ADVERTISEMENT

ADVERTISEMENT

സെന്‍റ് ഗ്രിഗോറിയോസ് കോളജിൽ അന്താരാഷ്‌ട്ര സെമിനാർ നടത്തി

മീനങ്ങാടി: സെന്‍റ് ഗ്രിഗോറിയോസ് ടീച്ചേഴ്സ് ട്രെയിനിംഗ് കോളജിൽ "എക്സ്പ്ലോറിംഗ് ന്യൂറോ കോഗ്നിറ്റീവ് ഫൗണ്ടേഷൻ ഓഫ് മൈൻഡ്ഫുൾ എഡ്യുക്കേഷൻ വിതിൻ ദ ഫ്രെയിം വർക്ക് ഓഫ് ദ എൻഇപി 2020’ എന്ന വിഷയത്തിൽ ദ്വിദിന അന്താരാഷ്‌ട്ര സെമിനാർ നടത്തി.

എൻസിടിഇ ജനറൽ കൗണ്‍സിൽ അംഗം ജോബി ബാലകൃഷ്ണൻ ഉദ്ഘാടനം ചെയ്തു. മലബാർ ഭദ്രാസനാധിപൻ ഡോ. ഗീവർഗീസ് മോർ സ്തേഫാനോസ് അധ്യക്ഷത വഹിച്ചു.

കുടമാളൂർ യൂണിവേഴ്സിറ്റി ബിഎഡ് സെന്‍ററിലെ അധ്യാപകൻ ഡോ.പി.പി. രാജേഷ് മുഖ്യപ്രഭാഷണം നടത്തി. സെന്‍റ് ഗ്രിഗോറിയോസ് ടീച്ചേഴ്സ് കോളജ് പ്രിൻസിപ്പൽ ഡോ.ടോമി കെ. ഔസേപ്പ്, ബി.കെ. പ്രിയേഷ്കുമാർ, പ്രഫ.എം. സലീൽ, സുജ ജോണ്‍ എന്നിവർ പ്രസംഗിച്ചു. വിവിധ സെഷനുകളിൽ ദേശീയ,

അന്തർദേശീയതലങ്ങളിൽനിന്നുള്ളവർ പ്രബന്ധം അവതരിപ്പിച്ചു. സെമിനാർ കോഡിനേറ്റർ പി. ശരത്കുമാർ, അധ്യാപകരായ കെ.എസ്. ബിൻഷ, സുജ ജോണ്‍, എം.സി. സൗമ്യ, ജോണ്‍സണ്‍ ജേക്കബ്, ഷെൽമി ഫിലിപ്, നോഡൽ ഓഫീസർ ഇ.വി. ഷൈജു തുടങ്ങിയവർ നേതൃത്വം നൽകി.

ADVERTISEMENT

യുഡിഎഫ് പ്രതിഷേധ സദസ് ഇന്ന്

സുൽത്താൻ ബത്തേരി: യുഡിഎഫ് ഇന്നു വൈകുന്നേരം നാലിന് നഗരത്തിൽ പ്രതിഷേധ സദസ് നടത്തും. ഫേസ്ബുക്കിൽ മതസ്പർധയ്ക്കു കാരണമാകുന്ന പോസ്റ്റിട്ട മൂലങ്കാവ് ഗവ.സ്കൂൾ പിടിഎ പ്രസിഡന്‍റിനെ അറസ്റ്റുചെയ്യാത്തതിൽ പ്രതിഷേധിച്ചാണ് പരിപാടിയെന്ന് നേതാക്കളായ കെ.എൽ. പൗലോസ്, അബ്ദുള്ള മാടക്കര, കെ.ഇ. വിനയൻ, പി.പി. അയ്യൂബ്, ഉമ്മർ കുണ്ടാട്ടിൽ, ബൈജു ഐസക്, പ്രഭാകരൻ നായർ, എം.എ. ഉസ്മാൻ, പി.കെ. ഹാരിസ് എന്നിവർ അറിയിച്ചു.

പൊളിച്ചുമാറ്റിയ തട്ടുകട നഗരസഭ പുനഃസ്ഥാപിച്ചു

കൽപ്പറ്റ: എസ്കെഎംജെ സ്കൂളിനു മുന്പിൽനിന്നു കഴിഞ്ഞദിവസം പൊളിച്ചുനീക്കിയ തട്ടുകട നഗരസഭ പുനഃസ്ഥാപിച്ചു. പുഞ്ചിരിമട്ടം ഉരുൾദുരന്ത ബാധിത കുടുംബം ഉപജീവനത്തിന് നടത്തിവന്ന തട്ടുകട പൊളിച്ചുമാറ്റിയത് വിവാദമായ സാഹചര്യത്തിലാണ് പുനഃസ്ഥാപിച്ചത്. മാനുഷിക പരിഗണന നൽകിയാണ് തട്ടുകട പുനഃസ്ഥാപിക്കാൻ തീരുമാനിച്ചതെന്നു നഗരസഭാധികൃതർ പറഞ്ഞു. ജനുവരി രണ്ട് മുതൽ പ്രവർത്തിക്കുന്ന തട്ടുകട എസ്കെഎംജെ സ്കൂൾ പ്രിൻസിപ്പലിന്‍റെ പരാതിയെത്തുടർന്നു ബുധനാഴ്ച രാവിലെയാണ് നഗരസഭ പൊളിച്ചുമാറ്റിയത്. സ്കൂൾ വളപ്പിലും പരിസരത്തും തെരുവുനായ ശല്യം വർധിക്കുന്നതിന് തട്ടുകട കാരണമാണെന്നും നടപടി സ്വീകരിക്കണമെന്നുമായിരുന്നു പ്രിൻസിപ്പിലിന്‍റെ പരാതി. തട്ടുകട ആരംഭിച്ചതിനുശേഷമാണ് തെരുവുനായ ശല്യം വർധിച്ചതെന്നും വിദ്യാർഥികളും അധ്യാപകരും ഭീതിയിലാണെന്നും പരാതിയിൽ ചൂണ്ടിക്കാട്ടിയിരുന്നു. ചൂരൽമല സ്വദേശി കെ. ഷാഹിദിന്‍റേതാണ് തട്ടുകട. ബുധനാഴ്ച പുലർച്ചെ രണ്ടു വരെ പ്രവർത്തിച്ച കട മുന്നറിയിപ്പില്ലാതെയാണ് പൊളിച്ചുമാറ്റിയതെന്നു അദ്ദേഹം ആരോപിച്ചിരുന്നു. ഉരുൾപൊട്ടലിൽ ഉപജീവനമാർഗങ്ങൾ അടഞ്ഞ സാഹചര്യത്തിലാണ് ഷാഹിദ് നഗരത്തിൽ തട്ടുകട തുടങ്ങിയത്.

എടിഎം കൗണ്ടറുകൾ പൂട്ടിയത് പ്രതിസന്ധിക്കിടയാക്കുന്നു

മാനന്തവാടി: ബസ് സ്റ്റാൻഡിന് സമീപം എടിഎം കൗണ്ടറുകൾ അടച്ചു പൂട്ടിയത് ഉപഭോക്താക്കളെ വലയ്ക്കുന്നു. എൽഎഫ് സ്കൂൾ ജംഗ്ഷന് സമീപം എസ്ബിഐ, ഫെഡറൽ ബാങ്ക് ബാങ്കുകളുടെ എടിഎം കൗണ്ടറുകൾ നാളുകളായി അടഞ്ഞുകിടക്കുന്നതാണ് ഉപഭോക്താക്കളെ പ്രയാസപ്പെടുന്നത്. എ ടി എം കൗണ്ടറുകൾ തേടി ടൗണിൽ അലയേണ്ട സ്ഥിതിയെന്ന് പരാതി. ഏറെ കാലമായി പ്രവർത്തിച്ചു കൊണ്ടിരുന്ന എടിഎം കൗണ്ടറുകളാണ് അടച്ചു പൂട്ടിയത്. സമീപത്തുള്ള വ്യാപാരികളെയും പണമെടുക്കാൻ എത്തുന്ന മറ്റ് ഉപഭോക്താക്കളെയും പ്രയാസത്തിലാക്കുന്നതായാണ് പരാതി. എൽഎഫ് സ്കൂളിന് സമീപമുള്ള എസ്ബിഐ എടിഎം കൗണ്ടർ അടച്ചുപൂട്ടിയിട്ട് മൂന്നുമാസത്തിലേറെയായി. മുന്പ് മികച്ച രീതിയിൽ പ്രവർത്തിച്ചിരുന്ന എടിഎം കൗണ്ടറായിരുന്നു ഇത്. ദിവസവും ഒട്ടേറെ ആളുകൾ എടിഎം കൗണ്ടർ പ്രവർത്തന സജ്ജമെന്ന് കരുതി ഈ ഭാഗത്തേക്ക് വന്ന് നിരാശരായി മടങ്ങി പോകാറുണ്ട്. 50 മീറ്ററോളം മാറി എൽഎഫ് സ്കൂൾ ജംഗ്ഷന് സമീപത്തുള്ള ഫെഡറൽ ബാങ്ക് എടിഎം കൗണ്ടറും പ്രവർത്തനരഹിതമായതിനാൽ മറ്റു ഭാഗങ്ങളിലുള്ള കൗണ്ടറുകളെ ആശ്രയിക്കേണ്ട അവസ്ഥയിലാണ് ഉപഭോക്താക്കൾ. ബസ് സ്റ്റാൻഡ് പരിസരത്ത് എടിഎം കൗണ്ടറുകൾ പ്രവർത്തനസജ്ജമാക്കി പ്രതിസന്ധിക്ക് പരിഹാരം കാണണമെന്നാണ് ആവശ്യമുയരുന്നത്.

ജീവനക്കാരുടെ സുവർണകാലം വിദൂരമല്ല: സജീവ് ജോസഫ് എംഎൽഎ

മാനന്തവാടി: ഉമ്മൻചാണ്ടി സർക്കാരിന്‍റെ കാലഘട്ടത്തിലേതിനു സമാനമായ സുവർണകാലം സിവിൽ സർവീസിൽ തിരിച്ചുവരുന്നതിന്‍റെ കാഹളം നിലന്പൂർ ഉപതെരഞ്ഞെടുപ്പിലൂടെ ഉയർന്നുകഴിഞ്ഞതായി സജീവ് ജോസഫ് എംഎൽഎ. കേരള എൻജിഒ അസോസിയേഷൻ ജില്ല പ്രവർത്തക കണ്‍വൻഷൻ ഉദ്ഘാടനം ചെയ്യുകയായിരുന്നു അദ്ദേഹം. ജീവനക്കാരുടെ ഒന്പതു വർഷത്തെ ദുരിതം അവസാനിക്കുന്നതിന്‍റെ കൃത്യമായ തെളിവാണ് ഉപതെരഞ്ഞെടുപ്പുഫലം. സാധാരണ ജനങ്ങളുടേയും ജീവിതം ദുസഹമാക്കിയ സർക്കാരാണ് നിലവിലുള്ളത്. സമയബന്ധിതമായി സേവനങ്ങൾ ലഭിക്കാതെ പൊതുജനം ജീവനക്കാരെ ശത്രുക്കളായാണ് കാണുന്നത്. യുഡിഎഫ് അധികാരത്തിലെത്തുന്നതോടെ ജീവനക്കാരുടെ പ്രശ്നങ്ങൾക്കു പരിഹാരമാകുമെന്നും എംഎൽഎ പറഞ്ഞു. അസോസിയേഷൻ ജില്ലാ പ്രസിഡന്‍റ് കെ.ടി. ഷാജി അധ്യക്ഷത വഹിച്ചു. ഗസറ്റഡ് തസ്തികയിലേക്ക് സ്ഥാനക്കയറ്റം ലഭിച്ചവരെയും പരീക്ഷകളിൽ ഉന്നത വിജയം നേടിയ വിദ്യാർഥികളെയും അനുമോദിക്കുന്നതിനും വിരമിച്ച ജീവനക്കാർക്കു യാത്രയയപ്പ് നൽകുന്നതിനും നടത്തിയ ചടങ്ങ് എഐസിസി അംഗം പി.കെ. ജയലക്ഷ്മി ഉദ്ഘാടനം ചെയ്തു. അസോസിയേഷൻ സംസ്ഥാന പ്രസിഡന്‍റ് ചവറ ജയകുമാർ മുഖ്യപ്രഭാഷണം നടത്തി. സംസ്ഥാന ട്രഷറർ ബി. പ്രദീപ്കുമാർ, സംസ്ഥാന സെക്രട്ടേറിയേറ്റംഗം മോബിഷ് പി. തോമസ്, ഡിസിസി സെക്രട്ടറി എം.ജി. ബിജു, ബ്ലോക്ക് കോണ്‍ഗ്രസ് കമ്മിറ്റി പ്രസിഡന്‍റ് എ.എം. നിഷാന്ത്, സി.കെ. ജിതേഷ്, സജി ജോണ്‍, ടി. അജിത്ത്കുമാർ, സി.ജി. ഷിബു, എം.ജി. അനിൽകുമാർ, സിനീഷ് ജോസഫ്, ഇ.എസ്. ബെന്നി, ഗ്ലോറിൻ സെക്വീര, ലൈജു ചാക്കോ, പി.എച്ച്. അഫ്റഫ്ഖാൻ, എൻ.വി. അഗസ്റ്റിൻ, എം. നസീമ, ഇ.വി. ജയൻ, എം.എ. ബൈജു, ബിജു ജോസഫ്, കെ.വി. ബിന്ദുലേഖ, ശരത് ശശിധരൻ, എം.വി. സതീഷ്, ശിവൻ പുതുശേരി എന്നിവർ പ്രസംഗിച്ചു.

ലഹരി വിരുദ്ധ ഫ്ലാഷ് മോബ് അവതരിപ്പിച്ചു

തവിഞ്ഞാൽ: തവിഞ്ഞാൽ സെന്‍റ് തോമസ് സ്കൂളിലെ വിദ്യാർഥികൾ തവിഞ്ഞാൽ ടൗണിൽ നേർവഴി ലഹരി വിരുദ്ധ ഫ്ളാഷ് മോബ് അവതരിപ്പിച്ചു. വരും തലമുറകളെ തകർത്തെറിയുന്ന ലഹരിവസ്തുക്കളിൽ നിന്നുമുള്ള മോചനമെന്ന ലക്ഷ്യത്തെ മുൻനിർത്തി വിദ്യാർഥികളെയും സമൂഹത്തെയും ബോധവത്കരിക്കാനായാണ് ഫ്ളാഷ് മോബ് അവതരിപ്പിച്ചത്. ഹെഡ്മാസ്റ്റർ ബിജു മാത്യു, മദർ പിടിഎ പ്രസിഡന്‍റ് ജൂബി സജി, അധ്യാപകരായ ജോമോൻ കുര്യൻ, സ്നേഹ രാജ്, നീതു വർഗീസ്, ജിഷ ജോസഫ്, ജോമോൻ ജോർജ്, എൻ.ജെ. ജോഷി എന്നിവർ പ്രസംഗിച്ചു.

