മാടപ്പള്ളി പഞ്ചായത്ത് ഗവ. ആയുര്‍വേദ ആശുപത്രിക്ക് എന്‍എബിഎച്ച് അംഗീകാരം
1564113
Sunday, June 1, 2025 7:21 AM IST
മാടപ്പള്ളി: മാടപ്പള്ളി പഞ്ചായത്ത് ഗവ. ആയുര്‍വേദ ഡിസ്‌പെന്‍സറിക്ക് ഉന്നത നിലവാര അംഗീകാര പ്രവര്‍ത്തനങ്ങളുടെ ഭാഗമായി എന്‍എബിഎച്ച് എന്‍ട്രി ലെവല്‍ ദേശീയ അംഗീകാരം ലഭിച്ചു. തിരുവനന്തപുരം ടാഗോര്‍ തിയറ്ററില്‍ നടന്ന ചടങ്ങില്‍ ആരോഗ്യമന്ത്രി വീണ ജോര്‍ജില്‍നിന്ന് പഞ്ചായത്ത് പ്രസിഡന്‍റ് മണിയമ്മ രാജപ്പനും മെഡിക്കല്‍ ഓഫീസര്‍ ഡോ. വിനീത രവിയും ചേര്‍ന്ന് സര്‍ട്ടിഫിക്കറ്റ് ഏറ്റുവാങ്ങി.
ജില്ലാ മെിക്കല്‍ ഓഫീസര്‍ എസ്. ശ്രീലത, ജില്ലാ പ്രോഗ്രാം മാനേജര്‍ ഡോ. ശരണ്യ ഉണ്ണികൃഷ്ണന്‍, മുന്‍ ജില്ലാ പ്രോഗ്രാം മാനേജര്‍ ഡോ. പ്രതിഭ, സ്റ്റേറ്റ് നോഡല്‍ ഓഫീസര്‍ ഡോ. എസ്. ശ്രീജിത്ത് എന്നിവര്‍ സന്നിഹിതരായിരുന്നു.
ഉന്നതനിലവാരത്തിലുള്ള ചികിത്സ സൗകര്യങ്ങള്‍, യോഗപരിശീലനം,രക്തപരിശോധന, ഔഷധസസ്യത്തോട്ടം, ഗൃഹസന്ദര്‍ശനം, മെഡിക്കല്‍ക്യാമ്പ്, ബോധവത്കരണ ക്യാമ്പുകള്‍ എന്നീ സേവനങ്ങളാണ് സ്ഥാപനത്തില്‍നിന്ന് ലഭ്യമാകുന്നത്.