ADVERTISEMENT

ADVERTISEMENT

വര്‍ണക്കൂടാരം ഉദ്ഘാടനം ചെയ്തു

നെയ്യാറ്റിന്‍കര: ശാസ്താന്തല ഗവ. യുപി സ്കൂളിൽ നിര്‍മിച്ച വർണക്കൂടാരം കെ. ആൻസലൻ എംഎൽഎ ഉദ്ഘാടനം ചെയ്തു. നഗരസഭ വികസനകാര്യ സ്റ്റാൻഡിംഗ് കമ്മിറ്റി ചെയർമാൻ കെ.കെ. ഷിബു അധ്യക്ഷനായി. വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ ഡോ. എം.എ. സാദത്ത്, കൗൺസിലർ ഡി. സൗമ്യ, എസ്എസ്കെ ജില്ലാ പ്രോഗ്രാം ഓഫീസർ ബിന്ദു ജോൺസ്,

ബിപിസി ആര്‍.എസ്. ബൈജുകുമാര്‍, പിടിഎ പ്രസിഡന്‍റ് കൂട്ടപ്പന രാജേഷ്, പ്രഥമാധ്യാപകൻ എൻ. രാജ്മോഹൻ, എസ്. അനിൽകുമാർ, ആര്‍.എസ്. സംഗീത, കെ.കെ. ബീന, കെ.ഐ. ബിന്ദു, ഷാജഹാൻ, അജിതകുമാരി, പത്മകുമാരി എന്നിവർ സംബന്ധിച്ചു.

ADVERTISEMENT

ഗവ. ഐടിഇ കാന്പസില്‍ ചീരകൃഷി

നെയ്യാറ്റിൻകര: ജമന്തി പൂക്കള്‍ വിരിഞ്ഞ മണ്ണില്‍ ഇനി ചീര കൃഷി. പരിപാലന ദൗത്യം ഏറ്റെടുത്ത് അധ്യാപക വിദ്യാര്‍ഥികള്‍. നെയ്യാറ്റിന്‍കര നഗരസഭയുടെയും കൃഷിഭവന്‍റെയും ഗവ. ഇൻസ്റ്റിറ്റ്യൂട്ട് ഓഫ് ടീച്ചർ എഡ്യൂക്കേഷന്‍റെയും സംയുക്താഭിമുഖ്യത്തിൽ ഊരൂട്ടുകാലയിലെ കാന്പസില്‍ നേരത്തെ ജമന്തി പുഷ്പകൃഷി ചെയ്തിരുന്നു. "ഓണത്തിന് ഒരു വട്ടി പൂവ്' പദ്ധതിയുടെ വിജയത്തെത്തുടര്‍ന്നാണ് പുതിയ പദ്ധതിക്ക് രൂപം നല്‍കിയിരിക്കുന്നത്. "ചുവപ്പിൽ തളിർക്കുന്ന ആരോഗ്യം' എന്ന പദ്ധതിയുടെ ഭാഗമായി കാന്പസില്‍ ചീരകൃഷി ആരംഭിച്ചു. നഗരസഭ ചെയർമാന്‍ പി.കെ. രാജമോഹനൻ പദ്ധതിയുടെ ഉദ്ഘാടനം നിര്‍വഹിച്ചു. വികസനകാര്യ സ്റ്റാൻഡിംഗ് കമ്മിറ്റി ചെയർമാൻ കെ.കെ. ഷിബു, വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാന്‍ ഡോ. എം.എ. സാദത്ത്, ഇന്‍സ്റ്റിറ്റ്യൂട്ട് പ്രിന്‍സിപ്പല്‍ ഡി.എസ്. ഷീലുകുമാർ, അഡ്വ. സജിൻ ലാൽ, പ്രസന്നകുമാര്‍, ടി. സജി , അനശ്വര രാജശേഖരൻ, എസ്. രതീഷ് കുമാർ എന്നിവര്‍ പങ്കെടുത്തു.

പോക്സോ കേസിൽ ദഫ്മുട്ട് അധ്യാപകൻ റിമാൻഡിൽ

കാട്ടാക്കട: പ്രായപൂർത്തിയാകാത്ത പെൺകുട്ടിയെ പീഡിപ്പിച്ച ദഫ് മുട്ട് അധ്യാപകൻ റിമാൻഡിൽ. കോട്ടൂർ കൃഷ്ണഗിരി തൈക്കാവിളയിൽ ആദിൽ (27) ആണ് റിമാൻഡിലായത്. കാട്ടാക്കടയിലെ ഒരു സ്കൂളിൽ ഇയാൾ ദഫ്മുട്ട് പഠിപ്പിക്കാൻ എത്തിയതായിരുന്നു. ഇവിടെയുള്ള കുട്ടിയെയാണ് ഇയാൾ പീഡിപ്പിച്ചത്. സംഭവശേഷം എറണാകുളം വഴി വിദേശത്തേക്കു കടക്കാൻ ശ്രമിക്കുകയായിരുന്ന പ്രതിയെ കാട്ടാക്കട എസ്ഐ മനോജിന്‍റെ നേതൃത്വത്തിൽ മൊബൈൽ ലൊക്കേഷൻ കേന്ദ്രീകരിച്ച് അന്വേഷണം നടത്തി എറണാകുളം നോർത്ത് പോലീസിന്‍റെ സഹായത്തോടെ പിടികൂടുകയായിരുന്നു. സിപിഒ പ്രദീപ്, ഡ്രൈവർ അജിത് എന്നിവർ ചേർന്നാണ് പിടികൂടിയത്.

മൂന്നുവയസുകാരിക്കു നേരെ കുപ്പിയേറ്: യുവാവ് റിമാൻഡിൽ

പാറശാല: പൊഴിയൂരില്‍ ബിയര്‍ കുപ്പിയേറില്‍ മൂന്നു വയസുകാരിക്കു ഗുരുതര പരിക്കേറ്റസംഭവത്തിൽ യുവാവ് അറസ്റ്റിൽ. വെട്ടുകാട് സ്വദേശി സനോജി(33)നെയാണ് ബോട്ട് ജീവനക്കാര്‍ കീഴ്‌പ്പെടുത്തി പോലീസിനു കൈമാറിയത്. പശ്ചിമ ബംഗാള്‍ സ്വദേശിയായ ആര്‍ക്കാ ദാസിന്‍റെ മകള്‍ അനുബാ ദാസിനാണ് കുപ്പിയേറിൽ ഗുരുതര പരിക്കേറ്റത്. കഴിഞ്ഞ ദിവസം വൈകുന്നേരം ആർക്കാ ദാസിന്‍റെ കുടുംബം ബോട്ടിംഗ് നടത്തുന്നതിനിടെ കരയില്‍നിന്നു യുവാവ് ബിയര്‍ കുപ്പി വലിച്ചെറിയുകയായിരുന്നു. അമ്മയുടെ മടിയില്‍ ഇരിക്കുകയായിരുന്ന മൂന്നു വയസുകാരിയുടെ തലയില്‍ കുപ്പി വീണു പൊട്ടിയാണു പരിക്കേറ്റത്. ആറു ദിവസം മുന്പാണ് ഏഴംഗ കുടുംബം വിനോദ യാത്രയ്ക്ക് എത്തിയത്. ഗുരുതരമായി പരിക്കേറ്റ മൂന്നു വയസുകാരി നെയ്യാറ്റിന്‍കര ജനറല്‍ ആശുപത്രിയില്‍ ചികിത്സയിലാണ്. നിലവില്‍ അപകടനില തരണം ചെയ്തുവെന്ന് ഡോക്ടര്‍മാര്‍ അറിയിച്ചു. പ്രതിയെ പൊഴിയൂര്‍ പോലീസാണ് കസ്റ്റഡിയില്‍ എടുത്തത്. ഇയാള്‍ മദ്യലഹരിയില്‍ ആയിരുന്നുവെന്ന് പോലീസ് പറയുന്നു.

കാര്യവട്ടത്തിനു പിന്നാലെ ആറ്റിങ്ങലിലും കുതിപ്പുമായി അശ്വിനി

ആറ്റിങ്ങല്‍: കഴിഞ്ഞ വര്‍ഷം കാര്യവട്ടം എല്‍എന്‍സിപി സ്റ്റേഡിയത്തില്‍ മത്സരത്തിനിടെ പരിക്കേറ്റ് ബോധം നഷ്ടപ്പെട്ട് ആശുപത്രിയില്‍ പ്രവേശിച്ച് മണിക്കൂറുകള്‍ക്കുള്ളില്‍ തിരികെ വീണ്ടും സ്റ്റേഡിയത്തിലെത്തി സ്വര്‍ണക്കുതിപ്പ് നടത്തിയ അശ്വിനി ഇക്കുറി ആറ്റിങ്ങലില്‍ നിന്നും സ്വന്തമാക്കിയത് ഇരട്ട സുവര്‍ണപതക്കം. അരുമാനൂര്‍ എംവിഎച്ച്എസ്എസിലെ പ്ലസ് ടു വിദ്യാര്‍ഥിനിയായ എസ്. അശ്വിനി ജാവലിനിലും ഡിസ്‌കസിലുമാണ് സ്വര്‍ണക്കുതിപ്പ് നടത്തിയത്. ഡിസ്‌കസ് ത്രോയില്‍ 27.84 മീറ്റര്‍ പായിച്ച് സ്വര്‍ണത്തില്‍ മുത്തമിട്ടപ്പോള്‍ ജാവലിന്‍ ത്രോയില്‍ 25.98 മീറ്ററാണ് അശ്വിനി കണ്ടെത്തിയത്. 2024-ല്‍ കാര്യവട്ടം എല്‍എന്‍സിപിഇ ഗ്രൗണ്ടില്‍ ജൂണിയര്‍ പെണ്‍കുട്ടികളുടെ ത്രോ ഇനങ്ങളില്‍ മത്സരിക്കുന്നതിനിടെ ഗ്രൗണ്ടില്‍ തെന്നി വീഴുകയായിരുന്നു അശ്വിനി. തുടര്‍ന്നു ബോധം നഷ്ടപ്പെട്ട അശ്വനിയെ ആശുപത്രിയില്‍ പ്രവേശിപ്പിച്ചു. രണ്ടു മണിക്കൂര്‍ ആശുപത്രിയില്‍ കഴിഞ്ഞ അശ്വിനി തുടര്‍ന്നു തിരികെ ഗ്രൗണ്ടിലെത്തി ഡിസ്‌കസ് ത്രോ പോരാട്ടത്തിനിറങ്ങി സ്വര്‍ണനേട്ടവുമായാണ് ഫീല്‍ഡ് വിട്ടത്. ജാവലിന്‍ ത്രോയിലും ഹാമര്‍ ത്രോയിലും വെള്ളി നേട്ടവും സ്വന്തമാക്കി ജൂണിയര്‍ വിഭാഗത്തിലെ വ്യക്തിഗത ചാമ്പ്യനുമായിരുന്നു.

സ്‌കൂള്‍ വിഭാഗത്തില്‍ അരുമാനൂരിന്‍റെ കുതിപ്പ്...

ആറ്റിങ്ങൽ: ആദ്യദിനം കാഞ്ഞിരംകുളം പികെഎസ്എച്ച്എസ്എസിന്‍റെ ആധിപത്യമായിരുന്നെങ്കില്‍ ഇന്നലെ അരുമാനൂര്‍ എംവിഎച്ച്എസ്എസിന്‍റെ മുന്നേറ്റത്തിനാണ് ശ്രീപാദം സ്റ്റേഡിയം സാക്ഷ്യം വഹിച്ചത്. നാലു സ്വര്‍ണവും രണ്ടു വെള്ളിയും മൂന്നു വെങ്കലവുമായി 29 പോയിന്‍റുമായി നെയ്യാറ്റിന്‍കര സബ് ജില്ലയിലെ അരുമാനൂര്‍ എംവിഎച്ച്എസ്എസ് പോയിന്‍റ് പട്ടികയില്‍ ഒന്നാമത് നില്ക്കുന്നു. രണ്ടാം സ്ഥാനത്തുള്ള പേരൂര്‍ക്കട ജിജിഎച്ച്എസ്എസിനു സമ്പാദ്യം മൂന്നു സ്വര്‍ണവും രണ്ടു വെള്ളിയും രണ്ടു വെങ്കലവും ഉള്‍പ്പെടെ 23 പോയിന്‍റുകളാണ്. ആദ്യ ദിനം പോയിന്‍റ് പട്ടികയില്‍ ഒന്നാമതുണ്ടായിരുന്ന കാഞ്ഞിരംകുളമാണ് രണ്ടാം ദിനം മൂന്നാം സ്ഥാനത്തുള്ളത്. രണ്ടു സ്വര്‍ണവും രണ്ടു വെള്ളിയും ഒരു വെങ്കലവും ഉള്‍പ്പെടെ 17 പോയന്‍റാണ് കാഞ്ഞിരംകുളത്തിനുള്ളത്.

അമ്മ നീന്തല്‍ക്കുളത്തില്‍നിന്നും മെഡല്‍ നേടിയപ്പോള്‍ മകള്‍ നടന്നു കയറിയത് പൊന്നിന്‍ നേട്ടത്തിലേക്ക്

തിരുവനന്തപുരം: അമ്മ നീന്തല്‍ക്കുളത്തില്‍നിന്നും സ്വന്തമാക്കിയ മെഡലുകള്‍ കണ്ട് തനിക്കും മെഡല്‍ നേട്ടം സ്വന്തമാക്കണമെന്ന ആഗ്രഹം തോന്നിയ മകള്‍ തെരഞ്ഞെടുത്തത് ട്രാക്ക് ഇനങ്ങള്‍. നടത്ത മത്സരത്തില്‍ സീനിയര്‍ പെണ്‍കുട്ടികളുടെ വിഭാഗത്തില്‍ പൊന്നിന്‍ കുതിപ്പ് സ്വന്തമാക്കി ശ്രദ്ധേയയത് ഗൗതമി കൃഷ്ണയാണ്. അമ്മയാണ് തന്‍റെ പൊന്നിന്‍ കുതിപ്പിന് പ്രചോദനമെന്നു ഗൗതമി തന്നെ പറയുന്നു. സീനിയര്‍ പെണ്‍കുട്ടികളുടെ 3000 മീറ്റര്‍ നടത്തത്തിലാണ് പേരൂര്‍ക്കട ഗവ. എച്ച്എസ്എസിലെ പ്‌ളസ് ടു കോമേഴ്‌സ് വിദ്യാര്‍ഥിനിയായ ഗൗതമി സ്വര്‍ണത്തില്‍ മുത്തമിട്ടത്. ഗൗതമിയുടെ മാതാവ് ജിഷാറാണി 1992 ഗോവയില്‍ നടന്ന ദേശീയ നീന്തല്‍ മത്സരത്തില്‍ സ്വര്‍ണം നേടിയിരുന്നു. ആദ്യം ഗൗതമിയും നീന്തലിലായിരുന്നു ശ്രദ്ധ കേന്ദ്രീകരിച്ചിരുന്നത്. പിന്നീടാണ് നടത്ത മത്സരത്തിലേക്ക് മാറിയത്. അമ്മയുടെ മെഡല്‍ നേട്ടത്തിനു പിന്നാലെ മകളുടെ മെഡല്‍ നേട്ടത്തിന്റെ ആഹ്ലാദമാണ് ഗൗതമിയുടെ കുടുംബത്തിന്. ഈ ഇനത്തില്‍ വെള്ളി നേട്ടം സ്വന്തമാക്കിയ അക്ഷര എസ്. പ്രശാന്തും പേരൂര്‍ക്കട സ്‌കൂളിലെ വിദ്യാര്‍ഥിനിയാണ്. ജൂണിയര്‍ വിഭാഗത്തില്‍ പേരൂര്‍ക്കട സ്‌കൂളിലെ തന്നെ ആദിഷയ്ക്കാണ് സുവര്‍ണനേട്ടം.