ഇന്ത്യ മുന്നണിയെ നയിക്കാനുളള പക്വത കോണ്‍ഗ്രസിനില്ല: മന്ത്രി കെ. രാജൻ

സുൽത്താൻ ബത്തേരി: ദേശീയ തലത്തിൽ ഇന്ത്യ മുന്നണിയെ നയിക്കാനുളള പക്വത കോണ്‍ഗ്രസിനില്ലെന്ന് സിപിഐ സംസ്ഥാന എക്സിക്യുട്ടീവ് അംഗവും റവന്യു മന്ത്രിയുമായ കെ. രാജൻ. സിപിഐ ജില്ലാ സമ്മേളനത്തിന്‍റെ പൊതുസമ്മേളനം ചീരാലിൽ ഉദ്ഘാടനം ചെയ്യുകയായിരുന്നു അദ്ദേഹം. കഴിഞ്ഞ പാർലമെന്‍റ് തെരഞ്ഞെടുപ്പിൽ ബിജെപിയെ നേരിടാൻ കോണ്‍ഗ്രസിന് താത്പര്യമില്ലായിരുന്നു. കാലാവധി കഴിയാത്ത രാജ്യസഭ അംഗങ്ങളെവരെ ലോക് സഭയിലേക്ക് മത്സരിപ്പിച്ചത് ആ പാർട്ടിയുടെ അപക്വ നിലപാടുകളാണ്. ജനാധിപത്യത്തെ അട്ടിമറിക്കാനായി ബിജെപി ഇതര സംസ്ഥാനങ്ങൾക്കെതിരേ ഗവർണർമാരെ ഉപയോഗിക്കുകയാണ്. മത ചിഹ്നങ്ങളെ ഭരണഘടനയുടെ ഭാഗമാക്കാൻ അനുവദിക്കില്ല. മത നിരപേക്ഷത സംരക്ഷിക്കാൻ കേരളത്തിലെ മന്ത്രിമാരും ഉണ്ടാകും. സാന്പത്തികമായി കേരളത്തെ കേന്ദ്രം ഞെരുക്കുകയാണ്. വിദ്യഭ്യാസ മേഖലയ്ക്ക് കേന്ദ്ര സർക്കാർ ഫണ്ട് അനുവദിക്കുന്നില്ല. ഓണക്കാലത്തേക്ക് ഭക്ഷ്യ വകുപ്പിന് ഒരു സഹായവും അനുവദിക്കില്ലെന്നാണ് കേന്ദ്ര തീരുമാനം. സാമൂഹിക സുരക്ഷ സംസ്ഥാന സർക്കാർ ഉറപ്പാക്കും. ചൂരൽമല ദുരന്ത ബാധിതരെ കേന്ദ്രം വഞ്ചിച്ചു. എല്ലാ ദുരിത ബാധിതരുടേയും സംരക്ഷണം സംസ്ഥാന സർക്കാർ ഉറപ്പ് വരുത്തും. രാജ്യത്തിന്‍റെ ഭരണ ഘടനയെ തകർക്കാൻ കേന്ദ്ര സർക്കാർ ശ്രമിക്കുകയാണ്. ക്രൂരമായ ഭരണകൂട നയമാണിത്. സോഷ്യലിസവും മതേതരത്വവും ഭരണഘടനയിൽ നിന്ന് മാറ്റാൻ ശ്രമം നടത്തുകയാണ്. ഫെഡറൽ സംവിധാനങ്ങൾ മുന്നോട്ട് പോകണമെന്ന് കേന്ദ്ര സർക്കാർ ആഗ്രഹിക്കുന്നില്ല. ഫാസിസ്റ്റ് ഭരണകൂടത്തിന് അന്ത്യം കുറിക്കാൻ എല്ലാവരും ഒന്നിക്കണം. ഇന്ത്യ മുന്നണിയെ സംഘപരിവാർ ഭയപ്പെട്ടിരുന്നു. പാർലമെന്‍റ് തെരഞ്ഞെടുപ്പിൽ നാന്നൂറിലധികെ സീറ്റുകൾ നേടുമെന്ന ബിജെപിയുടെ പ്രഖ്യാപനത്തെ പരാജയപ്പെടുത്താൻ കഴിഞ്ഞെന്നും അദ്ദേഹം പറഞ്ഞു. സിപിഐ ജില്ലാ സെക്രട്ടറി ഇ.ജെ. ബാബു അധ്യക്ഷത വഹിച്ചു. സംസ്ഥാന എക്സിക്യുട്ടീവ് അംഗം ടി.വി. ബാലൻ, പി.എം. ജോയി, സി.എസ്. സ്റ്റാൻലി എന്നിവർ പ്രസംഗിച്ചു.

വിദ്യാകിരണം: 29 സ്കൂളുകളിൽ ഭൗതിക സൗകര്യ വികസനം പൂർത്തിയായി

കൽപ്പറ്റ: കിഫ്ബിയിൽ ഉൾപ്പെടുത്തി വിദ്യാകിരണം പദ്ധതിക്കു കീഴിൽ ജില്ലയിലെ 63 ശതമാനം സ്കൂളുകളിലും ഭൗതിക സൗകര്യ വികസനം പൂർത്തിയാക്കി. ഭൗതിക സൗകര്യ വികസനത്തിനു തെരഞ്ഞെടുത്ത 46 സ്കൂളുകളിൽ 29 എണ്ണത്തിലാണ് പ്രവൃത്തി പൂർത്തിയായത്. ബാക്കി സ്കൂളുകളിൽ പ്രവൃത്തി വിവിധ ഘട്ടങ്ങളിലാണ്. ഭൗതിക സൗകര്യ വികസനം പൂർത്തിയാക്കിയ സ്കൂളുകളുടെ എണ്ണം ഈ മാസം 32 ആയി ഉയർത്തും. വിദ്യാകിരണം പദ്ധതിയുടെ ഭാഗമായ അക്കാദമിക പ്രവർത്തനങ്ങൾ നടപ്പാക്കുന്നതിന് ജില്ലാ, ബ്ലോക്ക് സമിതികൾ രൂപീകരിച്ചിട്ടുണ്ട്. ഇതുമായി ബന്ധപ്പെട്ട് ജില്ലയിൽ 305 സ്കൂൾതല യോഗം നടന്നു.

അഗീന ബെന്നിയെ അനുമോദിച്ചു

സുൽത്താൻ ബത്തേരി: കാലിക്കട്ട് യൂണിവേഴ്സിറ്റി ബിഎസ്‌സി ബോട്ടണി പരീക്ഷയിൽ ഒന്നാം റാങ്ക് നേടിയ സർവജന ഹയർ സെക്കൻഡറി സ്കൂൾ പൂർവ വിദ്യാർഥിനി അഗീന ബെന്നിയെ പിടിഎ അനുമോദിച്ചു. കൈപ്പഞ്ചേരി ടി.എ. ബെന്നിയുടെയും ഷൈനി ബെന്നിയുടെയും മകളായ അഗീന എട്ടാം ക്ലാസ് മുതൽ പ്ലസ് ടു വരെ സർവജനയിലാണ് പഠനം നടത്തിയത്. പ്ലസ് ടുവിനും ഉയർന്ന മാർക്ക് നേടിയാണ് വിജയിച്ചത്. ഡൽഹി റാവൂസ് ഐഎഎസ് അക്കാദമിയിൽ പ്രവേശനം നേടി ഐപിഎസ് ഓഫീസറാകാനാണ് അഗീനയുടെ ആഗ്രഹം. പിടിഎ പ്രസിഡന്‍റ് ടി.കെ. ശ്രീജൻ, പ്രിൻസിപ്പൽ അബ്ദുൾനാസർ, അധ്യാപകരായ ജി. സുജിത്കുമാർ, കെ.കെ. റസീന, സി. ബിനു, വി.എസ്. ദീപ എന്നിവർ അനുമോദിച്ചു.

ടൗണ്‍ഷിപ്പിൽ വീടുകളുടെ നിർമാണം ഡിസംബറിൽ പൂർത്തിയാക്കും: മന്ത്രി കെ. രാജൻ

കൽപ്പറ്റ: പുഞ്ചിരിമട്ടം ഉരുൾ ദുരന്തബാധിതർക്ക് എൽസ്റ്റൻ എസ്റ്റേറ്റ് മാനേജ്മെന്‍റിൽനിന്നു ഏറ്റെടുത്ത ഭൂമിയിൽ സജ്ജമാക്കുന്ന ടൗണ്‍ഷിപ്പിൽ വീടുകളുടെ നിർമാണം ഡിസംബറിൽ പൂർത്തിയാക്കുമെന്ന് റവന്യു മന്ത്രി കെ. രാജൻ. ടൗണ്‍ഷിപ്പ് നിർമാണം വിലയിരുത്തിയശേഷം മാധ്യമപ്രവർത്തകരുമായി സംസാരിക്കുകയായിരുന്നു അദ്ദേഹം. ടൗണ്‍ഷിപ്പിൽ 410 വീടുകൾ അഞ്ച് സോണുകളിലാണ് പണിയുന്നത്. ആദ്യ സോണിലെ 140 വീടുകൾക്ക് ഏഴ് സെന്‍റ് വീതം പ്ലോട്ടുകൾക്ക് അതിർത്തി നിശ്ചയിച്ചു. 51 വീടുകൾക്ക് അടിത്തറ പണിതു. 54 വീടുകളുടെ ഡൈനാമിക് കോണ്‍ പെനിട്രേഷൻ ടെസ്റ്റ് നടത്തി. 41 വീടുകളുടെ പ്ലെയിൻ സിമന്‍റ് കോണ്‍ക്രീറ്റ് പൂർത്തിയായി. 19 വീടുകളുടെ ഫൗണ്ടേഷൻ പ്രവൃത്തിയും രണ്ടാംഘട്ട നിർമാണത്തിനു സ്ഥലമൊരുക്കലും പുരോഗതിയിലാണ്. മാതൃകാവീടിന്‍റെ നിർമാണം വൈകാതെ പൂർത്തിയാക്കും. 110 തൊഴിലാളികളാണ് നിലവിൽ ഭവന നിർമാണം നടത്തുന്നത്. ടൗണ്‍ഷിപ്പിൽ വീട് വേണ്ടെന്നുവച്ച് സർക്കാർ സഹായം കൈപ്പറ്റിയവർ സന്നദ്ധ സംഘടനകൾ ലഭ്യമാക്കുന്ന ഭൂമിക്ക് കൃതൃമായ രേഖകൾ ഉറപ്പാക്കണം. ജില്ലയിലെ അധിക ഭൂമിയും ഭൂപരിഷ്കരണ നിയമം 12(3) പ്രകാരം തോട്ടം ഭൂമിയായി ലഭിച്ചവയാണ്. ഇത്തരം ഭൂമിയുടെ തുടരംഗീകാരം ലഭ്യമാക്കാൻ റവന്യു വകുപ്പിന് കഴിയില്ല. പ്ലാന്‍റേഷൻ ഭൂമി മുറിച്ചുവിൽക്കുന്നതിൽ നിയമ പ്രശ്നങ്ങൾ ഉണ്ടെന്നും മന്ത്രി പറഞ്ഞു. ജില്ലാ കളക്ടർ ഡി.ആർ. മേഘശ്രീ, എഡിഎം കെ. ദേവകി, സബ് കളക്ടർ മിസാൽ സാഗർ ഭരത്, അസിസ്റ്റന്‍റ് കളക്ടർ പി.പി. അർച്ചന എന്നിവർ ഒപ്പമുണ്ടായിരുന്നു.

വേങ്ങശേരിക്കവലയിൽ സംരക്ഷണ ഭിത്തി നിർമിക്കണമെന്ന്

പുൽപ്പള്ളി: മുള്ളൻകൊല്ലി-പാടിച്ചിറ റോഡിലെ വേങ്ങശേരിക്കവലയിൽ സംരക്ഷണഭിത്തി അടിയന്തരമായി നിർമിക്കണമെന്ന ആവശ്യം ശക്തമായി. കവലയിൽ വളവിനു സമീപം അരിക് ഇടിഞ്ഞ് റോഡ് അപകടാവസ്ഥയിലാണ്. കനത്ത മഴയ്ക്കിടയാണ് മണ്ണ് ഇടിഞ്ഞുതുടങ്ങിയത്. കഴിഞ്ഞ ദിവസം റോഡിന്‍റെ ഒരു ഭാഗത്തെ മണ്ണ് പൂർണമായി ഇടിഞ്ഞു. ബസുകളും കരിങ്കല്ല് കയറ്റിയ ടിപ്പറുകളും ഉൾപ്പടെ നിരവധി വാഹനങ്ങൾ ദിനേന ഓടുന്നതാണ് റോഡ്. ശക്തമായ മഴ തുടർന്നാൽ കൂടുതൽ ഭാഗങ്ങൾ ഇടിയുമെന്ന ആശങ്കയിലാണ് നാട്ടുകാർ. റോഡ് ഇടിഞ്ഞ ഭാഗത്ത് സംരക്ഷഭിത്തി നിർമിക്കണമെന്ന് ആവശ്യപ്പെട്ട് പൊതുപ്രവർത്തകർ പൊതുമരാമത്ത് അധികൃതർക്ക് പരാതി നൽകിയിട്ടുണ്ട്. കാടുമൂടിക്കിടക്കുന്നതിനാൽ ഇതു വഴി ഓടുന്ന വാഹനങ്ങളുടെ ഡൈവർമാർക്ക് റോഡ് ഇടിഞ്ഞ് ഭാഗം കാണാൻ കഴിയാത്ത സ്ഥിതിയാണ്.

സുരഭിക്കവല-ആലത്തൂർ റോഡ് തകർന്നു

പുൽപ്പള്ളി: സുരഭിക്കവല-ആലത്തൂർ റോഡ് പാടെ തകർന്നു. മുള്ളൻകൊല്ലി പഞ്ചായത്തിലെ 12, 15 വാർഡുകളിലൂടെ കടന്നുപോകുന്ന റോഡിന്‍റെ പലഭാഗങ്ങളിലും വൻകുഴികൾ രൂപപ്പെട്ടിരിക്കയാണ്. മഴക്കാലത്ത് കുഴികളിൽ വെള്ളം കെട്ടിനിൽക്കുന്നതുമൂലം ബൈക്കും സ്കൂട്ടറും ഉൾപ്പെടെ വാഹനങ്ങൾ അപകടത്തിൽപ്പെടുന്നത് പതിവായി. പാടിച്ചിറ, കബനിഗിരി, മരക്കടവ്, ചാമപ്പാറ, സീതാമൗണ്ട് പ്രദേശങ്ങളിലെ യാത്രക്കാർക്ക് പുൽപ്പള്ളി, മുള്ളൻകൊല്ലി ടൗണുകളിൽ പ്രവേശിക്കാതെ ബത്തേരി, കൽപ്പറ്റ എന്നിവിടങ്ങളിൽ എളുപ്പം എത്താൻ സഹായകമാണ് റോഡ്. എന്നിട്ടും പാതയുടെ ശോച്യാവസ്ഥയ്ക്കുനേരേ അധികൃതർ കണ്ണടയ്ക്കുകയാണെന്ന് നാട്ടുകാർ പറയുന്നു. മൂന്നുവർഷം മുന്പ് ജില്ലാ പഞ്ചായത്ത് ഫണ്ട് ഉപയോഗിച്ച് റോഡിന്‍റെ കുറച്ചുഭാഗം ടാർ ചെയ്തിരുന്നു. പിന്നീടിന്നോളം അറ്റകുറ്റപ്പണി പോലും നടന്നില്ല. വൻ കുഴികൾ ക്വാറിവേസ്റ്റ് ഇട്ട് നികത്തി റോഡ് സഞ്ചാരയോഗ്യമാക്കണമെന്ന് നാട്ടുകാർ ആവശ്യപ്പെട്ടു. അവഗണന തുടർന്നാൽ ശക്തമായ സമരം സംഘടിപ്പിക്കാനാണ് അവരുടെ തീരുമാനം.

