ADVERTISEMENT

ADVERTISEMENT

കടവരാന്തയിൽ മധ്യവയസ്കൻ മരിച്ച നിലയിൽ

മേലാറ്റൂർ: മേലാറ്റൂർ റെയിൽവേ ഗേറ്റിനു സമീപത്തെ കടയുടെ വരാന്തയിൽ മധ്യവയസ്കനെ മരിച്ച നിലയിൽ കാണപ്പെട്ടു. എരവിമംഗലം സ്വദേശി എ. ജയേഷ് (54) ആണ് മരിച്ചത്. മേലാറ്റൂർ പോലീസ് അസ്വഭാവിക മരണത്തിന് കേസെടുത്തു.

ADVERTISEMENT

ഉപതെരെഞ്ഞടുപ്പ്: 315 വോട്ടിംഗ് മെഷീനുകൾ തെരഞ്ഞെടുത്തു

മലപ്പുറം: നിലന്പൂർ ഉപതെരഞ്ഞെടുപ്പിൽ ഉപയോഗിക്കുന്നതിനായി 315 വോട്ടിംഗ് യന്ത്രങ്ങളും (315 വീതം കണ്‍ട്രോൾ- ബാലറ്റ് യൂണിറ്റുകൾ) 341 വിവിപാറ്റുകളും ഒന്നാംഘട്ട റാൻഡമൈസേഷൻ വഴി തെരഞ്ഞെടുത്തു. മണ്ഡലത്തിൽ 263 പോളിംഗ് ബൂത്തുകളാണുള്ളത്. കണ്‍ട്രോൾ- ബാലറ്റ് യൂണിറ്റുകൾ 20 ശതമാനവും വിവിപാറ്റുകൾ 30 ശതമാനവും റിസർവ് ഉൾപ്പെടെയാണ് മാറ്റിവച്ചത്. ജില്ലാ തെരഞ്ഞെടുപ്പ് ഓഫീസറായ കളക്ടർ വി.ആർ. വിനോദിന്‍റെ നേതൃത്വത്തിൽ രാഷ്ട്രീയപാർട്ടി പ്രതിനിധികളുടെ സാന്നിധ്യത്തിലാണ് ഇലക്ഷൻ കമ്മീഷന്‍റെ സോഫ്റ്റ് വെയർ വഴി വോട്ടിംഗ് യന്ത്രങ്ങൾ തെരഞ്ഞെടുത്തത്. സീരിയൽ നന്പറുകളുടെ അടിസ്ഥാനത്തിൽ ഇവിഎം കണ്‍ട്രോൾ യൂണിറ്റുകളും ബാലറ്റ് യൂണിറ്റുകളും വിവിപാറ്റുകളും തെരഞ്ഞെടുക്കുന്ന പ്രക്രിയയാണിത്. തുടർന്ന് വോട്ടിംഗ് ഉപകരണങ്ങൾ സൂക്ഷിച്ചിട്ടുള്ള വെയർ ഹൗസിൽ വച്ച് തെരഞ്ഞെടുത്ത മെഷീനുകൾ രാഷ്ട്രീയ പാർട്ടി പ്രതിനിധികളുടെ സാന്നിധ്യത്തിൽ മാറ്റിവച്ചു. രണ്ടാംഘട്ട റാൻഡമൈസേഷൻ വഴിയാണ് മണ്ഡലത്തിലെ ഓരോ ബൂത്തിലേക്കും ഏത് വോട്ടിംഗ് യന്ത്രം ഉപയോഗിക്കണമെന്ന് തീരുമാനിക്കുന്നത്.

ലോകപുകയിലവിരുദ്ധ ദിനാചരണം നടത്തി

മഞ്ചേരിയിൽ മാരത്തണ്‍ നടത്തി മഞ്ചേരി: തിമിർത്തു പെയ്യുന്ന മഴയയെ അവഗണിച്ച് പ്രായം ചെന്നവരടക്കം എഴുപതോളം പേർ പങ്കെടുത്ത മാരത്തണ്‍ ശ്രദ്ധേയമായി. ലോകപുകയിലവിരുദ്ധ ദിനത്തോടനുബന്ധിച്ച് മഞ്ചേരി എക്സൈസ് സർക്കിൾ ഓഫീസും ചുള്ളക്കാട് വാക്കിംഗ് എക്സസൈസ് യോഗ ക്ലബും സംയുക്തമായാണ് മാരത്തണ്‍ സംഘടിപ്പിച്ചത്. റണ്‍ എഗൈൻസ്റ്റ് ടുബാക്കോ ആൻഡ് ഡ്രഗ് എന്ന മുദ്രാവാക്യവുമായി സംഘടിപ്പിച്ച മാരത്തണ്‍ മഞ്ചേരി ഇന്ത്യൻ മാൾ പരിസരത്ത് എക്സൈസ് സർക്കിൾ ഇൻസ്പെക്ടർ ഇ. ജിനീഷ് ഫ്ളാഗ് ഓഫ് ചെയ്തു. ക്ലബ് പ്രസിഡന്‍റ് എം.പി. ഹംസ കുരിക്കൾ, വൈസ് പ്രസിഡന്‍റ് ഖാലിദ് മഞ്ചേരി, ട്രഷറർ അസ്കർ, കുഞ്ഞുമുഹമ്മദ് കുരിക്കൾ തുറക്കൽ എന്നിവർ നേതൃത്വം നൽകി. സമാപന ചടങ്ങിൽ മഞ്ചേരി പോലീസ് ഇൻസ്പെക്ടർ പ്രതാപ്കുമാർ, വിമുക്തി കോ ഓർഡിനേറ്റർ ഗാഥ എന്നിവർ പുകവലിയുടെ ദൂഷ്യഫലങ്ങളെക്കുറിച്ചും അപകടങ്ങളെക്കുറിച്ചും ക്ലാസെടുത്തു. അസിസ്റ്റന്‍റ് എക്സൈസ് ഇൻസ്പെക്ടർമാരായ വിജയൻ, പ്രദീപ്, സിവിൽ എക്സൈസ് ഓഫീസർമാരായ വിനിൽകുമാർ, എം.ടി. ഹരീഷ് ബാബു, ഇർഷാദ്, അതിര, അബ്ദുറഹിമാൻ എന്നിവർ സംസാരിച്ചു. റാലിയും പ്രദർശനവും നടത്തി പെരിന്തൽമണ്ണ: അന്താരാഷ്ട്ര പുകയില വിരുദ്ധദിനത്തോടനുബന്ധിച്ച് പെരിന്തൽമണ്ണ എക്സൈസ്, മെക് 7, വാക്കേഴ്സ് ക്ലബ്, ലഹരി വിരുദ്ധ കൂട്ടായ്മകൾ ചേർന്ന് ’റണ്‍ എഗെയിൻസ്റ്റ് ടുബാക്കോ ആൻഡ് ഡ്രഗ്സ് എന്ന പരിപാടി സംഘടിപ്പിച്ചു. പെരിന്തൽമണ്ണ ടൗണ്‍ സ്ക്വയറിൽ നിന്നരംഭിച്ച് ടൗണ്‍ ചുറ്റി കോടതിപ്പടിയിൽ അവസാനിപ്പിച്ച ചടങ്ങിന് പെരിന്തൽമണ്ണ എക്സൈസ് സർക്കിൾ ഇൻസ്പെക്ടർ വി. അനൂപ് ഫ്ളാഗ് ഓഫ് ചെയ്തു. ഡോ. നിലാർ മുഹമ്മദ്, ഡോ. അബ്ദുസലാം, ഡോ. നഹിം, കെ.ടി. ഹംസ, ഷംസു, എക്സൈസ് ഇൻസ്പെക്ടർ എം. യൂനസ് എന്നിവർ പ്രസംഗിച്ചു. ലഹരി വിരുദ്ധ പ്രതിജ്ഞയുമെടുത്തു. പെരിന്തൽമണ്ണ: പുകവലി വിരുദ്ധദിനത്തോടനുബന്ധിച്ച് മൗലാന കോളജ് ഓഫ് ഫാർമസി പോസ്റ്റർ പ്രദർശനം സംഘടിപ്പിച്ചു. പുകവലിയുടെ ഭവിഷ്യത്തിനെക്കുറിച്ച് സമൂഹത്തെ ബോധവത്കരിക്കുക എന്ന ലക്ഷ്യത്തോടെയാണ് പരിപാടി സംഘടിപ്പിച്ചത്. ഡിപ്പാർട്ട്മെന്‍റ് ഓഫ് ഫാർമസി പ്രാക്ടീസ്, എൻഎസ്എസ് യൂണിറ്റ് എന്നിവർ സംയുക്തമായി നടത്തിയ പ്രദർശനത്തിന് ഒന്നാം വർഷ ഡിഫാം വിദ്യാർഥികൾ നേതൃത്വം നൽകി. മൗലാന ഫാർമസി കോളജ് കാന്പസിൽ സംഘടിപ്പിച്ച പ്രദർശനം പെരിന്തൽമണ്ണ പാലിയേറ്റീവ് കോ ഓർഡിനേറ്റർ കുറ്റീരി മാനുപ്പ ഉദ്ഘാടനം ചെയ്തു. ഫാർമസി കോളജ് വൈസ് പ്രിൻസിപ്പൽ ഡോ. പി.പി.പി. നസീഫ് അധ്യക്ഷത വഹിച്ചു. ഫാർമസി പ്രാക്ടീസ് വകുപ്പ് മേധാവി ഡോ.സി. മുഹാസ്, എൻഎസ്എസ് പ്രോഗ്രാം കണ്‍വീനർ സൂര്യനാരായണൻ, ഡോ. കെ. അബ്ദുൾ വാജിദ്, കെ. റാഷിദ്,ഡോ.ടി.എസ്. കൃഷ്ണേന്ദു, എം.വി. ഷംസീത, കെ.കെ. ആയിശ ഹിബ, കെ.പി. സ്വാതി എന്നിവർ പ്രസംഗിച്ചു. പുകയില വിൽപ്പന കേന്ദ്രങ്ങളിൽ പരിശോധന നടത്തി മഞ്ചേരി: ലോക പുകയില വിരുദ്ധദിനത്തിന്‍റെ ഭാഗമായി നഗരസഭ, ഗവണ്‍മെന്‍റ് മെഡിക്കൽ കോളജ്, പോലീസ് എന്നിവയുടെ നേതൃത്വത്തിൽ പരിശോധന നടത്തി. മെഡിക്കൽ കോളജ് അടക്കമുള്ള വിവിധ വിദ്യാഭ്യാസ സ്ഥാപന പരിസരങ്ങളിൽ പുകയില ഉത്പന്നങ്ങൾ വിൽക്കുന്ന പത്തോളം സ്ഥാപനങ്ങളിൽ പരിശോധന നടത്തി. ഉത്പന്നങ്ങൾ പിടിച്ചെടുത്ത സ്ഥാപനങ്ങൾക്ക് പിഴ ഈടാക്കി. പരിശോധനയുടെ ഭാഗമായി മെഡിക്കൽ കോളജിൽ പുകയില വിരുദ്ധ ആരോഗ്യ ബോധവത്ക്കരണ ക്ലാസ് സംഘടിപ്പിച്ചു. മഞ്ചേരി നഗരസഭ ആരോഗ്യ വിഭാഗം ക്ലീൻസിറ്റി മാനേജർ ജെ.എ. നുജൂം, പബ്ലിക് ഹെൽത്ത് ഇൻസ്പെക്ടർമാരായ റെജി തോമസ്, സി. രതീഷ്, റിൽജു മോഹൻ, എസ്ഐ കെ. വിശ്വനാഥൻ, സിവിൽ പോലീസ് ഓഫിസർമാരായ മുഹമ്മദ് ഷാഫി, കൃഷ്ണദാസ്, രാജേഷ്, മെഡിക്കൽ കോളജ് സൂപ്രണ്ട് ഡോ. ആർ. പ്രഭുദാസ്, പിആർഒ സി. അലിബാപ്പു, ജഐച്ച്ഐമാരായ ഷിനോയ്, രേഷ്മ എന്നിവർ പരിശോധനക്ക് നേതൃത്വം നൽകി. പിടിച്ചെടുത്ത പുകയില ഉത്പന്നങ്ങൾ നശിപ്പിച്ചു.

കനത്ത മഴയിൽ സംസ്ഥാനപാതയിൽ വെള്ളക്കെട്ട് രൂക്ഷം

ചങ്ങരംകുളം: കനത്ത മഴ തുടരുന്നതിനിടെ സംസ്ഥാനപാതയിൽ വെള്ളക്കെട്ട് രൂക്ഷമായി. ചങ്ങരംകുളം ചിയ്യാനൂർപാടത്ത് റോഡരികിലെ കടകളിലും വീടുകളിലും വെള്ളം കയറിയിട്ടുണ്ട്. പാതയോരത്തെ ഡ്രൈനേജുകൾ പലതും മണ്ണും ചെളിയും മറ്റു മാലിന്യങ്ങളും വന്നടിഞ്ഞ് കിടക്കുകയാണ്. പലസ്ഥലത്തും മരങ്ങളും മരക്കൊന്പുകളും വീണ് വൈദ്യുതി ബന്ധങ്ങളും താറുമാറായി. താഴ്ന്ന പ്രദേശങ്ങൾ വെള്ളത്തിലാണ്. പലയിടത്തും മതിലുകളും കിണറുകളും ഇടിഞ്ഞ് വീണു. താഴ്ന്ന പ്രദേശങ്ങളിൽ താമസിക്കുന്നവർ ജാഗ്രത പാലിക്കണമെന്ന് അധികൃതർ മുന്നറിയിപ്പ് നൽകി. വയലുകളും തോടുകളും കരകവിഞ്ഞൊഴുകാൻ തുടങ്ങിയതോടെ ഗ്രാമീണ റോഡുകളിലും വെള്ളം കയറിയ അവസ്ഥയിലാണ്.

കിംസ് അൽശിഫയിൽ ഇന്‍റർവെൻഷണൽ റേഡിയോളജി വിഭാഗം തുടങ്ങി

പെരിന്തൽമണ്ണ: ശസ്ത്രക്രിയ കൂടാതെ അതിനൂതന ഇന്‍റർവെൻഷണൽ രീതികളുപയോഗിച്ച് അസുഖങ്ങൾ സുഖപ്പെടുത്തുന്ന സന്പൂർണ ഇന്‍റർവെൻഷണൽ റേഡിയോളജി വിഭാഗം പെരിന്തൽമണ്ണ കിംസ് അൽശിഫ ഹോസ്പിറ്റലിൽ പ്രവർത്തനമാരംഭിച്ചു. ഗർഭാശയ മുഴകൾ, ശരീരത്തിലെ വിവിധ ഭാഗങ്ങളിലുണ്ടാകുന്ന മുഴ, ഞരന്പുകളിലെ ബ്ലോക്ക് തുടങ്ങിയവ ശസ്ത്രക്രിയ കൂടാതെയും സങ്കീർണമായ ബയോപ്സി ടെസ്റ്റുകളും ഇതിലൂടെ ചെയ്യാവുന്നതാണ്. വേദന രഹിതവും കുറഞ്ഞ ആശുപത്രിവാസവും മറ്റു സങ്കീർണതകൾ ഇല്ലാതെയും രോഗിയെ ചികിത്സിക്കുക വഴി അടുത്ത ദിവസം തന്നെ ദൈനംദിന കാര്യങ്ങളിൽ ഏർപ്പെടാം. ഇതിനായി പ്രത്യേകം സജ്ജമാക്കിയ ഒപി ഡി പ്രൊസീജിയർ റൂം, കാത്ത്ലാബ്, അത്യാധുനിക ഉപകരണങ്ങൾ, ഈ രംഗത്ത് കഴിവ് തെളിയിച്ച നഴ്സിംഗ്, പാരാമെഡിക്കൽ സ്റ്റാഫുകളുടെ സേവനം ലഭ്യമാണ്. അൽശിഫ ഇന്‍റർവെൻഷണൽ റേഡിയോളജി വിഭാഗത്തിന്‍റെ ഉദ്ഘാടനം കിംസ് അൽശിഫ വൈസ് ചെയർമാൻ ഡോ. പി. ഉണ്ണീന്‍റെ അധ്യക്ഷതയിൽ പാണക്കാട് സയ്യിദ് മുനവറലി ശിഹാബ് തങ്ങൾ നിർവഹിച്ചു. നജീബ് കാന്തപുരം എംഎൽഎ ഡെന്‍റൽ എക്സ്-റേ ഒപിജി യൂണിറ്റിന്‍റെ ഉദ്ഘാടനവും നിർവഹിച്ചു. ഡയറക്ടർമാരായ പിലാക്കൽ ഹംസ, അബ്ദുൾ റസാക്ക്, ഡോ.അമീൻ, മുഹമ്മദ് ഫൈസൽ, ബ്ലോക്ക് പഞ്ചായത്ത് പ്രസിഡന്‍റ് എ.കെ. മുസ്തഫ, ഹോസ്പിറ്റൽ സിഇഒ കെ.സി. പ്രിയൻ, മെഡിക്കൽ സൂപ്രണ്ട് ഡോ. യഹിയ, ഡോ.ഇ.ജി.മോഹൻ കുമാർ, ഡോ.ഷാഹുൽ ഹമീദ്, ഡോ.കെ. സാജൻ, ഡോ. സയ്യിദ് മൊയ്നുള്ള, ഡോ.ഫെബിന, ഡോ. മുഹമ്മദ് ഇർഷാദ്, ഡോ. ജിതിൻ ബിനോയ് ജോർജ്, ഡോ. മൊയ്തീൻ ബാബു, ഡോ. അബ്ദുറഹിമാൻ, ഡോ.ഗണേശൻ, ഡോ.സൗമ്യ, ഡോ. മഹസൂമ എന്നിവർ പങ്കെടുത്തു. ഈ വിഭാഗത്തിന്‍റെ സേവനങ്ങൾക്ക് ഫോണ്‍: 8078777710.

