ADVERTISEMENT

ADVERTISEMENT

പൗരബോധമുള്ള വിദ്യാർഥിസമൂഹം നാടിന്‍റെ നന്മ: ഡോ. സിറിയക് തോമസ്

പത്തനംതിട്ട: പൗരബോധവും ലക്ഷ്യ ബോധവും അന്യം നിന്നു പോകുന്ന സാമൂഹ്യവ്യവസ്ഥിതിയിൽ വിദ്യാർഥിസമൂഹത്തിന്‍റെ തിരിച്ചറിവ് നാടിന്‍റെ നന്മയാകുമെന്ന് ദേശീയ ന്യൂനപക്ഷ വിദ്യാഭ്യാസ കമ്മീഷനംഗവും മഹാത്മാഗാന്ധി സർവകലാശാല മുൻ വൈസ്ചാൻസലറുമായ ഡോ.സിറിയക് തോമസ്. പത്തനംതിട്ട മാർത്തോമ്മാ ഹയർസെക്കൻഡറി സ്കൂളിൽ വിദ്യാഭ്യാസ സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം.

മാർത്തോമ്മ സഭ റാന്നി- നിലയ്ക്കൽ ഭദ്രാസനാധ്യക്ഷൻ ഡോ. ജോസഫ് മാർ ബർണബാസ് സഫ്രഗൻ മെത്രാപ്പോലീത്ത സ്കൂൾ പ്രവേശനോത്സവമായ ജ്യോതിർഗമയ - 2025 ഉദ്ഘാടനം ചെയ്തു.

പിടിഎ പ്രസിഡന്‍റ് മാത്യു കെ. തമ്പി അധ്യക്ഷത വഹിച്ചു. മുൻസിപ്പൽ കൗൺസിലർ സിന്ധു അനിൽ, റവ. സജി തോമസ് സ്കൂൾ പ്രിൻസിപ്പൽ ജിജി മാത്യു സ്ക്കറിയ, ഹെഡ്മിസ്ട്രസ് മിനി തോമസ്, എ.റ്റി. ജോൺ, കെ.കെ. ചെറിയാൻജി, കൃഷ്ണപ്രിയ ബി.നായർ, സി.കെ. സജി, ക്രിസ്റ്റീന ചാണ്ടി എന്നിവർ പ്രസംഗിച്ചു.

ADVERTISEMENT

നാടിനെ മദ്യത്തിൽ മുക്കിക്കൊല്ലാൻ ശ്രമം: മദ്യവർജന ബോധവത്കരണ സമിതി

പത്തനംതിട്ട: നിലന്പൂർ ഉപതെരഞ്ഞെടുപ്പിനുശേഷം നാടൊട്ടുക്ക് മദ്യശാലകൾ പുതുതായി ആരംഭിക്കാനുള്ള നീക്കത്തിലാണ് സർക്കാരെന്നും ഇതിനെതിരേ ശക്തമായ ജനവികാരം ഉയർന്നുവരണമെന്നും കേരള മദ്യവർജന ബോധവത്കരണ സമിതി. കെഎസ്ആർടിസി ബസ് സ്റ്റേഷനുകളിൽപോലും ബെവ്കോയുടെയും കൺസ്യൂമർഫെഡിന്‍റെയും ഔട്ട് ലെറ്റുകൾ തുടങ്ങുന്നത് ദൂരവ്യാപകമായ പ്രത്യാഘാതങ്ങൾക്ക് വഴിതെളിക്കുമെന്നും സമിതി അഭിപ്രായപ്പെട്ടു. ലോക ലഹരിവിരുദ്ധദിനമായ 26ന് സർക്കാരിന്‍റെ മദ്യനയത്തിനെതിരേ പത്തനംതിട്ടയിൽ വിപുലമായ പരിപാടി സംഘടിപ്പിക്കാനും യോഗം തീരുമാനിച്ചു. സംസ്ഥാന രക്ഷാധികാരി ഡോ. തോളൂർ ശശിധരൻ ഉദ്ഘാടനം ചെയ്തു. സംസ്ഥാന പ്രസിഡന്‍റ് സോമൻ പാന്പായിക്കോട് അധ്യക്ഷത വഹിച്ചു. വൈസ് പ്രസിഡന്‍റ് സാമുവേൽ പ്രക്കാനം ജനറൽ സെക്രട്ടറി നാസർ ഹമീദ്, സാം ചെക്കാട്, ബേബിക്കുട്ടി ഡാനിയേൽ, കെ. ജമീല മുഹമ്മദ്, ഗിരിജ മോഹൻ, കെ.എ.കമറുദ്ദീൻ തുടങ്ങിയവർ പ്രസംഗിച്ചു.

നാട്ടുകടവ് റോഡിലെ മെറ്റൽക്കൂന യാത്രയ്ക്കു ഭീഷണി

തിരുവല്ല: നഗരസഭയിൽ നാട്ടുകടവ് ഏഴാം വാർഡിലെ റോഡ് നവീകരണത്തിനായി കരാറുകാരൻ റോഡിൽ മെറ്റൽ കൂട്ടിയിട്ടിരിക്കുന്നത് അപകടം ക്ഷണിച്ചു വരുത്തുന്നു. ഇരുചക്ര വാഹന യാത്രക്കാർ ഉൾപ്പെടെ അപകടത്തിൽപെട്ടിട്ടും മെറ്റൽ റോഡിൽ നിന്നും നീക്കാൻ നടപടിയുണ്ടായിട്ടില്ല. കിഴക്കൻമുത്തൂർ - മനയ്ക്കച്ചിറ റോഡിൽ ശ്രീനാരായണ ഗുരുദേവ ക്ഷേത്രത്തിന് സമീപമാണ് മെറ്റൽകൂന. റോഡിലേക്ക് വീണു വാഹനങ്ങൾക്ക് മാർഗതടസം ഉണ്ടാകുന്ന രീതിയിലാണ് മെറ്റൽ കിടക്കുന്നത്. വേഗത്തിൽ എത്തുന്ന വാഹനം വളവിൽ കൂട്ടിയിട്ടിരിക്കുന്ന കൂന കാണാതെ അപകടത്തിൽപെടുന്നത് പതിവാണ്. കാൽനടയാത്രക്കാർക്കും കൂന അപകടമുണ്ടാക്കും. ടികെ റോഡിൽ പണികൾ നടക്കുന്നതു കാരണം വാഹനങ്ങൾ മനയ്ക്കച്ചിറ - കിഴക്കൻമുത്തൂർ റോഡിലൂടെ വഴിതിരിച്ചുവിട്ടിരിക്കുന്നതിനാൽ തിരക്കും ഏറെയാണ്.

മലയോരമേഖലയിൽ മഴക്കാല രോഗവ്യാപനസാധ്യത

റാന്നി: തുടർച്ചയായ മഴയും വെള്ളക്കെട്ടും കാരണം മലയോരത്ത് പകർച്ച വ്യാധികളുടെ വ്യാപന സാധ്യതയേറി. കൊതുക്, എലി തുടങ്ങിയവയിലൂടെ ഡെങ്കി, എലിപ്പനി ഉൾപ്പെടെയുള്ള രോഗങ്ങളുടെ ഭീഷണി നിലനിൽക്കുകയാണ്. ഇത്തവണ മുൻ വർഷത്തെ അപേക്ഷിച്ച് വൻ തോതിലാണ് കൊതുകു വ്യാപനം. ഡെങ്കി വ്യാപനവും കൂടുതലാണ്. കൊതുകുകളുടെ ബാഹുല്യം നിമിത്തം നശിപ്പിക്കാനോ പ്രതിരോധിക്കാനോ കഴിയാത്ത അവസ്ഥയിലാണ് പലരും. വൻകിട തോട്ടമുടമകൾ പലരും ചെറുതും വലുതുമായ ഏരിയകൾ കൈതക്കൃഷിക്കായി വിട്ടുകൊടുത്തിരിക്കുകയാണ്. ജനവാസ മേഖലകൾക്കു സമീപവും ചുറ്റിലും മിക്ക ഭാഗങ്ങളിലും കൈതക്കൃഷി വ്യാപകമായതോടെ കൊതുകുകളും എലികളും വർധിച്ചു. കൈതച്ചെടിയിലേക്ക് വീഴുന്ന മഴവെള്ളം താഴാതെ അതേപടി നിൽക്കുന്നതിനാൽ ഒരു കൈതച്ചെടിക്കുള്ളിൽ നിന്നു പോലും കൊതുകുകളുടെ വ്യാപനം വേഗത്തിലാക്കുന്നു. ശുദ്ധജലത്തിൽ മുട്ടയിട്ടു പെരുകുന്ന ഈഡിസ് വിഭാഗത്തിൽപെട്ട കൊതുകുകളാണ് ഡെങ്കി പോലെയുള്ള മാരകരോഗങ്ങൾ പരത്തുന്നത്. ടാപ്പിംഗ് നിലച്ച റബർ തോട്ടങ്ങളിലെ ചിരട്ടകളിലും കാടുകൾ തെളിക്കാത്തതും കൊതുകുകളുടെ വളർച്ചയ്ക്കു സഹായകരമാണ്.

തുന്പമൺ വൈഎംസിഎയിൽ സ്നേഹോത്സവ് - 2025

തുന്പമൺ: മദ്യത്തിന്‍റെയും മയക്കുമരുന്നിന്‍റെയും ഉപയോഗവും വില്പനയും വർധിച്ചു വരുന്ന സാഹചര്യത്തിൽ ധാർമികതയ്ക്ക് ഏറെ പ്രാധാന്യം നൽകുന്ന വിദ്യാഭ്യാസ രീതിയാണ് വർത്തമാനകാലത്തിന്‍റെ ആവശ്യമെന്ന് പത്തനംതിട്ട ജില്ലാ പഞ്ചായത്ത് പ്രസിഡന്‍റ് ജോർജ് ഏബ്രഹാം. തുമ്പമൺ വൈഎംസിഎയിൽ സംഘടിപ്പിച്ച സ്നേഹോത്സവ് - 2025 ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. പ്രസിഡന്‍റ് ഷിബു കെ. ഏബ്രഹാം അധ്യക്ഷത വഹിച്ചു. വൈഎംസിഎ സംസ്ഥാന പ്രസിഡന്‍റ് പ്രഫ. അലക്സ് തോമസ് മുഖ്യ പ്രഭാഷണം നടത്തി. പന്തളം ബ്ലോക്ക് പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ ലാലി ജോൺ അനുമോദന സന്ദേശം നൽകി. ഗ്രാമ പഞ്ചായത്ത് വൈസ് പ്രസിഡന്‍റ് തോമസ് ടി. വർഗീസ് , സ്റ്റാൻഡിംഗ് കമ്മിറ്റി ചെയർ പേഴ്സൺ ഗീതാറാവു, തുമ്പമൺ എംജി എച്ച്എസ് എസ് പ്രിൻസിപ്പൽ ഡോ. മാത്യു പി. ജോർജ്, ഹെഡ് മാസ്റ്റർ റോയി ജോൺ , വൈഎംസിഎ സീനിയർ നേതാവ് വി.ടി. ഡേവിഡ്, സെക്രട്ടറി ഇ. കെ. രാജൻ, മുൻ പ്രസിഡന്‍റ് കെ. എൻ. തോമസ് എന്നിവർ പ്രസംഗിച്ചു. വെറ്ററൻസ് അത് ലറ്റിക് മത്സരങ്ങളിലെ ദേശീയ ചാമ്പ്യൻ വി. ജി. മാത്യു. എംജി യൂണിവേഴ്സിറ്റി ബിഎഡ് പരീക്ഷയിൽ ആറാം റാങ്ക് നേടിയ ജെയ്നി മേരി ജോ എന്നിവരെയും എസ്എസ്എൽസി ,പ്ലസ് ടു പരീക്ഷകളിൽ എല്ലാ വിഷയങ്ങളിലും എ പ്ലസ് നേടിയ വിദ്യാർഥികളേയും ചടങ്ങിൽ അവാർഡുകൾ നൽകി ആദരിച്ചു.

ടിപ്പറുകൾ കൂട്ടിയിടിച്ചു

ഏഴംകുളം: തൊടുവക്കാട്ട് ടിപ്പറുകൾ കൂട്ടിയിടിച്ച് അപകടം. സമീപത്തുണ്ടായിരുന്ന വൈദ്യുതി പോസ്റ്റും അപകടത്തിൽ തകർന്നു. ‌ഒരു ടിപ്പറിന്‍റെ ടയറിന് ഉണ്ടായ പ്രശ്നമാണ് അപകടത്തിന് കാരണമായത്. ടയർ പൂർണമായും തേയ്മാനം സംഭവിച്ച സ്ഥിതിയിലായിരുന്നു. രാത്രികാലങ്ങളിലും അമിതവേഗത്തിൽ പായുന്ന ടിപ്പറുകൾ വലിയ അപകടങ്ങൾക്ക് കാരണമാകുമെന്ന് നാട്ടുകാർ പറഞ്ഞു. ഇന്നലെ രാത്രിയിലും പച്ചമണ്ണ് കയറ്റിയ ടിപ്പർ ലോറി നാട്ടുകാർ തടഞ്ഞിരുന്നു.

ഒളിന്പിക്ദിനാഘോഷം നാളെ മുതൽ

പത്തനംതിട്ട: ജില്ലാ ഭരണകൂടവും ജില്ലാ ഒളിന്പിക് അസോസിയേഷനും ജില്ലാ സ്പോർട്സ് കൗൺസിലും ചേർന്നു 23നു രാജ്യാന്തര ഒളിന്പിക്ദിനം ആഘോഷിക്കുന്നതിന്‍റെ മുന്നോടിയായി നാളെ മുതൽ 23 വരെ ജില്ലയിലെ വിവിധ ഭാഗങ്ങളിൽ കായികമത്സരം, കായികപ്രദർശനം, യോഗ, കളരിപ്പയറ്റ്, മിനി മാരത്തൺ, പ്രസംഗം, ക്വിസ്, ചിത്രരചനാ മത്സരങ്ങൾ എന്നിവ നടത്തും. നാളെ 9.30ന് പത്തനംതിട്ട കാതോലിക്കേറ്റ് കോളജ് ഗ്രൗണ്ടിൽ ജില്ലാ സ്പോർട്സ് കൗൺസിൽ പ്രസിഡന്‍റ് കെ. അനിൽ കുമറിനു ദീപശിഖ കൈമാറി കളക്ടർ എസ്. പ്രേംകൃഷ്ണൻ ദിനാഘോഷ പരിപാടികൾക്ക് തുടക്കം കുറിക്കും. 21നു യോഗദിനത്തോടനുബന്ധിച്ച് പത്തനംതിട്ടയിലും തിരുവല്ലയിലും യോഗ പ്രദർശനം സംഘടിപ്പിക്കും. 22നു ജില്ലയിലെ വിവിധ ഭാഗങ്ങളിൽ കായികമത്സരങ്ങൾ, സെമിനാറുകൾ എന്നിവ നടക്കും. 23ന് ഉച്ചകഴിഞ്ഞ് മൂന്നിന് ഒളിന്പിക് റാലി തിരുവല്ലയിൽ വൈഎംസിഎയ്ക്കു സമീപമുള്ള മുനിസിപ്പൽ ഗ്രൗണ്ടിൽ നടത്തും.

ഇരവിപേരൂരില്‍ നാട്ടുവിപണി

ഇരവിപേരൂർ: ശുദ്ധമായ നാട്ടുവിഭവങ്ങള്‍ ന്യായവിലയ്ക്കു വിറ്റഴിക്കാന്‍ അവസരമൊരുക്കി ഇരവിപേരൂര്‍ ഗ്രാമപഞ്ചായത്ത്. നെല്ലാട് ഗ്രാമചന്ത കൃഷിക്കൂട്ടം ഒരുക്കുന്ന നാട്ടുവിപണിയില്‍ പച്ചക്കറികളും പഴങ്ങളുമടക്കമുള്ള ഉത്പന്നങ്ങളുമായി നിരവധി കര്‍ഷകരാണ് എത്തുന്നത്. ഗ്രാമപഞ്ചായത്തും കൃഷിഭവനും സംയുക്തമായി സംഘടിപ്പിക്കുന്ന നാട്ടുവിപണി എല്ലാ വ്യാഴാഴ്ചയും പ്രവര്‍ത്തിക്കും. പേരയ്ക്ക, കിളിച്ചുണ്ടന്‍ മാമ്പഴം, ഡ്രാഗണ്‍ ഫ്രൂട്ട്, അവകാഡോ, നാടന്‍ ചക്ക തുടങ്ങിയ ഫലങ്ങളും തേങ്ങ, തൈര്, വാഴക്കൂമ്പ്, പാൽ, പച്ചക്കറി, മുട്ട ഉത്പന്നങ്ങളും വിപണിയില്‍ ലഭിക്കും. മൂല്യവര്‍ധിത ഉത്പന്നങ്ങള്‍ നിര്‍മിച്ച് വിപണിയിലെത്തിക്കുന്നതിലൂടെ വനിതകള്‍ക്ക് ചെറുകിട സംരംഭകരായി വളരാനുള്ള അവസരവും ഒരുക്കുന്നു. തനതുകൃഷി പ്രചരിപ്പിക്കുക, ന്യായവില കര്‍ഷകന് ലഭ്യമാക്കുക, ഗുണമേന്മയുള്ള സാധനങ്ങള്‍ വില്‍ക്കുവാനും വാങ്ങുവാനും കഴിയുന്ന സാഹചര്യം ഉറപ്പാക്കുക എന്നിവയാണ് നാട്ടുവിപണിയിലൂടെ ലക്ഷ്യം വയ്ക്കുന്നതെന്ന് പ്രസിഡന്‍റ് കെ. ബി. ശശിധരന്‍ പിള്ള പറഞ്ഞു.

ആറന്മുള ഇലക്‌ട്രോണിക്സ് ക്ലസ്റ്റർ പദ്ധതി നടപ്പാക്കണം: ആന്‍റോ ആന്‍റണി

പത്തനംതിട്ട: ആറന്മുള ഇലക്‌ട്രോണിക്സ് മാനുഫാക്ചറിംഗ് ക്ലസ്റ്റർ പ്രോജക്ട് യാഥാർഥ്യമാക്കാൻ സർക്കാർ മുൻകൈയെടുക്കണമെന്ന് ആന്‍റോ ആന്‍റണി എംപി ആവശ്യപ്പെട്ടു. പത്തനംതിട്ട ജില്ലയുടെയും സമീപപ്രദേശങ്ങളുടെയും വികസനപ്രക്രിയയിൽ സമഗ്രമായ മുന്നേറ്റം സാധ്യമാക്കുന്നതാണ് നിർദ്ദിഷ്ട ക്ലസ്റ്റർ പ്രോജക്ടെന്ന് എംപി അഭിപ്രായപ്പെട്ടു. 5000 കോടി രൂപ മുതൽമുടക്കുള്ളതും ആയിരക്കണക്കിന് ആളുകൾക്ക് നേരിട്ടും പതിനായിരക്കണക്കിന് ആളുകൾക്ക് പരോക്ഷമായും തൊഴിൽ നൽകുന്ന ഈ പദ്ധതി പത്തനംതിട്ടയിലെ ഏറ്റവും വലിയ വികസന പദ്ധതിയാണ്. കേന്ദ്ര സംസ്ഥാന സർക്കാരുകളുടെ സംയുക്ത പദ്ധതി ആയിട്ടാണ് ഇതു നടപ്പാക്കുന്നത്. പദ്ധതിയുടെ മുതൽമുടക്കിൽ മുഖ്യപങ്കും വഹിക്കുന്നത് കേന്ദ്രസർക്കാരാണ്. പദ്ധതി യാഥാർഥ്യമായാൽ തൊഴിലിനു വേണ്ടി പലായനം ചെയ്യേണ്ടി വരുന്ന പത്തനംതിട്ട ജില്ലക്കാർക്ക് ഏറ്റവും വലിയ ആശ്വാസമായിരിക്കുമെന്ന് ആന്‍റോ ആന്‍റണി ചൂണ്ടിക്കാട്ടി. പ്രവാസി ജില്ലയായ പത്തനംതിട്ടയിൽ പുതിയ തലമുറയ്ക്ക് തൊഴിലവസരം ലഭിക്കുന്ന ഒരു പദ്ധതിയെ സ്വാഗതം ചെയ്യേണ്ടതിനു പകരം അതിനെയും ഇല്ലാതാക്കാൻ കപട പരിസ്ഥിതിവാദികൾ കടന്നുവരുന്നുണ്ട്. കടുത്ത വികസന പ്രതിസന്ധിയിലൂടെ കടന്നുപോകുന്ന പത്തനംതിട്ട ജില്ലയ്ക്ക് ആശ്വാസം പകരുന്ന ഈ പദ്ധതി യാഥാർഥ്യമാക്കാൻ സർക്കാർ മുൻകൈയെടുക്കുകയാണ് വേണ്ടെതന്ന് എംപി അഭിപ്രായപ്പെട്ടു.

