ADVERTISEMENT

ADVERTISEMENT

തുന്പറ മാർക്കറ്റ് റോഡ് അപകടക്കെണി

മുണ്ടയ്ക്കൽ : ഉദയമാർത്താണ്ഡപുരം ഡിവിഷനിൽ എച്ച് ആൻഡ് സി ജംഗ്ഷൻ തുന്പറ മാർക്കറ്റ് റോഡിൽ സ്നേഹ ലോഡ്ജ് മുതൽ തങ്കപ്പൻ സ്റ്റോർ വരെയുള്ള റോഡ് തകർന്ന നിലയിൽ. ഇരുചക്രവാഹനങ്ങൾ റോഡിലെ കുഴിയിൽ വീണു അപകടത്തിൽപ്പെടുന്നത് പതിവാണ്.

എത്രയും വേഗം റോഡിലെ കുഴികൾ അടയ്ക്കാൻ അധികൃതർ നടപടി സ്വീകരിക്കണമെന്ന് ഉദയമാർത്താണ്ഡപുരം റസിഡൻസ് വെൽഫെയർ അസോസിയേഷൻ പ്രസിഡന്‍റ് എ. ജെ. ഡിക്രൂസ് ജനറൽ സെക്രട്ടറി എൽ. ബാബു എന്നിവർ ആവശ്യപ്പെട്ടു

ADVERTISEMENT

അഷ്ടമുടിക്കായലില്‍ മണ്ണെടുത്ത ഭാഗം ചെളിക്കുളമായി

കൊല്ലം: ദേശീയപാത നിര്‍മാണ ആവശ്യത്തിനായി അഷ്ടമുടിക്കായലില്‍ നിന്നു മണ്ണെടുത്ത ഭാഗം ചെളിക്കുണ്ടായി മാറി. സമീപത്തെ റോഡിലൂടെ കാല്‍നട യാത്ര പോലും ദുഷ്കരമായതിനാൽ പ്രദേശവാസികള്‍ ദുരിതത്തിലാണ്. കാവനാട് കുരീപ്പുഴ പാലത്തിനു താഴെ മാലിന്യ കൂമ്പാരമായതോടെയാണു പാലത്തിന്‍റെ പാര്‍ശ്വ ഭാഗത്തുള്ള പാത ചെളിക്കുളമായതെന്ന് നാട്ടുകാരും യാത്രക്കാരും പറയുന്നു. ദേശീയ പാത നിര്‍മാണത്തിന് കായലില്‍ നിന്നു മണ്ണ് ഡ്രഡ്ജ് ചെയ്‌തെടുത്തപ്പോള്‍ ഇതിന്‍റെ അവശിഷ്ടവും കോണ്‍ക്രീറ്റ് പാളികളും വീണു തൂണുകള്‍ക്കിടയില്‍ കായല്‍ നികന്നു. അഷ്ടമുടിക്കായലില്‍ മത്സ്യബന്ധനം നടത്തുന്നവര്‍ വള്ളം കെട്ടിയിട്ടിരുന്നത് ഇവിടെയാണ്. മാലിന്യവും മണ്ണും നിറഞ്ഞതോടെ വള്ളം അടുപ്പിക്കാന്‍ പോലും കഴിയാത്ത അവസ്ഥയായിയെന്ന് തൊഴിലാളികൾ പറയുന്നു. കെട്ടിയിട്ടിരുന്ന വള്ളം പോലും ഇവിടെ നിന്നു മാറ്റാനായില്ല. കായല്‍ നികന്നതോടെ മാലിന്യങ്ങൾ മുഴുവന്‍ ഇവിടെയാണ് അടിഞ്ഞ് കൂമ്പാരമാകുന്നത്. ഇതിനപ്പുറത്ത് അറവു മാലിന്യവും മറ്റും പിക്കപ്പ് ഓട്ടോറിക്ഷയിലും ഇതര വാഹനങ്ങളിലും കൊണ്ടുവന്നു ഇരുട്ടിന്‍റെ മറവിൽ പാലത്തില്‍ നിന്നു കായലിലേക്കു തള്ളുകയാണ്. ഇവ ചീഞ്ഞഴുകി അസഹ്യമായ ദുര്‍ഗന്ധമാണ് ഉയരുന്നത്. ഇവിടം തെരുവു നായ്ക്കളുടെ താവളമായി മാറിക്കഴിഞ്ഞു. രാപകൽ വ്യത്യാസമില്ലാതെ നായ്ക്കൾ ഇവിടെ കേന്ദ്രീകരിക്കുന്നത് സമീപവാസികള്‍ക്ക് ഭീഷണി ഉയര്‍ത്തുകയാണ്. പാലത്തിന്‍റെ അടിയിലുള്ള സ്ഥലത്ത് ദേശീയപാത നിര്‍മാണത്തിനുള്ള റീ ഇന്‍ഫോഴ്‌സ്ഡ് എര്‍ത്ത് (ആര്‍ഇ) പാനലും മറ്റും നിര്‍മിക്കുന്നുണ്ട്. ലോറി, ക്രെയിന്‍ തുടങ്ങിയവ ചെമ്മണ്‍ പാതയിലൂടെയാണ് പാലത്തിന്‍റെഅടിയിലുള്ള നിര്‍മാണ സ്ഥലത്തേക്കു പോകുന്നത്. വലിയ വാഹനങ്ങള്‍ കടന്നു പോകുന്ന ചെമ്മണ്‍പാത ഇപ്പോൾ കാല്‍നട യാത്ര പോലും സാധ്യമല്ലാത്ത വിധത്തില്‍ ചെളിക്കളമായി മാറി. കുട്ടികള്‍ക്ക് സ്കൂളുകളിൽ പോകാന്‍ പോലും കഴിയുന്നില്ല. റോഡിന്‍റെ ദുരവസ്ഥ കാരണം സമീപത്തെ ട്യൂഷന്‍ സെന്‍റര്‍ താത്ക്കാലികമായി അടച്ചു. കുട്ടികളുമായി ഇരുചക്രവാഹനത്തില്‍ ഇതുവഴി പോകാന്‍ ശ്രമിച്ചവര്‍ തെന്നിവീണു പരുക്കേറ്റ സംഭവം വരെ ഉണ്ടായി. മഴ കനത്തതോടെയാണ് റോഡ് കൂടുതല്‍ ദുരിതത്തിലായത്. അടിയന്തരമായി റോഡ് സഞ്ചാരയോഗ്യമാക്കണമെന്ന് ആവശ്യപ്പെട്ട് പ്രദേശവാസികള്‍ കരാര്‍ സ്ഥാപനത്തിന്‍റെ വാഹനങ്ങള്‍ കഴിഞ്ഞ ദിവസം തടയുകയുണ്ടായി. പാലത്തിന്‍റെ അടിയില്‍ മണ്ണിട്ടു നികത്തിയ സ്ഥലം ഡ്രഡ്ജ് ചെയ്തു പൂര്‍വ സ്ഥിതിയിലാക്കണമെന്നാണ് പ്രദേശവാസികൾ അടക്കമുള്ളവരുടെ പ്രധാന ആവശ്യം.

എസ്ബിഐ കാർഷിക ഉപഭോക്തൃ സമ്പർക്ക പരിപാടി സംഘടിപ്പിച്ചു

കൊട്ടാരക്കര: സ്റ്റേറ്റ് ബാങ്ക് ഓഫ് ഇന്ത്യയുടെ കാർഷിക വായ്പാ അവബോധ വാരാചരണ ഭാഗമായി കൊട്ടാരക്കര റീജണൽ ബിസിനസ് ഓഫീസിന്‍റെ നേതൃത്വത്തിൽ കുന്നത്തൂർ പഞ്ചായത്ത് ഹാളിൽ കാർഷിക ഉപഭോക്തൃ സമ്പർക്ക പരിപാടിയും കർഷക സംഗമവും സംഘടിപ്പിച്ചു. എസ്ബിഐ കൊട്ടാരക്കര റീജണൽ മാനേജർ ജെ .പ്രവീൺ ചന്ദ്രൻ ചടങ്ങിൽ അധ്യക്ഷത വഹിച്ചു. കുന്നത്തൂർ പഞ്ചായത്ത് പ്രസിഡന്‍റ് കെ .വത്സല കുമാരി ഉദ്ഘാടനം ചെയ്തു. കുന്നത്തൂർ പഞ്ചായത്ത് ക്ഷേമ വികസന കാര്യ സ്റ്റാൻഡിംഗ് കമ്മിറ്റി ചെയർപേഴ്സൺ ഷീജ രാധാകൃഷ്ണൻ ,ഡയറി ഡെവലപ്മെന്‍റ് ഓഫീസർ ബിജു, വ്യവസായ എക്സ്റ്റൻഷൻ ഓഫീസർ വിപിൻ ചന്ദ്രലാൽ, കൃഷി ഓഫീസർ നന്ദകുമാർ,ജേക്കബ് മാത്യു കുരാക്കാരൻ,അഭിലാഷ് കരിമുളയ്ക്കൽ,ചീഫ് മാനേജർ ജി .ജിനരാജ് , ഡെപ്യൂട്ടി മാനേജർ അരുൺ രാജ് ,നെടിയവിള ബ്രാഞ്ച് മാനേജർ രമ്യ ദിനേശൻ,ഷെറിൻ തുടങ്ങിയവർ പ്രസംഗിച്ചു. റീജിയൺ പരിധിയിൽ ഉള്ള എട്ടു മികച്ച കർഷകരെ ബാങ്ക് ആദരിച്ചു .

മലയോര കർഷകരുടെ രോഷം നിലമ്പൂരിൽ പ്രതിഫലിക്കുമെന്ന്

കേരള കോൺഗ്രസ് കുണ്ടറ നിയോജകമണ്ഡലം നേതൃയോഗം കണ്ണനെല്ലൂർ: മലയോര കർഷകരുടെ ദു:ഖവും രോഷവും നിലമ്പൂർ തെരഞ്ഞടുപ്പിൽ പ്രതിഫലിക്കുമെന്നും അത് യുഡിഎഫി ന്‍റെ വിജയം അനായാസമാക്കുമെന്നും കേരള കോൺഗ്രസ് സംസ്ഥാന ജനറൽ സെക്രട്ടറി കുളത്തൂർരവി. വന്യമൃഗങ്ങളുടെ ആക്രമണത്തിൽ സാധാരണക്കാരന്‍റെ ജീവൻ നഷ്ടപ്പെടുമ്പോൾ കേരള സർക്കാരും, കേന്ദ്ര സർക്കാരും നിയമത്തിന്‍റെ നൂലാമലയിൽ പിടിച്ച് പരസ്പരം കുറ്റപ്പെടുത്തി പാവപ്പെട്ട മലയോരജനതയെ കൈയൊഴിയുകയാണെന്ന് അദ്ദേഹം കുറ്റപ്പടുത്തി. കേരള കോൺഗ്രസ് കുണ്ടറ നിയോജകമണ്ഡലം നേതൃയോഗം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. ചിറ്റുമല ബ്ലോക്ക് പഞ്ചായത്ത് അംഗം അഡ്വ. അരുൺ അലക്സ് അധ്യക്ഷത വഹിച്ചു. സംസ്ഥാന ജനറൽ സെക്രട്ടറി വി. വിശ്വജിത്ത്, ജില്ലാ വൈസ് പ്രസിഡന്‍റ് വെങ്കിട്ട രമണൻ പോറ്റി, അനിൽ പനിക്കവിള, വി. പി. സാബു, ദാസ് കൊറ്റങ്കര, ലിജു വിജയൻ, ജിഷ്ണു ഗോകുലം, അനസ് കരിക്കോട്, രാജേഷ് മുകുന്ദാശ്രമം, ശിവൻകുട്ടി പിള്ള, അബ്ദുൽ ഷുക്കൂർ, രാജേഷ് രാഗം, സന്തോഷ് നാലുമുക്ക്, ജി. അജയകുമാർ, ഷെഫീഖ് ചന്ദനത്തോപ്പ്, മുഹമ്മദ് ഫയാസ്, രഘുനാഥ്, അജയകുമാർ, രവീന്ദ്രൻ പിള്ള, തുടങ്ങിയവർ പ്രസംഗിച്ചു.

കാടുപിടിച്ച പറമ്പുകള്‍ വൃത്തിയാക്കണം; ഇല്ലെങ്കിൽ ഉടമയ്ക്കെതിരേ നടപടി

ചാത്തന്നൂർ: സംസ്ഥാനത്ത് കാടുമൂടി കിടക്കുന്ന പറമ്പുകള്‍ വൃത്തിയാക്കുന്നതില്‍ വീഴ്ച വരുത്തുന്ന ഉടമകൾക്കെതിരേ നടപടി വരുന്നു. കാട് മൂടികിടക്കുന്ന പറമ്പുകൾ ഉടൻ തന്നെ വൃത്തിയാക്കിയില്ലെങ്കിൽ കർശനനടപടിയുമായി മുന്നോട്ട് പോകാൻ തദ്ദേശ ഭരണ സ്ഥാപനങ്ങൾക്ക് നിർദ്ദേശം നൽകി സർക്കാർ ഉത്തരവിറക്കി. ഉടമസ്ഥർ കാട് വൃത്തിയാക്കിയില്ലെങ്കിൽ തദ്ദേശഭരണ സ്ഥാപനങ്ങള്‍ വൃത്തിയാക്കി അതിന്‍റെ ചെലവ് ഉടമയില്‍നിന്ന് ഈടാക്കാമെന്ന പഞ്ചായത്തീരാജ് ചട്ടം കർശനമായി നടപ്പാക്കാനാണ് തദ്ദേശ സ്ഥാപന സെക്രട്ടറിമാർക്ക് നിർദേശം നല്‍കിയത്. അയല്‍പക്കത്തെ കാടുകയറിക്കിടന്ന പറമ്പില്‍നിന്നുള്ള പാമ്പ് കടിയേറ്റ് 2021 മാർച്ചിൽ മൂന്ന് വയസുകാരനായ കുട്ടി മരിച്ച സംഭവത്തിനു പിറകെ ഇക്കാര്യത്തിൽ കർശന നിർദ്ദേശത്തോടെ ഹൈക്കോടതി ഉത്തരവ് പുറപ്പെടുവിച്ചിരുന്നു. ഈ സാഹചര്യത്തിലാണ് സർക്കാർ ഇത് കർശനമായി നടപ്പാക്കാനൊരുങ്ങുന്നത്. തദ്ദേശ സ്ഥാപനങ്ങള്‍ക്ക് ഇത്തരം കാടുപിടിച്ച സ്ഥലം വൃത്തിയാക്കുന്നതിന് 1994-ലെ കേരള പഞ്ചായത്തുരാജ് ആക്റ്റില്‍ സെക്ഷൻ 238, 239, 240 പ്രകാരം ഉടമകള്‍ക്ക് നിർദേശം നല്‍കാവുന്നതാണ്. കാടുപിടിച്ച പറമ്പ് വ്യക്തികൾക്കോ കൃഷിക്കോ ആപത്തുണ്ടാക്കാൻ സാധ്യതയുണ്ടെന്ന് പഞ്ചായത്ത് കരുതുന്നപക്ഷം വൃക്ഷമോ ശാഖയോ മുറിച്ചുമാറ്റണമെന്നും കാട്ടുചെടികള്‍, ഹാനികരമായ വൃക്ഷ - സസ്യാദികള്‍, വിഷകരമായ ഇഴജന്തുക്കള്‍, ഉപദ്രവകാരികളായ മൃഗങ്ങള്‍ എന്നിവ അയല്‍പക്കത്തിന് ഉപദ്രവകരമായിട്ടുള്ളതാണെങ്കില്‍ ഒഴിവാക്കുന്നതിന് നടപടി സ്വീകരിക്കണമെന്നും ചട്ടത്തിൽ വ്യവസ്ഥ ചെയ്യുന്നുണ്ട്. നടപടി സ്വീകരിക്കാൻ പറമ്പിന്‍റെ ഉടമയോടോ കൈവശക്കാരനോടോ നിർദേശിക്കണമെന്നാണ് ചട്ടം. അവർ ചെയ്യാത്തപക്ഷം സെക്രട്ടറിക്ക് നേരിട്ട് ഭൂമി വൃത്തിയാക്കിക്കാം. ഇതിനു വരുന്ന മൊത്തം ചിലവും ഭൂഉടമയിൽ നിന്ന് ഈടാക്കുകയും ചെയ്യാം.

