ADVERTISEMENT

ADVERTISEMENT

കുരിയച്ചിറ സെന്‍റ് ജോസഫ്സ് ദേവാലയ കൂദാശ ഇന്ന്

കുരിയച്ചിറ: നവീകരിച്ച കുരിയച്ചിറ സെന്‍റ് ജോസഫ്സ് ദേവാലയത്തിന്‍റെ കൂദാശാകർമം ഇന്നുരാവിലെ 10ന് തൃശൂർ അതിരൂപത മെത്രാപ്പോലീത്ത മാർ ആൻഡ്രൂസ് താഴത്ത് നിർവഹിക്കും.

വികാരി ഫാ. തോമസ് വടക്കൂട്ട്, സഹവികാരി ഫാ. ജിയോ വേലൂക്കാരൻ, അജപാലനസഹായി ഫാ. അക്ഷയ് കുന്നേൽ എംഎസ്ജി, ജനറൽ കണ്‍വീനർ പോൾ ആലുക്ക, നടത്തു‌കൈക്കാരൻമാരായ ഡേവിസ് കുണ്ടുകുളങ്ങര, ജോസി ചീനിക്കൽ, ആന്‍റണി ചിറമേൽ, തോമസ് എലുവത്തിങ്കൽ തുടങ്ങിയവർ ചടങ്ങുകൾക്കു നേതൃത്വം നൽകും.

ADVERTISEMENT

കെ ഫോണ്‍: ജില്ലയിൽ 7564 കണക്‌ഷനുകൾ

തൃശൂർ: കെ ഫോണ്‍ കണക്‌ഷനുകളിൽ മൂന്നേറി തൃശൂർ ജില്ല. ഓഫീസുകൾ, വാണിജ്യ സ്ഥാപനങ്ങൾ, വ്യക്തികൾ എന്നിവർക്കായി 7564 കണക്‌ഷനുകളാണു നൽകിയത്. ജില്ലയിൽ ഇതുവരെ 2649.57 കിലോമീറ്റർ കേബിൾ വലിച്ചു. ജില്ലയിൽ കളക്ടറേറ്റ് ഉൾപ്പടെയുള്ള 2494 സർക്കാർ ഓഫീസുകൾ ഇപ്പോൾ കെ ഫോണ്‍ നെറ്റ് വർക്കാണ് ഉപയോഗിക്കുന്നത്. 1003 ബിപിഎൽ വീടുകളിൽ കെ ഫോണ്‍ കണക്‌ഷൻ നൽകി. 4067 വാണിജ്യ കണക്‌ഷനുകളും നൽകി. പ്രാദേശിക ഓപ്പറേറ്റർമാർ വഴിയാണു വാണിജ്യ കണക്‌ഷൻ. 287 ലോക്കൽ നെറ്റ്‌വർക്ക് ഓപ്പറേറ്റർമാരാണു കെ ഫോണുമായി സഹകരിക്കുന്നത്. രണ്ട് ഐഎൽഎൽ കണക്‌ഷനും 16 എസ്എംഇ കണക്‌ഷനുകളും നൽകി. പുതിയ ഗാർഹിക കണക്‌ഷൻ എടുക്കാൻ എന്‍റെ കെ ഫോണ്‍ എന്ന മൊബൈൽ ആപ്പിലൂടെയോ കെഫോണ്‍ വെബ്സൈറ്റിലൂടെയോ രജിസ്റ്റർ ചെയ്യാം. 18005704466 എന്ന ടോൾഫ്രീ നന്പർ വഴിയും കണക്‌ഷനായി രജിസ്റ്റർ ചെയ്യാം. കെ ഫോണ്‍ പ്ലാനുകളെയും ഓഫറുകളെയുംകുറിച്ച് കൂടുതൽ അറിയുവാൻ കെ ഫോണ്‍ ഔദ്യോഗിക വെബ്സൈറ്റായ https://kfon.in/ സന്ദർശിക്കുകയോ 90616 04466 എന്ന വാട്സ്ആപ്പ് നന്പറിൽ കെ ഫോണ്‍ പ്ലാൻസ് എന്നു ടൈപ്പ് ചെയ്ത് മെസേജ് ചെയ്തോ അറിയാൻ കഴിയും.

കുരിയച്ചിറ സെന്‍റ് ജോസഫ്സ് ദേവാലയം കൂദാശ ചെയ്തു

കുരിയച്ചിറ: നവീകരിച്ച കുരിയച്ചിറ സെന്‍റ് ജോസഫ്സ് ദേവാലയത്തിന്‍റെ കൂദാശാകർമം തൃശൂർ അതിരൂപത മെത്രാപ്പോലീത്ത മാർ ആൻഡ്രൂസ് താഴത്ത് നിർവഹിച്ചു. വികാരി ഫാ. തോമസ് വടക്കൂട്ട്, സഹവികാരി ഫാ. ജിയോ വേലൂക്കാരൻ, അജപാലനസഹായി ഫാ. അക്ഷയ് കുന്നേൽ എംഎസ്ജി, ഫാ. ജോയ് അടമ്പുകുളം, ജനറൽ കണ്‍വീനർ പോൾ ആലുക്ക, നടത്തു‌കൈക്കാരൻമാരായ ഡേവിസ് കുണ്ടുകുളങ്ങര, ജോസി ചീനിക്കൽ, ആന്‍റണി ചിറമേൽ, തോമസ് എലുവത്തിങ്കൽ തുടങ്ങിയവർ ചടങ്ങുകൾക്കു നേതൃത്വം നൽകി. സ്നേഹവിരുന്നുമുണ്ടായി.

കുന്നംകുളത്തു ബസ് മറിഞ്ഞ് 15 പേർക്കു പരിക്ക്

കുന്നംകുളം: തുറക്കുളം മാർക്കറ്റിനടുത്തു സ്വകാര്യ ബസ് തോട്ടിലേക്കു മറിഞ്ഞ് 15 പേർക്കു പരിക്കേറ്റു. പാലക്കാടുനിന്നും ഗുരുവായൂരിലേക്കുവന്നിരുന്ന മയിൽവാഹനം സ്വകാര്യബസാണ് മറിഞ്ഞത്. നിയന്ത്രണംവിട്ട ബസ് വലതുഭാഗത്തെ തോട്ടിലേക്കുമറിയുകയായിരുന്നു. ബസ് തോടിന്‍റെ വലിയ ഭിത്തിയിൽ തട്ടിനിന്നതിനാൽ വൻദുരന്തം ഒഴിവായി. അപകടം കണ്ട് ഓടിയെത്തിയ നാട്ടുകാരും തുടർന്നെത്തിയ ഫയർഫോഴ്സും ചേർന്നാണ് രക്ഷാപ്രവർത്തനം നടത്തിയത്. ബസ് അമിതവേഗത്തിലായിരുന്നു എന്നു പറയുന്നു. പരിക്കേറ്റവരെ കുന്നംകുളം സർക്കാർ ആശുപത്രിയിലും മലങ്കര ആശുപത്രിയിലും പ്രവേശിപ്പിച്ചു. ആരുടെയും പരിക്ക് ഗുരുതരമല്ല. ഇന്നലെ വൈകീട്ട് അഞ്ചുമണിയോടെയായിരുന്നു അപകടം. ഏതാനും മാസംമുൻപ് മറ്റൊരു സ്വകാര്യബസും ഈ പാടത്തേക്കുതന്നെ മറിഞ്ഞിരുന്നു.

മെൽവിൻ ചൊവ്വല്ലൂർ, ‌റെൽഹിൻ കള്ളിക്കാടൻ തിരുപ്പട്ടം സ്വീകരിച്ചു

മറ്റം: ഡീക്കൻ മെൽവിൻ ചൊവ്വല്ലൂർ രാമനാഥപുരം രൂപത മെത്രാൻ മാർ പോൾ ആലപ്പാട്ടിന്‍റെ കൈവയ്പുവഴി പൗരോഹിത്യം സ്വീകരിച്ചു. ബിഷപ് മാർ പോൾ ആലപ്പാട്ടിനെയും ഡീക്കനെയും നിത്യസഹായമാതാ തീർഥകേന്ദ്രത്തിന്‍റെ അടിവാരത്തുനിന്നും ഇരുചക്രവാഹനങ്ങളുടെ അകന്പടിയോടെ സ്വീകരിച്ചു. തിരുപ്പട്ടദാനശുശ്രൂഷയിൽ വടവാതൂർ സെന്‍റ് തോമസ് അപ്പസ്തോലിക് സെമിനാരി വൈസ് റെക്ടർ ഫാ. ലിന്‍റോ കുറ്റിക്കാടൻ തിരുക്കർമങ്ങൾക്ക് ആർച്ച്ഡീക്കനായി. മോണ്‍. ജീജോ ചാലയ്ക്കൽ, ഫാ. ജോയ് ചിറ്റിലപ്പിള്ളി, ഫാ. ഫ്രാങ്കോ കവലക്കാട്ട്, ഫാ. ഷാജു ഉൗക്കൻ, ഫാ. ഡേവിസ് പനംകുളം, ഫാ. ക്രിസ്റ്റി ചിരിയങ്കണ്ടത്ത്, ഫാ. സജീവ് ഇമ്മട്ടി എന്നിവർ സഹകാർമികരായി. നിരവധി വൈദികരും സന്യസ്തരും ഇടവകജനങ്ങളും ബന്ധുമിത്രാദികളും സാക്ഷിയായി. വികാരി റവ.ഡോ. ഫ്രാൻസിസ് ആളൂർ, അസി. വികാരി ഫാ. ഫ്രാങ്കോ ചെറുതാണിക്കൽ, ട്രസ്റ്റിമാരായ സി.കെ. ജോയ്, ജോണ്‍സണ്‍ കാക്കശേരി, പി.എ. സ്റ്റീഫൻ, ജോണ്‍സണ്‍ സി. തോമസ്, തിരുപ്പട്ടസ്വീകരണ കമ്മിറ്റി അംഗങ്ങളായ സി.എൽ. ആന്‍റണി, പി.ടി. സേവി, ഇ.എഫ്. സണ്ണി, അലക്സ് ജോസ് കെ എന്നിവർ പരിപാടികൾക്കു നേതൃത്വം നൽകി. കോടന്നൂർ: ഡീക്കൻ റെൽഹിൻ കള്ളിക്കാടൻ രാമനാഥപുരം രൂപത മെത്രാൻ മാർ പോൾ ആലപ്പാട്ടിന്‍റെ കൈവയ്പുവഴി പൗരോഹിത്യം സ്വീകരിച്ചു. തുടർന്ന് നവവൈദികന്‍റെ കാർമികത്വത്തിൽ വിശുദ്ധ കുർബാന അർപ്പിച്ചു. നേരത്തേ കോടന്നൂർ സെന്‍റ് ആന്‍റണീസ് പള്ളി വികാരി ഫാ.ആന്‍റണി ആലുക്കയുടെ നേതൃത്വത്തിൽ കൈക്കാരന്മാരും വിവിധ കണ്‍വീനർമാരും ഇടവക ജനങ്ങളും ചേർന്ന് ബിഷപ് മാർ പോൾ ആലപ്പാട്ടിനെയും ഡീക്കൻ റെൽഹിനെയും കോടന്നൂർ സെന്‍ററിൽനിന്ന് മാലയിട്ട് സ്വീകരിച്ച് വാദ്യഘോഷങ്ങളുടെയും പട്ടുകുടകളുടെയും അകന്പടിയോടെ പള്ളിയിലേക്ക് ആനയിച്ചു. തിരുപ്പട്ടസ്വീകരണത്തിനുശേഷം ഫാ. ആന്‍റണി ആലുക്കയുടെ അധ്യക്ഷതയിൽ അനുമോദനയോഗം നടന്നു. ഒല്ലൂർ ഫൊറോന വികാരി ഫാ.വർഗീസ് കൂത്തൂർ ഉദ്ഘാടനം ചെയ്തു. രാമനാഥപുരം മിഷൻ രൂപതയ്ക്കു വേണ്ടി കോടന്നൂർ ഇടവകയുടെ സ്നേഹസമ്മാനമായി ഒരു ലക്ഷം രൂപയുടെ ചെക്ക് ബിഷപ്പിനു കൈമാറി.

പാവറട്ടി സെന്‍റ് ജോസഫ് തീർഥകേന്ദ്രത്തിൽ തിരുനാളിനു നാളെ കൊടിയേറും

തൃശൂർ: പ്രസിദ്ധമായ പാവറട്ടി സെന്‍റ് ജോസഫ് തീർഥകേന്ദ്രത്തിലെ വിശുദ്ധ യൗസേപ്പിതാവിന്‍റെ 149-ാം മാധ്യസ്ഥതിരുനാളിനു നാളെ കൊടിയേറും. രാവിലെ 5.30 ന്‍റെ വിശുദ്ധകുർബാനയ്ക്കുശേഷം തീർഥകേന്ദ്രം റെക്ടർ റവ.ഡോ. ആന്‍റണി ചെന്പകശേരി കൊടിയേറ്റശുശ്രൂഷ നിർവഹിക്കും. ഒൻപതുമുതൽ 11 വരെയാണ് തിരുനാളാഘോഷം. ഒൻപതിനു രാത്രി ഏഴിനു പാവറട്ടി ആശ്രമാധിപൻ ഫാ. ജോസഫ് ആലപ്പാട്ട് സിഎംഐ ദേവാലയ ദീപാലങ്കാരത്തിന്‍റെ സ്വിച്ച്ഓണ്‍ കർമം നിർവഹിക്കും. 10 നു രാവിലെ 10 നു നടക്കുന്ന നൈവേദ്യപൂജയ്ക്ക് അതിരൂപത വികാരി ജനറാൾ മോണ്‍. ജെയ്സണ്‍ കൂനംപ്ലാക്കൽ കാർമികത്വം വഹിക്കും. തുടർന്നു നേർച്ചഭക്ഷണ ആശീർവാദവും വിതരണവും ഉണ്ടായിരിക്കും. ഒന്നരലക്ഷത്തോളം പേർക്കാണ് നേർച്ചസദ്യ വിതരണംചെയ്യുക. അരി, അവിൽ നേർച്ച എന്നിവയുടെ വിതരണവും ഉണ്ടായിരിക്കും. വൈകീട്ട് 5.30 നു നടക്കുന്ന സമൂഹബലിക്കും കൂടുതുറക്കൽ ശുശ്രൂഷയ്ക്കും രാമനാഥപുരം ബിഷപ് മാർ പോൾ ആലപ്പാട്ട് മുഖ്യകാർമികനാകും. തുടർന്നു വിവിധ കുടുംബകൂട്ടായ്മകളുടെ നേതൃത്വത്തിലുള്ള വള എഴുന്നള്ളിപ്പുകൾ തീർഥകേന്ദ്രത്തിലെത്തി സമാപിക്കും. തിരുനാൾദിനമായ 11 നു പുലർച്ചെ 4.30 മുതൽ തുടർച്ചയായി ദിവ്യബലി ഉണ്ടായിരിക്കും. രാവിലെ പത്തിന് ആഘോഷമായ പാട്ടുകുർബാനയ്ക്കു ഫാ. പോൾ തേക്കാനത്ത് മുഖ്യകാർമികനാകും. വൈകീട്ട് നാലിനു ദിവ്യബലി, തിരുനാൾപ്രദക്ഷിണം. ശതോത്തരസുവർണജൂബിലി ആരംഭിക്കുന്നതിന്‍റെ ഭാഗമായി നാലിനു വൈകീട്ട് ആറിനു നടക്കുന്ന ദിവ്യബലിക്കുശേഷം ഓപ്പണ്‍ സ്റ്റേജിന്‍റെ വെഞ്ചരിപ്പും ആശീർവാദവും സംഗീതവിരുന്നും ഉണ്ടായിരിക്കും. വിവിധ കാരുണ്യപ്രവർത്തനങ്ങൾ, നിർധനരായ അഞ്ചു കുടുംബങ്ങൾക്കു ഭവനനിർമാണം എന്നിവയും തിരുനാളിന്‍റെ ഭാഗമായി സംഘടിപ്പിച്ചിട്ടുണ്ട്. പത്രസമ്മേളനത്തിൽ തീർഥകേന്ദ്രം റെക്ടർ റവ.ഡോ. ആന്‍റണി ചെന്പകശേരി, മാനേജിംഗ് ട്രസ്റ്റി ഒ.ജെ. ഷാജൻ, വിവിധ കമ്മിറ്റി കണ്‍വീനർമാരായ ജോണ്‍ ജെ. പുലിക്കോട്ടിൽ, എൻ.ജെ. ലിയോ, കെ.എ. ജോസണ്‍ എന്നിവർ പങ്കെടുത്തു.

പന്തലുകളിൽ വിരിയും ഡിജിറ്റൽ വിസ്മയം

സി.ജി. ജിജാസൽ തൃശൂർ: എല്ലാ കണ്ണുകളും പന്തലിലേക്ക്. ആരു നേടും വർണപ്പകിട്ടിൽ ഒന്നാംസ്ഥാനം. തൃശൂർ പൂരപ്പന്തലുകളുടെ നിർമാണം പുരോഗമിക്കവെ ഉയരുന്ന ചോദ്യമിതാണ്. വിശ്വപ്രസിദ്ധ പൂരത്തിനു നിറംപകരാൻ ദേവസ്വങ്ങൾ പരസ്പരം മത്സരിക്കുന്പോൾ കാണാൻ പോകുന്ന പൂരം കണ്ടറിയാമെന്നാണ് പന്തൽനിർമാതാക്കളുടെ മറുപടി. ദൃശ്യചാരുതയ്ക്ക് ഒപ്പം സുരക്ഷയ്ക്കും പ്രാധാന്യംനൽകിയാണ് പന്തലുകൾ ഉയർത്തുന്നത്. പൂരം പ്രദക്ഷിണവഴിയായ സ്വരാജ് റൗണ്ടിൽ പടിഞ്ഞാറ്, തെക്ക്, വടക്ക് ഭാഗത്തുമാത്രമാണ് പന്തൽ ഉള്ളത്. പാറമേക്കാവിനു മണികണ്ഠനാലിൽ ഒരു പന്തലേയുള്ളുവെങ്കിൽ തിരുവന്പാടിക്കു നടുവിലാലിലും നായ്ക്കനാലിലും പന്തലുകളുണ്ട്. ഡിജിറ്റൽ പന്തൽ ലോകം മാറുന്പോൾ പന്തലുകളും മാറണ്ടേയെന്നാണ് പാറമേക്കാവിന്‍റെ പന്തൽനിർമാതാവ് എടപ്പാൾ സ്വദേശി നാദം ബൈജു ചോദിക്കുന്നത്. അതുകൊണ്ടുതന്നെ മണികണ്ഠനാലിൽ ഉയരുന്ന പന്തലിൽ വർണലൈറ്റുകൾക്കുപുറമെ ഇത്തവണ ചിത്രങ്ങളും വീഡിയോകളും പ്രത്യക്ഷപ്പെടും. 108 അടി ഉയരത്തിൽ നാലു നിലകളിലായി നിർമിക്കുന്ന പന്തലിൽ ഒരുലക്ഷത്തിലധികം ഡിജിറ്റൽ ലൈറ്റുകളിലാണ് ദൃശ്യവിസ്മയം ഒരുക്കുക. പാറമേക്കാവിനുവേണ്ടി ഇത് അഞ്ചാംതവണയാണ് ബൈജു പന്തൽ ഒരുക്കുന്നത്. വീണ്ടും സെയ്തലവി ആചാരപ്രകാരം ഏറെ പ്രാധാന്യമുള്ള നടുവിലാലിലെ തിരുവന്പാടി വിഭാഗത്തിന്‍റെ പന്തലിന് ഇത്തവണ ചുക്കാൻ പിടിക്കുന്നതു ചെറുതുരുത്തി സ്വദേശി സെയ്തലവിയാണ്. തൃശൂർ പൂരത്തിനായി 16-ാം വർഷമാണ് സെയ്തലവിയും സംഘവും പന്തൽ ഒരുക്കുന്നത്. 110 അടിയോളം ഉയരത്തിൽ ഗോപുരമാതൃകയിൽ നിർമിക്കുന്ന പന്തലിൽ ഡിജിറ്റൽ ലൈറ്റുകളാൽ വർണങ്ങൾ വിസ്മയം രചിക്കുന്പോൾ പലവിധ സർപ്രൈസുകളും കണ്ടറിയാനുണ്ടാവുമെന്നു സെയ്തലവി പറഞ്ഞു. പന്തലിന്‍റെ മൂന്നുവശങ്ങളിലും ചിത്രങ്ങളും വീഡിയോകളും പ്രദർശിപ്പിക്കും. മണികണ്ഠന്‍റെ കരവിരുത് തിരുവന്പാടി വിഭാഗത്തിന്‍റെ നായ്ക്കനാൽ പന്തലിന് ഈ വർഷവും ചേറൂർ സ്വദേശി പള്ളത്ത് മണികണ്ഠനാണ് നേതൃത്വം നൽകുന്നത്. 90 അടി ഉയരത്തിൽ 32 അടി വീതിയിൽ നിർമാണം പുരോഗമിക്കുന്ന ബഹുനിലപ്പന്തൽ പൂർണമായും ഡിജിറ്റൽ സ്റ്റൈലിൽതന്നെയാണ് കാഴ്ചക്കാർക്കുമുൻപിൽ തെളിയുക. തൃശൂർ പൂരത്തിൽ ആറാംവർഷമാണ് മണികണ്ഠൻ പന്തൽ ഒരുക്കുന്നത്. ക്ഷേത്രമാതൃകയിൽ നാലുനിലകളിലായി ഉയരുന്ന പന്തലിന്‍റെ നാലുവശങ്ങളിലും വീഡിയോകളും ചിത്രങ്ങളും പ്രദർശിപ്പിക്കും. പന്തലുകളുടെ കൂട്ടത്തിൽ ചെറുതാണെങ്കിലും കാഴ്ചയിൽ നായ്ക്കനാൽ പന്തൽ മുൻപിലുണ്ടാകുമെന്നും തൊഴിലാളികളും പൂരപ്രേമികളും ഒരേസ്വരത്തിൽ അവകാശപ്പെടുന്നു. പൂരപ്രേമികളുടെ ശ്രദ്ധയ്ക്ക്... മുൻകരുതൽ എടുക്കാം, നിർജലീകരണം ഒഴിവാക്കാം തൃശൂർ: കഴിഞ്ഞ വർഷങ്ങളിൽ പൂരത്തോടനുബന്ധിച്ചു നിർജലീകരണംമൂലവും മറ്റും ആയിരത്തിലധികംപേർ ആരോഗ്യവകുപ്പിന്‍റെ പവലിയനിൽ വൈദ്യസഹായം തേടി. 250 ൽ അധികംപേർക്കു കിടത്തിചികിത്സ നൽകി. ഈ സാഹചര്യത്തിൽ മുന്നറിയിപ്പുമായി ആരോഗ്യവകുപ്പ് രംഗത്ത്. · പൂരത്തിനു രണ്ടുദിവസം മുൻപുമുതലെങ്കിലും വെള്ളം ധാ രാളമായി കുടിക്കേണ്ടതും ഭക്ഷണം ശരിയായി കഴി ക്കേണ്ടതുമാണ്. · പൂരത്തിനു വരുന്ന ദിവസം രാവിലെമുതൽ ഉപ്പിട്ട നാര ങ്ങാ വെള്ളം, കഞ്ഞിവെള്ളം ഉൾപ്പെടെ ഏഴുമുതൽ 10 ഗ്ലാസ് വരെ വെള്ളം പൂരപ്പറന്പിൽ എത്തുന്നതിനുമുൻപ് കുടിക്കേണ്ടതാണ്. · വെള്ളം എല്ലായ്പ്പോഴും കൈയിൽ കരുതേണ്ടതാണ്. · കുട, തൊപ്പി ധരിക്കണം. · ജലാംശം കൂടുതലുള്ള തണ്ണിമത്തൻപോലുള്ള പഴങ്ങൾ ധാരാളമായി കഴിക്കണം. · കഴിയുന്നതും തണലിൽ നിൽക്കണം. · മദ്യപിച്ചിട്ടുണ്ടെങ്കിൽ നിർജലീകരണം കൂടാൻ സാധ്യ ത യു ണ്ട്. · ശാരീരിക, മാനസിക ബുദ്ധിമുട്ടുകൾ തോന്നുകയാണെ ങ്കി ൽ ഉടൻതന്നെ അടുത്തുള്ള മെഡിക്കൽ ടീം ആംബു ലൻസിന്‍റെ സേവനം പ്രയോജനപ്പെടുത്തുക.

"പഴമയുടെ ബാല്യങ്ങളിലേക്ക്' അവധിക്കാല വിനോദപരിപാടി

ചൂണ്ടൽ: എൽഐജിഎച്ച്എസിൽ "പഴമയുടെ ബാല്യങ്ങളിലേക്ക്'എന്ന അവധിക്കാല വിനോദ പരിപാടിയുടെ ഉദ്ഘാടനം പഞ്ചായത്ത് പ്രസിഡന്‍റ് രേഖ സുനിൽ നിർവഹിച്ചു. ഹെഡ്മിസ്ട്രസ് സിസ്റ്റർ മരിയ ഗ്രെയ്സ് അധ്യക്ഷത വഹിച്ചു. ലോക്കൽ മാനേജർ സിസ്റ്റർ സിദ്ധി സിഎംസി ആശംസകളർപ്പിച്ചു. പിടിഎ വൈസ് പ്രസിഡന്‍റ് കെ. ആർ. ജിൻസൻ സ്വാഗതവും അധ്യാപക പ്രതിനിധി ദീപ ടീച്ചർ നന്ദിയും പറഞ്ഞു. സ്നേഹ പ്രാ ന്തി, നൂറാം കോൽ, കൊത്തംകല്ല്, കള്ളനും പോലീസും, തൂപ്പുകളി തുടങ്ങിയ പഴമയുടെ കളികളെ ഓർമിപ്പിച്ചുകൊണ്ട് എല്ലാ വിദ്യാർഥിനികളെയും ബാല്യകാലങ്ങളിലക്കു കൊണ്ടുപോകുവാൻ ക്യാന്പിലൂടെ സാധിച്ചു.

പണം തട്ടിയെടുത്ത കേസിൽ യുവാവിനെ അസ്റ്റു ചെയ്തു

പഴയന്നൂർ: പലരിൽനിന്നായി പണം തട്ടിയെടുത്ത കേസിൽ പഴയന്നൂർ സ്വദേശിയായ യുവാവിനെ പോലീസ് അറസ്റ്റ് ചെയ്തു. സ്ഥ ലം നൽകാമെന്നും ബിസിനസിൽ പങ്കാളിയാക്കാമെ ന്നും പറഞ്ഞ് വിവിധ വ്യക്തികളിൽനിന്ന് പണം തട്ടിയെടുത്തെന്നാണു പരാതി. പഴയന്നൂർ ചീരക്കുഴി കുന്നമംഗലത്ത് വീട്ടിൽ സുരേഷിനെ (തണൽ സുര -45) പോലീസ് അറസ്റ്റ് ചെയ്തു. അരക്കോടിയോളം രൂപ വിവിധ വ്യക്തികളിൽ നിന്നായി തട്ടിയെടുത്തെന്ന് പറയുന്നു. ചീരക്കുഴി ഭാഗത്ത് 15 ലക്ഷം രൂപയ്ക്ക് 10 സെന്‍റ് വാങ്ങിനൽകാമെന്ന് പറഞ്ഞാണ് വടക്കേത്തറ കളരിക്കൽ ഇന്ദിരയുടെ പക്കൽ നിന്നും പലപ്പോഴായി 1,80,000 രൂപ ഇയാൾ കൈപ്പറ്റിയത്. പിന്നീട് ഒന്നരവർഷം കഴിഞ്ഞിട്ടും സ്ഥലം വാങ്ങി നൽകാതെ ഇയാൾ കബളിപ്പിക്കുകയായിരുന്നു. തുടർന്നാണ് പരാതിക്കാരി പോ ലീസിനെ സമീപിച്ചത്. തിരുവില്വാമല സ്വദേശിനിയിൽനിന്നും ബിസിനസിൽ പങ്കാളിയാക്കാമെന്ന് പറഞ്ഞ് 27 ലക്ഷം രൂപയും തട്ടിയെടുത്തതായി പറയുന്നു. ഇത്തരത്തിൽ നിരവധിപേരെ കബളിപ്പിച്ച് 50 ലക്ഷം രൂപ ഇയാൾ തട്ടിയെടുത്തതായാണ് പൊലീസിന് ലഭിച്ച വിവരം. പരാതിക്കാർ ഏറെയും സ്ത്രീകളാണ്. വരും ദിവസങ്ങളിൽ കൂടുതൽപേർ പരാതിയുമായി രംഗത്തുവരാൻ സാധ്യതയുണ്ട്. നിലവിൽ ഏഴുപേരുടെ പരാതി ലഭിച്ചിട്ടുണ്ടെന്ന് ഇൻസ്‌പെക്ടർ കെ.എ. മുഹമ്മദ് ബഷീർ പറഞ്ഞു.