ആറന്മുള ഇലക്‌ട്രോണിക്സ് ക്ലസ്റ്റർ; തീരുമാനം വൈകിയേക്കും

കോഴഞ്ചേരി: നിർദിഷ്ട ആറന്മുള വിമാനത്താവളം പദ്ധതി പ്രദേശത്ത് ഇലക്‌ട്രോണിക്സ് ക്ലസ്റ്റർ ആരംഭിക്കുന്നതു സംബന്ധിച്ച നിർദേശത്തിൽ അന്തിമ തീരുമാനം വൈകിയേക്കും. പദ്ധതിയെ സംബന്ധിച്ച് രാഷ്‌ട്രീയനിലപാട് നിർണായകമാകുകയാണ്. ആറന്മുളയിൽ നിലംനികത്തിയ സ്ഥലത്ത് ഒരു വ്യവസായ പദ്ധതിയും പാടില്ലെന്ന നിലപാടിലാണ് സിപിഐ. ഇതേ നിലപാട് കൃഷിമന്ത്രി പരസ്യമാക്കുകയും ചെയ്തു. നികത്തിയെടുത്ത സ്ഥലത്തു പദ്ധതി വരുന്നതിനെ സിപിഎം അനുകൂലിക്കുന്നുണ്ട്. നീർച്ചാലുകൾ സംരക്ഷിച്ച് പദ്ധതിയുമായി മുന്നോട്ടുപോകണമെന്ന അഭിപ്രായമാണ് പാർട്ടി നേതാക്കൾക്കുള്ളത്. പ്രദേശത്തെ നീര്‍ച്ചാലുകള്‍ സംരക്ഷിക്കുകയും ജലനിര്‍ഗമന മാർഗങ്ങൾ സുഗമമാക്കുകയും ചെയ്തില്ലെങ്കില്‍ അതിരൂക്ഷമായ വെള്ളക്കെട്ട് പദ്ധതി പ്രദേശത്തും സമീപ സ്ഥലങ്ങളിലും ഉണ്ടാകുമെന്ന് വിദഗ്ധാഭിപ്രായമുണ്ട്. നീര്‍ച്ചാലുകള്‍ പൂര്‍ണമായും സംരക്ഷിച്ചാല്‍ അനുയോജ്യമായ രീതിയില്‍ കൃഷി നടത്താനുള്ള സാധ്യത ഏറെയാണെന്ന് കൃഷിവകുപ്പിലെ തന്നെ ഉന്നത ഉദ്യോഗസ്ഥർ പറയുന്നു. പുന്നയ്ക്കാട്, തെക്കേമുറി, കുറുന്താര്‍ ഈ മൂന്നു പാടങ്ങളും നിര്‍ദ്ദിഷ്ട വിമാനത്താവള പദ്ധതി പ്രദേശത്തിനടുത്താണ്. വെള്ളക്കെട്ടുകള്‍ ഉള്ളപ്പോള്‍ തന്നെ ഈ പ്രദേശങ്ങള്‍ ഉള്‍പ്പെടെ 120 ഹെക്ടര്‍ സ്ഥലത്ത് നെല്‍കൃഷി ചെയ്യുന്നുണ്ട്. ഇതു കൂടാതെ തെച്ചിക്കാവ്, തൂമ്പുപാടി, പന്നിവേലിച്ചിറ, ആറന്മുള തുടങ്ങിയ പാടശേഖരങ്ങളിലും കൃഷി നടത്തുന്നുണ്ട്. ആറന്മുള എന്‍ജിനിയറിംഗ് കോളജിന്‍റെ സമീപത്തും എതിര്‍വശത്തുമുള്ള പാടശേഖരങ്ങളില്‍ ഇത്തവണ കൃഷി വിജയിച്ചില്ല. അപ്രതീക്ഷമായ മഴയും വെളളക്കെട്ടുമാണ്. ഇവിടെയാണ് മുഖ്യമന്ത്രി പിണറായി വിജയന്‍ വിത്തു വിതച്ച് നെല്ല് കൊയ്‌തെടുത്തതും ആറന്മുള അരിയെന്ന പേരില്‍ വിപണിയിലെത്തിച്ചതും. എന്നാല്‍ ഈ പ്രദേശത്തുള്‍പ്പെടെയുള്ള നീര്‍ച്ചാലുകള്‍ സംരക്ഷിക്കുന്നതിനു ശാസ്ത്രീയമായ മാര്‍ഗങ്ങള്‍ സര്‍ക്കാരിന്‍റെ ഭാഗത്തുനിന്നും ഉണ്ടാകുന്നില്ലെന്ന് കൃഷിവകുപ്പ് ഉദ്യോഗസ്ഥര്‍ തന്നെ കുറ്റപ്പെടുത്തുന്നു. കഴിഞ്ഞ മഴയ്ക്ക് ആറന്മുള എന്‍ജിനിയറിംഗ് കോളജിന്‍റെ സമീപത്തുള്ള പാടശേഖരത്ത് കയറിയ വെള്ളം ഇറങ്ങാതെ കെട്ടിക്കിടക്കുകയാണ്. ഇതിന്‍റെ പരിസരത്താണ് തണല്‍വൃക്ഷങ്ങള്‍ സ്ഥാപിച്ച് ഗ്രാമീണ വിനോദത്തിന് പഞ്ചായത്ത് പ്രാധാന്യം നല്‍കുന്നത്. നിര്‍ദിഷ്ട വിമാനത്താവള പ്രദേശത്തും അതിനോടു ചേര്‍ന്നും വ്യാപിച്ചുകിടക്കുന്ന മല്ലപ്പുഴശേരി, മെഴുവേലി പഞ്ചായത്തുകളിലൂടെയും തൊട്ടടുത്തുകിടക്കുന്ന പാടശേഖരങ്ങളിലുടെയും കടന്നുപോകുന്ന തോടുകള്‍ നവീകരിക്കുകയാണ് ആദ്യം ചെയ്യേണ്ടതെന്ന് കൃഷിക്കാരും സമീപവാസികളും പറയുന്നു. ഭൂമിയിൽ അവകാശം തനിക്കെന്ന് ഏബ്രഹാം കലമണ്ണിൽ ആറന്മുളയിലെ നിർദിഷ്ട വിമാനത്താവള ഭൂമിയിൽ കെജിഎസുമായുണ്ടായിരുന്ന ധാരണ അവസാനിച്ചെന്നും ആ നിലയ്ക്ക് തന്‍റെ കൈവശം ഇരിക്കുന്ന ഭൂമി മറ്റൊരു പദ്ധതിക്കു വിട്ടുകൊടുക്കാനാകില്ലെന്നും മൗണ്ട് സിയോൻ എഡ്യുക്കേഷൻ ഗ്രൂപ്പ് ചെയർമാൻ ഏബ്രഹാം കലമണ്ണിൽ പറഞ്ഞു. ആറന്മുളയിൽ എയർസ്ട്രിപ്പ് സ്ഥാപിക്കാനാണ് തന്‍റെ ശ്രമം. ഇതിനായാണ് ആ സ്ഥലം വാങ്ങിയത്. എന്നാൽ വിമാനത്താവള വിരുദ്ധ സമരത്തിന്‍റെ ഭാഗമായി ചിലർ ഇവിടെ കുടിൽ കെട്ടി. ഇവരെ അവിടെനിന്നും മാറ്റിയാൽ അടുത്ത ദിവസം എയർസ്ട്രിപ്പ് നിർമിക്കാൻ താൻ തയാറാണെന്നും കലമണ്ണിൽ പറഞ്ഞു. നിലവിലുള്ള വയൽ മേഖല നികത്തേണ്ട ആവശ്യമില്ല. വയൽ മധ്യത്തിലൂടെ ഒഴുകുന്ന കോഴിത്തോട് സംരക്ഷിച്ചുകാണ്ട് അതിനു മീതം സ്ലാബിട്ട് പദ്ധതി നടപ്പാക്കാൻ കഴിയും. തിരുവനന്തപുരം, കൊച്ചി വിമാനത്താവളങ്ങളിലേക്ക് ചെറുവിമാനങ്ങൾ ഉപയോഗിച്ച് എയർ ടാക്സി സർവീസ് തുടങ്ങുകയാണ് ലക്ഷ്യമെന്നും കുറഞ്ഞ ചെലവിൽ പത്തനംതിട്ടക്കാർക്ക് അന്താരാഷ്ട്ര വിമാനത്താവളങ്ങളിലെത്താൻ ഇതിലൂടെ കഴിയുമെന്നും ഏബ്രഹാം കലമണ്ണിൽ അഭിപ്രായപ്പെട്ടു. സർക്കാർ സഹകരിച്ചാൽ പദ്ധതി വേഗത്തിലാക്കാം. വയൽ നികത്താതെയുള്ള പദ്ധതിക്ക് ആറന്മുളക്കാരുടെ പിന്തുണയും ലഭിക്കുമെന്നാണ് പ്രതീക്ഷയെന്നും അദ്ദേഹം പറഞ്ഞു.

യുവാവിനെ അറസ്റ്റ് ചെയ്തു

പത്തനംതിട്ട: വീട്ടിൽ അതിക്രമിച്ചു കയറി സ്ത്രീകളെ തോക്കുചൂണ്ടി ഭീഷണിപ്പെടുത്തിയ ബന്ധുവായ യുവാവിനെ പത്തനംതിട്ട പോലീസ് അറസ്റ്റ് ചെയ്തു. പത്തനംതിട്ട നന്നുവക്കാട് പൂർണിമ വീട്ടിൽ വിഘ്നേഷാണ് ( 34) അറസ്റ്റിലായത്. നന്നുവക്കാട് പൂർണിമ വീട്ടിൽ സുചിത്രയുടെ പരാതിയിലാണ് അറസ്റ്റ്.

പോക്സോ കേസിൽ പിടിയിലായി

മല്ലപ്പള്ളി: പതിനഞ്ചും പത്തും വയസുള്ള പെൺകുട്ടികളോട് ലൈംഗികാതിക്രമം കാട്ടിയ ആളെ കീഴ്‌വായ്‌പൂര് പോലീസ് പിടികൂടി. കുന്നന്താനം സ്വദേശിയായ 48 കാരനാണ് പിടിയിലായത്. വീട്ടിൽവച്ച് പല തവണ കുട്ടികളോട് ലൈംഗിക അതിക്രമം കാട്ടിയതായി ശിശുക്ഷേമ സമിതി വഴി പരാതി ലഭിച്ച പ്രകാരം പോലീസ് കുട്ടികളുടെ മൊഴി രേഖപ്പെടുത്തി. രണ്ടു കേസുകൾ രജിസ്റ്റർ ചെയ്ത് എസ്എച്ച്ഒ വിപിൻ ഗോപിനാഥന്‍റെ നേതൃത്വത്തിൽ അന്വേഷണം ആരംഭിച്ചു. കോഴഞ്ചേരി സഖി വൺ സ്റ്റോപ്പ്‌ സെന്‍ററിൽ കഴിയുന്ന കുട്ടികളുടെ മൊഴി പോലീസ് സൈക്കോസോഷ്യൽ കൗൺസിലറുടെ സാന്നിധ്യത്തിൽ വിശദമായി രേഖപ്പെടുത്തി.

വെള്ളക്കെട്ടിൽ വീണു വിദ്യാർഥിയെ കാണാതായി

തിരുവല്ല: വെള്ളക്കെട്ടിൽ വീണു വിദ്യാർഥിയെ കാണാതായി. തിരുവല്ല തിരുമുലപുരം ബാലികാമഠം ഹയർ സെക്കൻഡറി സ്കൂൾ പ്ലസ്ടു വിദ്യാർഥി ജെറോം സാബുവിനെ (17) യാണ് കാണാതായത്. ഇരുവള്ളിപ്ര വാഴകൂട്ടത്തിൽ സാബു - രമ്യ ദമ്പതികളുടെ മകനാണ് ജെറോം സാബു. വള്ളംകുളം തിരുവാനപുരം പുഞ്ചയിലെ വെള്ളക്കെട്ടിൽ ഇന്നലെ വൈകുന്നേരം അഞ്ചോടെയാണ് സാബുവിനെ കാണാതായത്. കൂട്ടൂകാരുമായി വെള്ളത്തിൽ ഇറങ്ങിക്കളിക്കുന്നതിനിടയിൽ കയത്തിൽ അകപ്പെടുകയായിരുന്നുവെന്ന് പറയുന്നു. നാട്ടുകാരും തിരുവല്ല അഗ്നിശമന സേനാംഗങ്ങളും എത്തി തെരച്ചിൽ നടത്തിയെങ്കിലും വൈകും വരെ കണ്ടെത്താനായില്ല.

പോക്സോ കേസിൽ യുവാവ് അറസ്റ്റിൽ

പത്തനംതിട്ട: സമൂഹമാധ്യമത്തിലൂടെ പരിചയപ്പെട്ട് പ്രണയബന്ധത്തിലായ ശേഷം, വിവാഹവാഗ്ദാനം നൽകി പതിനേഴുകാരിയെ പീഡിപ്പിച്ചു ഗർഭിണിയാക്കിയ യുവാവിനെ പോലീസ് അറസ്റ്റ് ചെയ്തു. ഇടുക്കി പീരുമേട് തോട്ടപ്പുര കൊടിയകുളങ്ങര വീട്ടിൽ അഭിറാമാണ് (19) പെരുനാട് പോലീസിന്‍റെ പിടിയിലായത്. പെരുനാട് സ്വദേശിനിയും പ്ലസ് ടൂ വിദ്യാർഥിനിയുമായ പെൺകുട്ടി പത്താം ക്ലാസ്സിൽ പഠിക്കുമ്പോഴാണ് യുവാവിനെ വാട്ട്സാപ്പ് ഗ്രൂപ്പ് മുഖേന പരിചയപ്പെടുന്നത്. തുടർന്ന് പെൺകുട്ടിയെ പീരുമേട്ടിലെത്തിച്ച് പീഡിപ്പിക്കുകയായിരുന്നുവെന്നാണ് മൊഴി. ഇതേ പെൺകുട്ടിയെ തട്ടിക്കൊണ്ടു പോയതിന് 2024 ൽ ഇയാൾക്കെതിരേ പെരുനാട് പോലീസ് കേസ് എടുത്തിരുന്നു. കോടതിയിൽ ഹാജരാക്കിയ അഭിറാമിനെ റിമാൻഡ് ചെയ്തു.

സ്കൂളുകളിൽ പ്ലസ് വൺ പ്രവേശനോത്സവം

പത്തനംതിട്ട: ഹയർ സെക്കൻഡി, വൊക്കേഷണൽ ഹയർ സെക്കൻഡറി സ്കൂളുകളിൽ ഒന്നാം വർഷ ക്ലാസുകൾക്ക് ഇന്നലെ തുടക്കമായി. പതിവിലും നേരത്തെയാണ് ഇത്തവണ ഒന്നാംവർഷം ക്ലാസുകൾ ആരംഭിച്ചത്. പ്രവേശന നടപടികൾ തുടരുന്ന സാഹചര്യത്തിൽ കുട്ടികളുടെ എണ്ണം ക്ലാസുകളിൽ പൂർണമായിട്ടില്ല. ആദ്യദിനത്തിൽ പ്രത്യേക പരിപാടികളോടെയാണ് ഒന്നാം വർഷക്കാരെ സ്വീകരിച്ചത്. കുട്ടികൾക്കും രക്ഷിതാക്കൾക്കുമായി ഹയർ സെക്കൻഡറി വിദ്യാഭ്യാസ മേഖലയെ സംബന്ധിച്ച ക്ലാസുകൾ എല്ലാ സ്കൂളുകളിലും ക്രമീകരിച്ചിരുന്നു. ഇതോടൊപ്പം ലഹരി അടക്കമുള്ള സാമൂഹിക തിന്മകൾക്കെതിരേയുള്ള ബോധവത്കരണ പരിപാടികളും നടന്നു.

ന്യൂ ജെൻ ബൈക്കിടിച്ച് സ്കൂട്ടർ യാത്രികനു ദാരുണാന്ത്യം

തിരുവല്ല: അമിത വേഗത്തിൽ എത്തിയ ന്യൂജൻ ബൈക്ക് ഇടിച്ച് സ്കൂട്ടർ യാത്രക്കാരൻ മരിച്ചു. തുകലശേരി തെക്കേക്കൂറ്റ് എൻ.വി. ബെന്നി (59)യാണ് മരിച്ചത്. അപകടത്തിനിടെ ബൈക്കിലെ കന്പി നെഞ്ചിൽ തുളച്ചു കയറിയാണ് തന്പിയുടെ ദാരുണാന്ത്യം ഉണ്ടായത്. ചൊവ്വാഴ്ച രാത്രി 8.30 ഓടെ തിരുവല്ല - മാവേലിക്കര റോഡിൽ ബിഎസ്എൻഎൽ ഭവന് മുമ്പിലായിരുന്നു അപകടം. എംസി റോഡിൽ നിന്നും തിരുവല്ല - മാവേലിക്കര റോഡിലേക്കുള്ള വൺവേയിൽ നിന്നും എത്തിയ ബൈക്ക് ബെന്നി ഓടിച്ചിരുന്ന ആക്ടീവ സ്കൂട്ടറിൽ ഇടിക്കുയായിരുന്നു. ഇടിയുടെ ആഘാതത്തിൽ പൊട്ടിപ്പോയ ബൈക്കിന്‍റെ മിറർ സ്ഥാപിച്ചിരുന്ന കമ്പി ബെന്നിയുടെ നെഞ്ചിൽ തുളച്ചു കയറുകയായിരുന്നു. നെഞ്ചിൽ മാരകമായ മുറിവേറ്റ ബെന്നിയെ തിരുവല്ല താലൂക്ക് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. തിരുവല്ല നഗരത്തിലെ ഹോട്ടലിൽ നിന്നും ആഹാരം വാങ്ങി വീട്ടിലേക്ക് മടങ്ങും വഴിയാണ് ബെന്നി അപകടത്തിൽപെട്ടത്. തൃശൂർ ചിറ്റിലപ്പള്ളി സ്വദേശിയും കെട്ടിട നിർമാണ തൊഴിലാളിയുമായ ബെന്നി തുകലശേരി മാക്ഫാസ്റ്റിനു സമീപമുള്ള ഭാര്യവീട്ടിൽ ആയിരുന്നു താമസം. അപകടത്തിൽ നിസാര പരിക്കേറ്റ ബൈക്ക് യാത്രികനായ മിത്രക്കേരി പുതുക്കേരി തട്ടകത്തിൽ പുത്തൻചിറയിൽ ജ്യോതിസിനെ ( 19 ) തിരുവല്ലയിലെ സ്വകാര്യ ആശുപത്രിയിൽ പ്രഥമശുശ്രൂഷ നൽകി.

സ്വകാര്യബസിൽനിന്നു വിദ്യാർഥി പുറത്തേക്ക് തെറിച്ചുവീണു

തിരുവല്ല: പൊടിയാടിയിൽ ബസിന്റെ വാതിൽപ്പടിയിൽ നിന്നും വീണു വിദ്യാർഥിക്ക് പരിക്കേറ്റു. ഇന്നലെ രാവിലെ 8.30 ഓടെ പൊടിയാടി ജംഗ്ഷനിലായിരുന്നു സംഭവം. സ്റ്റോപ്പിൽ നിർത്തിയ ശേഷം ബസ് പുറപ്പെടാൻ തുടങ്ങവേ കുട്ടി പിൻവശത്ത് നിന്നും പുറത്തേക്ക് തെറിച്ചു വീഴുകയായിരുന്നു. തിരുവല്ല- മാവേലിക്കര റൂട്ടിലോടുന്ന രഘുമോൻ എന്ന സ്വകാര്യബസിൽ നിന്നാണ് വിദ്യാർഥി തെറിച്ചു വീണത്. സംഭവത്തിനുശേഷം നിർത്താതെ പോയ ബസ് പിന്നാലെ കാറിൽ എത്തിയ യാത്രക്കാർ കാവുംഭാഗം ജംഗ്ഷനിൽ തടഞ്ഞുനിർത്തി വിവരം അറിയിക്കുകയായിരുന്നു. എന്നാൽ തങ്ങളുടെ ബസിൽ നിന്നും ആരും താഴേക്ക് വീണില്ലെന്നു പറഞ്ഞു ജീവനക്കാർ യാത്രക്കാരോടു തട്ടിക്കയറി. തുടർന്ന് നാട്ടുകാരും ബസ് ജീവനക്കാരും തമ്മിൽ തർക്കം ഉണ്ടായി. ഡ്രൈവറുടെ അശ്രദ്ധയാണ് അപകടത്തിനു കാരണമെന്നു ദൃക്സാക്ഷികൾ പറഞ്ഞു. വാതിൽ അടയ്ക്കാതെ ബസ് മുന്നോട്ടെടുത്തതാണ് അപകടകാരണം. നാട്ടുകാർ തടഞ്ഞിട്ട ബസിന്‍റെ യാത്ര മുടങ്ങാതിരിക്കാൻ പോലീസ് ഇടപെട്ട് ബസ് വിട്ടയച്ചു.

127 ഗ്രാം കഞ്ചാവുമായി ഒരാൾ പിടിയിൽ

പത്തനംതിട്ട: ജില്ലാ പോലീസ് മേധാവിയുടെ നിർദേശപ്രകാരം ഡാൻസാഫ് സംഘവും കൂടൽ പോലീസും ചേർന്ന് നടത്തിയ നീക്കത്തിൽ ഒരാളെ ആറു ഗ്രാം കഞ്ചാവുമായി പിടികൂടി. കൂടൽ ഏലിയാമൂലയിൽ റോഡിൽ വില്പനക്കായി സൂക്ഷിച്ച കഞ്ചാവുമായി തണ്ണീർപന്തൽ വീട്ടിൽ വട്ടമല രാജനെയാണ് ( 37 ) അറസ്റ്റ് ചെയ്തത്. രഹസ്യവിവരത്തെതുടർന്ന് ഡാൻസാഫ് സംഘം ഇയാളെ നിരീക്ഷിച്ചുവരികയായിരുന്നു. കൂടൽ എസ്എച്ച്ഒ സി. എൽ. സുധീറിന്‍റെ നേതൃത്വത്തിലായിരുന്നു പരിശോധന. പോലീസ് സംഘത്തിൽ കൂടൽ സ്റ്റേഷനിലെ എസ് സിപിഒ സുനിൽ കുമാർ, സിപിഒ ഹരിദാസ് എന്നിവരും ഡാൻസാഫ് ടീം അംഗങ്ങളും ഉണ്ടായിരുന്നു. പോലീസിനെ കണ്ട് ഓടി രക്ഷപ്പെടാൻ ശ്രമിച്ച പ്രതിയെ തടഞ്ഞാണ് പിടികൂടിയത്. കടലാസിൽ പൊതിഞ്ഞ നിലയിൽ മടിക്കുത്തിൽ സൂക്ഷിച്ചിരിക്കുകയായിരുന്നു കഞ്ചാവ്. വില്പനയ്ക്ക് കയ്യിൽ വച്ചതാണെന്ന് പോലീസിനോട് ഇയാൾ സമ്മതിച്ചു. കൂടൽ മുറിഞ്ഞകൽ നിന്നും 121 ഗ്രാം കഞ്ചാവ് ജില്ലാ ഡാൻസാഫ് ടീമും കൂടൽ പോലീസും പിടികൂടി. ആലപ്പുഴ നൂറനാട് പടനിലം അരുൺനിവാസിൽ അനിൽകുമാർ എന്നയാൾ കഞ്ചാവ് വലിച്ചെറിഞ്ഞശേഷം ഓടിരക്ഷപെട്ടു. ഇയാളുടെ കൈവശം കഞ്ചാവുണ്ടെന്ന വിവരത്തിന്‍റെ അടിസ്ഥാനത്തിലാണ് പോലീസ് എത്തിയത്. പുനലൂർ പോലീസ്റ്റേഷൻ പരിധിയിൽ രണ്ട് കിലോ കഞ്ചാവ് പിടിച്ച കേസിൽ പ്രതിയായ ഇയാൾ മുറിഞ്ഞകലിലെ ഭാര്യാ വീട്ടിൽ ഒളിച്ചു താമസിക്കുകയായിരുന്നുവെന്ന് പോലീസ് പറഞ്ഞു.

