ADVERTISEMENT

ADVERTISEMENT

ലഹരിമുക്തകേരളത്തിനായി യുവജനത മുന്നിട്ടിറങ്ങണം: മന്ത്രി കൃഷ്ണന്‍കുട്ടി

പാലക്കാട്: ലഹരിമുക്ത കേരളത്തിനായി യുവജനത മുന്നിട്ടിറങ്ങണമെന്നു മന്ത്രി കെ. കൃഷ്ണന്‍കുട്ടി. പാലക്കാട് ഒളിന്പിക് അസോസിയേന്‍ സംഘടിപ്പിച്ച അന്താരാഷ്ട്ര ഒളിമ്പിക് ദിനാഘോഷത്തിന്‍റെ സമാപനം കോട്ടമൈതാനത്തു ഉദ്ഘാടനം ചെയ്യുകയായിരുന്നു മന്ത്രി.

നേരത്തെ വിക്ടോറിയ കോളജ് പരിസരത്തുനിന്നും കോട്ടമൈതാനംവരെ നടന്ന ദീപശിഖാ റാലി വി.കെ. ശ്രീകണ്ഠന്‍ എംപി ഫ്ളാഗ്ഓഫ് ചെയ്തു. ഒളിമ്പ്യന്‍ ടിന്‍റു ലൂക്ക ദീപശിഖാ പ്രയാണത്തിനു നേതൃത്വം നല്‍കി. എന്‍സിസി, എന്‍എസ്എസ്, സ്‌കൗട്ട് ആന്‍ഡ് ഗൈഡ്സ്, സ്റ്റുഡന്‍റ്സ് പോലീസ്, കായികതാരങ്ങള്‍, സന്നദ്ധസംഘടനാ പ്രവര്‍ത്തകര്‍ തുടങ്ങി മൂവായിരത്തോളം പേരാണ് അണിനിരന്നത്.

കോട്ടമൈതാനത്ത് നടന്ന സമാപന പരിപാടിയില്‍ സ്പോര്‍ട്സ് കൗണ്‍സില്‍ പ്രസിഡന്‍റ് കൂടിയായ കെ. പ്രേംകുമാര്‍ എംഎല്‍എ അധ്യക്ഷത വഹിച്ചു. ഒളിന്പിക് അസോസിയേഷന്‍ വൈസ് പ്രസിഡന്‍റ് കെ.സി. പ്രീത്,പാലക്കാട് നഗരസഭാ ചെയർപേഴ്സൺ പ്രമീള ശശിധരൻ, അഡീഷണല്‍ ജില്ലാ മജിസ്ട്രേറ്റ് കെ. സുനില്‍കുമാര്‍, എക്സൈസ് ഡെപ്യൂട്ടി കമ്മീഷണര്‍ പ്രിന്‍സ് ബാബു, ജില്ലാ സ്പോര്‍ട്സ് കൗണ്‍സില്‍ വൈസ് പ്രസിഡന്‍റ് സി. ഹരിദാസ്, ഒളിന്പിക് വേവ് ജില്ലാ കണ്‍വീനര്‍ മുഹമ്മദ് കാസിം തുടങ്ങിയവര്‍ പ്രസംഗിച്ചു.

ADVERTISEMENT

പട്ടാമ്പി പാലത്തിനുസമീപം റോഡ് തകർന്നു

ഷൊർണൂർ: പട്ടാമ്പി പാലത്തിന്‍റെ തൊട്ടടുത്ത് വെട്ടിക്കീറിയതുപോലെ റോഡ് തകർന്നത് ഭീഷണിയായി. പാലത്തിന്‍റെ തെക്കുഭാഗത്ത് ഗുരുവായൂർ റോഡിൽ ചോലക്കൽ മണ്ഡപത്തിന്‍റെ മുന്നിലാണ് റോഡ് വെട്ടിക്കീറിയതുപോലെ തകർന്നത്. പ്രളയത്തിൽ പാലംമുങ്ങിയപ്പോൾ നടത്തിയ അറ്റകുറ്റപ്പണിയിലും തകർന്ന ഈ ഭാഗം നന്നാക്കിയില്ലെന്നാണ് നാട്ടുകാർ പറയുന്നത്. ഗുരുവായൂർ ഭാഗത്തുനിന്ന് വരുന്ന വാഹനങ്ങൾ ഈ ഗട്ടറിൽ ചാടിയാണ് താഴ്ന്ന പാലത്തിലേക്ക് പ്രവേശിക്കുന്നത്. ഗട്ടർ വെട്ടിക്കാൻ നടത്തുന്ന ശ്രമം അപകടങ്ങൾക്ക് ഇടയാക്കുന്നുണ്ടെന്നും ഇരുചക്ര വാഹനങ്ങളും ഓട്ടോറിക്ഷകളുമാണ് ഏറെ പ്രയാസപ്പെടുന്നതെന്നും നാട്ടുകാർ പറയുന്നു.

കമ്പാലത്തറയിൽ അപകടമരണങ്ങൾ തുടർക്കഥ: നോക്കുകുത്തിയായി ജലസേചനവകുപ്പ് അധികൃതർ

വണ്ടിത്താവളം: കമ്പാലത്തറ ഏരിയിൽ മുങ്ങിമരണങ്ങൾ ആവർത്തിക്കുന്പോഴും ഫലപ്രദമായി തടയാൻ ജലസേചനവകുപ്പിന് കഴിയുന്നില്ലെന്ന ആക്ഷേപം ശക്തം. ഇക്കഴിഞ്ഞ ദിവസം രണ്ടു വിദ്യാർഥികൾ ഏരിയിൽ കുളിക്കാനിറങ്ങി ജീവഹാനി സംഭവിച്ചിരുന്നു. കോയമ്പത്തൂരിൽ നിന്നും വിനോദയാത്രക്കുവന്ന പത്തംഗ കോളജ് വിദ്യാർഥികളിൽ മൂന്നുപേർ സമാനമായ രീതിയിൽ മുങ്ങിമരിച്ചിരുന്നു. ഇതുകൂടാതെ കുളിക്കാനും ഇതര ആവശ്യത്തിനുമായി ഏരിയിലിറങ്ങി ഒരു ഡസനിലേറെ പേർ മരണപ്പെട്ട സംഭവം നടന്നിരുന്നു. കാലവർഷസമയങ്ങളിൽ ജലനിരപ്പ് ഉയരുമ്പോഴാണ് മിക്ക അപകടങ്ങളും നടന്നിരിക്കുന്നത്. വേനൽസമയങ്ങളിൽ അനധികൃതമായി മണൽവാരിയ കുഴികളും മരണങ്ങൾക്കു കാരണമാവുന്നുണ്ട്. അനധികൃതമായി മണൽ വാരുന്നവർക്കെതിരെ നടപടികൾ ഉണ്ടാവാത്തതും തുടർസംഭവങ്ങൾക്ക് കാരണമാകുന്നു. കമ്പാലത്തറ ഏരിയിൽ ജനം പ്രവേശിക്കുന്നത് തടയുംവിധം കമ്പിവേലികൾ യുദ്ധകാലാടിസ്ഥാനത്തിൽ നിർമിക്കേണ്ടതുണ്ട്. ഏരിയിൽ ഇറങ്ങാൻ പാടില്ലെന്ന ബോർഡ് സ്ഥാപിക്കുന്നത് പ്രശ്നത്തിനു പരിഹാരമാവില്ലെന്നത് തുടർമരണങ്ങൾ സാക്ഷ്യപ്പെടുത്തുന്നുണ്ട്. ജലനിരപ്പ് കുറയുന്ന സമയങ്ങളിൽ ദൂരസ്ഥലങ്ങളിൽ നിന്നും പലരും സംഘം ചേർന്ന് മദ്യപിക്കാനെത്തുന്നുണ്ടെന്ന് നാട്ടുകാർ വെളിപ്പെടുത്തുന്നുണ്ട്. ഏരിയിൽ ഇവരുടെ പ്രവേശനം തടഞ്ഞാൽ ഇത്തരക്കാർ അക്രമണത്തിനു തുനിയുമെന്നതിനാൽ നാട്ടുകാർ മൗനം പാലിക്കുകയാണ്. ഡാമിന്‍റെ വടക്കുവശത്തും പടിഞ്ഞാറുഭാഗത്തുമുള്ള ഷട്ടറുകളുടെ ഭാഗത്തും തുറന്ന സ്ഥലമെന്നതിനാൽ ഏരിയിൽ ഇറങ്ങുന്നതിന് സൗകര്യമാവുന്നുണ്ട്. കൊല്ലങ്കോട് സീതാർകുണ്ടും കമ്പാലത്തറ ഏരിയും മരണക്കയങ്ങളാവുന്നത് തടയാൻ അധികൃതർ ശക്തമായ നടപടികൾ സ്വീകരിക്കണമെന്നാണ് ആവശ്യം. കഴിഞ്ഞമാസം കൊല്ലങ്കോട് വെള്ളരിമേട് വെള്ളച്ചാട്ട ഭാഗത്ത് നിന്നും നെണ്ടൻകിഴായ സ്വദേശിയായ യുവാവ് പാറക്കെട്ടിൽ വീണ് മരണപ്പെട്ട സംഭവം നടന്നിരുന്നു. ഈ സ്ഥലം വനംവകുപ്പിന്‍റെതെന്നതിനാൽ മറ്റൊരു അറിയിപ്പുവരെ സന്ദർശകരെ പ്രവേശിപ്പിക്കില്ലെന്ന് മുന്നറിയിപ്പ് നൽകി ബോർഡ് സ്ഥാപിച്ച് ഒരു വാച്ചറെ നിയമിച്ചിരുന്നു. കമ്പാലത്തറ ഏരിയിലും ജലസേചന വകുപ്പ് അധികൃതർ വാച്ച്മാനെ നിർത്തി സന്ദർശകരെ തടയാൻ അടിയന്തര നടപടികൾ സ്വീകരിക്കണമെന്നാണ് ആവശ്യം.

മാലിന്യക്കൂമ്പാരമായിരുന്ന പേഴുംകര പാലത്തിന്‍റെ വശങ്ങള്‍ സ്‌നേഹാരാമം

പാലക്കാട്: ഒരിക്കല്‍ മാലിന്യകൂമ്പാരമായിരുന്ന പേഴുംകര പാലത്തിന്‍റെ ഇരുവശവും ഇന്ന് പൂത്തുലഞ്ഞ സ്‌നേഹാരാമമാണ്. 2023 ഒക്ടോബര്‍ ഏഴിന് ഗാന്ധിജയന്തി വാരാഘോഷത്തിന്‍റെ ഭാഗമായി ജില്ലാ ഇന്‍ഫര്‍മേഷന്‍ ഓഫീസ്, ജില്ലാ ഭരണകൂടം, നവകേരളം മിഷന്‍ എന്നിവയുടെ സംയുക്താഭിമുഖ്യത്തിലാണ് പുതുപ്പരിയാരം ഗ്രാമപഞ്ചായത്ത്, പാലക്കാട് നഗരസഭ, പിരായിരി ഗ്രാമപഞ്ചായത്ത് എന്നിവയുടെ സഹകരണത്തോടെ പേഴുംകര പാലത്തിന്‍റെ വശങ്ങളില്‍ കൂമ്പാരമായിരുന്ന മാലിന്യം നീക്കം ചെയ്ത് പൂച്ചെടികള്‍ നട്ട് ‘സ്‌നേഹാരാമം'സജ്ജീകരിച്ചത്. ഇന്ന് നിറപകിട്ടാര്‍ന്ന പൂക്കളും വിവിധങ്ങളായ ചെടികളുമായി വഴിയാത്രക്കാരുടെ ശ്രദ്ധാകേന്ദ്രമായി മാറിയിരിക്കുകയാണ് പ്രദേശം. പാലക്കാട് നഗരസഭ, പുതുപ്പരിയാരം, പിരായിരി ഗ്രാമപഞ്ചായത്തുകളുടെ കീഴില്‍ വരുന്ന പേഴുംകര പാലത്തിന്‍റെ ഇരുവശങ്ങളിലായാണ് സ്‌നേഹാരാമം സജ്ജീകരിച്ചിട്ടുള്ളത്. അതത് തദ്ദേശസ്ഥാപനങ്ങളുടെ നേതൃത്വത്തില്‍ കുടുംബശ്രീ യൂണിറ്റുകള്‍, ഹരിതകര്‍മസേന അംഗങ്ങള്‍ മുഖേന പരിപാലനം നടത്തിവരുന്നുണ്ട്. കൂടാതെ അനധികൃത മാലിന്യനിക്ഷേപത്തിന്‍റെ നിരീക്ഷണത്തിനായി പുതുപ്പരിയാരം ഭാഗത്ത് കാമറയും സജ്ജീകരിച്ചിട്ടുണ്ട്. പൂന്തോട്ടം സജ്ജീകരിച്ചതോടുകൂടി മാലിന്യം നിക്ഷേപിക്കുന്നത് ഇല്ലാതായിട്ടുണ്ടെന്നാണ് അധികൃതര്‍ പറയുന്നത്.

വന്യമൃഗശല്യം: ഡിഎഫ്ഒ ഓഫീസ് മാർച്ച് നടത്തി

പാലക്കാട്: ജനവാസമേഖലകളിൽ മനുഷ്യജീവനു പോലും ഭീഷണിയായി വന്യമൃഗങ്ങൾ കടന്നുകയറുകയാണെന്നും കൃഷിയുൾപ്പെടെയുള്ള ജീവനോപാധികൾ വ്യാപകമായി നശിപ്പിക്കപ്പെടുകയാണെന്നും എന്നാൽ ജനങ്ങളുടെ ജീവനും സ്വത്തിനും സംരക്ഷണം നൽകേണ്ട ഭരണകൂടം ഈവിഷയത്തിൽ തികഞ്ഞ അനാസ്ഥയാണ് കാണിക്കുന്നതെന്നും ബിഎംഎസ് സംസ്ഥാന ട്രഷറർ സി. ബാലചന്ദ്രൻ പറഞ്ഞു. മുണ്ടൂർ ആവർത്തിക്കാതിരിക്കട്ടെ എന്ന മുദ്രാവാക്യമുയർത്തി കർഷക മസ്ദൂർ സംഘം ബിഎംഎസ് നടത്തിയ ഡിഎഫ്ഒ ഓഫീസ് മാർച്ചും ധർണയും ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. വന്യജീവി ആക്രമണത്തിൽ മരണപ്പെട്ടവരുടെ ധനസഹായം ഒരു കോടി രൂപയാക്കി ഉയർത്തുക, വന്യജീവി ആക്രമണത്തിൽ അപകടം സംഭവിച്ചവർക്ക് ആജീവനാന്ത ചികിത്സാ സഹായമായി 50 ലക്ഷം രൂപ അനുവദിക്കുക, വന്യജീവി ആക്രമണത്താൽ വിളകൾ നശിപ്പിക്കപ്പെട്ടാൽ നൽകുന്ന സഹായധനം 4 ഇരട്ടിയായി ഉയർത്തുക, 15 ദിവസത്തിനകം സഹായധനം വിതരണം ചെയ്യുക, പ്രദേശവാസികളെ ഉൾപ്പെടുത്തി ശക്തമായ ഫെൻസിംഗ്, റഡാർ, കിടങ്ങ് സംവിധാനങ്ങൾ ഏർപ്പെടുത്തുക, വന്യജീവി ആക്രമണത്തിൽ മരണപ്പെട്ടവരുടെ കുടുംബാംഗങ്ങൾക്ക് ആശ്രിതനിയമനം ആയി സർക്കാർ സംവിധാനത്തിൽ ജോലി ഉറപ്പാക്കുക, കൃഷിസ്ഥലത്തെ വന്യമൃഗങ്ങളുടെ സാന്നിധ്യം അവസാനിപ്പിക്കാനുള്ള നടപടികൾ സ്വീകരിക്കുക എന്നീ ആവശ്യങ്ങൾ ഉന്നയിച്ചാണ് മാർച്ച് നടന്നത്. ഒലവക്കോട് ജംഗ്ഷനിൽ നിന്നും ആരംഭിച്ച മാർച്ച് ഡിഎഫ്ഒ ഓഫീസിനു മുന്നിൽ അവസാനിച്ചു. ധർണയിൽ കർഷക മസ്ദൂർസംഘം ജില്ലാ ഉപാധ്യക്ഷൻ എൻ.വി. ശശി അധ്യക്ഷത വഹിച്ചു.

കരിദിനാചരണം വിജയിപ്പിക്കും: കെഎസ്എസ്പിഎ

ചിറ്റൂർ: പെൻഷൻസമൂഹത്തോട് ഇടതു സർക്കാരിന്‍റെ അവഗണനക്കെതിരായി സംസ്ഥാന വ്യാപകമായി ജൂലൈ 1 ന് നടത്തുന്ന കരിദിന ആചരണം വിജയിപ്പിക്കാൻ ചിറ്റൂർ സബ് ട്രഷറിക്ക് മുന്നിൽ നടത്തിയ പ്രതിഷേധ സംഗമത്തിൽ‌ കെഎസ്എസ്പിഎ ചിറ്റൂർ നിയോജക മണ്ഡലം കമ്മിറ്റി തീരുമാനിച്ചു. പെൻഷൻ പരിഷ്കരണ കുടിശിക, ഡിആർ കുടിശിക അനുവദിക്കുക, മെഡിസെപ്പിലെ വ്യവസ്ഥകൾ പരിഷ്കരിക്കുക എന്നീ ആവശ്യങ്ങളും ഉന്നയിച്ചു. യോഗത്തിൽ എം. പോൾ ഉദ്ഘാടനം ചെയ്തു. സി. സുകുമാരൻ അധ്യക്ഷത വഹിച്ചു. എം. ഉണ്ണികൃഷ്ണൻ, ആർ. മണി, കെ. കണ്ണൻകുട്ടി, കെ. രാമനാഥൻ, എ. സത്യകൻ, എ.കെ. ഗീത, കെ. ശൈലജ കുമാരി, സി.ജി. പദ്മകുമാർ, ടി. പ്രേംനാഥ്, ശശികുമാർ, എം.ആർ. രാജീവൻ, എസ്. നാസർ, എ. ജയകൃഷ്ണൻ എന്നിവർ പ്രസംഗിച്ചു.