പാരിപ്പള്ളി പഞ്ചായത്ത് കമ്യൂണിറ്റി ഹാൾ ജീർണാവസ്ഥയിൽ

പാരിപ്പള്ളി: കല്ലുവാതുക്കൽ പഞ്ചായത്തിന്‍റെ കലാ-സഹിത്യ- സാംസ്കാരിക-കേന്ദ്രമായിരുന്ന കല്ലുവാതുക്കൽ പഞ്ചായത്ത് കമ്യുണിറ്റി ഹാൾ ജീർണാവസ്ഥയിൽ. പാരിപ്പള്ളിയിൽ സ്ഥിതിചെയ്യുന്ന കമ്യുണിറ്റി ഹാൾ പൊളിഞ്ഞ്നിലംപൊത്താറായ അവസ്ഥയിലാണ്. കഴിഞ്ഞ ഭരണ സമിതി ലക്ഷങ്ങൾ ചെലവഴിച്ച് ഇന്‍റീരിയർ ഉൾപ്പെടെ പുതുക്കിപ്പണിയുകയുംപുതിയ രീതിയിലുള്ള ഇരിപ്പിടങ്ങൾ സ്ഥാപിക്കുകയും ചെയ്തെങ്കിലും ഇതെല്ലാം വൃത്തിയായും കൃത്യതയോടെയും സംരക്ഷിക്കാത്തതിനെ തുടർന്ന് എല്ലാം നശിച്ച നിലയിലാണ്. ഓഡിറ്റോറിയത്തിൽ നടക്കുന്ന കല്യാണങ്ങൾക്കും മറ്റും പാചകം ചെയ്യുന്നതിനായി ഉപയോഗിച്ചു കൊണ്ടിരുന്ന പാചകപാത്രങ്ങളും അതുമായി ബന്ധപ്പെട്ടുള്ള മറ്റ് ഉപകരണങ്ങൾ എല്ലാം തന്നെ സാമൂഹ്യ വിരുദ്ധരും ആക്രിക്കാരും കവർന്നുകൊണ്ടു പോയി. വിവരം പഞ്ചായത്ത് അതികൃതരെ അറിയിച്ചിരുന്നെങ്കിലും യാതൊരു നടപടിയും സ്വീകരിച്ചില്ല. വൈദ്യുതി ഉപകരണങ്ങൾ പോലും നഷ്ടപ്പെട്ടിട്ടുണ്ട്. കമ്മ്യൂണിറ്റി ഹാളിന്‍റെ സോച്യാവസ്ഥയ്ക്കെതിരേ എൽ ഡി എഫിന്‍റെ നേതൃത്വത്തിൽ പ്രതിഷേധം സംഘടിപ്പിക്കുവാൻ ഒരുങ്ങുകയാണ്. ഹൈവേ വികസന ഭാഗമായി കമ്യുണിറ്റി ഹാളിന്‍റെ ഭാഗം പൊളിച്ചുമാറ്റി. മതിൽ കെട്ടിയ ഫൗണ്ടേഷൻ പൊളിച്ച് 25ഓളം ലോഡ് പാറയാണ് ഒരു രൂപ പോലും പഞ്ചായത്തിന് നൽകാതെ കടത്തിക്കൊണ്ട് പോയതെന്നുമുള്ള ആക്ഷേപവും നിലനിൽക്കുകയാണ്. ഇതിനെതിരെ പ്രക്ഷോഭം സംഘടിപ്പിക്കുമെന്ന് എൽഡിഎഫ് പാർലമെന്‍ററി പാർട്ടി നേതാവ് എസ് .വിജയൻ പറഞ്ഞു.

പെരിനാട് ആയുർവേദ ആശുപത്രിക്ക് റീത്തുവച്ച് പ്രതിഷേധം

കണ്ടറ: പെരിനാട് ആയുർവേദ ആശുപത്രിക്കുറീത്തുവച്ച് പ്രതിഷേധിച്ച് ബിജെപി. കോടികൾ ചെലവഴിച്ച് നിർമിച്ച പെരിനാട് ആയുർവേദ ആശുപത്രിയിൽ ഇതുവരെ ഒരു രോഗിക്ക് പോലും ചികിത്സ നൽകാൻ കഴിയാത്ത സാഹചര്യത്തിലായിരുന്നു പ്രതിഷേധം. മുപ്പത് കിടക്കകളോടെ കിടത്തി ചികിത്സ നടത്താൻ യോഗ്യമായ കെട്ടിടം മന്ത്രി അബ്ദുൾ റഹ്മാൻ ഉദ്ഘാടനം ചെയ്തിട്ട് വർഷങ്ങൾ കഴിഞ്ഞു. ഇന്നേവരെ ആശുപത്രി കെട്ടിടത്തിൽ ഒരു രോഗിക്ക് പോലും ചികിത്സ നൽകാൻ കഴിയാത്തത് ഇടത് ഭരണ സമിതിയുടെ കെടുകാര്യസ്ഥതയാണെന്നാണ് ബിജെപി ആരോപിക്കുന്നത്. പഞ്ചായത്ത് സമിതി അധ്യക്ഷൻ ഷാജുമോന്‍റെ അധ്യക്ഷതയിൽ നടന്ന പ്രതിഷേധ യോഗം ബിജെപി സംസ്ഥാനസമിതിയംഗം വെള്ളിമൺ ദിലീപ് ഉദ്ഘാടനം ചെയ്തു. ജില്ലാജനറൽ സെക്രട്ടറി ഇടവട്ടം വിനോദ്, ബ്ലോക്ക് പഞ്ചായത്ത് അംഗം മഠത്തിൽ സുനിൽ, ആരോഗ്യ സ്റ്റാന്‍റിംഗ് കമ്മിറ്റി ചെയർപേഴ്സൺ ശ്രുതി എന്നിവർ പ്രസംഗിച്ചു. മെമ്പർമാരായ വിജയലക്ഷ്മി, സുനിൽകുമാർ, സ്വപ്ന, രമ്യ എന്നിവർ പ്രകട നത്തിന് നേതൃത്വം നൽകി.

സെന്‍റ് ജോസഫ്സ് മിഷന്‍ ആശുപത്രിയില്‍ പുതുതായി നിര്‍മിച്ച രണ്ടു നിലകള്‍ തുറന്നു

അഞ്ചല്‍: അഞ്ചല്‍ സെന്‍റ് ജോസഫ്സ് മിഷന്‍ ആശുപത്രിയില്‍ നിര്‍മാണം പൂര്‍ത്തീകരിച്ച രണ്ടു നിലകള്‍ കൂടി ആശുപത്രി പ്രവര്‍ത്തനങ്ങള്‍ക്കായി തുറന്ന് നല്‍കി. മദര്‍ തെരേസ, സെന്‍റ് അല്‍ഫോണ്‍സാമ എന്ന് നാമകരണം ചെയ്യപ്പെട്ടിട്ടുള്ള വാര്‍ഡുകള്‍ പത്തനംതിട്ട ബിഷപ് ഡോ. സാമുവേല്‍ മാർ ഐറേനിയോസ് ആശീര്‍വാദം ചെയ്തു . അത്യാധുനിക സംവിധാനങ്ങളോട് കൂടിയ സ്യൂട്, എക്സിക്യൂട്ടീവ്, ഡീലക്സ് റൂമുകള്‍, നേഴ്സിങ് സെന്‍ററുകള്‍ എന്നിവയാണ് പുതിയ വാര്‍ഡുകളില്‍ സജ്ജമാക്കിയിട്ടുള്ളത്. പഞ്ചായത്ത് പ്രസിഡന്‍റ് എ. നൗഷാദ്, വൈസ് പ്രസിഡന്‍റ് ബിന്ദു തിലകന്‍, ആശുപത്രി ഡയറക്ടര്‍ സിസ്റ്റര്‍ ലില്ലി തോമസ്, മെഡിക്കല്‍ സൂപ്രണ്ട് ഡോ. ജെറി ജോണ്‍, എച്ച്ആര്‍ മാനേജര്‍ കെ. സിജോ തുടങ്ങി ജനപ്രതികള്‍, വൈദികര്‍, ഡോക്ടര്‍മാര്‍ അടക്കം നിരവധിപേര്‍ പങ്കെടുത്തു. എംആര്‍ഐ അടക്കമുള്ള പരിശോധന സംവിധാനങ്ങളും ആധുനിക സംവിധാനങ്ങളോട് കൂടിയ ചികിത്സസൗകര്യങ്ങളും ആശുപത്രിയില്‍ ഉടന്‍ പ്രവര്‍ത്തന സജ്ജമാകുമെന്ന് ആശുപത്രി അധികൃതര്‍ പറഞ്ഞു.

കടാശ്വാസ കമ്മീഷന് നിർദേശം നൽകണം: കേരള കർഷക കോൺഗ്രസ്

അയിലറ: വിളനഷ്ടമുൾപ്പെടെയുള്ള കാർഷിക നഷ്ടങ്ങളുടെ അപേക്ഷകൾ സ്വീകരിച്ച് തീർപ്പ് കല്പിക്കുന്നതിന് കാർഷിക കടാശ്വാസ കമ്മീഷന് നിർദ്ദേശം നൽകണമെന്ന് കേരള കർഷക കോൺഗ്രസ് സംസ്ഥാന ജനറൽ സെക്രട്ടറി ഡാനിയേൽ വിളക്കുപാറ മുഖ്യമന്ത്രിക്ക് നൽകിയ നിവേദനത്തിൽ ആവശ്യപ്പെട്ടു. കടാശ്വാസം സംബന്ധിച്ച് കാർഷിക കടാശ്വാസ കമ്മീഷൻ 2016 ന് മുമ്പുള്ള സംസ്ഥാനത്തെ വിവിധ ജില്ലകളിൽ നിന്നുള്ള പരാതികൾ മാത്രം സ്വീകരിക്കുന്ന നടപടി അപലപനീയമാണെന്ന് കേരള കർഷക കോൺഗ്രസ് ആരോപിച്ചു. 2018 ലെ മഹാപ്രളയവും 2020 ലെ കോവിഡ് മഹാമാരിയും മൂലം കാർഷിക രംഗത്തുണ്ടായ തകർച്ചയും തളർച്ചയും തുടർന്നുണ്ടായ കഷ്ട നഷ്ടങ്ങൾ കാരണം പല കർഷകരും ആത്മഹത്യയുടെ വക്കിലാണ്. സർക്കാർ സംഭരിച്ച നെല്ലിന്‍റെ വില സമയത്ത് നൽകാതിരിക്കുക, റബറിന് സർക്കാർ പ്രഖ്യാപിച്ച വില ലഭിക്കാതിരിക്കൂക, വന്യമൃഗശല്യം മൂലം കൃഷി നഷ്ടപ്പെടുക, പരിചയ സമ്പന്നരായ കർഷക തൊഴിലാളികളുടെ അപര്യാപ്തത, അന്യായമായ കൂലി വർധന, ഇവയൊക്കെക്കൊണ്ട് ബാങ്കുകളിൽ നിന്നും വായ്പ എടുത്തിട്ടുള്ള കർഷകർ സമയത്ത് വായ്പ തിരിച്ചടക്കാൻ കഴിയാത്തതുമൂലമുള്ള ആത്മഹത്യ, ബാങ്കുകളുടെ ജപ്തി ഭീഷണി ഇവയൊക്കെ തരണം ചെയ്യാൻ കഴിയാതെ കേരളത്തിലെ കർഷക സമൂഹം ഭീതിയിലാണ് മുന്നോട്ടു പോകുന്നതെന്നും ഡാനിയേൽ വിളക്കുപാറ നിവേദനത്തിൽ പറഞ്ഞു.

ദേശീയ പാതയോരത്ത് മരം വീഴുന്നത് തുടർക്കഥയായി

എഴുകോൺ : കൊല്ലം തിരുമംഗലം ദേശീയപാതയോരത്ത് മരം വീഴുന്നത് തുടർക്കഥയായി. ദേശീയപാതയിൽ എഴുകോണിനും ചീരങ്കാവിനും മധ്യേ പെട്രോൾ പമ്പിനുസമീപം രണ്ടുദിവസം മുന്പാണ് പുലർച്ചെ യൂക്കാലി മരം റോഡിന് കുറുകെ വീഴുന്നത്. തൊട്ടുപിന്നാലെ ഇന്നലെ രാവിലെ തേക്ക് മരം റോഡിന് കുറുകെ കടപുഴകി നിലം പൊത്തി. നിരന്തരം നൂറുകണക്കിന് വാഹനങ്ങൾ കടന്നുപോകുന്ന മെയിൻ റോഡിലാണ് അടിക്കടിയുള്ള ഈ മരം വീഴ്ച. തേക്ക് മരം വീഴുമ്പോൾ തല നാരിഴയ്ക്കാണ് ഒരു ഇരുചക്രവാഹന യാത്രക്കാരൻ രക്ഷപ്പെട്ടത്. സമീപത്തായി കെഎസ്ഇബി ഓഫീസ് ഉള്ളതിനാലും ഉടൻ വൈദ്യുതി ബന്ധം വിച്ഛേദിച്ചതിനാലും വലിയ ദുരന്തം ആണ് ഒഴിവായത്. റെയിൽവേ സ്റ്റേഷൻ മുതൽ എസ്ബിഐക്ക് എതിർവശം വരെയുള്ള വളവ് വരെ അനേകം മരങ്ങൾ ഭീഷണിയായി നിൽക്കുന്നുണ്ട്.

കളഞ്ഞുകിട്ടിയ സ്വർണം തിരികെ നൽകി

കൊട്ടാരക്കര :കളഞ്ഞുകിട്ടിയ സ്വർണം തിരികെ നൽകി വീട്ടമ്മ മാതൃകയായി .പുലമൺ കുരിങ്ങേൽ അശോകന്‍റെ ഭാര്യ ആശയ്ക്കാണ് കഴിഞ്ഞ ചൊവാഴ്ച രാവിലെ മാർത്തോമാ സ്കൂളിന് സമീപത്ത് റോഡരികിൽ നിന്ന് നാല് ഗ്രാം തൂക്കം വരുന്ന കൈ ചെയിൻ കളഞ്ഞുകിട്ടിയത് . സമീപത്തുള്ള സ്കൂളിലും കച്ചവട സ്ഥാപനങ്ങളിലും സ്വർണം കളഞ്ഞുകിട്ടിയ വിവരം അറിയിച്ചിരുന്നു .ഉടമയെ അനന്വേഷിച്ചെങ്കിലും കണ്ടെത്താൻ ആയില്ല .തുടർന്ന് സ്വർണാഭരണം ആശയുടെ കൈവശം സൂക്ഷിക്കുകയായിരുന്നു. ആശ ജോലിചെയ്യുന്ന പുലമൺ ജംഗ്ഷനിലെ തുണിക്കടയിൽ സ്വർണാഭരണത്തിന്‍റെ അവകാശികളായി പലരും എത്തിയിരുന്നു .എന്നാൽ യഥാർഥഉടമയെ തിരിച്ചറിയുന്നത് വരെ സ്വർണം ആരെയും കാണിക്കാൻ ആശ കൂട്ടാക്കിയിരുന്നില്ല. തുടർന്ന് കഴിഞ്ഞ ദിവസം യഥാർഥ ഉടമയായ മുസ്ലിം സ്ട്രീറ്റ് റാസി മൻസിലിൽ ആൽഫ സലീമിന് കൊട്ടാരക്കര പോലീസ് സ്റ്റേഷൻ ഇൻസ്‌പെക്ടർ അനീസിന്‍റെ സാന്നിധ്യത്തിൽ കൈമാറുകയായിരുന്നു .

ബിജെപി വികസിതകേരളം ശില്പശാല സംഘടിപ്പിച്ചു

കൊട്ടാരക്കര :മോദി സർക്കാരിന്‍റെ 11 വർഷത്തെ ക്ഷേമപ്രവർത്തനങ്ങൾ സാധാരണ ജന ങ്ങളിലേക്ക് എത്തിക്കുവാൻ കൊല്ലം ഈസ്റ്റ്‌ ജില്ലയിലെ എല്ലാ ഏരിയ കേന്ദ്രങ്ങളിലും സമ്മേളനവും ഗൃഹ സമ്പർക്കവും നടത്തുമെന്ന് ബിജെപി ജില്ല ഇൻ ചാർജ് വി .വി .രാജേഷ് പറഞ്ഞു. നമോ മന്ദിറിൽ നടന്ന വികസിത കേരളം ശില്പശാല ഉദ്ഘാടനം ചെയ്യുകയായിരുന്നു അദ്ദേഹം. 25 മുതൽ എല്ലാ മണ്ഡല കേന്ദ്രങ്ങളിലും പൗരപ്രമുഖരെ അണിനിരത്തി വികസിത സങ്കൽപ്പ സഭകൾ സംഘടിപ്പിക്കും.യോഗ ദിന മായ 21 ന് അഞ്ചു കേന്ദ്രങ്ങളിൽ ആയിരം പേരെ പങ്കെടുപ്പിച്ചു യോഗ പ്രദർശനവും,അയ്യങ്കാളി സ്മൃതി ദിനത്തിൽപുഷ്പാർച്ചനയുംനടത്തും. ജില്ല പ്രസിഡന്‍റ് രാജി പ്രസാദ് അധ്യക്ഷയായിരുന്നു. ജി .ഗോപിനാഥ് ,ആലഞ്ചേരി ജയചന്ദ്രൻ, അഡ്വ . വയക്കൽ സോമൻ, എ .ആർ .അരുൺ ,എം .ആർ .സുരേഷ്,ജോമോൻ, എന്നിവർ പ്രസംഗിച്ചു.

ശുചിത്വപാഠങ്ങള്‍ വിലയിരുത്താന്‍ ഗ്രാമീണ്‍ സര്‍വേ

കൊല്ലം: രാജ്യത്തെ ഏറ്റവും വൃത്തിയുള്ള സംസ്ഥാനത്തെയും ജില്ലയെയും കണ്ടെത്തുന്നതിനും ഗ്രാമീണ ജനതയുടെ ശുചിത്വപാഠങ്ങള്‍ വിലയിരുത്തുകയും ചെയ്യുന്ന സ്വച്ഛ് സര്‍വേക്ഷണ്‍ ഗ്രാമീണ്‍ സര്‍വെ കൊല്ലത്ത് നടക്കും. ജില്ലയില്‍ 26 വില്ലേജുകളിലാണ് ഇതിനായുള്ള പരിശോധന നടക്കുക. സര്‍വേയില്‍ വീടുകളില്‍ ശൗചാലയസൗകര്യങ്ങളുടെ സാന്നിധ്യം,വെളിയിടവിസര്‍ജന മുക്തം, കൈ കഴുകല്‍ സംവിധാനങ്ങള്‍, ജൈവ - അജൈവ മാലിന്യ സംസ്‌കരണം, മലിനജല പരിപാലനം, പ്ലാസ്റ്റിക് മാലിന്യ സംസ്‌കരണം തുടങ്ങിയവ വിലയിരുത്തും. വീടുകള്‍ക്ക്പുറമേ പൊതു ഇടങ്ങള്‍, ബസ് സ്റ്റാന്‍ഡുകള്‍, പഞ്ചായത്ത് പരിസരങ്ങള്‍, സ്‌കൂളുകള്‍, അങ്കണവാടികള്‍, ആരാധനാലയങ്ങള്‍, മാര്‍ക്കറ്റുകള്‍ എന്നിവിടങ്ങളിലെയും ശുചിത്വനിലവാരം പരിശോധനക്ക് വിധേയമാക്കും. അംഗീകൃത ദേശീയ ഏജന്‍സികളാണ് സര്‍വേ നടത്തുന്നത്. സര്‍വേയ്ക്കായി പ്രത്യേകമായി 1000 മാര്‍ക്കുള്ള ശുചിത്വ മാനദണ്ഡങ്ങള്‍ നിര്‍ദേശിച്ചിട്ടുണ്ട്. ഓരോ വില്ലേജിലെയും ശുചിത്വ പ്രവര്‍ത്തനങ്ങളെ അടിസ്ഥാനമാക്കിയാകും റാങ്ക് തീരുമാനിക്കുക. പൊതുജനങ്ങളുടെ ആശയങ്ങളും അഭിപ്രായങ്ങളും സര്‍വേയില്‍ ഉള്‍പ്പെടുത്തുന്നതിനായി ആരംഭിച്ച 'സ്വച്ഛ് സര്‍വേക്ഷന്‍ ഗ്രാമീണ്‍ 2025' മൊബൈല്‍ ആപ്ലിക്കേഷനിലൂടെ പൊതുജനങ്ങളുടെ പ്രതികരണങ്ങളും, അഭിപ്രായങ്ങളും ശേഖരിക്കും.

