പൂർവവിദ്യാർഥി സംഗമം നടത്തി : Deepika.com Nattu Visesham

ഊട്ടി: മേയ്ദിനം പ്രമാണിച്ച് നീലഗിരി ജില്ലയിലെ എല്ലാ മദ്യഷാപ്പുകൾക്കും ഇന്ന് അവധിയായിരിക്കുമെന്ന് ജില്ലാ കളക്ടർ ലക്ഷ്മി ഭവ്യതന്നീറു അറിയിച്ചു. നിയമം ലംഘിച്ച് മദ്യം വിൽക്കാൻ ശ്രമിച്ചാൽ കർശന നടപടി സ്വീകരിക്കുകയും ചെയ്യും.

കാട്ടാന ചരിഞ്ഞ നിലയിൽ

ഉൗട്ടി: ശിറുമുഖ വനമേഖലയിൽ കാട്ടാനയെ ചരിഞ്ഞ നിലയിൽ കണ്ടെത്തി. 17 വയസ് പ്രായം തോന്നിക്കുന്ന കാട്ടുകൊന്പനെയാണ് ചരിഞ്ഞ നിലയിൽ കണ്ടെത്തിയത്. വിവരമറിഞ്ഞ് വനംവകുപ്പ് ഉദ്യോഗസ്ഥർ സ്ഥലത്തെത്തി പരിശോധന നടത്തി. ഡോ. സുകുമാരൻ പോസ്റ്റ്മോർട്ടം നടത്തി.

ആശുപത്രി വളപ്പിൽ പുലി കയറി

ഉൗട്ടി: മഞ്ചൂർ ഗവ. ആശുപത്രി വളപ്പിൽ പുലി കയറി. സമീപത്തെ വനത്തിൽ നിന്നാണ് പുലി എത്തിയത്. സമീപത്തെ വീട്ടിലെ ആടിനെ കൊല്ലുകയും ചെയ്തു. പുലിയെക്കണ്ട് ആശുപത്രി ജീവനക്കാരും രോഗികളും കൂട്ടിരിപ്പുകാരും ഭീതിയിലായി. വന്യജീവി ശല്യത്തിന് ശാശ്വത പരിഹാരം കാണണമെന്ന് നാട്ടുകാർ ആവശ്യപ്പെട്ടു.

കുന്നന്പറ്റ ക്ഷേത്രത്തിൽ ഉത്സവം

കൽപ്പറ്റ: മേപ്പാടി കുന്നന്പറ്റ ശ്രീഭഗവതി-ശാസ്താ ക്ഷേത്രത്തിൽ എട്ടാം വാർഷിക മഹോത്സവം ഇന്നു മുതൽ നാലു വരെ ആഘോഷിക്കുമെന്ന് ക്ഷേത്ര സമിതി പ്രസിഡന്‍റ് അജേഷ് കനകത്ത്, സെക്രട്ടറി ബാബു മൂപ്പൻകുന്ന്, ആഘോഷ സമിതി പ്രസിഡന്‍റ് എം.ആർ. പ്രശാന്ത്, സെക്രട്ടറി ഡി. സുരേഷ്ബാബു, സതീഷ് ആദ്യവയൽ എന്നിവർ വാർത്താസമ്മേളനത്തിൽ അറിയിച്ചു. ഇന്നു രാവിലെ 7.30നാണ് കൊടിയേറ്റം. രാത്രി എട്ടിന് പ്രദേശിക കലാപരിപാടികൾ. നാളെ വൈകുന്നേരം 6.30ന് ദീപാരാധന. രാത്രി 8.30ന് കലാപരിപാടികൾ. മൂന്നിന് വൈകുന്നേരം 6.30ന് നഗരപ്രദക്ഷിണം. രാത്രി എട്ടിന് സാംസ്കാരിക സമ്മേളനം. ഒന്പതിന് ആകാശ വിസ്മയം, ഗാനമേള. നാലിനു രാവിലെ ആറിന് പൂജകൾക്കുശേഷം കൊടിയിറക്കൽ. ക്ഷേത്രം തന്ത്രി മുല്ലപ്പള്ളി ഇല്ലത്ത് മധുസൂദനൻ നന്പൂതിരിപ്പാട്, മേൽശാന്തി അനന്തൻ എന്പ്രാന്തിരി എന്നിവർ താന്ത്രിക കർമങ്ങൾക്കു നേതൃത്വം നൽകും.

അശാസ്ത്രീയ മാലിന്യ സംസ്കരണം ; പിഴയിട്ടു

കൽപ്പറ്റ: കൽപ്പറ്റ നഗരസഭാ പരിധിയിൽ അശാസ്ത്രീയ മാലിന്യ സംസ്കരണം നടത്തിയ സ്ഥാപനങ്ങൾക്ക് ജില്ലാ എൻഫോഴ്സ്മെന്‍റ് സ്ക്വാഡ് 20,000 രൂപ പിഴയിട്ടു. അജൈവമാലിന്യം കൂട്ടിയിട്ട് കത്തിക്കൽ, അക്ഷ്യമായി വലിച്ചെറിയൽ എന്നിവയ്ക്കാണ് പിഴ. കൽപ്പറ്റ കഐസ്ആർടിസി ഡിപ്പോ, കെസിപിഎംസി, സുബിസ് ഇൻ, എൻപിആർ വെജിറ്റബിൾസ് എന്നീ സ്ഥാപനങ്ങൾക്കാണ് പിഴയടയ്ക്കാൻ നോട്ടീസ് നൽകിയത്. ജില്ലാ എൻഫോഴ്സ്മെന്‍റ് സ്ക്വാഡിന്‍റെ മിന്നൽ പരിശോധനയിലാണ് സ്ഥാപനങ്ങളുടെ പരിസരത്ത് പ്ലാസ്റ്റിക് കവറുകൾ, പേപ്പർ, പ്ലാസ്റ്റിക് കുപ്പികൾ അലക്ഷ്യമായി വലിച്ചെറിയുകയും കൂട്ടിയിട്ട് കത്തിച്ചതും ശ്രദ്ധയിൽപ്പെട്ടത്. ജില്ലാ എൻഫോഴ്സ്മെന്‍റ് സ്ക്വാഡ് ലീഡർ ടി.കെ. സുരേഷ്, സ്ക്വാഡ് അംഗം ഐ.കെ. ഉഷ, വി.ആർ. നിഖിൽ, കൽപ്പറ്റ നഗരസഭ ഹെൽത്ത് ഇൻസ്പെക്ടർ സി.സി. സൗമ്യ എന്നിവർ പരിശോധനയ്ക്ക് നേതൃത്വം നൽകി.

തൊഴിലുറപ്പ് തൊഴിലാളികൾ ആഘോഷം സംഘടിപ്പിച്ചു

ചുള്ളിയോട്: നെൻമേനി പഞ്ചായത്ത് 19-ാം വാർഡിലെ തൊഴിലുറപ്പ് തൊഴിലാളികളുടെ കൂട്ടായ്മ ആഘോഷം സംഘടിപ്പിച്ചു. തീർഥം-2025 എന്ന പേരിൽ ആനപ്പാറ ഗവ.ഹയർ സെക്കൻഡറി സ്കൂൾ ഹാളിലായിരുന്നു പരിപാടി. പഞ്ചായത്ത് വൈസ് പ്രസിഡന്‍റ് ടിജി ചെറുതോട്ടിൽ ഉദ്ഘാടനം ചെയ്തു. വാർഡ് അംഗം ഉഷ വേലായുധൻ അധ്യക്ഷത വഹിച്ചു. വി.ടി. ബേബി, ഷാജി കോട്ടയിൽ, സുജാത ഹരിദാസ്, സിനി വർഗീസ് എന്നിവർ പ്രസംഗിച്ചു. തൊഴിലുറപ്പ് ഓംബുഡ്സ്മാൻ ഒ.പി. ഏബ്രഹാം ബോധവത്കരണ ക്ലാസെടുത്തു. 100 തൊഴിൽദിനം പൂർത്തിയാക്കിയ മുതിർന്ന തൊഴിലാളികളെ ആദരിച്ചു. കലാപരിപാടികൾ അരങ്ങേറി.

ലഹരി വിരുദ്ധ കാന്പയിൻ മാരത്തോണ്‍

കൽപ്പറ്റ: സ്പോർട്സ് ആണ് ലഹരി എന്ന മുദ്രാവാക്യമുയർത്തി കായിക മന്ത്രിയുടെ നേതൃത്വത്തിൽ നടക്കുന്ന ലഹരി വിരുദ്ധ കാന്പയിന്‍റെ ഭാഗമായുള്ള പ്രചരണ പരിപാടി ഏഴിന് ജില്ലയിൽ പര്യടനം നടത്തും. ജില്ലയിലെ പര്യടനത്തിന്‍റെ ഭാഗമായി മാരത്തോണ്‍ അന്നേദിവസം രാവിലെ ആറിന് പനമരത്ത് ആരംഭിച്ച് മാനന്തവാടി വള്ളിയൂർക്കാവ് ജംഗ്ഷനിൽ സമാപിക്കും. വളിയൂർക്കാവ് ജംഗ്ഷൻ മുതൽ മാനന്തവാടി ടൗണ്‍ വരെ കായിക മന്ത്രിയുടെ നേതൃത്വത്തിൽ നടക്കുന്ന ലഹരി വിരുദ്ധ സന്ദേശയാത്ര വാക്കത്തോണ്‍ ഉണ്ടാകും. വൈകുന്നേരം നാലിന് കൽപ്പറ്റ ആനപ്പാലം ജംഗ്ഷന് സമീപത്ത് ആരംഭിച്ച് പുതിയ സ്റ്റാൻഡ് വരെ വാക്കത്തോണ്‍ സംഘടിപ്പിക്കും.

പോലീസ് സ്റ്റേഷനിലെ തൂങ്ങിമരണം: സിബിഐ അന്വേഷണം ശിപാർശ ചെയ്ത് പോലീസ് മേധാവി

കൽപ്പറ്റ: അന്പലവയൽ നെല്ലാറച്ചാൽ പുതിയപാടി ഉന്നതിയിലെ ഗോകുലിനെ(17)കൽപ്പറ്റ പോലീസ് സ്റ്റേഷനിലെ ശുചിമുറിയിൽ തൂങ്ങിമരിച്ച നിലയിൽ കണ്ടെത്തിയ സംഭവത്തിൽ സിബിഐ അന്വേഷണത്തിന് സംസ്ഥാന പോലീസ് മേധാവിയുടെ ശിപാർശ. ഹൈക്കോടതി അഭിഭാഷകനും പൊതു പ്രവർത്തകനുമായ അഡ്വ.കുളത്തൂർ ജയ്സിംഗിനു വിവരാവകാശ നിയമപ്രകാരം ആഭ്യന്തര വകുപ്പിൽനിന്നു ലഭിച്ച മറുപടിയിലാണ് ഇക്കാര്യം വ്യക്തമാക്കുന്നത്. സംസ്ഥാന പോലീസ് മേധാവിയുടെ ശിപാർശ ആഭ്യന്തര വകുപ്പ് പരിശോധിച്ച് വരികയാണെന്നും വിവരാവകാശരേഖയിലുണ്ട്.

മംഗലശേരി നാരായണനെ ആദരിച്ചു

കൽപ്പറ്റ: വയനാട്ടിൽനിന്നുള്ള ആദ്യ ഗ്രാമസേവകനും ജില്ലാ പഞ്ചായത്ത് ആസൂത്രണ സമിതി ഉപാധ്യക്ഷനും കില ഫാക്കൽറ്റിയുമായ മംഗലശേരി നാരായണനെ ജില്ലാ പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റിയുടെ ആഭിമുഖ്യത്തിൽ ആദരിച്ചു. സ്റ്റാൻഡിംഗ് കമ്മിറ്റി ചെയർമാൻ ജുനൈദ് കൈപ്പാണി പൊന്നാടയണിയിച്ച് മെമന്‍റോ നൽകി.

എൻഎഫ്എസ്എ തൊഴിലാളികളുടെ കൂലി: സർക്കാർ നിലപാടിൽ പ്രതിഷേധിച്ചു

കൽപ്പറ്റ: സിവിൽ സപ്ലൈസ്, എൻഎഫ്എസ്എ ഗോഡൗണുകളിലെ കയറ്റിറക്ക് തൊഴിലാളികളുടെ കൂലി വർധിപ്പിക്കേണ്ടെന്ന സർക്കാർ നിലപാടിൽ ഹെഡ്ലോഡ് വർക്കേഴ്സ് ഫെഡറേഷൻ(ഐഎൻടിയുസി) ജില്ലാ കമ്മിറ്റി പ്രതിഷേധിച്ചു. സർക്കാർ നിലപാടിനെതിരേ ജില്ലയിലും സമരം സംഘടിപ്പിക്കാൻ തീരുമാനിച്ചു. റേഷൻകടകളിലും ഗോഡൗണുകളിലും കയറ്റിറക്കു നടത്തുന്നതിനുള്ള കരാർ 2023 ഫെബ്രുവരി ആറിന് അവസാനിച്ചതാണ്. തുടർന്നു നടന്ന ചർച്ചകളുടെയും മറ്റും അടിസ്ഥാനത്തിൽ 15 ശതമാനം കൂലി വർധന ധാരണയായി. എന്നാൽ കൂലി വർധിപ്പിക്കില്ലെന്ന നിലപാടാണ് കഴിഞ്ഞദിവസം സർക്കാരെടുത്തത്. ഒരുവശത്ത് ചർച്ചകൾ നടത്തുകയും മറുവശത്ത് കരാറുകാരെ സഹായിക്കാൻ കുറുക്കുവഴികൾ തേടുകയും ചെയ്ത സർക്കാർ തൊഴിലാളികളെ വഞ്ചിച്ചുവെന്ന് യോഗം കുറ്റപ്പെടുത്തി. ഐഎൻടിയുസി ജില്ലാ പ്രസിഡന്‍റ് പി.പി. ആലി ഉദ്ഘാടനം ചെയ്തു. ഫെഡറേഷൻ ജില്ലാ പ്രസിഡന്‍റ് സലാം മീനങ്ങാടി അധ്യക്ഷത വഹിച്ചു. ടി.എ. റെജി, ഉമ്മർ കുണ്ടാട്ടിൽ, മണി പന്പനാൽ, നിസാം പനമരം, മാടായി ലത്തീഫ്, കെ. മഹേഷ്, വി.പി. മൊയ്തീൻ, ഉമ്മർ മീനങ്ങാടി എന്നിവർ പ്രസംഗിച്ചു.

