ADVERTISEMENT

ADVERTISEMENT

കൊഴിഞ്ഞാന്പാറ സ്റ്റേഷൻ സന്ദർശിച്ച് നാലാംക്ലാസിലെ കുഞ്ഞോമനകൾ

കൊഴിഞ്ഞാമ്പാറ: നാലാംക്ലാസിലെ പുതിയ പാഠ്യപദ്ധതി അനുസരിച്ച് കൊഴിഞ്ഞാമ്പാറ യുപി സ്കൂളിലെ വിദ്യാർഥികൾ പോലീസ് സ്റ്റേഷൻ സന്ദർശിച്ചു.

പിഞ്ചോമനകൾക്ക് മധുരംനൽകി സ്വീകരിച്ചുകൊണ്ട് എസ്എച്ച്ഒ എം.ആർ. അരുൺകുമാർ, എസ്ഐ എസ്. സുരേഷ്, സിപിഒ ടി. സതീഷ് എന്നിവർ ബോധവത്കരണ ക്ലാസെടുത്തു. കുട്ടികളുടെ സംശയങ്ങൾക്ക് മറുപടി നൽകുകയും ചെയ്തു.

പിടിഎ പ്രസിഡന്‍റ് കെ.സി. മുഹമ്മദ് റാഫി, പ്രധാന അധ്യാപകൻ എ. ഉമ്മർ ഫാറൂഖ് അധ്യാപകരായ എം.ആർ. ബിന്ദു, ആർ. രാജേഷ് കുമാർ, എസ്. ഷീബ, കെ. കീർത്തന, കെ.പി. ലിഖിത, എൽ. ഡൊമിനിക് ആരോഗ്യരാജ് എന്നിവർ പങ്കെടുത്തു.

ADVERTISEMENT

അങ്കണവാടികൾക്കു ഗ്യാസ് സ്റ്റൗ വിതരണംചെയ്തു

കിഴക്കഞ്ചേരി: ഗ്രാമപഞ്ചായത്തിനു കീഴിലുള്ള അങ്കണവാടികൾക്ക് ഗ്യാസ് സ്റ്റൗ വിതരണോദ്ഘാടനം ഗ്രാമപഞ്ചായത്ത് പ്രസിഡന്‍റ് കവിത മാധവൻ നിർവഹിച്ചു. 2025- 26 സാന്പത്തിക വർഷത്തെ പദ്ധതിയിൽ ഉൾപ്പെടുത്തി 43 അങ്കണവാടികൾക്കാണ് ഗ്യാസ് സ്റ്റൗ നൽകിയത്. ഗ്രാമപഞ്ചായത്ത് ഹാളിൽ നടന്ന പരിപാടിയിൽ വൈസ് പ്രസിഡന്‍റ് വി. രാധാകൃഷ്ണൻ അധ്യക്ഷനായി. വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സണ്‍ രാജി കൃഷ്ണൻകുട്ടി, മെംബർമാരായ മറിയക്കുട്ടി, സുനിത, ഐസിഡിഎസ് സൂപ്പർവൈസർ ബെനിത അഗസ്റ്റിൻ എന്നിവർ പങ്കെടുത്തു.

അതിർത്തിയിൽ കർശനപരിശോധന

കോയന്പത്തൂർ: കേരളത്തിൽ നിപ്പ വൈറസ് രോവ്യാപനം വർധിച്ചതിനെത്തുടർന്ന് തമിഴ്‌നാട്- കേരള അതിർത്തി പ്രദേശങ്ങളിൽ 24 മണിക്കൂർ തീവ്രപരിശോധന. പ്രദേശമായ കെ.കെ. ചാവടി, വലിയാർ അതിർത്തി പ്രദേശങ്ങളിൽ ജില്ലാ മെഡിക്കൽ സംഘമാണ് തീവ്രപരിശോധന ഏർപ്പെടുത്തിയത്. കേരളത്തിൽനിന്നെത്തുന്ന ബസുകൾ, ട്രക്കുകൾ, ഫോർ വീലറുകൾ, ഇരുചക്ര വാഹനങ്ങൾ എന്നിവയിൽ വരുന്ന യാത്രക്കാരെ തീവ്ര പരിശോധനയ്ക്കു ശേഷമാണ് തമിഴ്‌നാട്ടിലേക്കു കടത്തിവിടുന്നത്. കേരളത്തിൽ നിന്ന് വരുന്നവർ മാസ്ക് ധരിക്കണമെന്നും നിർദ്ദേശം നൽകിയിട്ടുണ്ട്. വാളയാർ ചെക്ക്പോസ്റ്റിൽ വാഹനങ്ങളിൽ സഞ്ചരിക്കുന്ന ആളുകളുടെ ശരീര താപനില പരിശോധിക്കുന്നുണ്ടെന്നും അധികൃതർ അറിയിച്ചു. പരിശോധനയ്ക്കിടെ ആർക്കെങ്കിലും പനി കണ്ടെത്തിയാൽ ആശുപത്രിയിൽ ചികിത്സ തേടാനും അവരുടെ പേര്, ഫോൺ നമ്പർ, വിലാസം എന്നിവ എടുക്കാനും നിർദ്ദേശിച്ചിട്ടുണ്ട്. കടുത്ത പനിയുള്ളവരെ ആംബുലൻസെത്തിച്ചു ആശുപത്രിയിൽ പ്രവേശിപ്പിക്കാനും നിർദേശം നൽകിയിട്ടുണ്ട്.

പരിയാരത്തെ കനാൽറോഡ് നാടിനു സമർപ്പിച്ചു

വാണിയംകുളം: ഗ്രാമപഞ്ചായത്തിലെ നിർമാണം പൂർത്തീകരിച്ച പരിയാരത്ത് കനാൽറോഡ് നാടിനു സമർപ്പിച്ചു. ഗ്രാമപഞ്ചായത്ത് പ്രസിഡന്‍റ് കെ. ഗംഗാധരൻ ഉദ്ഘാടനം നിർവഹിച്ചു. ദേശീയ ഗ്രാമീണ തൊഴിലുറപ്പ് പദ്ധതിയിൽ ഉൾപ്പെടുത്തി 3.80 ലക്ഷം രൂപ വിനിയോഗിച്ചാണ് റോഡ് നിർമാണം പൂർത്തീകരിച്ചത്. റോഡ് വന്നതോടെ പ്രദേശത്തെ പന്ത്രണ്ടോളം വരുന്ന കുടുംബങ്ങളുടെ യാത്രാ സൗകര്യം മെച്ചപ്പെടുത്താൻ സാധിക്കും. ക്ഷേമകാര്യ കമ്മിറ്റി ചെയർപേഴ്സണ്‍ വി.പി. സിന്ധു അധ്യക്ഷയായി. വാർഡ് മെംബർ ഡി. ശങ്കരനാരായണൻ, മോണിറ്ററിംഗ് കമ്മിറ്റി ചെയർമാൻ എം. പ്രദീപ് പ്രസംഗിച്ചു.

കാവശേരിയിലെ വാതകശ്മശാനം പ്രവർത്തനം കാര്യക്ഷമമാക്കണമെന്നു ബിജെപി

ആലത്തൂർ: കാവശേരിയിലെ വാതകശ്മശാനം പ്രവർത്തനക്ഷമമാക്കണമെന്നാവശ്യപ്പെട്ടു ബിജെപി കാവശേരി പഞ്ചായത്ത് കമ്മിറ്റിയുടെ നേതൃത്വത്തിൽ കാവശേരി ഗ്രാമപഞ്ചായത്തിനുമുന്നിൽ പ്രതിഷേധസമരം നടത്തി. ബിജെപി പാലക്കാട് വെസ്റ്റ് ജില്ലാ പ്രസിഡന്‍റ് പി. വേണുഗോപാൽ ഉദ്ഘാടനം ചെയ്തു. ബിജെപി പഞ്ചായത്ത് കമ്മിറ്റി പ്രസിഡന്‍റ് വി.കെ. ജയകൃഷ്ണൻ അധ്യക്ഷനായി. ജില്ലാ ജനറൽ സെക്രട്ടറി ബാബു പൂക്കാട്ടിരി, ജില്ലാ വൈസ് പ്രസിഡന്‍റ് സി.എസ്. ദാസ്, മണ്ഡലം ജനറൽ സെക്രട്ടറി എൻ. കൃഷ്ണകുമാർ, കൃഷ്ണപ്രസാദ് , മോഹനൻ കല്ലേപ്പുള്ളി, സുനിൽകുമാർ, വി. ഭവദാസ്, നിത്യാമനോജ് പ്രസംഗിച്ചു.

നെന്മാറ സാമൂഹ്യാരോഗ്യകേന്ദ്രത്തിന്‍റെ ശോച്യാവസ്ഥയ്ക്കെതിരേ മാർച്ച്

നെന്മാറ: സാമൂഹ്യ ആരോഗ്യകേന്ദ്രത്തിന്‍റെ ശോച്യാവസ്ഥ പരിഹരിക്കണമെന്നാവശ്യപ്പെട്ട് യൂത്ത് കോൺഗ്രസ്, കെഎസ്‌യു മണ്ഡലം കമ്മിറ്റികൾ പ്രതിഷേധ മാർച്ച് നടത്തി. ഡിസിസി ജനറൽ സെക്രട്ടറി കെ.ജി. എൽദോ സമരം ഉദ്ഘാടനം ചെയ്തു. കോൺഗ്രസ് നിയോജകമണ്ഡലം കമ്മിറ്റി പ്രസിഡന്‍റ് മനു പല്ലാവൂർ അധ്യക്ഷത വഹിച്ചു. കെഎസ്‌യു നിയോജകമണ്ഡലം പ്രസിഡന്‍റ് രാജേഷ് നെന്മാറ, ഡിസിസി ജനറൽ സെക്രട്ടറി സി.സി. സുനിൽ, യൂത്ത് കോൺഗ്രസ് സംസ്ഥാന ജനറൽ സെക്രട്ടറി സി. വിഷ്ണു, ബ്ലോക്ക് കോൺഗ്രസ് കമ്മിറ്റി പ്രസിഡന്‍റ്, മറ്റു നേതാക്കളായ എസ്. വിനോദ്, പ്രദീപ് നെന്മാറ, വിനീഷ് കരിമ്പാറ, ശ്യാം ദേവദാസ്, വൈശാഖ് വക്കാവ്, എസ്.എം. ഷാജഹാൻ തുടങ്ങിയവർ നേതൃത്വം നൽകി.

പകൽസമയത്തും പടക്കവുമായി വനംവാച്ചർമാർ

നെന്മാറ: കരിമ്പാറ മേഖലയിൽ കാട്ടാനകളുടെ കൃഷിനാശം തുടരുന്നു. കഴിഞ്ഞരാത്രിയും കൃഷിയിടങ്ങളിലെ തെങ്ങുകൾ കാട്ടാന വ്യാപകമായി നശിപ്പിച്ചു. മുൻദിവസങ്ങളിൽ ഇറങ്ങിയ പൂഞ്ചേരിയിലെ കൃഷിയിടത്തിൽതന്നെ രാത്രിവൈകി വീണ്ടും കാട്ടാനയെത്തി. ഇതേ കൃഷിയിടത്തിലെ അഞ്ചുതെങ്ങുകളും നിരവധി മറ്റു കാർഷികവിളകളും നശിപ്പിച്ചു. തുടർച്ചയായ നാലാംദിവസമാണ് ഒരേ കൃഷിയിടത്തിൽ വ്യത്യസ്തസമയങ്ങളിലായി കാട്ടാന എത്തിയത്. ഇതിനകം കുന്നുപറമ്പ് വീട്ടിൽ ഷാജഹാന്‍റെ 60 തെങ്ങുകളാണ് കാട്ടാന നശിപ്പിച്ചത്. കഴിഞ്ഞദിവസം രാവിലെ മലയോരമേഖലയിൽ പരിശോധന നടത്തിയ വനംജീവനക്കാർ മലയോര മേഖലയോടുചേർന്ന് കാട്ടാനയെ കണ്ടെത്തി. പടക്കം പൊട്ടിച്ച് പിന്തുടർന്ന് ഉൾവനത്തിലെ ആലുംപതിയിലേക്കു കയറ്റിവിട്ടിരുന്നു. കരിമ്പാറ, കൽച്ചാടി, പൂഞ്ചേരി, ചള്ള തുടങ്ങിയ സമീപ മേഖലകളിലായി വിവിധ ഗ്രൂപ്പുകളായി തിരിഞ്ഞു വനംവാച്ചർമാർ ആനകളെ കാട്ടിലേക്കു കയറ്റിയിരുന്നു. രാത്രിയിൽ പടക്കംപൊട്ടിച്ച് കാവലിരിക്കുന്നുണ്ടെന്നും വാച്ചർമാർ പറഞ്ഞു.

പൊത്തപ്പാറയിലെ കവർച്ചയ്ക്കുപിന്നിൽ വീടിനെക്കുറിച്ച് അറിയുന്നവരെന്ന് സംശയം

വടക്കഞ്ചേരി: പൊത്തപ്പാറ വെട്ടിക്കൽകുളമ്പിൽ വീടിന്‍റെ വാതിലുകൾ ചവിട്ടിപ്പൊളിച്ച് അകത്തുകടന്നു വീട്ടമ്മയെ കത്തികാട്ടി ഭീഷണിപ്പെടുത്തുകയും ആക്രമിക്കുകയും ചെയ്ത് പണവും സ്വർണാഭരണങ്ങളും കവർന്ന സംഭവത്തിനുപിന്നിൽ വീട്ടുകാരെക്കുറിച്ച് വ്യക്തമായി അറിയുന്നവരാണെന്ന് നിഗമനം. അല്ലാതെയുള്ളവർക്ക് വീട്ടുകാരെക്കുറിച്ചറിഞ്ഞ് മോഷണം നടത്താൻ കഴിയില്ലെന്നാണ് വിലയിരുത്തൽ. വളയൽ ബാബുവിന്‍റെ വീട്ടിലാണ് തിങ്കളാഴ്ച രാത്രി ഏഴുമണിയോടെ മോഷ്ടാക്കളുടെ അക്രമവും കവർച്ചയും നടന്നത്. ടാർ റോഡിൽനിന്നും ഒരാൾക്കുമാത്രം നടന്നുപോകാൻ കഴിയുന്ന വഴിയിലൂടെ അമ്പതുമീറ്റർ ഉള്ളിലേക്ക് മാറിയാണ് ഈ വീട്. കുറച്ചുദിവസമായി വീട്ടിൽ അസമയങ്ങളിൽ ശബ്ദം കേൾക്കുകയും മറ്റും ഉണ്ടായിരുന്നതായി വീട്ടുകാർ പറയുന്നു. ഇതുസംബന്ധിച്ച് പോലീസിൽ പരാതിയും നൽകി. വടികളും മറ്റുമായി വീട്ടുകാരും മുൻകരുതലുമായാണ് രാത്രികളിൽ കഴിഞ്ഞിരുന്നത്. അപശബ്ദങ്ങളും മറ്റും ശല്യമായപ്പോൾ വഴിയിലേക്കുമാത്രമായി ഒരു സിസിടിവി കാമറയും വീടിന്‍റെ ടെറസിൽ സ്ഥാപിച്ചു. എന്നാൽ കവർച്ച നടന്ന സമയം കാമറ പ്രവർത്തിച്ചില്ല. വടക്കഞ്ചേരിയിലെ പെട്രോൾ പമ്പിൽ ജോലിയുള്ള ബാബു ജോലികഴിഞ്ഞ് രാത്രി വൈകിയാണ് തിരിച്ചെത്തുക. ജോലിയുമായി മക്കളും വീട്ടിലുണ്ടാകാറില്ല. വടക്കഞ്ചേരി സിഐ കെ.പി. ബെന്നിയുടെ നേതൃത്വത്തിലാണ് അന്വേഷണം പുരോഗമിക്കുന്നത്.

വീണുകിട്ടിയ പണമടങ്ങുന്ന പഴ്സ് ഉടമയ്ക്ക് തിരികെനൽകി വിദ്യാർഥികൾ മാതൃകയായി

കല്ലടിക്കോട്: വീണുകിട്ടിയ പണമടങ്ങുന്ന പഴ്സ് ഉടമയെ അന്വേഷിച്ചുകണ്ടെത്തി തിരികെനൽകി വിദ്യാർഥികൾ മാതൃകയായി. തച്ചന്പാറ ദേശബന്ധു ഹൈസ്കൂൾ വിദ്യാർഥികളായ ഡി. ആരുഷ്, കെ. ഷാഹിൻ, കെ.റിഷാൽ, ബാവുഷാ ഹസാദ് എന്നീ കുട്ടികൾ ട്യൂഷനുപോയി തിരിച്ചുവരുമ്പോൾ വഴിയിൽനിന്നു പണമടങ്ങുന്ന പഴ്സ് വീണുകിട്ടുകയായിരുന്നു. ഉടമയായ വിഷ്ണുവിന് കല്ലടിക്കോട് പോലീസ് സ്റ്റേഷൻ ഓഫീസർമാരായ അനിൽ, സാബു, കൃഷ്ണകുമാർ എന്നിവരുടെ സാന്നിധ്യത്തിൽ തിരിച്ചേൽപ്പിച്ചു. വിദ്യാർഥികളെ കല്ലടിക്കോട് പോലീസ് അഭിനന്ദിച്ചു. പഴ്സ് തിരിച്ചുകിട്ടിയ വിഷ്ണു വിദ്യാർഥികൾക്ക് മധുരപലഹാരം നൽകി.

