ADVERTISEMENT

ADVERTISEMENT

വിളക്കുപാറ സെന്‍റ് തെരേസാസ് പള്ളി അടിസ്ഥാനശില കൂദാശ

വിളക്കുപാറ: പുതുതായി നിർമിക്കുന്ന വിളക്കുപാറ സെന്‍റ് തെരേസാസ് മലങ്കരസുറിയാനി കത്തോലിക്കാ പള്ളിയുടെ അടിസ്ഥാനശില മലങ്കര കത്തോ ലിക്കാസഭ മേജർ ആർച്ച് ബിഷപ് കർദിനാൾ മാർ ബസേലിയോസ്‌ ക്ലീമിസ് കാതോലിക്കാ ബാവ കൂദാശ ചെയ്തു.

എൻ. കെ. പ്രേമചന്ദ്രൻ എംപി, അഞ്ചൽ വൈദിക ജില്ലാ വികാരി ഫാ. ബോവസ് മാത്യു, പുനലൂർ വൈദികജില്ല വികാരി റവ. ഡോ. സി. സി. ജോൺ, ഇടവക വികാരി ഫാ. ഗീവർഗീസ് മണിപറമ്പിൽ തുടങ്ങിയവർ സന്നിഹിതരായിരുന്നു.

ADVERTISEMENT

ഒസിവൈഎം അവാർഡ് നല്ലിലയ്ക്ക്

കുണ്ടറ : മലങ്കര ഓർത്തഡോക്സ് സുറിയാനിസഭ യുവജന പ്രസ്ഥാനത്തിന്‍റെ പ്രഥമ ഒസിവൈഎം എക്സലൻസ് അവാർഡ് നല്ലില സെന്‍റ് ഗബ്രിയേൽ യുവജന പ്രസ്ഥാനത്തിന്. കോട്ടയം ദേവലോകത്ത്നടന്ന പ്രഗതി അവാർഡ് സമ്മേളനത്തിൽ കേന്ദ്രയുവജന പ്രസ്ഥാനം പ്രസിഡന്‍റ് ഗീവർഗീസ്‌ മാർ യൂലിയോസ്‌, ചാണ്ടി ഉമ്മൻ എംഎൽഎ എന്നിവർ ചേർന്നു പുരസ്കാരം സമർപ്പിച്ചു. സഭാവൈദീക സെക്രട്ടറി ഫാ. സജി അമയിൽ, സഭാ അൽമായ ട്രസ്റ്റി റോണി വർഗീസ് , യുവജന പ്രസ്ഥാനം കേന്ദ്ര ജനറൽ സെക്രട്ടറി ഫാ.വിജു ഏലിയാസ് , കേന്ദ്ര യുവജനപ്രസ്ഥാനം ഭാരവാഹികൾ എന്നിവരുടെ സാന്നിധ്യത്തിൽ യുവജനപ്രസ്ഥാനം പ്രവർത്തകർ അവാർഡ് ഏറ്റുവാങ്ങി.

സ്കൂട്ടറും ബൈക്കും കൂട്ടിയിടിച്ച് മൂന്നുപേർക്ക് പരിക്ക്

ചവറ: നീണ്ടകരയിൽ സ്കൂട്ടറും ബൈക്കും കൂട്ടിയിടിച്ച് മൂന്ന് പേർക്ക് പരിക്കേറ്റു. സ്കൂട്ടർ യാത്രികനായ തേവലക്കര പാലക്കൽ അജ്മൽ മൻസിലിൽ അബ്ദുൽ മജീദ് ( 52 ), ബൈക്ക് യാത്രികരായ ചവറ കുളങ്ങര ഭാഗം മണ്ണാശ്ശേരി തെക്കതിൽ സജിത്ത്( 36), സുഹൃത്ത് നീണ്ടകര സ്വദേശി രതീഷ് (36) എന്നിവർക്കാണ് പരിക്കേറ്റത്. ദേശീയപാതയിൽ നീണ്ടകര പരിമണം ജംഗ്ഷന് വടക്ക് ഇന്നലെ വൈകുന്നേരം 5.15 ഓടെയായിരുന്നു അപകടം. അപകടത്തിൽ പരിക്കേറ്റ് റോഡിൽ കിടന്നവരെ അതുവഴി വന്ന പെട്ടി ഓട്ടോയിൽ കയറ്റി നാട്ടുകാർ നീണ്ടകര താലൂക്ക് ആശുപത്രിയിൽ എത്തിക്കുകയായിരുന്നു. പ്രാഥമിക ചികിത്സ നൽകിയശേഷം മൂവരെയും കൊല്ലം ജില്ല ആശുപത്രിയിലേക്ക് മാറ്റി.

തിരുമുക്ക് അടിപ്പാത സമരം: സാംസ്കാരിക പ്രവർത്തകർ സത്യഗ്രഹം അനുഷ്ഠിച്ചു

ചാത്തന്നൂർ : തിരുമുക്ക് അടിപ്പാത സമരസമിതി നേതൃത്വത്തിൽ നടത്തിവരുന്ന സമരത്തിന്‍റെ മുപ്പത്തിനാലാം ദിവസം സാംസ്കാരിക പ്രവർത്തകരുടെ നേതൃത്വത്തിൽ സത്യഗ്രഹമനുഷ്ഠിച്ചു. ശിവഗിരി ഗുരുധർമ പ്രചരണ സഭ സെക്രട്ടറി അസംഗാനന്ദഗിരി സ്വാമികൾ സത്യഗ്രഹ സമരം ഉദ്ഘാടനം ചെയ്തു. ശിവഗിരി മഠത്തിലെ സുകൃതാനന്ദ സ്വാമികൾ പ്രതിഷേധ ജ്വാല തെളിയിച്ചു. ചാത്തന്നൂർ വികസന സമിതി ചെയർമാൻ ജി.രാജശേഖരൻ അധ്യക്ഷത വഹിച്ചു. മാധ്യമ പ്രവർത്തകനായ ഹസ്താമലഖൻ, സാഹിത്യകാരൻ ഡി.സുധീന്ദ്രബാബു , ചാത്തന്നൂർ വികസന സമിതി കൺവീനർ ജി.പി.രാജേഷ് , സന്തോഷ് പാറയിൽക്കാവ്, എൻ.അനിൽകുമാർ തുടങ്ങിയവർ പ്രസംഗിച്ചു. സമരസമിതി ജനറൽ കൺവീനർ.കെ.കെ.നിസാർ സ്വാഗതവും അനസ് നന്ദിയും പറഞ്ഞു. ഇന്നു വൈകുന്നേരം അഞ്ചുമുതൽ വ്യാപാരികളുടെ നേതൃത്വത്തിൽ സായാഹ്ന സത്യഗ്രഹസമരം നടക്കും. പ്രതിഷേധ ജ്വാല കത്തിച്ച് ചാത്തന്നൂർ മാർത്തോമ്മാ പള്ളി വികാരി ഫാ. ജോൺസൺ ഫിലിപ്പ് സമരം ഉദ്ഘാടനം ചെയ്യും.

പാല്‍ ഉത്പാദനത്തില്‍ സുസ്ഥിര മാതൃകയുണ്ടാക്കും: മന്ത്രി ചിഞ്ചുറാണി

കൊല്ലം: പാല്‍, മുട്ട, ഇറച്ചി ഉത്പാദനത്തില്‍ സുസ്ഥിരമാതൃക രൂപപ്പെടുത്തുകയാണ് സര്‍ക്കാരിന്‍റെ ലക്ഷ്യമെന്നു മൃഗസംരക്ഷണ ക്ഷീരവികസന മന്ത്രി ജെ. ചിഞ്ചുറാണി. വിഷന്‍ 2031 സെമിനാര്‍പരമ്പരയുടെഭാഗമായി മൃഗസംരക്ഷണ-ക്ഷീരവികസന വകുപ്പിന്‍റെ സംസ്ഥാനതല സെമിനാര്‍ കടയ്ക്കല്‍ ഗാഗോ കണ്‍വെന്‍ഷന്‍ സെന്‍ററില്‍ ഉദ്ഘാടനം ചെയ്യുകയായിരുന്നു മന്ത്രി. കേരളത്തിന് 2031 ഓടെ പാല്‍ ഉത്പാദനം 70 ലക്ഷം ലിറ്ററില്‍ നിന്ന് 95 ലക്ഷമായി വര്‍ധിപ്പിക്കുകയും പശുക്കളുടെ ഉത്പാദനക്ഷമത 10.79 ലിറ്ററില്‍ നിന്നു 12 ലിറ്റര്‍ ആക്കുകയുമാണ് ലക്ഷ്യമെന്നും അവർ പറഞ്ഞു. മന്ത്രി കെ. എന്‍. ബാലഗോപാല്‍ അധ്യക്ഷത വഹിച്ചു. ചടയമംഗലം ബ്ലോക്ക് പഞ്ചായത്ത് പ്രസിഡന്‍റ് ലതിക വിദ്യാധരന്‍, വൈസ് പ്രസിഡന്‍റ് ഹരി വി.നായര്‍, പഞ്ചായത്ത് പ്രസിഡന്‍റുമാരായ മനോജ് കുമാര്‍ കൃഷ്ണപിള്ള, മിനി സുനില്‍, മില്‍മ ചെയര്‍മാന്‍ കെ.എസ്. മണി തുടങ്ങിയവര്‍ പങ്കെടുത്തു.

കുന്നിക്കോടും സിപിഐയിൽ കൂട്ട രാജി

കൊല്ലം: പാർട്ടിയുടെ ശക്തി കേന്ദ്രങ്ങളിൽ കൂട്ടരാജി പരമ്പരകൾ അരങ്ങേറുന്നതോടെ കൊല്ലത്ത് സമാനതകൾ ഇല്ലാത്ത പ്രതിസന്ധിയിലായി സിപിഐ. കുണ്ടറയ്ക്കും കടയ്ക്കലിനും പിന്നാലെ സിപിഐ ദേശീയ കമ്മിറ്റി അംഗമായ പ്രകാശ് ബാബു വി െ ന്‍റ തട്ടകമായ കുന്നിക്കോട് ഇന്നലെ കൂട്ടരാജി പ്രഖ്യാപിച്ച് നൂറോളം പേർ സിപിഐ ബന്ധം വേണ്ടെന്നു വെച്ച ു. രാജി വെച്ചവരുടെ കണക്കുകൾ നോക്കിയാൽ മൂന്നിടത്തായി ആയിരത്തിലേറെ സിപിഐ കുടുംബങ്ങളാണ് പാർട്ടി ബന്ധം അവസാനിപ്പിച്ചിരിക്കുന്നത്. കുന്നിക്കോട് രാജി വെച്ചവർ കോണ്‍ഗ്രസില്‍ ചെക്കേറിയത് ഇടത് മുന്നണിക്ക് വന്‍തിരിച്ചടിയാണ് ഉണ്ടാക്കിയിരിക്കുന്നത്. നേതൃത്വവുമായുണ്ടായ അഭിപ്രായ വ്യത്യാസങ്ങൾ പരിഹരിക്കാനാവാത്ത സാഹചര്യത്തിലാണ് പ്രവര്‍ത്തകരും പ്രാദേശിക നേതാക്കളും അടക്കം കുന്നിക്കോടും പാര്‍ട്ടി വിട്ടത്. രാഷ്ട്രീയമായി ഒരു മുന്നേറ്റവും നടത്താന്‍ കഴിയാത്ത അവസ്ഥയിലാണ് സിപിഐ എന്നാണ് രാജിവെച്ചവർ അവകാശപ്പെടുന്നത്. കെ.ഇ. ഇസ്മയില്‍ വിഭാഗത്തെ പൂര്‍ണമായും അകറ്റി നിര്‍ത്താന്‍ തീരുമാനിച്ചതും തിരിച്ചടിയായി. പാര്‍ട്ടിയില്‍ വിഭാഗീയത ഇപ്പോൾ ഉയരങ്ങളിൽ എത്തിയിരിക്കുകയാണ്. കാനത്തി െ ന്‍റ മരണ ശേഷം പാര്‍ട്ടിയില്‍ ഉണ്ടായ അധികാരതര്‍ക്കം തന്നെയാണ് സി പി ഐയില്‍ ഭിന്നത രൂക്ഷമാക്കിയിട്ടുള്ളത്. രാജ്യസഭാ സീറ്റുമായി ബന്ധപ്പെട്ട തര്‍ക്കവും സിപിഐയെ കൂടുതല്‍ സങ്കീർണത സൃഷ്ടിച്ചു. സി പി ഐ അസി. സെക്രട്ടറിയായിരുന്ന അഡ്വ പ്രകാശ് ബാബുവിനെ പാര്‍ട്ടി സെക്രട്ടറി സ്ഥാനത്തേക്ക് കൊണ്ടുവരാനുള്ള നീക്കത്തിന് തിരിച്ചടി ഉണ്ടായതും വിഭാഗീയത രൂക്ഷമാക്കിയി ട്ടുണ്ട്.

പശുവിന് വാഗ്ദാനം ചെയ്ത അളവിൽ പാൽ കിട്ടിയില്ല; നഷ്‌ടപരിഹാരം നൽകാൻ ഉപഭോക്തൃ തർക്കപരിഹാര കമ്മിഷൻ

കൊട്ടാരക്കര : പശുവിന് വാഗ്ദാനം ചെയ്തിരുന്ന അളവിൽ പാൽ കിട്ടാഞ്ഞതിന് ഉപഭോക്താവിന് നഷ്ടപരിഹാരം നൽകാൻ കൊല്ലം ജില്ല ഉപഭോക്തൃതർക്കപരിഹാരകമ്മിഷൻ. പുത്തൂർ മഠത്തിനാപ്പുഴ സുധ വിലാസത്തിൽ രമണൻ 56000 രൂപ കൊടുത്ത് ആറ്റുവാശേരി കുരു വീണവീട്ടിൽ ഉണ്ണികൃഷ്ണപിള്ളയിൽ നിന്നും ഗർഭിണിയായ പശുവിനെ വാങ്ങിയിരുന്നു. വാങ്ങുന്ന സമയത്ത് പശുവിൽ നിന്നും 12ലീറ്റർ പാൽ ലഭിക്കുമെന്നാണ് രമണനോട് ഉണ്ണികൃഷ്ണപിള്ള പറഞ്ഞിരുന്നത്. എന്നാൽ പശുവിന്‍റെ പ്രസവം കഴിഞ്ഞ് പാൽ കറന്നെടുത്തപ്പോൾ നാല് ലിറ്റർ മാത്രമേ ലഭിച്ചിരുന്നുള്ളു. തുടർന്ന് മൂന്ന് മാസം കറവ തുടർന്നെങ്കിലും ആറ് ലിറ്ററിൽ കൂടുതൽ പാൽ കിട്ടിയില്ല. കബളിപ്പിക്കപ്പെട്ടതോടെ ഉണ്ണികൃഷ്ണപിള്ളേയോട് പശുവിനെ തിരികെ കൊണ്ട് പോകാൻ രമണൻ ആവശ്യപ്പെട്ടെങ്കിലും കൂട്ടാക്കിയില്ല. പശുവിനെ വാങ്ങുന്ന സമയത്ത് 12ലിറ്റർ പാൽ ലഭിച്ചില്ലെങ്കിൽ തിരികെ വാങ്ങിക്കൊള്ളാം എന്ന് ഉണ്ണികൃഷ്ണപിള്ള രമണനോട് പറഞ്ഞിരുന്നു. പശുവിനെ തിരികെ കൊടുത്ത് കാശ് തിരിച്ചു വാങ്ങുന്നതിനായി പുത്തൂർ പോലീസിനെ സമീപിച്ചെങ്കിലും ഫലമുണ്ടായില്ല. റൂറൽ എസ് പിക്കു പരാതി നൽകിയെങ്കിലും നടപടി ഉണ്ടായില്ല. തുടർന്ന് രമണൻ ജില്ലാ ഉപഭോക്തൃ പരിഹാര കമ്മീഷനെ സമീപിക്കുകയായിരുന്നു. കേസിന്‍റെ വിചാരണ വേളയിൽ എതിർ കക്ഷിയായ ഉണ്ണികൃഷ്ണപിള്ള മരണമടഞ്ഞു. പ്രതി ചേർക്കപ്പെട്ട ഇയാളുടെ ഭാര്യ ജയലക്ഷ്മിയിൽ നിന്നും 56000രൂപയും കോടതി ചെലവിനത്തിൽ 10000രൂപയും മാനസികമായി രമണന് നേരിടേണ്ടി വന്ന ബുദ്ധിമുട്ടുകൾക്കായി 26000 രൂപയും നൽകാൻ ഉപഭോക്തൃതർക്കപരിഹാരകമ്മിഷൻ ഉത്തരവിടുകയായിരുന്നു. ഹർജിക്കാരന് വേണ്ടി അഡ്വ. പ്രവീൺ. പി. പൂവറ്റൂർ ഹാജരായി.

ആനക്കൊമ്പിൽ തീർത്ത ദണ്ഡ് വിൽക്കാൻ ശ്രമിക്കുന്നതിനിടെ രണ്ടുപേർ പിടിയിൽ

അഞ്ചൽ : ആനക്കൊമ്പിൽ തീർത്ത ദണ്ഡ് വിൽക്കാൻ ശ്രമിക്കുന്നതിനിടെ രണ്ടുപേർ പിടിയിൽ. കൊട്ടാരക്കര സ്വദേശി സുബു (40) വെളിയം സ്വദേശി അരുൺ എന്നിവരെയാണ് അഞ്ചൽ റേഞ്ച് ഫോറസ്റ്റ് ഓഫീസർ ദിവ്യയുടെ നേതൃത്വത്തിലുള്ള വനപാലക സംഘം കൊട്ടാരക്കര ഗണപതി ക്ഷേത്രം പാർക്കിംഗ് ഗ്രൗണ്ടിൽ നിന്നും പിടികൂടിയത്. പ്രദേശത്ത് ആനക്കൊമ്പ് വില്പന നടക്കുന്നുവെന്ന രഹസ്യ വിവരത്തിന്‍റെ അടിസ്ഥാനത്തിലാണ് വനപാലകർ രഹസ്യമായി നിരീക്ഷണം നടത്തിയത്. ഇതിനിടയിലാണ് ആനക്കൊമ്പിൽ തീർത്ത ദണ്ഡ് പിടികൂടുന്നത്. പിടിയിലായ സുബുവിന്‍റെ മുത്തച്ഛൻ കൈ മാറിയതാണെന്നും ശ്രീലങ്കയിൽനിന്നും എത്തിച്ച ആനക്കൊമ്പ് ആണെന്നുമാണ് പ്രതികൾ വനംവകുപ്പിനോട് പറഞ്ഞിരിക്കുന്നത്. ഇടനിലക്കാർ, വാങ്ങാൻ എത്തിയവർ ഉൾപ്പടെ കൂടുതൽ ആളുകൾ പിടിയിലാക്കുമെന്ന് വനം വകുപ്പ് അധികൃതർ പറയുന്നത്. പിടികൂടിയ പ്രതികളെ പിന്നീട് പത്തനാപുരം റേഞ്ച് അധികൃതർക്കു കൈമാറി. പ്രതികൾ എത്തിയ കാറും വനപാലകർ പിടികൂടിയിട്ടുണ്ട്.

വ്യാജ ആധാർ കാർഡുമായി ഒരാൾ അറസ്റ്റിൽ

കൊല്ലം: സിറ്റി പോലീസ് നടപ്പിലാക്കി വരുന്ന സുരക്ഷിത തീരം പദ്ധതിയുടെ ഭാഗമായി ഒരാൾ കൂടി ഇന്നലെ അറസ്റ്റിലായി. ബംഗ്ലാദേശിൽ നിന്നും എത്തി വ്യാജ ആധാർ കാർഡുമായി കൊല്ലത്തു താമസിച്ചുവരികയായിരുന്നു. പോലീസ് പരിശോധന ഉണ്ടെന്നറിഞ്ഞ് ബേപ്പൂർക്കു രക്ഷപ്പെട്ട നേപ്പാൾ ദാസ് എന്നയാളാണ് ബേപ്പൂർ പോലീസിന്‍റെ പിടിയിലായത്. ദിവസങ്ങൾക്കുമുൻപ് ബംഗ്ലാദേശ് സ്വദേശി പരുമൽദാസിനെ(21) വ്യാജ ആധാർ കാർഡ് ഉപയോഗിച്ച് താമസിച്ചതിന് അറസ്റ്റ് ചെയ്തിരുന്നു. ഇയാൾക്കു കൊല്ലത്ത് ബോട്ടിൽ ജോലി വാങ്ങി നൽകുന്നതിനു സഹായിച്ച ചെയ്ത തപൻ ദാസ് (24) എന്നയാളെയും ശക്തികുളങ്ങര പോലീസ് അറസ്റ്റ് ചെയ്തിരുന്നു. ഇരുവരെയും കോടതിയിൽ ഹാജരാക്കി റിമാൻഡ് ചെയ്തു.ഇതോടെ സുരക്ഷിതതീരം പദ്ധതിയുമായി ബന്ധപ്പെട്ട് ആകെ അറസ്റ്റിലായവരുടെ എണ്ണം മൂന്നായി. പരിശോധനയുടെ ആദ്യ ആഴ്ചയിൽ തന്നെ മൂന്നുപേർ അറസ്റ്റിൽ ആയതോടെ ഇത്തരത്തിൽ നിരവധി ആളുകൾ മത്സ്യബന്ധന മേഖലയിലും മറ്റു മേഖലയിലും എത്തിയിരിക്കാം എന്ന നിഗമനത്തിലാണ് പോലീസ്. വരും ദിവസങ്ങളിൽ പരിശോധന കർശനമാക്കുമെന് കൊല്ലം എസിപി എസ്.ഷെരീഫ് പറഞ്ഞു.

