ADVERTISEMENT

ADVERTISEMENT

പിന്നാക്കവിഭാഗ കോർപറേഷന് സ്വന്തം കെട്ടിടം

ചേർത്തല: സംസ്ഥാന പിന്നാക്ക വിഭാഗ വികസന കോർപറേഷൻ ചേർത്തല ഉപജില്ലാ ഓഫീസ്‌ സ്വന്തം കെട്ടിടത്തിലേക്ക്‌. കുപ്പിക്കവലയ്‌ക്ക്‌ സമീപം ഭവനനിർമാണ ബോർഡിന്‍റെ ഉടമസ്ഥതയിലെ കെട്ടിടവും ഒമ്പത്‌ സെന്‍റ് ഭൂമിയുമാണ്‌ വിലയ്‌ക്ക്‌ വാങ്ങിയത്‌.

നിലവിൽ ഓഫീസ്‌ പ്രവർത്തിക്കുന്നത്‌ വാടകക്കെട്ടിടത്തിലാണ്. സംസ്ഥാനത്ത്‌ 34 ജില്ലാ-മേഖല ഓഫീസുകളും കോർപറേഷനുണ്ട്‌. ഇവയെല്ലാം വാടകക്കെട്ടിടത്തിലാണ്. ചേർത്തല സബ്‌ രജിസ്‌ട്രാറിൽനിന്ന്‌ കോർപറേഷൻ ചെയർമാൻ കെ.പ്രസാദ്‌ ആധാരം ഏറ്റുവാങ്ങി. അസി. ജനറൽ മാനേജർ വി.പി. അലോഷ്യസ്‌, ചേർത്തല ഉപജില്ലാ മാനേജർ പി.വി. സജിത, എൻ.ആർ. ബാബുരാജ്‌, ബി. വിനോദ്‌, കെ.പി. പ്രതാപൻ, പി.ആർ. ഹരിക്കുട്ടൻ എന്നിവർ പങ്കെടുത്തു.

ADVERTISEMENT

എംഎല്‍എയുടെ മകനുള്‍പ്പെടെയുള്ളവരെ ഒഴിവാക്കി കഞ്ചാവ് കേസില്‍ കുറ്റപത്രം

ആലപ്പുഴ: കഞ്ചാവ് കേസില്‍ യു. പ്രതിഭ എംഎല്‍എയുടെ മകനുള്‍പ്പെടെ ഏഴു പേരെ ഒഴിവാക്കി എക്‌സൈസ് നര്‍കോട്ടിക് സ്പെഷല്‍ സ്‌ക്വാഡ് കുറ്റപത്രം സമര്‍പ്പിച്ചു. അമ്പലപ്പുഴ കോടതിയിലാണ് റിപ്പോര്‍ട്ട് സമര്‍പ്പിച്ചത്. ഇതോടെ കേസില്‍ രണ്ടു പ്രതികള്‍ മാത്രമായി. എംഎല്‍എയുടെ മകന്‍ കനിവിനെ അടക്കം പ്രതിയാക്കി എഫ്‌ഐആര്‍ ഇട്ട കേസിലാണ് മാറ്റം. തെളിവുകളുടെ അഭാവത്തില്‍ ഏഴുപേരെ പ്രതിപ്പട്ടികയില്‍നിന്ന് ഒഴിവാക്കിയതായി നേരത്തെ എക്‌സൈസ് ഇടക്കാല റിപ്പോര്‍ട്ട് സമര്‍പ്പിച്ചിരുന്നു. ഡിസംബര്‍ 28നാണ് കേസിനാസ്പദമായ സംഭവം. മൂന്നു ഗ്രാം കഞ്ചാവുമായി കനിവുള്‍പ്പെടെ ഒൻപതു പേരെ എക്‌സൈസ് സംഘം പിടികൂടുകയായിരുന്നു. ഒമ്പതാം പ്രതിയായിരുന്നു കനിവ്. ഒന്നാം പ്രതിയില്‍നിന്ന് കഞ്ചാവും രണ്ടാം പ്രതിയില്‍നിന്ന് കഞ്ചാവ് ഉപയോഗിക്കുന്ന ഉപകരണവും കണ്ടെത്തി. മറ്റുള്ളവര്‍ കഞ്ചാവ് ഉപയോഗിച്ചെന്നായിരുന്നു മഹസറിലുണ്ടായിരുന്നു. പിന്നീട് പ്രതികളെ ജാമ്യത്തില്‍ വിട്ടു. കുട്ടനാട് എക്‌സൈസാണ് കേസ് റജിസ്റ്റര്‍ ചെയ്തത്. ഇതിനു പിന്നാലെയാണ് മകനെതിരേ കേസെടുത്തില്ലെന്ന് പറഞ്ഞ് യു.പ്രതിഭ എംഎല്‍എ രംഗത്തെത്തിയത്. സംഭവം വിവാദമായതോടെ എക്‌സൈസ് നര്‍കോട്ടിക് സ്‌പെഷല്‍ സ്‌ക്വാഡ് അന്വേഷണം ഏറ്റെടുക്കുകയായിരുന്നു. എന്നാല്‍, വൈദ്യ പരിശോധന നടത്താത്തതിനാല്‍ പ്രതികള്‍ കഞ്ചാവ് ഉപയോഗിച്ചെന്ന് തെളിയിക്കാനായില്ല. കഞ്ചാവ് ഉപയോഗിക്കുന്നത് കണ്ടെന്ന് എക്‌സൈസ് ഉദ്യോഗസ്ഥര്‍ മൊഴി നല്‍കിയിട്ടുമില്ല. മറ്റു സാക്ഷികളും ഇല്ലാത്ത സാഹചര്യത്തിലാണ് ഏഴു പേരെ ഒഴിവാക്കി കുറ്റപത്രം സമര്‍പ്പിച്ചത്.

തായങ്കരി സെന്‍റ് ആന്‍റണീസ് പള്ളിയിൽ തിരുനാളിന് ഇന്നു കൊടിയേറും

എടത്വ: തായങ്കരി സെന്‍റ് ആന്‍റണീസ് പള്ളിയിൽ അദ്ഭുത പ്രവര്‍ത്തകനായ വിശുദ്ധ അന്തോനീസിന്‍റെ തിരുനാള്‍ ഇന്നു മുതല്‍ 15 വരെ നടക്കും. ഇന്ന് വൈകുന്നേരം 4.45ന് നടക്കുന്ന കൊടിയേറ്റിന് വികാരി ഫാ. ലിജോ കുഴിപ്പള്ളില്‍ മുഖ്യകാര്‍മികത്വം വഹിക്കും. തുടര്‍ന്ന് നടക്കുന്ന മധ്യസ്ഥപ്രാര്‍ഥന, കുര്‍ബാന, സന്ദേശം ഫാ. ജോര്‍ജ് തൈച്ചേരില്‍ കാര്‍മികത്വം വഹിക്കും. 14 വരെ എല്ലാ ദിവസവും വൈകുന്നേരം 4.30ന് ജപമാല, 4.45ന് മദ്ധ്യസ്ഥപ്രാര്‍ഥന, കുര്‍ബാന, സന്ദേശം തുടര്‍ന്ന് വാര്‍ഡുകളുടെ നേതൃത്വത്തില്‍ നേര്‍ച്ച വിതരണവും നടക്കും. ഞായറാഴ്ച രാവിലെ 9.45 ന് നടക്കുന്ന കുര്‍ബാനയ്ക്ക് ശേഷം മതാധ്യായന വര്‍ഷ ഉദ്ഘാടനവും പെന്തക്കുസ്താ ദിനവും ആചരിക്കും. കുട്ടികളെ എഴുത്തിന് ഇരുത്തും. 13ന് വൈകുന്നേരം 4.30ന് പ്രസുദേന്തി വാഴ്ച. 14ന് വൈകുന്നേരം 4.45ന് നടക്കുന്ന കുര്‍ബാനയ്ക്കുശേഷം വിശുദ്ധ അന്തോനീസിന്‍റെ കുരിശടിയിലേക്ക് പ്രദക്ഷിണവും നടക്കും. 15ന് തിരുനാള്‍ ദിനത്തില്‍ രാവിലെ 9.30ന് ജപമാല, 10.20ന് മധ്യസ്ഥ പ്രാര്‍ഥന, വിശുദ്ധ കുര്‍ബാന, സന്ദേശം. ഫാ. ജോസഫ് വേളങ്ങാട്ടുശേരി കാര്‍മികത്വം വഹിക്കും. തുടര്‍ന്ന് പള്ളിക്ക് ചുറ്റും പ്രദക്ഷിണം, കൊടിയിറക്ക്.

ചെങ്ങന്നൂർ നഗരസഭയ്ക്ക് നികുതി പിരിവിൽ റെക്കോർഡ് നേട്ടം

ചെങ്ങന്നൂർ: കെട്ടിടനികുതി പിരിവിൽ സർവകാല റെക്കോർഡ് നേടി ചെങ്ങന്നൂർ നഗരസഭ. മുൻ വർഷത്തേക്കാൾ മൂന്നു കോടിയിലധികം രൂപയുടെ അധികനികുതി ശേഖരണം നടത്തിയാണ് നഗരസഭ ഈ ചരിത്രനേട്ടം കൈവരിച്ചത്. 5,34,86,644 രൂപയാണ് ഇത്തവണ കെട്ടിടനികുതിയായി നഗരസഭയ്ക്ക് ലഭിച്ചത്. കഴിഞ്ഞ സാമ്പത്തിക വർഷം ഇത് 2,56,32,341 രൂപയായിരുന്നു. ഏഴു വാർഡുകളിൽ കെട്ടിടനികുതി ശേഖരണം നൂറുശതമാനം പൂർത്തിയാക്കി. ഇതിന്‍റെ ഭാഗമായി, നഗരസഭാ കൗൺസിലിന്‍റെയും സ്റ്റാഫ് കൗൺസിലിന്‍റെയും നേതൃത്വത്തിൽ സെക്രട്ടറി, റവന്യു വിഭാഗം ഉദ്യോഗസ്ഥർ, വാർഡ് കൗൺസിലർമാർ എന്നിവരെ ആദരിച്ചു. സെക്രട്ടറി ടി.വി. പ്രദീപ് കുമാർ, റവന്യു സൂപ്രണ്ട്: എസ്. ഗിരീഷ് കുമാർ, റവന്യു ഇൻസ്‌പെക്ടർ ആർ.എസ്. ശാന്തി, ക്ലർക്കുമാരായ രശ്മി ഭാസ്‌കരൻ, ടി. ഷിബു, അശ്വതി ധരൻ, ടി. വിപിൻ ദാസ്, ജോൺസിമോൾ തുടങ്ങിയവരെയാണ് ആദരിച്ചത്. ഒന്ന്, ഇരുപത് വാർഡുകളിൽ നൂറുശതമാനം പൂർത്തീകരണത്തിലേക്ക് എത്തുകയാണ്. നഗരസഭാ ചെയർപേഴ്സൺ അഡ്വ. ശോഭാ വർഗീസ് സമ്മേളനം ഉദ്ഘാടനം ചെയ്യുകയും ആദരിക്കൽ ചടങ്ങ് നിർവഹിക്കുകയും ചെയ്തു. വൈസ് ചെയർമാൻ കെ. ഷിബുരാജൻ അധ്യക്ഷനായി.

ലഹരിക്കെതിരേ പോരാടുന്ന ഭരണാധികാരികൾ മദ്യത്തെക്കുറിച്ച് മിണ്ടുന്നില്ല: വി.എം. സുധീരൻ

കറ്റാനം: നാടിനെ ലഹരിമുക്തമാക്കാൻ പോരാടുന്ന സർക്കാരും ഭരണാധികാരികളും മദ്യത്തെക്കുറിച്ച് ഒന്നും മിണ്ടാത്തത് ദുഃഖകരമാണെന്ന് മുതിർന്ന രാഷ്ട്രീയ നേതാവ് വി.എം. സുധീരൻ. കറ്റാനത്ത് ഡോ. ജോഷ്വാ മാർ ഇഗ്നാത്തിയോസ് ഫൗണ്ടേഷന്‍റെ പ്രഥമ പുരസ് കാരം ഏറ്റുവാങ്ങി സംസാരിക്കുകയായിരുന്നു അദ്ദേഹം. മദ്യം-മയക്കുമരുന്ന് ഉൾപ്പെടുന്ന ലഹരിക്കെതിരേ ജോഷ്വാ തിരുമേനി നടത്തിവരുന്ന പ്രവർത്തനങ്ങൾ ഇന്നു കൂടുതൽ പ്രസക്തമാവുകയാണ്. സമൂഹനന്മയ്ക്കുവേണ്ടി തലമുറകളെയും നാടിനെയും രക്ഷിക്കാൻ കേരളം ഒരു സാമൂഹ്യദുരന്തത്തിലേക്കു പോകുന്ന ദുരവസ്ഥയിൽനിന്നു രക്ഷിക്കാൻ തിരുമേനിയെപ്പോലുള്ളവർ നടത്തുന്ന പ്രവർത്തനങ്ങൾ കൂടുതൽ കരുത്തോടെ മുന്നോട്ടുപോകണം.വിദ്യാർഥികൾ ഏതുതലത്തിൽ എത്തിയാലും സത്യം കൈവിടാതെ ജനക്ഷേമത്തിനും നാടിന്‍റെ നന്മയ്ക്കുവേണ്ടിയും വേണം പ്രവർത്തിക്കാൻ. വർഗീയവിധ്വംസക താത്പര്യങ്ങൾ ഉയർത്തിപ്പിടിക്കുന്ന ശക്തികളുടെ കെണിയിൽ വീഴാതിരിക്കാൻ വിദ്യാർഥികൾ ഉൾപ്പെടുന്ന പുതുതലമുറ ജാഗ്രത പുലർത്തണമെന്നും സുധീരൻ പറഞ്ഞു.

ജോഷ്വാ തിരുമേനി സാമൂഹ്യനന്മയുടെ പ്രതീകം: കർണാടക മന്ത്രി കെ.ജെ. ജോർജ്

കറ്റാനം: സമൂഹത്തിൽ നല്ല കാര്യങ്ങൾ ചെയ്യുന്നവർ എന്നും അംഗീകരിക്കപ്പെടുകയും ആദരിക്കപ്പെടുകയും ചെയ്യുമെന്നും ജോഷ്വാ മാർ ഇഗ്നാത്തിയോസ് തിരുമേനി സാമൂഹ്യനന്മയുടെ പ്രതീകമാണന്നും കർണാടക ഊർജമന്ത്രി കെ.ജെ. ജോർജ് പറഞ്ഞു. ഡോ. ജോഷ്വാ മാർ ഇഗ്നാത്തിയോസിന് നൽ കിയ സ്നേഹാദരവ് സമ്മേളനം കറ്റാനം പോപ്പ് പയസ് സ്കൂളിൽ ഉദ്ഘാടനം ചെയ്യുകയായിരുന്നു അദ്ദേഹം. സാമൂഹ്യനന്മ മുൻനിർത്തിയുള്ള ജോഷ്വാ തിരുമേനിയുടെ പ്രവർത്തനം സമൂഹത്തിനാകെ മാതൃക പകരുന്നതാണ്. മാനവ സാഹോദര്യം കൊണ്ട് സമ്പന്നമായ നമ്മുടെ രാജ്യത്ത് പുതുതലമുറ മാനവീക മൂല്യങ്ങൾ ഉയർത്തിപ്പിടിക്കണമെന്നും മന്ത്രി കെ.ജെ. ജോർജ് പറഞ്ഞു. ജോഷ്വാ മാർ ഇഗ്നാത്തിയോസ് ഫൗണ്ടേഷൻ ഏർപ്പെടുത്തിയ പ്രഥമ പുരസ്കാരം മുതിർന്ന രാഷ്ട്രീയ നേതാവ് വി. എം. സുധീരന് അദ്ദേഹം സമ്മാനിച്ചു. സി.ടി. വർഗീസ് തയാറാക്കിയ സൂര്യതേജസോടെ ജോഷ്വാ മാർ ഇഗ്നാത്തിയോസ് എന്ന പുസ്തകത്തിന്‍റെ പ്രകാശനവും നടന്നു. എംഎസ്‌സി സ്കൂൾ കറസ്പോണ്ടന്‍റ് ഫാ. ഡാനിയേൽ തെക്കേടത്ത് അധ്യക്ഷത വഹിച്ചു. ജോൺസൺ ഏബ്രഹാം, എൻ.എം. നസീർ വാർഡ് മെമ്പർ മാത്യു ഫിലിപ്പ്, പ്രിൻസിപ്പൽ ടി. മോഹൻ, ഹെഡ്മാസ്റ്റർ ടി.കെ. സാബു, പിടിഎ പ്രസിഡന്‍റ് വർഗീസ് മത്തായി, ജനറൽ കൺവീനർ സി.റ്റി. വർഗീസ്, ഫാ. സിൽവസ്റ്റർ തെക്കേടത്ത്, സെലിൻ സ്കറിയ എന്നിവർ പ്രസംഗിച്ചു.

കണ്ണടച്ചു തുറക്കും മുൻപേ ടാറിംഗ് ഇളകി

ചാരുംമൂട്: ടാറിംഗ് നടത്തി ഒരുമാസം തികയും മുമ്പേ പാലമേൽ പഞ്ചായത്തിലെ മാവിളപ്പടി-ആശാൻകലുങ്ക് റോഡിലെ ടാറിംഗ് ഇളകി. നാട്ടുകാർ പ്രതിഷേധവുമായി രംഗത്ത് എത്തി. മഴയിൽ റോഡിന്‍റെ പല ഭാഗങ്ങളും തകർന്നു. മഴപെയ്തതോടെ റോഡിൽക്കൂടി ഇപ്പോൾ യാത്ര ചെയ്യാൻ പറ്റാതായി. ഇളകിക്കിടക്കുന്ന മെറ്റലുകളിൽ കയറി ഇരുചക്രവാഹന യാത്രക്കാർ അപകട ത്തിൽപ്പെടാനും തുടങ്ങി. നൂറനാട്-പന്തളം റോഡും മാവിളപ്പടി റോഡുമായി ബന്ധിപ്പിക്കുന്ന ഭാഗത്ത് പണി നടത്താനുണ്ട്. ഏഴു ചപ്പാത്തുകളുടെ കോൺക്രീറ്റും നടത്തിയിട്ടില്ല. മഴയിൽ ടാറിംഗ് നടത്തിയതിനെതിരേ നാട്ടുകാർ മുമ്പ് പ്രതിഷേധവുമായി എത്തിയിരുന്നു.ഇതേത്തുടർന്ന് പിഎംജിഎസ്‌വൈ ഉദ്യോഗസ്ഥരെത്തിയശേഷമാണ് പണി പുനരാരംഭിച്ചത്. മഴയെത്തുടർന്ന് മരങ്ങളിൽനിന്നു ശക്തമായി വെള്ളം വീണ ഭാഗങ്ങളിലാണ് ടാറിംഗ് ഇളകിപ്പോ യിട്ടുള്ളതെന്നും കേന്ദ്രസർക്കാർ പദ്ധതിയായതിനാൽ ടാറിംഗിന്‍റെ വിവിധ ഘട്ടങ്ങളിൽ പരിശോധന നടത്തിയിട്ടുണ്ടെന്നും ഏഴുചപ്പാത്തുകളും മാവിളപ്പടി ഭാഗത്തെ റോഡും കോൺക്രീറ്റ് ചെയ്യുമെന്നും പിഎംജിഎസ്‌വൈ അസി. എൻജിനിയർ ദീപ പറഞ്ഞു. പ്രധാനമന്ത്രി ഗ്രാമ സഡക് യോജന (പിഎംജിഎസ്‌വൈ) പദ്ധതിയിലാണ് റോഡ് നിർമിച്ചത്. പണി തുടങ്ങിയിട്ട് ഒന്നരവർഷത്തിലേറെയായി. മാവിളപ്പടി മുതൽ പയ്യനല്ലൂർ മായയക്ഷിക്കാവ് വരെയുമുള്ള ആറു കിലോമീറ്റർ വരെ റോഡിന്‍റെ നവീകരത്തിനായി 4.80 കോടി രൂപയാണ് അനുവദിച്ചിട്ടുള്ളത്. നൂറനാട്-പന്തളം റോഡിലെ മാവിളപ്പടി മുതൽ കായംകുളം-പുനലൂർ റോഡിലെ ആശാൻകലുങ്ക് വരെയുള്ള മൂന്നു കിലോമീറ്റർ ദൂരത്തിലു ള്ള ആദ്യ റിച്ചിലാണ് പണി ഏതാണ്ട് പൂർത്തിയായിട്ടുള്ളത്. കായംകുളം-പുനലൂർ റോഡിലെ മാമ്മൂട് മുതൽ പഴ കുളം-ആനയടി റോഡിലെ പയ്യനല്ലൂർ മായയക്ഷിക്കാവ് വരെയുമുള്ള മൂന്നു കിലോമീറ്റർ ഭാഗത്തെ രണ്ടാമത്തെ റീച്ചിലും പണി നടക്കുന്നുണ്ട്. മഴ കഴിഞ്ഞാൽ ഇവിടത്തെ ടാറിംഗ് നടത്തുമെന്നാണ് ഉദ്യോഗസ്ഥർ പറയുന്നത്. കായംകുളം-പുനലൂർ റോഡിനെ എംസി റോഡുമായി ബന്ധിപ്പിക്കുന്ന റോഡാണിത്. കെപി റോഡിൽനിന്നും ശബരിമല പാതയായും ഈ റോഡ് ഉപയോഗിക്കുന്നു. കൃഷിമന്ത്രി പി. പ്രസാദിന്‍റെ വീടിനോടു ചേർന്നും റാന്നി എംഎൽഎ പി.എൻ. പ്രമോദ് നാരായണന്‍റെ വീടിനു സമീപത്തു കൂടിയുമാണ് റോഡ് കടന്നുപോകുന്നത്. റോഡ് റീടാർ ചെയ്തിട്ട് പത്തുവർഷത്തിലേറെയായിരുന്നു. റോഡിന്‍റെ ശോച്യാവസ്ഥ കാരണം അഞ്ചു ബസുകൾ സർവീസ് നിർത്തി. നാട്ടുകാരു ടെ നിരന്തരമായ പരാതിയെത്തുടർ ന്നാണ് സുരേഷ്‌ എംപി ഇടപെട്ട് പിഎംജിഎസ്‌വൈ പദ്ധതിയിൽ റോഡു പണിയാൻ തുക അനുവദിച്ചത്.

