ADVERTISEMENT

ADVERTISEMENT

ആശാസമരം മറ്റൊരു സാമൂഹിക മുന്നേറ്റം: എം. വിൻസന്‍റ് എംഎൽഎ

വിഴിഞ്ഞം: കേരളം ഇതുവരെ കാണാത്ത വനിതകളുടെ സാമൂഹിക മുന്നേറ്റമാണ് അഞ്ചാം മാസത്തിലെത്തുന്ന ആശ അതിജീവന രാപ്പകൽ സമരമെന്ന് എം. വിൻസന്‍റ് എംഎൽഎ അഭിപ്രായപ്പെട്ടു.

കേരള ആശ ഹെൽത്ത്‌ വർക്കേഴ്സ് അസോസിയേഷൻ സംസ്ഥാന ജനറൽ സെക്രട്ടറി എം.എ. ബിന്ദുവിന്‍റെ നേതൃത്വത്തിൽ നടത്തുന്ന രാപ്പകൽ സമരയാത്രയ്ക്ക് വിഴിഞ്ഞത്ത് നൽകിയ സ്വീകരണ സമ്മേളനം ഉദ്ഘാടനം ചെയ്യുകയായിരുന്നു എംഎൽഎ. സംഘാടക സമിതി ചെയർപേഴ്സൺ കരുംകുളം ജയകുമാർ അധ്യക്ഷത വഹിച്ചു.

കെപിസിസി ജനറൽ സെക്രട്ടറി ജി. സുബോധൻ, കോൺഗ്രസ് നേതാവ് ഉച്ചക്കട സുരേഷ്, കേരള ആശ ഹെൽത്ത് വർക്കേഴ്സ് അസോസിയേഷൻ സംസ്ഥാന വൈസ് പ്രസിഡന്‍റ് എസ്. മിനി, വെങ്ങാനൂർ ശ്രീകുമാർ, കരുംകുളം പഞ്ചായത്ത് പ്രസിഡന്‍റ് ഫ്രീഡ സൈമൺ, വെങ്ങാനൂർ പഞ്ചായത്ത് വൈസ് പ്രസിഡന്‍റ് സുനിത ബിനു,

അതിയന്നൂർ ബ്ലോക്ക് പഞ്ചായത്ത് അംഗം എസ്. ജയകുമാരി, ബി ജെപി സംസ്ഥാന കൗൺസിൽഅംഗം മുക്കോല പ്രഭാകരൻ, വെങ്ങാനൂർ പഞ്ചായത്ത് അംഗം മിനി വേണുഗോപാൽ, പി. സുശീലൻ, ആർ. കുമാർ, പശ്ചിമഘട്ട സമരസമിതി ഭാരവാഹികളായ പ്രസാദ് സോമരാജൻ, ഇ.പി. അനിൽ, കെ.വി.അഭിലാഷ്, പൂങ്കുളം സതീഷ്, എം.മുജീബ് റഹ്മാൻ തുട ങ്ങിയവർ പ്രസംഗിച്ചു.

ADVERTISEMENT

പി.സുജാതകുമാരി അനുസ്മരണം

വെള്ളറട: പെരുങ്കടവിള ബ്ലോക്ക് പഞ്ചായത്ത് മുൻ പ്രസിഡന്‍റായിരുന്ന പി. സുജാത കുമാരിയുടെ രണ്ടാമത് അനുസ്മരണ ദിനം വെള്ളറട മണ്ഡലം കമ്മിറ്റി ആചരിച്ചു. കിളിയൂരിലെ വസതിയ്ക്കടുത്തുള്ള സ്മൃതി മണ്ഡപത്തില്‍ സിപിഐ ജില്ലാ അസിസ്റ്റന്‍റ് സെക്രട്ടറി കെ.എസ്. അരുണ്‍ പുഷ്പാര്‍ച്ചന നടത്തി. തുടർന്നു നടന്ന അനുസ്മരണ യോഗത്തില്‍ മണ്ഡലം സെക്രട്ടറി വാഴിച്ചല്‍ ഗോപന്‍ ഉള്‍പ്പെടെ മണ്ഡലത്തിലെനിരവധി നേതാക്കളും പ്രവര്‍ത്തകരും പങ്കെടുത്തു.

മുട്ടട സബ്‌രജിസ്ട്രാര്‍ ഓഫീസിന്‍റെ മതില്‍ അപകടാവസ്ഥയില്‍

പേരൂര്‍ക്കട: മുട്ടട സബ്‌രജിസ്ട്രാര്‍ ഓഫീസിന്‍റെ മതില്‍ക്കെട്ട് അപകടാവസ്ഥയില്‍. കുറച്ചുനാളായി മതില്‍ ബലക്ഷയം സംഭവിച്ച് ഏതുനിമിഷവും ഇടിഞ്ഞുവീഴാവുന്ന അവസ്ഥയിലാണ്. ഇടയ്ക്കിടെ കനത്ത മഴയും നിലനില്‍ക്കുന്നതിനാല്‍ ഇതുവഴിയുള്ള കാല്‍നടയാത്രക്കാര്‍ ഭീതിയിലാണ്. ഏകദേശം 40 വര്‍ഷത്തിനു മുമ്പാണ് ഓഫീസിന്‍റെ കോമ്പൗണ്ടില്‍ മതില്‍ കെട്ടിയത്. മുട്ടട ജംഗ്ഷനില്‍ നിന്ന് ടി.കെ. ദിവാകരന്‍ നായര്‍ റോഡിലേക്കു പോകുന്ന ഭാഗത്തിന്‍റെ തുടക്കത്തിലാണ് മതില്‍ക്കെട്ട് ഇടിഞ്ഞിരിക്കുന്നത്. കുറച്ചുഭാഗം നേരത്തെ ഇളകിവീണിരുന്നു. ചുടുകല്ല്‌കൊണ്ടു കെട്ടിയ മതില്‍ക്കെട്ട് ബെയ്‌സില്‍ നിന്നു നീങ്ങിമാറി സമീപത്തെ കൂറ്റന്‍ വൃക്ഷത്തില്‍ തട്ടിനില്‍ക്കുകയാണ്. ഈ ഭാഗത്താണ് ഓട്ടോറിക്ഷാ സ്റ്റാൻഡ്. യൂണിയന്‍ ജീവനക്കാര്‍ വിശ്രമിക്കുന്നതും ഈ ഭാഗത്തുതന്നെയാണ്. മതില്‍ക്കെട്ട് ഇടിഞ്ഞുവീഴുകയാണെങ്കില്‍ അതു വാഹനയാത്രികര്‍ക്ക് അപകടമുണ്ടാക്കും. പുരാവസ്തു വകുപ്പാണ് ആവശ്യമായ ഫണ്ട് അനുവദിച്ചു മതില്‍ നിര്‍മാണത്തിനു മുന്‍കൈയെടുക്കേണ്ടുന്നത്. ഇതിനുള്ള നടപടികള്‍ വേഗത്തിലാക്കാന്‍ ആവശ്യമായതു ചെയ്യുമെന്ന് കഴിഞ്ഞദിവസം വി.കെ. പ്രശാന്ത് എംഎല്‍എ അറിയിച്ചിരുന്നു.

ശക്തമായ മഴയില്‍ വീടിനു പുറത്ത് മരംവീണു

വെള്ളറട: കഴിഞ്ഞദിവസം ശക്തമായി പെയ്ത മഴയില്‍ കുടപ്പനമൂട് മേലാരിയംകോണം ഷൈന്‍ വിലാസത്തില്‍ സദാനന്ദന്‍റെ വീടിനു മുകളിൽ മരംവീണു. വീട്ടിലുള്ളവര്‍ അത്ഭുതകരമായി രക്ഷപ്പെട്ടു. വീടിന്‍റെ മേല്‍ക്കൂര പൂര്‍ണമായും തകര്‍ന്നു. ചുവരുകള്‍ വിണ്ടുകീറി. വീട്ടിലെ സാധനസാമഗ്രികള്‍ക്കും സാരമായ കേടുപാടുകള്‍ സംഭവിച്ചിട്ടുണ്ട്. ഗ്രാമീണ മേഖലയില്‍ മഴ ശക്തമായി തുടരുകയാണ്. പ്രദേശത്ത് കാറ്റില്‍ വ്യാപകമായ നാശനഷ്ടം സംഭവിച്ചിട്ടുണ്ട്. നിരവധി മരങ്ങള്‍ കടപുഴകി. വൈദ്യുതി ബന്ധവും വിച്ഛേദിക്കപ്പെട്ടു. നിരവധി മരങ്ങള്‍ വൈദ്യുതി തൂണുകളുടെ പുറത്തുകൂടെ പതിച്ചിട്ടുണ്ട്. പാടശേഖരങ്ങളെല്ലാം ശക്തമായ മഴയില്‍ വെള്ളംകെട്ടി കൃഷിനാശത്തിനും സാധ്യതയുണ്ട്. മഴ ശമനമില്ലാതെ തുടരുകയാണ്.

അപകടക്കെണിയൊരുക്കി തേവിയോട് പാലം

വിതുര: കനത്ത മഴയിൽ മണ്ണിടിഞ്ഞു മാറിയതോടെ അപകട ഭീതിയിൽ വിതുര പൊന്മുടി റോഡിലെ തേവിയോട് പാലത്തിലൂടെയുള്ള യാത്ര. പഞ്ചായത്ത് മിനി സ്റ്റേഡിയത്തിനു സമീപത്തെ തിരക്കുള്ള റോഡിലാണ് ഈ അവസ്ഥ. വർഷങ്ങളുടെ പഴക്കമുള്ള ഇടുങ്ങിയ പാലത്തിനോട് ചേർന്നാണ് കഴിഞ്ഞ ദിവസം മണ്ണിടിഞ്ഞു മാറിയത്. ദിവസങ്ങളായി തുടരുന്ന മഴയിൽ വെള്ളം കുത്തിയൊലിച്ചതും കളീയ്ക്കൽ നിന്നുള്ള കൈത്തോട്ടിൽ വെള്ളമുയർന്നതുമാണ് മണ്ണിടിയാൻ കാരണമെന്നു നാട്ടുകാർ പറയുന്നു. ഒരു വശത്തെ മണ്ണിടിഞ്ഞു തോട്ടിലേക്ക് വീണതോടെയാണ് റോഡ് അപകടക്കെണിയായത്. കലുങ്കിനോടു ചേർന്നു മണ്ണിടിഞ്ഞതു പാലം കയറി അടുത്തെത്തുമ്പോൾ മാത്രമേ കാണാൻ കഴിയൂ എന്നതാണ് മറ്റൊരു പ്രശ്നം. ഇവിടെനിന്ന് കളീയ്ക്കലേക്കും സമീപത്തെ പെട്രോൾ പമ്പിലേക്കും റോഡ് തിരിയുന്നുണ്ട്. മഴക്കാലത്ത് ഈ റോഡിലേക്ക് തിരിയുന്നവർ നന്നായി ശ്രദ്ധിച്ചില്ലെങ്കിൽ അപകടം ഉറപ്പാണ്. വർഷങ്ങൾ പഴക്കമുള്ള പാലവും ശോച്യാവസ്ഥയിലാണ്. അടിഭാഗത്തെ കല്ലുകൾ മുമ്പ് ഇളകി മാറിയിരുന്നു. കോൺക്രീറ്റ് പില്ലറുകൾ നിർമിച്ചാണ് ഇതിനു താത്കാലിക പരിഹാരം കണ്ടത്.

രാപകൽ സമരയാത്രയ്ക്കു തിരുമലയിൽ സ്വീകരണം നൽകി

നേമം: പിണറായി വിജയന്‍റെ നേതൃത്വത്തിലുള്ള ഇടതുപക്ഷ സർക്കാർ നാരീശാപത്താൽ വെന്തുരുകുമെന്നു നേമം നിയോജക മണ്ഡലം യുഡിഎഫ് ചെയർമാൻ കമ്പറ നാരായണൻ പ്രസ്താവിച്ചു. കാസർകോട്ട് നിന്നും ആരംഭിച്ച് നാളെ സെക്രട്ടറിയേറ്റു പടിക്കൽ സമാപിക്കുന്ന ആശാ വർക്കർമാരുടെ രാപ്പകൽ സമരയാത്രയ്ക്ക് തിരുമല ജംഗ്ഷനിൽ മണ്ഡലം കോൺഗ്രസ് കമ്മിറ്റി നൽകിയ സ്വീകരണ യോഗത്തിൽ സംസാരിക്കുകയായിരുന്നു കമ്പറ നാരായണൻ. കഴിഞ്ഞ 128 ദിവസമായി നടന്നു വരുന്ന സമരത്തോട് അനീതി മാത്രം കാണിക്കുന്ന പിണറായി വിജയന് ഇപ്പോൾ തൊഴിലാളി വർഗത്തോട് പരമപുഛമാണ്. സമരയാത്രയുടെ ക്യാപ്റ്റന്മാരായ ബിന്ദുവിനെയും മിനിയെയും യുഡിഎഫ് നേതാക്കളായ കമ്പറ നാരായണൻ, ആർ. സജി, വിമലാലയം ശശി, കെ. ബാലകൃഷ്ണൻ നായർ, പനംകുന്ന് സതി, ശങ്കരൻ കുട്ടി, ലേഖ കെ.ജി. വിനോദ്, പാപ്പനംകോട് ശിവരാജൻ, ഷാഹുൽ, വടകര രവി, സി.ആർ. സുരേഷ് കുമാർ, ഷൈൻ, സുരേഷ്, മോഹൻലാൽ, ശിവദാസൻ, മുരളി തുടങ്ങിയവർ ചേർന്ന് സ്വീകരിച്ചു.

വയലിക്കടയില്‍ കാറിടിച്ച് ഇലക്ട്രിക് പോസ്റ്റ് തകര്‍ന്നു

പേരൂര്‍ക്കട: അമ്പലമുക്ക്-മുട്ടട റോഡില്‍ വയലിക്കടയ്ക്കു സമീപം കാറിടിച്ച് ഇലക്ട്രിക് പോസ്റ്റ് തകര്‍ന്നു. മുട്ടടയിലേക്കു പോകുന്ന ഭാഗത്ത് വലതുവശത്ത് സ്ഥാപിച്ചിരുന്ന പോസ്റ്റാണ് രണ്ടായി ഒടിഞ്ഞുതൂങ്ങിയത്. കഴിഞ്ഞദിവസം പുലര്‍ച്ചെയായിരുന്നു അപകടം. അമ്പലമുക്കില്‍നിന്ന് എംസി റോഡിലേക്ക് പോകുകയായിരുന്ന കാറാണ് നിയന്ത്രണംവിട്ടു വലതുവശത്തെ പോസ്റ്റിലേക്ക് ഇടിച്ചുകയറിയത്. കാറില്‍ ഡ്രൈവര്‍മാത്രമാണ് ഉണ്ടായിരുന്നത്. ബ്രേക്ക് തെന്നിപ്പോയതാണ് അപകടത്തിന് കാരണമായതെന്നാണു സൂചന. കാറിന്‍റെ ബോണറ്റ് അപകടത്തില്‍ തകര്‍ന്നു. ഡ്രൈവര്‍ പരിക്കില്ലാതെ രക്ഷപ്പെട്ടു. കെഎസ്ഇബി പേരൂര്‍ക്കട സെക്ഷനില്‍ നിന്ന് ജീവനക്കാര്‍ എത്തി തകര്‍ന്ന പോസ്റ്റ് നീക്കി പുതിയതു പുനഃസ്ഥാപിച്ചു.

