ADVERTISEMENT

ADVERTISEMENT

രാമപുരം കോളജില്‍ കോണ്‍വൊക്കേഷന്‍ സെറിമണി

രാമപുരം: മാര്‍ ആഗസ്തിനോസ് കോളജിലെ ഈ വര്‍ഷത്തെ കോണ്‍വൊക്കേഷന്‍ സെറിമണി 25നു രാവിലെ 10ന് കോളജ് ഓഡിറ്റോറിയത്തില്‍ നടക്കും. മുന്‍ കേരള സെന്‍ട്രല്‍ യൂണിവേഴ്സിറ്റി വൈസ് ചാന്‍സലര്‍ ഡോ. ജി. ഗോപകുമാര്‍ ഉദ്ഘാടനം നിര്‍വഹിക്കും. കോളജ് മാനേജര്‍ ഫാ. ബെര്‍ക്കുമാന്‍സ് കുന്നുംപുറം അധ്യക്ഷത വഹിക്കും. പ്രിന്‍സിപ്പല്‍ ഡോ. റെജി വര്‍ഗീസ് മേക്കാടന്‍ ആമുഖ പ്രസംഗം നടത്തും.

ADVERTISEMENT

ശാസ്ത്രജാലകം തുറന്ന് സയന്‍സ് സെന്‍റര്‍

സ്വന്തം ലേഖകന്‍ കുറവിലങ്ങാട്: വിനോദവും വിജ്ഞാനവും സമന്വയിപ്പിച്ച് ശാസ്ത്രത്തിന്‍റെ കൗതുകലോകം തുറക്കുന്ന സയന്‍സ് സെന്‍റര്‍ നാളെ യാഥാര്‍ഥ്യത്തിലേക്ക്. കുറവിലങ്ങാട് പഞ്ചായത്തിലെ കോഴായില്‍ സംസ്ഥാന സര്‍ക്കാര്‍ അനുവദിച്ച 30 ഏക്കര്‍ ഭൂമിയിലാണ് സയന്‍സ് സിറ്റിയുടെ നിര്‍മാണം. ശാസ്ത്ര ഗാലറികള്‍, ത്രിമാന പ്രദര്‍ശന തിയറ്റര്‍, ശാസ്ത്ര പാര്‍ക്ക്, സെമിനാര്‍ ഹാള്‍, ഇന്നോവേഷന്‍ ഹബ് എന്നിവ ഉള്‍ക്കൊള്ളുന്ന സയന്‍സ് സെന്‍ററാണ് ഇതിലെ പ്രധാനഭാഗം. പ്ലാനറ്റേറിയം, മോഷന്‍ സിമുലേറ്റര്‍, ഓഗ്‌മെന്‍റഡ് റിയാലിറ്റി, വെര്‍ച്വല്‍ റിയാലിറ്റി തിയറ്ററുകള്‍, സംഗീത ജലധാര, പ്രകാശ-ശബ്ദ സംയുക്ത പ്രദര്‍ശനം, വാന നിരീക്ഷണ സംവിധാനം, പൂന്തോട്ടങ്ങള്‍ എന്നിവയും സയന്‍സ് സിറ്റിയിലെ പ്രധാന ആകര്‍ഷണങ്ങളാണ്. പദ്ധതി പ്രദേശത്ത് 47,147 അടി വിസ്തൃതിയിലുള്ള സയന്‍സ് സെന്‍റര്‍ കെട്ടിടത്തില്‍ ഫണ്‍ സയന്‍സ്, മറൈന്‍ ലൈഫ് ആന്‍ഡ് സയന്‍സ്, എമര്‍ജിംഗ് ടെക്‌നോളജി എന്നീ ശാസ്ത്ര ഗാലറികളും ത്രിമാന തിയറ്റര്‍, ടെമ്പററി എക്‌സിബിഷന്‍ ഏരിയ, ആക്റ്റിവിറ്റി സെന്‍റര്‍, സെമിനാര്‍ ഹാള്‍, കോണ്‍ഫറന്‍സ് ഹാള്‍, വര്‍ക്ക്‌ഷോപ്പുകള്‍ എന്നിവയും സജ്ജീകരിച്ചിരിക്കുന്നു. കൂടാതെ സയന്‍സ് സെന്‍ററിന് ചുറ്റുമായി സയന്‍സ് പാര്‍ക്ക്, ദിനോസര്‍ എന്‍ക്ലേവ്, വാനനിരീക്ഷണത്തിനു വേണ്ട ടെലിസ്‌കോപ്പ് എന്നിവയും ഒരുക്കിയിട്ടുണ്ട്. ഫണ്‍ സയന്‍സ് ഗാലറി ശാസ്ത്രതത്വങ്ങളും അതിന്‍റെ പ്രായോഗിക വശങ്ങളും പ്രതിപാദിക്കുന്ന ഫണ്‍ സയന്‍സ് ഗാലറി ശാസ്ത്രതത്പരരെ ഏറെ ആകര്‍ഷിക്കും. ഇവിടെ അമ്പതോളം ഇനങ്ങള്‍ വിവിധ ശാസ്ത്ര ശാഖയുടെ കീഴില്‍ പ്രദര്‍ശിപ്പിച്ചിരിക്കുന്നു. ഇലക്‌ട്രോ മാഗ്‌നറ്റിക് തിയറിയെ അടിസ്ഥാനമാക്കിയുള്ള പ്രദര്‍ശനങ്ങള്‍, സൗണ്ട് ഓഫ് മ്യൂസിക്, ബ്രെയിന്‍ ഗെയിംസ്, ഗണിതമാതൃകകള്‍ എന്നീ വിഭാഗങ്ങളായാണ് ക്രമീകരിച്ചിരിക്കുന്നത്. എമര്‍ജിംഗ് ടെക്നോളജി മാറിയ കാലത്തിന്‍റെ ശാസ്ത്രപുരോഗതി വ്യക്തമാക്കുന്ന കാര്യങ്ങളാണിവിടെ കാണാനാകുന്നത്. ഈ വിഭാഗത്തില്‍ കാര്‍ഷിക വിഭാഗം, ആരോഗ്യ വിഭാഗം, മെറ്റീരിയല്‍ സയന്‍സ് വിഭാഗം, ഊര്‍ജ്ജം, വിവര സാങ്കേതിക വിദ്യ, കമ്യൂണിക്കേഷന്‍, സ്പെയ്സ് സയന്‍സ് തുടങ്ങിയ വിഭാഗങ്ങളില്‍ പ്രദര്‍ശനം ഒരുക്കിയിട്ടുണ്ട്. മറൈന്‍ സയന്‍സ് ഈ വിഭാഗത്തില്‍ കടലിനടിയിലെ കാഴ്ചകളാണ് ആളുകളെ ആകര്‍ഷിക്കുന്നത്. വിവിധയിനം കടല്‍സസ്യങ്ങള്‍, അവയുടെ സമുദ്രാന്തര്‍ഭാഗത്തെ വിന്യാസം, കടല്‍ ജീവികളുടെ മാതൃകകളും ചിത്രങ്ങളും, ഓരോ ജീവികളും കാണപ്പെടുന്ന ആഴങ്ങളുടെ അടയാളപ്പെടുത്തല്‍ എന്നിവയെല്ലാം ഇവിടെ കാണാം. അമ്പതോളം പ്രദര്‍ശന വസ്തുക്കളാണുള്ളത്. ത്രീ ഡി തിയറ്റര്‍ ത്രീ ഡി തിയറ്ററാണ് മറ്റൊരു ആകര്‍ഷണം. സമുദ്രാന്തര്‍ഭാഗത്തെ കാഴ്ചകളും ആകാശകാഴ്ചകളും ത്രിമാന വീഡിയോ പ്രദര്‍ശനത്തിലൂടെ ഇവിടെ സജ്ജമാക്കിയിട്ടുണ്ട്. പഴയകാല മനുഷ്യര്‍ എങ്ങനെ ജീവിച്ചെന്നും പതിയെപതിയെയുണ്ടായ പരിവര്‍ത്തനങ്ങളും ത്രീ ഡി ദൃശ്യാനുഭവത്തില്‍ കണ്ടു മനസിലാക്കാം. 20 മിനിട്ട് നീണ്ടുനില്‍ക്കുന്ന പ്രദര്‍ശനത്തില്‍ രണ്ട് വീഡിയോകളാണുള്ളത്. സയന്‍സ് പാര്‍ക്ക് ഇവിടെ 32 കാഴ്ചകളുണ്ട്. ഫിസിക്സ് പ്രവര്‍ത്തന തത്വം ആധാരമാക്കി പ്രവര്‍ത്തിക്കുന്ന ഉപകാരണങ്ങളാണേറെയും. ആക്‌ടിവിറ്റി സെന്‍റര്‍ കുട്ടികള്‍ക്കു പരീക്ഷണങ്ങള്‍ നടത്താനുള്ള സാഹചര്യം ഒരുക്കിയിട്ടുണ്ട്. അതിനുവേണ്ട സാമഗ്രികളും സജ്ജമാക്കിയിട്ടുണ്ട്. ടെമ്പററി എക്സിബിഷന്‍ ഹാള്‍ ഇവിടെ സ്റ്റില്‍ മോഡലുകളുടെ പ്രദര്‍ശനമാണ് ഒരുക്കിയിട്ടുള്ളത്. വിവിധ ശാസ്ത്രതത്വങ്ങളുടെ തിയറികളും പ്രസന്‍റേഷനും ഉണ്ട്. പ്രധാന ആകര്‍ഷണങ്ങള്‍ കാണുന്നതെല്ലാം വിശ്വസിക്കാമോ? ശാസ്ത്രം പറയുന്നത് വിശ്വസിക്കുന്നതിനു പകരം പിന്നിലുള്ള ശാസ്ത്ര രഹസ്യങ്ങള്‍ മനസിലാക്കണമെന്നാണ്. ഇത് കൃത്യമായി മനസിലാക്കിത്തരുന്നവയാണ് സയന്‍സ് സെന്‍ററിലെ സ്പിന്നിംഗ് ഇറേസര്‍, മാജിക് വാട്ടര്‍ ടാപ്, ഇല്യൂഷന്‍ വിത്ത് റിംഗ്‌സ്, സ്‌കാനിമേഷന്‍ തുടങ്ങിയവ. കാഴ്ച തലച്ചോറിനെ എങ്ങനെ തെറ്റിധരിപ്പിക്കുന്നെന്ന് തിരിച്ചറിയുന്നത് ഫണ്‍ മിറര്‍, കര്‍വിംഗ് ടണല്‍, ഫ്രോസണ്‍ ഷാഡോ, കളര്‍ ഷാഡോ തുടങ്ങിയവ കാണുമ്പോഴാണ്.

ജീപ്പും പിക്കപ്പ് വാനും കൂട്ടിയിടിച്ച് രണ്ടു യുവാക്കള്‍ മരിച്ചു

ചിങ്ങവനം: കഴിഞ്ഞ രാത്രി കോട്ടയം കോടിമതയിൽ ബൊലോറോ ജീപ്പും പിക്കപ്പ് വാനും കൂട്ടിയിടിച്ച് രണ്ടു യുവാക്കള്‍ മരിച്ചു. മൂന്ന് പേര്‍ക്കു പരിക്കേറ്റു. കൊല്ലാട്, കുഴക്കീല്‍ ജയിംസിന്‍റെ മകന്‍ ജെയ്‌മോന്‍ (43), കൊല്ലാട്, നാല്‍ക്കവലയ്ക്കു സമീപം മംഗളാലയത്തില്‍ സുനിലിന്‍റെ മകന്‍ അര്‍ജുന്‍(19) എന്നിവരാണ് മരിച്ചത്. ഗുരുതരമായി പരിക്കേറ്റ ജാദവിനെ കോട്ടയം മെഡിക്കല്‍ കോളജാശുപത്രിയില്‍ വെന്‍റിലേറ്ററിലേക്ക് മാറ്റി. ചൊവ്വാഴ്ച പുലര്‍ച്ചെ 12.10ന് എംസി റോഡില്‍ കോടിമതയിലായിരുന്നു അപകടം. ജയ്‌മോന്‍ കൊല്ലാട് ബോട്ടുജട്ടി കവലയ്ക്കു സമീപം വാങ്ങിയ വീട്ടിലേക്ക് സാധനങ്ങള്‍ ഇറക്കിയശേഷം ഭക്ഷണം കഴിക്കാനായി പോകുമ്പോഴാണ് അപകടം. എതിര്‍ദിശയില്‍നിന്നെത്തിയ പിക്കപ്പ് വാനുമായി ജീപ്പ് കൂട്ടിയിടിക്കുകയായിരുന്നു. ജീപ്പില്‍ അഞ്ചു പേരാണ് ഉണ്ടായിരുന്നത്. ജെയ്മോന്‍റെ സഹോദരി പുത്രന്‍റെ സുഹൃത്തുക്കളാണ് കൂടെയുണ്ടായിരുന്നവര്‍. ഇടിയുടെ ആഘാതത്തില്‍ ബൊലോറോ ജീപ്പ് പൂര്‍ണമായും തകര്‍ന്നു. പിക്കപ്പ് വാനിനും സാരമായി കേടുപാടുകള്‍ സംഭവിച്ചു. ഓടിക്കൂടിയ നാട്ടുകാര്‍ ചേര്‍ന്നാണു പരിക്കേറ്റവരെ ആശുപത്രിയില്‍ എത്തിച്ചത്. ട്രാഫിക് സിഗ്നല്‍ ലൈറ്റിന്‍റെ വര്‍ക്കുകള്‍ ചെയ്തുവരികയായിരുന്നു ജെയിംസ്. പ്ലസ്ടു പഠനത്തിന് ശേഷം ജെസിബി ഡ്രൈവിംഗ് പഠിക്കകയായിരുന്നു അര്‍ജുന്‍. അപകടവിവരമറിഞ്ഞ് കോട്ടയത്തുനിന്ന് അഗ്നിരക്ഷാ സേനാ യൂണിറ്റ് സംഘവും സ്ഥലത്തെത്തി. ജീപ്പ് ഓടിച്ചിരുന്ന ജയ്‌മോനെ ജീപ്പ് വെട്ടിപ്പൊളിച്ചാണു പുറത്തെടുത്തത്. അഗ്നിരക്ഷാ സേനയുടെ ആംബുലന്‍സിലും മറ്റ് ആംബുലന്‍സുകളിലുമായാണു പരിക്കേറ്റവരെ കോട്ടയം മെഡിക്കല്‍ കോളജ് ആശുപത്രിയില്‍ എത്തിച്ചത്. പിക്കപ്പ് വാനിനുള്ളില്‍ ഉണ്ടായിരുന്ന രണ്ടു പേരുടെയും പരിക്ക് ഗുരുതരമല്ല. അപകടത്തെത്തുടര്‍ന്ന് റോഡില്‍ ഓയിലും രക്തവും പരന്നൊഴുകിയിരുന്നു. അഗ്നിരക്ഷാ സേനാ സംഘം എത്തിയാണ് കഴുകിക്കളഞ്ഞത്. എംസി റോഡില്‍ അരമണിക്കൂര്‍ ഗതാഗത തടസവുമുണ്ടായി. ചിങ്ങവനം പോലീസ് സംഘം അപകട വിവരമറിഞ്ഞ് സ്ഥലത്തെത്തി. ജയ്‌മോന്‍റെ ഭാര്യ അനിമോള്‍ ഐസക്ക്, മക്കള്‍: ജോഷ്വാ, ജുവാന. സംസ്‌കാരം നാളെ രാവിലെ 11ന് കടുവാക്കളും ലിറ്റിൽ ഫ്ലവർ പള്ളിയിൽ. മൃതദേഹം ഇന്നു വൈകന്നേരം നാലിന് വീട്ടിലെത്തിക്കും. അര്‍ജുന്‍റെ മാതാവ് മഞ്ജു. സഹോദരന്‍: രാഹുല്‍. സംസ്‌കാരം ഇന്ന് രാവിലെ 10ന് വീട്ടുവളപ്പില്‍.

ആരോഗ്യമേഖലയിലെ സർക്കാർ അലംഭാവം: കേരള കോൺഗ്രസ് പ്രക്ഷോഭം ഇന്ന്

കോട്ടയം: കേരളത്തിന്‍റെ ആരോഗ്യമേഖലയിൽ സർക്കാർ കാണിക്കുന്ന അലംഭാവത്തിൽ പ്രതിഷേധിച്ചു പ്രക്ഷോഭം ആരംഭിക്കുമെന്ന് കേരള കോൺഗ്രസ് ജില്ലാ കമ്മിറ്റി അറിയിച്ചു. മെഡിക്കൽ കോളജ് ആശുപത്രികളിൽ നിലനിൽക്കുന്ന ഗുരുതര സാഹചര്യം അടിയന്തരമായി പരിഹരിക്കണമെന്നാവശ്യപ്പെട്ട് കേരള കോൺഗ്രസ് ഇന്ന് ഉച്ചകഴിഞ്ഞ് മൂന്നിന് മെഡിക്കൽ കോളജ് ആശുപത്രിയിലേക്ക് പ്രതീകാത്മക സമരം നടത്തും. മെഡിക്കൽ കോളജുകൾക്കും ജില്ല-ജനറൽ ആശുപത്രികൾക്കും സർക്കാർ അനുവദിച്ച പണം കുത്തനെ വെട്ടി കുറച്ചതുമൂലം ആശുപത്രികളിൽ നടക്കേണ്ട ശസ്ത്രക്രിയകളും ചികിത്സകളും മുടങ്ങിയിരിക്കുന്ന ഈ ഘട്ടത്തിൽ അടിയന്തരമായി പണം അനുവദിക്കണമെന്ന് ജില്ലാ കമ്മിറ്റി ആവശ്യപ്പെട്ടു. കേരള കോൺഗ്രസ് കോട്ടയം ജില്ല പ്രസിഡന്‍റ് ജയ്സൺ ജോസഫിന്‍റെ അധ്യക്ഷതയിൽകൂടിയ യോഗം കേരള കോൺഗ്രസ് എക്സിക്യൂട്ടീവ് ചെയർമാൻ മോൻസ് ജോസഫ് എംഎൽഎ ഉദ്ഘാടനം ചെയ്തു. സെക്രട്ടറി ജനറൽ ജോയ് ഏബ്രഹാം , ഡെപ്യൂട്ടി ചെയർമാൻ കെ. ഫ്രാൻസിസ് ജോർജ് എംപി, വൈസ് ചെയർമാൻമാരായ വക്കച്ചൻ മറ്റത്തിൽ, കെ.എഫ്. വർഗീസ്, സീനിയർ സെക്രട്ടറി മാഞ്ഞൂർ മോഹൻകുമാർ, സംസ്ഥാന അഡ്വൈസർ തോമസ് കണ്ണന്തറ, ഉന്നത അധികാര സമിതി അംഗങ്ങളായ പ്രിൻസ് ലൂക്കോസ്, വി.ജെ. ലാലി, സന്തോഷ് അഗസ്റ്റിൻ, ചെറിയാൻ ചാക്കോ, പ്രഫ. മേഴ്സി ജോൺ, പോൾസൺ ജോസഫ്, സി.വി. തോമസ്കുട്ടി, ജോർജ് പുളിങ്കാട്, ബിനു ചെങ്ങളം തുടങ്ങിയവർ പ്രസംഗിച്ചു.

സ്വകാര്യ ബസുകളുടെ സൂചനാ പണിമുടക്ക് എട്ടിന്; 22 മുതല്‍ അനിശ്ചിതകാല പണിമുടക്ക്

ചങ്ങനാശേരി: വിവിധ ആവശ്യങ്ങളുന്നയിച്ച് സ്വകാര്യ ബസുകള്‍ എട്ടിന് പണിമുടക്കും. ഉന്നയിക്കുന്ന വിഷയങ്ങള്‍ സര്‍ക്കാര്‍ അംഗീകരിക്കുന്നില്ലെങ്കില്‍ 22 മുതല്‍ അനിശ്ചിതകാല പണിമുടക്കിനും ആഹ്വാനം ചെയ്തിട്ടുണ്ട്. ലിമിറ്റഡ് സ്റ്റോപ്പ് ദീര്‍ഘദൂര ബസുകളുടെ പെര്‍മിറ്റുകള്‍ അതേപടി പുതുക്കി നല്‍കുക, വിദ്യാര്‍ഥികളുടെ ചാര്‍ജ് വര്‍ധിപ്പിക്കുക, ബസ് ജീവനക്കാര്‍ക്ക് പോലീസ് ക്ലിയറന്‍സ് വേണമെന്ന കരിനിയമം പിന്‍വലിക്കുക, ഇ-ചലാന്‍ വഴിയുള്ള അന്യായ പിഴ ചുമത്തലുകള്‍ അവസാനിപ്പിക്കുക തുടങ്ങിയ വിഷയങ്ങള്‍ ഉന്നയിച്ചാണ് ബസുടമകളുടെ സംയുക്ത സമിതി സമരത്തിന് നോട്ടീസ് നല്‍കിയിരിക്കുന്നത്. സ്വകാര്യ ബസുകളിലും കെഎസ്ആര്‍ടിസിയിലും ഒരുപോലെ സ്‌പോട്ട് ടിക്കറ്റ് സമ്പ്രദായം നടപ്പിലാക്കണം, വിലപിടിപ്പുള്ള ഇലക്‌ട്രോണിക് ഉപകരണങ്ങള്‍ അടിച്ചേല്‍പ്പിക്കുന്ന നടപടി അവസാനിപ്പിക്കുക എന്നീ ആവശ്യങ്ങളും സമരസമിതി ഉന്നയിച്ചിട്ടുണ്ട്.

എഒഎംഎസ്‌ഐ പ്രതിഷേധിച്ചു

കോട്ടയം: ഹെയര്‍ ട്രാന്‍സ്പ്ലാന്‍റ് സര്‍ജറിക്കും മുഖസൗന്ദര്യ ശസ്ത്രക്രിയയ്ക്കും എംഡിഎസ് ഓറല്‍ ആന്‍ഡ് മാക്‌സിലോഫേഷ്യല്‍ സര്‍ജന്‍മാര്‍ക്ക് അധികാരമുണ്ടെന്ന് അസോസിയേഷന്‍ ഓഫ് ഓറല്‍ ആന്‍ഡ് മാക്‌സിലോഫേഷ്യല്‍ സര്‍ജന്‍സ് ഓഫ് ഇന്ത്യ കേരള ശാഖ. എംഡിഎസ് ഓറല്‍ ആന്‍ഡ് മാക്‌സിലോഫേഷ്യല്‍ സര്‍ജന്‍മാര്‍ക്ക് ഹെയര്‍ ട്രാന്‍സ്പ്ലാന്‍റ് ശസ്ത്രക്രിയയ്ക്കും മുഖസൗന്ദര്യ ശസ്ത്രക്രിയകള്‍ക്കും യോഗ്യതയില്ലെന്ന തെലുങ്കാന മെഡിക്കല്‍ കൗണ്‍സിലിന്‍റെ തീരുമാനത്തിൽ എഒഎംഎസ്‌ഐ കേരള ശക്തമായി പ്രതിഷേധിച്ചു. തെലുങ്കാന മെഡിക്കല്‍ കൗണ്‍സിലിന്‍റെ തീരുമാനത്തെ അടിസ്ഥാനമാക്കി മാധ്യമങ്ങളില്‍ വന്ന വാര്‍ത്തകള്‍ തെറ്റായസന്ദേശം പരത്താന്‍ ഇടയാക്കി. എംഡിഎസ് ഓറല്‍ ആന്‍ഡ് മാക്‌സിലോഫേഷ്യല്‍ സര്‍ജന്‍മാര്‍ക്ക് ഫേഷ്യല്‍ കോസ്‌മെറ്റിക് സര്‍ജറിയും ഹെയര്‍ ട്രാന്‍സ്പ്ലാന്‍റും ചെയ്യാനുള്ള നിയമപരമായും ശാസ്ത്രീയമായും പഠനമികവുള്ളവരാണെന്ന് ഡെന്‍റല്‍ കൗണ്‍സില്‍ ഓഫ് ഇന്ത്യ (ഡിസിഐ) വ്യക്തമാക്കിയിട്ടുണ്ട്. കേരള ഡെര്‍മറ്റൊളജി അസോസിയേഷന്‍ (ഐഎഡിവിഎല്‍) സംസ്ഥാന ശാഖയും ഇതുസംബന്ധിച്ച് ഉത്തരവ് നല്‍കിയതാണ്. നാഷണല്‍ മെഡിക്കല്‍ കൗണ്‍സില്‍ (എന്‍എംസി) മാര്‍ഗരേഖകള്‍ ഡെന്‍റല്‍ കൗണ്‍സില്‍ ഓഫ് ഇന്ത്യയുടെ അധികാരപരിധിയില്‍പ്പെടുന്ന എംഡിഎസ് ഓറല്‍ ആന്‍ഡ് മാക്‌സിലോഫേഷ്യല്‍ സര്‍ജന്‍സിന് ബാധകമല്ലെന്ന് എഒഎംഎസ്‌ഐ കേരള വ്യക്തമാക്കി. ലക്ഷക്കണക്കിന് ഹെയര്‍ട്രാന്‍സ്പ്ലാന്‍റ് നടത്തിയിട്ടുള്ള എംഡിഎസ് ഓറല്‍ ആന്‍ഡ് മാക്‌സിലോഫേഷ്യല്‍ സര്‍ജന്‍മാരെ അപൂര്‍വസംഭവങ്ങളുടെ പേരില്‍ കുറ്റപ്പെടുത്തുന്ന് ശരിയല്ലെന്നും എഒഎംഎസ്‌ഐ കേരള ആരോപിച്ചു. പത്രസമ്മേളനത്തില്‍ എഒഎംഎസ്‌ഐ കേരള പ്രസിഡന്‍റ് ഡോ. എൽ‍ദോ മര്‍ക്കോസ്, സെക്രട്ടറി ഡോ. എം. മുരളികൃഷ്ണന്‍, ഡോ. ഈപ്പന്‍ തോമസ് എന്നിവര്‍ പങ്കെടുത്തു. ആശങ്കപ്പെടേണ്ടതില്ല തെറ്റിദ്ധാരണ പരത്തുന്ന വാര്‍ത്തകളില്‍ ആശങ്കപ്പെടാതെ ഹെയര്‍ ട്രാന്‍സ്പ്ലാന്‍റ് സര്‍ജറിക്കും മുഖസൗന്ദര്യ ശസ്ത്രക്രിയയ്ക്കും എംഡിഎസ് ഓറല്‍ ആന്‍ഡ് മാക്‌സിലോഫേഷ്യല്‍ സര്‍ജന്‍മാരെ സമീപിക്കാമെന്നും അംഗീകാരമില്ലാതെയും നിയമവിരുദ്ധമായും പ്രവര്‍ത്തിക്കുന്ന സ്ഥാപനങ്ങള്‍ക്കെതിരേ നടപടി സ്വീകരിക്കണമെന്നും എഒഎംഎസ്‌ഐ കേരള പറഞ്ഞു.