രണ്ടരപ്പതിറ്റാണ്ടിന്‍റെ സ്വപ്നം പ ൂവണിഞ്ഞു; ഗുമസ്തനിൽനിന്ന് വക്കീലിലേക്ക് സുരേഷ്

അമ്പലപ്പുഴ: രണ്ടരപ്പതിറ്റാണ്ടായി മനസിൽ കൊണ്ടുനടന്ന സ്വപ്നം പൂവണിഞ്ഞു. ഗുമസ്തക്കുപ്പായത്തിൽനിന്ന് സുരേഷ് വക്കീൽക്കുപ്പായമണിഞ്ഞ് കോടതിയിലെത്തി. നീണ്ട 25 വർഷം അമ്പലപ്പുഴ ജുഡീഷ്യൽ ഒന്നാംക്ലാസ് മജിസ്ട്രേറ്റ് കോടതിയിൽ അഡ്വക്കറ്റ് ക്ലാർക്കായി ജോലി ചെയ്തിരുന്ന അമ്പലപ്പുഴ കട്ടക്കുഴി വണ്ടകം വീട്ടിൽ ജി. സുരേഷാണ് വ്യാഴാഴ്ച മുതൽ വക്കീൽക്കുപ്പായമണിഞ്ഞ് കോടതിയിലെത്തിയത്. ജൂൺ ഒന്നിന് കേരള ബാർ കൗൺസിൽ നടത്തിയ എൻറോൾമെന്‍റ് ചടങ്ങിലാണ് ജി. സുരേഷ് അഭിഭാഷകനായി സന്നത് എടുത്തത്. ആലപ്പുഴ-അമ്പലപ്പുഴ കോടതികളുടെ ചരിത്രത്തിൽ ആദ്യമായാണ് ഒരു അഡ്വക്കറ്റ് ക്ലാർക്ക് നിയമപഠനം പൂർത്തിയാക്കി അഭിഭാഷകനായി കോടതിയിലെ ത്തുന്നത്. ആലപ്പുഴ എസ്ഡി കോളജിൽനിന്നു 1986-1989ൽ ബിരുദപഠനം പൂർത്തിയാക്കിയ സുരേഷ് 10 വർഷം സ്വകാര്യ ട്യൂഷൻ സെന്‍ററിലെ അധ്യാപകനായി ജോലി നോക്കിയിരുന്നു. ആലപ്പുഴയിലെ പ്രമുഖ അഭിഭാഷകനായ അഡ്വ. ജി. രാമകൃഷ്ണന്‍റെ കൂടെ ക്ലാർക്കായി പ്രവർത്തനം തുടങ്ങി. പിന്നീട് അമ്പലപ്പുഴയിൽ 25 വർഷം ക്ലാർക്കായി സേവനം അനുഷ്‌ഠിച്ചു. അഡ്വക്കറ്റ് ക്ലാർക്ക് അസോസിയേഷന്‍റെ അമ്പലപ്പുഴ യൂണിറ്റിന്‍റ് പ്രസിഡന്‍റായും പ്രവർത്തിച്ചിട്ടുണ്ട്. അഡ്വക്കേറ്റ് ക്ലർക്കായി ജോലി ചെയ്ത കാലം മുതലുള്ള ആഗ്രഹമായിരുന്നു അഭിഭാഷകനാകണമെന്നത്. പല കാരണം കൊണ്ട് നടക്കാതിരുന്ന ഈ ആഗ്രഹമാണ് ഇപ്പോൾ പൂവണിഞ്ഞതെന്ന് സുരേഷ് പറയുന്നു. പുതിയ വേഷത്തിലെത്തിയ ജി. സുരേഷിനെ അമ്പലപ്പുഴ ബാർ അസോസിയേഷന്‍റെ നേതൃത്വത്തിൽ ആദരിച്ചു. കോടതി വളപ്പിൽ നടന്ന ചടങ്ങിൽ എച്ച്. സലാം എംഎൽഎ അനുമോദനം നിർവഹിച്ചു. അഡ്വ. ശ്രീലത ഹരി അധ്യക്ഷത വഹിച്ചു. മജിസ്ട്രേറ്റ് ഐശ്വര്യ ആൻ ജേക്കബ് ഉപഹാരങ്ങൾ നൽകി. അസി. പബ്ലിക് പ്രോസിക്യൂട്ടർ പ്രസൂൺ ബെന്നി, ബ്ലോക്ക് പഞ്ചായത്ത് പ്രസിഡന്‍റ് അഡ്വ. ഷീബാ രാകേഷ്, അഭിഭാഷകരായ അഹമ്മദ് അമ്പലപ്പുഴ, എ.ടി. പ്രദീപ്, സന്ധ്യ, ജെ. ഷെർലി, ആർ. രജിത എന്നിവർ പ്രസംഗിച്ചു.

ജില്ലാക്കോടതി പാലം: കച്ചവടക്കാരെ ഒഴിപ്പിക്കാൻ നോട്ടീസ്

ആലപ്പുഴ: ജില്ലാക്കോടതി പാലം പുനർനിർമാണത്തിന് ഭാഗമായി സ്ഥലം ഏറ്റെടുക്കുന്നതുമായി ബന്ധപ്പെട്ട് ഹൈക്കോടതിയിലുണ്ടായിരുന്ന കേസ് തീർപ്പായതോടെ വിധി നടപ്പാക്കി കച്ചവടക്കാരെ ഉടൻ ഒഴിപ്പിക്കണമെന്നാവശ്യപ്പെട്ട് പൊതുമരാമത്ത് വിഭാഗം നഗരസഭയ്ക്ക് കത്ത് നൽകി. നഷ്ടപരിഹാരത്തുക വർധിപ്പിക്കണമെന്നും പുനരധിവസിപ്പിക്കണമെന്നും ആവശ്യപ്പെട്ട് 25 കച്ചവടക്കാർ ആറുമാസം മുൻപ് നൽകിയ പരാതിയിൽ കഴിഞ്ഞമാസം 29ന് ആണ് ഹൈക്കോടതി വിധി പുറപ്പെടുവിച്ചത്. കച്ചവടക്കാർക്ക് നഷ്ടപരിഹാരമായി 50,000 രൂപ കിഫ്ബി നേരത്തെ കോടതിയിൽ കെട്ടിവച്ചിരുന്നു. കൂടാതെ രണ്ടു ലക്ഷം രൂപ വരെ കച്ചവടക്കാർക്ക് അവകാശപ്പെടാം എന്നു കോടതി പരാമർശിച്ചിട്ടുണ്ട്. അതിനായി റവന്യു സെക്രട്ടറിക്ക് അപേക്ഷ നൽകണം. മൂന്നാഴ്ചയ്ക്കുള്ളിൽ അപേക്ഷ നൽകണമെന്നും മൂന്നു മാസത്തിനുള്ളിൽ സർക്കാർ തീരുമാനം എടുക്കണമെന്നുമാണു വിധി. നിർമാണത്തിന്‍റെ പ്രാധാന്യവും ഗൗരവവും കണക്കിലെടുത്ത് ഒഴിപ്പിക്കലും പുനരധിവാസവും അടിയന്തരമായി പൂർത്തിയാക്കണമെന്നും കോടതി നിർദേശിച്ചിട്ടുണ്ട്.

നാടെങ്ങും പരിസ്ഥിതിദിനാഘോഷം

ആലപ്പുഴ: കൃഷി എന്‍റെ അഭിമാനമാണെന്നും കൃഷിയാണ് എന്‍റെ ലഹരിയെന്നും പുതുതലമുറ പറഞ്ഞും പ്രവർത്തിച്ചും പഠിച്ചു തുടങ്ങണമെന്ന് ജില്ലാ കളക്ടർ അലക്സ് വർഗീസ് പറഞ്ഞു. ജില്ലാ അഗ്രി ഹോൾട്ടി സൊസൈറ്റിയുടെ നേതൃത്വത്തിൽ ലോകപരിസ്ഥിതി ദിനത്തില്‍ കളക്ടറേറ്റിലെ ഗാന്ധി സ്മൃതി മണ്ഡപത്തിൽ വൃക്ഷത്തൈ നട്ടു സംസാരിക്കുകയായിരുന്നു അദ്ദേഹം. കിളിഞാവൽ വൃക്ഷത്തൈയാണ് കളക്ടര്‍ നട്ടത്. ജില്ലാ അഗ്രി ഹോൾട്ടി സൊസൈറ്റി ജനറൽ സെക്രട്ടറി രവി പാലത്തുങ്കൽ, വൈസ് പ്രസിഡന്‍റ് എ.എൻ. പുരം ശിവകുമാർ, പി. ശ്യാംകുമാർ, പയ്യസ് നെറ്റോ, ഹരികുമാർ വാലേത്ത്‌, പി.എസ്. ഹരിദാസ്, രാജു പള്ളിപ്പറമ്പിൽ, സുനിൽ വർഗീസ്, എം.ഇ. ഉത്തമക്കുറുപ്പ് തുടങ്ങിയവർ പങ്കെടുത്തു. ജില്ലാ പഞ്ചായത്തിൽ പോസ്റ്റർ പ്രദർശനം ആലപ്പുഴ: പരിസ്ഥിതി ദിനത്തിൽ ജില്ലാ സാക്ഷരതാമിഷന്‍റെ നേതൃത്വത്തിൽ ജില്ലാ പഞ്ചായത്തിൽ "ബീറ്റ് പ്ലാസ്റ്റിക് പൊലൂഷൻ" പോസ്റ്റർ പ്രദർശനം നടത്തി. ഐക്യരാഷ്ട്ര പരിസ്ഥിതി പരിപാടിയുടെ ഭാഗമായി തയാറാക്കിയ പോസ്റ്ററുകളാണ് പ്രദർശിപ്പിച്ചത്. പ്ലാസ്റ്റിക് മാലിന്യം ഇല്ലാതാക്കുക എന്ന സന്ദേശമാണ് പോസ്റ്ററുകളിലുള്ളത്. പോസ്റ്റർ പ്രദർശനം ജില്ലാ പഞ്ചായത്ത് പ്രസിഡന്‍റ് കെ.ജി. രാജേശ്വരി ഉദ്ഘാടനം ചെയ്തു. ആരോഗ്യ വിദ്യാഭ്യാസ സ്ഥിരം സമിതി അധ്യക്ഷ എം.വി. പ്രിയ, ജില്ലാ പഞ്ചായത്തംഗം ആർ. റിയാസ്, കെ. ആർ. ദേവദാസ്, കെ.വി. രതീഷ്, എസ്. മഞ്ജു, പി.കെ. ജോസഫ്, എസ്. സനിത തുടങ്ങിയവർ പങ്കെടുത്തു. പ്ലാസ്റ്റിക് മാലിന്യം ഗുരുതരഭീഷണി: നീതാ കെ. ഗോപാൽ ചെങ്ങന്നൂർ: പ്ലാസ്റ്റിക്കിന്‍റെ പുനരുത്പാദനം ഒരു ശാശ്വത പരിഹാരമല്ലെന്നും പ്ലാസ്റ്റിക് കണങ്ങൾ ഭൂമിയിൽ ദീർഘകാലം അടിഞ്ഞുകൂടുന്നത് ഹരിതഗൃഹ വാതകങ്ങൾ കെട്ടിക്കിടക്കാനും അതുവഴി അന്തരീക്ഷ ഊഷ്മാവ് വർധിപ്പിക്കാനും കാലാവസ്ഥയിൽ ഗുരുതരമായ മാറ്റങ്ങൾ വരുത്താനും ഇടയാക്കുമെന്ന് കേന്ദ്ര കാലാവസ്ഥ നിരീക്ഷണവകുപ്പ് തിരുവനന്തപുരം മേധാവി നീതാ കെ. ഗോപാൽ. ചെങ്ങന്നൂർ പ്രൊവിഡൻസ് എൻജിനിയറിംഗ് കോളജിന്‍റെ ആഭിമുഖ്യത്തിൽ നടന്ന ലോക പരിസ്ഥിതി ദിനാചരണം ഉദ്ഘാടനം ചെയ്യുകയായിരുന്നു നീതാ കെ. ഗോപാല്‍. പ്രകൃതിയിൽ അലിഞ്ഞുചേരുന്ന വസ്തുക്കളുടെ ഉപയോഗം വർധിപ്പിക്കുക മാത്രമാണ് ഇതിനുള്ള ഏക പോംവഴിയെന്നും അതിനായി വരും തലമുറകളെ പ്രോത്സാഹിപ്പിക്കേണ്ടത് വിദ്യാഭ്യാസ സ്ഥാപനങ്ങളുടെ കടമയാണെന്നും അവർ പറഞ്ഞു. ചെയർപേഴ്സൺ മറിയാമ്മ ജോർജ് അധ്യക്ഷയായി. പ്രിൻസിപ്പൽ ഡോ. സന്തോഷ് സൈമൺ, പ്രഫ. ഡോ. പി. എസ്. അനൂപ്, പ്രഫ. ജെറിൻ ജോയ് വർഗീസ്, പ്രഫ. ദിനുലാൽ, പ്രഫ. മഞ്ജുഷ എന്നിവർ പ്രസംഗിച്ചു. പരിസ്ഥിതിക്ക് അനുയോജ്യമായ വിവിധ വസ്തുക്കളുടെയും വൈദ്യുതി വാഹനങ്ങളുടെയും പ്രദർശനവും ദിനാചരണത്തിന്‍റെ ഭാഗമായി നടന്നു. മങ്കൊമ്പ്: പ്ലാസ്റ്റിക് മലിനീകരണം അവസാനിപ്പിക്കുകയെന്ന ഈ വർഷത്തെ പരിസ്ഥിതിദിന സന്ദേശം പൊതുസമൂഹത്തിൽ ആഹ്വാനം ചെയ്തു ചെറുകര ആർ.എൻ. മെമ്മോറിയൽ ഗ്രന്ഥശാലയും ജ്ഞാനോദയം ബാലവേദിയും സംഘടിപ്പിച്ച 'ഒരു തൈ നടാം' പരിപാടി കുട്ടനാട് താലൂക്ക് ലൈബ്രറി കൗൺസിൽ പ്രസിഡന്‍റ് കെ. ഗോപകുമാർ ഉദ്ഘാടനം ചെയ്തു. ബാലവേദി പ്രസിഡന്‍റ് ദേവ ജിത്ത് അധ്യക്ഷത വഹിച്ച യോഗത്തിൽ ഗ്രന്ഥശാല സെക്രട്ടറി കെ.എം. മഹേഷ്, ബാലവേദി കോ-ഓർഡിനേറ്റർ ശ്രീജാ മധു, പി.എൻ. സൺയാറ്റ്, ജി. യശോധരൻ, ബിന്ധ്യാ അഭിലാഷ്, കെ.ടി. വിജയനാഥ് തുടങ്ങിയവർ പ്രംസംഗിച്ചു.

ജലസമൃദ്ധിയുടെ കാലം കഴിഞ്ഞു ; ജലശാപമേറ്റ് കുട്ടനാട്

മങ്കൊമ്പ്: നെല്ലറയെന്നു പേരുകേട്ട കുട്ടനാട് ഇന്ന് നിരവധി പാരിസ്ഥിതിക പ്രശ്നങ്ങള്‍ നേരിടുന്ന പ്രദേശമായി മാറിക്കഴിഞ്ഞു. ജലസമൃദ്ധിക്കു പേരുകേട്ട കുട്ടനാടിന് ശാപവും ഇതേ ജലം തന്നെയാണ്. ശുദ്ധജലത്തടാകങ്ങളും ആറുകളും അനുഗ്രഹമായിരുന്ന കുട്ടനാടിന് ഇവയാണ് ഇന്നു ഏറ്റവും വലിയ വെല്ലുവിളിയുയര്‍ത്തുന്നതും. ജലാശയങ്ങളിലെ ജലം മുഴുവന്‍ മലിനമായിരിക്കുന്നു. മാരകമായ പല രോഗങ്ങളും കുട്ടനാട്ടുകാര്‍ക്കു സമ്മാനിക്കുന്നത് മലിനജലവാഹിനികളായ ജലാശയങ്ങള്‍ തന്നെയാണ്. കൃഷിയാവശ്യത്തിനുള്ള മാരകമായ കീടനാശിനികള്‍, ഹൗസ്ബോട്ടുകള്‍ പോലെയുള്ള ടൂറിസയാനങ്ങള്‍ വെള്ളത്തില്‍ കലര്‍ത്തുന്ന മാലിന്യങ്ങള്‍ ഇവയെല്ലാം കുട്ടനാടിന്‍റെ പരിസ്ഥിതിയെ ദോഷകരമായി ബാധിച്ചിട്ടുണ്ട്. ഒരു കാലത്ത് കുട്ടനാടിന്‍റെ ജീവനാഡികളെന്നു വിശേഷിപ്പിക്കപ്പെട്ടിരുന്ന ചെറുതോടുകളുടെ നാശം കുട്ടനാടിന്‍റെ പരിസ്ഥിയെ തകിടം മറിച്ചു. റോഡ് സൗകര്യങ്ങള്‍ വന്നതോടെ യാത്രകള്‍ക്കും ചരക്കുനീക്കങ്ങള്‍ക്കും കുട്ടനാട്ടുകാര്‍ ആശ്രയിച്ചിരുന്ന തോടുകള്‍ വിസ്മൃതിയിലായി. തോടുകള്‍ പലതും നികത്തി റോഡുകളാക്കിയപ്പോള്‍ നാട്ടുകാര്‍ക്കും നഷ്ടങ്ങളൊന്നുമുണ്ടായില്ല. ഗതാഗത പ്രാധാന്യം കുറഞ്ഞതോടെ വീടിനു സമീപത്തുകൂടി ഒഴുകിയിരുന്ന ചെറുതോടുകള്‍ പലതും നികത്തി, സമീപത്തെ പുരയിടങ്ങളുടെ മതില്‍ക്കെട്ടിനുള്ളിലായി. ആദ്യകാലങ്ങളില്‍ എത്രശക്തമായ മഴയുണ്ടായാലും കുട്ടനാട്ടിലെ പുരയിടങ്ങളില്‍ വെള്ളം കെട്ടിക്കിടന്നിരുന്നില്ല. അതിനാല്‍ ജനങ്ങളും ഹാപ്പി. എന്നാല്‍, കാലം മാറിയതോടെ കാര്യങ്ങള്‍ കീഴ്്‌മേല്‍ മറിഞ്ഞു. തോടുകള്‍ കരഭൂമിയായതോടെ പുരയിടങ്ങളും മലകള്‍ക്കിടയിലെ നാട്ടുവഴികളും മാസങ്ങളോളം സ്ഥിരം വെള്ളക്കെട്ടിലായി. റോഡ് ഗതാഗതത്തിന്‍റെ ഭാഗമായി നിര്‍മിക്കുന്ന ഉയരവും വീതിയും കുറഞ്ഞ കലുങ്കുകളും കുട്ടനാടിന്‍റെ പരിസ്ഥിതിക്കു ദോഷകരമായി. വാഹനഗതാഗതത്തിനു മാത്രമല്ല, നീരൊഴുക്കിനും ഇവ തടസമായി. തോടുകളില്‍ നിറഞ്ഞുവളരുന്ന പോളയും കടകലും തോടുകളുടെ നാശത്തിനു വഴിയൊരുക്കുന്നു. പണ്ട് ജലഗതാഗതത്തിനു ഉപയോഗിച്ചിരുന്ന പല തോടുകളും വര്‍ഷങ്ങളായി പോളയും കടകലും നിറഞ്ഞുകിടക്കുകയാണ്. നീരൊഴുക്കു തടസപ്പെട്ടതോടെ ചെറിയ പ്രളയത്തില്‍ പോലും കോടികള്‍ മുടക്കി ഉയര്‍ത്തിനിര്‍മിച്ച റോഡുകള്‍ പോലും വെള്ളത്തിനടിയിലായി. വെള്ളംകൊണ്ടു പൊറുതിമുട്ടുമ്പോഴും കുടിക്കാനൊരു തുള്ളി ശുദ്ധജലം കിട്ടാനില്ലാത്തത് കുട്ടനാട്ടുകാരെ വിഷമിപ്പിക്കുന്നു. പണ്ടുകാലത്തു പൊതുജലാശയങ്ങളിലെ വെള്ളം കുടിച്ച് ആരോഗ്യവാന്‍മാരായിരുന്ന ഭൂരിഭാഗം കുട്ടനാട്ടുകാരും ഇന്നു കുടിവെള്ളം വിലയ്്കു വാങ്ങി ഉപയോഗിക്കേണ്ട ഗതികേടിലെത്തി. റോഡ് സൗകര്യമില്ലാത്ത പ്രദേശങ്ങളില്‍ കഴിയുന്ന കുടുംബങ്ങളാകട്ടെ പഴയതുപോലെ ഇന്നും മലിനജലം കുടിച്ചു രോഗികളായി മാറുന്നു. കുടിവെള്ളം, ആശുപത്രി സൗകര്യങ്ങള്‍ എന്നിവയുടെ അഭാവം, അടിക്കടിയുണ്ടാകുന്ന വലിയ വെള്ളപ്പൊക്കങ്ങള്‍ ഇവയെല്ലാം കുട്ടനാട്ടുകാരെ പലായനം ചെയ്യാന്‍ പ്രേരിപ്പിക്കുന്നു. കഴിഞ്ഞ ഏതാനും വര്‍ഷങ്ങള്‍ക്കിടയില്‍ ആയിരക്കണക്കിനു കുടുംബങ്ങളാണ് സമീപ ജില്ലകളിലേക്കടക്കം കുടിയേറിയത്. ആളൊഴിഞ്ഞ പുരയിടങ്ങള്‍ വര്‍ധിച്ചതോടെ വിഷപ്പാമ്പുകള്‍ക്കു താവളങ്ങളേറി. കുട്ടനാട്ടിലിന്നു ഏറ്റവുമധികമായി കാണപ്പെടുന്ന ജീവികളിലൊന്നാണ് കീരി. ഇവയും കുട്ടനാടിന്‍റെ പരിസ്ഥിതിക്കു ദോഷകരമാകുന്നുണ്ട്. കുട്ടനാട്ടില്‍ ഏറെ കണ്ടുവന്നിരുന്ന ഒരു ജീവിയാണ് ആമകള്‍. ഇവ വംശനാശ ഭീഷണി നേരിടുകയാണ്. കരയിലാണ് ആമകള്‍ മുട്ടയിടുന്നത്. കീരികള്‍ ഇവ തേടിപ്പിടിച്ചു ഭക്ഷണമാക്കുന്നത് ആമകളുടെ വംശവര്‍ധനവിനു ഭീഷിയാകുന്നുണ്ട്. കര്‍ഷകന്‍റെ മിത്രമായ തവളയടക്കമുള്ള പല ജീവികളെയും ഇവ ഭക്ഷണമാക്കുന്നു. പണ്ടുകാലത്തു സുലഭമായിരുന്ന പല മത്സ്യങ്ങളും ഇന്നു കുട്ടനാട്ടില്‍നിന്ന് അപ്രത്യക്ഷമായിക്കഴിഞ്ഞു. ജലമലിനീകരണവും ഓരുവെള്ളത്തിന്‍റെ അഭാവവും മൂലം പ്രജനനത്തിനുണ്ടാകുന്ന പ്രതികൂല സാഹചര്യങ്ങളുമാണ് ഇതിനു കാരണമാകുന്നതെന്നാണ് വിദഗ്ധ പഠനങ്ങള്‍ വ്യക്തമാക്കുന്നത്.

