ADVERTISEMENT

ADVERTISEMENT

ലഹരിവിരുദ്ധ ബോധവത്കരണ ക്ലാസ് നടത്തി

അഞ്ചൽ : സെന്‍റ് ജോൺസ് കോളജിന്‍റെ നേതൃത്വത്തിൽ ലഹരി വിരുദ്ധ ബോധവത്കരണ ക്ലാസ് സംഘടിപ്പിച്ചു.

പുനലൂർ എക്സൈസ് ഓഫീസ് സർക്കിൾ ഇൻസ്പെക്‌ടർ ജെ.റെജി ക്ലാസുകൾ നയിച്ചു. കോളജ് പ്രിൻസിപ്പൽ പ്രഫ. ഡോ.നിഷ തോമസ് അധ്യക്ഷത വഹിച്ചു.

ബോട്ടണി വിഭാഗം അധ്യക്ഷൻ ജെറി.സി. ജാക്സൺ, സ്റ്റാഫ് അഡ്വൈസർ ഡോ. ഷിജോ.വി.വർഗീസ്, സുജിത്ത് എന്നിവർ പ്രസംഗിച്ചു.

ADVERTISEMENT

ഗാനമേളയ്ക്കിടെയുണ്ടായ സംഘർഷം ; മൂന്നു പോലീസുകാർക്ക് പരിക്ക്

കിളിമാനൂർ: ഉത്സവപ്പറമ്പിൽ ഗാനമേളയ്ക്കിടെയുണ്ടായ സംഘർഷത്തിൽ എസ്ഐ ഉൾപ്പെടെ മൂന്നു പേർക്കു പരിക്ക്. പോലീസ് വാഹനവും അക്രമികൾ കേടുപാടുകൾ വരുത്തി. അക്രമികളായ നാലുപേരെ കിളിമാനൂർ പോലീസ് അറസ്റ്റ് ചെയ്തു. കാട്ടുമ്പുറം സ്വദേശികളായ അൽമുബീൻ (27), സുബീഷ് (34), സുബിൻ (27), ഗൗതം (18) എന്നിവരാണ് അറസ്റ്റിലായത്. ഞായർ രാത്രി പത്തോടെ കാട്ടുംപുറം, കരിക്കകം ശ്രീപഞ്ചമുഖമാടൻ തമ്പുരാൻ ക്ഷേത്രത്തിലായിരുന്നു സംഭവം. ക്ഷേത്രപറമ്പിൽ നടന്ന ഗാനമേളയ്ക്കിടെ യുവാക്കൾ ചേരിതിരിഞ്ഞു സംഘർഷത്തിലേർപ്പെട്ടു. സ്ഥലത്ത് ഡ്യൂട്ടിയിലുണ്ടായിരുന്ന കിളിമാനൂർ സബ് ഇൻസ്പെക്ടർ അരുണിന്‍റെ നേതൃത്വത്തിലുള്ള പോലീസ് സംഘം അക്രമം തടയാൻ ശ്രമിച്ചു. ഇതിനിടെ അക്രമി സംഘത്തിലെ പത്തോളം പേർ ചേർന്നു പോലീസ് സംഘത്തെ ആക്രമിക്കുകയായിരുന്നു. എസ്ഐ ഉൾപ്പടെ മൂന്നു പോലീസ് ഉദ്യോഗസ്ഥർക്ക് ആക്രമണത്തിൽ പരുക്കേറ്റു. അക്രമികൾ മരക്കഷണം ഉപയോഗിച്ച് പോലീസ് ജീപ്പ് കേടുപാടുകൾ വരുത്തുകയും ചെയ്തു. അക്രമി സംഘത്തിലെ കണ്ടാലറിയാവുന്ന പത്തോളം പേർക്കെതിരേ പോലീസ് കേസെടുക്കുകയും ഇതിൽ മുഖ്യ പ്രതികളായ നാല് പേരെ അറസ്റ്റ് ചെയ്യുകയുമായിരുന്നു. അറസ്റ്റ് ചെയ്ത പ്രതികളെ കോടതിയിൽ ഹാജരാക്കി റിമാൻഡ് ചെയ്തു.

കരുനാഗപ്പള്ളിയിൽ പിടികിട്ടാപ്പുള്ളി അറസ്റ്റിൽ

കൊല്ലം: നിരവധി ക്രിമിനൽ കേസുകളിലെ പ്രതിയായ പിടികിട്ടാപ്പുള്ളിയെ കരുനാഗപ്പള്ളി പൊലിസ് അറസ്റ്റ്ചെയ്തു. പടിഞ്ഞാറേ കല്ലട വിളന്തറ ജീന ഭവനില്‍ പ്രിൻസ് (25) ആണ് അറസ്റ്റിലായത്. 2024 നവംബറിൽ നടന്ന കേസിലാണ് അറസ്റ്റ്. കരുനാഗപ്പള്ളി പൊളിടെക്നിക് വിദ്യാർഥികൾ തമ്മിലുള്ള തർക്കത്തിൽ ഇടപ്പെട്ട് വിദ്യാർഥിയുമായി ചേർന്ന് മറ്റൊരു വിദ്യാർഥിയേയും സുഹൃത്തിനേയുംആക്രമിച്ച് പരിക്കേൽച്ച കേസിലാണ് ഇയാൾ പിടിയിലായത്. ഇവരെ പിടിച്ചുമാറ്റാനെത്തിയ സമീപവാസിയായ യുവാവിനെയും പ്രതികൾ ആക്രമിച്ചിരുന്നു. കേസില്‍ ഉള്‍പ്പെട്ട പ്രിൻസിന്‍റെ കൂട്ടാളികളായ മറ്റ് പ്രതികളെ നേരത്തെ പോലീസ് പിടികൂടിയിരുന്നു. സംഭവശേഷം ഒളിവില്‍ കഴിഞ്ഞുവന്ന പ്രതിയെ തമിഴ്നാട് ഹൊസൂറില്‍ നിന്നുമാണ് പിടികൂടിയത്. പ്രിന്‍സിന്‍റെ പേരിൽ ശാസ്താംകോട്ട സ്റ്റേഷനില്‍ വധശ്രമം അടക്കം മൂന്നു കേസുകളും പാലക്കാട് ജില്ലയില്‍ വടക്കഞ്ചേരി സ്റ്റേഷനില്‍ ഹൈവേ കവര്‍ച്ചയടക്കമുള്ള കേസുകളും നിലവിലുണ്ട്. അന്വേഷണത്തില്‍ ഇയാള്‍ക്കെതിരേ നേരത്തെ ശൂരനാട്, ചവറ തെക്കുംഭാഗം എന്നീ സ്റ്റേഷനുകളിലും കേസുകള്‍ നിലവിലുണ്ട്. കരുനാഗപ്പള്ളി പോലീസ് സ്റ്റേഷന്‍ എസ്എച്ച്ഒ വി. ബിജുവിന്‍റെ നേതൃത്വത്തില്‍ എസ്‌ഐമാരായ ഷമീര്‍, ഷാജിമോന്‍, രവിചന്ദ്രന്‍, സിപിഒമാരായ സരണ്‍ തോമസ്, റിയാസ്, രതീഷ് എന്നിവര്‍ അടങ്ങിയ സംഘമാണ് പ്രതിയെ പിടികൂടിയത്.

വാനും ഓട്ടോറിക്ഷയും കൂട്ടിയിടിച്ച് നാലുപേര്‍ക്കു പരിക്ക്

മെഡിക്കല്‍കോളജ്: മരപ്പാലം-മുട്ടട റോഡില്‍ ഇന്നലെയുണ്ടായ വാഹനാപകടത്തില്‍ നാലുപേര്‍ക്കു പരിക്കേറ്റു. ഇതില്‍ ഒരു കൈക്കുഞ്ഞും ഉള്‍പ്പെടുന്നു. പാല്‍ കയറ്റി വരികയായിരുന്ന വാനും സവാരി ഓട്ടോയുമാണ് കൂട്ടിയിടിച്ചത്. വാന്‍ മുട്ടടയില്‍ നിന്നു മരപ്പാലത്തേക്കും ഓട്ടോറിക്ഷ മരപ്പാലത്തുനിന്ന് മുട്ടടയിലേക്കും വരികയായിരുന്നു. രാവിലെ 11 നാണ് സംഭവം. ഓട്ടോറിക്ഷയ്ക്കുള്ളില്‍ മണ്ണന്തല മുക്കോലയ്ക്കല്‍ അമ്പനാട് സ്വദേശികളായ ജയദേവി, രമണി എന്നിവരും ഒരു കൈക്കുഞ്ഞുമാണ് ഉണ്ടായിരുന്നത്. സ്ത്രീകള്‍ക്ക് രണ്ടുപേര്‍ക്കും ശരീരത്തിന് ഇടിയേല്‍ക്കുകയും മുഖത്തിനു പരിക്കേല്‍ക്കുകയും ചെയ്തു. ഇവരെ തിരുവനന്തപുരം മെഡിക്കല്‍കോളജ് ആശുപത്രിയില്‍ പ്രവേശിപ്പിച്ചു. കുഞ്ഞിനെ തിരുവനന്തപുരം എസ്എടി ആശുപത്രിയില്‍ പ്രവേശിപ്പിച്ചു. കുഞ്ഞിന്‍റെ നില ഗുരുതരമല്ല. ഓട്ടോ ഓടിച്ചിരുന്ന മെഡിക്കല്‍കോളജ് സ്വദേശി രാജീവ് ഗുരുതരമായി പരിക്കേറ്റ് മെഡിക്കല്‍കോളജില്‍ ചികിത്സയിലാണ്. അപകടത്തെ തുടര്‍ന്ന് ഇദ്ദേഹം ബോധരഹിതനാകുകയായിരുന്നു. ഇദ്ദേഹത്തിന്‍റെ തലയ്ക്കും ശരീരത്തിനും പരിക്കേറ്റു. രണ്ടുവാഹനങ്ങള്‍ക്കും വേഗത കൂടുതലായിരുന്നുവെന്നും മറ്റൊരു വാഹനത്തെ മറികടക്കുന്നതിനിടെയാണ് വാനും ഓട്ടോയും പരസ്പരം ഇടിച്ചതെന്നും പോലീസ് പറഞ്ഞു. ഇടിയുടെ ആഘാതത്തില്‍ ഓട്ടോറിക്ഷയുടെ മുന്‍ഭാഗം പൂര്‍ണമായും തകര്‍ന്നുപോയി. പാല്‍വണ്ടിക്കും കേടുപാടുകള്‍ ഉണ്ടായി. പേരൂര്‍ക്കട പോലീസ് മേല്‍നടപടികള്‍ സ്വീകരിച്ചു.

ശൂരനാട് രാജശേഖരൻ പാർട്ടിക്ക് മുതൽക്കൂട്ടായിരുന്ന നേതാവ് : കെ.സുധാകരൻ എംപി

കൊല്ലം : കെപിസിസി പ്രസിഡന്‍റ് കെ.സുധാകരൻ എംപി ശൂരനാട് രാജശേഖരന്‍റെ ചാത്തന്നൂരിലെ വസതിയിലെത്തി കുടുംബാംഗങ്ങളെ സന്ദർശിച്ച് അനുശോചനം അറിയിച്ചു. ഏറ്റെടുക്കുന്ന ഉത്തരവാദിത്വങ്ങളും ഏൽപ്പിക്കുന്ന സംഘടന ചുമതലകളും കൃത്യനിഷ്ഠയോടു ചെയ്തു തീർക്കുന്നതിൽ രാജശേഖരന്‍റെ മികവ് പാർട്ടിക്ക് മുതൽ കൂട്ടായിരുന്നെന്നും രചനകളിലും പ്രസംഗങ്ങളിലുമുള്ള രാജശേഖരൻ ശൈലിയും വിഷയങ്ങളിലുള്ള ആഴത്തിലുള്ള അറിവും രാഷ്‌ട്രീയ വിദ്യാർഥികൾക്ക് പ്രചോദനമായിരുന്നെന്നും കെ.സുധാകരൻ പറഞ്ഞു. രാജശേഖരന്‍റെ അകാലത്തിൽ ഉള്ള വേർപാടിൽ കുടുംബാംഗങ്ങളുടെയും സഹപ്രവർത്തകരുടെയും ദുഃഖത്തിൽ പങ്കുചേരുന്നതായും അദ്ദേഹം അറിയിച്ചു. ഐഎൻറ്റിടിസി സംസ്ഥാന പ്രസിഡന്‍റ് ആർ.ചന്ദ്രശേഖരൻ കെപിസിസി അംഗം നെടുങ്ങോലം രഘു, കെപിസിസി നിർവാഹക സമിതി മുൻ അംഗം എൻ.ജയചന്ദ്രൻ, കോൺഗ്രസ് ബ്ലോക്ക് പ്രസിഡന്‍റുമാരായ ബിജു വിശ്വരാജൻ, ലത മോഹൻദാസ്, ജയപ്രകാശ് നാരായണൻ, ഡിസിസി ജനറൽ സെക്രട്ടറിമാരായ എം.എം. സഞ്ജീവ് കുമാർ, ഇഞ്ചക്കാട് നന്ദകുമാർ, കെ.ബി.ഷഹാൽ, എഴുകോൺ മധുലാൽ, പഞ്ചായത്ത്‌ അംഗങ്ങളായ ടി.എം ഇക്ബാൽ, ഉളിയനാട് ജയൻ, പ്രമോദ് കാരംകോട്, മണ്ഡലം ചെയർമാൻ വരിഞ്ഞം സുരേഷ് ബാബു, കുരുവിള ജോസഫ്, ബ്ലോക്ക് കോൺഗ്രസ് കമ്മിറ്റി ഭാരവാഹികളായ പരവൂർ മോഹൻദാസ്, കെ. രാമചന്ദ്രൻപിള്ള, മരക്കുളം ബാബു, ഷിഹാബ്, ഷാജഹാൻ, ഷനോജ് തുടങ്ങിയവർ പ്രസിഡന്‍റിന് ഒപ്പമുണ്ടായിരുന്നു.

