ADVERTISEMENT

ADVERTISEMENT

ഉപയോഗശൂന്യമായ മരുന്ന് വിതരണം ചെയ്തത് അന്വേഷിക്കണം: കെ. പ്രവീൺ കുമാർ

താമരശേരി: താമരശേരി താലൂക്ക് ഹോസ്പിറ്റലിൽ ഉപയോഗശൂന്യമായ മരുന്ന് വിതരണം ചെയ്തത് അന്വേഷിക്കണമെന്ന് അഡ്വ. കെ. പ്രവീൺ കുമാർ പറഞ്ഞു.

താമരശേരി മണ്ഡലം മഹിള കോൺഗ്രസ് സംഘടിപ്പിച്ച ഏകദിന ഉപവാസം ഉദ്ഘാടനം ചെയ്യുകയായിരുന്നു അദ്ദേഹം. മഹിള കോൺഗ്രസ് മണ്ഡലം പ്രസിഡന്‍റ് ഷീജ ദിലീപ് അധ്യക്ഷത വഹിച്ചു. കെപിസിസി മെമ്പർ പി.സി. ഹബീബ് തമ്പി മുഖ്യ പ്രഭാഷണം നടത്തി.

മഹിള കോൺഗ്രസ് ജില്ലാ പ്രസിഡന്‍റ് ഗൗരി പുതിയേടത്ത്, ബാബു പൈക്കാട്ട്, നിജേഷ് അരവിന്ദ്, നവാസ് ഈർപ്പോണ, സി.ടി. ഭരതൻ, സി. മുഹ്സിൻ, യു.ആർ. ഗിരീഷ്, അൻഷാദ് മലയിൽ, സി. ഉസയിൻ, രാജേഷ് കുമാർ തുടങ്ങിയവർ പ്രസംഗിച്ചു.

മഹിളാ കോൺഗ്രസ് നേതാക്കളായ കെ. സരസ്വതി, ഖദീജ സത്താർ, സോണിയ സുനിൽ, ലളിത തുടങ്ങിയവർ ഉപവസിച്ചു. സമാപന സമ്മേളനം ബ്ലോക്ക് കോൺഗ്രസ് പ്രസിഡന്‍റ് പി. ഗിരീഷ് കുമാർ ഉദ്ഘാടനം ചെയ്തു.

ADVERTISEMENT

വയോധികയെ രക്ഷപ്പെടുത്തി

കൊയിലാണ്ടി: ടോയ്‌ലറ്റ് ക്ലോസറ്റിൽ കാലുകുടിങ്ങിയ വയോധികയെ രക്ഷപ്പെടുത്തി. ഇന്നലെ ഉച്ചയ്ക്ക് ഒന്നോടെയാണ് സംഭവം. കൊയിലാണ്ടി വടക്കേകണ്ടി ക്ഷേത്രത്തിനു സമീപമുള്ള സ്ത്രീയുടെ കാൽ വഴുതി ടോയ്‌ലറ്റ് ക്ലോസറ്റിൽ കുടുങ്ങിയത്. കൊയിലാണ്ടിയിൽ നിന്നും അഗ്നി രക്ഷാസേന എത്തി ക്ലോസറ്റ് മുറിച്ച് കാൽ സുരക്ഷിതമായി പുറത്തെടുത്തു.

യൂത്ത് കോൺഗ്രസ് കെഎസ്ഇബി ഓഫീസ് ഉപരോധിച്ചു

കൊയിലാണ്ടി: കുറുവങ്ങാട് വൈദ്യുതി ലൈൻ പൊട്ടി വീണു സ്ത്രീ മരിച്ച സംഭവത്തിൽ യൂത്ത് കോൺഗ്രസ് കെഎസ്ഇബി ഓഫീസ് ഉപരോധിച്ചു. രണ്ട് തവണയായി ഗൃഹനാഥൻ പരാതിപ്പെട്ടിട്ടും തിരിഞ്ഞു നോക്കാത്ത കെഎസ്ഇബി ഉദ്യോഗസ്ഥരുടെ തികഞ്ഞ അനാസ്ഥയാണ് ഇത്ര ദാരുണമായ സംഭവത്തിന്‌ കാരണം. കെഎസ്ഇബിയുടെ അനാസ്ഥ കാരണം കേരളത്തിൽ മരണം തുടർക്കഥയാവുകയാണ്. ഇനിയും അനാസ്ഥ തുടരുകയാണെങ്കിൽ ശക്തമായ പ്രക്ഷോഭമായി മുന്നോട്ടു പോവുമെന്നും യൂത്ത് കോൺഗ്രസ് നിയോജകമണ്ഡലം പ്രസിഡന്‍റ് തൻഹീർ കൊല്ലം പറഞ്ഞു. ഉപരോധിച്ച യൂത്ത് കോൺഗ്രസ് പ്രവർത്തകരെ പോലീസ് അറസ്റ്റ് ചെയ്തു നീക്കി.

വന്യമൃഗശല്യം: എംഎൽഎ സർവകക്ഷി യോഗം വിളിക്കണമെന്ന്

തിരുവമ്പാടി: മലയോര മേഖലയിൽ കാട്ടാന, പുലി, കടുവ, പന്നി തുടങ്ങിയ വന്യമൃഗങ്ങളുടെ ശല്യം രൂഷമായ സാഹചര്യത്തിൽ എംഎൽഎ മുൻകൈ എടുത്ത് സർവകക്ഷിയോഗം വിളിച്ച് പ്രശനപരിഹാരത്തിന് നടപടി സ്വീകരിക്കണമെന്ന് കിസാൻ ജനത തിരുവമ്പാടി മണ്ഡലം കമ്മിറ്റി യോഗം ആവശ്യപ്പെട്ടു. വനം വകുപ്പിന്‍റെ പ്രവർത്തനം കാര്യക്ഷമമല്ലെന്നും യോഗം വിലയിരുത്തി. പ്രസിഡന്‍റ് ജോർജ് പ്ലാക്കാട്ട് അധ്യക്ഷത വഹിച്ചു. കിസാൻ ജനത സംസ്ഥാന ജനറൽ സെക്രട്ടറി ജോൺസൺ കുളത്തിങ്കൽ, ആർജെഡി നിയോജക മണ്ഡലം പ്രസിഡന്‍റ് ടാർസൻ ജോസ്, ആർജെഡി സംസ്ഥാന സമിതി അംഗം ജിമ്മി ജോസ് പൈമ്പിളളി, ജില്ലാ കമ്മിറ്റി മെമ്പർമാരായ വിത്സൻ പുല്ലുവേലി, ഗോൾഡൻ ബഷീർ, ജോസ് തോമസ് തുടങ്ങിയവർ പ്രസംഗിച്ചു.

തെരുവുനായ ശല്ല്യം; ജനങ്ങളുടെ ആവശ്യങ്ങളോട് മുഖം തിരിച്ച് പഞ്ചായത്ത്

കോഴിക്കോട്: കുപ്പായക്കോട്, ഈങ്ങാപ്പുഴ അങ്ങാടിയിലും പരിസരത്തും തെരുവ് നായ്ക്കൾ രാത്രികാലങ്ങളിൽ സ്വൈര്യ വികാരം നടത്തി യാത്രക്കാരെ വളഞ്ഞിട്ട് ആക്രമിക്കുന്നത് നിത്യസംഭവമാണ്. പുതുപ്പാടി പഞ്ചായത്ത് ഇതിനെതിരേ നടപടി എടുക്കുന്നില്ല. പഞ്ചായത്തിന്‍റെ നിസംഗതക്കെതിരേ കുപ്പായക്കോട് എകെസിസി, ഡിഎഫ്സി, ഇൻഫാം എന്നീ സംഘടനകളുടെ സംയുക്ത യോഗം പ്രതിഷേധിച്ചു. ഈ വിഷയത്തിൽ പുതുപ്പാടി പഞ്ചായത്ത് നിസംഗത തുടരുകയാണെങ്കിൽ ബഹുജനങ്ങളെ പങ്കെടുപ്പിച്ചു ശക്തമായ സമരപരിപാടിക്ക് നേതൃത്വം നൽകുവാനും യോഗം തീരുമാനിച്ചു. കുപ്പായക്കോട് സെന്‍റ് ജോസഫ്സ് പള്ളി വികാരി ഫാ. ജെയിംസ് കുഴിമറ്റത്തിൽ ഉദ്ഘാടനം ചെയ്തു. എകെസിസി യൂണിറ്റ് പ്രസിഡന്‍റ് രാജു ചോള്ളാ മഠത്തിൽ അധ്യക്ഷത വഹിച്ചു. ജോയ് കാളംപറമ്പിൽ, വിനോദ് കിഴക്കയിൽ, രാജു പുതിയാടം, ഫ്രാൻസിസ് കുറവങ്കര, മനോജ് കിഴക്കേക്കൂറ്റ്, അഭിലാഷ് ചുരത്തിൽ, ബിജു വെട്ടിത്താനം, ആന്‍റോ കിളിവേലി എന്നിവർ പ്രസംഗിച്ചു.

ആംബുലൻസ് വേണ്ടെന്നുവച്ച നടപടി പുനഃപരിശോധിക്കണം: യുഡിഎഫ്

പേരാമ്പ്ര: വടകര എംപി ഷാഫി പറമ്പിലിന്‍റെ ആസ്തി വികസന ഫണ്ടിൽ നിന്നും പേരാമ്പ്ര ഗവ. താലൂക്ക് ആശുപത്രിക്കു അനുവദിച്ച ആംബുലൻസ് ആവർത്തനച്ചിലവുകൾക്കു ഫണ്ടില്ല എന്ന കാരണം കണ്ടെത്തി ഫണ്ട് ലാപ്സാക്കുവാനുള്ള തീരുമാനം പിൻവലിക്കണമെന്ന് യുഡിഎഫ് പേരാമ്പ്ര നിയോജകമണ്ഡലം നേതൃയോഗം യോഗം ആവശ്യപ്പെട്ടു. ബ്ലോക്ക് പഞ്ചായത്ത് ഭരണ സമിതിയിലും എച്ച്എംസി മീറ്റിംഗിലും ചർച്ച ചെയ്യാതെ ആശുപത്രിക്കു എംപിയുടെ ആംബുലൻസ് വേണ്ട എന്ന തീരുമാനത്തിന് പിന്നിൽ രാഷ്ട്രീയ താല്പര്യങ്ങളാണ്. പാവപ്പെട്ട രോഗികളോടുള്ള വെല്ലു വിളിയാണിത്. പേരാമ്പ്ര താലൂക്കു ആശുപത്രിയിൽ ഇപ്പോൾ ആംബുലൻസ് സർവീസില്ല. നേരത്തെ എച്ച്എംസി നിയമിച്ച ആംബുലൻസ് ഡ്രൈവർ ഇപ്പോഴും ആശുപത്രിയിൽ നിലവിലുണ്ടെന്നിരിക്കെയാണ് ബ്ലോക്ക് പഞ്ചായത്ത് ഭരണ നേതൃത്വത്തിന്‍റെ ഈ നിഷേധാത്മക തീരുമാനം. ഇതിനെതിരേ ശക്തമായ സമരപരിപാടികൾ ആരംഭിക്കുവാനും യോഗം തീരുമാനിച്ചു. സംസ്ഥാന സർക്കാറിന്‍റെ ദുർഭരണത്തിനെതിരേ 23 ന് നടക്കുന്ന കളക്ട്രേറ്റ് ധർണയിൽ പേരാമ്പ്ര നിയോജകമണ്ഡലത്തിൽ നിന്നും 1000 പേരെ പങ്കെടുപ്പിക്കുവാനും തീരുമാനിച്ചു. യുഡിഎഫ് ജില്ലാ ചെയർമാൻ കെ. ബാലനാരായണൻ ഉദ്ഘാടനം ചെയ്തു. നിയോജക മണ്ഡലം ചെയർമാൻ ടി.കെ. ഇബ്രാഹിം അധ്യക്ഷനായിരുന്നു.

വിലങ്ങാട് കുറ്റല്ലൂർ ഉന്നതിയിൽ ഒറ്റയാൻ കൃഷി നശിപ്പിച്ചു

നാദാപുരം: ചിറ്റാരിയിൽ നിന്ന് കണ്ണവം വനത്തിലേക്ക് കാട് കയറ്റിവിട്ട ഒറ്റയാൻ ഉൾപ്പെട്ട കാട്ടാനകൾ കുറ്റല്ലൂർ ഉന്നതിയിൽ ഇറങ്ങി വ്യാപകമായി കാർഷിക വിളകൾ നശിപ്പിച്ചു. കണ്ണൂർ ജില്ലയിലെകണ്ണവം വനത്തോട് ചേർന്ന കോഴിക്കോട് ജില്ലയിലെ ജനവാസ മേഖലയായ കുറ്റല്ലുർ ആദിവാസി ഉന്നതിയിലാണ് ഒറ്റയാൻ ഇറങ്ങി ഭീതി പരത്തിയത്. ഞായറാഴ്ച്ച പുലർച്ചെ നാലോടെയാണ് ആനകൾ സർവ്വ നാശം വിതച്ചത്. 15 ലേറെ കുടുംബങ്ങളാണ് കുറ്റല്ലൂർ ഉന്നതിയിൽ താമസിക്കുന്നത്. മുള്ളൻ കല്ലിൽ ബാബു, ചന്തു എന്നീ കർഷകരുടെ തെങ്ങുകൾ, റബർ, കമുങ്ങുകൾ വ്യാപകമായി നശിപ്പിച്ചു. ഇരുപതും, മുപ്പത് വർഷം പ്രായമായതും കായ്ഫലം ഏറെയുള്ളതുമായ തെങ്ങുകൾ പിഴുതെറിഞ്ഞ നിലയിലാണ്. ടാപ്പിംഗ് നടത്തുന്ന അമ്പതിലേറെ റബർ മരങ്ങളും ഈ മേഖലയിൽ മാത്രം നശിപ്പിച്ചു. ശനിയാഴ്ച്ചയാണ് ചിറ്റാരിയിലും, പൂവത്താംകണ്ടിയിലും ജനവാസ കേന്ദ്രങ്ങളിൽ ഇറങ്ങി കൃഷി നശിപ്പിക്കുകയും ഭീതി പരത്തുകയും ചെയ്ത രണ്ട് കൂട്ടങ്ങളായി തമ്പടിച്ചിരുന്ന ആനകളെ വനം വകുപ്പ് അധികൃതർ വനത്തിലേക്ക് തുരത്തി ഓടിച്ചത്. എന്നാൽ ആനക്കൂട്ടം ഉൾവനത്തിലേക്ക് പോവാതെ കാടിറങ്ങി ചിറ്റാരി പ്രദേശത്തിന് മുകൾ ഭാഗം വഴി കുറ്റല്ലൂർ ഉന്നതിയിൽ ഇറങ്ങുകയായിരുന്നെന്ന് പ്രദേശവാസികൾ പറഞ്ഞു. ഈ മേഖലയിൽ വന മേഖലയോട് ചേർന്ന് ഫെൻസിംഗ് ലൈനുകൾ സ്ഥാപിച്ചിരുന്നില്ല. ഇത് കാരണം ആനകൾക്ക് കൃഷിയിടത്തിലിറങ്ങാൻ സൗകര്യം ലഭിച്ചെന്നും ഉന്നതി നിവാസികൾ പറഞ്ഞു. കാട് കയറിയ മറ്റൊരു കൂട്ടം ആനകൾ കമ്പിളി പ്പാറയ്ക്ക് സമീപം നുറുക്ക് കല്ലിലും എത്തി കാർഷിക വിളകൾ നശിപ്പിച്ചു. ചങ്ങളത്ത് പറമ്പിൽ സോജന്‍റെ കൃഷിയിടത്തിലാണ് ആനകൾ ഇറങ്ങി കാർഷിക നാശം വിതച്ചത്. ഇവിടെയും തെങ്ങുകളാണ് ഏറെയും നശിപ്പിച്ചത്. കൃഷിനാശവും, ആനകളിറങ്ങിയതുമെല്ലാം വനം വകുപ്പ് ഉദ്യോഗസ്ഥരെ അറിയിച്ചെങ്കിലും ആരും സ്ഥലത്ത് എത്തിയില്ലെന്ന് നാട്ടുകാർ ആരോപിച്ചു.

റോഡിൽ മാലിന്യം തള്ളി

നാദാപുരം: വിലങ്ങാട് ജനവാസ കേന്ദ്രത്തിൽ പ്ലാസ്റ്റിക് മാലിന്യം തള്ളി. നരിപ്പറ്റ പഞ്ചായത്ത് രണ്ടാം വാർഡിൽ വിലങ്ങാട് - കൈവേലി റോഡിൽ കൂളിക്കാവിലാണ് സംഭവം. ഞായറാഴ്ച്ച രാവിലെയാണ് റോഡിലും വീടുകൾക്ക് പരിസരങ്ങളിലും ചാക്ക് കണക്കിന് പ്ലാസ്റ്റിക് മാലിന്യങ്ങൾ തള്ളിയ നിലയിൽ കണ്ടെത്തിയത്. റോഡിൽ കെട്ടുകളാക്കി പരക്കെ ചിതറി കിടക്കുന്ന നിലയിലായിരുന്നു. സംഭവം അറിഞ്ഞ് നാട്ടുകാർ നടത്തിയ പരിശോധനയിലാണ് കക്കട്ട് ടൗണിലെ കടയിലേതാണ് മാലിന്യമെന്ന് കണ്ടെത്തിയത്. തുടർന്ന് നാട്ടുകാർ കട ഉടമയോട് സ്ഥലത്ത് എത്താൻ ആവശ്യപ്പെടുകയും മാലിന്യങ്ങൾ നീക്കം ചെയ്യിക്കുകയുമായിരുന്നു. കട ഉടമ പിക്കപ്പ് ലോറി എത്തിച്ച് വൈകുന്നേരത്തേടെ മാലിന്യം തിരികെ എടുത്തു.

വലിയകൊല്ലി സെന്‍റ് അൽഫോൻസാ പള്ളി തിരുനാളിന് കൊടിയേറി

കോടഞ്ചേരി: വലിയകൊല്ലി സെന്‍റ് അൽഫോൻസാ തീർഥാടന കേന്ദ്രത്തിൽ വിശുദ്ധ അൽഫോൻസാമ്മയുടെ തിരുനാളിന് കൊടിയേറി. കൊടിയേറ്റ് കർമ്മം ഇടവക വികാരി ഫാ. ജിയോ പുതുശേരി പുത്തൻപുര നിർവഹിച്ചു. ഒന്പത് ദിവസമായി നടത്തുന്ന തിരുനാൾ 28ന് സമാപിക്കും. എല്ലാ ദിവസവും വൈകുന്നേരം അഞ്ചിന് വിശുദ്ധ കുർബാനയും തുടർന്ന് നൊവേനയും നടക്കും. സമാപന ദിവസമായ 28ന് രാവിലെ 9.30 ന് നൊവേനയും പത്തിന് ആഘോഷമായ വിശുദ്ധ കുർബാനയും തുടർന്ന് നേർച്ച ഭക്ഷണവും ഉണ്ടായിക്കും.