രാസലഹരിയുമായി യുവാവ് പിടിയിൽ

അമ്പലപ്പുഴ: രാസലഹരിയുമായി യുവാവ് പിടിയിൽ. അമ്പലപ്പുഴ തെക്ക് പഞ്ചായത്ത് 15-ാം വാർഡിൽ ഗണപതിവട്ടം കോമനയിൽ സുനിതാ മൻസിലിൽ റിയാസി(21)നെയാണ് ആലപ്പുഴ ജില്ലാ ലഹരിവിരുദ്ധ സ്ക്വാഡും അമ്പലപ്പുഴ പോലീസും ചേർന്ന് ആറു ഗ്രാം രാസലഹരിയിനത്തിൽപ്പെട്ട ആംഫിറ്റാമിനുമായി പിടികൂടിയത്. ഓപ്പറേഷൻ ഡി ഹണ്ടിന്‍റെ ഭാഗമായി അമ്പലപ്പുഴ റെയിൽവേ സ്റ്റേഷൻ, തോട്ടപ്പള്ളി, വ്യാസ ജംഗ്ഷൻ, വളഞ്ഞവഴി തീരദേശ പ്രദേശങ്ങൾ എന്നിവ കേന്ദ്രീകരിച്ച് നടത്തിയ പട്രോളിംഗിനിടെ അമ്പലപ്പുഴ തീരദേശ റോഡിൽ ഗണപതിവട്ടത്തിനടുത്ത് നടത്തിയ പരിശോധനയിലാണ് റിയാസിനെ പിടികൂടിയത്. നർക്കോട്ടിക് സെൽ ഡെപ്യൂട്ടി പോലീസ് സൂപ്രണ്ടന്‍റ് ബി. പങ്കജാക്ഷന്‍റെ നേതൃത്വത്തിലുള്ള ജില്ലാ ലഹരി വിരുദ്ധ സ്ക്വാഡും അമ്പലപ്പുഴ ഡെപ്യൂട്ടി പോലീസ് സൂപ്രണ്ടന്‍റ് കെ.എൻ. രാജേഷിന്‍റെ നേതൃത്വത്തിൽ അമ്പലപ്പുഴ പോലീസ് സ്റ്റേഷൻ സബ് ഇൻസ്പെക്ടർ അനീഷ് കെ. ദാസ്, പ്രൊബേഷൻ സബ് ഇൻസ്പെക്ടർ നിധിൻ, ഗ്രേഡ് എസ്ഐ പ്രിൻസ് സൽപുത്രൻ, സീനിയർ സിവിൽ പോലീസ് ഓഫീസർ സുജിമോൻ, സിവിൽ പോലീസ് ഓഫീസർമാരായ വിജിത്ത്, മിഥുൻ, ഹാരിസൺ, വിഷ്ണു എന്നിവരടങ്ങുന്ന സംഘമാണ് പ്രതിയെ പിടികൂടിയത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

മെഡിക്കല്‍ കോളജില്‍ അമ്പതു തസ്തികകള്‍ അനുവദിച്ചു

അമ്പലപ്പുഴ: ആലപ്പുഴ വണ്ടാനം മെഡിക്കല്‍ കോളജ് ആശുപത്രിയില്‍ നഴ്‌സുമാരുടെയും ടെക്‌നീഷന്‍മാരുടേതുമുള്‍പ്പെടെ 50 തസ്തികകള്‍ സര്‍ക്കാര്‍ അനുവദിച്ചതായി എച്ച്. സലാം എംഎല്‍എ അറിയിച്ചു. ബയോമെഡിക്കല്‍ എന്‍ജിനിയര്‍-(1), അനസ്‌തേഷ്യ ടെക്‌നീഷന്‍-(2), ഗ്രേഡ് 2 ഫാര്‍മസിസ്റ്റ് -(1), ഡയാലിസിസ് ടെക്‌നീഷന്‍-(2), കാത്ത് ലാബ് ടെക്‌നീഷന്‍-(1), ഇഇജി ടെക്‌നീഷന്‍-(1), സ്റ്റാഫ് നഴ്‌സ്-(42) ഉള്‍പ്പെടെ 50 പോസ്റ്റുകളാണ് അനുവദിച്ച് ഉത്തരവായത്. 1964 ലെ സ്റ്റാഫ് പാറ്റേണ്‍ അനുസരിച്ചാണ് നിലവില്‍ ആശുപത്രികളുടെ പ്രവര്‍ത്തനം. എന്നാല്‍, നിത്യേന ആശുപത്രിയില്‍ എത്തുന്നവരുടെ വര്‍ധന പലപ്പോഴും പ്രതിസന്ധി സൃഷ്ടിച്ചിരുന്നു. ടെക്‌നീഷന്‍മാര്‍ ഉള്‍പ്പെടെ ഉള്ളവരുടെ കുറവും പ്രയാസം സൃഷിച്ചു. ആര്‍എസ്ബിവൈ വഴിയും എന്‍എച്ച്എം വഴിയും നഴ്‌സുമാരെയും ജീവനക്കാരെയും നിയമിച്ചുകൊണ്ടാണ് ആശുപത്രിയുടെ പ്രവര്‍ത്തനങ്ങള്‍ മുന്നോട്ട് കൊണ്ടുപോയത്. ആലപ്പുഴയില്‍നിന്ന് വണ്ടാനത്തേക്കു മാറ്റി പ്രവര്‍ത്തിച്ച മെഡിക്കല്‍ കോളജിന്‍റെ ആരംഭഘട്ടത്തില്‍ 1500 രോഗികള്‍ വരെയാണ് നിത്യേന എത്തിയിരുന്നതെങ്കില്‍, ഇപ്പോള്‍ 2500 മുതല്‍ 3200 പേര്‍ വരെയാണ് ചികിത്സതേടി എത്തുന്നത്. സൂപ്പര്‍ സ്‌പെഷാലിറ്റിയുടെ പ്രവര്‍ത്തനം കൂടി ആരംഭിച്ചതോടെയാണ് ക്രമാതീതമായ വര്‍ധനവുണ്ടായത്. സൂപ്പര്‍ സ്‌പെഷാലിറ്റി ബ്ലോക്കിന്‍റെ ഉദ്ഘാടന വേളയില്‍ കൂടുതല്‍ ഡോക്ടര്‍മാരെയും ജീവനക്കാരെയും നിയമിക്കുമെന്ന് മുഖ്യമന്ത്രി തന്നെ ജനങ്ങള്‍ക്ക് ഉറപ്പുനല്‍കിയിരുന്നു. ഇതിന്‍റെ അടിസ്ഥാനത്തില്‍ എട്ടു ഡോക്ടര്‍മാരുടെ പോസ്റ്റ് അനുവദിക്കുകയും പ്ലാസ്റ്റിക് സര്‍ജറി വിഭാഗം പുതിയതായി ആരംഭിക്കുകയും ചെയ്തു. ഇതിനു പിന്നാലെയാണ് ഇപ്പോള്‍ 50 പോസ്റ്റുകള്‍ കൂടി സര്‍ക്കാര്‍ അനുവദിച്ച് ഉത്തരവായത്.

കൊല്ലം-തേനി ദേശീയപാതയോരം കാടുകയറി

ചാരുംമൂട്: തിരക്കേറിയ കൊല്ലം-തേനി ദേശീയപാതയുടെ ഇരുവശവും കാടുകയറി. ഇതുമൂലം കാല്‍ നടയാത്രക്കാര്‍ പാതയോരത്തുനിന്നു റോഡില്‍ കയറി സഞ്ചരിക്കേണ്ടിവരുന്നതിനാല്‍ അപകടസാധ്യതയും ഏറി. ദേശീയപാതയ്ക്കു മതിയായ വീതിയില്ലാത്തതും വലിയ പ്രശ്‌നമാണ്. കൊല്ലം -തേനി ദേശീയപാത 24 മീറ്റര്‍ വീതിയില്‍ നാലുവരി പാതയാക്കാനുള്ള പദ്ധതിക്ക് അന്തിമ അംഗീകാരം ലഭിച്ചിട്ട് മാസങ്ങളായി. ദേശീയപാതയുടെ വശങ്ങള്‍ കാടുപിടിച്ചതുമൂലം ഇഴജന്തുക്കളുടെ താവളമായി ഇവിടം മാറി. ചാരുംമൂട് മുതല്‍ വെട്ടിയാര്‍ പള്ളിമുക്ക് വരെയുള്ള ആറു കിലോമീറ്റര്‍ ദൂരത്തില്‍ വലിയ പുല്ലുകളും വള്ളിപ്പടര്‍പ്പുകളും വളര്‍ന്ന് പാതയോരം കാടുപിടിച്ചിരിക്കുകയാണ്. നുറുകണക്കിന് വാഹനങ്ങളാണ് ദിനം പ്രതി സഞ്ചരിക്കുന്നത്. റോഡ് കാടുകയറിയതിനാല്‍ രണ്ടു വാഹനങ്ങള്‍ എതിര്‍ദിശയില്‍നിന്ന് വന്നാല്‍ പോലും കുട്ടികള്‍ ഉള്‍പ്പെടെയുള്ളവര്‍ക്ക് വശത്തേക്ക് മാറി നില്‍ക്കാന്‍ പോലും കഴിയാത്ത സ്ഥിതിയാണ്. ചുനക്കര സാമൂഹിക ആരോഗ്യകേന്ദ്രത്തിന് വടക്കുവശത്തു ള്ള റോഡില്‍ കുറ്റിച്ചെടികള്‍ കാടുപിടിച്ച് കിടക്കുകയാണ്. റോഡിന് വശങ്ങള്‍ കുറവായതിനാല്‍ സൈക്കിള്‍ യാത്രക്കാരും കാല്‍നടയാത്രക്കാരും അപകടത്തില്‍പ്പെടുന്നതും പതിവാണ്. അപകടവളവുകളുടെ സമീപവും ഇത്തരത്തില്‍ കാടുവളര്‍ന്ന് നില്‍ക്കുകയാണ്. അടിയന്തരമായി നീക്കം ചെയ്യണമെന്നാണ് ആവശ്യം.

3x3 ബാസ്‌കറ്റ്‌ബോള്‍: അശ്വിനും ടെസയും നയിക്കും

ആലപ്പുഴ: ആദ്യത്തെ അണ്ടര്‍ ട്വന്‍റി ത്രീ (യു-23) 3x3 സ്റ്റേറ്റ് ബാസ്‌കറ്റ്ബോള്‍ ചാമ്പ്യന്‍ഷിപ്പില്‍ മത്സരിക്കുന്ന ആലപ്പുഴ ജില്ലാ ടീമുകളെ അശ്വിനും ടെസ ഹര്‍ഷനും നയിക്കും. 8ന് കൊച്ചി കടവന്ത്ര റീജണല്‍ സ്പോര്‍ട്സ് സെന്‍ററിലാണ് മത്സരം. ആലപ്പി ഡിസ്ട്രിക്ട് ബാസ്‌കറ്റ്ബോള്‍ അസോസിയേഷനാണ് (എഡിബിഎ) ടീമുകളെ തെരഞ്ഞെടുത്തത്. മറ്റ് ടീം അംഗങ്ങള്‍: പുരുഷന്മാര്‍: ആല്‍ഫി, ജോസഫ്, ദേവസി. സ്റ്റാന്‍ഡ് ബൈ: ആല്‍ബിന്‍, നിരഞ്ജന്‍. വനിതകള്‍: സുഭദ്ര ജയകുമാര്‍, ഗംഗാ രാജഗോപാല്‍, തേജസ് തോബിയാസ്. സ്റ്റാന്‍ഡ് ബൈ: സ്വപ്ന, ശിവാനി. ടീമുകള്‍ക്കുള്ള ജേഴ്സി വിതരണം ആറിന് രാവിലെ 8.30ന് മെഡിവിഷന്‍ മാനേജിംഗ് ഡയറക്ടര്‍ ബിബു ബി. പുന്നൂരാന്‍ നിര്‍വഹിക്കും. പ്രസിഡന്‍റ് റോണി മാത്യു അധ്യക്ഷത വഹിക്കും. രോഗനിര്‍ണയ സേവനങ്ങള്‍ നല്‍കുന്ന മെഡിവിഷന്‍, ടീമുകളെ സ്‌പോണ്‍സര്‍ ചെയ്യും.

ചേര്‍ത്തല സെന്‍റ് മൈക്കിള്‍സ് കോളജിന് വീണ്ടും റാങ്കിന്‍റെ തിളക്കം

ചേര്‍ത്തല: കേരള യൂണിവേഴ്സിറ്റിയുടെ ഡിഗ്രി ഫലപ്രഖ്യാപനത്തില്‍ ചേര്‍ത്തല സെന്‍റ് മൈക്കിള്‍സ് കോളജിന് തുടര്‍ച്ചയായി നേട്ടം. ബിവോക് ടൂറിസം ആൻഡ് ഹോസ്പിറ്റാലിറ്റി മാനേജ്‌മെന്‍റില്‍ ആദ്യ മൂന്നുറാങ്കുകള്‍ ചേര്‍ത്തല സെന്‍റ് മൈക്കിള്‍സ് കോളജിലെ വിദ്യാര്‍ഥികള്‍ക്കാണ്. കോളജിലെ ബി. ആദിത്യന്‍ ഒന്നാം റാങ്കും പി.എ. അര്‍ജുന്‍ രണ്ടാം റാങ്കും എയ്ഞ്ചല്‍ ജോസഫ് മൂന്നാം റാങ്കും കരസ്ഥമാക്കി. കഴിഞ്ഞദിവസം പ്രസിദ്ധീകരിച്ച ഫലപ്രഖ്യാപനത്തില്‍ ബിവോക് സോഫ്റ്റ് വെയര്‍, ബിബിഎ ലോജിസ്റ്റിക്സ്, ബിഎസ്‌സി ഫിസിക്സ് എന്നീ വിഷയങ്ങളില്‍ കോളജിലെ വിദ്യാര്‍ഥികളായ പി.എസ്. അലന്‍, എന്‍.പി. നന്ദന, ജെ.എല്‍. കരിഷ്മ, കെ.ആര്‍. ഭാഗ്യലക്ഷ്മി എന്നിവരും കേരള യൂണിവേഴ്സിറ്റിയുടെ റാങ്കുപട്ടികയില്‍ സ്ഥാനം പിടിച്ചിരുന്നു. വിദ്യാര്‍ഥികള്‍ക്ക് നല്‍കുന്ന ചിട്ടയായ പരിശീലനവും അധ്യാപകരുടെ അര്‍പ്പണമനോഭാവവുമാണ് കോളജിന് തുടര്‍ച്ചയായി നേട്ടം കൈവരിക്കാനായതെന്ന് അധികൃതര്‍ പറഞ്ഞു. മികച്ച നേട്ടം കൈവരിച്ച വിദ്യാര്‍ഥികളെ കോളജ് അധികൃതര്‍ അനുമോദിച്ചു.

ദേശീയപാതയിൽ ലോറിയിടിച്ച് ബൈക്ക് യാത്രികന് ദാരുണാന്ത്യം

തുറവൂർ: ഉയരപ്പാത നിർമാണം നടക്കുന്ന ദേശീയപാതയിൽ വീണ്ടും അപകടം. ടോറസിടിച്ച് പട്ടണക്കാട് കൈതപ്പറമ്പ് അയ്യപ്പന്‍റെ മകൻ രാധാകൃഷ്ണൻ (40) ആണ് മരിച്ചത്. ഇന്നലെ വൈകുന്നേരം മൂന്നിന് കുത്തിയതോട് തെക്ക് പാട്ടുകുളങ്ങരയിലായിരുന്നു അപകടം. ഇലക്ട്രിക് ജോലികൾ കരാറെടുത്തു ചെയ്തു കൊടുക്കുന്ന രാധാകൃഷ്ണൻ വർക്ക് സൈറ്റിലേക്കു പോകുംവഴിയാണ് അപകടമുണ്ടാകുന്നത്. ഇയാളുടെ ബൈക്കിൽ തമിഴ്നാട് രജിസ്ട്രേഷനിലുള്ള ടോറസ് ഇടിച്ചു വീഴ്ത്തുകയായിരുന്നു. മൃതദേഹം അരൂക്കുറ്റി ഗവ. ആശുപത്രി മോർച്ചറിയിൽ. കുത്തിയതോട് പോലീസ് സ്ഥലത്തെത്തി തുടർനടപടികൾ സ്വീകരിച്ചു. ഭാര്യ: ആതിര. മകൾ: കൃഷ്ണ തീർഥ.

ശുദ്ധമായ കുടിവെള്ളം ഉറപ്പാക്കുക സര്‍ക്കാര്‍ ലക്ഷ്യം: മന്ത്രി റോഷി അഗസ്റ്റിന്‍

ആലപ്പുഴ: എല്ലാവര്‍ക്കും ശുദ്ധമായ കുടിവെള്ളം ലഭ്യമാക്കുക എന്നതാണ് സര്‍ക്കാരിന്‍റെ ലക്ഷ്യമെന്ന് മന്ത്രി റോഷി അഗസ്റ്റിന്‍. വളവനാട് കുടുംബാരോഗ്യ കേന്ദ്രത്തിനു സമീപം നടന്ന ചടങ്ങില്‍ മണ്ണഞ്ചേരി പഞ്ചായത്തിലെ ഉന്നതതല ജലസംഭരണിയുടെ നിര്‍മാണോദ്ഘാടനം നിര്‍വഹിച്ച് സംസാരിക്കുകയായിരുന്നു അദ്ദേഹം. ശുദ്ധജലസ്രോതസുകള്‍ ഏറ്റവും കുറവുള്ള പ്രദേശങ്ങളാണ് ആലപ്പുഴയിലേത്. മണ്ണഞ്ചേരി പഞ്ചായത്തില്‍ ജലവിഭവ വകുപ്പിന്‍റെ പുതിയ പദ്ധതി പൂര്‍ത്തിയാകുന്നതോടെ പ്രദേശത്തെ കുടിവെള്ളക്ഷാമത്തിനു പരിഹാരം കാണാന്‍ കഴിയുമെന്നും പദ്ധതി എത്രയും വേഗം പൂര്‍ത്തിയാക്കുമെന്നും അദ്ദേഹം പറഞ്ഞു. എല്ലായിടത്തും കുടിവെള്ള കണക്ഷനുകള്‍ സ്ഥാപിക്കുന്നതിനൊപ്പം അതിന്‍റെ നിര്‍മാണ ഘട്ടങ്ങളില്‍ റോഡുകള്‍ക്ക് ഉള്‍പ്പെടെ സംഭവിക്കുന്ന തകരാറുകള്‍ പരിഹരിക്കാനുള്ള തുക കൂടി വകയിരുത്തിയാണ് ഓരോ പദ്ധതിയും സര്‍ക്കാര്‍ നടപ്പാക്കുന്നതെന്നും മന്ത്രി പറഞ്ഞു. പരിപാടിയില്‍ പി.പി. ചിത്തരഞ്ജന്‍ എംഎല്‍എ അധ്യക്ഷനായി. കുടിവെള്ളം ഓരോ ജനതയുടെയും മൗലികാവകാശമാണെന്ന് കണ്ട് ഇത്തരം പദ്ധതികള്‍ക്ക് വലിയ പ്രാധാന്യമാണ് സര്‍ക്കാര്‍ നല്‍കുന്നതെന്ന് എംഎല്‍എ പറഞ്ഞു. ഉന്നതതല ജലസംഭരണിയുടെ നിര്‍മാണം പൂര്‍ത്തിയാകുന്നതോടെ മണ്ണഞ്ചേരി നിവാസികള്‍ക്ക് ഏറ്റവും മികച്ച കുടിവെള്ളം തന്നെ ലഭ്യമാകുമെന്നും എംഎല്‍എ പറഞ്ഞു. മണ്ണഞ്ചേരി പഞ്ചായത്തിലെ ജലവിതരണത്തിന്‍റെ നവീകരണ പ്രവര്‍ത്തനങ്ങള്‍ നടപ്പാക്കുന്നതിനായി വളവനാട് കുടുംബാരോഗ്യകേന്ദ്രത്തിന് സമീപം 12 ലക്ഷം ലിറ്റര്‍ ശേഷിയുള്ള ഉന്നതതല ജലസംഭരണി, മൂന്നു ലക്ഷം ലിറ്റര്‍ ശേഷിയുള്ള ഭൂതല സംഭരണി, പഞ്ചായത്തില്‍ 105 കിലോ മീറ്റര്‍ വിതരണ ശൃംഖല എന്നിവ സ്ഥാപിക്കുന്നതിനും റോഡ് പുനര്‍നിര്‍മാണ പ്രവൃത്തികള്‍ക്കുമായി കിഫ്ബി പദ്ധതി വഴി 49.32 കോടി രൂപയാണ് അനുവദിച്ചിരിക്കുന്നത്. ഊരാളുങ്കല്‍ ലേബര്‍ കോണ്‍ട്രാക്ട് സൊസൈറ്റിക്കാണ് നിര്‍മാണച്ചുമതല. 2026 മാര്‍ച്ച് മാസത്തോടുകൂടി പ്രവൃത്തി പൂര്‍ത്തിയാക്കാനാണ് ലക്ഷ്യം. ചടങ്ങില്‍ ആര്യാട് ബ്ലോക്ക് പഞ്ചായത്ത് പ്രസിഡന്‍റ് കെ.ഡി. മഹീന്ദ്രന്‍, മണ്ണഞ്ചേരി പഞ്ചായത്ത് പ്രസിഡന്‍റ് റ്റി.വി. അജിത് കുമാര്‍ തുടങ്ങിയവര്‍ പങ്കെടുത്തു.