വായനപക്ഷാചരണം: ജില്ലാതല ഉദ്ഘാടനം 19ന്

കൊല്ലം: പുസ്തക വായനയുടെ മൂല്യം തലമുറകളിലേക്ക് കൈമാറുന്നത് ലക്ഷ്യമാക്കിയുള്ള വായനപക്ഷാചരണം 19ന്. ജില്ലാ ലൈബ്രറി കൗണ്‍സിലും ഇന്‍ഫര്‍മേഷന്‍ പബ്ലിക്ക് റിലേഷന്‍സ് വകുപ്പും സംയുക്തമായി വിദ്യാഭ്യാസ വകുപ്പ്, ജില്ലാ പഞ്ചായത്ത്, സാക്ഷരതാമിഷന്‍, പി.എന്‍ പണിക്കര്‍ ഫൗണ്ടേഷന്‍ എന്നിവയുടെ സഹകരണത്തോടെ ജൂലൈ ഏഴ് വരെ വായനപക്ഷാചരണവും നടത്തും. 19ന് രാവിലെ 10ന് തട്ടാമല ജി വി എച്ച് എസ് എസ് സ്‌കൂളില്‍ ജില്ലാപഞ്ചായത്ത് പ്രസിഡന്‍റ് ഡോ. പി.കെ. ഗോപന്‍ ജില്ലാതല ഉദ്ഘാടനം നിര്‍വഹിക്കും. ജില്ലാ ലൈബ്രറി കൗണ്‍സില്‍ പ്രസിഡന്‍റ് കെ.ബി.മുരളീകൃഷ്ണന്‍ അധ്യക്ഷനാകും. ജില്ലാ കളക്ടര്‍ എന്‍. ദേവിദാസ് വായനാപക്ഷാചരണ സന്ദേശം നല്‍കും. ഡോ. കെ. പ്രസന്നകുമാര്‍ മുഖ്യപ്രഭാഷണം നടത്തും. ജില്ലാ ലൈബ്രറി കൗണ്‍സില്‍ സെക്രട്ടറി ഡി. സുകേശന്‍, സംസ്ഥാന ലൈബ്രറി കൗണ്‍സില്‍ എക്‌സിക്യൂട്ടീവ് അംഗം എസ്.നാസര്‍, ജില്ലാ ഇന്‍ഫര്‍മേഷന്‍ ഓഫീസര്‍ എല്‍. ഹേമന്ത്കുമാര്‍, വിദ്യാഭ്യാസ ഉപഡയറക്ടര്‍ കെ. ഐ.ലാല്‍, താലൂക്ക് ലൈബ്രറി കൗണ്‍സില്‍ പ്രസിഡന്‍റ് പി. .ഉഷാകുമാരി, സാക്ഷരത മിഷന്‍ ജില്ലാ കോ-ഓര്‍ഡിനേറ്റര്‍ ടോജോ ജേക്കബ്, പി.എന്‍.പണിക്കര്‍ ഫൗണ്ടേഷന്‍ ജില്ലാ സെക്രട്ടറി എന്‍. ജയചന്ദ്രന്‍, വി എച്ച് എസ് എസ് പ്രിന്‍സിപ്പാള്‍ വി. ലിജി, ജി വി എച്ച് എസ് എസ് ഹെഡ്മിസ്ട്രസ് എം.മിനി, താലൂക്ക് ലൈബ്രറി കൗണ്‍സില്‍ സെക്രട്ടറി അഡ്വ. കെ. പി. സജിനാഥ് തുടങ്ങിയവര്‍ പങ്കെടുക്കും. ഗന്ഥശാല പ്രസ്ഥാനത്തിന്‍റെ അമരക്കാരായിരുന്ന പി. എന്‍. പണിക്കരുടെ ചരമദിനമായജൂൺ 19 മുതല്‍ ഐ വി ദാസിന്‍റെ ജന്മദിനമായ ജൂലൈ ഏഴ് വരെ വിവിധ പരിപാടികളോടെയാണ് പക്ഷാചരണം. അനുസ്മരണ യോഗങ്ങള്‍, ഉന്നതവിജയം നേടിയ വിദ്യാര്‍ഥികളെ ആദരിക്കല്‍, വായനോത്സവത്തിനായി തെരഞ്ഞെടുത്ത പുസ്തകങ്ങള്‍ പരിചയപ്പെടുത്തല്‍, ലഹരിവിരുദ്ധ സദസ്, വായനമത്സരങ്ങള്‍ തുടങ്ങിയവ സംഘടിപ്പിക്കുന്നുണ്ട്.

മലയോരമേഖലയിൽ മഴ ശക്തമായതോടെ പാലരുവിയിൽ സഞ്ചാരികളുടെ തിരക്കേറി

അനിൽ പന്തപ്ലാവ് പുനലൂർ: കിഴക്കൻ മലയോര മേഖലയിൽ മഴ ശക്തമാകുമ്പോൾ ആര്യങ്കാവിലെ പാലരുവി ജലപാതത്തിലേയ്ക്ക് സഞ്ചാരികളുടെ ഒഴുക്ക് ആരംഭിച്ചു. പശ്ചിമഘട്ടത്തിലെ രാജാകൂപ്പ്, കരിനാൽപത്തിയേഴ്, മഞ്ഞത്തേരി ,വിളക്കുമരം എന്നീ നിബിഡവനമേഖലകളിലൂടെ ഒഴുകിയെത്തുന്ന കാട്ടുചോലകൾ സംഗമിച്ച് വൻപാറ കൂട്ടങ്ങൾക്ക് മുകളിലൂടെ ഒഴുകിയിറങ്ങുന്ന അപൂർവസുന്ദരദൃശ്യങ്ങളാണ് ഇവിടെ എത്തിയാൽ കാണാൻ കഴിയുക. പ്രകൃതിയുടെ വന്യ ശോഭയും കാട്ടുമൃഗങ്ങളുടെ സാന്നിധ്യവും സഞ്ചാരികൾക്ക് വിസ്മയ കാഴ്ച സമ്മാനിക്കും.ഇതിന് പുറമെ ജലപാതത്തിന് സമീപം തിരുവിതാംകൂർ രാജാക്കന്മാർ നിർമിച്ച കൽമണ്ഡപവും കുതിര ലയങ്ങളുടെ അവശിഷ്ടങ്ങളും കാണാം.കൊല്ലം-തിരുമംഗലം ദേശീയ പാതയിൽ ആര്യങ്കാവിൽ നിന്ന് നാലു കിലോമീറ്റർ വനപാതയിൽ സഞ്ചരിച്ചാൽ മനോഹരമായ ഈ ജലപാതത്തിൽ എത്താം. ആര്യങ്കാവ് ജംഗ്ഷനിൽ നിന്ന് 500 മീറ്റർ വാഹനങ്ങളിലോ, നടന്നോ ടിക്കറ്റ് കൗണ്ടറിൽ എത്താം. ഇവിടെ നിന്നും വാഹന സൗകര്യം ഏർപ്പെടുത്തിയിട്ടുണ്ട്. ഇക്കോ ടൂറിസത്തിന്‍റെ അഞ്ച് വാഹനങ്ങളാണ് ഇപ്പോൾ സർവീസ് നടത്തുന്നത്. 40 സീറ്റുകളുള്ള മൂന്ന് വണ്ടികളും 25 സീറ്റുകൾ ഉള്ള രണ്ടു വാഹനങ്ങളുമാണ് ഉള്ളത്. എന്നാൽ കഴിഞ്ഞ ദിവസം തിരക്ക് ഏറിയതോടെ കെഎസ്ആർടിസി യുടെ ഒരു ബസ് കൂടി വാടകയ്ക്ക് എടുത്ത് സർവീസ് നടത്തിലരികയാണ്. ജലപാതത്തിലേയ്ക്ക് ഈ വാഹനങ്ങളിൽ മാത്രമെ പോകാൻ കഴിയൂ. ഒരാൾക്ക് 70 രൂപയാണ് ഇവിടേയ്ക്ക് പോകാൻ ഈടാക്കുന്നത്. പുറത്തു നിന്നുള്ള വാഹനങ്ങൾ ടിക്കറ്റ് കൗണ്ടറിന് സമീപത്തെ പാർക്കിംഗ് ഗ്രൗണ്ടിൽ പാർക്ക് ചെയ്യുവാൻ ഇരുചക്രവാഹനത്തിന് 25 രൂപ, കാർ, ജീപ്പ് 60 രൂപ, മിനി ബസ് 150 രൂപ, ബസ് 200 രൂപ എന്നതാണ് നിരക്ക്. വാഹനങ്ങളിൽ ജലപാതത്തിന് സമീപമെത്തിയാൽ വന നടുവിലെ ഒറ്റയടിപാതയിലൂടെ ജലപാതത്തിൽ എത്താം. യാത്രാ വഴിയിൽ ലഘുഭക്ഷണവും പാനീയങ്ങളും വില കൊടുത്ത് വാങ്ങി കഴിക്കുവാനും സൗകര്യമൊരുക്കിയിട്ടുണ്ട്‌.എന്നാൽ ജലപാതത്തിൽ നീരെഴുക്ക് ശക്തമാകുമ്പോൾ ഇതിന് സമീപത്ത് കുളിക്കുവാൻ നിയന്ത്രണങ്ങൾ ഏർപ്പെടുത്തിയിട്ടുണ്ട്. സുരക്ഷയുടെ ഭാഗമായി ചില നിർമാണ പ്രവർത്തനങ്ങൾ നടന്നുവരുന്നു. യാത്രാ വഴികളിൽ അപകടകരമായി നിന്നിരുന്ന വൃക്ഷങ്ങൾ മുറിച്ചു മാറ്റി തുടങ്ങിയിട്ടുണ്ട്. ജലപാതം വനം വകുപ്പിന്‍റെ നിയന്ത്രണത്തിലാണ് . ജലപാതത്തിന്‍റെ ഒരു കിലോമീറ്റർ ചുറ്റളവിൽ ഉള്ള തദ്ദേശിയരായ 50 ഓളം വരുന്ന വന സംരക്ഷണ സമിതി അംഗങ്ങളാണ് സുരക്ഷാ കാര്യങ്ങളും മറ്റ് ജോലികളും നോക്കി നടത്തുന്നത്. ഇതിന് സമീപമായി പ്രസിദ്ധമായ ആര്യങ്കാവ് ശ്രീധർമശാസ്താ ക്ഷേത്രം സ്ഥിതി ചെയ്യുന്നു.പുനലൂരിൽ നിന്നും ആര്യങ്കാവിലേയ്ക്ക് കെഎസ്‌ആർടിസി സർവീസ് നടത്തുന്നുണ്ട്. ഓരോ ദിവസവും ആയിരത്തിലധികം സഞ്ചാരികൾ ഇവിടം സന്ദർശിച്ച് മടങ്ങുന്നു.ഏറെയും തമിഴ്നാട്ടിൽ നിന്നുള്ളവരാണ്.

കെഎസ്‌ആര്‍ടിസി പെന്‍ഷന്‍കാരോടുള്ള അവഗണന അവസാനിപ്പിക്കണമെന്ന്

കൊല്ലം : കെ എസ്‌ ആര്‍ ടി സി പെന്‍ഷന്‍കാരോടുള്ള അവഗണന അവസാനിപ്പിക്കണമെന്ന്‌ ഐഎൻടിയുസി ജില്ലാപ്രസിഡന്‍റ് എ. കെ. ഹഫീസ്‌ അഭിപ്രായപ്പെട്ടു. ട്രാന്‍സ്‌പോര്‍ട്ട്‌ പെന്‍ഷനേഴ്‌സ്‌ വെല്‍ഫെയര്‍ അസോസിയേഷന്‍ ജില്ലാ സമ്മേളനം ഡി സി സി ഓഡിറ്റോറിയത്തില്‍ ഉദ്‌ഘാടനം ചെയ്‌ത്‌ പ്രസംഗിക്കുകയായിരുന്നു അദ്ദേഹം. ജീവിതത്തിന്‍റെ അന്ത്യ യാമങ്ങളില്‍ മരുന്ന്‌ പോലും വാങ്ങാന്‍ കഴിയാതെ പെന്‍ഷന്‍കാര്‍ വിഷമിക്കുകയാണ്. ഓരോ മാസത്തിന്‍റെയും ആദ്യ ആഴ്‌ചയില്‍ തന്നെ പെന്‍ഷന്‍ വിതരണം ചെയ്യുവാനുള്ള നടപടിസർക്കാർ സ്വീകരിക്കണമെന്നും അദ്ദേഹം ആവശ്യപ്പെട്ടു. ജില്ലാ കോര്‍ഡിനേറ്റര്‍ എസ്‌. വേണുവിന്‍റെ അധ്യക്ഷതയില്‍ ചേര്‍ന്ന സമ്മേളനത്തില്‍ സംസ്ഥാന ജന. സെക്രട്ടറി വി. കെ .രാജന്ദ്രന്‍ മുഖ്യ പ്രഭാഷണം നടത്തി. സംസ്ഥാന ഓര്‍ഗനൈസിംഗ്‌ സെക്രട്ടറി കെ. ബി. രാജേഷ്‌ കുമാര്‍, ഐ എന്‍ ടി യു സി ജില്ലാ ജന. സെക്രട്ടറി ബി. ശങ്കരനാരാണപിള്ള, എസ്‌. വസുന്ധരന്‍പിള്ള, എ. മോഹനന്‍, അനില്‍കുമാര്‍, വിനീഷ്‌ എന്നിവര്‍ സംസാരിച്ചു. ചേത്തടി ശശി പ്രസിഡന്‍റും എസ്‌. വേണു സെക്രട്ടറിയുമായുള്ള കമ്മിറ്റിയെ യോഗം തെരഞ്ഞെടുത്തു.

കാറിൽ ഇന്ധനം നിറച്ചശേഷം പണംനൽകാതെ രക്ഷപെടാൻ ശ്രമിച്ച സംഘം പിടിയിൽ

പുനലൂർ: കാറിൽ ഇന്ധനം നിറച്ച ശേഷം പണം നൽകാതെ രക്ഷപ്പെടാൻ ശ്രമിച്ച തമിഴ്നാട് സ്വദേശികൾ പുനലൂർ പോലീസിന്‍റെ പിടിയിലായി. ഇന്നലെ ഉച്ചകഴിഞ്ഞ് പുനലൂർ ചെമ്മന്തൂരിലുള്ള പെട്രോൾ പമ്പിലേക്ക് തമിഴ്നാട് രജിസ്ട്രേഷൻ നമ്പറിലുള്ള എൻഡവർ കാറിലെത്തിയ സംഘം പെട്രോൾ പമ്പ് ജീവനക്കാരിയായ ഷീബയോട് 3000 രൂപയ്ക്ക് ഇന്ധനം നിറയ്ക്കാൻ ആവശ്യപ്പെടുകയായിരുന്നു. ഇന്ധനം പൂർണമായും നിറച്ചെന്ന് ഉറപ്പുവരുത്തിയ തട്ടിപ്പുകാർ ജീവനക്കാരി പണം ചോദിച്ചതോടെ പണം നൽകാതെ അമിത വേഗതയിൽ വാഹനം എടുത്ത് തെങ്കാശി ഭാഗത്തേക്ക് പോവുകയായിരുന്നു . ഇത് കണ്ട് ജീവനക്കാരി ബഹളം വച്ചെങ്കിലും തട്ടിപ്പുകാർ വാഹനം നിർത്തിയില്ല . എന്നാൽ ഈ സമയം കൊണ്ട് പെട്രോൾ പമ്പ് ജീവനക്കാരിയായ ഷീബ വാഹനത്തിന്‍റെ നമ്പർ മനസിലാക്കുകയും വിവരം ഉടൻ തന്നെ വിളിച്ച് പുനലൂർ പോലീസിനെ അറിയിക്കുകയും ചെയ്തു . തുടർന്ന് പോലീസ് പുനലൂർ ടിബി ജംഗ്ഷനിൽ വെച്ച് തട്ടിപ്പുകാരെയും എൻഡവർ കാറും പിടി കൂടി കസ്റ്റഡിയിലെടുക്കുകയായിരുന്നു . അതേ സമയം സമാനമായ രീതിയിൽ നിരവധി തട്ടിപ്പു കേസുകൾ സംസ്ഥാനത്ത് ഉടനീളം റിപ്പോർട്ട് ചെയ്യപ്പെടുന്ന സാഹചര്യത്തിൽ പെട്രോൾ പമ്പ് ഉടമകളും ജീവനക്കാരും ജാഗ്രത പാലിക്കണമെന്ന് പോലീസ് അറിയിച്ചു.

