ADVERTISEMENT

ADVERTISEMENT

‘ജീവിതോത്സവം’ സമാപിച്ചു

റാന്നി: നാഷണൽ സർവീസ് സ്കീം റാന്നി എംഎസ് ഹയർ സെക്കൻഡറി സ്കൂൾ വിദ്യാർഥികൾ നടത്തിവന്ന 21 ദിവസത്തെ ജീവിതോത്സവം പദ്ധതിയുടെ സമാപനത്തോടനുബന്ധിച്ച് റാന്നി പെരുമ്പുഴ ബസ് സ്റ്റാൻഡിൽ ലഹരിവിരുദ്ധ പൊതുസമ്മേളനവും കലാസദസും നടത്തി.

റാന്നി ഗ്രാമപഞ്ചായത്ത് പ്രസിഡന്‍റ് കെ. ആർ. പ്രകാശ് സമാപന സമ്മേളനം ഉദ്ഘാടനം ചെയ്തു. സ്കൂൾ പ്രിൻസിപ്പൽ സ്മിജു ജേക്കബ് അധ്യക്ഷത വഹിച്ചു. സ്കൂൾ മാനേജർ കെ.സി. ജേക്കബ് മുഖ്യസന്ദേശം നൽകി. ഗ്രാമപഞ്ചായത്ത് മെംബർ സന്ധ്യാദേവി, പ്രോഗ്രാം ഓഫീസർ സ്മിതാ സ്കറിയ, സ്കൂൾ പ്രൊട്ടക്ഷൻ ഗ്രൂപ്പ് അംഗം രവി കുന്നക്കാട്ട്, ഡോ. ജെബു ജോസഫ് എന്നിവർ പ്രസംഗിച്ചു.

സമാപന സമ്മേളനത്തിന്‍റെ ഭാഗമായി വിദ്യാർഥികളുടെ നേതൃത്വത്തിൽ ലഹരിവിരുദ്ധ സന്ദേശം നൃത്തശില്പം, തുടി, ഫ്ലാഷ് മോബ്, കവിതാലാപനം, കലാസദസ് തുടങ്ങിയവ നടത്തി.

ADVERTISEMENT

ചേപ്പാട് ഓർത്തഡോക്സ് പള്ളിയിലെ പോലീസ് നടപടി അപലപനീയം: കെ.സി. വേണുഗോപാൽ

ഹരിപ്പാട്: ദേശീയപാതാ വികസനത്തിന്‍റെ ഭാഗമായി ഹരിപ്പാട് ചേപ്പാട് സെന്‍റ് ജോർജ് ഓർത്തഡോക്സ് വലിയപള്ളിയുടെ മതിലും കുരിശടിയും പൊളിച്ചുമാറ്റുകയും വൈദികരെ മർദിക്കുകയും ചെയ്ത പോലീസ് നടപടി അപലപനീയവും പ്രതിഷേധാർഹവുമാണെന്ന് എഐസിസി ജനറൽ സെക്രട്ടറി കെ.സി. വേണുഗോപാൽ എംപി. പള്ളിയുടെ ഭാഗത്തെ ദേശീയപാതയുടെ നിർമാണം ആരംഭിച്ചപ്പോൾ മുതൽ 1500 വർഷത്തോളം പഴക്കമുള്ള ഒറ്റക്കല്ലിൽ തീർത്ത കൽക്കുരിശും ചരിത്രപ്രാധാന്യമുള്ള പള്ളിയും പൊളിക്കരുതെന്ന ആവശ്യം പലതവണ കത്തിലൂടെയും നേരിട്ടും കേന്ദ്ര ഉപരിതലഗതാഗതമന്ത്രി നിതിൻ ഗഡ്കരിയേയും ദേശീയപാത അഥോറിറ്റിയേയും അറിയിക്കുകയും അതിനുവേണ്ടി വിശ്വാസികൾക്കൊപ്പം നിലപാട് സ്വീകരിക്കുകയും ചെയ്തിട്ടുണ്ടെന്ന് സംഭവസ്ഥലം സന്ദർശിച്ച എംപി പറഞ്ഞു. കുരിശടിയേയും പള്ളിയെയും ഒരുതരത്തിലും ബാധിക്കാത്ത വിധത്തിൽ പള്ളിയുടെ ഭരണസമിതിയെ കൂടി വിശ്വാസത്തിലെടുത്തു മാത്രമേ ആ ഭാഗത്തു നിർമാണം നടത്താവൂ എന്ന കാര്യം പലതവണ, പ്രാദേശികമായി ദേശീയപാത നിർമാണ ചുമതലവഹിക്കുന്ന പ്രൊജക്റ്റ് ഡയറക്ടറോടും ആവശ്യപ്പെട്ടിരുന്നുവെന്നും അവർ അക്കാര്യം ഉറപ്പു നല്കിയിരുന്നുവെന്നും എംപി പറഞ്ഞു. എന്നാൽ, ഉറപ്പിനു വിപരീതമായി നടപടിയെടുത്ത ദേശീയപാത അഥോറിറ്റി ഉദ്യോഗസ്ഥരെ എംപി ശക്തമായ പ്രതിഷേധമറിയിച്ചു. വികാരി ഫാ. ബിജി ജോൺ, ഫാ. ബിനു തോമസ്, ഇടവക ഭരണസമിതി അംഗങ്ങൾ, വിശ്വാസികൾ എന്നിവരോടൊപ്പം എംപി സംഭവസ്ഥലം സന്ദർശിച്ചു.

വോട്ടേഴ്സ് ലിസ്റ്റിൽ വിദ്യാർഥിക്ക് പേരു ചേർക്കാൻ കഴിയുന്നില്ലെന്ന് പരാതി

എടത്വ: പ്രായപൂർത്തിയായിട്ടും വോട്ടേഴ്സ് ലിസ്റ്റിൽ വിദ്യാർഥിക്ക് പേര് ചേർക്കാൻ കഴിയുന്നില്ലെന്ന് പരാതി. എടത്വ പഞ്ചായത്ത് 11 -ാം വാർഡിൽ പച്ച മണ്ണാംതുരുത്തിൽ പ്രിയൻ വി. വർഗീസാണ് വോട്ടർ പട്ടികയിൽ പേര് ചേർക്കാൻ കഴിയാതെ നാലാം വട്ടവും മടങ്ങിയത്. ലിസ്റ്റിൽ പേര് ചേർക്കൽ ആരംഭിച്ചതോടെ പ്രിയൻ വി. വർഗീസ് എടത്വ പഞ്ചായത്തിൽ എത്തിയിരുന്നു. അടുത്ത ഞായറാഴ്ചയിലേക്ക് സമയം മാറ്റി നൽകി. അധികൃതർ നൽകിയ സമയത്ത് എത്തിയെങ്കിലും പഞ്ചായത്ത് അടഞ്ഞു കിടക്കുകയായിരുന്നു. വീണ്ടും അപേക്ഷ നൽകിയതോടെ ഹിയറിംഗിന് വിളിപ്പിച്ചു. ഹിയറിംഗിന് വിളിപ്പിച്ച ദിവസം പഞ്ചായത്തിൽ എത്തിയപ്പോൾ വീണ്ടും അധികൃതർ സമയം നൽകി. വോട്ടർ ലിസ്റ്റ് ക്രമപ്പെടുത്തുന്നതിന്‍റെ ഭാഗമായി ഞായറാഴ്ചയും ഓഫീസ് പ്രവർത്തിക്കുമെന്നാണ് ഉദ്യോസ്ഥർ പറഞ്ഞത്. ഇതു പ്രകാരം ഇന്നലെ പഞ്ചായത്തിൽ എത്തിയെങ്കിലും പതിവു പോലെ ഓഫീസ് അടഞ്ഞുകിടക്കുകയായിരുന്നു. ജീവനക്കാരുമായി ബന്ധപ്പെടാൻ ശ്രമിച്ചെങ്കിലും നടന്നില്ല. പഠനാവശ്യവുമായി നടക്കുന്നതിനിടെ പഞ്ചായത്ത് അധിക്യതർ നിർദേശിച്ച സമയങ്ങളിൽ എത്തിയെങ്കിലും ലിസ്റ്റിൽ പേര് ചേർക്കാൻ കഴിയാത്ത മനോവിഷമത്തിലാണ് വിദ്യാർഥി. തദ്ദേശ തെരഞ്ഞെടുപ്പിൽ കന്നി വോട്ടായി സമ്മതിദാനാവകാശം വിനിയോഗിക്കാനുള്ള പൗരന്‍റെ അവകാശമാണ് പഞ്ചായത്ത് അധികൃതർ ഇല്ലാതാക്കുന്നതെന്ന് ആരോപണമുണ്ട്.

മാന്നാർ ഉറപ്പായും തിളയ്ക്കും

മാന്നാര്‍ ഗ്രാമപഞ്ചായത്ത് അപ്പര്‍ കുട്ടനാട്ടിലെ വിശാലമായ നെല്‍വയലുകള്‍ ഉള്ള പടിഞ്ഞാറന്‍ മേഖലയും മാന്നാര്‍ ടൗണും വെങ്കലപാത്ര ആലകള്‍ ഉള്‍പ്പെടുന്ന കുരട്ടിക്കാടും ഇതിനോടു ചേര്‍ന്നു നില്‍ക്കുന്ന കുട്ടംപേരൂരും ഉള്‍പ്പെടുന്ന ഭൂപ്രദേശം. 17.96 ച.കിലോമീറ്റര്‍ വിസ്തൃതിയുള്ള ഈ പഞ്ചായത്തില്‍ 7,566 കുടുംബങ്ങളാണ് ഉള്ളത്. മാവേലിക്കര ബ്ലോക്ക് പഞ്ചായത്തില്‍ ഉള്‍പ്പെടുന്ന മാന്നാര്‍, ചെങ്ങന്നൂര്‍ താലൂക്കിന്‍റെ രണ്ടാമത്തെ സിരാകേന്ദ്രം. നേട്ടങ്ങള്‍ ടി.വി. രത്നകുമാരി (പഞ്ചായത്ത് പ്രസിഡന്‍റ്) 4ഭൂരഹിതരും ഭവനരഹിതരും അഗതികളും ഇല്ലാത്ത പഞ്ചായത്താക്കി മാറ്റി. 4ഉപജീവന സുരക്ഷയും സാമൂഹ്യ സുരക്ഷയും ഉറപ്പാക്കാൻ കുടുംബശ്രീകളുമായി ചേര്‍ന്നു പദ്ധതി. പച്ചക്കറി കൃഷിയില്‍ സ്വയം പര്യാപ്ത നേടാൻ പദ്ധതികൾ. അങ്കണവാടി, സ്‌കൂള്‍ എന്നിവിടങ്ങളില്‍ കൃഷി. തരിശുനിലങ്ങള്‍ ഇല്ലാതാക്കി. നെല്‍വിത്തുകളും വളവും സൗജന്യമായി നല്‍കി. 42 ലക്ഷം മുടക്കി തോടുകള്‍ ശുചീകരിച്ചു. സ്വന്തം സ്ഥലത്ത് അങ്കണവാടി, എംസിഎഫ്. ഹെല്‍ത്ത് സെന്‍റർ നിര്‍മാണം തുടങ്ങി ലൈഫ് പദ്ധതിയില്‍ 180 വീടുകള്‍. കോട്ടങ്ങള്‍ സുജിത് ശ്രീരംഗം (യുഡിഎഫ് പാർലമെന്‍ററി പാർട്ടി നേതാവ്) വികസനം എല്ലാ മേഖലയിലും പിന്നാക്കം. 2023-24 വര്‍ഷത്തെ പദ്ധതികള്‍ പൂര്‍ണമായും നഷ്ടപ്പെടുത്തി. റോഡ് നിര്‍മാണത്തിനുള്ള മൂന്നു കോടി ലാപ്സാക്കി. ജലജീവന്‍ പദ്ധതി പൂർണമായില്ല. തൊഴിലുറപ്പ് പദ്ധതിയില്‍ റോഡുകള്‍ കോണ്‍ക്രീറ്റ് ചെയ്യാൻ കഴിഞ്ഞില്ല. അങ്കണവാടിക്കു ഭൂമി വാങ്ങിയതില്‍ ക്രമക്കേട്. ക്ഷീരഗ്രാമം പദ്ധതി നടപ്പിലാക്കാതെ 30 ലക്ഷം നഷ്ടപ്പെടുത്തി. ഹരിതകര്‍മ സേനയ്ക്കു വാങ്ങിയത് നിലവാരമില്ലാത്ത വാഹനങ്ങള്‍. ഒറ്റനോട്ടത്തില്‍ മാന്നാര്‍ പഞ്ചായത്തിന്‍റെ സമഗ്ര വികസനത്തിനുള്ള സാധ്യതകള്‍ ഏറെയുണ്ട്. പന്നായി കടവിലെ മിനി പാര്‍ക്ക്, മാന്നാര്‍ ടൗണിന്‍റെ വികസനം, പഞ്ചായത്ത് ബസ് സ്റ്റാന്‍ഡിന്‍റെ ശോച്യാവസ്ഥ, വെങ്കല പാത്രനിര്‍മാണ മുള്‍പ്പടെയുള്ള പരന്പരാഗത തൊഴില്‍ മേഖലയുടെ തിരിച്ചുവരവ്, പമ്പാനദിയുടെ നവീകരണം, ടൂറിസം തുടങ്ങി അനന്തമായ സാധ്യതകൾക്കു കാത്തിരിക്കുകയാണ് മാന്നാര്‍. അട്ടിമറിയിലൂടെ ഭരണം എല്‍ഡിഎഫ് പിടിച്ച പഞ്ചായത്താണ് മാന്നാര്‍. യുഡിഎഫില്‍നിന്നു കൂറു മാറി ഒരംഗം എല്‍ഡിഎഫില്‍ എത്തിയതോടെ യുഡിഎഫ് ഭരിക്കേണ്ട പഞ്ചായത്ത് എല്‍ഡിഎഫ് പക്ഷത്തായി. കൂറുമാറിയെത്തിയ സുനില്‍ ശ്രദ്ധേയത്തെ എല്‍ഡിഎഫ് വൈസ് പ്രസിഡന്‍റാക്കി. എന്നാല്‍, മൂന്നു വര്‍ഷം പിന്നിട്ടപ്പോള്‍ കൂറുമാറ്റ നിരോധന നിയമപ്രകാരം ഇയാള്‍ പുറത്തായി. പിന്നീട് നടന്ന ഉപതെരഞ്ഞെടുപ്പില്‍ എല്‍ഡിഎഫ് വിജയിച്ചതോടെ ഭരണം നിലനിര്‍ത്തി. കക്ഷിനില: ആകെ അംഗങ്ങൾ-18. എല്‍ഡിഎഫ്-9, യുഡിഎഫ് - 8, ബിജെപി-1 .

ഫിറ്റ്നസ് സെന്‍ററിന്‍റെ മറവിൽ മയക്കുമരുന്ന് കച്ചവടം: ഉടമ അറസ്റ്റിൽ

ചാരുംമൂട്: ഫിറ്റ്നസ് സെന്‍ററിന്‍റെ മറവിൽ മയക്കുമരുന്ന് കച്ചവടം നടത്തിവന്ന ഉടമ അറസ്റ്റിൽ. നൂറനാട് പാലമേൽ കൈലാസം വീട്ടിൽ അഖിൽ ജി. നാഥ് (31) ആണ് പിടിയിലായത്. ഇയാളുടെ വീട്ടിലെ കിടപ്പുമുറിയിൽനിന്ന് 48 ഗ്രാം എംഡിഎംഎ ജില്ലാ ലഹരിവിരുദ്ധ സ്ക്വാഡും നുറനാട് പോലീസും ചേർന്ന് കണ്ടെടുത്തു. നൂറനാട് പടനിലത്ത് ഫിറ്റ്നസ് സെന്‍റർ നടത്തുകയാണ് അഖിൽ നാഥ്. രണ്ടുമാസം മുമ്പ് ഇയാളുടെ ഫിറ്റ്നസ് സെന്‍റർ ട്രെയിനറായിരുന്ന കിരണിനെ ജില്ലാ ലഹരി വിരുദ്ധ സ്ക്വാഡും നുറനാട് പോലീസും ചേർന്ന് പിടികുടിയിരുന്നു. ഇതേതുടർന്ന് ജില്ലാ ലഹരിവിരുദ്ധ സ്ക്വാഡിന്‍റെ നിരീക്ഷണത്തിലായിരുന്നു അഖിൽ ജി. നാഥ്. ബംഗളൂരുവിൽനിന്ന് എംഡിഎംഐ വാങ്ങി നൽകുന്ന നൂറനാട് പടനിലം പറ്റൂർ സ്വദേശി ബിനുരാജിനെയും നൂറനാട് പോലീസ് കസ്റ്റഡിയിലെടുത്തിട്ടുണ്ട്. ഫിറ്റ്നസ് സെന്‍ററിൽ എത്തുന്ന യുവാക്കളെയും യുവതികളെയും രാസലഹരി പോലുള്ള മയക്കുമരുന്ന് കൊടുത്ത് ഫിറ്റ്നസിന് ഇത് ആവശ്യമാണെന്ന് വരുത്തി വൻതോതിൽ രാസലഹരി കച്ചവടമാണ് ഇയാൾ സെന്‍ററിന്‍റെ മറവിൽ നടത്തി വന്നിരുന്നതെന്ന് പോലീസ് കണ്ടെത്തി. ഫിറ്റ്നസ് സെന്‍ററിൽ സ്ഥിരം പോയിരുന്ന ചില യുവാക്കൾ മയക്കുമരുന്ന് ഉപയോഗിച്ച് നുറനാട്ടുള്ള ലഹരിവിമുക്ത കേന്ദ്രത്തിൽ ചികിത്സതേടിയതായും പോലീസിന് വിവരം ലഭിച്ചു. ലഹരി ഉപയോഗിക്കുന്നതിന് പ്രത്യേകം പാർട്ടി ഇയാൾ നടത്തിയിരുന്നതായി പോലീസ് പറയുന്നു. ഓപ്പറേഷൻ ഡി ഹണ്ടിന്‍റെ ഭാഗമായി ജില്ലാ പോലീസ് മേധവി എം.പി. മോഹനചന്ദ്രന്‍റെ മേൽനോട്ടത്തിൽ നർക്കോട്ടിക് സെൽ ഡിവൈഎസ്പി ബി. പങ്കജാക്ഷന്‍റെ നേതൃത്യത്തിലുള്ള ജില്ലാ ലഹരിവിരുദ്ധ സ്ക്വാഡും ചെങ്ങന്നൂർ ഡിവൈഎസ് പി എം.കെ. ബിനുകുമാറിന്‍റെ നേതൃത്വത്തിൽ നൂറനാട് സിഐ ശശികുമാർ, എസ് ഐ ശ്രീജിത്ത്, ഗ്രേഡ് എഎസ്ഐ സിനു വർഗീസ്, സിപിഒ കലേഷ്, വിഷ്ണു, രജനി, ജഗദിഷ് എന്നിവരുടെ സംഘമാണ് പ്രതിയെ പിടികൂടിയത്.

രാജ്യസുരക്ഷാ സേവകർക്ക് ആദരവ്

കരുമാടി: രാജ്യം അകത്തുനിന്നും പുറത്തുനിന്നും ഭീഷണികളെ അതിജീവിക്കുന്ന കാലഘട്ടത്തിൽ ഇത്തരത്തിലുള്ള സംഗമങ്ങൾ രാജ്യസുരക്ഷാ സേവകർക്ക് വലിയ ആവേശവും സന്തോഷവും നൽകുന്നതാണെന്ന് അമ്പലപ്പുഴ എസ്എച്ച്ഒ പ്രദീഷ്കുമാർ പറഞ്ഞു. കരുമാടി സെന്‍റ് നിക്കോളാസ്, സെന്‍റ് ജോസഫ് ദേവാലയത്തിൽ രാജ്യസുരക്ഷയുമായി ബന്ധപ്പെട്ട് സേവനം ചെയ്‌തു വിരമിച്ചവരെയും സേവനം ചെയ്‌തുകൊണ്ടിരിക്കുന്നവരെയും ആദരിക്കുന്ന ‘ദേശ് സുരക്ഷാ സേവക് സമ്മാൻ ആദരവ്’ ഉദ്ഘാടനം ചെയ്തു പ്രസം ഗിക്കുകയായിരുന്നു അദ്ദേഹം. മിഷൻലീഗ്, യുവദീപ്‌തി, മാതൃ-പിതൃവേദി എന്നീ സംഘടനകളുടെ സംയുക്താഭിമുഖ്യത്തിലാ ണ് പരിപാടി സംഘടിപ്പിച്ചത്. ചടങ്ങിൽ ൽ 75 രാജ്യസുരക്ഷാ സേവകർ പങ്കെടുത്തു. കരുമാടി സെന്‍റ് നിക്കോളാസ് ഹാളിൽ നടന്ന പരിപാടി വികാരി ഫാ. മാത്യു നടയ്ക്കൽ അധ്യക്ഷനായി. പ്രോഗ്രാം കോ ഓർഡിനേറ്റർ ഫാ. മാത്യു തടത്തിൽ സ്വാഗത പറഞ്ഞു. കൈക്കാരന്മാരായ ജോണി കളത്തിൽ, സാബു അഞ്ചിൽ, റൂബി ദേവസ്യ എന്നിവർ പ്രസംഗിച്ചു.

