ADVERTISEMENT

ADVERTISEMENT

വയോധികനെ ആക്രമിച്ച പ്രതി പിടിയിൽ

കോഴിക്കോട് :നടക്കാവ് പോലീസ് സ്റ്റേഷൻ പരിധിയിലെ എരഞ്ഞിപ്പാലത്ത് വയോധികനെ ആക്രമിച്ച എരഞ്ഞിപ്പാലം സ്വദേശി പിടിയിൽ. തേനാംവയൽ വീട്ടിൽ അജയ് (25 ) നെ നടക്കാവ് പോലീസ് അറസ്റ്റ് ചെയ്തു.

എരഞ്ഞിപ്പാലം സ്വദേശിയായ ദേവദാസൻ എന്നയാളെ കോഴിക്കോട് സഹകരണ ആശുപത്രിയുടെ സമീപം നടന്ന് പോകവേ അയൽവാസിയായ പ്രതി അടിച്ച് ഗുരുതര പരിക്കേൽപിക്കുകയായിരുന്നു.

തുർന്ന് നടക്കാവ് പോലീസ് കേസ് രജിസ്റ്റർ ചെയ്യുകയും പ്രതിയെ എരഞ്ഞിപ്പാലത്ത് വച്ച് കസ്റ്റഡിയിൽ എടുക്കുകയായിരുന്നു.

ADVERTISEMENT

എൽഡിഎഫ് പ്രതിഷേധ മാർച്ച് നടത്തി

കൂരാച്ചുണ്ട്: കൂരാച്ചുണ്ട് പഞ്ചായത്ത് യുഡിഎഫ് ഭരണസമിതിയുടെ കെടുകാര്യസ്ഥതക്കും ഓഡിറ്റ് റിപ്പോർട്ടിലെ ഗുരുതരമായ പോരായ്‌മകൾക്കുമെതിരേ എൽഡിഎഫ് കൂരാച്ചുണ്ട് പഞ്ചായത്ത് കമ്മിറ്റിയുടെ നേതൃത്വത്തിൽ പഞ്ചായത്ത് ഓഫീസിലേക്ക് പ്രതിഷേധ മാർച്ച് സംഘടിപ്പിച്ചു. എൽഡിഎഫ് ബാലുശേരി നിയോജക മണ്ഡലം കൺവീനർ ഇസ്മായിൽ കുറുമ്പൊയിൽ ഉദ്ഘാടനം ചെയ്തു. ചെയർമാൻ ജോസഫ് വെട്ടുകല്ലേൽ അധ്യക്ഷത വഹിച്ചു. സിപിഐ ബാലുശേരി നിയോജക മണ്ഡലം അസിസ്റ്റന്‍റ് സെക്രട്ടറി എൻ. മുരളീധരൻ, എൽഡിഎഫ് പഞ്ചായത്ത് കമ്മിറ്റി കൺവീനർ വി.ജെ സണ്ണി, സിപിഎം ലോക്കൽ കമ്മിറ്റി സെക്രട്ടറി കെ.ജി അരുൺ , കേരള കോൺഗ്രസ്- എം കൂരാച്ചുണ്ട് മണ്ഡലം കമ്മിറ്റി പ്രസിഡന്‍റ് വിത്സൻ പാത്തിച്ചാലിൽ എന്നിവർ പ്രസംഗിച്ചു.

വ്യാജ ആയുർവേദ കേന്ദ്രങ്ങൾക്കെതിരേ എഎംഎഐ

പേരാമ്പ്ര: ആയുർവേദത്തിന്‍റെ മറവിൽ യാതൊരു അംഗീകാരവുമില്ലാതെ പ്രവർത്തിക്കുകയും അനാശാസ്യ പ്രവർത്തനങ്ങളിൽ ഏർപ്പെടുകയും ചെയ്യുന്ന സ്ഥാപനങ്ങൾക്കെതിരേ കൃത്യമായ നടപടികൾ സ്വീകരിക്കണമെന്നു ആയുർവേദ മെഡിക്കൽ അസോസിയേഷൻ ഓഫ് ഇന്ത്യ (എഎംഎഐ) ആവശ്യപ്പെട്ടു. കഴിഞ്ഞ ദിവസം പേരാമ്പ്രയിലെ ഒരു വെൽനസ് സെന്‍ററിൽ നടന്ന പോലീസ് റെയ്ഡും അതിനെത്തുടർന്നുണ്ടായ അറസ്റ്റുകളും നിർഭാഗ്യകരമാണ്. ഇത്തരം വ്യാജ വൈദ്യ സ്ഥാപനങ്ങൾ പൊതുജനാരോഗ്യത്തിനും ആയുർവേദത്തിന്‍റെ സൽപ്പേരിനും ഭീഷണിയാണെന്നു എഎംഎഐ ഭാരവാഹികൾ പേരാമ്പ്ര പ്രസ് ക്ലബിൽ നടത്തിയ വാർത്താസമ്മേളനത്തിൽ വ്യക്തമാക്കി. ഈ സ്ഥാപനത്തിനെതിരേ സംഘടനയുടെ സംസ്ഥാന നേതൃത്വം മുമ്പ് തന്നെ കേരള മുഖ്യമന്ത്രി ഉൾപ്പെടെ ബന്ധപ്പെട്ട അധികാരികൾക്ക് പരാതി നൽകിയിരുന്നു. എന്നാൽ പരാതി താഴെത്തട്ടിലേക്ക് അന്വേഷണത്തിനായി വന്നപ്പോൾ അങ്ങനെ ഒരു സ്ഥാപനം ഇവിടെ പ്രവർത്തിക്കുന്നില്ല എന്ന റിപ്പോർട്ടാണ് പോലീസിന്‍റെ ഭാഗത്തുനിന്നും ലഭിച്ചത്. ഈ റിപ്പോർട്ടിന് വിരുദ്ധമായി അവിടെ നിന്ന് കഴിഞ്ഞ ദിവസം ആളുകളെ പിടികൂടുകയും അനാശാസ്യ പ്രവർത്തനങ്ങൾ നടന്നതായി തെളിയുകയും ചെയ്തത് ഞെട്ടിക്കുന്നതാണ്. ഇത് നിയമപാലകരുടെ ഭാഗത്തു നിന്നുണ്ടായ ഗുരുതരമായ വീഴ്ചയാണെന്നും ഭാരവാഹികൾ പത്രസമ്മേളനത്തിൽ പറഞ്ഞു. എഎംഎഐ ജില്ലാ പ്രസിഡന്‍റ് ഡോ.ബി.ജി. അഭിലാഷ്, എഎംഎഐ കോഴിക്കോട് സോൺ സെക്രട്ടറി ഡോ. ജി.എസ്. സുഗേഷ് കുമാർ, എഎംഎഐ കോഴിക്കോട് ജില്ലാ വൈസ് പ്രസിഡന്‍റ് ഡോ. കെ. വിപിൻദാസ്, എഎംഎഐ പേരാമ്പ്ര ഏരിയാ പ്രസിഡന്‍റ് ഡോ. ഷീന സുരേഷ്, എഎംഎഐ പേരാമ്പ്ര ഏരിയ സെക്രട്ടറി ഡോ. എം. മേനക എന്നിവർ വാർത്താ സമ്മേളനത്തിൽ പങ്കെടുത്തു.

കാട്ടാന ശല്യം:കൃഷിയിടം കർഷക കോൺഗ്രസ് നേതാക്കൾ സന്ദർശിച്ചു

തിരുവമ്പാടി: കാട്ടാന കൃഷി നശിപ്പിച്ച തിരുവമ്പാടി പഞ്ചായത്ത് മേലെ പൊന്നാങ്കയം കാടോത്തിമല ഭാഗത്ത്‌ കർഷക കോൺഗ്രസ് സംസ്ഥാന പ്രസിഡന്‍റ് മാജുഷ് മാത്യുവിന്‍റെ നേതൃത്വത്തിലുള്ളസംഘം സന്ദർശിച്ചു. കാട്ടാനയെ തുരത്തുന്നതിന് അടിയന്തര നടപടി സ്വീകരിക്കണമെന്ന് നേതാക്കൾ ആവശ്യപ്പെട്ടു. സ്ഥലം എംഎൽഎ കൃഷിനാശം സംഭവിക്കുന്ന കർഷകർക്ക് വേണ്ടി പ്രതികരിക്കുന്നില്ല. അവരുടെ പ്രശ്നങ്ങൾ ഉയർത്തിക്കാണിക്കുന്നതിൽ പരാജയപ്പെട്ടു. കൃഷിയിടത്തിൽ ഇറങ്ങുന്ന കാട്ടാനകളെ വനത്തിലേക്ക് തുരത്തുന്നതിൽ വനംവകുപ്പ് ഉദ്യോഗസ്ഥർ കാണിക്കുന്ന അനാസ്ഥ അവസാനിപ്പിക്കണമെന്നും മാജുഷ് മാത്യു പറഞ്ഞു. പുത്തൻപുരയിൽ ഷാജി, ഗോപിനാഥൻ പുത്തൻപുരയിൽ, മുരിങ്ങയിൽ മൈക്കിൾ, മണിക്കൊമ്പേൽ ജോസുകുട്ടി, മോഹനൻ പുളിയാനിപ്പുഴ, അശോകൻ പുതുപ്പറമ്പിൽ, പ്രവീൺ പതാലിയിൽ, അനിൽ പുതുപ്പറമ്പിൽ എന്നീ കർഷകരുടെ വാഴ, തെങ്ങ്, കമുങ്ങ്, ജാതി, കൊക്കോ, കപ്പ തുടങ്ങിയവയാണ് കാട്ടാന നശിപ്പിച്ചത്. കർഷക കോൺഗ്രസ് ജില്ലാ പ്രസിഡന്‍റ് അഡ്വ. ബിജു കണ്ണന്തറ, സംസ്ഥാന ജനറൽ സെക്രട്ടറി ബോസ് ജേക്കബ്, വൈസ് പ്രസിഡന്‍റ് ദേവസ്യ ചൊള്ളാമഠം, നിയോജക മണ്ഡലം പ്രസിഡന്‍റ് തമ്പി പറകണ്ടത്തിൽ, പഞ്ചായത്ത് പ്രസിഡന്‍റ് ബിന്ദു ജോൺസൺ, യുഡിഎഫ് ചെയർമാൻ ടി.ജെ. കുര്യാച്ചൻ തെങ്ങുംമൂട്ടിൽ, ടോമി കൊന്നക്കൽ, സാബു അവന്നൂർ, ലൈജു അരീപ്പറമ്പിൽ, തുടങ്ങിയവർ ഒപ്പമുണ്ടായിരുന്നു.

ജനങ്ങളുടെ പ്രശ്‌നങ്ങള്‍ മനസിലാക്കിയുള്ള ഇടപെടല്‍ ദേശീയപാത അഥോറിറ്റിയില്‍ നിന്നുണ്ടാവണമെന്ന് മന്ത്രി

കോഴിക്കോട്: ദേശീയപാത 66 നിര്‍മാണ പ്രവൃത്തിയുടെ ഭാഗമായി സോയില്‍ നെയ്‌ലിംഗ് നടന്ന ഭാഗത്തെ ഭൂമി ഏറ്റെടുക്കാൻ ദേശീയപാത അഥോറിറ്റി തയ്യാറാകണമെന്ന് മന്ത്രി പി.എ. മുഹമ്മദ് റിയാസ് ആവശ്യപ്പെട്ടു. ദേശീയപാത നിര്‍മാണത്തെത്തുടര്‍ന്ന് അപകടഭീഷണിയിലായ കൊയിലാണ്ടി കുന്ന്യോറ മലയിലെയും മറ്റു സ്ഥലങ്ങളിലെയും ഭൂമിയാണ് ഏറ്റെടുക്കേണ്ടത്. പ്രദേശത്ത് താമസിക്കുന്നത് 22 കുടുംബങ്ങളാണ്. ജനങ്ങളുടെ പ്രശ്‌നങ്ങള്‍ മനസിലാക്കിയുള്ള ഇടപെടല്‍ ദേശീയപാത അതൊറിറ്റിയില്‍ നിന്നുണ്ടാവണമെന്നും കളക്ടറേറ്റ് കോണ്‍ഫറന്‍സ് ഹാളില്‍ നടന്ന ജില്ലാ വികസന സമിതി യോഗത്തില്‍ മന്ത്രി പറഞ്ഞു. കഴിഞ്ഞദിവസം മുഖ്യമന്ത്രി പിണറായി വിജയന്‍ കേന്ദ്ര ഗതാഗത വകുപ്പ് മന്ത്രി നിതിന്‍ ഗഡ്കരിയെ സന്ദര്‍ശിച്ചപ്പോള്‍ കുന്ന്യോറ മലയിലെ മണ്ണിടിച്ചില്‍ വിഷയവും ദേശീയപാതയിലെ വെള്ളക്കെട്ട് പ്രശ്‌നങ്ങളും ശ്രദ്ധയില്‍പ്പെടുത്തിയിരുന്നു. ഇതേ വിഷയം പൊതുമരാമത്ത് വിഭാഗം കേന്ദ്ര ഗതാഗത മന്ത്രാലയത്തെ രേഖാമൂലം അറിയിച്ചതുമാണ്. ദേശീയപാത കോഴിക്കോട് ബൈപാസിന്‍റെ പ്രവൃത്തി അവസാനഘട്ടത്തിലാണ്. നെല്ലിക്കോട് ഭാഗത്തെ പ്രശ്‌നങ്ങള്‍ പരിഹരിക്കാന്‍ ജില്ല കളക്ടറുടെ നേതൃത്വത്തില്‍ ഇടപെടല്‍ നടത്തിയിട്ടുണ്ട്. വെങ്ങളം മുതല്‍ അഴിയൂര്‍ വരെയുള്ള സ്ട്രച്ചില്‍ ചില പ്രശ്‌നങ്ങള്‍ പരിഹരിക്കേണ്ടതായുണ്ട്. ഇതില്‍ സര്‍ക്കാര്‍ ഇടപെട്ടുകൊണ്ടിരിക്കുകയാണ്. ജില്ല കളക്ടറുടെയും എഡിഎമ്മിന്‍റെയും നേതൃത്വത്തില്‍ ദേശീയപാത അതോറിറ്റിയുടെയും പൊതുമരാമത്ത് വകുപ്പിന്‍റയും പ്രതിനിധികള്‍ നിര്‍മ്മാണ പ്രവൃത്തികള്‍ പരിശോധിച്ച് ജില്ലാ വികസന സമിതിയില്‍ റിപ്പോര്‍ട്ട് ചെയ്യണമെന്നും മന്ത്രി ആവശ്യപ്പെട്ടു. ദേശീയപാതയില്‍ ആവശ്യമായ ഇടങ്ങളില്‍ സൈന്‍ ബോര്‍ഡുകള്‍ സ്ഥാപിക്കണം. കിഫ്ബി പദ്ധതികള്‍ ഉള്‍പ്പെടെ മണ്ഡലങ്ങളിലെ പ്രധാന പദ്ധതികള്‍ക്കായുള്ള സ്ഥലമേറ്റെടുപ്പ് വേഗത്തില്‍ പൂര്‍ത്തിയാക്കാന്‍ മന്ത്രി നിര്‍ദേശം നല്‍കി. പദ്ധതികള്‍ വൈകുന്ന തരത്തിലുള്ള നിരുത്തതരവാദപരമായ സമീപനങ്ങള്‍ സ്വീകരിക്കുന്ന ഉദ്യോഗസ്ഥര്‍ തിരുത്താന്‍ തയ്യാറാവണമെന്നും മന്ത്രി പറഞ്ഞു. ദേശീയപാത പ്രവൃത്തി നടക്കുന്ന ഇടങ്ങളിലെ സര്‍വീസ് റോഡ് യാത്ര ദുരിതം നിറഞ്ഞതാണെന്ന് കെകെ രമ എംഎല്‍എ പറഞ്ഞു. പഴങ്കാവ് ഭാഗത്തു സ്വകാര്യ വ്യക്തിയുടെ ഭൂമിയിലേക്കാണ് കമ്പി അടിച്ചത്. ഇത് എടുത്തു മാറ്റാന്‍ മന്ത്രി നിര്‍ദേശം നല്‍കണമെന്നും എംഎല്‍എ ആവശ്യപ്പെട്ടു. കുന്ന്യോറ മലയിൽ സോയിൽ നെയിലിംഗ് നടന്ന ഭാഗത്ത് സ്ഥലമേറ്റെടുപ്പിന് ദേശീയപാത അഥോറിറ്റി തയ്യാറാകുന്ന മുറയ്ക്ക് സ്ഥലമേറ്റെടുത്തു നൽകാൻ സംസ്ഥാന സർക്കാർ തയ്യാറാണെന്നും ജില്ല കളക്ടർ സ്‌നേഹില്‍ കുമാര്‍ സിംഗ് പറഞ്ഞു.