ചങ്ങാതിക്ക് ഒരു മരവുമായി ആവേശത്തോടെ കുട്ടികൾ

പാലാ: സംസ്ഥാന സർക്കാർ നടപ്പിലാക്കുന്ന ചങ്ങാതിക്ക് ഒരു മരം എന്ന ജനകീയ വൃക്ഷവത്കരണ പരിപാടിയിൽ ആവേശത്തോടെ പങ്കുചേർന്ന് പാലാ സെന്‍റ് തോമസ് ഹൈസ്കൂളിലെ വിദ്യാർഥികൾ. സ്കൂൾ അങ്കണത്തിൽ നടന്ന ചടങ്ങിൽ പാലാ രൂപത വികാരി ജനറാൾ മോൺ. സെബാസ്റ്റ്യൻ വേത്താനത്ത് ചങ്ങാതിക്ക് ഒരു മരം പദ്ധതി ഉദ്ഘാടനം ചെയ്തു. തുടർന്നു കുട്ടികൾ വീടുകളിൽനിന്നു കൊണ്ടുവന്ന വൃക്ഷത്തൈകൾ തങ്ങളുടെ പ്രിയപ്പെട്ട ചങ്ങാതിക്കു നൽകി പദ്ധതിയിൽ പങ്കുചേർന്നു. കുട്ടികളും അധ്യാപകരും കൊണ്ടുവന്ന വൃക്ഷത്തൈകൾ സ്കൂൾ വളപ്പിൽ നട്ടുപിടിപ്പിച്ചു. ഹെഡ്മാസ്റ്റർ ഫാ. റെജിമോൻ തെങ്ങുംപള്ളി, പിടിഎ പ്രസിഡന്‍റ് വി.എം. തോമസ് തുടങ്ങിയവർ പരിപാടിക്കു നേതൃത്വം നൽകി.

മാണികാവിൽ കളിസ്ഥലം നിർമാണത്തിനു തുടക്കം

കുറവിലങ്ങാട്: ഉഴവൂർ ബ്ലോക്ക് പഞ്ചായത്ത് പദ്ധതിയിൽ ഉൾപ്പെടുത്തി ജില്ലാ പഞ്ചായത്ത് കുറവിലങ്ങാട് ഡിവിഷനിൽ നടപ്പിലാക്കുന്ന കളിസ്ഥലം നിർമാണത്തിന് തുടക്കമായി. പഞ്ചായത്ത് മൂന്നാം വാർഡിൽ മൂവാറ്റുപുഴ വാലി ഇറിഗ്രഷൻ പ്രോജക്‌ടിന്‍റെ സ്ഥലത്താണ് പുതിയ കളിസ്ഥലം നിർമാണം ആരംഭിക്കുന്നത്. ബ്ലോക്ക് പഞ്ചായത്തംഗം പി.സി. കുര്യൻ മന്ത്രി റോഷി അഗസ്റ്റിനു നൽകിയ നിവേദനത്തിന്‍റെ അടിസ്ഥാനത്തിലാണ് മാണികാവിൽ എംവിഐപി സ്ഥലത്ത് കളിസ്ഥലം നിർമിക്കുന്നതിന് സർക്കാർ അനുമതി നൽകിയത്. 74 മീറ്റർ നീളവും 40 മീറ്റർ വീതിയുമുള്ള സ്ഥലമാണ് കളിസ്ഥലത്തിനായി ബ്ലോക്ക് പഞ്ചായത്തിന് അനുവദിച്ചു നൽകിയിരിക്കുന്നത്. കളിസ്ഥലത്തിന്‍റെ പ്രാരംഭ നിർമാണ പ്രവർത്തനങ്ങൾക്കായി ജില്ലാ പഞ്ചായത്ത് മെംബർ നിർമല ജിമ്മി അനുവദിച്ച പത്തു ലക്ഷം രൂപ ഉൾപ്പെടുത്തിയാണ് ബ്ലോക്ക് പഞ്ചായത്ത് പദ്ധതി തയാറാക്കിയത്. കളിസ്ഥലത്തിന്‍റെ നിർമാണോദ്ഘാടനം നിർമല ജിമ്മി നിർവഹിച്ചു. ബ്ലോക്ക് മെംബർ പി.സി. കുര്യൻ അധ്യക്ഷത വഹിച്ചു. ഞീഴൂർ പഞ്ചായത്ത് പ്രസിഡന്‍റ് ശ്രീകല ദിലീപ്, ബ്ലോക്ക് പഞ്ചായത്തംഗം സിൻസി മാത്യു, പഞ്ചായത്ത് അംഗങ്ങളായ സന്ധ്യ സജികുമാർ, ഇ.കെ. കമലാസനൻ, വിനു കുര്യൻ, ജോമോൻ മറ്റം, സിബി മാണി, കൺവീനർ സുധിഷ് മാണികാവ് എന്നിവർ പ്രസംഗിച്ചു.

തലനാട് പഞ്ചായത്തിലെ അളിഞ്ഞിത്തുരുത്ത് നീക്കംചെയ്യാൻ നടപടി

തലനാട്: തലനാട് പഞ്ചായത്ത് ഒൻപതാം വാർഡ് അളിഞ്ഞി ഭാഗത്ത് മീനച്ചിലാറ്റിൽ രൂപപ്പെട്ട തുരുത്ത് നീക്കം ചെയ്യാൻ മേജർ ഇറിഗേഷൻ വകുപ്പ് ടെൻഡർ നൽകി. മണ്ണും ചെളിയും ഒരേക്കറോളം വിസ്തൃതിയിൽ തുരുത്തായി രൂപപ്പെട്ടതോടെ വർഷകാലത്ത് സമീപത്തെ പതിനഞ്ചോളം വീടുകളിൽ വെള്ളം കയറുന്നത് പതിവായിരുന്നു. പ്രദേശവാസികളുടെ നിരന്തര ആവശ്യത്തെത്തുടർന്നാണ് നടപടി. ജില്ലാ കളക്‌ടറാണ് അളിഞ്ഞി ഭാഗത്തെ തുരുത്ത് നീക്കം ചെയ്യാൻ ഇറിഗേഷൻ വകുപ്പിന് നിർദേശം നൽകിയത്. എൽഡിഎഫ് തലനാട് പഞ്ചായത്ത് കമ്മിറ്റി ഇത് സംബന്ധിച്ച് ജോസ് കെ. മാണി എംപിക്കും സെബാസ്റ്റ്യൻ കുളത്തുങ്കൽ എംഎൽഎയ്ക്കും നിവേദനവും നൽകിയിരുന്നു. പ്രശ്നത്തിൽ ഇടപെട്ട ജനപ്രതിനിധികളെയും ഉദ്യോഗസ്ഥരെയും എൽഡിഎഫ് പഞ്ചായത്ത് കമ്മിറ്റി അഭിനന്ദിച്ചു. എൽഡിഎഫ് കൺവീനർ പി.എസ്. ബാബുവിന്‍റെ അധ്യക്ഷതയിൽ ചേർന്ന അനുമോദന യോഗത്തിൽ സിപിഎം ലോക്കൽ സെകടറി ആശാ റിജു, കേരള കോൺഗ്രസ്-എം മണ്ഡലം പ്രസിഡന്‍റ് സലിം യാക്കിരി, പഞ്ചായത്ത് പ്രസിഡന്‍റ് രജനി സുധാകരൻ, വൈസ് പ്രസിഡന്‍റ് സോളി ഷാജി, പഞ്ചായത്തംഗങ്ങളായ വത്സമ്മ ഗോപിനാഥ്, മില ഹനിഫ തുടങ്ങിയവർ പ്രസംഗിച്ചു.

ഡോക്ടര്‍മാർക്ക് ആദരവുമായി വിദ്യാർഥികൾ

മൂന്നിലവ്: വാകക്കാട് സെന്‍റ് അല്‍ഫോന്‍സ ഹൈസ്‌കൂള്‍ വിദ്യാര്‍ഥികളുടെ നേതൃത്വത്തില്‍ ഇന്നലെ ഡോക്ടര്‍മാരെ ആദരിച്ചു. ഇടമറുക് കുടുംബാരോഗ്യ കേന്ദ്രത്തിലെ മെഡിക്കല്‍ ഓഫീസര്‍ ഡോ. മുഹമ്മദ് ജിജി, ഡോ. ശോഭ, ഡോ. ബോബി കുര്യന്‍, മൂന്നിലവ് പഞ്ചായത്ത് കുടുംബാരോഗ്യകേന്ദ്രം മെഡിക്കല്‍ ഓഫീസര്‍മാരായ ഡോ. നിര്‍മല്‍ ജോസ്, ഡോ. ഇ.എം. സൈനുദീന്‍, മൂന്നിലവ് ഗവ. ആയുര്‍വേദ ആശുപത്രി മെഡിക്കല്‍ ഓഫീസര്‍ ഡോ. എ. കാശ്മീര, മൂന്നിലവ് ഗവ. ഹോമിയോ ഡിസ്‌പെന്‍സറി മെഡിക്കല്‍ ഓഫീസര്‍ ഡോ. നിമ്മി ജോര്‍ജ് എന്നിവരെ സന്ദര്‍ശിച്ച് ആദരവ് അര്‍പ്പിച്ചു. ഹെഡ്മിസ്ട്രസ് സിസ്റ്റര്‍ റ്റെസ്, അധ്യാപകരായ കെ.വി. ജോസഫ്, മനു കെ. ജോസ്, സോയ തോമസ്, ജീമോന്‍ മാത്യു, സി. ജോര്‍ജ് എന്നിവര്‍ പരിപാടികള്‍ക്കു നേതൃത്വം നല്‍കി. ചെമ്മലമറ്റം: ഡോക്‌ടേഴ്സ് ദിനത്തിൽ ദമ്പതികളായ ഡോക്‌ടർമാർക്ക് ആദരവ് നൽകി ചെമ്മലമറ്റം ലിറ്റിൽ ഫ്ളവർ ഹൈസ്കൂൾ. ദന്ത ഡോക്‌ടർമാരായ രഞ്ജിത് ജോർജ്-അൽഫോൻസ് ബേബി എന്നിവർക്കാണ് സ്കൂൾ ഹാളിൽ വിദ്യാർഥികൾ ആദരവ് നൽകിയത്. തുടർന്ന് ദന്തസംരക്ഷണത്തെക്കുറിച്ചും ദന്തരോഗങ്ങളെക്കുറിച്ചും ഡോക്‌ടർമാർ ക്ലാസ് നയിച്ചു. ഹെഡ്മാസ്റ്റർ ജോബെറ്റ് തോമസ്, അധ്യാപകരായ ജിജി ജോസഫ്, അജു ജോർജ്, ഹണി ഫ്രാൻസിസ് തുടങ്ങിയവർ നേതൃത്വം നൽകി.

ഡോക്‌ടർമാരുടെ രക്തദാനവുമായി മരിയന്‍ മെഡിക്കല്‍ സെന്‍റര്‍

പാലാ: ഡോക്‌ടേഴ്‌സ് ഡേയില്‍ ഡോക്‌ടര്‍മാരുടെ രക്തദാനം. പാലാ മരിയന്‍ മെഡിക്കല്‍ സെന്‍ററും പാലാ ബ്ലഡ് ഫോറവും പാലാ റോട്ടറി ക്ലബ്ബും ഐഎംഎയും ചേര്‍ന്ന് മരിയന്‍ മെഡിക്കല്‍ സെന്‍ററില്‍ സംഘടിപ്പിച്ച ദിനാഘോഷത്തിലാണ് ഡോക്‌ടര്‍മാര്‍ രക്തം ദാനം ചെയ്തത്. സമ്മേളനം പാലാ ബ്ലഡ് ഫോറം ജനറല്‍ കണ്‍വീനര്‍ ഷിബു തെക്കേമറ്റം ഉദ്ഘാടനം ചെയ്തു. സൂപ്രണ്ട് ഡോ. മാത്യു തോമസിന്‍റെ അധ്യക്ഷതയില്‍ ചേര്‍ന്ന സമ്മേളനത്തില്‍ ഐഎംഎ മുന്‍ സംസ്ഥാന വൈസ് പ്രസിഡന്‍റ് ഡോ. സിറിയക് തോമസ്, പാലാ റോട്ടറി ക്ലബ് പ്രസിഡന്‍റ് മാത്തുക്കുട്ടി ജോസ്, റോട്ടറി അസിസ്റ്റന്‍റ് ഗവര്‍ണര്‍ ആന്‍റണി വൈപ്പന, പാലാ ബ്ലഡ് ഫോറം ജോയിന്‍റ് സെക്രട്ടറി സജി വട്ടക്കാനാല്‍, ഹോസ്പിറ്റല്‍ ഓപ്പറേഷന്‍ മാനേജര്‍ ബാബു സെബാസ്റ്റ്യന്‍, ബ്ലഡ് ഫോറം ട്രഷറാര്‍ പ്രഫ. സുനില്‍ തോമസ്, സിസ്റ്റര്‍ ബ്ലെസി ജോസി എഫ്‌സിസി, സിസ്റ്റര്‍ ബിന്‍സി എഫ്‌സിസി, ബ്ലഡ് ഫോറം ഡയറക്ടര്‍മാരായ സാബു ഏബ്രഹാം, സൂരജ് പാലാ, ഷാജി തകിടിയേല്‍ എന്നിവര്‍ പ്രസംഗിച്ചു.

ഡോക്‌ടേഴ്സ് ദിനാചരണം

പുതുവെളിച്ചം നേത്രദാന കേന്ദ്രവുമായി മാർ സ്ലീവാ മെഡിസിറ്റി പാലാ: മാര്‍ സ്ലീവാ മെഡിസിറ്റിയില്‍ ഡോക്‌ടേഴ്‌സ് ദിനാചരണം കോട്ടയം മെഡിക്കല്‍ കോളജ് പ്രിന്‍സിപ്പല്‍ ഡോ. വര്‍ഗീസ് പി. പുന്നൂസ് ഉദ്ഘാടനം ചെയ്തു. ആരോഗ്യ രംഗത്ത് ഉത്തമമായ മൂല്യങ്ങള്‍ കാത്തുസൂക്ഷിച്ചു പ്രവര്‍ത്തനം നടത്തുന്ന മാര്‍ സ്ലീവാ മെഡിസിറ്റിയുടെ പ്രവര്‍ത്തനം മാതൃകാപരമാണെന്ന് അദ്ദേഹം പറഞ്ഞു. മാര്‍ സ്ലീവാ മെഡിസിറ്റിയില്‍ ആരംഭിക്കുന്ന നേത്രദാനകേന്ദ്രം പുതുവെളിച്ചത്തിന്‍റെ ലോഞ്ചിംഗും ഡോ. വര്‍ഗീസ് പി. പുന്നൂസ് നിര്‍വഹിച്ചു. ബിഷപ് മാര്‍ ജോസഫ് കല്ലറങ്ങാട്ട് അധ്യക്ഷത വഹിച്ചു. രോഗത്തിന്‍റെ വിഷമവുമായി വരുന്നവരെ ഹൃദയ കണ്ണുകള്‍ കൊണ്ടു കാണുന്നവരാണ് ഡോക്‌ടര്‍മാരെന്ന് ബിഷപ് പറഞ്ഞു. ദി മാര്‍ സ്ലീവന്‍സ് എന്ന ഇ-മാഗസിന്‍റെ പ്രകാശനവും മാർ കല്ലറങ്ങാട്ട് നിര്‍വഹിച്ചു. മുതിര്‍ന്ന ഡോക്ടര്‍മാരായ ഓര്‍ത്തോപീഡിക്‌സ് വിഭാഗം മേധാവിയും സീനിയര്‍ കണ്‍സള്‍ട്ടന്‍റുമായ ഡോ. മാത്യു ഏബ്രഹാം, ചൈല്‍ഡ് ഡെവലപ്‌മെന്‍റ് സെന്‍റര്‍ സീനിയര്‍ കണ്‍സള്‍ട്ടന്‍റ് ഡോ. തോമസ് ഏബ്രഹാം, സൈക്യാട്രി വിഭാഗം സീനിയര്‍ കണ്‍സള്‍ട്ടന്‍റ് ഡോ. റോയി ഏബ്രഹാം കള്ളിവയലില്‍, ലബോറട്ടറി വിഭാഗം സീനിയര്‍ കണ്‍സള്‍ട്ടന്‍റ് ഡോ. റോസമ്മ തോമസ്, ജനറല്‍ മെഡിസിന്‍ വിഭാഗം സീനിയര്‍ കണ്‍സള്‍ട്ടന്‍റ് ഡോ. ജോയി മാണി തെക്കേടത്ത് എന്നിവരെ ചടങ്ങില്‍ ആദരിച്ചു. ആശുപത്രി മാനേജിംഗ് ഡയറക്ടര്‍ മോണ്‍. ജോസഫ് കണിയോടിക്കല്‍, ചീഫ് ഓഫ് മെഡിക്കല്‍ സര്‍വീസസ് എയര്‍ കോമഡോര്‍ ഡോ. പോളിന്‍ ബാബു, മെഡിക്കല്‍ സൂപ്രണ്ട് ഡോ. പി.എന്‍. നിതീഷ് എന്നിവര്‍ പ്രസംഗിച്ചു.

ചങ്ങാതിക്കൊരു മരം പദ്ധതി

വിഴിക്കിത്തോട്: പിവൈഎംഎ ലൈബ്രറിയും ആർവി ഗവൺമെന്‍റ് വിഎച്ച്എസ്‌ സ്കൂളും സംയുക്തമായി ഹോംഗ്രോൺ നഴ്സറിയുടെ സഹായത്തോടെ കുട്ടികൾക്കുവേണ്ടി ചങ്ങാതിക്കൊരു മരം പദ്ധതിക്കു തുടക്കമിട്ടു. ഹോംഗ്രോൺ പ്രതിനിധി സെബാസ്റ്റ്യൻ സ്കൂൾ പ്രഥമാധ്യാപിക എ.എം. ടീനയ്ക്ക് തൈകൾ കൈമാറി പദ്ധതി ഉദ്ഘാടനം ചെയ്തു. ലൈബ്രറി പ്രസിഡന്‍റ് കെ.കെ. പരമേശ്വരൻ, എസ്‌എംസി വൈസ് ചെയർമാൻ സന്തോഷ്‌ മഞ്ഞാക്കൻ, ലൈബ്രറി സെക്രട്ടറി കെ.ബി. സാബു, തോമസ് മാത്യു, ജാൻസി ബാലചന്ദ്രൻ, മുഹമ്മദ്‌ റാഫി, ജോസൻ ബെന്നി എന്നിവർ പ്രസംഗിച്ചു. പദ്ധതിക്ക് വിവിധ സമ്മാനങ്ങളും ലൈബ്രറി പ്രഖാപിച്ചു. ഓരോ ക്ലാസിലും നന്നായി തൈ വളർത്തുന്ന വിദ്യാർഥിയെ വൃക്ഷസ്നേഹി അവാർഡ് നൽകി ആദരിക്കും. ആദ്യം ഫലം പകമാകുന്ന വീട്ടിൽ ആദ്യ ഫല മഹോത്സവവും സംഘടിപ്പിക്കുമെന്ന് ലൈബ്രറി ഭാരവാഹികൾ അറിയിച്ചു.

എരുമേലി വനത്തിൽ ട്രഞ്ച് നിർമാണം മുടങ്ങി

എരുമേലി: വന്യമൃഗങ്ങൾ കാടിറങ്ങാതെ തടയാൻ എരുമേലി വനമേഖലയിലെ വനാതിർത്തി പ്രദേശങ്ങളിൽ ആരംഭിച്ച ഫെൻസിംഗ് ഉൾപ്പെടെയുള്ള നിർമാണ പ്രവർത്തനങ്ങളിൽ ഇനി അവശേഷിക്കുന്നത് കിടങ്ങ് (ട്രഞ്ച്) നിർമാണം. ഇതാകട്ടെ മാസങ്ങളായി പണികൾ നിലച്ച അവസ്ഥയിൽ. കരാറുകാരൻ പണികൾ ഉഴപ്പിയെന്ന് വനംവകുപ്പ് ഉദ്യോഗസ്ഥർ പറയുന്നു. വകുപ്പ് തലത്തിൽ കരാറുകാരനുമായി പല തവണ ഉദ്യോഗസ്ഥർ സംസാരിച്ചെങ്കിലും നിർമാണം തുടരാൻ കഴിഞ്ഞിട്ടില്ല. ഒടുവിൽ കൂടുതൽ സമയം നൽകണമെന്ന് കരാറുകാരൻ ആവശ്യം ഉന്നയിച്ചിട്ടുണ്ട്. അതേസമയം ഹാംഗിംഗ് ഫെൻസിംഗ് നിർമാണ ജോലികൾ പൂർത്തിയായിരുന്നു. 19 കിലോമീറ്റർ ദൂരമാണ് ഫെൻസിംഗ് നിർമിച്ചിരിക്കുന്നത്. പഴയ ഫെൻസിംഗ് പൊളിച്ചുമാറ്റുന്നത് സംബന്ധിച്ച് തീരുമാനമായിട്ടില്ല. പുതിയ ഫെൻസിംഗിനോട്‌ ചേർന്നാണ് പഴയ ഫെൻസിംഗുള്ളത്. ഇത് ഭാഗികമായി പ്രവർത്തനരഹിതമാണ്. പുതിയ ഫെൻസിംഗിന് ഇടയിൽ ഒന്നര കിലോമീറ്ററാണ് കിടങ്ങ് നിർമിച്ചു കൊണ്ടിരിക്കുന്നത്. ഇതിന്‍റെ നിർമാണം പാതിവഴിയിൽ നിലച്ച അവസ്ഥയിലാണ്. കോയിക്കക്കാവ് ശബരിമല കാനനപാതയിലാണ് കിടങ്ങ് നിർമിക്കുന്നത്. പദ്ധതി പൂർത്തിയാകുമ്പോൾ എരുമേലി ഫോറസ്റ്റ് റേഞ്ചിൽ പമ്പാവാലി, കാളകെട്ടി, തുമരംപാറ, പാക്കാനം വനമേഖലയിൽ ജനവാസ പ്രദേശങ്ങളിലെ വനാതിർത്തികൾ പൂർണമായും വന്യമൃഗ പ്രതിരോധ വലയത്തിലാകുമെന്ന് വനംവകുപ്പ് പറയുന്നു. അതേസമയം തുടർ പരിപാലനം ഇല്ലെങ്കിൽ പദ്ധതി പ്രയോജനരഹിതമാകും. കഴിഞ്ഞയിടെ എരുമേലി വനമേഖലയിലെ ഹാംഗിംഗ്, കിടങ്ങ് നിർമാണങ്ങൾ സെബാസ്റ്റ്യൻ കുളത്തുങ്കൽ എംഎൽഎ നേരിൽ കണ്ട് വിലയിരുത്തിയിരുന്നു. എരുമേലി, കോരുത്തോട്, മുണ്ടക്കയം പഞ്ചായത്തുകളിലായി മൊത്തം 30 കിലോമീറ്റർ ദൂരത്തിലാണ് പദ്ധതി. ഇത് പൂർത്തിയായാൽ വനാതിർത്തി പൂർണമായും സുരക്ഷിതത്വ സംവിധാനങ്ങൾ ഒരുക്കുന്ന കേരളത്തിലെ ആദ്യത്തെ നിയോജകമണ്ഡലമായി പൂഞ്ഞാർ മാറുമെന്നാണ് കരുതുന്നത്. മൊത്തം 34 കോടി രൂപയാണ് ഇതിനായി ചെലവിടുന്നത്.