അതിദരിദ്രരെ മുഖ്യധാരയിലേക്ക് കൊണ്ടുവരിക ലക്ഷ്യം: മന്ത്രി റോഷി അഗസ്റ്റിന്‍

ആലപ്പുഴ: അതിദരിദ്രരെ മുഖ്യധാരയിലേക്ക് കൊണ്ടുവരിക പ്രധാന ലക്ഷ്യമാണെന്ന് മന്ത്രി റോഷി അഗസ്റ്റിന്‍ പറഞ്ഞു. ആലപ്പുഴ നഗരസഭയിലെ സിവ്യൂ, പവര്‍ഹൗസ് എന്നീ വാര്‍ഡുകളെ ബന്ധിപ്പിച്ചു നിര്‍മിച്ച വെള്ളാപ്പള്ളി പാലത്തിന്‍റെ ഉദ്ഘാടനം സെന്‍റ് ഫ്രാന്‍സിസ് അസീസി പാരീഷ് ഹാളില്‍ നിര്‍വഹിച്ചു സംസാരിക്കുകയായിരുന്നു അദ്ദേഹം. ഭൂമി, വീട്, ഭക്ഷണം, തുടര്‍ചികിത്സ തുടങ്ങിയവ ആവശ്യമുള്ളവരെ കണ്ടെത്തി അവര്‍ക്കുവേണ്ട സഹായങ്ങള്‍ നല്‍കുന്നതിന് സര്‍ക്കാര്‍ ചിട്ടയായി പ്രവര്‍ത്തിച്ചു. നവംബര്‍ ഒന്നിന് ഈ ലക്ഷ്യം പൂര്‍ത്തീകരിക്കാന്‍ കേരളത്തിന് സാധിക്കുമെന്നും മന്ത്രി പറഞ്ഞു. മൂന്നുകോടി രൂപ ചെലവില്‍ സിവ്യൂ, പവര്‍ഹൗസ് വാര്‍ഡുകളെ ബന്ധിപ്പിച്ചുകൊണ്ടാണ് വെള്ളാപ്പള്ളി പാലത്തിന്‍റെ നിര്‍മാണം. 7.5 മീറ്റര്‍ ക്യാരേജ് വീതിയില്‍ ഇരുവശവും നടപ്പാത ഉള്‍പ്പെടെ 15.65 മീറ്റര്‍ നീളത്തില്‍ ജലഗതാഗതത്തിനു തടസമാവാത്ത രീതിയിലാണ് പാലം രൂപകല്പന ചെയ്തിരിക്കുന്നത്. പി.പി. ചിത്തരഞ്ജന്‍ എംഎല്‍എ അധ്യക്ഷനായി. നഗരസഭാധ്യക്ഷ കെ.കെ. ജയമ്മ, ഉപാധ്യക്ഷന്‍ പി.എസ.്എം. ഹുസൈന്‍, സ്ഥിരംസമിതി അധ്യക്ഷരായ എം.ആര്‍. പ്രേം, എം.ജി. സതീദേവി, എ.എസ്. കവിത, നഗരസഭാഗംങ്ങളായ ഹെലന്‍ ഫെര്‍ണാണ്ടസ്, റഹിയാനത്ത്, ഫാ. ആന്‍റണി തട്ടകത്ത്, ഫാ. സെബാസ്റ്റ്യന്‍ പുളിക്കല്‍, കെഐഐഡിസി ഡെപ്യൂട്ടി ജനറല്‍ മാനേജര്‍ ഹരണ്‍ ബാബു തുടങ്ങിയവര്‍ പങ്കെടുത്തു.

റോഡിന്‍റെ തിട്ട ഇടിഞ്ഞുതാഴ്ന്നു; വൈദ്യുതി പോസ്റ്റ് അപകടനിലയിൽ

എടത്വ: പഞ്ചായത്ത് റോഡിന്‍റെ തിട്ട ഇടിഞ്ഞുതാഴ്ന്നു. വൈദ്യുതി പോസ്റ്റ് തോട്ടിലേക്ക് ചരിഞ്ഞ് അപകടനിലയിൽ. തലവടി പഞ്ചായത്ത് 11-ാം വാർഡിൽ മുരിക്കോലിമുട്ട്- ബഥേൽ റോഡിൽ കാഞ്ഞൂമഠം വീടിനു സമീപത്താണ് റോഡിന്‍റെ തിട്ട തോട്ടിലേക്ക് ഇടിഞ്ഞുതാഴ്ന്നത്. തിട്ട ഇടിഞ്ഞതോടെ വൈദ്യുതി പോസ്റ്റ് തോട്ടിലേയ്ക്ക് ചരിഞ്ഞ നിലയിലാണ്. പോസ്റ്റ് തോട്ടിൽ വീണാൽ അപകടങ്ങൾക്കു കാരണമാകുമെന്ന് പരിസരവാസികൾ പറഞ്ഞു. ഓട്ടോയും കാറും ഈ റോഡിലൂടെ കടന്നുപോകുന്നത് ഏറെ ക്ലേശം സഹിച്ചാണ്. നാട്ടുകാർ പലതവണ അധികൃതരുമായി ബന്ധപ്പെട്ടെങ്കിലും യാതൊരു നടപടിയും സ്വീകരിച്ചില്ല. അധികൃതരുടെ അവഗണനയ്ക്കെതിരേ പ്രതിഷേധസമരം നടത്താനാണ് നാട്ടുകാരുടെ തീരുമാനം.

ചെത്തിപ്പുഴ ആശുപത്രിയില്‍ രാജ്യാന്തര സമ്മേളനം തുടങ്ങി

ചങ്ങനാശേരി: എംജി സര്‍വകലാശാലയിലെ ഡോ.എന്‍. രാധാകൃഷ്ണന്‍ ഇന്‍റര്‍നാഷനല്‍ സെന്‍റര്‍ ഫോര്‍ മെഡിക്കല്‍ ഇന്നൊവേഷന്‍റെ നേതൃത്വത്തില്‍ ചെത്തിപ്പുഴ സെന്‍റ് തോമസ് ആശുപത്രിയില്‍ ആരംഭിച്ച "റിഥം -2025’ രാജ്യാന്തര സമ്മേളനം എംജി സര്‍വകലാശാല വൈസ് ചാന്‍സലര്‍ ഡോ. സി.ടി. അരവിന്ദകുമാര്‍ ഉദ്ഘാടനം ചെയ്തു. ആശുപത്രി എക്‌സിക്യൂട്ടീവ് ഡയറക്ടര്‍ ഫാ. ജയിംസ് പി. കുന്നത്ത് അധ്യക്ഷത വഹിച്ചു. കോട്ടയം മെഡിക്കല്‍ കോളജ് ആശുപത്രി പ്രിന്‍സിപ്പല്‍ ഡോ. വര്‍ഗീസ് പി. പുന്നൂസ് മുഖ്യപ്രഭാഷണം നടത്തി. ജോബ് മൈക്കിള്‍ എംഎല്‍എ, സെന്‍റ് തോമസ് ആശുപത്രി മാനേജര്‍ മോണ്‍. ജോണ്‍ തെക്കേക്കര, അസോസിയേറ്റ് ഡയറക്ടര്‍ ഫാ. ജോഷി മുപ്പതില്‍ചിറ, എന്‍ആര്‍ഐസിഎംഐ ചെയര്‍മാനും സെന്‍റ് തോമസ് ഇന്‍സ്റ്റിറ്റ്യൂട്ട് ഓഫ് റിസര്‍ച്ച് ഓണ്‍ വീനസ് ഡിസീസ് മെഡിക്കല്‍ ഡയറക്ടറുമായ ഡോ. എന്‍. രാധാകൃഷ്ണന്‍, സെന്‍റ് തോമസ് ആശുപത്രി കാര്‍ഡിയോളജി വിഭാഗം ഡോ. അബ്ദുല്‍ ഖാദര്‍, മാര്‍ അത്തനാസിയോസ് കോളജ് ഫോര്‍ അഡ്വാന്‍സ് സ്റ്റഡീസ് പ്രിന്‍സിപ്പല്‍ ഫാ. ഏബ്രഹാം മുളമൂട്ടില്‍, പുഷ്പഗിരി മെഡിക്കല്‍ കോളജ് ജനറല്‍ സര്‍ജറി വിഭാഗം പ്രഫ. റോബിന്‍സണ്‍ പി. ജോര്‍ജ്, ഡോ. സി. ചന്ദന എന്നിവര്‍ പ്രസംഗിച്ചു.

എസ്റ്റിമേറ്റുകൾ പലത്; പരിഹാരം അകലെ

അമ്പലപ്പുഴ: കാലങ്ങളായി തുടരുന്ന വെള്ളക്കെട്ട് പരിഹാരിക്കാന്‍ എസ്റ്റിമേറ്റുകള്‍ പലതെടുത്തു. എന്നാല്‍, വെള്ളക്കെട്ടിനു പരിഹാരമായില്ല. ചെറിയ മഴ പെയ്താല്‍ പോലും അരയ്‌ക്കൊപ്പം വെള്ളം കയറുന്ന അവസ്ഥ. പുറത്തിറങ്ങാന്‍ ചങ്ങാടം ഉപയോഗിക്കേണ്ട സ്ഥിതി. ഒന്‍പതു വര്‍ഷമായി തുടരുന്ന ഈ ദുരിതത്തിന് പരിഹാരം കാണാന്‍ ഒരധികൃതരും ഇവിടേക്ക് എത്തിയിട്ടുമില്ല. അമ്പലപ്പുഴ വടക്ക് പഞ്ചായത്ത് ഒന്നാം വാര്‍ഡ് വണ്ടാനം ഇഎംഎസ് ഷിഹാബ് നഗര്‍ റോഡിന് സമീപമുള്ള 15 ഓളം കുടുംബങ്ങളാണ് എല്ലാ മഴക്കാലത്തും വെള്ളക്കെട്ടിന്‍റെ ദുരിതത്തില്‍ക്കഴിയുന്നത്. ഒന്‍പതു വര്‍ഷം മുന്‍പ് റോഡ് നിര്‍മിക്കാനായി ഇവിടെ നേരത്തെയുണ്ടായിരുന്ന പൈപ്പ് മാറ്റിയതോടെയാണ് പ്രദേശവാസികളുടെ ദുരിതമാരംഭിച്ചത്. പ്രദേശത്തെ വെള്ളക്കെട്ടിന് പരിഹാരമായി പതിറ്റാണ്ടുകള്‍ക്കു മുന്‍പ് സ്ഥാപിച്ച പൈപ്പ് പുതിയത് സ്ഥാപിക്കാമെന്ന ഉറപ്പിലാണ് മാറ്റിയത്. എന്നാല്‍, വര്‍ഷങ്ങള്‍ കഴിഞ്ഞിട്ടും മുന്‍പ് മാറ്റിയ പൈപ്പ് ഇതുവരെ പുനഃസ്ഥാപിച്ചിട്ടില്ല. എല്ലാവര്‍ഷവും ആദ്യ മഴയില്‍ത്തന്നെ ഇതാണ് അവസ്ഥ. ഇത്തവണയും ഇതിന് മാറ്റമുണ്ടായിട്ടില്ല. കഴിഞ്ഞ ഒരുദിവസത്തെ മഴയില്‍ പ്രദേശത്തെ വീടുകളിലെല്ലാം വെളളം കയറി. ഇപ്പോള്‍ വീടിന് പുറത്തിറങ്ങാന്‍ പല കുടുംബങ്ങളും ചങ്ങാടം നിര്‍മിച്ചിരിക്കുകയാണ്. മലിനജലത്തിലൂടെ നടന്ന് പലര്‍ക്കും അസുഖങ്ങളും പിടിപെട്ടു. ഓടനിര്‍മിക്കാനും പൈപ്പിടാനുമായി പലതവണ പഞ്ചായത്ത് എസ്റ്റിമേറ്റ് തയാറാക്കിയെങ്കിലും വര്‍ഷങ്ങള്‍ കഴിഞ്ഞിട്ടും ഇവ രണ്ടും യാഥാര്‍ഥ്യമായില്ല. 4,85,000 രൂപയുടെ എസ്റ്റിമേറ്റാണ് തയാറാക്കിയത്. കഴിഞ്ഞവര്‍ഷം രണ്ട് മാസത്തോളമാണ് ഇവര്‍ വെള്ളക്കെട്ടിന്‍റെ ദുരിതമനുഭവിച്ചത്. ഇനി തുലാവര്‍ഷം ശക്തമായാല്‍ വെള്ളക്കെട്ട് രൂക്ഷമാകുന്നതോടെ വീടിന് പുറത്തിറങ്ങാന്‍ കഴിയാത്ത സ്ഥിതിയാകും. വെള്ളം ഇങ്ങനെ കെട്ടിക്കിടക്കുന്നതിനാല്‍ പല കുടുംബത്തിനും പ്രാഥമികാവശ്യം നിര്‍വഹിക്കാന്‍ പോലും കഴിയാത്ത സ്ഥിതിയായി. വെള്ളം ഒഴുകിപ്പോകാന്‍ മാര്‍ഗമില്ലാതെ വന്നതോടെ പ്രദേശത്തുനിന്നുള്ള മലിനജലമെല്ലാം ഇവിടെ കെട്ടിക്കിടക്കുകയാണ്. ഇതോടെ കുട്ടികള്‍ക്ക് സ്‌കൂളുകളില്‍ പോകാന്‍ പോലും കഴിയാത്ത സ്ഥിതിയായി. ജില്ലാ ഭരണകൂടം അടിയന്തരമായി ഇടപെട്ട് ശാശ്വതപരിഹാരം കാണണമെന്നാണ് നാട്ടുകാരുടെ ആവശ്യം. പഞ്ചായത്ത് ഭരണസമിതിയുടെ കാലാവധി അവസാനിക്കാന്‍ ഇനി ആഴ്ചകള്‍ മാത്രമവശേിക്കേ തങ്ങളുടെ ദുരിതത്തിന് ആര്, എങ്ങനെ പരിഹാരം കാണുമെന്ന ആശങ്കയാണ് ഇവര്‍ക്ക്.

കെവിഎം ആശുപത്രി വാര്‍ഷികം

ചേര്‍ത്തല: കെവിഎം സൂപ്പര്‍ സ്‌പെഷാലിറ്റി ആശുപത്രിയുടെ 53-ാമത് വാര്‍ഷികം ആഘോഷിച്ചു. ആശുപത്രി ഓഡിറ്റോറിയത്തില്‍ ചേര്‍ന്ന സമ്മേളനത്തില്‍ ഇന്‍കംടാക്‌സ് അഡീഷണല്‍ കമ്മീഷണര്‍ ജ്യോതിസ് മോഹന്‍ ഉദ്ഘാടനം ചെയ്തു. ആശുപത്രി മാനേജിംഗ് പാര്‍ട്ണര്‍ ഡോ. അവിനാശ് ഹരിദാസ് അധ്യക്ഷത വഹിച്ചു. സീനിയര്‍ ഫിസിഷ്യന്‍ ഡോ.പി. വിനോദ് കുമാര്‍, ഡപ്യൂട്ടി ഓപ്പറേഷന്‍സ് മാനേജര്‍ മേഘ എം. പിള്ള എന്നിവര്‍ പ്രസംഗിച്ചു. 43 വര്‍ഷം സേവനം പൂര്‍ത്തിയാക്കിയ എച്ച്ആര്‍ എക്‌സിക്യൂട്ടീവ് എച്ച്. സരോജയ്ക്ക് ലൈഫ് ടൈം അച്ചീവ്‌മെന്‍റ് അവാര്‍ഡ് ഡോ. അവിനാശ് ഹരിദാസ്, ചീഫ് മെഡിക്കല്‍ ഓഫീസര്‍ ഡോ.വി.വി. ഹരിദാസ് എന്നിവര്‍ ചേര്‍ന്ന് സമ്മാനിച്ചു.

മെഗാ ടൂറിസം പദ്ധതിക്ക് മെഗാ താമസം!

കായംകുളം: ഏറെ കൊട്ടിഘോഷിച്ച കായംകുളം മെഗാടൂറിസം പദ്ധതി ഒരു പതിറ്റാണ്ടു കഴിഞ്ഞിട്ടും പാതിവഴിയിൽ. പദ്ധതി പൂര്‍ത്തിയാക്കാത്തത് കായലോര ടൂറിസം വികസനത്തെ പ്രതിസന്ധിയിലാക്കി. കായലോരത്തു മോഷണവും സാമൂഹ്യവിരുദ്ധ ശല്യവും വ്യാപകമായതിനെത്തുടര്‍ന്നു നിരീക്ഷണ കാമറകള്‍ സ്ഥാപിച്ചെങ്കിലും സാമൂഹ്യവിരുദ്ധ ശല്യത്തിനു പരിഹാരമായിട്ടില്ല. ആളുകള്‍ക്കു കായല്‍ സൗന്ദര്യംആസ്വദിക്കുന്നതിനായി നിര്‍മിച്ച നടപ്പാതകള്‍ കാടുകയറിയ നിലയിലാണ്. കേന്ദ്ര ടൂറിസം വകുപ്പ് മെഗാ ടൂറിസം വികസനം ലക്ഷ്യമിട്ട് 2013 ജൂലൈ 12നാണ് പദ്ധതി ആവിഷ്‌കരിച്ചത്. ദേശീയ പദ്ധതിയില്‍ ആലപ്പുഴ ജില്ലയ്ക്ക് 52.25 കോടി രൂപ പദ്ധതിയുടെ ഭാഗമായി അനുവദിച്ചു. കായംകുളത്ത് മാത്രമായി പദ്ധതിക്ക് 7.83 കോടി രൂപയാണ് അനുവദിച്ചത്. എല്ലാം നശിക്കുന്നു വിനോദസഞ്ചാരികള്‍ക്കു ബോധവത്കരണ കേന്ദ്രം, ഭക്ഷണശാല, ലൈഫ് ഗാര്‍ഡിനുവേണ്ടിയുള്ള മുറി, പോലീസ് ബൂത്ത്, കായല്‍ സൗന്ദര്യം ആസ്വദിക്കാൻ ബോട്ട് വാക് വ്യൂ, കുട്ടികള്‍ക്കായി പാര്‍ക്ക്, മത്സ്യകന്യകയുടെ ശില്പം തുടങ്ങിയവയാണ് പദ്ധതിയുടെ ഭാഗമായി നിര്‍മിച്ചത്. മത്സ്യകന്യക ശില്പം പെയിന്‍റ് മങ്ങി പായല്‍ പിടിച്ചു. കുട്ടികളുടെ പാര്‍ക്കിലെ ഉപകരണങ്ങള്‍ ആകട്ടെ അതും പ്രയോജനമില്ലാതെ കിടക്കുന്നു. സ്‌കൂള്‍ കോളജ് വിദ്യാര്‍ഥികളുടെയും കമിതാക്കളുടെയും ഇടമായി കായലോരം ഇപ്പോള്‍ മാറി. അമിനിറ്റി സെന്‍റർ ചത്തു കായലോര ടൂറിസം പദ്ധതി പ്രദേശത്തു ഡിടിപിസിയുടെ നിയന്ത്രണത്തിലുള്ള അമിനിറ്റി സെന്‍ററിന്‍റെ പ്രവര്‍ത്തനം നിലച്ചിട്ടു മാസങ്ങളായി. ഉടന്‍ തുറക്കുമെന്നു പറയുന്നുണ്ടെങ്കിലും പ്രദേശം ഇപ്പോൾ കാടുകയറി ക്കിടക്കുകയാണ്. അമിനിറ്റി സെന്‍റര്‍ സ്വകാര്യ സംരഭകര്‍ക്കു ലേലത്തില്‍ നല്‍കുകയാണ് ചെയ്തുകൊണ്ടിരുന്നത്. മുമ്പ് അമിനിറ്റി സെന്‍റര്‍ ലേലത്തില്‍ എടുക്കുന്നവര്‍ നഷ്ടം വരുന്നതിനാല്‍ സംരംഭകര്‍ പ്രവര്‍ത്തനം നിര്‍ത്തുകയാണ്. വിശ്രമമുറികളും റസ്റ്ററന്‍റും കോണ്‍ഫറന്‍സ് ഹാളും അടങ്ങുന്നതാണ് അമിനിറ്റി സെന്‍റര്‍. കാല്‍നൂറ്റാണ്ട് മുമ്പ് ടൂറിസം വകുപ്പ് നിര്‍മിച്ചതാണ് അമിനിറ്റി സെന്‍റര്‍. കായലോര ടൂറിസം പദ്ധതി പ്രദേശം കാലത്തിനൊത്തു വളരാത്തത് അനുബന്ധ സ്ഥാപനങ്ങളുടെ പ്രവര്‍ത്തനങ്ങളെയും ബാധിച്ചു. വര്‍ഷത്തില്‍ ഒരിക്കല്‍ മാത്രം നടക്കുന്ന വള്ളംകളിയാണ് ടൂറിസം കേന്ദ്രത്തിലെ പ്രധാന വിനോദ പരിപാടി. വിനോദസഞ്ചാര വകുപ്പ് ജില്ലാ ടൂറിസം പ്രമോഷന്‍ കൗണ്‍സിലിനു പദ്ധതി പ്രദേശം കൈമാറിയിട്ടുണ്ട്. സുരക്ഷാ ജീവനക്കാര്‍ അടക്കമുള്ള സംവിധാനങ്ങള്‍ ഉടന്‍ സജ്ജമാക്കുമെന്നാണ് അധികൃതര്‍ പറയുന്നത്.