ദേവാലയങ്ങളിൽ തിരുനാൾ

വേലൂർ സെന്‍റ് ഫ്രാൻസിസ് സേവ്യർ വേലൂർ: സെന്‍റ് ഫ്രാൻസിസ് സേവ്യർ ഫൊറോന പള്ളിയിൽ വിശുദ്ധ ഫ്രാൻസിസ് സേവ്യറിന്‍റെയും റോസ പുണ്യവതിയുടെയും തിരുനാളിനു കോടിയേറി. എരുമപ്പെട്ടി ഫൊറോന വികാരി ഫാ. ജോഷി ആളൂർ കൊടിയേറ്റം നിർവഹിച്ചു. 6, 7, 8 തിയതികളിൽ തിരുനാൾ ആഘോഷിക്കും. ഇടവക വികാരി ഫാ. റാഫേൽ താണിശേരി, അസി. വികാരി ഫാ. ജിജി മാളിയേക്കൽ,തിരുനാൾ ജനറൽകൺവീനർ മറഡോണ പീറ്റർ, കൈക്കാരന്മാരായ സാബു കുറ്റിക്കാട്ട്, ഔസേഫ് വാഴപ്പിള്ളി, ബാബു ജോർജ് താണിക്കൽ, ജോസഫ് പുലിക്കോട്ടിൽ, പബ്ലിസിറ്റി കൺവീനർ ബിജു പി. ജോസ്, മറ്റു കൺവീനർമാർ എന്നിവർ നേതൃത്വം നൽകും. ചിയ്യാരം വിജയമാത ഒല്ലൂർ: വിജയമാത പള്ളിയിലെ വിജയമാതാവിന്‍റെയും വിശുദ്ധ യൗസേപ്പിതാവിന്‍റെയും സെബസ്റ്റ്യാ നോസിന്‍റെയും സംയുക്ത തിരുനാള്‍ മേയ് 10,11,12 തിയതികളില്‍ ആഘോഷിക്കും. രണ്ടിന് വൈകിട്ട് നടക്കുന്ന ദിവ്യബലിക്കുശേഷം ഫൊറോന വികാരി ഫാ. വര്‍ഗീസ് കുത്തൂര്‍ തിരുനാളിന് കൊടിയേറ്റും. ഒമ്പതിന് വൈകീട്ട് ആറിനുള്ള കുര്‍ബാനയ്ക്കുശേഷം മന്ത്രി കെ. രാജന്‍ ദീപാലങ്കാരം സ്വിച്ച് ഓണ്‍ ചെയ്യും. 10ന് വൈകീട്ട് നാലിനുള്ള ആഘോഷമായ തിരുനാള്‍ കുര്‍ബാനയ്ക്കുശേഷം കുടുതുറക്കല്‍ ശുശ്രൂഷ, വിവിധ യൂണിറ്റുകളില്‍നിന്നുള്ള അമ്പുപ്രദക്ഷിണങ്ങള്‍ രാത്രി 10ന് പള്ളിയില്‍ സമാപിക്കും.തിരുനാള്‍ ദിനമായ 11 ന് ഞായറാഴ്ച രാവിലെ 10ന് ആഘോഷമായ തിരുനാള്‍ കുര്‍ബാനക്ക് ഫാ.ജോയ് പുത്തൂര്‍ മുഖ്യകാര്‍മികത്വം വഹിക്കും. വൈകിട്ട് അഞ്ചിന് തിരുനാള്‍ പ്രദക്ഷിണം. തുടര്‍ന്ന് ഫ്യൂഷന്‍ അരങ്ങേറും. 12 ന് ഇടവകയിലെ മരിച്ചവര്‍ക്കു വേണ്ടിയള്ള തിരുക്കര്‍മങ്ങള്‍ നടക്കും. വൈകിട്ട് സംഗീതവിരുന്നും ഉണ്ടായിരിക്കും. വാര്‍ത്താസമ്മേളനത്തില്‍ വികാരി ഫാ. പ്രിന്‍സ് പൂവത്തിങ്കല്‍, ഡീക്കൻ സാന്‍റിയോ എലുവത്തിങ്കല്‍, സിംസണ്‍ പുല്ലുപറമ്പില്‍, ഫ്രിജോ പോള്‍ തട്ടില്‍, റാഫി ഇയ്യൂ, മനോജ് പാല്യേക്കര, വിപിന്‍ എരിഞ്ഞേരി എന്നിവര്‍ വാർത്താസമ്മേളനത്തിൽ പങ്കെടുത്തു. കാവീട് സെന്‍റ്് ജോസഫ്സ് ഗുരുവായൂർ: കാവീട് സെന്‍റ്് ജോസഫ്‌സ് പള്ളിയിൽ വിശുദ്ധ യൗസേപ്പിതാവിന്‍റെയും വിശുദ്ധ സെബസ്ത്യാനോസിന്‍റെയും മാർത്ത് മറിയത്തിന്‍റെയും സംയുക്ത തിരുനാൾ നാളെ മുതൽ അഞ്ചുവരെയുള്ള ദിവസങ്ങിൽ ആഘോഷിക്കുമെന്ന് ഭാരവാഹികൾ പത്രസമ്മേളനത്തിൽ അറിയിച്ചു. രണ്ടിന് വൈകീട്ട് വിശുദ്ധ കുർബാനയ്ക്കുശേഷം ഗുരുവായൂർ പോലീസ് എസ്എച്ച്ഒ സി. പ്രേമാനന്ദകൃഷ്ണൻ ദീപാലങ്കാരം സ്വിച്ച് ഓൺ ചെയ്യും. മൂന്നിനു രാവിലെ വിശുദ്ധ കുർബാനയ്ക്കുശേഷം കൂടുതുറക്കൽ ശുശ്രൂഷ നടക്കും. തുടർന്ന് 12 യൂണിറ്റുകളിലേക്ക് അമ്പ്, വള, ലില്ലിപ്പൂവ് എന്നിവ ആശീർവദിച്ചു നൽകും. വാദ്യമേളങ്ങളുടെ അകമ്പടിയോടെ രാത്രി പള്ളിയിൽ തിരിച്ചെത്തും. തിരുനാൾ‌ദിനമായ നാലിനു മൂന്നുനേരം വിശുദ്ധ കുർബാന. 10.30ന് നടക്കുന്ന ആഘോഷമായ കുർബാനയ്ക്ക് ഫാ. പോൾ മുട്ടത്ത് മുഖ്യകർമികനാകും. ഫാ. അജിത്ത് കൊള്ളന്നൂർ സന്ദേശം നൽകും. വൈകീട്ട് തിരുനാൾ പ്രദക്ഷിണം, വർണക്കാഴ്‌ച എന്നിവയുണ്ടാകും. സമാപന ദിവസമായ അഞ്ചിനു രാവിലെ പൂർവികർക്കായി ഓർമബലിയും വൈകീട്ട് നാടകവും ഉണ്ടാകും. വികാരി ഫാ. ഫ്രാൻസിസ് നീലങ്കാവിൽ, ജനറൽ കൺവീനർ സി.വി. ജെയ്‌സൺ, പിആർഒ എം.എഫ്. ജോയ്, ട്രസ്റ്റിമാരായ സി. ജി. റാഫേൽ, സണ്ണി ചീരൻ, നിധിൻ ചാർളി, പബ്ലിസിറ്റി കൺവീനർ ഷാജൻ ജോർജ് എന്നിവർ പത്ര‌സമ്മേളനത്തിൽ പങ്കെടുത്തു.

ക്ഷേത്രത്തിൽ ഇന്നലെ നടന്നത് 153 വിവാഹങ്ങൾ

ഗുരുവായൂർ: ക്ഷേത്രത്തിൽ അക്ഷയതൃതീയ ദിനത്തിൽ വൻ ഭക്തജനത്തിരക്ക് അനുഭവപ്പെട്ടു. ഇന്നലെ 153 വിവാഹങ്ങളും 431 ചോറൂൺ വഴിപാടും നടന്നു. വിവാഹങ്ങളും ദർശനവും സുഗമമാക്കുന്നതിന് ദേവസ്വം മുന്നൊരുക്കങ്ങൾ നടത്തിയതു ഭക്തർക്ക് ഉപകാരപ്രദമായി. പുലർച്ചെ നിർമാല്യം മുതൽത്തന്നെ ഭക്തരെ കൊടിമരംവഴി നേരിട്ട് പ്രവേശിപ്പിച്ചു. വിവാഹ ക്രമീകരണങ്ങൾക്കായി കിഴക്കേ നടപ്പുരയിൽ വൺവെ സംവിധാനം ഏർപ്പെടുത്തിയതും വിവാഹ സംഘങ്ങൾക്ക് ടോക്കൺ നൽകി ക്രമീകരണം ഒരുക്കിയതും വിവാഹങ്ങൾ സുഗമമാക്കി. ഇന്നലെ ക്ഷേത്രത്തിൽ 63.98 ലക്ഷത്തിന്‍റെ വഴിപാട് നടന്നു. ഇതിൽ 15.3 ലക്ഷത്തിന്‍റെ തുലാഭാരം വഴിപാടും 17.06 ലക്ഷത്തിന്‍റെ നെയ്‌വിളക്ക് വഴിപാടുമാണ്. വൈശാഖം തുടങ്ങിയതോടെ ദിവസവും വലിയ ഭക്ത ജനത്തിരക്കാണ് അനുഭവപ്പെടുന്നത്. ക്ഷേത്രം ഡി‌എ പ്രമോദ് കളരിക്കലിന്‍റെ നേതൃത്വത്തിൽ ക്രമീകരണങ്ങളൊരുക്കി. അക്ഷയ ത്രിതീയയുടെ ഭാഗ മായി ക്ഷേത്രം പത്തുകാരുടെ വകയായി ചുറ്റുവിളക്കും ഉണ്ടാ യി.

പുന്ന ഉത്സവത്തിൽ ആന ഇടഞ്ഞു; രണ്ടുപേർക്കു പരിക്ക്

ചാവക്കാട്: പുന്ന അയ്യപ്പ സുബ്രഹ്മണ്യ ക്ഷേത്രം ഉത്സവത്തിലേക്ക് എഴുന്നളളിപ്പിന് കൊണ്ടുവന്ന മൂന്ന് ആനകളിൽ ഒന്ന് ഇടഞ്ഞു; രണ്ടുപേർക്കു പരിക്കേറ്റു. മുതുവട്ടൂരിലെ ഓട്ടോ ഡ്രൈവര്‍ പോക്കാക്കില്ലത്ത് നിസാം (40), രണ്ടാം പാപ്പാന്‍ കാരമുക്ക് മാമ്പുള്ളി ബിജു(42) എന്നിവര്‍ക്കാണു പരിക്കേറ്റത്. ഇവരെ തൃശൂര്‍ ദയ ആശുപത്രിയില്‍ പ്രവേശിപ്പിച്ചു. ഇന്നലെ വൈകീട്ടാണ് മരുതയൂർ‌കുളങ്ങര മഹാദേവൻ എന്ന കൊമ്പൻ ഇടഞ്ഞത്. നിസാമിനെ തുമ്പിക്കൈയില്‍ കോരിയെടുത്ത് സമീപത്തെ അയിനിപ്പുള്ളി ചുള്ളിപ്പറമ്പില്‍ ജനാര്‍ദനന്‍റെ വീട്ടുപറമ്പിലേക്ക് കയറിയ ആന നിസാമിനെ നിലത്തിട്ട് വലിച്ചിഴച്ചു. ഇതിനുശേഷം പാപ്പാനെ ആന കുടഞ്ഞിട്ടു. ഇതിനിടെ ആനയെ മെരുക്കാനുള്ള ശ്രമം മറ്റു പാപ്പാന്മാര്‍ നടത്തുന്നുണ്ടായിരുന്നു. ആനപ്പുറത്തുണ്ടായിരുന്നവര്‍ ചാടിരക്ഷപ്പെട്ടു. ഇവിടെ നിര്‍ത്തിയിട്ടിരുന്ന കാറിനും ഓട്ടോറിക്ഷക്കും കേടുപറ്റിയിട്ടുണ്ട്. മറ്റ് രണ്ട് ആനകളോടൊപ്പം പുന്ന സെന്‍ററില്‍ എത്തുന്നതിന് തൊട്ടുമുമ്പാണ് ആനയിടഞ്ഞത്. ആനയെ പിന്നീട് തളച്ചു. പോലീസ് എത്തി.

വിദ്യാർഥികൾ കൈകോർത്തു; ദമയന്തിയമ്മ പുതിയ വീട്ടിലേക്ക്

തൃപ്രയാർ: മഴ പെയ്താൽ ചോർന്നൊലിക്കുന്ന, ഏതുസമയവും നിലംപൊത്താവുന്ന കൂരയിൽനിന്നും ദമയന്തി അമ്മയ്ക്ക് മോചനം. നാട്ടിക എസ്എൻ ട്രസ്റ്റ് ഹയർസെക്കൻഡറി സ്‌കൂളിലെ പാചകക്കാരി ദമയന്തി അമ്മയ്ക്കാണ് സ്കൂളിലെ എൻഎസ്എസ് വിദ്യാർഥികൾ എട്ടുലക്ഷത്തോളം രൂപ സമാഹരിച്ച് പുതിയ വീട് നിർമിച്ചുനൽകിയത്. അപ്രതീക്ഷിതമായി വീട്ടിലെത്തിയ സ്കൂൾ അധികൃതരാണ് ദമയന്തിയുടെ ദുരിതം നേരിട്ടുകണ്ടത്. ഇത് സ്കൂളിൽ അവതരിപ്പിച്ചതോടെ എൻഎസ്എസ് വിദ്യാർഥികൾ ദൗത്യം ഏറ്റെടുക്കുകയായിരുന്നു. വിവിധ ചലഞ്ചുകളിലൂടെയാണു വീടിന്‍റെ നിർമാണത്തിനുവേണ്ട എട്ടുലക്ഷം രൂപ സമാഹരിച്ചു. നിർമാണത്തിന്‍റെ വിവിധ ഘട്ടങ്ങളിൽ ഹെൽപ്പർമാരായി വിദ്യാർഥികളും ഒപ്പം കൂടി. വിദ്യാർഥികളുടെ നേതൃത്വത്തിൽ നിർമിക്കുന്ന മൂന്നാമത്തെ വീടാണിത്. ഇന്ന് വീടിന്‍റെ പാലുകാച്ചലും താക്കോൽദാനവും മന്ത്രി ഡോ. ആർ. ബിന്ദു നിർവഹിക്കുമെന്ന് സ്‌കൂൾ പ്രിൻസിപ്പൽ ജയാബിനി, ജി.എസ്.ബി മാനേജർ പി.കെ. പ്രസന്നൻ എന്നിവർ പത്ര‌സമ്മേളനത്തിൽ അറിയിച്ചു. ചേർക്കരയിൽ നടക്കുന്ന ഉദ്ഘാടനച്ചടങ്ങിൽ തളിക്കുളം ബ്ലോക്ക് പഞ്ചായത്ത് പ്രസിഡന്‍റ്് കെ.സി. പ്രസാദ് അധ്യക്ഷത വഹിക്കും. നാട്ടിക പഞ്ചായത്ത് പ്രസിഡന്‍റ് എം.ആർ. ദിനേശൻ മുഖ്യാതിഥിയാവും. ഹെഡ്മിസ്ട്രസ് മിനിജ ആർ. വിജയൻ, എൻഎസ്എസ് പ്രോഗ്രാം കോ-ഒാർഡിനേറ്റർ ശലഭ ജ്യോതിഷ്, പിടിഎ പ്രസിഡന്‍റ് പി.എസ്.പി നസീർ എന്നിവരും വാർത്താസമ്മേളനത്തിൽ പങ്കെടുത്തു.

വാഴാനി വിനോദസഞ്ചാര കേന്ദ്രത്തിൽ ഉല്ലാസത്തിന് ഇനി കുട്ടവഞ്ചിയും

പുന്നംപറമ്പ്: ദിനംപ്രതി സന്ദർശകരുടെ എണ്ണം കൂടിവരുന്ന സാഹചര്യത്തിൽ സഞ്ചാരികൾക്ക് വാ ഴാനി ഡാമിൽ കുട്ടവഞ്ചി സവാരി ഏർപ്പെടുത്തി. ഇതോടെ വാഴാനി ടൂറിസ്റ്റ് കേന്ദ്രത്തിന്‍റെ മുഖച്ചായ തന്നെ മാറുമെന്നാണ് അധികൃതരുടെ കണക്കുകൂട്ടൽ. ഡാമിന്‍റെ ഷട്ടറിനുതാഴ്ഭാഗത്ത് ഫോറസ്റ്റ് ഓഫീസിനു സമീപം ശാന്തമായ ജലപ്പരപ്പിലൂടെയുള്ള കുട്ടവഞ്ചിയാത്ര സഞ്ചാരികൾക്ക് പുത്തൻ അനുഭവമാകും. പരീഷണാടിസ്ഥാനത്തിൽവളരെ ചുരുക്കം കുട്ടവഞ്ചികളാണ് സജ്ജമാക്കിയിരിക്കുന്നത്. സുരക്ഷാ മാനദണ്ഡങ്ങൾ പാലിച്ചുകൊണ്ട് പരിചയസമ്പന്നരായ ആളുകളുടെ മേൽനോട്ടത്തിലായിരിക്കും സവാരി നടത്തുക. കുട്ടികൾക്കും മുതിർന്നവർക്കും ഒരുപോലെ ആസ്വദിക്കാവുന്ന തരത്തിലാണ് ക്രമീകരണങ്ങൾ ഏർപ്പെടുത്തിയിരിക്കുന്നത്. കുട്ടവഞ്ചി സവാരി ആരംഭിക്കുന്നതോടെ വാഴാനിയിലേക്ക് കൂടുതൽ സഞ്ചാരികളെ ആകർഷിക്കാൻ കഴിയുമെന്നാണ് അധികൃതരുടെ കണക്കുകൂട്ടൽ. ഇത് പ്രദേശത്തെ കച്ചവട മേഖലയ്ക്കും ഗുണകരമാകും. താമസിയാതെ തന്നെ കുട്ടവഞ്ചി സവാരിയുടെ ഔദ്യോഗിക ഉദ്ഘാടനം നടക്കും. ദിവസവും ഡാമിൽ പരിശീലനവും നടക്കുന്നുണ്ട്.

ഇന്ത്യന്‍ നാഷണല്‍ കോണ്‍ഗ്രസ് ഇരിങ്ങാലക്കുട നിയോജകമണ്ഡലം നേതൃസംഗമം നടത്തി

ഇരിങ്ങാലക്കുട: തദ്ദേശ സ്വയംഭരണ സ്ഥാപങ്ങളിലേക്കുള്ള തെരഞ്ഞെടുപ്പിന് മുന്നോടിയായി ഇന്ത്യന്‍ നാഷണല്‍ കോണ്‍ഗ്രസ് ഇരിങ്ങാലക്കുട നിയോജക മണ്ഡലം നേതൃസംഗമം നടത്തി. ജില്ലാ കോണ്‍ഗ്രസ് കമ്മിറ്റി അധ്യക്ഷന്‍ അഡ്വ. ജോസഫ് ടാജറ്റ് സംഗമം ഉദ്ഘാടനം ചെയ്തു. നിയോജക മണ്ഡലത്തിന്‍റെ ചുമതല വഹിക്കുന്ന കെപിസിസി സെക്രട്ടറി സുനില്‍ അന്തിക്കാട് അധ്യക്ഷത വഹിച്ചു. കെപിസിസി മുന്‍ ജനറല്‍ സെക്രട്ടറി എം.പി. ജാക്‌സണ്‍, കെപിസിസി സെക്രട്ടറി രാജേന്ദ്രന്‍ അരങ്ങത്ത്, ജില്ലാ സെക്രട്ടറിമാരായ ആന്‍റോ പെരുമ്പിള്ളി, കെ.കെ. ശോഭനന്‍, സതീഷ് വിമലന്‍, സോണിയ ഗിരി എന്നിവര്‍ പ്രസംഗിച്ചു. ബ്ലോക്ക് കോണ്‍ഗ്രസ് പ്രസിഡന്റുമാരായ സോമന്‍ ചിറ്റേത്ത് സ്വാഗതവും, ഷാറ്റോ കുര്യന്‍ നന്ദിയും പറഞ്ഞു.

ദേവാലയങ്ങളിൽ തിരുനാൾ

മേലൂർ പള്ളി മേലൂർ: സെന്‍റ് ജോസഫ് ദേവാലയത്തിൽ വിശുദ്ധ യൗസേപ്പിതാവിന്‍റെ ഊട്ടുതിരുനാളിന് വികാരി ഫാ. ടോമി കണ്ടത്തിൽ കൊടി ഉയർത്തി. ഇന്ന് 9.30 ന് ദിവ്യബലി: ഫാ. ആൽബിൻ കാർമികത്വം വഹിക്കും. ഫാ ജോസഫ്പയ്യപ്പിള്ളി സന്ദേശം നൽകും. നേർച്ചസദ്യ വെഞ്ചരിപ്പ്, ഊട്ടുസദ്യ, 4.30 ന് പ്രസുദേന്തിവാഴ്ച, തിരുനാൾ പാട്ടുകുർബാന, ഫാ. സാന്‍റോ കണ്ണമ്പുഴ കാർമികത്വം വഹിക്കും. ഫാ. സിജൊ വട്ടേക്കാടൻ സന്ദേശം നൽകും. തുടർന്നു പ്രദക്ഷിണം. വൈന്തല പള്ളി കാടുകുറ്റി: വൈന്തല സെന്‍റ് ജോസഫ്സ് പള്ളിയിൽ വിശുദ്ധ യൗസേപ്പിതാവിന്‍റെ ഊട്ടുതിരുനാളിനു കൊടിയേറി. കൊടിയേറ്റിനും ദിവ്യബലി, ലദീഞ്ഞ്, നൊവേന എന്നീ തിരുക്കർമങ്ങൾക്കും ഫാ. ഡേവിസ് കുടിയിരിക്കൽ കാർമികനായി. ഇന്നുമുതൽ മൂന്നു വരെയുള്ള ദിവസങ്ങളിൽ വൈകീട്ട് 5.30ന് നടക്കുന്ന ദിവ്യബലിക്കും അനുബന്ധ പ്രാർഥനാശുശ്രുഷകൾക്കും യഥാക്രമം ഫാ. ലിജോ ചിറ്റിലപ്പിള്ളി, ഫാ. വിൽ‌സൺ മൂക്കനാംപറമ്പിൽ, ഫാ. ഡിന്‍റോ തെക്കിനിയത്ത് എന്നിവർ നേതൃത്വം നൽകും. തിരുനാൾദിനമായ നാലിന് രാവിലെ 8.30ന് ഊട്ടുനേർച്ച വെഞ്ചരിപ്പ്. ഒമ്പതിനു ഫാ. ജോജോ കുറ്റിക്കാടന്‍റെ നേതൃത്വത്തിൽ ആഘോഷമായ തിരുനാൾ ദിവ്യബലി. ഫാ. ജിജി കുന്നേൽ വചനസന്ദേശം നൽകും. തുടർന്ന് ആഘോഷമായ തിരുനാൾ പ്രദക്ഷിണം.

കഞ്ചാവുമായി യുവാവ് അറസ്റ്റിൽ

ചാലക്കുടി: ഒഡിഷയിൽ നിന്നും വില്പനയ്ക്കായി രഹസ്യമായി കടത്തിക്കൊണ്ടുവന്ന 1.885 കിലോഗ്രാം കഞ്ചാവുമായി യുവാവിനെ വാഹന പരിശോധനയിൽ പോലീസ് പിടികൂടി. മാള മടത്തുംപടി പയ്യപ്പിള്ളി വീട്ടിൽ ജസ്റ്റിൻ (25 ) ആണ് പിടിയിലായത്. തൃശൂർ റൂറൽ ജില്ലാ പോലീസ് മേധാവി ബി. കൃഷ്ണകുമാറിന് ലഭിച്ച രഹസ്യവിവരത്തിന്‍റെ അടിസ്ഥാനത്തിൽ ചാലക്കുടി ഡിവൈഎസ്പി കെ. സുമേഷിന്‍റെ നേതൃത്വത്തിൽ ചാലക്കുടി കെഎസ്ആർടിസി ബസ് സ്റ്റാൻഡ് പരിസരത്തുവച്ച് യാത്രക്കാരനായ യുവാവിന്‍റെ കൈയിലുണ്ടായിരുന്ന ട്രാവൽബാഗിൽ ഭദ്രമായി പൊതിഞ്ഞു സൂക്ഷിച്ചനിലയിൽ കഞ്ചാവ് കണ്ടെത്തിയത്. ചാലക്കുടി സർക്കിൾ ഇൻസ്പെക്ടർ എം.കെ. സജീവ്, റൂറൽ ജില്ലാ ഡാൻസാഫ് ടീം അംഗങ്ങൾ, ചാലക്കുടി പോലീസ് സ്റ്റേഷൻ സബ് ഇൻസ്പെക്ടർ ഋഷി പ്രസാദ്, അഡീഷണൽ എസ്ഐമാരായ ഹരിശങ്കർ പ്രസാദ്, ജെയ്സൻ ജോസഫ്, സീനിയർ സിപിഒമാരായ പി.കെ. രതീഷ്, സി.ആർ. സുരേഷ്, എൻ. പ്രദീപ് എന്നിവരടങ്ങിയ സംഘമാണ് യുവാവിനെ പിടികൂടി കഞ്ചാവ് കണ്ടെടുത്തത്.

യുവാവിനെ തട്ടിക്കൊണ്ടുപോയി കൊലപ്പെടുത്താന്‍ ശ്രമം; സഹോദരങ്ങളായ രണ്ടുപേര്‍ അറസ്റ്റില്‍

ആളൂര്‍: യുവാവിനെ തട്ടിക്കൊണ്ടുപോയി കൊലപ്പെടുത്താന്‍ ശ്രമിച്ച കേസില്‍ സഹോദരങ്ങളായ രണ്ടു പേര്‍ കൂടി അറസ്റ്റില്‍. പടിയൂര്‍ സ്വദേശി കോഴിപ്പറമ്പില്‍ അനന്തുവിനെ (26) ഇക്കഴിഞ്ഞ ഡിസംബര്‍ 25ന് രാവിലെ പത്തരയോടെ കൊമ്പിടിഞ്ഞാമാക്കല്‍ നിന്ന് ഇയാള്‍ സഞ്ചരിച്ചിരുന്ന കാറടക്കം തട്ടിക്കൊണ്ടുപോയി വെടിമറയിലുള്ള ഖുറേഷി എന്നയാളുടെ ഹോട്ടലില്‍ എത്തിച്ചു മര്‍ദ്ദിച്ചു കൊലപ്പെടുത്താന്‍ ശ്രമിച്ച കേസിലാണ് അറസ്റ്റ്. പറവൂര്‍ ചെറിയപ്പിള്ളി സ്വദേശികളായ മാലോത്ത് വീട്ടില്‍ റൊണാള്‍ഡ് (27), റിച്ചാര്‍ഡ്(25) എന്നിവരെയാണ് തൃശൂര്‍ റൂറല്‍ എസ്പി. ബി. കൃഷ്ണകുമാറിന്‍റെ നിര്‍ദേശപ്രകാരം ഇരിങ്ങാലക്കുട ഡിവൈഎസ്പി കെ.ജി. സുരേഷിന്‍റെ നേതൃത്വത്തിലുള്ള അന്വേഷണ സംഘം അറസ്റ്റു ചെയ്തത്. അനന്തുവും സുഹൃത്തുക്കളും ചേര്‍ന്ന് അമ്പത് ലക്ഷം രൂപ കവര്‍ച്ച ചെയ്തിരുന്നു. ഈ സംഭവത്തില്‍ മരട് സ്റ്റേഷനില്‍ കേസുണ്ട്. ഇവര്‍ കവര്‍ന്ന പണം അപഹരിക്കുന്നതിനുവേണ്ടിയാണ് പത്തു പേരടങ്ങുന്ന സംഘം അനന്തുവിനെ തട്ടിക്കൊണ്ടുപോയത്. ഈ കേസ്സില്‍ മുക്താര്‍, മുഹമ്മദ് ഷമീം, ഖുറൈഷി, ഷാജി, നിഷാന ഫാരിസ് എന്നിവര്‍ നേരത്തേ റിമാന്‍റിലായിരുന്നു. പോലീസ് അന്വേഷണം ആരംഭിച്ചതോടെ മുങ്ങിയ ഇവര്‍ പല സ്ഥലങ്ങളാലായി ഒളിവില്‍ കഴിഞ്ഞു വരികയായിരുന്നു. ചെറിയപ്പിള്ളിയിലെ ഇവരുടെ വീട് പൂട്ടി സ്ഥലം വിടുകയായിരുന്നു. ഇന്നലെ പുലര്‍ച്ചെ ആലുവയ്ക്കടുത്തു നിന്നുമാണ് ഇരുവരേയും പിടികൂടിയത്. ആളൂര്‍ എസ്ഐ എം. അഫ്‌സല്‍, സി.എസ്. സുമേഷ്, സീനിയര്‍ സിപിഒ ഇ.എസ്. ജീവന്‍, സിപിഒമാരായ കെ.എസ്. ഉമേഷ്, ബിജുകുമാര്‍, യു.ആഷിഖ് എന്നിവരടങ്ങിയ സംഘമാണ് പ്രതികളെ പിടികൂടിയത്.

ബസും ബൈക്കും കൂട്ടിയിടിച്ചു; യുവാവിനു പരിക്ക്

ഇരിങ്ങാലക്കുട: കോലോത്തുംപടിയില്‍ ലിമിറ്റഡ് സ്റ്റോപ്പ് ബസും ബൈക്കും കൂട്ടിയിടിച്ച് ബൈക്ക് യാത്രികനായ യുവാവിനു പരിക്ക്. കോലോത്തുംപടി കെഎസ്ഇബി സബ്‌സ്റ്റേഷനു മുന്നിലാണ് തൃശൂരില്‍നിന്ന് കൊടുങ്ങല്ലൂരിലേക്കു പോവുകയായിരുന്ന ബസും എതിര്‍ദിശയില്‍ വരികയായിരുന്ന ബൈക്കും കൂട്ടിയിടിച്ചത്. ബസ് റോഡിന്‍റെ എതിര്‍വശത്താണ് കിടന്നിരുന്നത്. പരിക്കേറ്റ മണ്ണുത്തി സ്വദേശി കുത്തൂര്‍ വീട്ടില്‍ ജുവലി‍(24) നെ ഇരിങ്ങാലക്കുട സഹകരണ ആശുപത്രിയില്‍ പ്രവേശിപ്പിച്ചു. പരിക്ക് ഗുരുതരമല്ല.

