ADVERTISEMENT

ADVERTISEMENT

ചിറ്റൂർ ബ്ലോക്ക് സ്റ്റേഷൻ പ്രവർത്തനസജ്ജം

ചിറ്റൂർ: വിജ്ഞാന കേരളം ചിറ്റൂർ ബ്ലോക്ക് പഞ്ചായത്ത്‌ ജോബ് സ്റ്റേഷൻ ഉദ്ഘാടനം മന്ത്രി കെ. കൃഷ്ണൻകുട്ടി നിർവഹിച്ചു. ചിറ്റൂർ ബ്ലോക്ക് പഞ്ചായത്ത് പ്രസിഡന്‍റ് എ. സുജാത അധ്യക്ഷത വഹിച്ചു. വില്ലേജ് എക്സ്റ്റൻഷൻ ഓഫീസർ സി.കെ. നവനീത് കൃഷ്ണൻ സ്വാഗതം പറഞ്ഞു.

വിജ്ഞാനകേരളം തൊഴിൽ കാമ്പയിൻ -ബ്ലോക്ക്‌തല ജോബ് സ്റ്റേഷനുകളുടെ പ്രാധാന്യവും ഫെസിലിറ്റേഷൻ സെന്‍ററുകളുടെ ദൗത്യവും എന്ന വിഷയത്തിൽ കിലാ സീനിയർഅർബൻ ഫെലോ ഡോ.കെ. രാജേഷ് വിഷയാവതരണ പ്രഭാഷണം നടത്തി. ചിറ്റൂർ ബ്ലോക്ക്‌ പഞ്ചായത്ത്‌ വൈസ് പ്രസിഡന്‍റ് സിന്ധു, വികസന സ്റ്റാൻഡിംഗ് കമ്മിറ്റി ചെയർമാൻ മണികുമാർ, ബ്ലോക്ക് പഞ്ചായത്ത് മെംബർമാരായ സുബൈറത്ത്, വിശാലാക്ഷി, ബാബുരാജ് പ്രിയങ്ക എന്നിവർ പ്രസംഗിച്ചു.

ADVERTISEMENT

ഒഴുക്കിൽപ്പെട്ട വിദ്യാർഥിയുടെ മൃതദേഹം കണ്ടെത്തി

ആലത്തൂർ: ഗായത്രി പുഴയിൽ ഒഴുക്കിൽപ്പെട്ട വിദ്യാർഥിയുടെ മൃതദേഹം കണ്ടെത്തി. കാവശേരി കഴനി എരകുളം ആന്തോട് ശിവരാമന്‍റെ മകനായ പ്രണവിന്‍റെ(21) മൃതദേഹമാണ് ഇന്നലെ രാവിലെ പട്ടാമ്പിയിൽ ഭാരതപ്പുഴയിൽ നിന്ന് ലഭിച്ചത്. ചൊവ്വാഴ്ച വൈകീട്ട് നാലോടെയാണ് തരൂർ കരിങ്കുളങ്ങര തടയണയിൽപെട്ട സുഹൃത്തിനെ രക്ഷിക്കാൻ ശ്രമിക്കുന്നതിനിടെ പ്രണവ് ഒഴുക്കിൽപ്പെട്ടത്. എൻഡിആർഎഫ് സംഘവും ഫയർഫോഴ്സും തെരച്ചിൽ നടത്തിയെങ്കിലും മൃതദേഹം കണ്ടെത്താനായില്ല. ഇതിനിടെ ഭാരതപ്പുഴയിൽ പട്ടാമ്പി നിള ആശുപത്രിക്കു സമീപം മൃതദേഹം കണ്ടെത്തുകയായിരുന്നു. ആലത്തൂർ ശ്രീനാരായണഗുരു കോളജ് ഓഫ് അഡ്വാൻസ്ഡ് സ്റ്റഡീസിലെ മൂന്നാം വർഷ ബിരുദ വിദ്യാർഥിയാണ്. മൃതദേഹം പാലക്കാട് ജില്ലാ ആശുപത്രി മോർച്ചറിയിൽ. ഇന്ന് പോസ്റ്റ്മോർട്ടം നടപടികൾക്കുശേഷം മൃതദേഹം ബന്ധുക്കൾക്ക് വിട്ടുകൊടുക്കും. അമ്മ: ബിന്ദു (അങ്കണവാടി ടീച്ചർ, അത്തിപ്പൊറ്റ). സഹോദരി: കാർത്തിക.

വിദ്യാർഥി മരിച്ചനിലയിൽ

ശ്രീകൃഷ്ണപുരം: വലമ്പിലിമംഗലം മഠത്തിൽ അനീഷിന്‍റെയും അനിതയുടെയും മകൻ അനിരുദ്ധിനെ(17) വീടിനകത്ത് തൂങ്ങിയനിലയിൽ കണ്ടെത്തി. ഉടൻതന്നെ ശ്രീകൃഷ്ണപുരത്തെ സ്വകാര്യക്ലിനിക്കിലും തുടർന്ന് മണ്ണാർക്കാട് വട്ടമ്പലത്തെ സ്വകാര്യ ആശുപത്രിയിലും എത്തിച്ചെങ്കിലും ജീവൻ രക്ഷിക്കാനായില്ല. ശ്രീകൃഷ്ണപുരം ഹയർ സെക്കൻഡറി സ്കൂളിലെ പ്ലസ് ടു വിദ്യാർഥിയാണ്. സഹോദരൻ: അരവിന്ദ്.

കുഴികൾ കിടങ്ങുകളായി മാറി; മംഗലം-ഗോവിന്ദാപുരം സംസ്ഥാനപാതയിൽ ഗതാഗതം ഭാഗികം

വടക്കഞ്ചേരി: ഭീമാകാരമായ കുഴികളും വെള്ളക്കെട്ടും മൂലം മംഗലം -ഗോവിന്ദാപുരം സംസ്ഥാന പാതയിൽ വാഹന ഗതാഗതം ഭാഗികമായി. മംഗലം പാലത്തിനടുത്ത് ഹീറോ ഷോറൂമിനുമുന്നിൽ കുഴികളുടെ രൂപംമാറി വലിയ കിടങ്ങുകളായി. ഇവിടെ അപകടപരമ്പര ഉണ്ടാകുന്നതിനെതുടർന്ന് നാട്ടുകാർ കുഴികളിൽ വാഴകളും മറ്റും മരങ്ങളും നട്ടു മുന്നറിയിപ്പുസൂചനകൾ നൽകുന്നുണ്ട്. മൂച്ചി ചുവട്ടിലും വള്ളിയോടും മുടപ്പല്ലൂരും വെള്ളക്കെട്ട് അതി രൂക്ഷമാണ്. വെള്ളം കയറി മുടപ്പല്ലൂർ ടൗണിലെ പല കടകൾക്കും ഇന്നലെ തുറക്കാനായില്ല.

റോഡരികിലെ ചെരിഞ്ഞ വാകമരം മുറിച്ചുനീക്കണമെന്ന് ആവശ്യം

ചിറ്റൂർ: പുഴപ്പാലം റോഡിൽ ചെരിഞ്ഞ് പതനാവസ്ഥയിലുള്ള വാകമരം മുറിച്ച് നീക്കണമെന്ന് യാത്രക്കാർ. ചൊവ്വാഴ്ച വൈകുന്നേരം ഉണ്ടായ കാറ്റിൽ മരം കൂടുതൽ ഇളകിയത് വാഹനസഞ്ചാരികൾക്ക് ഭീതി വർധിപ്പിച്ചിരിക്കുകയാണ്. മരം വീണാൽ വലിയ ശിഖരങ്ങൾ റോഡിലാണ് പതിക്കുന്നത്. കൊടുവായൂർ - വേലന്താവളം പാതയെന്നതിനാൽ ഇടതടവില്ലാതെ വാഹനസഞ്ചാരമുള്ള വഴിയാണിത്. പ്രദേശത്ത് ശക്തമായ മഴയും പെയ്തുവരികയാണ്.

കല്ലഞ്ചിറ റോഡിലെ കുഴികൾ ശ്രമദാനത്തിൽ ശരിയാക്കി

തത്തമംഗലം: കല്ലഞ്ചിറയിൽ റോഡ് തകർന്ന് വൻകുഴികളുണ്ടായി വാഹനസഞ്ചാരം അപകടവസ്ഥയിലായ സ്ഥലം നാട്ടുകാർ മെറ്റലും എം സാൻഡും ഉപയോഗിച്ച് നന്നാക്കി മാതൃകാസേവനം നടത്തി. തത്തമംഗലത്തുനിന്നും പാലക്കാട്ടേക്കു ദൂരക്കുറവെന്നതിനാൽ വാഹനയാത്രക്കാർ കല്ലഞ്ചിറ റോഡിനെയാണ് ആശ്രയിക്കുന്നത്. കഴിഞ്ഞ നാലു വർഷമായി അറ്റകുറ്റപ്പണി നടത്തതിനാൽ മിക്ക സ്ഥലങ്ങളിലും കുഴികൾ വ്യാപിച്ചു. ഗ്രാമസഭകളിലും പൊതുമരാമത്തിലും നാട്ടുകാർ നൽകിയ പരാതികൾ പരിഹരിക്കപ്പെട്ടിരുന്നില്ല.

മംഗലംഡാമിന്‍റെ ഷട്ടറുകൾ കൂടുതൽ തുറന്നു

മംഗലംഡാം: തീവ്ര മഴയെ തുടർന്ന് മംഗലംഡാമിന്‍റെ ആറുഷട്ടറുകളും ഇന്നലെ വൈകുന്നേരം കൂടുതൽ തുറന്നു. ഇന്നലെ പത്തുസെന്‍റീമീറ്ററാണ് തുറന്നത്. കഴിഞ്ഞ ദിവസം 20 സെന്‍റീമീറ്ററോളം ഷട്ടറുകൾ ഉയർത്തിയിരുന്നു. ജലനിരപ്പ് ക്രമീകരണത്തിന്‍റെ ഭാഗമായാണ് ഷട്ടറുകൾ കൂടുതൽ തുറന്നത്. മലമ്പുഴഡാം തുറക്കുന്ന സ്ഥിതിയുള്ളതിനാൽ കൂടുതൽ വെള്ളം പുഴകളിലേക്കൊഴുകി ഒന്നിച്ച് എല്ലാ പുഴകളിലും ജലനിരപ്പ് ഉയരുന്ന സ്ഥിതി ഒഴിവാക്കാനുള്ള ശ്രമമാണ് നടക്കുന്നതെന്ന് ഇറിഗേഷൻ അസിസ്റ്റന്‍റ് എക്സിക്യൂട്ടീവ് എൻജിനീയർ ശുഭ പറഞ്ഞു. 77. 01 മീറ്ററാണ് ഇന്നലത്തെ മംഗലംഡാമിലെ ജലനിരപ്പ്. 77.28 മീറ്ററാണ് ഡാമിന്‍റെ റെഡ് അലേർട്ട് പരിധി. ഇതിനാലാണ് ജലനിരപ്പ് ക്രമീകരണത്തിന്‍റെ ഭാഗമായി ഷട്ടറുകൾ കൂടുതൽ ഉയർത്തിയത്. വൃഷ്ടി പ്രദേശത്തു നിന്നും നീരൊഴുക്ക് ശക്തമാണെന്നും കൂടുതൽ വെള്ളം ഒഴുക്കികളയേണ്ടി വരുമെന്നും അധികൃതർ പറഞ്ഞു. കടപ്പാറ, ചൂരുപ്പാറ ഓടംതോട് ഭാഗങ്ങളിൽ നിന്നാണ് മംഗലംഡാം റിസർവോയറിലേക്ക് അതിശക്തമായ നീരൊഴുക്കുള്ളത്.

മീങ്കര ഡാം ഷട്ടറുകൾ ഇന്നു തുറക്കും

ചിറ്റൂർ: മുതലമടയിലും പരിസരപ്രദേശത്തും കനത്ത മഴ പെയ്തു വരുന്നതിനാൽ മീങ്കര ഡാമിലെ ജലനിരപ്പ് പൂർണതോതിലെത്തി. രണ്ടു ഷട്ടറുകൾ ഒരുസെന്‍റീമീറ്റർ വീതം ഇന്നുരാവിലെ എട്ടിനു തുറക്കാനാണ് അധികൃതരുടെ തീരുമാനം. ഗായത്രിപ്പുഴയുടെ ഇരുവശത്തെ താമസക്കാരും നിലമ്പതി പാലത്തിലുടെ സഞ്ചരിക്കുന്നവരും അതീവ ജാഗ്രത പാലിക്കണമെന്നും അധികൃതർ മുന്നറിയിപ്പ് നൽകി. കനത്ത മഴ തുടരുന്നതിനാൽ ഷട്ടറുകൾ കൂടുതൽ ഉയർത്താനും സാധ്യതയുണ്ട്.