ഡോ.എം. പ്രദീപിന് മികച്ച ഡോക്ടർക്കുള്ള തമിഴ്നാട് ഗവർണറുടെ പുരസ്കാരം

പാലക്കാട്: സീനിയർ ന്യൂറോളജിസ്റ്റും യൂ മെഡ് ഹോസ്പിറ്റൽ ഫൗണ്ടറുമായ ഡോ.എം. പ്രദീപിന് തമിഴ്നാട് ഗവർണറുടെ മികച്ച ഡോക്ടർക്കുള്ള പുരസ്കാരം ലഭിച്ചു. രാജ്ഭവനിൽ നടന്ന ചടങ്ങിൽ ഗവർണർ ആർ. എൻ. രവി അവാർഡ് സമ്മാനിച്ചു. വൈദ്യ പരിചരണത്തിലെ അതുല്യ പ്രതിഭാശാലികളുടെ സമർപ്പിത സേവനത്തിനുള്ള അംഗീകാരമായാണ് ഈ പുരസ്കാരം. സ്പെയിനിൽ നടന്ന യൂറോപ്യൻ ന്യൂറോളജി ഡോക്ടർമാരുടെ സമ്മേളനത്തിൽ ഇന്ത്യയുടെ പ്രതിനിധിയായി പ്രഭാഷണം നടത്തി രാജ്യാന്തര ശ്രദ്ധനേടിയ ഡോ.എം. പ്രദീപ് വൈദ്യ സേവനത്തിൽ നാല് പതിറ്റാണ്ടായി നിറസാന്നിധ്യമായി നിലകൊള്ളുന്നു. സ്വിറ്റ്സർലാൻഡിൽ നിന്ന് ന്യൂറോ ഇന്‍റർവെൻഷനും യുഎസിൽ നിന്ന് ന്യൂറോ സോണോളജി ബിരുദവും സ്വായത്തമാക്കിയ ഇദ്ദേഹം ന്യൂറോ സോണോളജി ഇന്ത്യൻ സൊസൈറ്റിയുടെ നിയുക്ത പ്രസിഡന്‍റ് കൂടിയാണ്. കേരള അസോസിയേഷൻ ഓഫ് ന്യൂറോളജിസ്റ്റ് കഴിഞ്ഞ വർഷത്തെ പ്രസിഡന്‍റ് കൂടിയാണ് ഡോ.എം. പ്രദീപ്.

മുതലമട പഞ്ചായത്ത് കാര്യാലയത്തിൽ കുത്തിയിരിപ്പുസമരം തുടങ്ങി

മുതലമട: പറമ്പിക്കുളം ആദിവാസി, എസ്‌സി, എസ്ടി ഉന്നതിയിലെ താമസക്കാർക്ക് മുൻപഞ്ചായത്ത് ഭരണസമിതി അനുവദിച്ച ഫണ്ട് റദ്ദാക്കിയത് പുനഃസ്ഥാപിക്കണമെന്നാവശ്യപ്പെട്ട് ജനകീയ വികസനമുന്നണി മുതലമടയുടെ നേതൃത്വത്തിൽ ആദിവാസി കുടുംബങ്ങൾ രാപ്പകൽസമരം തുടങ്ങി. ഊരുവാസിമൂപ്പൻമാരായ ഗോപാലൻ കുരിയാർകുറ്റി, രാമൻകുട്ടി തേക്കടി, ചിന്നസ്വാമി മുച്ചൻകുണ്ട്, ആദിവാസി സംരക്ഷണ സമിതി നീളിപ്പാറ മാരിയപ്പൻ, മുൻപഞ്ചായത്ത് പ്രസിഡന്‍റ് പി. കൽപ്പനാദേവി, എം. താജുദ്ദീൻ എന്നിവരുടെ നേതൃത്വത്തിൽ അമ്പതോളം ആദിവാസികളാണ് ഗ്രാമപഞ്ചായത്ത് നടുത്തളത്തിൽ സമരം നടത്തിവരുന്നത്. പറമ്പിക്കുളം, തേക്കടി വനപാത, പള്ളം പുഴപ്പാലം, ലൈഫ് മിഷൻ വീടുകൾ, എന്നിവ മുൻ തീരുമാനപ്രകാരം നടപ്പിലാക്കണം. കൂടാതെ വയോജനങ്ങൾക്ക് കട്ടിൽ, വല, സൗരോർജ റാന്തൽ എന്നിവയും സമയബന്ധിതമായി വിതരണം നടത്തണമെന്നതാണ് സമരക്കാരുടെ ആവശ്യം. ചൊവ്വ രാവിലെ മുതലാണ് സമരം ആരംഭിച്ചത്. കൊല്ലങ്കോട് പോലീസ് പഞ്ചായത്ത് കാര്യാലയത്തിൽ സംരക്ഷണമേർപ്പെടുത്തി. ആവശ്യങ്ങൾ വാക്കാൽ സമ്മതിച്ചാൽ പോരെന്നും ഡിപിആർ രേഖ നൽകണമെന്ന ആവശ്യത്തിൽ പ്രദേശവാസികൾ ഉറച്ചു നിൽക്കുകയാണ്. വിവിധ ആവശ്യ ങ്ങൾ ഉന്നയിച്ച് വീട്ടമ്മമാർ ഉൾപ്പെടെ സമരക്കാർ പ്ലക്കാർഡുകൾ പ്രദർശിപ്പിച്ചാണ് കുത്തിയിരുപ്പ് സമരം തുടരുന്നത്.

മാർക്കറ്റ് ഷോപ്പിംഗ് കോംപ്ലക്സ് കെട്ടിടം പൊളിക്കുന്നതിനു ഹൈക്കോടതിവിലക്ക്

ഒറ്റപ്പാലം: നഗരസഭയുടെ പഴയ മാർക്കറ്റ് ഷോപ്പിംഗ് കോംപ്ലക്സ് കെട്ടിടം പൊളിച്ചുനീക്കാനുള്ള നഗരസഭയുടെ തീരുമാനത്തിന് തിരിച്ചടി. കെട്ടിടം പൊളിക്കാനുള്ള തീരുമാനം ഹൈക്കോടതി വിലക്കി. യാതൊരുവിധത്തിലുള്ള കേടുപാടുകളും ഇല്ലാത്ത കെട്ടിടം രാഷ്ട്രീയ വിരോധത്തിന്‍റെ പേരിലാണ് പൊളിച്ചു നീക്കാൻ നഗരസഭ ശ്രമിക്കുന്നതെന്ന കച്ചവടക്കാരുടെ ഹർജിയുടെ അടിസ്ഥാനത്തിലാണ് ഹൈക്കോടതി ഇടപെടൽ ഉണ്ടായത്. കെട്ടിടത്തിന് ബലക്ഷയം ഉണ്ടെന്ന തരത്തിലുള്ള റിപ്പോർട്ട് നൽകണമെന്ന് പരിശോധന നടത്തിയ തൃശൂരിലെ എൻജിനീയറിംഗ് കോളജിനോട് ചില ബാഹ്യശക്തികൾ നിർദേശിച്ചതിന്‍റെ അടിസ്ഥാനത്തിലാണ് കെട്ടിടം പൊളിക്കാൻ അനുകൂലമായി റിപ്പോർട്ട് നൽകിയതെന്ന് കച്ചവടക്കാർ ആരോപിക്കുന്നു. കോളജിന്‍റെ പരിശോധനാ റിപ്പോർട്ടിൽ അതൃപ്തി രേഖപ്പെടുത്തിയ ഹൈക്കോടതി മറ്റൊരു വിദഗ്ധ ഏജൻസിയെ കൊണ്ട് കെട്ടിടം പരിശോധിപ്പിക്കണമെന്നും ഉത്തരവിട്ടതായി കച്ചവടക്കാർ വ്യക്തമാക്കി. കെട്ടിടത്തിൽ നിന്ന് ഒഴിയണമെന്ന് ആവശ്യപ്പെട്ട് വ്യാപാരികൾക്ക് നേരത്തെ ഒറ്റപ്പാലം നഗരസഭ നോട്ടീസ് നൽകിയിരുന്നു. കെട്ടിടം പൊളിക്കാൻ സർക്കാർ അനുമതി നൽകിയതിനു പിന്നാലെയാണ് കോടതിയുടെ ഇടപെടൽ ഉണ്ടായത്. ഏഴ് ദിവസത്തിനകം ഒഴിയണമെന്നായിരുന്നു നിർദേശം. കടമുറിയുടെ താക്കോൽ കൈമാറണമെന്നും വാടകക്കുടിശികയുണ്ടെങ്കിൽ അത് അടച്ചുതീർക്കണമെന്നും നോട്ടീസിൽ ആവശ്യപ്പെട്ടിരുന്നു. ഇതിനെതിരെ 17 കടയുടമകളാണ് ഹൈക്കോടതിയെ സമീപിച്ചത്.

കേരളത്തിലെ ആരോഗ്യരംഗത്തു മാറ്റം കൊണ്ടുവന്നത് ഉമ്മൻചാണ്ടി: സണ്ണി ജോസഫ്

പാലക്കാട്: കേരളത്തിലെ ആരോഗ്യരംഗത്ത് ശക്തമായ മാറ്റം കൊണ്ടുവന്നത് ഉമ്മൻചാണ്ടി സർക്കാരാണെന്നു കെപിസിസി പ്രസിഡന്‍റ് സണ്ണി ജോസഫ് എംഎൽഎ. ആരോഗ്യമേഖല ഇപ്പോൾ കുത്തഴിഞ്ഞ നിലയിലാണ്. കോട്ടയം മെഡിക്കൽ കോളജിൽ ബിന്ദു എന്ന വീട്ടമ്മയുടെ ദാരുണാന്ത്യത്തിന് ഉത്തരവാദി മന്ത്രിമാരായ വി.എൻ. വാസവനും വീണാ ജോർജുമാണെന്നും സണ്ണി ജോസഫ് പറഞ്ഞു. ഡിസിസിയുടെ നേതൃത്വത്തിൽ പാലക്കാട്ട് നടന്ന സമരസംഗമം ഉദ്ഘാടനംചെയ്യുകയായിരുന്നു അദ്ദേഹം, വരുന്ന തെരഞ്ഞെടുപ്പിൽ എൽഡിഎഫ് പരാജയഭീതിയിലാണ്. അതുകൊണ്ട് ഏതുവിധേനയും അട്ടിമറിനടത്താൻ അവർ ശ്രമിക്കും. തെരഞ്ഞെടുപ്പ് കമ്മീഷൻ ബൂത്തുകളുടെ എണ്ണം വർധിപ്പിക്കുന്ന കാര്യത്തിൽ പ്രവർത്തിക്കുന്നതു ദുഷ്ടലാക്കോടെയാണ്. നിഷ്പക്ഷമായി പ്രവർത്തിക്കേണ്ട തെരഞ്ഞെടുപ്പ് കമ്മീഷൻ അതു ചെയ്യുന്നില്ല. ഇടതുപക്ഷമാവട്ടെ വോട്ടർമാരെ വോട്ടുചെയ്യാൻ ബൂത്തുകളിലെത്തിക്കാതിരിക്കാനാണ് ശ്രമം നടത്തുന്നത്. വോട്ടർപട്ടികയിൽ പേരുചേർത്താതിരിക്കാനാണ് അവരുടെ നീക്കം. എല്ലാ ജില്ലകളിലും മെഡിക്കൽ കോളജ് എന്നത് ഉമ്മൻചാണ്ടിയുടെ ആശയമാണ്. രോഗികളുടെ ബാഹുല്യവും മികച്ച ചികിത്സയും പരിഗണിച്ചാണ് ഉമ്മൻചാണ്ടി സർക്കാർ തിരുവനന്തപുരത്ത് രണ്ടാമത്തെ മെഡിക്കൽ കോളജും ആരംഭിച്ചത്. ഡോ. ഹാരിസിന്‍റെ വെളിപ്പെടുത്തലിന്‍റെ അടിസ്ഥാനത്തിൽ പോരായ്മകൾ പരിഹരിക്കുന്നതിനു പകരം പിണറായി വിജയൻ ഡോ. ഹാരിസിനെ അടിച്ചിരുത്താനാണ് ശ്രമിച്ചത്. വിദ്യാഭ്യാസ ആരോഗ്യരംഗം ഉൾപ്പടെ എല്ലാ മേഖലയും തകർച്ചയിലാണ്. വിദ്യാർഥികളുടെ ഭാവിവച്ചാണ് സർക്കാർ പന്താടുന്നതെന്നു സണ്ണി ജോസഫ് കൂട്ടിച്ചേർത്തു. ഡിസിസി പ്രസിഡന്‍റ് എ. തങ്കപ്പൻ അധ്യക്ഷനായിരുന്നു. കെപിസിസി വർക്കിംഗ് പ്രസിഡന്‍റുമാരായ എ.പി. അനിൽകുമാർ എംഎൽഎ, ഷാഫി പറമ്പിൽ എംഎൽഎ, കെപിസിസി വൈസ് പ്രസിഡന്‍റ് വി.ടി. ബൽറാം, വി.കെ. ശ്രീകണ്ഠൻ എംപി, രാഹുൽ മാങ്കൂട്ടത്തിൽ എംഎൽഎ, കെപിസിസി ജനറൽ സെക്രട്ടറി അബ്ദുൾ മുത്തലീബ്, പ്രഫ. കെ.എ. തുളസി, മുൻ എംപി വി.എസ്. വിജയരാഘവൻ, കെപിസിസി വക്താവ് സന്ദീപ് വാര്യർ, നിർവാഹക സമിതിയംഗം സി.വി. ബാലചന്ദ്രൻ, സെക്രട്ടറിമാരായ പി. ബാലഗോപാൽ, പി.വി. രാജേഷ്, മുൻ മന്ത്രി വി.സി. കബീർ, മുൻ എംഎൽഎമാരായ കെ.എ. ചന്ദ്രൻ, സി.പി. മുഹമ്മദ്, ഡിസിസി വൈസ് പ്രസിഡന്‍റുമാരായ സുമേഷ് അച്യുതൻ, ടി.എച്ച്. ഫിറോസ് ബാബു, സി. ഷൗക്കത്തലി തുടങ്ങിയവർ സംബന്ധിച്ചു. ഡിസിസി ജനറൽ സെക്രട്ടറി വി. രാമചന്ദ്രൻ സ്വാഗതവും കെ.എം. ഫെബിൻ നന്ദിയും പറഞ്ഞു.

വനംവകുപ്പിന്‍റെ മുള നട്ടുപിടിപ്പിക്കൽ; കർഷകസംഘടനകൾ പ്രതിഷേധിച്ചു

നെന്മാറ: അയിലൂർ പഞ്ചായത്തിലെ മരുതംചേരി, പൂഞ്ചേരി, കൽച്ചാടി തുടങ്ങിയ പ്രദേശങ്ങളിൽ വനംവകുപ്പ് മുള നട്ടുപിടിപ്പിക്കുന്നതിലുള്ള ആശങ്ക അറിയിച്ചുകൊണ്ട് ഭൂസംരക്ഷണസമിതിയുടെയും കിഫയുടെയും നേതൃത്വത്തിൽ കർഷക സംഘടനകൾ നെന്മാറ ഡിഎഫ്ഒ ഓഫീസിലെത്തി പ്രതിഷേധം അറിയിച്ചു. കഴിഞ്ഞ കുറെ മാസങ്ങളായി നിരന്തരം ആന ഇറങ്ങി കൃഷി നശിപ്പിച്ചു കൊണ്ടിരിക്കുന്ന ഈ പ്രദേശങ്ങളിൽ ആനയ്ക്ക് ആഹാരമെന്ന നിലയിൽ വനം വകുപ്പ് മുള വച്ചുപിടിപ്പിക്കുന്നത് ഈ പ്രദേശത്തെ ആന ശല്യത്തെ വർധിപ്പിക്കുക മാത്രമേയുള്ളൂവെന്ന് കർഷകർ ആരോപിച്ചു. കഴിഞ്ഞദിവസവും കാട്ടാന ഇറങ്ങി ഈ പ്രദേശങ്ങളിൽ വ്യാപകമായി കൃഷി നശിപ്പിച്ചിരുന്നു. വനംവകുപ്പിന്‍റെ നേതൃത്വത്തിൽ രണ്ടായിരത്തോളം മുളതൈകൾ ആണ് ഈ പ്രദേശത്തു നട്ടുപിടിപ്പിക്കുന്നത്. ഉൾക്കാട്ടിൽ ചെയ്യേണ്ട ഇത്തരം പ്രവൃത്തികൾ ജനവാസ മേഖലയ്ക്ക് സമീപത്ത് ചെയ്യുന്നത് വന്യമൃഗശല്യം വർധിക്കുന്നതിന് കാരണമാകും എന്നതിനാൽ മുള നട്ടുപിടിപ്പിക്കുന്നത് ഉൾക്കാട്ടിലേക്ക് നീക്കി ചെയ്യണമെന്ന് കർഷകർ ആവശ്യപ്പെട്ടു. തുടർന്ന് ഇത്തരം പദ്ധതികൾ ജനവാസമേഖലയ്ക്ക് അടുത്ത് നടപ്പിലാക്കരുതെന്ന് കർഷകസംഘടനകൾ ആവശ്യപ്പെട്ടു. നെന്മാറ ഡിഎഫ്ഒ പ്രവീണുമായുള്ള ചർച്ചയിൽ നാളെമുതൽ ഉൾക്കാട്ടിലേക്ക് നീക്കി മുള നട്ടുപിടിപ്പിക്കാൻ നിർദേശം നൽകാമെന്നും തുടർന്നുള്ള പ്രവൃത്തികൾ കർഷകരെ കൂടി അറിയിച്ച് ചെയ്യാമെന്നും അറിയിച്ചു. ഭൂസംരക്ഷണ സമിതി ചെയർമാൻ കെ.ജി. എൽദോ, ജനറൽ കൺവീനർ എസ്.എം. ഷാജഹാൻ, കിഫ ജില്ലാ സെക്രട്ടറി അബ്ബാസ് ഒറവഞ്ചിറ, ട്രഷറർ രമേഷ് ചേവക്കുളം, കർഷക സംഘടന നേതാക്കളായ വി.പി. രാജു, ഐസക് വള്ളോംപറമ്പിൽ, ശ്രീജിത്ത് കല്യാണകണ്ടം, പ്രദീപ് നെന്മാറ, പി.ജെ. അബ്രഹാം, അബ്ദുൾ റഹ്മാൻ, ബലേന്ദ്രൻ കരിമ്പാറ, ടി.സി. ജിബു, എസ്. കാസിം, വൈ. അക്ബർ എന്നിവരുടെ നേതൃത്വത്തിൽ ആയിരുന്നു നെന്മാറ ഡിഎഫ്ഒ യുമായി ചർച്ച നടത്തിയത്.