തൊഴിലുറപ്പ് പദ്ധതി കാർഷിക സൗഹൃദമാക്കണം: കർഷക കോൺഗ്രസ്

താമരശേരി: കാർഷിക മേഖലയിൽ ചെലവ് വർധിക്കുകയും രൂക്ഷമായ വിളനാശം കാരണം കർഷകർ ദുരിതത്തിലാവുകയും ചെയ്ത സാഹചര്യത്തിൽ തൊഴിലുറപ്പ് പദ്ധതി കർഷകർക്ക് ഗുണകരമാവുന്ന രീതിയിലേക്ക് മാറ്റണമെന്ന് കർഷക കോൺഗ്രസ് ഓമശേരി മണ്ഡലം കമ്മിറ്റി യോഗം ആവശ്യപ്പെട്ടു. കർഷക കോൺഗ്രസ് ജില്ലാ പ്രസിഡന്‍റ് അഡ്വ. ബിജു കണ്ണന്തറ യോഗം ഉദ്ഘാടനം ചെയ്തു. പീയൂസ് കല്ലിടുക്കിൽ അധ്യക്ഷത വഹിച്ചു. യോഗത്തിൽ മണ്ഡലം കോൺഗ്രസ് കമ്മിറ്റി പ്രസിഡന്‍റ് ഒ. എം. ശ്രീനിവാസൻ മുഖ്യപ്രഭാഷണം നടത്തി. വി.ജെ. ചാക്കോ, അഗസ്റ്റിൻ ജോസഫ്, നിയോജകമണ്ഡലം പ്രസിഡന്‍റ് ഷരീഫ് വെളിമണ്ണ, ജോഷി തൈപ്പറമ്പിൽ, റോയ് കിഴക്കേടം, സുഹറ സലീം, അജീഷ് തോന്നക്കര, റിനി സണ്ണി എന്നിവർ പ്രസംഗിച്ചു.

അടിയന്തരാവസ്ഥ പോരാളികളെ ആദരിച്ചു

കുടരഞ്ഞി: ആർജെഡി പഞ്ചായത്ത് കമ്മിറ്റിയുടെ നേതൃത്വത്തിൽ അടിയന്തരാവസ്ഥ പോരാളികളെ ആദരിച്ചു. ഏബ്രഹാം മാനുവൽ, എളമന ഹരിദാസ് എന്നിവരെയാണ് ആർജെഡി കൂടരഞ്ഞി പഞ്ചായത്ത് കമ്മിറ്റി ആദരിച്ചത്. പി.എം. തോമസ് അധ്യക്ഷത വഹിച്ചു. ചടങ്ങിൽ ദേശീയ സമിതി അംഗം വി. കുഞ്ഞാലി ഉദ്ഘാടനം ചെയ്തു. അടിയന്തരാവസ്ഥയുടെ ഭീകരതയെക്കുറിച്ച് ഇരുവരും ചടങ്ങിൽ അനുസ്മരിച്ചു. ചടങ്ങിൽ വി.വി. ജോൺ, വിത്സൻ പുല്ലുവേലി, ടാർസൻ ജോസ്, ജിമ്മി ജോസ് പെമ്പിള്ളിൽ, ജോൺസൺ കുളത്തിങ്കൽ, ജോസ് തോമസ് മാവറ, ഗോൾഡൻ ബഷീർ, എൻ. അബ്ദുൾസത്താർ, വി.എ. ജോസ് തുടങ്ങിയവർ പ്രസംഗിച്ചു.

എംഡിഎംഎയുമായി യുവാവ് പിടിയില്‍

മേപ്പയ്യൂര്‍: മേപ്പയ്യൂര്‍ പോലീസ് സ്റ്റേഷന്‍ പരിധിയിലെ ചെറുവണ്ണൂരില്‍ എംഡിഎംഎയുമായി യുവാവ് പിടിയില്‍. ചെറുവണ്ണൂര്‍ വലിയ പറമ്പില്‍ മനോജന്‍ എന്നയാളുടെ വീട്ടില്‍ നിന്നാണ് പ്രതിയെ കസ്റ്റഡിയിലെടുത്തത്. പേരാമ്പ്ര എരവട്ടൂര്‍ സ്വദേശി മട്ടന്‍ കുട്ടു, കുട്ടുമുട്ടാസ് എന്നീ പേരിലറിയപ്പെടുന്ന വെള്ളയോട് ചാലില്‍ രജീഷ് (29) ആണ് മേപ്പയ്യൂര്‍ പോലീസിന്‍റെ പിടിയിലായത്. ഇയാളില്‍ നിന്ന് 160 മില്ലിഗ്രാം എംഡിഎംഎ കണ്ടെടുത്തു. പെണ്‍ സുഹൃത്തിനെ കാണാന്‍ ഇന്നലെ രാത്രി ചെറുവണ്ണൂരിലെ വീട്ടിലെത്തിയതാണെന്ന് പ്രതി പോലീസിനോട് പറഞ്ഞു. ഇയാളുടെ പെണ്‍ സുഹൃത്ത് അനുമോള്‍ എന്ന പിങ്കി നേരത്തേ 12 ഗ്രാം എംഡിഎംഎയുമായി പോലീസ് പിടിയിലായിരുന്നു.

ദീപ്നിയ ബാബുവിനെ ആദരിച്ചു

പേരാമ്പ്ര: കൂടുതല്‍ മികച്ച പഠനാന്തരീക്ഷം ഒരുക്കുന്നതിനും എല്ലാ വിദ്യാര്‍ഥികള്‍ക്കും തുല്യ അവസരങ്ങള്‍ ഉറപ്പാക്കുന്നതിനും സര്‍ക്കാര്‍ തുടര്‍ന്നും പ്രവര്‍ത്തിക്കുമെന്ന് മന്ത്രി വി. ശിവന്‍കുട്ടി. നീറ്റ് യു. ജി. പരീക്ഷയില്‍ കേരളത്തില്‍ ഒന്നാം റാങ്ക് നേടിയ ദീപ്നിയ ബാബുവിനെ ആദരിക്കുന്ന ദീപ്തം 25 ചടങ്ങ് ആവള-കുട്ടോത്ത് ജിഎച്ച്എസ്എസിൽ ഉദ്ഘാടനം ചെയ്യുകയായിരുന്നു മന്ത്രി. പേരാമ്പ്ര ബ്ലോക്ക് പഞ്ചായത്ത് പ്രസിഡന്‍റ് എന്‍. പി. ബാബു അധ്യക്ഷത വഹിച്ചു. പ്രിന്‍സിപ്പല്‍ എന്‍. സജീവന്‍ റിപ്പോര്‍ട്ട് അവതരിപ്പിച്ചു. ചെറുവണ്ണൂര്‍ പഞ്ചായത്ത് പ്രസിഡന്‍റ് എന്‍. ടി. ഷിജിത്ത്, ജില്ലാപഞ്ചായത്ത് അംഗം സി. എം. ബാബു, പഞ്ചായത്ത് വൈസ് പ്രസിഡന്‍റ് ആദില നിബ്രാസ്, സ്‌കൂള്‍ പ്രധാനധ്യാപകന്‍ വി. കെ. സന്തോഷ്, എം.കുഞ്ഞമ്മദ്, മുനീർ എരവത്ത്, പഞ്ചായത്ത് അംഗങ്ങള്‍, അധ്യാപകര്‍ തുടങ്ങിയവര്‍ പങ്കെടുത്തു.

ഇരുചക്രവാഹനത്തിൽ ‘ട്രിപ്പിൾ’ അടിച്ചയാൾക്ക് മർദ്ദനം : കേസെടുത്തു

കോഴിക്കോട് : ഇരുചക്ര വാഹനത്തിൽ മൂന്നുപേർ സഞ്ചരിച്ചതിന്‍റെ പേരിൽ ബേപ്പൂർ സ്വദേശി അനന്തുവിനെ ബേപ്പൂർ എസ്ഐമർദ്ദിച്ചെന്ന പരാതിയിൽ മനുഷ്യാവകാശ കമ്മീഷൻ കേസെടുത്തു. കോഴിക്കോട് സിറ്റി പോലീസ് കമ്മീഷണർ പരാതിയിൽ അന്വേഷണം നടത്തി 15 ദിവസത്തിനകം റിപ്പോർട്ട് സമർപ്പിക്കണമെന്ന് കമ്മീഷൻ ജുഡീഷ്യൽ അംഗം കെ. ബൈജുനാഥ് ആവശ്യപ്പെട്ടു. സ്റ്റേഷനിൽ നിന്നാണ് മർദ്ദനമേറ്റതെന്ന് അനന്തു പറഞ്ഞു. പട്ടിക ഉപയോഗിച്ചാണ് അടിച്ചതെന്നും തലക്കും അടിയേറ്റെന്നും അനന്തു പറഞ്ഞു. ജൂലൈ 29ന് കോഴിക്കോട് പൊതുമരാമത്ത് റസ്റ്റ് ഹൗസിൽ നടക്കുന്ന സിറ്റിംഗിൽ കേസ് പരിഗണിക്കും.

ചളിക്കുളമായി വഴി, നന്നാക്കുന്നില്ലെന്ന് ആക്ഷേപം

കുണ്ടുതോട് : കാവിലുംപാറ പഞ്ചായത്തിൽ എട്ടാം വാര്‍ഡില്‍ മാനിക്കുന്ന് പ്രദേശത്തേക്കുള്ള വഴി ദുരിതപൂര്‍ണമെന്ന് പരാതി.മഴക്കാലമായാൽചെളിയും വെള്ളവും കാരണം നടക്കാൻ വളരെ ബുദ്ധിമുട്ടാണെന്നാണ് നാട്ടുകാരുടെ പരാതി.വഴി കോൺക്രീറ്റ് ചെയ്ത് സഞ്ചാരയോഗ്യമാക്കിടരുവാൻ ഗ്രാമസഭയിലും പഞ്ചായത്തിലും പലവട്ടം ആവശ്യപ്പെട്ടിരുന്നു. ഇതുവരെ അതിനൊരു പരിഹാരം ആയിട്ടില്ലെന്നാണ് നാട്ടുകാരുടെ പരാതി. മഴക്കാലമായതോടെ ദുരിതം ഇരട്ടിയായി.

കാലിക്കറ്റ് അഡ്വര്‍ടൈസിംഗ് ക്ലബ് അക്കാദമിക് എക്‌സലന്‍സ് പുരസ്‌കാരങ്ങള്‍ നല്‍കി

കോഴിക്കോട്: കാലിക്കട്ട് അഡ്വര്‍ടൈസിംഗ് ക്ലബ് അംഗങ്ങളുടെ മക്കളില്‍ എസ്‌എസ്‌എല്‍‌സി, പ്ലസ് ടു പരീക്ഷകളില്‍ മുഴുവന്‍ വിഷയങ്ങള്‍ക്കും എ പ്ലസ് നേടിയ ആർദ്ര ശങ്കർ, ബിനിറ്റ ആൻ രഞ്ജിത്ത്, എ. ആർ. ദീപ്ത എന്നീ വിദ്യാർഥികൾക്ക് അക്കാദമിക് എക്സലന്‍സ് പുരസ്‌കാരങ്ങള്‍ നല്‍കി. പ്രൈഡ് ക്രെഡിറ്റ് കോ-ഓപ്പറേറ്റീവ് സൊസൈറ്റിയുടെ സഹകരണത്തോടെ നടത്തിയ ചടങ്ങിൽ ചീഫ് എക്സിക്യൂട്ടിവ് ഓഫിസർ ശൈലേഷ് സി. നായർ പുരസ്‌കാരങ്ങള്‍ നല്‍കി. ക്ലബ് പ്രസിഡന്‍റ് ശ്രീജിത്ത് കടത്തനാട്, സെക്രട്ടറി കെ.ഇ. ഷിബിന്‍ , ട്രഷറര്‍ എ.ആര്‍.അരുണ്‍, രക്ഷാധികാരി എന്‍. രാജീവ്, ക്ലബ് അംഗങ്ങളായ പി.എം. മാത്യൂ, അനീഷ്കുമാർ എം.വി., സുനിൽ വർഗീസ്, ഗോപൻ സി. അനീഷ് കെ.എൽ. എന്നിവർ പ്രസംഗിച്ചു.

വിലങ്ങാട് ചിറ്റാരിയിൽ കാട്ടാനക്കൂട്ടം കൃഷി നശിപ്പിച്ചു

നാദാപുരം: വിലങ്ങാട് മലയോര മേഖലയിൽ കാട്ടാനക്കൂട്ടം ജനവാസ മേഖലയിലിറങ്ങുന്നത് തുടരുന്നു. വായാട്, കുറ്റല്ലൂർ, ചിറ്റാരി, പറക്കാട് ഭാഗങ്ങളിലാണ് വീണ്ടും കാട്ടാനക്കൂട്ടങ്ങൾ ഇറങ്ങി വ്യാപകമായി കൃഷി നാശം വരുത്തിയത്. രാത്രിയെന്നോ പകലെന്നോ വ്യത്യാസമില്ലാതെയാണ് കാട്ടാനകൾ കൃഷി ഭൂമികളിൽ തമ്പടിക്കുന്നത്. വനം വകുപ്പ് ഉദ്യോഗസ്ഥർ കാട്ടാനകളെ പടക്കം പൊട്ടിച്ചും മറ്റും വനത്തിലേക്ക് തുരത്താറുണ്ടെങ്കിലും ഏറെ വൈകാതെ അവ തിരികെ എത്തുന്ന സ്ഥിതിയാണുള്ളത്. ചിറ്റാരിയിൽ വ്യാപകമായ കൃഷി നാശമാണ് കഴിഞ്ഞ ദിവസങ്ങളിൽ വരുത്തിയത്. കഴിഞ്ഞ ദിവസം മേഖലയിൽ ഇറങ്ങിയ കാട്ടാനകൂട്ടം ചിറ്റാരി ചെങ്ങളത്തു പറമ്പിൽ തോമസിന്‍റെ 60 ഓളം തെങ്ങുകളും 150 ഓളം കമുകുകളുമാണ് ഒറ്റ രാത്രി കൊണ്ട് നശിപ്പിച്ചത്. സമീപത്തെ കൃഷിഭൂമികളിലും നാശനഷ്ടം ഏറെയുണ്ട്. ഇവിടെയുള്ള കൃഷിഭൂമികളുള്ള ഏറെ പേർ വാണിമേൽ, നാദാപുരം, നരിപ്പറ്റ പഞ്ചായത്തുകളിലെ വിവിധ ഭാഗങ്ങളിലെ താമസക്കാരാണ്. അതിനാൽ തന്നെ ഇവർക്ക് പ്രതികൂല കാലാവസ്ഥയും കാട്ടാനകളെ ഭയന്നും മലയോരത്തെ കൃഷിഭൂമികളിൽ എത്തി സ്ഥിതിഗതികൾ വിലയിരുത്താൻ കഴിഞ്ഞിട്ടില്ല. അതിനാൽ തണെ നാശനഷ്ടങ്ങളുടെ വ്യാപ്തി പുറം ലോകമറിഞ്ഞിട്ടില്ല. മഴ ആരംഭിച്ചതോടെ പൂവത്താം കണ്ടി ചിറ്റാരി മലയങ്ങാട് ഭാഗത്ത് വൻ തോതിലുള്ള കാട്ടാന ശല്യമാണ് ഉണ്ടായി കൊണ്ടിരിക്കുന്നത്. ഈ ഭാഗങ്ങളിൽ നൂറ് കണക്കിന് തെങ്ങുകളും കമുകുകകളുമാണ് കർഷകർക്ക് നഷ്ടപ്പെട്ടത്. ഒരാഴ്ച മുമ്പ് കുറ്റല്ലൂരിലെ കുങ്കന്‍റെ കായ്ഫലമുള്ള 23 തെങ്ങുകളും ബാബൂട്ടിയുടെ ആറ് തെങ്ങുകളും കാട്ടാനകൾ കുത്തിമറിച്ചിട്ട് നശിപ്പിച്ചിരുന്നു. കൃഷിഭൂമികളിലെ റബർ അടക്കമുള്ള മരങ്ങളും കാട്ടാനകൾ പിഴുതും ഒടിച്ചും നശിപ്പിച്ചു. കണ്ണൂർ ജില്ലയിലെ കണ്ണവം വനമേഖലയിൽ നിന്നാണ് കാട്ടാനകൾ നാട്ടിലിറങ്ങുന്നത്. ഇവിടെ മലയങ്ങാട് പൂവത്താംകണ്ടി ഭാഗത്ത് 300 മീറ്ററോളം നീളത്തിൽ സോളാർ ഫെൻസിംഗ് ഇല്ല. ഈ ഭാഗത്ത് കൂടിയാണ് കാട്ടാനകൾ ജനവാസ കേന്ദ്രത്തിലിറങ്ങുന്നതും തിരിച്ച് പോവുന്നതും. ഈ ഭാഗത്ത് സോളാർ ഫെൻസിംഗ് പൂർത്തീകരിച്ചാൽ കാട്ടാന ശല്യം എഴുപത് ശതമാനത്തോളം ഇല്ലാതാക്കാമെന്ന് കർഷകർ പറയുന്നു.