നഷ്ടപ്പെട്ട മൊബൈല്‍ ഫോണുകള്‍ കണ്ടെത്തി ഉടമസ്ഥര്‍ക്ക് കൈമാറി പോലീസ് സൈബര്‍ സെല്‍

കൊല്ലം: നഷ്ടപ്പെട്ടുപോയ 25 ലധികം മൊബൈല്‍ ഫോണുകള്‍ കണ്ടെത്തി ഉടമസ്ഥര്‍ക്ക് കൈമാറി കൊല്ലം സിറ്റി പോലീസിലെ സൈബര്‍ സെല്‍. മൊബൈല്‍ ഫോണുകള്‍ നഷ്ടപ്പെട്ടതായി സിറ്റി പോലീസ് പരിധിയിലെ വിവിധ സ്റ്റേഷനുകളില്‍ രജിസ്റ്റര്‍ ചെയ്ത ഇരുപത്തിയഞ്ചോളം പരാതികൾക്കാണ് ഇതോടെ പരിഹാരമായത്. കഴിഞ്ഞ ഏതാനും മാസങ്ങള്‍ക്കുള്ളില്‍ നഷ്ടപ്പെട്ട മൊബൈല്‍ ഫോണുകളാണ് സി ഇ ഐ ആര്‍ പോര്‍ട്ടലില്‍ നിന്നുള്ള വിവരങ്ങളുടെ അടിസ്ഥാനത്തില്‍ സൈബര്‍ സെല്‍ കണ്ടെത്തി കൈമാറിയത്. നഷ്ടപ്പെട്ട ഫോണുകളില്‍ കേരളത്തില്‍ ഉപയോഗിച്ചു വന്നിരുന്നവ കർണാടക, ആന്ധ്രാപ്രദേശ്, തമിഴ്‌നാട് തുടങ്ങിയ സംസ്ഥാനങ്ങളില്‍ നിന്നാണ് കണ്ടെത്തിയത്. ഈ ഫോണുകള്‍ ഉപയോഗിച്ച് വന്ന ആളുകളുമായി കൊല്ലം സിറ്റി സൈബര്‍ സെല്ലിലെ പോലീസ് ഉദ്യോഗസ്ഥര്‍ നിരന്തരം ബന്ധപ്പെട്ടാണ് ഫോണുകള്‍ തിരിച്ചുപിടിച്ചത്. ഫോണുകള്‍ തിരികെ നല്‍കുവാന്‍ വിമുഖത കാട്ടിയ വ്യക്തികളില്‍ നിന്നും പോലീസ് ഉദ്യോഗസ്ഥര്‍ നേരിട്ട് ചെന്ന് പിടിച്ചെടുക്കുകയായിരുന്നു. കൊല്ലം സിറ്റി ജില്ലാ ക്രൈം റെക്കോര്‍ഡ്സ് ബ്യുറോ പോലീസ് അസിസ്റ്റന്‍റ് കമ്മീഷണര്‍ എ. നസീര്‍ നഷ്ടപ്പെട്ടുപോയ മൊബൈല്‍ ഫോണുകള്‍ ഉടമസ്ഥര്‍ക്ക് കൈമാറി. കൊല്ലം സിറ്റി പോലീസ് കമ്മിഷണര്‍ കിരണ്‍ നാരായണന്‍ നിര്‍ദ്ദേശാനുസരണം സിറ്റി സൈബര്‍ സെല്‍ സബ് ഇന്‍സ്പെക്ടര്‍ ഷാന്‍, പോലീസ് ഉദ്യോഗസ്ഥരായ പ്രതാപ്, ഹരികുമാര്‍, ജിജോ, വിനു തുടങ്ങിയവരുടെ നേതൃത്വത്തിലാണ് ഫോൺ വേട്ട നടന്നത്. കണ്ടെത്തിയ ഫോണുകളില്‍ കൊല്ലം സന്ദര്‍ശനത്തിനിടെ ഫോണ്‍ നഷ്ടപ്പെട്ടുപോയ തമിഴ്‌നാട് സ്വദേശികളുടെ ഫോണുകള്‍ ഉള്‍പ്പെടെ ഉണ്ടായിരുന്നു. മൊബൈല്‍ഫോണ്‍ നഷ്ടപ്പെട്ടാല്‍ ഡ്യൂപ്ലിക്കറ്റ് സിം കാര്‍ഡ് എടുത്ത് പോലീസ് സ്റ്റേഷനില്‍ പരാതി നല്‍കണം. പരാതിയുടെ രസീത് ഉപയോഗിച്ചു സി ഇ ഐ ആര്‍ പോര്‍ട്ടല്‍ വഴി റജിസ്റ്റര്‍ ചെയ്താല്‍ ഫോണ്‍ ബ്ലോക്ക് ആകും. ബ്ലോക്കായ ഫോണില്‍ ആരെങ്കിലും സിം കാര്‍ഡ് ഇട്ടാല്‍ ഫോണ്‍ പോലീസ് നിരീക്ഷണത്തിലാവുകയാണ് ചെയ്യുക.

മേയർക്കെതിരേ വധഭീഷണി മുഴക്കിയ പ്രതിക്കെതിരേ ശക്തികുളങ്ങരയിൽ പുതിയ കേസ്

കൊല്ലം:മേയറെ കൊല്ലുമെന്ന് ഭീഷണി മുഴക്കിയ കേസിലെ പ്രതി തിരുവനന്തപുരം കടകംപള്ളി സ്വദേശി അനിൽകുമാറിനെതിരേ ശക്തികുളങ്ങരയിൽ പുതിയ വഞ്ചനാ കേസ് രജിസ്റ്റർ ചെയ്തു. ദുബായ് എയർപോർട്ടിൽ ജോലി വാഗ്ദാനം ചെയ്താണ് ശക്തികുളങ്ങര സ്വദേശിയായ യുവാവിൽ നിന്നും 1,11,500 രൂപ കൈപ്പറ്റിയത്. അഡ്വാൻസായി ഒരു ലക്ഷം രൂപയും മെഡിക്കൽ പരിശോധനയ്ക്കായി 6000 രൂപയും സർട്ടിഫിക്കറ്റ് വെരിഫിക്കേഷനായി 5500 രൂപയും ആണ് ഇയാൾ വാങ്ങിയത്. വിസ ലഭിക്കുമ്പോൾ ബാക്കി 50,000 രൂപ കൂടി നൽകണമെന്നതായിരുന്നു കരാർ.പ്രതിയുടെ തിരുവനന്തപുരത്തുള്ള ബാങ്ക് അക്കൗണ്ടിൽ ഗൂഗിൾ പേ വഴിയാണ് യുവാവ് പൈസ നൽകിയത്. പ്രതിയെ പോലീസ് ചോദ്യം ചെയ്ത വേളയിലാണ് ഇയാൾ നിലവിൽ ഒളിവിൽ ഇരിക്കവേ തന്നെ വിസ നൽകാമെന്ന് വാഗ്ദാനം നൽകി തട്ടിപ്പ് നടത്തിയതായി വെളിവായത്. പോലീസ് പ്രതിയുടെ മൊബൈൽ ഫോൺ വിവരങ്ങൾ പരിശോധിക്കവെ ആണ് വിദേശത്ത് ജോലി വാഗ്ദാനം ചെയ്ത് പലരിൽ നിന്നായി പൈസ കൈപ്പറ്റുന്നതായി മനസിലായത്. തുടർന്ന് പോലീസ് പൈസ നൽകിയവരെ ഫോണിൽ ബന്ധപ്പെട്ടപ്പോഴാണ് തട്ടിപ്പ് പണം നൽകിയവർക്ക് മനസിലായത്. പരസ്യത്തിൽ തിരുവനന്തപുരത്തുള്ള സ്വകാര്യ റിക്രൂട്ടിംഗ് ഏജൻസിയുടെ പേരും പ്രതിയുടെ ഫോൺ നമ്പരും നൽകിയാണ് ഉദ്യോഗാർഥികളെ ഇതിലേക്ക് ആകർഷിച്ചിരുന്നത്.പ്രതി 2016 മുതൽ 2023 വരെ വിവിധ പോലീസ് സ്റ്റേഷനുകളിൽ മൂന്ന് വ്യത്യസ്ത വിലാസങ്ങളിൽ നിരവധി വിസ തട്ടിപ്പ് കേസുകളിൽ പ്രതി ആയ ശേഷം ജാമ്യത്തിൽ ഇറങ്ങി ഒളിവിൽ പോകുകയായിരുന്നു. കൊല്ലം ആശ്രമം കാവടി പുറം ജംഗ്ഷനിൽ ഇയാൾ വാടകക്ക് മൂന്ന് വർഷം മുൻപ് താമസിച്ചിരുന്നു.ആ സമയം പ്രതിയെ കൊല്ലം ഈസ്റ്റ് പോലീസ് തട്ടിപ്പ് കേസിൽ അറസ്റ്റ് ചെയ്തിരുന്നു.അന്ന് പ്രതി വർക്കല ഉള്ള വിലാസമാണ് നൽകിയത്. വിസക്ക് പൈസ നൽകിയവർ ട്രാവൽ ഏജൻസിയെയോ പ്രതിയെയോ കണ്ടിരുന്നില്ല. മറിച്ച് പ്രതിയുടെ ഫോൺ നമ്പറിൽ ബന്ധപ്പെട്ട് പ്രതി വാഗ്ദാനം നൽകിയത് അനുസരിച്ച് പൈസ നൽകുകയായിരുന്നു. കടയ്ക്കാവൂർ, തമ്പാനൂർ, കൊല്ലം എന്നിവിടങ്ങളിൽ നിന്നെല്ലാം ഉള്ള ഉദ്യോഗാർഥികൾ തട്ടിപ്പിനിരയായതായി പ്രാഥമികമായി മനസിലായിട്ടുണ്ട്. മേയറെ ഭീക്ഷണിപ്പെടുത്തിയ കേസിൽ പ്രതിയെ ഇന്നലെ കോടതിയിൽ ഹാജരാക്കി റിമാൻഡ് ചെയ്തു. കൂടുതൽ അന്വേഷണത്തിനായി പ്രതിയെ പോലീസ് കസ്റ്റഡിയിൽ വാങ്ങാനുള്ള അപേക്ഷയും നൽകി. പ്രതിയെ പോലീസ് കസ്റ്റഡിയിൽ വാങ്ങി കൂടുതൽ അന്വേഷണം നടത്തണമെന്നും പല കോടതികളിൽ വാറണ്ട് പുറപ്പെടുവിച്ചിട്ടുള്ള നിലവിലുള്ള വിചാരണ കേസുകളിൽ പ്രതിയുടെ അറസ്റ്റ് രേഖപ്പെടുത്തി ഈ കേസുകളിലെ വിചാരണ ത്വരിതപ്പെടുത്തുവാൻ നടപടി സ്വീകരിക്കുമെന്നും പോലീസ് അറിയിച്ചു.

ട്രാക്കിൽ മരം വീണ സംഭവം: ട്രെയിനുകൾ വൈകി, യാത്രക്കാർ വലഞ്ഞു

കൊല്ലം: കൊല്ലം - തിരുവനന്തപുരം റൂട്ടിൽ ഞായർ രാത്രി മരം വീണ് ഗതാഗതം തടസപ്പെട്ടതിനാൽ ഇന്നലെ ചില ട്രെയിനുകൾ വൈകി ഓടിയത് യാത്രക്കാരെ വലച്ചു. ഇന്നലെ രാവിലെ 5.20 ന് തിരുവനന്തപുരത്ത് നിന്ന് ഷൊർണൂർക്ക് പോകേണ്ട വേണാട് എക്സ്പ്രസ് രണ്ട് മണിക്കൂർ 10 മിനിറ്റ് വൈകി രാവിലെ 7.30 ന് പുറപ്പെടും എന്നായിരുന്നു റെയിൽവേയുടെ ഔദ്യോഗിക അറിയിപ്പ്. എന്നാൽ വണ്ടി അവിടുന്ന് യാത്ര തിരിച്ചത് 8.20 നാണ്. ജോഡി ട്രെയിൻ വൈകി എത്തിയതാണ് ഇതിന് കാരണം. തുടർന്നുള്ള മെയിന്‍റനൻസ് ജോലികൾക്ക് പ്രതീക്ഷിച്ചതിലും സമയം എടുത്തതാണ് വീണ്ടും പുറപ്പെടാൻ വൈകിയത്. ഇത് കാരണം തിരുവനന്തപുരത്തിനും കോട്ടയത്തിനും മധ്യേയുള്ള നൂറുകണക്കിന് സ്ഥിരം യാത്രക്കാർ ഏറെ ബുദ്ധിമുട്ടി. തിരുവനന്തപുരത്ത് നിന്ന് ഇന്നലെ രാവിലെ 9.15 ന് പുറപ്പെടേണ്ട ലോകമാന്യ തിലക് നേത്രാവതി എക്സ്പ്രസും ഒരു മണിക്കൂർ 15 മിനിറ്റ് വൈകി 10.30 ന് തിരുവനന്തപുരത്ത് നിന്ന് പുറപ്പെടും എന്നായിരിക്കുന്നു അറിയിപ്പ്. പക്ഷേ നേത്രാവതി അവിടുന്ന് പുറപ്പെട്ടത് 11.35 നാണ്. ഇതുകാരണം ചെന്നൈ എഗ്മോർ - കൊല്ലം അനന്തപുരി സൂപ്പർ ഫാസ്റ്റ് എക്സ്പ്രസിൽ വലിയ തിരക്കാണ് അനുഭവപ്പെട്ടത്.ഇന്നലെ പുലർച്ചെ 12.50 ന് തിരുവനന്തപുരം നോർത്തിൽ (കൊച്ചുവേളി) നിന്ന് പുറപ്പെടേണ്ട 22114 നമ്പർ ലോകമാന്യ തിലക് സൂപ്പർ ഫാസ്റ്റ് എക്സ്പ്രസ് മൂന്ന് മണിക്കൂർ 50 മിനിറ്റ് വൈകി പുലർച്ചെ നാലിനാണ് കൊച്ചുവേളിയിൽ നിന്ന് പുറപ്പെട്ടത്. അതുപോലെ ഇന്നലെ രാവിലെ 5.05 ന് തിരുനെൽവേലിയിൽ നിന്ന് തിരുവനന്തപുരം, ആലപ്പുഴ വഴി ജാംനഗറിന് പോകുന്ന എക്സ്പ്രസ് ട്രെയിൻ ഉച്ചകഴിഞ്ഞ് മൂന്നിനാണ് യാത്ര തിരിച്ചത്. ഈ ട്രെയിനുകളുടെ അപ്രതീക്ഷിതമായ സമയമാറ്റവും നിരവധി യാത്രക്കാരെ വലച്ചു. കൊല്ലം - തിരുവനന്തപുരം പാതയിൽ പോളയത്തോട് ശ്മശാനത്തിന് സമീപം ഞായർ രാത്രി 7.15നാണ് ട്രാക്കിൽ കൂറ്റൻ മരം വീണത്. വൈദ്യുതി ലൈനിന് മുകളിലേക്ക് വീണതിനാൽ തീ പിടിത്തവും ഉണ്ടായി. പുകയും ഉയർന്നു. ഈ സമയം കന്യാകുമാരി-പുനലൂർ പാസഞ്ചർ കൊല്ലത്തിന് പോകാൻ പോളയത്തോട് റെയിൽവേ ഗേറ്റിന് സമീപം എത്തിയിരുന്നു. ട്രാക്കിൽ മരം വീണ് തീ പിടിത്തം ഉണ്ടായി സ്ഫോടന ശബ്ദവും കേട്ടതോടെ ഗേറ്റ് കീപ്പർ അടിയന്തിര സന്ദേശം നൽകിയതിനാൽ ട്രെയിൻ അവിടെ നിർത്തിയിട്ടു. മരം വീണതിന് വണ്ടി നിർത്തിയിട്ടതതിനു 100 മീറ്റർ അകലെ ആയതിനാലാണ് വൻ അപകടമാണ് ഒഴിവായത്. മരം വീണത് ഇരുവശത്തേക്കുമുള്ള ട്രാക്കുകളിലുമായിട്ടാണ്. ഇതിനാൽ കൊല്ലം - തിരുവനന്തപുരം റൂട്ടിലും എതിർ ദിശയിലുമുള്ള പാതയിലും ട്രെയിൻ ഗതാഗതം പൂർണമായും തടസപ്പെട്ടു. പിന്നീട് ലൈനിലെ വൈദ്യുതി ഓഫാക്കിയ ശേഷം റെയിൽവേ ജീവനക്കാരും ഫയർ ഫോഴ്സും എത്തി ട്രാക്കിൽ കിടന്ന മരം മുറിച്ചു മാറ്റി. അതിനു ശേഷം ട്രാക്കിലെ തകരാറുകൾ കൂടി പരിഹരിച്ച് രാത്രി 9-10 ഓടെയാണ് കൊല്ലം ഭാഗത്തേക്കുള്ള ഗതാഗതം പുനസ്ഥാപിച്ചത്. കൊല്ലത്ത് നിന്ന് തിരുവനന്തപുരം ഭാഗത്തേക്കുള്ള ട്രെയിൻ ഗതാഗതം പൂർണമായി പുനസ്ഥാപിച്ചത് ഇന്നലെ പുലർച്ചെ 12.10 നാണ്. ഇതുകാരണം തിരുവനന്തപുരത്തിന് എന്തേണ്ട ഏറനാട് എക്സ്പ്രസ്, നേത്രാവതി എക്സ്പ്രസ്, ജനശതാബ്ദി എക്സ്പ്രസ്, വന്ദേ ഭാരത് എക്സ്പ്രസ് തുടങ്ങി നിരവധി ട്രെയിനുകൾ മണിക്കൂറുകളോളം വിവിധ സ്റ്റേഷനുകളിൽ നിർത്തിയിടേണ്ടി വന്നു. ഷൊർണൂർ - തിരുവനന്തപുരം വേണാട് എക്സ്പ്രസിന്‍റെ സമയത്തിലും മാറ്റമുണ്ടായി. ഉച്ചകഴിഞ്ഞ് 2.35 ന് ഷൊർണൂരിൽ നിന്ന് പുറപ്പെടേണ്ട വേണാട് ഒരു മണിക്കൂർ 50 മിനിറ്റ് വൈകിയാണ് തിരുവനന്തപുരത്തിന് യാത്ര തിരിച്ചത്. അതേ സമയം ട്രാക്കിൽ മരം വീണത് റെയിൽവേ അധികൃതരുടെ അനാസ്ഥമൂലമാണെന്ന ആരോപണവും ഉയർന്നിട്ടുണ്ട്. കൊല്ലത്തിനും ഇരവിപുരത്തിനും മധ്യേ ട്രാക്കിന് സമീപം നിരവധി മരങ്ങൾ ഏത് സമയവും വീഴാവുന്ന സ്ഥിതിയിലാണെന്ന് യാത്രക്കാരും ഫ്രണ്ട്സ് ഓൺ റെയിൽസ് അടക്കമുള്ള സംഘടനകളും റെയിൽവേ അധികൃതരെ നേരത്തേ അറിയിച്ചിരുന്നതാണ്. എന്നാൽ അപകടാവസ്ഥയിൽ നിൽക്കുന്ന മരങ്ങൾ മുറിച്ച് മാറ്റാൻ മഴക്കാലമായിട്ട് പോലും അധികൃതർ തയാറായില്ല എന്നതാണ് വാസ്തവം. പോളയത്തോട് ശ്മശാനത്തിന്‍റെ കോമ്പൗണ്ടിൽ ഇപ്പോഴും ഏതാനും വലിയ മരങ്ങൾ ഏത് നിമിഷവും റെയിൽവേ ട്രാക്കിലേക്ക് പതിക്കാമെന്ന അവസ്ഥയിൽ നിൽപ്പുണ്ട്.