മഴയും വെയിലും വകവയ്ക്കാതെ സഞ്ചാര സ്വാതന്ത്ര്യസമരം തുടരുന്നു

കൊട്ടിയം:ഇത്തിക്കരയിലെ ജനകീയ സത്യഗ്രഹ സമരം ഇരുപതാം ദിവസത്തിലേക്ക് കടന്നു. കഴിഞ്ഞ ഇരുപതു ദിവസത്തോളമായി സ്ത്രീകളും കുട്ടികളും അടങ്ങുന്ന ഒരു വലിയ സമൂഹം കനത്ത ചൂടിനെയോ, മഴയെയോ വകവെയ്ക്കാതെ തങ്ങളുടെ എല്ലാ ആവശ്യങ്ങളും ഉപേക്ഷിച്ചു തെരുവോരത്ത് സമരം ചെയ്യുകയാണ്. ഭരണാധികാരികളും നാഷണൽ ഹൈവേ അധികൃതരും സമരം കണ്ടില്ലെന്നു നടിക്കുകയാണ്. ഇനിയും ഭരണകൂടം കണ്ണടച്ചിരിക്കുകയാണെങ്കിൽ വരും ദിവസങ്ങളിൽ വളരെ ശക്തമായ പ്രക്ഷോഭത്തിലേക്ക് കടക്കുമെന്ന് സമരസമിതി അറിയിച്ചു. ഇരുപതാം ദിവസത്തെ സത്യഗ്രഹം സിപിഐ ആദിച്ചനല്ലൂർ ലോക്കൽ കമ്മിറ്റി അംഗം സജീവ് കുമാർ അനുഷ്ഠിച്ചു. കൺവീനർ ജി. രാജുവിന്‍റെ അധ്യക്ഷതയിൽ ചേർന്ന യോഗത്തിൽ ജില്ലാ പഞ്ചായത്ത്‌ വൈസ് പ്രസിഡന്‍റ് ശ്രീജ ഹരീഷ് ഉദ്ഘാടനം ചെയ്തു. സിപിഐ ആദിച്ചനല്ലൂർ ലോക്കൽ സെക്രട്ടറി എൻ. സുരേഷ്, ആർ എസ് പി മണ്ഡലം സെക്രട്ടറി ഷാലു വി.ദാസ്, സിപിഐ ചാത്തന്നൂർ ലോക്കൽ കമ്മിറ്റി മെമ്പർ രാധാകൃഷ്ണൻ, സിപിഐ കൊട്ടിയം ലോക്കൽ കമ്മിറ്റി അംഗം മൈലക്കാട് ഫൈസൽ, സപ്ലൈകോ വർക്കേഴ്സ് ഫെഡറേഷൻ അംഗങ്ങളായ ശ്യാം സുഗുണൻ, ബിജു എന്നിവർ പ്രസംഗിച്ചു. വൈകുന്നേരം നടന്ന സമാപന യോഗത്തിൽ സി പി ഐ ചാത്തന്നൂർ മണ്ഡലം സെക്രട്ടറിയേറ്റ് അംഗം കെ. നാസറുദ്ദീൻ നാരങ്ങാനീര് നൽകി സത്യഗ്രഹ സമരം അവസാനിപ്പിച്ചു.

അധ്യാപകരെ ആദരിച്ചു

കൊല്ലം: അന്താരാഷ്‌ട്ര അധ്യാപക ദിനത്തിൽ കൊല്ലം ലോട്ടറി ക്ലബ് ഓഫ് ലോട്ടസിന്‍റെ ആഭിമുഖ്യത്തിൽ അധ്യാപകരെ ആദരിച്ചു. പ്രസിഡന്‍റ് ഡോ. സരിത പ്രസാദ്, ലേണിങ് ഫെസിലിറ്റേറ്റർ ഷീന സാജൻ, ജോയിന്‍റ് സെക്രട്ടറി ഷിനിലാൽ, കാർത്തിക അവിനാഷ്, വൈസ് പ്രസിഡന്‍റ് അജി എന്നിവരാണ് അധ്യാപകരെ ആദരിച്ചത്. സെന്‍റ്മേരിസ് സ്കൂൾ ചെയർമാൻ ഡോ. ഡി. പൊന്നച്ചൻ, സെന്‍റ് മേരിസ് അഡ്മിനിസ്ട്രേറ്റർ ലീലാമ്മ പൊന്നച്ചൻ, പ്രിൻസിപ്പൽ മഞ്ജു രാജീവ് അധ്യാപകരായ എൽ.ഗിരിജ, എൽ. ആർ.ശാലിനി, ഡി. എസ്. സുനിത എന്നിവരെയാണ് സ്കൂൾ അസംബ്ലിയിൽ ആദരിച്ചത്. വിദ്യാർഥികൾ ഗുരുവന്ദനവും അധ്യാപക ദിന സന്ദേശവും നൽകി.

വിവിധ റോഡുകളുടെ ഉദ്ഘാടനം

അഞ്ചല്‍ : ഏരൂര്‍ പഞ്ചായത്തിലെ ചില്ലിംഗ്പ്ലാന്‍റ് വാര്‍ഡിലെ വിവിധ റോഡുകളുടെ നിര്‍മാണോദ്ഘാടനം ഉദ്ഘാടനം പി.എസ്. സുപാല്‍ എംഎല്‍എ നിര്‍വഹിച്ചു. ആലഞ്ചേരി തൊണ്ടിയറ - നെട്ടയം റോഡ്, ആലഞ്ചേരി - ഏല്ലാമുറ്റം റോഡ്, ഏരൂര്‍ വായനശാല റോഡ് തുടങ്ങിയ റോഡുകളുടെ നവീകരണ പ്രവര്‍ത്തികളാണ് ആലഞ്ചേരി ജംഗ്ഷനില്‍ സംഘടിപ്പിച്ച ചടങ്ങില്‍ എംഎല്‍എ ഉദ്ഘാടനം ചെയ്തത്. പഞ്ചായത്ത് പ്രസിഡന്‍റ് ജി. അജിത്ത് അധ്യക്ഷത വഹിച്ചു. എംഎല്‍എയുടെ ആസ്തി വികസന ഫണ്ടില്‍ നിന്നും അനുവദിച്ച മൂന്നു കോടി 35 ലക്ഷം രൂപ വിനിയോഗിച്ചാണ് റോഡുകളുടെ നവീകരണപ്രവർത്തനങ്ങൾ പൂര്‍ത്തീകരിക്കുന്നത്.

വികസന സദസ് ഉദ്ഘാടനം ചെയ്തു

അഞ്ചല്‍ : അഞ്ചല്‍ പഞ്ചായത്തിന്‍റെ വികസന സദസ് സംഘടിപ്പിച്ചു. ജെ ജെ ഓഡിറ്റോറിയത്തില്‍ സംഘടിപ്പിച്ച വികസന സദസ് പി.എസ്.സുപാല്‍ എംഎല്‍എ ഉദ്ഘാടനം ചെയ്തു. അഞ്ചലിനെ അതിദാരിദ്ര്യവിമുക്ത പഞ്ചായത്തായി ചടങ്ങില്‍ പ്രഖ്യാപിച്ചു. പഞ്ചായത്ത് പ്രസിഡന്‍റ് എ.നൗഷാദ് അധ്യക്ഷനായി. പഞ്ചായത്തിന്‍റെ വികസന പ്രവര്‍ത്തനങ്ങള്‍ക്കു സൗജന്യമായി ഭൂമി വിട്ടു നല്‍കിയവരെയും ഹരിതകര്‍മ സേനാംഗങ്ങളെയും ആദരിച്ചു. സെക്രട്ടറി ജി.എസ്. സുനിത പഞ്ചായത്തുതല പദ്ധതികള്‍ അവതരിപ്പിച്ചു. കരുനാഗപ്പള്ളി: നഗരസഭ വികസനസദസ് നഗരസഭ അങ്കണത്തില്‍ ഡോ.സുജിത് വിജയന്‍പിള്ള എംഎല്‍എ ഉദ്ഘാടനം ചെയ്തു. വികസനരേഖയും പ്രകാശനം ചെയ്തു. നഗരസഭ ചെയര്‍മാന്‍ പടിപ്പുര ലത്തീഫ് അധ്യക്ഷനായിരുന്നു. ആലപ്പാട് : ആലപ്പാട് വികസനസദസ് റോട്ടറി ഹാളില്‍ ജില്ലാ പഞ്ചായത്ത് അംഗം വസന്ത രമേശ് ഉദ്ഘാടനം ചെയ്തു. ഗ്രാമ പഞ്ചായത്ത് അംഗം പി.ലിജു അധ്യക്ഷനായി. മയ്യനാട്: പഞ്ചായത്തിനെ അതിദാരിദ്ര്യമുക്തമായി പ്രഖ്യാപിച്ചുകൊണ്ടുള്ള വികസന സദസ് എം. നൗഷാദ് എംഎൽഎ ഉദ്ഘാടനം ചെയ്തു. മയ്യനാട് പഞ്ചായത്ത് പ്രസിഡന്‍റ് ജെ. ഷാഹിദ അധ്യക്ഷയായി. ചവറ : തേവലക്കര പഞ്ചായത്ത് വികസന സദസ് ന‌ടന്നു. മുള്ളിക്കാല ദാറുൽഹുദാ യത്തീംഖാന ഓഡിറ്റോറിയത്തിൽ സുജിത്ത് വിജയൻപിള്ള എംഎൽഎ ഉദ്ഘാടനം ചെയ്തു. മത്സ്യഫെഡ് ചെയർമാൻ ടി മനോഹരൻ, കാർഷിക വികസന ബാങ്ക് പ്രസിഡന്‍റ് ഐ. ഷിഹാബ് എന്നിവർ പ്രസംഗിച്ചു. തേവലക്കര പഞ്ചായത്ത് പ്രസിഡന്‍റ് എസ്.സിന്ധു അധ്യക്ഷത വഹിച്ചു.

ഇടപ്പാ‍ളയത്ത് നിയന്ത്രണംവിട്ട കാർ ആറ്റിലേക്ക് മറിഞ്ഞു

ഇടപ്പാളയം: കൊല്ലം തിരുമംഗലം ദേശീയപാതയിൽ ഇടപ്പാളയം ആറുമുറികടയ് ക്കു സമീപം തമിഴ്നാട്ടിൽ നിന്നും കൊല്ലത്തേക്കു വന്ന കാർ നിയന്ത്രണം വിട്ടു വൈദ്യുതി പോസ്റ്റ് തകർത്ത് ആറ്റിലേക്ക് മറിഞ്ഞു. നാട്ടുകാർ യാത്രക്കാരെ രക്ഷപ്പെടുത്തി. കഴിഞ്ഞ ദിവസമാണ് അപകടനം നടന്നത്. ‌ ആർക്കും സാരമായ പരിക്കില്ല. ആറ്റിൽ ജലനിരപ്പ് കുറവായിരുന്നതുകൊണ്ടാണ് യാത്രക്കാർ രക്ഷപ്പെട്ടതെന്നു നാട്ടുകാർ പറഞ്ഞു. തെന്മല പോലീസ് സ്ഥലത്തെത്തി നടപടികൾ സ്വീകരിച്ചു.

കുളത്തൂപ്പുഴയിൽ ജിമ്മി ജോർജ് വോളിബാൾ അക്കാഡമിയും ഇൻഡോർ സ്റ്റേഡിയവും വരുന്നു

കുളത്തൂപ്പുഴ: വോളിബാൾ രംഗത്തെ ഇതിഹാസ താരമായിയുന്ന ജിമ്മി ജോർജിെ ന്‍റ സ്മരണക്കായി ജില്ല പഞ്ചായത്തി െ ന്‍റ നേതൃത്വത്തിൽ ജിമ്മി ജോർജ് വോളിബാൾ അക്കാഡമിയും ഇൻഡോർ സ്റ്റേഡിയവും കുളത്തുപ്പുഴയിൽ സ്ഥാപിക്കും. ജില്ലയിലെ എട്ടാംക്ലാസ് മുതൽ പന്ത്രണ്ടാം ക്ലാസ് വരെയുള്ള കുട്ടികൾക്ക് വോളിബാൾ കായിക പരിശീലനം നൽകി മികച്ച കായിക താരങ്ങളെ വാർത്തെടുക്കുന്നതിനും, സംസ്ഥാനദേശീയ ടീമുകളിലേക്ക് ജില്ലയിലെ കായിക പ്രതിഭകളെ എത്തിക്കുന്നതിനും വേണ്ടി കൊല്ലം ജില്ല പഞ്ചായത്ത് ആരംഭിക്കുന്ന പദ്ധതിയുടെ ഭാഗമായാണ് വോളിബാൾ അക്കാഡമി ആരംഭിക്കുന്നത്. ഇൻഡോർ സ്റ്റേഡിയത്തിനായി 50 ലക്ഷവും പരിശീലനത്തിനായി 10 ലക്ഷം രൂപയും വകയിരുത്തിയ പദ്ധതിയുടെ ടെൻഡർ നടപടികൾ പൂർത്തിയായതായും ഏതാനും ദിവസങ്ങൾക്കുള്ളിൽ നിർമാണ പ്രവർത്തനങ്ങൾ ആരംഭിക്കുമെന്നും ജില്ലാ പഞ്ചായത്ത് വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ കെ. അനിൽകുമാർ അറിയിച്ചു.

ധർമ സന്ദേശ യാത്രയ്ക്ക് സ്വീകരണം നൽകി

അമൃതപുരി : സനാതനധർമ സംരക്ഷണം ആഹ്വാനം ചെയ്തു കാസർഗോഡ് മുതൽ തിരുവനന്തപുരം വരെ സംഘടിപ്പിക്കുന്ന ധർമ സന്ദേശയാത്രയിൽ പങ്കെടുത്ത സന്ന്യാസിമാർക്ക് മാതാ അമൃതാനന്ദമയി മഠത്തിൽ സ്വീകരണം നൽകി. ആശ്രമത്തിലെത്തിയ സന്ന്യാസി സംഘത്തെ പാദപൂജയും ഹാരാർപ്പണവും നടത്തി സ്വീകരിച്ചു.

യുവതിയുടെ മരണം : അസ്വഭാവികതയില്ലെന്ന് പോസ്റ്റുമോർട്ടം റിപ്പോർട്ട്

പുനലൂർ: അശ്വതിയുടെ മരണത്തിൽ അസ്വഭാവികതയി െ ല്ലന്നു പോസ്റ്റുമോർട്ടം റിപ്പോർട്ട്. താലൂക്കാശുപത്രിയിൽ കഴിഞ്ഞ ദിവസം ചികിത്സ തേടിയെത്തിയ കോട്ടവട്ടം നിരപ്പിൽ വീട്ടിൽ ശ്രീഹരിയുടെ ഭാര്യ അശ്വതി (34) ആണ് മരിച്ചത്. ചികിത്സാപ്പിഴവാണ് മരണകാരണമെന്നാരോപിച്ചു യുവതിയുടെ ബന്ധുക്കൾ പരാതി നൽകിയിരുന്നു. ഇൻഫക്ഷൻ ഉണ്ടായതായും റിപ്പോർട്ടിൽ പറയുന്നുണ്ട്. കഴിഞ്ഞ ദിവസം വൈകുന്നേരം ഛർദിയെത്തുടർന്ന് ഇവരെ ആശുപത്രിയിൽ പ്രവേശിപ്പിക്കുകയായിരുന്നു. എന്നാൽ രാത്രിയിൽ മരണം സംഭവിച്ചു. ചികിത്സ തേടിയ യുവതിക്കു വിദഗ്ധ ചികിത്സ നൽകിയില്ലെന്നായിരുന്നു ബന്ധുക്കളുടെ ആക്ഷേപം. ആശുപത്രി അധികൃതരുമായി ബന്ധുക്കൾ തർക്കത്തിലേർപ്പെടുകയും ഉണ്ടായി. സംഭവത്തെ തുടർന്ന് പൊതുപ്രവർത്തകരും നാട്ടുകാരുമെല്ലാം ആശുപത്രിയിലെത്തിയിരുന്നു.പുനലൂരിലെ ഒരു സ്വകാര്യ സ്കൂളിലെ അധ്യാപികയായിരുന്നു അശ്വതി. മകൻ: അമ്പാടി. യാതൊരു വീഴ്ചയും സംഭവിച്ചിട്ടില്ലെന്ന് പുനലൂർ: താലൂക്ക് ആശുപത്രിയിൽ യുവതി മരിച്ച സംഭവത്തിൽ വിശദീകരണവുമായി ആശുപത്രി അധികൃതർ. രോഗിയുടെ ചികിത്സയിൽ ആശുപത്രിക്കു യാതൊരു വീഴ്ചയും സംഭവിച്ചിട്ടില്ലെന്നു സൂപ്രണ്ട് സുനിൽകുമാർ അറിയിച്ചു. തലകറക്കം,ഛർദ്ദി എന്നിവയോട് കൂടി അത്യാഹിത വിഭാഗത്തിൽ ചികിത്സ തേടിയെത്തിയതാണ് യുവതി. രോഗി വളരെ അപ്രതീക്ഷിതമായാണ് മരണപ്പെട്ടത്. രോഗിയുടെ പോസ്റ്റ്മോർട്ടം പാരിപ്പള്ളിയിൽ നടന്നു. വയറ്റിൽ ഉണ്ടായ പഴുപ്പും അതിൽ നിന്നുണ്ടായ രോഗാണു ബാധയുമാണ് മരണകാരണ മെന്നാണ് പ്രാഥമിക നിഗമനം.