ട്രോളിംഗ് : വഞ്ചിനിറയാതെ പരമ്പരാഗത മത്സ്യത്തൊഴിലാളികള്‍

അനധികൃത മത്സ്യബന്ധനം തിരിച്ചടിയായി കോഴിക്കോട്: ട്രോളിംഗ് കാലത്ത് വലിയ ബോട്ടുകളുടെ അനധികൃതമായ മത്സ്യബന്ധനം തിരിച്ചടിയാകുന്നത് പരമ്പരാഗത തൊഴിലാളികൾക്ക്. നിരോധനമേർപ്പെടുത്തിയാൽ സാധാരണ ഘട്ടങ്ങളിൽ പരമ്പരാഗതമായി ചെറുവഞ്ചികളിൽ പോയി മീൻപിടിത്തം നടത്തുന്ന മത്സ്യത്തൊഴിലാളികൾക്ക് പ്രതീക്ഷയുടെ കാലമാണ്. മുൻകാലങ്ങളിൽ വലിയ ബോട്ടുകാർ അടിത്തട്ടിൽ നിന്നും മീൻ അരിച്ചെടുത്ത് കൊണ്ടുപോകാത്തതിനാൽ വഞ്ചിക്കാരുടെ വല‌ നിറയും. ഇപ്പോൾ പേരിന് പോലും മീൻ കിട്ടാത്ത ദുരവസ്ഥയിലാണ് മത്സ്യത്തൊഴിലാളികൾ. അന്തർ സംസ്ഥാന ബോട്ടുകളും ട്രോളിംഗ് നിരോധനമേർപ്പെടുത്തിയതിനു പിന്നാലെ തിരിച്ചുപോയെങ്കിലും, തങ്ങൾക്ക് ഈ കാലങ്ങളിൽ ലഭിക്കേണ്ടുന്ന മത്സ്യം മുമ്പ്തന്നെ അരിച്ചെടുത്തതായി പരമ്പരാഗതക്കാർ ആരോപിക്കുന്നു. വഞ്ചിക്കാർക്ക് ഇന്ധനവും ഭക്ഷണവും മറ്റ് ചെലവുകളുമടക്കം പോയി വരാൻ കുറഞ്ഞത് ഇരുപതിനായിരം രൂപയുടെ ചെലവുണ്ട്. മുമ്പ് അമ്പതിനായിരം രൂപയുടെ മീൻ കിട്ടിയെങ്കിൽ, ഇന്ന് വെറുംകൈയോടെ മടങ്ങേണ്ടി വരുന്നതിനാൽ പലരും കടലിൽ പോകാത്ത സ്ഥിതിയാണ്. മീൻപിടിത്തം നിലച്ചപ്പോൾ മാർക്കറ്റുകളിൽ മീൻ ലഭ്യത കുറഞ്ഞു. ഉള്ളതിന് പൊള്ളുന്ന വിലയുമാണ്.സാധാരണക്കാരുടെ ഇഷ്ടമീനുകളായ അയലക്കും മത്തിക്കുമെല്ലാം പൊൻവിലയാണ്. മത്തിക്ക് 400 കിലോ വില. കോഴിയിറച്ചിക്ക് 240 രൂപയും, ബീഫിന് 340 രൂപയുമുള്ളപ്പോഴാണിത്. മുള്ളൻ, നെത്തോലി തുടങ്ങിയ ചെറുമീനുകൾക്കെല്ലാം 200 മുതൽ 300 വരെയാണ് കിലോക്ക് വില. ആവോലി, അയക്കൂറ, നെയ്മീൻ തുടങ്ങിയ വലിയ മീനുകൾക്ക് കിലോക്ക് ആയിരത്തിലപ്പുറം കൊടുക്കണം.. മാർക്കറ്റുകളിൽ മീൻ കുറഞ്ഞതോടെ ഉള്ളതിന് വില കുത്തനെ കൂടുകയായിരുന്നു. നേരത്തെ മത്സ്യങ്ങൾക്ക് വിലകുറഞ്ഞ അവസരങ്ങളിൽ ശീതീകരിച്ച് സൂക്ഷിച്ചവയാണ് ഇപ്പോൾ കിട്ടുന്നതിൽ കൂടുതലും. തമിഴ്നാട്ടിൽ നിന്നെത്തുന്ന ചൂര, കേതർ, പപ്പൻസ് തുടങ്ങിയവയുടെ വില 400 ഉം അതിനു മുകളിലേക്കും എത്തിക്കഴിഞ്ഞു.

വയോധികനെ വീട്ടിൽ മരിച്ചനിലയിൽ കണ്ടെത്തി

കൊയിലാണ്ടി: നന്തിയിലെ കുറൂളികുനി ശ്രീധര (62)നെ കുറൂളികുനിയിലെ വീട്ടിൽ മരിച്ച നിലയിൽ കണ്ടെത്തി. ഭാര്യയുടെയും മകന്‍റെയും നിര്യാണത്തിനുശേഷം ശ്രീധരൻ തനിച്ചാണ് വീട്ടിൽ താമസം. അമ്മയും സഹോദരങ്ങളും താമസിക്കുന്ന തറവാട്ടുവീട്ടിൽ ഇടയ്ക്കിടെ വന്നുപോകാറുണ്ടായിരുന്നു. രണ്ട് ദിവസമായി കാണാതിരുന്നതിനെ തുടർന്ന് ബന്ധുക്കൾ വീട്ടിൽ അന്വേഷിച്ച് എത്തിയപ്പോഴാണ് കിടപ്പുമുറിയുടെ തറയിൽ മരിച്ചു കിടക്കുന്നതായി കണ്ടത്. കൊയിലാണ്ടി പോലീസെത്തി ഇൻക്വസ്റ്റ് നടപടി പൂർത്തീകരിച്ചു. മൃതദേഹം പോസ്റ്റ്മോർട്ടത്തിനായി കോഴിക്കോട് മെഡിക്കല്‍ കോളജ് മോർച്ചറിയിലേക്ക് മാറ്റി. ഭാര്യ: പരേതയായ സതി. മക്കൾ: ശ്രീജിത, പരേതനായ ശ്രീജിത്ത്. മരുമകൻ: ബിജു കൊടക്കാട്ടുംമുറി. സഹോദരങ്ങൾ: അശോകൻ, കുഞ്ഞികൃഷ്ണൻ, ഷീബ, ഷാജി (യുഎൽസിസി), പരേതയായ ജാനകി.

മലയോര ഹൈവെ : അപാകതകൾ പരിഹരിക്കണമെന്ന്

ചക്കിട്ടപാറ: നിർദ്ദിഷ്ട പെരുവണ്ണാമൂഴി - ചെമ്പ്ര മലയോര ഹൈവേയുടെ നിർമ്മാണത്തിൽ ചക്കിട്ടപാറ ടൗണിൽ മാസങ്ങളായി നില നിൽക്കുന്ന അനിശ്ചിതാവസ്ഥക്ക് പരിഹാരം ഉണ്ടാക്കി 12 മീറ്റർ വീതിയിൽ റോഡ് പണി പൂർത്തിയാക്കി ഗതാഗത പ്രശ്നം പരിഹരിക്കണമെന്ന് കേരള സ്റ്റേറ്റ് സർവ്വീസ് പെൻഷനേഴ്സ് യൂണിയൻ ചക്കിട്ടപാറ യൂണിറ്റ്‌ അർദ്ധ വാർഷിക ജനറൽ ബോഡി യോഗം അധികൃതരോടാവശ്യപ്പെട്ടു. ടെലി ഫിലിം സംവിധായകനും അവാർഡ് ജേതാവും ചക്കിട്ടപാറക്കാരനുമായ ജിന്‍റോ തോമസ് ഉദ്ഘാടനം ചെയ്തു. സംഘടനാ യൂണിറ്റ് പ്രസിഡന്‍റ് പി.ജെ. മാത്യു അദ്ധ്യക്ഷത വഹിച്ചു. എസ്എസ്എൽസി, പ്ലസ് ടു പരീക്ഷകളിൽ ഫുൾ എ പ്ലസ് നേടിയ വിദ്യാർത്ഥികൾ, 75 വയസ് പിന്നിട്ട യൂണിയൻ അംഗങ്ങൾ എന്നിവരെ ജിന്‍റോ തോമസ് പൊന്നാട അണിയിച്ചും ഉപഹാരം നൽകിയും ആദരിച്ചു. യൂണിയൻ നവാഗതർക്ക് സ്വീകരണവും നൽകി. സംസ്ഥാന കമ്മറ്റി അംഗം കെ.വി.രാഘവൻ, ബ്ലോക്ക് സെക്രട്ടറി പി.രവീന്ദ്രൻ, അമൃത സന്തോഷ്, മറിയാമ്മ മാത്യു, ഡി.ജോസഫ്, പി.എ.ജോർജ്, പി.എം. കോമളം, ശ്രീധരൻ പെരുവണ്ണാമൂഴി, പി.പി. സന്തോഷ് കുമാർ, തോമസ് ഫിലിപ്പ്, പി.എം.വേണുഗോപാലൻ, എം. ഡി. വത്സ, വി.എൽ.ലൂക്ക, കെ. കെ. അശോകൻ, സി.വിജയകുമാർ, വി.പി.മധു എന്നിവർ പ്രസംഗിച്ചു.

ലഹരിവിരുദ്ധ ബോധവത്കരണ നാടകം

കോഴിക്കോട്: ലഹരി ഉപയോഗിക്കുന്ന വിദ്യാര്‍ഥികള്‍ക്കും അവരെ ശ്രദ്ധിക്കാതെ പോകുന്ന രക്ഷിതാക്കള്‍ക്കും പുതിയ ചിന്തകള്‍ പകരുന്ന തെരുവുനാടകവുമായി ഭിന്നശേഷി വിദ്യാര്‍ഥികള്‍. വടകര തണല്‍ സെന്‍ററിലെ വിദ്യാര്‍ഥികളാണ് ചാമ്പക്ക എന്ന ലഹരിവിരുദ്ധ ബോധവത്കരണ തെരുവു നാടകവുമായി ജില്ലയുടെ വിവിധ ഭാഗങ്ങളില്‍ പര്യടനം നടത്തുന്നത്.

ദേശീയപാതയിലെ വെള്ളക്കെട്ട് ; ഉടൻ പരിഹാരം കാണണമെന്ന് മന്ത്രി

കോഴിക്കോട്: ദേശീയപാതയിലെ വെള്ളക്കെട്ട് ഉൾപ്പെടെയുള്ള പ്രശ്നങ്ങൾക്ക് അടിയന്തര പരിഹാരം കാണണമെന്ന് മന്ത്രി എ.കെ. ശശീന്ദ്രൻ. പുറക്കാട്ടേരി മുതൽ വേങ്ങേരി വരെയുള്ള എലത്തൂർ നിയോജക മണ്ഡല പരിധിയിലെ ദേശീയപാത നിർമാണവുമായി ബന്ധപ്പെട്ട് കോഴിക്കോട് ഗസ്റ്റ് ഹൗസിൽ ചേർന്ന ദേശീയപാത ഉദ്യോഗസ്ഥരുടെയും ജനപ്രതിനിധികളുടെയും അവലോകന യോഗത്തിൽ സംസാരിക്കുകയായിരുന്നു മന്ത്രി. പടന്നകുളം അണ്ടർപാസിൽ അടിഞ്ഞ് കൂടിയ മണ്ണും മറ്റ് മാലിന്യങ്ങളും രണ്ട് ദിവസത്തിനകം നീക്കം ചെയ്ത് വെള്ളക്കെട്ട് പരിഹരിക്കണമെന്ന് മന്ത്രി നിർദ്ദേശിച്ചു.

കൂടരഞ്ഞി കുടുംബാരോഗ്യ കേന്ദ്രത്തിൽ ശൗചാലയമില്ലാതെ വലഞ്ഞ് രോഗികൾ‌

കൂടരഞ്ഞി: കുടുംബാരോഗ്യ കേന്ദ്രത്തിൽ ചികിത്സക്കായി എത്തുന്ന രോഗികളും അവരുടെ പരിചാരകരും ശൗചാലയമില്ലാതെ വലയുകയാണ്. കുടുംബാരോഗ്യ കേന്ദ്രത്തിന്‍റെ പുതിയ ശൗചാലയം മാസങ്ങളായി അടഞ്ഞുകിടക്കുകയാണ്. ദിവസേന നൂറുകണക്കിന് ആളുകൾ എത്തുന്ന ഈ കേന്ദ്രത്തിൽ ആവശ്യത്തിന് ശൗചാലയ സൗകര്യം ഇല്ലാത്തത് രോഗികൾക്കും കൂടെവരുന്നവർക്കും വലിയ ബുദ്ധിമുട്ടാണ് സൃഷ്ടിക്കുന്നത്. പരിശോധന റൂമിനോട് ചേർന്ന് നിലവിൽ ഉപയോഗത്തിലുള്ളത് പഴയ ഒരു ശൗചാലയമാണ്. മൂന്ന് യൂണിറ്റുകൾ ഉൾക്കൊള്ളുന്ന ഈ ശൗചാലയത്തിൽ രണ്ടെണ്ണം ഏറെക്കാലമായി ഉപയോഗശൂന്യമായി കയറ് ഉപയോഗിച്ച് വാതിലുകൾ അടച്ച നിലയിലാണ്. ശേഷിക്കുന്ന ഏക യൂണിറ്റ് അത്യന്തം വൃത്തിഹീനമായ അവസ്ഥയിലാണ്. ശൗചാലയത്തിന്‍റെ അറ്റകുറ്റപ്പണികൾ അടിയന്തിരമായി പൂർത്തിയാക്കി പൊതുജനങ്ങൾക്ക് തുറന്ന് കൊടുക്കണമെന്നും അല്ലാത്ത ശക്തമായ പ്രതിഷേധ സമരപരിപാടികളുമായി മുന്നോട്ടു വരുമെന്നും മൗണ്ട് ഹീറോസ് ജനകീയ കൂട്ടായ്മ അറിയിച്ചു.

ലഹരിക്കെതിരേ വൻജനപങ്കാളിത്തത്തോടെ പ്രതിജ്ഞയെടുത്തു

കോഴിക്കോട്: കോഴിക്കോട് ജില്ലാ പഞ്ചായത്തിനോടൊപ്പം ലഹരിക്കെതിരേ 2 മില്ല്യൺ പ്ലഡ്ജിന്‍റെ ഭാഗമായി മുക്കം നഗരസഭയുമായി ചേർന്ന് സെന്‍റ് ജോസഫ്സ് ഹോസ്പിറ്റലിന്‍റെ സജീവ പങ്കാളിത്തത്തിൽ പ്രതിജ്ഞയെടുത്തു. ഡോൺ ബോസ്കോ കുട്ടികളുടെ സഹകരണത്തോടെ മുക്കം ബസ് സ്റ്റാൻഡിൽ വച്ച് നടന്ന പരിപാടിയിൽ മുഖ്യമന്ത്രി പിണറായിവിജയൻ ഓൺലൈനായി പ്രതിജ്ഞചൊല്ലി. പരിപാടിയോടാനുബന്ധിച്ചു ധർമ്മഗിരി സെന്‍റ് ജോസഫ്സ് ഹോസ്പിറ്റൽ ജീവനക്കാർ ലഹരിവിരുദ്ധ ഗാനങ്ങൾക്ക് ചുവടുവെച്ചു. തുടർന്ന് ഡോൺ ബോസ്കോ കോളജ് മാനേജർ ഫാ. മാർട്ടിനും, ധർമ്മഗിരി സെന്‍റ് ജോസഫ്സ് ഹോസ്പിറ്റലിൽ വർക്ക് ചെയ്യുന്ന സിസ്റ്റേഴ്സും, സ്റ്റാഫ് അംഗങ്ങളും ചേർന്ന് ലഹരി വിരുദ്ധ ഗാനം ആലപിച്ചു. ചടങ്ങിൽ നഗരസഭ ചെയർമാൻ പി.ടി. ബാബു, വൈസ് ചെയർപേഴ്സൺ ചാന്ദ്നി, ധർമ്മഗിരി സെന്‍റ് ജോസഫ്സ് ഹോസ്പിറ്റലിൽ മെഡിക്കൽ സിസ്റ്റേഴ്സ് ഓഫ് സെന്‍റ് ജോസഫ്സ് (എം.എസ്.ജെ) സോഷ്യൽ കൗൺസിലർ സിസ്റ്റർ ശുഭാ, അഡ്മിനിസ്ട്രേറ്റർ സിസ്റ്റർ ഡാലിയ, ഡോൺബോസ്‌കോ കോളജ് പ്രിൻസിപ്പൽ ഫാ. മാർട്ടിൻ, വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ സത്യനാരായണൻ, ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ കുഞ്ഞൻ എന്നിവർ പ്രസംഗിച്ചു. ലഹരി ദിനത്തിന്‍റെ മുൻ ഒരുക്കമായി അവയർനസ് വീഡിയോ ക്ലാസുകളും, സിസ്റ്റർ ജിസ്‌ലറ്റ് (സൈക്കോളജി കൗൺസിലിംഗ് ഡിപ്പാർട്ട്മെന്‍റ്) നേതൃത്വത്തിൽ യോഗ ഡാൻസ് തെറാപ്പി, യോഗതെറാപ്പി, ലാഫിംഗ് ഡാൻസ് എന്നിവ പരിശീലിപ്പിച്ചു. ഹോസ്പിറ്റലിൽ വച്ച് മെഡിക്കൽ സിസ്റ്റേഴ്സ് ഓഫ് സെന്‍റ് ജോസഫ്സ് സോഷ്യൽ കൗൺസിലർ സിസ്റ്റർ ശുഭാ (എം.എസ്.ജെ) ലഹരി വിരുദ്ധ പ്രതിജ്ഞ ചൊല്ലി.

