ADVERTISEMENT

ADVERTISEMENT

മരിയൻ എഡ്യൂസിറ്റിയിലേക്ക് കെഎസ്ആർടിസിയുടെ ബസ് സർവീസ് ആരംഭിച്ചു

കഴക്കൂട്ടം: നെറ്റ് സീറോ കാർബണ്‍ കാന്പസ് എന്ന ലക്ഷ്യത്തിന്‍റെ ഭാഗമായി മരിയൻ എഡ്യൂസിറ്റിയിലേക്ക് കഐസ്ആർടിസിയുടെ പുതിയ ബസ് സർവീസ് ആരംഭിച്ചു. ജലവിഭവ വകുപ്പ് മന്ത്രി റോഷി അഗസ്റ്റിൻ ഫ്ളാഗ് ഓഫ് ചെയ്തു.

ചടങ്ങിൽ മരിയൻ എൻജിനീയറിംഗ് കോളജ് മാനേജർ റവ. ഡോ. എ.ആർ. ജോണ്‍, ഫാ. ജിം കാർവിൻ റോച്ച്, ഡോ. എ. സാംസണ്‍, ഡോ. അബ്ദുൽ നിസാർ, ആർ.പി. അഭിജിത്ത എന്നിവർ സന്നിഹിതനായിരുന്നു.

ADVERTISEMENT

കരമനയാറ്റിൽ കണ്ട തമിഴ്നാട് സ്വദേശിയുടെ മൃതദേഹം തിരിച്ചറിഞ്ഞു

നെടുമങ്ങാട് : കൂവക്കുടിയ്ക്ക് സമീപം കരമനയാറ്റിൽ കണ്ട മൃതദേഹം തമിഴ്നാട് തെങ്കാശി കടന്നല്ലൂർ അക്കരകട്ട എസ്കെടി നഗർ 114 നമ്പർ വീട്ടിൽ സെൽവ റീഗ (31)ന്‍റേതാണെന്ന് ബന്ധുക്കൾ തിരിച്ചറിഞ്ഞു. കഴിഞ്ഞദിവസം രാത്രി 10നാണ് കൂവക്കുടിയ്ക്ക് സമീപം മൃതദേഹം കണ്ടെത്തിയത്. ആര്യനാട്, വെള്ളനാട്, കുറ്റിച്ചൽ എന്നീ പ്രദേശങ്ങളിൽ നടത്തുന്ന കോഴിഫാമുകളിലെ സൂപ്പർവൈസർ ആയിരുന്നു സെൽവ റീഗൻ. കമ്പനിമുക്കിലെ വാടക വീട്ടിൽ നിന്ന് കഴിഞ്ഞ 22 വൈകുന്നേരം മുതൽ കാണാനില്ലായിരുന്നു. ഇയാളുടെ ബൈക്ക് വെള്ളനാട് പഴയവീട്ടുമൂഴി ക്ഷേത്രത്തിന് സമീപം കരമനയാറിന്‍റെ കരയിൽ കണ്ടെത്തിയിരിന്നു. സെൽവ റീഗൻ ആത്മഹത്യ ചെയ്തതാണെന്നാണ് പോലീസ് നിഗമനം.

പ്ലസ്ടു വിദ്യാര്‍ഥി ക്ഷേത്ര കുളത്തില്‍ മുങ്ങിമരിച്ചു

മെഡിക്കല്‍കോളജ്: പ്ലസ്ടു വിദ്യാര്‍ഥിയെ ക്ഷേത്രക്കുളത്തില്‍ മുങ്ങിമരിച്ച നിലയില്‍ കണ്ടെത്തി. കാട്ടായിക്കോണം ശാസ്തവട്ടം കുന്നത്തുവിളവീട്ടില്‍ സുരേഷ്-സുമ ദമ്പതികളുടെ മകന്‍ സൂരജ് (17) ആണ് മരിച്ചത്. ഇന്നലെ ഉച്ചതിരിഞ്ഞ് 1.30നായിരുന്നു സംഭവം. സൂരജ് കൂട്ടുകാര്‍ക്കൊപ്പം ചെമ്പഴന്തിയിലെ ആനന്ദേശ്വരം ഇടത്തറ ഭദ്രകാളി ക്ഷേത്രക്കുളത്തില്‍ ഇറങ്ങിയപ്പോള്‍ കാല്‍വഴുതി വീഴുകയായിരുന്നുവെന്ന് ഫയര്‍ഫോഴ്സ് അറിയിച്ചു. ചേങ്കോട്ടുകോണം തുണ്ടത്തില്‍ മാധവവിലാസം ഹയര്‍സെക്കന്‍ഡറി സ്കൂളിലെ പ്ലസ് ടു വിദ്യാര്‍ത്ഥിയായിരുന്നു. ഉച്ചയോടെ ക്ലാസ് കഴിഞ്ഞ് വീട്ടിലെത്തിയ കുട്ടിയെ സുഹൃത്തുക്കള്‍ വന്നുവിളിച്ചുകൊണ്ടു പോകുകയായിരുന്നുവെന്നാണ് ബന്ധുക്കള്‍ പറയുന്നത്. സംഭവമറിഞ്ഞ് തിരുവനന്തപുരത്തുനിന്ന് സ്കൂബ ടീം അംഗങ്ങളായ സന്തോഷ്, വിജിന്‍, പ്രദോഷ്, രാകേഷ്, അരവിന്ദ്, സജാദ് എന്നിവര്‍ ചേര്‍ന്ന് 20 അടിയോളം ആഴത്തില്‍ നിന്നാണ് സൂരജിനെ പുറത്തെടുത്തത്. മൃതദേഹം തിരുവനന്തപുരം മെഡിക്കല്‍കോളജ് ആശുപത്രി മോര്‍ച്ചറിയിൽ. സഹോദരി: സുചിത്ര.

ഇതരസംസ്ഥാനക്കാരന്‍ മരിച്ചനിലയില്‍

മെഡിക്കല്‍കോളജ്: ഇതരസംസ്ഥാനക്കാരനെ വീടിനുള്ളില്‍ മരിച്ചനിലയില്‍ കണ്ടെത്തി. പശ്ചിമ ബംഗാള്‍ ഹൂഗ്ലി സ്വദേശി കളിപ്പഡ ദാസ് (44) ആണ് മരിച്ചത്. കുമാരപുരത്തുള്ള കെട്ടിടത്തില്‍ ഇദ്ദേഹം താമസിക്കുന്ന മുറിയില്‍ കഴിഞ്ഞിവസം വൈകുന്നേരം അബോധാവസ്ഥയില്‍ കണ്ടെത്തുകയായിരുന്നു. ഒപ്പമുണ്ടായിരുന്ന സുഹൃത്തുക്കള്‍ ഉടന്‍തന്നെ തിരുവനന്തപുരം മെഡിക്കല്‍കോളജ് ആശുപത്രിയിലെത്തിച്ചുവെങ്കിലും ജീവൻ രക്ഷിക്കാനായില്ല. ഹൃദയാഘാതമാകാം മരണകാരണമെന്ന് മെഡിക്കല്‍കോളജ് പോലീസ് അറിയിച്ചു. മൃതദേഹം മേല്‍നടപടികള്‍ക്കശേഷം ബന്ധുക്കള്‍ക്കു വിട്ടുനല്‍കി.

ഡോ. ജെ. ലോറന്‍സിനെ ആദരിച്ചു

പാറശാല: കേരള നാടാര്‍ മഹാജന സംഘം പ്രസിഡന്‍റ് ഡോ. ജെ. ലോറന്‍സിനെ "കമ്മ്യൂണിറ്റി ലീഡര്‍ഷിപ്പ് ആന്‍ഡ് ഡവലപ്‌മെന്‍റില്‍' മികച്ച സാമൂഹിക സേവനം നല്‍കുന്നത് പരിഗണിച്ചു വേള്‍ഡ് മലയാളി കൗണ്‍സില്‍ ആദരിച്ചു. ഇന്ത്യാ റീജിയന്‍ ചെയര്‍മാന്‍ പി.എച്ച്. കുര്യൻ, ചാപ്റ്റര്‍ പ്രസിഡന്‍റ് സതീഷ് ചന്ദ്രന്‍ നായര്‍, ചാപ്റ്റര്‍ സെക്രട്ടറി ഡോ. അനിതാ മോഹന്‍, ട്രാവന്‍കൂര്‍ പ്രൊവിന്‍സ് ചെയര്‍മാന്‍ സാബു തോമസ്, ഡബ്ല്യൂ എം സി ട്രിവാന്‍ട്രം ചാപ്റ്റര്‍ ട്രഷറര്‍ ആനന്ദ് എന്നിവര്‍ പങ്കെടുത്തു.

അനുസ്മരണസമ്മേളനവും പുരസ്കാര വിതരണവും

നെടുമങ്ങാട്: കേരളത്തിന്‍റെ വിദ്യാഭ്യാസ മേഖലയിൽനിന്നും വിദ്യാർഥികളുടെ കൊഴിഞ്ഞുപോക്ക് ഏറെ വേദനയുണ്ടാക്കുന്നതായി മുൻ പ്രതിപക്ഷ നേതാവും കോൺഗ്രസ് വർക്കിംഗ് കമ്മിറ്റി അംഗവുമായ രമേശ് ചെന്നിത്തല പറഞ്ഞു. കോൺഗ്രസ് മൂഴി മണ്ഡലം കമ്മിറ്റിയുടെ നേതൃത്വത്തിൽ വേങ്കവിള എൻ. രാജശേഖരൻ നായർ നാലാമത് അനുസ്മരണ സമ്മേളനവും എസ്എസ്എൽസി, പ്ലസ് ടു പരീക്ഷകളിൽ ഉന്നത വിജയം നേടിയ വിദ്യാർഥികളെ ആദരിക്കലും നാലാമത് എൻ. രാജശേഖരൻ നായർ സ്മാരക പുരസ്കാരസമർപ്പണവും നിർവഹിക്കുകയായിരുന്നു രമേശ് ചെന്നിത്തല. മൂഴി മണ്ഡലം കോൺഗ്രസ് കമ്മിറ്റി പ്രസിഡന്‍റ് വേട്ടന്പള്ളി സനൽ അധ്യക്ഷത വഹിച്ചു. നാലാമത് എൻ. രാജശേഖരൻ നായർ പുരസ്കാരം ആനാട് ജയൻ ഏറ്റുവാങ്ങി. ജില്ലാ കോൺഗ്രസ് കമ്മിറ്റിയുടെ വൈസ് പ്രസിഡന്‍റ് സുധീർ ഷാ പാലോട്, ബ്ലോക്ക് കോൺഗ്രസ് കമ്മിറ്റി പ്രസിഡന്‍റ് ബിനു എസ്. നായർ, ബ്ലോക്ക് കോൺഗ്രസ് കമ്മിറ്റി മുൻ പ്രസിഡന്‍റുമാരായ ജി. പുരുഷോത്തമൻ നായർ, എസ്. അരുൺകുമാർ, കെപിസിസി ന്യൂനപക്ഷ സെൽ സംസ്ഥാന കോ-ഓർഡിനേറ്റർ എസ്. മുജീബ്, തുടങ്ങിയവർ സംസാരിച്ചു.

അരുവിക്കര വെള്ളനാട് റോഡ് തകർന്നു; യാത്ര ദുരിതപൂർണം

നെടുമങ്ങാട്: അരുവിക്കര വെള്ളനാട് റോഡ് സഞ്ചാര യോഗ്യമല്ലാതായിട്ടു മാസങ്ങളെന്നു നാട്ടുകാർ. പൊട്ടിപ്പൊളിഞ്ഞു തകർന്ന റോഡിൽ കാൽനട യാത്രപോലും ദുഷ്കരമാണ്. മഴ പെയ്താൽ റോഡ് തോടാകുന്നതാണ് നിലവിലെ സ്ഥിതി. പുതിയ അധ്യയന വർഷം ആരംഭിച്ചതോടെ ധാരാളം കുട്ടികളും ഇതുവഴി യാത്ര ചെയ്യുന്നുണ്ട്. അപകടങ്ങളും പതിവാണ്. പൊതുമരാമത്ത് വകുപ്പ് അധികൃതർ ഇക്കാര്യം കണ്ടഭാവം നടിക്കുന്നില്ലെന്നും ആക്ഷേപമുണ്ട്. റോഡ് പണിക്കു ടെണ്ടറായിയെന്നു പറഞ്ഞു ജനങ്ങളെ പറഞ്ഞു പറ്റിക്കാൻ തുടങ്ങിയിട്ടു വർഷങ്ങൾ പലതായെന്നും റോഡ് സഞ്ചാരയോഗ്യമാക്കണമെന്നും ആവശ്യപ്പെട്ടു കൊണ്ട് പൊതു പ്രവർത്തക ഫസീല കായ്പാടി നെടുമങ്ങാട് ലീഗൽ സെല്ല് സെക്രട്ടറിക്ക് പരാതി നൽകി.

വി. തങ്കയ്യനെ അനുസ്മരിച്ചു

പാറശാല: സ്വാതന്ത്ര്യ സമരസേനാനി വി. തങ്കയ്യയുടെ 19-ാമത് അനുസ്മരണ ദിനം ആചരിച്ചു. വി. തങ്കയ്യ സ്മാരക സമിതിയുടെ ആഭിമുഖ്യത്തില്‍ കാഞ്ഞിരംകുളത്തെ സ്മൃതി മണ്ഡപത്തില്‍ പുഷ്പാര്‍ച്ചനയും അനുസ്മരണ സമ്മേളനവും സംഘടിപ്പിച്ചു . സിപിഐ ജില്ലാ അസിസ്റ്റന്‍റ് സെക്രട്ടറി പള്ളിച്ചല്‍ വിജയന്‍ ഉദ് ഘാടനം ചെയ്തു. സിപിഎം ജില്ലാ സെക്രട്ടേറിയറ്റംഗം വി.എസ്. ഹരികുമാര്‍, സി.കെ. സിന്ധുരാജ്, ജി.എന്‍. ശ്രീകുമാര്‍, ആനാവൂര്‍ മണികണ്ഠന്‍, മോഹന്‍ദാസ്, ദേവപ്രസാദ് ജോണ്‍, എന്‍. രാഘവന്‍ നാടാര്‍, കാഞ്ഞിരംകുളം ഗോപാലകൃഷ്ണന്‍, രാജേന്ദ്രകുമാര്‍, മധു, സി.എസ്. രാധാകൃഷ്ണന്‍, കെ.കെ. വിജയന്‍, ഊക്കോട് കൃഷ്ണന്‍കുട്ടി, പ്രഫ. ചന്ദ്രബാബു, സംഘാടക സമിതിക്കുവേണ്ടി വി. ദേവരാജന്‍, എന്‍.എന്‍. ബൈജു, എന്‍. ആദര്‍ശ് കൃഷ്ണ, അജിത് തങ്കയ്യ, ശ്രീധരന്‍, പ്രേം കുമാര്‍, സ്മാരക സമിതിക്കുവേണ്ടി സെക്രട്ടറി എ. രാമനാഥന്‍, ആക്റ്റിംഗ് സെക്രട്ടറി സി. സുരേഷ് ബാബു തുടങ്ങിയവര്‍ പങ്കെടുത്തു.

തിരുവനന്തപുരം വിമാനത്താവളത്തില്‍ കുടുങ്ങിയ എഫ്-35 ബി ബ്രിട്ടീഷ് യുദ്ധവിമാനം ഹാംഗറിലേക്കു മാറ്റും

വലിയതുറ: തിരുവനന്തപുരം അന്താരാഷ്ട്ര വിമാനത്താവളത്തില്‍ ആഴ്ചകള്‍ക്ക് മുമ്പ് എമര്‍ജന്‍സി ലാന്‍ഡിംഗ് നടത്തിയ എഫ്-35 ബി ബ്രിട്ടീഷ് യുദ്ധവിമാനം ഹാംഗറിലേക്ക് മാറ്റും. എയര്‍ ഇന്ത്യയുടെ ഹാംഗറിലേക്കാകും അമേരിക്കന്‍ നിര്‍മിത എഫ്-35 മാറ്റുക. യുകെയില്‍നിന്നും വിദഗ്ധ സംഘം വിമാനത്തിന്‍റെ അറ്റകുറ്റപ്പണിക്കായി എത്തിയാലുടന്‍ വിമാനം ഹാംഗറിലേക്കു മാറ്റുമെന്നു ബ്രിട്ടീഷ് ഹൈ കമ്മീഷന്‍ വക്താവ് ബന്ധപ്പെട്ട അധികൃതരുമായി ആശയവിനിമയം നടത്തി. ഇന്ത്യയുടെ എല്ലാവിധ പിന്തുണയ്ക്കും സഹകരണത്തിനും നന്ദിയെന്നുമായിരുന്നു പ്രതികരണം. തിരുവനന്തപുരം അന്താരാഷ്ട്ര വിമാനത്താവളത്തില്‍ തുടരുന്ന ബ്രിട്ടീഷ് യുദ്ധവിമാനം എഫ്-35 ബിക്ക് ഹാങ്ങര്‍ സ്ഥലം നല്‍കാമെന്ന എയര്‍ ഇന്ത്യയുടെ വാഗ്ധാനം ബ്രിട്ടീഷ് റോയല്‍ നേവി തുടക്കത്തില്‍ നിരസിച്ചിരുന്നു. വിമാനം ഇപ്പോള്‍ നിര്‍ത്തിയിട്ടിരിക്കുന്ന സ്ഥലത്തുതന്നെ തുടര്‍ന്നാല്‍ മതിയെന്നായിരുന്നു അവരുടെ ആവശ്യം. അത്യാധുനിക സൈനിക വിമാനമായ എഫ്-35 ബി മറ്റൊരു രാജ്യത്തിനന്‍റെ അധീനതയിലുള്ള അറ്റകുറ്റപ്പണി കേന്ദ്രത്തിലേയ്ക്കു മാറ്റേണ്ടതില്ല എന്നാണ് നേരത്തെ ബ്രീട്ടീഷ് സംഘം എടുത്ത തീരുമാനം. എഫ്-35 ന്‍റെ നിര്‍മാണ രഹസ്യങ്ങള്‍ ചോര്‍ന്നു പോകരുതെന്ന മുന്‍കരുതലാകാം ബ്രിട്ടീഷ് അധികൃതര്‍ ഇത്തരമൊരു തീരുമാനം കൈകൊളളാന്‍ കാരണമെന്നാണു സൂചന. വിമാനത്താവളത്തിലെ നാലാം നമ്പര്‍ ബേയില്‍ സിഐഎസ്എഫിന്‍റെ സുരക്ഷാവലയത്തിലാണ് എഫ്-35 വിമാനം ഇപ്പോഴുള്ളത്.