മയിലുകൾ പച്ചക്കറികൾ നശിപ്പിക്കുന്നു

വണ്ടിത്താവളം: മയിൽക്കൂട്ടം വീട്ടുമുറ്റത്തെത്തി പച്ചക്കറികൃഷി തിന്നു നശിപ്പിക്കുന്നു. മുന്പ് ആളുകളെ കണ്ടാൽ ഓടിമറയുന്ന മയിലുകൾ നിലവിൽ വീടുകളുടെ മേൽക്കൂരകളിലും മറ്റും കയറി വളർത്തുമൃഗങ്ങളെപ്പോലയാണ് പെരുമാറുന്നത്. കാലവർഷം ആരംഭിച്ചതിനാൽ വീടുകളിൽ പച്ചമുളക്, വെണ്ട, തക്കാളി, ചോളം, വഴുതിന ഉൾപ്പെടെ പച്ചക്കറി കൃഷികൾ സജീവമാണ്. ഇവയെല്ലാം പുലർച്ചെ സമയങ്ങളിലെത്തി തിന്നുതീർക്കുകയാണ് മയിലുകൾ. ദേശീയപക്ഷിയായ മയിലിനെ ഓടിച്ചാൽ നിയമപ്രശ്നങ്ങൾ ഉണ്ടാവുമെന്ന ഭയത്തിൽ ജനം മൗനംപാലിക്കുകയാണ്. വീട്ടുകാർ സമീപമെത്തിയാലും മയിലുകൾ തിരിച്ചു പോവാറില്ല. പറന്നെത്തുന്നതിനാൽ തടയാനും മറ്റു മാർഗങ്ങളില്ലാത്തതിനാൽ പ്രഭാതസമയങ്ങളിൽ വളർത്തുകോഴികളെ പോലയാണ് വീടുകളുടെ മുറ്റത്ത് മയിലുകൾ വിഹരിക്കുന്നത്.

നെഹ്‌റു ആർട്‌സ് ആൻഡ് സയൻസ് കോളജിൽ ഫ്രെഷേഴ്സ് ഡേ

കോയമ്പത്തൂർ: നെഹ്‌റു ആർട്‌സ് ആൻഡ് സയൻസ് കോളജ് 2025-2026 അക്കാദമിക് വർഷത്തിലേക്കുള്ള യുജി ഫ്രെഷേഴ്‌സിന്‍റെ 27-ാമത് ഫ്രെഷേഴ്‌സ് ദിനാചരണം പി.കെ. ദാസ് മെമ്മോറിയൽ ഓഡിറ്റോറിയത്തിൽ സംഘടിപ്പിച്ചു. നെഹ്‌റു ആർട്‌സ് ആൻഡ് സയൻസ് കോളജ് പ്രിൻസിപ്പൽ ഡോ.വി. വിജയകുമാർ സ്വാഗതം പറഞ്ഞു. മൗറീഷ്യസ്-ഇന്ത്യയുടെ ഓണററി ട്രേഡ് കമ്മീഷണറും നെഹ്‌റു ഗ്രൂപ്പ് ഓഫ് ഇൻസ്റ്റിറ്റ്യൂഷൻസ് ചെയർമാനും മാനേജിംഗ് ട്രസ്റ്റിയുമായ അഡ്വ.ഡോ.പി. കൃഷ്ണദാസ് അധ്യക്ഷത വഹിച്ചു. കോയമ്പത്തൂർ പോലീസ് സൂപ്രണ്ട് ഡോ.കെ. കാർത്തികേയൻ ചടങ്ങിൽ മുഖ്യാതിഥിയായി. നെഹ്‌റു ഗ്രൂപ്പ് ഓഫ് ഇൻസ്റ്റിറ്റ്യൂഷൻസ് സിഇഒയും സെക്രട്ടറിയുമായ ഡോ.പി. കൃഷ്ണകുമാർ ആശംസാപ്രസംഗം നടത്തി. ഇന്ത്യൻ വ്യോമസേനയുടെ വിംഗ് കമാൻഡർ സുധാൻഷു റായ്, നെഹ്‌റു ഗ്രൂപ്പ് ഓഫ് ഇൻസ്റ്റിറ്റ്യൂഷൻസ് അക്കാദമിക്‌സ് ആൻഡ് അഡ്മിനിസ്ട്രേഷൻ എക്സിക്യൂട്ടീവ് ഡയറക്ടർ ഡോ.എച്ച്. എൻ. നാഗരാജ, പാലക്കാട് അവൈറ്റിസ് സൂപ്പർ സ്പെഷ്യാലിറ്റി ഹോസ്പിറ്റലിലെ ക്വാളിറ്റി കൺട്രോൾ മാനേജർ നൂർ ഫെറിൻഷ, പ്രൊപ്പോസ്ഡ് പി. കെ. ദാസ് യൂണിവേഴ്സിറ്റിയുടെ നിയുക്ത രജിസ്ട്രാർ ഡോ. ബി. അനിരുദ്ധൻ, കൺവീനർ ഡോ.എസ്. സരസ്വതി എന്നിവർ പ്രസംഗിച്ചു.

അട്ടപ്പാടി തുണൈ പദ്ധതി അദാലത്ത്; 116 അപേക്ഷകളിൽ നടപടിക്കു നിർദേശം

അഗളി: അട്ടപ്പാടി മേഖലയുടെ സമഗ്ര വികസനം ലക്ഷ്യമിട്ട് ജില്ലാ ഭരണകൂടം ആവിഷ്കരിച്ച തുണൈ കർമപദ്ധതിയുടെ ഭാഗമായി പുതൂരിൽ ജില്ലാ കളക്ടർ ജി. പ്രിയങ്കയുടെ അധ്യക്ഷതയിൽ അദാലത്ത് നടത്തി. പുതൂർ ഗ്രാമപഞ്ചായത്ത് കമ്യൂണിറ്റി ഹാളിൽ നടന്ന അദാലത്തിൽ ലഭിച്ച 116 അപേക്ഷകളിന്മേൽ ആവശ്യമായ നിർദേശങ്ങൾ നൽകുകയും തുടർനടപടികൾക്കായി ബന്ധപ്പെട്ട വകുപ്പുകൾക്കു കൈമാറുകയും ചെയ്തു. അട്ടപ്പാടിയിലെ ജനങ്ങളുടെ പ്രശ്നങ്ങൾക്ക് തത്സമയ പരിഹാരം കാണുന്നതിനും മേഖലയിലെ വികസന പ്രവർത്തനങ്ങൾ ഏകോപിപ്പിക്കുന്നതിനും വേണ്ടിയാണ് തുണൈ കർമ്മപദ്ധതിക്ക് രൂപം നൽകിയിരിക്കുന്നത്. ജില്ലയിലെ തെരഞ്ഞെടുക്കപ്പെട്ട ഉദ്യോഗസ്ഥർക്ക് ഉന്നതികളുടെ ചുമതല നൽകിയിട്ടുണ്ടെന്നും ഇവർ പ്രശ്നപരിഹാരത്തിനു ആവശ്യമായ മൈക്രോപ്ലാനുകൾ തയാറാക്കി നടപ്പാക്കണമെന്നും കളക്ടർ നിർദേശം നൽകി. അദാലത്തിൽ പുതൂർ ഗ്രാമപഞ്ചായത്ത് പ്രസിഡന്‍റ് ജ്യോതി അനിൽകുമാർ, അട്ടപ്പാടി ബ്ലോക്ക് പഞ്ചായത്ത് പ്രസിഡന്‍റ് മരുതി മുരുകൻ, ഒറ്റപ്പാലം സബ്കളക്ടർ മിഥുൻ പ്രേംരാജ്, അഗളി, ഷോളയൂർ ഗ്രാമപഞ്ചായത്ത് ജനപ്രതിനിധികൾ, ജില്ലാതല ഉദ്യോഗസ്ഥർ എന്നിവർ പങ്കെടുത്തു.

വിദ്യാർഥികൾക്കു സ്നേഹാദരവുമായി സഹകരണ സംഘം

കല്ലടിക്കോട്: കരിമ്പ പഞ്ചായത്ത് കാർഷിക ഉത്പാദന സഹകരണ സംഘം 2024-25 അധ്യയനവർഷത്തിൽ എസ്എസ്എൽസി, പ്ലസ്ടു പരീക്ഷകളിൽ മുഴുവൻ എപ്ലസ് നേടിയവരെയും എൽഎസ്എസ്, യുഎസ്എസ്, നീറ്റ്, എൻഎൻഎംഎസ് പരീക്ഷകളിൽ ശ്രദ്ധേയ വിജയം കൈവരിച്ച വിദ്യാർഥികളെയും ഉപഹാരങ്ങൾ നൽകി അനുമോദിച്ചു. കെ. ശാന്തകുമാരി എംഎൽഎ സ്നേഹാദരം പരിപാടി ഉദ്ഘാടനം ചെയ്തു. കാർഷിക ഉത്പാദന സഹകരണ സംഘം പ്രസിഡന്‍റ് ജിമ്മി മാത്യു അധ്യക്ഷത വഹിച്ചു. ഗ്രാമപഞ്ചായത്ത് പ്രസിഡന്‍റ് പി.എസ്. രാമചന്ദ്രൻ, വൈസ് പ്രസിഡന്‍റ് കെ. കോമളകുമാരി, എച്ച്. ജാഫർ, ജയവിജയൻ, സജി സി. പീറ്റർ, വി.കെ. തുഷാർ, സ്റ്റാഫ് പ്രതിനിധി എൻ.എ. ഷമീർ, കെ. ഗീത തുടങ്ങിയവർ പ്രസംഗിച്ചു.

"നെല്ലിയാന്പതി മുതൽ വാഗമൺവരെ' ജീപ്പ് റാലിയുമായി ഡ്രൈവേഴ്സ് ക്ലബ്

നെന്മാറ: നെല്ലിയാമ്പതി ഓഫ്റോഡ് ഡ്രൈവേഴ്സ് ക്ലബിന്‍റെ നേതൃത്വത്തിൽ നെല്ലിയാമ്പതിയിൽനിന്നും വാഗമണ്ണിലേക്ക് ജീപ്പ് റാലി നടത്തി. നെല്ലിയാമ്പതിയുടെ ടൂറിസംസാധ്യത നാട്ടിൽ പ്രചരിപ്പിക്കുന്നതിനായും വർധിച്ചുവരുന്ന മയക്കുമരുന്ന് ദുരുപയോഗത്തിനും വനമേഖലയിലെ പ്ലാസ്റ്റിക് മലിനീകരണത്തിനുമെതിരേ ബോധവത്കരണം ലക്ഷ്യമിട്ടായിരുന്നു റാലി സംഘടിപ്പിച്ചത്. പോത്തുണ്ടിഡാം ഉദ്യാന പരിസരത്തുനിന്നും കെ. ബാബു എംഎൽഎ റാലി ഫ്ലാഗ് ഓഫ് ചെയ്തു. ഡി. ദിലീപ്, ആർ. രവി, പി. സുധീഷ്, എസ്. അൻസാജ് എന്നിവരുടെ നേതൃത്വത്തിൽ 15 ജീപ്പുകളിലായി 59 പേരടങ്ങുന്ന സംഘമാണ് യാത്രതിരിച്ചത്.

അപകടമരം മുറിച്ചുനീക്കാൻ തുടങ്ങി

വടക്കഞ്ചേരി: വാർത്താ പരമ്പരകൾക്കും തുടർച്ചയായ പരാതികൾക്കുമൊടുവിൽ വടക്കഞ്ചേരി ടൗണിൽ റോളക്സ് ഓഡിറ്റോറിയത്തിനു മുന്നിലെ വൻമരം മുറിച്ചുമാറ്റാൻ തുടങ്ങി. പണികൾ ഇന്നും തുടരും. വാഹനങ്ങൾക്കും സമീപത്തെ കച്ചവടക്കാർക്കും വഴിയാത്രക്കാർക്കും ഭീഷണിയായി നിന്നിരുന്ന മരം മുറിച്ചു മാറ്റണമെന്നാവശ്യപ്പെട്ട് ദീപികയിൽ ഉൾപ്പെടെ മാധ്യമങ്ങളിൽ നിരവധി തവണ വാർത്തകൾ വന്നിരുന്നെങ്കിലും പലകാരണങ്ങൾപറഞ്ഞ് പൊതുമരാമത്തുവകുപ്പ് മരംമുറിക്കൽ നടപടി വൈകിപ്പിക്കുകയായിരുന്നു. ഒടുവിൽ മരം കടപുഴകി റോഡിൽ വീണ് വലിയ ദുരന്തം വിദൂരമല്ലെന്ന തിരിച്ചറിവിനെ തുടർന്നാണ് മുറിച്ചു മാറ്റാൻ നടപടിയായത്. കഴിഞ്ഞ വേനലിലെങ്കിലും സുഗമമായി മുറിച്ചു മാറ്റാമായിരുന്ന മരം മഴയ്ക്കിടെ മുറിക്കേണ്ടി വന്നതിനാൽ ചെലവും ഇരട്ടിയിലേറെയായി. വൈദ്യുതി ലൈനുകളെല്ലാം ഓഫാക്കി വാഹനങ്ങൾ വഴിതിരിച്ചുവിട്ടാണ് മുറിക്കൽ നടത്തുന്നത്. പകൽ മുഴുവൻ വൈദ്യുതി ഓഫാക്കുന്നത് കച്ചവടക്കാർക്കും ബുദ്ധിമുട്ടുണ്ടാകുന്നുണ്ട്. വീടുകൾക്കും കടകൾക്കു മുകളിലേക്കും റോഡിലെ വൈദ്യുതി ലൈനിനു മുകളിലേക്കും മരത്തിന്‍റെ വലിയ കൊമ്പുകൾ പടർന്ന് നിൽക്കുകയാണ്. ഇതിനാൽ ഹൈറിസ്ക് വർക്ക് ഗണത്തിൽ പ്പെടുത്തിയാണ് മുറിക്കൽ നടപടി.

വീടുകൾ ഉപേക്ഷിച്ചേ പറ്റൂ... നിവൃത്തിയില്ലാതെ കർഷകർ

നെന്മാറ: കരിമ്പാറ കൽച്ചാടിയിൽ വീണ്ടും കാട്ടാനക്കൂട്ടമിറങ്ങി വ്യാപകമായി കൃഷിനശിപ്പിച്ചു. അബ്രഹാം പുതുശ്ശേരിയുടെ 16 റബർമരങ്ങളിലെ മഴമറയും ചിരട്ടകളും ചിരട്ടതാങ്ങി കമ്പികളും കാട്ടാനക്കൂട്ടം നശിപ്പിച്ചു. മൂന്നു മരങ്ങൾ കാട്ടാന മറിച്ചിട്ടു. പണ്ടിക്കുടി എൽദോസിന്‍റെ ഒന്പതു കമുകുകളും നിരവധി കമുകിൻതൈകളും നശിപ്പിച്ചു. കോപ്പംകുളമ്പ് സ്വദേശി മണിയുടെ ആറുകമുകുകളും നശിപ്പിച്ചിട്ടുണ്ട്. രാത്രി മുഴുവൻ കൃഷിയിടത്തിൽ തലങ്ങും വിലങ്ങുംനടന്ന് കാട്ടാന മിക്കയിടങ്ങളും ചെളിക്കുളമാക്കിയിട്ടുമുണ്ട്. പ്രദേശത്തെ കൃഷിയിടങ്ങളിലെ താമസക്കാർ ജീവൻഭയന്ന് താമസം മാറിയതോടെയാണ് വൈകുന്നേരങ്ങളിൽ കൃഷിയിടങ്ങളിൽ കാട്ടാനകളുടെ വിഹാരം ആരംഭിച്ചത്. കഴിഞ്ഞദിവസം കൽച്ചാടിയിൽനിന്ന് രണ്ടുകിലോമീറ്റർ അകലെയുള്ള പൂഞ്ചേരിയിലും കാട്ടാനകൾ കൃഷിനാശം വരുത്തിയിരുന്നു. നെല്ലിയാമ്പതി വനമേഖലയിൽ നിന്നുമെത്തുന്ന കാട്ടാനകൾ മൂന്നും നാലും അടങ്ങുന്ന ചെറു സംഘങ്ങളായി പിരിഞ്ഞ് കരിമ്പാറ, നിരങ്ങൻപാറ, കൽച്ചാടി, പൂഞ്ചേരി, ചള്ള, ഓവുപാറ, ഒലിപ്പറ മേഖലകളിലായി ദിവസങ്ങൾ ഇടവിട്ട് കൃഷിനാശം വരുത്തുന്നതു പതിവായിരിക്കുകയാണ്. ഒരു പ്രദേശത്ത് വനം ജീവനക്കാർ പടക്കം പൊട്ടിച്ച് അകറ്റാൻ ശ്രമിച്ചാൽ അടുത്ത രാത്രി ഒന്നോ രണ്ടോ കിലോമീറ്റർ അകലെ മറ്റൊരു പ്രദേശത്ത് കാട്ടാനകളെത്തുന്ന സ്ഥിതിയാണുള്ളത്. മേഖലയിൽ സ്ഥിരമായി ആർആർടി സംഘത്തെ നിലനിർത്തണമെന്ന ആവശ്യം ശക്തമാണ്. സ്ഥിരമായി മേഖലയിൽ വന്യജീവികൾ കൃഷിനാശം വരുത്തുന്നതിനാൽ പ്രദേശത്തുകാർ പരാതിപ്പെടാനോ പുറംലോകത്തെ അറിയിക്കാനോ വിമുഖരായി മാറി. എങ്ങിനെയെങ്കിലും ഭൂമി വിറ്റൊഴിയണമെന്ന ചിന്തയിലാണ് കർഷകർ. പലർക്കും നിലവിലുള്ള ആദായം എടുക്കുന്നതല്ലാതെ പുതിയ വിളയിറക്കനോ പ്രദേശത്ത് കുടുംബത്തോടെ താമസിക്കാൻ കഴിയാനാത്ത സ്ഥിതിയാണ്. നിരവധി കർഷകർ ഭയംമൂലം സ്വന്തം കൃഷിയിടത്തിലെ വീട് ഉപേക്ഷിച്ച് വാടകവീട്ടിലും ദൂരെ മക്കളോടൊപ്പം താമസിക്കുന്ന സ്ഥിതിയിലേക്കും മാറിയിട്ടുണ്ട്.