മംഗലം, പാളയം, കരിപ്പാലി പുഴകൾ കവിഞ്ഞു; കുടുംബങ്ങൾ താമസംമാറി

വടക്കഞ്ചേരി: വടക്കഞ്ചേരി, മംഗലംഡാം മേഖലയിൽ രണ്ടുമണിക്കൂർ നീണ്ട പേമാരി. പുഴകളെല്ലാം കരകവിഞ്ഞു. മംഗലംഡാമിന്‍റെ ഷട്ടറുകൾ കൂടുതൽ ഉയർത്തി. പുഴയോരങ്ങളിലെ കൃഷിയിടങ്ങളും വീടുകളും വെള്ളപ്പൊക്ക ഭീഷണിയിലാണ്. കരിപ്പാലി, പുഴകൾ സംഗമിക്കുന്ന കുറുവത്ത്, പാളയം പ്രദേശങ്ങളിലാണ് വീടുകൾ വെള്ളപ്പൊക്ക ഭീഷണിയിലായിട്ടുള്ളത്. മംഗലംഡാം, പാലക്കുഴി മലയോര മേഖലകൾ ഉരുൾപൊട്ടൽ ഭീഷണി നിലനിൽക്കുന്നുണ്ട്. മലമ്പ്രദേശത്ത് ഒറ്റപ്പെട്ടു താമസിക്കുന്നവർ സുരക്ഷിത സ്ഥലങ്ങളിലേക്ക് താമസം മാറിത്തുടങ്ങി. തോരാത്ത മഴ തുടർന്നാൽ ഉരുൾപൊട്ടൽ ഉൾപ്പെടെ ദുരന്തസമാനമായ സ്ഥിതി മലയോരത്തും താഴ്ന്ന പ്രദേശങ്ങളിലുണ്ടാകും. ഇന്നലെ ഉച്ചയ്ക്ക് പന്ത്രണ്ടിനാണ് അതിതീവ്രമായ മഴ തുടങ്ങിയത്. രണ്ടുമണിക്കൂറോളം തോരാത്ത കനത്ത മഴ തന്നെയായിരുന്നു. നട്ടുച്ച സമയം ഇരുട്ടുമൂടി ഇടിവെട്ടോടുകൂടിയാണ് ഭീതിപ്പെടുത്തുന്നവിധം മഴ തകർത്തു പെയ്തത്. ഒപ്പം കാറ്റും ആഞ്ഞടിച്ചതിനാൽ പലയിടത്തും മരങ്ങൾവീണ് ഗതാഗതം തടസപ്പെട്ടു. വൈദ്യുതി വിതരണവും തടസപ്പെട്ടിട്ടുണ്ട്. മുടപ്പല്ലൂർ- മംഗലംഡാം റോഡിൽ ചിറ്റടിയിൽ മരംവീണ് ഗതാഗതം തടസപ്പെട്ടു. വടക്കഞ്ചേരി ഫയർഫോഴ്സും നാട്ടുകാരും ചേർന്ന് മരം മുറിച്ചുമാറ്റിയാണ് ഗതാഗതം പുനഃസ്ഥാപിച്ചത്. മംഗലം, കരിപ്പാലി, പാളയം പുഴകൾ കരകവിഞ്ഞ് അപകടാവസ്ഥയിലാണ് ഒഴുകുന്നത്. കടപ്പാറതോട് കരകവിഞ്ഞു അപകടനിലയിലാണ്. വനത്തിലും കനത്ത മഴയുണ്ട്. പേമാരിയെ തുടർന്ന് മേഖലയിലെ പല സ്കൂളുകൾക്കും ഇന്നലെ ഉച്ചയ്ക്കുതന്നെ അവധി നൽകി. നിലവിൽ ആശങ്കാജനകമായ സ്ഥിതിവിശേഷമില്ലെന്നും മലയോരങ്ങളും പുഴകൾ കവിഞ്ഞൊഴുകുന്ന പ്രദേശങ്ങളിലെ അതാത് വില്ലേജ് ഓഫീസർമാരോടു മുൻകരുതൽ നടപടി സ്വീകരിക്കാൻ നിർദേശം നൽകിയിട്ടുണ്ടെന്നും ആലത്തൂർ താലൂക്ക് ഹെഡ്ക്വാർട്ടേഴ്സ് ഡെപ്യുട്ടി തഹസിൽദാർ കെ.എച്ച്. ജോഷ് പറഞ്ഞു.

വടക്കഞ്ചേരി മേൽപ്പാലത്തിൽ വീണ്ടും കുത്തിപ്പൊളിക്കൽ

വടക്കഞ്ചേരി: ചെറിയ ഇടവേളക്കു ശേഷം വടക്കഞ്ചേരി- മണ്ണുത്തി ആറുവരി ദേശീയപാതക്കു തുടക്കം കുറിക്കുന്ന വടക്കഞ്ചേരി മേൽപ്പാലത്തിൽ വാഹനഗതാഗതം തടഞ്ഞ് വീണ്ടും കുത്തിപ്പൊളിക്കൽ തുടങ്ങി. തൃശൂർലൈനിൽ തങ്കം ജംഗ്ഷനു മുകളിൽ രണ്ടുവരിപ്പാത തടഞ്ഞ് ഒറ്റവരിയിലൂടെ വാഹനങ്ങൾ കടത്തിവിട്ടാണ് കുത്തിപ്പൊളിക്കൽ നടക്കുന്നത്. സ്ലാബുകൾ തമ്മിൽ ജോയിന്‍റ് ചെയ്യുന്ന ഭാഗത്ത് കനമുള്ള വലിയ കമ്പി പുറത്തേക്ക് തള്ളിവന്നത് മുറിച്ചുനീക്കി കോൺക്രീറ്റ് ചെയ്യുന്ന പണികളാണ് നടക്കുന്നത്. കോൺക്രീറ്റ് ഇളകിയതാണ് കമ്പി പുറത്തേക്ക് തള്ളി വരാൻ കാരണമെന്നു അധികൃതർ പറഞ്ഞു. മേൽപ്പാലം വാഹനങ്ങൾക്കായി തുറന്നു കൊടുത്ത് മൂന്നു വർഷത്തിനുള്ളിൽ അന്പത്തിരണ്ടാംതവണയാണ് കുത്തിപ്പൊളിക്കൽ നടക്കുന്നത്.

നെല്ലിയാമ്പതി ചുരംറോഡിൽ മരം വീണു; നാലുമണിക്കൂറോളം ഗതാഗതതടസം

നെല്ലിയാമ്പതി: നെല്ലിയാമ്പതി ചുരംറോഡിൽ ചെറുനെല്ലി വാച്ച്ടവറിനു സമീപം വൻമരം കടപുഴകി വീണു. നാലുമണിക്കൂറോളം ഗതാഗതം തടസപ്പെട്ടു. ഇന്നലെ രാവിലെ ആറിനായിരുന്നു സംഭവം. നെല്ലിയാമ്പതിയിൽനിന്നും രാവിലെ 6.30 ന് പുറപ്പെട്ട സ്വകാര്യ ബസും പാലക്കാട്‌ ഡിപ്പോയിൽനിന്നും നെല്ലിയാമ്പതിയിലേക്കുവന്ന കെഎസ്ആർടിസി ബസും വഴിയിൽ ഏറെനേരം കുടുങ്ങി. തുടർന്ന് പോബ്സ് എസ്റ്റേറ്റിലെ ജീവനക്കാരും വനപാലകരും ചേർന്ന് മരം മുറിച്ചുമാറ്റിയതിനു ശേഷമാണ് ഗതാഗതം പുനഃസ്ഥാപിച്ചത്. നെല്ലിയാമ്പതി ചുരം പാതയിൽ ചാഞ്ഞു നിൽക്കുന്നതും അപകട ഭീഷണി ഉയർത്തി നിൽക്കുന്നതുമായ മരങ്ങൾ വെട്ടിമാറ്റണമെന്നു നാഷണൽ ജനതാദൾ നെല്ലിയാമ്പതി യൂണിറ്റ് ജില്ലാ കളക്ടർക്ക് നിവേദനം നൽകി. നെല്ലിയാമ്പതിയിൽ ജോലി ചെയ്യുന്നവരുടെയും, വിദ്യാർഥികളുടെയും സൗകര്യാർഥം അടിയന്തര നടപടി വേണമെന്നു സെക്രട്ടറി വി. എസ്. പ്രസാദ് ആവശ്യപ്പെട്ടു.

ആര്യമ്പാവ്- കോട്ടോപ്പാടം ബൈപാസ് റോഡിൽ മരംവീണു ഗതാഗതതടസം

മണ്ണാർക്കാട്: ആര്യമ്പാവ് കോട്ടോപ്പാടം ബൈപാസ് റോഡിൽ മരംവീണ് ഗതാഗത തടസം. ഇന്നലെ വൈകുന്നേരം നാലരയോടെയാണ് വൈദ്യുതിലൈനിനു കുറുകെ മരംവീണത്. സ്കൂൾവിട്ട സമയമായതിനാൽ നിരവധി സ്കൂൾ വാഹനങ്ങളാണ് ഇതുവഴി കടന്നുപോയിരുന്നത്. മരം വൈദ്യുതിലൈനിൽ തങ്ങിനിന്നതിനാൽ വൻ അപകടമാണ് ഒഴിവായത്. ഗതാഗതതടസത്തെ തുടർന്ന് മണ്ണാർക്കാട് അഗ്നിരക്ഷാസേന സ്ഥലത്തെത്തി. സ്റ്റേഷൻ ഓഫീസർ ഇബ്രാഹിമിന്‍റെ നേതൃത്വത്തിൽ ഉദ്യോഗസ്ഥരായ അബ്ദുൽ ജലീൽ, വി. സുരേഷ്കുമാർ, മഹേഷ്, രഞ്ജിത്ത്, പി.ആർ. സുജിത്ത്, കെ.വി. ശരത്ത്, മഹേഷ് എന്നിവരുടെ നേതൃത്വത്തിലുള്ള സംഘം വൈദ്യുതി ബന്ധം വിച്ഛേദിച്ച് മരം മുറിച്ചുമാറ്റി ഗതാഗതം പുനഃസ്ഥാപിച്ചു.

വികസന മുരടിപ്പ്: മണ്ണാർക്കാട് ബ്ലോക്ക് പഞ്ചായത്ത് ഓഫീസ് ഉപരോധിച്ച് കോൺഗ്രസ്

മണ്ണാർക്കാട്: ബ്ലോക്ക്‌ പഞ്ചായത്ത് സെക്രട്ടറിയുടെ നിരുത്തരവാദ നിലപാടുകൾക്കെതിരെ മണ്ണാർക്കാട് ബ്ലോക്ക്‌ കോൺഗ്രസ്‌ കമ്മിറ്റി ബ്ലോക്ക്‌ പഞ്ചായത്ത് ഓഫീസ് ഉപരോധിച്ചു. പാലക്കാട്‌ എംപി വി.കെ. ശ്രീകണ്ഠന്‍റെ ആസ്തി വികസനഫണ്ടിൽ ഉൾപ്പെടുത്തി പ്രവൃത്തി പൂർത്തീകരിക്കാൻ തീരുമാനിച്ച തെങ്കര, എടത്താനാട്ടുകര, വടശ്ശേരിപ്പുറം എന്നിവിടങ്ങളിലെ വികസന പ്രവർത്തനങ്ങൾ ഒന്നരവർഷകാലമായി ബ്ലോക്ക്‌ പഞ്ചായത്ത് സെക്രട്ടറിയുടെ അനാസ്ഥ കാരണം മുടങ്ങിക്കിടക്കുകയാണെന്ന് ആരോപിച്ചായിരുന്നു സമരം. ജില്ലാ കോണ്‍ഗ്രസ് ജനറല്‍ സെക്രട്ടറി പി. അഹമ്മദ് അഷ്റഫ് ഉപരോധ സമരം ഉദ്ഘാടനം ചെയ്തു. ബ്ലോക്ക് കോണ്‍ഗ്രസ് പ്രസിഡന്‍റ് അസീസ് ഭീമനാട് അധ്യക്ഷത വഹിച്ചു. ഡിസിസി മെംബര്‍ കെ. ബാലകൃഷ്ണന്‍, ബ്ലോക്ക് കോണ്‍ഗ്രസ് വൈസ് പ്രസിഡന്‍റുമാരായ കെ.ജി. ബാബു, സക്കീര്‍ തയ്യില്‍, ഗിരീഷ് ഗുപ്ത, സതീശന്‍ താഴത്തേതില്‍, നൗഷാദ് ചേലംഞ്ചേരി, സി. ജെ. രമേശ്‌, രാധാകൃഷ്ണൻ, ടി. കെ. ഷംസുദീൻ, നാസർ കാപ്പുങ്ങൽ, ടി.കെ. ഇപ്പു, സുബൈര്‍ പാറക്കോട്ടില്‍, വര്‍ഗീസ്, ഹരിദാസ് ആറ്റക്കര, വി.ഡി. പ്രേംകുമാര്‍, ഉസ്മാൻ പാലക്കായി, ഉമ്മർ ഹത്താബ്, രാജൻ അമ്പാടത്ത്, മനച്ചിതൊടി ഉമ്മര്‍, വേണുഗോപാല്‍, ബാബു പലകക്കോടൻ, മേരി സന്തോഷ്‌, ജയകുമാരി, ലൈല ഷാജഹാൻ , ജിഷ, കുഞ്ഞിപ്പു തുടങ്ങിയവര്‍ പങ്കെടുത്തു.

തിരുവിഴാംകുന്നിൽ കാട്ടാനശല്യം രൂക്ഷം

മണ്ണാർക്കാട്: തിരുവഴാംകുന്നിൽ കാട്ടാനകളുടെ ശല്യം രൂക്ഷം. കഴിഞ്ഞ തിങ്കളാഴ്ച രാത്രി പഞ്ചായത്ത് അംഗം കെ. നൂറുൽസലാം രണ്ട് ആനകളുടെ മുന്നിൽനിന്ന് രക്ഷപ്പെട്ടതു തലനാരിഴയ്ക്കാണ്. കരടിയോട് ഭാഗത്തുനിന്നും ബൈക്കിൽ വരുന്നതിനിടെയാണ് ആനകളുടെമുന്നിൽ അകപ്പെട്ടത്. ഇരട്ടവാരി- കരടിയോട് റോഡിലുള്ള രണ്ടേക്കറോളം വരുന്നസ്ഥലം വലിയതോതിൽ കാടുപിടിച്ചു കിടക്കുന്നതിനാൽ ആനകൾ റോഡിലേക്കിറങ്ങുമ്പോൾ മാത്രമാണ് കാണാൻ കഴിയുന്നത്. വനംവകുപ്പും സ്വകാര്യവ്യക്തിയും തമ്മിൽ കേസിൽ ഉൾപ്പെട്ട സ്ഥലമായതിനാൽ കാടുവെട്ടി മാറ്റാത്തത് നാട്ടുകാർക്കും യാത്രക്കാർക്കും ഏറെ ദുരിതമായി. പുലർച്ചെ റബർടാപ്പിംഗ് തൊഴിലാളികളും മറ്റുംനടന്നും ഇരുചക്ര വാഹനങ്ങളിലും സഞ്ചരിക്കുന്ന റോഡാണിത്. കാടുവെട്ടിമാറ്റാൻ നടപടി സ്വീകരിക്കണമെന്നു അധികൃതരോട് ആവശ്യപ്പെട്ടിട്ടും നടപടിയുണ്ടായില്ലെന്നു വാർഡ് മെംബർ പറഞ്ഞു.

സെന്‍റ് തോമസ് സ്കൂളിൽ അന്തർദേശീയ മദ്യ-ലഹരിവിരുദ്ധ ദിനാചരണം ഇന്ന്

പാലക്കാട്: അന്തർദേശീയ മദ്യ-ലഹരി വിരുദ്ധദിനാചരണം ഇന്നുരാവിലെ ഒന്പതിന് ഒലവക്കോട് സെന്‍റ് തോമസ് ഹയർസെക്കൻഡറി സ്കൂളിൽ നടക്കും. ബിഷപ് മാർ പീറ്റർ കൊച്ചുപുരയ്ക്കൽ മദ്യ- ലഹരിവിരുദ്ധ സന്ദേശം നൽകും. മദ്യ- ലഹരിവിരുദ്ധസമിതി രൂപത ഡയറക്ടർ ഫാ. ജോസ് കൊച്ചുപറന്പിൽ പ്രതിജ്ഞ ചൊല്ലിക്കൊടുക്കും. രൂപത പ്രസിഡന്‍റ് ഡോ. മാത്യു കല്ലടിക്കോട് ആശംസാപ്രസംഗം നടത്തും. ഫാ. ജോബിൻ മേലേമുറിയിൽ ലഹരിവിരുദ്ധ ക്ലാസെടുക്കും. കാഞ്ഞിരപ്പുഴ സെന്‍റ് തോമസ് ഐടിഐ വിദ്യാർഥികൾ ഫ്ളാഷ് മോബ് അവതരിപ്പിക്കും. പ്രിൻസിപ്പൽ സിസ്റ്റർ ലീമ സിഎച്ച്എഫ് സ്വാഗതം പറയും. ഫാ. ജോസ് അങ്ങേവീട്ടിൽ, ഫാ. തോം കിഴക്കേടത്ത്, ഫാ. ഷൈജു പരിയാത്ത്, ഫാ. ഐബിൻ കളത്താര തുടങ്ങിയവർ പങ്കെടുക്കും.