സ്വര്‍ണാഭരണങ്ങള്‍ക്ക് എച്ച്‌യുഐഡി സമയം നീട്ടണം: എകെജിഎസ്എംഎ

ആലപ്പുഴ: സ്വര്‍ണാഭരണത്തില്‍ രണ്ടുമാസത്തിനുള്ളില്‍ ഹാള്‍മാര്‍ക്ക് യൂണിക്ക് ഐഡന്‍റിഫിക്കേഷന്‍ നിര്‍ബന്ധമാക്കിയ ബിഐഎസ് നടപടി വ്യാപാര മേഖലയില്‍ പ്രതിസന്ധി സൃഷ്ടിക്കുമെന്ന് ഓള്‍ കേരള ഗോള്‍ഡ് ആൻഡ് സില്‍വര്‍ മര്‍ച്ചന്‍റ്സ് അസോസിയേഷന്‍. ഇക്കാര്യത്തില്‍ ഒരുവര്‍ഷത്തെ കാലാവധി അനുവദിക്കണമെന്ന് അസോസിയേഷന്‍ സംസ്ഥാന ചെയര്‍മാന്‍ ഡോ. ബി. ഗോവിന്ദന്‍, പ്രസിഡന്‍് ജസ്റ്റിന്‍ പാലത്ര, ജനറല്‍ സെക്രട്ടറി കെ.എ. ജലീല്‍, ട്രഷറര്‍ ബിന്ദു മാധവ് എന്നിവര്‍ ആവശ്യപ്പെട്ടു. നിയമം നടപ്പിലാക്കുന്നതിന് മുമ്പ് വ്യാപാരികള്‍ക്ക് അവബോധം നല്‍കുന്നതിനായി എല്ലാ ജില്ലകളിലും ബിഐഎസുമായി സഹകരിച്ച് എകെജിഎസ്എംഎയുടെ നേതൃത്വത്തില്‍ ക്യാമ്പുകള്‍ സംഘടിപ്പിക്കുമെന്നും ഭാരവാഹികള്‍ അറിയിച്ചു.

ബോധവത്കരണ ക്ലാസ് സംഘടിപ്പിച്ചു

ചേര്‍ത്തല: അർത്തുങ്കൽ സെന്‍റ് ഫ്രാൻസിസ് അസീസി ഹൈസ്കൂളിലെ എന്‍എസ്എസ് യൂണിറ്റിന്‍റെ ഈ വര്‍ഷത്തെ പ്രവർത്തനങ്ങളുടെ ഉദ്ഘാടനം സ്കൂൾ മാനേജർ റവ. ഡോ. യേശുദാസ് കാട്ടുങ്കല്‍തയ്യിൽ നിര്‍വഹിച്ചു. പ്രിൻസിപ്പൽ കെ.ജെ. നിക്സൻ അധ്യക്ഷത വഹിച്ചു. തുടര്‍ന്നു നടന്ന നിയമ ബോധവത്കരണ ക്ലാസിന് ലീഗൽ സർവീസ് സെൽ റിസോഴ്സ് പേഴ്സൺ അഡ്വ.കെ.ആർ. അജിത് കുമാർ നേതൃത്വം നല്കി. വാർഡ് കൗൺസിലർ മേരി ഗ്രേസ് സെബാസ്റ്റ്യൻ, പിഎൽവി ടിൻസിമോൾ ജോസി, എൻഎസ്എസ് പ്രോഗ്രാം ഓഫീസർ അജു പി. ബഞ്ചമിൻ, അനിമോൾ ലെവി, അദിൻ റാഫെൽ, റോഡിയ എന്നിവർ പ്രസംഗിച്ചു.

കെഇ കാര്‍മല്‍ സിഎംഐ സ്‌കൂളില്‍ പരിസ്ഥിതിദിനം ആഘോഷിച്ചു

ആലപ്പുഴ: ചേര്‍ത്തല കെഇ കാര്‍മല്‍ സിഎംഐ സ്‌കൂളില്‍ പരിസ്ഥിതി ദിനം ആഘോഷിച്ചു. സ്‌കൂള്‍ ഓഡിറ്റോറിയത്തില്‍ നടന്ന ചടങ്ങ് ഗായകന്‍ അരുണ്‍ ഗിന്നസ് ഉദ്ഘാടനം ചെയ്തു. ആഘോഷത്തിന്‍റെ ഭാഗമായി അരുണ്‍ ഗിന്നസ,് സ്‌കൂള്‍ പ്രിന്‍സിപ്പല്‍ റവ.ഡോ. സാംജി വടക്കേടം സിഎംഐ, മാനേജര്‍ ഫാ. പോള്‍ തുണ്ടുപറമ്പില്‍ സിഎംഐ, സ്‌കൂള്‍ ബര്‍സര്‍ സനു വലിയവീട്, കെജി ഹെഡ്മിസ്ട്രസ് രൂപ ജയന്‍, കോ-ഓര്‍ഡിനേറ്റര്‍ ചിത്രനാഥ്, രക്ഷകര്‍ത്താക്കളുടെ പ്രതിനിധികള്‍ എന്നിവര്‍ ചേര്‍ന്ന് വൃക്ഷത്തൈ നട്ടു. വിദ്യാര്‍ഥികളുടെ കലാപരിപാടികളും ചടങ്ങില്‍ നടന്നു.

വിദ്യാർഥികൾക്ക് ആറു മുതൽ വൈകിട്ട് ഏഴുവരെ കൺസഷൻ

കായംകുളം: വിദ്യാർഥികൾക്ക് രാവിലെ ആറുമുതൽ വൈകിട്ട് ഏഴുവരെ യാത്രാ കണ്‍സഷന്‍ നൽകാൻ തീരുമാനം. വിദ്യാർഥികളുടെ യാത്രാ കൺസഷനുമായി ബന്ധപ്പെട്ട് കളക്‌ടറേറ്റ് കോൺഫറൻസ് ഹാളിൽ ചേർന്ന് സ്റ്റുഡന്‍സ് ട്രാവല്‍ ഫെസിലിറ്റി കമ്മിറ്റി യോഗത്തിലാണ് തീരുമാനം. എൽകെജി മുതൽ പ്ലസ്ടു വരെയുള്ള വിദ്യാർഥികൾക്ക് യൂണിഫോമിന്‍റെയോ ഐഡി കാർഡിന്‍റെയോ അടിസ്ഥാനത്തിൽ കൺസഷൻ യാത്ര ചെയ്യാം. യൂണിവേഴ്സിറ്റിയുടെ കീഴിലുള്ള സ്ഥാപനങ്ങൾ, ടെക്നിക്കൽ എജ്യുക്കേഷൻ ബോർഡ്, കേന്ദ്ര-സംസ്ഥാന സർക്കാരുകളുടെ കീഴിലുള്ള വിദ്യാഭ്യാസ സ്ഥാപനങ്ങൾ എന്നിവിടങ്ങളിലെ വിദ്യാർഥികൾക്ക് തങ്ങളുടെ മേൽവിലാസം, ജനനതീയതി, ഫോട്ടോ അടക്കം രേഖപ്പെടുത്തിയിട്ടുള്ള സ്ഥാപനത്തിന്‍റെ ഐഡി കാർഡ് ഉപയോഗിച്ച് യാത്ര ചെയ്യാം. മറ്റു സ്ഥാപനങ്ങളിലെ വിദ്യാർഥികൾക്ക് മോട്ടോർ വാഹനവകുപ്പ് തരുന്ന കൺസഷൻ കാർഡ് ഉപയോഗിച്ച് യാത്ര ചെയ്യാവുന്നതാണ്. ഈ സ്ഥാപനങ്ങളുടെ മേധാവിയോ, മേധാവി ചുമതലപ്പെടുത്തുന്ന ഉദ്യോഗസ്ഥനോ കൺസഷൻ കാർഡിനായി സ്ഥാപനം സ്ഥിതി ചെയ്യുന്ന താലൂക്കിലെ മോട്ടോർ വാഹന വകുപ്പിന്‍റെ ഓഫീസിനെ വിദ്യാർഥികളുടെ ലിസ്റ്റുമായി സമീപിക്കേണ്ടതാണ് എന്ന് ആർടിഒ എ.കെ. ദിലു പറഞ്ഞു. ഒരു വിദ്യാർഥിക്ക് ഒരു വശത്തേക്ക് യാത്ര ചെയ്യാവുന്ന പരമാവധി ദൂരം 40 കിലോ മീറ്ററാണ്. മിനിമം ചാർജ് ഒരു രൂപയും പരാമവധി ചാർജ് ആറു രൂപയുമാണ്. കൺസഷൻ ലഭിക്കുന്നതിനുള്ള പ്രായപരിധി 27 വയസാണ് എന്നും ആർടിഒ അറിയിച്ചു. ഡെപ്യൂട്ടി കളക്ടർ (ദുരന്ത നിവാരണം) സി പ്രേംജി, റീജണൽ ട്രാൻസ്പോർട്ട് ഓഫീസർ എ. കെ. ദിലു, ട്രാഫിക് പോലീസ് സ്റ്റേഷൻ ഇൻസ്പെകടർ മണികുട്ടൻ, ആര്‍ടിഒ, റവന്യു ഉദ്യോഗസ്ഥര്‍, വിദ്യാര്‍ഥി സംഘടന, ബസുടമകള്‍, പാരലല്‍ കോളജ് അസോസിയേഷന്‍ തുടങ്ങിയവരുടെ പ്രതിനിധികളും യോഗത്തിൽ പങ്കെടുത്തു.

മെഡി. കോളജിനു നാലു ഹൈമാസ്റ്റ് ലൈറ്റുകള്‍ അനുവദിച്ചു

ആലപ്പുഴ: വണ്ടാനം മെഡിക്കല്‍ കോളജിന് എംപി ഫണ്ടില്‍ ഉള്‍പ്പെടുത്തി നാലു ഹൈമാസ്റ്റ് ലൈറ്റുകള്‍ക്ക് 20 ലക്ഷം രൂപ കെ.സി. വേണുഗോപാല്‍ എംപി അനുവദിച്ചു. ടഡിഎംസി നല്‍കിയ നിവേദനം പരിഗണിച്ചാണ് നടപടി. രണ്ടു ലൈറ്റുകള്‍ കോളജ് കാമ്പസിലും രണ്ടെണ്ണം ആശുപത്രി കോമ്പൗണ്ടിലുമാണ് സ്ഥാപിക്കുക. പൊതുമേഖലാ സ്ഥാപനമായ കെല്ലിനാണ് നിര്‍മാണച്ചുമതല.

അന്ധകാരനഴി പൊഴിമുറിച്ചു, തീരത്തിന് ആശ്വാസം

തുറവൂർ: രണ്ടു ദിവസം നീണ്ടുനിന്ന പരിശ്രമത്തിനൊടുവിൽ അന്ധകാരനഴി അഴിമുഖം മുറിച്ച് വെള്ളക്കെട്ടിനു പരിഹാരമായി. ജില്ലാ കളക്ടറുടെ ഉത്തരവിനെത്തുടർന്ന് കഴിഞ്ഞ ആഴ്ചയാണ് പൊഴിമുറിക്കൽ ജോലി ആരംഭിച്ചത്. ഞായറാഴ്ച രാത്രി ഒമ്പതോടെ പൊഴിമുഖം മുറിക്കൽ പൂർത്തിയായി. ഇതോടെ കടലിലേക്ക് നല്ല നീരൊഴുക്ക് സാധ്യമായതായി അധികൃതർ പറഞ്ഞു. മൈനർ ഇറിഗേഷൻ, റവന്യുവകുപ്പു അധികൃതരുടെയും പട്ടണക്കാട് പഞ്ചായത്തിന്‍റെയും നേതൃത്വത്തിലാണ് പൊഴിമുറിക്കൽ നടത്തിയത്. നാല് ജെസിബി ഉപയോഗിച്ചാണ് അഴിമുഖത്തെ മണ്ണ് നീക്കം ചെയ്തത്. എന്നാൽ, ഇരുഭാഗത്തെയും നീക്കിയ മണ്ണ് ഇടിഞ്ഞുവീഴുന്നതും ശക്തമായ തിരമാലയും മൂലം അഴിമുഖം വീണ്ടും അടയുമോ എന്ന ആശങ്കയിലാണ് ജനം. പൊഴിമുറിഞ്ഞതോടെ ചേർത്തല താലൂക്കിന്‍റെ വടക്കൻ മേഖലയിലെ രൂക്ഷമായ വെള്ളക്കെട്ടിന് ചെറിയൊരു കുറവ് ഉണ്ടായിട്ടുണ്ട്. അന്ധകാരനഴി ഷട്ടർ തുറക്കുന്നതിനും അടയ്ക്കുന്നതിനും സംവിധാനം ഏർപ്പെടുത്തണം ത ുറവൂർ: അന്ധകാരനഴി വടക്കേ-തെക്ക് സ്പിൽവേയുടെ ഷട്ടറുകൾ അടിയന്തരമായി അടയ്ക്കുന്നതിനും തുറക്കുന്നതിനും സംവിധാനം ഏർപ്പെടുത്തണമെന്ന ആവശ്യം ശക്തമാകുന്നു. ചേർത്തല താലൂക്കിന്‍റെ വടക്കു-പടിഞ്ഞാറ് മേഖലകളിൽ ശക്തമായ വെള്ളപ്പൊക്കമാണ് അനുഭവപ്പെടുന്നത്. വെള്ളം കടലിലേക്ക് ഇറങ്ങുന്ന സമയങ്ങളിൽ ഷട്ടർ തുറക്കുകയും കടലിൽനിന്ന് വെള്ളം കയറുന്ന സമയങ്ങളിൽ ഷട്ടർ അടയ്ക്കുകയും ചെയ്യാനുള്ള സംവിധാനം ഏർപ്പെടുത്താതെ മുഴുവൻ സമയവും ഷട്ടറുകൾ തുറന്നുകിടക്കുന്നത് മേഖലയിലെ ജനജീവിതത്തെ ദുഃസ്സഹമാക്കിയിരിക്കുകയാണ്. താഴ്ന്ന പ്രദേശങ്ങളിൽനിന്ന് എപ്പോഴും വെള്ളമിറങ്ങി പോകാത്തതുമൂലം ഇവിടെ താമസിക്കുന്നവർ ബന്ധുവീടുകളിലേക്ക് താമസം മാറ്റിയിരിക്കുകയാണ്. വെള്ളക്കെട്ടിനു പരിഹാരം ഉണ്ടാകാത്തതുമൂലം ഇവർക്ക് സ്വന്തം ഭവനങ്ങളിലേക്ക് തിരികെ വരാൻ സാധിക്കാത്ത അവസ്ഥയാണ്. ഇഴജെന്തുക്കളുടെ ശല്യവും രൂക്ഷമായതോടെ പ്രദേശത്തെ ജനകീയ പ്രതിഷേധം ശക്തമാകുകയാണ്. നാട്ടുകാർ ജില്ലാ ഭരണകൂടവുമായി ബന്ധപ്പെട്ടപ്പോൾ ഹൈക്കേടതിയുടെ ഉത്തരവ് പ്രകാരമാണ് ഷട്ടറുകൾ പൂർണമായി തുറന്നിട്ടിരിക്കുന്നതെന്നാണ് പറയുന്നത്. എന്നാൽ, മത്സ്യ മാഫിയയുടെ സ്വാധീനത്തിനു വഴങ്ങിയാണ് മത്സ്യകൃഷിക്കുവേണ്ടി മാത്രം ഷട്ടറുകൾ പൂർണമായി തുറന്നിട്ടിരിക്കുന്നതെന്നും ഇത് പ്രദേശത്തെ കാർഷിക മേഖലയെ പൂർണമായും തകർക്കുകയാണെന്നും ആരോപണമുണ്ട്. പച്ചക്കറികൃഷിയും തെങ്ങ്, വാഴ, കമുങ്ങ് തുടങ്ങിയ മുഴുവൻ കൃഷികളും നാശത്തിന്‍റെ വക്കിലാണ്. ജില്ലാ ഭരണകൂടം കർഷകരുടെ ബുദ്ധിമുട്ടുകൾ മനസിലാക്കി അവർക്ക് സംരക്ഷണം നൽകുന്നില്ലെന്നും ആരോപണമുയർന്നു.

മങ്കൊമ്പ് സബ് ട്രഷറിയുടെ പ്രവർത്തനത്തിനു തടസം

മങ്കൊമ്പ്: വെള്ളപ്പൊക്കത്തെത്തുടർന്ന് മങ്കൊമ്പ് സബ് ട്രഷറിയുടെ പ്രവർത്തനം താത്കാലികമായി നിർത്തി. ഇവിടെയുള്ള സേവനം ഇനി ആലപ്പുഴ ജില്ലാ ട്രഷറി ഓഫീസിൽ ലഭിക്കും. സബ് ട്രഷറി കെട്ടിടത്തിൽ ഒന്നര അടിയോളം ജലനിരപ്പുയർന്നതിനാൽ ഓഫീസ് പ്രവർത്തിക്കാനാകാത്ത സ്ഥിതിവന്നു. പെൻഷൻകാർക്കും ബിൽ നൽകി ശമ്പളം വാങ്ങുന്നവർക്കുമാണ് ഏറെ ദുരിതം. ശമ്പളവും പെൻഷനും ഓൺലൈനായി അക്കൗണ്ടിലൂടെ ലഭിക്കുമെങ്കിലും ആ സൗകര്യമില്ലാത്തവരും പുതിയ ചെക്ക്‌ ബുക്ക്‌ വാങ്ങേണ്ടവരും ജില്ലാ ട്രഷറി ഓഫീസിലെത്തണം. ഇപ്പോൾ സബ് ട്രഷറി പ്രവർത്തിക്കുന്ന കെട്ടിടം പൊളിച്ചുപണിയുന്നതിന് സർക്കാർ അനുമതിയായിട്ടുണ്ടങ്കിലും തുടർ നടപടിയുണ്ടായിട്ടില്ല. കുട്ടനാട് മിനി സിവിൽ സ്റ്റേഷനുസമീപം സബ് ട്രഷറിക്കുവേണ്ടി കെട്ടിടം നിർമിക്കാനാണ് തീരുമാനം. നാൽപ്പതോളം ഓഫീസുകൾ പ്രവർത്തിക്കുന്ന മിനി സിവിൽ സ്റ്റേഷൻ കെട്ടിടം സൗകര്യമില്ലായ്മയാൽ വീർപ്പുമുട്ടുകയാണ്. അനക്സ് കെട്ടിടം നിർമിച്ചാൽ ഇവയിലെ ഓഫീസുകളും വാടകയ്ക്കു പ്രവർത്തിക്കുന്ന മറ്റ് ഓഫീസുകളും അങ്ങോട്ടു മാറ്റാനാകും.

ലഹരിവിരുദ്ധ സന്ദേശ യാത്ര

ചേര്‍ത്തല: റോട്ടറി ഇന്‍റര്‍നാഷണല്‍ ഡിസ്ട്രിക്ട് 3211 റോപ്പ് (റോട്ടറി പോലീസ് എന്‍ഗേജ്‌മെന്‍റ്) പ്രോജക്ടിന്‍റെ ഭാഗമായി സംഘടിപ്പിക്കുന്ന ലഹരിവിരുദ്ധ സന്ദേശ യാത്ര ആറിന് അരൂരില്‍നിന്ന് തുടങ്ങും. അരുതേ എന്ന് പേരിട്ടിരിക്കുന്ന യാത്ര സൗഹൃദമാണ് ലഹരി എന്ന മുദ്രാവാക്യം ഉയര്‍ത്തിപ്പിടിക്കുന്നതാണെന്ന് ചെയര്‍മാന്‍ സുമേഷ് ചെറുവാരണം, ചേര്‍ത്തല റോട്ടറി ക്ലബ് അഡ്മിന്‍ അഡ്വ. സി.കെ. രാജേന്ദ്രന്‍, ട്രഷറര്‍ ബിനു ജോണ്‍, സി.കെ. സുരേഷ് ബാബു, അരുതേ ഡിസ്ട്രിക്ട് ട്രഷറര്‍ ഡെലിഷ് കുമാര്‍ എന്നിവര്‍ പത്രസമ്മേളനത്തില്‍ അറിയിച്ചു. ആലപ്പുഴ, പത്തനംതിട്ട, കൊല്ലം ജില്ലകളിലൂടെ സഞ്ചരിക്കുന്ന യാത്ര തിരുവനന്തപുരത്ത് 10ന് ശംഖുമുഖം ബീച്ചില്‍ സമാപിക്കും. ഓരോ ജില്ലയിലെയും വിവിധ കേന്ദ്രങ്ങളില്‍ ജാഥയ്ക്ക് സ്വീകരണം നല്‍കും. ഇതിനോടനുബന്ധിച്ച് ലഹരി വിരുദ്ധ ബോധവത്കരണ ക്ലാസുകള്‍, ഫ്‌ളാഷ് മോബുകള്‍, കലാപരിപാടികള്‍ എന്നിവ സംഘടിപ്പിക്കുമെന്നും അവര്‍ പറഞ്ഞു. വെള്ളിയാഴ്ച രാവിലെ എട്ടിന് അരൂരില്‍നിന്ന് തുടങ്ങുന്ന ബൈക്ക് റാലി 10ന് പള്ളിപ്പുറം പട്ടാര്യസമാജം ഹൈസ്‌കൂളിലെത്തും. തുടര്‍ന്ന് നടക്കുന്ന സമ്മേളനം മന്ത്രി പി. പ്രസാദ് ഉദ്ഘാടനം ചെയ്യും. പള്ളിപ്പുറം പഞ്ചായത്ത് പ്രസിഡന്‍റ് ടി.എസ്. സുധീഷ് അധ്യക്ഷനാകും. ദലീമ ജോജോ എംഎല്‍എ റാലി ഫ്‌ളാഗ് ഓഫ് ചെയ്യും.