തേക്ക് മുറിച്ചു നീക്കി

പുൽപ്പള്ളി: ഷെഡ് കവലയിൽ അപകട ഭീഷണിയുയർത്തി നിന്ന തേക്ക് മുറിച്ചുനീക്കി. ഷെഡ് ജംഗ്ഷനിലുണ്ടായിരുന്ന ഈ തേക്കിന്‍റെ ഒരു ഭാഗം ഉണങ്ങിയതോടെ കാറ്റിലും മഴയിലും ശിഖരങ്ങൾ ഒടിഞ്ഞുവീണിരുന്നത് യാത്രക്കാർക്ക് വലിയ അപകട ഭീഷണിയായിരുന്നു. ഇതേത്തുടർന്ന് നാട്ടുകാർ പഞ്ചായത്തിലും ജില്ലാ ദുരന്തനിവാരണ അഥോറിറ്റിക്കും പരാതി നൽകിയതിനെ തുടർന്നാണ് മരംമുറിച്ചു നീക്കാൻ നടപടിയുണ്ടായത്.

ഡിഫറന്‍റ് ആർട് സെന്‍റർ മാജിക് ഹോം പദ്ധതി: വീടിന്‍റെ താക്കോൽദാനം ഇന്ന്

പുൽപ്പള്ളി: മജീഷ്യനും മോട്ടിവേഷണൽ സ്പീക്കറുമായ ഗോപിനാഥ് മുതുകാട് നേതൃത്വം നൽകുന്ന ഡിഫറന്‍റ് ആർട് സെന്‍റർ മാജിക് ഹോം പദ്ധതിയിൽ പഞ്ചായത്തിലെ വേലിയന്പത്ത് നിർമിച്ച ഭിന്നശേഷി സൗഹൃദ ഭവനത്തിന്‍റെ താക്കോൽദാനം ഇന്ന് ഉച്ചയ്ക്ക് 12ന് കവി മുരുകൻ കാട്ടാക്കട നിർവഹിക്കും. ഡിഫറന്‍റ് ആർട് സെന്‍റർ മാജിക് ഹോം പദ്ധതിയിൽ നിർമിച്ച നാലാമത് വീടാണ് വേലിയന്പത്തേത്. പടിഞ്ഞാറത്തറ സ്വദേശികളായ ദന്പതികൾക്കും ബൗദ്ധിക പരിമിതരായ രണ്ടു മക്കൾക്കുമായാണ് വീട് നിർമിച്ചത്. അഞ്ച് സെന്‍റ് ഭൂമിയിലാണ് ഭവന നിർമാണം പൂർത്തിയാക്കിയത്. പടിഞ്ഞാറത്തറയിൽ ടാർപോളിൻ ഉപയോഗിച്ചു കെട്ടിമറച്ച ഷെഡിൽ കഴിയുന്ന കുടുംബം കെട്ടുറപ്പുള്ള വീട് ലഭിക്കുന്നതിന്‍റെ ആഹ്ളാദത്തിലാണ്.

തിരുനെല്ലിയിലെ വന്യമൃഗ ആക്രമണം: കാട്ടിക്കുളം ഫോറസ്റ്റ് ഓഫീസിലേക്ക് ധർണ നടത്തി

മാനന്തവാടി: തിരുനെല്ലി പഞ്ചായത്തിൽ വർധിച്ചുവരുന്ന വന്യമൃഗ ആക്രമണങ്ങളിൽ പ്രതിഷേധിച്ച് കാട്ടിക്കുളം ഫോറസ്റ്റ് ഓഫീസിലേക്ക് തിരുനെല്ലി, തൃശിലേരി മണ്ഡലം കോണ്‍ഗ്രസ് കമ്മിറ്റി ധർണ നടത്തി. തിരുനെല്ലി പഞ്ചായത്തിലെ കർഷകരാകമാനം വലിയ പ്രതിസന്ധിയും വെല്ലുവിളിയും നേരിടുകയാണ്. കുടിയേറ്റ മേഖലയായ മുത്തുമാരി, പുളിമൂട്കുന്ന്, പനവല്ലി, തിരുനെല്ലി, തോൽപ്പെട്ടി, ബാവലി, പാൽവെളിച്ചം, ചേലൂർ പ്രദേശങ്ങളിലെ കാർഷികവിളകൾ ആന ഉൾപ്പെടെയുള്ള വന്യമൃഗങ്ങൾ നശിപ്പിക്കുകയാണ്. വനംവകുപ്പിന്‍റെ വലിയ ശ്രദ്ധക്കുറവ് ഈ വിഷയത്തിൽ ഉണ്ട് എന്ന് കോണ്‍ഗ്രസ് ആരോപിച്ചു. നൈറ്റ് പട്രോളിംഗും വാച്ചർമാരെയും ഗാർഡ്മാരെയും അവരുടെ ജീവന് സുരക്ഷിതത്വം നൽകുന്ന ആയുധങ്ങൾ നൽകി ജോലിക്ക് ഉപയോഗിച്ചാൽ ഒരു പരിധിവരെ ഈ പ്രശ്നങ്ങൾക്ക് പരിഹാരമാകും. എന്നാൽ ഉത്തരവാദിത്തപ്പെട്ടവർ ഇത് പലപ്പോഴും നിറവേറ്റുന്നില്ല. വനംവകുപ്പിന്‍റെ കെടുകാര്യസ്ഥതയും മണ്ഡലത്തിലെ എംഎൽഎയും മന്ത്രിയുമായ ഒ.ആർ. കേളുവിന്‍റെ അനാസ്ഥയും വന്യമൃഗങ്ങളുടെ സ്വൈര്യ വിഹാരത്തിന് കാരണമാകുന്നുണ്ട്. കർഷകർക്ക് നഷ്ടപ്പെട്ട നാണ്യവിളകളുടെ പരിഹാരത്തുക 2023ന് ശേഷം നൽകിയിട്ടില്ല. വരും ദിവസങ്ങളിൽ സമരം ശക്തമാക്കുമെന്ന് കോണ്‍ഗ്രസ് നേതൃത്വം പ്രഖ്യാപിച്ചു. ബ്ലോക്ക് കോണ്‍ഗ്രസ് കമ്മിറ്റി പ്രസിഡന്‍റ് എ.എം. നിശാന്ത് ഉദ്ഘാടനം ചെയ്തു. സതീഷ് പുളിമൂട് അധ്യക്ഷത വഹിച്ചു. കമ്മന മോഹനൻ, റഷീദ് തൃശിലേരി, കെ.ജി. രാമകൃഷ്ണൻ, ബാലനാരായണൻ, കെ.വി. ഷിനോജ്, റീന ജോർജ്, ജോർജ് അറകാക്കൻ, വി.പി. പ്രേം ദാസ്, ടി.എം. സുധാകരൻ എന്നിവർ പ്രസംഗിച്ചു.

പാക്കം - കുറിച്ചിപ്പറ്റ റോഡിൽ കാട്ടാന ശല്യം രൂക്ഷം

പുൽപ്പള്ളി: പുൽപ്പള്ളി - മാനന്തവാടി റോഡിലെ കുറിച്ചിപ്പറ്റ, പാക്കം റോഡിൽ കാട്ടാനശല്യം വാഹന യാത്രക്കാർക്ക് ഭീഷണിയാകുന്നു. വാഹനങ്ങൾക്കുനേരെ ഒറ്റയാൻ ചീറിയടുക്കുന്നത് പതിവായതോടെ ഇതുവഴി ഇരുചക്രവാഹനം ഉൾപ്പെടെയുള്ളവയ്ക്ക് കടന്നുപോകാൻ കഴിയാത്ത അവസ്ഥയാണ്. കഴിഞ്ഞ ദിവസം പുൽപ്പള്ളി സ്വദേശിയായ രണ്ടുപേർക്കു നേരെ കാട്ടാന ചീറിയടുത്തിരുന്നു. തലനാരിഴയ്ക്കാണ് ഇവർ രക്ഷപ്പെട്ടത്. ഈ ഭാഗങ്ങളിൽ ഒറ്റയാന്‍റെ ശല്യം വർധിച്ചിട്ടും ശല്യക്കാരനായ ആനയെ ഉൾവനത്തിലേക്ക് തുരത്താനാവശ്യമായ നടപടിയില്ലെന്നാണ് നാട്ടുകാരുടെ പരാതി. കുറിച്ചിപ്പറ്റ ഇറക്കം മുതൽ കുറുവാ ദ്വീപ് വരെയുള്ള റോഡിന്‍റെ ഭാഗങ്ങളിലാണ് ഈ ആനയുടെ ശല്യം കൂടുതൽ. ഇതുവഴി കാൽനടയാത്രക്കാർക്ക് പോലും നടന്നുപോകാൻ കഴിയാത്ത അവസ്ഥയാണ്. രണ്ട് ദിവസം മുന്പ് കാർ യാത്രക്കാർ ഈ ആനയുടെ മുന്നിൽനിന്നും തലനാരിഴയ്ക്കാണ് രക്ഷപ്പെട്ടത്. വനപാതയിൽ പതിഞ്ഞുനിൽക്കുന്ന ആന വാഹനങ്ങൾ അടുത്തെത്തുന്പോൾ ചീറിയടുക്കുന്നത് മൂലം വാഹനങ്ങൾ അപകടത്തിൽപ്പെടാനും കാരണമാകുന്നുണ്ട്. കഴിഞ്ഞ ദിവസം ബൈക്ക് യാത്രക്കാരൻ ആനയെ കണ്ട് ഓടി രക്ഷപ്പെടുകയായിരുന്നു. ജനങ്ങൾക്ക് ഭീഷണിയായ ആനയെ ഉൾവനത്തിലേക്ക് തുരത്താനാവശ്യമായ നടപടി സ്വീകരിക്കണമെന്നാണ് വാഹനയാത്രക്കാരുടെ ആവശ്യം. പാടന്തറയിലും കോട്ടായ്മെടിലും ഭീതി ഗൂഡല്ലൂർ: ദേവർഷോല പഞ്ചായത്തിലെ പാടന്തറ, കൊട്ടായ്മേട് ഭാഗങ്ങളിൽ ഭീതി പരത്തി കാട്ടാനകൾ. കഴിഞ്ഞ ദിവസമാണ് ആനകൾ ഈ പ്രദേശങ്ങളിൽ ഇറങ്ങിയത്. ഇവയെ വനസേന മുതുമല കാട്ടിലേക്ക് തുരത്തിയെങ്കിലും കുറച്ചുകഴിഞ്ഞപ്പോൾ തിരിച്ചെത്തി. കാട്ടാനകളെ ഉൾക്കാട്ടിലേക്ക് തുരത്തണമെന്നും ഇവ ജനവാസമേഖലയിൽ തിരിച്ചെത്തില്ലെന്ന് ഉറപ്പുവരുത്തുണമെന്നും നാട്ടുകാർ ആവശ്യപ്പെട്ടു.

മാർഗദർശകമണ്ഡലം ധർമസന്ദേശയാത്ര നടത്തുന്നു

കൽപ്പറ്റ: സമൂഹത്തിൽ ധാർമിക-സാംസ്കാരിക ബോധം ഉണർത്തുന്നതിനും പരിപോഷിപ്പിക്കുന്നതിനുള്ള പ്രവർത്തനങ്ങളുടെ ഭാഗമായി മാർഗദർശക മണ്ഡലം കേരള ഘടകത്തിന്‍റെ നേതൃത്വത്തിൽ സംസ്ഥാനത്തെ വിവിധ ആശ്രമങ്ങളിലുള്ള സന്യാസിമാർ ധർമസന്ദേശയാത്ര നടത്തുന്നു. ഒക്ടോബർ ഏഴിന് കാസർഗോഡ് ആരംഭിച്ച് 21ന് തിരുവനന്തപുരത്ത് സമാപിക്കുന്ന വിധത്തിലാണ് യാത്രയെന്ന് മീനങ്ങാടി നരനാരായണ അദ്വൈതാശ്രമത്തിലെ സ്വാമി ഹംസാനന്ദപുരി, വയനാട് ചിൻമയ മിഷനിലെ സ്വാമി അഭയാനന്ദ സരസ്വതി എന്നിവർ വാർത്താസമ്മേളനത്തിൽ അറിയിച്ചു. യാത്ര ഒക്ടോബർ 10ന് വയനാട്ടിലെത്തും. അന്ന് ജില്ലയിലെ ഒരു കേന്ദ്രത്തിൽ ഹിന്ദു മഹാസമ്മേളനം നടത്തും. യാത്ര ജില്ലാതല സ്വാഗതസംഘം രൂപീകരണയോഗം അഞ്ചിന് ഉച്ചകഴിഞ്ഞ് മൂന്നിന് മീനങ്ങാടി പഞ്ചായത്ത് കമ്മ്യൂണിറ്റി ഹാളിൽ ചേരും.

വിദ്യാരംഗം കലാസാഹിത്യവേദി ഉദ്ഘാടനം

സുൽത്താൻ ബത്തേരി: അസംപ്ഷൻ എയുപി സ്കൂളിൽ വിദ്യാരംഗം കലാസാഹിത്യവേദി സാംസ്കാരിക പ്രവർത്തകൻ സ്റ്റാൻലി ജേക്കബ് ഉദ്ഘാടനം ചെയ്തു. പിടിഎ പ്രസിഡന്‍റ് ടിജി ചെറുതോട്ടിൽ അധ്യക്ഷത വഹിച്ചു. മുൻസിപ്പൽ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ ടോം ജോസ് ലോഗോ പ്രകാശനം നടത്തി.ഹൈസ്കൂൾ ഹെഡ്മാസ്റ്റർ ബിനു തോമസ് ലഹരിവിരുദ്ധ സന്ദേശം നൽകി. ഹെഡ്മാസ്റ്റർ ഷോജി ജോസഫ് മുഖ്യപ്രഭാഷണം നടത്തി. വിദ്യാർഥി പ്രതിനിധി ബെനിറ്റോ പ്രസംഗിച്ചു. വിദ്യാർഥികൾ കലാപരിപാടികൾ അവതരിപ്പിച്ചു. അധ്യാപകരായ ലിൻസി ലൂക്കോസ്,സിസ്റ്റർ പ്രിയ തോമസ്, കെ.എൽ. ജെന്നി, പി.ജെ. സ്വപ്ന, ഐ.വി. സെബാസ്റ്റ്യൻ, ഗീതു, ഷീബ ഫ്രാൻസിസ്, ജസ്റ്റീന പീറ്റർ എന്നിവർ നേതൃത്വം നൽകി.

സംയുക്ത ട്രേഡ് യൂണിയൻ കണ്‍വൻഷൻ

മീനങ്ങാടി: സർക്കാർ വിജ്ഞാപനം ഇറക്കിയിട്ടും എൻഎഫ്എസ്എ ഗോഡൗണിലെ തൊഴിലാളികളുടെ കൂലി വർധന നടപ്പാക്കാത്ത ഭക്ഷ്യ വകുപ്പിന്‍റെയും കരാറുകാരുടെയും നിലപാടിൽ സംയുക്ത ട്രേഡ് യൂണിയൻ കണ്‍വൻഷൻ പ്രതിഷേധിച്ചു. നാളെ സപ്ലൈ ഓഫീസിലേക്ക് മാർച്ചും 10 മുതൽ അനിശ്ചിതകാല പണിമുടക്കും നടത്താൻ തീരുമാനിച്ചു. ഐഎൻടിയുസി ജില്ലാ പ്രസിഡന്‍റ് പി.പി. ആലി ഉദ്ഘാടനം ചെയ്തു. എസ്ടിയു ജില്ലാ പ്രസിഡന്‍റ് സി. മൊയ്തീൻകുട്ടി അധ്യക്ഷത വഹിച്ചു. ഹെഡ്ലോഡ് ജനറൽ വർക്കേഴ്സ് യൂണിയൻ(സിഐടിയു)ജില്ലാ വൈസ് പ്രസിഡന്‍റ് പി.കെ. അബു, സി. കുഞ്ഞബ്ദുള്ള, പി. വിജയൻ, കെ. അബൂബക്കർ, ടി.കെ. സലാം, എൽദോ ഡി. കുര്യാക്കോസ്, പി.എ. അഭിലാഷ്, എ.വി. ജോബ് എന്നിവർ പ്രസംഗിച്ചു.