രാപകല്‍ സമരയാത്രയ്ക്ക് നെയ്യാറ്റിന്‍കരയില്‍ സ്വീകരണം

നെയ്യാറ്റിന്‍കര : തൊഴിലാളികളുടെ പണം കട്ടു മുടിക്കുകയും പാവപ്പെട്ടവന്‍റെ പ്രശ്നങ്ങൾ മറക്കുകയും ചെയ്യുന്ന സർക്കാരിനെ ജനങ്ങൾ തിരിച്ചറിയുമെന്നും അതിനെതിരെ ജനകീയ കോടതി വിധിയെഴുതുമെന്നും മുന്‍ മന്ത്രി അഡ്വ. വി.എസ്. ശിവകുമാര്‍. ആശാ വര്‍ക്കര്‍മാര്‍ നടത്തുന്ന രാപ്പകൽ സമരയാത്രയ്ക്ക് നെയ്യാറ്റിന്‍കരയില്‍ നല്‍കിയ സ്വീകരണയോഗം ഉദ്ഘാടനം ചെയ്യുകയായിരുന്നു വി.എസ്. ശിവകുമാർ. നെയ്യാറ്റിൻകര കെഎസ്ആർടിസി ബസ് സ്റ്റാൻഡിന് സമീപം ചേര്‍ന്ന യോഗത്തില്‍ സംഘാടക സമിതി ചെയർമാൻ ജെ. ജോസ് ഫ്രാങ്ക്ളിൻ അധ്യക്ഷനായിരുന്നു. ജാഥാ ക്യാപ്റ്റനും കേരള ആശ ഹെൽത്ത് വർക്കേഴ്സ് അസോസിയേഷൻ സംസ്ഥാന ജനറൽ സെക്രട്ടറിയുമായ എം.എ. ബിന്ദു, മാമ്പഴക്കര രാജശേഖരൻനായർ, ആർ. വത്സലൻ, കെഎഎച്ച്ഡബ്ല്യുഎ സംസ്ഥാന വൈസ് പ്രസിഡന്‍റ് എസ്. മിനി, എം. മൊഹിനുദ്ദീൻ എന്നിവർ സംബന്ധിച്ചു.

കഞ്ചാവുമായി എത്തിയ രണ്ടുയുവാക്കൾ പിടിയില്‍

പാറശാല: കേരളത്തിലേക്ക് കടത്തിയ 10 കിലോ കഞ്ചാവുമായി കൊലപാതക കേസിലെ പ്രതി ഉള്‍പ്പെടെ രണ്ടുപേരെ പിടികൂടി. നിറമണ്‍കര പൂന്തോപ്പില്‍ വീട്ടില്‍ സനോജ് എസ്. സാബു (24), നേമം കൈമനം ലക്ഷംവീട് കോളനിയില്‍നിന്ന് പള്ളിച്ചല്‍ ഉടുമ്പുവിളാകം തോട്ടുംകര വീട്ടില്‍ വാടകയ്ക്ക് താമസിക്കുന്ന ആര്‍. വിഷ്ണുരാജ് (28)എന്നിവരാണ് പിടിയിലായത്. പാറശാല ഗവണ്‍മെന്‍റ് വൊക്കേഷണല്‍ ഹയര്‍സെക്കന്‍ഡറി സ്‌കൂളിനു സമീപം ദേശീയപാതയില്‍ വാഹനപരിശോധനയിലാണ് പ്രതികള്‍ പിടിയിലായത്. ആന്ധ്രാപ്രദേശില്‍നിന്നും വാങ്ങിയ കഞ്ചാവുമായി പ്രതികള്‍ നാഗര്‍കോവിലില്‍ എത്തി. തുടര്‍ന്ന് കെഎസ്ആർടിസി ബസിൽ തിരുവനന്തപുരത്തേക്കു വരുമ്പോഴാണ് നര്‍ക്കോട്ടിക് സെല്‍ അധികൃതര്‍ പിടികൂടിയത്. തിരുവനന്തപുരം റൂറല്‍ നെര്‍ക്കോട്ടിക് സെല്‍ ഡിവൈഎസ്പി കെ. പ്രദീപ്, ഡാന്‍സാഫ് എസ്ഐമാരായ റസല്‍ രാജ്, എ.എസ്. ഗോവിന്ദ്, പ്രേംകുമാര്‍, സുനില്‍രാജ് എഎസ്ഐ നെവില്‍ രാജ്, എസ്‌സിപിഒമാരായ അനീഷ് കുമാര്‍, അരുണ്‍ എന്നിവരുടെ നേതൃത്വത്തിലുള്ള ഡാന്‍സാഫ് ടീമും പാറശാല സി.ഐ. സജി, എസ്ഐമാരായ ദീപു, ഹര്‍ഷകുമാര്‍, ജയപോള്‍, സിപിഒമാരായ വിമല്‍കുമാര്‍, റോയി എന്നിവരുടെ നേതൃത്വത്തിലുള്ള സംഘവുമാണ് പ്രതികളെ പിടികൂടിയത്. കേരളത്തിലേക്കെത്തിച്ച കഞ്ചാവ് തിരുവനന്തപുരം പരിസരങ്ങളിലും ചില്ലറ വില്പന നടത്തുന്നതിനാണ് പ്രതികള്‍ പോലീസിനോട് സമ്മതിച്ചു. ഇവരെ കോടതിയില്‍ ഹാജരാക്കി.

നഗരമാലിന്യം ഉപേക്ഷിച്ച് കടക്കാന്‍ ശ്രമിച്ച സംഘത്തെ നാട്ടുകാര്‍ പിടികൂടി

വെള്ളറട: ആര്യങ്കോട് പോലീസ് പരിധിയില്‍ രാത്രിയുടെ മറവില്‍ നഗരമാലിന്യം നിക്ഷേപിച്ച് കടക്കുന്നത് സ്ഥിരം സംഭവമായിരിക്കുകയാണ്. ഇന്നലെ രാത്രി ശക്തമായ മഴയത്ത് നഗരമാലിന്യം ഒഴുകുപാറ എന്ന സ്ഥലത്ത് നിക്ഷേപിച്ച് കടക്കുന്നതിനിടെ വഴിയാത്ര കാര്‍ കണ്ട് ആര്യങ്കോട് പോലീസിനെ വിവരം അറിയിക്കുകയായിരുന്നു. ആര്യങ്കോട് പോലീസെത്തി വാഹനത്തെയും ഡ്രൈവറേയും കസ്റ്റഡിയില്‍ എടുത്തിട്ടുണ്ട്. സ്വകാര്യ വ്യക്തിയുടെ പറമ്പിലാണു മാലിന്യം തള്ളിയത്. പ്രദേശത്ത് സിസിടിവി സംവിധാനങ്ങള്‍ ഇല്ലാത്തത് ശ്രദ്ധയില്‍പെട്ട ശേഷമാണ് നഗരമാലിന്യം ഈ പ്രദേശത്ത് കൊണ്ടു തള്ളുന്നത്. രണ്ടുദിവസം മുന്‍പ് പാറശായില്‍ നഗരമാലിന്യം നിക്ഷേപിച്ചശേഷം രാത്രിയുടെ മറവില്‍ മുങ്ങിയ പ്രതിയെ പാറശാല പോലീസ് സിസിടിവിയുടെ സംവിധാനത്തോടെ പിടികൂടി. അവര്‍ക്കെതിരെ ശക്തമായി കേസെടുക്കുകയും ചെയ്തിട്ടുണ്ട്. കോഴി വേസ്റ്റുകളും, അറവുശാല മാലിന്യങ്ങളുമടക്കമാണ് കൊണ്ടുവന്നു ഗ്രാമീണ മേഖലയില്‍ തള്ളുന്നത്. ഇവര്‍ക്കെതിരെ ശക്തമായ നിയമനടപടി സ്വീകരിക്കണമെന്ന് പോതു പ്രവര്‍ത്തകന്‍ ഡാലുമുഖം മോഹനചന്ദ്രൻ ആവശ്യപ്പെട്ടു.

അധികൃതരുടെ കനിവിനു കാതോർത്ത് മരുത്തൂര്‍ പാലം

നെയ്യാറ്റിന്‍കര: കാടും പടര്‍പ്പും കയറിയ കൈവരി ഒരുവശത്ത്. മറുഭാഗത്തെ കൈവരി ഇടിഞ്ഞു താഴെ പോയതിനാല്‍ കരിങ്കല്‍ക്കല്ലുകള്‍ വാരി അടുക്കിയ നിലയില്‍. വീതി കുറഞ്ഞ പാലം പുതുക്കിപ്പണിയുകയോ സമാന്തരമായി മറ്റൊരു പാലം സ്ഥാപിക്കുകയോ വേണമെന്ന ആവശ്യത്തിനും പരിഹാരമായില്ല. കരമന- കളിയിക്കാവിള പാതയില്‍ മരുത്തൂര്‍ തോടിനു കുറുകെയുള്ള ചരിത്രപ്രസിദ്ധമായ മരുത്തൂര്‍ പാലം അധികൃതരുടെ കനിവ് കാത്തുകിടക്കുകയാണ്. ഒട്ടേറെ ജീവനുകള്‍ പൊലിഞ്ഞുവീണ നെയ്യാറ്റിന്‍കര മരുത്തൂര്‍ പാലം സ്ഥിതി ചെയ്യുന്നത് മൂന്നുകല്ലിന്‍മൂട്ടിനും ടിബി ജംഗ്ഷനും മധ്യേയായി നഗരസഭ സ്റ്റേഡിയത്തിനു സമീപത്തായാണ്. പൊതുവേ വീതി കുറഞ്ഞ പാലത്തില്‍ രണ്ടു ബസുകള്‍ക്ക് ഒരേ സമയം അങ്ങോട്ടുമിങ്ങോട്ടും സുഗമമായി കടന്നുപോകാനാവില്ല. മൂന്നുകല്ലിന്‍മൂട്ടില്‍നിന്നും നെയ്യാറ്റിന്‍കരയിലേയ്ക്ക് ഇറക്കം ഇറങ്ങി വരുന്ന യാത്രക്കാര്‍ വളവ് കഴിഞ്ഞു നേരെ മരുത്തൂര്‍ പാലത്തിലേയ്ക്ക് കയറും. മറുവശത്ത് ടി ബി ജംഗ്ഷനില്‍ നിന്നും തിരുവനന്തപുരം ഭാഗത്തേയ്ക്ക് പോകുന്ന വാഹനങ്ങള്‍ ഇറക്കവും വളവും പിന്നിട്ട് മരുത്തൂര്‍ പാലത്തിലേയ്ക്ക് കടക്കും. ഇറക്കം ഇറങ്ങി വരുന്നതിനായതിനാല്‍ പല വാഹനങ്ങളും സ്വാഭാവികമായി വേഗതയിലായിരിക്കാം. വീതി കുറഞ്ഞ പാലം എന്നതുപോലെ വാഹനങ്ങളുടെ ഈ വേഗതയും ഇവിടുത്തെ അപകടങ്ങളുടെ കാരണങ്ങളില്‍പ്പെടുന്നു. ദേശീയ പാതാ വികസനത്തിന്‍റെ ഭാഗമായി മരുത്തൂര്‍ പാലത്തിനും ആവശ്യമായ മാറ്റങ്ങള്‍ വരുമെന്ന പ്രതീക്ഷയിലാണ് നിലവില്‍ പ്രദേശവാസികളും യാത്രക്കാരും.

റഷ്യയിലെ ആർടെക് ക്യാന്പിൽ തിരുവനന്തപുരത്തെ വിദ്യാർഥികൾ

തിരുവനന്തപുരം: റഷ്യയിലെ പ്രശസ്തമായ ആർടെക് ക്യാന്പിൽ പങ്കെടുക്കാൻ ഇന്ത്യയിൽനിന്നു തെരഞ്ഞെടുക്കപ്പെട്ട മൂന്നു വിദ്യാർഥികളും തിരുവനന്തപുരത്തുകാർ. പതിനഞ്ചു രാജ്യങ്ങളിൽ നിന്നു നൂറോളം പേരാണ് ഇരുപത്തിയൊന്നു ദിവസം നീളുന്ന ക്യാന്പിലെത്തിയത്. തിരുവനന്തപുരം റഷ്യൻ ഹൗസിലെ സ്റ്റുഡന്‍റ്സ് ക്ലബിലെ അംഗങ്ങളായ ആക്യുൽ എം. അജു (സെന്‍റ് തോമസ് സ്കൂൾ), വിശാൽ എസ്. നായർ (സായികൃഷ്ണ പബ്ലിക് സ്കൂൾ, ചെങ്കൽ), ബി.എസ്. വൈഗ ശങ്കർ (സെന്‍റ് മേരീസ് സ്കൂൾ, പൂജപ്പുര) എന്നീ വിദ്യാർഥികളാണ് വിവിധ മത്സരങ്ങൾ ജയിച്ച് റഷ്യയിലെത്തിയത്. 2025-ൽ നൂറുവർഷം തികയുന്നുവെന്ന പ്രത്യേകതയും ആർടെക് ക്യാന്പിനുണ്ട്. സോവിയറ്റ് യൂണിയൻ 1925 ലാണ് റഷ്യയിലെ ക്രിമിയയിൽ വിദ്യാർഥികൾക്കായി ആർടെക് ക്യാന്പ് തുടങ്ങിയത്. ഇപ്പോൾ മുപ്പതു രാജ്യങ്ങളിൽ നിന്നായി നാനൂറ്റി അന്പത്തോളം കുട്ടികൾ ക്യാന്പിലുണ്ട്.

ടെക്നോപാർക്കിൽ സൗത്ത് ഇന്ത്യൻ ബാങ്കിന്‍റെ സ്മാർട്ട് കൗണ്ടർ

തിരുവനന്തപുരം: നൂതന ഡിജിറ്റൽ ബാങ്കിംഗ് സൗകര്യങ്ങൾ വിപുലീകരിക്കുന്നതിന്‍റെ ഭാഗമായി ടെക്നോപാർക്കിൽ സൗത്ത് ഇന്ത്യൻ ബാങ്ക് സ്മാർട്ട് കൗണ്ടർ തുറന്നു.ടെക്നോപാർക്കിലെ തേജസ്വിനി കെട്ടിടത്തിൽ നടന്ന ചടങ്ങിൽ കേരള ഐടി പാർക്ക് ചീഫ് ഫിനാൻഷൽ ഓഫീസർ എസ്. വിപിൻ കുമാർ സ്മാർട്ട് കൗണ്ടർ ഉദ്ഘാടനം ചെയ്തു . വിവിധ സാന്പത്തിക സേവനങ്ങൾക്കു പുറമെ ബ്രാഞ്ചുകളിനിന്നും സാധാരണ ലഭിക്കുന്ന വ്യക്തിഗത വായ്പകൾ, ഭവന, വാഹന വായ്പകൾ, മ്യുച്വൽ ഫണ്ട് വായ്പകൾ, സ്ഥിര നിക്ഷേപ സൗകര്യം, വീഡിയോ കെവൈസി എന്നിവ സ്മാർട്ട് കൗണ്ടറിൽ ലഭ്യമാണ്. ചടങ്ങിൽ സൗത്ത് ഇന്ത്യൻ ബാങ്ക് റീട്ടെയിൽ അസറ്റ് ഹെഡും ചീഫ് ജനറൽ മാനേജറുമായ സഞ്ജയ് കുമാർ സിൻഹ, ബാങ്കിന്‍റെ മുതിർന്ന ഉദ്യോഗസ്ഥർ, ടെക്നോപാർക്കിലെ കന്പനി പ്രതിനിധികൾ എന്നിവർ പങ്കെടുത്തു.

വൈഎംസിഎ കേരള റീജണൽ ബോർഡുകളുടെ ഉദ്ഘാടനം നാളെ

തിരുവനന്തപുരം: ദേശീയ വായനാദിനത്തോടനുബന്ധിച്ചു നാളെ ഉച്ചകഴിഞ്ഞു മൂന്നിനു വൈഎംസിഎ കേരള റീജണൽ കമ്മിറ്റി തിരുവനന്തപുരം വൈഎംസിഎയിൽ സംഘടിപ്പിക്കുന്ന ചടങ്ങിൽ സോഷ്യൽ സർവീസ് ബോർഡിന്‍റെയും ലിറ്ററേച്ചർ ബോർഡിന്‍റെയും ഉദ്ഘാടനം മന്ത്രി റോഷി അഗസ്റ്റിൻ നിർവഹിക്കും. പ്രഫ. അലക്സ് തോമസ് അധ്യക്ഷത വഹിക്കും. കവി പ്രഭാവർമ പുരസ്കാര സമർപ്പണം നടത്തും. ജോണ്‍ ജി. കൊട്ടറ, സാലു പതാലിൽ, കുര്യൻ തൂന്പുങ്കൽ, കെ. വി. തോമസ്, റവ. ബി.വി. ജയകുമാർ, അഡ്വ. ഇടിക്കുള സക്കറിയ, ഡോ. റെജി വർഗീസ് എന്നിവർ പ്രസംഗിക്കും. ഉച്ചകഴിഞ്ഞു നടക്കുന്ന വായനാദിന സമ്മേളനത്തിൽ പ്രമുഖ എഴുത്തുകാർ തങ്ങളുടെ വായനാനുഭവങ്ങൾ പങ്കുവയ്ക്കും.

