ഉന്നതവിജയികള്‍ക്ക് കോന്നിയില്‍ എംഎല്‍എയുടെ ആദരം
1569259
Sunday, June 22, 2025 2:58 AM IST
കോന്നി: നിയോജക മണ്ഡല പരിധിയില്‍ കഴിഞ്ഞ എസ്എസ്എല്‍സി, പ്ലസ്ടു പരീക്ഷകളില്‍ 100 ശതമാനം വിജയം നേടിയ സ്‌കൂളുകളെയും എല്ലാ വിഷയങ്ങള്‍ക്കും എ പ്ലസ് നേടിയ വിദ്യാര്‍ഥികളെയും കെ. യു. ജനീഷ് കുമാര്‍ എംഎല്‍എ ആദരിച്ചു. കോന്നി വകയാര്‍ മേരിമാതാ ഓഡിറ്റോറിയത്തില്‍ നടന്ന ആദരിക്കല്‍ സമ്മേളനം ഡോ. സഖറിയാസ് മാര്‍ അപ്രേം മെത്രാപ്പോലീത്ത ഉദ്ഘാടനം ചെയ്തു.
കെ. യു. ജനീഷ് കുമാര്‍ എംഎല്‍എ അധ്യക്ഷത വഹിച്ചു. ജില്ലാ കളക്ടര്‍ എസ്. പ്രേംകൃഷ്ണന്‍ മുഖ്യപ്രഭാഷണം നടത്തി. കോന്നിയില്‍ നിന്നുള്ള സിവില്‍ സര്‍വീസ് ജേതാവ് എസ്. സ്വാതി മുഖ്യാതിഥിയായിരുന്നു. മണ്ഡലത്തിലെ 100 ശതമാനം വിജയം നേടിയ സ്‌കൂളുകളുടെ പ്രധാനാധ്യാപകര്‍ ആദരം ഏറ്റുവാങ്ങി. സിവില്‍ സര്‍വീസ് പരീക്ഷയില്‍ ഉന്നത വിജയം നേടിയ കോന്നി സ്വദേശി എസ്. സ്വാതിക്ക് ജില്ലാ കളക്ടര്‍ ഉപഹാരം നല്‍കി.
മണ്ഡലത്തില്‍ നിന്നും വിവിധ സര്‍വകലാശാലകള്‍ പരീക്ഷകളില്‍ പങ്കെടുത്ത് റാങ്ക് നേടിയവർ, അഖിലേന്ത്യാ മെഡിക്കല്‍ എന്‍ട്രന്‍സ് പരീക്ഷയില്‍ ഉന്നത വിജയം നേടിയ വിദ്യാര്‍ഥികള്‍ എന്നിവര്‍ക്കും ഉപഹാരം നല്‍കി. പറക്കോട് ബ്ലോക്ക് പഞ്ചായത്ത് പ്രസിഡന്‍റ് എം.പി. മണിയമ്മ, ഗ്രാമപഞ്ചായത്ത് പ്രസിഡന്‍റുമാരായ ശ്രീജ പി. നായർ, ടി.വി. പുഷ്പവല്ലി, സാം വാഴോട്, ശ്യാം ലാല്‍, ദീപ കുമാർ, രാജേഷ് ആക്ലേത്ത്, ഫാ. വര്‍ഗീസ് കൈതോൺ, കോന്നി ഉപജില്ലാ വിദ്യാഭ്യാസ ഓഫീസര്‍ ബിജു ജോര്‍ജ്, വിവിധ സ്‌കൂള്‍ പ്രധാന അധ്യാപകര്‍ തുടങ്ങിയവര്‍ പ്രസംഗിച്ചു.