കാലിത്തീറ്റകൾക്ക് ഗുണനിലവാരം ഉറപ്പുവരുത്തും: മന്ത്രി ചിഞ്ചുറാണി

ചേര്‍ത്തല: കാലിത്തീറ്റ കമ്പനികളിൽ ഉത്പാദിപ്പിക്കുന്ന കാലിത്തീറ്റകൾക്ക് ഗുണനിലവാരം ഉറപ്പുവരുത്തുമെന്നും ഏതെങ്കിലും കമ്പനിയുടെ തീറ്റ കഴിച്ച് പശുക്കൾ ചത്താൽ അവർ പകരം പശുവിനെ നൽകണമെന്നും അല്ലാത്തപക്ഷം ആ കമ്പനി അടച്ചുപൂട്ടുന്നുതിനുള്ള പുതിയ നിയമം കേരളത്തില്‍ നടപ്പാക്കുമെന്നും ക്ഷീര വികസന മൃഗസംരക്ഷണമന്ത്രി ചിഞ്ചുറാണി പറഞ്ഞു. ക്ഷീരവികസന വകുപ്പിന്‍റെ ആലപ്പുഴ ജില്ലാ സംഗമത്തോടനുബന്ധിച്ചുള്ള പൊതുസമ്മേളനം ഉദ്ഘാടനം ചെയ്യുകയായിരുന്നു മന്ത്രി. കേന്ദ്രവും-കേരള സംസ്ഥാനവും ചേർന്ന് പുതിയ സമഗ്ര ഇൻഷ്വറൻസ് പരിരക്ഷ കൊണ്ടുവരും. ഇതിന്‍റെ ഉദ്ഘാടനം ഈ മാസം തന്നെ ഉണ്ടാകും. കേന്ദ്രസർക്കാർ 29 വെറ്ററിനറി ആംബുലൻസ് നൽകിയപ്പോൾ കേരള സർക്കാർ 56 ആംബുലൻസുകൾ വിവിധ ബ്ലോക്കുകളിൽ കൂടി നൽകി. 1962 എന്ന കോൾ സെന്‍ററിലെ നമ്പറിൽ ക്ഷീരകർഷകർ വിളിച്ചാൽ ആംബുലൻസും ഡോക്ടറുടെയും സേവനം വീട്ടുമുറ്റത്ത് കിട്ടും. ബ്ലോക്ക് പഞ്ചായത്തിലൂടെ നൽകുന്ന ക്ഷീര മരുന്നുകൾ ആംബുലൻസ് വഴിയും നൽകാൻ കഴിയും. വൈകുന്നേരം നാലു മുതൽ രാത്രി 12 വരെ എല്ലാ ജില്ലാകേന്ദ്രങ്ങളിലും ഓപ്പറേഷൻവരെ നടത്താനുള്ള സൗകര്യം ആംബുലൻസിൽ സേവനം ലഭ്യമാണ്. കേരള ബാങ്ക് വഴി കർഷകർക്ക് അഞ്ചു മുതൽ 10 വരെയുള്ള പശുക്കളെ വായ്പ വഴി നൽകും. ഇതിനുവേണ്ടി വരുന്ന പലിശ ക്ഷീരവകുപ്പിൽനിന്നും നൽകും. കയർത്തൊഴിലാളികൾക്ക് രണ്ടു പശുവിനെ വാങ്ങാൻ 95,000 രൂപ വായ്പ ക്ഷീരവകുപ്പ് നൽകും. ആലപ്പുഴ ജില്ലയിൽ മാത്രം ഈ വായ്പ 18 പേർക്ക് നൽകി. ക്ഷീരകർഷകരുടെ മക്കൾക്ക് മിൽമയിൽ വരുന്ന ജോലി ഒഴുവുകളിൽ മുൻഗണന നൽകുമെന്നും ചിഞ്ചു റാണി പറഞ്ഞു. കാവില്‍ സെന്‍റ് മൈക്കിള്‍സ് പാരീഷ് ഹാളില്‍ നടന്ന സമ്മേളനത്തില്‍ മന്ത്രി പി. പ്രസാദ് അധ്യക്ഷത വഹിച്ചു. ജില്ലയിലെ മികച്ച കർഷകരായ വത്സല, വത്സ, പ്രസന്നകുമാരി എന്നിവരെ ചടങ്ങില്‍ ആദരിച്ചു. ക്ഷീര വികസനവകുപ്പ് ഡയറക്ടർ ശാലിനി ഗോപിനാഥ് റിപ്പോർട്ട് അവതരിപ്പിച്ചു. ക്ഷീര സംഘങ്ങൾക്കുള്ള ധനസഹായം ടിആര്‍സിഎംപിയു ചെയർമാൻ മണി വിശ്വനാഥ് വിതരണം ചെയ്തു. അവാർഡ് വിതരണം ജില്ലാ പഞ്ചായത്ത് വൈസ് പ്രസിഡന്‍റ് എൻ.എസ്. ശിവപ്രസാദ് നിർവഹിച്ചു. സി.ആർ. ബാഹുലേയൻ, ടി.കെ. പ്രതുലചന്ദ്രൻ, ആയാപറമ്പ് രാമചന്ദ്രൻ, ഓമന ബാനർജി, ബിനു ഐസക് രാജു, എം.ജി. നായർ എന്നിവർ പങ്കെടുത്തു.

ആർപ്പോ... ആലപ്പുഴ! റവന്യു ജില്ലാ സ്കൂൾ കായിക മേള ഓവറോൾ ചാന്പ്യൻഷിപ്പ്

മുഹമ്മ: ഇഞ്ചോടിഞ്ച് പോരാട്ടം നടന്ന റവന്യു ജില്ലാ സ്കൂൾ കായിക മേളയിൽ ആലപ്പുഴ സബ് ജില്ല ഓവറോൾ ചാന്പ്യൻഷിപ്പ് കരസ്ഥമാക്കി. ചേർത്തല സബ് ജില്ലയ്ക്കാണ് രണ്ടാം സ്ഥാനം. ആലപ്പുഴ സബ് ജില്ലയ്ക്ക് 346 പോയിന്‍റും ചേർത്തല സബ് ജില്ലയ്ക്ക് 329 പോയിന്‍റും ലഭിച്ചു. 56 പോയിന്‍റ് നേടിയ മാവേലിക്കര സബ് ജില്ലയാണ് മൂന്നാം സ്ഥാനത്ത്. സ്കൂൾ വിഭാഗത്തിൽ കലവൂർ ഗവ. ഹയർ സെക്കൻഡറി സ്കൂളിന് 107 പോയിന്‍റ് ലഭിച്ചപ്പോൾ രണ്ടാം സ്ഥാനത്ത് എത്തിയ ആലപ്പുഴ എസ്ഡിവി ബോയ്സ് ഹയർ സെക്കൻഡറി സ്കൂൾ 93 പോയിന്‍റ് കരസ്ഥമാക്കി. 76 പോയിന്‍റ് ലഭിച്ച ആലപ്പുഴ ലിയോ തേർട്ടിന്ത് ഹയർ സെക്കൻഡറി സ്കൂളാണ് മൂന്നാം സ്ഥാനത്ത്. ത്രില്ലിംഗ് ക്ലൈമാക്സ് നാലുനാൾ നീണ്ട മത്സരത്തിൽ വാശിയേറിയ പോരാട്ടമാണ് ആലപ്പുഴ സബ് ജില്ലയും ചേർത്തല സബ് ജില്ലയും നടത്തിയത്. ഓരോ ദിവസവും മേള തീരുമ്പോൾ ഏതാനും പോയിന്‍റുകളുടെ വ്യത്യാസം മാത്രമാണ് ഈ സബ് ജില്ലകൾ തമ്മിൽ ഉണ്ടായിരുന്നത്. ഇന്നലെ നടന്ന മത്സരത്തിൽ അവസാന നിമിഷം വരെ ഫലം പ്രവചനാതീതമായിരുന്നു. ജില്ലാ പഞ്ചായത്തംഗം ആർ. റിയാസ് സമ്മാനദാനം നടത്തി. വിദ്യാഭ്യാസ ഡപ്യൂട്ടി ഡയറക്ടർ ഇ.എസ് ശ്രീലത, ആർജിഎസ്ഡിഎ സെക്രട്ടറി ആർ. അനസ്, മുഹമ്മ മദർ തെരേസാ ഹൈസ്കൂൾ ഹെഡ്മിസ്ട്രസ് മെയ്മോൾ ജോസഫ്, എം.വി. സാബുമോൻ, എൽ. വിനോദ് കുമാർ, സഹിതാ സതീശൻ, എസ്. സുജീഷ് എന്നിവർ പ്രസംഗിച്ചു. കലവൂരുകാരെ കളറാക്കിയ കരസ്പർശം ഇവരുടേത് മുഹമ്മ: പരിമിതികളോട് പടവെട്ടിയാണ് സ്കൂൾ വിഭാഗം മൽസരത്തിൽ കലവൂർ ഗവ. ഹയർ സെക്കൻഡറി സ്കൂൾ വിഭാഗം മൽസരത്തിൽ ഒന്നാമതെത്തിയത്. ആലപ്പുഴ എസ് ഡിവി സ്കൂളുമായി ഇഞ്ചോടിച്ച് മൽസരിച്ചാണ് കലവൂർ സ്കൂൾ വെന്നിക്കൊടി പാറിച്ചത്.

കായികാധ്യാപിക അന്നമ്മ അഗസ്റ്റിന്‍റെയും സ്പോർട്സ് കൗൺസിൽ കോച്ച് കെ.ആർ. സാംജിയുടെയും ശിക്ഷണത്തിലാണ് കലവൂർ സ്കൂളിലെ കുട്ടികൾ മേളയിൽ മാറ്റുരയ്ക്കാൻ എത്തിയത്. കായിക പരിശീലനത്തിനുള്ള അടിസ്ഥാന സൗകര്യങ്ങൾ കുറവുള്ള സ്കൂളാണ് കലവൂർ സ്കൂളെങ്കിലും സംസ്ഥാന തലത്തിലും ദേശീയ തലത്തിലുമെല്ലാം ഒന്നാമതെത്തുന്ന താരങ്ങളെ സംഭാവന ചെയ്യാൻ സ്കൂളിനു കഴിയുന്നുണ്ട്. അന്നമ്മ അഗസ്റ്റിൻ തെരഞ്ഞെടുക്കുന്ന താരങ്ങളെ വിദഗ്ധ പരിശീലനം നൽകി മുൻ നിരയിലെത്തിക്കുന്നത് സ്പോർട്സ് കൗൺസിലിന്‍റെ റീജണൽ കോച്ചിംഗ് സെന്‍ററായ പ്രീതികുളങ്ങരയിലെ കലവൂർ ഗോപിനാഥ് സ്റ്റേഡിയവും ഇവിടെ കോച്ചായ കെ.ആർ. സാംജിയുമാണ്.

അന്പലപ്പുഴ തെക്ക് പോരാട്ടം ഇരന്പും

അമ്പലപ്പുഴ തെക്ക് പഞ്ചായത്ത് അമ്പലപ്പുഴ തെക്ക് പഞ്ചായത്ത് പടിഞ്ഞാറ് അറബിക്കടൽ അതിരിടുന്നു. കിഴക്കിന്‍റെ ഒരു ഭാഗം വേമ്പനാട് കായലിന്‍റെ സാന്നിധ്യവും നെൽവയലുകളും തെങ്ങിൻ തോപ്പുകളും നിറഞ്ഞ ഗ്രാമപ്രദേശം. നെൽകൃഷിയാണ് പ്രധാന വരുമാനം. 15 വാർഡുകളുള്ളതിൽ മൂന്നു വാർഡുകൾ പൂർണമായും രണ്ടു വാർഡുകൾ ഭാഗികമായും തീരദേശ വാർഡുകൾ. തീരദേശത്ത് മത്സ്യബന്ധനം പ്രധാന വരുമാനം. ബാക്കിയുള്ള 10 വാർഡുകളിൽ 9 എണ്ണവും കാർഷിക മേഖലയിൽ. നേട്ടങ്ങൾ... ശോഭാ ബാലൻ അമ്പലപ്പുഴ തെക്ക് പഞ്ചായത്ത് പ്രസിഡന്‍റ് •കോമന സബ് സെന്‍ററിന് പത്തു സെന്‍റ് സ്ഥലം കണ്ടെത്തി. നിർമാണത്തിനു ഹെൽത്ത് ഗ്രാന്‍റിൽനിന്ന് 55 ലക്ഷം അനുവദിച്ചു ടെൻഡർ നടപടി തുടങ്ങി. 417 അങ്കണവാടികൾക്കു സൗജന്യമായി സ്ഥലം ലഭ്യമാക്കി. നാല് അങ്കണവാടികൾ പുതിയ കെട്ടിടത്തിൽ. •സുനാമി കോളനിയിൽ പത്തു കൊല്ലമായി മുടങ്ങിക്കിടന്ന കുഴൽക്കിണർ പ്രവർത്തനക്ഷമമാക്കി. മൂന്നാം വാർഡിൽ കുഴൽക്കിണർ. കറുകത്തറ, കരുമാടി പമ്പ് ഹൗസിലും മോട്ടോറുകൾ സ്ഥാപിച്ച് കുടിവെള്ളപ്രശ്‌നം പരിഹരിച്ചു. •13.50 ലക്ഷം ലിറ്റർ ശേഷിയുള്ള ജലസംഭരണിക്കായി പോലീസ് ക്വാർട്ടേഴ്‌സിനു സമീപം റവന്യൂ പുറമ്പോക്കു കണ്ടെത്തി ജലഅഥോറിറ്റിക്കു കൈമാറി. നിർമാണത്തിന് 12.50 കോടിയുടെ ടെൻഡർ. •അതിദരിദ്ര പട്ടികയിൽപ്പെട്ട രണ്ടു കുടംബങ്ങൾക്കു ഭൂമി വാങ്ങി വീടു നിർമാണത്തിനു നടപടി. മറ്റു രണ്ടു കുടുംബങ്ങൾക്കുള്ള വീടു നിർമാണം പുരോഗമിക്കുന്നു. അതിദാരിദ്ര്യമുക്ത പഞ്ചായത്തായി പ്രഖ്യാപിച്ചു. കോട്ടങ്ങൾ... കെ. മനോജ്‌കുമാർ (ബിജെപി പാർലമെന്‍ററി പാർട്ടി നേതാവ് ) •ജലജീവൻ പദ്ധതി പൂർത്തീകരിക്കാൻ സാധിച്ചില്ല. •രണ്ടാം നമ്പർ ഷോപ്പിംഗ് കോംപ്ലക്‌സ് നിൽക്കുന്ന സ്ഥലം പഞ്ചായത്തിന്‍റെ പേരിലാക്കാൻ സാധിച്ചില്ല. ഇതിന്‍റെ ഭൂമി ദേശീയപാതയ്ക്കു വിട്ടുകൊടുത്തതിന്‍റെ നഷ്ടപരിഹാരത്തുക വാങ്ങിയെടുത്തില്ല. •ഷോപ്പിംഗ് കോംപ്ലക്‌സിലെ അനധികൃത കച്ചവടം നടത്തുന്നവരെ ഒഴിപ്പിക്കാനായില്ല. പഞ്ചായത്തിന് ലക്ഷക്കണക്കിനു രൂപയുടെ നഷ്ടം. •മാലിന്യസംസ്കരണ, മാലിന്യസംഭരണ സംവിധാനങ്ങൾ പൂർണമാക്കാനായില്ല. •പൊതുജലാശയങ്ങളിലെ പോള നീക്കാൻ നടപടിയില്ല. മിനി സിവിൽസ്റ്റേഷനടക്കമുള്ള നിർമാണം തടസപ്പെട്ടു. •സ്വകാര്യ വ്യക്തികൾ കൈവശം വച്ചിരിക്കുന്ന അമ്പലപ്പുഴ ടൗൺ ക്ലബ് പഞ്ചായത്ത് ഏറ്റെടുക്കാനുള്ള നടപടി തുടങ്ങിയെങ്കിലും രാഷ്‌ട്രീയ ഇടപെൽ മൂലം പൂർത്തീകരിക്കാനായില്ല. ഒറ്റനോട്ടത്തിൽ കർഷകത്തൊഴിലാളികളും മത്സ്യത്തൊഴിലാളികളും കാർഷിക അനുബന്ധ തൊഴിൽ ചെയ്യുന്നവരുമാണ് പഞ്ചായത്തിലേറെയും. എല്ലാ മതവിഭാഗത്തിലുമുള്ള ജനങ്ങൾ വളരെ സൗഹാർദത്തോടെ കഴിഞ്ഞുവരുന്ന പഞ്ചായത്തിലെ ആകെ ജനങ്ങളുടെ എണ്ണം 2021ലെ സെൻസസ് പ്രകാരം 23205. 2020ലെ പഞ്ചായത്ത് തെരഞ്ഞെടുപ്പിലെ ആകെ വോട്ടർമാർ 16,306. ഇതിൽ 7,565 പുരുഷ വോട്ടർമാരും 8,741 സ്ത്രീകളും. 95 ശതമാനത്തോളം സാക്ഷരതയുള്ള ഗ്രാമത്തിലെ വിദ്യാഭ്യാസ, സാംസ്‌കാരിക, സാമൂഹിക സ്ഥാപനങ്ങൾ സാമൂഹിക ഐക്യത്തിനു വലിയ പങ്കുവഹിക്കുന്നു. നിലവിലെ കക്ഷിനില: ആകെ വാർഡുകൾ- 15. സിപിഎം-7, സിപിഐ- 1, ബിജെപി- 6, എസ്ഡിപിഐ -1.

മിച്ചല്‍ ജംഗ്ഷന്‍ വികസനം: തർക്കം, ബഹിഷ്കരണം

മാവേലിക്കര: മാവേലിക്കര മിച്ചല്‍ ജംഗ്ഷന്‍ വികസനം സംബന്ധിച്ച് ജില്ലാതല സാമൂഹിക പ്രത്യാഘാത പഠന യൂണിറ്റായ കളമശേരി രാജഗിരി കോളജ് ഓഫ് സോഷ്യല്‍ സയന്‍സ് നടത്തിയ സമൂഹിക പ്രത്യാഘാത പഠന റിപ്പോര്‍ട്ടിന്‍റെ കരടിന്‍മേല്‍ പൊതുവാദം നടന്നു. മാവേലിക്കര മിനി സിവില്‍ സ്റ്റേഷന്‍ കോണ്‍ഫറന്‍സ് ഹാളില്‍ നടന്ന ഹിയറിംഗില്‍ ജനപ്രതിനിധികള്‍, ഭൂവുടമകള്‍, വ്യാപാരികള്‍, സ്ഥാപനങ്ങളിലെ തൊഴിലാളികള്‍ എന്നിവര്‍ പങ്കെടുത്തു. നിലവില്‍ 18 മീറ്റര്‍ വീതിയില്‍ നിര്‍മിക്കുന്ന റോഡ് വടക്ക് തെക്ക് ഭാഗങ്ങളില്‍ അന്‍പത് മീറ്റര്‍ നീളത്തിലും കിഴക്ക് പടിഞ്ഞാറ് ഭാഗങ്ങളില്‍ നൂറ് മീറ്റര്‍ നീളത്തിലുമാണ് വീതികൂട്ടൽ പറഞ്ഞിരിക്കുന്നത്. ഭിന്നസ്വരം 18 മീറ്റര്‍ വീതിയാക്കുന്നതു വലിയ ആഘാതമായിരിക്കുമെന്നും 14 മീറ്റർ മതിയെന്നുമായിരുന്നു വ്യാപാരികളുടെ വാദം. എന്നാൽ, ഭാവിയിൽ വികസനവും പുതിയ സ്ഥാപനങ്ങളും വരണമെങ്കിൽ 18 മീറ്റർ വീതി തന്നെ വേണമെന്ന നിലപാടാണ് ഭൂഉടമകൾ സ്വീകരിച്ചത്. ഭൂമിക്കു മതിയായ നഷ്ടപരിഹാരം നൽകണമെന്നും ഇവർ ആവശ്യപ്പെട്ടു. നിലവിലെ വികസനം കുപ്പിക്കഴുത്ത് പോലെയാണെന്നും ആക്ഷേപം ഉയർന്നു. ഇറങ്ങിപ്പോയി അതേസമയം, പദ്ധതിപ്രദേശത്തെ ജനപ്രതിനിധികള്‍ പദ്ധതിതന്നെ ആശാസ്ത്രീയമെന്ന് ആരോപിച്ച് ഇറങ്ങിപ്പോയി. മാവേലിക്കര നഗരസഭ ചെയര്‍മാന്‍ നൈനാന്‍ സി. കുറ്റിശേരില്‍, വാര്‍ഡ് മെംബര്‍മാരായ ലളിത രവീന്ദ്രനാഥ്, അനി വര്‍ഗീസ്, മനസ് രാജന്‍, ശാന്തി അജയന്‍ എന്നിവരാണ് ഇറങ്ങിപ്പോയത്. രാജഗിരി കോളജ് ഓഫ് സോഷ്യല്‍ സയന്‍സ് ഡവലപ്മെന്‍റ് ഓഫീസര്‍ സി.പി. ബിജു, കോളജ് റിസര്‍ച്ച് അസോസിയേറ്റുകളായ മരിയ കെന്‍സി, കെ.ഒ. വര്‍ഗീസ്, പിഡബ്ല്യൂഡി അസിസ്റ്റന്‍റ് എക്‌സിക്യൂട്ടീവ് എന്‍ജിനിയര്‍ ഷാനജ, എ.ഇ അനീഷ്, ഭൂമി ഏറ്റെടുക്കല്‍ ഡപ്യൂട്ടി തഹസില്‍ദാര്‍ ആര്‍. രാജീവ്, റവന്യു ഇന്‍സ്‌പെക്ടര്‍ ബിജു എന്നിവര്‍ പങ്കെടുത്തു. അന്തിമ റിപ്പോര്‍ട്ട് കളക്ടര്‍ അധ്യക്ഷനായ വിദഗ്ധസമിതി പരിശോധിച്ച ശേഷം അംഗീകാരം നല്‍കും. റിപ്പോര്‍ട്ട് അംഗീകരിച്ച ശേഷം ഭൂമിയേറ്റെടുക്കാനുള്ള പ്രാരംഭ വിജ്ഞാപനത്തിലേക്കു കടക്കും. മിച്ചല്‍ ജംഗ്ഷന്‍ വികസനത്തിനെതിരേ ഹൈക്കോടതിലുണ്ടായിരുന്ന കേസിന്‍റെ വിധിയില്‍ സാമൂഹിക പ്രത്യാഘാതപഠനം വീണ്ടും നടത്തണമെന്നു കോടതി നിര്‍ദേശിച്ചതിനെത്തുടര്‍ന്നാണ് പുതിയ പഠനം ഇപ്പോൾ നടന്നുവരുന്നത്. 45 ദിവസത്തിനകം പഠനം പൂര്‍ത്തിയാക്കണമെന്നും ഒരു കാരണവശാലും ആറു മാസത്തില്‍ കൂടരുതെന്നും നിർദേശമുണ്ട്. ഇഴഞ്ഞിഴഞ്ഞ് ഏഴാം വർഷത്തിൽ മാവേലിക്കര: മുന്‍ എംഎല്‍എ ആര്‍. രാജേഷിന്‍റെ കാലഘട്ടത്തിലാണ് ടൗണ്‍ വികസനത്തിനു പച്ചക്കൊടി കാട്ടുന്നത്. ആദ്യഘട്ട സര്‍വേകളും മറ്റും നടന്നു പോയെങ്കിലും പിന്നീട് ഇഴഞ്ഞു തുടങ്ങി. നിലവില്‍ മൂന്നാം സാമൂഹിക പ്രത്യാഘാത പഠനമാണ് രാജഗിരി കോളജ് നടത്തിക്കൊണ്ടിരിക്കുന്നത്. ഇപ്പോഴും അലൈന്‍മെന്‍റിൽ തട്ടിയാണ് തർക്കം.പുരാതന നഗരങ്ങളിലൊന്നായ മാവേലിക്കരയിൽ കാര്യമായ വികസനക്കാറ്റ് വീശിയിട്ടില്ല. നഗര ഹൃദയത്തിലെ വീതി ഇല്ലായ്മയാണ് പ്രധാന പ്രശ്നം. മിച്ചല്‍ ജംഗ്ഷനില്‍നിന്നു കിഴക്കുപടിഞ്ഞാറ് ഭാഗങ്ങളിലേക്കു നൂറു മീറ്റർ നീളത്തിലും തെക്കുപടിഞ്ഞാറ് ഭാഗത്തേക്ക് അന്‍പത് മീറ്റര്‍ നീളത്തിലുമാണ് വീതികൂട്ടല്‍ വിഭാവനം ചെയ്യുന്നത്. എന്നാൽ, പുളിമൂട് പാലം മുതല്‍ ജില്ലാ ആശുപത്രി ജംഗ്ഷന്‍ വരെയും ബുദ്ധ ജംഗ്ഷന്‍ മുതല്‍ മണ്ഡപത്തിന്‍ കടവ് വരെയും വീതികൂട്ടിയാൽ മാത്രമേ പ്രയോജനമുള്ളെന്നു ഒരു വിഭാഗം ചൂണ്ടിക്കാട്ടുന്നു. നിലവിൽ നഗരത്തിൽ വാഹനപാർക്കിംഗിന് യാതൊരു സൗകര്യവുമില്ല. ചെറിയൊരു ഭാഗത്തു മാത്രം വീതികൂട്ടൽ നടപ്പാക്കിയതുകൊണ്ട് പാർക്കിംഗിനു പ്രയോജനം കിട്ടില്ല. മാത്രമല്ല കൂടുതൽ ഗതാഗത കുരുക്കിലേക്ക് ഇതു നയിക്കുമെന്നും ഇവർ പറയുന്നു. ഏഴു വർഷമായി തുടരുന്ന ചർച്ചകൾ ഇനി എത്ര കാലം നീളുമെന്ന ആശങ്കയിലാണ് നഗരവാസികൾ. മിച്ചല്‍ ജംഗ്ഷന്‍ വികസനം അശാസ്ത്രീയം: കോണ്‍ഗ്രസ് മാവേലിക്കര: നിലവില്‍ മാവേലിക്കരയില്‍ നടപ്പാക്കാന്‍ എംഎല്‍എ ശ്രമിക്കുന്ന മിച്ചല്‍ ജംഗ്ഷന്‍ വികസനം അശാസ്ത്രീയമാണെന്നു മാവേലിക്കര ബ്ലോക്ക് കോണ്‍ഗ്രസ് പ്രസിഡന്‍റ് അനി വര്‍ഗീസ് പറഞ്ഞു. നഗരത്തില്‍ ളാഹയില്‍ മുക്ക് ജംഗ്ഷന്‍ മുതല്‍ പ്രായിക്കര വരെയും തട്ടാരമ്പലം മുതല്‍ തഴക്കര ഓവര്‍ബ്രിഡ്ജു വരെയും വീതികൂട്ടൽ സാധ്യമായാല്‍ മാത്രമേ മാവേലിക്കരയുടെ വികസനം പൂര്‍ണമാകൂ. മിച്ചല്‍ ജംഗ്ഷനിലെ വളരെ കുറച്ചു ദൂരം മാത്രം വീതി കൂട്ടുന്നത് യാതൊരുവിധ ഗുണവും മാവേലിക്കര നഗരത്തിനു ചെയ്യില്ല. ഹിയറിംഗില്‍ പോലും വ്യക്തമായ ധാരണ ഇല്ലെന്നും അതിനാലാണ് ബഹിഷ്‌കരിച്ചതെന്നും അദ്ദേഹം പറഞ്ഞു.