സ്വതന്ത്ര തോട്ടം തൊഴിലാളി ഫെഡറേഷൻ സംസ്ഥാന സമ്മേളനം ജൂണ്‍ ആദ്യവാരം

കൽപ്പറ്റ: സ്വതന്ത്ര തോട്ടം തൊഴിലാളി ഫെഡറേഷൻ എസ്ടിയു സംസ്ഥാന സമ്മേളനം ജൂണ്‍ ആദ്യവാരത്തിൽ വയനാട്ടിൽ നടത്തുന്നതിന് സ്വതന്ത്ര തോട്ടം തൊഴിലാളി ഫെഡറേഷൻ സംസ്ഥാന പ്രവർത്തക സമിതി യോഗം തീരുമാനിച്ചു. പ്രസിഡന്‍റ് കെ.ടി.സി. മുഹമ്മദ് അധ്യക്ഷത വഹിച്ചു. മേയ് മാസം അംഗത്വ പ്രവർത്തനങ്ങൾ പൂർത്തീകരിക്കുന്നതിനും മേയ് 25നകം യൂണിറ്റ് സമ്മേളനങ്ങളും 31നകം ജില്ലാ സമ്മേളനങ്ങൾ നടത്തുന്നതിനും തീരുമാനിച്ചു. തോട്ടം തൊഴിലാളികളുടെ കൂലി പുതുക്കൽ കാലാവധി ഡിസംബർ 31ന് അവസാനിച്ചതാണ്. കൂലി പുതുക്കൽ ചർച്ച ഇതുവരെ ആരംഭിച്ചിട്ടില്ല. ചർച്ച ഉടനെ തുടങ്ങണമെന്നും ചെറുകിട തോട്ടം തൊഴിലാളി ക്ഷേമനിധി ആനുകൂല്യങ്ങൾ വർധിപ്പിക്കണമെന്നും യോഗം ആവശ്യപ്പെട്ടു. യോഗത്തിൽ സംസ്ഥാന സെക്രട്ടറി കെ. നാസർ പാലക്കാട്, ജനറൽ സെക്രട്ടറി ടി. ഹംസ, സംസ്ഥാന ഭാരവാഹികളായ പി.ടി. അബ്ദുള്ള ഹാജി മലപ്പുറം, കെ. റാബിയ വയനാട്, മഞ്ജു തിരുവനന്തപുരം, ശ്രീകുമാർ തിരുവനന്തപുരം, കെ.എം. റഹ്മാൻ പൊഴുതന, സൈനുൽ ആബിദ് തിരുവനന്തപുരം, കരീം വയനാട്, ട്രഷറർ വഞ്ചുവം ഷറഫ് എന്നിവർ പ്രസംഗിച്ചു.

കർഷക മിത്രം ജൈവ പച്ചക്കറി വിളവെടുപ്പ് നടത്തി

സുൽത്താൻ ബത്തേരി: കർഷകമിത്രം ഫാർമേഴ്സ് സംഘടന കൊഴുവണവയലിൽ നടത്തിയ ജൈവ പച്ചക്കറിയുടെ വിളവെടുപ്പ് കർഷമിത്രം ചെയർമാൻ പി.എം. ജോയ് നിർവഹിച്ചു. കൊഴുവണയിലെ കർഷകമിത്ര അംഗങ്ങൾ ചേർന്ന് വിവിധ മേഖലയിൽ ആയാണ് ജൈവ പച്ചക്കറി കൃഷി നടത്തിവരുന്നത്. പച്ചക്കറി കൃഷി വ്യാപിപ്പിക്കാൻ കർഷകർ തീരുമാനിച്ചു. ബത്തേരി പോലീസ് സ്റ്റേഷൻ റോഡിലെ കർഷകമിത്രം ഒൗട്ട്‌ലറ്റ് വഴിയാണ് വിപണനം നടത്തുന്നത്. വിളവെടുപ്പുമായി ബന്ധപ്പെട്ട് നടന്ന യോഗത്തിൽ വി.കെ. ഷാജി അധ്യക്ഷത വഹിച്ചു. കെ.എം. ജയിംസ്, സി.എം. ഷിജു, വിൽസണ്‍ ചുങ്കത്ത്, ഇ.കെ. രാജീവ്, കെ.ബി. രാജു, മനു കൊഴുവണ തുടങ്ങിയവർ പ്രസംഗിച്ചു.

മരം റോഡിലേക്ക് മറിഞ്ഞു

കാട്ടിക്കുളം: തോൽപ്പെട്ടി റോഡിൽ ചേലൂരിനു സമീപം വൻമരം റോഡിലേക്ക് മറിഞ്ഞു. കഴിഞ്ഞദിവസം അർധരാത്രിയോടെയാണ് സംഭവം. മരത്തിന്‍റെ കുറച്ചുഭാഗം ഇലക്ട്രിക് ലൈനിലാണ് പതിച്ചത്. മരം മറിയുന്പോൾ അതുവഴി പോയ ജീപ്പിലെ നാല് യാത്രക്കാർ അദ്ഭുതകരമായി രക്ഷപ്പെട്ടു. റോഡിൽനിന്നു തോട്ടത്തിലേക്ക് ജീപ്പ് ചാടിച്ചതാണ് ദുരന്തം ഒഴിവാക്കിയത്. മരം മറിഞ്ഞത് തോൽപ്പെട്ടി റോഡിൽ ദീർഘനേരം ഗതാഗത തടസത്തിനു കാരണമായി. മാനന്തവാടിയിൽനിന്നു അഗ്നി-രക്ഷാസേനയെത്തി മരം മുറിച്ചുമാറ്റിയാണ് ഗതാഗത തടസം നീക്കിയത്. അസി.സ്റ്റേഷൻ ഓഫീസർ സെബാസ്റ്റ്യൻ ജോസഫ്, ഫയർ ആൻഡ് റെസ്ക്യൂ ഓഫീസർമാരായ വിശാൽ അഗസ്റ്റ്യൻ, കെ.എസ്. ശ്രീകാന്ത്, കെ.ജെ. ജിതിൻ, ഹോംഗാർഡുമാരായ വി.ജി. രൂപേഷ്, എ.എം. മുരളിധരൻ, പി.യു. ജേബി എന്നിവരടങ്ങുന്ന സംഘമാണ് മരം മുറിച്ചുമാറ്റിയത്. തോട്ടത്തിൽനിന്നു ജീപ്പ് കെട്ടിവലിച്ച് റോഡിൽ കയറ്റിയതും അഗ്നി-രക്ഷാസേനയാണ്.

അധ്യാപകർക്ക് യാത്രയയപ്പ് നൽകി

മുട്ടിൽ: സർവീസിൽനിന്നു വിരമിക്കുന്ന പൂതാടി ഹയർ സെക്കൻഡറി സ്കൂൾ പ്രിൻസിപ്പൽ കെ.ആർ. ഷിബു, മുട്ടിൽ ഓർഫനേജ് ഹയർ സെക്കൻഡറി സ്കൂൾ കെമിസ്ട്രി അധ്യാപകൻ കെ. സുരേഷ് എന്നിവർക്ക് ജില്ലാ കെമിസ്ട്രി ടീച്ചേഴ്സ് അസോസിയേഷന്‍റെ നേതൃത്വത്തിൽ യാത്രയയപ്പ് നൽകി. പ്രിൻസൽമാരായി സ്ഥാനക്കയറ്റം ലഭിച്ച എ.ആർ. അജേഷ്, പി. ശിവപ്രസാദ്, അന്പിളി ജോണ്‍ എന്നിവരെ ആദരിച്ചു. മടക്കിമല സർവീസ് സഹകരണ ബാങ്ക് ഹാളിൽ നടന്ന പരിപാടിയിൽ അസോസിയേഷൻ പ്രസിഡന്‍റ് വി.ജെ. ബിന്ദു അധ്യക്ഷത വഹിച്ചു. സെക്രട്ടറി ഒ.ജെ. ബിജു,വൈസ് പ്രസിഡന്‍റ് ബിനേഷ് രാഘവൻ, എ.എം. ബെന്നി, അന്നമ്മ ജോണ്‍, ഡാർലി ക്ലയർ ജോസ്, പി.ടി. സജീവൻ, ലിയോ മാത്യു, വി.ജെ. റോയ് എന്നിവർ പ്രസംഗിച്ചു.

മംഗളൂരുവിലെ ആൾകൂട്ട കൊലപാതകം: സമഗ്ര അന്വേഷണം നടത്തണമെന്ന്

സുൽത്താൻ ബത്തേരി: കർണാടക മംഗളൂരൂവിൽ പുൽപ്പള്ളി സ്വദേശി അഷ്റഫ് ആൾക്കൂട്ട കൊലപാതകത്തിന് ഇരയായ സംഭവത്തിൽ സമഗ്ര അന്വേഷണം നടത്തണമെന്ന് ഐ.സി. ബാലകൃഷ്ണൻ എംഎൽഎ ആവശ്യപ്പെട്ടു. കേട്ടുകേൾവിപോലുമില്ലാത്ത സംഭവമാണ് ഉണ്ടായതെന്നും സംഭവത്തിൽ അന്വേഷണം നടത്താൻ സർക്കാരുകൾ തയാറകണമെന്നും കുറ്റവാളികളെ കണ്ടെത്തി മാതൃകാപരമായി ശിക്ഷിക്കണമെന്നും അദ്ദേഹം പറഞ്ഞു.

എള്ളുമന്ദം സെന്‍റ് ജോർജ് പള്ളി തിരുനാൾ ആഘോഷം

എള്ളുമന്ദം: സെന്‍റ് ജോർജ് ദേവാലയത്തിൽ വിശുദ്ധ ഗീവർഗീസ് സഹദായുടെ തിരുനാൾ ഇന്നു മുതൽ നാലു വരെ ആഘോഷിക്കും. ഇന്നു വൈകുന്നേരം അഞ്ചിന് വികാരി ഫാ. ജോമേഷ് തേക്കിലക്കാട്ടിൽ കൊടിയേറ്റും. വിശുദ്ധ കുർബാനയിൽ ദീപ്തിഗിരി സെന്‍റ് തോമസ് പള്ളി വികാരി ഫാ.ചാണ്ടി പുനക്കാട്ട് കാർമികനാകും. തുടർന്ന് വാർഡുകളിലേക്ക് വിശുദ്ധരുടെ തിരുസ്വരൂപങ്ങൾ എഴുന്നള്ളിക്കും. നാളെ വൈകുന്നേരം 4.30ന് ജപമാല. അഞ്ചിന് എള്ളുമന്ദം സെന്‍റ് മേരീസ് മലങ്കര പള്ളി വികാരി ഫാ.വർഗീസ് ചൂരക്കുഴിയുടെ കാർമികത്വത്തിൽ തിരുനാൾ കുർബാന, നൊവേന. 6.30ന് സണ്‍ഡേ സ്കൂൾ വിദ്യാർഥികളുടെയും മറ്റു ഭക്തസംഘടനകളുടെയും നേതൃത്വത്തിൽ കലാപരിപാടികൾ, കല്യാണ്‍ ആലപ്പുഴയുടെ ഗാനമേള. മൂന്നിന് വൈകുന്നേരം 4.30ന് ജപമാല. അഞ്ചിന് ഫാ.വിപിൻ കളപ്പുരയ്ക്കലിന്‍റെ കാർമികത്വത്തിൽ ആഘോഷമായ തിരുനാൾ കുർബാന, നൊവേന. 6.30ന് കാക്കഞ്ചേരി കുരിശടിയിലേക്ക് പ്രദക്ഷിണം. തുടർന്ന് പരിശുദ്ധ കുർബാനയുടെ ആശീർവാദം, നേർച്ചഭക്ഷണം, മേളക്കാഴ്ച, ആകാശ വിസ്മയം. നാലിന് രാവിലെ 10ന് കല്ലോടി സെന്‍റ് ജോർജ് ഫൊറോന പള്ളി വികാരി ഫാ.സജി കോട്ടയിലിന്‍റെ കാർമികത്വത്തിൽ വിശുദ്ധ കുർബാന, വചന സന്ദേശം, നൊവേന. തുടർന്ന് എള്ളുമന്ദം കുരിശടിയിലേക്ക് പ്രദക്ഷിണം, പരിശുദ്ധ കുർബാനയുടെ ആശീർവാദം, സ്നേഹവിരുന്ന്.

ബാവലി സെന്‍റ് ജോസഫ്സ് ദേവാലയം കൂദാശ ചെയ്തു

കാട്ടിക്കുളം: ബാവലി സെന്‍റ് ജോസഫ്സ് ദേവാലയം മാനന്തവാടി രൂപത മെത്രാൻ മാർ ജോസ് പൊരുന്നേടം കൂദാശ ചെയ്തു. വികാരി ഫാ.അജയ് തേക്കിലക്കാട്ടിൽ, ഫാ. സിബിച്ചൻ ചെലക്കാപള്ളി എന്നിവർ സഹകാർമികരായി. ട്രസ്റ്റിമാരായ ജോബിഷ് തെക്കേടത്ത്, സണ്ണി വർഗീസ്, വിനോദ് പൗലോസ് എന്നിവർ നേതൃത്വം നൽകി. മാനന്തവാടി രൂപതയിലെ ഏറ്റവും ചെറിയ ഇടവകയാണ് കർണാടക അതിർത്തി പ്രദേശമായ ബാവലിയിലേത്. 1984ൽ ആരംഭിച്ച ഇടവകയിൽ 12 കുടുംബങ്ങളാണുള്ളത്.