എക്‌സലന്‍സ് പുരസ്‌കാരം നല്‍കി

തിരുവനന്തപുരം: മികച്ച എക്‌സ്‌പോര്‍ട്ടിംഗ് ബിസിനസിനുള്ള അശ്വധ്വനി മൈത്രിയുടെ എക്‌സലന്‍സ് പുരസ്‌കാരം സബീന എക്‌സ്‌പോര്‍ട്ടിംഗ് മാനേജിംഗ് ഡയറക്ടര്‍ ഷംസുദ്ദീന്‍ ഹാജിക്ക് വ്യവസായ വകുപ്പ് മുന്‍ മന്ത്രിയും മുസ്‌ലീം ലീഗ് ദേശീയ ജനറല്‍ സെക്രട്ടറിയുമായ പി.കെ. കുഞ്ഞാലിക്കുട്ടി നല്‍കി ആദരിച്ചു. മൈത്രി പ്രസിഡന്‍റ് എസ്. കമാലുദ്ദീന്‍ അധ്യക്ഷത വഹിച്ചു. മുസ്‌ലീം ലീഗ് സംസ്ഥാന ജനറല്‍ സെക്രട്ടറി പി.എം.എ. സലാം മംഗളപത്രവും മുസ്‌ലീം ലീഗ് ജില്ലാ പ്രസിഡന്‍റ് ബീമാപള്ളി റഷീദ് പൊന്നാടയും നല്‍കി ആദരിക്കുകയുണ്ടായി. കേരള പ്രവാസി ലീഗ് ജില്ലാ പ്രസിഡന്‍റ് കലാപ്രേമി മാഹീന്‍, ആലംകോട് ഹസന്‍, നിസാര്‍ മുഹമ്മദ്, സുല്‍ഫി ചാന്നാങ്കര, എം.പി.കുഞ്ഞ്, കരമന ഹാരിസ്, അഡ്വ. കണിയാപുരം ഹലീം എന്നിവര്‍ പങ്കെടുത്തു. നൗഷാദ് സ്വാഗതവും ആസിഫ് മുഹമ്മദ് നന്ദിയും പറഞ്ഞു.

ചരിത്ര പുസ്തകം പ്രകാശിപ്പിച്ചു

പേരൂര്‍ക്കട: വലിയശാല വാര്‍ഡിലെ കാന്തള്ളൂര്‍ ശാലയെക്കുറിച്ചു കഴക്കൂട്ടം മിയന്‍ കോളജ് ഓഫ് ആര്‍ക്കിടെക്ചര്‍ ആൻഡ് പ്ലാനിംഗിലെ വിദ്യാര്‍ഥികള്‍ എഴുതിയ പുസ്തകം പ്രകാശിപ്പിച്ചു. കഥ: ദി ടെയില്‍ ബിയോണ്ട് ഈസ്റ്റ് ഫോര്‍ട്ട് എന്ന ചരിത്ര പുസ്തകപ്രകാശന ചടങ്ങ് വലിയശാല ഗ്രാമം ബ്രാഹ്മണസമുദായ ഹാളില്‍ വാര്‍ഡ് കൗണ്‍സിലര്‍ എസ്. കൃഷ്ണകുമാര്‍ നിര്‍വഹിച്ചു. കോളജ് ഡയറക്ടര്‍ പ്രഫ. കെ. ബേബി പോള്‍ അധ്യക്ഷത വഹിച്ചു. ജി. വിശ്വനാഥന്‍ അയ്യര്‍, റവ. എബിന്‍ സ്റ്റാന്‍ലി, ആദര്‍ശ് വിശ്വം തുടങ്ങിയവര്‍ പങ്കെടുത്തു.

കീഴമ്മാകത്ത് ഒന്നാംവിള കൃഷി തുടങ്ങി

നെയ്യാറ്റിന്‍കര: യുവതലമുറക്കാരുടെ സാന്നിധ്യമില്ലെങ്കിലും കീഴമ്മാകം പാടശേഖരത്തില്‍ ഒന്നാംവിള നെല്‍കൃഷിയുടെ നടീല്‍ പ്രവൃത്തികള്‍ പൂര്‍ത്തീകരിച്ചു. ജില്ലയിലെ ഏറ്റവും വലിയ പാടശേഖരമായി അറിയപ്പെടുന്ന ചെങ്കല്‍ പഞ്ചായത്തിലെ കീഴമ്മാകം പാടത്ത് വര്‍ഷങ്ങളായി നെല്‍കൃഷി കാര്യക്ഷമമായി തന്നെ തുടരുന്നുണ്ട്. ഞാറുകള്‍ കൃഷിയിടത്തില്‍ പറിച്ചു നടാനായി കൃഷിയിടം നന്നായി നേരത്തെ തന്നെ ഒരുക്കിയിരുന്നു. ഞാറു നടീല്‍ ചില പാടങ്ങളില്‍ പൂര്‍ത്തിയായി. കീഴമ്മാകം പാടശേഖരത്തിലെ ഒന്നാം വിള നെല്‍കൃഷി ഓണക്കാലത്ത് വിളവെടുക്കാന്‍ ലക്ഷ്യമിട്ടാണ് നടക്കുന്നത്.

അനധികൃതമായി തേക്കിൻ തടികൾ കടത്താൻ ശ്രമിച്ച ലോറി പിടിച്ചെടുത്തു

പാലോട്: അനധികൃതമായി തേക്കിൻ തടികൾ കടത്താൻ ശ്രമിച്ച ലോറി പിടിച്ചെടുത്തു. പാലോട് റേഞ്ചിന്‍റെ പരിധിയിൽ റെയിഞ്ച് ഓഫീസറുടെ നേതൃത്വത്തിൽ പെട്രോളിംഗ് നടത്തുന്നതിനിടയിലാണ് വ്യാജപാസ് ഉപയോഗിച്ച് തടി കടത്താൻ ശ്രമിച്ച വണ്ടി പിടിച്ചെടുത്തത്. തടി കടത്താൻ ശ്രമിച്ച കെ എൽ 59 ഇ 1904 നമ്പർ ലോറിയും വാഹനം ഓടിച്ചിരുന്ന ഡ്രൈവർ രാജേഷിനെയും തടികളും വനം വകുപ്പ് കസ്റ്റഡിയിലെടുത്തു. മുണ്ടക്കയത്തുനിന്നു വെള്ളറടയിലേക്കു തടികൾ കൊണ്ടുപോകാൻ എരുമേലി റേഞ്ചിൽനിന്നും നൽകിയ പാസ് ഉപയോഗിച്ചാണ് പത്തനംതിട്ടയിൽനിന്നും നാഗർകോവിലേക്ക് തേക്കിൻ തടികൾ കടത്താൻ ശ്രമിച്ചത്. ഹൈറേഞ്ച് മേഖലകളിൽനിന്നും ലഭിക്കുന്ന പാസ് ഉപയോഗിച്ച് കൊല്ലം, തിരുവനന്തപുരം ജില്ലകളിൽനിന്നും തമിഴ്നാട്ടിലേക്കു തടികൾ കടത്തുന്ന സംഘമാണു പിടിയിലായത്. തിരുവനന്തപുരം, കൊല്ലം, പത്തനംതിട്ട, ഇടുക്കി, കോട്ടയം ജില്ലകൾ കേന്ദ്രീകരിച്ച് അമ്പതോളം സംഘങ്ങളാണ് ഇത്തരത്തിൽ പ്രവർത്തിക്കുന്നത്. വാഹനം, തടികൾ എന്നിവയിൽ തുടർ നിയമ നടപടികൾ സ്വീകരിക്കുമെന്നു പാലോട് റെയിഞ്ച് ഓഫീസർ വിപിൻ ചന്ദ്രൻ അറിയിച്ചു. എസ്എഫ്ഒ വിനീത, ബിഎഫ്ഒ മാരായ അഭിമന്യു, രാജേഷ്, ഡ്രൈവർ വിനോദ് എന്നിവരുടെ സംഘമാണ് വാഹനം പിടികൂടിയത് പിടികൂടിയത്.

മണ്ണന്തല കൊലപാതകം : പ്രതികളെ നാളെ കസ്റ്റഡിയില്‍ വാങ്ങും

പേരൂര്‍ക്കട: മണ്ണന്തല മരുതൂരിലെ ഹോം സ്റ്റേയില്‍ ഷഹീനയുടെ കൊലപാതകവുമായി ബന്ധപ്പെട്ട് പ്രതികളെ ജൂണ്‍ 27നു പോലീസ് കസ്റ്റഡിയില്‍ വാങ്ങും. യുവതിയുടെ സഹോദരന്‍ ഷംഷാദ്, സുഹൃത്ത് വിശാഖ് എന്നിവരെയാണ് കസ്റ്റഡിയില്‍ വാങ്ങുക. മരുതൂരില്‍ സഹോദരങ്ങള്‍ താമസിച്ചിരുന്ന അത്രക്കാട്ടില്‍ എന്‍ക്ലേവ് ഹോം സ്റ്റേ, ചെമ്പഴന്തി അണിയൂരിലെ താമസസ്ഥലം എന്നിവിടങ്ങളിലാണ് പ്രതികളെ എത്തിക്കുന്നത്. മരുതൂരില്‍ എത്തുന്നതിനുമുമ്പ് അണിയൂരില്‍ കുറച്ചുനാള്‍ ഷംഷാദും ഷഹീനയും വാടകയ്ക്കു താമസിച്ചിരുന്നതായും അതുകൊണ്ടാണ് ഇവിടെ തെളിവെടുപ്പിനെത്തിക്കുകയെന്നും മണ്ണന്തല സിഐ ഡി. ഗോപി പറഞ്ഞു. ജൂണ്‍ 21ന് ഉച്ചയ്ക്ക് രണ്ടോടെയാണു ഹോംസ്റ്റേയില്‍ ബെഡ്‌റൂമിനുള്ളില്‍ ഷഹീനയെ ബോധമറ്റുകിടക്കുന്ന നിലയില്‍ പോലീസ് കണ്ടെത്തുന്നത്. തുടര്‍ന്നുനടന്ന അന്വേഷണത്തിലാണു സംഭവം കൊലപാതകമാണെന്നു കണ്ടെത്തുന്നതും സഹോദരനായ ഷംഷാദും സുഹൃത്ത് വിശാഖും പിടിയിലാകുന്നതും.

പിടികിട്ടാപുള്ളി പിടിയില്‍

പൂന്തുറ: വില്‍പ്പനയ്ക്കായി എത്തിച്ച എംഡിഎംഎ കേസിലെ പിടികിട്ടാപുളളിയെ ഡാന്‍സാഫ് സംഘം എറണാകുളത്തുനിന്നും പിടികൂടി. പേയാട് വിളപ്പില്‍ അശ്വതി ഭവനില്‍ ജിജിന്‍ ആണ് പിടിയിലായത്. മാര്‍ച്ച് 16ന് പൂന്തുറ ഭാഗത്തു പോലീസ് നടത്തിയ പരിശോധനയിലാണ് 2.5 ഗ്രാം എംഡിഎംഎ സഹിതം ഇയാൾ പി ടിയിലായത്. മൊത്തം ഏഴുപേരുണ്ടായിരുന്ന സംഘത്തില്‍ ആറു പേരെയും പൂന്തുറ പോലീസ് നേരത്തെ പിടികൂടിയിരുന്നു. ജിജിന്‍ എറണാകുളം ഭാഗത്തുണ്ടെന്നു പോലീസിനു ലഭിച്ച രഹസ്യ വിവരത്തിന്‍റെ അടിസ്ഥനത്തിലാണ് പോലീസ് സംഘം എറണാകുളത്തേയ്ക്ക് പോയത്. ഡാന്‍സാഫ് എസ്ഐ അജേഷ്‌കുമാറിന്‍റെ നേതൃത്വത്തില്‍ പിടികൂടിയ പ്രതിയെ പൂന്തുറ എസ്എച്ച്ഒ സജീവിന്‍റെ നേതൃത്വത്തില്‍ അറസ്റ്റ് രേഖപ്പെടുത്തുകയായിരുന്നു. പ്രതിയെ കോടതിയില്‍ ഹാജരാക്കി.

നേമം സഹകരണ ബാങ്ക് തട്ടിപ്പ് : പ്രാഥമിക റിപ്പോര്‍ട്ട് പുറത്ത്: ജാമ്യം സ്വീകരിക്കാതെ വായ്പകള്‍ നല്‍കി

നേമം: നേമം സഹകരണ ബാങ്കിന്‍റെ തട്ടിപ്പുകളെക്കുറിച്ചു സഹകരണ വകുപ്പ് നടത്തിയ വകുപ്പുതല അന്വേഷണത്തിന്‍റെ പ്രാഥമിക റിപ്പോര്‍ട്ട് വിവരാവകാശ നിയമ പ്രകാരം പുറത്തായി. മുന്‍ സെക്രട്ടറിമാരുടെ ഭാര്യയുടെയും മക്കളുടെയും പേരില്‍ നിരവധി ലോണുകള്‍ എഴുതി എടുത്തു. മുന്‍ സെക്രട്ടറി ബാലചന്ദ്രന്‍ നായരുടെ ഭാര്യ പി.കെ. ശ്രീകലയുടെയും മറ്റൊരു സെക്രട്ടറി എ.ആര്‍. രാജേന്ദ്രന്‍റെ ഭാര്യ ശ്രീജകുമാരിയുടെയും മക്കളുടെയും മരുമകന്‍റെയും പേരില്‍ ലക്ഷങ്ങള്‍ വായ്പ എടുത്ത് ബാങ്കിനെ പ്രതിസന്ധിയിലാക്കി. ഈ ബാങ്കില്‍നിന്നും സ്വന്തക്കാര്‍ക്കും, പാര്‍ട്ടിക്കാര്‍ക്കും, വേണ്ടപ്പെട്ടവര്‍ക്കും കാര്‍ഷിക ലോണുകള്‍ നാലുശതമാനം മാത്രം പലിശയ്ക്കു നല്‍കി. ഒരാള്‍ക്ക് പത്തു ലക്ഷം രൂപ നാലു ശതമാനം പലിശയ്ക്ക് കാര്‍ഷിക വായ്പയായി നല്‍കി. ബാങ്കില്‍നിന്നും 10 ലക്ഷം നാലുശതമാനം പലിശയ്ക്കു കാര്‍ഷിക വായ്പ എടുത്തിട്ട് ആ 10 ലക്ഷം ലോണ്‍ എടുത്ത അതേ ദിവസം ഈ ബാങ്കില്‍ അയാളുടെ പേരില്‍ തന്നെ ഈ ബാങ്കില്‍ 9.5 ശതമാനം പലിശക്ക് ഡിപ്പോസിറ്റ് ചെയ്യുകയും മാസം തോറും 9500 രൂപ കൈപ്പറ്റിയതായും രേഖകളില്‍ പറയുന്നു. ഭരണ സമിതി തെരഞ്ഞെടുപ്പ് പോലും സുതാര്യമായി അല്ല നടത്തിയിട്ടുള്ളതെന്നു രേഖകളില്‍ വ്യക്തമായി പറയുന്നു. പ്രസിഡന്‍റ് വി. പ്രഭാകരന്‍ നായരെ ചട്ടവിരുദ്ധമായി തെരഞ്ഞെടുത്തു. 2018-നുശേഷം പൊതുയോഗം ചേര്‍ന്നിട്ടില്ല. ലോണ്‍ എടുക്കുന്നവരില്‍നിന്നും അവരെ കബളിപ്പിച്ചു ലക്ഷങ്ങള്‍ എഴുതി എടുത്തുവെന്നു തുടങ്ങിയ ഗുരുതരമായ തട്ടിപ്പുകളാണ് പുറത്തായത്. പലിശ ഇനത്തിലും വായ്പ നല്‍കിയ ഇനത്തിലും കോടികണക്കിനു രൂപയാണ് ബാങ്കിനു കിട്ടുനുള്ളതെന്നു റിപ്പോര്‍ട്ട് ചൂണ്ടികാണിക്കുന്നു. തട്ടിപ്പിലുള്‍പ്പെട്ട മുഴുവന്‍ പേരെയും അറസ്റ്റുചെയ്യണമെന്നു നിക്ഷേപ കൂട്ടായ്മ രക്ഷാധികാരി ശാന്തിവിള മുജീബ് റഹ്‌മാനും കണ്‍വീനര്‍ കൈമനം സുരേഷും ആവശ്യപ്പെട്ടു.