എൽഡിഎഫ് പഞ്ചായത്ത് ഓഫീസ് മാർച്ചും ധർണയും സംഘടിപ്പിച്ചു

ചവറ : യുഡിഎഫ് ഭരിക്കുന്ന പന്മന പഞ്ചായത്തിലെ അഴിമതിക്കും ദുർഭരണത്തിനും കെടുകാര്യസ്ഥതയ്ക്കുമെതിരെ എൽഡിഎഫ് പഞ്ചായത്ത് ഓഫീസ് മാർച്ചും ധർണയും സംഘടിപ്പിച്ചു. വികസന പ്രവർത്തനത്തിന് സംസ്ഥാന സർക്കാർ നൽകുന്ന പണം മുഴുവൻ പഞ്ചായത്തിന്‍റെ വികസനത്തിനായി ചെലവഴിക്കുക, തകർന്നു കിടക്കുന്ന പഞ്ചായത്ത് റോഡുകൾ പുതുക്കി പണിത് സഞ്ചാരയോഗ്യമാക്കുക, വഴിവിളക്കുകൾ പുനസ്ഥാപിക്കുക, നൂതന സാങ്കേതികവിദ്യ ഉപയോഗപ്പെടുത്തി ചെറുകിട വ്യവസായ യൂണിറ്റുകൾ ആരംഭിച്ച് യുവാക്കളുടെ തൊഴിലില്ലായ്മയ്ക്ക് ആശ്വാസം കാണുക, ജെൽ ജീവൻ വെട്ടിപ്പ് കണ്ടെത്തി കുറ്റക്കാർക്ക് ശിക്ഷ ഉറപ്പാക്കുക, പണിപൂർത്തിയാക്കിയ അഞ്ച് കുഴൽ കിണറുകൾ ഉദ്ഘാടനം ചെയ്ത് പ്രവർത്തനക്ഷമമാക്കുക, തുടങ്ങിയ വിവിധ ആവശ്യങ്ങൾ ഉന്നയിച്ചു കൊണ്ടാണ് എൽഡിഎഫ് പന്മന പഞ്ചായത്ത് കമ്മിറ്റിയുടെ ആഭിമുഖ്യത്തിൽ മാർച്ചും ധർണയും സംഘടിപ്പിച്ചത്. ഇടപ്പള്ളി കോട്ടയിൽ നിന്നും ആരംഭിച്ച മാർച്ച് പഞ്ചായത്ത് ഓഫീസിന് മുന്നിൽ സമാപിച്ചു. തുടർന്ന് നടന്ന ധർണ സമരം സിപിഎം ജില്ലാ സെക്രട്ടറിയേറ്റ് അംഗം ടി. മനോഹരൻ ഉദ്ഘാടനം ചെയ്തു. സിപിഐ മണ്ഡലം കമ്മിറ്റി അംഗം ആർ .മുരളി അധ്യക്ഷനായി. സിപിഎം ഏരിയ സെക്രട്ടറി ആർ .രവീന്ദ്രൻ, സിപിഐ മണ്ഡലം സെക്രട്ടറി അനിൽ പുത്തേഴം, , ജെ .അനിൽ, കെ .ജി .വിശ്വംഭരൻ, എൽ .വിജയൻ നായർ , ഷീന പ്രസാദ്, കെ. എ .നിയാസ്, അഹമ്മദ് മൻസൂർ എന്നിവർ പ്രസംഗിച്ചു.

കത്തിയുമായി മേയറുടെ വീടിനു സമീപത്തെത്തിയ ആൾ അറസ്റ്റിൽ

കൊല്ലം: മേയര്‍ ഹണി ബഞ്ചമിന്‍റെ വീടിനു സമീപം കത്തിയുമായി എത്തിയയാളെ പോലിസ് അറസ്റ്റ് ചെയ്തു. തിരുവനന്തപുരം കടകംപള്ളി കരിക്കംമുറി സൗമ്യഭവനിൽ അനിൽകുമാറിനെ (52) യാണ് ഈസ്റ്റ് പോലിസ് ഇന്നലെ തേവള്ളിയിൽ നിന്ന് അറസ്റ്റ് ചെയ്തത്. ശനിയാഴ്ച രാവിലെ 7.15നാണ് അനിൽകുമാർ കത്തിയുമായി മേയറുടെ ആശ്രാമം വൈദ്യശാല ജംഗ്ഷനു സമീപമുള്ള വീടിനുമുന്നിൽ എത്തിയത്. ഇതുസംബന്ധിച്ച് മേയർ സിറ്റി പോലിസ് കമ്മീഷണർക്ക് പരാതി നൽകിയിരുന്നു. ഇയാളുടെ മൊബൈൽ ലൊക്കേഷൻ പരിശോധിച്ചപ്പോൾ തിങ്കളാഴ്ച രാവിലെ തിരുവനന്തപുരത്തായിരുന്നു. പോലീസ് അവിടെ എത്തിയപ്പോഴേക്കും ഇയാൾ വാടകയ്ക്കെടുത്ത കാറിൽ കൊല്ലത്തേക്ക് കടന്നുകളഞ്ഞു. തുടർന്ന് ഈസ്റ്റ് ഇൻസ്‍പെക്ടർ ഷെഫീക്കിന്‍റെ നേതൃത്വത്തിൽ എസ്ഐ വിപിൻ, സിവിൽ പോലീസ് അജയകുമാർ എന്നിവരടങ്ങിയ സംഘം പ്രതിയ പിന്തുടർന്ന് പിടികൂടുകയായിരുന്നു. ആലപ്പുഴ രാമങ്കരി, വഞ്ചിയൂർ, തിരുവനന്തപുരം പോർട്ട്, മംഗലപുരം, അടൂർ, കൊല്ലം ഈസ്റ്റ് തുടങ്ങിയ സ്റ്റേഷനുകളിലായി 28 കേസിൽ പ്രതിയാണ് പിടിയിലായ അനിൽകുമാർ. വിസയും തൊഴിലും വാഗ്ദാനംചെയ്തുള്ള തട്ടിപ്പുകളാണ് ഏറെയും. ഈസ്റ്റ് പോലീസിലും ഇയാൾക്കെതിരേ രണ്ട് കേസുണ്ട്. നേരത്തെ അനിൽകുമാർ മേയറുടെ വീടിനു സമീപത്ത് കാവടിപ്പുറത്തുള്ള ലോഡ്ജിൽ താമസിച്ചിരുന്നു. അങ്ങനെയാണ് ഇയാൾക്ക് മേയറുടെ വീട് പരിചയം. നിലവിൽ താമസിച്ചിരുന്നത് തേവള്ളിയിലെ എസ്ആർ ലോഡ്ജിലായിരുന്നു. സംഭവദിവസം രാവിലെ അനിൽ നായേഴ്സ് ആശുപത്രിക്ക് സമീപമുള്ള ഒരു ഡോക്ടറെ കാണാൻ എത്തിയിരുന്നു. എന്നാൽ, മദ്യലഹരിയിലായിരുന്ന ഇയാൾ ഡോക്ടറെ കാണാതെ അവിടെനിന്ന് വൈദ്യശാല ജംഗ്ഷനിലേക്കുള്ള റോഡിൽ നടന്നു. മേയറുടെ വീടിന് മുന്നിൽ എത്തി മേയറെ ഭീഷണിപ്പെടുത്തുംവിധം സംസാരിച്ചു. ഇതുകേട്ട മത്സ്യത്തൊഴിലാളിയാണ് വിവരം മേയറെ അറിയിച്ചത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

കോടതിയിൽ ഹാജരാകാനെത്തിയ യുവതിയെ ഭർത്താവ് കുത്തിപ്പരിക്കേൽപ്പിച്ചു

കൊല്ലം: ജീവനാംശവുമായി ബന്ധപ്പെട്ട കേസിൽ കുടുംബ കോടതിയിൽ ഹാജരാകാനെത്തിയ യുവതിയെ ഭർത്താവ് കുത്തിപ്പരിക്കേൽപ്പിച്ചു. കാവനാട് മുക്കാട് മീനാത്തുചേരി ജോർദാനിൽ ബിൻസി (46)യാണ് ഭാര്യ റീന ജോസഫിനെ (35) കുത്തിപ്പരിക്കേൽപിച്ചത്. ബിൻസിക്കെതിരേ വധശ്രമത്തിനു കേസെടുത്തു. കൊല്ലം ആൽത്തറമൂട്ടിലെ ജുഡീഷൽ ഫസ്‌റ്റ്‌ ക്ലാസ് രണ്ടാം കോടതിക്കു മുന്നിലെ റോഡിൽ ഇന്നലെ ഉച്ചയ്ക്ക് 12 ഓടെയായിരുന്നു സംഭവം. കോടതിയിൽ ഹാജരാകാനെത്തിയ റീനയുടെ കഴുത്തിൽ കത്തിവച്ചു ഭീഷണിപ്പെടുത്തുകയും കുത്താൻ ശ്രമിക്കുകയും ചെയ്തു. തടയാൻ ശ്രമിക്കുന്നതിനിടെ റീനയുടെ വലതു കൈയിൽ പരുക്കേറ്റു. വിവരമറിഞ്ഞ് വെസ്റ്റ് പോലിസ് സ്ഥലത്തെത്തി പ്രതിയെ കസ്റ്റഡിയിലെടുക്കുകയായിരുന്നു.

ഓണത്തിന് ഒരു മുറം പച്ചക്കറി; വിത്ത് വിതരണം ചെയ്തു

കുണ്ടറ: കിഴക്കേ കല്ലട പഞ്ചായത്തിൽ 'ഓണത്തിന് ഒരു മുറം പച്ചക്കറി, പദ്ധതിയുടെ ഭാഗമായി കൃഷി ഭവന്‍റെ നേതൃത്വത്തിൽ നടത്തിയ പച്ചക്കറി വിത്ത് വിതരണം ഗ്രാമ പഞ്ചായത്ത് പ്രസിഡന്‍റ് കെ.ജി.ലാലി ഉദ്ഘാടനം ചെയ്തു. വൈസ് പ്രസിഡന്‍റ് രാജു ലോറൻസ് അധ്യക്ഷത വഹിച്ചു . കൃഷി ഓഫീസർ അനഘ, അസി. കൃഷി ഓഫീസർ രത്നകുമാരി, സി ഡി എസ് ചെയർപേഴ്സൺ രശ്മി, കൃഷി വകുപ്പ് ഉദ്യോഗസ്ഥരായ അഭിലാഷ് ,ശ്രീകുമാർ, ലതിക അശോകൻ, ബെസി,സന്ധ്യ എന്നിവർ പ്രസംഗിച്ചു.

ഹരിത വിദ്യാലയം ശുചിത്വ സമൃദ്ധ വിദ്യാലയം പദ്ധതിക്ക് തുടക്കമായി

ചവറ : ശങ്കരമംഗലം ഗവ.ഹയർ സെക്കൻഡറി സ്കൂളിൽ സമഗ്ര ഗുണമേന്മ വിദ്യാഭ്യാസ പദ്ധതിയുടെ ഭാഗമായി സംസ്ഥാന സർക്കാരും പൊതു വിദ്യാഭ്യാസ വകുപ്പും ചേർന്ന് നടപ്പിലാക്കുന്ന ഹരിത വിദ്യാലയം ശുചിത്വ സമൃദ്ധ വിദ്യാലയം പദ്ധതിക്ക് തുടക്കമായി. പദ്ധതിയുടെ സ്കൂൾതല ഉദ്ഘാടനം ഉപജില്ലാ വിദ്യാഭ്യാസ ഓഫീസർ ടി.കെ. അനിത നിർവഹിച്ചു. പിടിഎ പ്രസിഡന്‍റ് ബീന ജയൻ ചടങ്ങിൽ അധ്യക്ഷയായി. യോഗത്തിൽ ശുചിത്വമിഷൻ ജില്ലാ കോ-ഓർഡിനേറ്റർ തൊടിയൂർ രാധാകൃഷ്ണൻ ശുചിത്വവും ഹരിത വിദ്യാലയം എന്ന വിഷയത്തെക്കുറിച്ച് ക്ലാസുകൾ നയിച്ചു . സ്കൂൾ പ്രഥമാധ്യാപിക എലിസബത്ത് ഉമ്മൻ, അധ്യാപകർ എന്നിവർ പ്രസംഗിച്ചു.

കൊല്ലത്ത് മൈജി ഫ്യൂച്ചര്‍ ഷോറൂം പ്രവര്‍ത്തനമാരംഭിച്ചു

കൊല്ലം: കൊല്ലത്ത് പുതിയ മൈജി ഫ്യൂച്ചര്‍ ഷോറൂമിന്‍റെ ഉദ്ഘാടനം സിനിമാതാരം ആസിഫ് അലി നിര്‍വഹിച്ചു. പള്ളിമുക്ക് വടക്കേവിളയില്‍ ദമാം ബില്‍ഡിംഗിലാണ് ഷോറൂം. ഡിജിറ്റല്‍ ഗാഡ്ജറ്റ്സിനൊപ്പം ഹോം ആന്‍ഡ് കിച്ചണ്‍ അപ്ലയന്‍സസ്, സ്‌മോള്‍ അപ്ലയന്‍സസ്, ഗ്ലാസ് ആന്‍ഡ് ക്രോക്കറി പ്രോഡക്ട്സ് എന്നിവ ഷോറൂമില്‍ ലഭിക്കും. ഉദ്ഘാടന ദിനത്തില്‍ ലാഭം ഈടാക്കാതെയുള്ള വില്പനയാണ് നടത്തിയത്. ഒറിജിനല്‍ പ്രോഡക്ട്‌സ്, ഏറ്റവും വലിയ കളക്‌ഷന്‍, മികച്ച കസ്റ്റമര്‍ കെയര്‍ എന്നിവയിലൂടെ സമ്പൂര്‍ണ ഷോപ്പിംഗ് ആഘോഷത്തിന്‍റെ ഫ്യൂച്ചറാണ് കൊല്ലം മൈജി ഫ്യുച്ചര്‍ അവതരിപ്പിച്ചിരിക്കുന്നത്. 130ൽ അധികം ഷോറൂമുകളും ഒരു കോടിയിലധികം ഉപഭോക്താക്കളുമായി ഡിജിറ്റല്‍ ഗാഡ്ജറ്റ്‌സ് ആന്‍ഡ് ഹോം അപ്ലയന്‍സസ് മേഖലയില്‍ സൗത്ത് ഇന്ത്യയിലെ ഏറ്റവും വലിയ റീറ്റെയില്‍ സെയില്‍സ് ആന്‍ഡ് സര്‍വീസ് നെറ്റ് വര്‍ക്കാണ് മൈജി. എക്‌സ്‌ചേഞ്ച് ഓഫര്‍ ഉള്‍പ്പെടെ എല്ലാ മൂല്യവര്‍ധിത സേവനങ്ങളും കൊല്ലം ഫ്യൂച്ചര്‍ ഷോറൂമില്‍ ലഭിക്കും. ഫോണ്‍: 9249 001 001.

എംആർഎസ് സ്കൂളിന്‍റെ ആഭിമുഖ്യത്തിൽ റോഡ് സുരക്ഷാ ക്ലാസ് സംഘടിപ്പിച്ചു

കുളത്തൂപ്പുഴ: ചോഴിയക്കോട് പട്ടിക വർഗ വികസന വകുപ്പിന്‍റെ നിയന്ത്രണത്തിൽ അരിപ്പയിൽ പ്രവർത്തിക്കുന്ന ഗവ.മോഡൽ റസിഡൻഷൽ സ്കൂളിൽ ജനമൈത്രി പോലീസിന്‍റെയും സ്കൂൾ എസ്പി സി യൂണിറ്റിന്‍റെയും ആഭിമുഖ്യത്തിൽ റോഡ് സുരക്ഷ ബോധവത്ക്കരണ ക്ലാസ് സംഘടിപ്പിച്ചു. കുളത്തുപ്പുഴ അസിസ്റ്റന്‍റ് സബ് ഇൻസ്പെക്ടർ എ.റഹീം, സിവിൽ പോലീസ് ഓഫീസർമാരായ വിമൽകുമാർ, അഭിലാഷ് എന്നിവർ ബക്ലാസെടുത്തു. പ്രഥമാധ്യാപിക സി.ഗിരിജ,സ്കൂൾ മാനേജർ എസ്. ഷാഹിർ,സീനിയർ അസിസ്റ്റന്‍റ് എസ്.ബിനു കുമാർ, എസ്പിസി യൂണിറ്റ് സിപിഒ.ആർ.സന്തോഷ്, എസിപിഒ സ്റ്റാലിൻ എന്നിവർ പ്രസംഗിച്ചു.