പാലം തകർന്നു; നാട്ടുകാർ ദുരിതത്തിൽ

ചമ്പക്കുളം: തകഴി, ചമ്പക്കുളം പഞ്ചായത്തുകളെ ബന്ധിപ്പിക്കുന്ന പാലം തകർന്ന് നാട്ടുകാർ ദുരിതത്തിൽ. 10 വർഷം മുമ്പ് ചമ്പക്കുളം പഞ്ചായത്തിലെ ഏഴാം വാർഡായ പുല്ലങ്ങടിയെയും തകഴി പഞ്ചായത്തിലെ മൂന്നാം വാർഡായ ചൂരവടി പ്രദേശത്തെയും തമ്മിൽ ബന്ധിപ്പിക്കുന്നതിന് തകഴി പഞ്ചായത്ത് പണികഴിപ്പിച്ച പാലമാണ് തകർന്നത്. പാലത്തിന്‍റെ ഉരുമ്പു കേഡറുകൾ കാലപ്പഴക്കം മൂലം തുരുമ്പുപിടിച്ച് കഴിഞ്ഞ ദിവസം ഒടിഞ്ഞുവീണതിനാൽ പ്രദേശവാസികളായ 25 വീട്ടുകാർ ഒറ്റപ്പെട്ട നിലയിലാണ്. പ്രദേശവാസികളും ചൂരവടി പാടശേഖരത്തിലെ 200 ഏക്കറോളം വരുന്ന കൃഷിഭൂമിയിലെ കൃഷിക്കാരും വിദ്യാർഥികളും വളരെയേറെ ബുദ്ധിമുട്ടിലാണ്. ഈ ദീപിൽനിന്നു കരകയറാനുള്ള ഏകമാർഗമായിരുന്ന പാലം. ബന്ധപ്പെട്ടവർ അടിയന്തരമായി ഇടപെടണമെന്നാണ് നാട്ടുകാരുടെ ആവശ്യം.

കായംകുളം റെയിൽവേ പ്ലാറ്റ് ഫോമിൽ മേൽക്കൂരയ്ക്ക് ചോർച്ച

കായംകുളം: തീരദേശപാതയിലെ പ്രധാന റയിൽവേ സ്റ്റേഷനായ കായംകുളം ജംഗ്‌ഷൻ റെയിൽവേ സ്റ്റേഷനിൽ യാത്രക്കാർക്ക് മഴയും വെയിലും ഏൽക്കാതിരിക്കാൻ പുതുതായി നിർമിച്ച മേൽക്കൂര ചോരുന്നു. ഒന്നാം നമ്പർ പ്ലാറ്റ് ഫോമിൽ നിർമിച്ച മേൽക്കൂരയാണ് കനത്ത മഴയിൽ ചോർന്നൊലിക്കുന്നത്. പുതുതായി നിർമിച്ച മേൽക്കൂരയിൽ സീലിംഗും മറ്റും നിർമിച്ചിട്ടുണ്ട്. മേൽക്കൂരയിൽനിന്ന് വെള്ളം ഒഴുകി സീലിംഗിൽ തങ്ങിനിന്ന് വിടവുകളിലൂടെ താഴേക്ക് ഒഴുകുകയാണ്. വെള്ളം കെട്ടികിടക്കുകയും ഭാരം കൂടി സീലിംഗ് അടർന്ന് വീഴാനും സാധ്യതയേറെയാണ്. ലൈറ്റ്, ഫാൻ, അനൗൺസ്‌മെന്‍റ് സിസ്റ്റം തുടങ്ങിയവയ്ക്കുള്ള ഇലക്‌ട്രിക്കൽ ഉപകരണങ്ങൾ വെള്ളം കയറിയാൽ നശിക്കും. സീലിംഗ് മുകളിലൂടെയാണ് ഇലക്‌ട്രിക്‌ വയറുകളും മറ്റും പോകുന്നത്. ഇവിടെ സ്ഥാപിച്ചിട്ടുള്ള ഫാനിലൂടെയും മറ്റും വെള്ളം താഴേക്ക് വീഴുന്നുണ്ട്. താഴെ വെള്ളം കെട്ടിക്കിടക്കുന്നതിനാൽ യാത്രക്കാർ തെന്നിവീഴാനുള്ള സാധ്യതയുണ്ട്. പ്ലാറ്റ് ഫോമിന്‍റെ മേൽക്കൂരയുടെ തൂണുകൾ എല്ലാം ഇരുമ്പ് പൈപ്പാണ്. ഇരുമ്പ് പൈപ്പിനെ അലൂമിനിയം ഷീറ്റുകൊണ്ട് പൊതിഞ്ഞിരിക്കുകയാണ്. കൂടാതെ സീലിംഗും അലൂമിനിയം ഷീറ്റുകൊണ്ടാണ് നിർമിച്ചിരിക്കുന്നത്. സീലിംഗിലൂടെ ഇലക്‌ട്രിക് വയറുകളും പോകുന്നുണ്ട്. മഴ പെയ്തപ്പോൾ വെള്ളം തൂണുകളിലൂടെ താഴേക്ക് ഇറങ്ങി. ഇലക്‌ട്രിക് വയറുകളുടെ ഇൻസുലേഷനോ മറ്റോ പോയാൽ വൈദ്യുതി പ്രവഹിക്കും. ഇത് ഷോക്കേൽക്കാനും കാരണമാകും.

ചാരുംമൂട് ജംഗ്‌ഷനിൽ ആംബുലൻസും കാറും കൂട്ടിയിടിച്ച് ആറു പേർക്കു പരിക്ക്

ചാരുംമൂട്: ആംബുലന്‍സും കാറും കൂട്ടിയിടിച്ച് ആറു പേർക്കു പരിക്കേറ്റു. കാർ യാത്രികരായ കാർത്തികപ്പള്ളി ചിങ്ങോലി കുന്നേൽ വടക്കേതിൽ സഫീർ, ഭാര്യ മനീഷ സഫീർ, ഇവരുടെ ബന്ധുക്കളായ കായംകുളം എരുവ സ്വദേശിനികളായ സുലേഖ, ലൈല കുഞ്ഞുമോൾ, ആംബുലൻസ് ഡ്രൈവർ പള്ളിപ്പാട് സ്വദേശി ജോർജി എന്നിവർക്കാണ് പരിക്കേറ്റത്. കാർ യാത്രികരെ അടൂരിലെ സ്വകാര്യ ആശുപത്രിയിൽ പ്രവേശിപ്പിച്ചു. ഇതിൽ രണ്ടുപേരുടെ നില ഗുരുതരമാണ്. ചാരുംമൂട് ജംഗ്‌ഷനിൽ കഴിഞ്ഞ ദിവസം അർധരാത്രിയോടെയായിരുന്നു അപകടം. കൊല്ലം-തേനി ദേശീയപാതയിലൂടെ അമിതവഗത്തിൽ വന്ന ആംബുലൻസ് ചാരുംമൂട് ജംഗ്‌ഷനിലെ ട്രാഫിക് സിഗ്നലിനു സമീപം കെപി റോഡിലൂടെ കായംകുളം ഭാഗത്തേക്ക് വരികയായിരുന്ന കാറിൽ ഇടിക്കുകയും ആംബുലൻസ് തലകീഴായി മറിയുകയുമായിരുന്നു. പരുമല സ്വകാര്യ ആശുപത്രിയിലെ ആംബുലൻസാണ് അപകടത്തിൽപ്പെട്ടത്. ആംബുലൻസിൽ രോഗികൾ ആരുമില്ലായിരുന്നു. നൂറനാട് പോലീസ് കേസെടുത്തു.

ദ്വിതീയ സോപാൻ ക്യാമ്പ്

കറ്റാനം: പോപ്പ് പയസ് ഹയർ സെക്കൻഡറി സ്കൂളിൽ ഭാരത് സ്കൗട്സ് ആൻഡ് ഗൈഡ്സിന്‍റെ ദ്വിതീയ സോപാൻ ക്യാമ്പ് ആരംഭിച്ചു. മാവേലിക്കര രൂപത വികാരി ജനറാൾ മോൺ. ജോബ് കല്ലുവിളയിൽ ഉദ്ഘാടനം ചെയ്തു. പിടിഎ പ്രസിഡന്‍റ് ഗോപൻ ഭരണിക്കാവ് അധ്യക്ഷത വഹിച്ചു. മാവേലിക്കര രൂപത കറസ്പോണ്ടന്‍റ് ഫാ. ഡാനിയേൽ തെക്കേടത്ത് മുഖ്യപ്രഭാഷണം നടത്തി. വാർഡ് മെംബർ മാത്യു ഫിലിപ്പ്, ഡിഒസി എൻ. ശ്രീകുമാർ, ഡിറ്റിസിബി, രേണുക, ഫാ. സിൽവെസ്റ്റർ തെക്കേടത്ത്, പ്രിൻസിപ്പൽ ടി. മോഹൻ, സ്കൗട്ട് മാസ്റ്റർ സി.റ്റി. വർഗീസ്, ഗൈഡ് ക്യാപ്റ്റൻ എസ്. മിനി, റെയ്ഞ്ചർലീഡർ രമ്യ സൂസൻ തോമസ്, അധ്യാപകരായ ഗ്രേസ് ഫിലിപ്പ്, സെലിൻസ്കറിയ, ലീഡേഴ്സ് മെൽബിൻ ബിനു, സ്മൃതി എസ്. കുമാർ എന്നിവർ പ്രസംഗിച്ചു.

അവകാശ പ്രഖ്യാപന ജാഥയ്ക്ക് സ്വീകരണം

ആലപ്പുഴ: കത്തോലിക്ക കോൺഗ്രസിന്‍റെ നേതൃത്വത്തിൽ കാസർഗോഡ് നിന്ന് ആരംഭിച്ച അവകാശ പ്രഖ്യാപന ജാഥ 22ന് ആലപ്പുഴയിൽ എത്തുമ്പോൾ വൻ സ്വീകരണം നൽകാൻ കത്തോലിക്ക കോൺഗ്രസ് ആലപ്പുഴ, മുഹമ്മ ഫൊറോന സമിതിയുടെയും വിവിധ സംഘടനകളുടെയും ഭാരവാഹികളുടെ യോഗത്തിൽ തീരുമാനിച്ചു. 22ന് രണ്ടിന് ചങ്ങനാശേരി ജംഗ്ഷനിൽ എത്തിച്ചേരുന്ന ജാഥയ്ക്ക് കൈതവന വിമലഹൃദയ നാഥാ ദേവാലയത്തിൽ സ്വീകരണം നൽകും. കത്തോലിക്ക കോൺഗ്രസ് ആലപ്പുഴ ഫൊറോന പ്രസിഡന്‍റ് ദേവസ്യാ പുളിക്കാശേരിയുടെ അധ്യക്ഷതയിൽ ചേർന്ന യോഗത്തിൽ ആലപ്പുഴ ഫൊറോനാ ഡയക്ടർ ഫാ. തോമസ് ഇരുമ്പുകുത്തി ഉദ്ഘാടനം ചെയ്തു. അതിരുപത സെക്രട്ടറി സെബാസ്റ്റ്യൻ വർഗീസ്, ഫെറോന ജനറൽ സെക്രട്ടറി ഷാജി പോൾ ഉപ്പൂട്ടിൽ, ബിനു സ്കറിയ, ജോസ് തോമസ്, തോമസ് കുറ്റേൽ തുടങ്ങിയവർ പ്രസംഗിച്ചു.

ബഥേൽ അരമനപ്പള്ളിയിൽ തിരുനാളിന് ഇന്ന് കൊടിയേറും

ചെങ്ങന്നൂർ: ബഥേൽ മാർ ഗ്രിഗോറിയോസ് അരമനപ്പള്ളിയുടെ 84-ാം പെരുന്നാളിന് ഇന്ന് കൊടിയേറി 26ന് സമാപിക്കും. പെരുന്നാൾ ശുശ്രൂഷകൾക്ക് ബസേലിയോസ് മാർത്തോമാ മാത്യൂസ് തൃതിയൻ കാതോലിക്കാ ബാവാ മുഖ്യകാർമികത്വം വഹിക്കും. ഇന്നു രാവിലെ എട്ടിന് വിശുദ്ധ കുർബാന, പത്തിന് കൊടിയേറ്റ്. 22ന് വൈകിട്ട് 5.30ന് സന്ധ്യാനമസ്കാരം, മധ്യസ്ഥപ്രാർഥന, ഗാനശ്രൂഷ, ഏഴിന് തിരുവചനശുശ്രൂഷ-ഡോ. അലക്സ് ജോൺ നയിക്കും. 23നും 24നും വൈകിട്ട് ആറിനു സന്ധ്യാനമസ്കാരം, 6.45ന് ഗാനശുശ്രൂഷ, ഏഴിന് തിരുവചനശുശ്രൂഷ. 25ന് രാവിലെ 6.30ന് പ്രഭാതനമസ്കാരം, 7.15ന് വിശുദ്ധ കുർബാന, വൈകിട്ട് ആറിന് സന്ധ്യാനമസ്കാരം, ഏഴിന് ഗാനശുശ്രൂഷ, തുടർന്ന് വചനശുശ്രൂഷ- അപ്രേം റമ്പാൻ. 7.45ന് പ്രദക്ഷിണം. 26ന് രാവിലെ എട്ടിന് വിശുദ്ധ കുർബാന-ബസേലിയോസ് മാർത്തോമാ മാത്യൂസ് തൃതിയൻ കാതോലിക്കാ ബാവ. തുടർന്ന് ശ്ലൈഹിക വാഴ്‌വ്, നേർച്ച സദ്യ, കൊടിയിറക്ക്.

ചന്പക്കുളം ബ്ലോക്ക് തല കേരളോത്സവത്തിനു തുടക്കം

എടത്വ: ചമ്പക്കുളം ബ്ലോക്ക് പഞ്ചായത്തിന്‍റെ നേതൃത്വത്തില്‍ ബ്ലോക്ക് തല കേരളോത്സവത്തിന് തുടക്കം. എടത്വ സെന്‍റ് അലോഷ്യസ് കോളജില്‍ നടന്ന കായിക മത്സരങ്ങള്‍ ബ്ലോക്ക് പഞ്ചായത്ത് പ്രസിഡന്‍റ് ജിന്‍സി ജോളി ഉദ്ഘാടനം ചെയ്തു. വൈസ് പ്രസിഡന്‍റ് എം.എസ്. ശ്രീകാന്ത് അധ്യക്ഷത വഹിച്ചു. ബ്ലോക്ക് പഞ്ചായത്തംഗം അജിത് പിഷാരത്ത്, സെക്രട്ടറി സാജുമോന്‍ പത്രോസ്, ജോയിന്‍റ് സെക്രട്ടറിമാരായ എ. കുഞ്ഞുമോന്‍, കെ.ബി. അജയകുമാര്‍, കേരളോത്സവം പ്രോഗ്രാം കോ-ഓർഡിനേറ്റര്‍ എസ്. സെറീന, കായികതാരങ്ങള്‍ എന്നിവര്‍ പങ്കെടുത്തു. കായിക മത്സരങ്ങള്‍ ഇന്ന് അവസാനിക്കും. കലാമത്സരങ്ങള്‍ 21ന് നടക്കും. തുടര്‍ന്ന് സമാപന സമ്മേളനവും സമ്മാനദാനവും ചമ്പക്കുളം ബ്ലോക്ക് പഞ്ചായത്ത് കോണ്‍ഫറന്‍സ് ഹാളില്‍ നടക്കും.

വനിതാ ഹോസ്റ്റലിനു ശാപമോക്ഷം

ചേര്‍ത്തല: ചേർത്തല നഗരസഭയുടെ പുനരുദ്ധരിച്ച വനിതാ ഹോസ്റ്റൽ പ്രവര്‍ത്തനം ആരംഭിച്ചു. ചേർത്തലയിലെത്തുന്ന സ്ത്രീകൾക്ക് സുരക്ഷിതമായി താമസിക്കുന്നതിനായി 1991ൽ സ്ഥാപിതമായ വർക്കിംഗ് വുമൺ ഹോസ്റ്റൽ കഴിഞ്ഞ ഒരു ദശകക്കാലമായി അടഞ്ഞുകിടക്കുകയായിരുന്നു. 40 ലക്ഷം രൂപയുടെ നിർമാണ പ്രവൃത്തികൾക്കുശേഷം കെ.ആർ. ഗൗരിയമ്മ സ്മാരക വനിതാ ഹോസ്റ്റൽ ആൻഡ് ഷീ ലോഡ്ജ് എന്ന് പുനർനാമകരണം ചെയ്താണ് വനിതാ ഹോസ്റ്റൽ തുറന്നത്. ഗൗരിയമ്മയുടെ പേരിൽ ചേർത്തലയിൽ ഉയരുന്ന ആദ്യ സ്മാരകമാണിത്. വനിതാ ഹോസ്റ്റലിന്‍റെ ഉദ്ഘാടനം മന്ത്രി പി. പ്രസാദ് നിർവഹിച്ചു. ചെയർപേഴ്സൺ ഷേർളി ഭാർഗവൻ അധ്യക്ഷത വഹിച്ചു. സ്ഥിരം സമിതി അധ്യക്ഷരായ എ.എസ്. സാബു, ശോഭാ ജോഷി, ജി. രഞ്ജിത്ത്, ഏലിക്കുട്ടി ജോൺ, മാധുരി സാബു, കൗൺസിലർമാരായ ബി. ഫൈസൽ, ആശാ മുകേഷ്, എ. അജി, ലിസി ടോമി, നഗരസഭ സെക്രട്ടറി ടി.കെ. സുജിത്ത്, രാഷ്ട്രീയകക്ഷി നേതാവായ ബി. വിനോദ് തുടങ്ങിയവർ പ്രസംഗിച്ചു.