ബസിൽ വിദ്യാർഥിനിക്കുനേരെ അതിക്രമം: ഒരാൾ പിടിയിൽ

കാട്ടാക്കട: കെഎസ്ആര്ടിസി ബസിനുള്ളിൽ പ്രായപൂർത്തിയാകാത്ത വിദ്യാർഥിനിയെ ശല്യം ചെയ്ത ആളെ യാത്രക്കാർ പിടികൂടി പോലിസിന് കൈമാറി. പോക്സോ കേസ് രജിസ്റ്റർ ചെയ്ത് കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. കാട്ടാക്കട കുരുതംകോട് അയണിയറത്തല വീട്ടിൽ അനീഷി (35) നെയാണ് യാത്രക്കാരുടെ ഇടപെടലിൽ പോലീസ് കസ്റ്റഡിയിൽ എടുത്തത്. ചൊവാഴ്ച വൈകുന്നേരം 5.30 ഓടെ വെള്ളറടയിൽനിന്നും തിരുവനന്തപുരത്തേക്കു വന്ന ബസിൽ ആയിരുന്നു സംഭവം. ബസിൽ കയറിയ ഇയാൾ പെൺകുട്ടി ഇരുന്ന സീറ്റിൽ വന്നിരിക്കുകയും അപമര്യാദയായി പെരുമാറുകയുമായിരുന്നു. പെൺകുട്ടി ബഹളം വച്ചതോടെ മറ്റുയാത്രക്കാരും ജീവനക്കാരും ചേർന്ന് ഇയാളെ തടഞ്ഞുവച്ചു പോലിസിനു മാറുകയായിരുന്നു. കാട്ടാക്കടയിൽ ബിവറേജസിൽ പോകാനായിരുന്നു ഇയാൾ ബസിൽ കയറിയത്. അവിവാഹിതനായ ഇയാൾ കൂലി പണിക്കാരൻ ആണ്. ബുധനാഴ്ച കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

പണംതട്ടാൻ ശ്രമിച്ച കേസിൽ യുവാവ് അറസ്റ്റിൽ

കാട്ടാക്കട: പോക്സോ കേസിലെ പ്രതിയെ ഇൻസ്റ്റഗ്രാം വഴി പരിചയപ്പെട്ടു പണം തട്ടാൻ ശ്രമിച്ച കേസിൽ യുവാവ് അറസ്റ്റിൽ. വെള്ളനാട് മുണ്ടേല കൊല്ലംകുഴി പുത്തൻവീട്ടിൽ അരുണിനെയാണ് (21) അറസ്റ്റ് ചെയ്തത്. ഇയാളെ കാട്ടാക്കട കോടതി ജാമ്യത്തിൽ വിട്ടയച്ചു. പൂവച്ചൽ ആലമുക്ക് പാറപ്പൊറ്റ ഷാജഹാൻ മൻസിലിൽ ഷാജഹാനെയാണ് (48) മൂന്നുപേർ ചേർന്നു തട്ടിപ്പിനിരയാക്കിയത്. തിങ്കളാഴ്ച രാത്രി ഒന്പതോടെ പണം വാങ്ങാനെത്തിയ ഇവരെ നാട്ടുകാർ പിടികൂടി കാട്ടാക്കട പൊലീസിൽ ഏല്പിക്കുകയായിരുന്നു.'അച്ചൂസ് ഗോൾസ്' എന്ന ഇൻസ്റ്റഗ്രാം അക്കൗണ്ടിൽ പെൺകുട്ടിയായി നടിച്ച്, ഷാജഹാനുമായി സൗഹൃദം സ്ഥാപിച്ചായിരുന്നു പ്രതികൾ പണം തട്ടിയത്. അരുണിനാണ് പലതവണകളായി ഗൂഗിൾ പേ വഴി ഷാജഹാൻ പണം അയച്ചത്. പ്രതികൾ വീണ്ടും വീണ്ടും പണം ആവശ്യപ്പെട്ടുകൊണ്ടിരുന്നു. പണം നൽകാൻ ഷാജഹാൻ മടിച്ചതോടെ ഇയാളുടെ ഭാര്യയെ ഫോൺ വിളിച്ച് വ്യാജ ആരോപണങ്ങൾ ഉന്നയിക്കുകയായിരുന്നു. ഷാജഹാൻ തന്‍റെ സഹോദരിയെ പീഡിപ്പിച്ചെന്ന് അരുൺ ആരോപിക്കുകയും ഭീഷണിപ്പെടുത്തുകയും പരിഹാരമായി 60,000 രൂപ ആവശ്യപ്പെടുകയുമായിരുന്നു. തുടർന്ന് ബന്ധുക്കളുടെ സഹായത്തോടെ പ്രതികളെ തന്ത്രപൂർവം ആലമുക്കിലേക്ക് വിളിച്ചുവരുത്തി പിടികൂടി പോലീസിനു കൈമാറുകയായിരുന്നു. രണ്ടു പ്രതികൾ പ്രായപൂർത്തിയാകാത്തവർ ആയതിനാൽ ചൈൽഡ് വെൽഫെയർ കമ്മിറ്റിക്ക് മുൻപാകെ ഹാജരാക്കി തുടർ നടപടികൾ സ്വീകരിക്കുമെന്നു കാട്ടാക്കട പോലീസ് അറിയിച്ചു.

കൃഷ്ണകുമാറിന്‍റെയും മകളുടെയും മുൻകൂർ ജാമ്യം: വിധി ഇന്ന്

തിരുവനന്തപുരം: നടൻ കൃഷ്ണകുമാറിന്‍റെ മകൾ ദിയ കൃഷ്ണയുടെ സ്ഥാപനത്തിലെ ജീവനക്കാർ നൽകിയ പരാതിയിൽ കൃഷ്ണകുമാറും മകൾ ദിയ കൃഷ്ണയും നൽകിയ മുൻകൂർ ജാമ്യാപേക്ഷയിൽ വിധി ഇന്ന്. പരാതിക്കാരിയെ തട്ടിക്കൊണ്ടു പോയി എന്നു പറയുന്നതല്ലാതെ ഒരു തെളിവും ലഭിച്ചിട്ടില്ലെന്നു പോലീസ് റിപ്പോർട്ട് നൽകി. പോലീസ് റിപ്പോർട്ടിനെ അനുകൂലിക്കുന്ന തരത്തിലായിരുന്നു പ്രതിഭാഗത്തിന്‍റെ വാദവും. ഫലത്തിൽ കൃഷണകുമാറിന് അനുകൂലമായ റിപ്പോർട്ടാണ് പോലീസ് നൽകിയിരിക്കുന്നത്. ഇതിനിടയിൽ ജീവനക്കാരായ വിനീത അടക്കമുള്ളവർ പ്രതികളായ കേസിൽ ഇരുവരുടെയും ജാമ്യാപേക്ഷയിൽ ഇന്നലെ ഉത്തരവു പറയാൻ തീരുമാനിച്ചിരുന്നെങ്കിലും പോലീസ് റിപ്പോർട്ടിൽ വ്യക്തതക്കുറവുണ്ടെന്നു ചൂണ്ടിക്കാട്ടി വീണ്ടും വാദം കേൾക്കാനായി കേസ് ഇന്നത്തേക്കു മാറ്റി. തിരുവനന്തപുരം പ്രിൻസിപ്പിൽ സെഷൻസ് കോടതിയാണ് ഹർജികൾ പരിഗണിക്കുന്നത്. ജീവനക്കാർക്കെതിരെ കൃഷ്ണകുമാറും കൃഷ്ണകുമാറിനും കുടുംബത്തിനുമെതിരെ ജീവനക്കാരും പരാതി നൽകിയിരുന്നു. ഈ കേസുമായി ബന്ധപ്പെട്ടാണ് ജാമ്യാപേക്ഷ സമർപ്പിച്ചത്.

വെട്ടുകാട് പള്ളിക്കു സമീപം നഗരസഭയുടെ പാര്‍ക്ക് തകര്‍ന്നു

നടപടി ആവശ്യപ്പെട്ട് മത്സ്യത്തൊഴിലാളി ഫെഡറേഷന്‍ വലിയതുറ: വെട്ടുകാട് മാദ്രേ ദേ ദേവൂസ് പള്ളിക്കു പടിഞ്ഞാറു വശത്ത് തിരുവനന്തപുരം നഗരസഭയുടെ നിര്‍മാണത്തിലിരുന്ന പാര്‍ക്ക് ഉദ്ഘാടനത്തിനു മുമ്പു രണ്ടായി പിളര്‍ന്ന സംഭവത്തില്‍ ബന്ധപ്പെട്ട ഉദ്യോഗസ്ഥര്‍ക്കെതിരെ കര്‍ശന നടപടി സ്ഥീകരിക്കണമെന്ന് സ്വതന്ത്ര മത്സ്യത്തൊഴിലാളി ഫെഡറേഷന്‍. കേരളത്തിലെ പ്രധാന തീർഥാടന കേന്ദ്രങ്ങളിലൊന്നായ വെട്ടുകാട് പള്ളിയിലും പരിസരത്തും യാതൊരു ദീർഘവീക്ഷണവുമില്ലാതെയാണ് 46 ലക്ഷം രൂപ ചെലവിൽ നിർമാണ പ്രവൃത്തികൾ നടത്തിയത്. കൃത്യമായ പ്ലാനിംഗില്ലാതെ നടത്തിയ നിർമാണമാണ് തകർന്നിരിക്കുന്നത്. പാര്‍ക്ക് തകരാനുള്ള കാരണം ബന്ധപ്പെട്ട അധികൃതരുടെ അനാസ്ഥയാണെന്നും ഇവര്‍ക്കെതിരെ കര്‍ശന നടപടി സ്ഥീകരിക്കണമെന്നും സ്വതന്ത്ര മത്സ്യത്തൊഴിലാളി ഫെഡറേഷന്‍ സംസ്ഥാന പ്രസിഡന്‍റ് പി. സ്റ്റെല്ലസ് ആവശ്യപ്പെട്ടു. 12 എംഎം മുതല്‍ എട്ട് എംഎം വരെ കനം കുറഞ്ഞ കമ്പി ഉപയോഗിച്ചാണ് പണി നടത്തിയിരിക്കുന്നത്. പണി നടക്കുമ്പോള്‍ ജനപ്രതിനിധി തിരിഞ്ഞുപോലും നോക്കിയിട്ടില്ലെന്നും പരാതിയുയരുന്നു. ‌പാര്‍ക്ക് രണ്ടായി പിളര്‍ന്നതിനുസമീപം സ്ഥാപിച്ചിട്ടുളള രണ്ട് ഹൈമാസ്റ്റ് ലൈറ്റ് ഏതു നിമിഷവും തകര്‍ന്നുവീഴാവുന്ന അവസ്ഥയിലാണ്. ഹൈമാസ്റ്റ് ലൈറ്റ് നീക്കം ചെയ്യാതെ വന്നാല്‍ സമീപത്തായി പാര്‍ക്ക് ചെയ്യുന്ന വാഹനങ്ങള്‍ക്കു മുകളില്‍ പതിക്കുമെന്നുള്ള കാര്യത്തില്‍ സംശയമില്ല. പാര്‍ക്കിന്‍റെ പണി തുടങ്ങിയ അന്നുമുതല്‍ ഇന്നുവരെ നഗരസഭയില്‍നിന്നോ ടൂറിസം വകുപ്പില്‍നിന്നോ ഒരു ഉദ്യോഗസ്ഥരും ഇവിടെ എത്തിയിരുന്നില്ല. നിര്‍മാണത്തിലിരിക്കുന്ന പാര്‍ക്കിന്‍റെ ജോലി നോക്കാന്‍ പള്ളിക്കമ്മിറ്റിയിലെ രണ്ടുപേരെയാണ് ഏല്‍പ്പിച്ചിരുന്നതെന്നും ആക്ഷേപമുയരുന്നു. ജൂണ്‍-ജൂലൈ മാസങ്ങളില്‍ ശക്തമായ കടല്‍ക്ഷോഭം ഉണ്ടാകുമെന്ന് അറിഞ്ഞിരുന്നിട്ടും മേയ് മാസം മധ്യേ പണി ആരംഭിക്കുകയായിരുന്നു. ഇത്തരത്തില്‍ അശാസ്ത്രീയമായ നിര്‍മാണ പ്രവര്‍ത്തികള്‍ നടത്തുകയും ലക്ഷങ്ങളുടെ നഷ്ടം വരുത്തുകയും വളരെ പ്രാധാന്യമേറിയ തീര്‍ഥാടന കേന്ദ്രത്തിന്‍റെ മുന്നിലുള്ള സ്ഥലത്ത് സാങ്കേതിക വിജ്ഞാനം ഇല്ലാതെ പാര്‍ക്ക് നിര്‍മാണം നടത്തിയ ഉദ്യോഗസ്ഥര്‍ക്കെതിരെ നടപടി കൈക്കൊളളണമെന്നും സ്റ്റെല്ലസ് ആവശ്യപ്പെട്ടു.

യുഡിഎഫ് അധികാരത്തിൽ എത്തിയാൽ കാര്യക്ഷമതയുള്ള സെക്രട്ടേറിയറ്റ് ആക്കുമെന്നു വി.ഡി.സതീശൻ

തിരുവനന്തപുരം: യുഡിഎഫ് സർക്കാർ അധികാരത്തിൽ എത്തിയാൽ കേരളത്തിന്‍റെ ഭരണസിരാകേന്ദ്രമായ സെക്രട്ടേറിയറ്റിനെ രാജ്യത്തെ മികച്ച കാര്യക്ഷമതയുള്ള ഭരണകേന്ദ്രമാക്കി മാറ്റുമെന്നു പ്രതിപക്ഷ നേതാവ് വി.ഡി. സതീശൻ. കേരള സെക്രട്ടേറിയറ്റ് അസോസിയേഷൻ വജ്രജൂബിലി സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. മൂന്നാം പിണറായി എന്ന് കേൾക്കുന്പോൾ ജനങ്ങളും ജീവനക്കാരും തലയിൽ കൈവയ്ക്കുന്ന അവസ്ഥയിലാണ്. മൂന്നാം പിണറായി സർക്കാരെന്നു സിപിഎമ്മുകാർ പ്രചരിപ്പിക്കുന്നത് യുഡിഎഫിന് ഗുണം ചെയ്യുമെന്നാണ് സാധാരണക്കാർ പറയുന്നത്. നിലന്പൂർ നിയമസഭാ തെരഞ്ഞെടുപ്പിൽ അത് അനുഭവേദ്യമായി. സംസ്ഥാന സർക്കാർ ജീവനക്കാരോട് ഇത്ര അവഗണന കാണിച്ച സർക്കാർ ചരിത്രത്തിൽ ഉണ്ടായിട്ടില്ല. പുതിയ ശന്പള പരിഷ്കരണ കമ്മീഷൻ ആനുകൂല്യം ലഭിക്കേണ്ട സമയം കഴിഞ്ഞു. എന്നിട്ടും പഴയ പേ റിവിഷൻ കുടിശിക പോലും കൊടുത്തു തീർത്തിട്ടില്ല. സർക്കാർ ജീവനക്കാർക്കും പെൻഷൻകാർക്കും ഒരു ലക്ഷം കോടി രൂപ വരെ ഈ സർക്കാർ കുടിശിക ഇനത്തിൽ നൽകാനുണ്ട്. സംസ്ഥാനത്തു വൈദ്യുതി ചാർജ് ആറ് മാസത്തിനകം മൂന്നുതവണ കൂട്ടി. വൈദ്യുതി ബോർഡ് കടം 1000 കോടി രൂപയിൽ നിന്ന് 45,000 കോടിയാക്കി മാറ്റിയതായും വി.ഡി. സതീശൻ ആരോപിച്ചു. സെക്രട്ടേറിയറ്റ് അസോസിയേഷൻ പ്രസിഡന്‍റ് എം.എസ്. ഇർഷാദ് അധ്യക്ഷനായിരുന്നു. കെപിസിസി മുൻ പ്രസിഡന്‍റ് എം.എം. ഹസൻ, എംഎൽഎമാരായ പ്രഫ. ആബിദ് ഹുസൈൻ തങ്ങൾ, സജീവ് ജോസഫ്, യുഡിഎഫ് സെക്രട്ടറി സി.പി. ജോണ്‍, കെപിസിസി ജനറൽ സെക്രട്ടറിമാരായ മര്യാപുരം ശ്രീകുമാർ, എം. ലിജു, ഡിസിസി പ്രസിഡന്‍റ് പാലോട് രവി, ജോസഫ് വാഴക്കൻ എക്സ്, ഷാനിമോൾ ഉസ്മാൻ, അബിൻ വർക്കി, കെ.പി പുരുഷോത്തമൻ, കെ.എം. അനിൽകുമാർ എന്നിവർ പ്രസംഗിച്ചു. തുടർന്നു നടന്ന പൊതുസമ്മേളനം കെപിസിസി പ്രസിഡന്‍റ് സണ്ണി ജോസഫ് ഉദ്ഘാടനം ചെയ്തു. രാവിലെ പ്രസിഡന്‍റ് എം.എസ്. ഇർഷാദ് പതാക ഉയർത്തിയതോടെ രണ്ടു ദിവസം നീണ്ടു നിൽക്കുന്ന സമ്മേളനത്തിനു തുടക്കമായി. സെക്രട്ടേറിയറ്റിനു സമീപത്തുനിന്നും ആരംഭിച്ച പ്രകടത്തിൽ നൂറുകണക്കിനു ജീവനക്കാർ പങ്കെടുത്തു. ചന്ദ്രശേഖരൻനായർ സ്റ്റേഡിയത്തിൽ പ്രകടനം സമാപിച്ചു.