800 മീറ്റർ സ്വര്‍ണം ശിവപ്രകാശിനും ശിവപ്രസാദിനും വീട്ടുകാര്യം

ആറ്റിങ്ങല്‍: മീറ്റിലെ ആവേശകരമായ മത്സര ഇനമായ ആണ്‍കുട്ടികളുടെ 800 മീറ്റര്‍ ഓട്ടം ശിവപ്രകാശും ശിവപ്രസാദും വീട്ടുകാര്യമാക്കിമാറ്റി. സീനിയര്‍ വിഭാഗത്തില്‍ ശിവപ്രകാശ് സ്വര്‍ണവുമായി വീട്ടിലേക്കെത്തുമ്പോള്‍ ജൂണിയര്‍ വിഭാഗത്തില്‍ തനിക്കും സ്വര്‍ണത്തില്‍ കുറഞ്ഞൊരു ലക്ഷ്യമില്ലെന്ന തീരുമാനവുമായി ട്രാക്കിലിറങ്ങിയ ശിവപ്രാസദും ഓടിക്കയറിയത് സ്വര്‍ണവുമായി. തൈക്കാട് ഗവ മോഡല്‍ ബിഎച്ച്എസ്എസിലെ പ്ലസ് ടു വിദ്യാര്‍ഥിയായ ശിവപ്രകാശ് സീനിയര്‍ ആണ്‍കുട്ടികളുടെ 800 മീറ്ററില്‍ രണ്ടു മിനിറ്റ് 05.07 സെക്കന്‍ഡില്‍ ഫിനിഷ് ചെയ്തു സ്വര്‍ണത്തില്‍ മുത്തമിട്ടപ്പോള്‍ ഇളയ സഹോദരനും ജിവി രാജാ സ്‌കൂളിലെ പ്ലസ് വണ്‍ വിദ്യാര്‍ഥിയുമായ ശിവ പ്രസാദ് ഒരു മിനിറ്റ് 58.03 സെക്കന്‍ഡില്‍ ഓടിയെത്തിയാണ് ജൂണിയര്‍ വിഭാഗത്തില്‍ സ്വര്‍ണം നേടിയത്. ശിവ പ്രസാദ് 3000 മീറ്ററില്‍ ഇന്നലെ സ്വര്‍ണം നേടിയിരുന്നു. ഓട്ടോറിക്ഷാ തൊഴിലാളിയായ പിതാവ് അയ്യപ്പന്‍റെ പ്രോത്സാഹനത്തെ തുടര്‍ന്നാണ് രണ്ടു മക്കളും കായിക മേഖലയിലേക്ക് തിരിഞ്ഞത്.

കിരീടം നോര്‍ത്തിലേക്കോ നെയ്യാറ്റിന്‍കരയിലേക്കോ..‍?

ആറ്റിങ്ങല്‍: ഇഞ്ചോടിഞ്ച് പോരാട്ടം. കിരീടപോരാട്ടത്തില്‍ തിരുവനന്തപുരം നോര്‍ത്തും നെയ്യാറ്റിന്‍കരയും തമ്മിലുള്ള അകലം വളരെ കുറച്ചുമാത്രം. റവന്യൂ ജില്ലാ അതലറ്റിക്‌സ് മീറ്റില്‍ അവസാനദിവസം വരെ കാത്തിരിക്കണം ജില്ലാ ചാമ്പ്യന്‍മാരെ കണ്ടെത്താന്‍. ആദ്യദിനം തിരുവനന്തപുരം നോര്‍ത്തിന്‍റെ കുതിപ്പിനായിരുന്നു ആറ്റിങ്ങല്‍ ശ്രീപാദം സ്റ്റേഡിയം വേദിയായതെങ്കില്‍ ഇന്നലെ നെയ്യാറ്റിന്‍കരയുടെ ഒപ്പത്തിനൊപ്പമുള്ള പോരാട്ടം കാണികള്‍ക്ക് ആവേശം സമ്മാനിച്ചു. റവന്യൂ ജില്ലാ അത്‌ലറ്റിക് മീറ്റിന്‍റെ രണ്ടാം ദിനത്തെ മത്സരങ്ങള്‍ പൂര്‍ത്തിയായപ്പോള്‍ തിരുവനന്തപുരം നോര്‍ത്ത് ഒന്‍പതു സ്വര്‍ണവും ആറു വെള്ളിയും ഒന്‍പതു വെങ്കലവുമായി 87 പോയിന്‍റുമായി പട്ടികയില്‍ ഒന്നാമത്. ഏഴു സ്വര്‍ണവും ആറു വെള്ളിയും ഒന്‍പത് വെങ്കലവുമായി 72 പോയിന്‍റു നേടിയ നെയ്യാറ്റിന്‍കരയാണ് തൊട്ടുപിന്നിലുളളത്. മൂന്നാം സ്ഥാനത്തുള്ള കിളിമാനൂരിന് നാലു സ്വര്‍ണവും രണ്ട് വെള്ളിയും നാലു വെങ്കലവും ഉള്‍പ്പെട 41 പോയിന്‍റാണ് ഉള്ളത്.

ഗവ. ജെബിഎസില്‍ `നിലാവ്' കുട്ടിപ്പത്രം

നെയ്യാറ്റിന്‍കര: നെയ്യാറ്റിന്‍കര ഗവ. ജെബിഎസില്‍ വിദ്യാര്‍ഥികളുടെ ഡയറി എഴുത്തിലെ രചനകള്‍ ചേര്‍ത്ത് "നിലാവ്' കുട്ടിപ്പത്രം പുറത്തിറക്കി. സ്കൂളിലെ ഒന്നാം ക്ലാസ് വിദ്യാര്‍ഥികളാണ് പത്രം തയാറാക്കിയത്. വിദ്യാര്‍ഥികളുടെ സംയുക്ത ഡയറിയിൽ നിന്നും ഏറ്റവും മികച്ചതു പഠനക്കൂട്ടത്തിൽ കണ്ടെത്തിയാണ് കുട്ടിപ്പത്രം യാഥാര്‍ഥ്യമാക്കിയതെന്നു സ്കൂളിലെ അധ്യാപകര്‍ പറഞ്ഞു. ഓരോ പഠനക്കൂട്ടത്തിൽനിന്നും ഓരോ കുട്ടിയുടെ ഡയറിയെഴുത്ത് പരിഗണിച്ചു. സ്വന്തം ഡയറി നോക്കി കൂട്ടുകാർ തന്നെ എഴുതുകയും ചിത്രം വരക്കുകയും ചെയ്തു. പേര് നിര്‍ദേശിച്ചതും വിദ്യാര്‍ഥികള്‍ തന്നെ.

കഞ്ചാവുമായി യുവാവ് പിടിയില്‍

വെള്ളറട: കുന്നത്തുകാല്‍ വണ്ടിത്തടം ജംഗ്ഷനിലാണ് കഞ്ചാവുമായി ബൈക്കില്‍ സഞ്ചരിച്ച യുവാവ് പിടിയിലായത്. ബുധനാഴ്ച ഉച്ചയ്ക്ക് പന്ത്രണ്ട് മണിയോടെ നെയ്യാറ്റിന്‍കര എക്‌സൈസ് ഇന്‍സ്‌പെക്ടര്‍ അജയകുമാറിന്റെ നേതൃത്വത്തിലുള്ള സംഘമാണ് മലയിന്‍കീഴ് തച്ചോട്ട്കാവ് സ്വദേശി (30) വിഷ്ണുവില്‍ നിന്ന് 2.600 കിലോ കഞ്ചാവ് പിടികൂടിയത്. ഒഡീസയില്‍ നിന്നെത്തിച്ച കഞ്ചാവ് മലയിന്‍കീഴ് ഭാഗത്തേയ് ക്ക് കൊണ്ടു പോകുന്നതിനിടയിലാണ് പ്രതി വലയിലായത്.

വാര്‍ഡുകളില്‍ സംവരണം

കല്ലിയൂരില്‍ 14 വാര്‍ഡുകളില്‍ സംവരണം നേമം: കല്ലിയൂര്‍ പഞ്ചായത്തിലെ ആകെ 24 വാര്‍ഡുകളില്‍ 14 വാര്‍ഡുകള്‍ സംവരണ വാര്‍ഡുകളും ബാക്കി ജനറല്‍ വാര്‍ഡുകളുമായി. മുകളൂര്‍മൂല, കല്ലിയൂര്‍ (പട്ടികജാതി സ് ത്രീ സംവരണം), വെള്ളായണി, ആശുപത്രി വാര്‍ഡ് (പട്ടികജാതി സംവരണം), ചെറുബാലമന്ദം, സർവോദയം, കുളകുടിയൂര്‍ക്കോണം, പകലൂര്‍, കണ്ണംകുഴി, ഓഫീസ് വാര്‍ഡ്, കുഴിതാലച്ചല്‍, നെടിഞ്ഞല്‍, സിഗ്നല്‍ സ്റ്റേഷന്‍, അഗ്രികള്‍ച്ചറല്‍ കോളജ് (സ്ത്രീ സംവരണം) എന്നിങ്ങനെയാണവ. പള്ളിച്ചലില്‍ 13 വാര്‍ഡുകളില്‍ സംവരണം നേമം: പള്ളിച്ചല്‍ പഞ്ചായത്തിലെ ആകെ 24 വാര്‍ഡുകളില്‍ 13 വാര്‍ഡുകള്‍ സംവരണ വാര്‍ഡുകളും ബാക്കി ജനറല്‍ വാര്‍ഡുകളുമായി. പള്ളിച്ചല്‍, കുണ്ടറത്തേരി (പട്ടികജാതി സ്ത്രീ സംവരണം), താന്നിവിള (പട്ടികജാതി സംവരണം), മൂക്കുന്നിമല, കുളങ്ങരകോണം, നരുവാമൂട്, വെള്ളാപ്പള്ളി, പൂങ്കോട്, ഭഗവതിനട, കേളേശ്വരം, കൊറിണ്ടിവിള, മുതുവല്ലൂര്‍ക്കോണം, കൈതൂര്‍ക്കോണം (സ്ത്രീ സംവരണം).

മൂഴി മണ്ഡലം കോൺഗ്രസ് കമ്മിറ്റി നൈറ്റ് മാർച്ച് നടത്തി

നെടുമങ്ങാട്: ശബരിമലയിലെ സ്വർണ്ണപ്പാളി കട്ടെടുത്ത വിഷയത്തിൽ ദേവസ്വം വകുപ്പ് മന്ത്രി രാജിവയ്ക്കണമെന്നും ദേവസ്വം ബോർഡ് പിരിച്ചുവിടണമെന്നും ആവശ്യപ്പെട്ട് മൂഴി മണ്ഡലം കോൺഗ്രസ് കമ്മിറ്റിയുടെ നേതൃത്വത്തിൽ മൂഴി ജംഗ്ഷനിൽ നിന്നും വേങ്കവിള വരെ നൈറ്റ് മാർച്ച് സംഘടിപ്പിച്ചു. കെപിസിസി നിർവാഹക സമിതി അംഗം ജെ.എസ്. അഖിൽ ഉദ്ഘാടനം ചെയ്തു. കോൺഗ്രസ് നേതാക്കളായ ആനാട് ജയൻ, ബിനു എസ്. നായർ, മണ്ഡലം കോൺഗ്രസ് കമ്മിറ്റി പ്രസിഡന്‍റ് വേട്ടംപള്ളി സനൽ, എസ്. മുജീബ്, കെ. ശേഖരൻ, വേങ്കവിള സുരേഷ്, കല്ലിയോട് ഭുവനേന്ദ്രൻ, ആനാട് സുരേഷ്, ഇര്യനാട് രാമചന്ദ്രൻ, മൂഴി സുനിൽ, വേട്ടമ്പള്ളി അനിൽ, പി.എൻ. ഷീല, ഷമി മൂഴി, പുത്തൻപാലം ഷഹീദ്, പത്മിനി അമ്മ തുടങ്ങിയവർ നേതൃത്വം നൽകി.

സര്‍ക്കാര്‍ വാഹനങ്ങളില്‍നിന്നു ബാറ്ററി മോഷ്ടിച്ചയാൾ പിടിയിൽ

പേരൂര്‍ക്കട: വിവിധ സര്‍ക്കാര്‍വാഹനങ്ങളില്‍നിന്നു ബാറ്ററികള്‍ മോഷ്ടിച്ചയാളെ കന്‍റോൺമെന്‍റ് എസി സ്റ്റ്യുവര്‍ട്ട് കീലറിനൊപ്പം മ്യൂസിയം സിഐ വിമല്‍, എസ്ഐമാരായ വിപിന്‍, ബാലസുബ്രഹ്‌മണ്യന്‍, സൂരജ്, സിപിഒമാരായ ഷൈന്‍, രാജേഷ്, സുനീര്‍, ബിനില്‍, അനൂപ്, പ്രവീണ്‍ എന്നിവർ ചേർന്നു പിഎംജിയില്‍നിന്നു പിടികൂടി. കുന്നുകുഴി വഞ്ചിയൂര്‍ സ്വദേശി അനില്‍കുമാര്‍ (50) ആണ് തിരുവനന്തപുരം വികാസ് ഭവന്‍ കെട്ടിടത്തിനു പിറകിലായി ഓടി കാലപ്പഴക്കം എത്തിയ വാഹനങ്ങള്‍ പാര്‍ക്ക് ചെയ്തിരുന്ന യാര്‍ഡില്‍നിന്നു ബാറ്ററികള്‍ മോഷ്ടിച്ചെടുത്തത്. ഓഡിറ്റ്, ജലസേചനം, ഫിഷറീസ്, വാണിജ്യ വകുപ്പുകളിലെ സര്‍ക്കാര്‍ വാഹനങ്ങള്‍ ഈ ഭാഗത്താണു പാർക്കു ചെയ്തിരുന്നത്. പാര്‍ക്ക് ചെയ്തിരുന്നതിന്‍റെ ബാറ്ററികള്‍ മോഷ്ടിച്ചിരിക്കുന്നതായി സാഹചര്യത്തെളിവുകള്‍ ലഭിച്ചതാണ് പരിശോധന നടത്താന്‍ കാരണമായത്. ജീവനക്കാര്‍ നല്‍കിയ പരാതിയില്‍ പോലീസ് സിസിടിവി ദൃശ്യങ്ങള്‍ പരിശോധിച്ചു. ഒരു വാഗണ്‍-ആര്‍ കാറും ഒരു ആക്ടീവ സ്‌കൂട്ടറും സര്‍ക്കാര്‍ വാഹനങ്ങള്‍ കിടക്കുന്ന ഭാഗത്ത് എത്തിയിരുന്നതായി ദൃശ്യങ്ങളില്‍നിന്നു വ്യക്തമായതോടെ ആ വഴിക്കായി അന്വേഷണം. എന്നാല്‍ കാമറയില്‍ വാഹനങ്ങളുടെ രജിസ്‌ട്രേഷന്‍ നമ്പരുകള്‍ വ്യക്തമായിരുന്നില്ല. വാഹനത്തില്‍ മോഷ്ടാവ് എത്തിയ വിവിധ സമയങ്ങള്‍ ശേഖരിച്ച് മ്യൂസിയം പോലീസ് നടത്തിയ അന്വേഷണത്തിലാണ് കവര്‍ച്ച നടത്തിയ ആളെക്കുറിച്ചുള്ള സൂചന ലഭിച്ചത്. തുടരന്വേഷണത്തില്‍ മോഷ്ടാവ് എത്തിയ വാഹനം കണ്ടെത്താന്‍ പോലീസിന് സാധിച്ചു. മോഷണത്തിനുശേഷം പിഎംജിയിലെ ഒരു തട്ടുകടയില്‍ മോഷ്ടാവ് വാഹനം നിര്‍ത്തുകയും പിന്നീട് അവിടെനിന്ന് ഒരാളെ കയറ്റിപ്പോകുകയും ചെയ്യുന്ന കാമറാ ദൃശ്യങ്ങള്‍ ലഭിച്ചതാണു വഴിത്തിരിവായത്.