മാള മെറ്റ്സ് കോളജ് ഓഫ് അഡ്വാൻസ്ഡ് സ്റ്റഡീസ് കെൽട്രോണുമായി ധാരണപത്രം ഒപ്പുവച്ചു

മാള: മെറ്റ്സ് കോളജ് ഓഫ് അഡ്വാൻസ്ഡ് സ്റ്റഡീസ് തിരുവനന്തപുരം കെൽട്രോണുമായി ധാരണപത്രം ഒപ്പുവെച്ചു. പുതിയ കാലഘട്ടത്തിനനുസരിച്ചുള്ള തൊഴിൽ ക്ഷമത വർധിപ്പിക്കുന്നതിനുള്ള വിവിധ കോഴ്സുകൾ നടത്തുന്നതിനായാണ് ധാരണയായത്. ഇതനുസരിച്ച് അടുത്ത മൂന്ന് വർഷം വിവിധ മേഖലകളിലെ നൈപുണ്യം വർദ്ധിപ്പിക്കുന്നതിനും വൈദഗ്ധ്യം ഉണ്ടാകുന്നതിനും വേണ്ടിയുള്ള കോഴ്സുകൾ കോളജിൽ റെഗുലർ കോഴ്സുകളോടൊപ്പം പഠിച്ച് പാസാകുവാനുള്ള സൗകര്യം വിദ്യാർഥികൾക്ക് ലഭിക്കും. കേന്ദ്ര സർക്കാരിന്‍റെ നാഷണൽ സ്കിൽ ഡെവലപ്മെന്‍റ് കോർപ്പറേഷന്‍റെയും കേരള സർക്കാരിന്‍റെയും അംഗീകാരമുള്ള തൊഴിൽ സാധ്യതയുള്ള കോഴ്സുകൾ ആണ് ഇതനുസരിച്ച് നടത്താനാകുന്നത്. ഇവിടെ പഠിച്ചിറങ്ങുന്ന വിദ്യാർഥികളുടെ തൊഴിൽക്ഷമത ഇതുമൂലം ഗണ്യമായി ഉയരുന്നതാണ്. ഈ കോഴ്സുകളോടൊപ്പം വിവിധ വ്യവസായ മേഖലകളിൽ ഇന്‍റേൺഷിപ്പിനുള്ള സൗകര്യവും വിദ്യാർഥികൾക്ക് ലഭിക്കുന്നതാണ്. മെറ്റ്സ് കോളജ് ഓഫ് അഡ്വാൻസ്ഡ് സ്റ്റഡീസിനുവേണ്ടി പ്രിൻസിപ്പൽ പ്രഫ. ഡോ. ഫോൺസി ഫ്രാൻസിസും കെൽട്രോണിനു വേണ്ടി ഐടി ബിസിനസ് ഗ്രൂപ്പ് മേധാവിയും ചീഫ് ജനറല്‍ മാനേജരുമായ കെ. ഉഷയും ധാരണാപത്രം ഒപ്പുവെച്ചു. ധാരണപത്രം കൈമാറുന്ന ചടങ്ങിൽ കെൽട്രോൺ പ്രോഗ്രാം കോർഡിനേറ്റർമാരായ വിനയ് വർഗീസ്, നാരായണൻ സി.ജെ, മെറ്റ്സ് ഗ്രൂപ്പ് ഓഫ് ഇൻസ്റ്റിറ്റ്യൂഷൻസ് അക്കാദമിക് ഡയറക്ടർ ഡോ. എ. സുരേന്ദ്രൻ, കമ്പ്യൂട്ടർ അപ്ലിക്കേഷൻ വിഭാഗം അസിസ്റ്റന്‍റ്് പ്രഫസറും അഡീഷണൽ സ്കിൽ പ്രോഗ്രാം കോർഡിനേറ്ററുമായ സി.എം. കൃഷ്ണേന്ദു എന്നിവർ പങ്കെടുത്തു.

േദശീയപാത വികസനത്തിന്‍റെ പേരിൽ നടക്കുന്നത് നിർമാണക്കമ്പനിയുടെ തന്നിഷ്ടം

കൊരട്ടി: ദേശീയപാത വികസനത്തിന്‍റെ ഭാഗമായി ചിറങ്ങര, കൊരട്ടി, മുരിങ്ങൂർ ഭാഗങ്ങളിൽ നടന്നുകൊണ്ടിരിക്കുന്ന നിർമാണ പ്രവൃത്തികളിലെ അപാകതകളും മേഖലയിൽ മണിക്കൂറുകളോളം രൂപപ്പെടുന്ന ഗതാഗതക്കുരുക്കുകളും പ്രദേശവാസികളെയും ദീർഘദൂര യാത്രികരെയും ഒരുപോലെ വലയ്ക്കുകയാണ്. വിവിധ കോണുകളിൽനിന്നും പ്രതിഷേധങ്ങൾ ഉയരുകയും ജില്ലാ കളക്ടർ തന്നെ മുരിങ്ങൂർ, കൊരട്ടി, ചിറങ്ങര ജംഗ്ഷനുകളിലെ പ്രശ്നബാധിത ഇടങ്ങളിൽ കഴിഞ്ഞമാസം നേരിട്ടെത്തി സ്ഥിതിഗതികൾ വിലയിരുത്തുകയുമുണ്ടായി. കുറ്റമറ്റ രീതിയിലുള്ള നിർമാണവും കിലോമീറ്ററുകൾ നീളത്തിൽ രൂപപ്പെടുന്ന ഗതാഗതസ്തംഭനത്തിനും പരിഹാരം കാണാൻ എൻഎച്ച്എഐ അധികൃതരടക്കമുള്ള ഉദ്യോഗസ്ഥരെയും പങ്കെടുപ്പിച്ച് യോഗം വിളിച്ചുചേർത്തിട്ടും തൽസ്ഥിതി തുടരുന്ന സാഹചര്യത്തിൽ ടോൾപിരിവ് താൽക്കാലികമായി നിർത്തിവച്ച് കളക്ടർ ഉത്തരവിറക്കി ചൂടാറുംമുമ്പെ മരവിപ്പിച്ചതിനും നാട് സാക്ഷിയായി. ഗതാഗതക്കുരുക്ക് ഒഴിവാക്കുന്നതിന് നടപടി സ്വീകരിച്ചുവെന്ന എന്ന എൻഎച്ച്എഐ യുടെ വിശദീകരണത്തിലായിരുന്നു ഉത്തരവ് മരവിപ്പിക്കാൻ തീരുമാനിച്ചത്‌. എന്നാൽ ഒരാഴ്ച സമയം അനുവദിച്ചിട്ടും യാതൊരു പുരോഗതിയും ഉണ്ടാകാത്തതിനെ തുടർന്ന് ടോൾപിരിവ് നിർത്തിവയ്ക്കുവാൻ കളക്ടർ ഉത്തരവിറക്കി. ഉത്തരവിന് ഒരു ദിവസം പോലും ആയുസ് ഉണ്ടായില്ലെന്ന് മാത്രമല്ല 28ന് ഇറക്കിയ ഉത്തരവ് 29ന് റദ്ദാക്കുകയായിരുന്നു. എൻഎച്ച്എഐ രേഖാമൂലം നൽകിയ ഉറപ്പിന്‍റെയും സർക്കാർ നിർദേശത്തിൻന്‍റെയും അടിസ്ഥാനത്തിലാണ് ഉത്തരവ് റദ്ദാക്കിയതെന്നാണ് കളക്ടർ നൽകുന്ന വിശദീകരണം. സുരക്ഷാ ക്രമീകരണങ്ങളൊരുക്കാതെ, കരാർ മാനദണ്ഡങ്ങൾ പാലിക്കാതെ, ഗുണനിലവാരമില്ലാതെ കൊരട്ടി മേഖലയിൽ നിർമാണം നടത്തുന്ന കരാർ കമ്പനിയോട് നാഷണൽ ഹൈവേ അഥോറിറ്റിയും ഉദ്യോഗസ്ഥ വൃന്ദവും സർക്കാർ സംവിധാനവും ഒറ്റക്കെട്ടായി അനുഭാവപൂർവമായ നിലപാടു സ്വീകരിക്കുന്നുവെന്ന ആക്ഷേപമാണ് ജനങ്ങൾ ഉന്നയിക്കുന്നത്. ജനപ്രതിനിധികളിൽ ഭൂരിഭാഗവും രാഷട്രീയ കക്ഷികളും പുലർത്തുന്ന അർത്ഥഗർഭമായ മൗനവും പൊതുസമൂഹത്തെ നിരാശയിലാക്കുകയാണ്. സർക്കാർ സംവിധാനങ്ങളിൽ സമ്മർദ്ദം ചെലുത്തി ജില്ലാ കളക്ടറുടെ ഉത്തരവ് പോലും അട്ടിമറിക്കാൻ കഴിവുള്ളവരാണോ കരാർ കമ്പനിയും നാഷണൽ ഹൈവേ അഥോറിറ്റിയും എന്ന ചിന്തയും നാട്ടുകാർ പങ്കുവയ്ക്കുന്നുണ്ട്. രാപകൽ ഭേദമില്ലാതെയാണ് അഞ്ചര കിലോമീറ്ററിനുള്ളിൽ നിർമിക്കുന്ന മുരിങ്ങൂർ, കൊരട്ടി, ചിറങ്ങര സിഗ്നൽ ജംഗ്ഷനുകളിലെ മൂന്നു അടിപ്പാതകളിൽ രൂപപ്പെടുന്ന ഗതാഗതക്കുരുക്ക്. അടിപ്പാത നിർമാണം ആരംഭിക്കുന്നതിനു മുമ്പ് പ്രധാനപാതയ്ക്ക് ഇരുഭാഗത്തും സർവീസ് റോഡുകൾ പൂർണമായി നിർമിക്കണമെന്ന നാട്ടുകാരുടെ ആവശ്യത്തെ എൻഎച്ച്എഐ നിരാകരിച്ചതാണ് ഗതാഗതക്കുരുക്ക് ഇത്രയും രൂക്ഷമാകാൻ കാരണമായത്. നിർമാണ പ്രവൃത്തികൾക്കിടെ ഒരുക്കേണ്ട സുരക്ഷാ ക്രമീകരണങ്ങൾ ഉണ്ടാകുന്നില്ലെന്ന പരാതിയും വ്യാപകമാണ്. നിലവിൽ ഒച്ചിഴയുന്ന വേഗതയാണ് ചിറങ്ങരയിലെ നിർമാണം നടക്കുന്നത്. ആവശ്യത്തിനനുസരിച്ച് തൊഴിലാളികളില്ലാത്തതാണ് കാരണം. സമയബന്ധിതമായി നിർമാണം പൂർത്തിയാകാനുള്ള സാധ്യതയും വിരളമാണ്. നിലവിൽ പുരോഗമിക്കുന്ന ദേശീയപാതാ വികസനത്തിൽ ജനപ്രതിനിധികളാേടും ഉദ്യാേഗസ്ഥ വൃന്ദത്തിനോടും രാഷ്ട്രീയ പാർട്ടികളോടും സർക്കാർ സംവിധാനങ്ങളോടും പൊതുസമൂഹത്തിന് അവമതിപ്പ് ഉണ്ട് എന്നതാണ് യാഥാർഥ്യം.

വസന്തംവിരിയിക്കാൻ വർണക്കുടകൾ ഒരുങ്ങുന്നു

തൃശൂർ: കാത്തുകാത്തിരുന്ന ഒരു പൂരംകൂടി പടിവാതിക്കൽ എത്തിനിൽക്കവേ എല്ലാ കണ്ണുകളും കാത്തിരിക്കുന്നതു കരിവീരന്മാരുടെ പുറത്തേറാൻ പോകുന്ന വർണക്കുടകളിലേക്കാണ്. അസ്തമയസൂര്യൻ വിടപറയുംമുൻപേ നെറ്റിപ്പട്ടംകെട്ടിയ കൊന്പന്‍റെ മുകളിൽ ഉദയസൂര്യന്‍റെ ശോഭയിൽ തിളങ്ങി നിൽക്കുന്ന ഈ പട്ടുകുടകൾ പൂരാഘോഷത്തിനു നൽകുന്ന ആവേശം ചെറുതൊന്നുമല്ല. വർണങ്ങൾ വാരിവിതറി നിമിഷനേരങ്ങൾകൊണ്ടുതന്നെ മിന്നിമറയുന്ന ഈ പട്ടുകുടകൾ മാസങ്ങൾ നീണ്ട കഠിനപ്രയ്തനങ്ങൾക്കുശേഷമാണ് പൂരപ്രേമികൾക്കുമുൻപിൽ എത്തുന്നത്. ഇതിനായി അണിയറയിൽ തിരക്കിട്ട പണികളിലാണ് തൊഴിലാളികൾ. 50 സെറ്റ് കുടകളാണ് ഓരോ ദേവസ്വങ്ങളും പൂരത്തിനായി ഒരുക്കുന്നത്. കുടകളിൽ വസന്തം നിറയും വസന്തനിലൂടെ പാറമേക്കാവ് ദേവസ്വത്തിന്‍റെ പൂരക്കുടകളുടെ നിർമാണം ഈ വർഷവും വസന്തൻ കുന്നത്തങ്ങാടിയുടെ കൈകളിൽ ഭദ്രമാണ്. പൂരപ്രേമികൾ വസന്തേട്ടൻ എന്നു സ്നേഹത്തോടെ വിളിക്കുന്ന കുന്നത്തങ്ങാടി കിഴക്കേപ്പുരയ്ക്കൽ വസന്തൻ പാറമേക്കാവിനുവേണ്ടി ഇത് 45-ാം വർഷമാണ് കുടകൾ ഒരുക്കുന്നത്. പൂരക്കുടകളുടെ നിർമാണത്തിൽ അച്ഛൻ കുട്ടപ്പന്‍റെ വഴിതന്നെ സ്വീകരിച്ച വസന്തൻ തന്‍റെ 20 ാാം വയസിലായിരുന്നു കുടനിർമാണവുമായി തൃശൂർ പൂരത്തിലേക്കു ചുവടുവയ്ക്കുന്നത്. പിന്നീട് നാളിതുവരെ പൂരപ്രേമികളുടെ ആവേശത്തിന് ഒരിക്കൽപ്പോലും കോട്ടംപറ്റാതെ സൂക്ഷ്മമായി മാരിവിൽവർണങ്ങൾ നെയ്തെടുക്കാൻ വസന്തനും സംഘത്തിനും സാധിച്ചിട്ടുണ്ട്. ഈ വർഷം ഇരുപതോളം തൊഴിലാളികൾക്കൊപ്പം മൂന്നുമാസങ്ങൾക്കുമുൻപ് ആരംഭിച്ച കുടനിർമാണം അവസാനഘട്ടത്തിലാണ്. രണ്ടുമുതൽ മൂന്നുദിവസംവരെയാണ് ഓരോ കുടയും നിർമിക്കാനെടുക്കുന്ന സമയം. പുരുഷോത്തമനെന്നും പൂരാവേശം പൂരക്കുടനിർമാണത്തിൽ 46 വർഷത്തെ അനുഭവസന്പത്തുള്ള പുരുഷോത്തൻ അരണാട്ടുകര തന്നെയാണ് ഈ വർഷവും തിരുവന്പാടിക്കായി കുടനിർമാണത്തിനു ചുക്കാൻ പിടിക്കുന്നത്. 30 വർഷത്തോളം പാറമേക്കാവ് ദേവസ്വത്തിനായി കുട നിർമിച്ചിരുന്ന പുരുഷോത്തമൻ ഇത് 16-ാം വർഷമാണ് തിരുവന്പാടിക്കുവേണ്ടി കുട നിർമിക്കുന്നത്. 15 തൊഴിലാളികൾക്കൊപ്പം മൂന്നുമാസങ്ങൾക്കുമുൻപ് നിർമാണപ്രവർത്തനങ്ങൾ ആരംഭിച്ച ഇദ്ദേഹവും സംഘവും രാവിലെ ആറിനുതന്നെ കുടനിർമാണം ആരംഭിക്കും. ആറാട്ടുപുഴ പൂരത്തിനുപിറകെയാണ് തൃശൂർ പൂരത്തിന്‍റെ കുടനിർമാണവുമായി പണിപ്പുരയിൽ സജീവമായത്. എല്ലാ സമയവും പൂരവുമായി ബന്ധപ്പെട്ട നിർമാണങ്ങളിൽ മുഴുങ്ങുന്നതിനാൽതന്നെ തനിക്കും സംഘത്തിനും എന്നും പൂരാവേശമാണെന്നും പുരുഷോത്തമൻ പറഞ്ഞു. പുതുമയാണ് മെയിൻ പട്ടുകുടകളിൽ പുതുമതേടുന്ന ഇരുകൂട്ടരും ഇത്തവണയും നിറങ്ങൾകൊണ്ട് മായാജാലം ഒരുക്കാനുള്ള തിരക്കിലാണ്. വെൽവെറ്റ്, സാറ്റിൻ, ബ്രോക്കേഡ് തുടങ്ങിയ തുണികൾ സൂററ്റിൽനിന്നുമാണ് എത്തിക്കുന്നത്. 15 കുടകളാണ് ഓരോ സെറ്റിലും ഉണ്ടാകുക. അത്തരത്തിൽ 50 സെറ്റ് കൂടുകൾ ഉണ്ടായിരിക്കും. മറ്റു കുടകളിൽനിന്നു വ്യത്യസ്‍തമായി കന്പിക്കുപകരം ചൂരൽകൊണ്ട് ഫ്രെയിം തീർത്ത് അതിലേക്കാവശ്യമായ തുണി മുറിച്ചെടുത്ത് സ്റ്റിച്ച് ചെയ്ത് അലുക്കുകൾ പിടിപ്പിച്ചാണ് ഓരോ കുടയും ഒരുക്കുന്നത്. ഇതിനായി ഒരു കുടയ്ക്കുമാത്രം മൂന്നുമീറ്ററോളം തുണിയുടെ ആവശ്യം വരും. ശേഷം പൂരപ്പറന്പിൽ പട്ടുകുടകൾക്കുപുറമെ പൂരപ്രേമികളെ ആവേശംകൊള്ളിക്കുന്ന സ്പെഷൽ കുടകൾ അണിയറയിൽ അതീവരഹസ്യമായും ഇരുദേവസ്വങ്ങൾക്കായി പലരും സജ്ജമാക്കുന്നുണ്ട്. അതുകാണാൻ പൂരദിനംവരെ കാത്തിരിക്കണമെന്നുമാത്രം. സി.ജി. ജിജാസൽ

തൃശൂർ പൂരം ഇന്നു കൊടിയേറും

തൃശൂർ: തൃശൂർ പൂരത്തിന് ഇന്നു കൊടിയേറും. എട്ടു ഘടകക്ഷേത്രങ്ങളിലും ഇന്നു പൂരം കൊടിയേറ്റം നടക്കും.അതോടെ നാടും നഗരവും പൂരലഹരിയിലാവും. പൂരത്തിന്‍റെ പ്രധാന പങ്കാളികളായ തിരുവന്പാടിയിൽ ഇന്നുരാവിലെ 11.30നും 12നുമിടയിലും പാറമേക്കാവിൽ 12നും 12.30നുമിടയിലുമാണ് കൊടിയേറ്റം. ഘടകക്ഷേത്രങ്ങളിൽ ലാലൂർ കാർത്യായിനി ക്ഷേത്രത്തിൽ രാവിലെ എട്ടിനും 8.30നുമിടയിലാണ് കൊടികയറുക. ഉച്ചയ്ക്കു11നും 11.30നുമിടയിൽ അയ്യന്തോൾ കാർത്യായിനിക്ഷേത്രത്തിൽ കൊടിയേറും. കണിമംഗലം ശാസ്താക്ഷേത്രത്തിലും കിഴക്കുംപാട്ടുകര പനമുക്കുംപള്ളി ധർമശാസ്താക്ഷേത്രത്തിലും കുറ്റൂർ നെയ്തലക്കാവിലും വൈകീട്ട് 6.30നും ഏഴിനുമിടയിൽ കൊടിയേറും. ചെന്പുക്കാവ് കാർത്യായിനി ക്ഷേത്രത്തിൽ വൈകീട്ട് 5.30നും ആറിനുമിടയിലാണ് കൊടിയേറ്റം. ചുരക്കോട്ടുകാവിലമ്മക്ഷേത്രത്തിൽ വൈകീട്ട് 7.30നും രാത്രി എട്ടിനുമിടയിലാണ് കൊടികയറുക. സ്വന്തം ലേഖകൻ ആദ്യം കൊടിയേറുക ലാലൂർ ക്ഷേത്രത്തിൽ തൃശൂർ: ലാലൂർ കാർത്യായനിദേവി ക്ഷേത്രത്തിൽ പൂരം കൊടിയേറ്റം ഇന്നു രാവിലെ എട്ടിനും 8.30നും മധ്യേ തന്ത്രി പുലിയന്നൂർ കൃഷ്ണൻനമ്പൂതിരിപ്പാടിന്‍റെ കാർമികത്വത്തിൽ നടക്കുമെന്നു പ്രസിഡന്‍റ് രവീന്ദ്രൻ ചെറുശേരി പത്രസമ്മേളനത്തിൽ പറഞ്ഞു. തൃശൂർ പൂരം ഘടകക്ഷേത്രങ്ങളിൽ ആദ്യം കൊടിയേറ്റുന്ന ക്ഷേത്രമാണിത്. പൂരം നാളിൽ പുലർച്ചെ താന്ത്രികപൂജകൾക്കുശേഷം മൂന്ന് ആനകളുടെയും പഞ്ചവാദ്യം, നാഗസ്വരം എന്നിവയുടെയും അകമ്പടിയിൽ ആരംഭിക്കുന്ന എഴുന്നള്ളിപ്പ് നടുവിലാലിൽ എത്തുമ്പോൾ ആനകളുടെ എണ്ണം ഒന്പതാകും. പാണ്ടിമേളത്തിന്‍റെ അകമ്പടിയോടെ ശ്രീമൂലസ്ഥാനത്തെത്തി വടക്കുന്നാഥനെ വണങ്ങി തെക്കേഗോപുരനടയിലൂടെ കടന്ന് ക്ഷേത്രത്തിലേക്കു തിരിക്കും. വൈകീട്ട് 6.30നു വീണ്ടുമെത്തി ചടങ്ങ് ആവർത്തിച്ചു തിരിച്ചുപോരും. ഉത്രംവിളക്കു കഴിഞ്ഞു കൊടിയിറങ്ങുന്നതോടെ പൂരച്ചടങ്ങുകൾ സമാപിക്കും. പത്രസമ്മേളനത്തിൽ ഭാരവാഹികളായ രഞ്ജിത് പുളിക്കത്തറ, ബിന്ദു സുരേഷ്, എം.സി. സുന്ദരൻ എന്നിവരും പങ്കെടുത്തു. രാമനില്ലാതെ എന്തു തൃശൂർ പൂരം? തൃശൂർ: കാത്തിരിപ്പുകൾക്ക് വിരാമംകുറിച്ച് തെച്ചിക്കോട്ടുകാവ് രാമചന്ദ്രൻ തൃശൂർ പൂരത്തിന് എത്തുന്നു. ചെമ്പുക്കാവ് ഭഗവതിയുടെ തിടമ്പേറ്റിയാണ് രാമൻ ഇത്തവണ പൂരനഗരിയിൽ എത്തുക. ഇതാദ്യമായാണ് ചെമ്പുക്കാവിനുവേണ്ടി രാമൻ തിടമ്പേറ്റുന്നത്. തെച്ചിക്കോട്ടുകാവ് രാമചന്ദ്രൻ ഇക്കുറി പൂരത്തിനു ഉണ്ടാകുമോ എന്ന ആശങ്കകൾക്കും സംശയങ്ങൾക്കുമാണ് ഇതോടെ ചെമ്പുക്കാവ് ദേശം മറുപടി നൽകിയിരിക്കുന്നത്. രാമനെ പൂരത്തിന് എഴുന്നള്ളിക്കാൻ തീരുമാനിച്ചതോടെ ആരാധകർ ആവേശത്തിലാണ്. പൂരം ദിവസം രാവിലെ ക്ഷേത്രത്തിൽനിന്നു പഞ്ചവാദ്യത്തോടെ പുറപ്പെട്ട് ജവഹർ ബാലഭവൻ ജംഗ്ഷനിലൂടെ കടന്നു ടൗൺഹാളിനുമുന്നിലൂടെ പാറമേക്കാവ് ക്ഷേത്രത്തിനു മുൻവശത്തെത്തി കിഴക്കേ ഗോപുരം കടന്ന് മതിൽക്കെട്ടിനകത്തു പഞ്ചവാദ്യം കൊട്ടിക്കലാശിക്കും. തുടർന്ന് ചെമ്പുക്കാവ് ഭഗവതി പാണ്ടിമേളത്തോടെ തെക്കേഗോപുരനട ഇറങ്ങും. തുടർന്ന് തെക്കേ ഗോപുരനടയ്ക്കു പുറത്ത് പാണ്ടിമേളം കുട്ടിക്കലാശിക്കും. ഈ സമയത്തെല്ലാം രാമനായിരിക്കും ഭഗവതിയുടെ തിടമ്പേറ്റുക. രാത്രിപ്പൂരത്തിനു രാമൻ ഉണ്ടാവില്ല. കുടനിർമാണത്തിലെ സ്ത്രീസാന്നിധ്യം പാറമേക്കാവ് ദേവസ്വത്തിന്‍റെ കുടമാറ്റത്തിൽ ഈ വർഷവും സ്ത്രീ തൊഴിലാളികളായ നാലംഗസംഘം ഇടംപിടിച്ചിട്ടുണ്ട്. ഫാഷൻ ഡിസൈനിംഗിനുശേഷം വിദേശത്തേക്കു പറക്കാൻ ജർമൻപഠനവുമായി മുന്നോട്ടുപോകുന്ന കണ്ടശാംകടവ് സ്വദേശിനി സ്നേഹയും മേക്കപ്പ് ആർട്ടിസ്റ്റായി മുന്നേറുന്ന ചേലക്കര പുലാക്കോട് സ്വദേശിനി നജ്മയും വീട്ടിൽതന്നെ ഫാഷൻ ഡിസൈനിംഗ് വർക്ക് ചെയ്യുന്ന ചേറൂർ ചിറ്റപ്പറന്പിൽ വിനീതയും ഇതു മൂന്നാംവർഷമാണ് കുടനിർമാണത്തിനു വസന്തനൊപ്പം എത്തുന്നത്. ഫാഷൻ ഡിസൈനിംഗ് സെന്‍ററിലെ അധ്യാപകൻവഴിയാണ് സ്നേഹയും നജ്മയും കുടനിർമാണത്തിലേക്ക് എത്തിയതെങ്കിൽ സുഹൃത്ത് വഴിയാണ് വിനീതയുടെ കടന്നുവരവ്. തുടക്കത്തിൽ പല പ്രതിസന്ധികൾ നേരിട്ടെങ്കിലും ഇപ്പോൾ എല്ലാവരുടെയും പിന്തുണയുണ്ടെന്നു നജ്മ പറഞ്ഞു. ഇവർക്കൊപ്പം 52 വയസുകാരി ചെറുവത്തേരി സ്വദേശി ലതികയും പൂരക്കുടനിർമാണത്തിലേക്ക് ഈ വർഷം ചുവടുവച്ചിട്ടുണ്ട്. ഫാൻസി നെറ്റിപ്പട്ടം നിർമിച്ചിരുന്ന ലതിക പൂരത്തോടുള്ള ഇഷ്ടവും പൂരക്കുടയുടെ നിർമാണം പഠിക്കാനുള്ള ആഗ്രഹവുംകൊണ്ടാണ് ഈ വർഷം വസന്തനൊപ്പം കുടനിർമാണത്തിന്‍റെ ഭാഗമായത്.

കാറ്ററേഴ്സ് അസോ. ധർണ നടത്തി

തൃശൂർ: വിലക്കയറ്റത്തിനെതിരേയും അനധികൃത കാറ്ററിംഗിനെതിരേ നടപടി സ്വീകരിക്കണമെന്നാവശ്യപ്പെട്ടും ഓൾ കേരള കാറ്ററേഴ്സ് അസോസിയേഷൻ ജില്ലാ ഫുഡ് സേഫ്റ്റി ഓഫീസിനുമുന്പിൽ സംഘടിപ്പിച്ച ധർണ അഡ്വ. ഷാജി കോടങ്കണ്ടത്ത് ഉദ്ഘാടനം ചെയ്തു. ജില്ലാ പ്രസിഡന്‍റ് അധ്യക്ഷത വഹിച്ചു. സംസ്ഥാനസെക്രട്ടറി കെ.കെ. കബീർ, ജില്ലാ ജനറൽ സെക്രട്ടറി ബാലൻ കല്യാണി എന്നിവർ പ്രസംഗിച്ചു. ധർണയ്ക്കു മുന്നോടിയായി അഞ്ഞൂറിൽപ്പരം അംഗങ്ങൾ അണിനിരന്ന ജാഥയുണ്ടായിരുന്നു. തുടർന്നു ഫുഡ് സേഫ്റ്റി അസിസ്റ്റന്‍റ് കമ്മീഷണർക്കു മെമ്മോറാണ്ടം സമർപ്പിച്ചു.

പാലിയേക്കര ടോളില്‍ യൂത്ത്‌കോണ്‍ഗ്രസ് പ്രതിഷേധം

പാലിയേക്കര: ജില്ലാ കളക്ടറുടെ ഉത്തരവില്‍ ടോള്‍പിരിവ് നിര്‍ത്തിവച്ചിട്ടും ഫാസ്ടാഗിലൂടെ ടോള്‍ പിരിവ് നടത്തുന്നതിനെതിരേ യൂത്ത് കോണ്‍ഗ്രസ് പ്രതിഷേധം. ഇന്നലെ രാവിലെ ടോള്‍ പ്ലാസയില്‍ പ്രതിഷേധവുമായെത്തിയ പ്രവര്‍ത്തകര്‍ കമ്പനിയുടെ ഓഫീസ് താഴിട്ടുപൂട്ടിയശേഷം കുത്തിയിരിപ്പുസമരം നടത്തി. ടോള്‍ ബൂത്തുകളില്‍ വച്ചിരുന്ന വീപ്പകള്‍ പ്രവര്‍ത്തകര്‍ വലിച്ചെറിഞ്ഞു. ഓഫീസ് ഉപരോധിച്ച് കുത്തിയിരുന്നു മുദ്രാവാക്യം വിളിച്ച പ്രവര്‍ത്തകരെ പുതുക്കാട് പോലീസ് അറസ്റ്റ് ചെയ്തുനീക്കി. യൂത്ത്‌ കോണ്‍ഗ്രസ് സംസ്ഥാന സെക്രട്ടറി ജെറോണ്‍ ജോണ്‍, നിയോജകമണ്ഡലം വൈസ് പ്രസിഡന്‍റ് പ്രിന്‍സ് ഫ്രാന്‍സിസ്, മണ്ഡലം വൈസ് പ്രസിഡന്‍റ് വൈശാഖ് ഐത്താടന്‍ എന്നിവരുടെ നേതൃത്വത്തിലായിരുന്നു പ്രതിഷേധം.