എൽഎസ്എസ് ജേതാക്കളെ അനുമോദിച്ചു

കൂടരഞ്ഞി: സെന്‍റ് സെബാസ്റ്റ്യൻസ് എൽപി സ്കൂളിൽ നിന്നും ഈ വർഷം എൽഎസ്എസ് നേടിയ കുട്ടികളെ മാനേജ്മെന്‍റും അധ്യാപകരും പിടിഎയും ചേർന്ന് അനുമോദിച്ചു. പിടിഎ ജനറൽ ബോഡിയോടനുബന്ധിച്ചു നടന്ന പൊതു സമ്മേളനത്തിൽ കുട്ടികൾക്ക് മൊമെന്‍റോ നൽകി ആദരിച്ചു. സ്കൂൾ മാനേജർ ഫാ. സെബാസ്റ്റ്യൻ പുരയിടത്തിൽ, അൽഫോൻസാ കോളജ് പ്രിൻസിപ്പൽ ഡോ. ഷൈജു ഏലിയാസ്, സ്കൂൾ ഹെഡ്മിസ്ട്രസ് സോഫിയ തോമസ്, പിടിഎ പ്രസിഡന്‍റ് ബോബി വർഗീസ് തുടങ്ങിയവർ പങ്കെടുത്തു.

ലാപ്ടോപ്പുകൾ വിതരണം ചെയ്തു

കോടഞ്ചേരി: പഞ്ചായത്തിലെ 16 എൽപി, യുപി, ഹൈസ്ക്കൂൾ, ഹയർ സെക്കൻഡറി സ്കൂളുകൾക്ക് ലിന്‍റോ ജോസഫ് എംഎൽഎയുടെ നേതൃത്വത്തിൽ നടപ്പാക്കുന്ന "ഉയരെ സമഗ്ര വിദ്യാഭ്യാസ പദ്ധതി'യുടെ ഭാഗമായി ലാപ്ടോപ്പുകൾ വിതരണം ചെയ്തു. കോടഞ്ചേരി സെന്‍റ് മേരീസ് ചർച്ച് പാരിഷ് ഹാളിൽ നടന്ന പരിപാടിയുടെ ഉദ്ഘാടനം ലിന്‍റോ ജോസഫ് എംഎൽഎ നിർവഹിച്ചു. പഞ്ചായത്ത് പ്രസിഡന്‍റ് അലക്സ് തോമസ് ചെമ്പകശേരി അധ്യക്ഷത വഹിച്ചു. സ്കൂൾ മാനേജർ ഫാ. കുര്യാക്കോസ് ഐക്കൊളമ്പിൽ മുഖ്യ പ്രഭാഷണം നടത്തി. കോടഞ്ചേരി ഹയർ സെക്കൻഡറി സ്കൂൾ പ്രിൻസിപ്പൽ വിജോയ് തോമസ്, ജില്ല പഞ്ചായത്ത് മെമ്പർ ബോസ് ജേക്കബ്, വാർഡ് മെമ്പർ വാസുദേവൻ ഞാറ്റുകാലായിൽ, പിടിഎ പ്രസിഡന്‍റ് റോക്കച്ചൻ, മുൻ പിടിഎ പ്രസിഡന്‍റ് മാത്യു ചെമ്പോട്ടിക്കൽ, ഹയർ സെക്കൻഡറി സ്കൂൾ ഹെഡ്മാസ്റ്റർ ബിനു ജോസ് എന്നിവർ പ്രസംഗിച്ചു.

ടെന്നീസ് വോളിബോൾ: അഭിമന്യുവും ആയിഷ ഹേമലിനും നയിക്കും

കോഴിക്കോട്: ഛത്തീസ്‌ഗഡിലെ റായ്പൂരിൽ 28 മുതൽ 30 വരെ നടക്കുന്ന ദേശീയ ടെന്നീസ് വോളിബാൾ ചാമ്പ്യൻഷിപ്പിൽ പങ്കെടുക്കുന്ന കേരള ജൂനിയർ ടീമിനെ കുന്നമംഗലം ഗവ. ഹയർ സെക്കൻഡറി സ്കൂളിലെ ജി. അഭിമന്യുവും ഗേൾസ് ടീമിനെ മടവൂർ ചക്കാലക്കൽ ഹയർ സെക്കൻഡറി സ്കൂളിലെ ആയിഷ ഹേമലിനും നയിക്കും. ബോയ്സ് ടീം അംഗങ്ങൾ: അൻഷിദ് അലി, ഫയാസ് അബൂബക്കർ, സി. അഖിൽ, കെ. സി ഹനാൻ. കോച്ച്: എ.ആർ. നവനീത്. മാനേജർ: ശ്രീജികുമാർ പൂനൂർ. ഗേൾസ് ടീം അംഗങ്ങൾ: സന ഫാത്തിമ, വൈഗ ചന്ദ്രൻ, കെ.എം. അനുദ്ര, ആർ. പവിത്ര. കോച്ച്: റിഥ്വിക് സുന്ദർ. മാനേജർ: കെ. ആദിത്യ സുരേന്ദ്രൻ.

ജനവാസ മേഖലയിൽ കാട്ടാന ഇറങ്ങി വ്യാപകമായി കൃഷി നശിപ്പിച്ചു

പുല്ലൂരാംപാറ: തിരുവമ്പാടി പഞ്ചായത്തിലെ മേലെ പൊന്നാങ്കയത്ത് കാട്ടാന ഇറങ്ങി വ്യാപകമായി കൃഷി നശിപ്പിച്ചു. കഴിഞ്ഞദിവസമാണ് മണിക്കൊമ്പിൽ ജോസുകുട്ടി, പുളിയാനിപ്പുഴയിൽ മോഹനൻ, കണ്ണന്താനത്ത് സജി എന്നിവരുടെ കമുങ്ങ്, ജാതി, വാഴ, കൊക്കോ തുടങ്ങിയവ കാട്ടാന നശിപ്പിച്ചത്. ജനങ്ങൾ തിങ്ങിപ്പാർക്കുന്ന ഈ മേഖലയിൽ കാട്ടാന ശല്യത്തിൽ പേടിച്ചു പുറത്തിറങ്ങാൻ പറ്റാത്ത സാഹചര്യത്തിൽ പകച്ചു നിൽക്കുകയാണ് പ്രദേശവാസികൾ. കാട്ടാനയ്ക്കും കാട്ടുപന്നിക്കും പുറമേ കുരങ്ങും വ്യാപകമായി കൃഷി നശിപ്പിച്ചതോടുകൂടി എന്തു ചെയ്യണമെന്ന് അറിയാതെ കർഷകർ വലയുകയാണ്. താമരശേരി ഫോറസ്റ്റ് സ്‌റ്റേഷനിലെ ഡെപ്യൂട്ടി റേഞ്ചർ സ്ഥലം സന്ദർശിച്ചു. വനാതിർത്തിയിൽ ആവശ്യത്തിന് പ്രതിരോധ സംവിധാനങ്ങളില്ലാത്തതിനാലാണ് കാട്ടാനകൾ കൂട്ടത്തോടെ കാടിറങ്ങാൻ കാരണമെന്നു നാട്ടുകാർ പറയുന്നു. പതിവായി കാട്ടാനകളെത്തുന്ന ഭാഗത്തു കിടങ്ങുകളും ഫെൻസിംഗും മറ്റും സ്ഥാപിച്ചാൽ കാട്ടാനകളെ പ്രതിരോധിക്കാനാകും. എന്നാൽ നടപടികളൊന്നും സ്വീകരിക്കാതെ വനംവകുപ്പ് അധികൃതർ അലംഭാവം കാണിക്കുകയാണ്.

പോക്സോ കേസിൽ ബസ് ജീവനക്കാരൻ പിടിയിൽ

കോഴിക്കോട് : വിദ്യാർത്ഥിനിയ്ക്കെതിരെ ലൈംഗികാതിക്രമം നടത്തിയ ബസ് ജീവനക്കാരൻ പിടിയിൽ. പന്തീരാങ്കാവ് സ്വദേശി മന്നാരംകുന്നത്ത് വീട്ടിൽ ജലീൽ (52 ) നെയാണ് കസബ പോലീസ് പോക്സോ നിയമപ്രകാരം അറസ്റ്റ് ചെയ്തത്. ജൂലൈ 16,26 തീയതികളില്‍ 13 വയസ് പ്രായമുള്ള വിദ്യാർത്ഥിനിയും കൂട്ടുകാരിയും സ്കൂളിൽ നിന്നും വീട്ടിലേക്ക് യാത്ര ചെയ്യുന്നതിനായി ബസിൽ കയറി മൂര്യാട് എത്തിയപ്പോള്‍ പ്രതി ശരീരത്തിൽ കയറി പിടിച്ച് ലൈംഗികാതിക്രമം നടത്തുകയായിരുന്നു. തുടർന്ന് കസബ പോലീസ് കേസ് രജിസ്റ്റർ ചെയ്യുകയും പ്രതിയെ അന്വേഷണത്തിന് ശേഷം അറസ്റ്റ് ചെയ്യുകയുമായിരുന്നു.

ഇലക്ട്രോണിക് സിഗരറ്റുകൾ പിടികൂടി

നാദാപുരം: നാദാപുരം ടൗണിലെ കടകളിൽ പോലീസ് നടത്തിയ പരിശോധനയിൽ നിരോധിക്കപ്പെട്ട ഇലക്ട്രോണിക് സിഗരറ്റുകളും മറ്റ് സിഗരറ്റുകളും പിടികൂടി. നാദാപുരം ടൗണിലെ ദുബായ് ബസാർ എന്ന കടയിൽ നിന്നാണ് 35 ഇലക്ട്രോണിക് സിഗരറ്റുകളും ഒമ്പത് വലിയ പേക്കറ്റ് മറ്റ് സിഗരറ്റുകളും പിടികൂടിയത്. സംഭവവുമായി ബന്ധപ്പെട്ട് കട നടത്തിവരുന്ന കല്ലാച്ചി പയന്തോങ്ങ് സ്വദേശി വലിയപറമ്പത്ത് നൗഷാദിനെതിരേ നാദാപുരം പോലീസ് കേസെടുത്തു.

കൂരാച്ചുണ്ടിൽ ഇന്ന് തിരുഹൃദയ കൺവൻഷൻ

കൂരാച്ചുണ്ട്: സെന്‍റ് തോമസ് ഫൊറോന ഇടവകയിൽ ദുക്റാന തിരുന്നാൾ ആഘോഷത്തിന്‍റെ ഭാഗമായി ഇന്ന് രാവിലെ ഒന്പത് മുതൽ വൈകിട്ട് നാല് വരെ ഫാ. ബെന്നി പുത്തൻനടയിൽ നയിക്കുന്നതിരുഹൃദയ കൺവൻഷൻ നടക്കും. കൺവൻഷന് സമാപനം കുറിച്ച് വൈകിട്ട് നടക്കുന്ന വിശുദ്ധ കുർബാന, സന്ദേശം, നൊവേന, തിരുശേഷിപ്പ് വണക്കം എന്നിവക്ക് ബിഷപ്പ് മാർ റെമീജിയോസ് ഇഞ്ചനാനിയിൽ കാർമികത്വം വഹിക്കും.

കാപ്പാട് കടലാക്രമണം ; റോഡ് വീണ്ടും തകർന്നു

കൊയിലാണ്ടി: കഴിഞ്ഞ ദിവസങ്ങളിൽ പെയ്ത ശക്തമായ മഴയിൽ കാപ്പാട് തീരദേശ മേഖലയിൽ കടലാക്രമണം രൂക്ഷമായതോടെ കൊയിലാണ്ടി ഹാർബർ വഴി കാട്ടില പീടിക വരെ എത്താനുള്ള റോഡ് പുർണ്ണമായും തകർന്നു .കഴിഞ്ഞ വർഷം റോഡ് തകർന്നതിനെ തുടർന്ന് 25 ലക്ഷത്തോളം രൂപ മുടക്കി അറ്റ കുറ്റപണികൾ നടത്തിയതായിരുന്നു.

റോഡിലെ കുഴികൾ: ഉദ്യോഗസ്ഥർക്കെതിരേ മനുഷ്യാവകാശ കമ്മീഷൻ കേസെടുത്തു

കോഴിക്കോട്: വടകര, കൊയിലാണ്ടി മേഖലയിൽ യാത്ര ചെയ്യാൻ കഴിയാത്ത തരത്തിൽ റോഡുകൾ തകർന്നിട്ടും നടപടിയെടുക്കാത്ത ഉദ്യോഗസ്ഥർക്കെതിരേ മനുഷ്യാവകാശ കമ്മീഷൻ സ്വമേധയാ കേസെടുത്തു. പൊതുമരാമത്ത് (റോഡ്സ്) വിഭാഗം എക്സിക്യൂട്ടീവ് എൻജിനീയറും ദേശീയപാതാ അഥോറിറ്റി പ്രോജക്റ്റ് ഡയറക്ടറും പരാതി പരിശോധിച്ച് 15 ദിവസത്തിനകം റിപ്പോർട്ട് സമർപ്പിക്കണമെന്ന് കമ്മീഷൻ ജുഡീഷ്യൽ അംഗം കെ. ബൈജുനാഥ് നോട്ടീസിൽ ആവശ്യപ്പെട്ടു. ജൂലൈ 29ന് കോഴിക്കോട് ഗവ. ഗസ്റ്റ് ഹൗസിൽ നടക്കുന്ന സിറ്റിംഗിൽ കേസ് പരിഗണിക്കും. പത്രവാർത്തയുടെ അടിസ്ഥാനത്തിലാണ് കമ്മീഷൻ സ്വമേധയാ കേസെടുത്തത്. അറ്റകുറ്റപ്പണി കൃത്യമായി നടത്താത്തതാണ് റോഡ് തകരാൻ കാരണമെന്ന് പറയപ്പെടുന്നു. ജലജീവൻ മീഷൻ പദ്ധതിയുടെ ഭാഗമായി റോഡ് കുഴിക്കുന്നതും തകർച്ചയ്ക്ക് കാരണമാകാറുണ്ട്. വടകരയിൽ ദേശീയപാതാ നിർമ്മാണത്തിന്റെ പേരിലാണ് കുഴികൾ രൂപം കൊള്ളുന്നത്. നാദാപുരം -കുറ്റ്യാടി സംസ്ഥാന പാതയിൽ കല്ലാച്ചി പൈപ്പ് റോഡ് നവീകരിക്കാൻ എട്ട് കോടി അനുവദിച്ചതായി പറയുന്നുണ്ടെങ്കിലും പണി തുടങ്ങിയിട്ടില്ലെന്ന് നാട്ടുകാർ പറയുന്നു.

അഴക് പദ്ധതിയുടെ ഭാഗമായ ഓട്ടോകള്‍ പെരുവഴിയില്‍

കോഴിക്കോട്: ഡ്രൈവര്‍മാരില്ലാത്തതിനാല്‍ കോർപറേഷൻ ഹരിത കർമസേനക്കായി അഴക് പദ്ധതിയുടെ ഭാഗമായി ഒരുക്കിയ ഓട്ടോകള്‍ പെരുവഴിയില്‍. എഴുപത്തഞ്ചു വാർഡുകളിലേക്ക് വാങ്ങിയ 75 ഓട്ടോകൾക്കും വേണ്ടത്ര ഡ്രൈവർമാരില്ലാത്തതാണ് വാഹന നീക്കം നടക്കാത്തത്. ഓട്ടോകൾ ഓടാത്തതിനാൽ വാർഡുകളിൽനിന്നുള്ള മാലിന്യനീക്കം ദിനംപ്രതി നടക്കുന്നുമില്ലെന്ന് വാർഡ് നിവാസികൾ പറയുന്നു. ഹരിതകർമസേനക്ക് നൽകുന്ന അതേ കൂലിയായ 700 രൂപയായിരുന്നു ഡ്രൈവർമാർക്ക് നൽകിയിരുന്നത്. ലൈസൻസുള്ള ഹരിതകർമസേന ഡ്രൈവർമാരില്ലാത്തതാണ് മാലിന്യനീക്കം തടസ്സപ്പെടുന്നതിനൊരു കാരണമെന്നാണ് കോർപറേഷൻ അധികൃതരുടെ വിശദീകരണം. അഞ്ചു വാർഡുകളുള്ള കാരപ്പറമ്പ് ഹെൽത്ത് സർക്കിളിനു കീഴിൽ അഞ്ച് ഓട്ടോകൾ നൽകിയെങ്കിലും രണ്ടു ഡ്രൈവർമാർ മാത്രമാണിപ്പോഴുള്ളത്. ഇതുമൂലം ഇടവിട്ട ദിവസങ്ങളിൽമാത്രമാണ് വാർഡുകളിൽനിന്ന് മാലിന്യം നീക്കുന്നത്. അഴക് ശുചിത്വ പ്രോട്ടോകോൾ പ്രകാരം പൂജ്യം മാലിന്യം, മാലിന്യ സംസ്കരണത്തിലെ മനോഭാവ മാറ്റം എന്നിവക്കുള്ള ബഹുജന സംരംഭത്തെ ശക്തിപ്പെടുത്താൻ പദ്ധതിയിട്ടാണ് 75 വാർഡുകളിലും മാലിന്യ ശേഖരണവും വേർതിരിക്കലും ഏർപ്പെടുത്തിക്കൊണ്ട് ഫ്ലാഗ്ഷിപ് പദ്ധതി നടപ്പാക്കിയത്. സംസ്ഥാനസർക്കാർ സാങ്കേതികവിദ്യാഭ്യാസ വകുപ്പും ചേർന്ന് ഇൻഡസ്ട്രി ഓൺ കാമ്പസ് (ഐഒസി )പദ്ധതിയുടെ ഭാഗമായി കോയമ്പത്തൂർ ആസ്ഥാനമായി പ്രവർത്തിക്കുന്ന ആക്സൻ വെഞ്ച്വർസ് എന്ന കമ്പനിയുമായി സഹകരിച്ച് വെസ്റ്റ്ഹിൽ ഗവ. പോളിടെക്നിക് കോളജിൽ നിർമിച്ചതാണ് ഇലക്ട്രിക് ഓട്ടോകൾ. 2024 ജനുവരിയിൽ ആദ്യഘട്ടത്തിൽ 30 ഇലക്ട്രിക് ഓട്ടോകളും തുടർന്ന് ശേഷിക്കുന്ന 45 ഓട്ടോകളും കൈമാറുകയായിരുന്നു. അസംബിൾ ചെയ്ത് കോർപറേഷന് കൈമാറിയ ഇലക്ട്രിക് ഗാർബേജ് വാഹനങ്ങൾ കൃത്യമായി ചാർജ് ചെയ്തില്ലെങ്കിലും പരിചരണം ഇല്ലെങ്കിലും നശിക്കുമെന്നുറപ്പാണ്.