മഞ്ചേരിയിൽ വാർഡ് വിഭജനം പൂർത്തിയായി; ഇനി 53 വാർഡുകൾ

മഞ്ചേരി: തദ്ദേശ സ്ഥാപനങ്ങളുടെ വാർഡ് വിഭജനം പൂർത്തിയാക്കി. മഞ്ചേരി നഗരസഭയിൽ ഇനി 53 വാർഡുകൾ. നിലവിൽ 50 വാർഡുകളുള്ള നഗരസഭയിൽ പുതുതായി മൂന്ന് വാർഡുകൾ കൂടി രൂപം കൊണ്ടു. മഞ്ചേരി, പയ്യനാട്, നറുകര എന്നീ മൂന്ന് വില്ലേജുകളിലായാണ് ഓരോ വാർഡുകൾ അധികരിച്ചത്. എട്ട് വാർഡുകളുടെ പേരുകളിൽ മാറ്റം വന്നു. നഗരസഭയിലെ മുഴുവൻ വാർഡുകളുടെയും അതിർത്തി പുനർനിർണയിച്ചു. വീടുകളുടെ എണ്ണം, ജനസംഖ്യ, ഭൂപ്രകൃതി എന്നിവ പരിഗണിച്ചാണ് വിഭജനം നടത്തിയത്. നേരത്തെ കരട് പ്രസിദ്ധീകരിച്ച് ആക്ഷേപങ്ങളും അഭിപ്രായങ്ങളും പരിഗണിച്ചാണ് വാർഡ് വിഭജനം പൂർത്തിയാക്കിയത്. പരാതിയുടെ അടിസ്ഥാനത്തിൽ മൂന്ന് വാർഡുകളുടെ അതിർത്തി മാറ്റി നിർണയിച്ചിരുന്നു. ഇതോടെ പൊന്നാനി നഗരസഭക്ക് പുറമെ മഞ്ചേരിയിലും 53 വാർഡുകളായി. സംസ്ഥാനത്ത് ഏറ്റവും കൂടുതൽ വാർഡുകളുള്ള മുനിസിപ്പാലിറ്റികളാണിത്. 1500 മുതൽ 2000 വരെയാണ് ഓരോ വാർഡിലെയും ജനസംഖ്യ നിശ്ചയിച്ചിട്ടുള്ളത്. 34-ാം വാർഡായ കോടതിപ്പടിയിലാണ് ഏറ്റവും കൂടുതൽ ജനസംഖ്യയുള്ളത്. 1994 പേരാണ് ഈ വാർഡിൽ ഉൾപ്പെട്ടിട്ടുള്ളത്. 47-ാം വാർഡായ പട്ടർകുളത്ത് 1982 പേരും ഇടംപിടിച്ചു. പത്താം വാർഡായ കോഴിക്കാട്ടുകുന്ന്, 23-ാം വാർഡായ കിഴക്കെകുന്ന് എന്നിവിടങ്ങളിലാണ് ഏറ്റവും കുറവ് ജനസംഖ്യ. 1678 പേരാണ് ഈ രണ്ട് വാർഡുകളിലുമുള്ളത്.

കടുവാഭീഷണി: മലയോര സംരക്ഷണ സമിതി പ്രതിഷേധ മാർച്ച് നടത്തി

കാളികാവ്: കാളികാവ് ബ്ലോക്ക് മലയോര സംരക്ഷണ സമിതി ജനകീയ പ്രതിഷേധ റാലിയും പൊതുയോഗവും സംഘടിപ്പിച്ചു. അടക്കാകുണ്ട് റാവുത്തൻകാട്ടിൽ ടാപ്പിംഗ് തൊഴിലാളിയെ അക്രമിച്ച് കൊലപ്പെടുത്തിയ കടുവയെ 15 ദിവസമായിട്ടും പിടികൂടാത്തതിൽ പ്രതിഷേധിച്ചാണ് മലയോര മേഖല സംരക്ഷണ സമിതി പ്രതിഷേധ മാർച്ചും സംഗമവും നടത്തിയത്. കാളികാവ് ബ്ലോക്ക് ഓഫീസ് പരിസരത്ത് നിന്നാരംഭിച്ച മാർച്ച് അങ്ങാടി ബസ് സ്റ്റാൻഡിൽ പ്രതിഷേധ സമ്മേളനത്തോടെ സമാപിച്ചു. കാളികാവ് ബ്ലോക്ക് പഞ്ചായത്ത് പ്രസിഡന്‍റ് കെ.തങ്കമ്മു ഉദ്ഘാടനം ചെയ്തു. വിവിധ മത, സാമൂഹിക, രാഷ്ട്രീയ പ്രവർത്തകർ അണിനിരന്ന പ്രതിഷേധ സംഗമത്തിൽ കിഫ സംസ്ഥാന സെക്രട്ടറി അഡ്വ.അലക്സ് ഒഴുകയിൽ മുഖ്യപ്രഭാഷണം നടത്തി. മലയോര സംരക്ഷണ സമിതി ചെയർമാൻ വാടയിൽ സക്കീർ അധ്യക്ഷത വഹിച്ചു. കാളികാവ് ഗ്രാമപഞ്ചായത്ത് വൈസ് പ്രസിഡന്‍റ് കെ.സുബൈദ, കരുവാരകുണ്ട് ഗ്രാമപഞ്ചായത്ത് വൈസ് പ്രസിഡന്‍റ് മഠത്തിൽ ലത്തീഫ്, ജോജി കെ. അലക്സ്, ജോഷി റാത്തപിള്ളി, റഷീദ് കാരയിൽ, സാജിത, അടക്കാകുണ്ട് സെന്‍റ് ജോർജ് പള്ളി വികാരി ഫാ. നിർമൽ, ഫാറൂഖ് വാഫി, എസ്.കെ. ശശികുമാർ, ശൈലേഷ് പട്ടിക്കാടൻ, സിപിഎം ലോക്കൽ സെക്രട്ടറി രാമചന്ദ്രൻ എന്ന കുട്ടൻ, അഷ്റഫ് ദോസ്ത്, കെ.അബ്ദുറഹ്മാൻ എന്നിവർ പ്രസംഗിച്ചു.

എസ്ഡിപിഐ സ്ഥാനാർഥി പത്രിക നൽകി

നിലന്പൂർ: എസ്ഡിപിഐ സ്ഥാനാർഥി അഡ്വ. സാദിഖ് നടുത്തൊടി നാമനിർദേശ പത്രിക സമർപ്പിച്ചു. ഇന്നലെ ഉച്ചക്ക് മൂന്നിന് സംസ്ഥാന ജനറൽ സെക്രട്ടറി റോയ് അറയ്ക്കൽ, ജില്ലാ പ്രസിഡന്‍റ് അൻവർ പഴഞ്ഞി, തെരഞ്ഞെടുപ്പ് കമ്മിറ്റി ചെയർമാൻ ഉസ്മാൻ കരുളായി എന്നിവർക്കൊപ്പമാണ് ഉപവരണാധികാരി നിലന്പൂർ തഹസിൽദാർ എം.പി. സിന്ധുവിന്‍റെ മുന്പാകെ പത്രിക സമർപ്പിച്ചത്. നിലന്പൂരിന്‍റെ രാഷ്ട്രീയ പശ്ചാത്തലത്തിൽ വോട്ടർമാർ അതൃപ്തരാണെന്നും രാഷ്ട്രീയവും വികസനവും ചർച്ചയായി ഉയർന്നു തുടങ്ങിയത് മണ്ഡലത്തിൽ വിചിന്തനത്തിന് വഴിയൊരുക്കാൻ സാധ്യതയുണ്ടെന്നും റോയ് അറക്കൽ പറഞ്ഞു. സ്ഥാനാർഥി അഡ്വ. സാദിഖ് നടുത്തൊടി ഇന്ന് വിവിധ പഞ്ചായത്തുകളിൽ നടക്കുന്ന കണ്‍വൻഷനുകളിൽ പങ്കെടുക്കും.

തെരഞ്ഞെടുപ്പ് പ്രചാരണം; അനുമതി ’സുവിധ’യിലൂടെ

നിലന്പൂർ: ഉപതെരഞ്ഞെടുപ്പുമായി ബന്ധപ്പെട്ട് വിവിധ അനുമതികൾക്ക് സുവിധ പോർട്ടൽ ഉപയോഗിക്കണമെന്ന് ജില്ലാ കളക്ടർ അറിയിച്ചു. തെരഞ്ഞെടുപ്പ് പൊതുയോഗങ്ങൾ, റാലികൾ, പ്രകടനങ്ങൾ എന്നിവ നടത്തുന്നതിനും ഉച്ചഭാഷിണി, പ്രചാരണത്തിനുള്ള വാഹനങ്ങൾ, ഹെലിപാഡുകൾ എന്നിവ ഉപയോഗിക്കുന്നതിനുള്ള ഏകജാലക ഓണ്‍ലൈൻ സംവിധാനമാണ് സുവിധ. അപേക്ഷ നൽകുന്നതിനായി suvidha.eci.gov. in വെബ്സൈറ്റിൽ രജിസ്റ്റർ ചെയ്ത് പ്രവേശിക്കണം. സുവിധ ആപ് വഴിയും സേവനങ്ങൾ ലഭിക്കും. എല്ലാ അപേക്ഷകളും 48 മണിക്കൂർ മുന്പ് നൽകണം. പോലീസ് സ്റ്റേഷനുകളിൽ നേരിട്ട് അപേക്ഷ നൽകിയാൽ മാത്രമേ മുൻകാലങ്ങളിൽ അനുമതി ലഭിച്ചിരുന്നുള്ളൂ. ഓണ്‍ലൈനായി രജിസ്റ്റർ ചെയ്താൽ വിവിധ ഓഫീസുകളിൽ നിന്ന് നടപടിക്രമങ്ങൾ പൂർത്തിയാക്കി ചുരുങ്ങിയ സമയത്തിനകം അനുമതി ലഭിക്കും. ഏതെങ്കിലും കാരണത്താൽ അപേക്ഷ നിരസിച്ചാൽ ആ വിവരവും പോർട്ടലിൽ അറിയാം. മൊബൈൽ നന്പർ നൽകിയാണ് രജിസ്റ്റർ ചെയ്യേണ്ടത്. അനുമതിക്കായി അപേക്ഷ സമർപ്പിക്കുന്നതിനൊപ്പം തന്നെ അനുബന്ധ രേഖകൾ അപ്ലോഡ് ചെയ്യാനും കഴിയും. അപേക്ഷ നൽകി അൽപ്പ സമയത്തിനകം അനുമതി നൽകിയോ നിരസിച്ചോ എന്ന് വെബ്സൈറ്റിൽ നിന്ന് അറിയാം.

തെരഞ്ഞെടുപ്പ്: ഗ്രീൻ പ്രോട്ടോക്കോൾ പാലിക്കണം

നിലന്പൂർ: നിലന്പൂർ ഉപതെരഞ്ഞെടുപ്പുമായി ബന്ധപ്പെട്ട എല്ലാ പ്രവർത്തനങ്ങളിലും പ്രചാരണങ്ങളിലും ഗ്രീൻ പ്രോട്ടോക്കോൾ കർശനമായി പാലിക്കണമെന്ന് ജില്ലാ തെരഞ്ഞെടുപ്പ് ഉദ്യോഗസ്ഥനായ കളക്ടർ വി.ആർ. വിനോദ് നിർദേശം നൽകി. പ്രചാരണ വസ്തുക്കളിൽ പ്ലാസ്റ്റിക്, പിവിസി തുടങ്ങിയവ അനുവദനീയമല്ലെന്നും പൂർണമായും റീസൈക്കിൾ ചെയ്യാൻ സാധിക്കുന്ന വസ്തുക്കൾ മാത്രമേ ഉപയോഗിക്കാൻ പാടുള്ളൂവെന്നും ഇത് സംബന്ധിച്ച് നടന്ന രാഷ്ട്രീയ പാർട്ടി പ്രതിനിധികളുടെ യോഗത്തിൽ കളക്ടർ നിർദേശം നൽകി. കൊടികൾ, തോരണങ്ങൾ തുടങ്ങിയവ പ്ലാസ്റ്റിക്കോ പിവിസിയോ ആകാൻ പാടില്ല. പരസ്യങ്ങൾ, ബോർഡുകൾ തുടങ്ങിയവ കോട്ടണ്‍, പേപ്പർ, പോളി എത്തിലീൻ തുടങ്ങിയവ കൊണ്ട് നിർമിച്ചത് വേണം. പ്ലാസ്റ്റിക്കിന്‍റെ അംശം ഉള്ളതോ പ്ലാസ്റ്റിക് കോട്ടിംഗ് ഉള്ളതോ ആയ പ്രചാരണ വസ്തുക്കളും ഉപയോഗിക്കരുത്. അതോടൊപ്പം സ്ഥാനാർഥിയുടെയോ രാഷ്ട്രീയ പാർട്ടികളുടെയോ ഓഫീസ് അലങ്കരിക്കുന്നതിനും പ്ലാസ്റ്റിക്, ഫ്ളക്സ് തുടങ്ങിയവ ഉപയോഗിക്കാൻ പാടില്ല. അംഗീകൃതമായി ഉപയോഗിക്കാവുന്ന പ്രചാരണ വസ്തുക്കളിൽ കൃത്യമായ ക്യൂർആർ കോഡ് ഉണ്ടായിരിക്കണം. ഈ കോഡ് സ്കാൻ ചെയ്യുന്പോൾ കേന്ദ്ര മലിനീകരണ നിയന്ത്രണ ബോർഡ് അനുവദിച്ച ലൈസൻസ് ലഭ്യമാകണം. അനുവദനീയമായതല്ലാത്ത പ്രചാരണ വസ്തുക്കൾ, ബോർഡുകൾ, കൊടി തോരണങ്ങൾ തുടങ്ങിയവ എൻഫോഴ്സ്മെന്‍റ് സ്കോഡുകൾ മുഖേന നീക്കം ചെയ്യുമെന്ന് ജില്ലാ കളക്ടർ അറിയിച്ചു. നടപടി സ്വാഗതാർഹമാണെന്നും നിരോധിത വസ്തുക്കൾ ഉപയോഗിച്ചുള്ള പ്രചാരണ സാമഗ്രികൾ ഉപയോഗിക്കില്ലെന്നും യോഗത്തിൽ പങ്കെടുത്ത എല്ലാ രാഷ്ട്രീയ പാർട്ടികളുടെയും പ്രതിനിധികൾ അറിയിച്ചു.

പോളിംഗ് ലൊക്കേഷനുകൾ കണ്ടെത്താൻ ജിഐഎസ് പോർട്ടൽ ’സുതാര്യം’

മലപ്പുറം: പോളിംഗ് ബൂത്തുകളുടെ ലൊക്കേഷനുകൾ ഉൾപ്പെടെയുള്ള വിവരങ്ങൾ എളുപ്പത്തിൽ കണ്ടെത്തുന്നതിനായി സംസ്ഥാന മുഖ്യതെരഞ്ഞെടുപ്പ് ഓഫീസറുടെ കാര്യാലയവും കേരള സ്റ്റേറ്റ് റിമോട്ട് സെൻസിംഗ് ആൻഡ് എൻവയോണ്‍മെന്‍റ് സെന്‍ററും ചേർന്ന് ’സുതാര്യം’ എന്ന പേരിൽ സംയോജിത ജിഐഎസ് പോർട്ടൽ തുടങ്ങി. പോർട്ടലിന്‍റെ ലോഞ്ചിംഗ് മുഖ്യതെരഞ്ഞെടുപ്പ് ഓഫീസർ ഡോ. രത്തൻ യു. കേൽകർ ഓണ്‍ലൈനായി നിർവഹിച്ചു. നിലന്പൂർ ഉപതെരഞ്ഞെടുപ്പിൽ പരീക്ഷണാടിസ്ഥാനത്തിൽ നടപ്പാക്കുന്ന പോർട്ടൽ 2026 നിയമസഭാ തെരഞ്ഞെടുപ്പിൽ സംസ്ഥാന വ്യാപകമായി നടപ്പാക്കാൻ ഉദ്ദേശിക്കുന്നതായി മുഖ്യതെരഞ്ഞെടുപ്പ് ഓഫീസർ പറഞ്ഞു. തെരഞ്ഞെടുപ്പ് പ്രക്രിയയുടെ സുതാര്യവും കാര്യക്ഷമവുമായ നിർവഹണം ഉറപ്പാക്കുകയാണ് പോർട്ടലിന്‍റെ പ്രാഥമിക ലക്ഷ്യം. ബൂത്ത് ലൊക്കേഷനുകൾ, വോട്ടർമാരുടെ എണ്ണം, ബൂത്തിനു സമീപമുള്ള സർക്കാർ ഓഫീസുകളുടെ വിവരം എന്നിവ പൊതുജനങ്ങൾക്ക് എളുപ്പത്തിൽ കണ്ടെത്താൻ കഴിയും. തെരഞ്ഞെടുപ്പ് ഉദ്യോഗസ്ഥർക്കും പൊതുജനങ്ങൾക്കും പോർട്ടൽ ഉപയോഗപ്രദമാകും. കളക്ടർ വി.ആർ. വിനോദ്, നിലന്പൂർ മണ്ഡലം വരണാധികാരി അപൂർവ ത്രിപാഠി എന്നിവരും ഓണ്‍ലൈനായി ചടങ്ങിൽ പങ്കെടുത്തു. താഴെ ലിങ്കും ക്യൂആർ കോഡും ഉപയോഗിച്ച് പോർട്ടലിൽ പ്രവേശിക്കാം. https://ksrec.in/sutharyam.

നിലന്പൂരിൽ റോഡ് ഷോയ്ക്കിടെ നേരിയ സംഘർഷം

നിലന്പൂർ: നിലന്പൂർ ഉപതെരഞ്ഞെടുപ്പിൽ യുഡിഎഫും എൽഡിഎഫും നേർക്കുനേർ പോരാട്ടം തുടങ്ങി. ഇന്നലെ ഇരുമുന്നണികളുടെയും റോഡ് ഷോക്കിടെ നഗരത്തിൽ നേരിയ സംഘർഷമുണ്ടായി. എൽഡിഎഫ് സ്ഥാനാർഥി എം. സ്വരാജിനെ നിലന്പൂർ റെയിൽവേ സ്റ്റേഷനിൽ നിന്ന് സ്വീകരിച്ചാനയിച്ച് എൽഡിഎഫ് നടത്തിയ പ്രകടനവും യുഡിഎഫ് സ്ഥാനാർഥി ആര്യാടൻ ഷൗക്കത്ത് നാമനിർദേശ പത്രിക സമർപ്പിക്കുന്നതിന് മുന്നോടിയായി നടത്തിയ റോഡ്ഷോയും കടന്നുപോയ ശേഷമാണ് നിലന്പൂർ ആശുപത്രി റോഡ് ജംഗ്ഷനിൽ നേരിയ സംഘർഷമുണ്ടായത്. പ്രകടനങ്ങൾ മുന്നോട്ട് പോയ ശേഷവും ജംഗ്ഷനിൽ നിലയുറപ്പിച്ച പ്രവർത്തകർ തമ്മിൽ ഉന്തും തള്ളുമുണ്ടാവുകയായിരുന്നു. ഇതോടെ നിലന്പൂർ സിഐ സുനിൽ പുളിക്കലിന്‍റെ നേതൃത്വത്തിലുള്ള പോലീസെത്തി രംഗം ശാന്തമാക്കി. ഈ സമയം ഇരുവിഭാഗത്തിന്‍റെയും പ്രചാരണ വാഹനങ്ങൾ റോഡിന്‍റെ വശങ്ങളിൽ നിർത്തിയിട്ട് അനൗണ്‍സ് ചെയ്തുകൊണ്ടിരുന്നു. അതിനിടെ എത്തിയ മറ്റു വാഹനങ്ങളും മുന്നോട്ട് പോകാനാകാതെ കുടുങ്ങി. പടക്കം പൊട്ടിച്ചും പൂക്കളെറിഞ്ഞും പ്രവർത്തകർ ഉത്സവാന്തരീക്ഷം തീർക്കുകയും ടൗണിന്‍റെ എല്ലാ ഭാഗങ്ങളിലും ഇരുവിഭാഗം പ്രവർത്തകർ നിറയുകയും ചെയ്തത്തോടെ നിലന്പൂർ നഗരം സ്തംഭിച്ചു. ഇരുമുന്നണികളും വിജയ പ്രതീക്ഷ പുലർത്തുന്ന മണ്ഡലത്തിൽ സംസ്ഥാന നേതാക്കളും സംസ്ഥാനത്തിന്‍റെ വിവിധ ഭാഗങ്ങളിൽ നിന്നുള്ള പ്രവർത്തകരും ക്യാന്പ് ചെയ്യുന്നുണ്ട്. എംപിമാരും എംഎൽഎമാരും ഉൾപ്പെടെ നിരവധി യുഡിഎഫ് നേതാക്കൾ ദിവസങ്ങളായി നിലന്പൂരിൽ താമസമാക്കിയിട്ടുണ്ട്. എൽഡിഎഫ് പ്രചാരണ കണ്‍വൻഷൻ ഉദ്ഘാടനം ചെയ്യാൻ ഇന്ന് മുഖ്യമന്ത്രി എത്തുന്നതോടെ എൽഡിഎഫ് ക്യാന്പ് കൂടുതൽ സജീവമാകും. മന്ത്രിമാരും എംഎൽഎമാരും തെരഞ്ഞെടുപ്പ് കഴിയും വരെ മണ്ഡലത്തിൽ ഉണ്ടാകും.