സ്ഥലത്ത് വന്‍ പോലീസ് സന്നാഹം

തിരുവനന്തപുരം: സെനറ്റ് ഹാളില്‍ ശ്രീ പത്മനാഭ സേവാ സമിതി ഇന്നലെ സംഘടിപ്പിച്ച പരിപാടിയില്‍ കാവിക്കൊടിയേന്തിയ ഭാരതാംബയുടെ ചിത്രം വച്ചതിനെതുടര്‍ന്നുണ്ടായ സംഘര്‍ഷം നിയന്ത്രിക്കുന്നതിനായി എത്തിയതു വന്‍ പോലീസം സംഘം. ഗവര്‍ണര്‍ കേരള യൂണിവേഴ്‌സിറ്റിയില്‍ പരിപാടിക്ക് എത്തുമെന്ന് അറിഞ്ഞതിനെ തുടര്‍ന്ന് ഉച്ചകഴിഞ്ഞു നാലോടെ വന്‍ പോലീസ് സംഘമാണ് സ്ഥലത്തെത്തിയത്. 5.30ന് ആണ് പരിപാടി തുടങ്ങേണ്ടിയിരുന്നതെങ്കിലും ഒരു മണിക്കൂറോളം വൈകിയാണു പരിപാടി ആരംഭിച്ചത്. ഗവര്‍ണര്‍ എത്തുമെന്ന് ഉറപ്പായതിനെ തുടര്‍ന്നാണു കെഎസ്‌യു- എസ് എഫ്‌ഐ പ്രവര്‍ത്തകര്‍ പ്രതിഷേധം കടുപ്പിച്ചത്. ഗവര്‍ണര്‍ ഉദ്ഘാടകനായ പരിപാടി ആരംഭിക്കുന്നതിനു മുന്നേതന്നെ സംഘര്‍ഷം തുടങ്ങിയിരുന്നു. പരിപാടി നടന്ന ഹാളിനകത്ത് ആദ്യം കെഎസ്‌യു പ്രവര്‍ത്തകര്‍ മുദ്രാവാക്യം വിളകളോടെ പ്രതിഷേധിച്ചു. ‌ തുടര്‍ന്നു സംഘാടകരും പോലീസും ചേര്‍ന്ന് ഇവരെ ഹാളില്‍ നിന്നും പുറത്തേയ്ക്ക് ബലപ്രയോഗത്തിലൂടെ നീക്കി. ഗവര്‍ണര്‍ എത്തിയതോടെ യൂണിവേഴ്‌സിറ്റി കവാടത്തിനു മുന്നില്‍ തമ്പടിച്ചിരുന്ന എസ്എഫ്‌ഐ പ്രവര്‍ത്തകര്‍ പ്രതിഷേധവുമായി ഗവര്‍ണറുടെ വാഹനത്തിന് മുന്നിലേയ്ക്ക് എത്തി. ഏറെ പണിപ്പെട്ടാണ് പ്രവര്‍ത്തകരെ നീക്കം ചെയ്ത് പോലീസ് ഗവര്‍ണര്‍ക്ക് സുരക്ഷയൊരുക്കിയത്. സെനറ്റ് ഹാളിനു പുറത്ത് ആര്‍എസ്എസിന്‍റെ തറവാട്ട് സ്വത്തല്ല രാജ്ഭവന്‍ എന്നെഴുതിയ ബാനറും എസ്എഫ്‌ഐ പ്രദര്‍ശിപ്പിച്ചിരുന്നു. രാത്രി വൈകിയും സ്ഥലത്ത് പോലീസ് ക്യാമ്പ് ചെയ്യുന്നുണ്ട്. സംഘാടകർ നിര്‍ദേശങ്ങള്‍ ലംഘിച്ചതായി രജിസ്ട്രാര്‍ തിരുവനന്തപുരം: സെനറ്റ് ഹാളിലെ പരിപാടിയുടെ സംഘാടകരായ ശ്രീ പത്മനാഭ സേവാ സമിതി പ്രവര്‍ത്തകര്‍ സര്‍വകലാശാല നല്‍കിയ നിര്‍ദേശങ്ങള്‍ ലംഘിച്ചതായി രജിസ്ട്രാര്‍. പ്രത്യേക ചിത്രങ്ങളൊന്നും പ്രദര്‍ശിപ്പിക്കരുതെന്ന നിബന്ധനയിലാണു ഹാള്‍ അനുവദിച്ചതെന്നും അതു സംഘാടകര്‍ ലംഘിച്ചതായും രജിസ്ട്രാര്‍ ആരോപിച്ചു. ഇതു സംബന്ധിച്ചു നിയമ നടപടി തേടുമെന്നും കേരള സര്‍വകലാശാല രജിസ്ട്രാര്‍ അറിയിച്ചു. മതചിഹ്നങ്ങള്‍ ഉപയോഗിച്ചു മുന്നോട്ടു പോകാനുള്ള ഗവര്‍ണറുടെ നടപടിയെ ഭരണ ഘടന ഉപയോഗിച്ചു ചെറുക്കുമെന്ന് എസ്എഫ്‌ഐ നേതാക്കള്‍ പ്രതികരിച്ചു. ഈ നിലയില്‍ കേരളത്തില്‍ ഒരിടത്തും ഗവര്‍ണര്‍ക്കു പങ്കെടുക്കാന്‍ കഴിയില്ലെന്നും അവര്‍ അറിയിച്ചു. റിപ്പോർട്ട് ചെയ്യാനെത്തിയ മാധ്യമസംഘത്തിനു മര്‍ദനമേറ്റു തിരുവനന്തപുരം: കേരള സര്‍വകലാശാല സെനറ്റ് ഹാളില്‍ ഗവര്‍ണര്‍ പങ്കെടുത്ത പരിപാടി റിപ്പോര്‍ട്ട് ചെയ്യാനെത്തിയ മീഡിയാവണ്‍ വാര്‍ത്താ സംഘത്തെ എബിവിപി - യുവമോര്‍ച്ച പ്രവര്‍ത്തകര്‍ മര്‍ദിച്ചതില്‍ കേരള പത്രപ്രവര്‍ത്തക യൂണിയന്‍ ജില്ലാ കമ്മിറ്റി ശക്തമായി പ്രതിഷേധിച്ചു. പ്രകോപനമില്ലാതെയായിരുന്നു മര്‍ദനം. വാര്‍ത്താസംഘത്തിലെ സജിന്‍ലാലിനാണ് കൂടുതല്‍ മര്‍ദനമേറ്റത്. മാധ്യമപ്രവര്‍ത്തനത്തെ തല്ലിയൊതുക്കാമെന്ന മനഃസ്ഥിതി യുവ രാഷ്ട്രീയപ്രവര്‍ത്തകരില്‍ തന്നെ വളര്‍ന്നു വരുന്നത് ജനാധിപത്യത്തിനു ഭൂഷണമല്ല. മര്‍ദിച്ചവര്‍ക്കെതിരെ കേസെടുത്ത് ശക്തമായ നിയമ നടപടികള്‍ സ്വീകരിക്കണമെന്നു ജില്ലാ പ്രസിഡന്‍റ് ഷില്ലര്‍ സ്റ്റീഫനും ജില്ലാ സെക്രട്ടറി അനുപമ ജി. നായരും ആവശ്യപ്പെട്ടു.

കേരള സർവകലാശാല ആസ്ഥാനത്ത് വൻ സംഘര്‍ഷം : വീണ്ടും ഭാരതാംബ ചിത്ര വിവാദം

സെനറ്റ് ഹാളിൽ അരങ്ങേറിയത് നാടകീയ രംഗങ്ങൾ തിരുവനന്തപുരം: ഭാരതാംബ ചിത്ര വിവാദത്തെത്തുടര്‍ന്നു കേരള സര്‍വകലാശാല ആസ്ഥാനത്തു വന്‍ സംഘര്‍ഷം. കേരള സര്‍വകലാശാല ആസ്ഥാനത്തെ സെനറ്റ് ഹാളില്‍ ശ്രീപത്മനാഭ സേവാസമിതി സംഘടിപ്പിച്ച അടിയന്തരാവസ്ഥ അന്‍പതാം വാര്‍ഷികവുമായി ബന്ധപ്പെട്ട പരിപാടിയെതുടര്‍ന്നായിരുന്നു സംഘര്‍ഷം ഉണ്ടായത്. വേദിയില്‍ കാവിക്കൊടിയേന്തിയ ഭാരതാംബയുടെ ചിത്രം സംഘാടകര്‍ വച്ചതിനെതുടര്‍ന്നായിരുന്നു എസ്എഫ്‌ഐ, കെഎസ്‌യു പ്രവര്‍ത്തകരുടെ നേതൃത്വത്തില്‍ പ്രതിഷേധം നടന്നത്. സര്‍വകലാശാല ആസ്ഥാനത്തെ ഹാളില്‍ ഭാരതാംബയുടെ ചിത്രം ഉപയോഗിക്കാനുള്ള തീരുമാനം സംബന്ധിച്ച വാര്‍ത്തകള്‍ പുറത്തു വന്നതിനു പിന്നാലെ രജിസ്ട്രാര്‍ പരിപാടി റദ്ദാക്കിയെങ്കിലും പങ്കെടുക്കുമെന്ന നിലപാടില്‍ ഗവര്‍ണര്‍ രാജേന്ദ്ര വിശ്വ നാഥ് ആർലേക്കർ ഉറച്ചു നില്‍ക്കുകയും പരിപാടിയില്‍ പങ്കെടുക്കുകയുമായിരുന്നു. ഇതോടെ ഗവര്‍ണറെ തടയുന്നതിനായി സര്‍വകലാശാല ആസ്ഥാനത്ത് പ്രതിഷേധവുമായി എസ്എഫ്‌ഐ പ്രവര്‍ത്തകര്‍ തടിച്ചുകൂടി. പിന്നാലെ കെഎസ്‌യു പ്രവര്‍ത്തകരും എത്തിയതോടെ സര്‍വകലാശാല ആസ്ഥാനം പ്രതിഷേധ ഭൂമിയായി. ഗവര്‍ണര്‍ എത്തിയാല്‍ തടയുന്നതിനായി എസ്എഫ്‌ഐ പ്രവര്‍ത്തകര്‍ സെനറ്റ് ഹാളിനു മുന്നിലായി സംഘടിച്ചിരുന്നു. ഇവരെ പോലീസ് ബലം പ്രയോഗിച്ചു നീക്കിയത് സംഘര്‍ഷത്തില്‍ കലാശിച്ചു. എസ്എഫ്‌ഐ പ്രവര്‍ത്തകര്‍ സര്‍വകലാശയുടെ മുഖ്യ കവാടത്തിലെ ഗേറ്റ് ബലമായി അടയ്ക്കാന്‍ ശ്രമിച്ചെങ്കിലും പോലീസ് തടഞ്ഞു. പരിപാടിയില്‍നിന്നു വിട്ടു നില്‍ക്കണമെന്നാവശ്യപ്പെട്ട് രജിസ്ട്രാര്‍ രാജ്ഭവനുമായി ബന്ധപ്പെട്ടെങ്കിലും ഇതില്‍ എന്തു മത ചിഹ്നമാണുള്ളതെന്നും പരിപാടിയില്‍നിന്നു വിട്ടുനില്‍ക്കില്ലെന്നും ഗവര്‍ണര്‍ ഉറച്ച നിലപാടെടുത്തു. പിന്നാലെ വന്‍ പോലീസ് സുരക്ഷയില്‍ വൈകുന്നേരം ആറരയോടെ ഗവര്‍ണര്‍ സര്‍വകലാശാല ആസ്ഥാനത്തെത്തി. നന്നേ പണിപ്പെട്ടാണ് സമരക്കാര്‍ക്കിടയില്‍നിന്നു ഗവര്‍ണറെ പോലീസ് സുരക്ഷിതമായി വേദിയിലേക്കെത്തിച്ചത്. ഗവര്‍ണറെ തടയാനായി ഓടിയെത്തിയ പ്രതിഷേധക്കാരും പോലീസും തമ്മില്‍ ഏറ്റുമുട്ടി. സെനറ്റ് ഹാളിനുള്ളില്‍ കടന്ന എസ്എഫ്‌ഐ പ്രവര്‍ത്തകരും പോലീസും തമ്മിലും സംഘര്‍ഷമുണ്ടായി. ഇതിനിടെ ഗവര്‍ണര്‍ സെനറ്റ് ഹാളിന്‍റെ വേദിയില്‍ പ്രവേശിക്കുകയും ഭാരതാംബ ചിത്രത്തില്‍ പുഷ്പാര്‍ച്ചന നടത്തുകയും ചെയ്തു. തുടര്‍ന്നു സര്‍വകലാശാല ആസ്ഥാനത്തിന്‍റെ എല്ലാ ഗേറ്റുകളിലും പ്രതിഷേധക്കാര്‍ തമ്പടിച്ചു. പിന്നീട് ഒരു വിഭാഗം പ്രതിഷേധക്കാര്‍ എംഎല്‍എ ഹോസ്റ്റലിനു മുന്നിലെ റോഡില്‍ മടങ്ങിവരുന്ന ഗവര്‍ണറെ തടയാനായും നിലയുറപ്പിച്ചു. പ്രതിഷേധത്തെ തുടര്‍ന്നു പരിപാടിക്കു ശേഷം ഗവര്‍ണറെ മറ്റൊരു വഴിയിലൂടെയാണ് പൊലീസ് പുറത്തെത്തിച്ചത്.

പന്പിലെ ജീവനക്കാരൻ വിശ്രമമുറിയിൽ തൂങ്ങിമരിച്ച നിലയിൽ

കല്ലറ: പെട്രോൾ പമ്പിലെ ജീവനക്കാരനെ തൂങ്ങിമരിച്ച നിലയിൽ കാണപ്പെട്ടു. അരിവാരിക്കുഴി റേഷൻ കടയ്ക്ക് സമീപം ശാന്തൻ (73) നെയാണ് തൂങ്ങിമരിച്ച നിലയിൽ കണ്ടത്. കല്ലറ പള്ളിമുക്കിലെ ഇന്ത്യൻ ഓയിൽ കോർപറേഷൻ പമ്പിലെ പിൻഭാഗത്തെ വിശ്രമമുറിയിലാണ് മറ്റ് ജീവനക്കാർ നോക്കിയപ്പോഴാണ് ശാന്തനെ തൂങ്ങിമരിച്ച നിലയിൽ കണ്ടത്. ഇദ്ദേഹം സ്ഥിരമായി കഴിയുന്ന മുറിയാണിത്. ഭാര്യ സുധർമ. രണ്ട് മക്കളുണ്ട്. പാങ്ങോട് പോലീസ് എത്തി മേൽ നടപടികൾ സ്വീകരിച്ചു വരുന്നു.

ജി. ശങ്കരപ്പിള്ള പുരസ്കാരം

വെഞ്ഞാറമൂട് : പ്രഫ. ജി. ശങ്കരപിള്ള മെമ്മോറിയൽ സെന്‍റർ ഓഫ് പെർഫോമിംഗ് ആർട്സും രംഗപ്രഭാതും സംയുക്തമായി സംഘടിപ്പിച്ച പ്രഫ. ജി. ശങ്കരപ്പിള്ള സ്മാരക പുരസ്കാരം അന്തർദേശീയ നാടക പ്രതിഭ പ്രഫ. ബി. അനന്തകൃഷ്ണന് സമർപ്പിച്ചു. രംഗപ്രഭാത് നാടക ഗ്രാമത്തിൽ നടന്ന ചടങ്ങിൽ അഡ്വ. ഡി.കെ. മുരളി എംഎൽഎ പുരസ്‌കാരം സമർപ്പിച്ചു. ഡോ. എൻ. രാധാകൃഷ്ണൻ അധ്യക്ഷത വഹിച്ചു. സ്റ്റേറ്റ് ലൈബ്രറി കൗൺസിൽ സെക്രട്ടറി വി.കെ. മധു. വിശിഷ്ട അതിഥിയായി പങ്കെടുത്തു. നാടക സിനിമ മാധ്യമപ്രവർത്തകൻ ജോൺ സാമുവൽ, പ്രഫ.ജി ശങ്കരപ്പിള്ള സ്മാരക പ്രഭാഷണം നടത്തി. കെ. ശശികുമാർ സിത്താര സ്വാഗതം പറഞ്ഞു. കെ. എസ്. വിപിനചന്ദ്രൻ, പി.കെ. വേണുഗോപാൽ, എസ്. ഹരികൃഷ്ണൻ, കെ.എസ്. ഗീത, രാജീവ് വെഞ്ഞാറമൂട്, എസ്. അനിൽകുമാർ, എസ്. ഹരീഷ് എന്നിവർ പങ്കെടുത്തു. തുടർന്ന് പ്രഫ. ജി. ശങ്കരപ്പിള്ള രചിച്ച് എസ്. അനിൽകുമാർ സംവിധാനം നിർവഹിച്ച ഇരുളിൽ അലിയുന്ന സന്ധ്യ എന്ന നാടകം പ്രഫ. ജി ശങ്കരപ്പിള്ള മെമ്മോറിയൽ സെന്‍റർ ഓഫ് പെർഫോമിംഗ് ആർട്സ് അവതരിപ്പിച്ചു. ചിത്രലേഖ, വിഷ്ണു മോഹൻ, അമൽ ജി. നാഥ് എന്നിവർ മുഖ്യ കഥാപാത്രങ്ങളെ അവതരിപ്പിച്ചു.

തിരുവല്ലത്തെ മോഷണം: പ്രതി പിടിയിൽ

തിരുവല്ലം: പരശുരാമസ്വാമി ക്ഷേത്രത്തില്‍ കഴിഞ്ഞ കര്‍ക്കടക വാവുബലി ദിവസം ബലി തര്‍പ്പണത്തിനെത്തിയ ആളുടെ സ്‌കൂട്ടറില്‍ സൂക്ഷിച്ച പണം കവര്‍ന്ന കേസിലെ പ്രതിയെ തിരുവല്ലം പോലീസ് അറസ്റ്റ് ചെയ്തു. പാലോട് കരുമന്‍കോട് ചിപ്പന്‍ച്ചിറ സന്ധ്യകോട്ടെജില്‍ സനോഷ് ഗോപി (48) ആണ് പിടിയിലായത്. ശ്രീകാര്യം സ്വദേശിയുടെ സ്‌കൂട്ടറില്‍ നിന്നും 6,000 രൂപ മോഷ്ടിച്ച കേസിലാണ് പോലീസ് സനോഷിനെ അറസ്റ്റ് ചെയ്തതെന്ന് തിരുവല്ലം എസ്എച്ച്ഒ ജെ. പ്രദീപ് അറിയിച്ചു. പ്രതി പാലക്കാടുഭാഗത്തുണ്ടെന്നറിഞ്ഞ് അവിടെനിന്നുളള പോലീസിന്റെ സഹോയത്തോടുകൂടിയാണ് സനോഷിനെ പിടികൂടിയത്. കഴിഞ്ഞദിവസം കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.