മൂലത്തറ വലതുകര കനാൽ ദീർഘിപ്പിക്കുന്നു; ഒന്നാംഘട്ട പ്രവർത്തനങ്ങൾ അന്തിമഘട്ടത്തിൽ

പാലക്കാട്: ജില്ലയിൽ ചിറ്റൂർ, എരുത്തേന്പതി പഞ്ചായത്തിലെ ദീർഘകാല ജലക്ഷാമത്തിന് പരിഹാരമായി മൂലത്തറ വലതുകര കനാൽ ദീർഘിപ്പിക്കലിന്‍റെ ഒന്നാംഘട്ട പ്രവർത്തനങ്ങൾ അന്തിമഘട്ടത്തിൽ. മഴനിഴൽ പ്രദേശങ്ങളിലേക്ക് കുടിവെള്ളവും കാർഷികാവശ്യങ്ങൾക്കുള്ള ജലവും എത്തിക്കുകയാണ് ലക്ഷ്യം. കോരയാർ മുതൽ വരട്ടയാർ വരെ 6.43 കിലോമീറ്റർ ദൂരത്തിൽ 10 മീറ്റർ വീതിയിലാണ് കനാൽ ദീർഘിപ്പിക്കുന്നത്. പദ്ധതി പൂർത്തിയാവുന്നതോടെ കേരളത്തിലെ ഏറ്റവും വലിയ സാമൂഹിക സൂക്ഷ്മ ജലസേചനമാർഗമാണ് യാഥാർഥ്യമാകുക. ഡ്രിപ്പ് ഇറിഗേഷൻവഴി 70 ശതമാനം ജലം ലാഭിക്കാനും വിളവ് ഇരട്ടിയാക്കാനും ഉയരംകൂടിയ ഭാഗങ്ങളിൽ ലിഫ്റ്റ് ഇറിഗേഷൻ വഴി വെള്ളമെത്തിച്ച് 3575 ഹെക്ടർഭൂമിയിൽ സുസ്ഥിര ജലസേചനം ഉറപ്പാക്കാനും സാധിക്കും. മൂലത്തറ വലതുകര കനാലിന്‍റെ രണ്ടാംഘട്ട ദീർഘിപ്പിക്കൽ പ്രവർത്തനങ്ങളും ഇതിനകം ആരംഭിച്ചിട്ടുണ്ട്. വരട്ടയാർ മുതൽ വേലന്താവളം വരെയുള്ള 8.2 കിലോമീറ്റർ ദൂരത്തിൽ10 മീറ്റർ വീതിയിലാണ് സ്ഥലമേറ്റെടുക്കൽ പുരോഗമിക്കുന്നത്. കിഫ്ബിയിൽ നിന്ന് 262.10 കോടിയുടെ ഭരണാനുമതി പ്രവർത്തനത്തിന് ലഭിച്ചിട്ടുണ്ട്. ജലവിഭവ വകുപ്പിന് കീഴിലുള്ള പൊതുമേഖലാ സ്ഥാപനമായ കേരള ഇറിഗേഷൻ ഇൻഫ്രാസ്ട്രക്ചർ ഡെവലപ്മെന്‍റ് കോർപറേഷനാണ് പദ്ധതിയുടെ നിർമാണ മേൽനോട്ടം. കെ.കെ. കണ്‍സ്ട്രക്ഷനാണ് നിർമാണ പ്രവർത്തനങ്ങൾ നടത്തുന്നത്. കനാലിന്‍റെ രൂപകൽപ്പനയിൽ വ്യത്യസ്ത രീതികൾ ഉൾപ്പെടുന്നു. വർഷത്തിൽ1000 മില്ലിമീറ്ററിൽതാഴെ മാത്രം മഴ ലഭിക്കുന്ന പ്രദേശങ്ങളിലേക്ക് ജലമെത്തിക്കുകയാണ് കനാൽ ദീർഘിപ്പിക്കുന്നതിലൂടെ ലക്ഷ്യമിടുന്നത്. നിലവിലുള്ള ചെക്ക്ഡാമുകളിലേക്കും കോരയാറിലെയും വരട്ടയാറിലെയും നൂറു വർഷത്തിലേറെ പഴക്കമുള്ള കല്യാണകൃഷ്ണയ്യർ സിസ്റ്റം, പോൾസൂസ സിസ്റ്റം എന്നിവയുൾപ്പെടെ പത്തിലേറെ ജലസേചന സംവിധാനങ്ങളെ ഈ പദ്ധതിയിലേക്ക് സംയോജിപ്പിക്കും. പദ്ധതി പൂർണമാകുന്നതോടെ പാലക്കാടിന്‍റെ കാർഷിക മേഖലയിൽ വലിയമാറ്റമുണ്ടാകുമെന്നാണ് പ്രതീക്ഷിക്കുന്നത്.

സെക്യൂരിറ്റി ജീവനക്കാരൻ കിണറ്റിൽ മരിച്ചനിലയിൽ

കുഴൽമന്ദം: സെക്യൂരിറ്റി ജീവനക്കാരനെ കിണറ്റിൽ മരിച്ചനിലയിൽ കണ്ടെത്തി. തോലനൂർ മണിയൻപാറ തോട്ടക്കര പരേതനായ ബാലകൃഷ്ണന്‍റെ മകൻ മുരുകേശനെ(53)യാണ് പാലക്കാട് കെഎസ്ആർടിസി സ്റ്റാൻഡിനുസമീപത്തെ വീട്ടിലെ കിണറ്റിൽ മരിച്ചനിലയിൽ കണ്ടെത്തിയത്. സ്വകാര്യവ്യക്തിയുടെ വീട്ടിലെ സെക്യൂരിറ്റി ജീവനക്കാരനാണ്. അമ്മ: രാജമ്മ. ഭാര്യ: പ്രീത. മക്കൾ: വിഷ്ണു, ഹേമലത. സംസ്കാരം ഇന്നു രാവിലെ ഒന്പതിനു പാന്പാടി ഐവർമഠം ശ്മശാനത്തിൽ.

ശിരുവാണി മുത്തികുളം ഉന്നതി ഒറ്റപ്പെടുന്നു

പാലക്കയം: ഷോളയൂർ ഗ്രാമപഞ്ചായത്തിന്‍റെ ഭാഗമായ മുത്തികുളം ഉന്നതി റോഡിന്‍റെ ശോചനീയാവസ്ഥമൂലം ഒറ്റപ്പെടുന്നു. ആദിവാസി വിഭാഗത്തിലെ മുഡുക സമുദായം താമസിക്കുന്ന മുത്തികുളം ഉന്നതിയിലേക്ക് എത്താൻ പാലക്കയത്ത് നിന്നും 13 കിലോമീറ്റർ ദൂരമുണ്ട്. ഇഞ്ചിക്കുന്നിലുള്ള ഫോറസ്റ്റ് ചെക്ക്പോസ്റ്റിനു ശേഷമുള്ള വനത്തിനുള്ളിലൂടെയുള്ള എട്ടു കിലോമീറ്റർ ദൂരം നടന്നുപോകുവാൻ പോലും കഴിയാത്ത വിധം തകർന്നിരിക്കുകയാണ്. ഉന്നതിയിൽ താമസിക്കുന്നവർക്ക് നിത്യോപയോഗ സാധനങ്ങളും റേഷൻ സാധനങ്ങളും വാങ്ങണമെങ്കിൽ പാലക്കയത്തുള്ള ഓട്ടോ-ടാക്സികളെ ആശ്രയിക്കുകയല്ലാതെ മറ്റു മാർഗങ്ങൾ ഇല്ല. റോഡിന്‍റെ ദുരവസ്ഥ മൂലം ഓട്ടോ, ടാക്സി ഡ്രൈവർമാർ സവാരി പോകുവാനും ഇപ്പോൾ തയ്യാറാകുന്നില്ല. രോഗം വന്ന് ആശുപത്രിയിൽ പോകേണ്ട സാഹചര്യം ഉണ്ടായാൽ എന്തു ചെയ്യണമെന്ന് പോലും അറിയാൻ കഴിയാത്ത അവസ്ഥയിലാണ്. ജലസേചനവകുപ്പിന്‍റെ കൈവശമുള്ള റോഡ് എത്രയും പെട്ടെന്ന് യാത്രായോഗ്യമാക്കി തരണമെന്ന് ആവശ്യപ്പെട്ട് ഉന്നതിയിൽ ഉള്ളവർ നാലുമാസം മുന്പ് വകുപ്പിന്‍റെ വാഹനങ്ങൾ ഉപരോധിച്ചിരുന്നു. പക്ഷേ ഇതുവരേയും ഒരു നടപടിയും ഇക്കാര്യത്തിൽ ഉണ്ടായിട്ടില്ല. 40 കുടുംബങ്ങളാണ് ഉന്നതിയിൽ താമസിക്കുന്നത്. എത്രയും പെട്ടെന്ന് റോഡ് യാത്രായോഗ്യമാക്കണമെന്ന് മുത്തികുളം ഉന്നതിയിലുള്ളവർ ആവശ്യപ്പെട്ടു.

വീട്ടമ്മയെ മർദിച്ച് 45,000 രൂപയും സ്വർണാഭരണങ്ങളും കവർന്നു

വടക്കഞ്ചേരി: വീടിന്‍റെ വാതിലുകൾ ചവിട്ടിപ്പൊളിച്ച് അകത്തുകടന്ന മോഷ്ടാക്കൾ വീട്ടമ്മയെ കത്തികാട്ടി ഭീഷണിപ്പെടുത്തിയും തല്ലിയും അവശയാക്കി സ്വർണാഭരണങ്ങളും പണവും കവർന്നു. വടക്കഞ്ചേരി പഞ്ചായത്തിലെ പൊത്തപ്പാറ സെന്‍ററിനടുത്ത് വെട്ടിക്കൽകുളമ്പിൽ വളയൽ ബാബുവിന്‍റെ വീട്ടിലാണ് തിങ്കളാഴ്ച രാത്രി മോഷണം നടന്നത്. വടികൊണ്ടുള്ള അടിയിൽ കൈക്ക് പരിക്കേറ്റ ബാബുവിന്‍റെ ഭാര്യ ജയന്തി (48)യെ ആലത്തൂരിലെ സ്വകാര്യ ആശുപത്രിയിൽ ചികിത്സയ്ക്ക് വിധേയമാക്കി. ബെഡ്റൂമിൽ അലമാരയിൽ സൂക്ഷിച്ചിരുന്ന 45,000 രൂപയും മൂന്ന് പവന്‍റെ സ്വർണാഭരണങ്ങളുമാണ് കവർന്നത്. തിങ്കളാഴ്ച രാത്രി ഏഴുമണിയോടെയായിരുന്നു സംഭവം. പിറകിലെ വാതിലും ഹാളിലേക്കുള്ള വാതിലും ചവിട്ടിപ്പൊളിച്ചാണ് മോഷ്ടാക്കൾ അകത്തു കടന്നതെന്ന് ജയന്തി പറഞ്ഞു. വാതിലുകളുടെ കുറ്റികളും കൊളുത്തുകളും തെറിച്ചുവീണ നിലയിലാണ്. ഹാളിൽ ഉണ്ടായിരുന്ന ജയന്തിയെ മോഷ്ടാക്കളിലൊരാൾ ചുമരിനോട് ചാരിനിർത്തി കഴുത്തിൽ കത്തിവച്ച് കൊല്ലുമെന്ന് ഭീഷണിപ്പെടുത്തുകയും വടികൊണ്ട് ആക്രമിക്കുകയുമായിരുന്നു. ഇതിനിടെ മോഷ്ടാക്കളിൽ നിന്നും കുതറിമാറി ജയന്തി മറ്റൊരു ബെഡ്റൂമിൽ കയറി വാതിൽ അടച്ചു. വാതിൽ ചവിട്ടിപൊളിക്കാതിരിക്കാൻ മുറിയിലെ കട്ടിൽ വാതിലിനോട് ചേർത്തിയിട്ടു. ഈ സമയമാണ് തൊട്ടടുത്ത മുറിയിലെ അലമാരയിലെ വസ്ത്രങ്ങളും മറ്റും പുറത്തേക്ക് വലിച്ച് വാരിയിട്ട് അതിൽ സൂക്ഷിച്ചിരുന്ന പണവും ആഭരണങ്ങളും കവർന്ന് മോഷ്ടാക്കൾ രക്ഷപ്പെട്ടത്. അരമണിക്കൂർ മുറിയിൽ കഴിഞ്ഞ ജയന്തി പിന്നീട് മുറിക്കുള്ളിൽ ചാർജ് ചെയ്യാൻ വച്ചിരുന്ന ഫോണിൽ കൂട്ടുകാരിയെ വിളിച്ച് നാട്ടുകാരെ വിവരമറിയിച്ചാണ് ജയന്തിയെ ആശുപത്രിയിലെത്തിച്ചത്. മഴയുള്ള സമയത്തായിരുന്നു മോഷണം. സംഭവത്തിന് പത്ത് മിനിറ്റ് മുമ്പ് അടുക്കള ഭാഗത്ത് ശബ്ദംകേട്ട് നോക്കിയപ്പോൾ ഒന്നും കണ്ടില്ല. ഈ സമയം കറന്‍റും ഉണ്ടായിരുന്നില്ല. മുഖംമൂടിവച്ച് റെയിൻകോട്ട് ധരിച്ച രണ്ട് പേരായിരുന്നെന്ന് ജയന്തി പറഞ്ഞു. ഭർത്താവ് ബാബു വടക്കഞ്ചേരിയിലെ ഐഒസി പെട്രോൾ പമ്പിൽ ജോലിയിലായിരുന്നു. മക്കളും വീട്ടിലുണ്ടായിരുന്നില്ല. കാറ്ററിംഗ് ജോലിയുള്ള ജയന്തി തനിച്ചായിരുന്നു വീട്ടിൽ. പൊത്തപ്പാറ സെന്‍ററിൽ നിന്നും പല്ലാറോഡിലേക്കുള്ള റോഡിൽ ഉള്ളിലേക്ക് മാറിയാണ് ഈ വീട്. രണ്ടു വീടുകൾക്കു നടുവിലൂടെയുള്ള ഒറ്റയടിപാതയിലൂടെ അമ്പത് മീറ്റർ നടന്നുവേണം ഈ വീട്ടിലെത്താൻ. വഴിയിലെ അവസാനത്തെ വീടാണിത്. ഒറ്റപ്പെട്ട വീടും സമീപത്ത് റബർതോട്ടവുമാണ്. വീടിനു മുന്നിൽ സിസി ടിവി ഉണ്ടെങ്കിലും സംഭവസമയത്ത് അത് പ്രവർത്തിച്ചിരുന്നില്ലെന്ന് ബാബു പറഞ്ഞു. വടക്കഞ്ചേരി സിഐ കെ.പി. ബെന്നിയുടെ നേതൃത്വത്തിൽ പോലീസ് എത്തി അന്വേഷണം ആരംഭിച്ചിട്ടുണ്ട്. ഡോഗ്‌ സ്ക്വാഡും വിരലടയാള വിദഗ്ധരും സ്ഥലത്തെത്തി പരിശോധന നടത്തി.

കാഞ്ഞിരപ്പുഴ പഞ്ചായത്ത്‌ ഓഫീസിലേക്ക് കോൺഗ്രസ് പ്രതിഷേധ മാർച്ച്‌ നടത്തി

കാഞ്ഞിരപ്പുഴ: പഞ്ചായത്ത്‌ ഭരണസമിതിയുടെ ജനവഞ്ചനക്കെതിരെ കോൺഗ്രസ് കാഞ്ഞിരപ്പുഴ മണ്ഡലം കമ്മിറ്റിയുടെ നേതൃത്വത്തിൽ പഞ്ചായത്ത്‌ ഓഫീസിലേക്ക് പ്രതിഷേധമാർച്ച്‌ സംഘടിപ്പിച്ചു. മണ്ഡലം പ്രസിഡന്‍റ് ജോയ് ജോസഫ് അധ്യക്ഷത വഹിച്ച പരിപാടി കെപിസിസി ജനറൽ സെക്രട്ടറി കെ.എ. തുളസി ഉദ്ഘാടനം ചെയ്തു. അഞ്ചു വർഷം തികയുമ്പോഴും അർഹതപ്പെട്ട ഒരാൾക്ക് പോലും വീടു നൽകാൻ സാധിക്കാത്ത പഞ്ചായത്ത്‌ ഭരണസമിതി പൂർണ പരാജയമാണെന്നും കാഞ്ഞിരപ്പുഴ പഞ്ചായത്തിലെ മുഴുവൻ ആളുകൾക്കും വീടെന്ന സ്വപ്നം യാഥാർഥ്യമാക്കുമെന്ന് പറഞ്ഞ് ജനങ്ങളെ കബളിപ്പിച്ച എംഎൽഎക്കും പഞ്ചായത്ത്‌ ഭരണസമിതിക്കുമുള്ള മറുപടി വരാനിരിക്കുന്ന തെരഞ്ഞെടുപ്പിൽ ജനം നൽകുമെന്നും അവർ പറഞ്ഞു. ഡിസിസി സെക്രട്ടറി സി. അച്യുതൻ, സേവാദൾ ജില്ലാ പ്രസിഡന്‍റ് ചെറൂട്ടി മുഹമ്മദ്‌, യുഡിഎഫ് കോങ്ങാട് നിയോജകമണ്ഡലം ചെയർമാൻ ശശി, കോങ്ങാട് ബ്ലോക്ക്‌ കോൺഗ്രസ് കമ്മിറ്റി പ്രസിഡന്‍റ് വി.കെ. ഷൈജു, യൂത്ത് കോൺഗ്രസ് ജില്ലാ ജനറൽസെക്രട്ടറി ഗിസാൻ മുഹമ്മദ്‌, ബ്ലോക്ക്‌ പഞ്ചായത്ത്‌ മെംബർ ബിജി ടോമി, പഞ്ചായത്ത്‌ മെംബർമാരായ പി. രാജൻ, റീന സുബ്രഹ്മണ്യൻ, പ്രിയ ടീച്ചർ, സ്മിത ജോസഫ്, ദിവ്യ, ബ്ലോക്ക്‌ കോൺഗ്രസ് കമ്മിറ്റി ഭാരവാഹികളായ ചെറുകര ബേബി, ഫിറോസ് ബാബു, എ.വി. മുസ്തഫ, ടി.കെ. റഫീഖ്, സുദേവൻ പാലേരി, യൂത്ത് കോൺഗ്രസ് മണ്ഡലം പ്രസിഡന്‍റ് പി.എം. സുനിൽ, മണ്ഡലം കോൺഗ്രസ് കമ്മിറ്റി ഭാരവാഹികളായ ബിന്ദു മണികണ്ഠൻ, കെ. രഞ്ജിത്, ബേബി കണ്ടത്തിൽക്കുടി, സുകുമാരൻ പടിഞ്ഞാറേക്കര, സിദ്ദി വിയ്യക്കുറുശി, സാബു പൂഞ്ചോല, രാമകൃഷ്ണൻ വിയ്യക്കുറുശി പ്രസംഗിച്ചു.