മഴ തുടരുന്നു; താഴ്ന്ന പ്രദേശങ്ങൾ വെള്ളത്തിനടിയിൽ

മുക്കം: മഴ വീണ്ടും ശക്തമായതോടെ കെടുതികളും രൂക്ഷമായി. കഴിഞ്ഞ ഒരാഴ്ചയായി തുടരുന്ന മഴ രണ്ട് ദിവസം മുമ്പാണ് വലിയ രീതിയിൽ ശക്തി പ്രാപിച്ചത്. ഇത് ജനജീവിതത്തെയും ബാധിച്ചു തുടങ്ങിയിട്ടുണ്ട്. മലയോര മേഖലയിൽ പലയിടങ്ങളിലും വെള്ളപ്പൊക്ക ഭീഷണി നേരിടുന്നുണ്ട്. ഇരുവഞ്ഞിപ്പുഴയും ചാലിയാറും നിറഞ്ഞ് താഴ്ന്ന പ്രദേശങ്ങൾ വെള്ളത്തിനടിയിലായി കഴിഞ്ഞു. തീരദേശവാസികളോട് ജാഗ്രത പാലിക്കാൻ മുക്കം നഗരസഭ ചെയർമാർ പി.ടി ബാബു, കാരശേരി പഞ്ചായത്ത് പ്രസിഡന്‍റ് സുനിത രാജൻ, കൊടിയത്തൂർ പഞ്ചായത്ത് പ്രസിഡന്‍റ് ദിവ്യ ഷിബു എന്നിവർ മുന്നറിയിപ്പ് നൽകിയിട്ടുണ്ട്. ജില്ലയിലെ കിഴക്കൻ മലയോര മേഖലയിൽ ഖനന പ്രവർത്തനങ്ങൾക്കും വിനോദസഞ്ചാര കേന്ദ്രങ്ങളിലേക്കുള്ള പ്രവേശനത്തിനും നിയന്ത്രണം ഏർപ്പെടുത്തിയിട്ടുണ്ട്. മഴക്കെടുതികൾ നേരിടാൻ തദ്ദേശസ്ഥാപനങ്ങൾ, റവന്യൂ ഫയർഫോഴ്സ് പോലെയുള്ള സംവിധാനങ്ങളും ആവശ്യമായ മുന്നൊരുക്കങ്ങളും നടത്തിയിട്ടുണ്ട്. ഇതിന്‍റെ ഭാഗമായി തദ്ദേശസ്വയംഭരണസ്ഥാപനങ്ങൾ ആളുകളെ മാറ്റിപ്പാർപ്പിക്കാൻ ഉള്ള സ്ഥലങ്ങളും ഒരുക്കിയിട്ടുണ്ട്. മലയോരത്തെ താഴ്ന്ന പ്രദേശങ്ങളായ ചേന്ദമംഗല്ലൂർ മംഗലശേരി വയൽ റോഡ്, പുൽപറമ്പ്- നായർ കുഴി റോഡ്, കുമാരനെല്ലൂർ ഗ്രൗണ്ട്, ചോണാട് റോഡ്, ചെറുവാടി ഖിലാഫത്ത് സ്റ്റേഡിയം, കാരക്കുറ്റി ഇതിഹാസ് ഗ്രൗണ്ട് എന്നിവയെല്ലാം വെള്ളത്തിനടിയിലായി. വെള്ളം വീണ്ടും ഉയരുന്ന സാഹചര്യത്തിൽ തീരപ്രദേശങ്ങളിലുള്ളവരും വലിയ ഭീതിയിലാണ്. മുൻ വർഷങ്ങളിലെല്ലാം ഏക്കർ കണക്കിന് ഭൂമി പുഴയെടുത്തിരുന്നു. ഇതോടെ നിരവധി വീടുകളും ഭീഷണിയിലായതിനൊപ്പം ഏക്കർ കണക്കിന് കൃഷി ഭൂമിയും നഷ്ടമായ അവസ്ഥയിലാണ്. ഈ വർഷം മൂന്ന് തവണ വെള്ളം കയറിയതോടെ ജില്ലയുടെ കിഴക്കൻ മേഖലയിൽ വലിയ രീതിയിലാണ് കൃഷി നശിച്ചത്. മാവൂർ, ചാത്തമംഗലം, കൊടിയത്തൂർ, കാരശേരി പഞ്ചായത്തുകളിലും മുക്കം നഗരസഭയിലുമായി കോടിക്കണക്കിന് രൂപയുടെ നഷ്ടമാണ് ഉണ്ടായത്. തെങ്ങ് വീണ് വീടിന് നാശം കുറ്റ്യാടി: കായക്കൊടിയിൽ തെങ്ങ് കടപുഴകി വീണ് വീടിന് നാശം. ഇടകുനിയിൽ കമറുദ്ദീന്‍റെ വീടിനാണ് നാശം സംഭവിച്ചത്. വീടിന്‍റെ കോൺക്രീറ്റ് ഭാഗികമായി തകർന്നു. ഇന്നലെ പുലർച്ചെ മൂന്നേമുക്കാലോടെ കനത്ത മഴയോടൊപ്പമെത്തിയ കാറ്റാണ് നാശമുണ്ടാക്കിയത്.

കെഎംസിടിയിൽ ഹോർമോൺ ക്ലിനിക് പ്രവർത്തനമാരംഭിച്ചു

മുക്കം: കെഎംസിടി മെഡിക്കൽ കോളജ് ആശുപത്രിയിൽ ഹോർമോൺ ക്ലിനിക് പ്രവർത്തനമാരംഭിച്ചു. മലയോര മേഖലയിലെ ആദ്യ ഹോർമോൺ ക്ലിനിക്കാണ് ഡോ. ഗീതു മേരിയുടെ നേതൃത്വത്തിൽ പ്രവർത്തനമാരംഭിച്ചതെന്ന് അധികൃതർ വാർത്ത സമ്മേളനത്തിൽ അറിയിച്ചു. ഇതിന്‍റെ ഭാഗമായി തിങ്കളാഴ്ച ആശുപത്രിയിൽ വച്ച് ഹോർമോൺ രോഗനിർണയ ക്യാമ്പ് നടത്തും. ക്യാമ്പിൽ ഡോക്ടറുടെ പരിശോധന സൗജന്യമായിരിക്കും. പ്രമേഹം, തൈറോയിഡ്, അമിത വണ്ണം, പിസിഒഡി പ്രശ്നങ്ങൾ, അമിതമായ രക്ത സമ്മർദ്ദം, ക്രമരഹിതമായ ആർത്തവം, അമിതമായ രോമ വളർച്ച, വളർച്ച കുറവ് തുടങ്ങിയവയ്ക്കുള്ള ചികിത്സയും ക്യാമ്പിൽ നിർദ്ദേശിക്കുമെന്ന് അവർ അറിയിച്ചു. വാർത്ത സമ്മേളനത്തിൽ ഡോ. ഗീതു മേരി, നവീൻ കുര്യൻ എന്നിവർ പങ്കെടുത്തു.

തിരുവമ്പാടി ലിസ ഹോസ്പിറ്റലിൽ ഒപി ബ്ലോക്ക് ഉദ്ഘാടനം ചെയ്തു

തിരുവമ്പാടി: തിരുവമ്പാടി ലിസ ഹോസ്പിറ്റൽ സുവർണ ജൂബിലി ആഘോഷങ്ങളുടെ ഭാഗമായി ആരംഭിച്ച പുതിയ ഒപി ബ്ലോക്കിന്‍റെ ഉദ്ഘാടനം ലിന്‍റോ ജോസഫ് എംഎൽഎ നിർവഹിച്ചു. കുടിയേറ്റ ജനതയുടെ ആരോഗ്യ സംരക്ഷണം മുന്നിൽ കണ്ട് അൻപത് വർഷങ്ങൾക്ക് മുൻപ് ആരംഭിച്ച ലിസ ഹോസ്പിറ്റൽ തിരുവമ്പാടിയുടെ ചരിത്രത്തിൽ എന്നും ഇടം പിടിക്കുമെന്ന് എംഎൽഎ കൂട്ടിച്ചേർത്തു. ലിസ ഹോസ്പിറ്റൽ മെഡിക്കൽ ഡയറക്ടർ ഡോ. പി.എം. മത്തായി അധ്യക്ഷത വഹിച്ചു. ചടങ്ങിൽ തിരുവമ്പാടി സേക്രഡ് ഹാർട്ട് ഫൊറോന പള്ളി വികാരി ഫാ. തോമസ് നാഗപറമ്പിൽ അനുഗ്രഹ പ്രഭാഷണം നടത്തി. ഡോ. ജെനി മാത്യു, തിരുവമ്പാടി പഞ്ചായത്ത് പ്രസിഡന്‍റ് ബിന്ദു ജോൺസൺ, മലബാർ ഹോസ്പിറ്റൽ എംഡി ഡോ. മിലി മോനി, ലിസ ഹോസ്പിറ്റൽ മെഡിക്കൽ സൂപ്രണ്ട് ഡോ. അരുൺ മാത്യു, ലിസ ഹോസ്പിറ്റൽ ഡയറക്ടർ ഡോ. പ്രവീൺ മാത്യു തുടങ്ങിയവർ പ്രസംഗിച്ചു.

ബോധവത്കരണ സെമിനാർ നടത്തി

കോഴിക്കോട്: കേരളത്തിലെ കാർഷിക മേഖലയുടെ സമഗ്ര വളർച്ചയ്ക്കും കാലാവസ്ഥ അനുസൃത കൃഷി രീതികളിലൂടെ ഉത്പാദന വർധനവും ലക്ഷ്യമിട്ട് കൃഷി വകുപ്പ് ലോക ബാങ്ക് സഹായത്തോടെ ആവിഷ്കരിച്ച് നടപ്പാക്കുന്ന കേര (കേരള ക്ലൈമറ്റ് അഗ്രി വാല്യൂ ചെയിൻ മോഡണൈസേഷൻ പ്രോജക്ട് ) ഉത്പാദക സഖ്യങ്ങൾക്കുള്ള ബോധവത്കരണ സെമിനാർ ഹോട്ടൽ വുഡിസ് ബ്ലെയ്ഷറിൽ നടന്നു. കാലാവസ്ഥ വ്യതിയാനത്തിന് അനുയോജ്യമായ കൃഷി രീതി പ്രോത്സാഹിപ്പിക്കുന്നതിനും മൂല്യവർധിത കാർഷിക ഉൽപന്നങ്ങളുടെ ഉത്പാദനവും വിപണനവും വർധിപ്പിക്കുന്നതിനും കാർഷിക സംരംഭകത്വം പ്രോത്സാഹിപ്പിക്കുന്നതിനുമാണ് കേര പദ്ധതി ലക്ഷ്യമിടുന്നത്. സെമിനാറിന്‍റെ ഭാഗമായി ബി ടു ബി മീറ്റും നടന്നു. കാർഷിക വ്യവസായത്തിലേക്ക് കടന്നുവരുന്ന നവ സംരംഭകർക്ക് ഏറെ പ്രതീക്ഷ നൽകുന്ന ഒരു പദ്ധതിയാണ് കേര. ചടങ്ങിൽ കോഴിക്കോട് ആത്മ പ്രോജക്ട് ഡയറക്ടർ രജനി മുരളീധരൻ അധ്യക്ഷത വഹിച്ചു. കേര എസ്പിഎംയു പ്രൊക്യൂർമെന്‍റ് ഓഫീസർ സുരേഷ് തമ്പി ആമുഖപ്രഭാഷണം നടത്തി.ജില്ലാ വ്യവസായ കേന്ദ്രം ജനറൽ മാനേജർ രജിത്ത് ബാബു, കൃഷിവകുപ്പ് ഡെപ്യൂട്ടി ഡയറക്ടർ അജയ് അലക്സ്, നബാർഡ് എഡിഎം രാഗേഷ് എന്നിവർ പ്രസംഗിച്ചു.

ലഹരിക്കെതിരേ യുദ്ധം ചെയ്യണം: ബിഷപ് മാർ ഇഞ്ചനാനിയിൽ

കൂരാച്ചുണ്ട്: ലോകത്ത് വിവിധ രാജ്യങ്ങൾ തമ്മിൽ യുദ്ധം നടക്കുന്നുണ്ടെങ്കിലും നമ്മൾ യുദ്ധം പ്രഖ്യാപിക്കേണ്ടത് ലഹരിക്കെതിരേയാണെന്ന് ബിഷപ് മാർ റെമീജിയോസ് ഇഞ്ചനാനിയിൽ. കൂരാച്ചുണ്ട് സെന്‍റ് തോമസ് പാരീഷ് ഹാളിൽ അന്താരാഷ്ട്ര ലഹരി വിരുദ്ധ ദിനത്തോടനുബന്ധിച്ച് ലഹരി വിരുദ്ധ സമിതി താമരശേരി രൂപതയുടെ ആഭിമുഖ്യത്തിൽ നടന്ന വ്യക്തിത്വ വികസന ക്ലബ് അവാർഡ് വിതരണവും വിവിധ ക്ലബുകളുടെ ഉദ്ഘാടനവും നിർവഹിച്ച് പ്രസംഗിക്കുകയായിരുന്നു ബിഷപ്. ലഹരിക്കെതിരേ പോരാടാൻ നമ്മുടെ മനസ് സജ്ജമാക്കണം. ലഹരി മൂലമുണ്ടാകുന്ന ദുരന്തങ്ങൾ ഇനി ആവർത്തിക്കാൻ പാടില്ലെന്നും പറഞ്ഞു. മയക്കു മരന്നുകൾ വിതരണം ചെയ്യുന്ന വലിയ സംഘങ്ങൾ എവിടെയുമുണ്ട്. അവരുടെ കെണിയിൽ അകപ്പെട്ടു പോകരുതെന്നും ബിഷപ്പ് വിദ്യാർഥികളെ ഓർമിപ്പിച്ചു. ലഹരി വിരുദ്ധ സമിതി രൂപത പ്രസിഡന്‍റ് കുര്യൻ ചെമ്പനാനി അധ്യക്ഷത വഹിച്ചു. പഞ്ചായത്ത് പ്രസിഡന്‍റ് ഒ.കെ. അമ്മദ് മുഖ്യപ്രഭാഷണം നടത്തി. കൂരാച്ചുണ്ട് ഫൊറോന വികാരി ഫാ. വിൻസെന്‍റ് കണ്ടത്തിൽ അനുഗ്രഹ പ്രഭാഷണം നടത്തി. ലഹരി വിരുദ്ധ സമിതി രൂപത ഡയറക്ടർ ഫാ. ജിന്‍റോ മച്ചുകുഴിയിൽ ആമുഖ പ്രഭാഷണം നടത്തി. കോടഞ്ചേരി സെന്‍റ് ജോസഫ്സ് ഹയർ സെക്കൻഡറി സ്കൂളിൽ വിവിധ പരിപാടികളോടെ ലഹരി വിരുദ്ധ ദിനാചരണം നടത്തി. ലഹരിക്കെതിരായി ജില്ല പഞ്ചായത്തിന്‍റെ ടു മില്യൺ പ്രതിജ്ഞ വിദ്യാർഥി പ്രതിനിധി ആഷ്‌ലിൻ ഗ്രേയ്സ് ചൊല്ലിക്കൊടുത്തു. സിവിൽ പോലീസ് ഓഫീസർ ജെസി മാത്യു, അധ്യാപക പ്രതിനിധി സി. രമ്യ ജോസ് എന്നിവർ ലഹരി വിരുദ്ധ സന്ദേശം നൽകി. ലഹരി വിരുദ്ധ സന്ദേശം ഉൾക്കൊള്ളുന്ന ഫ്ളാഷ് മോബ്, പോസ്റ്റർ മത്സരം, ഉപന്യാസ മത്സരം എന്നിവ നടത്തപ്പെട്ടു. സ്കൂൾ പ്രധാനാധ്യാപകൻ ബിനു ജോസ് പ്രസംഗിച്ചു. ജാഗ്രത സമിതി കൺവീനർ ഡെല്ല ജോർജ്, സ്കൂൾ കമ്മ്യൂണിറ്റി പോലീസ് ഓഫീസർമാരായ ബർണാഡ് ജോസ്, അനില അഗസ്റ്റിൻ, വ്യക്തിത്വ വികസന ക്ലബ് കൺവീനർമാരായ സി. ലെറ്റിൻ ജോസ്, പി.എൽ. ഡാർളി, അധ്യാപകരായ ജൂലി അലക്സ്, റ്റാൻസി ജോസ് എന്നിവർ നേതൃത്വം നൽകി. മേപ്പയ്യൂർ: ലഹരി വിരുദ്ധ ദിനത്തിൽ മേപ്പയൂർ ബസ് സ്റ്റാൻഡിൽ ബസിൽ വച്ച് യാത്രക്കാർ ലഹരി വിരുദ്ധ പ്രതിജ്ഞ എടുത്തു. ഗുഡ്സ് ട്രാൻസ്പോർട്ട് വർക്കേഴ്സ് യൂണിയൻ (സിഐടിയു) കോഴിക്കോട് ജില്ലാ കമ്മിറ്റി അംഗവും പേരാമ്പ്ര ഏരിയ സെക്രട്ടറിയുമായ ഇ.കെ. ഗോപി പ്രതിജ്ഞ ചൊല്ലി കൊടുത്തു. ഏരിയ കമ്മിറ്റിയംഗം എം.പി. കുഞ്ഞഹമ്മദ്, നരക്കോട് എകെജി ലൈബ്രറി എക്സിക്യൂട്ടീവ് അംഗം ഗോപാലൻ, ഓട്ടോ ടാക്സി ഗുഡ്സ് സെക്ഷൻ സെക്രട്ടറി ബാലകൃഷ്ണൻ തുടങ്ങിയവർ നേതൃത്വം നൽകി.