ദേശീയ പഞ്ചഗുസ്തിയിൽ കിരീടം

മങ്കട: ബംഗളുരൂവിൽ നടന്ന ബിസിഎ ദേശീയ പഞ്ചഗുസ്തി ചാന്പ്യൻഷിപ്പിൽ കേരളത്തിന് കിരീടം. ഷംസു മലപ്പുറമായിരുന്നു (ഷംസുദീൻ വലന്പൂർ) കേരള ടീമിന്‍റെ ക്യാപ്റ്റൻ. മാസ്റ്റേഴ്സ് ചാന്പ്യനായി സുഗീഷിനെ തെരഞ്ഞെടുത്തു. വിവിധ ജില്ലകളിൽ നിന്ന് പങ്കെടുത്ത താരങ്ങൾ 37 സ്വർണവും 26 വെള്ളിയും 17 വെങ്കലവും നേടി. 2017 മുതൽ നിരവധി സ്വർണ മെഡൽ കേരളത്തിന് വേണ്ടി നേടിയ ഷംസുദീൻ പെരിന്തൽമണ്ണ എംഇഎസ് ആർട്സ് ആൻഡ് സയൻസ് കോളജിലെജേർണലിസം വിദ്യാർഥിയായിരുന്നു. പട്ടിക്കാട് അൾട്ടിമേറ്റ് ഫിറ്റ്നസ് സെന്‍ററിൽ മാസ്റ്ററാണ്.

പുലിയെ തുറന്നുവിടാനുള്ള നീക്കത്തിൽ പ്രതിഷേധവുമായി എ.പി. അനിൽകുമാർ

നിലന്പൂർ:വനം വകുപ്പിന്‍റെ കൂട്ടിൽ കുടുങ്ങിയ പുലിയെ കരുളായി വനത്തിൽ വീടാനുള്ള നീക്കത്തിൽ പ്രതിഷേധവുമായി കെപിസിസി വർക്കിംഗ് പ്രസിഡന്‍റ് എ.പി.അനിൽകുമാർ എംഎൽഎ. കരുവാരക്കുണ്ട് സിടി എസ്റ്റേറ്റിൽ നരഭോജി കടുവയെ പിടികൂടാൻ സ്ഥാപിച്ച കൂട്ടിൽ കുടുങ്ങിയ പുലിയെ കരുളായി വനത്തിലെ നെടുങ്കയം വനമേഖലയിൽ വിടാനുള്ള നീക്കം ജനങ്ങളോടുള്ള വെല്ലുവിളിയാണെന്നും അനിൽകുമാർ പറഞ്ഞു. കഴിഞ്ഞ 15 നാണ് ടാപ്പിംഗ് തൊഴിലാളിയായ യുവാവിനെ കടുവ കടിച്ച് കൊന്നത്. ഇതേ തുടർന്ന് കടുവയെ പിടികൂടാൻ വനം വകുപ്പ് സ്ഥാപിച്ച കൂട്ടിലാണ് പുലി കുടങ്ങിയത്. കടുവക്ക് പുറമെ പുലി കൂടി എത്തിയതോടെ ജനങ്ങളുടെ ആശങ്ക വർധിച്ചിരിക്കുകയാണ്. വനംവകുപ്പിന്‍റെ കൂട്ടിൽ കുടങ്ങിയ പുലിയെയാണ് 15 കിലോമീറ്റർ മാത്രം അകലെയുള്ള വനമേഖലയിൽ വിടാൻ ഒരുങ്ങുന്നത്. വനം വകുപ്പിന്‍റെയും വകുപ്പ് മന്ത്രിയുടെയും നിഷേധാത്മക നിലപാടാണ് ഇതിന് പിന്നിലുള്ളത്. തൃക്കലങ്ങോട് നിന്നു പിടികൂടിയ പുലിയെ ഒരു മാസം മുന്പ് കരുളായി വനമേഖലയിൽ വിട്ടിരുന്നു. ഈ പുലിയാണോ കൂട്ടിൽ കുടുങ്ങിയതെന്ന് സംശയമുണ്ട്. അതിനാൽ കൂട്ടിൽ കുടുങ്ങിയ പുലിയെ മൃഗശാലയിലേക്ക് മാറ്റണമെന്നും നിലന്പൂരിൽ നടത്തിയ വാർത്താ സമ്മേളനത്തിൽ അനിൽകുമാർ എംഎൽഎ ആവശ്യപ്പെട്ടു. കൂട്ടിൽ കുടുങ്ങിയപ്പോൾ കാലിന് ഉൾപ്പെടെ ചെറിയ പരിക്കേറ്റ സാഹചര്യത്തിൽ ഡിഎഫ്ഒയുടെ നിർദേശ പ്രകാരം പുലിയെ അമരന്പലത്ത് വനം ആർആർടിയിൽ മൂന്ന് ദിവസം നീരീക്ഷണത്തിൽ വയ്ക്കും. പിന്നീട് മലപ്പുറം ജില്ലക്ക് പുറത്തുള്ള വന മേഖലയിലോ മൃഗശാലയിലോ വിടുകയെന്ന് വനം വകുപ്പ് തീരുമാനിക്കും.

അവധിക്കാലത്ത് കുട്ടികളെ ഡിജിറ്റൽ വായനക്കാരാക്കി ഷഫീഖ് മാഷ്

കുറുവ: അവധിക്കാലത്ത് കുട്ടികളിൽ വായനശീലം ഉറപ്പുവരുത്താൻ ഡിജിറ്റൽ വായന സാമഗ്രി ഒരുക്കി ഷഫീഖ് മാഷ്. കുഞ്ഞുവായന എന്ന പേരിൽ ആയിരത്തോളം വായന സാമഗ്രികളാണ് ഇദ്ദേഹം തയാറാക്കിയത്. ദിനംപ്രതി അയ്യായിരത്തിലധികം വായനക്കാരുണ്ട് മാഷിന്‍റെ ’കുഞ്ഞുവായന’ക്ക്. കുട്ടികളിൽ താൽപര്യമുണ്ടാക്കും വിധമുള്ള കുഞ്ഞുവായനകൾ തയാറാക്കി തന്‍റെ ഇൻസ്റ്റഗ്രാം വഴി പങ്കിടുന്നു. കേരളത്തിനകത്തും പുറത്തുമുള്ള വിദ്യാർഥികൾ, രക്ഷിതാക്കൾ, അധ്യാപകർ ഇതിന്‍റെ ഗുണഭോക്താക്കളാണ്. മലയാള ഭാഷാപഠനത്തിൽ ലേഖന, വായന മേഖലകളിൽ പിന്നാക്കാവസ്ഥ നേരിടുന്ന കുട്ടികൾക്കായാണ് ഇതാദ്യമായി തുടങ്ങിയത്. കുറുവ എയുപി സ്കൂളിലെ അധ്യാപകനാണ് . ഷഫീഖ്. പഠന റീലുകൾ ഒരുക്കി പങ്കിടുന്ന ഈ അധ്യാപകൻ സോഷ്യൽ മീഡിയകളിലെ താരവും അധ്യാപക അവാർഡ് ജേതാവുമാണ്. പരേതനായ തുളുവത്ത് അഹമ്മദ്കുട്ടിയുടെയും സഫിയയുടെയും മകനാണ്. അധ്യാപികയായ സഫ റസ്മ ഭാര്യയും ഷിമാസ് അയ്സൽ മകളുമാണ്.

കാട്ടാന ആക്രമണത്തിൽ പൊറുതിമുട്ടി കോടാലിപ്പൊയിൽ നിവാസികൾ

എടക്കര: കാട്ടാന ആക്രമണത്തിൽ പൊറുതിമുട്ടി കോടാലിപ്പൊയിൽ നിവാസികൾ. കാടിറങ്ങിയ ഒറ്റയാൻ നാശംവിതച്ചു. കേടാലിപ്പൊയിൽ പള്ളിപ്പടി അങ്ങാടിയോട് ചേർന്ന നായ്ക്കത്ത് ഹുസൈന്‍റെ മൂപ്പെത്താറായ വാഴകൾ, തെങ്ങ്, കമുക് എന്നിവയാണ് ഒറ്റയാൻ നശിപ്പിച്ചത്. രാത്രി പന്ത്രണ്ട് മണിയോടെയാണ് ആന കൃഷിയിടത്തിലെത്തിയത്. കഴിഞ്ഞ ദിവസം പള്ളിപ്പടി വടക്കുപാടം ഉമ്മർ ഹാജിയുടെ വീടിനോട് ചേർന്ന മതിൽ തകർക്കുകയും വ്യാപകമായി കൃഷി നശിപ്പിക്കുകയും ചെയ്തിരുന്നു. ചക്കക്കാലമായതോടെ ജനവാസസ കേന്ദ്രങ്ങളിലെ കൃഷിയിടങ്ങളിൽ നിന്ന് കാട്ടാനകൾ ഒഴിയുന്നില്ല. ആനകളെ തടയാൻ വനംവകുപ്പ് നടപടി സ്വീകരിക്കാത്തത് ജനങ്ങളെ ആശങ്കയിലാഴ്ത്തിയിരിക്കുകയാണ്. സന്ധ്യയായാൽ വീടിന് പുറത്തിറങ്ങാൻ പറ്റാത്ത അവസ്ഥയിലാണ് കോടാലിപ്പൊയിൽ നിവാസികൾ.

പികെസ് ധർണ നടത്തി

പെരിന്തൽമണ്ണ: പട്ടികജാതി ക്ഷേമ സമിതി പ്രവർത്തകർ പെരിന്തൽമണ്ണ താലൂക്ക് ഓഫീസ് മാർച്ചും ധർണയും നടത്തി. പട്ടികജാതി വിഭാഗക്കാരുടെ ജാതി തെളിയിക്കുന്ന സർട്ടിഫിക്കറ്റ് നൽകുന്നതിൽ ചില ഉദ്യോഗസ്ഥർ അടിസ്ഥാനരഹിതമായ കാരണങ്ങൾ കാണിച്ച് സർട്ടിഫിക്കറ്റ് നിഷേധിക്കുന്നു. ഇതിനെതിരെയാണ് പികഐസ് പ്രവർത്തകർ പ്രതിഷേധിച്ചത്. ധർണാ സമരം പികഐസ് ജില്ലാ ജോയിന്‍റ് സെക്രട്ടറി യു. അജയൻ ഉദ്ഘാടനം ചെയ്തു. ജില്ലാ കമ്മിറ്റിയംഗം കെ. ഷാജി അധ്യക്ഷനായിരുന്നു. ടി.പി. വിജയൻ, ടി.പി. രാമാനുജൻ, എം. ബാബു എന്നിവർ പ്രസംഗിച്ചു.

പെരിന്തൽമണ്ണയിൽ എലിപ്പനി ഗുളിക വിതരണവും ബോധവത്ക്കരണവും

പെരിന്തൽമണ്ണ: പെരിന്തൽമണ്ണ ജില്ലാ ആശുപത്രിയിലെ ശുചീകരണ തൊഴിലാളികൾക്ക് എലിപ്പനി രോഗ പ്രതിരോധ ഗുളികയായ ഡോക്സി സൈക്ലിൻ, ജനറൽ മെഡിസിൻ വിഭാഗംമേധാവി ഡോ. നോബി നെൽസണ്‍ വിതരണം ചെയ്ത് പരിപാടി ഉദ്ഘാടനം ചെയ്തു. മഴക്കാലത്ത് എലിപ്പനി രോഗ സാധ്യത കൂടുതലാണെന്നും ശുചീകരണ പ്രവർത്തനങ്ങളിൽ ഏർപ്പെടുന്നവർ ആഴ്ചയിലൊരിക്കൽ 100 മില്ലിഗ്രമിന്‍റെ രണ്ട് സോക്സി സൈക്ലിൻ ഗുളിക (ആഹാരത്തിന് ശേഷം) കഴിക്കണമെന്നും മലിനജലവുമായി സന്പർക്കത്തിൽ ഏർപ്പെടുന്നവർ വെള്ളം കയറാത്ത ഗംബൂട്ടുകൾ, കണ്ണടകൾ, കട്ടികൂടിയ തൊപ്പികൾ, കൈയുറകൾ ധരിക്കണമെന്നും ആവശ്യപ്പെട്ടു. പനി, തലവേദന, ക്ഷീണം, ശക്തമായ ശരീരവേദന, നടുവേദന, കാൽവണ്ണയിലെ പേശിവേദന, കണ്ണിനു മഞ്ഞനിറം അല്ലെങ്കിൽ ചുവപ്പുനിറം തുടങ്ങിയ ലക്ഷണങ്ങൾ അനുഭവപ്പെട്ടാൽ എലിപ്പനിയാണെന്ന് സംശയിക്കുകയും ഡോക്ടറെ സമീപിക്കുകയും വേണം. ഡോ.നസറുദ്ദീൻ ബോധവത്ക്കരണ ക്ലാസെടുത്തു. നഴ്സിംഗ് സൂപ്രണ്ട് ഇൻചാർജ് സുജാത, സീനിയർ നഴ്സിംഗ് ഓഫീസർ റോക്സി വർഗീസ്,ഹെൽത്ത് ഇൻസ്പെക്ടർ സെന്തിൽകുമാർ, എച്ച്ഐസി ഇൻചാർജ് സീനിയർ നഴ്സിംഗ് ഓഫീസർ ഷീബ എന്നിവർ പ്രസംഗിച്ചു.

വുഷു ചാന്പ്യൻഷിപ്പിൽ ഐഎസ്കെയും വാഴക്കാട് വുഷു ക്ലബും ജേതാക്കൾ

പുലാമന്തോൾ : ജില്ലാ ജൂണിയർ വുഷു ചാന്പ്യൻഷിപ്പ് ഐഎസ്കെ പുലാമന്തോളിൽ സംഘടിപ്പിച്ചു. ജില്ലയിലെ വിവിധ ക്ലബ്ലുകളിൽ നിന്ന് നൂറോളം വിദ്യാർഥികൾ പങ്കെടുത്തു. തൗലു വിഭാഗത്തിൽ 85 പോയിന്‍റുമായി ഐഎസ്കെ പുലാമന്തോൾ ജേതാക്കളായി. 21, 8 പോയിന്‍റുകളുമായി ആസ്ട്രിയ വുഷു ക്ലബും വൈറ്റ് ഡ്രാഗണ്‍ മലപ്പുറവും രണ്ടും മൂന്നും സ്ഥാനം നേടി. സാൻഷു വിഭാഗത്തിൽ വാഴക്കാട് വുഷു ക്ലബ് 42 പോയിന്‍റുമായി വിജയികളായി. 26,19 പോയിന്‍റുകളുമായി പൂക്കുളത്തൂർ വുഷു ക്ലബും വാഴയൂർ വുഷു ക്ലബും രണ്ടും മൂന്നും സ്ഥാനം സ്വന്തമാക്കി. ജില്ലാ സ്പോർട്സ് കൗണ്‍സിൽ അംഗം സുരേഷ് ഉദ്ഘാടനം ചെയ്തു. ജില്ലാ വുഷു അസോസിയേഷൻ പ്രസിഡന്‍റ് മുഹമ്മദലി ഐഎസ്കെ, ഫിറോസ് എന്നിവർ പ്രസംഗിച്ചു. ജൂണ്‍ രണ്ട്, മൂന്ന് തിയതികളിൽ തൃശൂരിൽ നടക്കുന്ന സംസ്ഥാന വുഷു ചാന്പ്യൻഷിപ്പിൽ ഈ വിജയികളെ പങ്കെടുപ്പിക്കുമെന്ന് അസോസിയേഷൻ സെക്രട്ടറി പി.എൻ. സുമേഷ് അറിയിച്ചു.

എടപ്പാളിൽ മണ്ണിടിഞ്ഞു വീണ് അപകടം

ചങ്ങരംകുളം: കനത്ത മഴയിൽ എടപ്പാളിൽ മണ്ണിടിഞ്ഞ് വീണ് അപകടം. പൊന്നാനി റോഡിലെ സ്വകാര്യ കെട്ടിടത്തിന് പിറകിലാണ് മണ്ണിടിഞ്ഞ് വീണത്. കെട്ടിടത്തിന് പിറകിൽ ഉയർന്നു നിൽക്കുന്ന സ്ഥലത്ത് നിന്നാണ് കൂറ്റൻ മണ്‍കൂന താഴേക്ക് പതിച്ചത്. അപകട സമയത്ത് താഴെ നിന്നവർ ഓടി മാറിയതിനാൽദുരന്തമൊഴിവായി. സമീപത്ത് നിർത്തിയിട്ട കാറുകൾക്ക് ചെറിയ രീതിയിൽ കേടുപാടുകൾ സംഭവിച്ചു. കഴിഞ്ഞ വർഷവും ഇതേ സ്ഥലത്ത് മണ്ണിടിഞ്ഞിരുന്നു. നിർത്താതെ പെയ്യുന്ന മഴ ആശങ്ക സൃഷ്ടിക്കുന്നുണ്ട്.