പാമ്പുപിടിത്തവിദഗ്ധൻ കാരയങ്കാട് മുഹമ്മദാലിക്കു വിശ്രമമില്ല

ഫ്രാൻസിസ് തയ്യൂർ വടക്കഞ്ചേരി: ടൗണിനടുത്ത് കാരയങ്കാട് സ്വദേശിയായ മുഹമ്മദാലി എന്ന ചെറുപ്പക്കാരന് വിശ്രമമില്ല. രാത്രിയെന്നോ പകലെന്നോ വ്യത്യാസമില്ലാതെ ഫോൺ കോളുകൾ വന്നുകൊണ്ടിരിക്കും. വീടിനുള്ളിൽ, ഫ്രിഡ്ജിനുള്ളിൽ, കിണറ്റിൽ, കോഴിക്കൂട്ടിൽ, വിറകുപുരയിൽ, അങ്ങനെ സഹായിക്കണേ, രക്ഷിക്കണേ എന്നു പറഞ്ഞുള്ള ഫോൺ കോളുകളുടെ പ്രവാഹമാണ് മുഹമ്മദാലിയെ തേടിയെത്തുന്നത്. കഴിഞ്ഞ രാത്രികളിൽ തന്നെ ആലത്തൂരിലും പരിസര പ്രദേശങ്ങളിൽ നിന്നുമായി ഉഗ്രവിഷപാമ്പുകളെയാണ് മുഹമ്മദാലി പിടികൂടി നാട്ടുകാരെ ഭയപ്പാടിൽ നിന്നും രക്ഷപ്പെടുത്തിയത്. നാലുവർഷമായി വനംവകുപ്പിൽ വാച്ചർ ജോലിയുള്ള മുഹമ്മദാലിക്ക് പാമ്പുപിടുത്തം തന്നെയാണ് പ്രധാന ജോലി. അണക്കപ്പാറ, മംഗലാംഡാം, പീച്ചി തുടങ്ങിയ ഫോറസ്റ്റ് ഓഫീസ് പരിധിയിലുള്ള സ്ഥലങ്ങളിൽ നിന്നെല്ലാം കോളുകൾ വരും. അറിയപ്പെടുന്ന പാമ്പു പിടുത്തക്കാരനായിരുന്നു മുഹമ്മദാലിയുടെ വാപ്പ ബഷീർ. പാമ്പ്പിടുത്തത്തിന് വാപ്പയെ സഹായിക്കാൻ പതിനേഴാം വയസു മുതൽ പോയി തുടങ്ങിയതാണ് മുഹമ്മദാലിയും. വാപ്പയുടെ മരണശേഷം പിന്നെ മുഹമ്മദാലിയായി നാട്ടിലെ പാമ്പുപിടുത്ത വിദഗ്ധൻ. 18 വർഷത്തിനിടെ 15,000 പാമ്പിനെയെങ്കിലും പിടികൂടിയിട്ടുണ്ടെന്ന് മുഹമ്മദാലി പറയുന്നു. കൂടുതലും മൂർഖൻ തന്നെയാണ്. അണലി, മലമ്പാമ്പ് തുടങ്ങിയവയും നാട്ടിൽ കുറവല്ല. മലമ്പ്രദേശമായ പാലക്കുഴിയിൽനിന്ന് മാത്രം എട്ടു രാജവെമ്പാലയെ പിടികൂടിയിട്ടുണ്ട്. പിടികൂടുന്നവയെയെല്ലാം നെല്ലിയാമ്പതി കാട്ടിലാണ് വിടുന്നത്. എന്നാൽ കാട്ടിലേക്കാൾ കൂടുതൽ പാമ്പുകൾ നാട്ടിലുണ്ടെന്നാണ് മുഹമ്മദാലി പറയുന്നത്. നാട്ടിൽ ഭക്ഷണ വേസ്റ്റും മറ്റും കൂടുതലുള്ളതിനാൽ അവിടെയെല്ലാം എലികൾ പെരുകുന്ന സ്ഥിതിയുണ്ട്. ഇവയെ പിടിക്കാൻ പാമ്പുകളുമെത്തും. ഇര തേടിയെത്തുന്ന പാമ്പുകൾ എലിയുടെ സാന്നിധ്യം കൂടുതലായി കണ്ട് അവിടെ തന്നെ വാസമുറപ്പിക്കും. കോഴികളുള്ള വീടുകളിലും പാമ്പ് വരാൻ സാധ്യത കൂടുതലാണ്. വീടും പരിസരവുമെല്ലാം മാലിന്യമില്ലാതെ സൂക്ഷിച്ചാൽ പാമ്പ്ശല്യവും കുറയുമെന്നാണ് മുഹമ്മദാലി പറയുന്നത്. പാമ്പുകളെ പിടികൂടി നാട്ടിലെ രക്ഷകനാകുന്നുണ്ടെങ്കിലും പലപ്പോഴും യാത്രാ ചെലവു പോലും കിട്ടാറില്ലെന്ന വിഷമവും മുഹമ്മദാലിക്കുണ്ട്.

ചിറ്റൂർ എംഎൽഎ ഓഫീസിലേക്ക് യൂത്ത് കോൺഗ്രസ് മാർച്ച്

ചിറ്റൂർ: ഉത്തരവാദിത്ത നിർവഹണത്തിൽ മന്ത്രി കെ. കൃഷ്ണൻകുട്ടി പൂർണപരാജയമെന്ന് ഡിസിസി പ്രസിഡന്‍റ് എ. തങ്കപ്പൻ. അനർട്ടിലെ കോടികളുടെ അഴിമതിയ്ക്കു നേതൃത്വം നൽകുന്ന മന്ത്രി കൃഷ്ണൻകുട്ടി രാജിവെക്കണമെന്നാവശ്യപ്പെട്ട് യൂത്ത് കോൺഗ്രസ് ചിറ്റൂർ നിയോജക മണ്ഡലം കമ്മിറ്റി നടത്തിയ എംഎൽഎ ഓഫീസ് മാർച്ച് ഉദ്ഘാടനം ചെയ്യുകയായിരുന്നു അദ്ദേഹം. ഊർജവകുപ്പിൽ അഴിമതിയല്ലാതെ മറ്റൊന്നും ചെയ്യാൻ കൃഷ്ണൻകുട്ടിയ്ക്ക് സാധിച്ചിട്ടില്ല. ഭരണത്തിന്‍റെ അവസാന ലാപ്പിൽ കടുംവെട്ടാണ് നടത്തുന്നത്. കർഷകരെയും അദിവാസികളെയും മറയാക്കി കോടിക്കണക്കിന് രൂപയുടെ അഴിമതിയാണ് നടത്തികൊണ്ടിരിക്കുന്നത്. ഈ വിഷയത്തിൽ തെളിവുകൾ പുറത്തുവന്ന സാഹചര്യത്തിൽ മന്ത്രി രാജിവെക്കാതെ സമരങ്ങൾ അവസാനിക്കില്ല. യൂത്ത്കോൺഗ്രസ് നിയോജകമണ്ഡലം പ്രസിഡന്‍റ് കെ. സാജൻ അധ്യക്ഷനായി. ഡിസിസി ‌ വൈസ് പ്രസിഡന്‍റ് സുമേഷ് അച്യുതൻ, കെ.എസ്. തണികാചലം, യൂത്ത് കോൺഗ്രസ് സംസ്ഥാന ജനറൽ സെക്രട്ടറിമാരായ പ്രതീഷ് മാധവൻ, ഷഫീക് അത്തിക്കോട്, എൻ. ജിതേഷ്, എ. ഷഫീക്ക്, പി.വി. വത്സൻ തുടങ്ങിയവർ പ്രസംഗിച്ചു. അണിക്കോട് മൊക്കിൽ നിന്നാരംഭിച്ച മാർച്ച് താലൂക്ക് ആശുപത്രിയുടെ മുന്നിൽ പോലീസ് ബാരിക്കേഡ് വെച്ച് തടഞ്ഞു. ബാരിക്കേഡ് മറികടന്ന പ്രവർത്തകരെ പോലീസ് അറസ്റ്റ് ചെയ്ത് നീക്കി. അറസ്റ്റ്ചെയ്തവരെ വിട്ടയക്കണമെന്ന് ആവശ്യപ്പെട്ട് പ്രവർത്തകർ ബാരിക്കേഡ് മറിച്ചിട്ടു. തുടർന്ന് പോലീസും പ്രവർത്തകരും തമ്മിൽ ഉന്തും തള്ളും ഉണ്ടായി. അറസ്റ്റ് ചെയ്ത നേതാക്കളെ വിട്ടയക്കുന്നതുവരെ പ്രവർത്തകർ റോഡിൽ കുത്തിയിരുന്ന് പ്രതിഷേധിച്ചു.

കൃഷിഭവനിലേക്കു "കൊടുംപാപി'യെ കെട്ടിവലിച്ച് കോൺഗ്രസ് പ്രതിഷേധ മാർച്ച്

നെന്മാറ: സർക്കാർ സംഭരിച്ച നെല്ലിന്‍റെ പണം കർഷകർക്കു നൽകാത്തതിൽ പ്രധിഷേധിച്ച് നെന്മാറ ബ്ലോക്ക് കോൺഗ്രസ് കമ്മറ്റി കൃഷിഭവനിലേക്കു കൊടുംപാപിയെ കെട്ടിവലിച്ച് മാർച്ച് നടത്തി. ഡിസിസി പ്രസിഡന്‍റ് എ. തങ്കപ്പൻ ഉദ്ഘാടനം ചെയ്തു. ബ്ലോക്ക് പ്രസിഡന്‍റ് വിനോദ് ചക്രായി അധ്യക്ഷത വഹിച്ചു. ഡിസിസി സെക്രട്ടറി സി.സി. സുനിൽ, കെ.ഐ. അബ്ബാസ്, ശിവപ്രസാദ്, ശിവദാസൻ, എം.ആർ. നാരായണൻ, പ്രിൻസ് ജോസഫ്, പ്രബിത ജയൻ, ആർ. സുരേഷ്, ഷാജഹാൻ മാസ്റ്റർ, രാമനാഥൻ, ആർ.ചന്ദ്രൻ എന്നിവർ പ്രസംഗിച്ചു.

ധോണിഗുണ്ട്-ദുണ്ടൂർ റോഡ് നാടിനു സമർപ്പിച്ചു

അഗളി: എംഎൽഎയുടെ ആസ്തി വികസന ഫണ്ടിൽ ഉൾപ്പെടുത്തി നവീകരിച്ച അഗളി ഗ്രാമപഞ്ചായത്തിലെ ധോണിഗുണ്ട്- ദുണ്ടൂർ റോഡ് എംഎൽഎ എൻ. ഷംസുദ്ദീൻ നാട്ടുകാർക്ക് തുറന്നുകൊടുത്തു. പഞ്ചായത്തംഗം സുനിൽ ജി. പുത്തൂർ അധ്യക്ഷനായി. ഹനീഫ പാക്കുളം, ജോബി കുരീക്കാട്ടിൽ, ഷിബു സിറിയക്, ഷൈജു ആലക്കകുന്നേൽ, പി.ടി. പ്രസാദ്, ഇ.ജെ. ആന്‍റണി പ്രസംഗിച്ചു.

ഒറ്റപ്പാലം നഗരസഭാ കൗൺസിൽ യോഗം ബഹിഷ്കരിച്ച് യുഡിഎഫും ബിജെപിയും

ഒറ്റപ്പാലം: അടിയന്തര നഗരസഭ കൗൺസിൽ യോഗം വിളിച്ചു ചേർത്തതിന്‍റെ അജണ്ട നൽകിയില്ലെന്നാരോപിച്ച് കഴിഞ്ഞ ദിവസത്തെ യോഗത്തിൽ ബഹളവും ഇറങ്ങിപ്പോക്കും. അടിയന്തര കൗൺസിൽയോഗം വിളിച്ചു ചേർത്തത് എന്തിനാണെന്ന് അറിയില്ലെന്നും അജണ്ടകൾ അറിയണമെന്നും ആവശ്യപ്പെട്ട് ബിജെപി കക്ഷി നേതാവ് എസ്. ഗംഗാധരൻ നടുത്തളത്തിൽ ഇറങ്ങിയതോടെയാണ് ബഹളം ആരംഭിച്ചത്. ഇതോടുകൂടി യുഡിഎഫ് അംഗങ്ങളും ബഹളംവച്ചു. ഭരണ പ്രതിപക്ഷ അംഗങ്ങൾ തമ്മിലുള്ള വാക്പോരായി ഇതുമാറി. ഇതോടുകൂടി യുഡിഎഫ് അംഗങ്ങൾ ഇറങ്ങിപ്പോയി. ബിജെപിയും കനത്ത പ്രതിഷേധം രേഖപ്പെടുത്തി. വാർഷിക പദ്ധതി, സ്പിൽ ഓവർ പദ്ധതികളുടെ ഭേദഗതിയുമായി ബന്ധപ്പെട്ടാണ് ഒറ്റപ്പാലം നഗരസഭ കൗൺസിൽ യോഗം ചേർന്നത്. യോഗത്തിൽ നിയമനുസൃതമുള്ള നടപടികൾ പൂർത്തിയാക്കാതെ അജണ്ട വയ്ക്കുകയും ഭേദഗതി അജണ്ട രേഖമൂലം നൽകാതിരിക്കുകയും ചെയ്തതാണ് പ്രശ്നകാരണമെന്നു പ്രതിപക്ഷം പറയുന്നു. രേഖാമൂലം വിയോജിപ്പുനൽകി ബിജെപിയും കൗൺസിൽ യോഗം ബഹിഷ്കരിച്ചു. നിയമാനുസൃതം അല്ലാത്ത കൗൺസിൽ അജണ്ട അംഗീകരിക്കാൻ അനുവദിക്കരുതെന്നാവശ്യപ്പെട്ടു ബിജെപി കൗൺസിലർമാർ ജോയിന്‍റ് ഡയറക്ടർക്കും, ജില്ലാ കളക്ടർക്കും പരാതി നൽകിയിട്ടുണ്ട്.

കരിമ്പ ഗ്രാമപഞ്ചായത്ത്‌ വിജയോത്സവം

കല്ലടിക്കോട്: എസ്എസ്എൽസി, പ്ലസ്ടു, നീറ്റ് പരീക്ഷകളിൽ മികവ് പുലർത്തിയ വിദ്യാർഥികളെ ആദരിക്കുന്നതിനായി കരിമ്പ ഗ്രാമപഞ്ചായത്ത്‌ വാർഷിക അവാർഡ് ദാനചടങ്ങ് വിജയോത്സവം സംഘടിപ്പിച്ചു. വിവിധ പരീക്ഷകളിൽ ഉന്നതവിജയം നേടിയവർക്ക് മെഡലുകളും സർട്ടിഫിക്കറ്റുകളും സമ്മാനിച്ചു. എൻഎസ് ഹാളിൽ നടത്തിയ പരിപാടി എഴുത്തുകാരൻ ശ്രീചിത്രൻ ഉദ്ഘാടനം ചെയ്തു. ഗ്രാമപഞ്ചായത്ത്‌ പ്രസിഡന്‍റ് പി.എസ്. രാമചന്ദ്രൻ അധ്യക്ഷനായി. ഫെഡറൽ ബാങ്ക് മാനേജർ കുട്ടൻ വിശിഷ്ടാതിഥിയായി പങ്കെടുത്തു. വൈസ് പ്രസിഡന്‍റ് കെ. കോമളകുമാരി,ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ എച്ച്. ജാഫർ,സി.കെ. ജയശ്രീ, കെ.സി. ഗിരീഷ്, കെ.കെ. ചന്ദ്രൻ, എം. ചന്ദ്രൻ, ജയവിജയൻ, ബീന ചന്ദ്രകുമാർ, റമീജ, അനിത, മോഹനൻ, സി.പി. സജി,തുടങ്ങിയവർ പ്രസംഗിച്ചു.

