ADVERTISEMENT

ADVERTISEMENT

ജില്ലാ സ്‌കൂള്‍ കായികമേളയ്ക്ക് ഇന്നു തുടക്കം

കോഴിക്കോട്: കോഴിക്കോട് ജില്ലാ റവന്യു സ്‌കൂള്‍ കായികമേളയ്ക്ക് ഇന്ന് തുടക്കമാകും. മേളയുടെ ദീപശിഖാ പ്രയാണം ആരംഭിച്ചു. കായികാധ്യാപകന്‍ സോണി തോമസിന്‍റെ സ്മരണാര്‍ഥം സെന്‍റ് മൈക്കിള്‍സ് ഗേള്‍സ് ഹയര്‍ സെക്കന്‍ഡറി സ്‌കൂളില്‍ നിന്നാണ് പ്രയാണം ആരംഭിച്ചത്.

പ്രമോദ് മോവനാരി അധ്യക്ഷത വഹിച്ച ചടങ്ങില്‍ ഡെയ്‌സി സോണി തോമസ് ദീപശിഖ ദേശീയ സ്‌കൂള്‍ ഫുട്‌ബോള്‍ താരം ടി.പി. പൂജക്ക് കൈമാറി. സ്‌പോര്‍ട്‌സ് കൗണ്‍സില്‍ വൈസ് പ്രസിഡന്‍റ് ഡോ. റോയി ജോണ്‍ തിരി തെളിയിച്ചു.

പ്രിന്‍സിപ്പൽ പ്രീതി ജോര്‍ജ്, ഹെഡ്മിസ്ട്രസ് സിനി എന്‍. കുര്യന്‍, മാനേജര്‍ ബി.എസ്. സൗമ്യ, പി. സതീഷ് കുമാര്‍, ബിനോജ് ചേറ്റൂര്‍, സി.അരുണ്‍, സി.ജിന്‍ഷ, ഡോ. ഷിംജിത് എന്നിവര്‍ സംസാരിച്ചു. കോഴിക്കോട് മെഡിക്കല്‍ കോളജ് കാമ്പസിലെ ഒളിന്പ്യന്‍ റഹ്‌മാന്‍ സ്‌റ്റേഡിയത്തിലാണ് കായികമേള.

ADVERTISEMENT

തോട്ടുമുക്കത്ത് പൊതു കളിസ്ഥലം: ജനകീയ കമ്മിറ്റി രൂപീകരിച്ചു

മുക്കം: തോട്ടുമുക്കത്തെയും പരിസര പ്രദേശങ്ങളിലെയും ആളുകളുടെ ഏറെ കാലത്തെ ആഗ്രഹമായിരുന്ന പൊതു കളിസ്ഥലം എന്ന സ്വപ്നം സാക്ഷാത്കരിക്കുന്നതിന് തോട്ടുമുക്കത്ത് ജനകീയ കമ്മറ്റി രൂപീകരിച്ചു. എംഎൽഎ, എംപി, പഞ്ചായത് പ്രസിഡന്‍റ്, മെമ്പർമാർ, കായിക താരങ്ങൾ തുടങ്ങിയവർ രക്ഷാധികാരികളായും ജെറിൻ ജോൺസൻ ചെയർമാനും, സുബിൻ കൺവീനറും, ആരിഫ് ട്രഷററും ആയിട്ടുള്ള 61 അംഗ കമ്മിറ്റിയാണ് രൂപീകരിച്ചത്. തോട്ടുമുക്കം ഹിൽവാലി ഓഡിറ്റോറിയത്തിൽ നടന്ന യോഗം കൊടിയത്തൂർ പഞ്ചായത്ത് പ്രസിഡന്‍റ് ദിവ്യ ഷിബു ഉദ്ഘാടനം ചെയ്തു. വാർഡ് മെമ്പർ സിജു ബൈജു അധ്യക്ഷത വഹിച്ചു. കളിസ്ഥലം വാങ്ങുന്നതിനു വേണ്ടി പണം സ്വരൂപിക്കുന്നതിന് വിവിധ പരിപാടികൾ സംഘടിപ്പിക്കാൻ യോഗം തീരുമാനിച്ചു.

പ്രചാരണ ജാഥ നടത്തി

കോഴിക്കോട്: സെക്രട്ടറിയേറ്റിനു മുന്നില്‍ അസോസിയേഷന്‍ നടത്തുന്ന രാപകല്‍ സമരത്തിന്‍റെ ഭാഗമായി പ്രചാരണ ജാഥയും വിശദീകരണ യോഗവും വെസ്റ്റ്ഹില്‍ എന്‍ജിനിയറിംഗ് കോളജിന് മുന്നില്‍ എന്‍ജിഒ അസോസിയേഷന്‍ ജില്ലാ പ്രസിഡന്‍റ് പ്രേംനാഥ് മംഗലശേരി ഉദ്ഘാടനം ചെയ്തു. ബ്രാഞ്ച് പ്രസിഡന്‍റ് കെ.ടി. രമേശന്‍ അധ്യക്ഷത വഹിച്ചു. ജില്ലാ ഭാരവാഹികളായ രഞ്ജിത്ത് ചേമ്പാല, എന്‍.പി.രഞ്ജിത്ത്, എന്‍. സന്തോഷ് കുമാര്‍, ബ്രാഞ്ച് സെക്രട്ടറി സി. ലിജിന, ഇ. രോഷ്‌ന എന്നിവര്‍ പ്രസംഗിച്ചു. ജാഥയ്ക്ക് പി.അരുണ്‍, കെ.വി. ബാലകൃഷ്ണന്‍, ആര്‍. റെജി, സി.ജെ. ലിന്‍സ്, എം. ബബിത, വി. ബെന്‍ഡിക്ട്, വി. സുഭാഷ് ചന്ദ്രന്‍, സി.ടി.കെ. രാജേഷ്, ഇ.സുഹൈല്‍, വി.പ്രഗില്‍, കെ.ജോതിഷ് കുമാര്‍ എന്നിവര്‍ നേതൃത്വം നല്‍കി.

ഭിന്നശേഷി കുട്ടികൾക്ക് വിമാനയാത്രയൊരുക്കി

മുക്കം: കുന്നമംഗലം ബിആർസിയുടെ നേതൃത്വത്തിൽ പ്രത്യേക പരിഗണന അർഹിക്കുന്ന കുട്ടികൾക്കായി വിമാനയാത്ര സംഘടിപ്പിച്ചു. എംഎൽഎ ലിന്‍റോ ജോസഫ് ഫ്ലാഗ് ഓഫ് ചെയ്തു. ബംഗളൂരു, മൈസൂർ എന്നിവിടങ്ങളിലേക്കാണ് 36 കുട്ടികളും 22 രക്ഷിതാക്കളും അടങ്ങുന്ന സംഘം യാത്ര പോയത്. ബിആർസിയിലെ സ്പെഷൽ എഡ്യൂക്കേറ്റർമാരുടെ നേതൃത്വത്തിൽ സുമനസുകളിൽ നിന്ന് ഫണ്ട്‌ ശേഖരിച്ചാണ് അർഹരായ കുട്ടികൾക്കും രക്ഷിതാക്കൾക്കും യാത്രക്ക് അവസരം ഒരുക്കിയത്.

കൂടരഞ്ഞി പഞ്ചായത്തിനെ അതിദാരിദ്ര്യമുക്തമായി പ്രഖ്യാപിച്ചു

കൂടരഞ്ഞി: കൂടരഞ്ഞിയെ അതിദാരിദ്ര്യമുക്ത പഞ്ചായത്തായി ലിന്‍റോ ജോസഫ് എംഎൽഎ പ്രഖ്യാപിച്ചു. സർവേയിലൂടെ കണ്ടെത്തിയ 89 പേർക്ക് എല്ലാവിധ ജീവിതസൗകര്യങ്ങളും ഒരുക്കിയതിന്‍റെ ഭാഗമായിട്ടാണ് പ്രഖ്യാപനം. പഞ്ചായത്തിലെ ലൈഫ് ഭവന പദ്ധതിയിലെ അർഹരായ മുഴുവൻ ഗുണഭോക്താക്കളെയും പദ്ധതിയിൽ ഉൾപ്പെടുത്തി ധനസഹായം നൽകി. ഈ ഭരണാസമിതി നിലവിൽ വന്നതിനു ശേഷം 208 കുടുംബങ്ങൾക്കാണ് ഭവന നിർമാണ പദ്ധതിയുടെ പ്രയോജനം ലഭിച്ചത്. കൂടരഞ്ഞി പഞ്ചായത്ത് കമ്മ്യൂണിറ്റി ഹാളിൽ നടത്തിയ ചടങ്ങിൽ പഞ്ചായത്ത്‌ പ്രസിഡന്‍റ് ആദർശ് ജോസഫ് അധ്യക്ഷത വഹിച്ചു. അസിസ്റ്റന്‍റ് സെക്രട്ടറി ജയപ്രകാശ്, വില്ലേജ് എക്സ്റ്റൻഷൻ ഓഫീസർ വി.ടി. ഷേളിത, വൈസ് പ്രസിഡന്‍റ് മേരി തങ്കച്ചൻ എന്നിവർ സംസാരിച്ചു. ലൈഫ് ഭവന പദ്ധതി റിപ്പോർട്ട്‌ വില്ലേജ് എക്സ്റ്റൻഷൻ ഓഫീസർ ജോസ് കുര്യാക്കോസ് അവതരിപ്പിച്ചു.

റോഡിന്‍റെ തകർച്ച; പെരുവണ്ണാമൂഴി-ചക്കിട്ടപാറ റൂട്ടിൽ ഓട്ടോ സർവീസ് നിർത്തി

ചക്കിട്ടപാറ: തകർന്ന റോഡ് നേരെയാക്കാൻ നടപടി സ്വീകരിക്കാത്തതിൽ പ്രതിഷേധിച്ച് പെരുവണ്ണാമൂഴി-പൊന്മലപ്പാറ-ചക്കിട്ടപാറ റൂട്ടിലൂടെയുള്ള ഓട്ടോറിക്ഷകളുടെ ഓട്ടം നിർത്തി. പെരുവണ്ണാമൂഴി ഓട്ടോ കോഓർഡിനേഷൻ കമ്മിറ്റിയാണ് തീരുമാനം നടപ്പിലാക്കിയത്. തകർന്നു കിടക്കുന്ന റോഡ് ജലസേചന വകുപ്പിന്‍റെ അധീനതയിൽ പെടുന്നതാണ്. റോഡ് നന്നാക്കിയില്ലെങ്കിൽ ഓട്ടം നിർത്തുമെന്ന് അധികൃതർക്ക് നേരത്തെ അറിയിപ്പ് നൽകിയിരുന്നു. റോഡ് പൊളിച്ചത് ജൽജീവൻ പൈപ്പ് സ്ഥാപിച്ച കരാറുകാരാണ്. പൈപ്പ് സ്ഥാപിച്ച ശേഷം ഫെസ്റ്റ് നടത്താൻ ധ്യതി പിടിച്ച് പാത നന്നാക്കിയതാണ് റോഡ് വീണ്ടും പൊട്ടിത്തകരാൻ ഇടയാക്കിയത്. ഓട്ടോറിക്ഷക്കാർ ഓട്ടം നിർത്തിയതോടെ പാറപ്പൊടി കുഴികളിൽ വിതറിയെങ്കിലും ഇത് തികച്ചും അപര്യാപ്തമാണ്.

തകർന്ന സർവീസ് റോഡും വെള്ളക്കെട്ടും; പെരുമാൾപുരത്തെ യാത്രാദുരിതത്തിന് ശമനമില്ല

പയ്യോളി: ദേശീയപാത നിർമാണം മൂന്ന് വർഷം പിന്നിടുമ്പോൾ പെരുമാൾപുരത്തെ യാത്രാദുരിതത്തിന് അറുതിയായില്ല. പയ്യോളിയിൽ നിന്ന് കോഴിക്കോട് ഭാഗത്തേക്കുള്ള യാത്രക്കാരാണ് ദുരിതം ഏറെയും അനുഭവിക്കുന്നത്. ശക്തമായ മഴ പെയ്യുന്നതോടെ ഇതുവഴിയുള്ള ഗതാഗതം ദുഷ്കരമാവുകയാണ്. അതേസമയം ഇവിടെ അണ്ടർപാസ് നിർമാണം പൂർത്തിയായിട്ട് ഒരു വർഷം കഴിഞ്ഞെങ്കിലും അപ്പ്രോച്ച് റോഡുകൾ നിർമിക്കാത്തതാണ് ദുരിതത്തിന് കാരണമാകുന്നത്. സർവീസ് റോഡിലെ വെള്ളക്കെട്ട് പരിഹരിക്കാൻ റോഡ് ഉയർത്തുമെന്ന് മുന്പ് പറഞ്ഞിരുന്നെങ്കിലും ഇത് സംബന്ധിച്ച് ഇപ്പോൾ സ്ഥിരീകരണമില്ല. ഇതുകാരണം റോഡിന് കിഴക്ക് ഭാഗത്തെ കെട്ടിടത്തിൽ പ്രവർത്തിക്കുന്ന വ്യാപാരസ്ഥാപനങ്ങൾ അടച്ചിട്ടിട്ട് മൂന്ന് വർഷം പിന്നിട്ടു. ഇക്കഴിഞ്ഞ മഴക്കാലത്ത് തിക്കോടി എഫ്സിഐ ഗോഡൗണിൽ നിന്നും അരി കയറ്റി പോവുകയായിരുന്ന ലോറി യന്ത്ര തകരാറുകാരണം ഇവിടെ കുടുങ്ങിയപ്പോൾ ഒരു ദിവസം മുഴുവൻ നീണ്ടുനിൽക്കുന്ന ഗതാഗതക്കുരുക്കാണ് അനുഭവപ്പെട്ടത്. ഇത്തരത്തിൽ ഓരോ മഴയത്തും ആശങ്കയോടെയാണ് യാത്രക്കാർ പെരുമാൾപുരം കടന്നുപോകുന്നത്. കഴിഞ്ഞദിവസം പെയ്ത മഴയിലും സ്ഥിതി വ്യത്യസ്തമല്ല. ഒരു മണിക്കൂറോളം നീണ്ട ഗതാഗതക്കുരുക്കാണ് പെരുമാൾപുരത്ത് അനുഭവപ്പെട്ടത്. റോഡിന്‍റെ ശോചനീയാവസ്ഥ തന്നെയായിരുന്നു കാരണം.

ഗാന്ധിചിത്രമുള്ള സ്റ്റാമ്പുകളില്ല; യൂത്ത് കോൺഗ്രസ്‌ പ്രതിഷേധത്തിലേക്ക്

കൂരാച്ചുണ്ട്: മഹാത്മാ ഗാന്ധിയുടെ ചിത്രമുള്ള സ്റ്റാമ്പുകൾ പോസ്റ്റ് ഓഫീസുകളിൽ ലഭ്യമാകാത്തതിൽ യൂത്ത് കോൺഗ്രസ്‌ പ്രതിഷേധത്തിലേക്ക്. നാളെ രാവിലെ 10ന് ഗാന്ധി ഫോട്ടോകൾ ടെലികോം - വാർത്ത വിനിമയ മന്ത്രാലയത്തിനും തപാൽ വകുപ്പ് അധികൃതർക്കും അയച്ചുകൊണ്ടാണ് പ്രതിഷേധമെന്ന് യൂത്ത് കോൺഗ്രസ്‌ കൂരാച്ചുണ്ട് മണ്ഡലം പ്രസിഡന്‍റ് നിസാം കക്കയം അറിയിച്ചു. ലോക്സഭ എംപിമാർ, കേന്ദ്ര മന്ത്രിമാർ എന്നിവർക്ക് വിഷയം ചൂണ്ടിക്കാട്ടി ഇ- മെയിൽ സന്ദേശം നൽകാനും യോഗം തീരുമാനിച്ചു. മണ്ഡലം പ്രസിഡന്‍റ് നിസാം കക്കയം അധ്യക്ഷത വഹിച്ചു. കോൺഗ്രസ്‌ മണ്ഡലം വൈസ് പ്രസിഡന്‍റ് ജെറിൻ കുര്യാക്കോസ്, കെഎസ്‌യു നിയോജക മണ്ഡലം പ്രസിഡന്‍റ് സുബിൻ കൊച്ചുവീട്ടിൽ, രാഹുൽ രാഘവൻ, വിഷ്ണു തണ്ടോറ, ജാക്സ് കരിമ്പനക്കുഴി, അജ്മൽ ചാലിടം, ജ്യോതിഷ് രാരപ്പൻകണ്ടി, ലിബിൻ പാവത്തികുന്നേൽ, അക്ഷത മരുതോട്ട്കുനിയിൽ, ഷാരോൺ ചാലിക്കോട്ടയിൽ, ദീപു കിഴക്കേനകത്ത്, സി.എം. റിഷാദ്, റീത്ത തോമസ് പ്രസംഗിച്ചു.