നീലംപേരൂരിൽ കുട്ടനാട് കുടിവെള്ള പദ്ധതി തുടങ്ങണം: കേരള കോൺഗ്രസ്

മങ്കൊന്പ്: ജലവിഭവവകുപ്പ് നടപ്പിലാക്കുന്ന കുട്ടനാട് ശുദ്ധജല പദ്ധതിയിൽനിന്നു നിലവിൽ വെള്ളം ലഭിക്കാത്ത നീലംപേരൂർ പഞ്ചായത്തിൽ, രണ്ടാം കുട്ടനാട് ശുദ്ധജല പദ്ധതിയിലെ ജോലികൾ അടിയന്തരമായി ആരംഭിക്കണമെന്ന് കേരള കോൺഗ്രസ് നീലംപേരൂർ മണ്ഡലം കൺവൻഷൻ ആവശ്യപ്പെട്ടു. വർഷങ്ങൾക്കു മുൻപ് പണിതീർത്ത ഓവർഹെഡ് ടാങ്കിലേക്ക് വെള്ളം എത്തിക്കാനും അവിടെനിന്ന് വെള്ളം വിതരണം ചെയ്യാനും ആവശ്യമായ പുതിയ പൈപ്പ് ലൈനുകൾ യുദ്ധകാലാടിസ്ഥാനത്തിൽ സ്ഥാപിക്കാൻ ആവശ്യമായ നടപടികൾ സ്വീകരിച്ചില്ലെങ്കിൽ ശക്തമായ സമരപരിപാടികൾ നടത്താനും കൺവൻഷനിൽ തീരുമാനമായി. ജില്ലാ പ്രസിഡന്‍റ് ജേക്കബ് ഏബ്രഹാം കൺവൻഷൻ ഉദ്ഘാടനം ചെയ്തു. സംസ്ഥാന കമ്മിറ്റി അംഗം സിബിച്ചൻ കണ്ണോട്ടുതറ അധ്യക്ഷത വഹിച്ചു. സിബിച്ചൻ തറയിൽ, സോജൻ ഇടയ്ക്കാട്, ടെൻസിംഗ് തോമസ്, ജോജോ പട്ടർകളം, ടോം പഴയകളം, ജോസുകുട്ടി മാളിയേക്കൽ, സി.റ്റി. ഔസേപ്പച്ചൻ, ജയിംസ് പന്ത്രണ്ടിൽ, കുട്ടൻ പാപ്പൻ പഴയകളം, അലക്സാണ്ടർ ചാക്കോ വേലശേരി എന്നിവർ പ്രസംഗിച്ചു.

പരുമല പെരുന്നാൾ: ആലോചനാ യോഗം

മാന്നാർ: പരുമല തിരുമേനിയുടെ ഓർമപ്പെരുന്നാൾ സര്‍ക്കാര്‍തല വിവിധ വകുപ്പുകളുടെ ഏകോപനവും ക്രമീകരണങ്ങളും സംബന്ധിച്ച് ആലപ്പുഴ, പത്തനംതിട്ട ജില്ലാതല വകുപ്പു മേധാവികളുടെ അവലോകന യോഗം നടന്നു. ഹരിത ചട്ടങ്ങൾ പാലിച്ചാകും പെരുന്നാൾ നടത്തുക. പെരുന്നാള്‍ ദിനങ്ങളില്‍ വിവിധ ഡിപ്പോകളില്‍നിന്ന് കെഎസ്ആര്‍ടിസി പ്രത്യേക സര്‍വീസുകള്‍ നടത്തും. കുടിവെള്ളം വിതരണം നടത്താനും റോഡുകളുടെയും പാലത്തിന്‍റെയും അറ്റകുറ്റപ്പണികള്‍ പൂര്‍ത്തിയാക്കാനും വഴിവിളക്കുകള്‍ പ്രകാശിപ്പിക്കാനും ആവശ്യമായ നടപടികള്‍ സ്വീകരിക്കുന്നതിനും വകുപ്പ് തലയോഗത്തിൽ ധാരണ. പ്രത്യേക പോലീസ് കണ്‍ട്രോള്‍ റൂം സ്ഥാപിക്കുന്നതിനും ആരോഗ്യവകുപ്പ് ആംബുലന്‍സ് സേവനം ഒരുക്കുകയും പ്രത്യേക മെഡിക്കല്‍ ടീമിനെ സജ്ജമാക്കുന്നതിനുമുള്ള ക്രമീകരണങ്ങള്‍ ഏര്‍പ്പെടുത്താനും തീരുമാനിച്ചു. മന്ത്രി വീണ ജോർജ് അധ്യക്ഷത വഹിച്ചു. മാത്യു ടി. തോമസ് എംഎൽഎ, പത്തനംതിട്ട കളക്ടർ പ്രേം കൃഷ്ണൻ, ഫാ. ഡോ. തോമസ് വർഗീസ് അമയിൽ, റോണി വർഗീസ് ഏബ്രഹാം തുടങ്ങിയവർ പ്രസംഗിച്ചു.

കലാവിദ്യാഭ്യാസരംഗത്തെ സിലബസ് കാലഘട്ടാനുസൃതം പരിഷ്കരിക്കാത്തത്: മന്ത്രി ആർ. ബിന്ദു

മാവേലിക്കര: കാലഘട്ടത്തിനനുസരിച്ച് പരിഷ്കരിക്കപ്പെടാത്ത സിലബസാണ് കലാ-വിദ്യാഭ്യാസ രംഗത്തുള്ളതെന്ന് ഉന്നതവിദ്യാഭ്യാസ സാമൂഹിക നീതിവകുപ്പ് മന്ത്രി ആർ. ബിന്ദു പറഞ്ഞു. വലിയ മാറ്റങ്ങൾ കലാരംഗത്തുണ്ടാകുമ്പോഴും നമ്മുടെ ക്ലാസ് മുറികളിലേക്ക് അവയൊക്കെ എത്തിച്ചേരുന്നുണ്ടോയെന്നു സംശയമാണ്. പലപ്പോഴും പരിമിതമായ സൗകര്യമുള്ള കലാലയങ്ങളിൽ കുട്ടികൾ ശ്വാസംമുട്ടുകയാണ്. സിലബസ് പരിഷ്‌കരിക്കാനായി കമ്മീഷനെ നിയോഗിച്ചിട്ടുണ്ട്. സ്ഥലപരിമിതി പരിഹരിക്കാനായി ശ്രമങ്ങൾ നടക്കുകയാണ്. വിവിധ യൂണിവേഴ്സിറ്റികളിലായാണ് അഫലിയേഷനുകൾ എന്നുള്ളതുകൊണ്ടുതന്നെ പല പ്രതിസന്ധികളും മുൻപിലുണ്ട്. അതൊക്കെ ഏകീകരിക്കാനുള്ള ശ്രമങ്ങൾ നടന്നുവരികയാണെന്നും മന്ത്രി മാവേലിക്കരയിൽ പറഞ്ഞു. മാവേലിക്കര രാജാരവിവർമ ഫൈൻ ആർട്ട്സ് കോളജിന് സംസ്ഥാന സർക്കാർ ബജറ്റിൽ അനുവദിച്ച 2.98 കോടിരൂപ വിനിയോഗിച്ചു നിർമിക്കുന്ന പുതിയ കെട്ടിടത്തിന്‍റെ നിർമാണോദ്ഘാടനം നിർവഹിച്ചു സംസാരിക്കുകയായിരുന്നു മന്ത്രി. എം.എസ്. അരുൺകുമാർ എംഎൽഎ അധ്യക്ഷത വഹിച്ചു. പൊതുമരാമത്ത് കെട്ടിടവിഭാഗം സൂപ്രണ്ടിംഗ് എൻജിനിയർ പി. ഇന്ദു റിപ്പോർട്ട് അവതരിപ്പിച്ചു. നഗരസഭാ ചെയർമാൻ നൈനാൻ സി. കുറ്റിശേരിൽ, മുൻ എംഎൽഎ ആർ. രാജേഷ്, വാർഡ് കൗൺസിലർ സുജാത ദേവി, കെ. രഘു, എൻ. ബാലമുരളീകൃഷ്ണ, ഡി. തുളസിദാസ്, എം.ഡി. ശ്രീകുമാർ, കെ.സി. ഡാനിയേൽ, ജേക്കബ് ഉമ്മൻ എന്നിവർ പ്രസംഗിച്ചു. പ്രിൻസിപ്പൽ മനോജ് വൈലൂർ സ്വാഗതവും അപ്ലൈഡ് ആർട്ട്സ് മേധാവി വി.എം. ബിനോയ് കൃതജ്ഞതയും പറഞ്ഞു.

ചന്പക്കുളത്ത് വന്പൻ പോരിനൊരുക്കം

ചന്പക്കുളം ഗ്രാമപഞ്ചായത്ത് 22.97ചതുരശ്ര കിലോമീറ്റര്‍ വിസ്തൃതിയുള്ള ചമ്പക്കുളം ബ്ലോക്കിലെ ഗ്രാമപഞ്ചായത്ത്. കലാകാരന്‍മാരുടെ പേരുകൊണ്ട് പ്രശസ്തമായ നാട്. ആലപ്പുഴ - ചങ്ങനാശേരി റോഡിന് ഇരു വശത്തായും പമ്പയാറും മണിമലയാറും അതിരിടുന്ന നയനമനോഹരമായ നെൽപാടങ്ങള്‍ നിറഞ്ഞ ഗ്രാമം. നേട്ടങ്ങള്‍ ടി.ജി. ജലജകുമാരി ഗ്രാമപഞ്ചായത്ത് പ്രസിഡന്‍റ് 4ഗ്രാമപഞ്ചായത്തിനു പുതിയ കെട്ടിടം നിര്‍മിച്ചു പ്രവര്‍ത്തനം തുടങ്ങി. 4ഹോമിയോ ആശുപത്രി കെട്ടിടം, യോഗ ഹാള്‍ എന്നിവ നിര്‍മിച്ചു. 4സ്മാര്‍ട്ട് അങ്കണവാടി, കാരകാട് സ്‌കൂള്‍ ആറ്റുകുറ്റപ്പണി. 4എംസിഎഫ് സജ്ജീകരിച്ചു 4ശുദ്ധജലക്ഷാമം രൂക്ഷമായിരുന്ന വാര്‍ഡുകളില്‍ കുഴല്‍കിണര്‍, പൈപ്പ് ലൈന്‍ സ്ഥാപിച്ചു. 4ഗ്രാമീണ റോഡുകള്‍ നവീകരിച്ചു. കോട്ടങ്ങള്‍ ഉഷാ സുഭാഷ് (യുഡിഎഫ്) പ്രതിപക്ഷ നേതാവ് 4പ്രതിപക്ഷ അംഗങ്ങള്‍ക്ക് അർഹമായ ഫണ്ട് ലഭ്യമാക്കിയില്ല. 4പരിഹാരമില്ലാതെ കുടിവെള്ള പ്രശ്നം. 4വഴിവിളക്കുകള്‍ മാസങ്ങളായി കത്തുന്നില്ല. 4പടിപ്പുരയ്ക്കല്‍ ക്ഷേത്രത്തിനു സമീപത്തെ കുഴല്‍ക്കിണര്‍ തുറന്നില്ല. 4തോടുകളുടെ ആഴം കൂട്ടലോ പോളനീക്കം ചെയ്യലോ ഉണ്ടായില്ല. 4ചമ്പക്കുളം ആശുപത്രിക്കു സമീപത്തെ ടേക്ക് എ ബ്രേക്ക് തുറന്നില്ല. 4മങ്കൊമ്പിലെ ഹൈമാസ്റ്റ് പ്രവര്‍ത്തനരഹിതം. ഒറ്റനോട്ടത്തിൽ ഒരു കാലത്തു വളരെ നല്ല രീതിയില്‍ പ്രവര്‍ത്തിച്ചിരുന്ന ചമ്പക്കുളം ഗവ. ഹോസ്പിറ്റലില്‍ കിടത്തിച്ചികിത്സ ഇല്ലാതായിട്ട് എട്ടു വര്‍ഷങ്ങളായി. വിവിധ കോണുകളില്‍നിന്ന് പ്രതിഷേധം ഉയര്‍ന്നിട്ടും നടപടി ഒന്നും ഉണ്ടായിട്ടില്ല. കുട്ടനാട് താലൂക്കിന്‍റെ ആസ്ഥാനവും എം.എസ്. സ്വാമിനാഥന്‍ മെമ്മോറിയല്‍ നെല്ല് ഗവേഷണ കേന്ദ്രവും നിരവധി സര്‍ക്കാര്‍ ഓഫിസുകള്‍ സ്ഥിതിചെയ്യുന്ന പഞ്ചായത്ത്. അതു പ്രയോജനപ്പെടുത്താവുന്ന നിരവധി പദ്ധതികൾക്ക് ഇനിയും സാധ്യതയുണ്ട്. ആകെ ജനസംഖ്യ 15,848. പ്രധാന കൃഷി നെല്ല്. കക്ഷിനില: കക്ഷിനില: വാര്‍ഡുകള്‍ 13. ഭരണം എല്‍ഡിഎഫിന്. സിപിഎം- 6, സിപിഐ- 1, കേരള കോണ്‍.- എം- 3, കോണ്‍ഗ്രസ്- 2, ബിജെപി-1.

പൂച്ചാക്കല്‍ ഷാഹുല്‍ ശതാഭിഷേക നിറവിൽ

പൂച്ചാക്കല്‍: മുതിര്‍ന്ന നാടക ഗാനരചയിതാവ് പൂച്ചാക്കല്‍ ഷാഹുല്‍ ശതാഭിഷേക നിറവിൽ. മുന്നൂറിലേറെ നാടകങ്ങള്‍ക്കായി 1500ൽ അധികം ഗാനങ്ങള്‍ രചിച്ച അദേഹം നാലു സിനിമകള്‍ക്കു വേണ്ടിയും പാട്ടെഴുതി. എം.എസ്. ബാബുരാജ്, എം.കെ. അര്‍ജുനന്‍, ദക്ഷിണാമൂര്‍ത്തി, ആര്‍.കെ. ശേഖര്‍ എന്നിവര്‍ക്കൊപ്പം പ്രവര്‍ത്തിച്ച അദ്ദേഹത്തെ ആദരിക്കുന്ന ചടങ്ങും ശിഷ്യരുടെയും സഹപ്രവര്‍ത്തകരുടെയും സംഗമവും ഇന്നും നാളെയുമായി നടക്കും. 1957ല്‍ പൂച്ചാക്കല്‍ യംഗ് മെന്‍സ് വായനശാലയിലെ കിരണം മാസികയിലൂടെ സാഹിത്യരംഗത്തു പ്രവേശിച്ചു. 1972ല്‍ അഴിമുഖം എന്ന ചലച്ചിത്രത്തിനുവേണ്ടി ബാബുരാജിന്‍റെ സംഗീത സംവിധാനത്തില്‍ ഗാനരചന നിര്‍വഹിച്ചു ചലച്ചിത്രരംഗത്തു പ്രവേശിച്ചു. അധ്യാപന ജോലി ഉപേക്ഷിച്ച് മദ്രാസില്‍ താമസിച്ചു ഗാനരചന നിര്‍വഹിക്കാനുള്ള വൈമുഖ്യം മൂലമാണ് സിനിമാരംഗത്ത് കൂടുതൽ അവസരങ്ങൾ ഇല്ലാതെ പോയത്. നാടകഗാന രചനയ്ക്കു കേരള സംഗീത നാടക അക്കാദമി അവാര്‍ഡ്, ഗുരുപൂജ അവാര്‍ഡ്, കൃഷ്ണാ അവാര്‍ഡ്, ജേസി ഫൗണ്ടേഷന്‍ അവാര്‍ഡ്, ബാബുരാജ് അനുസ്മരണ സമിതി പുരസ്‌കാരം, നാടക പ്രതിഭാ പുരസ്‌കാരം, ഇന്‍സ വഞ്ചിപ്പാട്ട് അവാര്‍ഡ്, ഇടക്കൊച്ചി പ്രഭാകരന്‍ സ്മാരക അവാര്‍ഡ്, ചേര്‍ത്തല പൗരാവലിയുടെ സര്‍ഗസ്ത്രീ അവാര്‍ഡ്, ഡോക്ടര്‍ പല്‍പ്പു സാഹിത്യ പുരസ്‌കാരം എന്നിങ്ങനെ അനവധി പുരസ്‌കാരങ്ങള്‍ ലഭിച്ചിട്ടുണ്ട്. ഗുരുപൂർണിമ ഇന്ന് ഇന്ന് പാണാവള്ളിയിലെ അദേഹത്തിന്‍റെ വീട്ടില്‍ 2.30 മുതല്‍ ഗുരുപൂര്‍ണിമ എന്ന പേരില്‍ ശിഷ്യരുടെയും സഹപ്രവര്‍ത്തകരുടെയും സംഗമം മട്ടാഞ്ചേരി ടിഡിബിറ്റിഎസില്‍ ഷാഹുലിന്‍റെ അധ്യാപകനായിരുന്ന വി. മുരളീധര മേനോന്‍ ഉദ്ഘാടനം ചെയ്യും. നാളെ തൈക്കാട്ടുശേരി ബ്ലോക്ക് പഞ്ചായത്ത് ഹാളില്‍ രാവിലെ 9.30 മുതല്‍ നാടക പ്രവര്‍ത്തക സംഗമം മന്ത്രി പി. പ്രസാദ് ഉദ്ഘാടനം ചെയ്യും. പൂച്ചാക്കല്‍ ഷാഹുല്‍ ഫൗണ്ടേഷന്‍ ഉദ്ഘാടനം മുന്‍ ഗോവ ഗവര്‍ണര്‍ പി.എസ്. ശ്രീധരന്‍ പിള്ള നിര്‍വഹിക്കും. മൂന്നിന് പൗരാവലിയുടെ ഉപഹാരം മന്ത്രി വി.എന്‍. വാസവന്‍ സമര്‍പ്പിക്കും. ആലപ്പുഴ ജില്ലയിലെ ചേര്‍ത്തല താലൂക്കില്‍ പൂച്ചാക്കല്‍ കെ. അബു ഹനീഫയുടേയും കെ.എം. ആത്തിക്കബീവിയുടേയും മകനായി 1941 ഒക്ടോബറില്‍ ജനനം. പി.എ. മറിയം ബീവിയാണ് ഭാര്യ. മക്കള്‍: റസല്‍ ഷാഹുല്‍ (സീനിയര്‍ ഫോട്ടോഗ്രഫര്‍ മനോരമ), റാഫി ഷാഹുല്‍ (ഹൈക്കോടതി) മരുമക്കള്‍: ഷിജി, സറീന.

തലവടി ഉപജില്ലാ ശാസ്‌ത്രോത്സവത്തിന് തിരി തെളിഞ്ഞു

എടത്വ: തലവടി വിദ്യാഭ്യാസ ഉപജില്ലാ ശാസ്‌ത്രോത്സവത്തിന് തിരിതെളിഞ്ഞു. സാമൂഹിക ശാസ്ത്ര, ഗണിതശാസ്ത്ര, പ്രവര്‍ത്തി പരിചയ-ഐടി മേളയ്ക്കാണ് തിരി തെളിഞ്ഞത്. ചമ്പക്കുളം ബ്ലോക്ക് പഞ്ചായത്ത് പ്രസിഡന്‍റ് ജിന്‍സി ജോളി ഉദ്ഘാടനം ചെയ്തു. തലവടി പഞ്ചായത്ത് പ്രസിഡന്‍റ് ഗായത്രി ബി. നായര്‍ അധ്യക്ഷത വഹിച്ചു. ബ്ലോക്ക് പഞ്ചായത്തംഗം അജിത്ത് പിഷാരത്ത്, തലവടി എഇഒ എസ്. അശോകന്‍, ജനറല്‍ കണ്‍വീനര്‍ ഇ. സാജിത, ജോമോന്‍ ജോസഫ്, സിനി ജി. നായര്‍, പ്രധാനധ്യാപിക വിജയലേഖ, സിന്ധു രമേശ് എന്നിവര്‍ പ്രസംഗിച്ചു. 21, 22 തീയതികളില്‍ തലവടി ഗവ. ഹൈസ്‌കൂള്‍, ആനപ്രമ്പാല്‍ ദേവസ്വം യുപി സ്‌കൂള്‍ എന്നിവിടങ്ങളിലാണ്ശാസ്‌ത്രോത്സവം.