കാഞ്ഞിരംകുളം പഞ്ചായത്ത് ഓഫീസ് തീപിടിത്തം: സമഗ്ര അന്വേഷണം നടത്തണമെന്ന് എം. വിൻസന്‍റ് എംഎൽഎ

പൂവാർ : അഴിമതിക്കഥകൾക്ക് പേരുകേട്ട കാഞ്ഞിരംകുളം പഞ്ചായത്ത് ഓഫീസിലെ തീപിടുത്തത്തെകുറിച്ചു സമഗ്ര അന്വേഷണം നടത്തണമെന്ന് എം. വിൻസന്‍റ് എംഎൽഎ ആവശ്യപ്പെട്ടു. പരാതിയിൽ മുങ്ങിയ പഞ്ചായത്തിലെ അഴിമതിക്കെതിരേ പലവിധത്തിലുള്ള വിജിലൻസ് അന്വേഷണം നടന്നുവരികയും അതിന്‍റെ ഭാഗമായി ഏഴോളം ഫയലുകൾ മുൻവർഷങ്ങളിൽ വിജിലൻസ് ഇവിടെ നിന്നും ശേഖരിച്ചുകൊണ്ടുപോയിട്ടുള്ളതുമാണ്. അഴിമതിക്കൊള്ള പുറത്തു വരാതിരിക്കാൻ ഇങ്ങനെ ഒരു അട്ടിമറി നടത്തിയതെന്ന സംശയം സ്വാഭാവികമാണ്. ആയതിനാലാണ് സമഗ്രമായ അന്വേഷണത്തിലൂടെ തീപിടുത്തത്തിന്‍റെ നിജസ്ഥിതി പുറത്തു കൊണ്ടുവരമെന്ന് ആവശ്യപ്പെടുന്നതെന്നു കത്തിയമർന്ന ഓഫീസ് കെട്ടിടം സന്ദർശിച്ചശേഷം എംഎൽഎ പറഞ്ഞു. കാഞ്ഞിരംകുളം ബ്ലോക്ക് കോൺഗ്രസ് കമ്മിറ്റി പ്രസിഡന്‍റ് കരിംകുളം ജയകുമാർ, മണ്ഡലം പ്രസിഡന്‍റ് ആർ. തങ്കരാജ്, ബ്ലോക്ക് കോൺഗ്രസ് കമ്മിറ്റി വൈസ് പ്രസിഡന്‍റ് സരസദാസ്, ജനറൽ സെക്രട്ടറിമാരായ കാഞ്ഞിരംകുളം ശരത് കുമാർ, പ്രദീപ്കുമാർ, പാർലമെന്‍ററി പാർട്ടി ലീഡർ അനിൽകുമാർ, വാർഡ് അംഗം ലൗലി റോസ്, മണ്ഡലം കമ്മിറ്റി ഭാരവാഹികളായ ജോണി, ബിനു തുടങ്ങിയവരും കത്തിയമർന്ന കെട്ടിടം സന്ദർശിക്കാൻ എംഎൽഎക്കൊപ്പം ഉണ്ടായിരുന്നു.

പഠനത്തിനൊപ്പം തൊഴിലെടുക്കുന്നത് ശീലമാക്കണം: ഡോ. അച്യുത് ശങ്കർ

നാവായിക്കുളം: പഠനത്തിനൊപ്പം തൊഴിലെടുക്കുന്നത് പുതുതലമുറ ശീലമാക്കണമെന്ന് ഡോ. അച്യുത ശങ്കർ അഭിപ്രായപ്പെട്ടു. വിദ്യാഭ്യാസത്തിന്‍റെ കാഴ്ചപ്പാട് അനുദിനം മാറി വരികയാണ്. ആഗോള വിദ്യാഭ്യാസത്തിന്‍റെ ഭാഗമായ മാറ്റങ്ങളെയും ശാസ് ത്രവളർച്ചയെയും പുതുതലമുറയ്ക്ക് വേഗത്തിൽ ഉൾക്കൊള്ളാൻ ആകുമെന്നും അദ്ദേഹം അഭിപ്രായപ്പെട്ടു. നാവായിക്കുളം സർവീസ് സഹകരണ ബാങ്കിന്‍റെ ശതാബ്ദി വാർഷിക ആഘോഷങ്ങളുടെ സമാപനവും വിദ്യാഭ്യാസ പുരസ്കാര വിതരണവും ഉദ്ഘാടനം ചെയ്യുകയായിരുന്നു അദ്ദേഹം. സഹകരണ ബാങ്ക് പ്രസിഡന്‍റ് അഡ്വ. എം. എം. താഹ അധ്യക്ഷത വഹിച്ചു. ബാങ്ക് ആരംഭിച്ച എടിഎമ്മിന്‍റെ പ്രവർത്തന ഉദ്ഘാടനവും സാന്ത്വനം ചികിത്സ സഹായവിതരണവും നാവായിക്കുളം പഞ്ചായത്ത് പ്രസിഡന്‍റ് ബേബി രവീന്ദ്രൻ നിർവഹിച്ചു. രാജസ്ഥാൻ യൂണിവേഴ്സിറ്റിയിൽ നിന്നും പൊളിറ്റിക്സിന് ഡോക്ടറേറ്റു നേടിയ ഡയറക്ടർ ബോർഡ് അംഗം ഡോ. കെ. ബിന്നി കെമിസ്ട്രിയിൽ കേരള സർവകലാശാലയിൽനിന്നും ഡോക്ടറേറ്റ് നേടിയ എസ്.എം. സുനേഷ്, മികച്ച ടെലിഫിലിമിനുള്ള നിരവധി പുരസ്കാരങ്ങൾ നേടിയ നാവായിക്കുളം ഹൈസ്കൂളിലെ വിദ്യാർഥികൾ, സംവിധായകനായ അധ്യാപകൻ സുൽജിത്ത് എന്നിവരെയും യോഗത്തിൽ ആദരിച്ചു. വിവിധ പരീക്ഷകളിൽ മികച്ച വിജയം നേടിയ വിദ്യാർഥികളെയും എസ്എസ്എൽസി, പ്ലസ് ടു പരീക്ഷകളിൽ മുഴുവൻ എ പ്ലസ് നേടിയ വിദ്യാർഥികളെയും ചടങ്ങിൽ ആദരിച്ചു. ഡയറക്ടർ ബോർഡ് അംഗം അഡ്വ. എൻ. സന്തോ ഷ് കുമാർ സ്വാഗതം പറഞ്ഞു. കവിയും നാടക, ചലച്ചിത്ര, ഗാന രചയിതാവുമായ രാധാകൃഷ്ണൻ കുന്നുംപുറം മുഖ്യപ്രഭാഷണം നടത്തി. നാവായിക്കുളം പഞ്ചായത്ത് പാർലമെന്‍ററി പാർട്ടി ലീഡർ എസ്. മണിലാൽ, വാർഡ് അംഗം നാവായിക്കുളം അശോകൻ, ബാങ്ക് സെക്രട്ടറി എസ്. ബിന്ദു, അസി. സെക്രട്ടറി പൃഥ്വിരാജ്, ഇന്‍റേണൽ ഓഡിറ്റർ ആർ.വി. രാജേഷ്, കെസിഇസി വർക്കിംഗ് പ്രസിഡന്‍റ് എസ്. ആർ. ഹാരിസ് തുടങ്ങിയവർ സംസാരിച്ചു.

കേരളത്തിലെ മതസൗഹാർദം രാജ്യത്തിന് മാതൃക: കേണൽ ജോണ്‍ വില്യം പോളി മെറ്റ്‌ല

തിരുവനന്തപുരം: കേരളത്തിൽ നിലനിൽക്കുന്ന മതസൗഹാർദവും ആത്മീയ കൂട്ടായ്മകളും തന്‍റെ ജീവിതത്തിലെ മറക്കാനാവാത്ത അനുഭവങ്ങളാണെന്ന് സാൽവേഷൻ ആർമി ടെറിറ്റോറിയൽ കമാൻഡർ കേണൽ ജോണ്‍ വില്യം പോളി മെറ്റ്‌ല പറഞ്ഞു. സാൽവേഷൻ ആർമി ഇന്ത്യാ വെസ്റ്റേണ്‍ (മുംബൈ) ടെറിട്ടോറിയൽ കമാൻഡറായി സ്ഥാനമേൽക്കുന്ന കേണൽ പോളിമെറ്റ്‌ല യ്ക്കും സഹധർമിണി കേണൽ രത്നസുന്ദരിക്കും ആക്ട് സിന്‍റെയും തലസ്ഥാനത്തെ വിവിധ ആത്മീയ സംഘടനകളുടെയും ആഭിമുഖ്യത്തിൽ നടത്തിയ യാത്രയയപ്പ് ചടങ്ങിൽ മറുപടി പ്രസംഗം നടത്തുകയായിരുന്നു അദ്ദേഹം. ബിലീവേഴ്സ് ഈസ്റ്റേണ്‍ ചർച്ച് ബിഷപ് ഹൗസിൽ നടന്ന ചടങ്ങിൽ ചങ്ങനാശേരി അതിരൂപതാ വികാരി ജനറാൾ റവ. ഡോ. ജോണ്‍ തെക്കേക്കര അധ്യക്ഷത വഹിച്ചു. ശാന്തിഗിരി ആശ്രമം ജനറൽ സെക്രട്ടറി സ്വാമി ഗുരുരത്നം ജ്ഞാനതപസ്വി ചടങ്ങ് ഉദ്ഘാടനം ചെയ് തു. പാളയം പള്ളി ഇമാം ഡോ. വി.പി. സുഹൈബ് മൗലവി മുഖ്യപ്രഭാഷണം നടത്തി. ബിലിവേഴ്സ് ഈസ്റ്റേണ്‍ ചർച്ച് തിരുവനന്തപുരം അതിരൂപതാധ്യക്ഷർ ബിഷപ് മാത്യൂസ് മാർ സിൽവാനിയോസ്, ആക്ട്സ് ജനറൽ സെക്രട്ടറി ജോർജ് സെബാസ്റ്റ്യൻ, ടി. മനോജ്, ആക്ട്സ് ഭാരവാഹികളായ പ്രഫ. ഷേർളി സ്റ്റുവാർട്ട്, എൽ. പ്രമീള, അഡ്വ. അന്പിളി ജേക്കബ്, സാജൻ വേളൂർ, ഫാ. ബിനുമോൻ ബി. റസൽ, ഫാ. ജോസ് കരിക്കം, ലെഫ. കേണൽ സാജു ദാനിയൽ, ഡെന്നിസ് ജേക്കബ്, ഡോ. സുരേഷ് ബൽരാജ്, ഡെയ്സി സെബാസ്റ്റ്യൻ തുടങ്ങിയവർ പങ്കെടുത്തു. കേണൽ ജോണ്‍ വില്യമിനും, കേണൽ രത്നസുന്ദരിക്കും തലസ്ഥാന നഗരിയുടെ സ്നേഹോപഹാരവും സമ്മാനിച്ചു.

തിരുവനന്തപുരം വിമാനത്താവളത്തില്‍ വ്യാജ ബോംബ് ഭീഷണി സന്ദേശം

സന്ദേശമെത്തിയത് ഇ-മെയിൽ വഴി വലിയതുറ: തിരുവനന്തപുരം ഡൊമസ്റ്റിക് വിമാനത്താവളത്തില്‍ വ്യാജ ബോംബ് ഭീഷണി സന്ദേശം. ചൊവ്വാഴ്ച രാവിലെ ഇ-മെയില്‍ വഴിയാണ് വ്യാജ ബോംബ് സന്ദേശമെത്തിയത്. ഇതിന്‍റെ അടിസ്ഥാനത്തില്‍ വിമാനത്താവളത്തിലെ സുരക്ഷ ശക്തമാക്കി. ബോംബ് ഭീഷണി സന്ദേശമെത്തിയതോടെ വിമാനത്താവള അധികൃതര്‍ വിവരം വലിയതുറ പോലീസിനെയും ബോംബ് സ്‌ക്വാഡ്, ഡോഗ് സ്‌ക്വാഡ്, ഫയര്‍ ഫോഴ്‌സ് എന്നിവരെ അറിയിക്കുകയായിരുന്നു. അധികൃതരുടെ നേതൃത്വത്തില്‍ വിമാനത്താവളത്തിനുള്ളിലും പരിസരത്തും ശക്തമായ പരിശോധന നടത്തിയെങ്കിലും യാതൊന്നും കണ്ടെത്താന്‍ കഴിഞ്ഞില്ല. സന്ദേശം എവിടെനിന്നാണ് എത്തിയതെന്നതിനെക്കുറിച്ചുള്ള അന്വേഷണം നടന്നുവരികയാണ്. കഴിഞ്ഞദിവസം അഹമ്മദാബാദ് വിമാനത്താവളത്തിലും ഇത്തരത്തിൽ ബോംബ് ഭീഷണി സന്ദേശം എത്തിയിരുന്നു. ഇതിനെത്തുടര്‍ന്ന് ലുഫ്താന്‍സ വിമാനത്തിന് അനുമതി നിഷേധിക്കുകയും ചെയ്തു. പരിശോധനയില്‍ സന്ദേശം വ്യാജമാണെന്നു തെളിയുകയായിരുന്നു.

എബിവിപി സെക്രട്ടേറിയറ്റ് മാർച്ച് നടത്തി

തിരുവനന്തപുരം: പിഎം ശ്രീ പദ്ധതിയിൽ കേരള സർക്കാർ ഒപ്പ് വയ്ക്കുക, സാങ്കേതിക സർവകലാശാല വിദ്യാർഥികളുടെ ഇയർ ബാക്ക് ഒഴിവാക്കുക തുടങ്ങിയ ആവശ്യങ്ങൾ ഉന്നയിച്ച് എബിവിപി സെക്രട്ടേറിയറ്റ് മാർച്ച് നടത്തി. പ്രവർത്തകർക്ക് നേരെ പോലീസ് ജലപീരങ്കി പ്രയോഗിച്ചു. തുടർന്ന് എംജി റോഡ് ഉപരോധിച്ച പ്രവർത്തകരെ പോലീസ് അറസ്റ്റ് ചെയ്ത് നീക്കി. മാർച്ച് എബിവിപി സംസ്ഥാന സെക്രട്ടറി ഇ.യു. ഈശ്വര പ്രസാദ് ഉദ്ഘാടനം ചെയ്തു. സംസ്ഥാന ജോയിന്‍റ് സെക്രട്ടറിമാരായ എസ്.അക്ഷയ്, ജി. ഗോകുൽ, അശ്വതി, എൻഇസി മെന്പർ ദിവ്യാ പ്രസാദ് തുടങ്ങിയവർ മാർച്ചിനു നേതൃത്വം നൽകി.