വടക്കഞ്ചേരി പഞ്ചായത്ത് ഭരണസമിതി യോഗത്തിൽ ബഹളവും വിയോജനക്കുറിപ്പും

വടക്കഞ്ചേരി: പഞ്ചായത്തിൽ മിനിഹൈമാസ്റ്റ് ലൈറ്റ് സ്ഥാപിക്കുന്നതു സംബന്ധിച്ച് ഭരണസമിതി യോഗത്തിൽ ബഹളവും പ്രതിപക്ഷമായ കോൺഗ്രസ് മെംബർമാരുടെ വിയോജനക്കുറിപ്പുമുണ്ടായി. ഇന്നലെ രാവിലെ നടന്ന ഭരണസമിതി യോഗത്തിലാണ് ലൈറ്റ് വിഷയം ചൂടേറിയ ചർച്ചകൾക്കു കാരണമായത്. മുൻ എംപി രമ്യഹരിദാസ് പഞ്ചായത്തിലെ 13 സ്ഥലങ്ങളിൽ സ്ഥാപിക്കാൻ കൊണ്ടുവന്ന പ്രൊപ്പോസൽ പഞ്ചായത്തിനു ബാധ്യതയാകും ഏറ്റെടുക്കാനാകില്ലെന്നുപറഞ്ഞ് രാഷ്ട്രീയനിറംനോക്കി അനുമതി നൽകാതെ മാറ്റിവച്ചപ്പോൾ പുതിയ എംപി കൊണ്ടുവന്ന പ്രൊപ്പോസൽ ചർച്ച പോലും നടത്താതെ ഭരണസമിതി അംഗീകരിച്ചതാണ് പ്രതിപക്ഷ മെംബർമാരെ ചൊടിപ്പിച്ചത്. തങ്ങളുടെ വിയോജനക്കുറിപ്പ് മിനിറ്റ്സിൽ രേഖപ്പെടുത്തണമെന്നും അംഗങ്ങൾ ആവശ്യപ്പെട്ടു. കെ. മോഹൻദാസ്, വി. ശ്രീനാഥ്, സതീഷ് കുമാർ, അമ്പിളി മോഹൻദാസ്, സി. കെ. ദേവദാസ് , സി. മുത്തു എന്നീ മെംബർമാരാണ് വിയോജനക്കുറിപ്പ് രേഖപ്പെടുത്തിയത്.

സ്ഥലംവാങ്ങുമെന്നു മണ്ണാർക്കാട് നഗരസഭ: വേണ്ടെന്ന് ഇടതു കൗൺസിലർമാർ

മണ്ണാർക്കാട്: മണ്ണാർക്കാട് നഗരസഭയുടെ വിവിധ പദ്ധതികൾക്കായി നഗരസഭ കണ്ടെത്തിയ പാതാക്കര മലയിലെ സ്ഥലംവാങ്ങാൻ വീണ്ടും കൗൺസിൽ യോഗത്തിൽ തീരുമാനം. തീരുമാനത്തിനെതിരെ സിപിഎം കൗൺസിലർമാർ വിയോജനക്കുറിപ്പ് രേഖപ്പെടുത്തി. ഒരിക്കൽ വേണ്ടെന്നുവച്ച പാതാക്കര മലയിലെ സ്ഥലംവേണ്ടെന്നും നാലുദിവസത്തിനകം വേറെ സ്ഥലംകണ്ടെത്തി തരാമെന്നും സിപിഎം കൗൺസിലർമാർ യോഗത്തിൽ പറഞ്ഞു. അങ്ങനെയെങ്കിൽ സ്ഥലം കണ്ടെത്തുന്നമുറയ്ക്ക് അതു വാങ്ങാനുള്ള നടപടിയാരംഭിക്കുമെന്നു നഗരസഭാ ചെയർമാൻ സി. മുഹമ്മദ് ബഷീർ യോഗത്തിൽ പറഞ്ഞു. മാലിന്യ സംസ്കരണ പ്ലാന്‍റ് നിർമിക്കാൻ സ്ഥലം കണ്ടെത്തേണ്ടത് അത്യാവശ്യമാണ്. കേരള ശുചിത്വമിഷൻ പ്രതികളും കേന്ദ്രസർക്കാർ പ്രതിനിധിയും പങ്കെടുത്ത യോഗത്തിൽ നിർദേശം നൽകിയിട്ടുണ്ടെന്നും ചെയർമാൻ പറഞ്ഞു. പ്ലാന്‍റ് നിർമിച്ചില്ലെങ്കിൽ നഗരസഭയ്ക്ക് ഹരിത ട്രൈബ്യൂണൽ ഭീമമായ പിഴ ചുമത്താൻ സാധ്യതയുണ്ട്. മാലിന്യ സംസ്കരണ പ്ലാന്‍റില്ലാതെ മുന്നോട്ടുപോകാൻ കഴിയില്ലെന്നും ചെയർമാൻ യോഗത്തിൽ പറഞ്ഞു. നേരത്തെ വേണ്ടെന്നുവച്ച പാതാക്കര മലയിലെ സ്ഥലം വീണ്ടും വാങ്ങുന്നത് അംഗീകരിക്കാൻ കഴിയില്ലെന്ന് സിപിഎം കൗൺസിലർമാർ പറഞ്ഞു. മുമ്പും സിപിഎം കൗൺസിലർമാർ വിയോജനക്കുറിപ്പ് രേഖപ്പെടുത്തിയിട്ടുണ്ട്.

മാസ്റ്റർപ്ലാൻ അംഗീകരിച്ച് മണ്ണാർക്കാട് നഗരസഭ കൗൺസിൽ

മണ്ണാർക്കാട്: നഗരസഭയുടെ സമഗ്ര വികസനത്തിനുള്ള മാസ്റ്റർപ്ലാൻ നഗരസഭാ കൗൺസിൽ അംഗീകരിച്ചു. പുതിയ ബൈപാസ്, ബസ് സ്റ്റാൻഡ്, ഹാപ്പിനസ് പാർക്കുകൾ, മാലിന്യ സംസ്കരണ പ്ലാന്‍റിനു സ്ഥലം തുടങ്ങി ഒട്ടേറെ വികസന പദ്ധതികളാണ് മാസ്റ്റർപ്ലാനിലുള്ളത്. 20 വർഷം കഴിയുമ്പോൾ മണ്ണാർക്കാട് എങ്ങനെയാവണമെന്ന കാഴ്ചപ്പാടോടു കൂടിയുള്ള പദ്ധതികളാണ് ആവിഷ്കരിച്ചിരിക്കുന്നത്. ദേശീയപാതയിൽനിന്ന് നെല്ലിപ്പുഴ പാലംമുതൽ പുഴയോരത്തു കൂടി മുക്കണ്ണം കാഞ്ഞിരംപാടം ചങ്ങലീരി റോഡ് വഴി ദേശീയപാതയിൽ കുന്തിപ്പുഴ ഭാഗത്ത് എത്താവുന്ന ബൈപാസാണ് പ്രധാന പദ്ധതി. ഈ റോഡ് യാഥാർഥ്യമായാൽ മണ്ണാർക്കാട് നഗരത്തിൽ കയറാതെ നെല്ലിപ്പുഴ ജംഗ്ഷനിൽനിന്ന് കുന്തിപ്പുഴ പാലത്തിനു സമീപം എത്താനാവും. പോത്തോഴികടവ് ക്ഷേത്രംമുതൽ ആറാട്ടുകടവ് വരെ കുന്തിപ്പുഴയുടെ ഓരത്ത് നടപ്പാതയും ഹാപ്പിനസ് പാർക്കും നിർമിക്കും. നെല്ലിപ്പുഴ പഴയപാലം സംരക്ഷിച്ച് ഈ ഭാഗത്ത് ഭക്ഷണക്കടകളും മറ്റും ഒരുക്കാനാണ് മറ്റൊരു പദ്ധതി. സ്വകാര്യ വ്യക്തികളുടെ സഹകരണത്തോടെ പുതിയൊരു ബസ് സ്റ്റാൻഡും മാസ്റ്റർപ്ലാനിലുണ്ട്. കൂടാതെ മണ്ണാർക്കാടിന്‍റെ പൈതൃക കെട്ടിടമായി അരകുറുശ്ശിയിലെ 16 കെട്ട് സംരക്ഷിക്കാനും ഉദയർക്കുന്ന് ക്ഷേത്രംമുതൽ ആറാട്ടുകടവ് വരെയുള്ള റോഡ് പൈതൃകവീഥിയായി മാറ്റാനും മാസ്റ്റർപ്ലാനിൽ നിർദ്ദേശമുണ്ട്. കൂമ്പാറ പോറ്റൂർ ഇൻഡോർ സ്റ്റേഡിയം, നായാടിക്കുന്ന് സ്റ്റേഡിയം നവീകരണം എന്നിവയുമുണ്ട്. താലൂക്ക് ആശുപത്രിക്ക് കൂടുതൽ സ്ഥലം കണ്ടെത്തി സൗകര്യം ഏർപ്പെടുത്താനും പദ്ധതി വിഭാവനം ചെയ്യുന്നു. മണ്ണാർക്കാടിനു മാലിന്യ സംസ്കരണ പ്ലാന്‍റ്, കേന്ദ്രീകൃത മത്സ്- മാംസ- പച്ചക്കറി മാർക്കറ്റ്, ടൂറിസം വികസനമെല്ലാം മാസ്റ്റർപ്ലാനിൽ പ്രതിപാദിക്കുന്നു. മാസ്റ്റർപ്ലാനിൽ ഉൾപ്പെട്ട പദ്ധതികൾക്കാവും ഭാവിയിൽ അനുമതി നൽകുക.

കല്യാണിയമ്മയുടെ വീട്ടിൽ വൈദ്യുതി വെളിച്ചമെത്തും

കല്ലടിക്കോട്: വർഷങ്ങളായി വൈദ്യുതി ഇല്ലാതെ മെഴുകുതിരി വെട്ടത്തിൽ കഴിഞ്ഞിരുന്ന കല്യാണിയമ്മയുടെ കുടുംബത്തിന് വരുംദിവസത്തിൽ വൈദ്യുതി എത്തും. വൈദ്യുതി നൽകാനാവശ്യമായ അഞ്ച് തൂണുകൾ കെഎസ്ഇബിയുടെ നേതൃത്വത്തിൽ സ്ഥാപിച്ചുകഴിഞ്ഞു. കരിമ്പ ഗ്രാമധനശ്രീ ഭാരത് ഫൗണ്ടേഷൻ ആണ് മറ്റു ചെലവുകൾ ഏറ്റെടുത്തിരിക്കുന്നത്. തിങ്കളാഴ്ചയോടെ ജോലി പൂർത്തിയാക്കി വൈദ്യുതി എത്തിക്കാനാകുമെന്ന് അധികൃതർ പറഞ്ഞു. കരിമ്പ പഞ്ചായത്ത് പടിഞ്ഞാറെ പനയംപാടം താന്നിക്കൽ വീട്ടിൽ കല്യാണിയമ്മ (87), മകൾ ശ്യാമള (66) എന്നിവരുടെ വീട് നിർമാണം കഴിഞ്ഞ് മൂന്നുവർഷമായിട്ടും വൈദ്യുതി കണക്ഷൻ എടുക്കാൻ കഴിയാത്ത അവസ്ഥ മാധ്യമങ്ങളാണ് പുറത്ത് എത്തിച്ചത്. വാർത്ത ശ്രദ്ധയിൽപ്പെട്ട നിരവധിപേർ സഹായം നൽകാനായി ബന്ധപ്പെട്ടിരുന്നു. വീഴ്ചയിൽ കാലിന്‍റെ തുടയെല്ല് പൊട്ടി കിടപ്പിലാണ് കല്യാണിയമ്മ.

വായനപക്ഷാചരണം

കല്ലടിക്കോട്‌: പുലാപ്പറ്റ ഇഎംഎസ് സ്മാരക ക്ലബ്ബ്, വായനശാല എന്നിവയുടെ നേതൃത്വത്തിൽ വായനപക്ഷാചരണം, അനുമോദന സദസ് എന്നിവ ഉണ്ടായി. വായനപക്ഷാചരണം കടമ്പഴിപ്പുറം പഞ്ചായത്ത് പ്രസിഡന്‍റ് പി.ശാസ്തകുമാർ ഉദ്‌ഘാടനം ചെയ്‌തു. വാർഡ് അംഗം എം.എൻ. വേണുഗോപാൽ അധ്യക്ഷത വഹിച്ചു. ജില്ലാലൈബ്രറി കൗൺസിൽ അംഗം ഷാജി മുഖ്യപ്രഭാഷണം നടത്തി. വിവിധ പരീക്ഷകളിൽ ഉന്നതവിജയം നേടിയവരെ അനുമോദിച്ചു. വിദ്യാർഥികളുടെ കായികക്ഷമത ഉയർത്തുന്നതിനായി പ്രവർത്തിക്കുന്ന ശൗര്യ വാരിയേഴ്സ് പരിശീലകൻ റിട്ട. ആർമി കമാൻഡൊ സി.രാംദാസിനെ ചടങ്ങിൽ ആദരിച്ചു. ഒ.പി. രാജേഷ്, ടി. പ്രതീഷ്, എം.രാജേഷ്, പി. ഉണ്ണികൃഷ്ണൻ, പ്രിയ രാജേഷ് പ്രസംഗിച്ചു. മണ്ണാർക്കാട്: യൂണിവേഴ്സൽ ആർട്സ് ആൻഡ് സയൻസ് കോളജ് ലിറ്റററി ക്ലബ്ബിന്‍റെ നേതൃത്വത്തിൽ വായനപക്ഷാചരണം സംഘടിപ്പിച്ചു. ലൈബ്രറി കൗൺസിൽ പ്രസിഡന്‍റ് എസ്.ആർ. ഹബീബുള്ള ഉദ്ഘാടനം ചെയ്തു. പ്രഫ.സി. രാമകൃഷ്ണൻ അധ്യക്ഷനായി. പ്രൊഫസർമാരായ അലി, വിവേക്, രാജഗോപാൽ, കോളജ് സൂപ്രണ്ട് റംഷിക്ക്, ലൈബ്രറേറിയൻ രേഖ തുടങ്ങിയവർ പ്രസംഗിച്ചു. വായനപക്ഷാചരണത്തിന്‍റെ ഭാഗമായി സംഘടിപ്പിച്ച വായനമത്സരം, ആസ്വാദനക്കുറിപ്പ് മത്സരം എന്നിവയിൽ വിജയിച്ചവർക്ക് സമ്മാനങ്ങൾ വിതരണം ചെയ്തു.

