ADVERTISEMENT

ADVERTISEMENT

ഹയർ സെക്കൻഡറി പ്രവേശനം: ഹെൽപ് ഡെസ്ക് ഒരുക്കി മുപ്പൈനാട് പഞ്ചായത്ത്

വടുവൻചാൽ: മുപ്പൈനാട് പഞ്ചായത്തും ജിഎച്ച്എസ്എസും സംയുക്തമായി ഹയർ സെക്കൻഡറി ഏകജാലക പ്രവേശനത്തിന് ഹെൽപ് ഡെസ്ക് ഒരുക്കി. പത്താംക്ലാസ് പാസായ മുഴുവൻ കുട്ടികൾക്കും പ്ലസ് വണ്‍ പ്രവേശനം ഉറപ്പാക്കുകയാണ് ലക്ഷ്യം. ജിഎച്ച്എസ്എസ് എൻഎസ്എസ് യൂണിറ്റ്, കരിയർ ഗൈഡൻസ് ആൻഡ് കൗണ്‍സലിംഗ് സെൽ എന്നിവ ഹെൽപ് ഡെസ്കുമായി സഹകരിക്കുന്നുണ്ട്. പഞ്ചായത്ത് പ്രസിഡന്‍റ് ആർ. ഉണ്ണിക്കൃഷ്ണൻ ഉദ്ഘാടനം ചെയ്തു.

ആരോഗ്യ-വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ പി.കെ. സാലിം, പ്രിൻസിപ്പൽ കെ.വി. മനോജ്, കരിയർ കോ ഓർഡിനേറ്റർ വി.പി. സുഭാഷ്, പഞ്ചായത്ത് അംഗങ്ങളായ ആർ. യമുന, അജിത, യശോദ, ശശിധരൻ, യു. ബാലൻ, മനോജ്കുമാർ, എൻഎസ്എസ് വോളണ്ടിയർമാരായ പി.ബി. അവന്തിക, ആനി ജോഷി, ആൻ മരിയ, ജോയൽ ജോയി എന്നിവർ പ്രസംഗിച്ചു.

ADVERTISEMENT

കാട്ടാനകൾ പരിഭ്രാന്തി പരത്തുന്നതായി പരാതി

‌ഊട്ടി: മഞ്ചൂർ-കെദ്ദ-കോയന്പത്തൂർ പാതയിൽ കാട്ടാനകൾ പരിഭ്രാന്തി പരത്തുന്നതായി പരാതി. കൂട്ടത്തോടെയാണ് ആനകൾ റോഡിലേക്ക് ഇറങ്ങുന്നത്. ഇത് വാഹന യാത്രക്കാർക്ക് ഭീഷണിയായിരിക്കുകയാണ്. ഇരുചക്രവാഹന യാത്രക്കാർ ഭീതിയിലായിരിക്കുകയാണ്. പെരുന്പള്ളത്തിലും ആനകൾ റോഡിലേക്ക് ഇറങ്ങുന്നുണ്ട്. കുന്നൂർ ബർളിയാറിലും കാട്ടാനക്കൂട്ടം ഭീതി പരത്തുന്നുണ്ട്. ആനകളെ വനത്തിലേക്ക് തുരത്തണമെന്നാണ ജനങ്ങൾ ആവശ്യപ്പെടുന്നത്.

ടി. സിദ്ദിഖ് ദുരിതാശ്വാസ ക്യാന്പ് സന്ദർശിച്ചു

കൽപ്പറ്റ: കരിംകുറ്റി ജിവിഎച്ച്എസ്എസിലെ ദുരിതാശ്വാസ ക്യാന്പ് ടി. സിദ്ദിഖ് എംഎൽഎ സന്ദർശിച്ചു. കാലവർഷം ശക്തമായതിനെത്തുടർന്നു കോട്ടത്തറ പ്രദേശത്തുനിന്നു മാറ്റിപ്പാർപ്പിച്ച കുടുംബങ്ങളാണ് ഈ ക്യാന്പിലുള്ളത്. കോട്ടത്തറ പഞ്ചായത്ത് പ്രസിഡന്‍റ് പി.പി. റെനീഷ്, ബ്ലോക്ക് പഞ്ചായത്ത് അംഗം പി.കെ. അബ്ദുറഹ്മാൻ, പഞ്ചായത്ത് അംഗം വസന്ത, സി.സി. തങ്കച്ചൻ, മാണി ഫ്രാൻസിസ് എന്നിവർ സിദ്ദിഖിനൊപ്പം ഉണ്ടായിരുന്നു. ക്യാന്പിലെ സൗകര്യങ്ങൾ എംഎൽഎ വിലയിരുത്തി.

മുത്തങ്ങ മൻമദമൂല റോഡിലെ വെള്ളമിറങ്ങി: നാല് ദിവസത്തിനുശേഷം പുറംലോകവുമായി ബന്ധം പുനസ്ഥാപിച്ച് കുടുംബങ്ങൾ

സുൽത്താൻ ബത്തേരി: മുത്തങ്ങ മൻമദമൂല റോഡിലെ വെള്ളമിറങ്ങിയതോടെ നാല് ദിവസത്തിന് ശേഷം പുറംലോകവുമായി ബന്ധം പുനസ്ഥാപിച്ച് കുടുംബങ്ങൾ. മുത്തങ്ങ മൻമദമൂല, അത്തികുനി, ചിറമൂല, കല്ലുമുക്ക്, ആലത്തൂർ, മേലെമൂല, രാംപള്ളി ഉന്നതികളിലെ കുടുംബങ്ങളാണ് ഇവിടേക്കുള്ള റോഡിൽ വെള്ളംകയറിയതോടെ ഒറ്റപ്പെട്ടത്. ഇക്കഴിഞ്ഞ 25ന് രാത്രി പെയ്ത് ശക്തമായ മഴയിൽ കല്ലൂർപുഴ കരകവിഞ്ഞാണ് മുത്തങ്ങയ്ക്ക് സമീപം മൻമദമൂല റോഡിൽ വെള്ളംകയറിയത്. പാടശേഖരത്തിൽ നിറഞ്ഞ വെള്ളം ശക്തമായ കുത്തൊഴുക്കോടെയാണ് റോഡിലുടെ ഒഴുകിയത്. ഇതോടെ ഇതുവഴിയുള്ള യാത്ര പൂർണമായും മുടങ്ങുകയായായിരുന്നു. പിന്നീട് മുതിർന്നവർ ജീവൻകയ്യിൽപിടിച്ചാണ് അക്കരെയിക്കരെ കടന്നിരുന്നത്. കഴിഞ്ഞദിവസം മൻമദമൂലയിലെ വിവാഹം നടന്ന വീട്ടിലേക്ക് സാധനങ്ങൾ തലചുമടായാണ് ഇതുവഴി കൊണ്ടുപോയത്. പിന്നീട് മഴകുറഞ്ഞ് വെള്ളമിറങ്ങിയതോടെ കഴിഞ്ഞദിവസം വൈകിട്ടുമുതലാണ് ഇവർക്ക് റോഡ് യാത്രയ്ക്കായി ഉപയോഗിക്കാനായത്. ഈ ഭാഗത്ത് ഒരു പാലം നിർമിച്ചാൽ എല്ലാവർഷകാലത്തും തങ്ങൾ അനുഭവിക്കുന്ന പ്രശ്നത്തിന് പരിഹാരമാകുമെന്നാണ് കുടുംബങ്ങൾ പറയുന്നത്. മുന്പ് ഈ ഭാഗത്ത് പാലം നിർമിക്കുന്നതിനായി എസ്റ്റിമേറ്റ് എടുത്തിരുന്നെങ്കിലും മറ്റ് നടപടികളൊന്നും മുന്നോട്ട് പോയിട്ടില്ലെന്നും ആരോപണമുണ്ട്.

കത്തിനശിച്ച പീടിക പുനസ്ഥാപിച്ച് വ്യാപാരി വ്യവസായി ഏകോപന സമിതി

സുൽത്താൻ ബത്തേരി: തീപിടിത്തത്തിൽ നശിച്ച ചെറുകിട കച്ചവടക്കാരന്‍റെ പീടിക വ്യാപാരി സമൂഹം പുനസ്ഥാപിച്ചു. ബീനാച്ചിയിലെ കുന്നത്ത് ബാഗ്സ് എന്ന പീടികയാണ് വ്യാപാരി വ്യവസായി ഏകോപന സമിതി വയനാട് ജില്ലാ കമ്മിറ്റിയും ബത്തേരി മർച്ചന്‍റ്സ് അസോസിയേഷനും സമിതി ബീനാച്ചി യൂണിറ്റും ചേർന്ന് പുനസ്ഥാപിച്ചത്. ബീനാച്ചിയിലെ ഖാലിദാണ് കടയുടമ. കഴിഞ്ഞ മാർച്ചിലാണ് കട തീപിടിച്ചുനശിച്ചത്. പുനസ്ഥാപിച്ച കടയുടെ ഉദ്ഘാടനം സമിതി ജില്ലാ ജനറൽ സെക്രട്ടറി കെ. ഉസ്മാൻ നിർവഹിച്ചു. ട്രഷറർ നൗഷാദ് കരിന്പനക്കൽ, ബത്തേരി യൂണിറ്റ് പ്രസിഡന്‍റ് പി.വൈ. മത്തായി, ട്രഷറർ ശ്രീജിത്, നൗഷാദ് മിന്നാരം, ബീരാൻ ഹാജി, നിഷാദ്, മുഹമ്മദ് ഷെരീഫ് ഹാജി, സണ്ണി, ടി.പി. റഫീക്ക്, ലത്തീഫ് തുടങ്ങിയർ പങ്കെടുത്തു.

കാട്ടാന തകർത്ത താത്കാലിക വീട് വനസേന പുനർനിർമിച്ചു

കൽപ്പറ്റ: കാട്ടാന തകർത്ത താത്കാലിക വീട് വനസേന പുനർനിർമിച്ചു. വൈത്തിരി സുഗന്ധഗിരിയിലെ ടി.കെ. തന്പിയും കുടുംബവും താമസിച്ചിരുന്ന വീടാണ് പുനർനിർമിച്ചത്. ആസ്ബറ്റോസ് ഷീറ്റ് മേഞ്ഞ വീട് കഴിഞ്ഞ ദിവസം പുലർച്ചെയാണ് ആന തകർത്തത്. 63 കാരനായ തന്പിക്ക് ആനയുടെ ആക്രമണത്തിനിടെ നിസാര പരിക്കേറ്റിരുന്നു. റേഞ്ച് ഫോറസ്റ്റ് ഓഫീസർ കെ. ഹാഷിഫ്, എസ്എഫ്ഒ എൻ.ആർ. കേളു, ബിഎഫ്ഒമാരായ അനില രമണൻ, സി.സി. ശ്യാംകുമാർ, ബി. അഭിനന്ദ്, എം. സുഭാഷ്, പരിസരവാസികളായ ബി. രവി, ടി.പി. ഗോപാലൻ എന്നിവരടങ്ങുന്ന സംഘമാണ് വീട് പുനർനിർമിച്ചത്. പൊഴുതന പഞ്ചായത്ത് പ്രസിഡന്‍റ് അനുവദിച്ച കട്ടിൽ വനപാലകർ തന്പിയുടെ വീട്ടിൽ എത്തിച്ചു.

മഴയിൽ വീട് ഭാഗികമായി തകർന്നു

സുൽത്താൻ ബത്തേരി: ശക്തമായ മഴയിൽ തോട് കരകവിഞ്ഞൊഴുകി വീട് ഭാഗികമായി തകർന്നു. നെൻമേനി നന്പ്യാർകുന്ന് പൊന്നകം കരിപ്പോട് ഷീബയുടെ വീടിന്‍റെ അടുക്കളഭാഗത്തെ ഭിത്തിയാണ് തകർന്നത്. വീടിനോട് ചേർന്നൊഴുകുന്ന പൊന്നകം തോട് ശക്തമായ മഴയിൽ കരകവിഞ്ഞൊഴുകി വെള്ളം കയറിയതോടെയാണ് കഴിഞ്ഞദിവസം വീടിന്‍റെ അടുക്കളഭാഗത്തെ ഭിത്തി തകർന്നത്. നിലവിൽ താങ്ങുകാൽ നൽകിയാണ് വീട് നിർത്തിയിരിക്കുന്നത്. ഇനിയും മഴശക്തമായി കൂടുതൽ വെള്ളം വീട്ടിലേക്ക് അടിച്ചുകയറാനുളള സാധ്യതയുണ്ട്. ഇതോടെ വീട് പൂർണമായും തകരുമോ എന്ന ആശങ്കയിലാണ് കുടംബം. സ്ഥലം സന്ദർശിച്ച റവന്യു, പഞ്ചായത്ത് അധികൃതർ ക്യാന്പിലേക്ക് മാറാൻ കുടുംബത്തോട് ആവശ്യപ്പെട്ടിട്ടുണ്ട്. എന്നാൽ ഇവരുടെ ഉപജീവനമാർഗമായ നാൽക്കാലികളെ എന്തുചെയ്യണമെന്നറിയാത്ത അവസ്ഥയിലാണ് കുടുംബം.

പ്രത്യാശയുടെ മഴക്കുടകൾ ഇനി കളക്ടറേറ്റിലും ലഭിക്കും

കൽപ്പറ്റ: ഉരുൾ പൊട്ടൽ ദുരന്തത്തെ അതിജീവിച്ച് മുണ്ടക്കൈയിലെ ഒരുപ്പറ്റം വനിതകൾ പ്രത്യാശയുടെ കുടവിരിക്കുകയാണ് ബെയ്‌ലി ചെറുകിട സംരംഭത്തിലൂടെ. പുഞ്ചിരിമട്ടം ദുരന്തത്തിൽ ഉറ്റവരെ നഷ്ടപ്പെടുകയും പ്രതീക്ഷകൾ അസ്തമിക്കുകയും ചെയ്തിടത്ത് നിന്നാണ് ഈ ഉയർത്തെഴുന്നേൽപിന്‍റെ വിജയഗാഥ രചിക്കുന്നത്. എല്ലാം നഷ്ടമായി നിസഹായരായി നിന്നവർ ബെയ്‌ലി സംരംഭത്തിലൂടെ അതിജീവനപാതയിലാണ്. മഴക്കുടകളും ബാഗുകളും നിർമിച്ച് വിപണിയിലെത്തിക്കുകയാണ് ഒരു കൂട്ടം വനിതകൾ. രക്ഷാ പ്രവർത്തനത്തിനായി സൈന്യം നിർമിച്ച ബെയ്ലി പാലത്തിന്‍റെ പേര് തന്നെ കടമെടുത്തു. ദുരന്ത സമയത്ത് മുണ്ടക്കൈ, ചൂരൽമല പ്രദേശങ്ങളെ ബന്ധിപ്പിച്ച് രക്ഷാപ്രവർത്തനത്തിന് ഏകമാർഗമായ ബെയ്‌ലി പാലത്തിന്‍റെ പേരിലാണ് സംരംഭത്തിന് തുടക്കമിട്ടത്. ചൂരൽമലയിലെ വനിതകൾക്ക് മുൻപിൽ കുട നിർമാണമെന്ന ആശയം ആദ്യമായി മുന്നോട്ടുവച്ചത് കുടുംബശ്രീ ജില്ലാ മിഷനാണ്. ആശയത്തിന് താത്പര്യം പ്രകടിപ്പിച്ചവർക്കായി കുടുംബശ്രീയുടെ നേതൃത്വത്തിൽ മൂന്ന് ദിവസം കുടനിർമാണത്തിൽ പരിശീലനം നൽകി. പരിശീലന ക്ലാസുകളിലൂടെ ലഭിച്ച അറിവും ചോരാത്ത ആത്മധൈര്യവും സംരംഭമെന്ന ആശയം യാഥാർഥ്യമാക്കാൻ ഇവർക്ക് സഹായമായി. ജില്ലാ കളക്ടർ ഡി.ആർ. മേഘശ്രീ, കുടുംബശ്രീ ജില്ലാമിഷൻ, സ്വാമിനാഥൻ ഫൗണ്ടേഷൻ എന്നിവയുടെ സംയുക്ത ഇടപെടലുകളാലാണ് യൂണിറ്റുകളിലേക്ക് ആവശ്യമായ സഹായങ്ങൾ ഒരുക്കിയത്. കൽപ്പറ്റ എസ്കെഎംജെ സ്കൂൾ ഗ്രൗണ്ടിൽ സംഘടിപ്പിച്ച സംസ്ഥാന സർക്കാരിന്‍റെ നാലാം വാർഷികാഘോഷ പരിപാടിയിലാണ് ബെയ്‌ലി ബാഗ് യൂണിറ്റിന് ആദ്യമായി വിപണന സാധ്യത തുറന്നത്. കുടനിർമിക്കാൻ ആവശ്യമായ 390 ഓളം അസംസ്കൃത വസ്തുക്കൾ നൽകിയതും ജില്ലാ കളക്ടറുടെ നേതൃത്വത്തിലാണെന്ന് സംരംഭക റംലത്ത് വ്യക്തമാക്കി. നിലവിൽ റിപ്പണ്‍, മേപ്പാടി കേന്ദ്രീകരിച്ച് കുടനിർമാണവും ബാഗ് നിർമാണവും വ്യത്യസ്ത യൂണിറ്റുകളായി നടക്കുന്നുണ്ട്. കുട നിർമാണ യൂണിറ്റിൽ എട്ടുപേരും ബാഗ് നിർമാണ യൂണിറ്റിൽ 26 പേരുമാണുള്ളത്. സഹായങ്ങൾ ലഭിക്കാറുണ്ടെങ്കിലും പലപ്പോഴും കെട്ടിട വാടക, മറ്റ് ആവശ്യങ്ങൾക്കായി പണം തികയാതെ വരുന്പോൾ സ്വർണാഭരണങ്ങൾ വിറ്റ് പണം കണ്ടെത്തേണ്ട അവസ്ഥയും ഇവർ നേരിടുന്നുണ്ട്. കുടുംബശ്രീ ജില്ലാ മിഷനിൽ നിന്നും അനുവദിച്ച ലോണ്‍ ആശ്വാസമാണ്. മികച്ച രീതിയിൽ കച്ചവടം നടന്നാൽ മാത്രമേ ഇവരുടെ മുന്നോട്ടുള്ള അതിജീവനത്തിന് കരുത്താവുകയുള്ളു. ഇതുവരെയുള്ള കച്ചവടത്തിൽ നിന്നും വിറ്റുവരവ് ഇനത്തിൽ കൂലിയായി എടുക്കാൻ കഴിഞ്ഞിട്ടില്ലെങ്കിലും പ്രതിസന്ധികളും പ്രതിബന്ധങ്ങളും തരണം ചെയ്ത് ഉയർന്നു വരാൻ സാധിക്കുമെന്ന പ്രതീക്ഷയുണ്ട്. കളക്ടറേറ്റിൽ അന്വേഷണ കൗണ്ടറിന് സമീപം ബെയ്ലി ബാഗുകളും കുടകളും കുറഞ്ഞ വിലയിൽ ലഭിക്കും.