ലഹരിയ്ക്കെതിരെ സന്ദേശമുയർത്തി ലഹരി വിരുദ്ധ ദിനാചരണം

കോഴിക്കോട്: ജില്ലയിലെ തദ്ദേശ സ്വയംഭരണ സ്ഥാപനങ്ങളുടെയും സര്‍ക്കാര്‍, സര്‍ക്കാറിതര സ്ഥാപനങ്ങളുടെയും പിന്തുണയോടെ ലഹരിവിരുദ്ധ ജനകീയ പ്രതിരോധം "2 മില്യണ്‍ പ്ലഡ്ജ്'സംഘടിപ്പിച്ചു. ജില്ലാ പഞ്ചായത്തിന്‍റെ നേതൃത്വത്തില്‍ സംഘടിപ്പിച്ച ലഹരിവിരുദ്ധ ജനകീയ പ്രതിരോധം 2 മില്യണ്‍ പ്ലഡ്ജില്‍ മുഖ്യമന്ത്രി പിണറായി വിജയൻ സന്ദേശം നൽകി. ജില്ലയിലെ 20 ലക്ഷം പേര്‍ ഒരുമിച്ച് ഒരേസമയം 42000 കേന്ദ്രങ്ങളില്‍ പ്രതിജ്ഞയെടുത്ത് ലഹരിക്കെതിരേ ശക്തമായ പ്രതിരോധം തീര്‍ത്തു. പ്രതിജ്ഞ ചടങ്ങുകളിൽ ഏറ്റവും കൂടുതൽ പങ്കാളിത്തം ഉറപ്പാക്കുന്ന പ്രതിജ്ഞ കേന്ദ്രങ്ങൾ, തദ്ദേശസ്വയംഭരണ സ്ഥാപനങ്ങൾ, സംഘടനകൾ, സ്ഥാപനങ്ങൾ, വ്യക്തികൾ തുടങ്ങി വിവിധ മേഖലകളിലുള്ളവരെ പ്രത്യേകം വിലയിരുത്തി അംഗീകാര സർട്ടിഫിക്കറ്റുകൾ നൽകും. വിദ്യാർഥികളിൽ ലഹരി ഉപയോഗം വ്യാപകമായ സമയത്ത് അഞ്ച് ലക്ഷത്തോളം വിദ്യാർഥികൾ പരിപാടിയുടെ ഭാഗമായി ലഹരിക്കെതിരേ പ്രതിജ്ഞയെടുത്തു. തുഷാരഗിരിയിൽ വിവിധ ഡിപ്പാർട്ട്മെന്‍റുകളുടെ സഹായത്തോടെ രണ്ടു മില്യൺ പ്ലഡ്ജ് ലഹരി വിരുദ്ധ ജനകീയ ക്യാമ്പയിൻ നടത്തി. വ്യക്തിയുടെ ആരോഗ്യവും കുടുംബങ്ങളുടെ സന്തോഷവും കെടുത്തുന്ന ലഹരിക്ക് അടിമ പെടുന്നവരെ ജീവിത ലഹരിയുടെ വെളിച്ചത്തിലേക്ക് കൊണ്ടുവരുന്നതിനായി ജില്ലാ ടൂറിസം പ്രമോഷൻ കൗൺസിലും (ഡിടിപിസി) സീനിയർ ചേമ്പർ വെസ്റ്റ് ലീജിയൻ കോടഞ്ചേരിയും വനസംരക്ഷണ സമിതിയുമായി ചേർന്നാണ് പരിപാടി നടത്തിയത്. ചടങ്ങിൽ ഡിജിപിസി മാനേജർ ഷെല്ലി കുന്നേൽ പ്രതിജ്ഞ ചൊല്ലിക്കൊടുത്തു. സീനിയർ ചേമ്പർ ഇന്‍റർനാഷണൽ വെസ്റ്റ്‌ ലീജിയൻ പ്രസിഡന്‍റ് ജോയ് മോളത്ത് ലഹരിക്കെതിരേ ക്ലാസുകൾ എടുത്തു. തിരുവമ്പാടി: പുല്ലൂരാംപാറ സെന്‍റ് ജോസഫ്സ് ഹയർ സെക്കൻഡറി സ്കൂളിൽ "ജീവിതമാകട്ടെ ലഹരി'എന്ന സന്ദേശമുയർത്തി ലോക ലഹരി വിരുദ്ധ ദിനം ആചരിച്ചു. ജില്ലാ പഞ്ചായത്തിന്‍റെ ലഹരിവിരുദ്ധ ജനകീയ പ്രതിരോധം സൃഷ്ടിക്കുന്നതിന്‍റെ ഭാഗമായുള്ള "ടു മില്യൺ പ്ലഡ്ജ്'എന്ന പദ്ധതിയുടെ ഭാഗമായി മുഴുവൻ വിദ്യാർഥികളും അധ്യാപകരും ലഹരിക്കെതിരേ പ്രതിജ്ഞയെടുത്തു. പ്രിൻസിപ്പൽ സുനിൽ ജോസഫ് പരിപാടി ഉദ്ഘാടനം ചെയ്തു. പിടിഎ പ്രസിഡന്‍റ് വിൽസൺ ടി. മാത്യു അധ്യക്ഷത വഹിച്ചു. വിദ്യാർഥി പ്രതിനിധി ധന്വി ദിനേശ് പ്രതിജ്ഞ ചൊല്ലി കൊടുത്തു. വിദ്യാർഥി പ്രതിനിധി കീർത്തന മനോജ് പ്രസംഗിച്ചു. മരഞ്ചാട്ടി: ലോക ലഹരി വിരുദ്ധ ദിനം ആഘോഷിച്ച് മരഞ്ചാട്ടി മേരിഗിരി ഹൈസ്കൂളിൽ വിവിധ പരിപാടികൾ നടത്തി. സ്കൂൾ പ്രധാനാധ്യാപിക സീന റോസിന്‍റെ അധ്യക്ഷതയിൽ നടന്ന ചടങ്ങ് താമരശേരി സിവിൽ എക്‌സൈസ് ഓഫീസർ മനോജ് പുളിമൂട്ടിൽ ഉദ്ഘാടനം ചെയ്തു. ലഹരി വിരുദ്ധ പ്രതിജ്ഞയിൽ എല്ലാ വിദ്യാർഥികളും അധ്യാപകരും പങ്കെടുത്തു. ഷിബിൽ ജോസ്, ജെസ്‌വിൻ ജോബി, നിഹാര സുരേഷ് എന്നിവർ പ്രസംഗിച്ചു. പരിപാടിയുടെ ഭാഗമായി ലഹരി വിരുദ്ധ ഗാനം, ഡിസിഎൽ കിക്കൗട്ട് തീം സോംഗ്, ബോധവത്കരണ റാലി, ലഹരി വിരുദ്ധ കവിത, ഞാനും എന്‍റെ ലഹരിയും എന്ന പേരിൽ ലഹരിമര നിർമാണം, സുംബ ഡാൻസ്, പ്ലക്കാർഡ് നിർമാണ മത്സരം തുടങ്ങിയവ നടന്നു. കൂരാച്ചുണ്ട്: ലഹരി വിരുദ്ധ ദിനത്തിന്‍റെ ഭാഗമായി കായണ്ണ പഞ്ചായത്തിന്‍റെ നേതൃത്വത്തിൽ കാറ്റുള്ളമല നിർമ്മല യുപി സ്കൂളും പഞ്ചായത്ത് ആറാം വാർഡും സംയുക്തമായി ലഹരി വിരുദ്ധ പ്രതിജ്ഞയും പൊതു ജനങ്ങൾക്ക് സന്ദേശവും നൽകി. വാർഡ് മെമ്പർ പി.കെ ഷിജു അധ്യക്ഷത വഹിച്ചു. ചടങ്ങിൽ എസ്ഐമാരായ കെ. ബാബു, ഐ.ബി രാജേഷ്, കാറ്റുള്ളമല സെന്‍റ് മേരീസ് പള്ളി വികാരി ഫാ. ജോസഫ് പെണ്ണാപറമ്പിൽ, ഇ.ജെ. ഷാജു എന്നിവർ പ്രസംഗിച്ചു. സ്കൂൾ പ്രധാനാധ്യാപിക പി. സുധി പ്രതിജ്ഞാ വാചകം കൊടുത്തു. ഫ്ലാഷ് മോബും സംഘടിപ്പിച്ചു. അന്താരാഷ്ട്ര ലഹരി വിരുദ്ധ ദിനത്തോടനുബന്ധിച്ച് കൂരാച്ചുണ്ട് പഞ്ചായത്തിൽ ലഹരി വിരുദ്ധ പരിപാടി സംഘടിപ്പിച്ചു. പഞ്ചായത്ത് വൈസ് പ്രസിഡന്‍റ് തോമസ് അധ്യക്ഷത വഹിച്ചു. പഞ്ചായത്ത് പ്രസിഡന്‍റ് ഒ.കെ. അമ്മദ് ലഹരി വിരുദ്ധ പ്രതിജ്ഞ ചൊല്ലിക്കൊടുത്തു. പഞ്ചായത്തംഗങ്ങളായ റസീന യൂസഫ്, വിജയൻ കിഴക്കയിൽമീത്തൽ, ആൻസമ്മ ജോസഫ്, അരുൺ ജോസ്, സിഡിഎസ് ചെയർപേഴ്സൺ കാർത്തിക വിജയൻ, അസിസ്റ്റന്‍റ് സെക്രട്ടറി മനിൽ കുമാർ, കൂരാച്ചുണ്ട് സബ് ഇൻസ്പെക്ടർ എസ്.ആർ. സൂരജ്, ഹെൽത്ത് ഇൻസ്പെക്ടർ എ.സി. അരവിന്ദൻ, ജോസ് വെളിയത്ത് എന്നിവർ പങ്കെടുത്തു. പെരുവണ്ണാമൂഴി: അന്താരാഷ്ട്ര ലഹരി വിരുദ്ധ ദിനം പെരുവണ്ണാമുഴി കുടുംബാരോഗ്യ കേന്ദ്രത്തിൽ ആചരിച്ചു. മെഡിക്കൽ ഓഫീസർ ഡോ. കമറുദ്ദീൻ ഉദ്ഘാടനം ചെയ്തു. ജൂനിയർ ഹെൽത്ത് ഇൻസ്പെക്ടർ ജ്യോത്സന അഗസ്റ്റിൻ ലഹരി വിരുദ്ധ പ്രതിജ്ഞ ചൊല്ലിക്കൊടുത്തു. ഹെൽത്ത്‌ ഇൻസ്പെക്ടർ സീനാ ബായ് നേതൃത്വം നൽകി. കോടഞ്ചേരി: കണ്ണോത്ത് സെന്‍റ് ആന്‍റണീസ് ഹൈസ്കൂളിലെ വിദ്യാര്‍ഥികൾ സമൂഹത്തില്‍ വ്യാപിക്കുന്ന ലഹരിക്കെതിരേ ശക്തമായ സന്ദേശമുയര്‍ത്തി. ബോധവത്കരണ സന്ദേശവുമായി കുട്ടികള്‍ കടകളിലേക്കും പൊതുസ്ഥലങ്ങളിലേക്കും ഇറങ്ങി ലഹരിക്കെതിരായ പ്രതിരോധത്തിന്‍റെ മുഴക്കമുയർത്തി. പൊതുജനങ്ങളിൽ ലഹരിയുടെ ഭീകരതയെ കുറിച്ച് ബോധവത്കരണം നടത്തി. “ലഹരി ഒരു ദുരന്തം ആകുന്നതിനു മുൻപേ നമുക്ക് അതിനെ തോൽപ്പിക്കാം” എന്ന സന്ദേശവുമായാണ് വിദ്യാര്‍ഥികൾ അങ്ങാടിയിലേക്കും പൊതു ഇടങ്ങളിലേക്കും ഇറങ്ങിയത്. സ്കൂൾ പ്രധാനാധ്യാപകന്‍ റോഷിൻ മാത്യുവും മറ്റ് അധ്യാപകരും ലഹരി വിരുദ്ധ പരിപാടികൾക്ക് നേതൃത്വം നൽകി.

ദേശീയപാതയിലെ വെള്ളക്കെട്ട്; അടിയന്തര നടപടികള്‍ സ്വീകരിക്കാന്‍ നിര്‍ദ്ദേശം

കോഴിക്കോട്: ദേശീയപാതയിലെയും സര്‍വീസ് റോഡുകളിലെയും വെള്ളക്കെട്ടുകളും കുഴികളും ഒഴിവാക്കാനും അടിയന്തര അറ്റകുറ്റപ്പണികള്‍ നടത്താനും ബന്ധപ്പെട്ട ഉദ്യോഗസ്ഥര്‍ക്ക് ജില്ലാ കളക്ടര്‍ സ്നേഹില്‍ കുമാര്‍ സിംഗ് നിര്‍ദ്ദേശം നല്‍കി. പൊതുമരാമത്ത് വിനോദ സഞ്ചാര മന്ത്രി പി.എ. മുഹമ്മദ് റിയാസിന്‍റെ നിര്‍ദ്ദേശപ്രകാരം അടിയന്തരമായി വിളിച്ചു ചേര്‍ത്ത ഓണ്‍ലൈന്‍ യോഗത്തിലാണ് ദേശീയപാത അഥോറിറ്റിക്കും കരാര്‍ കമ്പനികള്‍ക്കും ഇതുമായി ബന്ധപ്പെട്ട നിര്‍ദേശം നല്‍കിയത്. രണ്ടു ദിവസത്തിനകം അടിയന്തര അറ്റകുറ്റപ്പണികള്‍ നടത്താനാണ് നിര്‍ദ്ദേശം. വരും ദിവസങ്ങളില്‍ മഴ കനക്കാന്‍ സാധ്യതയുള്ളതിനാല്‍ താല്‍ക്കാലിക അറ്റകുറ്റപ്പണികള്‍ നടത്തി റോഡുകളിലെ വെള്ളക്കെട്ടുകള്‍ ഒഴിവാക്കാനും കുഴികള്‍ അടയ്ക്കാനും നിര്‍ദ്ദേശം നല്‍കി. പ്രശ്‌നങ്ങളുള്ള പ്രദേശങ്ങള്‍ ദേശീയപാത അഥോറിറ്റി ഉദ്യോഗസ്ഥര്‍ സന്ദര്‍ശിച്ച് കരാറുകാരെ കൊണ്ട് നടപടികള്‍ എടുപ്പിക്കണമെന്നും ജില്ലാ കളക്ടര്‍ ആവശ്യപ്പെട്ടു. ദേശീയപാത കടന്നുപോകുന്ന പഞ്ചായത്തുകളിലെയും മുനിസിപ്പാലിറ്റികളിലെയും അധ്യക്ഷന്മാര്‍ യോഗത്തില്‍ പങ്കെടുത്തു. ദേശീയപാതയിലും സര്‍വീസ് റോഡിലും വലിയ കുഴികളും വെള്ളക്കെട്ടും നിറഞ്ഞത് യാത്രക്കാരെ ദുരിതത്തിലാക്കുന്നുണ്ടെന്ന് അധ്യക്ഷന്മാര്‍ ചൂണ്ടിക്കാട്ടി. സര്‍വീസ് റോഡുകള്‍ പൊട്ടിപ്പൊളിഞ്ഞുകിടക്കുന്നതും ഡ്രെയിനേജ് സംവിധാനം പൂര്‍ത്തിയാവാത്തതും വലിയ വെള്ളക്കെട്ടുകള്‍ക്ക് കാരണമാവുന്നുണ്ട്. പ്രധാനപ്പെട്ട ജംഗ്ഷനുകളില്‍ വലിയ ഗതാഗതക്കുരുക്ക് ഇതുമൂലം ഉണ്ടാകുന്നതായും അവര്‍ പറഞ്ഞു. ശാശ്വത പരിഹാരത്തിനായി മഴ കുറയുന്നതുവരെ കാത്തുനില്‍ക്കാതെ താല്‍ക്കാലിക അറ്റകുറ്റപ്പണികള്‍ അടിയന്തരമായി നടത്താനാണ് ജില്ലാ കളക്ടറുടെ നിര്‍ദ്ദേശം. അടുത്ത ദിവസം തന്നെ വീണ്ടും യോഗം ചേര്‍ന്ന് പ്രവൃത്തി പുരോഗതി വിലയിരുത്തും. ദേശീയപാത അഥോറിറ്റി ഉദ്യോഗസ്ഥര്‍, കരാര്‍ കമ്പനി പ്രതിനിധികള്‍, പഞ്ചായത്ത് ഉദ്യോഗസ്ഥര്‍ തുടങ്ങിയവര്‍ യോഗത്തില്‍ പങ്കെടുത്തു.