എൽഡിഎഫ് സർക്കാർ തൊഴിലാളി പക്ഷത്ത് നിലയുറപ്പിക്കണം : എഐടിയുസി

കൊല്ലം:രാജ്യത്ത് കോർപറേറ്റ് വർഗീയ ഫാസിസ്റ്റ് ഭരണകുടം കൂടുതൽ ആക്രമണ സ്വഭാവത്തോടെ തൊഴിലാളികളെയും ട്രേഡ് യൂണിയൻ പ്രസ്ഥാനങ്ങളേയും തകർക്കാൻ ശ്രമിക്കുമ്പോൾ തൊഴിലാളികളെ കുടുതൽ ചേർത്തുപിടിച്ചു കൊണ്ട് തൊഴിൽ സംരക്ഷണവും തൊഴിലാളികളുടെ മൗലികമായ അവകാശങ്ങളും സംരക്ഷിയ്ക്കാൻ സംസ്ഥാനത്തെ ഇടതുപക്ഷ ജനാധിപത്യമുന്നണി സർക്കാർ മുന്നോട്ടു വരണമെന്നും തൊഴിലാളിപക്ഷത്ത് ശക്തമായി നിലയുറപ്പിക്കണമെന്നും എഐടിയുസി സംസ്ഥാന വർക്കിംഗ് കമ്മറ്റി യോഗം ആവശ്യപ്പെട്ടു. വിവിധ മേഖലകളിൽ വ്യവസായ - തൊഴിൽ പ്രതിസന്ധി രൂക്ഷമാകുന്നു.കശുവണ്ടി,കയർ, കൈത്തറി,കള്ള് ചെത്ത് ഉൾപ്പടെ പരമ്പരാഗത വ്യവസായ മേഖല വലിയ തകർച്ച നേരിടുന്നു. കൊല്ലത്തെ എണ്ണുറോളം കശുവണ്ടി ഫാക്ട‌റികൾ അടച്ചുപൂട്ടിയിട്ട് മാസങ്ങളും വർഷങ്ങളുമായി. ഫാക്‌ടറികൾ തുറന്നു പ്രവർത്തി പ്പിക്കുന്നതിനോ, തൊഴിലാളികളെ സംരക്ഷിയ്ക്കാനോ കഴിയുന്നില്ല. തൊഴിൽ നിയമങ്ങൾ നടപ്പിലാ ക്കാനോ, തൊഴിലാളികൾക്ക് അവകാശപ്പെട്ട മിനിമം കുലി ഉറപ്പുവരുത്താനോ സംസ്ഥാന തൊഴിൽ വകുപ്പിനു കഴിയുന്നില്ല. തൊഴിലാളി വിരുദ്ധ നയങ്ങളേയും, നിയമങ്ങളേയും ചെറുക്കാനും പരാജയപ്പെടുത്താനും തൊഴിലാളി-ബഹുജനശക്തി ഒന്നിച്ച് അണിനിരക്കുമ്പോൾ അതിനുള്ള ഏറ്റവും വലിയ പിന്തുണയും ശക്തിയും കേരളത്തിലെ എൽഡിഎഫ് സർക്കാരാണ്. തൊഴിലാളികളുടെ അവകാശങ്ങളും വിഷയങ്ങൾക്ക് കുടുതൽ മുൻഗണനയും പ്രാധാന്യവും നൽകി എൽഡിഎഫ് സർക്കാർ മുന്നോട്ടുപോകണമെന്ന് എഐടി യുസി വർക്കിംഗ് കമ്മിറ്റി പ്രമേയത്തിലൂടെ ആവശ്യപ്പെട്ടു.യോഗത്തിൽ പ്രസിഡന്‍റ് ടി.ജെ. ആഞ്ചലോസ് അധ്യക്ഷനായിരുന്നു. സംസ്ഥാന ജനറൽ സെക്രട്ടറി കെ.പി. രാജേന്ദ്രൻ റിപ്പോർട്ട് അവതരിപ്പിച്ചു. കൊല്ലം മേയറായി തെരഞ്ഞെടുക്കപ്പെട്ട ഹണി ബെഞ്ചമിനെ വർക്കിംഗ് കമ്മിറ്റി യോഗത്തിൽ അനുമോദിച്ചു. ദേശീയ സെക്രട്ടറി ആർ.പ്രസാദ് ദേശീയ കാമ്പയിനുകൾ വിശദീകരിച്ചു. സംസ്ഥാന ഭാരവാഹികളായ വാഴൂർ സോമൻ എം എൽ എ, കെ.എസ്.ഇന്ദുശേഖരൻ നായർ,വിജയൻ കുനിശേരി,സി.കെ ശശിധരൻ, കെ. മല്ലിക, പി.വി. സത്യനേശൻ, കെ.സി. ജയപാലൻ, അഡ്വ.ആർ.സജിലാൽ,അഡ്വ. ജി. ലാലു, എ. ശോഭ, പി.കെ. നാസർ, എസ്.അശ്വതി എന്നിവർ പ്രസംഗിച്ചു. മേയ് 20 ലെ ദേശീയ പണിമുടക്കും പ്രചരണ ജാഥകളും വിജയിപ്പിക്കുവാൻ യോഗം തീരുമാനിച്ചു.

മധ്യവയസ്കനെ കൊലപ്പെടുത്താൻ ശ്രമം : കുപ്രസിദ്ധ കുറ്റവാളി റിമാൻഡിൽ

കൊല്ലം: മധ്യവയസ്കനെ കുത്തിക്കൊലപ്പെടുത്താൻ ശ്രമിച്ച കുപ്രസിദ്ധ കുറ്റവാളി ചാത്തന്നൂർ പോലീസിന്‍റെ പിടിയിലായി. കടയ്ക്കാവൂർ നിലയ്ക്കമുക്ക് കോണത്തുവിള വീട്ടിൽ വിഷ്ണു(27) ആണ് ചാത്തന്നൂർ പോലീസിന്‍റെ പിടിയിലായത്. മൈലക്കാട് സുനൈദ മൻസിലിൽ സലാഹുദീനെയാണ് വിഷ്ണു കുത്തി കൊലപ്പെടുത്താൻ ശ്രമിച്ചത്. ഞായറാഴ്ച രാത്രി വിഷ്ണുവും സലാഹുദീനും തമ്മിൽ ഉണ്ടായ വാക്കു തർക്കത്തെ തുടർന്നായിരുന്നു സംഭവം. വിഷ്ണു കത്തി കൊണ്ട് സലാഹുദീനെ കുത്തിക്കൊലപ്പെടുത്താൻ ശ്രമിക്കുകയുമായിരുന്നുവെന്ന് പോലീസ് പറഞ്ഞു. കടയ്ക്കാവൂർ സ്വദേശിയായ ഇയാൾ കടയ്ക്കാവൂർ, ചിറയിൻകീഴ് എന്നീ പോലീസ് സ്റ്റേഷനുകളിൽ മോഷണം, പിടിച്ചുപറി, കൊലപാതകശ്രമം തുടങ്ങിയ വകുപ്പുകൾ പ്രകാരം രജിസ്റ്റർ ചെയ്ത 18 കേസുകളിൽ പ്രതിയാണ്. 2024- ൽ കാപ്പ നിയമപ്രകാരം കരുതൽ തടങ്കലിലായിരുന്ന ഇയാൾ ജയിൽ മോചിതനായ ശേഷം ചാത്തന്നൂരും പരിസരത്തും വാടകയ്ക്ക് താമസിച്ചു വരികയായിരുന്നു. ചാത്തന്നൂർ പോലീസ് ഇൻസ്‌പെക്ടർ അനൂപിന്‍റെ നിർദേശപ്രകാരം എസ്ഐ മാരായ കെ.പി. ബിജു, ജി.ആർ. രാജേഷ്,സിപിഒമാരായ പ്രശാന്ത്, വരുൺ, വിനായക് എന്നിവർ അടങ്ങിയ സംഘമാണ് പ്രതിയെ അറസ്റ്റ് ചെയ്യുന്നത്. ഇയാളെ കോടതിയിൽ ഹാജരാക്കി റിമാൻഡ് ചെയ്തു.

ആലീസ് ഉണ്ണികൃഷ്ണന് സ്നേഹാദരവ്

കൊല്ലം : കേരള സംഗീത നാടക അക്കാദമി അവാർഡ് കരസ്ഥമാക്കിയ ചലച്ചിത്ര പിന്നണി ഗായിക ആലീസ് ഉണ്ണികൃഷ്ണന് ആർ എസ് പി ഇരവിപുരം, ഭരണിക്കാവ് ബ്രാഞ്ച് കമ്മിറ്റിയുടെ നേതൃത്വത്തിൽ ആദരിച്ചു. സ്നേഹാദരവ് ചടങ്ങ് എൻ.കെ.പ്രേമചന്ദ്രൻ എംപി ഉദ്ഘാടനം ചെയ്തു. ആർഎസ്പി സംസ്ഥാനകമ്മിറ്റി അംഗം സജി. ഡി. ആനന്ദിന്‍റെ അധ്യക്ഷതയിൽ ചേർന്ന യോഗത്തിൽ ഡി. രാജ്കുമാർ, ബീനാകൃഷ്ണൻ, ഡി.എസ്. സുരേഷ്, ദീപ മണി , നെജിം, ബിജു ലക്ഷ്മീകാന്തൻ, എൻ. നൗഷാദ്, എൽ. ബാബു, രവീന്ദ്രൻ പിള്ള എന്നിവർ പ്രസംഗിച്ചു.

തപാല്‍ വകുപ്പില്‍ ഇന്‍ഷ്വറന്‍സ്‌ ഏജന്‍റ് നിയമനം

കൊല്ലം: പോസ്റ്റല്‍ ഡിവിഷനില്‍ പോസ്റല്‍ ലൈഫ്‌ ഇന്‍ഷ്വറന്‍സ്‌, റൂറല്‍ പോസ്റ്റല്‍ ലൈഫ്‌ ഇന്‍ഷുറന്‍സ്‌ എന്നിവയുടെ വിപണനത്തിനായി കമ്മീഷന്‍ വ്യവസ്ഥയില്‍ ഡയറക്റ്റ്‌ ഏജന്‍റ്മാരെയും ഫീല്‍ഡ്‌ ഓഫീസര്‍മാരെയും നിയമിക്കുന്നു. അപേക്ഷകര്‍ പത്താം ക്ലാസ്‌, പാസായിരിക്കണം .18 വയസ് പൂർത്തിയായ സ്വയം തൊഴില്‍ ചെയുന്നവര്‍ തൊഴില്‍ രഹിതര്‍, കുടുംബശ്രീ പ്രവര്‍ത്തകര്‍ അങ്കണവാടി ജീവനക്കാര്‍, ജനപ്രതിനിധികള്‍ എന്നിവരെ ഡയറക്റ്റ്‌ ഏജന്‍റായും കേന്ദ്ര - സംസ്ഥാന ഗവ.സര്‍വീസില്‍ നിന്നും വിരമിച്ചവരെ ഫീല്‍ഡ്‌ ഓഫീസര്‍ ആയും നിയമിക്കും. ഡിസ്പാര്‍ജ്‌ ചെയ്യപ്പെട്ട ഗ്രാമീണ്‍ ഡാക്‌ സേവകര്‍ക്കും ഫീല്‍ഡ്‌ ഓഫീസര്‍ ആയി അപേക്ഷിക്കാം.അപേക്ഷകര്‍ യോഗ്യത, മുന്‍ പരിചയം എന്നിവ തെളിയിക്കുന്ന രേഖകളുടെ കോപ്പി രണ്ടു പാസ്പോര്‍ട്ട് സൈസ്‌ ഫോട്ടോ സഹിതം മൊബൈല്‍ നമ്പര്‍ ഉള്‍പ്പെടെ സീനിയര്‍ സൂപ്രണ്ട്‌ ഓഫ്‌ പോസ്റ്റോഫീസ്‌, കൊല്ലം ഡിവിഷന്‍ കൊല്ലം -691001 എന്ന വിലാസത്തില്‍ അപേക്ഷകള്‍ അയക്കണം.അപേക്ഷകര്‍ ജില്ലയില്‍ സ്ഥിര താമസമുള്ളവരായിരിക്കണം . അപേക്ഷകള്‍ ലഭിക്കേണ്ട അവസാന തീയതി മെയ് പത്ത്. വിവരങ്ങള്‍ക്ക്‌ 7028438398 എന്ന നമ്പറില്‍ ബന്ധപ്പെടണം.

കേന്ദ്രസർക്കാർ അന്വേഷണ ഏജൻസികളെ ഉപയോഗിച്ച് നടത്തുന്നത് രാഷ്‌ട്രീയ പകതീർക്കൽ: അഡ്വ.പി.ജർമിയാസ്

കൊല്ലം : സോണിയ ഗാന്ധിക്കും രാഹുൽ ഗാന്ധിക്കും എതിരെ കേന്ദ്രസർക്കാർ അന്വേഷണ ഏജൻസികളെ ഉപയോഗിച്ച് രാഷ്ട്രീയ പക തീർക്കുകയാണെന്നു കെപിസിസി സെക്രട്ടറി അഡ്വ. പി ജർമിയാസ്. ശക്തികുളങ്ങര സൗത്ത് മണ്ഡലം കോൺഗ്രസ് കമ്മിറ്റി നടത്തിയ പ്രതിഷേധയോഗം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം.നാഷണൽ ഹെറാൾഡ് കേസിൽ ലോക്സഭയിലെ പ്രതിപക്ഷ നേതാവ് രാഹുൽ ഗാന്ധി കോൺഗ്രസ് പാർലമെന്‍ററി പാർട്ടി അധ്യക്ഷ സോണിയ ഗാന്ധി എന്നിവരെ ഒന്നും രണ്ടും പ്രതികളാക്കി എൻഫോഴ്സ്മെന്‍റ് ഡയറക്ടറേറ്റ് കുറ്റപത്രം സമർപ്പിച്ചത് രാഷ്ട്രീയ പക തീർക്കലാണ്. ബീഹാറിലും ഗുജറാത്തിലും നിയമസഭാ തിരഞ്ഞെടുപ്പ് നടക്കാനിരിക്കെ രാഹുൽ ഗാന്ധിയുടെ നേതൃത്വത്തിൽ ഇന്ത്യ മുന്നണി നടത്തുന്ന തിരഞ്ഞെടുപ്പ് മുന്നൊരുക്കങ്ങൾ ബിജെപി കേന്ദ്ര നേതൃത്വത്തെ അസ്വസ്ഥമാക്കിയിട്ടുണ്ട്. ഇ ഡിയെ ഉപയോഗിച്ച് പാർട്ടിയെയും ഇന്ത്യ മുന്നണിയെയും നിശബ്ദമാക്കാനുള്ള ശ്രമ ഭാഗമാണിതെന്നും ജർമിയാസ് ചൂണ്ടിക്കാട്ടി. ശക്തികുളങ്ങര സൗത്ത് മണ്ഡലം കോൺഗ്രസ് കമ്മിറ്റി പ്രസിഡന്‍റ് സച്ചു യേശുദാസ് അധ്യക്ഷത വഹിച്ചു. ഡിസിസി ജനറൽ സെക്രട്ടറി ചക്കനാൽ സനൽ കുമാർ, ചവറ ബ്ലോക്ക് കോൺഗ്രസ് കമ്മിറ്റി പ്രസിഡന്‍റ്മേച്ചേഴത്ത് ഗിരീഷ്, യുഡിഎഫ് ശക്തികുളങ്ങര മണ്ഡലം ചെയർമാൻ രാമാനുജൻ പിള്ള, നിസാർ കലദിക്കാട്, കേരള സ്റ്റേറ്റ് സർവീസ് പെൻഷനേഴ്സ് അസോസിയേഷൻ ജില്ലാ പ്രസിഡന്‍റ് വാരിയത്ത് മോഹൻകുമാർ തുടങ്ങിയവർ പ്രസംഗിച്ചു.

ബാബു നമ്പൂതിരിക്ക് പുരസ്കാരം

കൊല്ലം: വെളിനല്ലൂർ കലാമണ്ഡലം ഗംഗാധരൻ ആശാൻ സാംസ്കാരിക നിലയം കലാപഠന കേന്ദ്രത്തിന്‍റെ ഈ വർഷത്തെ ആശാൻ സ്മാരക പുരസ്കാരത്തിന് കലാമണ്ഡലം ബാബു നമ്പൂതിരി അർഹനായി.10,000 രൂപയും പ്രശസ്തിപത്രവും അടങ്ങുന്നതാണ് പുരസ്കാരം. വെളിനല്ലൂർ ശ്രീരാമ ക്ഷേത്രത്തിൽ 23 ന് വൈകുന്നേരം അഞ്ചിന് നടക്കുന്ന ചടങ്ങിൽ എൻ.കെ.പ്രേമചന്ദ്രൻ എംപി അവാർഡ് സമ്മാനിക്കും. സാംസ്കാരിക നിലയം പഠന കേന്ദ്രം പ്രസിഡന്‍റ് പ്രകാശ് വി. നായർ, സെക്രട്ടറി കെ.ജി.രാജേഷ്, താമരക്കുളം ഷംസു തുടങ്ങിയവർ പത്രസമ്മേളനത്തിൽ പങ്കെടുത്തു.

കിഴക്കൻ മലയോര മേഖലയിലെ പള്ളികളിൽ കാൽകഴുകൽ ശുശ്രൂഷയും പെസഹ അപ്പം മുറിക്കൽ ശുശ്രൂഷകളും നടന്നു

കുളത്തൂപ്പുഴ : കിഴക്കൻ മലയോര മേഖലയിലെ സെന്‍റ് പോൾ സിഎസ്ഐ പള്ളി, ശാലേം മാർത്തോമാ പള്ളി, സെന്‍റ് ജോർജ് ഓർത്തഡോക്സ് പള്ളി, സെന്‍റ് മാർക്ക് സിഎസ്ഐ പള്ളി, റോമൻ കത്തോലിക് പള്ളി, ആര്യങ്കാവ് സെന്‍റ്മേരീസ് മലങ്കര കത്തോലിക്കാ പള്ളി , ഇടപ്പാളയം സെന്‍റ് ജോർജ് പള്ളി എന്നിവി ടങ്ങളിൽ ക്രിസ്തു ദേവന്‍റെ കുരിശ് ആരോഹണത്തിന്‍റെ മുന്നോടിയായി കാൽകഴുകൽ ശുശ്രൂഷയും പെസഹ അപ്പം മുറിക്കൽ ശുശ്രൂഷകളും നടന്നു. ശുശ്രൂഷകൾക്ക് അതാത് പള്ളികളിലെ വികാരിമാർ നേതൃത്വം നൽകി.