റോഡ് ഉപരോധം: യൂത്ത് കോണ്‍ഗ്രസ് പ്രവർത്തകരെ അറസ്റ്റുചെയ്ത് നീക്കി

കൽപ്പറ്റ: ആരോഗ്യവകുപ്പിന്‍റെ വീഴ്ചകളിൽ പ്രതിഷേധിച്ചും മന്ത്രി വീണാ ജോർജിന്‍റെ രാജി ആവശ്യപ്പെട്ടും യൂത്ത് കോണ്‍ഗ്രസ് പ്രവർത്തകർ പഴയസ്റ്റാൻഡ് പരിസരത്ത് ദേശീയ പാത ഉപരോധിച്ചു. ജില്ലാ പ്രസിഡന്‍റ് അമൽ ജോയിയുടെ നേതൃത്വത്തിൽ രാത്രി എട്ടോടെയായിരുന്നു ഉപരോധം. സമരക്കാരെ പോലീസ് അറസ്റ്റുചെയ്തു നീക്കി. അറസ്റ്റുചെയ്ത് മാറ്റാനുള്ള ശ്രമത്തിനിടെ പ്രവർത്തകരും പോലീസുമായി ഉന്തും തള്ളും ഉണ്ടായി.

റോഡ് സുരക്ഷാ ബോധവത്കണം നടത്തി

മേപ്പാടി: ഡോ. മൂപ്പൻസ് മെഡിക്കൽ കോളജിൽ വിദ്യാർഥികൾക്കും ജീവനക്കാർക്കും ജില്ലാ ആർടി ഓഫീസിന്‍റെ നേതൃത്വത്തിൽ റോഡ് സുരക്ഷാ ബോധവത്കരണം നൽകി. എംവിഐമാരായ അജിൽകുമാർ, പദ്മലാൽ എന്നിവർ നേതൃത്വം നൽകി. ആർടി ഓഫീസ് ജീവനക്കാർക്കും കുടുംബാംഗങ്ങൾക്കും കോളജ് മാനേജ്മെന്‍റ് അനുവദിച്ച സ്പെഷൽ പ്രിവിലേജ് കാർഡുകൾ ആർടിഒ പി.ആർ. സുമേഷിനു കോളജ് എക്സിക്യുട്ടീവ് ട്രസ്റ്റി യു. ബഷീർ കൈമാറി. ഡീൻ ഡോ.എ.പി. കാമത്ത്, മെഡിക്കൽ സൂപ്രണ്ട് ഡോ. മനോജ് നാരായണൻ, ഡിജിഎമ്മുമാരായ സൂപ്പി കല്ലങ്കോടൻ, ഡോ. ഷാനവാസ്പള്ളിയാൽ തുടങ്ങിയവർ പങ്കെടുത്തു.

തൈ നടീലും വിത്തുണ്ടയേറും നടത്തി

മാനന്തവാടി: സാമൂഹിക വനവത്കരണത്തിന്‍റെ ഭാഗമായി തോൽപ്പെട്ടി വന്യജീവി സങ്കേതത്തിൽ തൈ നടീലും വിത്തുണ്ടയേറും നടത്തി. വനം-വന്യജീവി സംരക്ഷണ വകുപ്പും മനുഷ്യാവകാശ ഉപഭോക്തൃ സമിതിയും സംയുക്തമായാണ് പരിപാടി സംഘടിപ്പിച്ചത്. സമിതി സംസ്ഥാന പ്രസിഡന്‍റ് പി.ജെ. ജോണ്‍ ഉദ്ഘാടനം ചെയ്തു. അസിസ്റ്റന്‍റ് വൈൽഡ് ലൈഫ് വാർഡൻ ഷിബുക്കുട്ടൻ അധ്യക്ഷത വഹിച്ചു. ദേശീയ കർഷക അവാർഡ് ജേതാവ് ഷാജി കേദാരം, ബിഎഫ്ഒ ടി.പി. ദിവ്യശ്രീ, എം.എസ്. സജിൻ, ആലിയ കമ്മോം, ഷിജു ജോസ്, കെ. രാധാകൃഷ്ണൻ, കുര്യൻ പയ്യന്പള്ളി, സുബൈദ ചുണ്ടമുക്ക് എന്നിവർ പ്രസംഗിച്ചു. മാനന്തവാടി: വനമഹോത്സവത്തിന്‍റെ ഭാഗമായി സാമൂഹിക വനവത്കരണ വിഭാഗവും മേരിമാതാ കോളജും ചേർന്ന് ബേഗൂർ ഫോറസ്റ്റ് റേഞ്ചിലെ ഒണ്ടയങ്ങാടി റിസർവിൽ വിത്തേറ് നടത്തി. മാവ്, ചക്ക, അയനി എന്നിവയുടെ വിത്തുകളാണ് എറിഞ്ഞത്. മേരിമാതാ കോളജ് സുവോളജി വിഭാഗം തലവൻ വി.എഫ്. സനു ഉദ്ഘാടനം ചെയ്തു. അസി.പ്രഫ. ഷെറിൻ ചാക്കോ, സെക്ഷൻ ഫോറസ്റ്റ് ഓഫീസർമാരായ ടി.ബി. സത്യൻ ,സി.എസ്.വേണു, ബീറ്റ് ഫോറസ്റ്റ് ഓഫീസർ പി. സരിത, മേരിമാതാ കോളജ് ഭൂമിത്ര സേനാംഗങ്ങൾ തുടങ്ങിയവർ പങ്കെടുത്തു.

വൈത്തിരി പുഴയോരത്തെ ഈറ്റക്കാട് സംരക്ഷിക്കണം: ഒയിസ്ക

കൽപ്പറ്റ: ലക്കിടിയിൽ ആരംഭിക്കുന്ന വൈത്തിരി പുഴയുടെ തീരങ്ങളിൽ രണ്ടു കിലോമീറ്റർ ദൂരത്തിൽ 2007-09ൽ നട്ടുവളർത്തിയ ഈറ്റക്കാട് സംരക്ഷിക്കണമെന്ന് ഒയിസ്ക ചാപ്റ്റർ ആവശ്യപ്പെട്ടു. പുഴയുടെ സംരക്ഷണത്തിനും പുനരുജ്ജീവനത്തിനുമാണ് ഒയിസ്കയും ലക്കിടി നവോദയ സ്കൂളും ചേർന്ന് പുഴയോരത്ത് ഈറ്റകൾ നട്ടത്. തുടർന്നുള്ള വർഷങ്ങളിൽ വൈത്തിരി പഞ്ചായത്ത് കൂടുതൽ ദൂരത്ത് പദ്ധതി നടപ്പാക്കി. വേനലിലും തെളിനീരുള്ളതായി വൈത്തിരി പുഴ മാറുന്നതിന് സഹായകമായി. ഇപ്പോൾ ചില പദ്ധതികളുടെ പേരിൽ ഈറ്റക്കാട് വെട്ടിനീക്കുന്നതിന് ശ്രമം നടക്കുകയാണ്. ഇതിനെ നിയമപരമായി നേരിടാൻ യോഗം തീരുമാനിച്ചു. പ്രസിഡന്‍റ് ഡോ.എ.ടി. സുരേഷ് അധ്യക്ഷത വഹിച്ചു. ജില്ലാ സെക്രട്ടറി അഡ്വ. അബ്ദുറഹ്മാൻ കാതിരി, ലവ്ലി അഗസ്റ്റിൻ, അഡ്വ.എസ്.എ. നസീർ, സി.ഡി. സുനീഷ്, കെ.ഐ. വർഗീസ്, എം. മുഹമ്മദ്, സി.കെ. സിറാജുദ്ദീൻ, എം. ഉമ്മർ, എൽദോ ഫിലിപ്പ്, ഷംന നസീർ, ഡോ. അനിത നിഷ ദേവസ്യ എന്നിവർ പ്രസംഗിച്ചു. ചാപ്റ്റർ ഭാരവാഹികൾ പുഴയോരത്തെ ഈറ്റക്കാട് സന്ദർശിച്ചു.

മുസ്‌ലിം ലീഗ് നഗരസഭാ കാര്യാലയത്തിലേക്ക് മാർച്ച് നടത്തി

സുൽത്താൻ ബത്തേരി: മാനിക്കുനി ഉന്നതിയിലെ കുടുംബങ്ങളുടെ ദുരിതത്തിന് പരിഹാരം ആവശ്യപ്പെട്ട് മുസ്‌ലിം ലീഗ് പഞ്ചായത്ത് കമ്മിറ്റിയുടെ നേതൃത്വത്തിൽ ഇന്നലെ ഉച്ചകഴിഞ്ഞ് മുനിസിപ്പൽ കാര്യാലയത്തിലേക്ക് മാർച്ച് നടത്തി. പോലീസ് വലയം ഭേദിച്ച് ഓഫീസ് വളപ്പിൽ തള്ളിക്കയറിയ പ്രവർത്തകർ സെക്രട്ടറിയുടെ കാബിനു മുന്പിൽ കുത്തിയിരുന്നു. സമരക്കാർ തള്ളിക്കയറുന്നതിനിനിടെ മുനിസിപ്പൽ ഓഫീസിന്‍റെ ഗേറ്റിൽ കുടുങ്ങി എസ്ഐ വി. വിജയന്‍റെ വിരലിന് പരിക്കേറ്റു. ഇൻസ്പെക്ടർ എൻ.പി. രാഘവന്‍റെ നേതൃത്വത്തിൽ കൂടുതൽ പോലിസെത്തിയാണ് പ്രവർത്തകരെ നീക്കിയത്. നേതാക്കളായ പി.പി. അയ്യൂബ്, ഷബീർ അഹമ്മദ്, സമദ് കണ്ണിയൻ, റിയാസ് കല്ലുവയൽ, ഇ.പി. ജലീൽ, അസീസ് വേങ്ങൂർ, നൗഷാദ് മംഗലശേരി, സി.കെ. മുസ്തഫ, അൻസാർ മണിച്ചിറ, റിയാസ് കൂടത്താൾ തുടങ്ങിയവർ സമരത്തിനു നേതൃത്വം നൽകി.

സിപിഎം സമരങ്ങൾ പരിഹാസ്യം: എൻ.ഡി. അപ്പച്ചൻ

കൽപ്പറ്റ: യുഡിഎഫ് ഭരണത്തിലുള്ള സഹകരണ സ്ഥാപനങ്ങൾക്കെതിരേ സിപിഎം ഉന്നയിക്കുന്ന ആരോപണങ്ങളും സമരങ്ങളും പരിഹാസ്യമാണെന്ന് ഡിസിസി പ്രസിഡന്‍റ് എൻ.ഡി. അപ്പച്ചൻ പറഞ്ഞു. ബ്രഹ്മഗിരി സൊസൈറ്റിയുടെ പേരിൽ വ്യക്തികളിൽനിന്നും സ്ഥാപനങ്ങളിൽനിന്നും പലിശ വാഗ്ദാനം ചെയ്ത് വാങ്ങിയ കോടിക്കണക്കിനു രൂപ ദുർവ്യയം ചെയ്ത കൂട്ടരാണ് യുഡിഎഫ് നിയന്ത്രണത്തിലുള്ള സഹകരണ സംഘങ്ങൾക്കെതിരേ ഇല്ലാത്ത അഴിമതി ആരോപിച്ച് സമരവുമായി വരുന്നത്. സാമാന്യ മര്യാദയുണ്ടെങ്കിൽ ബ്രഹ്മഗിരി സൊസൈറ്റിക്കുവേണ്ടി വാങ്ങിയ പണം തിരിച്ചുകൊടുക്കുന്നതിനാണ് സിപിഎം ഇടപെടേണ്ടത്. സിപിഎം നിയന്ത്രണത്തിലുള്ളതാണ് ബ്രഹ്മഗിരി സൊസൈറ്റി. സംസ്ഥാനത്തെ മുഴുവൻ സഹകരണ സ്ഥാപനങ്ങളും കേന്ദ്ര സർക്കാരിന്‍റെ നിയന്ത്രണത്തിലാക്കാനുള്ള ബിജെപി നീക്കം വിലപ്പോകില്ലെന്നും അപ്പച്ചൻ പറഞ്ഞു.

ഇടിഞ്ഞുതാഴ്ന്ന പൊതുകിണർ മൂടിയില്ല; ഗോത്ര കുടുംബങ്ങൾ ഭീതിയിൽ

സുൽത്താൻ ബത്തേരി: മഴക്കാലത്ത് ഇടിഞ്ഞുതാഴ്ന്ന പൊതുകിണർ ഒരു വർഷം കഴിഞ്ഞിട്ടും മൂടിയില്ല. നെൻമേനി പഞ്ചായത്തിലെ കോളിയാടി കൊല്ലിവയൽ ഉന്നതിയിൽ ഇടിഞ്ഞുതാഴ്ന്ന കിണറാണ് ഇനിയും മൂടാത്തത്. കിണറിനുചുറ്റും ഗ്രീൻനെറ്റ് കെട്ടിയാണ് ഉന്നതിയിലെ കുടുംബങ്ങൾക്ക് അധികൃതർ താത്കാലിക സുരക്ഷ ഒരുക്കിയത്. വലിയ ശബ്ദത്തോടെയാണ് കിണർ ഇടിഞ്ഞുതാഴ്ന്നതെന്നു ഉന്നതിയിലുള്ളവർ പറഞ്ഞു. ഭയപ്പാടിലായ കുടുംബങ്ങൾ കുറച്ചുകാലം ബന്ധുവീടുകളിലാണ് കഴിഞ്ഞത്. ഉന്നതി സന്ദർശിച്ച അധികൃതർ കിണർ മണ്ണിട്ട് മൂടാമെന്ന് അറിയിച്ചത് വെറുതെയായി. കിണർ കെട്ടിമറയ്ക്കുന്നതിന് ഗ്രീൻനെറ്റ് ലഭ്യമാക്കുകമാത്രമാണ് അവർ ചയ്തത്. കിണറിനടുത്ത് കുട്ടികൾ കളിക്കുന്നത് ആശങ്കയോടെയാണ് മുതിർന്നവർ കണ്ടുനിൽക്കുന്നത്. വീണ്ടും മഴക്കാലമെത്തിയതോടെ കിണറിന്‍റെ വശങ്ങൾ ഇടിയുന്നുണ്ട്. ഉന്നതിയിലെ 30 ഓളം കുടുംബങ്ങൾക്ക് കുടിവെള്ളത്തിന് ജലനിധിയും നൂൽപ്പുഴ ശുദ്ധജലവിതരണ പദ്ധതിയുമാണ് നിലവിൽ ആശ്രയം. ഇടിഞ്ഞുതാഴ്ന്നത് മൂടി പകരം കിണർ നിർമിക്കണമെന്നാണ് ഉന്നതിയിലെ കുടുംബങ്ങളുടെ ആവശ്യം.

