വാഗമൺ കുരിശുമലയിൽ
വാഗമൺ: വാഗമൺ കുരിശുമലയിലെ നാല്പതാംവെള്ളി തിരുക്കർമങ്ങൾക്ക് മാർ ജേക്കബ് മുരിക്കൻ നേതൃത്വം നൽകും. ഇന്നു രാവിലെ ഒൻപതിന് വെള്ളികുളം, അടിവാരം ഇടവകകളുടെ നേതൃത്വത്തിൽ മലമുകളിലേക്ക് കുരിശിന്‍റെ വഴി. 10.30നു മലമുകളിൽ മാർ ജേക്കബ് മുരിക്കൻ വിശുദ്ധ കുർബാന അർപ്പിച്ച് സന്ദേശം നൽകും. തുടർന്ന് നേർച്ചക്കഞ്ഞി വിതരണം.
വൈദികരുമായി എത്തുന്ന തീർഥാടകർക്ക് മലമുകളിൽ വിശുദ്ധ കുർബാന അർപ്പിക്കുന്നതിന് സൗകര്യമുള്ളതായും തീർഥാടകരായി എത്തുന്ന ഭക്തർക്ക് എല്ലാ സൗകര്യങ്ങളും ഏർപ്പെടുത്തിയിട്ടുള്ളതാ‍യും വികാരി ഫാ. ആന്‍റണി വാഴയിൽ പറഞ്ഞു. മലയടിവാരത്ത് വാഹന പാർക്കിംഗ് സൗകര്യവുമുണ്ട്.
അരുവിത്തുറ വല്യച്ചൻമലയിൽ
അരുവിത്തുറ: സെന്‍റ് ജോർജ് ഫൊറോന പള്ളിയിൽ നാല്പതാംവെള്ളി ആചരണവും വല്യച്ചൻമലയിലേക്ക് കുരിശിന്‍റെ വഴിയും ഇന്ന്. രാവിലെ 5.30നും 6.30നും 7.30നും 9.00നും 10.30നും വൈകുന്നേരം നാലിനും പള്ളിയിൽ വിശുദ്ധ കുർബാന. രാവിലെ ഒൻപതിനു പാലാ രൂപത പിതൃവേദിയുടെയും മാതൃവേദിയുടെയും ആഭിമുഖ്യത്തിൽ സ്ലീവാപ്പാത. തുടർന്ന് മലമുകളിൽ രൂപത പിതൃവേദി- മാതൃവേദി ഡയറക്ടർ ഫാ. ജോസഫ് നരിതൂക്കിൽ വിശുദ്ധ കുർബാന അർപ്പിക്കും.
വൈകുന്നേരം 5.15നു പള്ളിയിൽനിന്ന് ജപമാല പ്രദക്ഷിണത്തോടെ കുരിശിന്‍റെ വഴി. മലയടിവാരത്ത് കുരിശിന്‍റെ സന്ദേശം. തുടർന്നു മരക്കുരിശുമേന്തിയുള്ള കുരിശിന്‍റെ വഴിക്ക് എസ്എംവൈഎം പാലാ രൂപത, അരുവിത്തുറ ഇടവക സമൂഹം, നെല്ലാപ്പാറ സെന്‍റ് മേരീസ് പള്ളി, സഹദാ കോ-ഓർഡിനേറ്റഴ്സ്, സഹദാ ഗ്രൂപ്പ് തുടങ്ങിയവർ നേതൃത്വം നൽകും. തുടർന്നു മലമുകളിൽ വിശുദ്ധ കുർബാന.
മലകയറാൻ എത്തുന്നവർക്കായി രാവിലെ മുതൽ നേർച്ചക്കഞ്ഞി വിതരണം ഉണ്ടായിരിക്കുമെന്ന് വികാരി ഫാ. അഗസ്റ്റിൻ പാലയ്ക്കപ്പറമ്പിൽ, സഹവികാരിമാരായ ഫാ. ആന്‍റണി തോണക്കര, ഫാ. ഡിറ്റോ തോട്ടത്തിൽ, ഫാ. ജോസഫ് മൂക്കൻതോട്ടത്തിൽ, ഫാ. ചെറിയാൻ കുന്നക്കാട്ട്, ഫാ. സെബാസ്റ്റ്യൻ നടുത്തടം, ഫാ. പോൾ നടുവിലേടം, കൈക്കാരന്മാരായ ജോസഫ് എമ്പ്രയിൽ, ജോസ്മോൻ കണ്ടത്തിൻകര, ജോണി പുല്ലാട്ട്, ബിജു കല്ലാച്ചേരിൽ എന്നിവർ അറിയിച്ചു.
പാലാ: രൂപത കരിസ്മാറ്റിക് ടീമിന്‍റെ നേതൃത്വത്തില്‍ അരുവിത്തുറ വല്യച്ചന്‍മല കയറ്റവും നാല്പതാം വെള്ളി ആചരണവും ഇന്നു നടത്തും. ഇവാഞ്ചലൈസേഷന്‍ ഡയറക്ടര്‍ ഫാ. ജേക്കബ് വെള്ളമരുതുങ്കലിന്‍റെ നേതൃത്വത്തില്‍ രാവിലെ 8.30ന് ജപമാല പ്രദക്ഷിണം വല്യച്ചന്‍മല അടിവാരത്തിലേക്ക്. ഒന്‍പതിന് മലമുകളിലേക്കു കുരിശിന്‍റെ വഴി. തുടര്‍ന്ന് വല്യച്ചന്‍മല ദേവാലയത്തില്‍ വിശുദ്ധ കുര്‍ബാന, നേര്‍ച്ചക്കഞ്ഞി വിതരണം. സോണല്‍ സേവനസമിതി ശുശ്രൂഷകള്‍ക്കു നേതൃത്വം നല്‍കും.
മുണ്ടന്‍വരമ്പ് കുരിശടിയിൽ
കുറവിലങ്ങാട്: നാല്പതാംവെള്ളി ആചരണത്തിന്‍റെ ഭാഗമായി കുറവിലങ്ങാട് ഇടവകയില്‍ മുണ്ടന്‍വരമ്പ് കുരിശടിയിലേക്ക് ആഘോഷമായ കുരിശിന്‍റെ വഴി നടക്കും. ഇന്നു രാവിലെ 5.30നും 6.30നും 7.30നും കുരിശിന്‍റെ വഴി ജൂബിലി കപ്പേളയില്‍നിന്ന് ആരംഭിക്കും. 10.30നും 4.30നും വിശുദ്ധ കുര്‍ബാന.