കരൂർ: കരൂർ ഗ്രാമപഞ്ചായത്തിന്റെ 2023-24 വർഷത്തെ ബജറ്റ് ഗ്രാമപഞ്ചായത്ത് വൈസ്പ്രസിഡന്റ് ബെന്നി മുണ്ടത്താനം അവതരിപ്പിച്ചു. 18,93,18,764 രൂപ വരവും 18,44,42,000 രൂപ ചെലവും 48,76,764 രൂപ നീക്കിബാക്കിയും പ്രതീക്ഷിക്കുന്ന ബജറ്റ് പഞ്ചായത്ത് പ്രസിഡന്റ് പി.കെ മഞ്ജുവിന്റെ അധ്യക്ഷതയിൽ ചേർന്ന യോഗത്തിൽ അംഗീകരിച്ചു. ശുചിത്വത്തിന് പ്രാമുഖ്യം നൽകിയിരിക്കുന്ന ബഡ്ജറ്റിൽ എംസിഎഫ് നിർമാണത്തിനും സ്ഥലം വാങ്ങലിനുമായി 7100000 രൂപ വകയിരുത്തി. ലൈഫ് ഭവന പദ്ധതിക്ക് 40325000 രൂപ, ആർദ്രം പദ്ധതിക്ക് 1000000 രൂപ, പാലിയേറ്റീവ് കെയറിന് 1200000രൂപ, ശാരീരിക മാനസികവെല്ലുവിളികൾ നേരിടുന്നവർക്കായി 1800000 രൂപ, കാർഷിക മേഖലയിലേക്ക് 2567500 രൂപ, മൃഗസംരക്ഷണത്തിന് 3700000 രൂപ, പട്ടികജാതി പട്ടികവർഗ വികസനത്തിനായി 7300000 രൂപ, പശ്ചാത്തലമേഖലയുടെ വികസനത്തിനായി 27900000 രൂപ എന്നിങ്ങനെ ഗ്രാമപഞ്ചായത്തിന്റെ സമഗ്രവികസനത്തിന് ഉതകുന്ന പദ്ധതികളാണ് വിഭാവനം ചെയ്തിരിക്കുന്നത്. കൂടാതെ ഗ്രാമപഞ്ചായത്തിലെ ടൂറിസം സാധ്യതകൾ പരിശോധിച്ച് ഗ്രാമപഞ്ചായത്തിന്റെ വികസനോത്മുഖമായ ടൂറിസം പദ്ധതികൾ നടപ്പാക്കുന്നതിനും ഗ്രാമപഞ്ചായത്ത് ബജറ്റ് വിഭാവനം ചെയ്യുന്നു.
നാടകദിനാചരണം
പനമറ്റം: ദേശീയവായനശാല ഗുരുജനവേദി ലോകനാടകദിനാചരണം സംഘടിപ്പിച്ചു. എം.അജിത്ത്, പി. വിജയൻ, വി.ജി. മുരളീധരൻ, ജിഷമോൾ ടി. ചന്ദ്രൻ, ഷാജി എസ്. നായർ എന്നിവർ പ്രസംഗിച്ചു. നാടകഗാനങ്ങളുടെ അവതരണം നടത്തി.