ഡോക്‌ടേഴ്സ് ദിനാചരണം

കാളകെട്ടി: ഡോക്‌ടേഴ്സ് ദിനാചരണത്തിന്‍റെ ഭാഗമായി കത്തോലിക്ക കോൺഗ്രസ്‌ കപ്പാട് യൂണിറ്റിന്‍റെ ആഭിമുഖ്യത്തിൽ കാളകെട്ടി അസീസി ആശുപത്രിയിലെ ഡോ. സോഫി ഫ്രാൻസിസിനെ ആദരിച്ചു. കത്തോലിക്ക കോൺഗ്രസ്‌ ഗ്ലോബൽ വൈസ് പ്രസിഡന്‍റ് ജോമി കൊച്ചുപറമ്പിൽ യോഗം ഉദ്ഘാടനം ചെയ്തു. യൂണിറ്റ് പ്രസിഡന്‍റ് ജോൺസൺ പന്തപ്ലാക്കൽ അധ്യക്ഷത വഹിച്ചു. രൂപത ട്രഷറർ ജോജോ തെക്കുംചേരിക്കുന്നേൽ, രൂപത സമിതിയംഗം ജോബി തെക്കുംചേരിക്കുന്നേൽ, സണ്ണി കിഴവഞ്ചിയിൽ, ജോയി പാലക്കുടി, സ്വപ്‌നിൽ കല്ലൂകുളങ്ങര, മാത്യു വെള്ളാത്തോട്ടം, ജോഷി കൊടിപ്പറമ്പിൽ, സിസ്റ്റർ ജോൺസി ഫ്രാൻസിസ് എന്നിവർ പ്രസംഗിച്ചു. ചെങ്ങളം: സെന്‍റ് ആന്‍റണീസ് എൽപി സ്കൂളിൽ ഡോക്‌ടേഴ്സ് ഡേ ആചരണവും വിവിധ ക്ലബ്ബുകളുടെ ഉദ്ഘാടനവും നടത്തി. ഡെന്‍റൽ സർജൻ ഡോ. അജു ജോർജ് കാഞ്ഞിരപ്പള്ളി, ഗവൺമെന്‍റ് ഹോസ്പിറ്റൽ മെഡിക്കൽ ഓഫീസർ ഡോ. റിച്ചിൻ മരിയ എന്നിവർ ഉദ്ഘാടനം ചെയ്തു. തുടർന്ന് കുട്ടികൾക്കായി ക്ലാസുകൾ നയിച്ചു. ഡോക്ടർമാർക്ക് ഉപഹാരങ്ങൾ നൽകി ആദരിച്ചു.

ദുക്റാന തിരുനാളിന് പൊതുഅവധി പ്രഖ്യാപിക്കണം: എസ്എംവൈഎം

കാഞ്ഞിരപ്പള്ളി: ജൂലൈ മൂന്ന് ദുക്റാന തിരുനാളിന് പൊതുവിദ്യാഭ്യാസ സ്ഥാപനങ്ങൾക്ക് അവധി പ്രഖ്യാപിക്കണമെന്ന് ആവശ്യപ്പെട്ട് കാഞ്ഞിരപ്പള്ളി ഫൊറോന എസ്എംവൈഎം ഭാരവാഹികൾ മന്ത്രി റോഷി അഗസ്റ്റിന് നിവേദനം നൽകി. ക്രൈസ്തവർ പരിപാവനമായി ആചരിക്കുന്ന പുണ്യദിനമാണ് ദുക്റാന തിരുനാൾ. അന്നേദിവസം കേരളത്തിലെ ക്രൈസ്തവർ സഭാദിനമായും ആചരിക്കുന്നു. മാർത്തോമ്മാ ശ്ലീഹായുടെ ദുക്റാന തിരുനാളിന്‍റെ പ്രാധാന്യം മനസിലാക്കി സർക്കാർ വിദ്യാഭ്യാസ സ്ഥാപനങ്ങൾക്ക് അവധി പ്രഖ്യാപിക്കണമെന്ന് എസ്എംവൈഎം ഭാരവാഹികൾ ആവശ്യപ്പെട്ടു. ഫൊറോന പ്രസിഡന്‍റ് അലൻ എസ്. വെള്ളൂർ, വൈസ് പ്രസിഡന്‍റ് റോഷ്നി ജോർജ്, ഭാരവാഹികളായ എബിൻ തോമസ്, ജോയൽ ജോബി, ജ്യോതിസ് മരിയ എന്നിവർ പ്രസംഗിച്ചു.

ജനറൽ ആശുപത്രിയിൽ പോസ്റ്റ്മോർട്ടം കോംപ്ലക്‌സ് ഉദ്ഘാടനം നാളെ

കാഞ്ഞിരപ്പള്ളി: ജനറൽ ആശുപത്രിയിലെ പുതിയ പോസ്റ്റ്മോർട്ടം മോർച്ചറി കോംപ്ലക്‌സിന്‍റെയും ഡയാലിസിസ് സെന്‍റർ നിർമാണത്തിന്‍റെയും ഉദ്ഘാടനം നാളെ വൈകുന്നേരം അഞ്ചിന് നടക്കും. ആരോഗ്യമന്ത്രി വീണാ ജോർജ് ഉദ്ഘാടനം ചെയ്യും. ചീഫ് വിപ്പ് ഡോ. എൻ. ജയരാജ് അധ്യക്ഷത വഹിക്കും. ആന്‍റോ ആന്‍റണി എംപി മുഖ്യപ്രഭാഷണം നടത്തും. ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗർ, ജില്ലാ പഞ്ചായത്തംഗങ്ങളായ പി.ആർ. അനുപമ, ടി.എൻ. ഗിരീഷ്കുമാർ, വാഴൂർ ബ്ലോക്ക് പഞ്ചായത്ത് പ്രസിഡന്‍റ് മുകേഷ് കെ. മണി, ബ്ലോക്ക് വൈസ് പ്രസിഡന്‍റ് ഗീത എസ്. പിള്ള, ബ്ലോക്ക് പഞ്ചായത്തംഗങ്ങളായ ഷാജി പാമ്പൂരി, ലതാ ഷാജൻ, പി.എം. ജോൺ, ബി. രവീന്ദ്രൻ നായർ, കോട്ടയം പൊതുമരാമത്ത് കെട്ടിട വിഭാഗം എക്‌സിക്യൂട്ടീവ് എൻജിനിയർ ആർ. ദീപ, വാർഡ് മെംബർ ആന്‍റണി മാർട്ടിൻ, ആശുപത്രി സൂപ്രണ്ട് ഡോ. സാവൻ സാറാ മാത്യു എന്നിവർ പ്രസംഗിക്കും. പോസ്റ്റ്മോർട്ടം മോർച്ചറി കോംപ്ലക്‌സിൽ എട്ട് മൃതദേഹങ്ങൾ സൂക്ഷിക്കാനുള്ള ശീതീകരണ സംവിധാനവും ആധുനിക പോസ്റ്റ്മോർട്ടം ടേബിളും വാഴൂർ ബ്ലോക്ക് പദ്ധതിയിൽ ഉൾപ്പെടുത്തി സ്ഥാപിച്ചിട്ടുണ്ട്. ഒരു മാനുവൽ ടേബിൾ, ഇൻക്വസ്റ്റ് മുറി, സ്റ്റോർ, ആംബുലൻസ് ഷെഡ്, കാത്തിരിപ്പ് ഏരിയ, കംപ്യൂട്ടർ അനുബന്ധ ഉപകരണങ്ങൾ, മലിനജലം സ്വീവേജ് ട്രീറ്റ്‌മെന്‍റ് പ്ലാന്‍റിലേക്ക് ഒഴുക്കിവിടുന്നതിനുള്ള സൗകര്യങ്ങൾ തുടങ്ങിയവ ഒരുക്കിയിട്ടുണ്ട്. നിർമാണം ആരംഭിക്കുന്ന ഡയാലിസിസ് സെന്‍ററിന് ജില്ലാ, ബ്ലോക്ക്, പഞ്ചായത്തുകൾ ഒരുകോടിയോളം രൂപ വകയിരുത്തിയിട്ടുണ്ട്. ഏഴ് ബെഡ് സ്ത്രീകൾക്കും ഏഴ് ബെഡുകൾ പുരുഷന്മാർക്കും ഒരു ഐസൊലേഷൻ ബെഡും അടങ്ങുന്നതാണ് ഡയാലിസിസ് സെന്‍റർ. ജില്ലാ മെഡിക്കൽ ഓഫീസറുടെ മേൽനോട്ടത്തിൽ നിർമിതി കേന്ദ്രത്തിനാണ് നിർമാണച്ചുമതല. നിർമാണം പൂർത്തീകരിച്ച് കഴിയുമ്പോൾ കോട്ടയം, പത്തനംതിട്ട, ഇടുക്കി ജില്ലകളിലെ ഒട്ടേറെ രോഗികൾക്ക് സെന്‍റർ ആശ്വസമാകും.

കൈക്കുഞ്ഞുമായി ഇതര സംസ്ഥാന യുവതി; സംശയം തോന്നിയ നാട്ടുകാർ പോലീസിൽ ഏൽപ്പിച്ചു

മുണ്ടക്കയം: കൈക്കുഞ്ഞുമായി അന്യസംസ്ഥാന യുവതിയെ കണ്ട് സംശയം തോന്നിയ നാട്ടുകാർ പോലീസിൽ ഏൽപ്പിച്ചു. മുണ്ടക്കയം ടൗണിൽ ഇന്നലെ ഉച്ചയോടെയാണ് സംഭവം. കൈക്കുഞ്ഞുമായി മുണ്ടക്കയം ടൗണിലൂടെ കറങ്ങിനടന്ന യുവതിയെ സംശയം തോന്നിയതിനെത്തുടർന്നാണ് നാട്ടുകാർ പോലീസിൽ ഏൽപ്പിച്ചത്. ടൗണിലൂടെ നടന്ന യുവതിയുടെ കൈയിലിരുന്ന് കുഞ്ഞ് ഏറെ നേരമായി കരയുന്നത് ചിലർ ശ്രദ്ധിച്ചു. വിവരങ്ങൾ ചോദിക്കാൻ ശ്രമിച്ചതോടെ ഭാഷ വശമില്ലാത്ത ഇവർ ഓടി രക്ഷപ്പെടാൻ ശ്രമിക്കുകയായിരുന്നു. തുടർന്നാണ് നാട്ടുകാർ മുണ്ടക്കയം പോലീസിനെ വിവരമറിയിക്കുന്നത്. പോലീസ് ഇവരെ സ്റ്റേഷനിലേക്ക് കൂട്ടിക്കൊണ്ടു പോയി വിവരങ്ങൾ ആരാഞ്ഞു. പശ്ചിമ ബംഗാൾ സ്വദേശിയായ യുവതി കഴിഞ്ഞ ഒരു വർഷമായി കാഞ്ഞിരപ്പള്ളിയിലാണ് ജോലി നോക്കിയിരുന്നത്. ഭർത്താവ് മരിച്ച യുവതി കാഞ്ഞിരപ്പള്ളിയിലെ ജോലി നഷ്ടമായതോടെ മുണ്ടക്കയത്ത് ജോലി അന്വേഷിച്ചുവന്നതാണെന്നും സഹോദരനോടൊപ്പമാണ് കഴിയുന്നതെന്നും പോലീസിനോട് പറഞ്ഞു. പോലീസ് സഹോദരനെ വിളിച്ചുവരുത്തി കുട്ടിയുടെ ജനന സർട്ടിഫിക്കറ്റ് അടക്കമുള്ള രേഖകൾ പരിശോധിച്ചതിന്‍റെ അടിസ്ഥാനത്തിൽ യുവതിയെയും കുഞ്ഞിനെയും സഹോദരനൊപ്പം വിട്ടയച്ചു.

മുണ്ടക്കയം ബൈപാസിൽ നിർത്തിയിട്ടിരുന്ന തടിലോറി ചെരിഞ്ഞു

മുണ്ടക്കയം: ബൈപാസ് റോഡിൽ നിർത്തിയിട്ടിരുന്ന തടിലോറി വശത്തേക്ക് ചെരിഞ്ഞു. കുഴിയിലേക്ക് താഴ്ന്ന ലോറി മണ്ണുമാന്തിയന്ത്രം ഉപയോഗിച്ച് ഉയർത്തി. മുണ്ടക്കയം ബൈപാസ് റോഡിൽ ഇന്നലെ ഉച്ചയോടെയാണ് സംഭവം. റബർത്തടിയുമായി വന്ന ലോറി ബൈപാസ് റോഡിന്‍റെ വശത്ത് പാർക്ക് ചെയ്യുകയായിരുന്നു. ഒരു വശത്തേക്ക് ചെരിഞ്ഞ് ലോറി അപകടാവസ്ഥയിലായതിനെത്തുടർന്ന് ഇവിടെനിന്നു മാറ്റാൻ ശ്രമിച്ചെങ്കിലും സാധിച്ചില്ല. ബൈപാസ് റോഡിന്‍റെ വശത്തെ കോൺക്രീറ്റിംഗ് പൊട്ടി ലോറിയുടെ പിൻഭാഗത്തെ ടയറുകൾ കുഴിയിലേക്ക് താഴുകയായിരുന്നു. ഉടൻതന്നെ സമീപത്തെ വേ ബ്രിഡ്ജിൽ ജോലി ചെയ്തിരുന്ന തൊഴിലാളികളെത്തി വടം ഉപയോഗിച്ച് ലോറി കെട്ടിനിർത്തുകയായിരുന്നു. പിന്നീട് രണ്ടു മണ്ണുമാന്തി യന്ത്രങ്ങളുടെ സഹായത്തോടെ ലോറി കുഴിയിൽനിന്ന് കയറ്റി. ലോറിയുടെ പിൻഭാഗം താഴ്ന്ന റോഡിന്‍റെ ഭാഗത്ത് വലിയ കുഴി രൂപപ്പെട്ടിട്ടുണ്ട്. രാത്രിയിൽ മറ്റ് വാഹനങ്ങൾ ഈ കുഴിയിൽ ചാടി അപകടത്തിൽപ്പെടാനുള്ള സാധ്യത ഏറെയാണ്. റോഡിന്‍റെ വശങ്ങളിൽ അനധികൃതമായി തടി കൂട്ടിയിടുന്നത് അപകടങ്ങൾക്ക് ഇടയാക്കുന്നുണ്ടെന്നും ഇതിനെതിരേ യാതൊരു നടപടിയും സ്വീകരിക്കാൻ അധികാരികൾ തയാറാകുന്നില്ലെന്നും ആരോപണമുണ്ട്.

അരുവിത്തുറ കോളജിൽ ദീക്ഷാരംഭ് വിജ്ഞാനോത്സവത്തിന് തുടക്കം

അരുവിത്തുറ: സെന്‍റ് ജോർജ്സ് കോളജിലെ പുതിയ ബിരുദ ബാച്ചുകളുടെ അധ്യയന വർഷത്തിന് തുടക്കമായി സംസ്ഥാന സർക്കാരിന്‍റെ വിജ്ഞാനോത്സം പരിപാടിയുടെ ഭാഗമായി കോളജിൽ ദീക്ഷാരംഭ് വിജ്ഞാനോത്സവം സംഘടിപ്പിച്ചു. കോളജ് മാനേജർ വെരി റവ.ഫാ. സെബാസ്റ്റ്യൻ വെട്ടുകല്ലേൽ അധ്യക്ഷത വഹിച്ച ചടങ്ങിൽ പൂഞ്ഞാർ എംഎൽഎ സെബാസ്റ്റ്യൻ കുളത്തുങ്കൽ വിജ്ഞാനോത്സവത്തിന് തിരി തെളിയിച്ചു. ഉദ്ഘാടന ചടങ്ങിന്‍റെ ഭാഗമായി വിദ്യാർഥികൾ ദീപം തെളിച്ച് പ്രതിജ്ഞയെടുത്തു. കോളജ് ബർസാർ റവ. ഫാ. ബിജു കുന്നയ്ക്കാട്ട് വിദ്യാർഥികൾക്ക് പ്രതിജ്ഞാ വാചകം ചൊല്ലി കൊടുത്തു. വൈസ് പ്രിൻസിപ്പൽ ഡോ. ജിലു ആനി ജോൺ, ഐക്യുഎസി കോഓർഡിനേറ്റർ ഡോ. സുമേഷ് ജോർജ്, അഡ്മിഷൻ സെൽ കൺവീനർ ജോബി ജോസഫ് തുടങ്ങിയവർ സംസാരിച്ചു.

ഓൺലൈൻ തട്ടിപ്പ്: വടവാതൂർ സ്വദേശിയുടെ 1.64 കോടി തട്ടിയ പ്രതി അറസ്റ്റിൽ

കോട്ടയം: ഓൺലൈൻ തട്ടിപ്പുവഴി വടവാതൂർ സ്വദേശിയുടെ ഒരു കോടി അറുപത്തിനാല് ലക്ഷം രൂപ തട്ടിയ പ്രതി വിശാഖപട്ടണത്തുനിന്നും അറസ്റ്റിലായി. വിശാഖപട്ടണം ഗാന്ധിനഗർ സ്വദേശിയായ രമേഷ് വെല്ലംകുള (33) ആണ് കോട്ടയം സൈബർ പോലീസിന്‍റെ പിടിയിലായത്. ഓൺലൈൻ ഷെയർ ട്രേഡിംഗ് ബിസിനസിലൂടെ ലാഭമുണ്ടാക്കിത്തരാമെന്ന് വിശ്വസിപ്പിച്ചശേഷം ചെറിയ തുക നിക്ഷേപിച്ച് ട്രേഡിംഗിലൂടെ എന്നു പറഞ്ഞു ലാഭംകൊടുത്ത് വിശ്വാസം ആർജിച്ചശേഷം തട്ടിപ്പ് നടത്തുകയായിരുന്നു. വലിയ തുകയുടെ ട്രേഡിംഗിലൂടെ വലിയ ലാഭം ഉണ്ടാക്കിത്തരാമെന്ന് പറഞ്ഞു വിശ്വസിപ്പിച്ച് പല പ്രാവശ്യമായി 1,64,00,141 രൂപ പല അക്കൗണ്ടുകളിൽനിന്നായി പ്രതി കൈക്കലാക്കുകയായിരുന്നു. ഏപ്രിൽ 28 മുതൽ മേയ് 20 വരെയുള്ള കാലയളവിലാണ് കേസിനാസ്പദമായ സംഭവം. ഓൺലൈനിൽ ഷെയർ ട്രേഡിംഗിനെക്കുറിച്ച് സെർച്ച് ചെയ്ത യുവാവിന് വാട്സാപ്പിൽ കങ്കണ ശർമ എന്ന പേരിൽ”ഷെയർ ട്രേഡിംഗിൽ താല്പര്യമുണ്ടോ ഞങ്ങൾ സഹായിക്കാം’’ എന്ന മെസേജ് ലഭിച്ചു. ഈ സമയം കമ്പനിയെക്കുറിച്ചും സ്റ്റാഫിനെപ്പറ്റിയും അന്വേഷിച്ചതിൽ ഇങ്ങനെ ഒരു സ്ഥാപനം നിലവിലുണ്ടെന്നും കങ്കണ ശർമ എന്ന ഒരു സ്റ്റാഫ് ഈ സ്ഥാപനത്തിൽ ഉണ്ടെന്നും യുവാവിന് ബോധ്യപ്പെട്ടു. തട്ടിപ്പുകാർ വാട്സ്ആപ്പ് വഴി അയച്ചുകൊടുത്ത ലിങ്കിൽ ക്ലിക്ക് ചെയ്ത യുവാവ് തട്ടിപ്പുകാർ തയാറാക്കിയ വ്യാജ കമ്പനിയുടെ സൈറ്റിൽ പ്രവേശിക്കുകയായിരുന്നു. തട്ടിപ്പുകാർ ആവശ്യപ്പെട്ട തുക അയച്ചുകൊടുത്തു ട്രേഡിംഗ് നടത്തിയ യുവാവ്, നിക്ഷേപിച്ച തുകയ്ക്ക് വലിയ തുക ലാഭമായി തന്‍റെ അക്കൗണ്ടിൽ വന്നതായി ബോധ്യപ്പെട്ടു. എന്നാൽ, ഈ തുക പിൻവലിക്കാൻ ശ്രമിച്ചപ്പോഴാണ് താൻ പറ്റിക്കപ്പെടുകയായിരുന്നുവെന്നും തനിക്ക് പണം നഷ്ടപ്പെട്ടെന്നും യുവാവിന് ബോധ്യമായത്. ജില്ലാ പോലീസ് ചീഫ് ഷാഹുൽ ഹമീദിന്‍റെ നിർദേശപ്രകാരം അന്വേഷണസംഘം നടത്തിയ പരിശോധനയിലാണ് പ്രതിയെ വിശാഖപട്ടണത്തുനിന്നു പിടികൂടിയത്. ഇയാളെ കോടതിയിൽ ഹാജരാക്കി.

പുതിയ പദ്ധതികള്‍ എംജി സര്‍വകലാശാലയുടെ കായികമുന്നേറ്റത്തിനു കരുത്തേകും: മന്ത്രി വാസവന്‍

കോട്ടയം: കായിക മേഖലയിലെ അടിസ്ഥാനസൗകര്യ വികസനത്തിനായി സര്‍ക്കാര്‍ നടപ്പാക്കുന്ന പദ്ധതികള്‍ എംജി സര്‍വകലാശാലയുടെ ഈ രംഗത്തെ മുന്നേറ്റത്തിനു കരുത്തുപകരുമെന്ന് മന്ത്രി വി.എന്‍. വാസവന്‍. 2023-24 വര്‍ഷത്തില്‍ കായികമേഖലയില്‍ മികവു പുലര്‍ത്തിയ കോളജുകളെയും താരങ്ങളെയും അനുമോദിക്കുന്ന ചടങ്ങ് സര്‍വകലാശാലയില്‍ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. വൈസ് ചാന്‍സലര്‍ ഡോ. സി.ടി. അരവിന്ദകുമാര്‍ അധ്യക്ഷത വഹിച്ചു. മുന്‍ രാജ്യാന്തര കായികതാരങ്ങളായ ഷൈനി വിത്സനും വിത്സന്‍ ചെറിയാനും വിശിഷ്ടാതിഥികളായിരുന്നു. സിന്‍ഡിക്കേറ്റ് അംഗങ്ങളായ അഡ്വ. റെജി സക്കറിയ, പി. ഹരികൃഷ്ണന്‍, ഡോ. ബിജു തോമസ്, എ.എസ്. സുമേഷ്, ഡോ. ടി.വി. സുജ, സര്‍വകലാശാലാ രജിസ്ട്രാര്‍ ഡോ. ബിസ്മി ഗോപാലകൃഷ്ണന്‍, പരീക്ഷാ കണ്‍ട്രോളര്‍ ഡോ. സി.എം. ശ്രീജിത്ത്, സ്‌കൂള്‍ ഓഫ് ഫിസിക്കല്‍ എജ്യുക്കേഷന്‍ ആന്‍ഡ് സ്പോര്‍ട്സ് സയന്‍സസ് ഡയറക്ടര്‍ ഡോ. ബിനു ജോര്‍ജ് വര്‍ഗീസ്, ഫിസിക്കല്‍ എജ്യുക്കേഷന്‍ ടീച്ചേഴ്സ് അസോസിയേഷന്‍ പ്രസിഡന്‍റ് ജോസ് സേവ്യര്‍, കെ.കെ. സ്വാതി എന്നിവര്‍ പങ്കെടുത്തു.