കൂരാച്ചുണ്ടിൽ യുവജന ഞായർ ആചരിച്ചു

കൂരാച്ചുണ്ട്: സെന്‍റ് തോമസ് ഫൊറോന ഇടവകയിലെ കെസിവൈഎം, എസ്എംവൈഎം യൂണിറ്റ് കമ്മിറ്റിയുടെ നേതൃത്വത്തിൽ "എലനോറ 2k25' യുവജന ഞായർ ആചരിച്ചു. കെസിവൈഎം രൂപത ഡയറക്ടർ ഫാ. ജോബിൻ തെക്കേക്കരമറ്റത്തിൽ ഉദ്ഘാടനം ചെയ്തു. കൂരാച്ചുണ്ട് യൂണിറ്റ് ഡയറക്ടർ ഫാ. മൈക്കിൾ നീലംപറമ്പിൽ അധ്യക്ഷത വഹിച്ചു. രൂപത പ്രസിഡന്‍റ് റിച്ചാർഡ് ജോൺ പന്തപ്ളാക്കൽ മുഖ്യപ്രഭാഷണം നടത്തി. ഡോണ കിരൺ തയ്യിൽ റിപ്പോർട്ട് അവതരിപ്പിച്ചു. സിസ്റ്റർ ഗ്രേസ് എസ്എച്ച്, ബ്രദർ ബിബിൻ കൊച്ചുപറമ്പിൽ, യൂണിറ്റ് പ്രസിഡന്‍റ് സെബിൻ പാഴുക്കുന്നേൽ, എയ്ബൽ ജോബി പനയ്ക്കവയൽ എന്നിവർ പ്രസംഗിച്ചു. അംഗത്വ സ്വീകരണവും നടന്നു.

നാല് റോഡുകള്‍ക്ക് 11 കോടിയുടെ ഭരണാനുമതി

കുറ്റ്യാടി: നിയോജകമണ്ഡലത്തിലെ നാല് റോഡുകള്‍ക്ക് 11 കോടി രൂപയുടെ ഭരണാനുമതി ലഭിച്ചതായി കെ.പി. കുഞ്ഞമ്മദ്കുട്ടി എംഎല്‍എ അറിയിച്ചു. തിരുവള്ളൂര്‍-ആയഞ്ചേരി റോഡിന് 1.5 കോടി, വില്യാപ്പള്ളി-ചെമ്മരത്തൂര്‍ റോഡിന് മൂന്ന് കോടി, എസ്മുക്ക്-വള്ളിയാട്-കോട്ടപ്പള്ളി-തിരുവള്ളൂര്‍ റോഡിന് 2.5 കോടി, ആയഞ്ചേരി തെരു-അരൂര്‍ കല്ലുംപുറം റോഡിന് നാല് കോടി എന്നിങ്ങനെയാണ് അനുമതി ലഭിച്ചത്. തിരുവള്ളൂര്‍-ആയഞ്ചേരി റോഡിന്‍റെ പൂര്‍ത്തീകരിക്കാനുള്ള 450 മീറ്റര്‍ ഭാഗം, വില്യാപ്പള്ളിയില്‍നിന്ന് ചെമ്മരത്തൂര്‍ വരെ പൂര്‍ത്തിയാക്കാനുള്ള 1.6 കിലോമീറ്റര്‍, എസ്മുക്ക്-വള്ളിയാട്-കോട്ടപ്പള്ളി-തിരുവള്ളൂര്‍ റോഡിലെ ശേഷിക്കുന്ന 2.21 കിലോമീറ്റര്‍ ഭാഗം, ആയഞ്ചേരി തെരു-അരൂര്‍ കല്ലുംപുറം റോഡിന്‍റെ നാല് കിലോമീറ്റര്‍ എന്നിവയാണ് ഉന്നത നിലവാരത്തില്‍ പൂര്‍ത്തീകരിക്കുക. കഴിഞ്ഞ ബജറ്റിലാണ് പ്രവൃത്തികള്‍ ഉള്‍പ്പെടുത്തിയത്. തുടര്‍ന്ന് പൊതുമരാമത്ത് വകുപ്പ് തോടന്നൂര്‍ സെക്ഷന്‍ മുഖേന എസ്റ്റിമേറ്റുകള്‍ തയാറാക്കി ചീഫ് എന്‍ജിനീയര്‍ വഴി സര്‍ക്കാരിന് സമര്‍പ്പിക്കുകയായിരുന്നു.

പൂവാറൻതോട് ഗവ. എൽപി സ്കൂളിന് വൈദ്യുതി ലൈൻ ഭീഷണി

കെട്ടിടത്തിന്‍റെ മേൽക്കൂരക്ക് ചോർച്ചയും കൂടരഞ്ഞി: പൂവാറൻതോട് ഗവ. എൽപി സ്കൂളിന് വൈദ്യുതി ലൈൻ ഭീഷണി. സ്കൂളിന്‍റെ ഗ്രൗണ്ടിലൂടെയാണ് വൈദ്യുതി ലൈൻ കടന്നുപോകുന്നത്. നിരവധി തവണ വൈദ്യുതി ലൈൻ മാറ്റി സ്ഫാപിക്കാൻ കെഎസ്‌ഇബി അധികൃതരോട് ആവശ്യപ്പെട്ടെങ്കിലും ഇതുവരെ ലൈൻ മാറ്റി സ്ഥാപിച്ചിട്ടില്ല. ഈ പ്രദേശത്ത് 2012 ലാണ് വൈദ്യുതി എത്തിയത്. അന്നുമുതൽ സ്കൂൾ ഗ്രൗണ്ടിലൂടെയാണ് കെഎസ്‌ഇബി വൈദ്യുതി ലൈൻ പോകുന്നത്. ഇതിന്‍റെ അപകടഭീഷണി നാട്ടുകാർ ഉദ്യോഗസ്ഥരുടെ ശ്രദ്ധയിൽപെടുത്തിയതാണ്. അന്ന് ഉദ്യോഗസ്ഥർ സാങ്കേതിക തടസം പറഞ്ഞപ്പോൾ വൈദ്യുതി തീരെ ഇല്ലാത്ത നാട്ടിൽ എങ്ങനെയെങ്കിലും വൈദ്യുതി ലഭിക്കട്ടെ എന്നതിനാൽ നാട്ടുകാർ സമ്മതിക്കുകയായിരുന്നു. എന്നാൽ കഴിഞ്ഞ അഞ്ച് വർഷം മുൻപ് സ്കൂൾ വാർഷികത്തോട് അനുബന്ധിച്ചു പന്തൽ ഇടുമ്പോൾ ലൈനിൽ തട്ടി അപകടം ഉണ്ടാകേണ്ടതായിരുന്നു. അന്ന് ബിജു എന്നയാൾ തലനാരിഴക്ക് രക്ഷപെടുകയായിരുന്നു. ഇതിന് ശേഷം നിരവധി തവണ പഞ്ചായത്ത് അതികൃതരോടും കെഎസ്‌ഇബി ഉദ്യോഗസ്ഥരോടും പരാതി പറഞ്ഞെങ്കിലും പരിഹാരം കണ്ടില്ല. കൂടാതെ 30 വർഷം പഴകിയ സ്കൂൾ കെട്ടിടത്തിന്‍റെ മേൽക്കൂരക്ക് ചോർച്ചയും ജനലുകൾ തകർന്നും ചുറ്റുമതിൽ ഇടിഞ്ഞും അപകട ഭീഷണിയുണ്ട്. മലയോര മേഖലയായതുകൊണ്ട് പ്രദേശത്ത് ശക്തമായ മഴയും കാറ്റും ഉണ്ടാവാറുണ്ട്. കെട്ടിടത്തിന്‍റെ അവസ്ഥ പഞ്ചായത്ത് അധികൃതരെ അറിയിച്ചിട്ട് യാതൊരു നടപടിയും ഉണ്ടയില്ലെന്നും പിടിഎ ഭാരവാഹികൾ പറഞ്ഞു. ഒരു കുട്ടിയുടെ ജീവൻ നഷ്ടമാകുന്നതിന് മുന്പ് പ്രശ്നത്തിന് പരിഹാരം കാണണമെന്നാണ് നാട്ടുകാരുടെ ആവശ്യം.

ചികിത്സയ്ക്കെത്തുന്നവരുടെ എണ്ണം കൂടി : ജില്ലയിൽ മഴക്കാലത്ത് ആശങ്കയായി പനി വ്യാപനം

കോഴിക്കോട്: മഴക്കാലത്ത് ജില്ലയില്‍ പനിച്ചൂട്.സർക്കാർ-സ്വകാര്യ ആശുപത്രികളിൽ പനി ബാധിച്ച് ചികിത്സക്കെത്തുന്നവരുടെ എണ്ണം വൻ തോതിൽ വർധിച്ചു. ആരോഗ്യവകുപ്പിന്‍റെ കണക്ക് പ്രകാരം ദിനംപ്രതി പനി ബാധിച്ച് ചികിത്സക്ക് എത്തുന്നവരുടെ എണ്ണം ആയിരത്തിന് മുകളിലാണ്. ജില്ലയിൽ 13,758 പേർ പനി ബാധിച്ച് സർക്കാർ ആശുപത്രികളിൽ ചികിത്സ തേടിയതായാണ് ആരോഗ്യവകുപ്പിന്‍റെ കണക്ക്. പനി കൂടി മുപ്പതോളം പേർ ദിനം കടത്തിച്ചികിത്സ തേടുന്നതായും കണക്കുകൾ വ്യക്തമാക്കുന്നു. സർക്കാർ, സ്വകാര്യ ആശുപത്രികളിൽ ജനറൽ വാർഡുകൾ പനി ബാധിതരെക്കൊണ്ട് നിറഞ്ഞ അവസ്ഥയിലാണ്. മെഡിക്കൽ കോളജ് അടക്കമുള്ള സർക്കാർ ആശുപത്രികളിൽ കിടക്ക കിട്ടാതെ വരാന്തകളിൽ വരെ രോഗികൾ കിടക്കുന്നുണ്ട്. സർക്കാർ ആശുപത്രികളിൽ ചികിത്സ തേടുന്നവരുടെ കണക്ക് മാത്രമാണ് ആരോഗ്യ വകുപ്പ് വെബ്സൈറ്റിൽ പറയുന്നത്. സ്വകാര്യ ആശുപത്രികളിലും ക്ലിനിക്കുകളിലും ചികിത്സക്കെത്തുന്നവരുടെ എണ്ണം കൂടി ലഭിച്ചാൽ പനി ബാധിതരുടെ കണക്ക് ഇനിയും വർധിക്കും. വൈറൽ പനിയോടൊപ്പം ഡെങ്കിപ്പനി, മഞ്ഞപ്പിത്തം, എലിപ്പനി, കോവിഡ് തുടങ്ങിയവയും പടർന്നു പിടിക്കുന്നുണ്ട്. തലവേദന, പനി, ചുമ, ജലദോശം തുടങ്ങിയ അസുഖങ്ങളും അസുഖ ലക്ഷണങ്ങളും അനുഭവപ്പെടുന്ന കുട്ടികളെ സ്കൂളുകളിലേക്ക് അയക്കരുതെന്ന് സ്കൂൾ അധികൃതർ നിർദേശം നൽകിയിട്ടുണ്ട്.

സാം തോമസിനെ ആദരിച്ചു

കോഴിക്കോട്: അര നൂറ്റാണ്ടിലേറെയായി മലയാള നാടകവേദിയിൽ സജീവ സാന്നിധ്യമായ സാം തോമസ് ദേവഗിരിയെ കോഴിക്കോട് താളിയോല സാംസ്കാരിക സമിതിയും ചാവറ കൾച്ചറൽ സെന്‍ററും സംയുക്തമായി സംഘടിപ്പിച്ച ചടങ്ങിൽ ആദരിച്ചു. നാടകരചയിതാവ്, നടൻ, സംവിധായകൻ, ഗായകൻ എന്നീ നിലകളിൽ കോഴിക്കോടൻ നാടകവേദിക്ക് സുപരിചിതനായ സാം തോമസ് ജീവിതം കലയാക്കിയ വ്യക്തിയാണെന്ന് ചടങ്ങ് ഉദ്ഘാടനം ചെയ്ത പ്രമുഖ മലയാള സിനിമാ സംവിധായകൻ വി.എം. വിനു പറഞ്ഞു. കലാഭവൻ പ്രസിഡന്‍റ് ഫാ. ചെറിയാൻ കുനിയന്തോടത്ത് സിഎംഐ പൊന്നാട അണിയിച്ചു. ചടങ്ങിൽ താളിയോല സാംസ്കാരിക സമിതി പ്രസിഡന്‍റ് പി.ഐ. അജയൻ, പ്രശസ്ത കവി പി.പി. ശ്രീധരനുണ്ണി, സെന്‍റ് ജോസഫ്സ് കോളജ് പ്രിൻസിപ്പൽ ഫാ. ഡോ. ബിജു ജോസഫ് സിഎംഐ , ചാവറ കൾച്ചറൽ സെന്‍റർ പ്രസിഡന്‍റ് ഫാ. ജോൺ മണ്ണാറത്തറ, വിൽസൻ സാമുവൽ, ഡോ റോഷൻ ബിജിലി , കെ.എഫ്. ജോർജ്, ഫാ. സിബി പൊൻപാറ, പി.പി. വൈരമണി എന്നിവർ പ്രസംഗിച്ചു. സാം തോമസ് മറുപടി പ്രസംഗം നടത്തി.

മോഡൽ സ്കൂളിലെ സുരക്ഷാ ഭീഷണി : മനുഷ്യാവകാശ കമ്മീഷൻ കേസെടുത്തു

കോഴിക്കോട് : മാനാഞ്ചിറ ഗവ. മോഡൽ ഹയർ ഹയര്‍ സെക്കന്‍ഡറി സ്‌കൂളിലെ പഴയ കെട്ടിടം തകർന്നു വീഴാറായിട്ടും സുരക്ഷാ നടപടികൾ സ്വീകരിച്ചില്ലെന്ന പരാതിയിൽ മനുഷ്യാവകാശ കമ്മീഷൻ സ്വമേധയാ കേസെടുത്തു. റീജണൽ ഡപ്യൂട്ടി ഡയറക്ടർ( വിദ്യാഭ്യാസം) , ജില്ലാ കളക്ടർ, കോർപറേഷൻ സെക്രട്ടറി എന്നിവർ 15 ദിവസത്തിനകം റിപ്പോർട്ട് സമർപ്പിക്കണമെന്ന് കമ്മീഷൻ ജുഡീഷ്യൽ അംഗം കെ. ബൈജുനാഥ് നിർദ്ദേശം നൽകി. ഓഗസ്റ്റ് 26 ന് കോഴിക്കോട് റസ്റ്റ് ഹൗസിൽ നടക്കുന്ന സിറ്റിംഗിൽ കേസ് പരിഗണിക്കും. പത്രവാർത്തയുടെ അടിസ്ഥാനത്തിൽ രജിസ്റ്റർ ചെയ്ത കേസിലാണ് നടപടി.കെട്ടിടത്തിന് സമീപം ചെല്ലരുതെന്ന് സ്കൂൾ അധിക്യതർ കുട്ടികൾക്ക് നിർദ്ദേശം നൽകാറുണ്ടെങ്കിലും പ്രാവർത്തികമാകാറില്ല.

ഉമ്മൻ ചാണ്ടി അനുസ്മരണ യോഗംനടത്തി

ചെമ്പുകടവ്: ദേശീയ കർഷക തൊഴിലാളി ഫെഡറേഷന്‍റെ നേതൃത്വത്തിൽ ചെമ്പുകടവ് അങ്ങാടിയിൽ ഉമ്മൻ ചാണ്ടി അനുസ്മരണ യോഗംനടത്തി. ഡികെടിഎഫ് കോടഞ്ചേരി മണ്ഡലം സെക്രട്ടറി തങ്കമണി തീക്കുന്നേൽ അദ്ധ്യക്ഷത വഹിച്ചു. മണ്ഡലം പ്രസിഡന്‍റ് ബേബിച്ചൻ വട്ടുകുന്നേൽ യോഗം ഉദ്ഘാടനം ചെയ്തു. ബാലകൃഷ്ണൻ തീക്കുന്നേൽ, ജോസ് പെരുമ്പള്ളിൽ, മനോജ് തട്ടാരുപറമ്പിൽ, ജെയ്സൺ പുലിക്കുടിയിൽ, സി.സി. ചന്ദ്രൻ, പാപ്പച്ചൻ ഒരപ്പുഴിയ്ക്കൽ, കുഞ്ഞാപ്പു പറക്കോട്ടുപാലത്ത്, മാത്യു കാട്ടുപറമ്പിൽ തുടങ്ങിയവർ പ്രസംഗിച്ചു. കേരള സ്‌റ്റേറ്റ് പെൻഷനേഴ്സ് അസോസിയേഷൻ നാദാപുരം നിയോജകമണ്ഡലം നടത്തിയ ഉമ്മൻ ചാണ്ടി അനുസ്മരണം കെപിസിസി മെമ്പർ അച്യുതന്‍ പുതിയേടത്ത്ഉദ്ഘാടനം ചെയ്തു. മുകന്ദൻ ആധ്യക്ഷം വഹിച്ചു. സെക്രട്ടറി രാജീവ് പുതുശ്ശേരി, ട്രഷറർ ജോഷി ദാമോദരൻ മാസ്റ്റർ പവിത്രൻ , വിജയലക്ഷമി സുമിത ടീച്ചർ, കെ ടി രാജൻ കെ. അബുജാക്ഷൻ കെ.രാജൻ ഡൊമിനിക് എന്നിവര്‍ പ്രസംഗിച്ചു.

വിശുദ്ധ അൽഫോൻസാമ്മയുടെ തിരുനാള്‍

മഞ്ഞക്കുന്ന്: മഞ്ഞക്കുന്ന് സെന്‍റ് അൽഫോൻസാ ദേവാലയത്തിൽ ഇടവക മദ്ധ്യസ്ഥയായ വി.അൽഫോൻസാമ്മയുടെ നവനാൾ മധ്യസ്ഥാപേക്ഷയും തിരുനാളും തുടങ്ങി.ഇന്നലെ വൈകുന്നേരം 4.30 ന് മഞ്ഞക്കുന്ന് സെന്‍റ് അൽഫോൻസാ ഇടവക വികാരി ഫാ. ബോബി പൂവത്തിങ്കൽ തിരുനാൾ കൊടിയേറ്റ് നിർവഹിച്ചു. തുടർന്ന് നടന്ന വി.കുർബാന,വചന സന്ദേശം, നൊവേന എന്നിവക്ക് വിലങ്ങാട് സെന്‍റ്.ജോർജ് ഫൊറോന വികാരി റവ.ഫാ.വിൽസൺ മുട്ടത്തുകുന്നേൽ നേതൃത്വം നൽകി. 27 വരെ എല്ലാ ദിവസവും വൈകിട്ട് 4:15 ന് ജപമാല, 4:45 ന് വി.കുർബാന,നൊവേന എന്നിവ നടത്തപ്പെടുന്നതാണ്. പ്രധാന തിരുനാൾ ദിവസമായ 28 ന് രാവിലെ 10 ന് ആഘോഷമായ വിശുദ്ധകുർബാനയ്ക്ക് കെസിവൈഎംഎസ്എംവൈഎം താമരശ്ശേരി രൂപത ഡയറക്റ്റർ റവ.ഫാ.ജോബിൻ തെക്കേക്കരമറ്റത്തിൽ കാർമ്മികത്വം വഹിക്കും.തുടർന്ന് ലദീഞ്ഞ്,തിരുശേഷിപ്പ് വണക്കം,സ്നേഹവിരുന്ന് എന്നിവയുണ്ടാകും.