കാട് കാണാൻ വയനാട്ടിലേക്ക് സഞ്ചാരികളുടെ ഒഴുക്ക്

സുൽത്താൻ ബത്തേരി: വേനൽ മഴയിൽ കാട് പച്ചപ്പണിഞ്ഞതോടെ കാടും വന്യജീവികളെയും കാണുന്നതിനായി സഞ്ചാരികളുടെ ഒഴുക്കാണ് വയനാട്ടിലേയ്ക്ക്. വയനാട് വന്യജീവിസങ്കേതത്തിലെ മുത്തങ്ങയിൽ ഏപ്രിലിൽ പതിനായിരത്തോളം പേരാണ് കാട് കണ്ട് മടങ്ങിയത്. ഇതിൽ അറുപത്തിയാറ് വിദേശികളും ഉൾപ്പെടും. 18ലക്ഷത്തോളം രൂപയുടെ വരുമാനമാണ് ഈ ഇനത്തിൽ വനം വകുപ്പിന് ലഭിച്ചത്. വനത്തിലൂടെയും ദേശീയപാതയിലൂടെയും പതിനാല് കിലോമീറ്റർ ദൂരത്തിലാണ് മുത്തങ്ങയിൽ കാനന യാത്ര നടത്തുന്നത്. വേനൽമഴയിൽ കാട് പച്ചപ്പണിയുകയും മധ്യവേനലവധിയും ആഘോഷദിനങ്ങളും ഒന്നിനുപുറകെ ഒന്നായി എത്തുകയും ചെയ്തതോടെ വയനാട്ടിലേക്ക് സഞ്ചാരികളുടെ ഒഴുക്കാണ്. ഇതിൽ കൂടുതൽപേരും വയനാടിന്‍റെ കനാനനഭംഗി ആസ്വദിക്കാനായാണ് എത്തുന്നത്. വയനാട് വന്യജീവിസങ്കേതത്തിലെ മുത്തങ്ങയിലെത്തി കാടും കാട്ടുമൃഗങ്ങളെയും കണ്ട് സഞ്ചാരികൾ സന്തോഷത്തോടെയാണ് മടങ്ങുന്നത്. രാവിലെ ആറ് മുതൽ പത്ത് വരെയും വൈകുന്നേരം മൂന്ന് മുതൽ ആറ് വരെയുമാണ് പ്രവേശനം. രാവിലെ എട്ട് വീതം ബസും ജീപ്പും വൈകുന്നേരം ആറ് ബസും എട്ട് ജീപ്പുമാണ് സഞ്ചാരികളുമായി കാട് ചുറ്റുക.

വയനാടിന് എയിംസ്: പ്രിയങ്ക ഗാന്ധി കേന്ദ്ര ആരോഗ്യമന്ത്രിക്ക് കത്ത് നൽകി

കൽപ്പറ്റ: ആരോഗ്യരംഗം ശക്തിപ്പെടുത്താൻ വയനാട്ടിൽ എയിംസ് അല്ലെങ്കിൽ പോസ്റ്റ് ഗ്രാജ്വേറ്റ് ഇൻസ്റ്റിറ്റ്യൂട്ട് ഓഫ് മെഡിക്കൽ എഡ്യുക്കേഷൻ ആൻഡ് റിസർച് സ്ഥാപിക്കുന്നതിന് പ്രിയങ്ക ഗാന്ധി എംപി കേന്ദ്ര ആരോഗ്യ മന്ത്രി ജെ.പി. നദ്ദയ്ക്ക് കത്തയച്ചു. ജില്ലയിലെ ഗോത്രവർഗ മേഖലകളിൽ അരിവാൾ രോഗ ബാധിതർ നിരവധിയാണ്. മാനന്തവാടി ഗവ.മെഡിക്കൽ കോളജ് ആശുപത്രിയിൽ പ്രത്യേക സൗകര്യം ഒരുക്കിയാണ് ഇവരെ ചികിത്സിക്കുന്നത്. കാൻസർ, വൃക്ക രോഗികളുടെ എണ്ണം ജില്ലയിൽ വർധിക്കുകയാണ്. വന്യമൃഗ ആക്രമണം, വാഹനാപകടം എന്നിവ മൂലം ഗുരുതര പരിക്കേൽക്കുന്നവർക്ക് ജില്ലയിൽ ലഭിക്കുന്ന വിദഗ്ധ ചികിത്സ പരിമിതമാണ്. മെഡിക്കൽ കോളജ് ആശുപത്രി, ജനറൽ, താലൂക്ക് ആശുപത്രികൾ എന്നിവിടങ്ങളിൽ അടിസ്ഥാന സൗകര്യങ്ങളുടെയും ജീവനക്കാരുടെയും അപര്യാപ്തതയുണ്ടെന്നും കത്തിൽ ചൂണ്ടിക്കാട്ടുന്നു.

മുട്ടിൽ സൗത്ത് വില്ലേജിലെ ഈട്ടിമുറി : പുതിയ ചീഫ് സെക്രട്ടറിക്ക് കത്തയച്ച് മുൻ ഗവ.പ്ലീഡർ

കൽപ്പറ്റ: മുട്ടിൽ സൗത്ത് വില്ലേജിലെ റവന്യു പട്ടയ ഭൂമികളിൽ 2020 നവംബറിനും 2021 ജനുവരിക്കും ഇടയിൽ നടന്ന അനധികൃത ഈട്ടിമുറിയുമായി ബന്ധപ്പെട്ട കേസുകളിൽ ശ്രദ്ധയും നിരീക്ഷണവും ആവശ്യപ്പെട്ട് പുതിയ ചീഫ് സെക്രട്ടറി ഡോ.എ. ജയതിലകിന് കത്ത്. ജില്ലാ ഗവ.പ്ലീഡറും പബ്ലിക് പ്രോസിക്യുട്ടറുമായിരുന്ന അഡ്വ.ജോസഫ് മാത്യുവാണ് കത്ത് അയച്ചത്. 2020 ഒക്ടോബർ 24ന് ഡോ.എ. ജയതിലക് റവന്യു സെക്രട്ടറിയായിരിക്കേ പുറപ്പെടുവിച്ച ഉത്തരവിന്‍റെ മറവിലാണ് പൊതുഖജനാവിന് കോടിക്കണക്കിനു രൂപ നഷ്ടം വരുത്തിയ ഈട്ടിമുറി നടന്നതെന്നു കത്തിൽ ചൂണ്ടിക്കാട്ടുന്നു. നിയമവിരുദ്ധ മരംമുറിക്കു പിന്നിൽ ഗൂഢാലോചനയുണ്ടോ എന്ന് അന്വേഷിക്കുന്നതിന് ക്രൈംബ്രാഞ്ചിനെ ഏൽപ്പിച്ച കേസിൽ സ്വീകരിച്ച നടപടികളെയും പരിസമാപ്തിയെയും കുറിച്ച് നിലവിൽ ആർക്കും മിണ്ടാട്ടമില്ലെന്ന് കത്തിൽ പറയുന്നു. റവന്യു പട്ടയഭൂമികളിലെ മരങ്ങൾ പൊതുമുതലായി സംരക്ഷിച്ചുവന്നതും 2020 ഓഗസ്റ്റ് 21ലെ ഹൈക്കോടതി ഉത്തരവ് പ്രകാരം മുറിക്കാൻ അനുമതി ഇല്ലാത്തതുമാണ്. ഹൈക്കോടതി ഉത്തരവ് അവഗണിച്ച് ഇറക്കിയ ഉത്തരവാണ് നിയമവിരുദ്ധമായി മരങ്ങൾ മുറിക്കുന്നതിന് ഇടയാക്കിയത്. റവന്യു വകുപ്പിന്‍റെ 2020 മാർച്ച് 11ലെ പരിപത്രവും 2020 ഓഗസ്റ്റ് 21ലെ ഉത്തരവും നിയമ പ്രാബല്യം ഇല്ലാത്തതാണെന്നു 2021 ജൂലൈയിൽ മരംമുറിക്കേസിലെ പ്രതികളിൽ ചിലരുടെ ജാമ്യാപേക്ഷ പരിഗണിക്കുന്നതിനിടെ ഹൈക്കോടതി വ്യക്തമാക്കിയിരുന്നു. നിയമവിരുദ്ധ മരംമുറിയുമായി ബന്ധപ്പെട്ട് ഇക്കഴിഞ്ഞ മാർച്ച് 25ന് സുപ്രീം കോടതി നടത്തിയ നിരീക്ഷണങ്ങളുടെ ഗൗരവം ബന്ധപ്പെട്ട ഉദ്യോഗസ്ഥർ കാണാതെപോകരുത്. അനധികൃത മരംമുറി കൂട്ടക്കൊലയ്ക്ക് തുല്യമാണെന്നാണ് കോടതി നിരീക്ഷിച്ചത്. നിയമപരമായ അനുമതിയില്ലാതെ മരങ്ങൾ മുറിക്കുന്നവരെ കർശന ശിക്ഷയ്ക്ക് വിധേയമാക്കണമെന്നു കോടതി അഭിപ്രായപ്പെടുകയുമുണ്ടായി. മുട്ടിൽ സൗത്ത് വില്ലേജിലെ ഈട്ടമുറിയുമായി ബന്ധപ്പെട്ട് 2021 ഫെബ്രുവരിയിൽ ആരംഭിച്ച കെഎൽസി നടപടികൾ നാല് വർഷം കഴിഞ്ഞിട്ടും എങ്ങുമെത്തിയില്ല. ഇതിനു കാരണം റവന്യു അധികാരികൾ വ്യക്തമാക്കേണ്ടതുണ്ട്. നിയമവിരുദ്ധ മരംമുറി സ്വതന്ത്ര ഏജൻസിയോ അല്ലെങ്കിൽ ഹൈക്കോടതി മേൽനോട്ടത്തിലോ അന്വേഷിക്കുന്നതിന് തൃശൂർ സ്വദേശി ജോർജ് വട്ടുകുളം ഫയൽ ചെയ്ത ഹർജി പരിഗണിക്കവേ സംസ്ഥാന പോലീസ് മേധാവി, വനം മേധാവി, അഡ്വക്കറ്റ് ജനറൽ എന്നിവർ ബോധിപ്പിച്ച കാര്യങ്ങൾ പരിശോധിക്കണം. ഈ ഹർജിയിൽ ഹൈക്കോടതി പുറപ്പെടുവിച്ച ഉത്തരവിലെ 65 മുതൽ 68 വരെ ഖണ്ഡികകളിലുള്ള നിരീക്ഷണങ്ങൾ പ്രത്യേകം കാണേണ്ടതുണ്ട്. ഈട്ടിമുറിയുമായി ബന്ധപ്പെട്ട് കൽപ്പറ്റ സിജെഎം, ബത്തേരി ജെഎഫ്സിഎം കോടതികളിലുള്ള കേസുകളിൽ തന്നെ സ്പെഷൽ പ്രോസിക്യൂട്ടറായി സർക്കാർ നിയമിച്ചിരുന്നു. എന്നാൽ 2024 ഏപ്രിലിനുശേഷം ഉദ്യോഗസ്ഥർ കേസ് വിഷയത്തിൽ ബന്ധപ്പെടുന്നില്ല. സ്പെഷൽ പ്രോസിക്യൂട്ടർ സ്ഥാനത്തുനിന്നു തന്നെ നീക്കിയെന്നാണ് മാധ്യമങ്ങളിലൂടെ അറിയാനിടയായത്. ഇക്കാര്യത്തിൽ ഔദ്യോഗിക അറിയിപ്പ് ലഭിച്ചിട്ടില്ല. ഈ സാഹചര്യത്തിൽ ക്രൈംബ്രാഞ്ച് എഡിജിപിക്കും തുടർന്ന് ചീഫ് സെക്രട്ടറിക്കും കത്ത് നൽകിയെങ്കിലും മറുപടി ലഭിച്ചില്ലെന്നും അഡ്വ.ജോസഫ് മാത്യുവിന്‍റെ കത്തിൽ പറയുന്നു.

വാട്ടർ എടിഎം കേടായി

ഊട്ടി: ഊട്ടി പൈൻഫോറസ്റ്റിലെ വാട്ടർ എടിഎം കേടായി. ഇത് പ്രദേശത്ത് വിനോദസഞ്ചാരത്തിന് എത്തുന്നവർക്ക് ബുദ്ധിമുട്ടായി. നീലഗിരിയിൽ ജില്ലാ ഭരണകൂടം 60 വാട്ടർ എടിഎമ്മുകളാണ് സ്ഥാപിച്ചത്. അഞ്ച് രൂപനാണയും നിക്ഷേപിച്ചാൽ ഒരു ലിറ്റർ വെള്ളം ലഭിക്കുന്ന വിധത്തിലാണ് എടിഎം പ്രവർത്തനം.