പനിയും ജലജന്യരോഗങ്ങളും തടയാന്‍ നടപടിയെടുക്കണം: കെ.സി. വേണുഗോപാല്‍ എംപി

ആലപ്പുഴ: മഴക്കാലത്ത് ജില്ലയില്‍ പനിയും മറ്റ് ജലജന്യരോഗങ്ങളും വ്യാപിക്കുന്നത് തടയുന്നതിന് അടിയന്തര നടപടികള്‍ സ്വീകരിക്കണമെന്ന് കെ.സി. വേണുഗോപാല്‍ എംപി ആരോഗ്യമന്ത്രിയോട് ആവശ്യപ്പെട്ടു. ഇക്കാര്യം ചൂണ്ടിക്കാട്ടി അദ്ദേഹം ആരോഗ്യമന്ത്രിക്ക് കത്തുനല്‍കി. മഴക്കാലം തുടങ്ങിയതോടെ പല ഭാഗങ്ങളിലെയും ജനങ്ങള്‍ക്ക് വിവിധ പനിരോഗങ്ങള്‍ ഉള്‍പ്പെടെയുള്ള ആരോഗ്യ പ്രശ്നങ്ങള്‍ നേരിടേണ്ടിവരുന്നു. പ്രത്യേകിച്ചും ഡെങ്കിപ്പനി, എലിപ്പനി, വയറിളക്കം പോലെയുള്ള ജലജന്യരോഗങ്ങള്‍ എന്നിവയാണ് ഈ കാലയളവില്‍ വ്യാപകമായത്. പത്തുദിവസത്തിനിടെ 28 പേര്‍ക്ക് ഡെങ്കിപ്പനിയും നാലു പേര്‍ക്ക് എലിപ്പനിയും സ്ഥിരീകരിച്ചിട്ടുണ്ട്. 85 പേര്‍ ഡെങ്കിപ്പനി ലക്ഷണങ്ങളോടെയും നാലുപേര്‍ എലിപ്പനി ലക്ഷണങ്ങളോടെയും ചികിത്സയിലുമാണ്. ഉയര്‍ന്ന താപനില, സ്ഥിരമായ മഴ, വൃത്തിഹീനമായ മാലിന്യശേഖരണ കേന്ദ്രങ്ങള്‍, മലിനമായ ജലസ്രോതസുകള്‍ തുടങ്ങിയവ രോഗവ്യാപനത്തിന് കാരണങ്ങളാണ്. ഇതോടൊപ്പം, കോവിഡ് വ്യാപകമാകുന്നത് സ്ഥിതിഗതികള്‍ വഷളാക്കിയിട്ടുണ്ടെന്നും കെ.സി. വേണുഗോപാല്‍ പറഞ്ഞു. ഡെങ്കിപ്പനി, എലിപ്പനി തുടങ്ങിയ രോഗങ്ങള്‍ക്കെതിരായ പ്രത്യേക മെഡിക്കല്‍ ക്യാമ്പുകള്‍ ആലപ്പുഴ ജില്ലയിലെ പ്രധാന നഗര-ഗ്രാമ മേഖലകളില്‍ സംഘടിപ്പിക്കണം. വീടുകളിലും പൊതുയിടങ്ങളിലും കെട്ടിക്കിടക്കുന്ന വെള്ളം നീക്കം ചെയ്യുന്നതിനായി ആരോഗ്യവകുപ്പിന്‍റെ നേതൃത്വത്തില്‍ ബോധവത്കരണവും ആക‌്ഷന്‍ പ്രോഗ്രാമുകളും നടപ്പിലാക്കണം. ആശുപത്രികളില്‍ ചികില്‍സാ സൗകര്യങ്ങള്‍ വര്‍ധിപ്പിക്കുക, പ്രത്യേകിച്ച് വെന്‍റിലേറ്റര്‍, ബ്ലഡ് ടെസ്റ്റിംഗ്, ഡെങ്കിപ്പനി കിറ്റുകള്‍ എന്നിവയുടെ സജ്ജീകരണം ഉറപ്പാക്കണം. എല്ലാ പഞ്ചായത്തുകളിലും റാപ്പിഡ് റെസ്പോണ്‍സ് ടീമുകള്‍ രൂപീകരിച്ച് രോഗനിര്‍ണയവും തുടര്‍ന്നുള്ള ഇടപെടലുകളും നടപ്പാക്കണം. ജലസ്രോതസുകളുടെ ശുദ്ധീകരണത്തിനായുള്ള സത്വരപ്രവര്‍ത്തനങ്ങളും കോവിഡ് വ്യാപനം തടയുന്നതിനുള്ള നടപടികള്‍ സ്വീകരിക്കണം തുടങ്ങിയ നിര്‍ദേശങ്ങളും വേണുഗോപാല്‍ മുന്നോട്ടുവച്ചു.

പ്രവേശനോത്സവം നടത്തി

പൂച്ചാക്കല്‍: പാണാവള്ളി അസീസി സ്‌പെഷല്‍ സ്‌കൂളില്‍ പ്രവേശനോത്സവം നടത്തി. പൂച്ചാക്കല്‍ പോലീസ് ഇന്‍സ്പെക്ടര്‍ സുബ്രഹ്‌മണ്യന്‍ ഉദ്ഘാടം ചെയ്തു. ഫാ. ആന്‍റണി കുഴിവേലി അധ്യക്ഷത വഹിച്ചു. പഠനോപകരണ വിതരണം തൈക്കാട്ടുശേരി ബ്ലോക്ക് പഞ്ചായത്ത് പ്രസിഡന്‍റ് രജിത നിര്‍വഹിച്ചു. സിസ്റ്റര്‍ ഡോളി, ബിനിത പ്രമോദ്, അംബിക ദേവി, സിസ്റ്റര്‍ ആഗ്‌നസ് എന്നിവര്‍ പ്രസംഗിച്ചു. പൂച്ചാക്കല്‍: മണപ്പുറം സെന്‍റ് തെരേസാസ് ഹൈസ്‌കൂളില്‍ നടന്ന പ്രവേശനോത്സവം രാജഗിരി സ്‌കൂള്‍ ഓഫ് എന്‍ജിനിയറിംഗ് ആന്‍ഡ് ടെക്‌നോളജി പ്രിന്‍സിപ്പലും പ്രഫസറുമായ ഫാ. ജയ്‌സണ്‍ പോള്‍ മുളവരിക്കല്‍ ഉദ്ഘാടനം ചെയ്തു. സ്‌കൂള്‍ മാനേജര്‍ ഫാ. ജയിംസ് പുതുശേരി അധ്യക്ഷത വഹിച്ചു. സ്‌കൂള്‍ ഹെഡ്മിസ്ട്രസ് റെജി ഏബ്രഹാം, തൈക്കാട്ടുശേരി ബ്ലോക്ക് പഞ്ചായത്ത് പ്രസിഡന്‍റ് വി.ആര്‍. രജിത, പഞ്ചായത്ത് പ്രസിഡന്‍റ് ഡി.ഷിബു, വിദ്യാഭ്യാസ ആരോഗ്യ സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ രതി നാരായണന്‍, പിടിഎ പ്രസിഡന്‍റ് ദീപു എസ്. പിള്ള, സ്‌കൂള്‍ ലീഡര്‍ ജനീലിയ രാജേഷ്, അധ്യാപകരായ ഫാ. ആന്‍റോച്ചന്‍ മംഗലശേരി, ഫാ. ഷൈജു ജോര്‍ജ്, സ്റ്റാഫ് സെക്രട്ടറി അജു ഡേവിസ് തുടങ്ങിയവര്‍ പങ്കെടുത്തു.

പാലമൂട്-ആഞ്ഞിലിമൂട് റോഡ് കുളമായി

ചാരുംമൂട്: കെപി റോഡിൽ പാലമൂട് ജംഗ്ഷനിൽനിന്നു പുതുപ്പള്ളിക്കുന്നം, ഇടക്കുന്നം, പടനിലം, പുലിമേൽ, ഇടപ്പോൺ പവർ ഹൗസ് ജംഗ്ഷൻ വഴി മാവേലിക്കര-പന്തളം റോഡിൽ എത്തിച്ചേരുന്ന പാലമൂട് -ആഞ്ഞിലിമൂട് റോഡ് കുളമായി. ടാറിംഗ് ഇളകി തകർന്നു തരിപ്പണമായി കിടക്കാൻ തുടങ്ങിയിട്ട് വർഷങ്ങളായി. ഏകദേശം മൂന്നു കിലോമീറ്റർ ദൂരം വരുന്ന റോഡ് പൂർണമായും നൂറനാട് പഞ്ചായത്തിന്‍റെ അധീനതയിലുള്ളതാണ്. ഇപ്പോൾ ശക്തമായ മഴ പെയ്തതോടെ റോഡ് കുളമായി മാറി. താമരക്കുളം, വള്ളിക്കുന്നം, കറ്റാനം വെട്ടിക്കോട് ഭാഗത്തുനിന്നുവരുന്ന വാഹന യാത്രക്കാർക്ക് നൂറനാട് പാറ ജംഗ്ഷനിൽ എത്താതെ പാലമൂട് വഴി എളുപ്പത്തിൽ പടനിലം, ഇടപ്പോൺ ഭാഗങ്ങളിൽ കടക്കാം. അഞ്ചു വർഷങ്ങൾക്കുമുമ്പേ ജില്ലാ പഞ്ചായത്ത് 55 ലക്ഷം രൂപ മുടക്കി നവീകരിച്ച റോഡാണിപ്പോൾ സഞ്ചാരയോഗ്യമല്ലാതെ പൊട്ടിപ്പൊളിഞ്ഞ് വലിയ കുഴികളായി മാറിയിരിക്കുന്നത്. എളുപ്പത്തിനുവേണ്ടി ഇതുവഴി യാത്ര ചെയ്യുന്ന സ്ത്രീകൾ അടക്കമുള്ള ഇരുചക്രവാഹന യാത്രക്കാർ കുഴികളിൽ വീണുള്ള അപകടങ്ങളിൽപ്പെടുകയും പതിവായി. തകർന്നു കിടക്കുന്ന പാലമൂട് -ആഞ്ഞിലിമൂട് റോഡിന്‍റെ പുനർനിർമാണം വേഗത്തിലാക്കി സഞ്ചാരയോഗ്യമാക്കണമെന്നാണ് നാട്ടുകാരുടെ ആവശ്യം.

ആര്യാട് പഞ്ചായത്ത്‌ റോഡ്‌ മഴയിൽ പൊളിഞ്ഞു

ആലപ്പുഴ: ആര്യാട് പഞ്ചായത്ത്‌ 14-ാം വാർഡിൽ ഗുരുകൃപ ഗ്യാസ് ഏജൻസി മുതൽ 15-ാം നമ്പർ അങ്കണവാടിവരെയുള്ള പഞ്ചായത്ത്‌ റോഡ്‌ മഴയിൽ പൊളിഞ്ഞു. പുനർനിർമിച്ച് ഒരുമാസം തികയുന്നതിനു മുൻപാണിത്. അങ്കണവാടി, കുടുംബക്ഷേമ ഉപകേന്ദ്രം, ഗ്യാസ് ഏജൻസി തുടങ്ങിയ ഇടങ്ങളിലേക്കു പോകാൻ കുട്ടികൾ ഉൾപ്പെടെ നൂറുകണക്കിനാളുകൾ ദിവസേന ഉപയോഗിക്കുന്ന വഴിയാണിത്. മഴയെത്തുടർന്ന്‌ റോഡിൽ ചെളി നിറഞ്ഞതോടെ നടക്കാൻപോലും പറ്റാത്ത സാഹചര്യമാണ്. തോടിനോടു ചേർന്ന ഭാഗത്ത്‌ റോഡിൽ വലിയ ഗർത്തവും രൂപപ്പെട്ടു. മഴപെയ്യുമ്പോൾ ഇതിലൂടെ പൂഴി തോട്ടിലേക്ക് ഒലിച്ചുപോവുകയാണ്. സംരക്ഷണഭിത്തിക്കു വശങ്ങളിൽ മണ്ണ്‌ കൃത്യമായി നിറയ്ക്കാത്തതാണ് പ്രശ്നത്തിനു കാരണമെന്ന്‌ നാട്ടുകാർ പറയുന്നു. ഗ്രാവലിനുപകരം പൂഴിപ്പൊടി ഉപയോഗിച്ചതിന്‍റെ ഫലമാണ് റോഡിലെ ചെളി.

പന്നായി പാലത്തിൽ ബാരിക്കേഡ് സ്ഥാപിച്ചു

മാന്നാർ: പന്നായി പാലത്തിൽനിന്നു ചാടിയുള്ള ആത്മഹത്യ ഇനി നടക്കില്ല. തിരുവല്ല- മാന്നാർ സംസ്ഥാനപാതയിൽ ആലപ്പുഴ, പത്തനംതിട്ട ജില്ലകളുടെ അതിർത്തി പങ്കിട്ടൊഴുകുന്ന പമ്പാനദിക്ക് കുറുകെയുള്ള പന്നായി പാലത്തിൽ ഉയരത്തിൽ ബാരിക്കേഡ് സ്ഥാപിച്ചു. പാലത്തിന്‍റെ ഉയരംകുറഞ്ഞ കൈവരികളും പമ്പയാറിന്‍റെ ഈ ഭാഗത്തെ വലിയ ഒഴുക്കും ആഴവും കാരണം പലരും ആത്മഹത്യ ചെയ്യാൻ പന്നായി പാലം തെരഞ്ഞെടുത്തിരുന്നു. പാലത്തിൽനിന്ന് ആറ്റിലേക്ക് ചാടി ആത്മഹത്യചെയ്യുന്നവരുടെ എണ്ണം വർധിച്ചതിനെത്തുടർന്ന് കൈവരികൾക്ക് ഉയരം കൂട്ടണമെന്ന് അഭിപ്രായം ഉയർന്നിരുന്നു. രാത്രികാലങ്ങളിൽ വാഹനങ്ങളിലെത്തി പാലത്തിൽനിന്ന് ആറ്റിലേക്ക് മാലിന്യം വലിച്ചെറിയുന്നതും പതിവായിരുന്നു. മാലിന്യനിക്ഷേപത്തിനെതിരേ നടപടി കൈക്കൊള്ളുനതിന്‍റെ ഭാഗമായി പാലത്തിന്‍റെ കൈവരികളിൽ ബാരിക്കേഡ് സ്ഥാപിക്കണമെന്ന് ദേശീയ ഹരിത ട്രൈബ്യൂണൽ ഉത്തരവിട്ടിരുന്നു. 120 മീറ്റർ നീളമുള്ള പാലത്തിന്‍റെ ഇരുവശങ്ങളിലും 29 മീറ്റർ അപ്രോച്ച് റോഡ് ഉൾപ്പെടെ രണ്ടു മീറ്റർ ഉയരത്തിലാണ് ബാരിക്കേഡ് സ്ഥാപിച്ചത്. പൊതുമരാമത്ത് ബ്രിഡ്ജ് വിഭാഗത്തിന്‍റെ കീഴിൽ നവംബർ മാസത്തിലായിരുന്നു നിർമാണ പ്രവർത്തനങ്ങൾ ആരംഭിച്ചത്. 25 ലക്ഷം രൂപയ്ക്കാണു കരാർ നൽകിയത്. ഇരുമ്പിൽ നിർമിച്ച ഫ്രെയിമിനുള്ളിൽ പിവിസി പൂശിയ ജിഐ നെറ്റ് പിടിപ്പിച്ചാണ് ബാരിക്കേഡുകൾ സ്ഥാപിച്ചത്. ഇതോടെ പാലം ഏറെ മനോഹരമാകുകയും ചെയ്യും.

ചെറുതന സെന്‍റ് മേരീസ് എൽപി സ്കൂളിൽ പുതിയ കെട്ടിടം ഉദ്ഘാടനം

ഹരിപ്പാട്: മണ്ണാറശാല ഇല്ലത്തിനു കീഴിൽ ചെറുതനയിൽ പ്രവർത്തിക്കുന്ന പൊതുവിദ്യാലയമായ സെന്‍റ് മേരീസ് എൽപി സ്കൂളിൽ 2025- 26 വർഷത്തെ ചെറുതന പഞ്ചായത്ത് തല പ്രവേശനോത്സവവും പുതിയ സ്കൂൾ കെട്ടിട സമുച്ചയത്തിന്‍റെ ഉദ്ഘാടനവും രമേശ്‌ ചെന്നിത്തല എംഎൽഎ നടത്തി. ചെറുതന പഞ്ചായത്ത് പ്രസിഡന്‍റ് എബി മാത്യു അധ്യക്ഷത വഹിച്ചു. മണ്ണാറശാല മാനേജ്മെന്‍റ് പ്രതിനിധിയും ഹരിപ്പാട് നഗരസഭ ആരോഗ്യ സ്റ്റാൻഡിംഗ് കമ്മിറ്റി ചെയർമാനുമായ എസ്. നാഗദാസ് ആമുഖപ്രഭാഷണം നടത്തി. മണ്ണാറശാല മുതിർന്ന കുടുംബാംഗമായ എം.ജി. ജയകുമാർ ഉപഹാര സമർപ്പണം നടത്തി. മണ്ണാറശാല മാനേജ്മെന്‍റ് അംഗം എൻ. ജയദേവൻ, പ്രഥമാധ്യാപിക എം.ജി. അനിഷ കൃഷ്ണൻ, സ്റ്റാഫ് സെക്രട്ടറി മഹേശ്വരി മോഹൻ, പിടിഎ പ്രസിഡന്‍റ് ആശ ഹരീഷ്, അഞ്ജു അനീഷ് എന്നിവർ പ്രസംഗിച്ചു.

മഴയും കാറ്റും ശമിച്ചു; ചാകര പ്രതീക്ഷയിൽ വള്ളങ്ങൾ കടലിലേക്ക്

അമ്പലപ്പുഴ: മഴയുടെയും കാറ്റിന്‍റെയും ശക്തി കുറഞ്ഞതോടെ ചാകര പ്രതീക്ഷയിൽ വള്ളങ്ങൾ കടലിലേക്ക്. ജില്ലയുടെ നാനാഭാഗത്തുനിന്നു നൂറുകണക്കിനു വള്ളങ്ങൾ തോട്ടപ്പള്ളി ഹാർബറിൽ ഇന്നലെ പുലർച്ചെ മുതൽ എത്തിത്തുടങ്ങി. നീട്ടുവല, ഡിസ്കോ, ബീഞ്ച് തുടങ്ങിയ ചെറിയ വള്ളങ്ങളും നൂറോളം പേർ കയറുന്ന കൂറ്റൻ ലെയ്‌ലാൻഡുകളുമാണ് കടലിൽ ഇറക്കിയത്. ആഴക്കടലിൽ തിരമാലയുടെ ശക്തി കുറഞ്ഞതാണ് വള്ളങ്ങൾക്കു തുണയായത്. തോട്ടപ്പള്ളി ഹാർബറിൽനിന്നു പോയ വള്ളങ്ങൾ പറവൂർ ഗലീലിയ തീരത്തിനോട് ചേർന്ന് പടിഞ്ഞാറ് ഭാഗത്താണ് വല നീട്ടിയത്. ചില വള്ളങ്ങൾക്ക് അഞ്ചു കുട്ടയോളം മത്തി കിട്ടിയതൊഴിച്ചാൽ ഭൂരിഭാഗം വള്ളങ്ങൾക്കും അധ്വാനം മാത്രമായിരുന്നു മിച്ചം. ഒരു കിലോമത്തി 200 രൂപ വച്ചാണ് തോട്ടപ്പള്ളിയിൽ വിൽപ്പന നടന്നത്. കടലിലെ ശക്തമായ ഒഴുക്കാണ് മീൻ വലയിൽ കയറുന്നതിനു തടസം. അതേസമയം, തീരത്ത് ശക്തമായ തിരമാലകൾ ഉള്ളതിനാൽ ഒരാൾ മാത്രം തുഴഞ്ഞുപോകുന്ന പൊന്തു വലക്കാർക്ക് കടലിൽ പോകാൻ പറ്റാത്ത സ്ഥിതിയാണ്. തെക്ക് തുക്കുന്നപ്പുഴ മുതൽ വടക്ക് പള്ളിത്തോടുവരെ നൂറുകണക്കിനു പൊന്തുവലക്കാരാണുള്ളത്. ഒരുപക്ഷേ സംസ്ഥാനത്തു തന്നെ ഏറ്റവും കൂടുതൽ പൊന്തുകളുള്ള ജില്ല ആലപ്പുഴയെന്നാണ് ഫിഷറീസ് വകുപ്പിന്‍റെ കണക്കുകൾ സൂചിപ്പിക്കുന്നത്. ഇവരെ ആശ്രയിച്ചു നൂറുകണക്കിനു കുടുംബങ്ങളാണ് കഴിയുന്നത്. കടൽ പൂർണമായും ശാന്തമാകാതെ ഇവർക്കു കടലിൽ പോകാനാകില്ല. അതേസമയം കഴിഞ്ഞ രണ്ടാഴ്ചയായി കേരള തീരത്തു മത്സ്യബന്ധനം നിലച്ചതോടെ ഇതരസംസ്ഥാനത്തുനിന്നെത്തുന്ന മത്സ്യത്തിനും കായൽ മീനിനും വില ഇരട്ടിയായി.

ആധുനിക മത്സ്യമാർക്കറ്റ് ഒരുങ്ങുന്നു; പ്രതാപം വീണ്ടെടുക്കാൻ മാങ്കാംകുഴി പബ്ലിക് മാർക്കറ്റ്

മാങ്കാംകുഴി: ഓണാട്ടുകരയിലെ പ്രധാന വിപണനകേന്ദ്രങ്ങളിലൊന്നായിരുന്ന തഴക്കര പഞ്ചായത്തിന്‍റെ അധീനതയിലുള്ള മാങ്കാംകുഴി പബ്ലിക് മാർക്കറ്റ് പഴയകാല പ്രതാപം വീണ്ടെടുക്കാനുള്ള ശ്രമത്തിൽ. മത്സ്യം, പച്ച ക്കറി, പലചരക്ക്, വെറ്റില തുടങ്ങി നിത്യോപയോഗസാധനങ്ങളുടെ മേഖലയിലെ പ്രധാന വിപണനകേന്ദ്രമായിരുന്ന ഇവിടെ പുറംസ്ഥലങ്ങളിൽനിന്നുപോലും കച്ചവടക്കാരും ഉപഭോക്താക്കളും എത്തിയിരുന്നു. കർഷകർക്ക് അവരുടെ ഉത്പന്നങ്ങൾ വിറ്റഴിക്കാനുള്ള പ്രധാനകേന്ദ്രമായിരുന്നു ഇവിടം. തൊണ്ണൂറുകളുടെ അവസാനത്തോടെയാണ് മാർക്കറ്റിന്‍റെ ശോച്യാവസ്ഥ തുടങ്ങിയത്. മാർക്കറ്റിന്‍റെ പ്രധാന ആകർഷണമായിരുന്ന മത്സ്യവിപണനം ഇവിടെനിന്നു പുറത്തെ പാതയോരത്തേക്കു മാറി. ഇതോടെ മാർക്കറ്റിനുള്ളിൽ കയറുന്നവരുടെ എണ്ണം കുറഞ്ഞു. കച്ചവടം കുറഞ്ഞതോടെ വ്യാപാരികളും പ്രതിസന്ധിയിലായി. പച്ചക്കറിവ്യാപാരികൾ ഉൾപ്പെടെ മറ്റു സ്ഥലങ്ങളിലേക്കു പോയി. കച്ചവടക്കാർ ഒഴിഞ്ഞതോടെ മാർക്കറ്റിനുള്ളിൽ തഴക്കര പഞ്ചായത്ത് ഹരിതകർമസേനയു ടെ അജൈവമാലിന്യ സംഭരണ കേന്ദ്രമായി ഉപയോഗിച്ചുവരുകയായിരുന്നു. മാർക്കറ്റിന്‍റെ പടിഞ്ഞാറുഭാഗത്തെ കെട്ടിടത്തിനുമുകളിൽ ഹരിതകർമസേനയ്ക്കായി പ്രത്യേക ഓഫീസ് സൗകര്യ ങ്ങളും പഞ്ചായത്ത് ഏർപ്പെടുത്തിയിട്ടുണ്ട്. കഴിഞ്ഞ സർക്കാരിന്‍റെ കാലത്ത് എംഎൽഎയായിരുന്ന ആർ. രാജേഷിന്‍റെ ശ്രമഫലമായി മാർക്കറ്റ് നവീകരണത്തിനായി ഒരുകോടി രൂപ അനുവദിച്ചിരുന്നു. പിന്നീട് എം.എസ്. അരുൺകുമാർ എംഎൽഎ ഇടപെട്ട് 1.66 കോടി രൂപയുടെ ഭരണാനുമതി നേടിയെടുത്തു. രണ്ടു മാസം മുമ്പ് മാർക്കറ്റിനുള്ളിൽ പുതിയ കെട്ടിടസമുച്ചയ നിർമാണം തുടങ്ങി. ആധുനിക മത്സ്യമാർക്കറ്റും അനുബന്ധമായി 12 കച്ചവട സ്റ്റാളുകളുമാണ് കെട്ടിടത്തിലുണ്ടാവുക. മാർക്കറ്റിന്‍റെ തെക്കേ ഗേറ്റുവഴി വാഹനങ്ങളുൾപ്പെടെ ഉള്ളിലേക്കുകയറി വടക്കേ ഗേറ്റു വഴി പുറത്തുപോകുന്ന സംവിധാനമാണുള്ളത്. ഇതിനായി മാർക്കറ്റിന്‍റെ വടക്കുവശത്തുനിന്ന് കിഴക്കേ റോഡിലേക്കിറങ്ങുന്നതിനായി പുതിയ കവാടം സ്ഥാപിക്കും. ഇപ്പോഴത്തെ പഞ്ചായത്ത് ഭരണസമിതിയുടെ കാലാവധി പൂർത്തീകരിക്കുന്നതിനു മുമ്പ് നിർമാണം പൂർത്തീകരിക്കാനാണ് ലക്ഷ്യം.