കക്കയം പവർ ഹൗസ് നിർമാണം; ഭൂമി നൽകിയ കുടുംബങ്ങളുടെ സമരം ഫലം കണ്ടു

കൂരാച്ചുണ്ട്: കക്കയത്തെ പവർ ഹൗസ് നിർമാണത്തിന്‍റെ ഭാഗമായി ഇരുപത് വർഷം മുമ്പ് കെഎസ്ഇബിക്ക് പെൻസ്റ്റോക് പൈപ്പിടാൻ ഭൂമി വിട്ടുനൽകിയ കുടുംബങ്ങൾക്ക് നഷ്ടപരിഹാരം ലഭിക്കുന്നതുമായി ബന്ധപ്പെട്ട് നിലനിന്നിരുന്ന പ്രശ്നങ്ങൾക്ക് പരിഹാരം. ഈ വിഷയത്തിൽ കുടുംബങ്ങൾ കൂരാച്ചുണ്ട് വില്ലേജ് ഓഫീസിന് മുന്നിൽ സെപ്റ്റംബർ 18 ന് നടത്തിയ നിരാഹാര സമരത്തെ തുടർന്ന് ജില്ലാ കളക്ടർ ഇടപെട്ടാണ് പ്രശ്നം പരിഹരിച്ചത്. കൂരാച്ചുണ്ട് ഗ്രാമപഞ്ചായത്തിലെ നാലാം വാർഡ് കക്കയം കോണിപ്പാറ മേഖലയിലെ ലീല കൂവ്വപൊയ്കയിൽ, പ്രജീഷ് പൂവത്തിങ്കൽ, ത്രേസ്യാമ്മ പൂവത്തിങ്കൽ എന്നിവരുടെ കുടുംബങ്ങൾക്ക് തർക്കത്തിലായിരുന്ന ഭൂമിയുടെ രേഖകൾ പരിശോധിച്ച് ജില്ലാ കളക്ടറുടെ നിർദേശപ്രകാരം നികുതി ശീട്ടും, കൈവശാവകാശം തെളിയിക്കുന്ന റവന്യു രേഖകളും കെ.എം. സച്ചിൻ ദേവ് എംഎൽഎ കൈമാറി. ചടങ്ങിൽ പഞ്ചായത്ത് പ്രസിഡന്‍റ് ഒ.കെ. അമ്മദ്, കൊയിലാണ്ടി തഹസിൽദാർ ജയശ്രീ എസ്. വാര്യർ, ഹെഡ്ക്വാർട്ടേഴ്സ് ഡെപ്യൂട്ടി തഹസിൽദാർ എം. ഷാജി, വില്ലേജ് ഓഫീസർ പി.വി. സുധി, പഞ്ചായത്ത് അംഗങ്ങളായ സിമിലി ബിജു, ഡാർളി ഏബ്രഹാം, നേതാക്കളായ വി.ജെ സണ്ണി, എ.സി. ഗോപി എന്നിവർ പങ്കെടുത്തു. റവന്യു രേഖകൾ ലഭിച്ചതോടെ കെഎസ്ഇബിയിൽ നിന്നും കുടുംബങ്ങൾക്ക് നഷ്ടപരിഹാര തുക ലഭിക്കുന്നതിനുള്ള തടസം നീങ്ങി.‌

കൂരാച്ചുണ്ട് സിഎച്ച്സിയിൽ ഓഫീസ് കെട്ടിടം ഉദ്ഘാടനം ചെയ്തു

കൂരാച്ചുണ്ട്: ബാലുശേരി ബ്ലോക്ക് പഞ്ചായത്തിന്‍റെ അധീനതയിലുള്ള കൂരാച്ചുണ്ട് സാമൂഹികാരോഗ്യ കേന്ദ്രത്തിൽ പുതുതായി നിർമിച്ച ഓഫീസ് കെട്ടിടത്തിന്‍റെ ഉദ്ഘാടനം കെ.എം. സച്ചിൻ ദേവ് എംഎൽഎ നിർവഹിച്ചു. ബ്ലോക്ക് പഞ്ചായത്ത് പ്രസിഡന്‍റ് വി.കെ. അനിത അധ്യക്ഷത വഹിച്ചു. കൂരാച്ചുണ്ട് പഞ്ചായത്ത് പ്രസിഡന്‍റ് ഒ.കെ. അമ്മദ് മുഖ്യാതിഥിയായി. ബ്ലോക്ക് പഞ്ചായത്ത് വൈസ് പ്രസിഡന്‍റ് സി.കെ. ശശി, ബ്ലോക്ക് പഞ്ചായത്തംഗം വി.കെ ഹസീന, ബ്ലോക്ക് പഞ്ചായത്ത് ആരോഗ്യ സ്റ്റാൻഡിംഗ് കമ്മിറ്റി ചെയർമാൻ സുരേഷ് ബാബു, പഞ്ചായത്ത് വൈസ് പ്രസിഡന്‍റ് വിൻസി തോമസ്, പഞ്ചായത്ത് അംഗം വിജയൻ കിഴക്കയിൽമീത്തൽ, സാമൂഹികാരോഗ്യ കേന്ദ്രം മെഡിക്കൽ ഓഫീസർ ഡോ. അസ്‌ലം ഫാറൂഖ് എന്നിവർ പ്രസംഗിച്ചു. 47 ലക്ഷം രൂപ ചെലവഴിച്ചാണ് കെട്ടിടത്തിന്‍റെ നിർമാണ പ്രവൃത്തി പൂർത്തീകരിച്ചത്. ചടങ്ങിൽ ബിഎൽഎസ് പരിശീലനം നൽകിയ മൈത്ര എമർജൻസി ഡിപ്പാർട്ട്മെന്‍റ് ജീവനക്കാർക്ക് ഉപഹാര സമർപ്പണവും സർട്ടിഫിക്കറ്റ് വിതരണവും നടന്നു.

പെരുവണ്ണാമൂഴിയിൽ ജലസേചന കനാൽ നവീകരണം പുരോഗമിക്കുന്നു

പെരുവണ്ണാമൂഴി: ഓരോ വർഷവും കുറ്റ്യാടി ജലസേചന പദ്ധതി പ്രധാന കനാലിൽ ജലം തുറന്നു വിടുമ്പോൾ കാലപ്പഴക്കം കാരണം ഇടിയുന്ന ഭാഗം ബലവത്തായി നവീകരിക്കുന്ന പ്രവൃത്തി പെരുവണ്ണാമൂഴിയിൽ ദ്രുതഗതിയിൽ പുരോഗമിക്കുന്നു. കുറ്റ്യാടി ജലസേചന പദ്ധതി അണക്കെട്ടിൽ നിന്ന് 230 മീറ്റർ താഴെ ഭാഗത്താണ് കനാലിൽ പ്രവൃത്തി നടക്കുന്നത്. ഇരുവശത്തുമായി 32 മീറ്റർ നീളത്തിലും 3.80 മീറ്റർ ഉയരത്തിലുമാണ് നവീകരിക്കുന്നത്. ഇതിന് ജിഎസ്ടി അടക്കം 12.5 ലക്ഷത്തോളം രൂപയാണ് വകയിരുത്തിയിരിക്കുന്നത്. ഈ മാസം ഒടുവിൽ പണി പൂർത്തിയാകും. വരും വർഷങ്ങളിൽ ജലസേചനത്തിനായി കനാലിൽ ആശങ്ക കൂടാതെ ജലം തുറന്നുവിടാനാകും. പെരുവണ്ണാമൂഴിയിൽ നിന്ന് മുതുകാട്, ചെമ്പനോട ഭാഗത്തേക്കുള്ള റോഡ് കനാലിനു മീതെയുള്ള പാലത്തിലൂടെയാണ് കടന്നുപോകുന്നത്. പ്രവൃത്തി നടക്കുന്നത് പാലത്തിനോട് ചേർന്നാണ്. നവീകരണം കഴിയുമ്പോൾ പാലവും കൂടുതൽ സുരക്ഷിതമാകും.

നാദാപുരം ഉപജില്ല ശാസ്‌ത്രോത്സവം സമാപിച്ചു

വിലങ്ങാട്: സെന്‍റ് ജോര്‍ജ് ഹൈസ്‌കൂളില്‍ മൂന്ന് ദിവസമായി നടന്ന നാദാപുരം ഉപജില്ല സ്‌കൂള്‍ ശാസ്‌ത്രോത്സവം സമാപിച്ചു. മൂന്ന് ദിവസങ്ങളിലായി 3066 വിദ്യാർഥികള്‍ മാറ്റുരച്ച ശാസ്ത്ര, സാമൂഹ്യ ശാസ്ത്ര, ഗണിതശാസ്ത്ര, പ്രവൃത്തി പരിചയ, ഐടി മേളകളുടെ സമാപന സമ്മേളനം ഇ.കെ. വിജയന്‍ എംഎല്‍എ ഉദ്ഘാടനം ചെയ്തു. വാണിമേല്‍ പഞ്ചായത്ത് പ്രസിഡന്‍റ് പി. സുരയ്യ അധ്യക്ഷത വഹിച്ചു. ചടങ്ങില്‍ ഉപജില്ല വിദ്യാഭ്യാസ ഓഫീസര്‍ സി.എച്ച്. സനൂപ് സമ്മാനദാനം നിര്‍വഹിച്ചു. സംസ്ഥാന അധ്യാപക അവാര്‍ഡ് ജേതാവ് പ്രശാന്ത് മാസ്റ്ററെ ചടങ്ങില്‍ ആദരിച്ചു.

തദ്ദേശ പൊതുതെരഞ്ഞെടുപ്പ്: സംവരണ വാര്‍ഡുകള്‍ തെരഞ്ഞെടുത്തു തുടങ്ങി

കോഴിക്കോട്: തദ്ദേശ പൊതുതെരഞ്ഞെടുപ്പിന് മുന്നോടിയായി സംസ്ഥാനത്തെ തദ്ദേശ സ്ഥാപനങ്ങളിലെ സംവരണവാര്‍ഡുകള്‍ നിശ്ചയിക്കുന്നതിനുള്ള നറുക്കെടുപ്പിന് ജില്ലയില്‍ തുടക്കമായി. ഗ്രാമപഞ്ചായത്ത്, സംവരണ വിഭാഗം, വാര്‍ഡ്, വാര്‍ഡ് നമ്പര്‍ എന്നീ ക്രമത്തില്‍ ചെക്യാട് ഗ്രാമപഞ്ചായത്ത്: പട്ടികജാതി സംവരണം: കായലോട്ട് താഴെ-3. സ്ത്രീ സംവരണം: പടിഞ്ഞാറെ താനക്കോട്ടൂര്‍-1, താനക്കോട്ടൂര്‍-2, കിഴക്കേ കുറുവന്തേരി-5, കുറുവന്തേരി-6, ജാതിയേരി-9, ഈസ്റ്റ് പുളിയാവ്-11, പുളിയാവ്-12, സൗത്ത് പാറക്കടവ്-14, ഉമ്മത്തൂര്‍-15. പുറമേരി ഗ്രാമപഞ്ചായത്ത്: പട്ടികജാതി സംവരണം: വട്ടപ്പൊയില്‍-8. സ്ത്രീ സംവരണം: വാട്ടര്‍ സൈറ്റ്-1, വിലാതപുരം-5, എളയിടം-7, നടേമ്മല്‍-9, നടക്കുമീത്തല്‍-10, പെരുമുണ്ടച്ചേരി-12, കല്ലുംപുറം-13, ആറാംവെള്ളി-16, മുതുവടത്തൂര്‍-17, നിടിയപാറ-18. തൂണേരി ഗ്രാമപഞ്ചായത്ത്: പട്ടികജാതി സംവരണം: ചാലപ്രം നോര്‍ത്ത്-13. സ്ത്രീ സംവരണം: താഴെ മുടവന്തേരി-1, മുടവന്തേരി പെരിയാണ്ടി-3, കളത്തറ-4, ബാലവാടി-6, ആവോലം-7, ചെറുവെള്ളൂര്‍-9, മലബാര്‍ കോടഞ്ചേരി-10, കോടഞ്ചേരി-11, കണ്ണങ്കൈ-14. വളയം ഗ്രാമപഞ്ചായത്ത്: പട്ടികവര്‍ഗ സംവരണം: വണ്ണാര്‍കണ്ടി-1. സ്ത്രീ സംവരണം: വരയാല്‍-2, പുഞ്ച-4, ചുഴലി-5, നീലാണ്ട്-6, മഞ്ചാന്തറ-9, കുറ്റിക്കാട്-10, മണിയാല-14, ചെക്കോറ്റ-15. വാണിമേല്‍ ഗ്രാമപഞ്ചായത്ത്: പട്ടികവര്‍ഗ സംവരണം: വെള്ളിയോട്-4. സ്ത്രീ സംവരണം: വയല്‍പീടിക-2, ഭൂമിവാതുക്കല്‍-3, പുതുക്കുടി-5, കരുകുളം-10, പുഴമൂല-11, കൂളിക്കുന്ന്-12, കൊടിയൂറ-14, കൊപ്രക്കളം-15, കുളപ്പറമ്പ്-16. എടച്ചേരി ഗ്രാമപഞ്ചായത്ത്: പട്ടികജാതി സംവരണം: തലായി നോര്‍ത്ത്-11. സ്ത്രീ സംവരണം: കായപ്പനിച്ചി-1, ഇരിങ്ങണ്ണൂര്‍ വെസ്റ്റ്-2, ഇരിങ്ങണ്ണൂര്‍ ഹൈസ്‌കൂള്‍-5, ചുണ്ടയില്‍-9, ആലിശേരി-10, നരിക്കുന്ന്-13, കാക്കന്നൂര്‍-15, പുതിയങ്ങാടി-16, തുരുത്തി-18. നാദാപുരം ഗ്രാമപഞ്ചായത്ത്: പട്ടികജാതി സംവരണം: കുമ്മങ്കോട് ഈസ്റ്റ്-19. സ്ത്രീ സംവരണം: ഇയ്യങ്കോട് ഈസ്റ്റ്-2, വിഷ്ണുമംഗലം വെസ്റ്റ്-4, കുറ്റിപ്രം-5, ചേലക്കാട് നോര്‍ത്ത്-8, ചേലക്കാട് സൗത്ത്-9, നരിക്കാട്ടേരി-12, വരിക്കോളി-13, കല്ലാച്ചി-16, കല്ലാച്ചി ടൗണ്‍-17, നാദാപുരം-18, കക്കംവെള്ളി-21, നാദാപുരം ടൗണ്‍-23. കുന്നുമ്മല്‍ ഗ്രാമപഞ്ചായത്ത്: പട്ടികജാതി സംവരണം: കുണ്ടുകടവ്-1. സ്ത്രീ സംവരണം: പാതിരിപ്പറ്റ വെസ്റ്റ്-2, കണ്ണന്‍കുന്ന്-4, പിലാച്ചേരി-5, കലാനഗര്‍-7, മൊകേരി-8, മധുകുന്ന്-10, കക്കട്ടില്‍ സൗത്ത്-11, കക്കട്ടില്‍ നോര്‍ത്ത്-13. വേളം ഗ്രാമപഞ്ചായത്ത്: പട്ടികജാതി സംവരണം: പള്ളിയത്ത്-13. സ്ത്രീസംവരണം: കാക്കുനി-1, വലകെട്ട്-4, ശാന്തിനഗര്‍-7, കുറിച്ചകം-11, ചെമ്പോട്-12, പൂളക്കൂല്‍-15, പുത്തലത്ത്-16, കോയ്യൂറ-17, പാലോടിക്കുന്ന്-18. കായക്കൊടി ഗ്രാമപഞ്ചായത്ത്: പട്ടികജാതി സംവരണം: കണയംകോട്-2. സ്ത്രീ സംവരണം: ദേവര്‍കോവില്‍-6, തളീക്കര-7, പൂളക്കണ്ടി-8, കൂട്ടുര്‍-10, തളീക്കര വെസ്റ്റ്-11, കുളങ്ങരതാഴെ-12, ചങ്ങരംകുളം-14, കോവുക്കുന്ന്-15, കാരേക്കുന്ന്-16. കാവിലുംപാറ ഗ്രാമപഞ്ചായത്ത്: പട്ടികജാതി സംവരണം: പൂതംപാറ-4. സ്ത്രീ സംവരണം: കരിങ്ങാട്-1, കാരിമുണ്ട-3, വട്ടിപ്പന-7, പുതുക്കാട്-9, ആശ്വസി-12, കലങ്ങോട്-13, മൊയിലോത്തറ-14, പൈക്കളങ്ങാടി-16, തൊട്ടില്‍പ്പാലം-17. കുറ്റ്യാടി ഗ്രാമപഞ്ചായത്ത്: പട്ടികജാതി സംവരണം: താഴെ വടയം-11. സ്ത്രീ സംവരണം: നരിക്കൂട്ടും ചാല്‍-2, കൂരാറ-3, കുറ്റ്യാടി-5, വളയന്നൂര്‍-6, ഊരത്ത് ഈസ്റ്റ്-8, ഊരത്ത്-9, പാലോങ്കര-12, നിട്ടൂര്‍-14. മരുതോങ്കര ഗ്രാമപഞ്ചായത്ത്:പട്ടികജാതി സംവരണം: മരുതോങ്കര-4. സ്ത്രീ സംവരണം: പൈക്കാട്ട്-2, തൂവ്വാട്ടപ്പൊയില്‍-7, പശുക്കടവ്-8, സെന്‍റര്‍ മുക്ക്-9, മുള്ളന്‍ കുന്ന്-11, മരുതോങ്കര സൗത്ത്-12, മണ്ണൂര്‍-14, അടുക്കത്ത്-15. നരിപ്പറ്റ ഗ്രാമപഞ്ചായത്ത്: പട്ടികജാതി സംവരണം: കണ്ടോത്ത്കുനി-12. സ്ത്രീ സംവരണം: പയ്യേക്കണ്ടി-1, വാളൂക്ക്-3, ഉപ്പമ്മല്‍-4, മുള്ളമ്പത്ത്-5, വള്ളിത്തറ-7, ചമ്പിലോറ-10, മണ്ണ്യൂര്‍-13, ചെവിട്ടുപാറ-15, കക്കുഴി പീടിക-17. മേപ്പയ്യൂര്‍ ഗ്രാമപഞ്ചായത്ത്: പട്ടികജാതി സംവരണം: മരുതേരിപറമ്പ്-15. സ്ത്രീ സംവരണം: മഠത്തുംഭാഗം-5, മേപ്പയ്യൂര്‍ ഹൈസ്‌കൂള്‍-6 , ചാവട്ട്-11, നിടുംപൊയില്‍-12, മാമ്പൊയില്‍-13, നരക്കോട്-14, മഞ്ഞക്കുളം-16, പാവട്ടുകണ്ടിമുക്ക്-17, നരിക്കുനി-18, വിളയാട്ടൂര്‍-19. നൊച്ചാട് ഗ്രാമപഞ്ചായത്ത്: പട്ടികജാതി സ്ത്രീ സംവരണം: കരിമ്പാം കുന്ന്-13. പട്ടികജാതി സംവരണം: കൈതക്കല്‍-7.സ്ത്രീ സംവരണം: എടത്തും ഭാഗം-1, വാല്ല്യക്കോട്-3, ഹോമിയോ സെന്‍റര്‍-4, ചേനോളി-6, ചാലിക്കര-12, നാഞ്ഞൂറ-14, രയരോത്ത് മുക്ക്-16, അഞ്ചാം പീടിക-18. കായണ്ണ ഗ്രാമപഞ്ചായത്ത്: പട്ടികജാതി സംവരണം: അമ്പായപ്പാറ-5. സ്ത്രീ സംവരണം: കുരിക്കള്‍ക്കൊല്ലി-2, മാട്ടനോട്-3, പാറമുതു- 4, പൂവത്താംകുന്ന്-6, മൊട്ടന്തറ-7, ചെറുക്കാട്-8 ,പാടിക്കുന്ന്- 9. കൂത്താളി ഗ്രാമപഞ്ചായത്ത്: പട്ടികജാതി സംവരണം: പനക്കാട്-9. സ്ത്രീ സംവരണം: ആശാരിപ്പറമ്പ്-1, കരിമ്പിലമൂല-4, വിളയാട്ട്കണ്ടി-5, കൊരട്ടി-8, പുലിക്കോട്ട്-10, ഈരാഞ്ഞീമ്മല്‍-13, കൂത്താളി-14. പേരാമ്പ്ര ഗ്രാമപഞ്ചായത്ത്: പട്ടികജാതി സ്ത്രീ സംവരണം: ഉണ്ണിക്കുന്ന്-11, കിഴിഞ്ഞാണ്യം-15. പട്ടികജാതി സംവരണം: കൈപ്രം-20. സ്ത്രീ സംവരണം: ചേനായി-1, കോളജ്-4, മൊയോത്ത് ചാല്‍-5, പാണ്ടിക്കോട്-8, കോടേരിചാല്‍-9, പേരാമ്പ്ര ടൗണ്‍-12, പാറപ്പുറം-16, ആക്കൂപറമ്പ്-17, മൊട്ടന്തറ മുക്ക്-19. ചക്കിട്ടപ്പാറ ഗ്രാമപഞ്ചായത്ത്: പട്ടികജാതി സ്ത്രീ സംവരണം: പ്ലാന്‍റേഷന്‍-8. പട്ടികജാതി സംവരണം: ചെങ്കോട്ടക്കൊല്ലി-5. സ്ത്രീ സംവരണം: പന്നിക്കോട്ടൂര്‍-1, ചെമ്പനോട-2, പൂഴിത്തോട്-4, മുതുകാട്-7, അണ്ണക്കൂട്ടന്‍ചാല്‍-10, ചക്കിട്ടപാറ-12, മുടിയന്‍ചാല്‍-15.