മത്സ്യബന്ധനത്തിനിടെ മരിച്ചയാളുടെ കുടുംബത്തിന് ഇൻഷ്വറൻസ് പരിരക്ഷ ലഭ്യമാക്കും

കോഴിക്കോട്: കഴിഞ്ഞ വർഷം ജനുവരി എട്ടിന് മത്സ്യബന്ധനത്തിനിടയിൽ ഇടിമിന്നലേറ്റ് മത്സ്യബന്ധനയാനം തകർന്ന് മത്സ്യത്തൊഴിലാളി മരിച്ച സംഭവത്തിൽ മരിച്ചയാളുടെ കുടുംബത്തിന് 10 ലക്ഷം രൂപയുടെ ഇൻഷ്വറൻസ് ക്ലെയിം അനുവദിക്കുന്നതിന് ഇൻഷ്വറൻസ് കമ്പനിക്ക് നിർദ്ദേശം നൽകിയിട്ടുണ്ടെന്ന് മത്സ്യത്തൊഴിലാളി ക്ഷേമനിധി ബോർഡ് മനുഷ്യാവകാശ കമ്മീഷനെ അറിയിച്ചു. മുഹമ്മദ് മൂടാടി എന്നയാളുടെ ഉടമസ്ഥതതയിലുള്ള ആലിയമോൾ എന്ന മത്സ്യബന്ധനയാനം അപകടത്തിൽപ്പെട്ട സംഭവത്തിൽ പത്രവാർത്തയുടെ അടിസ്ഥാനത്തിൽ കമ്മീഷൻ സ്വമേധയാ രജിസ്റ്റർ ചെയ്ത കേസിലാണ് നടപടി. സംഭവത്തിൽ ആവശ്യമായ നടപടികൾ സ്വീകരിക്കാൻ കമ്മീഷൻ ജുഡീഷ്യൽ അംഗം കെ. ബൈജുനാഥ് ഫിഷറീസ് ഡയറക്ടർക്ക് നിർദ്ദേശം നൽകിയിരുന്നു. മുഹമ്മദ് അഷറഫ്, അബ്ദുൾ റസാഖ് എന്നീ മത്സ്യത്തൊഴിലാളികൾ കടലിലേക്ക് തെറിച്ചു വീണെന്നും മുഹമ്മദ് അഷറഫിനെ മറ്റ് മത്സ്യത്തൊഴിലാളികൾ രക്ഷിച്ചെന്നും ഫിഷറീസ് ഡപ്യൂട്ടി ഡയറക്ടർ കമ്മീഷനെ അറിയിച്ചു. അബ്ദുൾ റസാഖിന്‍റെ മൃതദേഹം പിറ്റേന്നു ലഭിച്ചു. തോണി ഒഴുകിപോവുകയും തോണിയിലുണ്ടായിരുന്ന 70 കിലോ വല നഷ്ടമാവുകയും ചെയ്തു. ബോട്ടിന് ഇൻഷ്വറൻസ് പരിരക്ഷയുണ്ടായിരുന്നു. വല നഷ്ടമായതിന് ഇൻഷ്വറൻസ് നഷ്ടപരിഹാരം നൽകാൻ നിയമതടസമുണ്ട്. തുടർന്ന് 50,000 രൂപ ലഭ്യമാക്കാൻ മുഖ്യമന്ത്രിയുടെ ദുരിതാശ്വാസ സഹായനിധിയിലേക്ക് അപേക്ഷ നൽകാൻ നിർദ്ദേശം നൽകിയിരുന്നു. മരിച്ചയാളുടെ കുടുംബത്തിന് 10,000 രൂപ മത്സ്യബോർഡിൽ നിന്നും അനുവദിച്ചിട്ടുള്ളതായി റിപ്പോർട്ടിൽ പറയുന്നു.

ഭരണകൂട ഭീകരത ഇന്നും നിലനിൽക്കുന്നു: ടി.പി. രാമകൃഷ്ണൻ

കോഴിക്കോട്: അടിയന്തരാവസ്ഥ കാലത്തെ ഓർമ്മിപ്പിക്കുന്ന ഭരണകൂട ഭീകരത വിഭിന്നരൂപത്തിൽ ഇന്നും നിലനിൽക്കുന്നുണ്ടെന്ന് ഇടതുമുന്നണി കൺവീനർ ടി.പി. രാമകൃഷ്ണൻ എംഎൽഎ പറഞ്ഞു. ഗാന്ധിപഥം സാംസ്കാരിക വേദി കോഴിക്കോട് സംഘടിപ്പിച്ച അടിയന്തരാവസ്ഥയ്ക്ക് അമ്പതാണ്ട് - അനുഭവസാക്ഷ്യം പരിപാടി ഉദ്ഘാടനം ചെയ്യുകയായിരുന്നു അദ്ദേഹം. വേദി പ്രസിഡന്‍റ് ജൂലേഷ് രവീന്ദ്രൻ അധ്യക്ഷത വഹിച്ചു. ജാതിമതവർഗ ഭേദമന്യേ എല്ലാ വിഭാഗം ജനങ്ങൾക്കും ഒരുമയോടെ ജീവിക്കാനുള്ള സാഹചര്യം ഉണ്ടാവണമെന്നും അതിനായി ജനാധിപത്യ മതേതര ഇടതുപക്ഷകക്ഷികൾ ഒറ്റക്കെട്ടായി അണിചേരണമെന്നും രാമകൃഷ്ണൻ ആവശ്യപ്പെട്ടു. എൻസിപി സംസ്ഥാന ജനറൽ സെക്രട്ടറി എ.വി. വല്ലഭൻ, സിപിഎം ജില്ലാ സെക്രട്ടറി എം. മെഹബൂബ്, സിപിഐ ജില്ലാ സെക്രട്ടറി കെ.കെ. ബാലൻ, ആർജെഡി നേതാവ് വി. കുഞ്ഞാലി, പി.ടി. ആസാദ്, യൂസഫ് പുതുപ്പാടി എന്നിവർ പ്രസംഗിച്ചു.

ലഹരിക്കെതിരേ ബോധവത്കരണം നടത്തി

പുല്ലൂരാംപാറ: സെന്‍റ് ജോസഫ്സ് ഹൈസ്കൂളിൽ തിരുവമ്പാടി പോലീസ് ഉദ്യോഗസ്ഥരുടെ നേതൃത്വത്തിൽ ലഹരിയ്ക്കെതിരേ ബോധവത്കരണം നടത്തി. അസിസ്റ്റന്‍റ് സബ് ഇൻസ്‌പെക്ടർ ഡിനോയ് മാത്യു സെമിനാർ നയിച്ചു. ലഹരി ഉപയോഗത്തിന്‍റെ ദുരന്തങ്ങൾ, ലഹരി വസ്തുക്കളുമായി ബന്ധപ്പെട്ടാൽ ലഭിക്കുന്ന ശിക്ഷകൾ എന്നിവ വിശദീകരിച്ചു. സബ് ഇൻസ്‌പെക്ടർ ഇ.ജെ. ബെന്നി ലഹരി വിരുദ്ധ പ്രതിജ്ഞ ചൊല്ലിക്കൊടുത്തു. അസിസ്റ്റന്‍റ് സബ് ഇൻസ്‌പെക്ടർ കെ.ഐ. രജനി, പ്രധാനാധ്യാപകൻ ജോളി ജോസഫ്, പിടിഎ പ്രസിഡന്‍റ് വിൽ‌സൺ താഴത്തുപറമ്പിൽ, ബിജു വി. ഫ്രാൻസിസ് തുടങ്ങിയവർ പ്രസംഗിച്ചു.

പൊലീസിന് നേരെ ആക്രമം; പ്രതി കീഴടങ്ങി

നാദാപുരം: നാദാപുരം സിവിൽ എക്സൈസ് ഓഫീസറെ വാഹന പരിശോധന നടത്തുന്നതിനിടെ ഓട്ടോറിക്ഷ കൊണ്ട് ഇടിച്ചു പരിക്കേൽപ്പിച്ച കേസിൽ ഒളിവിൽ പോയ പ്രതി കോടതിയിൽ കീഴടങ്ങി. നരിപ്പറ്റ സ്വദേശി മീത്തലെ പുത്തമ്പുരയിൽ സുരേഷ് ആണ് നാദാപുരം കോടതിയിൽ കീഴടങ്ങിയത്. കഴിഞ്ഞ ഞായറാഴ്ച്ചയാണ് കേസിന് ആസ്പദമായ സംഭവം. പ്രതി ഓട്ടോറിക്ഷയിൽ മദ്യം കടത്തിക്കൊണ്ട് വരുന്നുണ്ടെന്ന രഹസ്യവിവരത്തിന്‍റെ അടിസ്ഥാനത്തിൽ പാതിരിപ്പറ്റ മീത്തൽവയൽ വെച്ച് നാദാപുരം എക്സൈസ് വാഹന പരിശോധന നടത്തുന്നതിനിടയിലാണ് സിവിൽ എക്സൈസ് ഓഫീസർ ശ്രീജേഷിനെ ഓട്ടോ ഇടിച്ച് പരിക്കേൽപ്പിച്ചത്. തുടർന്ന് പ്രതി ഒളിവിൽ പോവുകയായിരുന്നു. കുറ്റ്യാടി പോലീസ് കേസ് രജിസ്റ്റർ ചെയ്ത് അന്വേഷണം നടത്തുന്നതിനിടയിലാണ് കോടതിയിൽ കീഴടങ്ങിയത്. പ്രതിയെ രണ്ടാഴ്ച്ചത്തേക്ക് റിമാൻഡ് ചെയ്തു.

കറി പൗഡർ യൂണിറ്റ് ആരംഭിച്ചു

കൂരാച്ചുണ്ട്: കൃഷിഭവൻ, കുടുംബശ്രീ എന്നിവ സംയുക്തമായി കൂരാച്ചുണ്ട് പഞ്ചായത്ത് പതിനൊന്നാം വാർഡ് എരപ്പാൻതോട് ആരംഭിച്ച വനിതാ സംരംഭമായ കറി പൗഡർ യൂണിറ്റ് പഞ്ചായത്ത് പ്രസിഡന്‍റ് ഒ.കെ. അമ്മദ് ഉദ്ഘാടനം ചെയ്തു. കുടുംബശ്രീ ചെയർപേഴ്സൺ കാർത്തിക വിജയൻ അധ്യക്ഷത വഹിച്ചു. കാറ്റുള്ളമല സെന്‍റ് മേരീസ് ഇടവക വികാരി ഫാ. ജോസ് പെണ്ണാപറമ്പിൽ അനുഗ്രഹപ്രഭാഷണം നടത്തി. കൃഷി ഓഫീസർമാരായ എം. വിധു, രാജി, മുൻ പഞ്ചായത്ത് പ്രസിഡന്‍റ് ജോയി കുര്യൻ മുട്ടുംമുഖത്ത്, ലത ശേഖർ പാറച്ചോട്ടിൽ, ഫാരിഷ അസീസ്, സുനിത, സൗമ്യ എന്നിവർ പ്രസംഗിച്ചു.

വീട്ടിൽ നിന്ന് കഞ്ചാവ് പിടികൂടി

കൊയിലാണ്ടി: കൊയിലാണ്ടിയിൽ വീട്ടിൽ നിന്ന് കഞ്ചാവ് പിടികൂടി. അരിക്കുളം വില്ലേജിൽ മുത്താബി മഞ്ഞളാട്ട് പറമ്പിൽ ബഷീറിന്‍റെ വീട്ടിൽ നിന്നാണ് 1.405 കിലോഗ്രാം കഞ്ചാവ് പിടികൂടിയത്. കൊയിലാണ്ടി എക്സൈസ് ഇൻസ്പെക്ടർ ഇയാളെ അറസ്റ്റ് ചെയ്തു. ഇന്നലെ വൈകീട്ട് രഹസ്യ വിവരം ലഭിച്ചതിന്‍റെ അടിസ്ഥാനത്തിൽ നടത്തിയ പരിശോധനയിലാണ് പ്രതിയെ പിടികൂടിയത്.

കൂരാച്ചുണ്ടിൽ ദുക്‌റാന തിരുനാളിന് കൊടിയേറി

കൂരാച്ചുണ്ട്: സെന്‍റ് തോമസ് ഫൊറോന ഇടവകയിൽ മാർത്തോമാ ശ്ലീഹായുടെ ഒമ്പത് ദിവസം നീണ്ടുനിൽക്കുന്ന ദുക്റാന തിരുനാൾ ആഘോഷങ്ങൾക്ക് തുടക്കം കുറിച്ച് ഇടവക വികാരി ഫാ. വിൻസെന്‍റ് കണ്ടത്തിൽ കൊടിയേറ്റി. തുടർന്ന് നടന്ന വിശുദ്ധ കുർബാന, സന്ദേശം, നൊവേന, തിരുശേഷിപ്പ് വണക്കം എന്നീ തിരുക്കർമ്മങ്ങൾക്ക് അസിസ്റ്റന്‍റ് വികാരി ഫാ.മൈക്കിൾ നീലംപറമ്പിൽ കാർമികത്വം വഹിച്ചു.

കാട്ടാന ആക്രമണം;പ്രദേശം ഷാഫി പറന്പിൽ എംപി സന്ദർശിച്ചു

പെരുവണ്ണാമൂഴി: കാട്ടാന കൃഷി നാശം വിതച്ച ചക്കിട്ടപാറ പഞ്ചായത്തിലെ ഏഴാം വാർഡിൽപെട്ട വട്ടക്കയം ഭാഗത്ത് ഷാഫി പറമ്പിൽ എംപി സന്ദർശിച്ചു. സ്ഥലമുടമ കുംബ്ലാനിക്കൽ ജോർജിനോട് എംപി കാര്യങ്ങൾ ചോദിച്ചറിഞ്ഞു. ജനവാസ മേഖലയിൽ ഇറങ്ങുന്ന കാട്ടാനകളെ കാട് കടത്താൻ സ്ഥിരം ആർആർടി സംവിധാനം വേണമെന്നും തൂക്കു വേലി അടിയന്തരമായി ഈ ഭാഗത്ത് സ്ഥാപിക്കാൻ വനംവകുപ്പ് നടപടി സ്വീകരിക്കണമെന്നും എംപി ആവശ്യപ്പെട്ടു. വാർഡ് മെമ്പർ രാജേഷ് തറവട്ടത്ത്, മണ്ഡലം കോൺഗ്രസ് പ്രസിഡന്‍റ് റെജി കോച്ചേരി, മുൻ മെമ്പർ ജെയിംസ് മാത്യു, ജോസ് പുളിന്താനം, പ്രമോദ് ആന്‍റണി, മുഹമ്മദ് തലക്കാട്ട്, എം.വി. ഷിനോ, വി.ടി. സൂരജ്, ബിജു തോമസ് പുരയിടത്തിൽ എന്നിവരും ഒപ്പം ഉണ്ടായിരുന്നു.