മാറ്റിയിട്ടും മാറ്റിയിട്ടും തീരാതെ പ്ലാസ്റ്റിക്ക് മാലിന്യം

എസ്. രാജേന്ദ്രകുമാർ വിഴിഞ്ഞം: മാറ്റിയിട്ടും.. മാറ്റിയിട്ടും മാറാതെ പ്ലാസ്റ്റിക്ക് മാലിന്യം.! കടൽ നിറയെ പ്ലാസ്റ്റിക് തരികൾ നിറഞ്ഞെങ്കിലും പരിഹാര മാർഗം തേടാതെ അധികൃതർ. തിരമാലകൾ തീരത്തേക്ക് അടിച്ചുകയറ്റുന്ന പ്ലാറ്റിക് മാലിന്യങ്ങൾ നീക്കൽ രണ്ടാഴ്ചയായി തുടരുമ്പോഴും അവസാനം കാണതെ കുഴയുകയാണ് തൊഴിലാളികൾ. പ്ലാസ്റ്റിക് അരിപ്പ് കുട്ടകളിൽ നിറക്കുന്ന മണൽ കടൽ വെള്ളത്തിൽ മുക്കിയ ശേഷം വേർതിരിച്ചെടുക്കുന്ന ടൺ കണക്കിന് പ്ലാസ്റ്റിക് തരികൾ ഇതിനോടകം ഉത്തരവാദിത്തപ്പെട്ട സ്വകാര്യ കമ്പനി അധികൃതർ ഏറ്റുവാങ്ങിയെങ്കിലും ഇനിയും വൻശേഖരം കടലിൽ ഉണ്ടെന്നു മത്സ്യത്തൊഴിലാളികൾ പറയുന്നു. നിലവിൽ ഫയർ ഫോഴ്സിൽനിന്നു പരിശീലനം ലഭിച്ച സന്നദ്ധ പ്രവർത്തകരായ സിവിൽ ഡിഫൻസ് അംഗങ്ങളായ നിരവധി പേരാണ് തീരശുചികരണത്തിന് രംഗത്തുള്ളത്. കപ്പൽ കമ്പനി അധികാരപ്പെടുത്തിയ സ്വകാര്യ കമ്പനി അധികൃതർക്കാണ് മാലിന്യനീക്കത്തിന്‍റെ ഉത്തരവാദിത്വം. രാവിലെ എട്ടു മുതൽ വൈകുന്നേരം മൂന്നുവരെ നടക്കുന്ന ശുചീകരണത്തിനു ചുമതലപ്പെട്ട തൊഴിലാളികൾക്കു ദിവസവേതനമായി 900 രൂപ നൽകുന്നതായും അറിയുന്നു. കഴിഞ്ഞമാസം 24ന് ആലപ്പുഴക്കും ഉൾക്കടലിൽ താഴ്ന്ന എംഎസ്‌സിയുടെ എൽസാ - 3 യിലെ കണ്ടെയ്നറുകളിൽ നിന്നുള്ള കളിപ്പാട്ടങ്ങളും കസേരപോലുള്ള വസ്തുക്കളുടെയും നിർമാണത്തിനുപയോഗിക്കുന്ന പ്ലാസ്റ്റിക് തരികളാണ് കടലിനെയും തീരത്തെയും മലിനമാക്കിയത്. കഴിഞ്ഞ മാസം 26, 27 തീയതികളിലാണ് തിരുവനന്തപുരം, തമിഴ്നാട് കന്യാകുമാരി ജില്ലയുടെയും വിവിധ തീരങ്ങളിൽ കണ്ടെയ്നറുകളും പ്ലാസ്റ്റിക് നിറച്ച ചാക്കുകളും അടിഞ്ഞു കയറിയത്. പൊട്ടിപ്പൊളിഞ്ഞതും അല്ലാത്തതുമായ കണ്ടെയ്നറുകളും മാറ്റുകയും ചാക്കുകെട്ടുകൾ കരയിലേക്ക് മാറ്റുകയും ചെയ്തിരുന്നു. എന്നാൽ തിരയടിയിൽ പാറക്കൂട്ടങ്ങളിലും മറ്റും തട്ടി നൂറുകണക്കിനു ചാക്കുകൾ പൊട്ടി പ്പൊളിഞ്ഞ് പ്ലാസ്റ്റിക് തരികൾ കടലിൽ വീണിരുന്നു. തീരത്തേക്കു കൂട്ടമായി അടിഞ്ഞു കയറിയ പ്ലാസ്റ്റിക് മാലിന്യങ്ങളെ തുടക്കത്തിൽ പോലീസും സന്നദ്ധപ്രവർത്തകരും, ഹരിതകർമ സേനാംഗങ്ങളും ചേർന്നു നീക്കിയെങ്കിലും തിരയടിയിൽ ഇവ നിരന്തരം എത്താൻ തുടങ്ങിയതോടെ എല്ലാവരുംപിൻവാങ്ങി. ഏറെ പാരിസ്ഥിതിക പ്രശ്നങ്ങൾക്ക് വഴിതെളിക്കുമെന്ന മുന്നറിയിപ്പുണ്ടായതോടെയാണ് വോളൻഖിയർമാരെ രംഗത്തിറക്കാൻ സ്വകാര്യ കമ്പനി അധികൃതർ ശ്രമം നടത്തിയത്. കടലിൽ മീറ്ററുകളോളം ആഴത്തിൽ അടിഞ്ഞ പ്ലാസ്റ്റിക്കുകൾ മീനുകളെയും സാരമായി ബാധിക്കാൻ സാധ്യതയുള്ളതായും മത്സ്യത്തൊഴിലാളികൾ ആശങ്കപ്പെടുന്നുണ്ട്. കപ്പലപകടം നടന്ന് ഒരു മാസത്തോടടുക്കുമ്പോഴും പ്ലാസ്റ്റിക്കുകളുടെ വരവിനു മാറ്റമില്ല. വിഴിഞ്ഞത്തുനിന്ന് കൊച്ചിക്കുപോയ എൽസായിലുണ്ടായിരുന്ന 643 കണ്ടെയ്നറുകളിൽ അൻപതോളം എണ്ണം മാത്രമാണ് ഇതുവരെ തീരത്തടിഞ്ഞത്. കെമിക്കൽ നിറച്ചവയുൾപ്പെടെ ബാക്കിയുള്ളവയുടെ കാര്യത്തിൽ അധികൃതർക്ക് യാതൊരറിവും ഇല്ലതാനും. ശക്തമായ കടൽക്ഷോഭത്തിൽപ്പെട്ട് ഉൾക്കടലിൽ കണ്ടെയ്നറുകൾ തകരുന്നുണ്ടാകാമെന്നാണു മത്സ്യത്തൊഴിലാളികൾ കണക്ക് കൂട്ടൽ. ഇവിടെനിന്നാകാം നിലവിലും തുടർച്ചയായി പ്ലാസ്റ്റിക് തരികൾ തീരത്തേക്ക് അടിച്ച് കയറുന്നതെന്നും ഇവർ സംശയം പ്രകടിപ്പിക്കുന്നുണ്ട്.

വയോധികയുടെ മൃതദേഹം മോർച്ചറിയിൽ

മെഡിക്കൽ കോളജ്: തിരുവനന്തപുരം ജനറൽ ആശുപത്രിയിൽ ചികിത്സയിൽ കഴിഞ്ഞു വരുന്നതിനിടെ മരണപ്പെട്ട വയോധികയുടെ മൃതദേഹം മോർച്ചറിയിൽ. തെങ്കാശി രാജപാളയം സ്വദേശിനി പശുപതി (70) ആണ് ചികിത്സയിലിരിക്കെ ചൊവ്വാഴ്ച രാവിലെ 8.30ന് മരിച്ചത്. ഫോർട്ട് സ്റ്റേഷൻ പരിധിയിലുള്ള സ്ഥലങ്ങളിൽ അലഞ്ഞുതിരിഞ്ഞു നടന്നിരുന്ന ഇവരെ പോലീസ് ഇടപെട്ട് ഈ വർഷം ജനുവരി രണ്ടാം തീയതിയാണ് കല്ലടിമുഖത്തെ യാചക പുലരി വാസകേന്ദ്രത്തിൽ പാർപ്പിക്കുന്നത്. രോഗബാധിതയായതിനെ തുടർന്ന് കുറച്ചു ദിവസങ്ങൾക്കു മുമ്പ് വയോധിയെ ജനറൽ ആശുപത്രിയിൽ പ്രവേശിപ്പിക്കുകയായിരുന്നു. ഇവിടെ ചികിത്സയിലിരിക്കെയാണ് മരിച്ചത്. ഇവരെക്കുറിച്ച് എന്തെങ്കിലും വിവരം ലഭിക്കുന്നവർ ഫോർട്ട് സ്റ്റേഷനുമായി ബന്ധപ്പെടണം. ഫോൺ: 949798 7010, 0471 2461105, 949798 0044.

കരമനയിലെ ദമ്പതികളുടെ ആത്മഹത്യ: മൃതദേഹങ്ങളുമായി നാട്ടുകാർ ബാങ്കിനു മുന്നിൽ പ്രതിഷേധിച്ചു

തിരുവനന്തപുരം: ബാങ്കിന്‍റെ ജപ്തി ഭീഷണിയെ തുടർന്നു കരമനയിൽ ദമ്പതികൾ ജീവനൊടുക്കിയ സംഭവത്തിൽ വൻ പ്രതിഷേധം. വിഎസ്ഡിപിയുടെ നേതൃത്വത്തിൽ ദമ്പതികളുടെ മൃതദേഹവുമായി ബാങ്കിനു മുന്നിൽ നാട്ടുകാർ പ്രതിഷേധിച്ചതോടെ നാട്ടുകാരുടെ രോഷംഅണപൊട്ടി. മരണപ്പെട്ട ദമ്പതിമാരുടെ വായ്പകൾ എഴുതിത്തള്ളാമെന്ന് ബാങ്ക് രേഖാമൂലം ഉറപ്പുനൽകിയതോടെയാണ് പ്രതിഷേധക്കാ ർ സമരം അവസാനിപ്പിച്ചത്. ജനറൽ ആശുപത്രിക്കു സമീപമുള്ള എസ്ബിഐ എസ്എംഇ ശാഖയ്ക്കുമുന്നിലാണ് നാട്ടുകാർ പ്രതിഷേധിച്ചത്. വായ്പ എഴുതിത്തള്ളണമെന്ന് ആവശ്യപ്പെട്ട് രാവിലെ മുതല്‍ വിഎസ് ഡിപി പ്രവര്‍ത്തകര്‍ ബാങ്കിന് മുന്നില്‍ സമരം നടത്തിയിരുന്നു. ആശുപത്രിയില്‍ പോസ്റ്റ്‌മോര്‍ട്ടത്തിനുശേഷം ഉച്ചയ്ക്കു രണ്ടരയോടെ ദമ്പതികളുടെ മൃതദേഹങ്ങളും വഹിച്ചുകൊണ്ടുള്ള ആമ്പുലന്‍സ് ജനറല്‍ ആശുപത്രിക്ക് സമീപമുള്ള എസ്ബിഐ ബ്രാഞ്ചിനു മുന്നിലെത്തി. തുടര്‍ന്ന് വിഎസ്ഡിപി പ്രവര്‍ത്തകര്‍ മൃതദേഹങ്ങള്‍ ബാങ്കിനു മുന്നില്‍ ഇറക്കിവച്ച് പ്രതിഷേധം തുടര്‍ന്നു. ഒരു മണിക്കൂറോളം പ്രതിഷേധം തുടര്‍ന്നപ്പോള്‍ ബാങ്ക് അധികൃതര്‍ 20 ദിവസത്തിനുള്ളില്‍ മരണപ്പെട്ടവരുടെ വായ്പാ ബാധ്യത എഴുതിത്തള്ളാമെന്നു രേഖാമൂലം എഴുതി നല്‍കി. ഇതോടെ സമരം അവസാനിപ്പിച്ച് മൃതദേഹങ്ങള്‍ സംസ്‌കാര ചടങ്ങുകള്‍ക്കായി കൊണ്ടുപോയി. വിഎസ്ഡിപി നേതാക്കളായ വിഷ്ണുപുരം ചന്ദ്രശേഖര്‍, ശ്യാംലൈജു, ചൊവ്വര സുനില്‍, അഡ്വ. പൂഴിക്കുന്ന് സുദേവന്‍, കൗണ്‍സിലര്‍മാരായ കരമന അജിത്, ജി.എസ്. മഞ്ജു തുടങ്ങിയവര്‍ പ്രതിഷേധ പരിപാടിയിൽ പങ്കെടുത്തു. കഴിഞ്ഞദിവസം വീടിനുമുന്നിലും പ്രതിഷേധം നടന്നു. ബാങ്കിന്‍റെ ഭാഗത്തുനിന്നുള്ള പീഡനമാണ് മരണകാരണമെന്നാരോപിച്ച് നാട്ടുകാരും കോണ്‍ട്രാക്ടേഴ്‌സ് ഫെഡറേഷനും വന്‍ പ്രതിഷേധമുയര്‍ത്തി. മൃതദേഹങ്ങള്‍ മാറ്റണമെങ്കില്‍ കളക്ടറോ ആര്‍ഡിഒയോ എത്തണമെന്നു പ്രതിഷേധക്കാര്‍ ആവശ്യപ്പെട്ടതിനെത്തുടര്‍ന്നു തഹസില്‍ദാരെത്തി ചര്‍ച്ച നടത്തി. എട്ടു മണിക്കൂറിനുശേഷമാണു മൃതദേഹങ്ങള്‍ പോസ്റ്റ്‌മോര്‍ട്ടത്തിനായി മാറ്റിയത്. ഇവര്‍ താമസിച്ചുവരുന്ന കാട്ടാന്‍വിളയിലെ വീട് ജപ്തി ചെയ്യാനായി മൂന്നു തവണ ഉദ്യോഗ സ്ഥരെത്തിയെങ്കിലും പൊതുപ്രവര്‍ത്തകരും നാട്ടുകാരും ഇടപെട്ട് മടക്കി അയക്കുകയായിരുന്നു.

തീപിടിത്തം: സമഗ്ര അന്വേഷണം നടത്തണമെന്ന ആവശ്യം ശക്തം

പൂവാർ: കാഞ്ഞിരംകുളം പഞ്ചായത്ത് ഓഫീസിലെ അപ്രതീക്ഷിത തീപിടിത്തം സംബന്ധിച്ച് സമഗ്ര അന്വേഷണസ്റ്റ നടത്തണമെന്ന് ആവശ്യം. ഇന്നലെ ഫോറൻസിക് വിഭാഗം എത്തിപരിശോധന നടത്തി. 35 ലക്ഷത്തോളം രൂപയുടെ നാശനഷ്ടം ഉണ്ടായതായതാണു പ്രാഥമിക കണക്ക്. കൂടുതൽ നാശനഷ്ടങ്ങൾക്ക് വിധേയമായ ഒന്നാംനില പൂർണമായി കത്തിയമർന്നു. കാഞ്ഞിരംകുളം പോലീസിന്‍റെ നിരീക്ഷണത്തിലാണ് കെട്ടിടത്തിലെ പരിശോധനകൾ നടന്നത്. സെക്രട്ടറിയുടെ മുറിയടക്കം ഓഫീസിന്‍റെ വിവിധ ഭാഗങ്ങളിൽ വച്ചിരുന്ന കമ്പ്യൂട്ടർ സെർവർ, ക്ലയിന്‍റ് കമ്പ്യൂട്ടർ, നാലു ലാപ് ടോപ്പുകൾ, 12 ഡെസ്‌ക് ടോപ്പുകൾ, 11 പ്രിന്‍റുകൾ, 11 സ്കാനറുകൾ, ഒരു ഫോട്ടോസ്റ്റാറ്റ് മെഷീൻ, നെറ്റ് സെർവർ, ടെലഫോൺ, സിസിടിവി, ജീവനക്കാരുടെ സർവീസ് ബുക്ക് സൂക്ഷിച്ചിരുന്ന അലമാര, മറ്റു ഫയലുകൾ സൂക്ഷിച്ചിരുന്ന രണ്ട് അലമാരകൾ, ഓഫീസ് സ്റ്റാഫിനുള്ള കാബിനുകൾ, ഫർണീച്ചറുകൾ, എ‌ട്ട് സീലിംഗ് ഫാനുകൾ എന്നിവയാണു പൂർണമായി നശിച്ചത്. ഉദ്യോഗസ്ഥരുടെ കാബിനുകളിൽ സൂക്ഷിച്ചിരുന്ന ഫയലുകൾ, മറ്റും സാധനങ്ങളും പൂർണമായും കത്തിയമർന്നു. പഞ്ചായത്ത് ഓഫീസിന്‍റെ ഒന്നാം നിലയിലാണ് കഴിഞ്ഞ ദിവസം രാത്രി തീയും പുകയും ആദ്യം കണ്ടത്. ഇതു ശ്രദ്ധയിൽപെട്ട തൊട്ടടുത്ത ആയൂർവേദ ആശുപത്രിയിലെ സെക്യൂരിറ്റി ജീവനക്കാർ ഫയർഫോഴ്‌സിനെ വിവരം അറിയിക്കുകയായിരുന്നു. തുടർന്ന് പൂവാർ, നെയ്യാറ്റിൻകര ഫയർഫോഴ്സ് യൂണിറ്റുകൾ സ്ഥലത്തെത്തിയാണ് തീ നിയന്ത്രണ വിധേയമാക്കിയത്. ഷോർട്ട് സർക്യൂട്ടാണ് തീ കത്താൻ കാരണമെന്നാണ് പ്രാഥമിക നിഗമനം. എന്നാൽ ഇലക്ട്രിക് വിഭാഗത്തിന്‍റെ പരിശോധന ഇന്നു നടക്കുമെന്നറിയുന്നു. അത് കഴിഞ്ഞാൽ മാത്രമേ വ്യക്തമായ കാരണം കണ്ടെത്താനാകൂവെന്നു പോലീസ് പറയുന്നു. സിപിഎം ഭരിക്കുന്ന പഞ്ചായത്ത് ഓഫീസ് തീ കത്തി നശിച്ച സംഭവം സ്വതന്ത്ര ഏജൻസിയെ കൊണ്ട് അന്വേഷിപ്പിച്ചു സത്യം പുറത്തുകൊണ്ടുവരണമെന്ന് ബിജെപി ബാലരാമപുരം മണ്ഡലം പ്രസിഡന്‍റ് ഡി. സുനീഷ് ആവശ്യപ്പെട്ടു.