ജീവിതവിജയത്തിന് വ്യക്തമായ ലക്ഷ്യം വേണം: ഡോ. എസ്. ശശി ആനന്ദ് ശ്രീധരന്‍

കോട്ടയം: ജീവിതത്തില്‍ വിജയം നേടണമെങ്കില്‍ വ്യക്തമായ ലക്ഷ്യം വേണമെന്നു തമിഴ്‌നാട് കലശലിംഗം യൂണിവേഴ്‌സിറ്റി വൈസ് പ്രസിഡന്‍റ് ഡോ. എസ്. ശശി ആനന്ദ് ശ്രീധരന്‍. സെയിന്‍റ്ഗിറ്റ്‌സ് കോളജ് ഓഫ് എന്‍ജിനിയറിംഗിൽ (ഓട്ടോണമസ്) നിന്നും ബാച്ചിലര്‍ ഡിഗ്രി പൂര്‍ത്തിയാക്കിയ രണ്ടാമത് ബാച്ചിന്‍റെയും മാസ്റ്റര്‍ ബിരുദങ്ങള്‍ പൂര്‍ത്തിയാക്കിയ നാലാമത് ബാച്ചിന്‍റെയും കോണ്‍വൊക്കേഷന്‍ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഡയറക്ടര്‍ തോമസ് ടി. ജോണ്‍ ചടങ്ങില്‍ അധ്യക്ഷത വഹിച്ചു. പ്രിന്‍സിപ്പല്‍ ഡോ. സുധ ടി., എക്‌സിക്യൂട്ടീവ് ചെയര്‍മാന്‍ പുന്നൂസ് ജോര്‍ജ്, അസോസിയേറ്റ് ഡയറക്ടര്‍ ഡോ. റീബു സക്കറിയ, വൈസ് പ്രിന്‍സിപ്പൽ ഡോ. റോജി ജോര്‍ജ്, എംസിഎ ഡയറക്ടര്‍ മിനി പുന്നൂസ്, ചീഫ് ഡിജിറ്റല്‍ ഓഫീസര്‍ ഡോ. നവീന്‍ ജോണ്‍ പുന്നൂസ്, കണ്‍ട്രോളര്‍ ഓഫ് എക്‌സാമിനേഷന്‍സ് ഡോ. റിബോയ് ചെറിയാന്‍, ഡോ. സൂസന്‍ ജോര്‍ജ്, ഡോ. ജി. ഷൈനി, ഡോ. ജോസ് ജോയി തോപ്പന്‍, ഡോ. ജയദേവി വേണുഗോപാല്‍, വിവിധ വകുപ്പ് മേധാവികള്‍ എന്നിവര്‍ ചടങ്ങില്‍ സംബന്ധിച്ചു.

പാന്പാടിയിൽ തെരുവുനായ ആക്രമണത്തിൽ മൂന്നുപേർക്കു ഗുരുതര പരിക്ക്

പാമ്പാടി: തെരുവുനായയുടെ ആക്രമണത്തിൽ ഗുരുതര പരിക്കേറ്റ മൂന്നുപേർ കോട്ടയം മെഡിക്കൽ കോളജിൽ. ഇന്നലെ ഉച്ചകഴിഞ്ഞ് 1.30ന് കുറ്റിക്കൽ സെന്‍റ് തോമസ് ഹൈസ്കൂളിന് കിഴക്കുവശം ചാത്തൻപുരയിടത്ത് അനീഷ് സി. കുര്യാക്കോസിനാണ് ആദ്യം നായയുടെ കടിയേറ്റത്.അനീഷിന്‍റെ ചുണ്ടിലും മുഖത്തും കൈയിലും കടിയേറ്റു. തുടർന്ന് അമ്പാട്ട് ജോബി കുര്യാക്കോസിന്‍റെ കാലിൽ കടിച്ച നായ ചുണ്ടിന്‍റെ ഒരു ഭാഗം കടിച്ചെടുത്ത് കിഴക്കോട്ട് ഓടി. തുടർന്ന് മുളേക്കുന്ന്‌ കിഴക്കയിൽ കെ.എസ്. ചാക്കോയെ (കുഞ്ഞൂട്ടി) കടിച്ചു. കന്നുവെട്ടി ഭാഗത്ത് കൊല്ലംപറമ്പിൽ ജോസഫ് കുര്യനെ (റ്റിറ്റു) മാന്തിയ നായ വെള്ളറയിൽ മോഹനന്‍റെ ദേഹത്ത് ചാടിക്കയറി. ചാത്തൻപുരയിടത്ത് തോമസ് കുര്യാക്കോസിന്‍റെയും വെള്ളറയിൽ മോഹനന്‍റെയും വീട്ടിലെ കോഴികളെ നായ കടിച്ചുകൊന്നു. ഗുരുതര പരിക്കുകളുള്ള അനീഷും ജോബിയും ചാക്കോയും പാമ്പാടി താലൂക്ക് ആശുപത്രിയിൽ പ്രാഥമിക ചികിത്സ നേടി. പാമ്പാടിയിൽനിന്ന് ആന്‍റി റാബീസ് വാക്സിനും ടിടിയും എടുത്തശേഷം പരിക്ക് ഗുരുതരമായതിനാലും കഴുത്തിന് മുകളിലായതിനാലും പേവിഷബാധ സംശയിക്കുന്നതിനാലും വിദഗ്ധ പരിശോധനയ്ക്കുശേഷം ഇമ്യൂണോഗ്ലോബിൻ വാക്സിൻ നൽകേണ്ടി വന്നേക്കാമെന്നതിനാൽ അവരെ കോട്ടയം മെഡിക്കൽ കോളജിലേക്ക് അയച്ചു. പാമ്പാടി പഞ്ചായത്ത് മുൻ വൈസ് പ്രസിഡന്‍റ് സിജു കെ. ഐസക്ക്, കൊല്ലംപറമ്പിൽ റ്റിജു, റ്റിറ്റു, വെള്ളറയിൽ മോഹനൻ എന്നിവരുടെ നേതൃത്വത്തിൽ നായയെ വിരട്ടിയോടിച്ചു.പഞ്ചായത്ത് മെംബർ സുനിത ദീപുവും പഞ്ചായത്ത് അധികൃതരും സ്ഥലത്തെത്തിയിരുന്നു.

വ്യാപാരി വ്യവസായികളുടെ സേവനം സമൂഹത്തിന് അനിവാര്യം: ചാണ്ടി ഉമ്മൻ

പാമ്പാടി: വ്യാപാരി വ്യവസായികളുടെ സേവനം പൊതുസമൂഹത്തിനും നാടിന്‍റെ വികസനത്തിനും അനിവാര്യമാണെന്ന് ചാണ്ടി ഉമ്മൻ എംഎൽഎ. കേരള വ്യാപാരി വ്യവസായി ഏകോപന സമിതി പാമ്പാടി യൂണിറ്റിന്‍റെ 48-ാം വാർഷികവും കുടുംബസംഗമവും ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. യൂണിറ്റ് പ്രസിഡന്‍റ് കുര്യൻ സഖറിയ അധ്യക്ഷത വഹിച്ചു. ചെറിയാൻ ഫിലിപ്പ്, അനൂപ് എന്നിവരെ യോഗത്തിൽ ആദരിച്ചു. കെവിവിഇഎസ് സംസ്ഥാന വൈസ് പ്രസിഡന്‍റ് എം.കെ. തോമസുകുട്ടി, എ.കെ.എൻ. പണിക്കർ, പഞ്ചായത്ത് പ്രസിഡന്‍റ് ഡാലി റോയി, ഷാജി പി. മാത്യു, എം.എം. ശിവബിജു എന്നിവർ പ്രസംഗിച്ചു.

പി.ജെ. ജോസഫിനെ കേരള കര്‍ഷക യൂണിയന്‍ ആദരിച്ചു

കോട്ടയം: ശതാഭിഷേക നിറവിലെത്തിയ കേരള കോണ്‍ഗ്രസ് ചെയര്‍മാന്‍ പി.ജെ. ജോസഫ് എംഎല്‍എയ്ക്ക് കേരള കര്‍ഷക യൂണിയന്‍ സംസ്ഥാന കമ്മിറ്റിയുടെ ആദരം. പുറപ്പുഴയിലെ വസതിയിലെത്തിയാണ് നേതാക്കള്‍ പി.ജെ. ജോസഫിനെ ആദരിച്ചത്. സംസ്ഥാന പ്രസിഡന്‍റ് വര്‍ഗീസ് വെട്ടിയാങ്കല്‍, സംസ്ഥാന ജനറല്‍ സെക്രട്ടറി ജോസ് ജയിംസ് എന്നിവര്‍ ചേര്‍ന്ന് പൊന്നാടയണിയിക്കുകയും മെമന്‍റോ നല്‍കുകയും ചെയ്തു. തുടര്‍ന്ന് കേക്ക് മുറിച്ചു. കേരള കോണ്‍ഗ്രസ് സംസ്ഥാന ഡെപ്യുട്ടി ചെയര്‍മാന്മാരായ ഫ്രാന്‍സിസ് ജോര്‍ജ് എംപി, തോമസ് ഉണ്ണിയാടന്‍, സംസ്ഥാന കോ-ഓര്‍ഡിനേറ്റര്‍ അപു ജോണ്‍ ജോസഫ്, സംസ്ഥാന ജനറല്‍ സെക്രട്ടറി എം. മോനിച്ചന്‍, നിയോജകമണ്ഡലം പ്രസിഡന്‍റ് ബ്ലെയിസ് ജി. വാഴയില്‍, കേരള കര്‍ഷക യൂണിയന്‍ സംസ്ഥാന ഭാരവാഹികളായ ജോയി തെക്കേടത്ത്, സി.ടി. തോമസ്, ബേബിച്ചന്‍ കൊച്ചുകരൂര്‍, ടോമി കാവാലം, ബിനു ജോണ്‍, സണ്ണി തെങ്ങുംപള്ളി, വിനോദ് ജോണ്‍, സോജന്‍ ജോര്‍ജ്, ജോണി പുളിന്തടം, ആന്‍റണി കുര്യാക്കോസ്, കുഞ്ഞ് കളപ്പുര, ജോസ് വഞ്ചിപ്പുര, വില്‍സണ്‍ മേച്ചേരി തുടങ്ങിയവര്‍ പങ്കെടുത്തു.

പേവിഷബാധ ബോധവത്കരണ കാമ്പയിന് തുടക്കം

കോട്ടയം: സ്‌കൂൾ വിദ്യാർഥികൾക്കായുള്ള പേവിഷബാധ ബോധവത്കരണ കാമ്പയിന്‍റെ ജില്ലാതല ഉദ്ഘാടനവും ലഘുലേഖ വിതരണോദ്ഘാടനവും കോട്ടയം ഗവൺമെന്‍റ് മോഡൽ ഹയർ സെക്കൻഡറി സ്‌കൂളിൽ ജില്ലാ കളക്ടർ ജോൺ വി. സാമുവൽ നിർവഹിച്ചു. പേവിഷബാധയുമായി ബന്ധപ്പെട്ട് സ്‌കൂൾ അധികൃതരും വിദ്യാർഥികളും ചെയ്യേണ്ട കാര്യങ്ങളിൽ അവബോധം സൃഷ്ടിക്കുകയാണ് കാമ്പയിനിലൂടെ ലക്ഷ്യമിടുന്നത്. ജില്ലാ മെഡിക്കൽ ഓഫീസർ ഡോ.എൻ. പ്രിയ അധ്യക്ഷത വഹിച്ചു. ആരോഗ്യകേരളം ജില്ലാ പ്രോഗ്രാം മാനേജർ ഡോ. വ്യാസ് സുകുമാരൻ, വിദ്യാഭ്യാസ വകുപ്പ് ഡെപ്യൂട്ടി ഡയറക്ടർ ഹണി ജി. അലക്സാണ്ടർ, ഗവൺമെന്‍റ് മോഡൽ ഹയർ സെക്കൻഡറി സ്‌കൂൾ പ്രിൻസിപ്പൽ സി. മഞ്ജുള, ആരോഗ്യവകുപ്പ് ഡെപ്യൂട്ടി മാസ് മീഡിയ ഓഫീസർ ആർ. ദീപ എന്നിവർ പങ്കെടുത്തു. തുടർന്ന് ഡെപ്യൂട്ടി ജില്ലാ മെഡിക്കൽ ഓഫീസർ ഡോ. ജെസി സണ്ണി ബോധവത്കരണ ക്ലാസെടുത്തു.

മുങ്ങിനടന്ന തട്ടിപ്പുകേസ് പ്രതി പിടിയിൽ

ഗാന്ധിനഗർ: ജാമ്യത്തിലിറങ്ങി 10 വർഷമായി മുങ്ങിനടന്ന തട്ടിപ്പുകേസ് പ്രതി പിടിയിൽ. കുടമാളൂർ സ്വദേശി മഹേഷ് (54 ) ആണ് വാകത്താനം പോലീസിന്‍റെ പിടിയിലായത്. വാകത്താനം ബസ് സ്റ്റാൻഡ് ബിൽഡിംഗിൽ സ്ഥിതിചെയ്യുന്ന മുത്തൂറ്റ് ബാങ്കിൽ മുക്കുപണ്ടം പണയംവച്ച് എടുത്ത തുക തിരികെ അടയ്ക്കാതെ കബളിപ്പിച്ച കേസിലെ പ്രതിയാണ് പത്തുവർഷത്തിനുശേഷം വാകത്താനം പോലീസിന്‍റെ പിടിയിലായത്.

കാപ്പാ നിയമം ലംഘിച്ചയാൾ അറസ്റ്റിൽ

കോട്ടയം: കാപ്പാ നിയമ ലംഘനം നടത്തി‍യയാൾ അറസ്റ്റിൽ. ഉത്തരവ് ലംഘിച്ചു ജില്ലയിൽ പ്രവേശിച്ച മണർകാട് പാലക്കൽശേരി ശാലു (25) എന്നയാളെയാണ് മണർകാട് പോലീസ് അറസ്റ്റ് ചെയ്തത്. ഐരാറ്റുനട ഭാഗത്തുനിന്നുമാണ് പ്രതിയെ പിടികൂടിയത്. കോടതിയിൽ ഹാജരാക്കിയ ഇയാളെ റിമാൻഡ് ചെയ്തു.

യുവാവ് മരിച്ച നിലയില്‍

കോട്ടയം: യുവാവിനെ വീടിനുള്ളില്‍ മരിച്ചനിലയില്‍ കണ്ടെത്തി. തിരുവാതുക്കല്‍ മാന്താറ്റില്‍ പുതുപ്പറമ്പില്‍ സാജുവിന്‍റെ മകന്‍ സനൂഷിനെ (പൊന്നാച്ചന്‍-36) യാണു വീടിനുള്ളില്‍ തൂങ്ങിമരിച്ചനിലയില്‍ കണ്ടെത്തിയത്. ഇന്നലെ രാവിലെയാണ് സനൂഷിന്‍റെ മൃതദേഹം വീട്ടിലെ കിടപ്പുമുറിയില്‍ കണ്ടെത്തിയത്. മാസങ്ങളോളമായി ഭാര്യയുമായി പിണങ്ങിക്കഴിയുകയാണ് ഇയാളെന്നു പോലീസ് പറഞ്ഞു. ഇതേത്തുടര്‍ന്ന് മാനസികവിഷമം നേരിട്ടിരുന്നതായാണ് ലഭിക്കുന്ന വിവരം. കോട്ടയം വെസ്റ്റ് പോലീസ് സ്ഥലത്തെത്തി ഇന്‍ക്വസ്റ്റ് അടക്കമുള്ള നടപടികള്‍ പൂര്‍ത്തിയാക്കി മൃതദേഹം ആശുപത്രി മോര്‍ച്ചറിയിലേക്കു മാറ്റി. പോസ്റ്റ്‌മോര്‍ട്ടം അടക്കമുള്ള നടപടികള്‍ പൂര്‍ത്തിയാക്കി മൃതദേഹം ബന്ധുക്കള്‍ക്ക് വിട്ടുനല്‍കും. സംസ്‌കാരം ഇന്നു വൈകുന്നേരം വീട്ടുവളപ്പില്‍ നടക്കും.

തിരുവനന്തപുരത്ത് മാത്രമല്ല, കോട്ടയം മെഡിക്കൽ കോളജിലും രോഗികൾ ദുരിതത്തിൽ

ഗാന്ധിനഗർ: തിരുവനന്തപുരം മെഡിക്കൽ കോളജിൽ മാത്രമല്ല, കോട്ടയം മെഡിക്കൽ കോളജിലും രോഗികൾക്കു ദുരിതമെന്ന് ആരോപണം. ഡോ. ഹാരിസ് ഹസനെപ്പോലെ ഡോക്ടർമാർ ജനങ്ങൾക്കുവേണ്ടി രംഗത്തുവന്നാൽ കോട്ടയം മെഡിക്കൽ കോളജ് ആശുപത്രിയിലെ രോഗികൾ നേരിടുന്ന ഗുരുതര പ്രതിസന്ധികൾക്കു പരിഹാരമാകുമെന്നു രോഗികൾ പറയുന്നു. കോട്ടയം, ഇടുക്കി, പത്തനംതിട്ട , ആലപ്പുഴ, എറണാകുളം തുടങ്ങി വിവിധ ജില്ലകളിൽനിന്നായി ആയിരക്കണക്കിന് രോഗികൾ ചികിത്സ തേടുന്ന കോട്ടയം മെഡിക്കൽ കോളജ് ആശുപത്രിയിലെ വിവിധ വിഭാഗങ്ങളിലെ അത്യാധുനിക ചികിത്സാ ഉപകരണങ്ങൾ മിക്കതും തകരാറിലാണ്. വിവിധ ഡിപ്പാർട്ട്‌മെന്‍റുകളിലേക്കാവശ്യമായ മെഷീനുകൾ ലഭ്യമാക്കാത്തതും സാധാരണക്കാരായ രോഗികളെയും ഡോക്ടർമാരെയും പ്രതിസന്ധിയിലാക്കുന്നുണ്ട്. കോടികൾ മുടക്കി പുതിയ സർജറി ബ്ലോക്ക്, കാർഡിയോളജി-കാർഡിയോ തൊറാസിക് വിഭാഗത്തിനു വേണ്ടിയുള്ള പുതിയ ബ്ലോക്ക് എന്നീ ബഹുനില കെട്ടിടങ്ങളുടെ നിർമാണം പൂർത്തീകരിച്ചു. എന്നാൽ, ആശുപത്രിയിലെ നേത്രവിഭാഗത്തിൽ ചികിത്സ തേടുന്ന രോഗികൾ വലിയ ദുരിതം നേരിടുകയാണ്. നേത്രവിഭാഗത്തിലെ ലേസർ, ഒസിടി മെഷീനുകൾ പ്രവർത്തനരഹിതമായിട്ട് ഒരു വർഷമായി. മാധ്യമങ്ങളുൾപ്പെടെ ഇക്കാര്യം പലതവണ ചൂണ്ടിക്കാട്ടിയെങ്കിലും അധികൃതർ രോഗികളെ ദുരിതക്കയത്തിൽനിന്നു കരകയറ്റാൻ ഒരു ശ്രമവും നടത്തിയിട്ടില്ല. കണ്ണ് സ്‌കാൻ ചെയ്യാൻ ഉപയോഗിക്കുന്ന ഒസിടി മെഷീന്‍റെ പ്രവർത്തനം കാര്യക്ഷമമല്ല. ഗുരുതര നേത്രരോഗം ബാധിച്ചവർക്ക് ലേസർ ചികിത്സയിലൂടെ പരിഹാരം കണ്ടെത്താം. കണ്ണിലെ പ്രഷർ, ഡയബറ്റിക് റെറ്റിനോപ്പതി തുടങ്ങി വിവിധങ്ങളായ നേത്രരോഗങ്ങൾക്ക് ലേസർ ചികിത്സ ആവശ്യമാണ്. ആശുപത്രിയിലെ ലേസർ മെഷീൻ ഒരു വർഷമായി പ്രവർത്തനരഹിതമാണ്. കോട്ടയം ജനറൽ ആശുപത്രിയിൽ ലേസർ ചികിത്സയുണ്ടെങ്കിലും എല്ലാ ലേസർ ചികിത്സയ്ക്കുമുള്ള ലെൻസ് അവിടെയില്ലെന്ന് പറയുന്നു. ഒസിടി, ലേസർ എന്നിവ ഉപയോഗിച്ചുള്ള ചികിത്സയ്ക്ക് രോഗികൾ സ്വകാര്യ ആശുപത്രികളെ സമീപിക്കേണ്ട ഗതികേടിലാണ്. സ്വകാര്യ ആശുപത്രികളിൽ ഒരു തവണ ലേസർ ചെയ്യണമെങ്കിൽ 3000 മുതൽ 4000 രൂപ വരെ നൽകണം. മെഡിക്കൽ കോളജ് നേത്രവിഭാഗത്തിൽ ഒപി പ്രവർത്തിക്കുന്നുണ്ടെങ്കിലും തുടർപരിശോധനകൾക്ക് സ്വകാര്യ ആശുപത്രിയിൽ പോകണം. ഫണ്ട് അപര്യാപ്തതയാണ് മെഷീനുകൾ നന്നാക്കാത്തതിനു കാരണമെന്നാണ് അധികൃതർ പറയുന്നത്. മെഡിക്കൽ കോളജ് ആശുപത്രി ഗൈനക്കോളജി വിഭാഗം ലാബിലെ ബയോകെമിസ്ട്രി മെഷീൻ അടുത്തിടെ തകരാറിലായിരുന്നു. ഇതേത്തുടർന്ന് വിവിധ രക്തപരിശോധനയ്ക്ക് ഗൈനക്കോളജി വിഭാഗത്തിൽ ചികിത്സയിലുള്ളവരും ബന്ധുക്കളും ആശുപത്രിയിലെ സെൻട്രലൈസ്ഡ് ലാബ് പ്രവർത്തിക്കുന്ന പൊടിപാറ ബിൽഡിംഗിൽ പോകണമായിരുന്നു. ഇത് ഗൈനക്കോളജി വിഭാഗത്തിൽ ചികിത്സയിൽ കഴിഞ്ഞിരുന്ന ഗർഭിണികളെയും മറ്റു രോഗികളെയും വലച്ചിരുന്നു. ആശുപത്രിയിലെ ലിഫ്റ്റുകൾ തകരാറിലാകുന്നതും പതിവാണ്. അത്യാധുനിക ഉപകരണം വാങ്ങാൻ 25 ലക്ഷം അനുവദിച്ചതായി ഫ്രാൻസിസ് ജോർജ് കോട്ടയം: ആധുനിക പരിശോധനാ സംവിധാനങ്ങൾ ഉള്ളതും മുഴുവൻ ഓട്ടോമാറ്റിക്കായി പ്രവർത്തിക്കുന്നതുമായ കാപ്പിലറി ഇലക്‌ട്രോഫോറസിസ് ഉപകരണം കോട്ടയം മെഡിക്കൽ കോളജിൽ വാങ്ങുന്നതിനായി 25 ലക്ഷം രൂപ അനുവദിച്ചതായി ഫ്രാൻസിസ് ജോർജ് എംപി അറിയിച്ചു. മെഡിക്കൽ കോളജിലെ ബയോകെമിസ്ട്രി വിഭാഗത്തിൽ കഴിഞ്ഞ 13 വർഷമായി ഉണ്ടായിരുന്ന ഇലക്‌ട്രോഫോറസിസ് ഉപകരണം പ്രവർത്തനരഹിതമായതിനാൽ പാവപ്പെട്ട രോഗികൾക്കു വളരെയധികം ബുദ്ധിമുട്ട് ഉണ്ടായിരുന്നു. ഇത് കണക്കിലെടുത്താണ് ആധുനിക നിലവാരത്തിലുള്ള ഉപകരണം വാങ്ങുവാൻ തുക അനുവദിച്ചത്. ഉയർന്ന നിലവാരത്തിലുള്ള ഉപകരണം വാങ്ങി സ്ഥാപിക്കുന്നതിലൂടെ സിറം ഇലക്‌ട്രോഫോറസിസ് പോലെയുള്ള പരിശോധനകൾ അതിവേഗത്തിലും അത്യന്തം കൃത്യതയോടെയും നടത്തി റിസൾട്ട് ലഭ്യമാക്കുവാൻ കഴിയും. ഈ പരിശോധന നടത്തുന്നതുവഴി രോഗികളിൽ ബോൺമാരോ, ബയോപ്സി പോലുള്ള അതീവ ബുദ്ധിമുട്ടുള്ള പരിശോധനകൾ ഒഴിവാക്കാൻ കഴിയുമെന്നും സാമ്പത്തികമായി പിന്നാക്കം നിൽക്കുന്ന രോഗികൾക്ക് ഈ ഉപകരണം ഏറെ പ്രയോജനപ്പെടുമെന്നും ഫ്രാൻസിസ് ജോർജ് എംപി പറഞ്ഞു.