ട്രാക്ക് സ്യൂട്ടിന്‍റെ പോക്കറ്റിൽ എംഡിഎം എ : രണ്ടുയുവാക്കൾ അറസ്റ്റിൽ

പുനലൂർ: ഇരുചക്ര വാഹനത്തിൽ എംഡിഎംഎ കടത്താൻ ശ്രമിച്ച രണ്ടുയുവാക്കൾ പുനലൂരിൽ പോലീസ് പിടിയിലായി. പ്ലാച്ചേരി ചരുവിള വീട്ടിൽ സായൂഷ് ദേവ്(24) പരവട്ടം സുമേഷ് ഭവനിൽ സുമേഷ് (24) എന്നിവരാണ് 4.6 ഗ്രാം എംഡിഎംഎ യുമായി പുനലൂർ പോലീസിന്‍റെ പിടിയിലായത്. ഉച്ചയോടെ തൊളിക്കോട് നിന്നും പര വട്ടത്തേക്ക് ബൈക്കിൽ വരുമ്പോഴാണ് പരവട്ടം മുഖത്തല ജംഗ്ഷനിൽ വച്ച് പ്രതികളെ പോലീസ് പിടികൂടുന്നത്. പ്രതികൾ ധരിച്ചിരുന്ന ട്രാക്ക് സ്യൂട്ടിന്‍റെ പോക്കറ്റിൽ നിന്നാണ് പ്ലാസ്റ്റിക് കവറിൽ സൂക്ഷിച്ച നിലയിൽ എം ഡി എം എ കണ്ടെത്തുന്നത്. കൊട്ടാരക്കര റൂറൽ എസ്പിയുടെ നേതൃത്വത്തിലുള്ള ഡാൻ സാഫ് ടീമും പുനലൂർ പോലീസും ചേർന്നാണ് പ്രതികളെ പിടികൂടിയത് .കോടതിയിൽ ഹാജരാക്കിയ ഇവരെ റിമാൻഡ് ചെയ്തു.

പൂർവ വിദ്യാർഥി സംഗമവും അനുസ്മരണവും നാളെ

കൊല്ലം: അൽമനാർ അറബിക് കോളജ് സ്ഥാപകൻ അബ്ദുൾ വഹാബ് മൗലവി അനുസ്മരണവും പൂർവ വിദ്യാർഥി സംഗമവും കരുനാഗപ്പള്ളി ലാൽഖില ഹോട്ടലിൽ നടക്കും.രാവിലെ 9.30 ന് അനുസ്മരണ സമ്മേളനം സി.ആർ.മഹേഷ് എംഎൽഎ ഉദ്ഘാടനം ചെയ്യും. ഷറഫുദീൻ കരുനാഗപ്പള്ളി അധ്യക്ഷത വഹിക്കും. മുനിസിപ്പൽ ചെയർമാൻ പടിപ്പുര ലത്തീഫ് ഉപഹാര സമർപ്പണം നടത്തും.തുടർന്ന് നടക്കുന്ന പൂർവ വിദ്യാർഥി സംഗമം ഡോ. അബ്ദുൾ സമദ് ഉദ്ഘാടനം ചെയ്യും. അൽമനാർ അബ്ദുൾ അസീസ് അധ്യക്ഷത വഹിക്കും.സ്വാഗത സംഘം ചെയർമാൻ അബ്ദുൾ അസീസ്, മറ്റ് ഭാരവാഹികളായ ഹംസ കുഴിവേലി, എം. അബ്ദുൾ സമദ് മാസ്റ്റർ, യൂസുഫ് ചവറ, ബദറുദീൻ കേരളപുരം, കുറ്റിവട്ടം മുഹമ്മദ് കുഞ്ഞ് എന്നിവർ പത്രസമ്മേളനത്തിൽ പങ്കെടുത്തു.

രേഖകള്‍ ഇല്ലാതെ കടത്താന്‍ ശ്രമിച്ച 15 ലക്ഷം രൂപ പിടികൂടി

ആര്യങ്കാവ് : രേഖകള്‍ ഇല്ലാതെ ആര്യങ്കാവ് അതിര്‍ത്തിവഴി കടത്തിയ 15,10,000 രൂപ എക്സൈസ് സംഘം പിടികൂടി. രാവിലെ എട്ടോടെയാണ് എക്സൈസ് ചെക്ക് പോസ്റ്റില്‍ ഇൻസ്പെക്ടർ ആർ.രജിത്തിന്‍റെ നേതൃത്വത്തിൽ നടത്തിയ വാഹന പരിശോധനക്കിടെ തമിഴ്നാട്ടിൽ നിന്നും സ്കോര്‍പ്പിയോ കാറില്‍ കടത്തികൊണ്ടുവന്ന തുക പിടിച്ചെടുക്കുന്നത്. വിരുദനഗർ സ്വദേശിയായ പാണ്ഡ്യൻ എന്നയാളെപണവുമായി എക്സൈ സ് സംഘം കസ്റ്റഡിയില്‍ എടുത്തു. ചോദ്യം ചെയ്ത വേളയില്‍ മതിയായ രേഖകള്‍ ഹാജരാക്കാന്‍ കഴിയാതായതോടെ പാണ്ഡ്യനെയും പിടിച്ചെടുത്ത തുകയും തെന്മല പോലീസിന് കൈമാറി. തുക കോടതിയില്‍ ഹാജരാക്കുമെന്ന് പോലീസ് അറിയിച്ചു. ഇത്രയധികം തുക എന്തിന് എവിടേയ്ക്ക് കൊണ്ട് വന്നു എന്നതടക്കംപോലീസ് അന്വേഷിക്കും. അസി. എക്സൈസ് ഇൻസ്പെക്ടർ (ഗ്രേഡ്) , ഗോപൻ, പ്രേംനസീർ, പ്രിവന്‍റീവ് ഓഫീസർ (ഗ്രേഡ് ) സജീവ്, സന്ദീപ് കുമാർ , ശ്രീലേഷ് എന്നിവരും ട്രെയിനിങ് ഇൻസ്പെക്ടർ മാരായ മിഥുൻ അജയ്,അഫ്സൽ, ബിസ്മി ജസീറ, ആൻസി ഉസ്മാൻ എന്നിവരുടെയും നേതൃത്വത്തിലാണ് പരിശോധന നടത്തുകയും തുകയുമായി പാണ്ഡ്യനെ കസ്റ്റഡിയില്‍ എടുക്കുകയും ചെയ്തത്.

തൈല പരികർമ ദിവ്യബലിക്ക് ബിഷപ് മുഖ്യകാർമികത്വം വഹിച്ചു

കൊല്ലം : രൂപത തങ്കശേരി ഇൻഫന്‍റ് ജീസസ് കത്തീഡ്രലിൽ നടന്ന തൈല പരികർമ ദിവ്യബലിക്ക് രൂപതാ അധ്യക്ഷൻ പോൾ ആന്‍റണി മുല്ലശേരി മുഖ്യ കാർമികത്വം വഹിച്ചു. രൂപതയിലെ എല്ലാ വൈദികരും ബിഷപിനോടൊപ്പം സഹകാർമികരായി. പൗരോഹിത്യാ സ്ഥാപന ദിനത്തിൽ ദിവ്യബലി മധ്യേ വൈദികർ രൂപതാ മെത്രാനു മുന്നിൽ ദൈവജനത്തെ സാക്ഷിനിർത്തി തങ്ങളുടെ പൗരോഹിത്യ വ്രത നവീകരണം നടത്തി. കൂദാശകൾ പരികർമംചെയ്യുമ്പോൾ ഉപയോഗിക്കുവാനുള്ള തൈലവും രൂപത മെത്രാൻ ആശീർവദിച്ചു. രോഗികളുടെ തൈലവും ക്രൈസ്തവ പ്രാരംഭ കൂദാശ അർഥികളുടെ തൈലവും പ്രതിഷ്ഠാപന തൈലവും ആണ് ദിവ്യബലിയിൽ ആശിർവദിച്ചത്. രൂപതാ അധ്യക്ഷനോടൊപ്പം വൈദിക സമൂഹം ഒന്നടങ്കം അർപ്പിച്ച ദിവ്യബലി വൈദികരുടെയും മെത്രാന്‍റെയും കൂട്ടായ്മയെ പ്രകടിപ്പിക്കുന്നതായിരുന്നു. രൂപതയിൽ പ്രവർത്തിക്കുന്ന വിവിധ സന്യാസിനി സഭകളിൽ നിന്നുള്ള ദൈവജനവും തിരുകർമങ്ങളിൽ പങ്കുചേർന്നു .

സിപിഎം കൊലപാതക രാഷ്്‌ട്രീയത്തിന്‍റെ വക്താക്കൾ: എം.ലിജു

അഞ്ചല്‍ : സിപിഎം കൊലപാതക രാഷ്‌ട്രീയത്തിന്‍റെ വക്താക്കള്‍ ആണെന്നും നിരപരാധികളായ ആളുകളെ ക്രൂരമായി കൊലപ്പെടുത്തുന്ന പാർട്ടിയായി സിപിഎം മാറിയെന്ന് കെപിസിസി ജനറൽ സെക്രട്ടറി അഡ്വ.എം.ലിജു. എരൂരിൽ സിപിഎം പ്രവർത്തകർ കൊലപ്പെടുത്തിയ ഐഎൻടിയുസി മണ്ഡലം പ്രസിഡന്‍റും കോൺഗ്രസ്‌ മണ്ഡലം വൈസ് പ്രസിഡന്‍റുമായിരുന്ന നെട്ടയം രാമഭദ്രൻ അനുസ്മരണ സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. കേസിൽ ഉൾപ്പെട്ട മുഴുവൻ പ്രതികൾക്കും ശിക്ഷ ഉറപ്പാക്കാതെ കോൺഗ്രസ്‌ പാർട്ടിക്ക് വിശ്രമമില്ല. കെപിസിസി ഇക്കാര്യത്തിൽ പ്രതിജ്ഞാബദ്ധമാണ്. കേസില്‍ പ്രതികളാക്കപ്പെട്ടവരില്‍ ചിലരെ വെറുതെവിട്ട സിബിഐ കോടതി വിധിക്കെതിരെ ഹൈക്കോടതിയെ സമീപിച്ചിട്ടുണ്ട്. പ്രതിയാണ് എന്നു കോടതി കണ്ടെത്തി ശിക്ഷിച്ചയാളെ ലോക്കല്‍ കമ്മിറ്റിയില്‍ എടുത്ത പാര്‍ട്ടിയാണ് സിപിഎം. കൊലപാതക കേസിൽ നേരിട്ട് കൊല ചെയ്തു എന്ന് കോടതിയിൽ സമർപ്പിച്ച കുറ്റപത്രത്തിൽ ഉൾപ്പെട്ട പ്രതിയെ മുഖ്യമന്ത്രി ആക്കിയ പാർട്ടിയില്‍ നിന്നും കൂടുതല്‍ ഒന്നും പ്രതീക്ഷക്കരുതെന്നും എം. ലിജു പറഞ്ഞു. രാമഭദ്രൻ കേസിൽ ഹൈക്കോടതിയിലും സിബിഐ കോടതിയിലും കേസിന് നേതൃത്വം നൽകിയ ഡിസിസി ജനറൽ സെക്രട്ടറി ഏരൂർ സുഭാഷിനേ കെപിസിസി വർക്കിംഗ്‌ പ്രസിഡന്‍റ് ടി .എൻ .പ്രതാപൻ ആദരിച്ചു. ഡിസിസി എക്സിക്യൂട്ടീവ് അംഗം പി .ബി .വേണുഗോപാൽ അധ്യക്ഷത വഹിച്ചു. കെപിസിസി നിർവാഹക സമിതി അംഗം ജ്യോതികുമാർ ചാമക്കാല, കെപിസിസി സെക്രട്ടറി അഡ്വ .സൈമൺ അലക്സ്‌, അഡ്വ .അഞ്ചൽ സോമൻ, കെ. ശശിധരൻ, നെൽസൺ സെബാസ്റ്റ്യൻ, അഡ്വ. എസ് .ഇ .സഞ്ജയ് ഖാൻ, തോയിത്തല മോഹനൻ, സി. വിജയകുമാർ, ഡെനിമോൻ, നെട്ടയം സുജി, പി.ടി.കൊച്ചുമ്മച്ചൻ, പത്തടി സുലൈമാൻ, ബിജു, ശശിധരൻ എന്നിവര്‍ പ്രസംഗിച്ചു.

കെഎസ്ആര്‍ടിസി ബസിടിച്ച് വയോധികന്‍ മരിച്ചു

ചവറ : ശാസ്താം കോട്ട - ചവറ സംസ്ഥാന പാതയില്‍ കെഎസ്ആര്‍ടിസി വേണാട് ബസിടിച്ച് വയോധികന്‍ മരിച്ചു. ചവറ തെക്കുംഭാഗം നടുവത്ത് ചേരി വയലില്‍ പുത്തന്‍ വീട്ടില്‍ രഘുനാഥന്‍ (63) ആണ് മരിച്ചത്. തേവലക്കര അരിനല്ലൂര്‍ കുമ്പഴ മുക്കില്‍ ഗുരുമന്ദിരത്തിന് സമീപം വെച്ച് ഇന്നലെ ഉച്ചയ്ക്ക് 2.30 ഓടെയായിരുന്നു അപകടം. പത്തനംതിട്ടയില്‍ നിന്നും കൊല്ലത്തേക്ക് പോവുകയായിരുന്നു ബസ്. ഇതേ സമയം ഇട റോഡിൽ നിന്ന് സൈക്കിളില്‍ പ്രധാന റോഡിലേക്ക് കയറി വന്ന രഘുനാഥനെ ഇടിക്കാതിരിക്കാനായുള്ള ശ്രമത്തിനിടയില്‍ നിയന്ത്രണം വിട്ട ബസ് സമീപത്തെ വൈദ്യുത തൂണിലിടച്ച ശേഷം കടയിലെ ഭിത്തിയില്‍ ഇടിച്ചു നില്‍ക്കുകയായിരുന്നു. ഇതിനിടയില്‍ ബസിനടയില്‍പ്പെട്ട രഘുനാഥനെ സമീപത്തുള്ളവര്‍ ഉടന്‍ തന്നെ ശാസ്താംകോട്ടയിലെ സ്വകാര്യ ആശുപത്രിയിലെത്തിച്ചെങ്കിലും മരണമടഞ്ഞു. വിവിധ ജോലികൾ ചെയ്തു വരുന്ന ഇദ്ദേഹം അവിവാഹിതനാണ്. സഹോദരങ്ങള്‍ കുചേലന്‍, വല്ലഭന്‍.

ആദിവാസി ദളിത് മുന്നേറ്റ സമിതി

കുളത്തൂപ്പുഴ: ഡോ.ബി.ആർ. അംബേദ്കറുടെ ജന്മദിനം ആദിവാസി ദളിത് മുന്നേറ്റ സമിതിയുടെ നേതൃത്വത്തിൽ അരിപ്പ സമരഭൂമിയിൽ ആഘോഷിച്ചു. അംബേദ്കറുടെ ഛായാ ചിത്രത്തിനു മുന്നിൽ പുഷ്പാർച്ചന നടത്തി. എഡിഎംഎസ് സംസ്ഥാന സെക്രട്ടറി വി. രമേശൻ ഉദ്ഘാടനം ചെയ്തു. ജില്ലാ സെക്രട്ടറി വി.എസ്.വിജയൻ അധ്യക്ഷത വഹിച്ചു. സുലേഖബീവി, സുനിൽ അച്ചൻകോവിൽ, വി. ചന്ദ്രശേഖരൻ, പുഷ്പ അപ്പുക്കുട്ടൻ, അമ്മിണി ചെങ്ങറ, പാപ്പൻ വിതുര, ശ്രീജിത്ത്, തുടങ്ങിയവർ നേതൃത്വം നൽകി.

ശനിയാഴ്ച നിയന്ത്രിതഅവധി നൽകണമെന്ന്

കൊല്ലം : ദുഃഖവെള്ളിയാഴ്ചയുടെ അടുത്ത ദിവസമായ ശനിയാഴ്ച ക്രൈസ്തവ വിശ്വാസികളായ സർക്കാർ ജീവനക്കാർക്ക് നിയന്ത്രിത അവധി നൽകണമെന്ന് മഹാത്മാഗാന്ധി സാംസ്കാരിക സമിതി ആവശ്യപ്പെട്ടു. പ്രസിഡന്‍റ് സജീവ്പരിശവിള ഉദ്ഘാടനം ചെയ്തു.അഡ്വ.എം.ജി.ജയകൃഷ്ണൻ അധ്യക്ഷനായിരുന്നു. കണ്ണനല്ലൂർ നിസാം,ആന്‍റണി വടക്കുംതല, പ്രജീഷ് രാമകൃഷ്ണൻ, എം.മാത്യൂസ്, ഷീബ എന്നിവർ പ്രസംഗിച്ചു.