നേമം റെയില്‍വേ ടെര്‍മിനലിന്‍റെ നിർമാണം പുരോഗമിക്കുന്നു

നേമം: നേമം റെയില്‍വേ വികസനവുമായി ബന്ധപ്പെട്ട് ആദ്യഘട്ടത്തിലെ നിർമാണം പുരോഗമിക്കുന്നു. മൂന്നു സ്റ്റേബ്ലിംഗ് ലൈനുകള്‍, രണ്ട് പിറ്റ് ലൈനുകള്‍, രണ്ട് സിക്ക് ലൈനുകള്‍, പുതിയ സ്റ്റേഷന്‍ കെട്ടിടം, അടിപ്പാത, മേല്‍പ്പാലം തുടങ്ങിയവയാണു ടെര്‍മിനലിന്‍റെ ഭാഗമായി ആദ്യഘട്ടത്തിലെ പദ്ധതികള്‍. 117 കോടി രൂപയാണു നിർമാണ പ്രവര്‍ത്തനങ്ങള്‍ക്ക് റെയില്‍വേ അനുവദിച്ചിരിക്കുന്നത്. നിലവില്‍ രണ്ട് പിറ്റ് ലൈനുകളുടെയും മൂന്ന് സ്റ്റേബിളിംഗ് ലൈനുകളുടെയും നിര്‍മാണം നേമത്ത് നടന്നുവരികയാണ്. പുതിയ സ്റ്റേഷന്‍ കെട്ടിടത്തിനുള്ള നിർമാണ പ്രക്രിയകളും ആരംഭിച്ചിട്ടുണ്ട്. പ്ലാറ്റ്‌ഫോം നിർമാണത്തിന്‍റെ ഭാഗമായുള്ള ഷെല്‍ട്ടറുകളുടെ പണികളും പൂര്‍ത്തിയായി വരുന്നു. തിരുവനന്തപുരം മുതല്‍ കന്യാകുമാരി വരെയുള്ള രണ്ടാംപാതയുടെ നിര്‍മ്മാണവും പുരോഗമിക്കുകയാണ്. തമ്പാനൂര്‍ മുതല്‍ നേമം വരെ മൂന്നാം പാതയും പരിഗണനയിലുണ്ട്. പലഭാഗങ്ങളിലുള്ള മേല്‍പ്പാല നിർമാണവും പുരോഗമിക്കുകയാണ്. നേമം റെയില്‍വേ സ്റ്റേഷനു സമീപത്തുള്ള സ്റ്റുഡിയോ റോഡ് മേല്‍പ്പാലത്തിന്‍റെ പണി അന്തിമഘട്ടത്തിലാണ്. പാത ഇരട്ടിപ്പിക്കലിന്‍റെ ഭാഗമായി ഭൂമി ഏറ്റെടുത്ത സമയത്തുതന്നെ മൂന്നാം പാതയ്ക്കുകൂടി ചേര്‍ത്താണു ഭൂമി എടുത്തത്. ആദ്യ ഘട്ടത്തില്‍ മൂന്നാം പാതയുടെ സിവില്‍ ജോലികള്‍ പൂര്‍ത്തിയാക്കും. ട്രാക്ക് ഇടുന്നതു പിന്നീടായിരിക്കും. നേമം ടെര്‍മിനല്‍ യാഥാർഥ്യമാകുമ്പോള്‍ തമ്പാനൂര്‍ സെന്‍ട്രല്‍ സ്റ്റേഷനില്‍നിന്നും അടിയന്തരമായി വണ്ടികള്‍ക്കു നേമത്തേയ്ക്കുവന്നു പോകുന്നതിന് ഈ പാത ഉപയോഗിക്കും. മേല്‍പ്പാലങ്ങളുടെ നിർമാണം പൂര്‍ത്തിയായാല്‍ പിന്നീട് മൂന്നാം പാതയുടെ പണികള്‍ ചെയ്യാന്‍ കഴിയില്ല. അതിനാല്‍ പാത ഇരട്ടിപ്പിക്കലിനോടൊപ്പം മൂന്നാം പാതയുടെ അടിസ്ഥാന നിർമാണ പ്രവര്‍ത്തനങ്ങള്‍കൂടി ചെയ്യും. മൂന്ന് പിറ്റ് ലൈനുകളും ഏഴ് സ്റ്റേബളിംഗ് ലൈനുകളും ഉള്‍പ്പെടുന്നതാണു രണ്ടാം ഘട്ടത്തില്‍ റെയില്‍വേയുടെ പരിഗണനയിലുള്ളത്. ഈ പദ്ധതി നടപ്പിലായാല്‍ കൂടുതല്‍ തീവണ്ടികള്‍ ഓടിക്കാന്‍ കഴിയും. ടെര്‍മിനല്‍ നിർമാണം പുരോഗമിക്കുന്ന തിരുവനന്തപുരം സൗത്തായി മാറിയ നേമം റെയില്‍വേ സ്റ്റേഷനില്‍ സംസ്ഥാനങ്ങളുടെ ചുമതലയുള്ള റെയില്‍വേ മന്ത്രി വി. സോമണ്ണ രണ്ട് മാസം മുമ്പ് സന്ദര്‍ശനം നടത്തി പണികളുടെ പുരോഗതി വിലയിരുത്തിയിരുന്നു.

നഗരസഭയുടെ ആര്‍ആര്‍എഫില്‍ ഹരിതകർമ സേനാംഗങ്ങളുടെ പരിശീലനം

നെയ്യാറ്റിൻകര : അമരവിളയില്‍ ആരംഭിച്ച നെയ്യാറ്റിൻകര നഗരസഭയുടെ റിസോഴ്സ് റിക്കവറി ഫെസിലിറ്റി (ആര്‍ആര്‍എഫ്) യൂണിറ്റില്‍ ഹരിതകര്‍മസേനാംഗങ്ങള്‍ക്കുള്ള പരിശീലനം പുരോഗമിക്കുന്നു. അടുത്ത മാസം ഒന്നാം തീയതിയോടെ പ്രവര്‍ത്തനം പൂര്‍ണതോതില്‍ ആരംഭിക്കാനുള്ള ശ്രമത്തിലാണ് അധികൃതര്‍. റിസോഴ്സ് റിക്കവറി ഫെസിലിറ്റി യൂണിറ്റില്‍ എത്തിക്കുന്ന അജൈവ മാലിന്യം കൺവെയർ ബെൽറ്റിന്‍റെ സഹായത്തോടെ ശാസ്ത്രീയമായി വേര്‍തിരിക്കുകയും തരംതിരിച്ച മാലിന്യം പിന്നീട് ബൈലിംഗ് മെഷീനിൽ ബയിൽ ചെയ്ത് ക്ലീന്‍ കേരള കന്പനിക്ക് കൈമാറുകയുമാണ് ചെയ്യുന്നത്. നഗരസഭയിലെ വാര്‍ഡുകളിലേയ്ക്ക് നിയോഗിച്ചിട്ടുള്ള ഹരിത കര്‍മ സേനാംഗങ്ങളെ ക്ലസ്റ്റര്‍ അടിസ്ഥാനത്തില്‍ നാലായി വേര്‍തിരിച്ചിട്ടുണ്ട്. ഓരോ ദിവസവും 22 പേര്‍ വീതം ആര്‍ആര്‍എഫിലെ വിവിധപ്രവൃത്തികള്‍ ചെയ്യും. നഗരസഭയുടെ ഏക ആര്‍ ആര്‍എഫ് യൂണിറ്റാണ് അമരവിളയില്‍ ഈയിടെ ഉദ്ഘാടനം ചെയ്യപ്പെട്ടത്. ഇവിടെ നേരത്തെ മെറ്റീരിയല്‍ കളക്ഷന്‍ ഫെസിലിറ്റി (എംസിഎഫ്)യൂണിറ്റ് പ്രവര്‍ത്തിച്ചു വരികയായിരുന്നു. നഗരസഭയുടെ നിയന്ത്രണത്തില്‍ അമരവിള ഉള്‍പ്പെടെ മൂന്നു എംസിഎഫ് യൂണിറ്റുകളാണുള്ളത്. ആറാലുംമൂട്, തൊഴുക്കല്‍ എന്നിവിടങ്ങളിലാണ് മറ്റുള്ള രണ്ടെണ്ണം. വാർഡുകളിൽനിന്നും ഹരിതകര്‍മസേന ശേഖരിക്കുന്ന പ്ലാസ്റ്റിക് നേരത്തെ അതാത് വാര്‍ഡുകളില്‍ തന്നെ തരംതിരിക്കുമായിരുന്നു. മിനി എംസിഎഫുകളില്‍ നിന്നും അവ എംസിഎഫുകളില്‍ എത്തിക്കും. ആര്‍ആര്‍എഫ് യാഥാര്‍ഥ്യമായതോടെ, ഇനി ശേഖരിക്കുന്ന അജൈവ മാലിന്യം ആര്‍ആര്‍എഫില്‍ നേരിട്ട് എത്തിക്കാവുന്നതാണ്.

കൗതുകമായി കൈതച്ചക്ക

പാലോട് : നാട്ടുകാർക്ക് കൗതുകമായി കൈതച്ചക്ക. പച്ച പാലുവള്ളി രമ്യാഭവനിൽ സുമതിയുടെ പറമ്പിൽ വിളയിച്ച അത്ഭുതകരമായ കൈതച്ചക്കയാണ് നാട്ടുകാർക്ക് കൗതുകമായി മാറിയത്. ഒരു കൈതച്ചെടിയിൽ സാധാരണയായി ഒരു ചക്കയാണ് ഉണ്ടാകുന്നത്. എന്നാൽ ഈ കൈതച്ചക്കയിൽ പാകമായ ഒരു ചക്കയും അതോടൊപ്പം ഏഴു കുഞ്ഞു ചക്കകളും ആണ് ഉള്ളത്. ചക്കയുടെ മുകൾഭാഗത്ത് കാണുന്ന ഇലകളും ഇവയ്ക്കില്ല. പച്ച മുടുമ്പിലെ രാമചന്ദ്രന്‍റെ കടയിൽ പ്രദർശിപ്പിച്ചിരിക്കുന്ന കൈതച്ചക്കനാട്ടുകാരെ ഏറെ ആകർഷിച്ചു കൊണ്ടിരിക്കുന്നു.

പോലീസിൽ പരാതി നൽകിയിട്ടും നടപടിയില്ലെന്ന് ആക്ഷേപം : അയല്‍വാസിയുടെ ആക്രമണത്തില്‍ പരിക്കേറ്റ വീട്ടമ്മ ആശുപതിയില്‍

വെള്ളറട: പെരുങ്കടവിള പഞ്ചായത്തിലെ പാല്‍ക്കുളങ്ങര വാര്‍ഡില്‍ സാബു ഭവനില്‍ ജെ.ഷിബു മദ്യലഹരിയില്‍ അയല്‍വാസിയായ വീട്ടമ്മയെ കല്ല് കൊണ്ട് ഇടിച്ച് തലയ്ക്കു മാരകമായ മുറിവേല്‍പ്പിച്ചു. കഴിഞ്ഞ അഞ്ചു വര്‍ഷത്തിലധികമായി മദ്യപിച്ചെത്തുന്ന ഷിബു പിതാവിനേയും ഭാര്യയേയും ഉപദ്രവിക്കുന്നത് പതിവാണ്. സഹികെട്ട ഭാര്യയും രണ്ടു മക്കളും പിരിഞ്ഞു കഴിയുകയാണ്. സ്ഥിരമായി മദ്യപിച്ചെന്തി അയല്‍വാസികളെ അസഭ്യം പറയുകയും ചോദ്യം ചെയ്യുന്നവരെ മാരകായുധങ്ങളുമായെത്തി അക്രമിക്കുകയാണ് പതിവ്. നാട്ടുകാര്‍ ഒപ്പിട്ട നിരവധി പരാതികള്‍ മാരായുട്ടം പോലീസില്‍ നല്‍കിയിട്ടുണ്ട്. മദ്യപ്പിച്ച് അസഭ്യം പറയുന്നതു നിത്യസംഭവമായതിനെ തുടർന്നു പഞ്ചായത്ത് ജാഗ്രതാ സമിതി ഇടപ്പെട്ട് പഞ്ചായത്ത് പ്രസിഡന്‍റ് എസ്. സുരേന്ദ്രന്‍, പഞ്ചായത്ത് അംഗം കാനക്കോട് ബാലരാജ് എന്നിവരുടെ നേതൃത്വത്തില്‍ പ്രശ്‌നപരിഹാരത്തിന് ശ്രമിച്ചിരുന്നു. രാസലഹരിക്കക്ക് അടിമപ്പെട്ട യുവാവ് പുരുഷന്‍മാര്‍ ഇല്ലാത്ത സമയത്തു വീട്ടില്‍ അതിക്രമിച്ചു കയറി കൈയിലുണ്ടായിരുന്ന കരിങ്കല്‍ ചീളി ഉപയോഗിച്ച് തലക്ക് ഇടിച്ച് മാരകമായ മുറിവേല്‍പ്പിക്കുകയായിരുന്നു. കുഴഞ്ഞു വീണ വത്സലയെ വീട്ടുകാർ നെയ്യാറ്റിന്‍കര ജില്ലാ ആശുപത്രിയിലും തുടര്‍ ചികിത്സക്കായി കാരക്കോണം സിഎസ്ഐ മെഡിക്കല്‍ കോളേജിലും പ്രവേശിപ്പിച്ചു. നാട്ടില്‍ ഭീതിപരത്തി അക്രമംനടത്തി അഴിഞ്ഞാടുന്ന പ്രതിയെ അറസ്റ്റ് ചെയ്യണമെന്ന് നാട്ടുകാര്‍ ആവശ്യപ്പെട്ടു .

ദക്ഷിണ കേരള മഹായിടവക സ്ത്രീജനസഖ്യം വനിതാ സംഗമം

തിരുവനന്തപുരം: ദക്ഷിണകേരള മഹായടവക ആസ്ഥാനമായ എല്‍എംഎസ് കോമ്പൗണ്ടില്‍ ഇന്നലെ വനിതാ സംഗമം 2025 സംഘടിപ്പിച്ചു. സിഎസ്ഐ കോയമ്പത്തൂര്‍ ഡയോസിസ് ബിഷപ്പും, ദക്ഷിണ കേരള മഹായിടവക മോഡറേറ്റര്‍ കമ്മീസറിയുമായ റവ. തീമത്തി രവീന്ദ്രന്‍, ആനി രവീന്ദ്രൻ ബിഷപ്പ് അമ്മയും യോഗത്തില്‍ മുഖ്യാതിഥികള്‍ ആയിരുന്നു. വൈസ് പ്രസിഡന്‍റ് ജയ എസ്. ബാലന്‍ അധ്യക്ഷത വഹിച്ചു. യോഗത്തില്‍ സെക്രട്ടറി ധന്യ ജോസ് സ്വാഗതം പറഞ്ഞു. മഹായിടവക അഡ്മിനിസ്‌ട്രേറ്റീവ് സെക്രട്ടറി ടി. ടി. പ്രവീണ്‍, ട്രഷറര്‍ നിബു ജേക്കബ് വര്‍ക്കി, റവ. ഡോ. ജയരാജ് എന്നിവര്‍ മുഖ്യസന്ദേശം നല്‍കി. കൗണ്‍സിലിംഗിൽ ഡോക്ടറേറ്റു നേടിയ ഡോ. ഡയാന വില്‍സിയെ ആദരിച്ചു. ശാഖ ഡിസ്ട്രിക്ട് ഏരിയാതല സ്ത്രീ ജനസഖ്യ ഭാരവാഹികള്‍ പങ്കെടുത്തു.

തോടുകള്‍ മാലിന്യവാഹിനികള്‍; തിരിഞ്ഞുനോക്കാതെ അധികൃതര്‍

നെയ്യാറ്റിന്‍കര: കാര്‍ഷികനേട്ടങ്ങളാലും ജലസന്പത്താലും അനുഗ്രഹീതമായ തലസ്ഥാനജില്ലയുടെ തെക്കന്‍ പ്രദേശങ്ങളിലെ തോടുകള്‍ പലതും മാലിന്യവാഹിനികളായിരിക്കുന്നു. മാലിന്യമുക്ത കേരളം എന്നു നൂറുവട്ടം ആവര്‍ത്തിക്കുന്നുണ്ടെങ്കിലും ബന്ധപ്പെട്ട അധികൃതരെ സംബന്ധിച്ചിടത്തോളം ഈ പരിസ്ഥി തിനാശ കാഴ്ചകള്‍ ആരും മുഖവിലയ്ക്കെടുക്കുന്നില്ലെന്നും ആക്ഷേപമുണ്ട്. നെയ്യാറ്റിന്‍കര താലൂക്കിലും സമീപപ്രദേശങ്ങളിലും നിരവധി ചെറുതും വലുതുമായ കുളങ്ങളും തോടുകളുമുണ്ട്. ജനസാന്നിധ്യമുണ്ടായിരുന്ന ഈ ജലാശയ പരിസരങ്ങള്‍ മിക്കവയും കേവലം നോക്കുകുത്തികളായി. വെള്ളം ഒഴുകാതിരുന്ന ചാനലുകള്‍ നാട്ടിന്‍പുറങ്ങളിലെ ഇളംതലമുറക്കാര്‍ക്ക് കളിക്കളങ്ങളായി പരിണമിച്ചു. ഡിജിറ്റല്‍ യുഗമായതോടെ പ്രാദേശിക കളിക്കാര്‍ പോലും ഈ ചാനലുകളുമായുള്ള അടുപ്പം അവസാനിപ്പിച്ചു. കുളങ്ങളിലും തോടുകളിലുമൊക്കെ ചിലയിടങ്ങളില്‍ കാര്യമായ കൈയേറ്റമുണ്ടായതായും പരാതിയുണ്ട്. തോടുകളിലേക്കു മദ്യക്കുപ്പികളും ഗ്ലാസുകളും മാത്രമല്ല, മാലിന്യക്കിറ്റുകള്‍ വരെ വലിച്ചെറിയുന്ന പ്രവണത ഇപ്പോഴും തുടരുന്നു. വരണ്ട തോടുകളില്‍ കൂടിക്കിടക്കുന്ന മാലിന്യങ്ങള്‍ തെരുവു നായ്ക്കള്‍ക്കും കാക്കകള്‍ മുതലായവയ്ക്കും ആഹാരമാകുന്നുമുണ്ട്. പേരിനു വെള്ളമുള്ള തോടുകളിലും സ്ഥിതി വ്യത്യസ്ഥമല്ല. എന്നാല്‍ അവയൊന്നും നായ്ക്കളും കാക്കകളും ഉപയോഗിക്കുന്നില്ലായെന്നു മാത്രം. തോടുകളുടെ സമീപത്തിരുന്നു മദ്യപിച്ചാലും ഇല്ലെങ്കിലും ഒഴിഞ്ഞ കുപ്പികള്‍ തോടുകളിലേയ്ക്കു തന്നെ ഉപേക്ഷിക്കുന്നതായാണ് പരാതി. തദ്ദേശ സ്വയംഭരണ സ്ഥാപനങ്ങള്‍ ബജറ്റ് തയാറാക്കുന്പോള്‍ ജലാശയ നവീകരണത്തിനും അനുബന്ധ പ്രവൃത്തികള്‍ക്കും തുക അനുവദിക്കാറുണ്ടെങ്കിലും പലയിടത്തും അതൊക്കെ കടലാസില്‍ ഒതുങ്ങുന്നുവെന്നും പറയപ്പെടുന്നു. തോടുകളുടെ ദുരവസ്ഥയ്ക്കു പരിഹാരം കാണേണ്ട യാതൊരു നടപടിയും പൊതുവേ അധികൃതര്‍ സ്വീകരിക്കുന്നില്ലെന്നും പരാതിയുണ്ട്.