വവ്വാലുകളുടെ കൂട്ടം; ജനങ്ങൾക്കു ആശങ്ക

വടക്കഞ്ചേരി: ഇടവേളക്കുശേഷം നിപ്പ ഭീതി ആരോഗ്യമേഖലയെ പേടിപ്പിക്കുമ്പോൾ പതിറ്റാണ്ടുകളേറെയായി വവ്വാലുകളുടെ ആവാസകേന്ദ്രമായ പാളയം പ്രദേശവും ചർച്ചയാവുകയാണ്. കുറുക്കന്‍റെ മുഖ സാദൃശ്യമുള്ള ഫ്ളയിംഗ് ഫോക്സ് എന്ന ഇനം വവ്വാലുകളാണ് നിപ്പയുടെ വൈറസ് വാഹകരെന്ന നിഗമനം കഴിഞ്ഞ വർഷമുണ്ടായിരുന്നു. വവ്വാലുകളുടെയും കാക്ക ഉൾപ്പെടെയുള്ള പറവകളുടെയും വലിയ ആവാസ കേന്ദ്രമാണ് വടക്കഞ്ചേരി ടൗണിനടുത്തുള്ള പാളയം പ്രദേശം. ആരോഗ്യസംഘങ്ങളുടെ പരിശോധന വേണമെന്നും ജനങ്ങളുടെ ഭീതി അകറ്റണമെന്നും കോൺഗ്രസ് ബ്ലോക്ക് പ്രസിഡന്‍റ് അഡ്വ.എം. ദിലീപ് ആവശ്യപ്പെട്ടു. നൂറ്റാണ്ടുകളായി വവ്വാലുകളും മറ്റു പറവകളും പാളയം പ്രദേശത്തുണ്ട്. ഓരോ വർഷം പിന്നിടുമ്പോഴും പ്രദേശത്ത് വവ്വാൽ കൂട്ടങ്ങൾ പെരുകുകയാണെന്ന് പാളയം സ്വദേശി കൂടിയായ അഡ്വ.എം. ദിലീപ് പറഞ്ഞു. സർക്കാർ ആശുപത്രിക്കു സമീപമാണ് പാളയം പ്രദേശം. നിപ്പ ഭീതി നിലനിൽക്കുമ്പോഴും ആരോഗ്യ വകുപ്പിന്‍റെ ഭാഗത്തുനിന്നും യാതൊരു മുൻകരുതൽ നടപടികളുമുണ്ടാകുന്നില്ലെന്ന പരാതിയുമുണ്ട്. റമ്പൂട്ടാൻ തുടങ്ങിയ മുന്തിയ ഇനം പഴങ്ങളുടെ വിളവെടുപ്പുക്കാലം കൂടിയാണിത്. വവ്വാലുകളുടെ പഴംതീറ്റി വിനയാകുമോയെന്ന ആശങ്കയും നാട്ടുകാർ പങ്കിടുന്നു.

ഷൊർണൂർ റെയിൽവേ സ്റ്റേഷനിലെ പഴക്കമുള്ള കെട്ടിടങ്ങൾ നീക്കംചെയ്യും

ഷൊർണൂർ: ജംഗ്ഷൻ റെയിൽവേ സ്റ്റേഷനിൽ കാലപ്പഴക്കംചെന്ന മുഴുവൻ കെട്ടിടങ്ങളും പൊളിച്ചുനീക്കാൻ തീരുമാനം. സ്റ്റേഷൻ നവീകരണത്തിന്‍റെ ഭാഗമായിട്ടാണ് പ്ലാറ്റ്ഫോമുകളിലേതടക്കമുള്ള പഴയ കെട്ടിടങ്ങൾ മുഴുവൻ പൊളിച്ചു മാറ്റാൻ റെയിൽവേ തീരുമാനിച്ചത്. റെയിൽവേ സ്റ്റേഷനിലെ 4, 5, 6 പ്ലാറ്റ്ഫോമുകളിലുള്ള പഴയ കെട്ടിടങ്ങളാണു ഇതിൽ പ്രധാനം. നിലവിലെ കെട്ടിടങ്ങളിലെ വിവിധ ഓഫീസുകൾ, മുമ്പ് ആർഎംഎസ് ഓഫീസ് പ്രവർത്തിച്ചിരുന്ന കെട്ടിടത്തിലേക്കു മാറ്റും. യാത്രക്കാർക്കു കൂടുതൽ സൗകര്യം ഒരുക്കാനാണു കെട്ടിടങ്ങൾ പൊളിച്ചുമാറ്റുന്നതെന്നു റെയിൽവേ പറയുന്നു. പൊളിച്ചു മാറ്റുന്ന ഭാഗങ്ങളിൽ യാത്രക്കാർക്കു കൂടുതൽ ഇരിപ്പിടങ്ങൾ ഒരുക്കും. കച്ചവട സ്റ്റാളുകളും വർധിപ്പിക്കും. മൂന്നു പ്ലാറ്റ്ഫോമുകളിൽ പത്തിലധികം മുറികളാണു പഴയ കെട്ടിടത്തിലുള്ളത്. കെട്ടിടങ്ങൾ നീക്കുന്നതോടെ പ്ലാറ്റ്ഫോമുകളുടെ വീതിയും വർധിക്കും. 4, 5 പ്ലാറ്റ്ഫോമുകളിൽ ഇരുഭാഗത്തും കെട്ടിടങ്ങളുള്ളതിനാൽ യാത്രക്കാർക്ക് ഇരിക്കാനുള്ള സൗകര്യം കുറവാണ്. 6, 7 പ്ലാറ്റ്ഫോമുകളിൽ മാത്രമാണു പഴയ കെട്ടിടങ്ങളുടെ എണ്ണം കുറവുള്ളത്. ആർഎംഎസ് ഓഫിസ് സ്ഥിതി ചെയ്തിരുന്ന കെട്ടിടത്തിൽ തന്നെ ഇത്രയധികം ഓഫിസുകൾക്കു സൗകര്യങ്ങളുണ്ട്. ഷൊർണൂർ റെയിൽവേ പോലീസ് സ്റ്റേഷനു മറ്റൊരു കെട്ടിടം ആവശ്യപ്പെട്ടെങ്കിലും റെയിൽവേ ആവശ്യം അംഗീകരിച്ചില്ല. പ്ലാറ്റ്ഫോം നവീകരണം പൂർത്തിയാകുന്നതോടെ യാത്രക്കാർക്കു കൂടുതൽ സൗകര്യങ്ങൾ ഒരുങ്ങും എന്നാണു റെയിൽവേ പറയുന്നത്. കോടിക്കണക്കിന് രൂപയുടെ വികസന പദ്ധതികളാണ് ഷൊർണൂരിൽ നടപ്പാക്കി വരുന്നത്.

ശാപമോക്ഷംതേടി "ലോഹിതദാസ്' റോഡ്

ഒറ്റപ്പാലം: അമരാവതിയിലെത്താൻ ചെളിത്തോടു താണ്ടണം. അനശ്വര കഥാകാരൻ എ.കെ. ലോഹിതദാസിന്‍റെ വീടായ അമരാവതിക്ക് മുമ്പിലൂടെ കടന്നുപോകുന്ന പാതയാണ് മഴയിൽ തകർന്ന് ഉപയോഗരഹിതമായത്. മണ്ണും ചെളിയും നിറഞ്ഞ വെള്ളക്കെട്ടായിമാറി ഈ പാത. സിനിമസംവിധായകൻ ലോഹിതദാസിന്‍റെ പേരിലുള്ള ഈ പാത കാലെടുത്തുവയ്ക്കാൻ പോലും കഴിയാത്തനിലയിൽ തകർന്നു. ജൂൺ 28ന് ലോഹിതദാസ് അനുസ്മരണം നടക്കുന്നതിനു മുമ്പെങ്കിലും പാത നന്നാക്കുമെന്നായിരുന്നു നാട്ടുകാരുടെ പ്രതീക്ഷ. എന്നാൽ, അതുണ്ടായില്ല. എട്ടുവർഷംമുൻപാണ് പാത നിർമിച്ചത്. നാളിതുവരെ അറ്റകുറ്റപ്പണിയൊന്നും നടത്തിയിട്ടില്ല. വിദ്യാർഥികളും തൊഴിലാളികളും സർക്കാർജീവനക്കാരുമായി നിത്യേന ഇരുനൂറിലേറെ ആളുകൾ ഉപയോഗിക്കുന്ന പാതയാണിത്. എതിർദിശയിൽനിന്ന് വാഹനംവന്നാൽ ചെളിയിലിറങ്ങാതെ മാറിനിൽക്കാൻപോലും ഇടമില്ല. പ്രദേശവാസികളോടുള്ള അവഗണനയും മൺമറഞ്ഞ സംവിധായകനോടുള്ള അനാദരവുമാണ് പാത നന്നാക്കാൻ നടപടികളില്ലാത്തതെന്നു വിമർശനവും ഉയർന്നുകഴിഞ്ഞു.

നിയന്ത്രണംവിട്ട പിക്കപ്പ് വാൻ കടയിലേക്കു പാഞ്ഞുകയറി

വടക്കഞ്ചേരി: മംഗലം - ഗോവിന്ദാപുരം സംസ്ഥാനപാതയിൽ വള്ളിയോട് കരിപ്പാലിക്കു സമീപം നിയന്ത്രണംവിട്ട പിക്കപ്പ് വാൻ പാഞ്ഞുകയറി കടയ്ക്കു മുന്നിൽ നിന്നയാളെയും ബൈക്കിനേയും ഇടിച്ചുതെറിപ്പിച്ചു. ആലത്തൂർ വേങ്ങന്നൂർ സ്വദേശി രാജേഷി (44 ) നാണ് പരിക്കേറ്റത്. ഇന്നലെ ഉച്ചയ്ക്ക് ഒന്നരയോടെയായിരുന്നു അപകടം. കരിപ്പാലിയിലെ ടൈൽ കമ്പനിയിൽ വന്ന രാജേഷ് പിന്നീട് ഭക്ഷണം കഴിക്കുന്നതിനായി സമീപത്തെ ഹോട്ടലിന്‍റെ മുൻവശത്ത് വണ്ടി നിർത്തി ഇറങ്ങി നിൽക്കുമ്പോൾ വടക്കഞ്ചേരി ഭാഗത്തുനിന്നും മുടപ്പല്ലൂർ ഭാഗത്തേക്ക് പോവുകയായിരുന്ന പിക്കപ്പ് വാൻ നിയന്ത്രണം തെറ്റി ഇടിക്കുകയായിരുന്നു. ഇടിയുടെ ആഘാതത്തിൽ തൊട്ടടുത്തുള്ള കനാലിലേക്ക് ബൈക്കും രാജേഷും തെറിച്ചുവീണു. ഓടിക്കൂടിയ നാട്ടുകാർ ചേർന്ന് രാജേഷിനെ ഇരട്ടക്കുളത്തെ സ്വകാര്യ ആശുപത്രിയിൽ പ്രവേശിപ്പിച്ചു. അപകടസമയത്ത് ചാറ്റൽമഴ ഉണ്ടായിരുന്നതിനാലാകാം വാഹനം നിയന്ത്രണം വിട്ടതെന്നാണ് കരുതുന്നത്.

കുറവൻപാടി ഉണ്ണിമലയിൽ വീണ്ടും കാട്ടാനവിളയാട്ടം

അഗളി: കുറവൻപാടി ഉണ്ണിമലയിൽ വീണ്ടും കാട്ടാന വിളയാട്ടം. ഞായറാഴ്ച പുലർച്ചെയെത്തിയ കാട്ടാന ഉണ്ണിമല ഇൻഫന്‍റ് ജീസസ് പള്ളിക്കും കുറവൻപാടി എസ്എച്ച് കോൺവന്‍റിന്‍റെയും സമീപത്തും കൃഷികൾ നശിപ്പിച്ചു. സമീപത്തെ നിരവധി കൃഷിത്തോട്ടങ്ങളിൽ നാശം വിതച്ചു. മൂന്നാഴ്ച മുമ്പ് പ്രദേശത്തെ കൃഷിയിടങ്ങളിൽ സ്ഥിരം സന്ദർശകനായിരുന്നു കാട്ടാന. കൃഷിയോടൊപ്പം നിരവധി വാട്ടർ ടാങ്കുകളും ഹോസുകളും നശിപ്പിച്ച ശേഷം പുലിയറ പ്രദേശത്തേക്ക് കടന്നു. രണ്ടാഴ്ചയോളം പുലിയറയിൽ നാശം തീർത്തശേഷം എൻഎസ്എസ് കാട്ടിലേക്ക് മറഞ്ഞ കാട്ടാന വീണ്ടും ഉണ്ണിമലയിൽ പ്രത്യക്ഷപ്പെട്ടിരിക്കുകയാണ്. മഴയിൽ കുതിർന്ന മണ്ണിലൂടെ ചവിട്ടിനടന്ന് വൻ കൃഷിനാശം ആണ് സംഭവിക്കുന്നത്. മാസങ്ങളായി പ്രദേശത്ത് കണക്കറ്റ നാശനഷ്ടമാണ് കാട്ടാനകൾ വിതയ്ക്കുന്നത്. കർഷകരെ കാട്ടാനയിൽ നിന്ന് രക്ഷിക്കാൻ സർക്കാർ ഒരു നടപടിയും എടുക്കുന്നില്ലെന്ന് നാട്ടുകാർ പരാതിപ്പെട്ടു. കർഷകരുടെ പരാതിക്ക് കാത്തുനിൽക്കാതെ വനം ഉദ്യോഗസ്ഥർ സ്ഥലത്തെത്തി പരിശോധന നടത്തി നാശനഷ്ടത്തിന് മതിയായ നഷ്ടപരിഹാരം നൽകണമെന്ന് നാട്ടുകാർ ആവശ്യപ്പെട്ടു.

മലയോരമേഖലയിൽ മുള കൃഷിചെയ്യാൻ വനംവകുപ്പ്; എതിർപ്പുമായി കിഫ

നെന്മാറ: വനാതിർത്തി പ്രദേശങ്ങളിൽ മുള നട്ടുപിടിപ്പിക്കാൻ പദ്ധതിയുമായി വനംവകുപ്പ്. കാട്ടാന ഉൾപ്പെടെ വന്യജീവിശല്യം രൂക്ഷമായിരിക്കുന്ന പ്രദേശങ്ങളിലാണ് വനംവകുപ്പ് മുളകൃഷിയുമായി രംഗത്തെത്തിയിരിക്കുന്നതെന്ന് കിഫ ആരോപിച്ചു. മേഖലയിൽ മുള നടുന്നതിന് തൈകളുമായി വനംവകുപ്പ് വന്നാൽ തടയുമെന്ന് കേരള ഇൻഡിപെൻഡൻസ് ഫാർമേഴ്സ് അസോസിയേഷൻ ഭാരവാഹികൾ അറിയിച്ചു. നെല്ലിയാമ്പതി വനംറേഞ്ചിനു കീഴിൽ അയിലൂർ പഞ്ചായത്തിലെ തിരുവഴിയാട് സെക്ഷനിൽപെട്ട തളിപ്പാടം, കരിമ്പാറ, നിരങ്ങൻപാറ, കൽച്ചാടി, മരുതഞ്ചേരി, പൂഞ്ചേരി, ചള്ള, ഓവുപാറ, നേർച്ചപ്പാറ വരെയുള്ള മലയോരങ്ങളിലാണ് മുള നട്ടുപിടിപ്പിക്കാൻ വനംവകുപ്പ് പദ്ധതി തയ്യാറാക്കിയിരിക്കുന്നത്. സമാനരീതിയിൽ വനംവകുപ്പ് മുള നട്ടുപിടിപ്പിച്ച എലവഞ്ചേരി, കൊല്ലങ്കോട്, വയനാട്, മലമ്പുഴ മേഖലകളിലെ പ്രശ്നങ്ങളും കിഫ യോഗത്തിൽ ചൂണ്ടിക്കാട്ടി. കാട്ടാനകൾക്ക് തീറ്റയ്ക്കായാണ് മുളകൃഷി നടത്താൻ വനംവകുപ്പിന്‍റെ പദ്ധതി. കഴിഞ്ഞ കുറേ വർഷങ്ങളായി തുടർച്ചയായി ഈ മേഖലകളിൽ കാട്ടാനകൾ ജനവാസ മേഖലയിലിറങ്ങി തെങ്ങുകളും കമുകുകളും വാഴകളും വേലികളും നശിപ്പിച്ച് ഭീതി പരത്തി കൊണ്ടിരിക്കുന്നതിനിടയിൽ വനംവകുപ്പ് പരിഹാരം കാണാതിരിക്കുന്നതിനിടിയിലാണ് പുതിയ പദ്ധതിയുമായി വന്നിരിക്കുന്നത്. പ്രാണരക്ഷാർഥം പല കർഷകരും കൃഷി ഉപേക്ഷിച്ചും കൃഷിസ്ഥലം തരിശിട്ടും വീട് ഉപേക്ഷിച്ച് മറ്റിടങ്ങളിൽ താമസം ആരംഭിക്കുകയും ചെയ്യുന്നതിനിടയ്ക്കാണ് ഇത്തരം കാടൻപദ്ധതി നടപ്പിലാക്കുന്നത്. രണ്ടുവർഷംമുമ്പ് കാട്ടുമൃഗങ്ങൾക്ക് കുടിവെള്ളത്തിനായി പഞ്ചായത്ത് തൊഴിലുറപ്പുതൊഴിലാളികളെ ഉപയോഗിച്ച് ജനവാസമേഖലയ്ക്ക് സമീപം കുളം കുഴിക്കുന്ന പദ്ധതി കർഷകരുടെയും മലയോരവാസികളുടെയും എതിർപ്പിനെതുടർന്ന് ഉപേക്ഷിക്കുകയുണ്ടായി. അതേ സ്ഥലത്ത്തന്നെ ആനയുടെ ഇഷ്ടഭക്ഷണമായ മുള വച്ചുപിടിപ്പിച്ചാൽ ആനയും മാനും പന്നിയും ഒരിക്കലും ഉൾക്കാടുകളിലേക്ക് പോവുകയില്ല. മാത്രമല്ല ഇത്തരം മൃഗങ്ങളെ ഭക്ഷണമാക്കാൻ കടുവയും പുലിയും കൂടുതൽ വന്നുചേരും. അവ വംശവർധനവിലൂടെ ജനജീവിതത്തേയും കൃഷിയെയും കൂടുതൽ അപകടകരമാക്കും. കിഫ ജില്ലാ പ്രസിഡന്‍റ് സണ്ണി കിഴക്കേക്കരയുടെ നേതൃത്വത്തിൽ ചേർന്ന യോഗത്തിൽ സെക്രട്ടറി എം. അബ്ബാസ്, ഡോ. സിബി സക്കറിയ, രമേശ് ചേവക്കുളം, സന്തോഷ് അരിപ്പാറ, മോഹൻ തോട്ടത്തിൽ, അബ്ദുൾ റഹ്മാൻ മരുതഞ്ചേരി എന്നിവരുടെ നേതൃത്വത്തിൽ നടന്ന യോഗം വനംവകുപ്പ് പദ്ധതി ഉപേക്ഷിച്ചില്ലെങ്കിൽ പ്രത്യക്ഷ സമരത്തിന് ഇറങ്ങുമെന്ന് മുന്നറിയിപ്പു നൽകി. വനമേഖലയോട് ചേർന്ന് മുളകൃഷി പദ്ധതി ഉപേക്ഷിക്കാൻ വനംവകുപ്പിനോട് ആവശ്യപ്പെട്ടു. ഇത് സംബന്ധിച്ച് കർഷകരുടെ ആശങ്ക പങ്കുവെച്ച് ഡോ. സിബി സക്കറിയ നെന്മാറ ഡിഎഫ്ഒയുമായി ഫോണിൽ ചർച്ച നടത്തി ആശങ്ക പങ്കുവെച്ചു. മലയോരമേഖലയിൽ നിന്നും അഞ്ചു കിലോമീറ്റർ ഉൾവനത്തിലേക്ക് മാറ്റിനടാനും ആവശ്യപ്പെട്ടു. വനംവകുപ്പ് വെട്ടിമാറ്റുന്ന യൂക്കാലി, സെന്ന എന്നീ ഹാനികരമായ വൃക്ഷങ്ങളും കശുമാവ്, മലവേപ്പ് എന്നിവ കൃഷി ചെയ്യുന്ന സ്ഥലങ്ങളിൽ ഇത്തരം പദ്ധതികൾ നടപ്പാക്കാൻ ശ്രമിക്കണമെന്നും പറമ്പിക്കുളം വനമേഖലയോട് ചേർന്ന് നെല്ലിയാമ്പതി മേഖലയിൽ വനംവകുപ്പ് ഏറ്റെടുത്തു പാഴ്ചെടികൾ വളർന്നുനിൽക്കുന്ന തൂത്തമ്പാറ, മീര ഫ്ലോർസ്, റോസറി തുടങ്ങിയ തോട്ടങ്ങളിൽ ടൂറിസം കെട്ടിടങ്ങൾ നിർമിക്കുന്നതിന് പകരം ഇത്തരം കൃഷി നടത്താൻ തയ്യാറാകണമെന്നും കിഫ ഭാരവാഹികൾ ആവശ്യപ്പെട്ടു.