അംബേദ്കർ ജയന്തി ദിനം ആചരിച്ചു

കൊട്ടാരക്കര : കെപിഎംഎസ് കൊട്ടാരക്കര താലൂക്ക് യൂണിയന്‍റെ നേതൃത്വത്തിൽ അംബേദ്കർ ജയന്തി ദിനം ആചരിച്ചു. കൊട്ടാരക്കര ബ്ലോക്ക് പഞ്ചായത്ത് പ്രസിഡൻ്റ് എ. അഭിലാഷ് ഉദ്ഘാടനം ചെയ്തു. കോട്ടാത്തല സുരേഷ് അദ്ധ്യക്ഷത വഹിച്ചു. ബ്ലോക്ക് പഞ്ചായത്ത് അംഗം എം.ശിവപ്രസാദ് മുഖ്യ പ്രഭാഷണം നടത്തി. എ. കെ.മനോജ്,പ്രദീപ് പുല്ലാമല, സുദേവൻ, അഡ്വ. അമൽ കൃഷ്ണ, സജിമോൻ, അരുൺ പുത്തൂർ, ബസന്ത് കൃഷ്ണകുമാർ അജിത, ബീനഇടവട്ടം, പ്രദീപ് ചിറ്റിക്കോട് എന്നിവർ പ്രസംഗിച്ചു.

അംബേദ്കർ അനുസ്മരണ യോഗം

കൊട്ടാരക്കര: ഡോ. ബി. ആർ അംബേദ്കറുടെ ജയന്തിദിനത്തിൽ കൊട്ടാരക്കര ബ്ലോക്ക്‌ കോൺഗ്രസ് കമ്മിറ്റിയുടെ നേതൃത്വത്തിൽ കോൺഗ്രസ് ഭവനിൽ പുഷ്പാർച്ചന നടത്തി. അനുസ്മരണ യോഗത്തിൽബ്ലോക്ക് പ്രസിഡന്‍റ് കെ. ജി. അലക്സ്‌ അധ്യക്ഷത വഹിച്ചു. അഡ്വ. ബ്രിജേഷ് ഏബ്രഹാം, പാത്തല രാഘവൻ, ഒ. രാജൻ, ബേബി പടിഞ്ഞാറ്റിൻകര, അനീഷ് മംഗലത്ത്, കോശി. കെ ജോൺ, ആർ. മധു, സാംസൺ വാളകം,ജലജശ്രീകുമാർ, എം. സി. ജോൺസൻ,ശിവൻ പിള്ള, ഉണ്ണി കൃഷ്ണൻ, രമാ പ്രസാദ്, അരുൺകുമാർ, ദേവരാജൻ തുടങ്ങിയവർ നേതൃത്വം നൽകി.

ഗവർണറുടെ കാർ അപകടത്തിൽപ്പെട്ടു

കൊട്ടാരക്കര: ഗവർണറുടെ കാർ അപകടത്തിൽ പെട്ടു. മുൻപേ പോയ കാറുകളിലിടിച്ചാണ് അപകടമുണ്ടായത്. കാറിൽ ഗവർണർ ഉണ്ടായിരുന്നില്ല. ഇന്നലെ വൈകിട്ട് 5.30 ഓടെ കൊട്ടാരക്കര ലോവർ കരിക്കത്താണ് അപകടമുണ്ടായത്. ഗവർണറെ കൂട്ടികൊണ്ടുവരാൻ എറണാകുകുളത്തേക്ക് പോവുകയായിരുന്നു കാർ. പിന്നാലെ അകമ്പടി വാഹനവുമുണ്ടായിരുന്നു. മുന്നിൽ പോയ കാറിൽ ഗവർണറുടെ കാർ ഇടിച്ചതിനെ തുടർന്ന് കാർ അതിനു മുന്നിൽ പോയ കാറിൽ ഇടിക്കുകയായിരുന്നു. രണ്ട് കാറുകൾക്കും കേടുപാടുകൾ പറ്റി. ആർക്കും പരിക്കില്ല. ഇതിനിടയിൽ ഒരു കാറിന്‍റെ ഡ്രൈവർ അകമ്പടി വാഹനത്തിലെ പോലീസുകാരനെ അടിച്ചു. ഇയാളെ കൊട്ടാരക്കര പോലീസ് കസ്റ്റഡിയിലെടുത്തു.

മാര്‍ച്ചും ധര്‍ണയും നടത്തി

അഞ്ചല്‍ : ഏരൂര്‍ ഗ്രാമപഞ്ചായത്തില്‍ അഴിമതിയും കെടുകാര്യസ്ഥതയും കൊടികുത്തി വാഴുകയാണെന്ന് ബിജെപി ആരോപിച്ചു. പഞ്ചായത്തിലെ ഇടതുമുന്നണി ഭരണം അഴിമതി നിറഞ്ഞതാണെന്നും അവതരിപ്പിച്ച ബജ്റ്റിന് പേപ്പറിന്‍റെ വിലപോലും ഇല്ലന്നും മാട്ടിറച്ചി സ്റ്റാളുകളുടെ ലേലത്തില്‍ ഉള്‍പ്പടെ നടന്നിരിക്കുന്നത് വലിയ ക്രമക്കേടാണെന്നും ബിജെപി ആരോപിച്ചു. ഇക്കാര്യങ്ങളില്‍ അന്വേഷണം ആവശ്യപ്പെട്ടുകൊണ്ട് ഏരൂര്‍ പഞ്ചായത്ത് സമിതിയുടെ നേതൃത്വത്തില്‍ പഞ്ചായത്ത് ഓഫീസിലേക്ക് മാര്‍ച്ചും ധര്‍ണയും സംഘടിപ്പിച്ചു. സ്കൂള്‍ ജംഗ്ഷനില്‍ നിന്നും ആരംഭിച്ച മാര്‍ച്ച് പഞ്ചായത്ത് ഓഫീസ് പടിക്കല്‍ പോലീസ് തടഞ്ഞു. തുടര്‍ന്നു നടന്ന ധർണ ബിജെപി സംസ്ഥാന കൗൺസിൽ അംഗം ഉമേഷ് ബാബു ഉദ്ഘാടനം ചെയ്തു. പഞ്ചായത്ത് സമിതി പ്രസിഡന്‍റ് അഖിലിന്‍റെ ആധ്യക്ഷതയില്‍ നടന്ന പ്രതിഷേധത്തില്‍ ജില്ലാ കമ്മറ്റി അംഗങ്ങൾ ആയ സുമൻ ശ്രീനിവാസൻ, അലഞ്ചേരി ജയചന്ദ്രൻ, മണ്ഡലം ജനറൽ സെക്രട്ടറി ബാലചന്ദ്രൻ പിള്ള, മണ്ഡലം വൈസ് പ്രസിഡന്‍റ് അനിൽകുമാർ മഹിളാ മോർച്ച മണ്ഡലം പ്രസിഡന്‍റ് ചന്ദ്രലേഖ, നേതാക്കളായ വിഷ്ണു, കൃഷ്ണൻ കുട്ടി, സുരേഷ് ബാബു, സുജാത എന്നിവർ പ്രസംഗിച്ചു.

ആരാധനാലയങ്ങൾ രാഷ്‌ട്രീയ വത്കരിക്കരുത്: ബിന്ദു കൃഷ്ണ

കൊല്ലം: കൊല്ലം പൂരത്തിൽ നടന്ന കുടമാറ്റത്തിൽ ലോകത്തിന് മാതൃകയായ നവോത്ഥാന നായകർക്ക് ഒപ്പം ആർഎസ്എസ് സ്ഥാപകൻ ഹെഗ്‌ഡേവാറിന്‍റെ ചിത്രം ഉയർത്തിയത് ആരാധനാലയങ്ങൾ രാഷഷ്‌ട്രീീയ വത്്കരിക്കരുത് എന്നുള്ള ഹൈകോടതി വിധിയുടെ ഗുരുതരമായ ലംഘനം ആണെന്ന് കെ പി സി സി രാഷ്ട്രീയകാര്യസമിതിയംഗം ബിന്ദുകൃഷ്ണ. ഇത്തരം ദുഷിച്ച പ്രവണതകൾ കേരളിയ സമുഹത്തിൽ വർഗീയതയുടെ വിഷവിത്തുകൾ വളരാനെ ഉപകരിക്കുകയുള്ളു എന്നും ആരാധനാലയങ്ങൾ വിശ്വാസികൾക്ക് മാത്രം ഉള്ളതാണന്നും അവിടെങ്ങളെ അന്ധമായി രാഷ്‌ട്രീയവത്കരിക്കരുത് എന്നുള്ള തിരിച്ചറിവ് സിപിഎമ്മുകാർക്കും ബി ജെ പിക്കാർക്കും ഉണ്ടാകണമെന്നും ബിന്ദുകൃഷ്ണ പറഞ്ഞു. ഇത്തരം സംഭവങ്ങൾ ആവർത്തിക്കുന്നത് ആഭ്യന്തര വകുപ്പിന്‍റെയും ദേവസ്വം ബോർഡിന്‍റെയും പിടിപ്പ്‌കേടും കൊണ്ടാണ്. യഥാർത്ഥ വിശ്വാസികൾക്ക് വേദനയുളവാക്കുന്ന ഇത്തരം സംഭവങ്ങൾ ആവർത്തിക്കാതിരിക്കാൻ വേണ്ട ശക്തമായ നടപടി സർക്കാർ സ്വീകരിക്കണമെന്നും ബിന്ദുകൃഷ്ണ ആവശ്യപ്പെട്ടു.

വനപാത മാലിന്യങ്ങളാല്‍ സമൃദ്ധം; കണ്ണടച്ച് വനപാലകര്‍

അഞ്ചല്‍: അലയമണ്‍-കുളത്തൂപ്പുഴ പഞ്ചായത്തുകളെ ബന്ധിപ്പിക്കുന്ന വനപാതയിലൂടെ മൂക്ക് പൊത്താതെ യാത്രചെയ്യാനാവില്ല. മടത്തറ പാലോട് നെടുമങ്ങാട് ഭാഗങ്ങളില്‍ നിന്നുള്ളവര്‍ക്ക് കുളത്തൂപ്പുഴ വഴി ചുറ്റാതെ വേഗത്തില്‍ അഞ്ചല്‍, പുനലൂര്‍ ഭാഗങ്ങളില്‍ എത്താന്‍ കഴിയുന്ന പാത നിലവിൽ മാലിന്യം തള്ളുന്ന കേന്ദ്രമായി മാറിയിരിക്കുകയാണ്. കുടുക്കത്തുപാറ ഇക്കോടൂറിസത്തിലേക്ക് എത്താന്‍ കഴിയുന്ന മലയോര പാതയിലൂടെ നിത്യവും സ്വകാര്യ ബസുകള്‍ ഉള്‍പ്പടെ നിരവധി വാഹനങ്ങള്‍ ആണ് കടന്നുപോകുന്നത്. മാലിന്യം ഭക്ഷിക്കാന്‍ എത്തുന്ന കാട്ടുപന്നികള്‍, തെരുവ് നായക്കള്‍ എന്നിവയുടെ ശല്ല്യം വാഹനങ്ങൾക്കും പ്രത്യേകിച്ച് ഇരു ചക്ര വാഹന യാത്രക്കും ദുസഹമായിട്ടുണ്ട്. വനം വകുപ്പിന്‍റെ അഞ്ചല്‍ റേഞ്ച്, കേരള ഫോറസ്റ്റ് ഡവലപ്മെന്‍റ് കോര്‍പ്പറേഷന്‍ തുടങ്ങിവയയുടെ അധികാരപരിധിയിലുള്ള പാതയോരത്ത് കക്കൂസ് മാലിന്യം, അറവു മാലിന്യം, കോഴിവേസ്റ്റ്, കെട്ടിട വേസ്റ്റ്, കുട്ടികളുടെ ഉപയോഗിച്ച പാമ്പേഴ്സ്, പച്ചക്കറി വേസ്റ്റ്, ബാർബർ ഷോപ്പിൽ നിന്നുള്ള തലമുടി, പഴകിയ തുരുമ്പ് പിടിച്ച ബ്ലൈഡ് ഉൾപ്പെടെ വലിയ അളവിലുള്ള മാലിന്യങ്ങളാണ് ഇവിടെ തള്ളപ്പെടുന്നത്. ഡിസ്പോസിബിള്‍ പ്ലേറ്റ്, ഗ്ലാസുകള്‍ ഉള്‍പ്പടെ വലിയ അളവില്‍ പ്ലാസ്റ്റിക് മാലിന്യവും പാതയോരത്ത് ടണ്‍ കണക്കിന് തള്ളിയിരിക്കുന്നു. മാലിന്യങ്ങള്‍ കാക്കകള്‍ കൊത്തിവലിച്ചു വീടുകളിലെ കിണറുകളില്‍ ഇടുന്നത് നിത്യസംഭവമായിട്ടുണ്ട്. നവകേരളം പദ്ധതിയുടെ ഭാഗമായി ഗ്രാമ പഞ്ചായത്തുകൾ മാലിന്യ നിക്ഷേപങ്ങള്‍ക്കെതിരേ കര്‍ശന നടപടികള്‍ സ്വീകരിച്ച് തുടങ്ങിയതോടെയാണ് ആളൊഴിഞ്ഞ വനപാതകള്‍ മാലിന്യം തള്ളുന്നതിനായി സാമൂഹിക വിരുദ്ധര്‍ തെരഞ്ഞെടുത്തിരിക്കുന്നത്. വനപാതയിലെ മാലിന്യം നിക്ഷേപിക്കുന്നത് പലതവണ വനംവകുപ്പ് അധികൃതരെ അറിയിച്ചിട്ടും നടപടിയില്ലന്നു നാട്ടുകാര്‍ ആരോപിക്കുന്നു. വനപാത ആയതിനാല്‍ ഗ്രാമപഞ്ചായത്തിനും മാലിന്യ നിക്ഷേപം തടയാന്‍ കഴിയാത്ത സാഹചര്യമാണ് ഉള്ളത്. വനം പോലീസ് വകുപ്പുകള്‍ രാത്രികാല പെട്രോളിംഗ് നടത്തണമെന്ന ആവസശ്യമാണുയരുന്നത്. പരാതികള്‍ ഉയര്‍ന്നപ്പോള്‍ നിരീക്ഷണ കാമറകളും ചെക്ക്പോസ്റ്റും സ്ഥാപിക്കുമെന്ന് വനം വകുപ്പ് പറഞ്ഞിരുന്നു. എന്നാല്‍ ഇതിനുള്ള നടപടികള്‍ ഒന്നും പിന്നീട് ഉണ്ടായിട്ടില്ല.

ആശാ സമരത്തോട് നിഷേധാത്മക സമീപനമെന്ന്

കൊല്ലം: കിഫ്ബിയുടെ പേരിൽ കെ. എം. എബ്രഹാമിന് ആറേ മുക്കാൽ ലക്ഷം രൂപ മാസ ശമ്പളവും പിഎസ്‌സി ചെയർമാനും അംഗങ്ങൾക്കും ലക്ഷങ്ങളുടെ ശമ്പള വർദ്ധവനും മറ്റ് ആനുകൂല്യങ്ങളും, കെ. വി.തോമസിന് ലക്ഷങ്ങൾ നോക്ക് കൂലിയും നൽകുന്ന സർക്കാർ ആശാ വർക്കർമാരുടെ ന്യായമായ സമരത്തിന് മുന്നിൽ സാമ്പത്തിക ബാധ്യതയെ കുറിച്ച് പറയുന്നത് ലജ്ജാകരമാണെന്ന് ഐഎൻടിയു സി ജില്ലാ പ്രസിഡന്‍റ് എ. കെ. ഹഫീസ് പ്രസ്താവനയിൽ പറഞ്ഞു. ആശാ വർക്കർമാരെ സർക്കാർ ജീവനക്കാരായി അംഗീകരിച്ച് അവർക്ക് മാസ ശമ്പളവും ആനുകൂല്യങ്ങളും അനുവദിക്കണമെന്ന് ഹഫീസ് ആവശ്യപ്പെട്ടു.