രഞ്ജിതയുടെ ഡിഎൻഎ ഫലത്തിനായി കാത്തിരിപ്പ്

കോഴഞ്ചേരി: അഹമ്മദാബാദ് വിമാനപകടത്തില്‍ മരിച്ച പുല്ലാട് സ്വദേശി രഞ്ജിത ജി. നായരുടെ ഡിഎന്‍എ പരിശോധന ഫലത്തിനായി കാത്തിരിപ്പ് തുടരുന്നു. ഫലം ഇതേവരെ ലഭ്യമാകാത്തതിനാല്‍ രഞ്ജിതയുടെ സഹോദരന്‍ രതീഷും ബന്ധു ഉണ്ണികൃഷ്ണനും ഇപ്പോഴും അഹമ്മദാബാദില്‍ തുടരുകയാണ്. ഇന്നോടുകൂടി ഡിഎന്‍എ ഫലം പുറത്തുവരുമെന്നാണ് അധികൃതര്‍ അറിയിച്ചിരിക്കുന്നത്. മൃതദേഹം തിരിച്ചറിഞ്ഞാല്‍ നാട്ടിലെത്തിക്കാനുള്ള ക്രമീകരണങ്ങള്‍ സര്‍ക്കാര്‍ തലത്തിലും ഒരുക്കുന്നുണ്ട്. രഞ്ജിതയുടെ ഭവനത്തില്‍ ആശ്വാസ വാക്കുകളുമായി മുന്‍ പ്രതിപക്ഷ നേതാവ് രമേശ് ചെന്നിത്തല എത്തി. കെപിസിസി ജനറല്‍ സെക്രട്ടറി പഴകുളം മധു, സെക്രട്ടറി അനീഷ് വരിക്കണ്ണാമല, ഡിസിസി പ്രസിഡന്റ് സതീഷ് കൊച്ചുപറമ്പില്‍ വൈസ് പ്രസിഡന്‍റ് എ. സുരേഷ് കുമാര്‍, യുഡിഎഫ് ജില്ലാ ചെയര്‍മാന്‍ വര്‍ഗീസ് മാമ്മന്‍ എന്നിവരുമുണ്ടായിരുന്നു.

വായന മഹോത്സവം: അക്ഷരജ്യോതി വിളംബരജാഥ സംഘടിപ്പിച്ചു

പത്തനംതിട്ട: പി. എൻ. പണിക്കര്‍ ഫൗണ്ടേഷന്‍ 30-ാമത് ദേശീയ വായന മഹോത്സവം ജില്ലാതല ഉദ്ഘാടനം ഇന്ന് കിടങ്ങന്നൂര്‍ ശ്രീവിജയാനന്ദ ഗുരുകുല വിദ്യാപീഠം ഹയര്‍സെക്കന്‍ഡറി സ്‌കൂളില്‍ ആന്‍റോ ആന്‍റണി എംപി നിര്‍വഹിക്കും. വിവര പൊതുജന സമ്പര്‍ക്ക വകുപ്പ്, പൊതുവിദ്യാഭ്യാസം, തദ്ദേശസ്വയം ഭരണം, ജില്ലാ ഭരണകൂടം, കാന്‍ഫെഡ് എന്നിവയുടെ ആഭിമുഖ്യത്തിലാണ് പരിപാടി. ജില്ലാ പഞ്ചായത്ത് വിദ്യാഭ്യാസ സ്ഥിരം സമിതി അംഗം ആർ. അജയകുമാര്‍ അധ്യക്ഷത വഹിക്കും. പി.എൻ. പണിക്കര്‍ ഫൗണ്ടേഷന്‍ ചെയര്‍മാന്‍ ഫാ.ഡോ. ഏബ്രഹാം മുളമൂട്ടില്‍ വായനാദിന പ്രതിജ്ഞ ചൊല്ലും. പി.എന്‍. പണിക്കര്‍ പുരസ്‌കാര ജേതാവ് ഡോ. മണക്കാല ഗോപാലകൃഷ്ണന്‍ മുഖ്യപ്രഭാഷണം നടത്തും. ആറന്മുള ഗ്രാമപഞ്ചായത്ത് പ്രസിഡന്‍റ് ഷീജ റ്റി. റ്റോജി, എഡിഎം ബി. ജ്യോതി, ജില്ലാ വിദ്യാഭ്യാസ ഉപഡയറക്ടര്‍ ബി. ആർ. അനില, പി.എന്‍. പണിക്കര്‍ ഫൗണ്ടേഷന്‍ സെക്രട്ടറി സി. കെ. നസീർ, ഗ്രാമപഞ്ചായത്തംഗങ്ങള്‍ തുടങ്ങിയവര്‍ പങ്കെടുക്കും. വായന മഹോത്സവത്തിന്‍റെ ഭാഗമായി അക്ഷരജ്യോതി വിളംബരജാഥ എസ്‌വിജിവി ഹയര്‍ സെക്കന്‍ഡറി സ്‌കൂളില്‍ നിന്ന് സംഘടിപ്പിച്ചു. പിറ്റിഎ പ്രസിഡന്‍റ് സി. ജി. പ്രദീപ് കുമാര്‍ ഫ്‌ളാഗ് ഓഫ് ചെയ്തു. ഗ്രാമപഞ്ചായത്തംഗം ദീപ എസ്. നായർ, സ്‌കൂള്‍ പ്രിന്‍സിപ്പല്‍ വി. ശ്രീജ, മാനേജര്‍ മാതാ കൃഷ്ണാനന്ദ പൂര്‍ണിമാമയി, പ്രധാന അധ്യാപകന്‍ കെ. വി. മാധവന്‍ കുഞ്ഞ്, പി.എൻ. പണിക്കര്‍ ഫൗണ്ടേഷന്‍ സെക്രട്ടറി സി. കെ. നസീർ, ട്രസ്റ്റ് ട്രഷറര്‍ ജയന്‍ നായർ, അധ്യാപകരായ രാജേഷ് കുമാർ, വിദ്യ വിജയന്‍, ജ്യോതിമ എന്നിവര്‍ നേതൃത്വം നല്‍കി.

പുസ്തകം ലഹരിയാക്കി വി.പി. രാജശേഖരൻ

കോഴഞ്ചേരി: ചെറുപ്പത്തിൽ തുടങ്ങിയ വായനാശീലം വി.പി. രാജശേഖരന് റിട്ടയർമെന്‍റ് കാലയളവും വിശ്രമ രഹിതമാക്കുന്നു. നല്ല പുസ്തകങ്ങൾ തേടി 66 കാരനായ രാജശേഖരൻ ഇന്നും സഞ്ചാരപഥത്തിലാണ്. പുസ്തകങ്ങള്‍ വാങ്ങുന്നതിനും വായിക്കുന്നതിലും ഒരു പിശുക്കും കാണിക്കുന്നയാളല്ല, പുല്ലാട് ഞാലിപറമ്പില്‍ വി. പി. രാജശേഖരൻ. 1974 മുതല്‍ 79 വരെയുള്ള കോളജ് വിദ്യാഭ്യാസത്തിനു ശേഷമാണ് വായന ഗൗരവമായി എടുത്തു തുടങ്ങിയത്. സ്‌കൂളില്‍ പഠിക്കുമ്പോള്‍ പ്രസംഗം, ഉപന്യാസ മത്സരങ്ങളിൽ പങ്കെടുക്കുന്നതിനുവേണ്ടി അധ്യാപകര്‍ പറഞ്ഞ മഹാത്മ ഗാന്ധിയുടെ എന്‍റെ സത്യാന്വേഷണ പരീക്ഷണ കഥ എന്ന ആത്മകഥ വായിച്ചതാണ് പുസ്തക വായനയില്‍ താത്പര്യം ഉണ്ടാകാന്‍ കാരണമായത്. സ്‌കൂൾ, കോളജ് വിദ്യാഭ്യാസ കാലയളവിലെ അധ്യാപകര്‍ നിഷ്‌കര്‍ഷിച്ചിട്ടുള്ള പുസ്തകങ്ങള്‍ ലൈബ്രറിയില്‍ നിന്നെടുത്ത് വായിച്ചു തുടങ്ങിയത്. പിന്നെ ജീവിതത്തിന്‍റെ ലഹരിയായി മാറുകയായിരുന്നു. ഔദ്യോഗിക ജീവിതത്തിന്റെ തിരക്കില്‍ പുസ്തകവായനയ്ക്ക് സമയമില്ലെങ്കിലും വാങ്ങുന്നതിന് ഒരു പിശുക്കും കാണിച്ചിട്ടില്ല. ഗുരു നിത്യ ചൈതന്യയതി, ഖലീൽ ജിബ്രാന്‍ എന്നിവരുടെ പുസ്തകങ്ങളാണ് ഏറെ പ്രിയം ഒ.വി. വിജയന്‍റെ ഖസാക്കിന്‍റെ ഇതിഹാസം പല തവണ വായിച്ചിട്ടുണ്ട്. ഏതു പുസ്തകം കണ്ടാലും എന്തു വിലകൊടുത്തും വാങ്ങും. അതിന് സാമ്പത്തിക ബാധ്യത നോക്കാറില്ല. നോബല്‍ സമ്മാന ജേതാവായ ഹെര്‍മന്‍ ഹെസേയുടെ സിദ്ധാർഥ് എന്ന പുസ്തകമാണ് വായിച്ചുകൊണ്ടിരിക്കുന്നത്. തിരുവല്ല ഈസ്റ്റ് കോപ്പറേറ്റീവ് ബാങ്കിലെ ഔദ്യോഗിക ജോലിക്കു ശേഷം പുസ്തക വായനയനയിലാണ് ഏറെ താത്പര്യമുള്ളത്. വായനയോടൊപ്പം ആകാശവാണിയുടെ പരിപാടി ആസ്വദിക്കുന്നതിനും സമയം കണ്ടെത്തുന്നു. പുസ്തക വായനയിലൂടെ താന്‍ പഠിച്ചതും മനസിലാക്കിയതുമായ പലതും പുനര്‍ചിന്തനം നടത്താന്‍ അവസരം ലഭിക്കുന്നു. ഇടതുപക്ഷ രാഷ്‌ട്രീയത്തെ ഇഷ്ടപ്പെടുന്നതിനോടൊപ്പം തന്നെ മത ആധ്യാത്മിക ഗ്രന്ഥങ്ങളും അതിന്‍റെ വ്യാഖ്യാനങ്ങളും വായിക്കാന്‍ സമയം കണ്ടെത്തുന്നുണ്ട്. എല്ലാ മത വിഭാഗങ്ങളുടെയും പുസ്തകങ്ങള്‍ വായിക്കുന്നതിനും താരതമ്യ പഠനം നടത്തുന്നതിനും സമയം കണ്ടെത്തുന്നു. ഭാര്യ പുല്ലാട് എസ് വി ഹൈസ്‌കൂളിലെ റിട്ട. അധ്യാപിക ഗീതാ ദേവിയും പുസ്തക വായനയില്‍ രാജശേഖരന് കൂട്ടാണ്. മാനസിക സംഘര്‍ഷങ്ങളുണ്ടാകുമ്പോള്‍ ഗുരു നിത്യ ചൈതന്യയുടെ ഭഗവത് ഗീതയുടെ വ്യാഖ്യാനമാണ് വായിക്കാറുള്ളതെന്ന് ഇരുവരും പറഞ്ഞു. ആംഗലേയ സാഹിത്യത്തിലെ പുസ്തകങ്ങളും ശേഖരത്തിലുണ്ട്. ബംഗാളി സാഹിത്യകാരന്‍മാരുടെ മലയാളത്തിലേക്ക് പരിഭാഷപ്പെടുത്തിയിട്ടുള്ള പ്രശസ്തമായ പുസ്തകങ്ങളെല്ലാം തന്നെ സൂക്ഷിച്ചുവച്ചിട്ടുമുണ്ട്. ഒ.വി. വിജയനെ ഇഷ്ടപ്പെടുന്നപോലെ ബംഗാളി സാഹിത്യകാരന്‍മാരെയും ഇഷ്ടമാണ്. വളരെ ഗൗരവത്തോടുകൂടി തന്നെയാണ് രാജശേഖരനും കുടുംബവും പുസ്തക വായനയെ കാണുകയും സംരക്ഷിക്കുകയും ചെയ്യുന്നത്. മക്കളായ യദു ശേഖറും നന്ദു ശേഖറും പുസ്തക വായന ഇഷ്ടപ്പെടുന്നതിലൂടെ കുടുംബം മുഴുവന്‍ അക്ഷരങ്ങളെ സ്‌നേഹിക്കുന്ന കുടുംബമായി മാറിയിരിക്കുകയാണ്.

വായനദിനം ഇന്ന്; വാരാചരണവും ഇന്നു മുതൽ

പത്തനംതിട്ട: പി.എൻ. പണിക്കരുടെ സ്മരണയിൽ വായനദിനാചരണം ഇന്ന്. വായനപക്ഷാചരണത്തിനും ഇന്ന് വിവിധ ഗ്രന്ഥശാലകളിലും സ്കൂളുകളിലും തുടക്കം കുറിക്കുകയാണ്. ജില്ലാ ലൈബ്രറി കൗണ്‍സില്‍ ജില്ലാ ഇന്‍ഫര്‍മേഷന്‍ ഓഫീസിന്‍റെ സഹകരണത്തോടെ സംഘടിപ്പിക്കുന്ന പത്തനംതിട്ട ജില്ലാതല വായനപക്ഷാചരണം ഇന്ന് രാവിലെ 10 ന് റാന്നി എംഎസ് ഹയര്‍ സെക്കന്‍ഡറി സ്‌കൂളില്‍ പ്രമോദ് നാരായണ്‍ എംഎല്‍എ ഉദ്ഘാടനം ചെയ്യും. സംസ്ഥാന ലൈബ്രറി കൗണ്‍സില്‍ എക്സിക്യൂട്ടീവ് അംഗം പ്രഫ. ടി.കെ.ജി നായര്‍ അധ്യക്ഷത വഹിക്കും. ജില്ലാ പഞ്ചായത്ത് പ്രസിഡന്റ് ജോര്‍ജ് ഏബ്രഹാം മുഖ്യാതിഥിയാകും. ജില്ലാ കളക്ടര്‍ എസ് പ്രേം കൃഷ്ണന്‍ വായന സന്ദേശം നല്‍കും.

നിലന്പൂരിന്‍റെ കഥാകാരൻ പത്തനംതിട്ടയിൽ

പത്തനംതിട്ട: രാഷ്‌ട്രീയകേരളം നിലമ്പൂരിലേക്കു ഉറ്റുനോക്കുമ്പോൾ ആ നാടിന്‍റെ ചരിത്രം ചികഞ്ഞെടുത്ത് പുസ്തകത്താളിലാക്കിയ ഒരു കഥാകാരൻ പത്തനംതിട്ടയിലുണ്ട്. അര നൂറ്റാണ്ടിലേറെ നിലമ്പൂരുമായുള്ള ഹൃദയബന്ധത്തിൽ എം.എം. ജോസഫ് തയാറാക്കിയ നിലിന്പയുടെ ഊര് എന്ന പുസ്തകം 2017 ലാണ് പുറത്തിറങ്ങിയത്. നിലമ്പൂരിന്‍റെ പ്രാദേശിക ചരിത്രം പത്തനംതിട്ടയിൽ പ്രസിദ്ധീകരിച്ചപ്പോൾ ഡോ. ഫിലിപ്പോസ് മാർ ക്രിസോസ്റ്റം വലിയ മെത്രാപ്പോലീത്ത പ്രകാശനം നിർവഹിച്ചു. നിരവധി ചരിത്ര പൈതൃകങ്ങൾ സ്വന്തമായുള്ള നിലമ്പൂർ ദേശത്തിന്‍റെ കഥകൾ ഈ ഗ്രന്ഥത്തിലൂടെ വിവരിക്കുന്നു. നിലമ്പൂർ കോവിലകം, ബ്രിട്ടീഷ് അധിനിവേശം, ആദിവാസികൾ, നാട്ടിടവഴികളിലൂടെ ചൂളംവിളിച്ചു പായുന്ന കരിവണ്ടിയുടെ ചരിത്രം, തിരുവിതാംകൂറിൽ നിന്നുമുള്ള കുടിയേറ്റം, നിലമ്പൂർ തേക്ക്, ജന്തുസസ്യ വൈവിധ്യം ഇവയെല്ലാം ഈ പുസ്തകത്തിലുണ്ട്. 1968ൽ മൂന്നാമത്തെ വയസിലാണ് എം.എം. ജോസഫ് ബന്ധുവിന്‍റെ കുടിയേറ്റ കുടുംബത്തോടൊപ്പം ആദ്യമായി നിലമ്പൂരിലെത്തുന്നത്. പിന്നീട് അദ്ദേഹത്തിന്‍റെ അധ്യാപക ജീവിതത്തിന്‍റെ തുടക്കവും ഇവിടെയായിരുന്നു. ഭാര്യ ദീർഘകാലം നിലമ്പൂരിലെ മൂത്തേടം പിഎച്ച്സിയിൽ നഴ്സായി ജോലി നോക്കി. മക്കളുടെ വിദ്യാഭ്യാസവും നിലന്പൂരിലായിരുന്നു. പത്തനംതിട്ട മേക്കൊഴൂരിലാണ് സ്ഥിരതാമസമെങ്കിലും ഇടയ്ക്കിടെ നിലമ്പൂരിലെ സുഹൃത്തുക്കളുടെയും ബന്ധുക്കളുടേതുമായ വീടുകളിലേക്കു പോകാറുണ്ട്. നാട്ടിലുള്ള കൂട്ടുകാരെയും കൂട്ടി നിലമ്പൂർ സന്ദർശിക്കാറുമുണ്ട്. നിലന്പൂരിലെ ഉപതെരഞ്ഞെടുപ്പ് ചൂടിലേക്കും എം.എം. ജോസഫ് പോയിരുന്നു. നിലിമ്പയുടെ ഊരിന്‍റെ കൈയെഴുത്തുപ്രതി അന്നത്തെ നിലമ്പൂർ ഗ്രാമപഞ്ചായത്തു പ്രസിഡന്‍റായിരുന്ന ആര്യാടൻ ഷൗക്കത്തിനു നൽകിയത് ജോസഫ് ഓർക്കുന്നു. പുസ്തകം പ്രസിദ്ധീകരിച്ചപ്പോൾ ആദ്യകോപ്പി മന്ത്രിയായിരുന്ന ആര്യാടൻ മുഹമ്മദിന്‍റെ നിലമ്പൂരിലുള്ള വസതിയിലെത്തി കൈമാറിയിരുന്നു. അറിയപ്പെടുന്ന പാവനാടക പരിശീലകനും ദിനവിജ്ഞാനകോശം ഉൾപ്പെടെ നിരവധി കൃതികളുടെ രചയിതാവുമാണ് എം.എം. ജോസഫ് മേക്കൊഴൂർ. ദിനവിജ്ഞാനകോശം പരിഷ്കരിച്ച പതിപ്പ് കഴിഞ്ഞയിടെയാണ് പുറത്തിറക്കിയത്. വർഷത്തിലെ ഓരോ ദിനത്തിന്‍റെയും പ്രത്യേകതകൾ ക്രോഡീകരിച്ചു പുറത്തിറക്കിയ പുസ്തകം ഏറെ ചർച്ച ചെയ്യപ്പെട്ടു.