ഏരൂര്‍ പഞ്ചായത്ത് മികവ് -2025

അഞ്ചല്‍ : ഏരൂര്‍ പഞ്ചായത്തില്‍ പഞ്ചായത്തില്‍ പത്ത്, പന്ത്രണ്ട് ക്ലാസ് പരീക്ഷകളില്‍ എല്ലാ വിഷയങ്ങള്‍ക്കും എ പ്ലസ് നേടി വിജയിച്ച കുട്ടികള്‍ക്ക് അനുമോദനം നൽകാന്‍ മികവ് -2025 എന്ന പേരില്‍ ചടങ്ങ് സംഘടിപ്പിച്ചു. നൂറിലധികം കുട്ടികള്‍ക്കാണ് മുരളീയ ഫൗണ്ടേഷനൊപ്പം ചേര്‍ന്നു കാഷ് അവാര്‍ഡ് ഉള്‍പ്പടെ പഞ്ചായത്ത് നല്‍കിയത്. പഞ്ചായത്ത് പ്രസിഡന്‍റ് ജി. അജിത്ത് അധ്യക്ഷത വഹിച്ച ചടങ്ങ് പി.എസ്.സുപാല്‍ എംഎൽഎ ഉദ്ഘാടനം ചെയ്തു. ബ്ലോക്ക് പഞ്ചായത്ത് പ്രസിഡന്‍റ് ഓമനമുരളി, ഗ്രാമപഞ്ചായത്ത് വൈസ് പ്രസിഡന്‍റ് വി. രാജി, സ്ഥിരം സമിതി അധ്യക്ഷന്‍മാരായ ഷൈന്‍ ബാബു, ഡോണ്‍.വി.രാജ്, ഗ്രാമപഞ്ചായത്ത് അംഗങ്ങളായ റ്റി. അജയന്‍, പി.എസ്. സുമന്‍, അനുരാജ് തുടങ്ങിയവര്‍ പ്രസംഗിച്ചു

മഹാത്മാഗാന്ധി കുടുംബ സംഗമവും പ്രതിഭാ സംഗമവും

അഞ്ചല്‍ : അയിലറ വാർഡ് കോൺഗ്രസ്‌ കമ്മിറ്റിയുടെ നേതൃത്വത്തിൽ മഹാത്മാഗാന്ധി കുടുംബ സംഗമവും, പ്രതിഭാ സംഗമവും സംഘടിപ്പിച്ചു. അഞ്ചൽ ബ്ലോക്ക് കോൺഗ്രസ് കമ്മിറ്റിജനറൽ സെക്രട്ടറി ബിജു അയിലറ യുടെ അധ്യക്ഷതയിൽ കൂടിയ യോഗം ഡിസിസി ജനറൽ സെക്രട്ടറി അഡ്വ .എസ്. ഇ. സഞ്ജയ്‌ ഖാൻ ഉദ്ഘാടനം ചെയ്തു. ഡി സി സി ജനറൽ സെക്രട്ടറി ഏരൂർ സുഭാഷ് മുഖ്യപ്രഭാഷണം നടത്തി. മുൻ ബ്ലോക്ക് പ്രസിഡന്‍റ് പി. ബി. വേണുഗോപാൽ, കോർ കമ്മിറ്റി ചെയർമാൻ സി. ജെ. ഷോം, നെട്ടയം സുജി, പി.ടി. കൊച്ചുമ്മച്ചൻ, മണ്ഡലം പ്രസിഡന്‍റ് ഡെനി മോൻ, സാബു മോൻ, റോയ് മോൻ, അഷ്‌റഫ്‌, ജോജു വിൽസൺ, ഷാജി വർഗീസ് എന്നിവർ പ്രസംഗിച്ചു.

ഭാരതീപുരം കാർമൽഗിരി സ്കൂളിൽ ‘കാർമൽ റേഡിയോ’

കുളത്തൂപ്പുഴ: ഭാരതീപുരം കാർമൽഗിരി സ്കൂളിൽ ‘കാർമൽ റേഡിയോ 99.9 ; കേൾക്കൂ പറയൂ അറിഞ്ഞുകൊണ്ടേയിരിക്കൂ ’ എന്ന പേരിൽ സ്കൂൾ റേഡിയോ ആരംഭിച്ചു. കുട്ടികളുടെ വായനശീലവും ഭാഷാനൈപുണ്യവും സർഗാത്മകതയും വളർത്താനായി തുടങ്ങിയ പദ്ധതി സ്കൂൾ മാനേജർ ഫാ.ജോഷ്വാ കൊച്ചുവിളയിൽ ഉദ്ഘാടനം ചെയ്തു.പ്രിൻസിപ്പാൾ ഷാലി കാർമൽ റേഡിയോയുടെ ആവശ്യകതയെ കുറിച്ച് കുട്ടികളെ അഭിസംബോധന ചെയ്തു . സ്കൂൾ ഇടവേളകളിൽ റേഡിയോ ജോക്കികളായി എത്തുന്ന കുട്ടികൾ ഇംഗ്ലീഷ്, മലയാളം ഭാഷകളിൽ വിവേകവും വിജ്ഞാനവും പ്രധാനം ചെയ്യുന്ന വാർത്തകളും കഥകളും പാട്ടുകളും പ്രധാന സംഭവങ്ങളും മറ്റും രസകരമായ ഭാഷയിൽ സ്കൂൾ റേഡിയോയിലൂടെ അവതരിപ്പിക്കും. പരമ്പരാഗത ക്ലാസ് റൂം ശൈലികളിൽ നിന്നും വ്യത്യസ്തമായ പരിപാടികൾ നടപ്പിലാക്കി മാതൃകയാവുകയാണ് കാർമൽഗിരി സ്കൂൾ.

വെളിച്ചം പദ്ധതിയിൽ ലാപ്ടോപ് സമ്മാനിച്ചു

ചാത്തന്നൂർ: കൊല്ലം ജില്ലാ പഞ്ചായത്ത് വെളിച്ചം പദ്ധതിയിൽ ഉൾപ്പെടുത്തി ഉളിയനാട് കെ. പി .ഗോപാലൻ ഗ്രന്ഥശാലക്ക് അനുവദിച്ച ലാപ് ടോപ്പ്, സ്ക്രീൻ, പ്രോജക്ടർ എന്നിവ ജില്ലാ പഞ്ചായത്ത് വൈസ്പ്രസിഡന്‍റ് ശ്രീജാ ഹരീഷ് വിതരണം ചെയ്തു. ഗ്രന്ഥശാലാ പ്രസിഡന്‍റ്പി. ബിനു അധ്യക്ഷത വഹിച്ചു. സെക്രട്ടറി ടി.ആർ.ദിപു ,ജോയിന്‍റ്് സെക്രട്ടറി അനിൽ കുമാർ, വൈസ് പ്രസിഡന്‍റ് ബിജു ,എക്സിക്യൂട്ടീവ് അംഗങ്ങളായ ഫ്രാൻസിസ്, സുനിൽകുമാർ, ബിജു , ഷീജ വിശ്വംഭരൻ, അഭിജ, അനഘ,കെ.രാജൂ എന്നിവർ പ്രസംഗിച്ചു.

ഓപ്പറേഷൻ സിന്ദൂറിൽ പങ്കെടുത്ത സൈനികന് നാടിന്‍റെ ആദരവ്

ഭാരതീപുരം: ഓപറേഷൻ സിന്ദൂറിൽ പങ്കെടുത്ത ഭാരതീപുരം സ്വദേശി ഹവിൽദാർ ലിജോ ലാലുവിനെ ഭാരതീപുരം സെന്‍റ് കുറിയാക്കോസ് ഓർത്തഡോക്സ്‌ പള്ളിയുടെയും പൗരാവലിയുടെയും ആഭിമുഖ്യത്തിൽ ആദരിച്ചു. കഴിഞ്ഞദിവസം ഭാരതീപുരം ജംഗ്ഷനിൽ കൂടിയ പൊതുയോഗത്തിൽ സെന്‍റ്്കുറിയാക്കോസ്ഓർത്തഡോക്സ്‌പള്ളി വികാരി ഫാ. ഗീവർഗീസ് പള്ളിവാതുക്കലിന്‍റെ അധ്യക്ഷതയിൽ കൂടിയ പൊതുസമ്മേളനം എരൂർഗ്രാമപഞ്ചായത്ത് പ്രസിഡന്‍റ് ജി .അജിത് ഉദ്ഘാടനം ചെയ്തു. ഓപറേഷൻ സിന്ദൂറിൽ പങ്കെടുത്ത എല്ലാ സൈനികർക്കും ആദരവ് അർപ്പിച്ചുകൊണ്ടുള്ള സമ്മേളനമാണ് ഭാരതീപുരം ജംഗ്ഷനിൽ നടന്നത്. ഗ്രാമപഞ്ചായത്ത് മെമ്പർമാരായ ഷീന കൊച്ചുമ്മച്ചൻ, ജോസഫ് , പി.ടി.കൊച്ചുമ്മച്ചൻ, സ്വാമി നിത്യാനന്ദ ഭാരതി, കിഷോർ, രാജീവ് ബാലകൃഷ്ണൻ, രാധാകൃഷ്ണൻ, വനദേവ്, ഹർഷ കൊച്ചുമ്മച്ചൻ, അലൻ സാബു, ജോയൽ ഏബ്രഹാം തുടങ്ങിയവർ പ്രസംഗിച്ചു.

കെ.സി.വേണുഗോപാലിന്‍റെ പ്രസ്താവനയിൽ പ്രതിഷേധിച്ചു

കൊല്ലം:ക്ഷേമ പെൻഷനുകൾ കൈക്കൂലിയാണ് എന്ന് കോൺഗ്രസ് നേതാവ് കെ.സി.വേണുഗോപാൽ എംപിയുടെ പരാമർശത്തിനെതിരേ ഡിഫറന്‍റിലി ഏബിൾഡ് വെൽഫെയർ ഫെഡറേഷൻ(ഡിഎഡബ്യൂഎഫ്) ജില്ലാ കമ്മിറ്റിയുടെ ആഭിമുഖ്യത്തിൽ പ്രതിഷേധസമരം നടത്തി. ചിന്നക്കട ബസ് ബേയിൽ നടന്ന പ്രതിഷേധ ധർണ മുൻമേയർ പ്രസന്ന ഏണസ്റ്റ് ഉദ്ഘാടനം ചെയ്തു . ജില്ലാ പ്രസിഡന്‍റ് വി.പ്രകാശ് അധ്യക്ഷത വഹിച്ച യോഗത്തിൽ ജോയിന്‍റ് സെക്രട്ടറി സന്ദീപ് ,സംസ്ഥാന കമ്മിറ്റി അംഗം ഇന്ദിരാഭായി, കൊല്ലം കോർപറേഷൻ ഏരിയ പ്രസിഡന്‍റ് ശ്രീലാൽ ,നിസാർ എന്നിവർ പ്രസംഗിച്ചു.

വിദ്യാർഥികളെ അനുമോദിക്കുന്നു

കുണ്ടറ: മത്സര പരീക്ഷകളിൽ ഉന്നത വിജയം നേടിയ പട്ടികജാതി വിഭാഗത്തിലെ വിദ്യാർഥികളെ അനുമോദിക്കുന്നു.ഭാരതീയ ദളിത് കോൺഗ്രസ് ബ്ലോക്ക് കമ്മിറ്റിയുടെ നേതൃത്വത്തിൽ കുണ്ടറ, പേരയം, പെരിനാട്, ഇളമ്പള്ളൂർ ഗ്രാമപഞ്ചായത്തുകളിൽ താമസിക്കുന്ന പട്ടികജാതി വിഭാഗത്തിൽപ്പെട്ട എസ് എസ് എൽ സി, പ്ലസ് ടു പരീക്ഷകളിൽ ഫുൾ എ പ്ലസ് നേടിയ വിദ്യാർഥികളെ യാണ് ആദരിക്കുന്നത്. ആദരവിന് അർഹരായ വിദ്യാർഥികൾ മാർക്ക് ലിസ്റ്റിന്‍റെ കോപ്പി 30 ന് മുൻമ്പായി ഹാജരാക്കണമെന്ന് ബ്ലോക്ക് പ്രസിഡന്‍റ് എൻ. ബൈജു അറിയിച്ചു. ബന്ധപ്പെടേണ്ട നമ്പർ 9846228087,9745546405, 9497105855.

അനുമോദിച്ചു

കൊട്ടാരക്കര: സ്വന്തം നിയോജക മണ്ഡലത്തിലെ വിദ്യാർഥി പ്രതിഭകളെയും റാങ്ക്‌ ജേതാക്കളെയും ഉന്നത പരീക്ഷാ വിജയികളെയും അനുമോദിച്ച് മന്ത്രി കെ.എൻ.ബാലഗോപാൽ. കൊട്ടാരക്കര പുലമൺ മാർത്തോമ ജൂബിലി മന്ദിര അങ്കണത്തിൽ സംഘടിപ്പിച്ച അനുമോദന ചടങ്ങിൽ 1600 വിദ്യാർഥി പ്രതിഭകളാണ് മന്ത്രിയിൽ നിന്ന് പുരസ്കാരങ്ങൾ ഏറ്റുവാങ്ങിയത്. ഐഎസ്‌ആർഒ മുൻ ചെയർമാൻ ഡോ. എസ്‌. സോമനാഥ്‌ ചടങ്ങിൽ മുഖ്യാതിഥിയായിരുന്നു. കേരള സ്‌റ്റാർട്ടപ്പ്‌ മിഷൻ സിഇഒ അനൂപ്‌ അംബിക, കേരള ശാസ്‌ത്ര സാങ്കേതിക സർവകലാശാല മുൻ പ്രോവൈസ്‌ ചാൻസലർ ഡോ. എസ്‌. അയൂബ്‌ , ഐഎഎസ് റാങ്ക് ജേതാവ് ജി.പി.നന്ദന എന്നിവർ വിവിധ വിഷയങ്ങളിൽ പ്രഭാഷണം നടത്തി. പ്രോഗ്രാം കോ-ഓർഡി നേറ്റർ പി. കെ. ജോൺസൻ, മുൻസിപ്പൽ ചെയർമാൻ കെ. ഉണ്ണികൃഷ്ണമേനോൻ, കൊട്ടാരക്കര ബ്ലോക്ക് പഞ്ചായത്ത് പ്രസിഡന്‍റ് എ. അഭിലാഷ് ,വെട്ടിക്കവല, ബ്ലോക്ക് പഞ്ചായത്ത് പ്രസിഡന്‍റ് എസ്. രഞ്ജിത്ത്, പഞ്ചായത്ത് പ്രസിഡന്‍റുമാരായ എസ്. എസ്. സുവിധ, ആർ. പ്രശാന്ത്, ബിജു കെ. ഏബ്രഹാം ,വി. കെ. ജ്യോതി, ബിന്ദു ജി. നാഥ്, സജി കടൂക്കാല,മാർത്തോമാ ജൂബിലി മന്ദിരം സൂപ്രണ്ട് ഫാ. ബിനു സി. സാമുവൽ എന്നിവർ പങ്കെടുത്തു.

എസ്പിസി പാസിംഗ് ഔട്ട് പരേഡ് സംഘടിപ്പിച്ചു

ചവറ : ശങ്കരമംഗലം ഗവ. ഹയർ സെക്കൻഡറി സ്കൂളിൽ എസ് പി സി വിദ്യാർഥികളുടെ പാസിംഗ് ഔട്ട് പരേഡ് സംഘടിപ്പിച്ചു. സുജിത് വിജയൻ പിള്ള എംഎൽഎ കേഡറ്റുകളുടെ സല്യൂട്ട് സ്വീകരിച്ച് പരിപാടികൾക്ക് തുടക്കം കുറിച്ചു. ബ്ലോക്ക് പഞ്ചായത്ത് പ്രിസിഡന്‍റ് സന്തോഷ് തുപ്പാശേരി, ജില്ലാ പഞ്ചായത്ത് അംഗം സി.പി. സുധീഷ് കുമാർ, എസ് പി സി കൊല്ലം സിറ്റി എ ഡിഎൻ ഒ.ബി.രാജേഷ് , ചവറ സബ് ഇൻസ്പെക്‌ടർ അസരീഫ് ഷെഫീക്, പ്രഥമ അധ്യാപിക എലിസബത്ത് ഉമ്മൻ, പിടിഎ വൈസ് പ്രസിഡന്‍റ് ബിനൂപ്, സീനിയർ അസിസ്റ്റന്‍റ് ആനന്ദ് ജോൽസില, കമ്യുണിറ്റി പോലീസ് ഓഫീസർമാരായ ഐ.ജിജി , രാജേന്ദ്രൻ, ഡ്രിൽ ഇൻസ്ട്രക്‌ടർമാരായ അസീം, റിനു, അധ്യാപകർ, കൗൺസിലർ ആതിര തുടങ്ങിയവർ പങ്കെടുത്തു.

ആഭരണത്തട്ടിപ്പ്; ജ്വല്ലറിക്കെതിരേ 25 പരാതികള്‍

പേരൂര്‍ക്കട: ആഭരണത്തട്ടിപ്പുമായി ബന്ധപ്പെട്ട് തിരുവനന്തപുരം പുളിമൂടിനു സമീപം പ്രവര്‍ത്തിച്ചുവന്ന ജ്വല്ലറിക്കെതിരേ കന്‍റോൺമെന്‍റ് സ്റ്റേഷനില്‍ കഴിഞ്ഞ 15 ദിവസത്തിനിടെ 25 പരാതികള്‍ ലഭിച്ചു. ഇതില്‍ രണ്ണെണ്ണത്തില്‍ കേസെടുത്തു. തിരുവനന്തപുരം നഗരത്തിലും റൂറല്‍ ഭാഗത്തും താമസിച്ചുവരുന്നവരാണ് പരാതികള്‍ നല്‍കിയിരിക്കുന്നത്. ഇതില്‍ പരാതി നല്‍കിയിരിക്കുന്ന ഒരാള്‍ക്ക് ലഭിക്കാനുള്ള തുക 40 ലക്ഷം രൂപയെന്നാണ് പറയുന്നത്. വരും ദിവസങ്ങളില്‍ കൂടുതല്‍ പരാതികള്‍ ലഭിച്ചേക്കുമെന്നു കന്‍റോൺമെന്‍റ് സി.ഐ. പ്രജീഷ് ശശി പറഞ്ഞു. ജ്വല്ലറിയുടെ ശാഖയില്‍ സ്വർണാഭരണങ്ങളും പണവും സ്ഥിരനിക്ഷേപമായി നല്‍കി കബളിപ്പിക്കപ്പെട്ട ചിലര്‍ തങ്ങള്‍ക്കു പണം തിരികെ ലഭിക്കുമെന്ന വിശ്വാസത്തിലാണ്.