കൊട്ടാരക്കര ഡിഇഒ ഓഫീസിൽ ബോംബ് ഭീഷണി

കൊട്ടാരക്കര: ജില്ലാ വിദ്യാഭ്യാസ ഓഫീസറുടെ കാര്യാലയത്തിൽ ബോംബ് ഭീഷണി. തുടർന്ന് പ്രവർത്തനം നിർത്തിവച്ച് പരിശോധന നടന്നു. പുലർച്ചെ നാലുമണിയോടെ ഇ-മെയിലായാണ് ബോംബ് ഭീഷണി സന്ദേശം എത്തുന്നത്. എഐഎഡിഎംകെ നേതാവ് പളനി സ്വാമിയെ മാറ്റണമെന്നാവശ്യപ്പെട്ടാണ് ബോംബ് വച്ചിരിക്കുന്നതെന്നും ഭീഷണി സന്ദേശത്തിലുണ്ട്. രാവിലെ ജീവനക്കാരെത്തി മെയിൽ പരിശോധിക്കുമ്പോഴാണ് സന്ദേശം കാണുന്നത്. ഉടൻ പോലീസിനെ വിവരമറിയിക്കുകയായിരുന്നു. പോലീസും ബോംബ് സ്ക്വാഡും ഡോഗ് സ്ക്വാഡുമെത്തി പരിശോധന നടത്തിയെങ്കിലും ഒന്നും കണ്ടെത്താനായില്ല. ജീവനക്കാരെയും പൊതുജനങ്ങളെയും ഓഫീസ് വളപ്പിൽ നിന്നും പുറത്താക്കി പരിശോധന നടത്തി. സമീപത്തെ മറ്റു കെട്ടിടങ്ങളിലും പരിശോധന നടന്നു.

സി.ആർ. മഹേഷ് എംഎൽഎയുമായി ചർച്ച നടത്തി

കൊല്ലം: യുണൈറ്റഡ് മർച്ചൻ്സ് ചേമ്പർ, പുള്ളിമാൻ സാംസ്കാരിക വേദി എന്നിവയുടെ ഭാരവാഹികൾ സി. ആർ.മഹേഷ് എം എൽ എയുമായി ചർച്ച നടത്തി. റോഡ് വികസനം, പില്ലർ ഹൈവേ പുതിയകാവ് വരെ നീട്ടൽ, അടിപ്പാതകൾ, റെയിൽവേ വികസനം തുടങ്ങിയ നാടിന്‍റെ വികസന കാര്യങ്ങളിലായിരുന്നു ചർച്ച. എം എൽ എയുമായി എംപിയുടെ സാന്നിധ്യത്തിൽ കേന്ദ്ര മന്ത്രിമാരെ ഡൽഹിയിൽ പോയി കാണാനും നിവേദനം നൽകാനും തീരുമാനിച്ചു. ചർച്ചയിൽ യുഎംസി കൊല്ലം ജില്ലാ പ്രസിഡന്‍റ് നിജാം ബഷി,പുള്ളിമാൻ സാംസ്കാരിക വേദി ചെയർമാൻ കെ.കെ.രവി, യു എം സി.ഭാരവാഹികളായ എസ്.ഷംസുദ്ദീൻ, എന്നിവർ പങ്കെടുത്തു.

ലോട്ടറി തൊഴിലാളി യൂണിയൻ ജില്ലാ പ്രവർത്തകയോഗം

കൊല്ലം: ലോട്ടറി തൊഴിലാളി ക്ഷേമനിധി ബോർഡിൽ തട്ടിപ്പ് നടത്തിയ മുഴുവൻ പേർക്കെതിരെയും ശക്തമായ നടപടി സ്വീകരിക്കണമെന്ന് ഓൾ കേരള ലോട്ടറി ഏജന്‍റ് ആൻഡ് സെല്ലേഴ്സ് കോൺഗ്രസ് ഐഎൻടിയുസി കൊല്ലം ജില്ലാ കമ്മറ്റി ആവശ്യപ്പെട്ടു. തൊഴിലാളികളുടെ ക്ഷേമനിധി ആനുകൂല്യങ്ങൾ വൈകിപ്പിച്ചും അകാരണമായി അവരെ ക്ഷേമനിധിയിൽ നിന്നും പുറത്താക്കിയും ബോണസിൽ കാലോചിതമായ വർധനവ് വരുത്താതെയും കടുത്ത തൊഴിലാളി ദ്രോഹം ഇവർ നടത്തുമ്പോഴാണ് ഉന്നതരുടെ ഒത്താശയോടെ കോടികൾ കൊള്ള നടത്തുന്നതെന്നും ഐഎൻടിയു സി ആരോപിച്ചു. തിരൂരിൽ 26,27 തീയതികളിൽ നടക്കുന്ന യൂണിയൻ സംസ്ഥാന സമ്മേളനത്തിൽ 200 തൊഴിലാളി പ്രതിനിധികളെ പങ്കെടുപ്പിക്കാൻ യോഗം തീരുമാനിച്ചു. സംസ്ഥാന വൈസ് പ്രസിഡന്‍റ്് വടക്കേവിള ശശി യോഗം ഉദ്ഘാടനം ചെയ്തു. ജില്ലാ പ്രസിഡന്‍റ് ഒ.ബി. രാജേഷ് അധ്യക്ഷത വഹിച്ചു. ഭാരവാഹികളായ വിളയത്ത് രാധാകൃഷ്ണൻ, ചവറ ഹരീഷ്, എച്ച് താജുദ്ദീൻ, കുണ്ടറ സുബ്രഹ്മണ്യം, റഹീം ചൂളൂർ, മുനീർ ബാനു, അശോകൻ, വൈശാഖ് വി. പിള്ള, ഷുജാ ഷാഹുൽ തുടങ്ങിയവർ പ്രസംഗിച്ചു.

നാലംഗ സംഘം ബസ് കണ്ടക്ടറെ മർദിച്ചു

അഞ്ചൽ: സ്വകാര്യബസ് കണ്ടക്ടറെ ഇരുചക്ര വാഹനങ്ങളിലെത്തിയ നാലംഗ സംഘം മർദിച്ചു. മടത്തറ വേങ്കൊല്ല റാഷിദ് മൻസിലിൽ റാഷിദ് (20) നാണ് മർദനമേറ്റത്. കഴിഞ്ഞ ദിവസം രാവിലെ ഏഴേകാലോടെ ഏരൂര്‍ വിളക്കുപാറയിലാണ് സംഭവം. വിളക്കുപാറ - അഞ്ചൽ -കടയ്ക്കൽ - ചടയമംഗലം റൂട്ടിൽ സർവീസ് നടത്തുന്ന അജ്മി ബസിലെ കണ്ടക്ടറാണ് റാഷിദ്. വിളക്കുപാറയില്‍ പുലര്‍ച്ചെയെത്തിയ സംഘം ബസ് വരുന്നതും കാത്ത് കടത്തിണയില്‍ കാത്തിരിക്കുന്നതിന്‍റെ സിസിടിവി ദൃശ്യങ്ങള്‍ പോലീസിന് കിട്ടിയിട്ടുണ്ട്. ബൈക്കിലും സ്കൂട്ടിയിലുമായെത്തിയ നാലംഗ സംഘം ബസിൽ നിന്നും റാഷിദിനെ വലിച്ചിറക്കി ക്രൂരമായി മർദ്ദിക്കുകയായിരുന്നു. ഭക്ഷണം കഴിക്കുവാനായി പോയ ബസ് ഡ്രൈവർ ബഹളം കേട്ട് ഓടി വന്നപ്പോഴേക്കും അക്രമികൾ ബൈക്കിലും സ്കൂട്ടിയിലും കയറി രക്ഷപെടുകയായിരുന്നു. തലയ്ക്കും കൈകാലുകൾക്കും ഗുരുതരമായി പരിക്കേറ്റ റാഷിദിനെ ഡ്രൈവറും നാട്ടുകാരും ചേർന്ന് അഞ്ചലിലെ സ്വകാര്യ ആശുപത്രിയിലും തുടർന്ന് പുനലൂർ താലൂക്കാശുപത്രിയിലും പ്രവേശിപ്പിച്ചു. ബസിൽ നിന്നും വലിച്ചിറക്കിയ തന്നെ റോഡിൽ കിടന്ന റബർ കമ്പ് ഉപയോഗിച്ച് നാലുപേരും ചേർന്ന് മർദിച്ചെന്നും താനുമായി പരിചയത്തിലുള്ള ഒരു പെൺകുട്ടിയുടെ പേര് പറഞ്ഞാണ് മർദിച്ചതെന്നും റാഷിദ് പറയുന്നു. അക്രമികളുമായി മുൻ പരിചയം ഇല്ലെന്നും റാഷിദ് വ്യക്തമാക്കി. റാഷിദിന്‍റെ മൊഴി ഉള്‍പ്പടെ രേഖപ്പെടുത്തിയ പോലീസ് അന്വേഷണം നടത്തി വരികയാണ്.

നിയന്ത്രണം വിട്ട കാർ പാതയോരത്തെ വീട്ടുമുറ്റത്തേക്ക് തലകീഴായി മറിഞ്ഞു

കുളത്തൂപ്പുഴ :നിർമാണത്തിലെ പിഴവുമൂലം മലയോര ഹൈവേയിൽ അപകടങ്ങൾ പതിവാകുന്നതായി പരാതി. കുളത്തൂപ്പുഴ മടത്തറ പാതയിൽ നിയന്ത്രണം വിട്ടകാർ ഇന്നലെ പാതയോരത്തെ വീട്ടുമുറ്റത്തേക്ക് തലകീഴായി മറിഞ്ഞു. രാത്രി മൈലമൂട് ജംഗ്ഷനു സമീപമായിരുന്നു അപകടം. തെന്മല സ്വദേശികളായ കുടുംബം മടത്തറ ബന്ധുവീട്ടിലേക്ക് പോകവേ മൈലമൂട് വളവിൽ വച്ച് നിയന്ത്രണംവിട്ട കാർ എതിർവശത്തെ വീട്ടുമുറ്റത്തേക്ക് പതിക്കുകയായിരുന്നു. കഴിഞ്ഞ ദിവസം പെയ്ത മഴയിൽ സമീപത്തെ കുന്നിൻ മുകളിൽ നിന്നും പാതയിലൂടെ ചരലും മണ്ണും ചെളിയും ഒലിച്ചെത്തി ഹൈവേയുടെ ഒരു വശത്ത് തിട്ട പോലെ രൂപപ്പെട്ടതാണ് കാരണം. ശബ്ദം കേട്ട് ഓടിക്കൂടിയ നാട്ടുകാരും സമീപത്തെ വീട്ടുകാരും ചേർന്ന് അപകടത്തിൽപ്പെട്ട കാറിൽ സഞ്ചരിച്ചിരുന്ന പിഞ്ചുകുഞ്ഞ് അടക്കമുള്ളവരെ പുറത്തെത്തിച്ചു. ഇവർക്ക് കുളത്തൂപ്പുഴ സാമൂഹ്യ ആരോഗ്യ കേന്ദ്രത്തിൽ പ്രാഥമിക ശുശ്രൂഷ നൽകി.

101 അമ്മമാര്‍ സന്ദേശമുയര്‍ത്തി; ഗാന്ധിഭവന്‍റെ ലഹരിവിരുദ്ധ പ്രചാരണത്തിന് തുടക്കമായി

പത്തനാപുരം : നടി ശ്രീലത നമ്പൂതിരി ലഹരിവിരുദ്ധ ‍ പ്രതിജ്ഞ ചൊല്ലി കൊണ്ട് ഗാന്ധിഭവനില്‍ ലഹരി വിരുദ്ധ പ്രചാരണ പരിപാടിക്ക് തുടക്കമായി. ഗാന്ധിഭവനിലെ അന്തേവാസികളായ 101 അമ്മമാര്‍ 'ഞങ്ങള്‍ക്ക് ലഹരി വേണ്ട, ജീവിതം മതി' എന്ന സന്ദേശമെഴുതിയ പ്ലക്കാര്‍ഡുകള്‍ ഉയര്‍ത്തിപ്പിടിച്ചപ്പോള്‍ ഗാന്ധിഭവനിലെ നൂറോളം കുട്ടികളും സന്ദര്‍ശകരായെത്തിയ വിദ്യാര്‍ഥികളുള്‍പ്പെടെയുള്ളവരും പ്രതിജ്ഞ ഏറ്റുചൊല്ലി. സ്‌കൂളുകള്‍, കോളജുകള്‍, കുടുംബശ്രീകള്‍, ക്ലബുകള്‍, സന്നദ്ധ കൂട്ടായ്മകള്‍ വഴി ലഹരിക്കെതിരേ വ്യാപകമായ പ്രചരണം നടത്തുകയാണ് ഗാന്ധിഭവന്‍ പദ്ധതിയിലൂടെ ഉദ്ദേശിക്കുന്നത്. ഗാന്ധിഭവന്‍ സെക്രട്ടറി പുനലൂര്‍ സോമരാജന്‍ അധ്യക്ഷത വഹിച്ച ചടങ്ങില്‍ അലക്‌സാണ്ടര്‍ യേശുദാസന്‍, വി. സരളാഭായി, ആര്‍. ദിലീപ് കുമാര്‍ എന്നിവര്‍ പ്രസംഗിച്ചു.

കർഷക തൊഴിലാളി പെന്‍ഷന്‍ 5000 രൂപയാക്കണം: ഡികെടിഎഫ്

കൊല്ലം: കര്‍ഷക തൊഴിലാളി പെന്‍ഷന്‍ പ്രതിമാസം 5000 രൂപയാക്കി ഉയര്‍ത്തണമെന്ന് ദേശീയ കര്‍ഷക തൊഴിലാളി ഫെഡറേഷന്‍ ജില്ലാ നേതൃയോഗം സര്‍ക്കാരിനോട് ആവശ്യപ്പെട്ടു. പത്തു വര്‍ഷമായി മുടങ്ങിക്കിടക്കുന്ന അതിവര്‍ഷാനുകൂല്യങ്ങള്‍ നല്‍കുന്നതിന് ആവശ്യമായ ഫണ്ട് സര്‍ക്കാര്‍ ക്ഷേമനിധി ബോര്‍ഡിന് നല്‍കുക, പെന്‍ഷന്‍ അനുവദിക്കുന്നതിനുളള ഉപാധികള്‍ ഒഴിവാക്കുക എന്നീ ആവശ്യങ്ങള്‍ക്കായി തൊഴില്‍ വകുപ്പ് മന്ത്രിയ്ക്ക് നിവേദനം നല്‍കുന്നതിനും യോഗം തീരുമാനിച്ചു. നേതൃയോഗം ജില്ലാ പ്രസിഡന്‍റ് പി.ശിവാനന്ദന്‍ ഉദ്‌ഘാടനം ചെയ്തു. ജില്ലാ വൈസ്പ്രസിഡന്‍റ് കുണ്ടറ സുബ്രഹ്മണ്യം അധ്യക്ഷത വഹിച്ചു. സംസ്ഥാന ഭാരവാഹികളായ ആര്‍.ഡി.പ്രകാശ്, പോരുവഴി ജലീല്‍, ആദിനാട് ശിവാനന്ദന്‍, ഡി.വിജയന്‍, ജി.ആര്‍.നരേന്ദ്രനാഥ്, വൈ.ജോയി, കരിക്കോട് ഷറഫ്, ഇളമാട് ഷാജി, രാഘവന്‍പിളള, റജികുമാര്‍, ജി.കാര്‍ത്തികേയന്‍, ഉണ്ണി ഇളമാട്, സീതാഗോപാല്‍ എന്നിവര്‍ പ്രസംഗിച്ചു.