ഒളിമങ്ങാത്ത ഓർമകളുമായി ബിഷപ് ബെൻസിഗറിന്‍റെ കാളവണ്ടി

ജോൺസൺ വേങ്ങത്തടം കൊല്ലം: കടകട ശബ്ദവും മണി കിലുക്കവുമായി ഒരു കാലത്തു ഗ്രാമവീഥികളിലൂടെ പ്രതാപത്തോടെ ഓടിയിരുന്ന വണ്ടിയുടെ ഓട്ടം നിലച്ചെങ്കിലും ഒളിമങ്ങാത്ത ഓർമങ്ങളാണ് കൊല്ലം ബിഷപ് ഹൗസിനുമുന്നിലെ ബിഷപ് ബെൻസിഗറിന്‍റെ കാളവണ്ടി പകരുന്നത്. ഒരു മിഷനറി അനുഭവിച്ച ത്യാഗത്തിന്‍റെയും പങ്കുവച്ച വിശ്വാസത്തിന്‍റെയും ജീവിച്ച നന്മനിറഞ്ഞ ജീവിതത്തിന്‍റെയും കഥ ഈ വാഹനം പറയും. ബിഷപ് ഹൗസിൽനിന്നും രൂപതയുടെവക മ്യൂസിയത്തിലേക്കു മാറുവാനുള്ള ഒരുക്കത്തിലാണ് ഈ വണ്ടി. ഈട്ടിയിൽ നിർമിച്ചിരിക്കുന്ന വണ്ടിക്ക് ഇന്നും ഒരു കേടുപാടുപോലുമില്ല. ഒരാൾക്കു കാലുനീട്ടിയിരുന്നു യാത്ര ചെയ്യാവുന്ന വാഹനം. ഒന്നോ രണ്ടോ ദിവസം താമസിക്കേണ്ടിവന്നാൽ അതിനുള്ള വസ്ത്രംപോലും സൂക്ഷിക്കാനുള്ള പെട്ടിയും വാഹനത്തിലുണ്ട്. പ്രാർഥനപുസ്തകങ്ങളും ബൈബിളും വയ്ക്കാനുള്ള സൗകര്യവും തീർത്തിരിക്കുന്നു. ചക്രങ്ങളിൽ റബർച്ച‌ട്ട പിടിപ്പിച്ചിരിക്കുന്നതിനാൽ അസൗകര്യമായ ഒരു ശബ്ദമോ കുലുക്കമോ ഉണ്ടാകില്ല. അതിനുപോലും തേയ്മാനം സംഭവിച്ചിട്ടില്ല. ഇപ്പോഴും പുതുപുത്തൻപോലെ വാഹനം കിടക്കുന്നു. വാഹനത്തിനൊരു കേടുപാടുസംഭവിക്കാതെയിരിക്കാൻ മോൺ.ബൈജു ജൂലിയന്‍റെ നേതൃത്വത്തിൽ പ്രത്യേകം പരിപാലിക്കുന്നുമുണ്ട്. 31വർഷക്കാലം ബിഷപ് അലോഷ്യസ് മരിയ ബെൻസിഗറിന്‍റെ സന്തതസഹചാരിയായിരുന്നു ഈ വാഹനം. സ്വിറ്റ്സർലൻഡിലെ ഐൻസീഡനിലെ പ്രഭുകുടുംബത്തിൽ ജനിച്ചുവളർന്ന ഇദ്ദേഹം മിഷനറിയാകാൻ കൊതിച്ചു ഒരു കർമലീത്ത വൈദികനായിട്ടാണ് ഭാരതത്തിലെത്തുന്നത്. പ്രേഷിതപ്രവർത്തനത്തിനായി ഇറങ്ങി പുറപ്പെട്ട ഇദ്ദേഹം കൊച്ചിയിൽ സെമിനാരിയിൽ പ്രഫസറായി. ശ്രീലങ്കയിൽ അപ്പസ്തോലിക് ന്യൂണ്‍ഷയുടെ സെക്രട്ടറിയായി. അവിടെനിന്നും 1900ൽ സഹായമെത്രാനായിട്ടാണ് കൊല്ലത്തേക്കു വരുന്നത്. അദ്ദേഹത്തിന്‍റെ പ്രേഷിതപ്രവർത്തനമേഖലകളിൽ കൂട്ടായിരുന്നു ഈ വാഹനം. രോഗത്താലും പട്ടിണിയിലും വലയുന്ന സാധാരണക്കാരെ കൈപ്പിടിച്ച് ഉയർത്താൻ മുന്നിൽനിന്ന പിതാവായിരുന്നു ബെൻസിഗർ എന്ന് മോൺ. ബൈജു ജൂലിയൻ അനുസ്മരിക്കുന്നു. സാമ്പത്തിക ശാസ്ത്രത്തിൽ ബിരുദമുണ്ടായിരുന്ന പിതാവ് രൂപതയേയും നാടിനെയും സാമ്പത്തികമായി രക്ഷപ്പെടാനുള്ള മാർഗങ്ങളും സ്വീകരിച്ചു. ക്രിസ്തുവിന്‍റെ സുവിശേഷം ജീവിതത്തിലൂടെ പ്രസംഗിച്ച പച്ചയായ മനുഷ്യനായിരുന്നു അദ്ദേഹം. പള്ളി - പള്ളിക്കൂടം - മാർക്കറ്റ് എന്നിങ്ങനെയായിരുന്നു ബിഷപ് സമൂഹത്തെ ഉയർത്തികൊണ്ടുവന്നത്.മോട്ടോർവാഹനമില്ലാത്ത കാലത്തെ രാജകീയവാഹനമായിരുന്നു ഇത്. ഭാരതത്തിലെ ആദ്യത്തെ കത്തോലിക്ക രൂപതയായിരുന്നു കൊല്ലത്തേത്. അതുകൊണ്ടുതന്നെ അദ്ദേഹത്തിനു തിരുവനന്തപുരം വരെ യാത്ര ചെയ്യേണ്ടി വന്നിരുന്നു. വിശ്വാസികളുടെ വിശ്വാസജീവിതത്തിൽ മാത്രമല്ല ഭൗതികജീവിതത്തെയും രക്ഷപ്പെടുത്താൻ ദൗത്യമേറ്റെടുത്തു മുന്നിട്ടിറങ്ങിയ ബിഷപിനു കൂട്ടായി കൂടെയുള്ളത് ഈ വാഹനമായിരുന്നു. 1900 മുതൽ 1931ൽ അദ്ദേഹം സ്ഥാനത്യാഗം ചെയ്യുന്നതുവരെ ഈ വാഹനത്തിലായിരുന്നു യാത്ര. സഹോദരങ്ങൾ വിദേശത്തുനിന്നും കാർ വാങ്ങാൻ നൽകിയ പണം നൽകി വാഹനമെടുക്കുന്നതിനുപകരം ഫാത്തിമ കോളജ് സ്ഥിതി ചെയ്യുന്ന പ്രദേശമെല്ലാം വാങ്ങി വിദ്യാഭ്യാസത്തിനും ആതൂരസേവനത്തിനും ഉപയോഗപ്പെടുത്താനാണ് ശ്രമിച്ചത്. അക്കാലത്ത് തിരുവിതാംകൂർ മഹാരാജാവായിരുന്ന ശ്രീമൂലം തിരുനാളിന്‍റെ അഭ്യർത്ഥനപ്രകാരം ധാരാളം വിദ്യാഭ്യാസ-ആരോഗ്യ സ്ഥാപനങ്ങൾ ആരംഭിച്ചു. മഹാരാജാവിന്‍റെ അഭ്യർഥന പ്രകാരം സർക്കാർ ആശുപത്രികളിൽ രോഗികളെ ശുശ്രൂഷിക്കാൻ സ്വിറ്റ്സർലൻഡിൽ നിന്നു കന്യാസ്ത്രീകളെ കൊണ്ടുവന്നതും ബിഷപ് ബെൻസിഗർ ആണ്.അദ്ദേഹത്തെ സഭ ആർച്ച് ബിഷപ് പദവിയിലേക്ക് ഉയർത്തി. കൊല്ലം രൂപതയിൽ നിന്ന് ദൈവദാസ പദവിയിലെത്തുന്ന ആദ്യബിഷപ്പും ബിഷപ് ബെൻസിഗറാണ്. ദൈവദാസൻ ഉപയോഗിച്ച വാഹനത്തിനു ഇന്നും പ്രതാപം നഷ്ടപ്പെട്ടിട്ടില്ല. വിശുദ്ധമായി ഇന്നും ബിഷപ്ഹൗസിന്‍റെ മുറ്റത്ത് കിടക്കുന്നു.

അമിതമായി അയൺ ഗുളികകൾ കഴിച്ച ആറു വിദ്യാർഥികൾ ചികിത്സയിൽ

കൊല്ലം: അമിതമായി അയൺ ഗുളികകൾ കഴിച്ച സ്കൂൾ വിദ്യാർഥികളെ ദേഹാസ്വാസ്ഥ്യം അനുഭവപ്പെട്ടതിനെ തുടർന്ന് ആശുപത്രിയിൽ പ്രവേശിപ്പിച്ചു. ശാസ്താംകോട്ട മൈനാഗപ്പള്ളി മിലാദെ ഷെരീഫ് ബോയ്സ് ഹൈസ്കൂളിലെ കുട്ടികൾക്കാണ് ദേഹാസ്വസ്ഥ്യമുണ്ടായത്. ഒരാഴ്ച മുമ്പ് ആരോഗ്യ വകുപ്പ് അധികൃതർ സ്കൂളിൽ എത്തിച്ച അയൺ ഗുളികകൾ ഇന്നലെ നോഡൽ ഓഫീസറായ അധ്യാപകൻ ക്ലാസിൽ എത്തി വിതരണം ചെയ്യുകയായിരുന്നു. കഴിക്കേണ്ട രീതികളെ കുറിച്ചു വ്യക്തമായ നിർദേശം നൽകിയിരുന്നെങ്കിലും ഒരു സംഘം കുട്ടികൾ മത്സരിച്ചു ഗുളിക കഴിക്കുകയായിരുന്നുവെന്നു പറയപ്പെടുന്നു. ഗുളികയ്ക്കു മധുരം ഉള്ള തിനാലാണ് ഇവർ മത്സരിച്ച് കഴിച്ചത്. തുടർന്നു ഛർദി അനുഭവപ്പെട്ട് കുട്ടികൾ കുഴഞ്ഞു വീണതിനെ തുടർന്ന് ഉടൻ തന്നെ അധ്യാപകർ ഇവരെ ശാസ്താംകോട്ട താലൂക്ക് ആശുപത്രിയിൽ എത്തിച്ചു. പിന്നീട് രണ്ട് പേരെ കൊല്ലം ജില്ലാ ആശുപത്രിയിലേക്കും നാലുപേരെ ശാസ്താംകോട്ടയിലെ സ്വകാര്യ ആശുപത്രിയിലേക്കും മാറ്റി. കുട്ടികളുടെ ആരോഗ്യ നില തൃപ്തികരമാണെന്ന് ആശുപത്രി അധികൃതർ അറിയിച്ചു.സംഭവം അറിഞ്ഞ് രക്ഷകർത്താക്കളും നാട്ടുകാരും സ്കൂളിൽ തടിച്ചു കൂടിയതു സംഘർഷാവസ്ഥയ്ക്ക് കാരണമായി. ഗുളിക വിതരണം ചെയ്യുന്ന വിവരം സ്കൂൾ അധികൃതർ അറിയിച്ചിട്ടില്ലെന്നും ആരോഗ്യ വകുപ്പ് ഉദ്യോഗസ്ഥർക്ക് ഗുരുതരമായ വീഴ്ച സംഭവിച്ചു എന്നും ആരോപിച്ചും രക്ഷകർത്താക്കളുടെ പ്രതിഷേധം ഉണ്ടായി.വിവരം അറിഞ്ഞ് സ്ഥലത്ത് പോലീസും എത്തി. തുടർന്ന് മൈനാഗപ്പള്ളി പഞ്ചായത്ത് പ്രസിഡന്‍റ് വർഗീസ് തരകൻ , ബ്ലോക്ക് പഞ്ചായത്ത് അംഗം തുണ്ടിൽ നൗഷാദ്, ഗ്രാമ പഞ്ചായത്ത് അംഗം ഐ. ഷാനവാസ് തുടങ്ങിയവർ പ്രതിഷേധക്കാരുമായും സ്കൂൾ അധികൃതർ, ആരോഗ്യ വകുപ്പ് അധികൃതർ, പോലീസ് ഉദ്യോഗസ്ഥർ എന്നിവരുമായി നടത്തിയ ചർച്ചയിൽ സംഭവത്തിൽ ഉണ്ടായ വീഴ്ചയെ കുറിച്ച് അന്വഷിക്കാമെന്ന ഉറപ്പിന്‍റെ അടിസ്ഥാനത്തിൽ പ്രതിഷേധം അവസാനിപ്പിക്കുകയായിരുന്നു.

നാടക അവതരണത്തിനിടെ നടൻ കുഴഞ്ഞുവീണ് മരിച്ചു

കൊല്ലം: നാടക അവതരണത്തിനിടയിൽ നടൻ വേദിയിൽ കുഴഞ്ഞുവീണു മരിച്ചു. ആലപ്പുഴ നെടുമുടി പുതുമന സ്വദേശിയും പ്രശസ്ത നാടകനടനുമായ ലഗേഷ് (62) ആണ് മരിച്ചത്. സംസ്കാരം ഇന്ന് ഉച്ച കഴിഞ്ഞ് രണ്ടിന്. അഞ്ചാലുംമൂട് ചിറ്റയം പ്രീമിയർ സ്പോർട്സ് ആൻഡ് ആർട്സ് ക്ലബിലെ ദീപാവലി ആഘോഷങ്ങളുടെ ഭാഗമായുള്ള നാടക അവതരണത്തിനിടയിലായിരുന്നു സംഭവം. ഉടൻ ആശുപത്രിയിൽ എത്തിച്ചെങ്കിലും മരണം സംഭവിച്ചു. അമ്പലപ്പുഴ അക്ഷര ജ്വാലയുടെ "വാർത്ത' എന്ന നാടകത്തിൽ അഭിനയിച്ചു കൊണ്ടിരിക്കുകയായിരുന്നു ലഗേഷ്. കഴിഞ്ഞ 20 വർഷമായി പ്രഫഷണൽ നാടകങ്ങളിൽ അഭിനയിച്ചു വരികയായിരുന്നു. പോലീസ് ഉദ്യോഗസ്ഥനായിരുന്ന ലഗേഷ് പിന്നീട് ആരോഗ്യവകുപ്പിലേക്ക് മാറിയിരുന്നു. ഭാര്യ: രാജി. മക്കൾ: ഐശ്വര്യ, അമൽ.

വിദ്യാർഥി ഒഴുക്കിൽപ്പെട്ട് മരിച്ചു

കുണ്ടറ: 19കാരൻ ഒഴുക്കിൽപ്പെട്ടു മരിച്ചു. വെളിച്ചിക്കാല കാട്ടുവിള വീട്ടിൽ അൻസാർ-ഷംല ദമ്പതികളുടെ മകൻ അഫ്സൽ (19) ആണ് മരിച്ചത്. ഇന്നലെ ഉച്ചയ്ക്ക് 3.30 ഓടെയായിരുന്നുസംഭവം. നെടുമൺകാവ് ശാസ്താക്കടവ് പാലത്തിനുസമീപം കടുവാക്കുഴി ഭാഗത്തു കൂട്ടുകാരുമായി മീൻ പിടിക്കാനും കുളിക്കാനും എത്തിയതായിരുന്നു അഫ്സൽ. കുളിച്ചു കൊണ്ടിരിക്കവേ കാൽവഴുതി ഒഴുക്കിൽപ്പെടുകയായിരുന്നു. സുഹൃത്തുക്കൾ നീന്തി ചെന്നു രക്ഷിക്കാൻ ശ്രമിച്ചെങ്കിലും വിജയിച്ചില്ല. കൊല്ലത്തുനിന്നു സ്കൂബ സംഘം എത്തി കരക്കെത്തിച്ചപ്പോഴേക്കും മരണം സംഭവിച്ചിരുന്നു. ഒമ്പതാം ക്ലാസ് വിദ്യാർഥിനി ആസിയ സഹോദരിയാണ്.

മരണത്തെ മുഖാമുഖം കണ്ട് ലൈഫ് ഗാർഡുകൾ

ജോൺസൺ വേങ്ങത്തടം കൊല്ലം: കൊല്ലം ബീച്ചൊരു അമ്യൂസ്മെന്‍റ് പാർക്കല്ല, സൂക്ഷിച്ചില്ലെങ്കിൽ ഇതൊരു അപകടമുനന്പാണ്. തിരകണ്ട് മതിമറന്നു കടലിലേക്കു ചാടുന്നവരും കടലിലേക്കു കുളിക്കാനും കാലു നനയ്ക്കാനും ഇറങ്ങുന്നവരും അറിയുന്നില്ല മുന്നിലെ അപകടം. ജീവന്‍റെ കാവലാളുകളായി ലൈഫ്ഗാർഡുകൾ ഇവിടെ മുന്നിൽനിൽക്കുന്നതുകൊണ്ടാണ് പലരും രക്ഷപ്പെടുന്നത്. ആത്മഹത്യചെയ്യാൻ കടലിലേക്കു ചാടിയവരെയും കാലുനനയ്ക്കാൻ തുള്ളിച്ചാടി ഇറങ്ങിയവരെയും കടലമ്മ മാടിവിളിച്ചപ്പോൾ രക്ഷിക്കാൻ ലൈഫ് ഗാർഡുകൾ മാത്രമേയുണ്ടായിരുന്നുള്ളു. സ്വർണമണൽപ്പരപ്പുകളാൽ സന്പന്നമായ കൊല്ലം ബീച്ചിലെത്തുന്ന സഞ്ചാരികൾ മുന്നറിയിപ്പ് നിർദേശമൊന്ന് വായിച്ചാൽ മതി അപകടം കുറയും. പാഞ്ഞുവരുന്ന തിരകളിൽ സെൽഫി എടുക്കുന്നവരുടേയും കുളിക്കാനായി എടുത്തുചാടുന്നവരുടേയും ജീവൻ സംരക്ഷിക്കുന്നത് ലൈഫ് ഗാർഡുകളാണ്. ഇവർക്കു നമ്മൾ ഒരു വിലയും നൽകാറില്ലെങ്കിലും ഇവർ നമ്മുടെ ജീവനെ പൊന്നുപോലെയാണ് സംരക്ഷിക്കുന്നത്. കണ്ണും കാതും തുറന്നുവച്ചു ഓരോ സഞ്ചാരികളെയും നിരീക്ഷിച്ചു ഒരു പോറൽപോലും ഏൽക്കാതെ തിരിച്ചയ്ക്കാനാണ് ഇവർ ശ്രമിക്കുന്നത്. കൊല്ലം ബീച്ചിൽ ഏഴു ലൈഫ് ഗാർഡുകൾ മാത്രമേയുള്ളൂ. ഇത്രയും അപകടം പിടിച്ച മേഖലയിൽ ഗാർഡുകൾ കുറവാണ്. ഒരു ദിവസം നാലുപേരുടെ സേവനമാണ് ലഭിക്കുന്നത്. കൊല്ലം ബീച്ചിൽ എം.കെ. പൊന്നപ്പൻ, എസ്. അന്പിളി, ആന്‍റണി ജോൺസൺ, ഷാജി ഫ്രാൻസീസ്, സുരേഷ് ബാബു, പ്രഭുകുമാർ, യു. ഉണ്ണിക്കുട്ടൻ, അഴീക്കൽ ബീച്ചിൽ എസ്.അനിൽകുമാർ, എസ്. സതീഷ്കുമാർ എന്നിവരാണ് ലൈഫ് ഗാർഡുകളായിട്ടുള്ളത്. രാവിലെ ഏഴുമുതൽ രാത്രി ഏഴുവരെ ഇവരുടെ സേവനം ബീച്ചിലുണ്ട്. 30 വർഷമായി ഇവിടെ സേവനം ചെയ്യുന്ന എം.കെ. പൊന്നപ്പൻ മുതൽ കഴിഞ്ഞയിടെ എത്തിയ ഉണ്ണിക്കുട്ടൻവരെ ഇവിടെ സേവനം ചെയ്യുന്നു. കഴിഞ്ഞ 20 വർഷംകൊണ്ടു 600 പേരുടെ ജീവൻ ഇവർ രക്ഷിച്ചു. ഇതൊന്നും ഇവർ കഥ പറയുന്നതല്ല. രേഖപ്പെടുത്തിയിരിക്കുന്ന സത്യമാണ്. ഇവർക്കെല്ലാം കടലോളം സങ്കടം പേറുന്നവരാണ്. ഇവരെല്ലാം ഇപ്പോഴും ദിവസക്കൂലിക്കാണ് ജോലി ചെയ്യുന്നത്. ഒരു ആനുകൂല്യവും നൽകാറില്ല. ബീച്ചിലെ തെരുവുനായ്ക്കളുടെ കടിപോലും കിട്ടിയവരുണ്ട്. എന്ത് അപകടം സംഭവിച്ചാലും പിറ്റേന്ന് ജോലിക്കുവന്നില്ലെങ്കിൽ ശന്പളമില്ല. ഇഎസ്ഐയോ പിഎഫോ തുടങ്ങിയ ആനുകൂല്യമൊന്നുമില്ല. നാളെവരണ്ട എന്നു പറഞ്ഞാൽ വെറുംകൈയോടെ ഇറങ്ങി പോകണം. കഴിഞ്ഞ മാർച്ചിൽ 13 പേരെ പറഞ്ഞുവിട്ടു. ഇൻഷൂറൻസ് പരിരക്ഷയെങ്കിലും കിട്ടുമെന്ന പ്രതീക്ഷയിലാണ് ഇവർ കഴിയുന്നത്. സംസ്ഥാന അവാർഡുകളും അനുമോദനങ്ങളും ലഭിക്കുന്നുണ്ടെങ്കിലും ജോലിക്കുസുരക്ഷ ലഭിക്കുന്നില്ല. ദിവസക്കൂലിയായി 800 രൂപയാണ് ലഭിക്കുന്നത്. ലൈഫ് ഗാർഡ് എംപ്ലോയീസ് യൂണിയന്‍റെ നേതൃത്വത്തിൽ അവകാശസമരമെല്ലാം നടത്തി. ഒരു പ്രയോജനവുമില്ലെന്നുമാത്രം. തൊഴിൽസുരക്ഷ, മാന്യമായ ശന്പളം, സുരക്ഷ ഉപകരണങ്ങൾ എന്നിവയുണ്ടാകണമെന്നാണ് ഇവരുടെ ആഗ്രഹം. പോലീസിന്‍റെയും നാട്ടുകാരുടെയും സഹായം ലഭിക്കുന്നതുകൊണ്ടാണ് പലപ്പോഴും ഇവർ മദ്യപാനികളിൽ നിന്നും രക്ഷപ്പെടുന്നത്. എന്നിട്ടും പലപ്പോഴും മർദനമേറ്റിട്ടുണ്ട്. പലരും അപമാനിച്ചിട്ടുണ്ട്. പരിഹസിക്കാറുണ്ട്. എന്നിട്ടും ഇവർ ആരോടും വിരോധമില്ലാതെ ജോലി ചെയ്യുന്നു. ആഞ്ഞടിക്കുന്ന തിരമാലകൾ കേരളത്തിലെ ബീച്ചുകളിൽ ഏറ്റവും അപകടകരമായ ബീച്ചാണ് കൊല്ലം ബീച്ച്. ഇത്രശക്തമായ തിരമാലകൾ ആഞ്ഞടിക്കുന്ന മറ്റൊരു ബീച്ചില്ലെന്ന് ഇവർ പറയുന്നു. മറ്റുള്ള ബീച്ചുകളിൽ 50 മീറ്റർഅകലെ കടലിലാണ് തിരയടിക്കുന്നത്. എന്നാൽ കൊല്ലംബീച്ചിൽ തീരത്ത് തിര അടിക്കുകയാണ്. 20 അടിമുതൽ 40 അടിവരെ ആഴമുള്ള കടലാണ് ബീച്ചിനോടു ചേർന്നുള്ളത്. കടൽ കരകവർന്നോടെ ബീച്ചിൽനിന്നും കാലുനനച്ചു കടലിലേക്ക് നടന്നാൽ 12 അടി താഴ്ച്ചയിലേക്കു പോകും. ഒരാൾ കടലിലേക്കു മുങ്ങിപോയാൽ കാണാൻപോലും സാധിക്കാത്ത അവസ്ഥയുണ്ടെന്നും ഇവർ പറയുന്നു. ഈ അപകടമുനന്പിൽനിന്നാണ് വടംകെട്ടിതിരിച്ചു ഇവർ പറയുന്നത് ഇതൊരു അമ്യൂസ്മെന്‍റ് പാർക്കല്ല. കൊല്ലം ബീച്ചാണെന്ന് ആര് കേൾക്കാൻ.