കരമനയില്‍ ദമ്പതികളെ വീടിനുള്ളില്‍ മരിച്ചനിലയില്‍ കണ്ടെത്തി

പേരൂര്‍ക്കട: കരമനയില്‍ ദമ്പതികളെ വീടിനുള്ളില്‍ മരിച്ചനിലയില്‍ കണ്ടെത്തി. ആത്മഹത്യയെന്നാണു പ്രാഥമിക നിഗമനമെന്നു പോലീസ്. കരമന നെടുങ്കാട് കാട്ടാന്‍വിള കൊച്ചുമാവേലി വീട്ടില്‍ പരേതനായ കേശവന്‍ - ഭവാനി ദമ്പതികളുടെ മകന്‍ സതീഷ് (55), പരേതനായ തങ്കന്‍-വസന്ത ദമ്പതികളുടെ മകള്‍ ബിന്ദു (50) എന്നിവരെയാണു മരിച്ചനിലയില്‍ കണ്ടെത്തിയത്. കാട്ടാന്‍വിളയിലെ ഒറ്റനില വീടിന്‍റെ ഹാളിനുള്ളില്‍ സതീഷിനെ കഴുത്തറുത്ത നിലയിലും കിടപ്പുമുറിയിൽ ബിന്ദുവിനെ തൂങ്ങിമരിച്ച നിലയിലുമാണ് കണ്ടെത്തിയത്. ഇന്നലെ രാവിലെ 10 ന് ബിന്ദുവിന്‍റെ സഹോദരന്‍ ബിനു ഇരുവരേയും അന്വേഷിച്ചെത്തിയതോടെയാണ് മരണവിവരം പുറംലോകം അറിയുന്നത്. വീടിന്‍റെ കതക് ചവിട്ടിത്തുറന്നു നടത്തിയ പരിശോധനയിലാണ് മൃതദേഹങ്ങള്‍ കണ്ടെത്തിയത്. കരാര്‍ പണിക്കാരനായിരുന്നു സതീഷ്. വിവിധ കാലങ്ങളിലായി ഉണ്ടായ കടബാധ്യതയും ബാങ്കില്‍ നിന്നുള്ള മാനസിക സമ്മര്‍ദവുമാണ് ആത്മഹത്യയിലേക്കു നയിച്ചതെന്നാണു ബന്ധുക്കള്‍ പറയുന്നത്. അതേസമയം സതീഷിന്‍റെ മൃതദേഹത്തില്‍ ആഴത്തിലുള്ള മുറിവുകള്‍ ഉണ്ടായിരുന്നുവെന്നും ബിന്ദു ഭര്‍ത്താവിനെ കൊലപ്പെടുത്തിയശേഷം ആത്മഹത്യ ചെയ്യുകയായിരുന്നുവെന്നു കരുതുന്നുവെന്നും പോസ്റ്റുമോര്‍ട്ടം റിപ്പോര്‍ട്ട് ലഭിച്ചാല്‍ മാത്രമേ യഥാര്‍ഥ വസ്തുതകള്‍ അറിയാന്‍ സാധിക്കൂവെന്നും പോലീസ് അറിയിച്ചു. വിവരം അറിഞ്ഞ് കരമന പോലീസ് സ്ഥലത്തെത്തിയിരുന്നു. എന്നാൽ ആര്‍ഡിഒ എത്തിയാല്‍ മാത്രമേ വീട്ടില്‍നിന്നു മൃതദേഹങ്ങള്‍ മോര്‍ച്ചറിയിലേക്കു കൊണ്ടുപോകാന്‍ അനുവദിക്കുവെന്ന നിലപാടിലായിരുന്നു നാട്ടുകാർ. ബാങ്കിനെതിരേ നടപടിയെടുക്കണമെന്നും നാട്ടുകാർ ആവശ്യപ്പെട്ടു. അഞ്ചുവര്‍ഷത്തിനുമുമ്പു തളര്‍വാതം പിടിപെട്ടതിനെത്തുടര്‍ന്നു കരാര്‍പണിയിലേര്‍പ്പെടാന്‍ സാധിക്കാതിരുന്ന സതീഷ് കുറച്ചുനാളായി ഓട്ടോറിക്ഷ ഓടിച്ചുവരികയായിരുന്നു. മകന്‍: സജിത്ത് (സൗദി അറേബ്യ). അസ്വാഭാവിക മരണത്തിനു കരമന പോലീസ് കേസെടുത്തു.

റോഡിന് ഇരുവശവും കാട് കയറുന്നു

ചവറ :പന്മന പഞ്ചായത്തിലെ പൊന്മന, പന്മന, ചിറ്റൂർ വാർഡുകളിലെ പഞ്ചായത്ത് റോഡുകളുടെ ഇരുവശവും കാടുകയറി സഞ്ചാരയോഗ്യമല്ലാതാകുന്നു. റോഡ് വശത്ത് അടുത്ത വീട്ടുകാർ ചെടികൾ നട്ടുവളർത്തുന്നതും പതിവാകുന്നു. ഇഴജന്തുക്കളുടെ ശല്യവും ഇവിടെയുണ്ടെന്ന് നാട്ടുകാർ പറയുന്നു. തൊഴിലുറപ്പു പദ്ധതിയിൽ ഉൾപെടുത്തി പഞ്ചായത്ത് റോഡു വശങ്ങൾ വൃത്തിയാക്കാൻ ജനപ്രതിനിധികൾ തയാറാകുന്നില്ലെന്ന് നാട്ടുകാർ പറയുന്നു.

അയല്‍വാസിയായ യുവതിയെ കൊന്നു കുഴിച്ചുമൂടി; പ്രതി പിടിയില്‍

വെള്ളറട: പനച്ചമൂട്ടില്‍ കാണാതായ യുവതിയെ കൊന്നു കുഴിച്ചുമൂടിയ നിലയില്‍ കണ്ടെത്തി. പനച്ചമൂട് പഞ്ചാകുഴി മാവുവിള വീട്ടില്‍ പ്രിയംവദ (47) യെയാണ് തൊട്ടടുത്ത വീട്ടില്‍ കൊന്നു കുഴിച്ചു മൂടിയ നിലയില്‍ കണ്ടെത്തിയത്. സംഭവവുമായി ബന്ധപ്പെട്ട് അയല്‍വാസികളായ രണ്ടുപേരെയാണ് വെള്ളറട പോലീസ് കസ്റ്റഡിയിലെടുത്തത്. വര്‍ഷങ്ങള്‍ക്കു മുന്‍പ് ഭര്‍ത്താവ് ബാലകൃഷ്ണനുമായി പിരിഞ്ഞു മക്കളുമായി താമസിച്ച് വരികയായിരുന്നു പ്രിയംവദ. ഇവരുടെ രണ്ടുപെണ്‍മക്കള്‍ വിവാഹം കഴിഞ്ഞ് ഭര്‍തൃവീടുകളിലാണ്. ജൂണ്‍ 12 മുതല്‍ പ്രിയംവദയെ കാണാനില്ലായിരുന്നു. ഫോണില്‍ വിളിച്ചിട്ടും കിട്ടാത്തതിനെത്തുടര്‍ന്നു മക്കള്‍ വെള്ളറട പോലീസില്‍ പരാതി നല്‍കിയിരുന്നു. പോലീസ് അന്വേഷണം തുടരുന്നതിനിടയിലാണ് ഇന്നലെ ഉച്ചയോടെയാണ് പ്രിയംവദയുടെ മൃതദേഹം കണ്ടെത്തിയത്. അയല്‍വാസിയായ വിനോദിന്‍റെ വീടിനകത്തുള്ള കട്ടിലിനടിയില്‍ ചാക്കില്‍ കെട്ടിയ നിലയില്‍ എന്തോ കിടക്കുന്നതായി മക്കള്‍ കാണുകയും തൊട്ടടുത്ത് താമസിക്കുന്ന ബന്ധുവായ സരസ്വതിയെ വിവരമറിയിക്കുകയുമായിരുന്നു. സരസ്വതി ഈ വിവരം ആരാധനക്കായി പള്ളിയിലെത്തിയപ്പോള്‍ വികാരിയെ അറിയിച്ചു. വികാരി അറിയിച്ചതു പ്രകാരം പോലീസ് സ്ഥലത്തെത്തിയ സമയത്ത് യുവാക്കൾ വീടിന്‍റെ അകം കഴുകി വൃത്തിയാക്കുകയായിരുന്നു. തുടര്‍ന്നു നടത്തിയ പരിശോധനയിലാണ് മൃതദേഹം ശുചിമുറിയില്‍ കുഴിച്ചിട്ട നിലയില്‍ കണ്ടെത്തിയത്. തുടര്‍ന്നാണ് സഹോദരങ്ങളായ സന്തോഷ് (42), വിനോദ് (46) എന്നിവരെ പോലീസ് കസ്റ്റഡിയിലെടുത്തത്. ചോദ്യം ചെയ്യലില്‍ വിനോദ് കുറ്റംസമ്മതിച്ചതായി പോലീസ് പറഞ്ഞു. ഇക്കഴിഞ്ഞ 12നു രാവിലെ ഏഴിനും എട്ടിനും ഇടയിലാണു കൊല നടത്തിയതെന്നും ഞായറാഴ്ച മൃതദേഹം കുഴിച്ചിടുകയായിരുന്നുവെന്നും ഇയാള്‍ പോലീസിനോട് സമ്മതിച്ചതായാണ് വിവരം. ഇയാള്‍ക്കൊപ്പം പോലീസ് കസ്റ്റഡിയില്‍ എടുത്ത സന്തോഷിനു കൊലപാതകത്തില്‍ പങ്കില്ലെന്നാണ് വിനോദ് പറയുന്നത് .കശുവണ്ടി ഫാക്‌ടറി തൊഴിലാളിയായ പ്രിയംവദയുമായി സാമ്പത്തിക ഇടപാടുണ്ടായിരുന്നതായും ഇതിന്‍റെ പേരില്‍ തര്‍ക്കമുണ്ടായതായും വിനോദ് മൊഴി നൽകി. തർക്കത്തിനിടെ മർദിച്ചപ്പോൾ ബോധംകെട്ടു വീണ പ്രിയംവദയെ പിന്നീടു കഴുത്തുഞെരിച്ച് കൊലപ്പെടുത്തുകയായിരുന്നു. പ്രിയംവദയെ കാണാനില്ലെന്ന പരാതിയെത്തുടര്‍ന്ന് അന്വേഷണത്തിനായി വിനോദും നാട്ടുകാര്‍ക്കൊപ്പം ചേര്‍ന്നിരുന്നു. കസ്റ്റഡിയിലെടുത്ത പ്രതികളുമായി പോലീസ് തെളിവെടുപ്പ് നടത്തി. നെയ്യാറ്റിന്‍കര ഡിവൈഎസ്പിയുടെ നേതൃത്വത്തില്‍ പോലീസും വെള്ളറട സര്‍ക്കിള്‍ ഇന്‍സ്പക്ടര്‍ പ്രസാദ്, ഫോറന്‍സിക് സംഘവും ചേര്‍ന്ന് മൃതദേഹം പുറത്തെടുത്തു.

പീഡന കേസിൽ ജാമ്യത്തിലിറങ്ങി മുങ്ങിനടന്നയാൾ പിടിയിൽ

നെടുമങ്ങാട്: പ്രായപൂർത്തിയാകാത്ത പെൺകുട്ടിയെ പീഡിപ്പിച്ച കേസിൽ ജാമ്യത്തിലിറങ്ങി മുങ്ങി നടന്നയാൾ പിടിയിൽ. വെള്ളനാട് കുളക്കോട് ലക്ഷംവീട് കോളനി അലീനാ ഭവനിൽ ജോസിനെ (48)യാണ് ആര്യനാട് പോലീസ് പിടികൂടി. 2021 ലാണ് കേസിനാസ്പദമായ സംഭവം നടക്കുന്നത്. വെള്ളനാട് സ്വദേശിയായ പ്രായപൂർത്തിയാകാത്ത പെൺകുട്ടിയെ പീഡിപ്പിച്ച സംഭവത്തിൽ അറസ്റ്റിലായ ജോസ് ജാമ്യത്തിലിറങ്ങിയശേഷം കോടതിയിൽ ഹാജരാകാതെ ഒളിവിൽ പോകുകയായിരുന്നു. പ്രതിയെ കാസർഗോഡ് നിന്നും അറസ്റ്റ് ചെയ്തത്‌. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

കൊല്ലത്ത് റെയില്‍വേ ട്രാക്കില്‍ മരം വീണു

കൊല്ലം: കൊല്ലത്ത് റെയില്‍വേ ട്രാക്കില്‍ മരം വീണു. കന്യാകുമാരി - പുനലൂര്‍ എക്‌സ്പ്രസിന് തൊട്ടു മുന്നിൽ ആണ് മരം വീഴുന്നത്. വൈദ്യുതി ലൈൻ പൊട്ടിവീണപ്പോള്‍ സ്പാര്‍ക്കുണ്ടായത് യാത്രക്കാരെ ഭീതിയിലാഴ്ത്തി. റെയില്‍വെയുടെ വൈദ്യുതി ലൈൻ ഉള്‍പ്പെടെ പൊട്ടിവീഴുകയായിരുന്നു. കൊല്ലം റെയില്‍വേ സ്റ്റേഷനും പോളയത്തോടിനും ഇടയില്‍ കപ്പലണ്ടി മുക്കിന് സമീപത്താണ് മരം വീണത്. ഇന്നലെ രാത്രി 7.30 ഓടെയായിരുന്നു സംഭവം. വൈദ്യുതി ലൈൻ ഉള്‍പ്പെടെ പൊട്ടിവീണപ്പോള്‍ സ്പാര്‍ക്കുണ്ടായതാണ് യാത്രക്കാരെ ഭയപ്പാടിലാക്കിയത്. വലിയ ശബ്ദത്തോടെയാണ് മരം വീണത്. ലൈനില്‍ തട്ടി മരത്തിന് തീപിടിക്കുകയുണ്ടായി. ഇതോടെ രണ്ടു മണിക്കൂർ നേരം കൊല്ലം - തിരുവനന്തപുരം റൂട്ടിൽ ട്രെയിൻ ഗതാഗതം തടസപ്പെട്ടു.

കൊല്ലം മേയറിന് വധഭീഷണി

കൊല്ലം: കൊല്ലം മേയർ ഹണി ബെഞ്ചമിന് വധഭീഷണി. കത്തിയുമായി വീട്ടിന് മുന്നിലെത്തിയ യുവാവ് വധഭീഷണി മുഴക്കുകയായിരുന്നു. യുവാവ് കത്തിയുമായി എത്തുന്ന സി സിടിവി ദൃശ്യങ്ങൾ ലഭിച്ചിട്ടുണ്ടെങ്കിലും മുഖം വ്യക്തമല്ല. നിരവധി തവണ യുവാവ് വീടിന് സമീപമെത്തിയതായ ദൃശ്യങ്ങൾ പോലീസിന് കിട്ടിയിട്ടുണ്ട്. മേയർ ഇതുസംബന്ധിച്ച് പോലീസ് കമ്മീഷണർക്ക് പരാതി നൽകി. പോലീസ് സിസിടിവി ദൃശ്യങ്ങൾ പരിശോധിച്ചുവരികയാണ്. ഇന്നലെ രാവിലെ 7.15 ഓടെയാണ് ജീൻസ് പാന്‍റും ടീ ഷർട്ടും തൊപ്പിയും ധരിച്ച ഒരാൾ കത്തിയുമായി മേയറുടെ വീടിന് സമീപം എത്തുന്നത്.വൈദ്യശാല ജംഗ്ഷനിൽ എത്തിയ ഇയാൾ ഒരു കടയിൽ എത്തി മേയറുടെ വീട്ടിലേക്കുള്ള വഴി ചോദിച്ചിരുന്നു. മേയറുടെ വീട്ടിൽ എത്തിയ മത്സ്യ വ്യാപാരിയായ സ്ത്രീ പറഞ്ഞത് അനുസരിച്ചാണ് മേയർ ഇക്കാര്യം അറിയുന്നത്. തുടർന്ന് സിസിടിവി ദൃശ്യങ്ങൾ പരിശോധിച്ച ശേഷം പോലീസിൽ പരാതി നൽകുകയായിരുന്നു.

യൂത്ത് ഹോസ്റ്റൽ സ്ഥാപിക്കണമെന്ന്

കൊല്ലം: രാജ്യത്തെ എല്ലാ പ്രധാന നഗരങ്ങളിലും യൂത്ത് ഹോസ്റ്റൽ ഉള്ളതുപോലെ കൊല്ലത്തും ഒരു യൂത്ത് ഹോസ്റ്റൽ ആരംഭിക്കുവാൻ സ്ഥലം ലഭ്യമാക്കാൻ ബന്ധപ്പെട്ടവർ തയാറാകണമെന്ന് യൂത്ത് ഹോസ്റ്റൽ അസോസിയേഷൻ ജില്ലാ ജനറൽബോഡി യോഗം സർക്കാരിനോട് ആവശ്യപ്പെട്ടു. യൂത്ത് ഹോസ്റ്റൽ അസോസിയേഷൻ സംസ്ഥാന വൈസ് ചെയർമാൻ വടക്കേവിള ശശി യോഗം ഉദ്ഘാടനം ചെയ്തു. നെടുങ്ങോലം രഘു അധ്യക്ഷത വഹിച്ചു. ഭാരവാഹികളായി നെടുങ്ങോലം രഘു -പ്രസിഡന്‍റ്, പ്രബോധ് എസ് കണ്ടച്ചിറ -സെക്രട്ടറി, ഒ .ബി .രാജേഷ്, മണക്കാട് സജി, പ്രവീൺ കൊടുന്തറ -വൈസ് പ്രസിഡന്‍റുമാർ, ടി .ജി .സുഭാഷ് -ഓർഗനൈസിങ് സെക്രട്ടറി, ലീലാകൃഷ്ണൻ -ട്രഷറർ എന്നിവരെയും വിവിധ കമ്മറ്റികളുടെ ചെയർമാൻമാരായി ഉമയനല്ലൂർ രവി, എസ് .സുവർണകുമാർ, ആർ. പ്രകാശൻ പിള്ള, ഷീബ തമ്പി, എസ് .ഗണപതി, ഷിബു റാവുത്തർ, മുണ്ടക്കൽ കെ. ചന്ദ്രൻ പിള്ള, ശിവപ്രസാദ്, വിനോദ് ചെല്ലപ്പൻ, ബിനുരാജ് എന്നിവരെയും തെരഞ്ഞെടുത്തു.