പന്മന ആശ്രമ തീർഥാടനം 26 മുതൽ

കൊല്ലം: ചട്ടമ്പി സ്വാമികളുടെ സമാധി വാർഷികാചരണവും പന്മന ആശ്രമ തീർഥാടനവും 26 മുതൽ 29 വരെ പന്മന ആശ്രമത്തിൽ നടക്കും. തീർഥാടനത്തിന് തുടക്കം കുറിച്ച് മഠാധിപതി കൃഷ്ണമയാനന്ദ തീർഥപാദരും ആശ്രമ ആചാര്യൻ സ്വാമി നിത്യ സ്വരൂപാനന്ദയും ചേർന്ന് 26 ന് രാവിലെ എട്ടിന് ദീപം തെളിക്കും. കുമ്പളത്ത് ശങ്കുപ്പിള്ള അനുസ്മരണ ചടങ്ങുകൾക്ക് പ്രാരംഭം കുറിച്ച് കുമ്പളം സ്മൃതി മണ്ഡപത്തിൽ പന്മന ആശ്രമം ട്രസ്റ്റ് പ്രസിഡന്‍റ് കുമ്പളത്ത് വിജയകൃഷ്ണപിള്ള ഭദ്രദീപം പ്രകാശിപ്പിക്കും. 10.30 ന് ചേരുന്ന കുമ്പളത്ത് ശങ്കുപ്പിള്ള അനുസ്മരണ സമ്മേളനം മുൻ മന്ത്രി രമേശ് ചെന്നിത്തല ഉദ്ഘാടനം ചെയ്യും. സിപിഎം ജനറൽ സെക്രട്ടറി എം.എ. ബേബി മുഖ്യാതിഥിയായി പങ്കെടുക്കും. എൻ. കെ.പ്രേമചന്ദ്രൻ എംപി മുഖ്യപ്രഭാഷണം നടത്തും. 27 ന് രാവിലെ പത്തിന് ശാസ്ത്ര സമ്മേളനം ഡോ.സുജിത് വിജയൻ പിള്ള എംഎൽഎ ഉദ്ഘാടനം ചെയ്യും. കേരള അക്കാഡമി ഓഫ് സയൻസ് പ്രസിഡന്‍റ് ഡോ.ജി.എം. നായർ അധ്യക്ഷത വഹിക്കും. കേരള യൂണിവേഴ്സിറ്റി ഹെൽത്ത് സയൻസ് വിഭാഗം മുൻ വൈസ് ചാൻസിലർ ഡോ. എം.കെ. സി. നായർ മുഖ്യ പ്രഭാഷണം നടത്തും. 11 മുതൽ ശാസ്ത്ര സെമിനാർ. 28 ന് രാവിലെ 10.30 ന് യുവജന സമ്മേളനം മുൻ ഡിജിപി ജേക്കബ് പുന്നൂസ് ഉദ്ഘാടനം ചെയ്യും. ആർഎസ്പി സംസ്ഥാന സെക്രട്ടറി ഷിബു ബേബി ജോൺ അധ്യക്ഷത വഹിക്കും. പന്മന ആശ്രമം ആചാര്യൻ സ്വാമി നിത്യ സ്വരൂപാനന്ദ, സ്വാമി പ്രണവാനന്ദ തീർഥപാദർ അനുസ്മരണ പ്രഭാഷണം നടത്തും. വർധിച്ച് വരുന്ന അധാർമികത എന്ന വിഷയത്തിൽ ഡോ. എൻ. ഗോപാലകൃഷ്ണൻ നായരും യുവജനങ്ങളും രാഷ്‌ട്ര നിർമിതിയും എന്ന വിഷയത്തിൽ പ്രഫ. ബി. കാർത്തികേയൻ നായരും പ്രഭാഷണം നടത്തും. 29 ന് രാവിലെ 10.30 ന് സമാധി സമ്മേളനം മഹാ മണ്ഡലേശ്വർ ആനന്ദവനം ഭാരതി സ്വാമികൾ ഉദ്ഘാടനം ചെയ്യും. പ്രജ്ഞാനന്ദ തീർഥപാദർ അധ്യക്ഷത വഹിക്കും. സ്വാമി കൃഷ്ണമയാനന്ദ തീർഥപാദർ വിദ്യാധിരാജ സന്ദേശം നൽകും. ഉച്ചകഴിഞ്ഞ് 2.30 ന് സമാധി ദിവ്യജ്യോതി പ്രയാണം, രാത്രി ഏഴിന് മേജർ സെറ്റ് കഥകളി.

വന്യജീവി ശല്യം: ശാശ്വത പരിഹാരം വേണമെന്ന് ഐക്യ കർഷക സംഘം

കൊല്ലം: വർധിച്ചു വരുന്ന വന്യജീവി ശല്യം പരിഹരിക്കുന്നതിനും മനുഷ്യന്‍റെ ജീവനും സ്വത്തിനും സംരക്ഷണം നൽകുന്നതിനും വന്യജീവി സംരക്ഷണ നിയമം ഭേദഗതി ചെയ്യണമെന്ന് ഐക്യ കർഷക സംഘം ആവശ്യപ്പെട്ടു. വന്യജീവി ശല്യം പരിഹരിക്കുന്നതിനുള്ള നടപടി സ്വീകരിക്കേണ്ട കേന്ദ്ര - സംസ്ഥാന സർക്കാരുകൾ പരസ്പരം പഴിചാരി ഉത്തരവാദിത്ത്വത്തിൽ നിന്ന് ഒഴിഞ്ഞു മാറുന്ന അവസ്ഥ അവസാനിപ്പിക്കണമെന്ന് യോഗം ആവശ്യപ്പെട്ടു. കാർഷിക മേഖലയിൽ ഇറങ്ങുന്ന വന്യജീവികളെ ഇല്ലാഴ്മ ചെയ്യുവാൻ കാർഷകർക്ക് അനുവാദം കൊടുക്കുന്നതിനുളള നിയമനിർമാണം നടപ്പാക്കുന്നതിന് സർക്കാർ നടപടികൾ സ്വീകരിക്കണമെന്നും കർഷക ക്ഷേമ ബോർഡിന്‍റെ പ്രവർത്തനം നടപ്പാക്കുന്നതിനു സംസ്ഥാന സർക്കാർ നടപടി സ്വീകരിക്കണമെന്നുംയോഗം ആവശ്യപ്പെട്ടു. ഓമനക്കുട്ടന്‍റെ അദ്ധ്യക്ഷതയിൽ ചേർന്നയോഗം എ.എ. അസിസ് ഉദ്‌ഘാടനം ചെയ്തു. കെ. ജി. വിജയദേവൻപിള്ള. കെ. എസ്. വേണുഗോപാൽ, ആർ. അജിത്കുമാർ, മഹേശ്വരൻപിള്ള, വിക്രമൻനായർ, ഉണ്ണികൃഷ്ണൻ, കെ. ജി. ഗിരിഷ് തുടങ്ങിയവർ പ്രസംഗിച്ചു.

‘അറിവിന്‍റെ ചെറുതുള്ളികൾ’; തിരുവനന്തപുരം ജേതാക്കൾ

ചവറ : ചവറ സൗത്ത് മാലിഭാഗം കാർത്തിക മന്ദിരത്തിൽ എൻ. തങ്കപ്പൻ സ്മാരക കാഷ് അവാർഡിനു വേണ്ടി നടത്തിയ ‘അറിവിന്‍റെ ചെറുതുള്ളികൾ’ - സീസൺ ഒൻപത് സംസ്ഥാന ക്വിസ് മത്സരത്തിൽ വെള്ളനാട് സ്വദേശികളായ എസ്. എൽ. ശ്രീലേഷ് - എസ്. എൽ. ശ്രീലവ്യ ടീം ഒന്നാം സ്ഥാനം സ്വന്തമാക്കി. കാസ്കറ്റ് വായനശാല സംഘടിപ്പിച്ച മത്സരം കരുനാഗപ്പള്ളി താലൂക്ക് ലൈബ്രറി കൗൺസിൽ സെക്രട്ടറി വി. വിജയകുമാർ ഉദ്ഘാടനം ചെയ്തു. പ്രസിഡന്‍റ് ബി. കെ. വിനോദ് അധ്യക്ഷത വഹിച്ചു. സെക്രട്ടറി കെ. എസ്. അനിൽ, ബാലവേദി പ്രസിഡന്‍റ് പി. ആർ. പവിത്ര എന്നിവർ പ്രസംഗിച്ചു . രതീഷ്ചന്ദ്രൻ ക്വിസ് മാസ്റ്ററായി. രണ്ടാം സ്ഥാനം നേടിയ ചവറ തെക്കുംഭാഗം സ്വദേശികളായ എസ്. മിത്ര, എ. ആർ. മീനാക്ഷി ടീം ബീന റഷീദ് സ്മാരക കാഷ് അവാർഡ് നേടി. മത്സരാർഥികൾക്ക് സർട്ടിഫിക്കറ്റുകളും മെഡലുകളും വിതരണം ചെയ്തു. സമാപന സമ്മേളനം കൃഷിവകുപ്പ് തൃശൂർ റീജണൽ ഡെപ്യൂട്ടി ഡയറക്ടർ പ്രിയൻ അലക്സ് റിബല്ലോ ഉദ്ഘാടനം ചെയ്തു. ക വായനശാല രക്ഷാധികാരി ആർ. ഷാജിശർമ, ഇ എംഎസ് സ്മാരക ചാരിറ്റബിൾ സൊസൈറ്റി സെക്രട്ടറി സി. ശശിധരൻ, താലൂക്ക് ലൈബ്രറി കൗൺസിൽ അംഗം ടി. ദിലീപ്, കാസ്കറ്റ് ക്വിസ് ക്ലബ് കോ-ഓർഡിനേറ്റർ ടി. സുമേഷ് എന്നിവർ പ്രസംഗിച്ചു.

സ്കൂട്ടറിന്‍റെ സീറ്റിനടിയില്‍നിന്നും പണം മോഷ്ടിച്ച യുവാക്കള്‍ പിടിയില്‍

കൊല്ലം: സ്കൂട്ടറിന്‍റെ സീറ്റിനടിയില്‍ നിന്നും പണം മോഷ്ടിച്ച യുവാക്കള്‍ പോലീസ് പിടിയിലായി. മയ്യനാട്, സുനാമി ഫ്ളാറ്റ് 19, തെക്കുംമൂട്, നാസര്‍ മകന്‍ തന്‍സീം (24), തഴുത്തല, ഉമയനല്ലൂര്‍, ചരുവിള പുത്തന്‍ വീട്ടില്‍ അസീബ് മകന്‍ ഇജാസ് (24) എന്നിവരാണ് ഇരവിപുരം പോലീസിന്‍റെ പിടിയിലായത്. ഭരണിക്കാവ് അമ്പലത്തിന്‍റെ കോമ്പൗണ്ടില്‍ പാര്‍ക്ക് ചെയ്തിരുന്ന തട്ടാമല സ്വദേശിയായ ഗീതയുടെ സ്കൂട്ടറിന്‍റെ സീറ്റിനടിയില്‍ സൂക്ഷിച്ചിരുന്ന നാല്‍പതിനായിരം രൂപ പ്രതികള്‍ മോഷ്ടിച്ച് കടന്ന് കളയുകയായിരുന്നു. യുവതി പോലീസില്‍ നല്‍കിയ പരാതിയുടെ അടിസ്ഥാനത്തില്‍ കേസ് രജിസ്റ്റര്‍ ചെയ്ത് നടത്തിയ അന്വേഷണത്തില്‍ പ്രതികളെ കണ്ടെത്തി പിടികൂടുകയായിരുന്നു.

കേരള അഡ്വക്കേറ്റ് ക്ലാർക്സ് അസോസിയേഷൻ ധർണ നടത്തി

കൊല്ലം: കോടതി ഫീസുകൾ വർധിപ്പിച്ചതിൽ പ്രതിഷേധിച്ച് കേരള അഡ്വക്കേറ്റ് ക്ലാർക്സ് അസോസിയേഷന്‍റെ ആഭിമുഖ്യത്തിൽ കൊല്ലം സിവിൽ സ്റ്റേഷന് മുന്നിൽ പ്രതിഷേധ ധർണ നടത്തി. കേരള ബാർ കൗൺസിൽ അംഗം അഡ്വ.സജീവ് ബാബു ഉദ്‌ഘാടനം ചെയ്തു. ശങ്കർ, സേതുലക്ഷ്മി,അഡ്വ.കൈപ്പുഴ ,വി, റാം മോഹൻ, അഡ്വ. പി. ബി. ശിവൻ, അഡ്വ. ഷൈജു മങ്ങാട്, അഡ്വ. മരത്തടി നവാസ്, അഡ്വ.പനമ്പിൽ .എസ്. ജയകുമാർ, അഡ്വ. സേതുനാഥൻ പിള്ള, അഡ്വ. സുനിൽ .സി. എസ്, മിഥിലാജ്, ശശിധരൻ പിള്ള, പി. രാജൻ,രാധാകൃഷ്ണപിള്ള, സുരേന്ദ്രൻ പിള്ള, ഷീജു, വസന്തകുമാരി, ശശിധരൻ പിള്ള മാമ്പുഴ, കൃഷ്ണൻകുട്ടി എന്നിവർ പ്രസംഗിച്ചു.

ലോകജനതയ്ക്ക് നന്മയുടെ വിത്തുപാകിയ മഹാനാണ് ഗാന്ധിജി: ഡോ.എ.നീല ലോഹിതദാസ്

പത്തനാപുരം: ലോകജനതയ്ക്ക് നന്മയുടെ വിത്തുപാകിയ മഹാനാണ് രാഷ്‌ട്രപിതാവായ ഗാന്ധിജിയെന്ന് ഡോ.എ.നീല ലോഹിതദാസ്. വർത്തമാന കാലത്ത് മഹാത്മജിയുടെ ജീവിതവും ദർശനവും പുതിയ തലമുറകളിലേക്ക് എത്തിക്കുന്നതിനുംഅവരെ ഭാവിയിലേക്ക് കർമ്മോത്സുകരാക്കുന്നതിനുമുള്ള കർമ്മ പരിപാടികൾ നടപ്പിലാക്കുമെന്ന് ഗാന്ധിയൻ ബാല കേന്ദ്രം രക്ഷാധികാരി സമിതി ചെയർമാൻ ഡോ.എ.നീലലോഹിത ദാസ് പറഞ്ഞു. പത്തനാപുരം. ഗാന്ധിഭവനിൽ നടന്ന ഗാന്ധിയൻ ബാല കേന്ദ്രങ്ങളുടെ രക്ഷാധികാര സമിതിയുടെ നേതൃയോഗം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഗാന്ധിയൻ ബാല കേന്ദ്രങ്ങളുടെ സംസ്ഥാന നേതൃത്വ പരിശീലന ക്യാമ്പ് മേയ് 16, 17 തീയതികളിൽ പത്തനാപുരം ഗാന്ധിഭവനിൽ നടക്കുമെന്ന് ഭാരവാഹികൾ അറിയിച്ചു. കല, സാഹിത്യം, സംസ്കാരം, എന്നീ വിഷയങ്ങളിൽ ചർച്ചകൾ, സിമ്പോസിയങ്ങൾ, പ്രതിഭാ സംഗമങ്ങൾ എന്നിവ രണ്ടു ദിവസങ്ങളിലായി നടക്കുന്ന ക്യാമ്പിന്‍റെ ഭാഗമായി ഉണ്ടായിരിക്കും.

കഞ്ചാവ് കേസ് പ്രതിക്ക് അഞ്ചു വര്‍ഷം കഠിനതടവും അമ്പതിനായിരം പിഴയും

കൊല്ലം: 2.200 കിലോ കഞ്ചാവ് വില്‍ക്കാനായി കടത്തി കൊണ്ട് വന്ന കേസിൽ ഓച്ചിറ കാരലില്‍ തറവീട്ടില്‍ അരുണ്‍ കൃഷ്ണ (34) ന് അഞ്ചു വര്‍ഷം കഠിനതടവും അമ്പതിനായിരം രൂപ പിഴയും ശിക്ഷിച്ച് കോടതി. കൊല്ലം ഫസ്റ്റ്‌ ക്ലാസ് അഡീഷണല്‍ ജില്ലാ സെഷന്‍സ്‌ ജഡ്ജി പി.എൻ.വിനോദിനന്‍റേതാണ് ഉത്തരവ്. കഞ്ചാവ് വിൽപ്പനക്കായി കൊണ്ട് പോകവേ ഓച്ചിറ മേമന ജംഗ്ഷനില്‍ വച്ചാണ് പ്രതിയെ കൊല്ലം എക്‌സൈസ്‌ ആൻഡ് നാര്‍കോട്ടിക്‌ സ്പെഷല്‍ സ്ക്വാഡ്‌ ഇന്‍സ്പെക്ടര്‍ എസ്‌. ഷാജിയും സംഘവും പിടികൂടുന്നത്. സഞ്ചിയിൽ കൊണ്ട് പോവുകയായിരുന്ന കഞ്ചാവായിരുന്നു പിടിച്ചെടുത്തത്. എക്സൈസ്‌ സര്‍ക്കിള്‍ ഇന്‍സ്പെക്ടര്‍ ജി. കൃഷ്ണകുമാര്‍ അന്വേഷിച്ച്‌ കുറ്റപത്രം ഹാജരാക്കിയ കേസില്‍ പ്രോസി ക്യൂഷന്‌ വേണ്ടി പബ്ലിക് പ്രോസിക്യൂട്ടര്‍ അഡ്വ. സിസിന്‍. ഇ.കുണ്ടയ്‌ക്കല്‍ ആണ് ഹാജരായത്. ഗ്രേഡ്‌ പ്രിവന്‍റീവ്‌ ഓഫീസര്‍ രാജുഗോപാലന്‍ ചെട്ടിയാര്‍ പ്രോസിക്യൂഷന്‍ സഹായി ആയിരുന്നു.