മലയോരജനതയെ വന്യമൃഗങ്ങളിൽനിന്ന് സംരക്ഷിക്കാൻ സത്വരനടപടി വേണം

മണ്ണാർക്കാട്: മലയോരമേഖലയെ വന്യമൃഗങ്ങളിൽ നിന്ന് സംരക്ഷിക്കാൻ സത്വര നടപടി സ്വീകരിക്കണമെന്ന് വിഎഫ്പിസികെ കോട്ടോപ്പാടം സ്വാശ്രയ കർഷകസമിതി 20 ാമത് വാർഷിക പൊതുയോഗം സർക്കാരിനോട് ആവശ്യപ്പെട്ടു. ബ്ലോക്ക് പഞ്ചായത്ത് വൈസ് പ്രസിഡന്‍റ് ബഷീർ തെക്കൻ പൊതുയോഗം ഉദ്ഘാടനം ചെയ്തു. സമിതി പ്രസിഡന്‍റ് കെ. രാമൻകുട്ടി അധ്യക്ഷനായി. 2024 - 25 വർഷത്തെ മികച്ച കർഷകരെ ചടങ്ങിൽ ആദരിച്ചു. വിഎഫ്പിസികെ ജില്ലാ മാനേജർ ബിന്ദുമോൾ മാത്യു പദ്ധതി വിശദീകരിച്ചു. സെക്രട്ടറി സനിജ വിപിൻ റിപ്പോർട്ട് അവതരിപ്പിച്ചു. ജില്ലാ മാർക്കറ്റിംഗ് മാനേജർ ബീന മാത്യു, ബാങ്ക് ഓഫ് ഇന്ത്യ ബ്രാഞ്ച് മാനേജർ സി. ചൈത്ര, കേരള ബാങ്ക് ബ്രാഞ്ച് മാനേജർ എൻ. രാജേഷ്, വിഎഫ്പിസികെ അസിസ്റ്റന്‍റ് ജില്ലാ മാനേജർ കെ. റുക്സാന എന്നിവർ പ്രസംഗിച്ചു. കെ. തങ്കപ്പൻ സ്വാഗതവും സി. രാമൻകുട്ടി നന്ദിയും പറഞ്ഞു. ഭാരവാഹികൾ: സി. രാമൻകുട്ടി-പ്രസിഡന്‍റ്), കെ. അബൂബക്കർ-വൈസ് പ്രസിഡന്‍റ്), കെ. രാമചന്ദ്രൻ-ട്രഷറർ.

പുതിയ അധ്യയനവർഷം ഉദ്ഘാടനം

കോയന്പത്തൂർ: ഈറോഡ് കാർമൽ മെട്രിക്കുലേഷൻ ഹയർ സെക്കൻഡറി സ്കൂളിൽ പുതിയ അധ്യയനവർഷത്തിന്‍റെ ഉദ്ഘാടനവും തെരഞ്ഞെടുക്കപ്പെട്ട സ്കൂൾ കാബിനറ്റ് അംഗങ്ങളുടെ സത്യപ്രതിജ്ഞാചടങ്ങും നടത്തി. ഈറോഡ് ജലസംഭരണവകുപ്പ് മേധാവിയും പൂർവവിദ്യാർഥിയുമായ ഉദയകുമാർ ഉദ്ഘാടനം ചെയ്തു. സ്കൂൾ ലീഡർ ജോയൽ തെരഞ്ഞെടുക്കപ്പെട്ട കാബിനറ്റ് അംഗങ്ങൾക്ക് പ്രതിജ്ഞാവാചകം ചൊല്ലിക്കൊടുത്തു. സ്കൂൾ മാനേജർ ഫാ. തോമസ് ചീരൻ അധ്യക്ഷനായി. സ്കൂൾ അഡ്മിനിസ്ട്രേറ്റർ ഫാ. പ്രഭാത് ആശംസകളർപ്പിച്ചു. പ്രിൻസിപ്പൽ ഫാ. ആൻസൺ പാണേങ്ങാടൻ സമ്മാനവിതരണം നടത്തി. സുരേഖ സ്വാഗതവും രക്ഷാകർതൃപ്രതിനിധി ലളിത നന്ദിയും പറഞ്ഞു. വിദ്യാർഥികളുടെ നേതൃത്വത്തിൽ കലാവിരുന്നും അരങ്ങേറി.

വീടിന്‍റെ താക്കോൽ കൈമാറി

കല്ലടിക്കോട്: ജോയ് ആലുക്കാസ് ഫൗണ്ടേഷന്‍റെ കീഴിൽ പ്രവർത്തിക്കുന്ന ജോയ് ഹോംസിന്‍റെ നേതൃത്വത്തിൽ വേലിക്കാട് മണലിപ്പൊറ്റ പ്രജില രാജേഷിനു നിർമിച്ച് നൽകിയ വീടിന്‍റെ ഉദ്ഘാടനവും താക്കോൽദാനകർമവും എ. പ്രഭാകരൻ എംഎൽഎ, സിനിമതാരം നരേൻ എന്നിവർ ചേർന്ന് നിർവഹിച്ചു. മുണ്ടൂർ ഗ്രാമപഞ്ചായത്ത് പ്രസിഡന്‍റ് എം.വി. സജിത അധ്യക്ഷത വഹിച്ചു. മുണ്ടൂർ ഗ്രാമപഞ്ചായത്ത് വൈസ് പ്രസിഡന്‍റ് വി.സി. ശിവദാസൻ, വാർഡ് മെംബർ സുഭദ്ര, ജോയ് ആലുക്കാസ് ഡപ്യൂട്ടി ജനറൽ മാനേജർ രാജേഷ് കൃഷ്ണൻ, ജോയ് ആലുക്കാസ് ഫൗണ്ടേഷൻ കോ-ഓർഡിനേറ്റർ റിബിൻ പോൾ, പാലക്കാട് ഷോറൂം മാനേജർ അനിഷ്കുമാർ, ഉണ്ണികൃഷ്ണൻ, ജോബി ജോൺ എന്നിവർ പ്രസംഗിച്ചു.

വിദ്യാർഥികൾ പൊതിച്ചോർ നൽകി

കൊഴിഞ്ഞാമ്പാറ: എൻഎസ്എസ് യൂണിറ്റിന്‍റെ ആഭിമുഖ്യത്തിൽ അന്നദാനം മഹാദാനം സേവന പ്രവർത്തനം ഗവ. അപ്പർ പ്രൈമറി സ്കൂൾ വിദ്യാർഥികൾ നിർവഹിച്ചു. കുടുംബാരോഗ്യകേന്ദ്രത്തിൽ ചികിത്സക്കെത്തിയവർക്കും കൊഴിഞ്ഞാമ്പാറ ബസ് സ്റ്റാൻഡിൽ അശരണർക്കും ഭക്ഷണപ്പൊതികൾ വിതരണം നടത്തി. പ്രധാന അധ്യാപകൻ എ. ഉമ്മർ ഫാറൂഖ് നേതൃത്വം നൽകി. അധ്യാപകൻ ആർ. ശിവൻ, അധ്യാപികമാരായ എ. ജോഹറ, സി.പി. രമാദേവി, അമ്പതോളം വിദ്യാർഥികൾ അന്നദാന സേവനത്തിൽ പങ്കാളികളായി.

കെവിവിഇഎസ് വാർഷിക ജനറൽ ബോഡി യോഗം

കല്ലടിക്കോട്: വ്യാപാരമേഖലയിൽ ശബ്ദമില്ലാത്തവരുടെ ശബ്ദമായി കേരള വ്യാപാരി വ്യവസായി ഏകോപനസമിതി എന്നും കൂടെയുണ്ടാകുമെന്ന് സംസ്ഥാന വൈസ് പ്രസിഡന്‍റും ജില്ലാ പ്രസിഡന്‍റുമായ ബാബു കോട്ടയിൽ പറഞ്ഞു. എവിടെയെല്ലാം വ്യാപാരി വ്യവസായികൾ ചൂഷണം ചെയ്യപ്പെടുന്നുണ്ടോ അവിടെയെല്ലാം ശക്തമായ നിലപാടുകളെടുത്ത് സംഘടനയുണ്ടാകുമെന്നും അദ്ദേഹം പറഞ്ഞു. കല്ലടിക്കൊട് യൂണിറ്റ് വാർഷിക ജനറൽബോഡി യോഗം ഉദ്ഘാടനം ചെയ്ത് പ്രസംഗിക്കുകയായിരിന്നു ബാബു കോട്ടയിൽ. യൂണിറ്റ് പ്രസിഡന്‍റ് അജോ മഞ്ഞാടിക്കൽ അധ്യക്ഷത വഹിച്ചു. കോങ്ങാട് മണ്ഡലം പ്രസിഡന്‍റ് കെ മുരളികുമാർ, എൻ.പി. അഷറഫ് റിസ്റ്റി, സി. ശ്രീകാന്ത്, എൻ.എം. അബൂബക്കർ സിദ്ധിഖ്, കെ. ആർ.രാഹുൽ, എം. ഷാഹുൽ ഹമീദ്, ടി.ജെ. നീതു ജോൺ പ്രസംഗിച്ചു.

വാഹനാപകടം ബൈക്ക് യാത്രികൻ മരിച്ചു

കല്ലടിക്കോട്: പുലാപ്പറ്റ ഉമ്മനഴി പത്തീശ്വരം അങ്കണവാടിക്കു സമീപം ബൈക്ക് വൈദ്യുത പോസ്റ്റിൽ ഇടിച്ച് ബൈക്ക് യാത്രികൻ മരിച്ചു. അഴിയന്നൂർ തൃപ്പലമുണ്ട ലക്ഷം വീട് ഉന്നതി പമ്പാവാസൻ(24) ആണ് മരിച്ചത്. വെൽഡിംഗ് തൊഴിലാളിയാണ്. ഇന്നലെ വൈകീട്ട് 6.30നായിരുന്നു സംഭവം. കോണിക്കഴി ഭാഗത്തുനിന്ന് പുലാപ്പറ്റയിലേക്ക് വരുന്നതിനിടയിൽ വൈദ്യുത പോസ്റ്റിൽ ഇടിക്കുകയായിരുന്നു. ഓടിക്കൂടിയ നാട്ടുകാർ ഇയാളെ സമീപത്തെ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. ഇടിയുടെ ആഘാതത്തിൽ വൈദ്യുതി പോസ്റ്റ് പകുതിയിൽ മുറിഞ്ഞു നിലത്തിരുന്നു. അച്ഛൻ: അപ്പു, അമ്മ: ദേവകി. സഹോദരിമാർ: അശ്വതി, അജിത. മൃതദേഹം പാലക്കാട് ജില്ലാ ആശുപത്രി മോർച്ചറിയിൽ.

ബൈക്ക് വൈദ്യുതി പോസ്റ്റിലിടിച്ച് യുവാവിനു ദാരുണാന്ത്യം

ചിറ്റൂർ: അങ്കമാലിയിൽ നിയന്ത്രണംവിട്ട ബൈക്ക് വൈദ്യുത പോസ്റ്റിലിടിച്ചു ബൈക്ക് യാത്രക്കാരനു ദാരുണാന്ത്യം. ചിറ്റൂർ ദേവാങ്കപുരം സൂര്യഗായത്രിയിൽ പരേതനായ ജയശേഖരന്‍റെ മകൻ ജ്യോതിരാദിത്യ(20)യാണ് മരിച്ചത്. ബൈക്കിലുണ്ടായിരുന്ന അമ്മാവൻ സജിനെ(44) പരിക്കുകളോടെ അങ്കമാലിയിലെ സ്വകാര്യ ആശുപത്രിയിൽ പ്രവേശിപ്പിച്ചു. ഇന്നലെ രാവിലെ ഒന്പതുമണിയോടെ കരയാംപറമ്പിലാണ് അപകടമുണ്ടായത്. മറൈൻ എൻജിനീയറിംഗ് പൂർത്തിയാക്കിയ ജ്യോതിരാദിത്യ മർച്ചന്‍റ് നേവിയിൽ കൂടിക്കാഴ്ചയ്ക്കായി അമ്മാവനൊപ്പം കൊച്ചിയിലേക്കു പോയതാണ്. സജിൻ നേവി ഉദ്യോഗസ്ഥനാണ്. ജ്യോതിരാദിത്യയാണ് ബൈക്ക് ഓടിച്ചിരുന്നത്. ഉടൻ അങ്കമാലിയിലെ സ്വകാര്യ ആശുപത്രിയിൽ പ്രവേശിപ്പിച്ചെങ്കിലും മരിച്ചു. സംസ്കാരം ഇന്ന് ഉച്ചയ്ക്കു 12 നു ചിറ്റൂർ പുഴപ്പാലം വാതകശ്മശാനത്തിൽ. അമ്മ: സന്ധ്യ. സഹോദരി: സൂര്യനയന.

കുളത്തിൽവീണ് വയോധികൻ മരിച്ചു

നെന്മാറ: വയോധികനെ കുളത്തിൽ വീണ് മരിച്ച നിലയിൽ കണ്ടെത്തി. അയിനംപാടം കുന്നിങ്ങൽ വീട്ടിൽ സുബ്രഹ്മണ്യൻ(75) ആണ് മരിച്ചത്. വീടിനു സമീപമുള്ള കുളത്തിൽ ഭാര്യയോടൊപ്പം കുളിക്കാൻ പോയ സുബ്രഹ്മണ്യൻ അബദ്ധത്തിൽ കാൽ വഴുതി കുളത്തിൽ വീഴുകയായിരുന്നു. ഭാര്യ സമീപത്തെ വീട്ടിൽ അറിയിച്ച് രക്ഷാപ്രവർത്തനം നടത്തി നെന്മാറ സാമൂഹിക ആരോഗ്യ കേന്ദ്രത്തിൽ എത്തിച്ചെങ്കിലും മരണം സ്ഥിരീകരിച്ചു. ബന്ധുക്കൾ പോലീസിനെ അറിയിച്ചതിനെ തുടർന്ന് സംശയാസ്പദ മരണത്തിന് പോലീസ് കേസ് രജിസ്റ്റർ ചെയ്തു. ഭാര്യ: കമലം. മക്കൾ: ബിന്ദു മോൾ, ബിജുമോൻ, സീന മോൾ. മരുമക്കൾ: കുമാരൻ, മണികണ്ഠൻ, ശരണ്യ.