കണ്ടിവാതുക്കലില്‍ കാട്ടാനകളിറങ്ങി; കൃഷിയിടങ്ങളില്‍ വ്യാപക നാശനഷ്ടം

നാദാപുരം: ചെക്യാട് പഞ്ചായത്തിലെ കണ്ടിവാതുക്കലില്‍ കാട്ടാനകള്‍ വീണ്ടും കൃഷിനശിപ്പിച്ചു. കണ്ടിവാതുക്കല്‍, അഭയഗിരി, വാഴമല മേഖലകളിലെ കൃഷിയിടങ്ങളില്‍ കഴിഞ്ഞദിവസം താണ്ഡവമാടിയ കാട്ടാനക്കുട്ടത്തെ വനപാലക സംഘവും കര്‍ഷകരും ചേര്‍ന്ന് കാട്ടിനുള്ളിലേക്ക് തുരത്തിയിരുന്നു. ദിവസങ്ങള്‍ക്ക് ശേഷം അവ വീണ്ടും തിരികെയെത്തിയത് കര്‍ഷകരില്‍ ആശങ്ക സൃഷ്ടിച്ചിരിക്കുകയാണ്. ജനവാസ മേഖലകളില്‍ തമ്പടിച്ചിരിക്കുകയാണ് കാട്ടാനക്കൂട്ടം. ഇടക്കിടെ ചിന്നംവിളിച്ചു പരിഭ്രാന്തി പരത്തുന്ന ആനക്കൂട്ടത്തെ തുരത്താന്‍ വനപാലകര്‍ ഇന്നലെ ഉച്ചയോടെ വീണ്ടുമെത്തി. 14 ആനകളും രണ്ട് കുട്ടിയാനകളുമാണ് ആഴ്ചകളായി കര്‍ഷകരുടെ ഉറക്കം കെടുത്തുന്നത്. തറക്കുന്നേല്‍ ജോര്‍ജ്, ഒ.കെ. വാസു എന്നിവരുടെ റബര്‍, കരുമുളക്, തെങ്ങ് തുടങ്ങിയവയാണ് വ്യാപകമായി നശിപ്പിച്ചത്. കണ്ണൂര്‍ ജില്ല അതിര്‍ത്തിയിലെ വാഴമലയിലും കാട്ടാനകള്‍ വര്‍ഷങ്ങള്‍ ജാതിമരങ്ങള്‍ അടക്കമുള്ള കൃഷികള്‍ നശിപ്പിച്ചിട്ടുണ്ട്. മാസങ്ങള്‍ക്കു മുമ്പ് വനംവകുപ്പിന്‍റെ ജണ്ട കെട്ടലില്‍ കൃഷിയിടം നഷ്ടമായ കര്‍ഷകര്‍ക്കടക്കം കൃഷിനാശമുണ്ടായിട്ടുണ്ട്. തകര്‍ന്ന സൗരോര്‍ജ കമ്പിവേലി പുനര്‍ നിര്‍മിക്കാന്‍ ഫണ്ട് അനുവദിച്ചെന്ന് വനംവകുപ്പ് പറയുന്നുണ്ടെങ്കിലും ഈ ഭാഗത്ത് പണി തുടങ്ങിയിട്ടില്ല. ഡിഎഫ്ഒ അടക്കമുള്ള വനംവകുപ്പ് അധികൃതര്‍ സ്ഥലത്തെത്തി നഷ്ടപരിഹാരം നല്‍കുമെന്നും പ്രശ്‌നത്തിന് ശാശ്വത പരിഹാരം കാണുമെന്നും പലതവണ ഉറപ്പ് നല്‍കിയെങ്കിലും ഒന്നും യാഥാര്‍ഥ്യമായില്ല. മലമുകളില്‍ നിന്ന് 400 ഉം 500 ഉം രൂപ വണ്ടിക്കൂലി ഇനത്തില്‍ മുടക്കി വളയത്തെത്തി അപേക്ഷ നല്‍കാറുണ്ടെങ്കിലും വാഹനകൂലി പോലും നഷ്ടപരിഹാരമായി കിട്ടുന്നില്ലെന്ന് കര്‍ഷകര്‍ പറയുന്നു. കനത്ത നഷ്ടം കാരണം കര്‍ഷകരില്‍ പലരും കൃഷിയിടങ്ങളിലേക്ക് തിരിഞ്ഞു നോക്കാതെയായിട്ടുണ്ട്. ചിലര്‍ സ്ഥലം വില്‍പന നടത്തി മലയിറങ്ങിയിട്ടുമുണ്ട്.

ചെലവ് കൂടുതല്‍, വരുമാനം കുറവ് ; ക്ഷീരമേഖലയില്‍ നിന്നുയരുന്നത് കര്‍ഷകരുടെ വിലാപങ്ങള്‍

കൂരാച്ചുണ്ട്: കാര്‍ഷിക മേഖലയുടെ തകര്‍ച്ചയോടെ ക്ഷീര മേഖലയിലേക്കു ചുവടുമാറിയ കര്‍ഷകര്‍ക്ക് അവിടെയും രക്ഷയില്ല. കാലിത്തീറ്റ വില വര്‍ധനവും മറ്റു കന്നുകാലി പരിപാലനച്ചെലവുകളും ഭീമമായി വര്‍ധിച്ചതിനാല്‍ ക്ഷീരവ്യവസായ മേഖലയില്‍ പിടിച്ചുനില്‍ക്കാന്‍ കഴിയാതെ കടുത്ത പ്രതിസന്ധിയിലാണ് കര്‍ഷകര്‍. ക്ഷീരോല്‍പാദന രംഗത്തു നിന്നും കര്‍ഷകര്‍ ഒന്നൊന്നായി പിന്തിരിയുകയാണ്. ക്ഷീരോല്‍പാദനം ജീവിതോപാധിയായി തെരഞ്ഞെടുത്ത കൂരാച്ചുണ്ട് പഞ്ചായത്തിലെ നിരവധി കര്‍ഷകരിന്ന് കണ്ണീര്‍ക്കയത്തിലാണ്. കാലിത്തീറ്റ വില കുത്തനെ ഉയര്‍ന്നിട്ടും അതിന് അനുസരിച്ച് പാല്‍ വില വര്‍ധിപ്പിക്കാനും മറ്റ് ആനുകൂല്യങ്ങള്‍ ലഭ്യമാക്കാനും നടപടി ഉണ്ടാകുന്നില്ലെന്ന് കര്‍ഷകര്‍ പറയുന്നു. കാലിത്തീറ്റക്കു പുറമെ ഇതര സംസ്ഥാനങ്ങളില്‍ നിന്ന് എത്തുന്ന പുല്ല്, ചോളപ്പുല്ല്, ബിയര്‍ വേസ്റ്റ്, ചോളപ്പൊടി തുടങ്ങിയവയ്ക്കും വില വര്‍ധിച്ചിട്ടുണ്ട്. പണം മുടക്കുന്നതിനനുസരിച്ച് വരുമാനം ലഭിക്കാത്തതാണ് ക്ഷീരകര്‍ഷകരെ പ്രതിസന്ധിയിലാക്കുന്നത്. പാലുത്പ്പാദനത്തിനുള്ള ഭാരിച്ച ചെലവിനു പുറമെ, കന്നുകാലികളുടെ രോഗ ചികിത്സ തുടങ്ങിയവയ്ക്കും വന്‍ തുക ചെലവഴിക്കേണ്ടി വരുന്നുണ്ട്. കൂരാച്ചുണ്ട് മേഖലയില്‍ നിരവധി ആളുകള്‍ പശുവളര്‍ത്തലിലൂടെ ഉപജീവനമാര്‍ഗം കണ്ടെത്തിയിരുന്നു. കൂരാച്ചുണ്ട് ക്ഷീരോത്പാദക സഹകരണ സംഘത്തിലെ കണക്ക് പ്രകാരം കഴിഞ്ഞ അഞ്ചു വര്‍ഷത്തിനിടെ 217 ഓളം ക്ഷീര കര്‍ഷകരാണ് ക്ഷീരമേഖലയില്‍ നിന്ന് പിന്തിരിഞ്ഞ് മറ്റു ജീവിതമാര്‍ഗങ്ങളന്വേഷിക്കാന്‍ നിര്‍ബന്ധിതരായത്. 2021-22 സാമ്പത്തിക വര്‍ഷത്തില്‍ 392 കര്‍ഷകരില്‍ നിന്നായി സൊസൈറ്റിയില്‍ 10,45,730.1 ലിറ്റര്‍ പാല്‍ സംഭരിച്ചിരുന്നു. 2023-24 സാമ്പത്തിക വര്‍ഷമായപ്പോള്‍ കര്‍ഷകരുടെ എണ്ണം 296 ആയി കുറഞ്ഞു. പാലുല്‍പാദനം 717213.6 ലിറ്ററിലേക്കു കൂപ്പുകുത്തുകയും ചെയ്തു. തുടര്‍ന്ന് 2024-25 സാമ്പത്തിക വര്‍ഷമായപ്പോഴേക്കും ഉല്‍പാദനം വീണ്ടും കുറഞ്ഞു; 704284.3 ലിറ്റര്‍.നിലവില്‍ 175 കര്‍ഷകര്‍ മാത്രമാണ് സൊസൈറ്റിയില്‍ പാല്‍ അളക്കുന്നത്. 1785 ലിറ്റര്‍ പാല്‍ മാത്രമാണ് പ്രതിദിനം സൊസൈറ്റിയില്‍ സംഭരിക്കുന്നത്. കുറഞ്ഞ വിലയ്ക്ക് കര്‍ഷകരില്‍ നിന്നു സംഭരിക്കുന്ന പാല്‍ കൂടിയ വിലയ്ക്കാണ് ക്ഷീര സംഘങ്ങളും മറ്റു പൊതു സ്ഥാപനങ്ങളും പൊതുവിപണിയില്‍ വില്‍പന നടത്തുന്നത്. ഏറ്റവും കൂടുതല്‍ ചൂഷണത്തിനിരയാകുന്ന ഒരു വിഭാഗം കൂടിയാണ് ക്ഷീരകര്‍ഷകര്‍. നിലവില്‍ ഒരു ലിറ്റര്‍ പാലിന് 44.90 രൂപയാണ് കര്‍ഷകര്‍ക്ക് ലഭിക്കുന്നത്. എന്നാല്‍ 56 രൂപയാണ് പ്രാദേശികമായി വില്‍ക്കുന്ന ഒരു ലിറ്റര്‍ പാലിന് ക്ഷീരസംഘങ്ങള്‍ ഈടാക്കുന്നത്. ചെലവുമായി താരതമ്യം ചെയ്യുമ്പോള്‍ കര്‍ഷകനു ലഭിക്കുന്ന വരുമാനം തുച്ഛമാണ്. കടുത്ത ചുഷണം കാരണം ഈ മേഖലയില്‍ തുടരാന്‍ കഴിയാത്ത അവസ്ഥയാണെന്നു കര്‍ഷകര്‍ പറയുന്നു. ക്ഷീര മേഖലയ്ക്ക് പ്രോത്സാഹനമായി നിരവധി പദ്ധതികള്‍ ആവിഷ്‌ക്കരിച്ചിട്ടുണ്ടെന്നു സര്‍ക്കാര്‍ പറയുമ്പോഴും ഇതിന്‍റെ ഗുണം പലപ്പോഴും താഴേത്തട്ടിലേക്ക് എത്തുന്നില്ല. ജോണ്‍സണ്‍ പൂകമല

സിഎംഎല്‍ കലോത്സവം: കൂരാച്ചുണ്ട് മേഖല ജേതാക്കള്‍

താമരശേരി: ചെറുപുഷ്പ മിഷന്‍ ലീഗ്, തിരുബാല സഖ്യം താമരശേരി രൂപത കലോത്സവം തിരുവമ്പാടി ഫൊറോന വികാരി ഫാ. തോമസ് നാഗപ്പറമ്പില്‍ ഉദ്ഘാടനം ചെയ്തു. രൂപത പ്രസിഡന്‍റ് ജിനോ തറുപ്പ്‌തൊട്ടിയില്‍ അധ്യക്ഷത വഹിച്ചു. ഡയറക്ടര്‍ ഫാ. ജോര്‍ജ് വെള്ളാരംകാലായില്‍, അല്‍ഫോന്‍സ കോളജ് അഡ്മിനിസ്‌ട്രേറ്റര്‍ ഫാ. മനോജ് കൊല്ലംപറമ്പില്‍, ജൂനിയര്‍ പ്രസിഡന്‍റ് ക്രിസ് ബി. ഫ്രാന്‍സിസ് എന്നിവര്‍ പ്രസംഗിച്ചു. ചെറുപുഷ്പ മിഷന്‍ ലീഗ് രൂപതാതല കലോത്സവത്തില്‍ കൂരാച്ചുണ്ട് മേഖല ഒന്നാം സ്ഥാനവും തിരുവമ്പാടി മേഖല രണ്ടാം സ്ഥാനവും കോടഞ്ചേരി മേഖല മൂന്നാം സ്ഥാനവും നേടി. ശാഖാതലത്തില്‍ കൂരാച്ചുണ്ട്, തിരുവമ്പാടി, ചക്കിട്ടപാറ ശാഖകള്‍ യഥാക്രമം ഒന്ന്, രണ്ട്, മൂന്ന് സ്ഥാനങ്ങള്‍ കരസ്ഥമാക്കി. തിരുബാല സഖ്യങ്ങളുടെ മത്സരത്തില്‍ തിരുവമ്പാടി ഫൊറോന ഒന്നാം സ്ഥാനവും പാറോപ്പടി ഫൊറോന രണ്ടാം സ്ഥാനവും കോടഞ്ചേരിഫൊറോനാ മൂന്നാം സ്ഥാനവും കരസ്ഥമാക്കി. ഇടവക തലത്തില്‍ കൂടരഞ്ഞി, വിലങ്ങാട്, പാറോപ്പടി ഇടവകള്‍ യഥാക്രമം ഒന്നും രണ്ടും മൂന്നും സ്ഥാനങ്ങള്‍ നേടി. സമാപന സമ്മേളനത്തില്‍ ഫാ. സ്‌കറിയ മങ്കരയില്‍, ഫാ. വിനോയ് പുരയിടത്തില്‍ എന്നിവര്‍ ട്രോഫി വിതരണം ചെയ്തു. രൂപത സെക്രട്ടറി അരുണ്‍ കണ്ടത്തില്‍, ഓര്‍ഗനൈസര്‍ അനൂപ് ചീരാമറ്റത്തില്‍, രൂപത വൈസ് ഡയറക്ടര്‍ സിസ്റ്റര്‍ പ്രിന്‍സി, തിരുബാല സഖ്യം വൈസ് ഡയറക്ടര്‍ സിസ്റ്റര്‍ അലിന്‍ മരിയ, വൈസ് പ്രസിഡന്‍റ് ആന്‍ മരിയ കൊച്ചുകുടിയില്‍, ജൂനിയര്‍ വൈസ് പ്രസിഡന്‍റ് ആന്‍ലിയ സജി, ബാബു ചെട്ടിപ്പറമ്പില്‍, ജിന്‍റോ തകിടിയേല്‍, ജോയ് പുതിയാപറമ്പില്‍, ജയ്‌മോന്‍, സിനോ തോമാസ്, ജോയ്‌സി, അബിന്‍ ആക്കാട്ട്, ഷാനി പുളിക്കല്‍ എന്നിവര്‍ നേതൃത്വം നല്‍കി

വികസന നേട്ടങ്ങള്‍ പങ്കുവച്ച് കൂരാച്ചുണ്ട് പഞ്ചായത്ത് വികസന സദസ്

കൂരാച്ചുണ്ട്: മലയോര മേഖലയായ കൂരാച്ചുണ്ടില്‍ സംസ്ഥാന സര്‍ക്കാരും ഗ്രാമപഞ്ചായത്തും നടപ്പാക്കിയ വികസന പ്രവര്‍ത്തനങ്ങള്‍ പങ്കുവച്ച് വികസന സദസ്. പഞ്ചായത്ത് ഹാളില്‍ നടന്ന പരിപാടി ബ്ലോക്ക് പഞ്ചായത്ത് അംഗം അഡ്വ. വി.കെ. ഹസീന ഉദ്ഘാടനം ചെയ്തു. സംസ്ഥാന സര്‍ക്കാരിന്‍റെയും ഗ്രാമപഞ്ചായത്തിന്‍റെയും വികസന നേട്ടങ്ങളുടെ അവതരണം, ഗ്രാമപഞ്ചായത്തിന്‍റെ ഭാവി വികസന പ്രവര്‍ത്തനങ്ങള്‍ക്കുള്ള ആശയങ്ങളും നിര്‍ദേശങ്ങളും പങ്കുവയ്ക്കല്‍, ചര്‍ച്ച എന്നിവ വികസന സദസ്സില്‍ നടന്നു. നദികളിലെ മണല്‍ നീക്കം ചെയ്ത് ജലസംരക്ഷണം ഉറപ്പുവരുത്തുക, പൊതുശ്മശാനം നിര്‍മിക്കുക, ജലസ്രോതസുകളുടെ കരകള്‍ കെട്ടി സംരക്ഷിക്കുക, തകര്‍ന്ന ഗ്രാമീണ റോഡുകള്‍ പുനര്‍നിര്‍മിക്കുക, പകല്‍വീട് നിര്‍മിച്ചു നല്‍കുകയും വയോജന ക്ഷേമത്തിന് ആവശ്യമായ കൂടുതല്‍ പദ്ധതികള്‍ ആവിഷ്‌കരിക്കുകയും ചെയ്യുക തുടങ്ങിയ നിര്‍ദേശങ്ങള്‍ ചര്‍ച്ചയില്‍ ഉയര്‍ന്നു. വികസന ക്ഷേമ പ്രവര്‍ത്തനങ്ങള്‍ക്കായി 79 കോടി രൂപയാണ് പഞ്ചായത്തില്‍ ചെലവഴിച്ചത്. 48.70 കോടി രൂപ വാര്‍ഷിക പദ്ധതികളിലൂടെയും 30.30 കോടി രൂപ തൊഴിലുറപ്പ് പദ്ധതി വഴിയും ചെലവിട്ടു. ചടങ്ങില്‍ ഗ്രാമപഞ്ചായത്ത് അംഗം വിത്സണ്‍ മംഗലത്ത് അധ്യക്ഷനായി. ഗ്രാമപഞ്ചായത്ത് അംഗങ്ങളായ എന്‍.ജെ. ആന്‍സമ്മ, സിനി ഷിജോ, കെ. വിജയന്‍, സെക്രട്ടറി ഫാത്തിമ നിഷാന, അസി. സെക്രട്ടറി മഹേഷ്, കില റിസോഴ്സ് പേഴ്സണ്‍ നിധിന്‍ തുടങ്ങിയവര്‍ പങ്കെടുത്തു. വികസന സദസ് ബഹിഷ്‌ക്കരിച്ച് യുഡിഎഫ് കൂരാച്ചുണ്ട്: കൂരാച്ചുണ്ട് പഞ്ചായത്തും സംസ്ഥാന സര്‍ക്കാരും സംഘടിപ്പിച്ച വികസന സദസില്‍ പങ്കെടുക്കാതെ കൂരാച്ചുണ്ട് പഞ്ചായത്തിലെ യുഡിഎഫ് അംഗങ്ങള്‍ ബഹിഷ്‌കരിച്ചു. പേരാമ്പ്രയില്‍ ഷാഫി പറമ്പില്‍ എംപിക്കെതിരെ നടത്തിയ പോലീസ് ആക്രമണത്തില്‍ പ്രതിഷേധിച്ചു കൊണ്ടും സംസ്ഥാന യുഡിഎഫ് കമ്മിറ്റിയുടെ നിര്‍ദേശ പ്രകാരവുമാണ് യുഡിഎഫ് അംഗങ്ങള്‍ വികസന സദസില്‍ നിന്നും വിട്ടു നിന്നതെന്നു കൂരാച്ചുണ്ട് പഞ്ചായത്ത് പ്രസിഡന്‍റ് ഒ.കെ. അമ്മദ് പറഞ്ഞു.

