ADVERTISEMENT

ADVERTISEMENT

എസ്എസ്എൽസി ; ഉന്നതവിജയികളെ ആദരിച്ചു

പുല്ലൂരാംപാറ: പുല്ലൂരാംപാറ സെന്‍റ് ജോസഫ്സ് ഹൈസ്കൂളിൽ നിന്ന് എസ്എസ്എൽസ ി പരീക്ഷയിൽ മുഴുവൻ വിഷയങ്ങളിൽ എ പ്ലസ് നേടിയ വിദ്യാർഥികളെയും ഒന്പത് എ പ്ലസ് നേടിയ വിദ്യാർഥികളെയും ആദരിച്ചു.

തിരുവമ്പാടി ഗ്രാമപഞ്ചായത്ത് പ്രസിഡന്‍റ് ബിന്ദു ജോൺസൺ പരിപാടി ഉദ്ഘാടനം ചെയ്തു. സ്കൂൾ മാനേജർ ഫാ. കുര്യാക്കോസ് മുകാല അധ്യക്ഷത വഹിച്ചു.

സ്കൂൾ ഹെഡ്മാസ്റ്റർ ജോളി ജോസഫ് ഉണ്ണിയേപ്പിള്ളിൽ, വാർഡ് മെമ്പർ മേഴ്സി പുളിക്കാട്ട്, സെന്‍റ് ജോസഫ്സ് ഹയർ സെക്കൻഡറി സ്കൂൾ പ്രിൻസിപ്പൽ സുനിൽ ജോസഫ്, പിടിഎ പ്രസിഡന്‍റ് വിൽസൺ താഴത്തുപറമ്പിൽ, മുൻ അധ്യാപകരായ ബീന പോൾ, ജോളി തോമസ് എന്നിവർ പ്രസംഗിച്ചു.

ADVERTISEMENT

കൂരാച്ചുണ്ട് ജെസിഐയ്ക്ക് ബ്ലഡ് യൂണിറ്റി അവാർഡ് കൈമാറി

കൂരാച്ചുണ്ട്: യൂത്ത് കോൺഗ്രസ് കൂരാച്ചുണ്ട് മണ്ഡലം കമ്മിറ്റി ലോക രക്തദാന ദിനത്തിൽ പ്രഖ്യാപിച്ച ബ്ലഡ് യൂണിറ്റി അവാർഡ് ജെസിഐ കൂരാച്ചുണ്ടിന് കൈമാറി. രക്തദാന രംഗത്ത് മാതൃകാപരമായ പ്രവർത്തനങ്ങൾക്ക് നേതൃത്വം നൽകിയതാണ് അവാർഡിന് അർഹമാക്കിയത്. ഡിസിസി ജനറൽ സെക്രട്ടറി നിജേഷ് അരവിന്ദ് പുരസ്‌കാരം കൈമാറി. ജെസിഐ പ്രസിഡന്‍റ് ഡോ.എ.ജെ. അനിൽ, ജലീൽ കുന്നുംപുറം എന്നിവർ പുരസ്‌കാരം ഏറ്റുവാങ്ങി. യൂത്ത് കോൺഗ്രസ്‌ മണ്ഡലം പ്രസിഡന്‍റ് നിസാം കക്കയം അധ്യക്ഷത വഹിച്ചു. യൂത്ത് കോൺഗ്രസ്‌ സംസ്ഥാന ജനറൽ സെക്രട്ടറി വൈശാഖ് കണ്ണോറ, നിയോജക മണ്ഡലം പ്രസിഡന്‍റ് അഭിജിത്ത് ഉണ്ണികുളം, ജെറിൻ കുര്യാക്കോസ്, ജോസ്ബിൻ കുര്യാക്കോസ്, വിഷ്ണു തണ്ടോറ, അജ്മൽ ചാലിടം, ജാക്സ് കരിമ്പനക്കുഴി, ജ്യോതിഷ് രാരപ്പൻകണ്ടി എന്നിവർ പ്രസംഗിച്ചു.

വിദ്യാര്‍ഥികള്‍ സാമൂഹ്യ ബോധമുള്ളവരായി വളരണം: പി. സതീദേവി

കോഴിക്കോട്: വിദ്യാര്‍ഥികള്‍ സാമൂഹ്യ ബോധമുള്ളവരായി വളരണമെന്ന് സംസ്ഥാന വനിതാ കമീഷന്‍ അധ്യക്ഷ പി. സതീദേവി. "വ്യക്തി, സമൂഹം, സ്വാതന്ത്ര്യം: ലിംഗ വിവേചനങ്ങളുടെ കേരളീയ പശ്ചാത്തലം' വിഷയത്തില്‍ ഉള്ളിയേരി എംഡിഐടി എന്‍ജിനീയറിംഗ് കോളജില്‍ സംഘടിപ്പിച്ച സംസ്ഥാനതല സെമിനാര്‍ ഉദ്ഘാടനം ചെയ്യുകയായിരുന്നു അവര്‍. സമൂഹത്തില്‍ വ്യക്തികള്‍ എങ്ങനെ ജീവിക്കണമെന്നതിനെ കുറിച്ചും പൗരാവകാശത്തെ കുറിച്ചും ധാരണയുള്ളവരായി യുവതലമുറ മുന്നോട്ടുവന്നാല്‍ മാത്രമേ ഭരണഘടന ലക്ഷ്യമിടുന്ന രീതിയില്‍ രാജ്യത്തെ മാറ്റിയെടുക്കാന്‍ സാധിക്കൂ. എല്ലാ ലൈംഗിക വിഭാഗങ്ങള്‍ക്കും അവരുടേതായ അവകാശങ്ങളുണ്ട്. അതിന് പരിരക്ഷ കൊടുക്കുന്ന നാടായി നമ്മുടെ നാടിനെ മാറ്റിയെടുക്കണമെന്നും അവര്‍ കൂട്ടിച്ചേര്‍ത്തു. ചടങ്ങില്‍ എംഡിറ്റ് ചെയര്‍മാന്‍ എം. മെഹബൂബ് അധ്യക്ഷത വഹിച്ചു. എൻജിനീയറിംഗ് കോളജ് പ്രിന്‍സിപ്പല്‍ ഡോ. മഹീഷന്‍, ആര്‍ട്‌സ് ആന്‍ഡ് സയന്‍സ് കോളജ് പ്രിന്‍സിപ്പല്‍ ബീന സദാശിവന്‍, പോളിടെക്നിക് കോളജ് പ്രിന്‍സിപ്പല്‍ പി. ഷഹനാസ് തുടങ്ങിയവര്‍ പങ്കെടുത്തു.

മലയോര ഹൈവേ പെരുവണ്ണാമൂഴിയിൽ നീർപ്പാലത്തിനടിയിലൂടെ തന്നെ നിർമ്മിക്കും

ചക്കിട്ടപാറ: മലയോര ഹൈവേ പെരുവണ്ണാമൂഴി താഴത്തുവയലിൽ നിന്ന് കുറ്റ്യാടി ജലസേചന പദ്ധതിയുടെ ഇടതുകര നീർപ്പാലത്തിന് അടിയിലൂടെ തന്നെ നിർമ്മിക്കുമെന്ന് കേരളാ റോഡ് ഫണ്ട് ബോർഡ്. കൊയിലാണ്ടി താലൂക്ക് വികസന സമിതിക്ക് വകുപ്പ് എക്സിക്യൂട്ടീവ് എന്‍ജിനീയര്‍ ഒപ്പിട്ട് സമർപ്പിച്ച രേഖാ പരമായ റിപ്പോർട്ടിലാണ് ഇത് വ്യക്തമാക്കുന്നത്. ചക്കിട്ടപാറ പഞ്ചായത്ത് മുൻ ഭരണ സമിതി അംഗം ജെയിംസ് മാത്യു താലൂക്ക്‌ വികസന സമിതിക്ക് ഇത് സംബന്ധിച്ച് നേരത്തെ പരാതി നൽകിയിരുന്നു. ഇതിനുള്ള മറുപടിയായാണ് റിപ്പോർട്ട് സമിതിക്ക് നൽകിയത്. മലയോര ഹൈവേ നീർപ്പാലത്തിനു മുകളിലൂടെ നിർമ്മിക്കുമ്പോൾ 10 മീറ്റർ ഉയരത്തിൽ മണ്ണിട്ട്‌ ഉയർത്തി അടിത്തറ (എമ്പാൻക്മെന്‍റ്) നിർമ്മിക്കേണ്ടി വരും. ഇത് സമീപവാസികൾക്ക് ബുദ്ധിമുട്ട് സൃഷ്ടിക്കുമെന്നാണ് കെആർഎഫ്ബി റിപ്പോർട്ടിൽ പറയുന്നത്. മാത്രമല്ല, വിഷയം പരിസര വാസികളുമായി എംഎൽഎ. ചർച്ച നടത്തിയിട്ടുമുണ്ട്. നീർപ്പാലത്തിന് താഴെ റോഡിൽ വരുന്ന വെള്ളം അരികിലുള്ള തോട്ടിലേക്ക് ഒഴുക്കി വിടാനുള്ള കലുങ്കും ഡ്രെയിനേജും ഇതോടൊപ്പം നിർമ്മിക്കുമെന്നും റിപ്പോർട്ടിൽ പറയുന്നു. അതേ സമയം കാലവർഷക്കാലത്ത് നീർപ്പാലത്തിന്‍റെ അടി വശവും റോഡും പ്രളയത്തിൽ പലപ്പോഴും മുങ്ങി ദിവസങ്ങളോളം ഗതാഗതം മുടങ്ങാറുണ്ടെന്ന കാര്യം കെ.ആർ.എഫ്.ബി. ബോധപൂർവം മറന്നിരിക്കുകയാണെന്ന ആരോപണം ഇതിനകം ഉയര്‍ന്നിട്ടുണ്ട്. നീർപ്പാലത്തിനടിവശത്ത് ഒരു കുടുംബം മാത്രമാണ് താമസിക്കുന്നത്. പ്രളയത്തിൽ ഇയാളുടെ വീടും സ്ഥലവും മുങ്ങാറുണ്ട്. ഒരു കുടുംബത്തിനു വേണ്ടി നേരത്തെ നിർദ്ദേശിക്കപ്പെട്ട നീർപ്പാലത്തിനു മീതെയുള്ള മലയോര ഹൈവേ അലൈൻമെന്‍റിൽ ഭേദഗതി വരുത്തുന്നത് ശരിയല്ലെന്ന അഭിപ്രായമാണ് ഉയരുന്നത്.

വാർഡ് വിഭജന നടപടികൾ ഹൈക്കോടതി സ്റ്റേ ചെയ്തു

പേരാമ്പ്ര: അശാസ്ത്രീയമായ വാർഡ് വിഭജനത്തിനെതിരേ പേരാമ്പ്ര പഞ്ചായത്ത് യുഡിഎഫ് കമ്മിറ്റി സമർപ്പിച്ച പെറ്റീഷൻ അംഗീകരിച്ച് പഞ്ചായത്ത് വാർഡ് വിഭജന നടപടികൾ കേരള ഹൈക്കോടതി സ്റ്റേ ചെയ്തു. വാർഡു വിഭജനത്തിന്‍റെ കരട് ലിസ്റ്റ് പ്രസിദ്ധീകരിച്ചപ്പോൾ തന്നെ ജില്ലാ ഡീലിമിറ്റേഷൻ കമ്മിറ്റിക്കും സംസ്ഥാന ഡിലിമിറ്റേഷൻ കമ്മറ്റിക്കും പേരാമ്പ്ര പഞ്ചായത്ത് യുഡിഎഫ് കമ്മിറ്റി പരാതി നൽകിയിരുന്നു. ഡിലിമിറ്റേഷൻ കമ്മിറ്റി നിർദേശിച്ച എല്ലാ മാനദണ്ഡങ്ങളും ലംഘിച്ചാണ് പേരാമ്പ്ര പഞ്ചായത്ത് വാർഡ് വിഭജനം നടത്തിയത്. പഞ്ചായത്ത് വാർഡുകൾ നിർണയിച്ചപ്പോൾ ഭൂമി ശാസ്ത്രപരമായ അതിരുകൾ എന്ന മാനദണ്ഡം പോലും സ്വീകരിച്ചില്ല. ആറു കിലോമീറ്റർ വരെ സഞ്ചരിച്ചാൽ മാത്രമേ പല വാർഡുകളുടേയും ഒരറ്റത്ത് നിന്ന് മറ്റേ അറ്റത്ത് എത്താൻ സാധിക്കുകയുള്ളു. ഈ അപാകതകൾ ചൂണ്ടിക്കാട്ടിയാണ് യുഡിഎഫ് ഹൈക്കോടതിയെ സമീപിച്ചത്. അഡ്വ. ഷിബു മീരാൻ മുഖേനയാണ് ഹർജി ഫയൽ ചെയ്തത്.

നിയന്ത്രണം വിട്ട പിക്കപ്പ് വൈദ്യുതി തൂണിൽ ഇടിച്ച് ഡ്രൈവർക്ക് പരിക്ക്

താമരശേരി: ദേശീയ പാതയിൽ താമരശേരി ചുങ്കം കെടവൂർ ജുമാ മസ്ജിദിന് മുൻവശം നിയന്ത്രണം വിട്ട പിക്കപ്പ് വാൻ വൈദ്യുതി തൂണിൽ ഇടിച്ച് ഡ്രൈവർ ആലപ്പുഴ സ്വദേശി യാസീൻ (24) ന് പരുക്കേറ്റു. ഇയാളെ താമരശേരി താലൂക്ക് ആശുപത്രിയിൽ പ്രവേശിപ്പിച്ചു. സംഭവത്തിൽ ദേശീയ പാതയിൽ ഏറെ നേരം ഗതാഗതം സ്തംഭിച്ചു.

രക്ഷാപ്രവർത്തകരെ ആക്രമിച്ച സംഭവം: പ്രതികളെ കണ്ടെത്താനായില്ല

കോഴിക്കോട് ∙ രക്ഷാപ്രവർത്തനത്തിനു പോകുന്നതിനിടെ അഗ്നിരക്ഷാസേന സിവിൽ ഡിഫൻസ് അംഗങ്ങളെ വാഹനത്തിലെത്തിയ അഞ്ചംഗ സംഘം ആയുധം കൊണ്ട് ആക്രമിച്ച സംഭവത്തിൽ പ്രതികളെ പിടികൂടാനായില്ല. യുവാവിനെ ആക്രമിക്കുന്ന സിസിടിവി ദൃശ്യം പുറത്തു വന്നതോടെ ക്വട്ടേഷൻ സംഘമാണെന്നാണു പോലീസ് നിഗമനം. പുതിയപാലം സ്വദേശി തറയിങ്ങൽ എം.പി.അനീസ് റഹ്മാൻ, സുഹൃത്ത് മൻസൂർ എന്നിവർക്കാണ് ഗുരുതര പരിക്കേറ്റത്. കഴിഞ്ഞ മാസം 18ന് മൊഫ്യൂസിൽ ബസ് സ്റ്റാൻഡിലെ തീപിടിത്തത്തെ തുടർന്നു അനീസ് കുതിരവട്ടം – പൊറ്റമ്മൽ റോഡ് വഴി വാഹനത്തിൽ വരുമ്പോൾ ഗതാഗതക്കുരുക്കായി. തുടർന്നു വാഹനം അവിടെ വച്ച് സുഹൃത്ത് മൻസൂറിനൊപ്പം നഗരത്തിലേക്ക് നടന്നു പോകുമ്പോൾ ഒരു വാഹനം തുടർച്ചയായി ഹോൺ മുഴക്കി സഞ്ചരിച്ചത് അനീസ് ഇടപെട്ടു നിർത്തിച്ചു. പിന്നീട് അനീസും സുഹൃത്തും നടന്നു പോകുന്നതിനിടെ അനീസിനെ പിന്തുടർന്ന് എത്തിയ വാഹനം ഇടിച്ചു തെറിപ്പിക്കാൻ ശ്രമിച്ചു. അനീസിനെ പിന്നീട് വാഹനത്തിലുള്ള അഞ്ചംഗ സംഘം ആയുധം കൊണ്ടു മർദിച്ചു. തടുക്കാൻ ശ്രമിക്കുന്നതിനിടെ അടിയേറ്റ സുഹൃത്തിന്‍റെ പല്ല് പോയി. തുടർന്നു നാലു പേർ ചേർന്നു അനീസിനെ ക്രൂരമായി മർദിക്കുന്നത് സിസിടിവി ദൃശ്യത്തിലുണ്ട്. പിന്നീട്, സുഹൃത്തുക്കളാണ് വീണു കിടന്ന അനീസിനെ മെഡിക്കൽ കോളജ് ആശുപത്രിയിൽ എത്തിച്ചത്.