കരമന -കളിയിക്കാവിള പാതയിൽ മാവ് കടപുഴകി ഗതാഗതം സ്തംഭിച്ചു

നെയ്യാറ്റിന്‍കര : കരമന -കളിയിക്കാവിള പാതയില്‍ പത്താംകല്ലിനു സമീപം മാവ് കടപുഴകി ഗതാഗതം സ്തംഭിച്ചു. വീടുകള്‍ക്കു മുകളിലും പൊതുനിരത്തിലും മരങ്ങള്‍ മറിഞ്ഞു വീണു. വട്ടവിളയ്ക്കു സമീപം ബിജു, അനിരുദ്ധന്‍ എന്നിവരുടെ വീടുകളുടെ മുകളിലേയ്ക്കു വന്‍മരങ്ങള്‍ കടപുഴകി വീണു. ഫയര്‍ ആന്‍ഡ് റസ്ക്യൂ യൂണിറ്റ് സ്ഥലത്തെത്തിയെങ്കിലും അത്രയും കൂറ്റന്‍ വൃക്ഷം മുറിച്ചു നീക്കാനുള്ള സംവിധാനത്തിന്‍റെ അപര്യാപ്തത അവരെ നിസഹായരാക്കി. മരം മുറിക്കുന്ന തൊഴിലാളികള്‍ക്കു മാത്രമേ അവ കൃത്യമായ രീതിയില്‍ മുറിച്ചു മാറ്റാനാവൂ എന്ന് അധികൃതര്‍ അറിയിച്ചു. നെയ്യാറ്റിന്‍കര ആലംപൊറ്റയ്ക്കുംസമീപം രാധാകൃഷ് ണന്‍റെ വീടിനു മുകളില്‍ വീണ മരം ഫയര്‍ ആന്‍ഡ് റസ് ക്യൂ യൂണിറ്റ് മുറിച്ചുമാറ്റി. കരമന- കളിയിക്കാവിള പാതയില്‍ പത്താംകല്ലില്‍ സ്വകാര്യ വൃക്തിയുടെ പുരയിടത്തിലെ കൂറ്റന്‍ മാവ് കടപുഴകി വീണു. മതിലിനുമുകളിലൂടെ റോഡിലേയ് ക്ക് വൃക്ഷം പതിച്ചതോടെ ഗതാഗതവും താത്കാലികമായി സ് തംഭിച്ചു. മരച്ചില്ലകള്‍ ഏറെ പണിപ്പെട്ട് ഫയര്‍ ആന്‍ഡ് റസ്ക്യൂ യൂണിറ്റു മുറിച്ച് നീക്കം ചെയ്തു. ഗതാഗതം നിയന്ത്രിക്കാന്‍ പോലീസും സ്ഥലത്തുണ്ടായിരുന്നു. മരം പതിച്ചപ്പോള്‍ വാഹനങ്ങളൊന്നും റോഡിലില്ലാതിരുന്നതു വലിയ ദുരന്തം ഒഴിവാക്കി. പയറ്റുവിള, പെരുങ്കടവിള, പിരായുംമൂട്, ജെബിഎസ് സ്കൂളിനു സമീപം, ചെങ്കല്‍ ആശുപത്രിക്കു സമീപം, മൂന്നുകല്ലിന്‍മൂട് എന്നിവിടങ്ങളിലൊക്കെ റോഡിലേയ്ക്കു വീണ വൃക്ഷങ്ങള്‍ ഫയര്‍ ആന്‍ഡ് റസ്ക്യൂ യൂണിറ്റ് ടീം ആണ് മുറിച്ചുമാറ്റിയത്.

യുവാവിനെ ആളുമാറി മര്‍ദിച്ച സംഭവം; ഒരാള്‍കൂടി പിടിയില്‍

പേരൂര്‍ക്കട: യുവാവിനെ ആളുമാറി മര്‍ദിച്ചു കൊലപ്പെടുത്താന്‍ ശ്രമിച്ച സംഭവത്തില്‍ ഒരാള്‍കൂടി പിടിയില്‍. വട്ടിയൂര്‍ക്കാവ് അറപ്പുര സരസ്വതി വിദ്യാലയത്തിനു സമീപം പേഴുവിള വീട്ടില്‍ മനു (31) ആണ് പിടിയിലായത്. മേയ് 14-നായിരുന്നു കേസിനാസ്പദമായ സംഭവം. തിരുമല പുന്നയ്ക്കാമുകള്‍ സ്വദേശി പ്രവീണ്‍ ആണ് പത്തംഗസംഘത്തിന്‍റെ ആക്രമണത്തിന് ഇരയായത്. പ്രതികളുടെ സുഹൃത്തായ പൂജപ്പുര സ്വദേശി വിഷ്ണു സംഭവദിവസം ആത്മഹത്യ ചെയ്തിരുന്നു. വിഷ്ണുവിന്‍റെ മരണത്തിന് ഉത്തരവാദി പ്രവീണ്‍ ആണെന്ന് ആരോപിച്ചായിരുന്നു മര്‍ദനം. വിഷ്ണുവിന്‍റെ സംസ്‌കാരച്ചടങ്ങ് ശാന്തികവാടത്തില്‍ നടത്തിയശേഷം സംഘം പ്രവീണിനെ മര്‍ദിച്ചവശനാക്കുകയും കൈവശമുണ്ടായിരുന്ന പണം അപഹരിച്ച് രക്ഷപ്പെടുകയും ചെയ്യുകയായിരുന്നു. പ്രാവച്ചമ്പലം സ്വദേശി മുഹമ്മദ് കൈഫ് (23), നേമം പഴയ കാരയ്ക്കാമണ്ഡപം സ്വദേശി അനു (29), പാപ്പനംകോട് സ്വദേശികളായ നിഷാദ് (25), അദിത് വിജയന്‍ (20), അശ്വിന്‍ വിജയന്‍ (20), മുട്ടത്തറ സ്വദേശി വിഷ്ണു (32), കാട്ടാക്കട സ്വദേശി മുജീഷ് ഖാന്‍ (23) എന്നിവര്‍ നേരത്തെ അറസ്റ്റിലായിരുന്നു. മനുവിനെ അറപ്പുരയിലെ വീട്ടില്‍നിന്നും തമ്പാനൂര്‍ സിഐ വി.എം. ശ്രീകുമാര്‍, എസ്ഐ ബിനു മോഹന്‍, എസ്സിപിഒ ശ്രീരാഗ്, സിപിഒമാരായ ഷിഹാബ്, സുരേഷ് എന്നിവര്‍ ചേര്‍ന്നാണ് പിടികൂടിയത്. പ്രതിയെ കോടതി റിമാന്‍ഡ് ചെയ്തു.

നിറചിരിയോടെ അനഘേന്ദു തിരികെ സ്‌കൂളിലേക്ക്

തിരുവനന്തപുരം: അമ്മ പകുത്ത് നല്‍കിയ ജീവന്‍റെ നിറചിരിയുമായി അനഘേന്ദു വീണ്ടും സ്‌കൂളിലേക്ക്. മഞ്ഞപ്പിത്തം ബാധിച്ച് കരള്‍ പ്രവര്‍ത്തന രഹിതമായ നിലയിലായിരുന്നു 14 വയസുകാരി അനഘേന്ദുവിനെ തിരുവനന്തപുരം കിംസ് ഹെല്‍ത്തിലെത്തിച്ചത്. രോഗാവസ്ഥ ഏറെ ഗുരുതരമായതിനാല്‍ എത്രയും വേഗം കരള്‍ മാറ്റിവെക്കുക എന്നത് മാത്രമായിരുന്നു അനഘേന്ദുവിന്‍റെ ജീവന്‍ രക്ഷിക്കാനുള്ള ഏക മാര്‍ഗം. തുടര്‍ന്ന് അടിയന്തിരമായി കുട്ടിയുടെ അമ്മയില്‍ നിന്നുതന്നെ കരള്‍ സ്വീകരിച്ച് ശസ്ത്രക്രിയ വിജയകരമായി പൂര്‍ത്തീകരിക്കുകയായിരുന്നു. അടിയന്തരമായി ശസ്ത്രക്രിയ നടത്തേണ്ടുന്ന സാഹചര്യത്തില്‍ അനഘേന്ദുവിന്‍റെ അമ്മ തന്നെ കരള്‍ പകുത്ത് നല്‍കുവാന്‍ സന്നദ്ധമായി മുന്നോട്ടുവന്നു. ചികിത്സയ്ക്കാവശ്യമായ തുക സ്വരൂപിക്കുന്നതു വലിയ വെല്ലുവിളിയായിരുന്നു. എന്നാല്‍ ഇതിനായി കാത്തുനില്‍ക്കാതെതന്നെ കരള്‍മാറ്റ ശസ്ത്രക്രിയ വിജയകരമായി പൂര്‍ത്തിയാക്കി. ശസ്ത്രക്രിയ പൂര്‍ത്തിയായി ദിവസങ്ങള്‍ക്കകം അനഘേന്ദുവിന്‍റെ കുടുംബത്തിനു കൈത്താങ്ങായി കിംസ് ഹെല്‍ത്ത് നല്‍കിയ സാമ്പത്തിക സഹായത്തിനൊപ്പം, മന്ത്രി ഡോ. ആര്‍. ബിന്ദുവിന്‍റെയും വകുപ്പ് ഉദ്യാഗോസ്ഥരുടെയും സമയോചിത ഇടപെടലുകളിലൂടെ അനഘേന്ദുവിനുള്ള ചികിത്സാ ധനസഹായം വേഗത്തില്‍ ലഭ്യമാകുകയും ചെയ്തു. കൂടാതെ സുമനസുകളില്‍ നിന്നും ലഭിച്ച തുകയും അനഘേന്ദുവിനും അമ്മയ്ക്കും ചികിത്സ പൂര്‍ത്തിയാക്കാന്‍ താങ്ങായി. ഹെപ്പറ്റോബൈലറി, പാന്‍ക്രിയാറ്റിക് ആൻഡ് ലിവര്‍ ട്രാന്‍സ്പ്ലാന്‍റ് സര്‍ജറി വിഭാഗം സീനിയര്‍ കണ്‍സള്‍ട്ടന്‍റും ചീഫ് കോ-ഓര്‍ഡിനേറ്ററുമായ ഡോ. ടി.യു. ഷബീറലി, ട്രാന്‍സ്പ്ലാന്‍റ് സര്‍വീസസ് സീനിയര്‍ കണ്‍സള്‍ട്ടന്‍റും ക്ലിനിക്കല്‍ ചെയറുമായ ഡോ. ഷിറാസ് അഹമ്മദ് റാത്തര്‍ എന്നിവരുടെ നേതൃത്വത്തില്‍ 10 മണിക്കൂറോളം നീണ്ട ശസ്ത്രക്രിയയ്‌ക്കൊടുവിലാണ് കരള്‍ മാറ്റിവയ്ക്കല്‍ പൂര്‍ത്തിയാക്കിയത്. ഹെപ്പറ്റോബൈലറി, പാന്‍ക്രിയാറ്റിക് ആൻഡ് ലിവര്‍ ട്രാന്‍സ്പ്ലാന്‍റ് സര്‍ജറി വിഭാഗം കണ്‍സള്‍ട്ടന്‍റ് ഡോ. വര്‍ഗീസ് എല്‍ദോ, അനസ്‌തേഷ്യ വിഭാഗം കണ്‍സള്‍ട്ടന്‍റുമാരായ ഡോ. ഹാഷിര്‍ എ, ഡോ. ആര്‍.എസ്. പ്രിജിത്, ഡോ. അഭിജിത് ഉത്തമന്‍, ഗ്യാസ്‌ട്രോ എന്‍ട്രോളജി വിഭാഗം സീനിയര്‍ കണ്‍സള്‍ട്ടന്‍റ് ഡോ. മധു ശശിധരന്‍, പീഡിയാട്രിക് ഗ്യാസ്‌ട്രോ എന്‍ട്രോളജി, ഹെപ്പറ്റോളജി ആന്‍ഡ് ലിവര്‍ ട്രാന്‍സ്പ്ലാന്‍റ് വിഭാഗം അസോസിയേറ്റ് കൺസൾട്ടന്‍റ് ഡോ. അനു കെ. വാസു, ഇന്‍റർവൻ‍ഷണല്‍ റേഡിയോളജി വിഭാഗം സീനിയര്‍ കണ്‍സള്‍ട്ടന്‍റ് ഡോ. മനീഷ് കുമാര്‍ യാദവ്, ഇമേജിംഗ് ആന്‍ഡ് ഇന്‍റർവന്‍ഷണല്‍ റേഡിയോളജി വിഭാഗം സീനിയര്‍ കണ്‍സള്‍ട്ടന്‍റ് ഡോ. കെ.എസ്. മനോജ്, പീഡിയാട്രിക് ക്രിട്ടിക്കല്‍ കെയര്‍ വിഭാഗത്തിലെ ഡോ. ഷിജു കുമാര്‍ എന്നിവരും ചികിത്സയുടെ ഭാഗമായി.