ശമ്പളം ലഭിക്കാത്ത അധ്യാപകര്‍ കളക്ടറേറ്റിലേക്ക് മാര്‍ച്ച് നടത്തി; കഞ്ഞി കുടിച്ച് പ്രതിഷേധം

കോഴിക്കോട് : ഭിന്നശേഷി നിയമത്തിന്‍റെ പേരില്‍ നിയമന അംഗീകാരം ലഭിക്കാത്ത അധ്യാപകരും അഞ്ചുവര്‍ഷം ജോലി ചെയ്തിട്ടും ശമ്പളം ലഭിക്കാതെ നോഷണലായി അംഗീകാരം ലഭിച്ച അധ്യാപകരും കളക്ടറേറ്റിലേക്ക് മാര്‍ച്ച് നടത്തി. കുഴികുത്തി കഞ്ഞി കുമ്പിളില്‍ ഒഴിച്ചു കുടിച്ചായിരുന്നു പ്രതിഷേധം. എം.കെ രാഘവന്‍ എംപി ഉദ്ഘാടനം ചെയ്തു.സര്‍ക്കാരിന്‍റെ സാമ്പത്തിക പ്രതിസന്ധിയാണ് ഇരുപത്തി അയ്യായിരം അധ്യാപകര്‍ പട്ടിണിയാകാന്‍ കാരണമെന്നും ഇനിയും അധ്യാപകരെ ശമ്പളം നല്‍കാതെ തെരുവിലിറക്കിയാല്‍ കോണ്‍ഗ്രസും യുഡിഎഫും അധ്യാപകര്‍ക്കൊപ്പം അണിനിരക്കുമെന്നും എം.കെ രാഘവന്‍ പറഞ്ഞു.യൂത്ത് കോണ്‍ഗ്രസ് സംസ്ഥാന പ്രസിഡന്‍റ് അബിന്‍ വര്‍ക്കി മുഖ്യാതിഥിയായിരുന്നു. മുഖ്യമന്ത്രിയുടെ വീട്ടില്‍ ഒരു തൊഴുത്ത് കെട്ടാന്‍ 30 ലക്ഷത്തിലധികം രൂപ ചെലവഴിച്ച സര്‍ക്കാര്‍, അധ്യാപകരുടെ കാര്യത്തില്‍ ഇരട്ടത്താപ്പാണ് കാണിക്കുന്നതെന്നു അബിന്‍ വര്‍ക്കി പറഞ്ഞു . എന്‍എസ്എസിനു ലഭിച്ച സമാന ഉത്തരവ് ഹൈക്കോടതിയില്‍ നിന്ന് മറ്റ് അധ്യാപകര്‍ക്കും ലഭിച്ചിട്ടും അത് നായര്‍ സര്‍വീസ് സൊസൈറ്റിക്ക് മാത്രമായി മാറ്റിയ സര്‍ക്കാറിന്‍റെ പക്ഷപാത നിലപാടിനെതിരെ അധ്യാപകര്‍ കുഴികുത്തി കുമ്പിളില്‍ കഞ്ഞി ഒഴിച്ചു കുടിച്ചു പ്രതിഷേധിച്ചു . ആധുനിക കാലത്തും ഇരട്ട നീതി മാത്രം നല്‍കുന്ന സര്‍ക്കാര്‍ നിലപാടിനെതിരെ അധ്യാപകര്‍ പകല്‍പന്തം കൊളുത്തി പ്രതിഷേധിച്ചു. സംസ്ഥാന സെക്രട്ടറി അസീസ് നമ്പ്രത്തുക്കര, കോഴിക്കോട് ജില്ലാ പ്രസിഡന്‍റ് വി.ടി സൂരജ് ,എബിവിപി ദേശീയ എക്‌സിക്യൂട്ടീവ് അംഗം യദു കൃഷ്ണന്‍ എന്നിവര്‍ പ്രസംഗിച്ചു. കേരള എയ്ഡഡ് ടീച്ചേഴ്‌സ് കളക്ടീവും നോഷണല്‍ ടീച്ചേഴ്‌സ് കളക്ടീവും കെഎന്‍എടിഎയും സംയുക്തമായാണ് അധ്യാപക സമര സംഗമം സംഘടിപ്പിച്ചത്. കെഎടിസി പ്രസിഡന്‍റ് ബിന്‍സിന്‍ ഏക്കാട്ടൂര്‍ അധ്യക്ഷത വഹിച്ചു.

തിരുവമ്പാടിയെ കൂണ്‍ഗ്രാമമായി പ്രഖ്യാപിച്ചു

തിരുവമ്പാടി: കാര്‍ഷിക വികസന കര്‍ഷക ക്ഷേമ വകുപ്പ് തിരുവമ്പാടി നിയോജകമണ്ഡലത്തെ കൂണ്‍ഗ്രാമമായി പ്രഖ്യാപിച്ചതിന്‍റെ ഉദ്ഘാടനം തിരുവമ്പാടി എംഎല്‍എ ലിന്‍റോ ജോസഫ് നിര്‍വഹിച്ചു. ചെറുകിട,വന്‍കിട കൂണ്‍ സംരംഭകരെ ഒരു കുടക്കീഴില്‍ അണിനിരത്തി കര്‍ഷകര്‍ക്ക് സാമ്പത്തിക സഹായം നല്‍കുന്നതാണ് പദ്ധതി. തിരുവമ്പാടി പഞ്ചായത്ത് പ്രസിഡന്‍റ് ബിന്ദു ജോണ്‍സണ്‍ അധ്യക്ഷത വഹിച്ചു. ജില്ലാ പഞ്ചായത്ത് അംഗം ബോസ് ജേക്കബ്, തിരുവമ്പാടി പഞ്ചായത്ത് വികസന കാര്യ സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ ലിസി മാളിയേക്കല്‍, പഞ്ചായത്ത് അംഗങ്ങളായ ഷൈനി ബെന്നി, ലിസി സണ്ണി, കാര്‍ഷിക വികസന സമിതി അംഗമായ ഗോപിലാല്‍ എന്നിവര്‍ പ്രസംഗിച്ചു. കൊടുവള്ളി കൃഷി അസിസ്റ്റന്‍റ് ഡയറക്ടര്‍ ഡോ. പ്രിയമോഹന്‍, കൂണ്‍ കൃഷി വിദഗ്ധന്‍ പി.എ. അബ്ദുല്‍ സത്താര്‍, തിരുവമ്പാടി കൃഷി ഓഫീസര്‍ മുഹമ്മദ് ഫാസില്‍, പുതുപ്പാടി കൃഷി ഓഫീസര്‍ രമ്യ രാജന്‍ എന്നിവര്‍ പങ്കെടുത്തു.

കത്തോലിക്ക കോണ്‍ഗ്രസ് അവകാശ സംരക്ഷണ ദിനം ആചരിച്ചു

മുക്കം: കത്തോലിക്ക കോണ്‍ഗ്രസ് മുക്കം യൂണിറ്റിന്‍റെ നേതൃത്വത്തില്‍ മുക്കം തിരുഹൃദയ ഇടവകയില്‍ അവകാശ സംരക്ഷണ ദിനം ആചരിച്ചു. ഇടവക വികാരി ഫാ. ജോണ്‍ ഒറവുങ്കര ഉദ്ഘാടനം ചെയ്തു. നീതി ഔദാര്യമല്ല അവകാശമാണെന്നും മൗലിക അവകാശങ്ങളും ന്യൂനപക്ഷ അവകാശങ്ങളും സംരക്ഷിക്കുമെന്നും പ്രതിജ്ഞയെടുത്തു. കത്തോലിക്ക കോണ്‍ഗ്രസ് പ്രസിഡന്‍റ് അഡ്വ.വര്‍ഗീസ് പാലക്കില്‍, സെക്രട്ടറി രാജന്‍ ചൂരപൊയ്കയില്‍ എന്നിവര്‍ പ്രസംഗിച്ചു. ലോവല്‍ പള്ളിത്താഴത്ത്, ദേവസ്യ പൈമ്പിള്ളില്‍, അഖില്‍ മലേക്കുന്നേല്‍, ഷിജി കിഴക്കരക്കാട്ട്, ജോര്‍ജ് മഠത്തില്‍, കുര്യന്‍ പാറക്കല്‍, ജോണി കുഴുപ്പില്‍ എന്നിവര്‍ നേതൃത്വം നല്‍കി. തിരുവമ്പാടി: കത്തോലിക്ക കോണ്‍ഗ്രസ് ഗ്ലോബല്‍ സമിതി ആഹ്വാനം ചെയ്ത അവകാശ സംരക്ഷണ ദിനം തിരുവമ്പാടി സേക്രട്ട് ഹാര്‍ട്ട് ഫൊറോന പള്ളിയില്‍ ആചരിച്ചു. ഫൊറോന വികാരി ഫാ. തോമസ് നാഗപറമ്പില്‍ യോഗം ഉദ്ഘാടനം ചെയ്തു. ക്രൈസ്തവര്‍ നേരിടുന്ന അവഗണനയ്ക്കും നീതി നിഷേധത്തിനും എതിരേ നടത്തുന്ന സമുദായ അവകാശ സംരക്ഷണ യാത്രയുടെ മുന്നോടിയായിട്ടാണ് അവകാശ സംരക്ഷണ ദിനം ആചരിച്ചത്. അസിസ്റ്റന്‍റ് വികാരി ഫാ.ജേക്കബ് തിട്ടയില്‍, രൂപത വൈസ് പ്രസിഡന്‍റ് പ്രിന്‍സ് തിനംപറമ്പില്‍, രൂപത കമ്മറ്റി അംഗം ടോമി ചക്കിട്ടമുറിയില്‍, യൂണിറ്റ് പ്രസിഡന്‍റ് രാജന്‍ ചെമ്പകം, തോമസ് പുത്തന്‍പുരയ്ക്കല്‍, സണ്ണി പുതുപ്പറമ്പില്‍ എന്നിവര്‍ നേതൃത്വം നല്‍കി.

പതിയില്‍ കപ്പേളയില്‍ തിരുനാള്‍ 20ന് തുടങ്ങും

കൂരാച്ചുണ്ട്: കൂരാച്ചുണ്ട് സെന്‍റ് തോമസ് ഫൊറോന ഇടവകയുടെ കുരിശുപള്ളിയായ പതിയില്‍ കപ്പേളയില്‍ വിശുദ്ധ യൂദാ തദേവൂസിന്‍റെ ഒമ്പത് ദിവസം നീണ്ടുനില്‍ക്കുന്ന തിരുനാള്‍ ആഘോഷങ്ങള്‍ 20ന് ആരംഭിക്കും. വൈകുന്നേരം 4.30ന് ഇടവക വികാരി ഫാ. വിന്‍സെന്‍റ് കണ്ടത്തില്‍ കൊടിയേറ്റ് നിര്‍വഹിക്കും. തുടര്‍ന്നു വിശുദ്ധ കുര്‍ബാന, സന്ദേശം, നൊവേന -ഫാ. തോമസ് പതിയില്‍ സിഎംഐ. 21ന് വൈകിട്ട് 4ന് ജപമാല, 4.30 വിശുദ്ധ കുര്‍ബാന, സന്ദേശം, നൊവേന-ഫാ. ജോസ് പെണ്ണാപറമ്പില്‍. 22ന് വൈകുന്നേരം നാലിന് ജപമാല, 4.30 വിശുദ്ധ കുര്‍ബാന, സന്ദേശം, നൊവേന-ഫാ. ജോര്‍ജ് കുഴിവിളയില്‍ ഒഎഫ്എം. 23 ന് വൈകുന്നേരം നാലിന് ജപമാല, 4.30ന് വിശുദ്ധ കുര്‍ബാന, സന്ദേശം, നൊവേന. ഫാ. ഇമ്മാനുവേല്‍ കുറൂര്‍ കാര്‍മികത്വം വഹിക്കും. 24ന് വൈകുന്നേരം നാലിന് ജപമാല, 4.30 ന് വിശുദ്ധ കുര്‍ബാന, സന്ദേശം, നൊവേന- ഫാ. ജിയോ കടുകന്‍മാക്കല്‍. 25ന് വൈകുന്നേരം നാലിന് ജപമാല, 4.30ന് വിശുദ്ധ കുര്‍ബാന, സന്ദേശം, നൊവേന-ഫാ. തോമസ് കൊച്ചുകൈപ്പയില്‍. 26ന് വൈകുന്നേരം നാലിന് ജപമാല, 4.30ന് വിശുദ്ധ കുര്‍ബാന, സന്ദേശം, നൊവേന. ഫാ. മൈക്കിള്‍ നീലംപറമ്പില്‍ കാര്‍മികനാകും. 27 ന് വൈകുന്നേരം നാലിന് ജപമാല, 4.30ന് വിശുദ്ധ കുര്‍ബാന, സന്ദേശം, നൊവേന- ഫാ. ജോര്‍ജ് കുമ്പുക്കല്‍. പ്രധാന തിരുനാള്‍ ദിനമായ 28ന് വൈകുന്നേരം നാലിന് ജപമാല, പ്രസുദേന്തി വാഴ്ച, 4.30ന് ആഘോഷമായ തിരുനാള്‍ കുര്‍ബാന, സന്ദേശം, നൊവേന. ഫാ. കുര്യന്‍ താന്നിക്കല്‍ കാര്‍മ്മികത്വം വഹിക്കും. വൈകുന്നേരം ആറിന് ലദീഞ്ഞ്, പ്രദക്ഷിണം, സമാപന ആശീര്‍വാദം.

പഞ്ചായത്ത് ഓഫീസ് മാര്‍ച്ച് നടത്തി

കടിയങ്ങാട്: ചങ്ങരോത്ത് പഞ്ചായത്തിലെ യുഡിഎഫ് ജനപ്രതിനിധികളുടെ വാര്‍ഡുകളിലേക്ക് ഫണ്ട് അനുവദിക്കുന്നതിലുള്ള വിവേചനം അവസാനിപ്പിക്കണമെന്നതടക്കമുള്ള ആവശ്യങ്ങള്‍ ഉന്നയിച്ച് യുഡിഎഫിന്‍റെ ആഭിമുഖ്യത്തില്‍ ചങ്ങരോത്ത് പഞ്ചായത്ത് ഓഫീസ് മാര്‍ച്ച് നടത്തി. മുസ്ലീം ലീഗ് ജില്ല വൈസ് പ്രസിഡന്‍റ് എസ്പി കുഞ്ഞമ്മദ് ഉദ്ഘാടനം ചെയ്തു. മൂസ കോത്തമ്പ്ര അധ്യക്ഷത വഹിച്ചു. പുതുക്കോട്ട് രവീന്ദ്രന്‍, ഇ.വി. രാമചന്ദ്രന്‍, കെ.കെ. വിനോദന്‍, ആനേരി നസീര്‍, വി.പി. ഇബ്രാഹിം, അസീസ് പാറക്കടവ്,പാളയാട്ട് ബഷീര്‍, ഇ.ടി. സരീഷ്,സെഡ് എ. സല്‍മാന്‍, പ്രകാശന്‍ കന്നാട്ടി, അസീസ് നരിക്കലക്കണ്ടി,എ.പി. അബ്ദുറഹിമാന്‍ തുടങ്ങിയവര്‍ പ്രസംഗിച്ചു.

താമരശേരി ഉപജില്ലാ ശാസ്‌ത്രോത്സവം

താമരശേരി: താമരശേരി ഉപജില്ലാ ശാസ്‌ത്രോത്സവം കട്ടിപ്പാറയില്‍ തുടങ്ങി. മേളകളുടെ ഉദ്ഘാടനം ഹോളി ഫാമിലി ഹയര്‍ സെക്കന്‍ഡറി സ്‌കൂളില്‍ കട്ടിപ്പാറ പഞ്ചായത്ത് പ്രസിഡന്‍റ് പ്രേംജി ജെയിംസ് നിര്‍വഹിച്ചു. സ്‌കൂള്‍ മാനേജര്‍ ഫാ. മില്‍ട്ടണ്‍ മുളങ്ങാശ്ശേരി അധ്യക്ഷത വഹിച്ചു. ഉപജില്ലാ വിദ്യാഭ്യാസ ഓഫീസര്‍ പൗളി മാത്യു, അഷ്‌റഫ് താണ്ടിയേക്കല്‍, എ.കെ.അബൂബക്കര്‍ കുട്ടി, റംസീന നരിക്കുനി, നിതീഷ് കല്ലുള്ളതോട്, മുഹമ്മദ് ഷാഹിം ഹാജി, അനില്‍ ജോര്‍ജ്, വി.സി.ബാബു, മഹേഷ് കെ. ബാബു വര്‍ഗീസ്, കെ.യു.ബെസ്സി, സിസ്റ്റര്‍ ലിന്‍സി, ചിപ്പിരാജ്, കെ.കെ.മുനീര്‍ എന്നിവര്‍ പ്രസംഗിച്ചു .

പനി ബാധിച്ചു കുട്ടി മരിച്ചു

വടകര: വടകരക്കടുത്ത് തോടന്നൂരില്‍ താമസിക്കുന്ന ഇതര സംസ്ഥാന തൊഴിലാളിയുടെ കുഞ്ഞ് പനി ബാധിച്ച് മരിച്ചു. രാജസ്ഥാന്‍ സ്വദേശി നിസാമുദ്ദീന്‍റെ നാലു മാസം പ്രായമുള്ള അനം ആണ് കോഴിക്കോട് മെഡിക്കല്‍ കോളജ് ആശുപത്രിയില്‍ മരിച്ചത്. തോടന്നൂരില്‍ വാടകയ്ക്ക് താമസിക്കുകയാണ് നിസാമുദ്ദീനും കുടുംബവും. പനിയെ തുടര്‍ന്ന് മെഡിക്കല്‍ കോളജ് ആശുപത്രിയില്‍ ചികിത്സയിലിരിക്കെ കഴിഞ്ഞദിവസം രാത്രിയാണ് മരണമടഞ്ഞത്. വടകര പോലീസ് കേസെടുത്തു. ഏത് തരം രോഗമാണെന്ന് അറിയുന്നതിനു വേണ്ടി മൃതദേഹം പോസ്റ്റ്മോര്‍ട്ടം നടത്തും.

ഇതര സംസ്ഥാന തൊഴിലാളിയെ കുത്തിക്കൊന്നു

കോഴിക്കോട്: ബാലുശേരി എകരൂരില്‍ ഇതരസംസ്ഥാന തൊഴിലാളി കുത്തേറ്റു മരിച്ചു. രണ്ടുപേര്‍ അറസ്റ്റില്‍. ഝാര്‍ഖണ്ഡ് സ്വദേശിയായ പരമേശ്വര്‍ (25)ആണ് മരിച്ചത്. സംഭവത്തില്‍ എകരൂരില്‍ തന്നെ വാടകയ്ക്ക് താമസിക്കുന്ന ഝാര്‍ഖണ്ഡ് സ്വദേശികളായ സുനില്‍, ഘനശ്യാം എന്നിവരാണ് അറസ്റ്റിലായത്. മുന്‍ വൈരാഗ്യമാണ് കൊലപാതകത്തിലേക്ക് നയിച്ചത്. തൊഴിലാളികള്‍ താമസിക്കുന്ന സ്ഥലത്ത് ഞായറാഴ്ച രാത്രി പതിനൊന്നൊടെയാണ് കൊലപാതകം നടന്നത്. പ്രതികളും പരമേശ്വരും തമ്മില്‍ ഞായറാഴ്ച വൈകുന്നേരം ഫോണിലൂടെ വെല്ലുവിളിച്ചിരുന്നു. ഇതിനു പിന്നാലെ പ്രതികള്‍ രാത്രിയില്‍ പരമേശ്വര്‍ താമസിക്കുന്ന സ്ഥലത്തെത്തി. മദ്യലഹരിയിലായിരുന്ന പ്രതികള്‍ കത്തിയെടുത്ത് കുത്തി. നെഞ്ചിലും പുറത്തും ആഴത്തിലുള്ള മുറിവേറ്റാണ് പരമേശ്വര്‍ മരിച്ചത്. കത്തി പോലീസ് കണ്ടെത്തി. ഫോറന്‍സിക് സംഘം സ്ഥലത്ത് പരിശോധന നടത്തി. മൃതദേഹം മെഡിക്കല്‍ കോളജ് മോര്‍ച്ചറിയിലേക്ക് മാറ്റി. പോസ്റ്റ് മോര്‍ട്ടത്തിന് ശേഷം ബന്ധുക്കള്‍ക്ക് വിട്ടുകൊടുക്കും. പ്രതികളെ റിമാന്‍ഡ് ചെയ്തു.