ലക്ഷ്യം പത്തുലക്ഷം തൈകൾ; ഇതുവരെ നട്ടതു 90,471

പാലക്കാട്: ലോക പരിസ്ഥിതിദിനത്തിൽ ആരംഭിച്ച ഒരു തൈ നടാം ജനകീയ വൃക്ഷവത്കരണ കാമ്പയിനിന്‍റെ ഭാഗമായി ജില്ലയിൽ നട്ടത് 90471 തൈകൾ. തൊഴിലുറപ്പു പദ്ധതി, സാമൂഹിക വനവത്കരണ വകുപ്പ്, സ്വകാര്യ നഴ്സറികൾ വഴി ജനകീയമായാണ് തൈകൾ ലഭ്യമാക്കിയത്. സെപ്റ്റംബർ 30 നകം ജില്ലയിൽ 10 ലക്ഷം വൃക്ഷതൈകൾ നട്ടുപിടിപ്പിക്കുന്നതിന്‍റെ ഭാഗമായി ജില്ലാ കളക്ടർ ജി. പ്രിയങ്കയുടെ അധ്യക്ഷതയിൽ വിവിധ മേഖലയിലെ പ്രതിനിധികളുടെ യോഗം കളക്ടറേറ്റ് കോൺഫറൻസ് ഹാളിൽ ചേർന്നു. ജില്ലയിൽ ഒരുലക്ഷം കരിമ്പനത്തൈകൾ നട്ടുപിടിപ്പിക്കുന്ന "പനപർവ്വം' പരിപാടി വിജയിപ്പിക്കുന്നതിനും യോഗം തീരുമാനിച്ചു. വൃക്ഷവത്കരണത്തിന്‍റെ ഭാഗമായി നാലുലക്ഷം കുടുംബശ്രീ അയൽക്കൂട്ടം അംഗങ്ങൾ, മൂന്നുലക്ഷം വിദ്യാർഥികൾ, 200 ക്ലബുകൾ, വായനശാലകൾ, സന്നദ്ധ സംഘടനകൾ, വ്യവസായ സംഘടനകൾ, വിവിധ വകുപ്പുകൾ, അക്കാദമിക സ്ഥാപനങ്ങൾ, സന്നദ്ധ പ്രവർത്തകർ, സാമൂഹിക- സാംസ്കാരിക സർവീസ് സംഘടനകൾ കാന്പയിനിന്‍റെ ഭാഗമാകും. ചടങ്ങിൽ ജില്ലാ പഞ്ചായത്ത് സെക്രട്ടറി എം. രാമൻകുട്ടി, നവകേരളം കർമപദ്ധതി ജില്ലാ കോ- ഓർഡിനേറ്റർ പി. സെയ്തലവി, തൊഴിലുറപ്പുപദ്ധതി ജോയിന്‍റ് പ്രോഗ്രാം കോ-ഓർഡിനേറ്റർ ടി.എസ്. ശുഭ, അഡീഷണൽ എസ്പി എസ്. ഷംസുദ്ദീൻ, കുടുംബശ്രീ ജില്ലാ കോ- ഓർഡിനേറ്റർ എൻ. ഉണ്ണികൃഷ്ണൻ, പരിസ്ഥിതി സംഘടനാ പ്രതിനിധികൾ പങ്കെടുത്തു.

ലോറിയിൽനിന്നു വേർപെട്ട് കണ്ടെയ്നർ മറിഞ്ഞു; വാഹനഗതാഗതം തടസപ്പെട്ടു

വടക്കഞ്ചേരി: ദേശീയപാത മംഗലംപാലം ബൈപാസിനടുത്ത് ലോറിയിൽനിന്നും കണ്ടെയ്നർ വേർപ്പെട്ടു മറിഞ്ഞു. അപകടസമയത്ത് മറ്റു വാഹനങ്ങളുണ്ടാകാതിരുന്നതിനാൽ വലിയ ദുരന്തം ഒഴിവായി. അപകടത്തിൽ ആർക്കും പരിക്കില്ല. ഇന്നലെ പുലർച്ചയാണ് സംഭവം. തൃശൂർ ഭാഗത്തുനിന്നും ടയർ കയറ്റി പാലക്കാട് ഭാഗത്തേക്കു പോയിരുന്ന ലോറിയാണ് അപകടത്തിൽപ്പെട്ടത്. പാലക്കാട് ലൈനിൽ മംഗലംപാലത്തിൽ പൊളിച്ചുപണികൾ നടക്കുന്നതിനാൽ പാലക്കാട്ടേക്കുള്ള വാഹനങ്ങളും തൃശൂർ ലൈനിലൂടെ ഒറ്റവരിയായാണ് പോകുന്നത്. ലോറി ഒറ്റവരി ലൈനിലേക്ക് തിരിയുന്നതിനിടെയാണ് കണ്ടെയ്നർ വേർപ്പെട്ട് തൃശൂർ ലൈനിലെ വശത്തേക്കു മറിഞ്ഞത്. അപകടത്തെ തുടർന്ന് ദേശീയപാതയിൽ ഗതാഗത തടസമുണ്ടായി. വൈകുന്നേരം മൂന്ന് ക്രെയിനുകൾ സ്ഥലത്തെത്തിച്ചാണ് കണ്ടെയ്നർ പൊക്കിമാറ്റിയത്.

പ്രഭാതചായക്കിറങ്ങിയയാൾ കുഴഞ്ഞുവീണ് മരിച്ചു

കൊഴിഞ്ഞാമ്പാറ: അലമ്പാടിയിൽ പ്രഭാത ചായക്ക് തിരിച്ചയാൾ വീടിനുസമീപത്ത് കുഴഞ്ഞുവീണ് മരിച്ചു. ആലമ്പള്ളം മുത്തുവിന്‍റെ മകൻ രവി(57) ആണ് മരിച്ചത്. റോഡിൽ രവി വീഴുന്നതുകണ്ട് ഓടിക്കൂടിയ നാട്ടുകാർ സ്വകാര്യ ആശുപത്രിൽ എത്തിച്ചെങ്കിലും ജീവൻ രക്ഷിക്കാനായില്ല. കൊഴിഞ്ഞാമ്പാറ പോലീസ് ഇൻക്വസ്റ്റിനു ശേഷം പോസ്റ്റു മോർട്ടം നടത്തി മൃതദേഹം ബന്ധുക്കൾക്ക് വിട്ടു കൊടുത്തു. ഭാര്യ: ഭാഗ്യവതി. മക്കൾ: പ്രണവ്, പ്രജിത്ത്.

കുമരംപുത്തൂരില്‍ എക്സലന്‍സ് മീറ്റ്

മണ്ണാര്‍ക്കാട്: കുമരംപുത്തൂര്‍ ഗ്രാമപഞ്ചായത്തിന്‍റെ ആഭിമുഖ്യത്തില്‍ എക്സലന്‍സ് മീറ്റ് സംഘടിപ്പിച്ചു. എന്‍. ഷംസുദ്ദീന്‍ എംഎല്‍എ ഉദ്ഘാടനം ചെയ്തു. പ്രസിഡന്‍റ് രാജന്‍ ആമ്പാടത്ത് അധ്യക്ഷനായി. ഡോ.ടി. സൈനുല്‍ ആബിദ് മോട്ടിവേഷന്‍ ക്ലാസെടുത്തു. എസ്എസ്എല്‍സി, പ്ലസ്ടു പരീക്ഷകളില്‍ സമ്പൂര്‍ണ എപ്ലസ് നേടിയവരേയും എന്‍എംഎസ്എസ്, എല്‍എസ്എസ്, യുഎസ്എസ് നേടിയ വിദ്യാര്‍ഥികളെയും വിരമിച്ച അങ്കണവാടി ജീവനക്കാരെയും സിവില്‍ ഡിഫന്‍സ് പ്രവര്‍ത്തകരെയും മൊമന്‍റോ നല്‍കി ആദരിച്ചു. ഗ്രാമപഞ്ചായത്ത് പരിധിയിലെ സ്കൂളുകള്‍ക്ക് മെഡിക്കല്‍ കിറ്റ് വിതരണവും നടത്തി. വൈസ് പ്രസിഡന്‍റ് റസീന വറോടന്‍, വികസനകാ ര്യ ചെയര്‍മാന്‍ സഹദ് അരിയൂര്‍, ക്ഷേമകാര്യ ചെയര്‍മാന്‍ പി.എം. നൗഫല്‍ തങ്ങള്‍, ആരോഗ്യ വിദ്യാഭ്യാസ ചെയര്‍പേഴ്സണ്‍ ഇന്ദിര മാടത്തുംപുളളി, കാദര്‍ കുത്തനില്‍, ടി.കെ. ഷമീര്‍, സിഡിഎസ് ചെയര്‍പേഴ്സണ്‍ സുനിത, വിവിധ പാര്‍ട്ടി നേതാക്കളായ അസീസ് പച്ചീരി, ജേക്കബ്, അബു വറോടന്‍ ഗോപാലകൃഷ്ണന്‍, പി. മുഹമ്മദാലി അന്‍സാരി, മുജീബ് മല്ലിയില്‍, മുഹ്സിന്‍ ചങ്ങലീരി എന്നിവര്‍ പ്രസംഗിച്ചു.

ഫിസിയോതെറാപ്പി സെന്‍റർ പ്രവർത്തനോദ്ഘാടനം

കല്ലടിക്കോട്: കരിമ്പ ഗ്രാമപഞ്ചായത്ത് ജനകീയാസൂത്രണ പദ്ധതി പ്രകാരം കല്ലടിക്കോട് കുടുംബാരോഗ്യകേന്ദ്രത്തിൽ ഫിസിയോ തെറാപ്പി സെന്‍റർ പ്രവർത്തനമാരംഭിച്ചു. കരിമ്പ ഗ്രാമപഞ്ചായത്ത് പ്രസിഡന്‍റ് പി.എസ്. രാമചന്ദ്രൻ പ്രവർത്തനോദ്ഘാടനം നിർവഹിച്ചു. വൈസ് പ്രസിഡന്‍റ് കെ. കോമളകുമാരി അധ്യക്ഷയായി. അന്താരാഷ്ട്ര യോഗ ദിനാചരണവും നടത്തി. യോഗമാസ്റ്റർ നന്ദകുമാർ ക്ലാസ് എടുത്തു. സ്റ്റാൻഡിംഗ് കമ്മിറ്റി ചെയർമാൻ എച്ച്. ജാഫർ, ജയ വിജയൻ, വാർഡ് മെംബർമാരായ കെ.കെ. ചന്ദ്രൻ, എം. പ്രസന്ന, മോഹൻദാസ്, ബീന ചന്ദ്രകുമാർ, എം. ചന്ദ്രൻ, ഡോ. ഹണി റോസ് തോമസ്, ഡോ. ജിനു എൽ. തോമസ്, ഫിസിയോ തെറാപ്പിസ്റ്റ് ഡോ. എബിൻ,ഹെൽത്ത് ഇൻസ്പെക്ടർ പി.യു. സുഹൈൽ എന്നിവർ പ്രസംഗിച്ചു. ആദ്യഘട്ടത്തിൽ ആഴ്ചയിൽ മൂന്നു ദിവസമാണ് ഫിസിയോ തെറാപ്പി സെന്‍റർ പ്രവർത്തിക്കുകയെന്ന് അധികൃതർ അറിയിച്ചു.

നന്മ ചാരിറ്റബിൾ സൊസൈറ്റി വാർഷികാഘോഷം

ആലത്തൂർ: പഴമ്പാലക്കോട് നന്മ ചാരിറ്റബിൾ സൊസൈറ്റി വാർഷികം ആഘോഷിച്ചു. ആലത്തൂർ പോലീസ് ഇൻസ്പെക്ടർ ടി.എൻ. ഉണ്ണികൃഷ്ണൻ ഉദ്ഘാടനം ചെയ്തു. മദ്യത്തിനും മയക്കുമരുന്നിനും അടിമപ്പെടാതെ തങ്ങൾക്കും കുടുംബത്തിനും സമൂഹത്തിനും ഉപകാരപ്പെടുന്ന നന്മയുള്ളവരായി വളരാൻ വിദ്യാർഥികളെ അദ്ദേഹം ആഹ്വാനം ചെയ്തു. പ്രസിഡന്‍റ് പി.എം. മുഹമ്മദ് ഷെരീഫ് അധ്യക്ഷത വഹിച്ചു. തരൂർ പഞ്ചായത്ത് മുൻ പ്രസിഡന്‍റ് പി. മനോജ്കുമാർ മുഖ്യപ്രഭാഷണം നടത്തി. സെക്രട്ടറി അബ്ദുറഹ്മാൻ ഹസനാർ മോട്ടിവേഷൻ ക്ലാസ് നടത്തി. വാർഡ് മെംബർ കെ. ചെന്താമരാക്ഷൻ, ഗ്രേസി ടീച്ചർ, അബ്ബാസ് മൂപ്പൻ, ഹിബ, ആദില അമാൻ, വിദ്യാഭ്യാസ വകുപ്പ് കൺവീനർ അബ്ദുൾ മൻസൂർ എന്നിവർ പ്രസംഗിച്ചു. പുതിയ പദ്ധതികളായ വിദ്യാഭ്യാസ സ്കോളർഷിപ്പ് ഇൻസ്പെക്ടർ ടി.എൻ. ഉണ്ണികൃഷ്ണനും ഓർഫൻ സ്കോളർഷിപ്പ് പി. മനോജ് കുമാറും റേഷൻ കിറ്റ് വിതരണം ആതിര ഓഡിറ്റോറിയം ഉടമ പോൾ എന്നിവർ ഉദ്ഘാടനം ചെയ്തു. എസ്എസ്എൽസി, പ്ളസ് ടു പരീക്ഷയിൽ മികച്ച വിജയം നേടിയ വിദ്യാർഥികളെ അനുമോദിച്ചു.

കരിപ്പാലി -പൊക്കുന്നി പാത തകർന്ന് വാഹനസഞ്ചാരം ഭീതിയിൽ

കൊല്ലങ്കോട്: കരിപ്പാലി- വടവന്നൂർ പാതയിലുടനീളം ഗർത്തങ്ങൾ ഉണ്ടായി മഴവെള്ളം നിറഞ്ഞ് വാഹന- കാൽ നടയാത്ര ദുരിതമയം. ഇരുചക്രവാഹനങ്ങൾ ഗർത്തങ്ങളിൽ ഇടിച്ചിറങ്ങി മറിഞ്ഞ് യാത്രക്കാർ ചെളിവെള്ളത്തിൽ വീണ് പരിക്കേൽക്കുന്നത് സാധാരണമാണ്. വാഹനങ്ങൾ വെള്ളക്കെട്ടിൽ ഇറങ്ങി സഞ്ചരിക്കുമ്പോൾ ചെളിവെള്ളം യാത്രക്കാരുടെ ദേഹത്തും തെറിച്ച് വീഴുന്നുണ്ട്. നാലു സ്വകാര്യബസുകൾ ഉൾപ്പെടെ നിരവധി വാഹനങ്ങൾ കരിപ്പാലി പൊക്കുന്നി വഴി സഞ്ചരിക്കുന്നുണ്ട്. പല സ്ഥലങ്ങളിലും റോഡിൽ തോടുപോലെയാണ് ചെളിവെള്ളം കെട്ടിനിൽക്കുന്നത്. ഇതിലൂടെ സഞ്ചരിക്കുന്ന ചരക്കുവാഹനങ്ങൾക്ക് യന്ത്രത്തകരാറും സംഭവിക്കുന്നതായി സമീപവാസികൾ പരാതിപ്പെടുകയാണ്. ഇതുവഴി രാത്രിസഞ്ചാരം തീർത്തും അപകടഭീതിയിലാണ്. ഇരുചക്രവാഹനയാത്രക്കാരൻ രാത്രിയിൽ വരുന്നതിനിടെ കെട്ടിൽക്കുന്ന വെള്ളക്കെട്ടിൽ വിഷപ്പാമ്പിനെക്കണ്ട് അപകട ജീവഭയത്തിൽ തിരിച്ചുപോവുകയാണുണ്ടായത്. പ്രദേശത്തെ സ്കൂളിൽ വിദ്യാർഥികൾ വെള്ളക്കെട്ടിലൂടെ പോയിവരുന്നത് രക്ഷിതാക്കളുടെ ചങ്കിടിപ്പ് കൂട്ടുകയാണ്. പത്ത് വർഷം മുൻപാണ് റോഡ് അറ്റകുറ്റപ്പണി നടന്നിട്ടുള്ളതെന്നാണ് പതിവുയാത്രക്കാർ പറയുന്നത്. യുദ്ധകാലാടിസ്ഥാനത്തിൽ റോഡ് നവീകരണം ആവശ്യപ്പെട്ട് ജില്ലാ കളക്ടർക്ക് നിവേദനം നൽകാൻ യാത്രക്കാർ ഒപ്പുശേഖരണം നടത്താൻ തീരുമാനിച്ചിരിക്കുകയാണ്.

നാടിന്‍റെ അഭിമാനതാരങ്ങളെ നഗരസഭ ആദരിച്ചു

മണ്ണാർക്കാട്: നഗരസഭ പരിധിയിലെ എസ്എസ്എൽസി, പ്ലസ് ടു, എൽഎസ്എസ്, യുഎസ്എസ് പരീക്ഷകളിൽ ഉന്നതവിജയം നേടിയ വിദ്യാർഥികളെ ആദരിച്ചു. നഗരസഭ ചെയർമാൻ സി. മുഹമ്മദ് ബഷീർ ഉദ്ഘാടനം ചെയ്തു. വൈസ് ചെയർപേഴ്സൺ പ്രസീത അധ്യക്ഷത വഹിച്ചു. എസ്എസ്എൽസി പരീക്ഷയിൽ 100% വിജയം വരിച്ച ദാറുന്നജാത്ത് ഹയർ സെക്കൻഡറി സ്കൂൾ, എംഇഎസ് ഹയർ സെക്കൻഡറി സ്കൂൾ, എംഇടി സ്കൂൾ, സെന്‍റ് ഡൊമിനിക് ഇംഗ്ലീഷ് മീഡിയം സ്കൂൾ എന്നീ സ്കൂളുകളെ നഗരസഭ പ്രത്യേകം ആദരിച്ചു. എംജി പട്ടേൽ ബെസ്റ്റ് ഹൈസ്കൂൾ ഉർദു ടീച്ചർ നാഷണൽ അവാർഡ് കരസ്ഥമാക്കിയ ഡിഎച്ച്എസ്എസ് നെല്ലിപ്പുഴ സ്കൂളിലെ അധ്യാപകനായ ലെഫ്റ്റനന്‍റ് പി. ഹംസക്കും നഗരസഭ നടപ്പാക്കുന്ന വിവിധ പ്രവർത്തങ്ങളിൽ മികച്ച പ്രകടനം കാഴ്ചവച്ച ഡിഎച്ച്എസ്എസ് നെല്ലിപ്പുഴ സ്കൂളിലെ എൻസിസി യൂണിറ്റിനെയും ആദരിച്ചു. സ്ഥിരം സമിതി അധ്യക്ഷരായ ഷഫീഖ് റഹ്മാൻ, മാസിത സത്താർ, കൗൺസിലർമാരായ യൂസഫ് ഹാജി, രാധാകൃഷ്ണൻ, മുജീബ് ചോലോത്ത്, കദീജ, സുഹറ, ലക്ഷ്മി, ഷറഫുന്നീസ, ഉഷ, ഇബ്രാഹിം തുടങ്ങിയവർ പങ്കെടുത്തു. നഗരസഭ വികസന സ്ഥിരം സമിതി അധ്യക്ഷൻ കെ. ബാലകൃഷ്ണൻ സ്വാഗതവും വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ ഹംസ കുറുവണ്ണ നന്ദിയും പറഞ്ഞു.