മോപ്പഡ് മറിഞ്ഞു; ലോറി കയറി ഗൃഹനാഥന്‍ മരിച്ചു

ആലത്തൂര്‍: ഇരട്ടക്കുളത്തു മോപ്പഡില്‍ ടാങ്കര്‍ലോറിയിടിച്ച് ഗൃഹനാഥന്‍ മരിച്ചു. മംഗലംഡാം ഒലിങ്കടവ് പൈതല മോളത്ത് വീട്ടില്‍ പൗലോസ്(70) ആണ് മരിച്ചത്. ഇന്നലെ രാവിലെ 11 മണിയോടെയാണ് അപകടം. വടക്കഞ്ചേരി ഭാഗത്തേക്കു വരികയായിരുന്ന പൗലോസിന്‍റെ മോപ്പഡ് ഇരട്ടക്കുളം അസീസിയ ആശുപത്രിക്കു മുന്‍വശത്തുവച്ച് ഗതാഗതക്രമീകരണത്തിനായി വച്ചിരുന്ന ബാരിക്കേഡില്‍ തട്ടി നിയന്ത്രണംവിട്ടുമറിയുകയായിരുന്നു. ഈ സമയത്ത് ഇതേ ദിശയില്‍വന്ന ടാങ്കര്‍ലോറി പൗലോസിന്‍റെ തലയിലൂടെ കയറിയിറങ്ങി തല്‍ക്ഷണം മരിച്ചു. മൃതദേഹം അസീസിയ ആശുപത്രി മോര്‍ച്ചറിയില്‍. ഭാര്യ: ആലീസ്. മക്കള്‍: ടിന്‍സി, പോണ്‍സി. മരുമക്കള്‍: നോബിള്‍, മനോജ്.

ട്രെയിനില്‍നിന്നു തെറിച്ചുവീണ യാത്രക്കാരന്‍ മരിച്ചു

പാലക്കാട് : ട്രെയിനില്‍ യാത്രചെയ്യുന്നതിനിടെ ട്രാക്കിലേക്കു തെറിച്ചുവീണ യുവാവ് മരിച്ചു. ശ്രീകൃഷ്ണപുരം കരിമ്പുഴ കിഴക്കേപുഷ്പത്ത് വീട്ടില്‍ പരേതനായ നാരായണന്‍ നമ്പീശന്‍റെ മകന്‍ കൃഷ്ണചന്ദ്രന്‍(35) ആണ് മരിച്ചത്. പാലക്കാട് വാളയാര്‍ ചന്ദ്രാപുരത്തുവച്ചായിരുന്നു സംഭവം. ചവിട്ടുപടിയില്‍ ഇരുന്നു യാത്രചെയ്യുന്നതിനിടെയായിരുന്നു അപകടമെന്നാണ് സൂചന. കോയമ്പത്തൂരില്‍നിന്നു പാലക്കാട്ടേക്കു വരുന്നതിനിടെ പുലര്‍ച്ചെ ഒന്നരയോടെയായിരുന്നു അപകടം. മൃതദേഹം ആശുപത്രിയിലേക്കു മാറ്റി. പോസ്റ്റ്‌മോര്‍ട്ടത്തിനുശേഷം കുടുംബത്തിനു വിട്ടുകൊടുത്തു. അമ്മ: രത്‌നം ബ്രാഹ്മിണിഅമ്മ. സഹോദരന്‍: രാമചന്ദ്രന്‍.

പട്ടാമ്പി പാലത്തിനുസമീപം റോഡ് തകർന്നു

ഷൊർണൂർ: പട്ടാമ്പി പാലത്തിന്‍റെ തൊട്ടടുത്ത് വെട്ടിക്കീറിയതുപോലെ റോഡ് തകർന്നത് ഭീഷണിയായി. പാലത്തിന്‍റെ തെക്കുഭാഗത്ത് ഗുരുവായൂർ റോഡിൽ ചോലക്കൽ മണ്ഡപത്തിന്‍റെ മുന്നിലാണ് റോഡ് വെട്ടിക്കീറിയതുപോലെ തകർന്നത്. പ്രളയത്തിൽ പാലംമുങ്ങിയപ്പോൾ നടത്തിയ അറ്റകുറ്റപ്പണിയിലും തകർന്ന ഈ ഭാഗം നന്നാക്കിയില്ലെന്നാണ് നാട്ടുകാർ പറയുന്നത്. ഗുരുവായൂർ ഭാഗത്തുനിന്ന് വരുന്ന വാഹനങ്ങൾ ഈ ഗട്ടറിൽ ചാടിയാണ് താഴ്ന്ന പാലത്തിലേക്ക് പ്രവേശിക്കുന്നത്. ഗട്ടർ വെട്ടിക്കാൻ നടത്തുന്ന ശ്രമം അപകടങ്ങൾക്ക് ഇടയാക്കുന്നുണ്ടെന്നും ഇരുചക്ര വാഹനങ്ങളും ഓട്ടോറിക്ഷകളുമാണ് ഏറെ പ്രയാസപ്പെടുന്നതെന്നും നാട്ടുകാർ പറയുന്നു.

കമ്പാലത്തറയിൽ അപകടമരണങ്ങൾ തുടർക്കഥ: നോക്കുകുത്തിയായി ജലസേചനവകുപ്പ് അധികൃതർ

വണ്ടിത്താവളം: കമ്പാലത്തറ ഏരിയിൽ മുങ്ങിമരണങ്ങൾ ആവർത്തിക്കുന്പോഴും ഫലപ്രദമായി തടയാൻ ജലസേചനവകുപ്പിന് കഴിയുന്നില്ലെന്ന ആക്ഷേപം ശക്തം. ഇക്കഴിഞ്ഞ ദിവസം രണ്ടു വിദ്യാർഥികൾ ഏരിയിൽ കുളിക്കാനിറങ്ങി ജീവഹാനി സംഭവിച്ചിരുന്നു. കോയമ്പത്തൂരിൽ നിന്നും വിനോദയാത്രക്കുവന്ന പത്തംഗ കോളജ് വിദ്യാർഥികളിൽ മൂന്നുപേർ സമാനമായ രീതിയിൽ മുങ്ങിമരിച്ചിരുന്നു. ഇതുകൂടാതെ കുളിക്കാനും ഇതര ആവശ്യത്തിനുമായി ഏരിയിലിറങ്ങി ഒരു ഡസനിലേറെ പേർ മരണപ്പെട്ട സംഭവം നടന്നിരുന്നു. കാലവർഷസമയങ്ങളിൽ ജലനിരപ്പ് ഉയരുമ്പോഴാണ് മിക്ക അപകടങ്ങളും നടന്നിരിക്കുന്നത്. വേനൽസമയങ്ങളിൽ അനധികൃതമായി മണൽവാരിയ കുഴികളും മരണങ്ങൾക്കു കാരണമാവുന്നുണ്ട്. അനധികൃതമായി മണൽ വാരുന്നവർക്കെതിരെ നടപടികൾ ഉണ്ടാവാത്തതും തുടർസംഭവങ്ങൾക്ക് കാരണമാകുന്നു. കമ്പാലത്തറ ഏരിയിൽ ജനം പ്രവേശിക്കുന്നത് തടയുംവിധം കമ്പിവേലികൾ യുദ്ധകാലാടിസ്ഥാനത്തിൽ നിർമിക്കേണ്ടതുണ്ട്. ഏരിയിൽ ഇറങ്ങാൻ പാടില്ലെന്ന ബോർഡ് സ്ഥാപിക്കുന്നത് പ്രശ്നത്തിനു പരിഹാരമാവില്ലെന്നത് തുടർമരണങ്ങൾ സാക്ഷ്യപ്പെടുത്തുന്നുണ്ട്. ജലനിരപ്പ് കുറയുന്ന സമയങ്ങളിൽ ദൂരസ്ഥലങ്ങളിൽ നിന്നും പലരും സംഘം ചേർന്ന് മദ്യപിക്കാനെത്തുന്നുണ്ടെന്ന് നാട്ടുകാർ വെളിപ്പെടുത്തുന്നുണ്ട്. ഏരിയിൽ ഇവരുടെ പ്രവേശനം തടഞ്ഞാൽ ഇത്തരക്കാർ അക്രമണത്തിനു തുനിയുമെന്നതിനാൽ നാട്ടുകാർ മൗനം പാലിക്കുകയാണ്. ഡാമിന്‍റെ വടക്കുവശത്തും പടിഞ്ഞാറുഭാഗത്തുമുള്ള ഷട്ടറുകളുടെ ഭാഗത്തും തുറന്ന സ്ഥലമെന്നതിനാൽ ഏരിയിൽ ഇറങ്ങുന്നതിന് സൗകര്യമാവുന്നുണ്ട്. കൊല്ലങ്കോട് സീതാർകുണ്ടും കമ്പാലത്തറ ഏരിയും മരണക്കയങ്ങളാവുന്നത് തടയാൻ അധികൃതർ ശക്തമായ നടപടികൾ സ്വീകരിക്കണമെന്നാണ് ആവശ്യം. കഴിഞ്ഞമാസം കൊല്ലങ്കോട് വെള്ളരിമേട് വെള്ളച്ചാട്ട ഭാഗത്ത് നിന്നും നെണ്ടൻകിഴായ സ്വദേശിയായ യുവാവ് പാറക്കെട്ടിൽ വീണ് മരണപ്പെട്ട സംഭവം നടന്നിരുന്നു. ഈ സ്ഥലം വനംവകുപ്പിന്‍റെതെന്നതിനാൽ മറ്റൊരു അറിയിപ്പുവരെ സന്ദർശകരെ പ്രവേശിപ്പിക്കില്ലെന്ന് മുന്നറിയിപ്പ് നൽകി ബോർഡ് സ്ഥാപിച്ച് ഒരു വാച്ചറെ നിയമിച്ചിരുന്നു. കമ്പാലത്തറ ഏരിയിലും ജലസേചന വകുപ്പ് അധികൃതർ വാച്ച്മാനെ നിർത്തി സന്ദർശകരെ തടയാൻ അടിയന്തര നടപടികൾ സ്വീകരിക്കണമെന്നാണ് ആവശ്യം.

മാലിന്യക്കൂമ്പാരമായിരുന്ന പേഴുംകര പാലത്തിന്‍റെ വശങ്ങള്‍ സ്‌നേഹാരാമം

പാലക്കാട്: ഒരിക്കല്‍ മാലിന്യകൂമ്പാരമായിരുന്ന പേഴുംകര പാലത്തിന്‍റെ ഇരുവശവും ഇന്ന് പൂത്തുലഞ്ഞ സ്‌നേഹാരാമമാണ്. 2023 ഒക്ടോബര്‍ ഏഴിന് ഗാന്ധിജയന്തി വാരാഘോഷത്തിന്‍റെ ഭാഗമായി ജില്ലാ ഇന്‍ഫര്‍മേഷന്‍ ഓഫീസ്, ജില്ലാ ഭരണകൂടം, നവകേരളം മിഷന്‍ എന്നിവയുടെ സംയുക്താഭിമുഖ്യത്തിലാണ് പുതുപ്പരിയാരം ഗ്രാമപഞ്ചായത്ത്, പാലക്കാട് നഗരസഭ, പിരായിരി ഗ്രാമപഞ്ചായത്ത് എന്നിവയുടെ സഹകരണത്തോടെ പേഴുംകര പാലത്തിന്‍റെ വശങ്ങളില്‍ കൂമ്പാരമായിരുന്ന മാലിന്യം നീക്കം ചെയ്ത് പൂച്ചെടികള്‍ നട്ട് ‘സ്‌നേഹാരാമം'സജ്ജീകരിച്ചത്. ഇന്ന് നിറപകിട്ടാര്‍ന്ന പൂക്കളും വിവിധങ്ങളായ ചെടികളുമായി വഴിയാത്രക്കാരുടെ ശ്രദ്ധാകേന്ദ്രമായി മാറിയിരിക്കുകയാണ് പ്രദേശം. പാലക്കാട് നഗരസഭ, പുതുപ്പരിയാരം, പിരായിരി ഗ്രാമപഞ്ചായത്തുകളുടെ കീഴില്‍ വരുന്ന പേഴുംകര പാലത്തിന്‍റെ ഇരുവശങ്ങളിലായാണ് സ്‌നേഹാരാമം സജ്ജീകരിച്ചിട്ടുള്ളത്. അതത് തദ്ദേശസ്ഥാപനങ്ങളുടെ നേതൃത്വത്തില്‍ കുടുംബശ്രീ യൂണിറ്റുകള്‍, ഹരിതകര്‍മസേന അംഗങ്ങള്‍ മുഖേന പരിപാലനം നടത്തിവരുന്നുണ്ട്. കൂടാതെ അനധികൃത മാലിന്യനിക്ഷേപത്തിന്‍റെ നിരീക്ഷണത്തിനായി പുതുപ്പരിയാരം ഭാഗത്ത് കാമറയും സജ്ജീകരിച്ചിട്ടുണ്ട്. പൂന്തോട്ടം സജ്ജീകരിച്ചതോടുകൂടി മാലിന്യം നിക്ഷേപിക്കുന്നത് ഇല്ലാതായിട്ടുണ്ടെന്നാണ് അധികൃതര്‍ പറയുന്നത്.