മികവിന്‍റെ ആദ്യ കേന്ദ്രമായി പാറശാല ആടുവളര്‍ത്തല്‍ കേന്ദ്രം

പ്രഖ്യാപനം നടത്തി മന്ത്രി ജെ. ചിഞ്ചുറാണി പാറശ്ശാല: മലബാറി വിഭാഗത്തിലുള്ള ആടുകളുടെ പ്രജനന കേന്ദ്രമായ പാറശാല ആടുവളര്‍ത്താല്‍ കേന്ദ്രത്തെ ആട് ഫാം വിഭാഗത്തിലെ ആദ്യ മികവിന്‍റെ കേന്ദ്രമായി പ്രഖ്യാപിച്ചു. മന്ത്രി ജെ. ചിഞ്ചുറാണിയാണ് പ്രഖ്യാപനം നടത്തിയത്. മലബാറി വിഭാഗത്തില്‍പ്പെട്ട ആടുകള്‍ക്കായി കൂടുതല്‍ കേന്ദ്രങ്ങള്‍ കേരളത്തില്‍ തുടങ്ങുമെന്നും മന്ത്രി പറഞ്ഞു. പാറശാല പരശുവയ്ക്കലില്‍ സ്ഥിതിചെയ്യുന്ന ആടുവളര്‍ത്താല്‍ കേന്ദ്രം മലബാറി വിഭാഗത്തിലെ ആട്ടിന്‍കുട്ടികളെ ബുക്കിംഗ് അടിസ്ഥാനത്തില്‍ കര്‍ഷകര്‍ക്ക് വില്‍ക്കുന്നുണ്ട്. നിലവില്‍ അഞ്ച് ഏക്കറില്‍ പ്രവര്‍ത്തിക്കുന്ന ഫാമില്‍ 300 ആടുകളാണ് ഉള്ളത്. പ്രത്യേകം സജീകരിച്ച കെട്ടിടങ്ങളിലാണ് ആടുകളെ പാര്‍പ്പിക്കുന്നത്. മികവിന്‍റെ കേന്ദ്രമാവുന്നതോടെ ഇരുനിലകളിലായി പണിത പുതിയ കെട്ടിടങ്ങള്‍ കൂടി പ്രയോജനപ്പെടുത്തി 1000 ആടുകളെ ഒരേസമയം വളര്‍ത്താന്‍ സാധിക്കും. ഫാമില്‍ പ്രാദേശിക നിവാസികളായ 10 പേര്‍ ദിവസവേതന അടിസ്ഥാനത്തില്‍ ജോലിചെയ്യുന്നുണ്ട്. പുതിയ നിലവാരത്തിലേക്ക് ഉയര്‍ന്നതോടെ 20 പേര്‍ക്ക് തൊഴില്‍ നല്‍കാനാകും. ഫാമിന്‍റെ വിപുലീകരണം മുന്നില്‍ക്ക ണ്ട് 18 ഏക്കര്‍ സ്ഥലവും ഏറ്റെടുക്കാനുള്ള പ്രവര്‍ത്തനങ്ങളും ആരംഭിച്ചിട്ടുണ്ട്. ഫാമിലെ വിസര്‍ജ്യങ്ങളും മാലിന്യങ്ങളും കൃത്യമായി സംസ്‌കരിക്കുന്നതിനുള്ള ശാസ്ത്രീയ സംവിധാനങ്ങളും ഇവിടെ നടപ്പിലാക്കിയിട്ടുണ്ട്. കുറുംകുട്ടി ജിഎസ് കണ്‍വന്‍ഷന്‍ സെന്‍ററില്‍ നടന്ന ചടങ്ങില്‍ സി.കെ. ഹരീന്ദ്രന്‍ എംഎല്‍എ അധ്യക്ഷനായി. ജില്ലാ പഞ്ചായത്ത് പ്രസിഡന്‍റ് ഡി. സുരേഷ്‌കുമാര്‍, പാറശാല ബ്ലോക്ക് പഞ്ചായത്ത് പ്രസിഡന്‍റ് അഡ്വ.എസ്.കെ. ബെന്‍ ഡാര്‍വിന്‍, പാറശാല പഞ്ചായത്ത് പ്രസിഡന്‍റ് എല്‍. മഞ്ജുസ്മിത, മൃഗസംരക്ഷണ വകുപ്പ് ഡയറക്ടര്‍ എം.സി. റെജില്‍ തുടങ്ങിയവര്‍ പങ്കെടുത്തു.

നെയ്യാറ്റിന്‍കര ശാസ്ത്രമേള സമാപിച്ചു : നെയ്യാറ്റിന്‍കര ഗവ. ഗേള്‍സ് എച്ച്എസ്എസ് ജേതാക്കള്‍

നെയ്യാറ്റിൻകര : നെയ്യാറ്റിന്‍കര വിദ്യാഭ്യാസ ഉപജില്ലാ ശാസ്ത്ര, ഗണിത, സാമൂഹ്യ ശാസ്ത്ര, ഐടി, പ്രവൃത്തി പരിചയമേളയ്ക്ക് പരിസമാപ്തിയായി. 676 പോയിന്‍റോടെ നെയ്യാറ്റിന്‍കര ഗവ. ഗേള്‍സ് എച്ച്എസ് എസ് മേളയില്‍ ജേതാക്കളായി. മാരായമുട്ടം ഗവ. ഹയര്‍സെക്കന്‍ഡറി സ്കൂള്‍ 594 പോയിന്‍റോടെ രണ്ടാം സ്ഥാനവും ആതിഥേയ വിദ്യാലയമായ അരുമാനൂര്‍ എംവി ഹയര്‍സെക്കന്‍ഡറി സ് കൂള്‍ 531 പോയിന്‍റോടെ മൂന്നാം സ്ഥാനവും കരസ്ഥമാക്കി. അരുമാനൂര്‍ എംവി ഹയര്‍സെക്കന്‍ഡറി സ്കൂളില്‍ നടന്ന സമാപന സമ്മേളനം കെ. ആന്‍സലന്‍ എംഎല്‍എ ഉദ്ഘാടനം ചെയ്തു. വാർഡ് മെമ്പർ വി.എസ്. ഷിനുവിന്‍റെ അധ്യക്ഷതയിൽ ചേർന്ന യോഗത്തില്‍ പൂവാർ സിഐ സി.എസ്. സുജിത് മുഖ്യാതിഥിയായി. ബിപിസി ആര്‍.എസ് ബൈജു കുമാര്‍, ഉപജില്ലാ വിദ്യാഭ്യാസ ഓഫീസര്‍ എ. സുന്ദർദാസ്, പ്രിന്‍സിപ്പല്‍ എന്‍.വി. സുരേഷ്, ആതിഥേയ വിദ്യാലയങ്ങളിലെ പ്രഥമാധ്യാപകരായ ജീജ ജി റോസ്, കെ.എസ്. ശ്രീലത, എസ്. ബീന, പിടിഎ പ്രസിഡന്‍റ് വി. സുരേഷ് കുമാർ, വൈസ് പ്രസിഡന്‍റ് സി.എസ്. സുനിൽ, എസ്. ഷിബു, എസ്.പി. അനുപമ, സ് കൂള്‍ ലീഡര്‍ ആൻ മരിയ ബി തദേവൂസ് എന്നിവർ പങ്കെടുത്തു.

തമിഴ്നാട്ടിൽനിന്നു ഓട്ടം വിളിച്ചു വാഹനം തട്ടിയെടുത്ത രണ്ടംഗ സംഘം പിടിയിൽ

വാഹനം തട്ടിയെടുത്തത് കടം തീർക്കാൻ വിഴിഞ്ഞം : തമിഴ്നാട്ടിൽ നിന്ന് ഓട്ടം വിളിച്ചു വന്ന വാഹനത്തെ വിഴിഞ്ഞത്തുനിന്നു കടത്തിക്കൊണ്ടുപോയ രണ്ടംഗ സംഘത്തെ പോലീസ് പിടികൂടി. മോഷ്ടിക്കുന്ന വാഹനങ്ങൾ പൊളിച്ച് കടത്തുന്ന വർക്ക്ഷോപ്പിൽനിന്നു പകുതി പൊളിച്ചനിലയിൽ വാഹനവും കണ്ടെടുത്തു. പരാതി ലഭിച്ചു മൂന്നു ദിവസത്തിനുള്ളിൽ കേരളത്തിലെയും തമിഴ്നാട്ടിലെയും സിസിടിവികൾ പരിശോധിച്ച സിറ്റി ഡാൻസാഫ് സംഘവും വിഴിഞ്ഞം പോലീസും നടത്തിയ അന്വേഷണത്തിലാണു പ്രതികൾ പിടിയിലായത്. അഞ്ചുലക്ഷം രൂപയുടെ കടബാധ്യത തീർക്കുന്നതിനായി ആറരലക്ഷം രൂപ വിലയുള്ള പിക്കപ്പ് വാൻ മോഷ്ടിച്ച് വാഹന ങ്ങൾ പൊളിച്ച് ആക്രിയാക്കുന്ന കടയിലെത്തിച്ചു പണം വാങ്ങിയ പ്രതിയായ തമിഴ്‌നാട് മാർത്താണ്ഡം ഉന്നംകണ്ട കൊല്ലം വിളയിൽ രാജേഷ് (38), കൂട്ടാളി തമിഴ്‌നാട് കാഞ്ഞിരംകോട് ശിരയൻകുഴി കല്ലുവെട്ടാൻകുഴി വിളയിൽ എഡ്വിൻ എന്നിവരെയാണ് വിഴി ഞ്ഞം പോലീസും സിറ്റി ഡാൻസാഫ് സംഘവും ചേർന്നു പിടികൂടിയത്. തൂത്തുക്കുടി സ്വദേശി പുതുപെരുമാളിന്‍റെ ഉടമസ്ഥതയിലുള്ള പിക്കപ്പ് ലോറിയാണ് സംഘം തന്ത്രപൂർവം കടത്തിയത്. സിറ്റി പോലീസ് കമ്മീഷണറുടെ നിയന്ത്രണത്തിലുള്ള ഡാൻസാഫിലെ ടീമും വിഴിഞ്ഞം പോലീസും സംയുക്തമായി നടത്തിയ അന്വേഷണത്തിലായിരുന്നു തമിഴ്‌നാട്ടിൽനിന്നു പ്രതികളെ അറസ്റ്റു ചെയ്തത്. വിഴിഞ്ഞം മുതൽ തമിഴ്‌നാട് വരെയുള്ള 75ലധികം സിസിടിവി കാമറകളിൽനിന്നു ലഭിച്ച ദൃശ്യങ്ങളുടെ അടിസ്ഥാനത്തിലാ ണു പ്രതികളെ കണ്ടെത്താനായത്. ഒന്നാം പ്രതി രാജേഷ് അടൂർ, കായംകുളം എന്നിവിടങ്ങളിൽ സിസിടിവി കാമറകൾ മോ ഷ്ടിച്ച കേസുകളിലും പ്രതിയാണെന്നും പോലീസ് പറയുന്നു. പ്രതികളെ കോടതിയിൽ ഹാജരാക്കി റിമാൻഡു ചെയ്തു.

യൂത്ത് കോൺഗ്രസ്‌ പ്രതിഷേധ മാർച്ച്‌ സംഘടിപ്പിച്ചു

വെമ്പായം: ദഫ് കലാകാരന്മാരായ യൂത്ത് കോൺഗ്രസ്‌ പ്രവർത്തകരെ ആക്രമിച്ച എസ്ഡിപിഐ പ്രവർത്തകരെ അറസ്റ്റ് ചെയ്യാൻ ആവശ്യപ്പെട്ടുകൊണ്ട് യൂത്ത് കോൺഗ്രസ്‌ വെമ്പായം മണ്ഡലം കമ്മിറ്റി മുക്കോലക്കൽ മുതൽ വലിയവിള വരെ പ്രതിഷേധ മാർച്ച്‌ നടത്തി. യൂത്ത് കോൺഗ്രസ്‌ മണ്ഡലം കമ്മിറ്റി പ്രസിഡന്‍റ് മുഹമ്മദ്‌ റിഫായി നേതൃത്വം നൽകിയ മാർച്ച് സംസ്ഥാന സെക്രട്ടറി അഡ്വ. എസ്.കെ. അഭിജിത് ഉദ്ഘാടനം ചെയ്തു. ആഷിക് കന്യാകുളങ്ങര, ഫൈസൽ നന്നാട്ടുകാവ്, ബീന അജിത്, കണക്കോട് ഭൂവനേന്ദ്രൻ, എം. സജീർ, എ.എസ്. ഹാഷിം, എസ്. ഷിനു, അനന്തു കൃഷ്ണ തുടങ്ങിയവർ പങ്കെടുത്തു പങ്കെടുത്തു.

ഭരണപക്ഷ സംഘടനകള്‍ രാജസദസിലെ വിദൂഷകരെ പോലെ: പ്രതിപക്ഷനേതാവ്

തിരുവനന്തപുരം: ഒരുകാലത്തുമില്ലാത്ത രീതിയില്‍ ആനുകൂല്യനിഷേധം നടത്തുന്ന സര്‍ക്കാര്‍ നടപടിക്കെതിരെ ഒരക്ഷരം ഉരിയാടാതെ ഭരണപക്ഷ സര്‍വീസംഘടനകള്‍ നടത്തുന്ന വാഴ്ത്ത്പ്പാട്ട് രാജസദസിലെ വിദൂഷകരെയാണ് ഓര്‍മിപ്പിക്കുന്നതെന്നു പ്രതിപക്ഷ നേതാവ് വി.ഡി. സതീശന്‍. കേരള എന്‍ജിഒ അസോസിയേഷന്‍ സംസ്ഥാന കമ്മിറ്റിയുടെ നേതൃത്വത്തില്‍ സെക്രട്ടേറി യറ്റ് നടയില്‍ ആരംഭിച്ച രാപകല്‍ സമരത്തിന്‍റെ ഉദ്ഘാടനം നിര്‍വഹിക്കുകയായിരുന്നു അദ്ദേഹം. ജീവനക്കാര്‍ക്കും പെന്‍ഷന്‍കാര്‍ക്കുമായി ഒരുലക്ഷം കോടി രൂപയുടെ ആനുകൂല്യമാണ് സര്‍ക്കാര്‍ തടഞ്ഞുവച്ചിരിക്കുന്നത്. അതു നല്‍കാന്‍ സര്‍ക്കാര്‍ തയാറാകുന്നില്ലെന്നും അതിനു യുഡിഎഫ് സര്‍ക്കാര്‍ അധികാരത്തില്‍ വരേണ്ടിയിരിക്കുന്നു എന്നും പ്രതിപക്ഷ നേതാവ് പറഞ്ഞു. അസോസിയേഷന്‍ സംസ്ഥാന പ്രസിഡന്‍റ് എ.എം ജാഫര്‍ഖാന്‍ അധ്യക്ഷത വഹിച്ചു. സമ്മേളനത്തില്‍ മുന്‍ മന്ത്രി അഡ്വ. വി.എസ് ശിവകുമാര്‍, കെപിസിസി ജനറല്‍ സെക്രട്ടറിമാരായ മര്യായപുരം ശ്രീകുമാര്‍, അഡ്വ. ജി. സുബോധന്‍ തുടങ്ങിയവര്‍ പ്രസംഗിച്ചു.

സുരക്ഷാ ജീവനക്കാരന്‍ കുഴഞ്ഞുവീണ് മരിച്ചു

മെഡിക്കല്‍കോളജ്: തിരുവനന്തപുരം മെഡിക്കല്‍കോളജ് ആശുപത്രിയിലെ സുരക്ഷാ ജീവനക്കാരന്‍ കുഴഞ്ഞുവീണ് മരിച്ചു. കൊല്ലം പുനലൂര്‍ ചെമ്മന്തൂര്‍ രാജി ഭവനില്‍ കൊച്ചുകൃഷ്ണന്‍റെ മകന്‍ ജയാനന്ദന്‍ (52) ആണ് മരിച്ചത്. കഴിഞ്ഞദിവസം രാത്രിയാണ് സംഭവം. കമ്മ്യൂണിറ്റി ഫാര്‍മസിക്കു മുന്നില്‍ ഡ്യൂട്ടി നോക്കുകയായിരുന്ന ഇദ്ദേഹം കസേരയില്‍ അബോധാവസ്ഥയില്‍ ഇരിക്കുന്നതു കണ്ടെത്തിയവരാണ് വിവരം മെഡിക്കല്‍കോളജ് പോലീസിലും ആശുപത്രിയിലും അറിയിച്ചത്. ഉടന്‍തന്നെ വിദഗ്ധ ചികിത്സയ്ക്കായി പ്രവേശിപ്പിച്ചുവെങ്കിലും രക്ഷിക്കാനായില്ല. മൃതദേഹം ആശുപത്രി മോര്‍ച്ചറിയില്‍.

ഗുഡ്‌സ് ഓട്ടോ ഡ്രൈവർ വീട്ടിനുള്ളിൽ മരിച്ച നിലയിൽ

നെടുമങ്ങാട്: ഗുഡ്‌സ് ഓട്ടോ ഡ്രൈവറെ വീട്ടിനുള്ളിൽ മരിച്ച നിലയിൽ കണ്ടെത്തി. കുതിരകളം കണ്ണാത്തുകോണം ആതിര ഭവനിൽ അജിത്ത് കുമാറാണ് (52) മരിച്ചത്. ഇന്നലെ വൈകുന്നേരം നാലോടെയായിരുന്നു സംഭവം. രണ്ടു ദിവസമായി ഫോൺ ചെയ്തിട്ടും മറുപടിയില്ലാത്തതിനെ തുടർന്ന് കൂട്ടുകാർ വീട്ടിലെത്തി കതകുതുറന്ന് നോക്കിയപ്പോൾ അജിത്ത് കുമാർ തറയിൽ മരിച്ചു കിടക്കുന്നതായാണ് കണ്ടത്. നാട്ടുകാർ വിവരം അറിയിച്ചതിനെ തുടർന്ന് അരുവിക്കര പോലീസെത്തി ഇൻക്വസ്റ്റ് നടത്തി മൃതദേഹം മെഡിക്കൽ കോളേജ് ആശുപത്രിയിലേക്ക് മാറ്റി. ഭാര്യയുമായി പിണങ്ങി രണ്ടു വർഷമായി ഒറ്റയ്ക്കു താമസിച്ചു വരികയായിരിന്നു.