കാർ വീടിന്‍റെ മതിലിൽ ഇടിച്ചു തകർന്നു

പുല്ലൂരാംപാറ: കോടഞ്ചേരി- കക്കാടംപൊയിൽ മലയോര ഹൈവേയിൽ നിയന്ത്രണംവിട്ട കാർ വീടിന്‍റെ മതിലിൽ ഇടിച്ചു. പൊന്നാങ്കയം ഐവ ഹോട്ടലിനു സമീപമാണ് അമിത വേഗത്തിൽ വന്ന കാർ വീടിന്‍റെ മതിലിൽ ഇടിച്ചത്. ഇന്നലെ വൈകുന്നേരം നാലിനാണ് അപകടം. അപകടത്തിൽ ആർക്കും പരിക്കില്ല. കൊടുവള്ളി സ്വദേശികളാണ് കാറിലുണ്ടായിരുന്നത്. കാറിന്‍റെ മുൻവശം ഭാഗികമായി തകർന്നു. അമിത വേഗതയും അശ്രദ്ധയും മദ്യലഹരിയുമാണ് മിക്ക അപകടങ്ങളുടെയും മുഖ്യ കാരണമെന്ന് നാട്ടുകാർ പറഞ്ഞു. അപകടത്തെ തുടർന്ന് ഓടിക്കൂടിയ നാട്ടുകാർ ജെസിബി ഉപയോഗിച്ച് കാർ റോഡരികിലേക്ക് മാറ്റി.

സുപ്രീം കോടതി വിധി സര്‍ക്കാര്‍ നടപ്പിലാക്കണം : എന്‍ജിഒ അസോ

കോഴിക്കോട്: ക്ഷാമ ബത്ത സര്‍ക്കാര്‍ ജീവനക്കാരുടെ അവകാശമാണെന്നും കാലതാമസമില്ലാതെ നല്‍കണമെന്നുമുള്ള സുപ്രീം കോടതി വിധി സംസ്ഥാന സര്‍ക്കാര്‍ നടപ്പിലാക്കണമെന്ന് കേരള എന്‍ജിഒ അസോസിയേഷന്‍ ജില്ലാ പ്രസിഡന്‍റ് പ്രേംനാഥ് മംഗലശ്ശേരി ആവശ്യപ്പെട്ടു. സംസ്ഥാനത്ത് ആറു ഗഡുക്കളായി 18 ശതമാനം ക്ഷാമബത്ത കുടിശ്ശികയാണ്. മുന്‍കാല പ്രാബല്യം നിഷേധിച്ചതിലൂടെ 117 മാസത്തെ കുടിശ്ശിക കവര്‍ന്നെടുത്തിരിക്കയാണ്. ക്ഷാമബത്ത ജീവനക്കാരുടെ അവകാശമാണെന്ന കൊല്‍ക്കത്ത ഹൈക്കോടതി വിധിക്കെതിരെ പശ്ചിമബംഗാള്‍ സര്‍ക്കാര്‍ സുപ്രീം കോടതിയില്‍ നല്‍കിയ അപ്പീല്‍ തള്ളിക്കൊണ്ട് സുപ്രീം കോടതി നടത്തിയ വിധിയില്‍ നിന്നു ഒഴിഞ്ഞു മാറാന്‍ കേരള സര്‍ക്കാരിനു കഴിയില്ലെന്ന് പ്രേംനാഥ് മംഗലശ്ശേരി വ്യക്തമാക്കി. സംസ്ഥാന സര്‍ക്കാര്‍ ജീവനക്കാരോടു തുടരുന്ന ഇത്തരം ദ്രോഹ സമീപനങ്ങള്‍ക്കെതിരെ ഭരണ സംഘടനകള്‍ നിലപാട് വ്യക്തമാക്കണമെന്ന് അസോസിയേഷന്‍ ആവശ്യപ്പെട്ടു.

യോഗദിനം ആചരിച്ചു

മുക്കം: അന്താരാഷ്ട്ര യോഗദിനാചരണത്തിന്‍റെ ഭാഗമായി കൊടിയത്തൂർ പഞ്ചായത്ത് ആയുർവേദ ഡിസ്പെൻസറിയിൽ വിവിധ പരിപാടികൾ നടന്നു. യോഗ പരിശീലനം, ബോധവത്കരണ ക്ലാസ് തുടങ്ങിയ പരിപാടികളാണ് നടന്നത്. പരിപാടി പഞ്ചായത്ത് പ്രസിഡന്‍റ് ദിവ്യ ഷിബു ഉദ്ഘാടനം ചെയ്തു. മറിയം കുട്ടി ഹസൻ അധ്യക്ഷത വഹിച്ചു. 2025-2026 വാർഷിക പദ്ധതിയിൽ ഉൾപ്പെടുത്തി വനിതകൾക്ക് യോഗ പരിശീലനത്തിനായി പഞ്ചായത്ത് ആവിഷ്ക്കരിച്ച പദ്ധതിയുടെ ഉദ്ഘാടനവും ചടങ്ങിൽ ദിവ്യ ഷിബു നിർവഹിച്ചു. ജീവിത ശൈലി രോഗങ്ങൾക്ക് യോഗ എന്ന വിഷയത്തിൽ ഡോ: കൃഷ്ണേന്ദു ക്ലാസെടുത്തു.

കൂടരഞ്ഞി പഞ്ചായത്തില്‍ റാലിയും കണ്‍വെന്‍ഷനും സംഘടിപ്പിച്ചു

കൂടരഞ്ഞി: പഞ്ചായത്തില്‍ ലഹരിവിരുദ്ധ ജനകീയ പ്രതിരോധം ലക്ഷ്യമിട്ടുള്ള ജില്ലാ പഞ്ചായത്തിന്‍റെ "2 മില്ല്യണ്‍ പ്ലഡ്ജ്' ക്യാമ്പയിനിന്‍റെ ഭാഗമായി റാലിയും കണ്‍വന്‍ഷനും സംഘടിപ്പിച്ചു. 26ന് നടക്കുന്ന 2 മില്യണ്‍ പ്ലഡ്ജ് പരിപാടി പഞ്ചായത്തിലെ വിവിധ കേന്ദ്രങ്ങളില്‍ ജനകീയ പങ്കാളിത്തത്തോടെ നടത്താന്‍ കണ്‍വെന്‍ഷന്‍ തീരുമാനിച്ചു. കൂടരഞ്ഞി പഞ്ചായത്ത് കമ്യൂണിറ്റി ഹാള്‍ ഓപണ്‍ സ്റ്റേജില്‍ നടന്ന പരിപാടി ജില്ലാ പഞ്ചായത്ത് വികസന സ്ഥിരം സമിതി അധ്യക്ഷ വി.പി. ജമീല ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് ആദര്‍ശ് ജോസഫ് അധ്യക്ഷത വഹിച്ചു. സിവില്‍ എക്‌സൈസ് ഓഫീസര്‍ ഷഫീഖ് അലി ലഹരിവിരുദ്ധ ക്ലാസെടുത്തു. ഹോമിയോ ഡിസ്‌പെന്‍സറി മെഡിക്കല്‍ ഓഫീസര്‍ ഡോ. ഹമീലത്ത്, ഡോ. കൃഷ്‌ണേന്ദു എന്നിവര്‍ യോഗയും തിരുവമ്പാടി അല്‍ഫോന്‍സാ കോളജ് വിദ്യാര്‍ഥികള്‍ ഫ്‌ളാഷ് മോബും അവതരിപ്പിച്ചു. ജില്ലാ പഞ്ചായത്ത് അംഗം ബോസ് ജേക്കബ്, കൂടരഞ്ഞി പഞ്ചായത്ത് വൈസ് പ്രസിഡന്‍റ് മേരി തങ്കച്ചന്‍, സ്ഥിരം സമിതി അധ്യക്ഷരായ വി.എസ്. രവീന്ദ്രന്‍, ജെറീന റോയ്, റോസിലി ജോസ്, പഞ്ചായത്ത് അംഗങ്ങളായ എല്‍സമ്മ ജോര്‍ജ്, സീന ബിജു, ബിന്ദു, സുരേഷ് ബാബു മൂട്ടോളി, ജോസ് തോമസ് മാവറ, സിഡബ്ല്യൂഎഫ് മറീന സെബാസ്റ്റ്യന്‍ തുടങ്ങിയവര്‍ പ്രസംഗിച്ചു.

ലയണ്‍സ് ക്ലബിന് പുതിയ നേതൃത്വം

കോഴിക്കോട്: ലയണ്‍സ് ക്ലബ് ഓഫ് കാലിക്കട്ട് സമോറിയന്‍സ് 2025-26 ലയണ്‍സ് വര്‍ഷത്തേക്കുള്ള പുതിയ ഭാരവാഹികള്‍ ചുമതലയേറ്റു. പി.കെ. സോമസുന്ദരന്‍ ക്ലബ് പ്രസിഡന്‍റായും ബാബു ചിറമ്മേല്‍ സെക്രട്ടറിയായും കെ. ജയരാജന്‍ ട്രഷററായും തെരഞ്ഞെടുക്കപ്പെട്ടു.മുന്‍ ഡിസ്ട്രിക്ട് ഗവര്‍ണര്‍ ഡോ. എസ്. രാജീവ് മുഖ്യാതിഥിയായിരുന്നു. പരിസ്ഥിതി സംരക്ഷണത്തിന് മുന്‍തൂക്കം നല്‍കിയുള്ള ക്ലബിന്‍റെ 10 പ്രധാന സേവന പ്രവര്‍ത്തനങ്ങള്‍ ജൂലൈ ഒന്നിന് ആരംഭിക്കുമെന്ന് ഭാരവാഹികള്‍ അറിയിച്ചു.

പ്രക്ഷോഭം ആരംഭിക്കുമെന്ന് വ്യാപാരികള്‍

കോഴിക്കോട്: പുതിയ ബസ് സ്റ്റാന്‍ഡില്‍ തീപിടിത്തം മൂലം നഷ്ടസംഭവിച്ചിട്ടുള്ള വ്യാപാരികള്‍ക്ക് യാതൊരുവിധ ധനസഹായങ്ങളോ വൈദ്യുതി പുനസ്ഥാപിക്കുകയോ ചെയ്യാത്തതിനെതിരെ പ്രക്ഷോഭം ആരംഭിക്കുമെന്ന് ഇന്ത്യന്‍ നാഷണല്‍ വ്യാപാരി വ്യവസായി കോണ്‍ഗ്രസ് കോഴിക്കോട് ജില്ലാ കമ്മിറ്റി തീരുമാനിച്ചു. ജില്ലാ പ്രസിഡന്‍റ് കെ.വി. കൃഷ്ണന്‍റെ അധ്യക്ഷതയില്‍ ചേര്‍ന്ന യോഗം സംസ്ഥാന ജനറല്‍ സെക്രട്ടറി മനോജ് കുണ്ടൂപറമ്പ് ഉദ്ഘാടനം ചെയ്തു. ജില്ലാ സെക്രട്ടറിമാരായ ടി.പി. ഷാജി, കെ.വി. പ്രസാദ്, അഷ്‌റഫ്, ഗഫൂര്‍, രമേശ് അമ്പലക്കോത്ത്, റുഖ്‌സാന എന്നിവര്‍ പ്രസംഗിച്ചു.

ലോകസംഗീതദിനം ആഘോഷിച്ചു

പാറോപ്പടി: സില്‍വര്‍ ഹില്‍സ് ഹയര്‍ സെക്കൻഡറി സ്‌കൂള്‍ ലോകസംഗീതദിനം പുതുമയാര്‍ന്ന പരിപാടികളോടെ ആഘോഷിച്ചു. സ്‌കൂളിലെ അധ്യാപകരോടൊപ്പം ഇരുന്നൂറ്റി അമ്പത് കുട്ടികള്‍ പങ്കെടുത്ത ഗാനാലാപനം ഏറെ ശ്രദ്ധ ആകര്‍ഷിച്ചു. സ്‌കൂള്‍ കൗണ്‍സിലറും സംഗീതഅധ്യാപികയുമായ ആതിര കെ. കൃഷ്ണന്‍, സംഗീത അധ്യാപിക രമ്യ ശങ്കര്‍ എന്നിവര്‍ നേതൃത്വം നല്‍കി. പ്രിന്‍സിപ്പൽ ഫാ. ജോണ്‍ മണ്ണാറത്തറ സിഎംഐ സംഗീത ദിനാചരണസന്ദേശം നല്‍കി.

ബീച്ച് , സിവില്‍ സ്‌റ്റേഷന്‍ പരിസരങ്ങള്‍ തെരുവുനായകള്‍ കയ്യടുക്കുന്നു

മഴക്കാല ദുരിതത്തിന് പുറമെ തെരുവ് നായ ഭീഷണിയും കോഴിക്കോട്: കോഴിക്കോട് നഗരത്തില്‍ മഴക്കാലത്തും യാത്രക്കാര്‍ക്ക് ഭീഷണിയായി തെരുവുനായകള്‍. സമീപകാലത്തായി തെരുവുനായ ശല്യം രൂക്ഷമായിരിക്കുകയാണ്. മഴയായതോടെ ബീച്ചില്‍ കടലോരത്ത് ആളുകള്‍ വരുന്നത് കുറവാണ്. ഇതോടെയാണ് ഈ ഭാഗം മുഴവനായും തെരുവുനായകള്‍ കയ്യടിക്കിയിരിക്കുന്നത്. മഴയത്ത് ഒലിച്ചെത്തുന്ന മാലിന്യങ്ങള്‍ ഭക്ഷിച്ച് അവിടെ തന്നെ ചുറ്റികറങ്ങുകയാണിവ. ബീച്ചില്‍ അറവ് മാലിന്യം ഒഴുക്കുന്ന സാമൂഹ്യവിരുദ്ധരും ഇതിനൊരു പരിധിവരെ കാരണമാകുന്നു. ജില്ലാ പഞ്ചായത്ത് ഓഫീസ് പരിസരത്തും സമാനമായ അവസ്ഥയാണ് സിവില്‍ സ്റ്റേഷന്‍ പരിസരത്ത് കുന്നുകൂട്ടിയിട്ട പഴയ വാഹനങ്ങള്‍ക്കിടയില്‍ തെരുവ് നായകള്‍ പെറ്റു പെരുകിയിട്ടും അധികൃതര്‍ക്ക് ഒന്നും ചെയ്യാന്‍ കഴിഞ്ഞിട്ടില്ല. എബിസി പദ്ധതി ഉദ്ദേശിച്ചഫലം കാണുന്നില്ല. നിസംഗതയോടെയാണ് ജില്ലാ പഞ്ചായത്തും കോര്‍പറേഷനും തെരുവ് നായ പ്രശ്‌നത്തെ കൈകാര്യം ചെയ്യുന്നത്. കോര്‍പറേഷന്‍റെ മാലിന്യ സംഭരണ കേന്ദ്രങ്ങളും തെരുവ് നായകളുടെ സങ്കേതമായി മാറിയിരിക്കുകയാണ് . ഇത്തരത്തില്‍ ബീച്ചില്‍ കൊണ്ടിടുന്ന പച്ച മാംസം കഴിക്കുന്ന തെരുവ് നായകളാണ് പലപ്പോഴും അക്രമകാരികളായി മാറുന്നതും. എബിസി പദ്ധതിയിലൂടെ നായകളുടെ എണ്ണം കുറച്ചു കൊണ്ടു വരാന്‍ കഴിഞ്ഞ ഏതാനും വര്‍ഷങ്ങളായി അധികൃതര്‍ ശ്രമിച്ച് വരുകയാണ്. എന്നാല്‍ പലപ്പോഴും നായകളെ പിടിക്കാന്‍ പോലും ആളെ കിട്ടാതെ പദ്ധതി ഇഴയുകയാണ്. കഴിഞ്ഞ ദിവസം ഒളവണ്ണയില്‍ മൂന്നര വയസുകാരനാണ് തെരുവ് നായയുടെ കടിയേറ്റത്. ഒളവണ്ണ സ്വദേശികളായ ഷാജി ബിജുല ദമ്പതികളുടെ മകനായ സഞ്ചല്‍ കൃഷ്ണയെ വീട്ടു മുറ്റത്ത് ഇരിക്കുമ്പോഴാണ് നായ അക്രമിച്ചത്. തലയ്ക്ക് ആഴത്തില്‍ പരിക്കേറ്റതിനാല്‍ കുട്ടി ഇപ്പോഴും നിരീക്ഷണത്തിലാണ്. സംഭവത്തിന് പിന്നാലെ പ്രദേശവാസികള്‍ വന്‍ പ്രതിഷേധത്തിലാണ്. എബിസിയെ ഏക പോംവഴിയായി കാണരുത് നായ്ക്കളുടെ വന്ധ്യംകരണം അഥവാ അനിമല്‍ ബര്‍ത്ത് കണ്‍ട്രോള്‍ (എബിസി.) പദ്ധതി മാത്രമാണ് തെരുവുനായ നിയന്ത്രണത്തിനുള്ള ഏക പോംവഴി എന്ന സമീപനം സംസ്ഥാനത്ത് പേവിഷബാധ കേസുകള്‍ വര്‍ദ്ധിപ്പിക്കുമെന്ന് വെറ്ററിനറി ഡോക്ടര്‍മാരുടെ പ്രൊഫഷണല്‍ സംഘടനയായ ഇന്ത്യന്‍ വെറ്ററിനറി അസോസിയേഷന്‍ കേരള ഉള്‍പ്പെടെ മുന്നറിയിപ്പ് നല്‍കിയിരുന്നു. നായ്ക്കളുടെ എണ്ണം വര്‍ദ്ധിക്കുന്നത് തടയുന്നതിനും സംതുലിതാവസ്ഥ നിലനിര്‍ത്തുന്നതിനും മാത്രമാണ് എബിസി. ഉപകാരപ്പെടുക. നായ്ക്കള്‍ അനിയന്ത്രിതമായി പെരുകിയ സാഹചര്യത്തില്‍ എ.ബി.സി. പദ്ധതിയുടെ പ്രായോഗികതയും പരിശോധിക്കേണ്ടതുണ്ട്. നിലവിലെ സാഹചര്യത്തില്‍ നായ്ക്കളുടെ വംശവര്‍ദ്ധനവ് കുറയണമെങ്കില്‍ ഇനിയുമൊരു പത്ത് വര്‍ഷം കൂടെ വേണ്ടിവരും. നായശല്യം രൂക്ഷമായതിനെ തുടര്‍ന്ന് 2019ലാണ് അനിമല്‍ ബെര്‍ത്ത് കണ്‍ട്രോള്‍ (എബിസി) പദ്ധതി ആരംഭിച്ചത്. നിലവില്‍ 25,000 നായ്ക്കളെങ്കിലും കോര്‍പറേഷന്‍ പരിധിയില്‍ ഉണ്ടാകുമെന്ന അനുമാനത്തിലാണു പദ്ധതി മുന്നോട്ടു പോവുന്നത്. അടുത്ത അഞ്ചു വര്‍ഷത്തിനുള്ളില്‍ എല്ലാ തെരുവുനായ്ക്കളെയും വന്ധ്യംകരണം ചെയ്യാന്‍ സാധിക്കുമെന്നാണ് കോര്‍പറേഷന്‍റെ സ്വപ്‌നം. എന്നാല്‍ അതുവരെ ആളുകള്‍ക്ക് നേരെയുള്ള അക്രമങ്ങള്‍ക്ക് ആര് മറുപടി നല്‍കുമെന്ന ചോദ്യമാണ് ഉയരുന്നത്.