വന്യമൃഗ ആക്രമണത്തിനെതിരേ എകെസിസി പ്രതിഷേധറാലി

കൂരാച്ചുണ്ട്: വർധിച്ചു വരുന്ന വന്യമൃഗ ആക്രമണങ്ങൾ മൂലം മലയോര മേഖലകളിലെ ജനങ്ങളുടെ ജീവിതം വഴിമുട്ടിയ സാഹചര്യത്തിൽ "ഞങ്ങൾക്കിവിടെ ജീവിക്കണം' എന്ന മുദ്രാവാക്യം ഉയർത്തി താമരശേരി രൂപത കത്തോലിക്ക കോൺഗ്രസ്, കൂരാച്ചുണ്ട് മരുതോങ്കര ഫൊറോനകളിലെ വിവിധസംഘടനകളുടെ നേതൃത്വത്തിൽ ഓഗസ്റ്റ് രണ്ടിന് പെരുവണ്ണാമൂഴി ഫോറസ്റ്റ് റെയിഞ്ച് ഓഫീസിലേക്ക് മലയോര കർഷക അതിജീവന റാലി സംഘടിപ്പിക്കാൻ തീരുമാനിച്ചു. എകെസിസി കൂരാച്ചുണ്ട്, മരുതോങ്കര ഫൊറോന കമ്മിറ്റികളുടെ നേതൃത്വത്തിൽ ചേർന്ന യോഗത്തിലാണ് തീരുമാനം.ഓഗസ്റ്റ് രണ്ടിന് നടക്കുന്ന പ്രതിഷേധ റാലി താമരശേരി ബിഷപ് മാർ റെമീജിയോസ് ഇഞ്ചനാനിയിൽ ഉദ്ഘാടനം ചെയ്യും. വന്യമൃഗ ആക്രമണം മനുഷ്യാവകാശ ലംഘനമാണ്. ഇതിനെതിരേയുള്ള പോരാട്ടങ്ങൾ അനിവാര്യമാണ്. വന്യമൃഗ സംരക്ഷണത്തിന്‍റെ പേരിൽ കോടാനുകോടി രൂപയുടെ ഫണ്ടുകൾ ധൂർത്തടിക്കുന്ന വനം വകുപ്പ് നിഗൂഡമായ കർഷക കുടിയൊഴിപ്പിക്കലും, കർഷക ദ്രോഹവുമാണ് നടത്തുന്നതെന്ന് യോഗം ആരോപിച്ചു. എകെസിസി രൂപത പ്രസിഡന്‍റ് ഡോ.ചാക്കോ കാളംപറമ്പിൽ യോഗം ഉദ്ഘാടനം ചെയ്തു. മരുതോങ്കര ഫൊറോന ഡയറക്ടർ ഫാ. ആന്‍റോ മൂലയിൽ അധ്യക്ഷത വഹിച്ചു. കൂരാച്ചുണ്ട് ഫൊറോന ഡയറക്ടർ ഫാ. വിൻസെന്‍റ് കണ്ടത്തിൽ മുഖ്യപ്രഭാഷണം നടത്തി. ഡയറക്ടർമാരായ ഫാ. ഡൊമിനിക് മുട്ടത്തുകൂടി, ഫാ. ജോർജ് വരിക്കശേരി, ഫാ. എമ്മാനുവേൽ കുറൂർ, ഫാ. ജിനോ ചുണ്ടയിൽ, ഫാ. ജോസഫ് കൂനാനിക്കൽ, ഫാ. കുര്യാക്കോസ് കൊച്ചുകൈപ്പേൽ, ഫാ. ഏബ്രഹാം വള്ളോപ്പള്ളി ഭാരവാഹികളായ ജോൺസൺ കക്കയം, ജോഷി കറുകമാലില്‍, ഡോ. ജോൺ കട്ടക്കയം, നിമ്മി പൊതിയിട്ടേൽ, ജോസ് ചെറുവള്ളിൽ എന്നിവർ പ്രസംഗിച്ചു.

ഗതാഗത നിയന്ത്രണ ബോർഡുകൾ കൈമാറി

തിരുവമ്പാടി: തിരുവമ്പാടി - കൂടരഞ്ഞി റോഡിലെ ഗതാഗത നിയന്ത്രണത്തിന്‍റെ ഭാഗമായി നോ പാർക്കിംഗ് ബോർഡുകൾ കൈമാറി. ലിസ ഹോസ്പിറ്റൽ എംഡി ഡോ. പി.എം. മത്തായി തിരുവമ്പാടി സിഐ കെ. പ്രജീഷിന് ബോർഡുകൾ കൈമാറി. ചടങ്ങിൽ എസ്ഐമാരായ ഇ.കെ. രമ്യ, നിതിൻ, ലിസ ഹോസ്പിറ്റൽ ഡയറക്ടർ ഡോ. പ്രവീൺ മാത്യു, മാനേജർ അനുസ്മിത, ജമീഷ് ഇളംതുരുത്തിൽ എന്നിവർ പങ്കെടുത്തു.

അഞ്ച് സീനിയർ വിദ്യാർഥികളെ സസ്പെൻഡ് ചെയ്തു

നടുവണ്ണൂർ: വാകയാട് ഹയർ സെക്കൻഡറി സ്കൂളിൽ പ്ലസ് വൺ വിദ്യാർഥിയെ മർദിച്ച സംഭവത്തിൽ സ്കൂളിലെ അഞ്ച് സീനിയർ വിദ്യാർഥികളെ സസ്പെൻഡ് ചെയ്തു. പ്ലസ് വൺ സയൻസ് വിദ്യാർഥിയെയാണ് പ്ലസ് ടു സയൻസ് ബാച്ചിലെ വിദ്യാർഥികൾ മർദിച്ച് പരിക്കേൽപിച്ചത്. ജൂണിയര്‍ വിദ്യാർഥികൾ ഇൻസ്റ്റഗ്രാമിൽ പോസ്റ്റ് ചെയ്യരുതെന്ന് സീനിയർ വിദ്യാർഥികൾ ആവശ്യപ്പെട്ടിരുന്നു. ഇതുമായുണ്ടായ തർക്കമാണ് മർദനത്തിൽ കലാശിച്ചത്. വിദ്യാർഥിക്ക് ശരീരമാസകലം മർദനമേറ്റ പാടുണ്ട്. പ്രിൻസിപ്പലിന് ലഭിച്ച പരാതി പോലീസിന് കൈമാറിയതിനെ തുടർന്ന് കേസെടുത്തിരുന്നു. സ്കൂളിൽ അടിയന്തര സ്റ്റാഫ് യോഗവും പിടിഎയും ചേർന്നാണ് അക്രമത്തിൽ പങ്കെടുത്ത വിദ്യാർഥികളെ സസ്പെൻഡ് ചെയ്യാൻ തീരുമാനിച്ചത്.

8.48 കോടി ചെലവിൽ ലയൺസ്പാർക്ക് നവീകരിക്കുന്നു

കോഴിക്കോട്: കോഴിക്കോട് ലയൺസ് പാർക്ക് നവീകരണം ഉടൻ ആരംഭിക്കും. ഭരണാനുമതി ലഭിച്ച പദ്ധതിക്ക് സാങ്കേതികാനുമതി തേടാൻ കഴിഞ്ഞ ദിവസം നടന്ന കൗൺസിൽ യോഗത്തിൽ അംഗീകാരമായി. 8.48 കോടി ചെലവിൽ രണ്ടു പദ്ധതികളായാണ് പാർക്ക് നവീകരണം നടക്കുന്നത്. പദ്ധതിക്കായി 7.5 കോടി രൂപയാണ് ‘അടൽ മിഷൻ ഫോർ റിജുവനേഷൻ ആൻഡ് അർബൻ ട്രാൻസ്ഫർമേഷൻ’ (അമൃത്) പദ്ധതിയിൽനിന്ന് അനുവദിച്ചത്. കോർപറേഷൻ തനത് ഫണ്ടിൽനിന്ന് 98 ലക്ഷം രൂപയും അനുവദിച്ചു. ഒരേക്കറിലേറെ ഭൂമിയിൽ 34 സെന്‍റ് സ്ഥലത്ത് 5.25 കോടി ചെലവിൽ 1500 ചതുരശ്രമീറ്ററിൽ പുതിയ കുളവും 2.25 കോടി ചെലവിൽ ഉദ്യാനവും നിർമിക്കാനാണ് പദ്ധതി. ഉദ്യാനത്തിന് മാത്രമായി 7.5 കോടി രൂപ വകയിരുത്താൻ ബുദ്ധിമുട്ടുള്ളതായി അമൃത് മിഷൻ ഡയറകട്ർ അറിയിച്ചതിനെത്തുടർന്ന് പദ്ധതി രണ്ടായി വിഭജിച്ച് കുളവും അതിന് ചുറ്റുമുള്ള 5.2 കോടിയുടെ മോടിപിടിപ്പിക്കലുമടക്കം ജലാശയ നിർമാണത്തിനുള്ള വകയിൽ ഉൾപ്പെടുത്തുകയായിരുന്നു.

വീട്ടുമുറ്റത്തും ആനകളിറങ്ങി : വിലങ്ങാട് കാട്ടാനക്കൂട്ടം ഇറങ്ങി; വൻ കൃഷി നാശം

നാദാപുരം: വാണിമേൽ പഞ്ചായത്തിലെ മലയോര മേഖലകളായ ചിറ്റാരിയിലും, പൂവത്താം കണ്ടിയിലും കാട്ടാനകൂട്ടമിറങ്ങി വ്യാപക കൃഷി നാശം . ചിറ്റാരിയിൽ നിരവധി കർഷകരുടെ 30 ലേറെ തെങ്ങുകൾ, കമുങ്ങുകൾ, റബറുകൾ എന്നിവ കൂട്ടത്തോടെ ആനകൾ നശിപ്പിച്ചു. വാഴ, വള്ളികൾ എന്നിവയും ആനക്കൂട്ടം പിഴുതെറിഞ്ഞു. പൂവത്താം കണ്ടിയിലും വ്യാപകമായി കാർഷിക വിളകൾ നശിപ്പിച്ചതായി കർഷകർ പറഞ്ഞു. ഒരാഴ്ച്ചയിലേറെയായി ആനകൾ കൃഷിയിടത്തിൽ തന്നെ തമ്പടിച്ച് വിളകൾ നശിപ്പിക്കുകയായിരുന്നു. വെള്ളിയാഴ്ച്ച പുലർച്ചെ അഞ്ചോടെയാണ് മലയങ്ങാടിന് സമീപം പൂവത്താംകണ്ടിയിൽ വർക്കിയുടെ വീടിന്‍റെമുറ്റത്ത് കാട്ടാന ഇറങ്ങിയത്. ആനയുടെ സാന്നിധ്യം തിരിച്ചറിഞ്ഞ ഉന്നതി നിവാസികൾ ബഹളം ഉണ്ടാക്കുകയും വിവരം വനം വകുപ്പിൽ അറിയിക്കുകയും ആയിരുന്നു. ജനവാസ കേന്ദ്രമായ ചിറ്റാരി സുന്ദരി മുക്കിലും ഇന്നലെ പുലർച്ചെ നാലോടെ ആനകൾ ഇറങ്ങിയത് പ്രദേശവാസികളെ ഭീതിയിലാഴ്ത്തി. വിലങ്ങാട് നിന്ന് വനം വകുപ്പ് ഉദ്യോഗസ്ഥർ എത്തിയാണ് ആനകളെ വനത്തിലേക്ക് തുരത്തിയത്. കണ്ണൂർ ജില്ലയിലെ കണ്ണവം വനത്തിൽ നിന്നാണ് ആനകൾ കോഴിക്കോട് ജില്ലയിലെ കൃഷിയിടത്തിൽ ഇറങ്ങുന്നത്. ഒറ്റയാനും, കുട്ടി ആനകളും ഉൾപ്പെടുന്ന ആറ്, ഏഴ് ആനകൾ അടങ്ങുന്ന രണ്ട് കൂട്ടമാണ് മേഖലയിൽ കൃഷിയിടത്തിലും ജനവാസ കേന്ദ്രത്തിലും ഇറങ്ങുന്നത്. വന മേഖലയിൽ ഫെൻസിംഗ് ലൈനുകളുടെ പ്രവൃത്തി പൂർത്തിയാക്കാത്തതും, ലൈനുകൾ യഥാസമയം അറ്റകുറ്റ പ്രവൃത്തി നടത്താത്തതുമാണ് ആനകൾ കാടിറങ്ങാൻ കാരണമെന്ന് കർഷകർ പറയുന്നു. ചെക്യാട്, വാണിമേൽ, വളയം പഞ്ചായത്തുകളുടെ വന മേഖലകളോട് ചേർന്ന് നിൽക്കുന്ന കൃഷിയിടങ്ങളിൽ 20 ലേറെ ആനകൾ തമ്പടിച്ചതായായാണ് വനം വകുപ്പ് തന്നെ സ്ഥിതീകരിച്ചത്. കഴിഞ്ഞ ഒരു മാസത്തിനിടെ ലക്ഷങ്ങളുടെ കൃഷി നാശമാണ് ആനകൾ ഈ മേഖലയിൽ മാത്രം വരുത്തിയത്. വിലങ്ങാട് സെക്ഷൻ ഫോറസ്റ്റ് ഉദ്യോഗസ്ഥരും, ചിറ്റാരി കേന്രമായി അടുത്തിടെ രൂപീകരിച്ച ആറ് പേർ അടങ്ങുന്ന പിആർടി (പ്രൈമറി റസ്പോൺസ് ടീം) അംഗങ്ങളും ചേർന്ന് മണിക്കൂറുകൾ നീണ്ട കഠിന പ്രയത്നത്തിനൊടുവിൽ ആനക്കൂട്ടങ്ങളെ ചിറ്റാരി, പുവത്താം കണ്ടി മേഖലകളിൽ നിന്ന് കണ്ണവം വനത്തിലേക്ക് തുരത്തി ഓടിച്ചു. ഉൾവനത്തിലെ കനത്ത മഴയും, കോടയും കാരണം ഏറെ സാഹസികമായാണ് വനപാലകർ ആനകളെ തുരത്തി ഓടിച്ചത്.

സ്വകാര്യ ബസ് ഇടിച്ച് വയോധികന് ദാരുണാന്ത്യം

കോഴിക്കോട്: റോഡ് മുറിച്ചുകടക്കവേ സ്വകാര്യ ബസ് ഇടിച്ച് വയോധികന് ദാരുണാന്ത്യം. നെടുങ്ങാടി ബാങ്ക് റിട്ടയേര്‍ഡ് മാനേജര്‍ ഫറൂഖ് കോളജ് കുറ്റൂളങ്ങാടി കൊയ്യപ്പുറത്ത് ഗംഗാധര പണിക്കര്‍ (84) ആണ് മരിച്ചത്. ഇന്നലെ ഉച്ചയ്ക്ക് ഒന്നോടെയാണ് സംഭവം.രാമനാട്ടുകരയ്ക്കടുത്ത് അഴിഞ്ഞിലം തളി മഹാവിഷ്ണു ക്ഷേത്രത്തിലെ സപ്താഹത്തില്‍ പങ്കെടുത്ത് വീട്ടിലേക്ക് മടങ്ങുകയായിരുന്നു ഗംഗാധര പണിക്കര്‍. ക്ഷേത്രത്തിന്‍റെ മുന്നില്‍നിന്ന് ആറുവരി പാത മുറിച്ചു കടക്കുന്നതിനിടെ റൂട്ട് മാറി ആറുവരി പാതയിലൂടെ പാലക്കാട്ടേക്ക് പോയ സന എന്ന ബസ് ഇടിക്കുകയായിരുന്നു. ഇടിയുടെ ആഘാതത്തില്‍ ഗംഗാധര പണിക്കര്‍ അന്‍പതുമീറ്ററോളം ദൂരത്തേക്ക് തെറിച്ചുവീണു. ഉടന്‍ തന്നെ ആശുപത്രിയില്‍ എത്തിക്കാന്‍ ശ്രമിച്ചെങ്കിലും അപ്പോഴേക്കും മരിച്ചു.

ഇരുവഴിഞ്ഞിപ്പുഴയിൽ വയോധികയുടെ മൃതദേഹം

തിരുവമ്പാടി: കാണാതായ വയോധികയെ ഇരുവഴിഞ്ഞിപ്പുഴയിൽ മരിച്ച നിലയിൽ കണ്ടെത്തി. തോട്ടത്തിൻകടവ് കൂമുള്ളംകണ്ടി ആയിശുമ്മയുടെ (75) മൃതദേഹമാണ് അഗസ്ത്യാമുഴി പാലത്തിന് സമീപത്തുനിന്ന് ഇരുവഴിഞ്ഞിപ്പുഴയിൽ കണ്ടെത്തിയത്. ഇന്നലെ രാവിലെ മുതൽ ആയിശുമ്മയെ കാണാനില്ലായിരുന്നു. ബന്ധുക്കളും നാട്ടുകാരും നടത്തിയ തെരച്ചിലിനിടെയാണ് മൃതദേഹം കണ്ടെത്തിയത്. ഭർത്താവ് പരേതനായ ഉണ്ണിമോയി. മക്കൾ: കബീർ, ഉസ്മാൻ. മരുമക്കൾ: റുബീന, സജിറ. വിവരമറിഞ്ഞെത്തിയ മുക്കം ഫയർഫോഴ്‌സ് യൂണിറ്റ് മൃതദേഹം കരയ്‌ക്കെത്തിച്ചു. തുടർനടപടികൾക്കായി മൃതദേഹം കോഴിക്കോട് മെഡിക്കൽ കോളജ് ആശുപത്രിയിലേക്ക് മാറ്റി. സംഭവത്തിൽ പോലീസ് അന്വേഷണം ആരംഭിച്ചിട്ടുണ്ട്.

വിദ്യാര്‍ഥി ഷോക്കേറ്റ് മരിച്ച സംഭവം: കൊലക്കുറ്റത്തിന് കേസെടുക്കണമെന്ന്

കോഴിക്കോട്: കൊല്ലത്തെ വിദ്യാലയത്തില്‍ മിഥുന്‍ എന്ന വിദ്യാര്‍ഥി ഷോക്കേറ്റ് മരിച്ച സംഭവത്തില്‍ കൊലക്കുറ്റത്തിനു കേസെടുക്കണമെന്ന് ബിജെപി കോഴിക്കോട് സിറ്റി ജില്ല ജനറല്‍ സെക്രട്ടറി ടി.വി. ഉണ്ണികൃഷ്ണന്‍. മന്ത്രി ചിഞ്ചുറാണി രാജിവയ്ക്കണമെന്നാവശ്യപ്പെട്ട് യുവമോര്‍ച്ച പ്രവര്‍ത്തകര്‍ നടത്തിയ മന്ത്രിയുടെ കോലം കത്തിക്കല്‍ പ്രതിഷേധം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. വിദ്യാര്‍ഥിയുടെ ദാരുണമായ മരണം കേരള മനഃസാക്ഷിയെ ഞെട്ടിച്ചിരിക്കുകയാണ്. സംഭവത്തെക്കുറിച്ച് മന്ത്രി ചിഞ്ചുറാണി നടത്തിയ പ്രസ്താവനയും സുംബ നൃത്തവും കേരള സമൂഹത്തിന് അപമാനകരമാണ്. മന്ത്രി ചിഞ്ചുറാണി എത്രയും പെട്ടെന്ന് രാജിവച്ച് പുറത്തുപോകുന്നതാണ് ഉചിതമെന്ന് അദ്ദേഹം പറഞ്ഞു.വിജിത്ത് ബേപ്പൂര്‍, റിബിത്ത് മാങ്കാവ്, കെ.വി. യതുരാജ്, കെ. വൈഷ്ണവേഷ്, എ.കെ. സൂരജ്, കെ. സൂഷ്മ, മിഥുന്‍ മാനാരി എന്നിവര്‍ നേതൃത്വം നല്‍കി.