അധികാരം ഉള്ളിടത്ത് അഴിമതി തളച്ച് വളരുന്നു: വി.എം. സുധീരൻ

തിരുവനന്തപുരം: ആഗ്രഹങ്ങൾ മാത്രം ലക്ഷ്യവച്ച് രാഷ്ട്രീയ പാർട്ടികളിലേക്ക് കടന്നുവരുന്ന പുതുതലമുറക്ക് എസ്. വരദരാജൻ നായരുടെ ജീവചരിത്രം പാഠ്യവിഷയമാക്കാവുന്നതാണെന്നു മുൻ സ്പീക്കർ വി.എം. സുധീരൻ അഭിപ്രായപ്പെട്ടു. മുൻ മന്ത്രിയും കെപിസിസി പ്രസിഡന്‍റും പ്രമുഖ തൊഴിലാളി നേതാവുമായിരുന്ന എസ്. വരദരാജൻ നായരുടെ 36-ാമത് ചരമ വാർഷിക അനുസ്മരണ സമ്മേളനം കേസരി ഹാളിൽ ഉദ്ഘാടനം ചെയ്യുകയായിരുന്നു അദ്ദേഹം. ട്രസ്റ്റ്‌ ചെയർമാനും കെപിസിസി ജനറൽ സെക്രട്ടറിയുമായ അഡ്വ. ജി. സുബോധൻ അധ്യക്ഷനായിരുന്നു. മുൻ സ്പീക്കർമാരായ എം. വിജയകുമാർ, എൻ. ശക്തൻ, മുൻ മന്ത്രിമാരായ സി. ദിവാകരൻ, എ. നീലലോഹിത ദാസൻ നാടാർ, നേതാക്കളായ വഞ്ചിയൂർ രാധാകൃഷ്ണൻ, എ.കെ. നിസാർ, കെ. ഗോപാലകൃഷ്ണൻ നായർ, എം. സഞ്ജീവ് എന്നിവർ പ്രസംഗിച്ചു.

ഐഎൻടിയുസി കൂട്ടസത്യഗ്രഹം

നേമം: വർധിപ്പിച്ച രജിസ്ട്രേഷൻ തുക പിൻവലിപ്പിക്കണമെന്നാവശ്യപ്പെട്ട് ഐഎൻടിയുസി തിരുവനന്തപുരം ജില്ലാ കമ്മിറ്റിയുടെ നേതൃത്വത്തിൽ ലേബർ കമ്മീഷണർ ഓഫീസിനു മുന്നിൽ നടത്തിയ വിവിധ തൊഴിലാളി യൂണിയൻ പ്രതിനിധികളുടെ കൂട്ടസത്യഗ്രഹം സംസ്ഥാന പ്രസിഡന്‍റ് ആർ. ചന്ദ്രശേഖരൻ ഉദ്ഘാടനം ചെയ്തു. ജില്ലാ പ്രസിഡന്‍റ് വി. ആർ. പ്രതാപൻ അധ്യക്ഷത വഹിച്ചു. നേതാക്കന്മാരായ വി.ജെ ജോസഫ്, കെ. എം. അബ്ദുൽ സലാം, പ്രദീപ് നെയ്യാറ്റിൻകര, ആന്‍റണി ആൽബർട്ട്, പി. ബിജു, മലയം ശ്രീകണ്ഠൻ നായർ, കാർത്തിക് ശശി, ജെ. സതികുമാരി, പുത്തൻപള്ളി നിസ്സാർ, ഡി. ഷുബില, എം.എസ്. താജുദ്ദീൻ, ദിലീപ് രാജകുമാരൻ, ടി. അനിൽ കുമാർ, എ.കെ. സനിൽ, അഡ്വ. ജലിൻ ജയരാജ്, എ. യൂസഫ്, സി. ശ്രീലത, വഴിമുക്ക് സെയ്യദലി, ഷെമി മൂഴി തുടങ്ങിയവർ പ്രസംഗിച്ചു.

ബാറ്ററി മോഷ്ടാവ് തൊണ്ടിമുതല്‍ സഹിതം പിടിയിൽ

പേരൂര്‍ക്കട: ഹെവി വാഹനങ്ങളുടെ ബാറ്ററി മോഷ്ടിച്ചയാളെ തൊണ്ടിമുതല്‍ സഹിതം വീട്ടില്‍നിന്നു പോലീസ് പിടികൂടി. കുഞ്ചാലുമ്മൂട് സ്വദേശി നവാസ് (58) ആണ് പിടിയിലായത്. ഒക്ടോബര്‍ എട്ടിന് പുലര്‍ച്ചെ 2.30ന് കുഞ്ചാലുമ്മൂട് സ്റ്റാര്‍ ഓഡിറ്റോറിയത്തിലെത്തിയ പ്രതി ഇവിടെ സൂക്ഷിച്ചിരുന്ന ബാറ്ററികളിലൊന്ന് മോഷ്ടിക്കുകയായിരുന്നു. കുഞ്ചാലുമ്മൂട് സ്വദേശി ദിലീപിന്‍റെ ഉടമസ്ഥതയിലുള്ളതാണ് സ്റ്റാര്‍ ഓഡിറ്റോറിയം. സിസിടിവി കാമറയില്‍ പ്രതിയുടെ ദൃശ്യങ്ങള്‍ ലഭിച്ചതില്‍ നിന്നാണ് ഇയാളെ തിരിച്ചറിഞ്ഞത്. കരമന സ്റ്റേഷനില്‍ നിരവധി ക്രിമിനല്‍ക്കേസുകളില്‍ ഏര്‍പ്പെട്ടിട്ടുള്ളയാളാണ് പ്രതിയെന്നു തിരിച്ചറിഞ്ഞ പോലീസ് ഇയാളെ ബാറ്ററി ഉള്‍പ്പെടെ വീട്ടില്‍നിന്നു പിടികൂടുകയായിരുന്നു. സിഐ അനൂപ്, എസ് ഐ അജിത്ത്, എസ്‌സിപിഒ കൃഷ്ണകുമാര്‍, സിപിഒമാരായ ഹിരണ്‍, അനില്‍കുമാര്‍, ശരത്ചന്ദ്രന്‍ എന്നിവരാണ് അന്വേഷണ സംഘത്തില്‍ ഉണ്ടായിരുന്നത്. പ്രതിയെ റിമാന്‍ഡ് ചെയ്തു.

പെയ്തിറങ്ങിയത് പെരുമഴ: മത്സരങ്ങള്‍ ഇടയ്ക്ക് നിര്‍ത്തിവെച്ചു

ആറ്റിങ്ങല്‍: ശ്രീപാദം സ്റ്റേഡിയത്തില്‍ നടക്കുന്ന റവന്യു ജില്ലാ അത്‌ലറ്റിക് മീറ്റിനിടെ പെയ്തിറങ്ങിയ പെരുമഴ കായികാതരങ്ങളേയും സംഘാടകരേയും ഒരേപോലെ ദുരിതത്തിലാക്കി. ഇന്നലെ ഉച്ചകഴിഞ്ഞ്‌ത്തെ മത്സരങ്ങള്‍ ആരംഭിച്ചപ്പോഴാണ് 'തുളളിക്കൊരുകുടം' എന്ന ചൊല്ലിനു സമാനമായ മഴ പെയ്തത്. മഴ ആരംഭിച്ച സമയത്ത് പെണ്‍കുട്ടികളുടെ ഷോട്ട്്പുട്ട് മത്സരങ്ങള്‍ ഫീല്‍ഡില്‍ നടക്കുകയായിരുന്നു. പെരുമഴ നനഞ്ഞാണ് കുറച്ചു സമയം മത്സരം തുടര്‍ന്നത്. ഇതേ സമയത്തു തന്നെ ആയിരുന്നു മീറ്റിലെ വേഗമേറിയ താരങ്ങളെ നിശ്ചയിക്കുന്ന 100 മീറ്റര്‍ ഓട്ടമത്സരങ്ങളും നടത്തേണ്ടത്. എന്നാല്‍ അതിശക്തമായി മഴ പെയ്തതിനെ തുടര്‍ന്ന് ഈ മത്സരം മഴയ്ക്ക് ശേഷം ആരംഭിക്കാമെന്ന തീരുമാനത്തില്‍ സംഘാടകരെത്തി. തുടര്‍ന്ന് ഒരുമണിക്കൂറോളം കഴിഞ്ഞാണ് നൂറു മീറ്റര്‍ മത്സരങ്ങള്‍ ആരംഭിച്ചത്. ഇതിനിടെയും ചാറ്റമഴ പെയ്യുന്നുണ്ടായിരുന്നു. ഇടയ്ക്ക് ശമിച്ച മഴ ജാവലിന്‍ ത്രോ മത്സരങ്ങള്‍ നടക്കുമ്പോള്‍ വീണ്ടും ശക്തിയായി. എന്നാല്‍ മത്സരം ആരംഭിച്ചതിനാല്‍ മഴ നനഞ്ഞും ഒഫീഷ്യല്‍സ് മത്സരം പൂര്‍ത്തിയാക്കി.

ഡെല്‍നയ്ക്ക് "കായികം' വെറുമൊരു വീട്ടുകാര്യം

ആറ്റിങ്ങല്‍ : സബ് ജൂണിയര്‍ പെണ്‍കുട്ടികളുടെ ഷോട്ട് പുട്ടില്‍ സുവര്‍ണനേട്ടത്തിന് ഉടമയായ ഡെല്‍ഡനയ്ക്ക് "കായികം' വീട്ടുകാര്യമാണ്. മാതാപിതാക്കള്‍ കായികതാരങ്ങള്‍. ആ കായികതാരങ്ങളുടെ മകള്‍ ഇന്നലെ 7.45 മീറ്റര്‍ ദൂരം ഷോട്ട് പായിച്ച് സ്വര്‍ണം എറിഞ്ഞിട്ടു. റെസലിംഗ് ചാമ്പ്യനായിരുന്ന ഡേവിഡിന്‍റെയും ഷോട്ട് പുട്ടില്‍ കേരളാ യൂണിവേഴ്‌സിറ്റി താരമായിരുന്ന എസ്.പി.അജിലയുടെയും മകളാണ് ഡെല്‍ന. പിതാവ് ഡേവിഡാണ് പരിശീലനം നല്കുന്നത്. കാട്ടാക്കട വാഴിച്ചല്‍ ഓക്‌സിലിയം എച്ച്എസിലെ ആറാം ക്ലാസ് വിദ്യാര്‍ഥിനിയായ ഡെല്‍ന റെസ്ലിംഗില്‍ അണ്ടര്‍ 14 വിഭാഗത്തില്‍ മത്സരിക്കുന്നുണ്ട്.

വേഗതാരങ്ങളായി വിനായകും അനന്യയും

ആറ്റിങ്ങല്‍: റവന്യു ജില്ലാ സ്‌കൂള്‍ അത്‌ലറ്റിക് മീറ്റില്‍ വേഗതാരങ്ങളായി കെ.പി വിനായകും അനന്യ സുരേഷും. സീനിയര്‍ ആണ്‍കുട്ടികളുടെ 100 മീറ്ററില്‍ 11.2 സെക്കന്‍ഡില്‍ ഓടിയെത്തിയാണ് തിരുവനന്തപുരം നോര്‍ത്തിനു വേണ്ടി പോരാട്ടത്തിനിറങ്ങിയ ജി.വി രാജാ സ്‌പോര്‍ട്‌സ് സ്‌കൂളിലെ കെ.പി വിനായക് സ്വര്‍ണത്തില്‍ മുത്തമിട്ട് മീറ്റിലെ വേഗതാരമായി തെരഞ്ഞെടുക്കപ്പട്ടത്. സീനിയര്‍ പെണ്‍കുട്ടികളില്‍ കണിയാപുരം സബ് ജില്ലയ് ക്കായി ട്രാക്കിലിറങ്ങിയ തിരുവനന്തപുരം സായിയിലെ അനന്യ സുരേഷ് 12.7 സെക്കന്‍ഡില്‍ ഫൈനല്‍ ലൈന്‍ മറികടന്ന് പെണ്‍കുട്ടികളിലെ വേഗതാരമായി മാറി. ഇരുവരും സംസ്ഥാസ് സ്‌കൂള്‍ മീറ്റില്‍ തലസ്ഥാന ജില്ലയ്ക്ക് വേണ്ടി പോരാട്ടത്തിനിറങ്ങാനുള്ള അര്‍ഹതയും നേടി. സീനിയര്‍ ആണ്‍കുട്ടികളില്‍ തിരുവനന്തപുരം സെന്റ് ജോസഫ് എച്ച്എസ്എസിലെ ജോയല്‍ സജി 11.5 സെക്കന്‍ഡില്‍ ഫിന്ഷ് ചെയ്ത് വെള്ളിനേട്ടത്തിന് അര്‍ഹനായപ്പോള്‍ ജി.വി രാജാ സ്‌പോര്‍ട്‌സ് സ്‌കൂളിലെ ഏബല്‍ തദേവൂസ് 11.6 സെക്കന്‍ഡില്‍ ഫൈനല്‍ ലൈന്‍ ടച്ച് ചെയ്ത് വെങ്കലത്തിന് ഉടമയായി. ജിവി രാജാ സ്‌പോര്‍ട്‌സ് സ്‌കൂളിലെ ബി. അനശ്വര(13.2 സെക്കന്‍ഡ്) ആണ് സീനിയര്‍ പെണ്‍കുട്ടികളില്‍ വെള്ളിനേട്ടത്തിന് ഉടമ. വിതുര വൊക്കേഷണല്‍ ഹയര്‍സെക്കന്‍ഡറി സ്‌കൂളിലെ എം. അജ്മിയ റഹീം (14.8) വെങ്കലം സ്വന്തമാക്കി. ജൂണിയര്‍ ആണ്‍കുട്ടികളുടെ 100 മീറ്ററില്‍ ഒന്നാം സ്ഥാനം അയ്യങ്കാളി സ്‌പോര്‍ട്‌സ് സ്‌കൂളി ആര്‍.എസ് രോഹിത് രാജ് (11.5 സെക്കന്‍ഡ്) സ്വന്തമാക്കിയപ്പോള്‍ ജി.വി രാജാ സ്‌പോര്‍ട്‌സ് സ്‌കൂളിലെ താരങ്ങളായ വി. ഹാഷിം റെയ്ഹാന്‍ (11.8 സെക്കന്‍ഡ്) വെള്ളിയും ഗൗരേഷ് ബിനോയ് (12.1 സെക്കന്‍ഡ്) വെങ്കലവും നേടി. ഈ വിഭാഗം പെണ്‍കുട്ടികളില്‍ ഒന്നും രണ്ടും സ്ഥാനങ്ങള്‍ ജി.വി രാജായ്ക്കാണ്. 12. 8 സെക്കന്‍ഡില്‍ ഫിന്ഷ് ചെയ്ത് എ.നന്ദന സ്വര്‍ണത്തിന് അവകാശിയായപ്പോള്‍ 13.2 സെക്കന്‍ഡില്‍ ഓടിയെത്തിയ ജില്‍ഷാ ജിനിലിനാണ് വെള്ളി. തിരുവനന്തപുരം സായിയുടെ എസ്. പാര്‍വതി 13.7 സെക്കന്‍ഡില്‍ ഫിനിഷ് ചെയ്ത് വെങ്കലനേട്ടത്തിന് അര്‍ഹയായി. സബ്ജൂണിയര്‍ ആണ്‍കുട്ടികളില്‍ ജി.വിരാജ താരങ്ങളായ എസ്. ആകാഷ്(12.6 സെക്കന്‍ഡ്), സി.യദുരാജ്(12.9 സെക്കന്‍ഡ് ) എന്നിവര്‍ ഒന്നും രണ്ടും സ്ഥാനങ്ങള്‍ നേടിയപ്പോള്‍ തിരുവനന്തപുരം സെന്റ് ജോസഫ്‌സ് ഹയര്‍സെക്കന്‍ഡറി സ്‌കൂളിലെ റയാന്‍ ലോപ്പസ് (13.2 സെക്കന്‍ഡ്) വെങ്കലത്തിന് ഉടമയായി.പെണ്‍കുട്ടികളിലും ഒന്നും രണ്ടും സ്ഥാനം ജിവി രാജയ്ക്കാണ്. ജൂലിയറ്റ് ഷാബിന്‍ (13.7 സെക്കന്‍ഡ്) ഒന്നാമതെത്തിയപ്പോള്‍ വി.വി തീര്‍ഥപ്രകാശ് (14.0 സെക്കന്‍ഡ്) വെള്ളിയും അയ്യങ്കാളി സ്‌പോര്‍ട്‌സ് സ്‌കൂളിലെ ദിയ രതീഷ് (14.2സെക്കന്‍ഡ് വെങ്കലവും നേടി.