അപകടകരമായി ലോഡ് കയറ്റിയ വാഹനം പിടികൂടി

തൃശൂർ: വാഹനത്തിനുമുകളിൽ അപകടകരമായി കന്പി കയറ്റിവന്ന വാഹനം തൃശൂർ ആർടിഒ എൻഫോഴ്സ്മെന്‍റ് പിടികൂടി. വരന്തരപ്പിള്ളി സ്വദേശിയുടേതാണ് വാഹനം. ശക്തൻ സ്റ്റാൻഡിലെ സ്ഥാപനത്തിൽനിന്നു കന്പി കയറ്റി വരന്തരപ്പിള്ളിയിലേക്കുപോകുന്പോൾ ഒല്ലൂരിൽവച്ചാണ് പിടികൂടിയത്. ഇരുപതിനായിരം രൂപ പിഴയും ചുമത്തി. വാഹനം പെട്ടെന്നു ബ്രേക്കിടേണ്ടിവന്നാൽ കന്പി മുന്നോട്ടുതെന്നി അപകടമുണ്ടാകുമെന്നും വലിപ്പംകൂടിയ വാഹനങ്ങൾ ലോഡ് കയറ്റാൻ ഉപയോഗിക്കണമെന്നും മോട്ടോർ വെഹിക്കിൾ ഇൻസ്പെക്ടർ പി.വി. ബിജു പറഞ്ഞു.

വഴിയോരക്കച്ചവടക്കാരെ പുനരധിവസിപ്പിക്കണം: കേരള വഴിവാണിഭസഭ

തൃശൂർ: വഴിയോരക്കച്ചവടക്കാരെ പഞ്ചായത്ത് അടിസ്ഥാനത്തിൽ പുനരധിവസിപ്പിക്കണമെന്നു കേരള വഴിവാണിഭസഭ സംസ്ഥാന ജനറൽ കൗണ്‍സിൽ പ്രമേയത്തിലൂടെ ആവശ്യപ്പെട്ടു. പ്രാദേശിക അടിസ്ഥാനത്തിൽ വഴിയോരക്കച്ചവടക്കാരുടെ ഡാറ്റ തയാറാക്കി അവർക്കു ലഭിക്കേണ്ട ആനുകൂല്യങ്ങൾ പഞ്ചായത്ത് അടിസ്ഥാനത്തിൽ ലഭ്യമാക്കാൻ വേണ്ട നടപടികൾ സർക്കാർ അടിയന്തരമായി കൈക്കൊള്ളണമെന്ന് കൗണ്‍സിൽ ആവശ്യപ്പെട്ടു. ഹിന്ദ് മസ്ദൂർ സഭ സംസ്ഥാന എക്സിക്യൂട്ടീവ് അംഗം കെ.എസ്. ജോഷി ജനറൽ കൗണ്‍സിൽ ഉദ്ഘാടനം ചെയ്തു. എം.എൻ. സുരേഷ്, രാഹുൽ വി. നായർ, രാഘവൻ മുളങ്ങാടൻ എന്നിവർ പ്രസംഗിച്ചു. സംസ്ഥാനഭാരവാഹികൾ: കെ.സി. കാർത്തികേയൻ -പ്രസിഡന്‍റ് , വിൽസണ്‍ പണ്ടാരവളപ്പിൽ - ജനറൽ സെക്രട്ടറി, തോമസ് ആന്പക്കാടൻ, ടി.എൽ. ദാസ് -വൈസ് പ്രസിഡന്‍റുമാർ, വേണു കോങ്ങാട്ട് -സെക്രട്ടറി, ഷീജ കുമാരി - ട്രഷറർ.

അതിരപ്പിള്ളി പദ്ധതി അനുവദിക്കില്ല: എഐവൈഎഫ്

തൃശൂര്‍: വിനോദസഞ്ചാരവികസനത്തിന്‍റെ പേരില്‍ അതിരപ്പിള്ളിയില്‍ ജലവൈദ്യുതപദ്ധതി നടപ്പാക്കാനുള്ള കെഎസ്ഇബിയുടെ രഹസ്യ അജൻഡ എന്തുവിലകൊടുത്തും ചെറുക്കുമെന്ന് എഐവൈഎഫ്. പദ്ധതിക്കു മാസ്റ്റര്‍പ്ലാന്‍ തയാറാക്കാന്‍ സി എര്‍ത്ത് എന്ന സ്ഥാപനത്തെ ചുമതലപ്പെടുത്തിയിരിക്കുകയാണ്. ഏഷ്യയിലെതന്നെ നാമവശേഷമായിക്കൊണ്ടിരിക്കുന്ന ആദിമജനവിഭാഗമായ കാടര്‍ അവശേഷിക്കുന്നത് അതിരപ്പിള്ളിയിലെ നിര്‍ദിഷ്ട ജലവൈദ്യുത പദ്ധതിപ്രദേശത്താണ്. പശ്ചിമഘട്ടമലനിരകളിലെ അവശേഷിക്കുന്ന അപൂര്‍വജൈവജാതികളുടെയും പക്ഷിമൃഗാദികളുടെയും ആവാസവ്യവസ്ഥയും ഇവിടെയാണ്. ഇതെല്ലാം തകര്‍ത്തും കനത്ത പാരിസ്ഥിതിക ആഘാതത്തിന് ഇടയാക്കിയും നടപ്പാക്കുന്ന പദ്ധതി ഒരുതരത്തിലും അനുവദിക്കാന്‍ കഴിയില്ലെന്നും വനസമ്പത്ത് ഇല്ലാതാക്കാന്‍ ശ്രമിച്ചാല്‍ എന്തുവിലകൊടുത്തും തടയുമെന്നും ജില്ലാ പ്രസിഡന്‍റ് ബിനോയ് ഷബീര്‍, സെക്രട്ടറി പ്രസാദ് പറേരി എന്നിവര്‍ പത്രക്കുറിപ്പിൽ അറിയിച്ചു.

അതിരപ്പിള്ളി പദ്ധതി നടപ്പിലാക്കാൻ അനുവദിക്കില്ല: എഐവൈഎഫ്

ചാലക്കുടി: വിനോദസഞ്ചാരസാധ്യതകളുടെ മറവിൽ അതിരപ്പിള്ളി ജലവൈദ്യുതപദ്ധതി നടപ്പാക്കാനുള്ള സർക്കാർ നീക്കം അനുവദിക്കില്ലെന്ന് എഐവൈഎഫ് ചാലക്കുടി മണ്ഡലം കമ്മിറ്റി. ലോകനിലവാരമുള്ള ടൂറിസം കേന്ദ്രമാക്കി അതിരപ്പിള്ളിയെ മാറ്റുമെന്ന് പ്രഖ്യാപിച്ചുകൊണ്ടാണ് തീവ്രമായ പരിസ്ഥിതിപ്രശ്നങ്ങൾ സൃഷ്ടിക്കുന്നതും ജനങ്ങളുടെ ആവാസവ്യവസ്ഥയ്ക്കും ഉപജീവനമാര്‍ഗത്തിനുമെതിരേ കനത്ത വെല്ലുവിളി ഉയർത്തുന്നതുമായ പദ്ധതിക്ക് കെഎസ്ഇബി നീക്കംനടത്തുന്നത്. പാരമ്പര്യേതര ഊര്‍ജപദ്ധതികളില്‍നിന്നുവേണ്ട വൈദ്യുതി ഉത്പാദിപ്പിക്കാന്‍ കഴിയുമെന്നിരിക്കെ, വനമേഖലയെ പാടെതകര്‍ക്കുന്ന പദ്ധതിയുമായി മുന്നോട്ടുപോകുന്നത് അംഗീകരിക്കാൻ കഴിയില്ലെന്നു എഐവൈഎഫ് മണ്ഡലം പ്രസിഡന്‍റ് പി.സി. സജിത്ത്, സെക്രട്ടറി എം.ഡി. പ്രവീൺ എന്നിവർ പ്രസ്താവനയിൽ അറിയിച്ചു. പദ്ധതി നടത്തിപ്പിലൂടെ 163 മെഗാവാട്ട് വൈദ്യുതി ഉത്പാദിപ്പിക്കാനാവുമെന്ന് കെഎസ്ഇബി അവകാശപ്പെടുന്നുണ്ടെങ്കിലും അതിന്‍റെ പകുതിപോലും ഉത്പാദിപ്പിക്കാനുള്ള വെള്ളം ചാലക്കുടിപ്പുഴയില്‍ നിലവില്‍ ഇല്ലെന്നതാണ് വസ്തുത. സംസ്ഥാനത്തിന്‍റെ വൈദ്യുതി ആവശ്യത്തിന്‍റെ ഒരുശതമാനംപോലും നിറവേറ്റാന്‍ നിര്‍ദിഷ്ട അതിരപ്പിള്ളി പദ്ധതിക്കാവില്ലെന്നും പഠനങ്ങൾ തെളിയിച്ചിട്ടുണ്ട്. വൈദ്യുതപദ്ധതി നടപ്പാക്കാനുദ്ദേശിക്കുന്ന സ്ഥലത്ത് ആദിവാസികളുടെ സാമൂഹിക വനാവകാശം നിലവിലുണ്ടന്ന റിപ്പോര്‍ട്ട് മുൻപ് പുറത്തുവന്നിരുന്നു. വനപ്രദേശത്ത് പദ്ധതി നടപ്പിലാക്കുന്നതിനുവേണ്ടി എടുക്കേണ്ട പ്രാഥമികകാര്യങ്ങള്‍പോലും അതിരപ്പിള്ളിപദ്ധതിയുടെ കാര്യത്തിലുണ്ടായിട്ടുമില്ല. ഇടതുമുന്നണിയുടെ പ്രഖ്യാപിതനയത്തിന് വിരുദ്ധമായതിനാൽ മുൻപ് ഉപേക്ഷിച്ച പദ്ധതി നടപ്പാക്കാനുളള നീക്കം അനുവദിക്കാനാവില്ലെന്നും എന്തുവില കൊടുത്തും ചെറുക്കുമെന്നും പ്രസ്താവനയിൽ പറയുന്നു.

ചെട്ടിക്കാട് തീർഥാടനകേന്ദ്രത്തിൽ തിരുശേഷിപ്പുപ്രദക്ഷിണം ഭക്തിസാന്ദ്രം

കൊടുങ്ങല്ലൂർ: ചെട്ടിക്കാട് തീർഥാടനകേന്ദ്രത്തിൽ വിശുദ്ധ അന്തോണീസിന്‍റെ തിരുശേഷിപ്പുപ്രദക്ഷിണം ഭക്തിസാന്ദ്രമായി. മേയ് 13-നു നടക്കുന്ന ചരിത്രപ്രസിദ്ധമായ ഊട്ടുതിരുനാളിന് ഒരുക്കമായുള്ള നവനാൾചൊവ്വയുടെ സമാപനത്തോടനുബന്ധിച്ച്, 1975-ൽ ഡോ. ജോസഫ് കേളന്തറ പ്രതിഷ്ഠ നടത്തിയ വിശുദ്ധ അന്തോണീസിന്‍റെ അഴുകാത്ത നാവിന്‍റെ തിരുശേഷിപ്പ് പേടകത്തിൽനിന്ന് പുറത്തെടുത്ത് പ്രദക്ഷിണമായി പൊതുവണക്കത്തിനായി കൊണ്ടുവന്നതു വിശ്വാസികൾക്ക് ആത്മീയഅനുഭവം പകർന്നു. രാവിലെ 6.15 മുതൽ വൈകീട്ട് 6.30 വരെ തുടർച്ചയായി ദിവ്യബലി, നൊവേന, ആരാധന, തിരുശേഷിപ്പ് പ്രദക്ഷിണം എന്നിവ നടന്നു. തിരുക്കർമങ്ങളിൽ പങ്കെടുക്കുന്നതിനും തിരുശേഷിപ്പുകൾ വണങ്ങുന്നതിനും അദ്ഭുതരൂപം ദർശിക്കുന്നതിനും പൊൻനാവ് നേർച്ചയ്ക്കും അടിമസമർപ്പണത്തിനും അയൽസംസ്ഥാനങ്ങളിൽനിന്നടക്കം തീർഥാടകരുടെ വൻതിരക്കാണ് അനുഭവപ്പെട്ടത്.

ദേശീയപാത വികസനം: സുരക്ഷയില്ല; ചിറങ്ങരയിൽ കാർ കുഴിയിലേക്ക്

കൊരട്ടി: ദേശീയപാത വികസനത്തിന്‍റെ ഭാഗമായി നിർമാണപ്രവൃത്തികൾ നടക്കുന്ന ചിറങ്ങരയിൽ കാർ നിയന്ത്രണംവിട്ട് കുഴിയിലേക്കുമറിഞ്ഞു. സുരക്ഷാ മുന്നൊരുക്കമില്ല എന്ന പ്രദേശവാസികളുടെ ആവർത്തിച്ചുള്ള പരാതികൾ ശരിവയ്ക്കുന്നതായിരുന്നു തിങ്കളാഴ്ച രാത്രി 9.30 മണിയോടെ ചിറങ്ങര ജംഗ്ഷനിൽ സംഭവിച്ചത്. ഒരു സ്പാനിലുള്ള അടിപ്പാതയുടെ ഇരുഭാഗവും മണ്ണിട്ട് നികത്തുന്നതിനു മുന്നോടിയായി പ്രികാസ്റ്റ് കോൺക്രീറ്റ് റീടെയ്ൻ വാൾ നിർമിക്കുന്നതിനായി എടുത്ത കുഴിയിലേക്കാണ് കാർ മറിഞ്ഞത്. ചാലക്കുടി ഭാഗത്തേക്ക് വരുന്നതിനിടെയാണ് അപകടം. സംരക്ഷണഭിത്തി നിർമിക്കുന്നതിനായി എടുത്ത കുഴിക്കും വാഹനങ്ങൾ കടന്നുപോകുന്ന സമാന്തര റോഡിനും ഇടയിൽ സുരക്ഷാ റിബൺ മാത്രമാണ് അപകടസൂചന നൽകുന്നത്. പ്രദേശത്തെ വെളിച്ചക്കുറവും അപകടത്തിനു വഴിവയ്ക്കുമെന്ന് പലവട്ടം എൻഎച്ച്എഐ, നിർമാണകമ്പനി, കളക്ടർ അടക്കമുള്ളവരെ അറിയിച്ചിട്ടും സുരക്ഷാക്രമീകരണങ്ങളൊരുക്കാൻ നടപടി സ്വീകരിച്ചില്ലെന്നാണ് നാട്ടുകാർ പറയുന്നത്. കാർ താഴ്ചയിലേക്ക് പതിച്ചെങ്കിലും യാത്രികർ പരിക്കേൽക്കാതെ രക്ഷപ്പെട്ടു എന്നതുമാത്രമാണ് ഒരു ആശ്വാസം.

അഞ്ച് റോഡുകളുടെ നിര്‍മാണോദ്ഘാടനം

കാറളം: പഞ്ചായത്തിലെ അഞ്ച് റോഡുകളുടെ നിര്‍മാണോദ് ഘാടനം മന്ത്രി ആര്‍. ബിന്ദു നിര്‍വഹിച്ചു. ഇരിങ്ങാലക്കുട മണ്ഡലത്തിലെ നഗരസഭയിലും ഏഴ് ഗ്രാമപ്പഞ്ചായത്തുകളിലുമായി തകര്‍ന്ന 30 റോഡുകള്‍ക്കായി 8.39 കോടി രൂപയാണ് പുനരുദ്ധാരണത്തിനായി അനുവദിച്ചത്. കാറളം ഗ്രാമപ്പഞ്ചായത്തിലെ എകെജി പുഞ്ചപ്പാടം റോഡ് 16 ലക്ഷം, ഐഎച്ച്ഡിപി കോളനി റോഡ് 20 ലക്ഷം, ചെമ്മണ്ട കോളനി റോഡ് 15 ലക്ഷം, മനപ്പടി വെട്ടിക്കര റോഡ് 17 ലക്ഷം, ഹെല്‍ത്ത് സബ് സെന്‍റര്‍ താണിശേരി റോഡ് 15 ലക്ഷം എന്നീ റോഡുകളുടെ പുനരുദ്ധാരണത്തിന്‍റെ നിര്‍മാണോദ്ഘാടനമാണ് മന്ത്രി നിര്‍വഹിച്ചത്. നന്തി ഐഎച്ച്ഡിപി റോഡ് പരിസരത്തുനടന്ന ഉദ്ഘാടനച്ചടങ്ങില്‍ കാറളം പഞ്ചായത്ത് പ്രസിഡന്‍റ് ബിന്ദു പ്രദീപ് അധ്യക്ഷതവഹിച്ചു. കാറളം ഗ്രാമപ്പഞ്ചായത്ത് സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ ബീന സുബ്രഹ്മണ്യന്‍, ബ്ലോക്ക് പഞ്ചായത്ത് മെമ്പര്‍ മോഹനന്‍ വലിയാട്ടില്‍, പഞ്ചായത്ത് മെമ്പര്‍മാരായ സീമ പ്രേംരാജ്, വൃന്ദ അജിത്കുമാര്‍, രജനി നന്ദകുമാര്‍, കാറളം ഗ്രാമപ്പഞ്ചായത്ത് സെക്രട്ടറി കെ.കെ. ഗ്രേസി എന്നിവര്‍ സംസാരിച്ചു.

റോഡ് ഉദ്ഘാടനവും കായികപ്രതിഭകളെ ആദരിക്കലും

അവിട്ടത്തൂര്‍: രാജ്യസഭാംഗം പി.ടി. ഉഷയുടെ പ്രാദേശികവികസന ഫണ്ട് ഉപയോഗിച്ച് പൂര്‍ത്തീകരിച്ച വേളൂക്കര അവിട്ടത്തൂര്‍ തേമാലിത്തറ റോഡിന്‍റെ ഉദ്ഘടനവും കായികപ്രതിഭകളെ ആദരിക്കലും പി.ടി. ഉഷ നിര്‍വഹിച്ചു. 10 ലക്ഷത്തോളം രൂപ ചെലവഴിച്ചാണ് റോഡ് പണി പൂര്‍ത്തീകരിച്ചത്. അവിട്ടത്തൂര്‍ എല്‍ബിഎസ്എം സ്‌കൂളിലെ ഫുട്‌ബോള്‍ ക്ലബിന്‍റെ വികസന കാര്യങ്ങളും ഓങ്ങിച്ചിറ നീന്തല്‍കുളത്തിന്‍റെ പ്രാധാന്യവും ചര്‍ച്ചചെയ്തു. അവിട്ടത്തൂര്‍ തേമാലിത്തറ പരിസരത്തുനടന്ന ചടങ്ങില്‍ വേളൂക്കര പഞ്ചായത്ത് പ്രസിഡന്‍റ് കെ.എസ്. ധനേഷ് അധ്യക്ഷതവഹിച്ചു. വാര്‍ഡ് മെംബര്‍ ശ്യാംരാജ് തെക്കാട്ട്, ആര്‍എസ്എസ് സംസ്ഥാന പ്രാന്ത‌കാര്യവാഹ് പി.എന്‍. ഈശ്വരന്‍, തപസ്യ സംസ്ഥാന സെക്രട്ടറി സി.സി. സുരേഷ്, ക്രൈസ്റ്റ് കോളജ് മാനേ ജർ ഫാ. ജോയ് പീണിക്കപ്പറമ്പില്‍, ബിജെപി സംസ്ഥാന സമിതിയഗം സന്തോഷ് ചെറാകുളം എന്നിവര്‍ സംസാരിച്ചു.

മേത്തലയിൽ തെരുവുനായ് ആക്രമണം: വൃദ്ധയുടെ ചെവി കടിച്ചുകീറി

കൊടുങ്ങല്ലൂർ: മേത്തലയിൽ തെരുവുനായയുടെ ആക്രമണത്തില്‌ മൂന്നുപേർക്ക് പരിക്കേറ്റു. വയോധികയുടെ ചെവി കടിച്ചെടുത്തു. ചാമയ്ക്കൽ സോമന്‍റെ ഭാര്യ ലളിത(70), തേവാലിൽ പ്രദീപ്(65), കിഴ്ത്തോളി കളരിക്കൽ കൃഷ്ണവേദി(36) എന്നിവർക്കാണ് കടിയേറ്റത്. കടുക്കച്ചുവ് ശാസ്ത്രാംപറമ്പിൽ ഇന്നലെ വൈകിട്ടാണ് സംഭവം. വീട്ടുമുറ്റത്തുനിന്ന പ്രദീപിനെയാണ് നായ ആദ്യം ആക്രമിച്ചത്. പരിസരവാസിയായ ലളിത നായയെ തുരത്തിയൊടിക്കാൻ ശ്രമിക്കുന്നതിനിടയിലാണ് കടിയേറ്റത്. നായയുടെ ആക്രമണത്തിൽ ലളിതയുടെ ചെവി രണ്ടായി മുറിഞ്ഞു. കമ്മൽ നായ കൊണ്ടുപോയതായി ലളിത പറഞ്ഞു. പരിക്കേറ്റ ലളിതയെ ഗവ. ആശുപത്രിയിൽ പ്രാഥമികശുശ്രൂഷ നൽകിയശേഷം തൃശൂർ മെഡിക്കൽ കോളജ് ആശുപത്രിയിലേക്ക് കൊണ്ടുപോയി.

മൊബൈൽ വെറ്ററിനറി യൂണിറ്റുകള്‌ക്ക് അനുമതി

ചാലക്കുടി: വെറ്ററിനറി ആശുപത്രിക്കുകീഴിൽ മൊബൈൽ വെറ്ററിനറി യൂണിറ്റ് ആരംഭിക്കുന്നതിനുള്ള അനുമതി ലഭ്യമായതായി സനീഷ്‌കുമാർ ജോസഫ് എംഎൽഎ അറിയിച്ചു. മൃഗസംരക്ഷണമേഖലയിലെ കർഷകർക്ക് ആശ്വാസമായി വീട്ടുപടിക്കൽ മൃഗചികിത്സ ലഭ്യമാക്കുകയാണ് പദ്ധതിയുടെ ലക്ഷ്യം. ചാലക്കുടി ബ്ലോക്ക് പഞ്ചായത്തുപരിധിയിലാണ് യൂണിറ്റിന്‍റെ സേവനങ്ങൾ ലഭ്യമാവുക. നിശ്ചിതനിരക്കിൽ കന്നുകാലികൾക്കുള്ള ചികിത്സ, അരുമമൃഗങ്ങൾക്കുള്ള ചികിത്സ, കന്നുകാലികളിലെ കൃത്രിമ ബീജദാനം, പ്രസവസംബന്ധമായ സേവനം തുടങ്ങിയവയാണ് പ്രധാന സേവനങ്ങൾ. വെറ്ററിനറി ഡോക്ടർ, ഡ്രൈവർ കം അറ്റൻഡർ എന്നിവരെ ഈ യൂണിറ്റിന്‍റെ പ്രവർത്തനങ്ങൾക്കായി നിയമിക്കുമെന്നു എംഎൽഎ അറിയിച്ചു. വൈകീട്ട് ആറുമുതൽ രാവിലെ അഞ്ചുവരെയുള്ള മൊബൈൽ വെറ്ററിനറി യൂണിറ്റിന്‍റെ സേവനങ്ങൾക്കായി 1962 എന്ന ടോൾഫ്രീ നമ്പർ മുഖേനയാണ് കർഷകർ ബന്ധപ്പെടേണ്ടതെന്നും എംഎൽഎ അറിയിച്ചു. കേന്ദ്രീകൃത നിരീക്ഷണസംവിധാനം ഉപയോഗിച്ച് പദ്ധതി അവലോകനംചെയ്യും. ഇരിങ്ങാലക്കുട: മണ്ഡലത്തിലെ മൃഗപരിപാലന രംഗത്തിന് കുതിപ്പേകി പുതിയ മൊബൈല്‍ വെറ്ററിനറി യൂണിറ്റ്. ഇരിങ്ങാലക്കുട വെറ്ററിനറി പോളി ക്ലിനിക്കില്‍ പുതിയ മൊബൈല്‍ വെറ്ററിനറി യൂണിറ്റ് അനുവദിച്ചതായി മന്ത്രി ആര്‍. ബിന്ദു പറഞ്ഞു. സംസ്ഥാനത്താകെ അനുവദിച്ച 47 പുതിയ മൊബൈല്‍ വെറ്ററിനറി യൂണിറ്റുകളില്‍ ഒന്നാണ് ഇരിങ്ങാലക്കുട ബ്ലോക്കില്‍ ഉള്‍പ്പെട്ട വെറ്റിനറി പോളിക്ലിനിക്കിന് ലഭിച്ചിരിക്കുന്നതെന്നും മന്ത്രി ബിന്ദു പറഞ്ഞു. തന്‍റെ ഉരുവിന് ചികിത്സവേണ്ട അടിയന്തരസാഹചര്യം വന്നാല്‍ കര്‍ഷകന് 1962 എന്ന നമ്പറില്‍ ബന്ധപ്പെടാം. മൃഗചികിത്സയ്ക്ക് വാഹനവും ഡോക്ടറും കര്‍ഷകന്‍റെ വീട്ടുപടിയ്ക്കല്‍ ലഭ്യമാവും. ഇരിങ്ങാലക്കുടയുടെ സമഗ്ര കാര്‍ഷിക വികസനപദ്ധതിയായ പച്ചക്കുടയ്ക്ക് വലിയ പ്രോത്സാഹനമാകും മൊബൈല്‍ യൂണിറ്റ്.

ദേവാലയങ്ങളില്‍ തിരുനാള്‍

വെള്ളാങ്കല്ലൂര്‍: സെന്‍റ് ജോസഫ് ദേവാലയത്തില്‍ വിശുദ്ധ യൗസേപ്പിതാവിന്‍റെ മധ്യസ്ഥതിരുനാളും വിശുദ്ധ സെബസ്ത്യാനോസിന്‍റെ അമ്പുതിരുനാളും ഇന്നും നാളെയും ആഘോഷിക്കും. തിരുനാളിന്‍റെ കൊടിയേറ്റുകര്‍മം പുത്തന്‍ചിറ ഫൊറോന പള്ളി വികാരി ഫാ. ബിനോയ് പൊഴോലിപറമ്പില്‍ നിര്‍വഹിച്ചു. ഇന്ന് രാവിലെ ഏഴിന് ദിവ്യബലി, ലദീഞ്ഞ്, നൊവേന, രൂപം എഴുന്നള്ളിച്ചുവയ്ക്കല്‍. തിരുകര്‍മങ്ങള്‍ക്ക് വികാരി ഫാ. ഷെറന്‍സ് എളംതുരുത്തി മുഖ്യകാര്‍മികത്വംവഹിക്കും. തുടര്‍ന്ന് അമ്പ്, വള വെഞ്ചിരിപ്പ്, രൂപം പന്തലിലേക്ക് എഴുന്നള്ളിപ്പ്, വീടുകളിലേക്ക് പട്ടുകുടകളുടെ അകമ്പടിയോടെ അമ്പെഴുന്നള്ളിപ്പ്. രാത്രി ഒമ്പതിന് യൂണിറ്റുകളില്‍ നിന്നുള്ള അമ്പെഴുന്നള്ളിപ്പുകള്‍ പള്ളിയില്‍ എത്തിച്ചേരും. തിരുനാള്‍ദിനമായ നാളെ രാവിലെ 10ന് ആഘോഷമായ തിരുനാള്‍ ദിവ്യബലിക്ക് രൂപത വികാരി ജനറാള്‍ മോണ്‍ ജോളി വടക്കന്‍ മുഖ്യകാര്‍മികത്വംവഹിക്കും. വൈകീട്ട് അഞ്ചിന് തിരുനാള്‍ പ്രദക്ഷിണം ആരംഭിച്ച് ഏഴിന് സമാപിക്കും. തുടര്‍ന്ന് വര്‍ണമഴ. മെയ് രണ്ടിന് സകല മരിച്ചവര്‍ക്കും വേണ്ടിയുള്ള ഓര്‍മദിനത്തില്‍ രാവിലെ 6.30ന് ദിവ്യബലി, സെമിത്തേരിയില്‍ പൊതു ഒപ്പീസ് എന്നിവ ഉണ്ടായിരിക്കും.

വണികവൈശ്യ മഹിളാ ഫെഡറേഷന്‍ പ്രവര്‍ത്തനങ്ങള്‍ ശ്ലാഘനീയം: തോമസ് ഉണ്ണിയാടന്‍

ഇരിങ്ങാലക്കുട: കേരള വണികവൈശ്യ മഹിളാ ഫെഡറേഷന്‍ പ്രവര്‍ത്തനങ്ങള്‍ ശ്ലാഘനീയമാണെന്ന് തോമസ് ഉണ്ണിയാടന്‍ പറഞ്ഞു. കേരള വണിക വൈശ്യ മഹിളാ ഫെഡറേഷന്‍ തൃശൂര്‍ ജില്ലാ ക്യാമ്പും സെമിനാറും ഇരിങ്ങാലക്കുടയില്‍ ഉദ്ഘാടനംചെയ്തു സംസാരിക്കുകയായിരുന്നു അദ്ദേഹം. പിന്നാക്കവികസന കമ്മീഷന്‍റെ മൈക്രോ ക്രെഡിറ്റ് പദ്ധതിയില്‍ കെവിവിഎംഎഫിനെ ഉള്‍പ്പെടുത്തണമെന്ന് ക്യാമ്പ് അംഗീകരിച്ച പ്രമേയം ആവശ്യപ്പെട്ടു. ജില്ലാ പ്രസിഡന്‍റ് വിജയലക്ഷ്മി ചേനോത്തുപറമ്പില്‍ അധ്യക്ഷതവഹിച്ചു. കെവിവിഎസ് സംസ്ഥാന പ്രസിഡന്‍റ് എസ്. കുട്ടപ്പന്‍ ചെട്ടിയാര്‍, ജില്ലാ പ്രസിഡന്‍റ് എം.കെ. സേതുമാധവന്‍, കെവിവിഎംഎഫ് സംസ്ഥാന പ്രസിഡന്‍റ് അനന്തലക്ഷ്മി എന്നിവര്‍ പ്രസംഗിച്ചു.