യുവതിയെ കഴുത്തറുത്ത് കൊലപ്പെടുത്തിയ സംഭവം : മഞ്ചേരി കോടതിയിൽ 12 വർഷത്തിന് ശേഷം വധശിക്ഷാവിധി

മഞ്ചേരി: യുവതിയെ കശാപ്പുശാലയിലെത്തിച്ച് കഴുത്തറുത്തു കൊലപ്പെടുത്തിയ ഭർത്താവിനെ മഞ്ചേരി അഡീഷണൽ ജില്ലാ സെഷൻസ് കോടതി (രണ്ട്) മരണം വരെ തൂക്കി കൊല്ലാൻ വിധിച്ച സംഭവം മഞ്ചേരി കോടതിയിൽ ഒരു വ്യാഴവട്ടക്കാലത്തിന്‍റെ ഇടവേളയെടുത്ത് വിധിക്കുന്ന വധശിക്ഷയാണ്. പരപ്പനങ്ങാടി ചുടലപ്പറന്പ് കൊടക്കാട് നെടുവ പഴയകത്ത് നജ്ബുദ്ദീൻ എന്ന ബാബു (44) വിനെയാണ് ജഡ്ജ് എ.വി ടെല്ലസ് ശിക്ഷിച്ചത്. 2017 ജൂലൈ 23നായിരുന്നു കേസിനാസ്പദമായ സംഭവം. സംശയം മൂലം ആദ്യഭാര്യയായ റഹീന(30)യെ പ്രതിയുടെ ഉടമസ്ഥതയിൽ അഞ്ചപ്പുര ബീച്ച് റോഡിലുള്ള ഇറച്ചിക്കടയിൽ കൊണ്ടുപോയി കഴുത്തറുത്ത് കൊലപ്പെടുത്തുകയായിരുന്നു. 12 വർഷം മുന്പ് ജില്ലാ സെഷൻസ് ജഡ്ജിയായിരുന്ന പി.കെ. ഹനീഫയായിരുന്നു മറ്റൊരു കേസിൽ ഇതിനുമുന്പ് വധശിക്ഷ വിധിച്ചത്. മകളുടെ കൂട്ടുകാരിയായ ഒന്പതുകാരിയെ ബലാൽസംഗം ചെയ്തു കൊലപ്പെടുത്തിയ പൂക്കോട്ടുംപാടം ചുള്ളിയോട് പൊന്നാംകല്ല് പാലപ്പറന്പത്ത് അബ്ദുൾനാസറിനെ മരണം വരെ തൂക്കി കൊല്ലാനായിരുന്നു . വിധിച്ചത്. 2013 ജൂലൈ 31നായിരുന്നു വിധി. വിധിക്കെതിരേ പ്രതി അപ്പീൽ നൽകിയെങ്കിലും 2018 ഫെബ്രുവരി 28ന് ഹൈക്കോടതിയും തുടർന്ന് സുപ്രീം കോടതിയും ശിക്ഷ ശരിവയ്ക്കുകയായിരുന്നു. ചാരിത്യ്രശുദ്ധിയിൽ സംശയം തോന്നിയ ഭാര്യ സുചിത്രയെ ഉളികൊണ്ട് കുത്തികൊലപ്പെടുത്തിയ കേസിൽ പ്രതിയായ ഭർത്താവ് വണ്ടൂർ കാരാട് കേലേന്പാടം വെള്ളില രാമചന്ദ്രനെ (40) മഞ്ചേരി അഡീഷണൽ ജില്ലാ സെഷൻസ് ജഡ്ജ് പിഎസ്. നസീർ അഹമ്മദ് മരണം വരെ തൂക്കി കൊല്ലാൻ വിധിച്ചിരുന്നു. 2010 ഒക്ടോബർ ഏഴിനായിരുന്നു ഈ വിധി. 2008 സെപ്റ്റംബർ 25ന് ഗർഭിണിയെ വെട്ടിക്കൊന്ന കേസിലെ പ്രതിക്ക് വധശിക്ഷ വിധിച്ചിരുന്നു. കൽപകഞ്ചേരി കൻമനം മയ്യേരി കുഞ്ഞിമൊയ്തീൻ എന്ന ബാബുവിന്‍റെ ഭാര്യ ഖദീജ (36)യെ വെട്ടി കൊലപ്പെടുത്തിയ കേസിൽ മഞ്ചേരി അഡീഷണൽ ജില്ലാ സെഷൻസ് കോടതി (ഒന്ന്) ആണ് പ്രതി മേനോത്തിൽ മോഹൻദാസ് എന്ന വിനീഷി (22)നെ മരണം വരെ തൂക്കി കൊല്ലാൻ ശിക്ഷിച്ചത്. മൂന്ന് കേസുകളിലും കൊല്ലപ്പെട്ടത് വനിതകളായിരുന്നുവെന്നതാണ് മറ്റൊരു പ്രത്യേകത.

ബിജുമോന്‍റെ സർവീസ് ജീവിതത്തിലെ ഫൈനൽ വിസിൽ ഇന്ന്

മലപ്പുറം: കൃത്യനിർവഹണത്തിനിടയിലും കാൽപ്പന്തുകളിയുടെ കടിഞ്ഞാണ്‍ കൈവിടാതിരുന്ന ജില്ലാ പിഎസ്‌സി ഓഫീസർ എം.എ.ബിജുമോന്‍റെ സർവീസ് ജീവിതത്തിലെ ഫൈനൽ വിസിൽ ഇന്ന് മുഴുങ്ങും. സന്തോഷ് ട്രോഫിയിൽ ഉൾപ്പെടെ ഒട്ടേറെ ഫുട്ബോൾ മത്സരങ്ങൾ നിയന്ത്രിച്ചിട്ടുള്ള നാഷണൽ റഫറി കൂടിയായ ബിജുമോൻ ഇന്ന് ഒൗദ്യോഗിക ജീവിതത്തിൽ നിന്ന് വിരമിക്കുകയാണ്. ഇക്കാലമത്രയും കാൽപ്പന്തു കളിയെ കൂടെ കൂട്ടിയ ഇദ്ദേഹത്തിന് സഹപ്രവർത്തകർ ഉചിതമായ യാത്രയയപ്പും നൽകി. പെരുമഴയത്ത് അദ്ദേഹത്തോടൊപ്പം മലപ്പുറം കൂട്ടിലങ്ങാടി ടർഫ് മൈതാനത്ത് പന്തു കളിച്ചായിരുന്നു യാത്രയയപ്പ്. 1997 ഏപ്രിൽ രണ്ടിന് പിഎസ്‌സിയിൽ അസിസ്റ്റന്‍റായി ജോലിയിൽ പ്രവേശിച്ച എം.എ.ബിജുമോൻ, ഡെപ്യൂട്ടി സെക്രട്ടറി റാങ്കിലിരുന്നാണ് സർക്കാർ സർവീസിൽ നിന്ന് ബൂട്ടഴിക്കുന്നത്. അതും കാൽപ്പന്തു കളിയുടെ ഹൃദയ ഭൂമികയായ മലപ്പുറത്ത് നിന്ന്. ഇരുപത്തെട്ടു വർഷം നീണ്ട സേവനകാലത്തിനിടെ കേരള പബ്ലിക് സർവീസ് കമ്മീഷന്‍റെ തിരുവനന്തപുരത്തെ ആസ്ഥാന ഓഫീസിലും പാലക്കാട്, തൃശൂർ, വയനാട് ജില്ലാ ഓഫീസുകളിലും ബിജുമോൻ ജോലി ചെയ്തു. 2024 ഏപ്രിലിലാണ് മലപ്പുറത്ത് ചുമതലയേൽക്കുന്നത്. പഠനകാലത്ത് പാലക്കാട് ഗവണ്‍മെന്‍റ് വിക്ടോറിയ കോളജ് ടീമിനു വേണ്ടിയും ജില്ലാ എ ഡിവിഷൻ ചാന്പ്യൻമാരായ പാലക്കാട് അത് ലറ്റിക്സ് ആൻഡ് ഫുട്ബോൾ ക്ലബിനു വേണ്ടിയും ഒട്ടേറെ മത്സരങ്ങൾ കളിച്ചിട്ടുള്ള അദ്ദേഹം 1993 ലാണ് റഫറിയിംഗ് രംഗത്തെത്തുന്നത്. ഓൾ ഇന്ത്യ ഫുട്ബോൾ ഫെഡറേഷന്‍റെ ക്ലാസ് ഫോർ റഫറിയായിട്ടായിരുന്നു തുടക്കം. 2005 ൽ നാഷണൽ റാങ്കിംഗ് കരസ്ഥമാക്കി 2013 വരെ റഫറിയിംഗ് രംഗത്ത് തുടർന്നു. ഇക്കാലയളവിൽ ഒട്ടേറെ സംസ്ഥാന, ദേശീയ മത്സരങ്ങൾ നിയന്ത്രിച്ചു. 2006 ൽ കോഴിക്കോടും 2012 ൽ തമിഴ്നാട്ടിലും നടന്ന സന്തോഷ് ട്രോഫി മത്സരങ്ങൾ നിയന്ത്രിക്കാനും അവസരം ലഭിച്ചു. ഐ ലീഗ് ജൂണിയർ ചാന്പ്യൻഷിപ്പിലും വിമണ്‍സ് സീനിയർ ചാന്പ്യൻഷിപ്പിലുമെല്ലാം ഇദ്ദേഹം മത്സരങ്ങൾ നിയന്ത്രിച്ചിട്ടുണ്ട്. പിന്നീട് റഫറിയിംഗ് രംഗത്തു നിന്ന് പിൻമാറിയെങ്കിലും ഇപ്പോഴും വെറ്ററൻസ് ഫുട്ബോൾ രംഗത്ത് സജീവമാണ്. പാലക്കാട് ജില്ലയിലെ മണ്ണാർക്കാട് സ്വദേശിയാണ് ബിജുമോൻ. പാലക്കാട് കൊഴിഞ്ഞന്പാറ സെന്‍റ് പോൾസ് ഹയർ സെക്കൻഡറി സ്കൂൾ അധ്യാപിക ജോളി മാനുവൽ ആണ് ഭാര്യ. മക്കൾ: ക്രിസ്റ്റി എം. അഗസ്റ്റിൻ, അലക്സ് അഗസ്റ്റിൻ (ഇരുവരും വിദ്യാർഥികൾ).

ജനങ്ങൾ യുഡിഎഫിനൊപ്പം: ഷാഫി പറന്പിൽ

നിലന്പൂർ: നിലന്പൂർ ഉപതെരഞ്ഞെടുപ്പിൽ ജനങ്ങൾ യുഡിഎഫിനൊപ്പമെന്ന് കെപിസിസി വർക്കിംഗ് പ്രസിഡന്‍റ് ഷാഫി പറന്പിൽ എംപി. മാധ്യമ പ്രവർത്തകരുടെ ചോദ്യങ്ങളോട് പ്രതികരിക്കുകയായിരുന്നു അദ്ദേഹം. എൽഡിഎഫ് സ്ഥാനാർഥി ആരാണെന്നത് യുഡിഎഫിനെ ബാധിക്കുന്ന വിഷയമല്ല. പിണറായി സർക്കാരിനെതിരെ കേരളത്തിലെ ജനങ്ങൾ ആഗ്രഹിക്കുന്ന ഫലം നിലന്പൂരിൽ ഉണ്ടാകും. ആശാ വർക്കർമാരുടെ സമരം, ദേശീയപാതയുടെ തകർച്ച, വന്യമൃഗശല്യം എല്ലാം ഈ തെരഞ്ഞെടുപ്പിൽ ജനങ്ങൾ വിലയിരുത്തുമെന്നും ഷാഫി പറന്പിൽ പറഞ്ഞു. രാഷ്ട്രീയ പോരാട്ടം നടന്നാൽ അതിന്‍റെ ഏറ്റവും വലിയ ഗുണം ലഭിക്കുക യുഡിഎഫിനാണ്. സിപിഎം പ്രവർത്തകർക്കു പോലും അംഗീകരിക്കാൻ കഴിയാത്ത അഴിമതി നാട്ടിൽ നടക്കുന്നുണ്ടെന്നും പിണറായി ഭരണം മാറണമെന്ന്് ആഗ്രഹിക്കുന്ന സിപിഎമ്മുകാർ പോലുമുണ്ട്. അവർ ഇക്കുറി യുഡിഎഫ് സ്ഥാനാർഥിക്ക് വോട്ടുചെയ്യും. പി.വി. അൻവർ യുഡിഎഫിനൊപ്പം ഉണ്ടാകുമെന്ന പ്രതീക്ഷയുണ്ടെന്നും അദ്ദേഹം പറഞ്ഞു. പിണറായിസത്തിനെതിരെയുള്ള പോരാട്ടത്തിൽ എല്ലാവരും ഉണ്ടാകും. സിപിഎമ്മിന് അവരുടെ സ്ഥാനാർഥിയെ നിർത്താനുള്ള സ്വാതന്ത്ര്യമുണ്ടെന്നും ഷാഫി പറന്പിൽ പറഞ്ഞു.

തെരഞ്ഞെടുപ്പ് പ്രവർത്തനങ്ങൾ അവലോകനം ചെയ്തു

മലപ്പുറം: ജില്ലയിലെ തെരഞ്ഞെടുപ്പ് പ്രവർത്തനങ്ങൾ അഡീഷണൽ ചീഫ് ഇലക്ട്രൽ ഓഫീസറുടെ നേതൃത്വത്തിൽ അവലോകനം ചെയ്തു. വോട്ടർ പട്ടിക പ്രസിദ്ധീകരണം, തെരഞ്ഞെടുപ്പ് പ്രവർത്തനങ്ങൾ, തെരഞ്ഞെടുപ്പ് ഉദ്യോഗസ്ഥരുടെ ചുമതലകൾ എന്നിവ സംബന്ധിച്ച് യോഗത്തിൽ ചർച്ച ചെയ്തു. ജില്ലാ തെരഞ്ഞെടുപ്പ് ഉദ്യോഗസ്ഥരുടെ പ്രവർത്തന രീതി, പാലിക്കേണ്ട കാര്യങ്ങൾ എന്നിവയും സംഘം വിലയിരുത്തി. നിലന്പൂർ ഉപതെരഞ്ഞെടുപ്പുമായി ബന്ധപ്പെട്ട പ്രവർത്തനങ്ങളും സംഘം വിലയിരുത്തി. അഡീഷണൽ മുഖ്യതെരഞ്ഞെടുപ്പ് ഓഫീസർ പി. കൃഷ്ണദാസൻ, സെക്ഷൻ ഓഫീസർ ആർ.വി. ശിവലാൽ, അസിസ്റ്റന്‍റ് സെക്ഷൻ ഓഫീസർ പി. ഉദയകുമാർ, അസിസ്റ്റന്‍റ് കെ.വി. ശിവപ്രസാദ്, ടെക്നിക്കൽ അസിസ്റ്റന്‍റ് ബിജി എന്നിവരാണ് സംഘത്തിലുണ്ടായിരുന്നത്. മലപ്പുറം കളക്ടറേറ്റ് കോണ്‍ഫറൻസ് ഹാളിൽ നടന്ന ചടങ്ങിൽ സബ് കളക്ടർ ദിലീപ് കെ. കൈനിക്കര, ഇലക്ഷൻ ഡെപ്യൂട്ടി കളക്ടർ സി.ആർ. ജയന്തി എന്നിവർ സംസാരിച്ചു. ഓഡിറ്റോറിയങ്ങളുടെ ബുക്കിംഗ് മുൻകൂട്ടി അറിയിക്കണം നിലന്പൂർ: നിലന്പൂർ ഉപതെരഞ്ഞെടുപ്പുമായി ബന്ധപ്പെട്ട് സ്ഥാനാർഥികളോ ഏജന്‍റുമാരോ രാഷ്ട്രീയ കക്ഷികളോ ഓഡിറ്റോറിയങ്ങൾ, കമ്മ്യൂണിറ്റി ഹാളുകൾ എന്നിവ ബുക്ക് ചെയ്യുന്ന പക്ഷം പരിപാടിയുടെ തിയതി, സമയം എന്നിവ മാനേജർമാർ തെരഞ്ഞെടുപ്പ് ഉപവരണാധികാരിയായ നിലന്പൂർ തഹസിൽദാരുടെ കാര്യാലയത്തിൽ ക്യാന്പ് ചെയ്തിട്ടുള്ള മണ്ഡലത്തിന്‍റെ ചുമതലയുളള അസിസ്റ്റന്‍റ് എക്സ്പെൻഡിച്ചർ ഒബ്സർവറെ രേഖാമൂലം അറിയിക്കണം. തെരഞ്ഞെടുപ്പ് കാലയളവിലുള്ള മറ്റ് ബുക്കിംഗ് വിവരങ്ങളും അറിയിക്കണം. വീഴ്ച വരുത്തുന്ന പക്ഷം 1951 ലെ ജനപ്രാതിനിധ്യ നിയമ പ്രകാരമുള്ള നടപടികൾ സ്വീകരിക്കുമെന്ന് ജില്ലാ ഇലക്ഷൻ ഓഫീസറായ കളക്ടർ അറിയിച്ചു.

നിലന്പൂരിൽ സിപിഎം പാർട്ടി ചിഹ്നത്തിൽ മത്സരിക്കുന്നത് 19 വർഷത്തിന് ശേഷം

നിലന്പൂർ:നിലന്പൂരിൽ സിപിഎം പാർട്ടി ചിഹ്നത്തിൽ മത്സരിക്കുന്നത് 19 വർഷത്തിന് ശേഷം. 2006 ൽ ഡിവൈഎഫ്ഐ അഖിലേന്ത്യ പ്രസിഡന്‍റ് പി.ശ്രീരാമകൃഷ്ണനാണ് പാർട്ടി ചിഹ്നത്തിൽ അവസാനമായി മത്സരിച്ചത്. അന്ന് യുഡിഎഫ് സ്ഥാനാർഥി ആര്യാടൻ മുഹമ്മദിനോട് കനത്ത പരാജയമാണ് ഏറ്റുവാങ്ങിയത്. 18000 ത്തിലേറെ വോട്ടുകൾക്കാണ് പരാജയപ്പെട്ടത്. പിന്നീട് സിപിഎം പൊതുസ്വതന്ത്രരുടെ പിന്നാലെ പോകുന്ന കാഴ്ചയാണ് കണ്ടത്. 2011 ൽ പ്രഫ. എം. തോമസ് മാത്യുവിനെയും 2016ലും 2011ലും പി.വി. അൻവറിനെയും മത്സരിപ്പിക്കുകയായിരുന്നു. 1987 ൽ ദേവാസ് പൊറ്റെക്കാട് സിപിഎം സ്ഥാനാർഥിയായി മത്സരിച്ച് പരാജയപ്പെട്ടതിനെ തുടർന്ന് 19 വർഷത്തിന് ശേഷമാണ് 2006 ൽ ശ്രീരാമകൃഷ്ണനെ പരീക്ഷിച്ചത്. ചരിത്ര നിയോഗം പോലെ വീണ്ടുമൊരു 19 വർഷത്തിന് ശേഷം എം. സ്വരാജിനെ പാർട്ടി ചിഹ്നത്തിൽ രംഗത്തിറക്കുന്പോൾ കുഞ്ഞാലിക്ക് ശേഷം പാർട്ടി ചിഹ്നത്തിൽ വിജയിപ്പിച്ച് ഒരംഗത്തെ നിയമസഭയിലേക്ക് അയക്കാമെന്ന പ്രതീക്ഷയിലാണ്് സിപിഎം. 1969-ൽ കുഞ്ഞാലി മരിച്ച 56 വർഷമായിട്ടും പിന്നീട് സിപിഎമ്മിന് നിലന്പൂരിൽ പാർട്ടി ചിഹ്നത്തിൽ ഒരാളെ വിജയിപ്പിക്കാനായിട്ടില്ല. സ്വരാജ് വെല്ലുവിളിയാകില്ല: എ.പി. അനിൽകുമാർ നിലന്പൂർ:പിണറായിസത്തിനെതിരെയുള്ള പോരാട്ടത്തിൽ പി.വി. അൻവർ ഒപ്പം ഉണ്ടാകുമെന്ന് കെപിസിസി വർക്കിംഗ് പ്രസിഡന്‍റ് എ.പി.അനിൽകുമാർ എംഎൽഎ. എം.സ്വരാജിന്‍റെ സ്ഥാനാർഥിത്വം യുഡിഎഫിന് വെല്ലുവിളിയാകില്ലെന്നും അനിൽകുമാർ നിലന്പൂരിൽ നടത്തിയ വാർത്താ സമ്മേളനത്തിൽ പറഞ്ഞു. അൻവർ എംഎൽഎ സ്ഥാനം രാജിവച്ചത് പിണറായി സർക്കാരിനെതിരെയുള്ള പോരാട്ടത്തിനാണ്. വന്യമ്യഗശല്യം, മലപ്പുറം ജില്ലയിലെ ന്യൂനപക്ഷങ്ങളോടുള്ള അവഗണന തുടങ്ങിയ വിഷയങ്ങളാണ് അൻവർ ഉയർത്തിയത്. അതിനാൽ യുഡിഎഫും അൻവറും ഒന്നിച്ചായിരിക്കും ഉപതെരഞ്ഞെടുപ്പ് പോരാട്ടത്തിൽ ഉണ്ടാവുക. പി.വി. അൻവറുമായി ഇതിനകം ആശയവിനമയം നടത്തി കഴിഞ്ഞു എന്ന സൂചനയും അനിൽകുമാർ നൽകി. രണ്ടു മാസമായി സ്ഥാനാർഥിക്കായി സിപിഎം തെരച്ചിലിലായിരുന്നു. സിപിഎം സമീപിച്ച നേതാക്കളുടെ പേരുകൾ എഴുതാൻ തന്നെ ഒരു ബുക്ക് വേണ്ടി വരും. മത്സരിക്കാനില്ലെന്ന് പറഞ്ഞ സ്വരാജിനെ തന്നെ മത്സരിപ്പിക്കേണ്ടി വന്നു എന്നത് വ്യക്തമായിരിക്കുകയാണ്. വന്യമ്യഗശല്യം, ദേശീയപാത തകർച്ച തുടങ്ങിയ ജനകീയ വിഷയങ്ങൾ ഉയർത്തിയാകും യുഡിഎഫ് പ്രചാരണം. നിലന്പൂർ മണ്ഡലത്തിൽ ചരിത്ര ഭൂരിപക്ഷത്തോടെ യുഡിഎഫ് ജയിക്കുമെന്നും എ.പി. അനിൽകുമാർ പറഞ്ഞു ആര്യാടൻ ഷൗക്കത്തിന്‍റെ പത്രിക സമർപ്പണം ഇന്ന് നിലന്പൂർ: നിലന്പൂർ ഉപതെരഞ്ഞെടുപ്പിലെ യുഡിഎഫ് സ്ഥാനാർഥി ആര്യാടൻ ഷൗക്കത്തിന്‍റെ നാമനിർദേശ പത്രിക സമർപ്പണം ഇന്ന്. രാവിലെ 11ന് നിലന്പൂരിൽ നിന്ന് ചന്തക്കുന്നിലേക്ക് റോഡ് ഷോ നടത്തിയ ശേഷം നിലന്പൂർ നിയോജകമണ്ഡലത്തിലെ ഉപവരണാധികാരിയായ തഹസിൽദാർ എം.പി. സിന്ധു മുന്പാകെ പത്രിക സമർപ്പിക്കും.