അറിവിന്‍റെ കലവറയുമായി കേരളവർമ ഗ്രന്ഥശാല

പന്തളം: മഹാകവി പന്തളം കേരളവർമയുടെ ചരിത്രം പറയുന്ന വായനശാലയാണ് കേരളവർമ സ്മാരക ഗ്രന്ഥശാല. അറിവിന്‍റെ കലവറയുമായി ഇന്നും പന്തളത്തു തല ഉയർത്തി നിൽക്കുകയാണ് ഈ വായനശാല. കൈയെഴുത്തു പ്രതികൾ മുതൽ ആധുനിക സാഹിത്യം വരെ നിറഞ്ഞുനിൽക്കുന്ന ഗ്രന്ഥസമ്പത്ത് പന്തളം കേരളവർമ ലൈബ്രറിക്കുണ്ട്. ഗ്രാമത്തിന്‍റെ വിശുദ്ധിയെ അടയാളപ്പെടുത്താൻ അക്ഷരസ്നേഹികൾ ഇപ്പോഴും ഒത്തൊരുമിക്കുന്ന പന്തളത്തെ ഏക സാംസ്കാരിക കേന്ദ്രം. വർഷങ്ങൾക്ക് മുമ്പ് ഗ്രന്ഥശാലയുടെ പ്രസക്തി തിരിച്ചറിഞ്ഞ നാടാണ് പന്തളം. 1938 ഡിസംബർ 16ന് പന്തളം കൊട്ടാരത്തിൽ കവന കൗമുദി എന്ന പേരിലാണ് ആദ്യം ഈ ഗ്രന്ഥശാല സ്ഥാപിച്ചത്. പന്തളത്തെ മഹാകവി കേരളവർമ കവിത രൂപത്തിൽ പ്രസിദ്ധീകരിച്ച പത്രത്തിന്‍റെ പേരിൽ നിന്നുമാണ് കവന കൗമുദി എന്ന പേര് ഉണ്ടായത്. പരസ്യം പോലും കവിതാരൂപത്തിൽ വന്ന ആ പത്രം ഏറെ സവിശേഷതകൾ നിറഞ്ഞതായിരുന്നു. അക്ഷര കുലപതിയായ കേരളവർമയുടെ സ്മരണ നിലനിർത്താൻ വേണ്ടി പിന്നീട് കേരളവർമ ഗ്രന്ഥശാല എന്ന പേരാക്കി മാറ്റുകയായിരുന്നു. പദം കൊണ്ട് പന്താടിയ പന്തളത്ത് തമ്പുരാന്‍റെ സ്മരണയുയർത്തുന്ന ഒരേയൊരു സ്മാരകമാണ് ഈ ഗ്രന്ഥശാല. പന്തളത്തിനും കുളനടയ്ക്കും മധ്യേ എംസി റോഡിനു കിഴക്ക് ഭാഗത്തുള്ള നാല് സെന്‍റ് സ്ഥലത്താണ് ഇപ്പോൾ ലൈബ്രറി സ്ഥിതി ചെയ്യുന്നത്. 1957 ലാണ് ഗ്രന്ഥശാലയ്ക്കു വേണ്ടി സ്ഥലം വാങ്ങുകയും 1964 ൽ സ്വന്തം കെട്ടിടം നിർമിക്കുകയും ചെയ്തു. 1956 മുതൽ വായനശാലയുടെ ആഭിമുഖ്യത്തിൽ ഉന്നത നിലവാരം പുലർത്തിയ ഒരു കൈയെഴുത്തു മാസിക പ്രസിദ്ധീകരിച്ചിരുന്നു. 2007-ൽ ഏറ്റവും മികച്ച ഗ്രന്ഥശാലയ്ക്കുള്ള കെ. എൻ. ഭാസ്കരപിള്ള പുരസ്കാരം, 2016 ൽ ജില്ലയിലെ മികച്ച ഗ്രന്ഥശാലയ്ക്കുള്ള പി. എൻ. പണിക്കർ പുരസ്കാരം, 2021-ൽ സംസ്ഥാനത്തെ മികച്ച ഗ്രന്ഥശാലയ്ക്കുള്ള കണ്ണൂർ ജില്ല ലൈബ്രറി കൗൺസിലിന്‍റെ ഐ.വി. ദാസ് പുരസ്കാരം, 2010 -ൽ ഏറ്റവും മികച്ച ഗ്രന്ഥശാലയ്ക്കുള്ള സംസ്ഥാന ലൈബ്രറി കൗൺസിൽ ആദ്യമായി ഏർപ്പാടാക്കിയ കാഷ് അവാർഡും ഈ ഗ്രന്ഥശാലയ്ക്ക് ലഭിച്ചിട്ടുണ്ട്. ഗ്രന്ഥശാലയുടെ ആഭിമുഖ്യത്തിൽ ബാലവേദി, വനിതാ വേദി, യുവജന വേദി, വയോജന വേദി എന്നീ സംഘടനകളും നല്ല രീതിയിൽ പ്രവർത്തിച്ചുവരുന്നു. കുട്ടികളുടെ വായനശീലം വളർത്തുന്നതിന് വായന കളരികളും കവിതാ പഠന ക്ലാസുകളും ചിത്രരചനാ മത്സരങ്ങളും ക്വിസ് മത്സരങ്ങളും, വർണക്കൂടാരം എന്ന പദ്ധതിയിലൂടെ നടപ്പാക്കുന്നുണ്ട്. പന്തളം കോളേജിൽ പഠിക്കുന്ന കാലത്ത് അടൂർ ഗോപാലകൃഷ്ണനും നരേന്ദ്രപ്രസാദും കടമ്മനിട്ടയും കൂടാതെ മുൻ മന്ത്രിയായ എം.എൻ.ഗോവിന്ദൻനായർ, മുൻ എംഎൽഎ ആയ ഇറവുങ്കര ഗോപാലക്കുറുപ്പ് തുടങ്ങിയവരുടെ ഇഷ്ടപ്പെട്ട ഇടമായിരുന്നു ഈ ഗ്രന്ഥശാല. പ്രതിദിനംവായനാശീലം വളർത്തുന്നതിനു വേണ്ടി വായന വസന്തം എന്ന പേരിൽ പുസ്തകങ്ങൾ വീടുകളിൽ എത്തിച്ചു കൊടുക്കുന്ന പദ്ധതിയും ആരംഭിച്ചു കഴിഞ്ഞു. 23,095 പുസ്തകങ്ങളും 670 അംഗങ്ങളുമാണ് ഇപ്പോൾ ഈ ഗ്രന്ഥശാലയ്ക്കുള്ളത്. ഇപ്പോഴും അക്ഷരങ്ങളെ സ്നേഹിക്കുന്ന ധാരാളം ആളുകൾ ഈ ഗ്രന്ഥശാലയിൽ എന്നും കടന്നു വരാറുണ്ടെന്ന് സെക്രട്ടറി കെ. അമ്മിണിയമ്മ പറയുന്നു. ഈ ഗ്രന്ഥശാലയെ ഇത്രയും വലിയ ഒരു വായനശാല ആക്കുന്നതിന് മുഖ്യപങ്കു വഹിച്ചത് ആരംഭകാലം മുതൽ 40 വർഷം സെക്രട്ടറിയും ലൈബ്രറേറിയനുമായ വി.എസ്. ശങ്കരൻ നമ്പൂതിരിയാണ്. പ്രസിഡന്‍റായി പി.ജി. രാജശേഖരൻപിള്ളയും സെക്രട്ടറിയായി കെ. അമ്മിണിയമ്മയും ലൈബ്രേറിയനായി രോഹിണി എസ്.ആർ.കൃഷ്ണനും പ്രവർത്തിക്കുന്നു.

റാന്നിയിൽ വർക്കിംഗ് വിമൻസ് ഹോസ്റ്റൽ

റാന്നി: റാന്നി വർക്കിംഗ് വിമൻസ് ഹോസ്റ്റൽ കെട്ടിടം നിർമാണത്തിനുള്ള നടപടികൾ ആരംഭിച്ചതായി പ്രമോദ് നാരായൺ എംഎൽഎ അറിയിച്ചു. കേന്ദ്രസർക്കാരിന്‍റെ സംസ്ഥാനങ്ങൾക്കുള്ള പ്രത്യേക സാമ്പത്തിക സഹായ പദ്ധതിയിൽ (എസ് സി ഐ) നിന്നുള്ള 10.10 കോടി രൂപ വിനിയോഗിച്ചാണ് ഹോസ്റ്റൽ നിർമിക്കുക. ഇതിനാവശ്യമായ ടെൻഡർ ക്ഷണിച്ചു. 14927 ചതുരശ്ര മീറ്റർ കെട്ടിടമാണ് നിർമിക്കുക. ഒരു കിടക്കയുടെ 16 മുറികളും മൂന്ന് കിടക്കകളുള്ള എട്ട് മുറികളും അഞ്ച് കിടക്കകളുടെ രണ്ട് മുറികളും ഭിന്നശേഷിക്കാർക്ക് രണ്ടു മുറികളുമാണ് കെട്ടിടത്തിൽ ഉൾപ്പെടുത്തിയിരിക്കുന്നത്. എല്ലാ മുറികളോടും അനുബന്ധിച്ച് ശുചിമുറികൾ ഉണ്ടായിരിക്കും. രണ്ടു നിലകളിലായാണ് കെട്ടിടം നിർമിക്കുക. അടുക്കള, ഡൈനിംഗ് ഏരിയ. ലോൺട്രി, റിക്രിയേഷൻ, സിക്ക് റൂം എന്നിവയെല്ലാം ഇതിൽ ഉൾപ്പെടുത്തിയിട്ടുണ്ട്. ഹൗസിംഗ് ബോർഡിന്‍റെ ഉടമസ്ഥതയിലുള്ള സ്ഥലത്ത് അവരുടെ തന്നെ ചുമതലയിലായിരിക്കും നിർമാണമെന്നും എംഎൽഎ പറഞ്ഞു. ജോലിക്കും മറ്റ് ആവശ്യങ്ങൾക്കുമായി എത്തുന്ന വനിതകൾക്ക് താമസിക്കാൻ ഹോസ്റ്റൽ സൗകര്യങ്ങളൊന്നും തന്നെ റാന്നിയിൽ ഇല്ല. വർക്കിംഗ് വിമൻസ് ഹോസ്റ്റൽ നിർമാണം പൂർത്തിയാകുന്നതോടെ ഒറ്റയ്ക്ക് ജോലിക്കായും മറ്റും എത്തുന്ന വനിതകൾക്ക് സുരക്ഷിതമായ താമസസ്ഥലം ഒരുക്കാനാകും.

വീടിനുള്ളിൽ കയറിയ കാട്ടുപൂച്ച പിടിയിലായി

തിരുവല്ല: വീടിന്‍റെ ഉള്ളില്‍ കടന്ന കാട്ടുപൂച്ചയെ വനപാലകര്‍ പിടികൂടി. തിരുവല്ല പുളിക്കീഴ് അന്നപറമ്പില്‍ വാസുദേവന്‍റെ വീടിന്‍റെ ഉള്ളില്‍ നിന്നുമാണ് വനംവകുപ്പ് റാന്നി ആര്‍ആര്‍ടി സംഘം കാട്ടൂപൂച്ചയെ പിടികൂടിയത്. സെക്‌ഷന്‍ ഫോറസ്റ്റ് ഓഫീസര്‍ ജിജോ ജോര്‍ജിന്‍റെ നേതൃത്വത്തില്‍ ബീറ്റ് ഫോറസ്റ്റര്‍മാരായ മനീഷ് മോൻ, അരുണ്‍ കുമാര്‍, ഫിറോസ്ഖാന്‍ എന്നിവര്‍ സംഘത്തിലുണ്ടായിരുന്നു.

മലയാലപ്പുഴയിലെ മാലമോഷണം; നാടോടി സംഘത്തിലെ ഒരാൾകൂടി പിടിയിൽ

പത്തനംതിട്ട: മലയാലപ്പുഴ ദേവി ക്ഷേത്രത്തില്‍ ദര്‍ശനത്തിനെത്തിയ വീട്ടമ്മയുടെ നാലര പവന്‍ സ്വര്‍ണമാല കവര്‍ന്ന നാടോടി സംഘത്തിൽ ഒരാളെക്കൂടി പോലീസ് അറസ്റ്റ് ചെയ്തു. അട്ടക്കുളങ്ങര സബ് ജയിലില്‍ കഴിഞ്ഞുവരുന്ന തമിഴ്‌നാട് തിരുവല്ലൂര്‍ പൊളിവാക്കം വൈഷ്ണവി നഗര്‍ രതി(40) യെയാണ് കോടതി ഉത്തരവ് പ്രകാരം, മലയാലപ്പുഴ എസ്ഐ വി. എസ്. കിരണ്‍ ജയിലിലെത്തി അറസ്റ്റ് രേഖപ്പെടുത്തിയത്. തുടര്‍ന്ന്, കസ്റ്റഡിയില്‍ വാങ്ങി മലയാലപ്പുഴയിലെത്തിച്ച് തെളിവെടുപ്പും ചോദ്യം ചെയ്യലും പൂര്‍ത്തിയാക്കിയശേഷം കോടതിയില്‍ തിരികെ ഹാജരാക്കി. കേസില്‍ ഒന്നും രണ്ടും പ്രതികളായ തമിഴ്‌നാട് വെള്ളാച്ചി പള്ളിവാസല്‍ കോട്ടൂര്‍ സ്വദേശി ജൂലി (53), തമിഴ്‌നാട് രാജപാളയം ജക്കമ്മാള്‍(42) എന്നിവരെ നേരത്തേ അറസ്റ്റ് ചെയ്തിരുന്നു. ഈ മാസം ഒന്നിന് ക്ഷേത്രത്തിന്‍റെ ശ്രീകോവിലിനു സമീപം പത്തനംതിട്ട തോന്ന്യാമല പട്ടം കിഴക്കേക്കര വീട്ടില്‍ സുധാ ശശിയുടെ മൂന്നു ഗ്രാം താലിയും ഒരു ഗ്രാം ലോക്കറ്റുമടക്കം നാലരപവന്‍റെ മാലയാണ് സംഘം അപഹരിച്ചത്.

സൈക്കിൾദിനത്തിൽ സവാരി സംഘടിപ്പിച്ചു

അടൂർ: ഇളംപള്ളിൽ - പയ്യനല്ലൂർ പ്രതീക്ഷ ലൈബ്രറി ആർട്സ് ആൻഡ് സ്പോർട്സ് ക്ലബ‌ിന്‍റെ നേതൃത്വത്തിൽ പത്തനംതിട്ട മേരാ യുവഭാരതുമായി ചേർന്ന് ലോക സൈക്കിൾ ദിനത്തോടനുബന്ധിച്ച് ഫിറ്റ് ഇന്ത്യാ കാമ്പെയിന്‍റെ ഭാഗമായി സൺഡൈസ് ഓൺ സൈക്കിൾ പ്രോഗ്രാം സംഘടിപ്പിച്ചു. മഹാത്മാ ജനസേവന കേന്ദ്രം ട്രസ്റ്റി അക്ഷർ രാജ് സൈക്കിൾ റാലി ഫ്ലാഗ് ഓഫ് ചെയ്തു. ബാലവേദി പ്രസിഡന്‍റ് എം. അഭിജിത്ത്, ജോയിന്‍റ് സെക്രട്ടറി ആർ. അദ്വൈത്, ആർ. ആദിത്യൻ, ശിവശങ്കരൻ , അഗ്രജ് ബിശ്വാസ് എന്നിവർ പ്രസംഗിച്ചു. എക്സിക്യൂട്ടീവ് അംഗം അദ്വൈത് ബിശ്വാസ് റാലിക്ക് നേതൃത്വം നല്കി.

മീന്തലക്കരയിൽ വീട് തകർന്നു

തിരുവല്ല: കഴിഞ്ഞ ദിവസം രാത്രിയിൽ ഉണ്ടായ കാറ്റിലും മഴയിലും മീന്തലക്കര മൈലമൂട്ടിൽ പൊയ്കയിൽ എം. കെ. രാജേന്ദ്രന്‍റെ വീട് തക‌ർന്നു. കാറ്റിൽ വീടിന്‍റെ മേൽക്കൂര ഇളകിപ്പോയി. വീട് പൂർണമായും നശിച്ച നിലയിലാണ്. പിക്കപ്പ് വാഹന ഡ്രൈവറാണ് രാജേന്ദ്രൻ. മൂന്ന് മുറികളുള്ള വീട്ടിൽ രാജേന്ദ്രനും ഭാര്യയും സഹോദരനുമാണുള്ളത്. വീട്ടിലുണ്ടായിരുന്ന ഗൃഹോപകരണങ്ങളും നശിച്ചു. ഓടും ഷീറ്റു മേഞ്ഞതായിരുന്നു മേൽക്കൂര . അപകടം നടക്കുമ്പോൾ ഇവർ മറ്റൊരു മുറിയിലായിരുന്നതിനാൽ വൻ അപകടമാണ് ഒഴിവായത്.

ഹൈസ്കൂളിലെ അധികസമയം; പ്രൈമറി ക്ലാസുകളിൽ കാത്തിരിപ്പ്

കോഴഞ്ചേരി: ഹൈസ്കൂൾ ക്ലാസുകളിലെ സമയമാറ്റം മൂലം ആദ്യദിനത്തിൽ അവ്യക്തത.തിങ്കളാഴ്ച മുതലായിരുന്നു സംസ്ഥാനത്തെ പൊതുവിദ്യാല‍യങ്ങളിൽ അധ്യയന സമയം രാവിലെ 9.45 ന് ആരംഭിച്ച് വൈകുന്നേരം 4.45 ന് അവസാനിക്കുന്ന തരത്തിൽ പുനഃക്രമീകരിച്ചത്. ഇതിലൂടെ കുട്ടികള്‍ക്ക് അധ്യയന സമയം കൂടി. 45 മിനിട്ട് വീതമുള്ള എട്ട് പീരിയഡുകൾ നിലവിൽ വന്നു. തിങ്കളാഴ്ച ജില്ലയ്ക്ക് അവധിയായിരുന്നതിനാല്‍ ഇന്നലെ മുതലാണ് സമയമാറ്റം പ്രാവർത്തികമായത്. 8,9,10 ക്ലാസുകളില്‍ മാത്രമാണ് സമയ വ്യത്യാസമുളളത്. യുപി, എല്‍പി വിഭാഗങ്ങളില്‍ രാവിലെ 10 ന് തുടങ്ങി നാലിന് അവസാനിക്കുന്ന പഴയ രീതിയിലാണ് ക്ലാസുകള്‍ നടക്കുന്നത്. ഹൈസ്കൂളിനൊപ്പം പ്രവർത്തിക്കുന്ന പ്രൈമറി ക്ലാസുകളിലെ കുട്ടികൾക്ക് പുതിയ സമയമാറ്റം പൊല്ലാപ്പായിട്ടുണ്ട്. ഈ കുട്ടികളും ഹൈസ്കൂൾ കുട്ടികളോടൊപ്പം എത്തേണ്ടിവരും. സ്കൂൾ വാഹനങ്ങളുടെ സമയവും പുനഃക്രമീകരിച്ചിട്ടുണ്ട്. 9.30ന് ബെല്ലടിച്ച് 9.45ന് ഹൈസ്കൂൾ ക്ലാസുകളിൽ അധ്യയനം ആരംഭിക്കുമെങ്കിലും പ്രൈമറി ക്ലാസുകളിൽ പത്തിനു തുടങ്ങിയാൽ മതി. പ്രൈമറി കുട്ടികൾ അരമണിക്കൂർ ക്ലാസിൽ വെറുതെയിരിക്കേണ്ടിവരും. വൈകുന്നേരം പ്രൈമറി ക്ലാസുകൾ നാലിന് അവസാനിക്കുമെങ്കിലും ഹൈസ്കൂൾകുട്ടികൾ കൂടി വരാതെ വാഹനങ്ങൾ പുറപ്പെടില്ല. പ്രായോഗിക ബുദ്ധിമുട്ട് അധ്യയന സമയമാറ്റം സ്കൂൾ അധികൃതരെ ബുദ്ധിമുട്ടിലാക്കിയിട്ടുണ്ട്. രാവിലെയും വൈകുന്നേരവും കുട്ടികളുടെ യാത്ര ക്രമീകരിക്കുന്നതാണ് പൊല്ലാപ്പായത്. പല എയ്ഡഡ്, സർക്കാർ വിദ്യാലയങ്ങളും ഒരു വാഹനം ഉപയോഗിച്ചാണ് കുട്ടികളെ എത്തിക്കുന്നത്. പ്രൈമറി, ഹൈസ്കൂൾ കുട്ടികൾക്കായി വെവേറെ ട്രിപ്പ് നടത്താനാകില്ല. രണ്ടു വിഭാഗത്തിലെയും കുട്ടികളെയും കയറ്റി എത്തുകയും മടക്കിക്കൊണ്ടുപോകുകയും ചെയ്യുന്നത് ഒരു സമയത്താകും. വൈകുന്നേരങ്ങളിൽ അഞ്ചിന് ട്രിപ്പ് ആരംഭിച്ചാൽ വിദൂരങ്ങളിലെത്തുന്പോഴേക്കും സന്ധ്യയാകും. രാവിലെ ഏഴോടെ ട്രിപ്പ് ആരംഭിച്ചെങ്കിലേ കുട്ടികളെ 9.30നു മുന്പ് പലയിടത്തും എത്തിക്കാനാകൂ. സാധാരണക്കാരായ കുട്ടികൾ പഠിക്കുന്ന പൊതുവിദ്യാലയങ്ങളിൽ പൊതുഗതാഗത സംവിധാനത്തെ ആശ്രയിച്ചു കുട്ടികൾ വരട്ടേയെന്നു നിർദേശിക്കാനുമാകില്ല. വെള്ളിയാഴ്ചകളില്‍ പഴയതുപോലെ ക്ലാസുകള്‍ പ്രവര്‍ത്തിച്ചാല്‍ മതിയാവും. ആഴ്ചയിൽ ഒരുദിവസം മറ്റൊരു സമയക്രമമെന്നതിലും അപ്രായോഗികതയുണ്ടെന്ന് രക്ഷിതാക്കളും സ്കൂൾ അധികൃതരും ചൂണ്ടിക്കാട്ടുന്നു. ഹൈക്കോടതിയുടെ ഉത്തരവിനേ തുടര്‍ന്ന് 220 അധ്യയന ദിവസം ഹൈസ്‌കൂള്‍ ക്ലാസുകളില്‍ ഉറപ്പാക്കാനാണ് സമയമാറ്റം കൊണ്ടുവന്നിരിക്കുന്നത്.

തിരുമൂലപുരത്ത് ബേക്കറിയിൽ മോഷണം

തിരുവല്ല: തിരുമൂലപുരത്ത് ബേക്കറിയുടെ ഷട്ടർ കുത്തിത്തുറന്ന് മോഷണം. തിരുമൂലപുരത്ത് പ്രവർത്തിക്കുന്ന അമ്പാടിയിൽ ബേക്കറി ആൻഡ് കഫേയിലാണ് മോഷണം നടന്നത്. സ്ഥാപനത്തിന്‍റെ പ്രധാന ഷട്ടറിന്‍റെ പൂട്ട് തകർത്ത് അകത്തു കയറിയ അഞ്ചംഗ സംഘം മേശയിൽ നിന്നു 5200 രൂപയോളം കവർന്നു. ചൊവ്വാഴ്ച രാവിലെ എട്ടരയോടെ ജീവനക്കാരനായ സുരേന്ദ്രൻ കട തുറക്കാനായി എത്തിയപ്പോഴാണ് മോഷണ വിവരം അറിഞ്ഞത്. ഉടൻതന്നെ സ്ഥാപന ഉടമയെയും മറ്റ് ജീവനക്കാരെയും വിവരം അറിയിച്ചു. തുടർന്ന് സ്ഥാപന ഉടമ നൽകിയ പരാതിയിൽ തിരുവല്ല പോലീസ് സ്ഥലത്തെത്തി തെളിവുകൾ ശേഖരിച്ചു. പുലർച്ചെ 3.20 ഓടെ ഷട്ടറിന്‍റെ പൂട്ട് തകർത്ത് മോഷണസംഘം അകത്തു കയറുന്നതായ ദൃശ്യങ്ങൾ ലഭിച്ചു. മഴക്കോട്ടും തൊപ്പിയും ധരിച്ച സംഘം പണം പരതുന്ന ദൃശ്യങ്ങൾ സ്ഥാപനത്തിലെ സിസിടിവികളിൽ നിന്നും ലഭിച്ചിട്ടുണ്ട്. മോഷണം നടന്ന ബേക്കറിയുടെ എതിർവശത്ത് പ്രവർത്തിക്കുന്ന തട്ടുകടയിൽ എത്തിയ സംഘം മോഷണ ശ്രമം നടത്തുകയും ഇവിടെ സൂക്ഷിച്ചിരുന്ന ഗ്യാസ് അടുപ്പ് സമീപത്തെ വെള്ളക്കെട്ടിൽ ഉപേക്ഷിക്കുകയും ചെയ്തു. തിങ്കളാഴ്ച അർധരാത്രി മുതൽ പ്രദേശത്ത് ശക്തമായ മഴ അനുഭവപ്പെട്ടിരുന്നു. ഇതിന്‍റെ മറവിലാകാം മോഷണമെന്ന് അനുമാനിക്കുന്നതായും സ്ഥാപനത്തിൽ നിന്നും ലഭിച്ച സിസിടിവി ദൃശ്യങ്ങൾ അടിസ്ഥാനമാക്കി പ്രതികൾക്കായുള്ള അന്വേഷണം ആരംഭിച്ചതായും പോലീസ് പറഞ്ഞു. photo തിരുമൂലപുരത്ത് ബേക്കറിക്കുള്ളിൽ കടന്ന മോഷ്ടാക്കൾ മേശയിൽ നിന്നു പണം മോഷ്ടിക്കുന്ന ദൃശ്യം സിസിടിവിയിൽ പതിഞ്ഞപ്പോൾ.