ജലാശയങ്ങളും വയലുകളും വെള്ളം നിറഞ്ഞതോടെ മീൻപിടുത്തം സജീവം

സുൽത്താൻ ബത്തേരി: ശക്തമായ മഴയിൽ വയനാട്ടിലെ പുഴകളിലും വയലുകളിലും വെള്ളം നിറഞ്ഞതോടെ സജീവമായി മീൻപിടുത്ത സംഘങ്ങൾ. ചെറുതും വലുതുമായ മീൻപിടുത്ത സംഘങ്ങളാണ് വയനാട്ടിലെ വിവിധ പുഴയിറുന്പുകളിലും തോട്ടിൻകരയിലും വയലോരങ്ങളിലും സജീവമാകുന്നത്. ജില്ലയ്ക്ക് പുറത്തുനിന്നുവരെ മീൻ പിടുത്ത സംഘങ്ങൾ വയനാട്ടിലെ പുഴകളിലേക്കും മറ്റു ജലാശയങ്ങളിലേക്കും മീൻ പിടിക്കാനായി എത്തുന്നുണ്ട്. ആഫ്രിക്കൻ മുഷി, ചെന്പല്ലി, തോണിയാടി, പരൽ, കല്ലേമുട്ടി, പൊടിമീനുകൾ തുടങ്ങിയ മത്സ്യങ്ങളാണ് ഈ സംഘങ്ങളുടെ വലകളിൽ പ്രധാനമായും ലഭിക്കുന്നത്. മുതിർന്നവർക്ക് പുറമെ കുട്ടികളും ചെറിയ വലകളുമായി മത്സ്യബന്ധനത്തിനായി എത്തുന്നത് കൗതുകത്തിനൊപ്പം ആശങ്കയും വർധിപ്പിക്കുന്നുണ്ട്. പലരും സ്വന്തം ആവശ്യത്തിനുള്ള മത്സ്യം പിടിക്കാനായി വരുന്നവരാണ്. എന്നാൽ കൂടുതൽ മത്സ്യം ലഭിക്കുന്ന ദിവസങ്ങളിൽ ഇവർ വിൽപ്പന നടത്താറുമുണ്ട്. മഴ ശക്തമായതോടുകൂടി പുഴകളിലും തോടുകളിലും ജലനിരപ്പ് ഉയരുന്നതോടെ നാടൻ മത്സ്യങ്ങൾ ധാരാളം എത്തുമെന്ന് മത്സ്യം പിടിക്കാനെത്തിയവർ പറയുന്നു. മുത്തങ്ങ കല്ലൂർ, നന്പിക്കൊല്ലി പ്രദേശങ്ങളിലായി പുഴയിൽ ദിവസവും നൂറ്റിയന്പതിലേറെ പേർ മത്സ്യബന്ധനത്തിന് എത്താറുണ്ട്. കുത്തുവല, തണ്ടാടി, കോരുവല, ചൂണ്ട എന്നിവയാണ് മത്സ്യബന്ധനത്തിനായി പ്രധാനമായും ഉപയോഗിക്കുന്നത്. ഏതാനും ദിവസങ്ങളായി ജില്ലയിൽ മഴ ശക്തമായതോടെ പുഴകളിലെയും വലിയ തോടുകളിലെയും ചെക്ഡാമിന് സമീപത്തെ കുത്തൊഴുക്കുള്ള വെള്ളത്തിൽ മത്സ്യബന്ധനം നടത്തുന്നത് ശ്രദ്ധയോടെയാകണമെന്ന മുന്നറിയിപ്പാണ് പ്രദേശവാസികൾ നൽകുന്നത്.

കബനി ഗിരിയിൽ വീണ്ടും പുലി ആടിനെ കൊന്നു

പുൽപ്പള്ളി: കബനിഗിരിയിൽ വീണ്ടും പുലിയുടെ ആക്രമണം. വീട്ടുമുറ്റത്തെ കൂട്ടിൽ കെട്ടിയിരുന്ന ആടിനെ പുലി കൊന്നു. കബനിഗിരി 60 കവലയ്ക്ക് സമീപം തേവർകാട്ടുകുന്നേൽ ജോയിയുടെ രണ്ട് വയസ് പ്രായമുള്ള ആടിനെയാണ് പുലി കൊന്നത്. വ്യാഴാഴ്ച രാത്രി ഒന്പതോടെയാണ് സംഭവം. ആടിന്‍റെ കരച്ചിൽകേട്ട് വീട്ടുകാർ പുറത്തെ ലൈറ്റിട്ട് ശബ്ദമുണ്ടാക്കിയതോടെ പുലി ആടിനെ ഉപേക്ഷിച്ച് കടന്നുകളയുകയായിരുന്നു. വിവരമറിയിച്ചതിനെ തുടർന്ന് രാത്രിതന്നെ വനപാലകരെത്തി പ്രദേശത്ത് തെരച്ചിൽ നടത്തിയെങ്കിലും പുലിയെ കണ്ടെത്താനായില്ല. ഇന്നലെ രാവിലെയും കൂടുതൽ വനംവകുപ്പ് ഉദ്യോഗസ്ഥരെത്തി പ്രദേശത്ത് തെരച്ചിൽ നടത്തി. വീട്ടുമുറ്റത്തെ ആട്ടിൻ കൂടിന് സമീപം വനംവകുപ്പ് നിരീക്ഷണത്തിനായി കാമറകൾ സ്ഥാപിച്ചിട്ടുണ്ട്. കഴിഞ്ഞ പത്ത് ദിവസത്തിനിടെ നാല് ആടുകളും ഒരു വളർത്തുനായയുമാണ് പുലിയ്ക്കിരയായത്. പുലിയെ പിടികൂടുന്നതിനായി പ്രദേശത്ത് കൂടുൽ കൂടുകൾ സ്ഥാപിക്കണമെന്നാണ് നാട്ടുകാരുടെ ആവശ്യം. വെറ്ററിനറി ഡോക്ടറുടെ റിപ്പോർട്ടിന്‍റെ അടിസ്ഥനത്തിൽ ആടിന്‍റെ ഉടമയ്ക്ക് അർഹമായ നഷ്ടപരിഹാരം നൽകുമെന്ന് വനംവകുപ്പ് റേഞ്ചർ രാജിവ്കുമാർ പറഞ്ഞു. പുലിയെ പിടികൂടാൻ നടപടി വേണമെന്ന് പുൽപ്പള്ളി: കബനിഗിരി, മരക്കടവ് പ്രദേശത്ത് രണ്ടാഴ്ചയോളമായി ഭീതിപരത്തുന്ന പുലിയെ അടിയന്തിരമായി പിടികൂടാൻ വനംവകുപ്പ് ഉണർന്ന് പ്രവർത്തിക്കണമെന്ന് കേരളാ കർഷക യൂണിയൻ-എം ജില്ലാ പ്രസിഡന്‍റ് റെജി ഓലിക്കരോട്ട് ആവശ്യപ്പെട്ടു. വനംവകുപ്പ് പ്രദേശത്ത് കൂടുതൽ കൂടുകൾ സ്ഥാപിച്ചും കൃഷിയിടങ്ങളിൽ തെരച്ചിൽ നടത്തിയും പുലിയെ കണ്ടെത്താനുള്ള നടപടി സ്വീകരിക്കണമെന്നും പുലി ശല്യംമൂലം പ്രദേശത്തെ ക്ഷീരകർഷകർ ഉൾപ്പെടെയുള്ളവർക്ക് പുല്ലരിയാൻ പോലും പുറത്തിറങ്ങാൻ കഴിയാത്ത അവസ്ഥയാണെന്നും ഇതിന് അടിയന്തിര പരിഹാരം കാണണമെന്നും അദ്ദേഹം ആവശ്യപ്പെട്ടു.

സപ്ലൈകോ നെല്ല് സംഭരിക്കാനെത്തിയില്ല കർഷകർ പ്രതിസന്ധിയിൽ

പുൽപ്പള്ളി: കൊയ്തെടുത്ത നെല്ല് സംഭരിക്കാനാളില്ലാതെ കർഷകർ ദുരിതത്തിൽ. സപ്ലൈയ്ക്കോയ്ക്ക് നെല്ല് വിൽക്കാൻ കരാറായ കർഷകരാണ് നെല്ല് സംഭരിക്കാൻ ആളെത്താത്തതിനാൽ പ്രയാസമനുഭവിക്കുന്നത്. പെരിക്കല്ലൂർ വരദൂർ പാടശേഖരത്തിലെ 40 ഓളം കർഷകരാണ് കൊയ്തെടുത്ത നെല്ലുമായി കാത്തിരിക്കുന്നത്. മഴ ശക്തമായതോടെ കളങ്ങളിൽ സൂക്ഷിച്ചിരിക്കുന്ന നെല്ല് നശിച്ചുപോകുമെന്ന ആശങ്കയിലാണ് കർഷകർ. മെതിച്ചെടുത്ത നെല്ല് പ്ലാസ്റ്റിക്ക് ചാക്കുകളിൽ കെട്ടി, കളങ്ങളിൽ പ്ലാസ്റ്റിക് ഷീറ്റുകൊണ്ട് മൂടിയിട്ടിരിക്കുകയാണ്. രണ്ടാഴ്ച മുന്പാണ് കൊയ്ത്ത് നടത്തിയത്. തുടർന്ന് സപ്ലൈയ്ക്കോയ്ക്ക് നെല്ല് വിൽക്കുന്നതിനുള്ള കരാറും തയ്യാറാക്കി. എന്നാൽ സപ്ലൈകോ നൽകിയ നാല് മില്ലുകാരെ ബന്ധപ്പെട്ടെങ്കിലും ഇവരാരും നെല്ല് സംഭരിക്കാൻ വരാൻ തയ്യാറാകുന്നില്ലെന്നാണ് കർഷകർ പറയുന്നത്. മഴ കനത്തതോടെ കർഷകരുടെ ആശങ്കയും കൂടി. സപ്ലൈക്കോ അധികൃതരുമായി ബന്ധപ്പെട്ടെങ്കിലും പ്രയോജനമൊന്നുമില്ലെന്നാണ് കർഷകർ പറയുന്നത്. വരവൂർ പാടശേഖരത്തിൽ 40 ഏക്കറോളം ഇത്തവണ പുഞ്ചകൃഷി ചെയ്തിരുന്നു. രണ്ടാഴ്ച മുന്പ് കൊയ്ത്ത് ഏകദേശം പൂർത്തിയാക്കി. മഴ കനത്തതിനാൽ ഇനി ഏഴ് ഏക്കറിലെ കൊയ്ത്തുകൂടി ബാക്കിയുണ്ട്. ഇതിനിടെ മഴ നനഞ്ഞ് 3500 ഓളം റോൾ വൈക്കോലും മഴ നനഞ്ഞ് നശിച്ചുപോയി. നെല്ല് വിറ്റുകിട്ടുന്ന പണം കൊണ്ടുവേണം അടുത്ത നഞ്ചകൃഷിക്കുള്ള ഒരുക്കങ്ങൾ നടത്താനാണെന്നാണ് കർഷകർ പറയുന്നത്. കർണാടകയോട് ചേർന്നുകിടക്കുന്ന പെരിക്കല്ലൂരിലെ വരവൂർ പാടത്ത് കാട്ടാനയടക്കമുള്ള വന്യമൃഗങ്ങളുടെ ശല്യം രൂക്ഷമാണ്. ഇത്തവണ ദിവസങ്ങളോളം കാവൽകിടന്നാണ് നെല്ല് വിളവെടുപ്പിന് പാകമെത്തിച്ചത്. എന്നാൽ വിളവെടുത്ത നെല്ല് വാങ്ങാൻ ആളെത്താതായതോടെ കർഷകരുടെ പ്രതീക്ഷകളെല്ലാം താളംതെറ്റിയിരിക്കുയാണ്.

ജില്ലയിലെ 14 ദുരിതാശ്വാസ ക്യാന്പുകളിലായി 628 പേർ

കൽപ്പറ്റ: ജില്ലയിൽ ആരംഭിച്ച 14 ദുരിതാശ്വാസ ക്യാന്പുകളിലായി 628 പേരെ മാറ്റിപ്പാർപ്പിച്ചു. 179 കുടുംബങ്ങളിൽ നിന്നായി 628 പേരെയാണ് വിവിധയിടങ്ങളിലെ ക്യാന്പുകളിലേക്ക് മാറ്റിയത്. ഇതിൽ 211 പുരുഷൻമാരും 248 സ്ത്രീകളും (നാല് ഗർഭിണികൾ), 169 കുട്ടികളും 48 വയോജനങ്ങളും ആറ് ഭിന്നശേഷിക്കാരും ഉൾപ്പെടുന്നുണ്ട്. സുൽത്താൻ ബത്തേരി താലൂക്കിലെ നാല് കുടുംബങ്ങൾ, വൈത്തിരി താലൂക്കിലെ 20 കുടുംബങ്ങൾ, മാനന്തവാടി താലൂക്കിലെ അഞ്ച് കുടുംബങ്ങൾ സ്വന്തം വീടുകളിലേക്ക് മടങ്ങി. സുൽത്താൻ ബത്തേരി താലൂക്കിൽ എട്ട് ക്യാന്പും വൈത്തിരി താലൂക്കിൽ അഞ്ച് ക്യാന്പും മാനന്തവാടി താലൂക്കിൽ ഒരുക്യാന്പുമാണ് ഉള്ളത്. ജില്ലയിൽ കൂടുതൽ മഴ ലക്കിടിയിൽ ജില്ലയിൽ കഴിഞ്ഞ ദിവസം കൂടുതൽ മഴ ലഭിച്ചത് ലക്കിടിയിൽ. ഇന്നലെ രാവിലെ എട്ട് വരെ 24 മണിക്കൂറിൽ ലഭിച്ച മഴയുടെ കണക്ക് പ്രകാരമാണ് വൈത്തിരി ഗ്രാമപഞ്ചായത്തിലെ ലക്കിടിയിൽ കൂടുതൽ മഴ ലഭിച്ചത്. 144 മില്ലിമീറ്റർ മഴയാണ് പ്രദേശത്ത് കിട്ടിയത്. നൂൽപ്പുഴ, ഗ്രാമപഞ്ചായത്തിലെ മുത്തങ്ങയിലാണ് കുറവ് മഴ. 18 മില്ലിമീറ്റർ മഴയാണ് പ്രദേശത്ത് ലഭിച്ചത്. ജില്ലയിൽ ഇന്ന് യെല്ലോ അലർട്ട് കേന്ദ്ര കാലാവസ്ഥ നിരീക്ഷണ വകുപ്പ് ജില്ലയിൽ ഇന്ന് യെല്ലോ അലർട്ട് പ്രഖ്യാപിച്ചു.

ആൾക്കൂട്ട ആക്രമണം; മധ്യവയസ്കനു ഗുരുതര പരിക്ക്

കൽപ്പറ്റ: ആൾക്കൂട്ട ആക്രമണത്തിൽ മധ്യവയസ്കനു ഗുരുതര പരിക്കേറ്റു. എടഗുനി കരുമതിയിൽ ബിജുവിനെയാണ്(50)ഒരുകൂട്ടം ആളുകൾ മർദിച്ചത്. ബുധനാഴ്ച രാത്രി എട്ടരയോടെ പിണങ്ങോട് റോഡിൽ ആക്സിസ് ബാങ്ക് പരിസരത്താണ് സംഭവം. ബിജു സ്വകാര്യ ആശുപത്രിയിൽ ചികിത്സയിലാണ്. . മറ്റൊരു കാറിലുണ്ടായിരുന്നയാൾ വിളിച്ചുവരുത്തിയവരാണ് മർദിച്ചതെന്നും ഓട്ടോ ഡ്രൈവറാണ് രക്ഷപ്പെടുത്തി ആശുപത്രിയിൽ എത്തിച്ചതെന്നും ബിജു പറഞ്ഞു.

697 കുടുംബങ്ങൾക്ക് എമർജൻസി ഷെൽട്ടർ കിറ്റ് വിതരണം ചെയ്തു

കൽപ്പറ്റ: മഴ ശക്തമായ സാഹചര്യത്തിൽ ടെക്സസ് ഇൻസ്ട്രുമെന്‍റ്സിന്‍റെ പിന്തുണയോടെ ഹൗസിംഗ് എൻജിഒ ഹാബിറ്റാറ്റ് ഫോർ ഹ്യുമാനിറ്റി ഇന്ത്യ ജില്ലയിൽ 697 കുടുംബങ്ങൾക്ക് എമർജൻസി ഷെൽട്ടർ കിറ്റ് വിതരണം ചെയ്തു. പനമരം, എടവക, കോട്ടത്തറ, മാനന്തവാടി, ബത്തേരി എന്നിവിടങ്ങളിലെ കുടുംബങ്ങൾക്കാണ് കിറ്റ് നൽകിയത്. ടാർപോളിൻ, കയർ, പ്ലയർ, ഹാമർ, ആണികൾ, വാഷറുകൾ, പ്ലാസ്റ്റിക് ഷീറ്റ് തുടങ്ങിയവ അടങ്ങിയതാണ് എമർജൻസി കിറ്റ്. കൊളഗപ്പാറ ശ്രേയസ് ഹാളിൽ നടത്തിയ ചടങ്ങിൽ ഹാബിറ്റാറ്റ് ഫോർ ഹ്യുമാനിറ്റി ഇന്ത്യ സൗത്ത് റീജിയണൽ ഹെഡ് ജോർജ് പി. കുര്യൻ, മീനങ്ങാടി പഞ്ചായത്ത് പ്രസിഡന്‍റ് കെ.ഇ. വിനയൻ, സ്റ്റാൻഡിംഗ് കമ്മിറ്റി ചെയർമാൻ ബേബി വർഗീസ്, ബത്തേരി ശ്രേയസ് എക്സിക്യുട്ടീവ് ഡയറക്ടർ ഫാ.ഡേവിഡ് ആലിങ്കൽ എന്നിവർ ചേർന്ന് കിറ്റുകൾ കൈമാറി.

തരിയോട് നിർമല സ്കൂളിൽ സന്പാദ്യം പദ്ധതി തുടങ്ങി

തരിയോട്: നിർമല ഹൈസ്കൂളിൽ സന്പാദ്യം പദ്ധതി തുടങ്ങി. പുതുതായി എട്ടാം ക്ലാസിൽ പ്രവേശനം നേടിയ മുഴുവൻ വിദ്യാർഥികളെയും സഞ്ചയികയിൽ അംഗങ്ങളാക്കിയാണ് പദ്ധതി ആരംഭിച്ചത്. ഓരോ വിദ്യാർഥിക്കും 50 രൂപ നിക്ഷേപം കാണിക്കുന്ന പാസ്ബുക്ക് നൽകി. മുൻ വർഷങ്ങളിൽ സഞ്ചയിക പദ്ധതിയിൽനിന്ന് ലഭിച്ച പലിശയാണ് വിദ്യാർഥികളുടെ പ്രാഥമിക നിക്ഷേപത്തിന് ഉപയോഗപ്പെടുത്തിയത്. ജില്ലാ സഞ്ചയിക ഓഫീസർ അഖിൽ ജോണ്‍ ഉദ്ഘാടനം ചെയ്തു. ഹെഡ്മാസ്റ്റർ ജോബി മാനുവൽ, പിടിഎ പ്രസിഡന്‍റ് ഡെൻസി ജോണ്‍, എംപിടിഎ പ്രസിഡന്‍റ് ദിവ്യ പ്രതീഷ് തുടങ്ങിയവർ പങ്കെടുത്തു.

വെറ്ററിനറി സർവകലാശാല ബോർഡ് ഓഫ് മാനേജ്മെന്‍റ്: ആറു പേർ എതിരില്ലാതെ വിജയിച്ചു

കൽപ്പറ്റ: കേരള വെറ്ററിനറി ആൻഡ് അനിമൽ സയൻസസ് സർവകലാശാല ബോർഡ് ഓഫ് മാനേജ്മെന്‍റിലേക്ക് നടന്ന തെരഞ്ഞെടുപ്പിൽ ആറു പേർ എതിരില്ലാതെ വിജയിച്ചു. എൽഡിഎഫ് എംഎൽഎമാരായ കെ.എം. സച്ചിൻദേവ്(ബാലുശേരി) ഇ.കെ. വിജയൻ(നാദാപുരം), ഫാക്കൽറ്റി ഡീൻ പ്രതിനിധിയായി ഡോ.എസ്.എൻ. രാജകുമാർ, അധ്യാപക പ്രതിനിധികളായി ഡോ.കെ.സി. ബിപിൻ, ഡോ.എ.ആർ. ശ്രീരഞ്ജിനി, പൊതുമണ്ഡലം പ്രതിനിധിയായി സി.ആർ. സന്തോഷ് എന്നിവരാണ് വിജയിച്ചത്. ഡീൻ, അധ്യാപക, പൊതുമണ്ഡലം പ്രതിനിധികളായി വിജയിച്ചവർ ഇടത് അനുകൂല സംഘടനകളിൽനിന്നുള്ളവരാണ്.