ആദ്യദിനം സ്‌കൂളുകളില്‍ കാഞ്ഞിരംകുളം പികെഎസ്എച്ച്എസ്എസ് : തിരുവനന്തപുരം നോര്‍ത്തിന്‍റെ മുന്നേറ്റം

ആറ്റിങ്ങല്‍: കോരിച്ചൊരിയുന്ന മഴയിലും കൗമാര താരങ്ങളുടെ പോരാട്ടവീര്യത്തെ തടുക്കാനായില്ല. ശ്രീപാദം സ്റ്റേഡിയത്തില്‍ അവര്‍ ആവേശത്തോടെ ഓടിയും ചാടിയും എറിഞ്ഞും മെഡലുകള്‍ വാരിക്കൂട്ടി. റവന്യു ജില്ലാ സ്‌കൂള്‍ അത്‌ലറ്റിക് മീറ്റിന്‍റെ ആദ്യ ദിനത്തെ മത്സരങ്ങള്‍ പൂര്‍ത്തിയായപ്പോള്‍ മെഡല്‍ കൊയ്ത്തില്‍ തിരുവനന്തപുരം നോര്‍ത്തിന്‍റെ കുതിപ്പ്. ആറു സ്വര്‍ണവും നാലു വെള്ളിയും അഞ്ചു വെങ്കലവും ഉള്‍പ്പെടെ 62 പോയിന്‍റുമായാണ് നോര്‍ത്ത് ഉപജില്ല ഒന്നാം സ്ഥാനത്തെത്തിയത്. അഞ്ചു സ്വര്‍ണവും രണ്ടു വെള്ളിയും അഞ്ചു വെങ്കലവുമായി 46 പോയിന്‍റു നേടിയ നെയ്യാറ്റിന്‍കരയാണ് രണ്ടാം സ്ഥാനത്തുള്ളത്. കിളിമാനൂര്‍ വിദ്യാഭ്യാസ ഉപജില്ല രണ്ടു വീതം സ്വര്‍ണം, വെള്ളി,വെങ്കലം എന്നിവയുടെ പിന്‍ബലത്തില്‍ 29 പോയിന്റുമായി പട്ടികയില്‍ മൂന്നാം സ്ഥാനത്തുണ്ട്. സീനിയര്‍ ആണ്‍കുട്ടികളുടെ 3000 മീറ്റര്‍ ഓട്ട മത്സരത്തോടെയാണ് ട്രാക്ക് ഉണര്‍ന്നത്. ഈ ഇനത്തില്‍ കാഞ്ഞിരംകുളം പികെഎസ്എച്ച്എസ്എസിലെ മെരോമല്‍ ഷാജി 10 മിനിറ്റ് 19.7 സെക്കന്‍ഡില്‍ ഫിനിഷ് ചെയ്ത് മീറ്റിലെ ആദ്യ സ്വര്‍ണത്തിന് അവകാശിയായി. വെമ്പായം നെടുവേലികൊഞ്ചിറ ഗവണ്‍മെന്‍റ് എച്ച്എസ്എസിലെ എസ്.എസ് അഭിനവ് കൃഷ്ണ(10 മിനിറ്റ് 33.1 സെക്കന്‍ഡ്) വെള്ളിയും പാറശാല ഗവണ്‍മെന്‍റ് വിഎച്ച്എസ്എസിലെ എസ്.അഭിജിത്ത് (10 മിനിറ്റ് 35.2 സെക്കന്‍ഡ്) വെങ്കലവും നേടി. വ്യക്തിഗത സ്‌കൂള്‍ വിഭാഗത്തില്‍ നെയ്യാറ്റിന്‍കര ഉപജില്ലയിലെ കാഞ്ഞിരംകുളം പികെഎസ്എച്ച്എസ്എസ് ആണ് ആദ്യ ദിനം ഒന്നാമതുള്ളത്. രണ്ടു സ്വര്‍ണവും ഒരു വെള്ളിയുമുള്‍പ്പെടെ 13 പോയിന്റുമായാണ് കാഞ്ഞിരംകുളം സ്‌കൂള്‍ ഒന്നാം സ്ഥാനത്ത് നില്ക്കുന്നത്. എംവിഎച്ച്എസ്എസ് അരുമാനൂര്‍ രണ്ടു സ്വര്‍ണവും ഒരു വെങ്കലവുമുള്‍പ്പെടെ 11 പോയിന്‍റോ ടെ രണ്ടാം സ്ഥാനത്തും ഒരു സ്വര്‍ണം ഒരു വെള്ളി ഒരു വെങ്കലം എന്നിവയുമായി ഒന്‍പതു പോയിന്‍റുമായി തിരുവനന്തപുരം സെന്‍റ് ജോസഫ്‌സ് സ്‌കൂള്‍ മൂന്നാം സ്ഥാനത്തുമുണ്ട്. സബ് ജൂണിയര്‍ ,ജൂണിയര്‍, സീനിയര്‍ വിഭാഗങ്ങളിലായി മൂന്ന ദിവസങ്ങളിലായി 96 ഇനങ്ങളിലാണ് മത്സരങ്ങള്‍ നടക്കുന്നത്. റവന്യൂ ജില്ലയിലെ 12 ഉപപജില്ലകളില്‍ നിന്നായി 2000 ത്തോളം കായികതാരങ്ങളാണ് പോരാട്ടത്തിന് ഇറങ്ങുന്നത്. സായ് തിരുവനന്തപുരം, ജി.വി. രാജാ സ്‌കൂള്‍, അയ്യങ്കാളി സ്‌പോട്‌സ് സ്‌കൂള്‍ എന്നിവിടങ്ങളിലെ താരങ്ങളാണ് മെഡല്‍സകൊയ്ത്തില്‍ മുന്നിലുള്ളത്.

നെയ്യാറ്റിന്‍കര ശാസ്ത്രമേളയ്ക്ക് ഇന്ന് സമാപനം : നെയ്യാറ്റിന്‍കര ഗവ. ഗേൾസ് എച്ച്എസ്എസ് മുന്നില്‍

നെയ്യാറ്റിൻകര: നെയ്യാറ്റിന്‍കര വിദ്യാഭ്യാസ ഉപജില്ലാ ശാസ് ത്ര, ഗണിത, സാമൂഹ്യ ശാസ് ത്ര, ഐ.ടി, പ്രവൃത്തി പരിചയമേള ഇന്ന് സമാപിക്കും. 568 പോയിന്‍റോടെ നെയ്യാറ്റിന്‍കര ഗവ. ഗേള്‍സ് ഹയർ സെക്കൻ ഡറി സ്കൂളാണു മുന്നില്‍. അരുമാനൂര്‍ എംവി ഹയര്‍സെക്കന്‍ഡറി സ്കൂള്‍, അരുമാനൂര്‍ ഗവ. എല്‍പി സ്കൂള്‍, അരുമാനൂര്‍തുറ ഗവ. ന്യൂ എല്‍പി സ്കൂള്‍ എന്നിവിടങ്ങളിലായി സംഘടിപ്പിച്ചിരിക്കുന്ന മേളയില്‍ ഇപ്രാവശ്യം മികച്ച പങ്കാളിത്തം പ്രകടമായി. എല്‍ പി മുതല്‍ എച്ച്എസ്എസ് വരെയുള്ള വിഭാഗങ്ങളിലായി നാലായിരത്തിലേറെ മത്സരാര്‍ഥികള്‍ വിവിധയിനങ്ങളില്‍ മാറ്റുരച്ചു. ആദ്യദിനത്തിലേ മുന്നേറ്റം തുടര്‍ന്ന നെയ്യാറ്റിന്‍കര ഗവ. ഗേള്‍സ് ഹയര്‍സെക്കന്‍ഡറി സ്കൂള്‍ ഇന്നലെയും ആധിപത്യം നിലനിര്‍ത്തി. മാരായമുട്ടം ഗവ. ഹയര്‍സെക്കന്‍ഡറി സ്കൂള്‍ 517 പോയിന്‍റോടെ രണ്ടാം സ്ഥാനത്തും ആതിഥേയ വിദ്യാലയമായ അരുമാനൂര്‍ എംവി ഹയര്‍സെക്കന്‍ഡറി സ്കൂള്‍ 468 പോയിന്‍റോടെ മൂന്നാം സ്ഥാനത്തുമാണുള്ളത്. സമാപന ദിവസമായ ഇന്നത്തെ ശാസ്ത്രമേളയുടെ ഫലം കൂടി അറിഞ്ഞാലേ ചാന്പ്യന്‍മാരെ പ്രഖ്യാപിക്കുകയുള്ളൂ. ഇന്നലെ നടന്ന ശാസ്ത്രനാടകത്തില്‍ നെയ്യാറ്റിന്‍കര സെന്‍റ് തെരേസാസ് കോണ്‍വന്‍റ് ജിഎച്ച്എസ്എസിലെ വൈഗയും സംഘവും ഒന്നാം സ്ഥാനവും അരുമാനൂര്‍ എംവി ഹയര്‍സെക്കന്‍ഡറി സ്കൂളിലെ അസ്ന എ. ഗ്ലാഡ് സ്റ്റണും സംഘവും രണ്ടാം സ്ഥാനവും കരസ്ഥമാക്കി. കഥയെഴുത്തുകാരി ആഷ്നിക കാര്‍മലിനും സഹപാഠി എസ്.എസ്. നിരഞ്ജനയ്ക്കും യുപി വിഭാഗം സാമൂഹ്യശാസ്ത്രം വര്‍ക്കിംഗ് മോഡലില്‍ രണ്ടാം സമ്മാനം ലഭിച്ചു. ലൂര്‍ദുപുരം സെന്‍റ് ഹെലന്‍സ് ഗേള്‍സ് എച്ച്എസി ലെ വിദ്യാര്‍ഥിനികളാണ് ഇരുവരും. ഈയിനത്തില്‍ ഒന്നാം സ്ഥാനം പുല്ലുവിള ലിയോ തേര്‍ട്ടീന്ത് ഹയര്‍സെക്കന്‍ഡറി സ്കൂളിലെ എ. ആന്‍ സയനയ്ക്കും ജെ.ജെ ജയ്ഷയ്ക്കുമാണ്. പൂവാര്‍ ഏയ്‍ഞ്ചല്‍ ഹൈസ്കൂളിലെ എസ്. ഫെറോണിനും റൂബിന്‍ ദാസ് ലോപ്പസിനുമാണ് മൂന്നാം സമ്മാനം. അരുമാനൂര്‍ എംവി ഹയര്‍സെക്കന്‍ഡറി സ്കൂളില്‍ ഇന്നു വൈകുന്നേരം മൂന്നിന് സമാപന സമ്മേളനം കെ. ആന്‍സലന്‍ എംഎല്‍എ ഉദ്ഘാടനം ചെയ്യും.

വിദ്യാർഥിയെ വീടുകയറി ആക്രമിച്ചു

പോത്തൻകോട്: ചെങ്കോട്ടുകോണത്ത് പ്ലസ്ടു വിദ്യാർഥികള്‍ സഹപാഠിയുടെ വീടുകയറി ആക്രമിച്ചു. തുണ്ടത്തില്‍ മാധവ വിലാസം സ്കൂളിലെ വിദ്യാർഥിയായ ശാസ്തവട്ടം സ്വദേശിയുടെ വീട്ടിനു നേരെയാണ് ഇന്നലെ രാത്രി ഒന്പതോടെ ആക്രമണമുണ്ടായത്. ബൈക്കിലെത്തിയ എട്ടംഗ സംഘമാണ് ആക്രമണം നടത്തിയത്. സംഘം വീട്ടില്‍ നിന്നും പിടിച്ചിറക്കി കൊണ്ടുവന്നു മർദ്ദിക്കുകയും ചെയ്തു. കുട്ടിയുടെ മുഖത്തും കൈക്കും പരിക്കേറ്റിട്ടുണ്ട്. സ്കൂളില്‍ കഴിഞ്ഞ ദിവസം കുട്ടികള്‍ ഏറ്റുമുട്ടിയിരുന്നു. ഇതിന്‍റെ പ്രതികാരമാണ് ആക്രമത്തിന് കാരണ മെന്നാണ് കരുതുന്നത്. വീട്ടിനകത്ത് അതിക്രമിച്ച്‌ കയറിയ സംഘം വീട്ടുകാരെ ഭീഷണിപ്പെടുത്തിയിരുന്നു. രണ്ടാഴ്ച മുൻപ് ഇതേ സ്കൂളിലെ കുട്ടികള്‍ ഒരാളെ കുത്തിയിരുന്നു.

മത്സ്യബന്ധന വള്ളങ്ങളിൽ ട്രാൻസ്പോണ്ടറുകൾ ഘടിപ്പിക്കും

വിഴിഞ്ഞം: ജില്ലയിലെ പരമ്പരാഗത മത്സ്യബന്ധന വള്ളങ്ങളിൽ ഉൾക്കടലിൽനിന്ന് കരയിൽ സന്ദേശമെത്തിക്കാൻ സഹായിക്കുന്ന സംവിധാനമായ ട്രാൻസ്പോണ്ടറുകൾ ഘടിപ്പിക്കുന്നു. ഇതിന്‍റെ ആദ്യ ഘട്ട പരീക്ഷണം നടന്നു. പരീക്ഷണാർഥം വിഴിഞ്ഞത്ത് നിന്നുള്ള പത്തു വള്ളങ്ങളിൽ ഘടിപ്പിച്ചതിനുപരി പൊഴിയൂർ മുതൽ ജില്ലയുടെ അതിർത്തിയായ പരവൂർ വരെയുള്ള മത്സ്യത്തൊഴിലാളികൾക്ക് വിതരണം ചെയ്യാനുള്ള 1500 എണ്ണം വിഴിഞ്ഞം ഫിഷറീസ് ഓഫീസിൽ എത്തിക്കഴിഞ്ഞു. ആഴക്കടലിൽ മീൻ പിടിക്കാൻ പേകുന്നമത്സ്യത്തൊഴിലാളികൾക്ക് ഇനി എത്ര ദൂരത്തായാലും കരയുമായി ബന്ധപ്പെടാനാകുമെന്നതാണ് ഇതിന്‍റെ മേന്മയായി അധികൃതർ പറയുന്നത്. എന്നാൽ ഒരു പ്രാവശ്യം ബാറ്റിറി ചാർജ് ചെയ്താൽ മൂന്നു മണിക്കൂർ മാത്രമേ ആയുസുള്ളൂവെന്നു തൊഴിലാളികൾ പറയുന്നു. ഒരു ദിവസവും അതിനപ്പുറംവരെ നീളുന്ന ആഴക്കടൽ മീൻ പിടിത്തക്കാർക്ക് ഇത് എത്ര കണ്ട് പ്രയോജനമുണ്ടെന്നു കണ്ടറിയണം. കടലിൽ അപകടത്തിൽപ്പെടുന്ന യാനത്തിന്‍റെ സ്ഥാനം കണ്ടെത്തി കരയിൽ വിവരം അറിയിക്കാനാവുന്ന ട്രാൻസ്പോണ്ടർ സംവിധാനം ആദ്യമായാണ് വിഴിഞ്ഞം തീരദേശത്ത് പരമ്പരാഗത വള്ളങ്ങളിൽ ഘടിപ്പിച്ചത്. വള്ളങ്ങൾക്ക് ഇവ പൂർണമായും സൗജന്യമാണെന്ന് അധികൃതർ പറയുന്നു. അക്ഷരാഭ്യാസം കുറവുള്ളവർ ക്കു പോലും മനസിലാകും വിധം ചിത്രങ്ങളുടെ സഹായത്തോടെയാണ് അപായ സൂചനകൾ രേഖപ്പെടുത്തിയിട്ടുള്ളത്. ആപൽഘട്ടങ്ങളിൽ അലാറം മുഴക്കാനുമാവും. ഉപയോഗിക്കുന്ന തിനുള്ള പരിശീലനം അസി. ഡയറക്ട‌ർ കാര്യാലയം, മത്സ്യഭവൻ, ലാൻഡിംഗ് സെന്‍റർ എന്നിവിടങ്ങളിലാരംഭിച്ചു. ഐഎസ്‌ആർഒ വികസിപ്പിച്ച ഉപകരണത്തിന്‍റെ പ്രവർത്തനം ഉപഗ്രഹം മുഖാന്തരമാണ്. ട്രാൻസ്പോണ്ടറുകൾ ചാർജ് ചെയ്തു ഉപയോഗിക്കാവുന്നതാണ്. വള്ളത്തിന്‍റെ മധ്യഭാഗത്തെ പലകയിൽ ഇതു ഘടിപ്പിക്കുന്നത്. വള്ളങ്ങൾക്ക് കളർകോഡ്, റജിസ്ട്രേഷൻ, ലൈ സൻസ് എന്നിവ നിർബന്ധമാണെന്നും ഫിഷറീസ് അധികൃതർ അറിയിച്ചു. ട്രാൻസ്പോണ്ടറുകൾക്കായുള്ള അപേക്ഷകൾ മത്സ്യഭവനുകൾ വഴി സ്വീകരിക്കും.