റോഡരികിൽ കഞ്ചാവു ചെടി കണ്ടെത്തി

തിരുവല്ല: എംസി റോഡിൽ തിരുവല്ല തിരുമൂലപുരത്ത് ഫർണിച്ചർ കടയുടെ സമീപം കഞ്ചാവു ചെടി കണ്ടെത്തി. ഇന്നലെ വൈകുന്നരം തിരുവല്ല എക്സൈസ് സർക്കിൾ ഇൻസ്‌പെക്ടർ കെ. രാജേന്ദ്രനും സംഘവും നടത്തിയ പരിശോധനയിലാണ് റോഡരികിൽ വൈദ്യുതി പോസ്റ്റിന്‍റെ കിഴക്കുവശത്ത് കുറ്റിച്ചെടികൾക്കിടയിൽ നിന്ന് കഞ്ചാവ് ചെടി കണ്ടെത്തയിത്. 89 സെന്‍റിമീറ്റർ നീളമുള്ള ചെ‌ടിയാണിത്. എക്സൈസ് വകുപ്പ് കേസെടുത്തെങ്കിലും പ്രതിയായി ആരെയും ഉൾപ്പെടുത്തിയിട്ടില്ല.

പത്തനംതിട്ട നഗര റോഡുകളിലെ കുഴികൾ യാത്രക്കാർക്ക് ഭീഷണി

പത്തനംതിട്ട: കനത്ത മഴയിൽ പത്തനംതിട്ട നഗരത്തിലെ റോഡുകൾ നിറയെ കുണ്ടുംകുഴിയും. വെള്ളക്കെട്ടു കാരണം റോഡുകളിലൂടെ സഞ്ചരിക്കാനാകാത്ത സ്ഥിതിയാണ്. മാലിന്യങ്ങളും റോഡിലേക്ക് ഒഴുക്കാൻ തുടങ്ങിയതോടെ നഗരം ദുർഗന്ധപൂരിതവുമായി. പകർച്ച വ്യാധികൾ പടിവാതിൽക്കൽ നിൽക്കുന്പോഴാണ് നഗരം മുഴുവൻ ചെളിക്കുണ്ടിലും മാലിന്യത്തിലുമായിരിക്കുന്നത്. നഗരവാർഡുകളിലെ ഉപറോഡുകൾ മുഴുവൻ തകർന്നു കിടക്കുകയാണ്. പഴയ ബസ് സ്റ്റാൻഡിനു പിന്നിലൂടെ കടമ്മനിട്ട റോഡിലേക്ക് പ്രവേശിക്കുന്ന റോഡാണ് ഏറെ ശോച്യാവസ്ഥയിലായിരിക്കുന്നത്. മഴക്കാലത്ത് റോഡ് നിറഞ്ഞാണ് മലിനജലം ഒഴുകുന്നത്. ഇതിൽ ചവിട്ടിവേണം നടന്നുപോകേണ്ടത്. വെള്ളം ഒഴുകിപ്പോകാൻ ഓട സംവിധാനവും ഇവിടെയില്ല. സകല മാലിന്യങ്ങളും വെള്ളത്തിൽ കെട്ടിക്കിടക്കുകയാണ്. വാഹനങ്ങൾ കടന്നുപോകുമ്പോൾ സമീപത്തെ കടകളിലേക്കാണ് മാലിന്യം തെറിക്കുന്നത്. ഈ ഭാഗത്തെ മറ്റു റോഡുകളും തകർന്ന് കിടക്കുകയാണ്. പത്തനംതിട്ട ഗവൺമെന്‍റ് ഹൈസ്കൂളിലേക്കുള്ള പാത നിറയെ കുണ്ടും കുഴിയുമാണ്. ഗവൺമെന്‍റ് സ്കൂൾ, എംപ്ലോയ്മെന്‍റ് എക്സ്ചേഞ്ച് എന്നിവിടങ്ങളിലേക്കുള്ള പാതയാണിത്. ചിറ്റൂർ റോഡിന്‍റെസ്ഥിതിയും പരിതാപകരമാണ്. ഡോക്ടേഴ്സ്ലൈൻ, പീപ്പിൾസ് ക്ലിനിക് റോഡുകളും നിശേഷം തകർന്ന് യാത്ര ദുഷ്കരമാണ്. പീപ്പിൾസ് ക്ലിനിക് റോഡിൽ ഓട തകർന്നത് നന്നാക്കാതെയും കിടക്കുന്നു . കെഎസ്ആർടിസി - ശാസ്താക്ഷേത്രം റോഡിൽകൂടിയും സഞ്ചരിക്കാൻ കഴിയില്ല. നിരവധിവ്യാപാര സ്ഥാപനങ്ങളും അഭിഭാഷകരുടെ ഓഫീസുകളും പ്രവർത്തിക്കുന്നത് ഇവിടെയാണ്. കക്കൂസ് മാലിന്യംവരെ റോഡിലേക്ക് ഒഴുകിയെത്തുന്നുണ്ട്. മുനിസിപ്പൽ ബസ് സ്റ്റാൻഡ് റോഡ് തോടായി പത്തനംതിട്ട അബാൻ മേൽപാലം പണി നടക്കുന്ന സ്വകാര്യ ബസ് സ്റ്റാൻഡിനു മുന്നിലെ നഗരത്തിലെ പ്രധാനപ്പെട്ടറോഡും തോടിനു സമാനമാണിപ്പോൾ. കാലൊന്നു തെറ്റിയാൽ ചെളിയിൽ മുങ്ങും. റോഡും കുഴിയും തിരിച്ചറിയാനും കഴിയില്ല.അത്രത്തോളം തകർന്നു തരിപ്പണമായിരിക്കുകയാണ് ഈ പാത. കാൽനടയാത്രക്കാരും ഏറെ ബുദ്ധിമുട്ടുന്നു. കാലൊന്നു തെറ്റിയാൽ ചെളിയിൽ മുങ്ങുമെന്നതാണു സ്‌ഥിതി. മഴ കനത്തതോടെ വലിയ ദുരിതമാണ്. ഒട്ടേറെ വ്യാപാര സ്‌ഥാപനങ്ങളും ഓട്ടോ സ്‌റ്റാൻഡുമുള്ള മേഖല കൂടിയാണിത്. റോഡിന്‍റെ തകർച്ച വ്യാപാരികളെയും ദുരിതത്തിലാക്കി. മേൽപാലം നിർമാണഭാഗമായി സർവീസ് റോഡ് യാഥാർഥ്യമാക്കാൻ വൈകുന്നതാണ് ബുദ്ധിമു ട്ടുകൾക്കെല്ലാം കാരണമാകുന്ന്. സ്ഥലമേറ്റെടുപ്പ് ഉൾപ്പെടെയുള്ള വിവിധ കാരണങ്ങളാൽ സർവീസ് റോഡ് പണി വൈകുകയാണ്. രണ്ടാഴ്ചമുമ്പ് സർവീസ് റോഡിന്‍റെ സംരക്ഷണ ഭിത്തിയുടെ കുറെ ഭാഗം തകർന്നതും പുനർനിർമിക്കാനാകാതെ കിടക്കുകയാണ്. എൽഡിഎഫ് സർക്കാരിന്‍റെ നാലാം വാർഷികത്തിന്‍റെ ഭാഗമായി മുഖ്യമന്ത്രി പങ്കെടുത്ത യോഗം ബസ് സ്‌റ്റാൻഡിനുള്ളിലെ വടക്കേ യാർഡിലാണു നടത്തിയത്. റോഡിലെ ദുരവസ്ഥ കാണാതിരിക്കാൻ തലേന്നു ചില ഭാഗങ്ങളിൽഅറ്റകുറ്റപ്പണി നടത്തിയിരുന്നു. തൊട്ടടുത്ത ദിവസത്തെ കനത്ത മഴയിൽ ഇതെല്ലാം ഒഴുകിപ്പോകുകയും ചെയ്തു. താഴെ വെട്ടിപ്രത്ത് ബീക്കൺ ലൈറ്റ് സ്ഥാപിച്ച് കടയുടമ, ജലഅഥോറിറ്റി കുഴിമൂടി പത്തനംതിട്ട - മൈലപ്ര റോഡിൽ താഴെവെട്ടിപ്രം ഭാഗത്തു ബീക്കൺ ലൈറ്റ് സ്ഥാപിച്ച് സമീപത്തെ കടയുമട മുന്നറിയിപ്പ് നൽകിയതോടെ ജലഅഥോറിറ്റി ഇടപ്പെട്ടു. താഴെ വെട്ടിപ്രത്ത് പൈപ്പ് പൊട്ടി രൂപപ്പെട്ട കുഴിയിൽ നിരവധി ആളുകളാണ് കഴിഞ്ഞദിവസങ്ങളിൽ അപകടത്തിൽപെട്ടത്. എസ്പി ഓഫീസിനു സമീപത്തും ജില്ലാ ജഡ്ജിയുടേതടക്കം വീടിനു മുന്നിലുമാണ് കുഴി രൂപപ്പെട്ടത്. റോഡിനു സമീപം വർക്ക്ഷോപ്പ് നടത്തുന്ന പുഷ്പരാജാണ് തിങ്കളാഴ്ച രാത്രി റോഡിൽ ബോർഡ് വച്ച് മുന്നറിയിപ്പ് നൽകാൻ ബീക്കൺ ലൈറ്റ് സ്ഥാപിച്ചത്. ബീക്കൺ ലൈറ്റിനൊപ്പം ബോർഡും ചുവന്ന ലൈറ്റുകളും വച്ചിരുന്നു. ഉച്ചയോടെ ജലഅഥോറിറ്റി അധികൃതരെത്തി കുഴി അടച്ചു. മക്കിട്ട് കുഴി നികത്തുകയാണ് ചെയ്തത്. നഗരത്തിലെ പ്രധാന റോഡുകളിൽ പൈപ്പ് പൊട്ടി വൻ കുഴികളാണ് രൂപപ്പെട്ടിരുന്നത്. കെഎസ്ആർടിസി ജംഗ്ഷനിൽ പൈപ്പ് പൊട്ടിയുണ്ടായ കുഴി വാഹനയാത്രയ്ക്കു തടസമായി നിൽക്കുകയായിരുന്നു. പരാതികളേതുടർന്ന് ഇന്നലെയാണ് ഇത് മക്കിട്ട് നികത്തിയത്. കനത്ത മഴയ്ക്കിടെയിൽ നിലവിലെ കുഴിയടയ്ക്കൽ അധികദിവസം നീണ്ടു നിൽക്കില്ല. താഴെ വെട്ടിപ്രത്ത് ശബരിമല ഇടത്താവളത്തിനു സമീപം നിരന്തരം പൈപ്പ് പൊട്ടി രൂപപ്പെട്ട കുഴികളിലും ഇന്നലെ മക്കിട്ട് നികത്തുന്നുണ്ടായിരുന്നു. സുഗമമായ യാത്രയ്ക്കു തടസമാകുന്ന തരത്തിൽ രൂപപ്പെട്ട കുഴികൾ നികത്തുകയാണുണ്ടായത്.

സുരക്ഷാ ജീവനക്കാരനു മർദനമേറ്റു

അടൂർ: വസ്ത്ര വ്യാപാരശാലയിൽ എത്തിയയാൾ വാഹനം പാർക്ക് ചെയ്യുന്നതുമായുണ്ടായ തർക്കത്തിൽ സെക്യൂരിറ്റിയെ മർദിച്ചു. അടൂർ സെൻട്രൽ ടോളിൽ പ്രവർത്തിക്കുന്ന സുഡിയോ വസ്ത്രവ്യാപാരശാലയിലെ സുരക്ഷാജീവനക്കാരൻ കടമ്പനാട് അബി ഭവനം ബിജുകുമാറിനാണ് ( 52 ) മർദനമേറ്റത്. സംഭവത്തിൽ പന്തളം കടയ്ക്കാട് സുബൈദ മൻസിൽ അഖിൽ മുഹമ്മദിനെ (23) അടൂർ പോലീസ് അറസ്റ്റ് ചെയ്തു. ബിജു കുമാറിന്‍റെ തോളെല്ലിന് പരിക്കേറ്റു. കഴിഞ്ഞദിവസം ഉച്ചയ്ക്കാണ് സംഭവം. അഖിൽ മുഹമ്മദ് ബിജു കുമാറിനെ പിടിച്ചു തള്ളുന്നതിന്‍റെ ദൃശ്യം വസ്ത്രശാലയിലെ സിസിടിവിയിൽ പതിഞ്ഞിരുന്നു. തുടർന്ന് സ്ഥാപനത്തിലെ സെക്യൂരിറ്റി വിഭാഗം അധികൃതർ അടൂർ പോലീസിൽ പരാതി നൽകി. അടൂർ എസ് എച്ച്ഒ ശ്യാം മുരളിയുടെ നേതൃത്വത്തിലാണ് അഖിൽ മുഹമ്മദിനെ അറസ്റ്റ് ചെയ്തത്. ഇയാളെ പിന്നീട് സ്റ്റേഷൻ ജാമ്യത്തിൽ വിട്ടയച്ചു.

റോഡ് മുറിച്ചുകടക്കുന്നതിനിടയിൽ കാറിടിച്ച് കാൽനട യാത്രികൻ മരിച്ചു

അടൂർ: മണ്ണടിയിൽ റോഡ് മുറിച്ചു കടക്കുന്നതിനിടയിൽ കാറിടിച്ച് കാൽനടയാത്രികൻ മരിച്ചു. മണ്ണടി മുഖമുറി കൊണ്ടൂർ പടിക്കൽ എ. തങ്കപ്പനാണ് (69) മരിച്ചത്. തിങ്കളാഴ്ച രാത്രി 7.30ന് മണ്ണടി കല്ലുവിളേത്ത് ജംഗ്ഷനിലാണ് അപകടം. പരിക്കേറ്റ തങ്കപ്പനെ അടൂർ ജനറൽ ആശുപത്രിയിലും പിന്നീട് ചായലോട് സ്വകാര്യ മെഡിക്കൽ കോളജിലും എത്തിച്ചെങ്കിലും രക്ഷിക്കാനായില്ല.

ബാങ്ക് എംപ്ലോയീസ് ഫെഡറേഷൻ കൺവൻഷൻ

പത്തനംതിട്ട: കേരള ബാങ്ക് എംപ്ലോയീസ് ഫെഡറേഷൻ ജില്ലാ പ്രവർത്തക കൺവൻഷൻ സിപിഎം ജില്ലാ സെക്രട്ടറി രാജു ഏബ്രഹാം ഉദ്ഘാടനം ചെയ്തു. ജില്ലാ പ്രസിഡന്‍റ് എ.ആർ. വിക്രമൻ അധ്യക്ഷത വഹിച്ചു. കേരള ബാങ്ക് ഭരണസമിതിയംഗം നിർമലാദേവി, ഫെഡറേഷൻ ജില്ലാ സെക്രട്ടറി റോയി ഫിലിപ്പ്, സേതുകുമാർ, ഇന്ദുലേഖ, ആർ. അജയകുമാർ, യു. ജിൽ തുടങ്ങിയവർ പ്രസംഗിച്ചു. സംസ്ഥാന കമ്മിറ്റിയംഗം വി.ആർ. സജികുമാറിനും പത്മകുമാരിക്കും യോഗത്തിൽ യാത്രയയപ്പ് നല്കി.

ജില്ലാ നിയമ സേവന അഥോറിറ്റി അദാലത്ത്: 6332 കേസുകള്‍ തീര്‍പ്പാക്കി

പത്തനംതിട്ട: ജില്ലാ നിയമ സേവന അഥോറിറ്റിയുടെയും വിവിധ താലൂക്ക് ലീഗല്‍ സര്‍വീസ് കമ്മിറ്റികളുടെയും നേതൃത്വത്തില്‍ പത്തനംതിട്ട കോടതി സമുച്ചയത്തില്‍ നടന്ന അദാലത്തില്‍ ജില്ലയിലെ വിവിധ കോടതികളിലായി 6332 കേസുകള്‍ തീര്‍പ്പാക്കി. വിവിധ കേസുകളില്‍ നഷ്ടപരിഹാരമയും പിഴയിനത്തിലുമായി 10.25 കോടി രൂപ ഈടാക്കി. പിഴ ഒടുക്കിത്തീര്‍ക്കാവുന്നവ, എംഎസിറ്റി, ബാങ്ക്, ആര്‍ടിഒ, ബിഎസ്എന്‍എല്‍, സിവില്‍ വ്യവസായങ്ങൾ, കുടുംബ തര്‍ക്കങ്ങള്‍ തുടങ്ങിയവയാണ് തീര്‍പ്പാക്കിയത്. ജില്ലാ സേവന അഥോറിറ്റി ചെയര്‍മാനും ജില്ലാ ജഡ്ജിയുമായ എൻ. ഹരികുമാര്‍, താലൂക്ക് നിയമ സേവന കമ്മിറ്റി ചെയര്‍മാനും അഡീഷണൽ ജില്ലാ ജഡ്ജിയുമായ ജി. പി. ജയകുമാർ, ജില്ലാ സേവന അഥോറിറ്റി സെക്രട്ടറി സിവില്‍ ജഡ്ജ് സീനിയര്‍ ഡിവിഷന്‍ അരുണ്‍ ബെച്ചു എന്നിവര്‍ നേതൃത്വം നല്‍കി.

ഗവിയിലെ തൊഴിലാളി സമരം അവസാനിച്ചു

പത്തനംതിട്ട: കെഎഫ്ഡിസി മാനേജ്മെന്‍റുമായുള്ള തർക്കത്തേ തുടർന്ന് ഗവിയിലെ തൊഴിലാളികൾ മൂന്ന് ദിവസമായി നടത്തിവന്ന സമരം അവസാനിച്ചു. ടൂറിസം രംഗത്ത് പ്രവർത്തിച്ച 42 തൊഴിലാളികളെ തോട്ടം മേഖലയിലേക്ക് മാറ്റിയ തീരുമാനം കെഎഫ്ഡിസി പിൻവലിക്കാൻ തയാറായതിനേ തുടർന്നാണ് സമരം അവസാനിച്ചത്. തൊഴിലാളി യൂണിയൻ പ്രതിനിധികളും കെഎഫ്ഡിസി മാനേജ്മെന്‍റ് പ്രതിനിധികളും ഇന്നലെ പത്തനംതിട്ട ലേബർ ഓഫീസിൽ നടത്തിയ ചർച്ചയേ തുടർന്നാണ് പ്രശ്നം പരിഹരിച്ചത്. കഴിഞ്ഞ ദിവസം മൂഴിയാർ സിഐയുടെ സാന്നിധ്യത്തിൽ നടന്ന ചർച്ചയിൽ സമരം അവസാനിപ്പിക്കാൻ ധാരണയിലെത്തിയിരുന്നു. ഇന്നലെ നടന്ന ചർച്ചയിൽ ഗവിയിലെ തൊഴിലാളികൾ ഉന്നയിച്ച ആവശ്യങ്ങൾ കെഎഫ്ഡിസി ഡയറക്ടർ ബോർഡ് യോഗം ചേർന്ന് ചർച്ച ചെയ്യണമെന്ന് നിർദേശമുയർന്നു. ടൂറിസ്റ്റ് ഗൈഡുകൾക്ക് മഴക്കോട്ട്, ഷൂസ്, ട്രക്കിംഗ് പാത തെളിക്കൽ, ബോട്ടുകളുടെ സുരക്ഷാ പരിശോധന എന്നിവയാണ് തൊഴിലാളികൾ ഉന്നയിച്ച ആവശ്യങ്ങൾ.