വന്യമൃഗശല്യം: ഡിഎഫ്ഒ ഓഫീസ് മാർച്ച് നടത്തി

പാലക്കാട്: ജനവാസമേഖലകളിൽ മനുഷ്യജീവനു പോലും ഭീഷണിയായി വന്യമൃഗങ്ങൾ കടന്നുകയറുകയാണെന്നും കൃഷിയുൾപ്പെടെയുള്ള ജീവനോപാധികൾ വ്യാപകമായി നശിപ്പിക്കപ്പെടുകയാണെന്നും എന്നാൽ ജനങ്ങളുടെ ജീവനും സ്വത്തിനും സംരക്ഷണം നൽകേണ്ട ഭരണകൂടം ഈവിഷയത്തിൽ തികഞ്ഞ അനാസ്ഥയാണ് കാണിക്കുന്നതെന്നും ബിഎംഎസ് സംസ്ഥാന ട്രഷറർ സി. ബാലചന്ദ്രൻ പറഞ്ഞു. മുണ്ടൂർ ആവർത്തിക്കാതിരിക്കട്ടെ എന്ന മുദ്രാവാക്യമുയർത്തി കർഷക മസ്ദൂർ സംഘം ബിഎംഎസ് നടത്തിയ ഡിഎഫ്ഒ ഓഫീസ് മാർച്ചും ധർണയും ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. വന്യജീവി ആക്രമണത്തിൽ മരണപ്പെട്ടവരുടെ ധനസഹായം ഒരു കോടി രൂപയാക്കി ഉയർത്തുക, വന്യജീവി ആക്രമണത്തിൽ അപകടം സംഭവിച്ചവർക്ക് ആജീവനാന്ത ചികിത്സാ സഹായമായി 50 ലക്ഷം രൂപ അനുവദിക്കുക, വന്യജീവി ആക്രമണത്താൽ വിളകൾ നശിപ്പിക്കപ്പെട്ടാൽ നൽകുന്ന സഹായധനം 4 ഇരട്ടിയായി ഉയർത്തുക, 15 ദിവസത്തിനകം സഹായധനം വിതരണം ചെയ്യുക, പ്രദേശവാസികളെ ഉൾപ്പെടുത്തി ശക്തമായ ഫെൻസിംഗ്, റഡാർ, കിടങ്ങ് സംവിധാനങ്ങൾ ഏർപ്പെടുത്തുക, വന്യജീവി ആക്രമണത്തിൽ മരണപ്പെട്ടവരുടെ കുടുംബാംഗങ്ങൾക്ക് ആശ്രിതനിയമനം ആയി സർക്കാർ സംവിധാനത്തിൽ ജോലി ഉറപ്പാക്കുക, കൃഷിസ്ഥലത്തെ വന്യമൃഗങ്ങളുടെ സാന്നിധ്യം അവസാനിപ്പിക്കാനുള്ള നടപടികൾ സ്വീകരിക്കുക എന്നീ ആവശ്യങ്ങൾ ഉന്നയിച്ചാണ് മാർച്ച് നടന്നത്. ഒലവക്കോട് ജംഗ്ഷനിൽ നിന്നും ആരംഭിച്ച മാർച്ച് ഡിഎഫ്ഒ ഓഫീസിനു മുന്നിൽ അവസാനിച്ചു. ധർണയിൽ കർഷക മസ്ദൂർസംഘം ജില്ലാ ഉപാധ്യക്ഷൻ എൻ.വി. ശശി അധ്യക്ഷത വഹിച്ചു.

കരിദിനാചരണം വിജയിപ്പിക്കും: കെഎസ്എസ്പിഎ

ചിറ്റൂർ: പെൻഷൻസമൂഹത്തോട് ഇടതു സർക്കാരിന്‍റെ അവഗണനക്കെതിരായി സംസ്ഥാന വ്യാപകമായി ജൂലൈ 1 ന് നടത്തുന്ന കരിദിന ആചരണം വിജയിപ്പിക്കാൻ ചിറ്റൂർ സബ് ട്രഷറിക്ക് മുന്നിൽ നടത്തിയ പ്രതിഷേധ സംഗമത്തിൽ‌ കെഎസ്എസ്പിഎ ചിറ്റൂർ നിയോജക മണ്ഡലം കമ്മിറ്റി തീരുമാനിച്ചു. പെൻഷൻ പരിഷ്കരണ കുടിശിക, ഡിആർ കുടിശിക അനുവദിക്കുക, മെഡിസെപ്പിലെ വ്യവസ്ഥകൾ പരിഷ്കരിക്കുക എന്നീ ആവശ്യങ്ങളും ഉന്നയിച്ചു. യോഗത്തിൽ എം. പോൾ ഉദ്ഘാടനം ചെയ്തു. സി. സുകുമാരൻ അധ്യക്ഷത വഹിച്ചു. എം. ഉണ്ണികൃഷ്ണൻ, ആർ. മണി, കെ. കണ്ണൻകുട്ടി, കെ. രാമനാഥൻ, എ. സത്യകൻ, എ.കെ. ഗീത, കെ. ശൈലജ കുമാരി, സി.ജി. പദ്മകുമാർ, ടി. പ്രേംനാഥ്, ശശികുമാർ, എം.ആർ. രാജീവൻ, എസ്. നാസർ, എ. ജയകൃഷ്ണൻ എന്നിവർ പ്രസംഗിച്ചു.

മയിലുകൾ പച്ചക്കറികൾ നശിപ്പിക്കുന്നു

വണ്ടിത്താവളം: മയിൽക്കൂട്ടം വീട്ടുമുറ്റത്തെത്തി പച്ചക്കറികൃഷി തിന്നു നശിപ്പിക്കുന്നു. മുന്പ് ആളുകളെ കണ്ടാൽ ഓടിമറയുന്ന മയിലുകൾ നിലവിൽ വീടുകളുടെ മേൽക്കൂരകളിലും മറ്റും കയറി വളർത്തുമൃഗങ്ങളെപ്പോലയാണ് പെരുമാറുന്നത്. കാലവർഷം ആരംഭിച്ചതിനാൽ വീടുകളിൽ പച്ചമുളക്, വെണ്ട, തക്കാളി, ചോളം, വഴുതിന ഉൾപ്പെടെ പച്ചക്കറി കൃഷികൾ സജീവമാണ്. ഇവയെല്ലാം പുലർച്ചെ സമയങ്ങളിലെത്തി തിന്നുതീർക്കുകയാണ് മയിലുകൾ. ദേശീയപക്ഷിയായ മയിലിനെ ഓടിച്ചാൽ നിയമപ്രശ്നങ്ങൾ ഉണ്ടാവുമെന്ന ഭയത്തിൽ ജനം മൗനംപാലിക്കുകയാണ്. വീട്ടുകാർ സമീപമെത്തിയാലും മയിലുകൾ തിരിച്ചു പോവാറില്ല. പറന്നെത്തുന്നതിനാൽ തടയാനും മറ്റു മാർഗങ്ങളില്ലാത്തതിനാൽ പ്രഭാതസമയങ്ങളിൽ വളർത്തുകോഴികളെ പോലയാണ് വീടുകളുടെ മുറ്റത്ത് മയിലുകൾ വിഹരിക്കുന്നത്.

നെഹ്‌റു ആർട്‌സ് ആൻഡ് സയൻസ് കോളജിൽ ഫ്രെഷേഴ്സ് ഡേ

കോയമ്പത്തൂർ: നെഹ്‌റു ആർട്‌സ് ആൻഡ് സയൻസ് കോളജ് 2025-2026 അക്കാദമിക് വർഷത്തിലേക്കുള്ള യുജി ഫ്രെഷേഴ്‌സിന്‍റെ 27-ാമത് ഫ്രെഷേഴ്‌സ് ദിനാചരണം പി.കെ. ദാസ് മെമ്മോറിയൽ ഓഡിറ്റോറിയത്തിൽ സംഘടിപ്പിച്ചു. നെഹ്‌റു ആർട്‌സ് ആൻഡ് സയൻസ് കോളജ് പ്രിൻസിപ്പൽ ഡോ.വി. വിജയകുമാർ സ്വാഗതം പറഞ്ഞു. മൗറീഷ്യസ്-ഇന്ത്യയുടെ ഓണററി ട്രേഡ് കമ്മീഷണറും നെഹ്‌റു ഗ്രൂപ്പ് ഓഫ് ഇൻസ്റ്റിറ്റ്യൂഷൻസ് ചെയർമാനും മാനേജിംഗ് ട്രസ്റ്റിയുമായ അഡ്വ.ഡോ.പി. കൃഷ്ണദാസ് അധ്യക്ഷത വഹിച്ചു. കോയമ്പത്തൂർ പോലീസ് സൂപ്രണ്ട് ഡോ.കെ. കാർത്തികേയൻ ചടങ്ങിൽ മുഖ്യാതിഥിയായി. നെഹ്‌റു ഗ്രൂപ്പ് ഓഫ് ഇൻസ്റ്റിറ്റ്യൂഷൻസ് സിഇഒയും സെക്രട്ടറിയുമായ ഡോ.പി. കൃഷ്ണകുമാർ ആശംസാപ്രസംഗം നടത്തി. ഇന്ത്യൻ വ്യോമസേനയുടെ വിംഗ് കമാൻഡർ സുധാൻഷു റായ്, നെഹ്‌റു ഗ്രൂപ്പ് ഓഫ് ഇൻസ്റ്റിറ്റ്യൂഷൻസ് അക്കാദമിക്‌സ് ആൻഡ് അഡ്മിനിസ്ട്രേഷൻ എക്സിക്യൂട്ടീവ് ഡയറക്ടർ ഡോ.എച്ച്. എൻ. നാഗരാജ, പാലക്കാട് അവൈറ്റിസ് സൂപ്പർ സ്പെഷ്യാലിറ്റി ഹോസ്പിറ്റലിലെ ക്വാളിറ്റി കൺട്രോൾ മാനേജർ നൂർ ഫെറിൻഷ, പ്രൊപ്പോസ്ഡ് പി. കെ. ദാസ് യൂണിവേഴ്സിറ്റിയുടെ നിയുക്ത രജിസ്ട്രാർ ഡോ. ബി. അനിരുദ്ധൻ, കൺവീനർ ഡോ.എസ്. സരസ്വതി എന്നിവർ പ്രസംഗിച്ചു.

അട്ടപ്പാടി തുണൈ പദ്ധതി അദാലത്ത്; 116 അപേക്ഷകളിൽ നടപടിക്കു നിർദേശം

അഗളി: അട്ടപ്പാടി മേഖലയുടെ സമഗ്ര വികസനം ലക്ഷ്യമിട്ട് ജില്ലാ ഭരണകൂടം ആവിഷ്കരിച്ച തുണൈ കർമപദ്ധതിയുടെ ഭാഗമായി പുതൂരിൽ ജില്ലാ കളക്ടർ ജി. പ്രിയങ്കയുടെ അധ്യക്ഷതയിൽ അദാലത്ത് നടത്തി. പുതൂർ ഗ്രാമപഞ്ചായത്ത് കമ്യൂണിറ്റി ഹാളിൽ നടന്ന അദാലത്തിൽ ലഭിച്ച 116 അപേക്ഷകളിന്മേൽ ആവശ്യമായ നിർദേശങ്ങൾ നൽകുകയും തുടർനടപടികൾക്കായി ബന്ധപ്പെട്ട വകുപ്പുകൾക്കു കൈമാറുകയും ചെയ്തു. അട്ടപ്പാടിയിലെ ജനങ്ങളുടെ പ്രശ്നങ്ങൾക്ക് തത്സമയ പരിഹാരം കാണുന്നതിനും മേഖലയിലെ വികസന പ്രവർത്തനങ്ങൾ ഏകോപിപ്പിക്കുന്നതിനും വേണ്ടിയാണ് തുണൈ കർമ്മപദ്ധതിക്ക് രൂപം നൽകിയിരിക്കുന്നത്. ജില്ലയിലെ തെരഞ്ഞെടുക്കപ്പെട്ട ഉദ്യോഗസ്ഥർക്ക് ഉന്നതികളുടെ ചുമതല നൽകിയിട്ടുണ്ടെന്നും ഇവർ പ്രശ്നപരിഹാരത്തിനു ആവശ്യമായ മൈക്രോപ്ലാനുകൾ തയാറാക്കി നടപ്പാക്കണമെന്നും കളക്ടർ നിർദേശം നൽകി. അദാലത്തിൽ പുതൂർ ഗ്രാമപഞ്ചായത്ത് പ്രസിഡന്‍റ് ജ്യോതി അനിൽകുമാർ, അട്ടപ്പാടി ബ്ലോക്ക് പഞ്ചായത്ത് പ്രസിഡന്‍റ് മരുതി മുരുകൻ, ഒറ്റപ്പാലം സബ്കളക്ടർ മിഥുൻ പ്രേംരാജ്, അഗളി, ഷോളയൂർ ഗ്രാമപഞ്ചായത്ത് ജനപ്രതിനിധികൾ, ജില്ലാതല ഉദ്യോഗസ്ഥർ എന്നിവർ പങ്കെടുത്തു.

വിദ്യാർഥികൾക്കു സ്നേഹാദരവുമായി സഹകരണ സംഘം

കല്ലടിക്കോട്: കരിമ്പ പഞ്ചായത്ത് കാർഷിക ഉത്പാദന സഹകരണ സംഘം 2024-25 അധ്യയനവർഷത്തിൽ എസ്എസ്എൽസി, പ്ലസ്ടു പരീക്ഷകളിൽ മുഴുവൻ എപ്ലസ് നേടിയവരെയും എൽഎസ്എസ്, യുഎസ്എസ്, നീറ്റ്, എൻഎൻഎംഎസ് പരീക്ഷകളിൽ ശ്രദ്ധേയ വിജയം കൈവരിച്ച വിദ്യാർഥികളെയും ഉപഹാരങ്ങൾ നൽകി അനുമോദിച്ചു. കെ. ശാന്തകുമാരി എംഎൽഎ സ്നേഹാദരം പരിപാടി ഉദ്ഘാടനം ചെയ്തു. കാർഷിക ഉത്പാദന സഹകരണ സംഘം പ്രസിഡന്‍റ് ജിമ്മി മാത്യു അധ്യക്ഷത വഹിച്ചു. ഗ്രാമപഞ്ചായത്ത് പ്രസിഡന്‍റ് പി.എസ്. രാമചന്ദ്രൻ, വൈസ് പ്രസിഡന്‍റ് കെ. കോമളകുമാരി, എച്ച്. ജാഫർ, ജയവിജയൻ, സജി സി. പീറ്റർ, വി.കെ. തുഷാർ, സ്റ്റാഫ് പ്രതിനിധി എൻ.എ. ഷമീർ, കെ. ഗീത തുടങ്ങിയവർ പ്രസംഗിച്ചു.

"നെല്ലിയാന്പതി മുതൽ വാഗമൺവരെ' ജീപ്പ് റാലിയുമായി ഡ്രൈവേഴ്സ് ക്ലബ്

നെന്മാറ: നെല്ലിയാമ്പതി ഓഫ്റോഡ് ഡ്രൈവേഴ്സ് ക്ലബിന്‍റെ നേതൃത്വത്തിൽ നെല്ലിയാമ്പതിയിൽനിന്നും വാഗമണ്ണിലേക്ക് ജീപ്പ് റാലി നടത്തി. നെല്ലിയാമ്പതിയുടെ ടൂറിസംസാധ്യത നാട്ടിൽ പ്രചരിപ്പിക്കുന്നതിനായും വർധിച്ചുവരുന്ന മയക്കുമരുന്ന് ദുരുപയോഗത്തിനും വനമേഖലയിലെ പ്ലാസ്റ്റിക് മലിനീകരണത്തിനുമെതിരേ ബോധവത്കരണം ലക്ഷ്യമിട്ടായിരുന്നു റാലി സംഘടിപ്പിച്ചത്. പോത്തുണ്ടിഡാം ഉദ്യാന പരിസരത്തുനിന്നും കെ. ബാബു എംഎൽഎ റാലി ഫ്ലാഗ് ഓഫ് ചെയ്തു. ഡി. ദിലീപ്, ആർ. രവി, പി. സുധീഷ്, എസ്. അൻസാജ് എന്നിവരുടെ നേതൃത്വത്തിൽ 15 ജീപ്പുകളിലായി 59 പേരടങ്ങുന്ന സംഘമാണ് യാത്രതിരിച്ചത്.