സ്കൂൾ തെരഞ്ഞെടുപ്പ്

മാറനല്ലൂർ: ക്രൈസ്റ്റ് നഗർ പബ്ലിക് സ്കൂൾ സീനിയർ സെക്കൻഡറിയിൽ ആദ്യമായി സ്കൂൾ തെരഞ്ഞെടുപ്പ് നടത്തി. പ്ലസ്ടു വിദ്യാർഥിയായ ഗൗതം കൃഷ്ണയുടെ സഹായത്തോടെ വികസിപ്പിച്ചെടുത്ത പ്രത്യേക സോഫ്റ്റ്‌വേറിലൂടെ കമ്പ്യൂട്ടറിൽ "ഹെഡ് ബോയ് "ഹെഡ് ഗേൾ", വിവിധ ഹൗസുകളുടെ ക്യാപ്റ്റൻ, വൈസ് ക്യാപ്റ്റൻ എന്നിവരെ കുട്ടികൾ തെരഞ്ഞെടുത്തു. പ്രിൻസിപ്പൽ ഫാ. ചാക്കോ പുതുകുളം സിഎംഐ നേതൃത്വം നൽകി. അജിൻ എസ്. അജയ്, എസ്. ലോലേന എന്നിവരെ യഥാക്രമം ഹെഡ് ബോയായും ഹെഡ് ഗേളായും തെരഞ്ഞെടുത്തു.

എസ്എടിയിലെ അമ്മയും കുഞ്ഞും ബ്ലോക്ക് പ്രവർത്തനരഹിതം: ന്യൂനപക്ഷ കമ്മീഷൻ സ്വമേധയാ കേസെടുത്തു

തിരുവനന്തപുരം: ഉദ്ഘാടനം കഴിഞ്ഞ് ഒന്പതു വർഷം പിന്നിട്ടിട്ടും എസ്എടി ആശുപത്രിയിലെ അമ്മയും കുഞ്ഞും ബ്ലോക്ക് പ്രവർത്തന സജ്ജമായില്ലെന്ന വാർത്തയെത്തുടർന്നു കേരള സംസ്ഥാന ന്യൂനപക്ഷ കമ്മീഷൻ സ്വമേധയാ കേസെടുത്തു. കമ്മീഷൻ ചെയർമാൻ അഡ്വ. എ.എ. റഷീദാണ് വിഷയത്തിൽ അടിയന്തര റിപ്പോർട്ട് സമർപ്പിക്കാൻ അധികൃതർക്ക് നിർദ്ദേശം നൽകിയത്. 30 കോടി രൂപ ചെലവഴിച്ച് 66,000 ചതുരശ്ര അടിയിൽ നിർമിച്ച കെട്ടിടത്തിന്‍റെ പ്രവർത്തനോദ്ഘാടനം 2017 മേയ് 24നാണു മുഖ്യമന്ത്രി നിർവഹിച്ചത്. മൂന്നു നിലകളിൽ പൂർത്തിയായ കെട്ടിടം പൂർണസജമായിട്ടും പ്രവർത്തനം തുടങ്ങാത്തതിന്‍റെ കാരണം അജ്ഞാതമാണ്. ജൂലൈ അഞ്ചിനകം റിപ്പോർട്ട് സമർപ്പിക്കാൻ ആരോഗ്യവകുപ്പ് സെക്രട്ടറി, ജില്ലാ കളക്ടർ, എന്നിവർക്ക് കമ്മീഷൻ നിർദേശം നൽകി.

ഒന്നരക്കിലോ കഞ്ചാവുമായി പി‌ടിയിൽ

പോത്തൻകോട്: ഒന്നരക്കിലോ കഞ്ചാവുമായി രണ്ടുപേർ പിടിയിൽ. മംഗലപുരം കുടവൂർ സ്വദേശികളായ ആദർശ് (27), ശ്രീജിത്ത് (23) എന്നിവരെയാണ് ഡാൻസാഫ് സംഘം പിടികൂടിയത്. ചില്ലറ വിൽപ്പന നടത്തുന്നതിനായി കുടവൂരിൽ ഇരുചക്ര വാഹനത്തിൽ കഞ്ചാവ് എത്തിച്ചപ്പോഴാണ് രഹസ്യത്തിന്‍റെ അടിസ്ഥാനത്തിൽ ഡാൻസാഫ് സംഘം ഇരുവരെയും പിടികൂടിയത്. സ്കൂൾ-കോളജുകൾ കേന്ദ്രീകരിച്ച് വില്പനയ്ക്കായി കൊണ്ടുവന്നതാണ് കഞ്ചാവെന്ന് ഇവർ പോലീസിനു മൊഴി നൽകി.ആറ്റിങ്ങലിൽ നിന്നാണ് കഞ്ചാവ് ഇവർക്ക് ലഭിച്ചതെന്നാണു വിവരം. നിരവധി കേസുകളിൽ പ്രതികളാണ് ഇരുവരും.

നാണക്കേട് മാറാതെ തിരുപുറം പഞ്ചായത്ത് : ചൂടുവെള്ളം ഒഴിക്കൽ, അസഭ്യവർഷം; പരാതികളിൽ പോലീസ് കേസെടുത്തു

പൂവാർ: ചൂടുവെള്ളംദേഹത്ത് ഒഴിച്ചതായ വൈസ് പ്രസിഡന്‍റിന്‍റെ പരാതിയിൽ പഞ്ചായത്ത് പ്രസിഡന്‍റിനെതിരെയും അസഭ്യം പറഞ്ഞു ദേഹോപദ്രവം ചെയ്യാൻ വൈസ് പ്രസിഡന്‍റ് ശ്രമിച്ചെന്ന പ്രസിഡന്‍റി ന്‍റെ പരാതിയിലും പൂവാർ പോലീസ് കേസെടുത്തു. ചേരിപ്പോര് തുടരുമ്പോൾ തിരുപുറം പഞ്ചായത്ത് ഭരണം പ്രതിസന്ധിയിലായി. പ്രസിഡന്‍റ് ഷീനാ ആൽബിനും വൈസ് പ്രസിഡന്‍റ് തിരുപുറം സുരേഷും തമ്മിലുള്ള തർക്കമാണ് ഒടുവിൽ പോലീസ് സ്റ്റേഷൻ വരെയെത്തിയത്. ലൈഫ് മിഷൻ പദ്ധതിയുമായി ബന്ധപ്പെട്ട അഴിമതിയാരോപണം കമ്മിറ്റിയിൽ അവതരിപ്പിക്കുന്നതിനിടയിലെ തർക്കമാണ് ചൂടുവെള്ളമൊഴിക്കൽ വരെയെത്തിയത്. ദേഹം പൊള്ളിയ വൈസ് പ്രസിഡന്‍റ് ആശുപത്രിയിൽ ചികിത്സയും തേടിയിരുന്നു. എന്നാൽ കമ്മിറ്റി സമയത്ത് ഗ്ലാസിൽ മുന്നിൽ വച്ചിരുന്ന ചൂടുവെള്ളം അബദ്ധത്തിൽ തട്ടി വീണതാണെന്നു പ്രസിഡന്‍റും പറയുന്നു. ദേഹം പൊള്ളിയതോടെ വംശീയ ആക്ഷേപം ഉൾപ്പെടെയുള്ള ആക്ഷേപങ്ങൾ ഉന്നയിച്ച് വൈസ് പ്രസിഡന്‍റ് നൽകിയ പരാതിയെ കൗണ്ടർ ചെയ്തു കഴിഞ്ഞ ദിവസം പ്രസിഡന്‍റും പൂവാർ പോലീസിൽ പരാതി നൽകി. ഇരുവരുടെയും പരാതി കിട്ടിയ പാടെ പോലീസ് കേസുകളും രജിസ്റ്റർ ചെയ്തു. സ്വതന്ത്രരായി ജയിച്ചു വന്ന ഇരുവരും തുടക്കത്തിൽ ഇടതു പാളയത്തിൽ ചേർന്നു പ്രസിഡന്‍റും വൈസ് പ്രസിഡന്‍റുമായി ഭരണം തുടർന്നു. ഇതിനിടയിലുണ്ടായ ചില സംഭവവികാസങ്ങൾ പ്രസിഡന്‍റിനെ മറുകണ്ടം ചാടാൻ പ്രേരിപ്പിച്ചു. അങ്ങനെ കോൺഗ്രസിൽ ചേർന്നപ്പോഴും ഷീന പ്രസിഡന്‍റായി തുടർന്നു. പഞ്ചായത്തിൽ ആകെയുള്ള 14 സീറ്റിൽ ബിജെപിക്ക് രണ്ടും യുഡിഎഫിന് ആറും ഇടതുപക്ഷത്തിനു നാലും സ്വതന്ത്രരായി രണ്ടു പേരുമാണുള്ളത്. രണ്ടു സ്വതന്ത്രൻമാരെയും ചാക്കിലാക്കി ഭരണം പിടിക്കാൻ മത്സരത്തിനിറങ്ങിയ ഇടതുപക്ഷത്തിന് ഒരുകോൺഗ്രസ് അംഗത്തിന്‍റെ വോട്ട് അസാധുവായത് ഷീനക്ക് തുണയായി. ബിജെപി വോട്ടെടുപ്പിൽനിന്നു വിട്ടുനിന്നു. എന്നാൽ വൈസ് പ്രസിഡന്‍റ് തെരഞ്ഞെടുപ്പ് തുല്യമായി വന്നു. ഒടുവിൽ നടന്ന നറുക്കെടുപ്പിൽ ഭാഗ്യം സ്വതന്ത്രനായി വന്ന സുരേഷിനെത്തന്നെ തുണച്ചു. എന്നാൽ പ്രസിഡന്‍റ് തെരഞ്ഞെടുപ്പിൽ വോട്ട് അസാധുവായ അംഗം കോടതിയെ സമീപിച്ച് അനുകൂല വിധി സമ്പാദിച്ചു. ഇതോടെ പ്രസിഡന്‍റിനു താല്കാലിക മാറ്റമുണ്ടാവുകയും പകരം ചാർജ് വൈസ് പ്രസിഡന്‍റിന്‍റെ കൈയിലെത്തുകയും ചെയ്തു. ഇതിനിടയിൽ സ്റ്റേയും മറ്റുമായുള്ള കോടതി കയറലും ഒരു വർഷത്തോളം നീണ്ടുപോകുന്നതിനിടയിൽ ഒത്തുതീർപ്പു ശ്രമം തുടങ്ങി. ഒത്തുതീർപ്പ് കഴിഞ്ഞതോടെ ഇടതുപക്ഷംവിട്ട പ്രസിഡന്‍റ് കോൺഗ്രസിൽ ചേർന്നു. അവിശ്വാസത്തിനുശേഷം പിന്നെ നടന്ന തെരഞ്ഞെടുപ്പിൽ ഭരണം പിടിച്ചെടുത്ത കോൺഗ്രസിന്‍റെ പ്രസിഡന്‍റെയും ഷീനാ ആൽബിൻ വന്നു. ഇടതുപക്ഷത്തിനൊപ്പം വൈസ് പ്രസിഡന്‍റ് സുരേഷ് ഉറച്ച് നിന്നു. പിന്നെ നടന്ന അഭിപ്രായവ്യത്യാസങ്ങൾ പഞ്ചായത്തിനെ നാണക്കേടിന്‍റെ വക്കിലെത്തിച്ചു.

വൈസ്മെൻ ഇന്‍റർനാഷണൽ കണ്‍വൻഷൻ നടത്തി

തിരുവനന്തപുരം: വൈസ്മെൻ ഇന്‍റർനാഷണൽ സൗത്ത് വെസ്റ്റ് ഇന്ത്യാ റീജണൽ കണ്‍വൻഷൻ നടന്നു. തിരുവനന്തപുരം ശ്രീമൂലം ക്ലബിൽ നടന്ന ചടങ്ങിൽ കന്യാകുമാരി മുതൽ കരുനാഗപ്പള്ളി വരെയുള്ള പ്രദേശങ്ങൾ ഉൾപ്പെട്ട സൗത്ത് വെസ്റ്റ് ഇന്ത്യാ റീജണിലെ 156 ക്ലബുകളിൽ നിന്നും അറുനൂറോളം പ്രതിനിധികൾ പങ്കെടുത്തു. കണ്‍വൻഷൻ ഇന്ത്യ ഏരിയ പ്രസിഡന്‍റ് വി.എസ്. രാധാകൃഷ്ണൻ ഉദ്ഘാടനം ചെയ് തു. ചടങ്ങിൽ അഡീഷണൽ അഡ്വക്കറ്റ് ജനറൽ കെ.പി. ജയചന്ദ്രൻ മുഖ്യാതിഥി ആയിരുന്നു. കന്യാകുമാരി, തിരുവനന്തപുരം, കൊല്ലം ജില്ലകളിലെ നൂറോളം വരുന്ന ഗവണ്മെന്‍റ് ആശുപത്രികളുമായി ചേർന്നു കഴിഞ്ഞ ഒരു വർഷക്കാലമായി നടപ്പിലാക്കി വരുന്ന "വായോജന പരിപാലനം' പ്രോജക്ടിന്‍റെ ഭാഗമായി ഇന്നലെ പത്തു ഹെൽത്ത് സെന്‍ററുകൾക്കാവശ്യമായ ഡയപ്പേഴ് സ്, കന്പിളി പുതപ്പുകൾ, വീൽ ചെയറുകൾ മുതലായവ വിതരണം ചെയ്തു. കഴിഞ്ഞ ഒരു വർഷം വിവിധ ക്ലബുകളുടെ സഹായത്താൽ മൂന്നുകോടിയോളം രൂപയുടെ സഹായം വയോജന പരിപാലനം പദ്ധതിയിലൂടെ നൽകിയെന്നു റീജണൽ ഡയറക്ടർ ഷാജി മാത്യു അറിയിച്ചു. മികച്ച സാമൂഹിക സേവനത്തിനുള്ള കർമയോഗി അവാർഡ് ഡോ. ബാബു സ്റ്റീഫനും കർമശ്രേഷ്ഠ അവാർഡ് സുരേന്ദ്രൻ കണ്ണാട്ടിനും നൽകി. മികച്ച ഡിസ്ട്രിക്ട് ഗവർണറായി ഡോ. എം.കെ. ഷീജയും മികച്ച പ്രസിഡന്‍റുമാരായി സാലു പതാലിൽ, സുമ തരകൻ എന്നിവർ ഉൾപ്പെടെ വിവിധ ക്ലബുകളിൽ മികച്ച പ്രവർത്തനങ്ങൾ കാഴ്ച വച്ച നൂറോളം അംഗങ്ങൾക്ക് അവാർഡ് നൽകി. 2025-26 വർഷത്തേക്കു റീജണൽ ഡയറക്ടറായി തെരഞ്ഞെടുത്ത അഡ്വ. തോമസ് ജോർജിനെ ഷാജി മാത്യു ഒൗദ്യോഗിക കോളർ അണിയിച്ചു. ചടങ്ങിൽ രാജൻ പണിക്കർ, തോമസ് ലൂക്കോസ്, സെക്രട്ടറി വിനോദ് രാജശേഖരൻ, ട്രഷറർ ജയകുമാർ, മുഹമ്മദ് അഷ്റഫ്, അഡ്വ. വിനീത് കുമാർ, തുടങ്ങിയവർ സംബന്ധിച്ചു.