നെഹ്‌റു കുടുംബത്തിലെ ഇളം തലമുറയ്ക്ക് അഴിമതി നടത്തേണ്ട കാര്യമില്ല: ബിന്ദു കൃഷ്ണ

കൊല്ലം: കോടാനുകോടി രൂപയുടെ സ്വത്ത് വകകള്‍ ഇന്ത്യന്‍ സമൂഹത്തിന് ഉദാരപൂര്‍വം സംഭാവന നല്‍കിയ നെഹ്‌റു കുടുംബത്തിലെ ഇളംതലമുറയ്ക്ക് അഴിമതി നടത്തേണ്ട കാര്യമില്ലെന്ന് കോൺഗ്രസ് രാഷ്‌ട്രീയകാര്യ സമിതി അംഗം ബിന്ദുകൃഷ്ണ. കോടി കണക്കിന് രൂപ നഷ്ടത്തിലായ നാഷണല്‍ ഹെറാള്‍ഡ് എന്ന ദേശീയ പത്രത്തിനന്‍റെ പുനരുദ്ധാരണത്തിന് വായ്പ എടുത്തു എന്നല്ലാതെ മറ്റൊന്നും ചെയ്തിട്ടില്ലാത്ത സോണിയാഗാന്ധിയ്ക്കും രാഹുല്‍ ഗാന്ധിയ്ക്കും എതിരെ ഇ ഡിയെ ഉപയോഗിച്ച് കുറ്റപത്രം സമര്‍പ്പിച്ചത് രാഷ്‌ട്രീയ പ്രതിയോഗികളെ കേന്ദ്ര അന്വേഷണ ഏജന്‍സികളെ ഉപയോഗിച്ച് തകര്‍ക്കുവാന്‍ ശ്രമിക്കുന്നതിന്‍റെ ഭാഗമാണെന്നും ബിന്ദു കൃഷ്ണ പറഞ്ഞു. ഇ ഡി യെ ഉപയോഗിച്ച് സോണിയാഗാന്ധിയും രാഹുല്‍ഗാന്ധിയും കേസില്‍ കുടുക്കാന്‍ ശ്രമിക്കുന്ന നരേന്ദ്രമോദി സര്‍ക്കാരിനന്‍റെ സമീപനങ്ങള്‍ക്ക് എതിരെയും പെട്രോളിയം ഉത്പന്നങ്ങളുടെ വില വര്‍ദ്ധനവിന് എതിരെയും ചിന്നക്കടയില്‍ കോണ്‍ഗ്രസും ഐഎന്‍ടിയുസിയും സംയുക്തമായി നടത്തിയ പ്രതിഷേധ ജാഥ ഉദ്ഘാടനം ചെയ്യുകയായിരുന്നു അവര്‍. ഡി സി സി വൈസ് പ്രസിഡന്‍റ് എസ്. വിപിനചന്ദ്രന്‍ അധ്യക്ഷത വഹിച്ചു. ഐ എന്‍ ടി യു സി ജില്ലാ പ്രസിഡന്‍റ് എ. കെ. ഹഫീസ്,കെ പി സി സി സെക്രട്ടറി പി. ജര്‍മ്മിയാസ്, ഡി സി സി ഭാരവാഹികളായ ജി . ജയപ്രകാശ്, കൃഷ്ണവേണി ശര്‍മ്മ, ആനന്ദ് ബ്രഹ്‌മാനന്ദ്, എം. എം. സഞ്ജീവ് കുമാര്‍, ഡി. ഗീതാകൃഷ്ണന്‍, എം. നാസര്‍, പ്രാക്കുളം സുരേഷ്, പാലത്തറ രാജീവ്, സാബ്ജാന്‍, എസ്. നാസര്‍, ബി. ശങ്കരനാരായണ പിള്ള, കോതേത്ത് ഭാസുരന്‍, എം. നൗഷാദ്, പനയം സജീവ്, എന്നിവര്‍ പ്രസംഗിച്ചു.

ലഹരി മുക്ത കേരളം കാമ്പയിൻ സംഘടിപ്പിച്ചു

പുനലൂർ : ലഹരി മുക്ത ഭാരതം ആരോഗ്യകരമായ ഒരു സമൂഹം എന്ന ലക്ഷ്യത്തിനായി 'നശ മുക്ത് ഭാരത് അഭിയാൻ' പദ്ധതിയുടെ ആഭിമുഖ്യത്തിൽ ബ്രഹ്മാകുമാരീസ് മെഡിക്കൽ വിംഗ് പുനലൂർ തൂക്കുപാലത്തിനു മുന്നിലെ ഗാന്ധിസ്‌മൃതി മണ്ഡപത്തിൽ ലഹരി മുക്ത കേരളം കാമ്പയിൻ സംഘടിപ്പിച്ചു. പുനലൂർ, പത്തനാപുരം താലൂക്കുകൾ കേന്ദ്രികരിച്ച് ബി. കെ. രഞ്ജിനിയുടെ നേതൃത്വത്തിൽ നടന്ന റാലിയുടെ ഉദ്ഘാടനം ഇന്ത്യൻ മെഡിക്കൽ അസോസിയേഷൻ പ്രസിഡന്‍റ് ഡോ. ആർ. വി. അശോകൻ നിർവ്വഹിച്ചു. എക്‌സൈസ് സർക്കിൾ ഇൻസ്‌പെക്ടർ ഷെമീർഖാൻ തുടങ്ങിയവർ പ്രസംഗിച്ചു.

പെസഹ-ദുഃഖ വെള്ളിയാഴ്ച തിരുകർമങ്ങൾ

സെന്‍റ് ആൻഡ്രൂസ് ദേവാലയം ചവറ : കോവിൽത്തോട്ടം സെന്‍റ് ആൻഡ്രൂസ് ദേവാലയത്തിൽ പെസഹ - ദുഃഖ വെള്ളി - ഈസ്റ്റർ തിരുകർമ്മങ്ങൾക്ക് ഇന്ന് തുടക്കമാകും. ഇന്ന് വൈകുന്നേരം അഞ്ചിന് തിരുകർമ്മങ്ങൾ ആരംഭിക്കും. തിരുവത്താഴ ദിവ്യബലി, പാദക്ഷാളന കർമ്മം തുടർന്ന് രാത്രി 10 വരെ ആരാധന. ദുഃഖ വെള്ളിയാഴ്ച രാവിലെ ആറിന് കുരിശിനന്‍റെ വഴി തുടർന്ന് ആരാധന, വൈകുന്നേരം മൂന്നിന് തിരുകർമ്മങ്ങൾ ആരംഭിക്കും. തുടർന്ന് നഗരികാണിക്കൽ പ്രദക്ഷിണം, രാത്രി പത്തിന് കബറടക്കം. ദുഃഖ ശനിയാഴ്ച രാത്രി 11 ന് ഉയർപ്പ് ദിവ്യബലി. ഈസ്റ്റർ ദിനത്തിൽ രാവിലെ ഏഴിന് ദിവ്യബലി എന്നിവ നടക്കും. അഞ്ചൽ മേരി മാതാ പള്ളി അഞ്ചൽ : മേരിമാതാ പള്ളിയിൽ വിശുദ്ധവാര തിരു കർമങ്ങളുടെ ഭാഗമായി ഇന്ന് 5.15 ന് കാൽ കഴുകൽ ശുശ്രൂഷ, ദിവ്യകാരുണ്യ ആരാധന. 18 ന് എട്ടിന് കുരിശിനന്‍റെ വഴി, പൊതു ആരാധന, രണ്ടിന് പീഡാനുഭവ തിരുകർമ്മങ്ങൾ. 19 ന് 6.45 ന് വിശുദ്ധ കുർബാന, പുത്തൻ തീ, പുത്തൻ വെള്ളം വെഞ്ചരിപ്പ്. 20 ന് മൂന്നു മുതൽ ഉയർപ്പ് തിരു കർമങ്ങൾ, ഏഴിന് കുർബാന. പഴയെരൂർ സെന്‍റ് തോമസ് പള്ളി പഴയെരൂർ : സെന്‍റ് തോമസ് പള്ളിയിൽ വിശുദ്ധവാര തിരു കർമങ്ങളുടെ ഭാഗമായി ഇന്ന് 4.45 ന് കാൽ കഴുകൽ ശുശ്രൂഷ, ദിവ്യകാരുണ്യ ആരാധന. നാളെ എട്ടിന് കുരിശിന്‍റെ വഴി, പൊതു ആരാധന, 1.30 ന് പീഡാനുഭവ തിരുകർമ്മങ്ങൾ. 19 ന് ഏഴിന് വിശുദ്ധ കുർബാന, പുത്തൻ തീ, പുത്തൻ വെള്ളം വെഞ്ചരിപ്പ്. സെന്‍റ് ജോസഫ് പള്ളി ഫിൽഗിരി: ഇന്ന് നാലിന് വി. കുർബാന, കാൽ കഴുകൽ ശുശ്രൂഷ, തിരുമണിക്കൂർ. പീഡാനുഭവ വെള്ളി. ഏഴിന് : പട്ടണ സ്ലീവാപാത. ഒൻപതിന് ഒരുമണിക്ക് ആരാധന, നേർച്ച ഭക്ഷണം. രണ്ടിന് പൊതു ആരാധന, മൂന്നിന് പീഡാനുഭവ തിരുക്കർമ്മങ്ങൾ. അഞ്ചിന് നഗരി കാണിക്കൽ. വലിയ ശനി. 6.15 നു സപ്രാ, വി. കുർബാന, പുത്തൻ തീ, പുത്തൻ വെള്ളം വെഞ്ചിരിപ്പ്. ഉയിർപ്പു ഞായർ 2.30. ഉയിർപ്പു തിരുക്കർമ്മങ്ങൾ വി. കുർബാന. ഏഴിന് വി. കുർബാന. സെന്‍റ് മേരീസ് മലങ്കര കത്തോലിക്കാ പള്ളി അഞ്ചല്‍: ഇന്ന് രാവിലെ ഒൻപതു മുതല്‍ ദിവ്യകാരുണ്യ ആരാധന, വൈകിട്ട് അഞ്ചിന് പെസഹാ കുര്‍ബാന, ദുഃഖവെള്ളി ശുശ്രൂഷകള്‍ രാവിലെ ഏഴിന് ആരംഭിക്കും. വൈകുന്നേരം അഞ്ചി ന് സന്ധ്യാ നമസ്‌കാരം. ദുഃഖശനിയാഴ്ച രാവിലെ ഏഴിന് കുര്‍ബാന തുടര്‍ന്ന് സെമിത്തേരിയില്‍ പരേതരായവര്‍ക്കുവേണ്ടി പ്രത്യേക പ്രാര്‍ത്ഥന. ഈസ്റ്റര്‍ ശുശ്രൂഷകള്‍ ശനി വൈകിട്ട് 6.30 ന് ആരംഭിക്കും. എട്ടിന് ഉയിര്‍പ്പ് പെരുന്നാള്‍ കുര്‍ബാന. സെന്‍റ് ജോര്‍ജ്ജ് മലങ്കര കത്തോലിക്കാ പള്ളി തഴമേല്‍: ഇന്ന് വൈകിട്ട് 5.30 ന് പെസഹാ കുര്‍ബാന. ദുഃഖവെള്ളി ശുശ്രൂഷകള്‍ രാവിലെ ഏഴിന് ആരംഭിക്കും. ശനിയാഴ്ച വൈകിട്ട് 6.30 ന് ഉയിര്‍പ്പിന്‍റെ ശുശ്രൂഷകളും കുര്‍ബാനയും.

എഐവൈഎഫ് പ്രതിഷേധിച്ചു

കൊല്ലം : കൊല്ലം പൂരത്തിന്‍റെ കുടമാറ്റത്തിൽ നവോത്ഥാന നായകർക്കൊപ്പം ആർഎസ്എസ് സ്ഥാപക നേതാവായിരുന്ന ഹെഡ്‌കേവാറിനന്‍റെ ചിത്രവും ഉയർത്തിക്കാട്ടിയത്തിൽ പ്രതിഷേധിച്ചു എഐവൈഎഫ് കൊല്ലം ജില്ല കമ്മറ്റി പ്രതിഷേധ പ്രകടനവും യോഗവും നടത്തി. ജില്ലാ സെക്രട്ടറി ടി. എസ്. നിതീഷ് ഉദ്ഘാടനം ചെയ്തു. കൊല്ലം ജില്ലാ പ്രസിഡന്‍റ് അഡ്വ. വിനീത് വിൻസന്‍റ് അധ്യക്ഷത വഹിച്ചു എഐവൈഎഫ് സംസ്ഥാന കമ്മിറ്റി അംഗം ജി. എസ്. ശ്രീലക്ഷ്മി എഐഎസ്എഫ് ജില്ലാ പ്രസിഡന്‍റ് ശ്രീജിത്ത്‌ സുദർശനൻ എഐവൈഎഫ് ജില്ലാ ജോയിൻ സെക്രട്ടറി യു. കണ്ണൻ ജില്ലാ എസിക്യൂട്ടീവ് അഗം ആർ. ഹരീഷ്, കൊല്ലം മണ്ഡലം സെക്രട്ടറി എസ്. എസ്. കണ്ണൻ ജില്ലാ കമ്മിറ്റിയംഗം ഷംനാദ് എന്നിവർ പ്രസംഗിച്ചു. വിഷയവുമായി ബന്ധപ്പെട്ട് ജില്ലാ കമ്മിറ്റി പോലീസ് മേധാവിക്ക് പരാതി നൽകി.

കുടമാറ്റത്തിൽ ഹെഡ്ഗേവാറിന്‍റെ ചിത്രം; ദേവസ്വം ബോർഡ് അന്വേഷിക്കും

കൊല്ലം: കൊല്ലം പൂരത്തിൽ പുതിയകാവ് ക്ഷേത്രത്തിന്‍റെ കുടമാറ്റത്തിൽ ആർഎസ്എസ് നേതാവ് ഹെഡ്‌ഗേവാറിനന്‍റെ ചിത്രം ഉയർത്തിയത് വൻ വിവാദത്തിന് കാരണമായി. നവോഥാന നായകരുടെ ചിത്രത്തിനൊപ്പമാണ് ഹെഡ്‌ഗേവാറിനന്‍റെ ചിത്രം ഉയർത്തിയത്. സ്വാമിവിവേകാനന്ദൻ, ബി.ആർ.അംബേദ്കർ, ശ്രീനാരായണ ഗുരു എന്നിവരുടെ ചിത്രങ്ങൾക്കൊപ്പമാണ് ഹെഡ്‌ഗേവാറിന്‍റെ ചിത്രവും ഉൾപ്പെടുത്തിയത്. ആശ്രാമം ശ്രീകൃഷ്ണ സ്വാമി ക്ഷേത്ര ഭാരവാഹികളാണ് പൂരം നടത്തുന്നത്. വിഷയത്തിൽ പരാതിയുമായി യൂത്ത് കോൺഗ്രസും ഡിവൈഎഫ്ഐയും രംഗത്തെത്തി. ക്ഷേത്ര ആചാരങ്ങളിലും വിശ്വാസങ്ങളിലും രാഷ്‌ട്രീയം കലർത്തുന്ന നടപടിയാണ് ഉണ്ടായതെന്നാണ് പരാതി. സംഭവത്തിൽ കേസ് എടുത്ത് അന്വേഷണം നടത്തണമെന്നാണ് ആവശ്യം. ഇതിന്‍റെ അടിസ്ഥാനത്തിൽ ഈസ്റ്റ് പോലീസ് കേസെടുത്തിട്ടുണ്ട്. സംഭവത്തിൽ അന്വേഷണത്തിന് ദേവസ്വം ബോർഡ് പ്രസിഡന്‍റ് പി. എസ്. പ്രശാന്ത് നിർദേശം നൽകി. വിജിലൻസ് എസ്പിക്കാണ് അന്വേഷണ ചുമതല. ദേവസ്വം ബോർഡിന്‍റെ കൊല്ലം അസിസ്റ്റന്‍റ് കമ്മീഷണറോട് സംഭവത്തിൽ അടിയന്തര റിപ്പോർട്ടും തേടി. വിഷയത്തിൽ ചട്ടലംഘനം ബോധ്യപ്പെട്ടാൽ നടപടി ഉണ്ടാകും. ക്ഷേത്രം വിശ്വാസികൾക്ക് പ്രാർഥിക്കാൻ ഉള്ളതാണ്. രാഷ്‌ട്രീയ പാർട്ടികൾക്കോ മത സമുദായിക സംഘടനകൾക്കോ പരിപാടി നടത്താൻ കഴിയില്ല. ഉപദേശക സമിതിക്ക് കൊടി അടയാളങ്ങളില്ല. ധിക്കരിച്ചു മുന്നോട്ടു പോകുന്ന ഉപദേശക സമിതികൾ പിരിച്ചു വിടും - പി.എസ്. പ്രശാന്ത് വ്യക്തമാക്കി.