സഹസ്രകലശ ചടങ്ങുകൾ ഇന്ന്

പുൽപ്പള്ളി: സീതാദേവി ലവകുശ ക്ഷേത്രത്തിലെ അഷ്ടബന്ധ നവീകരണ സഹസ്രകലശ ചടങ്ങുകളുടെ അഞ്ചാം ദിനമായ ഇന്ന് രാവിലെ ആറിന് ഗണപതി ഹോമം, ഉഷപൂജ, ശയ്യാ പൂജ, കുംഭേശ കർക്കരി കലശപൂജ, ജീവകലശ പൂജ, ജീവകലശം ശയ്യയിലേക്ക് എഴുന്നള്ളിക്കൽ, ബ്രഹ്മ കലശപൂജ വിവിധ താന്ത്രി കർമങ്ങൾ നടന്നു. തന്ത്രി മഴുവന്നൂർ തെക്കെയില്ലത്ത് ഡോ.എം. ഗോവിന്ദരാജ് എന്പ്രാന്തിരി മുഖ്യകാർമികത്വത്തിലായിരുന്നു ചടങ്ങുകൾ. ഇന്ന് രാവിലെ ആറിന് ഗണപതി ഹോമം, അധിവാസം വിടർത്തി പൂജ, പ്രാസാദ പ്രതിഷ്ഠ, പീഠപ്രതിഷ്ഠ, മുഷ്ട്യയാദി ശുദ്ധി, നാന്ദീമുഖം പുണ്യാഹം, രത്ന ന്യാസം, സ്വർണന്യാസം, പ്രതിഷ്ഠാപാണി, ദേവീപ്രതിഷ്ഠ, ഉപദേവ പ്രതിഷ്ഠ, താഴികകുട പ്രതിഷ്ഠയും നടക്കുമെന്ന് മുരിക്കൻമാർ ദേവസ്വം ട്രസ്റ്റി കുപ്പത്തോട് രാജശേഖരൻ നായർ, ദേവസ്വം എക്സിക്യുട്ടീവ് ഓഫീസർ സി. വിജേഷ്, വിജയൻ കുടിലിൽ, ഐക്കരശേരി ഗോപാലകൃഷ്ണൻ നായർ തുടങ്ങിയവർ പറഞ്ഞു.

കളക്ടറേറ്റ് പടിക്കൽ ധർണ നടത്തി

ഊട്ടി: സിപിഐ നിയന്ത്രണത്തിലുള്ള ആദിവാസി മുന്നേറ്റ സംഘത്തിന്‍റെ നേതൃത്വത്തിൽ കളക്ടറേറ്റ് പടിക്കൽ ധർണ നടത്തി. മുതുമല പുനരധിവാസ പദ്ധതി നിർവഹണത്തിലെ ക്രമക്കേടുകൾ അന്വേഷിക്കുക, പുനരധിവാസ പ്രദേശത്ത് അടിസ്ഥാന സൗകര്യങ്ങൾ ഒരുക്കുക തുടങ്ങിയ ആവശ്യങ്ങൾ ഉന്നയിച്ചായിരുന്നു സമരം. എഐടിയുസി ജില്ലാ സെക്രട്ടറി ബോജരാജ് അധ്യക്ഷത വഹിച്ചു. എ. മുഹമ്മദ്ഗനി, കമലാക്ഷി, മഹേന്ദ്രൻ, ഗുണശേഖരൻ എന്നിവർ പ്രസംഗിച്ചു. പുലിയാലം, മുതുകുളി, ബെണ്ണ, മണ്ടേക്കര, നാഗംപള്ളി, നെല്ലിക്കര, കുടിത്തകൻ തുടങ്ങിയ ഗ്രാമങ്ങളിലെ ആദിവാസികളെയും മാണ്ടാടൻ ചെട്ടിമാരെയുമാണ് പുനരധിവാസ പദ്ധതിയിൽ മുതുമല കടുവാസങ്കേതത്തിൽനിന്നു മാറ്റിയത്.

ഹോട്ടലുകൾ രാത്രി 11 വരെ തുറക്കാൻ അനുവദിക്കണമെന്ന്

ഊട്ടി: സമ്മർ സീസണ്‍ പ്രമാണിച്ച് നഗരത്തിലെ ഹോട്ടലുകൾ രാത്രി 11 വരെ പ്രവർത്തിക്കാൻ അനുമതി തേടി ഉടമകൾ ജില്ലാ ഭരണകൂടത്തിന് നിവേദനം നൽകി. ഹോട്ടലുകൾ രാത്രി 10നുശേഷം പ്രവർത്തിക്കാൻ പോലീസ് അനുവദിക്കുന്നില്ല. ഇത് സഞ്ചാരികൾക്കടക്കം പ്രയാസം സൃഷ്ടിക്കുന്ന സാഹചര്യത്തിലാണ് ഹോട്ടൽ ഉടമകൾ ജില്ലാ ഭരണകൂടത്തെ സമീപിച്ചത്.

സിഡിസി കെട്ടിട നിർമാണം: ചായപ്പയറ്റുമായി ജ്യോതി പാലിയേറ്റീവ് കെയർ സൊസൈറ്റി

കൽപ്പറ്റ: ചൈൽഡ് ഡവലപ്മെന്‍റ് സെന്‍റർ(സിഡിസി)കെട്ടിട നിർമാണത്തിനു പണം കണ്ടെത്താൻ മേപ്പാടി ജ്യോതി പെയിൻ ആൻഡ് പാലിയേറ്റീവ് കെയർ സൊസൈറ്റി ചായപ്പയറ്റ് നടത്തുന്നു. ദീപ്തം-2025 എന്ന പേരിൽ സൊസൈറ്റി 22-ാം വാർഷികം ആഘോഷിക്കുന്ന നാളെ രാവിലെ ഒന്പത് മുതൽ രാത്രി എട്ടുവരെ മേപ്പാടി സെന്‍റ് ജോസഫ്സ് യുപി സ്കൂളിലാണ് ചായപ്പയറ്റ്. ഇതിൽ പങ്കെടുക്കുന്നതിന് സമൂഹത്തിന്‍റെ വിവിധ തുറകളിലുള്ള 5,000 പേർക്ക് കത്ത് നൽകിയതായി സൊസൈറ്റി ഭാരവാഹികളായ സി.എച്ച്. സുബൈർ, ഒ.എം. സാമുവൽ, എൻ.കെ. വർക്കി, ഒ.കെ. മുഹമ്മദലി, ഹൈദ്രു കാവുന്പാടൻ, ബിജി ബേബി എന്നിവർ വാർത്താസമ്മേളനത്തിൽ അറിയിച്ചു. സൊസൈറ്റിക്കു കീഴിലുള്ള ഡയാലിസിസ് കേന്ദ്രത്തിനു സമീപം വിലയ്ക്കുവാങ്ങിയ 40 സെന്‍റ് ഭൂമിയിലാണ് ഭിന്നശേഷി കുട്ടികൾക്കുള്ള സെന്‍ററിന് കെട്ടിം പണിയുന്നത്. രണ്ട് നിലകളിൽ 6,000 ചതുരശ്ര അടി വിസ്തീർണമുള്ളതാകും കെട്ടിടം. 70 ലക്ഷം രൂപയാണ് ചെലവ് കണക്കാക്കുന്നത്. ആറ് മാസത്തിനകം പ്രവൃത്തി പൂർത്തിയാക്കും. ദീപ്തം-2025ന്‍റെ ഭാഗമായി വൈകുന്നേരം അഞ്ചിന് ചേരുന്ന സാംസ്കാരിക സമ്മേളനത്തിനുശേഷം കെട്ടിടത്തിന്‍റെ ശിലാസ്ഥാപനം മേപ്പാടി അരപ്പറ്റ ഡോ.മൂപ്പൻസ് മെഡിക്കൽ കോളജ് മാനേജിംഗ് ട്രസ്റ്റി യു. ബഷീർ നിർവഹിക്കും. രോഗി-ബന്ധു സംഗമം, മത നേതൃ സൗഹൃദ സംഗമം, കുട്ടികളുടെ കലാപരിപാടികൾ, വൃക്കരോഗ നിർണയ ക്യാന്പ്, ഡയാലിസിസ് സെന്‍റർ സന്ദർശനം, യുവജ്യോതി സംഗമം, മാതൃജ്യോതി സംഗമം തുടങ്ങിയവയും ദീപ്തം-2025ന്‍റെ ഭാഗമാണ്. രോഗി-ബന്ധു സംഗമത്തിൽ മേപ്പാടി പഞ്ചായത്ത് വൈസ് പ്രസിഡന്‍റ് രാധ രാമസ്വാമി, മൂപ്പൈനാട് പഞ്ചായത്ത് വൈസ് പ്രസിഡന്‍റ് ഷൈബാൻ അബ്ദുൾസലാം, കൽപ്പറ്റ ബ്ലോക്ക് പഞ്ചായത്ത് അംഗം നസീമ, മേപ്പാടി മാരിയമ്മൻ ക്ഷേത്രം ട്രസ്റ്റി അഡ്വ.ബബിത തുടങ്ങിയവർ പങ്കെടുക്കും. മത നേതൃ സൗഹൃദസംഗമത്തിൽ മേപ്പാടി സെന്‍റ് ജോസഫ്സ് പള്ളി വികാരി ഫാ.സണ്ണി പടിഞ്ഞാറേടത്ത്, മുട്ടിൽ ഡബ്ല്യുഎംഒ കോളജ് അസി.പ്രഫ.ഡോ.യൂസഫ് മുഹമ്മദ് നദ്വി, സിസ്റ്റർ ഷീല ബഹൻജി(ബ്രഹ്മകുമാരീസ്) എന്നിവർ പ്രസംഗിക്കും. സാംസ്കാരിക സമ്മേളനം ടി. സിദ്ദിഖ് എംഎൽഎ ഉദ്ഘാടനം ചെയ്യും. മേപ്പാടി പഞ്ചായത്ത് പ്രസിഡന്‍റ് കെ. ബാബു, മൂപ്പൈനാട് പഞ്ചായത്ത് പ്രസിഡന്‍റ് ആർ. ഉണ്ണിക്കൃഷ്ണൻ, തണൽ ചെയർമാൻ ഡോ.വി. ഇദ്രിസ്, വിദ്യാഭ്യാസ പ്രവർത്തകൻ പി.എം.എ. ഗഫൂർ, യു. ബഷീർ എന്നിവർ പ്രസംഗിക്കും. കഴിഞ്ഞ 22 വർഷത്തിനിടെ അനേകം രോഗികൾക്ക് സാന്ത്വനം പകരാൻ സൊസൈറ്റിക്ക് കഴിഞ്ഞതായി ഭാരവാഹികൾ പറഞ്ഞു. കാൻസർ ബാധിതർ, കിഡ്നി രോഗികൾ, നട്ടെല്ല് തകർന്ന് കിടപ്പിലായവർ, ശരീരം തളർന്നവർ, മാനസിക രോഗികൾ, ഭിന്നശേഷി കുട്ടികൾ എന്നീ വിഭാഗങ്ങളിൽ 400 ഓളം പേർ നിലവിൽ ജ്യോതിയുടെ പരിചരണത്തിലുണ്ട്. 2019ൽ ആരംഭിച്ച ജ്യോതി-തണൽ ഡയാലിസ് സെന്‍ററിൽ ഒന്പത് മെഷീനുണ്ട്. 36 പേർക്കാണ് സൗജന്യ ഡയാലിസിസ് നൽകുന്നത്. സൈക്യാട്രിക് ആൻഡ് ഡി അഡിക്ഷൻ ക്ലിനിക് 2020 ഒക്ടോബർ മുതൽ പ്രവർത്തിക്കുന്നുണ്ട്. ഫാർമസി, ആംബുലൻസ് സർവീസ് എന്നിവയും സൊസൈറ്റിക്കു കീഴിലുണ്ട്. 2023ൽ ആരംഭിച്ച ചൈൽഡ് ഡവലപ്മെന്‍റ് സെന്‍ററിൽ 75ൽ അധികം കുട്ടികൾക്ക് വിവിധ തെറാപ്പികൾ നൽകുന്നുണ്ട്.

കാർ തകർത്ത് സ്വർണവും പണവും മോഷ്ടിച്ചു

ഉൗട്ടി: കാന്തൽ മുക്കോണത്തിൽ പാതയോരത്ത് പാർക്ക് ചെയ്ത കാറിൽനിന്നു 20 പവന്‍റെ ആഭരണങ്ങളും ഏഴുലക്ഷം രൂപയും മോഷ്ടിച്ചു. കഴിഞ്ഞ ദിവസമാണ് സംഭവം. കാറിന്‍റെ പിൻഭാഗത്തെ ഗ്ലാസ് തകർത്താണ് മോഷണം നടത്തിയത്. ആന്ധ്രപ്രദേശ് ഗോദാവരി സ്വദേശി വെങ്കിട്ട് അഖിൽ വർമയുടേതാണ് നഷ്ടപ്പെട്ട ആഭരണങ്ങളും പണവും. ഇദ്ദേഹത്തിന്‍റെ പരാതിയിൽ പോലീസ് കേസെടുത്ത് അന്വേഷണം തുടങ്ങി.

ബസ് സർവീസ് ആരംഭിക്കണമെന്ന്

റിപ്പണ്‍: മൂപ്പൈനാട് ഗ്രാമ പഞ്ചായത്തിലെ വാളത്തൂർ പ്രദേശത്ത് നിന്നും വടുവഞ്ചാൽ, വിംസ് ആശുപത്രി, കൽപ്പറ്റ എന്നീ സ്ഥലങ്ങളെ കോർത്തിണക്കി കഐസ്ആർടിസി ബസ് സർവീസ് ആരംഭിക്കണമെന്ന് ആം ആദ്മി പാർട്ടി മൂപ്പൈനാട് പഞ്ചായത്ത് കമ്മിറ്റി ആവശ്യപ്പെട്ടു. ആയിരക്കണക്കിന് ആളുകൾ ആരോഗ്യ, വിദ്യാഭ്യാസ, തൊഴിൽ മേഖല ഉൾപ്പെടെ എല്ലാ ആവശ്യങ്ങൾക്കും പ്രധാനമായും ആശ്രയിക്കുന്ന വടുവഞ്ചാൽ, മേപ്പാടി, കൽപ്പറ്റ പ്രദേശങ്ങളിലേക്ക് യാത്ര ചെയ്യാൻ നിലവിൽ സർക്കാർ, സ്വകാര്യ ബസുകൾ ഒന്നും തന്നെ സർവീസ് നടത്തുന്നില്ല. ഈ ആവശ്യവുമായി ബന്ധപ്പെട്ടവർക്ക് പരാതി നൽകിയിട്ടുണ്ടെന്നും വിഷയത്തിൽ അനുകൂലമായ നടപടി ഉണ്ടായില്ലെങ്കിൽ തുടർ നടപടികൾ സ്വീകരിക്കുമെന്നും കൽപ്പറ്റ മണ്ഡലം സെക്രട്ടറി സൽമാൻ എൻ. റിപ്പണ്‍ ആവശ്യപ്പെട്ടു. യോഗത്തിൽ നിഹ്മത്ത് പിച്ഛൻ അധ്യക്ഷത വഹിച്ചു. മുഹമ്മദ് പി. അനസ്, ലീനസ് ജിജോ, മഖ്സൂദ്, അൽബർട്ട്, കൃഷ്ണൻകുട്ടി, അഷറഫ്, പി.കെ. മൻസൂറലി എന്നിവർ പ്രസംഗിച്ചു.