ജില്ലയിൽ വീണ്ടും മഴക്കെടുതി; കൂടുതൽ നാശനഷ്ടം

മഞ്ചേരി: ഏറനാട് താലൂക്ക് പരിധിയില്‍ ഇന്നലെയും മഴക്കെടുതികള്‍ തുടർക്കഥ. മരംവീണ് വീടുകള്‍ ഭാഗികമായി തകര്‍ന്നും കിണറിടിഞ്ഞും നാശനഷ്ടം സംഭവിച്ചു. ചെമ്പ്രശ്ശേരി വില്ലേജില്‍ ആര്‍പ്പിനിക്കുന്ന് കണിയംപാറ ജമീലയുടെ വീട്ടില്‍ കിണര്‍ ഇടിഞ്ഞു താഴ്ന്നു. ആളപായമില്ല. മഞ്ചേരിയില്‍ പുത്തന്‍പുരക്കല്‍ പി.പി. ശ്രീകൃഷ്ണന്‍റെ വീട്ടിലേക്ക് മതിലിടിഞ്ഞ് വീണ് വീടിന് ഭാഗികമായി നാശം സംഭവിച്ചു. കുന്നത്തുകൂഴിയില്‍ വേലുക്കുട്ടിയുടെ വീടിന്‍റെ ചുറ്റുമതില്‍ ഭാഗികമായി തകര്‍ന്ന് റോഡിലേക്ക് വീണു. തൃക്കലങ്ങോട് കുതിരാടത്ത് അമരക്കാട്ടില്‍ കൃഷ്ണന്‍റെ വീടിനു മുകളില്‍ തെങ്ങ് വീണ് ഭാഗികമായ നാശനഷ്ടം ഉണ്ടായി. പൂക്കോട്ടൂര്‍ മൂച്ചിക്കലില്‍ സുബ്രമണ്യന്‍റെ വീടിനുമുകളില്‍ തെങ്ങുവീണ് ഓടുകള്‍ തകര്‍ന്നു. ചെമ്പ്രശേരിയില്‍ രുഗ്മിണി പള്ളിപുറത്ത്, മൂത്തേടത്ത് കരുണാകരന്‍ എന്നിവരുടെ വീടിനുമുകളില്‍ മരം വീണ് ഭാഗിക ഭവനനാശം സംഭവിച്ചു. മലപ്പുറത്ത് സോപാനം വീട്ടില്‍ കെ. പ്രവീണിന്‍റെ വീടിനു പിന്നില്‍ ഉരുളന്‍ കല്ലുകള്‍ വീണു. സ്ഥലത്ത് മണ്ണിടിയാന്‍ സാധ്യതയുള്ളതിനാല്‍ സ്ഥലപരിശോധന നടത്തി നഗരസഭക്ക് വേണ്ട നിര്‍ദേശങ്ങള്‍ നല്‍കുന്നതിന് ജില്ലാ ജിയോളജി വകുപ്പിന് നിര്‍ദേശം നല്‍കി. കാവന്നൂര്‍ വില്ലേജില്‍ നിത്യാനന്ദന്‍ കോന്നന്‍കുഴിയുടെ കുടിവെള്ള കിണര്‍ താഴ്ന്നു. കൊമ്പന്‍ മുഹമ്മദ് വള്ളിതൊടുവിലിന്‍റെ വീടിനുമുകളില്‍ മരം വീണ് ഭാഗിക നാശനഷ്ടമുണ്ടായി. ഇരുമ്പുഴി ഹൈസ്‌കൂളിലേക്കുള്ള വഴി മണ്ണിടിഞ്ഞുവീഴാറായി അപകടകരമായ നിലയിലാണുള്ളത്. ഏറനാട് ഡെപ്യൂട്ടി തഹസില്‍ദാറായ വി.വി. ബാസ്റ്റിന്‍റെ നേതൃത്വത്തില്‍ റവന്യൂ ഉദ്യാഗസ്ഥര്‍ സ്ഥലം സന്ദര്‍ശിച്ച് സ്ഥിതിഗതികള്‍ വിലയിരുത്തി. മഴക്കാലദുരന്ത പ്രതിരോധ പ്രവര്‍ത്തനങ്ങള്‍ ചര്‍ച്ച ചെയ്യുന്നതിനായി പൂക്കോട്ടൂര്‍ വില്ലേജ് യോഗം പഞ്ചായത്ത് ഹാളിലും ചെമ്പ്രശേരി, പാണ്ടിക്കാട്, വെട്ടിക്കാട്ടിരി വില്ലേജുകളുടെ സംയുക്തയോഗം പാണ്ടിക്കാട് ഗ്രാമപഞ്ചായത്ത് സിഎച്ച് ഹാളിലും ചേര്‍ന്നു. പെരിന്തൽമണ്ണ: ശക്തമായ മഴയിൽ കുന്നപ്പള്ളിയിൽ താമസിക്കുന്ന മിൻപിടി അബ്ദുൾ അസീസിന്‍റെ വീടിന്‍റെ മുകളിലേക്ക് കടപുഴകി വീണ ഭീമൻ പുളിമരം മുറിച്ചു നീക്കി മലപ്പുറം ജില്ലാ ട്രോമാ കെയർ പെരിന്തൽമണ്ണ സ്റ്റേഷൻ യൂണിറ്റ് പ്രവർത്തകർ. റോഡ് സൈഡിൽ നിന്നാണ് മരം കടപുഴകി വീണത്. മലപ്പുറം ജില്ലാ ട്രോമാ കെയർ പെരിന്തൽമണ്ണ സ്റ്റേഷൻ യൂണിറ്റ് ലീഡർ ജബ്ബാർ ജൂബിലിയുടെ നേതൃത്വത്തിൽ,സുമേഷ് വലമ്പൂർ, ഫാറൂഖ് പൂപ്പലം, ജിൻഷാദ് പൂപ്പലം,സുബീഷ് പരിയാപുരം, ശ്യാം പാതായ്ക്കര, യധു പാതായ്ക്കര, അഭിൻ വിജയ് എന്നിവർ സ്ഥലത്തെത്തിയാണ് ഏറെ നേരത്തെ പരിശ്രമത്തിനൊടുവിൽ മരം മുറിച്ചു നീക്കിയത്. കരുവാരകുണ്ട്: കരുവാരകുണ്ട് ഗ്രാമപഞ്ചായത്തിന്‍റെ വിവിധ ഭാഗങ്ങളിൽ കഴിഞ്ഞദിവസമുണ്ടായ കനത്ത കാറ്റിലും മഴയിലും വ്യാപകമായ നാശനഷ്ടം. മരങ്ങൾ കടപുഴകിയും പൊട്ടിവീണും വീടുകൾക്കും സ്ഥാപനങ്ങൾക്കും കേടുപാടുകൾ സംഭവിച്ചു. ചിലയിടങ്ങളിൽ ഗതാഗതം മുടങ്ങി. വൈദ്യുതി കമ്പികൾക്കുമേൽ മരം പൊട്ടിവീണ് വൈദ്യുതി വിതരണവും മുടങ്ങി. പുന്നക്കാട്, പുൽവട്ട, കക്കറ, ചുള്ളിയോട്, കരിങ്കോണി, വട്ടമല, കുട്ടത്തി, തരിശ്, മുള്ളറ, മാമ്പുഴ, പൊടുവണ്ണി, ഭവനംപറമ്പ് ഇരിങ്ങാട്ടിരി എന്നിവിടങ്ങളിലാണ് നാശനഷ്ടങ്ങൾ ഏറെയും സംഭവിച്ചത്.

ഭിന്നശേഷിക്കാരനായ ജീവനക്കാരെ വഞ്ചിച്ചു പണം തട്ടിയതായി പരാതി

മഞ്ചേരി: ഭിന്നശേഷിക്കാരനായ ജീവനക്കാരെ വഞ്ചിച്ചു പണം തട്ടിയതായി പരാതി. മഞ്ചേരി ഗവ. ഗേള്‍സ് ഹയര്‍സെക്കന്‍ഡറി സ്‌കൂളിലെ ക്ലാര്‍ക്കായി ജോലി ചെയ്യുന്ന എം.പി. കമറുസ്സമാന്‍ ആണ് ജില്ലാകളക്ടര്‍ക്ക് പരാതി നല്‍കിയത്. 2018ല്‍ തിരൂരങ്ങാടി ഉപജില്ലാ വിദ്യാഭ്യാസ ഓഫിസില്‍ ജോലി ചെയ്യുന്ന സമയത്ത് ഓഫിസ് നടപടികളുടെ ഭാഗമായി സീനിയര്‍ ക്ലാര്‍ക്ക് എം. അശോക് ഏതാനും രേഖകളില്‍ കമറുസ്സമാനെക്കൊണ്ട് ഒപ്പിടുവിച്ചിരുന്നു. അവ ഉപയോഗിച്ച് തിരൂരങ്ങാടി താലൂക്ക് എംപ്ലോയീസ് കോ ഓപറേറ്റീവ് സൊസൈറ്റിയില്‍ നിന്നും നാല് ലക്ഷം രൂപ വായ്പ എടുത്തു. മൂന്ന് വര്‍ഷമായി തിരിച്ചടവില്ലാത്തതിനാല്‍ കമറുസ്സമാന്‍റെ ശമ്പളത്തില്‍ നിന്നും റിക്കവറി നടത്താന്‍ നോട്ടീസ് വന്നതോടെയാണ് പരാതിയുമായി ജില്ലാ കളക്ടറെ സമീപിച്ചത്. കേള്‍വി സംസാര വൈകല്യം ഉള്ള തനിക്ക് പലവിധ ശാരീരിക അസ്വസ്തകള്‍ കാരണം ഏറെ പ്രയാസമുണ്ടെന്നും പരാതിയില്‍ പറയുന്നു.

"പൊതുവിദ്യാലയങ്ങൾ സൗഹൃദങ്ങൾ ഉറപ്പ് വരുത്തുന്നു'

പാറൽ: പൊതുവിദ്യാലയങ്ങൾ മികവിനോടൊപ്പം സൗഹൃദങ്ങളും ഉറപ്പ് വരുത്തുന്നതായി നജീബ് കാന്തപുരം എംഎൽഎ പറഞ്ഞു. പാറൽ വീട്ടിക്കാട് എഎംഎൽപി സ്കൂൾ യാത്രയയപ്പ് സമ്മേളനവും സ്കൂൾ പ്രവേശന കവാടത്തിന്‍റെ ഉദ്ഘാടനവും നിർവഹിച്ച് സംസാരിക്കുകയായിരുന്നു അദ്ദേഹം. പഞ്ചായത്ത് പ്രസിഡന്‍റ് കെ.ടി. അഫ്സൽ അധ്യക്ഷത വഹിച്ചു. എഇഒ കെ.ടി. കുഞ്ഞുമൊയ്തു മുഖ്യപ്രഭാഷണം നടത്തി. മാനേജർ കെ.കെ. സെയ്ത് മുഹമ്മദ്, പിടിഎ പ്രസിഡന്‍റ് പി.ടി. ഖമറുന്നീസ, മുൻ എച്ച്എംമാരായ കെ.കെ. യൂസഫ്കുട്ടി, എം. സതീദേവി, പാറൽ റിലീഫ് സെന്‍റർ പ്രസിഡന്‍റ് വി.കെ. ഹംസ, പൊതുജന വായനശാല സെക്രട്ടറി എം. രവീന്ദ്ര മോഹൻ, സ്റ്റാഫ് സെക്രട്ടറി ഹുസൈൻ പാറൽ, പ്രോഗ്രാം കൺവീനർ കെ.കെ.അബ്ദുൽ ലത്തീഫ് എന്നിവർ പ്രസംഗിച്ചു. വിരമിക്കുന്ന അധ്യാപിക കെ.കെ. റൈഹാനത്ത് മറുപടി പ്രസഗം നടത്തി. സ്കൂളിൽ നിന്നും എൽഎസ്എസ് നേടിയ പ്രതിഭകളെ ചടങ്ങിൽ ആദരിച്ചു.

സംഭവസ്ഥലം സന്ദർശിച്ച് ഇ.പി. ജയരാജൻ

പൂക്കോട്ടുംപാടം: അമരമ്പലം പഞ്ചായത്തിലെ കവളമുക്കട്ട മാനുപ്പൊട്ടിയിൽ നായയെ പുലിപിടിച്ച സ്ഥലം സിപിഎം സംസ്ഥാന സെക്രട്ടറിയേറ്റ് അംഗം ഇ.പി. ജയരാജൻ സന്ദർശിച്ചു. തൊട്ടിതൊടിക താമുക്കുട്ടിയുടെ വീടാണ് സന്ദർശിച്ചത്. ജനങ്ങളുടെ ഭീതി അകറ്റാനുള്ള നടപടി സ്വീകരിക്കുമെന്ന് പറഞ്ഞ അദ്ദേഹം ചക്കിക്കുഴി ഫോറസ്റ്റ് സ്റ്റേഷൻ സന്ദർശിച്ച് വനംമന്ത്രി, നിലമ്പൂർ ഡിഎഫ്ഒ, സിസിഎഫ് എന്നിവരുമായി ഫോണിൽ ബന്ധപ്പെട്ടതിനെ തുടർന്ന് പുലിയെ പിടിക്കാനുള്ള കൂട്, നിരീക്ഷണ കാമറകൾ എന്നിവ സ്ഥാപിക്കാമെന്ന് ഉറപ്പ് നൽകി. സിപിഎം സംസ്ഥാന കമ്മിറ്റി അംഗം അഡ്വ. അനിൽകുമാർ, സിപിഎം അമരമ്പലം, ചുള്ളിയോട് ലോക്കൽ സെക്രട്ടറിമാരായ പി.സി. നന്ദകുമാർ, പി. ഉണ്ണികൃഷ്ണൻ, നിലമ്പൂർ ഏരിയാ സെന്‍റർ അംഗം പി. ശിവാത്മജൻ തുടങ്ങിയവരും അദ്ദേഹത്തോടൊപ്പം ഉണ്ടായിരുന്നു.

മാനുപ്പൊട്ടിയിൽ വളർത്തുനായയെ പുലി പിടിച്ചു

പൂക്കോട്ടുംപാടം: കവളമുക്കട്ട മാനുപ്പൊട്ടിയിൽ വളർത്തുനായയെ പുലി പിടിച്ചു. തൊട്ടിതൊടിക താമുകുട്ടിയുടെ വളർത്തുനായയെയാണ് കഴിഞ്ഞ ദിവസം രാത്രിയിൽ പുലി പിടിച്ചുക്കൊണ്ടു പോയത് ദിവസങ്ങൾക്ക് മുന്പ് പ്രദേശത്തെ മറ്റൊരു വീട്ടിലെ നായയേയും പുലി പിടിച്ചിരുന്നു. കന്നുകാലി വളർത്തി ഉപജീവനം നടത്തുന്ന ഇവർ പുലി ഭീതിയിലാണ്. വാർഡ് അംഗം രാജശ്രീയുടെ നേതൃത്വത്തിൽ ചക്കിക്കുഴി ഫോറസ്റ്റ് സ്റ്റേഷനിൽ പോയി നാട്ടുകാരുടെ ഭീതി ഒഴിവാക്കുന്നതിനായി നടപടി എടുക്കണമെന്ന് ആവശ്യപ്പെട്ടു.

ഭാര്യയെ കശാപ്പുശാലയില്‍ കഴുത്തറുത്തുകൊന്ന കേസ്: പ്രതി കുറ്റക്കാരന്‍, വിധി ഇന്ന്

മഞ്ചേരി: യുവതിയെ കശാപ്പുശാലയിലെത്തിച്ച് കഴുത്തറുത്തു കൊലപ്പെടുത്തിയ ഭര്‍ത്താവ് കുറ്റക്കാരനെന്ന് മഞ്ചേരി അഡീഷണല്‍ ജില്ലാ സെഷന്‍സ് കോടതി (രണ്ട്) കണ്ടെത്തി. ജഡ്ജ് എ.വി. ടെല്ലസ് ശിക്ഷാ വിധി 31ന് പ്രസ്താവിക്കും. പരപ്പനങ്ങാടി ചുണ്ടാലപ്പറമ്പ് കൊടക്കാട് നെടുവ പഴയകത്ത് നജ്ബുദ്ദീന്‍ എന്ന ബാബു (44) ആണ് കേസിലെ പ്രതി. 2017 ജൂലൈ 23നാണ് കേസിനാസ്പദമായ സംഭവം. ചാരിത്ര്യശുദ്ധയിലുള്ള സംശയം മൂലം ആദ്യഭാര്യയായ റഹീന(30)യെ പ്രതിയുടെ ഉടമസ്ഥതയില്‍ അഞ്ചപ്പുര ബീച്ച് റോഡിലുള്ള ഇറച്ചിക്കടയില്‍ കൊണ്ടുപോയി കഴുത്തറുത്ത് കൊലപ്പെടുത്തിയെന്നാണ് പ്രോസിക്യൂഷന്‍ കേസ്. പുലര്‍ച്ചെ രണ്ട മണിക്കും 4.45നും ഇടയിലാണ് സംഭവം. 2017 ജൂലൈ 25നാണ് പ്രതി അറസ്റ്റിലായത്. 41 സാക്ഷികളുള്ള കേസില്‍ പ്രോസിക്യൂഷനുവേണ്ടി അഡീഷണല്‍ പബ്ലിക് പ്രോസിക്യൂട്ടര്‍ അഡ്വ. കെ.പി. ഷാജു ഹാജരായി.