വനമഹോത്സവം സംസ്ഥാനതല ഉദ്ഘാടനം മൂന്നിന്

കോട്ടയം: വനമഹോത്സവവുമായി ബന്ധപ്പെട്ട 2025-ലെ ആഘോഷ പരിപാടികളുടെ സംസ്ഥാനതല ഉദ്ഘാടനം മൂന്നിന് മന്ത്രി എ.കെ. ശശീന്ദ്രന്‍ നിര്‍വഹിക്കും. കോട്ടയം സിഎംഎസ് കോളജില്‍ ഉച്ചകഴിഞ്ഞ് 2.30ന് നടക്കുന്ന പരിപാടിയില്‍ മന്ത്രി വി.എന്‍. വാസവന്‍ അധ്യക്ഷത വഹിക്കും. തിരുവഞ്ചൂര്‍ രാധാകൃഷ്ണന്‍ എംഎല്‍എ, ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍, നഗരസഭാ ചെയര്‍പേഴ്‌സണ്‍ ബിന്‍സി സെബാസ്റ്റ്യന്‍, നഗരസഭാംഗം ഡോ. പി.ആര്‍. സോന, കേരള വനം വികസന കോര്‍പറേഷന്‍ ചെയര്‍പേഴ്‌സണ്‍ ലതിക സുഭാഷ്, അഡീഷണല്‍ പ്രിന്‍സിപ്പല്‍ ചീഫ് ഫോറസ്റ്റ് കണ്‍സര്‍വേറ്റര്‍ ആന്‍ഡ് ഹെഡ് ഓഫ് ഫോറസ്റ്റ് ഫോഴ്‌സ് ഡോ. പി. പുകഴേന്തി, അഡീഷണല്‍ ചീഫ് ഫോറസ്റ്റ് കണ്‍സര്‍വേറ്റര്‍ ആന്‍ഡ് ചീഫ് വൈല്‍ഡ് ലൈഫ് വാര്‍ഡന്‍ പ്രമോദ് ജി. കൃഷ്ണന്‍, അഡീഷണല്‍ പ്രിന്‍സിപ്പല്‍ ചീഫ് ഫോറസ്റ്റ് കണ്‍സര്‍വേറ്റര്‍ (ഫോറസ്റ്റ് മാനേജ്‌മെന്‍റ്) ഡോ. എല്‍. ചന്ദ്രശേഖര്‍, അഡീഷണല്‍ പ്രിന്‍സിപ്പല്‍ ചീഫ് ഫോറസ്റ്റ് കണ്‍സര്‍വേറ്റര്‍ (ഇ ആന്‍ഡ് ടി ഡബ്ല്യു) ഡോ. ജെ. ജസ്റ്റിന്‍ മോഹന്‍, ഫോറസ്റ്റ് കണ്‍സര്‍വേറ്റര്‍ (ഐ ആന്‍ഡ് ഇ) എം. നീതുലക്ഷ്മി, ഡിവിഷണല്‍ ഫോറസ്റ്റ് ഓഫീസര്‍ പ്രഭുല്‍ അഗര്‍വാള്‍, ചീഫ് ഫോറസ്റ്റ് കണ്‍സര്‍വേറ്റര്‍ പി.പി. പ്രമോദ്, ബിഷപ് റവ. മലയില്‍ സാബു കോശി ചെറിയാന്‍ എന്നിവര്‍ പങ്കെടുക്കും.

യുപി സ്‌കൂള്‍ വിദ്യാര്‍ഥികള്‍ക്കായി ക്രിയേറ്റീവ് കോര്‍ണര്‍ തുറന്നു

തൃക്കൊടിത്താനം: സമഗ്ര ഗുണമേന്മാ വിദ്യാഭ്യാസം ഉറപ്പാക്കാനായി തൃക്കൊടിത്താനം ഗവണ്‍മെന്‍റ് എച്ച്എസ്എസില്‍ യുപി വിഭാഗം കുട്ടികള്‍ക്കായി ക്രിയേറ്റീവ് കോര്‍ണര്‍ ആരംഭിച്ചു. പദ്ധതിയുടെ ഉദ്ഘാടനം സ്‌കൂള്‍ ഓഡിറ്റോറിയത്തില്‍ നടന്ന ചടങ്ങില്‍ ജില്ലാ പഞ്ചായത്ത് പ്രസിഡന്‍റ് ഹേമലത പ്രേംസാഗര്‍ നിര്‍വഹിച്ചു. മാടപ്പള്ളി ബ്ലോക്ക് പഞ്ചായത്ത് പ്രസിഡന്‍റ് എന്‍. രാജു, തൃക്കൊടിത്താനം പഞ്ചായത്ത് പ്രസിഡന്‍റ് മോളി ജോസഫ്, വൈസ് പ്രസിഡന്‍റ് ബിനോയ് ജോസഫ്, ജില്ലാ പഞ്ചായത്ത് സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ മഞ്ജു സുജിത്ത്, മാടപ്പള്ളി ബ്ലോക്ക് സ്റ്റാന്‍ഡിംഗ് കമ്മിറ്റി ചെയര്‍മാന്‍ ടി. രഞ്ജിത്, പഞ്ചായത്തംഗം ദീപ ഉണ്ണികൃഷ്ണന്‍, സ്‌കൂള്‍ ഹെഡ്മിസ്ട്രസ് ആര്‍.എസ്. രാജി, എല്‍പി സ്‌കൂള്‍ ഹെഡ്മിസ്ട്രസ് എ.എം. അജിതമ്മ, വി.കെ. സുനില്‍കുമാര്‍, ബിനു ഏബ്രഹാം, പ്രീത ടി. കുറുപ്പ് എന്നിവര്‍ പ്രസംഗിച്ചു. പാഠപുസ്തകത്തിനപ്പുറം തൊഴില്‍ പഠനവും പാഠപുസ്തകത്തിനപ്പുറം വിവിധ തൊഴില്‍ ബന്ധിത പ്രവര്‍ത്തനങ്ങളെ കോര്‍ത്തിണക്കി രസകരമായും ക്രിയാത്മകമായും പഠനത്തെ മാറ്റുകയെന്നതാണ് ക്രിയേറ്റീവ് കോര്‍ണറിന്‍റെ ലക്ഷ്യമെന്ന് പദ്ധതിയുടെ നോഡല്‍ ഓഫീസറായ കെ. സുധര്‍മ പറഞ്ഞു. സമഗ്രശിക്ഷാ കേരളയുടെ നേതൃത്വത്തില്‍ കൊച്ചി ശാസ്ത്ര സാങ്കേതിക സര്‍വകലാശാലയുമായി സഹകരിച്ച് അഞ്ചുലക്ഷം രൂപ വിനിയോഗിച്ചാണ് പദ്ധതി നടപ്പാക്കിയത്. ഈ അക്കാദമിക വര്‍ഷത്തിലെ അപ്പര്‍ പ്രൈമറി വിഭാഗത്തിലെ കുട്ടികള്‍ക്കായാണ് ക്രിയേറ്റീവ് കോര്‍ണര്‍ സജ്ജമാക്കിയിരിക്കുന്നത്. പാചകം, ഫാഷന്‍ ഡിസൈന്‍, ഇലക്‌ട്രിക്കല്‍ ജോലി, കൃഷി, ഫര്‍ണിച്ചര്‍ നിര്‍മാണം, പ്ലംബിംഗ്, എല്‍ഇഡി ബള്‍ബ് നിര്‍മാണം തുടങ്ങിയവയ്ക്കാണ് ക്രിയേറ്റീവ് കോര്‍ണറില്‍ പ്രാധാന്യം നല്‍കുന്നത്.

ചങ്ങനാശേരിയില്‍ നിയന്ത്രിത, നിരോധിത, സ്വതന്ത്ര കച്ചവടമേഖലകള്‍ പ്രഖ്യാപിച്ച് നഗരസഭ

ചങ്ങനാശേരി: നഗരത്തിലെ വഴിയോര കച്ചവടവുമായി ബന്ധപ്പെട്ട് നഗര കച്ചവടസമിതി (ടിവിഎസ്) യോഗത്തില്‍ തെരഞ്ഞെടുത്ത നിയന്ത്രിത കച്ചവടമേഖല, നിരോധിത കച്ചവടമേഖല, സ്വതന്ത്ര കച്ചവടമേഖല എന്നിവ ഉള്‍പ്പെടുന്ന പ്രദേശങ്ങള്‍ക്കും നഗരകച്ചവട സമിതി അംഗീകരിച്ച 42 പുതിയ വഴിയോരക്കച്ചവടക്കാര്‍ക്കും നഗരസഭാ കൗണ്‍സില്‍ യോഗം അംഗീകാരം നല്‍കി. ഇതോടെ കച്ചവട നിരോധിത മേഖലയില്‍ പൂര്‍ണമായും വഴിയോരക്കച്ചവടം നിരോധിക്കും. നിയന്ത്രിത കച്ചവടമേഖലയില്‍ നഗരസഭയുടെ അംഗീകാരമുള്ള തിരിച്ചറിയല്‍ കാര്‍ഡുള്ള കച്ചവടക്കാര്‍ക്ക് നിര്‍ദ്ദേശങ്ങള്‍ പാലിച്ച് കച്ചവടം അനുവദിച്ചു. സ്വതന്ത്ര കച്ചവട മേഖലയില്‍ എവിടെയും ആര്‍ക്കും കച്ചവടം നടത്തുന്നതിനുള്ള അനുമതിയാണ് നഗരസഭ നല്‍കിയത്. ചെയര്‍പേഴ്‌സണ്‍ കൃഷ്ണകുമാരി രാജശേഖരന്‍ അധ്യക്ഷത വഹിച്ചു. യാത്രക്കാര്‍ക്കും വ്യാപാരികള്‍ക്കും ബുദ്ധിമുട്ടുണ്ടാക്കാതെ അനുയോജ്യമായ സ്ഥലം കണ്ടെത്തിയാണ് വഴിയോരക്കച്ചവടത്തിന് അനുമതി നല്‍കേണ്ടതെന്ന് യുഡിഎഫ് പാര്‍ലമെന്‍ററി പാര്‍ട്ടി ലീഡര്‍ ജോമി ജോസഫ് അഭിപ്രായപ്പെട്ടു. ഇപ്പോള്‍ത്തന്നെ യാത്രക്കാര്‍ ദുരിതപ്പെടുന്ന ഒന്നാംനമ്പര്‍ ബസ് സ്റ്റാന്‍ഡിന്‍റെ കംഫര്‍ട്ട് സ്റ്റേഷനു സമീപം വഴിയോരക്കച്ചവടത്തിന് അനുമതി നല്‍കരുതെന്നും ജോമി ആവശ്യപ്പെട്ടു. ആഹാരവിതരണം നടത്തുന്ന തട്ടുകടക്കാര്‍ക്ക് ഫുഡ്‌സേഫ്റ്റി സര്‍ട്ടിഫിക്കറ്റ്, ഹെല്‍ത്ത് കാര്‍ഡ്, മുനിസിപ്പല്‍ ലൈസന്‍സ്, മാലിന്യ സംസ്‌കരണത്തിന് നടപടി എന്നിവ ഉണ്ടാകണമെന്ന് ആരോഗ്യ സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ എല്‍സമ്മ ജോബ് പറഞ്ഞു. വഴിയോരക്കച്ചവടത്തിന്‍റെ മറവില്‍ അനധികൃതമായി നഗരത്തില്‍ തട്ടുകടകള്‍ വ്യാപിക്കുന്നത് മുനിസിപ്പല്‍ ലൈസന്‍സെടുത്ത് എല്ലാ മാനദണ്ഡങ്ങളും പാലിച്ച് കച്ചവടം നടത്തുന്നവര്‍ക്ക് ബുദ്ധിമുട്ടുണ്ടാക്കുന്നതിന് കാരണമാകുമെന്ന് സിപിഎം അംഗം കെ.ആര്‍. പ്രകാശ് അഭിപ്രായപ്പെട്ടു. കേന്ദ്ര-സംസ്ഥാന സര്‍ക്കാരുകളുടെ നിബന്ധനയനുസരിച്ച് നഗരകച്ചവട സമിതിയുടെ തീരുമാനപ്രകാരമാണ് വിവിധ മേഖലകള്‍ തിരിച്ച് കച്ചവടത്തിന് അനുമതി നല്‍കിയിരിക്കുന്നതെന്ന് സിപിഎം അംഗം പി.എ. നസീര്‍ പറഞ്ഞു. വൈസ് ചെയര്‍മാന്‍ മാത്യൂസ് ജോര്‍ജ്, ശ്യാം സാംസണ്‍, റെജി കേളമ്മാട്ട്, അഡ്വ. മധുരാജ്, രാജു ചാക്കോ തുടങ്ങിയവര്‍ ചര്‍ച്ചകളില്‍ പങ്കെടുത്തു. കച്ചവട നിരോധിത മേഖല 1. പുതൂര്‍പ്പള്ളി പ്രവേശനകവാടം മുതല്‍ എസ്ബി കോളജ് ഇന്‍ഡോര്‍ സ്റ്റേഡിയം ഗേറ്റ് വരെ റോഡിനിരുവശവും. 2. സെന്‍ട്രല്‍ ജംഗ്ഷന്‍ മുതല്‍ എസ്ബി ഹൈസ്‌കൂള്‍ വരെ റോഡിനിരുവശവും. 3. മുനിസിപ്പല്‍ കാര്യാലയത്തിനു സമീപത്തു കൂടിയുള്ളഎപിജെ അബ്ദുള്‍ കലാം റോഡ് മുതല്‍ ഫാത്തിമാപുരം എസ് എച്ച് സ്‌കൂള്‍ വരെ റോഡിനിരുവശവും. 4. ടിബി റോഡില്‍ ഹെഡ് പോസ്റ്റ്ഓഫീസ് മുതല്‍ കെഎസ്ആര്‍ടിസി ബസ് ഇറങ്ങിവരുന്ന റോഡ് വരെ റോഡിനിരുവശവും. 5. പൊതുസ്ഥാപനങ്ങളുടെ പ്രവേശന ഭാഗത്ത് നിന്നു 100 മീറ്റര്‍ പരിധിയില്‍. 6. സെന്‍ട്രല്‍ ജംഗ്ഷന്‍ മുതല്‍ ബോട്ട്‌ജെട്ടി വരെ റോഡിനിരുവശവും. 7. പെരുന്ന ഗവ. എല്‍പി സ്‌കൂള്‍ മുതല്‍ പൂച്ചിമുക്ക് വരെ റോഡിനിരുവശവും. 8. മധുമൂല ജംഗ്ഷന്‍ മുതല്‍ സെന്‍റ് തെരേസാസ് സ്‌കൂള്‍വരെ റോഡിനിരുവശവും . 9. ചങ്ങനാശേരി-വാഴൂര്‍ റോഡില്‍ ഇന്ത്യന്‍ കോഫീ ഹൗസ് മുതല്‍ കുരിശുംമൂട് ജംഗ്ഷന്‍ വരെ റോഡിനിരുവശവും. 10. ചങ്ങനാശേരി-വാഴൂര്‍ റോഡില്‍ എസ്ബി ഹൈസ്‌കൂള്‍ മുതല്‍ ഇന്ത്യന്‍ കോഫീ ഹൗസ് വരെ റോഡിന്‍റെ തെക്കുവശം. 11. നഗരസഭാ പരിധിയില്‍ അപകട സാധ്യതയുള്ള എല്ലാ വളവുകളും എല്ലാ ജംഗ്ഷനുകളും എംസി റോഡില്‍ പെരുന്ന പത്മ കഫേയുടെ മുന്‍വശത്തെ വളവ്, എസ് സ്‌ക്വയർ ജംഗ്ഷന്‍, രാജേശ്വരി കോംപ്ലക്‌സ് ജംഗ്ഷന്‍, പൂച്ചിമുക്കിലേക്ക് തിരിയുന്ന റോഡ് വളവ്, പെരുന്ന ഗവൺമെന്‍റ് എല്‍പി സ്‌കൂള്‍ ജംഗ്ഷന്‍, പെരുന്ന എല്‍പിഎസ് ജംഗ്ഷന്‍, ഇരൂപ്പ ജംഗ്ഷന്‍, എംസി റോഡില്‍ വേഴയ്ക്കാട്ട്ചിറ വളവ്, വാഴൂര്‍ റോഡില്‍ റെയില്‍വേ ഓവര്‍ബ്രിഡ്ജ് അപ്രോച്ച് റോഡ് എന്നിവ കച്ചവട നിരോധിതമായ വളവുകളിലും ജംഗ്ഷനുകളിലും ഉള്‍പ്പെടുന്നു. നിയന്ത്രിത കച്ചവട മേഖല നഗരസഭയുടെ തിരിച്ചറിയല്‍ കാര്‍ഡ് ലഭിച്ച വഴിയോര കച്ചവടക്കാര്‍ക്ക് കച്ചവടം നടത്താം. 1. പുതൂര്‍പള്ളി ആര്‍ച്ച് മുതല്‍ നമ്പര്‍ 2 പ്രൈവറ്റ് ബസ് സ്റ്റാന്‍ഡ്‌ വരെ റോഡിന് കിഴക്കുവശം നിലവില്‍ കച്ചവടം ചെയ്യുന്നവര്‍ക്കു മാത്രം അനുമതി. 2. ചങ്ങനാശേരി-വാഴൂര്‍ റോഡില്‍ എസ്ബി ഹൈസ്‌കൂള്‍ മുതല്‍ ഇന്ത്യന്‍ കോഫീഹൗസ് വരെ റോഡിന്‍റെ വടക്ക് വശത്ത് അപകടരഹിതവും അനുയോജ്യവുമായ സ്ഥലങ്ങളില്‍ കാല്‍നട യാത്രക്കാര്‍ക്കും പ്രദേശവാസികള്‍ക്കും ഗതാഗതത്തിനും തടസവും ബുദ്ധിമുട്ടും ഉണ്ടാകാത്ത രീതിയില്‍. 3. നഗരസഭാ ഓഫീസിനു സമീപം എംസി റോഡരികില്‍ വൈകുന്നേരം 6.30 മുതല്‍ രാത്രി 11വരെ നിലവില്‍ കച്ചവടം ചെയ്യുന്നവര്‍ക്ക്. 4. ടിബി റോഡില്‍ അമൃത ഓഡിറ്റോറിയം (കെഎസ്ആര്‍ടിസി ബസ് ഇറങ്ങിവരുന്ന ഭാഗം) മുതല്‍ സ്റ്റേഡിയം ആര്‍ച്ച് പരിസരംവരെ അപകടരഹിതവും അനുയോജ്യവുമായ സ്ഥലങ്ങളില്‍ നിലവില്‍ കച്ചവടം ചെയ്യുന്നവര്‍ക്ക്. 5. നമ്പര്‍ 1 സ്റ്റാന്‍ഡില്‍ കംഫര്‍ട്ട് സ്റ്റേഷനു സമീപം നിലവില്‍ കച്ചവടം ചെയ്യുന്നവര്‍ക്ക് കാല്‍നട യാത്രക്കാര്‍ക്കും ഗതാഗതത്തിനും തടസവും ബുദ്ധിമുട്ടും ഉണ്ടാകാത്ത രീതിയില്‍ മാത്രം വഴിയോരക്കച്ചവടം നടത്താം. 6. എംസി റോഡില്‍ എസ്ബി കോളജ് ഇന്‍ഡോര്‍ സ്റ്റേഡിയം ഗേറ്റിനു ശേഷം മോര്‍ സൂപ്പര്‍ മാര്‍ക്കറ്റ് വരെ. 7. നിരോധിത മേഖലയിലും സ്വതന്ത്ര കച്ചവട മേഖലയിലും ഉള്‍പ്പെട്ടിട്ടില്ലാത്ത നഗരസഭയുടെ മറ്റെല്ലാ പ്രദേശങ്ങളിലും വഴിയോര കച്ചവടത്തിന് അനുമതി. സ്വതന്ത്ര കച്ചവട മേഖല 1. പാലാത്ര-ളായിക്കാട് ബൈപാസ് റോഡില്‍ (മധുമൂല റെയില്‍വേ റോഡ് പ്രവേശിക്കുന്ന ഭാഗവും ജംഗ്ഷനും എസ്എച്ച് ജംഗ്ഷന്‍, തിരുമല താഴ്ച തുടങ്ങിയ സ്ഥലങ്ങള്‍ ഒഴികെ) ജംഗ്ഷനുകളില്‍ രണ്ട് വശത്തുനിന്നും 30 മീറ്റര്‍ ഒഴിവാക്കി വരുന്ന സ്ഥലങ്ങള്‍. 2. ചങ്ങനാശേരിയില്‍നിന്നും ആലപ്പുഴയിലേക്കുള്ള എസി റോഡില്‍ മനക്കച്ചിറ മുതല്‍ കോണ്ടൂര്‍ വരെ റോഡിന്‍റെ ഇടതു വശം. 3. കാവാലം ബസാര്‍. 4. നമ്പര്‍ 2 ബസ് സ്റ്റാന്‍ഡില്‍ ഓട നിര്‍മിച്ചതില്‍ ഓടയുടെ സ്ലാബിന്‍റെ മുകളില്‍ വീതിയുള്ള ഭാഗം.

കെഎസ്ആര്‍ടിസി പെന്‍ഷന്‍കാര്‍ക്ക് ആനുകൂല്യങ്ങള്‍ നിഷേധിക്കുന്നെന്ന് വെല്‍ഫെയര്‍ അസോസിയേഷന്‍

ചങ്ങനാശേരി: സംസ്ഥാന സര്‍ക്കാര്‍ കെഎസ്ആര്‍ടിസി പെന്‍ഷന്‍കാര്‍ക്ക് തുടര്‍ച്ചയായി ആനുകൂല്യങ്ങള്‍ നിഷേധിക്കുകയാണെന്ന് ട്രാന്‍സ്‌പോര്‍ട്ട് പെന്‍ഷനേഴ്‌സ് വെല്‍ഫെയര്‍ അസോസിയേഷന്‍ ചങ്ങനാശേരി മേഖലാ സമ്മേളനം അഭിപ്രായപ്പെട്ടു. 2011ല്‍ യുഡിഎഫ് സര്‍ക്കാരിന്‍റെ കാലത്ത് നടന്ന ശമ്പള പരിഷ്‌കരണത്തോടൊപ്പം വന്ന പെന്‍ഷന്‍ പരിഷ്‌കരണത്തിനുശേഷം ഈ രംഗത്ത് ആനുകൂല്യങ്ങള്‍ ലഭിച്ചിട്ടില്ല. 2022ല്‍ ശമ്പളം പരിഷ്‌കരിച്ചപ്പോള്‍ പെന്‍ഷന്‍ പരിഷ്‌കരണം നടത്തിയില്ലെന്നും 2021നു ശേഷം ക്ഷാമാശ്വാസവും ആറുവര്‍ഷമായി ഉത്സവബത്തയും ലഭിക്കുന്നില്ലെന്നും സമ്മേളനം ചൂണ്ടിക്കാട്ടി. ഐഎന്‍ടിയുസി ജില്ലാ പ്രസിഡന്‍റ് ഫിലിപ്പ് ജോസഫ് ഉദ്ഘാടനം ചെയ്തു. അസോസിയേഷന്‍ ജില്ലാ പ്രസിഡന്‍റ് ടി.കെ. സതീശന്‍ നായര്‍ അധ്യക്ഷത വഹിച്ചു. സംസ്ഥാന ജനറല്‍ സെക്രട്ടറി വി.കെ. രാജേന്ദ്രന്‍ ആമുഖ പ്രസംഗവും വര്‍ക്കിംഗ് പ്രസിഡന്‍റ് ജോസ് വേങ്ങല്‍ അംഗത്വ വിതരണവും നടത്തി. പി.വി. ചാക്കോ അംഗത്വം ഏറ്റുവാങ്ങി. കോണ്‍ഗ്രസ് ബ്ലോക്ക് പ്രസിഡന്‍റ് ബാബു കോയിപ്പുറം, തോമസ് അക്കര, പി.എച്ച് അഷറഫ്, ജോബ് വിരുത്തിക്കരി, ബെന്നി ജോസഫ്, എ.വി ഫ്രാന്‍സിസ്, ഡിപിന്‍ ദിനേശ്, ജെബി ജോര്‍ജ്, റോയി സെബാസ്റ്റ്യന്‍ എന്നിവര്‍ പ്രസംഗിച്ചു.

ആശാ പ്രവര്‍ത്തകരെ ജെസിഐ ആദരിച്ചു

ചങ്ങനാശേരി: ജെസിഐ ഇന്ത്യയുടെ കാബില്‍ പദ്ധതിയോടനുബന്ധിച്ച് ജൈവ പച്ചക്കറികൃഷിയില്‍ മുനിസിപ്പാലിറ്റിയിലെ ആശാ പ്രവര്‍ത്തകര്‍ക്ക് പരിശീലനം നല്‍കി. ആശാ പ്രവര്‍ത്തകര്‍ സമൂഹത്തിന് നല്‍കുന്ന സേവനം പരിഗണിച്ച് ആശാ പ്രവര്‍ത്തകരെ ജെസിഐ പുരസ്‌കാരം നല്‍കി ആദരിച്ചു. മുനിസിപ്പല്‍ ചെയര്‍പേഴ്‌സണ്‍ കൃഷ്ണകുമാരി രാജശേഖരന്‍, വൈസ് ചെയര്‍മാര്‍ മാത്യൂസ് ജോര്‍ജ്, വാര്‍ഡ് മെംബര്‍ ബീന ജോബി, ജെസിഐ പ്രസിഡന്‍റ് ഡോ. ജോര്‍ജി ജോര്‍ജ് കുരുവിള, സച്ചു ലൂയിസ്, രഞ്ജിത് ആന്‍ഡ്രൂസ്, മാനുവല്‍ അലക്‌സ് എന്നിവര്‍ പ്രസംഗിച്ചു.