പ്രസംഗ ചിത്ര രചനാ മത്സരങ്ങൾ സംഘടിപ്പിച്ചു

കൂടരഞ്ഞി: ഗ്രീൻസ് കൂടരഞ്ഞി സംഘടിപ്പിച്ച ജില്ലാതല പ്രസംഗ ചിത്ര രചനാ മത്സരങ്ങൾ "രാഗാസ് - 2025' കൂടരഞ്ഞി സെന്‍റ് സെബാസ്റ്റ്യൻസ് ഹയർ സെക്കണ്ടറി സ്കൂളിൽ നടന്നു. മത്സരങ്ങൾ സ്കൂൾ മാനേജർ ഫാ. സെബാസ്റ്റ്യൻ പുരയിടത്തിൽ ഉദ്ഘാടനം ചെയ്തു. ഗ്രീൻസ് കൂടരഞ്ഞി പ്രസിഡന്‍റ് ജയേഷ് സ്രാമ്പിക്കൽ അധ്യക്ഷത വഹിച്ചു. ടോമി പ്ലാത്തോട്ടം, യേശുദാസ് സി. ജോസഫ്, തോമസ് വലിയപറമ്പൻ, ടോം തോമസ്, തൂലിക പൗലോസ്, ആർട്ടിസ്റ്റ് ഹനീഫ, ചാരുത ആർട്ടിസ്റ്റ് ബൈജു, ജോയി മച്ചുക്കുഴിയിൽ, അഗസ്റ്റിൻ മുതലക്കുഴിയിൽ, ആൻസിയ ടോം തുടങ്ങിയവർ പ്രസംഗിച്ചു. മത്സരങ്ങളിൽ വിജയികൾക്ക് ക്യാഷ് അവാർഡ്, മെമന്‍റോ, സർട്ടിഫിക്കറ്റ് എന്നിവയും ഒന്നാം സ്ഥാനം നേടിയ വിദ്യാർഥിയുടെ വിദ്യാലയത്തിന് എവർ റോളിംഗ് ട്രോഫികളും സമ്മാനിച്ചു.

പോക്സോ കേസിൽ യുവാവ് പിടിയിൽ

ബാലുശേരി: പോക്സോ കേസിൽ യുവാവ് പിടിയിൽ. കണ്ണൂർ സ്വദേശിയായ ഫൈസലിനെയാണ് ബാലുശേരി പോലീസ് പിടികൂടിയത്. പ്രതി തന്‍റെ ബുള്ളറ്റ് മോട്ടോർസൈക്കിളിൽ വന്ന് കുട്ടിയെ ലൈംഗികമായി ചൂഷണം ചെയ്തുവെന്ന പരാതിയിലാണ് പിടിയിലായത്. 200 ഓളം സിസിടിവി ദൃശ്യങ്ങൾ പരിശോധിച്ച ശേഷമാണ് ഇന്നലെ പ്രതിയെ കുറ്റ്യാടി പത്തിരിപ്പറ്റ നിന്ന് പിടികൂടിയത്.

വികസനത്തിന്‍റെ മണിയൂർ മോഡൽ; നേട്ടങ്ങളിൽ തിളങ്ങി മണിയൂർ പഞ്ചായത്ത്

കോഴിക്കോട്: വികസനത്തിന്‍റെ "മണിയൂർ മോഡൽ' തീർത്ത് സംസ്ഥാനത്തിന് തന്നെ മാതൃകയാകുകയാണ് മണിയൂർ ഗ്രാമപഞ്ചായത്ത്. മാലിന്യ സംസ്കരണം, മൂല്യ വർദ്ധിത ഉത്പന്ന നിർമാണം, നികുതി പിരിവ്, ടൂറിസം പദ്ധതി, കയ്യേറ്റ ഭൂമി തിരിച്ചുപിടിക്കൽ, ഊട്ടുപ്പുര, ഡിജിറ്റൽ സാക്ഷരത തുടങ്ങി ഒട്ടേറെ മേഖലകളിൽ അഞ്ചുവർഷമായി നടത്തുന്ന മാതൃകാപരമായ ഇടപെടലുകളിലൂടെ വലിയ വികസന നേട്ടങ്ങളാണ് പഞ്ചായത്ത് കൈവരിച്ചത്. പഞ്ചായത്തിലെ 44 അതിദരിദ്ര കുടുംബങ്ങളെ അതി ദാരിദ്ര്യമുക്തമാക്കി. ലൈഫ് ഭവന പദ്ധതി വഴി 150 വീടുകളാണ് നിർമ്മിക്കുന്നത്. ഇതിൽ 82 വീടുകൾ പൂർത്തിയാക്കുകയും 68 വീടുകൾ നിർമ്മാണത്തിലുമാണ്. സമഗ്ര പാലിയേറ്റീവ് കെയറിന്‍റെ ഭാഗമായി മൂന്ന് പാലിയേറ്റീവ് കെയറുകളാണ് പഞ്ചായത്തിലുള്ളത്. പകൽ വീട്, 37 ക്രാഡിൽ അങ്കണവാടി, മൾട്ടിപർപ്പസ് ഹാളും ശൗചാലയ സൗകര്യവും വാനനിരീക്ഷണ കേന്ദ്രവുമുള്ള മനോഹരമായ ടേക്ക് എ ബ്രേക്ക് വിശ്രമ കേന്ദ്രം, ഓപ്പൺ ജിം എന്നിവയും പഞ്ചായത്തിലുണ്ട്. ജെൻഡർ പാർക്ക്, ബഡ്സ് റീഹാബിലിറ്റേഷൻ സെന്‍റർ, ഐടിഐ കെട്ടിടം, സ്റ്റേഡിയം, വിനോദസഞ്ചാര കേന്ദ്രം എന്നിവയുടെ നിർമാണവും പഞ്ചായത്തിൽ പുരോഗമിക്കുകയാണ്. സംസ്ഥാനത്തെ തന്നെ ഏറ്റവും വലിയ മാലിന്യ സംസ്കരണ കേന്ദ്രങ്ങളിൽ ഒന്നാണ് മണിയൂരിലെ എംസിഎഫ്. കൂടാതെ, 22 മിനി എംസി എഫും 63 ബോട്ടിൽ ബൂത്തും പഞ്ചായത്ത് സ്ഥാപിച്ചിട്ടുണ്ട്. ആരോഗ്യ കായിക മേഖലക്കായി റൈസിംഗ് മണിയൂർ പദ്ധതിയും സമഗ്ര വിദ്യാഭ്യാസ പദ്ധതിയായ ഉയരെ മണിയൂർ പദ്ധതിയും പഞ്ചായത്ത് ആഭിമുഖ്യത്തിൽ നടപ്പിലാക്കി വരുത്തുന്നു. ദേശീയ ഗ്രാമീണ തൊഴിലുറപ്പു പദ്ധതിയിൽ ജില്ലയിൽ തന്നെ മികച്ച മുന്നേറ്റമാണ് പഞ്ചായത്ത് കൈവരിച്ചത്. തുടർച്ചയായി മൂന്ന് വർഷവും ജില്ലയിൽ ഒന്നാം സ്ഥാനത്താണ്. മികച്ച പഞ്ചായത്തിനുള്ള സ്വരാജ് ട്രോഫി, ശുചിത്വ മാലിന്യ സംസ്കരണ രംഗത്ത് സംസ്ഥാനത്തെ ഏറ്റവും മികച്ച രണ്ടാമത്തെ ഗ്രാമപഞ്ചായത്ത് ട്രോഫി എന്നിവയും 100 തൊഴിൽ ദിനം സൃഷ്ടിക്കുന്നതിൽ തുടർച്ചയായി മൂന്നാം വർഷം ഒന്നാമത് എത്തുകയും ചെയ്തിട്ടുണ്ട്.

കത്തോലിക്ക കോൺഗ്രസിന്‍റെ അവകാശ സംരക്ഷണ യാത്രയ്ക്ക് സ്വീകരണം നൽകും

താമരശേരി: കത്തോലിക്കാ കോൺഗ്രസിന്‍റെ നേതൃത്വത്തിൽ കാസർക്കോഡ് നിന്ന് തിരുവനന്തപുരത്തേക്ക് പ്രഫ. രാജീവ് കൊച്ചുപറമ്പിൽ നയിക്കുന്ന അവകാശ സംരക്ഷണ യാത്രയ്ക്ക് 16ന് താമരശേരിയിൽ സ്വീകരണം നൽകുമെന്ന് ഭാരവാഹികൾ അറിയിച്ചു. താമരശേരിയിൽ സ്വീകരണം നൽകുന്നതിന് സംഘാടക സമിതി രൂപീകരിച്ചു. യോഗം ഫൊറോന ഡയറക്ടർ ഫാ. തോമസ് ചിലമ്പിക്കുന്നേൽ ഉദ്ഘാടനം ചെയ്തു. ഫൊറോന പ്രസിഡന്‍റ് രാജു മംഗലശേരി അധ്യക്ഷത വഹിച്ചു. സ്വീകരണ കമ്മിറ്റി ഭാരവാഹികളായി കത്തോലിക്കാ കോൺഗ്രസ് ഫൊറോന ഡയറക്ടർ ഫാ. തോമസ് ചിലമ്പിക്കുന്നിൽ (രക്ഷാധികാരി), രാജു മംഗലശേരി (ചെയർമാൻ), ജോബിഷ് തുണ്ടത്തിൽ (കൺവീനർ), ജോഷി മണിമല (ട്രഷറർ) എന്നിവരെ തെരഞ്ഞെടുത്തു.

പഞ്ചദിന പ്രകൃതി കൃഷി പരിശീലന പരിപാടി സമാപിച്ചു

പേരാമ്പ്ര: പെരുവണ്ണാമൂഴി കൃഷിവിജ്ഞാന കേന്ദ്രത്തിൽ കോഴിക്കോട് "ആത്മ'യുമായി സഹകരിച്ച് നാഷണൽ മിഷൻ ഓൺ നാച്ചുറൽ ഫാമിംഗിന് കീഴിലെ കമ്മ്യൂണിറ്റി റിസോർസ് പേഴ്സൺമാർക്കായി സംഘടിപ്പിച്ച പഞ്ചദിന പ്രകൃതി കൃഷി പരിശീലന പരിപാടി സമാപിച്ചു. വിഷയ വിദഗ്ധരായ ഡോ.കെ.എം. പ്രകാശ്, ഡോ. കെ. കെ. ഐശ്വര്യ എന്നിവർ പരിശീലന പരിപാടി ഏകോപിപ്പിച്ചു. കെവികെയിലെ പോളിഹൗസ് കുരുമുളക് നഴ്സറി, ബണ്ടു കൃഷി, തെങ്ങിന്‍റെ ബണ്ടുകളിൽ വളർത്തിയ പൈനാപ്പിൾ, മരച്ചീനി, മുതലായ ഇടവിളകൾ വളർത്തിയ പ്രകൃതി കൃഷി പ്രദർശന യൂണിറ്റ്, തുടങ്ങിയവ സിആർപിമാർ സന്ദർശിച്ചു. സമാപന ചടങ്ങിൽ സബ്ജക്ട് മാറ്റർ സ്പെഷ്യലിസ്റ്റുമാരായ ഡോ.പി.എസ്. മനോജ് സർട്ടിഫിക്കറ്റുകൾ നല്കി. ഡോ. ബി. പ്രദീപ്, എ. ദീപ്തി എന്നിവർ പ്രസംഗിച്ചു. പരിശീലനത്തിൽ പങ്കെടുത്തവർക്ക് ഔഷധ സസ്യങ്ങളുടെ നടിൽ വസ്തുക്കൾ വിതരണം ചെയ്തു.

അവകാശ സംരക്ഷണ ദിനം ആചരിച്ചു

കോടഞ്ചേരി: കത്തോലിക്കാ കോൺഗ്രസ് ഗ്ലോബൽ സമിതി ആഹ്വാനം ചെയ്ത "ഒക്ടോബർ 12 അവകാശ സംരക്ഷണ ദിനം' കോടഞ്ചേരി സെന്‍റ് മേരീസ് ഫൊറോന പള്ളിയിൽ ആചരിച്ചു. ഫൊറോന വികാരി ഫാ. കുര്യാക്കോസ് ഐക്കൊളമ്പിൽ യോഗം ഉദ്ഘാടനം ചെയ്തു. കേരളത്തിൽ ക്രൈസ്തവർ നേരിടുന്ന വിവിധ പ്രതിസന്ധികൾ വിലയിരുത്തുകയും നീതിക്കായി പോരാടാനുള്ള ആഹ്വാനവും നടത്തി. നീതി ഔദാര്യമല്ല അവകാശമാണെന്നും മൗലിക അവകാശങ്ങൾ സംരക്ഷിക്കാൻ തങ്ങൾ പ്രതിജ്ഞാബദ്ധരായിരിക്കുമെന്നും കത്തോലിക്കാ കോൺഗ്രസ് അംഗങ്ങൾ പ്രതിജ്ഞയെടുത്തു. അസിസ്റ്റന്‍റ് വികാരി ഫാ. ജിയോ കടുകൻമാക്കിൽ, യൂണിറ്റ് പ്രസിഡന്‍റ് ഷാജു കരിമഠത്തിൽ, ഷില്ലി സെബാസ്റ്റ്യൻ, ബിബിൻ കുന്നത്ത്, ഷിജി അവന്നൂർ, ജോജോ പള്ളിക്കാമഠത്തിൽ, ജോസഫ് നടുവിലേടത്ത്, ജയിംസ് വെട്ടുകല്ലും പുറത്ത്, അനീഷ്‌ ചക്കാലക്കൽ എന്നിവർ നേതൃത്വം നൽകി. ദേവഗിരി: കത്തോലിക്ക കോൺഗ്രസ് ദേവഗിരി യൂണിറ്റ് അവകാശ സംരക്ഷണ ദിനം ആചരിച്ചു. ക്രൈസ്തവ സമുദായത്തോടുള്ള അവഗണനയ്ക്കും നീതി നിഷേധത്തിനും എതിരേ കത്തോലിക്ക കോൺഗ്രസ് ഗ്ലോബൽ പ്രസിഡന്‍റ് പ്രഫ. രാജീവ് കൊച്ചു പറമ്പിലിന്‍റെ നേതൃത്വത്തിൽ 13ന് കാസർഗോഡ് നിന്നാരംഭിക്കുന്ന അവകാശ സംരക്ഷണ യാത്രക്ക് മുന്നോടിയായി ആണ് അവകാശ സംരക്ഷണ ദിനം ആചരിച്ചത്. ദേവഗിരി യൂണിറ്റ് അവകാശ സംരക്ഷണ ദിന ഉദ്ഘാടനം ഡയറക്ടർ ഫാ. പോൾ കുരിക്കാട്ടിൽ നിർവഹിച്ചു. യൂണിറ്റ് പ്രസിഡന്‍റ് മാത്യു ചുങ്കപ്പുര പ്രതിജ്ഞാ വാചകം ചൊല്ലി കൊടുത്തു. ഗ്ലോബൽ പ്രവർത്തക സമിതി അംഗം കേണൽ മോഹനദാസൻ, വിൻസന്‍റ് പൊട്ടനാനിക്കൽ, കെ.സി. സെബാസ്റ്റ്യൻ, ഇ.ഡി. ബേബി, വി.വി. സെബാസ്റ്റ്യൻ, സണ്ണി പുളിക്കൽ, ഷിജി ജോസഫ്, സാനി തോമസ് തുടങ്ങിയവർ നേതൃത്വം നൽകി. അവകാശ സംരക്ഷണയാത്ര എല്ലാ ജില്ലകളിലൂടെയും സഞ്ചരിച്ച് ഒക്ടോബർ 24 ന് തിരുവനന്തപുരത്ത് സമാപിക്കും.

പൾസ് പോളിയോ ഇമ്മ്യൂണൈസേഷൻ; ജില്ലയിൽ 1,78,457 കുട്ടികൾക്ക് തുള്ളി മരുന്ന് നൽകി

കോഴിക്കോട്: പൾസ് പോളിയോ ഇമ്മ്യൂണൈസേഷൻ പരിപാടിയുടെ ഭാഗമായി ജില്ലയിലെ വിവിധ ബൂത്തുകളിലായി 1,78,457 കുട്ടികൾക്ക് തുള്ളി മരുന്ന് നൽകി. ജില്ലയിൽ അഞ്ച് വയസിന് താഴെയുള്ള 2,06,363 കുട്ടികളാണുള്ളത്. അതിൽ 86.5 ശതമാനം പേർക്കാണ് ഒന്നാം ദിവസമായ ഞായറാഴ്ച പോളിയോ തുള്ളിമരുന്ന് നൽകിയത്. ഇതര സംസ്ഥാന തൊഴിലാളികളുടെ 1117 കുട്ടികളാണ് വാക്സിൻ സ്വീകരിച്ചത്. ജില്ലയിൽ സര്‍ക്കാര്‍ ആശുപത്രികള്‍, സ്വകാര്യ ആശുപത്രികള്‍, അങ്കണവാടികള്‍, ജനകീയാരോഗ്യ കേന്ദ്രങ്ങള്‍ എന്നിവിടങ്ങളിലായി ഒരുക്കിയ 2,215 ബൂത്തുകള്‍ക്കു പുറമെ ബസ് സ്റ്റാന്‍ഡുകള്‍, റെയില്‍വേ സ്റ്റേഷനുകള്‍ തുടങ്ങിയ 53 കേന്ദ്രങ്ങളില്‍ ട്രാന്‍സിറ്റ് ബൂത്തുകളും പ്രവര്‍ത്തിച്ചു. ബൂത്തുകളില്‍ എത്താന്‍ ബുദ്ധിമുട്ടുള്ള പ്രദേശങ്ങളിലും ഇതരസംസ്ഥാന തൊഴിലാളി ക്യാമ്പുകളിലും തുള്ളിമരുന്ന് എത്തിക്കാന്‍ 26 മൊബൈല്‍ ടീമുകളുമുണ്ടായിരുന്നു. തുള്ളിമരുന്ന് നൽകാൻ സാധിക്കാത്തവർക്ക് ഇന്നും നാളെയും ആരോഗ്യ പ്രവർത്തകർ വീടുകളിലെത്തി വാക്സിൻ നൽകും. പരിപാടിയുടെ ജില്ലാതല ഉദ്ഘാടനം കോട്ടപ്പറമ്പ് സ്ത്രീകളുടെയും കുട്ടികളുടെയും സർക്കാർ ആശുപത്രിയിൽ ജില്ലാ മെഡിക്കൽ ഓഫീസർ ഡോ. കെ.കെ. രാജാറാം നിർവഹിച്ചു. കോഴിക്കോട് നഗരസഭ ഡിവിഷൻ കൗൺസിലർ എസ്.കെ. അബൂബക്കർ അധ്യക്ഷത വഹിച്ചു. പരിപാടിയിൽ എൻഎച്ച്എം പ്രോഗ്രാം ഓഫീസർ ഡോ. സി.കെ. ഷാജി, സ്ത്രീകളുടെയും കുട്ടികളുടെയും സർക്കാർ ആശുപത്രി സൂപ്രണ്ട് ഡോ. എം. സുജാത, ജില്ലാ ആർസിഎച്ച് ഓഫീസർ ഡോ. നവ്യ ജെ. തൈക്കാട്ടിൽ, മാസ് മീഡിയ ഓഫീസർ ഡോ. എൻ. ഭവില, ആർഎംഒ ഡോ. ബിന്ദു എന്നിവർ പങ്കെടുത്തു. തിരുവമ്പാടി: തിരുവമ്പാടിയിൽ ദേശീയ പൾസ് പോളിയോ ഇമ്മ്യൂണൈസേഷൻ പരിപാടി ജനകീയ പങ്കാളിത്തത്തോടെ നടത്തി. പ്രത്യേകം സജ്ജീകരിച്ച 33 ബൂത്തുകളിലും തുള്ളിമരുന്ന് വിതരണം നടത്തി. പോളിയോ തുള്ളിമരുന്ന് വിതരണത്തിന്‍റെ പഞ്ചായത്ത് തല ഉദ്ഘാടനം തിരുവമ്പാടി ബസ് സ്റ്റാൻഡ് ഓപ്പൺ സ്റ്റേജിൽ പഞ്ചായത്ത് പ്രസിഡന്‍റ് ബിന്ദു ജോൺസൺ നിർവഹിച്ചു. പഞ്ചായത്ത് വൈസ് പ്രസിഡന്‍റ് കെ.എ. അബ്ദുറഹിമാൻ അധ്യക്ഷത വഹിച്ചു. തിരുവമ്പാടി കുടുംബാരോഗ്യ കേന്ദ്രം മെഡിക്കൽ ഓഫീസർ ഡോ. കെ.വി. പ്രിയ പൾസ് പോളിയോ ദിനാചാരണ സന്ദേശം നൽകി. സ്ഥിരം സമിതി അധ്യക്ഷയായ ലിസി ഏബ്രഹാം, ഹെൽത്ത് ഇൻസ്പെക്ടർമാരായ എം. സുനീർ, സി.പി. റിജു, ജൂനിയർ ഹെൽത്ത്‌ ഇൻസ്‌പെക്ടർമാരായ സെൽവകുമാർ, മുഹമ്മദ്‌ മുസ്തഫ ഖാൻ, റോട്ടറി ക്ലബ് തിരുവമ്പാടി ഭാരവാഹികളായ റോഷൻ മാത്യു, ഡോ. സിന്‍റോ, അഡ്വ. ജനിൽ ജോൺ എന്നിവർഡ പ്രസംഗിച്ചു.