കരടിയുടെ ആക്രമണം: നഷ്ടപരിഹാരം നൽകണമെന്ന് മണ്ഡലം കോണ്‍ഗ്രസ്

സുൽത്താൻ ബത്തേരി: കരടിയുടെ ആക്രമണത്തിൽ മാരകമായി പരിക്കേറ്റ ചെതലയം കൊമ്മഞ്ചേരി ഉന്നതിയിലെ ഗോപിക്ക് അർഹമായ നഷ്ടപരിഹാരം നൽകണമെന്നും വിദഗ്ദ ചികിത്സ നൽകുന്നതിന് വനം വകുപ്പ് തയാറാകണമെന്നും സുൽത്താൻ ബത്തേരി മണ്ഡലം കോണ്‍ഗ്രസ് കമ്മറ്റി ആവശ്യപ്പെട്ടു. വനത്തിനകത്ത് കൊമ്മൻചേരി ഉന്നതിയിൽ താമസിച്ചിരുന്ന അഞ്ച് കുടുംബങ്ങളെ വനത്തിനകത്ത് നിന്നും മാറ്റിയെങ്കിലും ഇതുവരെ ഭൂമി നൽകുന്നതിനോ വീട് വച്ചു നൽകുന്നതിനോ സർക്കാർ തയാറായിട്ടില്ല. വനത്തിൽ നിന്നും കുടിയൊഴിപ്പിച്ച കുടുംബങ്ങളെ വനഭൂമിയിൽ പണിത താത്കാലിക ഷെഡിൽ താമസിക്കാൻ അനുവാദം നൽകുകയായിരുന്നു. ഈ ഷെഡ്ഡുകൾ പൊളിഞ്ഞുവീണതോടെ താമസിക്കാൻ സ്ഥലമില്ലാതായ കുടുംബങ്ങളെ ചെതലയം സ്കൂൾ കെട്ടിടത്തിൽ താമസിപ്പിച്ചു. എന്നാൽ സ്കൂൾ പ്രവർത്തനത്തിന് ബുദ്ധിമുട്ടായപ്പോൾ സ്കൂളിൽ നിന്നും ഫോറസ്റ്റ് ക്വാർട്ടേഴ്സിലേക്ക് താമസം മാറ്റി. നിലവിയിൽ ഈ ക്വാട്ടേഴ്സിൽ കുടുംബങ്ങൾ ബുദ്ധിമുട്ടിയാണ് താമസിക്കുന്നത്. കൊമ്മൻചേരി ഉന്നതിയിൽ നിന്നും ഒഴിപ്പിച്ച അഞ്ച് കുടുംബങ്ങൾക്കും അർഹമായ സ്ഥലം നൽകി വീട് വച്ച് കൊടുക്കുന്നതിന് സർക്കാർ തയാറാകണമെന്നും യോഗം ആവശ്യപ്പെട്ടു. മണ്ഡലം പ്രസിഡന്‍റ് സതീഷ് പൂതിക്കാട് അധ്യക്ഷത വഹിച്ചു. ബാബു പഴുപ്പത്തൂർ, അസീസ് മാടാല, മധു സെബാസ്റ്റ്യൻ, ബിന്ദു സുധീർ ബാബു, സഫീർ പഴേരി, കെ.പി. സാമുവൽ, ഷിജു എളങ്ങനാമറ്റം, സി.വി. സാജു, പ്രമോദ് പാളാക്കര, ഷാലി ജോസഫ്, ഷൈലജ സോമൻ എന്നിവർ പ്രസംഗിച്ചു.

വ്യാജ ഇൻസ്റ്റഗ്രാം അക്കൗണ്ടിലൂടെ ലൈംഗിക അധിക്ഷേപം: പ്രതി അറസ്റ്റിൽ

കൽപ്പറ്റ: ഇൻസ്റ്റഗ്രാമിൽ വ്യാജ അക്കൗണ്ട് ഉണ്ടാക്കി പുഞ്ചരിമട്ടം ദുരന്തബാധിതരായ സ്ത്രീകൾക്കെതിരേ ലൈംഗിക അധിക്ഷേപം നടത്തിയ യുവാവ് അറസ്റ്റിൽ. ബത്തേരി ചെതലയം നായ്ക്കമാവുടിയിൽ ബാഷിദിനെയാണ്(28) ജില്ലാ സൈബർ ക്രൈം പോലീസ് ഇൻസ്പെക്ടർ ഷജു ജോസഫ്, എസ്‌സിപിഒമാരായ കെ.എ. അബ്ദുൾ സലാം, ടി.സി. നജീബ്, സിപിഒമാരായ സി. രഞ്ജിത്ത്, സി. വിനീഷ, പ്രവീണ്‍കുമാർ എന്നിവരടങ്ങുന്ന സംഘം അറസ്റ്റു ചെയ്തത്. ഉരുൾദുരന്തം നടന്നതിനു പിറ്റേന്നാണ് ഇയാൾ ലൈംഗിക അധിക്ഷേപം നടത്തിയത്. കൽപ്പറ്റയിൽ കച്ചവടം നടത്തുന്ന എറണാകുളം സ്വദേശിയുടെ ഫോട്ടോയും പേരും ദുരുപയോഗം ചെയ്താണ് ബാഷിദ് വ്യാജ അക്കൗണ്ട് നിർമിച്ചു പോസ്റ്റുകൾ ഇട്ടത്. കൽപ്പറ്റ എസ്കെ‌എംജെ സ്കൂളിലെ ദുരിതാശ്വാസ ക്യാന്പിൽ സേവനം ചെയുന്നതിനിടയിലാണ് തന്‍റെ പേരിൽ വ്യാജ അക്കൗണ്ട് ഉണ്ടാക്കി ആരോ പോസ്റ്റുകൾ നടത്തുന്നത് എറണാകുളം സ്വദേശി അറിഞ്ഞത്. വിപിഎൻ സംവിധാനം ഉപയോഗിച്ച് ഐപി മേൽവിലാസം മാസ്ക് ചെയ്തായിരുന്നു പ്രതിയുടെ അധിക്ഷേപം. എറണാകുളം സ്വദേശിയുടെ പരാതിയിൽ കേസെടുത്ത പോലീസ് മാസങ്ങൾ നീണ്ട അന്വേഷണത്തിന് ഒടുവിലാണ് പ്രതിയിലേക്ക് എത്തിയത്. അനേകം ഐപി മേൽവിലാസങ്ങൾ പോലീസ് വിശകലനം ചെയ്തു. ഐടി നിയമത്തിലേതടക്കം വകുപ്പുകൾ പ്രകാരമാണ് ബാഷിദിനെതിരേ കേസ്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

വധക്കേസ്: പ്രതികളെ വെറുതെ വിട്ടു

മാനന്തവാടി: കൊലപാതകക്കേസിൽ പ്രതികളെ കുറ്റക്കാരല്ലെന്നുകണ്ട് കോടതി വെറുതെ വിട്ടു. നഗരത്തിൽ പഴയ ഇരുന്പ്, പ്ലാസ്റ്റിക് സാധനങ്ങൾ പെറുക്കിവിറ്റ് ഉപജീവനം നടത്തിയിരുന്ന പാലക്കാട് സ്വദേശി ഉണ്ണിക്കൃഷ്ണൻ കൊല്ലപ്പെട്ട കേസിലാണ് പ്രതികളായ തങ്കച്ചൻ, വാസു എന്നിവരെ അഡീഷണൽ സെഷൻസ് കോടതി വിട്ടയച്ചത്. 2020 ജൂണിലാണ് കേസിനാസ്പദമായ സംഭവം. മൈസൂരു റോഡിൽ നിർമാണത്തിലുള്ള കെട്ടിടത്തിൽ ഉണ്ണിക്കൃഷ്ണനെ മരിച്ചനിലയിൽ കണ്ടെത്തുകയായിരുന്നു. കേസിൽ പോലീസ് പ്രതിചേർത്ത മാനന്തവാടി സ്വദേശികളായ തങ്കച്ചനും വാസുവും ഉണ്ണിക്കൃഷ്ണന്‍റെ സുഹൃത്തുക്കളായിരുന്നു. പ്രതികൾക്കുവേണ്ടി ജില്ലാ ലീഗൽ സർവീസസ് അഥോറിറ്റി ചീഫ് ഡിഫൻസ് കൗണ്‍സൽ അഡ്വ.വി.കെ. സുലൈമാൻ, അസിസ്റ്റന്‍റുമാരായ അഡ്വ.എം.ജെ. സാരംഗ്, അഡ്വ.ക്രിസ്റ്റഫർ ജോസ് എന്നിവർ ഹാജരായി.

എന്‍റെ കേരളം മേള: വാണിജ്യ വിഭാഗത്തിൽ 10.42 ലക്ഷം വിറ്റുവരവ്

കൽപ്പറ്റ: സംസ്ഥാന സർക്കാരിന്‍റെ നാലാം വാർഷികാഘോഷത്തിന്‍റെ ഭാഗമായി എസ്കഐംജെ സ്കൂൾ ഗ്രൗണ്ടിൽ നടന്ന എന്‍റെ കേരളം പ്രദർശന-വിപണന മേളയിൽ 69 വാണിജ്യ സ്റ്റാളുകളിൽ 10.42 ലക്ഷം രൂപയുടെ വിറ്റുവരവ്. ഏഴുദിവസങ്ങളായി നടന്ന മേളയിൽ മികച്ച പ്രകടനം കാഴ്ചവച്ച വാണിജ്യ സ്റ്റാളിനുള്ള പുരസ്കാരം വയനാട് ഹാൻഡ്ലൂം പവർലൂം ആൻഡ് മൾട്ടി പർപ്പസ് വ്യവസായ സഹകരണ സംഘം നേടി. മേളയുടെ സമാപനച്ചടങ്ങിൽ വ്യവസായ മന്ത്രി പി. രാജീവ് സംഘത്തിന് ഉപഹാരം നൽകി. ഭക്ഷ്യമേളയിലൂടെ കുടുംബശ്രീ 12.47 ലക്ഷം രൂപയുടെ വിറ്റവരവ് നേടി. കുടുംബശ്രീയുടെ സൂക്ഷ്മ സംരംഭങ്ങളിൽനിന്നു തെരഞ്ഞെടുത്ത 60 വനിതകളാണ് ഭക്ഷണം ഒരുക്കിയത്. അട്ടപ്പാടി വനസുന്ദരി ചിക്കൻ മേളയിലെ മികച്ച വിഭവമായി മാറി. അട്ടപ്പാടിയിൽനിന്നുള്ള അഞ്ച് വനിതകളുടെ സൂക്ഷ്മ സംരംഭമാണ് വനസുന്ദരി ചിക്കൻ. ഫുഡ് കോർട്ടിൽ സർവീസ് വിഭാഗത്തിൽ 20 വനിതകൾക്ക് തൊഴിൽ ലഭിച്ചു.

കേരള പോലീസ് ഓഫീസേഴ്സ് അസോസിയേഷൻ ജില്ലാ സമ്മേളനം

കൽപ്പറ്റ: കേരള പോലീസ് ഓഫീസേഴ്സ് അസോസിയേഷൻ 35-ാമത് ജില്ല സമ്മേളനത്തിന്‍റെ പൊതുസമ്മേളനം പച്ചിലക്കാട് സ്വകാര്യ ഓഡിറ്റോറിയത്തിൽ കേരള പട്ടിക ജാതി പട്ടിക വർഗ്ഗ ക്ഷേമ മന്ത്രി ഒ.ആർ. കേളു ഉദ്ഘാടനം ചെയ്തു. കേരള പോലീസ് ഓഫീസേഴ്സ് അസോസിയേഷൻ ജില്ല പ്രസിഡന്‍റ് എം.എ. സന്തോഷ് അധ്യക്ഷത വഹിച്ചു. സംസ്ഥാന പ്രസിഡന്‍റ് ആർ. പ്രശാന്ത്, നാർകോട്ടിക് സെൽ ഡിവൈഎസ്പി എം.കെ. ഭരതൻ, കേരള പോലീസ് അസോസിയേഷൻ ജില്ല പ്രസിഡന്‍റ് ബിപിൻ സണ്ണി, ജില്ല പോലീസ് സഹകരണ സംഘം പ്രസിഡന്‍റ് കെ.എം. ശശിധരൻ, ജില്ല സെക്രട്ടറി പി.സി. സജീവ്, വൈസ് പ്രസിഡന്‍റ് എം.കെ. സാദിർ എന്നിവർ പ്രസംഗിച്ചു. തുടർന്ന് നടന്ന പ്രതിനിധി സമ്മേളനവും സർവ്വീസിൽ നിന്ന് വിരമിക്കുന്നവർക്കുന്നവർക്കുള്ള യാത്രയയപ്പ് ചടങ്ങും ജില്ല പോലീസ് അഡി. സൂപ്രണ്ട് ടി.എൻ. സജീവ് ഉദ്ഘാടനം ചെയ്തു. സംഘടനാ റിപ്പോർട്ട് സംസ്ഥാന വൈസ് പ്രസിഡന്‍റ് കെ. പ്രേംജിയും പ്രവർത്തന റിപ്പോർട്ട് സെക്രട്ടറി പി.സി. സജീവും വരവ് ചെലവ് കണക്ക് ജില്ല ട്രഷറർ കെ.ജി. റെജിയും അവതരിപ്പിച്ചു. ജില്ല ക്രൈംബ്രാഞ്ച് ഡിവൈഎസ്പി എം.കെ. സുരേഷ് കുമാർ, സ്റ്റേറ്റ് സ്പെഷൽ ബ്രാഞ്ച് ഡിവൈഎസ്പി എം.ഡി. സുനിൽ, സംസ്ഥാന വൈസ് പ്രസിഡന്‍റ് ഷാജി്, കേരള പോലീസ് അസോസിയേഷൻ ജില്ല സെക്രട്ടറി ഇർഷാദ് മുബാറക് എന്നിവർ പ്രസംഗിച്ചു.