ഗതിമാറിയൊഴുകിയ കാട്ടുചോല കൃഷിനാശം വരുത്തുന്നു; ജനവാസമേഖലയ്ക്കു ഭീഷണി

നെന്മാറ: അയിലമുടി മലയുടെ താഴ്ഭാഗത്തു നിന്നും ഉത്ഭവിക്കുന്ന കാട്ടുചോല ഗതിമാറിയൊഴുകി കൃഷിയിടങ്ങളിൽ നാശം. അയിലൂർ പഞ്ചായത്തിലെ നാലാംകൂപ്പ്, കൈതച്ചിറ, പയ്യാങ്കോട് എന്നീ പ്രദേശങ്ങളിലൂടെ ഒഴുകി പയ്യാംകോട്ടിലെ തോട്ടിൽ എത്തിച്ചേരുന്ന ചോലയാണ് ബണ്ട് പൊട്ടി കൃഷിയിടങ്ങളിലൂടെ പരന്നൊഴുകുന്നത്. കൈതച്ചിറയിൽ ബണ്ട് തകർന്ന് കാട്ടുചോലയിലെ വെള്ളം ഏക്കർ കണക്കിന് നെൽകൃഷിക്കും റബർ കൃഷിക്കും തെങ്ങ്, കമുക് എന്നീ കൃഷികൾക്കും അഞ്ചോളം വീടുകൾക്കും നാശം സംഭവിക്കുന്ന രീതിയിൽ വെള്ളം ആഴ്ചകളായി ഒഴുകിക്കൊണ്ടിരിക്കുകയാണ്. കാട്ടുചോലയ്ക്ക് സമീപമുള്ള മരങ്ങളും പനയും മലവെള്ളപ്പാച്ചിലിൽ കടപുഴകി വീണു കിടക്കുകയാണ്. ചില വീടുകൾക്ക് മുന്നിലൂടെ കുത്തിയൊലിച്ച് വീടുകളിലേക്കുള്ള നടവഴി പോലും നഷ്ടമായി. പ്രദേശവാസികൾ അധികൃതരെ അറിയിച്ചിട്ടും ദിവസങ്ങളായി ഗതിമാറി ഒഴുകുന്ന കാട്ടുചോലയെ പൂർവസ്ഥിതിയിൽ ഒഴുകുന്നതിന് നടപടി സ്വീകരിച്ചിട്ടില്ല. അധികാരികൾ ഇടപെട്ട് ഉടൻ പ്രശ്നത്തിന് ശാശ്വത പരിഹാരം കാണണമെന്നും സിപിഐ, എഐവൈഎഫ് ബ്രാഞ്ച് കമ്മിറ്റികൾ ചോലപൊട്ടിയ സ്ഥലത്ത് പ്രതിഷേധം സംഘടിപ്പിച്ചുകൊണ്ട് ആവശ്യപ്പെട്ടു. യോഗത്തിൽ ആർ. രാജേഷ്, പി.എം. യൂസഫ്, കുട്ടൻ മണലാടി, ജയ്സൺ, ശിവൻ എന്നിവർ നേതൃത്വം നൽകി. പ്രതിഷേധത്തിൽ പ്രദേശവാസികളും അണിനിരന്നിരുന്നു.

പനയന്പാടത്തും കല്ലടിക്കോടും നാറ്റ്പാക് സംഘം പരിശോധന നടത്തി

കല്ലടിക്കോട്: ദേശീയപാതയിൽ സ്ഥിരം അപകടമേഖലകളായ പനയന്പാടം, കല്ലടിക്കോട് അയ്യപ്പൻകാവ് പ്രദേശങ്ങളിൽ നാറ്റ്പാക് സംഘം പരിശോധന നടത്തി. അപകടകാരണങ്ങളെക്കുറിച്ചും റോഡിന്‍റെ അപര്യാപ്തതയെക്കുറിച്ചും പഠനം നടത്താൻ വിദഗ്ധ സംഘമെത്തിയതോടെ പ്രദേശവാസികൾ പ്രതീക്ഷയിലാണ്. തിരുവനന്തപുരത്തു നിന്നു നാറ്റ്പാക്, പൊതുമരാമത്ത്, മോട്ടോർവാഹന വകുപ്പ്, പോലീസ് എന്നിവരുൾപ്പെട്ട സംഘമാണു പരിശോധന നടത്തിയത്. 5 പേരുടെ മരണത്തിനിടയാക്കിയ അപകടംനടന്ന കല്ലടിക്കോട് ഭാഗവും 4 വിദ്യാർഥിനികളുടേതടക്കം ഒട്ടേറെ അപകടമരണങ്ങൾനടന്ന പനയന്പാടം ഭാഗവുമാണ് പരിശോധിച്ചത്. ദേശീയപാതയിൽ പലയിടത്തും പ്രശ്നങ്ങൾ ഉണ്ടെന്നു സംഘം പറഞ്ഞു. ചിലയിടത്ത് റോഡിന് ആവശ്യമായ വീതിയില്ല. ചിലയിടങ്ങളിൽ വീതി കൂടുതലാണ്. പനയന്പാടത്ത് 500 മീറ്റർ അപകടമേഖലയാണെന്നും സംഘം വിലയിരുത്തി. ഇറക്കം ഇറങ്ങിവരുന്ന വാഹനങ്ങളുടെ വേഗം കുറയുകയും കയറിപ്പോകുന്ന വാഹനങ്ങൾക്കു സുഗമമായി കയറിപ്പോകാൻ കഴിയുകയും ചെയ്യുന്ന രീതിയിൽവേണം നിർമാണം. പനയന്പാടത്തു വെളിച്ചക്കുറവും ഉണ്ട്. ഇരുവശവും പാർക്കിംഗ് ഒഴിവാക്കണം. റോഡിൽ പലഭാഗത്തും വെള്ളക്കെട്ടുകൾ ഉണ്ട്. മഴവെള്ളം പൂർണമായും ഒഴിഞ്ഞുപോകാനുള്ള സൗകര്യം വേണം. റോഡിന്‍റെ വശങ്ങളിലുള്ള കലുങ്കിൽ പോരായ്മകളുണ്ട്. ബസ് കാത്തിരിപ്പു കേന്ദ്രങ്ങൾ മാറ്റി സ്ഥാപിക്കണം. പരിഹാരങ്ങൾക്കായി അനുവദിച്ച 1.35 കോടി രൂപ തികയാതെവരും. കൂടുതൽ തുക ദേശീയപാത അഥോറിറ്റി അനുവദിക്കണമെന്നും നാറ്റ്പാക് പ്രിൻസിപ്പൽ ഗവേഷകൻ സഞ്ജയ് കുമാർ പറഞ്ഞു. ജൂണിയർ ഗവേഷകരായ ഗൗതം സാരംഗ്, പി.പി. ഷിജിത്ത്, മണ്ണാർക്കാട് ഗതാഗത വകുപ്പ് ഇൻസ്പെക്ടർ പി.എം. രവികുമാർ, പൊതുമരാമത്ത് വകുപ്പ് എൻഎച്ച് വിഭാഗം എഇ പി. സ്മിത, മണ്ണാർക്കാട് ഡിവൈഎസ്പി എം. സന്തോഷ്കുമാർ, കല്ലടിക്കോട് ഇൻസ്പെക്ടർ ജി.എസ്. സജി എന്നിവരും സംഘത്തിലുണ്ടായിരുന്നു.

ആരോഗ്യമന്ത്രി രാജിവയ്ക്കണം: കേരള കോൺ. ജേക്കബ്

പാലക്കാട്: ആരോഗ്യമന്ത്രി വീണാ ജോർജ് രാജിവെക്കണമെന്ന് ആവശ്യപ്പെട്ട് സംസ്ഥാനത്ത് കേരള കോൺഗ്രസ്-ജേക്കബിന്‍റെ അഭിമുഖ്യത്തിൽ നടത്തുന്ന പ്രക്ഷോഭത്തിന്‍റെ ഭാഗമായി പാലക്കാട് ജില്ലാ കമ്മിറ്റി മെഡിക്കൽ ഓഫീസിനു മുന്നിൽ ധർണ നടത്തി. സംസ്ഥാന വൈസ് ചെയർമാൻ വി.ഡി. ജോസഫ് ഉദ്ഘാടനം ചെയ്തു. ജില്ലാ വൈസ് പ്രസിഡന്‍റ് വി.ഡി. ഉലഹന്നാൻ അധ്യക്ഷനായിരുന്നു. ജില്ലാ സെക്രട്ടറി പി.ഒ. വക്കച്ചൻ, വൈസ് പ്രസിഡന്‍റ് എൻ.കെ. പുരുഷോത്തമൻ, ജനറൽ സെക്രട്ടറിമാരായ കെ.വി.സുദേവൻ, ഗ്രേസി ജോസഫ്, ശശി പിരായിരി, ജിത്ത് കല്യാണകണ്ടത്തിൽ, അഡ്വ.കെ. ശ്രീധരൻ, എൻജിഒ ഫ്രണ്ട് മുൻ സംസ്ഥാന പ്രസിഡന്‍റ് എസ്. ജയകൃഷ്ണൻ, നിയോജകമണ്ഡലം പ്രസിഡന്‍റുമാരായ വി.എ. കേശവൻ, കെ.പി.തങ്കച്ചൻ, എം. തങ്കവേലു, ജെയിംസ് തോമസ്, ആർ. ദേവൻ, വി.ജെ. സാബു വെള്ളാരംകാലായിൽ, ജിജു മാത്യു പെരുമ്പള്ളി, യൂത്ത് ഫ്രണ്ട് ജില്ലാ പ്രസിഡന്‍റ് ടിനു മാത്യൂ കുഴിവേലി, കർഷക തൊഴിലാളി കോൺഗ്രസ് ജില്ലാ പ്രസിഡന്‍റ് പി.എം. ജോസ്, ജില്ലാ ദളിത് കോൺഗ്രസ് പ്രസിഡന്‍റ് വാസുദേവൻ കുഴൽമന്ദം, ജില്ലാ ജനറൽ സെക്രട്ടറി വി.അനിൽകുമാർ എന്നിവർ പ്രസംഗിച്ചു.

വനം വാച്ചർമാരെ കബളിപ്പിച്ച് കാട്ടാനകൾ വീണ്ടും കൃഷിയിടങ്ങളിൽ

നെന്മാറ: കരിമ്പാറ മേഖലയിലെ കൃഷിയിടങ്ങളിൽ മൂന്നാം ദിവസവും കാട്ടാനകൾ നാശംവരുത്തി. മരുതഞ്ചേരി കുന്നുപറമ്പ് വീട്ടിൽ ഷാജഹാന്‍റെ അഞ്ചുതെങ്ങുകളാണ് കഴിഞ്ഞ രാത്രിയിൽ വീണ്ടും കാട്ടാന നശിപ്പിച്ചത്. നാലു തെങ്ങുകൾ പൂർണമായും നിലത്തു തള്ളിയിടാതെ പട്ടകളും മൃദുവായ തൂമ്പും മാത്രം തിന്നു നശിപ്പിച്ചിട്ടുണ്ട്. കഴിഞ്ഞ രണ്ട് ദിവസം കാട്ടാനകൾ കൃഷിനാശം ഉണ്ടാക്കിയ പൂഞ്ചേരി കൽച്ചാടി, കോപ്പൻകുളമ്പ്, പ്രദേശങ്ങളിൽ കാട്ടാന പ്രതിരോധത്തിനായി രാത്രി ആനയെ അകറ്റാൻ വനം വാച്ചർമാർ സന്ധ്യ മുതൽ തന്നെ വിവിധ പ്രദേശങ്ങളിൽ പടക്കം പൊട്ടിച്ച് കാവലിരുന്നു. എന്നാൽ കൽച്ചാടി, ചള്ള മേഖലകളിൽ ശ്രദ്ധ കേന്ദ്രീകരിച്ച വനം വാച്ചർമാരെ കബളിപ്പിച്ച് പതിവുവഴിവിട്ട് പൂഞ്ചേരി ജെഫ്രിമട വഴി രാത്രി പൂഞ്ചേരിയിൽ എത്തി തെങ്ങിൻതോപ്പിൽ വ്യാപക നാശം ഉണ്ടാക്കി. ഒരേക്കറിലേറെ വിസ്തീർണമുള്ള തെങ്ങിൻതോപ്പ് ഏകദേശം തരിപ്പണമായ നിലയിലാണ്. അത്യുത്പാദനശേഷിയുള്ള ഗംഗാബോട്ടം ഇനത്തിൽപ്പെട്ട കായ്ച്ചു തുടങ്ങിയ തെങ്ങുകളാണ് കാട്ടാന നശിപ്പിച്ചത്. തുടർച്ചയായ കൃഷിനാശത്തിൽ ഷാജഹാൻ കൃഷിയിടം ഉപേക്ഷിക്കാനുള്ള തയ്യാറെടുപ്പിലാണ്. സമീപത്തെ പല കർഷകരും മുൻകാലങ്ങളിൽ കാട്ടാന ആക്രമണത്തിൽ പ്രദേശത്തെ തെങ്ങ്, കമുക്, വാഴ കൃഷികൾ ഉപേക്ഷിച്ച് റബർ പോലുള്ള കൃഷികളിലേക്ക് മാറിയിരുന്നു. കഴിഞ്ഞ മൂന്നുദിവസമായി വിവിധ മേഖലകളിൽ മാറിമാറി കാട്ടാന വരുന്നുണ്ടെങ്കിലും വാച്ചർമാർ സന്ധ്യയായാൽ പടക്കം പൊട്ടിച്ച് പോകുന്നതല്ലാതെ മറ്റ് പ്രതിരോധനടപടികൾ ഒന്നും വനംവകുപ്പിന്‍റെ ഭാഗത്തുനിന്നില്ലെന്ന് പ്രദേശവാസികൾ പ്രതികരിച്ചു.

താണാവ്-ചന്ദ്രനഗർ ദേശീയപാത നാലുവരിയാക്കണം: എംപി

പാലക്കാട്: ദേശീയപാത 966 ലെ താണാവ്-ചന്ദ്രനഗർ റോഡിലെ അപകടങ്ങൾ ഒഴിവാക്കുന്നതിനും ഗതാഗതതടസം പരിഹരിക്കുന്നതിനും നാലുവരി പാതയാക്കണമെന്നും ആവശ്യപ്പെട്ട് കേന്ദ്ര റോഡ് ഉപരിതല ഗതാഗത വകുപ്പ് മന്ത്രി നിതിൻ ഗഡ്കരിക്ക് വി.കെ. ശ്രീകണ്ഠൻ എംപി കത്ത് നൽകി. മഴക്കാലമായതോടുകൂടി കഴിഞ്ഞ കുറച്ചു മാസങ്ങളായി ഈ ഭാഗത്തുകൂടിയുള്ള യാത്ര അതീവ ദുഷ്കരമാണ്. ഗതാഗത തടസവും അപകടങ്ങളും ഇവിടെ നിത്യസംഭവമാണ്. ഈ റോഡിൽ രൂപപ്പെട്ടിട്ടുള്ള വലുതും ആഴമേറിയതുമായ കുഴികൾ കാരണം പകലും രാത്രിയിലും പുതിയ പാലം മുതൽ പുതുപ്പരിയാരം ഇൻഡസ്ട്രിയൽ എസ്റ്റേറ്റ് വരെ ഗതാഗതക്കുരുക്ക് പതിവാണ്. റെയിൽവേ സ്റ്റേഷൻ, വീടുകൾ എന്നിവടങ്ങളിലേക്ക് ആളുകൾക്ക് കൃത്യസമയത്ത് എത്തുവാൻ സാധിക്കുന്നില്ല. ആംബുലൻസ് ഉൾപ്പെടെ ഗതാഗതകുരുക്കിൽ അകപ്പെടുന്നതിനാൽ രോഗികളെ കൃത്യസമയത്ത് ഹോസ്പിറ്റലിൽ എത്തിക്കുവാൻ സാധിക്കുന്നില്ല. പുതുപ്പരിയാരം താണാവ് ജംഗ്ഷന് സമീപം റോഡിന്‍റെ വീതി കുറവായതിനാൽ ഇവിടെ അപകടങ്ങൾ പതിവാണ്. താണാവിനും ചന്ദ്രനഗറിനുമിടയിലുള്ള ദേശീയപാത രണ്ട് വരിയിൽ നിന്ന് നാല് വരിയായി വീതി കൂട്ടേണ്ടതുണ്ട്. തമിഴ്നാട്ടിലേക്കും കർണാടകയിലേക്കുമുള്ള ആയിരക്കണക്കിന് വാഹനങ്ങൾ ഇതുവഴി കടന്നുപോകുന്നതിനാൽ ഗതാഗതകുരുക്ക് നിത്യസംഭവമാണ്. കഴിഞ്ഞ വർഷം സെപ്തംബർ 23 ന് കേന്ദ്ര മന്ത്രി നിതിൻ ഗഡ്കരിക്ക് നൽകിയ കത്തിന് ഈ കാര്യം പരിശോധിച്ച് വേണ്ട നടപടിയെടുക്കുമെന്ന് മറുപടി ലഭിച്ചിരുന്നു. എന്നാൽ നാഷണൽ ഹൈവേ അഥോറിറ്റിയുടെ ഭാഗത്തുനിന്നും നടപടിയൊന്നും ഉണ്ടായില്ല. അതിനാൽ റോഡിലെ ഗതാഗതകുരുക്കും അപകടങ്ങളും ഒഴിവാക്കാൻ അടിയന്തരമായി ശാശ്വത പരിഹാരം ഉണ്ടാക്കണമെന്ന് വീണ്ടും കേന്ദ്രമന്ത്രിക്കയച്ച കത്തിൽ എംപി ആവശ്യപ്പെട്ടു.