എക്സൈസ് ഉദ്യോഗസ്ഥനെ കാറിടിപ്പിച്ച ശേഷം പ്രതി രക്ഷപ്പെട്ടു

കൊല്ലം: കഞ്ചാവ് കടത്തിക്കൊണ്ടുവന്നതു പിടികൂടാൻ ശ്രമിക്കവേ എക്സെസ് ഉദ്യോഗസ്ഥനെ കാറിടിച്ച് വീഴ്ത്തി പ്രതി രക്ഷപ്പെട്ടു. കിളികൊല്ലൂർ സ്വദേശി നിഷാദാണ് പിടികൂടാൻ ശ്രമിക്കവേ സിവിൽ എക്സൈസ് ഓഫീസർ ജോജോയെ കാറിടിച്ചു വീഴ്ത്തി രക്ഷപ്പെട്ടത്. പരിക്കേറ്റ ജോജോയെ ജില്ലാ ആശുപത്രിയിൽ പ്രവേശിപ്പിച്ചു. ശക്തികുളങ്ങര കന്നിമേൽ ഭാഗത്ത് കഴിഞ്ഞദിവസം രാത്രി എക്സൈസ് നടത്തിയ പരിശോധനയ്ക്കിടെയാണ് സംഭവം. കാറിലെത്തിയ നിഷാദ് കഞ്ചാവ് തൃശൂർ സ്വദേശിക്കു കൈമാറാൻ ശ്രമിക്കുന്പോഴാണ് സംഭവം. തൃശൂർ പീച്ചി മനയ്ക്കപ്പാടം പുളിന്തറ വീട്ടിൽ സ്റ്റാൻലി പീറ്ററിനെ (26) സംഭവ സ്ഥലത്തു വച്ചുതന്നെ എക്സൈസ് സംഘം പിടികൂടി. പിന്നീട് ഇയാൾ വാടകയ്ക്കു താമസിക്കുന്ന വീട്ടിൽ നടത്തിയ പരിശോധനയിൽ 8.286 കിലോഗ്രാം കഞ്ചാവും വടിവാളും കഞ്ചാവ് പായ്ക്കു ചെയ്യാനുള്ള ഉപകരണങ്ങളും കണ്ടെടുത്തു. കേസിൽ സ്റ്റാൻലി പീറ്റർ ഒന്നാം പ്രതിയും രക്ഷപ്പെട്ട നിഷാദ് രണ്ടാം പ്രതിയുമാണ്. എക്സൈസ് ഉദ്യോഗസ്ഥനെ ആക്രമിച്ചതിനു നിഷാദിനെ പ്രതിയാക്കി മറ്റൊരു കേസുമെടുത്തിട്ടുണ്ട്. നിഷാദിനെ പിടികൂടുന്നതിന് എക്സൈസ് ജില്ലയിൽ വ്യാപക തെരച്ചിൽ ആരംഭിച്ചിട്ടുണ്ട്. ഒഡീഷയിൽ നിന്നും വൻ തോതിൽ കഞ്ചാവ് എത്തിച്ച് ഇടനിലക്കാർ വഴി വിൽപന നടത്തുന്നതാണ് ഇവരുടെ രീതി. കൊല്ലം എക്സൈസ് സ്പെഷൽ സ്ക്വാഡ് ഇൻസ്പെക്ടർ സി.പി. ദിലീപിന്‍റെ നേതൃത്വത്തിലാണ് പരിശോധന നടത്തിയത്. സിവിൽ എക്സൈസ് ഓഫീസർമാരായ തൻസീർ അസീസ്, ജോജോ, സൂരജ്, ലാൽ, ജാസ്മിൻ, പ്രിവന്‍റീവ് ഓഫീസർ പ്രസാദ് കുമാർ, അസിസ.എക്സൈസ് ഇൻസ്പെക്ടർ ശ്രീകുമാർ, സിവിൽ എക്സൈസ് ഓഫീസർ ഡ്രൈവർ സുഭാഷ് എന്നിവരും പരിശോധനയിൽ പങ്കെടുത്തു.

മൊസാംബിക് ബോട്ടപകടം: കാണാതായ തേവലക്കര സ്വദേശിയുടെ മൃതദേഹം കണ്ടെത്തി

ചവറ : ആഫ്രിക്കന്‍ രാജ്യമായ മൊസാംബിക്കില്‍ ബോട്ട് മറിഞ്ഞ് കാണാതായതേവലക്കര സ്വദേശിയുടെ മൃതദേഹം കണ്ടെത്തി. കൊല്ലം തേവലക്കര നടുവിലക്കര ഗംഗാ ഭവനില്‍ രാധാകൃഷ്ണന്‍റെയും ഷീലയുടെയും മകന്‍ ശ്രീരാഗ് രാധാകൃഷ്ണന്‍റെ (36) മൃതദേഹമാണ് കണ്ടെത്തിയയെന്ന് ഇന്നലെ ഉച്ചയ്ക്ക് 2.30 ഓടെ ബന്ധുക്കള്‍ക്ക് വിവരം കിട്ടി. ഇറ്റലി ആസ്ഥാനമായിട്ടുള്ള സ്‌കോര്‍പ്പിയോ ഷിപ്പിംഗ് കമ്പനിയിലെ സ്വീ ക്വസ്റ്റ് എന്ന കപ്പലിലെ ഇലക്‌ട്രോ ഓഫീസറായിട്ടായിരുന്നു ശ്രീരാഗിന് ജോലി.ഏഴു വർഷമായി കപ്പലിലാണ് ജോലി. മൊസാംബിക്കിൽ ജോലിക്ക് കയറിയിട്ട് മൂന്നു വർഷമായി. ആറു മാസമായി നാട്ടിലുണ്ടായിരുന്ന ശ്രീരാഗ് ഈ മാസം ആറിനാണ് വീണ്ടും മൊസാംബിക്കിലേക്ക് പോയത്. ബോട്ട് മറിഞ്ഞ് ശ്രീരാഗിനെ കാണാതായതിനെ തുടർന്ന് ഇന്ത്യൻ എംബസി ഉദ്യോഗസ്ഥർ ഇടപെട്ടു. മൊസാമ്പിക്കിലെ ബന്ധപ്പെട്ട ഉദ്യോഗസ്ഥർ തിരച്ചിൽ നടത്തി വരുന്നതിനിടയില്‍ ഇദ്ദേഹത്തിന്‍റെ മൃതദേഹം കണ്ടെത്തുകയായിരുന്നു.മൊസാംബിക്കടുത്ത് ബെയ്‌റ എന്ന സ്ഥലത്ത് തുറമുഖത്തിനകലെ നങ്കൂരമിട്ടിരിക്കുന്ന കപ്പലിലേക്ക് പോയ ഇന്ത്യക്കാരുള്‍പ്പടെ 21 അംഗ സംഘം സഞ്ചരിച്ച ബോട്ടായിരുന്നു മുങ്ങിയത്.ഇതില്‍ 15 പേര്‍ രക്ഷപെട്ടിരുന്നു. തെരച്ചിലില്‍ മൂന്ന് പേരുടെ മൃതദേഹം നേരത്തെ കണ്ടു കിട്ടിയിരുന്നു.ശേഷിച്ച മൂന്നുപേര്‍ക്കായി തെരച്ചില്‍ നടത്തി വരുകയായിരുന്നു അപകടം അറിഞ്ഞ ഉടന്‍ തന്നെ ശ്രീരാഗിന്‍റെ ബന്ധുക്കള്‍ ഇന്ത്യന്‍ എംബസിയുമായി ബന്ധപ്പെട്ടുവരികയായിരുന്നു. ഭാര്യ ജിത്തു. നാല് വയസുള്ള അതിഥി മോന്‍, ആറ് മാസം പ്രായമായ അനശ്വര്‍ എന്നിവരാണ് മക്കള്‍. ശ്രീരാഗ് രാധാകൃഷ്ണന്‍റെ മൃതശരീരം തുടര്‍നടപടികള്‍ പൂര്‍ത്തിയാക്കി നാട്ടിലേക്ക് അയയ്ക്കുവാന്‍ പോലീസിന് കൈമാറിയസാഹചര്യത്തിൽ നടപടികള്‍ എത്രയും പെട്ടെന്ന് പൂര്‍ത്തിയാക്കി ഷിപ്പിംഗ് ഡയറക്ടറേറ്റിന്‍റെ ചെലവില്‍ നാട്ടിലേക്ക് അയയ്ക്കുവാനുള്ള നടപടി സ്വീകരിച്ചതായി എൻ.കെ.പ്രേമചന്ദ്രൻ എംപി വാർത്താകുറിപ്പിൽ അറിയിച്ചു. കുടുംബത്തിന് ആശ്വാസധനസഹായം അടിയന്തിരമായി വിതരണം ചെയ്യുമെന്നും എംപി യുടെ ആവശ്യത്തെ തുടര്‍ന്ന് അധികൃതര്‍ ഉറപ്പുനല്‍കിയിട്ടുണ്ട്. ശ്രീരാഗ് രാധാകൃഷ്ണന്‍റെ പേരിലുള്ള ഇന്‍ഷുറന്‍സ് സംബന്ധിച്ച നടപടികള്‍ സമയബന്ധിതമായി പൂര്‍ത്തിയാക്കി എത്രയും പെട്ടെന്ന് കുടുംബത്തിന് നഷ്ടപരിഹാരം നല്‍കുവാനുള്ള നടപടികള്‍ ത്വരിതപ്പെടുത്തണമെന്ന് എന്‍.കെ. പ്രേമചന്ദ്രന്‍ എംപി ഷിപ്പിംഗ് ഡയറക്ടര്‍ ജനറല്‍ അധികാരികളോട് ആവശ്യ പ്പെട്ടു.

മര്‍ച്ചന്‍റ് നേവിയില്‍ ജോലി വാഗ്ദാനം ചെയ്ത് ലക്ഷങ്ങള്‍ തട്ടിയ കേസ്; പ്രതി അറസ്റ്റില്‍

അഞ്ചല്‍ : മര്‍ച്ചന്‍റ് നേവിയില്‍ ജോലി വാഗ്ദാനം ചെയ്തു ലക്ഷങ്ങള്‍ തട്ടിച്ച കേസില്‍ പ്രതി അറസ്റ്റില്‍. അഞ്ചല്‍ അഗസ്ത്യാക്കോട് സ്വദേശിയായ ആരോമലില്‍ നിന്നും മൂന്നര ലക്ഷം രൂപ തട്ടിയെടുത്ത കേസിലാണ് കാസര്‍ഗോഡ് പെര്‍ള സ്വദേശി അഹമ്മദ് അസ്ബക്ക് പിടിയിലായത്. സുഹൃത്ത് പറഞ്ഞതിന്‍ പ്രകാരം 2023 ലാണ് ആരോമല്‍ അഹമ്മദ് അസ്ബക്കുമായി ബന്ധപ്പെടുന്നത്. ഇന്ത്യക്കകത്തും വിദേശത്തും മര്‍ച്ചന്‍റ് നേവിയില്‍ ജോലി തരപ്പെടുത്തി നല്കാം എന്നും ഇതിനായി വിസ, ടിക്കറ്റ്, പ്രോസസിങ് ചാര്‍ജ് ഉള്‍പ്പടെ മൂന്നര ലക്ഷം രൂപയാകുമെന്നും അസ്ബക്ക് അറിയിച്ചു. ഇതേ തുടര്‍ന്നു പലതവണകളിലായി മൂന്നര ലക്ഷം രൂപ ഇയാള്‍ കൈപ്പറ്റി. പിന്നീട് യുകെ ആസ്ഥാനമായി പ്രവര്‍ത്തിക്കുന്ന സെലിബ്രേറ്റി എക്സ് ക്രൂയിസ് എന്ന കപ്പലില്‍ ജോലി ശരിയായിട്ടുണ്ടെന്നും എത്രയുംപെട്ടന്നു ജോലിയില്‍ പ്രവേശിക്കണം എന്നും അറിയിച്ചു. ഉടന്‍ ജോലിക്കു കയറാനുള്ള രേഖകളും, വിസയും എത്തുമെന്നും പറഞ്ഞ പ്രതി വിശ്വാസത്തിനായി വിമാന ടിക്കറ്റും നല്‍കി. എന്നാല്‍ ചില സംശയങ്ങള്‍ തോന്നിയ ആരോമല്‍ ടിക്കറ്റുമായി ബന്ധപ്പെട്ടു നടത്തിയ പരിശോധനയില്‍ ഇത് കാന്‍സല്‍ ചെയ്തതായി മനസിലാക്കി. പിന്നീട് പലതവണ പ്രതിയെ ബന്ധപ്പെടാന്‍ ശ്രമിച്ചുവെങ്കിലും ഫോണ്‍ എടുത്തില്ല എന്നു മാത്രമല്ല പിന്നീട് സിം കാര്‍ഡ് തന്നെ മാറ്റുകയും ചെയ്തു. ഇതോടെ ഇക്കഴിഞ്ഞ ജൂണില്‍ ആരോമല്‍ അഞ്ചല്‍ പോലീസില്‍ പരാതി നല്‍കി. പ്രതിക്കായി പോലീസ് അന്വേഷണം ആരംഭിച്ചതോടെ ഇയാള്‍ മുംബൈയിലേക്ക് മുങ്ങി. എന്നാല്‍ കഴിഞ്ഞ ദിവസം രഹസ്യമായി നാട്ടിലെത്തിയ പ്രതിയെ അഞ്ചല്‍ പോലീസ് തന്ത്രപരമായി കസ്റ്റഡിയില്‍ എടുക്കുകയായിരുന്നു. അഹമ്മദ് അസ്ബക്ക് കേരളത്തിലെ വിവിധ ഇടങ്ങളിൽ സമാനമായി തട്ടിപ്പ് നടത്തി പലരില്‍ നിന്നുമായി ലക്ഷങ്ങള്‍ തട്ടിയെടുത്തതായി പോലീസ് കണ്ടെത്തിയിട്ടുണ്ട്. തട്ടിപ്പ് കേസില്‍ അറസ്റ്റിലായി റിമാന്‍റിലും കഴിഞ്ഞിട്ടുള്ള പ്രതി ജാമ്യത്തിലറങ്ങി വീണ്ടും തട്ടിപ്പ് നടത്തുകയും ഒളിവില്‍ പോവുകയുമായിരുന്നു. അഞ്ചല്‍ എസ്എച്ച്ഒ ഹരീഷ്, എസ്ഐ പ്രജീഷ്കുമാര്‍, എഎസ്ഐ വിനോദ് കുമാര്‍, സീനിയര്‍ സിവില്‍ പോലീസ് ഓഫീസര്‍ വിഷ്ണു എന്നിവരടങ്ങുന്ന സംഘമാണ് കാസര്‍കോട് നിന്നും പ്രതിയെ പിടികൂടിയത്. അറസ്റ്റ് രേഖപ്പെടുത്തിയ പ്രതിയെ കോടതിയില്‍ ഹാജരാക്കി റിമാൻഡ് ചെയ്തു .

സിപിഐയിൽ ഭിന്നത രൂക്ഷം; കടയ്ക്കൽ മണ്ഡലം സെക്രട്ടറിയെ പാര്‍ട്ടിയില്‍ നിന്ന് പുറത്താക്കി

കൊല്ലം: ഗുരുതരമായ സാമ്പത്തിക ക്രമക്കേടുകള്‍ നടത്തിയ ജെ.സി. അനിലിനെ പാര്‍ട്ടിയുടെ പ്രാഥമിക അംഗത്വത്തില്‍ നിന്ന് പുറത്താക്കാന്‍ ഇന്നലെ ചേര്‍ന്ന സിപിഐ ജില്ലാ കൗണ്‍സില്‍ തീരുമാനിച്ചു. സാന്പത്തിക തിരിമറി കൂടാതെ പാര്‍ട്ടിയെ ജനമധ്യത്തില്‍ അപകീര്‍ത്തിപ്പെടുത്താനും സമ്മര്‍ദത്തിലാക്കാനും ബോധപൂര്‍വം ശ്രമം നടത്തിയെന്ന് ആരോപിച്ചാണ് നടപടി. എംഎന്‍ സ്മാരക നവീകരണത്തിനായി നടത്തിയ ഫണ്ട് ശേഖരണം ജില്ലയിലെ പാര്‍ട്ടി സഖാക്കള്‍ വളരെ വൈകാരികമായിട്ടാണ് ഏറ്റെടുത്തത്. പ്രതീക്ഷിച്ചതിനേക്കാള്‍ കൂടുതല്‍ പണം സമാഹരിക്കുകയും ചെയ്തു. എന്നാല്‍ കടയ്ക്കല്‍ മണ്ഡലത്തില്‍ സമാഹരിച്ച തുക മണ്ഡലം സെക്രട്ടറിയായിരുന്ന ജെ.സി. അനില്‍ തിരിമറി നടത്തിയതായും ജില്ലാകൗൺസിൽ ആരോപിക്കുന്നു. ഇക്കാര്യം ഗൗരവമായി പാര്‍ട്ടി ഡിസി പരിശോധിക്കുകയും വിശദീകരണം ചോദിക്കുകയും ചെയ്തു. തുടര്‍ന്നാണ് പ്രാഥമിക നടപടി എന്ന നിലയില്‍ മണ്ഡലം സെക്രട്ടറി സ്ഥാനത്ത് നിന്ന് ഒഴിവാക്കിയത്. സംഘടനാ നടപടി റിപ്പോര്‍ട്ട് ചെയ്യാന്‍ മണ്ഡലം കമ്മിറ്റി ചേര്‍ന്നപ്പോൾ കൂടുതല്‍ ക്രമക്കേടുകള്‍ ഇദ്ദേഹത്തിനെതിരെ പാര്‍ട്ടി സഖാക്കള്‍ ഉന്നയിച്ചു. തുടര്‍ന്ന് അതേപ്പറ്റി അന്വേഷിക്കാന്‍ കെ.രാജു കണ്‍വീനറായും ആര്‍.എസ്. അനില്‍, എം. എസ്. താര എന്നിവര്‍ അംഗങ്ങളായും കമ്മിഷനെ ഡിസി ചുമതലപ്പെടുത്തിയത്. അവര്‍ സമര്‍പ്പിച്ച റിപ്പോര്‍ട്ടില്‍ ഗുരുതരമായ സാമ്പത്തിക ക്രമക്കേട് കണ്ടെത്തുകയായിരുന്നു. പാര്‍ട്ടിയെ വെല്ലുവിളിച്ചുകൊണ്ട് സമാന്തര പ്രവര്‍ത്തനം നടത്തി പാര്‍ട്ടി സഖാക്കളെ തെറ്റിദ്ധരിപ്പിക്കാനും പാര്‍ട്ടിയില്‍ നിന്ന് രാജി പ്രഖ്യാപനം നടത്താനും അദ്ദേഹം കാട്ടിയ നീക്കം ഗുരുതരമായ സംഘടനാ വീഴ്ചയാണെന്നും പാര്‍ട്ടി നേതാവെന്ന നിലയില്‍ തന്‍റെ സ്ഥാനം ദുര്‍വിനിയോഗം ചെയ്യുകയാണ് അദ്ദേഹം ചെയ്തതെന്നും ഡിസി വിലയിരുത്തി. യോഗത്തില്‍ എം.സി. ബിനുകുമാര്‍ അധ്യക്ഷത വഹിച്ചു. ഉപരികമ്മിറ്റിയില്‍ നിന്ന് ആര്‍. രാജേന്ദ്രന്‍, മന്ത്രി ജെ. ചിഞ്ചുറാണി, മുല്ലക്കര രത്നാകരന്‍ തുടങ്ങിയവര്‍ പങ്കെടുത്തു.

