പൂഞ്ഞാർ: പൂഞ്ഞാർ തെക്കേക്കര സ്മാർട്ട് വില്ലേജ് ഓഫീസിന്‍റെ ഉദ്ഘാടനം ഇന്നു രാവിലെ 9. 30നു മന്ത്രി കെ. രാജൻ നിർവഹിക്കും. സെബാസ്റ്റ്യൻ കുളത്തുങ്കൽ എംഎൽഎ അധ്യക്ഷത വഹിക്കും. എംപിമാരായ ജോസ് കെ. മാണി, ആന്‍റോ ആന്‍റണി എന്നിവർ മുഖ്യാതിഥികളാകും.
ജില്ലാ പഞ്ചായത്ത് പ്രസിഡന്റ് കെ.വി. ബിന്ദു, ജില്ലാ കളക്ടർ ഡോ. പി.കെ. ജയശ്രീ, ഈരാറ്റുപേട്ട ബ്ലോക്ക് പഞ്ചായത്ത് പ്രസിഡന്റ് ആർ. ശ്രീകല, പൂഞ്ഞാർ തെക്കേക്കര പഞ്ചായത്ത് പ്രസിഡന്റ് ജോർജ് മാത്യു അത്യാലിൽ, ജില്ലാ പഞ്ചായത്തംഗം പി.ആർ. അനുപമ, ബ്ലോക്ക് പഞ്ചായത്തംഗങ്ങളായ അജിത് കുമാർ നെല്ലിക്കച്ചാലിൽ, അക്ഷയ് ഹരി, പൂഞ്ഞാർ തെക്കേക്കര പഞ്ചായത്ത് വൈസ് പ്രസിഡന്റ് റെജി ഷാജി, പഞ്ചായത്തംഗം എം.കെ. അനിൽകുമാർ മഞ്ഞപ്ലാക്കൽ, പാലാ ആർഡിഒ പി.ജി. രാജേന്ദ്രബാബു, മീനച്ചിൽ തഹസീൽദാർ കെ.എം. ജോസുകുട്ടി എന്നിവർ പങ്കെടുക്കും.
റീബിൽഡ് കേരള പദ്ധതിയിൽപ്പെടുത്തി 72 ലക്ഷം രൂപയ്ക്കാണു പുതിയ ഓഫീസ് കെട്ടിടം നിർമിച്ചത്. 2057 ചതുരശ്ര അടിയുള്ള ഇരുനില കെട്ടിടം ഭിന്നശേഷി സൗഹൃദമാണ്.
നാലു മുറികൾ, ശുചിമുറികൾ, ഫ്രണ്ട് ഓഫീസ്, പാർക്കിംഗ് ഏരിയ, വെയിറ്റിംഗ് ഏരിയ, വർക്ക് സ്റ്റേഷനുകൾ, റാമ്പ്, ഇരിപ്പിടങ്ങൾ എന്നിവ ഉൾപ്പെടുന്നതാണ് കെട്ടിടം.