മഹിളാ സാഹസ് കേരളയാത്ര ഇന്ന് ചങ്ങനാശേരി മണ്ഡലത്തില്‍

ചങ്ങനാശേരി: മഹിളാ കോണ്‍ഗ്രസ് സംസ്ഥാന പ്രസിഡന്‍റ് അഡ്വ. ജെബി മേത്തര്‍ എംപി നയിക്കുന്ന മഹിളാ സാഹസ് കേരളയാത്ര ഇന്ന് ചങ്ങനാശേരിയില്‍ പര്യടനം നടത്തും. രാവിലെ 9.30ന് ചങ്ങനാശേരി ടൗണ്‍ വെസ്റ്റ് ഈസ്റ്റ് മണ്ഡലം കമ്മിറ്റികളുടെ സംയുക്താഭിമുഖ്യത്തില്‍ മുനിസിപ്പല്‍ മിനി ഓഡിറ്റോറിയത്തില്‍ സ്വീകരണം നല്‍കും. കൊടിക്കുന്നില്‍ സുരേഷ് എംപി സമ്മേളനം ഉദ്ഘാടനം ചെയ്യും. 10.30ന് പായിപ്പാട് മണ്ഡലം കമ്മിറ്റിയുടെ സ്വീകരണം നാലുകോടി ജംഗ്ഷനില്‍ കെപിസിസി രാഷ്‌ട്രീയകാര്യ സമിതിയംഗം ബിന്ദു കൃഷ്ണയും 11.30ന് തൃക്കൊടിത്താനം മണ്ഡലം കമ്മിറ്റിയുടെ സ്വീകരണം കുന്നുംപുറം ജംഗ്ഷനില്‍ കെപിസിസി ജനറല്‍ സെക്രട്ടറി അഡ്വ. ജോസി സെബാസ്റ്റ്യനും 12.30ന് മാടപ്പള്ളി മണ്ഡലം കമ്മിറ്റിയുടെ സ്വീകരണം തെങ്ങണ ജംഗ്ഷനില്‍ മുന്‍മന്ത്രി കെ.സി. ജോസഫും ഉദ്ഘാടനം ചെയ്യും. ഉച്ചകഴിഞ്ഞ് രണ്ടിനു വാഴപ്പള്ളി മണ്ഡലം കമ്മിറ്റിയുടെ സ്വീകരണം കുരിശുമൂട് ജംഗ്ഷനില്‍ കെപിസിസി അംഗം ഡോ. അജീസ് ബെന്‍ മാത്യുവും മൂന്നിന് കുറിച്ചി മണ്ഡലം കമ്മിറ്റിയുടെ നേതൃത്വത്തിലുള്ള സ്വീകരണം നാല്പതിന്‍കവല മഹാത്മ അയ്യങ്കാളി സ്മാരകമന്ദിരത്തില്‍ കെപിസിസി സെക്രട്ടറി അഡ്വ.പി.എസ്. രഘുറാമും ഉദ്ഘാടനം ചെയ്യും. മഹിളാ സാഹസ് കേരള യാത്രയുടെ സ്വീകരണവുമായി ബന്ധപ്പെട്ട ഒരുക്കങ്ങള്‍ പൂര്‍ത്തിയായതായി മഹിളാ കോണ്‍ഗ്രസ് കോട്ടയം ജില്ലാ പ്രസിഡന്‍റ് ബെറ്റി ടോജോ, ബ്ലോക്ക് പ്രസിഡന്‍റുമാരായ ആര്യാ ശ്യാം, ജയശീ പ്രഹ്‌ളാദന്‍ എന്നിവര്‍ അറിയിച്ചു.

കുറുമ്പനാടം സെന്‍റ് പീറ്റേഴ്‌സില്‍ മെറിറ്റ് ദിനാഘോഷം ഇന്ന്

കുറുമ്പനാടം: സെന്‍റ് പീറ്റേഴ്‌സ് ഹയര്‍ സെക്കന്‍ഡറി സ്‌കൂളില്‍ 2024-25 അധ്യയനവര്‍ഷം മികച്ചവിജയം കരസ്ഥമാക്കിയ വിദ്യാര്‍ഥികളെ അനുമോദിക്കുന്ന സമ്മേളനം ഇന്നു രണ്ടിനു നടക്കും. ചങ്ങനാശേരി ഡിവൈഎസ്പി കെ.പി. ടോംസണ്‍ ഉദ്ഘാടനം ചെയ്യും. സ്‌കൂള്‍ മാനേജര്‍ റവ.ഡോ. ചെറിയാന്‍ കറുകപ്പറമ്പില്‍ അധ്യക്ഷത വഹിക്കും. അസംപ്ഷന്‍ കോളജ് പ്രിന്‍സിപ്പല്‍ ഡോ. റാണി മരിയ തോമസ് മുഖ്യപ്രഭാഷണം നടത്തും. പ്രിന്‍സിപ്പല്‍ ജയിംസ് കെ. മാളിയേക്കല്‍, ഹെഡ്മാസ്റ്റര്‍ എം.സി. മാത്യു, പിടിഎ പ്രസിഡന്‍റ് ജയ്‌സണ്‍ ചെറിയാന്‍, അധ്യാപകരായ ജോണിയ ഗ്രേസ് ജോസഫ്, എം.സി. ബിനു എന്നിവര്‍ പ്രസംഗിക്കും. പ്ലസ്ടു പരീക്ഷയില്‍ ഉന്നതവിജയം നേടിയ വിദ്യാര്‍ഥികളെ ആദരിക്കും. നീറ്റ് പരീക്ഷയില്‍ ടോപ് റാങ്ക് നേടിയ പൂര്‍വവിദ്യാര്‍ഥികളായ റെയ്‌സാ മരിയ സോണി, തെരേസ് തോമസ്, ഗൗരിനന്ദ എസ്., എംജി യൂണിവേഴ്‌സിറ്റി ബികോം പരീക്ഷയില്‍ നാലാം റാങ്ക് കരസ്ഥമാക്കിയ സുബിമോള്‍ സിബിച്ചന്‍ എന്നിവരെ അനുമോദിക്കും.

വെള്ളക്കെട്ടില്‍ ഒറ്റപ്പെട്ട് എഴുമാന്തുരുത്ത്

കടുത്തുരുത്തി: മഴയ്ക്കൊപ്പം കിഴക്കന്‍ വെള്ളത്തിന്‍റെ വരവുകൂടി ശക്തമായതോടെ വെള്ളക്കെട്ടില്‍ ഒറ്റപ്പെട്ട് എഴുമാന്തുരുത്ത് ഗ്രാമം. ഇവിടേക്കുള്ള റോഡുകളിൽ വെള്ളം കയറിയതോടെ വാഹനഗതാഗതം നിലച്ച അവസ്ഥയാണ്. എഴുമാന്തുരുത്തിലെ താഴ്ന്ന പ്രദേശങ്ങളിലെ വീടുകളിലെല്ലാം വെള്ളം കയറി. കൊല്ലങ്കേരി, പത്തിപ്പാടം, മാത്താംകരി, പുലിത്തുരുത്ത് ഭാഗങ്ങളിലെ വീടുകളിലാണ് വെള്ളക്കെട്ട് പ്രധാനമായും രൂക്ഷമായിട്ടുള്ളത്. കഴിഞ്ഞ ദിവസങ്ങളില്‍ മഴ മാറിനിന്നത് നാട്ടുകാര്‍ക്ക് ആശ്വാസമായെങ്കിലും കിഴക്കന്‍ വെള്ളത്തിന്‍റെ വരവ് നിലയ്ക്കാത്തത് പ്രതിസന്ധിയാണ്. എഴുമാന്തുരുത്തില്‍നിന്ന് പുറത്തേക്കുള്ള മൂന്നു വഴികളിലും വെള്ളം കയറി. ആയാംകുടിയിലേക്കുള്ള വഴിയുടെ അരക്കിലോമീറ്റര്‍ ഭാഗവും മധുരവേലിയിലേക്കുള്ള റോഡിന്‍റെ തുരുത്ത് ഭാഗത്തും തലയോലപ്പറമ്പിലേക്കുള്ള വഴിയിലും വെള്ളം നിറഞ്ഞ സ്ഥിതിയാണ്. കെഎസ്ആര്‍ടിസി ഗ്രാമവണ്ടിയും സ്വകാര്യ ബസുകളടക്കമുള്ള വാഹനങ്ങളും രണ്ടു ദിവസമായി ഇതുവഴിയുള്ള സര്‍വീസുകള്‍ നിര്‍ത്തിവച്ചിരിക്കുകയാണ്. കടുത്തുരുത്തി വലിയതോട്, ചുള്ളിത്തോട് എന്നിവിടങ്ങളിലൂടെ എത്തുന്ന വെള്ളം എഴുമാംകായലിലൂടെ ഒഴുകിപ്പോകാനുള്ള കാലതാമസമാണ് വെള്ളക്കെട്ട് ദിവസങ്ങളോളം നീണ്ടുനില്‍ക്കാന്‍ കാരണമെന്നു പ്രദേശവാസികള്‍ പറയുന്നു. തോടുകളുടെ ആഴംകൂട്ടണമെന്നാവശ്യപ്പെട്ട് ഇറിഗേഷന്‍ വകുപ്പധികൃതരെ സമീപിച്ചെങ്കിലും നടപടിയുണ്ടായിട്ടില്ലെന്നാണ് ജനപ്രതിനിധികള്‍ വ്യക്തമാക്കുന്നത്.

ലഹരിക്ക് ബദൽ സ്പോർട്സ്: മന്ത്രി വി. അബ്ദുൾ റഹ്‌മാൻ

വൈക്കം: ലഹരിക്കു ബദലായി കുട്ടികൾക്ക് ഊർജം പകരാൻ സ്പോർട്സിനാകുമെന്നു കായിക മന്ത്രി വി. അബ്ദുൾ റഹ്‌മാൻ. സംസ്ഥാന സർക്കാരിന്‍റെ ഒരു പഞ്ചായത്തില്‍ ഒരു കളിക്കളം പദ്ധതിയില്‍പ്പെടുത്തി നിര്‍മാണം പൂര്‍ത്തീകരിച്ച ഉദയനാപുരം പഞ്ചായത്തിലെ അക്കരപ്പാടം ടര്‍ഫ് സ്റ്റേഡിയം നാടിനു സമർപ്പിച്ചു പ്രസംഗിക്കുകയായിരുന്നു അദ്ദേഹം. സംസ്ഥാനത്ത് 300 പഞ്ചായത്തുകളിലാണ് കളിക്കളമില്ലാതിരുന്നത്. ഇപ്പോഴത് 200ൽ താഴെയായി കുറഞ്ഞു. ബാക്കി ഈ സാമ്പത്തിക വർഷം പൂർത്തിയാക്കാനുള്ള ശ്രമം ദ്രുതഗതിയിൽ നടന്നുവരുന്നു. 1,400 കോടി കിഫ്ബി ഫണ്ടിൽനിന്നും 500 ലധികം കോടി പ്ലാൻ ഫണ്ടിൽനിന്നുമടക്കം 2,000 കോടി രൂപ ചെലവഴിച്ചു കായിക അടിസ്ഥാനസൗകര്യ വികസന പ്രവർത്തനങ്ങൾ കേരളത്തിൽ നടന്നുവരുന്നു. അതിനുപുറമേ 369 വലിയ കളിക്കളങ്ങൾ പൂർത്തിയായി. ജില്ലാ ആസ്ഥാനങ്ങളിലും കളിക്കളങ്ങൾ നിർമിക്കുന്നു. ഗ്രാമങ്ങളിലെ എല്ലാ പ്രായക്കാരുടെയും കായികക്ഷമത വർധിപ്പിക്കാൻ കായികകേരളം പദ്ധതി നടപ്പാക്കുമെന്നും മന്ത്രി കുട്ടിച്ചേർത്തു. സംസ്ഥാന കായിക വകുപ്പിന്‍റെ 50 ലക്ഷം രൂപയും എംഎല്‍എയുടെ ആസ്തിവികസന ഫണ്ടില്‍നിന്നുള്ള 60 ലക്ഷം രൂപയുമടക്കം 1.10 കോടി രൂപ വിനിയോഗിച്ചാണ് സ്റ്റേഡിയത്തിന്‍റെ നിര്‍മാണം പൂര്‍ത്തീകരിച്ചത്. അക്കരപ്പാടം ഗവൺമെന്‍റ് യുപി സ്‌കൂള്‍ ഗ്രൗണ്ടില്‍ നടന്ന സമ്മേളനത്തിൽ സി.കെ. ആശ എംഎല്‍എ അധ്യക്ഷത വഹിച്ചു. വൈക്കം ബ്ലോക്ക് പഞ്ചായത്ത് പ്രസിഡന്‍റ് എസ്. ബിജു, ജില്ലാ പഞ്ചായത്ത് അംഗം പി.എസ്. പുഷ്പമണി, ഉദയനാപുരം പഞ്ചായത്ത് പ്രസിഡന്‍റ് പി.കെ. ആനന്ദവല്ലി, ബ്ലോക്ക്-ഗ്രാമപഞ്ചായത്ത് അംഗങ്ങള്‍, വിവിധ രാഷ‌്‌ട്രീയ പാര്‍ട്ടി പ്രതിനിധികള്‍ എന്നിവര്‍ പങ്കെടുത്തു. വൈക്കം നിയോജക മണ്ഡലത്തില്‍ നിര്‍മാണം പൂര്‍ത്തീകരിച്ച് ഉദ്ഘാടനം ചെയ്യുന്ന ആദ്യ സ്റ്റേഡിയമാണ് അക്കരപ്പാടം ടര്‍ഫ് ഗ്രൗണ്ട്.

ടിവിപുരത്ത് സ്മാർട്ട് കൃഷിഭവൻ നിർമാണം പുരോഗമിക്കുന്നു

ടിവിപുരം: ടിവിപുരം പഞ്ചായത്തിൽ പുതുതായി ആരംഭിക്കുന്ന സ്മാർട്ട് കൃഷിഭവന്‍റെ നിർമാണ പ്രവർത്തനങ്ങൾ പുരോഗമിക്കുന്നു. രണ്ടു നിലകളിലായിട്ടാണ് സ്മാർട്ട് കൃഷി ഭവൻ നിർമിക്കുന്നത്. രണ്ടാംനിലയുടെ പണികളാണ് ഇപ്പോൾ ദ്രുതഗതിയിൽ പുരോഗമിച്ചുവരുന്നത്. ടിവിപുരം ചെമ്മനത്തു കരയിൽ പഞ്ചായത്ത് അനുവദിച്ച ആറു സെന്‍റ് സ്ഥലത്താണ് കെട്ടിടം പണിയുന്നത്. നബാർഡ് ആർഎൽഡിഎഫ് 2022 - 2023 സാമ്പത്തിക വർഷത്തിൽ അനുവദിച്ച 1.41 കോടി രൂപയാണ് പദ്ധതിക്കായി ചെലവഴിക്കുന്നത്. 151.305 ചതുരശ്ര അടിയിലായി താഴത്തെ നിലയും മുകൾനിലയിൽ 148.22 ചതുരശ്ര അടിയിലുമായാണ് കെട്ടിടം നിർമിക്കുന്നത്. കെഎൽഡിസി കമ്പനിക്കാണ് നിർമാണ ച്ചുമതല. താഴത്തെ നിലയിൽ ഫ്രണ്ട് ഓഫീസ്, ഇക്കോ ഷോപ്പ്, ബയോഫാർമസി, ഓഫീസ് മുറികളും രണ്ടാമത്തെ നിലയിൽ പ്ലാന്‍റ്, ഹെൽത്ത് ക്ലിനിക്, സെമിനാർ ഹാൾ എന്നിവയുമാണ് ഉൾപ്പെടുന്നത്. കൃഷിഭവനുകളെ നവീനവത്കരിക്കുന്നതിനും നൂതന സാങ്കേതികവിദ്യകൾ പ്രയോജനപ്പെടുത്തി സേവനങ്ങൾ കൃത്യതയോടും സമയബന്ധിതമായും കർഷകരിലേക്ക് എത്തിക്കുന്നതിനായി രൂപീകരിച്ച പദ്ധതിയാണ് സ്മാർട്ട് കൃഷിഭവൻ. കാർഷിക സേവനങ്ങൾ പൂർണമായും ഓൺലൈനാക്കി പേപ്പർലെസ് ഓഫീസ് സംവിധാനം ഏർപ്പെടുത്തുക, കർഷകർക്ക് തിരിച്ചറിയൽ കാർഡുകൾ ലഭ്യമാക്കുക, പ്ലാന്‍റ് ഹെൽത്ത് ക്ലിനിക് മുഖേന വിളപരിപാലന പരിപാടികൾ ഏകോപിപ്പിക്കുക തുടങ്ങിയ പ്രവർത്തനങ്ങൾ സ്മാർട്ട് കൃഷിഭവനിലൂടെ പ്രാഥമികമായി നടപ്പിലാക്കും.

ജൂലൈ മൂന്ന് പൊതു അവധിയായി പ്രഖ്യാപിക്കണം: കത്തോലിക്ക കോണ്‍ഗ്രസ്

കടുത്തുരുത്തി: ജൂലൈ മൂന്ന് പൊതു അവധിയായി പ്രഖ്യാപിക്കണമെന്നു കത്തോലിക്ക കോണ്‍ഗ്രസ് കടുത്തുരുത്തി മേഖലാ സമ്മേളനം ആവശ്യപ്പെട്ടു. മാന്നാര്‍ സെന്‍റ് മേരീസ് പള്ളിയങ്കണത്തില്‍ ചേര്‍ന്ന മേഖലാ സമ്മേളനം വികാരി ഫാ. സിറിയക് കൊച്ചുകൈപ്പെട്ടിയില്‍ ഉദ്ഘാടനം ചെയ്തു. മേഖലാ പ്രസിഡന്‍റ് രാജേഷ് ജയിംസ് കോട്ടായില്‍ അധ്യക്ഷത വഹിച്ച സമ്മേളനത്തില്‍ കത്തോലിക്ക കോണ്‍ഗ്രസ് രൂപതാ പ്രസിഡന്‍റ് ഇമ്മാനുവല്‍ നിധീരി മുഖ്യപ്രഭാഷണം നടത്തി. രൂപതാ ജനറല്‍ സെക്രട്ടറി ജോസ് വട്ടുകുളം, മേഖലാ സെക്രട്ടറി ജോര്‍ജ് മങ്കുഴിക്കരി, ജെറി ജോസഫ്, മനോജ് കടവന്‍റെകാല എന്നിവര്‍ പ്രസംഗിച്ചു.

ലഹരിവിരുദ്ധ ബോധവത്കരണ ക്ലാസ് നടത്തി

ഞീഴൂര്‍: ഒരുമ ചാരിറ്റബിള്‍ ആന്‍ഡ് അഗ്രിക്കള്‍ച്ചര്‍ സൊസൈറ്റിയുടെ നേതൃത്വത്തില്‍ ലഹരിവിരുദ്ധ ബോധവത്കരണ റാലിയും നിര്‍ധനരായവര്‍ക്കുള്ള ഭക്ഷ്യക്കിറ്റ് വിതരണവും നടത്തി. കടുത്തുരുത്തി എസ്‌ഐ എന്‍.എസ്. സജീവ്കുമാര്‍ ലഹരിവിരുദ്ധ ബോധവത്കരണ ക്ലാസെടുത്തു. ഒരുമ ചാരിറ്റബിള്‍ സൊസൈറ്റി നല്‍കിവരുന്ന 150 കിറ്റുകളുടെ വിതരണം, ചികിത്സാസഹായം, മരുന്ന് വിതരണം എന്നിവയുടെ ഉദ്ഘാടനം ഒരുമ പ്രസിഡന്‍റ് കെ.കെ. ജോസ്പ്രകാശ് നിര്‍വഹിച്ചു. സെക്രട്ടറി ശ്രുതി സന്തോഷ്, ട്രഷറര്‍ സിന്‍ജ ഷാജി, വൈസ് പ്രസിഡന്‍റ് ഷാജി അഖില്‍ നിവാസ്, സുധര്‍മിണി ജോസ് പ്രകാശ്, ജയന്‍ കറുകപ്പള്ളി, സുഷമ അജിപ്രകാശ്, ജോയ് മൈലംവേലില്‍, കെ.പി. വിനോദ്, അര്‍ച്ചന ഹരിദാസ് എന്നിവര്‍ പങ്കെടുത്തു.

രുഗ‌്മിണീ സ്വയംവര ഘോഷയാത്ര ഭക്തിനിർഭരമായി

വൈക്കം: ചാലപ്പറമ്പ് കാർത്യാകുളങ്ങര ശ്രീധർമശാസ്താ ക്ഷേത്രത്തിൽ ശ്രീമദ് ഭാഗവത സപ്താഹ യജ്ഞത്തോടനുബന്ധിച്ചു നടന്ന രുഗ്‌മിണീ സ്വയംവരം ഭക്തിനിർഭരമായി. ചാലപ്പറമ്പ് എൻഎസ് എസ് കരയോഗമന്ദിരത്തിൽനിന്നാണ് വർണാഭമായ സ്വയംവരഘോഷയാത്ര ക്ഷേത്രത്തിലേക്ക് എത്തിയത്. യജ്ഞാചാര്യൻ അരൂർ അപ്പുജി, ക്ഷേത്രം തന്ത്രി ബ്രഹ്മശ്രീ ആനത്താനത്ത് ഇല്ലത്ത് എ.വി. ഗോവിന്ദൻ നമ്പൂതിരി എന്നിവരുടെ കാർമികത്വത്തിലാണ് ശ്രീമദ് ഭാഗവത സപ്താഹ യജ്ഞം നടന്നു വരുന്നത്. വൈകുന്നേരം നടന്ന സർവൈശ്വര്യപൂജയിലും നൂറുകണക്കിനു ഭക്തർ പങ്കെടുത്തു. ജൂലൈ ഒന്നിന് രാവിലെ 10.30ന് കുചേലോപാഖ്യാനം.11.30ന് സന്താനഗോപാലം. വൈകുന്നേരം 5.30ന് സർവൈശ്വര്യപൂജ. രണ്ടിനു രാവിലെ ഒൻപതിന് പുനപ്രതിഷ്ഠാദിന പൂജകൾ. 10.30ന് ഭഗവാന്‍റെ സ്വധാമ പ്രാപ്തി. ക്ഷേത്രം ദേവസ്വം പ്രസിഡന്‍റ് എസ്. ഹരിദാസൻ നായർ, സെക്രട്ടറിമാരായ എം. വിജയകുമാർ, കെ.ടി. രാംകുമാർ, വനിതാ സമാജം പ്രസിഡന്‍റ് ജഗദംബിക, സെക്രട്ടറി അംബക തുടങ്ങിയവർ നേതൃത്വം നൽകി.

ഞാറ്റുവേലച്ചന്ത ഉദ്ഘാടനം ചെയ്തു

മറവൻതുരുത്ത്: മറവൻതുരുത്ത് പഞ്ചായത്ത്, കൃഷിഭവൻ എന്നിവയുടെ ആഭിമുഖ്യത്തിൽ കർഷകസഭയും ഞാറ്റുവേലച്ചന്തയും സംഘടിപ്പിച്ചു. പഞ്ചായത്ത് വൈസ് പ്രസിഡന്‍റ് വി.ടി. പ്രതാപന്‍റെ അധ്യക്ഷതയിൽ നടന്ന യോഗത്തിൽ പഞ്ചായത്ത് പ്രസിഡന്‍റ് പി. പ്രീതി ഞാറ്റുവേലച്ചന്ത ഉദ്ഘാടനം ചെയ്തു. ബ്ലോക്ക്, ഗ്രാമപഞ്ചായത്ത് അംഗങ്ങൾ, കൃഷിഭവൻ ഉദ്യോഗസ്ഥർ, കാർഷിക വികസനസമിതി അംഗങ്ങൾ, കർഷകർ തുടങ്ങിയവർ പങ്കെടുത്തു. കുരുമുളക് വള്ളികൾ, പച്ചക്കറിവിത്ത് എന്നിവയുടെ വിതരണവും നടത്തി.

