ഒരു വാർഡിൽ നിന്നും ഒരു പ്രതിനിധി എന്ന നിലയിൽ 23 അംഗങ്ങളുള്ള പഞ്ചായത്തുതല സമിതിയാണ് രൂപീകരിച്ച ത്. 30-നകം പഞ്ചായത്തിലെ വയോജനങ്ങളുടെ വിവരശേഖരണം നടത്തും. വയോജനങ്ങൾക്ക് ആവശ്യമായ സംവിധാനങ്ങൾക്കായി പഞ്ചായത്തിൽ പ്രത്യേക ഓഫീസ് പ്രവർത്തിക്കും. വയോജനസഭ പഞ്ചായത്ത് പ്രസിഡന്‍റ് ടി. സനൽകുമാർ ഉദ്ഘാടനം ചെയ്തു. വൈസ് പ്രസിഡന്‍റ് ഒ. ശ്രീകുമാരി അധ്യക്ഷയായി. പഞ്ചായത്ത് അസോസിയേഷൻ ജനറൽ സെക്രട്ടറി മദൻമോഹൻ പദ്ധതി വിശദീകരിച്ചു.

മുതിർന്ന അല്മായരെ ആദരിച്ചു

തിരുവനന്തപുരം: മലങ്കര കാത്തലിക് അസോസിയേഷൻ തിരുവനന്തപുരം വൈദീക ജില്ലാ കമ്മിറ്റിയുടെ ആഭിമുഖ്യത്തിൽ മുതിർന്ന അല്മായരെ ആദരിച്ചു. ജില്ലാ പ്രസിഡന്‍റ് സാം ജോസഫ് അധ്യക്ഷത വഹിച്ച യോഗത്തിൽ ബിഷപ്പ് ആന്‍റണി മാർ സിൽവാനോസ് മുഖ്യാതിഥിയായിരുന്നു. ഡയറക്ടർ ഫാ. ജോൺസൺ പുതുവേലിൽ ആമുഖ സന്ദേശം നടത്തി. ജില്ലാ വികാരി ഫാ. ജോൺ വിളയിൽ, സെക്രട്ടറി തോമസ് ഈപ്പൻ, ട്രഷറാർ സാം കുരുവിള, ജോർജ് വറുഗീസ് എന്നിവർ പ്രസംഗിച്ചു. ജില്ലയിൽ നിന്നുള്ള തെരഞ്ഞെടുക്കപ്പെട്ട 15 പേരെയാണ് ആദരിച്ചത്.

സിആർപിഎഫ് ജവാൻ വിഷ്ണു അനുസ്മരണം

പാലോട്: മാവോയിസ്റ്റ് ആക്രമണത്തിൽ വീരമൃത്യു വരിച്ച സിആർപിഎഫ് ജവാൻ ആർ വിഷ്ണുവിന്‍റെ ഒന്നാം ഓർമദിനം വിവിധ പരിപാടികളോടെ ആചരിച്ചു. നന്ദിയോട് പൊട്ടൻചിറയിലെ കുടുംബ വീടായ അനിഴത്തിൽ വിഷ്ണുവിന്‍റെ ഛായ ചിത്രത്തിനു മുന്നിൽ അനവധി പേർ പുഷ്പാർച്ചന നടത്തി. വിഷ്ണു മെമ്മോറിയൽ ഗ്രന്ഥശാല പ്രസിഡന്‍റ് പൊട്ടൻചിറ ശ്രീകുമാറിന്‍റെ അധ്യക്ഷതയിൽ നടന്ന അനുസ്മരണ സമ്മേളനത്തിൽ പഞ്ചായത്ത് പ്രസിഡന്‍റുമാരായ ശൈലജ രാജീവൻ, മഞ്ജുഷ ജി. ആനന്ദ്, ജനപ്രതിനിധികളായ എസ്. സുനിത, പി. സനൽകുമാർ, വിഷ്ണു ആനപ്പാറ, കടുവച്ചിറ സനൽ, വി. രാജകുമാർ, മാങ്കുഴി പ്രകാശ്, ജി ഗിരീഷ് കുമാർ, മിൽമ മേഖലാ ഡയറക്ടർ ബോർഡ് അംഗം ടി.കെ. വേണുഗോപാൽ, പാലോട് എസ്എച്ച്ജെ എൻ. അശ്വനി, ഇൻസ്പെക്ടർ വി.എസ്. ശ്രീനാഥ്, ഫയർ ആൻഡ് റസ്കി ഓഫീസർ എ.കെ. രാജേന്ദ്രൻ കലാകാരൻ വിതുര തങ്കച്ചൻ, ഗ്രന്ഥശാല സെക്രട്ടറി രതീഷ് ഭാവന തുടങ്ങിയവർ പങ്കെടുത്തു.