ജില്ലയിൽ യാഥാർഥ്യമാവുക 21 കോടിയുടെ വികസന പദ്ധതികൾ

കൽപ്പറ്റ: ജില്ലയിൽ നിന്ന് മുഖ്യമന്ത്രിക്കും മന്ത്രിമാർക്കും നൽകിയ നിർദേശങ്ങളുടെ ഭാഗമായി 21 കോടി രൂപയുടെ വികസന പദ്ധതികൾ ജില്ലയിൽ നടപ്പാക്കും. നവകേരള സദസിൽ ജില്ലയിൽ നിന്ന് ഉയർന്നുവന്ന പദ്ധതികൾ നടപ്പാക്കാൻ മന്ത്രിസഭായോഗം 21 കോടി രൂപയാണ് അനുവദിച്ചു. വയനാട് മെഡിക്കൽ കോളജിൽ ആധുനിക ഉപകരണങ്ങൾ ലഭ്യമാക്കുന്നതിന് ഏഴ് കോടി രൂപയാണ് അനുവദിച്ചത്. 3.95 കോടി രൂപ ചെലവിൽ സിടി സ്കാനർ, ഡിജിറ്റൽ റേഡിയോഗ്രഫി സിസ്റ്റം (1.61 കോടി), 3ഡി ലാപ്രോസ്കോപിക് സെറ്റ് (1.17 കോടി), സിആം മൊബൈൽ ഇമേജ് ഇന്‍റൻസിഫയർ സിസ്റ്റം (27 ലക്ഷം രൂപ) എന്നിവ സ്ഥാപിക്കാനും നിർദേശമുണ്ട്. സുൽത്താൻ ബത്തേരി നിയമസഭ മണ്ഡലത്തിൽ വനംവന്യജീവി വകുപ്പിന് കീഴിലാകും വികസന പദ്ധതികൾ നടപ്പാക്കുക. വയനാട് വൈൽഡ് ലൈഫ് ഡിവിഷനിലെ സുൽത്താൻ ബത്തേരി നായ്ക്കട്ടി ഫോറസ്റ്റ് സ്റ്റേഷനിലെ 18.75 കിലോമീറ്ററിലും മുത്തങ്ങ, തോട്ടമൂല ഫോറസ്റ്റ് സ്റ്റേഷനിലുമായി ഒന്നര കോടി രൂപ വീതം ചെലവിട്ട് സോളാർ തൂക്ക് വേലി സ്ഥാപിക്കും. മരിയനാട് പ്രോജക്ടുമായി ബന്ധപ്പെട്ട് 2005 മുതൽ 2024 വരെ തൊഴിലാളികൾക്ക് നൽകേണ്ട സർവീസ് ആനുകൂല്യങ്ങളും അധിക സമാശ്വാസ സഹായം ഉൾപ്പെടെ പദ്ധതികൾക്കുമായി നാല് കോടി രൂപ ചെലവഴിക്കും. കൽപ്പറ്റ മണ്ഡലത്തിൽ ബിഎംബിസി നിലവാരത്തിൽ റോഡ് നവീകരണത്തിനായി ഏഴ് കോടി രൂപയുടെ പദ്ധതി നടപ്പാക്കും. കാക്കവയൽ മുതൽ കാരാപ്പുഴ അണക്കെട്ട് വരെയുള്ള കാരാപ്പുഴ പ്രോജക്ട് റോഡാണ് നവീകരിക്കുന്നത്.

കാട്ടാന വീട് തട്ടിമറിച്ചു

കൽപ്പറ്റ: വൈത്തിരി സുഗന്ധഗിരിയിൽ കാട്ടാന വീട് തട്ടിമറിച്ചു. വ്യാഴാഴ്ച പുലർച്ചെയാണ് സംഭവം. സുഗന്ധഗിരിയിലെ തന്പിയും കുടുംബവും താമസിക്കുന്ന ആസ്ബറ്റോസ് ഷീറ്റ് മേഞ്ഞ വീടാണ് ആന തട്ടിയിട്ടത്. വീടിന്‍റെ ഭാഗം ദേഹത്തുവീണ് തന്പിക്ക്(63) നിസാര പരിക്കേറ്റു. ബുധനാഴ്ച രാത്രിയാണ് നാല് ആനകൾ സുഗന്ധഗിരിയിൽ എത്തിയത്. വിവരം അറിഞ്ഞയുടൻ വനം വകുപ്പിന്‍റെ ആർആർ ടീം സ്ഥലത്ത് എത്തിയെങ്കിലും മഴയും വൈദ്യുതി വിതരണം തടസപ്പെട്ടിരുന്നതും ആനകളെ തുരത്തുന്നതിന് വിഘാതമായി. വനം ഉദ്യോഗസ്ഥർ പ്രദേശത്ത് നിരീക്ഷണം തുടരുകയാണ്.

തുരങ്കപാത: വയനാട് പ്രകൃതി സംരക്ഷണ സമിതി ദേശീയ ഹരിത ട്രൈബ്യൂണലിലേക്ക്

കൽപ്പറ്റ: ആനക്കാംപൊയിൽ-കള്ളാടി നാലുവരി തുരങ്കപാത നിർമാണത്തിന് കേന്ദ്ര പരിസ്ഥിതി മന്ത്രാലയത്തിനു കീഴിലെ വിദഗ്ധ സമിതി അനുമതി നൽകിയതിനെതിരേ വയനാട് പ്രകൃതി സംരക്ഷണ സമിതി രംഗത്ത്. വനം-പരിസ്ഥിതി മന്ത്രാലയത്തെ തെറ്റിദ്ധരിപ്പിച്ചും വസ്തുതകൾ മറച്ചുവച്ചും നേടിയതാണ് അനുമതിയെന്ന് സമിതി പ്രസിഡന്‍റ് എൻ. ബാദുഷ ആരോപിച്ചു. തുരങ്കപാത നിർമാണം തടയുന്നതിന് ഇടപെടൽ തേടി ദേശീയ ഹരിത ട്രൈബ്യൂണലിലോ ഹൈക്കോടതിയിലോ ദിവസങ്ങൾക്കുള്ളിൽ ഹർജി നൽകുമെന്ന് അദ്ദേഹം പറഞ്ഞു. വലിയ തോതിലുള്ള വിനാശത്തിന് കാരണമാകുന്നതാണ് തുരങ്കപാത പദ്ധതി. കോട്ടപ്പടി, വെള്ളരിമല, തിരുവന്പാടി, ജീരകപ്പാറ വില്ലേജുകളിലെ പരിസ്ഥിതി ലോല പ്രദേശങ്ങളിലൂടെയാണ് 8.7 കിലോമീറ്റർ ദൈർഘ്യത്തിൽ തുരങ്കം നിർമിക്കേണ്ടത്. ആകെ 51. 370 ഹെക്ടർ ഭൂമിയാണ് പദ്ധതിക്ക് ആവശ്യം. ഇതിൽ 34.304 ഹെക്ടർ വനമാണ്. തുരങ്കപാത പദ്ധതിക്കു ഉപയോഗപ്പെടുത്തേണ്ട സ്ഥലത്തിനു സമീപമാണ് 2024 ജൂലൈ 30ന് ഉരുൾപൊട്ടിയ പുഞ്ചിരിമട്ടം. 1960 മുതൽ ഈ ഭൂപ്രദേശത്ത് നിരവധി തവണ ഉരുൾ പൊട്ടിയിട്ടുണ്ട്. 1984ലെ മുണ്ടക്കൈ ഉരുൾപൊട്ടൽ 17 പേരുടെ ജീവനെടുത്തു. 2019ലും 2020ലും മുണ്ടക്കൈയിൽ ഉരുൾ പൊട്ടി. വിനാശകരമായ ഉരുൾ പൊട്ടൽ ഉണ്ടായ കവളപ്പാറയും പാതാറും നിർദ്ദിഷ്ട പദ്ധതി പ്രദേശത്തിന്‍റെ പടിഞ്ഞാറുഭാഗത്താണ്. നിർദിഷ്ട പാതയിൽനിന്നു ഏകദേശം 0.85 കിലോമീറ്റർ അകലെയാണ് മുന്പ് ഉരുൾപൊട്ടിയ പുത്തുമല. ഇവയൊക്കെ പദ്ധതി പ്രദേശത്തിന്‍റെ ദുർബലതയിലേക്കാണ് വിരൽചൂണ്ടുന്നത്. തുരങ്കപാത കടന്നുപോകേണ്ട പർവതപ്രദേശങ്ങൾ വംശനാശ ഭീഷണി നേരിടുന്നതടക്കം ജൈവജാലങ്ങളുടെ ആവാസ വ്യവസ്ഥയാണ്. പരിസ്ഥിതിയിലും പരിസ്ഥിതി സുസ്ഥിരത ഉറപ്പുനൽകുന്ന സമൂഹത്തിലും പദ്ധതി ദൂരവ്യാപകമായ പ്രത്യാഘാതങ്ങൾ സൃഷ്ടിക്കും. കോഴിക്കോട് ജില്ലയിലെ തിരുവന്പാടി, വയനാട്ടിലെ വെള്ളരിമല വില്ലേജുകൾ പരിസ്ഥിതി ലോല പ്രദേശങ്ങളാണ്. വയനാട്ടിലും കോഴിക്കോട് ജില്ലയിലുമായി 32 പട്ടികവർഗ ഉന്നതികൾ നിർദിഷ്ട തുരങ്കപാതയ്ക്കു സമീപത്തുണ്ട്. തെറ്റായ വിവരങ്ങൾ നൽകിയാണ് കേന്ദ്ര വനംപരിസ്ഥിതി മന്ത്രാലയത്തിൽനിന്നു പദ്ധതിക്കുവേണ്ടി സ്റ്റേജ് വണ്‍ ക്ലിയറൻസ് നേടിയത്. വനം വകുപ്പിന്‍റെ ക്ലിയറൻസ് ലഭിച്ചശേഷം സ്റ്റേറ്റ് ഇക്കോളജി അസസ്മെന്‍റ് കമ്മിറ്റി പ്രസിദ്ധീകരിച്ച രേഖകളിൽ വൈരുധ്യം പ്രകടമാണ്. ഉയർന്ന പാരിസ്ഥിതിക സംവേദനമുള്ള മേഖലയിലൂടെയാണ് തുരങ്കം കടന്നുപോകേണ്ടത്. പാതയുടെ സമീപമുളള പ്രദേശങ്ങൾ അപകടമേഖലയാണ്. തിരുവന്പാടി പഞ്ചായത്തിലെ 35.67 ശതമാനം പ്രദേശം അസ്ഥിരവും 26.5 ശതമാനം ഉയർന്ന അസ്ഥിരവും 0.96 ശതമാനം ഗുരുതര അസ്ഥിരവും ആണ്. ഇക്കാര്യങ്ങൾ അസസ്മെന്‍റ് കമ്മിറ്റി കണ്ടെത്തിയതാണ്. വിദഗ്ധ സമിതി നടത്തിയ വിലയിരുത്തൽ പ്രക്രിയയിൽ സമർപ്പിച്ച നിർണായക രേഖയായ ഫോം ഒന്നിൽ അംഗീകാരം ലഭിക്കുന്നതിന് വനഭൂമിയെക്കുറിച്ചടക്കം തെറ്റായ വിവരമാണ് നൽകിയത്. പ്രോജക്ട് ഏരിയയുടെ ഏതെങ്കിലും ഭാഗം പ്രൊട്ടക്റ്റഡ് ഏരിയയിലോ ഇക്കോ സെൻസിറ്റീവ് സോണിലോ ഉൾപ്പെടുമോ എന്ന ചോദ്യത്തിന് അല്ല എന്ന തെറ്റായ മറുപടിയാണ് കൊടുത്തത്. വനാവകശ നിയമപ്രകാരം അവകാശങ്ങൾ നൽകാനുണ്ടോ, വനവകാശം പ്രോജക്ടിന് വിട്ടുകൊടുക്കുന്ന ഭൂമിയിൽ പൂർത്തികരിക്കാനുണ്ടോ എന്നീ ചോദ്യങ്ങൾക്ക് ഇല്ല എന്നായിരുന്നു ഉത്തരം. പദ്ധതി പ്രദേശത്ത് ആദിവാസി ഇതര സ്വകാര്യ ഭൂമിയിൽ 17.53 ഹെക്ടറിൽ നഷ്ടപരിഹാര വനവത്കരണത്തിന് കണ്ടെത്തിയ സ്ഥലം റീബിൽഡ് കേരള സ്കീമിലെ നവകിരണം പദ്ധതിയിൽ വനം വകുപ്പ് ഏറ്റെടുത്തതാണ്. വനവത്കരണം സ്വകാര്യ ഭൂമിയിലേ ചെയ്യാവൂ എന്ന നിബന്ധന പാലിക്കപ്പെട്ടിട്ടില്ല. സൗത്ത് വയനാട് ഫോറസ്റ്റ് ഡിവിഷനിലെ ചെതലത്ത് റേഞ്ചിൽപ്പെട്ട മണൽവയലിൽ 1.27 ഹെക്ടർ, കൊല്ലിവയലിൽ 1.8 ഹെക്ടർ, മാടപ്പറന്പിൽ 10.03 ഹെക്ടർ, ചുള്ളിക്കലിൽ 4.43 ഹെക്ടർ എന്നിങ്ങനെ വനപ്രദേശമാണ് വനവത്കരണത്തിന് ശിപാർശ ചെയ്തത്. നീലഗിരി ബയോസ്ഫിയർ റിസർവിന്‍റെ ഒരു ഭാഗം പദ്ധതി വിന്യാസത്തിന്‍റെ 10 കിലോമീറ്റർ ചുറ്റളവിൽ ഉൾപ്പെടുന്നതാണെന്നും ബാദുഷ പറഞ്ഞു.

എംഎൽഎമാരുടെ പ്രവൃത്തികൾ മന്ദഗതിയിലാക്കാൻ രാഷ്ട്രീയ സമ്മർദ്ദമെന്ന്

കൽപ്പറ്റ: എംഎൽഎമാരായ ഐ.സി. ബാലകൃഷ്ണന്‍റേയും, ടി. സിദ്ദിഖിന്‍റേയും പ്രാദേശിക വികസന ഫണ്ടുകൾ ഉപയോഗിച്ച് നടക്കുന്ന പ്രവൃത്തികൾക്ക് ഭരണാനുമതി നൽകാതെ നീട്ടികൊണ്ട് പോകുന്നതായി ആരോപണം. ജോയിന്‍റ് ഡയറക്ടറുടെ ഓഫീസിൽ പ്രാവീണ്യമുള്ള ജീവനക്കാരെ നിയമിക്കാത്തതാണ് ഇത്തരത്തിൽ ഭരണാനുമതി വൈകിപ്പിക്കാൻ ഇടയാക്കിയിരിക്കുന്നതെന്നാണ് ആക്ഷേപം. മനപ്പൂർവം ജീവനക്കാരുടെ എണ്ണം വെട്ടിക്കുറച്ച് പദ്ധതികൾ അട്ടിമറിക്കാനുള്ള രാഷ്ട്രീയ ഇടപെടലുകളാണെന്നാണ് ആരോപണമുയർന്നിരിക്കുന്നത്. 2024-2025 സാന്പത്തിക വർഷം നൽകേണ്ട പ്രവൃത്തികൾക്കുള്ള ഭരണാനുമതി ഉദ്യോഗസ്ഥർ വൈകിപ്പിച്ചിരുന്നു. എന്നാൽ ഈ പ്രവൃത്തികൾക്ക് 2025 ഓഗസ്റ്റ് 31 വരെ വരെ ഭരണാനുമതിക്ക് സമയം ദീർഘിപ്പിച്ച് നൽകിയിട്ടുണ്ട്. ഉദ്യോഗസ്ഥരുടെ മെല്ലെപോക്ക് കാരണം ഈ സമയപരിധിക്കുള്ളിലും ഭരണാനുമതി ലഭ്യമായില്ലെങ്കിൽ പ്രവൃത്തികൾക്ക് വീണ്ടും സമയം ദീർഘിപ്പിച്ച് വാങ്ങേണ്ട സ്ഥിതി വരുകയും പദ്ധതികൾ അനന്തമായി നീളുകയും ചെയ്യും. ഇതിന് വേണ്ടിയുള്ള രാഷ്ട്രീയ ഇടപെടലാണ് നടക്കുന്നതെന്നാണ് സംശയിക്കുന്നത്. പ്രതിപക്ഷ എംഎൽഎമാരുടെ ഫണ്ട് ഉപയോഗിച്ച് നടപ്പാക്കുന്ന പദ്ധതികളാണ് ഇത്തരത്തിൽ മനപ്പൂർവം മന്ദഗതിയിലാക്കി തെരഞ്ഞെടുപ്പ് പ്രചരണ വിഷയമാക്കാനുള്ള ശ്രമം നടക്കുന്നതെന്നാണ് ആക്ഷേപം. എന്നാൽ മാനന്തവാടി എംഎൽഎ ഭരണകക്ഷിയുടെ മന്ത്രിയായതിനാൽ പ്രവൃത്തികൾക്ക് വേഗത്തിലാണ് ഭരണാനുമതി നൽകുന്നതെന്നും പറയുന്നു. ഇത് തികച്ചും രാഷ്ട്രീയ ഇടപെടലുണ്ടെന്ന സംശയത്തിന് ആക്കം കൂട്ടുന്നു. പ്രിൻസിപ്പൽ ഡയറക്ടർ നിയമിക്കുന്ന ജീവനക്കാരെ എവിടെയെല്ലാം ജോലിക്ക് നിയമിക്കണമെന്ന് തീരുമാനിക്കുന്നത് ജോയിന്‍റ് ഡയറക്ടറാണ്. എന്നാൽ നിലവിൽ ഭരണകക്ഷിയിലെ പ്രധാനപ്പെട്ടവരുടെ പിന്തുണയോടെ തദ്ദേശ സ്വയംഭരണ വകുപ്പ് ജോയിന്‍റ് ഡയറക്ടറായി അവരോതിതനായ ഉദ്യോഗസ്ഥൻ ജെഡി ഓഫീസിൽ പ്രാവീണ്യമുള്ള ജീവനക്കാരെ നിയമിക്കാൻ തയാറാകുന്നില്ല. ഉന്നതങ്ങളിൽ നിന്നുള്ള ഇടപെടൽ മൂലം ജോയിന്‍റ് ഡയറക്ടർ അവരോടൊപ്പം നിന്ന് രാഷ്ട്രീയം കളിക്കുകയാണെന്നാണ് ആക്ഷേപം. നേരത്തെ ജില്ലയിലെ എംപി, എംഎൽഎ ഫണ്ടുകളുടെ ഫയൽ പ്രവൃത്തികൾക്ക് ജോയിന്‍റ് ഡയറക്ടറുടെ ഓഫീസിൽ പരിചയ സന്പന്നരായ ജീവനക്കാർ ഉണ്ടായിരുന്നു. എന്നാൽ ഈ വകുപ്പുമായി യാതൊരു അറിവുമില്ലാത്ത ഒരാളെയാണ് ഇപ്പോൾ നിയമിച്ചിരിക്കുന്നത്. ഇത് മനപൂർവമാണെന്നാണ് ആക്ഷേപം.