നെന്മാറയിൽ ഏകപാത്രനാടകം അരങ്ങേറി

നെന്മാറ: വാർധക്യത്തിന്‍റെ ഒറ്റപ്പെടലിൽ കഴിയുന്നവരുടെ കഥ പറയുന്ന രാരിച്ചനും പറയാനുണ്ട് ഏക കഥാപാത്ര നാടകം അരങ്ങേറി. ആദ്യാവതരണത്തിന്‍റെ ഉദ്ഘാടനം കെ. ബാബു എംഎൽഎ നിർവഹിച്ചു. വൈഎംസിഎ നെന്മാറ യൂണിറ്റ് പ്രസിഡന്‍റ് അഡ്വ. ജോയ് കാഞ്ഞിരത്തിൻചാലിൽ അധ്യക്ഷനായി. വൈഎംസിഎ ജില്ലാ സബ് റീജിയൻ ചെയർമാൻ ഷൈൻ, പുത്തൂർ രവി, ചേരാമംഗലം ചാമുണ്ണി, പ്രഫ. സുധാകരൻ, റോയ് കെ. പോൾ തുടങ്ങിയവർ പ്രസംഗിച്ചു. രവി തൈക്കാട് രചനയും സംവിധാനവും നിർവഹിച്ച നാടകത്തിൽ എം.ജെ. സാജുവാണ് അഭിനയിച്ചത്. വൈഎംസിഎ നെന്മാറ യൂണിറ്റ്, ഇടം സാംസ്ക്കാരിക സമിതി, കേളി സാംസ്ക്കാരിക സമിതി, നെന്മാറ പെൻഷനേഴ്സ് യൂണിയൻ എന്നീ സംഘടനകളുടെ നേതൃത്വത്തിലാണ് നാടകം നടന്നത്.

ഡബിൾ ഡക്കറും മെമു ട്രെയിനും എത്തിയില്ല; യാത്രക്കാർ നിരാശയിൽ

കൊല്ലങ്കോട്: പാലക്കാട്- പൊള്ളാച്ചി ബ്രോഡ്ഗേജ് ലൈൻ ചരക്ക് കടത്തിനു മാത്രമായി വഴിമാറുന്നതിൽ യാത്രക്കാരുടെ പ്രതിഷേധം ശക്തം. 800 കോടി ചെലവഴിച്ച് പാലക്കാട് -രാമേശ്വരം പാത നവീകരിച്ചപ്പോൾ കൂടുതൽ യാത്രാസൗകര്യം ഉണ്ടാവുമെന്ന പ്രതീക്ഷയിലായിരുന്നു ജനങ്ങൾ. 50 കോടി ചെലവഴിച്ച് ബ്രോഡ്ഗേജ് ലൈൻ വൈദ്യുതീകരണവും വർഷങ്ങൾക്ക് മുൻപ് പൂർത്തികരിച്ചു. എന്നാൽ മീറ്റർ ഗേജിൽ ഓടിയിരുന്ന ആറു ജോടി പാസഞ്ചർ ട്രെയിൻ പുനഃസ്ഥാപിക്കാൻ വർഷം എട്ട് കഴിഞ്ഞും ഒരു നടപടിയുമില്ല. പാസഞ്ചർ ട്രെയിൻ പുനഃസ്ഥാപിക്കാൻ നാട്ടുകാർ നിരവധി തവണ സമരങ്ങൾ നടത്തിയിട്ടും ഫലമില്ല. പാസഞ്ചർ ട്രെയിനുകൾക്കായുള്ള യാത്രക്കാരുടെ കാത്തിരിപ്പിന് മുന്നിൽ ചീറിപ്പായുന്നത് ഗുഡ്സ് ട്രെയിനുകളാണ്. നിലവിൽ തിരുച്ചെന്തൂർ പാസഞ്ചർ , അമൃത എക്സ്പ്രസ് , ചെന്നെ സൂപ്പർ ഫാസ്റ്റ് ട്രെയിനു കളാണ് സർവീസ് നടത്തുന്നത്. യാത്രക്കാർക്ക് യാത്രാസൗകര്യം ലഭിക്കുന്ന പാസഞ്ചർ ട്രെയിന് രാത്രിസഞ്ചാരമെന്നതിനാൽ പകൽ യാത്രക്ക് പറ്റില്ല. മധുര-തിരുവനന്തപുരം അമൃതക്ക് മീനാക്ഷിപുരം, മുതലമട, വടകന്യാപുരം, പുതുനഗരം സ്റ്റേഷനുകളിൽ സ്റ്റോപ്പില്ല. കൊല്ലങ്കോട് മാത്രമാണ് സ്റ്റോപ്പ് അനുവദിച്ചിരിക്കുന്നത്. ചെന്നൈ ഫാസ്റ്റിന് അഞ്ച് സ്റ്റേഷനുകളിലും സ്റ്റോപ്പില്ല. പാലക്കാട് -മധുര പാതയിൽ മെമുഓടിക്കാൻ നടപടി സ്വീകരിച്ചതായി റെയിൽവേ അധികൃതർ അറിയിച്ചതും നടപ്പിലാവാതെ നീളുകയാണ്. യാത്രക്കാർക്ക് പ്രതീക്ഷ നൽകി ഡബിൾ ഡക്കർ ഓടിക്കാൻ പാലക്കാട് - പഴനിപാതയിൽ ട്രയൽറൺ നടത്തിയെങ്കിലും തുടർ‌നടപടിയുണ്ടായില്ല. പരീക്ഷണ ഓട്ടം വിജയകരം എന്ന് അറിയിച്ചെങ്കിലും പത്തുമാസം കഴിഞ്ഞും ഡബിൾ ഡക്കർ പാളത്തിലെത്തിയില്ല. പാലക്കാട് -പൊള്ളാച്ചി പാത ഗുഡ്സ് ട്രെയിനുകൾക്കുള്ള ഫ്ലാഗ്സ്റ്റേഷനുകളായി മാറുമോ എന്നാണ് യാത്രക്കാരുടെ ആശങ്ക.

നവീകരണത്തിനു പുതിയ കരാറുകാരൻ

ഷൊർണൂർ: കൊച്ചിൻപാലം മുതൽ കുളപ്പുള്ളിവരെയുള്ള പാത നവീകരിക്കുന്ന പ്രവൃത്തി പുതിയ കരാറുകാരൻ ഏറ്റെടുത്തു. കൊച്ചിൻപാലംമുതൽ പൊതുവാൾ ജംഗ്ഷൻവരെയുള്ള 1.400 കിലോമീറ്റർ റോഡ് ഓഗസ്റ്റ് 31നകം റബറൈസ് ചെയ്ത് നവീകരിക്കുമെന്നു പൊതുമരാമത്ത് വിഭാഗം നേരത്തെ അറിയിച്ചിരുന്നു. എന്നാൽ പഴയ കരാറുകാരൻ പ്രവൃത്തികൾ പാതിവഴിയിൽ അവസാനിപ്പിച്ചു മടങ്ങുകയായിരുന്നു. ഇതോടെ റോഡ് നിർമാണം നിലച്ചു. റോഡ് കുണ്ടുംകുഴിയും നിറഞ്ഞ പാതാള ഗർത്തങ്ങൾ രൂപപ്പെട്ടു. തുടർന്ന് പൊതുവാൾ ജംഗ്ഷൻമുതൽ കുളപ്പുള്ളിവരെ കുഴികളടച്ച് ഗതാഗതയോഗ്യമാക്കാൻ കരാറുകാരനു നിർദേശവും നൽകി. അല്ലാത്തപക്ഷം കരാറുകാരനെ കരിമ്പട്ടികയിൽപ്പെടുത്തുമെന്നു പൊതുമരാമത്ത് വിഭാഗം അസിസ്റ്റന്‍റ് എക്സിക്യൂട്ടിവ് എൻജിനീയർ അറിയിച്ചിരുന്നു. ഒറ്റപ്പാലം താലൂക്ക് പ്രൈവറ്റ് ബസ് ഓപ്പറേഴ്സ് അസോസിയേഷൻ നൽകിയ പരാതിക്ക് രേഖാമൂലം നൽകിയ മറുപടിയിലാണിക്കാര്യം ബന്ധപ്പെട്ടവർ നൽകിയത്. കുഴിനിറഞ്ഞ റോഡിലൂടെ സഞ്ചരിക്കാൻ പറ്റാത്ത സ്ഥിതിയാണിപ്പോൾ. റോഡുനിർമാണം പൂർത്തിയാകാത്തതിനാൽ മഴപെയ്താൽ പാതയിൽ വാഹനങ്ങളുടെ നീണ്ടനിരയാണ് പലപ്പോഴും. ഒന്നാംഘട്ടം പൂർത്തിയായ ഭാഗങ്ങൾ ഉൾപ്പെടെ റോഡിന്‍റെ പല ഭാഗങ്ങളും തകർന്നിരിക്കുകയാണിപ്പോൾ. ഇതോടുകൂടിയാണ് പഴയ കരാറുകാരനെ ഒഴിവാക്കി പുതിയ കരാറുകാരനെ കണ്ടെത്തിയത്.

പുല്ലമ്പാടത്തെ നെൽകൃഷി വെള്ളത്തിൽമുങ്ങി

വടക്കഞ്ചേരി: കനത്ത മഴയെതുടർന്ന് വണ്ടാഴി പുല്ലംമ്പാടം പാടശേഖരം വെള്ളത്തിൽ മുങ്ങി. ഏക്കർ കണക്കിന് സ്ഥലത്തെ ഞാറ്റടികൾ വെള്ളത്തിനടിയിലായി. ദിവസങ്ങളായി തുടരുന്ന വെള്ളക്കെട്ടിൽ ഞാറ്റടികളെല്ലാം ചീഞ്ഞുനശിച്ചു. തോടിന്‍റെ ബണ്ട് കോൺക്രീറ്റ് ചെയ്തതോടെ വെള്ളം ഒഴുകിപ്പോകാനാകാത്ത സ്ഥിതിയുണ്ടായെന്നാണു കർഷകർ പറയുന്നത്. പലഭാഗത്തുനിന്നും കൂടുതൽ വെള്ളം പാടശേഖരത്തിലെത്തിയതും വെള്ളക്കെട്ടു രൂക്ഷമാക്കി. ഒന്നാംവിളകൃഷി സാധ്യമല്ലാത്ത സ്ഥിതിയാണിപ്പോൾ. പാടശേഖരത്തിലെ വെള്ളക്കെട്ട് ഒഴിവാക്കാൻ അടിയന്തിര നടപടി സ്വീകരിക്കണമെന്നാണു കർഷകരുടെ ആവശ്യം.

ഒരേ കൃഷിയിടത്തിൽ അഞ്ചാംതവണ

നെന്മാറ: കരിമ്പാറ പൂഞ്ചേരിയിൽ കാട്ടാനയിറങ്ങി തെങ്ങിൻതോട്ടത്തിൽ വ്യാപകനാശം വരുത്തി. മരുതഞ്ചേരി കുന്നുപറമ്പ് വീട്ടിൽ ഷാജഹാന്‍റെ പൂഞ്ചേരിയിലുള്ള കൃഷിയിടത്തിൽ അഞ്ചുതെങ്ങുകൾ നശിപ്പിച്ചു. ഫലവൃക്ഷങ്ങൾ, കമുകിൻതൈകൾ, കമ്പിവേലി എന്നിവയും നശിപ്പിച്ചിട്ടുണ്ട്. ഏകദേശം 35000 രൂപയുടെ നഷ്ടം വരുത്തിയിട്ടുണ്ട്. കഴിഞ്ഞ പത്തുമാസത്തിനിടെ ഈ കൃഷിയിടത്തിൽ അഞ്ചാം തവണയാണ് കാട്ടാനകൾ കൂട്ടമായും ഒറ്റയായും തെങ്ങുകൾ നശിപ്പിക്കുന്നത്. ഇതുവരെ 35 തെങ്ങുകൾ ഈ കർഷകന്‍റെ മാത്രം മേഖലയിൽ നശിപ്പിച്ചിട്ടുണ്ട്. കൽച്ചാടി, ചള്ള മേഖലയിലെ അഞ്ചോളം കർഷകരുടെ കൃഷിയിടങ്ങൾ കടന്നാണ് കാട്ടാന ഈ കൃഷിയിടത്തിൽ എത്തിയത്. സമീപ കർഷകരായ കെ. ചെന്താമരാക്ഷൻ, വീപ്പനാടൻ ജോർജ് എന്നിവരുടെ കൃഷിയിടങ്ങളിലും കാട്ടാന നടന്നും ഫലവൃക്ഷങ്ങൾ ഒടിച്ചുംതിന്നും നശിപ്പിച്ചിട്ടുണ്ട്. നെന്മാറ വനം ഡിവിഷനിലെ തിരുവഴിയാട് സെക്്ഷനു കീഴിലുള്ള കൽച്ചാടി വനമേഖലയിൽനിന്നാണ് രണ്ടുകിലോമീറ്ററോളം അകലെയുള്ള ഷാജഹാന്‍റെ കൃഷിയിടത്തിൽ കാട്ടാനയെത്തിയത്.

പരിഹാരത്തിന് അതിരുകളില്ല, സ്ഥലം സന്ദർശിക്കുമെന്ന് അധികൃതർ

ഒറ്റപ്പാലം: റെയിൽവേയുടെ സുരക്ഷാമതിൽ നിർമാണത്തോടെ ഒറ്റപ്പെടുമെന്ന വെള്ളിയോട്, ചോറോട്ടൂർ നിവാസികളുടെ ആശങ്കക്ക് പരിഹാരം കാണാൻ റെയിൽവേ വിദഗ്ധസംഘം പ്രദേശങ്ങളിൽ സന്ദർശനം നടത്തും. റെയിൽവേ ലൈനിനോടു ചേർന്ന് താമസിക്കുന്ന കുടുംബങ്ങളുടെ ആശങ്ക പരിഹരിച്ച് പദ്ധതി നടപ്പാക്കാനാണ് അധികൃതരുടെ തീരുമാനം. റെയിൽവേ ലൈനിന് അപ്പുറമുള്ള കുടുംബങ്ങളുടെ വഴി അടയുമെന്ന ആശങ്കയ്ക്കിടെ ഡിവിഷനൽ റെയിൽവേ മാനേജർ ഉൾപ്പെടെയുള്ള ഉദ്യോഗസ്ഥരുമായി കഴിഞ്ഞ ദിവസം ആക്‌ഷൻ കൗൺസിൽ ഭാരവാഹികൾ കൂടിക്കാഴ്ച നടത്തിയിരുന്നു. ആശങ്ക വേണ്ടെന്നും റെയിൽവേയുടെ എൻജിനീയർമാർ സ്ഥലത്തു പരിശോധന നടത്തി ഉചിതമായ തീരുമാനമെടുക്കുമെന്നുമെന്നും അധികൃതർ ഉറപ്പുനൽകിയിരുന്നു. ഇതിന്‍റെ തുടർച്ചയായാണ് റെയിൽവേയുടെ ഇടപെടൽ. നിലവിലെ പ്ലാൻ അനുസരിച്ചു റെയിൽവേയുടെ സുരക്ഷാ വേലി നിർമിക്കപ്പെട്ടാൽ മറുവശത്തേക്കുള്ള കാൽനടയാത്ര പോലും പ്രതിസന്ധിയിലാകുന്ന സാഹചര്യമാണ്. നിലവിൽ റോഡ് അവസാനിക്കുന്ന ഭാഗത്തു നിന്നു കാൽനടക്കാർ ട്രാക്ക് കുറുകെകടന്നും വാഹനങ്ങൾ റെയിൽവേയുടെ കലുങ്കുകക്ക് അടിയിലൂടെയുമാണു മറുഭാഗത്ത് എത്തുന്നത്.

അപകടക്കുരുക്കഴിക്കൽ ഒന്നാംഘട്ടം തുടങ്ങി

ഷൊർണൂർ: വാടാംനാംകുർശിയിൽ റെയിൽവേ മേൽപ്പാലം നിർമാണം നടക്കുന്നിടത്തെ റോഡ് തകർച്ചയും വാഹനക്കുരുക്കും അപകടങ്ങളും ഒഴിവാക്കാൻ നടപടി. റെയിൽവേ ബ്രിഡ്ജസ് അധികൃതരുടെ ഉറപ്പുലംഘിക്കപ്പെട്ടാൽ സമരരംഗത്തിറങ്ങാൻ തയാറായി രാഷ്ട്രീയ പാർട്ടികൾ തീരുമാനമെടുത്തിരുന്നു. സന്ദർശനം നടത്തിയ ആർബിഡിസികെ ഉന്നത ഉദ്യോഗസ്ഥസംഘം ഇഴഞ്ഞുനീങ്ങുന്ന മേൽപാല നിർമാണം വേഗത്തിലാക്കാനും യാത്രക്കാരുടെ പ്രശ്നപരിഹാരത്തിനു നടപടിയെടുക്കാനും കഴിഞ്ഞ ദിവസം തീരുമാനിച്ചിരുന്നു. പാലംപണികാരണം വാടാനാംകുർശി ഗേറ്റ് പരിസരത്ത് അപകടങ്ങൾ പതിവാകുന്നുവെന്ന പരാതിയെ തുടർന്നാണ് ഉദ്യോഗസ്ഥസംഘവും പണി കരാറെടുത്ത കമ്പനിയുടെ പ്രതിനിധികളും സ്ഥലം സന്ദർശിച്ചത്. വാഹനഗതാഗതം സുഗമമാക്കുന്നതിനായി മണ്ണുമാന്തിയന്ത്ര സഹായത്തോടെ സർവീസ് റോഡിന്‍റെ വശങ്ങളിൽ അഴുക്കുചാൽ നിർമിച്ച് റോഡിലെ വെള്ളക്കെട്ട് ഒഴിവാക്കാനും ധാരണയായി. പണി നടക്കുന്നിടത്ത് പാലം കഴിയുന്നതുവരെ യാത്ര സുഗമമാക്കാൻ റോഡിൽ കട്ടവിരിക്കുവാനും ധാരണയായിട്ടുണ്ട്. ആവശ്യമെങ്കിൽ ഒരു ദിവസം റോഡിൽ പൂർണമായും ഗതാഗതം നിരോധിച്ച് പണി നടത്തുമെന്നും സ്ഥലം സന്ദർശിച്ച് ഉദ്യോഗസ്ഥ സംഘം അറിയിച്ചു. പ്രദേശത്ത് നിർമാണ പ്രവൃത്തികൾ ആരംഭിച്ചിട്ടുണ്ട്.