"ആയുഷ്മാൻ ഭാരത് ഇൻഷ്വറൻസ് നടപ്പാക്കണം'

വെഞ്ഞാറമ്മൂട്: എഴുപതു വയസ് കഴിഞ്ഞ വയോജനങ്ങൾക്ക് അഞ്ചുലക്ഷം രൂപയുടെ സൗജന്യ ചികിത്സ ഉറപ്പുനൽകുന്ന "ആയുഷ്മാൻ ഭാരത് ഇൻഷ്വറൻസ് പദ്ധതി" കാലതാമസം കൂടാതെ സംസ്ഥാനത്ത് നടപ്പാക്കണമെന്നു സീനിയർ സിറ്റിസൺസ് സർവീസ് കൗൺസിൽ വെഞ്ഞാറമ്മൂട് മണ്ഡ ലം സമ്മേളനം ആവശ്യപ്പെട്ടു. കേന്ദ്ര-സംസ്ഥാന സർക്കാരുകൾ ഇതു സംബന്ധിച്ച അഭിപ്രായ വ്യത്യാസങ്ങൾ വളരെ വേഗം പരിഹരിച്ച് വയോജനങ്ങളുടെ ആരോഗ്യ പദ്ധതി കേരളത്തിലെ ആശുപത്രികളിൽ നടപ്പിലാക്കണമെന്നു സീനിയർ സിറ്റിസൺസ് സർവീസ് കൗൺസിൽ സംസ്ഥാന സെക്രട്ടറി എസ്. ഹനീഫാ റാവുത്തർ ചൂണ്ടിക്കാട്ടി. ഭാരവാഹികളായി മോഹനൻ പുതുവിള - പ്രസിഡന്‍റ്, പ്രസന്നൻ - വൈസ് പ്രസിഡന്‍റ്, കെ.ബാബു ആശാരി-സെക്രട്ടറി, കൃഷ്ണൻകുട്ടി-ജോയിന്‍റ് സെക്രട്ടറി, ഷിഹാബുദീൻ - ട്രഷറർ എന്നിവരെ ഭാരവാഹികളാക്കി 17 അംഗ മണ്ഡലം കമ്മിറ്റിയെ സമ്മേളനം തെരഞ്ഞെടുത്തു.

കെഎസ്ആർടിസി ബസിടിച്ച് സ്കൂട്ടര്‍ യാത്രികന്‍ മരിച്ചു

നെയ്യാറ്റിന്‍കര : കെഎസ്ആര്‍ടിസി ബസിടിച്ച് സ്കൂട്ടര്‍ യാത്രികന്‍ മരിച്ചു. അതിയന്നൂര്‍ അവണാകുഴി പി.ജി നിവാസില്‍ പ്രസന്നകുമാര്‍ (67) ആണ് മരിച്ചത്. ഇന്നലെ രാവിലെ ഏഴോടെ വഴിമുക്ക് കാഞ്ഞിരംകുളം റോഡില്‍ രാമപുരത്തായിരുന്നു അപകടം. തിരുവനന്തപുരം ഭാഗത്തേക്ക് പോയ ബസും എതിര്‍ദിശയില്‍ നിന്നും വരികയിരുന്ന സ്കൂട്ടറും കൂട്ടിയിടിക്കുകയായിരുന്നു. ഇടിയുടെ ആഘാതത്തില്‍ സ്കൂട്ടര്‍ ബസിനടിയിലായി. ഗുരുതരമായി പരിക്കേറ്റ പ്രസന്നകുമാറിനെ ഉടൻ തന്നെ ആശുപത്രിയിലെത്തിച്ചുവെങ്കിലും ജീവന്‍ രക്ഷിക്കാനായില്ല. നെയ്യാറ്റിന്‍കര പോലീസ് കേസെടുത്തു.