ലീഗ് ഫുട്ബോളിൽ റണ്ണേഴ്സ് അപ്പായി അർജുന സ്പോർട്സ്

കൂടരഞ്ഞി: കോഴിക്കോട് ജില്ല എ ഡിവിഷൻ ഫുട്ബോൾ ലീഗ് ചാമ്പ്യൻഷിപ്പിൽ കൂടരഞ്ഞി അർജുന സ്പോർട്സ് ക്ലബ് രണ്ടാം സ്ഥാനം നേടി. അവസാന ഗ്രൂപ്പ് മത്സരത്തിൽ ബേപ്പൂർ റോയൽ സ്പോർട്സ് ക്ലബിനെ അർജുന ക്ലബ് എതിരില്ലാത്ത ഒരു ഗോളിനാണ് പരാജയപ്പെടുത്തിയത്. ക്ലബിന് അടുത്തവർഷം ഉപരി ഡിവിഷനായ സെക്കൻഡ് ഡിവിഷനിൽ മാറ്റുരയ്ക്കാം. എല്ലാ കളിക്കാർക്കും മെഡലുകളും ട്രോഫിയും ക്യാഷ് അവാർഡും സമ്മാനിച്ചു. ക്ലബിനു വേണ്ടി ക്യാപ്റ്റൻ നജ്മുദ്ദീൻ ജില്ലാ ഫുട്ബോൾ അസോസിയേഷൻ ജോയിന്‍റ് സെക്രട്ടറി അബ്ദുൾ സലീമിൽ നിന്ന് ട്രോഫി ഏറ്റുവാങ്ങി.

കൃഷിവകുപ്പിന്‍റെ ഭൂമിയിൽ ദുരിതാശ്വാസ ഷെൽട്ടർ: ഉദ്യോഗസ്ഥർ സന്ദർശിച്ചു

കൂരാച്ചുണ്ട്: കല്ലാനോട്‌ കുടുംബാരോഗ്യ സബ് സെന്‍ററിന് സമീപം കൃഷിവകുപ്പിന്‍റെ അധീനതയിലുള്ള അഞ്ച് സെന്‍റ് ഭൂമിയിൽ വർഷങ്ങൾക്കു മുമ്പ് നിർമിച്ച കെട്ടിടം നശിച്ച സ്ഥലത്ത് ദുരിതാശ്വാസ ഷെൽട്ടർ നിർമിക്കാൻ കൂരാച്ചുണ്ട് പഞ്ചായത്ത്. പാഴായി കിടക്കുന്ന സ്ഥലം പഞ്ചായത്തിന് വിട്ടു നൽകുന്നതിനായി പഞ്ചായത്ത് പ്രസിഡന്‍റ് ഒ.കെ. അമ്മദിന്‍റെ നേതൃത്വത്തിലുള്ള സംഘം കൃഷിവകുപ്പ് മന്ത്രിക്ക് ഇതു സംബന്ധിച്ച നിവേദനം നൽകിയിരുന്നു. തുടർന്ന് കൃഷി വകുപ്പ് ജില്ലാ എൻജിനീയറിംഗ് വിഭാഗം ഉദ്യോഗസ്ഥർ കഴിഞ്ഞ ദിവസം സ്ഥലം സന്ദർശിച്ച് സർവ്വേ നടത്തി. ഇതിന്‍റെ തുടർ നടപടികൾ ത്വരിത ഗതിയിൽ നടത്താമെന്ന് ഉദ്യോഗസ്ഥർ ഉറപ്പ്‌ നൽകിയിട്ടുള്ളതായും പഞ്ചായത്ത് അധികൃതർ അറിയിച്ചു. മലയോര മേഖലയിൽ നിരന്തരമായി ഉണ്ടാകുന്ന പ്രകൃതി ദുരന്തങ്ങൾക്ക്‌ ഇരയാവുന്നവർക്ക്‌ പഞ്ചായത്ത് വകയിൽ താൽക്കാലികമായി ക്യാമ്പ് ചെയ്യാൻ ഇത് ഉപകരിക്കും. ജില്ലാ കൃഷി വകുപ്പ് അസിസ്റ്റന്‍റ് എൻജിനീയർ സുനിൽ കുമാർ, ഓവർസിയർ ജിതേഷ്, ആയിഷ മങ്ങാട്ട്, വാർഡ് മെമ്പർ അരുൺ ജോസ്, പൊതുപ്രവർത്തകൻ കുര്യൻ ചെമ്പനാനി എന്നിവരടങ്ങുന്ന സംഘമാണ് സ്ഥലം സന്ദർശിച്ചത്.

ബോധവത്കരണ ക്ലാസ് സംഘടിപ്പിച്ചു

തിരുവമ്പാടി: ലഹരി വിരുദ്ധാചരണത്തോടനുബന്ധിച്ച് തിരുവമ്പാടി ഇൻഫന്‍റ് ജീസസ് ഹൈസ്കൂളിൽ ലഹരിവിമുക്ത ബോധവത്കരണ ക്ലാസ് നടത്തി. താമരശേരി വിമൻ എക്സൈസ് ഓഫീസർ ലതാ മോൾ പരിപാടി ഉദ്ഘാടനം ചെയ്തു. രണ്ട് സെക്ഷനുകളിലായി നടത്തപ്പെട്ട ബോധവത്കരണ ക്ലാസ് വിദ്യാർഥികൾക്ക് ഏറെ അറിവ് പകരുന്നതായിരുന്നു. ഹെഡ്മിസ്ട്രസ് സിസ്റ്റർ ദീപ സിഎംസി, കോഡിനേറ്റർ സിസ്റ്റർ മരിയ സിഎംസി എന്നിവർ പ്രസംഗിച്ചു.

മൈജിയിൽ ലാഭമഴയ്ക്കൊപ്പം "ഇപ്പോൾ വന്നാൽ ഇരട്ടി ലാഭം' ഓഫറും

കോഴിക്കോട്: അപ്ലയൻസസും ഗാഡ്ജറ്റ്സും വലിയ വിലക്കുറവിലും ചെറിയ മാസതവണകളിലും വാങ്ങാൻ അവസരമൊരുക്കി മൈജിയുടെ ഇപ്പോൾ വന്നാൽ ഇരട്ടി ലാഭം ഓഫർ എല്ലാ മൈജി, മൈജി ഫ്യൂച്ചർ ഷോറൂമുകളിലും 22 വരെ നടക്കും. ഇപ്പോഴുള്ള ലാഭമഴ ഓഫറിന്‍റെ ഭാഗമായാണ് "ഇപ്പോൾ വന്നാൽ ഇരട്ടി ലാഭം ഓഫറും' അവതരിപ്പിച്ചിട്ടുള്ളത്. വലിയ വിലക്കുറവും ക്യാഷ്ബാക്ക് സമ്മാനങ്ങളും ചെറിയ ഇഎംഐയുമാണ് ഈ ഓഫറിലെ ഹൈലൈറ്റ്. വിവിധ ക്രെഡിറ്റ് കാർഡുകളിൽ പർച്ചേസ് ചെയ്യുമ്പോൾ 10,000 രൂപ ഇൻസ്റ്റന്‍റ് ഡിസ്കൗണ്ട് മുതൽ 22,500 രൂപ വരെ ക്യാഷ്ബാക്ക്, ഒരു ഇഎംഐ സൗജന്യം പോലുള്ള ആനുകൂല്യങ്ങൾ സ്വന്തമാക്കാം. കേരളത്തിൽ ഏറ്റവും കൂടുതൽ മൊബൈൽ ഫോണുകൾ വിൽക്കുന്ന ബ്രാൻഡ് എന്ന നിലയിൽ സ്മാർട്ട്ഫോണുകളിൽ വലിയ വിലക്കുറവും ഓഫറുകളുമാണ് ഉപഭോക്താവിന് മൈജി നൽകുന്നത്. പഴയ ഫോണുകളിൽ 12,000 രൂപ വരെ എക്സ്ചേഞ്ച് ബോണസ് ലഭിക്കും. ലോകോത്തര ബ്രാന്‍റുകളുടെ ഫോണുകൾ വാങ്ങുമ്പോൾ 4,000 രൂപ വരെ ക്യാഷ്ബാക്കിനൊപ്പം ഏറ്റവും കുറഞ്ഞ ഇഎംഐ യിൽ വാങ്ങാനുള്ള അവസരവുമുണ്ട്. മഴക്കാലം പ്രമാണിച്ച് വാഷിങ് മെഷീനുകളിൽ മറ്റാരും നൽകാത്ത വിലക്കുറവും സമ്മാനങ്ങളുമാണ് മൈജി അവതരിപ്പിക്കുന്നത്. 5,555 രൂപ കില്ലർ പ്രൈസിൽ തിരഞ്ഞെടുത്ത ബ്രാൻഡഡ് സെമി ഓട്ടോമാറ്റിക്ക് വാഷിംഗ് മെഷീൻ വാങ്ങാം. മറ്റ് ബ്രാൻഡുകൾക്കൊപ്പം 1,500 രൂപ ക്യാഷ്ബാക്ക് ഉണ്ട്. ഓഫറിന്‍റെ ഭാഗമായി തെരഞ്ഞെടുത്ത ബ്രാൻഡഡ് വൺ ടൺ ത്രീ സ്റ്റാർ ഇൻവെർട്ടർ ഏസി 21,990 രൂപക്ക് ലഭിക്കും. സെലക്റ്റഡ് ബ്രാൻഡ് ഏസികൾക്കൊപ്പം ഫ്രീ ഇൻസ്റ്റലേഷനും ഉണ്ട്. സിംഗിൾ ഡോർ റെഫ്രിജറേറ്ററുകളിൽ 2,000 രൂപ ക്യാഷ്ബാക്ക് ഉള്ളപ്പോൾ 17,999 രൂപ കില്ലർ പ്രൈസിൽ ഡബിൾ ഡോർ റെഫ്രിജറേറ്റർ വാങ്ങാം. മറ്റ് ഓഫറുകളെക്കുറിച്ച് അറിയാൻ 9249 001 001 എന്ന നമ്പറിൽ ബന്ധപ്പെടാവുന്നതാണ്.

ടീം യോഗ അന്താരാഷ്ട്ര ദിനാചരണം ഇന്‍ഡോര്‍ സ്‌റ്റേഡിയത്തില്‍

കോഴിക്കോട്: കോര്‍പറേഷന്‍ പരിധിയിലെ വിദ്യാര്‍ഥികളെ പങ്കെടുപ്പിച്ച് അന്താരാഷ്ട്ര യോഗാ ദിനം 21ന് ഇര്‍ഡോര്‍ സ്‌റ്റേഡിയത്തില്‍ നടത്തുമെന്ന് ടീംയോഗ ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. രാവിലെ ആറര മുതല്‍ 7.45 വരെയാണ് പരിപാടി. എന്‍സിസി, സ്‌കൗട്ട് ആന്‍ഡ് ഗൈഡ്‌സ്, എസ്പിജി, ജെആര്‍സി, എന്‍എസ്എസ് എന്നീ വിഭാഗം കുട്ടികളെയും മറ്റു വിദ്യാര്‍ഥികളെയും പങ്കെടുപ്പിച്ചാണ് ദിനാചരണം. ജില്ലാ സ്‌പോര്‍ടസ് കൗണ്‍സില്‍ പ്രസിഡന്‍റ് ഒ. രാജഗോപാല്‍ ഉദ്ഘാടനം ചെയ്യും. ഡോ. രാജീവ്, ഷോജി സെന്‍ എന്നിവര്‍ സംബന്ധിക്കും. യോഗ പരിപാടികള്‍ക്കു ടീം യോഗ കാലിക്കറ്റിന്‍റെ പ്രസിഡന്‍റും യോഗ മാസ്റ്ററുമായ ബൈജു ചെക്യാടത്ത് േനതൃത്വം നല്‍കും. സെക്രട്ടറി എന്‍. രഞ്ജിത്ത്, പ്രസിഡന്‍റ് ബൈജു ചെക്യാടത്ത് എന്നിവര്‍ വാര്‍ത്താസമ്മേളനത്തില്‍ സംബന്ധിച്ചു.

വട്ടക്കയം മേഖലയിൽ കാട്ടാനയുടെ പരാക്രമം

പെരുവണ്ണാമൂഴി: ചക്കിട്ടപാറ പഞ്ചായത്ത് വാർഡ് ഏഴിൽ പെട്ട വട്ടക്കയം മേഖലയിൽ മോഴയാന കർഷകരുടെ ഉറക്കം കെടുത്തുന്നു. ബുധനാഴ്ച രാത്രി കർഷക നേതാവ് കുംബ്ലാനി ജോർജിന്‍റെ കൃഷിയിടത്തിലായിരുന്നു പരാക്രമം. കാട്ടാന മതിലും വിളകളുമെല്ലാം നശിപ്പിച്ചു. സമീപത്തുള്ള തെങ്ങ് വാഴ ജാതി എന്നിവയെല്ലാം തകർത്തു. ഇതേ സ്ഥിതിയാണ് മേഖലയിലെ മറ്റു കർഷകരും നേരിടുന്നതെന്ന് വാർഡ് മെമ്പർ രാജേഷ് തറവട്ടത്ത് പറഞ്ഞു. വന്യ ജീവികൾ പരത്തുന്ന ഭീതി കാരണം രാത്രിയായാൽ പുറത്തിറങ്ങാൻ പോലും നാട്ടുകാർ മടിക്കുകയാണെന്നു മുൻ മെമ്പർ ജെയിംസ് മാത്യു പറഞ്ഞു. തൂക്കു വേലി സ്ഥാപിക്കൽ പ്രഖ്യാപനവുമായി സർക്കാർ വരാൻ പോവുകയാണ്. ഒരു കോടി നാൽപ്പത്തി എട്ട് ലക്ഷം രൂപയാണ് പ്രദേശത്ത് തൂക്കു വേലിക്ക് വകയിരുത്തിയിരിക്കുന്നത്.കാട്ടാന നശിപ്പിച്ച ജോർജിന്‍റെ കൃഷിയിടം കർഷകരായ എം.എ. മത്തായി മംഗലത്ത്, ജോസ് പുളിന്താനം, ഉണ്ണി പാഴുക്കുന്നേൽ, കുഞ്ഞിക്കണ്ണൻ പുലച്ചാളക്കണ്ടി, ബിജു പുരയിടത്തിൽ എന്നിവർ സന്ദർശിച്ചു. പ്രദേശത്ത് പ്രധാന പോയന്‍റുകളിൽ വഴി വിളക്കുകൾ സ്ഥാപിക്കുമെന്ന് പെരുവണ്ണാമൂഴി ഫോറസ്റ്റ് ഡെപ്യൂട്ടി റേഞ്ചർ ഇ. ബൈജു നാഥ് പറഞ്ഞു.