കോട്ടൂർ കുമ്പിൾമൂട് തോട് കരകവിഞ്ഞ് വെള്ളപ്പൊക്കം സ്ഥിരമായി മാറുന്നു

കോട്ടൂർ: പരിസ്ഥിതി വകുപ്പിന്‍റെ മുന്നറിയിപ്പും സെന്‍റർ ഫോർ എർത്ത് സയൻസ് സ്റ്റഡീസ് നൽകിയ നിർദേശങ്ങളും അവഗണിച്ചു; കോട്ടൂർ കുമ്പിൾമൂട് തോടു കരവിയുന്നതും വെള്ളപൊക്കം വീടുകളെയും കൃഷിയിടങ്ങളേയും ബാധിക്കുന്നതു പതിവായി മാറുന്നു. കോട്ടൂർ പ്രദേശം മുങ്ങു കയും തോടു പോകുന്ന കുറ്റിച്ചൽ ജംഗ്ഷൻ വെള്ളത്തിനടിയിലാകുകയും ചെയ്തു. കോട്ടൂരിലെ പാലമൂട്, കാഞ്ചിമൂട്ട്താര, മൂന്നാറ്റുമുക്ക്, ചോനാംപാറയുടെ കിഴക്കേചരിവ്, പുലിയടിച്ചാൻകുന്ന് കിഴക്കേമല പാറയുടെ തെക്ക് കിഴക്കേ ചരിവ്, ചാരുംകുഴി, വെള്ളക്കുഴി ഏല, ഈച്ചുകുട്ടി കോണു വട്ടക്കരിക്കകം എന്നിവ ഉൾപ്പെട്ട വിസ്തൃതമായ കുമ്പിൾമൂട് തോടിന്‍റെ വൃഷ്ടിപ്രദേശത്തു രണ്ടോ മൂന്നോ മണിക്കൂർ തുടർച്ചയായി മഴ പെയ്യുന്നതും കോട്ടൂർ കണ്ടകംചിറ, മാൻകുടി പ്രദേശം മേപ്പിലാംകോണം, വില്ലുചാരി കുന്നിന്‍റെ വടക്കു കിഴക്കേചരിവ്, നെല്ലിക്കുന്ന്, കറണ്ടകംചിറ എന്നിവിടങ്ങളിലുള്ള വെള്ളവുംകൂടി ഒന്നിച്ചൊഴുകിയെത്തി കോട്ടൂർ പ്രദേശത്ത് ഇത്തരത്തിൽ വെള്ളപ്പൊക്കമുണ്ടാകാറാണ് പതിവ്. കോട്ടൂരിൽനിന്നു താഴേക്കൊഴുകി കരമനയാറ്റിന്‍റെ ഭാഗമെത്തുന്നതിനുമുൻപ് നടുവച്ചൽ, എലിമല, വാഴപ്പള്ളി, കുരുന്തറക്കോണം, ശംഭുതാങ്ങി, അരുകിൽ, പച്ചക്കാട് തുടങ്ങിയ പ്രദേശങ്ങളിലെത്തി കാര്യോട് കുമ്പിൾ മൂട് തോടായി മാറുന്നു. ഇവിടങ്ങളിലെ പ്രാദേശിക നീർച്ചാലുകളും കൂടിചേർന്നു കൂടുതൽ അപകടസാധ്യതയും ഉണ്ടാക്കാറുണ്ട്. കഴിഞ്ഞ കുറേ വർഷങ്ങളായി കുമ്പിൾമൂട് തോടിൻഖെ ഇരുകരകളിലും സ്വാഭാവിക നീരൊഴുക്കിനെ തടഞ്ഞതും വികസന പ്രവർത്തനങ്ങൾക്കുവേണ്ടി അശാസ്ത്രീയ നിർമാണങ്ങൾ നടത്തിയതും താത്ക്കാലിക ബണ്ടു നിർമാണവും കുമ്പിൾമൂട് തോടിന്‍റെ ഇരുകരകളിലെ കൈയേറ്റവും തോടിലൂടെയുള്ള സ്വാഭാവിക നീരൊഴുക്കിനെ തടസപ്പെടു ത്തുന്നുണ്ട്. മലവെള്ളം സമീപ പ്രദേശങ്ങളിലൂടെ കയറിയൊഴുകുന്ന നിലയിലേക്കു മാറിയിരുന്നു. വർഷങ്ങൾക്ക് മുൻപ് ഇവിടെ പഠനത്തിനെത്തിയ സെസ്സും പരിസ്ഥിതിവകുപ്പും തോടിനെ സംരക്ഷിക്കാൻ മുന്നറിയിപ്പു നൽകിയിരുന്നുവെങ്കിലും എല്ലാവരും മുന്നറിയിപ്പിനെ അവഗണിക്കുകയായിരുന്നു. കാലങ്ങൾക്കുശേഷം അവർ ചൂണ്ടികാട്ടിയതുപോലെ പ്രദേശങ്ങളിൽ വെള്ളമെത്തുകയും ചെയ്തിരുന്നു. പരിഹാരമായി ചില നിർദേശങ്ങളും അവർ മുന്നോട്ട് വച്ചിരുന്നു. കുറ്റിച്ചൽ പഞ്ചായത്തിനും ഇതു സംബന്ധിച്ചു നിർദേങ്ങൾ നൽകിയെങ്കിലും ഒരു നടപടിയും ഉണ്ടായില്ല. മഴവെള്ള നിർഗമനം തടസപ്പെടുത്തി, നീർചാലിനോടു ചേർന്നു നിർമാണവും കുമ്പിൾമൂട് തോടിൽ മലവെള്ളം ഒലിച്ചുപോകുന്നതിന് തടസമാകുന്ന തരത്തിൽ മാലിന്യങ്ങൾ നിറഞ്ഞതും കുറ്റിച്ചെടികളും ഈറയും, മുളയുമെല്ലാം വളർന്നു ഇരുകരകളുംമൂടി കിടക്കുന്നതും സ്വാഭാവിക നീരൊഴുക്കിന് തടസമുണ്ടാകുന്നതിന് കാരണമായിരിക്കുകയാണെന്നും നഗരത്തിലേയ്ക്ക് കുടിവെള്ളമെത്തിക്കാൻ രണ്ടു വർഷം മുൻപ് വന്ന ജലവിഭവവകുപ്പ് വിദഗ്ദരും മുന്നറിയിപ്പ് നൽകിയതാണ്. ശാസ്ത്രീയമായ രീതിയിലൂടെ ചെളി നീക്കി സ്വാഭാവിക നീരൊഴുക്ക് പുനഃസ്ഥാപിക്കുവാൻ ബന്ധപ്പെട്ടവർ ശ്രദ്ധിച്ചില്ലെങ്കിൽ വീണ്ടും പ്രളയമുണ്ടാകുമെന്നും ചൂണ്ടികാണിക്കപ്പെടുന്നുണ്ട്.

വഴുതോട്ടുകോണം കുളത്തിന് ശാപമോക്ഷമായില്ല

പാറശാല: കൊല്ലയില്‍ പഞ്ചായത്തിലെ കൊറ്റാമം വാര്‍ഡില്‍ സ്ഥിതി ചെയ്യുന്ന വഴുതോട്ടുകോണം കുളത്തിന് ഇനിയും ശാപമോക്ഷമാവുന്നില്ല. മൂന്നു വര്‍ഷം മുന്‍പ് റോഡു പണിക്ക് ടാര്‍ കയറ്റിവന്ന ടിപ്പര്‍ ലോറി കുളത്തിലേക്ക് മറിഞ്ഞ് അപകടം സംഭവിച്ചിരുന്നു. പാര്‍ശ്വഭിത്തി തകര്‍ന്ന് റോഡ് കുളത്തിലേക്ക് പതിച്ചതാണ് അപകടകാരണം. കൊച്ചുകുട്ടികളുമായി പോകുന്ന സ്‌കൂള്‍ വാഹനങ്ങള്‍ ഉള്‍പ്പെടെ നിരവധി വാഹനങ്ങള്‍ ഈ റോഡിലൂടെയാണ് കടന്നുപൊയ്‌ക്കൊണ്ടിരുന്നത്. പഞ്ചായത്തിനും മറ്റ് അധികാരികള്‍ക്കും നാട്ടുകാര്‍ നിരവധി പരാതികള്‍ നല്‍കിയെങ്കിലും ഇതുവരെയും പ്രശ്‌നത്തിന് ശാശ്വത പരിഹാരം ആയില്ല. തൊഴുലുറപ്പ് ഫണ്ട് എന്ന പേരില്‍ പഞ്ചായത്ത് ഇപ്പോള്‍ പതിനഞ്ച് ലക്ഷം രൂപ അനുവദിച്ചതായി പറയുന്നു. എന്നാല്‍ പണി എവിടെയും എത്തിയില്ല. വെള്ളം വറ്റിക്കാനെന്ന പേരില്‍ നൂറുകണക്കിന് ആളുകളും വാഹനങ്ങളും ദിവസവും കടന്നുപോകുന്ന കുളത്തിന്‍റെ പാര്‍ശ്വഭിത്തിയോട് ചേര്‍ന്ന കോണ്‍ക്രീറ്റ് റോഡ് ജെസിബി ഉപയോഗിച്ച് വെട്ടിപ്പൊളിച്ചിട്ടും നാളേറെയായി. കുളത്തിന്‍റെ കണ്ണറ തുറന്നും മോട്ടോറുപയോഗിച്ചും വെള്ളം വറ്റിക്കാന്‍ മറ്റു മാര്‍ഗങ്ങള്‍ നിലനില്‍ക്കെയാണ് പതിനായിരങ്ങള്‍ ചെലവഴിച്ച് ജനങ്ങള്‍ക്ക് ഏറെ ബുദ്ധിമുട്ടുണ്ടാക്കി റോഡ് വെട്ടിപൊളിച്ചത്. റോഡു പണിക്കുള്ള കരിങ്കല്ലും മെറ്റലും മറ്റു നിർമാണ സാമഗ്രികളും റോഡിലാണ് ഇട്ടിരിക്കുന്നത്. ഇതുകാരണം ധനുവച്ചപുരം റെയില്‍വേ സ്‌റ്റേഷനിലേക്കു പോകുന്ന ചെറുവാഹനങ്ങൾക്കും കാല്‍നടയാത്രക്കാര്‍ക്കും ഇതുവഴി യാത്ര ചെയ്യാന്‍ സാധിക്കാതായിട്ട് നാളേറെയായി. എത്രയും വേഗം പ്രശ്‌നത്തിന് ശാശ്വത പരിഹാരം കാണാന്‍ അധികൃതര്‍ തയാറാകണമെന്നാണ് നാട്ടുകാരുടെ ആവശ്യം .

പ്രിയംവദ കൊലക്കേസ് പ്രതികളെ റിമാൻഡ് ചെയ്തു

വെള്ളറട: അയല്‍വാസിയായ വീട്ടമ്മയെ കൊലപ്പെടുത്തി വീടിനു സമീപത്തു കുഴിച്ചിട്ട സംഭവത്തില്‍ പ്രതികളെ റിമാൻഡു ചെയ്തു. കേസിലെ രണ്ടാം പ്രതി സന്തോഷിന്‍റെ തെളിവെടുപ്പ് പൂര്‍ത്തിയാക്കിയ ശേഷമാണ് ഇരുവരെയും നെയ്യാറ്റിന്‍കര കോടതിയില്‍ ഹാജരാക്കിയത്. പനച്ചമൂട് പഞ്ചാക്കുഴി മാവുവിള വീട്ടില്‍ പ്രിയംവദ (48) കൊല്ലപ്പെട്ട സംഭവത്തില്‍ മാവുവിള വി.എസ്. ഭവനില്‍ വിനോദാണ് (46) ഒന്നാം പ്രതി. ‌ സാമ്പത്തിക ഇടപാടാണ് കൊലപാതകത്തിനു കാരണമെന്നാണ് പോലീസ് കണ്ടെത്തല്‍. മൃതദേഹം കുഴിച്ചിടാന്‍ സഹായിച്ചതിനു വിനോദിന്‍റെ സഹോദരന്‍ ചെങ്കല്‍ വട്ടവിള സ്വദേശി സന്തോഷി(42)നെയും പോലീസ് പിടികൂടിയിരുന്നു. കഴിഞ്ഞ വ്യാഴാഴ്ചയാണ് വിനോദ് പ്രിയംവദയെ കൊലപ്പെടുത്തിയത്. ഞായറാഴ്ച രാവിലെയാണ് കൊലപാതകവിവരം പുറത്തറിയുന്നത്.

നെടുമങ്ങാട് പഴവടി ഗ്രാമത്തിൽ മൂന്നു ദിവസമായി വൈദ്യുതി ഇല്ല; 150 കുടുംബങ്ങൾ ദുരിതത്തിൽ

നെടുമങ്ങാട്: ടൗണിലെ പഴവടി ഗ്രാമത്തിൽ മൂന്നു ദിവസമായി വൈദ്യുതി ഇല്ല.150ഓളം കുടുംബങ്ങൾ ദുരിതത്തിലാണ്. കല്ലമ്പാറ ട്രാൻസ്ഫോമറിൽനിന്നും കേബിൾ വഴി വൈ ദ്യുതി കണക്‌ഷനുള്ള പഴവടി, കല്ലമ്പാറ, കുന്നുംപുറം പ്രദേശങ്ങളിലെ 150 ലധികം വീടുകളിലുള്ളവർ കഴിഞ്ഞ മൂന്നുദിവസമായി പകലും രാത്രിയും വൈദ്യുതിയില്ലാതെ ദുരിതത്തി ലാണ്. കെഎസ്ഇബി ഓഫീസിൽ നിന്നും അരകിലോമീറ്റർ പോലും ഇല്ലാത്ത സ്ഥലത്താണ് വൈദ്യുതി ബന്ധം താറുമാറായിരി ക്കുന്നത്. ആസ്ഥാനത്തുൾപ്പെടെ നിരവധി പേർ പരാതി ഫോണിലൂടെയും നേരിട്ടും അറിയിച്ചിട്ടും ഇതുവരെ പരിഹാരവുമായിട്ടില്ല. അണ്ടർഗ്രൗണ്ട് കേബിളിലെ തകരാറാണു പ്രശ്നമെന്നും പരിഹരിക്കാൻ സമയമെടുക്കുമെന്നുമാണു സ്ഥിരം മറുപടി. ഇടയ്ക്കിടയ്ക്ക് വൈദ്യുതി വന്നാൽ വീണ്ടും തടസപ്പെടും. ഓരോ തവണ വൈദ്യുതി വന്നുകുമ്പോഴും വീടുകളിലെ ഒന്നോ രണ്ടോ വൈദ്യത ഉപപകരണങ്ങൾ കേടാവുകയും ചെയ്യും.

പാചകവാതക സിലിന്‍ഡര്‍ മോഷണം; പ്രതി പിടിയില്‍

പേരൂര്‍ക്കട: പാചകവാതക സിലിന്‍ഡറുകള്‍ മോഷ്ടിച്ചു മറിച്ചുവിറ്റ സംഭവത്തിലെ രണ്ടാംപ്രതിയെ മ്യൂസിയം പോലീസ് പിടികൂടി. കരമന തളിയല്‍ സത്യന്‍ നഗര്‍ തളിയല്‍ ക്ഷേത്രത്തിനു സമീപം ടി.സി 50/1335-ല്‍ ശരവണന്‍ (35) ആണ് പിടിയിലായത്. ജഗതി ഡിപിഐ ജംഗ്ഷനിലെ രജനി ഗ്യാസ് ഏജന്‍സിയില്‍ ജൂണ്‍മാസം ആദ്യത്തെ ആഴ്ചയായിരുന്നു സംഭവം. രണ്ടു സിലിന്‍ഡറുകളാണ് ഇവിടെനിന്നു മോഷ്ടിക്കപ്പെട്ടത്. ഇതില്‍ ഒന്നു തമ്പാനൂരിലും മറ്റൊന്നു കരമനയിലുമുള്ള കടകളില്‍ വില്‍പ്പന നടത്തിയത് പോലീസ് കണ്ടെടുത്തിരുന്നു. കരമന തെലുങ്കുചെട്ടി തെരുവില്‍ ടി.സി 20/2205ല്‍ കാര്‍ത്തികും (30) ശരവണനും ചേര്‍ന്നാണ് ഗ്യാസ് ഏജന്‍സിയില്‍ നിന്ന് സിലിന്‍ഡറുകള്‍ കടത്തിയത്. കാര്‍ത്തിക് നേരത്തെ റിമാന്‍ഡിലായിരുന്നു. സിസിടിവി ദൃശ്യങ്ങള്‍ പ്രതിയെ പിടികൂടുന്നതിന് സഹായകമായി. മ്യൂസിയം സിഐ വിമല്‍, എസ്ഐമാരായ വിപിന്‍, ഷിജു, സിപിഒമാരായ രഞ്ജിത്ത്, അനീഷ് ചന്ദ്രന്‍, അനു കൃഷ്ണന്‍, അനൂപ് എന്നിവരാണ് അന്വേഷണ സംഘത്തില്‍ ഉണ്ടായിരുന്നത്. അറസ്റ്റിലായ പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.

ഭീഷണിയായി കൂറ്റന്‍ തണല്‍മരം

പേരൂര്‍ക്കട: ആല്‍മര ഭീഷണിക്കു പിന്നാലെ മുട്ടട നിവാസികള്‍ക്കു തലവേദന സൃഷ്ടിച്ചുകൊണ്ടു കൂറ്റന്‍ തണൽമരവും. ജംഗ്ഷനു തൊട്ടടുത്ത് എടിഎം കൗണ്ടറിനു മുന്നില്‍ നില്‍ക്കുന്ന കൂറ്റന്‍ തണല്‍മരമാണ് ഭീഷണി സൃഷ്ടിക്കുന്നത്. ശക്തമായ മഴയും കാറ്റും തുടരുന്നതിനാല്‍ തണല്‍മരത്തിന്‍റെ ശിഖരങ്ങള്‍ ഏതുനിമിഷവും ഒടിഞ്ഞുവീഴാവുന്ന അവസ്ഥയിലാണ്. ജംഗ്ഷനില്‍ കൂറ്റന്‍ ആല്‍മരം ഭീഷണി സൃഷ്ടിക്കുന്നതു സംബന്ധിച്ച് ദീപിക വാര്‍ത്ത പ്രസിദ്ധീകരിച്ചിരുന്നു. തണല്‍മരശിഖരങ്ങള്‍ നിലംപൊത്തുകയാണെങ്കില്‍ എടിഎം കൗണ്ടര്‍, വ്യാപാര സ്ഥാപനങ്ങളില്‍ മൂന്നെണ്ണം, സമീപത്തെ സ്റ്റാൻഡില്‍ പാര്‍ക്ക് ചെയ്തിരിക്കുന്ന ഓട്ടോറിക്ഷകള്‍, സബ്രജിസ്ട്രാര്‍ ഓഫീസിന്‍റെ മതില്‍ക്കെട്ട് എന്നിവ അപകടത്തില്‍പ്പെടും. മഴ കൂടുതല്‍ ശക്തമാകുന്നതിനുമുമ്പ് ദുരന്ത നിവാരണ അഥോറിറ്റി ഇടപെട്ട് മരക്കൊമ്പുകള്‍ മുറിക്കണമെന്നതാണ് നിവാസികളുടെ ആവശ്യം.