കുളക്കിമൊട്ടം ഉന്നതിക്കാർ കാലവർഷത്തിൽ ഒറ്റപ്പെട്ടു; ഇടപെടുമെന്ന് എംഎൽഎ

കൽപ്പറ്റ: കോട്ടത്തറ ഗ്രാമപഞ്ചായത്തിലെ കുളക്കിമൊട്ടം ഉന്നതിയിലേക്കുള്ള റോഡ്, പാലം എന്നിവ തകർന്നതിനെ തുടർന്ന് ടി. സിദ്ദിഖ് എംഎൽഎ സന്ദർശിച്ചു. കോട്ടത്തറ ഗ്രാമപഞ്ചായത്തിലെ ഇരുപതോളം കുടുംബങ്ങൾ താമസിക്കുന്ന ഉന്നതിയാണ് കുളക്കിമൊട്ടം. ഇവരുടെ ഏക ആശ്രയമായിരുന്ന പാലം ഈ കഴിഞ്ഞ ദിവസം ഉണ്ടായ ശക്തമായ മഴയിൽ തകരുകയും തോട് വഴിമാറി ഒഴുകിയതിനാൽ റോഡ് രണ്ടായി പിളർന്ന് ഗതാഗതയോഗ്യമല്ലാതാവുകയും ചെയ്തു. ഗ്രാമപഞ്ചായത്ത് അടിയന്തരമായി ഇവർക്കായി മരപ്പാലം ഒരുക്കിയിട്ടുണ്ട്. റോഡ് ഇടിഞ്ഞതിനാൽ പുഴ ഗതിമാറി ഒഴുകുന്ന സാഹചര്യമാണ്. അത് റോഡിന്‍റെ കൂടുതൽ ഭാഗം ഇടിഞ്ഞു പോകുന്നതിനും ഇടയാക്കി. ഈ സാഹചര്യം തുടർന്നാൽ ഈ കുടുംബങ്ങളെ മാറ്റി പാർപ്പിക്കേണ്ട അവസ്ഥയാണ്. ഐടിഡിപി ജില്ലാ പ്രോഗ്രാം ഓഫീസർ, ജില്ലാ ഭരണകൂടം ഉൾപ്പെടെ ഉള്ളവർ ഈ വിഷയത്തിൽ അടിയന്തരമായി ഇടപെടാൻ ആവശ്യമായ നടപടികൾ സ്വീകരിക്കുമെന്ന് എംഎൽഎ അറിയിച്ചു. ഗ്രാമപഞ്ചായത്ത് പ്രസിഡന്‍റ് പി.പി. റനീഷ്, ബ്ലോക്ക് പഞ്ചായത്ത് അംഗം പി.കെ. അബ്ദുറഹിമാൻ, സി.സി. തങ്കച്ചൻ, മാണി ഫ്രാൻസീസ് എന്നിവരും ഉണ്ടായിരുന്നു.

ജില്ലയിൽ 6,500ലധികം തെരുവുനായകൾ : ബത്തേരിയിൽ എബിസി സെന്‍റർ ഇന്ന് പ്രവർത്തനം തുടങ്ങും

കൽപ്പറ്റ: ജില്ലയിൽ 6,500ൽപരം തെരുവുനായകൾ. ദേശീയ മൃഗസംഖ്യാ കണക്കെടുപ്പിന്‍റെ ഭാഗമായി ജില്ലയിൽ മാർച്ച്, ഏപ്രിൽ മാസങ്ങളിൽ നടത്തിയ നിരീക്ഷണത്തിലാണ് ഇത്രയും തെരുവുനായകളെ കണ്ടതെന്ന് ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ, ബത്തേരി ബ്ലോക്ക് പഞ്ചായത്ത് പ്രസിഡന്‍റ് സി. അസൈനാർ, മൃഗസംരക്ഷണ വകുപ്പ് ഡപ്യൂട്ടി ഡയറക്ടർ ഡോ.സജി ജോസഫ്, ബത്തേരി ബ്ലോക്ക് പഞ്ചായത്ത് വികസനകാര്യ സ്റ്റാൻഡിംഗ് കമ്മിറ്റി ചെയർപേഴസ്ണ്‍ ലത ശശി എന്നിവർ വാർത്താസമ്മേളനത്തിൽ അറിയിച്ചു. ബത്തേരിയിൽ തെരുവുനായ പ്രജനന നിയന്ത്രണ കേന്ദ്രം(എബിസി സെന്‍റർ) ഇന്നും പടിഞ്ഞാറത്തറയിൽ നാല് മാസത്തിനകവും പ്രവർത്തനം തുടങ്ങുമെന്ന് അവർ പറഞ്ഞു. ബത്തേരിയിൽ ബ്ലോക്ക് പഞ്ചായത്തിനു കീഴിൽ വെറ്ററിനറി പോളി ക്ലിനിക് വളപ്പിലാണ് എബിസി സെന്‍റർ പ്രവർത്തിക്കുക. ബത്തേരി മുനിസിപ്പാലിറ്റിയിലെയും ബത്തേരി, പനമരം ബ്ലോക്കുകളിലെ ഒന്പത് പഞ്ചായത്തുകളിലെയും തെരുവുനായകളെ ആണ്‍-പെണ്‍ വ്യത്യാസമില്ലാതെ ഘട്ടങ്ങളായി പിടികൂടി സെന്‍ററിലെത്തിച്ച് വന്ധ്യംകരിക്കും. ചികിത്സയും പേ വിഷബാധയ്ക്കെതിരായ കുത്തിവയ്പ്പും നൽകി ഇവയെ പിടിച്ചെടുത്തുതന്നെ മോചിപ്പിക്കും. നായകളെ തിരിച്ചറിയുന്നതിന് ചെവിയിൽ അടയാളമിടും. തെരുവുനായകളുടെ എണ്ണം നിയന്ത്രിക്കുകയും പൊതുജനാരോഗ്യം സംരക്ഷിക്കുകയുമാണ് എബിസി പദ്ധതി ലക്ഷ്യം. മൃഗസംരക്ഷണ വകുപ്പ് ത്രിതല പഞ്ചായത്തുകളുടെ സഹകരണത്തോടെയാണ് പദ്ധതി പ്രാവർത്തികമാക്കുന്നത്. സംസ്ഥാന സർക്കാരിന്‍റെ 2065/2022 നന്പർ ഉത്തരവ്, മിനിസ്ട്രി ഓഫ് ഫിഷറീസ്, അനിമൽ ഹസ്ബൻഡറി ആൻഡ് ഡയറിയിംഗിന്‍റെ 2022 ലെ അനിമൽ ബർത്ത് കണ്‍ട്രോൾ റൂൾസ് എന്നിവ അടിസ്ഥാനമാക്കിയാണ് എബിസി സെന്‍ററുകളുടെ നിർമാണവും പ്രവർത്തനവും. ബത്തേരിയിൽ ഓപ്പറേഷൻ തിയേറ്റർ, ശസ്ത്രക്രിയയ്ക്ക് നായകളെ തയാറാക്കുന്നതിനുള്ള മുറികൾ, സർജറിക്കുശേഷം അവയെ പരിചരിക്കുന്നതിനു എയർ കണ്ടീഷൻ ചെയ്ത ഷെൽട്ടർ എന്നിവ സജ്ജമാക്കിയിട്ടുണ്ട്. സെന്‍ററിന് അനിമൽ വെൽഫെയർ ബോർഡ് ഓഫ് ഇന്ത്യയുടെ അംഗീകാരം ലഭിച്ചിട്ടുണ്ട്. പടിഞ്ഞാറത്തറ എബിസി സെന്‍ററിന്‍റെ നിർമാണം പൂർത്തിയാക്കി ബോർഡ് അംഗീകാരം നേടാനുള്ള നീക്കം നടന്നുവരികയാണ്. മാനന്തവാടി മുനിസിപ്പാലിറ്റിയും മാനന്തവാടി, കൽപ്പറ്റ ബ്ലോക്കുകളിലെ പഞ്ചായത്തുകളുമാണ് പടിഞ്ഞാറത്തറ സെന്‍ററിനു പരിധിയിൽ വരിക. ഒരു വെറ്ററിനറി സർജൻ, നാല് മൃഗപരിപാലകർ, ഒരു ഓപ്പറേഷൻ തിയേറ്റർ സഹായി, നായ പിടിത്തക്കാർ എന്നിവരടങ്ങുന്ന ടീമാണ് എബിസി കേന്ദ്രത്തിൽ ഉണ്ടാകുക. നായകളെ പാർപ്പിക്കുന്നതിന് ബത്തേരി സെന്‍ററിൽ 69 കൂട് സജ്ജമാക്കിയിട്ടുണ്ട്. ഓരോ തദ്ദേശ ഭരണ സ്ഥാപനവും തെരുവുനായകളുടെ എണ്ണത്തിന് അനുസരിച്ചു പദ്ധതി നടത്തിപ്പിനു വാർഷിക പദ്ധതിയിൽ തുക വകയിരുത്തും. ഒരു നായയെ പിടിച്ച് വന്ധ്യംകരിച്ച് പരിചരണം നൽകുന്നതിന് 1,500 രൂപയാണ് ചെലവ് കണക്കാക്കുന്നത്. നായ ഒന്നിന് 300 രൂപയാണ് പിടിത്തക്കാർക്ക് ലഭിക്കുക. ട്രാൻസ്പോർട്ടേഷന് 200 രൂപയാണ് ചെലവ്. മരുന്നിന് 600 ഉം ആഹാരത്തിന് 400 ഉം രൂപയാണ് ചെലവ് കണക്കാക്കുന്നത്. സ്കൂൾ പരിസരം, മാർക്കറ്റുകൾ, ടൗണുകൾ, ഉന്നതികൾ എന്നിവിടങ്ങളിൽ ചുറ്റിത്തിരിയുന്ന നായകളെയാണ് ആദ്യം പിടികൂടി സെന്‍ററിൽ എത്തിക്കുക. നായകളെ പിടിക്കുന്ന സ്ഥലവും സമയവും അതതു പഞ്ചായത്തുകളെ മുൻകൂട്ടി അറിയിക്കും. പിടിക്കുന്ന നായകളുടെ എണ്ണവും സ്ഥലവും വാർഡ് അംഗം സാക്ഷ്യപെടുത്തും.

പുലി കൊന്ന ആടുകളുടെ ഉടമയ്ക്ക് നഷ്ടപരിഹാരം നൽകി

പുൽപ്പള്ളി: മുള്ളൻകൊല്ലി പഞ്ചായത്തിലെ കബനിഗിരിയിൽ പുലി കൊന്ന മൂന്നു ആടുകളുടെ ഉടമ പി.എ. ജോയിക്ക് വനം വകുപ്പ് നഷ്ടപരിഹാരം നൽകി. 75,000 രൂപയുടെ ചെക്ക് മുള്ളൻകൊല്ലി പഞ്ചായത്ത് പ്രസിഡന്‍റ് പി.കെ. വിജയന്‍റെ സാന്നിധ്യത്തിൽ ചെതലത്ത് റേഞ്ച് ഫോറസ്റ്റ് ഓഫീസർ എം.കെ. രാജീവ് കുമാർ കൈമാറി. വാർഡ് അംഗം അമ്മിണി സന്തോഷ്, വനം ഉദ്യോഗസ്ഥരായ പി.യു. സുരേന്ദ്രൻ, താരാനാഥ്, ശ്രീജിത്, രവീന്ദ്രൻ, ശിവൻ എന്നിവർ സന്നിഹിതരായിരുന്നു.

ഒ.എൻ.വി അനുസ്മരണസദസ് സംഘടിപ്പിച്ചു

മീനങ്ങാടി: പഞ്ചായത്തിന്‍റെ നേതൃത്വത്തിൽ രൂപീകരിച്ച സകലകലാ സാംസ്കാരിക വേദിയുടെ നേതൃത്വത്തിൽ ഒ.എൻ.വി അനുസ്മരണസദസ് സംഘടിപ്പിച്ചു. ചലച്ചിത്ര നിരൂപകനും എഴുത്തുകാരനുമായ ഒ.കെ. ജോണി ഉദ്ഘാടനം ചെയ്തു. എഴുത്തുകാരും കലാകാരൻമാരും ദന്തഗോപുരങ്ങളിൽ കഴിയേണ്ടവരല്ലെന്നും സമൂഹത്തിന്‍റെ അടിത്തട്ടിലുള്ള ശബ്ദമില്ലാത്ത മനുഷ്യരുടെ ശബ്ദമായി മാറേണ്ടവരാണെന്നും അദ്ദേഹം പറഞ്ഞു. കുഞ്ചൻനന്പ്യാർക്കും ചങ്ങന്പുഴയ്ക്കും ശേഷം മലയാളത്തിലുണ്ടായ ഏറ്റവും ശക്തനായ ജനകീയ കവിയാണ് ഒ.എൻ.വി കുറുപ്പ്. അദ്ദേഹത്തിന്‍റെ രചനകൾ കാലത്തെ അതിജീവിക്കുന്നത് അത് സാധാരണമനുഷ്യരുടെ വികാരവിചാരങ്ങൾ ഉൾക്കൊണ്ടതുകൊണ്ടാണെന്ന് ജോണി പറഞ്ഞു. പഞ്ചായത്ത് പ്രസിഡന്‍റ് കെ.ഇ. വിനയൻ അധ്യക്ഷത വഹിച്ചു. വൈസ് പ്രസിഡന്‍റ് കെ.പി. നുസ്റത്ത് വേദി ലോഗോ പ്രകാശനം ചെയ്തു. ബേബി വർഗീസ്, ഉഷ രാജേന്ദ്രൻ, ജോയ് പാലക്കമൂല, സുമി മീനങ്ങാടി, ജോയ് ഐക്കരക്കുടി, സാബു സേവ്യർ, കെ.കെ. മോഹൻദാസ്, എൻ.ആർ. പ്രിയ എന്നിവർ പ്രസംഗിച്ചു. ഡോ. ബാവ കെ. പാലുകുന്ന് സ്വാഗതവും റീമ പപ്പൻ നന്ദിയും പറഞ്ഞു. ഒ.എൻ.വിയുടെ ഗാനങ്ങളും കവിതകളും കോർത്തൊരുക്കിയ കാവ്യസായാഹ്നം നടത്തി.

നിയമസഭ സമിതി ലോക്കൽ ഫണ്ട് അക്കൗണ്ട്സ് കമ്മിറ്റി സിറ്റിംഗ് നടത്തി

കൽപ്പറ്റ: നിയമസഭ സമിതി ജില്ലയിൽ ലോക്കൽ ഫണ്ട് അക്കൗണ്ട്സ് കമ്മിറ്റി സിറ്റിംഗ് നടത്തി. ലോക്കൽ ഫണ്ട് അക്കൗണ്ട്സ് കമ്മിറ്റി ചെയർമാനും പേരാന്പ്ര നിയോജക മണ്ഡലം എംഎൽഎയുമായ ടി.പി. രാമകൃഷ്ണന്‍റെ അധ്യക്ഷതയിൽ കളക്ടറേറ്റ് എ.പി.ജെ ഹാളിൽ ചേർന്ന യോഗത്തിൽ ജില്ലയിലെ ഗ്രാമപഞ്ചായത്തുകളുടെയും നഗരസഭകളുടെയും വികസന നിർമാണ പ്രവർത്തനങ്ങളുമായി ബന്ധപ്പെട്ട അപാകതകൾ പരിശോധിക്കുകയും പരിഹാരം നിർദേശിക്കുകയും ചെയ്തു. നടപടികൾ ഉദ്യോഗസ്ഥർ സത്യസന്ധതയോടെയും സഹകരണമനോഭാവത്തോടെയും സ്വീകരിക്കണമെന്ന് ടി.പി. രാമകൃഷ്ണൻ പറഞ്ഞു. മൃഗ സംരക്ഷണ/ക്ഷീര വികസന മേഖലയുടെ പുരോഗതി, അനധികൃത നിർമാണ പ്രവർത്തനങ്ങൾ, നികുതി നിർണയത്തിലെ അപാകതക തുടങ്ങി തദ്ദേശ സ്വയംഭരണ സ്ഥാപനങ്ങളുടെ പദ്ധതി ആസൂത്രണവുമായി ബന്ധപ്പെട്ട വിവിധ വിഷയങ്ങൾ യോഗത്തിൽ ചർച്ച ചെയ്തു. ജില്ലയുടെ പൊതുവികസനത്തിന് സഹായകരമായ നിലപാടുകൾ ശക്തിപ്പെടുത്താൻ ആവശ്യമായ നിർദേശങ്ങൾ സമിതി മുന്നോട്ടുവച്ചു. വിനോദസഞ്ചാരത്തിന്‍റെ മറവിൽ നടത്തുന്ന ഒറ്റപ്പെട്ട നിയമ വിരുദ്ധ പ്രവർത്തനങ്ങൾ തടയുന്നതിന് ആവശ്യമായ നിലപാട് സ്വീകരിക്കുന്നതിനും കമ്മിറ്റിയിൽ ധാരണയായി. ലോക്കൽ ഫണ്ട് അക്കൗണ്ട്സ് കമ്മിറ്റിയിൽ 2014 മുതൽ 2024 വരെയുള്ള സമാഹൃത ഓഡിറ്റ് റിപ്പോർട്ടുകളിൽ ജില്ലയുമായി ബന്ധപ്പെട്ട ഓഡിറ്റ് പരാമർശങ്ങളുടെ തൽസ്ഥിതി വിവരങ്ങൾ പരിശോധിച്ചു. നിയമസഭ സമിതി അംഗങ്ങളായ, കോട്ടക്കൽ എംഎൽഎ പ്രഫ. ആബിദ് ഹുസൈൻ തങ്ങൾ, കുറ്റ്യാടി എംഎൽഎ കെ.പി. കുഞ്ഞമ്മദ് കുട്ടി, എഡിഎം കെ. ദേവകി, സെക്ഷൻ ഓഫീസർ ടി. സിന്ധു, സംസ്ഥാന ലോക്കൽ ഫണ്ട് ഓഡിറ്റ് ഡയറക്ടർ കെ.ജി. മിനിമോൾ, എൽഎസ്ജിഡി ജോയിന്‍റ് ഡയറക്ടർ ത്രേസ്യാമ്മ ആന്‍റണി, അഡീഷണൽ ഡയറക്ടർ എം ജെ ബിജുക്കുട്ടൻ, ഫിനാൻസ് ജോയിന്‍റ് സെക്രട്ടറി മനോജ് കുമാർ, എൽഎസ്ജിഡി ഡെപ്യൂട്ടി ഡയറക്ടർ സജി തോമസ്, അസിസ്റ്റന്‍റ് ഡയറക്ടർ ജോമോൻ ജോർജ്, ജൂണിയർ സൂപ്രണ്ട് സി. പ്രമോദ്, ഓഡിറ്റ് സെക്ഷൻ അസിസ്റ്റന്‍റ് കെ.എസ്. സനുജ എന്നിവർ നേതൃത്വം വഹിച്ചു. ജില്ലയിലെ 31 തദ്ദേശസ്വയംഭരണ സ്ഥാപനങ്ങളുടെ സെക്രട്ടറിമാർ, ക്ഷീര വികസന ഓഫീസർ, ആർആർ ഡെപ്യൂട്ടി കളക്ടർ, ആർആർ തഹസിൽദാർ, പട്ടികജാതി/വകുപ്പ് ഓഫീസർമാർ, ലൈഫ് മിഷൻ കോർഡിനേറ്റർ, ജില്ല മൃഗസംരക്ഷണ വകുപ്പ് ഓഫീസർ എന്നിവരും പങ്കെടുത്തു.