ഗോഡൗണിനുമുന്നില്‍ പിക്കറ്റിംഗ് നടത്തി

കോഴിക്കോട്: ബേപ്പൂര്‍ ഗോഡൗണില്‍ നിന്ന് റേഷന്‍ സാധനങ്ങള്‍ എടുക്കുന്നതു സംബന്ധിച്ച പ്രശ്‌നം പരിഹരിക്കാത്തതില്‍ പ്രതിഷേധിച്ച് ആള്‍ കേരള റീട്ടെയില്‍ റേഷന്‍ ഡീലേഴ്‌സ് അസോസിയേഷന്‍ ബേപ്പൂര്‍ ഗോഡൗണിനുമുന്നില്‍ പിക്കറ്റിംഗ് നടത്തി. ഈ മാസം 12ന് കടകളടച്ച് സമരം നടത്തുമെന്ന് സംഘടന പ്രഖ്യാപിച്ചിരുന്നു. എന്നാല്‍ അധികൃതര്‍ ചര്‍ച്ചയ്ക്ക് വിളിച്ച സാഹചര്യത്തില്‍ സമരം മാറ്റിവച്ചു. ജില്ലാ സപ്‌ളൈ ഓഫീസര്‍ ചര്‍ച്ചയില്‍ സംബന്ധിച്ചിരുന്നു.എന്നാല്‍ പ്രശ്‌നത്തിനു പരിഹാരമായില്ല. കടലോര മേഖലയിലാണ് ട്രോളിംഗ് നിരോധനകാലത്ത് റേഷന്‍ മുടങ്ങിയത്. സംസ്ഥാന ജനറല്‍ സെക്രട്ടറി ടി. മുഹമ്മദലി സമരം ഉദ്ഘാടനം ചെയ്തു. പി. അരവിന്ദന്‍, കെ. ജയപ്രകാശ്, പി.ശക. അരുണ്‍, അഷ്‌റഫ് എന്നിവര്‍ പ്രസംഗിച്ചു.

ആംആദ്മി പാർട്ടി ഓഫീസ് ഉദ്ഘാടനം ചെയ്തു

തിരുവമ്പാടി: ആംആദ്മി പാർട്ടി തിരുവമ്പാടി പഞ്ചായത്ത് കമ്മിറ്റിയുടെ പുതിയ ഓഫീസ് ഉദ്ഘാടനം ചെയ്തു. തിരുവമ്പാടി മണ്ഡലം കമ്മിറ്റി പ്രസിഡന്‍റ് മനു പൈമ്പിള്ളിൽ ഉദ്ഘാടനകർമ്മം നിർവഹിച്ചു. ബേബി തരണിയിൽ, സജി കാഞ്ഞിരത്താംകുന്നേൽ, തോമസ് പുത്തൻപുരക്കൽ, ഷാജി ജോസഫ്, ജോബി പുളിമൂട്ടിൽ, ജയിംസ് മറ്റത്തിൽ എന്നിവർ പ്രസംഗിച്ചു.

സെന്‍റ് സേവ്യേഴ്‌സ് കോളജില്‍ യോഗ ദിനം ആചരിച്ചു

കോഴിക്കോട്: അന്താരാഷ്ട്ര യോഗ ദിനാചരണത്തിന്‍റെ ഭാഗമായി കാലിക്കട്ട് എന്‍ഐടിയുടെ ആഭിമുഖ്യത്തില്‍ സെന്‍റ് സേവ്യേഴ്‌സ് കോളജ് വിദ്യാര്‍ഥികള്‍ക്കായി യോഗ പരിശീലനം സംഘടിപ്പിച്ചു. എന്‍ഐടി ഡയറക്ടര്‍ ഡോ. പ്രസാദ് കൃഷ്ണ ഉദ്ഘാടനം ചെയ്തു. സെന്‍റ് സേവ്യേഴ്‌സ് കോളജ് സൈക്കോളജി വിഭാഗം മേധാവി ഫാ. അനില്‍ സാഞ്ചോസ് അധ്യക്ഷത വഹിച്ചു. എന്‍ഐടി സെന്‍റര്‍ ഫോര്‍ ഇന്ത്യന്‍ നോളജ് സിസ്റ്റം ഡോ.ആഷിഷ് അവസ്ഥി, എന്‍ഐടി കാലിക്കട്ട് മൈന്‍ഡ്ഫുള്‍നെസ് മെഡിറ്റേഷന്‍ റിസര്‍ച്ച് സ്‌കോളര്‍ പ്രഫ. വര്‍ഗീസ് മാത്യു എന്നിവര്‍ ക്ലാസെടുത്തു. നീമാ വിവേക് സ്വാഗതവും എ.അവന്തിക രാജ് നന്ദിയും പറഞ്ഞു.

ബൈക്ക് മോഷണം പോയി

വടകര: ബസ് സ്‌റ്റോപ്പിനു സമീപം നിര്‍ത്തിയ ബൈക്ക് മോഷണം പോയി. മെഡിക്കല്‍ റപ്രസന്‍റേറ്റീവ് രജീഷിന്‍റെ കെഎല്‍ 18വി 3196 ബ്ലാക്ക് യൂനിക്കോണ്‍ ബൈക്കാണ് കളവുപോയത്. ബുധനാഴ്ച രാവിലെ ഇവിടെ നിര്‍ത്തിയതായിരുന്നു. രാത്രി തിരികെ എത്തിയപ്പോഴാണ് മോഷണം പോയതറിയുന്നത്. ചോമ്പാല പോലീസില്‍ പരാതി നല്‍കി.

ജില്ലയിലെങ്ങും വായനദിനം ആചരിച്ചു

ജില്ലാതല ഉദ്ഘാടനം കാരപ്പറമ്പ് സ്‌കൂളില്‍ നടന്നു കോഴിക്കോട്: വിദ്യാലയങ്ങളിലെ ലൈബ്രറി സൗകര്യങ്ങള്‍ ഉപയോഗപ്പെടുത്താന്‍ വിദ്യാര്‍ഥികള്‍ തയാറാവണമെന്ന് തോട്ടത്തില്‍ രവീന്ദ്രന്‍ എംഎല്‍എ. ജില്ലാ ഇന്‍ഫര്‍മേഷന്‍ ഓഫീസിന്‍റെയും ജില്ലാ ഭരണകൂടത്തിന്‍റെയും നേതൃത്വത്തില്‍ സംഘടിപ്പിച്ച വായന ദിനാഘോഷത്തിന്‍റെയും വായന പക്ഷാചരണത്തിന്‍റെയും ജില്ലാതല ഉദ്ഘാടനം കാരപ്പറമ്പ് ഗവ. ഹയര്‍സെക്കന്‍ഡറി സ്‌കൂളില്‍ നിര്‍വഹിക്കുകയായിരുന്നു അദ്ദേഹം. വായനയെ ജീവിതത്തിന്‍റെ ഭാഗമാക്കി മാറ്റാന്‍ സാധിക്കണമെന്നും പത്രവായന ദിനചര്യയുടെ ഭാഗമാക്കണമെന്നും എംഎല്‍എ കൂട്ടിച്ചേര്‍ത്തു. പി.എന്‍. പണിക്കര്‍ ഫൗണ്ടേഷന്‍, ലൈബ്രറി കൗണ്‍സില്‍ എന്നിവയുടെ സഹകരണത്തോടെയാണ് പരിപാടി സംഘടിപ്പിച്ചത്. ചടങ്ങില്‍ എഡിഎം പി. സുരേഷ് അധ്യക്ഷത വഹിച്ചു. വായനാദിന പ്രതിജ്ഞ എഡിഎം ചൊല്ലിക്കൊടുത്തു. സാഹിത്യകാരന്‍ യു.കെ. കുമാരന്‍ മുഖ്യപ്രഭാഷണം നടത്തി. എസ്എസ്‌കെ പ്രോജക്ട് ഓഫീസര്‍ ഡോ. എ.കെ. അബ്ദുല്‍ ഹക്കീം പി.എന്‍. പണിക്കര്‍ അനുസ്മരണം പ്രഭാഷണം നടത്തി. ജില്ലാ ഇന്‍ഫര്‍മേഷന്‍ ഓഫീസര്‍ സി.പി. അബ്ദുല്‍ കരീം, വിദ്യാഭ്യാസ ഉപഡയറക്ടര്‍ കെ. ശിവദാസന്‍, താലൂക്ക് ലൈബ്രറി കൗണ്‍സില്‍ പ്രസിഡന്‍റ് കെ. പി. സുരേന്ദ്രനാഥ്, എന്‍എസ്എസ് ജില്ലാ കോഓഡിനേറ്റര്‍ ഫസീല്‍ അഹമ്മദ്, പ്രിന്‍സിപ്പല്‍ കെ.പി. മനോജ്, പ്രധാനാധ്യാപിക എം. ദീപാഞ്ജലി തുടങ്ങിയവര്‍ പ്രസംഗിച്ചു. വായന ദിനാഘോഷത്തിന്‍റെയും പക്ഷാചരണത്തിന്‍റെയും ഭാഗമായി വിദ്യാഭ്യാസ വകുപ്പിന്‍റെ നേതൃത്വത്തില്‍ ജില്ലയിലെ വിദ്യാലയങ്ങളില്‍ വായനയുടെ മഹത്വം പ്രതിപാദിക്കുന്ന ക്വിസ്, പ്രസംഗം, ഉപന്യാസം, ചിത്രരചന, പെയിന്‍റിംഗ്, പദ്യ പാരായണം, കഥ-കഥനം മത്സരങ്ങള്‍, സെമിനാറുകള്‍, ശില്‍പശാലകള്‍, ലഹരി-മയക്കുമരുന്ന് വിരുദ്ധ പ്രചാരണ യോഗങ്ങള്‍, സമൂഹവായന പ്രചാരണം, ഡിജിറ്റല്‍ വായന പരിശീലനം, തെരുവ് നാടകം, നാടന്‍ കലകളുടെ അവതരണം തുടങ്ങിയ പരിപാടികള്‍ സംഘടിപ്പിക്കും. വായനാദിനത്തോട് അനുബന്ധിച്ച് സംസ്‌കാര സാഹിതി ജില്ലാകമ്മിറ്റിയുടെയും എ. സുജനപാല്‍ ലൈബ്രറി ആൻഡ് കള്‍ച്ചറല്‍ സെന്‍ററിന്‍റെയും ആഭിമുഖ്യത്തില്‍ വായനാദിനാഘോഷം സംഘടിപ്പിച്ചു. പ്രശസ്ത എഴുത്തുകാരി സുധാമേനോന്‍റെ ഇന്ത്യ എന്ന ആശയം പുസ്തകത്തെ അധികരിച്ചുള്ള ചര്‍ച്ച ഡിസിസി പ്രസിഡന്‍റ് അഡ്വ. കെ. പ്രവീണ്‍കുമാര്‍ ഉദ്ഘാടനം ചെയ്തു. എഴുത്തുകാരും സാംസ്‌കാരിക പ്രവര്‍ത്തകരും ഭരണകൂടത്തിന് വാഴ്ത്തുപാട്ടുമായ് നടക്കുമ്പോള്‍ സുധാമോനോനെപോലുള്ള എഴുത്തുകാരുടെ ചരിത്രബോധവും ദേശീയ കാഴ്ചപാടും ഉയര്‍ത്തികൊണ്ടുവരാനുള്ള ശ്രമങ്ങള്‍ ചര്‍ച്ച ചെയ്യപ്പെടേണ്ടതാണെന്ന് അദ്ദേഹം പറഞ്ഞു. ചടങ്ങില്‍ സംസ്‌കാര സാഹിതി ജില്ലാ ചെയര്‍മാന്‍ കാവില്‍ പി. മാധവന്‍ അധ്യക്ഷത വഹിച്ചു. പ്രതാപന്‍ തായാട്ട് വിഷയം അവതരിപ്പിച്ചു. സിയസ്‌കൊ ലൈബ്രറി ആന്‍ഡ് റിസര്‍ച്ച് സെന്‍ററും ഹിമായത്തുല്‍ ഇസ്ലാം ഹയര്‍ സെക്കന്‍ഡറി സ്‌കൂള്‍ എന്‍എസ്എസും സംയുക്തമായി വായനാദിനം ആചരിച്ചു.സെന്‍റ് സേവിയേഴ്‌സ് കോളജ് മുന്‍ പ്രിന്‍സിപ്പല്‍ പ്രഫ. വര്‍ഗീസ് മാത്യു ഉദ്ഘാടനം ചെയ്തു.സിയസ്‌കൊ സെക്രട്ടറി സി.പി.എം.സഈദ് അഹമ്മദ് അധ്യക്ഷത വഹിച്ചു. ജനറല്‍ സിക്രട്ടറി എം.വി. ഫസല്‍റഹ്മാന്‍, ലൈബ്രറി ചെയര്‍മാന്‍ എസ്.എ.ഖുദ്‌സി, എസ്.സര്‍ഷാദ് അലി, പിടിഎ പ്രസിഡണ്ട് പി.എന്‍.വലീദ് ,ലൈബ്രറി സെക്രട്ടറി എം.ഹസ്സന്‍കോയ സി.ടി.ഫാത്തിമ, കെ.ലുബ്‌ന ,കെ. അലൈന്‍ എന്നിവര്‍ സംസാരിച്ചു. ഓൾ കേരള ബാങ്ക് റിട്ടയറീസ് ഫെഡറേഷന്‍റെ സാംസ്കാരിക വിഭാഗമായ അബ്കയുടെ വായനമാസാചരണത്തിന്‍റെ സംസ്ഥാനതല ഉദ്ഘാടനം ഡോ. ഒ.കെ. മുരളീകൃഷ്ണൻ നിർവഹിച്ചു. കോഴിക്കോട് ബിഇസിഎസ് ഹാളിൽ നടന്ന പരിപാടിയിൽ ജില്ലാ രക്ഷാധികാരി പി. രാധാകൃഷ്ണൻ അധ്യക്ഷത വഹിച്ചു. എ.പി. കുഞ്ഞാമു മുഖ്യപ്രഭാഷണം നടത്തി. തോട്ടുമുക്കം: സെന്‍റ് തോമസ് ഹയർ സെക്കൻഡറി സ്കൂളിൽ എൻഎസ്എസിന്‍റെ നേതൃത്വത്തിൽ വായനാദിനാഘോഷം നടത്തി. മുൻ ആധ്യാപകനും സംസ്ഥാന അവാർഡ് ജേതാവുമായ എം.ആർ. പുരുഷോത്തമൻ വായനാദിനം ഉദ്ഘാടനം ചെയ്തു. കുട്ടികൾക്ക് വായനാദിന സന്ദേശം നൽകി. തുടർന്ന് സ്കൂൾ ലൈബ്രറിലേക്കുള്ള പുസ്തകങ്ങൾ എം.ആർ. പുരുഷോത്തമൻ പ്രിൻസിപ്പലിന് കൈമാറി. ചടങ്ങിൽ സ്കൂൾ പ്രിൻസിപ്പൽ എ.സി. ലളിത അധ്യക്ഷത വഹിച്ചു. എൻഎസ്എസ് പ്രോഗ്രാം ഓഫീസർ റാണി തോമസ്, മലയാളം അധ്യാപിക മിനിമോൾ തോമസ് എന്നിവർ പങ്കെടുത്തു. വിദ്യാർത്ഥികളായ രേവതി, ദയ എസ്. മരിയ എന്നിവർ കവിത ആലപിച്ചു. കാരശേരി: പുതിയ കാലത്ത് വായനശാലകൾ കൂടുതലായി ഉണ്ടാക്കുകയല്ല, വായന ശീലം വളർത്താനാണ് പരിശ്രമിക്കേണ്ടതെന്ന് എം.എൻ. കാരശേരി പറഞ്ഞു. സ്നേഹതീരം വയോജന കൂട്ടായ്മ വായനാദിനത്തിൽ നൽകിയ ആദരവിന് മറുപടി പറയുകയായിരുന്നു അദ്ദേഹം. പുതിയ തലമുറ പുസ്തകം വായനയിൽ നിന്ന് അകലുകയും ഇലക്ട്രോണിക് മാധ്യമങ്ങൾ വഴിയുള്ള വായനയിലേക്ക് മാറിയിട്ടുമുണ്ട്. ആളുകൾക്ക് താൽപര്യമുള്ള വായനാരീതി പ്രോത്സാഹിപ്പിക്കുന്നതാണ് പ്രായോഗികം. ലോകം മുഴുവൻ സാഹിത്യവും സംസ്‌ക്കാരവും വലിയ തിരിച്ചടി നേരിട്ടുകൊണ്ടിരിക്കുന്നതും പണാധിപത്യത്തിന്‍റെതായ കാലവുമാണിതെന്നും അദ്ദേഹം പറഞ്ഞു. കാരശേരി പഞ്ചായത്ത് പ്രസിഡന്‍റ് സുനിതാ രാജൻ പൊന്നാട അണിയിച്ച് ആദരിച്ചു.സ്നേഹതീരം പ്രസിഡന്‍റ് സി. അബ്ദുറഹിമാൻ അധ്യക്ഷനായി അക്ഷരോദ്യാനമൊരുക്കി കോഴിക്കോട്: വായനാ ദിനത്തില്‍ അക്ഷരോദ്യാനത്തിന് തുടക്കം കുറിച്ച് വള്ള്യാട് നോര്‍ത്ത് എംഎല്‍പി സ്‌കൂള്‍. മലയാളത്തിലെ 51 അക്ഷരങ്ങള്‍ രേഖപ്പെടുത്തിയ ചട്ടികളില്‍ പൂച്ചെടികള്‍ ഒരുക്കിയാണ് ഉദ്യാനം യാഥാര്‍ഥ്യമാക്കിയത്. പദ്ധതിയുടെ തുടര്‍ച്ചയായി ഇംഗ്ലീഷ്, ഹിന്ദി അക്ഷരങ്ങള്‍ കൂടി ഉള്‍പ്പെടുത്തും. തിരുവള്ളൂര്‍ ഗ്രാമപഞ്ചായത്ത് ജൈവോദ്യാന പരിപാലന സമിതിയാണ് പദ്ധതിക്ക് നേതൃത്വം നല്‍കുന്നത്. സാംസ്‌കാരിക പ്രവര്‍ത്തകന്‍ രാജേഷ് കരിമ്പനപ്പാലം ഉദ്ഘാടനം നിര്‍വഹിച്ചു. പഞ്ചായത്ത് പ്രസിഡന്‍റ് പി.സി. ഹാജറ അധ്യക്ഷത വഹിച്ചു. ജൈവ വൈവിധ്യ ബോര്‍ഡ് ജില്ലാ കോഓഡിനേറ്റര്‍ ഡോ. കെ.പി. മഞ്ജു മുഖ്യാതിഥിയായി. പഞ്ചായത്ത് വൈസ് പ്രസിഡന്‍റ് ഡി. പ്രജീഷ്, സ്ഥിരം സമിതി അധ്യക്ഷ നിഷില കോരപ്പാണ്ടി, ജനപ്രതിനിധികളായ സബിത മണക്കുനി, എഫ്.എം. മുനീര്‍, ബവിത്ത് മലോല്‍, പി.പി. രാജന്‍, പ്രധാനാധ്യാപിക കെ. അനിത, എം.സി. അഷ്‌റഫ് എന്നിവര്‍ പ്രസംഗിച്ചു. ലൈബ്രറി ഉദ്ഘാടനം ചെയ്തു കൂരാച്ചുണ്ട്: കല്ലാനോട് സെന്‍റ് മേരീസ് എൽപി സ്കൂളിൽ വായനാ ദിനത്തോടനുബന്ധിച്ച് പുതിയ ലൈബ്രറി ഉദ്ഘാടനം ചെയ്തു. സ്കൂൾ മാനേജർ ഫാ. ജിനോ ചുണ്ടയിൽ ഉദ്ഘാടനം നിർവഹിച്ചു. പ്രധാനാധ്യാപിക സ്വപ്ന വർഗീസ് അധ്യക്ഷത വഹിച്ചു. വായനാദിന അസംബ്ലി, വിദ്യാർഥി പ്രതിനിധികളായ ആഷിൻ ജോർജ്, അഞ്ജന എന്നിവർ വായനാദിന സന്ദേശം നൽകി. വിദ്യാർഥിയായ ജോയൽ ജോഷി ലൈബ്രറിയിലേക്കുള്ള പുസ്തകം ലൈബ്രറി ഇൻചാർജ് സോണിയ ഏബ്രഹമിന് കൈമാറി. അധ്യാപകരായ ഡെൽബിൻ കുമ്പുക്കൽ, ഡെൽന ജോർജ്, ദിൽന ആന്‍റണി, ജെസി ടോം, അലോണ ജോൺസൺ എന്നിവർ നേതൃത്വം നൽകി.