ഇലവുംതിട്ടയിൽ നവജാതശിശുവിന്‍റെ മൃതദേഹം കണ്ടെത്തി

പത്തനംതിട്ട: നവജാതശിശുവിന്‍റെ മൃതദേഹം കണ്ടെത്തി. കുഞ്ഞിന്‍റെ അമ്മയെന്നു കരുതുന്ന യുവതി പോലീസ് നിരീക്ഷണത്തിൽ. മെഴുവേലി ആലക്കോട് കനാലിന് സമീപമുള്ള പറമ്പില്‍ ചൊവ്വാഴ്ച ഉച്ചയോടെയാണ് മൃതദേഹം കണ്ടത്. ചികില്‍സ തേടി ചെങ്ങന്നൂര്‍ ഉഷാ നഴ്സിംഗ് ഹോമില്‍ ചെന്ന അവിവാഹിതയില്‍ നിന്ന് കിട്ടിയ വിവരം അനുസരിച്ച് ഇലവുംതിട്ട പോലീസ് നടത്തിയ തെരച്ചിലിലാണ് മൃതദേഹം കണ്ടെത്തിയത്. മൃതദേഹത്തിനു മൂന്നുദിവസത്തെ പഴക്കമെങ്കിലുമുണ്ട്. ഇരുപത്തൊന്നു വയസുകാരിയാണ് വീട്ടില്‍ പ്രസവിച്ചത്. വീട്ടില്‍ പ്രസവിച്ചതിന്‍റെ അസ്വസ്ഥത കാരണം യുവതി ആദ്യം കിടങ്ങന്നൂരിലെ സ്വകാര്യ ആശുപത്രിയില്‍ ചികില്‍സ തേടിയിരുന്നു. യുവതി പ്രസവിച്ചതാണെന്ന് മനസിലാക്കിയ ആശുപത്രി അധികൃതര്‍ ഇവിടെ പ്രവേശിപ്പിക്കാതെ പറഞ്ഞു വിട്ടു. തുടര്‍ന്നാണ് ചെങ്ങന്നൂര്‍ അങ്ങാടിക്കലിലുള്ള ഉഷ നഴ്‌സിംഗ് ഹോമില്‍ എത്തി. പ്രസവലക്ഷണങ്ങൾ കണ്ടതോടെ കുഞ്ഞ് എവിടെയെന്നു ഡോക്ടർ തിരക്കി, യുവതി വ്യക്തമായ മറുപടി നൽകാതെ വന്നപ്പോൾ പോലീസിൽ അറിയിക്കുകയായിരുന്നു. ഇലവുംതിട്ട പോലീസ് നടത്തിയ തെരച്ചിലില്‍ തൊട്ടടുത്ത പറമ്പില്‍ പുല്ലിനിടയില്‍ നിന്ന് പെണ്‍കുഞ്ഞിന്‍റെ മൃതദേഹം കണ്ടെത്തുകയായിരുന്നു. ഇലവുംതിട്ട പോലീസ് ഇന്‍സ്‌പെക്ടര്‍ വിനോദ് കൃഷ്‌ണന്‍റെ നേതൃത്വത്തില്‍ അന്വേഷണം ആരംഭിച്ചു. യുവതി ആശുപത്രിയില്‍ ചികില്‍സയിലാണ്

ലഹരിക്കെതിരേ ‘പ്രൗഡ് കേരള’ ജില്ലാതല ഉദ്ഘാടനം

പത്തനംതിട്ട: ലഹരിക്കെതിരേ മുൻ പ്രതിപക്ഷ നേതാവ് രമേശ്‌ ചെന്നിത്തല നടത്തുന്ന പോരാട്ടം ശ്ലാഘനീയമെന്നും ഇതിനെ കേരളീയ സമൂഹം ഒന്നാകെ പിന്തുണയ്ക്കണമെന്നും മലങ്കര ഓർത്തഡോക്സ് സഭ വലിയ മെത്രാപ്പോലീത്ത കുര്യാക്കോസ് മാർ ക്ലിമീസ്. ലഹരിക്കെതിരേ രമേശ് ചെന്നിത്തല നേതൃത്വം നൽകുന്ന വാക്ക് എഗൈൻസ്റ്റ് ഡ്രഗ്സിന്‍റെ ഭാഗമായ പ്രൗഡ് കേരളയുടെ ജില്ലാ തല ഉദ്ഘാടനം നിർവഹിച്ചു പ്രസംഗിക്കുകയായിരുന്നു അദ്ദേഹം. എല്ലാവിധ ലഹരികളും സമൂഹത്തെ കാർന്നു തിന്നുന്ന ദുരവസ്ഥ വേദനജനകമാണ്. ഇതിനൊക്കെ പിന്തുണ നൽകുന്നവരെ സമൂഹം ഒറ്റപ്പെടുത്തണമെന്നും മെത്രാപ്പോലീത്ത പറഞ്ഞു. സംസ്ഥാന ചെയർമാൻ മലയിൻകീഴ് വേണുഗോപാൽ അധ്യക്ഷത വഹിച്ചു. പി. മോഹൻരാജ്, വെട്ടൂർജ്യോതിപ്രസാദ്, ആർ. വത്സലൻ, ജോൺസൻ വിളവിനാൽ, സാമുവേൽ കിഴക്കുപുറം, കെ. ജാസിംകുട്ടി, ടി. ടി. മുഹമ്മദ്‌, ഏബൽ മാത്യു, ഷാജിമോൻ, തട്ടയിൽ ഹരികുമാർ, രജനിപ്രദീപ്, എസ്.വി. പ്രസന്ന കുമാർ, റീബി ജോർജ്, അനു ഫിലിപ്പ്, പി. കെ. ജോസഫ്, എലിസബേത്ത് അബു, ലീലരാജൻ, വി. ടി. അജോമോൻ, സുനിൽ യമുന, മനോഷ് ഇലന്തൂർ, സുരേഷ്ബാബു പാലാഴി, കാട്ടൂർ അബ്ദുൽ സലാം, പി. രാമചന്ദ്രൻ നായർ എന്നിവർ പ്രസംഗിച്ചു.

ഇസ്രയേൽ - ഇറാൻ സംഘർഷത്തിന്‍റെ ആശങ്ക പ്രവാസി കുടുംബങ്ങളിലും

കോഴഞ്ചേരി: ഇസ്രയേല്‍ - ഇറാന്‍ സംഘര്‍ഷത്തിന്‍റെ ആശങ്കയിലും പ്രാർഥനയിലുമാണ് മധ്യതിരുവിതാംകൂറിലെ നിരവധി കുടുംബങ്ങൾ. പുല്ലാട്, - കോഴഞ്ചേരി, കുമ്പനാട്, ആറന്മുള, ആറാട്ടുപുഴ തുടങ്ങിയ പ്രദേശങ്ങളില്‍ നിന്നുള്ള നിരവധി ആളുകളാണ് ഇസ്രയേലിലും മറ്റുമുള്ളത്. ആതുര സേവന രംഗത്താണ് ബഹുഭൂരിപക്ഷം ആളുകളും ജോലി ചെയ്യുന്നത്. പുല്ലാട് സ്വദേശികളായ നിരവധിയാളുകള്‍ ഇസ്രയേലിലെ ടെല്‍ അവീവ്, ടെല്‍ഹി എന്നിവിടങ്ങളിലുണ്ട്. ഇവരെല്ലാം സുരക്ഷിതരാണെന്നാണ് ബന്ധുക്കൾക്കു ലഭിച്ച വിവരം. അടിയന്തര ഘട്ടങ്ങളിൽ ബങ്കറുകളിലേക്ക് മാറേണ്ട സാഹചര്യമുണ്ടെന്നും ബന്ധുക്കളെ അറിയിച്ചിട്ടുണ്ട്. ഇന്നലെ രാവിലെയും ഫോണില്‍ വിളിച്ചെന്നും സുരക്ഷിതരാണെന്നും എന്നാല്‍ പുറത്തിറങ്ങരുതെന്ന മുന്നറിയിപ്പുണ്ടെന്നും ടെല്‍ അവീവിൽ ജോലി ചെയ്യുന്ന പുല്ലാട് സ്വദേശിനിയുടെ മാതാവ് പറഞ്ഞു. യുദ്ധത്തിന്‍റെയും മിസൈല്‍ ആക്രമണത്തിന്‍റെയും ദൃശ്യങ്ങള്‍ മാധ്യമങ്ങളിൽ കാണുന്പോൾ ആകുലതകളുണ്ടെങ്കിലും ഫോണിലൂടെ അവിടെയുള്ളവരെ ലഭിക്കുന്നതാണ് ബന്ധുക്കൾക്ക് ഏക ആശ്വാസം.

മാർത്തോമ്മ മെത്രാപ്പോലീത്ത രഞ്ജിതയുടെ വീട് സന്ദർശിച്ചു

കോഴഞ്ചേരി: അഹമ്മദാബാദ് വിമാനാപകടത്തില്‍ മരിച്ച പുല്ലാട് സ്വദേശിനി രഞ്ജിത ജി. നായരുടെ പുല്ലാട് കൊഞ്ഞോണ്‍ വീട്ടില്‍ ആശ്വാസ വാക്കുകളുമായി മാര്‍ത്തോമ്മ സഭാധ്യക്ഷൻ ഡോ. തിയഡോഷ്യസ് മാര്‍ത്തോമ്മ മെത്രാപ്പോലീത്ത, ഡോ. യുയാക്കീം മാര്‍ കൂറിലോസ് സഫ്രഗൻ മെത്രാപ്പോലീത്തഎന്നിവരെത്തി. സഭ അല്മായ ട്രസ്റ്റി ആന്‍സില്‍ കോമാട്ടും മെത്രാപ്പോലീത്തയ്ക്കൊപ്പം ഉണ്ടായിരുന്നു. പുല്ലാട് ശ്രീരാമകൃഷ്ണവിലാസം എന്‍എസ്എസ് കരയോഗം പ്രസിഡന്‍റ് എം. പി. പ്രതാപന്‍ എന്നിവരും ഇന്നലെ രഞ്ജിതയുടെ വീട്ടിലെത്തി. കിടങ്ങന്നൂര്‍ വിജയാനന്ദാശ്രമം മഠാധിപതി കൃഷ്ണനന്ദ പൂര്‍ണമയിതീര്‍ഥയും എത്തിയിരുന്നു. ഇതിനിടെ രഞ്ജിതയുടെ ഡിഎൻഎ ഫലം ഇന്നലെയും എത്തിയില്ല. രഞ്ജിതയുടെ സഹോദരന്‍ രതീഷ് ജി. നായരുടെ രക്തസാമ്പിള്‍ ഡിഎന്‍എ പരിശോധനയ്ക്കായി അഹമ്മദാബാദിലെ സിവില്‍ ആശുപത്രി അധികൃതര്‍ ശേഖരിച്ചിരുന്നു. ഇന്നലെ രാവിലെ ഫലം അറിയുമെന്നു പറഞ്ഞിരുന്നെങ്കിലും ഇതുവരെ അറിവായിട്ടില്ല. ഡിഎന്‍എ പരിശോധനയിലൂടെ മൃതദേഹം തിരിച്ചറിഞ്ഞു കഴിഞ്ഞാൽ നാട്ടിലെത്തിച്ചു സംസ്‌കരിക്കാനുള്ള ക്രമീകരണങ്ങളും ആരംഭിക്കും. രഞ്ജിത പഠിച്ചതും മകന്‍ ഇന്ദുചൂഢന്‍ ഇപ്പോള്‍ പഠിക്കുന്നതുമായ പുല്ലാട് ശ്രീവിവേകാനന്ദ ഹൈസ്‌കൂളില്‍ പൊതു ദര്‍ശനത്തിനുവച്ചതിനു ശേഷമായിരിക്കും സംസ്‌കാര ചടങ്ങുകള്‍ നടക്കുന്നത്. ഇതുമായി ബന്ധപ്പെട്ട് പഞ്ചായത്ത് അധികൃതര്‍ ഇന്നലെ സ്‌കൂള്‍ സന്ദര്‍ശിച്ചിരുന്നു.

ആറന്മുള ഇലക്‌ട്രോണിക്സ് ക്ലസ്റ്റർ : അനുകൂലിച്ച് ഐടി വകുപ്പ്, പദ്ധതി നടപ്പാക്കാനാകില്ലെന്ന് കൃഷിവകുപ്പ്

പത്തനംതിട്ട: നിർദിഷ്ട ആറന്മുള വിമാനത്താവളം പദ്ധതി പ്രദേശത്ത് ഇലക്‌ട്രോണിക്സ് മാനുഫാക്ചറിംഗ് ക്ലസ്റ്റർ പദ്ധതി ആരംഭിക്കാനുള്ള നീക്കത്തെ പിന്തുണച്ച് ഐടി വകുപ്പ്. മുഖ്യമന്ത്രിയുടെ കീഴിലുള്ള ഐടി വകുപ്പിലെ കെഎസ്ഐടിഎൽ പദ്ധതിക്ക് പച്ചക്കൊടി നൽകിയിട്ടുണ്ട്. പദ്ധതി നടപ്പാക്കണമെങ്കിൽ ഭൂപരിഷ്കരണ നിയമത്തിൽ ഇളവുവേണമെന്നതിനാൽ ഇതിനായി ടേക്ക് ഓഫ് ടു ഫ്യൂച്ചർ പ്രൈവറ്റ് ലിമിറ്റഡ് (ടിഒഎഫ്എൽ) കന്പനി സർക്കാരിനെ സമീപിച്ചിട്ടുണ്ട്. ഇവർ നൽകിയ അപേക്ഷ സർക്കാരിന്‍റെ പരിഗണനയിലാണ്. സർക്കാർ മിച്ചഭൂമിയായി കണ്ടെത്തിയ സ്ഥലത്തു പദ്ധതി വരുന്നതിനെ എതിർത്ത് കൃഷിമന്ത്രി പി. പ്രസാദ് രംഗത്തെത്തിയിട്ടുണ്ട്. ആറന്മുളയിലെ നിർദിഷ്ട 139 ഹെക്ടർ ഭൂമിയിൽ 122.87 ഹെക്ടർ നിലമുണ്ടെന്നാണ് കണ്ടെത്തൽ. നിലം നികത്തിയ സ്ഥലത്ത് ഇത്തരമൊരു പ്രോജക്ട് വരുന്നതിലെ ദുരൂഹത തുടക്കം മുതൽ കൃഷി മന്ത്രി ചൂണ്ടിക്കാട്ടിയിരുന്നു. നെൽവയലും തണ്ണീർത്തടങ്ങളും നികത്തിയുള്ള പദ്ധതിയെ അനുകൂലിക്കില്ലെന്നതാണ് മന്ത്രിയുടെ നിലപാട്. മുന്പ് വിമാനത്താവള വിരുദ്ധ സമരത്തിലും മുൻപന്തിയിൽ തന്നെയുണ്ടായിരുന്നു. ഇലക്ട്രോണിക്സ് ക്ലസ്റ്റർ ആരംഭിക്കാനുദ്ദേശിക്കുന്ന ഭൂമിയിൽ നിലം നികത്തിയ ഭാഗമുണ്ടെന്നുള്ളത് ജില്ലാ കളക്ടർ സർക്കാരിലേക്കു നൽകിയ റിപ്പോർട്ടിൽ ചൂണ്ടിക്കാട്ടിയിരുന്നു. വിമാനത്താവള പദ്ധതിയുടെ നടത്തിപ്പുകാരായി എത്തിയ കെജിഎസ് ഗ്രൂപ്പ് പേരു മാറ്റിയാണ് പുതിയ പദ്ധതിക്കുവേണ്ടി ടിഐഎഫ്എൽ എന്ന കന്പനി രൂപീകരിച്ചതെന്നും കളക്ടറുടെ റിപ്പോർട്ടിൽ പറയുന്നു. രണ്ടു വർഷം മുമ്പാണ് കെജിഎസ് എന്ന സ്ഥാപനം ടേക്ക് ഓഫ് ടു ഫ്യൂച്ചർ പ്രൈവറ്റ് ലിമിറ്റഡ് എന്ന പുതിയ പേരിൽ പദ്ധതിക്കായി ഐവകുപ്പിൽ അപേക്ഷ സമർപ്പിക്കുന്നത്. ഭൂപരിഷ്കരണ നിയമത്തിൽ ഇളവു തേടി ഐടി വകുപ്പ് റവന്യു വകുപ്പിന് അപേക്ഷ കൈമാറി. റവന്യു വകുപ്പ് കൃഷി വകുപ്പിന്‍റെ പരിഗണനയ്ക്കായി കത്ത് സമർപ്പിച്ചു. നിർദ്ദിഷ്ട പ്രദേശത്ത് 65 ഹെക്ടറിൽ പുഞ്ചകൃഷി നടക്കുന്നുണ്ടെന്നും നെൽവയൽ നികത്തിയാൽ വെള്ളപ്പൊക്ക ഭീഷണി ഉണ്ടാകുമെന്നും കാട്ടി കൃഷി ഡെപ്യൂട്ടി ഡയറക്ടർ റിപ്പോർട്ട് നൽകിയിട്ടുമുണ്ട്. പദ്ധതിക്കു സിപിഎം പിന്തുണ സംസ്ഥാന സർക്കാർ രണ്ട് ബജറ്റുകളിൽ ആറന്മുള കേന്ദ്രീകരിച്ച് ഐടി പദ്ധതി പ്രഖ്യാപച്ചിരുന്നു. സർക്കാർ നേരിട്ടു നടത്തുന്ന ഐടി പാർക്കായിരിക്കുമെന്ന ധാരണ ആളുകൾക്കുണ്ടായിരുന്നു. ഇതിനിടെയണ് പുതിയ കന്പനി അപേക്ഷയുമായി രംഗപ്രവേശം ചെയ്തത്. 139 ഹെക്ടർ ഭൂമിയാണ് പദ്ധതിക്ക് ആവശ്യം എന്ന് അപേക്ഷയിൽ പറയുന്നു. എന്നാൽ ഇതിൽ 118.74 ഹെക്ടറും പണ്ട് വിമാനത്താവള പദ്ധതിക്കായി കണ്ടെത്തിയ വയലാണ്. കോഴഞ്ചേരി ചാരിറ്റബിൾ എഡ്യുക്കേഷൻ സൊസൈറ്റി ഉൾപ്പെടെയുള്ളവ കെജിഎസ് കന്പനിക്കു വിമാനത്താവളം ആവശ്യത്തിനായി നൽകിയ വസ്തു കോഴഞ്ചേരി താലൂക്കിലെ ആറന്മുള, കിടങ്ങന്നൂർ, മെഴുവേലി, മല്ലപ്പുഴശേരി വില്ലേജുകളിലാണ്. ഈ സ്ഥലം സ്വകാര്യ വ്യക്തി വാങ്ങിയതു നിയമപരമല്ലെന്നു കണ്ടെത്തുകയും പോക്കുവരവ് നടപടികൾ നിർത്തിവയ്ക്കുകയും ചെയ്തു. ഇതേത്തുടർന്ന് 118.74 ഹെക്ടർ മിച്ചഭൂമിയായി കോഴഞ്ചേരി താലൂക്ക് ലാൻഡ് ബോർഡ് പ്രഖ്യാപിച്ചിരുന്നു. 7.08 ഹെക്ടർ സർക്കാർ ഏറ്റെടുക്കുകയും ചെയ്തതാണ്. 5000 കോടിയുടെ നിക്ഷേപം, 1000 പേർ‌ക്ക് തൊഴിൽ ഭൂപരിഷ്കരണ നിയമത്തിൽ ഇളവുതേടി ഇലക്ട്രോണിക്സ് ക്ലസ്റ്ററിന് അനുമതി തേടിയിട്ടുള്ള പ്രദേശത്തിന്‍റെ 90 ശതമാനവും നിലമാണെന്ന് പറയുന്നു. നെൽവയലും തണ്ണീർത്തടവുമടങ്ങിയ പ്രദേശം നികത്തിയെടുത്താൽ വെള്ളപ്പൊക്ക സാധ്യയുണ്ടെന്ന മുന്നറിയിപ്പും കൃഷിവകുപ്പ് നൽകിയിരുന്നു. അനുമതി നൽകണമെങ്കിൽ പ്രാദേശിക നിരീക്ഷണസമിതിയുടെ ശിപാർശയും വേണം. എന്നാൽ വിമാനത്താവളം പോലെ പാടം നികത്തേണ്ട ആവശ്യമില്ലെന്ന് ഇലക്ട്രോണിക്സ് ക്ലസ്റ്റർ കന്പനി വാദിക്കുന്നു. ഒരേക്കർ സ്ഥലത്ത് പത്തു കോടി രൂപയുടെ നിക്ഷേപവും 20 പേർക്കു തൊഴിലും ഉറപ്പാക്കിയാൽ വ‍യലും തണ്ണീർത്തടവും നികത്തുന്നതിൽ ഇളവു നൽകാമെന്നു വ്യവസ്ഥയുണ്ട്. 1000 പേർക്കു തൊഴിലും 5000 കോടി നിക്ഷേപവുമാണ് ടിഒഎഫ്എൽ മുന്നോട്ടുവയ്ക്കുന്നത്. ആറന്മുളയിൽ പുതിയ പദ്ധതി പരിഗണനയിൽ ഇല്ല ആറന്മുളയിൽ വിമാനത്താവളമല്ലാതെ മറ്റേതെങ്കിലും പദ്ധതി പരിഗണനയിൽ ഇല്ലെന്ന് മൗണ്ട് സിയോൻ ഗ്രൂപ്പ് ചെയർമാനും എഡ്യുക്കേഷൻ ചാരിറ്റബി‌ൾ സൊസൈറ്റി ചെയർമാനുമായ ഡോ.ഏബ്രഹാം കലമണ്ണിൽ പറഞ്ഞു. എയറോനോട്ടിക്കൽ എൻജിനിയറിംഗ് പഠനത്തിനായുള്ള എയർ സ്ട്രിപ്പ് സ്ഥാപിക്കാനാണ് ആറന്മുളയിൽ സ്ഥലം വാങ്ങിയത്. പിന്നീട് ഇവിടെ വിമാനത്താവളം പദ്ധതി നിർദേശമുണ്ടായി.‌ ഇതിനാവശ്യമായ നടപടിക്രമങ്ങൾ നടത്തിയതാണ്. മറ്റാർക്കും ഭൂമി കൈമാറ്റം ചെയ്തിട്ടില്ലെന്നും മറ്റൊരു പദ്ധതി നിലവിൽ ആലോചനയിൽ ഇല്ലെന്നും ഏബ്രഹാം കലമണ്ണിൽ വ്യക്തമാക്കി.