സിപിഐ പ്രാദേശിക നേതാക്കള്‍ തമ്മില്‍ വാക്കേറ്റവും സംഘര്‍ഷവും

കടുത്തുരുത്തി: സിപിഐ പ്രാദേശിക നേതാക്കള്‍ തമ്മില്‍ വാക്കേറ്റവും സംഘര്‍ഷവും. സിപിഐ കടുത്തുരുത്തി മണ്ഡലം കമ്മിറ്റി ഓഫീസില്‍ ഞായറാഴ്ച വൈകുന്നേരമാണ് സംഭവം. മണ്ഡലം കമ്മിറ്റിയംഗങ്ങള്‍, ലോക്കല്‍ സെക്രട്ടറിമാര്‍, ബ്രാഞ്ച് സെക്രട്ടറിമാര്‍ എന്നിവരുടെ യോഗം കഴിഞ്ഞ ഉടനാണ് വാക്കേറ്റമുണ്ടായത്. കടുത്തുരുത്തി ടൗണ്‍ ബ്രാഞ്ച് സെക്രട്ടറി അജിന്‍ കുര്യന്‍, ആയാംകുടി ബ്രാഞ്ച് സെക്രട്ടറി രാജു തോമസ് എന്നിവര്‍ തമ്മിലാണ് സംഘര്‍ഷമുണ്ടായത്. പാര്‍ട്ടി നേതാക്കള്‍ മുകളിലുള്ള ഓഫീസിനു താഴെയെത്തിക്കഴിഞ്ഞാണ് സംഭവം. നേതാക്കള്‍ ഇടപെട്ട് ഇരുവരെയും പിടിച്ചുമാറ്റുകയായിരുന്നു. തുടര്‍ന്ന് രാജു തോമസ് മര്‍ദനമേറ്റതായിക്കാണിച്ച് കടുത്തുരുത്തി പോലീസില്‍ പരാതി നല്‍കുകയായിരുന്നു. മര്‍ദനമേറ്റ ബ്രാഞ്ച് സെക്രട്ടറിയുടെ പരാതിയില്‍ അന്വേഷണം ആരംഭിച്ചതായി കടുത്തുരുത്തി എസ്എച്ച്ഒ ടി.എസ്. റെനീഷ് പറഞ്ഞു. ഇതേസമയം ഇങ്ങനെയൊരു സംഭവം പാര്‍ട്ടി ഓഫീസില്‍ ഉണ്ടായിട്ടില്ലെന്ന് മണ്ഡലം സെക്രട്ടറി പി.ജി. ത്രിഗുണസെന്‍ പറഞ്ഞു. കടുത്തുരുത്തിയില്‍ സിപിഐക്കുള്ളില്‍ ഏറെക്കാലമായി വിഭാഗിയത നിലനില്‍ക്കുകയാണ്.

സയന്‍സ് സെന്‍റര്‍ മൂന്നിന് മുഖ്യമന്ത്രി ഉദ്ഘാടനം ചെയ്യും

കോട്ടയം: ശാസ്ത്രത്തിന്‍റെ വിസ്മയലോകത്തേക്ക് വാതിലുകള്‍ തുറന്നിട്ട് കോഴാ സയന്‍സ് സിറ്റി. ഇനി പ്രപഞ്ചസത്യങ്ങളുടെ വിശാലവിസ്മയങ്ങളിലേക്ക് കൗതുകപ്രവേശനം. ഉന്നത വിദ്യാഭ്യാസ വകുപ്പിനുകീഴിലുള്ള സംസ്ഥാന ശാസ്ത്ര സാങ്കേതിക മ്യൂസിയത്തിന്‍റെ ആഭിമുഖ്യത്തില്‍ ജില്ലയില്‍ സ്ഥാപിക്കുന്ന സയന്‍സ് സിറ്റിയുടെ ഒന്നാംഘട്ടമായ സയന്‍സ് സെന്‍റര്‍ യാഥാര്‍ഥ്യമായി. ഉദ്ഘാടനം മൂന്നിന് മുഖ്യമന്ത്രി പിണറായി വിജയന്‍ നിര്‍വഹിക്കും. ഉന്നതവിദ്യാഭ്യാസ സാമൂഹികനീതി മന്ത്രി ഡോ. ആര്‍. ബിന്ദു അധ്യക്ഷത വഹിക്കും. സമൂഹത്തില്‍ ശാസ്ത്രാവബോധം വളര്‍ത്താനും ശാസ്ത്ര വിഷയങ്ങളില്‍ കുട്ടികള്‍ക്കുള്ള ആഭിമുഖ്യം വര്‍ധിപ്പിക്കാനും ലക്ഷ്യമിട്ടാണ് കുറവിലങ്ങാട് പഞ്ചായത്തിലെ കോഴായില്‍ എംസി റോഡരില്‍ സര്‍ക്കാര്‍ അനുവദിച്ച 30 ഏക്കര്‍ ഭൂമിയില്‍ സയന്‍സ് സിറ്റി സ്ഥാപിച്ചത്. ശാസ്ത്ര ഗാലറികള്‍, തൃമാന പ്രദര്‍ശന തിയറ്റര്‍, ശാസ്ത്ര പാര്‍ക്ക്, സെമിനാര്‍ ഹാള്‍, ഇന്നവേഷന്‍ ഹബ് എന്നിവ ഉള്‍ക്കൊള്ളുന്ന സയന്‍സ് സെന്‍ററാണ് പ്രധാന ഭാഗം. പദ്ധതി പ്രദേശത്ത് 47,147 ചതുരശ്ര അടി വിസ്തീര്‍ണത്തില്‍ നിര്‍മിച്ചിരിക്കുന്ന സയന്‍സ് സെന്‍റര്‍ കെട്ടിടത്തില്‍ പല വിഭാഗങ്ങളിലായിട്ടാണ് പ്രദര്‍ശനം സജ്ജമാക്കിയിട്ടുള്ളത്. ഇതിനുപുറമേ തദ്ദേശസ്ഥാപനങ്ങളുടെ സഹകരണത്തോടെ അപൂര്‍വയിനം വനസുഗന്ധവ്യഞ്ജനങ്ങൾ ഉള്‍ക്കൊള്ളിച്ച് പൊതുജനങ്ങള്‍ക്കായി ഒരു ജൈവവൈവിധ്യ ഉദ്യാനത്തിന്‍റെ നിര്‍മാണോദ്ഘാടനം ഉടന്‍ നടക്കും. പ്രവേശനം നാലു മുതല്‍ സയന്‍സ് സിറ്റിയിലേക്ക് ഉദ്ഘാടനപ്പിറ്റേന്നു മുതല്‍ പ്രവേശനം അനുവദിക്കും. രാവിലെ 10 മുതല്‍ വൈകുന്നേരം അഞ്ചുവരെയാണ് പൊതുജനങ്ങള്‍ക്ക് സന്ദര്‍ശിക്കാവുന്നത്. തിങ്കളാഴ്ചകളില്‍ അവധിയായിരിക്കും. 30 രൂപയാണ് പ്രവേശന ഫീസ്. വിദ്യാര്‍ഥികള്‍ക്ക് 20 രൂപയും.

കുട്ടികള്‍ക്കൊപ്പം സൂംബ നൃത്തവുമായി മന്ത്രി വി.എന്‍. വാസവന്‍

കോട്ടയം: വിദ്യാര്‍ഥികള്‍ക്കൊപ്പം സൂംബ ഡാന്‍സ് കളിച്ച് മന്ത്രി വി.എന്‍. വാസവന്‍. മൗണ്ട് കാര്‍മല്‍ ഹൈസ്‌കൂളില്‍ വിദ്യാഭ്യാസ വകുപ്പിന്‍റെ നേതൃത്വത്തില്‍ നടത്തിയ ലോക ലഹരിവിരുദ്ധ ദിനാചരണത്തിന്‍റെ ജില്ലാതല ഉദ്ഘാടനത്തോടനുബന്ധിച്ചാണ് കുട്ടികള്‍ക്കൊപ്പം മന്ത്രിയും ചുവടുവച്ചത്. സ്‌കൂളിലെ ആയിരത്തോളം വരുന്ന കുട്ടികളും സൂംബയില്‍ അണിചേര്‍ന്നു. ചടങ്ങില്‍ കോട്ടയം നഗരസഭാ ചെയര്‍പേഴ്‌സണ്‍ ബിന്‍സി സെബാസ്റ്റ്യന്‍ അധ്യക്ഷത വഹിച്ചു. നഗരസഭാംഗം അജിത് പൂഴിത്തറ, പൊതുവിദ്യാഭ്യാസ വകുപ്പ് ഡെപ്യൂട്ടി ഡയറക്ടര്‍ ഹണി ജി. അലക്‌സാണ്ടര്‍, എസ്എസ്‌കെ ജില്ലാ പ്രോജക്‌ട് കോ-ഓര്‍ഡിനേറ്റര്‍ കെ.ജെ. പ്രസാദ്, ജില്ലാ വിദ്യാഭ്യാസ ഓഫീസര്‍ എം.ആര്‍. സുനിമോള്‍, സ്‌കൂള്‍ പ്രിന്‍സിപ്പല്‍ ടി.പി. മേരി, ഹെഡ്മിസ്ട്രസ് സിസ്റ്റര്‍ എ.എസ്. ജെയിന്‍, പിടിഎ. പ്രസിഡന്‍റ് പ്രവീണ്‍ കെ. രാജ് എന്നിവര്‍ പങ്കെടുത്തു.

ഇന്ന് ഡോക്‌ടേഴ്‌സ് ദിനം; പാലായിലെ ഓടുന്ന ഡോക്‌ടർ

പാലാ: ആതുരസേവനത്തില്‍ ഒട്ടേറെ ശസ്ത്രക്രിയകള്‍ നടത്തിയ ഡോ. ഖലീല്‍ ഐസക്ക് മത്തായി ഇടയ്ക്കിടെ ഓടും. ചെറിയ ഓട്ടമല്ല പത്തും നാല്‍പതും കിലോമീറ്റര്‍. ആരോഗ്യം വിലപ്പെട്ടതാണെന്ന സന്ദേശം സമൂഹത്തെ അറിയിക്കുകയാണ് മാരത്തണിലൂടെ പാലാ മാര്‍ സ്ലീവാ മെഡിസിറ്റിയിലെ ന്യൂറോസര്‍ജറി ആന്‍ഡ് സ്‌പൈന്‍ സര്‍ജറി വിഭാഗം സീനിയര്‍ കണ്‍സള്‍ട്ടന്‍റായ ഡോ. ഖലീല്‍ ഐസക്ക് മത്തായി. 66 വയസിനിടെ ഡോക്ടര്‍ പൂര്‍ത്തിയാക്കിയത് മുപ്പത്തിയഞ്ചിലേറെ മാരത്തണുകളാണ്. ഇതില്‍ പത്തെണ്ണം 42 കി.മീ ഫുള്‍ മാരത്തണുകളായിരുന്നു. മുംബൈയില്‍ മുന്‍പ് നടന്ന ഹാഫ് മാരത്തണില്‍ വെറ്ററന്‍ വിഭാഗത്തില്‍ ചാമ്പ്യനാണ് ഡോ. ഖലീല്‍ ഐസക്ക് മത്തായി. സൈന്യത്തില്‍ മൂന്നര പതിറ്റാണ്ടു നീണ്ട സേവനത്തിനിടയിലും ചിട്ടയായ വ്യായാമവും ബോധവത്കരണവും മുടക്കിയില്ല. വ്യോമസേനയുടെ കമാന്‍ഡ് ഹോസ്പിറ്റലില്‍ സര്‍ജറി ആന്‍ഡ് ന്യൂറോസര്‍ജറി വിഭാഗം മേധാവിയായിരുന്ന ഡോക്ടര്‍ പൂന യൂണിവേഴ്‌സിറ്റി നടത്തിയ ഡെക്കാത്തലണില്‍ ഒന്നാം സ്ഥാനം, വെസ്റ്റേണ്‍ നേവല്‍ കമാന്‍ഡിലെ മികച്ച അത്‌ലറ്റ് തുടങ്ങിയ അംഗീകാരങ്ങള്‍ കൈവരിച്ചു. കന്യാകുമാരിയില്‍നിന്ന് മുംബൈ വരെ സൈക്കിള്‍ ചവിട്ടിയും ആരോഗ്യസന്ദേശവുമായി മാതൃകയാകാന്‍ സാധിച്ചു. വൈദ്യവും വ്യായാമവും ഒരുമിപ്പിച്ച ഡോക്ടര്‍ വായനയിലും എഴുത്തിലും സജീവമാണ്. ഇതോടകം പത്ത് ഫിക്‌ഷന്‍ കഥകള്‍ പ്രസിദ്ധീകരിച്ചിട്ടുണ്ട്. ന്യൂറോ സര്‍ജറിയില്‍ പഠന ഗ്രന്ഥം എഴുതിയതിനു പുറമേ മുപ്പതില്‍പരം ജേര്‍ണലുകളിലും പഠന ലേഖനങ്ങള്‍ എഴുതി. തന്‍റെ ശസ്ത്രകിയയിലൂടെ ജീവിതത്തിലേക്ക് തിരിച്ചെത്തിയവരെ സന്ദര്‍ശിക്കാനും അവര്‍ക്ക് മാര്‍ഗനിര്‍ദേശം നല്‍കാനും സമയം കണ്ടെത്തുന്നതും പതിവാണ്. കോട്ടയം പാലത്തിങ്കല്‍ കുടുംബാംഗമാണ് ഡോ. ഖലീല്‍. ഭാര്യ വൈസ് അഡ്മിറല്‍ (റിട്ട) ഡോ. ഷീല മത്തായി മണിപ്പാല്‍ കസ്തൂര്‍ബാ ഗാന്ധി മെഡിക്കല്‍ കോളജ് നവജാത ശുശുവിഭാഗം മേധാവിയാണ്.

പാലായെ ‘തിരുനാൾ വൈബിലാക്കി ’ സിനിമാ ഷൂട്ടിംഗ്

കോട്ടയം: ഡിസംബറിലെ പാലാക്കാരുടെ സ്വന്തം ജൂബിലി തിരുനാളിന്‍റെ അതേ ആളും ബഹളവും. ദീപാലങ്കാരങ്ങളും വെള്ളിത്തോരണങ്ങളും മാല ബള്‍ബുകളും ഉഴുന്നാട വഴിയോരക്കടകളുമെല്ലാം അതേപടി. പാലാ വീണ്ടും ജൂബിലി തിരുനാള്‍ ആഘോഷത്തിന്‍റെ മൂഡിലാണ്. കേന്ദ്രമന്ത്രി സുരേഷ് ഗോപി നായകനാകുന്ന ‘ഒറ്റക്കൊമ്പന്‍’ സിനിമയുടെ ഷൂട്ടിംഗാണ് കഴിഞ്ഞ മൂന്നു ദിവസമായി പാലായില്‍ നടന്നുവരുന്നത്. രാത്രി ഏഴു മുതല്‍ പുലര്‍ച്ചെ വരെയാണ് ഷൂട്ട്. വാദ്യോപകരണങ്ങളുടെയും കരിമരുന്നിന്‍റെയും അകമ്പടിയോടെയുള്ള രാത്രി പ്രദക്ഷിണമാണ് രണ്ടു ദിവസമായി ചിത്രീകരിച്ചത്. സ്റ്റേഡിയം ജംഗ്ഷനില്‍നിന്നു ജൂബിലി പന്തലിലേക്കുള്ള പ്രദക്ഷിണത്തിന്‍റെ ഷൂട്ടാണ് നടന്നുവരുന്നത്. പാലായിലും പരിസര പ്രദേശങ്ങളിലുമുള്ള ആയിരത്തോളം ജൂണിയര്‍ ആര്‍ട്ടി സ്റ്റുകളാണ് മുത്തുക്കുടകളുമേന്തി പ്രദക്ഷിണത്തില്‍ വേഷമിട്ടത്. ഷൂട്ടിംഗ് കാണാനെത്തിയവര്‍ റോഡിനിരുവശത്തായി നിറഞ്ഞതോടെ കാഴ്ചക്കാര്‍ പ്രദക്ഷിണം വീക്ഷിക്കുന്നവരായി അഭ്രപാളിയിലുമായി. ജൂബിലി തിരുനാളിന്‍റെ പട്ടണപ്രദക്ഷിണം അതേപടി വീണ്ടും പുനരാവിഷ്‌കരിച്ച രീതിയിലായിരുന്നു സിനിമയുടെ സെറ്റ്. ഷൂട്ടിംഗ് കാണാനായി കഴിഞ്ഞ രണ്ടു രാത്രി പാലായില്‍ വന്‍ ജനസഞ്ചയമാണ് എത്തിയത്. വെള്ളിത്തോരണങ്ങളാല്‍ പാലാ നഗരം വീണ്ടും മേലാപ്പണിഞ്ഞിരിക്കുകയാണ്. പീപ്പിയും പടക്കവും ഉഴുന്നാടയും വറവുകടലയും കരയുന്ന ബലൂണും കൈവിട്ടാല്‍ ഊതി തെറിക്കുന്ന രസഗോളങ്ങളുമൊക്കെയായുള്ള പാലാ നഗരവും ആകാശത്തൊട്ടിലും മരണക്കിണറും ടൂവീലര്‍ ഫാന്‍സിഡ്രസും ടാബ്ലോയും ഒക്കെ പുനരാവിഷ്‌കരിക്കപ്പെടുന്ന അപൂര്‍വ കാഴ്ച കാണാനായി ദൂരദിക്കില്‍നിന്നുവരെ ആളുകള്‍ പാലായിലേക്ക് ഒഴുകിയെത്തുകയാണ്. പ്രദക്ഷിണവും കൂടി, ടൗണ്‍ മഴുവന്‍ നടന്നു ചുറ്റി ഉഴുന്നാടയും ബലൂണുമൊക്കെയായി ജൂബിലിത്തിരുനാള്‍ കൂടി പോകുന്ന അതേ പ്രതീതിയിലായിരുന്നൂ ആളുകളുടെ മടക്കം. ജൂബിലി തിരുനാളിനോടനുബന്ധിച്ച് നടത്തിവരാറുള്ള ടൂവീലര്‍ ഫാന്‍സിഡ്രസ് മത്സരവും സുരേഷ് ഗോപി അഭിനയിക്കുന്ന രംഗങ്ങളും അടുത്ത ദിവസങ്ങളില്‍ ഷൂട്ട് ചെയ്യും. പാലായിലുള്ള ദിനങ്ങളിലെല്ലാം പതിവായി പുലര്‍ച്ചെ കുരിശുപള്ളി മാതാവിന്‍റെ യടുത്തെത്തി തിരികത്തിച്ചു പ്രാര്‍ഥിച്ച് ജീവിതചര്യ ആരംഭിക്കുന്ന കഥാപാത്രമായാണ് സുരേഷ് ഗോപി ചിത്രത്തില്‍ വേഷമിടുന്നത്. സുരേഷ് ഗോപിയെ കൂടാതെ ഇന്ദ്രജിത്ത്, ലാല്‍‌, ജോണി ആന്‍റണി, ലാലു അലക്‌സ് അടക്കമുള്ള വമ്പന്‍ താരനിരയും സിനിമയിലുണ്ട്. മൂന്നു വര്‍ഷം മുമ്പ് തുടങ്ങിയതാണ് സിനിമയുടെ ഷൂട്ടിംഗ് നടപടികള്‍. കഴിഞ്ഞ രണ്ടു വര്‍ഷത്തെ ജൂബിലി തിരുനാളിന്‍റെ വീഡിയോ ഫുട്ടേജും ഷൂട്ടിംഗിന്‍റെ ഭാഗമായി എടുത്തിട്ടുണ്ട്. ജൂബിലി തിരുനാളിലെ പാലാക്കാരുടെ വീടുകളിലെ ആഘോഷവും മറ്റും തിരുവനന്തപുരത്ത് സെറ്റ് ഇട്ടാണ് ഷൂട്ട് ചെയ്തത്. പാലാ ജൂബിലി തിരുനാള്‍ ഷൂട്ടിനൊപ്പം പാലായുടെ തനിമയായ മീനച്ചിലാര്‍, പാലാ കത്തീഡ്രല്‍, പാലാ നഗരം എന്നിവയും ചേര്‍പ്പുങ്കല്‍ പള്ളി മൈതാനവും ഷൂട്ട് ചെയ്യുന്നുണ്ട്.

മോഷണക്കേസില്‍ പോലീസ് പിടികൂടിയ പ്രതി ജയില്‍ ചാടി

കോട്ടയം: മൊബൈല്‍ മോഷണക്കേസില്‍ പോലീസ് പിടികൂടിയ പ്രതി ജയില്‍ ചാടി. ആസാം നെഗോണ്‍ സ്വ ദേശി അമിനുള്‍ ഇസ്‌ലാം (ബാബു-20) ആണ് ജയില്‍ ചാടിയത്. ഇന്നലെ വൈകുന്നേരം മൂന്നോടെയാണ് സംഭവം. ജില്ലാ ജയിലിനോട് ചേര്‍ന്നുള്ള വിജിലന്‍സ് ഓഫീസ് കെട്ടിടം സ്ഥിതി ചെയ്യുന്ന ഭാഗത്തെ മതിലാണ് പ്രതി ചാടിക്കടന്നു രക്ഷപ്പെട്ടത്. കഴിഞ്ഞ ദിവസം റെയില്‍വേ പോലീസാണ് ഇയാളെ പിടികൂടിയത്. മുണ്ട് മാത്രമാണ് പ്രതി ധരിച്ചിരുന്നത്. ഇയാൾ കളക്ടറേറ്റ് ഭാഗത്തേക്ക് നടന്നുപോകുന്ന സിസിടിവി ദൃശ്യവും പോലീസിന് ലഭിച്ചിട്ടുണ്ട്. കഴിഞ്ഞ ദിവസം ചെന്നൈ തിരുവനന്തപുരം എക്സ്പ്രസ് ട്രെയിനിലെ യാത്രക്കാരുടെ മൊബൈല്‍ ഫോണ്‍ മോഷ്ടിച്ച കേസിലാണ് അമിനുള്‍ അറസ്റ്റിലായത്. ഇയാളെ കണ്ടെത്താന്‍ പോലീസ് അന്വേഷണം ഊര്‍ജിതമാക്കിയിട്ടുണ്ട്.

ദേശീയപാതയിൽ കലുങ്ക് നിർമാണം; മുണ്ടക്കയം ടൗണിൽ ഗതാഗതക്കുരുക്ക് രൂക്ഷം

മുണ്ടക്കയം: ദേശീയപാതയിൽ മുണ്ടക്കയം ടൗണിന് സമീപം നടക്കുന്ന കലുങ്കിന്‍റെ നിർമാണം ടൗണിൽ ഗതാഗതക്കുരുക്ക് രൂക്ഷമാക്കുന്നു. രാവിലെയും വൈകുന്നേരങ്ങളിലും സ്കൂൾ സമയങ്ങളിലടക്കം വലിയ ഗതാഗതക്കുരുക്കാണ് ടൗണിൽ അനുഭവപ്പെടുന്നത്. കലുങ്കിന്‍റെ നിർമാണം നടക്കുന്ന റോഡിന്‍റെ ഭാഗത്ത് കഷ്ടിച്ച് ഒരു വാഹനത്തിന് മാത്രമാണ് കടന്നുപോകുവാൻ കഴിയുന്നത്. ഇരുവശങ്ങളിൽനിന്നും ബസും ലോറിയടക്കമുള്ള വലിയ വാഹനങ്ങൾ കടന്നുവരുന്നതോടെ പ്രദേശമാകെ ഗതാഗതക്കുരുക്കിലമരും. ദേശീയപാതയിൽ നിർമാണം നടക്കുന്നുണ്ടെങ്കിലും ടൗണിൽ മതിയായ ഗതാഗത പരിഷ്കരണം നടത്താൻ അധികാരികൾ തയാറാകുന്നില്ലെന്ന ആക്ഷേപം ശക്തമാണ്. കട്ടപ്പന, കുമളി ഭാഗങ്ങളിൽനിന്നു വരുന്ന വാഹനങ്ങൾ 34-ാം മൈലിൽനിന്ന് എരുമേലി റൂട്ടിലൂടെ കോസ്‌വേ പാലത്തിലൂടെയോ അല്ലെങ്കിൽ ദേശീയപാതയിൽ കോസ്‌വേ കവലയിൽനിന്നു തിരിച്ച് ബൈപാസ് റോഡിലൂടെയോ കടത്തിവിട്ടാൽ ടൗണിലെ ഗതാഗതക്കുരുക്കിന് പരിഹാരമാകും. എന്നാൽ ചെറുതും വലുതുമായ വാഹനങ്ങളെല്ലാം ദേശീയപാതയിലൂടെ കടന്നുവരികയും വലിയ ഗതാഗതക്കുരുക്കിന് ഇടയാക്കുകയും ചെയ്യുകയാണ്. മുന്നറിയിപ്പ് ബോർഡുകൾ ഒന്നുമില്ലാത്തതിനാൽ മറ്റു സ്ഥലങ്ങളിൽനിന്നു വരുന്ന വാഹന യാത്രക്കാർ ബൈപാസ് റോഡ് ഉപയോഗിക്കാതെ ദേശീയപാതയിലൂടെ മാത്രം കടന്നു പോകുകയാണ്. ഹോം ഗാർഡുകളെ നിയോഗിച്ച് ദേശീയപാതയിൽ കോസ്‌വേ ജംഗ്ഷനിൽനിന്നു വാഹനങ്ങൾ തിരിച്ചുവിട്ടാൽ വലിയ ഗതാഗതക്കുരുക്കിന് പരിഹാരമാകും. ടൗണിൽ ഗതാഗതക്കുരുക്ക് ഉണ്ടാകുമ്പോഴും മുണ്ടക്കയം ബൈപാസ് റോഡ് വേണ്ടവിധം പ്രയോജനപ്പെടുത്താൻ അധികാരികൾക്കാകുന്നില്ലെന്ന് ആക്ഷേപവുമുണ്ട്.