കുളത്തില്‍ ഇറങ്ങിയ സ്‌കൂള്‍ വിദ്യാര്‍ഥി മുങ്ങിമരിച്ചു

വടകര: താഴെ അങ്ങാടിയിലെ ചിറക്കല്‍ കുളത്തില്‍ നീന്താനിറങ്ങിയ സ്‌കൂള്‍ വിദ്യാര്‍ഥി മുങ്ങിമരിച്ചു. ചേരാന്‍റവിട അസ്ലമിന്‍റെ മകന്‍ സഹലാണ് (14) മരിച്ചത്. ഇന്നലെ ഉച്ചയ്ക്കാണ് സംഭവം. സുഹൃത്തിനോടൊപ്പം നീന്താനിറങ്ങിയ സഹല്‍ മുങ്ങിത്താഴുകയായിരുന്നു. നാട്ടുകാരും വിവരമറിഞ്ഞെത്തിയ അഗ്നിരക്ഷാസേനയും സഹലിനെ മുങ്ങിയെടുത്ത് ആശുപത്രിയിലെത്തിച്ചെങ്കിലും രക്ഷിക്കാനായില്ല. താഴെ അങ്ങാടിയിലായിരുന്ന സഹലിന്‍റെ കുടുംബം ഇപ്പോള്‍ തണ്ണീര്‍പന്തലിലാണ് താമസം. കഴിഞ്ഞ വര്‍ഷം എംയുഎം ഹയര്‍സെക്കൻഡറി സ്‌കൂളില്‍ എട്ടാം ക്ലാസ് വിദ്യാര്‍ഥിയായിരുന്ന സഹല്‍ വീട് മാറിയതിനാല്‍ ഇവിടെ നിന്ന് കടമേരി ആര്‍എസിയിലേക്ക് ടിസി വാങ്ങിയിരുന്നു. മൃതദേഹം ജില്ലാ ആശുപത്രി മോര്‍ച്ചറിയിലേക്ക് മാറ്റി.

വെല്‍ഡിംഗിനിടെ ഷോക്കേറ്റ തൊഴിലാളി കെട്ടിടത്തില്‍നിന്ന് വീണുമരിച്ചു

കോഴിക്കോട്: വെല്‍ഡിംഗ് ജോലിക്കിടെ ഷോക്കേറ്റ തൊഴിലാളി കെട്ടിടത്തിന്‍റെ മുകള്‍ നിലയില്‍ നിന്നും താഴേക്ക് തെറിച്ചുവീണ് മരിച്ചു. വെള്ളായിക്കോട് പടിഞ്ഞാറേക്കര അലവിക്കുട്ടി (56) ആണ് മരിച്ചത്. ഇന്നലെ രാവിലെയാണ് സംഭവം. പെരുമണ്ണ അങ്ങാടിയിലെ എസ്ബിഐ കെട്ടിടത്തിന്‍റെ പിറകിലെ കെട്ടിടത്തിലെ ഒന്നാം നിലയില്‍ ജോലി ചെയ്യുന്നതിനിടെ ഷോക്കേറ്റ് താഴേക്ക് തെറിച്ചു വീഴുകയായിരുന്നു. വീഴ്ചയുടെ ആഘാതത്തില്‍ തലയ്ക്ക് സാരമായി പരിക്കേറ്റ അലവിക്കുട്ടിയെ പരിസരത്ത് ഉണ്ടായിരുന്നവര്‍ ഉടന്‍ കോഴിക്കോട് മെഡിക്കല്‍ കോളജ് ആശുപത്രിയില്‍ എത്തിച്ചെങ്കിലും രക്ഷിക്കാനായില്ല.

ദേവഗിരിയില്‍ ഉന്നത വിദ്യാഭ്യാസ ശില്പശാല സംഘടിപിച്ചു

കോഴിക്കോട്: നാലു വര്‍ഷ ബിരുദ പ്രോഗ്രാം സിലബസില്‍ ഭാഷാ പഠനത്തില്‍ പഴയ കോഴ്‌സുകള്‍ക്ക് പകരമായി നിലവില്‍ വരുന്ന എ.ഇ.സി, എം.ഡി.സി കോഴ്‌സുകള്‍ പഠിപ്പിക്കുന്നതിന് വേണ്ട തയ്യാറെടുപ്പുകള്‍ നടത്തുന്നതിനായി കേരള സ്റ്റേറ്റ് ഉന്നതവിദ്യാഭ്യാസ കൗണ്‍സിലിന്‍റെ ആഭിമുഖ്യത്തില്‍ ദേവഗിരി സെന്‍റ് ജോസഫ്‌സ് (ഓട്ടോണമസ്) കോളജില്‍ ശില്പശാല സംഘടിപ്പിച്ചു. മൂന്നാം സെമസ്റ്ററിലെ എം.ഡി.സി കോഴ്‌സായ കേരള വിജ്ഞാന വ്യവസ്ഥകള്‍ എന്ന കോഴ്‌സിനെകുറിച്ചാണ് പ്രധാനമായും ചര്‍ച്ച ചെയ്തത്. കാലിക്കട്ട് യൂണിവേഴ്‌സിറ്റിയുടെ പരിധിയില്‍ വരുന്ന കോഴിക്കോട്, വയനാട് ജില്ലകളിലെ കോളജുകളിലെ ഇരുന്നുറോളം ഭാഷാ അധ്യാപകര്‍ പങ്കെടുത്തു. സംസ്ഥാന ഉന്നത വിദ്യാഭ്യാസ കൗണ്‍സില്‍ വൈസ് ചെയര്‍മാന്‍ പ്രഫ.രാജന്‍ ഗുരുക്കള്‍ ശില്പശാല ഉദ്ഘാടനം ചെയ്തു. ഉന്നത വിദ്യാഭ്യാസ കൗണ്‍സില്‍ അംഗം സെക്രട്ടറി ഡോ.രാജന്‍ വര്‍ഗീസ്, കൗണ്‍സില്‍ റിസേര്‍ച്ച് ഓഫീസര്‍മാരായ ടിന്‍ജു പി.ജെയിംസ്, ഡോ. വി. ഷെഫീഖ് എന്നിവര്‍ ക്ലാസെടുത്തു. കോളജ് പ്രില്‍സിപ്പല്‍ ഫാ.ഡോ. ബിജു ജോസഫ്, വൈസ് പ്രിന്‍സിപ്പല്‍ ഫാ.ഡോ. സുനില്‍ ജോസ് എന്നിവര്‍ സംസാരിച്ചു.

വിദ്യാരംഗം കലാസാഹിത്യ വേദി ഉദ്ഘാടനം ചെയ്തു

കൂരാച്ചുണ്ട്: കല്ലാനോട് സെന്‍റ് മേരീസ് ഹൈസ്കൂളിൽ വിദ്യാരംഗം കലാ സാഹിത്യവേദിയുടെയും വിവിധ ക്ലബുകളുടെയും ഉദ്ഘാടനം എഴുത്തുകാരൻ സജി എം. നരിക്കുഴി നിർവഹിച്ചു. സ്കൂൾ മാനേജർ ഫാ. ജിനോ ചുണ്ടയിൽ, പിടിഎ പ്രസിഡന്‍റ് ഷാജു നരിപ്പറ, പ്രധാനാധ്യാപകൻ കെ.സി. ബിജു , എംപിഎ ചെയർപേഴ്സൺ ടിന്‍റു സെബാസ്റ്റ്യൻ, മുൻ പ്രധാനാധ്യാപകൻ സജി ജോസഫ്, വിദ്യാർഥി പ്രതിനിധി എയ്ഞ്ചൽ റോസ്, ഷിബി ജോസ് എന്നിവർ പ്രസംഗിച്ചു. എസ്എസ്എൽസി, യുഎസ്എസ്, എൻഎംഎംഎസ് വിജയികളെ ചടങ്ങിൽ ആദരിച്ചു.

ടിൻ ജൂബിലി സുവനീർ പ്രകാശനം

കോടഞ്ചേരി: വേളംകോട് സെന്‍റ് ജോർജ്സ് ഹയർ സെക്കൻഡറി സ്കൂളിൽ ഹയർ സെക്കൻഡറി ബാച്ച് ആരംഭിച്ചു പത്തുവർഷങ്ങൾ പൂർത്തീകരിച്ചതിന്‍റെ ഓർമ്മയ്ക്കായി "ഡെക്കാ വൈബ്സ് 2024' എന്ന പേരിൽ ടിൻ ജൂബിലി സുവനീർ പുറത്തിറക്കി. കോടഞ്ചേരി പഞ്ചായത്ത് പ്രസിഡന്‍റ് അലക്സ് തോമസ് ചെമ്പകശേരി സുവനീർ പ്രകാശനം ചെയ്തു. തിരുവമ്പാടി അൽഫോൻസ കോളജ് പ്രിൻസിപ്പൽ ഡോ. ഷിജു ഏലിയാസ്, പിടിഎ പ്രസിഡന്‍റ് ഷിജി ആന്‍റണി, കോടഞ്ചേരി പഞ്ചായത്ത് ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ സിബി ചിരണ്ടായത്ത്, സ്കൂൾ ഹെഡ്മിസ്ട്രസ് സോഫിയ ജേക്കബ്, അധ്യാപിക സിസ്റ്റർ സുധർമ്മ എസ്ഐസി, സീനിയർ വിദ്യാർഥി ക്രിസ്റ്റീന വിജോയ് എന്നിവർ പങ്കെടുത്തു.

ലിസ കോളജില്‍ യോഗ ക്ലാസ് സംഘടിപ്പിച്ചു

കോഴിക്കോട്: രാജ്യാന്തര യോഗാ ദിനത്തോടനുബന്ധിച്ച് ലിസ കോളജ് നാഷണല്‍ ഇന്‍സ്റ്റിറ്റ്യൂട്ട് ഓഫ് ടെക്‌നോളജി (എന്‍ഐടി) കാലിക്കട്ടുമായി സഹകരിച്ച് പ്രത്യേക യോഗാ പരിശീലന പരിപാടി സംഘടിപ്പിച്ചു. ലിസ കോളജ് വിദ്യാര്‍ഥികള്‍ക്കും ജീവനക്കാര്‍ക്കും യോഗയുടെ പ്രാധാന്യം മനസ്സിലാക്കാന്‍ അവസരമൊരുക്കുന്നതായിരുന്നു പരിപാടി. എന്‍ഐടി കാലിക്കട്ട് ഡയറക്ടര്‍ ഡോ. പ്രസാദ് കൃഷ്ണ, സെന്റര്‍ ഫോര്‍ ഇന്ത്യന്‍ നോളജ് സിസ്റ്റംസ് ചെയര്‍പേഴ്‌സണ്‍ ഡോ. ആശിഷ് അവാസ്തി എന്നിവര്‍ സംസാരിച്ചു. ലിസ കോളജ് മുന്‍ പ്രിന്‍സിപ്പലും നിലവില്‍ എന്‍ഐടിയിലെ മൈന്‍ഡ് ഫുള്‍നെസ് മെഡിറ്റേഷനിലെ ഗവേഷക വിദ്യാര്‍ഥിയുമായ പ്രഫ. വര്‍ഗ്ഗീസ് മാത്യു, ലിസ കോളജ് ഡയറക്ടര്‍ ഫാ. നിജു തോമസ്, സൈക്കോളജി വിഭാഗം അസിസ്റ്റന്‍റ് പ്രഫസര്‍ വി.ശില്പ എന്നിവര്‍ പ്രസംഗിച്ചു.