ടിപ്പർ ലോറി തലകീഴായി മറിഞ്ഞു

നാദാപുരം: ടിപ്പർ ലോറി മൺതിട്ടയിലിടിച്ച് തലകീഴായി മറിഞ്ഞു. ഇന്നലെ രാവിലെ ഏഴരയോടെ നാദാപുരം -തലശേരി സംസ്ഥാന പാതയിൽ ചേറ്റുവെട്ടിയിൽ കെഎൽ 59 ഇ 2466 നമ്പർ ലോറിയാണ് അപകടത്തിൽ പെട്ടത്. ഡ്രൈവറും സഹായിയും പരിക്കേൽക്കാതെ അത്ഭുതകരമായി രക്ഷപ്പെട്ടു. ശ്രീകണ്ഠാപുരം സ്വദേശികളാണ് രക്ഷപ്പെട്ടത്. ശ്രീകണ്ഠാപുരത്ത് നിന്ന് ചെങ്കല്ലുമായി നാദാപുരം ഭാഗത്തേക്ക് പോവുകയായിരുന്ന ടിപ്പർ ലോറിയുടെ ടയർ പൊട്ടി മൺതിട്ടയിലിടിച്ചാണ് അപകടമുണ്ടായതെന്ന് നാട്ടുകാർ പറഞ്ഞു.‌ ലോറിയാലുണ്ടായിരുന്ന ചെങ്കല്ലുകൾ റോഡിലേക്ക് വീണ് ഏറെ നേരം ഗതാഗത തടസമുണ്ടായി. നാദാപുരം പോലീസെത്തി ജെസിബി എത്തിച്ചാണ് റോഡിലെ കല്ലുകൾ നീക്കം ചെയ്തത്.

കട്ടിപ്പാറയിൽ കാട്ടുപന്നി കൃഷി നശിപ്പിച്ചു

താമരശേരി: കട്ടിപ്പാറ പഞ്ചായത്തിലെ മൂന്നാം വാർഡിൽ തുരുത്തി പള്ളി രാജുവിന്‍റെ വിളവെടുപ്പിന് പാകമായ കപ്പ കഴിഞ്ഞ ദിവസം രാത്രി കാട്ടുപന്നി കൂട്ടം നശിപ്പിച്ചു. പഞ്ചായത്തിന്‍റെ മലയോര പ്രദേശങ്ങളിൽ എല്ലാം കാട്ടുപന്നിയെത്തി ഇടവിള കൃഷി നശിപ്പിക്കുന്നത് നിത്യസംഭവമാണ്. കട്ടിപ്പാറ പഞ്ചായത്തിൽ തോക്ക് ലൈസൻസ് ലഭിച്ചവർ കുറവാണ്. വനം വകുപ്പ് എം പാനൽ ഷൂട്ടർന്മാരെയും വേട്ട നായ്ക്കളെയും ഉപയോഗിച്ച് പഞ്ചായത്തിൽ പകൽ സമയത്ത് കാട് ഇളക്കി കാട്ടുപന്നികളെ വെടിവെച്ച് കൊല്ലാൻ പഞ്ചായത്ത് ഭരണസമിതി നടപടി സ്വീകരിക്കണമെന്ന് കട്ടിപ്പാറ സംയുക്ത കർഷക കൂട്ടായ്മ ആവശ്യപ്പെട്ടു.

ഡോൺ ബോസ്കോ കോളജിൽ ക്വിസ് മത്സരം സംഘടിപ്പിച്ചു

മുക്കം: മാമ്പറ്റ ഡോൺ ബോസ്കോ കോളജിൽ വച്ച് ഹയർ സെക്കൻഡറി വിദ്യാർഥികൾക്ക് വേണ്ടി ദി ലുമിനാറി ലീഗ്, സ്റ്റേറ്റ് ലെവൽ ക്വിസ് മത്സരം സംഘടിപ്പിച്ചു. വിവിധ സ്കൂളുകളിൽ നിന്ന് കുട്ടികൾ പങ്കെടുത്ത പരിപാടി കോളജ് പ്രിൻസിപ്പൽ‌ ഡോ. ഫാ. ജോബി എം. ഏബ്രഹാം ഉദ്ഘാടനം ചെയ്തു. കോളജ് വൈസ് പ്രിൻസിപ്പൽ ജിജി ജോർജ് അധ്യക്ഷത വഹിച്ചു. എം. സാരഗ് ബിജു, കെ.കെ. ദിലു ( ജിഎച്ച്എസ്എസ് നരിക്കുനി) ഒന്നാം സ്ഥാനം കരസ്ഥമാക്കി. ഹിദ ഫാത്തിമ, ഡാനിയ സത്താർ (എംകെഎച്ച്എം എംഒവിഎച്ച് ഫോർ ഗേൾസ്, മുക്കം) രണ്ടാം സ്ഥാനവും നീരജ് സുനിൽ, നവനീത് സതീഷ് (സെന്‍റ് ജോസഫ്സ് എച്ച്എസ്എസ് കോടഞ്ചേരി) മൂന്നാം സ്ഥാനവും കരസ്ഥമാക്കി. വിജയികൾക്ക് ക്യാഷ് പ്രൈസും സർട്ടിഫിക്കറ്റും നൽകി. കോളജ് അഡ്മിനിസ്ട്രേറ്റർ ഫാ. ഷിനോ ‌പ്രസംഗിച്ചു. പരിപാടികൾക്ക് ക്വിസ് മാസ്റ്റർ ഡോ. ഐശ്വര്യ അനിൽ, ക്വിസ് ക്ലബ്‌ കോഡിനേറ്റർ പി. അഞ്ജലി, സ്റ്റുഡന്‍റ് കോഡിനേറ്റർ ഹിഷാം, കോളജ് അധ്യപകരായ ലിജു, ജംഷിന, ആതിര എന്നിവർ നേതൃത്വം നൽകി.

മുക്കം ഉപജില്ല കായികമേള; പുല്ലൂരാംപാറ സ്കൂൾ ജേതാക്കൾ

തിരുവമ്പാടി: മുക്കം ഉപജില്ല കായിക മേളയിൽ പുല്ലൂരാംപാറ സെന്‍റ് ജോസഫ്സ് ഹയർ സെക്കൻഡറി സ്കൂൾ 510 പോയിന്‍റോടെ ജേതാക്കളായി. കൂടരഞ്ഞി സെന്‍റ് സെബാസ്റ്റ്യൻസ് ഹയർ സെക്കൻഡറി സ്കൂൾ 105 പോയിന്‍റോടെ റണ്ണറപ്പായി. തോട്ടുമുക്കം സെന്‍റ് തോമസ് ഹയർ സെക്കൻഡറി സ്കൂൾ 53 പോയിന്‍റോടെ മൂന്നാം സ്ഥാനം കരസ്ഥമാക്കി. സ്കൂൾ മാനേജർ ഫാ. കുര്യാക്കോസ് മുകാല അധ്യക്ഷനായി. സമാപന സമ്മേളനത്തിൽ വിജയികൾക്കുളള ട്രോഫികൾ വിതരണം ചെയ്തു. യോഗത്തിൽ മുക്കം എഇഒ ദീപ്തി, പ്രധാനാധ്യാപകരായ സുനിൽ ജോസഫ്, ബിനു ബേബി, ജോളി ജോസഫ്, സിബി കുര്യാക്കോസ്, പിടിഎ പ്രസിഡന്‍റ് വിത്സൺ ടി. മാത്യു, കായികാധ്യാപകൻ എഡ്വേർഡ് എന്നിവർ പ്രസംഗിച്ചു.

നഗര, ഗ്രാമ വ്യത്യാസമില്ലാതെ മികച്ച റോഡുകളൊരുക്കലാണ് ലക്ഷ്യം: മന്ത്രി

നവീകരിച്ച വില്യാപ്പള്ളി- എടച്ചേരി-ഇരിങ്ങണ്ണൂർ റോഡ് മന്ത്രി മുഹമ്മദ് റിയാസ് ഉദ്ഘാടനം ചെയ്തു കോഴിക്കോട്: നഗര, ഗ്രാമ വ്യത്യാസമില്ലാതെ സംസ്ഥാനത്തെ എല്ലാ റോഡുകളും മികച്ചതാക്കി നാടിന് സമർപ്പിക്കുകയാണ് സർക്കാർ ലക്ഷ്യമെന്ന് മന്ത്രി പി.എ. മുഹമ്മദ് റിയാസ്. ഇതിനായുള്ള പ്രവർത്തനങ്ങൾ അതിവേഗം പുരോഗമിക്കുകയാണെന്നും നാദാപുരം നിയോജക മണ്ഡലത്തിൽ പൊതുമരാമത്ത് 3.5 കോടി രൂപ ചെലവിൽ ആധുനികരീതിയിൽ നവീകരിച്ച വില്യാപ്പള്ളി- എടച്ചേരി-ഇരിങ്ങണ്ണൂർ റോഡ് ഉദ്ഘാടനം ചെയ്തുകൊണ്ട് മന്ത്രി പറഞ്ഞു. ചെറിയ കാലയളവിൽ തന്നെ റോഡുകളെല്ലാം ഉയർന്ന നിലവാരത്തിൽ നവീകരിക്കാനും പ്രവൃത്തി പൂർത്തിയാക്കാനും സർക്കാരിനായി. പൊതുമരാമത്ത് റോഡുകൾ ബിഎം ആൻഡ് ബിസി നിലവാരത്തിൽ നിർമ്മിക്കുന്നതിലൂടെ സംസ്ഥാനത്തെ റോഡുകൾ മികവുറ്റതായി മാറുമെന്നും മന്ത്രി പറഞ്ഞു. വില്ല്യാപ്പള്ളി-എടച്ചേരി-ഇരിങ്ങണ്ണൂർ റോഡിൽ വേങ്ങോളി പാലം മുതൽ എടച്ചേരി വരെയാണ് നവീകരിച്ചത്. ബിഎം ബിസി നിലവാരത്തിൽ നവീകരിച്ച റോഡിൽ ഡ്രൈനേജുകൾ, റോഡ് സൈഡ് കോൺക്രിറ്റ്, റോഡ് സുരക്ഷ ബോർഡുകൾ, റോഡ് മാർക്കിംഗ് എന്നിവ ഉൾപ്പെടുത്തിയിട്ടുണ്ട്. വേങ്ങോളി പാലത്തിന് സമീപം നടന്ന ചടങ്ങിൽ ഇ.കെ. വിജയൻ എംഎൽഎ അധ്യക്ഷനായി. തൂണേരി ബ്ലോക്ക് പഞ്ചായത്ത് പ്രസിഡന്‍റ് കെ.പി. വനജ, എടച്ചേരി പഞ്ചായത്ത് പ്രസിഡന്‍റ് എൻ. പത്മിനി ടീച്ചർ, തൂണേരി ബ്ലോക്ക് പഞ്ചായത്ത് വൈസ് പ്രസിഡന്‍റ് ടി.കെ. അരവിന്ദാക്ഷൻ, എടച്ചേരി പഞ്ചായത്ത് വൈസ് പ്രസിഡന്‍റ് എം. രാജൻ, പഞ്ചായത്ത് സ്റ്റാൻഡിംഗ് കമ്മിറ്റി അധ്യക്ഷരായ രാജൻ കൊയിലോത്ത്, എൻ. നിഷ, ഷീമ വള്ളിൽ, സ്റ്റാൻഡിംഗ് കമ്മിറ്റി ഉപാധ്യക്ഷൻ ടി.വി. ഗോപാലൻ, എക്സിക്യൂട്ടീവ് എഞ്ചിനീയർ വി.കെ. ഹാഷിം തുടങ്ങിയവർ പങ്കെടുത്തു. മരുതോങ്കര പുളിക്കൽ പാലം നാടിന് സമർപ്പിച്ചു കോഴിക്കോട്: മരുതോങ്കര പഞ്ചായത്തിലെ പുളിക്കൽ പാലം മന്ത്രി പി.എ. മുഹമ്മദ് റിയാസ് ഉദ്ഘാടനം ചെയ്തു. പശ്ചാത്തല സൗകര്യ വികസനത്തിലും ജനക്ഷേമ പ്രവർത്തനങ്ങളിലും സംസ്ഥാനം കൈവരിച്ച നേട്ടങ്ങൾ മറ്റ് സംസ്ഥാനങ്ങൾക്ക് മാതൃകയാണെന്ന് മന്ത്രി പറഞ്ഞു. ലൈഫ് ഭവന പദ്ധതി ഒരുപാട് പേർക്ക് ആശ്വാസമായി, പട്ടയം നൽകുന്ന കാര്യത്തിൽ സർവകാല റെക്കോർഡോടെ സർക്കാർ മുന്നോട്ടു പോവുകയാണ്. അതിദരിദ്രരില്ലാത്ത സംസ്ഥാനം എന്ന വലിയ ലക്ഷ്യത്തിലേക്ക് സംസ്ഥാനം അടുത്തുകൊണ്ടിരിക്കുകയാണെന്നും മന്ത്രി പറഞ്ഞു. മലയോര പ്രദേശമായ പശുക്കടവ് പുളിക്കൽ ഭാഗത്ത് നാൽപ്പതോളം കുടുംബങ്ങളുടെ ചിരകാല സ്വപ‌നമായിരുന്നു ചടയൻതോടിന് കുറുകെ പാലം. ഇതാണ് റീബിൽഡ് കേരള പദ്ധതിയിലൂടെ 57 ലക്ഷം രൂപ ചെലവഴിച്ച് നിർമിച്ച പുളിക്കൽ പാലത്തിലൂടെ യാഥാർത്ഥ്യമായത്. ഇ.കെ. വിജയൻ എംഎൽഎ അധ്യക്ഷത വഹിച്ചു. മരുതോങ്കര പഞ്ചായത്ത് വൈസ് പ്രസിഡന്‍റ് ശോഭ അശോകൻ, സ്റ്റാൻഡിംഗ് കമ്മിറ്റി ചെയർപേഴ്സൺമാരായ സി.പി. ബാബുരാജ്, ഡെന്നി തോമസ്, വി.പി. .റീന, അസിസ്റ്റന്‍റ് എൻജിനീയർ റാൻസി, ഉദ്യോഗസ്ഥർ, രാഷ്ട്രീയ പാർട്ടി പ്രതിനിധികൾ തുടങ്ങിയവർ പങ്കെടുത്തു.

സ്വർണക്കപ്പിൽ മുത്തമിട്ട് അഴിക്കോടന്‍ അച്ചാം തുരുത്തി

ചാലിയാറിന്‍റെ ഇരുകരകളിലുമുള്ള പതിനായിരങ്ങളെ ആവേശത്തിന്‍റെ കൊടുമുടിയിൽ എത്തിച്ച് ഓളപ്പരപ്പിൽ ആവേശത്തിന്‍റെ തുഴയെറിഞ്ഞ ചാമ്പ്യൻസ് ബോട്ട് ലീഗ് ചാമ്പ്യൻഷിപ്പിൽ വേഗരാജാക്കൻമാരായി അഴിക്കോടന്‍ അച്ചാം തുരുത്തി. പാലിച്ചോൻ അച്ചാം തുരുത്തി എ ടീമിനെ പിന്നിലാക്കിയാണ് അഴിക്കോടന്‍ അച്ചാം തുരുത്തി ചാമ്പ്യൻസ് ബോട്ട് ലീഗിലെ ജലരാജാക്കൻമാരായത്. അണിയത്ത് സജിരാജ്, അമരത്ത് കെ.പി. വിജേഷും വള്ളം നിയന്ത്രിച്ചു. കെ. ദീപേഷ് ആയിരുന്നു ടീം മാനേജർ. എകെജി പോടോത്തുരുത്തി എ ടീം മൂന്നാം സ്ഥാനവും കരസ്ഥമാക്കി. വൻ ജനാവലിയെ സാക്ഷിയാക്കി മന്ത്രി പി.എ. മുഹമ്മദ് റിയാസിൽ നിന്നും വിജയികൾ ട്രോഫി ഏറ്റുവാങ്ങി. ഒന്ന്, രണ്ട്, മൂന്ന് സ്ഥാനങ്ങളിലെത്തിയവർക്ക് യഥാക്രമം ഒന്നര ലക്ഷം രൂപ, ഒരു ലക്ഷം രൂപ, അമ്പതിനായിരം രൂപ എന്നിങ്ങനെയാണ് സമ്മനത്തുക ലഭിച്ചത്. പങ്കെടുത്ത വള്ളങ്ങൾക്ക് ഒരു ലക്ഷം രൂപ വീതമാണ് ബോണസ്.