റവന്യൂ ജില്ലാ സ്കൂൾ കായിക മേള : ആലപ്പുഴ എസ്ഡിവി ബോയ്സ് ഹൈസ്കൂൾ മുന്നിൽ

മുഹമ്മ: കലവൂർ പ്രീതി കുളങ്ങര സ്കൂൾ ഗ്രൗണ്ടിൽ ഇന്നലെ നടന്ന റവന്യൂ ജില്ലാ സ്കൂൾ കായിക മേളയിൽ ആലപ്പുഴ എസ്ഡിവി ബോയ്സ് ഹൈസ്കൂൾ 89 പോയിന്‍റോടെ മുന്നിൽ നിൽക്കുന്നു. കലവൂർ ഗവ. ഹൈസ്കൂളും (88 പോയിന്‍റ്), ചാരമംഗലം ഡിവി എച്ച്എസ്എസുമാണ് (73 പോയിന്‍റ്) യഥാക്രമം രണ്ടും മൂന്നും സ്ഥാനത്ത്. സബ് ജില്ലാ തലത്തിൽ 325 പോയിന്‍റോടെ ആലപ്പുഴ സബ് ജില്ലയാണ് മുന്നിൽ. 276 പോയിന്‍റ് കരസ്ഥമാക്കിയ ചേർത്തല സബ് ജില്ലയ്ക്കാണ് രണ്ടാം സ്ഥാനം. 52 പോയിന്‍റോടെ മാവേലിക്കര സബ് ജില്ല മൂന്നാമതെത്തി. സമാപന ദിനമായ ഇന്നു രാവിലെ 8.30 മുതൽ മുഹമ്മ കാർമൽ ഗ്രൗണ്ടിലും (മദർ തെരേസ ഗ്രൗണ്ട്), ചേർത്തല എസ്എൻ കോളജിലുമായി മത്സരങ്ങൾ തുടരും. സീനിയർ ആൺകുട്ടികളുടെ ഡിസ്കസ് ത്രോ, ജൂണിയർ, സീനിയർ ആൺകുട്ടികളുടെ ജാവലിൻത്രോ മത്സരങ്ങളാണ് കാർമൽ ഗ്രൗണ്ടിൽ നടക്കുക. ആൺകുട്ടികളുടെയും പെൺകുട്ടികളുടെയും ജൂനിയർ, സീനിയർ വിഭാഗം ഹൈജംപ് മത്സരങ്ങളാണ് എസ്എൻ കോളജിൽ നടക്കുക. ഇന്നലെ (17ന്) നടത്താനിരുന്ന എല്ലാ മത്സരങ്ങളും ക്രമപ്രകാരം ഇന്നു നടക്കുമെന്നു സംഘാടകർ അറിയിച്ചിട്ടുണ്ട്. സംഘാടകരുടെ പരിചയക്കുറവ്; കായികമേളയിൽ കല്ലുകടി മുഹമ്മ: സംഘാടനത്തിലെ പിഴവാണ് കായികമേളയുടെ താളംതെറ്റിച്ചത്. മേളകൾ നടത്തി പരിചയമുള്ളവർ പല രംഗത്തും കുറവായിരുന്നതു വിനയായി. പല സ്ഥലങ്ങളിലായി മത്സരങ്ങൾ നിശ്ചയിച്ചെങ്കിലും മേൽനോട്ടച്ചുമതല കൈമാറുന്നതിൽ പാളിച്ചയുണ്ടായി. ഇതിന്‍റേതായ താളപ്പിഴകൾ എല്ലായിടത്തും ഉണ്ടായി. ഓൺലൈൻ എൻട്രിയിൽ താമസം നേരിട്ടതാണ് ആദ്യദിനം മത്സരം വൈകാൻ കാരണമായത്. മേളയ്ക്ക് എത്തിയവർക്കു ഭക്ഷണം കിട്ടാത്ത സാഹചര്യം വന്നതും പ്രശ്നമായി. മത്സരത്തിൽ പങ്കെടുക്കേണ്ട താരങ്ങൾ ഭക്ഷണംതേടി മുഹമ്മയിൽ ചുറ്റിത്തിരിയേണ്ട സ്ഥിതിയുണ്ടായി. ഇത്തരം പാളിച്ചകൾ മത്സരക്രമത്തിന്‍റെ താളം തെറ്റിച്ചു. ആദ്യദിനത്തിലുണ്ടായ പ്രശ്നങ്ങൾ രണ്ടാംദിനത്തിലും ഭക്ഷണവുമായി ബന്ധപ്പെട്ട കാര്യങ്ങളിൽ ആവർത്തിച്ചു. വൈകുന്നേരങ്ങളിൽ പെയ്ത മഴയും മത്സരത്തെ ബാധിച്ചു. രണ്ടാം ദിനത്തിൽ വൈകിട്ട് ഏഴായിട്ടും മത്സരങ്ങൾ തീർന്നിരിന്നില്ല. ഇതിനാലാണ് ഇന്ന് സമാപിക്കേണ്ടിയിരുന്ന മത്സരങ്ങൾ ഒരു ദിവസം കൂടി നീണ്ടത്. മുഹമ്മ കെ ഇ കാർമൽ സ്കൂൾ ഗ്രൗണ്ടിൽ സ്കൂളുമായി ബന്ധപ്പെട്ട പരിപാടികൾ ഉണ്ടായിരുന്നതിനാൽ കലവൂർ പ്രീതികുളങ്ങര സ്കൂൾ ഗ്രൗണ്ടിലാണ്. ഇന്നലെ മത്സരങ്ങൾ നടന്നത്

കുടിവെള്ളത്തിനായി തീരദേശജനത സമരത്തിൽ

തുറവൂര്‍: കുടിവെള്ളത്തിനായി തീരദേശ ജനത വീണ്ടും സമരത്തില്‍. കുത്തിയതോട് ഗ്രാമപഞ്ചായത്ത് തീരപ്രദേശമായ പള്ളിത്തോട് ഒന്നും പതിനാറും വാര്‍ഡുകളില്‍ കുടിവെള്ളക്ഷാമം രൂക്ഷമായി തുടരുന്നു. കുടിവെള്ളത്തിനായി ജനം സമരം തുടങ്ങിയിട്ട് 14 വര്‍ഷത്തിലേറെയായി. ഉപജീവിതത്തിനായി കടലില്‍പോകുന്ന തീരവാസികള്‍ കുടിവെള്ളം വിലയ്ക്കുവാങ്ങിയാണ് ജീവിതം മുന്നോട്ടുപോകുന്നത്. വളരെ ദുരിതത്തിലായ ജീവിതാവസ്ഥയില്‍ വര്‍ഷങ്ങളേറെയായി സമരപരിപാടികളുമായി മുന്നോട്ടുപോയിട്ടും ഇതേവരെ ഒരു പരിഹാരം ഉണ്ടാക്കാന്‍ തദ്ദേശസ്ഥാപനങ്ങള്‍ക്കോ വാട്ടര്‍ അഥോറിറ്റിക്കോ സാധിച്ചിട്ടില്ല. കുത്തിയതോട് പഞ്ചായത്ത്, ബ്ലോക്ക് പഞ്ചായത്ത്, ജില്ലാ പഞ്ചായത്ത്, തഹസില്‍ദാര്‍, എംഎല്‍എ, എംപി, ജില്ലാകളക്ടര്‍ - വാട്ടര്‍ അഥോറിറ്റിയില്‍ എക്‌സിക്യൂട്ടീവ് എന്‍ജിനിയര്‍ എന്നിവര്‍ക്കു പരാതി നല്‍കിയിട്ടുണ്ട്. എങ്കിലും ഇതുവരെ കുടിവെള്ളപ്രശ്‌നത്തിന് പരിഹാരം കണ്ടെത്താന്‍ സാധിച്ചിട്ടില്ല. ഈ കുടിവെള്ളപ്രശ്‌നം പരിഹരിക്കുന്നതിനായി പുതിയ പൈപ്പ് സ്ഥാപിക്കണമെന്നാണ് വാട്ടര്‍ അഥോറിറ്റി നിര്‍ദേശിച്ചത്. ഇതിനായി നാട്ടുകാര്‍ ചേര്‍ന്നു പണം മുടക്കി വാട്ടര്‍ അഥോറിറ്റിയെക്കൊണ്ട് പുതിയ എസ്റ്റിമേറ്റെടുക്കുകയും എംപിക്കും എംഎല്‍എക്കും സമര്‍പ്പിക്കുകയും ചെയ്തിട്ടുള്ളതാണ്. പക്ഷേ, ദുരിതമനുഭവിക്കുന്ന ഈ ജനങ്ങള്‍ക്ക് കുടിവെള്ളം എത്തിക്കാന്‍ ഇതുവരെ ആരും ശ്രമിച്ചിട്ടില്ല. ജനങ്ങളുടെ പ്രാഥമിക ആവശ്യമായ കുടിവെള്ളപ്രശ്നത്തിന് പരിഹാരം ഉണ്ടാക്കിയില്ലെങ്കില്‍ വോട്ടു ബഹിഷ്‌കരണം ഉള്‍പ്പെടെയുള്ള സമരപരിപാടികളുമായി മുന്നോട്ടുപോകാനാണ് കടലോര ജനതയുടെ തീരുമാനം.

അവശ്യസാധനങ്ങൾ വിതരണം ചെയ്തു

ചേർത്തല: നൈപുണ്യ സ്കൂൾ ഓഫ് മാനേജ്മെന്‍റിലെ സമുദ്ര ബെസ്റ്റ് പദ്ധതിയുടെ ഭാഗമായുള്ള നെസ്റ്റ് പാലിയേറ്റീവ് യൂണിറ്റിന്‍റെ ആഭിമുഖ്യത്തില്‍ മനക്കോടം സ്നേഹാലയം വൃദ്ധസദനം സന്ദര്‍ശിക്കുകയും അവശ്യസാധനങ്ങൾ വിതരണം ചെയ്തു. കോളജിലെ വിദ്യാർഥികളിൽനിന്നും അധ്യാപകരുൾപ്പടെയുള്ള ജീവനക്കാരിൽനിന്നും ശേഖരിച്ച വസ്ത്രം, ദൈനംദിന ആവശ്യങ്ങൾക്കുള്ള ഉത്പന്നങ്ങളാണ് കൈമാറിയത്. ഇതോടനുബന്ധിച്ചു നടന്ന ചടങ്ങില്‍ നൈപുണ്യ സ്കൂൾ ഓഫ് മാനേജ്മെന്‍റ് എക്സിക്യൂട്ടീവ് ഡയറക്ടർ ഫാ. വർഗീസ് പാലാട്ടി, അസിസ്റ്റന്‍റ് എക്സിക്യൂട്ടീവ് ഡയറക്ടർ ഫാ. അൻസിൽ മൈപ്പാൻ, പ്രിൻസിപ്പൽ ഡോ. ബിജി പി. തോമസ്, വൈസ് പ്രിൻസിപ്പൽ പുഷ്പ ജോൺ എന്നിവർ പങ്കെടുത്തു.

രാജ്യസുരക്ഷാ സേവകർക്ക് ആദരമർപ്പിച്ച് കരുമാടി ഇടവക

കരുമാടി: ഈശോമിശിഹായുടെ തിരുപ്പിറവിയുടെ ജൂബിലി വർഷത്തിൽ ഇടവകയിൽ നടത്തപ്പെടുന്ന വ്യത്യസ്തങ്ങളായ കർമപരിപാടികളുടെ ഭാഗമായി കരുമാടി സെന്‍റ് നിക്കോളാസ് - സെന്‍റ് ജോസഫ് ഇടവക രാജ്യസുരക്ഷയുമായി ബന്ധപ്പെട്ട് സേവനം ചെയ്തു വിരമിച്ചവരെയും ഇപ്പോൾ സേവനം ചെയ്തുകൊണ്ടിരിക്കുന്നവരെയും ആദരിക്കുന്നു. ഇടവകയിൽ സജീവമായി പ്രവർത്തിക്കുന്ന മിഷൻ ലീഗ്, യുവദീപ്തി, മാതൃപിതൃവേദി എന്നീ സംഘടനകളുടെ സംയുക്താഭിമുഖ്യത്തിലാണ് പരിപാടി സംഘടിപ്പിക്കപ്പെടുന്നത്. ധീരമായ രാജ്യസേവനത്തിന് ഇടവകയുടെ ആദരം എന്ന കാഴ്ചപ്പാടോടെ നടത്തപ്പെടുന്ന "ദേശ് സുരക്ഷാ സേവക് സമ്മാൻ" പരിപാടിയിൽ 75 രാജ്യസുരക്ഷാ സേവകർ പങ്കെടുക്കുന്നു. നാളെ രാവിലെ 11ന് കരുമാടി സെന്‍റ് നിക്കോളാസ് ഹാളിൽ നടത്തപ്പെടുന്ന സംഗമത്തിൽ അമ്പലപ്പുഴ ഡിവൈഎസ്പി കെ.എൻ. രാജേഷ് മുഖ്യാഥിതിയായിരിക്കും. ഇതിനോടാനുബന്ധിച്ച് മിഷൻലീഗ് കുട്ടികളുടെയും യുവജനങ്ങളുടെയും മാതാക്കളുടെയും വിവിധ കലാപരിപാടികളും ഉണ്ടായിരിക്കുന്നതാണെന്ന് വികാരി ഫാ. മാത്യു നടയ്ക്കൽ, പ്രോഗ്രാം കോ-ഓർഡിനേറ്റർ ഫാ. മാത്യു തടത്തിൽ, കൈക്കാരന്മാരായ ജോണി കളത്തിൽ, സാബു അഞ്ചിൽ എന്നിവർ അറിയിച്ചു.

പാമ്പിനെ കൊന്ന് ഉടമയുടെ ജീവന്‍ രക്ഷിച്ച് റോക്കി

എടത്വ: പാമ്പിനെ കടിച്ചുകൊന്ന് ഉടമയുടെ ജീവന്‍ രക്ഷിച്ച് വീരനായകനായി റോക്കി. പാമ്പുകടിയേറ്റ നായ അപകടനില തരണം ചെയ്തു. പച്ച തോട്ടുകടവ് തുഷാരയുടെ വീടിന്‍റെ മുറ്റത്ത് കഴിഞ്ഞദിവസം ഉച്ചകഴിഞ്ഞ് 1.30നാണ് സംഭവം. വീടിന്‍റെ മുറ്റത്തേക്ക് ഇഴഞ്ഞുവന്ന മൂര്‍ഖന്‍പാമ്പിനെയാണ് റോക്കി എന്ന നായ നേരിട്ടത്. പാമ്പിനെ കടിച്ചുകൊടഞ്ഞ റോക്കിക്ക് പാമ്പിന്‍റെ കടിയേറ്റിരുന്നു. വിദേശത്തുനിന്ന് വരുന്ന ഭര്‍ത്താവ് സുബാഷ് കൃഷ്ണയെ വിളിക്കാനായി വീട്ടുടമ തുഷാര യാത്ര തിരിക്കാന്‍ വീട്ടുമുറ്റത്തേക്ക് ഇറങ്ങുകയാണ് സംഭവം. കളര്‍കോട് വെറ്ററിനറി ആശുപത്രി ഡോക്ടര്‍ മേരിക്കുഞ്ഞിന്‍റെ നിര്‍ദേശ പ്രകാരം നായയെ ഹരിപ്പാട് വെറ്ററിനറി ആശുപത്രിയിലേക്കും തുടര്‍ന്ന് തിരുവല്ല മഞ്ഞാടിയിലെ സ്വകാര്യ പെറ്റ്‌സ് ആശുപത്രിയിലേക്കും മാറ്റി. ദിവസങ്ങളുടെ നീണ്ട ചികിത്സയ്‌ക്കൊടുവില്‍ നായ സുഖം പ്രാപിച്ചു. വിദേശത്തുനിന്ന് എത്തിയ സുഭാഷ് നേരേ ആശുപത്രിയിലേക്കാണ് എത്തിയത്. വെറ്ററിനറി സര്‍ജന്‍ ഡോ. ബിബിന്‍ പ്രകാശിന്‍റെ നേത്യത്വത്തില്‍ ഡോ. സിദ്ധാര്‍ഥ്, ഡോ. നീമ, ഡോ. ലിറ്റി എന്നിവരുടെ തീവ്ര ശ്രമഫലമായാണ് നായുടെ ജീവന്‍ രക്ഷിച്ചത്.

നിർമാണപ്രവൃത്തികൾ തടസപ്പെടുത്തി

അമ്പലപ്പുഴ: ദേശീയപാതാ നിർമാണവുമായി ബന്ധപ്പെട്ട് പൈപ്പ് ലൈനുകൾ തകരാറിലാകുകയും കുടിവെള്ളം മുടങ്ങുകയു ചെയ്തതിനെത്തുടർന്ന് ജനപ്രതിനിധികൾ പ്രവൃത്തികൾ തടഞ്ഞു. പുന്നപ്ര വടക്ക് പഞ്ചായത്ത് പ്രസിഡന്‍റ് സജിത സതീശൻ, വൈസ് പ്രസിഡന്‍റ് എ.പി. സരിത, ജില്ലാ പഞ്ചായത്തംഗം ഗീതാ ബാബു, സ്ഥിരം സമിതി അധ്യക്ഷരായ വിനോദ് കുമാർ, അജിത ശശി, ജയ പ്രസന്നൻ, എന്നിവരാണ് നിർമാണ പ്രവൃത്തികൾ തടഞ്ഞത്. ദേശീയപാതയിൽ തൂക്കുകുളം ഭാഗത്താണ് ജനപ്രതിനിധികൾ നിർമാണപ്രവൃത്തികൾ തടസപ്പെടുത്തിയത്. കുടിവെള്ള പൈപ്പ് ലൈൻ തകർന്നതോടെ പഞ്ചായത്തിലെ രണ്ട്, 10, 14, 15 വാർഡുകളിൽ ആഴ്ചകളായി കുടിവെള്ളം മുടങ്ങിയിരുന്നു. നിർമാണ കമ്പിനി അധികൃതരോട് നിരന്തരം ആവശ്യപ്പെട്ടിട്ടും കുടിവെള്ളവിതരണം പുനഃസ്ഥാപിക്കാനും അധികൃതർ തയാറായില്ല. ഇതേത്തുടർന്നാണ് പ്രവൃത്തികൾ തടഞ്ഞത്. തുടർന്ന് അടിയന്തരമായി തകരാർ പരിഹരിച്ച് പമ്പിംഗ് ആരംഭിക്കാമെന്ന് അധികൃതർ ഉറപ്പുനൽകിയതോടെ സമരം അവസാനിപ്പിച്ചു.

അതിരൂപത സണ്‍ഡേസ്‌കൂള്‍ ബൈബിള്‍ കലോത്സവം ഇന്ന് ആരംഭിക്കും

ചങ്ങനാശേരി: അതിരൂപത മതബോധന കേന്ദ്രമായ സന്ദേശനിലയത്തിന്‍റെ ആഭിമുഖ്യത്തിലുള്ള ബൈബിള്‍ കലോത്സവം എസ്ബി കോളജില്‍ (കാവുകാട്ട് നഗറില്‍) ഇന്ന് ആരംഭിക്കും. 18 ഫൊറോനകളില്‍നിന്നുള്ള രണ്ടായിരത്തിലധികം കലാപ്രതിഭകള്‍ കലോത്സവത്തില്‍ പങ്കെടുക്കും. രാവിലെ ഒമ്പതിന് ജോമ്മ കാട്ടടി പതാക ഉയര്‍ത്തുന്നതോടെ സമ്മേളനത്തിനു തുടക്കമാകും. ഫാ. ഷെറിന്‍ കുറശേരി ബൈബിള്‍ പ്രതിഷ്ഠ നടത്തും. തുടര്‍ന്ന് നടക്കുന്ന സമ്മേളനം വികാരി ജനറാള്‍ മോണ്‍. മാത്യു ചങ്ങങ്കരി ഉദ്ഘാടനം ചെയ്യും. ഡയറക്ടര്‍ ഫാ. ബാബു പുത്തന്‍പുരയ്ക്കല്‍ അധ്യക്ഷത വഹിക്കും. എസിസി സെക്രട്ടറി പ്രിന്‍സ് ചിറ്റേട്ടുകളം പ്രസംഗിക്കും. തുടർന്ന് കലാമത്സരങ്ങള്‍ ആരംഭിക്കും. 20ന് വൈകുന്നേരം 4.30ന് നടക്കുന്ന സമാപന സമ്മേളനം ആര്‍ച്ച്ബിഷപ് മാര്‍ തോമസ് തറയില്‍ ഉദ്ഘാടനം ചെയ്യും. ഡയറക്ടര്‍ ഫാ. ബാബു പുത്തന്‍പുയ്ക്കല്‍ അധ്യക്ഷത വഹിക്കും. എസിസി കണ്‍വീനര്‍ ബോബി തോമസ്, സിജോ ആന്‍റണി എന്നിവര്‍ പ്രസംഗിക്കും.

ബഡ്സ് സ്‌കൂൾ പെണ്‍കുട്ടികള്‍ക്ക് മെനുസ്ട്രല്‍ കപ്പ് വിതരണം

ആലപ്പുഴ: റോട്ടറി ക്ലബ് ഓഫ് മാരാരിയുടെ നേതൃത്വത്തില്‍ ഓപ്പോള്‍ പ്രോജക്ടിന്‍റെ ഭാഗമായി ജില്ലയിലെ മുഴുവന്‍ ബഡ്സ് സ്‌കൂളുകളിലെയും പെണ്‍കുട്ടികള്‍ക്കായ് സൗജന്യ മെനുസ്ട്രല്‍ കപ്പുകള്‍ എത്തിച്ചു നല്‍കുന്ന പദ്ധതിക്ക് തുടക്കം കുറിച്ചു. ചേര്‍ത്തല നഗരസഭയ്ക്കു കീഴിലുള്ള ആര്‍ദ്രം ബഡ്സ് സ്‌കൂളിലായിരുന്നു പദ്ധതിയുടെ ഉദ്ഘാടനം. ഭിന്നശേഷിക്കാരായ കുഞ്ഞുങ്ങളുടെ അമ്മമാര്‍ക്ക് മെനുസ്ട്രല്‍ കപ്പിന്‍റെ ഉപയോഗത്തെ സംബന്ധിച്ച് വിശദമായ ക്ലാസും സംഘടിപ്പിച്ചു. സ്‌കൂളിലെ വിദ്യാര്‍ഥികളില്‍ ഒരാളുടെ അമ്മയ്ക്ക് കപ്പു നല്‍കികൊണ്ട് വിതരണോദ്ഘാടനം റോട്ടറി 3211 ഡിസ്ട്രിക്ട് ഗവർണര്‍ ഡോ. ടീന ആന്‍റണി നിര്‍വഹിച്ചു. പരിപാടികള്‍ക്ക് റോട്ടറി ക്ലബ് ഓഫ് മാരാരിയുടെ പ്രസിഡന്‍റ് കെ.ജി. ബിജു, സെക്രട്ടറി ശരണ്യാ സ്‌നേഹജന്‍, കുടുംബശ്രീ ജില്ലാ കോ-ഓര്‍ഡിനേറ്റര്‍ മോള്‍ജി റഷീദ് എന്നിവര്‍ നേതൃത്വംനല്‍കി.