എം.പി. വീരേന്ദ്രകുമാർ അനുസ്മരണം നടത്തി

കൽപ്പറ്റ: സോഷ്യലിസ്റ്റ് സ്റ്റഡി സെന്‍റർ സംസ്ഥാന സമിതി സംഘടിപ്പിച്ച എം.പി. വീരേന്ദ്രകുമാർ അഞ്ചാം ചരമവാർഷിക അനുസ്മരണം സംസ്ഥാന പ്രസിഡന്‍റ് ബി. രാധാകൃഷ്ണപിള്ള ഉദ്ഘാടനം ചെയ്തു. സോഷ്യലിസത്തിൽ ഊന്നിയ രാഷ്ട്രീയ സാമൂഹിക സാംസ്കാരിക ഇടപെടലുകളിലൂടെ മലയാളിയെ സ്വാധീനിച്ച അപൂർവ പ്രതിഭകളിൽ ഒരാളാണ് വീരേന്ദ്രകുമാർ എന്ന് സമ്മേളനം അഭിപ്രായപ്പെട്ടു. ഏച്ചോം ഗോപി അധ്യക്ഷത വഹിച്ചു. റസാക്ക് കൽപ്പറ്റ മുഖ്യപ്രഭാഷണം നടത്തി. എ.പി. വാസുദേവൻ നായർ, ചീക്കല്ലൂർ ഉണ്ണികൃഷ്ണൻ, വി. മഹേഷ്, രണരാജൻ, പി.എം.കെ. നന്പ്യാർ, എൽ.വി. സുരേഷ്, റോബർട്ട് കോട്ടായി, പോൾ ചെറുകാട്ടൂർ, നിസാർ പള്ളിമുക്ക്, കെ. സുബൈർ, സി.പി. അഷ്റഫ് എന്നിവർ പ്രസംഗിച്ചു. കരുണാകരൻ ചെറുകരയുടെ നിര്യാണത്തിൽ യോഗം അനുശോചനം രേഖപ്പെടുത്തി.

ഇടിഞ്ഞ ചുറ്റുമതിൽ ദേഹത്തുവീണ് മൂന്ന് ഇതര സംസ്ഥാന തൊഴിലാളികൾക്ക് പരിക്ക്

സുൽത്താൻ ബത്തേരി: ഇടിഞ്ഞ ചുറ്റുമതിൽ ദേഹത്തുവീണ് മൂന്ന് ഇതര സംസ്ഥാന തൊഴിലാളികൾക്ക് പരിക്കേറ്റു. ബ്ലോക്ക് ഓഫീസിന് സമീപം പട്ടരുപടിയിൽ ഇന്നലെ ഉച്ചയോടെയാണ് സംഭവം. പശ്ചിമ ബംഗാൾ സ്വദേശികളായ രഞ്ജൻ വർമ(35),ധ്വജൻ അധികാരി(35), ഓമിത്ത് വർമ(32)എന്നിവർക്കാണ് പരിക്കേറ്റത്. അഗ്നി-രക്ഷാസേനയും പോലീസും ചേർന്നാണ് ഇവരെ രക്ഷപ്പെടുത്തി താലൂക്ക് ഗവ.ആശുപത്രിയിൽ പ്രവേശിപ്പിച്ചത്. സ്വകാര്യ വ്യക്തിയുടെ കെട്ടിടത്തിന് ചുറ്റുമതിൽ നിർമിക്കാൻ മണ്ണ് നീക്കുന്നതിനിടെ സമീപവാസിയുടെ ചുറ്റുമതിലാണ് ഇടിഞ്ഞത്.

മഴക്കാലപൂർവ രോഗങ്ങൾ: ജാഗ്രതയിൽ ആരോഗ്യ വകുപ്പ്

കൽപ്പറ്റ: മഴക്കാലപൂർവ രോഗങ്ങൾക്കെതിരേ ജാഗ്രതയുമായി ആരോഗ്യ വകുപ്പ്. ഡെങ്കിപ്പനി, എലിപ്പനി, വയറിളക്കം, കോളറ, മഞ്ഞപ്പിത്തം തുടങ്ങിയ ജലജന്യ രോഗങ്ങൾക്കെതിരായ പ്രതിരോധ പ്രവർത്തനങ്ങൾക്ക് കൂട്ടായ പ്രവർത്തനം വേണമെന്ന് ജില്ലാ മെഡിക്കൽ ഓഫീസർ(ആരോഗ്യം)അറിയിച്ചു. ചെള്ളുപനി (സ്ക്രബ് ടൈഫസ്), എച്ച്1 എൻ1 (പന്നിപ്പനി), സാധാരണ പനി, ശ്വാസകോശ രോഗങ്ങൾ തുടങ്ങിയവ മഴക്കാലങ്ങളിൽ വർധിക്കാൻ സാധ്യതയുണ്ട്. ഡെങ്കിപ്പനി പരത്തുന്ന ഈഡിസ് കൊതുകുകൾ മുട്ടയിട്ട് പെരുകുന്നതു തടയാൻ വീട്ടിലും സ്ഥാപനങ്ങളുടെ പരിസരത്തും വലിച്ചെറിയുന്ന പാത്രങ്ങൾ, കുപ്പികൾ, ചിരട്ടകൾ, വീടിന്‍റെ സണ്‍ഷെയ്ഡുകൾ, വെള്ളം കെട്ടിനിൽക്കാൻ സാധ്യതയുള്ള പ്രതലങ്ങൾ, ടയറുകൾ, ചെടിച്ചട്ടികൾ, പ്ലാസ്റ്റിക് വസ്തുക്കൾ, മുട്ടത്തോട്, മറ്റ് പാഴ് വസ്തുക്കൾ എന്നിവയിൽ വെള്ളം കെട്ടിക്കിടക്കുന്നില്ലെന്ന് ഉറപ്പാക്കണം. ഇൻഡോർ ചെടികൾ, ഫ്രിഡ്ജിന്‍റെ ട്രേ, മേൽക്കൂരകൾ, ടാങ്കുകൾ തുടങ്ങിയവ വൃത്തിയാക്കണം. ആഴ്ചയിലൊരിക്കൽ ഡ്രൈ ഡേ ആചരിക്കുന്നത് കൊതുകുനശീകരണത്തിന് ഏറെ സഹായകമാണ്. സ്കൂളുകളിൽ വെള്ളിയാഴ്ചയും സ്ഥാപനങ്ങളിൽ ശനിയാഴ്ചയും വീടുകളിൽ ഞായറാഴ്ചയും ഡ്രൈ ഡേ ആചരിക്കാൻ ആരോഗ്യവകുപ്പ് നിർദേശിച്ചു. വയലുകളിലും തോടുകളിലും മലിനജലത്തിലും ജോലി ചെയ്യുന്നവർക്ക് എലിപ്പനി പകരാൻ സാധ്യതയുള്ളതിനാൽ ഡോക്സിസൈക്ലിൻ പ്രതിരോധ മരുന്ന് മുൻകൂട്ടി കഴിക്കാൻ ശ്രദ്ധിക്കണമെന്നും നിർദേശിച്ചു. ജലസ്രോതസുകൾ മലിനമാകാൻ സാധ്യതയുള്ളതിനാൽ വയറിളക്കം, ടൈഫോയ്ഡ്, കോളറ, മഞ്ഞപ്പിത്തം തുടങ്ങിയ ജലജന്യ രോഗങ്ങൾ തടയാൻ തിളപ്പിച്ചാറിയ വെള്ളം കുടിക്കണം. ജലസ്രോതസുകൾ ക്ലോറിനേറ്റ് ചെയ്യണം. പാകം ചെയ്ത് ഭക്ഷണത്തിൽ ശുചിത്വം പാലിക്കുക. രോഗലക്ഷണങ്ങൾ ശ്രദ്ധയിൽപ്പെട്ടാൽ സ്വയം ചികിത്സിക്കാതെ ആരോഗ്യ കേന്ദ്രത്തിലെത്തി വിദഗ്ധ ചികിത്സ നേടണം.

വയനാട്ടിൽ മഴയുടെ ശക്തിക്കു ശമനം

കൽപ്പറ്റ: ജില്ലയിൽ മഴയുടെ ശക്തിക്കു ശമനം. കഴിഞ്ഞ ദിവസങ്ങളെ അപേക്ഷിച്ച് ഇന്നലെ പകൽ മഴ കോരിച്ചൊരിഞ്ഞില്ല. കേന്ദ്ര കാലാവസ്ഥാ നിരീക്ഷണ വകുപ്പ് ഇന്ന് ജില്ലയിൽ ഓറഞ്ച് അലർട്ട് പ്രഖ്യാപിച്ചിട്ടുണ്ട്. ഇന്നലെ രാവിലെ എട്ടിന് അവസാനിച്ച 24 മണിക്കൂറിൽ വൈത്തിരി പഞ്ചായത്തിലെ ലക്കിടിയിലാണ് കൂടുതൽ മഴ ലഭിച്ചത്-183 മില്ലിമീറ്റർ. പടിഞ്ഞാറത്തറ അത്തിക്കലിൽ 156 മില്ലി മീറ്റർ മഴ രേഖപ്പെടുത്തി. മാനന്തവാടി എടവക പാണ്ടിക്കടവിൽ 114.2 മില്ലി മീറ്റർ മഴ പെയ്തു. മുള്ളൻകൊല്ലി പെരിക്കല്ലൂരിൽ 30.6 എംഎം മഴ ലഭിച്ചു. പുൽപ്പള്ളി ചേകാടിയിൽ 94 എംഎം മഴ രേഖപ്പെടുത്തി. വെങ്ങപ്പള്ളി മാടക്കുന്നിൽ 98 എംഎം മഴ ലഭിച്ചു. മുത്തങ്ങ, പഴേരി ഭാഗങ്ങളിലാണ് കുറവ് മഴ ലഭിച്ചത്. 16 മില്ലി മീറ്റർ മഴയാണ് പ്രദേശത്ത് രേഖപ്പെടുത്തിയത്. മേപ്പാടി, വൈത്തിരി, പൊഴുതന, തരിയോട്, പടിഞ്ഞാറത്തറ, വെള്ളമുണ്ട, തൊണ്ടർനാട്, തിരുനെല്ലി പടിഞ്ഞാറുഭാഗം, പൂതാടി, ബത്തേരി, മീനങ്ങാടി തുടങ്ങിയ സ്ഥലങ്ങളിൽ ഇന്നലെ ഭേദപ്പെട്ട അളവിൽ മഴ കിട്ടി. ജില്ലയിൽ നിറഞ്ഞൊഴുകുന്ന പുഴകളും തോടുകളും അങ്ങിങ്ങ് കരകവിഞ്ഞു. ഇത് വലിയ തോതിൽ കൃഷിനാശത്തിനു കാരണമാകുന്നുണ്ട്. വാഴ, നെല്ല് കൃഷികളാണ് നശിച്ചതിൽ അധികവും. തരിയോടിനു സമീപം കരിവേപ്പിൽ ജോണിന്‍റെ 1,200 വാഴ കാറ്റിലും മഴയിലും വീണു. മാനന്തവാടി താലൂക്കിൽ ഒരു വീട് പൂർണമായും 13 വീട് ഭാഗികമായും തകർന്നു. 18 ദുരിതാശ്വാസ ക്യാന്പുകളിൽ 710 പേർ കൽപ്പറ്റ: കാലവർഷം ശക്തമായതിനെത്തുടർന്ന് ജില്ലയിൽ ആരംഭിച്ച 18 ദുരിതാശ്വാസക്യാന്പുകളിലായി 202 കുടുംബങ്ങളിലെ 710 പേരെ മാറ്റിപ്പാർപ്പിച്ചു. 236 പുരുഷൻമാരും 283 സ്ത്രീകളും 191 കുട്ടികളും 40 വയോജനങ്ങളും ആറ് ഭിന്നശേഷിക്കാരുമാണ് ക്യാന്പുകളിലുള്ളത്. വൈത്തിരി, സുൽത്താൻ ബത്തേരി താലൂക്കുകളിൽ എട്ടുവീതവും മാനന്തവാടി താലൂക്കിൽ രണ്ടും ക്യാന്പുകളാണ് ആരംഭിച്ചത്.

കുറിച്യർമലയിലെ വെള്ളക്കെട്ട് തുറന്നുവിട്ടു

കൽപ്പറ്റ: 2018ൽ ഉരുൾപൊട്ടലുണ്ടായ കുറിച്യർമലയിൽ രൂപപ്പെട്ട വെള്ളക്കെട്ട് വനസേനാംഗങ്ങൾ തുറന്നുവിട്ടു. വലിയ കുളത്തിനു സമാനമായ രീതിയിലാണ് മലമുകളിൽ വെള്ളം കെട്ടിനിന്നത്. വെള്ളക്കെട്ട് നിറഞ്ഞൊഴുകി മണ്ണിടിച്ചിൽ ഉണ്ടാകാനുള്ള സാധ്യത കണക്കിലെടുത്താണ് ചാലുകീറി വെള്ളം മറ്റൊരു ഭാഗത്തേക്ക് തുറന്നു വിട്ടത്. മുൻവർഷങ്ങളിലും ഇതേരീതിയിൽ വെള്ളം തുറന്നുവിട്ടിരുന്നു. റേഞ്ച് ഫോറസ്റ്റ് ഓഫീസർ കെ. ഹാഷിഫ്, എസ്എഫ്ഒ എൻ.ആർ. കേളു, ബിഎഫ്ഒ മാരായ ടി.പി. മിനു, കെ. അനിൽകുമാർ, സി.സി. ശ്യാംകുമാർ, എം. സാജൻ, എം. സുഭാഷ്, നാട്ടുകാരായ ആരിഫ് സെറ്റുകുന്ന്, അബൂബക്കർ ആറാംമൈൽ എന്നിവരടങ്ങുന്ന സംഘമാണ് മണിക്കൂറുകൾ നീണ്ട പരിശ്രമത്തിലൂടെ വെള്ളക്കെട്ട് തുറന്നുവിട്ടത്. ജില്ലാ കളക്ടറുടെ നിർദേശപ്രകാരം ജിയോളജിസ്റ്റ് ഷെൽജുവിന്‍റെ നേത്രത്തിലുള്ള സംഘം സ്ഥലം പരിശോധിച്ചു.

മുട്ടിൽ ഈട്ടിമുറി: 31 കേസുകളിൽ കെഎൽസി നടപടികൾ എങ്ങുമെത്തിയില്ല

കൽപ്പറ്റ: മുട്ടിൽ സൗത്ത് വില്ലേജിലെ റവന്യു പട്ടയഭൂമികളിൽ 2020-2021ൽ നടന്ന അനധികൃത ഈട്ടി മുറിയുമായി ബന്ധപ്പെട്ട കേസുകളിൽ 31 എണ്ണത്തിൽ കെഎൽസി(കേരള ലാൻഡ് കണ്‍സർവൻസി) നടപടികൾ എങ്ങുമെത്തിയില്ല. തീർപ്പാക്കിയ 37 കേസുകളിൽ കണക്കാക്കിയ പിഴ കക്ഷികളിൽ ആരും അടച്ചില്ല. ജില്ലാ ഗവ.പ്ലീഡറും പ്രോസിക്യൂട്ടറുമായിരുന്ന അഡ്വ.ജോസഫ് മാത്യുവിന് വിവരാവകാശ നിയമപ്രകാരം വൈത്തിരി തഹസിൽദാരുടെ കാര്യാലയത്തിൽനിന്നു ലഭിച്ച മറുപടിയിലാണ് ഈ വിവരം. നിയമവിരുദ്ധ ഈട്ടിമുറിയുമായി ബന്ധപ്പെട്ട് 68 കേസുകളാണ് കെഎൽസി നടപടിക്കു വിട്ടത്. ഇതിൽ 37 എണ്ണത്തിൽ 8.29 കോടി രൂപയാണ് പിഴ കണക്കാക്കിയത്. ബാക്കി കേസുകൾ എപ്പോൾ തീർപ്പാക്കുമെന്നതിൽ അനിശ്ചിതത്വം തുടരുകയാണ്. 2021 ഫെബ്രുവരിയിൽ ആരംഭിച്ചതാണ് കെഎൽസി നടപടികൾ. മുട്ടിൽ സൗത്ത് വില്ലേജിൽ റവന്യു പട്ടയഭൂമികളിൽനിന്നു മുറിച്ച മരങ്ങൾ 2021 ജൂണിലാണ് വനം വകുപ്പ് കസ്റ്റഡിയിലെടുത്ത് കുപ്പാടി ഡിപ്പോയിലേക്ക് മാറ്റിയത്. 231 ക്യുബിക് മീറ്റർ ഈട്ടിയാണ് ഡിപ്പോയിലുള്ളത്. ഓരോ വർഷം കഴിയുന്പോഴും തടികളുടെ ഗുണനിലവാരം കുറയുകയാണ്. ഇപ്പോഴത്തെ ചീഫ് സെക്രട്ടറി ഡോ.എ. ജയതിലക് റവന്യു സെക്രട്ടറിയായിരിക്കേ 2020 ഒക്ടോബർ 24ന് പുറപ്പെടുവിച്ച ഉത്തരവിന്‍റെ മറവിലാണ് പൊതുഖജനാവിന് കോടിക്കണക്കിനു രൂപ നഷ്ടം വരുത്തിയ ഈട്ടിമുറി നടന്നത്. റവന്യു പട്ടയഭൂമികളിലെ മരങ്ങൾ പൊതുമുതലായി സംരക്ഷിച്ചുവന്നതും 2020 ഓഗസ്റ്റ് 21ലെ ഹൈക്കോടതി ഉത്തരവ് പ്രകാരം മുറിക്കാൻ അനുമതി ഇല്ലാത്തതുമാണ്. റവന്യു വകുപ്പിന്‍റെ 2020 മാർച്ച് 11ലെ പരിപത്രവും 2020 ഒക്ടോബർ 24ലെ ഉത്തരവും നിയമപ്രാബല്യം ഇല്ലാത്തതാണെന്നു 2021 ജൂലൈയിൽ മരംമുറിക്കേസിലെ പ്രതികളിൽ ചിലരുടെ ജാമ്യാപേക്ഷ പരിഗണിക്കുന്നതിനിടെ ഹൈക്കോടതി വ്യക്തമാക്കിയിരുന്നു. കുപ്പാടി വനം ഡിപ്പോയിൽ സൂക്ഷിച്ചിരിക്കുന്ന ഈട്ടിത്തടികൾ ലേലം ചെയ്യുന്നതിനു അനുവാദം തേടി സൗത്ത് വയനാട് ഡിഎഫ്ഒ സമർപ്പിച്ച ഹർജിയും തടികളുടെ സംരക്ഷണച്ചുമതല ലഭിക്കുന്നതിന് മരംമുറിക്കേസിലെ പ്രതികളിൽ ചിലർ സമർപ്പിച്ച ഹർജിയും വീണ്ടും പരിഗണിക്കുന്നതിന് ജൂണ്‍ ഏഴിലേക്ക് ജില്ലാ അഡീഷണൽ സെഷൻസ് കോടതി മാറ്റിയിരിക്കയാണ്. ഹർജികളിൽ കക്ഷികൾ താത്പര്യം കാട്ടാത്ത സ്ഥിതിയാണുള്ളത്. തടികളുടെ സംരക്ഷണച്ചുമതല വിട്ടുകിട്ടുന്നതിനുള്ള ഹർജിക്ക് ഏകദേശം മൂന്നു വർഷമാണ് പഴക്കം. തടികളുടെ സംരക്ഷണം മുൻനിർത്തി 2023 ജനുവരി ആറിന് ജില്ലാ കോടതി നൽകിയ നിർദേശങ്ങൾ വനം വകുപ്പ് പാലിച്ചിട്ടില്ല. തടികൾ മേൽക്കൂരയുള്ള ഷെഡിൽ നിലത്തുനിന്നു മതിയായ ഉയരത്തിൽ വെയിലോ മഴയോ ഈർപ്പമോ തട്ടാതെ കേസ് തീർപ്പാകുന്നതുവരെസൂക്ഷിക്കണമെന്നായിരുന്നു കോടതി നിർദേശം. ഈട്ടിമുറിയുമായി ബന്ധപ്പെട്ട് വനം വകുപ്പ് രജിസ്റ്റർ ചെയ്ത ഒആർ 01/2021 മുതൽ 43/2021 വരെയുള്ള കേസുകളിൽ കുറ്റപത്ര സമർപ്പണം നടന്നിട്ടില്ല. കേസുകളിൽ ഉൾപ്പെടെ മുഴുവൻ തടികളും വനം വകുപ്പ് കസ്റ്റഡിയിൽ എടുത്തിട്ടില്ല. തടികളുടെ കണ്ടുകെട്ടൽ പൂർത്തിയായില്ല. കണ്ടുകെട്ടൽ നടപടികൾക്കെതിരേ കോടതിയിലുള്ള കേസുകൾ അനിശ്ചിതമായി നീളുകയാണ്. പോലീസ് കേസുകളിൽ 25 ഓളം എണ്ണത്തിൽ കുറ്റപത്രം സമർപ്പിക്കാനുണ്ട്. ഇതിനകം 22 കേസുകളിലാണ് കുറ്റപത്ര സമർപ്പണം നടന്നത്. ഈട്ടി മുറിയിൽ തുടരന്വേഷണം സ്പെഷൽ പബ്ലിക് പ്രോസിക്യൂട്ടർ ശിപാർശ ചെയ്തത് ക്രൈംബ്രാഞ്ച് തള്ളുകയാണുണ്ടായത്.