ഉള്ളിലൊന്നുമില്ലാത്ത "നവീകരണം'

മംഗലംഡാം: മംഗലംഡാം ഉദ്യാന കവാടത്തിലെ സൂചനാ ബോർഡ് കണ്ടാൽ ഇവിടെ എന്തൊക്കെയോ ഉണ്ടെന്ന പ്രതീതി ജനിപ്പിക്കും. കുട്ടികളുടെ പാർക്ക്, കളിസ്ഥലം, സാഹസിക കളിഉപകരണങ്ങൾ, റോപ്പ് വേ, ബാലൻസിംഗ് ബ്രിഡ്ജ്, ടീ സ്റ്റാൾ, വ്യൂ പോയിന്‍റ് തുടങ്ങി വലിയ ഉദ്യാനങ്ങളിൽ സ്ഥാപിക്കുന്ന ബോർഡുകളാണ് മംഗലംഡാം ഉദ്യാനത്തിലേക്കുള്ള പ്രവേശന കവാടത്തിലും സ്ഥാപിച്ചിട്ടുള്ളത്. എന്നാൽ പ്രവേശനഫീസ് കൊടുത്ത് അകത്തുകടന്നാൽ പിന്നെ വിനോദ സഞ്ചാരികൾ എങ്ങനെ പ്രതികരിക്കും എന്നുപറയാനാകില്ല. കാരണം ഉള്ളിലെത്തിയാൽ ഒന്നും കാണാനില്ല. ഇപ്പോൾ ഡാമിന്‍റെ ഷട്ടറുകൾ തുറന്നിട്ടുള്ളതിനാൽ അതെങ്കിലും കണ്ടുമടങ്ങാം എന്നുമാത്രം. യാതൊരു പ്രതികരണശേഷിയുമില്ലാത്തവർപോലും അടക്കംപറഞ്ഞുപോകും ഇവിടെയെത്തിയാൽ. നാലുവർഷംമുമ്പ് അഞ്ചുലക്ഷം രൂപ ചെലവഴിച്ച് നവീകരിച്ച ഉദ്യാനത്തിലെ പല കളിഉപകരണങ്ങളും ഇപ്പോൾ വള്ളിപ്പടർപ്പുകൾ കയറി കാടുമൂടി. സാഹസിക ഉദ്യാനം പ്രവർത്തനരഹിതമാണ്. കളി ഉപകരണങ്ങളിൽ കയറരുത്, അപകടകരമാണ്. സാഹസിക ഉദ്യാനത്തിലെ പലയിടത്തും എഴുതി വച്ചിട്ടുള്ള വാക്കുകളാണിത്. വലിയ മരങ്ങളെ തമ്മിൽ ബന്ധിപ്പിച്ചായിരുന്നു സാഹസിക ഉദ്യാനത്തിലെ ഉപകരണങ്ങൾ സ്ഥാപിച്ചിരുന്നത്. മരം വണ്ണംകൂടിയപ്പോൾ ഫിറ്റ് ചെയ്തതെല്ലാം തകർന്നു. യഥാസമയം അറ്റകുറ്റപ്പണികൾ ഇല്ലാതെ ആകാശമേലാപ്പിലുള്ള സാഹസിക നടപ്പാതകളും നശിച്ചു. ചുരുക്കത്തിൽ ഇവിടെ ഇപ്പോൾ ഒന്നുമില്ല. കാടുമൂടിയ പൊന്തക്കാടുകളിൽ മാതാപിതാക്കളുടെ കണ്ണുവെട്ടിച്ചെത്തുന്ന കമിതാക്കളെയും കാണാം. പ്രവേശനകവാടത്തിൽ ടിക്കറ്റ് കൗണ്ടർ മാത്രമാണ് ഇപ്പോൾ ശരിയായി പ്രവർത്തിക്കുന്നത്. തുടക്കം മുതൽതന്നെ അധികൃതരുടെ ഒളിച്ചുകളി ഇവിടെ വ്യക്തമായിരുന്നു. 2020 ഒക്ടോബർ 22നാണ് ഉദ്യാന നവീകരണം പൂർത്തീകരിച്ചതിന്‍റെ ഉദ്ഘാടനം ഓൺലൈനിലൂടെ മുഖ്യമന്ത്രി നിർവഹിച്ചത്. മന്ത്രിയും എംഎൽഎയും പങ്കെടുത്ത ഉദ്ഘാടനയോഗംപോലും നടന്നത് മറ്റൊരിടത്ത്. ഉദ്ഘാടനദിവസംപോലും ഒന്നും തുറന്നില്ല. എല്ലാം മൂടിവച്ചു. പണിപൂർത്തീകരിക്കനുണ്ടെന്നു പറഞ്ഞ് പിന്നെയും കുറെക്കാലം എല്ലാം പൂട്ടിയിട്ടു. പിന്നീട് ഒന്നരവർഷം കഴിഞ്ഞാണ് സാഹസിക ഉദ്യാനം ഉൾപ്പെടെയുള്ളവ തുറന്നത്. ഏതാനുംമാസം മാത്രം പ്രവർത്തിച്ച ഉദ്യാന ഉപകരണങ്ങൾ എല്ലാം ഉപയോഗശൂന്യമായി, ചെലവഴിച്ച ലക്ഷങ്ങൾ പാഴായി. രാഷ്ട്രീയപാർട്ടികളോ സംഘടനകളോ ആരും മിണ്ടിയില്ല. അതിനുമുമ്പും നാലര കോടി രൂപയുടെ വികസനം വിനോദസഞ്ചാര കേന്ദ്രത്തിൽ നടത്തിയിരുന്നു. അതിനും ദീർഘായുസുണ്ടായില്ല.

സ്മാർട്ട് ഇന്ത്യ; സ്മാർട്ട് അശ്വതി

ആലത്തൂർ: ജില്ലയ്ക്കു അഭിമാനനേട്ടമായി ബി. അശ്വതിയുടെ സ്മാർട്ട് ഇന്ത്യ ലേഖനം. ടാറ്റ ബിൽഡേർസ് ഇന്ത്യ 2023 - 2024ൽ സംഘടിപ്പിച്ച ഉപന്യാസമത്സരത്തിൽ ഫസ്റ്റ് റണ്ണർഅപ് ആയിരുന്നു അശ്വതി. കുനിശേരി കണ്ണമ്പുള്ളി ജിയുപി സ്കൂളിനെ പ്രതിനിധീകരിച്ച അശ്വതി ഇക്കഴിഞ്ഞ16ന് രാഷ്ടപതിഭവനിൽ നടന്ന രാഷ്ട്രപതി ദ്രൗപതി മുർമുവിൽനിന്ന് അവാർഡും ഏറ്റുവാങ്ങി. പ്ലാസ്റ്റിക്മാലിന്യം കുറയ്ക്കാനുള്ള അഞ്ച് മാർഗങ്ങളെക്കുറിച്ചായിരുന്നു ഉപന്യാസം. മലയാള ഭാഷയിൽ ഉപന്യാസമെഴുതിയാണ് സമ്മാനനേട്ടം. കുനിശ്ശേരി പനയംപാറ സ്വദേശി ബിജുവിന്‍റെയും സന്ധ്യയുടെയും മകളായ അശ്വതി ഇപ്പോൾ വടക്കഞ്ചേരി ചെറുപുഷ്പം ഗേൾസ് ഹൈസ്കൂളിലെ എട്ടാംക്ലാസ് വിദ്യാർഥിനിയാണ്.

കൂടുതൽ മൊഞ്ചത്തിയാകാൻ താമരക്കുളം

ഒറ്റപ്പാലം: താമരക്കുളത്തിനു പുതുമോടി, പത്തുലക്ഷംരൂപ ചെലവിൽ നവീകരണം വരും. സായാഹ്നങ്ങൾ ചെലവഴിക്കാനുള്ള ഇടമായി കുളം പരിസരത്തെ മാറ്റും. പത്തൊമ്പതാം മൈലിലെ താമരക്കുളത്തെയാണ് പുതുമോടി‍യിലാക്കാൻ നഗരസഭയുടെ പദ്ധതി വരുന്നത്. ഇതിനുവേണ്ടി അമൃത് പദ്ധതിയിൽ പത്തുലക്ഷംരൂപ അനുവദിച്ചതായി നഗരസഭാ ചെയർപേഴ്സൺ കെ. ജാനകിദേവി അറിയിച്ചു. കുളത്തിനു നാലുവശവും പൂന്തോട്ടമൊരുക്കി ഇരിപ്പിടങ്ങൾ സജ്ജീകരിച്ച് വെളിച്ച സംവിധാനങ്ങൾ ഒരുക്കാനാണ് പദ്ധതി. കുട്ടികൾക്കു കളിക്കാനുള്ള ഉപകരണങ്ങൾ സ്ഥാപിക്കാൻ പറ്റുമോ എന്നതും ആലോചിക്കും. കുടുംബശ്രീയുടെ കഫ്റ്റീരിയ തുടങ്ങുന്നതും പരിഗണനയിലുണ്ട്. ഒറ്റപ്പാലത്ത് സായാഹ്നങ്ങൾ ചെലവഴിക്കാൻ പാർക്ക് പോലുള്ള സംവിധാനങ്ങൾ ഇല്ലാത്തതിനാൽ ഭാരതപ്പുഴയെയും മായന്നൂർ പാലത്തെയുമാണ് ജനങ്ങൾ ആശ്രയിക്കുന്നത്. താമരക്കുളത്തിലും ധാരാളം പേർ എത്താറുണ്ട്. ഇതിനു പുറമേ അഗ്നിരക്ഷാസേന യൂണിറ്റ് തുടങ്ങുന്നതിന്നും ആലോചനയുണ്ട്. താലൂക്കാസ്ഥാനമായ ഒറ്റപ്പാലത്ത് അഗ്നിരക്ഷാസേന യൂണിറ്റ് നിലവിൽ ഇല്ലാത്ത അവസ്ഥയാണ്. ഇത് താമരക്കുളത്തിന് സമീപം തുടങ്ങാനുള്ള സാധ്യതയാണ് പരിശോധിക്കുന്നത്. വേനലിൽപോലും കുളത്തിൽ ആവശ്യത്തിന് വെള്ളമുണ്ടാകുമെന്നതും പാലക്കാട്-കുളപ്പുള്ളി പാതയ്ക്ക് അരികിലാണെന്നതും അനുകൂലഘടകമാണ്.

മീറ്റ്ന തടയണ ഷട്ടർ ഉയർത്തൽ; മഴ മാറിനിന്നാൽ വല്ലതും നടക്കും...

ഒറ്റപ്പാലം: മഴ മാറിക്കഴിഞ്ഞാൽ മാത്രമേ ഭാരതപ്പുഴയിലെ മീറ്റ്‌ന തടയണയിലെ ഷട്ടറുകൾ ഉയർത്താൻ സാധിക്കുകയുള്ളുവെന്നു ജല അഥോറിറ്റി. അഗ്നിരക്ഷാസേനയെ എത്തിച്ച് ഷട്ടറുകൾ ഉയർത്താനുള്ളശ്രമവും പരാജയപ്പെട്ട സാഹചര്യത്തിലാണ് ഈ തീരുമാനം. വെള്ളത്തിന്‍റെ അളവുകുറഞ്ഞ സമയത്താണു ശ്രമം നടത്തിയത്. ഇതിനിടെ മഴ ശക്തമായതോടെ വീണ്ടും പ്രതിസന്ധിയിലായി. ഇനിയും മഴ ശക്തമായാൽ വെള്ളം ഇരുകരകളിലേക്കും കയറുമെന്നതാണാശങ്ക. പൂർണസംഭരണശേഷിയിലാണിപ്പോൾ വെള്ളമുള്ളത്. ആകെ 26 ഷട്ടറുകളാണ് തടയണയ്ക്കുള്ളത്. വെള്ളത്തിന്‍റെ സമ്മർദ്ദംവന്നാൽ ഉരുക്കുനിർമിത ഷട്ടറുകൾ തുറക്കാൻ ബുദ്ധിമുട്ടാണ്. വേനൽ ലക്ഷ്യമിട്ട് വെള്ളംസംഭരിക്കാൻ നവംബറിൽ ഷട്ടർ അടയ്ക്കുകയും മേയ്മാസം അവസാനത്തോടെ തുറക്കുകയുമാണ് പതിവ്. എന്നാൽ ഇത്തവണ മേയ് അവസാനത്തോടെതന്നെ മഴ ശക്തമായതോടെ പ്രതിസന്ധി ഉടലെടുത്തു. വെള്ളം ഒഴുകിപ്പോകാതായതോടെ തടയണ നിറഞ്ഞു. വെള്ളംകയറൽ ഭീഷണിയും തുടങ്ങി. ഇതു പരിഹരിക്കാനാണ് അഗ്നിരക്ഷാസേനയെ സമീപിച്ചത്. എന്നാൽ, അവർക്കും ഷട്ടറുയർത്താൻ സാധിച്ചില്ല.

പകർച്ചവ്യാധി പ്രതിരോധ പ്രവർത്തനങ്ങൾ ഊർജിതമാക്കി ഷോളയൂർ ഗ്രാമപഞ്ചായത്ത്

അഗളി: പകർച്ചവ്യാധി പ്രതിരോധ പ്രവർത്തനങ്ങൾ ഊർജിതമാക്കി ഷോളയൂർ ഗ്രാമപഞ്ചായത്ത്. കൊതുകുജന്യ രോഗങ്ങൾ തടയാനായി ആഴ്ചയിൽ ഒരിക്കൽ ഡ്രൈഡേയായി ആചരിക്കണമെന്ന് ഗ്രാമപഞ്ചായത്ത് പ്രസിഡന്‍റ് പി. രാമമൂർത്തി പറഞ്ഞു. ഗ്രാമപഞ്ചായത്തിന്‍റെ പ്രാദേശിക പൊതുജനാരോഗ്യസമിതി യോഗം ഉദ്ഘാടനം ചെയ്യുകയായിരുന്നു പ്രസിഡന്‍റ്. ഈ വർഷം പകർച്ചവ്യാധി രോഗങ്ങൾ മൂലമുള്ള മരണം കുറയ്ക്കുകയാണ് ലക്ഷ്യമെന്നും പ്രസിഡന്‍റ് കൂട്ടിചേർത്തു. ആദ്യഘട്ടത്തിൽ മഴക്കാല പ്രവർത്തനങ്ങളുടെ ഭാഗമായി ബോധവത്കരണം, പകർച്ചവ്യാധി റിപ്പോർട്ട് ചെയ്യാൻ സാധ്യതയുള്ള പ്രദേശങ്ങളിൽ ഹോട്ട്സ്പോട്ടായി പരിഗണിച്ച് ഉറവിട നശീകരണം തുടങ്ങിയവ നടത്തി. അടുത്ത ഘട്ടത്തിൽ തൊഴിലുറപ്പ് തൊഴിലാളികൾക്കും, മലിനജലവുമായി സന്പർക്കമുള്ളവർക്കും എലിപ്പനി പ്രതിരോധ ഗുളിക വിതരണം നടത്തുമെന്നു മെഡിക്കൽ ഓഫീസർ ഡോ. സഞ്ജീവ് കുമാർ യോഗത്തിൽ അറിയിച്ചു. കഴിഞ്ഞ മൂന്ന് മാസത്തെ പ്രവർത്തനങ്ങളും മഴക്കാല മുന്നൊരുക്ക പ്രവർത്തനങ്ങളെക്കുറിച്ചും ഹെൽത്ത് ഇൻസ്പെക്ടർ എസ്.എസ് കാളിസ്വാമി വിശദീകരിച്ചു. ഷോളയൂർ ഗ്രാമപഞ്ചായത്തിൽ നടന്ന പരിപാടിയിൽ വൈസ് പ്രസിഡന്‍റ് എസ്. രാധ, ആരോഗ്യവിദ്യാഭ്യസ സ്റ്റാൻഡിംഗ് കമ്മിറ്റി ചെയർമാൻ എം.ആർ. ജിതേഷ്, ഹോമിയോ ഡിസ്പെൻസറി മെഡിക്കൽ ഓഫീസർ ഡോ. വിനീത, ആയുർവേദ മെഡിക്കൽ ഓഫിസർ ഡോ. ശ്രീരാഗ്, കൃഷി ഓഫീസർ പി.വിഷ്ണു എന്നിവർ പങ്കെടുത്തു.

കല്ലടിക്കോട്‌ സർവീസ്‌ സഹകരണബാങ്ക്‌ വിവിധ പരീക്ഷാ വിജയികളെ ആദരിച്ചു

കല്ലടിക്കോട്‌: കല്ലടിക്കോട്‌ സർവീസ്‌ സഹകരണ ബാങ്കിന്‍റെ നേതൃത്വത്തിൽ വിവിധ മേഖലകളിൽ ഉന്നതവിജയം നേടിയവരെയും മുഴുവൻ വിഷയത്തിലും എപ്ലസ്‌ കിട്ടിയ കുട്ടികളെയും ആദരിച്ചു. ആദരം- 2025 എൻ. ഷംസുദ്ദീൻ എംഎൽഎ ഉദ്ഘാടനം ചെയ്തു. ബാങ്ക്‌ പ്രസിഡന്‍റ് മുഹമ്മദുപ്പ കരിമ്പനയ്ക്കൽ അധ്യക്ഷത വഹിച്ചു. കരിമ്പ ഗ്രാമ പഞ്ചായത്ത്‌ പ്രസിഡന്‍റ് പി.എസ്‌. രാമചന്ദ്രൻ മുഖ്യപ്രഭാഷണം നടത്തി. ബാങ്ക്‌ വൈസ്‌ പ്രസിഡന്‍റ് ഡോ. മാത്യു കല്ലടിക്കോട്‌, ആന്‍റണി മതിപ്പുറം, പി.കെ. അബ്ദുള്ളക്കുട്ടി, വി.കെ. ഷൈജു, എം.എസ്‌. നാസർ, എം.കെ. മുഹമ്മദ്‌ ഇബ്രാഹീം, കെ.കെ. ചന്ദ്രൻ, പി.കെ. മുഹമ്മദ്‌ മുസ്തഫ, സി.എം. നൗഷാദ്‌, യൂസഫ്‌ പാലയ്ക്കൽ, സി.സി. ഉസ്മാൻ, മുഹമ്മദ്‌ ഹരീസ്‌, സെക്രട്ടറി ബിനോയ്‌ ജോസഫ്‌ എന്നിവർ പ്രസംഗിച്ചു.