കരുവാരകുണ്ടിൽ വളർത്തുനായയെ അജ്ഞാത ജീവി അക്രമിച്ച സംഭവം : പുലി തന്നെയെന്ന് ഉറപ്പുവരുത്തി വനംവകുപ്പ്

കരുവാരകുണ്ട്: പുലിയുടെ ആക്രമണത്തിൽ വളർത്തു നായയ്ക്ക് പരിക്കേറ്റു. കരുവാരക്കുണ്ട് കൽക്കുണ്ട് അൽഫോൻസ് ഗിരിയിലെ ചേരി മാധവന്‍റെ വളർത്തു നായയെയാണ് പുലി അക്രമിച്ചത്.ബുധനാഴ്ച രാത്രി 12 ഓടെയാണ് സംഭവം. കൂട്ടിനുള്ളിൽ ചങ്ങലയിൽ കെട്ടിയിട്ടിരുന്ന നായയെ പുലി പുറത്തേക്ക് വലിച്ചിട്ട് കഴുത്തിൽ ആഴത്തിൽ മുറിവേൽപ്പിച്ചിട്ടുണ്ട്. ശബ്ദം കേട്ടെത്തിയ വീട്ടുകാർ ബഹളം വച്ചതോടെ നായയെ ഉപേക്ഷിച്ച് പുലി കടന്നു കളയുകയായിരുന്നു. തുടർന്ന് രാത്രി തന്നെ സ്ഥലത്തെത്തിയ വനപാലകർ പരിശോധന നടത്തുകയും കടിച്ചത് പുലി തന്നെയാണെന്ന് സ്ഥിരീകരിക്കുകയും ചെയ്തു. പരിക്കേറ്റ നായയ്ക്ക് ഇന്നലെ രാവിലെ കരുവാരകുണ്ട് വെറ്ററിനറി ഡിസ്പെൻസറിയിലെത്തിച്ച് ചികിത്സ നൽകി. മാധവന്‍റെ മറ്റൊരു നായയെ രണ്ട് വർഷം മുമ്പ് പുലി വകവരുത്തിയിരുന്നു. കടുവാ ഭീതിക്ക് പുറമെ ജനവാസ മേഖലയിൽ പുലിയുടെ സാന്നിധ്യവും ഉറപ്പായതോടെ നാട്ടുകാർ ആശങ്കയിലാണ്. വ്യാഴാഴ്ച വൈകുന്നേരം അൽഫോൻസ് ഗിരിയിൽ വന്യമൃഗ ശല്യത്തിനെതിരേ പ്രതിഷേധ യോഗവും നടത്തി.

ജനവാസ കേന്ദ്രത്തിലിറങ്ങിയ കാട്ടാന വ്യാപക നാശം വിതച്ചു

എടക്കര: ജനവാസ കേന്ദ്രത്തിലിറങ്ങിയ കാട്ടാന വ്യാപക നാശം വിതച്ചു. പോത്തുകല്‍ കോടാലിപ്പൊയില്‍ പള്ളിപ്പടിയിലാണ് കാട്ടാന നാശം വിതച്ചത്. വടക്കുംപാടം ഉമ്മര്‍ ഹാജിയുടെ വീടിനോട് ചേര്‍ന്ന് മതില്‍ തകര്‍ക്കുകയും വാഴ, കമുക് എന്നിവ വ്യാപകമായി നശിപ്പിക്കുകയും ചെയ്തു. കഴിഞ്ഞ ദിവലം രാത്രി 12 മണിയോടെയാണ് ആന കൃഷിയിടത്തിലിറങ്ങിയത്. തരിപ്പ അബ്ദുള്‍ അസീസിന്‍റെ കൃഷിയിടത്തിലെ തെങ്ങും കാട്ടാന നശിപ്പിച്ചു. പ്രദേശത്ത് കാട്ടാനശല്യം രൂക്ഷമാണ്. വനാതിര്‍ത്തി പ്രദേശമായ കോടാലിപ്പൊയിലില്‍ കാട്ടാനകള്‍ സ്ഥിരമായെത്താന്‍ തുടങ്ങിയതോടെ ജനങ്ങള്‍ കടുത്ത ഭീതിയിലാണ്. കൃഷിയിടങ്ങള്‍ക്ക് ചുറ്റും സ്ഥാപിച്ചിട്ടുള്ള സൗരോര്‍ജ വേലികള്‍ തകര്‍ത്താണ് കാട്ടാനകള്‍ വിളകള്‍ നശിപ്പിക്കുന്നത്. കൃഷിയിടത്തിലിറങ്ങുന്ന വന്യമൃഗങ്ങളെ തടയാന്‍ വനം വകുപ്പ് യാതൊരു നടപടിയും സ്വീകരിക്കുന്നില്ലെന്ന് കര്‍ഷകര്‍ പരാതിപ്പെടുന്നു. ചിത്രവിവരണം കാട്ടാന തകര്‍ത്ത ഉമ്മര്‍ ഹാജിയുടെ വീടിന്‍റെ മതിലും നശിപ്പിച്ച കൃഷിയും.

ആര്യാടൻ ഷൗക്കത്തിന് കെട്ടിവയ്ക്കാനുള്ള തുക നൽകി പുല്ലങ്കോട്ട് എസ്റ്റേറ്റ് തൊഴിലാളികൾ

നിലമ്പൂര്‍: ആര്യാടന്‍ മുഹമ്മദിന് 11 തെരഞ്ഞെടുപ്പിലും കെട്ടിവയ്ക്കാനുള്ള പണം നല്‍കിയ പാരമ്പര്യം മകന്‍ ഷൗക്കത്തിനും നല്‍കി പുല്ലങ്കോട്ട് എസ്റ്റേറ്റിലെ പ്ലാന്‍റേഷന്‍ തൊഴിലാളികള്‍. പ്രചാരണത്തിരക്കിനിടയില്‍ ഇന്നലെ ഉച്ചയോടെ അപ്രതീക്ഷിതമായാണ് പുല്ലങ്കോട്ട് എസ്‌റ്റേറ്റിലെ ഐഎന്‍ടിയുസി സെക്രട്ടറി ഹസന്‍ പുല്ലങ്കോട്ടിന്‍റെ നേതൃത്വത്തില്‍ തൊഴിലാളികളെത്തി യൂണിയന്‍ പ്രസിഡന്‍റ് കൂടിയായ ആര്യാടന്‍ ഷൗക്കത്തിന് തെരഞ്ഞെടുപ്പില്‍ മത്സരിക്കാന്‍ കെട്ടിവയ്ക്കാനുള്ള തുകയായ 10,000 രൂപ കൈമാറിയത്. 1963ലാണ് ആര്യാടന്‍ മുഹമ്മദ് ആസ്പിന്‍ വാള്‍ കമ്പനിയുടെ പുല്ലങ്കോട്ട് എസ്‌റ്റേറ്റിലെ പുല്ലങ്കോട്ട് പ്ലാന്‍റേഷന്‍ ലേബര്‍ കോണ്‍ഗ്രസ് ഐഎന്‍ടിയുസി യൂണിയന്‍റെ പ്രസിഡന്‍റായത്. അന്ന് നിലമ്പൂരില്‍ നിന്നും സൈക്കിളിൽ 23 കിലോ മീറ്ററകലെ പുല്ലങ്കോട്ടെ എസ്‌റ്റേറ്റിലേക്ക് ആര്യാടന്‍ എത്തിയിരുന്നു. ദിസവങ്ങളോളം തൊഴിലാളികള്‍ക്കൊപ്പം താമസിച്ച് സംഘടനാ പ്രവര്‍ത്തനം നടത്തിയിരുന്ന ആര്യാടന് ഇവിടുത്തെ തൊഴിലാളികളുമായി ആത്മബന്ധമായിരുന്നു. നിരവധി തവണ സമരം ചെയ്ത് തൊഴിലാളികളുടെ അവകാശങ്ങള്‍ ആര്യാടന്‍ നേടിക്കൊടുത്തിട്ടുണ്ട്. മന്ത്രിയാകുമ്പോള്‍ എല്ലാ തൊഴിലാളി യൂണിയന്‍ പ്രസിഡന്‍റ് സ്ഥാനവും ഒഴിയുമായിരുന്നെങ്കിലും പുല്ലങ്കോട്ട് എസ്‌റ്റേറ്റിലെ യൂണിയന്‍ പ്രസിഡന്‍റ് സ്ഥാനം മാത്രം ആര്യാടന്‍ നിലനിര്‍ത്തുകയായിരുന്നു പതിവ്. 1965 മുതല്‍ 2011 വരെ 11 തെരഞ്ഞെടുപ്പുകളിലാണ് ആര്യാടന്‍ നിലമ്പൂരില്‍ നിന്നും നിയമസഭയിലേക്ക് മത്സരിച്ചത്. എട്ട് തവണ വിജയിക്കുകയും മൂന്ന് തവണ പരാജയപ്പെടുകയും ചെയ്തു. ഈ തെരഞ്ഞെടുപ്പുകളിലെല്ലാം പുല്ലങ്കോട്ടെ ഐഎന്‍ടിയുസി തൊഴിലാളികളായിരുന്നു കെട്ടിവയ്ക്കാനുള്ള തുക നല്‍കിയത്. തെഞ്ഞെടുപ്പ് രാഷ്ട്രീയം അവസാനിപ്പിച്ച് പ്രസിഡന്‍റ് സ്ഥാനം ഒഴിയാന്‍ ആര്യാടന്‍ ശ്രമിച്ചെങ്കിലും തൊഴിലാളികള്‍ അനുവദിച്ചിരുന്നില്ല. വിയോഗം വരെ 62 വര്‍ഷമാണ് ആര്യാടന്‍ പ്രസിഡന്‍റ് സ്ഥാനം വഹിച്ചത്. ആര്യാടന്‍റെ വിയോഗ ശേഷം കെപിസിസി ജനറല്‍ സെക്രട്ടറിയായ മകന്‍ ആര്യാടന്‍ ഷൗക്കത്തിനെയാണ് പ്രസിഡന്‍റ് സ്ഥാനത്തേക്ക് യൂണിയന്‍ ജനറല്‍ ബോഡി തെരഞ്ഞെടുത്തിരുന്നത്. ഇത്തവണ യൂണിയന്‍ പ്രസിഡന്‍റിന് കെട്ടിവയ്ക്കാനുള്ള തുക നല്‍കാനായെന്ന സന്തോഷവുമുണ്ട് തൊഴിലാളികള്‍ക്ക്. ഇന്ന് ഉമ്മൻചാണ്ടിയുടെ കല്ലറ സന്ദർശിക്കും നിലമ്പൂര്‍: നാമനിര്‍ദേശ പത്രിക സമര്‍പ്പിക്കും മുമ്പ് അനുഗ്രഹം തേടി ഉമ്മന്‍ചാണ്ടിയുടെ കല്ലറയിലേക്ക് നിലമ്പൂര്‍ നിയോജകമണ്ഡലം ഉപതെരഞ്ഞെടുപ്പിലെ യുഡിഎഫ് സ്ഥാനാര്‍ഥി ആര്യാടന്‍ ഷൗക്കത്ത്. ഇന്ന് ഉച്ചയ്ക്ക് 12ന് കല്ലറയില്‍ കോണ്‍ഗ്രസ് നേതാക്കള്‍ക്കൊപ്പം പ്രാര്‍ഥന നടത്തും. നാളെ പത്രിക സമർപ്പിക്കും നിലമ്പൂര്‍: നിലമ്പൂര്‍ ഉപതെരഞ്ഞെടുപ്പിലെ യുഡിഎഫ് സ്ഥാനാര്‍ഥി ആര്യാടന്‍ ഷൗക്കത്ത് ശനിയാഴ്ച നാമനിര്‍ദേശ പത്രിക നല്‍കും. ശനിയാഴ്ച രാവിലെ 11ന് നിലമ്പൂര്‍ നിന്ന് ചന്തക്കുന്ന് വരെ റോഡ് ഷോ നടത്തിയാണ് നിലമ്പൂര്‍ നിയോജക മണ്ഡലത്തിന്‍റെ ഉപവരണാധികാരിയായ നിലമ്പൂര്‍ തഹസില്‍ദാര്‍ എം.പി. സിന്ധുവിന്‍റെ അടുത്തെത്തി നാമനിര്‍ദേശ പത്രിക സമര്‍പ്പിക്കുക. ചന്തക്കുന്നില്‍ നിന്ന് താലൂക്ക് ഓഫീസിലേക്ക് പോകുന്ന പ്രവര്‍ത്തകരുടെ എണ്ണത്തിന് നിയന്ത്രണമുള്ളതിനാലാണ് റോഡ് ഷോ ചന്തക്കുന്നിലവസാനിപ്പിക്കുന്നത്.

കടുവപ്പേടി: അധ്യയന വർഷാരംഭം നിസഹായതയോടെ രക്ഷിതാക്കൾ

കരുവാരകുണ്ട്: രക്ഷിതാക്കളും കുട്ടികളും അധ്യാപകരും പുതിയ അധ്യയന വർഷത്തെ വരവേൽക്കാൻ ഒരുക്കങ്ങൾ നടത്തുമ്പോൾ കടുവ പേടിയിലമർന്ന മലയോരത്തെ ചെറുകിട കർഷകരും തോട്ടം തൊഴിലാളികളും നിസഹായരാണ്. കടുവപ്പേടി കാരണം തൊഴിലിടങ്ങളിലെത്തി തൊഴിലെടുക്കാനാവാത്തതോടെ ആഴ്ചകളായി മേഖലയിലെ ചെറുകിട കർഷകരും തൊഴിലാളികളും ചെലവിന് വക കണ്ടെത്താൻ വിഷമിക്കുകയാണ്. അധ്യയന വർഷം ആരംഭിക്കുമ്പോൾ കുട്ടികൾക്ക് പുസ്തകം, യൂണിഫോം, ബാഗ്, കുട തുടങ്ങി വിവിധ വസ്തുക്കൾ വാങ്ങേണ്ടതായി വരുന്നു. ഇവയ്ക്കെല്ലാം വലിയ തുക തന്നെ ചെലവഴിക്കേണ്ടി വരും. മഴക്കാലമായാലും തോട്ടങ്ങളിൽ ജോലി ചെയ്താണ് തോട്ടം തൊഴിൽ മേഖലയിലെ തൊഴിലാളികൾ പണം കണ്ടെത്തിയിരുന്നത്. എന്നാൽ കടുവ യുവാവിനെ അക്രമിച്ച് കൊലപ്പെടുത്തിയതോടെയും ജാഗ്രതാ നിർദേശം നിലനിൽക്കുന്നതിനാലും തൊഴിലാളികൾക്ക് തൊഴിലിടങ്ങളിൽ എത്തിപ്പെടാനാവുന്നില്ല. ഇതോടെ മേഖലയിലെ തൊഴിലാളികൾക്കും കുടുംബങ്ങൾക്കും വരുമാനം പൂർണമായും നിലച്ചിരിക്കുകയാണ്. കുട്ടികൾക്ക് വിദ്യാലയങ്ങളിലെത്തുമ്പോൾ പുതിയ പഠനോപകരണങ്ങളും മറ്റും വാങ്ങിക്കാൻ പണം കണ്ടെത്താൻ ഇവർക്കാവുന്നില്ല. വീട്ടിലെ ദൈനംദിന ചെലവുകൾക്ക് പോലും പണമില്ലാതെ വിഷമിക്കുകയാണ് മേഖലയിലെ തോട്ടം തൊഴിലാളികൾ.തോട്ടം തൊഴിൽ മേഖല പൂർണമായും നിശ്ചലമായിട്ടും സർക്കാർ ഇതുവരെ തൊഴിലാളികൾക്ക് ഒരുതരത്തിലുള്ള ആനുകൂല്യങ്ങളും പ്രഖ്യാപിച്ചിട്ടില്ല. പുതിയ അധ്യയന വർഷമാരംഭിക്കുമ്പോൾ കുട്ടികൾക്ക് ആവശ്യമായ യൂണിഫോം, നോട്ടുബുക്കുകൾ,പേന, ബാഗ്, കുട തുടങ്ങിയവയെല്ലാം സർക്കാർ സൗജന്യമായി വിദ്യാലയങ്ങൾ വഴി വിതരണം ചെയ്യണമെന്നാണ് വിവിധ തൊഴിലാളി സംഘടനകളുടെ ആവശ്യം. കടുവയെ പിടികൂടി തോട്ടം തൊഴിൽ മേഖലയിലേക്ക് തൊഴിലാളികൾക്ക് തൊഴിലെടുക്കാൻ പോകാവുന്ന സാഹചര്യമുണ്ടാക്കുകയും വിദ്യാർഥികൾക്ക് ആവശ്യമായ വസ്തുക്കൾ സർക്കാർ വിതരണം ചെയ്യുകയും ചെയ്തില്ലെങ്കിൽ അധ്യയന വർഷാരംഭത്തിൽ കുട്ടികളെ സ്കൂളിൽ എത്തിക്കൽ പ്രയാസമായേക്കുമെന്നാണ് ഒരു വിഭാഗം രക്ഷിതാക്കൾ പറയുന്നത്. ഇത് കുട്ടികളുടെ പഠനത്തെ പ്രതികൂലമായി ബാധിക്കുമെന്നതിനാൽ സർക്കാർ അടിയന്തരമായ ഇടപെടലുകൾ നടത്തണമെന്നും രക്ഷിതാക്കൾ ആവശ്യപ്പെട്ടു.

യുവാവിനെ വീടിന് സമീപം പറമ്പില്‍ മരിച്ചനിലയില്‍ കണ്ടെത്തി

ചങ്ങരംകുളം: യുവാവിനെ വീടിന് സമീപം പറമ്പില്‍ മരിച്ചനിലയില്‍ കണ്ടെത്തി. മാട്ടത്തില്‍ താമസിച്ചിരുന്ന പള്ളത്ത് അബ്ദുള്ളക്കുട്ടിയുടെ മകന്‍ ജലീല്‍ എന്ന ഷൗക്കത്തലി(38)യെയാണ് വീടിന് സമീപത്ത് പറമ്പില്‍ മരിച്ച നിലയില്‍ കണ്ടെത്തിയത്. ബുധനാഴ്ച സമീപത്തെ വീട്ടിലെ കിണറ്റില്‍ മോട്ടോര്‍ കയറ്റുന്നതിന് പോയ ജലീലിനെ കാണാതെ വന്നതോടെ നടത്തിയ തെരച്ചിലില്‍ രാത്രി 11.30ന് അബോധാവസ്ഥയില്‍ കണ്ടെത്തുകയായിരുന്നു. തുടര്‍ന്ന് നാട്ടുകാര്‍ ചേര്‍ന്ന് ചങ്ങരംകുളത്തെ സ്വകാര്യ ആശുപത്രിയില്‍ എത്തിച്ചെങ്കിലും മരണം സംഭവിച്ചിരുന്നു. ചങ്ങരംകുളം സണ്‍റൈസ് ആശുപത്രി മോര്‍ച്ചറിയില്‍ സൂക്ഷിച്ച മൃതദേഹം ചങ്ങരംകുളം പോലീസ് ഇന്‍ക്വസ്റ്റ് നടത്തി. മഞ്ചേരി മെഡിക്കല്‍ കോളജില്‍ പോസ്റ്റ്മോര്‍ട്ടത്തിന് ശേഷം മൃതദേഹം ബന്ധുക്കള്‍ക്ക് വിട്ടുനല്‍കും. മാതാവ്: ഹാജറ. ഭാര്യ: സബീന. മക്കള്‍: സഹദ്,സാദിയ.