നരിനട പള്ളിയിൽ അൽഫോൻസാമ്മയുടെ തിരുനാൾ കൊടിയേറി

കൂരാച്ചുണ്ട്: നരിനട സെന്‍റ് അൽഫോൻസാ പള്ളിയിൽ വിശുദ്ധ അൽഫോൻസാമ്മയുടെ തിരുനാൾ ഇടവക വികാരി ഫാ. ജോസഫ് പുത്തൻപുരക്കൽ കൊടിയേറ്റി. തുടർന്ന് ജപമാല, വിശുദ്ധ കുർബാന, നൊവേന എന്നിവയ്ക്ക് ഫാ. സെബാസ്റ്റ്യൻ മറ്റപ്പള്ളി കാർമികത്വം വഹിച്ചു. നാളെ വൈകുന്നേരം അഞ്ചിന് ജപമാല, 5.30ന് ആഘോഷമായ വിശുദ്ധ കുർബാന, നൊവേന, ഫാ. മെൽബിൻ കുടിയിരിക്കൽ കാർമികത്വം വഹിക്കും. 20ന് വൈകുന്നേരം 4.30ന് ജപമാല, അഞ്ചിന് ആഘോഷമായ കുർബാന, നൊവേന, ഫാ. ജോസഫ് പുത്തൻപുരയ്ക്കൽ കാർമികത്വം വഹിക്കും. 21ന് വൈകുന്നേരം അഞ്ചിന് ജപമാല, 5.30ന് ആഘോഷമായ വിശുദ്ധ കുർബാന, നൊവേന, ഫാ. ജോബിൻ തെക്കേക്കര മറ്റത്തിൽ കാർമികനാകും. 22ന് വൈകുന്നേരം അഞ്ചിന് ജപമാല, 5.30ന് ആഘോഷമായ വിശുദ്ധ കുർബാന, ഫാ. മൈക്കിൾ നീലംപറമ്പിൽ കാർമികനാകും. 23ന് വൈകുന്നേരം അഞ്ചിന് ജപമാല, 5.30ന് വിശുദ്ധ കുർബാന, നൊവേന, ഫാ. റിനു തിട്ടയിൽ കാർമികത്വം വഹിക്കും. 24ന് 5.30ന് ആഘോഷമായ വിശുദ്ധ കുർബാന, നൊവേന, ഫാ. മനു കുറൂർ കാർമികനാകും. 25ന് വൈകുന്നേരം അഞ്ചിന് ജപമാല, 5.30ന് വിശുദ്ധ കുർബാന, ഫാ.ജോർജ് വെള്ളാരംകാലായിൽ കാർമികത്വം വഹിക്കും. 26ന് വൈകുന്നേരം അഞ്ചിന് ജപമാല, 5.30ന് വിശുദ്ധ കുർബാന, ഫാ. ജിനോയ് പനക്കൽ കാർമികനാകും. സമാപന ദിവസമായ 27ന് രാവിലെ 10ന് ആഘോഷമായ വിശുദ്ധ കുർബാന, സന്ദേശം, ലദീഞ്ഞ്, വികാരി ജനറാൾ മോൺ. ഏബ്രഹാം വയലിൽ കാർമികത്വം വഹിക്കും. തുടർന്ന് സ്നേഹവിരുന്ന്.

ഫറോക്ക് കുടിവെള്ള പദ്ധതി പ്രാവർത്തികമാക്കണം: മനുഷ്യാവകാശ കമ്മീഷൻ

കോഴിക്കോട്: ഫറോക്ക് മുനിസിപാലിറ്റിയിലെ പതിനായിരത്തോളം പ്രദേശവാസികൾക്ക് കുടിവെള്ളം വിതരണം ചെയ്യുന്നതിനുള്ള പദ്ധതി അനാവശ്യമായ കാലതാമസം ഒഴിവാക്കി സമയബന്ധിതമായി നടപ്പിലാക്കണമെന്ന് മനുഷ്യാവകാശ കമ്മീഷൻ ജുഡീഷൽ അംഗം കെ. ബൈജുനാഥ് നഗരസഭാ സെക്രട്ടറിക്ക് നിർദേശം നൽകി. ഉത്തരവിന്‍റെ അടിസ്ഥാനത്തിൽ സ്വീകരിച്ച നടപടികൾ രണ്ടാഴ്ചക്കുള്ളിൽ നഗരസഭാ സെക്രട്ടറി കമ്മീഷനെ അറിയിക്കണം. ഫറോക്ക്- കരുവൻതിരുത്തി കുടിവെള്ള ജനകീയ കമ്മിറ്റി കൺവീനർ ഷംസുദീൻ മൂപ്പൻ സമർപ്പിച്ച പരാതിയിലാണ് നടപടി. ഗുണഭോക്തൃ കമ്മിറ്റി രൂപീകരിക്കാനും പദ്ധതി ഈ കമ്മിറ്റിയെ ഏൽപ്പിക്കാനും കമ്മീഷൻ നിർദേശിച്ചിരുന്നു. കുടിവെള്ള പദ്ധതിയുടെ വൈദ്യുതി ചാർജ് ഗുണഭോക്തൃ സമിതി നിർവഹിക്കണമെന്നാണ് നിയമം. എന്നാൽ പൊതുജന താത്പര്യം മുൻ നിർത്തി ബാധ്യത ഉണ്ടാവുകയാണെങ്കിൽ അത് കൗൺസിൽ അംഗങ്ങൾ വീതിച്ചെടുക്കാമെന്ന ധാരണയുണ്ടാക്കിയിട്ടുണ്ടെന്നും റിപ്പോർട്ടിൽ പറയുന്നു. ടെണ്ടർ നോട്ടീസും നഗരസഭ ഹാജരാക്കി. കിലോമീറ്ററോളം നടന്നാണ് നാട്ടുകാർ വെള്ളം ശേഖരിക്കുന്നത്.

ഉമ്മന്‍ചാണ്ടി അനുസ്മരണം സംഘടിപ്പിച്ചു

കോഴിക്കോട്: ജനങ്ങളിലും ദൈവത്തിലുമുള്ള വിശ്വാസം വലിയ പ്രതിസന്ധി ഘട്ടങ്ങളിലും ഉമ്മന്‍ചാണ്ടിക്ക് ആത്മവിശ്വാസം പകര്‍ന്നുവെന്ന് എം.പി അബ്ദുസമദ് സമദാനി എംപി. പ്രത്യയശാസ്ത്രപരമായ രീതിശാസ്ത്രങ്ങള്‍ക്ക് പകരം വ്യക്തിവിരോധങ്ങള്‍ രാഷ്ട്രീയത്തില്‍ നിര്‍ണായകമായിത്തീരുന്ന കാലത്ത് തനിക്ക് നേരെയുണ്ടായ വ്യാജ പ്രചാരണങ്ങളെ ഉറച്ച വിശ്വാസംകൊണ്ടാണ് അദ്ദേഹം നേരിട്ടത്. ദൈവത്തിലും തന്‍റെ ജനങ്ങളിലും തന്‍റേതായ മൂല്യങ്ങളിലും അദ്ദേഹം ഉറച്ചു വിശ്വസിച്ചു. അത് അദ്ദേഹത്തിന് നല്‍കിയ ആത്മവിശ്വാസം പ്രതികൂല ഘടകങ്ങള്‍ക്കു മുമ്പില്‍ നിസംഗനായി നില്‍ക്കാന്‍ പ്രാപ്തനാക്കി. ജനകീയനായ ജനപ്രതിനിധിയും മനുഷ്യസ്‌നേഹിയായ ഭരണാധികാരിയും സാമൂഹിക മൈത്രിയുടെ പ്രയോക്താവുമെല്ലാമായിരിക്കാന്‍ ഉമ്മന്‍ചാണ്ടിയെ സജ്ജനാക്കിയത് ജനങ്ങള്‍ നല്‍കിയ കരുത്തായിരുന്നു. ജനങ്ങളായിരുന്നു അദ്ദേഹത്തിന്‍റെ ഊര്‍ജവും ശ്വാസവുമെന്ന് സമദാനി ചൂണ്ടിക്കാട്ടി. ഉമ്മന്‍ചാണ്ടിയുടെ രണ്ടാം ഓര്‍മദിനത്തോടനുബന്ധിച്ച് ജില്ലാ കോണ്‍ഗ്രസ് കമ്മിറ്റി ഉമ്മന്‍ചാണ്ടി ഓഡിറ്റോറിയത്തില്‍ സംഘടിപ്പിച്ച അനുസ്മരണ സമ്മേളനം ഉദ്ഘാടനം ചെയ്യുകയായിരുന്നു സമദാനി. ഡിസിസി പ്രസിഡന്‍റ് കെ. പ്രവീണ്‍ കുമാര്‍ അധ്യക്ഷത വഹിച്ചു. ഉമ്മന്‍ചാണ്ടിയുടെ പ്രതിമയില്‍ ഹാരാര്‍പ്പണവും പുഷ്പാര്‍ച്ചനയും നടത്തി. പന്തിരിക്കര: ചങ്ങരോത്ത് മണ്ഡലം കോൺഗ്രസ് കമ്മിറ്റിയുടെ ആഭിമുഖ്യത്തിൽ ഉമ്മൻ ചാണ്ടി അനുസ്മരണവും പന്തിരിക്കര മേഖല മഹാത്മാഗാന്ധി കുടുംബ സംഗമവും സംഘടിപ്പിച്ചു. കെപിസിസി നിർവാഹക സമിതി അംഗം എൻ. സുബ്രഹ്മണ്യൻ ഉദ്ഘാടനം ചെയ്തു. മണ്ഡലം കോൺഗ്രസ് കമ്മിറ്റി പ്രസിഡന്‍റ് വി.പി. ഇബ്രാഹിം അധ്യക്ഷത വഹിച്ചു. യൂത്ത് കോൺഗ്രസ് ദേശീയ സെക്രട്ടറി വിദ്യാ ബാലകൃഷ്ണൻ മുഖ്യപ്രഭാഷണം നടത്തി. മുതിർന്ന കോൺഗ്രസ് പ്രവർത്തകരെ ചടങ്ങിൽ ആദരിച്ചു. ഡിസിസി സെക്രട്ടറി ഇ.വി. രാമചന്ദ്രൻ, കർഷക കോൺഗ്രസ് സംസ്ഥാന സെക്രട്ടറി എൻ.പി. വിജയൻ, ഇ.ടി. സരീഷ്, സന്തോഷ് കോശി, ഷൈലജ ചെറുവോട്ട്, കെ.കെ. ലീല, സി.കെ. രാഘവൻ, പി.ടി. കുഞ്ഞിക്കേളു, കെ.എൻ. കൃഷ്ണൻ, പി.കെ. കൃഷ്ണദാസ്, മണ്ഡലം വൈസ് പ്രസിഡന്‍റ് കെ.എം. ശങ്കരൻ, വി.പി. സുഹൈൽ എന്നിവർ പ്രസംഗിച്ചു. കൂടരഞ്ഞി: മുൻ മുഖ്യമന്ത്രി ഉമ്മൻചാണ്ടിയുടെ രണ്ടാം ചരമവാർഷികത്തിൽ അനുസ്മരണ യോഗവും പുഷ്പാർച്ചനയും നടത്തി. ഡിസിസി ജനറൽ സെക്രട്ടറി സി.ജെ. ആന്‍റണി ഉദ്ഘാടനം ചെയ്തു. വൻകിട വികസനങ്ങൾക്ക് ഒപ്പം തന്നെ സമൂഹത്തിലെ പാവപ്പെട്ടവരിലേക്കും അധികാരത്തിന്‍റെ സംരക്ഷണവും ക്ഷേമവും എത്തിച്ച നേതാവായിരുന്നു ഉമ്മൻ ചാണ്ടിയെന്ന് അദ്ദേഹം അനുസ്മരിച്ചു. യോഗത്തിൽ മണ്ഡലം പ്രസിഡന്‍റ് സണ്ണി പെരികിലം തറപ്പേൽ അധ്യക്ഷത വഹിച്ചു. ബ്ലോക്ക് വൈസ് പ്രസിഡന്‍റുമാരായ മുഹമ്മദ് പാതിപ്പറമ്പിൽ, സണ്ണി കിഴുക്കാരക്കാട്ട്, സിബു തോട്ടത്തിൽ, സെക്രട്ടറി ഷാജി പൊന്നമ്പേൽ, എ.പി. മണി, പഞ്ചായത്ത് അംഗം മോളി തോമസ്, ഏലിയാമ്മ ഇടമുളയിൽ, പൗലോസ് താന്നിമുളയിൽ, ഫ്രാൻസീസ് മൂക്കിലിക്കാട്ട്, ജോസ് പള്ളിക്കുന്നേൽ തുടങ്ങിയവർ പ്രസംഗിച്ചു. താമരശേരി: മുൻ മുഖ്യമന്ത്രി ഉമ്മൻ ചാണ്ടി ജനമനസിലെ മായാത്ത നായകനാണെന്ന് കോൺഗ്രസ് നേതാവ് പി.എം. നിയാസ്. ഉമ്മൻ ചാണ്ടിയുടെ രണ്ടാം ചരമവാർഷിക അനുസ്മരണ യോഗം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. കെ.പി. കൃഷ്ണൻ അധ്യക്ഷത വഹിച്ചു. മുൻ എംഎൽഎ വി.എം ഉമ്മർ, പഞ്ചായത്ത് പ്രസിഡന്‍റ് എ. അരവിന്ദൻ, കെപിസിസി മെമ്പർ പി.സി. ഹബീബ് തമ്പി, പി. ഗിരീഷ് കുമാർ തുടങ്ങിയവർ പ്രസംഗിച്ചു. പുഷ്പാർച്ചനയും നടത്തി. താമരശേരി: ഉമ്മൻ ചാണ്ടിയുടെ ചരമവാർഷികത്തിൽ ജീവകാരുണ്യ പ്രവർത്തനങ്ങളുമായി എൻജിഒ അസോസിയേഷന്‍റെ സ്മരണാഞ്ജലി. താമരശേരി ബ്രാഞ്ച് കമ്മിറ്റിയുടെ നേതൃത്വത്തിൽ താലൂക്ക് ആശുപത്രിയിലേക്ക് അനുവദിച്ച വീൽ ചെയറുകൾ ജില്ലാ പ്രസിഡന്‍റ് പ്രേംനാഥ് മംഗലശേരി വിതരണം ചെയ്തു. താലൂക്ക് ആശുപത്രി സൂപ്രണ്ട് കെ. ഗോപാലകൃഷ്ണൻ വീൽചെയറുകൾ ഏറ്റുവാങ്ങി. പുതുപ്പാടി മണ്ഡലം കോൺഗ്രസ് കമ്മിറ്റിയുടെ ആഭിമുഖ്യത്തിൽ പ്രവർത്തകർ ഉമ്മൻ ചാണ്ടിയുടെ ഛായാ ചിത്രത്തിൽ പുഷ്പാർചന നടത്തി. തുടർന്ന് നടന്ന അനുസ്മരണയോഗം ഡിസിസി നിർവാഹക സമിതി അംഗം പി.സി. മാത്യു ഉദ്ഘാടനം ചെയ്തു. കോഴിക്കോട്: കേരള എന്‍ജിഒ അസോസിയേഷന്‍ ജില്ലാ കമ്മിറ്റി സംഘടിപ്പിച്ച ഉമ്മന്‍ചാണ്ടി അനുസ്മരണം കെപിസിസി ജനറല്‍ സെക്രട്ടറി പി.എം. നിയാസ് ഉദ്ഘാടനം ചെയ്തു. അടിസ്ഥാന ജനത്തെ ചേര്‍ത്തുപിടിച്ച് കേരളത്തെ വികസന രംഗത്ത് വിസ്മയകരമായി മുന്നോട്ട് നയിച്ച ഭരണാധികാരിയായിരുന്നു ഉമ്മന്‍ ചാണ്ടിയെന്ന് അദ്ദേഹം പറഞ്ഞു. ജില്ലാ പ്രസിഡന്‍റ് പ്രേംനാഥ് മംഗലശേരി അധ്യക്ഷത വഹിച്ചു. സെറ്റോ ജില്ലാ ചെര്‍മാന്‍ സിജു കെ. നായര്‍, താലൂക്ക് ചെയര്‍മാന്‍ മധു രാമനാട്ടുകര, സംസ്ഥാന കമ്മിറ്റി അംഗങ്ങളായ എന്‍.ടി. ജിതേഷ്, ടി. അജിത്കുമാര്‍, ജില്ലാ ഭാരവാഹികളായ എന്‍.പി.രഞ്ചിത്ത്, കെ.വി. രവീന്ദ്രന്‍, വി. വിപീഷ്, കെ.ഫവാസ് , എലിസബത്ത് ടി. ജേക്കബ്, സംസ്ഥാന കൗണ്‍സില്‍ അംഗം എം.പി. നന്ദകുമാര്‍, കെ.പി.സുധീര, എം.ടി. ഫൈസല്‍, കെ.കെ അശോകന്‍, യു.കെ. ആയിശകുട്ടി, ജില്ലാ വൈസ് പ്രസിഡന്‍റ് രഞ്ജിത്ത് ചേമ്പാല, സിറ്റി ബ്രാഞ്ച് സെക്രട്ടറി ആര്‍. രജി എന്നിവര്‍ സംസാരിച്ചു . കോടഞ്ചേരി: മുൻ മുഖ്യമന്ത്രി ഉമ്മൻചാണ്ടിയുടെ രണ്ടാം ചരമവാർഷികദിനത്തിൽ പുഷ്പാർച്ചനയും അനുസ്മരണ സമ്മേളനവും നടത്തി. അനുസ്മരണ സമ്മേളനം കെപിസിസി നിർവാഹക സമിതി അംഗം പി.സി. ഹബീബ് തമ്പി ഉദ്ഘാടനം ചെയ്തു. ചടങ്ങിൽ മണ്ഡലം കോൺഗ്രസ് പ്രസിഡന്‍റ് വിൻസന്‍റ് വടക്കേമുറിയിൽ അധ്യക്ഷത വഹിച്ചു. 50 തവണ രക്തദാനം നടത്തിയ സന്നദ്ധ പ്രവർത്തകനായ ബിജു ഓത്തിക്കലിനെ ചടങ്ങിൽ ആദരിച്ചു. ബ്ലോക്ക് കോൺഗ്രസ് പ്രസിഡന്‍റ് ജോബി ഇലന്തൂർ മുഖ്യപ്രഭാഷണം നടത്തി. പഞ്ചായത്ത് പ്രസിഡന്‍റ് അലക്സ് തോമസ് ചെമ്പകശേരി, കെ.എം. പൗലോസ്, റോയി തോമസ്, വി.ഡി. ജോസഫ്, സണ്ണി കാപ്പാട്ട്മല, റോയി കുന്നപ്പള്ളി, അബൂബക്കർ മൗലവി, ആഗസ്തി പല്ലാട്ട്, ആന്‍റണി നീർവേലി, ലിസി ചാക്കോ, ഫ്രാൻസിസ് ചാലിൽ, തമ്പി പറകണ്ടത്തിൽ, ഫ്രാൻസിസ് മുണ്ടാട്ടിൽ, ബിജു ഓത്തിക്കൽ എന്നിവർ പ്രസംഗിച്ചു. കൂരാച്ചുണ്ട്: കോൺഗ്രസ് കൂരാച്ചുണ്ട് മണ്ഡലം കമ്മിറ്റിയുടെ നേതൃത്വത്തിൽ മുൻ മുഖ്യമന്ത്രി ഉമ്മൻ ചാണ്ടിയുടെ അനുസ്മരണ യോഗവും പുഷ്പാർച്ചനയും നടത്തി. കക്കയം, കരിയാത്തുംപാറ, കല്ലാനോട്‌, വട്ടച്ചിറ, കേളോത്തുവയൽ മേഖലകളിൽ കോൺഗ്രസ്‌ കമ്മിറ്റികളുടെ നേതൃത്വത്തിൽ പുഷ്‌പാർച്ചന നടന്നു. കോൺഗ്രസ് ഓഫീസിൽ നടന്ന അനുസ്മരണ യോഗം ഡിസിസി ജനറൽ സെക്രട്ടറി അഗസ്റ്റിൻ കാരക്കട ഉദ്ഘാടനം ചെയ്തു. മണ്ഡലം പ്രസിഡന്‍റ് ജോസ് വെളിയത്ത് അധ്യക്ഷത വഹിച്ചു. കൂരാച്ചുണ്ട്: മുൻ മുഖ്യമന്ത്രി ഉമ്മൻ ചാണ്ടിയുടെ രണ്ടാം ചരമദിനാചരണത്തിന്‍റെ ഭാഗമായി കൂരാച്ചുണ്ട് സാന്ത്വനം പെയിൻ ആൻഡ് പാലിയേറ്റീവ് കെയറിന് യൂത്ത് കോൺഗ്രസ്‌ കൂരാച്ചുണ്ട് മണ്ഡലം കമ്മിറ്റി വീൽ ചെയർ കൈമാറി. യൂത്ത് കോൺഗ്രസ്‌ സംസ്ഥാന ജനറൽ സെക്രട്ടറി അഡ്വ. വി.ടി. നിഹാൽ ഉദ്ഘാടനം ചെയ്തു. സാന്ത്വനം പെയിൻ ആൻഡ് പാലിയേറ്റീവ് കെയർ പ്രസിഡന്‍റ് ജോൺസൺ തേനംമാക്കൽ വീൽചെയർ ഏറ്റുവാങ്ങി. യൂത്ത് കോൺഗ്രസ്‌ മണ്ഡലം പ്രസിഡന്‍റ് നിസാം കക്കയം അധ്യക്ഷത വഹിച്ചു. നിയോജക മണ്ഡലം പ്രസിഡന്‍റ് അഭിജിത് ഉണ്ണികുളം മുഖ്യപ്രഭാഷണം നടത്തി.