പെരുവണ്ണാമൂഴി ആശുപത്രി പടിയിൽ റോഡ് നന്നാക്കി തുടങ്ങി

ചക്കിട്ടപാറ: മലയോര ഹൈവേ പ്രവർത്തി കാരണം ചെളിക്കെട്ടായ പെരുവണ്ണാമൂഴി കുടുംബാരോഗ്യ കേന്ദ്രം ഭാഗത്തെ പാത നന്നാക്കാൻ ഇന്നലെ വൈകീട്ടോടെ നടപടി തുടങ്ങി. കുടുംബാരോഗ്യ കേന്ദ്രത്തിൽ വനിതാ രോഗിയെ കൊണ്ടു പോകാൻ ചങ്ങരോത്ത് ആശുപത്രിയിൽ നിന്ന് എത്തിയ 108 ആംമ്പുലൻസ് ചെളിയിൽ കുടുങ്ങി. ഏറെ പണിപ്പെട്ടാണ് ഇത് നാട്ടുകാരുടെ സഹായത്തോടെ കരക്ക് കയറ്റിയത്. മറ്റൊരു രോഗിയെ കൊണ്ടു പോകാൻ പേരാമ്പ്ര ആശുപത്രിയിൽ നിന്നെത്തിയ 108 ആംമ്പുലൻസ് ചെളി റോഡിൽ ഇറങ്ങാതെ ചക്കിട്ടപാറ വഴി ചുറ്റിക്കറങ്ങിയാണ് പെരുവണ്ണാമൂഴി ആശുപത്രിയിലെത്തിയത്. പെരുവണ്ണാമൂഴി -കടിയങ്ങാട് പ്രധാന റോഡിൽ നിന്ന് 200 മീറ്റർ ദൂരം മാത്രമാണ് പെരുവണ്ണാമൂഴി കുടുംബാരോഗ്യ കേന്ദ്രത്തിലേക്കുള്ള ദൂരം. ഇത് ചെളിക്കെട്ടായതാണ് പ്രശ്നമായത്. മലയോര ഹൈവേ പ്രവർത്തി തടയുമെന്ന് ജനപ്രതിനിധികൾ അടക്കമുള്ള കോൺഗ്രസ് നേതാക്കൾ അറിയിച്ചതോടെയാണ് പ്രശ്നം പരിഹാരമുണ്ടായത്. ഇന്ന് പണി പൂർത്തിയാകും. റോഡിലെ ചെളിക്കെട്ട് ജനകീയ വിഷയത്തിൽ ജന പ്രതിനിധികൾ ഇടപെടണമെന്നാവശ്യപ്പെട്ട് ചക്കിട്ടപാറയിലെ പൊതു പ്രവർത്തകൻ രാജൻ വർക്കി ആശുപത്രി പരിസരത്തെ ചെളിക്കെട്ടിലിറങ്ങി കഴിഞ്ഞ ദിവസം സമരം ചെയ്തിരുന്നു.

വേനപ്പാറ ഹോളി ഫാമിലി സ്കൂളിൽ പ്രതിഭാസംഗമം

കോഴിക്കോട്: വേനപ്പാറ ഹോളി ഫാമിലി സ്കൂളിൽ പ്രതിഭാസംഗമം സംഘടിപ്പിച്ചു.ഹയർ സെക്കൻഡറി പരീക്ഷയിൽ സയൻസ് വിഭാഗത്തിൽ മുഴുവൻ മാർക്ക് നേടിയ ക്രിസ്റ്റി പോൾ മാത്യു, ക്രിസ് മരിയ വിൽസൺ എന്നിവർക്ക് ക്യാഷ് അവാർഡും മെമന്‍റോയും നൽകി. താമരശേരി ബിഷപ് മാർ റെമീജിയോസ് ഇഞ്ചനാനിയിൽ ചടങ്ങ് ഉദ്ഘാടനം ചെയ്തു. സ്കൂൾ മാനേജർ ഫാ. സ്കറിയ മങ്കരയിൽ അധ്യക്ഷത വഹിച്ചു. മികച്ച പരിസ്ഥിതി പ്രവർത്തനങ്ങൾ നടത്തിയ വിദ്യാലയങ്ങൾക്കുള്ള സംസ്ഥാന പുരസ്കാരം നേടിയ വേനപ്പാറ ലിറ്റിൽ ഫ്ലവർ യുപി സ്കൂൾ ഹെഡ്മാസ്റ്റർ ജെയിംസ് ജോഷിയെ ചടങ്ങിൽ ആദരിച്ചു. എസ്എസ്എൽസി, പ്ലസ്ടു, യുഎസ്എസ് പരീക്ഷകളിൽ ഉന്നത വിജയം നേടിയവർക്ക് പുരസ്കാര സമർപ്പണവും എൻഡോവ്മെന്‍റ് വിതരണവും നടത്തി. ഓമശേരി പഞ്ചായത്ത് പ്രസിഡന്‍റ് കരുണാകരൻ, ജില്ലാ പഞ്ചായത്ത് മെമ്പർ നാസർ എസ്റ്റേറ്റ് മുക്ക്, വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ പി.കെ. ഗംഗാധരൻ, വാർഡ് മെന്പർ രജിത രമേശ്‌, പ്രിൻസിപ്പൽ ബിന്ദു മേരി പോൾ, ഹെഡ്മിസ്ട്രസ് റീജ വി. ജോൺ, ലീന വർഗീസ്, സിജു കുര്യാക്കോസ് എന്നിവർ പ്രസംഗിച്ചു.

കൈവരിയില്ലാത്ത പനന്പിലാവ് പാലത്തിൽ കാർ പുഴയിലേക്ക് മറിഞ്ഞു

മുക്കം: കോഴിക്കോട്-മലപ്പുറം ജില്ലകളെ ബന്ധിപ്പിക്കുന്ന തോട്ടുമുക്കം - പനമ്പിലാവ് പാലത്തിൽനിന്ന് കാർ നിയന്ത്രണംതെറ്റി പുഴയിലേക്കു മറിഞ്ഞു. ഇന്നലെ പുലർച്ചെയാണ് സംഭവം. കാറിൽ സഞ്ചരിച്ചിരുന്ന രണ്ടു പേർ അത്ഭുതകരമായി രക്ഷപ്പെട്ടു. കക്കാടംപൊയിലിൽ നിന്ന് വരികയായിരുന്ന രണ്ടു യുവാക്കൾ സഞ്ചരിച്ച കാറാണ് അപകടത്തിൽപെട്ടത്. 35 വർഷം പഴക്കമുള്ളതും അപകടക്കെണിയുമായ പാലം പുതുക്കിപ്പണിയണമെന്ന് നാട്ടുകാരും ഇതുവഴി പോകുന്നവരും ആവശ്യപ്പെടാൻ തുടങ്ങിയിട്ട് കാലമേറെയായി. 1990-ൽ ട്രൈബൽ ഡവലപ്മെന്‍റ് ഫണ്ട് ഉപയോഗിച്ച് ചെറുപുഴയ്ക്ക് കുറുകെ ഓവർ ഫ്ലോ ക്രോസ് വേയായി നിർമിച്ച പലമാണിത്. തോട്ടുമുക്കം, വെറ്റിലപ്പാറ, കൂമ്പാറ, മരഞ്ചാട്ടി, ചുണ്ടത്തുംപൊയിൽ തുടങ്ങിയ സ്കൂളുകളിലേയ്ക്കുള്ള വിദ്യാർഥികളും സ്കൂൾ ബസുകളും കക്കാടംപൊയിൽ ടുറിസ്റ്റ് മേഖലയിലയ്ക്കുള്ള നിരവധി സഞ്ചാരികളും ഉൾപ്പടെ നൂറു കണക്കിനാളുകൾ കടന്നുപോകുന്ന പാലമാണിത്. കേടുപാടുകൾ സംഭവിച്ചുകൊണ്ടിരിക്കുന്ന പാലം പുതുക്കിപ്പണിയണമെന്ന് ആവശ്യപ്പെട്ട് മന്ത്രി പി.എ മുഹമ്മദ് റിയാസിനും ലിന്‍റോ ജോസഫ് എംഎൽഎക്കും നിവേദനം നൽകിയതാണെന്നും അപകട സൂചന ചൂണ്ടിക്കാട്ടിയതായും നാട്ടുകാർ പറഞ്ഞു. 2018-19 ലെ സംസ്ഥാന ബജറ്റിൽ തിരുവമ്പാടി മണ്ഡലത്തിലെ പ്രൊപ്പോസലിൽ ഉൾപ്പെടുത്തുകയും, 5 .28 കോടി രൂപ എസ്റ്റിമേറ്റ് ഇട്ടു നബാർഡിന്‍റെ അനുമതിക്കായി സമർപ്പിച്ചതായും പറഞ്ഞിരുന്നു. എന്നാൽ ഇതിനിടെ കഴിഞ്ഞ വർഷം നാട്ടുകാരുടെ പ്രതിഷേധം വകവെക്കാതെ പാലത്തിന്‍റെ ഇരുവശങ്ങളിലും പൈപ്പിന്‍റെ കൈവരികൾ സ്ഥാപിച്ച് കണ്ണിൽ പൊടിയിട്ടുകയായിരുന്നു. ഇതിൽ ഒരു വശത്തേത് വൈകാതെ തകർന്നു പോയി. ഇവിടെയാണ് കഴിഞ്ഞ ദിവസം കാർ മറിഞ്ഞത്. വെറും മൂന്ന് മീറ്റർ വീതി മാത്രമുള്ളതും അടിയിലെ തൂണുകൾ ദ്രവിച്ചു, കോൺക്രീറ്റു പൊളിഞ്ഞു കമ്പികൾ പുറത്തു കാണുന്ന പാലം യാത്രക്കാരുടെ ജീവൻ എടുക്കും മുമ്പ് പുതുക്കിപ്പണിയണമെന്നാണ് എല്ലാവരുടെയും ആവശ്യം.

കോഴിക്കോട് കളക്ടറേറ്റിനെ വിവരാവകാശ സൗഹൃദമാക്കും

കോഴിക്കോട്: കളക്ടറേറ്റിലെ എല്ലാ ഓഫീസുകളെയും വിവരാവകാശ സൗഹൃദ ഓഫീസുകളാക്കി മാറ്റും. വിവരാവകാശ നിയമം നടപ്പിലാക്കിയ ദിനമായ ഒക്ടോബര്‍ 15ന് ഇതിന്‍റെ പ്രഖ്യാപനം നടത്താന്‍ വിവരാവകാശ കമീഷണര്‍ അഡ്വ. ടി കെ രാമകൃഷ്ണന്‍ ജില്ലാ കളക്ടര്‍ സ്നേഹില്‍ കുമാര്‍ സിംഗുമായി നടത്തിയ കൂടിക്കാഴ്ചയില്‍ തീരുമാനമായി. ആദ്യപടിയായി ജില്ലാ കളക്ടര്‍, എഡിഎം, ജില്ലാ പോലീസ് മേധാവി, ജില്ലാ ഇന്‍ഫര്‍മേഷന്‍ ഓഫീസര്‍ എന്നിവരുടെ യോഗം ചേര്‍ന്ന് കര്‍മപരിപാടികള്‍ ആസൂത്രണം ചെയ്യും. തുടര്‍ന്ന് കളക്ടറേറ്റിലെ എല്ലാ ഓഫീസുകളിലെയും പബ്ലിക് ഇന്‍ഫര്‍മേഷന്‍ ഓഫീസര്‍മാര്‍മാര്‍ക്കും അപ്പീല്‍ അധികാരികള്‍ക്കുമായി സെമിനാറും ബോധവത്കരണവും സംഘടിപ്പിക്കും. വിവരാവകാശ നിയമം വകുപ്പ് നാലില്‍ പ്രതിപാദിച്ച പ്രകാരം എല്ലാ ഓഫീസുകളിലെയും വിവരങ്ങള്‍ ക്രോഡീകരിച്ച് കാറ്റലോഗ് ചെയ്ത് കമ്പ്യൂട്ടറിലൂടെ ലഭ്യമാക്കാന്‍ നടപടി സ്വീകരിക്കും. ഇത് നടപ്പാക്കിയിട്ടുണ്ടെന്ന് ഉറപ്പാക്കാന്‍ കമീഷണര്‍മാര്‍ ഓഫീസുകളില്‍ പരിശോധന നടത്തും. എല്ലാ ഓഫീസുകളിലും വിവരാവകാശവുമായി ബന്ധപ്പെട്ട ബോര്‍ഡുകള്‍ സ്ഥാപിച്ചിട്ടുണ്ടെന്ന് ഉറപ്പാക്കും. വിവരാവകാശ അപേക്ഷകള്‍ക്ക് സമയബന്ധിതമായി വിവരം നല്‍കാനുള്ള സാഹചര്യമൊരുക്കും. അറിയാനുള്ള അവകാശം പൊതുജനത്തിനുണ്ടെന്നും ഭരണസംവിധാനം സുതാര്യമാക്കുന്നതിനും അഴിമതി അവസാനിപ്പിക്കുന്നതിനും വിവരാവകാശ നിയമം സഹായകമാകുമെന്നും വിവരാവകാശ കമീഷണര്‍ ചൂണ്ടിക്കാട്ടി.

പോർച്ചിൽ നിർത്തിയിട്ട ഓട്ടോറിക്ഷക്ക് തീ പിടിച്ചു

പേരാമ്പ്ര: പാലേരി അങ്ങാടിയിലെ വീട്ടിൽ നിർത്തിയിട്ട ഓട്ടോയ്ക്ക് തീ പിടിച്ചു. പരേതനായ കിഴക്കയിൽ കുഞ്ഞിരാമൻ നായരുടെ മകൾ രമണിയുടെ വീട്ടുമുറ്റത്ത് നിർത്തിയിട്ട ഓട്ടോയ്ക്കാണ് തീ പിടിച്ചത്. ഇന്നലെ വൈകുന്നേരം നാലരയോടെയായിരുന്നു സംഭവം. തീ വീട്ടിലേക്കും പടർന്നു. ഇവിടെ ആൾ താമസം ഉണ്ടായിരുന്നില്ല. പേരാമ്പ്രയിൽ നിന്ന് ഫയർ ഫോഴ്സ് എത്തിയാണ് തീയണച്ചത്. വീട് തുറന്നു പരിശോധിച്ചാലെ നഷ്ടം കണക്കാക്കാൻ കഴിയുകയുള്ളൂ. തീപിടിത്തത്തിന്‍റെ കാരണം വ്യക്തമല്ല.

‘2 മില്യൺ പ്ലഡ്ജി’നൊപ്പം അണിചേരാൻ കോർപറേഷൻ

കോഴിക്കോട്: ജില്ലാ പഞ്ചായത്തിന്‍റെ നേതൃത്വത്തിൽ 26ന് സംഘടിപ്പിക്കുന്ന ലഹരി വിരുദ്ധ ജനകീയ പ്രതിരോധം "2 മില്യൺ പ്ലഡ്ജി'നൊപ്പം അണിചേരാൻ കോഴിക്കോട് കോർപറേഷനും. 20ന് കോർപറേഷൻ തലത്തിൽ വിപുലമായ കൺവൻഷൻ ചേരും. കോർപറേഷൻ പരിധിയിലെ ആളുകളും കോർപറേഷൻ കൗൺസിലർമാരും ജീവനക്കാരുമെല്ലാം പരിപാടിക്കൊപ്പം ചേർന്ന് ലഹരി വിരുദ്ധ പ്രതിജ്ഞയെടുക്കും. ജില്ലാ പഞ്ചായത്ത് പ്രസിഡന്‍റ് ഷീജാ ശശി, ഡെപ്യൂട്ടി മേയർ സി.പി. മുസാഫർ അഹമ്മദ് എന്നിവരുടെ നേതൃത്വത്തിൽ നടന്ന യോഗത്തിലാണ് തീരുമാനം. കോർപറേഷൻ തലത്തിൽ പരിപാടി വൻ വിജയമാക്കുന്നതിന് എല്ലാവിധ പിന്തുണയും ഉണ്ടാകുമെന്ന് മേയർ ഡോ. ബീന ഫിലിപ്പ് അറിയിച്ചു. 26ന് ശേഷം ലഹരിക്കെതിരേ വിവിധ വകുപ്പുകളെ ഏകോപിപ്പിച്ച് ആവിഷ്കരിക്കുന്ന പദ്ധതികൾ നടപ്പിലാക്കുന്നതിനുള്ള സഹായവും കോർപറേഷൻ വാഗ്ദാനം ചെയ്തു. ജില്ലയിലെ 20 ലക്ഷം മനുഷ്യരാണ് ഒരുമിച്ച് ഒരേ സമയം വിവിധ കേന്ദ്രങ്ങളിൽ വച്ച് ലഹരിക്കെതിരേ പ്രതിജ്ഞയെടുക്കുക.

നീറ്റ്‌ പരീക്ഷ ജേതാവിനെ ആദരിച്ചു

പേരാമ്പ്ര: നീറ്റ് പരീക്ഷയിൽ സംസ്ഥാനത്ത് ഒന്നാം സ്ഥാനവും അഖിലേന്ത്യാ തലത്തിൽ 109-ാം സ്ഥാനവും നേടിയ ആവളയിലെ ദീപ്നിയയെ പേരാമ്പ്ര ബ്ലോക്ക് പഞ്ചായത്ത് ആദരിച്ചു. പ്രസിഡന്‍റ് എൻ.പി. ബാബു പൊന്നാട അണിയിച്ചു. വികസന സ്റ്റാൻഡിംഗ് കമ്മിറ്റി ചെയർമാൻ കെ. സജീവൻ, ബ്ലോക്ക് അംഗം കെ. അജിത, ബിഡിഒ ഇൻ ചാർജ് പി.കെ. സുജീഷ്, വുമൺസ് വെൽഫയർ ഓഫീസർ സജീഷ് എന്നിവർ പങ്കെടുത്തു.