കൂടുതൽ ജലസേചന പദ്ധതികൾ നടപ്പാക്കണം: സിപിഐ

പുൽപ്പള്ളി: കാർഷിക മേഖലയുടെ സംരക്ഷണത്തിന് കൂടുതൽ ജലസേചന പദ്ധതികൾ നടപ്പാക്കണമെന്ന് വീട്ടിമൂലയിൽ ചേർന്ന സിപിഐ ലോക്കൽ സമ്മേളനം സർക്കാരിനോട് ആവശ്യപ്പെട്ടു. ജില്ലയിലെ വന്യജീവി ആക്രമണത്തിന് പരിഹാരം കാണണമെന്ന ആവശ്യവും ഉന്നയിച്ചു. ജില്ലാ സെക്രട്ടറി ഇ.ജെ. ബാബു ഉദ്ഘാടനം ചെയ്തു. ലോക്കൽ സെക്രട്ടറി ഇ.ഡി. സുധീഷ് റിപ്പോർട്ട് അവതരിപ്പിച്ചു. ജില്ലാ എക്സിക്യുട്ടീവ് കമ്മിറ്റി അംഗം ടി.ജെ. ചാക്കോച്ചൻ, മണ്ഡലം സെക്രട്ടറി ടി.സി. ഗോപാലൻ, സി.കെ. ശിവദാസൻ, സുശീല സുബ്രഹ്മണ്യൻ, വി.എം. ജയചന്ദ്രൻ, എസ്.ജി. സുകുമാരൻ, എം.ആർ. ജനകൻ, വി.എൻ. ബിജു, ഇ.എം. ആശ, അനിൽ സി. കുമാർ എന്നിവർ പ്രസംഗിച്ചു. എൻ.വി. വേലായുധൻ നായർ, പി.കെ. പ്രകാശ്, കെ.ടി. സജീവൻ, എൽദോ പുല്ലാട്ടേൽ, ഇന്ദിര വിനോദ്, ശാന്ത കൃഷ്ണൻകുട്ടി, സജി കള്ളിക്കൽ, സിബി വട്ടപ്പാറ, ലീല കുമാരൻ, കെ.ജെ. ബിജു തുടങ്ങിയവർ ചർച്ചയിൽ പങ്കെടുത്തു. ഭാരവാഹികളായി ഇ.ഡി. സുധീഷ്(സെക്രട്ടറി), എൽദോ പുല്ലാട്ടേൽ(അസി.സെക്രട്ടറി)എന്നിവരെ തെരഞ്ഞെടുത്തു. പൊതുസമ്മേളനം ജില്ലാ സെക്രട്ടറി ഇ.ജെ. ബാബു ഉദ്ഘാടനം ചെയ്തു. സി.കെ. ശിവദാസൻ അധ്യക്ഷത വഹിച്ചു. ടി.ജെ. ചാക്കോച്ചൻ, എം.ആർ. ജനകൻ, ടി.സി. ഗോപാലൻ, വി.എൻ. ബിജു, വി.എൻ. ജയചന്ദ്രൻ എന്നിവർ പ്രസംഗിച്ചു.

അന്പലവയൽ സെന്‍റ് ജോർജ്സ് ഓർത്തഡോക്സ് പള്ളി തിരുനാൾ

അന്പലവയൽ: അന്പലവയൽ സെന്‍റ് ജോർജ്സ് ഓർത്തഡോക്സ് പള്ളിയിലെ തിരുനാൾ ഇന്നും നാളെയും നടക്കുമെന്ന് വികാരി ഫാ. ബേബി ജോണ്‍ കളിയ്ക്കൽ, സെക്രറി സണ്ണി പനയ്ക്കൽ, ട്രസ്റ്റി ജോയി അറയിക്കൽ എന്നിവർ അറിയിച്ചു. ഇന്ന് വൈകുന്നേരം നാലിന് കൊടി ഉയർത്തൽ, 5.30ന് സന്ധ്യാനമസ്കാരം, 6.30ന് പ്രസംഗം, 6.45ന് അന്പലവയൽ കുരിശിങ്കലേക്ക് പ്രദക്ഷിണം, എട്ടിന് ആശീർവാദം, 8.45ന് നേർച്ചഭക്ഷണം. നാളെ രാവിലെ 7.30ന് പ്രഭാതനമസ്കാരം, 8.30ന് വിശുദ്ധ മൂന്നിൻമേൽ കുർബാന- ഫാ. ജോസഫ് പി. വർഗീസ് പാലപ്പള്ളിൽ, ഫാ. ഷാജി മത്തായി കൂമുള്ളൻകുന്നേൽ, ഫാ. ജിബിൻ കുര്യാക്കോസ് പടിക്കകുടി എന്നിവർ കാർമികത്വം വഹിക്കും. തുടർന്ന് മദ്ധ്യസ്ഥ പ്രാർഥന. 10.45ന് ആയിരംകൊല്ലി കുരിശിങ്കലേയ്ക്ക് പ്രദക്ഷിണം, 11.15 ധൂപപ്രാർഥന, 11.30ന് ആശീർവാദം, 12ന് നേർച്ചഭക്ഷണം, ഉച്ചയ്ക്ക് രണ്ടിന് കൊടിയിറക്കൽ.

എൽപി വിദ്യാഭ്യാസ ഗുണനിലവാരം ഉറപ്പുവരുത്താൻ മൂപ്പൈനാട് പഞ്ചായത്ത്

കൽപ്പറ്റ: എൽപി സ്കൂൾ വിദ്യാർഥികളുടെ വിദ്യാഭ്യാസ ഗുണനിലവാരം ഉറപ്പുവരുത്താൻ പദ്ധതിയുമായി മൂപ്പൈനാട് പഞ്ചായത്ത്. നാലാം ക്ലാസ് പഠനം പൂർത്തിയാക്കുന്ന മുഴുവൻ കുട്ടികൾക്കും നിശ്ചിത വിദ്യാഭ്യാസ നിലവാരം ഇല്ലെന്ന ബോധ്യത്തിന്‍റെയും ആറിനും 14നും ഇടയിൽ പ്രായമുള്ള കുട്ടികളുടെ വിദ്യാഭ്യാസം പഞ്ചായത്തുകളുടെയും രക്ഷിതാക്കളുടെയും ഉത്തരവാദിത്വമാണെന്ന് 2009ലെ വിദ്യാഭ്യാസ അവകാശ നിയമം പ്രഖ്യാപിക്കുകയും ചെയ്തതിന്‍റെ അടിസ്ഥാനത്തിലാണ് പദ്ധതി പ്രാവർത്തികമാക്കുന്നതെന്ന് പഞ്ചായത്ത് പ്രസിഡന്‍റ് ആർ. ഉണ്ണിക്കൃഷ്ണൻ, വൈസ് പ്രസിഡന്‍റ് ഷൈബാൻ അബ്ദുൾസലാം, ആരോഗ്യ-വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ പി.കെ. സാലിം, ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ ഡയാന മച്ചോഡോ, മെംബർമാരായ ദീപ ശശികുമാർ, യശോദ ഗോപാലകൃഷ്ണൻ എന്നിവർ വാർത്താസമ്മേളനത്തിൽ അറിയിച്ചു. പഞ്ചായത്തിലെ നാല് എൽപി സ്കൂളുകളിൽ നാലാം ക്ലാസ് പൂർത്തിയാക്കിയ 300 ഓളം വിദ്യർഥികൾക്ക് പദ്ധതിയുടെ ഭാഗമായി മെയ് രണ്ടിന് പ്രത്യേക പരീക്ഷ നടത്തും. അതത് വിദ്യാലയങ്ങളിൽ നാസ്(നാഷണൽ അച്ചീവ്മെന്‍റ് സർവേ)മാതൃകയിൽ നടത്തുന്ന പരീക്ഷയിൽ നിശ്ചിത വിദ്യാഭ്യാസ ഗണമേൻമ ഇല്ലെന്നു കാണുന്ന കുട്ടികൾക്ക് പ്രത്യേക മൊഡ്യൂൾ സഹായത്തോടെ രണ്ട് ഘട്ടങ്ങളിലായി 10 ദിവസത്തെ പരിശീലനം നൽകും. മെയ് അവസാനത്തോടെ ഇവരുടെ ഗുണനിലവാര പരിശോധന വീണ്ടും നടത്തും. ജൂണ്‍ രണ്ടിന് പ്രവേശനോത്സവവേദിയിൽ കുട്ടികളുടെ പഠനനേട്ടം പ്രദർശിപ്പിക്കും. തുടർന്ന് സന്പൂർണ ഗുണനിലവാര പ്രഖ്യാപനം നടത്തും. പദ്ധതി നടപ്പാക്കുന്നതിന്‍റെ ഭാഗമായി സ്കൂളുകളിലെ എൽപി വിഭാഗം പ്രധാനാധ്യാപകർ, അധ്യാപകർ, പിടിഎ, എസ്എംസി ഭാരവാഹികൾ, പഞ്ചായത്ത് ഭരണസമിതിയംഗങ്ങൾ എന്നിവരുടെ യോഗം ചേർന്നതായി പ്രസിഡന്‍റ് പറഞ്ഞു. എസ്ആർജി യോഗം അടുത്ത ദിവസം ചേരും.

സഹകരണ സ്ഥാപനങ്ങളിലെ നിയമന സംവരണം: വിദഗ്ധ സമിതി രൂപീകരിച്ചു

കൽപ്പറ്റ: സംസ്ഥാനത്ത് സഹകരണ സർവീസ് പരീക്ഷാ ബോർഡ് മുഖേനയും സഹകരണ സംഘങ്ങൾ നേരിട്ടും നടത്തുന്ന നിയമനങ്ങളിൽ പിന്നാക്ക വിഭാഗങ്ങൾക്കും മുന്നാക്ക വിഭാഗങ്ങളിലെ പിന്നാക്കക്കാർക്കും സംവരണം അനുവദിക്കുന്നതു പരിശോധിച്ച് ശിപാർശകൾ സമർപ്പിക്കുന്നതിന് വിദഗ്ധ സമിതി രൂപീകരിച്ചു. സഹകരണ സർവീസ് പരീക്ഷാ ബോർഡ് ചെയർമാൻ എസ്.യു. രാജീവ്, മുൻ ചെയർമാൻ ആർ.വി. സതീന്ദ്രകുമാർ, സഹകരണ അഡീഷണൽ രജിസ്ട്രാർ(ക്രഡിറ്റ്) എന്നിവരാണ് സമിതി അംഗങ്ങൾ. സഹകരണ നിയമങ്ങളിലും ചട്ടങ്ങളിലും ആവശ്യമായ ഭേദഗതി വരുത്തുന്നതിൽ ശിപാർശകൾ സമർപ്പിക്കുന്നതിനും സമിതിയെ സർക്കാർ ചുമതലപ്പെടുത്തി.

തുടി വാർഷികാഘോഷവും ആദിവാസി ഗ്രാമോത്സവവും നാളെ മുതൽ

കൽപ്പറ്റ: ഏച്ചോം തുടി (ട്രൈബൽ യൂണിറ്റി ഫോർ ഡവലപ്മെന്‍റ് ഇനീഷ്യേറ്റീവ്) 29-ാം വാർഷികാഘോഷവും ആദിവാസി ഗ്രമോത്സവവും നാളെ മുതൽ നാല് വരെ നടത്തും. നാളെ വൈകുന്നേരം നാലിന് നായാടിപ്പൊയിൽ ഉൗരിൽ ഗോത്രപൂജയോടെയാണ് പരിപാടികൾക്ക് തുടക്കം. രണ്ടിന് കലാകായിക മത്സരങ്ങൾ നടത്തും. രാവിലെ 10ന് ഫുട്ബോൾ പരിശീലകൻ വിനീത് ഉദ്ഘാടനം ചെയ്യും. മൂന്നിന് രാവിലെ 10ന് ആരംഭിക്കുന്ന ശിൽപശാലയ്ക്ക് വിദ്യാഭ്യാസ പ്രവർത്തകൻ സിബിൻ ആന്‍റണി നേതൃത്വം നൽകും. നാലിന് രാവിലെ 11.30ന് കുട്ടികളുടെയും 11.30ന് മുതിർന്നവരുടെയും വട്ടക്കളി മത്സരം. വൈകുന്നേരം നാലിന് ഘോഷയാത്ര. സാംസ്കാരിക സമ്മേളനം പനമരം പഞ്ചായത്ത് പ്രസിഡന്‍റ് ലക്ഷ്മി ആലയ്ക്കമുറ്റം ഉദ്ഘാടനം ചെയ്യും. അധ്യാപകൻ പവിത്രൻ അധ്യക്ഷത വഹിക്കും. വിദ്യാർഥിനി എമിൽ ജോസഫിയ റിപ്പോർട്ട് അവതരിപ്പിക്കും. സിവിൽ പോലീസ് ഓഫീസർ സിജു സി. മീന മൂപ്പൻമാരെ ആദരിക്കും. ഫാ.ജോർജ് തേനാടിക്കുളം എസ്ജെ മുഖ്യപ്രഭാഷണം നടത്തും. സാമൂഹിക പ്രവർത്തക അമ്മിണി കെ. വയനാട്, ഏച്ചോം സർവോദയ സ്കൂൾ ഡയറക്ടർ ഫാ.ബിജു ജോർജ് എസ്ജെ, എടിഡിഒ ടി.കെ. മനോജ്, ഫാ.തോമസ് ചമതയിൽ, പഞ്ചായത്തംഗം രാമചന്ദ്രൻ, സാഹത്യകാരൻ ഏച്ചോം ഗോപി, പ്രേംകുമാർ, ബോധി ഡയറക്ടർ ഡോ.ടോമി, ട്രാൻസ്ജെൻഡർ ആക്ടിവിസ്റ്റ് പ്രകൃതി, സർവോദയ സ്കൂൾ പ്രിൻസിപ്പൽ സിസ്റ്റർ ബീന, ഹെഡ്മിസ്ട്രസ് സിസ്റ്റർ ജെസി പോൾ, അധ്യാപകൻ സുരേന്ദ്രൻ, പിടിഎ പ്രസിഡന്‍റ് ഗിരീഷ് എന്നിവർ പ്രസംഗിക്കും. തുടി ഡയറക്ടർ ഫാ.ജേക്കബ് കുമ്മിണിയിൽ എസ്ജെ സ്വാഗതവും സംഘാടക സമിതി കണ്‍വീനർ കൃഷ്ണ നന്ദിയും പറയും.