എല്ലാ മഴക്കാലത്തും വെള്ളക്കെട്ടിന്‍റെ ദുരിതത്തിൽ 15 കുടുംബങ്ങൾ

അമ്പലപ്പുഴ: എല്ലാ മഴക്കാലത്തും വെള്ളക്കെട്ടിന്‍റെ ദുരിതത്തിൽ 15 കുടുംബങ്ങൾ. ചെറിയ മഴയായാൽപ്പോലും മലിനജലത്തിൽ മുട്ടറ്റം നീന്താനാണ് ഇവരുടെ ദുർവിധി. ഒൻപതു വർഷമായി തുടരുന്ന ഈ ദുരിതത്തിനു പരിഹാരം കാണാൻ ഒരധികൃതരും ഇവിടേക്ക് എത്തിയിട്ടുമില്ല. അമ്പലപ്പുഴ വടക്ക് പഞ്ചായത്ത് ഒന്നാം വാർഡ് വണ്ടാനം ഇഎംഎസ് ഷിഹാബ് നഗർ റോഡിന് സമീപമുള്ള 15 ഓളം കുടുംബങ്ങളാണ് എല്ലാ മഴക്കാലത്തും വെള്ളക്കെട്ടിന്‍റെ ദുരിതത്തിൽക്കഴിയുന്നത്. 9 വർഷം മുൻപ് റോഡ് നിർമിക്കാനായി ഇവിടെ നേരത്തെയുണ്ടായിരുന്ന പൈപ്പ് മാറ്റിയതോടെയാണ് പ്രദേശവാസികളുടെ ദുരിതമാരംഭിച്ചത്. പ്രദേശത്തെ വെള്ളക്കെട്ടിനു പരിഹാരമായി പതിറ്റാണ്ടുകൾക്കു മുൻപ് സ്ഥാപിച്ച പൈപ്പ് പുതിയത് സ്ഥാപിക്കാമെന്ന ഉറപ്പിലാണ് പൈപ്പ് മാറ്റിയത്. എന്നാൽ, 9 വർഷം മുൻപ് മാറ്റിയ പൈപ്പ് ഇതുവരെ പുനഃ സ്ഥാപിച്ചിട്ടില്ല. എല്ലാ വർഷവും ആദ്യ മഴയിൽത്തന്നെ ഇതാണ് അവസ്ഥ. ഇത്തവണയും ഇതിന് മാറ്റമുണ്ടായിട്ടില്ല. കഴിഞ്ഞ രണ്ടു ദിവസത്തെ മഴയിൽ പ്രദേശത്തെ വീടുകളിലെല്ലാം വെള്ളം കയറി. ഓടനിർമിക്കാനും പൈപ്പിടാനുമായി നാലു തവണ പഞ്ചായത്ത് എസ്റ്റിമേറ്റ് തയാറാക്കിയെങ്കിലും വർഷങ്ങൾ കഴിഞ്ഞിട്ടും ഇവ രണ്ടും യാഥാർഥ്യമായില്ല. ഒരാഴ്ച കനത്ത വെയിലുണ്ടായാൽ മാത്രമേ കെട്ടിക്കിടക്കുന്ന വെള്ളം വറ്റിപ്പോകൂ. വെള്ളം കെട്ടിക്കിടക്കുന്നതിനാൽ പല കുടുംബത്തിനും പ്രാഥമികാവശ്യം നിർവഹിക്കാൻ പോലും കഴിയാത്ത സ്ഥിതിയായി. വെള്ളം ഒഴുകിപ്പോകാൻ മാർഗമില്ലാതെ വന്നതോടെ പ്രദേശത്തുനിന്നുള്ള മലിന ജലമെല്ലാം ഇവിടെ കെട്ടിക്കിടക്കുകയാണ്. ഇതോടെ കുട്ടികൾക്ക് സ്കൂളുകളിൽ പോകാൻ പോലും കഴിയാത്ത സ്ഥിതിയായി. ജില്ലാ ഭരണകൂടം അടിയന്തരമായി ഇടപെട്ട് ഇതിന് ശാശ്വത പരിഹാരം കാണണമെന്നാണ് ഇവരുടെ ആവശ്യം.

പ്രതികൂല കാലാവസ്ഥ: മത്സ്യത്തൊഴിലാളികൾ ദുരിതത്തിൽ

തുറവൂര്‍: പ്രതികൂല കാലാവസ്ഥയെത്തുടര്‍ന്നു വള്ളങ്ങള്‍ കടലില്‍ ഇറക്കാന്‍ കഴിയാത്തതു മൂലം കഴിഞ്ഞ ഒരാഴ്ചയായി മത്സ്യത്തൊഴിലാളികളും അനുബന്ധ തൊഴിലാളികളും ദുരിതത്തിൽ. കടലില്‍ കപ്പല്‍ മറിഞ്ഞുണ്ടായ സംഭവവും മത്സ്യമേഖലയ്ക്കു തിരിച്ചടിയായി. കാറ്റും മഴയും ശക്തമായതോടെ ദിവസങ്ങളായി കടല്‍ പ്രക്ഷുബ്‌ധമാണ്. തീരക്കടലില്‍ പോലും കടല്‍വെള്ളം ശക്തിയായി ഉയരുകയാണ്. കടല്‍ ശാന്തമാകാതെ വള്ളമിറക്കാന്‍ കഴിയില്ലെന്ന് മത്സ്യത്തൊഴിലാളികള്‍ പറഞ്ഞു. അര്‍ത്തുങ്കല്‍ മുതല്‍ പള്ളിത്തോട് ചാപ്പക്കടവ് വരെയുള്ള മത്സ്യത്തൊഴിലാളികള്‍ മത്സ്യബന്ധനത്തിന് പോകുന്നത് ചെല്ലാനം ഹാര്‍ബറില്‍ നിന്നാണ്. പള്ളിത്തോട്, ചാപ്പക്കടവ്, ചെല്ലാനം എന്നിവിടങ്ങളില്‍ വള്ളങ്ങള്‍ കരയ്ക്കു കയറ്റിയിട്ടിരിക്കുന്നു. ശക്തമായ കാറ്റും മഴയും മൂലം ഒരാഴ്ച മുന്‍പേ വള്ളങ്ങള്‍ എല്ലാം കരയ്ക്കു കയറ്റിയിട്ടിരിക്കുകയാണ്. ഓരോ വര്‍ഷത്തിലും ജൂണ്‍, ജൂലൈ മാസങ്ങളിലെ സീസണ്‍ പണിയാണ് തൊഴിലാളികള്‍ക്ക് ആശ്വാസമാകുന്നത്. എന്നാല്‍ കാലാവസ്ഥ പ്രതികൂലമായി തുടര്‍ന്നാല്‍ ഈ വര്‍ഷവും തൊഴിലാളികളുടെ കാര്യം കഷ്ടമാകും. മത്സ്യബന്ധനം നടത്താതെ വന്നാല്‍ എന്‍ജിന്‍ ഉള്‍പ്പെടെ മത്സ്യബന്ധന ഉപകരണങ്ങള്‍ക്കെല്ലാം തന്നെ കേടുപാടു സംഭവിക്കുമെന്നും മത്സ്യത്തൊഴിലാളികള്‍ പറയുന്നു. മത്സ്യമേഖലയിലെ ഈ പ്രതിസന്ധി ഘട്ടത്തില്‍ സര്‍ക്കാര്‍ നല്‍കുന്ന സഹായം എല്ലാ മത്സ്യത്തൊഴിലാളികള്‍ക്കും ലഭിക്കണമെന്നും പ്രതികൂല കാലാവസ്ഥമൂലം ദുരിതമനുഭവിക്കുന്ന എല്ലാ മത്സ്യത്തൊഴിലാളികള്‍ക്കും പ്രത്യേക പാക്കേജ് അനുവദിക്കണമെന്നും സ്വതന്ത്ര മത്സ്യത്തൊഴിലാളി ഫെഡറേഷന്‍ ഭാരവാഹി ആന്‍റണി കുരിശിങ്കല്‍ പറഞ്ഞു.

ലപ്രസി സാനിറ്റോറിയം പുതിയ ബ്ലോക്ക് നിര്‍മാണത്തിലെ അഴിമതി അന്വേഷിക്കണം: എംപി

മാവേലിക്കര: നബാര്‍ഡ് ഫണ്ട് ഉപയോഗിച്ച് നിര്‍മാണം നടത്തിയ നൂറനാട് ലെപ്രസി സാനിറ്റോറിയം വളപ്പിലെ പുതിയ കെട്ടിടങ്ങളുടെ നിര്‍മാണത്തിലെ അഴിമതിയും അപാകതയും സംബന്ധിച്ച് വിശദമായ അന്വേഷണം നടത്തണമെന്ന് കൊടിക്കുന്നില്‍ സുരേഷ് എംപി. സൂപ്പര്‍ സ്‌പെഷാലിറ്റി ആശുപത്രി സമുച്ചയം എന്നുപറഞ്ഞ് മുഖ്യമന്ത്രി നിര്‍മാണോദ്ഘാടനം നടത്തിയ കെട്ടിടം നാട്ടുകാരെ കബളിപ്പിച്ച് കെട്ടിടത്തിന്‍റെ ഒരു ഭാഗം സ്വാശ്രയ നഴ്‌സിംഗ് കോളജിനും ബാക്കിയുള്ള സ്ഥലം കോപ്പി പരിശോധനകള്‍ക്കുമാണ് നിലവില്‍ ഉപയോഗിക്കുന്നത്. എന്നാല്‍ ഈ കെട്ടിടമാണ് തട്ടിക്കൂട്ട് ഉദ്ഘാടനം നടത്തി മാസങ്ങള്‍ക്കുള്ളില്‍ ചോര്‍ന്നൊലിക്കുന്നത്. പുതിയ കെട്ടിടത്തിന്‍റെ പലഭാഗങ്ങളിലും വിള്ളല്‍ വീഴുകയും വിണ്ടുകീറുകയും ചെയ്തിട്ടുണ്ട്. നിലവില്‍ ചികിത്സ തേടിയെത്തുന്ന രോഗികള്‍ ജീവന്‍ പണയം വച്ചാണ് കെട്ടിടത്തിനുള്ളില്‍ പ്രവേശിക്കുന്നത്. നിര്‍മാണം പൂര്‍ത്തിയായി വളരെ ചുരുങ്ങിയ കാലത്തിനുള്ളില്‍ തന്നെ ഇത്തരത്തില്‍ അപാകതകള്‍ ഉണ്ടാകുന്നത് നിര്‍മാണത്തിലെ അഴിമതി മൂലമാണ്. ഈ വിഷയത്തില്‍ കോണ്‍ഗ്രസ് ശക്തമായ നിലപാടുമായി മുന്നോട്ടു പോകുമെന്നും കൊടിക്കുന്നില്‍ പറഞ്ഞു. പുതിയ ആശുപത്രി കെട്ടിടത്തിന്‍റെ നിര്‍മാണത്തില്‍ വ്യാപക ന്യൂനതകളും അഴിമതി ആരോപണവും ഉയര്‍ന്ന സാഹചര്യത്തില്‍ അടിയന്തരമായി ആശുപത്രി വികസന സമിതി യോഗം വിളിച്ചുകൂട്ടാന്‍ കളക്ടറോട് ആവശ്യപ്പെട്ടതായും കൊടിക്കുന്നില്‍ പറഞ്ഞു.

കുട്ടനാടിനെ പ്രളയ ദുരിതബാധിത മേഖലയായി പ്രഖ്യാപിക്കണം: കൊടിക്കുന്നിൽ സുരേഷ് എംപി

കുട്ടനാട്: വെള്ളപ്പൊക്കം മൂലം ദുരിതമനുഭവിക്കുന്ന കുട്ടനാടിനെ പ്രളയ ദുരിതബാധിത മേഖലയായി സംസ്ഥാന സർക്കാർ പ്രഖ്യാപിക്കണമെന്ന് കൊടിക്കുന്നിൽ സുരേഷ് എംപി ആവശ്യപ്പെട്ടു. അതോടൊപ്പം കുട്ടനാട്ടിലെ നിലവിലെ സാഹചര്യങ്ങൾ വിലയിരുത്തുന്നതിനായി റവന്യുമന്ത്രിയുടെ നേതൃത്വത്തിൽ ജില്ലയിലെ മന്ത്രി, എംപി, എംഎൽഎ, ജില്ലാ കളക്ടർ എന്നിവരെ ഉൾപ്പെടുത്തി പ്രളയ ദുരിതബാധിത മേഖലകൾ സന്ദർശിച്ച് അവലോകനം നടത്തുകയും പ്രത്യേക ദുരിതാശ്വാസ പാക്കേജ് പ്രഖ്യാപിക്കണമെന്നും എംപി ആവശ്യപ്പെട്ടു. മഴക്കാല മുന്നൊരുക്കങ്ങളുമായി ബന്ധപ്പെട്ട നടത്തിയ യോഗങ്ങളിൽ തീരുമാനിക്കപ്പെട്ട പ്രവർത്തനങ്ങൾ ജില്ലയിൽ നടപ്പിലാക്കുന്നതിൽ റവന്യുവകുപ്പിന് വീഴ്ച വന്നതായും കുട്ടനാട്ടിലെ ഇടത്തോടുകളും കനാലുകളും പോളയും പായലും നീക്കുന്നതിൽ പരാജയപ്പെട്ടതായും വേമ്പനാട് കായലിന്‍റെ ആഴം കൂട്ടുന്നതും കരുവാറ്റ ലീഡിംഗ് ചാനലിൽ അടിഞ്ഞുകൂടിയ എക്കൽ നീക്കുന്നതുമായ പ്രവർത്തനങ്ങൾ ലക്ഷ്യം കണ്ടില്ലെന്നും യഥാസമയം കിഴക്കൻ വെള്ളം ഒഴുക്കിക്കളയുന്നതിനായി തണ്ണീർമുക്കം ബണ്ട്, തോട്ടപ്പള്ളി സ്പിൽവേ എന്നിവിടങ്ങളിൽ ഏർപ്പെടുത്തേണ്ടിയിരുന്ന ക്രമീകരണങ്ങൾക്ക് പിഴവ് സംഭവിച്ചതായും കൊടിക്കുന്നിൽ കുറ്റപ്പെടുത്തി. മൺസൂൺ മഴയ്ക്ക് മുമ്പായിതന്നെ കുട്ടനാട് വെള്ളത്തിൽ മുങ്ങിയ സാഹചര്യമാണ് നിലവിലുള്ളതെന്നും ഇതിന്‍റെ പൂർണ ഉത്തരവാദിത്തം സംസ്ഥാന സർക്കാരിനാണെന്നും ദുരിതബാധിതർക്ക് അടിയന്തര സഹായം ഉറപ്പാക്കണമെന്നും കൊടിക്കുന്നിൽ സുരേഷ് എംപി ആവശ്യപ്പെട്ടു.

ബസ് കാത്ത് മുഷിയേണ്ട; അധിക ട്രിപ്പുകള്‍ ആരംഭിച്ച് കെഎസ്ആര്‍ടിസി

ആലപ്പുഴ: സ്‌കൂളിലും കോളജിലുമെത്താന്‍ ബസ് കാത്ത് മുഷിയേണ്ട. സ്‌കൂള്‍ തുറക്കുന്നതുമായി ബന്ധപ്പെട്ട് അധിക ട്രിപ്പുകള്‍ ആരംഭിച്ച് കെഎസ്ആര്‍ടിസി. ജില്ലയില്‍ ഏറ്റവും കൂടുതല്‍ വിദ്യാഭ്യാസ സ്ഥാപനങ്ങളുള്ള ചേര്‍ത്തല, അരൂര്‍ ഭാഗത്തേക്കായി 13 അധിക ട്രിപ്പുകളാണ് നടത്തുക. നിലവില്‍ 74 സര്‍വീസുകളാണ് കെഎസ്ആര്‍ടിസി ആലപ്പുഴ ഡിപ്പോയില്‍നിന്ന് നടത്തുന്നത്. ഇതില്‍ തിരുവല്ല ഭാഗങ്ങളിലേക്ക് എട്ട് ട്രിപ്പുകളും അരൂര്‍, തോപ്പുംപടി ഭാഗങ്ങളിലേക്ക് ആറ് ട്രിപ്പുകളും നടത്തുമെന്ന് കെഎസ്ആര്‍ടിസി അധികൃതര്‍ അറിയിച്ചു. വിദ്യാര്‍ഥികളുടെ സുരക്ഷിതയാത്ര മുന്‍ നിറുത്തി സര്‍വീസ് നടത്തുന്ന എല്ലാ ബസുകളും വൃത്തിയാക്കുകയും പോരായ്മകളെല്ലാം ഇതിനകം പരിഹരിച്ചതായും അധികൃതര്‍ പറഞ്ഞു. ബസുകളുടെ അറ്റകുറ്റപ്പണികളും പൂര്‍ത്തിയാക്കി. പ്രവേശനോത്സവത്തോട് അനുബന്ധിച്ച് കലവൂര്‍ ഭാഗത്തേക്ക് വിവിധ ഡിപ്പോകളില്‍നിന്ന് കൂടുതല്‍ സര്‍വീസുകള്‍ നടത്തി. വെള്ളപ്പൊക്കത്തെ തുടര്‍ന്ന് നിര്‍ത്തിവച്ച അമ്പലപ്പുഴ-തിരുവല്ല ബസ് സര്‍വീസ് പുനരാരംഭിച്ചു. കണ്‍സഷന് അപേക്ഷിക്കാം പുതിയ അധ്യയന വര്‍ഷത്തേക്കുള്ള കണ്‍സഷന് അടുത്ത ദിവസം മുതല്‍ വിദ്യാര്‍ഥികള്‍ക്ക് അപേക്ഷിച്ചു തുടങ്ങാം. പൊതുവിദ്യാലയങ്ങളിലെ കുട്ടികള്‍ ആധാര്‍കാര്‍ഡ്, റേഷന്‍ കാര്‍ഡ്, സ്‌കൂള്‍ ഐഡന്റിറ്റി കാര്‍ഡ്, ഫോട്ടോ എന്നിവ സഹിതം ഓണ്‍ലൈനില്‍ അപേക്ഷിക്കാം. സിബിഎസ്ഇ വിദ്യാര്‍ഥികള്‍ക്ക് രക്ഷാകര്‍ത്താക്കള്‍ നികുതി അടച്ചതിന്‍റെ രേഖയും സമര്‍പ്പിക്കണം.

ടിഎ കനാലില്‍ പായലും പോളയും; മഴക്കാലപൂര്‍വ ശുചീകരണം നടന്നില്ല

വള്ളികുന്നം: വള്ളികുന്നം പഞ്ചായത്തിലൂടെയുള്ള ടിഎ കനാലില്‍ പായലും പോളയുംനിറഞ്ഞ് വെള്ളത്തിന്‍റെ ഒഴുക്ക് തടസപ്പെട്ടു. ഇതോടെ കനാലിന് ഇരുവശവുമുള്ള വീടുകള്‍ വെള്ളപ്പൊക്ക ഭീഷണിയിലായി. കനാലില്‍ മഴക്കാലപൂര്‍വ ശുചീകരണം നടന്നിരുന്നില്ല. കഴിഞ്ഞ മഴക്കാലത്ത് ടിഎ കനാല്‍ കവിഞ്ഞൊഴുകി കൊണ്ടോടിമുകള്‍, കാമ്പിശേരി, താളീരാടി, കടുവുങ്കല്‍ വാര്‍ഡുകളിലെ താഴ്ന്നപ്രദേശങ്ങളിലെ ഇരുനൂറോളം വീടുകളില്‍ വെള്ളംകയറിയിരുന്നു. കാമ്പിശേരി അരീക്കര എല്‍പി സ്‌കൂള്‍, കടുവിനാല്‍ മേനി മെമ്മോറിയല്‍ സങ്കേതത്തിലെ സാംസ്‌കാരികനിലയം എന്നിവിടങ്ങളില്‍ അന്ന് ദുരിതാശ്വാസ ക്യാമ്പ് തുറന്നിരുന്നു. 35 കുടുംബങ്ങളാണ് ക്യാമ്പിലുണ്ടായിരുന്നത്. ആറാട്ടുപുഴയില്‍നിന്നു വെട്ടിക്കോട്, ഈരിക്കല്‍പാലം, പള്ളം, മീനത്ത് ഭാഗത്തൂടെ കൊല്ലം ജില്ലയിലെ വട്ടക്കായല്‍, പാവുമ്പ വഴി തൊടിയൂര്‍വരെയാണ് ടിഎ കനാല്‍ പോകുന്നത്. കനാലിനെയും വള്ളികുന്നത്തെ പാടങ്ങളെയും ബന്ധിപ്പിച്ച് തോടുകളുമുണ്ട്. മുന്‍വര്‍ഷങ്ങളിലും മഴക്കാലത്ത് ടിഎ കനാല്‍ കവിഞ്ഞൊഴുകി വീടുകളില്‍ വെള്ളംകയറിയിരുന്നു. കനാല്‍ ആഴംകൂട്ടി പായലും പോളയും നീക്കി ശുചീകരണം നടത്തിയിട്ട് വര്‍ഷങ്ങളായി. രണ്ടുവര്‍ഷം മുമ്പുവരെ തൊഴിലുറപ്പു പദ്ധതിയില്‍പ്പെടുത്തി മാലിന്യം നീക്കിയിരുന്നു. എന്നാല്‍, ആവര്‍ത്തനസ്വഭാവമുള്ള പ്രവൃത്തികള്‍ പദ്ധതിയിലൂടെ നടത്താന്‍ ഇപ്പോള്‍ അനുമതിയില്ല. ഇതോടെയാണ് വൃത്തിയാക്കല്‍ മുടങ്ങിയത്.