പഠനോപകരണ വിതരണം

നെടുമങ്ങാട് : താലൂക്ക് സോഷ്യൽ വെൽഫെയർ അസോസിയേഷന്‍റെ ആഭിമുഖ്യത്തിൽ എസ്എസ്എൽസി, പ്ലസ് ടൂ പരീക്ഷകളിൽ ഉന്നത വിജയം കരസ്ഥമാക്കിയവർക്ക് അ നുമോദനവും പഠനോപകരണ വിതരണവും നടത്തി. റിട്ട. അധ്യാപകൻ രത്നരാജ് ഉ ത്ഘാടനം ചെയ്തു. പ്രസിഡന്‍റ് കെ.എസ്. പ്രമോദ് അധ്യക്ഷത വഹിച്ചു. സെക്രട്ടറി മന്നൂർക്കോണം സത്യൻ, ശോഭന, മാർട്ടിൻ ജോസ്, അക്ഷയ് രാജ്,ഇനി ജി മാർട്ടിൻ, സുജികുമാർ എന്നിവർ സംസാരിച്ചു.

മികവുത്സവം 2025 ഉദ്ഘാടനം ചെയ്തു

നെടുമങ്ങാട്: കഴിഞ്ഞ ഒമ്പത് വർഷത്തിനിടെ 5000 കോടി രൂപയുടെ അടിസ്ഥാന വികസന പ്രവർത്തനങ്ങൾ പൊതുവിദ്യാഭ്യാസ മേഖലയിൽ നടപ്പാക്കിയിട്ടുണ്ടെന്നു മന്ത്രി വി. ശിവൻകുട്ടി അഭിപ്രായപ്പെട്ടു. പത്താം ക്ലാസ്, പ്ലസ് ടു പരീക്ഷകളിൽ ഉന്നത വിജയം നേടിയ നെടുമങ്ങാട് മണ്ഡലത്തിലെ വിദ്യാർഥികൾക്കുള്ള നെടുമങ്ങാട് എംഎൽഎയുടെ വിദ്യാഭ്യാസ അവാർഡുദാന ചടങ്ങ് 'മികവുത്സവം 2025 ' ഉദ്ഘാടനം ചെയ്യുകയായിരുന്നു മന്ത്രി. എസ്എസ്എൽസിക്ക് മുഴുവൻ വിഷയങ്ങളിലും എ പ്ലസ് കരസ്ഥമാക്കിയ മണ്ഡലത്തിലെ 554 വിദ്യാർഥികളും ഐസിഎസ്ഇ, സിബിഎസ്ഇ സ്കൂളുകളിൽ പഠിച്ച 75 ശതമാനത്തിൽ അധികം മാർക്ക്‌ നേടിയ 318 വിദ്യാർഥികളും ഉൾപ്പെടെ 872 വിദ്യാർഥികളെയാണ് ചടങ്ങിൽ അനുമോദിച്ചത്. നെടുമങ്ങാട് മുൻസിപ്പൽ ടൗൺ ഹാളിൽ നടന്ന ചടങ്ങിൽ നെടുമങ്ങാട് നഗരസഭ ചെയർപേഴ്സൺ സി.എസ്. ശ്രീജ, നെടുമങ്ങാട് മണ്ഡലത്തിൽ ഉൾപ്പെട്ട വിവിധ പഞ്ചായത്തുകളുടെ പ്രസിഡന്‍റുമാർ, തൃശൂർ ഡിഐജി ഹരിശങ്കർ, നഗരസഭ കൗൺസിലർമാർ, മണ്ഡലത്തിലെ വിവിധ സ്കൂളിലെ അധ്യാപകർ തുടങ്ങിയവർ പങ്കെടുത്തു.

ചീഫ് സെക്രട്ടറിയെ ആദരിച്ചു

മെഡിക്കല്‍കോളജ്: പുതുതായി നിയമിതനായ കേരള ചീഫ് സെക്രട്ടറി ഡോ. എ. ജയതിലകിനു സ്‌നേഹാദരങ്ങള്‍ അര്‍പ്പിച്ച് സ്വന്തം നാടും നാട്ടുകാരും. കേശവദാസപുരം വാര്‍ഡിലെ രാജലക്ഷ്മി നഗറിലെ സ്ഥിരതാമസക്കാരനായ അദ്ദേഹത്തിന്‍റെ പുതിയ സ്ഥാനലബ്ദിയിലെ സന്തോഷത്തിലാണ് അയല്‍ക്കാരും നാട്ടുകാരും. കേശവദാസപുരം വാര്‍ഡിന്‍റെകൂടി അഭിമാനമായ അദ്ദേഹത്തിന് വാര്‍ഡിന്‍റെ സ്‌നേഹോപഹാരം കൗണ്‍സിലര്‍ അംശു വാമദേവന്‍ കൈമാറി.

കെ. മാധവൻ അനുസ്മരണം

നെടുമങ്ങാട്: മൈലം നേതാജി ഗ്രന്ഥശാലയുടെ ആഭിമുഖ്യത്തിൽ സംഘടിപ്പിച്ച കെ. മാധവൻ വാർഷിക അനുസ്മരണ സമ്മേളനം ജില്ലാ കോൺഗ്രസ് കമ്മിറ്റി മുൻ പ്രസിഡന്‍റ് കരകുളം കൃഷ്ണപിള്ള ഉദ്ഘാടനം ചെയ്തു. തോപ്പിൽ ശശിധരൻ അധ്യക്ഷത വഹിച്ചു. വിതുര ശശി മുഖ്യപ്രഭാഷണവും, അഡ്വ. വീണ എസ്. നായർ വിദ്യാഭ്യാസ അവാർഡ് വിതരണവും നടത്തി. കായിക പ്രതിഭകളെ കെ. ജ്യോതിഷ് കുമാർ ആദരിച്ചു, ലാൽ റോഷൻ, ഉഷാകുമാരി യു.എസ്. സുഷ, അജയഘോഷ്, നടരാജൻ ചെട്ടിയർ, ബി. അശോകൻ, കൃഷ്ണൻകുട്ടി, സന്തോഷ്, രതീഷ് തുടങ്ങിയവർ പ്രസംഗിച്ചു.

പ്രതിഭാ സംഗമവും അനുമോദനവും

വെമ്പായം: പിരപ്പൻകോട് പ്ലാക്കീഴ് സോമശേഖരൻ നായർ മെമ്മോറിയൽ ലൈബ്രറിയുടെ ആഭിമുഖ്യത്തിൽ സംഘടിപ്പിച്ച പ്രതിഭാ സംഗമവും അനുമോദനവും കെഎസ്ആർടിസി മാനേജിംഗ് ഡയറക്ടർ പ്രമോജ് ശങ്കർ ഉദ്ഘാടനം ചെയ്തു. ഗ്രന്ഥശാലാ പ്രസിഡന്‍റ് എം.എസ്. രാജു അധ്യക്ഷനായ ചടങ്ങിനു സെക്രട്ടറി ബാബുരാജൻ സ്വാഗതം ആശംസിച്ചു. കേരള സംഗീത നാടക അക്കാദമി പ്രഫഷണൽ നാടക മത്സരത്തിൽ വിജയികളായ മുഹാദ് വെമ്പായം, എൻ.കെ. ശ്രീജ എന്നിവരെ അനുമോദിച്ചു. താലൂക്ക് ലൈബ്രറി കൗൺസിൽ സെക്രട്ടറി ജി. രാജേന്ദ്രൻ, താലൂക്ക് കൗൺസിൽ പ്രസിഡന്‍റ് കെ. രാജേന്ദ്രൻ, മാണിക്കൽ പഞ്ചായത്ത് വൈസ് പ്രസിഡന്‍റ് ലേഖ കുമാരി, ബ്ലോക്ക് മെമ്പർമാരായ ടി. നന്ദു, കെ. സജീവ്, വാർഡ് ജനപ്രതിനിധി ജ്യോതിലക്ഷ്മി തുടങ്ങിയവർ സംസാരിച്ചു. ഗ്രന്ഥശാലാ അംഗം ശാന്തകുമാരി നന്ദി പറഞ്ഞു.

വിതുര ദൈവപരിപാലന പള്ളിയിലെ തിരുനാൾ ദിനങ്ങൾക്ക് തുടക്കമായി

വിതുര : ദൈവ പരിപാലന ലത്തീൻ കത്തോലിക്ക പള്ളിയിലെ തിരുനാൾ, നൊവേന ദിങ്ങൾക്കു തുടക്കംകുറിച്ചുള്ള നൊവേനക്കും ദിവ്യബലിക്കും സീറോ മലങ്കര സെന്‍റ് തോമസ് പള്ളി ഇടവക വികാരി ഫാ. മാത്യു റെജി ഒഐസി നേതൃത്വം നൽകി. ഇന്നു നടക്കുന്ന തിരുകർമങ്ങൾക്ക് സീറോ മലബാർ കൊപ്പം ആൾ സെയിന്‍റ്സ് ഇടവക വികാരി ഫാ. ബെന്നി വെട്ടിത്താനം നേതൃത്വം നൽകും. നാളെ വൈകുന്നേരം അഞ്ചിന് ഇടവക വികാരി ഫാ. റിനോയ് കാടിപ്പറമ്പിൽ ഒഎസ്ജെ തിരുനാൾ പതാക ഉയർത്തും. തുടർന്നു നടക്കുന്ന സമൂഹ ദിവ്യബലിക്കു നെടുമങ്ങാട് റീജണൽ കോ- ഓർഡിനേറ്റർ ഫാ. റൂഫസ് പയസ് ലീൻ മുഖ്യകർമികനാകും, ഫാ. സേവ്യർ ചിറയത്ത് സിഎംഐ വചനസന്ദേശം നൽകും. തിരുനാൾ ദിനങ്ങളിൽ ചുള്ളിമാനൂർ ഫെറോന വികാരി ഡോ. ടി. ബിനു, ഫാ. സെബാസ്റ്റ്യൻ കാണിച്ചുക്കുന്നത്ത്, ഫാ. അനൂജോ, ഫാ. പ്രവീൺ പോൾ, തുടങ്ങിയവർ തിരുകർമങ്ങൾക്കു മുഖ്യകർമികാരാകും, ഫാ. വിജിൻ എസ്. അഞ്ചോലസ്, ഫാ. സെബാസ്റ്റ്യൻ പള്ളിക്കൽ തുടങ്ങിയവർ വചന സന്ദേശം നൽകും. തിരുനാൾ 22 നു സമാപിക്കും.

പഞ്ചായത്തിനെതിരേ അപവാദ പ്രചാരണം: പ്രതിഷേധം ശക്തം

പാറശാല: കൊല്ലയില്‍ പഞ്ചായത്ത് എല്‍ഡിഎഫ് ഭരണസമിതിക്കെതിരെ കോൺഗ്രസും ബിജെപിയും ചേർന്നു അവിശുദ്ധ കൂട്ടുകെട്ട് നടത്തുന്നതിനെതിരെ പ്രതിഷേധം ശക്തം. എല്‍ഡിഎഫ് കൊല്ലയില്‍ പഞ്ചായത്ത് കമ്മിറ്റി സംഘടിപ്പിച്ച പ്രതിഷേധ കൂട്ടായ്മ സിപിഎം പാറശാല ഏരിയ സെക്രട്ടറി അഡ്വ. എസ് അജയകുമാര്‍ ഉദ്ഘാടനം ചെയ്തു. ശശീന്ദ്ര ബാബു അധ്യക്ഷത വഹിച്ചു. സിപിഐ കൊല്ലയില്‍ ലോക്കല്‍ കമ്മിറ്റി സെക്രട്ടറി എ. വിജയൻ സ്വാഗതം പറഞ്ഞു. സിപിഎം ധനുവച്ചപുരം ലോക്കല്‍ കമ്മിറ്റി സെക്രട്ടറി വി. താണുപിള്ള, കെ. രാജേന്ദ്രകുമാര്‍, വി.എസ്. ബിനു, കെ. അംബിക, ഡോ. എന്‍.എസ്. നവനീത് കുമാര്‍, രാധാകൃഷ്ണന്‍, കെ.വി. പത്മകുമാര്‍, എസ്. സന്ധ്യ, ജി. ബൈജു, വി.എസ്. അനില, ജ്യോതിഷ റാണി, സന്തോഷ് കുമാര്‍, സി.കെ. സിനി കുമാരി, കെ.പി. സുശീല, നന്ദി എം. മഹേഷ് എന്നിവര്‍ പ്രസംഗിച്ചു.

സാന്പത്തിക തിരിമറി: ജീവനക്കാരുടെ ജാമ്യാപേക്ഷ 19ന് പരിഗണിക്കും

തിരുവനന്തപുരം: നടൻ കൃഷ് ണകുമാറിന്‍റെ മകൾ ദിയ കൃഷ്ണയുടെ സ്ഥാപനത്തിൽ ജീവനക്കാർ സാന്പത്തിക തട്ടിപ്പ് നടത്തിയെന്ന കേസിൽ മൂന്നു ജീവനക്കാരുടെ ജാമ്യാപേക്ഷ പരിഗണിക്കുന്നത് 19 ലേക്കു മാറ്റി. തിരുവനന്തപുരം സെഷൻസ് കോടതിയാണ് ജീവനക്കാരായ വിനീത, ദിവ്യ ഫ്രാൻക്ലിൻ, രാധ എന്നിവരുടെ ജാമ്യ ഹർജി പരിഗണിക്കുന്നത്. സ്ഥാപനത്തിൽ എത്തുന്ന ഉപഭോക്താക്കൾക്ക് സ്ഥാപനത്തിലെ ക്യുആർ കോഡിനുപകരം ജീവനക്കാർ സ്വന്തം അക്കൗണ്ടിലെ ക്യുആർ കോഡ് നൽകി 69 ലക്ഷം രൂപയുടെ തട്ടിപ്പ് നടത്തിയെന്നതാണ് ദിയ കൃഷ്ണ നല്കിയ പരാതി. ഇതിനു പിന്നാലെയാണ് ദിയയുടെ സ്ഥാപനത്തിലെ മൂന്നു ജീവനക്കാരും മുൻകൂർ ജാമ്യാപേക്ഷയ്ക്ക് കോടതിയെ സമീപിച്ചത്. ജീവനക്കാർ ദിയയ്ക്കെതിരേയും കേസ് നല്കിയിരുന്നു. തങ്ങളെ തട്ടിക്കൊണ്ടുപോകാൻ ശ്രമിച്ചു എന്നത് ഉൾപ്പെടെയുള്ള പരാതിയാണ് ജീവനക്കാർ നല്കിയിട്ടുള്ളത്. ദിയ നല്കിയ പരാതിയിലും ജീവനക്കാർ നല്കിയ പരാതിയിലും പോലീസ് റിപ്പോർട്ട് ഹാജരാക്കത്തതിനാലാണ് ജാമ്യ ഹർജിയിൽ വാദം കേൾക്കുന്നത് 19 ലേക്ക് മാറ്റിയത്.