പൂക്കോട് കോളജിൽ "നോ ടു ഡ്രഗ്സ്' കാന്പയിൻ അഞ്ചാംഘട്ടത്തിനു തുടക്കമായി

കൽപ്പറ്റ: പൂക്കോട് വെറ്ററിനറി കോളജിൽ അന്താരാഷ്ട്ര ലഹരിവിരുദ്ധ ദിനാചരണവും "നോ ടു ഡ്രഗ്സ്' കാന്പയിൻ അഞ്ചാംഘട്ടം ഉദ്ഘാടനവും നടത്തി. വിമുക്തി മിഷൻ, പോലീസ്, ആരോഗ്യവകുപ്പ്, കേരള വെറ്ററിനറി ആൻഡ് ആനിമൽ സയൻസസ് യൂണിവേഴ്സിറ്റി എന്നിവ സംയുക്തമായാണ് പരിപാടി സംഘടിപ്പിച്ചത്. ജില്ലാ പഞ്ചായത്ത് പ്രസിഡന്‍റ് സംഷാദ് മരക്കാർ ഉദ്ഘാടനം ചെയ്തു. ജില്ലയിലെ 120 വിദ്യാലയങ്ങളെ പുകയില-ലഹരി വിമുക്തമായി അദ്ദേഹം പ്രഖ്യാപിച്ചു. ഡെപ്യൂട്ടി എക്സൈസ് കമ്മീഷണർ എ.ജെ. ഷാജി അധ്യക്ഷത വഹിച്ചു. ഡിവൈഎസ്പി കെ.ജി. പ്രവീണ്‍കുമാർ മുഖ്യപ്രഭാഷണം നടത്തി. എൻപിഎൻസിഡി നോഡൽ ഓഫീസർ ഡോ.കെ.ആർ. ദീപ ലഹരിവിരുദ്ധ സന്ദേശം നൽകി. അസിസ്റ്റന്‍റ് എക്സൈസ് കമ്മീഷണർ വൈ. പ്രസാദ്, റവ.ഡോ. ഷാജൻ നോറോണ, ജില്ലാ എഡ്യുക്കേഷൻ ആൻഡ് മീഡിയ ഓഫീസർ കെ.എം. മുസ്തഫ, ടെക്നിക്കൽ അസിസ്റ്റന്‍റ് സി.കെ. മനോജ്കുമാർ, വിമുക്തി മിഷൻ ജില്ലാ കോഓർഡിനേറ്റർ എൻ.സി. സജിത്ത്കുമാർ, എം.എം. ജോയ്, പി.വി. രജിത്ത്, കോളജ് ഡീൻ ഇൻ ചാർജ് ഡോ. അജിത് ജേക്കബ് ജോർജ്, എക്സൈസ് സർക്കിൾ ഇൻസ്പെക്ടർ ടി. ഷറഫുദ്ദീൻ എന്നിവർ പ്രസംഗിച്ചു.

വന്യജീവി ശല്യം: വനം ഓഫീസിനു മുന്പിൽ ധർണ നടത്തി

കാട്ടിക്കുളം: തിരുനെല്ലി, തൃശിലേരി മണ്ഡലം കോണ്‍ഗ്രസ് കമ്മിറ്റികളുടെ നേതൃത്വത്തിൽ തൃശിലേരി സെക്ഷൻ ഫോറസ്റ്റ് ഓഫീസിനു മുന്പിൽ ധർണ നടത്തി. തിരുനെല്ലി പഞ്ചായത്തിന്‍റെ വിവിധ ഭാഗങ്ങളിൽ രൂക്ഷമായ വന്യമൃഗശല്യത്തിനു പരിഹാരം ആവശ്യപ്പെട്ടായിരുന്നു സമരം. മാനന്തവാടി ബ്ലോക്ക് കോണ്‍ഗ്രസ് കമ്മിറ്റി പ്രസിഡന്‍റ് എ.എം. നിശാന്ത് ഉദ്ഘാടനം ചെയ്തു. സതീശൻ പുളിമൂട് അധ്യക്ഷത വഹിച്ചു. കമ്മന മോഹനൻ, ഒ.പി. ഹസൻ, റഷീദ് തൃശിലേരി, ബാലനാരായണൻ, കെ.ജി. രാമകൃഷ്ണൻ, കെ.വി. ഷിനോജ്, റീന ജോർജ്, സുധാകരൻ പാൽവെളിച്ചം എന്നിവർ പ്രസംഗിച്ചു.

പ്രൈമറി വിദ്യാലയങ്ങൾക്ക് മൈക്ക് സെറ്റും പ്രിന്‍ററും നൽകി

അന്പലവയൽ: പഞ്ചായത്ത് വാർഷിക പദ്ധതിയിൽ ഉൾപ്പെടുത്തി ഗവ.പ്രൈമറി വിദ്യാലയങ്ങൾക്ക് മൈക്ക് സെറ്റും പ്രിന്‍ററും നൽകി. ആണ്ടൂർ ജിഎൽപി സ്കൂളിൽ പഞ്ചായത്ത് വൈസ് പ്രസിഡന്‍റ് കെ. ഷമീർ വിതരണോദ്ഘാടനം നിർവഹിച്ചു. വാർഡ് അംഗം എൻ.സി. കൃഷ്ണകുമാർ അധ്യക്ഷത വഹിച്ചു. പിടിഎ പ്രസിഡന്‍റ് റഷീദ് ആണ്ടൂർ വിദ്യാലയത്തിന്‍റെ അക്കാദമിക മാസ്റ്റർ പ്ലാൻ പ്രകാശനം ചെയ്തു. അധ്യാപകരായ ഗീത, റജിന, സുജ, ഹെഡ്മാസ്റ്റർ അബ്ദുൾ വാഹിദ്, പിഇസി കണ്‍വീനർ എം.എഫ്. എൽസി എന്നിവർ പ്രസംഗിച്ചു.

മാണിക്യ ജൂബിലി ആഘോഷിച്ചു

കൽപ്പറ്റ: വൈത്തിരി പ്രാഥമിക സഹകരണ കാർഷിക ഗ്രാമ വികസന ബാങ്ക് മാണിക്യ ജൂബിലി(റൂബി ജൂബിലി)ആഘോഷിച്ചു. സഹകരണ വികസന ക്ഷേമനിധി ബോർഡ് വൈസ് ചെയർമാൻ സി.കെ. ശശീന്ദ്രൻ ഉദ്ഘാടനം ചെയ്തു. ബാങ്ക് പ്രസിഡന്‍റ് കെ. സുഗതൻ അധ്യക്ഷത വഹിച്ചു. മുൻ പ്രസിഡന്‍റ് വി.പി. ശങ്കരൻ നന്പ്യാരെ സി.കെ. ശശീന്ദ്രനും മാതൃകാ കർഷകൻ വി.യു. കുര്യാച്ചനെ ജില്ലാ ഡ്രൈവേഴ്സ് സഹകരണ സംഘം പ്രസിഡന്‍റ് കെ. റഫീഖും ആദരിച്ചു.എസ്എസ്എൽസി വിദ്യാർഥികൾക്കുള്ള ഇഎംഎസ് എൻഡോവ്മെന്‍റ് കേരള ബാങ്ക് ഡയറക്ടർ പി. ഗഗാറിനും പ്ലസ് ടു വിദ്യാർഥികൾക്കുള്ള ടി.എസ്. രാധാകൃഷ്ണൻ എൻഡോവ്മെന്‍റ് സഹകരണ ജോയിന്‍റ് രജിസ്ട്രാർ അബ്ദുൾ റഷീദ് തിണ്ടുമ്മലും വിതരണം ചെയ്തു. ബാങ്ക് റീജിയണൽ മാനേജർ ടി.ജെ. ജോണ്‍സണ്‍, പി. അശോക്കുമാർ, ഒ.ഇ. കാസിം, കെ. വിശാലാക്ഷി, വൈസ് പ്രസിഡന്‍റ് വി. യൂസുഫ്, സെക്രട്ടറി എ. നൗഷാദ് എന്നിവർ പ്രസംഗിച്ചു.

തെരുവോര ചിത്രരചന ശ്രദ്ധേയമായി

പുൽപ്പള്ളി: കബനിഗിരി നിർമല ഹൈസ്കൂളിലെ വിദ്യാർഥികളും അധ്യാപകരും പിടിഎ പ്രതിനിധികളും പാടിച്ചിറ ടൗണിൽ നടത്തിയ ലഹരിവിരുദ്ധ തെരുവോര ചിത്രരചന ശ്രദ്ധേയമായി. കച്ചവടക്കാർ, ഓട്ടോ-ടാക്സി, ചുമട്ടു തൊഴിലാളികൾ, രാഷ്ട്രീയ, സാമൂഹിക, സാസ്കാരിക പ്രവർത്തകർ തുടങ്ങിയവർ പരിപാടിയുമായി സഹകരിച്ചു. എം.ടി. ബിനുവിന്‍റെ നേതൃത്വത്തിലാണ് ചിത്രരചന സംഘടിപ്പിച്ചത്. മുള്ളൻകൊല്ലി പഞ്ചായത്ത് പ്രസിഡന്‍റ് പി.കെ. വിജയൻ ഉദ്ഘാടനം ചെയ്തു. പിടിഎ പ്രസിഡന്‍റ് ഷിനു കച്ചിറയിൽ അധ്യക്ഷത വഹിച്ചു. ഹെഡ്മാസ്റ്റർ എ.ടി. ഷാജി, സാബു ജോണ്‍, ജയമോൾ, ശ്രീലേഷ്, വ്യാപാരി വ്യവസായി ഏകോപന സമിതി യൂണിറ്റ് പ്രസിഡന്‍റ് വി.എം. വിജയൻ എന്നിവർ പ്രസംഗിച്ചു.

അരിവാൾ രോഗം : നൂൽപ്പുഴയിൽ കെട്ടിട നിർമാണം പൂർത്തിയാകുന്നു

കൽപ്പറ്റ: അരിവാൾ കോശ രോഗ ചികിത്സ ലക്ഷ്യമാക്കി നൂൽപ്പുഴ ആരോഗ്യ കേന്ദ്രത്തിൽ 1.43 കോടി രൂപ ചെലവിൽ കെട്ടിട നിർമാണം പൂർത്തിയാകുന്നു. 2022-23 എൻഎച്ച്എം ആർഒപിയിൽ അനുവദിച്ച കെട്ടിടം ഈ മാസം തുറന്നുപ്രവർത്തിക്കും. അരിവാൾ രോഗ നിർമാർജനത്തിന് ജില്ലയിൽ വിവിധ പരിപാടികൾ നടന്നുവരികയാണ്. നാഷണൽ സിക്കിൾ സെൽ അനീമിയ എലിമിനേഷൻ മിഷന്‍റെ ഭാഗമായി ജില്ലയിൽ അരിവാൾ രോഗികൾക്കായി മൊബൈൽ മെഡിക്കൽ ക്യാന്പുകൾ നടത്തുന്നുണ്ട്. മാനന്തവാടി ഗവ. മെഡിക്കൽ കോളജ് ആശുപത്രിയിൽ അരിവാൾ രോഗികൾക്കായി എല്ലാ ദിവസവും ഒപി പ്രവർത്തിക്കുന്നുണ്ട്. കൈനാട്ടി ജനറൽ ആശുപത്രി, വൈത്തിരി, ബത്തേരി താലൂക്ക് ആശുപത്രികൾ, കുടുംബാരോഗ്യ കേന്ദ്രങ്ങൾ, പ്രാഥമികാരോഗ്യ കേന്ദ്രങ്ങൾ എന്നിവിടങ്ങളിൽ രോഗികൾക്ക് സൗജന്യമായി ഹൈഡ്രോക്സി യൂറിയ, ഫോളിക് ആസിഡ് മരുന്നുകൾ ലഭ്യമാക്കുന്നുണ്ട്. മാനന്തവാടിയിൽ ബ്ലഡ് എക്സ്ചേഞ്ച് ട്രാൻസ്ഫ്യൂഷൻ സൗകര്യം ഒരുക്കിയിട്ടുണ്ട്. മെഡിക്കൽ കോളജ് ആശുപത്രിയിൽ 10 കിടക്കകളോടെ പ്രവർത്തിക്കുന്ന സിക്കിൾ സെൽ അനീമിയ യൂണിറ്റിൽ ഡോക്ടർ, സ്റ്റാഫ് നഴ്സ്, ഫിസിയോ തെറാപിസ്റ്റ്, ലാബ് ടെക്നീഷൻ, സോഷ്യൽ വർക്കർ, ഡാറ്റാ എൻട്രി ഓപറേറ്റർ എന്നിവരുടെ സേവനം ലഭ്യമാണ്. അസ്ഥിരോഗ വിഭാഗത്തിന്‍റെ നേതൃത്വത്തിൽ ഇടുപ്പ് മാറ്റിവയ്ക്കൽ ശസ്ത്രക്രിയ്ക്കും ഗവ. മെഡിക്കൽ കോളജ് ആശുപത്രിയിൽ സൗകര്യമുണ്ട്. സിക്കിൾ സെൽ പോയിന്‍റ് ഓഫ് ടെസ്റ്റിൽ(പിഒസി)പോസിറ്റീവ് ആയവരുടെ രക്ത സാംപിളുകൾ മെഡിക്കൽ കോളജ് ആശുപത്രിയിലെത്തിച്ച് എച്ച്പിഎൽസി പരിശോധനയ്ക്ക് വിധേയമാക്കുന്നുണ്ട്. ജില്ലാ പഞ്ചായത്തിന്‍റെ പോഷകാഹാര കിറ്റ് പദ്ധതിയിൽ എല്ലാ മാസവും അരിവാൾ രോഗികൾക്ക് ഭക്ഷ്യക്കിറ്റ് ഉറപ്പാക്കുന്നുണ്ട്. നവജാത ശിശുക്കൾക്ക് രോഗനിർണയ പരിശോധനയും സാമൂഹികനീതി വകുപ്പ് മുഖേന എല്ലാ രോഗികൾക്കും യുഡിഐഡി കാർഡും ലഭ്യമാക്കുന്നുണ്ട്. ഉന്നതികളിലെ അരിവാൾ രോഗികൾക്ക് പട്ടികവർഗ വകുപ്പ് 2,500 രൂപ വീതവും അല്ലാത്തവർക്ക് കെഎസ്എസ്എം മുഖേന 2,000 രൂപ വീതവും പ്രതിമാസം നൽകുന്നുണ്ട്. ഓരോ ആരോഗ്യകേന്ദ്ര പരിധിയിലും അരിവാൾ കോശ രോഗികൾക്ക് അവശ്യ സേവനങ്ങൾ ഉറപ്പാക്കാൻ മാപ്പിംഗ് ആരംഭിക്കും. ഉന്നതികളിലെ 40 വയസിൽ താഴെ പ്രായമുള്ള എല്ലാവരിലും അരിവാൾ രോഗ പരിശോധന ഈ വർഷം പൂർത്തിയാക്കും. 2023-24ൽ 1,07,000 ആളുകളെ സിക്കിൾ സെൽ പിഒസി ടെസ്റ്റ് മുഖേന സ്ക്രീൻ ചെയ്തു. 2024-25ൽ 70,000 പേരെയാണ് സ്ക്രീൻ ചെയ്തത്.