ഫാർമസിസ്റ്റുകൾക്ക് മിനിമം വേതനം ഉറപ്പാക്കണം: കെപിപിഎ

പേരാമ്പ്ര: പേരാമ്പ്ര ഏരിയകളിലെ സ്വകാര്യ ഫാർമസികളിലും ഹോസ്പിറ്റലുകളിലും മറ്റ് മെഡിക്കൽ സ്ഥാപനങ്ങളിലും ജോലിചെയ്യുന്ന ഫാർമസിസ്റ്റുകൾക്ക് സർക്കാർ നിശ്ചയിച്ച മിനിമം വേതനം ഉറപ്പാക്കണമെന്ന് കേരള പ്രൈവറ്റ് ഫാർമസിസ്റ്റ്സ് അസോസിയേഷൻ പേരാമ്പ്ര ഏരിയ കമ്മിറ്റി ജനറൽ ബോഡി യോഗം ആവശ്യപ്പെട്ടു. പല തവണ അധികാരികൾ മുഖേന ആവശ്യപ്പെട്ടിട്ടും ഇപ്പോഴും ചില സ്ഥാപനങ്ങൾ ഫാർമസിസ്റ്റിന് മിനിമം വേതനം നൽകാത്തത് നീതീകരിക്കാനാവില്ല. ജില്ലാ പ്രസിഡന്‍റ് മെഹമൂദ് മൂടാടി യോഗം ഉദ്ഘാടനം ചെയ്തു. ഏരിയ പ്രസിഡന്‍റ് സി.സി. ഉഷ അധ്യക്ഷത വഹിച്ചു. സെക്രട്ടറി പി.കെ. രാജീവൻ, എസ്.ഡി. സലീഷ് കുമാർ, എ.കെ. റനീഷ്, എം.വി. പ്രേംനാഥ്, പി.കെ. രജിഷ എന്നിവർ പ്രസംഗിച്ചു.

തലയാട് അപകട ഭീഷണി ഉയർത്തി ട്രാൻസ്ഫോർമർ

താമരശേരി: തലയാട് അങ്ങാടിയിൽ ചീടിക്കുഴി ബസ് കാത്തിരിപ്പുകേന്ദ്രത്തോട് ചേർന്ന് സ്ഥാപിച്ച ട്രാൻസ്ഫോർമർ അപകട ഭീഷണി ഉയർത്തുന്നു. സംരക്ഷണവേലിയോ മറ്റു അപകട മുന്നറിയിപ്പോ ഇല്ലാതെ നിൽക്കുന്നത് ജനങ്ങൾക്ക് വലിയ സുരക്ഷാ ഭീഷണിയാണ്. വിദ്യാർഥികൾ അടക്കം നിരവധി ആളുകൾ കടന്നുപോകുന്ന വഴിയോട് ചേർന്നാണ് ട്രാൻസ്ഫോർമർ സ്ഥാപിച്ചത്. മലയോര ഹൈവേയുടെ ഭാഗമായി റോഡുപണി നടന്നപ്പോൾ നിലവിൽ ഉണ്ടായിരുന്ന ട്രാൻസ്ഫോർമർ കെഎസ്ഇബിയുടെ സ്വന്തം സ്ഥലത്തേക്ക് മാറ്റി സ്ഥാപിക്കുകയായിരുന്നു. ഇവിടെ വേണ്ട സുരക്ഷാ മുൻകരുതലുകൾ ഒന്നും ചെയ്തിട്ടില്ല. അങ്ങാടിയുടെ ഹൃദയഭാഗത്തുള്ള ഈ സ്ഥലം വെള്ളക്കെട്ടുകൾ നിറഞ്ഞ് കൊതുകുവളർത്തു കേന്ദ്രമായിരിക്കുകയാണ്. കെഎസ്ഇബിക്കെതിരേ ശക്തമായ സമര പരിപാടികൾക്ക് നേതൃത്വം നൽകാൻ തലയാട് മേഖല കോൺഗ്രസ് കമ്മിറ്റി യോഗത്തിൽ തീരുമാനിച്ചു. പി.കെ. മോഹൻദാസ് അധ്യക്ഷത വഹിച്ചു. ലാലി രാജു, കെ.കെ. ബിജു, ടി.കെ. മുഹമ്മദലി, എൻ.ജെ. മാത്യു, രാജു തലയാട്, ഇമ്മാനുവൽ, ഷാജു നരിപ്പാറ, പ്രസാദ് മാനുവൽ എന്നിവർ പ്രസംഗിച്ചു.

ടൈപ്പ് 1 പ്രമേഹബാധിതരായ കുട്ടികള്‍ക്ക് ജില്ലാ ഭരണകൂടത്തിന്‍റെ കരുതല്‍

കോഴിക്കോട്: ടൈപ്പ് 1 പ്രമേഹബാധിതരായ കുട്ടികളുടെ സംരക്ഷണം ലക്ഷ്യമിട്ട് ജില്ലാ ഭരണകൂടം സൗഖ്യ പദ്ധതിയുടെ ഭാഗമായി പ്രത്യേക പദ്ധതി ആവിഷ്‌കരിക്കുന്നു. ജില്ലാ വിദ്യാഭ്യാസ പരിശീലന കേന്ദ്രം (ഡയറ്റ്), ടൈപ്പ് 1 ഡയബറ്റിക്‌സ് വെല്‍ഫെയര്‍ സൊസൈറ്റി എന്നിവയുടെ സഹകരണത്തോടെയാണ് പദ്ധതി നടപ്പാക്കുന്നത്. ജില്ലയില്‍ ടൈപ്പ് 1 പ്രമേഹബാധിതരായ 300ഓളം കുട്ടികള്‍ക്ക് പദ്ധതിയുടെ ഭാഗമായി തുടര്‍ച്ചയായ ഗ്ലൂക്കോസ് നിര്‍ണയ സംവിധാനം (സിജിഎം) സൗജന്യമായി ലഭ്യമാക്കും. കോഴിക്കോട്ടെ വിവിധ ആശുപത്രികള്‍, ലയണ്‍സ്, റോട്ടറി ക്ലബുകള്‍ ഉള്‍പ്പെടെയുള്ള സന്നദ്ധ സംഘടനകള്‍, വ്യാപാരി-വ്യവസായി സംരംഭകര്‍, സേവന സംഘടനകള്‍ തുടങ്ങിയവരുടെ സഹകരണത്തോടെ 1000 സിജിഎമ്മുകള്‍ സമാഹരിക്കാനാണ് ലക്ഷ്യമിടുന്നത്. ഓഗസ്റ്റ് 15ഓടെ ജില്ലയിലെ എല്ലാ ടൈപ്പ് 1 പ്രമേഹബാധിതരായ കുട്ടികള്‍ക്കും സിജിഎം സംവിധാനം ലഭ്യമാക്കുംവിധമാണ് പദ്ധതി ആസൂത്രണം ചെയ്തിട്ടുള്ളത്. അര്‍ഹരായ എല്ലാ കുട്ടികളുടെയും വിവരശേഖരണം പൂര്‍ത്തിയാക്കുകയും മാനദണ്ഡങ്ങള്‍ക്കനുസരിച്ച് സിജിഎമ്മുകള്‍ വിതരണം ചെയ്യുകയും ചെയ്യും. കുട്ടികളെ ആരോഗ്യകരമായ ജീവിതശൈലികള്‍ പരിശീലിപ്പിക്കുക, ടൈപ്പ് 1 പ്രമേഹബാധിതരായ കുട്ടികള്‍ അഭിമുഖീകരിക്കുന്ന വെല്ലുവിളികളെക്കുറിച്ച് പൊതുജനങ്ങളില്‍ അവബോധമുണ്ടാക്കുക, രോഗത്തെക്കുറിച്ചുള്ള ഗവേഷണാത്മക പഠനങ്ങള്‍ക്കും ഇടപെടലുകള്‍ക്കും പ്രോത്സാഹനം നല്‍കുക എന്നിവയാണ് പദ്ധതിയുടെ പ്രധാന ലക്ഷ്യങ്ങള്‍. ശരീരത്തിലെ പഞ്ചസാരയുടെ അളവ് നിയന്ത്രിക്കുന്ന സംവിധാനങ്ങളുടെ തകരാറോ അഭാവമോ ആണ് ടൈപ്പ് 1 പ്രമേഹത്തിന് കാരണമാകുന്നത്. ടൈപ്പ് 1 പ്രമേഹബാധിതര്‍ക്ക് ശരിയായ പരിചരണം ലഭിക്കാത്തതിനാല്‍ പ്രതീക്ഷിക്കുന്ന ആയുര്‍ദൈര്‍ഘ്യം പൂര്‍ത്തിയാക്കാന്‍ കഴിയുന്നില്ലെന്നാണ് പഠനങ്ങള്‍ സൂചിപ്പിക്കുന്നത്. വികസിത രാജ്യങ്ങളില്‍ ടൈപ്പ് 1 പ്രമേഹബാധിതരുടെ ശരാശരി ആയുര്‍ദൈര്‍ഘ്യം 70 വയസിന് മുകളിലാണെങ്കില്‍, ഇന്ത്യയില്‍ ഇത് 35 വയസില്‍ താഴെയാണ്. ജില്ലാ കളക്ടര്‍ സ്‌നേഹില്‍ കുമാര്‍ സിംഗ് വിളിച്ചുചേര്‍ത്ത യോഗത്തില്‍ റോട്ടറി, ലയണ്‍സ്, വിവിധ ആശുപത്രികള്‍, പത്ര-മാധ്യമ സ്ഥാപനങ്ങള്‍, സന്നദ്ധ സംഘടനകള്‍ എന്നിവയുടെ പ്രതിനിധികള്‍, പൗരപ്രമുഖര്‍ എന്നിവര്‍ പങ്കെടുത്തു. ജീവിത ശൈലി രോഗങ്ങള്‍ക്കെതിരായ സമഗ്ര അവബോധ-പ്രതിരോധ പരിപാടിയായ "സൗഖ്യ'യുടെ വിജയത്തിനായി എല്ലാവരുടെയും പൂര്‍ണ സഹകരണം നല്‍കണമെന്ന് ജില്ലാ കളക്ടര്‍ അഭ്യര്‍ഥിച്ചു.

വീട്ടമ്മക്ക് നേരെ അസഭ്യ വർഷവും ഭീഷണിയും; യുവാവിനെതിരേ കേസ്

നാദാപുര: വീട്ടമ്മയെ അസഭ്യം പറഞ്ഞതിനും ഭീഷണിമുഴക്കിയതിനും യുവാവിനെതിരേ നാദാപുരം പോലീസ് കേസെടുത്തു. മലയിൽ രാജേഷിനെതിരേയാണ് പോലീസ് കേസെടുത്തത്. വിഷ്ണുമംഗലം സ്വദേശിനിയുടെ പരാതിയിലാണ് നടപടി. പരാതിക്കാരിയുടെ വീടിന് സമീപത്തെ ഇടവഴിയിൽ വച്ച് പ്രതി വച്ചേക്കില്ലെന്ന് ഭീഷണിപ്പെടുത്തിയെന്നും പിന്നീട് ഫോണിൽ വിളിച്ച് അശ്ലീല ചുവയോടെ ചീത്തവിളിച്ചെന്നുമാണ് പരാതി.

ആരോഗ്യവകുപ്പിന്‍റെ നിർദേശങ്ങൾ അവഗണിച്ചു; ഗൃഹനാഥന് തടവും പിഴയും

നാദാപുരം: ഡെങ്കിപ്പനി പടർന്നുപിടിക്കെ വീടിന് പരിസരത്ത് കൊതുക് വളരുന്ന സാഹചര്യം ഉണ്ടാക്കിയതിനും വളർത്തു പൂച്ചകൾക്ക് പ്രതിരോധ വാക്സിൻ നൽകണമെന്നുമുള്ള ആരോഗ്യ വിഭാഗത്തിന്‍റെ നിർദേശങ്ങൾ അവഗണിച്ച ഗൃഹനാഥന് കോടതി ശിക്ഷ വിധിച്ചു. പുറമേരി അരൂരിലെ സുമാലയം രാജീവ(48) നെയാണ് നാദാപുരം ജുഡീഷൽ ഫസ്റ്റ്ക്ലാസ് മജിസ്ട്രേറ്റ് അമൃത അരവിന്ദ് 6000 രൂപ പിഴയും പിഴ അടച്ചില്ലെങ്കിൽ വിവിധ വകുപ്പുകളിലായി 45 ദിവസം തടവിനും ശിക്ഷ വിധിച്ചത്. പുറമേരി പഞ്ചായത്തിലെ അരൂരിൽ പകർച്ചവ്യാധി പ്രതിരോധ പ്രവർത്തനത്തിന്‍റെ ഭാഗമായി നടത്തിയ പരിശോധനയിൽ പ്ലാസ്റ്റിക് മാലിന്യം ഹരിത കർമസേനയ്ക്ക് കൈമാറാതെ വീടിന്‍റെ പരിസരത്ത് അലക്ഷ്യമായി തള്ളിയനിലയിലും കണ്ടെയ്നറുകളിലും ടയറുകളിലും വെള്ളം കെട്ടി നിന്ന് കൊതുക് വളരുന്ന സാഹചര്യം ഉണ്ടാക്കുകയും വളർത്തു മൃഗങ്ങളായ പ്രത്യേക ഇനം പൂച്ചകൾക്ക് പ്രതിരോധ കുത്തിവയ്പ്പ് എടുക്കാത്തതും കണ്ടെത്തിയിരുന്നു. എന്നാൽ ആരോഗ്യ വിഭാഗത്തിന്‍റെ പകർച്ചവ്യാധി പ്രതിരോധ പ്രവർത്തനത്തിൽ സഹകരിക്കണമെന്ന രേഖാമൂലമുള്ള നിർദേശം അവഗണിക്കുകയായിരുന്നു. ഇതേ തുടർന്ന് അധികൃതർ കേസ് ഫയൽ ചെയ്തു.

വഴിയോര വിളക്കുകൾ കണ്ണടച്ചു, കണ്ണുതുറക്കാതെ അധികൃതരും

കൂരാച്ചുണ്ട്: പഞ്ചായത്തിലെ വിവിധ വാർഡുകളിലായി സ്ഥാപിച്ചുള്ള വഴിയോര വിളക്കുകൾ കൂട്ടത്തോടെ കണ്ണടച്ച് പ്രദേശം ഇരുട്ടിലെന്ന് പരാതി. കൂരാച്ചുണ്ട് ടൗണിൽ സ്ഥാപിച്ച തെരുവുവിളക്കുകൾ അടുത്തിടെ മാറ്റി പ്രവർത്തനസജ്ജമാക്കി. എന്നാൽ പഞ്ചായത്തിലെ വാർഡുകളിലെ പൊതുവഴികൾ, റോഡുകൾ എന്നിവിടങ്ങളിലുള്ള വഴിയോര വിളക്കുകൾ ഒട്ടുമിക്കവയും പ്രവർത്തനരഹിതമായതിനാൽ ദുരിതമായി മാറിയിട്ടുണ്ട്. രാത്രിയായാൽ പലയിടങ്ങളിലും കാട്ടുപന്നി അടക്കമുള്ള വന്യമൃഗങ്ങളുടെ ശല്യം വ്യാപകമാണ്. മാത്രമല്ല തെരുവു നായകളുടെ ശല്യവും ഇഴജന്തുക്കൾ എന്നിവയെല്ലാം ഭീക്ഷണിയായി മാറുന്നുണ്ട്. തെരുവുനായകൾ കൂടുതലുള്ള പ്രദേശങ്ങളുമുണ്ട്. ഈ സാഹചര്യത്തിൽ പൊതുജനങ്ങൾക്ക് സുരക്ഷിതമായി യാത്ര ചെയ്യാൻ വഴിവിളക്കുകൾ പ്രവർത്തനസജ്ജമാക്കാൻ നടപടി വേണമെന്ന് സിപിഐ കൂരാച്ചുണ്ട് ബ്രാഞ്ച് കമ്മിറ്റി ആവശ്യപ്പെട്ടു. തെരുവുവിളക്കുകൾ സ്ഥാപിക്കുന്നത് നിലവാരം ഇല്ലാത്തവയായതിനാൽ മാസങ്ങൾ കഴിയുമ്പോൾ തന്നെ ഇവയുടെ പ്രവർത്തനം നിലയ്ക്കുകയാണെന്ന് യോഗം ആരോപിച്ചു. ഇത്തരം ബൾബുകളാണ് ഇപ്പോൾ വൈദ്യുത പോസ്റ്റുകളിൽ കാലങ്ങളായി കിടക്കുന്നത്. ഇതിന് ഒരു നടപടിയും അധികൃതർ സ്വീകരിക്കുന്നില്ല. നാട്ടിൽ തെരുവു നായകളുടെ ശല്യവും വർധിച്ചിട്ടും നടപടിയില്ല. കൂരാച്ചുണ്ട് പഞ്ചായത്തിലെ എല്ലാ വാർഡുകളിലും തെളിയാതെ കിടക്കുന്ന തെരുവു വിളക്കുകൾ പ്രവർത്തനസജ്ജമാക്കാൻ നടപടി സ്വീകരിക്കണമെന്നും യോഗം പഞ്ചായത്ത് ഭരണസമിതിയോട് ആവശ്യപ്പെട്ടു. ടി.കെ. ശിവദാസൻ അധ്യക്ഷത വഹിച്ചു. എ.കെ.പ്രേമൻ, പി.ടി. തോമസ് , വിനു മ്ലാക്കുഴിയിൽ, പ്രവീൺ ശങ്കരവേലിൽ, ഗോപിനാഥൻ, ഗോപാലൻ മണ്ടോപ്പാറ എന്നിവർ പ്രസംഗിച്ചു.