തേങ്കുറിശിയില്‌ ഓണക്കനി നിറപ്പൊലിമ നടീൽഉത്സവം

കുഴൽമന്ദം: തേങ്കുറിശ്ശി ഗ്രാമപഞ്ചായത്ത്, കുടുംബശ്രീ സിഡിഎസ് എന്നിവയുടെ നേതൃത്വത്തിൽ സമുന്നതി പദ്ധതിയുടെ ഭാഗമായി നടീൽ ഉത്സവം നടത്തി. തേങ്കുറിശ്ശി ഗ്രാമപഞ്ചായത്ത് പ്രസിഡന്‍റ് ആർ. ഭാർഗവൻ പരിപാടി ഉദ്ഘാടനം ചെയ്തു. നടീൽ ഉത്സവത്തിന്‍റെ ഭാഗമായി കൂർക്ക തൈകളാണ് നട്ടത്. പരിപാടിയിൽ ബ്ലോക്ക് കോ- ഓർഡിനേറ്റർ എസ്. രേഖ, തേങ്കുറിശ്ശി പഞ്ചായത്ത് വൈസ് പ്രസിഡന്‍റ് സ്വർണമണി, സ്റ്റാൻഡിംഗ് കമ്മിറ്റി ചെയർമാൻമാരായ ആർ.സജിനി, എം.എസ് സജിഷ, വാർഡ് മെംബർ വി.ഡി. ശോഭന കുമാരി, സിഡിഎസ് ചെയർപേഴ്സണ്‍ എം. ഉഷ, അഗ്രികൾച്ചറൽ കമ്യൂണിറ്റി റിസോഴ്സ് പേഴ്സണ്‍ പി റഷീദ, എന്നിവർ പങ്കെടുത്തു.

നെൽകൃഷി നശിച്ച കർഷകർക്കു സൗജന്യ വിത്തുവിതരണം

കൊല്ലങ്കോട്: ഗ്രാമപഞ്ചായത്തിലെ ഒന്നാംവിളയിൽ കാലവർഷക്കെടുതിയിൽ കൃഷിനാശം സംഭവിച്ച കർഷകർക്ക് സൗജന്യമായി നെൽവിത്ത് വിതരണം ചെയ്തു. കൊല്ലങ്കോട് കൃഷിഭവൻ പരിധിയിലെ 16 പാടശേഖര സമിതികൾക്കാണ് നെൽവിത്ത് വിതരണം ചെയ്തത്. കാലംതെറ്റിപെയ്ത മഴയിൽ 350 ഏക്കർ സ്ഥലത്തെ പൊടിവിതയും ഞാറ്റടിയുമാണ് നശിച്ചത്. സർക്കാരിന്‍റെ പ്രകൃതിക്ഷോഭ ദുരിതാശ്വാസ നിധിയിൽ നിന്നുള്ള തുകയിൽ നിന്നാണ് 20,000 കിലോ നെൽവിത്ത് നൽകിയത്. വിത്തിന്‍റെ വിതരണോദ്ഘാടനം കൊല്ലങ്കോട് ഗ്രാമപഞ്ചായത്ത് പ്രസിഡന്‍റ് കെ. സത്യപാൽ നിർവഹിച്ചു. ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ ആർ. ശിവൻ, കൃഷി ഓഫീസർ ബി. ജ്യോതി, അസിസ്റ്റന്‍റ് കൃഷി ഓഫീസർ ആർ. പ്രസാദ്, കൃഷി അസിസ്റ്റന്‍റ് കെ. വിനിത, ഫീൽഡ് അസിസ്റ്റന്‍റ് കെ. ശ്രീജിത്ത് സംയുക്ത പാടശേഖരസമിതി പ്രതിനിധി കെ. സഹദേവൻ, പാടശേഖര പ്രതിനിധികളായ മാതക്കോട് ജയപ്രകാശ്, മണലിപ്പാടം ലിജു, ആറുവന്നുർപറന്പ് സേതു, നെൻമേനി കൃഷ്ണ കുമാർ, വേലംപൊറ്റ ശിവദാസ്, മറ്റു കർഷകർ തുടങ്ങിയവർ പങ്കെടുത്തു.

കോയമ്പത്തൂർ ശെമ്മൊഴി പാർക്ക് ആദ്യഘട്ടം നിർമാണം പുരോഗമിക്കുന്നു

കോയമ്പത്തൂർ: ഗാന്ധിപുരം സെൻട്രൽ ജയിൽ ഗ്രൗണ്ടിൽ ഒരുക്കുന്ന ശെമ്മൊഴി ഗാർഡൻ പദ്ധതി ആദ്യഘട്ടം നിർമാണം അവസാനഘട്ടത്തിൽ. പദ്ധതിയുടെ ഭാഗമായി നട്ടുപിടിപ്പിച്ച പൂച്ചെടികളുടെ മനോഹാരിതയിൽ വിളങ്ങുകയാണ് പാർക്കിപ്പോൾ. വെറും നിലമായിരുന്ന ഈ പ്രദേശം ഇപ്പോൾ പച്ചപ്പിലേക്കു മാറിത്തുടങ്ങിയിരിക്കുന്നു. ശെമ്മൊഴി ഗാർഡൻ പദ്ധതി രണ്ട് ഘട്ടങ്ങളിലായാണ് നടപ്പിലാക്കുന്നത്. ഇതിൽ ആദ്യഘട്ടം 45 ഏക്കറിലും രണ്ടാംഘട്ടം120 ഏക്കറിലുമാണ് നടപ്പാക്കുന്നത്. ആദ്യഘട്ടത്തിലെ 45 ഏക്കറിൽ 25 ഏക്കറും പൂന്തോട്ടമായാണ് നവീകരിക്കുക. രണ്ടരലക്ഷത്തോളം തൈകളും നടാൻ പദ്ധതിയുണ്ട്. ലോകോത്തര നിലവാരമുള്ള മൾട്ടി പർപ്പസ് കോൺഫറൻസ് സെന്‍റർ, ഓപ്പൺഎയർ ഓഡിറ്റോറിയം, 300 കാറുകൾക്കുള്ള പാർക്കിംഗ് സൗകര്യം, കൃത്രിമ ജലധാര എന്നിവയും ലക്ഷ്യമിടുന്നു.

ജാതി സെൻസസ് സാമൂഹ്യനീതി ലക്ഷ്യമാക്കി നടത്തണം: മൺപാത്ര നിർമാണ സമുദായസഭ

വടക്കഞ്ചേരി: ജാതി സെൻസസെടുക്കുമ്പോൾ അർഹതപ്പെട്ടവർക്ക് എല്ലാ മേഖലയിലും പ്രാതിനിധ്യവും അവസര സമത്വവും ഉറപ്പുവരുത്തുവാനും ഏറെ പിന്നോക്കം നിൽക്കുന്ന വിഭാഗങ്ങളെ കണ്ടെത്തി അവർക്ക് സാമൂഹ്യനീതി ലക്ഷ്യം വയ്ക്കുന്നതുമാകണമെന്നു കേരള മൺപാത്രനിർമാണ സമുദായ സഭ (കെഎംഎസ്എസ്) സംസ്ഥാന കമ്മിറ്റി യോഗം ആവശ്യപ്പെട്ടു. രാജ്യത്ത് പിന്നോക്ക- മുന്നാക്ക വിഭാഗ വ്യത്യാസമില്ലാതെ ജാതിസംവരണം നടപ്പിലാക്കിയിട്ട് അതുഅനുഭവിക്കുന്ന ചിലർ ജാതിസെൻസസിനെ എതിർക്കുന്ന നിലപാട് പരിഹാസ്യവും ദുരുദ്ദേശപരവുമാണെന്നും യോഗം കുറ്റപ്പെടുത്തി. നിലവിലുള്ള സംവരണത്തിൽ ഭരണഘടനാപ്രകാരം ജനസംഖ്യാനുപാതികമായി സാമൂഹ്യനീതി പാലിക്കപ്പെടുന്നില്ലെന്നും അതിനാൽ ജാതി സെൻസസ് നടത്തി പരിഹരിക്കണമെന്നും ഇക്കാര്യത്തിൽ എല്ലാ രാഷ്ട്രീയപാർട്ടികളും നിലപാട് വ്യക്തമാക്കണമെന്നും യോഗം ആവശ്യപ്പെട്ടു. സംസ്ഥാന വൈസ് പ്രസിഡന്‍റ് കെ. ഭാസ്കരൻ അധ്യക്ഷത വഹിച്ചു. ജനറൽ സെക്രട്ടറി രാജേഷ് പാലങ്ങാട്ട്, ട്രഷറർ സി.കെ. ചന്ദ്രൻ, ഓർഗനൈസിംഗ് സെക്രട്ടറി എം.കെ. ചന്ദ്രൻ, വൈസ് പ്രസിഡന്‍റുമാരായ പി.ടി. രാജൻ, എ.ജി. ഉണ്ണികൃഷ്ണൻ, പി.വി. വിജയൻ, എസ്. സനൽകുമാർ, പി.കെ. ജനാർദ്ദനൻ, ശിവദാസൻ ഇരിങ്ങത്ത്, വി. വിജയകുമാർ, ടി.എ. വിജയൻ, കെ.കെ. പ്രതാപൻ, സജിത്ത്തമ്പി, സനീഷ് ഗോപി, ലതിക രവീന്ദ്രൻ, ഓമനക്കുട്ടപ്പൻ പ്രസംഗിച്ചു.

ഡെങ്കിപ്പനി വ്യാപകം: ജാഗ്രത പാലിക്കണമെന്നു ആരോഗ്യവകുപ്പ്

പാലക്കാട്: ജില്ലയിൽ ഡെങ്കിപ്പനി വ്യാപകമായി റിപ്പോർട്ട് ചെയ്യപ്പെടുന്ന സാഹചര്യത്തിൽ പൊതുജനങ്ങൾ കൂടുതൽ ജാഗ്രത പാലിക്കണമെന്നു ജില്ലാ മെഡിക്കൽ ഓഫീസർ മുന്നറിയിപ്പു നൽകി. കൊതുകുവഴിയാണ് രോഗം പടരുന്നത് എന്നതിനാൽ വീടിനകത്തും പുറത്തും പരിസരവും ശുചിത്വം പാലിച്ച്, കൊതുകു വളരാനുള്ള ഇല്ലാതാക്കണമെന്നാണ് ആരോഗ്യവകുപ്പ് മുന്നറിയിപ്പ്. കഠിനമായ പനി, കണ്ണിന് പിന്നിലെ വേദന, വെളിച്ചത്തിൽ നോക്കാൻ പ്രയാസം, ചർമത്തിൽ ചുവന്ന പാടുകൾ തുടങ്ങിയ ലക്ഷണങ്ങളോടെയാണ് ഡെങ്കിപ്പനി തുടങ്ങുന്നത്. ചിലപ്പോൾ തീവ്രമായ വയറുവേദന, മൂക്കിൽ നിന്നും വായിൽ നിന്നുമുള്ള രക്തസ്രാവം, കറുത്ത മലം, ശ്വാസ തടസം, കൈകൾ തണുത്ത് മരവിക്കുക തുടങ്ങിയ ഗുരുതര ലക്ഷണങ്ങളിലേക്ക് രോഗം കടന്നേക്കാം. ഈഡിസ് വിഭാഗത്തിൽപ്പെട്ട കൊതുകുകൾ പകൽ സമയങ്ങളിൽ കടിക്കുന്നതിലൂടെയാണ് ഡെങ്കിപ്പനി പരത്തുന്നത്. ഇവ ശുദ്ധജലത്തിൽ മുട്ടയിട്ട് വീടിനകത്തും പുറത്തും വളരും. ജാഗ്രതയും കൃത്യമായ ശുചിത്വ നിയന്ത്രണ നടപടികളും പാലിച്ചാൽ ഡെങ്കിപ്പനിയുടെ വ്യാപനം നിയന്ത്രിക്കാൻ സാധിക്കുമെന്നും ആരോഗ്യ വകുപ്പ് നിർദ്ദേശിച്ചു.

അപകടം തുടർക്കഥ: വാടാനംകുർശിയിൽ റോഡ് നവീകരിക്കണമെന്നു ജനകീയാവശ്യം

ഷൊർണൂർ: രാഷ്ട്രീയ പാർട്ടികൾ അനങ്ങുന്നില്ല, വാടാനംകുർശിയിൽ അപകടങ്ങൾ നിത്യസംഭവമായ ഭാഗത്ത് അടിയന്തിരമായി റോഡുനവീകരണം നടത്തണമെന്നു വ്യാപകമായി ജനകീയാവശ്യം. കുളപ്പുള്ളി- പട്ടാമ്പി പ്രധാന പാതയിൽ ഉൾപ്പെടുന്ന മേഖലയിൽ അപകടങ്ങൾ നിത്യസംഭവമായ സാഹചര്യത്തിലാണ് ജനകീയ പ്രതിഷേധം കനത്തത്. പാതയിൽ വർഷങ്ങളേറെയായി വാടാനാംകുർശി വഴി പോകുന്ന യാത്രക്കാരുടെ ദുരിതം തുടങ്ങിയിട്ട്. ഈ കാലവർഷത്തിലും യാത്രക്കാർക്ക് സുരക്ഷയായിട്ടില്ല. മേൽപ്പാലം നിർമാണം ആരംഭിച്ചെങ്കിലും ഇതുവരെ പൂർത്തിയാക്കാത്തതിനാൽ ഇതുവഴി അപകടയാത്ര തുടരുകയാണ്. ഇവിടെയുള്ള കുഴികളിൽപ്പെട്ട് കഴിഞ്ഞ ദിവസമാണ് ചരക്കുലോറി മറിഞ്ഞത്. റോഡിലെ കുഴികളും വെള്ളക്കെട്ടുമാണ് അപകടത്തിനിടയാക്കുന്നത്. റെയിൽവേ ലൈനിന് മുകളിലെ ഗർഡറുകൾ സ്ഥാപിക്കുന്ന പ്രവൃത്തികൾ നേരത്തെ തുടങ്ങിയിരുന്നു. ഇനി അനുബന്ധ റോഡുകളുടെ നിർമാണമാണ് നടക്കാനുള്ളത്. മേൽപ്പാലത്തിന്‍റെ തുടക്കത്തിലും അവസാനത്തിലും ഇനിയും പ്രവൃത്തികൾ ഏറെയാണ്. മഴ പെയ്തുതുടങ്ങിയതോടെ ഇവിടെ വെള്ളക്കെട്ടും റോഡുതകർച്ചയും രൂക്ഷമാണ്. റെയിൽവേ മേൽപ്പാലത്തിന്‍റെ ട്രാക്കിനു മുകളിൽ വരുന്ന ഭാഗത്തെ നിർമാണം വൈകിയത് പദ്ധതിയെ മന്ദഗതിയിലായിക്കിയിരുന്നു. ഈ ഭാഗത്തെ നിർമാണ പ്രവർത്തനങ്ങൾ റെയിൽവേ നേരിട്ടാണ് നിർവഹിക്കുന്നത്. ഇതിന്‍റെ കരാർ നടപടികളടക്കം വൈകി. റോഡ്‌സ് ആൻഡ് ബ്രിഡ്ജസ് കോർപറേഷനാണ് മറ്റുഭാഗത്തെ പ്രവൃത്തികൾ നടത്തുന്നത്. നിർമാണോദ്ഘാടന സമയത്ത്, ഒരുവർഷത്തിനകം മേൽപ്പാലം പൂർത്തീകരിച്ച് തുറന്നുകൊടുക്കുമെന്നായിരുന്നു പ്രഖ്യാപനം. എന്നാൽ നാലുവർഷം കഴിഞ്ഞിട്ടും പാലംനിർമാണം പൂർത്തിയായിട്ടില്ല. 2021 ജനുവരിയിലാണ് വാടാനാംകുർശി മേൽപ്പാലത്തിന്‍റെ നിർമാണോദ്ഘാടനം മുഖ്യമന്ത്രി പിണറായി വിജയൻ ഓൺലൈൻ വഴി നടത്തിയത്. കോവിഡ് പ്രതിസന്ധിയടക്കം തടസമായി മാറി. പിന്നീട് റെയിൽവേ അനുമതി ലഭിക്കുന്നതിലുള്ള താമസവും പ്രശ്‌നമായി. പാലക്കാട്- പൊന്നാനി പാതയിൽ വാഹനഗതാഗതത്തിന് തടസ്സമായാണ് വാടാനാംകുർശി റെയിൽവേ ഗേറ്റുള്ളത്. ഗേറ്റടവുള്ളപ്പോൾ ആംബുലൻസ് അടക്കമുള്ള വാഹനങ്ങൾ കുടുങ്ങിക്കിടക്കണം. 2016ൽ പാലത്തിന് കിഫ്ബി അനുമതി ലഭിച്ചു. 32.49 കോടി രൂപയാണ് പാലം നിർമാണത്തിന് അനുവദിച്ചത്. എന്നാൽ മേൽപ്പാല നിർമ്മാണം അനന്തമായി നീളുകയാണ്.