ആറന്മുള വിമാനത്താവള പദ്ധതിപ്രദേശത്ത് ഇ പാർക്ക് പദ്ധതിയുമായി കെജിഎസ് ഗ്രൂപ്പ്

കോഴഞ്ചേരി: ആറന്മുള വിമാനത്താവളത്തിനായി ഏറ്റെടുത്ത സ്ഥലത്തു പുതിയ പദ്ധതികൾ സംബന്ധിച്ച നിർദേശങ്ങളും വിവാദത്തിൽ. വിമാനത്താവളം പദ്ധതി വിവാദങ്ങളിൽ കുടുങ്ങിയതോടെ പാഴായിപ്പോയ പദ്ധതി പ്രദേശത്ത് ഐടി പാർക്ക് അടക്കമുള്ള പദ്ധതികൾ പരിഗണിക്കുകയും സംസ്ഥാന സർക്കാർ ബജറ്റ് നിർദേശമായി അംഗീകരിക്കുകയും ചെയ്തിരുന്നു. പിന്നാലെ ഇതേ സ്ഥലത്ത് ഇലക്ട്രോണിക്‌സ് പാര്‍ക്ക് സിറ്റി ആരംഭിക്കുന്നതിനുള്ള സന്നദ്ധത അറിയിച്ചുകൊണ്ട് വിമാനത്താവള കമ്പനി ഉടകളായ കെജിഎസ് ഗ്രൂപ്പ് സർക്കാരിനെ സമീപിച്ചതോടെയാണ് പുതിയ വിവാദം ഉരുത്തിരിഞ്ഞിരിക്കുന്നത്. ഇതിനായി ഭൂപരിഷ്കരണ ചട്ടങ്ങളിൽ ഇളവ് തേടി ഐടി വകുപ്പിന് കെജിഎസ് അപേക്ഷ നൽകി. കെജിഎസ് ഗ്രൂപ്പിന്‍റെ 344 ഏക്കർ ഭൂമിയിൽ ഇലക്ട്രോണിക്സ് ക്ലസ്റ്റർ പദ്ധതിയാണ് ലക്ഷ്യം. അപേക്ഷ ജില്ലാ കളക്ടർ റവന്യു പ്രിൻസിപ്പൽ സെക്രട്ടറിക്കും കൃഷിവകുപ്പിനും കൈമാറി. പ്രദേശം കൃഷി ചെയ്യുന്ന നിലവുംതണ്ണീർത്തടവുമായതുകൊണ്ട് കൃഷി വകുപ്പിന്‌റെ അനുമതിയില്ലാതെ റവന്യു വകുപ്പിന് നടപടിയെടുക്കാനാവില്ല. കെജിഎസ് പത്തനംതിട്ട ഇൻഫ്ര ലിമിറ്റഡ് എന്ന കമ്പനി ടിഒഎഫ്എൽ എന്ന പേരിലാണ് പുതിയ പദ്ധതിക്ക് അപേക്ഷ നൽകിയത്.തണ്ണീർത്തടവും നിലവും നികത്തി വിമാനത്താവളം നിർമിക്കുന്നതിനെതിരേ പ്രതിഷേധമുയർന്നതിനേ തുടർന്നാണ് പദ്ധതിയിൽ നിന്നു പിൻമാറാൻ കെജിഎസ് നിർബന്ധിതമായത്. 2016ൽ സംസ്ഥാന സർക്കാർ പദ്ധതിക്കുള്ള എല്ലാ അനുമതികളും റദ്ദാക്കിയിരുന്നു. 2018ലെ പ്രളയത്തിൽ പമ്പാ നദി കരകവിഞ്ഞൊഴുകിയപ്പോൾ പ്രധാന ജലസംഭരണിയായത് പദ്ധതി പ്രദേശമായിരുന്നു. ആറൻമുള, കിടങ്ങന്നൂർ, മല്ലപ്പുഴശേരി വില്ലേജുകളിലാണ് സ്ഥലം. വിമാനത്താവളം നിർമിക്കുന്നതിനുവേണ്ടി സംസ്ഥാന സര്‍ക്കാര്‍ ഏറ്റെടുത്തതും നിലവിലുള്ള കമ്പനി ഉടമകളായ കെജിഎസ് ഗ്രൂപ്പിന്‍റെയും മുന്‍ ഉടമകളായ കലമണ്ണിൽ എഡ്യുക്കേഷണൽ ട്രസ്റ്റിന്‍റെയും ഉടമസ്ഥതയിലുള്ള 230 ഏക്കര്‍ സ്ഥലത്തിലെ 49 ഏക്കര്‍ മാത്രമാണ് മണ്ണിട്ട് നികത്തിയിട്ടുള്ളത്. എന്നാല്‍ ഇവര്‍ വാങ്ങിയ സ്ഥലത്ത് മിച്ചഭൂമി ഉണ്ടെന്നുള്ള തിരിച്ചറിവിന്‍റെ അടിസ്ഥാനത്തില്‍ 20 ലധികം കേസുകള്‍ ലാൻഡ് ബോര്‍ഡിന്‍റെ മുമ്പില്‍ നിലനില്‍ക്കുകയാണ്. സംസ്ഥാന സര്‍ക്കാര്‍ ഭൂമിക്കുവേണ്ടി നിശ്ചയിച്ചിട്ടുള്ള അടിസ്ഥാന വിലയില്‍ നിന്നും കുറച്ചാണ് ഉടമകളില്‍ നിന്നും വിമാനത്താവള കമ്പനികള്‍ ഭൂമി വാങ്ങിക്കൂടടിയത്. ഇക്കാരണത്താല്‍ തന്നെ പോക്കുവരവ് നടത്തി കരം ഒടുക്കിയിട്ടില്ലാത്തതിനാല്‍ ഇത്തരം ഭൂമി പാട്ടത്തിനെടുത്തും സ്വന്തമായി കര്‍ഷകര്‍ കൃഷി ചെയ്യുന്നുണ്ട്. പദ്ധതി പ്രദേശത്ത് കരിന്പു കൃഷി വിവാദ വിമാനത്താവളത്തിനുവേണ്ടിയുള്ള ഭൂമിയുടെ സമീപത്തായി വ്യാപിച്ചുകിടക്കുന്ന ആറന്മുള-മല്ലപ്പുഴശേരി വില്ലേജില്‍പ്പെട്ട കുറുന്താര്‍ പ്രദേശമുള്‍പ്പെടെയുള്ള 18 ഏക്കറോളം സ്ഥലത്ത് വിജയകരമായി കരിമ്പ് കൃഷി ഇപ്പോള്‍ നടക്കുന്നുണ്ട്. ഇതിനുവേണ്ടിയുള്ള വിത്തുകള്‍ തമിഴ്‌നാട്ടിൽ നിന്നുമാണ് ശേഖരിച്ചത്. ഇവിടെ കൃഷി ചെയ്യുന്ന കരിമ്പുകള്‍ ഒരടി ഉയരത്തില്‍ നില്‍ക്കുകയാണെന്നും കൃഷി നടത്തുന്ന ജൈവ വൈവിധ്യ ബോര്‍ഡിന്‍റെ അവാര്‍ഡ് ജേതാവുകൂടിയായ എഴുമറ്റൂര്‍ അമൃതധാര ഗോശാല ചെയര്‍മാന്‍ അജയകുമാര്‍ വല്ലൂഴത്തില്‍ പറഞ്ഞു. പ്രകൃതിക്ക് ഏറ്റവും അനുയോജ്യമായ സ്ഥലമാണെന്നും വിവാദമായിട്ടുളള വിമാനത്താവളം ഉള്‍പ്പെടെയുള്ള പ്രദേശങ്ങളില്‍ ജൈവകൃഷി നടത്തി വിജയിപ്പിക്കാമെന്നും ഇതിന് സംസ്ഥാന സര്‍ക്കാരിന്‍റെയും കൃഷി വകുപ്പിന്‍റെയും സഹായമാണ് ഉണ്ടാവേണ്ടതെന്നും അജയകുമാര്‍ പറഞ്ഞു. വെല്ലുവിളികള്‍ ഏറ്റെടുത്തുകൊണ്ടുതന്നെ നെല്‍കൃഷിയുള്‍പ്പെടെയുള്ള കൃഷികള്‍ പരമ്പരാഗതമായ രീതിയില്‍ ചെയ്യാമെന്നും കാര്‍ഷിക ജൈവമായി ബന്ധപ്പെട്ട മോഡല്‍ ഗ്രാമമായി ഇതിനെ മാറ്റാന്‍ കഴിയുമെന്നും അദ്ദേഹം പറഞ്ഞു. 2016 - 21 കാലയളവിൽ പദ്ധതി പ്രദേശത്തെ പാടശേഖരങ്ങൾ ഏറ്റെടുത്ത് കൃഷിവകുപ്പ് തന്നെ നെൽകൃഷി നടത്തിയിരുന്നു. മുഖ്യമന്ത്രി പിണറായി വിജയൻ നേരിട്ടെത്തി ഉദ്ഘാടനം ചെയ്ത പദ്ധതി പിന്നീട് ഉപേക്ഷിച്ചു. ആറന്മുള ബ്രാൻഡിൽ നെല്ലുത്പാദനം നടത്തിയെങ്കിലും ഇത്തരം പ്രവർത്തനങ്ങൾ ഇപ്പോൾ നടക്കുന്നില്ല. പദ്ധതി പ്രദേശത്തു കുടിൽ കെട്ടി താമസം തുടങ്ങിയവരെയും സംരക്ഷിക്കാനാളില്ലാത്ത സ്ഥിതിയാണ്. നീർച്ചാലുകൾ സംരക്ഷിക്കപ്പെടണം ഇലക്ട്രോണിക്സ് സിറ്റി പാര്‍ക്ക് വരുന്നതിന് തങ്ങള്‍ എതിരല്ലെന്നും എന്നാല്‍ ഈ പ്രദേശത്തെ നീര്‍ച്ചാലുകള്‍ സംരക്ഷിക്കുകയും ജലനിര്‍ഗമനം തടസമില്ലാതിരിക്കുകയുംഅതിനോടൊപ്പം പ്രകൃതിക്ക് ദോഷമുണ്ടാകാത്ത രീതിയിലായിരിക്കണമെന്നും ആറന്മുള വിമാനത്താവള വിരുദ്ധ സമിതി ജനറല്‍ കണ്‍വീനര്‍ പി. ആർ. ഷാജി പറഞ്ഞു. മണ്ണിട്ട് ഭൂമി നികത്തിയതിനാല്‍ ഈ പ്രദേശത്തെ നീര്‍ച്ചാലുകൾ ഒഴുക്കു നഷ്ടപ്പെട്ട് തടസപ്പെട്ടിരിക്കുന്ന സ്ഥിതിയാണുള്ളതെന്ന് അദ്ദേഹം ചൂണ്ടിക്കാട്ടി. മിച്ചഭൂമിയുമായി ബന്ധപ്പെട്ട കേസുകള്‍ക്ക് പൂര്‍ണ വിരാമം ഉണ്ടാവുകയും ഇവിടെ താമസിക്കുന്നവര്‍ക്ക് ഭൂമിയടക്കമുള്ള സംരക്ഷണം നല്‍കാനുള്ള ബാധ്യതയും സര്‍ക്കാര്‍ ഏറ്റെടുക്കണമെന്നും പി. ആർ. ഷാജി പറഞ്ഞു. എതിർപ്പുമായി കൃഷി വകുപ്പ് കൃഷി ചെയ്യുന്ന നിലവും തണ്ണീർത്തടവും നികത്തി ഒരു പദ്ധതിക്കും അനുമതി നൽകില്ലെന്ന് കൃഷി വകുപ്പ് വ്യക്തമാക്കി. വയലുകൾ നികത്താൻ അനുവദിക്കില്ല. തൊണ്ണൂറ് ശതമാനവും നിലമായ ഭാഗത്താണ് പദ്ധതി നടപ്പാക്കാൻ നീക്കം. നിലം നികത്തിയാൽ വെള്ളക്കെട്ട് ഉണ്ടാകുമെന്ന് കൃഷി ഓഫീസർ റിപ്പോർട്ട് നൽകിയിട്ടുണ്ട്. ഗുരുതരമായ പരിസ്ഥിതി പ്രശ്നങ്ങൾ ഉയർത്തിക്കാട്ടിയാണ് വിമാനത്താവളത്തിനുള്ള അനുമതികൾ റദ്ദാക്കിയത്. ഇതുമായി ബന്ധപ്പെട്ട് ഹരിത ട്രിബ്യൂണലിന്‍റെ വിധിയും പദ്ധതിക്ക് എതിരായിരുന്നു. നിലം നികത്തി പദ്ധതി നടപ്പാക്കാൻ അനുവദിക്കേണ്ടതില്ലെന്ന നിലപാടിലാണ് കൃഷി മന്ത്രി പി. പ്രസാദ്. വിമാനത്താവളത്തിനെതിരേയുള്ള സമരത്തിൽ മുൻപന്തിയിലായിരുന്നു അദ്ദേഹം.

കാട്ടാന ശല്യം: വനാതിർത്തിയിലെ കൈതക്കൃഷിക്കെതിരേ വനംവകുപ്പ്

പത്തനംതിട്ട: വനാതിർത്തികളിലെ കൈതകൃഷി നിരോധിക്കുകയോ നിയന്ത്രിക്കുകയോ വേണമെന്ന് വനംവകുപ്പ്. വന്യജീവികളെ ആകർഷിക്കുന്ന കൈത കൃഷി ചെയ്യുന്നത് കാട്ടാനകളെ ആകർഷിക്കാൻ കാരണമാകുമെന്നതിനാലാണിത്. കോന്നി, റാന്നി വനം ഡിവിഷനുകളിലെ വിവിധ സ്ഥലങ്ങളിലായി 1100 ഹെക്ടറിൽ കൈതകൃഷി ആരംഭിച്ചിട്ടുണ്ട്. കുളത്തുമൺ, പാടം, വെള്ളംതെറ്റി, കല്ലേലി ഭാഗങ്ങളിൽ സമീപകാലത്ത് കൈത കൃഷിയ്ക്കായി സ്ഥലം പാട്ടത്തിനു നൽകിയിട്ടുണ്ട്. വിവിധ പ്ലാന്‍റേഷൻ കമ്പനികളുടെ ഉടമസ്ഥതയിലുള്ള റബർ തോട്ടങ്ങളിൽ, പുതിയ റബർ കൃഷിക്കൊപ്പം ഇടവിളയായാണ് കൈത കൃഷി ആരംഭിച്ചിരിക്കുന്നത്. അഞ്ച് വർഷത്തേക്ക് വരെ പാട്ടത്തിനെടുത്താണ് കൃഷി. തോട്ടങ്ങൾക്ക് ചുറ്റും ഫെൻസിംഗ് സ്ഥാപിച്ചിട്ടുണ്ട്. ഇതിലേക്ക് ഉയർന്ന തോതിൽ വൈദ്യുതി കടത്തിവിടുന്നതായും വന്യ ജീവികൾക്ക് ജീവഹാനി സംഭവിക്കുന്നതായും റേഞ്ച് ഓഫീസർമാർ ഡിവിഷണൽ ഫോറസ്റ്റ് ഓഫീസർമാർക്ക് റിപ്പോർട്ട് നൽകി. ആനകൾ അടക്കമുള്ള വന്യജീവികൾ കൈതയുടെ മണം പിടിച്ചെത്തുകയും തോട്ടങ്ങൾക്ക് സമീപം തമ്പടിക്കുകയും ചെയ്യുന്നു. കൈതത്തോട്ടങ്ങളിലേക്ക് ഇറങ്ങാൻ ശ്രമിച്ചപ്പോൾ ഷോക്കേറ്റാണ് കുളത്തുമണ്ണിൽ അടുത്തയിടെ കാട്ടാന ചരിഞ്ഞത്. ഷോക്കേറ്റ് പിൻമാറുന്ന കാട്ടാനകൾ ഫെൻസിംഗ് ഇല്ലാത്ത ഭാഗത്തു കൂടി ജനവാസ മേഖലയിലെത്തി കൃഷി നശിപ്പിക്കുന്നുണ്ട്. കൈത കൃഷി ചെയ്യുന്ന സ്ഥലങ്ങളിൽ അവസാന ചെടിയും ഇല്ലാതാകുന്നതുവരെ ആന ഏതുവഴിയും എത്തിയിരിക്കുമെന്ന് വനംവകുപ്പ് പറയുന്നു. സമീപകാലത്ത് കക്കാട്ടാറ് നീന്തിക്കടന്ന് രണ്ട് കാട്ടാനകൾ അള്ളുങ്കൽ ഭാഗത്തെ ജനവാസ മേഖലയിൽ എത്തിയിരുന്നത് ഉദാഹരണമായി ചൂണ്ടിക്കാണിക്കപ്പെടുന്നു. എലിഫന്‍റ് ബാരിക്കേഡ് സ്ഥാപിക്കണം കാട്ടാനകൾ കൃഷി സ്ഥലങ്ങളിലേക്ക് ഇറങ്ങാതിരിക്കാൻ പ്രതിരോധ മാർഗങ്ങളായ കിടങ്ങുകളും സോളാർ ഫെൻസിംഗും ഫലപ്രദമല്ലെന്ന് വനപാലകർ പറയുന്നു. പാറക്കെട്ടുകളുള്ള സ്ഥലങ്ങളിൽ കിടങ്ങുകൾ കുഴിക്കാൻ അനുമതിയില്ല. സോളാർ ഫെൻസിംഗിലേക്ക് വള്ളിപ്പടർപ്പുകൾ കയറി തകരാറുകൾ സംഭവിക്കുന്നു. ഇതിനു പരിഹാരമായി കർണാടക വനപ്രദേശങ്ങളിലെ അതിർത്തികളിൽ സ്ഥാപിച്ചിട്ടുള്ള തരം എലിഫന്‍റ് ബാരിക്കേഡ് സ്ഥാപിക്കണമെന്നാണ് നിർദേശം. റെയിൽവേയുടെ ഉപയോഗശൂന്യമായ പാളങ്ങൾ ലെയറുകളായി ഘടിപ്പിച്ചാണ് അവിടെ ബാരിക്കേഡുകൾ സ്ഥാപിക്കുന്നത്. ചെലവ് കുറവാണ്. ഇവ കാട്ടാനൾക്ക് നശിപ്പിക്കാനാവില്ലെന്ന് തെളിഞ്ഞിട്ടുണ്ട്. സോളാർ വേലികൾ പുനർ നിർമിക്കുകയും ഫെൻസിംഗ് ജോലിൾ നടത്തുകയും ചെയ്തു താത്കാലിക പ്രശ്ന പരിഹാരത്തിനും വനംവകുപ്പ് നിർദേശങ്ങൾ സമർപ്പിച്ചിട്ടുണ്ട്. കല്ലേലിയിൽ കാട്ടാനക്കൂട്ടം കല്ലേലിയിൽ പട്ടാപകലും കാട്ടാനക്കൂട്ടം . കല്ലേലി ഡിപ്പോ ജംഗ്ഷനു സമീപമാണ് കാട്ടാനകൾ ഇറങ്ങിയത്. അഞ്ച് ആനകൾ റോഡ് മുറിച്ചു കടന്ന് പോകുന്ന ദൃശ്യങ്ങൾ സാമൂഹ മാധ്യമങ്ങളിൽ പ്രചരിച്ചിരുന്നു. കല്ലേലി, കുളത്തുമൺ പ്രദേശങ്ങളിൽ കാട്ടാന ശല്യം രൂക്ഷമാകുകയാണ്. കല്ലേലി റോഡിൽ കാട്ടാന ശല്യം വർധിച്ചതിനേ തുടർന്ന് സ്ഥലത്ത് രാത്രികാല പട്രോളിംഗ് ശക്തമാക്കുമെന്ന് വനം വകുപ്പ് അറിയിക്കുകയും ചെയ്തു. നിരവധി വാഹന യാത്രക്കാർക്ക് നേരെയും എസ്റ്റേറ്റ് തൊഴിലാളികൾക്കു നേരെയും കാട്ടാനയുടെ ആക്രണം ഇതിനോടകം ഉണ്ടായിട്ടുണ്ട്. കല്ലേലി - കൊക്കാത്തോട് റോഡിൽ നിരവധി തവണയാണ് കാട്ടാന ഇറങ്ങിയത്. സാധാരണ ഇറങ്ങുന്ന ആനത്താരകൾക്കു പുറന പുതിയ പാതകൾ കണ്ടെത്തിയാണ് കാട്ടാനകൾ ഇറങ്ങുന്നതെന്നാണ് വനം വകുപ്പ് അധികൃതർ പറയുന്നത്.

ശിശു സൗഹൃദ കോര്‍ണറുമായി പ്രമാടം ഗ്രാമപഞ്ചായത്ത്

പ്രമാടം: കുരുന്നുകളുടെ പ്രിയ ഇടമാക്കാന്‍ സ്‌കൂള്‍ ചുമരുകളില്‍ വര്‍ണ വിസ്മയം തീര്‍ക്കുകയാണ് പ്രമാടം ഗ്രാമപഞ്ചായത്ത്. അക്ഷരങ്ങള്‍ക്കും അക്കങ്ങള്‍ക്കുമൊപ്പം ഓരോ ക്ലാസ് മുറിയേയും മനോഹരമാക്കി കുട്ടികളുടെ ഇഷ്ട മൃഗങ്ങളും ഫലങ്ങളും ചുമരുകളില്‍ ഇടം പിടിച്ചിട്ടുണ്ട്. പഞ്ചായത്ത് പരിധിയിലെ അഞ്ചു സ്‌കൂളുകളിലാണ് അറിഞ്ഞും രസിച്ചും പഠിക്കാന്‍ ശിശു സൗഹൃദ കോര്‍ണര്‍ ഒരുക്കുന്നത്. പ്രമാടം ജിഎല്‍പിഎസ്, മല്ലശേരി ജിഎല്‍പിഎസ്, തെങ്ങുംകാവ് ജിഎല്‍പിഎസ്, വി കോട്ടയം ജിഎല്‍പിഎസ്, ളാക്കൂര്‍ ജിഎല്‍പിഎസ് എന്നിവിടങ്ങളിലാണ് ശിശു സൗഹൃദ കോര്‍ണര്‍ തയാറാകുന്നത്. ഓരോ സ്‌കൂളിനും 50,000 രൂപയാണ് പദ്ധതി ചെലവ്. പ്രവേശനോത്സവത്തിന്‍റെ ഭാഗമായി പ്രമാടം സര്‍ക്കാര്‍ എല്‍പി സ്‌കൂളില്‍ ശിശു സൗഹൃദ കോര്‍ണര്‍ പഞ്ചായത്ത് പ്രസിഡന്‍റ് എന്‍. നവനിത്ത് ഉദ്ഘാടനം ചെയ്തിരുന്നു. ചിത്രകാരന്‍ ഉന്മേഷ് പൂങ്കാവാണ് ചുവരുകള്‍ മനോഹരമാക്കിയത്. കുട്ടികള്‍ക്ക് കലാപഠനവും പ്രഭാത ഭക്ഷണം ഒരുക്കി പഞ്ചായത്ത് മുമ്പും ശ്രദ്ധ നേടിയിരുന്നു. ശാസ്ത്രത്തെ അടുത്ത് അറിയാന്‍ സയന്‍സ് കോര്‍ണറുമുണ്ട്. കായിക ഉപകരണങ്ങളും നല്‍കിയിരുന്നു. ക്രിയേറ്റീവ് കോര്‍ണർ, ചികിത്സാ മുറി പദ്ധതികളും ആരംഭിക്കുമെന്ന് നവനിത്ത് പറഞ്ഞു.