അപകടമരം മുറിച്ചുനീക്കാൻ തുടങ്ങി

വടക്കഞ്ചേരി: വാർത്താ പരമ്പരകൾക്കും തുടർച്ചയായ പരാതികൾക്കുമൊടുവിൽ വടക്കഞ്ചേരി ടൗണിൽ റോളക്സ് ഓഡിറ്റോറിയത്തിനു മുന്നിലെ വൻമരം മുറിച്ചുമാറ്റാൻ തുടങ്ങി. പണികൾ ഇന്നും തുടരും. വാഹനങ്ങൾക്കും സമീപത്തെ കച്ചവടക്കാർക്കും വഴിയാത്രക്കാർക്കും ഭീഷണിയായി നിന്നിരുന്ന മരം മുറിച്ചു മാറ്റണമെന്നാവശ്യപ്പെട്ട് ദീപികയിൽ ഉൾപ്പെടെ മാധ്യമങ്ങളിൽ നിരവധി തവണ വാർത്തകൾ വന്നിരുന്നെങ്കിലും പലകാരണങ്ങൾപറഞ്ഞ് പൊതുമരാമത്തുവകുപ്പ് മരംമുറിക്കൽ നടപടി വൈകിപ്പിക്കുകയായിരുന്നു. ഒടുവിൽ മരം കടപുഴകി റോഡിൽ വീണ് വലിയ ദുരന്തം വിദൂരമല്ലെന്ന തിരിച്ചറിവിനെ തുടർന്നാണ് മുറിച്ചു മാറ്റാൻ നടപടിയായത്. കഴിഞ്ഞ വേനലിലെങ്കിലും സുഗമമായി മുറിച്ചു മാറ്റാമായിരുന്ന മരം മഴയ്ക്കിടെ മുറിക്കേണ്ടി വന്നതിനാൽ ചെലവും ഇരട്ടിയിലേറെയായി. വൈദ്യുതി ലൈനുകളെല്ലാം ഓഫാക്കി വാഹനങ്ങൾ വഴിതിരിച്ചുവിട്ടാണ് മുറിക്കൽ നടത്തുന്നത്. പകൽ മുഴുവൻ വൈദ്യുതി ഓഫാക്കുന്നത് കച്ചവടക്കാർക്കും ബുദ്ധിമുട്ടുണ്ടാകുന്നുണ്ട്. വീടുകൾക്കും കടകൾക്കു മുകളിലേക്കും റോഡിലെ വൈദ്യുതി ലൈനിനു മുകളിലേക്കും മരത്തിന്‍റെ വലിയ കൊമ്പുകൾ പടർന്ന് നിൽക്കുകയാണ്. ഇതിനാൽ ഹൈറിസ്ക് വർക്ക് ഗണത്തിൽ പ്പെടുത്തിയാണ് മുറിക്കൽ നടപടി.

വീടുകൾ ഉപേക്ഷിച്ചേ പറ്റൂ... നിവൃത്തിയില്ലാതെ കർഷകർ

നെന്മാറ: കരിമ്പാറ കൽച്ചാടിയിൽ വീണ്ടും കാട്ടാനക്കൂട്ടമിറങ്ങി വ്യാപകമായി കൃഷിനശിപ്പിച്ചു. അബ്രഹാം പുതുശ്ശേരിയുടെ 16 റബർമരങ്ങളിലെ മഴമറയും ചിരട്ടകളും ചിരട്ടതാങ്ങി കമ്പികളും കാട്ടാനക്കൂട്ടം നശിപ്പിച്ചു. മൂന്നു മരങ്ങൾ കാട്ടാന മറിച്ചിട്ടു. പണ്ടിക്കുടി എൽദോസിന്‍റെ ഒന്പതു കമുകുകളും നിരവധി കമുകിൻതൈകളും നശിപ്പിച്ചു. കോപ്പംകുളമ്പ് സ്വദേശി മണിയുടെ ആറുകമുകുകളും നശിപ്പിച്ചിട്ടുണ്ട്. രാത്രി മുഴുവൻ കൃഷിയിടത്തിൽ തലങ്ങും വിലങ്ങുംനടന്ന് കാട്ടാന മിക്കയിടങ്ങളും ചെളിക്കുളമാക്കിയിട്ടുമുണ്ട്. പ്രദേശത്തെ കൃഷിയിടങ്ങളിലെ താമസക്കാർ ജീവൻഭയന്ന് താമസം മാറിയതോടെയാണ് വൈകുന്നേരങ്ങളിൽ കൃഷിയിടങ്ങളിൽ കാട്ടാനകളുടെ വിഹാരം ആരംഭിച്ചത്. കഴിഞ്ഞദിവസം കൽച്ചാടിയിൽനിന്ന് രണ്ടുകിലോമീറ്റർ അകലെയുള്ള പൂഞ്ചേരിയിലും കാട്ടാനകൾ കൃഷിനാശം വരുത്തിയിരുന്നു. നെല്ലിയാമ്പതി വനമേഖലയിൽ നിന്നുമെത്തുന്ന കാട്ടാനകൾ മൂന്നും നാലും അടങ്ങുന്ന ചെറു സംഘങ്ങളായി പിരിഞ്ഞ് കരിമ്പാറ, നിരങ്ങൻപാറ, കൽച്ചാടി, പൂഞ്ചേരി, ചള്ള, ഓവുപാറ, ഒലിപ്പറ മേഖലകളിലായി ദിവസങ്ങൾ ഇടവിട്ട് കൃഷിനാശം വരുത്തുന്നതു പതിവായിരിക്കുകയാണ്. ഒരു പ്രദേശത്ത് വനം ജീവനക്കാർ പടക്കം പൊട്ടിച്ച് അകറ്റാൻ ശ്രമിച്ചാൽ അടുത്ത രാത്രി ഒന്നോ രണ്ടോ കിലോമീറ്റർ അകലെ മറ്റൊരു പ്രദേശത്ത് കാട്ടാനകളെത്തുന്ന സ്ഥിതിയാണുള്ളത്. മേഖലയിൽ സ്ഥിരമായി ആർആർടി സംഘത്തെ നിലനിർത്തണമെന്ന ആവശ്യം ശക്തമാണ്. സ്ഥിരമായി മേഖലയിൽ വന്യജീവികൾ കൃഷിനാശം വരുത്തുന്നതിനാൽ പ്രദേശത്തുകാർ പരാതിപ്പെടാനോ പുറംലോകത്തെ അറിയിക്കാനോ വിമുഖരായി മാറി. എങ്ങിനെയെങ്കിലും ഭൂമി വിറ്റൊഴിയണമെന്ന ചിന്തയിലാണ് കർഷകർ. പലർക്കും നിലവിലുള്ള ആദായം എടുക്കുന്നതല്ലാതെ പുതിയ വിളയിറക്കനോ പ്രദേശത്ത് കുടുംബത്തോടെ താമസിക്കാൻ കഴിയാനാത്ത സ്ഥിതിയാണ്. നിരവധി കർഷകർ ഭയംമൂലം സ്വന്തം കൃഷിയിടത്തിലെ വീട് ഉപേക്ഷിച്ച് വാടകവീട്ടിലും ദൂരെ മക്കളോടൊപ്പം താമസിക്കുന്ന സ്ഥിതിയിലേക്കും മാറിയിട്ടുണ്ട്.

ലക്ഷ്യം പത്തുലക്ഷം തൈകൾ; ഇതുവരെ നട്ടതു 90,471

പാലക്കാട്: ലോക പരിസ്ഥിതിദിനത്തിൽ ആരംഭിച്ച ഒരു തൈ നടാം ജനകീയ വൃക്ഷവത്കരണ കാമ്പയിനിന്‍റെ ഭാഗമായി ജില്ലയിൽ നട്ടത് 90471 തൈകൾ. തൊഴിലുറപ്പു പദ്ധതി, സാമൂഹിക വനവത്കരണ വകുപ്പ്, സ്വകാര്യ നഴ്സറികൾ വഴി ജനകീയമായാണ് തൈകൾ ലഭ്യമാക്കിയത്. സെപ്റ്റംബർ 30 നകം ജില്ലയിൽ 10 ലക്ഷം വൃക്ഷതൈകൾ നട്ടുപിടിപ്പിക്കുന്നതിന്‍റെ ഭാഗമായി ജില്ലാ കളക്ടർ ജി. പ്രിയങ്കയുടെ അധ്യക്ഷതയിൽ വിവിധ മേഖലയിലെ പ്രതിനിധികളുടെ യോഗം കളക്ടറേറ്റ് കോൺഫറൻസ് ഹാളിൽ ചേർന്നു. ജില്ലയിൽ ഒരുലക്ഷം കരിമ്പനത്തൈകൾ നട്ടുപിടിപ്പിക്കുന്ന "പനപർവ്വം' പരിപാടി വിജയിപ്പിക്കുന്നതിനും യോഗം തീരുമാനിച്ചു. വൃക്ഷവത്കരണത്തിന്‍റെ ഭാഗമായി നാലുലക്ഷം കുടുംബശ്രീ അയൽക്കൂട്ടം അംഗങ്ങൾ, മൂന്നുലക്ഷം വിദ്യാർഥികൾ, 200 ക്ലബുകൾ, വായനശാലകൾ, സന്നദ്ധ സംഘടനകൾ, വ്യവസായ സംഘടനകൾ, വിവിധ വകുപ്പുകൾ, അക്കാദമിക സ്ഥാപനങ്ങൾ, സന്നദ്ധ പ്രവർത്തകർ, സാമൂഹിക- സാംസ്കാരിക സർവീസ് സംഘടനകൾ കാന്പയിനിന്‍റെ ഭാഗമാകും. ചടങ്ങിൽ ജില്ലാ പഞ്ചായത്ത് സെക്രട്ടറി എം. രാമൻകുട്ടി, നവകേരളം കർമപദ്ധതി ജില്ലാ കോ- ഓർഡിനേറ്റർ പി. സെയ്തലവി, തൊഴിലുറപ്പുപദ്ധതി ജോയിന്‍റ് പ്രോഗ്രാം കോ-ഓർഡിനേറ്റർ ടി.എസ്. ശുഭ, അഡീഷണൽ എസ്പി എസ്. ഷംസുദ്ദീൻ, കുടുംബശ്രീ ജില്ലാ കോ- ഓർഡിനേറ്റർ എൻ. ഉണ്ണികൃഷ്ണൻ, പരിസ്ഥിതി സംഘടനാ പ്രതിനിധികൾ പങ്കെടുത്തു.

ലോറിയിൽനിന്നു വേർപെട്ട് കണ്ടെയ്നർ മറിഞ്ഞു; വാഹനഗതാഗതം തടസപ്പെട്ടു

വടക്കഞ്ചേരി: ദേശീയപാത മംഗലംപാലം ബൈപാസിനടുത്ത് ലോറിയിൽനിന്നും കണ്ടെയ്നർ വേർപ്പെട്ടു മറിഞ്ഞു. അപകടസമയത്ത് മറ്റു വാഹനങ്ങളുണ്ടാകാതിരുന്നതിനാൽ വലിയ ദുരന്തം ഒഴിവായി. അപകടത്തിൽ ആർക്കും പരിക്കില്ല. ഇന്നലെ പുലർച്ചയാണ് സംഭവം. തൃശൂർ ഭാഗത്തുനിന്നും ടയർ കയറ്റി പാലക്കാട് ഭാഗത്തേക്കു പോയിരുന്ന ലോറിയാണ് അപകടത്തിൽപ്പെട്ടത്. പാലക്കാട് ലൈനിൽ മംഗലംപാലത്തിൽ പൊളിച്ചുപണികൾ നടക്കുന്നതിനാൽ പാലക്കാട്ടേക്കുള്ള വാഹനങ്ങളും തൃശൂർ ലൈനിലൂടെ ഒറ്റവരിയായാണ് പോകുന്നത്. ലോറി ഒറ്റവരി ലൈനിലേക്ക് തിരിയുന്നതിനിടെയാണ് കണ്ടെയ്നർ വേർപ്പെട്ട് തൃശൂർ ലൈനിലെ വശത്തേക്കു മറിഞ്ഞത്. അപകടത്തെ തുടർന്ന് ദേശീയപാതയിൽ ഗതാഗത തടസമുണ്ടായി. വൈകുന്നേരം മൂന്ന് ക്രെയിനുകൾ സ്ഥലത്തെത്തിച്ചാണ് കണ്ടെയ്നർ പൊക്കിമാറ്റിയത്.

പ്രഭാതചായക്കിറങ്ങിയയാൾ കുഴഞ്ഞുവീണ് മരിച്ചു

കൊഴിഞ്ഞാമ്പാറ: അലമ്പാടിയിൽ പ്രഭാത ചായക്ക് തിരിച്ചയാൾ വീടിനുസമീപത്ത് കുഴഞ്ഞുവീണ് മരിച്ചു. ആലമ്പള്ളം മുത്തുവിന്‍റെ മകൻ രവി(57) ആണ് മരിച്ചത്. റോഡിൽ രവി വീഴുന്നതുകണ്ട് ഓടിക്കൂടിയ നാട്ടുകാർ സ്വകാര്യ ആശുപത്രിൽ എത്തിച്ചെങ്കിലും ജീവൻ രക്ഷിക്കാനായില്ല. കൊഴിഞ്ഞാമ്പാറ പോലീസ് ഇൻക്വസ്റ്റിനു ശേഷം പോസ്റ്റു മോർട്ടം നടത്തി മൃതദേഹം ബന്ധുക്കൾക്ക് വിട്ടു കൊടുത്തു. ഭാര്യ: ഭാഗ്യവതി. മക്കൾ: പ്രണവ്, പ്രജിത്ത്.