ബാലരാമപുരം- കളിയിക്കാവിള പാത : വികസന സ്തംഭനത്തിനെതിരേ നെയ്യാറ്റിന്‍കരയില്‍ ജനകീയ ഉപവാസം

നെയ്യാറ്റിൻകര: ബാലരാമപുരം -വഴിമുക്ക് പാത വികസനം ഉടന്‍ പൂര്‍ത്തിയാക്കണമെന്നും വഴിമുക്ക്- കളിയിക്കാവിള അലൈന്‍മെന്‍റ് അംഗീകരിച്ച് ഭൂമി ഏറ്റെടുക്കല്‍ അടിയന്തരമായി ആരംഭിക്കണമെന്നും ആവശ്യപ്പെട്ട് കരമന- കളിയിക്കാവിള പാതാ വികസന ആക്ഷൻ കൗൺസിലിന്‍റെ ആഭിമുഖ്യത്തില്‍ ഇന്നു നെയ്യാറ്റിന്‍കരയില്‍ ജനകീയ ഉപവാസം നടക്കും. കരമന- കളിയിക്കാവിള പാതയിൽ ബാലരാമപുരം മുതലുള്ള വികസന കാര്യത്തിൽ രണ്ടാം പിണറായി സർക്കാരിന്‍റെ നയം കടുത്ത വഞ്ചനയുടെതാണെന്ന് ആക്‌ഷൻ കൗൺസിൽ ജനറൽ സെക്രട്ടറി എസ്.കെ. ജയകുമാർ ആരോപിച്ചു. സർക്കാരിന്‍റെ അഞ്ച് വർഷത്തെ കാലാവധിക്കുള്ളിൽ ഒന്നര കിലോമീറ്റർ ദൂരം വികസിപ്പിക്കാൻ കഴിയാത്തത് ഏറെ ലജ്ജാകരമാണ്. 30.2 മീറ്ററിൽ റോഡ് വികസനത്തിനായി വഴിമുക്ക് വരെയുള്ള ഭൂമി ഏറ്റെടുക്കൽ പോലും പൂർത്തീകരിക്കാൻ നാളിതുവരെ സർക്കാരിന് കഴിഞ്ഞില്ല. കാലതാമസം ഉണ്ടായതോടെ കോടികളുടെ അധിക ബാധ്യതയാണ് ഉണ്ടായിരിക്കുന്നത്. വഴിമുക്ക് മുതൽ റോഡിന് 22 മീറ്റർ മതിയെന്ന കിഫ് ബിയുടെ നിർദേശം ഒരു കാരണവശാലും അംഗീകരിക്കില്ലെന്നും എസ്.കെ. ജയകുമാര്‍ കൂട്ടിച്ചേര്‍ത്തു. ഇന്നു രാവിലെ ഒന്പതു മുതല്‍ വൈകുന്നേരം ആറു വരെ നെയ്യാറ്റിന്‍കര ബസ് സ്റ്റാന്‍ഡ് ജംഗ്ഷനില്‍ നടക്കുന്ന ഉപവാസം ആക്‌ഷന്‍ കൗണ്‍സില്‍ രക്ഷാധികാരിയും സേവ് യൂണിവേഴ്സിറ്റി ക്യാന്പയിന്‍ കമ്മിറ്റി ചെയര്‍മാനുമായ ആര്‍.എസ് ശശികുമാര്‍ ഉദ്ഘാടനം ചെയ്യും.

ഓൾ കേരള ഫോട്ടോഗ്രഫേഴ്സ് അസോസിയേഷൻ നെടുമങ്ങാട് മേഖലാ സമ്മേളനം

നെടുമങ്ങാട്: ഓൾ കേരള ഫോട്ടോഗ്രഫേഴ്സ് അസോസിയേഷൻ നെടുമങ്ങാട് മേഖലാ സമ്മേളനം ജില്ലാ പ്രസിഡന്‍റ് പ്രശാന്ത് തോപ്പിൽ സമ്മേളനം ഉദ്ഘാടനം ചെയ്തു. മേഖലാ പ്രസിഡന്‍റ് സജി കുമാർ അധ്യക്ഷത വഹിച്ചു. സംസ്ഥാന സെക്രട്ടറി എം.എസ്. അനിൽകുമാർ, ജില്ലാ സെക്രട്ടറി സതീഷ് കവടിയാർ, ട്രഷറർ രാജൻ, മേഖലാ സെക്രട്ടറി ഉണ്ണി ഉമാസ്, ട്രഷറർ റെജി ചന്ദ്രൻ, ആർ. വി. മധു, സജീവ് പള്ളിപ്പുറം തുടങ്ങിയവർ പ്രസംഗിച്ചു. തുടർന്ന് എസ്എസ്എൽസി -പ്ലസ് ടു പരീക്ഷകളിൽ ഉന്നത വിജയം നേടിയ അംഗങ്ങളുടെ കുട്ടികൾക്കുള്ള ആദരവും മാധ്യമ രംഗത്തുള്ളവർക്കുള്ള ആദരവും അംഗങ്ങൾക്കുള്ള ചികിത്സാ സഹായങ്ങളും നൽകി. പുതിയ ഭാരവാഹികളായി മേഖല പ്രസിഡന്‍റാ യി രാജേഷ് കായിപ്പാടി, സെക്രട്ടറിയായി സുബിത ട്രഷററായി റെജി ചന്ദ്രൻ എന്നിവരെ സമ്മേളനം തെരഞ്ഞെടുത്തു.

ബസ് സ്റ്റാന്‍ഡിലെ മാല മോഷണം; രണ്ടുപേര്‍ പിടിയില്‍

പേരൂര്‍ക്കട: കിഴക്കേക്കോട്ട ബസ് സ്റ്റാൻഡിലെ മാല മോഷണത്തിനു രണ്ടുപേരെ ഫോര്‍ട്ട് എസ്ഐ ശോഭകുമാറും എസ്‌ സിപിഒ മനോജും പിടികൂടി. ഇവരെ കോടതി റിമാന്‍ഡ് ചെയ് തു. പൂന്തുറ പള്ളിത്തുറ ഭാഗത്ത് താമസിക്കുന്ന സുനീര്‍ (36), കല്ലടിമുഖത്ത് താമസിച്ചുവരുന്ന സയ്യദ് അലി (37) എന്നിവരാണ് പിടിയിലായത്. തിങ്കളാഴ്ച കിഴക്കേക്കോട്ട സ്റ്റാന്‍ഡില്‍ ബസ് കാത്തുനില്‍ക്കുകയായിരുന്ന 32 വയസുള്ള യുവതിയുടെ ഒന്നരവയസു പ്രായമുള്ള കുഞ്ഞിന്‍റെ രണ്ടുപവന്‍ വരുന്ന മാലയാണ് പ്രതികള്‍ കവര്‍ന്നത്. കാട്ടാക്കടയിലെ വീട്ടിലേക്കു പോകാനാണ് ഇവര്‍ സ്റ്റാൻഡില്‍ ബസ് കാത്തുനിന്നത്. മാല കവര്‍ന്ന് ഓടിയ പ്രതികളെ പഴവങ്ങാടി ഭാഗത്തുവച്ചാണ് പോലീസ് തൊണ്ടിമുതലുമായി പിടികൂടിയത്. പിടിയിലായവര്‍ ഫോര്‍ട്ട് സ്റ്റേഷനിലെ നിരവധി കേസുകളില്‍ ഉള്‍പ്പെട്ടിട്ടുള്ളവരുമാണെന്നു സിഐ വി.ആര്‍. ശിവകുമാര്‍ പറഞ്ഞു.

വായ്പ തിരിച്ചടച്ചില്ലെന്നപേരിൽ ലൈഫ് പദ്ധതി വീട് ജപ്തിചെയ്തു

ജപ്തി നടപടികൾ കേരള ഗ്രാമീൺ ബാങ്കിന്‍റേത് കുറ്റിച്ചൽ: വായ്പ തിരിച്ചടച്ചില്ലെന്നപേരിൽ ലൈഫ് പദ്ധതിയിൽ ലഭിച്ച വീട് ഗ്രാമീൺ ബാങ്ക് ജപ്തിചെയ്തു. കുറ്റിച്ചൽ പഞ്ചായത്തിൽ തച്ചൻകോട് പതിനൊന്നാം വാർഡിൽ മാറാൻകുഴി രേവതി ഭവനിൽ സനൽകുമാറിന്‍റെ വീടാണ് ജപ്തി ചെയ്തത്. സനൽകുമാർ പറയുന്നത് ഇങ്ങനെ: അഞ്ചു സെന്‍റ് സ്ഥലത്തിൽ 2015-ൽ ലൈഫ് ഭവന പദ്ധതിയിൽ ഉൾപ്പെടുത്തി രണ്ടുലക്ഷം രൂപ സർക്കാർ അനുവദിച്ചിരുന്നു. ആ തുക കൊണ്ടു വീട് പൂർത്തീകരിക്കാൻ പറ്റാതെ വന്നപ്പോൾ 2016 കേരള ഗ്രാമീൺ ബാങ്ക് കോട്ടൂർ ബ്രാഞ്ചിൽ നിന്നും അഞ്ചുലക്ഷം രൂപ ലോൺ എടുക്കുകയും ചെയ്തിരുന്നു. 20 വർഷ കാലാവധിയിലെടുത്ത ലോൺ ഇതുവരെ 3.20 ലക്ഷം രൂപ തിരിച്ചടച്ചു. ഇതിനുമുമ്പ് ലോൺ അടവ് മുടങ്ങിയപ്പോൾ ബാങ്ക് വിളിച്ചു 2021 ൽ 75,000 രൂപ കാർഷിക ലോൺ അനുവദിക്കുകയും അത് അടച്ചു തീർക്കുകയും ചെയ്തിരുന്നു. അതിനുശേഷം 50,000 രൂപ ബാങ്ക് ലോൺ ആയി നൽകുകയും അതു അടച്ചു തീർക്കുകയും ചെയ്തു. ഈ രണ്ടുലോണും അഞ്ചുലക്ഷം രൂപ എടുത്തതിന്‍റെ കുടിശികയിൽ ഉൾപ്പെടുത്തിയാണ് എ‌ടുത്തത്. അതിനുശേഷം ബാങ്ക് ജപ്തി നടപടികളിലോട്ട് പോയപ്പോൾ വക്കീലിനെ കണ്ടു ജപ്തി നടപടി ഒഴിവാക്കിയിട്ടുമുണ്ട്. രണ്ടു മാസം മുമ്പ് 5.80 ലക്ഷം അടച്ചാൽ ജപ്തി നടപടികളിൽനിന്നും ഒഴിവാക്കാമെന്നു ബാങ്ക് അധികൃതർ അറിയിച്ചിരുന്നു. തൽക്കാലം ഒരുലക്ഷം രൂപ അടയ്ക്കാമെന്നും ബാക്കി തുക പ്രതിമാസം 10000 രൂപവീതം അടച്ച് തീർക്കാമെന്നു അറിയിച്ചെങ്കിലും ബാങ്ക് അതിനു വഴങ്ങിയിരുന്നില്ല. ഇതിനുശേഷം ഇന്നലെ വൈകുന്നേരം മൂന്നരയോടെ എത്തിയ ബാങ്ക് അധികൃതർ ജപ്തി നടപടികൾ സ്വീകരിക്കുകയും കുടുംബത്തെ വീട്ടിൽനിന്നു പുറത്താക്കി വീടുപൂട്ടുകയും ചെയ്തു. വീടിലെ വൈദ്യുതി ഫ്യൂസ് ഊരുകയും വാട്ടർ ടാങ്കിന്‍റെ കണക്‌ഷൻ അടക്കുകയും ചെയ്തു. തുടർന്ന് വാർഡ് മെമ്പർ എലിസബത്ത് ഉൾപ്പടെയുള്ള നാട്ടുകാരും പ്രാദേശിക പാർട്ടി നേതാക്കളും ചേർന്നു വീടു തുറന്നു. കറണ്ട് കണക്‌ഷനെ കുറിച്ച് അറിയിച്ചപ്പോൾ ബാങ്ക് അധികൃതർ കെഎസ്ഇബിയെ ഇക്കാര്യം അറിയിച്ചിട്ടില്ലെന്ന മറുപടിയാണ് ലഭിച്ചത്. പിന്നീട് കെഎസ്ഇബി അധികൃതരെത്തി കണക്‌ഷൻ നൽകി. വിഷയം സർക്കാരിന്‍റെ ശ്രദ്ധയിൽപ്പെടുത്താനുള്ള നടപടി എടുക്കുമെന്ന് പഞ്ചായത്ത് അധികൃതർ പറഞ്ഞു.

പ്രതിരോധ പെൻഷൻകാർക്കായി പാങ്ങോട് സൈനിക കേന്ദ്രത്തിൽ നാളെ സ്പർഷ് ഔട്ട്റീച്ച് പ്രോഗ്രാം

തിരുവനന്തപുരം: പ്രതിരോധ പെൻഷൻകാർ, കുടുംബ പെൻഷൻകാർ, പ്രതിരോധ സിവിലിയൻ പെൻഷൻകാർ എന്നിവർക്കായി ചെന്നൈയിലെ കണ്‍ട്രോളർ ഓഫ് ഡിഫൻസ് അക്കൗണ്ട്സിന്‍റെ നേതൃത്വത്തിൽ നാളെ പാങ്ങോട് കരിയപ്പ ഓഡിറ്റോറിയത്തിൽ സ്പർഷ് ഒൗട്ട്റീച്ച് പ്രോഗ്രാം സംഘടിപ്പിക്കും. രാവിലെ 9.30 മുതൽ വൈകുന്നേരം വരെ പരിപാടി നീളും. കേരള ഗവർണർ പരിപാടിയുടെ മുഖ്യാതിഥിയായിരിക്കും. ന്യൂഡൽഹിയിലെ കണ്‍ട്രോളർ ജനറൽ ഓഫ് ഡിഫൻസ് അക്കൗണ്ട്സും ചെന്നൈയിലെ കണ്‍ട്രോളർ ഓഫ് ഡിഫൻസ് അക്കൗണ്ട്സും പരിപാടിയിൽ പങ്കെടുക്കും. സ്പർഷിലേക്ക് മാറിയ എല്ലാ പ്രതിരോധ പെൻഷൻകാർക്കും അവരുടെ എല്ലാ സംശയങ്ങളും ദൂരീകരിക്കാൻ സ്പാർഷ് ഒൗട്ട്റീച്ച് പ്രോഗ്രാം സഹായകരമാകും. സിജിഡിഎ, ഡൽഹി കാന്‍റ്, പിസിഡിഎ (പെൻഷനുകൾ), പ്രയാഗ് രാജ്, ചെന്നൈയിലെ സിഡിഎ, കേരളത്തിലെയും തമിഴ്നാട്ടിലെയും സ്പർഷ് സർവീസ് സെന്‍ററുകൾ, സ്റ്റേറ്റ് ബാങ്ക് ഓഫ് ഇന്ത്യ, കണ്ണൂർ, വെല്ലിംഗ്ടണ്‍, ബാംഗ്ലൂർ, നാസിക്, ജബൽപൂർ എന്നിവിടങ്ങളിലെ റിക്കാർഡ് ഓഫീസുകൾ, സൈനിക് വെൽഫെയർ വകുപ്പ് എന്നിവിടങ്ങളിൽ നിന്നുള്ള പ്രതിനിധികളും പങ്കെടുക്കുകയും പ്രശ്നപരിഹാരം നടത്തുകയും ചെയ്യും. തിരുവനന്തപുരം ജില്ലയിലെയും സമീപ ജില്ലകളിലെയും എല്ലാ പ്രതിരോധ പെൻഷൻകാരും കുടുംബ പെൻഷൻകാരും (ഡിഫൻസ് സിവിലിയന്മാരും കമ്മീഷൻഡ് ഓഫീസർമാരും ഉൾപ്പെടെ) അവരുടെ പരാതികൾ പരിഹരിക്കുന്നതിന് ഈ അവസരം ഉപയോഗിക്കണം. വാർഷിക തിരിച്ചറിയലും പ്രൊഫൈൽ അപ്ഡേറ്റും ഈ അവസരത്തിൽ നടത്താനാകും.