നാളെ വിരമിക്കാനിരുന്ന അധ്യാപിക ഇന്നലെ മരിച്ചു

മഞ്ചേരി: നാളെ സര്‍വീസില്‍ നിന്നും വിരമിക്കാനിരിക്കെ അധ്യാപിക ഇന്നലെ മരിച്ചു. മഞ്ചേരി ഗവ. ഗേള്‍സ് ഹയര്‍സെക്കൻഡറി സ്‌കൂള്‍ സംഗീത അധ്യാപിക കരുവമ്പ്രം ചിറക്കല്‍ ഹരിതം വീട്ടില്‍ കെ. സിന്ധു (56) ആണ് മരിച്ചത്. ഇന്നലെ പുലര്‍ച്ചെ ശ്വാസം മുട്ടലും പനിയും അനുഭവപ്പെട്ടതിനെ തുടര്‍ന്ന് മഞ്ചേരിയിലെ സ്വകാര്യ ആശുപത്രിയില്‍ പ്രവേശിപ്പിച്ചതായിരുന്നു. രാവിലെയോടെ മരണം സംഭവിച്ചു. ചങ്ങനാശേരി സ്വദേശിനിയായ സിന്ധു 20 വര്‍ഷം മുമ്പ് ഗേള്‍സ് ഹൈസ്‌കൂളില്‍ മ്യൂസിക് ടീച്ചറായി ജോലി ലഭിച്ച് മഞ്ചേരിയില്‍ എത്തിയതാണ്. ഭര്‍ത്താവ് : സി.കെ. അനില്‍കുമാര്‍ (യൂണിക്കോണ്‍ ഫാര്‍മ, മഞ്ചേരി). സഹോദരങ്ങള്‍ : സുഗതന്‍, വസന്തന്‍, സുഭാഷ്, ലത രവി. സംസ്‌കാരം ഇന്ന് രാവിലെ മഞ്ചേരി മുനിസിപ്പല്‍ ശ്മശാനത്തില്‍.

റോഡിലെ കുഴികൾ അടച്ച് പോലീസ്

പെരിന്തൽമണ്ണ: ദേശീയപാതയിൽ അങ്ങാടിപ്പുറം മേൽപ്പാലത്തിന് സമീപമുള്ള റോഡിലെ വൻ കുഴികൾ പെരിന്തൽമണ്ണ ട്രാഫിക് പോലീസ് ഉദ്യോഗസ്ഥരുടെ നേതൃത്വത്തിൽ അടച്ചു തുടങ്ങി. റോഡിലെ കുഴി കാരണം ഒരാഴ്ചയിലേറെയായി അങ്ങാടിപ്പുറത്ത് ഗതാഗതകുരുക്ക് രൂക്ഷമായിരുന്നു. ഇന്നലെ രാവിലെ മഴയ്ക്ക് നേരിയ ശമനമുണ്ടായപ്പോഴാണ് പോലീസ് ഇടപെട്ട് താൽക്കാലികമായെങ്കിലും കുഴി അടച്ചത്.

വിദ്യാലയങ്ങൾ തുറക്കുന്നു; നിലന്പൂരിൽ ലഹരി വിൽപ്പനക്കെതിരേ കർശന നടപടിയുമായി പോലീസ്

നിലന്പൂർ:വിദ്യാർഥികൾക്ക് ലഹരി വസ്തുക്കൾ വിൽക്കുന്ന കടകളുടെ ലൈസൻസ് റദ്ദാക്കുമെന്ന മുന്നറിയിപ്പുമായി പോലീസ്. ജൂണ്‍ രണ്ടു മുതൽ നടപടി കർശനമാക്കും. നിലന്പൂരിൽ കേരള വ്യാപാരി വ്യവസായി ഏകോപന സമിതിയുമായി സഹകരിച്ചാണ് പോലീസിന്‍റെ നടപടി. ഇതുമായി ബന്ധപ്പെട്ട പോസ്റ്റർ ലോഞ്ചിംഗ് വ്യാപാര ഭവനിൽ നിലന്പൂർ പോലീസ് ഇൻസ്പെക്ടർ സുനിൽ പുളിക്കൽ നിർവഹിച്ചു. കേരള വ്യാപാരി വ്യവസായി ഏകോപന സമിതി ജനറൽ സെക്രട്ടറി കെ. സഫറുള്ള, ഭാരവാഹികളായ പി.മോഹനൻ, മുഹമ്മദ് അഷ്റഫ്, എസ്ഐ ടി.മുജീബ് തുടങ്ങിയവർ സംബന്ധിച്ചു. കടകളിൽ പോസ്റ്റർ പതിക്കലും ആരംഭിച്ചു. അധ്യയന വർഷാംരംഭത്തോടെ സ്കൂൾ പരിസരങ്ങളിലെ ലഹരി വിൽപ്പനകളും നിയന്ത്രിക്കാനാണ് നടപടികളെടുക്കുന്നത്.

അധ്യയനവർഷാരംഭം: കൊളത്തൂർ പോലീസ് ജാഗ്രതാ യോഗം ചേർന്നു

കൊളത്തൂർ: സ്കൂൾ തുറക്കുന്നതിന്‍റെ മുന്നോടിയായി കൊളത്തൂർ പോലീസ് സ്റ്റേഷൻ പരിധിയിലെ സ്കൂൾ പ്രൊട്ടക്ഷൻ ഗ്രൂപ്പ് പ്രവർത്തന സജ്ജമാക്കുക എന്ന ലക്ഷ്യവുമായി കൊളത്തൂർ പോലീസ് സ്റ്റേഷൻ എസ്എച്ച്ഒയുടെ നേതൃത്വത്തിൽ പ്രധാനാധ്യാപകൻ, പിടിഎ പ്രസിഡന്‍റ്, പ്രൊട്ടക്ഷൻ ഗ്രൂപ്പ് ഇൻ ചാർജ് അധ്യാപകൻ എന്നിവർ ഉൾപ്പെട്ട ജാഗ്രതാ യോഗം ചേർന്നു. സ്കൂൾ പാലിക്കേണ്ട മാർഗനിർദേശങ്ങൾ എസ്എച്ച്ഒ അവതരിപ്പിച്ചു. സ്കൂൾ വളപ്പിൽ കുട്ടികൾക്ക് ഭീഷണിയുയർത്തുന്ന മരങ്ങൾ മുറിച്ചുമാറ്റുന്നതിനും സ്കൂളിന്‍റെ ചുറ്റുപാടുകളിലെ കച്ചവട സ്ഥാപനങ്ങളിൽ കുട്ടികൾക്ക് ഹാനികരമാകുന്ന പുകയില ഉത്പ്പന്നങ്ങൾ വിൽപ്പന നടത്തുന്നില്ലെന്ന് ഉറപ്പുവരുത്തുന്നതിനും യോഗം തീരുമാനിച്ചു. സ്കൂൾ വാഹനങ്ങളുടെ സുരക്ഷിതത്വവും ഡ്രൈവറും ക്ലീനറും പാലിക്കേണ്ട ചുമതലകളെക്കുറിച്ചും യോഗം വിലയിരുത്തി. റോഡ് ക്രോസ് ചെയ്യുന്നതിന് സീബ്രാ ലൈൻ ഇല്ലാത്ത റോഡുകളിൽ ബന്ധപ്പെട്ട ഡിപ്പാർട്ട്മെന്‍റിന് ഉൾപ്പെടുത്തി യോഗം ചേരും. എസ്എച്ച്ഒ എ. സുജിത്ത് യോഗം ഉദ്ഘാടനം ചെയ്തു. എസ്ഐ വി. രാജൻ അധ്യക്ഷത വഹിച്ചു. ജനമൈത്രി ബീറ്റ് ഓഫീസർ ബൈജു ഒതുക്കുങ്ങൽ, സ്റ്റേഷൻ റൈറ്റർ ജയേഷ് എന്നിവർ പ്രസംഗിച്ചു. സ്കൂളിലെ പ്രധാനാധ്യാപകർ, പിടിഎ പ്രസിഡന്‍റുമാർ, പഞ്ചായത്ത് മെംബർമാർ, മറ്റു ഉദ്യോഗസ്ഥർ പങ്കെടുത്തു.

ആകാശപ്പറക്കലിന്‍റെ ആനന്ദത്തിൽ പെരിന്തൽമണ്ണയിലെ ഹരിതകർമ സേന

പെരിന്തൽമണ്ണ: പെരിന്തൽമണ്ണ ഹരിതകർമ സേനാംഗങ്ങൾ ആദ്യവിമാനയാത്ര നടത്തിയതിന്‍റെ സന്തോഷത്തിലാണ്. 86 ഹരിതകർമ സേനാംഗങ്ങളാണ് പെരിന്തൽമണ്ണ നഗരസഭയുടെ സഹായത്തോടെ കൊച്ചിയിൽ നിന്ന് ബംഗളൂരുവിലേക്ക് വിമാനയാത്ര നടത്തിയത്. അവധി ദിവസങ്ങളിലും ജോലി ചെയ്യുന്ന ശുചീകരണ സേനയിലെ സാധാരണക്കാരായ തൊഴിലാളികളുടെ ആകാശയാത്ര മോഹമാണ് നഗരസഭ സഫലമാക്കിയത്. പെരിന്തൽമണ്ണയിൽ നിന്ന് കൊച്ചി വിമാനത്താവളത്തിലേക്ക് ബസിലും അവിടെ നിന്ന് വിമാനത്തിൽ ബംഗളൂരുവിലേക്കുമായിരുന്നു യാത്ര. ലാൽബാഗ്, കുബ്ബണ്‍ പാർക്ക്, വിധാൻസൗദ, വ്യാപാര കേന്ദ്രങ്ങൾ തുടങ്ങിയവ സന്ദർശിച്ച ശേഷം ട്രെയിൻ മാർഗം സംഘം തിരിച്ച് പെരിന്തൽമണ്ണയിലെത്തി. കൗണ്‍സിലർമാരും ജീവനക്കാരും ഉൾപ്പെടെ നൂറുപേരടങ്ങുന്ന യാത്രാസംഘത്തിൽ ഭൂരിഭാഗം പേരും ആദ്യമായാണ് വിമാന യാത്ര നടത്തിയത്.

മഴയും കാറ്റും; നിലന്പൂർ -ഷൊർണൂർ ട്രെയിനുകൾ വൈകി ഓടുന്നു, യാത്രക്കാർ ദുരിതപാളത്തിൽ

കരുവാരകുണ്ട്: കനത്ത മഴയും കാറ്റും മൂലം മരക്കൊന്പുകൾ വൈദ്യുതി കന്പികളിലേക്ക് പൊട്ടിവീണ് നിലന്പൂർ -ഷൊർണൂർ ലൈനിൽ ട്രെയിനുകൾ മുടങ്ങൽ പതിവായതോടെ യാത്രക്കാർക്ക് ദുരിതമേറി. പ്രധാനപാതകളിൽ വൈദ്യുതി തടസം വന്ന് ട്രെയിനുകൾ മുടങ്ങലും വൈകിയോടലും സാധാരണമായിട്ടുണ്ട്. എന്നാൽ മലയോര മേഖലയായ നിലന്പൂർ - ഷൊർണൂർ പാതയിലാണ് വൈദ്യുതി തടസം കാരണം തീവണ്ടി മുടങ്ങലും വൈകിയോടലും കൂടുതൽ. നിലന്പൂർ-ഷൊർണൂർ 56610 നന്പർ പാസഞ്ചർ, ഷൊർണൂർ-നിലന്പൂർ 16326, 16325 നന്പർ പാസഞ്ചർ എന്നീ വണ്ടികൾ കഴിഞ്ഞ ദിവസങ്ങളിൽ യാത്രക്കാരെ വലച്ചു. പാതയിലെ മരങ്ങൾ പൊട്ടി വീണതുമൂലമുണ്ടാകുന്ന വൈദ്യുതി തടസങ്ങളാണ് വണ്ടികൾ വൈകാൻ കാരണമാകുന്നത്. നിലന്പൂരിൽ നിന്ന് 9.55ന് പുറപ്പെടുന്ന 56610 നന്പർ ഷൊർണൂർ പാസഞ്ചർ തിങ്കളാഴ്ച റദ്ദാക്കുകയും ചെയ്തിരുന്നു. ഞായറാഴ്ച 4.20ന് നിലന്പൂരിൽ നിന്ന് പുറപ്പെടേണ്ടിയിരുന്ന നിലന്പൂർ-പാലക്കാട് പാസഞ്ചർ രണ്ടര മണിക്കൂറിലധികം വൈകിയാണ് ഓടിയത്. ഈ വണ്ടിക്ക് പാലക്കാട്ടെത്തിയാൽ ചെന്നൈ, ബംഗളൂരു ഭാഗങ്ങളിലേക്ക് കണക്ഷൻ സൗകര്യം ലഭിക്കാറുണ്ട്. പാസഞ്ചർ വൈകിയതിനാൽ ബംഗളൂരു, ചെന്നൈ ഭാഗങ്ങളിലേക്കു പോകേണ്ട യാത്രക്കാർക്ക് കണക്ഷൻ ലഭിച്ചില്ല. മഴ കനത്തതോടെ വൈദ്യുതി ലൈനിലേക്ക് മരങ്ങൾ വീഴുന്നതും പതിവായിട്ടുണ്ട്. നിലന്പൂർ-ഷൊർണൂർ പാത വൈദ്യുതീകരിച്ചപ്പോൾ കൂടുതൽ സൗകര്യങ്ങളായെങ്കിലും കൂടെക്കൂടെയുണ്ടാകുന്ന വൈദ്യുതി തടസം യാത്രക്കാരെ ദുരിതത്തിലാക്കുകയാണ്. നിലന്പൂർ - ഷൊർണൂർ പാതയോരങ്ങളിലെ വൃക്ഷങ്ങളുടെ ശിഖരങ്ങൾ വെട്ടി മാറ്റി വൈദ്യുതി കന്പികളിലേക്ക് വീഴാതെ സൗകര്യങ്ങൾ ഒരുക്കണമെന്നാണ് യാത്രക്കാരുടെ ആവശ്യം.

വാഹനം ഹാജരാക്കാത്തവർക്കെതിരേ നടപടി പെരിന്തൽമണ്ണിയിൽ സ്കൂൾ വാഹനങ്ങൾ പരിശോധിച്ചു

പെരിന്തൽമണ്ണ: പെരിന്തൽമണ്ണ താലൂക്കിലെ സ്കൂൾ വാഹനങ്ങൾ മോട്ടോർ വെഹിക്കിൾ ഇൻസ്പെക്ടർമാരുടെ നേതൃത്വത്തിൽ പരിശോധിച്ചു. വിദ്യാർഥികളുടെ സുരക്ഷ ഉറപ്പാക്കുകയാണ് ലക്ഷ്യം. താലൂക്കിലെ ഇരുനൂറിലധികം വാഹനങ്ങളാണ് മാനത്തുമംഗലം - പൊന്ന്യാകുർശി ബൈപ്പാസ് റോഡിൽ പരിശോധിച്ചത്. വാഹനങ്ങളുടെ ഫിറ്റ്നസ് തെളിയിക്കുന്നതിനുള്ള രേഖകൾ ഹാജരാക്കാൻ മോട്ടോർ വാഹനവകുപ്പ് നിർദേശിച്ചിരുന്നു. പെരിന്തൽമണ്ണ ആർടിഒ എം. രമേശിന്‍റെ നിർദേശ പ്രകാരം മോട്ടോർ വെഹിക്കിൾ ഇൻസ്പെക്ടർമാരായ പി.ജെ. റെജി, മുഹമ്മദ് ഷെഫീഖ്, അസിസ്റ്റന്‍റ് മോട്ടോർ വെഹിക്കിൾ ഇൻസ്പെക്ടർമാരായ എം.മയിൽരാജ്, മുഹമ്മദ് ബഷീർ, ഹരികൃഷ്ണൻ, കെ.മുകേഷ് എന്നിവർ അടങ്ങുന്ന സംഘമാണ് വാഹനങ്ങൾ പരിശോധിച്ചത്. വാഹനങ്ങളുടെ പ്രവർത്തന ക്ഷമത, വേഗപ്പൂട്ട്, ജിപിഎസ്, ഫസ്റ്റ് എയ്ഡ് കിറ്റ് തുടങ്ങിയ സാങ്കേതിക കാര്യങ്ങളാണ് പരിശോധിച്ചത്. ഫിറ്റ്നസ് തെളിയിച്ച വാഹനങ്ങളിൽ ചെക്ക്ഡ് സ്റ്റിക്കർ പതിപ്പിച്ചു. ഫിറ്റ്നസ് തെളിയിക്കാൻ സാധിക്കാത്ത 16 വാഹനങ്ങൾ തിരിച്ചയച്ചു. പരിശോധനക്ക് വാഹനങ്ങൾ എത്തിക്കാൻ സാധിക്കാത്തവർ സ്കൂൾ തുറക്കുന്നതിനു മുന്പ് നിർബന്ധമായും ഫിറ്റ്നസ് തെളിയിക്കണമെന്ന് ജോയിന്‍റ് ആർടിഒ എം. രമേശ് നിർദേശം നൽകി. താലൂക്കിലെ സ്കൂൾ ബസ് ഡ്രൈവർമാർക്കായി മോട്ടോർ വാഹന വകുപ്പിന്‍റെ നേതൃത്വത്തിൽ സുരക്ഷാ പരിശീലന ക്ലാസും സംഘടിപ്പിച്ചു. ക്ലാസിൽ പങ്കെടുത്താത്തവർക്കും പരിശോധനക്ക് വിധേയമാകാത്ത സ്കൂൾ ബസുകൾക്കെതിരെയും ഫിറ്റ്നസ് തെളിയിക്കാത്ത സ്കൂൾ ബസുകളുടെ പേരിലും നടപടിയെടുക്കുമെന്ന് ഉദ്യോഗസ്ഥർ അറിയിച്ചു.