വെള്ളപ്പൊക്കത്തിനു കാരണം തോട്ടപ്പള്ളി പൊഴി മുറിക്കാന്‍ വൈകിയത്: സജി ജോസഫ്

ആലപ്പുഴ: നാലു ദിവസം മഴ പെയ്തപ്പോള്‍ കുട്ടനാട്ടില്‍ വെള്ളപ്പൊക്കം സൃഷ്ടിച്ചത് തോട്ടപ്പള്ളി പൊഴി കൃത്യമായി തുറക്കാതിരുന്നത് കൊണ്ടാണെന്ന് ഡിസിസി വൈസ് പ്രസിഡന്‍റ് സജി ജോസഫ് ആരോപിച്ചു. കിഴക്കന്‍ വെള്ളം കാര്യമായി വരാഞ്ഞിട്ടും എസി റോഡിലും കുട്ടനാട്ടിലെ ഇടറോഡുകളിലും വീടുകളിലും കെട്ടിടങ്ങളിലും വെള്ളം കയറിയതില്‍ പ്രതിഷേധിച്ച് കുട്ടനാട് നോര്‍ത്ത്-സൗത്ത് ബ്ലോക്ക് കോണ്‍ഗ്രസ് കമ്മിറ്റികളുടെ നേതൃത്വത്തില്‍ നടത്തിയ എസി റോഡില്‍ വള്ളം ഇറക്കിയ സമരം ഉദ്ഘാടനം ചെയ്യുകയായിരുന്നു അദ്ദേഹം. സമരം നടന്നു കൊണ്ടിരുന്നപ്പോള്‍ എസി റോഡിലെ വെള്ളക്കെട്ടിലൂടെ കടന്നുവന്ന ഫിഷറീസ്-സാംസ്‌കാരിക വകുപ്പ് മന്ത്രി സജി ചെറിയാന്‍റെ വാഹനം തടയാന്‍ സമരക്കാര്‍ ശ്രമിച്ചുവെങ്കിലും പോലീസ് സമയോചിതമായി ഇടപെട്ട് പിന്തിരിപ്പിച്ചു. അമ്പലപ്പുഴ ബ്ലോക്ക് കോണ്‍ഗ്രസ് കമ്മിറ്റി നടത്തിയ സമരത്തെത്തുടര്‍ന്ന് മുന്‍ പ്രതിപക്ഷ നേതാവ് രമേശ് ചെന്നിത്തല ഇടപെട്ടതിന് ശേഷമാണ് പൊഴി കൃത്യമായി തുറന്നത്. ഇത് ആദ്യമേ ചെയ്തിരുന്നുവെങ്കില്‍ ഇവിടെ വെള്ളക്കെട്ട് തുടരില്ലായിരുന്നുവെന്നും അദ്ദേഹം പറഞ്ഞു. നോര്‍ത്ത്, സൗത്ത് ബ്ലോക്ക് പ്രസിഡന്‍റുമാരായ സി.വി. രാജീവ് , ജോര്‍ജ് മാത്യു പഞ്ഞിമരം എന്നിവരുടെ നേതൃത്വത്തില്‍ നടന്ന സമരത്തില്‍ ഡിസിസി വൈസ് പ്രസിഡന്‍റ് ടിജിന്‍ ജോസഫ് മുഖ്യ പ്രസംഗം നടത്തി. ഡിസിസി ജനറല്‍ സെക്രട്ടറി കെ.ഗോപകുമാര്‍, യുഡിഎഫ് കുട്ടനാട് ചെയര്‍മാന്‍ ജോസഫ് ചേക്കോടന്‍, സൈറിഷ് ജോര്‍ജ്, സിബി മുലംകുന്നം, എ.കെ. കുഞ്ചെറിയ, ജി. സൂരജ്, തങ്കച്ചന്‍ കുലിപ്പുരയ്ക്കല്‍, ബന്‍സന്‍ ജോസഫ് തുടങ്ങിയവര്‍ പ്രസംഗിച്ചു.

ലഹരിക്കെതിരേ ഫ്ലാഷ് മോബുമായി കുരുന്നുകൾ

അന്പലപ്പുഴ: പ്രവേശനോത്സവ ദിവസം ലഹരിക്കെതിരേ ഫ്ലാഷ് മോബുമായി കുരുന്നുകൾ. പുന്നപ്ര ഗവ. ജെബി സ്കൂളിലെ കുട്ടികളാണ് ലഹരിക്കെതിരേ ബോധവത്കരണവുമായി ഫ്ലാഷ് മോബ് അവതരിപ്പിച്ചത്. ലഹരിക്കെതിരേയുള്ള പ്ലാക്കാർഡുകളും എല്ലാ വിദ്യാർഥികളും കൈയിലേന്തിയിരുന്നു. ആലപ്പുഴ ജില്ലയിൽ എല്ലാ ക്ലാസ് മുറിയും ഹൈടെക്കാക്കി മാറ്റിയതിന്‍റെ ഉദ്ഘാടനവും പ്രവേശനോത്സവ ദിവസം നടന്നു. പുതിയ അധ്യയന വർഷത്തിൽ ക്ലാസിലെത്തിയ വിദ്യാർഥികളെ കാത്തിരുന്നത് ഹൈടെക് ക്ലാസ് മുറികളായിരുന്നു. പ്രീ പ്രൈമറി മുതൽ എൽപി വിഭാഗം വരെ എല്ലാ ക്ലാസ് മുറിയും ഹൈടെക്കാക്കി ജില്ലയ്ക്ക് അഭിമാനമാകുകയാണ് ഈ പൊതു വിദ്യാലയം. 500ഓളം വിദ്യാർഥികൾ പഠിക്കുന്ന ഈ വിദ്യാലയത്തിൽ പഴയ നാല് ഹൈടെക് ക്ലാസ് മുറികൾ ഉൾപ്പെടെ 19 ക്ലാസ് മുറികളാണ് ഏഴു ലക്ഷം രൂപ ചെലവിൽ ഹൈടെക്കാക്കി മാറ്റിയത്. പൊതുജന പങ്കാളിത്തത്തോടെ സ്കൂൾ വികസന സമിതിയുടെയും എസ്എംസിയുടെയും നേതൃത്വത്തിലാണ് സ്കൂളിനെ ആധുനികവത്കരിച്ചത്. സമ്പൂർണ ഹൈടെക് പദ്ധതിയുടെ ഉദ്ഘാടനവും പഞ്ചായത്ത്തല പ്രവേശനോത്സവവും പുന്നപ്ര തെക്ക് പഞ്ചായത്ത് പ്രസിഡന്‍റ് പി.ജി. സൈറസ് നിർവഹിച്ചു.

ഹരിപ്പാട് നഗരസഭാതല പ്രവേശനോത്സവം മണ്ണാറശാല യുപി സ്കൂളിൽ നടന്നു

ഹരിപ്പാട്: ഹരിപ്പാട് ഉപജില്ലയിൽ ഏറ്റവും കൂടുതൽ വിദ്യാർഥികൾ പഠനം നടത്തുന്ന പ്രൈമറി പൊതുവിദ്യാലയമായ മണ്ണാറശാല യുപി സ്കൂളിൽ ഹരിപ്പാട് നഗരസഭാതല പ്രവേശനോത്സവം നടന്നു. രമേശ്‌ ചെന്നിത്തല എംഎൽഎ ഉദ്ഘാടനം ചെയ്തു. നഗരസഭാ ചെയർമാൻ കെ.കെ. രാമകൃഷ്ണൻ അധ്യക്ഷത വഹിച്ചു. വൈസ് ചെയർപേഴ്സൺ സുബി പ്രജിത്ത്, വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ എസ്. കൃഷ്ണകുമാർ എന്നിവർ മുഖ്യപ്രഭാഷണം നടത്തി. ആരോഗ്യ സ്റ്റാൻഡിംഗ് കമ്മിറ്റി ചെയർമാൻ എസ്. നാഗദാസ് ഉപഹാര സമർപ്പണം നിർവഹിച്ചു. മാനേജ്‌മെന്‍റ് പ്രതിനിധി എൻ. ജയദേവൻ പതാക ഉയർത്തി. മുൻ അധ്യാപിക ഇ.പി. ബിന്ദു പഠനോപകരണ വിതരണം നടത്തി. സ്റ്റാൻഡിംഗ് കമ്മിറ്റി ചെയർമാന്മാരായ വിനു അർ. നാഥ്, മിനി സാറാമ്മ, നിർമല കുമാരി, കൗൺസിലർ എസ്. രാധാമണിയമ്മ, പിടിഎ പ്രസിഡന്‍റ് സി. പ്രകാശ്, വൈസ് പ്രസിഡന്‍റ് പി. ഭാനു സരിഗ, എംപിടിഎ പ്രതിനിധി കെ. കവിത, കെ.അർ. രഞ്ജന, ആർ.ബീന, പ്രഥമാധ്യാപിക കെ.എസ്. ബിന്ദു, സ്റ്റാഫ് സെക്രട്ടറി ആർ.എസ്. ശ്രീലക്ഷ്മി എന്നിവർ പ്രസംഗിച്ചു.

വിദ്യാഭ്യാസരംഗത്ത് കേരളം രാജ്യത്തിനാകെ മാതൃക: മന്ത്രി വി. ശിവൻകുട്ടി

ചെങ്ങന്നൂർ: കേരളത്തിലെ വിദ്യാഭ്യാസ മേഖല കഴിഞ്ഞ ഒൻപത് വർഷത്തിനുള്ളിൽ രാജ്യത്തിനാകെ മാതൃകയായി മാറിയെന്ന് വിദ്യാഭ്യാസമന്ത്രി വി. ശിവൻകുട്ടി പറഞ്ഞു. അങ്ങാടിക്കൽ തെക്ക് ഗവ. ഹയർ സെക്കൻഡറി സ്കൂളിലെ പുതിയ കെട്ടിടം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. കിഫ്ബി വഴി 2460 കോടി രൂപ ഉൾപ്പെടെ വിദ്യാലയങ്ങളുടെ അടിസ്ഥാന സൗകര്യ വികസനത്തിനായി 5000 കോടി രൂപ സർക്കാർ ചെലവഴിച്ചുവെന്നും മന്ത്രി പറഞ്ഞു. പഠന നിലവാരം ഉയർത്തുന്നതിനും വിദ്യാലയ സൗകര്യങ്ങളും പരിസരവും കാത്തു സൂക്ഷിക്കുന്നതിനും അധ്യാപകരും രക്ഷകർത്താക്കളും തദ്ദേശ സ്വയംഭരണ സ്ഥാപനങ്ങളും ഒരുപോലെ ശ്രദ്ധിക്കണമെന്നും ചടങ്ങിൽ അധ്യക്ഷത വഹിച്ച മന്ത്രി സജി ചെറിയാൻ പറഞ്ഞു. വിദ്യാകിരണം മിഷൻ പദ്ധതിയിലൂടെ കിഫ്ബി ഫണ്ടിൽ 1.30 കോടി രൂപ ചെലവഴിച്ചാണ് സ്കൂളിൽ പുതിയ കെട്ടിടം നിർമിച്ചത്. ആർഡിഡി സുധ റിപ്പോർട്ട് അവതരിപ്പിച്ചു. ചെങ്ങന്നൂർ നഗരസഭാധ്യക്ഷ അഡ്വ. ശോഭ വർഗീസ്, കെഎസ്‌സിഎംഎംസി ചെയർമാൻ എം.എച്ച്. റഷീദ്, എം. ശശികുമാർ, നഗരസഭാ സ്ഥിരംസമിതി അധ്യക്ഷ ശ്രീദേവി ബാലകൃഷ്ണൻ, എം.ജി ജയകൃഷ്ണൻ, ബിപിഒ ജി. കൃഷ്ണകുമാർ, മോഹൻ കൊട്ടാരത്തുപറമ്പിൽ, ടി.കെ. ഇന്ദ്രജിത്ത്, കെ.എച്ച്. രാജേഷ്, വി.എസ്. സവിത, സ്കൂൾ പ്രിൻസിപ്പാൾ എം. നിശാന്ത് മോഹൻ എന്നിവർ പ്രസംഗിച്ചു.

അപ്പര്‍ കുട്ടനാട്ടില്‍ ജലനിരപ്പ് താഴ്ന്നു തുടങ്ങി

എടത്വ: അപ്പര്‍ കുട്ടനാട്ടില്‍ ജലനിരപ്പ് താഴ്ന്നു തുടങ്ങി. ഒറ്റപ്പെട്ട മഴയ്ക്ക് ശമനമില്ല. ശക്തമായ മഴയിലും കിഴക്കന്‍ വെള്ളത്തിന്‍റെ വരവിലും അപ്പര്‍ കുട്ടനാട്ടിലെ ജലനിരപ്പ് അപകട നിലയില്‍ എത്തിയിരുന്നു. അപ്പര്‍ കുട്ടനാട്ടിലെ അഞ്ച് പഞ്ചായത്തുകളിലാണ് അതിരൂക്ഷമായ വെള്ളപ്പൊക്കക്കെടുതി നേരിട്ടത്. നൂറുകണക്കിന് വീടുകള്‍ വെള്ളത്തില്‍ മുങ്ങി. ഇന്നലെ വൈകുന്നേരവും തലവടി, മുട്ടാര്‍, വീയപുരം, തകഴി പ്രദേശങ്ങളിലെ വീടുകളില്‍ കയറിയ വെള്ളം പൂര്‍ണമായി മാറിയിട്ടില്ല. വെള്ളം കയറി മുങ്ങിയ വീടുകളില്‍നിന്ന് ജലം പൂര്‍ണമായി വിട്ടുപോകാന്‍ ഇനിയും ദിവസങ്ങള്‍ വേണ്ടി വരും. ഗ്രാമീണ സര്‍വീസ് റോഡുകളും വെള്ളത്തില്‍ മുങ്ങിയ നിലയിലാണ്. ഒട്ടുമിക്ക പഞ്ചായത്ത് റോഡുകളും അരയോളം വെള്ളത്തില്‍ മുങ്ങിക്കിടക്കുകയാണ്. തലവടിയിലെ ചില സ്‌കൂള്‍ മുറ്റങ്ങളില്‍ വെള്ളക്കെട്ട് രൂക്ഷമാണ്. പ്രവേശനോത്സവം നടത്തേണ്ട സ്‌കൂളുകളാണ് വെള്ളത്തിലായത്. വെള്ളം ഇറങ്ങി തുടങ്ങിയ പ്രദേശങ്ങളില്‍ ശുചീകരണ പ്രവര്‍ത്തനം ആരംഭിച്ചിട്ടുണ്ട്. ക്യാമ്പുകളില്‍ കഴിയുന്നവര്‍ വീടുകളിലെത്തി ശുചീകരണം ആരംഭിച്ചിട്ടുണ്ട്. ദുരിതബാധിതര്‍ക്ക് വീടുകളില്‍ താമസ സൗകര്യം ഒരുക്കാന്‍ ഇനിയും കാത്തിരിക്കേണ്ടി വരും. കനത്ത മഴ അല്പം ശമിച്ച് വെള്ളം ഇറങ്ങി തുടങ്ങിയെങ്കിലും ഒറ്റപ്പെട്ട കനത്ത മഴ ജനങ്ങളില്‍ ആശങ്ക സൃഷ്ടിക്കുന്നുണ്ട്. ‌ഇന്നലെ പുലര്‍ച്ചെ ശക്തരായ മഴ പെയ്‌തെങ്കിലും വൈകുന്നേരം അഞ്ചുവരെ തെളിഞ്ഞ അന്തരീക്ഷമായിരുന്നു. പിന്നീട് കാറ്റിനൊപ്പം ശക്തമായ മഴ അപ്പര്‍ കുട്ടനാടിന്‍റെ വിവിധ മേഖലയില്‍ പെയ്തിരുന്നു. രണ്ടു ദിവസമായി ഒറ്റപ്പെട്ട കനത്ത മഴ അപ്പര്‍ കുട്ടനാട്ടില്‍ പെയ്യുന്നുണ്ട്. വെള്ളം ഒഴിക്കിവിടാനുള്ള താമസവും ഒറ്റപ്പെട്ട കനത്ത മഴയുമാണ് ജലനിരപ്പിന് കാര്യമായ മാറ്റം സംഭവിക്കാത്തത്. വരും ദിവസങ്ങളില്‍ കാലവര്‍ഷം വീണ്ടും ശക്തി പ്രാപിച്ചാല്‍ അപ്പര്‍ കുട്ടനാട്ടിലെ ജനങ്ങളുടെ ദുരിതം ഇരട്ടിക്കും. പ്രധാന ഉപജീവന മാര്‍ഗമായ നെല്‍കൃഷിയും കരകൃഷിയും ഏറെക്കുറെ പൂര്‍ണമായി നശിച്ചിട്ടുണ്ട്. നൂറുകണക്കിന് വീടുകളാണ് ഇക്കുറി കാറ്റില്‍ തകര്‍ന്നത്. പൂര്‍ണമായി തകര്‍ന്ന വീടുകളിലെ ദുരിതബാധിതര്‍ ആശ്രയമറ്റ നിലയിലായി. കര്‍ഷകരുടെയും കര്‍ഷക തൊഴിലാളികളുടെയും വീടുകളാണ് അപ്പര്‍ കുട്ടനാട്ടിൽ ഏറെയും തകര്‍ന്നത്. പലര്‍ക്കും സ്വന്തം വീട്ടിലേക്കു മടങ്ങിയെത്താന്‍ കഴിയാത്ത അവസ്ഥയാണ്. റവന്യുവകുപ്പ് നഷ്ടങ്ങളുടെ കണക്കെടുപ്പ് അപ്പര്‍ കുട്ടനാട്ടില്‍ ആരംഭിച്ചിട്ടില്ല. കനത്ത മഴയിലും കാറ്റിലും കോടികളുടെ നഷ്ടം കണക്കാക്കുന്നു. അടിയന്തര സഹായമായി കുട്ടനാട്ടിലെ ഓരോ കുടുംബത്തിനും 10,000 രൂപ അനുവദിക്കണമെന്ന് തോമസ് കെ. തോമസ് എംഎൽഎ സര്‍ക്കാരിനോട് ആവശ്യപ്പെട്ടിട്ടുണ്ട്. അതേസമയം വെള്ളപ്പൊക്കക്കെടുതി രൂക്ഷമായി നേരിട്ട പ്രദേശങ്ങളിലെ ദുരിതബാധിത ക്യാമ്പുകളിൽ ആരോഗ്യ വകുപ്പിന്‍റെ നേതൃത്വത്തില്‍ പരിശോധന ആരംഭിച്ചു. കിടപ്പുരോഗികള്‍ക്കും വ്യദ്ധര്‍ക്കും കുട്ടികള്‍ക്കും പ്രതിരോധ മരുന്നുകള്‍ വിതരണം ചെയ്തും ആരോഗ്യ പരിരക്ഷ ഉറപ്പാക്കിയുമാണ് വകുപ്പുതല ഉദ്യോഗസ്ഥരുടെ പ്രവര്‍ത്തനം മുന്നോട്ടു പോകുന്നത്. ക്യാമ്പുകളിലും കഞ്ഞിവീഴ്ത്തല്‍ കേന്ദ്രങ്ങളിലും ജനപ്രതിനിധികളുടെയും റവന്യു ഉദ്യോഗസ്ഥരുടെയും നേത്യത്വത്തില്‍ സ്ഥിതിഗതി വിലയിരുത്തി വരുന്നുണ്ട്. ക്യാന്പുകളിൽ 10,029 പേർ ആലപ്പുഴ: മഴവിട്ടുനിന്നതോടെ വെള്ളപ്പൊക്കഭീഷണി ഒഴിയുന്നു. കുട്ടനാട്ടിലെ മുട്ടാര്‍, തലവടി, എടത്വ മേഖലകളില്‍നിന്ന് വെള്ളമിറങ്ങിത്തുടങ്ങി. പുളിങ്കുന്ന്, കാവാലം, തട്ടാശേരി പ്രദേശങ്ങളില്‍ കാര്യമായ മാറ്റമില്ല. ജില്ലയുടെ മറ്റുഭാഗങ്ങളിലെ താഴ്ന്ന പ്രദേശങ്ങളിലെ വീടുകളില്‍ പലതും വെള്ളക്കെട്ടിലാണ്. 68 ക്യാമ്പില്‍ 2,957 കുടുംബങ്ങളിലെ 10,029 പേരാണുള്ളത്. ഞായറാഴ്ച ഒന്‍പത് വീടുകള്‍ പൂര്‍ണമായും 222 വീടുകള്‍ ഭാഗികമായും തകര്‍ന്നു. തകര്‍ന്ന വീടുകളുടെ എണ്ണം 868 ആയി. ഇതില്‍ 24 വീടുകള്‍ പൂര്‍ണമായും 844 എണ്ണം ഭാഗികമായുമാണ് തകര്‍ന്നത്. കഴിഞ്ഞദിവസം കുപ്പപ്പുറത്ത് മീന്‍ പിടിക്കുന്നതിനിടെ കാണാതായ മുഹമ്മ കായിപ്പുറം പട്ടാണിവെളിയില്‍ പി.സി. രഞ്ജിത്തിന്‍റെ (44) മൃതദേഹം കണ്ടെത്തി. മഴക്കെടുതിയില്‍ ജില്ലയില്‍ ആറുമരണമാണ് ഔദ്യോഗികമായി സ്ഥിരീകരിച്ചിട്ടുള്ളത്. വൈദ്യുതി ലൈനിലേക്ക് മരംവീണുണ്ടായ പ്രശ്‌നങ്ങള്‍ കെഎസ്ഇബിക്ക് പൂര്‍ണമായി പരിഹരിക്കാനായിട്ടില്ല. ഒറ്റപ്പെട്ട വീടുകളിലേക്കുള്ള വൈദ്യുതി പുനഃസ്ഥാപിക്കലാണ് ബാക്കിയുള്ളത്. ജീവനക്കാരുടെ കുറവ് പ്രവര്‍ത്തനത്തെ ബാധിച്ചിട്ടുണ്ട്. സര്‍വീസ് പുനരാരംഭിച്ചു അമ്പലപ്പുഴ-തിരുവല്ല സംസ്ഥാനപാതയില്‍ കെഎസ്ആര്‍ടിസി സര്‍വീസ് പുനരാരംഭിച്ചു. എന്നാല്‍, ആലപ്പുഴയില്‍നിന്ന് തട്ടാശേരി, പുളിങ്കുന്ന് ഭാഗത്തേക്കുള്ള സര്‍വീസുകള്‍ തുടങ്ങിയിട്ടില്ല. ദുരിതാശ്വാസ ക്യാമ്പുകള്‍ ചേര്‍ത്തല-രണ്ട്, അമ്പലപ്പുഴ-21, കുട്ടനാട്-15, കാര്‍ത്തികപ്പള്ളി-12, മാവേലിക്കര-മൂന്ന്, ചെങ്ങന്നൂര്‍-15 എന്നിങ്ങനെയാണ് ദുരിതാശ്വാസക്യാന്പുകൾ പ്രവർത്തിക്കുന്നത്. കുട്ടനാട് താലൂക്കിലെയും പുറക്കാട് പഞ്ചായത്തിലെയും വിദ്യാഭ്യാസ സ്ഥാപനങ്ങള്‍ക്ക് ഇന്നും അവധി ആലപ്പുഴ: കഴിഞ്ഞ ദിവസങ്ങളിലുണ്ടായ ശക്തമായ മഴയെത്തുടര്‍ന്ന് കുട്ടനാട്, അമ്പലപ്പുഴ താലൂക്കുകളിലെ മിക്ക പ്രദേശങ്ങളിലും വെള്ളക്കെട്ടുകള്‍ രൂപപ്പെടുകയും ജലനിരപ്പ് വര്‍ധിക്കുകയും ചെയ്യുന്ന സാഹചര്യത്തില്‍ ഇന്നും കുട്ടനാട് താലൂക്കിലെ പ്രഫഷണല്‍ കോളജുകള്‍ ഉള്‍പ്പെടെയുള്ള എല്ലാ വിദ്യാഭ്യാസ സ്ഥാപനങ്ങള്‍ക്കും അങ്കണവാടികള്‍ക്കും ട്യൂഷന്‍ സെന്‍ററുകള്‍ക്കും അമ്പലപ്പുഴ താലൂക്കിലെ പുറക്കാട് പഞ്ചായത്തിലെ എല്ലാ വിദ്യാഭ്യാസ സ്ഥാപനങ്ങള്‍ക്കും ജില്ലാ കളക്ടർ അവധി പ്രഖ്യാപിച്ചു. കൂടാതെ ജില്ലയില്‍ ക്യാമ്പുകള്‍ പ്രവര്‍ത്തിക്കുന്ന സ്‌കൂളുകള്‍ക്കും അവധി നല്‍കിയിട്ടുണ്ട്. മുന്‍ നിശ്ചയിച്ച പരീക്ഷകള്‍ക്ക് അവധി ബാധകമല്ല. കുട്ടനാട്ടില്‍ സ്‌കൂളുകള്‍ വെള്ളക്കെട്ടില്‍ ആലപ്പുഴ: പ്രവേശനോത്സവദിനത്തില്‍ കുട്ടനാട്ടിലെ സ്‌കൂളുകള്‍ അടഞ്ഞുകിടന്നു. ജലനിരപ്പ് ഉയര്‍ന്നുനില്‍ക്കുന്നതിനാല്‍ കുട്ടനാട് താലൂക്കിലെ എല്ലാ വിദ്യാഭ്യാസ സ്ഥാപനങ്ങള്‍ക്കും കളക്ടര്‍ അവധി പ്രഖ്യാപിച്ചിരുന്നു. കുട്ടനാട്ടിലെ പകുതിയിലധികം സ്‌കൂളുകളില്‍ വെള്ളം കയറിയിട്ടുണ്ട്. ഉയര്‍ന്ന പ്രദേശങ്ങളിലെ സ്‌കൂളുകളിലാകട്ടെ ദുരിതാശ്വാസ ക്യാമ്പുമുണ്ട്. വള്ളത്തെയും ജലഗതാഗത വകുപ്പിന്‍റെ ബോട്ടിനെയും ആശ്രയിക്കുന്ന കുട്ടികള്‍ കുട്ടനാട്ടിലേറെയുണ്ട്. വെള്ളമിറങ്ങിയാലും സ്‌കൂളുകള്‍ വൃത്തിയാക്കി പഠനം തുടങ്ങണമെങ്കില്‍ കുറച്ചു സമയമെടുത്തക്കും. അതിനാല്‍ താലൂക്കില്‍ എന്ന് അധ്യയനം തുടങ്ങണമെന്നതില്‍ തീരുമാനമായിട്ടില്ല. വെള്ളമിറങ്ങിത്തുടങ്ങിയത് ആശ്വാസമായിട്ടുണ്ടെങ്കിലുംജലനിരപ്പും ക്യാമ്പിന്‍റെ പ്രവര്‍ത്തനവും വിലയിരുത്തിയാകും അവധിക്കാര്യത്തില്‍ തീരുമാനമുണ്ടാകുക.