അഴീക്കൽ കടൽ തീരത്ത് ഓയിൽ വീപ്പ കരയ്ക്കടിഞ്ഞു

കൊല്ലം: അഴീക്കലിൽ കടൽ ഭാഗത്ത് ഓയിൽ വീപ്പ കരയ്ക്കടിഞ്ഞു. ഓറഞ്ച് നിറത്തിലുള്ള ഭാഗികമായി കത്തിയ ബാരലാണ് സ്രായിക്കാട് ആവണി ജംഗ്ഷന് സമീപം തീരത്തടിഞ്ഞത്. അറബിക്കടലില്‍ തീപിടിച്ച വാന്‍ഹായ് 503 കപ്പലില്‍ നിന്നുള്ള ബാരലാകാമെന്നാണ് സംശയം. ഓച്ചിറ പോലിസും ഫയർഫോഴ്സും സ്ഥലത്തെത്തി പരിശോധന നടത്തി. കസ്റ്റംസിന്‍റെ അനുമതി ലഭിച്ചാല്‍ മാത്രമെ തുടര്‍നടപടികളിലേക്ക് കടക്കാനാകൂവെന്ന് ജില്ലാ ഭരണകൂടം അറിയിച്ചു. ഒഴിഞ്ഞ ബാരല്‍ ആണെന്നാണ് പ്രാഥമിക നിഗമനം. കപ്പലില്‍ നിന്നും താഴേയ്ക്ക് പതിച്ച കണ്ടെയ്നറുകള്‍ എറണാകുളം ജില്ലയുടെ തെക്കു ഭാഗത്തും ആലപ്പുഴ-കൊല്ലം ജില്ലകളുടെ തീരങ്ങളിലുമായി വന്നടിയാന്‍ സാധ്യതയുള്ളതായി കഴിഞ്ഞ ദിവസം സംസ്ഥാന ദുരന്തനിവാരണ അഥോറിറ്റി മുന്നറിയിപ്പ് നല്‍കിയിരുന്നു. ഈ തീരപ്രദേശങ്ങളിലുള്ളവര്‍ക്ക് ജാഗ്രതാ നിര്‍ദേശവും നല്‍കിയിരുന്നു. കപ്പലിൽ നിന്നും കടലിൽ വീണ സാധനങ്ങൾ നീക്കുന്ന കരാർ കമ്പനിയിലെ വിദഗ്ധർ പരിശോധന നടത്തും.

ഉയർന്ന തിരമാല; ജാഗ്രത വേണമെന്ന് കളക്‌ടർ

കൊല്ലം: ഉയർന്ന തിരമാല മുന്നറിയിപ്പുള്ള പശ്ചാത്തലത്തിൽ ചുവടെ പറയും പ്രകാരമുള്ള ജാഗ്രത വേണമെന്ന് ജില്ലാ ദുരന്ത നിവാരണ അഥോറിറ്റി ചെയർമാൻ കൂടിയായ ജില്ലാ കളക്\’ർ എൻ .ദേവിദാസ് മുന്നറിയിപ്പ് നൽകി. ഇന്ന് രാത്രി 8.30വരെ ജില്ലയിൽ ഓറഞ്ച് അലർട്ട്. ആലപ്പാട് മുതൽ ഇടവ വരെപ്രദേശങ്ങളിലെ മത്സ്യത്തൊഴിലാളികളും തീരദേശവാസികളും പ്രത്യേക ജാഗ്രത പാലിക്കണം. കടൽക്ഷോഭം രൂക്ഷമാകാൻ സാധ്യതയുള്ളതിനാൽ അപകട മേഖലകളിൽ നിന്ന് അധികൃതരുടെ നിർദേശാനുസരണം മാറി താമസിക്കണം. ചെറിയ വള്ളങ്ങളും ബോട്ടുകളും കടലിലേക്ക് ഇറക്കുന്നത് ഈ സമയത്ത് ഒഴിവാക്കേണ്ടതാണ്. കള്ളക്കടൽ പ്രതിഭാസത്തിനും ഉയർന്ന തിരമാലക്കും സാധ്യതയുള്ള ഘട്ടത്തിൽ കടലിലേക്ക് മത്സ്യബന്ധന യാനങ്ങൾ ഇറക്കുന്നത് പോലെ തന്നെ അപകടകരമാണ് കരക്കടുപ്പിക്കുന്നതും. തിരമാല ശക്തിപ്പെടുന്ന ഘട്ടത്തിൽ കടലിലേക്ക് ഇറക്കുന്നതും കരക്കടുപ്പിക്കുന്നതും ഒഴിവാക്കേണ്ടതാണ്. മുന്നറിയിപ്പ് പിൻവലിക്കുന്നത് വരെ ബീച്ചുകൾ കേന്ദ്രീകരിച്ചുള്ള വിനോദസഞ്ചാരമുൾപ്പെടെയുള്ള എല്ലാ പ്രവർത്തനങ്ങളും പൂർണമായി ഒഴിവാക്കേണ്ടതാണ് മത്സ്യബന്ധന യാനങ്ങൾ (ബോട്ട്, വള്ളം, മുതലായവ) ഹാർബറിൽ സുരക്ഷിതമായി കെട്ടിയിട്ട് സൂക്ഷിക്കുക. വള്ളങ്ങൾ തമ്മിൽ സുരക്ഷിത അകലം പാലിക്കുന്നത് കൂട്ടിയിടിച്ചുള്ള അപകട സാധ്യത ഒഴിവാക്കാം. മത്സ്യബന്ധന ഉപകരണങ്ങളുടെ സുരക്ഷ ഉറപ്പാക്കണം. ബീച്ചിലേക്കുള്ള യാത്രകളും കടലിൽ ഇറങ്ങിയുള്ള വിനോദങ്ങളും പൂർണമായും ഒഴിവാക്കുക. തീരശോഷണത്തിനു സാധ്യതയുള്ളതിനാൽ പ്രത്യേകം ജാഗ്രത പുലർത്തമെന്നും അറിയിപ്പിൽ പറയുന്നു.

ഗൂഗിൾ മാപ്പ് ‘പണി’ കൊടുത്തു : ഇടുങ്ങിയ റോഡിൽ കണ്ടെയ്നർ ലോറി ഓടിച്ചു കയറ്റി

കുണ്ടറ: കച്ചേരി മുക്ക് കേരള ഇലക്‌ട്രിക്കൽ ആൻഡ് അലൈഡ് എൻജിനിയറിംഗ് കമ്പനിക്ക് സമീപം ഇടുങ്ങിയ പഞ്ചായത്ത് റോഡിൽ വലിയ കണ്ടെയ്നർ ലോറി ഓടിച്ചു കയറ്റി നാശനഷ്‌ടമുണ്ടാക്കി. ഇന്നലെ പുലർച്ചെ 1. 30 തിന് മരച്ചില്ലകളും മറ്റും ഒടിഞ്ഞുവീഴുന്ന ശബ്ദം കേട്ടാണ് പ്രദേശവാസികൾ ഉണർന്നത്. അമിതമായി മദ്യപിച്ച തമിഴ്നാട് സ്വദേശികളായ ഡ്രൈവറും മറ്റ് രണ്ടുപേരുമാണ് കണ്ടെയ്നർ ലോറിയിൽ ഉണ്ടായിരുന്നത്. കായലി െ ന്‍റ കരയിൽ വീടുപണി നടക്കുന്ന സ്ഥലത്താണ് വണ്ടി പുതഞ്ഞത്. പ്രദേശത്തെ നിരവധി വീടുകളുടെ റോഡ് സൈഡിലുള്ള ഷീറ്റുകൾ, സിസി കാമറകൾ, സർവീസ് വയറുകൾ എന്നിവയ്ക്ക് വലിയ നാശ നഷ്‌ടമാണ് ഉണ്ടായത്. അധികം ബലമില്ലാത്ത റോഡിന്‍റെ ടാറിംഗും സൈഡിലെ ടൈലുകളും ഇടിഞ്ഞുതാണു. തമിഴ്നാട് രജിസ്ട്രേഷൻ ഉള്ളതും മിൽക്ക് വാൻ എന്ന ബോർഡ് വെച്ചിട്ടുള്ളതുമായ വണ്ടിയിൽ എറണാകുളത്ത് നിന്നും 21 ടൺ ഡാൽഡ കയറ്റിയാണ് വന്നതെന്നും അഞ്ചാലുംമൂട് ഭാഗത്തേക്ക് പോകേണ്ട വണ്ടി ഗൂഗിൾ മാപ്പ് നോക്കി വഴിതെറ്റി വന്നതാണെന്നുമാണ് ഡ്രൈവർ പറഞ്ഞത്. പോലീസുകാരുടെയും വാർഡ് മെമ്പറുടെയും സാന്നിധ്യത്തിൽ ക്രെയിൻ ഉപയോഗിച്ച് വാഹനം പൊക്കി പോലീസ് സ്റ്റേഷനിലേക്ക് മാറ്റുകയായിരുന്നു. ഉടമസ്ഥർ വന്നാൽ മാത്രമേ, സീൽ പൊട്ടിച്ച് വണ്ടി പരിശോധിക്കാൻ സാധിക്കൂ എന്നാണ് പോലീസ് പറയുന്നത്. ഉടമസ്ഥർ വന്ന് നഷ്‌ടപരിഹാരം നൽകി പരിശോധനയ്ക്ക് ശേഷം വണ്ടി വിട്ടു നൽകുമെന്നും പോലീസ് അറിയിച്ചു.

പരിസ്ഥിതി ദിനാഘോഷവും സെമിനാറും

കൊല്ലം: പൊടിയാട്ടുവിള സെന്‍റ് മേരീസ് മലങ്കര കത്തോലിക്ക പള്ളിയിലെ സണ്ടേ സ്കൂളിന്‍റെ നേതൃത്വത്തിൽ പരിസ്ഥിതി ദിനാഘോഷവും സെമിനാറും നടത്തി. ഇടവക വികാരി ഫാ.അനു ജോസ് കുന്നിൽ ഉദ്ഘാടനം ചെയ്തു. ഹെഡ്മാസ്റ്റർ ബിജു അലക്സ് കിഴക്കേവീട് അധ്യക്ഷത വഹിച്ചു. ‘ഭൂമിക്കായി ഒരാൾ ഒരു മരം' എന്ന വിഷയത്തെ ആസ്പദമാക്കി രഞ്ജിത രാജു ക്ലാസെടുത്തു. കുട്ടികൾക്കായി ഡോക്യുമെന്‍ററി പ്രദർശനവും നടത്തി .തുടർന്ന് വൃക്ഷത്തൈ നടുകയും പ്രതിജ്ഞ എടുക്കുകയും ചെയ്തു. ആഘോഷ പരിപാടികൾക്ക് അധ്യാപകരും വിദ്യാർഥികളും നേതൃത്വം നൽകി.

കുണ്ടറ താലൂക്ക് ആശുപത്രി കെട്ടിട നിർമാണ പ്രതിസന്ധി മാറുന്നു

കുണ്ടറ : താലൂക്ക് ആശുപത്രി പരിസരത്ത് കിഫ്ബി ഫണ്ട് ഉപയോഗിച്ച് നിർമാണം നടന്നു വരുന്ന ബഹുനില കെട്ടിട നിർമാണത്തിന്‍റെപൂർത്തീകരണത്തിലെ പ്രതിസന്ധി മാറുന്നു. കിഫ്ബി 35 കോടി രൂപ ചെലവഴിച്ച് നിർമാണം ആരംഭിച്ച പദ്ധതിയിൽ ഹൈ ടെൻഷൻ വൈദ്യുത കണക്ഷൻ ലഭ്യമാക്കുന്നതിനുളള തുക വകയിരുത്താത്തതാണ് കെട്ടിട പൂർത്തീകരണത്തിന് പ്രതിസന്ധിയായി മാറിയിരുന്നത്. ഹൈ ടെൻഷൻ വൈദ്യൂത കണക്ഷൻ ലഭിക്കുന്നതിനായി വൈദ്യുത ബോർഡിന് 8.93 ലക്ഷം രൂപ അടയ്ക്കണമെന്ന് കാണിച്ച് ആശുപത്രി അധികൃതർക്ക് കത്ത് നൽകിയത് ശ്രദ്ധയിൽപ്പെട്ടതോടെയാണ് പ്രത്യേക വികസന പദ്ധതിയിൽ നിന്നും 8.93 ലക്ഷം രൂപ കൂടി അനുവദിക്കുന്നതിനായി കത്ത് നൽകിയതെന്ന് പി.സി. വിഷ്ണുനാഥ് എം എൽഎ അറിയിച്ചു. വൈദ്യുത ബോർഡ് എസ്റ്റിമേറ്റ് സമർപ്പിക്കുന്ന മുറയ്ക്ക് ഭരണാനുമതി നൽകി തുടർ നടപടികളിലേയ്ക്ക് കടക്കുമെന്നും എംഎൽഎ അറിയിച്ചു. കറണ്ടില്ലാത്തതും ജനറേറ്ററിൽ ഡീസൽ അടിക്കാൻ പൈസ ഇല്ലാത്തതിനാലും ചികിത്സ മുടങ്ങിയതും ഈയിടെ വലിയ വാർത്തയായിരുന്നു.

കൊട്ടാരക്കര ചന്തമുക്കിലെ ഹൈമാസ്‌റ്റ് ലൈറ്റ് മിഴിയടച്ചു

കൊട്ടാരക്കര: ചന്തമുക്കിലെ ഹൈമാസ്റ്റ് ലൈറ്റ് മിഴിയടച്ചു. മഴക്കാലത്തിന്‍റെ ദുരിതങ്ങൾക്കൊപ്പം നഗരം ഇരുട്ടിലായി. മൂന്ന് മാസമായി ലൈറ്റ് തെളിയുന്നില്ല . വർഷങ്ങൾക്ക് മുൻപ് സ്ഥാപിച്ച ഹൈമാസ്റ്റ് ലൈറ്റ് ഇതുപോലെ പലതവണ പണിമുടക്കിയിട്ടുണ്ട്. എന്നാൽ അറ്റകുറ്റപ്പണികൾ നടത്തി വീണ്ടും ഉപയോഗിക്കും. ഇപ്പോൾ ലൈറ്റ് തകരാറിലായിട്ട് ഏറെ നാൾ കഴിഞ്ഞിട്ടും അധികൃതർ തിരിഞ്ഞു നോക്കിയിട്ടില്ല. കൊല്ലം-തിരുമംഗലം ദേശീയപാതയും കൊട്ടാരക്കര- പുത്തൂർ റോഡും ചേരുന്ന ഭാഗത്തായിട്ടാണ് ഹൈമാസ്റ്റ് ലൈറ്റ് സ്ഥാപിച്ചിട്ടുള്ളത് . ഇവിടെയാണ് ഓട്ടോ സ്റ്റാൻഡുള്ളത്.സന്ധ്യ മയങ്ങിയാൽ ഈ ഭാഗം കൂരിരുട്ടായി മാറുകയാണ് .തെരുവുനായകളുടെ ശല്യവുമേറിയിട്ടുണ്ട്. ഓട്ടോ സ്റ്റാൻഡിലും വെളിച്ചമില്ല. ചന്തമുക്കിലാകെ വെളിച്ചം വിതറിയിരുന്ന ലൈറ്റാണ് മിഴിയടച്ചത്.

നേത്ര ചികിത്സാ ക്യാന്പ് നടത്തി

കുണ്ടറ : കച്ചേരിമുക്ക് സഹൃദയ കലാകേന്ദ്രം, സഹൃദയ നഗർ റസിഡൻസ് അസോസിയേഷൻ, വി വി ജോസഫ് ലൈബ്രറി എന്നിവയുടെ സംയുക്താഭിമുഖ്യത്തിൽ തിരുനെൽവേലി അരവിന്ദ് കണ്ണാശുപത്രിയുമായി ചേർന്നു കാഞ്ഞിരകോട് സെന്‍റ് ആന്‍റണീസ് പാരിഷ് ഹാളിൽ നേത്ര ചികിത്സാ ക്യാമ്പ് നടത്തി. ജില്ലാ പഞ്ചായത്ത് പ്രസിഡന്‍റ് ഡോ.പി .കെ .ഗോപൻ ഉദ്ഘാടനം ചെയ്തു. സഹൃദയ കലാകേന്ദ്രം പ്രസിഡന്‍റ് വി .ശിവപ്രസാദ് അധ്യക്ഷത വഹിച്ചു. ചടങ്ങിൽ കാഞ്ഞിരകോട് ഇടവക വികാരി ഫാ. ബി.ജെ.റൊസാരിയോ, ചിറ്റുമലബ്ലോക്ക് പഞ്ചായത്ത് ആരോഗ്യകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ ഇജീന്ദ്രലേഖ, കുണ്ടറ പഞ്ചായത്ത് ആരോഗ്യകാര്യ കമ്മിറ്റി ചെയർമാൻവിനോദ്, വേണൂസ് കോളജ് പ്രിൻസിപ്പൽ വേണുഗോപാലപിള്ള, അസോസിയേഷൻ പ്രസിഡന്‍റ് ജോബ് ആൻഡ്രൂ, തോമസ് ആന്‍റണി എന്നിവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]