സ്‌കൂള്‌‍ പ്ലാറ്റിനം ജൂബിലി ആഘോഷം

കടുപ്പശേരി: എസ്എച്ച്എല്‍പി സ്‌കൂളിന്‍റെ പ്ലാറ്റിനംജൂബിലി ആഘോഷം മന്ത്രി ആര്‍. ബിന്ദു ഉദ്ഘാടനംചെയ്തു. ബിഷപ് മാര്‍ പോളി കണ്ണൂക്കാടന്‍ അധ്യക്ഷത വഹിച്ചു. ജില്ലാ പഞ്ചായത്തംഗം പി.കെ. ഡേവിസ്, സ്‌കൂള്‍ മാനേജര്‍ ഫാ. ജോമിന്‍ ചെരടായി, രൂപത കോര്‍പറേറ്റ് മാനേജര്‍ ഫാ. സീജോ ഇരിമ്പന്‍, ബ്ലോക്ക് പഞ്ചായത്തംഗം ടെസി ജോയ് കൊടിയന്‍, പഞ്ചായത്തംഗം ഷീബ നാരായണന്‍, മുന്‍ വികാരി ഫാ. റോബിന്‍ പാലാട്ടി, കണ്‍വീനര്‍ പ്രഫ. കെ.ആര്‍. വര്‍ഗീസ് എന്നിവര്‍ പ്രസംഗിച്ചു.

തെറ്റായ പ്രവണതകൾക്കെതിരേ കായികപ്രതിരോധം ലക്ഷ്യം: മന്ത്രി

മതിലകം: അഖിലേന്ത്യാ വോളിബോൾ ടൂർണമെന്‍റിനോടനുബന്ധിച്ച് കായിക സംവാദം സംഘടിപ്പിച്ചു. കായികമന്ത്രി വി. അബ്ദുറഹ്മാൻ ഉദ്ഘാടനംചെയ്തു. പുതുതലമുറകളിൽ കാണുന്ന തെറ്റായപ്രവണതകൾക്കെതിരേ കായിക പ്രതിരോധമാണ് സർക്കാർ ലക്ഷ്യമെന്ന് മന്ത്രി പറഞ്ഞു. അഖിലേന്ത്യാ വോളിബോളിന്‍റെ അനുബന്ധമായിനടന്ന മിനി മത്സരത്തിലെ വിജയികൾക്ക് മന്ത്രി ട്രോഫികൾ വിതരണംചെയ്തു. ഇ.ടി. ടൈസൺ എംഎൽഎ അധ്യക്ഷത വഹിച്ചു. പഞ്ചായത്ത് പ്രസിഡന്‍റുമാരായ സീനത്ത് ബഷീർ, എം.എസ്. മോഹനൻ, മതിലകം ബ്ലോക്ക് പഞ്ചായത്തംഗം ഷീജ ബാബു, സ്പോർട്സ് കൗൺസിൽ പ്രസിഡന്‍റ് സാംബശിവൻ, പി.എച്ച്. നിയാസ്, വി.കെ. മുജീബ് റഹ്മാൻ എന്നിവർ പങ്കെടുത്തു.

പോഴങ്കാവ് ഫെസ്റ്റ്

കൊടുങ്ങല്ലൂർ: രാസലഹരിക്കെതിരേ പോഴങ്കാവ് യുവജനസമിതിയുടെ നേതൃത്വത്തിൽ പോഴങ്കാവ് ഫെസ്റ്റ് സംഘടിപ്പിക്കുന്നു. ഇന്നുമുതൽ മേയ് ആറു വരെയാണ് ഫെസ്റ്റ്. 'അരികിലുണ്ട് ലഹരി അതിനെതിരേ കരുതലായി നമ്മളും' എന്ന സന്ദേശവുമായി ലഹരിവിരുദ്ധ കൂട്ടായ്മയും സൈക്കിൾറാലിയും ലഹരി വിരുദ്ധ സത്യപ്രതിജ്ഞയുംനടത്തും. ലോഗോ മന്ത്രി റോഷി അഗസ്റ്റിനും സമ്മാന കൂപ്പൺ മന്ത്രി കെ. രാജനും പ്രകാശിപ്പിച്ചു. ഇന്നു അഞ്ചിന് ശ്രീനാരായണ സെന്‍ററിൽനിന്ന് പോഴങ്കാവിലേക്ക് ഘോഷയാത്ര നടത്തും. തുടർന്ന് ഇ.ടി. ടൈസൺ എംഎൽഎ ഫെസ്റ്റ് ഉദ്ഘാടനംചെയ്യo. തുടര്‌ന്നു വയലിൻ ഫ്യൂഷൻ നടക്കും. തുടർന്നുള്ള ദിവസങ്ങളിൽ ഫോക്ക് ബാൻഡ്, പ്രാദേശിക കലാകാരന്മാരുടെ പരിപാടികൾ, മെഗാഷോ, ഗാനമേള എന്നിവയുണ്ടാകും. ഇതിനോടെപ്പം അമ്യുസ്മെന്‍റ് പാർക്ക്, ഫുഡ്കോർട്ട് എന്നിവയുമൊരുക്കിയിട്ടുണ്ട്.

ചാന്താട്ടത്തിനു വൻ ഭക്തജനത്തിരക്ക്

കൊടുങ്ങല്ലൂർ: ശ്രീകുരുംബഭഗവതി ക്ഷേത്രത്തില്‌ ചാന്താട്ടം ഭക്തിസാന്ദ്രമായി. കുന്നത്തുമഠം പരമേശ്വരനുണ്ണി അടികള്‌ മുഖ്യകാർമികത്വംവഹിച്ചു. ചാന്താട്ടത്തിന് വന്‍ ഭക്തജനത്തിരക്കാണ് അനുഭവപ്പെട്ടത്. ഇന്നലെ ദാരുബിംബത്തിൽനിന്നു അഴിച്ചുമാറ്റിയ തിരുവാഭരണങ്ങൾ കർക്കിടകം ഒന്നിന് മാത്രമേ ഭഗവതിവിഗ്രഹത്തിൽ ചാർത്തുകയുള്ളൂ. ചടങ്ങിന് കൊച്ചിൻ ദേവസ്വം ബോർഡ് സെക്രട്ടറി പി. ബിന്ദു, ഡെപ്യൂട്ടി കമ്മീഷണർ സുനിൽ കർത്താ, അസിസ്റ്റന്‍റ് കമ്മീഷണർ എം.ആർ. മിനി, ദേവസ്വം മാനേജർ കെ. വിനോദ് എന്നിവർ നേതൃത്വംനൽകി.

സ്കൂട്ടറും ബൈക്കും തീവച്ച് നശിപ്പിച്ച കേസിലെ പ്രതി അറസ്റ്റിൽ

കയ്പമംഗലം: ശ്രീനാരായണപുരം ആലയിൽ യുവാവിന്‍റെ വീട്ടിൽ നിർത്തിയിട്ടിരുന്ന ഇലക്ട്രിക് സ്കൂട്ടറും ബുള്ളറ്റും തീവച്ച് നശിപ്പിച്ച കേസിലെ പ്രതിയെ അറസ്റ്റ് ചെയ്തു. ആല ദുർഗാനഗർ സ്വദേശി ചൂരപ്പെട്ടിവീട്ടിൽ ഷാംജിത്തി(29)നെയാണ് മതിലകം പോലീസ് അറസ്റ്റ് ചെയ്തത്. ഇക്കഴിഞ്ഞ 27 നാണ് ആല സ്വദേശി നാലുമാക്കൽവീട്ടിൽ അക്ഷയിന്‍റെ വീട്ടിലെ പോർച്ചിൽ വച്ചിരുന്ന ബുള്ളറ്റും സ്കൂട്ടറും തീവച്ച് നശിപ്പിച്ചത്. ആല അമ്പലത്തിലെ ഉത്സവത്തിനിടെ ഷാംജിത്തും ശ്രീക്കുട്ടനും തമ്മിലുണ്ടായ തർക്കത്തിൽ ശ്രീക്കുട്ടന്‍റെ കൂട്ടുകാരനായ അക്ഷയ് ഇടപെട്ടതുമൂലമുള്ള വൈരാഗ്യത്താലാണ് അക്ഷയുടെ വീടിന്‍റെ പോർച്ചിലേക്ക് അതിക്രമിച്ചുകയറി ഏഴുലക്ഷം രൂപയോളം വിലവരുന്ന ബുള്ളറ്റും ഇലക്ട്രിക് സ്കൂട്ടറും കത്തിച്ചതെന്ന് പോലീസ് പറഞ്ഞു. ഷാംജിത്തിനെതിരെ കൊടുങ്ങല്ലൂർ പോലീസ് സ്റ്റേഷനിൽ ഒരു വധശ്രമകേസുണ്ട്. മതിലകം ഇൻസ്പെക്ടർ എം.കെ. ഷാജിയും സംഘവുമാണ് പ്രതിയെ അറസ്റ്റ് ചെയ്തത്. തെളിവെടുപ്പിനുശേഷം പ്രതിയെ കോടതിയിൽ ഹാജരാക്കി.

കാറ്റ്, മഴ: ചിറ്റണ്ടയിലും വരവൂരിലും വ്യാപകനാശം

എരുമപ്പെട്ടി: തിങ്കളാഴ്ച രാത്രിയിൽ ഉണ്ടായ ശക്തമായ കാറ്റിലും മഴയിലും ചിറ്റണ്ട പൂങ്ങോട് പ്രദേശങ്ങളിൽ വ്യാപക നാശം. മരങ്ങൾ റോഡിലേക്ക് പൊട്ടി വീണും വീടിനു മുകളിലേക്ക് കടപുഴകി വീണുമാണ് നാശം സംഭ വിച്ചിരിക്കുന്നത്. ചിറ്റണ്ട തലശേരി റോഡിൽ സ്വകാര്യ വ്യക്തിയുടെ പറമ്പിലെ തേക്കുമരം പൊട്ടിവീണ് ഗതാഗതം തടസപ്പെട്ടു. നാട്ടുകാരുടെ നേതൃത്വത്തിൽ മരം‌ മുറിച്ചുനീക്കി ഗതാഗതം പുനഃസ്ഥാപിച്ചു. ചിറ്റണ്ട വടക്കേക്കര പ്രകാശന്‍റെ വീടിനുമുകളിലേക്ക് മാവിന്‍റെ കൊമ്പ് പൊട്ടിവീണ് വീടിന്‍റെ ഒരു വശവും ശൗചാലയവും തകർന്നു. ചിറ്റണ്ട പാക്കത്ത് സിന്ധുവിന്‍റെ പറമ്പിലെ മരം കടപുഴകി വീണു. വരവൂരിൽ 400 നേന്ത്രവാഴകൾ ഒടിഞ്ഞുവീണു എരുമപ്പെട്ടി: ശക്തമായ കാറ്റിലും മഴയിലും വരവൂരിൽ വൻ കൃഷിനാശം. വരവൂർ നീർക്കോലി മുക്കിലെ വാഴത്തോട്ടത്തിലെ 400 നേന്ത്രവാഴകൾ ഒടിഞ്ഞുവീണു. വരവൂർ ആവശേരി വീട്ടിൽ വിജയകുമാറിന്‍റെ വാഴത്തോട്ടത്തിലാണു വ്യാപക നാശനഷ്ടമുണ്ടായത്. കഴിഞ്ഞ ദിവസമുണ്ടായ മഴയിലും കാറ്റിലും 400 ചെങ്ങാലിക്കോടൻ നേന്ത്രവാഴകളാണ് ഒടിഞ്ഞുവീണത്. വരുന്ന ഓണത്തിന് വിളവെടുക്കാനുള്ള വാഴകളാണു നശിച്ചത്. പ്രവാസിയായിരുന്ന വിജയകുമാർ 15 വർഷം മുമ്പാണു നാട്ടിൽ സ്ഥിരതാമസമാക്കിയത്. ഇതിനുശേഷം പ്രധാന വരുമാനമാർഗം വാഴകൃഷിയാണ്. ശാസ്‌ത്രീയമായി കൃഷി ചെയ്യുന്നതിനാൽ മികച്ച വിളവാണ് ലഭിക്കാറുള്ളത്. 1500 രൂപ വിലയ്ക്കാണ് ഓണക്കുലകൾ വിൽക്കാറുള്ളതെന്നും ഏകദേശം മൂന്നരലക്ഷം രൂപയുടെ നഷ്ടം കണക്കാക്കുന്നതായും വിജയകുമാർ പറയുന്നു. സ്ഥലം പാട്ടത്തിനെടുത്തും ചെലവിനുവരുന്ന തുക വായ്പയെടുത്തുമാണ് വിജയകുമാർ കൃഷി ചെയ്യുന്നത്. കൃഷിഭവനുമായി ബന്ധപ്പെട്ട് സർക്കാരിൽ നിന്ന് ധനസഹായം ലഭിക്കാൻ നടപടി സ്വീകരിക്കുമെന്ന് വരവൂർ പഞ്ചായത്ത് വൈസ് പ്രസിഡന്‍റ് കെ.കെ. ബാബു അറിയിച്ചു. പഞ്ചായത്തംഗങ്ങളായ കെ.ജിഷ, വി.കെ. സേതുമാധവൻ, കൃഷി അസിസ്റ്റന്‍റുമാരായ പി. രജനി, കെ.എച്ച്. ഹരിപ്രിയ എന്നിവർ തോട്ടത്തിൽ സന്ദർശനം നടത്തി റിപ്പോർട്ട് തയാറാക്കി.

മേയ്ദിനത്തില്‍ ലഹരി വിരുദ്ധ മാരത്തണ്‍ സംഘടിപ്പിക്കും

ഒല്ലൂര്‍: മേയ് ദിനത്തില്‍ ഫൈഡെസ് കണ്ണാശുപത്രിയുടെ നേതൃത്വത്തില്‍ ലഹരിവിരുദ്ധ മാരത്തണ്‍ സംഘടിപ്പിക്കുന്നു. നാളെ ആശുപത്രിയുടെ മുന്നില്‍‌ രാവിലെ എഴിന് ഒല്ലൂര്‍ എസിപി എസ്പി സുധീരന്‍ ഫ്‌ളാഗ് ഓഫ് ചെയ്യും. തുടര്‍ന്നു പടവരാട് ഒല്ലുര്‍ പോലീസ് സ്റ്റേഷന്‍, ഒല്ലൂര്‍ സെന്‍റര്‍വഴി ആശുപത്രിയുടെ മുന്നില്‍ സമാപിക്കും. ആശുപത്രിയുടെ ഒന്നാം വാര്‍ഷികത്തിന്‍റെ ഭാഗമായി മേയ്മാസം മുഴുവന്‍ ആശുപത്രിയിലെ ചികിത്സകള്‍ക്ക് സൗജന്യനിരക്കുകല്‍ പ്രഖ്യാപിച്ചിട്ടുണ്ട്. ഒന്നാം വാര്‍ഷിക ആഘോഷങ്ങൾ മേയ് 19 ന് മന്ത്രി കെ. രാജന്‍ ഉദ്ഘാടനം ചെയ്യുമെന്നു വാര്‍ത്താസമ്മേളനത്തില്‍ അറിയിച്ചു. ആശുപത്രി മനേജര്‍ എ. സിനോജ് ജോസ്, പാര്‍ട്ട്ണര്‍ വിഷ്ണു ശങ്കര്‍, ആന്‍സന്‍ ആന്‍റോ, കൗണ്‍സിലര്‍ കെ.വി. ക്യഷ്ണവേണി, പിആര്‍ഒ എന്‍.പി. അശ്വതി എന്നിവര്‍ പങ്കെടുത്തു.

കടൽഭിത്തിനിർമാണത്തിനായി കല്ലുമായെത്തിയ ലോറി തടഞ്ഞു; അണ്ടത്തോട് സംഘർഷം

പുന്നയൂർക്കുളം: പഞ്ചായത്തിലെ അണ്ടത്തോട് കടൽഭിത്തി നിർമാണത്തിനായി കല്ലുമായി എത്തിയ ലോറി ജനകീയ സമരസമിതി തടഞ്ഞു; പ്രതിരോധിക്കാൻ എൽഡിഎഫ് പ്രവർത്തകർ എത്തിയതു സംഘർഷത്തിനു കാരണമായി. ശാസ്ത്രീയപഠനം നടത്തിയ ശേഷം കടൽഭിത്തി നിർമിച്ചാൽ മതിയെന്ന നിലപാടിലാണു സമരസമിതി. കടൽഭിത്തി നിർമാണം ആരംഭിച്ചപ്പോൾ നേരത്തെ രണ്ടുതവണ നാട്ടുകാർ ലോറി തടഞ്ഞിരുന്നു. ഇതേത്തുടർന്ന് എംഎൽഎ യോഗം വിളിച്ചെങ്കിലും പരിഹാരമായില്ല. നിർമാണം ആരംഭിച്ച സ്ഥലത്ത് ഭിത്തി കെട്ടി, മറ്റു തീരങ്ങളിൽ ഭിത്തികെട്ടാൻ സർക്കാരിനു നിവേദനം നൽകാമെന്നും പഠനം നടത്താമെന്നും എംഎൽഎ യോഗത്തെ അറിയിച്ചു. എന്നാൽ, ശാസ്ത്രീയപഠനം നടത്തിയ ശേഷം ഭിത്തിനിർമാണം തുടർന്നാൽ മതിയെന്ന നിലപാടിലാണ് തീരവാസികൾ. ഇതിനായി ആക്‌ഷൻ കൗൺസിൽ രൂപീകരിച്ച് ഇറിഗേഷൻ വകുപ്പിന് നിവേദനം നൽകി. പ്രശ്നം പരിഹരിച്ചശേഷമേ ഭിത്തിനിർമാണം നടത്തുകയുള്ളൂവെന്ന് അധികൃതർ സമരക്കാർക്ക് ഉറപ്പുകൊടുത്തിരുന്നു. ഇതിനിടയിലാണ് ഇന്നലെ ഭിത്തി നിർമാണത്തിനായി കല്ലുമായി ലോറി എത്തിയത്. പോലീസെത്തി ഇരുവിഭാഗത്തേയും പിരിച്ചുവിട്ടു.

പച്ചളിപ്പുറത്ത് യുവാവിനെ കൊലപ്പെടുത്താന്‍ ശ്രമിച്ച കേസില്‍ മൂന്നുപേര്‍ അറസ്റ്റില്‍

പുതുക്കാട്: മണ്ണംപേട്ട പച്ചളിപ്പുറത്ത് യുവാവിനെ കൊലപ്പെടുത്താ ന്‍ ശ്രമിച്ച കേസില്‍ മൂന്നുപേര്‍ അറസ്റ്റില്‍. കല്ലൂര്‍ മാവിന്‍ചുവട് സ്വദേശി ജിതിന്‍ലാല്‍, എടതിരിഞ്ഞി പുതുപ്പള്ളി വീട്ടില്‍ നസ്മല്‍, കല്ലൂര്‍ ആതൂര്‍ ചിട്ടിയാട്ട് വീട്ടില്‍ ബിഥുന്‍ എന്നിവരെയാണ് പുതുക്കാട് പോലീസ് അറസ്റ്റ് ചെ യ്തത്. പച്ചളിപ്പുറം സ്വദേശി അറയ്ക്കല്‍ വീട്ടില്‍ വിശാഖിനെ വീട്ടില്‍ അതിക്രമിച്ചുകയറി വെട്ടിക്കൊലപ്പെടുത്താന്‍ ശ്രമിച്ച കേസിലാണ് അറസ്റ്റ്. തിങ്കളാഴ്ച വൈകിട്ടായിരുന്നു സംഭവം. ബിഥുനെതിരെ ഒരു വര്‍ഷം മുമ്പ് വിശാഖ് പോലീസില്‍ പരാതി നല്‍കിയതിന്‍റെ വൈരാഗ്യമാണ് ആക്രമണത്തിനു പിന്നിലെന്ന് പോലീസ് പറഞ്ഞു. എസ്‌ഐമാരായ എന്‍. പ്രദീപ്, ലിയാസ്, സിവില്‍ പോലീസ് ഓഫീസര്‍മാരായ നിഥീഷ്, പ്രശാന്ത് എന്നിവര്‍ ചേര്‍ന്നാണ് അറസ്റ്റുചെയ്തത്.

അതിരൂപതാദിനം: പന്തലിനു കാൽനാട്ടി

കണ്ടശാംകടവ്: സെന്‍റ് മേരീസ് നേറ്റിവിറ്റി ഫൊറോന പള്ളിയിൽ മേയ് 20ന് നടക്കാനിരിക്കുന്ന തൃശൂർ അതിരൂപത ദിനാഘോഷത്തിന്‍റെയും 15, 16, 17, 18 തിയതിക ളിൽ ഫാ. ഡേവിസ് പട്ടത്ത് സി എം‌ഐ ജെറുസലേം ടീം നയിക്കുന്ന ബൈബിൾ കണ്‍വൻഷന്‍റെയും ഭാഗമായി ഒരുക്കുന്ന പന്തലിന്‍റെ കാൽനാട്ടുകർമം തൃശൂർ അതിരൂപത വികാരി ജനറാൾ മോണ്‍. ജോസ് കോനിക്കര നിർവഹിച്ചു. വികാരി ഫാ. റാഫേൽ ആക്കാമറ്റത്തിൽ അധ്യക്ഷത വഹിച്ചു. അസി. വികാരി ഫാ. അജിത്ത് ചിറ്റിലപ്പിള്ളി, ട്രസ്റ്റിമാരായ ബൈജു ജോർജ്, ജോസഫ് അറക്കൽ, ജയ്സണ്‍ പോൾ തേയ്ക്കാനത്ത്, ജിന്‍റോ ചാലിശേരി എന്നിവർ നേതൃത്വം നൽകി.

പൂജാമഹോത്സവം തുടങ്ങി

ചേലക്കര: ശ്രീ മാരിയമ്മൻ പൂജമഹോത്സവത്തിനു ആരംഭംകുറിച്ചു. ഇന്നും നാളെയും അതിവിപുലമായ പരിപാടികളോടെ നടക്കും. ഇന്നലെ ഏഴിന് ഗംഗ കരയിൽനിന്നും അമ്മൻകരകങ്ങൾ, ഉടുക്കുപാട്ട്, ആട്ടക്കരകം, പാണ്ടിമേളം, ഗജവീരന്മാരുടെ അകമ്പടിയോടുകൂടി എഴുന്നള്ളിപ്പ്, പാണ്ടിമേളം, പ്രസാദഊട്ട്, നിറമാല, ദീപാരാധന, സോപാനസംഗീതം, മെഗാ‌ഷൊ എന്നിവ നടന്നു. ഇന്നു രാവിലെ ഒന്പതിനു വിളക്കുപൂജ, 12 ന് പ്രസാദഊട്ട്, വൈകീട്ട് അഞ്ചിന് രാജകീയ വിളക്ക് ഘോഷയാത്ര. നാളെ രാവിലെ ഒന്പതിന് മഹാപൊങ്കാല, 12ന് പ്രസാദഊട്ട്. 7.30ന് അമ്മൻ കരകങ്ങൾ ശ്രീകോവിലിൽ നിന്ന് മഞ്ഞൾ നീരാട്ടോടുകൂടി ഗ്രഹപ്പൂജയ്ക്ക് പുറപ്പെടും. 10 ന് അമ്മൻ കരകങ്ങൾ ഗംഗ കരയിൽ നിമഞ്ജനം ചെയ്യും.

മറ്റം നിത്യസഹായമാതാ തീര്‍ഥകേന്ദ്രം തിരുനാൾ 30 ലക്ഷത്തിന്‍റെ കാരുണ്യപ്രവൃത്തിയോടെ

മറ്റം: നിത്യസഹായമാതാ തീര്‍ഥകേന്ദ്രത്തിലെ 87-ാമത് തിരുനാളാഘോഷത്തിന്‍റെ വിളംബരറാലി ഇന്നു നടക്കുമെന്നും ആഘോഷത്തിന്‍റെ ഭാഗമായി 30 ലക്ഷം രൂപയുടെ കാരുണ്യപ്രവൃത്തികൾ നടക്കുമെന്നും ഭാരവാഹികൾ പത്രസമ്മേളനത്തിൽ അറിയിച്ചു. നിർധനരോഗികൾക്ക് ധനസഹായം, ഭവനം നിർമിച്ചുനൽകൽ, പലിശരഹിത സഹായം എന്നിവ നൽകും. ഇന്ന് രാവിലെ ഒൻപതിന് ഡീക്കൻ മെൽവിൻ ചൊവ്വല്ലൂരിന്‍റെ തിരുപ്പട്ട സ്വീകരണമാണ്. വൈകിട്ട് 4.45 ന് തിരുനാൾ വിളംബര റാലി നടത്തും. നാളെ നവവൈദികന് സ്വീകരണവും ഫൊ റോനതല അരങ്ങേറ്റവും നടക്കും. മേയ് രണ്ടിന് വൈകിട്ട് അഞ്ചിന് പ്രസുദേന്തി വാഴ്ച, വിശുദ്ധ കുർബാന എന്നിവയ്ക്ക് അതിരൂപതയിലെ 16 നവവൈദികർ കാർമികത്വം വഹിക്കും. തുടർന്ന് ദീപാലങ്കാരത്തിന്‍റെ സ്വിച്ച് ഓൺ ഗുരുവായൂർ എസിപി ടി.എസ്. സിനോജ് നിർവഹിക്കും. രാത്രി 7.30ന് ഫ്യൂഷൻ നൈറ്റ്. മൂന്നിന് രാവിലെ ആറിന് വിശുദ്ധ കുർബാന. തുടർന്ന് കുടുംബക്കൂട്ടായ്മകളിലേക്കുള്ള കിരീടം എഴുന്നള്ളിപ്പ്. വൈകിട്ട് അഞ്ചിന് കിരീട സമര്‍പ്പണം, വിശുദ്ധ കുര്‍ബാന എന്നിവയ്ക്ക് അതിരൂപത വികാരി ജനറാൾ മോൺ. ജോസ് കോനിക്കര കാർമികത്വം വഹി ക്കും. രാത്രി 10 ന് കിരീടം എഴുന്നള്ളിപ്പ് സമാപനവും തേര് മത്സരവും. നാലിനു തിരുനാള്‍ ദിനത്തില്‍ രാവിലെ 5.30,7, 8.30, വൈകിട്ട് നാല് എന്നീ സമയങ്ങളില്‍ വിശുദ്ധ കുര്‍ബാനയാണ്. രാവിലെ 10ന് ആഘോഷമായ തിരുനാള്‍ പാട്ടു‌കുര്‍ബാനയ്ക്ക് പറപ്പൂർ ഫൊറോന വികാരി ഫാ. സെബി പുത്തൂർ മുഖ്യകാര്‍മികത്വം വഹിക്കും. ഫാ. ലിജോ ചിറ്റിലപ്പിള്ളി സന്ദേശം നല്‍കും. തുടർന്ന് തിരുനാൾ പ്രദക്ഷിണമാണ്. വൈകിട്ട് ആറിന് ഇടവക പള്ളിയിൽ വിശുദ്ധ കുർബാന. 6.45ന് ഇടവക പള്ളിയിൽനിന്ന് തീർഥകേന്ദ്രത്തിലേക്ക് കിരീടം എഴുന്നെള്ളിപ്പ്, രാത്രി ഒൻപതിന് മെഗാമേളം. അഞ്ചിന് മരിച്ചവർക്കുവേണ്ടിയുള്ള തിരുക്കർമങ്ങൾക്ക് ഇടവകാംഗമായ ബിഷപ് മാർ ഫ്രാങ്കോ മുളയ്ക്കൽ കാർമികനാകും. വൈകിട്ട് ഏഴിന് നാടകവും ഉണ്ടാകും. പത്രസമ്മേളനത്തിൽ വികാരി റവ. ഡോ. ഫ്രാൻസിസ് ആളൂർ, അസി. വികാരി ഫാ. ഫ്രാങ്കോ ചെറുതാണിക്കൽ, മാനേജിംഗ് ട്രസ്റ്റി സി.കെ. ജോയ്, തിരുനാൾ ജനറൽ കൺവീനർ എം.ജെ. ജോഷി, പബ്ലിസിറ്റി കൺവീനർ പി.ടി. സേവി എന്നിവർ പങ്കെടുത്തു.

സിനിമ തിയേറ്ററിലെ ജനറേറ്റർ കത്തി

വടക്കാഞ്ചേരി: കഴിഞ്ഞദിവസം ഉണ്ടായ ശക്തമായ കാറ്റിലും ഇടിമിന്നലിലും നാശം. ഓട്ടുപാറ-കുന്നംകുളം റോഡിൽ ന്യൂരാഗം സിനിമ തിയേറ്ററിലെ ജനറേറ്റർ കത്തിനശിച്ചു. ഏറെനേരം സിനിമ പ്രദർശനം നിർത്തിവച്ചു. പിന്നീട് ഷൊർണൂരിൽ നിന്നും മറ്റൊരു ജനറേറ്റർ എത്തിച്ചാണ് സിനിമ പ്രദശനം പൂർത്തീകരിച്ചത്. തിങ്കളാഴ്ച രാത്രി 10.30 ഓടെയാണ് സംഭവം.

വാടാനപ്പിള്ളിയിൽ മധ്യവയസ്കനു വെട്ടേറ്റു

വാടാനപ്പിള്ളി. അമ്പലനടയിൽ വാക്കുതർക്കത്തെ തുടർന്നുണ്ടായ സംഘർഷത്തിൽ കഴുത്തിലും നെഞ്ചിലും വെട്ടേറ്റ് മധ്യവയസ്കനു ഗുരുതര പരിക്ക്. പുതുക്കുളം പടിഞ്ഞാറ് സ്വദേശി തേവക്കാട്ടിൽ ബാബു (59) വിനാണ് വെട്ടേറ്റത്. ഇയാളെവാടാനപ്പിള്ളി ആക്ട്സ് പ്രവർത്തകർ ജില്ലാ ആശുപത്രിയിൽ എത്തിക്കുകയും തുടർന്ന് വിദഗ്ധ ചികിത്സയ്ക്കായി മെഡിക്കൽ കോളജിലേക്കു മാറ്റി. ഇന്നലെ രാത്രി എട്ടിന് വാടാനപ്പിള്ളി ഭഗവതി ക്ഷേത്രമൈതാനത്തായിരുന്നു സംഭവം.