കൂരാച്ചുണ്ട് പ്രസ് ഫോറം ഉന്നത വിജയികളെ ആദരിച്ചു

കൂരാച്ചുണ്ട്: കൂരാച്ചുണ്ട് പ്രസ് ഫോറത്തിന്‍റെ ആഭിമുഖ്യത്തിൽ എസ്എസ്എൽസി, പ്ലസ് ടു പരീക്ഷകളിൽ ഉന്നത വിജയം നേടിയ കല്ലാനോട് സെന്‍റ് മേരീസ് ഹയർ സെക്കൻഡറി സ്കൂൾ, കൂരാച്ചുണ്ട് സെന്‍റ് തോമസ് ഹയർ സെക്കൻഡറി സ്കൂൾ എന്നിവിടങ്ങളിലെ വിദ്യാർഥികളെ ഉപഹാരം നൽകി ആദരിച്ചു. കോഴിക്കോട് ക്രൈംബ്രാഞ്ച് ഡിവൈഎസ്പി വി.വി. ബെന്നി ഉദ്ഘാടനം ചെയ്തു. പ്രസ് ഫോറം പ്രസിഡന്‍റ് ജോയി കുര്യൻ മുട്ടുംമുഖത്ത് അധ്യക്ഷത വഹിച്ചു. കൂരാച്ചുണ്ട് സെന്‍റ് തോമസ് ഫൊറോന വികാരി ഫാ. വിൻസെന്‍റ് കണ്ടത്തിൽ അനുഗ്രഹ പ്രഭാഷണം നടത്തി. ഗ്രാമപഞ്ചായത്ത് പ്രസിഡന്‍റ് ഒ.കെ. അമ്മദ് മുഖ്യാതിഥിയായി. മജീഷ്യനും അധ്യാപകനുമായ ശ്രീജിത്ത് വിയ്യൂർ മുഖ്യപ്രഭാഷണം നടത്തി. ജോൺ ജ്യോതിഷ് മുട്ടുംമുഖത്ത്, പ്രസ് ഫോറം സെക്രട്ടറി ജോബി കാഞ്ഞിരത്തുംകുഴിയിൽ, വൈസ് പ്രസിഡന്‍റ് ജോൺസൺ പൂകമല എന്നിവർ പ്രസംഗിച്ചു. ചടങ്ങിൽ കാറ്റുള്ളമല മുട്ടുംമുഖത്ത് കുര്യൻ - ഏലിയാമ്മ കുര്യൻ സ്മരണാർഥം മെമന്‍റോ വിദ്യാർഥികൾക്ക് നൽകി. ജിതിൻ പതിയിൽ, അഗസ്റ്റിൻ കാരക്കട, ജോസ് വെളിയത്ത്, വി.ജെ സണ്ണി, വർഗീസ് പാലക്കാട്ട് എന്നിവർ സന്നിഹിതരായി. ബിജു കക്കയം എൻ.കെ കുഞ്ഞമ്മദ്, രാജൻ വർക്കി, നിസാം കക്കയം എന്നിവർ നേതൃത്വം നൽകി.

വല്ലത്തായ് കടവുപാലം പ്രവൃത്തി ഇഴയുന്നു; സ്കൂൾ വിദ്യാർഥികൾ ഉൾപ്പെടെ ദുരിതത്തിൽ

മുക്കം: കാരശേരി പഞ്ചായത്തിലെ കാരമല-വല്ലത്തായ്പാറ പ്രദേശങ്ങളെ ബന്ധിപ്പിച്ച് ചെറുപുഴയ്ക്ക് കുറുകെ നിർമിക്കുന്ന വല്ലത്തായ് കടവുപാലം പ്രവൃത്തി വൈകുന്നതോടെ യാത്രാ ദുരിതത്തിലായി നിരവധി പേർ. വിദ്യാർഥികൾ ഉൾപ്പടെയുള്ളവർ കിലോമീറ്ററുകൾ ചുറ്റിവേണം യാത്രചെയ്യാൻ. കഴിഞ്ഞ ഏപ്രിലിൽ പണിപൂർത്തിയാക്കുമെന്ന് അധികൃതർ പറഞ്ഞിരുന്നുവെങ്കിലും ഇതുവരെ പകുതിയോളമേ പൂർത്തിയായിട്ടുള്ളൂ.വല്ലത്തായ് കടവിൽ ഉണ്ടായിരുന്ന പഴയ വെന്‍റ് പൈപ്പ് പാലം വളരെ ഉയരം കുറഞ്ഞതായിരുന്നതിനാൽ മഴക്കാലം തുടങ്ങുമ്പോൾ മുതൽ വെള്ളത്തിനടിയിലായി ഈ റൂട്ടിൽ ഗതാഗതം മുടങ്ങുക പതിവായിരുന്നു. തൊട്ടടുത്തുള്ള സ്കൂളുകളിലേക്കും ആശുപത്രിയിലേക്കും അങ്ങാടിയിലേക്കുമൊക്കെ ആളുകൾക്ക് എത്തിച്ചേരാൻ ഏറെ ചുറ്റിക്കറങ്ങേണ്ട അവസ്ഥയുമായിരുന്നു. വീതി കുറഞ്ഞ പാലവും ഇരുവശത്തും വളവുകളുമായിരുന്നതിനാൽ ബസ് പോലുള്ള വലിയ വാഹനങ്ങൾക്ക് ഓടാൻ പറ്റാത്ത സാഹചര്യവുമുണ്ടായിരുന്നു. ഈ സാഹചര്യത്തിലാണ് ഉയരം കൂടിയ കോൺക്രീറ്റ് പാലം വേണമെന്ന് നാട്ടുകാർ ആവശ്യമുന്നയിച്ചത്. വർഷങ്ങൾ നീണ്ട കാത്തിരിപ്പിനൊടുവിൽ 2021 ഫെബ്രുവരിയിൽ കോൺക്രീറ്റ് പാലം അനുവദിച്ചെങ്കിലും പ്രവൃത്തി തുടങ്ങാനായത് രണ്ടുവർഷം കഴിഞ്ഞാണ്. ഫണ്ട് ലഭിക്കാത്ത കാരണത്താൽ ഇതിനിടെ നാലു മാസം പ്രവൃത്തി മുടങ്ങിക്കിടന്നിരുന്നു. കഴിഞ്ഞ മാസമാണ് പ്രവൃത്തി പുനരാരംഭിച്ചത്. തൂണുകളുടെയും ബീമുകളുടെയും പ്രവൃത്തി പൂർത്തിയായ പാലത്തിന് സ്ലാബ് വാർക്കാനുള്ള കമ്പികൾ ഒരു ഭാഗത്ത് കെട്ടി ഒരുക്കുന്ന പ്രവൃത്തിയാണ് നടന്നുവരുന്നത്. പത്ത് പണിക്കാരാണ് ഈ പ്രവൃത്തിയിൽ ഏർപ്പെട്ടിട്ടുള്ളത്. പാലംപണി തുടങ്ങിയത് മുതൽ വല്ലത്തായ്പാറ, കപ്പാല തുടങ്ങിയ പ്രദേശങ്ങളിലുള്ളവർ തൊട്ടടുത്ത കാരമൂല, ആനയാംകുന്ന്, മുക്കം എന്നിവിടങ്ങളിലേക്ക് ഏറെ ചുറ്റിക്കറങ്ങി യാത്ര ചെയ്യേണ്ട അവസ്ഥയാണ്. വിദ്യാർഥികളാണ് ഏറെ ദുരിതം അനുഭവിക്കുന്നത്. പാലം പ്രവൃത്തി പൂർത്തിയായാൽ തേക്കുംകുറ്റി, മരഞ്ചാട്ടി, തോട്ടക്കാട്, തോട്ടുമുക്കം, കക്കാടംപൊയിൽ തുടങ്ങിയ ഉൾനാടുകളിലേക്ക് ബസ് ഗതാഗതം ഉൾപ്പെടെയുള്ള യാത്രാസൗകര്യം എത്തും. കൂടുതൽ തൊഴിലാളിലകളെ ഉൾപ്പെടുത്തി പാലം പ്രവൃത്തി എത്രയും പെട്ടന്ന് പൂർത്തീകരിച്ച് ഗതാഗത യോഗ്യമാക്കണമെന്നാണ് നാട്ടുകാരുടെ ആവശ്യം.

ഉന്നത വിജയികളെ അനുമോദിച്ചു

തിരുവമ്പാടി: പുല്ലൂരാംപാറ സെന്‍റ് ജോസഫ്സ് ഹയർ സെക്കൻഡറി സ്കൂളിൽ നിന്ന് ഹയർസെക്കൻഡറി പരീക്ഷയിൽ ഉന്നതവിജയം നേടിയ വിദ്യാർഥികളെ അനുമോദിച്ചു. യോഗം സ്കൂൾ മാനേജർ ഫാ. കുര്യാക്കോസ് മുഖാല ഉദ്ഘാടനം ചെയ്തു. തിരുവമ്പാടി പഞ്ചായത്ത് പ്രസിഡന്‍റ് ബിന്ദു ജോൺസൺ അധ്യക്ഷത വഹിച്ചു. യോഗത്തിൽ പഞ്ചായത്തംഗം ഷൈനി ബെന്നി, ഹൈസ്കൂൾ പ്രധാനാധ്യാപകൻ ജോളി ജോസഫ്, പ്രിൻസിപ്പൽ സുനിൽ ജോസഫ്, സ്റ്റാഫ് സെക്രട്ടറി സംഗീത റോസ്‌ലി ജോർജ്, പിടിഎ പ്രസിഡന്‍റ് വിത്സൻ ടി. മാത്യു, അധ്യാപക പ്രതിനിധി പി.സി. സീന, വിദ്യാർഥി പ്രതിനിധികളായ ധന്വി ദിനേഷ്, ആൻമരിയ ഷിജു എന്നിവർ പ്രസംഗിച്ചു.

കനത്തമഴയിൽ താഴ്ന്ന പ്രദേശങ്ങൾ വെള്ളത്തിൽ

കൊയിലാണ്ടി: കനത്തമഴയിൽ താഴ്ന്ന പ്രദേശങ്ങൾ വെള്ളത്തിൽ. നന്തി മുതൽ ചെങ്ങോട്ടുകാവ് വരെ ദേശീയപാത തകർന്നു. കാറ്റിൽ നിരവധി മരങ്ങൾ വീണു. കൊയിലാണ്ടി നഗരസഭയിലെ നടേലക്കണ്ടി വാർഡിലെ കുറ്റിവയൽ കോളനിയിലെ ജയൻ, ശിവദാസൻ എന്നിവരുടെ കുടുംബങ്ങളെ കോതമംഗലം ജിഎൽപി സ്കൂളിലെ ദുരിതാശ്വാസ കേന്ദ്രത്തിലേക്ക് മാറ്റി. കൗൺസിലർ എ. ലളിതയുടെ നേതൃത്വത്തിലാണ് ഇവരെ മാറ്റിയത്. പതിവുപോലെ കൊരയങ്ങാട് വാർഡിലെ അമ്പാടി റോഡും കൊരയങ്ങാട് ക്ഷേത്ര മൈതാനവും വെള്ളത്തിലായി. പന്തലായനിയിൽ ഈശ്വരൻ ചിറ കവിഞ്ഞൊഴുകി സമീപത്തെ നാല് വീടുകളിൽ വെള്ളം കയറി.

വാര്‍ഡ് തലത്തില്‍ വോട്ടര്‍ പട്ടിക പുനക്രമീകരണം: 68 ജീവനക്കാരും ഇടതു പ്രവര്‍ത്തകരെന്ന് ആക്ഷേപം

കോഴിക്കോട്: കോര്‍പറേഷന്‍ തെരഞ്ഞെടുപ്പിന് വാര്‍ഡ് തലത്തില്‍ വോട്ടര്‍ പട്ടിക പുനക്രമീകരിക്കുന്നതിന് നിയോഗിച്ച 68 ജീവനക്കാരും ഇടതു യൂണിയന്‍ പ്രവര്‍ത്തകരെന്ന് ആക്ഷേപം. പേരിനു പോലും പ്രതിപക്ഷ സംഘടനയിലെ ഒരാളെ പോലും നിയമിക്കാതെയാണ് കോഴിക്കോട് ഇലക്ടറല്‍ രജിസ്‌ട്രേഷന്‍ സെക്രട്ടറിയുടെ ഉത്തരവ് കഴിഞ്ഞദിവസം ഇറങ്ങിയതെന്ന് യുഡിഎഫ് കൗണ്‍സില്‍ പാര്‍ട്ടി ലീഡര്‍ കെ.സി. ശോഭിതയും ഡെപ്യൂട്ടി ലീഡര്‍ കെ.മൊയ്തീന്‍ കോയയും പറഞ്ഞു. ഇത് ഗുരുതരമായ പ്രത്യാഘാതം സൃഷ്ടിക്കും. സ്വതന്ത്രവും നീതിപൂര്‍വവുമായ തെരഞ്ഞെടുപ്പ് വോട്ടര്‍ പട്ടിക പുറത്തിറക്കുക എന്ന മൗലികമായ ഉത്തരവാദിത്വമാണ് കോര്‍പറേഷന്‍ സെക്രട്ടറി നിരാകരിച്ചതെന്ന് യുഡിഎഫ് നേതാക്കള്‍ കുറ്റപ്പെടുത്തി. ഭരണഘടനയുടെ 243 (കെ) അനുച്ഛേദപ്രകാരം രൂപീകരിച്ച സംസ്ഥാന തെരഞ്ഞെടുപ്പ് കമ്മീഷന്‍റെ ഉത്തരവുകളെ കാറ്റില്‍ പറത്തിയാണ് കോഴിക്കോട് കോര്‍പറേഷന്‍ സെക്രട്ടറി പക്ഷപാതപരമായ നടപടി സ്വീകരിച്ചത്. ചെറുവണ്ണൂര്‍ സോണല്‍ ഓഫീസില്‍ റവന്യു ഓഫീസര്‍ ഷാജിയെ ഒഴിവാക്കി ബേപ്പൂര്‍ സോണലിലെ റവന്യു ഓഫീസര്‍ക്കാണ് അഡിഷണല്‍ ചാര്‍ജ് നല്‍കിയിട്ടുള്ളത്. ഒരാളെ അപമാനിക്കുകയും മറ്റൊരാളോട് സ്വജനപക്ഷപാതം കാണിക്കുകയും ചെയ്യുന്ന ഉത്തരവ് നീതി നിഷേധമാണ്. മെയിന്‍ ഓഫീസിലെ നിയമനവും പക്ഷപാതപരമാണ്. യൂണിയന്‍കാരെ മാത്രം കുത്തിനിറച്ചുള്ള കോര്‍പറേഷന്‍ സെക്രട്ടറിയുടെ നടപടിക്കെതിരേ സംസ്ഥാന തെരഞ്ഞെടുപ്പ് കമ്മീഷനും ജില്ലാ ഇലക്‌ഷന്‍ഓഫീസര്‍ക്കും യുഡിഎഫ് പരാതി നല്‍കിയിട്ടുണ്ടെന്ന് അവര്‍ പറഞ്ഞു.

വര്‍ധിപ്പിച്ച ഭൂനികുതി പിന്‍വലിക്കണം: കര്‍ഷക കോണ്‍ഗ്രസ്

ബാലുശേരി: വര്‍ധിച്ചു വരുന്ന വന്യമൃഗശല്യംകൊണ്ടും പ്രതികൂല കാലാവസ്ഥ കാരണവും കഷ്ടപ്പെടുന്ന കര്‍ഷകര്‍ക്ക് ഭൂനികുതി വര്‍ധനവ് വലിയ പ്രഹരമായിത്തീര്‍ന്ന സാഹചര്യത്തില്‍ അതു പിന്‍വലിക്കണമെന്ന് കര്‍ഷക കോണ്‍ഗ്രസ് ബാലുശേരി നിയോജക മണ്ഡലം കണ്‍വന്‍ഷന്‍ ആവശ്യപ്പെട്ടു. പിണറായി സര്‍ക്കാര്‍ ജനവിരുദ്ധ നിലപാടില്‍നിന്ന് പിറകോട്ടു പോകണമെന്ന് സമ്മേളനം ആവശ്യപ്പെട്ടു.ജില്ലാ പ്രസിഡന്‍റ് അഡ്വ. ബിജു കണ്ണന്തറ ഉദ്ഘാടനം ചെയ്തു. നിയോജക മണ്ഡലം പ്രസിഡന്‍റ് സുജിത്ത് കറ്റോട് അധ്യക്ഷത വഹിച്ചു. വാളങ്ങല്‍ ബാലകൃഷ്ണന്‍, കെ.പി. സത്യന്‍, സി.പി. ബാലകൃഷ്ണന്‍, സി.കെ. സതീശന്‍, അമല്‍രാജ് കോഴിക്കോട്, അമൃതരാജ്, ഐ. രവീന്ദ്രന്‍, ശകുന്തള ബാലകൃഷ്ണന്‍ തുടങ്ങിയവര്‍ സംസാരിച്ചു.