പൂജപ്പുര സെൻട്രൽ ജയിലിലെ അന്തേവാസി മരിച്ചു

മെഡിക്കല്‍കോളജ്: പൂജപ്പുര സെന്‍ട്രല്‍ ജയിലിലെ അന്തേവാസി ആശുപത്രിയില്‍ മരിച്ചു. മാവേലിക്കര സ്വദേശി ജോസ് മൈക്കിള്‍ (60) ആണ് തിരുവനന്തപുരം മെഡിക്കല്‍കോളജ് ആശുപത്രിയില്‍ മരിച്ചത്. അബ്കാരി കേസുമായി ബന്ധപ്പെട്ട് ചെങ്ങന്നൂര്‍ അസി. സെഷന്‍സ് കോടതി റിമാന്‍ഡ് ചെയ്ത പ്രതിയെ മാവേലിക്കര സ്പെഷല്‍ സബ്ജയിലില്‍ നിന്ന് മേയ് 21നാണ് തിരുവനന്തപുരത്തേക്ക് കൊണ്ടുവന്നത്. ആരോഗ്യപ്രശ്നങ്ങള്‍ ഉണ്ടായതോടെ ജൂണ്‍ ഏഴിന് മെഡിക്കല്‍കോളജില്‍ പ്രവേശിപ്പിക്കുകയായിരുന്നു. ഞായറാഴ്ച പുലര്‍ച്ചെയായിരുന്നു മരണം. പൂജപ്പുര പോലീസ് കേസെടുത്തു.

കാപ്പ കേസ് പ്രതി കരുതൽ തടങ്കലിൽ

പേരൂർക്കട: നിരവധി ക്രിമിനൽ കേസുകളിലെ പ്രതിയെ കന്‍റോൺമെന്‍റ് പോലീസ് കാപ്പ ആക്ട് പ്രകാരം കരുതൽ തടങ്കലിലാക്കി. തമ്പാനൂർ രാജാജി നഗർ ഫ്ലാറ്റ് നമ്പർ 491-ൽ കുളിക്കാത്ത അപ്പു എന്ന് വിളിക്കുന്ന അഭിറാം (21) ആണ് പിടിയിലായത്. കുറച്ചുനാൾമുമ്പ് രാജാജി നഗർ സ്വദേശിയായ ഒരു യുവാവിനെ വധിക്കാൻ ശ്രമിച്ചതിന് ഇയാൾക്കെതിരേ കേസെടുത്തിരുന്നു. പക്ഷേ ഒളിവിലായിരുന്ന പ്രതിയെ പിടികൂടാൻ സാധിച്ചിരുന്നില്ല. കന്‍റോൺമെന്‍റ് എ.സി സ്റ്റ്യുവർട്ട് കീലറിന്‍റെ നിർദേശപ്രകാരം സിഐ പ്രജീഷ് ശശി എസ്ഐമാരായ ജിജു കുമാർ, ഗ്രീഷ്മ, ആന്‍റി നർക്കോട്ടിക് ടീം എസ്ഐ മിഥുൻ, പോലീസുകാരായ സുജീഷ്, സുബി എന്നിവർ ചേർന്ന് കോയമ്പത്തൂരിനു സമീപത്തു നിന്നാണ് ഇയാളെ അറസ്റ്റ് ചെയ്തത്. പ്രതിയെ തിരുവനന്തപുരം സെൻട്രൽ ജയിലിൽ കരുതൽ തടങ്കലിൽ പാർപ്പിച്ചിട്ടുണ്ട്.