നിയന്ത്രണംവിട്ട കാർ ഓടയിലേയ്ക്ക് ഇടിച്ചു കയറി

കൊട്ടിയം: മയ്യനാട് റെയിൽവേ സ്റ്റേഷനിൽ നിന്നും വരികയായിരുന്ന കാർ നിയന്ത്രണം വിട്ടു റോഡരികിൽ നിർമാണം നടന്നുകൊണ്ടിരിക്കുകയായിരുന്ന ഓടയിലേക്ക് ഇടിച്ചു കയറി.ഡ്രൈവർ നിസാര പരിക്കുകളോടെ രക്ഷപ്പെട്ടു.ഇന്നലെ പുലർച്ചേ നാലോടെ കൂട്ടിക്കട മയ്യനാട് റോഡിൽഅമ്മാച്ചൻ മുക്കിൽ ആയിരുന്നു അപകടം. വാഹനം ഓടിച്ചിരുന്ന ഡ്രൈവർ മുണ്ടക്കൽ സ്വദേശിയാണ്. ഡ്രൈവർ ഉറങ്ങിപ്പോയതാണ് അപകടത്തിന് കാരണമായതെന്ന് പറയുന്നു.അപകടത്തിന്‍റെ ശബ്ദം കേട്ട് ഓടിക്കൂടിയവർ ചേർന്ന് അപകടത്തിൽ പരിക്കേറ്റ ഡ്രൈവറെ ജില്ലാ ആശുപത്രിയിൽ പ്രവേശിപ്പിച്ചു.

തിരുമുക്ക് അടിപ്പാത സമരം: പരവൂർക്കാർ കൂട്ടായ്മ സത്യഗ്രഹം നടത്തി

ചാത്തന്നൂർ: തിരുമുക്കിൽ വലിയ വാഹനങ്ങൾക്ക് കടന്നുപോകുവാൻ കഴിയുന്ന തരത്തിൽ അടിപ്പാത ശാസ്ത്രീയമായി പുതുക്കിപ്പണിയണമെന്ന് ആവശ്യപ്പെട്ട് തിരുമുക്ക് അടിപ്പാത സമരസമിതിയുടെ നേതൃത്വത്തിൽ നടത്തിവരുന്ന സമരത്തിന്‍റെ 33-ാംദിവസംപരവൂർക്കാർ കൂട്ടായ്മ നേതൃത്വത്തിൽപ്രവർത്തകർ സത്യഗ്രഹമനുഷ്ടിച്ചു. ചാത്തന്നൂർ വികസന സമിതി ചെയർമാൻ ജി.രാജശേഖരൻ പ്രതിഷേധ ജ്വാല തെളിയിച്ച് സത്യഗ്രഹ സമരം ഉദ്ഘാടനം ചെയ്തു.പരവൂർക്കാർ കൂട്ടായ്മ കൺവീനർ സന്തോഷ് പാറയിൽക്കാവ് അധ്യക്ഷത വഹിച്ചു.കെ.ആർ.ബാബു,മഹേശ്വരൻ, എൻ.അനിൽകുമാർ, ചാത്തന്നൂർ വികസന സമിതി കൺവീനർ ജി.പി.രാജേഷ്, അനിൽകുമാർ ,ശ്രീധരൻതുടങ്ങിയവർ പ്രസംഗിച്ചു. അടിപ്പാത സമരത്തിന്‍റെ മുപ്പത്തിനാലാം ദിവസമായ ഇന്ന് വൈകുന്നേരം അഞ്ചുമുതൽ സാംസ്കാരിക പ്രവർത്തകരുടെനേതൃത്വത്തിലാണ് സായാഹ്ന സത്യഗ്രഹസമരം നടക്കുന്നത്. സമരവേദിയിൽ തയാറാക്കിയ പ്രതിഷേധ ജ്വാല കത്തിച്ച് ശിവഗിരി ശ്രീനാരായണ ധർമ്മസംഘം ട്രസ്റ്റ് പ്രസിഡന്‍റ് സച്ചിദാനന്ദ സ്വാമികൾ സമരം ഉദ്ഘാടനം ചെയ്യും.ഗുരുധർമ്മ പ്രചരണ സഭ സെക്രട്ടറി അസംഗാനന്ദഗിരി സ്വാമികൾ മുഖ്യ പ്രഭാഷണം നടത്തും.

അന്തർ സംസ്ഥാന പാതയിൽ വാഹനാപകടം; മണിക്കൂറുകളോളം ഗതാഗതം തടസപ്പെട്ടു

കുളത്തൂപ്പുഴ: തിരുവനന്തപുരം - തെങ്കാശി അന്തർ സംസ്ഥാന പാതയിൽ ആർപിഎൽ വള്ളംപെട്ടി ഭാഗത്തുള്ള വളവിൽ അടൂർ സ്വദേശികൾ സഞ്ചരിച്ചിരുന്ന വാഹനം നിയന്ത്രണം നഷ്ടപ്പെട്ട് 11 കെവി ഇലക്‌ട്രിസിറ്റി പോസ്റ്റിൽ ഇടിച്ച് അപകടം. ഇന്നലെ വൈകുന്നേരമാണ് സംഭവം. പോസ്റ്റ് ഒടിഞ്ഞു അന്തർ സംസ്ഥാന പാതയിൽ വീണു മണിക്കൂറുകളോളം ഗതാഗതം തടസപ്പെട്ടു. നാട്ടുകാർ അറിയിച്ചിനെ തുടർന്നു കെഎസ്ഇ ബി ഉദ്യോഗസ്ഥർ ലൈൻ ഓഫ് ചെയ്തതിനാൽ അപകടം ഒഴിവായി. വാഹനത്തിൽ ഉണ്ടായിരുന്നവർ അത്ഭുതകരമായ രക്ഷപ്പെട്ടു. കുളത്തൂപ്പുഴ പോലീസ് സംഭവസ്ഥലത്ത് എത്തി മേൽനടപടികൾ സ്വീകരിച്ചു.

ഉളിയക്കോവിൽ സെന്‍റ് മേരീസ് സ്കൂളിൽ കിഡ്സ് ഫെസ്റ്റ് നടത്തി

കൊല്ലം: ഉളിയക്കോവിൽ സെന്‍റ് മേരീസ് പബ്ലിക് സ്കൂളിൽ കിഡ്സ് ഫെസ്റ്റ് 2025 സ്കൂൾ ചെയർമാൻ ഡോ. ഡി. പൊന്നച്ചൻ അധ്യക്ഷത വഹിച്ച ചടങ്ങിൽ പൂർവ വിദ്യാർഥി കെ.കെ. സൂര്യനാരായണൻ ഉദ്ഘാടനം ചെയ്തു. സ്കൂൾ പ്രിൻസിപ്പൽ മഞ്ജു രാജീവ് സ്വാഗതം പറഞ്ഞു. മൂന്ന് വിഭാഗങ്ങളിലായി നടത്തിയ മത്സരങ്ങളിൽ ഏകദേശം 325 ഓളം കുട്ടികൾ പങ്കെടുത്തു. ഗ്രൂപ്പ് ഡാൻസ്, ആക്ഷൻ സോംഗ്,നാടോടി നൃത്തം, പദ്യപാരായണം ഇംഗ്ലീഷ്, പദ്യപാരായണം തുടങ്ങിയ 18 ഇനങ്ങളിലായി കുട്ടികൾ മത്സരിച്ചു. ഫാ. മാത്യു തോമസ്, ലീലാമ്മ പൊന്നച്ചൻ എന്നിവർ സമ്മാനവിതരണം നടത്തി. ബ്ലൂംസ് നേഴ്സറി സ്കൂൾ ഹെഡ്മിസ്ട്രസ് ആൻസി ഷാജുദീൻ, അക്കാഡമിക് കോർഡിനേറ്റർ എൽ. ഗിരിജ, ബിഷൻ കെ. ബേബി എന്നിവർ പ്രസംഗിച്ചു.

കര്‍ഷക സായാഹ്ന സദസ് 24ന്

അഞ്ചല്‍ : മീന്‍കുളം റസിഡന്‍റ്സ് അസോസിയേഷനും സനാതന ലൈബ്രറിയും സംയുക്തമായി സംഘടിപ്പിക്കുന്ന കര്‍ഷക സായാഹ്ന സദസ് 24ന് നടക്കും. ഉച്ചകഴിഞ്ഞ് മൂന്നിന് സനാതന ലൈബ്രറി ഹാളില്‍ നടക്കുന്ന സായാഹ്ന സദസിന്‍റെ ഭാഗമായി വന്യമൃഗആക്രമണം മൂലം കൃഷി നാശം സംഭവിച്ച സ്ഥലങ്ങള്‍ സന്ദര്‍ശിക്കുന്നതിനോടൊപ്പം കര്‍ഷകര്‍ നേരിടുന്ന പ്രശ്നങ്ങള്‍ നേരിട്ടു അവതരിപ്പിക്കുന്നതിനും പരിഹാര പ്രവര്‍ത്തനങ്ങള്‍ക്കുള്ള മാര്‍ഗനിര്‍ദേശങ്ങള്‍ നല്‍കുന്നതിനും അവസരമുണ്ടാകും. പരിഹാര നിര്‍ദേശങ്ങള്‍ ജനകീയ പങ്കാളിത്തത്തോടെ നടപ്പിലാക്കുകയാണ് കര്‍ഷക സായാഹ്ന സദസിലൂടെ ലക്ഷ്യമിടുന്നതെന്ന് സനാതന ലൈബ്രറി പ്രസിഡന്‍റ് ജെയിംസ് ജോസഫ് ഒറ്റപ്ലാക്കല്‍, സെക്രട്ടറി സജീവ് പാങ്ങലംകാട്ടില്‍, മീന്‍കുളം റസിഡന്‍റ്സ് അസോസിയേഷന്‍ സെക്രട്ടറി മാക്സ്മിലന്‍ പള്ളിപ്പുറം, ട്രഷറര്‍ വൈ. സോമന്‍ പരപ്പാടിയില്‍ എന്നിവര്‍ അറിയിച്ചു. അഞ്ചല്‍ റേഞ്ച് ഫോറസ്റ്റ് ഓഫീസറുടെ നേതൃത്വത്തിലുള്ള വനപാലകര്‍, ജനപ്രതിനിധികള്‍, പൊതുപ്രവര്‍ത്തകര്‍, പരിസ്ഥിതി പ്രവര്‍ത്തകര്‍ തുടങ്ങി സമൂഹത്തിന്‍റെ വിവിധ മേഖലകളില്‍ നിന്നുള്ളവര്‍ പങ്കെടുക്കും.

നാടകശാലയിൽ സാംസ്കാരിക സമ്മേളനം നടത്തി

കരുനാഗപ്പള്ളി : നാടകശാലയുടെ നേതൃത്വത്തിൽ സംഘടിപ്പിച്ച സാസ്കാരിക സമ്മേളനം മുൻമന്ത്രി ജി.സുധാകരൻ ഉദ്ഘാടനം ചെയ്തു. ആർ.രവികുമാർ അധ്യക്ഷനായി. നാടകശാല ഡയറക്ടർ കരുനാഗപ്പള്ളി കൃഷ്ണൻകുട്ടി ആമുഖാവതരണം നടത്തി. ഛായാഗ്രാഹകൻ കെ .പി .നമ്പ്യാതിരിയും മധു ആദിനാടും ചേർന്ന് ജി .സുധാകരനെ ആദരിച്ചു.നാടകശാലാ മാഗസിന്‍റെ 59-ാം ലക്കം ജി .സുധാകരന് നൽകി ഡോ .ഫയാസ് അമീൻ പ്രകാശനം ചെയ്തു. ഭക്ഷ്യക്കിറ്റ് വിതരണം ഷാജഹാൻ രാജധാനി നിർവഹിച്ചു. അബ്ബാ മോഹൻ, ഡി .മുരളീധരൻ, വിജയമ്മലാലി, ജയചന്ദ്രൻ തൊടിയൂർ, പോണാൽ നന്ദകുമാർ, ഷാനവാസ് കമ്പിക്കീഴിൽ, പ്രഫ.അരുൺ കോളശേരിൽ, ലത്തീഫ് മാമൂട്, കെ .പി .ലീലാകൃഷ്ണൻ, ജിജി വിജയൻ ,സിന്ധു സുരേന്ദ്രൻ, സീനാ രവി, ഡോ. സുഷമ തോപ്പിൽ,രത്നമ്മ ബ്രാഹ്മമുഹൂർത്തം എന്നിവർ പ്രസംഗിച്ചു.

പുസ്തക പരിചയം സംഘടിപ്പിച്ചു

പുനലൂർ: ബാലൻ മെമ്മോറിയൽ മുനിസിപ്പൽ ലൈബ്രറി വായന സമിതിയുടെ ആഭിമുഖ്യത്തിൽ ലൈബ്രറി ഹാളിൽ പുസ്തക പരിചയം സംഘടിപ്പിച്ചു. ലൈബ്രറി വായനസമിതി മുഖ്യരക്ഷാധികാരി ഡോ . കെ. ടി .തോമസ് അധ്യക്ഷത വഹിച്ചു.പുനലൂർ താലുക്ക് ലൈബ്രറി കൗൺസിൽ വൈസ് പ്രസിഡന്‍റ് ഡി .ദിനേശൻ പുസ്തക പരിചയം നടത്തി. ആദ്യ അഭിലാഷ്, മോഹന ചന്ദ്രൻ, രാജീവ് കരുണാകരൻ ,നിഷ, അനിൽപന്തപ്ലാവ് , രാജൻപിളള, ലൈബ്രറി വായന സമിതി സെക്രട്ടറി വിനായക മുരളി എന്നിവർ പ്രസംഗിച്ചു.