നല്ല സാഹിത്യം മികച്ച വ്യക്തിത്വങ്ങളെ രൂപപ്പെടുത്തുന്നു: റവ. ഡോ. തോമസ് കുഴിനാപ്പുറത്ത്

നെടുമങ്ങാട്: മികച്ച വ്യക്തിത്വങ്ങളെ രൂപപ്പെടുത്തുന്നതിൽ നല്ല സാഹിത്യസൃഷ്ടികൾക്കു വലിയ പങ്കു വഹിക്കാൻ കഴിയുമെന്നു റവ. ഡോ. തോമസ് കുഴിനാപ്പുറത്ത്. വായന ദിനത്തോടനുബന്ധിച്ചു വെള്ളൂർക്കോണം ലാ സലേത്ത് മാതാ മലങ്കര കത്തോലിക്കാ ഇടവകയിൽ സംഘടിപ്പിച്ച സാഹിത്യ സെമിനാർ ഉദ്ഘാടനം ചെയ്യുകയായിരുന്നു അദ്ദേഹം. ഷൈജു വാമനപുരം സെമിനാറിനു നേതൃത്വം നൽകി. അനുഭവങ്ങളാണ് സാഹിത്യ സൃഷ്ടികളുടെ നിർമാണശാല എന്ന് ഷൈജു പറഞ്ഞു. മദർ ഫെലിസിറ്റ ഡിഎം, സോനു സതീഷ്, എം. ജിജോ, പ്രീതി എസ്. ചന്ദ്രൻ തുടങ്ങിയവർ പ്രസംഗിച്ചു.

നാലാഞ്ചിറ സെന്‍റ് ജോൺസിൽ പ്രതീക്ഷ പദ്ധതി ഉദ്ഘാടനം

തിരുവനന്തപുരം: ജൂണിയർ ചെംമ്പർ ഇന്‍റർനാഷണൽ ട്രിവാൻഡ്രം റോയൽ സിറ്റിയുടെ ആഭിമുഖ്യത്തിൽ നടപ്പാക്കുന്ന പ്രതീക്ഷ പദ്ധതി നാലാഞ്ചിറ സെന്‍റ് ജോൺസ് മോഡൽ ഹയർ സെക്കൻഡറി സ്കൂളിൽ ഉദ്ഘാടനം ചെയ്തു. വിദ്യാർത്ഥികൾക്ക് പഠനോപകരണങ്ങൾ നൽകൽ, കപ്പാസിറ്റി ബിൽഡിംഗ്,നേതൃത്വശേഷി വർധിപ്പിക്കൽ, ലൈഫ് സ്കിൽ ഡവലപ്പ്മെന്‍റ് പരിപാടികൾ തുടങ്ങിയവയാണ് പദ്ധതിയിലൂടെ നടപ്പാക്കുന്ന പ്രധാന പരിപാടികൾ. പ്രിൻസിപ്പൽ ഫാ. ജോസ് ചരുവിൽ ഉദ്ഘാടനം നിർവഹിച്ചു. പ്രസിഡന്‍റ് സനു സർദാർ അധ്യക്ഷത വഹിച്ചു. വൈസ് പ്രിൻസിപ്പൽ അജീഷ് കുമാർ, പ്രീത, ഷമീർ, ബിജു, ബിന്നി സാഹിതി, ബീഗം ബുഷ്റ, ദിദ്യ, ശൈഖ എന്നിവർ പ്രസംഗിച്ചു. മൈഫ് സ്കിൽ പരിശീലന പരിപാടിക്ക് ട്രയിനർ ദിവ്യ നേതൃത്വം നൽകി.

സ്കൂളിനുനേരെ കാട്ടാന ആക്രമണം: ഉടൻ നടപടിയെന്ന് എംഎൽഎ

പേപ്പാറ: പേപ്പാറ വന്യ ജീവി സങ്കേതത്തിനു സമീപം തലത്തൂതക്കാവ് ട്രൈബൽ എൽപി സ്കൂളിന്‍റെ മതിൽ കാട്ടാനകൂട്ടം കുത്തിമറിച്ചു, പറമ്പിലെ തെങ്ങുകളും നശിപ്പിച്ചു. വനത്തിനോടു ചേർന്നാണു സ്കൂൾ പ്രവർത്തി ക്കുന്നത്. കാട്ടാന ആക്രമണമുണ്ടായ പ്രദേശം ജി. സ്റ്റീഫൻ എം എൽ എ സന്ദർശിച്ചു. അടിയന്തിരമായി സഹായം എത്തിക്കുമെന്ന് എംഎൽഎ അറിയിച്ചു. രണ്ടു വർഷം മുൻപ്‌ 24 ലക്ഷം രൂപ ചെലവഴിച്ചു നിർമിച്ച മതിലാണ് ആനകൾ കുത്തിമറിച്ചത്. സ്കൂൾ പാചകപ്പുരയുടെ സമീപത്തുനിന്ന തെങ്ങിൻതൈകളും കാട്ടാന നശിപ്പിച്ചിട്ടുണ്ട്. സ്കൂൾപരിസരത്ത് ആനശല്യം രൂക്ഷമാണെന്നു വിദ്യാർഥികളുടെ രക്ഷിതാക്കളും പറയുന്നു. മുൻപ്‌ സ്ഥിരമായി ആനക്കൂട്ടമിറങ്ങിയിരുന്നു. ചുറ്റുമതിൽ നിർമിച്ചശേഷമാണ് ഇതിനു ശമനമായത്. രണ്ട ദിവസം മുൻപ്‌ മണലി ആലുംമൂട് സ്വദേശി രാധയുടെ വീട് ആനകൾ തകർത്തിരുന്നു. മാസങ്ങൾക്കു മുൻപ്‌ കല്ലാർ ഗവ. എൽപി സ്കൂളിന്‍റെ മതിലും കാട്ടാന തകർത്തിരുന്നു. കാട്ടാനശല്യം രൂക്ഷമാകുമ്പോഴും വനംവകുപ്പിന്‍റെ ഭാഗത്തുനിന്നു കൃത്യമായ ഇടപെടലുണ്ടാകുന്നില്ലന്നും പരാതിയുണ്ട്. വർഷങ്ങളായി കാട്ടുമൃഗഭീതിയിലാണ് ഈ സ്കൂളുകളിലെ കുട്ടികളുടെ പഠനം. കാട്ടാനയും കാട്ടുപോത്തും ഉൾപ്പെടെ സ്കൂൾവളപ്പിൽ കടക്കുന്നതു പതിവാണ്. ഈ സംഭവത്തിൽ വനം വകുപ്പുമായി ബന്ധപ്പെട്ട് നടപടികൾ ഉണ്ടാക്കുമെന്ന് എംഎൽഎ അറിയിച്ചു.

കൈമനം-പ്രാവച്ചന്പലം ദേശീയപാത : അപകടങ്ങളിൽ റിപ്പോർട്ട് തേടി മനുഷ്യാവകാശ കമ്മീഷൻ

തിരുവനന്തപുരം: കൈമനം മുതൽ പ്രാവച്ചന്പലം വരെയുള്ള ദേശീയപാതയിൽ അപകടങ്ങൾ ഒഴിവാക്കാനുള്ള പരിഹാരമാർഗങ്ങൾ ചേർത്തു സമഗ്രമായ റിപ്പോർട്ട് പൊതുമരാമത്ത് എക്സിക്യൂട്ടീവ് എൻജിനീയർ ഒരു മാസത്തിനുള്ളിൽ സമർപ്പിക്കണമെന്നു മനുഷ്യാവകാശ കമ്മീഷൻ ചെയർപേഴ്സണ്‍ ജസ്റ്റീസ് അലക് സാണ്ടർ തോമസ്. ഓഗസ്റ്റ് ഏഴിനു രാവിലെ 10 ന് കമ്മീഷൻ ഓഫീസിൽ നടക്കുന്ന സിറ്റിംഗിൽ പൊതുമരാമത്ത് ദേശീയപാതാ വിഭാഗം എക്സിക്യൂട്ടീവ് എൻജിനീയർ നേരിട്ട് ഹാജരായി വസ്തുതകൾ ധരിപ്പിക്കണമെന്ന് ഉത്തരവിൽ പറയുന്നു. സീബ്രാ ക്രോസിംഗ് അനുവദിച്ചിട്ടില്ലാത്ത സ്ഥലങ്ങളിലൂടെ കാൽനടയാത്രക്കാർ അലക്ഷ്യമായി റോഡ് മുറിച്ചു കടക്കുന്ന സമയത്താണു വാഹനങ്ങൾ ഇടിച്ചു മരണം സംഭവിക്കുന്നതെന്നു നേമം പോലീസ് ഇൻസ്പെക്ടർ കമ്മീഷനിൽ സമർപ്പിച്ച വിശദീകരണത്തിൽ പറയുന്നു. അനധികൃതമായി റോഡ് മുറിച്ചുകടക്കുന്നത് ഒഴിവാക്കുന്നതിന് ഡിവൈഡറിൽ ഫെൻസിംഗ് സ്ഥാപിക്കാൻ തീരുമാനിച്ചു. തെരുവുവിളക്കുകൾ സ്ഥാപിക്കാനും തീരുമാനിച്ചു. 2020 ജനുവരി മുതൽ ഏകദേശം 459 കേസുകൾ രജിസ്റ്റർ ചെയ്തിട്ടുണ്ട്. ഹൈവേയിൽ ട്രാഫിക് സംവിധാനങ്ങൾ പരിഷ്കരിക്കേണ്ടതും മേൽപ്പാലങ്ങൾ നിർമിക്കേണ്ടതും സർക്കാരാണെന്നും റിപ്പോർട്ടിൽ പറയുന്നു. റോഡിൽ ഫെൻസിംഗും തെരുവുവിളക്കും പൂർണമായും സ്ഥാപിച്ചിട്ടുണ്ടോയെന്ന് എക്സിക്യൂട്ടീവ് എൻജിനീയർ പരിശോധിക്കണമെന്നു ജസ്റ്റീസ് അലക്സാണ്ടർ തോമസ് ആവശ്യപ്പെട്ടു. ജനങ്ങൾക്ക് സുരക്ഷിതമായി റോഡ് മുറുച്ചുകടക്കാൻ സീബ്രാ ലൈൻ വരച്ചിട്ടുണ്ടോ, ട്രാഫിക് സിഗ്നൽ കാര്യക്ഷമമാണോ തുടങ്ങിയ കാര്യങ്ങൾ എക്സിക്യൂട്ടീവ് എൻജി നീയർ പരിശോധിക്കണം. ‌സുരക്ഷാ സംവിധാനങ്ങൾ കാര്യക്ഷമമല്ലെങ്കിൽ അതിനു ചുമതലപ്പെട്ടവർ ആരൊക്കെയാണെന്നും അവരുടെ ഒൗദ്യോഗിക മേൽവിലാസം എന്താണെന്നും കമ്മീഷനെ അറിയിക്കണം. പൊതുപ്രവർത്തകനായ ശാന്തിവിള പദ്മകുമാർ സമർപ്പിച്ച പരാതിയിലാണ് ഉത്തരവ്.

പാളയം മാർക്കറ്റ് പുനരധിവാസത്തിൽ വൻ അഴിമതി : വ്യാപാരികളോടു കാണിക്കുന്നതു ക്രൂരതയെന്നു രമേശ് ചെന്നിത്തല

തിരുവനന്തപുരം: പാളയം കണ്ണിമാറ മാർക്കറ്റിലെ വ്യാപാരികളുടെ പുനരധിവാസ പദ്ധതിയിൽ കോടികളുടെ അഴിമതി നടന്നിട്ടുണ്ടെന്നും പാവപ്പെട്ട കച്ചവടക്കാരോട് സർക്കാർ കാണിക്കുന്നത് കടുത്ത വിവേചനവും ക്രൂരതയുമാണെന്നും മുതിർന്ന കോൺഗ്രസ് നേതാവ് രമേശ് ചെന്നിത്തല പറഞ്ഞു. വ്യാപാരികളെ പുനരധിവസിപ്പിക്കുന്നതിനായി നിർമിച്ച പുതിയ കെട്ടിട സമുച്ചയത്തിലെ അപാകതകൾ നേരിട്ടു വിലയിരുത്താൻ എത്തിയതായിരുന്നു അദ്ദേഹം. സന്ദർശനത്തിനു ശേഷം മാധ്യമങ്ങളോടു സംസാരിക്കവെ, "19 കോടി രൂപ ചെലവഴിച്ചു നിർമിച്ച ഈ കെട്ടിടത്തിൽ ശ്വാസം പോലും ലഭിക്കാത്ത അവസ്ഥയാണ്. വായുസഞ്ചാരമില്ലാത്ത ഇവിടെ പാവപ്പെട്ട കച്ചവടക്കാർ എങ്ങനെ കച്ചവടം നടത്തും..? ഇത് വലിയ അഴിമതിയുടെ ഉദാഹരണമാണ്,"എന്നു ചെന്നിത്തല ആരോപിച്ചു. നൂറ്റാണ്ടുകളായി കച്ചവടം നടത്തി ജീവിക്കുന്നവരെ മതിയായ സൗകര്യങ്ങളോ പുനരധിവാസമോ നൽകാതെ ബലം പ്രയോഗിച്ച് ഒഴിപ്പിക്കാനുള്ള നീക്കം ഗുണ്ടായിസമാണ്. വ്യാപാരികളുമായി ചർച്ച നടത്താനോ അവരുടെ പ്രശ്നങ്ങൾ കേൾക്കാനോ കോർപ്പറേഷനോ സർക്കാരോ തയാ റാകുന്നില്ല. താൽക്കാലികമായി നിർമിച്ച സ്ഥലത്തു കച്ചവടം നടക്കാത്തതിനാൽ വ്യാപാരികൾ ഇന്നു വലിയ ദുരിതത്തിലാണ്. ഇതൊരു രാഷ്ട്രീയ പ്രശ്നമല്ല, മറിച്ചു ജനകീയ പ്രശ്നമാണ്. സർക്കാർ അടിയന്തരമായി വിഷയത്തിൽ ഇടപെടുകയും വ്യാപാരികളുടെ ന്യായമായ ആവശ്യങ്ങൾ അംഗീകരിക്കുകയും വേണം. അവരുടെ പുനരധിവാസം ഉറപ്പാക്കിയ ശേഷം മാത്രമേ തുടർനടപടികൾ സ്വീകരിക്കാവൂ. വ്യാപാരികൾ നടത്തുന്ന നിയമപോരാട്ടത്തിന് എല്ലാവിധ പിന്തുണയും ഉണ്ടാകുമെന്നും അദ്ദേഹം ഉറപ്പുനൽകി. പാളയം ബ്ലോക്ക് പ്രസിഡന്‍റ് ആർ. ഹരികുമാർ, മണ്ഡലം പ്രസിഡന്‍റ് സുരേഷ് നരിവാമുട് ജോയി, പ്രാണകുമാർ, ബ്ലോക്ക് ഭാരവാഹികളായ വി. പത്മകുമാർ, കെ. കണ്ണൻ മുരളിധരൻ, ആർ.പി. സുധാകരൻ നായർ, രാജാജി നഗർ മഹേഷ്, ഷെർലി, മധു, നാരായണൻ, വേണുഗോപാൽ, ശ്യാം , സെൽവൻ അനിൽ പോറ്റി എന്നിവർ പങ്കെടുത്തു.

ഷഹീനയുടെ കൊലപാതകം : സുഹൃത്തുക്കളുടെ മൊഴിയെടുത്തു; മുറിയെടുത്തത് ഒളിവില്‍ കഴിയാന്‍

പേരൂര്‍ക്കട: പോത്തന്‍കോട് സ്വദേശിനി ഷഹീന(32)യുടെ കൊലപാതകവുമായി ബന്ധപ്പെട്ട് സഹോദരന്‍ ഷംഷാദിന്‍റെ രണ്ടു സുഹൃത്തുക്കളുടെ മൊഴി രേഖപ്പെടുത്തി പോലീസ്. വട്ടപ്പാറ സ്വദേശികളായ ഷെഫിന്‍, ധനു എന്നിവരുടെ മൊഴികളാണു രേഖപ്പെടുത്തിയത്. ചെമ്പഴന്തി സ്വദേശിയായ മറ്റൊരാള്‍ മൊഴി നല്‍കാന്‍ എത്തിയിരുന്നില്ല. മരുതൂരില്‍ ഷഹീന മരിച്ചുകിടന്ന ആത്രക്കാട്ട് എന്‍ക്ലേവ് എന്ന ഹോംസ്റ്റേയിലെ സിസിടിവി ദൃശ്യങ്ങളുടെ സഹായത്തോടെയാണ് ഇവരെ തിരിച്ചറിഞ്ഞത്. ജൂണ്‍ 14നു ഷംഷാദിനും ഷഹീനയ്ക്കും താമസിക്കുന്നതിന് മുറിയെടുത്ത് നല്‍കിയത് മൂന്നു സുഹൃത്തുക്കള്‍ ചേര്‍ന്നാണ്. പിന്നീട് അവര്‍ ഇവിടേക്ക് വന്നിട്ടില്ല. ധനുഷ് എന്നയാളുമായി തമിഴ്‌നാട്ടിലെ മധുരയില്‍വച്ചു ഷംഷാദ് അടിപിടിയുണ്ടാക്കിയെന്നും അതിനുശേഷം ഒളിവില്‍ത്താമസിക്കുന്നതിനുവേണ്ടിയാണ് ഹോം സ്റ്റേ തെരഞ്ഞെടുത്തതെന്നുമാണ് അന്വേഷത്തില്‍ തെളിഞ്ഞത്. വട്ടപ്പാറയിലെ ഒരു ആശുപത്രിയില്‍ പല്ലിന്‍റെ ചികിത്സാര്‍ഥമാണു താന്‍ മുറിയെടുത്തതെന്നു പ്രതി പറയുന്നുണ്ടെങ്കിലും ആശുപത്രിയില്‍ ചികിത്സ നടത്തിയതിന്‍റെ രേഖകളൊന്നും ലഭിച്ചിട്ടില്ല. ഇതുമായി ബന്ധപ്പെട്ടും ഷഹീനയും ഷംഷാദും തമ്മില്‍ വാക്കുതര്‍ക്കം നിലനിന്നിരുന്നു. ഭര്‍ത്താവുമായി സംസാരിക്കാന്‍ ഷഹീനയെ ഒരിക്കലും ഷംഷാദ് അനുവദിച്ചിരുന്നില്ലെന്നും ബന്ധം വേര്‍പിരിയുന്നതിന് ഇതൊരു കാരണമായി എന്നും പോലീസ് പറഞ്ഞു. ഏഴുവയസുള്ളപ്പോള്‍ ഷഹീനയെ സഹോദരന്‍ വീടിന്‍റെ സ്റ്റെയര്‍കേസില്‍ നിന്നും ഷംഷാദ് എടുത്തെറിഞ്ഞിരുന്നുവെന്നും ഏറെ ചികിത്സകള്‍ക്കുശേഷമാണു രക്ഷപ്പെട്ടതെന്നും ഇവരുടെ മാതാവ് സലീന പോലീസിനോടു പറഞ്ഞു. കുറച്ചുനാള്‍ വിദേശത്തായിരുന്ന ഷംഷാദ് മദ്യപിച്ചാല്‍ അക്രമം കാട്ടുമെന്നും വീഡിയോ കോളിന്‍റെ പേരിലാണ് സംഭവദിവസം അടിപിടിയുണ്ടായതെന്നും തെളിഞ്ഞിട്ടുണ്ട്. വീട്ടില്‍നിന്നും ആഹാരം കഴിക്കാത്തതിനാല്‍ ഷംഷാദിന് ആഹാരം വച്ചുകൊടുക്കാനാണ് ഷഹീനയെ ഇയാള്‍ക്കൊപ്പം അയച്ചതെന്നാണ് അമ്മയുടെ മൊഴി. കൊലപാതകം നടന്ന ദിവസം വലിയ അടിപിടിയുണ്ടായിയെന്നും തന്നെ ആക്രമിക്കുന്നതില്‍നിന്നു രക്ഷപ്പെടാന്‍ ഷഹീന തിരികെ ആക്രമിച്ചതിനെത്തുടര്‍ന്നു ഷംഷാദിന്‍റെ വാരിയെല്ലിനു പൊട്ടലുണ്ടായിട്ടുണ്ടെന്നും മണ്ണന്തല എസ്ഐ ആര്‍.എസ്. വിപിന്‍ പറഞ്ഞു. സംഭവദിവസം ഷംഷാദ് സുഹൃത്തായ വിശാഖിനെ വിളിച്ചുവരുത്തിയത് മൃതദേഹം മറവുചെയ്യാനായിരുന്നുവെന്നും എന്നാല്‍ പദ്ധതി പൊളിയുകയായിരുന്നുവെന്നും പോലീസ് അറിയിച്ചു. photo ഷഹീനയും ഷംഷാദും താമസിച്ചിരുന്ന ഹോം സ്റ്റേയിലെ മുറി (വൃത്തത്തിനുള്ളിൽ)