വനപാതയിൽ ബസിനുനേരേ പാഞ്ഞടുത്ത് കാട്ടാന

സുൽത്താൻ ബത്തേരി: വനപാതയിൽ ബസിനുനേരേ കാട്ടാന പാഞ്ഞടുത്തു. ദേശീയപാത 766ലെ മുത്തങ്ങയിൽ ഇന്നലെ രാവിലെയാണ് സംഭവം. തിരുവനന്തപുരത്തുനിന്ന് ബംഗളൂരൂവിനുള്ള സ്കാനിയ ബസിനുനേരേയാണ് ആന പാഞ്ഞടുത്തത്. ഡ്രൈവർ തുടർച്ചയായി ഹോണ്‍ മുഴക്കിയതോടെ ആന പിൻവാങ്ങി. ഇതോടെയാണ് യാത്രക്കാർക്ക് ആശ്വാസമായത്. യാത്രക്കാരിലൊരാൾ മൊബൈൽ ഫോണ്‍ കാമറയിൽ പകർത്തിയ ആനയുടെ ദൃശ്യം സമൂഹമാധ്യമങ്ങളിൽ വൈറലായി.

വീടിന്‍റെ തറയിലും ചുമരിലും രക്തത്തിന് സമാനമായ നിറത്തിൽ ദ്രാവകം കിനിയുന്നത് പരിഭ്രാന്തിക്കിടയാക്കി

സുൽത്താൻ ബത്തേരി: വീടിന്‍റെ തറയിലും ചുമരിലും രക്തത്തിന് സമാനമായ നിറത്തിൽ ദ്രാവകം കിനിയുന്നത് പരിഭ്രാന്തിക്കിടയാക്കി. നെൻമേനി പഞ്ചായത്തിലെ മഞ്ഞാടിയിൽ പറയഞ്ചേരി ഹഫ്സത്തും കുടുംബവും താമസിക്കുന്ന വീട്ടിലാണ് ഈ പ്രതിഭാസം. ചൊവ്വാഴ്ച രാത്രി ഏഴോടെയാണ് നിലത്ത് രക്തത്തിന് സമാനമായ നിറത്തിൽ ദ്രാവകം ആദ്യം കണ്ടത്. രണ്ടരവയസുള്ള കുട്ടിയുടെ ദേഹത്തും നിറമുള്ള ദ്രാവകം പടർന്നിരുന്നു. വീട്ടുകാർ കുട്ടിയെ ആശുപത്രിയിൽ പരിശോധനയ്ക്ക് വിധേയമാക്കിയെങ്കിലും പ്രത്യേകിച്ച് ഒന്നും കണ്ടെത്താനായില്ല. ഒരു ദിവസത്തിനുശേഷം ഇന്നലെ രാവിലെ മുതൽ പല സമയങ്ങളിൽ ഹാളിലും കിടപ്പുമുറികളിലും ശുചിമുറിയിലും ചുമരിലും ഇത്തരത്തിൽ ദ്രാവകം കിനിഞ്ഞത് വീട്ടുകാരെ ആശങ്കയിലാക്കി. ഒരിടത്ത് തുടച്ചുകളയുന്പോൾ മറ്റൊരിടത്ത് ദ്രാവകം കിനിയുകയാണ്. ഇതേക്കുറിച്ച് അറിഞ്ഞ് നിരവധിയാളുകളും നെൻമേനി പഞ്ചായത്ത് അധികൃതരും സ്ഥലത്ത് എത്തി. വൈകുന്നേരം വീട്ടിലെത്തിയ അന്പലവയൽ പോലീസ് സാംപിൾ ശേഖരിച്ച് പരിശോധനയ്ക്ക് അയയ്ച്ചു. പരിശോധനാഫലം വന്നതിനുശേഷമേ പ്രതിഭാസത്തിനു കാരണം വ്യക്തമാകൂവെന്ന് പോലീസ് പറഞ്ഞു. ഹഫസ്ത്തിന്‍റെ അമ്മാവന്‍റെ മകന്‍റേതാണ് വീട്. കുടുംബം തൊട്ടടുത്തുള്ള വീട്ടിലാണ് കഴിഞ്ഞ രാത്രി ഉറങ്ങിയത്.

വാഹനാപകടത്തിൽ മരിച്ച ആശ വർക്കർക്ക് നാടിന്‍റെ യാത്രാമൊഴി

മാനന്തവാടി: മേയ് ആറിന് ചുള്ളിയോടിനു സമീപം വാഹനാപകടത്തിൽ പരിക്കേറ്റ് ചികിത്സയിലിരിക്കേ മരിച്ച ആശ വർക്കർ പാണ്ടിക്കടവ് മുത്താറിമൂല ആലഞ്ചേരി കെ.വി. ഷീജയ്ക്ക് നാടിന്‍റെ യാത്രാമൊഴി. സമൂഹത്തിന്‍റെ വിവിധ തുറകളിൽനിന്നുള്ള നൂറകണക്കിന് ആളുകളുടെ സാന്നിധ്യത്തിലായിരുന്നു ഇന്നലെ ഉച്ചയോടെ ഷീജയുടെ സംസ്കാരം. ചൊവ്വാഴ്ച കോഴിക്കോട് ഉള്ളിയേരിയിലെ സ്വകാര്യ മെഡിക്കൽ കോളജ് ആശുപത്രിയിലായിരുന്നു ഷീജയുടെ മരണം. ചികിത്സയ്ക്ക് നാട്ടുകാർ കമ്മിറ്റി രൂപീകരിച്ച് ധനസമാഹരണം നടത്തിവരുന്നതിനിടെയായിരുന്നു വിയോഗം. ഭർത്താവ് രാമകൃഷ്ണനൊപ്പം സഞ്ചരിച്ച സ്കൂട്ടറിൽ കാർ ഇടിച്ചായിരുന്നു അപകടം. എടവക പഞ്ചായത്ത് ഓഫീസ് ഹാളിൽ പൊതുദർശനത്തിനുവച്ചശേഷമാണ് മൃതദേഹം സംസ്കാരത്തിനായി വീട്ടിലേക്ക് എടുത്തത്.

സിക്കിൾസെൽ അനീമിയ ബാധിതർ വീടില്ലാതെ ദുരിതത്തിൽ

പുൽപ്പള്ളി: ജില്ലയിലെ സിക്കിൾസെൽ അനീമിയ ബാധിതരെ സർക്കാർ സ്ഥലം നൽകി വഞ്ചിച്ചെന്ന് ആരോപണം. ജില്ലയിലെ സിക്കിൾസെൽ അനീമിയ രോഗബാധിതരുടെ നിരന്തരമായ അപേക്ഷകൾ പരിഗണിച്ചാണ് 10 വർഷങ്ങൾക്ക് മുന്പ് അന്നത്തെ യുഡിഎഫ് സർക്കാർ ഇവരെ പുനരധിവസിപ്പിക്കുന്നതിനായി ജില്ലയിൽ വിവിധ ഇടങ്ങളിൽ സ്ഥലം വാങ്ങുവാൻ തീരുമാനിച്ചത്. ഇതിന്‍റെ ഭാഗമായി പുൽപ്പള്ളി ഗ്രാമപഞ്ചായത്തിലെ പതിനാറാം വാർഡിലെ കാപ്പികുന്നിൽ ആറ് ഏക്കർ സ്ഥലം സർക്കാർ വാങ്ങി. പാതിരി വനത്തോട് ചേർന്ന പ്രദേശത്ത് ഏക്കറിന് 16 ലക്ഷം രൂപ വീതം നൽകിയാണ് സർക്കാർ ഭൂമി ഏറ്റെടുത്തത്. മൂടക്കൊല്ലി സ്വദേശി കുഞ്ഞിക്കണ്ണൻ, അജിത്, കൊട്ടമുരട് ഉന്നതിയിലെ ചീര എന്നിവരടക്കം ആറുപേർക്ക് ഓരോ ഏക്കർ വീതം രജിസ്റ്റർ ചെയ്ത് നൽകുകയും ചെയ്തു. സ്ഥലത്തേക്ക് റോഡ്, വീട്, കുടിവെള്ളം എന്നീ സൗകര്യങ്ങൾ ഏർപ്പെടുത്തി പുനരധിവസിപ്പിക്കും എന്നായിരുന്നു സർക്കാർ വാഗ്ദാനം. യുഡിഎഫ് സർക്കാർ വിഭാവനം ചെയ്ത പദ്ധതി പിന്നീട് വന്ന എൽഡിഎഫ് സർക്കാർ പിന്നാന്പുറത്തേക്ക് തള്ളി. രോഗബാധിതർക്ക് സ്ഥലം കിട്ടിയെങ്കിലും വീടോ മറ്റു സൗകര്യങ്ങളോ കിട്ടാത്തതുകൊണ്ട് കൈവശക്കാരാരും ഇങ്ങോട്ട് വന്നില്ല. കഴിഞ്ഞ 10 വർഷമായി അനാഥമായി കിടക്കുന്ന ഈ ആറേക്കർ സ്ഥലം ഇപ്പോൾ സ്വാഭാവിക വനമായി പരിണമിച്ചു. ഈ സ്ഥലത്തിന്‍റെ പഴയ ഉടമ 1987ൽ നിർമിച്ച കിണർ ഇപ്പോഴും ജലസമൃദ്ധമാണ്. സ്ഥലത്തിന്‍റെ നടുവിൽ ഉണ്ടായിരുന്ന കെട്ടിടം പരിപാലിക്കാൻ ആളില്ലാത്തതിനാൽ ജീർണാവസ്ഥയിലായി. അനാഥമായ ഈ സ്ഥലത്തിന്‍റെ ദുരിതം അനുഭവിക്കുന്നത് സമീപവാസികളാണ്. കാട്ടുപന്നി, മാൻ, കുരങ്ങ് എന്നീ വന്യമൃഗങ്ങളുടെ ആവാസ കേന്ദ്രമാണ് ഈ സ്ഥലം. കാട്ടാനകളും പതിവായി ഇവിടെയെത്തുംന്നുണ്ട്. ഉപേക്ഷിക്കപ്പെട്ട വീട് ചൂതാട്ടക്കാരുടെയും മദ്യപരുടെയും മയക്കുമരുന്ന് വിപണന കേന്ദ്രമായും മാറി. സിക്കിൾസെൽ അനീമിയ ബാധിതർക്ക് സർക്കാർവീടും മറ്റ് സൗകര്യങ്ങളും ഏർപ്പെടുത്തണമെന്നാണ് രോഗ ബാധിതരുടെ ആവശ്യം.

പേവിഷബാധയ്ക്കെതിരേ ബോധവത്കരണം

പുൽപ്പള്ളി: പാടിച്ചിറ സെന്‍റ് സെബാസ്റ്റ്യൻസ് എയുപി സ്കൂൾ വിദ്യാർഥികൾക്ക് പേവിഷബാധയ്ക്കെതിരേ ബോധവത്കരണം നൽകി. ഹെഡ്മാസ്റ്റർ സാബു പി.ജോണ്‍ അധ്യക്ഷത വഹിച്ചു. മുള്ളൻകൊല്ലി പ്രാഥമികാരോഗ്യകേന്ദ്രത്തിലെ ഡോ.ആൽബിൻ മാത്യു ക്ലാസെടുത്തു. ജഐച്ച്ഐ ജോസ് ആന്‍റണി പേവിഷബാധ പ്രതിരോധ പ്രതിജ്ഞയെടുപ്പിനു നേതൃത്വം നൽകി. സാന്‍റി പ്രസംഗിച്ചു.

കക്കടവ് - വെട്ടുപാറപ്പടി റോഡ് കാട് മൂടുന്നു

വെള്ളമുണ്ട: ഗ്രാമപ്പഞ്ചായത്തിൽ പാലിയാണ, കൊമ്മയാട് വാർഡുകളെ ബന്ധിപ്പിക്കുന്ന കക്കടവ് - വെട്ടുപാറപ്പടി റോഡിന്‍റെ ഇരുവശവും കാടുമുടി. വാഹനങ്ങൾക്കും കാൽനടയാത്രക്കാർക്കും ഈ വഴി യാത്ര ചെയ്യാൻ പറ്റാതായി. കക്കടവ് മുതൽ ചെന്പോട്ടി കടവ് വരെയുള്ള റോഡ് മുളംകൂട്ടങ്ങളും ഇഞ്ചക്കാടുകളും വളർന്ന് റോഡിനെ പൂർണമായും മറയ്ക്കുകയാണ്. ഇതുവഴി സ്കൂളിലേക്ക് പോകേണ്ട കുട്ടികളോടൊപ്പം മുതിർന്നവരും കൂടെ ചെല്ലേണ്ട അവസ്ഥയാണ്. റോഡിനുരുപുറവും കാടുമുടിയതിനാൽ കക്കടവ്, തരുവണകുന്ന് പ്രദേശങ്ങളിൽ നിന്ന് വിവിധ വിദ്യാലയങ്ങളിലേക്ക് കുട്ടികളെ എടുക്കേണ്ട സ്കൂൾ വാഹനങ്ങൾ ഓട്ടം നിർത്തുവാനുള്ള തയാറെടുപ്പിലാണ്. പഞ്ചായത്ത് അധികൃതർ അടിയന്തരമായി ഇടപെട്ട് യാത്രാദുരിതത്തിൽ നിന്നും പ്രദേശവാസികളെ മോചിപ്പിക്കണമെന്ന് പാലിയാണ പൗരസമിതി ആവശ്യപ്പെട്ടു.

ഇന്‍റർ ഡിസിപ്ലിനറി നാഷണൽ കോണ്‍ഫറൻസ് നടത്തി

മുട്ടിൽ: ഡബ്ല്യുഎംഒ ആർട്സ് ആൻഡ് സയൻസ് കോളജ് പേൾ ജൂബിലിയുടെ(30-ാം വാർഷികം)ഭാഗമായി കേരള ഹയർ എഡ്യുക്കേഷൻ കൗണ്‍സിലുമായി സഹകരിച്ച് നാഷണൽ ഇന്‍റർ ഡിസിപ്ലിനറി റിസർച്ച് കോണ്‍ഫറൻസ് സംഘടിപ്പിച്ചു. സയൻസ്, സോഷ്യൽ സയൻസ് ,ഭാഷ വിഷയങ്ങളിലെ ബിരുദാനന്തരബിരുദ വിദ്യാർഥികൾ, ഗവേഷക വിദ്യാർഥികൾ എന്നിവരിൽ ശക്തമായ ഗവേഷണ സംസ്കാരം വളർത്തുകയെന്ന ലക്ഷ്യത്തോടെയാണ് പരിപാടി സംഘടിപ്പിച്ചത്. കോഴിക്കോട് എൻഐടി രസതന്ത്ര വിഭാഗം പ്രഫ.ഡോ.എ. സുജിത്ത് ഉദ്ഘാടനം ചെയ്തു. കോണ്‍ഫറൻസിൽ അവതരിപ്പിച്ച പ്രബന്ധങ്ങളുടെ സംഗ്രഹ സമാഹാരം കോളജ് പ്രിൻസിപ്പൽ ഡോ.വിജി പോൾ പ്രകാശനം ചെയ്തു. സ്പെയിനിലെ ഡൊനോസ്റ്റിയ ഇന്‍റർനാഷണൽ ഫിസിക്സ് സെന്‍ററിലെ പോസ്റ്റ് ഡോക്ടറൽ ഗവേഷകൻ ഡോ.സ്റ്റീഫൻ മക്മില്ലൻ, സൗദി അറേബ്യയിലെ ഷഖ്റ യൂണിവേഴ്സിറ്റി ഇംഗ്ലീഷ് വിഭാഗം അസി.പ്രഫ.ഡോ.കെ.കെ. ഫഹീം, കൽപ്പറ്റ ഗവ.കോളജ് അറബിക് വിഭാഗം മേധാവി ഡോ.ബഷീർ പൂളക്കൽ, നിലന്പൂർ അമൽ കോളജ് കൊമേഴ്സ് വിഭാഗം അസി.പ്രഫ.ഡോ.യു. ഉമേഷ്, ബത്തേരി സെന്‍റ് മേരീസ് കോളജ് കൊമേഴ്സ് വിഭാഗം അസി.പ്രഫ.ഡോ.ആർ. ഗണേഷ്, തണൽ ചൈൽഡ് ആൻഡ് വിമൻ റെസിലിയൻസ് പ്രോജക്ട് ഹെഡ് ഡോ.കെ. നൂർജഹാൻ എന്നിവർ പ്രഭാഷണം നടത്തി. ഡബ്ല്യുഎംഒ കോളജ് ഐക്യുഎസി കോ ഓർഡിനേറ്റർ ഡോ.നജ്മുദ്ദീൻ, കോണ്‍ഫറൻസ് കോ ഓർഡിനേറ്റർമാരായ അബ്ദുൾ റഷീദ്, സോ.സിറാജുദ്ദീൻ, എൻ. മുഹമ്മദ്റാഫി, കെ. ആസിൽ, വി. മുഹ്സിന, സുഹാൻ ശിഹാബ്, എം. അഫീറ എന്നിവർ പ്രസംഗിച്ചു.