കണ്ണവം വനത്തിൽനിന്ന് കാട്ടാനകൾ ജനവാസ മേഖലയിലേക്ക്

കുറ്റല്ലൂരിലും പറക്കാടും വ്യാപക കൃഷിനാശം നാദാപുരം: വിലങ്ങാട് മലയോര മേഖലകളിൽ കാട്ടാനകൾ നാശം വിതയ്ക്കുന്നു. കണ്ണൂർ-കോഴിക്കോട് ജില്ലകളുടെ അതിർത്തി പ്രദേശമായ കുറ്റല്ലൂർ, പറക്കാട് ഭാഗത്ത് കഴിഞ്ഞ ഒരാഴ്ചയായി രാത്രിയെന്നോ പകലെന്നോ വ്യത്യാസമില്ലാതെ ജനവാസ മേഖലയിൽ കാട്ടാനകൾ തമ്പടിച്ചിരിക്കുകയാണ്. പ്രദേശത്തെ റബർ മരങ്ങൾ, പ്ലാവ്, തെങ്ങ്, കമുക്, വാഴ തുടങ്ങി എല്ലാം പിഴുതും കുത്തിയും മറിച്ചിടുകയാണ്. കുറ്റല്ലൂരിലെ ബാബൂട്ടിയുടെ ആറ് തെങ്ങുകളാണ് ആനകൾ കുത്തിമറിച്ചിട്ട് നശിപ്പിച്ചത്. രണ്ട് ദിവസം മുമ്പ് കുറ്റല്ലൂരിലെ കുങ്കന്‍റെ 23 തെങ്ങുകൾ ആന കുത്തിമറിച്ചിട്ടു. പറമ്പിലെ മറ്റു കൃഷികളും നശിപ്പിച്ചു. ‌കഴിഞ്ഞ വർഷമുണ്ടായ ഉരുൾപൊട്ടലിൽ വൻ നാശനഷ്ടം നേരിട്ട കർഷകർക്ക് കാട്ടുമൃഗങ്ങളുടെ അക്രമം കാരണം കൃഷി നാശവും സഹിക്കേണ്ട ദുർഗതിയാണ് ഉണ്ടായിരിക്കുന്നത്. കാട്ടുമൃഗങ്ങളുടെ സംഹാര താണ്ഡവത്തിന്‍റെ തിക്ത ഫലം അനുഭവിക്കേണ്ടിവരുന്നത് ഇവിടെയുള്ള കുടിയേറ്റ കർഷകർ കൂടിയാണ്. വനവാസി വിഭാഗത്തിൽപെട്ട നിരവധി കുടുംബങ്ങൾ ഇവിടെ താമസിക്കുന്നുണ്ട്. ഇവരുടെ ഉപജീവനമാർഗം കൃഷിയാണ്. കണ്ണവം വനമേഖലയിൽ നിന്നാണ് കാട്ടാനക്കൂട്ടം എത്തുന്നത്. കാട്ടാന ശല്യം രൂക്ഷമാകുന്ന സാഹചര്യത്തിൽ വനംവകുപ്പ് ഉദ്യോഗസ്ഥർ സ്ഥലത്തെത്തി പടക്കം പൊട്ടിച്ചും മറ്റും കാട്ടാനകളെ തിരികെ കാട്ടിലേക്ക് ഓടിച്ചു വിടാറുണ്ടെങ്കിലും അധികം വൈകാതെ ഇവ തിരികെ എത്തുന്ന സ്ഥിതിയാണ്. കാട്ടാനകളെ ഭയന്ന് കൃഷിഭൂമിയിൽപോയി നോക്കാൻ പോലും കർഷകർ തയാറാകാത്ത സ്ഥിതി നിലനിൽക്കുന്നുണ്ട്. ഇവിടെ മുമ്പ് സ്ഥാപിച്ചിരുന്ന സോളാർ വേലി തകർന്നതോടെയാണ് കാട്ടുമൃഗങ്ങളുടെ ശല്യം രൂക്ഷമായത്. കഴിഞ്ഞ വർഷം കാട്ടാന ശല്യം രൂക്ഷമായതോടെ ജില്ലാ കളക്ടർ വിലങ്ങാട് സന്ദർശിച്ചിരുന്നു. സോളാർ വേലി പുനർനിർമിക്കുമെന്ന് കളക്ടർ ജനങ്ങൾക്ക് ഉറപ്പ് നൽകിയെങ്കിലും നടപ്പായില്ല. കാട്ടാനകൾക്ക് പുറമെ കാട്ടുപോത്തുകൾ, കാട്ടുപന്നികൾ, കുരങ്ങുകൾ എന്നിവയും ജനവാസ കേന്ദ്രങ്ങളിൽ എത്തി കൃഷി നശിപ്പിക്കുന്നത് സ്ഥിതി രൂക്ഷമാക്കുകയാണ്.

പി.സുരേഷ് കോഴിക്കോട് എഡിഎം

കോഴിക്കോട്: അഡീഷണല്‍ ജില്ലാ മജിസ്‌ട്രേറ്റ് (എഡിഎം) ആയി പി.സുരേഷ് ചുമതലയേറ്റു. മലപ്പുറം ജില്ലയിലെ വണ്ടൂര്‍ സ്വദേശിയാണ്.പാലക്കാട് എഡിഎം ആയിരുന്നു. തിരൂര്‍, തിരുവല്ല എന്നിവിടങ്ങളില്‍ ആര്‍ഡിഒ ആയും മലപ്പുറം സോണല്‍ ലാന്‍ഡ് ബോര്‍ഡ് ഡെപ്യൂട്ടി കളക്ടറായും കോഴിക്കോട് ഡെപ്യൂട്ടി കളക്ടര്‍ (എല്‍ആര്‍) ആയും സേവനമനുഷ്ഠിച്ചിട്ടുണ്ട്.

മാനാഞ്ചിറ -വെള്ളിമാട്കുന്ന് റോഡ് പ്രവൃത്തി പൂര്‍ത്തിയാക്കും: മന്ത്രി

കോഴിക്കോട്: മാനാഞ്ചിറ -വെള്ളിമാട്കുന്ന് റോഡ് പ്രവര്‍ത്തി ഉദ്ഘാടനം പൊതുമരാമത്ത് മന്ത്രി പി.എ. മുഹമ്മദ് റിയാസ് നിര്‍വഹിച്ചു. മലബാര്‍ ആകെ ആഗ്രഹിച്ച പദ്ധതിയാണ് യാഥാര്‍ത്ഥ്യമാകാന്‍ പോകുന്നത്. ജനങ്ങളെ ആണിനിരത്തി ഏത് പ്രതിസന്ധിയെയും മറികടന്ന് റോഡ് വികസന പ്രവൃത്തി പൂര്‍ത്തിയാക്കുമെന്ന് മന്ത്രി പറഞ്ഞു. 8.34 കി.മീ ദൂരം വരുന്ന മാനാഞ്ചിറ- വെള്ളിമാടുകുന്ന് റോഡ് നവീകരിക്കാന്‍ സര്‍ക്കാര്‍ 482 കോടി രൂപയാണ് അനുവദിച്ചതെന്ന് മന്ത്രി പറഞ്ഞു. സ്ഥലമേറ്റെടുക്കലിന് വേണ്ടി മാത്രം 344.5 കോടി രൂപയും റോഡ് നിര്‍മ്മാണത്തിന് 137. 44 കോടി രൂപയും അനുവദിച്ചു. ആദ്യഘട്ടത്തില്‍ മാനാഞ്ചിറ- മലാപ്പറമ്പ് ഭാഗത്തെ പ്രവൃത്തിയാണ് നടപ്പാക്കുന്നത്. മലാപ്പറമ്പ് നിന്ന് വെള്ളിമാടുകുന്നു വരെയുള്ള ഭാഗം ദേശീയപാത 766 ല്‍ ഉള്‍പ്പെടുന്നതാണ്. മുത്തങ്ങ വരെ നീളുന്ന ഈ റോഡിന്‍റെ നിര്‍മാണം ദേശീയപാത വിഭാഗത്തിന്‍റെ പരിധിയില്‍ വരുന്നതാണ്. അതിനാലാണ് മലാപ്പറമ്പ് മുതല്‍ വെള്ളിമാടുകുന്ന് വരെയുള്ള മൂന്നു കിലോമീറ്റര്‍ ഈ റോഡ് വികസന പദ്ധതിയില്‍ ഉള്‍പ്പെടുത്താന്‍ സാധിക്കാതെ വന്നതെന്നും മന്ത്രി പറഞ്ഞു. പ്രസ്തുത ഭാഗത്തെ പ്രവൃത്തി കേന്ദ്ര ഉപരിതല ഗതാഗത മന്ത്രാലയം അനുവദിക്കാതെ ആരംഭിക്കാന്‍ സാധിക്കില്ല.മലാപ്പറമ്പ് മുതല്‍ വെള്ളിമാട്കുന്ന് വരെയുള്ള ഭാഗത്ത് പ്രവൃത്തി നടത്താന്‍ കേന്ദ്ര ഗതാഗത മന്ത്രാലയത്തില്‍ നിന്നും അനുമതി ലഭ്യമാക്കാനുള്ള നടപടി ആരംഭിച്ചിട്ടുണ്ട്. അനുമതി ലഭിക്കുന്നപക്ഷം പ്രവൃത്തി ആരംഭിക്കുമെന്നും മന്ത്രി പറഞ്ഞു. കേരള റോഡ് ഫണ്ട് ബോര്‍ഡ്- കോഴിക്കോട് നഗര പാത വികസന പദ്ധതി പ്രകാരമാണ് റോഡിന്‍റെ നിര്‍മ്മാണം ആരംഭിക്കുന്നത്. 24 മീറ്റര്‍ വീതിയില്‍ 5.320 കിലോമീറ്റര്‍ നീളത്തില്‍ ഡി.ബി.എം/ബി.സി നിലവാരത്തിലുള്ള നാല് വരിപ്പാതയായാണ് നിര്‍മ്മാണം. ഇരുവശത്തും കോണ്‍ക്രീറ്റ് കാന, ഡക്റ്റ്, 2.00 മീറ്റര്‍ വീതിയില്‍ നടപ്പാത, കുറുകെ 22 ഡക്റ്റുകള്‍ എന്നിവയുണ്ട്. മദ്ധ്യത്തില്‍ രണ്ട് മീറ്റര്‍ വീതിയില്‍ മീഡിയന്‍, മീഡിയനില്‍ തെരുവ് വിളക്കുകള്‍ എന്നിവ നിര്‍മ്മിക്കും. 21 ബസ് കാത്തിരുപ്പ് കേന്ദ്രങ്ങള്‍, സിവില്‍ സ്റ്റേഷനു മുന്‍പില്‍ നടപ്പാലം, റോഡ് സുരക്ഷാ മാര്‍ഗ്ഗങ്ങള്‍, പ്രധാന കവലകളില്‍ ട്രാഫിക് സിഗ്‌നലുകള്‍ എന്നിവ നിര്‍മ്മിക്കും. ചടങ്ങില്‍ തോട്ടത്തില്‍ രവീന്ദ്രന്‍ എംഎല്‍എ അധ്യക്ഷത വഹിച്ചു. അഹമ്മദ് ദേവര്‍കോവില്‍ എംഎല്‍എ എന്നിവര്‍ മുഖ്യാതിഥിയായിരുന്നു.

കോണ്‍ഗ്രസ്, ബിജെപി പ്രതിഷേധം

കോഴിക്കോട്: മലാപ്പറമ്പ് -വെള്ളിമാടുകുന്ന് വരെ റോഡ് വികസനം നടത്താത്തില്‍ കോണ്‍ഗ്രസ് പ്രതിഷേധം. ചേവായൂര്‍ ബ്ളോക്ക് കോണ്‍ഗ്രസ് സംഘടിപ്പിച്ച പൊതുയോഗം ഡിസിസി പ്രസിഡന്‍റ് അഡ്വ. കെ.പ്രവീണ്‍കുമാര്‍ ഉദ്ഘാടനം ചെയ്തു. കോര്‍പറേഷന്‍ പ്രതിപക്ഷ നേതാവ് കെ.സി. ശോഭിത, കൗണ്‍സിലര്‍ വിദ്യ ബാലകൃഷ്ണന്‍, എ.സഫറി, എന്‍. ഷെറില്‍ ബാബു, പി.കെ. ശ്രീനിവാസന്‍, എം.പി. വാസുദേവന്‍ എന്നിവര്‍ പ്രസംഗിച്ചു. കോഴിക്കോട്: മാനാഞ്ചിറ വെള്ളിമാട്കുന്ന് റോഡ് നിര്‍മ്മാണം അട്ടിമറിച്ചത് ജനവികാരം മാനിക്കാത്തവരാണെന്ന് ബിജെപി കോഴിക്കോട് സിറ്റി ജില്ല പ്രസിഡന്‍റ് അഡ്വ.കെ.പി.പ്രകാശ് ബാബു പറഞ്ഞു. മലാപ്പറമ്പില്‍ ബി.ജെ.പി സംഘടിപ്പിച്ച പ്രതിഷേധ കൂട്ടായ്മ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. ജില്ല വൈസ് പ്രസിഡന്‍റ് ഇ.പ്രശാന്ത് കുമാര്‍ അദ്ധ്യക്ഷത വഹിച്ചു.മുന്‍ ജില്ല പ്രസിഡന്‍റ് വി.കെ.സജീവന്‍, ജില്ല ജനറല്‍ സെക്രട്ടറിമാരായ ടി.വി.ഉണ്ണികൃഷ്ണന്‍, എം.സുരേഷ്,കൗണ്‍സിലര്‍ സരിത പറയേരി, നോര്‍ത്ത് മണ്ഡലം പ്രസിഡന്‍റ് കെ. ജിതിന്‍ എന്നിവര്‍ സംസാരിച്ചു.

ഓവുചാലിന് സ്ലാബിട്ടില്ല; തിരുവമ്പാടി - കൂടരഞ്ഞി റോഡില്‍ അപകടഭീഷണി

തിരുവമ്പാടി: തിരുവമ്പാടി - കൂടരഞ്ഞി റോഡില്‍ കക്കുണ്ട് ഭാഗത്ത് ഓവുചാലിന് സ്‌ളാബ് ഇടാത്തത് യാത്രക്കാര്‍ക്ക് ഭീഷണിയുയര്‍ത്തുന്നു. റോഡിനോടു തൊട്ടുചേര്‍ന്നാണ് മൂടിയില്ലാത്ത ഓവുചാല്‍ ഉള്ളത്. കണ്ണൊന്നു തെറ്റിയാല്‍ കാല്‍നടയാത്രക്കാര്‍ ഓവുചാലില്‍ വീഴും.ചീറീപ്പാഞ്ഞു വരുന്ന വാഹനങ്ങള്‍ കണ്ട് റോഡരികിലേക്കു മാറിയാല്‍ ഓവുചാലില്‍ വീഴും. ഓടകള്‍ക്ക് സ്‌ളാബ് ഇടാത്തതിനാല്‍ യാത്രക്കാര്‍ക്ക് നടന്നുപോകാനുള്ള സൗകര്യമാണ് ഇല്ലാതായത്. നിരവധി സ്‌കൂള്‍ കുട്ടികളും പ്രായമായവരും നടന്നുപോകുന്ന ഈ റോഡരുകിലെ ഓവുചാലിന് അടിയന്തരമായി സ്ലാബ് ഇടണമെന്ന് പ്രദേശവാസികള്‍ ആവശ്യപ്പെട്ടു. നടപടി സ്വീകരിച്ചില്ലെങ്കില്‍ പി.ഡബ്ല്യു.ഡി ഓഫീസ് മാര്‍ച്ച് അടക്കമുള്ള സമരപരിപാടികള്‍ നടത്തുമെന്ന് വാര്‍ഡ് കോണ്‍ഗ്രസ് കമ്മിറ്റി നേതാക്കള്‍ അറിയിച്ചു. ബിജു വര്‍ഗീസ് പുരയിടത്തില്‍, ലിസി മാളിയേക്കല്‍, റോബര്‍ട്ട് നെല്ലിക്കത്തെരുവില്‍, മറിയാമ്മ ബാബു,സിജോ വെട്ടിക്കാട്ട്, രാജു പൈമ്പിള്ളി എന്നിവര്‍ സംസാരിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]