ജില്ലയില്‍ അധ്യാപക സ്ഥലംമാറ്റം അട്ടിമറിച്ചതായി ആരോപണം

പ്രതിഷേധവുമായി പ്രതിപക്ഷ അധ്യാപക സംഘടന കോഴിക്കോട്: ജില്ലയിൽ ഓൺലൈനായി അപേക്ഷിച്ച ചില അധ്യാപകർക്ക് സ്ഥലംമാറ്റം കൊടുക്കാതെ ചില സ്കൂളുകളിലെ ഒഴിവുകൾ ഒഴിച്ചിട്ടതായി ആരോപണം. വിദ്യാഭ്യാസ ഉപഡയറക്ടറുടെ ഓഫിസ് കേന്ദ്രീകരിച്ച് സർക്കാർ പ്രൈമറി, ഹൈസ്കൂൾ അധ്യാപകരുടെ ജില്ലാന്തര ഓൺലൈൻ സ്ഥലംമാറ്റം അട്ടിമറിക്കുന്നതിനെതിരേ പ്രതിഷേധവുമായി പ്രതിപക്ഷ അധ്യാപക സംഘടന രംഗത്ത്. എല്ലാവർഷവും പൊതുവിദ്യാഭ്യാസ വകുപ്പ് പൊതുസ്ഥലംമാറ്റത്തിന് അപേക്ഷ ക്ഷണിക്കുകയും മാനദണ്ഡങ്ങളുടെ അടിസ്ഥാനത്തിൽ സീനിയോറിറ്റി ലിസ്റ്റ് പ്രസിദ്ധീകരിക്കുകയും ചെയ്യും. പരാതികൾ പരിഹരിച്ച് തയാറാക്കുന്ന പട്ടികയിൽ നിന്നാണു സ്ഥലംമാറ്റം. ജൂൺ ആദ്യവാരം ഈ പട്ടികയിൽ നിന്ന് കുറച്ച് പേർക്ക് സ്ഥലംമാറ്റം നൽകി. എന്നാൽ ചില സ്കൂളുകളിലെ ഒഴിവുകൾ മനഃപൂർവം നികത്താതെയിട്ടു. തുടർന്ന് ഈ സ്കൂളുകളിലേക്ക് തയാറാക്കിയ സീനിയോറിറ്റി പട്ടികയിൽ ഉൾപ്പെട്ട അധ്യാപകർ വിദ്യാഭ്യാസ ഉപഡയറക്ടറുടെ ഓഫീസില്‍ പരാതി നൽകി. എന്നാൽ വകുപ്പ് കൈകാര്യം ചെയ്യുന്ന പാർട്ടിയുടെയും ഭരണപക്ഷ അധ്യാപകസംഘടനയുടെയും സമ്മർദങ്ങളെത്തുടർന്ന് സീനിയോറിറ്റി പട്ടികയിൽ ഉൾപ്പെടാത്ത അധ്യാപകർക്ക് സ്ഥലംമാറ്റ ഉത്തരവ് രണ്ട് തവണ പുറപ്പെടുവിച്ചുവെന്നാണ് അധ്യാപക സംഘടനകളുടെ ആരോപണം. ഈ വർഷത്തിലെ തസ്തിക നിർണയ പ്രകാരം തസ്തിക നഷ്ടപ്പെട്ട അധ്യാപകർ ത്രിശങ്കുവിൽ നിൽക്കുമ്പോഴാണ് ഇത്തരം സ്ഥലംമാറ്റം. ജില്ലാ വിദ്യാഭ്യാസ ഉപഡയറക്ടറുടെ ഓഫീസിൽ ഇത്തരം അട്ടിമറി തുടർക്കഥയാണെന്ന് ആരോപണം ഉയർന്നിട്ടുണ്ട്. കഴിഞ്ഞ വർഷം ആദ്യം ഇറക്കിയ പൊതുസ്ഥലംമാറ്റ ഉത്തരവിൽ ഉൾപ്പെടാത്തവരെ പിന്നീട് തിരുകിക്കയറ്റിയിരുന്നു. ഡിഡിഇ ഒപ്പിട്ട പട്ടികയിൽ വെട്ടിത്തിരുത്തിയ സംഭവം വിവാദമായിരുന്നു.വിദ്യാഭ്യാസ ഉപഡയറക്ടറെയും ബന്ധപ്പെട്ട സെക്‌ഷൻ ക്ലർക്കുമാരെയും നോക്കുകുത്തികളാക്കിയാണ് ചിലർ ഓൺലൈൻ സ്ഥലംമാറ്റം അട്ടിമറിക്കുന്നതെന്ന് കെപിഎസ്ടിഎ ജില്ലാ കമ്മിറ്റി ആരോപിക്കുന്നു.

ലോഡ്ജ് അടിച്ചുതകർത്ത് പണം അപഹരിച്ച പ്രതി പിടിയിൽ

കോഴിക്കോട്: കല്ലായി റോഡിലുള്ള ലോഡ്ജിലെ റിസപ്ഷനിൽ അതിക്രമിച്ച് കയറി ഭീകരാന്തരീക്ഷം സൃഷ്ടിക്കുകയും ജീവനക്കാരെ ഭീഷണിപ്പെടുത്തി മേശവലിപ്പിലുണ്ടായിരുന്ന പണം അപഹരിക്കുകയും ചെയ്ത കേസില്‍ പ്രതി അറസ്റ്റില്‍. ചാലപ്പുറം സ്വദേശി ഫാത്തിമ്മ ഹൌസിൽ മിജാഷിർ (39 ) നെ കസബ പോലീസ് അറസ്റ്റ് ചെയ്തു. ന്യൂ കീർത്തി മഹൽ ലോഡ്ജിലെ റിസപ്ഷനിലെ രണ്ട് ലാൻഡ് ഫോണുകളും പ്രിന്‍ററും പ്രതി എറിഞ്ഞ് പൊട്ടിക്കുകയും ലോഡ്ജിലെ ജീവനക്കാരെ ആക്രമിക്കുകയും മൊബൈൽ ഫോൺ പിടിച്ച് പറിച്ച് എറിഞ്ഞ് പൊട്ടിക്കാൻ ശ്രമിക്കുകയുമായിരുന്നു. തുടർന്ന് കസബ പോലീസ് കേസ് രജിസ്റ്റർ ചെയ്ത് അന്വേഷണം നടത്തിവരവെ സിസിടിവി ദൃശ്യങ്ങളിൽ നിന്ന് പ്രതിയെ മനസിലാക്കുകയും കസ്റ്റഡിയിലെടുക്കുകയുമായിരുന്നു.

ലഹരിക്കെതിരായ പോരാട്ടം സ്‌കൂളുകളില്‍നിന്നു തുടങ്ങണം: സംവിധായകന്‍ ജിന്‍റോ തോമസ്

ദീപിക കളര്‍ ഇന്ത്യ മത്സരത്തിന്‍റെ രജിസ്‌ട്രേഷന്‍ ലോഞ്ചിംഗ് നടത്തി കോഴിക്കോട്: ലഹരിക്കെതിരായ പോരാട്ടം സ്‌കൂളുകളില്‍നിന്നു തുടങ്ങണമെന്ന് ചലച്ചിത്രസംവിധായകന്‍ ജിന്‍റോ തോമസ്. പാട്ടും നൃത്തവും വരയും ലഹരിയാക്കിമാറ്റാന്‍ കുട്ടികള്‍ക്കു കഴിയണമെന്നും അദ്ദേഹം പറഞ്ഞു. പത്തുലക്ഷത്തിലധികം വിദ്യാര്‍ഥികള്‍ മാറ്റുരയ്ക്കുന്ന ചിത്രരചനാമത്സരമായ ദീപിക കളര്‍ ഇന്ത്യ മത്സരത്തിന്‍റെ രജിസ്‌ട്രേഷന്‍ ലോഞ്ചിംഗ് ബാലുശേരി ജയ്‌റാണി എസ്എബിഎസ് പബ്ലിക് സ്‌കൂളില്‍ നിര്‍വഹിക്കുകയായിരുന്നു അദ്ദേഹം. ചിത്രരചനാ മത്സരത്തിന്‍റെ തീം ആയ "നോ ഡ്രഗ് നോ വാര്‍' ഏറെ പ്രസ്‌കതമായ മുദ്രാവാക്യമാണെന്ന് അദ്ദേഹം പറഞ്ഞു. ജീവിതത്തോടാണ് നമ്മള്‍ യുദ്ധം ചെയ്യേണ്ടത്. കുട്ടികളാണ് നാളെ സമൂഹത്തെയും നാടിനെയും നയിക്കേണ്ടത്. ശാസ്ത്രജ്ഞരും രാഷ്ട്രതന്ത്രജ്ഞരുമെല്ലാം ആവേണ്ടവര്‍. മയക്കുമരുന്ന് ഉപയോഗിച്ചാല്‍ പിന്നീട് സാധാരണ ജീവിതത്തിലേക്ക് തിരിച്ചുവരാന്‍ കഴിയില്ല. ജീവിതകാലം മുഴുവന്‍ രോഗിയായി മാറുന്ന അവസ്ഥയുണ്ടാകും. അതുകൊണ്ട് തമാശയ്ക്കുപോലും ഒരിക്കലും ലഹരി ഉപയോഗിക്കാന്‍ പാടില്ലെന്ന് അദ്ദേഹം കുട്ടികളെ ഉദ്‌ബോധിപ്പിച്ചു. ലഹരിയെ മാറ്റി നിര്‍ത്താനും ചവിട്ടിപുറത്താക്കാനുമുള്ള തന്‍റേടം കുട്ടികള്‍ ആര്‍ജിക്കണം. ജീവിതത്തിനു പ്രചോദനമാകുന്ന നല്ല കാര്യങ്ങള്‍ തുടങ്ങാന്‍ കുട്ടികള്‍ക്കു കഴിയണം. തന്‍റെ സിനിമാ ജീവിതത്തില്‍ ഏറ്റവും കൂടുതല്‍ പ്രോത്സാഹനം നല്‍കിയത് ദീപികയാണെന്ന് അദ്ദേഹം പറഞ്ഞു.മയക്കുമരുന്നനെതിരേ ദീപികയുടെ പോരാട്ടം അഭിമാനകരമാണെന്നും ജിന്‍റോ തോമസ് അഭിപ്രായപ്പെട്ടു. ജയ്‌റാണി എസ്എബിഎസ് പബ്ലിക് സ്‌കൂള്‍ പ്രിന്‍സിപ്പല്‍ സിസ്റ്റര്‍ ഫിലോ തോമസ് അധ്യക്ഷത വഹിച്ചു. കേരളത്തെ അക്ഷരങ്ങള്‍ കൊണ്ട് വിളിച്ചുണര്‍ത്തിയ പത്രമാണ് ദീപികയെന്ന് അവര്‍ പറഞ്ഞു. സംസ്ഥാനത്ത് പുതിയ വായനാസംസ്‌കാരത്തിനു തുടക്കം കുറിച്ച പത്രം. സ്‌നേഹത്തിന്‍റെ പങ്കുവയ്ക്കലാണ് ദീപിക നടത്തുന്നത്. ദീപികയുടെ കളര്‍ ഇന്ത്യ ചിത്രരചനാമത്സരം കുട്ടികളില്‍ സര്‍ഗാത്മകത വളര്‍ത്തുന്നതാണെന്നും അവര്‍ പറഞ്ഞു. ദീപിക കോഴിക്കോട് റസിഡന്‍റ് മാനേജര്‍ ഫാ. ഷെറിന്‍ പുത്തന്‍പുരയ്ക്കല്‍ ആമുഖ ഭാഷണവും ബാലുശേരി സെന്‍റ് മേരീസ് ചര്‍ച്ച് വികാരി ഫാ. മെല്‍വിന്‍ വെള്ളയ്ക്കാകുടിയില്‍ അനുഗ്രഹ പ്രഭാഷണവും നടത്തി. സ്റ്റാഫ് സെക്രട്ടറി ശ്രുതിമോള്‍ ജോസഫ് സ്വാഗതവും വൈസ് പ്രിന്‍സിപ്പല്‍ സിസ്റ്റര്‍ അനുഷാ മാത്യു നന്ദിയും പറഞ്ഞു.വേദലക്ഷ്മി രത്‌നഹരി, ജോസ്‌വിന്‍ സണ്ണി എന്നിവര്‍ ഗാനങ്ങള്‍ ആലപിച്ചു. സ്‌കൂള്‍ നൃത്തസംഘത്തിന്‍റെ നൃത്ത പരിപാടികളും അരങ്ങേറി.

കല്ലായി പുഴയിലെ ചെളി നീക്കല്‍ 2026 മാര്‍ച്ചില്‍ പൂര്‍ത്തീകരിക്കും

മന്ത്രിയുടെ നേതൃത്വത്തില്‍ യോഗം കോഴിക്കോട്: കല്ലായി പുഴയില്‍ അടിഞ്ഞുകൂടിയ ചെളി 2026 മാര്‍ച്ചോടെ പൂര്‍ണമായി നീക്കം ചെയ്ത് ഉദ്ഘാടനം നടത്തുമെന്ന് മന്ത്രി റോഷി അഗസ്റ്റിന്‍. കല്ലായി പുഴ നവീകരണവുമായി ബന്ധപ്പെട്ട് ഗവ. ഗസ്റ്റ് ഹൗസില്‍ ചേര്‍ന്ന അവലോകന യോഗത്തില്‍ സംസാരിക്കുകയായിരുന്നു മന്ത്രി. ടൂറിസം സാധ്യതയടക്കം ഉള്‍പ്പെടുത്തി പദ്ധതിയുടെ തുടര്‍പ്രവൃത്തിയുമായി ബന്ധപ്പെട്ട് ജലസേചന വകുപ്പ് വിശദമായ ഡിപിആര്‍ തയാറാക്കി കോര്‍പറേഷന് നല്‍കണം. ഓരോ മാസവും ചെയ്യേണ്ട കാര്യങ്ങള്‍ പ്രത്യേകം പട്ടിക തയാറാക്കി അവലോകനം നടത്തണമെന്നും മന്ത്രി ഉദ്യോഗസ്ഥര്‍ക്ക് നിര്‍ദേശം നല്‍കി. പ്രവൃത്തി പുരോഗമിക്കുന്ന വേളയില്‍ ഇതിന്‍റെ വേഗം കൂട്ടാനുള്ള എല്ലാ സാധ്യതകളും ഉപയോഗപ്പെടുത്തണം. ഒരു തദ്ദേശ സ്ഥാപനം പുഴ സംരക്ഷണത്തിന് കോടികള്‍ ചെലവിട്ട് ഇടപെടല്‍ നടത്തുന്നത് മാതൃകാപരമാണെന്നും മന്ത്രി കൂട്ടിച്ചേര്‍ത്തു.പുഴ ശുചീകരണത്തിന് 12.98 കോടിയുടെ പദ്ധതിയാണ് കോര്‍പറേഷന്‍ ആവിഷ്‌കരിച്ചത്. ബാര്‍ജ്, ഡ്രഡ്ജര്‍, എസ്‌കവേറ്റര്‍ എന്നിവ ഉപയോഗിച്ചാണ് ചെളി നീക്കം ചെയ്യുക. ഇവ ബാര്‍ജില്‍കൊണ്ടുപോയി കടലില്‍ നിക്ഷേപിക്കും. കോതി മുതല്‍ മാങ്കാവ് വരെയുള്ള ഭാഗത്തെ 3.29 ലക്ഷം ക്യൂബിക് മീറ്റര്‍ ചെളിയാണ് എടുക്കുക. നിലവില്‍ 300 മീറ്റര്‍ ഭാഗികമായും 180 മീറ്ററില്‍ പൂര്‍ണമായും നീക്കം ചെയ്തിട്ടുണ്ട്. കടലിലെ പ്രതികൂല കാലാവസ്ഥ കണക്കിലെടുത്ത് പ്രവൃത്തി താല്‍ക്കാലികമായി നിര്‍ത്തിവെച്ചിരിക്കുകയാണ്. നഗരത്തിലെ വെള്ളക്കെട്ടിനുള്ള ശാശ്വതപരിഹാരമെന്ന രീതിയിലാണ് കല്ലായിപ്പുഴയിലെ ചെളിനീക്കലിനെ കാണുന്നത്. പ്രവൃത്തി പൂര്‍ത്തിയാകുന്നതോടെ കല്ലായിയിലെയും കനോലി കനാലിലെയും ഒഴുക്ക് സുഗമമാകും.