തദ്ദേശ തെരഞ്ഞെടുപ്പ്: ബ്ലോക്ക് പഞ്ചായത്ത് സംവരണ വാര്‍ഡുകൾ

ജില്ലയിലെ തദ്ദേശസ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പിന്‍റെ ഭാഗമായി ഓച്ചിറ, ശാസ്താംകോട്ട, ചവറ, ചിറ്റുമല, കൊട്ടാരക്കര, അഞ്ചല്‍, പത്തനാപുരം, വെട്ടിക്കവല, മുഖത്തല, ഇത്തിക്കര, ചടയമംഗലം ബ്ലോക്ക് പഞ്ചായത്തുകളിലെ സംവരണ നിയോജക മണ്ഡലങ്ങളുടെ നറുക്കെടുപ്പ് ജില്ലാ തെരഞ്ഞെടുപ്പ് ഉദ്യോഗസ്ഥനായ ജില്ലാകളക്ടര്‍ എന്‍.ദേവിദാസിന്‍റെ നേതൃത്വത്തില്‍ കളക്‌ട്രേറ്റ് കോണ്‍ഫറന്‍സ് ഹാളില്‍ നടത്തി. ബ്ലോക്ക് തല വിവരങ്ങള്‍ ചുവടെ: 1. ഓച്ചിറ ബ്ലോക്ക് പഞ്ചായത്ത്- സംവരണ വിഭാഗം സംവരണ നിയോജക മണ്ഡലത്തിന്‍റെ നമ്പരുംപേരും പട്ടികജാതി സംവരണം 6-കുറുങ്ങപ്പള്ളി സ്ത്രീ സംവരണം 3-ക്ലാപ്പന സ്ത്രീ സംവരണം 5-ചങ്ങന്‍കുളങ്ങര സ്ത്രീ സംവരണം 8-പാവുമ്പ സ്ത്രീ സംവരണം 9-കുറ്റിപ്പുറം സ്ത്രീ സംവരണം 10-തൊടിയൂര്‍ സ്ത്രീ സംവരണം 12-ഇടക്കുളങ്ങര സ്ത്രീ സംവരണം 13-പുത്തന്‍തെരുവ് സ്ത്രീ സംവരണം 15-ശക്തികുളങ്ങര 2. ശാസ്താംകോട്ട ബ്ലോക്ക്പഞ്ചായത്ത് പട്ടികജാതി സ്ത്രീ സംവരണം 9-വേങ്ങ പട്ടികജാതി സ്ത്രീ സംവരണം 12-ഇടവനശേരി പട്ടികജാതി സംവരണം 4-ഐവര്‍കാല സ്ത്രീ സംവരണം 1-ആനയടി സ്ത്രീ സംവരണം 2-പോരുവഴി സ്ത്രീ സംവരണം 7-ശാസ്താംകോട്ട സ്ത്രീ സംവരണം 8-കടപുഴ സ്ത്രീ സംവരണം 11-മൈനാഗപ്പള്ളി സ്ത്രീ സംവരണം 15-ശൂരനാട് വടക്ക് 3. വെട്ടിക്കവല ബ്ലോക്ക്പഞ്ചായത്ത് പട്ടികജാതി സ്ത്രീ സംവരണം 2-പുത്തൂര്‍ പട്ടികജാതി സ്ത്രീ സംവരണം 9-മേലില പട്ടികജാതി സംവരണം 12-വാളകം സ്ത്രീ സംവരണം 1-പാങ്ങോട് സ്ത്രീ സംവരണം 4-കലയപുരം സ്ത്രീ സംവരണം 7-കിഴക്കേതെരുവ് സ്ത്രീ സംവരണം 8-വെട്ടിക്കവല സ്ത്രീ സംവരണം 11-ചിരട്ടക്കോണം സ്ത്രീ സംവരണം 13-സദാനന്ദപുരം 4. പത്തനാപുരം ബ്ലോക്ക്പഞ്ചായത്ത് പട്ടികജാതി സ്ത്രീ സംവരണം 10-കുന്നിക്കോട് പട്ടികജാതി സംവരണം 6-പുന്നല സ്ത്രീ സംവരണം 3-പത്തനാപുരം സ്ത്രീ സംവരണം 5-കടയ്ക്കാമണ്‍ സ്ത്രീ സംവരണം 7-പിറവന്തൂര്‍ സ്ത്രീ സംവരണം 8-കമുകുംചേരി സ്ത്രീ സംവരണം 9-ഇളമ്പല്‍ സ്ത്രീ സംവരണം 13-പിടവൂര്‍ 5. അഞ്ചല്‍ ബ്ലോക്ക് പഞ്ചായത്ത് പട്ടികജാതി സ്ത്രീ സംവരണം 16-തിങ്കള്‍കരിക്കം പട്ടികജാതി സംവരണം 8-ഇടമുളയ്ക്കല്‍ സ്ത്രീ സംവരണം 1-ഇടമണ്‍ സ്ത്രീ സംവരണം 2-തെന്മല സ്ത്രീ സംവരണം 6-അലയമണ്‍ സ്ത്രീ സംവരണം 7-അഞ്ചല്‍ സ്ത്രീ സംവരണം 11-മാത്ര സ്ത്രീ സംവരണം 12-വെഞ്ചേമ്പ് സ്ത്രീ സംവരണം 14-ഏരൂര്‍ 6. കൊട്ടാരക്കര ബ്ലോക്ക്പഞ്ചായത്ത് പട്ടികജാതി സ്ത്രീ സംവരണം 3-മുട്ടറ പട്ടികജാതി സംവരണം 7-പൂയപ്പള്ളി സ്ത്രീ സംവരണം 8-കൊട്ടറ സ്ത്രീ സംവരണം 9-നെടുമണ്‍കാവ് സ്ത്രീ സംവരണം 10-മടന്തകോട് സ്ത്രീ സംവരണം 11-കരീപ്ര സ്ത്രീ സംവരണം 12-തൃപ്പലഴികം സ്ത്രീ സംവരണം 13-എഴുകോണ്‍ 7. ചിറ്റുമല ബ്ലോക്ക്പഞ്ചായത്ത് പട്ടികജാതി സ്ത്രീ സംവരണം 4-കുമ്പളം പട്ടികജാതി സംവരണം 3-ചിറ്റുമല സ്ത്രീ സംവരണം 1-മണ്‍റോതുരുത്ത് സ്ത്രീ സംവരണം 2-കിഴക്കേകല്ലട സ്ത്രീ സംവരണം 8-കേരളപുരം സ്ത്രീ സംവരണം 9-ചന്ദനത്തോപ്പ് സ്ത്രീ സംവരണം 11-താന്നിക്കമുക്ക് സ്ത്രീ സംവരണം 14-പ്രാക്കുളം 8. ചവറ ബ്ലോക്ക് പഞ്ചായത്ത് പട്ടികജാതി സംവരണം 14-പന്മന സ്ത്രീ സംവരണം 4-മുകുന്ദപുരം സ്ത്രീ സംവരണം 5-കോയിവിള സ്ത്രീ സംവരണം 6-തെക്കുംഭാഗം സ്ത്രീ സംവരണം 7-നീണ്ടകര സ്ത്രീ സംവരണം 11-കോവില്‍ത്തോട്ടം സ്ത്രീ സംവരണം 12-വടുതല സ്ത്രീ സംവരണം 13-മനയില്‍ 9. മുഖത്തല ബ്ലോക്ക് പഞ്ചായത്ത് പട്ടികജാതി സ്ത്രീ സംവരണം 11-കണ്ണനല്ലൂര്‍ പട്ടികജാതി സംവരണം 15-മയ്യനാട് സ്ത്രീ സംവരണം 1-പേരൂര്‍ സ്ത്രീ സംവരണം 3-കേരളപുരം സ്ത്രീ സംവരണം 6-പഴങ്ങാലം സ്ത്രീ സംവരണം 7-പള്ളിമണ്‍ സ്ത്രീ സംവരണം 9-നെടുമ്പന സ്ത്രീ സംവരണം 12-തഴുത്തല സ്ത്രീ സംവരണം 14-പുല്ലിച്ചിറ സ്ത്രീ സംവരണം 17-തൃക്കോവില്‍വട്ടം 10. ചടയമംഗലം ബ്ലോക്ക്പഞ്ചായത്ത് പട്ടികജാതി സ്ത്രീ സംവരണം 4-ഇട്ടിവ പട്ടികജാതി സംവരണം 17-അമ്പലംകുന്ന് സ്ത്രീ സംവരണം 1-ചെറുവക്കല്‍ സ്ത്രീ സംവരണം 2-ഇളമാട് സ്ത്രീ സംവരണം 3-ഇളവക്കോട് സ്ത്രീ സംവരണം 5-ചുണ്ട സ്ത്രീ സംവരണം 7-ചിങ്ങേലി സ്ത്രീ സംവരണം 10-മതിര സ്ത്രീ സംവരണം 12-കടയ്ക്കല്‍ സ്ത്രീ സംവരണം 15-ചടയമംഗലം 11. ഇത്തിക്കര ബ്ലോക്ക്പഞ്ചായത്ത് പട്ടികജാതി സ്ത്രീ സംവരണം 1-ആദിച്ചനല്ലൂര്‍ പട്ടികജാതി സംവരണം 5-വേളമാനൂര്‍ സ്ത്രീ സംവരണം 3-ചാത്തന്നൂര്‍ വടക്ക് സ്ത്രീ സംവരണം 6-മീനമ്പലം സ്ത്രീ സംവരണം 7-ചിറക്കര സ്ത്രീ സംവരണം 9-പൂതക്കുളം സ്ത്രീ സംവരണം 10-കലയ്‌ക്കോട് സ്ത്രീ സംവരണം 11-നെടുങ്ങോലം കൊല്ലം മുന്‍സിപ്പല്‍ കോര്‍പറേഷന്‍: സംവരണ മണ്ഡലങ്ങൾ ജില്ലയിലെ തദ്ദേശസ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പിന്‍റെ ഭാഗമായി കൊല്ലം മുന്‍സിപ്പല്‍ കോര്‍പറേഷനിലേക്കുള്ള സംവരണ മണ്ഡലങ്ങളുടെ നറുക്കെടുപ്പ് തദ്ദേശസ്വയംഭരണ വകുപ്പ് (അര്‍ബന്‍) ഡയറക്ടറുടെ നേതൃത്വത്തില്‍ നടത്തി. വിവരങ്ങള്‍ ചുവടെ: സംവരണ വിഭാഗം സംവരണ മണ്ഡലത്തിന്‍റെ നമ്പരും പേരും പട്ടികജാതി സ്ത്രീ സംവരണം 46-ഉദയമാര്‍ത്താണ്ഡപുരം പട്ടികജാതി സ്ത്രീ സംവരണം 52-തിരുമുല്ലവാരം പട്ടികജാതി സംവരണം 15-ആശ്രാമം പട്ടികജാതി സംവരണം 26-പാല്‍കുളങ്ങര സ്ത്രീ സംവരണം 2-ശക്തികുളങ്ങര സ്ത്രീ സംവരണം 4-കാവനാട് സ്ത്രീ സംവരണം 5-വള്ളികീഴ് സ്ത്രീ സംവരണം 9-അഞ്ചാലുംമൂട് വെസ്റ്റ് സ്ത്രീ സംവരണം 11-കടവൂര്‍ സ്ത്രീ സംവരണം 13-തേവള്ളി സ്ത്രീ സംവരണം 16-ഉളിയക്കോവില്‍ സ്ത്രീ സംവരണം 20-കല്ലുംതാഴം സ്ത്രീ സംവരണം 21-മങ്ങാട് സ്ത്രീ സംവരണം 27-അമ്മന്‍നട സ്ത്രീ സംവരണം 29-പള്ളിമുക്ക് സ്ത്രീ സംവരണം 30-അയത്തില്‍ സ്ത്രീ സംവരണം 31-കിളികൊല്ലൂര്‍ സ്ത്രീ സംവരണം 33-പാലത്തറ സ്ത്രീ സംവരണം 37-വാളത്തുങ്കല്‍ സ്ത്രീ സംവരണം 39-തെക്കുംഭാഗം സ്ത്രീ സംവരണം 40-ഇരവിപുരം സ്ത്രീ സംവരണം 41-ഭരണിക്കാവ് സ്ത്രീ സംവരണം 42-തെക്കേവിള സ്ത്രീ സംവരണം 43-മുണ്ടക്കല്‍ സ്ത്രീ സംവരണം 45-കന്‍റോണ്‍മെന്‍റ് സ്ത്രീ സംവരണം 48-പോര്‍ട്ട് സ്ത്രീ സംവരണം 49-കൈക്കുളങ്ങര സ്ത്രീ സംവരണം 50-കച്ചേരി സ്ത്രീ സംവരണം 51-തങ്കശ്രി സ്ത്രീ സംവരണം 54-ആലാട്ടുകാവ്

നഗരത്തിൽ ഓൺലൈൻ ഓട്ടോസർവീസിനു തുടക്കം

കൊല്ലം: നഗരത്തിൽ ഓൺലൈൻ ഓട്ടോറിക്ഷാ സർവീസിനു തുടക്കമായി. അർധരാത്രിയിലും അസമയങ്ങളിലും റെയിൽവേസ്റ്റേഷനിലും ബസ് സ്റ്റാൻഡുകളിലും വന്നിറങ്ങുന്നവർക്ക് ഇനി സുരക്ഷിതമായും നിർഭയമായും ഓട്ടോറിക്ഷയിൽ സഞ്ചരിക്കാമെന്നതാണ് സർവീസിന്‍റെ പ്രത്യേകത. രാജ്യത്തെ മെട്രോപൊളിറ്റൻ നഗരങ്ങളിൽ വിജയകരമായി പരീക്ഷിച്ച " ജുഗ്നൂ " മൊബൈൽ ആപ്പ് വഴിയാണ് സേവനം ലഭ്യമാക്കുന്നത്. ഓട്ടോറിക്ഷ ആവശ്യമുള്ളവർ മൊബൈൽ ഫോണിൽ ആപ്പ് ഡൗൺലോഡ് ചെയ്യണം. പിന്നെ കാര്യങ്ങൾ വളരെ എളുപ്പമാണ്. ഓട്ടോറിക്ഷയുടെ സേവനം ആവശ്യമുള്ളവർ ആദ്യം ആപ്പ് തുറക്കണം. അപ്പോൾ തന്നെ യാത്രക്കാരന്‍റെ ജിപിഎസ് ലോക്കേഷൻ അറിയാം. പിന്നീട് റൈഡ്സ് (ഓട്ടം) എന്ന ബട്ടൺ അമർത്തണം. ഉടൻ തന്നെ ഈ ആപ്പ് ഉപയോഗിക്കുന്ന സമീപത്തെ ഡ്രൈവർമാരെ ആപ്പ് വഴി നേരിട്ടു ബന്ധപ്പെടും.യാത്രയുടെ അവസാനം ആപ്പ് തന്നെ നിരക്ക് കണക്കാക്കി അറിയിക്കും. കൊല്ലം നഗരത്തിൽ ഈ ആപ്പ് വഴി ബുക്ക് ചെയ്യുന്ന ആദ്യ രണ്ടുയാത്രകൾക്ക് 50 ശതമാനം നിരക്ക് ഇളവും അനുവദിച്ചിട്ടുണ്ട്. രണ്ടാം ഘട്ടത്തിൽ നഗരത്തിൽ ഓൺലൈൻ ടാക്സി സർവീസുകളും ബൈക്ക് സേവനങ്ങളും ആരംഭിക്കാനും ജുഗ്നുവിനു പദ്ധതിയുണ്ട്. അടുത്ത ഘട്ടത്തിൽ ഓൺലൈൻ ഡെലിവറി സേവനങ്ങളും ആരംഭിക്കും.

എക്‌സ് റേ കോംപ്ലക്സ് ഉദ്ഘാടനം ചെയ്തു

ചവറ : കേന്ദ്ര പൊതുമേഖലാ സ്ഥാപനമായ ചവറ ഐആർ ഇ എൽ സാമൂഹ്യ ഉത്തരവാദിത്ത പദ്ധതിയിൽ ഉൾപ്പെടുത്തി ചവറ കുടുംബാരോഗ്യ കേന്ദ്രത്തിൽ നിർമിച്ച എക്സ്റേ കോംപ്ലക്സ് എൻ.കെ.പ്രേമചന്ദ്രൻ എംപി ഉദ്ഘാടനം ചെയ്തു. ഡിജിറ്റൽ എക്സ്റേ മെഷീൻ സുജിത് വിജയൻ പിള്ള എംഎൽ എ ആശുപത്രിക്ക് കൈമാറി. ഏകദേശം 32 ലക്ഷം രൂപ ചെലവിലാണ് ഉപകരണങ്ങളും കെട്ടിടവുമടങ്ങുന്ന കോംപ്ലക്സ് പൂർത്തിയായത്. ഐ ആർ ഇ എൽ ജനറൽ മാനേജരും യൂണിറ്റ് മേധാവിയുമായ എൻ.എസ്.അജിത് പദ്ധതി വിശദീകരണം നടത്തി. പഞ്ചായത്ത് പ്രസിഡന്‍റ് ജെ.ആർ.സുരേഷ് കുമാർ അധ്യക്ഷനായി. ചവറ ബ്ലോക്ക് പഞ്ചായത്ത് പ്രസിഡന്‍റ് സന്തോഷ് തുപ്പാശേരി, ജില്ലാ പഞ്ചായത്ത് അംഗം സി.പി.സുധീഷ് കുമാർ, ഗ്രാമ പഞ്ചായത്ത് വൈസ് പ്രസിഡന്‍റ് ഐ.ജയലക്ഷ്മി, പഞ്ചായത്ത് അംഗങ്ങളായ വിജി മോൾ, കുറ്റിയിൽ ലത്തീഫ്, സോഫിത, നദീർ, സി. രതീഷ്, സി. വസന്തകുമാർ, കെ. ബാബു, കെ. സുരേഷ് ബാബു, പി.ആർ. ജയപ്രകാശ്, എച്ച്എംസി അംഗങ്ങൾ, പഞ്ചായത്ത് സെക്രട്ടറി വി. മനോജ്, ഡോ. എസ്. ഷെഹ്ന എന്നിവർ പ്രസംഗിച്ചു.

നാടിന്‍റെ തീരാദുഃഖമായി ശ്രീരാഗ്

ചവറ: ജീവനോടെ തിരികെ എത്തും എന്ന പ്രതീക്ഷയോടെ കാത്തിരുന്ന ഗ്രാമത്തിനും കുടുംബത്തിനും തീരാദുഃഖമായി ശ്രീരാഗിന്‍റെ മരണം.ആഫ്രിക്കന്‍ രാജ്യമായ മൊസാംബിക്കില്‍ ബോട്ട് അപകടത്തിലാണ് ശ്രീരാഗ് കാണാതായത്. ശ്രീരാഗിന്‍റെ മൃതദേഹം കണ്ടെത്തിയെന്ന് അധികൃതർ അറിയിക്കുകയായിരുന്നു. നാടും കുടുംബവും ഏറെ പ്രതീക്ഷയോടും പ്രാർഥനയോടും കൂടിയാണ് ശ്രീരാഗിന്‍റെ തിരിച്ചുവരവിനായി കാത്തിരുന്നത്. എന്നാൽ ഇന്നലെ ഉച്ചയ്ക്ക് 2.30ഓടെ ശ്രീരാഗിന്‍റെ മൃതദേഹം കണ്ടെത്തിയ വിവരമാണ് ബന്ധുക്കൾക്ക് ലഭിച്ചത്. സംഭവമറിഞ്ഞ് ബന്ധുക്കളും നിരവധി ആൾക്കാരും ആശ്വാസ വാക്കുകളുമായി വീട്ടിൽ എത്തി. അപകടത്തിൽ മരിച്ച ശ്രീരാഗ് ഒരു കുടുംബത്തിന്‍റെ അത്താണിയായിരുന്നു. ആറുമാസം മുമ്പ് രണ്ടാമത്തെ കുഞ്ഞിനെ കാണാനായിട്ടാണ് നാട്ടിലെത്തിയിരുന്നത്. തുടർന്ന് ഈ മാസം ആറിനാണ് തിരിച്ച് ജോലിസ്ഥലത്തേക്ക് മടങ്ങിയത്. കപ്പലിലെ ഇലക്‌ട്രോ ഓഫീസറായിട്ടാണ് ശ്രീരാഗ് ജോലി ചെയ്തു വന്നിരുന്നത്. അപകടത്തിന്‍റെ തലേദിവസം ശ്രീരാഗുമായി കുടുംബങ്ങൾ സംസാരിച്ചിരുന്നു. അടുത്തദിവസം പുതിയ ജോലിസ്ഥലത്തേക്ക് പോകുമെന്ന് ബന്ധുക്കളോട് പറയുകയും ചെയ്തു. എന്നാൽ അപ്രതീക്ഷിതമായ ഉണ്ടായ മരണം എല്ലാ അർഥത്തിലും നാടിനെയും കുടുംബത്തെയും ദുഃഖത്തിലാഴ്ത്തിയിരിക്കുകയാണ്.

കിഴക്കനേല കേളിയുടെ വാർഷികാഘോഷം തുടങ്ങി

പാരിപ്പള്ളി: കിഴക്കേനല കേളി ഗ്രന്ഥശാലയുടെ വാർഷികാഘോഷങ്ങൾ ആരംഭിച്ചു. പ്രഫഷണൽ നാടകമേളയും മെഡിക്കൽ ക്യാമ്പും ചിത്രരചന മത്സരവും പുരസ്കാര സമർപ്പണങ്ങളും ഉൾപ്പെടുന്ന 11 ദിവസത്തെ ആഘോഷങ്ങൾക്ക് തുടക്കം കുറിച്ചുകൊണ്ടുള്ള ലഹരിവിരുദ്ധ സ്നേഹ സന്ദേശ യാത്രയുടെ ഫ്ലാഗ് ഓഫ് പാരിപ്പള്ളി എസ്എച്ച്ഒ നിസാർ നിർവഹിച്ചു. എൻ.കെ.പ്രേമചന്ദ്രൻ എംപി വാർഷികാഘോഷം ഉദ്ഘാടനം ചെയ്തു. കേളി ജംഗ്ഷനിലെ ഹൈമാസ്റ്റ് ലൈറ്റിന്‍റെസ്വിച്ച് ഓൺ കർമവും എംപി നിർവഹിച്ചു. ഭദ്രദീപ പ്രകാശനവും സേവന പുരസ്കാര സമർപ്പണവും ഗാന്ധിഭവൻ ചെയർമാൻ പുനലൂർ സോമരാജൻ നിർവഹിച്ചു. കേളിയുടെ പ്രസിഡന്‍റ് വേണു സി കിഴക്കനേല അധ്യക്ഷനായിരുന്നു. നാടകമേളയുടെ ഉദ്ഘാടനം കലാശ്രീ രാജൻ കിഴക്കനേല നിർവഹിച്ചു .

വിജ്ഞാനകേരളം തൊഴിൽമേള സംഘടിപ്പിച്ചു

പുനലൂർ : അഭ്യസ്തവിദ്യരായ യുവതി യുവാക്കൾക്ക് തൊഴിലവസരങ്ങൾ ലഭ്യമാക്കുന്നതിനായി പുനലുർ നഗരസഭയുടെയും കുടുംബശ്രീ മിഷന്‍റെയും സംയുക്ത ആഭിമുഖ്യത്തിൽ പുനലൂർ ഗവ. എച്ച്എസ്എസിൻ വിജ്ഞാനകേരളം തൊഴിൽമേള സംഘടിപ്പിച്ചു. പുനലൂർ നഗരസഭ വൈസ് ചെയർമാൻ രഞ്ജിത്ത് രാധാകൃഷ്ണൻ അധ്യക്ഷത വഹിച്ച ചടങ്ങിൽ ചെയർപേഴ്സൺ കെ.പുഷ്പലത ഉദ്ഘാടന കർമംനിർവഹിച്ചു പുനലൂർ നഗരസഭയുടെ വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ പ്രിയപിള്ള സ്വാഗതം പറഞ്ഞു. പൊതുമരാത്ത സ്റ്റാൻഡിംഗ് കമ്മിറ്റി ചെയർമാൻ ബിനോയ് രാജൻ, ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ പി.എ. അനസ്, ആരോഗ്യകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ വസന്ത രഞ്ജൻ, വിവിധ വാർഡ് കൗൺസിലർമാർ, യുഡിഎഫ് പാർലമെന്‍ററി പാർട്ടി ലീഡർ ജി .ജയപ്രകാശ്, സിഡിഎസ് ചെയർ പേഴ്സൺ സുശീല രാധാകൃഷ്ണൻ എന്നിവർ പങ്കെടുത്തു. പുനലൂർ നഗരസഭയും കുടുംബശ്രീ പ്രവർത്തകരും മേളയ്ക്ക് നേതൃത്വം നൽകി. ഉദ്യോഗാർഥികളുടെ പങ്കാളിത്തം കൊണ്ടും സെലക്ട് ചെയ്യപ്പെട്ടവരുടെ ശതമാനം കൊണ്ടും മേള വിജയമായിരുന്നു.

