അക്കുത്തിസിന്‍റെ തിരുനാൾ ഒക്‌ടോബർ 12ന്; ഫ്രസാത്തിയുടേത് ജൂലൈ നാലിന്
Wednesday, September 10, 2025 2:20 AM IST
വത്തിക്കാൻ സിറ്റി: കഴിഞ്ഞദിവസം ലെയോ പതിനാലാമൻ മാർപാപ്പ വിശുദ്ധരായി പ്രഖ്യാപിച്ച കാർലോ അക്കുത്തിസിന്‍റെയും പിയെർ ജോർജോ ഫ്രസാത്തിയുടെയും ഔദ്യോഗിക തിരുനാൾ ദിനങ്ങൾ വത്തിക്കാൻ പ്രഖ്യാപിച്ചു. വിശുദ്ധ കാർലോയുടെ തിരുനാൾ ഒക്‌ടോബർ 12നും വിശുദ്ധ ഫ്രസാത്തിയുടെ തിരുനാൾ ജൂലൈ നാലിനുമായിരിക്കും.
ദിവ്യകാരുണ്യത്തിന്‍റെ സൈബർ അപ്പസ്തോലൻ, ദൈവത്തിന്‍റെ ഇൻഫ്ളുവൻസർ, ആദ്യ മില്ലേനിയൻ വിശുദ്ധൻ തുടങ്ങിയ വിശേഷണങ്ങളുള്ള കാർലോ അക്കുത്തിസ് തന്‍റെ 15-ാം വയസിൽ 2006 ഒക്‌ടോബർ 12നാണ് രക്താർബുദം ബാധിച്ചു മരിച്ചത്.
തന്‍റെ ഹ്രസ്വമായ ജീവിതകാലം മുഴുവന്‍ അശരണര്‍ക്കും ആലംബഹീനര്‍ക്കും ഉഴിഞ്ഞുവച്ച പിയെര്‍ ജോര്‍ജോ ഫ്രസാത്തിയാകട്ടെ 1925 ജൂലൈ നാലിന് തന്‍റെ 24-ാം വയസിൽ പോളിയോ ബാധിച്ചു മരിച്ചു. വിശുദ്ധരുടെ മരണദിനങ്ങളാണ് തിരുനാൾദിനങ്ങളായി സഭയിൽ ആചരിച്ചുവരുന്നത്.