ഏഷ്യൻ പഞ്ചഗുസ്തി മത്സരത്തിന് വയനാട്ടിൽ നിന്ന് അഞ്ച് പേർ

പുൽപ്പള്ളി: മേയ് മൂന്ന് മുതൽ 10 വരെ ഡൽഹിയിൽ നടക്കുന്ന 23-ാമത് ഏഷ്യൻ പഞ്ചഗുസ്തി ചാന്പ്യൻഷിപ്പിൽ വയനാട്ടിൽ നിന്നുള്ള അഞ്ച് താരങ്ങൾ ഇന്ത്യൻ ജഴ്സിയണിയും. എ.പി. സൂര്യനന്ദൻ, ടി.പി. തോമസ്, സ്റ്റീവ് തോമസ്, നവീൻ പോൾ, എലെയ്ൻ ആൻ നവീൻ എന്നിവരാണ് കഴിഞ്ഞ ദേശീയ പഞ്ചഗുസ്തി ചാന്പ്യൻഷിപ്പിലെ പ്രകടനത്തിന്‍റെ അടിസ്ഥാനത്തിൽ ഏഷ്യൻ ചാന്പ്യൻഷിപ്പിലേക്ക് യോഗ്യത നേടിയത്. ഡൽഹി ലീല അംബിയെൻസ് ഹോട്ടലാണ് മത്സരവേദി. ജില്ലാ പഞ്ചഗുസ്തി അസോസിയേഷൻ കായിക താരങ്ങൾക്ക് യാത്രയയപ്പ് നൽകി. യോഗത്തിൽ കെ. കബീർ, ഗ്രിഗറി വൈത്തിരി, കെ.യു. സുരേന്ദ്രൻ, അനൂപ് കുമാർ, ബിജേഴ്സ് മാത്യു, നവീൻ പോൾ എന്നിവർ പ്രസംഗിച്ചു .

ബാസ്ക്കറ്റ് ബോൾ ചാന്പ്യൻഷിപ്പിന് തുടക്കമായി

പുൽപ്പള്ളി: സംസ്ഥാന ജൂണിയർ ബാസ്ക്കറ്റ്ബോൾ ചാന്പ്യൻഷിപ്പ് മുള്ളൻ കൊല്ലി സെന്‍റ് മേരീസ് ഹയർ സെക്കൻഡറി സ്കൂൾ ഫ്ളഡ്‌ലിറ്റ് സ്റ്റേഡിയത്തിലും കബനിഗിരി നിർമല ഹൈസ്കൂൾ ഗ്രൗണ്ടിലുമായി ആരംഭിച്ചു. 14 ജില്ലകളിൽ നിന്നുള്ള പുരുഷ, വനിതാ ടീമുകളിലായി നിരവധി ദേശീയ, അന്തർദേശീയ താരങ്ങൾ പങ്കെടുക്കുന്നുണ്ട്. മേയ് നാലു വരെയാണ് ടൂർണമെന്‍റ്. രാവിലെ 6.15നും വൈകുന്നേരം 4.15നുമായാണ് മത്സര സമയം ക്രമീകരിച്ചിട്ടുള്ളത്. ഇന്ന് വൈകുന്നേരം ആറിന് ഐ.സി. ബാലകൃഷ്ണൻ എംഎൽഎ ചാന്പ്യൻഷിപ്പ് ഉദ്ഘാടനം ചെയ്യും. സമാപന സമ്മേളനം മേയ് നാലിന് വൈകുന്നേരം ആറിന് മന്ത്രി ഒ.ആർ. കേളു ഉദ്ഘാടനം ചെയ്യും.

ശക്തമായ കാറ്റിൽ കൃഷിനാശം : ആയിരത്തോളം വാഴകൾ നിലം പൊത്തി

മാനന്തവാടി: വേനൽമഴയിലും കാറ്റിലും ആയിരത്തോളം വാഴകൾ നിലം പൊത്തി. പനമരം അഞ്ചുകുന്ന് നിരപ്പേൽ ബേബിയുടെ ഒന്നര ഏക്കർ ഭൂമിയിലെ പകുതിയോളം വാഴകളും കപ്പയുമാണ് കഴിഞ്ഞ ദിവസത്തെ കാറ്റിൽ നിലം പൊത്തിയത്. ഞായറാഴ്ച വൈകുന്നേരത്തോടെ അഞ്ചുകുന്ന് പഴഞ്ചേരിക്കുന്നിൽ ആഞ്ഞ് വീശിയകാറ്റിലാണ് നിരപ്പേൽ ബേബിയുടെ വാഴകൾ നശിച്ചത്. തോട്ടിൽ നിന്നും വെള്ളം അടിച്ച് നനച്ചു വളർത്തി വളപ്രയോഗമുൾപ്പടെ നടത്തിയിരുന്നു. എട്ട് മാസത്തിലധികം പ്രായമുള്ള വാഴകൾ കുലച്ചുവരുന്ന സമയത്താണ് നിലംപൊത്തിയത്. ഒന്നര ഏക്കറോളം വരുന്ന ഭൂമിയിൽ 1600 വാഴകളും കപ്പയുമാണ് കൃഷി ചെയ്തിരുന്നത്. ഇതിൽ പകുതിയിലേറെ വാഴകളും കാറ്റിൽ നശിച്ചു. കുല വിരിയുന്ന സമയത്താണ് കുള്ളൻ വിഭാഗത്തിൽപ്പെട്ട വാഴകൾക്ക് കാറ്റ് പിടിച്ചത്. ഇത് കാരണം ചെലവഴിച്ച ലക്ഷക്കണക്കിന് രൂപയിൽ ഒന്നുംതന്നെ തിരികെ ലഭിക്കാത്ത അവസ്ഥയാണ് കർഷകനുണ്ടായത്. നഷ്ടപരിഹാരത്തിനായി പനമരം കൃഷി ഓഫീസിൽ അപേക്ഷ നൽകിയിട്ടുണ്ട്.

ജനവാസകേന്ദ്രത്തിൽ കാവലായി കുങ്കികൾ

കാറ്റിലും മഴയിലും വ്യാപക നാശനഷ്ടം

പുൽപ്പള്ളി: കഴിഞ്ഞ ദിവസമുണ്ടായ കനത്ത കാറ്റിലും മഴയിലും വ്യാപക നാശനഷ്ടം. മരകാവിൽ 600 ഓളം വാഴകൾ നിലംപൊത്തി. മണ്ണേക്കാട്ടിൽ വാസുവിന്‍റെ മരകാവ് വലയിലുള്ള വാഴത്തോട്ടത്തിലാണ് വൻ നാശനഷ്ടമുണ്ടായത്. ഒരു മാസം കഴിഞ്ഞാൽ വിളവെടുക്കാൻ കഴിയുന്ന വാഴകളാണ് ശക്തമായ കാറ്റിൽ പൂർണമായി നിലംപൊത്തിയത്. വാസു പാട്ടത്തിനെടുത്ത് കൃഷിചെയ്യുന്ന വയലിലാണ് വവി# കൃഷിനാശമുണ്ടായത്. രണ്ട് ലക്ഷത്തോളം രൂപയുടെ നഷ്ടമുണ്ടായതായി വാസു പറഞ്ഞു. കഴിഞ്ഞ ദിവസം രാത്രി മഴയോടൊപ്പമുണ്ടായ ശക്തമായ കാറ്റിലാണ് വാഴകൾ പൂർണമായി നിലംപൊത്തിയത്. കൃഷിവകുപ്പ് ഉദ്യോഗസ്ഥർ സ്ഥലത്തെത്തി നാശനഷ്ടം വിലയിരുത്തി. ഈ മേഖലയിലെ നിരവധി കർഷകരുടെ വാഴ, തെങ്ങ്, കമുക് ഉൾപ്പെടെയുള്ള വിളകൾ കനത്തകാറ്റിൽ നിലംപൊത്തി.

വിദ്യാർഥികളെ കുതിര സവാരി പഠിപ്പിച്ച് സ്കൂൾ; ലക്ഷ്യം കൊഴിഞ്ഞ് പോക്ക് തടയൽ

സുൽത്താൻ ബത്തേരി: ഫുട്ബോളും ക്രിക്കറ്റുമൊക്കെ നിറഞ്ഞുനിന്ന ഓടപ്പള്ളം ഗവ. ഹൈസ്കൂളിന്‍റെ മൈതാനത്താണ് വേനൽ അവധിക്കാലത്ത് വിദ്യാർഥികളെ പുറത്ത്കയറ്റി പായുന്ന കുതിരക്കുളന്പടിശബ്ദം നിറഞ്ഞത്. ഗോത്ര വിദ്യാർഥികളെ കുതിര സവാരി പഠിപ്പിക്കുന്നതിന്‍റെ ഭാഗമായിരുന്നു ഇത്. അഞ്ചാം ക്ലാസ് മുതൽ ഒന്പതാം ക്ലാസ് വരെ പഠിക്കുന്ന തെരഞ്ഞെടുക്കപ്പെട്ട പത്ത് ഗോത്ര വിദ്യാർഥികൾക്കായാണ് കുതിര സവാരി പരിശീലനം നൽകിയത്. കല്ലൂരിലെ ഹൂഫ്സ് ഹെവൻ റൈഡിംഗ് ക്ലബ്ബാണ് സൗജന്യമായി കുട്ടികളെ സവാരി പഠിപ്പിച്ചത്. ഇവരുടെ തന്നെ റോക്കി, റൂബി എന്നീ കുതിരകളെ ഉപയോഗിച്ചായിരുന്നു പരിശീലനം. കുതിര സവാരിയിൽ വിദഗ്ധ പരിശീലനം നേടിയ ബബിത അഗസ്റ്റിൻ, ഷിയോണ്‍ അലി, സൂര്യ, വിഷ്ണു എന്നിവരാണ് സ്കൂളിൽ ക്യാന്പ് ചെയ്ത രാവിലെയും വൈകുന്നേരവുമായി വിദ്യാർഥികളെ പരിശീലിപ്പിച്ചത്. വിദ്യാർഥികളുടെ കൊഴിഞ്ഞുപോക്ക് തടയുക എന്ന ലക്ഷ്യത്തോടെയാണ് കുതിര സവാരി പഠിപ്പിച്ചത്. കുതിര സവാരി പഠിക്കാൻ വന്ന കുട്ടികൾ നല്ലകഴിവുള്ളവരാണെന്നും സ്കൂൾ അധികൃതരുടെ ഭാഗത്തുനിന്ന് നല്ല പ്രോത്സാഹനം ലഭിച്ചതായും മുഖ്യ ട്രെയ്നർ ബബിതയും സാക്ഷ്യപ്പെടുത്തുന്നു. വിദ്യാർഥികളുടെ കുതിര സവാരി പരിശീലനം നാട്ടുകാർക്കും പുതുമയുള്ള കാഴ്ചയായിരുന്നു. പരിശീലന ക്യാന്പ് നായ്ക്കട്ടി ഡിവിഷൻ ഡെപ്യൂട്ടി റേഞ്ച് ഫോറസ്റ്റ് ഓഫീസർ ബി.പി. സുനിൽകുമാർ ഉദ്ഘാടനം ചെയ്തു. പിടിഎ പ്രസിഡന്‍റ് കെ.പി. അനിൽ അധ്യക്ഷത വഹിച്ചു. ഹെഡ്മിസ്ട്രസ് കെ. കമലം, എം. സി ശരത്, സുരേഷ് മാത്യു, എം.കെ. സുധ എന്നിവർ പ്രസംഗിച്ചു. വിദ്യാർഥികളുടെ കൊഴിഞ്ഞുപോക്ക് തടയാൻ ഫുട്ബോൾ ക്യാന്പ്, ഗെജ്ജ മ്യൂസിക്കൽ ബാന്‍റ്, സംസ്കൃതി ഓപ്പണ്‍ തീയറ്റർ തുടങ്ങി വിവിധങ്ങളായ പദ്ധതികളാണ് സ്കൂളിൽ നടപ്പാക്കുന്നത്.