വ്യാപാരി വ്യവസായി ഏകോപനസമിതി കല്ലടിക്കോട് യൂണിറ്റ് സമ്മേളനം നാളെ

കല്ലടിക്കോട്: വ്യാപാരി വ്യവസായി ഏകോപന സമിതി കല്ലടിക്കോട് യൂണിറ്റ് സമ്മേളനം നാളെ ഉച്ചയ്ക്കുശേഷം രണ്ടിനു കല്ലടിക്കോട് സനാന ഓഡിറ്റോറിയത്തിൽ നടക്കും. വ്യാപാരികൾക്കായി ആസൂത്രണംചെയ്ത വിവിധ പദ്ധതികൾ അവതരിപ്പിക്കും. സമ്മേളനം നടക്കുന്നതിനാൽ നാളെ ഉച്ചയ്ക്കു രണ്ടുമുതൽ അഞ്ചരവരെ കടകൾ മുടക്കമായിരിക്കും. യൂണിറ്റ് സമ്മേളനം ജില്ലാ പ്രസിഡന്‍റും സംസ്ഥാന വൈസ് പ്രസിഡന്‍റുമായ ബാബു കോട്ടയിൽ ഉദ്ഘാടനം ചെയ്യും. യൂണിറ്റ് പ്രസിഡന്‍റ് അജോ അഗസ്റ്റിൻ മഞ്ഞാടിക്കൽ അധ്യക്ഷത വഹിക്കുന്ന യോഗത്തിൽ ജില്ലാ ജനറൽ സെക്രട്ടറി കെ.എ. ഹമീദ് മുഖ്യാതിഥിയായിരിക്കും. യൂണിറ്റ് ആലോചനായോഗം പ്രസിഡന്‍റ് അജോ അഗസ്റ്റ്യൻ ഉദ്ഘാടനം ചെയ്തു. ജനറൽ സെക്രട്ടറി അഷറഫ് റിട്സി, ട്രഷറർ ശ്രീകാന്ത്, എൻ.എം. അബൂബക്കർ സിദ്ധിക്ക്, എം. ഷാഹുൽ ഹമീദ്, സി. രാജൻ, എൻ.കെ. ഷാഹുൽ ഹമീദ്, കെ.ആർ. രാഹുൽ, ടി.ജെ. നീതു ജോൺ. എന്നിവർ പ്രസംഗിച്ചു.

പ്രൈവറ്റ് ബാങ്കേഴ്സ് അസോസിയേഷൻ ആലത്തൂർ താലൂക്ക് സമ്മേളനം

വടക്കഞ്ചേരി: കേരള പ്രൈവറ്റ് ബാങ്കേഴ്സ് അസോസിയേഷൻ ആലത്തൂർ താലൂക്ക് സമ്മേളനം നടത്തി. വടക്കഞ്ചേരിയിൽ നടന്ന സമ്മേളനം പഞ്ചായത്ത് പ്രസിഡന്‍റ് ലിസി സുരേഷ് ഉദ്ഘാടനം ചെയ്തു. താലൂക്ക് പ്രസിഡന്‍റ് മോഹനൻ പള്ളിക്കാട് അധ്യക്ഷത വഹിച്ചു. ജില്ലാ പ്രസിഡന്‍റ് എസ്. പരന്താമൻ മുഖ്യപ്രഭാഷണം നടത്തി. വി. ബാലചന്ദ്രൻ, എം.എം. ബാലകൃഷ്ണൻ, കെ.കെ. പങ്കജാക്ഷൻ, കെ. പ്രകാശ് കുമാർ, പി.ഡി. ജോസ് എന്നിവർ പ്രസംഗിച്ചു. താലൂക്ക് സെക്രട്ടറി കെ. രാധാകൃഷ്ണൻ വാർഷിക റിപ്പോർട്ടും ട്രഷറർ ബൈജു അഗസ്റ്റിൻ തുറുവേലിൽ വരവുചെലവു കണക്കുകളും അവതരിപ്പിച്ചു. ചികിത്സാ സഹായവിതരണവും വിദ്യാഭ്യാസ, കലാകായിക മേഖലകളിൽ ഉന്നത വിജയം നേടിയവരെ അനുമോദിക്കലും നടന്നു. സ്വകാര്യ ബാങ്കിംഗ് രംഗത്ത് 25 വർഷം പൂർത്തിയാക്കിയവരെ യോഗത്തിൽ ആദരിച്ചു. അസോസിയേഷന്‍റെ ജില്ലാ സമ്മേളനം ഓഗസ്റ്റിൽ പാലക്കാട്ടുനടക്കും.

ജാഗ്രതൈ.. നാട്ടിൽ ഞാറുമോഷണവും

നെന്മാറ: ഞാറും മോഷണവസ്തുവായി മാറി. ഒന്നാംവിളയ്ക്കു തയാറാക്കിയ ഞാറ്റടി നശിച്ചതോടെ ഞാറുക്ഷാമവും രൂക്ഷം. ഇതോടെ പലയിടത്തും ഞാറുമോഷണവും തകൃതി. വിത്തനശേരിയിൽ വേലികെട്ടി സംരക്ഷിച്ച വളപ്പിൽ പറിച്ചുസുക്ഷിച്ചിരുന്ന ഏതാണ്ട് 200 ഞാറ്റു മുടിക്കെട്ടുകൾ കഴിഞ്ഞദിവസംരാത്രി മോഷണം പോയി. വിത്തനശേരി കവളപ്പാറ പനയംപറമ്പ് വീട്ടിൽ പി.കെ. വിശ്വനാഥന്‍റെ കൃഷിയിടത്തിൽനിന്നാണ് ഞാറ് കളവുപോയത്. സാധാരണ നടീലിനുമുമ്പ് ട്രാക്ടർ ഉഴുത് നെൽപാടം പാകപ്പെടുത്തുമ്പോൾ പറിച്ച ഞാറുകൾ പാടവരമ്പുകളിൽതന്നെ കയറ്റിവയ്ക്കുകയാണ് പതിവ്. ആവശ്യംകഴിഞ്ഞ് ബാക്കിയുള്ളവ ചീഞ്ഞുപോവുകയോ ആവശ്യത്തിൽ അധികമുള്ളവ ആവശ്യക്കാരില്ലെങ്കിൽ ഉഴുതുമറിച്ച് കളയുകയാണ് ചെയ്യാറുള്ളത്. ഇപ്രാവശ്യം കാലാവസ്ഥാ വ്യതിയാനം മൂലം ബഹുഭൂരിപക്ഷം കർഷകരുടെയും പാകിയ വിത്തുകൾ അമിത മഴമൂലവും വെള്ളക്കെട്ട് മൂലവും നശിച്ചതോടെയാണ് ഞാറ്റടിക്കു ക്ഷാമമുണ്ടായത്. മിക്കയിടത്തും കൃഷിഭവൻ മുഖേന രണ്ടാമത് വിതരണം ചെയ്ത വിത്ത് ഉപയോഗിച്ച ഞാറുപാകേണ്ട സ്ഥിതിയുമുണ്ടായി. ഞാറു പാകിയതുതന്നെ ആവശ്യത്തിനു തികയാത്ത സ്ഥിതിയുണ്ടായി. ഇതാണ് ഞാറ്റടിയും മോഷണ വസ്തുമാകാൻ കാരണം. ഞാറുകെട്ടുകൾ പാടത്തു തന്നെ സൂക്ഷിക്കാൻ ധൈര്യമില്ലാത്ത അവസ്ഥയാണ്. പലരുടെയും ഞാറുകൾ നഷ്‌ടപ്പെട്ടു പോയതിനാൽ കർഷകർ പാടത്തുനിന്നു വീട്ടുവളപ്പിലേക്കു കടത്തി സൂക്ഷിക്കുകയാണ് ചെയ്യുന്നത്.

അറുനൂറേക്കർ ഭൂമിയുടെ അനധികൃത രജിസ്ട്രേഷൻ നടന്നെന്നു ആധാരമെഴുത്ത് അസോസിയേഷൻ

അഗളി: അട്ടപ്പാടി കോട്ടത്തറ വില്ലേജിൽ മാത്രം 570 ഏക്കർഭൂമി രാഷ്ട്രീയ നേതാക്കളുടെ ബിനാമികളുടെ പേരിൽ അനധികൃത രജിസ്ട്രേഷൻ നടത്തിയതായി ആധാരം എഴുത്ത് അസോസിയേഷൻ അഗളി യൂണിറ്റ് ഭാരവാഹികൾ ആരോപിച്ചു. ഓൾ കേരള ഡോക്യുമെന്‍റ് റൈറ്റേഴ്സ് ആൻഡ് സ്ക്രൈബ്സ് അസോസിയേഷൻ അഗളി യൂണിറ്റ് ഭാരവാഹികളായ ഗോപീകൃഷ്ണൻ, കെ.ആർ. രവീന്ദ്രദാസ്, കെ.സി. അനീഷ്, പി. രാജാമണി എന്നിവർ അഗളിയിൽ വിളിച്ചു ചേർത്ത പത്രസമ്മേളനത്തിലാണ് ഗുരുതര ആരോപണം ഉന്നയിച്ചത്. മൂപ്പിൽ നായരുടെ അവകാശികളെന്ന് അവകാശപ്പെടുന്ന ഏതാനും പേർ ചില രാഷ്ട്രീയ നേതാക്കളുടെ പിൻബലത്തോടെയാണ് അനധികൃത ഭൂമിരജിസ്ട്രേഷൻ നടത്തുന്നതെന്നും ആരോപിച്ചു.ഭൂരഹിതരായ ആദിവാസികൾക്ക് നായനാർസർക്കാർ പതിച്ചുനൽകിയതും വി.എസ്. അച്യുതാനന്ദൻ സർക്കാർ ചെങ്ങറ ഭൂസമരക്കാർക്ക് പതിച്ചു നൽകിയതുമായ ഭൂമിയും ആദിവാസികൾ കൈവശംവച്ച് കൃഷി ചെയ്ത ഭൂമിയുമാണ് രജിസ്ട്രേഷൻ നടത്തിയിരിക്കുന്നതെന്നും അസോസിയേഷൻ ഭാരവാഹികൾ പറഞ്ഞു. സംഘടന നൽകിയിരിക്കുന്ന പരാതിയിൽ അന്തിമതീരുമാനമുണ്ടാകുന്നതുവരെ ആധാരങ്ങൾ രജിസ്റ്റർ ചെയ്യുന്നതു നിർത്തിവയ്ക്കുവാനും ശക്തമായ നിയമനടപടികളെടുക്കണമെന്നും ആവശ്യപ്പെട്ടു അസോസിയേഷൻ മുഖ്യമന്ത്രിക്കു പരാതി നൽകിയിട്ടുണ്ട്.

ഉന്നതവിജയികളെ അനുമോദിച്ചു അർബൻ ഗ്രാമീൺ സൊസൈറ്റി

മണ്ണാർക്കാട്: അർബൻ ഗ്രാമീൺ സൊസൈറ്റിയും പുതുക്കുടി ചാരിറ്റി കൂട്ടായ്മയും സംയുക്തമായി എസ്എസ്എൽസി, പ്ലസ്ടു പരീക്ഷകളിൽ ഉന്നതവിജയം നേടിയ വിദ്യാർഥികളെ അനുമോദിച്ചു. പയ്യനെടം പുതുക്കുടിയിൽ നടന്ന അനുമോദനസദസ് മണ്ണാർക്കാട് അർബൺ ഗ്രാമീൺ സൊസൈറ്റി സെക്രട്ടറി അജിത് പാലാട്ട് ഉദ്ഘാടനം ചെയ്തു. അർബൻ ഗ്രാമീൺ സൊസൈറ്റിയുടെ നേതൃത്വത്തിൽ വിദ്യാഭ്യാസ, സാംസ്കാരിക മേഖലകളുടെ പുരോഗതി ലക്ഷ്യമിട്ടു നടത്തുന്ന പ്രവർത്തനങ്ങളുടെ ഭാഗമായാണ് പുതുക്കുടി ചാരിറ്റി കൂട്ടായ്മയുമായി സഹകരിച്ച് പഠനോപകരണങ്ങൾ വിതരണം ചെയ്തുഅനുമോദന സദസിന്‍റെ ഭാഗമായത്. കൂട്ടായ്മ പ്രസിഡന്‍റ് സോനു ശിവൻ അധ്യക്ഷനായി. ഡോ. കമ്മാപ്പ ലഹരിവിരുദ്ധ സന്ദേശം നൽകി. സാഹിത്യകാരൻ കെപിഎസ് പയ്യനെടം മുഖ്യപ്രഭാഷണം നടത്തി. പുതുക്കുടി കൂട്ടായ്മയിലെ മുതിർന്ന അംഗങ്ങൾ, വിശിഷ്ട വ്യക്തികൾ എന്നിവരെ ആദരിച്ചു. അച്യുതൻ പനച്ചിക്കുത്ത്, കൃഷ്ണദാസ്കൃപ, വാർഡ് മെംബർ ഇന്ദിര, ഗോപാലകൃഷ്ണൻ, രാജേന്ദ്രൻ എന്നിവർ പ്രസംഗിച്ചു. ചാരിറ്റി കൂട്ടായ്മ സെക്രട്ടറി ഭാഗ്യരാജ് സ്വാഗതവും ട്രഷറർ ഉണ്ണിക്കണ്ണൻ നന്ദിയും പറഞ്ഞു.

മുടപ്പല്ലൂരിലെ കവർച്ചയ്ക്കുപിന്നിൽ വിദഗ്ധ മോഷ്ടാവെന്നു നിഗമനം

വടക്കഞ്ചേരി: വടക്കഞ്ചേരി ടൗണിലും പരിസരപ്രദേശങ്ങളിലും കഴിഞ്ഞ ദിവസങ്ങളിലായി തുടരുന്ന മോഷണ പരമ്പരകൾക്കു പിന്നാലെ മുടപ്പല്ലൂർ ടൗണിനടുത്ത് പൂട്ടിയിട്ട വീട്ടിൽനിന്നു 13 പവൻ സ്വർണാഭരണങ്ങളും 8,500 രൂപയും 12,000 രൂപ വിലയുള്ള വാച്ചും കവർന്നതിനു പിന്നിൽ വിദഗ്ധ മോഷ്ടാവെന്നു വിലയിരുത്തൽ. വാതിലിനോ പൂട്ടിട്ടിരുന്ന കുറ്റിക്കോ കേടുപാടു വരുത്താതെ അതിവിദഗ്ധമായാണ് മുൻവാതിൽതുറന്ന് മോഷ്ടാവ് ഇരുനില വീടിന്‍റെ അകത്തുകടന്നിട്ടുള്ളത്. കൃത്യം നിർവഹിച്ച് മുന്നിലൂടെതന്നെ പോകുമ്പോഴും വാതിലും കൊതുകുനെറ്റുള്ള വാതിലും അടച്ചിരുന്നു. വാതിലിന്‍റെ ലോക്ക് കയറുന്ന മരക്കട്ട്ളയുടെ ചെറിയൊരു തുണ്ടു മാത്രമാണ് ലോക്ക് തകർക്കാൻ നശിപ്പിച്ചിട്ടുള്ളത്. മറ്റുനാശനഷ്ടങ്ങളൊന്നും വരുത്തിയിട്ടില്ല. അലമാരകളിലോ മറ്റോ പരിശോധിച്ച് വലിച്ചുവാരിയിടാതെ എല്ലാം അറിയുന്നപ്പോലെയാണ് കൃത്യമായി സ്വർണവും പണവുമായി മോഷ്ടാവ് കടന്നു കളഞ്ഞത്. പടിഞ്ഞാറെതറയിൽ ഗംഗാശൈലത്തിൽ സൈന്യത്തിൽനിന്നു റിട്ടയർ ചെയ്ത ഗംഗാധരന്‍റെ വീട്ടിലാണ് കഴിഞ്ഞദിവസം കവർച്ച നടന്നത്. ബെഡ്റൂമിലെ കട്ടിലിനടിയിലെ മരലോക്കറിൽ സൂക്ഷിച്ചിരുന്ന സ്വർണവും മേശയിലെ ബാഗിൽ വച്ചിരുന്ന 8,500 രൂപയും 12,000 രൂപ വിലവരുന്ന ഭാര്യ ഷൈലജയുടെ വാച്ചുമാണ് കവർന്നത്. വീടുപൂട്ടി മുടപ്പല്ലൂരിനടുത്ത് പന്തംപറമ്പിലുള്ള തറവാട്ടു വീട്ടിൽ പോയ സമയത്താണ് സംഭവം. 18നാണ് ഇവർ തറവാട്ടിലേക്കുപോയത്. ശനിയാഴ്ച രാവിലെ എട്ടരയോടെ വീട്ടിലെത്തിയപ്പോഴാണ് കവർച്ചാവിവരം അറിയുന്നത്. കവർച്ചനടന്ന വീട് തൊട്ടടുത്തുവീടുകളുള്ള സ്ഥലമാണ്. മുന്നിലെ മതിൽ ചാടിക്കടന്നാണ് മോഷ്ടാവ് അകത്തുകടന്നിട്ടുള്ളതെന്നാണ് നിഗമനം. മതിലിൽ ചുവന്ന മണ്ണിന്‍റെ ചവിട്ടുപാടുകളുണ്ട്. ഇവിടെനിന്നും മണംപിടിച്ച പോലീസ് നായ മുടപ്പല്ലൂർ ടൗണിലേക്കുള്ള റോഡിലേക്ക് കുറച്ചുദൂരം ഓടിനിന്നു. ഫിംഗർപ്രിൻറ് വിദഗ്ധരും ഫോറൻസിക് സംഘവും സ്ഥലത്തെത്തി പരിശോധന നടത്തിയിരുന്നു. വടക്കഞ്ചേരി സിഐ കെ.പി. ബെന്നിയുടെ നേതൃത്വത്തിലാണ് അന്വേഷണം നടക്കുന്നത്. ഭീതിപ്പെടുത്തി തുടർകവർച്ചകൾ... വടക്കഞ്ചേരി: കഴിഞ്ഞദിവസം തന്നെ മുടപ്പല്ലൂരിൽ ചക്കാന്തറ ആറുമുഖന്‍റെ വീട്ടിൽ മോഷണ ശ്രമമുണ്ടായി. പിൻവാതിൽ തുറക്കുന്ന ശബ്ദംകേട്ട് മുകൾനിലയിലുണ്ടായിരുന്ന മകൻ ഓടിവരുമ്പോഴേക്കും മുഖംമൂടി ധരിച്ച മോഷ്ടാവ് ഓടിപ്പോവുകയായിരുന്നു. രണ്ടുദിവസം മുമ്പ് വടക്കഞ്ചേരി ടൗണിലെ ലോട്ടറികടയിൽനിന്നും 5,000 രൂപയും അറുപതിനായിരം രൂപയുടെ ലോട്ടറി ടിക്കറ്റുകളും മോഷണം പോയിരുന്നു. അതിനുമുമ്പ് വടക്കഞ്ചേരി ടൗണിൽ വിനായക സ്ട്രീറ്റിലെ ഉഷാ ദേവിയുടെ വീട്ടിൽ നിന്നും വാച്ചുകളും പണവും നഷ്ടപ്പെട്ടു. സമീപത്തെ ക്ഷേത്രത്തിലും മോഷണശ്രമം നടന്നു. രണ്ടുമാസം മുമ്പ് ചുവട്ടുപ്പാടത്ത് ദേശീയപാതക്കു സമീപമുള്ള പ്രസാദ് പിള്ളയുടെ ഇരുനില വീട്ടിൽനിന്നു 45 പവൻ സ്വർണാഭരണങ്ങൾ കവർന്നതും അതിവിദഗ്ധമായിട്ടായിരുന്നു. രാത്രി വീട്ടുകാർ ഉറങ്ങിക്കിടന്നിരുന്ന മുറിയിൽ നിന്നാണ് ആഭരണങ്ങൾ കവർന്നത്. അടുക്കള ഭാഗത്തെ ചിമ്മിനി കുഴലിലൂടെ കയറി മുകളിലെ നിലയിലെ വാതിൽ വഴിയായിരുന്നു അന്ന് മോഷ്ടാവ് അകത്തു കടന്നത്. യാതൊന്നും വലിച്ചു വാരിയിടാതെ കൃത്യയായി സ്വർണം കവരുകയായിരുന്നു. ആഭരണങ്ങൾ വച്ചിരുന്ന ചെറിയ പെട്ടികൾ അതേപടി അലമാരയിൽവച്ചാണ് മോഷ്ടാവ് പോയത്. ഈ കേസിനും തുമ്പുണ്ടായിട്ടില്ല. സ്വർണം കണ്ടെത്താനുള്ള പുതിയ ഉപകരണങ്ങൾ വല്ലതും മോഷ്ടാക്കൾ ഉപയോഗിക്കുന്നുണ്ടോ എന്നാണ് വീട്ടുകാർ സംശയിക്കുന്നത്.