ബത്തേരി പെരിക്കല്ലൂർ റോഡ് ടാറിംഗ്: ആവശ്യമായ ഫണ്ട് അനുവദിക്കണമെന്ന്

പുൽപ്പള്ളി: ഇരുപത്തിമൂന്ന് വർഷങ്ങൾക്ക് മുന്പ് ടാർ ചെയ്ത ബത്തേരി - പെരിക്കല്ലൂർ റോഡ് നല്ല രീതിയിൽ പണിയുന്നതിന് ആവശ്യമായ ഫണ്ട് അനുവദിക്കണമെന്ന് ആം ആദ്മി ബത്തേരി മണ്ഡലം കമ്മിറ്റി ആവശ്യപ്പെട്ടു. ബത്തേരി - പെരിക്കല്ലൂർ റോഡ് വളരെ ശോചനീയമായ സ്ഥിതിയിലാണുള്ളത്. റോഡ് പണിതതിന് ശേഷം ബത്തേരി മുതൽ പുൽപ്പള്ളി വരെ അറ്റകുറ്റപ്പണികൾ ചെയ്തെങ്കിലും പുൽപ്പള്ളി മുതൽ പെരിക്കല്ലൂർ വരെ നാളിത് വരെ ഒരു പണിയും എടുത്തിട്ടില്ല. വലിയ കുഴികളിൽ ചാടി വാഹനങ്ങൾ മറിയുന്നതും വാഹനങ്ങൾ തമ്മിൽ കൂട്ടിമുട്ടി അപകടങ്ങൾ ഉണ്ടാകുന്നതും പതിവാണ്. പെരിക്കല്ലൂർ മുതൽ പുൽപ്പള്ളി വരെയുള്ള ഡ്രൈവിംഗ് സാഹസികമാണ്. തദേശ തെരെത്തെടുപ്പ് അടുത്തപ്പോൾ ജനങ്ങളെ പറ്റിക്കാനായി ബത്തേരി - പെരിക്കല്ലൂർ റോഡ് ടാറിംഗിന് 19 കോടി അനുവദിച്ചെന്നാണ് ഐ.സി. ബാലകൃഷ്ണൻ എംഎൽഎ പറയുന്നത്. ഇതിന് മുൻപും പല പ്രാവശ്യം റോഡ് പണിയാൻ ഫണ്ട് അനുവദിച്ചെന്ന് പറഞ്ഞിരുന്നെങ്കിലും ഒരു പണിയും നടന്നില്ല. ഇന്നത്തെ കാലത്ത് മുപ്പത്തിഅഞ്ച് കിലോമീറ്റർ ദൈർഘ്യമുള്ള ഈ റോഡ് ടാറിംഗിന് പത്തൊൻപത് കോടി രൂപ തികയില്ലെന്ന് ആർക്കും മനസിലാകും. ഈ പ്രസ്ഥാവന ഇവിടുത്തെ ജനങ്ങളെ കബളിപ്പിക്കാനാണെന്ന് ആം ആദ്മി പാർട്ടി ബത്തേരി നിയോജക മണ്ഡലം കമ്മിറ്റി കുറ്റപ്പെടുത്തി. അനുവദിച്ച ഫണ്ട് ഉപയോഗിച്ച് റോഡ് പണി ഏറ്റവും തകർന്ന് കിടക്കുന്ന പെരിക്കല്ലൂർ ഭാഗത്ത് ആരംഭിക്കുകയും ഇരുളം വരെ പൂർത്തികരിക്കണം. ഇരുളം മുതൽ ബത്തേരി വരെ പണിയാനുള്ള ഫണ്ട് അനുവദിക്കാൻ ആവശ്യമായ അടിയന്തര നടപടികൾ സ്വീകരിക്കുകയും ചെയ്യണമെന്ന് കമ്മിറ്റി ആവശ്യപ്പെട്ടു. ആം ആദ്മി പാർട്ടി ബത്തേരി മണ്ഡലം പ്രസിഡന്‍റ് ലിയോ കൊല്ലവേലിൽ യോഗം ഉദ്ഘാടനം ചെയ്തു. മണ്ഡലം സെക്രട്ടറി ബേബി തയ്യിൽ അധ്യക്ഷത വഹിച്ചു. ജില്ല സെക്രട്ടറി പോൾസണ്‍ അന്പലവയൽ, ഇ.വി. തോമസ്, കെ.സി. സണ്ണി, കെ.പി. ജേക്കബ്, തോമസ് ഒറ്റക്കുന്നേൽ, കെ.സി. വർഗീസ്, കെ.ജി. ചാക്കോ തുടങ്ങിയവർ പ്രസംഗിച്ചു.

ഷുഗർ ബോർഡ് സ്ഥാപിച്ചു

മുള്ളൻകൊല്ലി: കുട്ടികളിൽ മധുരപദാർഥ ഉപയോഗം കുറയ്ക്കുക, അതിമധുര വസ്തുക്കളുണ്ടാക്കുന്ന അപകടങ്ങളെക്കുറിച്ച് ബോധവത്കരിക്കുക എന്നീ ലക്ഷ്യങ്ങളോടെ സെന്‍റ് തോമസ് എയുപി സ്കൂളിൽ ഷുഗർ ബോർഡ് സ്ഥാപിച്ചു. പഞ്ചായത്ത് വൈസ് പ്രസിഡന്‍റ് മോളി ആക്കാന്തിരി അനാച്ഛാദനം നിർവഹിച്ചു. വാർഡ് അംഗം മഞ്ജു ഷാജി, പിടിഎ പ്രസിഡന്‍റ് നോബി പള്ളിത്തറ, മദർ പിടിഎ പ്രസിഡന്‍റ് സബിത പൂത്തോട്ടായിൽ, ചാക്കോച്ചൻ കണ്ണന്താനം, അധ്യാപകരായ കെ.എം. നൗഫൽ, അർമിൻ ഏബ്രഹാം എന്നിവർ പ്രസംഗിച്ചു. സമീകൃത ആഹാരം, നാരുകളുടെ പ്രാധാന്യം, പഞ്ചസാരയുടെയും മറ്റും അമിതോപയോഗംമൂലം ഉണ്ടാകുന്ന രോഗങ്ങൾ തുടങ്ങിയ വിഷയങ്ങളിൽ വരുംദിവസങ്ങളിൽ കുട്ടികൾക്ക് ക്ലാസ് നൽകും. സെമിനാറുകൾ സംഘടിപ്പിക്കും.

പെൻഷനേഴ്സ് അസോസിയേഷൻ കരിദിനം ആചരിച്ചു

സുൽത്താൻ ബത്തേരി: കേരള സ്റ്റേറ്റ് സർവീസ് പെൻഷനേഴ്സ് അസോസിയേഷൻ കരിദിനാചരണത്തിന്‍റെ ഭാഗമായി ടൗണിൽ പ്രകടനവും സബ് ട്രഷറിക്കു മുന്പിൽ ധർണയും നടത്തി. ഡിസിസി ജനറൽ സെക്രട്ടറി അഡ്വ.പി.ഡി. സജി ഉദ്ഘാടനം ചെയ്തു. എൻ.ഡി. ജോർജ് അധ്യക്ഷത വഹിച്ചു. ഷാജി ജോസഫ്, സണ്ണി ജോസഫ്, വി.ആർ. ശിവൻ, കെ. രാധാകൃഷ്ണൻ, ആർ.പി. നളിനി, ടി.പി. ശശിധരൻ, എം. ആലീസ്, പി.വി. പൗലോസ്, എ.പി. ചാക്കോ എന്നിവർ പ്രസംഗിച്ചു. ഏബ്രഹാം ഫിലിപ്പ്, എം. ശിവരാമൻ, സി. ജേക്കബ്, അബ്ദുൾസലാം, കുര്യൻ കോട്ടുപ്പള്ളി, ഗോപിനാഥൻ പുൽപ്പള്ളി, ടി. ഏലിയാസ്, കെ.എ. കുര്യാക്കോസ്, ബാബു തോമസ്, ചന്ദ്രിക, കെ.ജെ. ജോളി തുടങ്ങിയവർ നേതൃത്വം നൽകി.

കാട്ടാന ആക്രമണത്തിൽ പരിക്കേറ്റ സുബ്രഹ്മണ്യനും ലക്ഷ്മണനും വനം വകുപ്പ് സഹായം നൽകാത്തതിൽ പ്രതിഷേധം

മാനന്തവാടി: കാട്ടാന ആക്രമണത്തിൽ ഗുരുതരമായി പരിക്കേറ്റ് കിടപ്പിലായ സുബ്രഹ്മണ്യനും ലക്ഷ്മണനും വനം വകുപ്പ് സഹായം നിഷേധിക്കുന്നതിൽ പ്രതിഷേധം. തിരുനെല്ലി പഞ്ചായത്ത് പരിധിയിൽ താമസക്കാരാണ് ഇരുവരും. 2023 ഡിസംബർ 24ന് വീട്ടുമുറ്റത്താണ് സുബ്രഹ്മണ്യനെ ആന ആക്രമിച്ചത്. ദീർഘകാലം ചികിത്സയിലായിരുന്ന ഇദ്ദേഹത്തിന് വനം വകുപ്പ് നഷ്ടപരിഹാരം നൽകിയില്ല. കഴിഞ്ഞ മെയ് 24ന് രാത്രി പനവല്ലിക്കു സമീപമാണ് ലക്ഷ്മണനെ ആന ആക്രമിച്ചത്. ഇദ്ദേഹത്തിന്‍റെ നട്ടെല്ലിനു ഗുരുതര പരിക്കേറ്റു. അഞ്ച് വാരിയെല്ല് ഒടിഞ്ഞു. ദിവസങ്ങളോളം ആശുപത്രിയിൽ കഴിയേണ്ടിവന്നു. ചികിത്സാസഹായത്തിന് പലതവണ വനം വകുപ്പിനെ സമീപിച്ചെങ്കിലും തുച്ഛമായ തുകയാണ് ലഭിച്ചത്. ഇരുവർക്കും മതിയായ സഹായം നിഷേധിക്കുന്നതിൽ മനുഷ്യാവകാശ ഉപഭോക്തൃ സംരക്ഷണ സമിതി(എച്ച്ആർസിപിസി) പ്രതിഷേധിച്ചു. സഹായവും നഷ്ടപരിഹാരവും ഉടൻ ലഭ്യമാക്കണമെന്ന് ആവശ്യപ്പെട്ടു.

‘ജൈവ സന്തുലനം നിലനിർത്തണം’

വെള്ളമുണ്ട: ജൈവ സന്തുലനം നിലനിർത്തി മനുഷ്യരുടെയും മറ്റ് ജീവജാലങ്ങളുടെയും നിലനിൽപ്പ് ഉറപ്പാക്കണമെന്ന് പട്ടികജാതി-വർഗ-പിന്നാക്ക ക്ഷേമ മന്ത്രി ഒ.ആർ. കേളു. പഞ്ചായത്തിൽ നബാർഡിന്‍റെ സാന്പത്തിക സഹായത്തോടെ മണ്ണ് സംരക്ഷണ വകുപ്പ് നടപ്പാക്കിയ എരുവാഞ്ചേരി നീർത്തട പദ്ധതിയിലെ പൊതു ആസ്തികളുടെ കൈമാറ്റം ഉദ്ഘാടനം ചെയ്യുകയായിരുന്നു അദ്ദേഹം. ജലവും മണ്ണും സംരക്ഷിക്കാൻ ഏവരും തയാറാവണമെന്നു മന്ത്രി പറഞ്ഞു. പൊതു ആസ്തികളായ കോണ്‍ക്രീറ്റ് തടയണ, കോണ്‍ക്രീറ്റ് ഫാം, കുളങ്ങൾ, കരിങ്കൽ കുളം എന്നിവ പഞ്ചായത്തിന് കൈമാറി. പുലിക്കാട് ഗവ.എൽപി സ്കൂളിൽ നടന്ന പരിപാടിയിൽ പഞ്ചായത്ത് പ്രസിഡന്‍റ് സുധി രാധാകൃഷ്ണൻ അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്‍റ് ജസ്റ്റിൻ ബേബി, ജില്ലാ പഞ്ചായത്ത് ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ ജുനൈദ് കൈപ്പാണി, ബ്ലോക്ക് അംഗങ്ങളായ പി.കെ. അമീൻ, ബാലൻ വെള്ളരിമ്മൽ, ജില്ലാ മണ്ണ് സംരക്ഷണ ഓഫീസർ താര മനോഹരൻ, മാനന്തവാടി മണ്ണുസംരക്ഷണ ഓഫീസർ ഇ.കെ. അരുണ്‍, മാനന്തവാടി മണ്ണ് സംരക്ഷണ അഡീഷണൽ ഡയറക്ടർ ഡി. ആനന്ദ ബോസ്, എരുവാഞ്ചേരി നീർത്തടം കണ്‍വീനർ മുസ്തഫ മുലന്തേരി തുടങ്ങിയവർ പങ്കെടുത്തു.

കൃപാലയ സ്കൂളിൽ രജതജൂബിലി ആഘോഷങ്ങൾക്ക് തുടക്കമായി

പുൽപ്പള്ളി: കൃപാലയ സ്പെഷൽ സ്കൂളിൽ രജത ജൂബിലി ആഘോഷ പരിപാടിയുടെ ഉദ്ഘാടനം പുൽപ്പള്ളി തിരുഹൃദയവികാരി ഫാ. ജോഷി പുൽപ്പയിൽ നിർവഹിച്ചു. ഫാ. ജോർജ് ആലൂക്കയുടെ നേതൃത്വത്തിൽ വിശുദ്ധ കുർബാനയും ജൂബിലി തിരിതെളിക്കലും നടത്തി. മുള്ളൻകൊല്ലി സെന്‍റ് മേരീസ് ഫോറോന വികാരി ഫാ. ജോർജ് ആലുക്ക അനുഗ്രഹ പ്രഭാഷണം നടത്തി. കൃപാലയ സ്പെഷൽ സ്കൂൾ മാനേജർ റവ.സിക്ഷർ. പൗളിൻ മുകാല അധ്യക്ഷത വഹിച്ചു. സിസ്റ്റർ ടെസീന ആദ്യകാല കുട്ടികൾക്ക് ജൂബിലി വൃക്ഷ തൈകൾ വിതരണം ചെയ്തു. സ്കൂൾ പ്രിൻസിപ്പൽ സിസ്റ്റർ ആൻസീന, സോഷ്യൽ വർക്ക് കൗണ്‍സലർ സിസ്റ്റർ ആൻസ് മരിയ, ജൂബിലി കണ്‍വീനർ ടി.യു. ഷിബു എന്നിവർ പ്രസംഗിച്ചു.