മുതിര്‍ന്ന പൗരന്മാരോടുള്ള അതിക്രമം: ബോധവത്കരണ പരിപാടി നടന്നു

പത്തനംതിട്ട: മുതിര്‍ന്ന പൗരന്മാരോടുള്ള അതിക്രമങ്ങള്‍ക്കെതിരേ ബോധവത്കരണ പരിപാടി സാമൂഹികനീതി വകുപ്പിന്‍റെ ആഭിമുഖ്യത്തില്‍ കുമ്പനാട് ധര്‍മഗിരി മന്ദിരത്തില്‍ നടന്നു. ജില്ലാ പഞ്ചായത്ത് പ്രസിഡന്‍റ് ജോര്‍ജ് ഏബ്രഹാം ഉദ്ഘാടനം ചെയ്തു. ക്ഷേമകാര്യ സ്ഥിരം സമിതി ചെയര്‍മാന്‍ ജിജി മാത്യു അധ്യക്ഷത വഹിച്ചു. ജില്ല സാമൂഹികനീതി ഓഫീസര്‍ ജെ.ഷംല ബീഗം, കോയിപ്രം ഗ്രാമപഞ്ചായത്ത് പ്രസിഡന്‍റ് പി. സുജാത, ജില്ല പഞ്ചായത്തംഗം സി. കെ. ലതാകുമാരി, പ്രൊബേഷന്‍ ഓഫീസര്‍ സിജു ബെന്‍, റവ. കെ. എസ്. മാത്യൂസ്, വയോജന കമ്മിറ്റി അംഗങ്ങളായ ബി. ഹരികുമാര്‍, രാമേശ്വരി അമ്മ, വി.ആര്‍. ബാലകൃഷ്ണന്‍, പി. ഇ. ലാലച്ചന്‍, വയോമിത്രം കോഓര്‍ഡിനേറ്റര്‍ എ.എല്‍. പ്രീത, ഓള്‍ഡ്ഏജ് ഹോം സൂപ്രണ്ട് ഒ.എസ്. മീന എന്നിവര്‍ പങ്കെടുത്തു. എന്‍എസ്എസ് ജില്ല കോ-ഓര്‍ഡിനേറ്റര്‍ രാജശ്രീ വയോജന സംരക്ഷണ പ്രതിജ്ഞ ചൊല്ലി. മുതിര്‍ന്ന പൗരന്മാരുടെ മാനസികാരോഗ്യത്തില്‍ കുടുംബത്തിനുള്ള പങ്ക് വിഷയത്തിലും മുതിര്‍ന്ന പൗരന്മാരും നിയമസംരക്ഷണവും വിഷയത്തിലും ക്ലിനിക്കല്‍ സൈക്കോളജിസ്റ്റ് പി.റ്റി. സന്ദീഷ് , പ്രകാശ് പി. തോമസ് എന്നിവര്‍ ബോധവത്കരണ ക്ലാസുകള്‍ നയിച്ചു. ദിനാഘോഷത്തോടനുബന്ധിച്ച് നടത്തിയ സെല്‍ഫി , ഷോര്‍ട്ട് വീഡിയോ മത്സരത്തിലെ വിജയികള്‍ക്ക് ജില്ലാ പഞ്ചായത്ത് പ്രസിഡന്‍റ് ജോര്‍ജ് ഏബ്രഹാം കാഷ് അവാര്‍ഡ് വിതരണം ചെയ്തു. വയോജനങ്ങള്‍ക്കുളള സൗജന്യ ഗ്ലൂക്കോ മീറ്റര്‍ വിതരണവും നടന്നു.

ഓണക്കാലം ലക്ഷ്യമിട്ട് പൂകൃഷിയുമായി ഇരവിപേരൂര്‍

പത്തനംതിട്ട: ഓണക്കാല പൂകൃഷിക്കാവശ്യമായ ബന്ദി തൈകളുടെ വിതരണോദ്ഘാടനം ഇരവിപേരൂര്‍ ഗ്രാമപഞ്ചായത്ത് പ്രസിഡന്‍റ് കെ. ബി. ശ്രീധരന്‍ പിള്ള നിര്‍വഹിച്ചു. കാര്‍ഷിക കര്‍മസേന ഉത്പാദിപ്പിച്ച ഓറഞ്ച്, മഞ്ഞ നിറങ്ങളിലുള്ള 16000 ഹൈബ്രിഡ് ബന്ദിതൈകള്‍ സൗജന്യമായാണ് വിതരണം ചെയ്തത്. ഫ്ളോറി വില്ലേജ് പദ്ധതിയിലൂടെ 80,000 രൂപയാണ് കൃഷിക്കായി വിനിയോഗിക്കുന്നത്. പഞ്ചായത്ത് പരിധിയിലെ 1.6 ഹെക്ടര്‍ സ്ഥലമാണ് ബന്ദിക്കൃഷിക്ക് ഒരുങ്ങുന്നത്. ഓരോ വാര്‍ഡില്‍ നിന്നുള്ള വനിതകളാണ് കൃഷി ചെയ്യുന്നത്. വൈസ് പ്രസിഡന്‍റ് സാലി ജേക്കബ് അധ്യക്ഷത വഹിച്ചു. വികസനകാര്യ സ്ഥിരം സമിതി അധ്യക്ഷ ആര്‍. ജയശ്രീ, അംഗങ്ങളായ അമ്മിണി ചാക്കോ, ത്രേസ്യാമ്മ കുരുവിള, മോഹനൻ, അനില്‍ ബാബു, വിജയമ്മ തുടങ്ങിയവർ പ്രസംഗിച്ചു. ബന്ദി തൈകള്‍ വിതരണം ചെയ്തു വള്ളിക്കോട്: ഗ്രാമപഞ്ചായത്തില്‍ ബന്ദി തൈകളുടെ വിതരണം പ്രസിഡന്‍റ് ആര്‍. മോഹനന്‍ നായര്‍ നിര്‍വഹിച്ചു. ഓണവിപണി ലക്ഷ്യമാക്കിയാണ് പദ്ധതി നടപ്പാക്കുന്നത്. സ്ഥിര സമിതി അധ്യക്ഷരായ എം. പി. ജോസ്, ജി സുഭാഷ്, സെക്രട്ടറി പി. ജെ. രാജേഷ്, സിഡിഎസ് ചെയര്‍പെഴ്‌സണ്‍ സരിതാ മുരളി എന്നിവര്‍ പ്രസംഗിച്ചു.

ശുചിത്വമിഷൻ പ‌ ുരസ്കാരം തുന്പമൺ എംജി എച്ച്എസ്എസിന്

പത്തനംതിട്ട: ജില്ലയിലെ ഏറ്റവും മികച്ച സ്നേഹാരാമം നിർമിക്കുകയും പരിപാലിക്കുകയും ചെയ്യുന്ന തുന്പമൺ എംജി എച്ച്എസ്എസ് എൻഎസ്എസ് യൂണിറ്റിന് പത്തനംതിട്ട ശുചിത്വമിഷൻ നൽകുന്ന പുരസ്കാരം പത്തനംതിട്ട ജില്ലാ പഞ്ചായത്ത് പ്രസിഡന്‍റ് ജോർജ് ഏബ്രഹാം സമ്മാനിച്ചു. പ്രിൻസിപ്പൽ ഡോ. മാത്യു പി.ജോർജ്, തുന്പമൺ ഗ്രാമപഞ്ചായത്ത് പ്രസിഡന്‍റ് റോണി ഏബ്രഹാം, ജില്ലാ പഞ്ചായത്തംഗം റോബിൻ പീറ്റർ, കാതോലിക്കേറ്റ് ആൻഡ് എംഡി സ്കൂൾസ് കോർപറേറ്റ് മാനേജർ ഡോ. ഗബ്രിയേൽ മാർ ഗ്രീഗോറിയോസ് മെത്രാപ്പോലീത്ത, ഹയർ സെക്കൻഡറി വിഭാഗം റീജിയണൽ ഡെപ്യൂട്ടി ഡയറക്ടർ കെ. സുധ, പന്തളം ബ്ലോക്ക് പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ ലാലി ജോൺ തുടങ്ങിയവർ പങ്കെടുത്തു.

പെയ്തിറങ്ങിയത് ശക്തമായ മഴ; നാശനഷ്ടങ്ങളും ഏറി

പത്തനംതിട്ട: കഴിഞ്ഞ രണ്ടുദിവസം ജില്ലയിൽ ലഭിച്ചത് കനത്ത മഴ. അധികസമയം നീണ്ടുനിന്നില്ലെങ്കിലും ശക്തമായ മഴയാണ് ഈ ദിവസങ്ങളിൽ പെയ്തിറങ്ങിയത്. ഇന്നലെ രാവിലെ അവസാനിച്ച 24 മണിക്കൂറിൽ ജില്ലയിലെ വിവിധ ഭാഗങ്ങളിലെ മഴമാപിനികളിൽ നിന്നു ലഭിച്ച കണക്കുകളും ഇത് വ്യക്തമാക്കുന്നു. നദികളിലെ ജലനിരപ്പും ഉയർന്നുവെങ്കിലും ഇന്നലെ പകൽ മഴയ്ക്കു ശമനമുണ്ടായതോടെ പ്രളയഭീതി ഒഴിഞ്ഞു. തിരുവല്ല താലൂക്കിന്‍റെ വിവിധ ഭാഗങ്ങളിൽ താഴ്ന്ന പ്രദേശങ്ങളിൽ വെള്ളം കയറിയിരുന്നു. മഴ കുറഞ്ഞതിനാൽ വെള്ളം ഇറങ്ങുകയാണെന്ന് പ്രദേശവാസികൾ പറഞ്ഞു. പത്തനംതിട്ടയിൽ 40, തുന്പമൺ 36.4, കക്കി 129, പന്പ 111, മൂഴിയാർ 65, നിലയ്ക്കൽ 53.2, വടശേരിക്കര 83, പെരുന്തേനരുവി 57, അയിരൂർ 58.4, കല്ലൂപ്പാറ 41.4, തിരുവല്ല 44 മില്ലിമീറ്റർ എന്നിങ്ങനെയാണ് ഞായറാഴ്ച പകലും രാത്രിയിലുമായി ലഭിച്ച മഴയുടെ അളവ്. പന്പാനദിയുടെ അയിരൂർ ഭാഗത്ത് 7.99 മീറ്റർ, മാരാമൺ 6.76, ആറന്മുള 6.36, അച്ചൻകോവിലാറിന്‍റെ കോന്നിയിൽ 19.1, പന്തളം 8.2, തുന്പമൺ 8.85 മീറ്ററും ഇന്നലെ ജലനിരപ്പ് രേഖപ്പെടുത്തി. മണിമലയാറിന്‍റെ വള്ളംകുളം ഭാഗത്ത് 5.17, കല്ലൂപ്പാറയിൽ 6.04 മീറ്ററും ജലനിരപ്പുണ്ടായിരുന്നു. ജലനിരപ്പുയർന്നതിനേ തുടർന്ന് അച്ചൻകോവിൽ, മണിമല നദികളിൽ പ്രളയസാധ്യത മുന്നറിയിപ്പ് പുറപ്പെടുവിച്ചിരുന്നു. മൂഴിയാർ സംഭരണിയുടെ ഷട്ടറുകൾ ജലനിരപ്പ് ക്രമീകരിക്കുന്നതിനായി വെള്ളിയാഴ്ച രാത്രി മുതൽ തുറക്കുന്നുണ്ട്. കക്കിയിൽ 46 ശതമാനം മാത്രമാണ് ഇന്നലെയും ജലനിരപ്പ്. റോഡിന്‍റെ സംരക്ഷണഭിത്തി ഇടിഞ്ഞു താഴ്ന്നു റോഡിന്‍റെ സംരക്ഷണ ഭിത്തി ഇടിഞ്ഞു താഴ്ന്നു. റാന്നി ഗ്രാമപഞ്ചായത്തിന്‍റെ ഉടമസ്ഥതയിലുള്ള മുണ്ടപ്പുഴ - പെരുമ്പുഴ റോഡില്‍ ടെലിഫോണ്‍ ഭവനു മുന്നിലായിട്ടാണ് റോഡിന്‍റെ സംരക്ഷണ ഭിത്തി തകര്‍ന്നു വീണത്. കഴിഞ്ഞ ദിവസം പെയ്ത കനത്ത മഴയിലാണ് കെട്ട് ഇടിഞ്ഞു വീണത്.

കെട്ട് ഇടിഞ്ഞതോടെ ഗതാഗതത്തിന് ഭീഷണിയായി വശം ഇരുത്തി തുടങ്ങിയിട്ടുമുണ്ട്. നാട്ടുകാര്‍ മരച്ചില്ലകള്‍ ഉപയോഗിച്ചാണ് അപകട മുന്നറിയിപ്പു നല്‍കിയിരിക്കുന്നത്. മഴ തുടരുന്ന സാഹചര്യത്തില്‍ കൂടുതല്‍ മണ്ണ് ഒലിച്ചു പോകാന്‍ സാധ്യത ഏറെയാണ്. അങ്ങനെ സംഭവിച്ചാല്‍ വലിയ ദുരന്തം ഉണ്ടാകുമെന്ന് നാട്ടുകാര്‍ ആശങ്കപ്പെടുന്നുണ്ട്. അധികൃതര്‍ സംഭവത്തിന്‍റെ ഗൗരവം മനസിലാക്കി എത്രയുംവേഗം വശം കെട്ടി ബലപ്പെടുത്തണമെന്ന് നാട്ടുകാര്‍ ആവശ്യപ്പെട്ടു. ഏഴ് വീടുകള്‍ ഭാഗികമായി തകര്‍ന്നു ശക്തമായ മഴയില്‍ ജില്ലയിലെ രണ്ട് താലൂക്കുകളിലായി ഏഴ് വീടുകള്‍ ഭാഗികമായി തകര്‍ന്നു. കോന്നി അഞ്ച്, റാന്നി രണ്ട് എന്നിങ്ങനെയാണ് കണക്ക്. കോന്നി താലൂക്കില്‍ മൂന്നും റാന്നിയില്‍ ഒരു വില്ലേജിലുമാണ് മഴക്കെടുതി ബാധിച്ചത്. ജില്ലയില്‍ മൂന്ന് കര്‍ഷകരുടെ 30 വാഴകള്‍ കഴിഞ്ഞ ദിവസത്തെ കാറ്റില്‍ നശിച്ചു. മലയാലപ്പുഴയിൽ വീടിനു മുകളിൽ മരം വീണു; വയോധികനു പരിക്ക് മലയാലപ്പുഴ: കാറ്റിലും മഴയിലും വീടിനു മുകളിൽ മരം വീണ് മലയാലപ്പുഴയിൽ വായോധികന് പരിക്ക്. മലയാലപ്പുഴ താഴം ശ്യാം വിലാസിൽ കൃഷ്ണൻ കുട്ടിക്കാണ് (65) നാണ് പരിക്കേറ്റത്. ഞായറാഴ്ച രാത്രിയുണ്ടായ കാറ്റിലാണ് അപകടമുണ്ടായത്. ശക്തമായ കാറ്റിൽ കൃഷ്ണൻകുട്ടിയുടെ വീടിന് മുകളിലേക്ക് ആഞ്ഞിലി മരം വീഴുകയായിരുന്നു. കൃഷ്ണൻകുട്ടിയും ഭാര്യ ശ്യാമളയുമാണ് വീട്ടിലുണ്ടായിരുന്നത്. മേൽക്കൂരയുടെ ഓട് പൊട്ടിവീണാണ് കൃഷ്ണൻകുട്ടിയുടെ തലയ്ക്കു പരിക്കേറ്റത്. ഭാര്യ ശ്യാമളയ്ക്കും പരിക്കേറ്റു. കൃഷ്ണൻകുട്ടി നായരെ കോഴഞ്ചേരിയിലെ സ്വകാര്യ ആശുപത്രിയിൽ എത്തിച്ച് ചികിത്സ നൽകിയ ശേഷം കോന്നി മെഡിക്കൽ കോളജിൽ പ്രവേശിപ്പിച്ചു. വീടിന്‍റെ മേൽക്കൂര പൂർണമായി തകർന്നു. മലയാലപ്പുഴ പഞ്ചായത്ത് പ്രസിഡന്റ് പ്രീജ പി. നായർ, വില്ലേജ് ഓഫിസർ വിനോദ് തോമസ് തുടങ്ങിയവർ സ്ഥലം സന്ദർശിച്ചു. മലയാലപ്പുഴ താഴം സ്യമന്തകം വീട്ടിൽ രേഷ്മ രമേശിന്‍റെ വീടിനു മുകളിലേക്ക് ആഞ്ഞിലി മരം വീണ് നഷ്ടമുണ്ടായി. മലയാലപ്പുഴ താഴം പനമ്പള്ളി ഇല്ലം ഇന്ദിരാ ദേവി, കിഴക്കുപുറം പനാറയിൽ ആനി, തേക്കിനാൽ പതാലിൽ ബാബു എന്നിവരുടെ വീടുകൾക്ക് മുകളിൽ മരം വീണ് നാശനഷ്ടമുണ്ടായി. ഇളകൊള്ളൂരിൽ വീടിന്‍റെ മുറി ഇടിഞ്ഞുവീണുവെങ്കിലും വീട്ടിനുള്ളിലുണ്ടായിരുന്നവർ പരിക്കേൽക്കാതെ രക്ഷപെട്ടു. അജിതിന്‍റെ വീടാണ് ഇടിഞ്ഞുവീണത്.

അഭിഭാഷകന്‍ ഉൾപ്പെട്ട പോക്‌സോ കേസ് അന്വേഷണം ഇനി ക്രൈംബ്രാഞ്ചിന്

പത്തനംതിട്ട: അഭിഭാഷകന്‍ കുറ്റാരോപിതനായ പോക്സോ കേസിന്‍റെ തുടരന്വേഷണം സംസ്ഥാന ക്രൈംബ്രാഞ്ചിനു കൈമാറി. പതിനാറുകാരിയെ മദ്യം കൊടുത്ത് മയക്കി ലൈംഗിക വൈകൃതങ്ങള്‍ക്കും പ്രകൃതി വിരുദ്ധ പീഡനത്തിനും ഇരയാക്കി ബലാല്‍സംഗം ചെയ്ത കേസാണ് ക്രൈംബ്രാഞ്ചിനെ ഏല്പിച്ചത്. കേസ് അട്ടിമറിക്കാനും കുറ്റാരോപിതനായ അഭിഭാഷകനെ രക്ഷിക്കാനും തുടർ ശ്രമങ്ങൾ നടന്നുവെന്ന ആരോപണങ്ങളുടെ പേരിലാണ് അന്വേഷണം കൈമാറിയത്. കേസിൽ വീഴ്ച വരുത്തിയെന്ന പേരിൽ കോന്നി ഡിവൈഎസ്പി, എസ്എച്ച്ഒ എന്നിവർ സസ്പെൻഷനിലാണ്. കേസിൽ കോന്നി സ്വദേശിയായ ബിൻസിയെ (41) മാത്രമാണ് ഇതേവരെ അറസ്റ്റു ചെയ്തത്. ഇവര്‍ കേസില്‍ രണ്ടാം പ്രതിയാണ്. അഭിഭാഷകനായ ഒന്നാം പ്രതിക്ക്, ബലാല്‍സംഗത്തിനും ലൈംഗിക അതിക്രമങ്ങള്‍ക്കും കുട്ടിയെ വിധേയമാക്കാൻ സഹായിയായി നിന്നുവെന്നതാണ് ബിൻസിക്കെതിരേയുള്ള കുറ്റം. ഒന്നാം പ്രതി നൗഷാദ് (46) ഒളിവിലാണ്. ഹൈക്കോടതിയിൽ ഇയാൾ നൽകിയ മുൻകൂർ ജാമ്യാപേക്ഷ തള്ളിയതിനേ തുടർ്ന് സുപ്രീംകോടതിയെ സമീപിച്ചിരിക്കുകയാണ്. കോഴഞ്ചേരി ഹോട്ടല്‍ പാര്‍ക്ക്, പത്തനംതിട്ട കുമ്പഴയിലെ ഹോട്ടല്‍ ഹില്‍പാര്‍ക്ക് എന്നിവിടങ്ങളിലെത്തിച്ചായിരുന്നു പീഡനം തുടര്‍ന്നത്. പ്ലസ് വണ്‍ വെക്കേഷന്‍ കാലയളവില്‍ എറണാകുളത്ത് കോറല്‍ ഹോട്ടലില്‍ എത്തിച്ചും അഭിഭാഷകന്‍ കുട്ടിയെ ക്രൂര ലൈംഗിക പീഡനങ്ങള്‍ക്ക് ഇരയാക്കിയിരുന്നു. പത്തനംതിട്ട ചൈല്‍ഡ് വെല്‍ഫയര്‍ കമ്മിറ്റിയില്‍ നിന്നും ലഭിച്ച വിവരത്തിന്‍റെ അടിസ്ഥാനത്തില്‍ ആറന്മുള പോലീസ് കേസ് രജിസ്റ്റര്‍ ചെയ്ത് അന്വേഷണം നടത്തിയത്. ആദ്യം പരാതി ലഭിച്ചത് കോന്നി പോലീസ് സ്റ്റേഷനിലായിരുന്നു. ഇതിൽ കേസെടുക്കുന്നതിൽ വീഴ്ച വരുത്തിയെന്ന ആരോപണമാണ് പോലീസിനെതിരേയുള്ളത്. കേസിൽ പത്തനംതിട്ട ജില്ലാ ക്രൈംബ്രാഞ്ച് അന്വേഷണം നടത്തിയെങ്കിലും പോലീസ് ഉദ്യോഗസ്ഥരുടേതടക്കമുള്ള വീഴ്ചകൾ ചൂണ്ടിക്കാട്ടി ഡിഐജി നൽകിയ റിപ്പോർട്ടിന്‍റെ അടിസ്ഥാനത്തിലാണ് അന്വേഷണം ക്രൈംബ്രാഞ്ചിനെ ഏല്പിച്ചത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]