ചാമ്പ്യൻസ് ബോട്ട് ലീഗിന് ചാലിയാർ സ്ഥിരം വേദിയാകും: മുഹമ്മദ് റിയാസ്

കോഴിക്കോട്: ചാമ്പ്യൻസ് ബോട്ട് ലീഗിന് ചാലിയാർ സ്ഥിരം വേദിയായിരിക്കുമെന്ന് മന്ത്രി പി.എ. മുഹമ്മദ് റിയാസ്. സംസ്ഥാന ടൂറിസം വകുപ്പ് ഐപിഎൽ മാതൃകയിൽ സംഘടിപ്പിക്കുന്ന മൂന്നാമത് വള്ളംകളി ലീഗായ ചാമ്പ്യൻസ് ബോട്ട് ലീഗ് (സിബിഎൽ) മത്സരങ്ങൾ ഫറോക്ക് പഴയ പാലത്തിന് സമീപം ഉദ്ഘാടനം ചെയ്യുകയായിരുന്നു മന്ത്രി. കേരളത്തിലെ വള്ളം കളി ലോകപ്രശസ്തമാണ്. വടക്കൻ ജില്ലകളിലെ ടൂറിസം സാധ്യതകൾ വളർത്തുക എന്ന ലക്ഷ്യത്തോടെയാണ് സിബിഎൽ ആരംഭിച്ചതെന്നും മന്ത്രി പറഞ്ഞു. പിഡബ്ല്യുഡി റസ്റ്റ്‌ ഹൗസുകളിൽ ഓൺലൈൻ ബുക്കിംഗ് ആരംഭിച്ചതിനുശേഷം 30 കോടി രൂപ അധിക വരുമാനം സർക്കാരിന് ലഭിച്ചു. ഇതിൽ ഭൂരിപക്ഷം ആളുകളും വിനോദ സഞ്ചാരികളാണെന്ന് മന്ത്രി പറഞ്ഞു. ടൂറിസം സാധ്യതകൾ വികസിക്കുന്നത് നാടിന് ഒന്നാകെ മാറ്റം കൊണ്ടുവരും. ദേശീയപാത വികസനം 450 കിലോമീറ്റർ പൂർത്തിയായി. ദേശീയപാത വികസനം ജനങ്ങളുടെ യാത്രാസൗകര്യത്തിൽ വലിയ രീതിയിലുള്ള മാറ്റം കൊണ്ടുവരുമെന്നും മന്ത്രി പറഞ്ഞു. ചുരുളൻ വള്ളങ്ങളെ ഉൾപ്പെടുത്തിക്കൊണ്ടുള്ള സിബിഎൽ മത്സരങ്ങൾ ചാലിയാർ പുഴയിൽ ഫറോക്ക് പുതിയ പാലത്തിൽ നിന്നും ആരംഭിച്ച് പഴയ പാലത്തിനു സമീപത്തായി അവസാനിക്കുന്ന രീതിയിലാണ് നടത്തിയത്. കാസർഗോഡ്, കണ്ണൂർ ജില്ലകളിൽ നിന്നുള്ള 60 അടി നീളമുള്ള 15 ചുരുളൻ വള്ളങ്ങളാണ് മത്സരങ്ങളിൽ പങ്കെടുത്തത്. ഓരോ വള്ളത്തിലും 30 തുഴച്ചിലുകാർ. മൂന്ന് ട്രാക്കുകളിലായി അഞ്ച് ഹീറ്റ്സ് മത്സരങ്ങളും തുടർന്ന് രണ്ട് ലൂസേഴ്സ് മത്സരങ്ങളും ഫൈനൽ മത്സരവും നടന്നു. ഫറോക്ക് നഗരസഭ ചെയർമാൻ എൻ.സി. അബ്ദുൾ റസാഖ് അധ്യക്ഷത വഹിച്ചു. മുൻ എംഎൽഎ വി.കെ.സി. മമ്മദ് കോയ മുഖ്യാതിഥിയായി. ജനഹൃദയങ്ങൾ കീഴടക്കി ചുരുളൻ വള്ളങ്ങൾ അതിവേഗതയോടെ ചാലിയാറിനെ മുറിച്ചു മുന്നോട്ടു കുതിച്ച ചുരുളൻ വള്ളങ്ങളെ ആർപ്പ് വിളികളോടെയാണ്‌ കാഴ്ചക്കാർ സ്വീകരിച്ചത്. ചാമ്പ്യൻസ് ബോട്ട് ലീഗ് കാണാനെത്തിയവരെ നേരിൽകണ്ടും വിശേഷം പറഞ്ഞും മന്ത്രി മുഹമ്മദ് റിയാസ് മത്സര വേദിയിൽ നിറസാന്നിധ്യമായിരുന്നു. വള്ളംകളിയുടെ ഇടവേളകളിൽ ജലാഭ്യാസ പ്രകടനങ്ങളും മലബാർ മെഹന്തി കൊടുങ്ങല്ലൂർ അവതരിപ്പിച്ച ഫ്യൂഷൻ ഡാൻസ്, ചെണ്ട മേളം, സൂഫി നൃത്തം തുടങ്ങിയ കലാപരിപാടികളും അരങ്ങേറി. സിനിമ കഥാപാത്രങ്ങളുടെ കാർട്ടൂൺ വേഷധാരികൾ മത്സരം കാണാനെത്തിയവർക്ക് ചിരി കാഴ്ചയായിരുന്നു. മത്സരത്തിന്‍റെ സുരക്ഷ സംവിധാനങ്ങള്‍ക്കായി അഗ്നിരക്ഷാ സേന, കോസ്റ്റ് ഗാര്‍ഡ്, സിവില്‍ ഡിഫന്‍സ് എന്നിവരുടെ പൂർണ സമയ സേവനവും ഉണ്ടായിരുന്നു.

ഷാഫി പറമ്പിലിന് മര്‍ദനമേറ്റ സംഭവം : പോലീസുകാരെ ബലിയാടാക്കി രക്ഷപെടാന്‍ ഉന്നത ഉദ്യോഗസ്ഥ നീക്കം?

പാര്‍ലമെന്‍റ് പ്രിവിലേജ് കമ്മിറ്റിക്ക് പരാതി നൽകാൻ കോൺഗ്രസ് കോഴിക്കോട്: ഷാഫി പറമ്പില്‍ എംപിക്കെതിരായ പോലീസ് മര്‍ദനം ലോക്‌സഭയിലടക്കം വന്‍ വിവാദമാകുമെന്നു മുന്നില്‍കണ്ട് കീഴുദ്യോഗസ്ഥരെ ബലിയാടാക്കി രക്ഷപെടാനാണ് ഉന്നത പോലീസ് ഉദ്യോഗസ്ഥരുടെ നീക്കമെന്ന ആക്ഷേപം ശക്തമാകുന്നു. പോലീസ് ഷാഫിയെ മര്‍ദിച്ചിട്ടില്ലെന്ന് ഭരണപക്ഷത്തെ നേതാക്കള്‍ ആവര്‍ത്തിക്കുന്നതിനിടെയാണ് റൂറല്‍ എസ്പി കെ.ഇ. ബൈജു ഇതിനു വിരുദ്ധമായി ഇന്നലെ നടത്തിയ പ്രതികരണം. ഷാഫിയെ മര്‍ദിച്ച സംഭവം പാര്‍ലമെന്‍റ് പ്രിവിലേജ് കമ്മിറ്റിക്ക് മുന്നില്‍ പരാതിയായി എത്തുമെന്ന് കണ്ടതോടെ പോലീസുകാരെ പഴിചാരി തലയൂരാനുള്ള ശ്രമമാണ് ഉന്നത പോലീസ് ഉദ്യോഗസ്ഥര്‍ നടത്തുന്നതെന്ന ആരോപണമാണ് ബലപ്പെടുന്നത്. പോലീസിലെ ചിലര്‍ മനഃപൂര്‍വം പ്രശ്‌നമുണ്ടാക്കാന്‍ ശ്രമിച്ചുവെന്നും അവര്‍ ഷാഫിയുടെ തലയില്‍ ലാത്തികൊണ്ടടിച്ചുവെന്നുമാണ് റൂറല്‍ എസ്പി വെളിപ്പെടുത്തിയത്. ഷാഫിക്ക് മര്‍ദനമേറ്റ സംഭവത്തില്‍ ഏതാനും കീഴുദ്യോഗസ്ഥര്‍ക്കെതിരേ നടപടി ഉണ്ടാകുമെന്നും അവര്‍ക്കെതിരേ അന്വേഷണം നടക്കുകയാണെന്നുമുള്ള സൂചനയും റൂറല്‍ എസ്പിയുടെ വെളിപ്പെടുത്തലില്‍ ഉണ്ടായിരുന്നു. ഷാഫിക്ക് പരിക്കേല്‍ക്കാനിടയായ സാഹചര്യത്തെക്കുറിച്ച് പോലീസ് രഹസ്യാന്വേഷണ വിഭാഗങ്ങള്‍ അന്വേഷണം തുടങ്ങി. ലാത്തിച്ചാര്‍ജ് നടത്തിയിട്ടില്ലെന്നും സംഘം ചേര്‍ന്നവരെ പിരിച്ചുവിടാന്‍ കണ്ണീര്‍ വാതകം പ്രയോഗിച്ചപ്പോള്‍ ഉണ്ടായ സമ്മര്‍ദത്തില്‍ എംപിക്ക് പരിക്കേറ്റതാകാമെന്നുമായിരുന്നു റൂറല്‍ എസ്പിയുടെ മുന്‍ വാദം. ഈ വാദം പൊളിക്കുന്ന ദൃശ്യങ്ങള്‍ പുറത്തു വരികയും ലോക്‌സഭാ സ്പീക്കര്‍ക്ക് പരാതി നല്‍കുമെന്ന് യുഡിഎഫ് അറിയിക്കുകയും ചെയ്ത സാഹചര്യത്തിലാണ് റൂറല്‍ എസ്പി മുന്‍നിലപാടില്‍ നിന്ന് മലക്കം മറിഞ്ഞത്. ഷാഫിക്കു മര്‍ദനമേറ്റ സംഭവത്തില്‍ പ്രതിഷേധം കടുപ്പിക്കാനാണ് യുഡിഎഫിന്‍റെ തീരുമാനം. സംഘര്‍ഷത്തിനിടെ പോലീസ് ഷാഫിയുടെ തലയ്ക്ക് അടിക്കുന്നത് ദൃശ്യങ്ങളില്‍ വ്യക്തമാണ്. ഈ ദൃശ്യങ്ങള്‍ സഹിതം ശക്തമായ പ്രതിഷേധം ഉയര്‍ത്താനും നിയമപോരാട്ടം നടത്താനുമാണ് കോണ്‍ഗ്രസിന്‍റെ തീരുമാനം. ജനപ്രതിനിധികളെ പോലീസ് മര്‍ദിക്കുന്നത് പതിവില്ലെന്നും പേരാമ്പ്രയില്‍ ആദ്യം തന്നെ എംപിയുടെ തലയ്ക്കടിച്ച് അപായപ്പെടുത്തലായിരുന്നു പോലീസിന്‍റെ ലക്ഷ്യമെന്നും കോണ്‍ഗ്രസ് ആരോപിക്കുന്നു. അക്രമത്തിനു മുതിര്‍ന്നത് മുന്‍ ഡിവൈഎഫ്ഐ പ്രവര്‍ത്തകനായ പോലീസുകാരനാണെന്നും കോണ്‍ഗ്രസ് ചൂണ്ടിക്കാട്ടുന്നു.

ഷാഫി പറമ്പില്‍ എംപി ഐസിയുവില്‍ തുടരുന്നു

കോഴിക്കോട്: പേരാമ്പ്ര സംഘര്‍ഷത്തില്‍ മുഖത്തിനു സാരമായി പരിക്കേറ്റ് ശസ്ത്രക്രിയയ്ക്ക് വിധേയനായ ഷാഫി പറമ്പില്‍ എംപി വിദഗ്ധ ഡോക്ടര്‍മാരുടെ നിരീക്ഷണത്തില്‍ കോഴിക്കോട്ടെ സ്വകാര്യ ആശുപത്രിയിലെ ഐസിയുവില്‍ തുടരുന്നു. വെള്ളിയാഴ്ച രാത്രി ആശുപത്രിയില്‍ പ്രവേശിപ്പിക്കപ്പെട്ട എംപിയുടെ ഇടതു മൂക്കിന്‍റെ അസ്ഥി പൊട്ടുകയും സ്ഥാനം തെറ്റുകയും ചെയ്തിരുന്നു. മൂക്കിന്‍റെ പാലം വളയുക കൂടി ചെയ്ത സാഹചര്യത്തിലാണ് ശസ്ത്രക്രിയയ്ക്ക് വിധേയനാക്കിയത്. ആശുപത്രിയില്‍ കഴിയുന്ന ഷാഫിയെ ഇന്നലെ നിരവധി നേതാക്കള്‍ സന്ദര്‍ശിച്ചു. കെപിസിസി വര്‍ക്കിംഗ് പ്രസിഡന്‍റ് പി.സി. വിഷ്ണുനാഥ് എംഎല്‍എ, ആര്‍എസ്പി സംസ്ഥാന സെക്രട്ടറി ഷിബു ബേബി ജോണ്‍, മുന്‍ എംപി രമ്യ ഹരിദാസ്, ഡിസിസി പ്രസിഡന്‍റ് അഡ്വ. കെ. പ്രവീണ്‍കുമാര്‍, മുന്‍ എംഎല്‍എമാരായ കെ.എം. ഷാജി, സി.പി. മുഹമ്മദ്, കെഎസ്‌യു സംസ്ഥാന പ്രസിഡന്‍റ് അലോഷ്യസ് സേവ്യര്‍, കെപിസിസി ഭാരവാഹികളായ സോണി സെബാസ്റ്റ്യന്‍, വി.എ. നാരായണന്‍, സജീവ് മാറോളി, കെ.സി. അബു, യൂത്ത് കോണ്‍ഗ്രസ് ദേശീയ സെക്രട്ടറി ബിനു ചുള്ളിയില്‍, ഒ.ജെ. ജനീഷ്, കെ.എം. അഭിജിത്ത് തുടങ്ങിയവര്‍ ഷാഫിയെ സന്ദര്‍ശിച്ച് ആരോഗ്യവിവരങ്ങള്‍ അന്വേഷിച്ചു. ഡോക്ടര്‍മാരുടെ നിര്‍ദേശത്തെ തുടര്‍ന്ന് എംപിയുടെ 10 ദിവസത്തെ ഔദ്യോഗിക പരിപാടികള്‍ മാറ്റിവച്ചിട്ടുണ്ട്. ഷാഫിയെ സന്ദര്‍ശിക്കാനായി പ്രതിപക്ഷ നേതാവ് വി.ഡി. സതീശന്‍ ഇന്ന് കോഴിക്കോട് എത്തും. ഷാഫിക്കെതിരേ നടന്നത് ബോധപൂര്‍വമായ ആക്രമണം: ബിനു ചുള്ളിയില്‍ കോഴിക്കോട്: ഷാഫി പറമ്പില്‍ എംപിക്കെതിരേ പേരാമ്പ്രയില്‍ ഉണ്ടായത് ബോധപൂര്‍വമായ ആക്രമണമാണെന്ന് യൂത്ത് കോണ്‍ഗ്രസ് ദേശീയ സെക്രട്ടറി ബിനു ചുള്ളിയില്‍. ഷാഫി പറമ്പിലിനെ കോഴിക്കോട് സ്വകാര്യ ആശുപത്രിയില്‍ സന്ദര്‍ശിച്ച ശേഷം പ്രതികരിക്കുകയായിരുന്നു അദ്ദേഹം. കേരള പോലീസില്‍ സിപിഎമ്മിന്‍റെ ഫ്രാക്‌ഷന്‍ ആയി പ്രവര്‍ത്തിക്കുന്ന എസ്പിയാണ് ഷാഫി പറമ്പിലിനെ ആക്രമിക്കാന്‍ നേതൃത്വം നല്‍കിയത്. ശബരിമലയിലെ സ്വര്‍ണക്കൊള്ള മറച്ചുവയ്ക്കാനാണ് ഷാഫി പറമ്പിലിനെ പോലീസ് അക്രമിച്ചത്. സര്‍ക്കാരിനെതിരേ ആരോപണങ്ങള്‍ ഉയരുന്ന സാഹചര്യങ്ങളിലെല്ലാം ഇത്തരത്തില്‍ പോലീസിനെ ഉപയോഗിച്ച് അതിക്രമം നടത്തുന്നത് പതിവാണ്. ഷാഫിയെ ആക്രമിച്ച വിഷയത്തില്‍ എസ്പി ഉള്‍പ്പെടെയുള്ള പോലീസ് ഉദ്യോഗസ്ഥര്‍ക്കെതിരേ നടപടി സ്വീകരിക്കണമെന്നും ബിനു ചുള്ളിയില്‍ ആവശ്യപ്പെട്ടു. കെപിസിസി അംഗം എ.എം. രോഹിത്, കേരളത്തിന്‍റെ ചുമതലയുള്ള യൂത്ത് കോണ്‍ഗ്രസ് ദേശീയ സെക്രട്ടറി ഷംസീര്‍ അസാരി ഖാന്‍, യൂത്ത്‌കോണ്‍ഗ്രസ് സംസ്ഥാന ജനറല്‍ സെക്രട്ടറിമാരായ വി.പി. ദുല്‍ഖിഫില്‍, ബബിന്‍രാജ്, മുന്‍ ദേശീയ സെക്രട്ടറി വിദ്യ ബാലകൃഷ്ണന്‍, ലക്ഷദ്വീപ് യൂത്ത് കോണ്‍ഗ്രസ് പ്രസിഡന്‍റ് അജാസ് അക്ബര്‍ തുടങ്ങിയവരും ബിനു ചുളളിയിലിനൊപ്പമുണ്ടായിരുന്നു.

വിജയികൾക്ക് സർട്ടിഫിക്കറ്റ് വിതരണം ചെയ്തു

മുക്കം: രണ്ടാഴ്ചക്കാലം കൊടിയത്തൂർ ഗ്രാമപഞ്ചായത്തിന്‍റെ വിവിധ ഭാഗങ്ങളിൽ നടന്ന വിവിധ കേരളോത്സവ മത്സര വിജയികൾക്ക് സമ്മാനങ്ങളും സർട്ടിഫിക്കറ്റുകളും വിതരണം ചെയ്തു. പന്നിക്കോട് എയുപി സ്കൂളിൽ നടന്ന ചടങ്ങിന്‍റെ ഉദ്ഘാടനവും മത്സര വിജയികൾക്കുള്ള സമ്മാന വിതരണവും ഗ്രാമപഞ്ചായത്ത് പ്രസിഡന്‍റ് ദിവ്യ ഷിബു നിർവഹിച്ചു. വൈസ് പ്രസിഡന്‍റ് ഫസൽ കൊടിയത്തൂർ അധ്യക്ഷത വഹിച്ചു. സ്റ്റാൻഡിംഗ് കമ്മിറ്റി ചെയർമാൻമാരായ ബാബു പൊലുകുന്ന്, മറിയംകുട്ടി ഹസൻ, കോഓർഡിനേറ്റർ സി. ഫസൽ ബാബു, രാഗേഷ് ചെറുവാടി, ബഷീർ പാലാട്ട് തുടങ്ങിയവർ പ്രസംഗിച്ചു.

ബോട്ടിൽ ബൂത്തിലെ മാലിന്യം നീക്കുന്നില്ലെന്ന്

കൂരാച്ചുണ്ട്: പഞ്ചായത്ത് ടൗണിൽ സ്ഥാപിച്ച ബോട്ടിൽ ബൂത്തിലെ മാലിന്യം നീക്കം ചെയ്യുന്നില്ലെന്ന് പരാതി. കൂരാച്ചുണ്ട് ടൗണിലെ ഹൈസ്കൂൾ റോഡിന് സമീപം സ്ഥാപിച്ച ബോട്ടിൽ ബൂത്തിലെ പ്ലാസ്റ്റിക് മാലിന്യങ്ങളാണ് മാസങ്ങൾ പിന്നിട്ടിട്ടും നീക്കാത്ത നിലയിലുള്ളത്. എന്നാൽ ഇവിടെ മദ്യക്കുപ്പികൾ അടക്കം മറ്റ് മാലിന്യങ്ങളും നിക്ഷേപിക്കുന്നുണ്ടെന്ന് നാട്ടുകാർ പറയുന്നു. പ്ലാസ്റ്റിക് മാലിന്യങ്ങൾ നീക്കം ചെയ്യാൻ പഞ്ചായത്ത് അധികൃതർ നടപടി സ്വീകരിക്കണമെന്നാണ് നാട്ടുകാർ ആവശ്യപ്പെടുന്നത്.