കൊട്ടേക്കാട് വനംസെക്്ഷനിലും വിത്തൂട്ട്

പാലക്കാട്: വാളയാർ വനം റേഞ്ചിലെ കൊട്ടേക്കാട് സെക്്ഷൻ പുല്ലംകുന്നിലും വിത്തുണ്ടകൾ നിക്ഷേപിച്ചു. എ. പ്രഭാകരൻ എംഎൽഎ വിത്തെറിഞ്ഞ് ഉദ്ഘാടനം നിർവഹിച്ചു. വാളയാർ ഫോറസ്റ്റ് റേഞ്ച് ഓഫീസർ ആർ.എസ്. പ്രവീൺ അധ്യക്ഷത വഹിച്ചു. മലന്പുഴ നിർമലമാതാ സ്കൂൾ വിദ്യാർഥികളും അധ്യാപകരും ചടങ്ങിൽ സന്നിഹിതരായിരുന്നു. പ്രിൻസിപ്പൽ സിസ്റ്റർ സൂന, ജൈവവൈവിധ്യ ബോർഡ് കമ്മിറ്റിയംഗം അഡ്വ. ലിജോ പനങ്ങാടൻ പ്രസംഗിച്ചു.

ശുചീകരണ തൊഴിലാളികൾ വാടാതിരിക്കാൻ ഇനി ഐ-ബ്രല്ല

കോയന്പത്തൂർ: ശുചീകരണ തൊഴിലാളികൾക്കു ആശ്വാസവുമായി കോയന്പത്തൂർ കോർപറേഷൻ. മഴയത്തും വെയിലത്തും ശുചീകരണ ജോലികൾ ഏർപ്പെടുന്ന തൊഴിലാളികൾക്കു തോളിൽ ധരിക്കാവുന്ന കുട- ഐ-ബ്രല്ല യാണ് കോർപറേഷൻ അനുവദിക്കുന്നത്. കഴിഞ്ഞ ദിവസം പൊള്ളാച്ചി റോഡിലും സുന്ദരപുരം പ്രദേശത്തും ശുചീകരണ തൊഴിലാളികൾ ഇതു ധരിച്ചാണ് പണിയെടുത്തത്. കോർപറേഷൻ കമ്മീഷണർ ശിവഗുരു പ്രഭാകരൻ ഇതു നേരിട്ടു പരിശോധിക്കുകയും തൊഴിലാളികളുടെ അഭിപ്രായം തേടുകയും ചെയ്തു. കുട്ടികൾ, യുവാക്കൾ, മുതിർന്നവർ എന്നിവരുൾപ്പെടെയുളളവർക്കായി കോയമ്പത്തൂരിലെ ഒരു സ്വകാര്യ കമ്പനിയാണ് ഐ-ബ്രല്ല നിർമിക്കുന്നതെന്നതും ശ്രദ്ധേയമാണ്.

എ.കെ. രാമൻകുട്ടി ഗാന്ധിജിയുടെ പാത പിന്തുടർന്ന കമ്യൂണിസ്റ്റ്: പന്ന്യൻ രവീന്ദ്രൻ

രാമശ്ശേരി: ഗാന്ധിജിയുടെ പാത പിന്തുടർന്ന കമ്യൂണിസ്റ്റാണ് സ്വാതന്ത്ര്യ സമര സേനാനിയായ എ.കെ. രാമൻകുട്ടിയെന്നു മുൻ എംപി. പന്ന്യൻ രവീന്ദ്രൻ. അധികാരസ്ഥാനങ്ങളോടും സമ്പത്തിനോടും ആർത്തി ഇല്ലാതിരുന്ന പൊതുപ്രവർത്തകനായിരുന്നു അദ്ദേഹം. അദ്ദേഹത്തിന്‍റെ ത്യാഗപൂർണമായ ജീവിതം പുതിയ തലമുറയ്ക്കു പരിചയപ്പെടുത്തേണ്ടത് നമ്മുടെ കടമയാണെന്നും പന്ന്യൻ രവീന്ദ്രൻ പറഞ്ഞു. എ.കെ. രാമൻകുട്ടി ഫൗണ്ടേഷന്‍റെ നേതൃത്വത്തിൽ രാമശ്ശേരി ഗാന്ധി ആശ്രമത്തിൽ സംഘടിപ്പിച്ച അനുസ്മരണ സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. ഫൗണ്ടേഷൻ ചെയർമാൻ വി. ചാമുണ്ണി അധ്യക്ഷനായി. പ്രഫ. പി.എ. വാസുദേവൻ മുഖ്യപ്രഭാഷണം നടത്തി. ഫൗണ്ടേഷൻ ജനറൽ സെക്രട്ടറി പുതുശ്ശേരി ശ്രീനിവാസൻ, ഗാന്ധി ആശ്രമം വർക്കിംഗ് ഗ്രൂപ്പ് രക്ഷാധികാരി ഡോ. ശുദ്ധോധനൻ, ലെജി കൃഷ്ണൻ, ഫൗണ്ടേഷൻ ഖജാൻജി കെ. കൃഷ്ണൻകുട്ടി, വൈസ് ചെയർമാൻ പി. എസ്. മുരളീധരൻ, സെക്രട്ടറി എം.ആർ മണികണ്ഠൻ, മുരളി കെ. താരേക്കാട്, ചെന്താമരാക്ഷൻ പള്ളവക്കാട് പ്രസംഗിച്ചു.

നെല്ലായ ഫാമിലി ഹെല്‍ത്ത് സെന്‍ററിനു പുതിയ കെട്ടിടം; നിർമാണത്തിനു തുടക്കം

ഷൊർണൂർ: നെല്ലായ ഗ്രാമപഞ്ചായത്തിലെ ഫാമിലി ഹെല്‍ത്ത് സെന്‍ററിന്‍റെ പുതിയ കെട്ടിടത്തിന്‍റെ നിര്‍മാണ ഉദ്ഘാടനം പി. മമ്മികുട്ടി എംഎല്‍എ നിര്‍വഹിച്ചു. എംഎല്‍എയുടെ 2023- 24 സാമ്പത്തിക വര്‍ഷത്തെ ആസ്തി വികസന ഫണ്ടില്‍ നിന്നും 60 ലക്ഷം രൂപ ചെലവിലാണ് കെട്ടിടം നിര്‍മിക്കുന്നത്. നിലവില്‍ ചെറിയ കെട്ടിടത്തില്‍ പ്രവര്‍ത്തിക്കുന്ന കുടുംബാരോഗ്യ കേന്ദ്രത്തില്‍ ഒപി സൗകര്യം മാത്രമാണുള്ളത്. പുതിയ കെട്ടിടം യാഥാര്‍ഥ്യമാകുന്നതോടെ കിടത്തിചികിത്സയും ലഭ്യമാകും. ഒരുവര്‍ഷത്തിനകം നിര്‍മാണം പൂര്‍ത്തീകരിക്കും. ഗ്രാമപഞ്ചായത്ത് പ്രസിഡന്‍റ് കെ. അജേഷ്, ബ്ലോക്ക് പഞ്ചായത്ത് വൈസ് പ്രസിഡന്‍റ് സി. ബാബു, സ്റ്റാന്‍ഡിംഗ് കമ്മിറ്റി ചെയര്‍മാന്‍മാരായ പി.കെ. മുഹമ്മദ് ഷാഫി, എ. മൊയ്തീന്‍കുട്ടി, ജിഷ പി. വിനു, മെഡിക്കല്‍ ഓഫീസര്‍ ഡോ. റിസ്വാന, നിര്‍വഹണ ഏജന്‍സി ഉദ്യോഗസ്ഥര്‍, വാര്‍ഡ് മെംബര്‍മാര്‍, ആരോഗ്യ പ്രവര്‍ത്തകര്‍ പങ്കെടുത്തു.

കേസുകള്‍ മധ്യസ്ഥതയിലൂടെ പരിഹരിക്കാം

പാലക്കാട്: ദേശീയ നിയമസേവന അഥോറിറ്റിയുടെയും മീഡിയേഷന്‍ ആന്‍ഡ് കണ്‍സീലിയേഷന്‍ പ്രോജക്ട് കമ്മിറ്റിയുടെയും ആഭിമുഖ്യത്തില്‍ സംഘടിപ്പിക്കുന്ന "മീഡിയേഷന്‍ ഫോര്‍ ദി നേഷന്‍' കാമ്പയിന് ജില്ലയില്‍ തുടക്കം. കേസുകള്‍ മധ്യസ്ഥതയിലൂടെയും അനുരഞ്ജനത്തിലൂടെയും വേഗത്തില്‍ പരിഹരിക്കുന്നതിനായി ജനങ്ങളെ പ്രോത്സാഹിപ്പിക്കുകയാണ് ഈ കാന്പയിനിന്‍റെ ലക്ഷ്യം. വിവാഹസംബന്ധമായ തര്‍ക്കങ്ങള്‍, വാഹനാപകട നഷ്ടപരിഹാരങ്ങള്‍, ഗാര്‍ഹിക പീഡനം, ചെക്ക്, കൊമേഴ്ഷ്യല്‍ ഉപഭോക്തൃ, സേവന സംബന്ധമായത്, സ്വത്ത് കേസുകള്‍, സിവില്‍ കോമ്പൗണ്ടബിള്‍ ക്രിമിനല്‍ കേസുകള്‍ എന്നിവയെല്ലാം മധ്യസ്ഥതയിലൂടെ പരിഹരിക്കാനുള്ള അവസരം കാമ്പയിന്‍ വഴി ലഭിക്കും. ഇതില്‍ കോടതി തെരഞ്ഞെടുത്ത കേസുകള്‍ പാര്‍ട്ടികളെ അറിയിച്ചശേഷം മധ്യസ്ഥകേന്ദ്രങ്ങളിലേക്കു കൈമാറും. ദിവസവും അഭിഭാഷകര്‍ (മീഡിയേറ്റര്‍) വഴി തീര്‍പ്പാക്കല്‍ ശ്രമങ്ങള്‍ നടത്തും. ഓണ്‍ലൈന്‍ സംവിധാനവും ലഭ്യമാക്കും. സേവനങ്ങള്‍ സൗജന്യമാണ്. മധ്യസ്ഥതവഴി തീരുന്ന കേസുകള്‍ക്ക് അടച്ചിരുന്ന കോടതിഫീസ് മുഴുവനായും തിരിച്ചുനല്‍കും. സെപ്റ്റംബര്‍ 30 വരെയാണ് കാമ്പയിന്‍. കൂടുതല്‍ വിവരങ്ങള്‍ക്കും സഹായങ്ങള്‍ക്കും 0491-2505665 എന്ന ഫോണ്‍നമ്പറില്‍ ബന്ധപ്പെടാവുന്നതാണെന്ന് ജില്ലാ ലീഗല്‍ സര്‍വീസസ് അഥോറിറ്റി സെക്രട്ടറി അറിയിച്ചു.

കൊടുവായൂർ പഞ്ചായത്ത് ആശ്രയ കിറ്റുകളും ലാപ്‌ടോപ്പുകളും നൽകി

പാലക്കാട്: കൊടുവായൂര്‍ ഗ്രാമപഞ്ചായത്തിന്‍റെ ആഭിമുഖ്യത്തില്‍ ആശ്രയ കിറ്റുകളും പട്ടികജാതി വിദ്യാര്‍ഥികള്‍ക്കു ലാപ്‌ടോപ്പുകളും വിതരണം ചെയ്തു. ഗ്രാമപഞ്ചായത്ത് പ്രസിഡന്‍റ് വി. പ്രേമ സുകുമാരന്‍ വിതരണോദ്ഘാടനം നിർവഹിച്ചു. ഗ്രാമപഞ്ചായത്ത് വൈസ് പ്രസിഡന്‍റ് എം. മനോജ് അധ്യക്ഷനായി. 27 വിദ്യാര്‍ഥികള്‍ക്കാണ് ലാപ്‌ടോപ്പുകള്‍ വിതരണംചെയ്തത്. ഒരുലക്ഷ രൂപ അടങ്കലില്‍ 146 ആശ്രയ ഗുണഭോക്താക്കള്‍ക്ക് ഭക്ഷ്യധാന്യ കിറ്റുകളും വിതരണം ചെയ്തു. ചടങ്ങില്‍ സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍മാരായ പി.എന്‍. ശബരീശന്‍, മഞ്ജു സച്ചിദാനന്ദന്‍, ഭരണസമിതി അംഗങ്ങളായ കെ. രാജന്‍, എ. മുരളീധരന്‍, പി.ആര്‍. സുനില്‍, കെ. കുമാരി, ഇന്ദിര രവീന്ദ്രന്‍, അസിസ്റ്റന്‍റ് സെക്രട്ടറി വി. ശ്രീലേഖ, കുടുംബശ്രീ ചെയര്‍പേഴ്‌സണ്‍ ദേവയാനി, വൈസ് ചെയര്‍പേഴ്‌സണ്‍ നസീമ എന്നിവരും പങ്കെടുത്തു.

ചിറ്റൂർ താലൂക്ക് ആശുപത്രി അത്യാഹിത വിഭാഗം പുതിയ കെട്ടിടത്തിലേക്കു മാറ്റി

ചിറ്റൂർ: താലൂക്ക് ആശുപത്രിയിൽ അത്യാഹിതവിഭാഗം പുതിയ കെട്ടിടത്തിൽ തുടക്കമായി. അത്യാധുനിക രീതയിലുള്ള സൗകര്യങ്ങളാണ് അത്യാഹിത വിഭാഗം ബ്ലോക്കിലുളളത്. ചികിത്സക്കെത്തുന്നവർക്കും കൂട്ടിരിപ്പുകാർക്കും സൗകര്യപ്രദമായ രീതിയിൽ കിടക്കകളും സജ്ജമാക്കിയിട്ടുണ്ട്. ഘട്ടംഘട്ടമായി മറ്റുചികത്സകളും പുതിയ ബ്ലോക്കിലേക്കു മാറ്റാനുള്ള ശ്രമങ്ങളും പുരോഗമിച്ചു വരികയാണെന്നു ആശുപത്രി അധികൃതർ അറിയിച്ചു.

വിദ്യാർഥികൾക്കു സ്റ്റാർട്ട്അപ്പ് തുടങ്ങാൻ പൂർവവിദ്യാർഥികളുടെ ഒരുകോടി

കോയന്പത്തൂർ: തുടിയലൂരിലെ വട്ടമലപാളയത്തുള്ള ശ്രീരാമകൃഷ്ണ എൻജിനീയറിംഗ് കോളജിൽ 2000ൽ ബിരുദം നേടിയ വിദ്യാർഥികളുടെ ഇരുപത്തിയഞ്ചാമത് രജതജൂബിലി സംഗമം കോളജ് പരിസരത്തു നടന്നു. കഴിവുള്ള വിദ്യാർഥികളെ സ്റ്റാർട്ടപ്പ് സംരംഭകരാകാൻ സഹായിക്കുന്നതിനായി പൂർവവിദ്യാർഥികൾ കോളേജിന് ഒരുകോടിരൂപ സംഭാവന നൽകി. രാജ്യത്തിന്‍റെ വിവിധ ഭാഗങ്ങളിലുള്ള നൂറ്റയിരുപത്തിയഞ്ചിലേറെ പൂർവവിദ്യാർഥികൾ കുടുംബത്തോടൊപ്പം പങ്കെടുത്തു. വിദ്യാർഥി യൂണിയൻ പ്രസിഡന്‍റ് വീണ രമേശ് സ്വാഗതം പറഞ്ഞു. എസ്എൻആർ സൺസ് ചാരിറ്റബിൾ ട്രസ്റ്റ് മാനേജിംഗ് ട്രസ്റ്റി ആർ. സുന്ദർ ചടങ്ങിൽ അധ്യക്ഷത വഹിച്ചു. രാമകൃഷ്ണ എൻജിനീയറിംഗ് കോളജും എസ്എൻആർ സൺസ് ചാരിറ്റബിൾ ട്രസ്റ്റും തങ്ങളുടെ 25 വർഷത്തെ വളർച്ച വിശദീകരിച്ചു. കോളജ് പ്രിൻസിപ്പൽ എ. സൗന്ദരരാജൻ ഒരുകോടി രൂപയുടെ ചെക്ക് ചടങ്ങിൽ ഏറ്റുവാങ്ങി. വിവിധ സ്കോളർഷിപ്പുകൾ സമ്മാനിക്കുന്നതിനു പൂർവവിദ്യാർഥി സംഘടന 20 ലക്ഷം രൂപയുടെ മറ്റൊരു ചെക്കും കൈമാറി. എസ്എൻആർ സൺസ് ചാരിറ്റബിൾ ട്രസ്റ്റ് കോളജ് സിഇഒ സി.വി. രാംകുമാർ, വിവിധ വകുപ്പു മേധാവികൾ, പ്രഫസർമാർ, പൂർവവിദ്യാർഥി സംഘടന ഭാരവാഹികൾ പ്രസംഗിച്ചു.