ദുരിതബാധിതരോടുള്ള വെല്ലുവിളി: ഡിസിസി

ഭക്ഷ്യ, വന ശിൽപശാല സംഘടിപ്പിച്ചു

കൽപ്പറ്റ: കാവുമന്നം കിംഗ്സ് ഫ്ളോറ ഫാമിൽ ത്രിദിന ഭക്ഷ്യ വന ശിൽപശാല സംഘടിപ്പിച്ചു. 40 ഇനം ചക്കകൾ, 53 ഇനം മാങ്ങകൾ, 40 ഇനം കാച്ചിൽ, 20 ഇനം വാഴപ്പഴം, 60 ഇനം കിഴങ്ങുകൾ തുടങ്ങി ഒട്ടേറെ വൈവിധ്യങ്ങൾ പ്രദർശിപ്പിച്ച ശിൽപശാല പങ്കെടുത്തവർക്ക് വേറിട്ട അനുഭവമായി. ബഡ്ഡിംഗ്, പ്രിസിഷൻ അഗ്രികൾച്ചർ, വെർട്ടിക്കൽ ഫാമിംഗ്, പുനരുത്പാദന കൃഷി തുടങ്ങി ഒട്ടേറെ പ്രവണതകൾ ശിൽപശാലയിൽ പരിചയപ്പെടുത്തി. അപൂർവ ഇനങ്ങളായ മെക്കാഡമിയ, ആഞ്ഞിലി ചക്ക, മരോട്ടിക്കായ തുടങ്ങിയ വൈവിധ്യമാർന്ന ഇനങ്ങൾ സന്ദർശകരെ ആകർഷിച്ചു. രാജ്യത്തിന്‍റെ വിവിധ ഭാഗങ്ങളിൽ നിന്നായി നൂറോളം പേർ ശിൽപശാലയിൽ പങ്കെടുത്തു. അഷറഫ് അക്കിരിപ്പറന്പത്ത്, യു.എ. മുനീർ, ഷിഹാബ് കുഞ്ഞഹമ്മദ്, ഇ.എം. അബ്ദുറസാഖ്, മജീദ് പുളിക്കൽ, ഹിന്ദ് ഹനീഫ, എൻ. ഹഫീസ്, സുലു വയനാട് തുടങ്ങിയവർ നേതൃത്വം നൽകി.

കൂണ്‍ കൃഷി പരിശീലന പരിപാടി സംഘടിപ്പിച്ചു

മാനന്തവാടി: വയനാട് സോഷ്യൽ സർവീസ് സൊസൈറ്റി സ്മാൾ ഇൻഡസ്ട്രീസ് ഡെവലപ്മെന്‍റ് ബാങ്ക് ഓഫ് ഇന്ത്യ (സിഡ്ബി) കേരള സ്റ്റേറ്റ് അസോസിയേഷൻ ഓഫ് ഫിനാൻഷ്യൽ ഇൻക്ലൂഷൻ ഇൻസ്റ്റിറ്റ്യൂഷൻസ് (കസാഫി) എന്നിവയുടെ സാന്പത്തിക സഹായത്തോടെ കൂണ്‍ കൃഷി പരിശീലനത്തിൽ പരിശീലന പരിപാടി സംഘടിപ്പിച്ചു. വയനാട് സോഷ്യൽ സർവീസ് സൊസൈറ്റി ഓഡിറ്റോറിയത്തിൽ നടന്ന പരിശീലന പരിപാടി വയനാട് സോഷ്യൽ സർവീസ് സൊസൈറ്റി എക്സിക്യൂട്ടീവ് ഡയറക്ടർ ഫാ. ജിനോജ് പാലത്തടത്തിൽ ഉദ്ഘാടനം നിർവഹിച്ചു. പ്രോഗ്രാം ഓഫീസർ പി.എ. ജോസ് അധ്യക്ഷത വഹിച്ചു. കസാഫി ജില്ലാ കോഓർഡിനേറ്റർ വരുണ്‍ പദ്ധതി വിശദീകരണം നടത്തി. മണ്‍സൂണ്‍ മഷ്റൂം നിർമാതാക്കളായ രാഹുൽ, ശ്രീകാന്ത് എന്നിവർ ട്രെയിനിംഗിന് നേതൃത്വം നൽകി. കസാഫി ഫീൽഡ് കോഓർഡിനേറ്റർ അനഘ ജോസ്, പ്രോഗ്രാം കോഓർഡിനേറ്റർമാരായ ജാൻസി ജിജോ, ചിഞ്ചു മരിയ എന്നിവർ പ്രസംഗിച്ചു. സ്വന്തമായി കൂണ്‍ ഉണ്ടാക്കിയെടുക്കുക, വ്യക്തിതലത്തിലും സ്വാശ്രയ സംഘതലത്തിലും കൂണ്‍ ഉത്പാദിപ്പിച്ച് വിപണനം നടത്തുക, വരുമാന വർധക പദ്ധതികൾ ആരംഭിക്കുക എന്നീ ലക്ഷ്യങ്ങളോടെയാണ് പരിശീലന പരിപാടി സംഘടിപ്പിച്ചത്. പരിശീലനം പൂർത്തിയാക്കിയവർക്ക് സർട്ടിഫിക്കറ്റുകൾ വിതരണം ചെയ്തു. കൂടാതെ സംരംഭങ്ങൾ ആരംഭിക്കുന്നതിനുള്ള വായ്പ സൗകര്യവും സാങ്കേതിക സഹായവും നൽകും. വയനാട് സോഷ്യൽ സർവീസ് സൊസൈറ്റി റീജണൽ കോഓർഡിനേറ്റർമാരായ ഷീന ആന്‍റണി, ആലീസ് സിസിൽ, ബിൻസി വർഗീസ്, ലിജ കുര്യാക്കോസ്, ജിനി ഷിനു എന്നിവർ നേതൃത്വം നൽകി.

വിദ്യാഭ്യാസ മേഖലയിൽ സർക്കാർ നടപ്പാക്കുന്നത് കാലോചിതമായ മാറ്റങ്ങൾ: മന്ത്രി ഒ.ആർ. കേളു

ചാറ്റ് ജിപിടിയുടെ കാലത്ത് കോഴ്സ് തെരഞ്ഞെടുക്കുന്നത് പ്രധാനം: സെമിനാർ

കൽപ്പറ്റ: നിർമിതി ബുദ്ധിയുടെയും ചാറ്റ് ജിപിടിയുടെയും കാലത്ത് വിദ്യാർത്ഥികൾ കോഴ്സുകൾ തെരഞ്ഞെടുക്കുന്നത് വളരെ പ്രാധാന്യമർഹിക്കുന്ന ഒന്നാണെന്ന് കരിയർ ഗൈഡൻസ് സെമിനാർ. എന്‍റെ കേരളം മേളയുടെ സമാപന ദിവസം സംസ്ഥാന പിന്നാക്ക വികസന വകുപ്പും എച്ച്സിഎല്ലും സംയുക്തമായി സംഘടിപ്പിച്ച സെമിനാറിൽ പ്ലസ് ടു കഴിഞ്ഞ് ഉന്നത വിദ്യാഭ്യാസത്തിന് തയാറാകുന്ന വിദ്യാർഥികൾ അറിഞ്ഞിരിക്കേണ്ട വിവിധ കോഴ്സുകളെക്കുറിച്ചാണ് ക്ലാസുകൾ എടുത്തത്. കരിയർ രംഗത്ത് വലിയ മാറ്റം വന്നുകൊണ്ടിരിക്കുകയാണ്. വിദ്യാർഥികൾ വിദേശ പഠനങ്ങൾക്ക് താല്പര്യപ്പെടുന്പോൾ കൃത്യമായ അവബോധത്തോടെ വേണം കോഴ്സുകളെ സമീപിക്കാനെന്നും സെമിനാർ അഭിപ്രായപ്പെട്ടു. കോഴ്സ് ചെയ്യാൻ ഉദ്ദേശിക്കുന്ന രാജ്യത്തിലെ ഭാഷ കൈകാര്യം ചെയ്യാൻ പഠിക്കുകയെന്നത് പ്രാധാന്യമർഹിക്കുന്നതാണ്. കൗണ്‍സലിംഗ് സൈക്കോളജിസ്റ്റും കരിയർ കൗണ്‍സിലറുമായ പി.ഒ. മുരളീധരൻ, എച്ച്സിഎൽ ടെക്നോളജീസ് ക്ലസ്റ്റർ ഹെഡ് ടിന സി. ഷെറി എന്നിവർ ക്ലാസുകൾ നയിച്ചു.

യുഡിഎഫ് ജനകീയ സമരം സംഘടിപ്പിച്ചു

സുൽത്താൻ ബത്തേരി: സംസ്ഥാനത്തെയും ബത്തേരി നഗരസഭയിലെയും എൽഡിഎഫ് ഭരണം ജനവിരുദ്ധമാണെന്നാരോപിച്ചും നയങ്ങൾ തിരുത്തണമെന്നാവശ്യപ്പെട്ടും നഗരസഭ ഓഫീസിന് മുന്നിൽ യുഡിഎഫ് ഏകദിന ജനകീയസമരം നടത്തി. പ്രതിഷേധ പരിപാടി ഐ.സി. ബാലകൃഷ്ണൻ എംഎൽഎ ഉദ്ഘാടനം ചെയ്തു. യുഡിഎഫ് മുനിസിപ്പൽ കമ്മിറ്റി ചെയർമാൻ ഷബീർ അഹമ്മദ് അധ്യക്ഷത വഹിച്ചു. നേതാക്കളായ ടി. മുഹമ്മദ്, ഡി.പി. രാജശേഖരൻ, അബ്ദുള്ള മാടക്കര, എം.എ. അസൈനാർ, എൻ.സി. കൃഷ്ണൻ, പി.പി. അയൂബ്, ഉമ്മർകുണ്ടാട്ടിൽ, സി.കെ. ഹാരിഫ്, ലയണൽ മാത്യു, ഷറീന അബ്ദുള്ള, ബിന്ദു സുധീർ ബാബു, അഡ്വ. സതീഷ് പൂതിക്കാട്, ഇബ്രാഹിം തൈതൊടി, ബാബു പഴുപ്പത്തൂർ എന്നിവർ പ്രസംഗിച്ചു. സമാപന സമ്മേളനം യൂത്ത് ലീഗ് സംസ്ഥാന ട്രഷറർ പി. ഇസ്മായിൽ ഉദ്ഘാടനം ചെയ്തു. സാധാരണക്കാരന്‍റെ അടിസ്ഥാന ആവശ്യങ്ങൾ നിറവേറ്റാൻ കഴിയാതെ പുറംമോടിയും മനംമയക്കുന്ന മുദ്രാവാക്യങ്ങളുമായിട്ടാണ് നഗരസഭ ഭരണം മുന്നോട്ടുപോകുന്നതെന്ന് നേതാക്കൾ ആരോപിച്ചു. ഗ്രാമങ്ങളിൽ നിലവാരമില്ലാത്ത സ്ട്രീറ്റുലൈറ്റുകൾ സ്ഥാപിച്ചതിനാൽ എല്ലാം പ്രവർത്തരഹിതമായിരിക്കുകയാണ്. ടൗണിൽ പുതുതായി സ്ഥാപിച്ച സ്ട്രീറ്റ് ലൈറ്റുകളിൽ ട്രാഫിക് ജംഗ്ഷൻമുതൽ ചുങ്കം വരെ സ്ഥാപിച്ചവ രണ്ട് മാസമായിട്ടും പ്രവർത്തനസജ്ജമാക്കിയിട്ടില്ലെന്നും നഗരസഭ ഭരണം സ്വജനപക്ഷപാതവും അഴിമതിയുംകൊണ്ട് നിറഞ്ഞതായും യുഡിഎഫ് ആരോപിച്ചു. ഗ്രാമീണ റോഡുകൾ പൊട്ടിപൊളിഞ്ഞുകിടക്കുകയാണ്. ശുചിത്വ സുന്ദര നഗരമെന്ന് പറയുന്പോഴും ദേശീയ സംസ്ഥാന ശുചിത്വ സൂചികയിൽ സ്റ്റാർ കാറ്റഗറിയിലെത്താൻ ഇതുവരെ നഗരസഭയ്ക്ക് സാധിച്ചിട്ടില്ലെന്നും നേതാക്കൾ ആരോപിച്ചു.

ലഹരിക്കെതിരേ ഭവനസന്ദർശനം നടത്തും

കേണിച്ചിറ: മദ്യത്തിനും മറ്റ് ലഹരിവസ്തുക്കൾക്കുമെതിരെ കേരള മദ്യ നിരോധന സമിതി വയനാട് ജില്ലാ കമ്മറ്റിയുടെ ആഭിമുഖ്യത്തിൽ ഭവനസന്ദർശനം നടത്തി ലഘുലേഖവിതരണം ചെയ്യാനും പനമരത്ത് ചേർന്ന ജില്ലാ കണ്‍വൻഷൻ തീരുമാനിച്ചു. മദ്യനയം തിരുത്തണമെന്നാവശ്യപ്പെട്ടു കൊണ്ട് സംസ്ഥാന കമ്മിറ്റിയുടെ നേതൃത്വതത്തിൽ മലപ്പുറം കളക്ടറേറ്റ് പടിക്കൽ നടത്തിവരുന്ന അനിശ്ചിതകാല സത്യഗ്രഹത്തിന്‍റെ 650-ാം ദിവസമായ മേയ് 24ന് മഹാസമ്മേളനം നടത്തും. ഇതിന്‍റെ ഭാഗമായി സന്ദേശപ്രചരണവും മേയ് ഒന്ന് മുതൽ ദ്വൈവാര പ്രചരണം നടത്താനും കണ്‍വൻഷൻ തീരുമാനിച്ചു. സംസ്ഥാന കമ്മറ്റി കോഓർഡിനേറ്റർ ടി.എൻ. രവീന്ദ്രൻ ഉദ്ഘാടനം ചെയ്തു. ജില്ലാപ്രസിഡന്‍റ് സി.കെ. ദിവാകരൻ അധ്യക്ഷത വഹിച്ചു.ജോസ് പാലിയാണ, വെള്ളസോമൻ മുജീബ് റഹുമാൻ, കെ.ആർ. ഗോപി, മണി നാരായണൻ, എൻ. സൈനബ, സി.എൻ. പവിത്രൻ, എൻ.യു. ബേബി എന്നിവർ പ്രസംഗിച്ചു.

Deepika.com

The Largest Read Malayalam Internet Daily

Quick Links

Rashtra Deepika LTD

Deepika.com

The Largest Read Malayalam Internet Daily

Local News

Quick Links

Rashtra Deepika LTD