കായിപ്പുറം സൗഹൃദവേദിയുടെ പ്രവർത്തനങ്ങൾ പ്രശംസനീയം: മന്ത്രി പി. പ്രസാദ്

മുഹമ്മ: കായിപ്പുറം സൗഹൃദവേദി വായനശാലയുടെ ജനോപകാര പ്രവർത്തനങ്ങൾ എത്ര പ്രശംസിച്ചാലും മതിയാകില്ലെന്ന് മന്ത്രി പി. പ്രാസാദ്. വായനശാലയുടെ വാർഷികത്തോടനുബന്ധിച്ച് നടന്ന സാംസ്കാരിക സമ്മേളനം ഉദ്ഘാടനം ചെയ്യുകയായിരുന്നു മന്ത്രി. എല്ലാവിധ സൗകര്യങ്ങളുമുള്ള ലാബ് നാടിന് ലഭിച്ചിരിക്കയാണ്. ലാബ് സന്ദർശിച്ചപ്പോൾ ഏറെ തൃപ്തി തോന്നി. കാൽ നൂറ്റാണ്ടിലേറെയായി ഒരു കുട്ടം ആൾക്കാർ അർപ്പണബുദ്ധിയോടെ നിലകൊള്ളുന്നതിനാലാണ് ഇത്തരം നേട്ടങ്ങളിലൂടെ കടന്നുപോകാൻ കഴിയുന്നതെന്നും മന്ത്രി പറഞ്ഞു. മനുഷ്യനന്മയുടെ മഹാ മഴ പെയ്ത്താണ് സൗഹൃദവേദിയുടെ അമരക്കാരിലൂടെ നാടിന് ലഭിക്കുന്നതെന്ന് മുഖ്യപ്രഭാഷണം നടത്തിയ ഗ്രാന്‍റ്മാസ്റ്റർ ജി.എസ്. പ്രദീപ് പറഞ്ഞു.ആയിരം വിദ്യാർഥികൾക്കുള്ള പഠനോപകരണ വിതരണം പഞ്ചായത്ത് പ്രസിഡന്‍റ് സ്വപ്ന ഷാബു നിർവഹിച്ചു. വായനശാലാ പ്രസിഡന്‍റ് ടി. കുഞ്ഞുമോൻ അധ്യക്ഷത വഹിച്ചു. അർജുൻ മഹാദേവൻ, മുഹമ്മ എസ്എച്ച്ഒ ലൈസാദ് മുഹമ്മദ്, ആർ. വിനോദ്, പി.കെ. ബിനോയ്, വിജീഷ് മുല്ലശേരി, ഷെജിമോൾ സജീവ്, ഡി. തങ്കച്ചൻ എന്നിവർ പ്രസംഗിച്ചു. സമ്മേളനത്തിനു മുന്നോടിയായി വർണാഭമായ സാംസ്കാരിക ജാഥ നടന്നു.

താമരപ്പൂ വസന്തത്തിൽ കരിങ്ങാലി പാടശേഖരം

ചാരുംമൂട്: പ്രകൃതിരമണീയമായ നൂറനാട്, പന്തളം പഞ്ചായത്തുകളുടെ അതിർത്തിയിൽ വരുന്ന കരിങ്ങാലി പാടശേഖരത്തിൽ താമരപ്പൂവസന്തം. കരിങ്ങാലി പുഞ്ചയുടെ പടിഞ്ഞാറ് നൂറനാട് പള്ളിമുക്കം ഭദ്രകാളീ ക്ഷേത്രത്തോടു ചേർന്നുള്ള ഭാഗത്താണ് നിറയെ താമരപ്പൂക്കൾ പൂത്തത്. ഈ ഭാഗം തരിശായിക്കിടക്കുകയാണ്. കരിങ്ങാലിപ്പാടത്ത് താമര വിരിഞ്ഞതോടെ വിസ്മയക്കാഴ്ച കാണാൻ ധാരാളം പേർ ഇവിടേക്ക് ഒഴുകിയെത്തുകയാണ്. മുമ്പ് ആമ്പൽപ്പൂക്കളുണ്ടായിരുന്ന പാടത്താണ് ഇപ്പോൾ താമര വിരിയുന്നത്. ക്ഷേത്രത്തിൽ പൂജയ്ക്കായി കൊണ്ടുവന്ന താമരപ്പൂക്കൾ പുഞ്ചയിൽ ഇട്ടതോടെയാണ് താമരച്ചെടികൾ കിളിർത്തതെന്നു പറയുന്നു.

ദേശീയപാതാ നിർമാണം: ചേപ്പാട് ജംഗ്ഷൻ ചെളിക്കുഴിയായി

കായംകുളം: ദേശീയപാത 66ന്‍റെ നിർമാണവുമായി ബന്ധപ്പെട്ട് ചേപ്പാട് ജംഗ്ഷൻ മുതൽ ഒരു കിലോമീറ്റർ ദൂരത്തിൽ യാത്ര ദുരിതത്തിലായി. സികെഎച്ച്എസ് സ്കൂളിൽ കുട്ടികൾക്ക് പ്രവേശിക്കാൻ കഴിയാത്തവിധം റോഡിൽ വെള്ളക്കെട്ടാണ്. പോസ്റ്റ്ഓഫീസ്, ആയുർവേദ ആശുപത്രി, ആരാധനാലയങ്ങൾ, റോഡ് സമീപം താമസിക്കുന്ന നാട്ടുകാർ എന്നിവർക്ക് യാത്ര ദുഷ്കരമായി. വെള്ളക്കെട്ടും ചെളിയും മൂലം റോഡ് സഞ്ചാരയോഗ്യമല്ലാതായി. ഉയരപ്പാതയുടെ നിർമാണം നടക്കുന്ന ഭാഗത്തെ റോഡ് സഞ്ചാരയോഗ്യമല്ല. യാത്രാദുരിതത്തിന് അടിയന്തര പരിഹാരം കാണണമെന്നാവശ്യപ്പെട്ട് സിപിഎം പ്രവർത്തകർ ദേശീയപാത കോൺട്രാക്‌ട് പ്ലാന്‍റ് ഓഫീസിലെ ജീവനക്കാരെ ഉപരോധിച്ചു. സമരക്കാർ ഉദ്യോഗസ്ഥരുമായി ചർച്ച നടത്തി. പ്രശ്നത്തിന് അടിയന്തര പരിഹാരം കാണുമെന്ന് കോൺട്രാക്ടറുടെ പ്രതിനിധികൾ ഉറപ്പ് നൽകിയതിനെത്തുടർന്നാണ് പ്രതിഷേധം അവസാനിപ്പിച്ചത്. ഉപരോധ സമരത്തിന് എസ്എഫ് ഐ സംസ്ഥാന പ്രസിഡന്‍റ് എം. ശിവപ്രസാദ്, സിപിഎം ചേപ്പാട് പടിഞ്ഞാറ് എൽസി സെക്രട്ടറി കെ. രഘു, ചേപ്പാട് പഞ്ചായത്ത് വൈസ് പ്രസിഡന്‍റ് ബിന്ദു രാജേന്ദ്രൻ, എൽസി അംഗം എസ്. അനി, ബ്രാഞ്ച് സെക്രട്ടറി ജി. സന്തോഷ്, ഷാജി തോമസ്, അജയൻ, വേണുഗോപാൽ എന്നിവർ നേതൃത്വം നല്‍കി.

നങ്ങ്യാര്‍കുളങ്ങരയിലെ ഫ്ലാറ്റ് സമുച്ചയം ഭാഗികമായി പൊളിക്കാനുള്ള സാധ്യതതേടി ദേശീയപാത അഥോറിറ്റി

ആലപ്പുഴ: കാലിക്കറ്റ് എന്‍ഐടി വിദഗ്ധ സംഘം മുഴുവനായി പൊളിക്കണമെന്നു നിര്‍ദേശിച്ച നങ്ങ്യാര്‍കുളങ്ങരയിലെ ഫ്ലാറ്റ് സമുച്ചയം ഭാഗികമായി പൊളിക്കാനുള്ള സാധ്യത ദേശീയപാത അഥോറിറ്റി തേടുന്നു. ഫ്ലാറ്റ് പൂര്‍ണമായും പൊളിക്കുന്നതു വന്‍ സാമ്പത്തിക ബാധ്യതയാകുമെന്നതു കണക്കാക്കിയാണു പകുതി പൊളിക്കാന്‍ ആധുനിക സാങ്കേതികവിദ്യകളുടെ സാധ്യത പരിശോധിക്കാന്‍ ദേശീയപാത റീജനല്‍ ഓഫിസില്‍ നിന്നു നിര്‍ദേശം ലഭിച്ചത്. ഫ്ലാറ്റ് ഭാഗികമായി നിലനിര്‍ത്തുന്നതിലൂടെ നഷ്ടപരിഹാര ഇനത്തില്‍ ദേശീയപാത അഥോറിറ്റിക്ക് പത്തുകോടിയിലേറെ രൂപ ലാഭിക്കാനാകും. പാതയോരത്തുള്ള ഫ്ലാറ്റിന്‍റെ പകുതിയോളം ഭാഗം പൊളിച്ചെങ്കില്‍ മാത്രമേ ആറുവരിപ്പാതയുടെ നിര്‍മാണം പൂര്‍ത്തിയാക്കാനാകൂ. എന്നാല്‍ ഫ്ലാറ്റ് മുഴുവനായും നഷ്ടപരിഹാരം നല്‍കി ഏറ്റെടുക്കണമെന്ന ആവശ്യവുമായി ഫ്ലാറ്റിലെ താമസക്കാര്‍ ഹൈക്കോടതിയെ സമീപിച്ച് സ്റ്റേ വാങ്ങിയിരുന്നു. ഇതിനു പിന്നാലെ നഷ്ടപരിഹാരം നല്‍കി ഫ്ലാറ്റ് ഏറ്റെടുക്കുന്നതിനു നിയമോപദേശവും തേടിയിരുന്നു. തുടര്‍ന്നാണു കാലിക്കറ്റ് എന്‍ഐടിയില്‍നിന്നുള്ള വിദഗ്ധ സംഘം ഫ്ലാറ്റിന്‍റെ ബലത്തെക്കുറിച്ചു പഠനം നടത്തി ഭാഗികമായി പൊളിക്കുന്നതു സുരക്ഷിതമാകില്ലെന്നു റിപ്പോര്‍ട്ട് ചെയ്തത്. രണ്ടു ടവറുകളുടെയും അടിത്തറ തമ്മില്‍ ബന്ധമില്ലെന്നാണു ദേശീയപാത അഥോറിറ്റി പറയുന്നത്. ഡയമണ്ട് കട്ടിംഗ് എന്ന സാങ്കേതികവിദ്യ ഉപയോഗിച്ചു ഒറു ടവര്‍ പൊളിച്ചാല്‍ ശേഷിക്കുന്ന ഭാഗത്തിനു കേടുപാടുണ്ടാകില്ലെന്നാണു വിലയിരുത്തല്‍. എന്നാല്‍ അത്തരം പ്രവൃത്തികളില്‍ വിദഗ്ധരായ കരാറുകാരും തൊഴിലാളികളും ഉണ്ടോയെന്നതില്‍ സംശയമുണ്ട്. വിദഗ്ധരെ ലഭ്യമായെങ്കില്‍ മാത്രമാകും ഫ്‌ളാറ്റ് ഇത്തരത്തില്‍ പൊളിക്കുക. നങ്ങ്യാര്‍കുളങ്ങര ജംഗ്ഷനില്‍ മേല്‍പാലം നിര്‍മാണത്തിനായി തൂണുകളുടെ നിര്‍മാണം പുരോഗമിക്കുകയാണ്. ഫ്ലാറ്റ് ഭാഗികമായെങ്കിലും പൊളിച്ചു നീക്കിയാല്‍ മാത്രമേ പാത നിര്‍മാണം പൂര്‍ത്തിയാക്കാനാകൂ.

വൈസ്‌മെൻ ഡിസ്ട്രിക്‌ട് ഭാരവാഹികൾ ചുമതലയേറ്റു

ചെങ്ങന്നൂർ: വൈസ്‌മെൻ ഇന്‍റർനാഷണൽ സെൻട്രൽ ട്രാവൻകൂർ റീജൺ ഡിസ്ട്രിക്‌ട്-രണ്ടിന്‍റെ വാർഷിക സമ്മേളനം ചെങ്ങന്നൂർ വൈസ്മെൻ കമ്യൂണിറ്റി ഹാളിൽ നടന്നു. ഫിഷറീസ്-സാംസ്കാരിക മന്ത്രി സജി ചെറിയാൻ സമ്മേളനം ഉദ്ഘാടനം ചെയ്തു. ഡിസ്ട്രിക്‌ട് ഗവർണർ ഡോ. സജി കുര്യൻ അധ്യക്ഷത വഹിച്ചു. രമേശ് ചെന്നിത്തല എംഎൽ‌എ മുഖ്യപ്രഭാഷണം നടത്തി. പുതിയ ഡിസ്ട്രിക്‌ട് ഗവർണറായി ചെങ്ങന്നൂർ ക്ലബ് അംഗമായ ഫിലിപ്പിനെ നിയുക്ത റീജണൽ ഡയറക്ടർ ഡോ. വി. രാജേഷ് സ്ഥാനാരോഹണം ചെയ്യിച്ചു. ഈ വർഷം ഡിസ്ട്രിക്‌ട് തലത്തിൽ നടപ്പിലാക്കുന്ന വിവിധ പ്രോജക്‌ടുകളുടെ ഉദ്ഘാടനം നിയുക്ത ഇന്‍റർനാഷണൽ കൗൺസിൽ അംഗവും നിയുക്ത ഇന്ത്യ ഏരിയ പ്രസിഡന്‍റുമായ മാമ്മൻ ഉമ്മനും റീജണൽ ഡയറക്ടർ ഫ്രാൻസിസ് ഏബ്രഹാമും ചേർന്ന് നിർവഹിച്ചു. ഡിസ്ട്രിക്‌ട് ബുള്ളറ്റിൻ ലഫ്. റീജണൽ ഡയറക്ടർ ഡോ. വിനോദ് രാജ് പ്രകാശനം ചെയ്തു. നിയുക്ത ഡിസ്ട്രിക്‌ട് ഗവർണർ സനോജ് വർഗീസ്, റിജോ ജോൺ, അഡ്വ. ജോർജ്‌ തോമസ്, കെ. ഷിബുരാജൻ, രാജൻ കണ്ണാട്ട്, ജ്യൂണി തോമസ്, റിജോ ജോൺ ജോർജ്, ഗോപു പുത്തൻമഠത്തിൽ, മുരളിദാസ് സാഗർ, സി.എം.എസ്. നായർ, തോമസ് ഏബ്രഹാം, മനോജ് ഏബ്രഹാം ജോസഫ്, മറിയാമ്മ ഫിലിപ്പ്, ജേക്കബ് ഫിലിപ്പ്, പി.കെ. കുര്യൻ, ഐപ് സഖറിയ എന്നിവർ പ്രസംഗിച്ചു.

മാവേലിക്കര സബ് ആർടി ഓഫീസിന് ഇരട്ടനേട്ടം

മാവേലിക്കര: സബ് ആർടി ഓഫീസിന് ഇരട്ട നേട്ടം. 2023-24 കാലഘട്ടത്തിലെ മുഖ്യമന്ത്രിയുടെ ട്രാൻസ്പോർട്ട് മെഡൽ മാവേലിക്കര സബ് ആർടി ഓഫീസിലെ അസിസ്റ്റന്‍റ് മോട്ടോർ വെഹിക്കിൾ ഇൻസ്പെക്ടർമാരായ പ്രസന്നകുമാറും സജു പി. ചന്ദ്രനും അർഹരായി. പ്രളയ-കോവിഡ് ദുരന്ത കാലഘട്ടത്തിൽ നടത്തിയ പ്രവർത്തനങ്ങൾക്കും റോഡ് സുരക്ഷാ പ്രവർത്തനങ്ങൾക്കുമാണ് പ്രസന്നകുമാർ ബഹുമതിക്ക് അർഹനായത്. സാമൂഹിക മാധ്യമങ്ങളിലൂടെ റോഡ് സുരക്ഷാ നിയമങ്ങൾ സാധാരണ ജനങ്ങളിലേക്ക് എത്തിക്കുന്നതിനുള്ള ബോധവത്കരണ വീഡിയോകളും റീൽസുകളും ചിട്ടപ്പെടുത്തി മോട്ടോർ വാഹനവകുപ്പിന്‍റെ സമൂഹിക മാധ്യമപേജിനു നൽകിയ പ്രവർത്തനത്തിനാണ് സജു പി. ചന്ദ്രൻ ബഹുമതിക്ക് അർഹനായത്. ഇരുവരെയും ഗതാഗതമന്ത്രി കെ.ബി. ഗണേഷ് കുമാർ അനുമോദിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]