ഒഴിവ് ദിവസങ്ങളിലും വിദ്യാർഥികൾക്ക് കണ്‍സഷൻ അനുവദിക്കണം: കളക്ടർ

മലപ്പുറം: അവധിക്കാലത്തും ഒഴിവ് ദിവസങ്ങളിലും വിദ്യാഭ്യാസ സ്ഥാപനങ്ങൾ പ്രവർത്തിക്കുന്നുണ്ടെങ്കിൽ ബസ് യാത്രയ്ക്ക് നിർബന്ധമായും കണ്‍സഷൻ അനുവദിക്കണമെന്ന് ജില്ലാ കളക്ടർ വി.ആർ. വിനോദ് നിർദേശിച്ചു. കണ്ടക്ടർ ആവശ്യപ്പെട്ടാൽ കണ്‍സഷൻ കാർഡും ഐഡി കാർഡും കാണിക്കാൻ വിദ്യാർഥികൾ ബാധ്യസ്ഥരാണെന്നും കളക്ടർ അറിയിച്ചു. സ്റ്റുഡന്‍റ്സ് ട്രാവലിംഗ് ഫെസിലിറ്റി കമ്മിറ്റിയുടെ യോഗത്തിൽ അധ്യക്ഷത വഹിച്ച് സംസാരിക്കുകയായിരുന്നു കളക്ടർ. രാവിലെ ഏഴ് മുതൽ വൈകിട്ട് ഏഴ് വരെയാണ് വിദ്യാർഥികൾക്ക് ബസുകളിൽ കണ്‍സഷൻ അനുവദിക്കുന്നത്. 27 വയസിന് താഴെ പ്രായമുള്ള റെഗുലർ വിദ്യാർഥികൾക്കാണ് ഇതിന് അർഹതയുള്ളത്. കണ്‍സഷൻ കാർഡിന് അപേക്ഷിക്കുന്ന വിദ്യാഭ്യാസ സ്ഥാപനങ്ങൾ അപേക്ഷയോടൊപ്പം 200 രൂപയുടെ മുദ്ര പത്രത്തിൽ സത്യവാങ്മൂലം സമർപ്പിക്കണം. വിദ്യാർഥികളിൽ നിന്ന് അധിക ചാർജ് ഈടാക്കാൻ പാടില്ലെന്ന് യോഗത്തിൽ നിർദേശം നൽകി. ബസ് പുറപ്പെടുന്നതുവരെ കുട്ടികളെ ബസിനടുത്ത് വെയിലത്തും മഴയത്തും നിർത്തുന്നത് ശ്രദ്ധയിൽപ്പെട്ടാൽ കർശന നടപടിയുണ്ടാകും. കെഎസ്ആർടിസി ബസുകളിൽ വിദ്യാർഥികൾക്ക് കൂടുതൽ പാസ് നൽകുന്നതിന് നടപടി വേണമെന്നും വിദ്യാർഥികളും ബസ് ഉടമകളും പങ്കെടുത്ത യോഗത്തിൽ ആവശ്യപ്പെട്ടു. വൈകുന്നേരങ്ങളിൽ സ്കൂൾ സ്റ്റോപ്പുകളിലെ തിരക്ക് കുറയ്ക്കാൻ 10 മിനിറ്റിന്‍റെ ഇടവേളകളിൽ വിവിധ ക്ലാസുകൾ വിടുന്ന കാര്യം പരിഗണിക്കാമെന്ന്് കളക്ടർ അറിയിച്ചു. ഇക്കാര്യത്തിൽ സ്കൂൾ അധികൃതർക്ക് പിടിഎ യോഗം ചേർന്ന് തീരുമാനമെടുക്കാം. പോലീസ്, മോട്ടോർവാഹന വകുപ്പുകളിലെ ഉദ്യോഗസ്ഥരും ബസ് ഉടമകളുടെ സംഘടനാപ്രതിനിധികളും വിദ്യാർഥി സംഘടനാപ്രതിനിധികളും യോഗത്തിൽ പങ്കെടുത്തു.

വീട്ടമ്മയുടെ ആഭരണങ്ങൾ തട്ടിയെടുത്ത യുവാവിന് തടവും പിഴയും

മഞ്ചേരി: പ്രണയം നടിച്ച് വീട്ടമ്മയുടെ എട്ട് പവൻ സ്വർണാഭരണങ്ങൾ തട്ടിയെടുത്ത യുവാവിന് മഞ്ചേരി ഫാസ്റ്റ് ട്രാക് സ്പെഷൽ കോടതി (രണ്ട്) രണ്ടു വർഷം കഠിന തടവിനും രണ്ട് ലക്ഷം രൂപ പിഴയടക്കാനും ശിക്ഷിച്ചു. തിരുവനന്തപുരം ഒറ്റശേഖരമംഗലം വെള്ളറട ദാലുമുഖം മറവൻകോട് തെക്കേക്കര പുത്തൻവീട് എം.ജി. അനീഷ് (36)നെയാണ് ജഡ്ജ് എസ്. രശ്മി ശിക്ഷിച്ചത്. 2020 ജനുവരി 15നാണ് കേസിനാസ്പദമായ സംഭവം. 31കാരിയായ വീട്ടമ്മയെ പ്രതി കോട്ടക്കൽ ചങ്കുവെട്ടിയിലെ ലോഡ്ജിൽ കൊണ്ടുപോയി പീഡനത്തിന് ഇരയാക്കിയതായും പരാതിയിൽ പറയുന്നു. കോട്ടക്കൽ പോലീസ് ഇൻസ്പെക്ടർമാരായിരുന്ന കെ.ഒ. പ്രദീപ്, എം.കെ. ഷാജി എന്നിവരാണ് കേസന്വേഷണം നടത്തിയത്. പ്രോസിക്യൂഷനു വേണ്ടി ഹാജരായ സ്പെഷൽ പബ്ലിക് പ്രോസിക്യൂട്ടർ അഡ്വ. എ.എൻ. മനോജ് 16 സാക്ഷികളെ കോടതി മുന്പാകെ വിസ്തരിച്ചു. 22 രേഖകളും ഹാജരാക്കി. പിഴയൊടുക്കാത്തപക്ഷം പ്രതി ആറു മാസത്തെ അധിക തടവ് അനുഭവിക്കണമെന്നും കോടതി വിധിച്ചു.

ഗതാഗത കുരുക്കിൽപ്പെട്ട കാർ ഭാഗികമായി കത്തിനശിച്ചു

പെരിന്തൽമണ്ണ: പാലക്കാട് - കോഴിക്കോട് ദേശീയപാതയിൽ ഗതാഗതക്കുരുക്കിൽപ്പെട്ട കാർ ഭാഗികമായി കത്തി നശിച്ചു. പെരിന്തൽമണ്ണയിൽ നിന്ന് അങ്ങാടിപ്പുറം ഭാഗത്തേക്ക് പോവുകയായിരുന്ന കാറാണ് പെരിന്തൽമണ്ണ ജൂബിലി ജംഗ്ഷനിൽ വച്ച് കത്തിയത്. ചൊവ്വാഴ്ച വൈകിട്ട് ഏഴ് മണിയോടെയാണ് സംഭവം. ജൂബിലി ജംഗ്ഷൻ പിന്നിട്ടതോടെ കാറിന്‍റെ മുൻവശത്ത് നിന്ന് പുകയുയർന്നു. ഉടൻ ഡ്രൈവർ കാറിലെ യാത്രക്കാരോട് ഇറങ്ങാൻ പറഞ്ഞു. പെട്ടെന്ന് കാറിന്‍റെ മുൻവശം കത്തുകയും ഉഗ്രശബ്ദം ഉണ്ടാവുകയുമായിരുന്നെന്ന് ദൃക്സാക്ഷികൾ പറഞ്ഞു. സമീപത്തുള്ള കാർ ആക്സസറീസ് ഷോപ്പിൽ നിന്ന് അഗ്നിരക്ഷാ ഉപകരണങ്ങൾ ഉപയോഗിച്ച് ജീവനക്കാർ തീയണച്ചതിനാൽ വൻ അപകടമൊഴിവായി. അങ്ങാടിപ്പുറം ഭാഗത്തേക്ക് ഏറെ ഗതാഗതക്കുരുക്കുള്ള സമയത്തായിരുന്നു അപകടം. ഗതാഗത കുരുക്കിൽ മണിക്കൂറുകൾ വാഹനങ്ങൾ സ്റ്റാർട്ട് ചെയ്ത് നിൽക്കുന്നതിനാൽ വാഹനങ്ങൾക്ക് ഇതുപോലുള്ള ഇലക്ട്രിക് സാമഗ്രികൾക്ക് കേടുപാടുകൾ സംഭവിക്കുക പതിവാണെന്ന് സമീപത്തെ വ്യാപാരികൾ പറയുന്നു.

മർച്ചന്‍റ്സ് അസോസിയേഷൻ പഠനോപകരണങ്ങൾ വിതരണം ചെയ്തു

പെരിന്തൽമണ്ണ: പെരിന്തൽമണ്ണ മർച്ചന്‍റ്സ് അസോസിയേഷന്‍റെ ജീവകാരുണ്യ പ്രവർത്തനങ്ങളുടെ ഭാഗമായി യൂത്ത് വിംഗിന്‍റെ ആഭിമുഖ്യത്തിൽ പെരിന്തൽമണ്ണയിലെ നിർധനരായ വിദ്യാർഥികൾക്ക് പഠനോപകരണങ്ങൾ വിതരണം ചെയ്തു. മർച്ചന്‍റ്സ് അസോസിയേഷൻ പ്രസിഡന്‍റ് പി.ടി.എസ്. മൂസു യോഗം ഉദ്ഘാടനം ചെയ്തു. ജില്ലാ യൂത്ത് വിംഗ് പ്രസിഡന്‍റ് താജുദ്ദീൻ ഉറുമഞ്ചേരി പഠനോപകരണ വിതരണം നടത്തി. യൂത്ത് വിംഗ് ജില്ലാ ജനറൽ സെക്രട്ടറി ആരിഫ് കരുവാരകുണ്ട് മുഖ്യപ്രഭാഷണം നടത്തി. പരിപാടിയോടനുബന്ധിച്ച് ചരിത്ര പുരാവസ്തു പ്രദർശനവും സിസ്കോ മൊയ്തു നയിച്ച മോട്ടിവേഷൻ ക്ലാസും ഉണ്ടായിരുന്നു. യൂത്ത് വിംഗ് പ്രസിഡന്‍റ് കാജാമുഹിയുദീൻ അധ്യക്ഷതവഹിച്ചു. മർച്ചന്‍റ്സ് അസോസിയേഷൻ ജനറൽ സെക്രട്ടറി സി.പി. മുഹമ്മദ് ഇഖ്ബാൽ, ലത്തീഫ് ടാലന്‍റ്, യൂത്ത് ജനറൽ സെക്രട്ടറി ഇബ്രാഹിം കാരയിൽ, ഇബ്രാഹിം ഫിറോസ്, ഫിറോസ് ഫസ്റ്റ് ക്രൈ, റിയാസ് ഹൈടെക്, യഹിയ, ഒസാമ, ഫിറോസ് ബാബു എന്നിവർ നേതൃത്വം നൽകി. യൂത്ത് വിംഗ് കോ ഓർഡിനേറ്റർ ഷാലിമാർ ഷൗക്കത്ത്, പെയിൻ ആൻഡ് പാലിയേറ്റീവ് ജനറൽ സെക്രട്ടറി പി.പി. സൈതലവി, മണ്ഡലം പ്രസിഡന്‍റ് യൂസഫ് രാമപുരം തുടങ്ങിയവർ പ്രസംഗിച്ചു.

രാമപുരം ജെംസ് കോളജിന് ഓട്ടോണോമസ് അംഗീകാരം

രാമപുരം: കാലിക്കട്ട് സർവകലാശാലയുടെ കീഴിലുള്ള രാമപുരം ജെംസ് കോളജിന് യൂണിവേഴ്സിറ്റി ഗ്രാന്‍റ്സ് കമ്മീഷൻ (യുജിസി) സ്വയംഭരണ പദവി (ഓട്ടോണോമസ് അംഗീകാരം) നൽകി. കോളജിന്‍റെ അക്കാഡമിക് നിലവാരം, ഭരണനിർവഹണം, പാഠ്യപദ്ധതി, വികസന സംരംഭങ്ങൾ, അടിസ്ഥാന സൗകര്യങ്ങൾ എന്നിവ വിലയിരുത്തിയ ശേഷമാണ് യുജിസിയുടെ തീരുമാനം. സർവകലാശാല സ്വയംഭരണ സമിതി നേരത്തെ സ്ഥാപനം സന്ദർശിച്ചിരുന്നു. സമിതി സമർപ്പിച്ച റിപ്പോർട്ടിന്‍റെയും കോളജിന്‍റെ സമഗ്രമായ പ്രകടനത്തിന്‍റെയും അടിസ്ഥാനത്തിലാണ് യുജിസി സ്വയംഭരണ പദവി അനുവദിച്ചത്. ഈ അംഗീകാരത്തോടെ രാമപുരം ജെംസ് കോളജിന് സ്വന്തമായി പാഠ്യപദ്ധതികൾ രൂപകൽപ്പന ചെയ്യാനും പരീക്ഷകൾ നടത്താനും ഫലങ്ങൾ പ്രസിദ്ധീകരിക്കാനും സാധിക്കും. ഇത് വിദ്യാർഥികൾക്ക് കൂടുതൽ പ്രയോജനകരവും തൊഴിലധിഷ്ഠിതവുമായ കോഴ്സുകൾ പഠിക്കാൻ അവസരമൊരുക്കും. കൂടാതെ, വിദ്യാഭ്യാസ മേഖലയിലെ പുതിയ മാറ്റങ്ങളെയും ആവശ്യകതകളെയും ഉൾകൊണ്ട് പാഠ്യപദ്ധതിയിൽ വേഗത്തിൽ പരിഷ്കാരങ്ങൾ വരുത്താനും പുതിയ കോഴ്സുകൾ ആരംഭിക്കാനും കോളജിന് സാധിക്കുമെന്ന് കോളജ് ഭരണസമിതി അറിയിച്ചു.

നിലന്പൂർ വോട്ടു ചെയ്യുന്നത് കേരളത്തിന് വേണ്ടി: സണ്ണി ജോസഫ്

മൂത്തേടം: നിലന്പൂർ വോട്ടു ചെയ്യുന്നത് കേരളത്തിന് വേണ്ടിയാണെന്ന് കെപിസിസി പ്രസിഡന്‍റ് സണ്ണി ജോസഫ് എംഎൽഎ. കേരളത്തിലെ ഭരണമാറ്റത്തിന് തുടക്കം കുറിക്കുന്ന തെരഞ്ഞെടുപ്പാകും നിലന്പൂരിലേതെന്നും അദ്ദേഹം വ്യക്തമാക്കി. കരുളായി പഞ്ചായത്ത് യുഡിഎഫ് കണ്‍വൻഷൻ ഉദ്ഘാടനം ചെയ്ത് പ്രസംഗിക്കുകയായിരുന്നു. പി. അഷ്റഫ് അധ്യക്ഷത വഹിച്ചു. പ്രതിപക്ഷ നേതാവ് വി.ഡി സതീശൻ, കെപിസിസി വർക്കിംഗ് പ്രസിഡന്‍റുമാരായ എ.പി. അനിൽകുമാർ എംഎൽഎ, പി.സി. വിഷ്ണുനാഥ് എംഎൽഎ, ഷാഫി പറന്പിൽ എംപി, മഹിളാ കോണ്‍ഗ്രസ് പ്രസിഡന്‍റ് ജെബി മേത്തർ എംപി, പി. അബ്ദുൾ ഹമീദ് എംഎൽഎ, ഡിസിസി പ്രസിഡന്‍റ് വി.എസ്. ജോയി, ആലിപ്പറ്റ ജമീല, കെ.പി. നൗഷാദലി എന്നിവർ പ്രസംഗിച്ചു.

നിലന്പൂരിൽ സിപിഎം വോട്ടുകളും യുഡിഎഫിന്: വി.ഡി. സതീശൻ

അമരന്പലം: നിലന്പൂർ ഉപതെരഞ്ഞെടുപ്പിൽ സിപിഎം വോട്ടുകളും യുഡിഎഫിന് ലഭിക്കുമെന്ന് പ്രതിപക്ഷ നേതാവ് വി.ഡി. സതീശൻ. ചിട്ടയൊപ്പിച്ച പ്രവർത്തനം നടത്തിയാൽ യഥാർഥ കമ്മ്യൂണിസ്റ്റുകാരുടെ വോട്ടും ലഭിക്കുമെന്നത് ഉറപ്പാണെന്നും അദ്ദേഹം വ്യക്തമാക്കി. അമരന്പലം വ്യാപാര ഭവനിൽ അമരന്പലം പഞ്ചായത്തിലെ യുഡിഎഫ് ബൂത്ത് ഭാരവാഹി കണ്‍വൻഷൻ ഉദ്ഘാടനം ചെയ്ത് പ്രസംഗിക്കുകയായിരുന്നു. സംസ്ഥാനത്ത് ഏറ്റവും ശക്തമായ യുഡിഎഫ് സംവിധാനമുള്ള മണ്ഡലമാണ് നിലന്പൂർ. 30ന് ഒറ്റ ദിവസം കൊണ്ട് 263 ബൂത്തിലും പ്രവർത്തക കണ്‍വൻഷൻ വിളിച്ചു ചേർക്കുകയാണ്. ഇതുവരെ കാണാത്ത ഐക്യമാണ് കോണ്‍ഗ്രസിലും യുഡിഎഫിലുമെന്നും അദ്ദേഹം പറഞ്ഞു. പഞ്ചായത്ത് യുഡിഎഫ് ചെയർമാൻ അഷ്റഫ് മുണ്ടശേരി അധ്യക്ഷത വഹിച്ചു. കെപിസിസി പ്രസിഡന്‍റ് സണ്ണി ജോസഫ് എംഎൽഎ, കെപിസിസി വർക്കിംഗ് പ്രസിഡന്‍റ് പി.സി. വിഷ്ണുനാഥ് എംഎൽഎ, ജെബി മേത്തർ എംപി, പി.അബ്ദുൾ ഹമീദ് എംഎൽഎ, സി.പി. ചെറിയ മുഹമ്മദ്, ഇസ്മായിൽ മൂത്തേടം, ഇഖ്ബാൽ മുണ്ടേരി, എൻ.എ. കരീം, കേന്പിൽ രവി, സ്ഥാനാർഥി ആര്യാടൻ ഷൗക്കത്ത് എന്നിവർ പ്രസംഗിച്ചു.

കാറിന് മുകളിൽ മരം പൊട്ടി വീണു

മഞ്ചേരി: മഞ്ചേരിയിൽ കാറിന് മുകളിലേക്ക് മരം പൊട്ടി വീണു. ഇന്നലെ വൈകീട്ട് 3.45ഓടെയാണ് അപകടം. മഞ്ചേരി കച്ചേരിപ്പടി ബോയ്സ് ഹയർ സെക്കൻഡറി സ്കൂളിന് മുൻവശത്ത് റോഡിനോട് ചേർന്ന് നിർത്തിയിട്ട കാറിനു മുകളിലേക്കാണ് മരം പൊട്ടി വീണത്. റോഡിനോട് ചേർന്ന് സ്വകാര്യവ്യക്തിയുടെ പറന്പിലെ മരമാണ് പൊട്ടിവീണത്. വാഹനത്തിലുണ്ടായിരുന്ന യുവാക്കൾ അത്ഭുതകരമായി രക്ഷപ്പെട്ടു. കാറിന്‍റെ മുകൾവശവും മുൻവശത്തെ ഗ്ലാസിനും സാരമായ കേടുപാടുകൾ പറ്റി. മഞ്ചേരി അഗ്നിരക്ഷാ നിലയം മേധാവി സുനിൽകുമാറിന്‍റെ നേതൃത്വത്തിലുള്ള ഫയർഫോഴ്സ് സംഘം മരം മുറിച്ചുമാറ്റി വാഹനം പുറത്തെടുത്തു. ഒഴുകൂർ സ്വദേശി ഇർഷാദിന്‍റെ വാഹനമാണ് അപകടത്തിൽപ്പെട്ടത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]