കാലവർഷക്കെടുതി: ജില്ലയിൽ 242.74 ഹെക്ടറിൽ കൃഷിനാശം

കൽപ്പറ്റ: ജില്ലയിൽ ഈ മാസം 24 മുതൽ ആരംഭിച്ച മഴ ശക്തി പ്രാപിച്ചതോടെ വിവിധ സ്ഥലങ്ങളിലായി 242.74 ഹെക്ടറുകളിലെ കൃഷി വിളകൾക്ക് നാശനഷ്ടം. വൈത്തിരി, പനമരം, മാനന്തവാടി, സുൽത്താൻ ബത്തേരി ബ്ലോക്കുകളിലെ 2,259 കർഷകർക്കാണ് കൃഷി നാശം നേരിടേണ്ടിവന്നത്. 2199.35 ലക്ഷം രൂപയുടെ നഷ്ടമാണ് ജില്ലയിൽ ഇതുവരെ സംഭവിച്ചത്. ഏറ്റവും കൂടുതൽ നാശം സംഭവിച്ചത് വാഴ കൃഷിക്കാണ്. 3,53,850 കുലച്ച വാഴകൾ പൂർണമായി നശിച്ചതായാണ് പ്രാഥമിക കണക്കുകൾ. 92 ഹെക്ടർ സ്ഥലത്തെ നെൽകൃഷിയും പൂർണമായി നശിച്ചു. ശക്തമായ മഴയും വെള്ളപ്പൊക്കവും കാറ്റുമാണ് കൃഷി മേഖലയിൽ വ്യപക നാശനഷ്ടം സംഭവിക്കാൻ കാരണമായത്. മഴ തുടരുന്ന സാഹചര്യത്തിൽ കൃഷിനാശം നേരിട്ട കർഷകർ 24 മണിക്കൂറിനകം നാശനഷ്ടത്തിന്‍റെ കണക്ക് ബന്ധപ്പെട്ട കൃഷി ഉദ്യോഗസ്ഥരെ അറിയിക്കണം. ശേഷം 10 ദിവസത്തിനകം ആവശ്യമായ രേഖകളും കൃഷി നഷ്ടത്തിന്‍റെ ഫോട്ടോയും സഹിതം അക്ഷയ കേന്ദ്രങ്ങളിലെത്തി ഓണ്‍ലൈനായി അപേക്ഷ നൽകണം. ഇൻഷ്വർ ചെയ്ത വിളകൾക്ക് കാലവർഷക്കെടുതിയിലെ നഷ്ടപരിഹാരത്തിന് പുറമേ വിള ഇൻഷ്വറൻസ് ആനുകൂല്യം ലഭിക്കും. ഇതിനായി വിളനാശം സംഭവിച്ച് 15 ദിവസത്തിനകം ഓണ്‍ലൈനായി അപേക്ഷ നൽകാം. പ്രകൃതിക്ഷോഭവുമായി ബന്ധപ്പെട്ട് ജില്ലയിൽ പ്രവർത്തിക്കുന്ന കണ്‍ട്രോൾ റൂമുകളിലും കർഷകർക്ക് ബന്ധപ്പെടാം ഫോണ്‍: 9495012353, 9383471912.

മണ്ണിടിച്ചിൽ: പനമരം ചെറിയപാലത്തിൽ ഗതാഗതം നിരോധിച്ചു

പനമരം: കനത്ത മഴയിൽ സംരക്ഷണ മതിലിന്‍റെ ഭാഗം ഉൾപ്പെടെ ഇടിഞ്ഞതിനെത്തുടർന്ന് നടവയൽ റോഡിലെ ചെറിയപാലത്തിൽ ഗതാഗതം നിരോധിച്ചു. തിങ്കളാഴ്ച സന്ധ്യയോടെയാണ് മണ്ണിടിച്ചിൽ പ്രദേശവാസികളുടെ ശ്രദ്ധയിൽപ്പെട്ടത്. വിവരം അറിഞ്ഞ അധികാരികൾ പാലത്തിൽ ഗതാഗതം നിരോധിക്കുകയായിരുന്നു. വർഷങ്ങൾ പഴക്കമുള്ള ചെറിയപാലം ദുർബലമാണ്. പുതിയ പാലത്തിന്‍റെ പണി നടന്നുവരികയാണ്. പാലത്തിൽ ഗതാഗതം തടഞ്ഞതിനെത്തുടർന്നു ബത്തേരി, പുൽപ്പള്ളി, ദാസനക്കര ഭാഗങ്ങളിലിൽനിന്നു പനമരത്തേക്കും തിരിച്ചുമുള്ള ബസുകൾ ഉൾപ്പെടെ വാഹനങ്ങൾ പച്ചിലക്കാട്, കൂടോത്തുമ്മൽ, കാവടം വഴിയാണ് ഓടുന്നത്.

പണ്ഡിറ്റ് ജവാഹർലാൽ നെഹ്രു അനുസ്മരണം നടത്തി

കൽപ്പറ്റ: ഇന്ത്യയുടെ പ്രഥമ പ്രധാനമന്ത്രിയും നവഭാരത ശിൽപിയുമായ പണ്ഡിറ്റ് ജവാഹർലാൽ നെഹ്രുവിന്‍റെ 61-ാം ചരമവാർഷികദിനത്തോടനുബന്ധിച്ച് വയനാട് ഡിസിസിയിൽ അനുസ്മരണം നടത്തി. ഇന്ത്യയുടെ സ്വാതന്ത്ര്യസമരത്തിന്‍റെ മുൻനിര പോരാളിയും ബ്രിട്ടീഷുകാരോട് പടപൊരുതി പലതവണ ജയിൽവാസം അനുഭവിച്ച നേതാവായിരുന്നു നെഹ്റു. ദീർഘകാലം കോണ്‍ഗ്രസ് പ്രസിഡന്‍റും സ്വാതന്ത്രലബ്ധിക്ക് ശേഷമുള്ള 17 വർഷക്കാലം ഇന്ത്യയുടെ പ്രധാനമന്ത്രിയുമായിരുന്ന അദ്ദേഹം ഈ രാജ്യത്തിന് നൽകിയ സംഭാവനകൾ മറക്കാൻ കഴിയില്ലെന്നും ശിശുക്കളെ എന്നും നെഞ്ചോട് ചേർത്ത് നിർത്തി ഒരു തലമുറയെതന്നെ പൂർണ രാജ്യസ്നേഹമുള്ളവരാക്കി വളർത്തിയെടുത്ത രാജ്യം കണ്ട ഏറ്റവും മികച്ച പ്രധാനമന്ത്രിയായിരുന്നു ജവഹർ ലാൽ നെഹ്രു എന്നും ഡിസിസി പ്രസിഡന്‍റ് എൻ.ഡി. അപ്പച്ചൻ അനുസ്മരിച്ചു. യോഗത്തിൽ പി.പി. ആലി, കെ.വി. പോക്കർ ഹാജി, ഒ.വി. അപ്പച്ചൻ, വിജയമ്മ, ശോഭനകുമാരി, പോൾസണ്‍ കൂവക്കൽ, ഷാജി വട്ടത്തറ, അരുണ്‍ രവീന്ദ്രൻ എന്നിവർ പ്രസംഗിച്ചു.

വയനാട് പുസ്തകോത്സവം ആരംഭിച്ചു

കൽപ്പറ്റ: ജില്ലാ ലൈബ്രറി കൗണ്‍സിൽ വികസനസമിതി സംഘടിപ്പിക്കുന്ന ന്ധപുസ്തകോത്സവംന്ധ പുളിയാർമല കൃഷ്ണ ഗൗഡർ ഹാളിൽ സാഹിത്യകാരി ഷീല ടോമി ഉദ്ഘാടനം ചെയ്തു. ജില്ലാ ലൈബ്രറി കൗണ്‍സിൽ സെക്രട്ടറി പി.കെ. സുധീർ രചിച്ച ‘ഗ്രന്ഥശാല പ്രസ്ഥാനം ഇന്നലെ ഇന്ന്’ പ്രകാശനം നടത്തി. മുസ്തഫ ദ്വാരക പുസ്തകം ഏറ്റുവാങ്ങി. ലൈബ്രറി കൗണ്‍സിൽ ജില്ലാ പ്രസിഡന്‍റ് ടി.ബി. സുരേഷ് അധ്യക്ഷത വഹിച്ചു. ലൈബ്രറി കൗണ്‍സിൽ ഗ്രാന്‍റ് ഉപയോഗിച്ച് ജില്ലയിലെ 236 ലൈബ്രറികളും വായനക്കാരുമാണ് രണ്ട് ദിവസങ്ങളിലായി നടക്കുന്ന പുസ്തകോത്സവത്തിൽ നിന്നും പുസ്തകങ്ങൾ വാങ്ങുന്നത്. ലൈബ്രറി കൗണ്‍സിൽ സ്റ്റേറ്റ് എക്സിക്യൂട്ടിവ് അംഗം എ.ടി. ഷണ്‍മുഖൻ, ജില്ലാ സെക്രട്ടറി പി.കെ. സുധീർ, സംസ്ഥാന സമിതി അംഗം എം. സദാനന്ദൻ, വൈത്തിരി താലൂക്ക് ലൈബ്രറി കൗണ്‍സിൽ പ്രസിഡന്‍റ് സി.കെ. രവീന്ദ്രൻ, സെക്രട്ടറി സി.എം. സുമേഷ്, ബത്തേരി സെക്രട്ടറി പി.കെ. സത്താർ, പി.കെ. ഷാഹിന, ജില്ലാ ലൈബ്രറി വികസന സമിതി ചെയർമാൻ ഇ.കെ. ബിജുജൻ, ജില്ലാ വൈസ് പ്രസിഡന്‍റ് കെ. വിശാലാക്ഷി എന്നിവർ പ്രസംഗിച്ചു. പുസ്തകമേള ഇന്ന് സമാപിക്കും.

മഴക്കെടുതി: ജില്ലയിൽ 15 ദുരിതാശ്വാസ ക്യാന്പുകൾ; 592 പേരെ മാറ്റിപ്പാർപ്പിച്ചു

കൽപ്പറ്റ: ജില്ലയിൽ കാലവർഷക്കെടുതിയെത്തുടർന്ന് വൈത്തിരി, ബത്തേരി, മാനന്തവാടി താലൂക്കുകളിലായി 15 ദുരിതാശ്വാസ ക്യാന്പുകൾ തുറന്നു. 165 കുടുംബങ്ങളിൽനിന്നായി 207 പുരുഷൻമാർ, 233 സ്ത്രീകൾ(മൂന്ന് ഗർഭിണികൾ), 152 കുട്ടികൾ, 32 വയോജനങ്ങൾ, രണ്ട് ഭിന്നശേഷിക്കാർ എന്നിവരെ ഇത്രയും ക്യാന്പുകളിലേക്ക് മാറ്റി. വൈത്തിരി താലൂക്കിൽ ആറും ബത്തേരിയിൽ ഏഴും മാനന്തവാടി താലൂക്കിൽ രണ്ടും ക്യാന്പുകളാണ് പ്രവർത്തിക്കുന്നത്. കാവുമന്ദം, വെങ്ങപ്പള്ളി, പടിഞ്ഞാറത്തറ, കോട്ടത്തറ, മുട്ടിൽ, പനമരം, മാനന്തവാടി, ചീരാൽ, പൂതാടി, കോട്ടപ്പടി, നെൻമേനി, നൂൽപ്പുഴ വില്ലേജ് പരിധികളിൽ താമസിക്കുന്നവരെയാണ് ക്യാന്പുകളിലേക്ക് മാറ്റിയത്. പാന്പുംകുനി ഉന്നതിയിൽ വെള്ളം കയറിയതിനെത്തുടർന്ന് കോളിയാടി എയുപിഎസ് സ്കൂളിൽ ആരംഭിച്ച ക്യാന്പിലേക്ക് 18 കുടുംബങ്ങളെ മാറ്റി. 28 പുരുഷൻമാരും 32 സ്ത്രീകളും അഞ്ച് വയോധികരും 21 കുട്ടികളുമാണ് ക്യാന്പിലുള്ളത്. ചീരാൽ വെള്ളച്ചാൽ ഉന്നതിയിൽനിന്നു 10 കുടുംബങ്ങളെ കല്ലിങ്കര എയുപി സ്കൂളിലേക്കു മാറ്റി. ക്യാന്പിൽ ഒൻപത് പുരുഷൻമാരും 11 സ്ത്രീകളും ഒന്പത് കുട്ടികളുമാണുള്ളത്. നൂൽപ്പുഴ പുഴങ്കുനി ഉന്നതിയിലെ 15 കുടുംബങ്ങളെ കല്ലൂർ ജിഎച്ച്എസ് സ്കൂളിലെ ക്യാന്പിലേക്ക് മാറ്റി. 11 പുരുഷൻമാരും 19 സ്ത്രീകളും 12 കുട്ടികളും ക്യാന്പിലുണ്ട്. മുത്തങ്ങ ജിഎൽപി സ്കൂളിലേക്ക് എട്ട് കുടുംബങ്ങളെ മാറ്റി. 10 പുരുഷൻമാരെയും 10 സ്ത്രീകളെയും ആറ് കുട്ടികളെയുമാണ് ക്യാന്പിലേക്ക് മാറ്റിയത്. കുന്താണി ഗവ.എൽപി സ്കൂളിലേക്കു 17 കുടുംബങ്ങളെ മാറ്റിപ്പാർപ്പിച്ചു. 20 പുരുഷൻമാരും 29 സ്ത്രീകളും ഏഴു കുട്ടികളും മൂന്ന് വയോജനങ്ങളുമാണ് ഇവിടെ. പൂതാടി എസ്എൻഎച്ച്എസ് സ്കൂളിലേക്ക് ഒന്പത് കുടുംബങ്ങളെ മാറ്റി. 13 പുരുഷൻമാരും 12 സ്ത്രീകളും ഏഴു കുട്ടികളുമാണ് ക്യാന്പിൽ. മുത്തങ്ങ ജിഎൽപി സ്കൂളിലേക്ക് എട്ട് കുടുംബങ്ങളെ മാറ്റി. 10 പുരുഷൻമാർ, 10 സ്ത്രീകൾ, ആറ് കുട്ടികൾ എന്നിങ്ങനെയാണ് ക്യാന്പിലുള്ളവരുടെ എണ്ണം. നൂൽപ്പുഴ ചെട്ട്യാലത്തൂർ എൽപി സ്കൂളിലേക്ക് 15 കുടുംബങ്ങളെ മാറ്റി. 15 പുരുഷൻമാരും 16 സ്ത്രീകളും എട്ട് കുട്ടികളും ഏഴു വയോജനങ്ങളും ക്യാന്പിലുണ്ട്. വൈത്തിരി താലൂക്കിലെ മുട്ടിൽ പറളിക്കുന്ന് ഡബ്ല്യുഒഎൽപി സ്കൂളിൽ ആരംഭിച്ച ക്യാന്പിലേക്ക് 10 കുടുംബങ്ങളെ മാറ്റി. 12 പുരുഷൻമാരും 15 സ്ത്രീകളും മൂന്ന് കുട്ടികളും രണ്ട് ഭിന്നശേഷിക്കാരും മൂന്ന് വയോധികരും ക്യാന്പിൽ താമസിക്കുന്നുണ്ട്. കരിംകുറ്റി ജിവിഎച്ച് സ്കൂളിലേക്ക് 16 കുടുംബങ്ങളെ മാറ്റി. 27 പുരുഷൻമാരും 24 സ്ത്രീകളും 17 കുട്ടികളും അഞ്ചു വയോധികരുമാണ് ക്യാന്പിൽ. തരിയോട് എൽപി സ്കൂളിലെ ക്യാന്പിലേക്ക് 12 കുടുംബങ്ങളെ മാറ്റി. 17 പുരുഷൻമാരും 19 സ്ത്രീകളും 20 കുട്ടികളും ആറ് വയോജനങ്ങളുമാണ് ക്യാന്പിൽ താമസിക്കുന്നത്. തെക്കുംതറ എയുപി സ്കൂളിലേക്ക് 19 കുടുംബങ്ങളെ മാറ്റി. 23 പുരുഷൻമാരും 25 സ്ത്രീകളും 26 കുട്ടികളും ക്യാന്പിലുണ്ട്. പടിഞ്ഞാറത്തറ കൊപ്പിടി സെന്‍റ് തോമസ് ഇവാഞ്ചലിക്കൽ എൽപി സ്കൂളിലേക്ക് അഞ്ചു കുടുംബങ്ങളെ മാറ്റി. എട്ട് പുരുഷൻമാരും ഏഴ് സ്ത്രീകളും ആറ് കുട്ടികളുമാണ് ക്യാന്പിലുള്ളത്. മേപ്പാടി കോട്ടനാട് ഗവ.യുപി സ്കൂളിലെ ക്യാന്പിൽ അഞ്ചു കുടുംബങ്ങളിൽനിന്നുള്ള എട്ട് പുരുഷൻമാരും ഒന്പത് സ്ത്രീകളും മൂന്നുവീതം കുട്ടികളും വയോജനങ്ങളും കഴിയുന്നുണ്ട്. മാനന്തവാടി താലൂക്കിലെ പനമരം ഹയർ സെക്കൻഡറി സ്കൂളിലേക്ക് 15 കുടുംബങ്ങളെ മാറ്റി. 12 പുരുഷൻമാരും 17 സ്ത്രീകളും 15 കുട്ടികളും ക്യാന്പിലുണ്ട്. മാനന്തവാടി വരടിമൂല സാംസ്കാരിക നിലയത്തിലേക്ക് ഒരു കുടുംബത്തെ മാറ്റി പാർപ്പിച്ചു. ഒന്നുവീതം സ്ത്രീയും പുരുഷനും മൂന്ന് കുട്ടികളുമാണ് ക്യാന്പിൽ.

