കൊച്ചി വീണ്ടും മഴയിൽ മുങ്ങി തിമിർത്തു പെയ്ത മഴ വീണ്ടും എറണാകുളം ജില്ലയെ വെള്ളക്കെട്ടിലാക്കി. ഇന്നലെ ഉച്ചയ്ക്കുശേഷം ആരംഭിച്ച മഴ വൈകുന്നേരം ആറു വരെ തുടർന്നു. നേരിയ ശമനമുണ്ടായെങ്കിലും വീണ്ടും നിർത്താതെയുള്ള പെയ്ത്ത് കളമശേരിയെയും പറവൂരിനെയും കാക്കനാടിനെയും വെള്ളക്കെട്ടിലാക്കി. കൊച്ചി ഇന്ഫോപാര്ക്കിലും കളമശേരി മൂലേപ്പാടത്ത് 200 ഓളം വീടുകളിലും ഇന്നലെയും വെള്ളം കയറി.
അശ്വിനി ആശുപത്രിയിൽ വീണ്ടും വെള്ളം കയറി
ഇന്നലെ വൈകുന്നേരം മഴ കനത്തതോടെ തൃശൂർ അശ്വിനി ആശുപത്രിയിൽ വീണ്ടും വെള്ളം കയറി. അത്യാഹിതവിഭാഗത്തിന്റെ പ്രവർത്തനം നിലച്ചു. ഇവിടെയുണ്ടായിരുന്ന രോഗികളെ ആശുപത്രിയുടെ മുകൾനിലയിലേക്കു മാറ്റി. ദിവസങ്ങൾക്കുമുന്പേ ഉണ്ടായ കനത്ത മഴയിൽ ആശുപത്രിക്ക് ഉൾവശം ആറടി ഉയരത്തിൽ വെള്ളം കയറി അഞ്ചു കോടിയുടെ നാശനഷ്ടം സംഭവിച്ചിരുന്നു.
ആശുപത്രിയുടെ മുൻവശത്തുള്ള കാന പൊളിച്ചിട്ടിരിക്കുകയാണ്. ഇതു നിറഞ്ഞുകവിഞ്ഞാണ് വെള്ളം കോന്പൗണ്ടിനുള്ളിലേക്കു കയറിയത്.
11 ജില്ലകളിൽ യെല്ലോ അലർട്ട് തിരുവനന്തപുരം: മണിക്കൂറുകൾക്കുള്ളിൽ സംസ്ഥാനത്ത് തെക്കുപടിഞ്ഞാറൻ കാലവർഷം പെയ്തുതുടങ്ങുമെന്നു കാലാവസ്ഥാ നിരീക്ഷണകേന്ദ്രം.
തെക്കുപടിഞ്ഞാറൻ കാറ്റിന്റെ ശക്തി വർധിച്ചതിനൊപ്പം മറ്റ് അന്തരീക്ഷ സാഹചര്യങ്ങളും കേരളത്തിൽ കാലവർഷപ്പെയ്ത്ത് തുടങ്ങാൻ അനുകൂലമാണ്. വരും ദിവസങ്ങളിൽ സംസ്ഥാനത്ത് മഴ കനക്കുമെന്നാണു കാലാവസ്ഥാ നിരീക്ഷണ കേന്ദ്രത്തിന്റെ നിഗമനം. മഴ തുടരുന്ന സാഹചര്യത്തിൽ കേരളമെങ്ങും ജാഗ്രതാ നിർദേശം നൽകിയിട്ടുണ്ട്.
കനത്ത മഴ തുടരുന്ന സാഹചര്യത്തിൽ ഞായറാഴ്ച വരെ 11 ജില്ലകളിൽ വിവിധ ദിവസങ്ങളിൽ യെല്ലോ അലർട്ട് പ്രഖ്യാപിച്ചു.
വയനാട്, കണ്ണൂർ, കാസർഗോഡ് ഒഴികെയുള്ള ജില്ലകളിൽ ഇന്ന് യെല്ലോ അലർട്ട് പ്രഖ്യാപിച്ചു.
തിരുവനന്തപുരം, കൊല്ലം, വയനാട്, കണ്ണൂർ, കാസർഗോഡ് ഒഴികെയുള്ള ജില്ലകളിൽ നാളെയും തിരുവനന്തപുരം, കൊല്ലം ഒഴികെയുള്ള ജില്ലകളിൽ ശനി, ഞായർ ദിവസങ്ങളിലും യെല്ലോ അലർട്ട് പ്രഖ്യാപിച്ചതായി കാലാവസ്ഥാ നിരീക്ഷണ കേന്ദ്രം അറിയിച്ചു. .