തെന്നല ബാലകൃഷ്ണപിള്ള അനുസ്മരണം നടത്തി

കൽപ്പറ്റ: കേരള പ്രദേശ് ഗാന്ധിദർശൻ വേദിയുടെ ആഭിമുഖ്യത്തിൽ പ്രമുഖ ഗാന്ധിയനായിരുന്ന കെപിസിസി മുൻ പ്രസിഡന്‍റ് തെന്നല ബാലകൃഷ്ണപിള്ളയെ ജില്ലാ കോണ്‍ഗ്രസ് കമ്മിറ്റി ഓഫീസിൽ അനുസ്മരിച്ചു. തികഞ്ഞ ഗാന്ധിയനും ലാളിത്യത്തിന്‍റെ മൂർത്തിമത് ഭാവവുമായിരുന്നു തെന്നല ബാലകൃഷ്ണപിള്ളയെന്ന് അനുസ്മരണ യോഗം ഉദ്ഘാടനം ചെയ്ത ഗാന്ധിദർശൻ വേദി സംസ്ഥാന കമ്മറ്റി അംഗം പി.വി. ആന്‍റണി പറഞ്ഞു. തെന്നല ബാലകൃഷ്ണപിള്ളയുടെ ഛായാ ചിത്രത്തിൽ ഗാന്ധിദർശൻ വേദി പ്രവർത്തകരും നേതാക്കളും പുഷ്പാർച്ചന നടത്തി. ജില്ലാ ചെയർമാൻ ഇ.വി. ഏബ്രഹാം അധ്യക്ഷത വഹിച്ചു. പി.വി. ശോഭന കുമാരി, കസ്തൂർബാ വനിതാ ഗാന്ധി ദർശൻ വേദി ജില്ലാ ചെയർപേഴ്സണ്‍ ചിന്നമ്മ ജോസ്, സംസ്ഥാന സമിതി അംഗം കെ.ജി. വിലാസിനി, ഗാന്ധി ദർശൻവേദി ജില്ലാ ജനറൽ സെക്രട്ടറി മുസ്തഫ എള്ളിൽ, പി. ചന്ദ്രൻ, ജി. പ്രമോദ്, കെ.പി. ജോണ്‍, കെ. സുബ്രഹ്മണ്യൻ, ഗിരിജ സതീഷ്, ബെന്നി വട്ടപ്പറന്പിൽ, വി.ഡി. രാജു, ഐ.ബി. മൃണാളിനി, ലില്ലിക്കുട്ടി മാത്യു, ഒ.ജെ. ബിന്ദു, അംബുജം, ശ്രീജ ബാബു, ഷാന്‍റി ചേനപ്പാടി എന്നിവർ പ്രസംഗിച്ചു.

ആനുകൂല്യ നിഷേധം സർക്കാർ അലങ്കാരമാക്കുന്നു: കെപിഎസ്ടിഎ

കൽപ്പറ്റ: ജീവനക്കാർക്കു നൽകേണ്ട ആനുകൂല്യങ്ങൾ ഒന്നൊന്നായ് കവർന്നെടുത്തുകൊണ്ട് ഇടതുസർക്കാർ വഞ്ചനാപരമായ നിലപാട് സ്വീകരിക്കുകയാണെന്ന് കെപിഎസ്ടിഎ സംസ്ഥാന വൈസ് പ്രസിഡന്‍റ് പി.എസ്. ഗിരീഷ്കുമാർ പ്രസ്താവിച്ചു. ശന്പളപരിഷ്കരണം നടപ്പാക്കേണ്ട തീയതി കഴിഞ്ഞ് ഒരു വർഷമായിട്ടും ഇതുവരെ ശന്പളപരിഷ്കരണ കമ്മീഷനെ പോലും നിയമിക്കാത്ത ഇടതുപക്ഷ സർക്കാരിന്‍റെ സമീപനം അധ്യാപകരോടും ജീവനക്കാരോടുമുള്ള അവഗണനയുടെ ഭാഗമാണ്. ശന്പള പരിഷ്കരണ പ്രാബല്യ തീയതിയുടെ ഒന്നാം വാർഷിക ദിനത്തിൽ കെപിഎസ്ടിഎ ജില്ലാ കമ്മിറ്റി നടത്തിയ പ്രതിഷേധ പ്രകടനം പി.എസ്. ഗിരീഷ്കുമാർ ഉദ്ഘാടനം ചെയ്തു. ജില്ലാ പ്രസിഡന്‍റ് ഷാജു ജോണ്‍, സെക്രട്ടറി ടി.എം. അനൂപ്, സംസ്ഥാന നിർവാഹക സമിതി അംഗങ്ങളായ ടി.എൻ. സജിൻ, ബിജു മാത്യു, ട്രഷറർ സി.കെ. സേതു, എം. പ്രദീപ്കുമാർ, ഷെർലി സെബാസ്റ്റ്യൻ, ജോണ്‍സണ്‍ ഡിസിൽവ, കെ.ജി. ബിജു, ആൽഫ്രഡ് ഫ്രെഡി, ടി.എം. വിൽസണ്‍, അക്ബർ അലി, നിമ റാണി, ജോസഫ് ജോഷി, ജിജോ കുര്യാക്കോസ്, കെ.എസ്. അനൂപ് കുമാർ, ആദിത്ത്, നവീൻ പോൾ, കെ.പി. ബിന്ദു, സാലി ജോസഫ്, പി.ജെ. റെയ്ച്ചൽ, നന്ദകുമാർ, എം.എസ്. ഷാജു, എം. ഗണേശൻ എന്നിവർ നേതൃത്വം നൽകി.

മുള്ളൻകൊല്ലി മാർക്കറ്റിംഗ് സൊസൈറ്റിയെ തകർക്കാൻ സിപിഎം, ബിജെപി ശ്രമം: ഭരണസമിതി

കൽപ്പറ്റ: യുഡിഎഫ് നിയന്ത്രണത്തിലുള്ള മുള്ളൻകൊല്ലി റബർ ആൻഡ് അഗ്രികൾച്ചറൽ മാർക്കറ്റിംഗ് സൊസൈറ്റിയെ തകർക്കാൻ സിപിഎമ്മും ബിജെപിയും ആസൂത്രിത ശ്രമം നടത്തുന്നതായി പ്രസിഡന്‍റ് സാജൻ ജോസഫ്, വൈസ് പ്രസിഡന്‍റ് പി.ആർ. ബാലചന്ദ്രൻ, ഡയറക്ടർമാരായ ജോസഫ് വേങ്ങാശേരി, ദേവസ്യ കാക്കനാട്ട്, രാധ വിദ്യാധരൻ, എത്സി മാത്യു എന്നിവർ വാർത്താസമ്മേളനത്തിൽ ആരോപിച്ചു. സൊസൈറ്റിക്കെതിരേ അടിസ്ഥാനമില്ലാതെ അഴിമതി ആരോപണം ഉന്നയിച്ച് മാധ്യമങ്ങളിലൂടെ പ്രചരിപ്പിക്കുന്നതും സമരങ്ങൾ സംഘടിപ്പിക്കുന്നതും ഗൂഢാലോചനയുടെ ഭാഗമാണ്. മൂന്ന് പതിറ്റാണ്ടുമുന്പ് പ്രവർത്തനം തുടങ്ങിയതാണ് സൊസൈറ്റി. തുടക്കം മുതൽ യുഡിഎഫ് ഭരണത്തിലുള്ള സംഘത്തിൽ മുള്ളൻകൊല്ലി പഞ്ചായത്തിലെ നാലായിരത്തോളം കർഷകർ അംഗങ്ങളാണ്. ഇല്ലാത്ത അഴിമതിക്കഥകൾ പറഞ്ഞ് സൊസൈറ്റിയെയും ഭരണസമിതിയെയും ഇകഴ്ത്താൻ നടത്തുന്ന ശ്രമങ്ങൾക്കു പിന്നിൽ കോണ്‍ഗ്രസിലെ ഒരു വിഭാഗവുമുണ്ടെന്ന് സംശയമുണ്ട്. കഴിഞ്ഞ ഭരണസമിതിയുടെ കാലത്ത് സാന്പത്തിക ക്രമക്കേട് നടത്തിയതായി സഹകരണ ഉദ്യോഗസ്ഥരുടെ പരിശോധനയിൽ കണ്ടെത്തിയതിനെത്തുടർന്ന് സെക്രട്ടറിയടക്കം രണ്ട് ജീവനക്കാരെ സൊസൈറ്റി പുറത്താക്കിയിരുന്നു. ഇവരുടെ ഇടപെടലും സൊസൈറ്റിക്കെതിരായ പുത്തൻ നീക്കങ്ങൾക്കു പിന്നിലുണ്ടെന്നാണ് കരുതുന്നത്. നിലവിലെ ഭരണസമിതി എല്ലാ മാസവും യോഗം ചേർന്ന് സൊസൈറ്റി പ്രവർത്തനം വിലയിരുത്തുന്നുണ്ട്. സഹകരണ വകുപ്പിന്‍റെ ഗ്രൂപ്പ് ഓഡിറ്റിംഗും സെൻട്രൽ ജിഎസ്ടി ഓഡിറ്റിംഗും യഥാസമയം സൊസൈറ്റിയിൽ നടക്കുന്നുണ്ട്. ഓഡിറ്റിംഗിൽ ഒരു ക്രമക്കേടും കണ്ടെത്തിയിട്ടില്ല. സിപിഎമ്മും ബിജെപിയും സൊസൈറ്റിക്കെതിരേ അഴിമതി ആരോപണം ഉന്നയിക്കുന്നത് രാഷ്ട്രീയ മുതലെടുപ്പിനാണ്. തദ്ദേശ സ്ഥാപനങ്ങളിലേക്ക് നടക്കാനിരിക്കുന്ന തെരഞ്ഞെടുപ്പാണ് അവരുടെ ലക്ഷ്യം. സൊസൈറ്റിക്കെതിരായ കുപ്രചാരണം കർഷകരോടുള്ള വെല്ലുവിളിയാണ്. സൊസൈറ്റി പ്രവർത്തനം ഉത്തരവാദപ്പെട്ട ഏജൻസികൾക്കും ഉദ്യോഗസ്ഥർക്കും എപ്പോൾ വേണമെങ്കിലും പരിശോധിക്കാമെന്നിരിക്കേ ആരോപണങ്ങൾ കർഷകർ തള്ളുമെന്നും പ്രസിഡന്‍റും മറ്റും പറഞ്ഞു.

താളൂർ ബസ് സ്റ്റാൻഡിൽ തമിഴ്നാടിന്‍റെ ബോർഡ്: എംഎൽഎമാർ ചർച്ച നടത്തി

സുൽത്താൻബത്തേരി: നെൻമേനി പഞ്ചായത്ത് പരിധിയിലെ താളൂർ ബസ് സ്റ്റാൻഡിലെ തമിഴ്നാട് ബോർഡുകൾ മാറ്റുന്നത് സംബന്ധിച്ച് ഐ.സി. ബാലകൃഷ്ണൻ എംഎൽഎയും ഗൂഡല്ലൂർ എംഎൽഎ പൊൻജയശീലനും താളൂരിൽ ചർച്ച നടത്തി. നെൻമേനി പഞ്ചായത്ത് വൈസ് പ്രസിഡന്‍റ് ടിജി ചെറുതോട്ടിൽ, സ്റ്റാൻഡിംഗ് കമ്മിറ്റി അധ്യക്ഷരായ സുജാത ഹരിദാസ്, ജയ മുരളി, വി.ടി. ബേബി, അംഗങ്ങളായ കെ.വി. ശശി, ഉഷ വേലായുധൻ, തഹസിൽദാർമാരായ എം.എസ്. ശിവദാസൻ, സുരാജ് നിഷ, രാഷ്ട്രീയപ്പാർട്ടി നേതാക്കളായ കെ.കെ. പോൾസൻ, മൊയ്തീൻ കരടിപ്പാറ, ഷാജി ചുള്ളിയോട്, രാജേഷ് നന്പിച്ചാൻകുടി തുടങ്ങിയവരുടെ സാന്നിധ്യത്തിലായിരുന്നു ചർച്ച. ബത്തേരി എംഎൽഎയുടെ ആസ്തി വികസന നിധിയിൽനിന്നു താളൂർ ബസ്‌സ്റ്റാൻഡ് നിർമാണത്തിന് 54 ലക്ഷം രൂപ അനുവദിച്ചിരുന്നു. പ്രവൃത്തി ആരംഭിക്കാൻ കരാറുകാരൻ എത്തിയപ്പോളാണ് ബോർഡ് പ്രശ്നം ഉടലെടുത്തത്. തമിഴ്നാട് സർക്കാർ ദശകങ്ങൾ മുന്പ് സ്ഥാപിച്ച രണ്ട് ബോർഡുകൾ സ്ഥലത്തുണ്ട്. ഈ ബോർഡുകൾ നീക്കം ചെയ്യുകയോ മാറ്റാൻ അനുമതി ലഭ്യമാക്കുകയോ ചെയ്യണമെന്ന് ആവശ്യപ്പെട്ട് ചേരന്പാടി പഞ്ചായത്ത്, ഗൂഡല്ലൂർ ബ്ലോക്ക് പഞ്ചായത്ത് അധികൃതർക്ക് നെൻമേനി പഞ്ചായത്ത് കത്ത് നൽകിയെങ്കിലും നടപടി ഉണ്ടായില്ല. ഇതേത്തുടർന്ന് നെൻമേനി പഞ്ചായത്ത് ഭരണസമിതി മുൻകൈയെടുത്താണ് സെന്‍റ് മേരീസ് ഓർത്തഡോക്സ് പള്ളി ഹാളിൽ ചർച്ച സംഘടിപ്പിച്ചത്. വിഷയം വയനാട്, നീലഗിരി ജില്ലാ കളക്ടർമാരുടെ ശ്രദ്ധയിൽപ്പെടുത്താനും എത്രയും വേഗം പരിഹരിക്കാനും ചർച്ചയിൽ തീരുമാനമായി.

കാട്ടാനക്കൂട്ടം കൃഷി നശിപ്പിച്ചു

ഗൂഡല്ലൂർ: നെല്ലാക്കോട്ട പഞ്ചായത്തിലെ പാട്ടവയൽ, വീട്ടിപ്പടി, കൈവട്ട മേഖലകളിൽ കാട്ടാനശല്യം രൂക്ഷമായി. കഴിഞ്ഞദിവസം രാത്രി വീട്ടിപ്പടിയിൽ ഇറങ്ങിയ രണ്ട് ആനകൾ പ്രദേശത്തെ അബ്ദുൾ അസീസ്, കെ.കെ. ബാവ, കെ.കെ. അബ്ദുൾ കരീം എന്നിവരുടെ വാഴക്കൃഷി നശിപ്പിച്ചു. ആയിരക്കണക്കിനു രൂപയുടെ നഷ്ടമാണ് കർഷകർക്കുണ്ടായത്. നേരം ഇരുട്ടുന്നതോടെ ജനവാസ മേഖലയിൽ എത്തുന്ന ആനകൾ നാട്ടുകാരെ മുൾമുനയിൽ നിർത്തുകയാണ്. ആനകളെ ഉൾവനത്തിലേക്ക് തുരത്തണമെന്നാണ് നാട്ടുകാരുടെ ആവശ്യം.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]