കബനിയിൽ ജലനിരപ്പ് ഉയർന്നതോടെ തീരത്ത് ചാകര

പുൽപ്പള്ളി: കാലവർഷം ശക്തമാകുകയും കബനി നദിയിൽ ജലനിരപ്പുയരുകയും ചെയ്തതോടെ മീൻപിടിത്തം സജീവമായി. ഒരാഴ്ചയായി പെയ്യുന്ന കനത്തമഴയിൽ കബനി നദി നിറഞ്ഞുകവിഞ്ഞതോടെ കൊളവള്ളി മുതൽ പെരിക്കല്ലുർ വരെയുള്ള പുഴയുടെ തീരങ്ങളിൽ ജില്ലയുടെ വിവിധ ഭാഗങ്ങളിൽ നിന്നായി വലയുമായി മീൻ പിടിക്കാനെത്തുന്നവരുടെ എണ്ണം വർധിച്ചു. ദൂരെ സ്ഥലങ്ങളിൽ നിന്നും ആവേശത്തോടെ വല വീശാനെത്തുന്നവരുണ്ട്. വിവിധ സ്ഥലങ്ങളിൽ നിന്നും വാഹനങ്ങളിൽ എത്തി ഇവിടെ താമസിച്ച് മീൻപിടിക്കുന്നതും നിരവധിയാളുകളാണ്. വിവിധയിനം വലകളുപയോഗിച്ചാണ് മീൻ പിടിത്തം. ഇടയ്ക്ക് ചൂണ്ടക്കാരുമുണ്ട്. പ്രധാനമായും കട്ല, രോഹു, തിലാപ്പിയ, ഗ്രാസ്കാർപ്പ്, വിവിധതരം പരലുകൾ ഉൾപ്പടെയുള്ള മീനുകളാണ് ലഭിക്കുന്നത്. രാത്രിയിൽ പിടിക്കുന്ന മത്സ്യങ്ങൾ പുലർച്ചെ തന്നെ മൊത്തമായി വാങ്ങാനെത്തുന്ന കച്ചവടക്കാരും ഏറെയാണ്. മീൻപിടിത്തം കാണാനും മത്സ്യം വാങ്ങാനുമായി നിരവധിയാളും ഇവിടെയെത്തുന്നുണ്ട്.

മരക്കടവ് ജനവാസ മേഖലയിൽ വീണ്ടും പുലിയുടെ സാന്നിധ്യം

പുൽപ്പള്ളി: കഴിഞ്ഞ ഒരാഴ്ചയായി കബനിഗിരി പ്രദേശങ്ങളിലെ ജനവാസ മേഖലയിലിറങ്ങി വളർത്തുമൃഗങ്ങളെ കൊന്ന് ഭീതിപരത്തിയ പുലി സമീപത്തെ മരക്കടവ് മേഖലയിലെത്തി. മരക്കടവ് തീരദേശപാതയ്ക്ക് സമീപം മാവേലി പുത്തൻപുരയിൽ ബെന്നിയുടെ നിർമാണത്തിലിരിക്കുന്ന വീടിന് സമീപമാണ് തിങ്കളാഴ്ച രാത്രി 11.30ഓടെ പുലിയെത്തിയത്. വീടിന്‍റെ നിർമാണ ജോലികൾ നടക്കുന്നത് വീട്ടുകാർ സിസിടിവിയിലൂടെ നിരീക്ഷിക്കുന്നതിനിടെയാണ് വീടിന് സമീപം പുലിയെത്തിയ ദൃശ്യങ്ങൾ കാണുന്നത്. വനംവകുപ്പിനെ വിവരമറിയിച്ചതിനെ തുടർന്ന് ഉദ്യോഗസ്ഥരെത്തി സ്ഥലത്ത് തെരച്ചിൽ നടത്തി. ഞായറാഴ്ച രാത്രി മരക്കടവിലെ മുണ്ടപ്ലാക്കലിന്‍റെ കൂട്ടിൽകെട്ടിയിരുന്ന വളർത്തുനായയെ പുലി പിടികൂടിയിരുന്നു. കഴിഞ്ഞ ഒരാഴ്ചയായി കബനിഗിരി, മരക്കടവ് പ്രദേശങ്ങളിലിറങ്ങിയ പുലി മൂന്ന് ആടുകളെ കൊല്ലുകയും ഒരു പശുവിനെയും വളർത്തുനായയേയും ആക്രമിക്കുകയും ചെയ്തിരുന്നു.

കുട്ടികളുടെ പ്രതിരോധ കുത്തിവയ്പ്പ്: ആരോഗ്യ പ്രവർത്തകർ വീട് സന്ദർശിച്ചു

കൽപ്പറ്റ: ജില്ലയിലെ മുഴുവൻ കുട്ടികൾക്കും രോഗപ്രതിരോധ കുത്തിവയ്പ്പുകൾ ലഭ്യമാക്കുകയെന്ന ലക്ഷ്യത്തോടെ ആരോഗ്യ പ്രവർത്തകർ എടവക പഞ്ചായത്തിലെ വീടുകൾ സന്ദർശിച്ചു. പ്രതിരോധ കുത്തിവയ്പ്പിൽനിന്നു വിട്ടുനിൽക്കുന്ന മാതാപിതാക്കളെ നേരിൽ കണ്ട് അഞ്ച് കുട്ടികൾക്ക് കുത്തിവയ്പ്പ് നൽകി. സമഗ്ര മാതൃശിശു ആരോഗ്യം ലക്ഷ്യമാക്കി മീസിൽസ് റൂബെല്ല രോഗ നിവാരണ കാന്പയിനിന്‍റെ ഭാഗമായാണ് ആരോഗ്യ വകുപ്പ് സാമൂഹിക ഇടപെടൽ ദൗത്യം നടത്തുന്നത്. എടവക ഗ്രാമപഞ്ചാത്തിലെ ഏഴ് വീടുകളിൽ ആരോഗ്യ പ്രവർത്തകർ സന്ദർശിച്ചു. ജില്ലാ റിപ്രൊഡക്ടീവ് ആൻഡ് ചൈൽഡ് ഹെൽത്ത് ഓഫീസർ ഡോ. ജെറിൻ എസ്. ജെറോഡ്, എടവക കുടുംബാരോഗ്യ കേന്ദ്രം മെഡിക്കൽ ഓഫീസർ ഡോ. കെ.സി. പുഷ്പ, ജില്ലാ പബ്ലിക് ഹെൽത്ത് നഴ്സ് മജോ ജോസഫ്, എടവക കുടുംബാരോഗ്യ കേന്ദ്രം പബ്ലിക് ഹെൽത്ത് നഴ്സ് ലാലി ഏബ്രഹാം, ഹെൽത്ത് ഇൻസ്പെക്ടർ റഫീഖ് അലി, ജൂണിയർ പബ്ലിക് ഹെൽത്ത് നഴ്സുമാരായ സി.കെ. സക്കീന, അഞ്ജലി വർഗീസ്, ജൂണിയർ ഹെൽത്ത് ഇൻസ്പെക്ടർമാരായ ലൗലി മോൾ, റജി വടക്കയിൽ, മിഡിൽ ലെവൽ സർവീസ് പ്രൊവൈഡർ ഹരിപ്രിയ എന്നിവർ പങ്കെടുത്തു.

കുടിവെള്ള പദ്ധതിക്ക് ചാല് കീറി: റോഡിൽ വൻഗർത്തം രൂപപ്പെട്ടു

സുൽത്താൻ ബത്തേരി: കുടിവെള്ള പദ്ധതിക്കായി റോഡിൽ ചാല് കീറിയത് വൻ ഗർത്തമായി മാറി. സുൽത്താൻ ബത്തേരി ചുങ്കം ജംഗ്ഷനിലാണ് അപകടാകരമായ ഗർത്തം രൂപപ്പെട്ടത്. മഴ തുടങ്ങിയ ദിനത്തിൽ തന്നെയാണ് കുടിവെള്ളത്തിനായി റോഡ് പൊളിച്ച് പൈപ്പ് ഇടാൻ തുടങ്ങിയത്. മഴ ശക്തമായതോടെ പൈപ്പിനായി ചാല് കീറിയ ഭാഗത്താണ് വൻ കുഴി രൂപപ്പെട്ടത്. ദേശീയ പാതയിലെ സുൽത്താൻ ബത്തേരി ചുങ്കം ഉൗട്ടി റോഡ് ജംഗ്ഷനിലാണ് വൻ കഴിയുണ്ടായത്. പൈപ്പിനായി ചാല് കീറിയ ഭാഗത്തെ മണ്ണ് റോഡിലൂടെ ഒഴുകി കാൽനട യാത്രക്കാർക്കും ഇരുചക്ര വാഹനങ്ങൾക്കും വൻ ഭീഷണിയായി തീർന്നിരിക്കുകയാണ്. ചെളിവെള്ളം റോഡിലൂടെ ഒഴുകി വാഹനങ്ങൾ തെന്നി മറിയാനും സാധ്യത ഏറെയാണ്. മഴയിൽ റോഡ് പൊളിച്ച് പൈപ്പിടാനുള്ള നടപടി വ്യാപക പ്രതിഷേധമാണ് വിളിച്ചു വരുത്തിയത്. ചുങ്കം ജംഗ്ഷൻ മുതൽ കോട്ടക്കുന്ന് ജംഗ്ഷൻ വരെയുള്ള റോഡിന്‍റെ ഒരു വശം മുഴുവനും ചെളിയും വെള്ളക്കെട്ടുമായി മാറിയത് മൂലം സൈഡ് കൊടുക്കുന്ന വാഹനങ്ങളും അപകട ഭീഷണിയിലാണ്.

ദേശീയ ലോക് അദാലത്ത് ജൂണ്‍ 14ന്

കൽപ്പറ്റ: ദേശീയ നിയമ സേവന അഥോറിറ്റിയുടെ നിർദേശപ്രകാരം കൽപ്പറ്റ, മാനന്തവാടി, ബത്തേരി കോടതി കേന്ദ്രങ്ങളിൽ ജൂണ്‍ 14ന് ദേശീയ ലോക് അദാലത്ത് നടത്തും. പൊതുജനങ്ങൾക്ക് ചെക്ക് കേസുകൾ, തൊഴിൽത്തർക്കങ്ങൾ, വൈദ്യുതി, വെള്ളക്കരം, മെയിന്‍റനൻസ് കേസുകൾ, ഒത്തുതീർപ്പാക്കാവുന്ന ക്രിമിനൽ കേസുകൾ എന്നിവ സംബന്ധിച്ച പരാതികൾ അദാലത്തിൽ നേരിട്ട് നൽകാം. മോട്ടോർ വാഹന നഷ്ടപരിഹാര കേസുകൾ, ലേബർ കോടതിയിലെ കേസുകൾ, കുടുംബ കോടതിയിലെ വിവാഹമോചനം ഒഴികെ കേസുകൾ, ഭൂമി ഏറ്റെടുക്കൽ കേസുകൾ, സർവീസ് കേസുകൾ, സിവിൽ കോടതിയിലെ കേസുകൾ എന്നിവ അദാലത്തിൽ ഒത്തുതീർക്കാം. കൂടുതൽ വിവരത്തിന് 8281668101, 8304882641, 04936 207800 എന്നീ നന്പറുകളിൽ ബന്ധപ്പെടാം.

ഇടതു ഭരണത്തിൽ സിപിഎം പോഷക സംഘടനകൾ നോക്കുകുത്തികൾ: ഐ.സി. ബാലകൃഷ്ണൻ എംഎൽഎ

കൽപ്പറ്റ: പിണറായി സർക്കാരിന്‍റെ ഒന്പതു വർഷ കാലയളവിൽ ദളിതരോടും ആദിവാസികളോടും കടുത്ത അനീതിയും അവഗണനയും കാട്ടിയിട്ടും യാതൊന്നും തന്നെ സർക്കാരിനെതിരെ പ്രതികരിക്കാതെ സിപിഎം പോഷക സംഘടനകളായ ആദിവാസി ക്ഷേമ സമിതിയും പട്ടിക ജാതി ക്ഷേമ സമിതിയും നോക്കു കുത്തികൾ മാത്രമായി വർത്തിക്കുകയാണെന്ന് ഐ.സി. ബാലകൃഷ്ണൻ എംഎൽഎ കുറ്റപ്പെടുത്തി. ആത്മാഭിമാനമുണ്ടെങ്കിൽ സംഘടനയിലെ സഖാക്കൾ രാജിവച്ചു പുറത്തു പോകണമായിരുന്നു. പട്ടിക വർഗ പദ്ധതി വിഹിതം (പ്ലാൻ ഫണ്ട്) 612 കോടി രൂപ വെട്ടിക്കുറച്ചത് നീതികരിക്കാൻ ആകുന്നതല്ലെന്നും സിപിഎമ്മിന്‍റെ കപട സ്നേഹം ഇതിലൂടെ മറനീക്കി ഒരിക്കൽകൂടെ പുറത്തു വന്നിരിക്കുകയാണ്. കേരളത്തിൽ പട്ടിക വിഭാഗങ്ങളോട് സർക്കാർ അനുവർത്തിക്കുന്ന കടുത്ത അവഗണനയിൽ പ്രതിഷേധിച്ചു ആദിവാസികൾ, പട്ടിക ജാതി വിഭാഗക്കാർ എന്നിവരെ അണിനിരത്തി ശക്തമായ സമര മുഖങ്ങൾ തുറക്കുമെന്നും എംഎൽഎ പറഞ്ഞു. ഭാരതീയ ദളിത് കോണ്‍ഗ്രസ് ജില്ല കമ്മിറ്റി കളക്ടറേറ്റിനു മുൻപിൽ സംഘടിപ്പിച്ച രാപകൽ സമരത്തിന്‍റെ സമാപന സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ചടങ്ങിൽ ദളിത് കോണ്‍ഗ്രസ് ജില്ല പ്രസിഡന്‍റ് വി.കെ. ശശികുമാർ അധ്യക്ഷത വഹിച്ചു. കെപിസിസി സെക്രട്ടറി അഡ്വ.ടി.ജെ. ഐസക്ക്, കെപിസിസി അംഗം പി.പി. ആലി, ജില്ല പഞ്ചായത്ത് പ്രസിഡന്‍റ് സംഷാദ് മരക്കാർ, സംസ്ഥാന ജനറൽ സെക്രട്ടറിമാരായ ആർ. രാജൻ, കെ.വി. ശശി, സെക്രട്ടറി എ. രാംകുമാർ, ഹർഷൽ കൊന്നാടൻ, എം. രാഘവൻ, ആർ. രാമചന്ദ്രൻ, ശ്രീജ ബാബു, രാജാറാണി, ഉഷ എന്ന സിന്ധു, കാർത്തിയാനി വെണ്മണി, കെ.ജി. രഘു, ഉണ്ണി പൂതാടി, വിനോദ് മൂപൈനാട് എന്നിവർ പ്രസംഗിച്ചു.

ധനസഹായത്തിന് സ്വാശ്രയ സംഘങ്ങൾക്ക് അപേക്ഷിക്കാം

കൽപ്പറ്റ: പട്ടികജാതി വിഭാഗക്കാർ അംഗങ്ങളായ സ്വാശ്രയ സംഘങ്ങൾക്ക് ധനസഹായത്തിന് അപേക്ഷിക്കാം. പത്തോ അതിലധികമോ പട്ടികജാതി വിഭാഗക്കാർ അംഗങ്ങളായ സ്വയം സഹായ സംഘങ്ങൾ, 80 ശതമാനത്തിൽ കൂടുതൽ സ്ത്രീകൾ അംഗങ്ങളായ സ്വാശ്രയ സംഘങ്ങൾക്കും അപേക്ഷിക്കാം. കുറഞ്ഞത് ഒരു വർഷത്തെ പ്രവർത്തന പരിചയമുള്ളവർക്കാണ അവസരം. പരമാവധി 15 ലക്ഷം രൂപ ധനസഹായമായി ലഭിക്കും. അപേക്ഷകൾ 31നകം ജില്ലാ പട്ടികജാതി വികസന ഓഫീസിൽ നൽകണം. ഫോണ്‍: 04936 203824

തടി ദേഹത്തുവീണ് യുവാവ് മരിച്ചു

മാനന്തവാടി: തടി ദേഹത്തുവീണ് യുവാവ് മരിച്ചു. കാട്ടിമൂല പുളിക്കൽ ജോബിഷാണ്(42) മരിച്ചത്. ഇന്നലെ ഉച്ചയ്ക്ക് 12 ഓടെ വാളാട് ടൗണിലെ ഇറച്ചിക്കടയിലേക്ക് തടിയുമായി പോകുന്പോഴാണ് അപകടം. ടൈലിൽ തെന്നി തടി തലയിൽ വീഴുകയായിരുന്നു. ഉടൻ മെഡിക്കൽ കോളജ് ആശുപത്രിയിൽ എത്തിച്ചെങ്കിലും രക്ഷിക്കാനായില്ല.