ദേവാലയങ്ങളിൽ തിരുനാൾ

എറവ് കപ്പൽ പള്ളി എറവ്: സെന്‍റ് തെരേസാസ് കപ്പൽ പള്ളിയിൽ തൊഴിലാളി മധ്യസ്ഥനായ വിശുദ്ധ യൗസേപ്പിതാവിൻ്റെ ഊട്ടുതിരുനാളിന് കൊടിയേറി. വികാരി ഫാ. റോയ് ജോസഫ് വടക്കൻ കൊടിയേറ്റം നിർവഹിച്ചു. സഹവികാരി ഫാ. ജോഷ്‌വിൻ കൊക്കൻ സഹകാർമികനായി. പാട്ടുകുർബാന, ലദീഞ്ഞ്, നൊവേന എന്നിവയുണ്ടായിരുന്നു. നാളെയാണ് ഊട്ടുതിരുനാൾ. വട്ടുള്ളി സെന്‍റ് ്ജോർജ് ചേലക്കര: വട്ടുള്ളി സെന്‍റ് ്ജോർജ് ബത്‌ലഹേം യാക്കോബായ സുറിയാനി പള്ളിക്കു കീഴിൽ പുനർനിർമ്മിച്ച കുരിശുപള്ളിയുടെ കൂദാശയും ശ്രേഷ്ഠ കാതോലിക്ക ബാവ ആബൂൻ മോർ ബസേലിയോസ് ജോസഫിനുള്ള സ്വീകരണവും വിശുദ്ധ ഗീവർഗീസ് സഹദായുടെ ഓർമപ്പെരുന്നാളും മേയ് 2,3,4 തീയതികളിൽ ആഘോഷിക്കുമെന്ന് ഭാരവാഹികൾ പത്രസമ്മേളനത്തിലറിയിച്ചു. രണ്ടിനു വൈകിട്ട് ആറിന് കാതോലിക്ക ബാവയെ ചേലക്കരയിൽനിന്ന് സ്വീകരിച്ച് വട്ടുള്ളിയിലേക്കാനയിക്കും. 6.30ന് സന്ധ്യ നമസ്കാരത്തിനുശേഷം പുനർനിർമിച്ച കുരിശു‌പള്ളിയുടെ കൂദാശ കർമം ആബൂൻ മോർ ബസേലിയോസ് ജോസഫ് പ്രഥമൻ ബാവ നിർവഹിക്കും. തുടർന്ന് 7.30 ന് കാതോലിക്ക ബാവയ്ക്കുള്ള സ്വീകരണവും അനുമോദന സമ്മേളനവും കെ. രാധാകൃഷ്ണൻ എംപി ഉദ്ഘാടനം ചെയ്യും. തൃശൂർ ഭദ്രാസന മെത്രാപ്പോലീത്ത കുര്യാക്കോസ് മോർ ക്ലീമിസ് അധ്യക്ഷത വഹിക്കും. ബെന്നി ബഹനാൻ എംപി, യു.ആർ. പ്രദീപ് എം‌എൽഎ തുടങ്ങിയ ജനപ്രതിനിധികളും സാംസ്കാരിക നേതാക്കളും പങ്കെടുക്കും. ഗീവർഗീസ് സഹദായുടെ ഓർമപ്പെരുന്നാൾ ശനി, ഞായർ ദിനങ്ങളിൽ ആഘോഷിക്കും. മർക്കോസ് മോർ ക്രിസോസ്റ്റമോസ് തിരുമേനിയുടെ പ്രധാനകാർമികത്വത്തിലാണു ചടങ്ങുകൾ നടക്കുക. ശനിയാഴ്ച 7.30 ന് പ്രഭാത നമസ്കാരം, 8.30 ന് കുർബാന, പ്രസംഗം രാത്രി 7.30ന് സന്ധ്യാനമസ്കാരം തുടർന്ന് മെത്രാപ്പോലീത്തയുടെ പ്രസംഗം. ഒന്പതിന് ആശിർവാദം. ഞായറാഴ്ച രാവിലെ വിശുദ്ധ കുർബാനയ്ക്ക് മെത്രാപ്പോലീത്ത നേതൃത്വം നൽകും. 11 ന് ആശിർവാദം. വൈകിട്ട് ഏഴിന് സെന്‍റ് ജോർജ് യൂത്ത് അസോസിയേഷന്‍റെ ആഭിമുഖ്യത്തിൽ ഗ്രാമഫോൺ മ്യൂസിക് ബാൻഡ് അവതരിപ്പിക്കുന്ന ഗാനമേളയും ഉണ്ടായിരിക്കുമെന്ന് വികാരി ഫാ. തോമസ് നെടിയപാലക്കൽ, ട്രസ്റ്റി ബെന്നി കോച്ചേരിയിൽ, സഭ മാനേജിംഗ് കമ്മിറ്റിയംഗം ഷാജി മംഗലശേരി, പ്രോഗ്രാം കൺവീനർ സി.ജി. ജോസ് എന്നിവർ പത്രസമ്മേളനത്തിലൂടെ അറിയിച്ചു. കുമ്പളങ്ങാട് വിശുദ്ധ യൂദാതദേവൂസ് വടക്കാഞ്ചേരി: കുമ്പളങ്ങാട് വിശുദ്ധ യൂദാതദേവൂസ് ശ്ലീഹായുടെ ദേവാലയത്തിൽ ഇടവക മധ്യസ്ഥ നായ വിശുദ്ധ യൂദാ‌തദേവൂസ് ശ്ലീഹയുടെയും വിശുദ്ധ സെബസ്ത്യാനോസിന്‍റെയും പരിശുദ്ധ കന്യകാമറിയത്തിന്‍റെയും സംയുക്ത തിരുനാൾ ആഘോഷിച്ചു. പരിശുദ്ധ പിതാവ് ഫ്രാൻസിസ് പാപ്പ കാലം ചെയ്തതിനെത്തുടർന്ന് ആഘോഷങ്ങളെല്ലാം മാറ്റിവച്ചുകൊണ്ട് ഭക്തിനിർഭരമായി ചടങ്ങ് മാത്രമായാണ് തിരുനാൾ ആഘോഷിച്ചത്. ആഘോഷമായ പാട്ടുകുർബാനയ്ക്ക് ഫാ. ബിജു പാണേങ്ങാടൻ മുഖ്യകാർമികത്വം വഹിച്ചു. ഫാ. ഫിജോ ആലപ്പാടൻ തിരുനാൾ സന്ദേശം നൽകി. വികാരി ഫാ. സിജോ പുത്തൂർ സഹകാർമികനായി. തുടർന്ന് തിരുനാൾ പ്രദക്ഷിണവും നടന്നു. ചാഴൂർ സെന്‍റ്് മേരീസ് ചാഴൂർ: സെന്‍റ് മേരീസ് പള്ളിയിലെ പരിശുദ്ധ വേളാങ്കണ്ണി മാതാവിന്‍റെയും വിശുദ്ധ സെബസ് ത്യാ നോസിന്‍റെയും വിശുദ്ധ അന്തോണീസിന്‍റെയും സംയുക്ത തിരുനാളിന് കൊടിയേറി. ഫാ. ചെറിയാൻ മാളിയേക്കൽ കപ്പൂച്ചിൻ കൊടിയേറ്റം നിർവഹിച്ചു. മേയ് 3, 4 തീയതികളിലാണു തിരുനാൾ. വികാരി ഫാ. സിജോ കാട്ടൂക്കാരൻ, ജനറൽ കൺവീനർ ഷിബു കവലക്കാട്ട്, പബ്ലിസിറ്റി കൺവീനർ ഷാരോൺ ജോജു, ട്രസ്റ്റിമാരായ ടി.കെ. സണ്ണി, മേജോ തട്ടിൽ, ജസ്റ്റിൻ വർഗീസ് എന്നിവർ നേതൃത്വം നൽകി. കോനിക്കര ഫാത്തിമനാഥ തൃശൂർ: കോനിക്കര ഫാത്തിമനാഥ പള്ളിയിൽ ഇടവകമധ്യസ്ഥനായ പരിശുദ്ധ ഫാത്തിമനാഥയുടെയും വിശുദ്ധ യൗസേപ്പിതാവിന്‍റെയും വിശുദ്ധ സെബസ്ത്യാനോസിന്‍റെയും തിരുനാൾ മേയ് മൂന്ന്, നാല് തീയതികളിൽ ആഘോഷിക്കും. മൂന്നിനു വൈകീട്ട് യൂണിറ്റുകളിൽനിന്നുള്ള അന്പെഴുന്നള്ളിപ്പ് പള്ളിയിൽ സമാപിക്കും. നാലിനു രാവിലെ പത്തരയ്ക്ക് ആഘോ ഷമായ തിരുനാൾ പാട്ടുകുർബാനയും ഉച്ചകഴിഞ്ഞു തിരുനാൾപ്രദക്ഷിണവുമുണ്ടാകും. തിരുനാളിന്‍റെ വിജയത്തിനായി ഫാ. ജിക്സണ്‍ മാളോക്കാരൻ, കൈക്കാരൻമാരായ ടോണി തെക്കുംപീടിക, ജോബി ആലപ്പാട്ട്, ജനറൽ കണ്‍വീനർ ഫ്രാൻസിസ് ചാക്കേരി എന്നിവരുടെ നേതൃത്വത്തിൽ കമ്മിറ്റി പ്രവർത്തിച്ചുവരുന്നു.

മണലൂരിലെ 34 അയൽക്കൂട്ടങ്ങൾക്കായി മൂന്നുകോടി വായ്‌പ നൽകി

കാഞ്ഞാണി: വനിത വികസന കോ ർപറേഷനിൽ നിന്ന് സംസ്ഥാന സർക്കാർ അനുവദിച്ച മൂന്നുകോടി രൂപ മണലൂർ പഞ്ചായത്തിലെ 34 അയൽക്കൂട്ടങ്ങൾക്ക് വായ്പയായി നൽകി. മണലൂർ പഞ്ചായത്ത് പ്രസിഡന്‍റ്് സൈമൺ തെക്കത്ത് ജ്യോതിസ് അയൽക്കൂട്ടത്തിന് ചെക്ക് നൽകി വായ്‌പാവിതരണം ഉദ്ഘാടനം ചെയ്തു. കുടുംബശ്രീ ചെയർപേഴ്സൺ ഗിരിജാ രാമചന്ദ്രൻ അധ്യക്ഷത വഹിച്ചു. ബാങ്ക് മാനേജർ ഷാൻപ്രസാദ് പദ്ധതി വിശദീകരണം നടത്തി. വൈസ് ചെയർപേഴ്‌സൺ രാജി സുധീരൻ, പഞ്ചായത്ത് വൈസ് പ്രസിഡന്‍റ് ബീന സേവ്യർ, ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്‌സൺ മരിയ ജിൻസി, ജനപ്രതിനിധികളായ ഷാനി അനിൽകുമാർ, ഷേളി റാഫി, കവിത രാമചന്ദ്രൻ, അക്കൗണ്ടന്‍റ് രാജലക്ഷ്മി, സിഡിഎസ് അംഗം സോജ സതീഷ് എന്നിവർ പ്രസംഗിച്ചു.

കുടുംബനാഥൻ കുഴഞ്ഞുവീണു മരിച്ചു

മുല്ലശേരി: ഗ്രാമപഞ്ചായത്തിലെ മാനിനയിൽ കുടുബനാഥൻ കുഴഞ്ഞുവീണ് മരിച്ചു. ബിജെപി മുൻ മുല്ലശേരി പഞ്ചായത്ത് കമ്മിറ്റി പ്രസിഡന്‍റ് ആയിരുന്ന വെട്ടിയാറ ശേഖരൻ മകൻ പ്രശാന്ത്(50) ആണ് മരിച്ചത്. വീട്ടിൽ നിന്ന് പുറത്തേക്ക് പോകാൻ ഒരുങ്ങി കൊണ്ടിരിക്കുമ്പോൾ കുഴഞ്ഞു വീഴുകയായിരുന്നു. ഉടൻ തന്നെ പാവറട്ടിയിലെ സ്വകാര്യആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. പാവറട്ടി പോലീസ് ഇൻക്വസ്റ്റ് നടത്തി. പോസ്റ്റ്‌മോർട്ടത്തിനു ശേഷം ഇന്ന് രാവിലെ മുല്ലശേരി മാനിനയിലുള്ള വസതിയിൽ സംസ്‌കരിക്കും. ഭാര്യ: ജിഷ. മകൻ: ദേവനന്ദൻ.

പനിബാധിച്ച് യുവാവ് മരിച്ചു

ചിറ്റാട്ടുകര: പുലിക്കോട്ടിൽ ജോസ് മകൻ രാജജോസ്(44) പനി ബാധിച്ച് മരിച്ചു. പനി ശക്തമായതിനെ തുടർന്ന് ആശുപത്രിയിൽ പ്രവേശിപ്പിക്കുകയും പരിശോധനയിൽ ന്യുമോണിയ സ്ഥിരീകരിക്കുകയും ചെയ്തു. ചികിത്സയിലിരിക്കെ ഇന്നലെ പുലർച്ചെ നാലിനായിരുന്നു മരണം. സംസ്കാരം നടത്തി. ഭാര്യ: പെസി. മക്കൾ: ജോൺ, ലിഥിയ മരിയ.

ആനപ്പാപ്പാനെ കിണറ്റിൽ മരിച്ചനിലയിൽ കണ്ടെത്തി

അരിമ്പൂർ: വെളുത്തൂരിൽ ആനപ്പാപ്പാനെ കിണറ്റിൽ മരിച്ചനിലയിൽ കണ്ടെത്തി. ആലപ്പുഴ മാവേലിക്കര സ്വദേശി അട്ടാശേരി കൊട്ടാക്കാട്ടുശേരി സ്വദേശി രവി(66)യാണ് മരിച്ചത്. തിങ്കളാഴ്ച്ച വൈകീട്ട് മുതൽ ഇയാളെ കാണാതായിരുന്നതായി പറയുന്നു. ചൊവ്വാഴ്ച രാവിലെ മുതൽ സുഹൃത്തുക്കൾ നടത്തിയ തെരച്ചിലിനിടയിൽ നമ്പോർക്കാവ് ക്ഷേത്രത്തിനു സമീപം ആൾതാമസമില്ലാത്ത വീടിന്‍റെ കിണറ്റിൽ മൃതദേഹം കണ്ടെത്തിയത്. സാവിത്രി എന്ന ആനയുടെ പാപ്പാനാണ് രവി. വെളുത്തൂരിലുള്ള ഒരു പറമ്പിലാണ് ആനയെ സ്ഥിരമായി തളയ്ക്കുന്നത്. അന്തിക്കാട് പോലീസ് സ്ഥലത്തെത്തി. തൃശൂരിൽ നിന്നെത്തിയ ഫയർഫോഴ്സ് സംഘം മൃതദേഹം പുറത്തെടുത്തു.

ജില്ലാ സീനിയർ ഹാൻഡ്ബോൾ ചാമ്പ്യൻഷിപ്പ് തുടങ്ങി

കാടുകുറ്റി: തൃശൂർ ജില്ല സീനിയർ പുരുഷ/വനിത ഹാൻഡ്ബോൾ ചാമ്പ്യൻഷിപ്പ് തുടങ്ങി. അന്നനാട് യൂണിയൻ ഹയർസെക്കൻഡറി സ്കൂളിൽ വച്ചു നടക്കുന്ന ചാമ്പ്യൻഷിപ്പ് കാടുകുറ്റി ഗ്രാമപഞ്ചയത്ത് പ്രസിഡന്‍റ് പ്രിൻസി ഫ്രാൻസിസ് ഉദ്ഘാടനം ചെയ്തു. പിടിഎ പ്രസിഡന്‍റ്് പി.ആർ. രാജേഷ് അധ്യക്ഷത വഹിച്ചു. ഗ്രാമപഞ്ചായത്ത് വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്‌സൺ മോഹിനി കുട്ടൻ, വാർഡ് മെമ്പർ മോളി തോമസ്, സ്കൂൾ മാനേജർ സി.എ. ഷാജി, കേരള ഹാൻഡ്ബോൾ അസോസിയേഷൻ വൈസ് പ്രസിഡന്‍റ്് ജിബി വി. പെരേപ്പാടൻ, സ്കൂൾ പ്രിൻസിപ്പൽ ഐ. ജയ, പ്രധാനാധ്യാപിക എം.പി. മാലിനി എന്നിവർ പ്രസംഗിച്ചു. വിവിധ ടീമുകളിലായി ഇരുന്നൂറോളം താരങ്ങളാണ് പങ്കെടുക്കുന്നത്. സംസ്ഥാന ചാമ്പ്യൻഷിപ്പിൽ പങ്കെടുക്കുന്ന ജില്ലാ ടീമിനെ ഇതിൽനിന്നും തെരഞ്ഞെടുക്കും.

ശിശുവിദ്യാപോഷിണി സ്കൂൾ സർക്കാർ ഏറ്റെടുത്തു

കൊടുങ്ങല്ലുർ: എറിയാട് ശിശുവിദ്യാപോഷിണി എൽപി സ്കൂളിന്‍റെ ശതാബ്ദി ആഘോഷ സമാപ നവും സ്മരണിക പ്രകാശനവും സർക്കാർ വിദ്യാലയപ്രഖ്യാപനവും മന്ത്രി ആർ. ബിന്ദു ഉദ്ഘാടനം ചെയ്തു. ഇ.ടി. ടൈസൺ എം എൽഎ അധ്യക്ഷത വഹിച്ചു. ജില്ല കളക്ടർ അർജുൻപാണ്ഡ്യൻ മുഖ്യാതിഥിയായി. സോവനീർ പ്രകാശനം സുഗത ശശിധരൻ നിർവഹിച്ചു. ഫൗസിയ ഷാജഹാൻ, കെ.എ. ഹസ് ഫൽ, പി.കെ. അസീം, സാറാബി ഉമ്മർ,നജ്മൽ ഷക്കീർ, ബീന ബാബു, ഉണ്ണി പിക്കാസോ, തമ്പി ഇ. കണ്ണൻ, മൊയ്തീൻകുട്ടി, കെ.എ.സിദ്ദീഖ്, സിറാജുദ്ദീൻ, ഇ.കെ.ലെനിൻ, മുഹമ്മദ് സഗീർ, പ്രിൻസ് തലശേരി, എന്നിവർ പ്രസംഗിച്ചു. പഞ്ചായത്ത് പ്രസിഡന്‍റ് കെ.പി. രാജൻ സ്വാഗതവും പ്രധാന അധ്യാപിക കെ. സരിത നന്ദിയും പറഞ്ഞു.

ലൈഫ് പദ്ധതി ലോകത്തിനു മാതൃക: മന്ത്രി വി. അബ്ദുറഹ്‌മാൻ

കയ്പമംഗലം: സംസ്ഥാനത്തെ എല്ലാ ഭവനരഹിതർക്കും അടച്ചുറപ്പുള്ള വീടെന്ന സ്വപ്നം സാക്ഷാത്കരിക്കുന്ന ലൈഫ് പദ്ധതി ലോകത്തിനു മാതൃകയെന്ന് കായിക മന്ത്രി വി. അബ്ദുറഹ്‌മാൻ. മതിലകം ബ്ലോക്ക് പഞ്ചായത്തിന്‍റെ പുതിയ കോൺഫറൻസ് ഹാളിന്‍റെ ഉദ്ഘാടനവും ലൈഫ് പിഎംഎവൈ ഗുണഭോക്തൃസംഗമവും ഉദ്ഘാടനം ചെയ്യുകയായിരുന്നു മന്ത്രി. സംസ്ഥാനത്ത് 4,51,631 വീടുകളുടെ നിർമാണം പൂർത്തിയാക്കി. കൂടാതെ 95922 വീടുകളുടെ നിർമാണം വിവിധ ഘട്ടങ്ങളിലാണ്. സംസ്ഥാനത്തെ മുഴുവൻ ഭവനരഹിതർക്കും വീടുവച്ച് നൽകുവാനും തൊഴിൽ ചെയ്ത് ഉപജീവനമാർഗം മെച്ചപ്പെടുത്തുന്നതിനും പങ്കാളികളാകുകയാണ് സർക്കാർ ലക്ഷ്യമെന്നും മന്ത്രി കൂട്ടിച്ചേർത്തു. ഇ.ടി. ടൈസൺ എംഎൽഎ അധ്യക്ഷത വഹിച്ചു. മതിലകം ബ്ലോക്ക് പഞ്ചായത്ത് പ്രസിഡന്‍റ് സി.കെ. ഗിരിജ, ശ്രീനാരായണപുരം പഞ്ചായത്ത് പ്രസിഡന്‍റ് എം.എസ്. മോഹനൻ, മതിലകം പഞ്ചായത്ത് പ്രസിഡന്‍റ്് സീനത്ത് ബഷീർ, എടവിലങ്ങ് പഞ്ചായത്ത് പ്രസിഡന്‍റ്് നിഷ അജിതൻ, മതിലകം ബ്ലോക്ക് പഞ്ചായത്ത് സെക്രട്ടറി കെ. മധുരാജ്, സ്റ്റാൻഡിംഗ് കമ്മിറ്റി ചെയർപേഴ്സൺമാർ, ലൈഫ് പദ്ധതി ഗുണഭോക്താക്കൾ, ജനപ്രതിനിധികൾ, ഉദ്യോഗസ്ഥർ, നാട്ടുകാർ എന്നിവർ പങ്കെടുത്തു.

വി കെയര്‍ പദ്ധതി: ജില്ലാതല ഉദ്ഘാടനം നടത്തി

അവിട്ടത്തൂര്‍: ഭിന്നശേഷിക്കാരുടെ സാമൂഹികോന്നമനം ലക്ഷ്യമാക്കി പ്രവര്‍ത്തിക്കുന്ന വി കെയര്‍ പദ്ധതിയുടെ ജില്ലാതല ഉദ്ഘാ ടനം അവിട്ടത്തൂര്‍ എല്‍ ബിഎസ്എം ഹയര്‍ സെക്കന്‍ഡറി സ്‌കൂളില്‍ ജില്ലാ പഞ്ചായത്ത് പ്രസിഡന്‍റ് വി.എസ്. പ്രിന്‍സ് ഉദ്ഘാടനം ചെയ്തു. ജില്ലാ പഞ്ചായത്ത് വൈസ് പ്രസിഡന്‍റ് ലത ചന്ദ്രന്‍ അധ്യക്ഷത വഹിച്ചു. ജില്ല കോ-ഓര്‍ഡിനേറ്റര്‍ പി.ഡി. പ്രകാശ് ബാബു, വിദ്യാഭ്യാസജില്ല കണ്‍വീനര്‍ ടി.എസ്. സരിത, സ്‌കൂള്‍ പിടിഎ പ്രസിഡന്‍റ്് മിനി രാമചന്ദ്രന്‍, മാനേജര്‍ എ. അജിത്ത്‌കുമാര്‍, മാനേജ്‌മെന്‍റ്് കമ്മിറ്റി അംഗങ്ങളായ എ.സി. സുരേഷ്, കെ.കെ. കൃഷ്ണന്‍ നമ്പൂതിരി, പ്രിന്‍സിപ്പല്‍ ഡോ. എ.വി. രാജേഷ്, ഹെഡ്മാസ്റ്റര്‍ മെജോ പോള്‍, ടി.ആര്‍. ശ്രീദേവി, ഡി. ഹസിത എന്നിവര്‍ പ്രസംഗിച്ചു. പൊതുവിദ്യഭ്യാസ വകുപ്പ് ഹയര്‍ സെക്കന്‍ഡറി വിഭാഗം കരിയര്‍ ഗൈഡന്‍സ് ആന്‍ഡ് അഡോളസ ന്‍റ്് കൗണ്‍സലിംഗ് സെല്‍, ജില്ല പഞ്ചായത്ത് വിദ്യാഭ്യാസ പരിപാടി സമേതം, നാഷണല്‍ കരിയര്‍ സെന്‍റര്‍, ഇരിങ്ങാലക്കുട വിദ്യാഭ്യാസ ജില്ല എന്നിവ സംയുക്തമായി നടപ്പിലാക്കുന്ന പദ്ധതിയാണിത്‍.

കൊയ്ത്തുകഴിഞ്ഞ് മൂന്നാഴ്ച; നെല്ല് സംഭരിക്കാന്‍ ആരുമില്ല

ഇരിങ്ങാലക്കുട: കൊയ്ത്തുകഴിഞ്ഞ് മൂന്നാഴ്ച പിന്നിട്ടിട്ടും നെല്ല് സംഭരിക്കുവാന്‍ മില്ലുടമകളോ ഏജന്‍റുമാരോ തയാറാകാത്തതില്‍ പ്രതീക്ഷനശിച്ചിരിക്കുകയാണ് മുരിയാട് പാടശേഖരത്തിലെ ഒരു കൂട്ടം കര്‍ഷകർ. പുല്ലൂര്‍ പള്ളിക്കു സമീപമുള്ള സെന്‍റ് സേവിയേഴ്‌സ് സ്‌കൂള്‍ ഗ്രൗണ്ടിലും പള്ളിപ്പറമ്പിലും ടണ്‍ കണക്കിന് നെല്ല് സംഭരിക്കാനാളില്ലാത്തതിനാല്‍ കെട്ടിക്കിടക്കുകയാണ്. മുരിയാട് പഞ്ചായത്തിലെ കൃഷി‌ഭവനു കീഴിലെ പൊതുമ്പുചിറ പാടശേഖരത്തിലെ കര്‍ഷകര്‍ക്കാണ് ഈ ദുര്‍ഗതി. 80 ഏക്കര്‍ പാടശേഖരത്തിലെ കര്‍ഷകരുടെ കൊയ്‌തെടുത്ത നെല്ലാണ് ആരും സംഭരിക്കാതെ കെട്ടികിടക്കുന്നത്. ഏറെ പ്രതീക്ഷയോടെ നെല്ല് കൊയ്തു കൂട്ടിയിട്ടിരിക്കുന്ന കര്‍ഷകരാണ് ഇപ്പോള്‍ എന്തുചെയ്യണമെന്നറിയാതെ വിഷമിക്കുന്നത്. പുല്ലര്‍ സെന്‍റ്് സേവിയേഴ്‌സ് ആശ്രമം, ബാബു കോലങ്കണ്ണി, ശേഖരന്‍ കോച്ചേരി, ബിജുചിറയത്ത്, വിക്രമന്‍ അമ്പാടന്‍, ജോസഫ് കോക്കാട്ട്, പ്രേമന്‍ തെക്കാട്ട് തുടങ്ങി നിരവധി കര്‍ഷകരുടെ ഉടമസ്ഥതയിലുള്ള പാടശേഖരങ്ങളിലെ 60 ടണ്‍ നെല്ലാണ് സംഭരിക്കാതെ കെട്ടിക്കിടക്കുന്നത്. പാട്ടത്തിനെടുത്ത് കൃഷിചെയ്തവരുടെയും ഗതി ഇതു‌തന്നെ. കടം വാങ്ങിയും വായ്പയെടുത്തും സ്വര്‍ണാഭരണങ്ങള്‍ പണയംവച്ചും പണം കണ്ടെത്തി കൃഷിയിറക്കിയ കര്‍ഷകരുടെ വിളവെടുത്ത നെല്ലാണ് വില്‍ക്കാന്‍ കഴിയാതെ പ്രതിസന്ധിയിലായിരിക്കുന്നത്. നെല്ല് ഇനി എന്ന് സംഭരിക്കു‌മെന്നു നിശ്ചയമില്ല. നെല്ലിന്‍റെ തൂക്കം നോക്കി കമ്പനിക്ക് അയക്കുന്ന സമയത്ത് വളരെ കൂടുതലായിട്ടുള്ള കിഴിവാണ് മില്ലുടമകള്‍ അവരുടെ ഏജന്‍റുമാര്‍ വഴി ആവശ്യപ്പെടുന്നത്. ഉണങ്ങിക്കിടക്കുന്ന നെല്ലിന് ഈര്‍പ്പം ഉണ്ടാകില്ല, അതിനാല്‍ത്തന്നെ കിഴിവിന്‍റെ ആവശ്യമില്ല. പിന്നെ ഇത് ആര്‍ക്ക് ലാഭം ഉണ്ടാക്കാന്‍ വേണ്ടിയാണ് സപ്ലൈക്കോ ഉദ്യോഗസ്ഥരും മില്ലുടമകളും അവരുടെ ഏജന്‍റുമാരും ഇത്തരത്തിലുള്ള പരിശ്രമം നടത്തുന്നതെന്നാണ് കര്‍ഷകരുടെ ചേദ്യം. പണം മുടക്കി അധ്വാനിച്ച് ബുദ്ധിമുട്ടുന്ന കര്‍ഷകന്‍റെ വിയര്‍പ്പിന്‍റെ ഉപ്പുകൂട്ടിയിട്ടുവേണോ ഈ കമ്പനിക്കാര്‍ക്കും ഉദ്യോഗസ്ഥകര്‍ക്കും ചൊറുണ്ണാനെന്ന് ആശ്രമത്തിന്‍റെ കീഴിലുള്ള പാടശേഖരത്തിന്‍റെ ുമതലയുള്ള ഫാ. ജോസ് ചുങ്കത്ത് ചോദിച്ചു. നെല്ല് പാടത്തുകിടക്കുന്നതുമൂലം മഴയെ ഭയന്നാണ് കര്‍ഷകര്‍ ദിവസങ്ങള്‍ തള്ളിനീക്കുന്നത്. ഇപ്പോഴും പാടശേഖരത്തില്‍ കൊയ്ത്തു നടന്നുകൊണ്ടിരിക്കുകയാണ്. കാലടിയിലെ മില്ലുകാരാണ് ഈ മേഖലയില്‍നിന്നുള്ള നെല്ല് കൂടുതലായും സംഭരിച്ചിരുന്നത്. മഴ‌വരുമ്പോള്‍ പ്ലാസ്റ്റിക് ഷീറ്റിട്ടു മൂടിയും വെയിലെത്തുമ്പോള്‍ നെല്ലുണക്കിയും കര്‍ഷകര്‍ പാടുപെടുകയാണ്. ഒരു മഴ പെയ്താല്‍ കര്‍ഷകരുടെ പ്രതീക്ഷകള്‍ കുതിര്‍ന്നുപോകുന്ന സ്ഥിതിയാണ് ഇപ്പോഴുള്ളത്. മില്ലുകാര്‍ വന്ന് നെല്ല് പരിശോധിച്ചെങ്കിലും കൂടുതല്‍ കിഴിവ് ആവശ്യപ്പെടുകയാണ്. സിവില്‍ സപ്ലൈസ് മന്ത്രിയും കൃഷി മന്ത്രിയും ജില്ലാ കളക്ടറും മുരിയാട് പഞ്ചായത്ത് പ്രസിഡന്‍റും മറ്റുബന്ധപ്പെട്ട ഉദ്യോഗസ്ഥരും ഇക്കാര്യത്തില്‍ ഇടപെട്ട് മില്ലുകള്‍ എത്രയും വേഗം നെല്ല് ഏറ്റെടുക്കുന്നതിനും അതിന്‍റെ പണം എത്രയും വേഗം കര്‍ഷകര്‍ക്ക് ലഭ്യമാക്കുന്നതിനുമുള്ള നടപടികള്‍ സ്വീകരിക്കണമെന്നും കർഷകര്‍ ആവശ്യപ്പെട്ടു. അല്ലാത്ത‌പക്ഷം ശക്തമായ സമരപരിപാടികളുമായി രംഗത്തിറങ്ങുമെന്നും കര്‍ഷകര്‍ മുന്നറിയിപ്പു നല്‍കി.