വയോധികനെ തലയ്ക്കടിച്ച് കൊലപ്പെടുത്തി

കടയ്ക്കല്‍ : മുന്‍ വൈരാഗ്യത്തെ തുടര്‍ന്നു വയോധികനെ തലയ്ക്കടിച്ച് കൊലപ്പെടുത്തി. കടയ്ക്കല്‍ തൃക്കണ്ണാപുരം നെല്ലിക്കുന്നത്ത് വീട്ടില്‍ ശശി (58) ആണ് കൊല്ലപ്പെട്ടത്. പ്രദേശവാസി രാജ് എന്നയാള്‍ക്കായി പോലീസ് അന്വേഷണം ആരംഭിച്ചിട്ടുണ്ട്. ഞായറാഴ്ച രാത്രി ഏഴോടെ ആനപ്പാറയിലായിരുന്നു സംഭവം. ഇരുവരും പ്രദേശത്തിരുന്നു മദ്യപിക്കുകയും മദ്യപാനത്തിനിടെ മുമ്പുണ്ടായ ചില സംഭവങ്ങളുടെ പേരില്‍ വാക്കുതര്‍ക്കമാവുകയും ഇത് പിന്നീട് കൈയാങ്കളിയിലേക്ക് നീങ്ങുകയും ചെയ്തു. ഇതിനിടയില്‍ കമ്പ് ഉപയോഗിച്ച് രാജ് ശശിയുടെ തലക്കടിക്കുകയും മാരകമായി പരിക്കേറ്റ ശശിയെ റോഡിലേക്ക് തള്ളിയിടുകയും ചെയ്യുകയായിരുന്നുവെന്ന് പോലീസ് പറഞ്ഞു. ഗുരുതരമായ് പരിക്കേറ്റ ശശി ഏറെനേരം രക്തം വാര്‍ന്ന് പാതയോരത്ത് കിടന്നു. പിന്നീട് കടയ്ക്കല്‍ താലൂക്ക് ആശുപത്രിയിലും തിരുവനന്തപുരം മെഡിക്കല്‍ കോളജ് ആശുപത്രിയിലും എത്തിച്ചുവെങ്കിലും ഇന്നു പുലർച്ചെ മരിച്ചു. സംഭവശേഷം കടന്നുകളഞ്ഞ രാജുവിനായി പോലീസ് അന്വേഷണം ആരംഭിച്ചിട്ടുണ്ട്. ഇയാളെ പിടികൂടിയാല്‍ മാത്രമേ കൊലപാതകത്തിന്‍റെ കൃത്യമായ കാരണം മനസിലാകുവെന്ന് കടയ്ക്കല്‍ പോലീസ് പറഞ്ഞു.

ബംഗാൾ സ്വദേശി വാടകവീട്ടിൽ മരിച്ച നിലയിൽ

പരവൂർ: ബംഗാൾ സ്വദേശിയായ യുവാവിനെ വാടക വീട്ടിൽ മരിച്ച നിലയിൽ കണ്ടെത്തി. പശ്ചിമ ബംഗാൾ ബിർപാറ സ്വദേശി സൻജിത് കോർവ (28) ആണ് മരിച്ചത്. പുറ്റിംഗൽ ക്ഷേത്രത്തിനുസമീപം കുറുമണ്ടൽ വേടാംകുഴിയിൽ സൗപർണിക വീടിന്‍റെ മുറ്റത്താണ് ഇന്നലെ രാവിലെ മൃതദേഹം കാണപ്പെട്ടത്. തലയ്ക്ക് പുറകുവശത്തും മുഖത്തും ഗുരുതരമായ മുറിവുകൾ ഉണ്ടായിരുന്നു. സംശയം തോന്നിയ പരിസരവാസികൾ വിവരം അറിയിച്ചതനുസരിച്ച് ചാത്തന്നൂർ എസിപി അലക്സാണ്ടർ തങ്കച്ചന്‍റെ നേതൃത്വത്തിലുള്ള പോലീസ് സംഘം സ്ഥലത്ത് എത്തി പരിശോധകൾ നടത്തി. ഫോറൻസിക് ഉദ്യോഗസ്ഥരെ വിവരം അറിയിക്കുന്നതിന് മുമ്പ് സമീപത്തെ വീട്ടിലെ സിസിടിവി ദൃശ്യങ്ങൾ പോലീസ് പരിശോധിച്ചു. വിശദമായ പരിശോധനയിൽ വീടിന്‍റെ ടെറസിൽനിന്നു വീണാണ് മരണം സംഭവിച്ചതെന്ന് പോലീസ് സ്ഥിരീകരിച്ചു. പുലർച്ചെ 1.10 ന് ഇയാൾ വീടിന്‍റെ ടെറസിൽ ഫോണിൽ സംസാരിക്കുന്നതും തുടർന്നു കാൽവഴുതി വീഴുന്നതും ദൃശ്യങ്ങളിലുണ്ട്. ടെറസിന്‍റെ താഴത്തെ സൺഷേഡിൽ തലയിടിച്ച ശേഷമാണ് ഇയാൾ നിലത്ത് വീണത്. തലക്കേറ്റ മുറിവാണ് മരണകാരണമെന്ന് പോലീസ് പറഞ്ഞു. വാടക വീട്ടിൽ മറ്റ് ആറുപേർ കൂടി താമസമുണ്ട്. അവർ ഉറക്കത്തിൽ ആയിരുന്നതിനാൽ വിവരം അറിഞ്ഞതുമില്ല. പരവൂർ ടൗണിലെ ബേക്കറിയിൽ ജീവനക്കാരനായിരുന്നു. പോലീസ് തന്നെ ബംഗാളിലെ ബന്ധുക്കളെ വിവരം അറിയിച്ചു. പാരിപ്പള്ളി മെഡിക്കൽ കോളജ് ആശുപത്രിയിൽ പോസ്റ്റ് മോർട്ടം നടത്തിയ ശേഷം മൃതദേഹം സ്വദേശത്തേക്ക് കൊണ്ടുപോയി.

ഗൃഹനാഥൻ കുളത്തിൽ മരിച്ച നിലയിൽ

പരവൂർ: ഗൃഹനാഥനെ കുളത്തിൽ മരിച്ച നിലയിൽ കാണപ്പെട്ടു. പുതക്കുളം പുത്തൻകുളം താഴത്തു പുത്തൻവീട്ടിൽ ജനാർദ്ദനൻ പിള്ളയുടെ മകൻ അനിൽ കുമാർ (54) ആണ് മരിച്ചത്. പുത്തൻകുളത്ത് വീടിന് സമീപമുള്ള കുളത്തിൽ ഇന്നലെ രാവിലെയാണ് നാട്ടുകാർ മൃതദേഹം കണ്ടെത്തിയത്. പരവൂർ പോലീസിനെ നാട്ടുകാർ വിവരമറിയിച്ചതിനെ തുടർന്ന് പോലീസ് എത്തി മൃതദേഹം കരയ്ക്കെടുത്ത് ആളിനെ തിരിച്ചറിയുകയായിരുന്നു. മക്കൾ: അമൽ,അബിർ. സംസ്കാരം ഇന്ന് ഉച്ചയ്ക്ക് 12- ന്. പരവൂർ പോലീസ് കേസെടുത്തു.

കൊല്ലം റെയിൽവേ കോടതി ജഡ്ജിയുടെ നിയമനം : ചുവപ്പുനാടയിൽ കുരുങ്ങി

കൊല്ലം: കൊല്ലം റെയിൽവേ കോടതിയിലെ ജഡ്ജിയുടെ നിയമനം സർക്കാരിന്‍റെ ചുവപ്പുനാടയിൽ കുരുങ്ങി കിടക്കുന്നതിനാൽ നൂറു കണക്കിന് കേസുകൾ തീർപ്പാക്കാനാവാതെ കെട്ടിക്കിടക്കുന്നു. കൊല്ലം റെയിൽവേ കോടതിയിൽ കഴിഞ്ഞ ഒൻപത് മാസമായി ജഡ്ജിയില്ല. തമിഴ്നാട്ടിലെ കുഴിത്തുറ മുതൽ എറണാകുളം സൗത്ത് വരെയുള്ള റെയിൽവേ സ്റ്റേഷനുകളിലും ട്രെയിനുകളിലും നടക്കുന്ന നിയമലംഘനങ്ങളിൽ റെയിൽവേ ആക്‌ട് പ്രകാരമുള്ള കേസുകൾ കൈകാര്യം ചെയ്യുന്ന കൊല്ലം റെയിൽവേ കോടതിയിലെ ജഡ്ജിയുടെ നിയമനം ആണ് ചുവപ്പു നാടയിൽ കുരുങ്ങി കിടക്കുന്നത്. ജഡ്ജിയുടെ നിയമനം വൈകുന്നത് മൂലം സർക്കാരിന് പ്രതിമാസം എട്ടു ലക്ഷം രൂപയാണ് നഷ്ടമായി കൊണ്ടിരിക്കുന്നത്. കോടതി വിധിക്കുന്ന പിഴ തുക എല്ലാം സർക്കാരിലേക്കാണ് എത്തി കൊണ്ടിരിക്കുന്നത്. കോച്ചുകൾ മാറിക്കയറൽ, അനാവശ്യ ചെയിൻ വലിക്കൽ, സ്റ്റേഷനുകളിലെ അനധികൃത പാർക്കിംഗ്, ടിക്കറ്റെടുക്കാതെ യാത്ര ചെയ്യൽ, ട്രെയിനിനുള്ളിലെ പുകവലി, മദ്യപാനം, യാത്രക്കാരോട് മോശമായി പെരുമാറൽ എന്നിവയാണ് പ്രധാനമായും ഈ കോടതിയിൽ പരിഗണിച്ചു വന്നിരുന്നത്. കഴിഞ്ഞ ജനുവരിയിലാണ് നിലവിൽ ഉണ്ടായിരുന്ന ജഡ്ജി വിരമിക്കുന്നത്. ജഡ്ജി വിരമിക്കുന്നതിന് മൂന്ന് മാസം മുമ്പേ പുതിയ നിയമനത്തിനുള്ള അപേക്ഷ ക്ഷണിച്ചിരുന്നെങ്കിലും നിയമനം അനന്തമായി നീളുകയാണ്. തൊഴിൽ നിയമ വകുപ്പുകളിൽ നിന്ന് വിരമിച്ചവരിൽ സർവീസിലിരിക്കെ എൽ എൽ ബിയുള്ളവരെയാണ് രണ്ടാം ക്ലാസ് ജുഡീഷ്യൽ മജിസ്ട്രേറ്റ് പദവിയിൽ നിയമിക്കുക. കൊല്ലം ചീഫ് ജുഡീഷൽ മജിസ്ട്രേറ്റാണ് ജഡ്ജിയെ നിയമിക്കാൻ അപേക്ഷ ക്ഷണിക്കേണ്ടത്. കിട്ടുന്ന അപേക്ഷകൾ പരിശോധിച്ച് യോഗ്യരായവരുടെ ലിസ്റ്റ് തയാറാക്കി കളക്ടർക്ക് നൽകുകയാണ് പതിവ്. തുടർന്ന് കളക്ടർ പോലീസ് ക്ലിയറൻസ് സർട്ടിഫിക്കറ്റ് സഹിതം പട്ടിക ഹൈക്കോടതിക്ക് കൈമാറും. ഹൈക്കോടതിയാണ് പിന്നീട് അയോഗ്യരെ ഒഴിവാക്കി സംസ്ഥാന സർക്കാരിന് നൽകുക. ഈ പട്ടികയിൽ നിന്ന് സർക്കാർ തീരുമാനിക്കുന്നയാളെയാണ് ഹൈക്കോടതി നിയമിക്കുക. മൂന്നോ നാലോ പേരുടെ പട്ടികയാണ് സാധാരണ സംസ്ഥാന സർക്കാരിന്‍റെ മുന്നിൽ എത്താറുള്ളത്. ഇത്തവണ അതിൽ നിന്ന് വിരുദ്ധമായി ലിസ്റ്റിൽ കൂടുതൽ പേ‌ർ എത്തിയതാണ് പ്രശ്നമായത്. ഇത്തവണ പട്ടികയിൽ 14 പേർ ആണ് ഇടം പിടിച്ചത്. നിയമോപദേശം തേടുന്നതിന്‍റെ പേരിലും കാലതാമസം ഉണ്ടായി. പട്ടിക സർക്കാരിന്‍റെ മുന്നിലെത്തിയിട്ടു മാസങ്ങളായെങ്കിലും ഇത് വരെ ഒരു പരിശോധനയും നടന്നിട്ടില്ല.

ശ്രീനാരായണഗുരു ഓപ്പൺ യൂണിവേഴ്സിറ്റി പ്രവേശനോത്സവം വിവിധ പഠനകേന്ദ്രങ്ങളിൽ സംഘടിപ്പിച്ചു

കൊല്ലം: ശ്രീനാരായണഗുരു ഓപ്പൺ യൂണിവേഴ്സിറ്റിയുടെ വിവിധ യുജി/ പിജി പ്രോഗ്രാമുകളിൽ ഈ അധ്യയന വർഷം പ്രവേശനം നേടിയ 22000 ത്തോളം പഠിതാക്കൾക്കുള്ള പ്രവേശനോത്സവം കേരത്തിലെ എല്ലാ ജില്ലകളിലുമുള്ള പഠന കേന്ദ്രങ്ങളിൽ നടന്നു. ഈ അധ്യയന വർഷത്തെ അഡ്മിഷനോടെ യൂണിവേഴ്സിറ്റയിലെ പഠിതാക്കളുടെ എണ്ണം ശ്രീനാരായണഗുരു ഓപ്പൺ യൂണിവേഴ്സിറ്റിയിലെ പഠിതാക്കളുടെ എണ്ണം 76000 കടന്നു. ഏറ്റവും കൂടുതൽ പഠിതാക്കൾ ഈ വർഷം അഡ്മിഷൻ നേടിയത് കോഴിക്കോട് റീജിയണൽ കേന്ദ്രത്തിലെ വിവിധ പഠന കേന്ദ്രങ്ങളിലാണ്. 8000 ത്തോളം പഠിതാക്കളാണ് ഇത്തവണ കോഴിക്കോട്, മലപ്പുറം ജില്ലകളിലെ വിവിധ ലേണർ സപ്പോർട്ട് സെന്‍ററുകളിൽ അഡ്മിഷൻ നേടിയത്. 56 പഠന കേന്ദ്രങ്ങൾ നിലയിൽ യൂണിവേഴ്സിറ്റിക്കുണ്ട്.കഴിഞ്ഞ വർഷം വരെ 23 പഠന കേന്ദ്രങ്ങളായിരുന്നു ഉണ്ടായിരുന്നത്. കേരളത്തിലെ വിവിധ ജില്ലകളിൽ നടന്ന പ്രവേശനോത്സവത്തിൽ യൂണിവേഴ്സിറ്റി വൈസ് ചാൻസിലർ പ്രഫ. ഡോ. വി.പി. ജഗതി രാജ് ,സിൻഡിക്കേറ്റ് അംഗങ്ങൾ, രജിസ്ട്രാർ, പരീക്ഷാ കൺട്രോളർ,വിവിധ പഠന സ്കൂൾ മേധാവികൾ, യൂണിവേഴ്സിറ്റി ഓഫീസർമാർ, അസിസ്റ്റന്‍റ് പ്രഫസർമാർ പഠിതാക്കളെ അഭിസംബോധന ചെയ്ത് പ്രസംഗിച്ചു. ബിഎസ് സി ഡേറ്റ് സയൻസ് ആന്‍ഡ് അനലറ്റിക്സ്, ബി എ നാനോ എന്‍റർപ്രണുർഷിപ് തുടങ്ങിയ നൂതന പ്രോഗ്രാമുകളും യൂണിവേഴ്സിറ്റിയിലുണ്ട്. ഇത്തവണ പോസ്റ്റൽ വകുപ്പിന്‍റെ സഹായത്തോടെ പഠിതാക്കൾക്ക് പഠനസാമഗ്രികൾ നേരിട്ട് വീടുകളിൽ എത്തിക്കുകയാണ് യൂണിവേഴ്സിറ്റി ചെയ്യുന്നത്. കൂടാതെ എസ് എൽ എമ്മിന്‍റെ പിഡിഎഫ് കൂടി ലഭിക്കും. എഐ ടൂളുകളുടെ സഹായത്തോടെ പഠിതാക്കൾക്ക് മാതൃ ഭാഷയിലേക്ക് ഇവ പരിഭാഷപ്പെടുത്തുവാൻ സാധിക്കും. ഇത് പഠനത്തെ കൂടുതൽ എളുപ്പമാക്കും. പരീക്ഷാ ഫലപ്രഖ്യാപനം സമയബന്ധിതമായി നടത്തുവാൻ ഓൺ സ്ക്രീൻ വാല്യൂവേഷൻ അടക്കം നൂതന സാങ്കേതിക വിദ്യകൾ യൂണിവേഴ്സിറ്റി നടപ്പിലാക്കുന്നുണ്ട്. എ ഐ സാങ്കേതിക വിദ്യയുടെ സഹായത്തോടെ അധ്യയനം സുഗമമാക്കുന്ന ഡിജി ഗുരു ഈ വർഷം മുതൽ പഠിതാക്കൾക്ക് ലഭിക്കും. ഇതുൾപ്പെടെ യൂണിവേഴ്സിറ്റിയുടെ ബോധന രീതി, പരീക്ഷാ നടത്തിപ്പ്, പഠന ക്രമം എന്നിവ ഉൾപ്പെടെ യൂണിവേഴ്സിറ്റിയെ പരിചയപ്പെടുത്തുന്ന എല്ലാ വിവരങ്ങളും ഇൻഡക്ഷൻ പ്രോഗ്രാമിൽ വിശദീകരിച്ചു. പഠിതാക്കൾക്ക് സംശയനിവാരണത്തിനും അവസരമുണ്ടായിരുന്നു. പ്രായപരിധിയോ മാർക്ക് മാനദണ്ഡമോ ഇല്ലാതെ അർഹരായ പഠിക്കാൻ താല്പര്യമുള്ള എല്ലാവർക്കും പഠിക്കാൻ അവസരം ഒരുക്കുന്നു എന്നുള്ളതാണ് ഓപ്പൺ യൂണിവേഴ്സിറ്റിയുടെ സ്വീകാര്യത കൂട്ടുന്നത്.

ശങ്കരമംഗലം - കോവിൽത്തോട്ടം റോഡ് നിർമാണം പാതിവഴിയിൽ നിർത്തി; യാത്രക്കാർ ദുരിതത്തിൽ

ചവറ: റോഡ് നിർമാണം പാതിവഴിയിൽ നിർത്തിയതിനെ തുടർന്ന് ശങ്കരമംഗലം - കോവിൽത്തോട്ടം റോഡിലൂടെയുള്ള യാത്ര ദുരിത പൂർണ മായി. ദേശീയപാതയിൽ നിന്നും ആരംഭിച്ച് കോവിൽതോട്ടം പാലത്തിന് സമീപം വരെ പോകുന്ന റോഡാണിത്. ശങ്കരമംഗലം ജംഗ്ഷനിൽ ആരംഭിക്കുന്ന സ്ഥലം തന്നെ റോഡിൽ വെള്ളക്കെട്ടാണ്. ഈ ഭാഗത്ത് സ്കൂളിന് മുന്നിൽ ടാറിംഗ് നടന്നിട്ടില്ല. ഈ ഭാഗത്തെ റോഡിൽ ചെറിയ കുഴികൾ രൂപപ്പെട്ടു. ഈ റോഡും മിന്നാം തോട്ടിൽ ക്ഷേത്രത്തിലേക്ക് പോകുന്ന റോഡും തമ്മിൽ കൂട്ടിയോജിപ്പിച്ചത് അശാസ്ത്രീയമായിട്ടാണ്. ഈ ഭാഗത്തെ റോഡുകൾ തകർന്ന മട്ടിലാണ്. ഇവിടെയും മഴപെയ്താൽ വെള്ളക്കെട്ട് ഉണ്ടാകുന്നുവെന്ന് നാട്ടുകാർ ആരോപിച്ചു. ശങ്കരമംഗലം ഹയർ സെക്കൻഡറി സ്കൂൾ, ഗേൾസ് സ്കൂൾ, കോവിത്തോട്ടം ഹയർസെക്കൻഡറി സ്കൂൾ, ലൂർദ് മാതാ സെൻട്രൽ സ്കൂൾ, ചവറ കോളജ്, കോവിൽത്തോട്ടം സെന്‍റ് ആൻഡ്രൂസ് ദേവാലയം, മിന്നാം തോട്ടിൽ ക്ഷേത്രം, കാട്ടിൽ മേക്കതിൽ ക്ഷേത്രം, കാമൻകുളങ്ങര ക്ഷേത്രം, വിവിധ സർക്കാർ ഓഫീസുകൾ, ദേശീയപാതയിലേക്ക് വന്ന് അവിടെ നിന്നും വിവിധ ഭാഗങ്ങളിലേക്ക് പോകുന്നവർ ഉൾപ്പെടെ നിരവധി പേർ സഞ്ചരിക്കുന്ന റോഡാണ് ഇത്. ബന്ധപ്പെട്ടവർ ഇടപെട്ട് ശങ്കരമംഗലം സ്കൂളിന് മുന്നിലുള്ള ഭാഗം ടാർ ചെയ്യാനും മിന്നാംതോട്ടിലേക്ക് പോകുന്ന ഭാഗത്തെ റോഡും ഈ റോഡും തമ്മിൽ സംഗമിക്കുന്ന ഭാഗം നികത്തി ടാർ ലെവൽ ചെയ്യണമെന്നും യാത്രക്കാർ ആവശ്യപ്പെട്ടു.