സംരക്ഷണഭിത്തിയില്ല: മലയോര ഹൈവേ നിര്‍മാണസ്ഥലത്ത് കൃഷിയിടങ്ങള്‍ ഇടിഞ്ഞുതാഴുന്നു

ജോൺസൺ പൂകമല കൂരാച്ചുണ്ട്: മലയോര ഹൈവേ നിർമ്മാണ പ്രവർത്തി നടക്കുന്ന പടിക്കൽവയൽ- ഇരുപത്തെട്ടാംമൈൽ റോഡിൽ കൂരാച്ചുണ്ട് പഞ്ചായത്ത് ആറാം വാർഡിൽ ഉൾപ്പെട്ട ഇരുപത്തെട്ടാംമൈൽ മേഖലയിൽ റോഡിന് വീതി വർധിപ്പിക്കുന്നതിനായി ഇടിച്ചു നീക്കിയത് മൂലം കൃഷിയിടങ്ങൾ ഇടിഞ്ഞു തകരുന്നു. റോഡിനായി കൃഷിയിടം ഇടിച്ചു നിരത്തിയ സ്ഥലത്ത് സംരക്ഷണ ഭിത്തി നിർമിക്കാത്തതുമൂലം നിരവധി കൃഷിയിടങ്ങളിലെ കാർഷിക വിളകളാണ് നാശത്തിലായത്. മഴ കനത്തതോടെ നാല്‍പതടിയോളം ഉയരത്തിലുള്ള തിണ്ട് നിരന്തരം പല സ്ഥലത്തും ഇടിഞ്ഞ് തകരുകയാണ്. എന്നാൽ ഈ മേഖലയിൽ മണ്ണ് നീക്കിയ ഭാഗങ്ങളിൽ സംരക്ഷണ ഭിത്തി നിർമിക്കണമെന്നും ഈ ഭാഗത്ത് പൊതുമരാമത്ത് വകുപ്പിന്‍റെ അധീനതയിലായി റോഡിന് ആവശ്യമായ വീതി വർധിപ്പിക്കാൻ റോഡിന് മറുഭാഗത്ത് സ്ഥലമുണ്ടായിട്ടും കൃഷിയിടം ഇടിച്ചു നീക്കിയെന്നും ആക്ഷേപമുണ്ട്. റോഡിന്‍റെ മറുഭാഗം താഴ്ചയുള്ള ഭാഗമാണ്. ഈ ഭാഗത്തും സംരക്ഷണമതിൽ നിർമിക്കുന്നില്ല. 200 മീറ്ററോളം ദൂരത്തിൽ ഈ മേഖലയിൽ മാത്രം റോഡിന് കരിങ്കൽ ഭിത്തി നിർമ്മിക്കാതെയാണ് പ്രവർത്തി നടക്കുന്നത്. ഉയർന്നു നിൽക്കുന്ന റോഡിന്‍റെ താഴ്ഭാഗത്തായി കൃഷിയിടങ്ങളും വീടുകളുമുണ്ട്. കരിങ്കൽഭിത്തി നിർമിച്ചില്ലെങ്കിൽ റോഡ് ഇടിഞ്ഞു തകർന്നാൽ കൃഷിയിടങ്ങൾക്കും വീടുകൾക്കും ഭീഷണിയാകുമെന്നുറപ്പാണ്. ഇവിടം ഒഴികെ താഴ്ചയുള്ള ബാക്കി ഭാഗങ്ങളിലെല്ലാം കരിങ്കൽ ഭിത്തികൾ നിർമിച്ചിട്ടുണ്ട്. റോഡിന്‍റെ ഈ മേഖലയിൽ ഇരുഭാഗങ്ങളിലും സംരക്ഷണഭിത്തി നിർമിക്കണമെന്നാണ് ആവശ്യം ഉയരുന്നത്. റോഡരികിലെ കൃഷിയിടങ്ങളിലേക്കുള്ള വഴിയും ഇല്ലാതെയായതായും പരാതിയുണ്ട്. കാലാന്തരത്തിൽ മണ്ണ് ഇടിഞ്ഞ് സമീപത്തെ ഡാം റിസർവോയറിൽ അടിയുന്നതും ഭാവിയിൽ പ്രശ്നങ്ങൾ സൃഷ്ടിക്കാനിടയുണ്ട്. കല്ലാനോട് ആറാം വാർഡിലെ തടത്തിൽ ജോർജ് തോമസ്, തടത്തിൽ സണ്ണി തോമസ്, തടത്തിൽ നിമിഷ, ലവ്‌ലി സണ്ണി, ജോർജ് ചിറ്റക്കാട്ടുകുഴി, തടത്തിൽ ഫിലോമിന, ഷൈൻ ജോർജ് തുടങ്ങിയവരുടെ കൃഷിയിടങ്ങളിലെ തെങ്ങ് കമുക് റബർ തുടങ്ങിയ കൃഷി വിളകളാണ് ഇത്തരത്തിൽ ഭീഷണി നേരിടുന്നത്. ഇതു സംബന്ധിച്ച് കെആർഎഫ്ബി വകുപ്പ് ഉദ്യോഗസ്ഥർക്ക് പരാതി നൽകുമെന്നും കർഷകർ അറിയിച്ചു. ഇടിയുന്ന ഭാഗത്ത് സംരക്ഷണഭിത്തി കെട്ടണം കൂരാച്ചുണ്ട്: മലയോര ഹൈവേ നിർമാണത്തിനായി ഭൂമി വിട്ടു നൽകിയ നിരവധി പേരുടെ കൃഷിയിടങ്ങൾ വീണ്ടും വീണ്ടും ഇടിഞ്ഞ് തകരുകയാണ് റോഡിന്‍റെ രണ്ടു വശങ്ങളിലും കെട്ടില്ലാത്തത് മൂലം വലിയ പ്രതിസന്ധിയാണ് നേരിടുന്നത്. റോഡിന്‍റെ താഴ്ഭാഗത്തുള്ള കർഷകർക്കും അവരുടെ കൃഷിസ്ഥലം നശിക്കുന്നു. താഴെ ഭാഗത്ത് പതിനഞ്ച് മീറ്ററോളം പിഡബ്ല്യൂഡിക്ക് സ്ഥലമുണ്ട്. ആ ഭാഗം കരിങ്കൽ ഭിത്തി നിർമിച്ച് സംരക്ഷിക്കുകയും ചെയ്തുകൊണ്ട് റോഡിന്‍റെ ഇടിയുന്ന ഭാഗത്ത് സംരക്ഷണഭിത്തി കെട്ടുകയും ചെയ്താൽ മാത്രമെ പ്രശ്ന പരിഹാരമാവുകയുള്ളു. മഴ കനത്തതോടെ മണ്ണിടിച്ചിൽ കൂടി കൂരാച്ചുണ്ട്: മലയോര ഹൈവേ നിർമാണ പ്രവൃത്തി നടക്കുന്ന ഇരുപത്തെട്ടാം മൈൽ മേഖലയിലെ 200 മീറ്റർ ദൂരം വരുന്ന റോഡിന്‍റെ ഇരു ഭാഗങ്ങളിലും സംരക്ഷണ ഭിത്തികൾ നിർമിച്ച് റോഡിനും ഇരുഭാഗങ്ങളിലുമുള്ള കർഷകരുടെ കൃഷിയിടങ്ങൾക്കും സുരക്ഷ ഉറപ്പാക്കാൻ ബന്ധപ്പെട്ട അധികാരികൾ നടപടി സ്വീകരിക്കേണ്ടതുണ്ട്. മഴ കനത്തതോടെ ഈ മേഖലയിലെ മണ്ണിടിച്ചിൽ മൂലം നിരവധി കൃഷിയിടങ്ങളും കാർഷിക വിളകളും തകർന്നടിയുകയാണ്. അടിയന്തരമായി പരിഹാരം കാണണം.

തീരദേശ സദസ് നേതൃസംഗമം

കോഴിക്കോട്: കടല്‍ കടലിന്‍റെ മക്കള്‍ക്ക് കടലോര മക്കളോടൊപ്പം കോണ്‍ഗ്രസ് എന്ന മുദ്രാവാക്യമുയര്‍ത്തി ജില്ലാ കോണ്‍ഗ്രസ് കമ്മിറ്റി ആഗസ്ത് രണ്ട് മുതല്‍ അഞ്ച് വരെ നടത്തുന്ന തീരദേശ സദസ് വിജയിപ്പിക്കുന്നതിനുവേണ്ടിയുള്ള മേഖലാ യോഗങ്ങള്‍ വടകര, കൊയിലാണ്ടി, കോഴിക്കോട് എന്നിവിടങ്ങളില്‍ നടന്നു. ആഗസ്ത് രണ്ടിന് അഴിയൂര്‍, വടകര മൂന്നിന് പയ്യോളി, കൊയിലാണ്ടി നാലിന് കാപ്പാട്, പുതിയാപ്പ, അഞ്ചിന് മുഖദാര്‍, ചാലിയം എന്നിവിടങ്ങളില്‍ നടക്കുന്ന തീരദേശ സദസില്‍ കടലോരമേഖലയിലെ വ്യത്യസ്ത വിഷയങ്ങളില്‍ മത്സ്യതൊഴിലാളികളില്‍നിന്ന് വിവരശേഖരണം നടത്തും. ഇതിന്‍റെ അടിസ്ഥാനത്തില്‍ ആവശ്യമായ സമരങ്ങളും നിയമ പോരാട്ടങ്ങളും ജില്ലാ കോണ്‍ഗ്രസ് കമ്മിറ്റി ഏറ്റെടുത്ത് നടത്തും. തീരദേശ സദസ്സില്‍ ഉയര്‍ന്നുവന്ന വിഷയങ്ങള്‍ കെപിസിസിക്കും പ്രതിപക്ഷ നേതാവിനും കൈമാറും. പ്രവര്‍ത്തക സംഗമങ്ങള്‍ ഡിസിസി പ്രസിഡന്‍റ് അഡ്വ. കെ. പ്രവീണ്‍കുമാര്‍ ഉദ്ഘാടനം ചെയ്തു. ഡിസിസി ജനറല്‍ സെക്രട്ടറി നിജേഷ് അരവിന്ദ്, സത്യനാഥന്‍ മാടഞ്ചേരി, സത്യന്‍ പുതിയാപ്പ, ഡിസിസി ഭാരവാഹികള്‍, ബ്ലോക്ക് കോണ്‍ഗ്രസ് കമ്മിറ്റി പ്രസിഡന്‍റുമാര്‍, മണ്ഡലം പ്രസിഡന്‍റുമാര്‍, മത്സ്യതൊഴിലാളി കോണ്‍ഗ്രസ് നേതാക്കള്‍ എന്നിവര്‍ പങ്കെടുത്തു.

ബാലുശേരി ഭക്ഷ്യസംസ്‌കരണ-പോഷകാഹാര കേന്ദ്രത്തിന്‍റെ ചുമതല ഇനി ബ്ലോക്ക് പഞ്ചായത്തിന്

ബാലുശേരി: ഭക്ഷ്യസംസ്‌കരണ-പോഷകാഹാര കേന്ദ്രത്തിന്‍റെ നവീകരണത്തിന് വഴിയൊരുങ്ങുന്നു. ഗ്രാമവികസന വകുപ്പിന് കീഴില്‍ പ്രവര്‍ത്തിച്ചിരുന്ന കേന്ദ്രം ബാലുശേരി ബ്ലോക്ക് പഞ്ചായത്തിന് കൈമാറിയതോടെയാണ് കൂടുതല്‍ വികസന പ്രവര്‍ത്തങ്ങള്‍ക്ക് സാധ്യത തെളിഞ്ഞത്. ദക്ഷിണേന്ത്യയിലെ ആദ്യ ഭക്ഷ്യ സംസ്‌കരണ-പോഷകാഹാര കേന്ദ്രമാണ് ബാലുശേരിയിലേത്. 1982ല്‍ യുനിസെഫിന്‍റെ സഹായത്തോടെയാണ് കേന്ദ്രസര്‍ക്കാര്‍ ഇതാരംഭിച്ചത്. 1988ല്‍ സംസ്ഥാന ഗ്രാമവികസന വകുപ്പിന് വിട്ടുനല്‍കി. വിളവെടുപ്പിന് ശേഷം ഭക്ഷ്യധാന്യങ്ങള്‍ സംസ്‌കരിച്ചെടുക്കുന്നതിനും മൂല്യവര്‍ധിത ഉല്‍പന്നങ്ങളാക്കി വിപണനം നടത്തി വരുമാനം കണ്ടെത്തുന്നതിനും ഗ്രാമീണ ജനതയെ പ്രാപ്തരാക്കുകയെന്ന ലക്ഷ്യത്തോടെയാണ് സ്ഥാപനം ആരംഭിച്ചത്. ബേക്കറി പലഹാരങ്ങള്‍, പഴങ്ങള്‍ ഉപയോഗിച്ച് ജാം, സ്‌ക്വാഷ് എന്നിവ നിര്‍മിക്കുന്നതിലാണ് ഇവിടെ പരിശീലനം നല്‍കുന്നത്. ഇവിടെനിന്ന് പരിശീലനം നേടിയവര്‍ കേന്ദ്രത്തിലെ സംസ്‌കരണ സംവിധാനം ഉപയോഗിച്ച് ഉല്‍പന്നങ്ങള്‍ തയാറാക്കി വിപണനം നടത്തുന്നുണ്ട്. സ്ത്രീകള്‍ക്കും യുവാക്കള്‍ക്കും കൂടുതല്‍ തൊഴിലവസരങ്ങള്‍ കണ്ടെത്താന്‍ കഴിയുംവിധം കേന്ദ്രത്തെ വികസിപ്പിക്കാനാണ് ബ്ലോക്ക് പഞ്ചായത്ത് ലക്ഷ്യമിടുന്നത്. കെ.എം. സച്ചിന്‍ദേവ് എംഎല്‍എ, ബ്ലോക്ക് പഞ്ചായത്ത് പ്രസിഡന്‍റ് വി.കെ. അനിത എന്നിവരുടെ ശ്രമഫലമായാണ് ഭക്ഷ്യസംസ്‌കരണ-പോഷകാഹാര കേന്ദ്രത്തിന്‍റെ ചുമതല ബ്ലോക്ക് പഞ്ചായത്തിന് ലഭിച്ചത്.

4.5 കോടി രൂപയുടെ പദ്ധതികള്‍ക്ക് ഭരണാനുമതി

കുന്നമംഗലം: കുന്നമംഗലം നിയോജക മണ്ഡലത്തില്‍ നാല് പ്രവൃത്തികള്‍ക്കായി 4.5 കോടി രൂപയുടെ ഭരണാനുമതി ലഭിച്ചതായി പി.ടി.എ. റഹീം എംഎല്‍എ അറിയിച്ചു. കാരന്തൂര്‍ പാറക്കടവ് റോഡിന് രണ്ട് കോടി, പുവാട്ടുപറമ്പ്-കോട്ടായിത്താഴം റോഡിന് 1.75 കോടി, ചെത്തുകടവ് വരിട്ട്യാക്കില്‍ ബൈപാസ് സ്ഥലമെടുപ്പിന് 50 ലക്ഷം, കളന്‍തോട് ടൗണില്‍ കൂളിമാട് റോഡ് ജംഗ്ഷന്‍ സ്ഥലമെടുപ്പിന് 25 ലക്ഷം എന്നിങ്ങനെയാണ് തുക അനുവദിച്ചത്. 2025-26 സാമ്പത്തിക വര്‍ഷത്തെ ബജറ്റില്‍ ധനകാര്യ മന്ത്രി പ്രഖ്യാപിച്ച പദ്ധതികള്‍ക്കാണ് സര്‍ക്കാര്‍ ഉത്തരവിലൂടെ തുക അനുവദിച്ചതെന്നും പദ്ധതികള്‍ യാഥാര്‍ഥ്യമാക്കാന്‍ അടിയന്തര നടപടി സ്വീകരിക്കാന്‍ പൊതുമരാമത്ത് വകുപ്പ് ഉദ്യോഗസ്ഥര്‍ക്ക് നിര്‍ദേശം നല്‍കിയതായും എംഎല്‍എ അറിയിച്ചു.

വടകരയില്‍ വാഹന പരിശോധന: നിരവധി വാഹനങ്ങള്‍ക്ക് പിഴയിട്ടു

വടകര: ആര്‍ടിഒയുടെ നിര്‍ദേശപ്രകാരം വടകരയില്‍ നടത്തിയ പ്രത്യേക വാഹനപരിശോധനയില്‍ നിയമം ലംഘിച്ച് വാഹനമോടിച്ചവര്‍ക്കെതിരേ നടപടി സ്വീകരിച്ചു. ടാക്‌സും ഫിറ്റ്നസ് സര്‍ട്ടിഫിക്കറ്റും ഇന്‍ഷൂറന്‍സും ഇല്ലാതെ വാഹനമോടിക്കല്‍, നമ്പര്‍ പ്ലേറ്റ് പ്രദര്‍ശിപ്പിക്കാതിരിക്കല്‍, നിരോധിത എയര്‍ ഹോണ്‍ തുടങ്ങിയ നിയമലംഘനങ്ങള്‍ക്കെതിരെയാണ് നടപടിയെടുത്തത്. ഹെല്‍മറ്റ് ഇല്ലാതെ യാത്ര ചെയ്ത 10 ഇരുചക്രവാഹന യാത്രക്കാരില്‍ നിന്ന് പിഴ ഈടാക്കി. ഹസാര്‍ഡ് ഗുഡ്സ് കൊണ്ടുപോകുന്ന വാഹനങ്ങള്‍ പരിശോധിച്ചതില്‍ ക്രമക്കേടുകള്‍ കണ്ടെത്തി. ഇത്തരം അഞ്ചു വാഹനങ്ങള്‍ക്കെതിരേയും നടപടി സ്വീകരിച്ചു. റോഡ് നികുതി ഇല്ലാതെയും ഫിറ്റ്നസ് സര്‍ട്ടിഫിക്കറ്റ് കൃത്യമായി പ്രദര്‍ശിപ്പിക്കാതെയും സര്‍വ്വീസ് നടത്തിയ റോഡ് നിര്‍മാണ കമ്പനിയുടെ വാഹനങ്ങള്‍ക്കെതിരെയും പിഴ ചുമത്തി. സര്‍വ്വീസ് നിര്‍ത്തിവയ്ക്കാനുള്ള നിര്‍ദേശവും നല്‍കിയിട്ടുണ്ട്. വരും ദിവസങ്ങളിലും പരിശോധന തുടരുമെന്ന് വടകര ആര്‍ടിഒ പി.രാജേഷ് അറിയിച്ചു.

അജ്ഞാത ജീവിയുടെ ആക്രമണത്തിൽ വളർത്തു നായക്ക് പരിക്ക്

കൂമ്പാറ: കൂമ്പാറ ചങ്ങാത്തൊടിയിൽ ബാബുവിന്‍റെ വളർത്തു നായയ്ക്ക് അജ്ഞാത ജീവിയുടെ ആക്രമണത്തിൽ പരിക്കേറ്റു. കഴിഞ്ഞദിവസം രാത്രിയാണ് സംഭവം. പുലിയാണോ എന്ന് സംശയിക്കുന്ന തരത്തിലാണ് ആക്രമണം. വളർത്തുന്നായയെ കക്കാടംപൊയിൽ മൃഗാശുപത്രിയിൽ എത്തിച്ചു പരിശോധന നടത്തിയപ്പോൾ പുലിയുടേതായ ആക്രമണ ശൈലിയാണ് നായയുടെ ശരീരത്തിൽ ഉള്ളതെന്ന് മൃഗഡോക്ടർ പറഞ്ഞു. സ്ഥലത്തെത്തിയ ആര്‍ആർടി സംഘം പുലിയുടെ ആക്രമണം ആണെന്നും പ്രദേശത്ത് ക്യാമറ സ്ഥാപിക്കുമെന്നും പറഞ്ഞു. ഈ പ്രദേശങ്ങളിൽ വന്യജീവികളുടെ ആക്രമണം പെരുകി വരുകയാണ്. കഴിഞ്ഞ ദിവസങ്ങളിൽ വിവിധ രാഷ്ട്രീയ കക്ഷി നേതാക്കൾ ഈ പ്രദേശങ്ങളിൽ സന്ദർശിക്കുകയും പ്രതിഷേധിക്കുകയും ചെയ്തിരുന്നു.

സാം തോമസിന് സ്നേഹാദരം

കോഴിക്കോട്: അരനൂറ്റാണ്ടിലേറെയായി മലയാള നാടകവേദിയിൽ സജീവ സാന്നിധ്യമായ സാം തോമസിനെ സുഹൃദ്സംഘം ആദരിക്കുന്നു. പ്രൈമറി സ്കൂൾ കാലം തൊട്ട് നാടകങ്ങളിൽ അഭിനയിച്ചു തുടങ്ങിയ സാം തോമസ് 1958 മുതൽ ദേവഗിരി സെന്‍റ് ജോസ്ഫ്സ് കോളജിൽ ഹോസ്റ്റൽ വിഭാഗത്തിൽ അക്കൗണ്ടന്‍റാണ്. നാടകരചയിതാവ്, നടൻ, സംവിധായകൻ, ഗായകൻ എന്നീ നിലകളിൽ കോഴിക്കോടൻ നാടകവേദിക്ക് സുപരിചിതനായ സാം തോമസ് ഏതാനും ചലച്ചിത്രങ്ങളിലും അഭിനയിച്ചിട്ടുണ്ട്. ഇന്ന് വൈകുന്നേരം 4.30 ന് കോഴിക്കോട് ചാവറ കൾചറൽ സെന്‍ററിൽ നടക്കുന്ന സുഹൃദ് സമ്മേളനം പ്രമുഖ മലയാള സിനിമാ സംവിധായകൻ വി.എം. വിനു ഉദ്ഘാടനം ചെയ്യും. കലാഭവൻ പ്രസിഡന്‍റ് ഫാ. ചെറിയാൻ കുനിയന്തോടത്ത് പൊന്നാട അണിയിക്കും.