കുട്ടികള്‍ക്കായി പ്രകൃതിപഠനയാത്ര നടത്തി

കോടാലി: കാടും പുഴയും അണക്കെട്ടും കണ്ട് കുട്ടികള്‍ക്കായി കേരള ശാസ്ത്ര സാഹിത്യപരിഷത്ത് കോടാലി യൂണിറ്റ് സംഘടിപ്പിച്ച പ്രകൃതി പഠനയാത്ര പങ്കെടുത്തവർക്കെല്ലാം വേറിട്ട അനുഭവമായി. കോടാലിയില്‍ നടന്ന കളിയരങ്ങ് ബാലവേദി ക്യാമ്പിന്‍റെ ഭാഗമായിരുന്നു ചിമ്മിനി വനമേഖലയിലേക്കു നടത്തിയ പഠനയാത്ര. കോടാലിയില്‍നിന്ന് പുറപ്പെട്ട് വെള്ളാരംപാടത്തെത്തി കുറുമാലിപുഴ മുറിച്ചുകടന്നാണു കുട്ടികള്‍ ചിമ്മിനി ഡാമിലെത്തിയത്. കുറുമാലിയില്‍ വന്നു ചേരുന്ന പിള്ളത്തോടും മുപ്ലിപ്പുഴയും കുട്ടികള്‍ നേരില്‍‌കണ്ടു. ഉച്ചയോടെ ചിമ്മിനിയില്‍ എത്തിയ കുട്ടികള്‍ക്ക് പുഴയുടെ ഉത്ഭവം മുതലുള്ള കാര്യങ്ങള്‍ വനപാലകരും ക്യാമ്പിനു നേതൃത്വം നല്‍കിയവരും വിവരിച്ചുനല്‍കി. പൊന്‍മുടിയില്‍നിന്ന് വടക്കോട്ട് ഒഴുകിയെത്തുന്ന വെള്ളം മണലിപ്പുഴയായും പീച്ചി അണക്കെട്ടായും തെക്കോട്ട് ഒഴുകുന്ന വെള്ളം കുറുമാലിപ്പുഴയായും ചിമ്മിണി അണക്കെട്ടായും മാറുന്നതെങ്ങനെയെന്ന് കുട്ടികള്‍ മനസിലാക്കി. ചിമ്മിനിക്കാടുകളിലെ പക്ഷിജാലങ്ങളെക്കുറിച്ചും വന്യജീവികളെക്കുറിച്ചും ക്യാമ്പംഗങ്ങള്‍ ചോദിച്ചറിഞ്ഞു. ചിമ്മിനി അണക്കെട്ടിനെക്കുറിച്ചുള്ള വിവരശേഖരണവും കുട്ടികള്‍ നടത്തി. ഇന്ദ്രജിത്ത് കാര്യാട്ട്, കെ.കെ. അനീഷ്‌കുമാര്‍, ഐ.ആര്‍. ബാലകൃഷ്ണന്‍, എം.കെ. വിജയന്‍, കെ.ആര്‍. സന്തോഷ്, കാവ്യ, രാധിക എന്നിവര്‍ പഠനയാത്രക്കു നേതൃത്വം നല്‍കി.

ചെവ്വൂർ വൈഎംസിഎ വാർഷിക പൊതുയോഗം

ചെവ്വൂർ: വൈഎംസിഎ 44-ാം വാർഷിക പൊതുയോഗം പ്രസിഡന്‍റ് ജോബി ജോർജിന്‍റെ അധ്യക്ഷതയിൽ ചേർന്നു. കേരള റീജിയൻ ചെയർമാൻ പ്രഫ. അലക്സ് തോമസ് ഉദ്ഘാടനംചെയ്തു. നാഷണൽ സെക്രട്ടറി എൻ.വി. എൽദോ മുഖ്യാതിഥിയായി. പുതിയ അംഗത്വവിതരണത്തിനു കേരള റീജിയന്‌‍ സെക്രട്ടറി ഡേവിസ് സാമുവൽ നേതൃത്വം നൽകി. തൃശൂർ സബ് റീജിയൻ ചെയർമാൻ ജോണ്‍സണ്‍ മാറോക്കി, റീജണൽ ഡെവലപ്മെന്‍റ് സെക്രട്ടറി അജുൽ വർഗീസ്, ചെവ്വൂർ വൈഎംസിഎ മുൻ പ്രസിഡന്‍റ് അഡ്വ. ഇ.ഡി. ഫ്രാൻസിസ്, മുൻസെക്രട്ടറി ഇ.പി. ജോസഫ്, സെക്രട്ടറി ജോസഫ് പുളിക്കൻ, ട്രഷറർ എം.ഒ. പോൾസണ്‍, ജോയിന്‍റ് സെക്രട്ടറി ജോസ് ആന്‍റോ, വനിതാഫോറം ചെയർപേഴ്സണ്‍ അഡ്വ. ലീന ജോസ് എന്നിവർ പ്രസംഗിച്ചു.

മാർത്ത് മറിയം വലിയപള്ളിയിൽ ഓർമത്തിരുനാൾ നാളെമുതൽ

തൃശൂർ: ഇന്ത്യയിലെ പൗരസ്ത്യ കൽദായ സുറിയാനിസഭയുടെ വിശുദ്ധ അബിമലേക് തിമോഥെയൂസിന്‍റെ 80-ാം ഓർമത്തിരുന്നാളും ദിവംഗതരായ സഭാപിതാക്കന്മാരുടെ ഓർമദിനവും സമൂഹസദ്യയും മാർത്ത് മറിയം വലിയപള്ളിയിൽ നാളെയും മറ്റന്നാളുമായി ആചരിക്കും. നാളെ വൈകീട്ട് 6.30ന് റംശാ പ്രാർഥനയും തിരുനാൾപ്രദക്ഷിണവും നടക്കും. ഒന്നിനു രാവിലെ ഏഴിന് മാർ ഔഗിൻ കുര്യാക്കോസ് മെത്രാപ്പോലീത്തയുടെ കാർമികത്വത്തിൽ വിശുദ്ധ കുർബാന, ധൂപപ്രാർഥന, അന്നീദശുശ്രൂഷ, രാവിലെ 10.30നു സമൂഹസദ്യ ആശീർവദിക്കൽ. തുടർന്നുനടക്കുന്ന അനുസ്മരണസമ്മേളനവും അഖിലേന്ത്യാ പുരോഹിത അവാർഡ് പ്രഖ്യാപനവും ഓർത്തഡോക്സ് സിറിയൻ സഭ കണ്ടനാട് ഭദ്രാസനാധിപൻ തോമസ് മോർ അത്തനേഷ്യസ് മെത്രാപ്പോലീത്ത ഉദ്ഘാടനം ചെയ്യും. മന്ത്രിമാരായ കെ. രാജൻ, ഡോ. ആർ. ബിന്ദു, എംഎൽമാരായ സേവ്യർ ചിറ്റിലപ്പിള്ളി, പി. ബാലചന്ദ്രൻ, മേയർ എം.കെ. വർഗീസ്, അതിരൂപത സഹായമെത്രാൻ മാർ ടോണി നീലങ്കാവിൽ തുടങ്ങിയവർ മുഖ്യാതിഥികളാകും. സൗജന്യനേത്രപരിശോധന, മെഡിക്കൽ ക്യാന്പുകൾ എന്നിവയും ഉണ്ടായിരിക്കുമെന്നും മാർ ഔഗിൻ കുര്യാക്കോസ് മെത്രാപ്പോലീത്ത പത്രസമ്മേളനത്തിൽ അറിയിച്ചു. ഫാ. കെ.ആർ. ഇനാശു, അബി ജെ. പൊൻമാണിശേരി, രാജൻ ജോസ് മണ്ണുത്തി, ഗിഫ്റ്റൻ കെ. ജോസഫ് എന്നിവരും പങ്കെടുത്തു.

ഇടക്കുന്നിയിൽ മണ്ണിടിഞ്ഞു

എരുമപ്പെട്ടി: വേലൂർ പഴവൂർ ഇടക്കുന്നിയിൽ മണ്ണിടിഞ്ഞ് പാറകളും മരങ്ങളും റോഡിലേക്ക് വീഴുന്നത് പതിവാകുന്നു. റോഡിന് ഇരുവശവും സംരക്ഷണ ഭിത്തി നിർമിക്കണമെന്ന് നാട്ടുകാർ. എരുമപ്പെട്ടി - വേലൂർ പഞ്ചായത്തുകളെ തമ്മിൽ ബന്ധിപ്പിക്കുന്നതാണ് പഴവൂർ ഇടക്കുന്നി റോഡ്. വേലൂരിൽ നിന്ന് കുന്നംകുളം - വടക്കാഞ്ചേരി സംസ്ഥാന പാതയിലേക്കുമുള്ള റോഡായതിനാൽ നിരവധി വാഹനങ്ങൾ ഇടക്കുന്നി വഴിയാണ് സഞ്ചരിക്കുന്നത്. 300 മീറ്ററോളം ദൂരം വനത്തിനുള്ളിലൂടെയാണ് റോഡ് കടന്ന് പോകുന്നത്. ഈ പ്രദേശത്താണ് റോഡരികിലെ കുന്നിൻ ചെരുവിൽ നിന്ന് മരങ്ങളും വലിയ പാറകളും ഇടിഞ്ഞ് വീഴുന്നത്. മണ്ണിടിഞ്ഞ് നിരവധി മരങ്ങൾ മറിഞ്ഞ് വീഴാവുന്ന അവസ്ഥയിൽ നിൽക്കുന്നുണ്ട്. റോഡരികിലെ വലിയ മുളങ്കുടും ഏത് നിമിഷവും നിലം പൊത്താവുന്ന അവസ്ഥയിലാണ്. കുന്നിടിയുന്ന പ്രദേശത്ത് സംരക്ഷണ ഭിത്തി നിർമിക്കാൻ അധികൃതർ നടപടി സ്വീകരിക്കണമെന്നും റോഡരുകിലെ മരത്തടികൾ നീക്കം ചെയ്യണമെന്നും നാട്ടുകാർ ആവശ്യപ്പെടുന്നു. ട്രാൻസ്ഫോർമറിന് തീപിടിച്ചു കുന്നംകുളം: ഇന്നലെ വൈകിട്ട് ഉണ്ടായ ശക്തമായ ഇടിമിന്നലിൽ വടക്കാഞ്ചേരി റോഡിലെ ഗുഡ് ഷെപ്പേഡിന് മുന്നിലുള്ള ട്രാൻസ്ഫോർമറിന് തീപിടിച്ചു. രാത്രി എട്ടുമണിയോടെയാണ് അപകടമുണ്ടായത്. കുന്നംകുളത്തു നിന്നും ഫയർഫോഴ്സ് എത്തി തീയണച്ചു.

എരുമപ്പെട്ടിയിൽ ശക്തമായ കാറ്റിലും മഴയിലും വ്യാപകനാശനഷ്ടം

എരുമപ്പെട്ടി: ഇന്നലെ രാത്രിയിലുണ്ടായ ശക്തമായ കാറ്റിലും മഴയിലും എരുമപ്പെട്ടി മേഖലയിൽ വ്യാപക നാശനഷ്ടം. വിവിധ പ്രദേശങ്ങളിൽ മരങ്ങൾ വീണ് വൈദ്യുതി കാലുകൾ തകർന്നു. എരുമപ്പെട്ടി, തിച്ചൂർ, നെല്ലുവായ് മുരിങ്ങത്തേരി പ്രദേശങ്ങളിലാണ് മരങ്ങൾ വീണത്. നെല്ലുവായ് പട്ടാമ്പി റോഡിൽ മുരിങ്ങത്തേരിയിൽ മരം കടപുഴകി വീണ് ഗതാഗതം തടസപ്പെട്ടു. പഞ്ചായത്ത് മെമ്പർ എൻ.പി അജയന്‍റെ നേതൃത്വത്തിൽ നാട്ടുകാരും വടക്കാഞ്ചേരി ഫയർ സ്റ്റേഷൻ ഓഫീസർ ടി.കെ. നിതീഷിന്‍റെ നേതൃത്വത്തിൽ മരം മുറിച്ച് നീക്കി. പല പ്രദേശങ്ങളിലും വൈദ്യുതി വിതരണം തടസപ്പെട്ടു. കെഎസ്ഇബി ഉദ്യോഗസ്ഥരെത്തി തകരാറുകൾ പരിഹരിക്കുന്നുണ്ട്.

ആറ്റുപുറം പള്ളിയിൽ തിരുനാൾ

പുന്നയൂർക്കുളം: ആറ്റുപുറം സെന്‍റ് ആന്‍റണീസ് പള്ളിയിൽ വിശുദ്ധ അന്തോണീസ്, വിശുദ്ധ സെബസ്ത്യാനോസ് എന്നിവരുടെ സംയുക്തതിരുനാളിനു കൊടിയേറി. വികാരി ജനറാൾ മോൺ. ജെയ്സൺ കൂനംപ്ലാക്കൽ കൊടിയേറ്റം നിർവഹിച്ചു. തിരുനാളും ഇടവകദിനാഘോഷവും രണ്ട്, മൂന്ന്, നാല് തീയതികളിലായി നടത്തുമെന്ന് വികാരി ഫാ. ഡെന്നീസ് മാറോക്കി, ജനറൽ കൺവീനർ ജോസ് മുട്ടത്ത്, ട്രസ്റ്റി സൈമൺ കൊള്ളന്നൂർ, ജോയിന്‍റ്് ജനറൽ കൺവീനർ ആന്‍റണി പുലിക്കോട്ടിൽ, കൺവീനർമാരായ ജോഷി മേലിട്ട്, ഷാരോ ൺ വെള്ളറ എന്നിവർ പത്രസമ്മേളനത്തിൽ അറിയിച്ചു. വെള്ളിയാഴ്ചവരെ എല്ലാദിവസവും വൈകീട്ട് 5.30ന് ദിവ്യബലി, ലദീഞ്ഞ് എന്നിവ നടക്കും. വെള്ളിയാഴ്ച വൈകീട്ട് ഏഴിന് ദീപാലങ്കാരം സ്വിച്ചോൺ വടക്കേക്കാട് എസ്എച്ച്ഒ കെ. അനിൽകുമാർ നിർവഹിക്കും. തുടർന്നു നടക്കുന്ന ഇടവകദിനാഘോഷ പൊതുസമ്മേളനം പാലയൂർ മാർതോമ തീർഥകേന്ദ്രം ആർച്ച്പ്രീസ്റ്റ് റവ.ഡോ. ഡേവിസ് കണ്ണമ്പുഴ ഉദ്ഘാടനം ചെയ്യും. ശനി രാവിലെ ദിവ്യബലി, തുടർന്ന് തിരുസ്വരൂപം എഴുന്നള്ളിച്ചുവയ്ക്കൽ, എഴുന്നളളിപ്പ് ആരംഭം. രാത്രി 11ന് എഴുന്നള്ളിപ്പ് സമാപനം, ബാൻഡ് വാദ്യ ഫ്യൂഷൻ. ഞായറാഴ്ച രാവിലെ 10.30ന് ആഘോഷമായ തിരുനാൾ പാട്ടുകുർബാനയ്ക്കു റവ.ഡോ. ആന്‍റണി കൊള്ളന്നൂർ മുഖ്യകാർമികനാകും. ഫാ. ഫ്രാൻസിസ് വാഴപ്പിള്ളി സന്ദേശം നൽകും. കപ്പേളയിലേക്കു പ്രദക്ഷിണം. രാത്രി ഏഴിനു ഗാനമേള.

റോഡ് സുരക്ഷയ്ക്കായി സ്ഥാപിച്ച മതിൽപൊളിച്ച് സ്വകാര്യവ്യക്തി

വടക്കാഞ്ചേരി: റോഡ് സുരക്ഷയ് ക്കായി സ്ഥാപിച്ച മതിൽ സ്വകാര്യവ്യക്തി പൊളിച്ചുനീക്കി. വടക്കാഞ്ചേരി പോലീസിൽ പരാതി നൽകി പൊതുമരാമത്ത് ബ്രിഡ് ജസ് വിഭാഗം. ഞായറാഴ്ചയുടെ മറവിലാണ് ജെസിബി ഉപയോഗിച്ച് മതിൽ പൊളിച്ചുനീക്കിയത്. പ്രതിഷേധം ശക്തം. വടക്കാഞ്ചേരി റെയിൽവേ ഓവർ ബ്രിഡ്ജിനോടുചേർന്നുള്ള മതിലാണ് സ്വകാര്യവ്യക്തി കെട്ടിടം പണിയുന്നതിന്‍റെ ഭാഗമായി അനധികൃതമായി പൊളിച്ചുനീക്കിയത്. വടക്കാഞ്ചേരി ഫൊറോന പള്ളിക്കു സമീപമുള്ള കോൺക്രീറ്റ് മതിലിന്‍റെ ഏഴുമീറ്ററോളം ഭാഗമാണ് ഞായറാഴ്ച ജെസിബി ഉപയോഗിച്ച് പൊളിച്ചു മാറ്റിയത്. സംഭവത്തിൽ വടക്കാഞ്ചേരി പൊതുമരാമത്ത് ബ്രിഡ്ജ് വിഭാഗം എഇഇ വടക്കാഞ്ചേ രി പോലീസിൽ പരാതി നൽകിയിട്ടുണ്ട്. സ്ഥിരം അപകടമേഖലയായ വടക്കാഞ്ചേരി റെയിൽവേ ഓവർ ബ്രിഡ്ജ് ഭാഗത്ത് സുരക്ഷാകവചമായി തീർത്തിരുന്ന കോൺക്രീറ്റ് മതിലാണ് സ്വകാര്യ വ്യക്തി അനുമതിയില്ലാതെ പൊളിച്ചു നീക്കിയത്. മതിൽ പൊളിക്കുന്നതുമായി ബന്ധപ്പെട്ട അപേക്ഷ പൊതുമരാമത്തുവകുപ്പിനു നൽകിയിരുന്നു. റോഡ് സുരക്ഷാ അഥോറിറ്റിക്ക് ഇതുസംബന്ധിച്ച അപേക്ഷ കൈമാറിയിരുന്നു. എന്നാൽ അനുമതി ലഭിക്കുന്നതിനു മുൻപേ സ്വകാര്യവ്യക്തി മതിൽ പൊളിക്കുകയായിരുന്നുവെന്നാണ് പറയുന്നത്. സംഭവം വിവാദമായതോടെ പൊതുമരാമത്തുവകുപ്പ് ഉദ്യോഗസ്ഥർ സ്ഥലത്തെത്തി ഉടമയ്ക്ക് സ്റ്റോപ്പ് മെമ്മോ നൽകിയിട്ടുണ്ട്. പുതിയതായി നിർമിക്കുന്ന കേട്ടിടത്തിലേക്ക് വഴി ഒരുക്കുന്നതിനാണ് മതിൽ പൊളിച്ചുനീക്കിയത്. എന്നാൽ നഗരസഭാ സെക്രട്ടറി തങ്ങൾക്ക് 14 മീറ്റർ ദൂരം മതിൽ പൊളിക്കാൻ അനുമതിപത്രം നൽകിയിട്ടുണ്ടെന്നു കെട്ടിട ഉടമ പറഞ്ഞു.

മൾട്ടിലെവൽ കാർപാർക്കിംഗ്: പ്രതിപക്ഷം പ്രതിഷേധിച്ചു

തൃശൂർ: ഉദ്ഘാടനംകഴിഞ്ഞ് അഞ്ചുമാസമായിട്ടും കോർപറേഷൻ മൾട്ടിലെവൽ കാർ പാർക്കിംഗ് സംവിധാനം തുറന്നുനൽകാത്തതിൽ പ്രതിഷേധിച്ച് കോണ്‍ഗ്രസ് കൗണ്‍സിലർമാർ. കുട്ടികൾ കളിക്കുന്ന ടോയ് കാർ പാർക്കിംഗ് ഏരിയയിൽ പാർക്ക് ചെയ്ത് പ്രതിപക്ഷനേതാവ് രാജൻ ജെ. പല്ലൻ ഉദ്ഘാടനം ചെയ്തു. കൗണ്‍സിലർമാർ ആവർത്തിച്ചുചോദിച്ചിട്ടും മാധ്യമങ്ങളിൽ വാർത്തയായിട്ടും കാർ പാർക്കിംഗ് സംവിധാനം തുറന്നിട്ടില്ല. മേയറും എൽഡിഎഫ് നേതൃത്വവും മൗനംവെടിയണം. കോടിക്കണക്കിനു രൂപ മുടക്കിയ നെഹ്റു പാർക്കിലെ മ്യൂസിക് ഫൗണ്ടൻ, റോഡ് ശുചീകരണത്തിനു വാങ്ങിയ യന്തിരൻ എന്ന ശുചീകരണവാഹനം എന്നിവയും പ്രവർത്തിക്കുന്നില്ല. കോടികളുടെ നഷ്ടമുണ്ടായതിൽ വിജിലൻസ് അന്വേഷണം വേണമെന്നും രാജൻ ജെ. പല്ലൻ ആവശ്യപ്പെട്ടു. കോർപറേഷൻ പ്രതിപക്ഷ ഉപനേതാവ് ഇ.വി. സുനിൽരാജ്, സ്റ്റാൻഡിംഗ് കമ്മിറ്റി ചെയർമാൻമാരായ ജയപ്രകാശ് പൂവത്തിങ്കൽ, മുകേഷ് കൂളപറന്പിൽ, ശ്യാമള മുരളീധരൻ, കൗണ്‍സിലർമാരായ കെ. രാമനാഥൻ, ലാലി ജെയിംസ്, എബി വർഗീസ്, വിനേഷ് തയ്യിൽ, സുനിത വിനു, ലീല വർഗീസ്, മേഴ്സി അജി, റെജി ജോയ്, മേഫി ഡെൽസണ്‍, നിമ്മി റപ്പായി, അഡ്വ. വില്ലി എന്നിവർ പങ്കെടുത്തു.

കെഎസ്എഫ്ഇഎസ്എ - സിഐടിയു ജില്ലാ സമ്മേളനം

തൃശൂർ: കെഎസ്എഫ്ഇ എസ്എ- സിഐടിയു ജില്ലാ സമ്മേളനം സേവ്യർ ചിറ്റിലപ്പിള്ളി എംഎൽഎ ഉദ്ഘാടനംചെയ്തു. യൂണിയൻ ജില്ലാ പ്രസിഡന്‍റ് ബൈജു ആന്‍റണി അധ്യക്ഷനായിരുന്നു. സിഐടിയു ജില്ലാ ജനറൽ സെക്രട്ടറി യു.പി. ജോസഫ്, ദേശീയ ജനറൽ കൗണ്‍സിൽ അംഗം പി.കെ. ഷാജൻ, ജില്ലാ സെക്രട്ടറി ടി. സുധാകരൻ, ഓഫീസേഴ്സ് യൂണിയൻ സംസ്ഥാന സെക്രട്ടറി സി. കേശവകുമാർ, ഏജന്‍റ് അസോസിയേഷൻ ജില്ലാ സെക്രട്ടറി എ. അജിത്കുമാർ, ഗോൾഡ് അപ്രൈസേഴ്സ് അസോസിയേഷൻ ജില്ലാ സെക്രട്ടറി ടി.വി. വിനോദ്കുമാർ, യൂണിയൻ സംസ്ഥാന ജനറൽ സെക്രട്ടറി എസ്. മുരളീകൃഷ്ണപിള്ള, വൈസ് പ്രസിഡന്‍റ് ഷമീർ മുഹമ്മദ്, മണിക്കുട്ടി പി. കുര്യാക്കോസ്, ആർ. സുരേഷ് കുമാർ എന്നിവർ പ്രസംഗിച്ചു. ജില്ലാ ഭാരവാഹികളായി പി.എൻ. വിഷ്ണു- പ്രസിഡന്‍റ്, ബൈജു ആന്‍റണി- സെക്രട്ടറി, പി.യു. റംലത്ത്- ട്രഷറർ എന്നിവരെ തെരഞ്ഞെടുത്തു.

എൻഎച്ച്എ സുരക്ഷാമുൻകരുതലുകൾ സ്വീകരിച്ചില്ലെന്നു കണ്ടെത്തൽ

തൃശൂർ: ദേശീയപാതയിലെ ഗതാഗതക്കുരുക്കുമായി ബന്ധപ്പെട്ട ചാലക്കുടി ഡിവൈഎസ്പി, ചാലക്കുടി ആർടിഒ, ചാലക്കുടി തഹസിൽദാർ എന്നിവരുടെ സംയുക്ത പരിശോധനാറിപ്പോർട്ടിൽ പേരാമ്പ്ര, മുരിങ്ങൂർ, ചിറങ്ങര എന്നിവിടങ്ങളിലെ അടിപ്പാതനിർമാണമേഖലകളിൽ ആവശ്യമായ സുരക്ഷാമുൻകരുതലുകൾ നാഷണൽ ഹൈവേ അഥോറിറ്റി (എൻഎച്ച്എ) സ്വീകരിച്ചിട്ടില്ലെന്നും ഫ്ലാഗ്‌മാനെ നിയോഗിച്ചിട്ടില്ലെന്നും കണ്ടെത്തൽ. ഡീപ് എക്സ്‌കവേഷൻ (വലിയ കുഴിയെടുക്കൽ) നടക്കുന്ന ഭാഗങ്ങളിൽ സർവീസ് റോഡിന്‍റെ വശങ്ങളിൽ മതിയായ സംരക്ഷണ ബാരിക്കേഡുകൾ സ്ഥാപിച്ചിട്ടില്ല. സർവീസ് റോഡിനരികിൽ നിലവിലുള്ള ഇലക്ട്രിക് പോസ്റ്റുകൾ എല്ലാം മാറ്റിയിട്ടില്ല. മെയിൻ റോഡുകളിൽനിന്ന് സർവീസ് റോഡുകളിലേക്കു പ്രവേശിക്കുന്ന സ്ഥലങ്ങളിൽ എല്ലായിടത്തും വീതികൂട്ടിയിട്ടില്ല. റോഡിന്‍റെ ഉയരം ക്രമീകരിച്ചിട്ടില്ല. മതിയായ വെളിച്ചം, ആവശ്യത്തിനു മുന്നറിയിപ്പ് ബോർഡുകൾ എന്നിവ സ്ഥാപിച്ചിട്ടില്ല. നിർമാണപ്രവർത്തനങ്ങൾ നടത്തുന്ന സ്ഥലത്തിന് 500 മീറ്റർ മുൻപുതന്നെ ട്രാഫിക് ഡൈവേർഷൻ ഉണ്ടെന്നു വിവിധ ഭാഷകളിലുള്ള ഫ്ലൂറസെന്‍റ് ബോർഡുകൾ, ഡൈവേർഷനുള്ള ഭാഗങ്ങളിൽ ഓവർടേക്കിംഗ് നിരോധിച്ചുള്ള ബോർഡുകൾ, ബ്ലിങ്കർ ലൈറ്റുകൾ, റിഫ്ലക്ടറുകൾ എന്നിവ എല്ലായിടത്തും സ്ഥാപിച്ചിട്ടില്ല. ഡ്രെയിനേജ് സംവിധാനം എല്ലായിടത്തും പൂർത്തിയാക്കിയിട്ടില്ല. കഴിഞ്ഞദിവസത്തെ മഴയിൽ കൊരട്ടി ജംഗ്ഷനിൽ ശക്തമായ വെള്ളക്കെട്ട് രൂപപ്പെട്ടെന്നും നിർമാണ പ്രവൃത്തികൾ മന്ദഗതിയിലാണെന്നും ക്രെയിൻ സൗകര്യം ഏർപ്പെടുത്തിയിട്ടില്ലെന്നും റിപ്പോർട്ടിലുണ്ട്.