സ്റ്റാർസിന്‍റെ മുട്ടക്കോഴി സംരംഭകത്വ പദ്ധതി വിജയത്തിലേക്ക്

പെരുവണ്ണാമൂഴി: ചക്കിട്ടപാറ പഞ്ചായത്തിലെ മൂന്നു ഉന്നതികളിൽ നടപ്പാക്കിയ സ്റ്റാർസിന്‍റെ മുട്ടക്കോഴി സംരംഭകത്വ പദ്ധതി വിജയത്തിലേക്ക്. നബാർഡിന്‍റെ സാമ്പത്തിക സഹായത്തോടെ സിഎംഐ സഭയുടെ നേതൃത്വത്തിൽ പ്രവർത്തിക്കുന്ന സ്റ്റാർസിന്‍റെ ആഭിമുഖ്യത്തിലാണ് ചക്കിട്ടപാറ പഞ്ചായത്തിലെ നരേന്ദ്രദേവ്, സീതപ്പാറ, കുളത്തൂർ ഉന്നതികളിൽ താമസിക്കുന്ന അറുപതോളം പിന്നോക്ക കുടുംബങ്ങൾക്ക് വരുമാന മാർഗം മെച്ചപ്പെടുത്തുന്ന പദ്ധതി ആരംഭിച്ചത്. മുട്ടക്കോഴി, ചെറു തേനീച്ച വളർത്തൽ പരിപാടികളിൽ ഉന്നതികളിലെ വനിതകൾക്ക് പരിശീലനം നൽകിയാണ് 2024 ഏപ്രിൽ മാസത്തിൽ പദ്ധതിക്ക് തുടക്കമിട്ടത്. എണ്ണായിരം രൂപയോളം വില വരുന്ന 60 ഹൈടെക് കോഴിക്കൂടുകളും ഒരു കുടുംബത്തിന് വർഷത്തിൽ എല്ലാ ദിവസവും മുട്ട നൽകുന്ന മികച്ചയിനം കോഴികളെയും നൽകി. പദ്ധതിയുടെ ഭാഗമായി കുളത്തൂർ ഉന്നതിയിൽ മുട്ടക്കോഴി വളർത്തൽ പരിശീലന കേന്ദ്രവും ആരംഭിച്ചു. പദ്ധതിയിൽ ഉൾപ്പെട്ട 60 കുടുംബങ്ങൾ ഓരോ ആഴ്ചയിലും 4000 മുതൽ 6000 മുട്ടകൾ വരെ മാർക്കറ്റിൽ എത്തിക്കുന്നുണ്ട്. പദ്ധതിക്ക് ചക്കിട്ടപാറ ഗ്രാമ പഞ്ചായത്തിന്‍റെ നിർലോഭമായ സഹായവും ലഭിക്കുന്നുണ്ട്. കോഴിത്തീറ്റക്കായി പഞ്ചായത്ത് രണ്ട് ലക്ഷത്തോളം രൂപ അനുവദിച്ചു. സ്റ്റാർസിന്‍റെ ഡയറക്ടർ ഫാ.ജോസ് പ്രകാശ് സിഎംഐ ആണ് പദ്ധതിയുടെ മാർഗദർശി. പദ്ധതിയുടെ അവലോകന യോഗം കഴിഞ്ഞ ദിവസം കുളത്തൂർ ഉന്നതി സാംസ്കാരിക നിലയത്തിൽ നടന്നു. നബാർഡ് ജില്ലാ വികസന ഓഫീസർ വി.രാഗേഷ് ഉദ്ഘാടനം ചെയ്തു. സ്റ്റാർസ് പ്രൊജക്ട് ഓഫീസർ ജോമോൻ ജോസഫ് അധ്യക്ഷത വഹിച്ചു. കേരളാ ഗ്രാമീൺ ബാങ്ക് ചക്കിട്ടപാറ ബ്രാഞ്ച് അസി. മാനേജർ പി.ശ്രുതി, ബാങ്ക് ഓഫീസ് അസിസ്റ്റന്‍റ് ടി.മനോജ്, സ്റ്റാർസ് പ്രൊജക്ട് മാനേജർ റോബിൻ മാത്യു, ഉന്നതി മൂപ്പൻ ടി. ബാലൻ, പദ്ധതി ഫീൽഡ് കോർഡിനേറ്റർ ഷീന പുരുഷു എന്നിവർ സംബന്ധിച്ചു.

മലമ്പനി: പ്രതിരോധ പ്രവര്‍ത്തനങ്ങള്‍ ഊര്‍ജിതമാക്കി ആരോഗ്യവകുപ്പ്

കോഴിക്കോട്: മഴക്കാലത്ത് മലമ്പനി പകര്‍ത്തുന്ന അനോഫിലസ് കൊതുകിന്‍റെ സാന്ദ്രത വര്‍ധിച്ച് രോഗപ്പകര്‍ച്ചക്ക് സാധ്യതയുള്ളതിനാല്‍ പൊതുജനങ്ങള്‍ ജാഗ്രത പുലര്‍ത്തണമെന്ന് ജില്ലാ മെഡിക്കല്‍ ഓഫീസര്‍ അറിയിച്ചു. ജില്ലാ വെക്ടര്‍ നിയന്ത്രണ യൂണിറ്റിന്‍റെയും മൊബൈല്‍ ഇമിഗ്രന്‍റ് സ്‌ക്രീനിംഗ് ടീമിന്‍റെയും ആഭിമുഖ്യത്തില്‍ പനിയുള്ളവരുടെയും അതിഥി തൊഴിലാളികളുടെയും രക്തപരിശോധന, കെട്ടിട നിര്‍മാണ സ്ഥലങ്ങളിലെ കൊതുകിന്‍റെ ഉറവിട നശീകരണം, കിണറുകളും കുടിവെള്ള ടാങ്കുകളും വലയിട്ട് സുരക്ഷിതമാക്കല്‍, തീരപ്രദേശങ്ങളിലെ കിണറുകളില്‍ ഗപ്പി മത്സ്യം നിക്ഷേപിക്കല്‍, കൊതുക്, കൂത്താടി നശീകരണത്തിനായി സ്പ്രേയിംഗ്, എല്ലാ വാര്‍ഡുകളിലും കൂത്താടി നശീകരണം, ബോധവത്കരണം എന്നീ പ്രവര്‍ത്തനങ്ങള്‍ മലമ്പനി പ്രതിരോധത്തിന്‍റെ ഭാഗമായി നടക്കുന്നുണ്ട്. പനിയോടൊപ്പം ശക്തമായ കുളിരും തലവേദനയും പേശീവേദനയുമാണ് പ്രാരംഭ ലക്ഷണം. വിറയലോടു കൂടി ആരംഭിച്ച് ശക്തമായ പനിയും വിറയലും ദിവസേനയോ ഒന്നിടവിട്ട ദിവസങ്ങളിലോ ആവര്‍ത്തിക്കാം. ഇതോടൊപ്പം മനംപുരട്ടല്‍, ഛര്‍ദ്ദി, ചുമ എന്നിവയും ഉണ്ടാകാം. ഈ ലക്ഷണങ്ങള്‍ കണ്ടാല്‍ ഉടന്‍ അടുത്തുള്ള സര്‍ക്കാര്‍ ആരോഗ്യ കേന്ദ്രത്തില്‍ ചികിത്സ തേടണമെന്ന് ആരോഗ്യ വകുപ്പ് അധികൃതർ അറിയിച്ചു.

എംഡിഎംഎയുമായി യുവാക്കൾ പിടിയിൽ

നാദാപുരം: എംഡിഎംഎയുമായി രണ്ട് യുവാക്കളെ വളയം പോലീസ് അറസ്റ്റ് ചെയ്തു. ചെക്ക്യാട് പുളിയാവ് സ്വദേശികളായ കൈതോറ മീത്തൽ മുഹമ്മദ് സ്വാലിഹ് (29), കൈതോറയിൽ മുഹമ്മദ് അജ്മൽ ( 26) എന്നിവരെയാണ് വളയം സബ് ഇൻസ്പെക്ടർ വി.കെ. മനീഷും സംഘവും അറസ്റ്റ് ചെയ്തത്. പാറക്കടവിന് സമീപം വാഹന പരിശോധന നടത്തവെ സ്കൂട്ടർ യാത്രികരായ യുവാക്കളെ പരിശോധിച്ചപ്പോൾ ഇവരിൽ നിന്നും 1.180 ഗ്രാം എംഡിഎംഎ പോലീസ് കണ്ടെത്തുകയായിരുന്നു. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു. സ്കൂട്ടർ പോലീസ് കസ്റ്റഡിയിലെടുത്തു.

നഗരത്തില്‍ ആറുമാസത്തിനിടെ 2.5 കിലോ എംഡിഎംഎ പിടികൂടി

102.53 കിലോ കഞ്ചാവും പിടികൂടി കോഴിക്കോട്: കോഴിക്കോട് സിറ്റിയില്‍ കഴിഞ്ഞ ആറുമാസത്തിനിടയില്‍ എക്‌സൈസ് വകുപ്പ് പിടികൂടിയത് രണ്ടര കിലോ എംഡിഎംഎ. 102.53 കിലോ കഞ്ചാവും പിടിച്ചെടുത്തിട്ടുണ്ട്. ലഹരിക്കെതിരായ പരിശോധനയും നടപടികളും ശക്തമാക്കിയ സാഹചര്യത്തിലാണ് ഇത്രയും ലഹരിവസ്തുക്കള്‍ പിടച്ചെടുത്തത്.മയക്കുമരുന്നുമായി ബന്ധപ്പെട്ട് 1490 കേസുകള്‍ രജിസ്റ്റര്‍ ചെയ്തിട്ടുണ്ട്. എന്‍ഡിപിഎസ് ആക്ടിലെ 27 (ബി), (എ) വകുപ്പുകള്‍ പ്രകാരം 1345 കേസുകളും രജിസ്റ്റര്‍ ചെയ്തു.മയക്കുമരുന്ന് കൈവശം വച്ചതിനും വില്‍പന നടത്തിയതിനുംമറ്റുമായി 1584 പേരെ അറസ്റ്റ് ചെയ്തു.ഈ കാലയളവില്‍ ഒന്നര ഗ്രം ബ്രൗണ്‍ ഷുഗറും 16.63 ഗ്രം ഹഷീഷും പിടികൂടി. പതിനഞ്ചു കഞ്ചാവു ചെടികള്‍ നശിപ്പിച്ചു.79 ഗ്രം മെറ്റാഫ്‌ളാം ഗുളികകളും പിടികൂടി. ഫെബ്രുവരി മാസത്തിലാണ് ഏറ്റവും കൂടുതല്‍ എംഡിഎംഎ പിടികൂടിയത്.1233 ഗ്രാം. ജനുവരി മാസത്തില്‍ 546.42 ഗ്രാമും മേയില്‍ 372 ഗ്രാമും മാര്‍ച്ചില്‍ 237 ഗ്രാമും ഏപ്രിലില്‍ 152 ഗ്രാമും പിടിച്ചെടുത്തു. ഏറ്റവും കൂടതല്‍ കഞ്ചാവ് പിടികൂടിയത് ഫെബ്രുവരി മാസത്തിലാണ്. 35.88 കിലോഗ്രാം. ഏപ്രില്‍ മാസത്തില്‍ 25.25 കിലോഗ്രാമും ജൂണില്‍ 25 കിലോഗ്രാമും ജനുവരിയില്‍ 10.64 കിലോഗ്രാമും കഞ്ചാവ് പിടിച്ചെടുത്തിട്ടുണ്ട്.

മലയോര മേഖലയിൽ അതിശക്തമായ മഴ, പുഴ കരകവിഞ്ഞു, വെള്ളക്കെട്ട്

കൂടരഞ്ഞി: മലയോര മേഖലയിൽ ഇന്നലെ അതിശക്തമായ മഴ. ഉൾവനങ്ങളിൽ പെയ്ത മഴയിൽ ജലാശയങ്ങളും പുഴകളും അപകടകരമാകാംവിധം നിറഞ്ഞു കവിഞ്ഞു. കൂട്ടക്കര പാലം കരകവിഞ്ഞൊഴുകിയതിനെ തുടർന്ന് ഗതാഗതം തടസപ്പെട്ടു. പഞ്ചായത്ത് പ്രസിഡന്‍റ് ആദർശ് ജോസഫിന്‍റെ നിയന്ത്രണത്തിൽ ഗതാഗതം വഴിതിരിച്ചുവിട്ടു. പുഴയ്ക്കരികിൽ താമസിക്കുന്നവർക്ക് ജാഗ്രത നിർദ്ദേശം നൽകി. റോഡിലേക്ക് തെങ്ങ് മുറിഞ്ഞു വീണു കൊയിലാണ്ടി: ഉള്ളിയേരി- അത്തോളി റൂട്ടിൽ വേളൂരിൽ ശക്തമായ കാറ്റിൽ തെങ്ങ്പൊട്ടി റോഡിന് കുറുകെ വീണു. ഗതാഗതം തടസപ്പെട്ടു. ബുധനാഴ്ച ഉച്ചയ്ക്ക് 12 ഓടുകൂടിയായിരുന്നു സംഭവം. വിവരം കിട്ടിയതിനെ തുടർന്ന് കൊയിലാണ്ടിയിൽ നിന്നും അഗ്നിരക്ഷാസേന സ്റ്റേഷൻ ഓഫീസർ വി.കെ ബിജുവിന്‍റെ നേതൃത്വത്തിൽ എത്തുകയും മരം മുറിച്ച് മാറ്റി ഗതാഗതം പുനസ്ഥാപിക്കുകയും ചെയ്തു. ഫയർ ആൻഡ് റെസ്ക്യു ഓഫീസർമാരായ എം. ജാഹിർ, ജിനീഷ് കുമാർ, സി. സിജിത്ത്, എസ്.പി. സുജിത്ത്, ഹോഗാർഡുമാരായ പ്രദീപ്കുമാർ, ഓം പ്രകാശ് എന്നിവർ രക്ഷാപ്രവർത്തനത്തിൽ ഏർപ്പെട്ടു. വീട് തകർന്നു നാദാപുരം: നരിക്കാട്ടേരിയിൽ കനത്ത മഴയിൽ വീട് തകർന്നു. പുത്തൻ പീടികയിൽ കല്യാണിയുടെ വീടാണ് തകർന്നത്. ബുധനാഴ്ച്ച പുലർച്ചെയാണ് വീട് നിലം പൊത്തിയത്. ഓടുമേഞ്ഞ വീട് പൂർണമായും തകർന്നിട്ടുണ്ട്. മകൻ സന്തോഷ് ജോലി ആവശ്യർഥം വയനാട് പോയതിനാൽ അമ്മ കല്യാണി മറ്റൊരു മകന്‍റെ വീട്ടിലായിരുന്നു. വീട്ടിൽ ആളില്ലാത്തതിനാൽ വലിയ ദുരന്തമാണ് ഒഴിവായിത്. എല്ലാ വീട്ടു ഉപകരണങ്ങളും, ഫണ്ണിച്ചറുകളും നശിച്ചു. ലക്ഷങ്ങളുടെ നാശനഷ്ടം ഉണ്ടായിട്ടുണ്ട്. മരം വീണ് വൈദ്യുത പോസ്റ്റുകൾ ഒടിഞ്ഞു കോടഞ്ചേരി: മഴയോടൊപ്പം വീശി അടിച്ച ശക്തമായ കാറ്റിനെ തുടർന്ന് മരം വീണ് വൈദ്യുത പോസ്റ്റുകൾ ഒടിഞ്ഞു. ഇന്നലെ ഉച്ചകഴിഞ്ഞ് വീശി അടിച്ച ശക്തമായ കാറ്റിലാണ് കോടഞ്ചേരി സെക്ഷൻ പരിധിയിലെ മുരിക്കിൻചാൽ കയറ്റത്തിലുള്ള മൂന്ന് എച്ച്ടി വൈദ്യുത പോസ്റ്റുകൾ ഒടിഞ്ഞത്. ഇതിനെ തുടർന്ന് ഈ ഭാഗത്തെ വാഹനഗതാഗതം തടസപ്പെട്ടു.വാഹനങ്ങൾ നൂറനാനിപ്പടി വഴി കടത്തി വിട്ടു.

ദുക്റാന തിരുനാൾ ആഘോഷത്തിന് ഇന്ന് കൊടിയേറും

കൂരാച്ചുണ്ട്: സെന്‍റ് തോമസ് ഫൊറോന ഇടവകയിൽ മാർത്തോമാ ശ്ലീഹായുടെ ഒമ്പത് ദിവസം നീണ്ടുനിൽക്കുന്ന ദുക്റാന തിരുനാൾ ആഘോഷങ്ങൾക്ക് ഇന്ന് കൊടിയേറും. രാവിലെ ആറിന് ആരാധന, ജപമാല, കുമ്പസാരം, 6.25ന് കൊടിയേറ്റ്, 6.30ന് വിശുദ്ധ കുർബാന, നൊവേന, തിരുശേഷിപ്പ് വണക്കം, നേർച്ച. വൈകുന്നേരം നാലിന് ആരാധന, ജപമാല, കുമ്പസാരം, 4.30ന് വിശുദ്ധ കുർബാന, സന്ദേശം, നൊവേന, തിരുശേഷിപ്പ് വണക്കം, നേർച്ച. 28ന് രാവിലെ ആറിന് ആരാധന, ജപമാല, കുമ്പസാരം, 6.30ന് വിശുദ്ധ കുർബാന, നൊവേന, തിരുശേഷിപ്പ് വണക്കം, നേർച്ച. രാവിലെ ഒന്പത് മുതൽ വൈകുന്നേരം നാല് വരെ തിരുഹൃദയ കൺവൻഷൻ (ഫാ. ബെന്നി പുത്തൻനടയിൽ നയിക്കും) തുടർന്ന് കൺവൻഷൻ സമാപനം, വിശുദ്ധ കുർബാന, സന്ദേശം, നൊവേന, തിരുശേഷിപ്പ് വണക്കം എന്നിവയ്ക്ക് ബിഷപ് മാർ റെമീജിയോസ് ഇഞ്ചനാനിയിൽ കാർമികത്വം വഹിക്കും. പ്രധാന തിരുനാൾ ദിനമായ മൂന്നിന് രാവിലെ ആറിന് ആരാധന, ജപമാല, കുമ്പസാരം, വൈകുന്നേരം ആറിന് വിശുദ്ധ കുർബാന, സന്ദേശം, നൊവേന, ലദീഞ്ഞ്, തിരുശേഷിപ്പ് വണക്കം, നേർച്ച. പത്തിന് ആഘോഷമായ തിരുനാൾ കുർബാന, സന്ദേശം, നൊവേന, ലദീഞ്ഞ്, തിരുശേഷിപ്പ് വണക്കം, സ്നേഹവിരുന്ന് എന്നിവയോടെ സമാപിക്കും.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]