മുതലമടയിൽ പ്രൈമറി അനിമൽ ഹെൽത്ത് സർവീസ് സെന്‍ററിനു തുടക്കം

മുതലമട: കിഴക്ക് ക്ഷീരവ്യവസായ സഹകരണസംഘത്തിലെ പ്രൈമറി അനിമൽ ഹെൽത്ത് സർവീസ് സെന്‍ററിന്‍റെ ഉദ്ഘാടനം മീങ്കര ഹെഡ് ഓഫീസിൽ നടത്തി. മുതലമട കിഴക്ക് ക്ഷീരവ്യവസായസഹകരണസംഘം വൈസ് പ്രസിഡന്‍റ് ജോതിലക്ഷമി അധ്യക്ഷത വഹിച്ച പരിപാടി പ്രസിഡന്‍റ് പി. മാധവൻ ഉദ്ഘാടനം ചെയ്തു. റിട്ടയേഡ് അസിസ്റ്റൻറ് ഡയറക്ടർ ഡോ.സി.കെ സിൽവൻ, റിട്ടയേഡ് മിൽമ വെറ്റിനറി ഓഫീസർ ഡോ. ശ്രീകലശ്രീകുമാർ എന്നിവർ സെമിനാർ അവതരിപ്പിച്ചു. പഞ്ചായത്തംഗം കൃഷ്ണമൂർത്തി, മുൻ ബ്ലോക്ക് പഞ്ചായത്ത് പ്രസിഡന്‍റ് ശാരദ തുളസിദാസ്, പി. ഗംഗാധരൻ, സംഘം സെക്രട്ടറി ഇൻ ചാർജ് വി. പ്രമീള, സംഘം ഡയറക്ടർമാരായ ജി. രമേഷ്, മുത്തുക്കുമാർ, ശശീന്ദ്രൻ, ജയലക്ഷമി, മഹാലിംഗം, ഭാഗ്യം, എ. ജനാർദനൻ എ.കമാലുദീൻ തുടങ്ങിയർ പ്രസംഗിച്ചു. സെന്‍ററിലൂടെ മുഴുവൻ കർഷകർക്കും ഡോക്ടറുടെ സേവനം സൗജന്യമാണ്.

കനാലിൽ മലിനജലം കെട്ടിനിൽക്കുന്നു; ദുർഗന്ധം രൂക്ഷം, കൊതുകുശല്യം കൂടി

തത്തമംഗലം: മൂലത്തറ പള്ളിമൊക്കിൽ ഇടതുകനാലിൽ മലിനജലം കെട്ടിനിൽക്കുന്നതു ദുർഗന്ധം രൂക്ഷമാക്കിയതായി സമീപത്തെ വീട്ടുകാർ. തത്തമംഗലം ടൗണിനോടു ചേർന്നാണ് ഈ കനാലുള്ളത്. കനാലിൽ അടിഞ്ഞുകൂടിയ ചെളിയും മാലിന്യവും നീക്കാത്തതിനാലാണ് വെള്ളം കെട്ടിനിൽക്കുന്നത്. ഇതുമൂലം സമീപ വീടുകളിൽ കൊതുകു ശല്യവും കൂടിവരുന്നതിനാൽ പകർച്ചവ്യാധി ബാധിക്കുമോ എന്ന ആശങ്കയുമുണ്ട്. ജലസേചന വകുപ്പ് എല്ലാ വർഷവും കനാൽ ശുചീകരണത്തിന് ഫണ്ട് വകയിരുത്താറുണ്ടെങ്കിലും സമയോചിതമായി ശുചീകരണം നടത്താത്തതാണ് ഇപ്പോഴത്തെ പ്രതിസന്ധിക്കു കാരണം. രാത്രിസമയങ്ങളിൽ പലരും മൃഗങ്ങളുടെ അവശിഷ്ടങ്ങൾ കൊണ്ടിടുന്നതായും ആക്ഷേപമുണ്ട്. ആരോഗ്യവകുപ്പിന്‍റെ ശ്രദ്ധ ഇങ്ങോട്ടെത്തുന്നില്ലെന്നും നാട്ടുകാർ പരാതിപ്പെട്ടു.

ആലത്തൂർ ടൗണിൽ തന്പടിച്ചു തെരുവുനായ്ക്കൾ

ആലത്തൂർ: താലൂക്ക് ആശുപതിയിൽ ചികിത്സതേടി കാൽനടയായും ഇരുചക്രവാഹനങ്ങളിലും പോകുന്നവരും വില്ലേജ് ഓഫീസിൽ വിവിധ ആവശ്യങ്ങൾക്കായി പോകുന്നവരും സൂക്ഷിക്കുക. നിങ്ങളെ കാത്ത് വഴിയരികിൽ തെരുവുനായ്ക്കളുണ്ടാകും. ദിവസേന ധാരാളം ആളുകൾ ആലത്തൂർ പഴയ ബസ് സ്റ്റാന്‍റിലും താലൂക്ക് ഓഫീസ് സ്റ്റോപ്പിലും ബസിറങ്ങി താലൂക്ക് ആശുപത്രിയിലേക്കും വില്ലേജ് ഓഫീസിലേക്കുമുള്ള വഴിയിൽ കാൽനടയായി യാത്ര ചെയ്യുന്നുണ്ട് . ആലത്തൂർ ടൗണിന്‍റെ മറ്റുഭാഗങ്ങളിലെ സ്ഥിതിയും വ്യത്യസ്തമല്ല. തെരുവുനായ്ക്കളുട സ്വൈര്യവിഹാരത്തിനു തടസമുണ്ടായാൽ ഇവ ആക്രമണകാരികളാകും. ഇവയെ നിയന്ത്രിക്കാൻ അധികൃതർ യാതൊരു നടപടിയും സ്വീകരിക്കുന്നില്ല എന്നാണ് യാത്രക്കാരുടെ പരാതി.

കരിന്പുഴയിലെ കൃഷിയിടങ്ങളിൽ കാട്ടാനയുടെ താണ്ഡവം

നെന്മാറ: രണ്ടുദിവസമായി കരിമ്പാറയിലെ കൃഷിയിടങ്ങളിൽ താണ്ഡവമാടി കാട്ടാനകൾ. കോപ്പംകുളമ്പ്, വടക്കൻചിറ, പൂഞ്ചേരി, കൽചാടി മേഖലകളിലെ കൃഷിയിടങ്ങളിലാണ് വ്യാപകമായി കൃഷിനാശം വരുത്തിയത്. ശനിയാഴ്ച കൽച്ചാടിവഴി വന്ന കാട്ടാന കോപ്പൻകുളമ്പിൽ എം. മോഹൻദാസ്, വേവലാക്ഷകുമാർ, വത്സൻ എന്നിവരുടെ വീട്ടുവളപ്പിലെ വിവിധ ഇടങ്ങളിലായി മൂന്നു തെങ്ങുകളും വാഴകളും ഫലവൃക്ഷങ്ങളും വേലികളും വ്യാപകമായി നശിപ്പിച്ചു. വനംജീവനക്കാരെ അറിയിച്ചതിനെ തുടർന്ന് ശനിയാഴ്ച രാത്രിയോടെ പടക്കംപൊട്ടിച്ച് കാട്ടാനയെ തുരത്താൻ പടക്കം പൊട്ടിച്ച് ഉൾക്കാട്ടിലേക്കു കയറ്റാൻ ശ്രമം നടത്തിയെങ്കിലും, വനമേഖലയിലെ ചള്ള ഭാഗത്തുകൂടെ പൂഞ്ചേരി ഭാഗത്തിറങ്ങി നാശം വരുത്തുകയായിരുന്നു. രാത്രി മരുതഞ്ചേരി ഷാജഹാന്‍റെ പൂഞ്ചേരിയിലെ കൃഷിയിടത്തിൽ ഒന്പത് തെങ്ങുകളും12 കമുകുകളും ഇരുമ്പുവേലിയും ആറു വേലിക്കാലുകളും നശിപ്പിച്ചു. നെന്മാറ വനംഡിവിഷനിലെ തിരുവഴിയാട് സെക്്ഷനിൽപെട്ട കരിമ്പാറ മേഖലയിയിൽ തുടർച്ചയായി കാട്ടാനകൾ കൃഷിനാശമുണ്ടാക്കിയിട്ടും മേഖലയിൽ ആർആർടി സംഘത്തെ വനംവകുപ്പ് ഈ പ്രദേശങ്ങളിൽ നിലനിർത്തിയില്ല. കർഷകർ ആവശ്യപ്പെടുമ്പോൾ രാത്രി വനമേഖലയോടുചേർന്ന് പടക്കംപൊട്ടിച്ച് വാച്ചർമാർ മടങ്ങുന്നതിനപ്പുറം മറ്റുനടപടികളൊന്നും നടത്തുന്നില്ലെന്നു ആക്ഷേപം ഉയരുന്നു. വൈദ്യുതവേലിയും കാര്യക്ഷമമായി പ്രവർത്തിക്കുന്നില്ല. നബാർഡ് പദ്ധതിയായി മേഖലയിൽ പ്രഖ്യാപിച്ച തൂക്കുവേലിയുടെ നിർമാണവും മന്ദഗതിയിലാണ് നടക്കുന്നത്.

സുകുമാരനുണ്ണി മാസ്റ്റർ അനുസ്മണവും പുരസ്കാര സമർപ്പണവും

ശ്രീകൃഷ്ണപുരം: അധ്യാപകരുടെ അവകാശങ്ങൾക്കുവേണ്ടി ഭരണാധികാരികളോടു വിട്ടുവീഴ്ചയില്ലാത്ത സമീപനം സ്വീകരിച്ച അധ്യാപക നേതാവായിരുന്നു സുകുമാരനുണ്ണി മാസ്റ്ററെന്നു പ്രതിപക്ഷ നേതാവ് വി.ഡി. സതീശൻ. കെപിഎസ്ടിഎ സംസ്ഥാന സമിതി, സുകുമാരനുണ്ണി മാസ്റ്റർ എഡ്യുക്കേഷണൽ ട്രസ്റ്റ് എന്നിവയുടെ ആഭിമുഖ്യത്തിൽ നടത്തിയ അനുസ്മരണയോഗം ഉദ്ഘാടനം ചെയ്യുകയായിരുന്നു അദ്ദേഹം. ‌ ശ്രീകൃഷ്ണപുരം സംഗീതശില്പം ഓഡിറ്റോറിയത്തിലാണ് സുകുമാരനുണ്ണി മാസ്റ്ററുടെയും - കെ എ പി ടി യു മുൻ സംസ്ഥാന പ്രസിഡന്‍റ് പഴനി മാസ്റ്ററുടെയും അനുസ്മരണ സമ്മേളനം സംഘടിപ്പിച്ചത്. ട്രസ്റ്റ് ഏർപ്പെടുത്തിയ ഈ വർഷത്തെ സുകുമാരനുണ്ണി മാസ്റ്റർ കർമ്മശ്രീ പുരസ്കാരം കെപിഎസ് സംസ്ഥാന പ്രസിഡന്‍റ് കെ. അബ്ദുൽ മജീദിനാണ്. വി. പഴനി മാസ്റ്ററുടെ സ്മരണാർഥം ഏർപ്പെടുത്തിയ കർമ്മശ്രീ പ്രഥമ പുരസ്കാരം സംഘടന പാലക്കാട് റവന്യൂജില്ലാ പ്രസിഡന്‍റ് ഷാജി എസ്. തെക്കേതിലിനു ലഭിച്ചു. അനുസ്മരണ സമ്മേളനവും പുരസ്കാര വിതരണവും പ്രതിപക്ഷ നേതാവ് ഉദ്ഘാടനം ചെയ്തു. കെപിഎസ് ടി എ സംസ്ഥാന ജനറൽ സെക്രട്ടറി പി.കെ. അരവിന്ദൻ അധ്യക്ഷനായിരുന്നു. വി.കെ. ശ്രീകണ്ഠൻ എംപി മുഖ്യാതിഥിയായിരുന്നു. ട്രസ്റ്റ് ചെയർമാൻ പി. ഹരിഗോവിന്ദൻ, അവാർഡ് നിർണയ സമിതി ചെയർമാൻ മുൻമന്ത്രി വി.സി. കബീർ, മുൻ എംഎൽഎ സി.പി. മുഹമ്മദ്, കെയ അബ്ദുൽ മജീദ്, ഷാജി എസ്. തെക്കേതിൽ പ്രസംഗിച്ചു.

ക്രിസ്തുവിനോടുചേർന്നു സമൂഹത്തിന്‍റെ വെളിച്ചമാകാൻ യുവജനങ്ങൾക്കു കഴിയണം: മാർ പീറ്റർ കൊച്ചുപുരയ്ക്കൽ

വടക്കഞ്ചേരി: ക്രിസ്തുവിനോടു ചേർന്നുനിന്ന് സമൂഹത്തിന്‍റെ വെളിച്ചമാകാൻ യുവജനങ്ങൾക്കു കഴിയണമെന്ന് രൂപതാധ്യക്ഷൻ മാർ പീറ്റർ കൊച്ചുപുരക്കൽ യുവാക്കളെ ഉദ്ബോദിപ്പിച്ചു. കെസിവൈഎം രൂപത യുവജന ദിനാഘോഷത്തോടനുബന്ധിച്ച് വടക്കഞ്ചേരിയിൽ നടന്ന പൊതുസമ്മേളനം ഉദ്ഘാടനം ചെയ്തു സന്ദേശം നൽകുകയായിരുന്നു ബിഷപ്. രൂപത പ്രസിഡന്‍റ് അഭിഷേക് പുന്നാംതടത്തിൽ അധ്യക്ഷത വഹിച്ചു. വന്യജീവി ആക്രമണങ്ങൾ ദിനംപ്രതി കൂടുമ്പോൾ മനുഷ്യജീവനു വില കൽപ്പിക്കാത്ത ഭരണകൂടത്തിനെതിരെ നൂറുകണക്കിനു യുവാക്കൾ പങ്കെടുത്ത പ്രതിഷേധ ജാഥ വടക്കഞ്ചേരി ടൗണിൽ നടന്നു. ഫൊറോന ഡയറക്ടർ ഫാ. ഹെൽബിൻ മീമ്പള്ളിൽ പ്രതിഷേധജാഥ ഫ്ലാഗ്ഓഫ് ചെയ്തു. പൊതുസമ്മേളനത്തിൽ പി.പി. സുമോദ് എംഎൽഎ മുഖ്യാതിഥിയായിരുന്നു. കെസിവൈഎം സംസ്ഥാന സെക്രട്ടറി വിബിൻ ജോസഫ് യുവജനദിന സന്ദേശം നൽകി. രൂപത ഡയറക്ടർ ഫാ. ജോബിൻ മേലേമുറിയിൽ ആമുഖപ്രഭാഷണം നടത്തി. വൈസ് പ്രസിഡന്‍റ് ബിൻസി പൗലോസ്, രൂപത ആനിമേറ്റർ സിസ്റ്റർ ലിജി എംഎസ്ജെ, ഫൊറോന പ്രസിഡന്‍റ് മെൽവിൻ, ഫൊറോന ഡയറക്ടർ ഫാ. ഹെൽബിൻ മീമ്പള്ളി, രൂപത സെക്രട്ടറി ജിത്ത് ജോയ് പ്രസംഗിച്ചു.

ഉന്നതവിജയികൾക്കു എംഎൽഎയുടെ ആദരം

വടക്കഞ്ചേരി: തരൂർ നിയോജകമണ്ഡലത്തിൽ എംഎൽഎയുടെ സമഗ്ര വിദ്യാഭ്യാസപദ്ധതിയായ മെറിറ്റിന്‍റെ നേതൃത്വത്തിൽ മണ്ഡലത്തിലെ എസ്എസ്എൽസി, പ്ലസ്ടു പരീക്ഷകളിൽ ഉന്നതവിജയം കരസ്ഥമാക്കിയ വിദ്യാർഥികൾക്ക് പി.പി. സുമോദ് എംഎൽഎ എക്സലൻസ് അവാർഡുകൾ നൽകി അനുമോദിച്ചു. വടക്കഞ്ചേരി ഇഎംഎസ് സ്മാരക കമ്യുണിറ്റി ഹാളിൽ നടന്ന അനുമോദന പരിപാടിയിൽ മണ്ഡലത്തിലെ വിവിധ സ്കൂളുകളിൽ നിന്നായി 400 വിദ്യാർഥികൾ പങ്കെടുത്തു. പി.പി. സുമോദ് എംഎൽഎ ഉദ്ഘാടനം ചെയ്തു. ജില്ലാ പഞ്ചായത്ത് വൈസ് പ്രസിഡന്‍റ് സി.കെ. ചാമുണ്ണി അധ്യക്ഷത വഹിച്ചു. കോട്ടായി ഗ്രാമപഞ്ചായത്ത് പ്രസിഡന്‍റ് സതീഷ്, പുതുക്കോട് ഗ്രാമപഞ്ചായത്ത് പ്രസിഡന്‍റ് ഐ. ഹസീന ടീച്ചർ, തരൂർ ഗ്രാമപഞ്ചായത്ത് പ്രസിഡന്‍റ് രമണി ടീച്ചർ, കുത്തന്നൂർ ഗ്രാമപഞ്ചായത്ത് പ്രസിഡന്‍റ് പി.ടി. സഹദേവൻ, ഡോ. വാസുദേവൻപിള്ള മാസ്റ്റർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]