അനുമോദന സദസ് ശ്രദ്ധേയമായി

നെയ്യാറ്റിന്‍കര: തെങ്ങുകയറ്റ തൊഴിലാളിയായ അച്ഛന്‍റെ നിര്‍ബന്ധത്താല്‍ ബാല്യത്തിലേ വായനയോട് അടുപ്പം ആരംഭിച്ച് നിലവില്‍ ഡോക്ടറേറ്റു നേടിയ മലയാളം സ്കൂള്‍ അധ്യാപിക..! മത്സരങ്ങള്‍ക്കും മറ്റും കൊണ്ടുപോവുകയും പുസ്തകങ്ങളോടുള്ള ആഭിമുഖ്യം പ്രോത്സാഹിപ്പിക്കുകയും ചെയ്ത മുത്തശ്ശന്‍റെ നല്ലോര്‍മകള്‍ പങ്കുവച്ച പത്താം ക്ലാസിലെ മുഴുവന്‍ എ പ്ലസ് നേട്ടത്തിനുടമയായ പ്ലസ് വണ്‍ വിദ്യാര്‍ഥി... പഠനകാര്യങ്ങളില്‍ മാതാപിതാക്കളുടെ പിന്തുണയും വിദ്യാഭ്യാസം മികവോടെ പൂര്‍ത്തിയാക്കണമെന്ന കരുതലോടെയുള്ള ഓര്‍മപ്പെടുത്തലുമൊക്കെ നിറകണ്ണീരോടെ വെളിപ്പെടുത്തിയ വിവിധ പരീക്ഷാ ജേതാക്കള്‍... കിടാരക്കുഴി ജവഹര്‍ സ്മാരക ഗ്രന്ഥശാലയില്‍ ഇന്നലെ സംഘടിപ്പിച്ച അനുമോദന സദസ് പുതുതലമുറയിലെ പ്രതിഭകളുടെ ഹൃദയസ്പര്‍ശിയായ വാക്കുകളാല്‍ കൂടുതല്‍ ശ്രദ്ധേയമായി. ഡോ. സുമ, ഡോ. അഞ്ജന പ്രസാദ്, ഡോ. എസ്.എസ്, അശ്വതി, ഡോ. എം.പി. സൂര്യപ്രഭ, എസ്.എസ് ശ്രേയ, ഡി. മിഥുന്‍, എസ്.ആര്‍. സാന്ദ്ര, എസ്.എ. ആരതി, എസ്.പി. അനന്തു, വി.കെ. വിസ്മയ, ആര്‍. ഭവ്യ, ബി. ദയനന്ദ, പി.എസ്. നയന, എം.എസ്. അനുശ്രീ, എസ്. അശ്വനി, ആര്‍.എസ്. അക്ഷയ, ആര്‍.എസ്. അഖില, പി. നവനീത് എന്നിവരെയാണ് അനുമോദിച്ചത്. ഗ്രന്ഥശാല പ്രസിഡന്‍റ് അഡ്വ. കെ. ജയചന്ദ്രന്‍റെ അധ്യക്ഷതയില്‍ ചേര്‍ന്ന സമ്മേളനം മാധ്യമപ്രവര്‍ത്തകനും മോട്ടിവേറ്ററുമായ ഗിരീഷ് പരുത്തിമഠം ഉദ്ഘാടനം ചെയ്തു. അതിയന്നൂര്‍ ബ്ലോക്ക് പഞ്ചായത്ത് വൈസ് പ്രസിഡന്‍റും ജില്ലാ ലൈബ്രറി കൗണ്‍സില്‍ അംഗവുമായ ബി.ബി. സുനിതാറാണി, കഥാകൃത്ത് സതീഷ് കിടാരക്കുഴി, വൈഷ്ണവി, ഗ്രന്ഥശാല ഭാരവാഹികളായ കെ.ബി. ചന്ദ്രമോഹന്‍, എസ്. രാജാനന്ദന്‍ എന്നിവര്‍ പ്രസംഗിച്ചു.വായന വാരാഘോഷങ്ങളുടെ ഭാഗമായി പ്രശ്നോത്തരി, പി.എന്‍ പണിക്കര്‍ അനുസ്മരണം എന്നിവയും നടന്നു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]