ശല്യക്കാരായ 70 കാട്ടുപന്നികളെ വെടിവെച്ചു കൊന്നു

ആര്യങ്കാവ്: അച്ചൻകോവിൽപ്രദേശത്ത് കാട്ടുപന്നി ശല്യം രൂക്ഷമായ വിവിധ പ്രദേശങ്ങളിൽ പന്നികളെ വെടിവെച്ചു കൊന്നു. രണ്ട് ദിവസമായി ആര്യങ്കാവ് പഞ്ചായത്തിന്‍റെ നേതൃത്വത്തിൽ 70 പന്നികളെയാണ് വെടിവെച്ച് കൊന്നത്. പഞ്ചായത്ത് പ്രസിഡന്‍റ് സുജാ തോമസിന്‍റെ ഉത്തരവിനെ തുടർന്ന് വർക്കലയിലെ ലൈസൻസുള്ള അംഗീകൃത ഷൂട്ടർമാരുടെ നേതൃത്വത്തിൽ പോലീസിന്‍റെയും വനംവകുപ്പ് ഉദ്യോഗസ്ഥരുടെയും സഹായത്തോടെയാണ് പന്നികളെ വെടിവെച്ച് കൊന്നത്. പന്നികൾ കാർഷികവിള നശിപ്പിക്കുകയും കോഴികളെയും താറാവിനെയും കൊന്നു തിന്നുകയും വീടിനുള്ളിലും കടയ്ക്കുള്ളിലും കയറി വീട്ടുസാധനങ്ങളും കടയിലെ സാധനങ്ങളും നശിപ്പിക്കുകയുംചെയ്തിരുന്നു. കുട്ടികൾക്ക് സ്കൂളിൽ പോലും പോകാൻ പറ്റാത്ത അവസ്ഥയിലായിരുന്നു. ജനങ്ങളുടെ പരാതിയെ തുടർന്നാണ് പഞ്ചായത്ത് നടപടിയെടുത്തത്. പഞ്ചായത്ത് ഇത് നാലാമത്തെ പ്രാവശ്യമാണ് അംഗീകൃത ഷൂട്ടർമാരെ കൊണ്ട് പന്നികളെ വെടിവയ്ക്കുന്നത്. കഴിഞ്ഞ മൂന്ന് തവണ 130ഓളം പന്നികളെ പിടിച്ചിരുന്നു .

ചുമട്ടുതൊഴിലാളികളെ ഇഎസ്ഐയിൽ ഉൾപ്പെടുത്തണമെന്ന്

ചാത്തന്നൂർ:ചുമട്ട് തൊഴിലാളികൾക്ക് ഇഎസ്ഐ ആനുകൂല്യങ്ങൾ ലഭിക്കും വിധം നിയമനിർമാണം നടത്തണമെന്ന് ഐഎൻടിയുസി ജില്ലാ ട്രഷറർ അൻസർ അസീസ് ആവശ്യപ്പെട്ടു. വിവിധ ആവശ്യങ്ങൾ ഉന്നയിച്ചു ചുമട്ടുതൊഴിലാളി യൂണിയൻ ഐഎൻടിയുസി ചാത്തന്നൂർ ക്ഷേമനിധി ഓഫീസിനു മുന്നിൽ നടത്തിയ ധർണസമരം ഉദ്ഘാടനം ചെയ്തു പ്രസംഗിക്കുകയായിരുന്നു അസീസ്. ഐഎൻടിയുസി റീജണൽ പ്രസിഡന്‍റ് ഹാഷിം തെക്കുംഭാഗം അധ്യക്ഷത വഹിച്ചു.ഡിസിസി ജനറൽ സെക്രട്ടറി ഉണ്ണികൃഷ്ണൻ, ഐഎൻടിയുസി ജില്ലാ വൈസ് പ്രസിഡന്‍റ് പാരിപ്പള്ളി വിനോദ്, റീജണൽ വൈസ് പ്രസിഡന്‍റ് പരവൂർ മോഹൻദാസ്, മണ്ഡലം പ്രസിഡന്‍റുമാരായ രാധാകൃഷ്ണൻ, സുഗതൻ പറമ്പിൽ, ഉളിയനാട് ജയൻ, പ്രദീപ്, സജീവ് തുടങ്ങിയവർ പ്രസംഗിച്ചു.

പ്രസവ ചികിത്സയ്ക്കിടെ യുവതി മരിച്ചു; താലൂക്ക് ആശുപത്രിയുടെ അനാസ്ഥയെന്ന് ബന്ധുക്കൾ

തേവലക്കര: പ്രസവ ചികിത്സയ്ക്കിടെ യുവതി മരിച്ചതില്‍ കരുനാഗപ്പള്ളി താലൂക്ക് ആശുപത്രിക്കെതിരെ ആരോപണവുമായി ബന്ധുക്കൾ. കൊല്ലം തേവലക്കര സ്വദേശി ജാരിയത്താണ് മരിച്ചത്. താലൂക്ക് ആശുപത്രിയിലെ ചികിത്സാപ്പിഴവാണ് മരണകാരണമെന്നാണ് ബന്ധുക്കൾ ആരോപിക്കുന്നത്. അനസ്തേഷ്യയയില്‍ പിഴവുണ്ടായെന്നാണ് പരാതി. ഗുരുതരാവസ്ഥയിലായ യുവതിയെ ആലപ്പുഴ വണ്ടാനം മെഡിക്കല്‍ കോളജ് ആശുപത്രിയിൽ പ്രവേശിപ്പിച്ചെങ്കിലും മരിച്ചു. ഇന്നലെ രാവിലെയാണ് 22കാരിയായ ജാരിയത്ത് മരിച്ചത്. വണ്ടാനം മെഡിക്കൽ കോളജിലെ ആശുപത്രിക്ക് മുന്നിൽ ബന്ധുക്കൾ ഇന്നലെ ഉച്ചയോടെ പ്രതിഷേധിച്ചു.തങ്ങൾക്ക് ചികിത്സാപ്പിഴവുണ്ടായില്ലെന്നാണ് കരുനാഗപ്പള്ളി താലൂക്ക് ആശുപത്രി അധികൃതർ പറയുന്നത്. പ്രസവം സിസേറിയനായിരുന്നു. അനസ്തീസിയയ്ക്ക് ഒരു ഡോക്ടറാണ് കരുനാഗപ്പള്ളി ആശുപത്രിയിൽ ഉള്ളത്. ഈ ഡോക്ടർ ഇന്നലെ ഇല്ലാതിരുന്നതിനാൽ കുണ്ടറ താലൂക്ക് ആശുപത്രിയിൽ നിന്ന് അനസ്തേഷ്യ ഡോക്ടറെ എത്തിക്കുകയായിരുന്നു. പ്രസവശേഷം തിയറ്ററിൽ നിന്ന് മാറ്റി ഒന്നര മണിക്കൂറിനു ശേഷം യുവതിയുടെ ബിപി കുറഞ്ഞെന്നും എത്ര ശ്രമിച്ചിട്ടും സാധാരണ നിലയിലേക്ക് കൊണ്ടുവരാനായില്ലെന്നുമാണ് കരുനാഗപ്പള്ളി താലൂക്ക് ആശുപത്രി അധികൃതരുടെ വിശദീകരണം. തുടർന്നാണ് വണ്ടാനത്തേക്ക് റഫർ ചെയ്യുന്നത്. 108 ആംബുൻസിലാണ് വണ്ടാനത്തേക്ക് കൊണ്ടു പോയത്. കാർഡിയോ മയോപ്പതിയാകാം മരണ കാരണമെന്നും പോസ്റ്റ്മോർട്ടത്തിന് ശേഷം മാത്രമേ ഇക്കാര്യം സ്ഥിരീകരിക്കാനാകൂ എന്നും ആശുപത്രി അധികൃതർ പറഞ്ഞു.

മൊസാംബിക്കിലെ ബോട്ട് അപകടം : പ്രതീക്ഷയോടെ ശ്രീരാഗിന്‍റെ ബന്ധുക്കൾ

ചവറ: മൊസാംബിക്കിലെ ബോട്ട് അപകടത്തിൽ കാണാതായ തേവലക്കര സ്വദേശി ഉൾപ്പെടെയുള്ളവർക്കായി തെരച്ചിൽ തുടരുമ്പോൾ ഗംഗ ഭവനിൽ ഭാര്യയും രണ്ടു മക്കളുൾപ്പടെയുള്ള ബന്ധുക്കൾ ശ്രീരാഗിനെ പറ്റിയുള്ള വിവരങ്ങൾ അറിയാൻ പ്രതീക്ഷയോടെ കാത്തിരിക്കുകയാണ്. തേവലക്കരയിലെ നടുവിലക്കര ഗംഗ ഭവനിൽ രാധാകൃഷ്ണന്‍റെയും ഷീലയുടെയും മകന്‍ ശ്രീരാഗി (36 )നെയാണ് അപകടത്തിൽ കാണാതായത്. ഇറ്റലി ആസ്ഥാനമായുള്ള സ്കോർപിയോ ഷിപ്പിംഗ് കമ്പനിയിലെ ഇലക്‌ട്രോ ഓഫീസറാണ് ശ്രീരാഗ്. കഴിഞ്ഞ ഏഴ് വർഷമായി ശ്രീരാഗ് ഇവിടെയുള്ള കമ്പനിയിൽ ജോലി ചെയ്തു വരികയായിരുന്നു. പുതിയ സ്ഥലത്തേയ്ക്ക് ജോയിൻ ചെയ്യാൻ പോകുന്ന സമയത്താണ് അപകടം എന്നാണ് വിവരം. കഴിഞ്ഞ വ്യാഴാഴ്ചയായിരുന്നു അപകടം. അപകടത്തിൽപ്പെട്ട വിവരം അറിഞ്ഞ ശേഷം ഫോണിൽ ബന്ധപ്പെടാൻ ബന്ധുക്കൾ ശ്രമിച്ചെങ്കിലും കിട്ടിയില്ല. ഒരാഴ്ചയ്ക്ക് മുമ്പാണ് ലീവ് കഴിഞ്ഞ് വീട്ടിൽ നിന്നും ശ്രീരാഗ് ജോലിസ്ഥലത്തിലേക്ക് യാത്ര തിരിച്ചത്. ശ്രീരാഗിനായി ബന്ധുക്കൾ പ്രതീക്ഷയോടെ കാത്തിരിക്കുകയാണ്. ഭാര്യ: ജീത്തു. മക്കൾ : അതിഥി മോൻ, ആറ് മാസം പ്രായമായ അനശ്വർ.

കൊല്ലത്ത് സിപിഐയിൽ പൊട്ടിത്തെറി : കുണ്ടറയ്ക്കു പിന്നാലെ കടയ്ക്കലിലും കൂട്ടരാജി

കൊല്ലം : തദ്ദേശ സ്വയംഭരണ സ്ഥാപങ്ങളിലേക്കുള്ള തെരഞ്ഞെടുപ്പ് പടിവാതിൽക്കൽ എത്തിയിരിക്കേ കൊല്ലത്ത് സിപി ഐയിൽ വിഭാഗീയത കനത്തു. കടയ്‌ക്കലിൽ സിപിഐ അംഗങ്ങൾ കൂട്ടരാജി വച്ചു. കുണ്ടറയ്ക്ക് പിന്നാലെ കടയ്‌ക്കലിലും സിപി ഐയുടെ നേതാക്കളും പ്രവർത്തകരും അടക്കം രാജിവച്ചത് എൽഡിഎഫ് ജില്ലാ നേതൃത്വത്തിന് ആശങ്കയ്ക്ക് ഇടയാക്കിയിട്ടുണ്ട്. വിവിധ സ്ഥാനങ്ങൾ വഹിച്ചിരുന്ന 112 പേരാണ് കടയ്‌ക്കലിൽ പാർട്ടിവിട്ടത്. മന്ത്രി ജെ.ചിഞ്ചുറാണിയുടെ ചടയമംഗലം നിയോജക മണ്ഡലത്തിലാണ് സിപിഐ ജില്ലാ നേതൃത്വം പ്രതീക്ഷിക്കാത്ത കൂട്ടത്തോടെ രാജി ഉണ്ടായിരിക്കുന്നത്. 10 മണ്ഡലം കമ്മിറ്റി അംഗങ്ങൾ, 45 ലോക്കൽ കമ്മിറ്റി അംഗങ്ങൾ, 48 ബ്രാഞ്ച് സെക്രട്ടറിമാർ, ഒമ്പത് ബ്ലോക്ക് -ഗ്രാമ പഞ്ചായത്ത്‌ അംഗങ്ങൾ എന്നിവർ രാജിവച്ചവരിൽ ഉൾപ്പെടും. ജില്ലാ നേതൃത്വത്തോടുള്ള അതൃപ്തി അറിയിച്ചു കൊണ്ടാണ് രാജി പ്രഖ്യാപനം നടന്നിരിക്കുന്നത്. 700ൽ അധികം പാർട്ടി അംഗങ്ങൾ രാജിവച്ചതായാണ് വിമത നേതാക്കൾ അവകാശപ്പെടുന്നത്. ഉൾപാർട്ടി പ്രശ്നങ്ങളാണ് തീരുമാനത്തിന് കാരണമെന്നും അവർ പറയുന്നു. എന്നാൽ അഴിമതി നടത്തിയതിന് സംഘടനാ നടപടി നേരിട്ടയാൾ അടക്കമാണ് രാജിവച്ചതെന്ന് സിപിഐ ജില്ലാ നേതൃത്വം പറയുന്നുണ്ട്. എം എൻ സ്മാരകത്തിനായി ഫണ്ട് പിരിവു നടത്തിയതിൽ അഴിമതി നടത്തിയതായി ആരോപണ വിധേയനായ മണ്ഡലം സെക്രട്ടറിയുടെ പേരിൽ പാർട്ടി ഡിസിയും എക്സിക്യൂട്ടീവും നടപടിയെടുക്കാനിരിക്കെയാണ് കൂട്ടരാജി സംഭവം. പ്രവർത്തകർ പാർട്ടിവിട്ടെന്ന പ്രചാരണം അടിസ്ഥാന രഹിതമെന്നാണ് സിപി ഐ ജില്ലാ നേതൃത്വം പ്രതികരിച്ചത്. അതേസമയം, വിഭാഗീയതയെത്തുടർന്നു കുണ്ടറ മണ്ഡലം കമ്മിറ്റിയിൽ നിന്നു കൂട്ട രാജി‍ ഉണ്ടായതിന് പിറകെയാണ് കടയ്‌ക്കലും രാജി ഉണ്ടായിരിക്കുന്നത്. മുൻ മണ്ഡലം സെക്രട്ടറി ഉൾപ്പെടെ മുന്നൂറോളം പേർ ആണ് കുണ്ടറയിൽ ഒരാഴ്ച മുൻപ് രാജി വെച്ചത്. മുൻ പാർട്ടി മണ്ഡലം സെക്രട്ടറി ടി.സുരേഷ്, ഇളമ്പള്ളൂർ മുൻ വൈസ് പ്രസിഡന്‍റും മണ്ഡലം അസി. സെക്രട്ടറിയുമായ ജലജ ഗോപൻ, സെക്രട്ടേറിയറ്റ് അംഗം സോണി വി.പള്ളം, സെക്രട്ടേറിയറ്റ് അംഗവും കുണ്ടറ ലോക്കൽ കമ്മിറ്റി സെക്രട്ടറിയുമായ എം.ഗോപാലകൃഷ്ണൻ, പേരയം എൽസി സെക്രട്ടറി ജോൺ വിൻസന്‍റ്, ഇളമ്പള്ളൂർ എൽസി സെക്രട്ടറി ഒ.എസ്.വരുൺ, എഐവൈഎഫ് കുണ്ടറ മണ്ഡലം സെക്രട്ടറി മുഹമ്മദ് ഷാൻ, മഹിള സംഘം ഭാരവാഹികളായ ജയ, പ്രിഷിൽഡ വിൽസൺ എന്നിവരാണ് കുണ്ടറയിൽ സി പി ഐ വിട്ട പ്രാദേശിക നേതാക്കൾ. 28 എൽസി അംഗങ്ങളും 22 ബ്രാഞ്ച് സെക്രട്ടറിമാരും രാജി വെച്ചിരുന്നെങ്കിലും ഇവരിൽ 17 ഓളം എൽ സി അംഗങ്ങളും എട്ടു ബ്രാഞ്ച് സെക്രട്ടറിമാരും പിന്നീട് പാർട്ടി ജില്ലാ നേതൃത്വവുമായി സമവായത്തിലെത്തുകയായിരുന്നു. 25 അംഗങ്ങൾ അടങ്ങുന്ന മണ്ഡലം കമ്മിറ്റിയിലെ മൂന്നു പേർക്കെതിരെ നടപടി എടുത്തതാണ് പ്രശ്നങ്ങൾക്ക് തുടക്കം. കഴിഞ്ഞ മണ്ഡലം സമ്മേളനത്തിലാണു കുണ്ടറയിൽ സി പി ഐ യിലെ വിഭാഗീയത പുറത്ത് വരുന്നത്. സെക്രട്ടറി തെരഞ്ഞെടുപ്പുമായി ബന്ധപ്പെട്ട് ഉപരിനേതൃത്വത്തിന്‍റെ നിർദേശം ഒരു വിഭാഗം എതിർത്തതോടെ സമ്മേളനം അടികൂടി പിരിയുന്ന സാഹചര്യമാണ് ഉണ്ടായത്. സെക്രട്ടറിയായിരുന്ന ടി.സുരേഷ് കുമാറിനെ മാറ്റി സേതുനാഥിനെ നിയമിക്കണമെന്നു ജില്ല സെക്രട്ടറി നിർദേശം നൽകിയതാണ് ചിലരെ ചൊടിപ്പിക്കുന്നത്. മുന്പ് എട്ടു തവണ സെക്രട്ടറിയായ സേതുനാഥിനെ സെക്രട്ടറിയായി തെരഞ്ഞെടുക്കുന്നതു ഭൂരിപക്ഷ പ്രതിനിധികളും എതിർത്തു. സുരേഷ് കുമാറിനെ തന്നെ നിലനിർത്തണം എന്നായിരുന്നു ആവശ്യം. സമ്മേളനത്തിൽ പങ്കെടുത്ത സംസ്ഥാന എക്സിക്യൂട്ടീവ് അംഗം കെ.ആർ.ചന്ദ്രമോഹനൻ, ജില്ലാ സെക്രട്ടറി പി.എസ്.സുപാൽ,അസി.സെക്രട്ടറിമാരായ സാം കെ.ഡാനിയൽ, എം.എസ്.താര, ജില്ലാ നേതാക്കളായ മന്മഥൻ നായർ, ആർ.എസ്.അനിൽ, ജി.ബാബു, ജഗദമ്മ എന്നിവരാണു ജില്ലാ എക്സിക്യൂട്ടീവ് തീരുമാനമായി സെക്രട്ടറി സ്ഥാനത്തേക്കു സേതുനാഥിന്‍റെ പേര് നിർദേശിച്ചത്. തീരുമാനം ക്രമവിരുദ്ധമാണെന്ന് ആരോപിച്ചായിരുന്നു അംഗങ്ങൾ സമ്മേളനം ബഹിഷ്കരിച്ചത്. തുടർന്നാണ് ജില്ലാ നേതൃത്വം മൂന്നു പേർക്കെതിരെ അച്ചടക്ക നടപടി സ്വീകരിക്കുന്നത്. തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പ് അടുത്ത സാഹചര്യത്തിൽ കൂട്ടരാജി സിപിഐ സംഘടനാ സംവിധാനത്തെ ദുർബലമാക്കുമെന്ന കാര്യം ഉറപ്പാണ്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]