നെല്ലിന്‍റെ സംഭരണവില വര്‍ധിപ്പിക്കണം:‌ കത്തോലിക്ക കോണ്‍ഗ്രസ്

എടത്വ: കുട്ടനാട്ടിലും ഇതര പ്രദേശങ്ങളിലും കര്‍ഷികമേഖലയില്‍ അധ്വാനിക്കുന്ന കര്‍ഷകര്‍ക്ക് നിലവില്‍ ലഭിക്കുന്ന നെല്ലുവില കൃഷിച്ചെലവുകള്‍ വര്‍ധിച്ച സാഹചര്യത്തില്‍ തികച്ചും അപര്യാപ്തമാണ് എന്ന യാഥാര്‍ഥ്യം മനസിലാക്കി സംഭരണവിലയില്‍ കാലോചിതമായ വർധന നല്‍കി കര്‍ഷകരെയും കൃഷിയെയും പ്രോത്സാഹിപ്പിക്കുന്ന സമീപനം ബന്ധപ്പെട്ടവര്‍ സ്വീകരിക്കണമെന്ന് കത്തോലിക്ക കോണ്‍ഗ്രസ് എടത്വ ഫൊറോന നേതൃയോഗം ആവശ്യപ്പെട്ടു. നെല്ല് സംഭരണത്തോടു ബന്ധപ്പെട്ട കൈകാര്യച്ചെലവ് വഹിക്കുന്നതില്‍നിന്നു കര്‍ഷകരെ ഒഴിവാക്കണമെന്ന ദീര്‍ഘകാല ആവശ്യം പരിഗണിക്കാത്തത്തില്‍ യോഗം പ്രതിഷേധം രേഖപ്പെടുത്തി. കാലാകാലങ്ങളില്‍ കേന്ദ്രസര്‍ക്കാര്‍ പ്രഖ്യാപിക്കുന്ന നെല്ലിന്‍റെ താങ്ങുവിലയിലെ വര്‍ധന കര്‍ഷകര്‍ക്കു നിഷേധിക്കുന്നത് നീതീകരിക്കാനാവില്ല. അത്തരം കര്‍ഷകവിരുദ്ധ നടപടികളില്‍നിന്ന് ഉത്തരവാദിത്വപ്പെട്ടവര്‍ പിന്തിരിയണമെന്നും കര്‍ഷകര്‍ക്ക് അര്‍ഹതപ്പെട്ടത് ലഭ്യമാക്കുന്നതില്‍ കാലതാമസം വരുത്തുന്നത് കര്‍ഷകദ്രോഹമാണെന്നും യോഗം ചൂണ്ടിക്കാട്ടി. രാജ്യത്ത് നെല്ലിന് ഏറ്റവും ഉയര്‍ന്ന വില ലഭിക്കുന്നത് കേരളത്തിലാണ് എന്ന അടിസ്ഥാനരഹിതമായ പ്രചാരണത്തിന്‍റെ പൊള്ളത്തരം കര്‍ഷകസമൂഹത്തിന് ബോധ്യമുണ്ടെന്നും യോഗം വിലയിരുത്തി. കത്തോലിക്ക കോണ്‍ഗ്രസിന്‍റെ നേതൃത്വത്തില്‍ നടക്കുന്ന അഖില കേരള അവകാശ സംരക്ഷണ ജാഥ മുന്നോട്ടുവയ്ക്കുന്ന കാര്‍ഷിക വിഷയങ്ങള്‍ അടക്കമുള്ള ആവശ്യങ്ങളില്‍മേല്‍ സത്വരവും നീതിപൂര്‍വകവുമായ നടപടി കൈക്കൊള്ളാന്‍ അമാന്തി കാട്ടരുതെന്നും യോഗം പ്രമേയത്തിലൂടെ ആവശ്യപ്പെട്ടു. ജാഥയ്ക്ക് രാമങ്കരിയില്‍ ഉജ്വല സ്വീകരണം നല്‍കാനും തിരുവനന്തപുരത്തു നടക്കുന്ന ജാഥ സമാപനത്തില്‍ എടത്വ ഫൊറോനയുടെ ശക്തമായ പ്രാതിനിധ്യം ഉറപ്പുവരുത്താനും തീരുമാനിച്ചു. കത്തോലിക്ക കോണ്‍ഗ്രസ് എടത്വ ഫൊറോന ഡയറക്ടര്‍ ഫാ .ജോസഫ് ചൂളപ്പറമ്പില്‍ യോഗം ഉദ്ഘാടനം ചെയ്തു. ഫൊറോന പ്രസിഡന്‍റ് തോമസ് ഫ്രാന്‍സിസ് അധ്യക്ഷത വഹിച്ചു. വര്‍ഗീസ് മാത്യു, മാര്‍ട്ടിന്‍ കളങ്ങര, വര്‍ഗീസ് ദേവസ്യ, വി.ജെ. കുര്യന്‍, പി. ജെ. ജോസഫ്, സിബി വര്‍ഗീസ് എന്നിവര്‍ പ്രസംഗിച്ചു.

സ്‌പോര്‍ട്‌സ് കൗണ്‍സില്‍ പ്രസിഡന്‍റിന് സ്വീകരണം

ആലപ്പുഴ:ജില്ലാ സ്‌പോര്‍ട്‌സ് കൗണ്‍സില്‍ പ്രസിഡന്‍റായി തെരഞ്ഞ ടുക്കപ്പെട്ട വി.ജി. വിഷ്ണുവിന് ആലപ്പി ഡിസ്ട്രിക്ട് ബാസ്‌കറ്റ്‌ബോള്‍ അസോസിയേഷന്‍ (എഡിബിഎ) സ്വീകരണം നല്‍കി. വൈഎംസിഎയില്‍ നടത്തിയ ചടങ്ങില്‍ എഡിബിഎ പ്രസിഡന്‍റ് റോണി മാത്യു പൊന്നാട അണിയിച്ചു. സെക്രട്ടറി ജോണ്‍ ജോര്‍ജ്, പിആര്‍ഒ തോമസ് മത്തായി കരിക്കംപള്ളില്‍, മെഡിവിഷന്‍ മാനേജിംഗ് ഡയറക്ടര്‍ ബിബു പുന്നൂരാന്‍, ഇന്‍റര്‍നാഷണല്‍ കോച്ച് റിച്ചാര്‍ഡ് ലീ ബ്രൂക്‌സ്, വൈഎംസിഎ വൈസ് പ്രസിഡന്‍റ് സുനില്‍ മാത്യു ഏബ്രഹാം, ജനറല്‍ സെക്രട്ടറി ഏബ്രഹാം കുരുവിള, മായ ബ്രൂക്‌സ് എന്നിവര്‍ സംബന്ധിച്ചു.

വൈഎംസിഎ - എവിടി ഭവനരഹിതര്‍ക്കു ഭവനം; സൗരോര്‍ജ സമ്പാദ്യത്തിലൂടെ പദ്ധതിക്ക് ഇന്നു തുടക്കം

ആലപ്പുഴ: വൈഎംസിഎ - എവിടി ഭവനരഹിതര്‍ക്കു ഭവനം, സൗരോര്‍ജ സമ്പാദ്യത്തിലൂടെ പദ്ധതിക്ക് തുടക്കം കുറിക്കുന്നു. അന്തരിച്ച പ്രസിഡന്‍റ് എ.വി. തോമസിന്‍റെ സ്മരണയ്ക്കായിട്ടുള്ളതാണ് പദ്ധതി. ചടങ്ങില്‍ ആലപ്പുഴ വൈഎംസിഎ സര്‍ ജോര്‍ജ് വില്യംസ് അവാര്‍ഡും വിതരണം ചെയ്യും. ഇന്നു വൈകുന്നേരം അഞ്ചിന് വൈഎംസിഎ എ.വി. തോമസ് മെമ്മോറിയല്‍ ഓഡിറ്റോറിയത്തില്‍ പദ്ധതിയുടെ ഉദ്ഘാടനം എ.വി. തോമസ് ആന്‍ഡ് കമ്പനി ചെയര്‍മാന്‍ അജിത് തോമസ് നിര്‍വഹിക്കും. പ്രസിഡന്‍റ് മൈക്കിള്‍ മത്തായി അധ്യക്ഷത വഹിക്കും. ബിഷപ് ഡോ. ജയിംസ് റാഫേല്‍ ആനാപറമ്പില്‍ ആശീര്‍വാദ സന്ദേശം നല്‍കും. എന്‍സിവൈഐ നാഷണല്‍ ട്രഷറര്‍ റെജി ജോര്‍ജ് വിശിഷ്ടാതിഥിയായിരിക്കും. വൈഎംസിഎ സൗത്ത് വെസ്റ്റ് ഇന്ത്യാ റീജണ്‍ ചെയര്‍മാന്‍ പ്രഫ. അലക്‌സ് തോമസ് മുഖ്യപ്രഭാഷണം നടത്തും. ആലപ്പുഴ വൈഎംസിഎ സര്‍ ജോര്‍ജ് വില്യംസ് അവാര്‍ഡ് സഹൃദയ ഹോസ്പിറ്റലിലെ ചീഫ് മെഡിക്കല്‍ ഓഫീസര്‍ ഡോ. കെ.പി. ഹെഗ്ഡെക്ക് സമ്മാനിക്കും. നിര്‍മാണ കമ്മിറ്റി ഡയറക്ടര്‍മാരായ റോണി മാത്യു, ബൈജു ജേക്കബ്, ജനറല്‍ സെക്രട്ടറി ഏബ്രഹാം കുരുവിള തുടങ്ങിയവര്‍ നേതൃത്വം നല്‍കും.

കുട്ടികള്‍ മൂല്യബോധമുള്ളവരായി വളരണം: ഡോ. ആന്‍റണി മൂലയിൽ

എടത്വ: കുട്ടികള്‍ മൂല്യബോധമുള്ളവരായി വളരണമെന്ന് ചങ്ങനാശേരി അതിരൂപത കോര്‍പറേറ്റ് മാനേജര്‍ ഡോ. ആന്‍റണി മൂലയില്‍ പറഞ്ഞു. എടത്വ സെന്‍റ് അലോഷ്യസ് ഹയര്‍ സെക്കന്‍ഡറി സ്‌കൂളില്‍ പുതുതായി ആരംഭിച്ച റേഞ്ചര്‍ യൂണിറ്റിന്‍റെ ഉദ്ഘാടനം നിര്‍വഹിച്ച് സംസാരിക്കുകയായിരുന്നു അദ്ദേഹം. മാനേജര്‍ ഫാ. ഫിലിപ്പ് വൈക്കത്തുകാരൻ അധ്യക്ഷത വഹിച്ചു. പ്രിന്‍സിപ്പല്‍ പി.സി. ജോബി, ഭാരത് സ്‌കൗട്ട് ആന്‍ഡ് ഗൈഡ് ഡിസ്ട്രിക് സെക്രട്ടറി ജസി സേവ്യർ, ക്ലസ്റ്റര്‍ കണ്‍വീനര്‍ ബിന്‍സു ജേക്കബ്, പിടിഎ പ്രസിഡന്‍റ് ബൈജു തങ്കച്ചന്‍, റെയിഞ്ചര്‍ ലീഡര്‍ ബീന സ്റ്റീഫന്‍, മെറിന്‍ ജോസ് നീലങ്കാവില്‍ എന്നിവര്‍ പ്രസംഗിച്ചു.

ഇനിയും പൂർത്തിയാകാതെ കായംകുളം മൾട്ടി പ്ലക്‌സ്‌ തിയറ്റർ

കായംകുളം: വര്‍ഷങ്ങള്‍ പിന്നിടുമ്പോഴും കായംകുളം മള്‍ട്ടിപ്ലക്‌സ് തിയറ്ററിന്‍റെ നിര്‍മാണപ്രവര്‍ത്തനങ്ങള്‍ ഇനിയും പൂര്‍ത്തിയായില്ല. മൂന്നു തിയറ്ററുകളും വ്യാപാര സമുച്ചയവും അടങ്ങുന്ന തിയറ്റര്‍ കോംപ്ലക്‌സിന്‍റെ സ്ട്രക്ചറല്‍ വര്‍ക്കുകള്‍ പൂര്‍ത്തിയായെങ്കിലും എന്ന് നിര്‍മാണം പൂര്‍ത്തിയാകുമെന്ന് പറയാന്‍ പറ്റാത്ത നിലയിലാണ് ഇപ്പോഴത്തെ പ്രവൃത്തികള്‍. പ്ലാസ്റ്ററിംഗ്, പ്ലമ്പിംഗ്, ഇലക്ട്രിക്കല്‍ വര്‍ക്കുകള്‍ എല്ലാം പൂര്‍ത്തിയാകാനുണ്ട്. 32,000 ചതരശ്ര അടി വിസ്തീര്‍ണത്തില്‍ 15.03 കോടി രൂപ വിനിയോഗിച്ച് കേരള സംസ്ഥാന ചലചിത്ര വികസന കോര്‍പറേഷനാണ് തിയറ്ററുകള്‍ നിര്‍മിക്കുന്നത്. തിയറ്റര്‍ ഒന്നില്‍ 200 ഉം മറ്റ് രണ്ടെണ്ണത്തില്‍ 152 വീതവും ഇരുപ്പിടങ്ങളാണ് സജ്ജമാക്കുന്നത്. നാലു കെ പ്രൊജക്ടര്‍, ഡോള്‍ബി അറ്റ്മോസ്റ്റ് സൗണ്ട് സിസ്റ്റം, സില്‍വര്‍ സ്‌ക്രീന്‍, പുഷ്ബാക്ക് ചെയറുകള്‍, വ്യാപാര സ്ഥാപനങ്ങള്‍, ലാന്‍ഡ്‌സ്‌കേപ്പിംഗ്, നൂറോളം വാഹനങ്ങള്‍ക്ക് പാര്‍ക്ക് ചെയ്യുന്നതിനുള്ള സൗകര്യങ്ങള്‍ എന്നിവ ലക്ഷ്യമിട്ടാണ് നിര്‍മാണം നടക്കുന്നത്. ആറുമാസത്തിനുള്ളില്‍ നിര്‍മാണപ്രവര്‍ത്തനങ്ങള്‍ പൂര്‍ത്തീകരിക്കാന്‍ കഴിയുമെന്ന് യു. പ്രതിഭ എംഎല്‍എയും ചലചിത്ര വികസന കോര്‍പറേഷന്‍ ചെയര്‍മാന്‍ ഷാജി എന്‍. കരുണും മുമ്പ് വ്യക്തമാക്കിയെങ്കിലും നിര്‍മാണം എങ്ങും എത്തിയിട്ടില്ല. കെഎസ്ആര്‍ടിഡിപ്പോയ്ക്ക് പടിഞ്ഞാറ് ഭാഗത്ത് നഗരസഭ വിട്ടുനല്‍കിയ 77 സെന്‍റ് സ്ഥലത്താണ് തിയറ്റര്‍ സമുച്ചയം നിര്‍മിക്കുന്നത്. 2017 സെപ്റ്റംബറിലാണ് മള്‍ട്ടി പ്ലസ് തിയറ്റര്‍ നിര്‍മിക്കാന്‍ കായംകുളം നഗരസഭയുടെ സ്ഥലം സംസ്ഥാന ചലച്ചിത്ര വികസന കോര്‍പ്പറേഷന് പാട്ടത്തിന് നല്‍കി സര്‍ക്കാര്‍ ഉത്തരവ് ഇറക്കിയത്. 30 വര്‍ഷത്തേക്കാണ് നഗരസഭയുടെ സ്ഥലം പാട്ടവ്യവസ്ഥയില്‍ സംസ്ഥാന ചലച്ചിത്രവികസന കോര്‍പറേഷന് പാട്ടത്തിന് വിട്ട് നല്‍കുന്നത്. പാട്ടത്തുകയായി എട്ടുലക്ഷം രൂപ ഓരോവര്‍ഷവും കെഎസ്എഫ്ഡിസി നഗരസഭയ്ക്ക് നല്‍കണം എന്നാണ് വ്യവസ്ഥ.

മണ്ണാറശാലയിൽ കന്നിമാസത്തിലെ ആയില്യം എഴുന്നള്ളത്ത്

ഹരിപ്പാട്: മണ്ണാറശാല നാഗരാജ ക്ഷേത്രത്തിൽ കന്നിമാസത്തിലെ ആയില്യം പൂജയും എഴുന്നള്ളത്തും നടന്നു. കുടുംബ കാർണവർ ആയില്യം നാളിലെ പൂജകൾ ആരംഭിച്ചതിനെ തുടർന്ന് ഇല്ലത്ത് നിലവറയ്ക്കു സമീപം ഭക്തജനങ്ങൾക്ക് അമ്മ ദർശനം നൽകി. ഉച്ചപൂജയ്ക്കുശേഷം കുടുംബകാർണവരുടെ നേതൃത്വത്തിൽ നിലവറയോട് ചേർന്നുളള തളത്തിൽ ശംഖ്, കുരവ എന്നിവയുടെ അകമ്പടിയോടെ ആയില്യം പൂജയ്ക്കുളള നാഗപത്മക്കളം വരച്ചു. കളം പൂർത്തിയായപ്പോൾ അമ്മ തീർത്ഥക്കുളത്തിൽ കുളിച്ച് ക്ഷേതത്തിലെത്തി. ഇളയമ്മ, കുടുംബത്തിലെ മുതിർന്ന കാരണവന്മാർ എന്നിവർ അമ്മയെ അനുഗമിച്ചു. അമ്മ ശ്രീകോവിലിൽ പ്രവേശിച്ചതിനുശേഷം ശ്രീകോവിലിൽനിന്നും കുത്തുവിളക്കിലേക്ക് കുടുംബകാർണവർ ദീപം പകർന്നതോടെ എഴുന്നള്ളത്ത് തുടങ്ങി. തുടർന്ന് വലിയമ്മ സാവിത്രി അന്തർജനം നാഗരാജാവിന്‍റെ തിരുമുഖവും നാഗഫണവുമായി ആയില്യം എഴുന്നള്ളത്തും നടന്നു. ഇളയമ്മ സതി അന്തർജനം സർപ്പയക്ഷിയമ്മയുടെയും കാരണവൻമാർ നാഗചാമുണ്ഡിയമ്മയുടെ വിഗ്രഹവും, നാഗയക്ഷിയമ്മയുടെ വിഗ്രഹവുമായി വലിയമ്മയെ അനുഗമിച്ചു ക്ഷേത്രത്തിന് വലം വെച്ച് ഇല്ലത്തേക്ക് എത്തി. ഇല്ലത്ത് എത്തി അമ്മയുടെ പതിവ് പൂജകൾക്ക് ശേഷം ആയില്യം പൂജ ആരംഭിച്ചു. തുലാംമാസത്തെ ആയില്യമാണ് മണ്ണാറശാല ആയില്യമായി അറിയപ്പെടുന്നത്. എന്നാൽ, കന്നിമാസവും സമാനമായ ചടങ്ങുകളോടെയാണ് മണ്ണാറശാലയിൽ ആയില്യം ഉത്സവം കൊണ്ടാടുന്നത്. നവംബർ 12 നാണ് മണ്ണാറശാല ആയില്യം.

മഴയത്തും ആവേശം ചോരാതെ; റവന്യു ജില്ലാ സ്കൂൾ കായിക മേളയിൽ ആലപ്പുഴ എസ്ഡിവി മുന്നിൽ

മുഹമ്മ: മുഹമ്മ കാർമൽ ഗ്രൗണ്ടിൽ (മദർ തെരേസാ ഹൈസ്കൂൾ ഗ്രൗണ്ട്) നടക്കുന്ന റവന്യു ജില്ലാ സ്കൂൾ കായിക മേളയിൽ ആലപ്പുഴ എസ്ഡിവി ബോയ്സ് ഹൈസ്കൂൾ 57 പോയിന്‍റോടെ മുന്നിൽ നിൽക്കുന്നു. കലവൂർ ഗവ. ഹൈസ്ക്കൂളും (57 പോയിന്‍റ്) ആലപ്പുഴ ലിയോ തേർട്ടിന്ത് ഹൈസ്കൂളുമാണ് (34 പോയിന്‍റ്) യഥാക്രമം രണ്ടും മുന്നും സ്ഥാനത്ത്. സബ് ജില്ലാ തലത്തിൽ 152 പോയിന്‍റോടെ ആലപ്പുഴ സബ് ജില്ലയാണ് മുന്നിൽ. 147 പോയിന്‍റ് കരസ്ഥമാക്കിയ ചേർത്തല സബ് ജില്ലയ്ക്കാണ് രണ്ടാം സ്ഥാനം. 27 പോയിന്‍റോടെ മാവേലിക്കര സബ് ജില്ല മൂന്നാമതെത്തി. മേളയുടെ രണ്ടാം ദിവസമായിരുന്ന ഇന്നലെ വൈകിയാണ് മത്സരങ്ങൾ സമാപിച്ചത്. രാവിലെ മുതൽ മത്സരങ്ങൾ തുടങ്ങുന്നതിൽ താളപ്പിഴ ദൃശ്യമായിരുന്നു. ഭക്ഷണം ഒരുക്കുന്നതിലും വിതരണം ചെയ്യുന്നതിലും താമസം നേരിട്ടതും കളിക്കളം മഴയിൽ കുതിർന്ന് കിടന്നതും മത്സരങ്ങളുടെ സമയക്രമം തെറ്റുന്നതിനു കാരണമായി. മുഹമ്മ മദർ തെരേസ സ്കൂളിന് ഇരട്ടിമധുരം മുഹമ്മ: മുഹമ്മ മദർ തെരേസാ ഹൈസ്കൂളിന് ഇന്നലെത്തെ ദിനം ഇരട്ടിമധുരമുള്ളതായിരുന്നു. സ്കൂളിലെ എട്ടാം ക്ലാസ് വിദ്യാർഥികളായ ഡി.ധീരജും ആര്യൻ കെ. സാംജിയും ആണ് ഇരട്ടിമധുരം സമ്മാനിച്ചത്. ഡി. ധീരജ് ജൂണിയർ ബോയ്സിന്‍റെ ലോംഗ് ജംപ് മത്സരത്തിൽ ഒന്നാമതായപ്പോൾ സബ് ജൂണിയർ ബോയ്സ് സ്വിംമ്മിംഗിലാണ് ആര്യൻ കെ. സാംജി ഒന്നാമതെത്തിയത്. കായികാധ്യാപകൻ ഫാ. സനീഷ് മാവേലിയുടെ ശിക്ഷണത്തിൽ നടത്തിയ ചിട്ടയായ പരിശീലനമാണ് വിജയത്തിനാധാരമെന്ന് ധീരജ് പറയുന്നു. മുഹമ്മ കോലാട്ട് ധനേഷിന്‍റെ യും അഞ്ജുവിന്‍റെയും മകനാണ്. ഓട്ടമത്സരത്തിനിടെ വിദ്യാർഥിനി ട്രാക്കിൽ തെന്നിവീണു മുഹമ്മ: മഴയിൽ കുതിർന്ന ട്രാക്ക് മത്സരത്തെ പ്രതികൂലമായി ബാധിച്ചു. ഓട്ടമത്സരം നടക്കുമ്പോൾ, പൂഴി ഇളകിയ ട്രാക്കിൽ അൽപ്പം ഭയത്തോടെയാണ് താരങ്ങൾ ഓടിയത്.