കുമരംപുത്തൂരില്‍ എക്സലന്‍സ് മീറ്റ്

മണ്ണാര്‍ക്കാട്: കുമരംപുത്തൂര്‍ ഗ്രാമപഞ്ചായത്തിന്‍റെ ആഭിമുഖ്യത്തില്‍ എക്സലന്‍സ് മീറ്റ് സംഘടിപ്പിച്ചു. എന്‍. ഷംസുദ്ദീന്‍ എംഎല്‍എ ഉദ്ഘാടനം ചെയ്തു. പ്രസിഡന്‍റ് രാജന്‍ ആമ്പാടത്ത് അധ്യക്ഷനായി. ഡോ.ടി. സൈനുല്‍ ആബിദ് മോട്ടിവേഷന്‍ ക്ലാസെടുത്തു. എസ്എസ്എല്‍സി, പ്ലസ്ടു പരീക്ഷകളില്‍ സമ്പൂര്‍ണ എപ്ലസ് നേടിയവരേയും എന്‍എംഎസ്എസ്, എല്‍എസ്എസ്, യുഎസ്എസ് നേടിയ വിദ്യാര്‍ഥികളെയും വിരമിച്ച അങ്കണവാടി ജീവനക്കാരെയും സിവില്‍ ഡിഫന്‍സ് പ്രവര്‍ത്തകരെയും മൊമന്‍റോ നല്‍കി ആദരിച്ചു. ഗ്രാമപഞ്ചായത്ത് പരിധിയിലെ സ്കൂളുകള്‍ക്ക് മെഡിക്കല്‍ കിറ്റ് വിതരണവും നടത്തി. വൈസ് പ്രസിഡന്‍റ് റസീന വറോടന്‍, വികസനകാ ര്യ ചെയര്‍മാന്‍ സഹദ് അരിയൂര്‍, ക്ഷേമകാര്യ ചെയര്‍മാന്‍ പി.എം. നൗഫല്‍ തങ്ങള്‍, ആരോഗ്യ വിദ്യാഭ്യാസ ചെയര്‍പേഴ്സണ്‍ ഇന്ദിര മാടത്തുംപുളളി, കാദര്‍ കുത്തനില്‍, ടി.കെ. ഷമീര്‍, സിഡിഎസ് ചെയര്‍പേഴ്സണ്‍ സുനിത, വിവിധ പാര്‍ട്ടി നേതാക്കളായ അസീസ് പച്ചീരി, ജേക്കബ്, അബു വറോടന്‍ ഗോപാലകൃഷ്ണന്‍, പി. മുഹമ്മദാലി അന്‍സാരി, മുജീബ് മല്ലിയില്‍, മുഹ്സിന്‍ ചങ്ങലീരി എന്നിവര്‍ പ്രസംഗിച്ചു.

ഫിസിയോതെറാപ്പി സെന്‍റർ പ്രവർത്തനോദ്ഘാടനം

കല്ലടിക്കോട്: കരിമ്പ ഗ്രാമപഞ്ചായത്ത് ജനകീയാസൂത്രണ പദ്ധതി പ്രകാരം കല്ലടിക്കോട് കുടുംബാരോഗ്യകേന്ദ്രത്തിൽ ഫിസിയോ തെറാപ്പി സെന്‍റർ പ്രവർത്തനമാരംഭിച്ചു. കരിമ്പ ഗ്രാമപഞ്ചായത്ത് പ്രസിഡന്‍റ് പി.എസ്. രാമചന്ദ്രൻ പ്രവർത്തനോദ്ഘാടനം നിർവഹിച്ചു. വൈസ് പ്രസിഡന്‍റ് കെ. കോമളകുമാരി അധ്യക്ഷയായി. അന്താരാഷ്ട്ര യോഗ ദിനാചരണവും നടത്തി. യോഗമാസ്റ്റർ നന്ദകുമാർ ക്ലാസ് എടുത്തു. സ്റ്റാൻഡിംഗ് കമ്മിറ്റി ചെയർമാൻ എച്ച്. ജാഫർ, ജയ വിജയൻ, വാർഡ് മെംബർമാരായ കെ.കെ. ചന്ദ്രൻ, എം. പ്രസന്ന, മോഹൻദാസ്, ബീന ചന്ദ്രകുമാർ, എം. ചന്ദ്രൻ, ഡോ. ഹണി റോസ് തോമസ്, ഡോ. ജിനു എൽ. തോമസ്, ഫിസിയോ തെറാപ്പിസ്റ്റ് ഡോ. എബിൻ,ഹെൽത്ത് ഇൻസ്പെക്ടർ പി.യു. സുഹൈൽ എന്നിവർ പ്രസംഗിച്ചു. ആദ്യഘട്ടത്തിൽ ആഴ്ചയിൽ മൂന്നു ദിവസമാണ് ഫിസിയോ തെറാപ്പി സെന്‍റർ പ്രവർത്തിക്കുകയെന്ന് അധികൃതർ അറിയിച്ചു.

നന്മ ചാരിറ്റബിൾ സൊസൈറ്റി വാർഷികാഘോഷം

ആലത്തൂർ: പഴമ്പാലക്കോട് നന്മ ചാരിറ്റബിൾ സൊസൈറ്റി വാർഷികം ആഘോഷിച്ചു. ആലത്തൂർ പോലീസ് ഇൻസ്പെക്ടർ ടി.എൻ. ഉണ്ണികൃഷ്ണൻ ഉദ്ഘാടനം ചെയ്തു. മദ്യത്തിനും മയക്കുമരുന്നിനും അടിമപ്പെടാതെ തങ്ങൾക്കും കുടുംബത്തിനും സമൂഹത്തിനും ഉപകാരപ്പെടുന്ന നന്മയുള്ളവരായി വളരാൻ വിദ്യാർഥികളെ അദ്ദേഹം ആഹ്വാനം ചെയ്തു. പ്രസിഡന്‍റ് പി.എം. മുഹമ്മദ് ഷെരീഫ് അധ്യക്ഷത വഹിച്ചു. തരൂർ പഞ്ചായത്ത് മുൻ പ്രസിഡന്‍റ് പി. മനോജ്കുമാർ മുഖ്യപ്രഭാഷണം നടത്തി. സെക്രട്ടറി അബ്ദുറഹ്മാൻ ഹസനാർ മോട്ടിവേഷൻ ക്ലാസ് നടത്തി. വാർഡ് മെംബർ കെ. ചെന്താമരാക്ഷൻ, ഗ്രേസി ടീച്ചർ, അബ്ബാസ് മൂപ്പൻ, ഹിബ, ആദില അമാൻ, വിദ്യാഭ്യാസ വകുപ്പ് കൺവീനർ അബ്ദുൾ മൻസൂർ എന്നിവർ പ്രസംഗിച്ചു. പുതിയ പദ്ധതികളായ വിദ്യാഭ്യാസ സ്കോളർഷിപ്പ് ഇൻസ്പെക്ടർ ടി.എൻ. ഉണ്ണികൃഷ്ണനും ഓർഫൻ സ്കോളർഷിപ്പ് പി. മനോജ് കുമാറും റേഷൻ കിറ്റ് വിതരണം ആതിര ഓഡിറ്റോറിയം ഉടമ പോൾ എന്നിവർ ഉദ്ഘാടനം ചെയ്തു. എസ്എസ്എൽസി, പ്ളസ് ടു പരീക്ഷയിൽ മികച്ച വിജയം നേടിയ വിദ്യാർഥികളെ അനുമോദിച്ചു.

കരിപ്പാലി -പൊക്കുന്നി പാത തകർന്ന് വാഹനസഞ്ചാരം ഭീതിയിൽ

കൊല്ലങ്കോട്: കരിപ്പാലി- വടവന്നൂർ പാതയിലുടനീളം ഗർത്തങ്ങൾ ഉണ്ടായി മഴവെള്ളം നിറഞ്ഞ് വാഹന- കാൽ നടയാത്ര ദുരിതമയം. ഇരുചക്രവാഹനങ്ങൾ ഗർത്തങ്ങളിൽ ഇടിച്ചിറങ്ങി മറിഞ്ഞ് യാത്രക്കാർ ചെളിവെള്ളത്തിൽ വീണ് പരിക്കേൽക്കുന്നത് സാധാരണമാണ്. വാഹനങ്ങൾ വെള്ളക്കെട്ടിൽ ഇറങ്ങി സഞ്ചരിക്കുമ്പോൾ ചെളിവെള്ളം യാത്രക്കാരുടെ ദേഹത്തും തെറിച്ച് വീഴുന്നുണ്ട്. നാലു സ്വകാര്യബസുകൾ ഉൾപ്പെടെ നിരവധി വാഹനങ്ങൾ കരിപ്പാലി പൊക്കുന്നി വഴി സഞ്ചരിക്കുന്നുണ്ട്. പല സ്ഥലങ്ങളിലും റോഡിൽ തോടുപോലെയാണ് ചെളിവെള്ളം കെട്ടിനിൽക്കുന്നത്. ഇതിലൂടെ സഞ്ചരിക്കുന്ന ചരക്കുവാഹനങ്ങൾക്ക് യന്ത്രത്തകരാറും സംഭവിക്കുന്നതായി സമീപവാസികൾ പരാതിപ്പെടുകയാണ്. ഇതുവഴി രാത്രിസഞ്ചാരം തീർത്തും അപകടഭീതിയിലാണ്. ഇരുചക്രവാഹനയാത്രക്കാരൻ രാത്രിയിൽ വരുന്നതിനിടെ കെട്ടിൽക്കുന്ന വെള്ളക്കെട്ടിൽ വിഷപ്പാമ്പിനെക്കണ്ട് അപകട ജീവഭയത്തിൽ തിരിച്ചുപോവുകയാണുണ്ടായത്. പ്രദേശത്തെ സ്കൂളിൽ വിദ്യാർഥികൾ വെള്ളക്കെട്ടിലൂടെ പോയിവരുന്നത് രക്ഷിതാക്കളുടെ ചങ്കിടിപ്പ് കൂട്ടുകയാണ്. പത്ത് വർഷം മുൻപാണ് റോഡ് അറ്റകുറ്റപ്പണി നടന്നിട്ടുള്ളതെന്നാണ് പതിവുയാത്രക്കാർ പറയുന്നത്. യുദ്ധകാലാടിസ്ഥാനത്തിൽ റോഡ് നവീകരണം ആവശ്യപ്പെട്ട് ജില്ലാ കളക്ടർക്ക് നിവേദനം നൽകാൻ യാത്രക്കാർ ഒപ്പുശേഖരണം നടത്താൻ തീരുമാനിച്ചിരിക്കുകയാണ്.

നാടിന്‍റെ അഭിമാനതാരങ്ങളെ നഗരസഭ ആദരിച്ചു

മണ്ണാർക്കാട്: നഗരസഭ പരിധിയിലെ എസ്എസ്എൽസി, പ്ലസ് ടു, എൽഎസ്എസ്, യുഎസ്എസ് പരീക്ഷകളിൽ ഉന്നതവിജയം നേടിയ വിദ്യാർഥികളെ ആദരിച്ചു. നഗരസഭ ചെയർമാൻ സി. മുഹമ്മദ് ബഷീർ ഉദ്ഘാടനം ചെയ്തു. വൈസ് ചെയർപേഴ്സൺ പ്രസീത അധ്യക്ഷത വഹിച്ചു. എസ്എസ്എൽസി പരീക്ഷയിൽ 100% വിജയം വരിച്ച ദാറുന്നജാത്ത് ഹയർ സെക്കൻഡറി സ്കൂൾ, എംഇഎസ് ഹയർ സെക്കൻഡറി സ്കൂൾ, എംഇടി സ്കൂൾ, സെന്‍റ് ഡൊമിനിക് ഇംഗ്ലീഷ് മീഡിയം സ്കൂൾ എന്നീ സ്കൂളുകളെ നഗരസഭ പ്രത്യേകം ആദരിച്ചു. എംജി പട്ടേൽ ബെസ്റ്റ് ഹൈസ്കൂൾ ഉർദു ടീച്ചർ നാഷണൽ അവാർഡ് കരസ്ഥമാക്കിയ ഡിഎച്ച്എസ്എസ് നെല്ലിപ്പുഴ സ്കൂളിലെ അധ്യാപകനായ ലെഫ്റ്റനന്‍റ് പി. ഹംസക്കും നഗരസഭ നടപ്പാക്കുന്ന വിവിധ പ്രവർത്തങ്ങളിൽ മികച്ച പ്രകടനം കാഴ്ചവച്ച ഡിഎച്ച്എസ്എസ് നെല്ലിപ്പുഴ സ്കൂളിലെ എൻസിസി യൂണിറ്റിനെയും ആദരിച്ചു. സ്ഥിരം സമിതി അധ്യക്ഷരായ ഷഫീഖ് റഹ്മാൻ, മാസിത സത്താർ, കൗൺസിലർമാരായ യൂസഫ് ഹാജി, രാധാകൃഷ്ണൻ, മുജീബ് ചോലോത്ത്, കദീജ, സുഹറ, ലക്ഷ്മി, ഷറഫുന്നീസ, ഉഷ, ഇബ്രാഹിം തുടങ്ങിയവർ പങ്കെടുത്തു. നഗരസഭ വികസന സ്ഥിരം സമിതി അധ്യക്ഷൻ കെ. ബാലകൃഷ്ണൻ സ്വാഗതവും വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ ഹംസ കുറുവണ്ണ നന്ദിയും പറഞ്ഞു.

നെന്മാറയിൽ ഏകപാത്രനാടകം അരങ്ങേറി

നെന്മാറ: വാർധക്യത്തിന്‍റെ ഒറ്റപ്പെടലിൽ കഴിയുന്നവരുടെ കഥ പറയുന്ന രാരിച്ചനും പറയാനുണ്ട് ഏക കഥാപാത്ര നാടകം അരങ്ങേറി. ആദ്യാവതരണത്തിന്‍റെ ഉദ്ഘാടനം കെ. ബാബു എംഎൽഎ നിർവഹിച്ചു. വൈഎംസിഎ നെന്മാറ യൂണിറ്റ് പ്രസിഡന്‍റ് അഡ്വ. ജോയ് കാഞ്ഞിരത്തിൻചാലിൽ അധ്യക്ഷനായി. വൈഎംസിഎ ജില്ലാ സബ് റീജിയൻ ചെയർമാൻ ഷൈൻ, പുത്തൂർ രവി, ചേരാമംഗലം ചാമുണ്ണി, പ്രഫ. സുധാകരൻ, റോയ് കെ. പോൾ തുടങ്ങിയവർ പ്രസംഗിച്ചു. രവി തൈക്കാട് രചനയും സംവിധാനവും നിർവഹിച്ച നാടകത്തിൽ എം.ജെ. സാജുവാണ് അഭിനയിച്ചത്. വൈഎംസിഎ നെന്മാറ യൂണിറ്റ്, ഇടം സാംസ്ക്കാരിക സമിതി, കേളി സാംസ്ക്കാരിക സമിതി, നെന്മാറ പെൻഷനേഴ്സ് യൂണിയൻ എന്നീ സംഘടനകളുടെ നേതൃത്വത്തിലാണ് നാടകം നടന്നത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]