വീണുപരിക്കേറ്റ വിദേശ വനിത മരിച്ചു

കോവളം : വീണ് പരിക്കേറ്റ് ചികിത്സയിലായിരുന്ന വിദേശ വനിത മരണമടഞ്ഞു. അമേരിക്കൻ സ്വദേശി മേരി മെഡലിൻ (81)ആണ് മരിച്ചത്. അവിവാഹിതയായ ഇവർ വർഷങ്ങളായി കോവളം ഹാർബർ റോഡിൽ ആഴാകുളത്തിനു സമീപത്തെ ഒരു വീട്ടിലായിരുന്നു താമസം. വിവിധ രോഗങ്ങൾക്ക് ചികിത്സയിലായിരുന്നു ഇവർ. മൂന്നുമാസം മുൻപുണ്ടായ വീഴ്ചയിൽ കാലിന്‍റെ എല്ല് പൊട്ടിയിരുന്നു. നെയ്യാറ്റിൻകരയിലെ സ്വകാര്യ ആശുപത്രിയിൽ ചികിത്സയിലായിരുന്ന മെഡലിൻ ഇന്നലെ മരണമടഞ്ഞു. സ്വകാര്യ ആശുപത്രിയിലെ ഇൻക്വിസ്റ്റിന് ശേഷം മെഡിക്കൽ കോളേജിൽ എത്തിക്കുന്ന മൃതദേഹം ഇന്ന് പോസ്റ്റുമോർട്ടം നടത്തുമെന്ന് കോവളം പോലീസ് അറിയിച്ചു.

ബൈക്കുകൾ തമ്മിൽ കൂട്ടിയിടിച്ച് പതിനേഴുകാരൻ മരിച്ചു

പൂവാർ: രണ്ടു ബൈക്കുകൾ തമ്മിൽ കൂട്ടിയിടിച്ച് ഒരാൾ മരിച്ചു. ബൈക്കുകളിൽ സഞ്ചരിച്ച അഞ്ചു പേർക്ക് ഗുരുതരമായി പരിക്കേറ്റു. അവണാകുഴി മരുതംകോട് മാങ്കാല പ്ലാവറത്തല പുത്തൻ വീട്ടിൽ ജയന്‍റെയും - അജിതകുമാരിയുടെയും മകൻ ആദർശ് (17) ആണ് മരിച്ചത്. വീഴ്ച്ചയിൽ തലയ്ക്കും മുഖത്തും ഗുരുതരമായി പരിക്കേറ്റ ആദർശിനെ നെയ്യാറ്റിൻകരയിലെ സ്വകാര്യ ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. പ്ലസ്ടു പഠനം പൂർത്തിയാക്കി തുടർപഠനത്തിന് കാത്തിരിക്കുമ്പോഴാണ് അപകടം. ആദർശിനൊപ്പം സഞ്ചരിച്ച അവണാകുഴി സ്വദേശി മനു, ബാലരാമപുരം സ്വദേശി മനു, ചാവടി നട സ്വദേശികളായ വിശാഖ്, അപ്പു, അരുൺ എന്നിവർക്കാണ് പരിക്കേറ്റത്.ഇവരെ തിരുവനന്തപുരം മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. തിങ്കളാഴ്ച്ച രാത്രി എട്ടോടെ കാഞ്ഞിരംകുളം ചാവടി ജംഗ്ഷനു സമീപം മാർ എഫ്രാം നഗറിലാണ് അപകടം നടന്നത്. കാഞ്ഞിരംകുളത്തു നിന്നും പൾസർ ബൈക്കിൽ പുല്ലുവിളയിലേക്ക് മൂന്നുപേരുമായി വന്ന ബൈക്കും പുല്ലുവിളയിൽ നിന്നും ചാവടിയിലേക്ക് മറ്റ് മൂന്നുപേരുമായി വന്ന സ്പ്ലെൻഡർ ബൈക്കും തമ്മിൽ കൂട്ടിയിടിച്ചാണ് അപകടമുണ്ടായത്. കാഞ്ഞിരംക്കുളം പോലീസ് കേസെടുത്തു. ആദർശിന്‍റെ മൃതദേഹം മെഡിക്കൽ കോളജിൽ പോസ്റ്റുമോർട്ടത്തിനുശേഷം നെയ്യാറ്റിൻകര ജനറൽ ആശുപത്രി മോർച്ചറിയിൽ സൂക്ഷിച്ചിട്ടുണ്ട്. വിദേശത്തുള്ള അജിതകുമാരി ഇന്ന് നാട്ടിലെത്തിയ ശേഷം സംസ്കാരം നടക്കും.ആകാശ് സഹോദരനാണ്.

ശബരിമല സ്വർണക്കൊള്ള: യുവമോർച്ച മാർച്ചിൽ സംഘർഷം

തിരുവനന്തപുരം: ശബരിമലയിലെ സ്വർണക്കൊള്ളയ്ക്കു കൂട്ടുനിന്ന ദേവസ്വം മന്ത്രി വി.എൻ.വാസവനും ദേവസ്വം ബോർഡ് പ്രസിഡന്‍റ് പി.എസ്്.പ്രശാന്തും രാജിവയ്ക്കണമെന്നു ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ. കോട്ടയത്തു ദേവസ്വം മന്ത്രിയുടെ വീട്ടിലേക്കു സമാധാനപരമായി ബിജെപി നടത്തിയ മാർച്ചിനു നേരെ സിപിഎം പ്രവർത്തകർ അക്രമം അഴിച്ചുവിട്ടു. അതിനി നടക്കില്ല. ബിജെപി ഈ രാജ്യത്തെ ഏറ്റവും വലിയ പാർട്ടിയാണ്. ഞങ്ങളുടെ പ്രവർത്തകരെ ആക്രമിക്കാൻ സമ്മതിക്കില്ല. നരേന്ദ്രമോദി ഭരിക്കുന്ന നാട്ടിൽ ആര് അഴിമതിയും കൊള്ളയും നടത്തിയാലും അവരെ വിടില്ലായെന്നും അദ്ദേഹം പറഞ്ഞു. ശബരിമലയിലെ സ്വർണക്കൊള്ളയ്ക്കെതിരെ യുവമോർച്ച നടത്തിയ സെക്രട്ടേറിയറ്റ് മാർച്ച് ഉദ്ഘാടനം ചെയ്തു പ്രസംഗിക്കുകയായിരുന്നു രാജീവ് ചന്ദ്രശേഖർ. എല്ലാം ശരിയാകുമെന്നു പറഞ്ഞ എൽഡിഎഫ് സർക്കാർ കഴിഞ്ഞ പത്തുകൊല്ലമായി ഹിന്ദു വിശ്വാസികളെ ദ്രോഹിക്കുന്നു. കൊള്ള നടന്നതു വേറെ ഏതെങ്കിലും സമുദായത്തിന്‍റെ ആരാധനാലയത്തിലായിരുന്നൂവെങ്കിൽ പിണറായി വിജയൻ അവിടെ പോയി കാലുപിടിക്കുമായിരുന്നില്ലേയെന്നും രാജീവ് ചന്ദ്രശേഖർ പറഞ്ഞു. യുവമോർച്ച പ്രവർത്തകർ നടത്തിയ മാർച്ച് പോലീസ് തടഞ്ഞതിനെ തുടർന്നു സെക്രട്ടേറിയറ്റിനു മുന്നിൽ പ്രവർത്തകരും പോലീസും തമ്മിൽ ഏറെ നേരം സംഘർഷമുണ്ടായി. മൂന്നുതവണ പോലീസ് ജലപീരങ്കി പ്രയോഗിച്ചു. ചെറിയ രീതിയിൽ പോലീസ് ലാത്തിയും വീശി. ജലപീരങ്കി പ്രയോഗത്തിൽ യുവമോർച്ച പ്രവർത്തകർക്കു പരിക്കേറ്റു. യുവമോർച്ച സംസ്ഥാന പ്രസിഡന്‍റ് വി. മനുപ്രസാദ്, ജനറൽ സെക്രട്ടറി ഗോകുൽ ഗോപിനാഥ് , ബിജെപി ദേശീയ സമിതി അംഗം പി.കെ. കൃഷ് ണദാസ്, നേതാക്കളായ അനൂപ് ആന്‍റണി, എസ്. സുരേഷ്, സിറ്റി ജില്ലാ പ്രസിഡന്‍റ് കരമന ജയൻ എന്നിവർ പങ്കെടുത്തു.

നേമം സഹകരണ ബാങ്ക് തട്ടിപ്പ് : മുന്‍ സെക്രട്ടറി രാജേന്ദ്രനെ ക്രൈംബ്രാഞ്ച് അറസ്റ്റുചെയ്തു

നേമം: നേമം സഹ. ബാങ്കില്‍ സാമ്പത്തിക തട്ടിപ്പ് നടത്തിയ മുന്‍ സെക്രട്ടറി എ.ആര്‍. രാജേന്ദ്രനെ ക്രൈംബ്രാഞ്ച് അറസ്റ്റുചെയ്തു. രണ്ടാം പ്രതിയായ ഇയാള്‍ക്കെതിരെ ക്രൈംബ്രാഞ്ച് കഴിഞ്ഞ ആഴ്ച ലുക്ക്ഔട്ട് നോട്ടീസ് പുറത്തിറിക്കിയിരുന്നു. പ്രതിയെ കോടതി റിമാന്‍ഡ് ചെയ്തു. നേമം ബാങ്കിലെ സാമ്പത്തിക തട്ടിപ്പിനുശേഷം ഇയാള്‍ മാസങ്ങളായി ഒളിവിലായിരുന്നു. ഇതിനിടെ സുപ്രീംകോടതിയില്‍ നിന്നും ജാമ്യത്തിനായി ശ്രമം നടത്തിയിരുന്നു. രാജേന്ദ്രന്‍ സെക്രട്ടറിയായിരുന്ന കാലത്ത് കോടികളുടെ ക്രമക്കേട് നടന്നതായി സഹകരണ വകുപ്പിന്‍റെ അന്വേഷണത്തില്‍ കണ്ടെത്തിയിരുന്നു. കേസുമായി ബന്ധപ്പെട്ട് മറ്റൊരു മുന്‍ സെക്രട്ടറിയും ഒന്നാം പ്രതിയുമായ എസ്. ബാലചന്ദ്രന്‍ നായരെയും മുന്‍ പ്രസിഡന്‍റ് ആര്‍. പ്രദീപ് കുമാറിനെയും ക്രൈംബ്രാഞ്ച് നേരത്തെ അറസ്റ്റ് ചെയ്തിരുന്നു. 96 കോടിയോളം രൂപയുടെ തട്ടിപ്പു നടന്ന ബാങ്കില്‍ ഇപ്പോള്‍ സിപിഎം നേതൃത്വത്തിലുള്ള ഭരണസമിതിയെ പിരിച്ചുവിട്ടശേഷം അഡ്മിനിസ്‌ട്രേറ്റര്‍ ഭരണം ഏര്‍പ്പെടുത്തിയിരിക്കുകയാണ്. ഇതിനുശേഷം 40 ലക്ഷം രൂപ പിരിഞ്ഞ് കിട്ടിയെങ്കിലും ഇതു നിക്ഷേപകര്‍ക്ക് കൊടുത്തു തീർത്തിട്ടില്ല.

ഭാരതമെന്ന വലിയ ദർശനത്തെ യാഥാർഥ്യമാക്കിയത് ഗാന്ധിജി: കർദിനാൾ

തിരുവനന്തപുരം: ഭാരതം എന്ന വലിയ ദർശനത്തെ ഒരു ഭൂപടമായും സംസ്കാരമായും പ്രതിഷ്ഠിച്ച ഋഷിവര്യനും ദേശസ്നേഹിയുമായിരുന്നു നമ്മുടെ രാഷ്ട്രപിതാവ് മഹാത്മാഗാന്ധിയെന്നു മലങ്കര കത്തോലിക്കാ സഭ മേജർ ആർച്ച്ബിഷപ്പ് കർദിനാൾ മാർ ബസേലിയോസ് ക്ലീമിസ് കാതോലിക്കാ ബാവ. ഗാന്ധിഭവൻ തീയറ്റർ ഇന്ത്യയുടെ ഗാന്ധി നാടകത്തിന്‍റെ വിദ്യാർഥികൾക്കായുള്ള പ്രദർശനം മാർ ഈവാനിയോസ് വിദ്യാനഗറിലെ സെന്‍റ് മേരിസ് മലങ്കര മേജർ സെമിനാരി ഓഡിറ്റോറിയത്തിൽ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ബ്രിട്ടീഷുകാരിൽ നിന്നും സ്വാതന്ത്ര്യം നേടിത്തരിക മാത്രമല്ല ഗാന്ധിജി ചെയ്തത്. നമ്മെ ഒത്തൊരുമയോടെ ജീവിക്കാൻ പഠിപ്പിച്ചത് അദ്ദേഹമാണ്. പുനലൂർ സോമരാജന്‍റെ നേതൃത്വത്തിൽ ഒരുക്കിയ ഗാന്ധിജിയെ കുറിച്ചുള്ള പുതിയ നാടകാവിഷ്കാരം ഗാന്ധിജിയുടെ രൂപം നമ്മുടെ മനസ്സിലും സംസ്കൃതിയിലും നിറഞ്ഞുനിൽക്കുന്നതിന് കാരണമാകട്ടെ എന്നും അദ്ദേഹം ആശംസിച്ചു. പ്രമുഖ സിനിമ സംവിധായകൻ അടൂർ ഗോപാലകൃഷ്ണൻ അധ്യക്ഷത വഹിച്ച ചടങ്ങിൽ സെന്‍റ് മേരിസ് മലങ്കര മേജർ സെമിനാരി റെക്ടർ റവ. ഡോ. ജിജി ഫിലിപ്പ് ചരിവുപുരയിടത്തിൽ സ്വാഗതം ആശംസിച്ചു. ഗാന്ധിഭവൻ മാനേജിംഗ് ട്രസ്റ്റിയും സെക്രട്ടറിയുമായ പുനലൂർ സാമരാജൻ ആമുഖ പ്രസംഗം നടത്തി. പ്രധാനമന്ത്രിയുടെ മുൻ പ്രിൻസിപ്പൽ സെക്രട്ടറി ടി.കെ.എ .നായർ, സാഹിത്യകാരൻ ഡോ. ജോർജ് ഓണക്കൂർ, ചലച്ചിത്രതാരം ശ്രീലത നമ്പൂതിരി, ഗാന്ധി ഭവൻ സിഇഒ ഡോ. വിൻസന്‍റ് ഡാനിയേൽ, നാടക സംവിധായകൻ മീനമ്പലം സന്തോഷ്തുടങ്ങിയവർ പങ്കെടുത്തു. ടി.കെ.എ. നായർ നേതൃത്വം നൽകുന്ന സിറ്റിസൺസ് ഇന്ത്യ ഫൗണ്ടേഷനന്‍റെ ആഭിമുഖ്യത്തിൽ നാലാഞ്ചിറ മലങ്കര മേജർ സെമിനാരിയുടെ സഹകരണത്തോടെയാണ് പ്രദർശനം സംഘടിപ്പിച്ചത്. സ്വന്തം ലേഖകൻ

പാറശാല ബ്ലോക്ക് കോണ്‍ഗ്രസ് കമ്മിറ്റിയുടെ പ്രതിഷേധം

പാറശാല: ഷാഫി പറമ്പില്‍ എംപിയെ പോലീസ് മര്‍ദിച്ചതില്‍ പ്രതിഷേധിച്ചു പാറശാല ബ്ലോക്ക് കോണ്‍ഗ്രസ് കമ്മിറ്റിയുടെ നേതൃത്വത്തില്‍ പന്തംകൊളുത്തി പ്രകടനം നടത്തി. കെപിസിസി സെക്രട്ടറി ഡോ. ആര്‍. വത്സലന്‍ ഉദ്ഘാടനം ചെയ്തു. ബ്ലോക്ക് പ്രസിഡന്‍റ് അഡ്വ. എസ്. ജോണിന്‍റെ നേതൃത്വത്തില്‍, പാറശാല സുധാകരന്‍, കൊല്ലിയോടു സത്യനേശന്‍, കൊറ്റാമം മോഹനന്‍, വേലപ്പന്‍ നായര്‍, ലിജിത്ത്, കൊല്ലയില്‍ ആനന്ദന്‍, അഡ്വ. മഞ്ചവിളാകം ജയകുമാര്‍, രാജന്‍, ജെ.കെ. ജസ്റ്റിന്‍, പവതിയാന്‍വിള സുരേന്ദ്രന്‍, സുഗതന്‍ എന്നിവര്‍ പ്രസംഗിച്ചു.