കളക്ടറേറ്റിലെ ഈ പൂന്തോട്ടം പറയും ശിവദാസന്‍റെ ഒറ്റയാൻ പരിപാലനക്കഥ

ജോസ് ചാലക്കൽ പാലക്കാട്: കളക്ടറേറ്റിലേക്കു പടികടന്നെത്തുമ്പോൾ ആദ്യംകാണുന്നത് മഹാത്മഗാന്ധിജിയുടെ അർധകായ പ്രതിമയെ. എന്നും കഴുകി വൃത്തിയാക്കി പുഷ്പാർച്ചന നടത്തിയതും കാണാം. നല്ലൊരു പൂന്തോട്ടവും ഇതോടൊപ്പമുണ്ട്. ഇതുപരിപാലിച്ചു വരുന്നത് കളക്ടറേറ്റിലെതന്നെ സ്റ്റേറ്റ് ബാങ്ക് ഓഫ് ഇന്ത്യ ബ്രാഞ്ചിലെ ഡ്രൈവർ കുത്തന്നൂർ സ്വദേശി ശിവദാസ്. ഞായറാഴ്ച്ചകളിലും മറ്റു മുടക്കു ദിവസങ്ങളിലടക്കം രാവിലെ ഏഴിനെത്തി ഗാന്ധിപ്രതിമയും സ്റ്റെപ്പുകളും കഴുകി വൃത്തിയാക്കി പുഷ്പാർച്ചന നടത്തും. തുടർന്നു ചെടികൾ നനച്ചും വളമിട്ടും പരിപാലിക്കും. നല്ലൊരു പൂന്തോട്ടം വീട്ടിൽ അമ്മ പരിപാലിച്ചിരുന്നു. അമ്മ മരിച്ചപ്പോൾ പൂന്തോട്ട ഓർമകൾക്കായാണ് ഇവിടെ സ്വന്തം ഇഷ്ടപ്രകാരം ശിവദാസ് ഇപ്രകാരം ചെയ്യുന്നത്. പൂന്തോട്ടം മാത്രമല്ല ഗാന്ധിജിയേയും ഒത്തിരി ഇഷ്ടമാണ് ശിവദാസന്. ബാങ്കിലേയും സിവിൽ സ്റ്റേഷനിലേയും ജീവനക്കാരിൽ പലരും നല്ല പിന്തുണ നൽകുന്നുണ്ടെന്നു ശിവദാസൻ പറയുന്നു. സ്വന്തം പണംമുടക്കി വാങ്ങുന്ന ചെടികളും പലരും കൊണ്ടുവന്നു കൊടുക്കുന്ന ചെടികളും പൂവണിഞ്ഞുനിൽക്കുന്പോൾ കളക്ടറേറ്റിലെത്തുന്നവർക്കിതൊരു അപൂർവകാഴ്ചയാണ്. 2017 ജൂൺ 12ന് മന്ത്രി എ.കെ. ബാലനാണ് പ്രതിമ അനാഛാദനം ചെയ്തത്. സബർമതിയിൽ ഗാന്ധിജിയുടെ പാദസ്പർശമേറ്റ മണ്ണ് ഇതിലുണ്ടെന്നു ശിലാഫലകത്തിൽ കൊത്തിവച്ചിട്ടുണ്ട്.

മംഗലംപുഴയിൽ ഗൃഹനാഥൻ മുങ്ങി മരിച്ചു

വടക്കഞ്ചേരി: മംഗലംപുഴയിൽ മഞ്ഞപ്ര ചിറ കടാംപ്പാടം ഭാഗത്ത് മധ്യവയസ്കൻ മുങ്ങി മരിച്ചു. മഞ്ഞപ്ര പന്നിക്കോട് താമസിക്കുന്ന സാബുവാണ് (50) മരിച്ചത്. കണ്ണൂർ കോളയാട് സ്വദേശിയായ സാബു കഴിഞ്ഞ 15 വർഷത്തോളയായി മഞ്ഞപ്ര പന്നിക്കോട്ടിലാണ് താമസം. ഇന്നലെ രാവിലെ 11 ഓടുകൂടിയാണ് അപകടമുണ്ടായത്. കടാംപാടം ഭാഗത്ത് വീണുകിടന്ന തെങ്ങ് മുറിച്ച് മാറ്റി കൈകാൽ കഴുകാനായി പുഴയിലേക്ക് പോയ സാബു ചെക്ക് ഡാമിന് സമീപത്തെ പുഴയിലേക്കിറങ്ങുന്ന പടിയിൽ നിന്നും അബദ്ധത്തിൽ വഴുതി പുഴയിലെ ഒഴുക്കിൽപ്പെടുകയായിരുന്നു. കൂടെയുണ്ടായിരുന്ന സുഹൃത്ത് സലീം രക്ഷിക്കാൻ ശ്രമിച്ചെങ്കിലും മുങ്ങിതാഴ്‌ന്നു. വടക്കഞ്ചേരിയിൽ നിന്ന് അഗ്നിരക്ഷാസേനയെത്തി ഏറെ നേരത്തെ തെരച്ചിലിലാണ് മൃതദേഹം കണ്ടെത്തിയത്. ആലത്തൂർ താലൂക്ക് ആശുപത്രി മോർച്ചറിയിലേക്ക് മാറ്റിയ മൃതദേഹം ഇന്ന് പോസ്റ്റ്മോർട്ടത്തിനു ശേഷം സ്വദേശമായ കണ്ണൂരിലേക്ക് കൊണ്ടുപോകും. സംസ്കാരം ഇന്ന് വൈകുന്നേരം കൊന്നേരി പുന്നപ്പാലം സെന്‍റ് ജോർജ് ഓർത്തഡോക്സ് പള്ളിയിൽ. ഭാര്യ: ലിനി (അബുദാബി). മക്കൾ: എബിൻ (റിയാദ്), എൽദോ, എഡ്വിൻ.

കുളിക്കാനിറങ്ങിയ രണ്ടു വിദ്യാർഥികൾ മുങ്ങിമരിച്ചു

വണ്ടിത്താവളം: മീനാക്ഷിപുരത്തിനു സമീപം കമ്പാലത്തറ ഡാമിൽ കുളിക്കാനിറങ്ങിയ രണ്ടു വിദ്യാർഥികൾ മുങ്ങിമരിച്ചു. പുതുനഗരം കുളത്ത് മേട് സ്വദേശി മുരളീധരന്‍റെ മകൻ കാർത്തിക് (19), ചിറ്റൂർ തറക്കളം സ്വദേശി മുരളിയുടെ മകൻ വിഷ്ണുപ്രസാദ് (18) എന്നിവരാണ് മരിച്ചത്. ഇന്നലെ വൈകീട്ട് നാലരയോടെയാണ് സംഭവം. സുഹൃത്തുക്കൾക്കൊപ്പം എത്തിയതായിരുന്നു വിദ്യാർഥികൾ. ആറംഗസംഘമാണ് കുളിക്കാനെത്തിയത്. സുഹൃത്തുക്കൾ വിവരമറിയിച്ചതിനെ തുടർന്ന് സ്കൂബ ടീം ഉൾപ്പെടെ സ്ഥലത്തെത്തി പരിശോധന നടത്തി. ആറോടെ കാർത്തിക്കിന്‍റെ മൃതദേഹവും ഏഴിനു വിഷ്ണുപ്രസാദിന്‍റെ മൃതദേഹവും ഫയർഫോഴ്സ് സംഘം കണ്ടെടുത്തു. ജില്ലാ ആശുപത്രിയിൽ എത്തിച്ച മൃതദേഹങ്ങൾ ഇന്നുരാവിലെ മീനാക്ഷിപുരം പോലീസിന്‍റെ ഇൻക്വസ്റ്റിനു ശേഷം പോസ്റ്റുമോർട്ടം നടത്തും. വിഷ്ണു പ്രസാദിന്‍റെ അമ്മ : ശോഭ. കാർത്തിക് കൊഴിഞ്ഞാമ്പാറ ആർട്സ് ആൻഡ് സയൻസ് കോളജ് വിദ്യാർഥിയാണ്. അമ്മ: വിനോദിനി.

വിദ്യാഭ്യാസവായ്പ നൽകുന്നതിൽ ബാങ്കുകൾ ഉദാരസമീപനം പുലർത്തണം: വി.കെ. ശ്രീകണ്ഠൻ എംപി

പാലക്കാട്: വിദ്യാഭ്യാസ വായ്പ നൽകുന്നതിൽ ബാങ്കുകൾ ഉദാര സമീപനം പുലർത്തണമെന്ന് വി.കെ. ശ്രീകണ്ഠൻ എംപി. വ്യാവസായിക ഇടനാഴിയുമായി ബന്ധപ്പെട്ട് പാലക്കാട് പ്രതീക്ഷിക്കുന്ന വികസനത്തിൽ ബാങ്കുകൾ സുപ്രധാന പങ്ക് വഹിക്കണമെന്നും അദ്ദേഹം അഭിപ്രായപ്പെട്ടു. ജില്ലാതല ബാങ്കിംഗ് അവലോകനസമിതി യോഗം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. നെൽകൃഷിക്കാർക്ക് പിആർഎസ് ലോണുകൾ ലഭിക്കുന്നതിലെ കാലതാമസം ഒഴിവാക്കണം. ബാങ്കുകളിലെ ജീവനക്കാരുടെ ഒഴിവുകൾ നികത്തണമെന്നും എംപി നിർദേശിച്ചു. 2024-2025 സാന്പത്തിക വർഷത്തിലെ നാലാംപാദത്തിൽ ജില്ലയിലെ ബാങ്കുകൾ ആകെ 33000 കോടി രൂപ വായ്പ നൽകിയതായി യോഗം വിലയിരുത്തി. ഇത് വാർഷിക ക്രെഡിറ്റ് പദ്ധതിയുടെ 116.32% ആണ്. 2025 മാർച്ച് 31 വരെയുള്ള ബാങ്കുകളുടെ വായ്പ നീക്കിയിരിപ്പ് 44149 കോടി രൂപയും നിക്ഷേപം 60405 കോടിയുമാണ്. ജില്ലയിലെ വായ്പാ നിക്ഷേപ അനുപാതം 73.08 ശതമാനം ആണ്. കഴിഞ്ഞ പാദത്തിൽ ഇത് 74 ശതമാനമായിരുന്നു. വിദ്യാഭ്യാസ വായ്പകളുടെ കാര്യത്തിൽ ഇനിയും മുന്നോട്ട് പോകാനുണ്ടെന്ന് യോഗം വിലയിരുത്തി. 159 കോടി രൂപയുടെ ലക്ഷ്യത്തിൽ 90 കോടി രൂപ മാത്രമാണ് ഈ മേഖലയിൽ വിതരണം ചെയ്തത്. വിവിധ കേന്ദ്ര സർക്കാർ പദ്ധതികളുടെ പുരോഗതിയും യോഗം അവലോകനം ചെയ്തു. വായ്പ നിരസിക്കലുമായി ബന്ധപ്പെട്ട പരാതികൾ, ചില ബ്രാഞ്ചുകളിലെ അടിസ്ഥാന സൗകര്യങ്ങളുടെ അപര്യാപ്തത, സ്വാശ്രയ സംഘങ്ങൾക്കുള്ള വായ്പകളിലെ ആർബിഐ മാർഗനിർദേശങ്ങൾ പാലിക്കാത്ത സാഹചര്യങ്ങൾ തുടങ്ങിയ കാര്യങ്ങളിൽ ബാങ്കുകൾ ജാഗ്രത പുലർത്തണം. വായ്പാ അംഗീകാര പ്രക്രിയകൾ ലളിതമാക്കാനും സുതാര്യത ഉറപ്പാക്കാനും, സാന്പത്തിക സാക്ഷരതാ കേന്ദ്രങ്ങളിലെ ഒഴിവുകൾ നികത്താനും ബാങ്കുകൾക്ക് നിർദേശം നൽകി. ആർബിഐ ലീഡ് ഡിസ്ട്രിക്റ്റ് ഓഫീസർ മുത്തുകുമാർ യോഗത്തിൽ അധ്യക്ഷത വഹിച്ചു. നബാർഡ് ജില്ലാ അസിസ്റ്റന്‍റ് ജനറൽ മാനേജർ കവിത റാം, കനറാ ബാങ്ക് അസിസ്റ്റന്‍റ് ജനറൽ മാനേജർ എച്ച്.എസ്. ആനന്ദ, ലീഡ് ഡിസ്ട്രിക്ട് മാനേജർ പി.ടി. അനിൽകുമാർ, ലീഡ് ബാങ്ക് ഓഫീസർ രൂപലേഖ എന്നിവർ പ്രസംഗിച്ചു.

ഒറ്റപ്പാലം റെയിൽവേ സ്റ്റേഷനു വികസനത്തിന്‍റെ പച്ചവെളിച്ചം

ഒറ്റപ്പാലം: അമൃത്‌ഭാരത് പദ്ധതിയിൽ ഒറ്റപ്പാലം റെയിൽവേസ്റ്റേഷന് പുതു മുഖശ്രീ. ഒട്ടേറെ വികസന പദ്ധതികളാണ് സ്‌റ്റേഷനിൽ വരാനിരിക്കുന്നത്. പ്ലാറ്റ്ഫോം വിപുലീകരണത്തിനു പുറമേയാണിത്. സ്റ്റേഷന്‍റെ മുഖഛായ തന്നെ മാറുന്ന പദ്ധതികൾ അന്തിമഘട്ടത്തിലാണ്. സ്റ്റേഷനിലെ പ്ലാറ്റ്ഫോമുകളിൽ മേൽക്കൂരകളുടെ വിപുലീകരണം, കൂടുതൽ ഇരിപ്പിടങ്ങൾ സ്ഥാപിക്കൽ, പ്രവേശനകവാടത്തിന്‍റെയും നടപ്പാതകളുടെയും നവീകരണം, വിശ്രമകേന്ദ്രങ്ങളുടെയും ടിക്കറ്റ് കൗണ്ടറിന്‍റെയും ആധുനികവത്കരണം, ആവശ്യമായ ഇലക്ട്രിക്കൽ ജോലികൾ, പാർക്കിംഗ് കേന്ദ്രവും മറ്റ് അടിസ്ഥാന സൗകര്യങ്ങളും ഒരുക്കൽ എന്നിവയടക്കമുള്ളവയാണ് നടക്കാനിരിക്കുന്നത് നേരത്തെ കൂടുതൽ കംപാർട്ട്മെന്‍റുകളുള്ള ദീർഘദൂര ട്രെയിനുകൾ സ്റ്റേഷനിൽ നിർത്തുമ്പോൾ ഇവയുടെ പിന്നിലെ ബോഗികൾ പ്ലാറ്റ്ഫോമിന് പുറത്താകുന്ന സാഹചര്യമായിരുന്നു. ഇവിടെ ട്രെയിൻ കയറാനും ഇറങ്ങാനും യാത്രക്കാർ ഏറെ ബുദ്ധിമുട്ടിയിരുന്നു. സാഹസികയാത്ര പലപ്പോഴും അപകടഭീഷണിയും ഉയർത്തി. സ്റ്റേഷൻ എത്തിയെന്ന് ട്രെയിനിനുള്ളിലെ യാത്രക്കാർക്കു മനസ്സിലാകാത്ത സാഹചര്യവും ഉണ്ടായിരുന്നു. സിഗ്നൽ ലഭിക്കാതെ പുറത്തു നിർത്തിയിട്ടിരിക്കുകയാണെന്നു കരുതി ഇറങ്ങാതിരുന്നതു സംബന്ധിച്ച പരാതികളും യാത്രക്കാർ ഉയർന്നിരുന്നു. സ്റ്റേഷനു പുറത്താണെന്നു ധരിച്ച് ഇറങ്ങാതിരുന്ന യുവതിയും രണ്ടും മക്കളും പിന്നീട് ഒറ്റപ്പാലമെത്തിയെന്നു മനസിലാക്കി ഓടിത്തുടങ്ങിയ ട്രെയിനിൽ നിന്നു ചാടി ഇറങ്ങിയപ്പോൾ അപകടത്തിൽപെട്ടു പരിക്കേറ്റ സംഭവവും ഒരു വർഷം മുൻപുണ്ടായി. ദിവസവും ഒട്ടേറെ യാത്രക്കാർ ആശ്രയിക്കുന്ന സ്റ്റേഷനിൽ നിലനിന്നിരുന്ന പരാതികൾക്കു പരിഹാരമായാണു പ്ലാറ്റ്ഫോം വിപുലീകരിക്കുന്നത്. ഒന്നാം നമ്പർ പ്ലാറ്റ്ഫോമിന്‍റെ അതിർത്തിയിൽ മതിലും നിർമിക്കുന്നുണ്ട്. അതേസമയം, കോവിഡ് കാലത്ത് നിർത്തലാക്കിയ ട്രെയി നുകളുടെ സ്റ്റോപ്പ് ഇവിടെ പുനഃ ക്രമീകരിക്കണമെന്ന ആവശ്യം മാത്രം റെയിൽവേ ചെവിക്കൊ ള്ളുന്നില്ല.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]