അഷ്ടമുടിക്ക് 59 കോടിയുടെ പദ്ധതി: മന്ത്രി കെ.എന്‍. ബാലഗോപാല്‍

കൊല്ലം: കൊല്ലത്ത് അഷ്ടമുടി കായൽ കേന്ദ്രീകരിച്ച് 59 കോടി രൂപയുടെ വിനോദസഞ്ചാര വികസന പദ്ധതി നടപ്പിലാക്കുമെന്ന് മന്ത്രി കെ.എന്‍. ബാലഗോപാല്‍. സി.കേശവന്‍ സ്മാരക ടൗണ്‍ഹാളില്‍ സംസ്ഥാന മന്ത്രിസഭ വാര്‍ഷികത്തോടനുബന്ധിച്ച സംഘാടക സമിതി യോഗം ഉദ്ഘാടനം ചെയ്യുകയായിരുന്നു മന്ത്രി. ഒരു ലക്ഷത്തോളം പഠിതാക്കളെ ലക്ഷ്യമിട്ട് വികസിപ്പിക്കുകയാണ് ശ്രീനാരായണ ഓപണ്‍ യൂണിവെഴ്സിറ്റി. പടിഞ്ഞാറേ കല്ലടയില്‍ സോളാര്‍ പദ്ധതി യാഥാര്‍ഥ്യമാകുന്നു. കോടതി സമുച്ചയം, വല നിര്‍മാണ ഫാക്ടറി, ഓഷ്യനേറിയം, ഐ ടി പാര്‍ക്ക്, തുറമുഖ വികസനം തുടങ്ങി കേരളത്തിന്‍റെ മുന്നേറ്റത്തില്‍ കുതിച്ചുചാട്ടത്തിന് സഹായകമാകുന്ന പദ്ധതികളാണ് ജില്ലയില്‍ സാക്ഷാത്കരിക്കുന്നത്. കേരളത്തിനന്‍റെ ഭാവിസ്വപ്നങ്ങള്‍ സാക്ഷാത്കരിക്കാന്‍ സഹായകമാകുംവിധമാണ് എന്‍റെ കേരളം പ്രദര്‍ശനവിപണന മേള ഒരുക്കുക എന്നും മന്ത്രി പറഞ്ഞു. നിയോജക മണ്ഡലം അടിസ്ഥാനത്തിലും, ഗ്രാമ- ബ്ലോക്ക് - വാര്‍ഡ് തലത്തിലും പ്രചാരണം ശക്തിപ്പെടുത്തണം. ഏപ്രില്‍ 30 നകം നിയോജകമണ്ഡല തലത്തിലും മേയ് അഞ്ചിനകം പഞ്ചായത്ത് തലത്തിലും 10നകം വാര്‍ഡ് തലത്തിലും യോഗങ്ങള്‍ നടത്താനും തീരുമാനിച്ചതായി മന്ത്രി വ്യക്തമാക്കി. സര്‍ക്കാര്‍ താഴെത്തട്ട് വരെ നടത്തിയ പ്രവര്‍ത്തനങ്ങളാണ് മേളയിലൂടെ സാക്ഷ്യപ്പെടുത്തുകയെന്ന് അധ്യക്ഷയായ മന്ത്രി ജെ. ചിഞ്ചുറാണി പറഞ്ഞു. എംഎല്‍എമാരായ എം. നൗഷാദ്, ജി.എസ്. ജയലാല്‍, മേയര്‍ ഹണി, ജില്ലാ പഞ്ചായത്ത് പ്രസിഡന്‍റ് ഡോ. പി.കെ. ഗോപന്‍, ജില്ലാ കളക്ടര്‍ എന്‍. ദേവിദാസ് തുടങ്ങിയവര്‍ പങ്കെടുത്തു.

കാട്ടുപോത്ത് ഓട്ടോറിക്ഷ ഇടിച്ചു മറിച്ചു

കുളത്തൂപ്പുഴ: കാട്ടുപോത്തിന്‍റെ ആക്രമണത്തിൽ നിയന്ത്രണം വിട്ട ഓട്ടോ റിക്ഷ മറിഞ്ഞ് ഡ്രൈവര്‍ക്ക് പരിക്ക്. തിരുവനന്തപുരം-തെങ്കാശി അന്തര്‍ സംസ്ഥാന പാതയില്‍ കുളത്തൂപ്പുഴ നെടുവന്നൂര്‍ക്കടവ് ചെക്ക് പോസ്റ്റിനു സമീപം ഇന്നലെ പുലര്‍ച്ചെ നാലിനായിരുന്നു സംഭവം. കുളത്തൂപ്പുഴ ആര്‍പിഎല്‍ പള്ളംവെട്ടി കോളനിയില്‍ സൂര്യരാജ് (49) നാണ് പരിക്കേറ്റത്. യാത്രക്കാരെ കുളത്തൂപ്പുഴയിലെത്തിച്ച് തിരികെ മടങ്ങുകയായിരുന്ന ഓട്ടോറിക്ഷക്കു മുന്നിലേക്ക് സമീപത്തെ വനത്തില്‍ നിന്നും ഓടിയെത്തിയ കാട്ടുപോത്ത് ഇടിക്കുകയായിരുന്നു. ഇടിയുടെ ആഘാതത്തില്‍ മുന്‍വശം തകര്‍ന്ന ഓട്ടോറിക്ഷയില്‍ നിന്നും ഡ്രൈവറായ സൂര്യരാജ് പുറത്തേക്ക് തെറിച്ചു വീണു. ഇടതു കൈക്ക് പരിക്കേറ്റ സൂര്യരാജിനെ കുളത്തൂപ്പുഴ സര്‍ക്കാര്‍ ആശുപത്രിയിലെത്തിച്ച് പ്രാഥമിക ശുശ്രൂഷ നല്‍കി. അപകടത്തിനു ശേഷം കാട്ടുപോത്ത് തിരികെ വനത്തിലേക്ക് കയറി പോയി. ശബ്ദം കേട്ട് സമീപത്തെ ക്വാര്‍ട്ടേഴ്സിലെ താമസക്കാരെത്തി സഹായിച്ചാണ് റോഡില്‍ മറിഞ്ഞ ഓട്ടോ റിക്ഷ നിവർത്താനായത്. വാഹനത്തിന്‍റെ മുന്‍ഭാഗവും ഇടതുഭാഗത്തിനം കേടുപാടുണ്ടായി. സംഭവമറിഞ്ഞ് സെക്ഷന്‍ വനപാലകരെത്തി വിവരങ്ങള്‍ ശേഖരിച്ചു മടങ്ങിയതായും തന്‍റെ ജീവിത മാര്‍ഗമായ ഓട്ടോ റിക്ഷ തകര്‍ന്നതോടെ അറ്റകുറ്റപണി നടത്താന്‍ പോലും കടം വാങ്ങേണ്ട അവസ്ഥയിലാണെന്നും സൂര്യരാജ് പറഞ്ഞു. പ്രദേശത്ത് വന്യമൃഗ ശല്യം രൂക്ഷമാണെങ്കിലും ഇതിനെതിരെ വനം വകുപ്പ് ഉദ്യോഗസ്ഥർ ഒരു നടപടിയും കൈക്കൊള്ളുന്നില്ല എന്നാണ് നാട്ടുകാരുടെ പരാതി.

ഡോ. വന്ദനദാസ് കൊലക്കേസ്; ക്രോസ് വിസ്താരം 25ന്

കൊല്ലം: കൊട്ടാരക്കര താലൂക്ക് ആശുപത്രിയിൽ കൊലചെയ്യപ്പെട്ട ഡോ. വന്ദനാദാസ് കേസിലെ സാക്ഷിയും വന്ദനയ്ക്കൊപ്പം ജോലി ചെയ്തിരുന്നതുമായ ഡോ.ഷിബിൻ മുഹമ്മദിന്‍റെ ക്രോസ് വിസ്താരം 25 ലേക്ക് മാറ്റി. പീഡനക്കേസ് പ്രതിയായ മുൻ ഗവ.പ്ലീഡർ പി.ജി. മനുവിന്‍റെ മരണത്തെ തുടർന്ന് കേസുമായി ബന്ധപ്പെട്ട ഫയലുകളെല്ലാം കൊല്ലത്തെ വാടകവീട്ടിലാണെന്നും പോലീസ് നടപടികൾ നടക്കുന്നതിനാൽ ഫയലുകൾ കൈവശം ലഭിച്ചിട്ടില്ലെന്നും കേസിലെ പ്രതിഭാഗം അഭിഭാഷകനായ ബി.എ. ആളൂർ ഇന്നലെ കോടതിയെ ധരിപ്പിച്ചിരുന്നു. ഇതേ തുടർന്നാണ് ഇന്നലെ നടക്കാനിരുന്ന വിസ്താരം 25 ലേക്ക് മാറ്റിയത്. കേസിൽ പ്രതിഭാഗത്തിനുവേണ്ടി ഹാജരാകാനാണ് എറണാകുളം പിറവം സ്വദേശിയായ പി.ജി.മനു കൊല്ലത്തെത്തിയത്. സംഭവദിവസം വന്ദനയെ കൊലപ്പെടുത്താൻ ശ്രമിച്ച ശേഷം പ്രതി കാഷ്വാലിറ്റിക്ക് പുറത്തേക്ക് വരുന്നതും കൗണ്ടറിന്‍റെ മുൻവശത്ത് നിന്ന പോലീസുകാരന്‍റെ തലയിൽ കുത്തുന്നതും ഡോ.ഷിബിൻ കോടതിയിൽ നേരത്തെ തിരിച്ചറിഞ്ഞിരുന്നു. പ്രതിയുടെ ആക്രമണത്തിൽ സാരമായി പരിക്കേറ്റ ഡോ. വന്ദനയെ താങ്ങി ആംബുലൻസിലേക്ക് കൊണ്ടുപോകുന്നത് താനാണെന്നും ദൃശ്യങ്ങൾ കണ്ട ശേഷം ഡോക്ടർ കോടതിയിൽ മൊഴി നൽകിയിരുന്നു. പ്രോസിക്യൂഷന് വേണ്ടി സ്‌പെഷൽ പ്രോസിക്യൂട്ടർ പ്രതാപ് ജി. പടിക്കലിനോടൊപ്പം അഭിഭാഷകരായ ശ്രീദേവി പ്രതാപ്, ശില്പ ശിവൻ, ഹരീഷ് കാട്ടൂർ എന്നിവരാണ് ഹാജരാകുന്നത്.

ഓണ്‍ലൈന്‍ തട്ടിപ്പ് : അഞ്ച് ലക്ഷം അപഹരിച്ച വിദേശ പൗരന്‍ അറസ്റ്റിൽ

കൊല്ലം: ഓണ്‍ലൈന്‍ തട്ടിപ്പിലൂടെ കൊല്ലം ഉമയനല്ലൂര്‍ സ്വദേശിനിയില്‍ നിന്നും അഞ്ച് ലക്ഷത്തോളം രൂപ തട്ടിയെടുത്ത വിദേശ പൗരന്‍ പോലീസിന്‍റെ പിടിയിലായി. നൈജീരിയന്‍ സ്വദേശിയായ മാത്യൂ എമേക്കാ(30) ആണ് കൊട്ടിയം പോലീസ് അറസ്റ്റ് ചെയ്തത്. പോയ വർഷം ജൂലൈ, ആഗസ്റ്റ് മാസങ്ങളിലാണ് കേസിനാസ്പദമായ സംഭവം അരങ്ങേറുന്നത്. യുകെയില്‍ ഡോക്ടറാണെന്ന് വിശ്വസിപ്പിച്ച് കൊല്ലം സ്വദേശിനിയുമായി ഇയാള്‍ ഓണ്‍ലൈനിലൂടെ സൗഹൃദം സ്ഥാപിക്കുകയായിരുന്നു. തുടര്‍ന്ന് വിലപിടിപ്പുള്ള സമ്മാനങ്ങള്‍ യുവതിയുടെ പേരില്‍ അയച്ചിട്ടുണ്ടെന്നും അത് ഡല്‍ഹിയില്‍ കൊറിയറിൽ എത്തിയിട്ടുണ്ടെന്നും പറഞ്ഞു കൈപ്പറ്റുന്നതിന് 45000 രൂപ ആവശ്യപ്പെടുകയായിരുന്നു. പ്രതി നിര്‍ദേശിച്ച അക്കൗണ്ടിലേക്ക് പണം കൈമാറിയ യുവതിയെ പലപ്പോഴായി നുണകള്‍ പറഞ്ഞ് വിശ്വസിപ്പിച്ചും ഭീഷണിപ്പെടുത്തിയും പലപ്പോഴായി 4,90,000 രൂപ തട്ടിയെടുക്കുകയായിരുന്നു. കൊട്ടിയം പോലീസ് സ്റ്റേഷനില്‍ നല്‍കിയ പരാതിയുടെ അടിസ്ഥാനത്തില്‍ ഓണ്‍ലൈനായി തട്ടിപ്പ് നടത്തി പണം കൈക്കലാക്കിയ കുറ്റത്തിന് ഐ ടി ആക്ട് പ്രകാരം ഇയാള്‍ക്കെതിരേ കേസ് രജിസ്റ്റര്‍ ചെയ്തു. പണം കൈമാറിയ ബാങ്ക് അക്കൗണ്ടിന്‍റെ വിവരങ്ങള്‍ പിന്‍തുടര്‍ന്ന് ഡല്‍ഹിയിലെത്തിയ പോലീസ് സംഘം നടത്തിയ അന്വേഷണത്തില്‍ പ്രതിയെ സമാനമായ കുറ്റത്തിന് ഡല്‍ഹി പോലീസും തുടര്‍ന്ന് വയനാട് അമ്പലവയല്‍ പോലീസും അറസ്റ്റ് ചെയ്തിട്ടുള്ളതായും തുടര്‍ന്ന് കോടതിയില്‍ നിന്നും ജാമ്യം ലഭിച്ച പ്രതിയെ സാമൂഹ്യ നീതി വകുപ്പിന്‍റെ കീഴില്‍ കൊട്ടിയത്ത് പ്രവര്‍ത്തിക്കുന്ന ട്രാന്‍സിറ്റ് ഹോമില്‍ പാര്‍പ്പിച്ചിരിക്കുകയാണെന്നും കണ്ടെത്തി. കൊട്ടിയം എസ് എച്ച് ഒയുടെ ചാര്‍ജ് വഹിക്കുന്ന ചാത്തന്നൂര്‍ ഇന്‍സ്പെക്ടര്‍ അനൂപിന്‍റെ നിര്‍ദ്ദേശപ്രകാരം എസ് ഐ മാരായ നിതിന്‍ നളന്‍, പ്രമോദ്, മിനുരാജ് എന്നിവരടങ്ങിയ പോലീസ് സംഘമാണ് അന്വേഷണം നടത്തിയത്.

വീട്ടമ്മ തൂങ്ങിമരിച്ച നിലയില്‍

കൊട്ടാരക്കര: നെടുവത്തൂർ സ്വദേശിയയ വീട്ടമ്മയെ വീട്ടിനുള്ളിൽ തൂങ്ങി മരിച്ച നിലയിൽ കണ്ടെത്തി. ഇഞ്ചക്കാട് അനീഷാ ഭവനം അനീഷിന്‍റെ ഭാര്യ നെടുവത്തൂർ നെടിയില വീട്ടിൽ ശരണ്യമോള്‍ (26) ആണ് മരിച്ചത്. ഭര്‍ത്താവ് അനീഷ് വിദേശത്താണ്. ആത്മഹത്യാ കുറിപ്പ് പോലീസിന് ലഭിച്ചു. ഭര്‍തൃവീടായ ഇഞ്ചക്കാട്ടുനിന്ന് രണ്ടു ദിവസം മുന്പാണ് ശരണ്യ നെടുവത്തൂരിലെ വീട്ടിലേക്ക് എത്തിയത്. മൂന്നും ആറും വയസുളള കുട്ടികളെ മുറിയില്‍ നിന്ന് പുറത്താക്കിയ ശേഷം തൂങ്ങിമരിക്കുകയായിരുന്നു. മക്കൾ: ആദ്യ, ആദർശ്. കൊട്ടാരക്കര പോലീസ് അന്വേഷണം നടത്തി വരുകയാണ്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]