സീനിയർ ഗേൾസിന്‍റെ 100 മീറ്റർ ഓട്ടം നടക്കുമ്പോൾ ആലപ്പുഴ മുഹമ്മദൻസ് സ്കൂളിലെ ജൂലി പോൾ ട്രാക്കിൽ തെന്നിവീണത് കാണികളുടെ നെഞ്ചിടിപ്പ് കൂട്ടി. മത്സരാർഥികൾ ഓടി പകുതി ദൂരം എത്തിയപ്പോഴാണ് ജൂലി പോൾ പൂഴിയിൽ തെന്നിവീണത്. ജൂലി പോൾ തെന്നി വീണെങ്കിലും മറ്റ് മത്സരാർഥികൾ ഓട്ടം തുടർന്നു. ട്രാക്കിൽനിന്ന് എഴുന്നേറ്റ് കാൽവലിച്ച് നടന്നാണ് ജൂലി പോൾ ഗ്രൗണ്ടിൽ എത്തിയത്. ഇതിനിടെ ഓടിയെത്തിയവർ പ്രഥമ ശുശ്രൂഷ നൽകി. ഇന്ന് നടക്കുന്ന 200 മീറ്റർ ഓട്ടമത്സരത്തിലും ജൂലി പോൾ പങ്കെടുക്കേണ്ടതാണ്. ലോംഗ് ജംപിൽ രണ്ടാം സ്ഥാനം ലഭിച്ചത് ജൂലി പോളിനായിരുന്നു.

തെക്കേമലയിലെ സാനിറ്ററി വില്പനശാലയിലെ മോഷണം; ഒരാൾ പിടിയിൽ

ആറന്മുള: തെക്കേമലയിലെ സാനിറ്ററി വില്പനശാലയിലും സമീപത്തുണ്ടായിരുന്ന സ്കൂട്ടറും മോഷ്ടിച്ചു കടന്നുകളഞ്ഞയാളെ പോലീസ് പിടികൂടി. ചങ്ങനാശേരി കുറിച്ചി സ്വദേശി ബിനു(42)വിനെയാണ് അറസ്റ്റ് ചെയ്തത്. തെക്കേമല പിഐപി ക്വാർട്ടേഴ്‌സിനു മുൻവശത്തു വച്ചിരുന്ന സ്കൂട്ടറും സമീപസ്ഥലത്ത് പ്രവർത്തിക്കുന്ന ഹോ ടെക് എന്ന സ്ഥാപനത്തിലെ രണ്ടു കടമുറിയുടെ ഷട്ടറുകളുടെ പൂട്ട് പൊട്ടിച്ചു മൂന്ന് ലക്ഷത്തോളം വില വരുന്ന സാനിറ്ററി ഫിറ്റിംഗ്സുകൾ മോഷ്ടിച്ച കേസിലാണ് അറസ്റ്റ്. അന്വേഷണത്തിനായി രൂപീകരിച്ച പ്രത്യേക സംഘമാണ് ബിനുവിനെ പിടികൂടിയത്. എരുമേലി മുക്കടയിൽ മോഷണം പോയ സ്കൂട്ടർ കണ്ടെത്തിയതോടെയാണ് ഇയാളിലേക്ക് അന്വേഷണം നീങ്ങിയത്. സ്കൂട്ടർ സ്റ്റാർട്ടാകാതെ വന്നതോടെ പോലീസിനെകണ്ട ബിനു ഓടിരക്ഷപ്പെടാൻ ശ്രമിക്കുകയായിരുന്നു. ഇതേത്തുടർന്ന് പോലീസ് സംഘം പിന്തുടർന്ന് ഓടിച്ചിട്ട് ബിനുവിനെ പിടികൂടുകയായിരുന്നു. എസ്ഐ വിഷ്ണുവിന്‍റെ നേതൃത്വത്തിലുള്ള അന്വേഷണസംഘത്തിൽ എസ്ഐ ശിവപ്രസാദ്, എഎസ്ഐ ദിലീപ്, സിപിഒമാരായ സുമൻ, വിഷ്ണു, രാഹുൽ, ജിഷ്ണു എന്നിവരാണുണ്ടായിരുന്നത്. അറസ്റ്റിലായ ബിനുവിനെതിരേ ആറൻ‌മുള, പത്തനംതിട്ട, ചെങ്ങന്നൂർ പോലീസ് സ്റ്റേഷനുകളിലും കേസുകൾ നിലവിലുണ്ട്.

രണ്ടാം ക്ലാസുകാരിക്കുനേരേ ലൈംഗികാതിക്രമം: അച്ഛന്‍റെ സുഹൃത്ത് അറസ്റ്റിൽ

മാവേലിക്കര: രണ്ടാം ക്ലാസുകാരിക്കുനേരേ ലൈംഗികാതിക്രമം കാട്ടി യ കുട്ടിയുടെ അച്ഛന്‍റെ സുഹൃത്തിനെ കുറത്തികാട് പോലീസ് അറസ്റ്റ് ചെയ്തു. ചെട്ടികുളങ്ങര നിർമിതി കോളനിയിൽ മഞ്ഞാടിയിൽ കുഴുവിള പടീറ്റതിൽ രാഹുൽ (27) ആണ് അറസ്റ്റിലായത്. പ്രതി കുട്ടിയുടെ അച്ഛന്‍റെ സുഹൃത്തും കുട്ടിയുടെ വീട്ടിലെ നിത്യസന്ദർശകനുമാണ്. ഇയാൾ കുട്ടിയുടെ അച്ഛനൊപ്പം വീട്ടിലിരുന്ന് മദ്യപിക്കുന്നത് പതിവായിരുന്നെന്നും കുട്ടിയുടെ അമ്മ പിണങ്ങി പോയിരിക്കുകയാണെന്നും പോലീസ് പറഞ്ഞു. അച്ഛനും മുത്തശ്ശിക്കുമൊപ്പം കഴിയുന്ന കുട്ടി രണ്ടുതവണ ആക്രമിക്കപ്പെട്ടു. സ്കൂളിൽ വച്ച് അസ്വസ്ഥത പ്രകടിപ്പിച്ച കുട്ടി, അധ്യാപരോട് വിവരം പറയുകയായിരുന്നു. അധ്യാപകർ ചൈൽഡ് ലൈനിൽ വിവരം അറിയിച്ചശേഷം കുട്ടിയെ മാവേലിക്കര ജില്ലാ ആശുപത്രിയിൽ എത്തിച്ചു. തുടർന്ന് കുറത്തികാട് പോലീസെത്തി നിയമനടപടികൾ സ്വീകരിച്ചു. തമിഴ്നാട്ടിലേക്ക് കടക്കാൻ ശ്രമിച്ച രാഹുലിനെ, വിവരം കിട്ടി മണിക്കൂറുകൾക്കുള്ളിൽ പോലീസ് തന്ത്രപരമായി പിടികൂടുകയായിരുന്നു. ഇയാൾ കുറത്തികാട് പോലീസ് സ്റ്റേഷനിൽ മറ്റു ക്രിമിനൽ കേസുകളിലും പ്രതിയാണ്. പ്രതിയെ റിമാൻഡ് ചെയ്തു.

മരം വെട്ടുന്നതിനിടയിൽ തടിവീണു തൊഴിലാളി മരിച്ചു

ഹരിപ്പാട്: മരം വെട്ടുന്നതിനിടയിൽ തടിവീണു തൊഴിലാളി മരിച്ചു. മഹാദേവികാട് നികത്തിൽ പുത്തൻ കണ്ടത്തിൽ കെ. സന്തോഷ്‌ (52) ആണ് മരിച്ചത്. ഇന്നലെ വൈകുന്നേരം ആറിന് ഹരിപ്പാട് കെഎസ്ആർടിസി ബസ് സ്റ്റാൻഡിന് പടിഞ്ഞാറുവശത്തുള്ള വീട്ടിൽ മരം മുറിക്കുന്നതിനിടയിലാണ് അപകടമുണ്ടായത്. മുറിച്ച മരം വലിച്ചു താഴെക്കിട്ടപ്പോൾ ശരീരത്തേക്കു വീഴുകയായിരുന്നു. കാൽ മണ്ണിൽ പുതഞ്ഞതിനാൽ സന്തോഷിന് ഓടിമാറാൻ കഴിഞ്ഞില്ല. ഒപ്പമുണ്ടായിരുന്നവർ ഉടൻതന്നെ ഹരിപ്പാട് താലൂക്ക് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. മൃതദേഹം ഹരിപ്പാട് താലൂക്ക് ആശുപത്രി മോർച്ചറിയിൽ. മാതാവ്: ലക്ഷ്മിക്കുട്ടി. ഭാര്യ: ബിന്ദു. മക്കൾ: സന്ദീപ്, അപർണ.

ഒളിവിൽ കഴിഞ്ഞ പ്രതിയെ പിടികൂടി

ഹരിപ്പാട്: ഒളിവിൽ കഴിഞ്ഞിരുന്ന പ്രതിയെ കരീലക്കുളങ്ങര പോലീസ് പിടികൂടി. കീരിക്കാട് കരുവാറ്റുംകുഴി പുല്ലമ്പള്ളിത്തറ വീട്ടിൽ സുന്ദരനാണ് പിടിയിലായത്. അടിപിടി കേസിൽ ഹരിപ്പാട് ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതി-ഒന്ന് ശിക്ഷിച്ചയാളാണ് സുന്ദരൻ. 2022 ജൂൺ 30നായിരന്നു ശിക്ഷ വിധിച്ചത്. ഇതിനു പിന്നാലെ പ്രതി ഒളിവിൽ പോകുകയായിരുന്നു. തുടർന്ന്, കോടതി കൺവിക്ഷൻ വാറന്‍റ് പുറപ്പെടുവിക്കുകയായിരുന്നു. ഹരിപ്പാട് ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതി ഒന്നിൽ ഹാജരാക്കിയ പ്രതിയെ ആറു മാസത്തേക്ക് ശിക്ഷിച്ചു. മാവേലിക്കര സബ് ജയിലിലേക്കു മാറ്റി.

എല്ലാ ക്ഷേത്രങ്ങളിലും മോഷണം വ്യാപകം, നിലവിലുള്ള സംവിധാനം മാറ്റണം: വെള്ളാപ്പള്ളി

ചേർത്തല: തിരുവിതാംകൂർ ദേവസ്വം ബോർഡ് ക്ഷേത്രങ്ങളിൽ മാത്രമല്ല സമ്പത്തുള്ള എല്ലാ ദേവസ്വം ബോർഡ് ക്ഷേത്രങ്ങളിലും മോഷണം വ്യാപകമാണെന്നും ഇത് തടയാൻ നിലവിലുള്ള സംവിധാനം മാറ്റി ക്ഷേത്രങ്ങൾ ഒന്നാേ രണ്ടോ ദേവസ്വം ബോർഡിന് കീഴിലാക്കണമെന്നും എസ്എൻ ഡിപി യോഗം ജനറൽ സെക്രട്ടറി വെള്ളാപ്പള്ളി നടേശൻ പറഞ്ഞു. കണിച്ചുകുളങ്ങരയിലെ വസതിയിൽ മാധ്യമ പ്രവർത്തകരോട് സംസാരിക്കുകയായിരുന്നു അദ്ദേഹം. ശബരിമല ശ്രീകോവിലിൽ പോലും ശുദ്ധിയില്ല. ദേവസ്വം ബോർഡ് മുൻ പ്രസിഡന്‍റ് എ. പത്മകുമാർ കുഴപ്പക്കാരനാണെന്ന് പണ്ടേ പറഞ്ഞതാണ്. ചക്കരക്കുടം കണ്ടാൽ മോഷണമുണ്ടാകും. അഴിമതി പുറത്തുവന്നത് അയ്യപ്പന്‍റെ അനുഗ്രഹം മൂലമാണ്. ഏത് പാർട്ടിക്കാരനായാലും ഉപ്പുതിന്നവൻ വെള്ളം കുടിക്കും. ഇടമില്ലാത്ത രാഷ്ട്രീയക്കാരുടെ ഇടമായി ദേവസ്വം ബോർഡ് അധപ്പതിച്ചു. ഇതിന് പരിഹാരമായി ദേവസ്വം ബോർഡ് സംവിധാനം അഴിച്ചുപണിത് ഐഎഎസുകാരന് ചുമതലകൊടുക്കണം. രാഷ്ട്രീയക്കാരനെ കമ്മിറ്റിയിൽ ഉൾപ്പെടുത്തി മന്ത്രിക്ക് പൂർണ നിയന്ത്രണം ഏർപ്പെടുത്തണമെന്നും വെള്ളാപ്പള്ളി പറഞ്ഞു. മന്ത്രി ഗണേഷ്കുമാറിനെതിരേയും വെള്ളാപ്പള്ളി ആഞ്ഞടിച്ചു. മാതാപിതാക്കൾക്കും സഹോദരിക്കുമെതിരേ പാരപണിത ഗണേശൻ സരിതയെ ഉപയോഗിച്ചാണ് മന്ത്രിസ്ഥാനം നേടിയത്. സരിതയുടെ ഇപ്പോഴത്തെ അവസ്ഥ മോശമായിട്ടും സഹായിക്കാൻ അയാൾ തയാറായിട്ടില്ല. അഹങ്കാരത്തിന് കൈയും കാലും വച്ച ഇയാൾ ഫ്യൂഡൽ മാടമ്പിത്തരമാണ് കാട്ടുന്നതെന്നും വെള്ളാപ്പള്ളി നടേശന്‍ പറഞ്ഞു.

ചന്പക്കുളം കല്ലൂർക്കാട് ബസിലിക്കയിൽ കൽക്കുരിശ് ആശീർവാദം ഇന്ന്

ചമ്പക്കുളം: തെക്കൻ കേരളത്തിലെ ഏറ്റവും പുരാതന കൽക്കുരിശ് എന്ന് വിശേഷിപ്പിക്കപ്പെടുന്ന ചമ്പക്കുളം കല്ലൂർക്കാട് ബസിലിക്കയിലെ കൽക്കുരിശ് പള്ളിയുടെ മുന്നിലേക്ക് മാറ്റിസ്ഥാപിച്ചത് ചങ്ങനാശേരി ആർച്ച്ബിഷപ് മാർ തോമസ് തറയിൽ ഇന്ന് വൈകുന്നേരം 4.30ന് ആശീർവദിക്കും. കല്ലൂർക്കാട് പള്ളിയുടെ തെക്കേമുറ്റത്ത് മണിമാളികയുടെ തെക്കുഭാഗത്തായും വാദ്യപുരയുടെ (കൊട്ടുപുര) വടക്ക് കിഴക്കുഭാഗത്തായും സ്ഥാപിച്ചിരുന്ന കരിങ്കൽ കുരിശ് ജൂബിലി വർഷം പ്രമാണിച്ച് പള്ളിയുടെ മുന്നിലേക്ക് മാറ്റി സ്ഥാപിക്കുകയായിരുന്നു. ചങ്ങനാശേരി അതിരൂപതയുടെ കീഴിലുള്ള ദൈവാലയങ്ങളിലെ മാത്രമല്ല, ദക്ഷിണ കേരളത്തിലെ തന്നെ ഏറ്റവും പുരാതന കരിങ്കൽ കുരിശാണ് ഇതെന്ന് രേഖകൾ സാക്ഷ്യപ്പെടുത്തുന്നു. കരിങ്കൽ കുരിശിന്‍റെ കൽത്തറയുടെ ദളത്തിലെ ശിലാ ലിഖിതം ഇതിന്‍റെ ചരിത്ര പാരമ്പര്യം അരക്കിട്ടുറപ്പിക്കുന്നു. 874 വർഷം പഴക്കമുള്ള കരിങ്കൽ കുരിശാണ് ഇവിടെ സ്ഥിതി ചെയ്യുന്നത്. ഇത്രയും പഴക്കമുള്ള കൽക്കുരിശ് മറ്റ് സമീപപ്രദേശങ്ങളിൽ കണ്ടെത്താൻ കഴിഞ്ഞിട്ടില്ല. അഞ്ചര അടി ഉയരത്തിൽ ഏഴര അടി ചതുരത്തിൽ ചെത്തി മിനുസപ്പെടുത്തിയ കരിങ്കൽ പാളികൾ ചേർത്ത് അടിയിൽപടിയും, മേലോട്ട് നിരയും, ദളവും, പടിത്തലയും ആയി പണി ചെയ്തിട്ടുള്ള ഒരു തറയിൽ കുരിശ് ഉറപ്പിക്കപ്പെട്ടിരിക്കുന്നു. അതേ രീതിയിൽ തന്നെയാണ് കുരിശ് ഇപ്പോൾ മാറ്റിസ്ഥാപിച്ചിരിക്കുന്നത്. കൽത്തറയുടെ മേൽ ദളത്തിന് താഴെ നാലു വശത്തുമുള്ള എടുത്തു കെട്ടിയിൽ ചതുരവടിവിൽ കൊത്തിയിട്ടുള്ള അക്ഷരങ്ങൾ ഉണ്ട്.അതിൽ താഴെ പറയും പ്രകാരം രേഖപ്പെടുത്തപ്പെട്ടിരിക്കുന്നു. ഈ കുരിശ് കല്ലൂർക്കാടെന്നു നാമം വിളങ്ങും പള്ളിയുടെ കിഴക്കുവശം വച്ചിരുന്നു. പള്ളി പണി ചയ്ത് ഏറെക്കുറെ 670 വത്സരം ചെന്ന 1821-ാം കാലം മദ്ബഹ പൊളിച്ചു. 1857-ാം കാലം സെമിത്തേരി പണി ചെയ്തപ്പോൾ രണ്ടാമതു വച്ചു. ഈ കുരിശുകൾ പാലവി കുരിശുകൾ എന്നാണ് അറിയപ്പെടുന്നത്. ഈ ലിഖിതത്തിന്‍റെ അടിസ്ഥാനത്തിൽ 12-ാം നൂറ്റാണ്ടിൽ 1151 ആണ്ടിൽ കല്ലൂർക്കാട് ഒരു പള്ളിപണി നടന്നിരുന്നു എന്ന് തെളിയിക്കുന്നു. പമ്പാനദിയുടെ തീരത്ത് സ്ഥിതി ചെയ്തിരുന്ന ഈ കുരിശിൻ ചുവട്ടിൽ പ്രാർഥിച്ച് കാണിക്ക ഇട്ട് കൃഷിക്കും മത്സ്യബന്ധനത്തിനുമായി പോകുന്ന പതിവ് ഇന്നാട്ടിലെ നാനാജാതി മതസ്ഥരായ ആളുകൾ പാലിച്ചു പോന്നിരുന്നു. മുൻകാലങ്ങളിൽ കൃഷിയുടെ വിളവെടുപ്പിന്‍റെ കാലത്ത് ആദ്യഫലം എന്ന തരത്തിൽ നെൽക്കറ്റകൾ കുരിശിൻ ചുട്ടിൽ സമർപ്പിച്ചിരുന്നു. ഹൈന്ദവ ക്ഷേത്രങ്ങളിലെ ഇല്ലം നിറയ്ക്ക് സമാനമായ രീതിയിൽ കുരിശിന്‍റെ താഴത്തെ ദളങ്ങളിലെല്ലാം കറ്റകൾ കൊണ്ട് നിറയുമായിരുന്നു. രാത്രികാലങ്ങളിൽ പമ്പാനദിയിലൂടെയുള്ള ജലവാഹനയാത്രക്കാർക്ക് മാർഗദീപമായി ഒരു വലിയ വിളക്കുമരവും ഇതിനോട് ചേർന്ന് ഉണ്ടായിരുന്നു. കാലക്രമേണ അത് നശിച്ചുപോയി. മുൻ കാലങ്ങളിൽ തിരുനാൾ പ്രദക്ഷിണത്തിന്‍റെ സമാപനത്തിൽ സ്ലോസ ചൊല്ലിയിരുന്നത് ഈ കൽക്കുരിശിന് മുന്നിലായിരുന്നു. കുരിശ് ദൈവാലയത്തിന്‍റെ തിരുമുറ്റത്തേക്ക് എത്തിക്കുക വഴി പള്ളിയുടെയും കുരിശിന്‍റെയും പാരമ്പര്യവും കുരിശിന് വിശ്വാസികൾ നല്കിവന്നിരുന്ന പ്രാധാന്യവും എത്ര വലുതാണെന്ന് വരാനിരിക്കുന്ന തലമുറകൾക്കുകൂടി വെളിപ്പെടുത്തി നല്കുന്നു. ബസിലിക്കയിൽ ഇന്ന് രാവിലെ 5.45ന് ആരാധന, സപ്രാ, വിശുദ്ധ കുർബാന-ഫാ. ജോസഫ് ഓണാട് (ഡി പോൾ കെയർ ഹോം, പത്തനംതിട്ട). വൈകുന്നേരം 4ന് പ്രസുദേന്തിയുടേയും സ്ഥാനക്കാരുടേയും വാഴ്ച. 4.45ന് ചങ്ങനാശേരി ആർച്ച്ബിഷപ് മാർ തോമസ് തറയിൽ പിതാവിന് സ്വീകരണം. 4.50ന് വിശുദ്ധ കുർബാന, പ്രസംഗം-ആർച്ച്ബിഷപ് മാർ തോമസ് തറയിൽ. 6ന് ജപമാല പ്രദക്ഷിണം ( മർത്ത് മറിയം കുരിശടിയിലേക്ക്) ഫാ. ആന്‍റ ണി തേവാരി (വികാരി സെന്‍റ് ആന്‍റണിസ് പള്ളി വൈശ്യംഭാഗം. 7.15ന് പുതിയ പ്രസുദേന്തിക്ക് പള്ളിമേടയിൽ സ്വീകരണം.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]