മണ്ണിടിച്ചിൽ: പൂഴിത്തോട്ടിൽ തകർന്ന് കൃഷിയിടങ്ങൾ

പൂഴിത്തോട്: ഇന്നലെ പുലർച്ചെയുണ്ടായ കനത്ത മഴയെ തുടർന്ന് ചക്കിട്ടപാറ പഞ്ചായത്ത് നാലാം വാർഡിൽ പെട്ട പൂഴിത്തോട്ടില ഇന്ദിര പുത്തൻപുരയിൽ, ദേവി കുന്നത്ത് എന്നിവരുടെ കൃഷിയിടത്തിൽ ഉരുൾപൊട്ടലിനു സമാനമായ രീതിയിലുണ്ടായ കനത്ത മണ്ണ് ഇടിച്ചിലിൽ വൻ കൃഷി നാശം. കൊക്കോ, റബ്ബർ, കുരുമുളക്, കമുങ്ങ്, പ്ലാവ് എന്നീ കാർഷിക വിളകളാണ് നശിച്ചത്. രണ്ടു പേർക്കും കൂടി ഒരേക്കർ സ്ഥലമാണുണ്ടായിരുന്നത്‌. ഇതിൽ ഭൂരിഭാഗവും നശിച്ചു. അജേഷ് മണിമലക്കുന്നേൽ, മാത്യു കുംബ്ലാനിക്കൽ, ബാബു പൊട്ടനാനിക്കൽ, സേവ്യർ പതിപ്പള്ളിൽ, ത്രേസ്യാമ്മ മുണ്ടക്കൽ, ജോൺസൺ കാരിക്കനാൽ എന്നിവരുടെ വീടുകളുടെ പിൻ വശങ്ങളിലും അപകട ഭീഷണി ഉയർത്തുന്ന വിധത്തിൽ മണ്ണിടിച്ചിൽ സംഭവിച്ചിട്ടുണ്ട്. പഞ്ചായത്ത് വികസന സ്റ്റാൻഡിംഗ് കമ്മിറ്റി ചെയർമാൻ സി.കെ. ശശി, കൃഷി ഓഫീസർ രശ്മ നായർ, അസിസ്റ്റന്‍റ് കൃഷി ഓഫീസർ കെ. ഗിരീഷ് കുമാർ, കൃഷി അസിസ്റ്റന്‍റ് ഇ. ലിനൂപ് എന്നിവർ സംയുക്തമായി നാശമുണ്ടായ കൃഷിയിടങ്ങൾ സന്ദർശിച്ചു. നാശനഷ്ടം നേരിട്ടവർക്ക് സാമ്പത്തിക സഹായം നൽകണമെന്ന് വാർഡ് മെമ്പർ കൂടിയായ സി.കെ.ശശി ആവശ്യപ്പെട്ടു.

പുല്ലൂരാംപാറ സെന്‍റ് ജോസഫ്സ് ഹൈസ്കൂൾ ജൂബിലി നിറവിൽ

പുല്ലൂരാംപാറ: അരനൂറ്റാണ്ടു കാലമായി തലയുയർത്തി നിൽക്കുന്ന പുല്ലുരാംപാറ സെന്‍റ് ജോസഫ്സ് ഹൈസ്കൂൾ സുവർണ ജൂബിലിയിലേക്ക്. ജൂബിലി ആഘോഷങ്ങളുടെ ഉദ്ഘാടനം ഇന്ന് 9.30 ന് ഹൈസ്കൂൾ പരിസരത്ത് നിന്ന് ആരംഭിക്കുന്ന വിളംബരജാഥയോടെ നടക്കും. ആദ്യകാല ഗുരുക്കന്മാരും 50 ബാച്ചുകളിലെയും പ്രതിനിധികളും തിരികത്തിച്ചു നൽകും. ലിന്‍റോ ജോസഫ് എംഎൽഎ ഭദ്ര ദീപം തെളിക്കുന്നതോടു ഒരു വർഷം നീണ്ടു നിൽക്കുന്ന ജൂബിലി ആഘോഷങ്ങൾക്ക് തുടക്കം കുറിക്കും. പഞ്ചായത്ത്‌ പ്രസിഡന്‍റ് ബിന്ദു ജോൺസൺ, കോർപറേറ്റ് മാനേജർ ഫാ. ജോസഫ് വർഗീസ് പാലക്കാട്ട്, സ്കൂൾ മാനേജർ ഫാ. കുര്യാക്കോസ് മുകാല, എച്ച്എം ജോളി ഉണ്ണിയേപ്പിള്ളിൽ തുടങ്ങിയവർ പങ്കെടുക്കും.

ശക്തമായ മഴ: രാത്രി മുഴുവന്‍ മുള്‍മുനയിലായി വിലങ്ങാട്

നാദാപുരം: ശക്തമായ മഴയില്‍ പുഴ കരകവിഞ്ഞൊഴുകി വിലങ്ങാട്, നാദാപുരം മേഖലകളില്‍ വ്യാപക നാശം. വ്യാഴാഴ്ച രാവിലെ മുതല്‍ നാദാപുരം മേഖലയില്‍ മഴ തിമര്‍ത്ത് പെയ്തതോടെ താഴ്ന്ന പ്രദേശങ്ങളില്‍ വെളളം കയറി. വിലങ്ങാട് മലയോരത്തെ ശക്തമായ മഴയില്‍ മയ്യഴി പുഴയുടെ ഉത്ഭവ കേന്ദ്രമായ പുല്ലുവപുഴയിലും മലയങ്ങാട് പുഴയിലും ശക്തമായ ഒഴുക്കായിരുന്നു. വിലങ്ങാട് ടൗണ്‍ പാലത്തിലും വായാട് ഉന്നതി റോഡിലെ വായാട് പാലത്തിനും മുകളിലൂടെ വെളളം ഒഴുകിയതോടെ നാട്ടുകാര്‍ പരിഭ്രാന്തിയിലായി. കഴിഞ്ഞ ജൂലൈ 30 നാണ് നാടിനെ നടുക്കി വിലങ്ങാട് ഉരുള്‍പൊട്ടലുണ്ടായത്. രാത്രിയില്‍ പുഴ കരകവിഞ്ഞൊഴുകിയതോടെ പ്രയാസം അനുഭവിക്കുന്നവര്‍ വിലങ്ങാട് പാരിഷ് ഹാളിലെത്തണമെന്ന മുന്നറിയിപ്പും നല്‍കിയിരുന്നു. വായാട് പാലത്തിന്‍റെ അപ്രോച്ച് റോഡ് പുഴയിലെ കുത്തൊഴുക്കില്‍ ഒലിച്ച് പോയി. അപ്രോച്ച് റോഡ് തകര്‍ന്നതോടെ ഇരുചക്രവാഹനങ്ങള്‍ മാത്രമേ പാലത്തിലൂടെ കടത്തി വിടുന്നുളളു. വിഷ്ണു മംഗലം ബണ്ട് കരകവിഞ്ഞതോടെ പെരുവങ്കര, ചെറുമോത്ത്, വിഷ്ണുമംഗലം, ഈയ്യങ്കോട് ഭാഗങ്ങളിലും നാദാപുരം പോലീസ് സ്റ്റേഷന് സമീപത്തെ മുത്താറിക്കുനി ഭാഗങ്ങളിലെ വീടുകളിലും വെളളം കയറി. രാത്രി പതിനൊന്ന് മണിയോടെ നാദാപുരം കസ്തൂരി കുളത്തെ പാലേരി റഷീദിന്‍റെ മുപ്പത് മീറ്ററോളം നീളത്തിലുളള വീട്ടുമതിലും മഴയില്‍ തകര്‍ന്ന് വീണു. നാദാപുരം പോലീസും ഫയര്‍ ഫോഴ്സും സ്ഥലത്തെത്തി നാട്ടുകാരുടെ സഹായത്തോടെ മണ്ണ് മാറ്റി ആളുകള്‍ മണ്ണിനടിയില്‍ പെട്ടിട്ടില്ലെന്ന് ഉറപ്പ് വരുത്തി. പല ഭാഗങ്ങളിലും മരങ്ങള്‍ കടപുഴകി വീണ് വൈദ്യുതി തൂണുകളും ലൈനുകളും തകര്‍ന്നു. വളയത്ത് വീട് തകർന്നു നാദാപുരം: ശക്തമായ മഴയിൽ വളയത്ത് വീട് തകർന്നു. വളയം ചാലിയാട്ട് പൊയിൽ കിണറ്റിൽ പിലാവുള്ള പറമ്പത്ത് കണ്ണന്‍റെ വീടിന്‍റെ മേൽക്കൂരയുടെ ഒരു ഭാഗമാണ് ബുധനാഴ്ച്ച രാത്രി തകർന്ന്വീണത്. സംഭവം നടക്കുമ്പോൾ വീട്ടിൽ ആളുകളുണ്ടായിരുന്നെങ്കിലും പരിക്കേൽക്കാതെ രക്ഷപ്പെട്ടു.നൂറിലേറെ ഓടുകൾ തകർന്നു. പഞ്ചായത്ത് പ്രസിഡന്‍റ് കെ.പി. പ്രദീഷിന്‍റെ നേതൃത്വത്തിൽ ജനപ്രതിനിധികൾ സ്ഥലം സന്ദർശിച്ചു. വീടിന്‍റെ ചുമർ ഇടിഞ്ഞു വീണു താമരശേരി: കനത്ത മഴയിൽ വീടിന്‍റെ ചുമർ ഇടിഞ്ഞു വീണു. പുതുപ്പാടി പഞ്ചായത്തിലെ പെരുമ്പള്ളി ആനപ്പാറപ്പൊയിൽ രാധയുടെ വീടിന്‍റെ പിൻഭാഗമാണ് തകർന്നത്. രാധയും മൂന്നു മക്കളുമാണ് വീട്ടിൽ താമസം. മൺ കട്ടകൾക്കൊണ്ട് മലമുകളിൽ നിർമിച്ച വീടിന്‍റെ അടുക്കള ഭാഗം തകർന്നതോടെ താമസ യോഗ്യമല്ലാതെയായി. ഇതേ തുടർന്ന് ഇവർ മകളുടെ വീട്ടിലേക്ക് മാറിയിരിക്കുകയാണ്. അടച്ചുറപ്പുള്ള ഒരു വീടിനായി പലതവണ ലൈഫ് പദ്ധതിയിൽ അപേക്ഷ നൽകിയെങ്കിലും ഇതുവരെ പരിഗണിച്ചില്ലെന്ന് ഇവർ പറയുന്നു. വീടിന് പിന്നിലെ തിണ്ടിടിഞ്ഞു കൂരാച്ചുണ്ട്: കനത്ത മഴയിൽ വീടിന് പിന്നിലെ തിണ്ടിടിഞ്ഞ് വീടിന് ഭീഷണി.കൂരാച്ചുണ്ട് പഞ്ചായത്ത് പന്ത്രണ്ടാം വാർഡ് കൈതക്കൊല്ലി മ ൂന്നാംമുക്ക് മേഖലയിൽ താമസിക്കുന്ന വാളിയാംപ്ലാക്കൽ ജോബിയുടെ വീടിന്‍റെ പിൻഭാഗമാണ് ഇടിഞ്ഞത്. ഇവിടെയുണ്ടായിരുന്ന മരം വീടിന് മുകളിൽ വീണ് മേൽക്കൂരയുടെ ഓടിനും നാശം സംഭവിച്ചിട്ടുണ്ട്. തലയാട് ഭാഗങ്ങളിൽ മണ്ണിടിച്ചിൽ ബാലുശേരി: തലയാട്, ചിടികുഴി, ചുരുക്കൻ കാവ് ഭാഗങ്ങളിൽ കനത്ത മഴയിൽ മണ്ണിടിച്ചിൽ. പനങ്ങാട് പഞ്ചായത്തിന്‍റെയും കാന്തലാട് വില്ലേജിന്‍റെയും ശക്തമായ മുന്നറിയിപ്പുകൾ ഉണ്ടായിരുന്നതിനെത്തുടർന്ന് ആളുകളെ മാറ്റിപ്പാർപ്പിച്ചിരുന്നു. ആയതിനാൽ വൻ അപകടം ഒഴിവായി.പ്രദേശത്ത് കൃഷി നാശം ഉണ്ടായിട്ടുണ്ട്. മഴ കനത്താൽ ഇനിയും ഈ പ്രദേശത്ത് മണ്ണിടിയാൻ സാധ്യതയുണ്ട്. അടിയന്തരമായി സർക്കാർ ഇടപെടണമെന്ന് പ്രദേശവാസികൾ പറഞ്ഞു.

കണ്ണോത്ത് സെന്‍റ് ആന്‍റണീസ് ഹൈസ്കൂൾ ജൂബിലി നിറവിൽ

കോഴിക്കോട്: കണ്ണോത്ത് സെന്‍റ് ആന്‍റണീസ് ഹൈസ്കൂൾ സുവർണ ജൂബിലി വർഷത്തിൽ പ്രവേശിച്ചു. ജൂബിലി പ്രവർത്തനങ്ങളുടെ പ്രാരംഭമായി 12 അംഗ കോർ കമ്മിറ്റി രൂപീകരണം നടന്നു. സ്കൂൾ മാനേജർ ഫാ. സെബാസ്റ്റ്യൻ പുളിക്കലിന്‍റെ നേതൃത്വത്തിൽ നടന്ന കോർ കമ്മിറ്റി രൂപീകരണ യോഗത്തിൽ സ്കൂൾ മാനേജ്മെന്‍റ്, പിടിഎ, അധ്യാപക- അനധ്യാപക പ്രതിനിധികൾ പങ്കെടുത്തു. സ്കൂൾ മാനേജർ ഫാ. സെബാസ്റ്റ്യൻ പുളിക്കൽ ചെയർമാനും സ്കൂൾ അസിസ്റ്റന്‍റ് മാനേജർ ഫാ. എബിൻ മാടശേരി വൈസ് ചെയർമാനും ഹെഡ്മാസ്റ്റർ റോഷിൻ മാത്യു കൺവീനറും സ്റ്റാഫ് സെക്രട്ടറി സി. അന്നമ്മ തോമസ് ട്രഷററുമായാണ് കമ്മിറ്റി രൂപീകരിച്ചത്. 24ന് ഉച്ചയ്ക്ക് 2.30 ന് വിപുലമായ സ്വാഗത സംഘം രൂപീകരിക്കുവാൻ തീരുമാനിച്ചു. കണ്ണോത്തിന്‍റെ അക്ഷര വെളിച്ചമായി 1976 ജൂൺ മാസത്തിലാണ് വിദ്യാലയം സ്ഥാപിതമാകുന്നത്.

പിക്കപ്പ് വാൻ പാലത്തിന്‍റെ കൈവരിയിൽ ഇടിച്ചു തകർന്നു ; മൂന്ന് പേർക്ക് പരിക്ക്

നാദാപുരം: വിഷ്ണുമംഗലം പുഴയുടെ പാലത്തിന്‍റെ കൈവരിയിൽ നിയന്ത്രണംവിട്ട പിക്കപ്പ് വാൻ ഇടിച്ചു കയറി തകർന്നു. വ്യാഴാഴ്ച്ച പുലർച്ചെയാണ് അപകടം. കല്ലാച്ചി ഭാഗത്ത് നിന്ന് വളയം ഭാഗത്തേക്ക് പോവുകയായിരുന്ന വാനാണ് അപകടത്തിൽപെട്ടത്. വളയം സ്വദേശികളായ ചെക്കോറ്റ അശ്വന്ത് (26), ചെക്കോറ്റ ജിഷ്ണുജിത്ത് (22), ചെറ്റക്കണ്ടി മണത്തണേമ്മൽ അശ്വിൻ (26) എന്നിവർക്കാണ് പരിക്കേറ്റത്. വാനിന്‍റെ മുൻഭാഗവും പാലത്തിന്‍റെ കൈവരിയും തകർന്നു. മലയോരത്ത് പെയ്ത കനത്ത മഴയിൽ പുഴ നിറഞ്ഞൊഴുകുന്ന അവസ്ഥയിലായിരുന്നു. വിഷ്ണുമംഗലം ബണ്ടിന്‍റെ മുകളിൽക്കൂടി പോകുന്ന പാലത്തിൽ നിന്ന് വാഹനം താഴെ വീഴാതിരുന്നതിനാൽ വൻദുരന്തം ഒഴിവായി. വളയം പോലീസും, ഫയർ ഫോഴ്സും സ്ഥലത്തെത്തി അപകടത്തിൽപെട്ട വാൻ നീക്കിയാണ് ഗതാഗതം പുന:സ്ഥാപിച്ചത്.

സ്വച്ഛ് സര്‍വേക്ഷന്‍ സര്‍വേ : കോഴിക്കോട് കോര്‍പറേഷനും പയ്യോളി നഗരസഭക്കും നേട്ടം

കോഴിക്കോട്: കേന്ദ്ര പാര്‍പ്പിട നഗരകാര്യ മന്ത്രാലയം നടത്തുന്ന രാജ്യത്തെ ഏറ്റവും വലിയ ശുചിത്വ സര്‍വേയായ സ്വച്ഛ് സര്‍വേക്ഷന്‍ 2024ല്‍ മികച്ച നേട്ടവുമായി കോഴിക്കോട് കോര്‍പറേഷനും പയ്യോളി നഗരസഭയും. രാജ്യത്തെ 4,852 തദ്ദേശ സ്ഥാപനങ്ങള്‍ പങ്കെടുത്ത മത്സരത്തില്‍ കോഴിക്കോട് കോര്‍പറേഷന്‍ 70-ാം റാങ്കിലെത്തി. 2023ല്‍ 3,367 ആയിരുന്നു കോര്‍പറേഷന്‍റെ സ്ഥാനം. 2016 മുതല്‍ കേന്ദ്രസര്‍ക്കാര്‍ നടത്തിവരുന്ന സര്‍വേയില്‍ 1000ത്തില്‍ താഴെ റാങ്കിലേക്ക് കേരളത്തിലെ ഒരു നഗരസഭയും ഇതുവരെ എത്തിയിരുന്നില്ല. "ഗാര്‍ബേജ് ഫ്രീ സിറ്റി' വണ്‍ സ്റ്റാര്‍ റാങ്കിങ്ങില്‍ സംസ്ഥാനത്തുനിന്ന് തെരഞ്ഞെടുക്കപ്പെട്ട 20 നഗരങ്ങളില്‍ പയ്യോളി നഗരസഭയും ഇടം പിടിച്ചു. ആദ്യമായാണ് സര്‍വേക്ഷനിലെ പ്രധാന ഘടകമായ ഗാര്‍ബേജ് ഫ്രീ സിറ്റീസ് സ്റ്റാര്‍ റേറ്റിങ്ങില്‍ സംസ്ഥാനത്തെ നഗരസഭകള്‍ സ്ഥാനം പിടിക്കുന്നത്. സ്വച്ഛ് സര്‍വേഷനില്‍ കഴിഞ്ഞ വര്‍ഷം 3,707-ാം റാങ്കിലായിരുന്ന പയ്യോളി ഇത്തവണ 596-ാം സ്ഥാനത്തെത്തി. 2024 സര്‍വേക്ഷനില്‍ കൂടുതല്‍ മികവ് പുലര്‍ത്താനായി ശുചിത്വ മിഷന്‍റെ നേതൃത്വത്തില്‍ എല്ലാ നഗരസഭകളിലും സ്വച്ഛ് സര്‍വേക്ഷന്‍ പ്രീ അസസ്മെന്‍റ് നടത്തിയിരുന്നു. ഈ പരിശോധനയില്‍ കണ്ടെത്തിയ പോരായ്മകള്‍ പരിഹരിച്ചതും റാങ്കില്‍ മുന്നേറാന്‍ സഹായകമായി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]