ചാമ്പ്യന്‍സ് ബോട്ട് ലീഗ് മത്സരങ്ങള്‍ ഇന്ന് ഫറോക്കില്‍

കോഴിക്കോട്: സംസ്ഥാന ടൂറിസം വകുപ്പ് ഐപിഎല്‍ മാതൃകയില്‍ സംഘടിപ്പിക്കുന്ന വള്ളംകളി ലീഗായ ചാമ്പ്യന്‍സ് ബോട്ട് ലീഗിന്‍റെ (സിബിഎല്‍) ചുരുളന്‍ വള്ളങ്ങളുടെ മത്സരങ്ങള്‍ ഫറോക്കില്‍ ചാലിയാറില്‍ ഇന്ന് നടക്കും. ഫറോക്ക് പഴയ പാലത്തിനും പുതിയ പാലത്തിനുമിടയില്‍ നടക്കുന്ന മത്സരത്തില്‍ 14 വള്ളങ്ങളാണ് മാറ്റുരയ്ക്കുന്നത്. മത്സരങ്ങള്‍ മന്ത്രി പി.എ മുഹമ്മദ് റിയാസ് ഉദ്ഘാടനം ചെയ്യും. ഫറോക്ക് മുന്‍സിപ്പല്‍ ചെയര്‍മാന്‍ എന്‍.സി. അബ്ദുള്‍ റസാഖ് അധ്യക്ഷത വഹിക്കും. എം.കെ രാഘവന്‍ എംപി, കോഴിക്കോട് മേയര്‍ ബീനാ ഫിലിപ്പ്, ജില്ലാ പഞ്ചായത്ത് പ്രസിഡന്‍റ് ഷീജാ ശശി, ജില്ലാ കളക്ടര്‍ സ്‌നേഹില്‍ കുമാര്‍ സിംഗ്, കെടിഐഎല്‍ ചെയര്‍മാന്‍ എസ്.കെ. സജിഷ്, മുന്‍ എംഎല്‍എ വി.കെ.സി. മമ്മദ് കോയ എന്നിവര്‍ പങ്കെടുക്കും. മത്സരങ്ങള്‍ ഉച്ചതിരിഞ്ഞ് രണ്ടിന് ആരംഭിക്കും. ഒരു വള്ളത്തില്‍ 30 തുഴച്ചിലുകാര്‍ ഉണ്ടായിരിക്കും. അഞ്ച് ഹീറ്റ്‌സ് മത്സരങ്ങളും അതില്‍ നിന്ന് സമയക്രമം അനുസരിച്ച് മൂന്ന് ഫൈനലുകളും (ഫസ്റ്റ് ലൂസേഴ്‌സ്, ലൂസേഴ്‌സ്, ഫൈനല്‍) നടക്കും. വൈകുന്നേരം അഞ്ചിന് സമ്മാനദാനം നടക്കും.

സ്ത്രീചേതന വിചാര സദസ് നടത്തി

കോഴിക്കോട്: മുതിര്‍ന്ന പൗരന്മാരും ആരോഗ്യ നിയമപരിരക്ഷയും എന്ന വിഷയത്തില്‍ സ്ത്രീചേതനയുടെ നേതൃത്വത്തില്‍ വിചാര സദസ് നടത്തി. മുതിര്‍ന്ന പൗരന്മാരുടെ ആരോഗ്യ സംരക്ഷണത്തിന് വ്യായാമം, പോഷകസമ്പുഷ്ടമായ ഭക്ഷണം, പൊതുസമൂഹവുമായുള്ള നിരന്തര സമ്പര്‍ക്കം എന്നിവ ആവശ്യമാണെന്നും മുതിര്‍ന്ന പൗരന്മാര്‍ അവരവരുടെ ആരോഗ്യ കാര്യങ്ങളില്‍ സ്വയം ശ്രദ്ധ പുലര്‍ത്തേണ്ടത് അത്യാവശ്യമാണെന്നും ഉദ്ഘാടനം ചെയ്ത ഡോ. നളിനിവാര്യര്‍ പറഞ്ഞു. സ്ത്രീചേതന വൈസ് പ്രസിഡന്‍റ് എ.ആര്‍. സുപ്രിയ , അഡ്വ. ജിഷ പള്ളിക്കര എന്നിവര്‍ ചര്‍ച്ച നയിച്ചു. സ്ത്രീചേതന പ്രസിഡന്‍റ് ഡോ. എം.കെ. ബിന്ദു അധ്യക്ഷത വഹിച്ചു. അഡ്വ. ഗീതാറാണി, ഡോ. എം.കെ ശ്രീലത, ശൈലജ പണിക്കര്‍ എന്നിവര്‍ പ്രസംഗിച്ചു.

ബ്ലാക്ക് ബെൽറ്റുമായി എട്ടാം ക്ലാസുകാരി

കോഴിക്കോട്: കരാട്ടയിൽ ബ്ലാക്ക് ബെൽറ്റ് സ്വന്തമാക്കിയിരിക്കുകയാണ് എട്ടാം ക്ലാസുകാരി തോട്ടുമുക്കം ചുണ്ടത്തുംപൊയിൽ സ്വദേശിയായ അനിറ്റ റോജൻ. മൂന്ന് വർഷത്തെ കഠിനാധ്വാനവും അർപ്പണബോധവുമാണ് അനിറ്റയെ ഈ നേട്ടത്തിലെത്തൻ സഹായിച്ചത്. മുതിർന്ന പലരും ആറും ഏഴുംവർഷം കഠിനാധ്വാനം ചെയ്തിട്ടാണ് ബ്ലാക്ക് ബെൽറ്റ് നേടുന്നത്. പരിശീലകൻ രാജന്‍റെ പിന്തുണയാണ് അനിറ്റ ഈ നേട്ടം കൈവരിക്കാൻ സഹായിച്ചത്. തോട്ടുമുക്കം ഹയർസെക്കൻഡറി സ്കൂൾ വിദ്യാർഥിയാണ് അനിറ്റ. ചുണ്ടത്തുപൊയിൽ സ്വദേശിയായ വെറ്റിലപ്പാറ ഹൈസ്കൂളിലെ അധ്യാപകൻ റോജന്‍റെയും എടവണ്ണ ഐഒഎച്ച്എസ്എസിലെ അധ്യാപിക അജി റോജന്‍റെയും മകളാണ്.

മർത്തമറിയം വനിത സമാജം സമ്മേളനം നടത്തി

കൂരാച്ചുണ്ട്: കോഴിക്കോട് സെന്‍റർ മർത്തമറിയം വനിത സമാജം ഏകദിന സമ്മേളനം കൂരാച്ചുണ്ട് ഓഞ്ഞിൽ സെന്‍റ് ജോൺസ് ഓർത്തഡോക്സ് പള്ളിയിൽ നടന്നു. ഫാ. ജേക്കബ് കുര്യൻ ചായനാനിയ്ക്കൽ കോർ എപ്പിസ്കോപ്പ ഉദ്ഘാടനം ചെയ്തു. ഫാ. ഷാനു ഏബ്രഹാം ക്ലാസുകൾ നയിച്ചു. ഇടവക വികാരി ഫാ. ജോമി ജോർജ്, സെന്‍റർ പ്രസിഡന്‍റ് ഫാ. ജിനു ജസ്റ്റിൻ, ഫാ. നിതിൻ കുര്യൻ എന്നിവർ പ്രസംഗിച്ചു. മേഴ്‌സി ബേബി, ബിന്ദു റോയ് എന്നിവർ വേദവായന, ഗീതം എന്നിവ അവതരിപ്പിച്ചു. ജോയിന്‍റ് സെക്രട്ടറി ഷേർലി പൗലോസ് റിപ്പോർട്ട്‌ അവതരിപ്പിച്ചു. നവജ്യോതി മോംസ് അവലോകനം മിനി മത്തായി നടത്തി. മേഖലയിലെ പത്തോളം പള്ളിയിൽ നിന്നായി 120 പ്രതിനിധികൾ സമ്മേളനത്തിൽ പങ്കെടുത്തു.

വിഷന്‍ 2031 പൊതുമരാമത്ത് വകുപ്പ് സെമിനാര്‍: സാമൂഹ്യ മാധ്യമ കാമ്പയിനിലൂടെ നിര്‍ദേശങ്ങള്‍ സ്വീകരിക്കും

കോഴിക്കോട്: സംസ്ഥാനതല "വിഷന്‍ 2031' ന്‍റെ ഭാഗമായി 18ന് കോഴിക്കോട് ബീച്ചിലെ ആസ്പിന്‍ കോര്‍ട്ട് യാര്‍ഡില്‍ നടക്കുന്ന പൊതുമരാമത്ത് വകുപ്പ് സെമിനാറിലേക്ക് പൊതുജനങ്ങളുടെ അഭിപ്രായങ്ങളും ആശയങ്ങളും സ്വീകരിക്കാനായി സാമൂഹ്യ മാധ്യമങ്ങളില്‍ വലിയ തോതില്‍ പ്രചരണം നടത്തുമെന്ന് മന്ത്രി പി.എ. മുഹമ്മദ് റിയാസ്. എല്ലാ ജനവിഭാഗങ്ങളില്‍ നിന്നും അഭിപ്രായങ്ങളും നിര്‍ദേശങ്ങളും ക്രിയാത്മകമായ വിമര്‍ശനങ്ങളും തേടുക എന്ന ഉദ്ദേശത്തോടെയാണ് കാമ്പയിന്‍ സംഘടിപ്പിക്കുന്നതെന്നും കളക്ടറേറ്റ് കോണ്‍ഫറന്‍സ് ഹാളില്‍ ചേര്‍ന്ന സെമിനാര്‍ സംഘാടക സമിതി അവലോകന യോഗത്തില്‍ അധ്യക്ഷത വഹിച്ചു മന്ത്രി പറഞ്ഞു. സെമിനാറിന്‍റെ ഭാഗമായി തയാറാക്കുന്ന നയരേഖയില്‍ ജനങ്ങളുടെ അഭിപ്രായവും നിര്‍ദേശങ്ങളും ഉള്‍പ്പെടുത്തുമെന്നും മന്ത്രി പറഞ്ഞു. കേരളത്തിലെ റോഡുകള്‍, പാലങ്ങള്‍, പിഡബ്ല്യുഡി റസ്റ്റ് ഹൗസുകള്‍ എന്നിവ സംബന്ധിച്ച് പൊതുജനങ്ങള്‍ക്ക് അഭിപ്രായം പറയാനും വിമര്‍ശിക്കാനുമുള്ള അവസരമൊരുക്കും. പശ്ചാത്തല വികസനം ഉള്‍പ്പെടെ വിവിധ മേഖലകളിലെ വിദഗ്ധര്‍, അനുഭവസമ്പത്തുള്ളവര്‍ തുടങ്ങിയവരെ സെമിനാറില്‍ പങ്കെടുപ്പിക്കാന്‍ മന്ത്രി ഉദ്യോഗസ്ഥര്‍ക്ക് നിര്‍ദേശം നല്‍കി. യുവജനങ്ങള്‍, ജില്ലയിലെ മികവിന്‍റെ കേന്ദ്രങ്ങളായ ഐഐഎം, എന്‍ഐടി, ഐഐടി തുടങ്ങി അക്കാദമിക സ്ഥാപനങ്ങളിലെ വിദഗ്ധര്‍, തൊഴിലാളി പ്രതിനിധികള്‍, കരാറുകാരുടെ പ്രതിനിധികള്‍, മുന്‍ ഉദ്യോഗസ്ഥര്‍, റസ്റ്റ് ഹൗസ് ഗുണഭോക്താക്കള്‍, ഗവേഷക വിദ്യാര്‍ഥികള്‍ തുടങ്ങിയവരെയും പ്രതിനിധികളായി പങ്കെടുപ്പിക്കും.

കലുങ്കിന്‍റെ സംരക്ഷണക്കെട്ട് തകർച്ചയിൽ

കൂരാച്ചുണ്ട്: പിഡബ്ല്യുഡിയുടെ അധീനതയിലുള്ള പ്രധാന റോഡിൽ നിർമിച്ചിട്ടുള്ള കലുങ്കിന്‍റെ സംരക്ഷണ ഭിത്തി തകർച്ചയിൽ. കൂരാച്ചുണ്ട്-കൂട്ടാലിട റോഡിൽ കൈതക്കൊല്ലി മേഖലയിൽ നിർമിച്ചിട്ടുള്ള കലുങ്കിന്‍റെ അടിത്തറയുടെ കരിങ്കൽ കെട്ടാണ് അപകട ഭീക്ഷണി നേരിടുന്നത്. കെട്ടിന്‍റെ തകർച്ചയുടെ വ്യാപ്തി ഏറിവരുന്നുണ്ട്. മാത്രമല്ല കലുങ്കിന്‍റെ കോൺക്രീറ്റ് സ്ലാബിന്‍റെ കമ്പികളും തുരുമ്പിച്ച് പുറത്തായ നിലയിലാണ്. ഇരുപത് അടിയോളം ഉയരത്തിലുള്ള കലുങ്ക് ആയതിൽ ഉയരത്തിലുള്ള സംരക്ഷണഭിത്തിയുമാണ്. ഇതിന്‍റെ അടിത്തറയുടെ നിരവധി കല്ലുകൾ അടർന്നുവീണ നിലയിലാണ്. കോഴിക്കോട്ടേക്കുള്ള പ്രധാന റോഡായതിനാൽ ഒട്ടനവധി ബസുകളും ഭാരം കയറ്റിയുള്ള വാഹനങ്ങളും ഇതുവഴി കടന്നുപോകുന്നുണ്ട്. വർഷങ്ങളായി സംരക്ഷണഭിത്തി തകർച്ചയിലായിട്ടും അധികൃതർ നടപടി സ്വീകരിക്കുന്നില്ലെന്നാണ് നാട്ടുകാരുടെ ആക്ഷേപം. കലുങ്കിന്‍റെ സുരക്ഷ ഉറപ്പാക്കാൻ അറ്റകുറ്റപ്പണി നടത്തണമെന്നും യാത്രക്കാർക്ക് സുരക്ഷ ഉറപ്പാക്കാൻ ബന്ധപ്പെട്ട അധികൃതർ അടിയന്തര നടപടി സ്വീകരിക്കണമെന്നുമാണ് നാട്ടുകാർ ആവശ്യപ്പെടുന്നത്.

15,000 കിലോമീറ്റർ പിഡബ്ല്യുഡി റോഡുകൾ ബിഎംബിസി നിലവാരത്തിലാക്കി: മന്ത്രി റിയാസ്

കുറ്റ്യാടി: പൊതുമരാമത്ത് വകുപ്പിന് കീഴിൽ വരുന്ന മുപ്പതിനായിരം കിലോമീറ്റർ റോഡുകളിൽ പതിനയ്യായിരം കിലോമീറ്റർ റോഡുകൾ ബിഎം ആൻഡ് ബിസി നിലവാരത്തിലുള്ളതാക്കി മാറ്റിയതായി മന്ത്രി പി.എ. മുഹമ്മദ് റിയാസ്. നാദാപുരം നിയോജക മണ്ഡലത്തിലെ ചാപ്പൻതോട്ടം-പൊയിലോംചാൽ- നിരവിൽപുഴ റോഡിന്‍റെ നിർമാണ പ്രവൃത്തി ഉദ്ഘാടനം ചെയ്ത് സംസാരിക്കുകയാരുന്നു മന്ത്രി. സംസ്ഥാനത്തെ ഓരോ നിയോജക മണ്ഡലത്തിലും റോഡുകളുടെ നിർമാണം നേരിട്ട് പരിശോധിക്കുന്നതിന് പൊതുമരാമത്ത് വകുപ്പ് എക്സിക്യൂട്ടീവ് എൻജിനിയറുടെ നേതൃത്വത്തിൽ രൂപീകരിച്ച സമിതി ഓരോ മാസവും റോഡ് നിർമാണ പ്രവൃത്തി വിലയിരുത്തുന്നുണ്ട്. ഇത്തരം ഇടപെടലുകളിലൂടെയാണ് സംസ്ഥാനത്തെ റോഡുകൾ ഇത്രയധികം മെച്ചപ്പെട്ടതെന്നും മന്ത്രി പറഞ്ഞു. രണ്ട് കോടി രൂപ ഭരണാനുമതിയോടെയാണ് ചാപ്പൻതോട്ടം-പൊയിലോംചാൽ- നിരവിൽപുഴ റോഡ് നിർമിക്കുന്നത്. ചാപ്പൻതോട്ടം മുതൽ പൊയിലോംചാൽ വരെ 3.80 മീറ്റർ വീതിയിൽ 40 എംഎംഎം എസ്എസ് പ്രവൃത്തിയും നാല് കലുങ്കുകൾ, അത്യാവശ്യ ഭാഗങ്ങളിൽ ഓവുപാൽ, ഐറിഷ് ബ്രെയിൻ എന്നിവയും ഉൾപ്പെടുത്തിയിട്ടുണ്ട്. റോഡ് സുരക്ഷയുടെ ഭാഗമായി റോഡ് മാർക്കിംഗ്, സൂചനാ ബോർഡുകൾ, സ്റ്റഡുകൾ എന്നീ സംവിധാനങ്ങളും ഒരുക്കും. ചടങ്ങിൽ ഇ.കെ. വിജയൻ എംഎൽഎ അധ്യക്ഷത വഹിച്ചു.

‌കായിക താരങ്ങൾക്ക് ജേഴ്‌സി വിതരണം ചെയ്തു

പുല്ലുരാംപാറ: സെന്‍റ് ജോസഫ്സ് ഹൈസ്കൂളിൽ കായിക താരങ്ങൾക്ക് ജേഴ്‌സി വിതരണം നടത്തി. തിരുവമ്പാടി പഞ്ചായത്ത് പ്രസിഡന്‍റ് ബിന്ദു ജോൺസൺ പരിപാടി ഉദ്ഘാടനം ചെയ്തു. സ്കൂൾ അസിസ്റ്റന്‍റ് മാനേജർ ഫാ. അമൽ പന്തംപ്ലാക്കൽ അധ്യക്ഷത വഹിച്ചു. താമരശേരി കാർഷിക വികസന ബാങ്ക് പ്രസിഡന്‍റ് ഗിരീഷ് ജോൺ ജേഴ്‌സി വിതരണം ചെയ്തു. ജില്ലാ പഞ്ചായത്തംഗം ബോസ് ജേക്കബ്, വാർഡ് അംഗം മേഴ്‌സി പുളിക്കാട്ട്, ഉപജില്ല വിദ്യാഭ്യാസ ഓഫീസർ ടി. ദീപ്തി, പ്രിൻസിപ്പൽ സുനിൽ ജോസഫ്, പ്രധാനാധ്യാപകരായ ജോളി ജോസഫ് ഉണ്ണിയേപ്പിള്ളിൽ, സിബി കുര്യാക്കോസ് തുടങ്ങിയവർ പ്രസംഗിച്ചു. താമരശേരി കാർഷിക വികസന ബാങ്കാണ് ജേഴ്‌സി സ്പോൺസർ ചെയ്തത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]