ജില്ലയിൽ മഴക്കെടുതി രൂക്ഷം , ഇന്ന് റെഡ് അലർട്ട് ; അഞ്ച് ക്യാന്പുകളിലായി 104 പേർ

കൽപ്പറ്റ: ജില്ലയിൽ മഴ ശക്തമായതിനെ തുടർന്ന് അഞ്ച് ദുരിതാശ്വാസ ക്യാന്പുകളിൽ നിന്നായി 104 പേരെ മാറ്റിപ്പാർപ്പിച്ചു. വൈത്തിരി, സുൽത്താൻ ബത്തേരി താലൂക്കുകളിലെ മുട്ടിൽ, നെൻമേനി, നൂൽപ്പുഴ വില്ലേജ് പരിധിയിലെ ഉന്നതികളിൽ താമസിക്കുന്നവരെയാണ് ക്യാന്പുകളിലേക്ക് മാറ്റിയത്. ജില്ലയിൽ ജില്ലയിൽ കേന്ദ്ര കാലാവസ്ഥ നിരീക്ഷണ വകുപ്പ് ഇന്ന് റെഡ് അലർട്ട് പ്രഖ്യാപിച്ചു. റെഡ് അലർട്ട് സോണിൽ 24 മണിക്കൂറിൽ 204.4 മില്ലി മീറ്ററിൽ കൂടുതൽ മഴ ലഭിക്കുമെന്നാണ് വ്യക്തമാക്കുന്നത്. പാന്പുംകുനി ഉന്നതിയിൽ വെള്ളം കയറിയതിനെ തുടർന്ന് നെൻമേനി കോളിയാടി എയുപിഎസ് സ്കൂളിൽ ആരംഭിച്ച ക്യാന്പിൽ അഞ്ച് പുരുഷൻമാരും അഞ്ച് സ്ത്രീകളും (ഒരു ഗർഭിണി) മൂന്ന് കുട്ടികളുമുണ്ട്. ചീരാൽ വെള്ളച്ചാൽ ഉന്നതിയിൽ വെള്ളം കയറാൻ സാധ്യതയുള്ളതിനാൽ ഏഴ് കുടുംബങ്ങളെ കല്ലിങ്കര എയുപി സ്കൂളിലേക്കും മാറ്റി. ക്യാന്പിൽ ഏഴു പുരുഷൻമാരും അഞ്ചു സ്ത്രീകളും ആറ് കുട്ടികളുമാണുള്ളത്. നൂൽപ്പുഴ പുഴങ്കുനി ഉന്നതിയിലെ ഏഴ് കുടുംബങ്ങളെ കല്ലൂർ ജിഎച്ച്എസ് സ്കൂളിൽ ആരംഭിച്ച ക്യാന്പിലേക്ക് മാറ്റി. മൂന്നു പുരുഷൻമാരും അഞ്ചു സ്ത്രീകളും ഒൻപത് കുട്ടികളും ക്യാന്പിലുണ്ട്. ജില്ലയിൽ തുടരുന്ന ശക്തമായ മഴയിൽ പുഴകളും തോടുകളും കരകവിഞ്ഞു. മരംവീണ് പലയിടത്തും ഗതാഗതം തടസപ്പെട്ടു. നിരവധി വീടുകൾക്ക് കേടുപാടുകൾ സംഭവിച്ചു. എൻഡിആർഎഫ് സംഘം ജില്ലയിൽ ക്യാന്പ് ചെയ്യുന്നുണ്ട്. ദുരന്ത സാഹചര്യം ഉണ്ടായാൽ ദ്രുതഗതിയിൽ രക്ഷാപ്രവർത്തനം നടത്താനാണ് സംഘം മീനങ്ങാടിയിൽ ക്യാന്പ് ചെയ്യുന്നത്. അടിയന്തരസാഹചര്യം നേരിടാൻ തയാറെണെന്നും 30,000 ഓളംപേരെ പുനരധിവസിപ്പിക്കാനുള്ള തയാറെടുപ്പുകൾ പൂർത്തിയായതായും കളക്ടർ പറഞ്ഞു. ജനങ്ങൾ പരിഭ്രാന്തരാകേണ്ടതില്ലെന്നും കളക്ടർ അറിയിച്ചു. രണ്ടുദിവസമായി പെയ്യുന്ന ശക്തമായ മഴയിൽ കോഴിക്കോട് -കൊല്ലെഗൽ ദേശീയപാതയിൽ മൂലങ്കാവിൽ ഇന്നലെ രാവിലെ മരം കടപുഴകി വീണു. അരമണിക്കൂറോളം ഗതാഗതം സ്തംഭിച്ചു. ബത്തേരിയിൽ നിന്നും അഗ്നിരക്ഷാസേന എത്തി മരം മുറിച്ചുമാറ്റിയാണ് ഗതാഗതം പുനഃസ്ഥാപിച്ചത്. മേപ്പാടി ഗ്രാമപഞ്ചായത്തിൽ അടിയന്തര യോഗം ചേർന്നു മേപ്പാടി: മഴക്കാല ദുരന്തനിവാരണ പ്രവർത്തനങ്ങൾ അവലോകനം ചെയ്യുന്നതിന് മേപ്പാടി ഗ്രാമപഞ്ചായത്തിൽ അടിയന്തര യോഗം ചേർന്നു. മഴക്കാലമുന്നൊരുക്കങ്ങളുടെ ഭാഗമായി മേപ്പാടി ഗ്രാമപഞ്ചായത്തിൽ നടത്തിയ പ്രവർത്തനങ്ങൾ യോഗത്തിൽ അവലോകനം ചെയ്തു. പഞ്ചായത്ത് പരിധിയിൽ അപകടാവസ്ഥയിലുള്ള മരങ്ങൾ മുറിച്ചുമാറ്റാൻ പഞ്ചായത്ത് തലത്തിൽ സന്നദ്ധസേനയെ രൂപീകരിക്കാൻ യോഗത്തിൽ തീരുമാനിച്ചു. ജില്ലയിൽ ശക്തമായി മഴ പെയ്യുന്നതിനാൽ അടിയന്തര സാഹചര്യമുണ്ടായാൽ ദുരന്തബാധിത പ്രദേശങ്ങളിലെ ആളുകളെ മാറ്റിപ്പാർപ്പിക്കാൻ ക്യാന്പുകൾ സജ്ജീകരിച്ചതായി യോഗത്തിൽ അറിയിച്ചു. ചൂരൽമല, മുണ്ടക്കൈ ഭാഗങ്ങളിൽ കനത്ത മഴയുള്ളതിനാൽ വിനോദസഞ്ചാര കേന്ദ്രങ്ങളുടെ പ്രവർത്തനങ്ങൾ പൂർണമായും നിർത്തിവയ്ക്കാൻ സ്ഥാപനങ്ങൾക്ക് നിർദേശം നൽകാൻ യോഗം ആവശ്യപ്പെട്ടു. ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ അധ്യക്ഷനായ യോഗത്തിൽ മേപ്പാടി ഗ്രാമപഞ്ചായത്ത് പ്രസിഡന്‍റ് കെ. ബാബു, വൈസ് പ്രസിഡന്‍റ് രാധ രാമസ്വാമി, പഞ്ചായത്ത് സെക്രട്ടറി എം. ഷാജു, മേപ്പാടി എസ്എച്ച്ഒ ജയപ്രകാശ്, വൈത്തിരി തഹസിൽദാർ കുമാരി വി. ബിന്ദു, വില്ലേജ് ഓഫീസർ അജീഷ്, ട്രൈബൽ എക്സ്റ്റൻഷൻ ഓഫീസർ രജനികാന്ത്, വനംആരോഗ്യ, കൃഷി വകുപ്പ് ഉദ്യോഗസ്ഥർ, ട്രൈബൽ പ്രമോട്ടർമാർ, പഞ്ചായത്ത് ഭരണസമിതി അംഗങ്ങൾ എന്നിവർ പങ്കെടുത്തു.

കണ്ണങ്ങോട് പാടശേഖരം വെള്ളത്തിലായി: 50 ഏക്കർ നെൽകൃഷി നശിച്ചു

സുൽത്താൻ ബത്തേരി: ഒരാഴ്ചയായി തുടരുന്ന കനത്ത മഴയിൽ നൂൽപ്പുഴ പഞ്ചായത്തിലെ കണ്ണങ്കോട് 50 ഏക്കറോളം വരുന്ന പുഞ്ച കൃഷി വെള്ളത്തിലായിരിക്കുകയാണ്. കൊയ്ത്ത് സമയത്ത് ഒരാഴ്ചയായി മഴ വിട്ടുമാറാത്തതുമൂലം ഏക്കർ കണക്കിന് പാടത്താണ് കൊയ്യാൻ സാധിക്കാത്തതുമൂലം നെല്ല് നശിക്കുന്നത്. നൂൽപ്പുഴ പഞ്ചായത്തിലെ ഏറ്റവും വലിയ പാടശേഖരത്തിനോട് ചേർന്ന് ഒഴുകുന്ന കല്ലൂർപുഴ കരകവിഞ്ഞ തോടുകൂടി തൊട്ടടുത്ത പ്രദേശത്തെ പാടശേഖരത്തിലെ നെല്ലും ഇപ്പോൾ വെള്ളത്തിനടിയിലാണ്. കാലവർഷം നേരത്തെയെത്തിയതും കൊയ്ത് തന്ത്രങ്ങളുടെ ലഭ്യതക്കുറവും നെൽ കർഷകരെ പ്രതിസന്ധിയിലാക്കി. മഴയിൽ പാടങ്ങൾ വെള്ളം നിറഞ്ഞതോടുകൂടി തന്ത്രങ്ങൾ ഉപയോഗിച്ച് കൊയ്യാൻ സാധിക്കാത്ത അവസ്ഥയാണ്. ചില കർഷകർ തൊഴിലാളികളെ ഉപയോഗിച്ച് കൊയ്തെടുത്തെങ്കിലും ഉണങ്ങാൻ സാധിക്കാത്ത അവസ്ഥയാണ്.

നീലഗിരിയിൽ കനത്ത മഴ തുടരുന്നു: ജനജീവിതം ദുസഹമായി

ഗൂഡല്ലൂർ: നീലഗിരി ജില്ലയിൽ കാലവർഷം ശക്തിപ്രാപിച്ചു. ജില്ലയിൽ കനത്ത മഴ തുടരുകയാണ്. കളക്ടർ റെഡ് അലർട്ട് പ്രഖ്യാപിച്ചിരിക്കുകയാണ്. ഉൗട്ടി, കുന്താ, ഗൂഡല്ലൂർ, പന്തല്ലൂർ താലൂക്കുകളിലാണ് അതിതീവ്ര മഴ പെയ്യുന്നത്. താഴ്ന്ന പ്രദേശങ്ങളിൽ വെള്ളത്തിനടിയിലായി. കൃഷിയിടങ്ങൾ വെള്ളത്തിൽ മുങ്ങി. വ്യാപക കൃഷി നാശവും സംഭവിച്ചിട്ടുണ്ട്. ജില്ലയിലെ 40 ഇടങ്ങളിൽ മണ്ണിടിച്ചിലുണ്ടായി. 32 ഇടങ്ങളിൽ മരംവീണു. ചില ഇടങ്ങളിൽ മരം വീണ് വൈദ്യുതി തൂണുകളും കന്പികളും പൊട്ടി വീണിട്ടുണ്ട്. പ്രധാന പാതകളിലെല്ലാം മണ്ണിടിച്ചിലുണ്ടായിട്ടുണ്ട്. ശക്തമായ കാറ്റോടുകൂടി പെയ്ത മഴയിൽ വ്യാപക നാശനഷ്ടമാണ് സംഭവിച്ചത്. തണുത്ത കാലാവസ്ഥ കാരണം നഗരങ്ങൾ ആളൊഴിഞ്ഞ അവസ്ഥയിലാണ്. ശക്തമായ മഴ തുടരുന്ന സാഹചര്യത്തിൽ നീലഗിരിയിലെ വിനോദ സഞ്ചാര കേന്ദ്രങ്ങൾ താത്ക്കാലികമായി അടച്ചു. കഴിഞ്ഞ ദിവസം ഉൗട്ടിയിൽ വിനോദ സഞ്ചാരത്തിനെത്തിയ പതിനഞ്ചുകാരൻ പൈൻ ഫോറസ്റ്റിൽ മരം വീണ് മരിച്ചിരുന്നു. ഇതേത്തുടർന്നാണ് ജില്ലാ ഭരണകൂടം സഞ്ചാര കേന്ദ്രങ്ങൾ അടച്ചിട്ടത്. അതേസമയം മഴക്കെടുതി നേരിടാനുള്ള എല്ലാ സജ്ജീകരണങ്ങളും ഒരുക്കിയിട്ടുണ്ടെന്നും ജനങ്ങൾ ആശങ്കപ്പെടേണ്ടതില്ലെന്നും ജില്ലാ കളക്ടർ ലക്ഷ്മി ഭവ്യതന്നീറു അറിയിച്ചു.

ദുരിതാശ്വാസ ക്യാന്പുകൾ മന്ത്രി സ്വാമിനാഥൻ സന്ദർശിച്ചു

ഉൗട്ടി: നീലഗിരിയിലെ ദുരിതാശ്വാസ ക്യാന്പുകൾ തമിഴ്നാട് സാമൂഹിക ക്ഷേമ മന്ത്രി എം.എസ്. സ്വാമിനാഥൻ സന്ദർശിച്ചു. തുമ്മനട്ടി പഞ്ചായത്തിലെ രംഗനാഥപുരം, ഗാന്ധി നഗർ, തലയാട്ടുമന്ദ്, അഴകർമല ഭാഗങ്ങളിലെ ക്യാന്പുകളാണ് സന്ദർശിച്ചത്. ക്യാന്പുകളിൽ കഴിയുന്നവർക്ക് ഭക്ഷ്യ വസ്തുക്കളും അവശ്യ മരുന്നുകളും കന്പളി പുതപ്പുകളും വിതരണം ചെയ്തു. തമിഴ്നാട് ചീഫ് വിപ്പ് കെ. രാമചന്ദ്രൻ, നീലഗിരി ജില്ലാ നിരീക്ഷക ലളിത, ജില്ലാ കളലക്ടർ ലക്ഷ്മി ഭവ്യതന്നീറു, ജില്ലാ പോലീസ് സൂപ്രണ്ട് എം.എസ്. നിഷ, ഡിആർഒ നാരായണൻ, സബ് കളക്ടർമാരായ കൗസിക്, സംഗീത, ഉൗട്ടി മെഡിക്കൽ കോളജ് പ്രഫ. ഗീതാജ്ഞലി, ആർഡിഒ സതീഷ്, തഹസിൽദാർ ശങ്കർ ഗണേഷ്, ഉൗട്ടി നഗരസഭാ കമ്മീഷണർ വിനോദ്, സിബി, മുരുകേശൻ സംഘത്തിലുണ്ടായിരുന്നു. കോടപ്പമന്ദ് ഉൾപ്പെടെയുള്ള അപകട മേഖലകളിൽ സംഘം പരിശോധന നടത്തി. ജനങ്ങൾ ജാഗ്രത പാലിക്കണമെന്നും അത്യാവശ്യ യാത്രകൾ അല്ലാത്തവ ഒഴിവാക്കണമെന്നും ജില്ലാ കളക്ടർ അറിയിച്ചു.

മഴക്കാല വൈദ്യുത സുരക്ഷാ നിർദേശങ്ങൾ

കൽപ്പറ്റ: ഉപയോഗിക്കാത്ത വൈദ്യുതി ഉപകരണങ്ങൾ കനത്ത മഴയിലും ഇടിമിന്നലുള്ള സമയങ്ങളിലും പ്ലഗ്ഗിൽ നിന്ന് ഉൗരിയിടുക. ഇത് ഷോർട്ട് സർക്യൂട്ട് സാധ്യതകൾ കുറയ്ക്കും. ജനാലകൾക്ക് സമീപമുള്ള പ്ലഗ് പോയിന്‍റുകൾ നനയുന്നില്ലെന്ന് ഉറപ്പാക്കണം. ആവശ്യമായാൽ പ്ലാസ്റ്റിക് കവർ ഉപയോഗിച്ച് സംരക്ഷിക്കുക. ഇലക്ട്രിക്ക് ഉപകരണങ്ങൾ പ്രവർത്തിപ്പിക്കുന്പോൾ കൈകൾ ഉണങ്ങിയിരിക്കണം. നനഞ്ഞ കൈകൾ ഉപയോഗിക്കുന്നത് വൈദ്യുതാഘാതത്തിന് കാരണമാകും. കനത്ത മഴയിലും കാറ്റിലും വൈദ്യുതി ലൈനുകൾ പൊട്ടിവീഴാൻ സാധ്യതയുള്ളതിനാൽ വെള്ളക്കെട്ടുകളിലൂടെ നടക്കുന്നത് ഒഴിവാക്കണം. വീടിന്‍റെ എർത്തിംഗ് സിസ്റ്റം ശരിയായ രീതിയിൽ പ്രവർത്തിക്കുന്നുണ്ടെന്ന് ഉറപ്പാക്കുക. ഇത് വൈദ്യുതി ചോർച്ച തടയാൻ സഹായിക്കും. കണ്‍ട്രോൾ റൂമുകളിൽ നിന്നുള്ള അറിയിപ്പുകളും സുരക്ഷാ നിർദേശങ്ങളും ശ്രദ്ധിക്കുക. കാലാവസ്ഥാ പ്രവചനങ്ങൾ ശരിയായി മനസിലാക്കി പ്രവർത്തിക്കുക. മഴക്കാലത്ത് വൈദ്യുതി അപകടങ്ങൾ വർധിക്കുന്നതിനാൽ വീടുകളിൽ സുരക്ഷാ ഉപകരണമായ കറന്‍റ് സർക്യൂട്ട് ബ്രേക്കർ സ്ഥാപിക്കണം. വൈദ്യുതി ചോർച്ചയുണ്ടാകുന്പോൾ വൈദ്യുതി വിച്ഛേദിച്ച് അപകടങ്ങൾ തടയും. അടിയന്തര പ്രാധാന്യമുള്ള പരാതികൾ ജില്ലകളിൽ പ്രവർത്തിക്കുന്ന കണ്‍ട്രോൾ റൂം നന്പറുകളിലോ, 1912 ടോൾ ഫ്രീ നന്പറിലോ അറിയിക്കുക. വൈദ്യുതി ലൈനുകളിൽ പൊട്ടിവീണ മരക്കന്പുകൾ, മരങ്ങൾ കഐസ്ഇബി ഓഫീസുകളിൽ അറിയിക്കാതെ വെട്ടിമാറ്റാൻ ശ്രമിക്കരുത്. വൈദ്യുതി വിച്ഛേദിച്ചാൽ ഫ്ളാഷ് ലൈറ്റുകൾ, തീപ്പെട്ടികൾ ഉൾപ്പെടുന്ന സുരക്ഷാ കിറ്റുകളും വൈദ്യുതാഘാതമുണ്ടായാൽ പ്രാഥമിക ചികിത്സ നൽകാൻ പ്രഥമ ശുശ്രൂഷ കിറ്റുകളും തയാറാക്കണം.

പാതയോരത്ത് അപകട ഭീഷണി ഉയർത്തി നിൽക്കുന്ന മരങ്ങൾ വിനയാകുന്നു

സുൽത്താൻ ബത്തേരി: പാതയോരത്തെ അപകട ഭീഷണി ഉയർത്തി നിൽക്കുന്ന മരങ്ങൾ വിനയാകുന്നു. ശക്തമായ കാറ്റിലും മഴയിലും മരങ്ങൾ കടപുഴകി റോഡിന് കുറുകെ വീഴുന്നത് അപകടങ്ങൾക്കും തുടച്ചയായ ഗതാഗത തടസത്തിനും കാരണമാവുകയാണ്. മണിക്കൂറുകളോളം വൈദ്യുതി തടസത്തിനും മരങ്ങൾ കടപുഴകി വീഴുന്നത് ഇടയാക്കുന്നു. അപകടാവസ്ഥയിൽ നിൽക്കുന്ന മരങ്ങൾ മുറിച്ചുമാറ്റാൻ നടപടി എടുക്കാതിരുന്നതാണ് ഇതിന് കാരണം. മഴശക്തമായതോടെ ദേശീയപാതയിലും മറ്റ് റോഡുകളിലും മരം വീണ് ഗതാഗത തടസം നേരിടുന്നത് തുടർ സംഭവമാവുകയാണ്. രണ്ടുദിവസങ്ങൾ കൊണ്ട് ദേശീയപാതയിൽ മാത്രം പത്തിലേറെ ഇടങ്ങളിലാണ് മരങ്ങൾ വീണ് മണിക്കൂറുകളോളം ഗതാഗതം തടസപ്പെട്ടത്. മരം കടപുഴകി വീഴുന്നതുകാരണം വൈദ്യുതി ബന്ധവും താറുമാറാവുകയാണ്

യന്ത്ര സഹായത്തോടെ മണ്ണ് നീക്കം ചെയ്യുന്നതിന് നിരോധനം

കൽപ്പറ്റ: ജില്ലയിൽ അതിശക്തമായ മഴ മുന്നറിയിപ്പ് ലഭിച്ച സാഹചര്യത്തിൽ യന്ത്രസഹായത്തോടെയുള്ള മണ്ണ് നീക്കം ചെയ്യൽ പ്രവർത്തികൾ നിരോധിക്കാൻ ജില്ലാ കളക്ടർ ഉത്തരവിട്ടു. യന്ത്രസഹായത്തോടെ മണ്ണ് നീക്കം ചെയ്യുന്നത് ദുരന്തസാധ്യത വർധിപ്പിക്കാനും പൊതുജനങ്ങളുടെ ജീവനും സ്വത്തിനും ഭീഷണിയുള്ളതിനാൽ ഇനിയൊരു അറിയിപ്പ് ഉണ്ടാകുന്നതുവരെ ജില്ലയിൽ യന്ത്രം ഉപയോഗിച്ച് മണ്ണ് നീക്കം ചെയ്യുന്നത് നിരോധിച്ചു. ദുരന്തനിവാരണ പ്രവർത്തനങ്ങളുടെ ഭാഗമായി പുഴകളിലും തോടുകളിലും അടിഞ്ഞുകൂടിയ എക്കലുകൾ നീക്കം ചെയ്യുന്നതിന് നിരോധന ഉത്തരവ് ബാധകമല്ലെന്ന് ജില്ലാ ദുരന്ത നിവാരണ അതോറിറ്റി ചെയർപേഴ്സണ്‍ കൂടിയായ ജില്ലാ കളക്ടർ ഡി.ആർ. മേഘശ്രീ അറിയിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]