ടൗൺഹാളൊരു മാന്തോപ്പായി, പൂരനഗരിക്കിതു മാമ്പഴക്കാലം

തൃശൂർ: ടൗൺഹാൾ ഒരു മാന്തോപ്പായി മാറി; മധുരമൂറുന്ന, തേൻകിനിയുന്ന ഒരായിരം മാമ്പഴങ്ങളുള്ള മാന്തോപ്പ്!! തൃശൂർ അഗ്രിഹോർട്ടിക്കൾച്ചർ സൊസൈറ്റിയുടെ ആഭിമുഖ്യത്തിൽ കൃഷിവകുപ്പ്, കാർഷികസർവകലാശാല, ഇൻഡിജീനസ് മാങ്കോട്രീ കണ്‍സർവേഷൻ പ്രോജക്ട്, ഡിടിപിസി എന്നിവയുടെ സഹകരണത്തോടെ സംഘടിപ്പിച്ചിട്ടുള്ള മാങ്ങാമേള കാണാൻ ടൗൺഹാളിൽ എത്തിയാൽ ഒരുപാടൊരുപാട് മാഞ്ചുവട്ടിൽ എത്തിയപോലെയാണ്. കുട്ടിക്കാലംതൊട്ട് കേട്ടു കൊതിതോന്നിയ മാമ്പഴങ്ങൾക്കൊപ്പം പുതുമയുള്ള പേരുകളുമായി ഒട്ടനവധി മാമ്പഴങ്ങളുമുണ്ട്. ജോളി, മുംതാസ്, മേനക, നീലകണ്ഠൻ, അലിക്കുട്ടി, പത്മിനി, അമ്പിളി, വെങ്കിടി, സൽമ, അശ്വിൻ... അങ്ങനെ ഒരു ക്ലാസിലെ ഹാജർബുക്കിലെ പേരുകൾപോലെ മാമ്പഴങ്ങളുടെ പേരുകൾ നീളുന്നു.പേരുകളിലെ വൈവിധ്യം രുചിയിലും വലിപ്പത്തിലും ആകൃതിയിലും മണത്തിലും നിറത്തിലുമുണ്ട്.മൂവാണ്ടനും പ്രിയൂരും കിളിച്ചുണ്ടനുംമാത്രമറിയുന്നവർക്ക് ഇതു പൂരക്കാലത്തെ മാമ്പഴ കുടമാറ്റമാണ്. പൊതിക്കാത്ത ഒരു നാളികേരത്തിന്‍റെയത്ര വലിപ്പമുള്ള മാമ്പഴവും ഉരുളൻകല്ലിന്‍റെ വലിപ്പമുള്ള മാങ്ങയും മേളയിലുണ്ട്.1500-ലധികം മാമ്പഴ ഇനങ്ങൾ ഇവിടെ അണിനിരത്തിയിട്ടുണ്ട്. ഭീമൻ മാങ്കോശ്രീയും കുഞ്ഞൻ കടുക്കയുമാണ്. മാങ്കോശ്രീ എട്ടു കിലോയുണ്ട്. അൽഫോൻസ, മന്ദാകിനി, കോസാപുരി, ബ്ലാക്ക് ആൻഡ്രൂസ്, മല്ലിക, ജഹാംഗിർ, മെർക്കുറി, കോട്ടപ്പറമ്പൻ, അർജുൻ, അംഗോർ... എന്നിങ്ങനെ നീളുന്നു വൈവിധ്യമാർന്ന ഇനങ്ങൾ. സിന്ദൂരം, സുന്ദരി, കൊളമ്പ്, ബ്ലാക്ക് റോസ്, ബംഗനാപ്പള്ളി, പ്രിയൂർ, മൂവാണ്ടൻ എന്നീ മാമ്പഴങ്ങളും സുലഭം. കേരളത്തിലെ 14 ജില്ലകളിൽനിന്ന് ഇൻഡിജീനസ് മാങ്കോട്രീ കണ്‍സർവേഷൻ ടീമിന്‍റെ പ്രതിനിധികളുടെ നേതൃത്വത്തിലാണ് വ്യത്യസ്തങ്ങളായ ഇത്രയധികം മാമ്പഴങ്ങളും മാങ്ങകളും ശേഖരിച്ചത്. മാമ്പഴ ഐസ്ക്രീമുകളും മാമ്പഴപ്പായസവും മാങ്ങ ജ്യൂസും ജാമുകളും അച്ചാറുകളും ഇവിടെയുണ്ട്. പഴുക്കുന്നതിനുമുമ്പ് പച്ചനിറത്തിലും പഴുത്താൽ മഞ്ഞയിലും മാത്രമല്ല മാങ്ങയുള്ളത്. മഞ്ഞനിറത്തിലുള്ള മാങ്ങ കണ്ടാൽ പഴുത്തുവെന്നു തോന്നുമെങ്കിലും പച്ചയാണെന്ന് അറിയുമ്പോൾ അത്ഭുതംതോന്നും. പഴുക്കുംമുമ്പേ മേക്കപ്പിട്ടു സുന്ദരിയായ നല്ല മഞ്ഞപച്ചമാങ്ങ. നട്ടുവളർത്താൻ മാവിൻതൈകളും വില്പനയ്ക്കുണ്ട്. മാവുകൃഷിയെക്കുറിച്ച് സെമിനാർ, പരിപാലനനിർദേശങ്ങൾക്കും സംശയദുരീകരണത്തിനും മാങ്കോ ക്ലിനിക് എന്നിവയും സജ്ജീകരിച്ചിട്ടുണ്ട്. മാങ്ങാമേള മേയർ എം.കെ. വർഗീസ് ഉദ്ഘാടനം ചെയ്തു. പി. ബാലചന്ദ്രൻ എംഎൽഎ അധ്യക്ഷനായിരുന്നു. മേള ഇന്നു സമാപിക്കും.

അമലയിൽ ലോക ലബോറട്ടറി ദിനാചരണം

അമലനഗർ: അമല മെഡിക്കൽ കോളജിൽ ലോക ലബോറട്ടറി ദിനാചരണം ഡയറക്ടർ ഫാ. ജൂലിയസ് അറയ്ക്കൽ വെള്ളരിപ്രാവിനെ പറത്തി ഉദ്ഘാടനംചെയ്തു. ലോകത്തിലെതന്നെ ഏറ്റവും മേന്മയേറിയ ഉപകരണങ്ങളാണ് അമല ആശുപത്രിയിലെ ലബോറട്ടറികളിൽ ഉപയോഗിക്കുന്നതെന്നും രോഗനിർണയത്തിൽ സുപ്രധാനപങ്കുവഹിക്കുന്ന അമലയിലെ 380 ടെസ്റ്റുകളും ഗുണമേന്മ ഉറപ്പുവരുത്തുന്ന ഇന്ത്യയിലെ ഏറ്റവും പ്രധാന സംവിധാനമായ എൻഎബിഎൽ അക്രഡിറ്റേഷൻ അംഗീകാരം നേടിയിട്ടുള്ളതാണെന്നും ഡയറക്ടർ വ്യക്തമാക്കി. പ്രഗത്ഭരായ ഡോക്ടർമാരെയും ലബോറട്ടറി ടെക്നീഷ്യൻമാരെയും അനുമോദിച്ചു. ജോയിന്‍റ് ഡയറക്ടർ ഫാ. ജെയ്സൺ മുണ്ടൻമാണി, വൈസ് പ്രിൻസിപ്പൽ ഡോ. ലോലദാസ്, ലാബ് ഡയറക്ടർ ഡോ. റീന ജോൺ, ബയോകെമിസ്ട്രി വിഭാഗം മേധാവി ഡോ. ജോസ് ജേക്കബ്, പത്തോളജി വിഭാഗം മേധാവി ഡോ. എം.സി. സാവിത്രി എന്നിവർ സന്ദേശം നൽകി. ഡോ. നിധിൻ പോൾ, വി.പി. പ്രജിത്ത് എന്നിവരുടെ നേതൃത്വത്തിൽ ലാബ് ജീവനക്കാരും അവരുടെ കുടുംബാംഗങ്ങളുമടക്കം 59 പേർ രക്തദാനം നടത്തി. നാലു ദിവസങ്ങളിലായി നടന്ന ലബോറട്ടറി ദിനാചരണത്തിൽ ലാബ് സേവനങ്ങളുടെ പ്രാധാന്യത്തെക്കുറിച്ചുള്ള റീൽസ് മത്സരങ്ങൾ, ജീവകാരുണ്യപ്രവർത്തനങ്ങൾക്കുള്ള ഫുഡ് ഫെസ്റ്റ്, എംബിബിഎസ് വിദ്യാർഥികൾക്കായുള്ള സ്കിൽ ലാബ് പരിശീലനം, ഓട്ടിസം ബാധിച്ചവരെ സന്ദർശിക്കൽ, ലാബ് ജീവനക്കാർക്കായുള്ള സൗഹൃദ ഉച്ചഭക്ഷണം എന്നിവയുണ്ടായിരുന്നു.

ബുദ്ധിയുണ്ടെങ്കിൽ സർക്കാർ ആശാസമരം അവസാനിപ്പിക്കണം: സാറാ ജോസഫ്

തൃശൂർ: ബുദ്ധിയുണ്ടെങ്കിൽ ആശമാരുടെ സമരം അവസാനിപ്പിക്കാൻ സർക്കാർ തയാറാവണമെന്നും മർക്കടമുഷ്ടി ഒഴിവാക്കണമെന്നും സാറാ ജോസഫ്. അടിസ്ഥാനപരമായി ദരിദ്രരായിരിക്കുകയും ദളിതരായിരിക്കുകയും സ്ത്രീകളായിരിക്കുകയും ചെയ്യുന്നവരുടെ സമരം ദുരഭിമാനത്തിന്‍റെ പ്രശ്നമായാണു സർക്കാർ കാണുന്നത്. ഇതിനെ അനാവശ്യസമരമെന്നുപറഞ്ഞു നിസാരവത്കരിക്കുന്ന ഇടതുപക്ഷസർക്കാർ ഏതാണ് ആവശ്യസമരമെന്നു വ്യക്തമാക്കണം. ജനങ്ങളുടെ ന്യായമായ പ്രശ്നത്തിൽ ഇടപെടാൻ സർക്കാരിനു കഴിയണം. കേന്ദ്ര-സംസ്ഥാന സർക്കാരുകളുടെ ധിക്കാരവും അഹങ്കാരവും അവസാനിപ്പിക്കാൻ ഓരോരുത്തരും ഉണർന്നുപ്രവർത്തിക്കണമെന്നും സാറാ ജോസഫ് പറഞ്ഞു. ആശമാരോടുള്ള സർക്കാർനിഷേധം തുടരുന്ന സാഹചര്യത്തിൽ പൊതുസമൂഹത്തിന്‍റെ ഉത്തരവാദിത്വമെന്ന നിലയിൽ സിവിൽ സമൂഹത്തിന്‍റെ 1,000 രൂപയുടെ ഓണറേറിയം ആശമാർക്കു കൈമാറുമെന്നും സർക്കാർതുക ലഭ്യമാകുംവരെ ഇതു തുടരുമെന്നും അവർ പത്രസമ്മേളനത്തിൽ അറിയിച്ചു. സിവിൽ സൊസൈറ്റി വിത്ത് ആശാ വർക്കേഴ്സ് അറ്റ് തൃശൂരിന്‍റെ നേതൃത്വത്തിൽ മേയ് ഒന്നിനു വൈകീട്ട് നാലിനു പബ്ലിക് ലൈബ്രറി പരിസരത്തുനടക്കുന്ന ചടങ്ങിൽ ആശമാർക്കുള്ള സിവിൽ സമൂഹത്തിന്‍റെ ഓണറേറിയം പ്രഖ്യാപനവും വിതരണവും നടക്കും. ഇതൊരു സമ്മർദതന്ത്രമാണെന്നും സമാനചിന്താഗതിക്കാർവഴി മറ്റു ജില്ലകളിലും നടപ്പാക്കാനാണു ശ്രമമെന്നും ഭാരവാഹികൾ പറഞ്ഞു. എം.പി. സുരേന്ദ്രൻ, കെ. അരവിന്ദാക്ഷൻ, ഡോ. കെ. ഗോപിനാഥൻ, പ്രഫ. കുസുമം ജോസഫ് എന്നിവരും പത്രസമ്മേളനത്തിൽ പങ്കെടുത്തു.

പൂരം ഗംഭീരമാക്കാൻ ഒരുക്കം പൂർത്തിയായി: ആർ. ബിന്ദു

തൃശൂർ: തെരഞ്ഞെടുപ്പുചട്ടം നിലനിന്നതിനാൽ കഴിഞ്ഞവർഷം ജനപ്രതിനിധികളെന്ന നിലയിൽ ഇടപെടാൻ കഴിഞ്ഞില്ലെന്നും ഇക്കുറി പൂരം ഗംഭീരമാക്കാൻ സർക്കാർതലത്തിൽ തയാറെടുപ്പു നടത്തിയെന്നും മന്ത്രി ആർ. ബിന്ദു. തൃശൂർ പൂരത്തിലെ ഘടകപൂരങ്ങൾക്കുള്ള കൊച്ചിൻ ദേവസ്വം ബോർഡിന്‍റെ ധനസഹായ‌വിതരണം നിർവഹിച്ചു പ്രസംഗിക്കുകയായിരുന്നു അവർ. ബോർഡ് പ്രസിഡന്‍റ് കെ. രവീന്ദ്രൻ, അംഗം അഡ്വ. കെ.പി. അജയൻ, ദേവസ്വം കമ്മീഷണർ എസ്.ആർ. ഉദയകുമാർ, ദേവസ്വം സെക്രട്ടറി പി. ബിന്ദു, ഡെപ്യൂട്ടി കമ്മീഷണർ കെ. സുനിൽകുമാർ, പാറമേക്കാവ് ദേവസ്വം സെക്രട്ടറി ജി. രാജേഷ്, തിരുവന്പാടി ദേവസ്വം സെക്രട്ടറി കെ. ഗിരീഷ്കുമാർ എന്നിവർ പ്രസംഗിച്ചു.

പൂരം കൊടിയേറ്റം നാളെ

തൃശൂർ: ഒരാണ്ടിന്‍റെ കാത്തിരിപ്പ് ഒരാഴ്ചയിലേക്കു ചുരുക്കിക്കൊണ്ട് നാളെ തൃശൂർ പൂരം കൊടിയേറും. പൂരത്തിന്‍റെ പ്രധാന പങ്കാളികളായ പാറമേക്കാവിലും തിരുവമ്പാടിയിലും എട്ടു ഘടകക്ഷേത്രങ്ങളിലും നാളെ പൂരം കൊടിയേറും. തിരുവമ്പാടി ക്ഷേത്രത്തിൽ നാളെ രാവിലെ 11നും 11.30 നും ഇടയിലാണ് കൊടിയേറ്റം. കൊടിയേറ്റത്തിന‌ു മുന്നോടിയായി ഇന്നു നടക്കുന്ന പ്രത്യേക പൂജകൾക്കു തന്ത്രി പുലിയന്നൂർ ശങ്കരനാരായണൻ നമ്പൂതിരിപ്പാട്, പുലിയന്നൂർ ജയന്തൻ നമ്പൂതിരിപ്പാട്, മേൽശാന്തിമാരായ പൊഴിച്ചൂർ ദിനേശൻ നമ്പൂതിരി, വടക്കേടത്ത് കപ്ലിങ്ങാട് പ്രദീപ് നമ്പൂതിരി എന്നിവർ കാർമികത്വം വഹിക്കും. നാളെ പാരമ്പര്യ അവകാശികളായ താഴത്തുപുരയ്ക്കൽ ആശാരിഗൃഹത്തിൽ സുന്ദരൻ, സുഷിത്ത് എന്നിവർ അടയ്ക്കാമരം ചെത്തിമിനുക്കി കൊടിമരം നിർമിച്ചശേഷം കൊടിമരം സ്ഥാപിക്കേണ്ട സ്ഥലത്തു ഭൂമിപൂജ നടത്തും. തുടർന്ന് 11നും 11. 30നും ഇടയിൽ ശ്രീകോവിലിൽ പൂജിച്ച കൊടിക്കൂറ നാട്ടുകാർ ചേർന്നു കൊടിമരത്തിൽ കെട്ടി കൊടിമരം ഉയർത്തുന്നതോടെ പൂരം കൊടിയേറും. വൈകീട്ട് മൂന്നിനുള്ള എഴുന്നള്ളിപ്പിനു തിരുവമ്പാടി ചന്ദ്രശേഖരൻ തിടമ്പേറ്റും. 3.30 ന് എഴുന്നള്ളിപ്പ് നായ്ക്കനാലിൽ എത്തുന്നതോടെ നടുവിലാലിലും നായ്ക്കനാലിലും പൂരപ്പതാകകൾ ഉയരും. ആചാര വെടികളും മുഴങ്ങും. തുടർന്നു ശ്രീമൂലസ്ഥാനത്ത് മേളം കൊട്ടിക്കലാശിച്ചശേഷം നടുവിൽമഠത്തിലെത്തി ആറാട്ടുകഴിഞ്ഞു ഭഗവതി വൈകീട്ട് അഞ്ചുമണിയോടെ ക്ഷേത്രത്തിലേക്കുതിരിച്ചെഴുന്നള്ളും പാറമേക്കാവ് ക്ഷേത്രത്തിൽ നാളെ ഉച്ചയ്ക്ക് 12നു വലിയപാണിയോടെ കൊടിയേറ്റുചടങ്ങുകൾ തുടങ്ങും. വലിയപാണിക്കുശേഷം പുറത്തേക്കെഴുന്നള്ളുന്ന ഭഗവതിയെ സാക്ഷിനിർത്തി ദേശക്കാർ കൊടിയുയർത്തും. ചെമ്പിൽ കുട്ടനാശാരി നിർമിച്ച കവുങ്ങിൻകൊടിമരത്തിൽ ആല്, മാവ് എന്നിവയുടെ ഇലകളും ദര്‍ഭപ്പുല്ലുംകൊണ്ട് അലങ്കരിച്ചിരിക്കും. അതിൽ ക്ഷേത്രത്തിൽനിന്ന് കൊടുക്കുന്ന സിംഹമുദ്രയുള്ള കൊടിക്കൂറകെട്ടിയാണ് കൊടി ഉയർത്തുക. പാണ്ടിമേളത്തിനുകിഴക്കൂട്ട് അനിയൻമാരാർ നേതൃത്വം നൽകും. അഞ്ചാനപ്പുറത്തുള്ള എഴുന്നള്ളിപ്പിനു പാറമേക്കാവ് കാശിനാഥൻ തിടമ്പേറ്റും. വടക്കുന്നാഥനിലെ ചന്ദ്രപുഷ്‌കര്‍ണയില്‍ ആറാട്ടിനുശേഷം മേളത്തിന്‍റെ അകമ്പടിയോടെ ഭഗവതി ക്ഷേത്രത്തിലേക്കു തിരിച്ചെഴുന്നള്ളും. തുടർന്ന് വെടിക്കെട്ട് നടക്കും. പൂരത്തിന്‍റെ പങ്കാളികളായ എട്ടു ഘടകക്ഷേത്രങ്ങളിലും നാളെ രാവിലെയും രാത്രിയുമായി കൊടിയേറ്റ് നടക്കും.

സാന്പിൾ പൊരിക്കാൻ മാർക്കോ, എന്പുരാൻ, ബസൂക്ക...

സ്വന്തം ലേഖകൻ തൃശൂർ: മേയ് നാല് ഞായറാഴ്ചയാണ് സാന്പിൾ വെടിക്കെട്ട്. അതുകൊണ്ടുതന്നെ ഇത്തവണ പതിവിൽകവിഞ്ഞ തിരക്കായിരിക്കും. കൂടുതൽപേരെ റൗണ്ടിലേക്കു വെടിക്കെട്ടു കാണാൻ കയറ്റിനിർത്തുമെന്നു മന്ത്രിയും പോലീസുമൊക്കെ പറഞ്ഞിട്ടുള്ളതിനാലും തിരക്കേറും. ശബ്ദംകുറച്ച് വർണഭംഗി കൂട്ടിയാവും ഇത്തവണയും സാന്പിളും വെടിക്കെട്ടും. തിരുവന്പാടി വിഭാഗമാണ് ഇത്തവണ വെടിക്കെട്ടിന് ആദ്യം തീകൊളുത്തുക. സൂപ്പർഹിറ്റ് സിനിമാപ്പേരുകളുമായാണ് ഇത്തവണയും ആകാശപ്പൂരത്തിനു തിരുവന്പാടിയും പാറമേക്കാവുമെത്തുന്നത്. ആകാശത്തു മിന്നൽപ്പിണരാകാൻ മാർക്കോ എത്തുന്പോൾ തിളങ്ങിവിടരാൻ എന്പുരാനും വർണംവിതറാൻ ബസൂക്ക അമിട്ടുകളും അണിയറയിൽ ഒരുങ്ങിക്കഴിഞ്ഞു. പൊട്ടിവിടർന്നാൽ അതിവേഗം മിന്നിപ്പായുന്ന പൊൻമാൻ, കിളികൾ ചിലയ്ക്കുംപോലെ ശബ്ദംവരുന്ന പൈങ്കിളി എന്നിവയും കാഴ്ചക്കാരെ വിസ്മയിപ്പിക്കും. ഇവയ്ക്കൊപ്പം നിലയമിട്ടുകളും പതിവ് ഐറ്റങ്ങളുമുണ്ടാവും. പാറമേക്കാവിനുവേണ്ടി ബിനോയ് ജേക്കബാണ് വെടിക്കെട്ടിന്‍റെ പ്രാമാണ്യം വഹിക്കുന്നത്. നെൻമാറ വേലയ്ക്കും കാവശേരി പൂരത്തിനുമൊക്കെ കരിമരുന്നിന്‍റെ ഇന്ദ്രജാലക്കാഴ്ചകളൊരുക്കി വെടിക്കെട്ടുപ്രേമികളെ ആവേശത്തിലാഴത്തിയ ബിനോയ് ജേക്കബിനു തൃശൂർ പൂരത്തിൽ ആദ്യമായാണ് വെടിക്കെട്ടൊരുക്കാൻ അവസരം കിട്ടുന്നത്. മുണ്ടത്തിക്കോട് സതീഷ് തന്നെയാണ് തിരുവന്പാടിക്കായി വെടിക്കെട്ടൊരുക്കുന്നത്. കഴിഞ്ഞതവണ പൂരം ചരിത്രത്തിലാദ്യമായി തിരുവന്പാടിയുടെയും പാറമേക്കാവിന്‍റെയും വെടിക്കെട്ട് ലൈസൻസി സതീഷായിരുന്നു. ലൈസൻസ് കൊടുക്കുന്ന കാര്യത്തിലുണ്ടായ ചില സാങ്കേതികപ്രശ്നങ്ങളെതുടർന്നായിരുന്നു രണ്ടുകൂട്ടരുടെയും ലൈസൻസി ഒരാളായി പൂരം വെടിക്കെട്ട് ചരിത്രം കുറിച്ചത്. വർഷങ്ങളായി തിരുവന്പാടിക്കുവേണ്ടി മുണ്ടത്തിക്കോട് പന്തലങ്ങാട്ട് സതീഷ് വെടിക്കെട്ട് ലൈസൻസിയായിട്ടുണ്ട്. സതീഷിന്‍റെ അച്ഛൻ മണിപ്പാപ്പനും തിരുവന്പാടിയുടെ വെടിക്കെട്ടുകരാറെടുത്തിട്ടുണ്ട്. പതിവിൽനിന്ന് വ്യത്യസ്തമായി ഇത്തവണ ഫയർലൈൻ കുറച്ചുകൂടി ഉള്ളിലേക്കു നീക്കിക്കൊണ്ട് ഫയർലൈനും കാണികളും തമ്മിലുള്ള അകലം വർധിപ്പിച്ച് കൂടുതൽപേരെ വെടിക്കെട്ട് കാണാൻ റൗണ്ടിൽ കയറ്റിനിർത്താനാണ് തീരുമാനിച്ചിരിക്കുന്നത്. സാന്പിളും പ്രധാന വെടിക്കെട്ടും നടക്കുന്ന സമയത്ത് മാഗസിൻ ഒഴിച്ചിടുകയും ചെയ്യും. തേക്കിൻകാട് മൈതാനിയിൽ സാന്പിൾ വെടിക്കെട്ടിനുള്ള കുഴികൾ കുഴിച്ചുതുടങ്ങി. മഴഭീഷണിയുള്ളതിനാൽ കുഴികൾ ടാർപോളിൻകൊണ്ട് മൂടിയിട്ടിരിക്കുകയാണ്.

റോഡ് മുറിച്ചുകടക്കുന്നതിനിടയില്‍ ലോറിയിടിച്ച് യുവാവ് മരിച്ചു

ഇരിങ്ങാലക്കുട: റോഡ് മുറിച്ചുകടക്കുന്നതിനിടയില്‍ ലോറിയിടിച്ച് യുവാവ് മരിച്ചു. ഇരിങ്ങാലക്കുട പുല്ലൂര്‍ അമ്പലനട തൊടുപറമ്പില്‍ വര്‍ക്കി മകന്‍ ബിജു (47) ആണ് മരിച്ചത്. കഴിഞ്ഞ ദിവസം രാത്രി 11.30ന് എറണാകുളത്ത് വെച്ചാണ് അപകടം സംഭവിച്ചത്. അപകടം സംഭവിച്ചയുടനെ ആശുപത്രിയില്‍ പ്രവേശിപ്പിച്ചുവെങ്കിലും തലക്കേറ്റ പരിക്കാണ് മരണകാരണമായി പറയുന്നത്. സംസ്‌കാരം നടത്തി. അമ്മ: റോസി. സഹോദരങ്ങള്‍: ഷാജു, ഷൈനി.

0480 ശ്രീകുമാരന്‍തമ്പി പ്രഥമ അവാര്‍ഡ് റഫീക്ക് അഹമ്മദിന് സമ്മാനിച്ചു

ഇരിങ്ങാലക്കുട: 0480 എന്ന കലാസാംസ്‌കാരിക സംഘടന എര്‍പ്പെടുത്തിയ പ്രഥമ ശ്രീകുമാരന്‍തമ്പി പുരസ്‌കാരം കവി റഫീഖ് അഹമ്മദിന് സമ്മാനിച്ചു. 25,000 രൂപയും പ്രശസ്തിപത്രവും ഫലകവുമായിരുന്നു അവാര്‍ഡ്. ടൗണ്‍ഹാളില്‍ നടന്ന ചടങ്ങില്‍ സംഘടനയുടെ ഉദ്ഘാടനം കവി ശ്രീകുമാരന്‍തമ്പി നിര്‍വഹിച്ചു. പ്രദീപ് മേനോന്‍ അധ്യക്ഷതവഹിച്ചു. പ്രതാപ് സിംഗ്, കലാഭവന്‍ നൗഷാദ്, വൈഗ കെ.സജീവ്, ഇ. ജയകൃഷ്ണന്‍ എന്നിവരേയും ചടങ്ങില്‍ ആദരിച്ചു. മേരിക്കുട്ടി ജോയ്, റഷീദ് കാറളം, റഫീക്ക് അഹമ്മദ്, ഇ. ജയകൃഷ്ണന്‍ എന്നിവര്‍ സംസാരിച്ചു. ശ്രീകുമാരന്‍തമ്പിയുടേയും റഫീക്ക് അഹമ്മദിന്‍റെയും കോര്‍ത്തിണക്കിയ എടപ്പാള്‍ വിശ്വന്‍ നയിച്ച ഗാനമേള, മീനാക്ഷിമേനോന്‍റെ മോഹിനിയാട്ടം, ശരണ്യ സഹസ്ര ടീമിന്‍റെ കഥക്, ജെ.ഡി.എസ് ഡാന്‍സ് അക്കാദമിയുടെ നൃത്തം എന്നിവ അരങ്ങേറി.

കാർഷികവായ്പ എഴുതിത്തള്ളണം: മന്ത്രി കെ. കൃഷ്ണൻകുട്ടി

തൃശൂർ: രാജ്യത്തെ കർഷകരുടെ മുഴുവൻ കാർഷികവായ്പയും എഴുതിത്തള്ളണമെന്നു മന്ത്രി കെ. കൃഷ്ണൻകുട്ടി. എച്ച്എംഎസ് തൃശൂർ ജില്ലാ പ്രതിനിധിസമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. കേന്ദ്രസർക്കാർ തൊഴിലാളികളെ വർഗീയമായി ചേരിതിരിക്കുന്നതിനൊപ്പം തൊഴിൽനിയമങ്ങൾ ഒന്നൊന്നായി മാറ്റിമറിച്ച് കോർപറേറ്റുകൾക്കു കൂട്ടുനിൽക്കുകയാണ്. റെയിൽവേയിലടക്കം 15 ലക്ഷത്തോളം തൊഴിലുകൾ കേന്ദ്രം മരവിപ്പിച്ചെന്നും മന്ത്രി കുറ്റപ്പെടുത്തി. എച്ച്എംഎസ് ജില്ല പ്രസിഡന്‍റ് ഐ.എ. റപ്പായി, സംസ്ഥാന വൈസ് പ്രസിഡന്‍റ് ഒ.പി. ശങ്കരൻ, ആർജെഡി സംസ്ഥാന ജനറൽ സെക്രട്ടറി യൂജിൻ മോറേലി, പാലക്കാട് ജില്ലാ പ്രസിഡന്‍റ് എ. രാമചന്ദ്രൻ, അഡ്വ. വി.എൻ. നാരായണൻ, പി.ടി. അഷറഫ്, ഷീബ ബാബു, എം.ഡി. ഗ്രേസ്, അഡ്വക്കേറ്റ് ഷാജൻ മഞ്ഞളി, അജി ഫ്രാൻസിസ്, അഡ്വക്കേറ്റ് മനോജ് ചിറ്റിലപ്പിള്ളി, ഉദയൻ കളരിക്കൽ എന്നിവർ പ്രസംഗിച്ചു. മുതിർന്ന നേതാക്കളെ മന്ത്രി ആദരിച്ചു.

പറക്കോട്ടുകാവ് താലപ്പൊലി മേയ് നാലിന് കൊടിയേറും

തിരുവില്വാമല: പറക്കോട്ടുകാവ് താലപ്പൊലി മഹോത്സവത്തിന് ഞായറാഴ്ച കൊടിയേറും. രാത്രി എട്ടിന് പറക്കോട്ടുകാവിൽ കൊടിയേറ്റത്തിനുശേഷം മൂന്നു ദേശക്കമ്മിറ്റികൾ സംയുക്തമായി നടത്തുന്ന സാമ്പിൾ വെടിക്കെട്ടുണ്ടാകും. എഴുന്നള്ളിപ്പുകൾ, നാടൻകലാപ്രകടനങ്ങൾ, വെടിക്കെട്ട് എന്നിവയ്ക്ക് പേരുകേട്ട ഉത്സവത്തിന് പങ്കാളികളായ പടിഞ്ഞാറ്റുമുറി, കിഴക്കുമുറി, പാമ്പാടി ദേശങ്ങളിൽ ഒരുക്കങ്ങൾ അവസാനഘട്ടത്തിലാണ്. താലപ്പൊലി കൊടിയേറുന്നതോടെ തട്ടകം ഉത്സവലഹരിയിലാകും. പിറ്റേന്നുമുതൽ ദേശങ്ങളിൽ പറയെടുപ്പ് ആരംഭിക്കും. പൂതൻ, തിറ, വെള്ളാട്ട്, നായാടികൾ തുടങ്ങിയ കലാരൂപങ്ങൾ ഉത്സവം അറിയിച്ച് വീടുകളിലെത്തും. മേടമാസത്തിലെ ഒടുവിലത്തെ ഞായറാഴ്ചയായ മേയ് 11നാണ് താലപ്പൊലി ആഘോഷം. താലപ്പൊലിയോടനുബന്ധിച്ച് ഇന്നലെ പറക്കോട്ടുകാവിൽ കിഴക്കുമുറിദേശം ഒരുക്കിയ ലക്ഷദീപ സമർപ്പണം നടന്നു. സന്ധ്യക്ക് ദീപങ്ങൾ തെളിയിക്കാൻ ക്ഷേത്രസന്നിധിയിൽ നിരവധി ഭക്തരെത്തി. ചുറ്റുവിളക്ക്, നിറമാല, തായമ്പക, മേളം എന്നിവയും വിവിധ കലാപരിപാടികളും ഉണ്ടായിരുന്നു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]