വിജയോത്സവം സംഘടിപ്പിച്ചു

നെയ്യാറ്റിന്‍കര: നെല്ലിമൂട് സെന്‍റ് ക്രിസോസ്റ്റംസ് ജിഎച്ച്എസിലെ വിജയോത്സവം പാറശാല രൂപത ബിഷപ് ഡോ. തോമസ് മാര്‍ യൗസേബിയോസ് ഉദ്ഘാടനം ചെയ്തു. എസ്എസ്എല്‍സി പരീക്ഷയില്‍ മുഴുവന്‍ വിഷയങ്ങള്‍ക്കും എ പ്ലസ് നേടിയ 138 പേരെയും ഒന്പതു വിഷയങ്ങള്‍ക്ക് എ പ്ലസ് ലഭിച്ച 27 പേരെയും യുഎസ്എസ് സ്കോളര്‍ഷിപ്പ് ജേതാക്കളെയും എന്‍ എംഎംഎസ് സ്കോളര്‍ഷിപ്പ് ജേതാവിനെയും ചടങ്ങില്‍ അനുമോദിച്ചു. പിടിഎ പ്രസിഡന്‍റ് സി.എസ്. ശ്രീകുമാര്‍ അധ്യക്ഷനായ ചടങ്ങില്‍ മെന്‍റലിസ്റ്റ് വിനോദ് ശാന്തിപുരം മുഖ്യാതിഥിയായിരുന്നു. അധ്യാപക പ്രതിനിധി സിസ്റ്റര്‍ മെര്‍ലിന്‍ മരിയ, ഹെഡ് മിസ്ട്രസ് സിസ്റ്റര്‍ ശോഭിത ജോസ്, പിടിഎ വൈസ് പ്രസിഡന്‍റ് എസ്.എസ്. വീണ എന്നിവര്‍ പ്രസംഗിച്ചു. രംഗപൂജ, അനുമോദനഗാനം എന്നിവയും നടന്നു.

പട്ടം എസ്‌യുടി ആശുപത്രിയില്‍ ലോക രക്തദാനദിനം ആചരിച്ചു

തിരുവനന്തപുരം: ലോക രക്തദാന ദിനത്തോടനുബന്ധിച്ച് എസ്‌യുടി ആശുപത്രിയില്‍ രക്തദാന ക്യാമ്പ് സംഘടിപ്പിച്ചു. ആശുപത്രിയുടെ മാനേജിംഗ് ഡയറക്ടറും ചീഫ് എക്സിക്യൂട്ടീവ് ഓഫീസറുമായ കേണല്‍ രാജീവ് മണ്ണാളി പരിപാടി ഉദ്ഘാടനം ചെയ്തു. വിവിധ കോളജ് വിദ്യാര്‍ഥികളും ആംബുലന്‍സ് ഡ്രൈവര്‍മാരും ഉള്‍പ്പെടെ നിരവധി പേര്‍ രക്തദാനം ചെയ്തു. ആശുപത്രിയുടെ മെഡിക്കല്‍ സൂപ്രണ്ട് ഡോ. വി. രാജശേഖരന്‍ നായര്‍, ബ്ലഡ് ബാങ്ക് ഇന്‍ചാര്‍ജ് ബി. രാധാകൃഷ്ണന്‍, വിവിധ വകുപ്പുകളുടെ മാനേജര്‍മാര്‍ എന്നിവരും ക്യാമ്പില്‍ പങ്കെടുത്തു.

കേരള ഹിന്ദീ പ്രചാരസഭയുടെ ബിരുദ സമർപ്പണം നാളെ

തിരുവനന്തപുരം: ഹിന്ദീപ്രചാര സഭയുടെ ആചാര്യ/ബിഎഡിന്‍റെ ബിരുദസമർപ്പണ സമ്മേളനം നാളെ രാവിലെ 11ന് ഗവർണർ രാജേന്ദ്ര വിശ്വനാഥ് ആർലേക്കർ വഴുതക്കാട് എം.കെ. വേലായുധൻ നായർ ഹാളിൽ ഉദ്ഘാടനം ചെയ്യും. കേരള യൂണിവേഴ്സിറ്റി വൈസ് ചാൻസലർ ഡോ. മോഹൻ കുന്നുമ്മൽ അധ്യക്ഷത വഹിക്കും. കേരള യൂണിവേഴ്സിറ്റി ഹിന്ദീ വിഭാഗം മുൻ വകുപ്പ് മേധാവി ഡോ. എസ്. തങ്കമണി അമ്മ അനുഗ്രഹ പ്രഭാഷണം നടത്തും. സഭ അധ്യക്ഷൻ എസ്. ഗോപകുമാർ സത്യവാചകം ചൊല്ലിക്കൊടുക്കും. സെക്രട്ടറി അഡ്വ. ബി. മധു, ട്രഷറർ ജി. സദാനന്ദൻ, ആചാര്യ കോളജ് ഓഫ് ടീച്ചർ എഡ്യൂക്കേഷൻ പ്രിൻസിപ്പൽ ഡോ. മധുബാലചന്ദ്രൻ എന്നിവർ പങ്കെടുക്കും.

ടീം വിഴിഞ്ഞം വിദ്യാർഥികളെ അനുമോദിച്ചു

വിഴിഞ്ഞം: ടീം വിഴിഞ്ഞം സൊസൈറ്റിയുടെ നേതൃത്വത്തിൽ എസ്എസ്എൽസി, പ്ലസ്ടു പരിക്ഷകളിൽ ഉന്നത വിജയം നേടിയവരെ അനുമോദിച്ചു. ടീം വിഴിഞ്ഞം പ്രസിഡന്‍റ് സാദിക്കിന്‍റെ അധ്യക്ഷതയിൽ കൂടിയ യോഗം മുൻ പ്രസിഡന്‍റ് സഫറുള്ള ഖാൻ ഉദ്ഘാടനം ചെയ്തു. ജലീൽ തൈവിളാകം, ടീം വിഴിഞ്ഞം ട്രഷറർ ഒ എസ് ഷാജഹാൻ, തുടങ്ങിയവർ ആശംസകൾ അർപ്പിച്ചു സംസാരിച്ചു. ടീം വിഴിഞ്ഞം സെക്രട്ടറി എൻ നൗഷാദ് സ്വാഗതവും, നഹാസ് ഇസ്മായിൽ നന്ദിയും പറഞ്ഞു.

പ്രിയദർശിനി ഗ്രന്ഥശാലാ വാർഷികാഘോഷം

മാറനല്ലൂർ: പ്രിയദർശിനി ഗ്രന്ഥശാലയുടെ 18-ാമത് വാർഷികാഘോഷവും സെമിനാറും ജില്ലാ പഞ്ചായത്ത് പ്രസിഡന്‍റ് സുരേഷ് കുമാർ ഉദ്ഘാടനം ചെയ്തു. ഗ്രന്ഥശാല വൈസ് പ്രസിഡന്‍റ് വിനുലാൽ അധ്യക്ഷത വഹിച്ചു. ബാലവേദി വിദ്യാർഥികളുടെ വിവിധ കലാപരിപാടികൾ നടന്നു. ഗ്രന്ഥശാല സെക്രട്ടറി സജി ജോസ് റിപ്പോർട്ട് അവതരിപ്പിച്ചു. പ്ലസ് ടു, എസ്എസ്എൽസി വിജയികൾക്ക് ക്യാഷ് നൽകി. വിദ്യാർഥികൾക്കുള്ള പഠനോപകരണ വിതരണം വാർഡ് മെമ്പർ ശരണ്യ നിർവഹിച്ചു. തുടർന്ന് കവിയരങ്ങിൽ സംഘടിപ്പിച്ച കുറ്റിയാണിക്കാട് ദിലീപ്, രാജി വെട്ടമംഗലം, ഹരൻ പുന്നവൂർ തുടങ്ങിയവർ പങ്കെടുത്തു

ഭാര്യയും ഭർത്താവും മണിക്കുറുകളുടെ വ്യത്യാസത്തിൽ മരിച്ചു

കാരക്കോണം: ഭാര്യയും ഭർത്താവും മണിക്കുറുകളുടെ വ്യത്യാസത്തിൽ മരിച്ചു. കാരക്കോണം തുറ്റിയോട്ടുകോണം ശിവദത്തിൽ ജി.വിദ്യാധരൻപിള്ള(71)യും ഭാര്യ വി.വത്സകുമാരി(68)യുമാണ് മരിച്ചത്. വിദ്യാധരൻപിള്ള ഞായറാഴ്ച രാത്രി 8.30നും വത്സകുമാരി തിങ്കളാഴ് ചാവിലെ എട്ടിനുമാണ് മരിച്ചത്. തിരുവനന്തപുരം ജനറൽ ആശുപത്രിയിൽ ചികിത്സയിലായിരുന്ന വിദ്യാധരൻപിള്ളക്ക് കൂട്ടിരിനെത്തിയതായിരുന്നു ബാര്യ വത്സലകുമാരി. ആറുകാണി ഹോളി ഫാമിലി ഹൈസ്കൂളിലെ റിട്ട. പ്യൂണായിരുന്നു വിദ്യാധരൻപിള്ള. മക്കൾ: സജികുമാർ, സന്തോഷ്കുമാർ, ബൈജു, സൗമ്യ. മരുമക്കൾ: ശാന്തി, ശകുന്തള, കൃഷ്ണ, ജ്യോതിഷ്കുമാർ.

വീട്ടിനുള്ളിൽ പരിക്കേറ്റ നിലയിൽ കണ്ടയാൾ മരിച്ചു

പാലോട് : വീടിനുള്ളിൽ പരിക്കേറ്റ നിലയിൽ കണ്ടയാൾ മരണമടഞ്ഞു. പെരിങ്ങമ്മല പാപ്പനംകോട് വേലൻ വെട്ടി വീട്ടിൽ ഹണി(44) യാണ് മരിച്ചത്. വീട്ടിൽ ഒറ്റക്കായിരുന്നു താമസം. തലയിൽ പരിക്ക് പറ്റിയ നിലയിൽ കാണുകയായിരുന്നു. ആശുപത്രിയിൽ എത്തിച്ചെങ്കിലും മരണം സംഭവിക്കുകയായിരുന്നു. പാലോട് ഹിമ വെസ്സൽസ് സ്ഥാപനത്തിന്‍റെ ഉടമയാണ്.പോലീസ് അന്വേഷണം ആരംഭിച്ചു. ഫോറൻസിക് വിഭാഗം സ്ഥലത്തെത്തി പരിശോധന നടത്തി. ഭാര്യ: രേവതി. മകൻ: ഇവാൻ.

ബൈക്കിടിച്ച് പരിക്കേറ്റ വീട്ടമ്മ മരിച്ചു

വിഴിഞ്ഞം: ബൈക്കിടിച്ച് പരിക്കേറ്റ് ആശുപത്രിയിൽ പ്രവേശിപ്പിച്ച വീട്ടമ്മ മരിച്ചു. അതിയന്നൂർ താന്നിമൂട് തോപ്പുവിള വീട്ടിൽ ചന്ദ്രന്‍റെ ഭാര്യ സൗദാമിനി (65)ആണ് മരിച്ചത്. ഞായറാഴ്ച രാത്രി ഏഴരയോടെ വിഴിഞ്ഞം ഉച്ചക്കടയിലായിരുന്നു സംഭവം. ഉച്ചക്കടയിൽ താമസിക്കുന്ന മകൻ ജയകുമാറിന്‍റെ വീട്ടിലേക്ക് പോകാൻ ബസിറങ്ങി നടന്നു വരുന്നതിനിടയിലാണ് അമിതവേഗത്തിൽ എത്തിയ ബൈക്ക് ഇടിച്ച് തെറിപ്പിച്ചത്. ഗുരുതരമായി പരിക്കേറ്റ സൗദാമിനിയെ നാട്ടുകാർ തെയ്യാറ്റിൻകരയിലെ സ്വകാര്യ ആശുപത്രിയിലും അവിടെ നിന്ന് മെഡിക്കൽ കോളജിൽ എത്തിച്ചെങ്കിലും രാത്രി 11.30 ഓടെ മരിച്ചു. വിഴിഞ്ഞം പോലീസ്മേൽ നടപടി സ്വീകരിച്ചു.

അജ്ഞാത മൃതദേഹം കണ്ടെത്തി

പൂവാർ:കോവളം - കാരോട് ബൈപാസിൽ കല്ലുമുട് പാലത്തിന് സമീപം വൃദ്ധനെ മരിച്ച നിലയിൽ കണ്ടെത്തി. ആളെ തിരിച്ചറിഞ്ഞിട്ടില്ല. ഏകദേശം 63 വയസ് പ്രായം തോനിക്കുന്ന ഇയ്യാൾ ഇളം പച്ചനിറത്തിൽ ലുങ്കി ധരിച്ചിട്ടുണ്ട്. വെള്ളിയാഴ്ച്ച രാത്രി എട്ടോടെ വാഹനം ഇടിച്ച് മരിച്ച നിലയിൽ മൃതദേഹം കണ്ടെത്തുകയായിരുന്നു. മൃതദേഹം കാഞ്ഞിരംകുളം മെഡിക്കൽ കോളജ് മോർച്ചറിയിലേക്ക് മാറ്റി.

വഴിച്ചല്‍ ഇമ്മാനുവേല്‍ ബിഎഡ് ട്രെയിനിംഗ് കോളജ് ബിരുദദാനം

വെള്ളറട: വാഴിച്ചല്‍ ഇമ്മാനുവേല്‍ ബിഎഡ് ട്രെയിനിംഗ് കോളജില്‍ 2023-2025 ബാച്ചിലെ ബിരുദ ധാരികള്‍ക്ക് വേണ്ടിയുള്ള ബിരുദദാന ചടങ്ങുകള്‍ നടന്നു. നെയ്യാറ്റിന്‍കര രൂപത നിയുക്ത മെത്രാന്‍ റവ. ഡോ. സെല്‍വരാജന്‍ ദാസന്‍ ചടങ്ങുകള്‍ക്ക് ഭദ്രദീപം തെളിച്ചു. കേരള യൂണിവേഴ്‌സിറ്റി സിൻഡിക്കേറ്റു മുൻ മെമ്പറും തൈക്കാട് ഗവ.ട്രെയിനിംഗ് കോളജ് മുൻ പ്രിൻസിപ്പലുമായ പ്രഫ. ജേക്കബ് മാത്യു വിശിഷ്ടാതിഥിയായി. കോളേജ് മാനേജര്‍ റവ. ജി. ക്രിസ്തുദാസ്, പ്രിന്‍സിപ്പൽ ഡോ. ബിനിത ദാസ്, കോളജ് ബര്‍സാര്‍ ഷാജ്കുമാര്‍, മുന്‍ പ്രിന്‍സിപ്പല്‍ ഡോ. ഇ. നാരായണപിള്ള, ഡെന്നിസ് കുമാര്‍ തുടങ്ങിയവർ പങ്കെടുത്തു.

മഴശക്തം: ബൈപാസിന്‍റെ സർവീസ് റോഡിലും വെള്ളക്കെട്ട്

വിഴിഞ്ഞം: മഴ ശക്തമായതോടെ ബൈപ്പാസിന്‍റെ സർവീസ് റോഡിലും വെള്ളക്കെട്ട്. യാത്രക്കാരും നാട്ടുകാരും ദുരിതത്തിലായി. കോവളം - കാരോട് ബൈപ്പാസിൽ കാഞ്ഞിരംകുളം, കോട്ടു കാൽ ഭാഗങ്ങളിലാണ് വെള്ളക്കെട്ടു രൂപംകൊണ്ടത്. കയറ്റിറക്ക് സ്ഥലങ്ങളിൽ വെള്ളം ഒഴുകിപ്പോകാനുള്ള ഓടകൾ നിർമിിച്ചതിലുള്ള അപാകതയാണ് പ്രശ്നമെന്നു നാട്ടുകാർ പറയുന്നു. ഇരുചക്ര വാഹന യാത്രക്കാരും കാൽനടയാത്രക്കാരുമാണ് ഏറെ ദുരിതമനുഭവിക്കുന്നത്. കെട്ടിക്കിടക്കുന്ന മലിന ജലം പകർച്ചവ്യാധികൾക്ക് കാരണമാകാമെന്ന ഭയത്തിലാണ് നാട്ടുകാർ. അശാസ്ത്രീയമായ ഓട നിർമാണത്തിനെതിരെ പരാതി അറിയിച്ചെങ്കിലും ദേശീയപാതാ അധികൃതർ തിരിഞ്ഞു നോക്കിയില്ലെന്നും പരാതിയുണ്ട്. ഇതിനുപരി ബൈപ്പാസിൽ നിന്നുള്ള വെള്ളം വൻ ശക്തിയായി കുത്തന്നെ സർവീസ് റോഡിലേക്ക് പതിക്കുന്നതും യാത്രക്കാർക്ക് ദുരിതമായി. മഴവെള്ളം താഴേക്ക് ഒഴുക്കാൻ പൈപ്പുകൾ സ്ഥാപിച്ചെങ്കിലും ഒന്നും ഫലം കണ്ടില്ലെന്നും നാട്ടുകാർ പറയുന്നു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]