നിയന്ത്രണംവിട്ട കാര്‍ കുഴിയില്‍ വീണു; ഏഴുപേര്‍ക്കു പരിക്ക്

വെള്ളറട: നിയന്ത്രണം നഷ്ടപ്പെട്ട കാര്‍ കുഴിയില്‍ പതിച്ചു ഏഴോളം പേര്‍ക്ക് ഗുരുതര പരിക്കേറ്റു. വെള്ളറട കൂട്ടപ്പൂവിനു സമീപത്താണ് നിയന്ത്രണംവിട്ട കാര്‍ കുഴിയില്‍ പതിച്ചത്. ഗുരുതര പരിക്കേറ്റ നാലുപേരെ തിരുവനന്തപുരം മെഡിക്കല്‍ കോളജില്‍ പ്രവേശിപ്പിച്ചു. മൂന്നുപേരെ വെള്ളറട സര്‍ക്കാര്‍ ആശുപത്രിയിലും പ്രവേശിപ്പിച്ചു. മണ്ണന്തല സ്വദേശി ആദിത്യന്‍ (19), പാളയം സ്വദേശി അഹ്‌ന (19), മരുതൂര്‍ സ്വദേശി അലീന്‍ (19) എന്നിവരാണ് വെള്ളറട സര്‍ക്കാര്‍ ആശുപത്രിയില്‍ ചികിത്സയിലുള്ളത്. ആറുകാണിയില്‍നിന്നു കുടപ്പനമൂടുവഴി തിരുവനന്തപുരത്തേക്കു വരികയായിരുന്നു അപകടത്തില്‍പ്പെട്ട കാര്‍. കൂട്ടപ്പു ഇറക്കം ഇറങ്ങവേ കയറ്റം കയറുകയായിരുന്ന ഓട്ടോറിക്ഷയില്‍ ഇടിക്കാതിരിക്കുന്നതിനുവേണ്ടി ഇടതുവശത്തേക്കു തിരിച്ച സമയത്ത് കാര്‍ നിയന്ത്രണം വിട്ട് കുഴിയില്‍ പതിക്കുകയായിരുന്നു. വീഴ്ചയില്‍ കാര്‍ തകര്‍ന്നു. യാത്രക്കാരായിരുന്ന എല്ലാവര്‍ക്കും ഗുരുതരമായി പരിക്കേറ്റിട്ടുണ്ട്. ഗ്ലാസ് തകര്‍ത്താണ് പരിക്കേറ്റവരെ പുറത്തെടുത്തത്. കീഴ്ക്കാംതൂക്കായ റോഡില്‍ പണി നടക്കുന്നതിനാല്‍ മെറ്റല്‍ ഇളകി കിടക്കുകയായിരുന്നു. മെറ്റലില്‍തെന്നിയാണ് കാർ ഏഴടിയോളം താഴ്ചയുള്ള വീട്ടുമുറ്റത്തേക്കു പതിച്ചത്. വെള്ളറട പോലീസ് സംഭവ സ്ഥലത്തെത്തി തെളിവെടുപ്പ് നടത്തി കേസ് രജിസ്റ്റര്‍ ചെയ്ത് അന്വേഷണം ആരംഭിച്ചിട്ടുണ്ട്.

കാപ്പ ഉത്തരവ് ലംഘിച്ച് നാട്ടിൽ വന്ന പ്രതി പിടിയിൽ

നെടുമങ്ങാട്: സാമൂഹ്യവിരുദ്ധ പ്രവർത്തനങ്ങൾ നടത്തിയതിനു നാടുകടത്തിയ വെള്ളനാട് ചാങ്ങ കടുവക്കുഴി കവിയാക്കോട് അനു ഭവനിൽ മനു (26) നെ ആര്യനാട് പോലീസ് കാപ്പ ഉത്തരവ് ലംഘിച്ചതിന് അറസ്റ്റ് ചെയ്തു. ആര്യനാട് പോലീസ് സ്റ്റേഷൻ പരിധിയിലും അടിപിടി അക്രമം തുടങ്ങി നിരവധി ക്രിമിനൽ കേസുകളിൽ ഉൾപ്പെട്ട പ്രതി വീണ്ടും കുറ്റകൃത്യങ്ങളിൽ ഏർപ്പെട്ടതിനെ തുടർന്ന് തിരുവനന്തപുരം റെയ്ഞ്ച് ഡിഐജി കാപ്പാ നിയമ പ്രകാരം തിരുവനന്തപുരം ജില്ലയിൽ ഒരു വർഷകാലത്തേക്ക് വിലക്ക് പുറപ്പെടുവിച്ചിരുന്നു. കാപ്പാ ഉത്തരവ് ലംഘിച്ച് തിരുവനന്തപുരം ജില്ലയിൽ പ്രവേശിച്ചതായി രഹസ്യ വിവരം ലഭിച്ചതിന്‍റെ അടിസ്ഥാനത്തിൽ ആര്യനാട് പോലീസ് സ്റ്റേഷൻ ഇൻസ്പെക്ടർ വി.എസ്. അജീഷ്, എഎസ്ഐ സുരേഷ് കുമാർ, സിപിഒമാരായ രഞ്ജിത്ത് ശരത്ത് എന്നിവരടങ്ങിയ സംഘം പ്രതിയെ അറസ്റ്റ് ചെയ്തു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

വാഹനങ്ങൾ പാതയോരത്ത്: വൻ അപകടഭീഷണി

മാറനല്ലൂർ: വാഹനങ്ങൾ പാതയോരത്ത്; വൻ അപകട ഭീഷണിയും. അപകടങ്ങളെത്തുടർന്നും തകരാറു കാരണവും നിന്നുപോയ വാഹനങ്ങൾ പാതയോരത്തുനിന്നു മാറ്റാതെ കിടക്കുന്നത് അപകടങ്ങൾക്കു കാരണമാകുന്നു. ഊരൂട്ടമ്പലം-തിരുവനന്തപുരം റോഡിൽ ഗവ. എൽപി സ്‌കൂളിനു സമീപത്തായാണ് ഒരു പിക്കപ്പ് ഓട്ടോയും രണ്ടു കാറുകളും വർഷങ്ങളായി ഉപേക്ഷിക്കപ്പെട്ട നിലയിൽ കിടക്കുന്നത്. വാഹനങ്ങൾ പാതയോരത്തോടു ചേർന്നുകിടക്കുന്നതു കാരണം കാൽനടയാത്രക്കാർക്ക് റോഡിലൂടെ മാത്രമേ സഞ്ചരിക്കാൻ കഴിയുന്നുള്ളൂ. പഞ്ചായത്തിനും പോലീസിനും നാട്ടുകാർ നിരവധി പരാതികൾ നൽകിയെങ്കിലും ഫലമുണ്ടാകുന്നില്ലെന്നാണ് ആക്ഷേപം. ഉപേക്ഷിക്കപ്പെട്ട വാഹനങ്ങളിൽ അടുത്തിടെയായി മാലിന്യം കൊണ്ടിടുന്നതും പതിവായിട്ടുണ്ട്. കോഴിമാലിന്യം ഉൾപ്പെടെ ചാക്കിൽകെട്ടി തള്ളുന്നതു കാരണം തെരുവുനായകളുടെ ശല്യവും പ്രദേശത്ത് വർധിച്ചിട്ടുണ്ട്. സ്‌കൂൾ അധ്യയനവർഷം ആരംഭിച്ചതോടെ കുട്ടികൾക്കുൾപ്പെടെ ഇപ്പോൾ റോഡിൽക്കയറി നടക്കേണ്ടിവരുന്നതും, തെരുവുനായകളുടെ ഭീഷണിയും കൂടുതൽ ബുദ്ധിമുട്ടാക്കുന്നതായാണ് പരാതി.

വീട്ടിലേക്കൊരു പുസ്തകം: പദ്ധതി ഉദ്ഘാടനം ചെയ്തു

വെഞ്ഞാറമൂട്: വീട്ടിലേക്കൊരു പുസ്തകം എന്ന പദ്ധതിയുടെ ഗ്രന്ഥശാലാതല ഉദ്ഘാടനം കലാലയ ഗ്രന്ഥശാലയിൽ നടന്നു. ജില്ലാ പഞ്ചായത്ത് മുൻ പ്രസിഡന്‍റ് രമണി പി. നായർ, നേതൃത്വ സമിതി കൺവീനർ നെല്ലനാട് മോഹനൻ, കവയിത്രി സോണി നായർ എന്നിവർ ചേർന്ന് ഉദ്ഘാടനം നിർവഹിച്ചു. കലാലയ പ്രസിസ്റ്റന്‍റ് ആർ. അജയകുമാർ, സെക്രട്ടറി എം.ബി. ബിജു, വൈസ് പ്രസിഡന്‍റ് അഡ്വ: എസ്. മോഹനൻ നായർ, പഞ്ചായത്ത് മെമ്പർ പി. പ്രസാദ്, ലൈബ്രറിയൻ ബി ശശിധരൻ നായർ, വർക്കിംഗ് കമ്മിറ്റി അംഗങ്ങളായ എസ്. രാജൻ, ജി.ആർ. ഷാജി, ബി. ഉഷ, . ബാലവേദി പ്രസിഡന്‍റ് വി.എം. വിനയ തുടങ്ങിയവർ പങ്കെടുത്തു.

ശ്രീചിത്തിര തിരുനാൾ ട്രസ്റ്റ് കെ. ജയകുമാറിനെ ആദരിച്ചു

വെള്ളറട: 2024-ലെ കേന്ദ്ര സാഹിത്യ അക്കാദമി അവര്‍ഡ് നേടിയ കെ. ജയകുമാറിനെ ശ്രീ ചിത്തിര തിരുനാള്‍ റസിഡന്‍ഷ്യല്‍ സെന്‍ട്രല്‍ സ്‌കൂളും ശ്രീ ചിത്തിര തിരുനാള്‍ ട്രസ്റ്റും ചേർന്ന് ആദരിച്ചു. തമ്പാനൂരിലെ ഹോട്ടല്‍ ദിമോറയില്‍ നടന്ന സമ്മേളനത്തില്‍ പാട്‌ന ഹൈക്കോടതി മുന്‍ ചീഫ് ജസ്റ്റീസ് ജെ.ബി. കോശി മുഖ്യാഥിതിയായിരുന്നു. ട്രസ്റ്റ് ചെയര്‍മാനും മുന്‍ അംബാസിഡറുമായിരുന്ന ടി.പി. ശ്രീനിവാസന്‍ അധ്യക്ഷത വഹിച്ച ചടങ്ങില്‍ മാനേജിംഗ് ട്രസ്റ്റി സതീഷ് കുമാര്‍ സ്വാഗതം പറഞ്ഞു. തുടര്‍ന്ന് അവാര്‍ഡിനർഹമായ ജയകുമാറിന്‍റെ പിംഗളകേശിനി എന്ന കവിതാസമാഹാരത്തിന്‍റെ അവലോകനം പ്രഫ. ലേഖ നരേന്ദ്രന്‍ നിര്‍വഹിച്ചു. ജയകുമാറിന്‍റെ പുതിയ കവിതാസമാഹാരം - പ്രണയത്തിന്‍റെ അധര മുദ്രകളുടെ പ്രകാശനം ഭാഷാ ഇന്‍സ്റ്റിറ്റ്യൂട്ട് മുൻ ഡയറക്ടര്‍ ശ്രീകല നിര്‍വഹിക്കുകയും അതില്‍ ഉള്‍പെട്ട കവിതകളെ സദസിനു പരിചയപ്പെടുത്തുകയും ചെയ്തു. എന്‍എസ്എസ് കോളജ് അസിസ്റ്റന്‍റ് പ്രഫ. ലക്ഷ്മിദാസ്, അധ്യാപകനും യുവകവിയുമായ സുമേഷ്‌ കൃഷ്ണന്‍ എന്നിവര്‍ ജയകുമാര്‍ രചിച്ച കവിതകളുടെ ആലാപനം നടത്തി. ശ്രീ ചിത്തിര തിരുനാള്‍ സ്‌കൂള്‍ പ്രിന്‍സിപ്പാള്‍ എസ്. പുഷ്പവല്ലി നന്ദി പ്രകാശിപ്പിച്ചു.

"നമ്മുടെ ഓണം നമ്മുടെ പൂക്കൾ' പദ്ധതിയുമായി ക്രൈസ്റ്റ് നഗർ കോളജ്

മാറനല്ലൂർ: ക്രൈസ്റ്റ് നഗർ കോളജിലെ പരിസ്ഥിതി ക്ലബ്ബ് മാറനല്ലൂർ പഞ്ചായത്ത് കൃഷിഭവനുമായി സഹകരിച്ചുകൊണ്ട് "നമ്മുടെ ഓണം നമ്മുടെ പൂക്കൾ' എന്ന ലക്ഷ്യത്തോടുകൂടി കോളജ് കാമ്പസിൽ പുഷ്പക്കൃഷി ആരംഭിച്ചു. മാറനല്ലൂർ പഞ്ചായത്ത് പ്രസിഡന്‍റ് എസ്. സുരേഷ് കുമാർ പദ്ധതി ഉദ്ഘാടനം ചെയ്തു. മുപ്പത് സെന്‍റ് സ്ഥലത്ത് രണ്ടായിരം ജമന്തി തൈകളാണ് നട്ടത്. മാറനല്ലൂർ പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ എ.ആർ. സുധീർഖാൻ, കൃഷി ഓഫീസർ കെ.ജി. ബാബുരാജ്, കോളജ് മാനേജർ ഫാ. സിറിയക് മഠത്തിൽ സിഎംഐ, പ്രിൻസിപ്പൽ ഡോ. ജോളി ജേക്കബ്, കൊമേഴ്സ് വിഭാഗം മേധാവി പ്രഫ. ഡോ. പി.എസ്. ദേവകുമാർ എന്നിവർ സംസാരിച്ചു. അധ്യാപകരായ ഡോ. കെ.പി. ഷാനന്ദ്, ഡോ. കവിത ഗോപൻ എന്നിവർ നേതൃത്വം നൽകി.

കുടുബശ്രീ എഡിഎസ് വാർഷികം

നെടുമങ്ങാട്: നഗരസഭ സന്നഗർ വാർഡ് കുടുബശ്രീ എഡിഎസ് വാർഷികം നഗരസഭ ചെയർപേഴ്സൺ സി.എസ്. ശ്രീജ ഉദ്ഘാടനം ചെയ്തു. നഗരസഭ ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ ബി. സതീശൻ അധ്യക്ഷനായി. കൗൺസിലർ ശ്യാമള സ്വാഗതം പറഞ്ഞു. ആരോഗ്യ സ്റ്റാൻഡിംഗ് കമ്മിറ്റി ചെയർപേഴ്സൺ അജിത, സിഡിഎസ് ചെയർപേഴ്സൺ റീജ നസീർ എന്നിവർ പ്രസംഗിച്ചു. കുടുബശ്രീയിലെ മുതിർന്ന അംഗങ്ങൾ ഹരിത കർമസേന അംഗങ്ങളായ ലാലി, ഹാഷിത, ലത, സൗമ്യ എന്നിവരെയും ആശാ വർക്കർ ജയകുമാരി, തൊഴിലുറപ്പ് തൊഴിലാളി രാധ എന്നിവരെയും ഉന്നതവിദ്യാഭ്യാസം നേടിയ കുട്ടികളെയും ആദരിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]