1.875 കിലോഗ്രാം കഞ്ചാവ് സഹിതം രണ്ടുപേർ അറസ്റ്റിൽ

നെടുമങ്ങാട്: വിൽപ്പനയ്ക്കായി കൊണ്ടുവന്ന 1.875 കിലോഗ്രാം കഞ്ചാവുമായി റൗഡി ലിസ്റ്റിൽ പെട്ട ആൾ ഉൾപ്പെടെ രണ്ടു പേർ അറസ്റ്റിലായി. തിരുവനന്തപുരം പുരവൂർകോണം ഭാഗത്ത് വച്ച് വിൽപ്പനയ്ക്കായി കൊണ്ടുവന്ന 1.875 കിലോഗ്രാം കഞ്ചാവുമായി പനവൂർ കരിക്കുഴി തടത്തരികത്ത് വീട്ടിൽ ഷജീർ (44), ആനാട് കല്ലടക്കുന്ന് വൈഷ്ണവി ഭവനിൽ ബൈജു (46 )എന്നിവരെ യാണ് അറസ്റ്റു ചെയ്തത്. ഒന്നാംപ്രതിയെ സജീർ മോഷണം, പിടിച്ചുപറി, അടിപിടി തുടങ്ങി 20 ഓളം കേസുകളിൽ ശിക്ഷ അനുഭവിച്ചിട്ടുള്ള ആളാണ്. മാത്രമല്ല ഷജീർ നെടുമങ്ങാട് പോലീസ് സ്റ്റേഷനിലെ റൗഡി ഹിസ്റ്ററി ലിസ്റ്റിൽ ഉൾപ്പെട്ട ആളുമാണ്. സ്കൂളുകൾ കേന്ദ്രീകരിച്ചും ഇയാൾ കഞ്ചാവ് വില്പന നടത്താറുണ്ട്. തിരുവനന്തപുരം റൂറൽ ജില്ലാ പോലീസ് മേധാവി കെ.എസ്. സുദർശനു ലഭി ച്ച രഹസ്യ വിവരത്തിന്‍റെ അടിസ്ഥാനത്തിൽ നാർകോട്ടിക് സെൽ ഡിവൈഎസ്പി പ്രദീപിന്‍റെ നിർദേശാനുസരണം നെടുമങ്ങാട് ഡാൻസാഫ് ടീമിന്‍റെ നേതൃത്വത്തിൽ എസ് ഐ ഓസ്റ്റിൻ ജി. ഡെന്നിസൺ, എഎസ്ഐമാരായ സതികുമാർ, അനൂപ്, എസ്‌സിപി ഒ മാരായ ഉമേഷ്‌ ബാബു, രാജേഷ്, അനീഷ് കുമാർ, സിപിഒ അഖിൽ എന്നിവർ ചേർന്നാ ണു പ്രതിയെ അറസ്റ്റ് ചെയ് തത്. നെടുമങ്ങാട് പോലീസ് തുടർന്നടപടികൾ തുടങ്ങി.

സമഗ്ര പച്ചക്കറി കൃഷി വികസന പദ്ധതി

നെയ്യാറ്റിൻകര: നെയ്യാറ്റിൻകര നഗരസഭയുടെയും കൃഷിഭവന്‍റെയും സംയുക്താഭിമുഖ്യത്തിൽ നഗരസഭയുടെ ജനകീയ ആസൂത്രണ പദ്ധതിയായ സമഗ്ര പച്ചക്കറി കൃഷി വികസന പദ്ധതി ആരംഭിച്ചു. കർഷകർക്ക് പച്ചക്കറി തൈ വിതരണം ചെയ്ത് നഗരസഭ ചെയർമാൻ പി.കെ. രാജമോഹനന്‍ ഉദ്ഘാടനം നിര്‍വഹിച്ചു. നഗരസഭ വികസനകാര്യ സ്റ്റാൻഡിംഗ് കമ്മിറ്റി ചെയർമാൻ കെ.കെ. ഷിബു അധ്യക്ഷനായി. വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ ഡോ. എം.എ സാദത്ത്, കൗൺസിലർ പ്രസന്നകുമാര്‍, നെയ്യാറ്റിൻകര നഗരസഭ കൃഷി ഓഫീസർ ടി. സജി എന്നിവർ പങ്കെടുത്തു.

വികസന മുന്നേറ്റ യാത്ര സമാപിച്ചു

വെള്ളറട: വെള്ളറടയില്‍ നടന്ന വികസന മുന്നേറ്റ യാത്രയുടെ സമാപന സമ്മേളനം വിന്‍സന്‍റ് എംഎല്‍എ ഉദ്ഘാടനം ചെയ്തു. മണ്ഡലം പ്രസിഡന്‍റ് മണലി സ്റ്റാന്‍ലി അധ്യക്ഷതവഹിച്ചു. എല്‍.വി. അജയന്‍, അഡ്വ. ഗിരീഷ് കുമാര്‍, അമ്പലത്തറ ഗോപകുമാര്‍, മലയില്‍ രാധാകൃഷ്ണന്‍, രാജ്‌മോഹന്‍, കെ.ജി. മംഗൾദാസ്, ആനി പ്രസാദ്, സജിതജോണ്‍, മുട്ടച്ചല്‍ സിവില്‍, ദീപ്തി, ലീല, വിജി, ജനില്‍ റോസ്, ഫിലോമിന, കാനക്കോട് അജയന്‍ തുടങ്ങിയവര്‍ പ്രസംഗിച്ചു.

ഭിന്നശേഷി കലോത്സവം "ഒന്നിച്ചൊന്നായ്' സംഘടിപ്പിച്ചു

നെടുമങ്ങാട്: വെള്ളനാട് ബ്ലോക്ക് പഞ്ചായത്തിന്റെ 2025 26 വാർഷിക പദ്ധതിയിൽ ഉൾപ്പെടുത്തി നടപ്പിലാക്കിയ ഭിന്നശേഷി കലോത്സവം ഒന്നിച്ചൊന്നായ് സംഘടിപ്പിച്ചു. ബ്ലോക്ക് പഞ്ചായത്തിന്റെ പരിധിയിലെ എട്ട് ഗ്രാമപഞ്ചായത്തുകളിൽ നിന്നുള്ള 150ലേറെ കുട്ടികൾ പരിപാടികളിൽ പങ്കെടുത്തു തുടർന്ന് വിവിധ കലാപരിപാടികൾ അരങ്ങേറി. സമാപന സമ്മേളനം ബ്ലോക്ക് പ്രസിഡൻറ് എസ് ഇന്ദുലേഖ ഉദ്ഘാടനം ചെയ്തു. വി.രമേഷ് സ്വാഗതം പറഞ്ഞു കാട്ടാക്കട ഗ്രാമപഞ്ചായത്ത് പ്രസിഡൻറ് കെ .അനിൽകുമാർ ബ്ലോക്ക് പഞ്ചായത്ത് അംഗങ്ങളായ സുനിത.വി.ജെശ്രീക്കുട്ടി സതീഷ്, ഫർസാന, സി. വിജയൻ,ശ്രീലത.എൽ, ശിശു വികസന പദ്ധതി ഓഫീസർമാരായ ലേഖ. എസ് , ബിന്ദു വി എന്നിവർ പങ്കെടുത്തു. കലാ കായിക പരിപാടികളിൽ പരിപാടികളിൽ പങ്കെടുത്തവർക്ക് സമ്മാനങ്ങൾ വിതരണം ചെയ്തു.

അരുവിക്കര മൈലത്ത് പ്ലമ്പിംഗ് തൊഴിലാളിക്ക് അമീബിക് മസ്തിഷ്ക ജ്വരം സ്ഥിരീകരിച്ചു

നെടുമങ്ങാട്: അരുവിക്കര മൈലം ജി.വി. രാജ സ്കൂളിനു സമീപം പ്ലമ്പിംഗ് തെ‌ാഴിലാളിക്ക് അമീബിക് മസ്തിഷ്ക ജ്വരം സ്ഥിരീകരിച്ചു. രണ്ടാഴ്ച മുൻപ് നഗരത്തിലെ ഒരു ഫ്ലാറ്റിൽ ജോലി ചെയ്യുന്നതിനിടെ ഇയാളുടെ ദേഹത്ത് മലിനജലം വീണതായി പറയപ്പെടുന്നു. കാലിനു വേദനയും ക്ഷീണവും അനുഭവപ്പെട്ട ഇയാൾ കഴിഞ്ഞ 29ന് പേരൂർക്കട ആശുപത്രിയിൽ ചികിത്സ തേടി. പനി ഭേദമാകാത്തതിനെ തുടർന്ന് പിന്നീട് മെഡിക്കൽ കോളജ് ആശുപത്രിയിലേയ്ക്ക് മാറ്റുകയായിരുന്നു. അവിടെ നടത്തിയ പരിശോധനയിലാണ് രോഗം സ്ഥിരീകരിച്ചത്. അമീബിക് മസ്തിഷ്ക ജ്വരം സ്ഥിരീകരിച്ചതോടെ മൈലത്ത് ആരോഗ്യ വകുപ്പ് അധികൃതർ പരിശോധന നടത്തി. രോഗം ബാധിച്ച ആളിന്‍റെ വീട്ടിൽ നിന്നും സമീപ പ്രദേശങ്ങളിൽനിന്നും വെള്ളം ശേഖരിച്ച് പബ്ലിക് ഹൈൽത്ത് ലാബിൽ പരിശോധനയ്ക്ക് അയച്ചിട്ടുണ്ട്. പരിശോധനാഫലം വന്ന ശേഷം തുടർ നടപടികൾ സ്വീകരിക്കുമെന്ന് ആരോഗ്യ വകുപ്പ് അധികൃതർ പറഞ്ഞു.

വാഹന അപകടം പെരുകുന്നു: റോഡ് ഉപരോധിച്ച് യൂത്ത് കോണ്‍ഗ്രസ്

വെള്ളറട: ഇലക്ട്രിക് പോസ്റ്റുകള്‍ മാറ്റിയില്ലെന്നാരോപിച്ച് റോഡ് ഉപരോധിച്ച യൂത്ത് കോണ്‍ഗ്രസ് പ്രവര്‍ത്തകരെ പോലീസ് അറസ്റ്റ് ചെയ്തു. കാരക്കോണം, കുന്നത്തുകാല്‍, ധനുവച്ചപുരം റോഡില്‍ വാഹന യാത്രക്കാര്‍ക്ക് ഭീഷണിയായി റോഡിന്‍റെ നടുവില്‍ നില്‍ക്കുന്ന ഇരുപതോളം ഇലക്ട്രിക് പോസ്റ്റുകള്‍ മാറ്റി സ്ഥാപിക്കാത്തതിലായിരുന്നു പ്രതിഷേധം. യൂത്ത് കോണ്‍ഗ്രസ് പാറശാല നിയോജക മണ്ഡലം കമ്മിറ്റി സംഘടിപ്പിച്ച ഉപരോധത്തിന് പ്രസിഡന്‍റ് ബ്രമിന്‍ ചന്ദ്രന്‍ നേതൃത്വം നല്‍കി. ജില്ല പ്രസിഡന്‍റ് നേമം ഷജീര്‍ ഉദ്ഘാടനം ചെയ്തു. എള്ളുവിള പ്രതീഷ്, സതീഷ് കോട്ടുക്കോണം, ജോബിന്‍ മണ്ണാംകോണം, പ്രതിഭ, അഭിലാഷ് പ്ലാംപഴിഞ്ഞി, ആദര്‍ശ് ചിറക്കോണം, തത്തലം രാജു, മാരായമുട്ടം അനന്തന്‍, തുടങ്ങിയവര്‍ പ്രസംഗിച്ചു.

മോഷണം: യുവാവ് പിടിയിൽ

പേരൂര്‍ക്കട: കെഎസ്ആര്‍ടിസി പാപ്പനംകോട് സെന്‍ട്രല്‍ വര്‍ക്‌ഷോപ്പില്‍ നിന്നു ചെമ്പുകമ്പികള്‍ മോഷ്ടിച്ച സംഭവത്തില്‍ താല്‍ക്കാലിക ജീവനക്കാരന്‍ പിടിയില്‍. തിരുവല്ലം വെള്ളായണി കായലിനു സമീപം കിഴക്കേ കോളനി വരമ്പില്‍ വീട്ടില്‍ ഷാജി (48) യാണ് പിടിയിലായത്. വര്‍ക്‌ഷോപ്പില്‍ സ്‌ക്രാപ്പിനു സൂക്ഷിച്ചിരുന്ന ചെമ്പുകമ്പികള്‍ മോഷ്ടിച്ചശേഷം കവറിലാക്കി തന്റെ സ്‌കൂട്ടറില്‍ കടത്താന്‍ ശ്രമിക്കുന്നതിനിടെയാണ് സുരക്ഷാ ഉദ്യോഗസ്ഥര്‍ കണ്ടെത്തി ഇയാളെ പിടികൂടുന്നത്.

പ്രതിഷേധ പ്രകടനം നടത്തി

വെമ്പായം: ശബരിമലയിലെ സ്വര്‍ണം കൊള്ളയടിക്കുന്ന പിണറായി വിജയൻ സർക്കാരിന് ഒത്താശ ചെയ്യുന്ന ദേവസ്വം ബോര്‍ഡ് പ്രസിഡന്‍റ് പി എസ്. പ്രശാന്തിന്‍റെ രാജി ആവശ്യപ്പെട്ട് യൂത്ത് കോൺഗ്രസ് നെടുമങ്ങാട് നിയോജകമണ്ഡലം കമ്മിറ്റിയുടെ നേതൃത്വത്തിൽ പ്രതിഷേധ പ്രകടനം നടത്തി. നിയോജകമണ്ഡലം പ്രസിഡന്‍റ് താഹിർ നെടുമങ്ങാട് നേതൃത്വം നൽകിയ പ്രകടനം കൊപ്പം ജംഗ്ഷനിൽ നിന്നും ആരംഭിച്ച് പിരപ്പന്‍കോട് ജംഗ്ഷനിൽ സമാപിച്ചു. തുടർന്നു നടന്ന പ്രതിഷേധ യോഗം സംസ്ഥാന സെക്രട്ടറി ഫൈസല്‍ നന്നാട്ടുകാവ് ഉദ്ഘാടനം ചെയ്തു. സംസ്ഥാന സെക്രട്ടറി അഡ്വ. എസ്.കെ. അഭിജിത്, ജില്ലാ ജനറല്‍ സെക്രട്ടറി ശരത് ശൈലേശ്വരൻ, മണ്ഡലം പ്രഡിഡന്‍റുമാരായ വിനീഷ്, റിഫായി കന്യാകുളങ്ങര, ഗോകുൽ, കൊടൂർ, ഷൈജു, നിയോജകമണ്ഡലം ഭാരവാഹികളായ അഞ്ജന, മോനിഷ്, ബിനീഷ്, അഭിലാഷ് പോത്തൻകോട്, പ്രവീണ്‍ മൊട്ടമൂട്, സജീർ ഷാ തുടങ്ങിയവര്‍ പങ്കെടുത്തു.

കോഴികുഞ്ഞുങ്ങളെ നൽകി

വെള്ളറട: വെള്ളറട പഞ്ചായത്ത് 2024-25ലെ സാമ്പത്തിക വര്‍ഷത്തില്‍ തെരഞ്ഞെടുത്ത ഗുണഭോക്തള്‍ക്ക് കോഴി കുഞ്ഞുങ്ങളെ വിതരണം ചെയ്തു. വെള്ളറട മൃഗാശുപത്രിയില്‍ വച്ചായിരുന്നു കോഴിക്കുഞ്ഞുങ്ങളെ ഗുണഭോക്താക്കള്‍ക്ക് കൈമാറിയത്. പഞ്ചായത്ത് വൈസ് പ്രസിഡന്‍റ് സരളാ വിൻസന്‍റ്, സ്റ്റാന്‍ഡിംഗ് കമ്മിറ്റി ചെയര്‍മാന്‍ കെ.ജി. മംഗള്‍ ദാസ്, ചെയര്‍പേഴ്‌സന്‍ ജയന്തി, രാജ് മോഹന്‍, ഡോ: ലെജാനിയ, ലൈഫ് സ്‌റ്റോക്ക് ഇന്‍സ്‌പെക്ടര്‍ പ്രീത തുടങ്ങിയവര്‍ വിതരണ ഉദ്ഘാടന പരിപാടിയില്‍ പങ്കെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]