സർക്കാർ അവകാശവാദം ഊതിവീർപ്പിച്ച ബലൂൺ: ആന്‍റോ ആന്‍റണി എംപി

പൊൻകുന്നം: ആരോഗ്യരംഗത്തെ നേട്ടങ്ങളെക്കുറിച്ചുള്ള സർക്കാർ അവകാശവാദം ഊതിവീർപ്പിച്ച ബലൂണാണെന്ന് ആന്‍റോ ആന്‍റണി എംപി. ത്രിതല പഞ്ചായത്ത് തെരഞ്ഞെടുപ്പിനു മുന്നോടിയായി കോൺഗ്രസ് നിയോജകമണ്ഡലം കമ്മിറ്റിയുടെ ആഭിമുഖ്യത്തിൽ നടത്തിയ നേതൃക്യാമ്പ് "വിഷൻ 2025' ഉദ്ഘാടനം ചെയ്യുകയായിരുന്നു അദ്ദേഹം. കഴിഞ്ഞ ഒന്പത് വർഷക്കാലത്തെ ഇടതുഭരണത്തിന്‍റെ യഥാർഥ വിലയിരുത്തലാണ് നിലമ്പൂർ ഉപതെരഞ്ഞെടുപ്പ് ഫലമെന്നും 2026ലെ തെരഞ്ഞെടുപ്പിൽ കോൺഗ്രസ് കൊടുങ്കാറ്റുപോലെ മടങ്ങിവരുമെന്നും അദ്ദേഹം പറഞ്ഞു. കോൺഗ്രസ് കാഞ്ഞിരപ്പള്ളി ബ്ലോക്ക് പ്രസിഡന്‍റ് പി. ജീരാജ് അധ്യക്ഷത വഹിച്ചു. ഡിസിസി പ്രസിഡന്‍റ് നാട്ടകം സുരേഷ് മുഖ്യപ്രഭാഷണം നടത്തി. കെപിസിസി അംഗം തോമസ് കല്ലാടൻ, കോൺഗ്രസ് കറുകച്ചാൽ ബ്ലോക്ക് പ്രസിഡന്‍റ് മനോജ് തോമസ്, ഡിസിസി ജനറൽ സെക്രട്ടറിമാരായ പി.എ. ഷെമീർ, പ്രഫ. റോണി കെ. ബേബി, ഷിൻസ് പീറ്റർ, സുഷമാ ശിവദാസ്, യുഡിഎഫ് കൺവീനർ ജിജി അഞ്ചാനി, കോൺഗ്രസ് മണ്ഡലം പ്രസിഡന്‍റുമാരായ ജോജി മാത്യു, ബിജു പത്യാല, സേവ്യർ മൂലകുന്ന്, എസ്.എം. സേതുരാജ്, സാലു പി. മാത്യു, അജിത അനിൽ, ഷെറിൻ സലിം, ജോൺസൺ ഇടത്തിനകം തുടങ്ങിയവർ പ്രസംഗിച്ചു.

ലോക സാമൂഹികമാധ്യമ ദിനത്തിൽ ജോർജിയൻ റേഡിയോക്കു തുടക്കം

ചുങ്കപ്പാറ: സെന്‍റ് ജോർജ് ഹൈസ്കൂളിൽ സ്കൂൾ ഗ്രീൻ സ്റ്റുഡിയോയുടെയും മീഡിയ ക്ലബ്ബിന്‍റെയും ആഭിമുഖ്യത്തിൽ ജോർജിയൻ റേഡിയോക്ക് തുടക്കമായി. സ്കൂൾ റേഡിയോ പ്രക്ഷേപണത്തിന്‍റെ ഉദ്ഘാടനം ഹെഡ്മാസ്റ്റർ വർഗീസ് ജോസഫ് റേഡിയോയിലൂടെ ആദ്യ സന്ദേശം നൽകി നിർവഹിച്ചു. സാമൂഹിക മാധ്യമങ്ങളുടെ നന്മയാർന്ന ഉപയോഗം കുട്ടികൾക്കു മനസിലാക്കാനുള്ള അവസരമാണ് സ്കൂളിൽ ക്രമീകരിക്കുന്നതെന്ന് ഹെഡ്മാസ്റ്റർ പറഞ്ഞു. കുട്ടികൾതന്നെ റേഡിയോ ജോക്കിയായി റേഡിയോ നിയന്ത്രിക്കുന്നു. സ്റ്റുഡിയോ കോ-ഓർഡിനേറ്റർ ലൈജു കോശി മാത്യു, അനി മാത്യു, ദീപ അഗസ്റ്റിൻ എന്നിവരാണ് നേതൃത്വം നൽകുന്നത്.

ചെറിയമഠത്തില്‍ വലിയ യാക്കോബ് കത്തനാർ സ്മാരക മന്ദിരം ഉദ്ഘാടനം ചെയ്തു

പുളിക്കല്‍കവല: വാഴൂര്‍ പള്ളി സ്ഥാപകനായ ചെറിയമഠത്തില്‍ വലിയ യാക്കോബ് കത്തനാര്‍ സ്മാരക മന്ദിരത്തിന്‍റെ ഉദ്ഘാടനം ബസേലിയോസ് മാര്‍ത്തോമ്മാ മാത്യൂസ് തൃതീയന്‍ കാതോലിക്കാ ബാവ നിര്‍വഹിച്ചു. കൂദാശയ്ക്ക് മാടാംകുന്നേല്‍ എം.കെ. ഫിലിപ്പ് കോര്‍ എപ്പിസ്‌കോപ്പ, ഫാ. ബിറ്റു കെ. മാണി, ഫാ. മര്‍ക്കോസ് മര്‍ക്കോസ്, ഫാ. ജേക്കബ് ഫിലിപ്പോസ്, ഫാ. ജോമോന്‍ ചെറിയാന്‍ എന്നിവര്‍ സഹകാര്‍മികത്വം വഹിച്ചു. സണ്‍ഡേസ്‌കൂള്‍ പഠനകേന്ദ്ര നിര്‍മാണത്തിന് പൂര്‍വ വിദ്യാര്‍ഥിയായ കാതോലിക്കാ ബാവ ആദ്യ സംഭാവന നല്‍കി. നിര്‍മാണത്തിന് നേതൃത്വം നല്‍കിയവരെ സമ്മേളനത്തില്‍ ബാവ ആദരിച്ചു. വികാരി ഫാ. അലക്‌സ് തോമസ്, സഹവികാരി ഫാ. ജോണ്‍ സ്‌കറിയ, ട്രസ്റ്റി എം.എ. അന്ത്രയോസ്, സെക്രട്ടറി രാജന്‍ ഐസക് എന്നിവര്‍ നേതൃത്വം നല്‍കി.

അനുവാദം നൽകിയാൽ ബസ് സ്റ്റാൻഡ് റോഡ് നവീകരിക്കാൻ തയാറെന്ന് ബസുടമകൾ

കാഞ്ഞിരപ്പള്ളി: ബസ് സ്റ്റാൻഡ് റോഡിന്‍റെ ശോച്യാവസ്ഥയെക്കുറിച്ചു പറയുന്പോൾ പഞ്ചായത്തും ദേശീയപാത വിഭാഗവും പരസ്പരം കൈയൊഴിയുകയാണെന്നും അനുവാദം നൽകിയാൽ പണം മുടക്കി കോൺക്രീറ്റ് ചെയ്തു നവീകരിക്കാൻ തയാറാണെന്നും ബസുടമകൾ. ദേശീയപാതയിൽനിന്നു കാഞ്ഞിരപ്പള്ളി ബസ് സ്റ്റാൻഡിലേക്കു പ്രവേശിക്കുന്നതും ഇറങ്ങുന്നതുമായ റോ‍ഡിലെ കോൺക്രീറ്റിംഗും ഓടയ്ക്കു മീതെയുള്ള സ്ലാബുകളും തകർന്ന് ബസുകൾക്ക് കേടുപാടുകൾ പതിവായതോടെയാണ് ബസുടമകൾ ഇക്കാര്യം അറിയിച്ചത്. കോൺക്രീറ്റ് സ്ലാബുകൾ തകർന്നു കമ്പികൾ ഉയർന്നു നിൽക്കുന്നത് കാൽനട യാത്രികർക്ക് അപകട സാധ്യതയും ബസുകൾക്കു കേടുപാടും ഉണ്ടാക്കുകയാണ്. ഇന്നലെ കാഞ്ഞിരപ്പള്ളി-ഈരാറ്റുപേട്ട റൂട്ടിലോടുന്ന "അനസ് മോൻ' എന്ന സ്വകാര്യ ബസിന്‍റെ അടിവശം ഇടിച്ച് പിൻഭാഗത്തെ ബ്രേക്ക് ലൈറ്റ് ഉൾപ്പെടെയുള്ള ഒരു ഭാഗം തകർന്നു. ഇരുപതിനായിരത്തോളം രൂപയുടെ നഷ്ടമുണ്ടായതായി ഉടമ ഹബീബി കരീം പറഞ്ഞു. കഴിഞ്ഞ ദിവസം സ്റ്റാൻഡിലെ വ്യാപാരി കടയടച്ച് സ്കൂട്ടറിൽ വീട്ടിലേക്കു പോകുന്ന വഴി ഓടയിലെ വിടവിൽ വീണ് സ്കൂട്ടറിന് കാര്യമായ കേടുപാടുണ്ടായി. പഞ്ചായത്തിൽ പരാതിപ്പെടുമ്പോൾ ദേശീയപാത വിഭാഗമാണ് ഇവിടെ നവീകരണം നടത്തേണ്ടതെന്നും, ദേശീയപാത വിഭാഗത്തിൽ പരാതിപ്പെടുമ്പോൾ പഞ്ചായത്താണ് പണികൾ നടത്തേണ്ടതെന്നും പറഞ്ഞ് അധികൃതർ പരസ്പരം കൈയൊഴിയുകയാണെന്നും ബസ് ഉടമകളും ജീവനക്കാരും ആരോപിക്കുന്നു. മുൻപ് ദിവസങ്ങളോളം ബസ് സ്റ്റാൻഡ് അടച്ചിട്ട് ചെയ്ത് നവീകരണം നടത്തിയപ്പോൾ കവാടത്തിൽ ബസ് ഉടമകൾ പണം മുടക്കി കോൺക്രീറ്റ് ചെയ്തിരുന്നതായും ഇവർ പറയുന്നു. ബസ് സ്റ്റാൻഡ് കുറച്ചു ദിവസം അടച്ചിട്ട് സഹകരിക്കുകയാണെങ്കിൽ തങ്ങൾ പണം മുടക്കി ഇവിടെ കോൺക്രീറ്റ് ചെയ്തു നവീകരിക്കാൻ തയാറാണെന്നും ബസുടമകൾ പറയുന്നു. കോൺക്രീറ്റ് ചെയ്ത ശേഷം അതിനു മുകളിലാണ് ടാറിംഗ് നടത്തിയത്. മുകളിലത്തെ ടാറിംഗും അടിയിലെ കോൺക്രീറ്റിംഗും തകർന്ന നിലയിലായി. ഇതോടെ ബസുകൾക്ക് ദേശീയപാതയിലേക്കു പ്രവേശിക്കാനും ഇറങ്ങാനും ബുദ്ധിമുട്ടായി. കഷ്ടിച്ച് ഒരു ബസിനു മാത്രം കടന്നുപോകാൻ കഴിയുന്ന ഭാഗത്തെ കോൺക്രീറ്റിംഗാണു തകർന്ന് കുഴികളായത്. ഇതോടെ ഇവിടെ അപകടസാധ്യതയും വർധിച്ചു. ബസുകൾ കടന്നുപോകുമ്പോൾ കുഴികളിൽ ചാടിയും ബസിന്‍റെ അടിവശം ഇടിച്ചും റോഡ് കൂടുതൽ തകരുന്ന സ്ഥിതിയാണ്.

തൊഴിലധിഷ്ഠിത - സംരംഭകത്വ പരിപാടികളുമായി സെന്‍റ് ഡൊമിനിക്സ് കോളജും ബ്ലോക്ക് പഞ്ചായത്തും

കാഞ്ഞിരപ്പള്ളി: സെന്‍റ് ഡൊമിനിക്സ് കോളജും കാഞ്ഞിരപ്പള്ളി ബ്ലോക്ക് പഞ്ചായത്തും സംയുക്തമായി തൊഴിലധിഷ്ഠിത - സംരംഭകത്വ പരിപാടികള്‍ നടപ്പിലാക്കാൻ തീരുമാനിച്ചു. ഒരു വിദ്യാര്‍ഥി തന്‍റെ പഠനത്തോടൊപ്പം പാര്‍ട്ട്ടൈം ജോലിചെയ്ത് പഠനത്തിനാവശ്യമായ തുക കണ്ടെത്താനുള്ള തൊഴിലധിഷ്ഠിത പദ്ധതികള്‍ ബ്ലോക്ക് പഞ്ചായത്ത് ഈ വര്‍ഷത്തെ പദ്ധതിയിലൂടെ നടപ്പിലാക്കുമെന്ന് വൈസ് പ്രസിഡന്‍റ് ജോളി മടുക്കക്കുഴി പറഞ്ഞു. വ്യവസായ വാണിജ്യവകുപ്പ് സംഘടിപ്പിച്ച എംഎസ്എംബി ദിനാഘോഷ പരിപാടികള്‍ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. ഒഴിവുദിവങ്ങളില്‍ ബ്ലോക്ക് പഞ്ചായത്ത് പദ്ധതിയിലൂടെ ‌കോളജ് തലത്തില്‍ ബ്യൂട്ടീഷന്‍, എംബ്രോയ്ഡറി, ഫുഡ് ടെക്നോളജി, മൊബൈല്‍ സര്‍വീസ് എന്നീ കോഴ്സുകൾ നടത്തുമെന്ന് അദ്ദേഹം പറഞ്ഞു. കോളജ് പ്രിന്‍സിപ്പൽ ഡോ. സീമോന്‍ തോമസ് അധ്യക്ഷത വഹിച്ച യോഗത്തില്‍ ട‌ഫ്കോ കമ്പനിയുടെ സിഇഒ കെ.സി. സുമോദ് മുഖ്യപ്രഭാഷണം നടത്തി. വ്യവസായവകുപ്പ് ഓഫീസര്‍ കെ.കെ. ഫൈസല്‍ പദ്ധതികള്‍ വിശദീകരിച്ചു. വനിതാ സംരംഭകരായ സഫ്ന അമല്‍, സബി ജോസഫ്, ജിജി തോമസ്, സെറീന, ഇഡി ക്ലബ് കോ-ഓര്‍ഡിനേറ്റര്‍ റാണി അല്‍ഫോന്‍സ ജോസ് തുടങ്ങിയവര്‍ പ്രസംഗിച്ചു. വിദ്യാര്‍ഥികളുമായി സംരംഭകര്‍ സംവാദം നടത്തി. വിദ്യാര്‍ഥികളുടെ പുതിയ ആശയങ്ങളും യോഗത്തില്‍ ചര്‍ച്ച ചെയ്തു.

സൂംബ പരിശീലനത്തിന്‍റെ പേരിലുള്ള വിവാദം അനാവശ്യം: കത്തോലിക്ക കോൺഗ്രസ്

പൊടിമറ്റം: ലഹരിവിരുദ്ധ കാന്പയിനിന്‍റെ ഭാഗമായി സംസ്ഥാനത്തെ പൊതുവിദ്യാലയങ്ങളിൽ സൂംബ നൃത്ത പരിശീലനം നടത്താനുള്ള വിദ്യാഭ്യാസവകുപ്പിന്‍റെ നിർദേശത്തെച്ചൊല്ലി ഉയർന്നിട്ടുള്ള വിവാദങ്ങൾ അനാവശ്യവും അപലപനീയവുമാണെന്ന് കത്തോലിക്ക കോൺഗ്രസ്‌ കാഞ്ഞിരപ്പള്ളി രൂപത ഡയറക്ടർ ഫാ. ജസ്റ്റിൻ മതിയത്ത്. കത്തോലിക്ക കോൺഗ്രസ് പൊടിമറ്റം യൂണിറ്റിന്‍റെ ആഭിമുഖ്യത്തിൽ സംഘടിപ്പിച്ച സ്നേഹാദരവ് പ്രോഗ്രാം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. സൂംബ, എയ്റോബിക്സ്, യോഗ തുടങ്ങിയ കായികഇനങ്ങളെ സദുദ്ദേശ്യപരമായി മാത്രം കണ്ടാൽ മതി. കത്തോലിക്ക കോൺഗ്രസ് പൊടിമറ്റം യൂണിറ്റിന്‍റെ നേതൃത്വത്തിൽ കഴിഞ്ഞ രണ്ടുമാസമായി സൂംബപരിശീലനം വിജയകരമായി നടത്തിവരുന്നുണ്ട്. യോഗത്തിൽ പത്താം ക്ലാസ്, പ്ലസ്ടു, ഡിഗ്രി പരീക്ഷകളിൽ വിജയികളായ പൊടിമറ്റം ഇടവകയിലെ മുഴുവൻ കുട്ടികളെയും പൊടിമറ്റം സെന്‍റ് മേരീസ് പള്ളിയിൽ അക്കൗണ്ടന്‍റായി 44 വർഷത്തെ സേവനത്തിനുശേഷം വിരമിച്ച തോമസ് കെ. മാണി കിഴക്കേത്തലയ്ക്കലിനെയും ആദരിച്ചു. വികാരി ഫാ. മാർട്ടിൻ വെള്ളിയാംകുളം അനുഗ്രഹപ്രഭാഷണം നടത്തി. യൂണിറ്റ് പ്രസിഡന്‍റ് സെബാസ്റ്റ്യൻ കൊല്ലക്കൊമ്പിൽഅധ്യക്ഷത വഹിച്ചു. കത്തോലിക്ക കോൺഗ്രസ് ഗ്ലോബൽ വൈസ് പ്രസിഡന്‍റ് ജോമി കൊച്ചുപറമ്പിൽ, രൂപത ജനറൽ സെക്രട്ടറി ജോസഫ് പണ്ടാരക്കളം, രൂപത വൈസ് പ്രസിഡന്‍റ് ഡെയ്സി ജോർജുകുട്ടി, പിആർഒ ബോബി കെ. മാണി കിഴക്കേത്തലയ്ക്കൽ എന്നിവർ പ്രസംഗിച്ചു.

അനുസ്മരണവും എൻഡോവ്‌മെന്‍റ് വിതരണവും

എലിക്കുളം: പൈക കൈരളി ഗ്രന്ഥശാലയിൽ ദീർഘകാലം പ്രസിഡന്‍റായിരുന്ന ഒ.എൻ. വാസുദേവൻ നമ്പൂതിരിയെയും സെക്രട്ടറിയായിരുന്ന പി.ജെ. ജോസഫിനെയും അനുസ്മരിച്ച് സമ്മേളനം നടത്തി. വിവിധ എൻഡോവ്‌മെന്‍റുകൾ വിതരണം ചെയ്തു. മാണി സി. കാപ്പൻ എംഎൽഎ ഉദ്ഘാടനം ചെയ്തു. ഗ്രന്ഥശാലാ പ്രസിഡന്‍റ് ടോമി തെക്കേൽ അധ്യക്ഷത വഹിച്ചു. എലിക്കുളം പഞ്ചായത്ത് പ്രസിഡന്‍റ് ജിമ്മിച്ചൻ ഈറ്റത്തോട്ട് മുഖ്യപ്രഭാഷണം നടത്തി. പഞ്ചായത്തംഗങ്ങളായ മാത്യൂസ് പെരുമനങ്ങാട്, സിനി ജോയ്, ജയിംസ് ജീരകത്ത്, താലൂക്ക് ലൈബ്രറി കൗൺസിൽ സെക്രട്ടറി ജോർജ് സെബാസ്റ്റ്യൻ, കെ.ആർ. മന്മഥൻ, ജിമ്മിച്ചൻ പാംപ്ലാനി, എസ്. സന്ദീപ് ലാൽ, ജിം ജയിംസ്, റെജി ആയിലിക്കുന്നേൽ, ഷാജി പന്തലാനി എന്നിവർ പ്രസംഗിച്ചു.

ഫ്‌ളവര്‍ മിൽ തൊഴിലാളി കാറിടിച്ച് മരിച്ചു

പാലാ: റോഡ് മുറിച്ചുകടക്കുന്നതിനിടെ കാറിടിച്ച് ഫ്‌ളവര്‍ മിൽ തൊഴിലാളി മരിച്ചു. വെള്ളിയേപ്പള്ളി ഇടയാറ്റുകര കൊട്ടാരത്തില്‍ കെ.വി. ജോര്‍ജ് (56) ആണ് മരിച്ചത്. ഇന്നലെ രാവിലെ 8.30ഓടെ പാലാ-പൊന്‍കുന്നം റോഡില്‍ പന്ത്രണ്ടാംമൈലിലാണ് അപകടം. പന്ത്രണ്ടാംമൈല്‍ സെന്‍റ് മേരീസ് ഫ്‌ളവര്‍ മില്ലിലെ ജീവനക്കാരനായിരുന്നു. രാവിലെ മില്ല് തുറക്കാന്‍ എത്തുമ്പോള്‍ മില്ലിന് സമീപത്തുവച്ചാണ് പാലാ ഭാഗത്തേക്ക് വന്ന വാഹനം ഇടിച്ചത്. പാലാ ജനറല്‍ ആശുപത്രിയില്‍ പ്രവേശിപ്പിച്ചെങ്കിലും മരണം സംഭവിച്ചു. സംസ്‌കാരം ഇന്നു രാവിലെ 11ന് പാലാ കത്തീഡ്രലില്‍. ഭാര്യ അംബിക കൊണ്ടാട് കാഞ്ഞിരക്കാട്ട് കുടുംബാംഗം. മക്കള്‍: അപര്‍ണ, അരുണ്‍.

സ്വച്ഛതാ പഖ്വാദാ കാമ്പയിന്‍ പാലായില്‍

പാലാ: മാലിന്യ നിര്‍മാര്‍ജനവും ശുചിത്വവും പ്രോത്സാഹിപിക്കാനായി കേന്ദ്രസര്‍ക്കാര്‍ നടത്തുന്ന ബോധവത്കരണ പ്രവര്‍ത്തനമായ സ്വച്ഛതാ പഖ്വാദാ പദ്ധതികളുടെ പ്രചരണ കാമ്പയിന്‍ പാലാ ചാവറ സിഎംഐ പബ്ലിക് സ്‌കൂളില്‍ നാളെ രാവിലെ 9.30ന് നടത്തും. പൊതുമേഖലാ എണ്ണക്കമ്പനികളുടെ സഹകരണത്തോടെ രാജ്യവ്യാപകമായി നടത്തപ്പെടുന്ന സ്വച്ഛതാ പഖ്വാദ പദ്ധതിയുടെ ഈ വര്‍ഷത്തെ കാമ്പയിന്‍ 15 വരെയാണ് നടക്കുന്നത്. ചാവറ പബ്ലിക് സ്‌കൂള്‍ അങ്കണത്തില്‍ വൃക്ഷത്തൈ നട്ടും ശുചീകരണ സന്ദേശം നല്‍കിയും പരിപാടിയുടെ ഉദ്ഘാടനം കേന്ദ്ര സഹമന്ത്രി സുരേഷ് ഗോപി നിര്‍വഹിക്കും. വിദ്യാര്‍ഥികള്‍ക്ക് വൃക്ഷത്തൈകള്‍ സമ്മാനിക്കും. ഭാരത് പ്രെട്രോളിയം കോര്‍പറേഷന്‍ ലിമിറ്റഡ് ചീഫ് എക്‌സിക്യൂട്ടീവ് ഡയറക്ടര്‍ എം. ശങ്കര്‍ അധ്യക്ഷത വഹിക്കുന്ന യോഗത്തില്‍ സ്‌കൂള്‍ പ്രിന്‍സിപ്പല്‍ ഫാ. സാബു കൂടപ്പാട്ട്, ബിപിസിഎല്‍ കമ്പനി ചീഫ് ജനറല്‍ മാനേജര്‍ ജോര്‍ജ് തോമസ്, പാലാ ബ്രില്യന്‍റ് സ്റ്റഡി സെന്‍റർ ഡയറക്ടര്‍ ജോര്‍ജ് തോമസ്, വൈസ് പ്രിന്‍സിപ്പല്‍ ഫാ. പോള്‍സണ്‍ സിഎംഐ, വിദ്യാര്‍ഥി പ്രതിനിധി ദേവിക നായര്‍ തുടങ്ങിയവര്‍ പ്രസംഗിക്കും. സമ്മേളനത്തിൽ ചാവറ പബ്ലിക് സ്‌കൂളിലെ വിദ്യാര്‍ഥികളുടെ കലാവേദിയായ സര്‍ഗസംഗമത്തിനും സുരേഷ് ഗോപി തിരിതെളിക്കും.

ദമ്പതിമാരെ മരിച്ച നിലയില്‍ കണ്ടെത്തിയ സംഭവം: പിന്നില്‍ ബ്ലേഡ് മാഫിയ ഭീഷണിയെന്ന് സൂചന

രാമപുരം: രാമപുരം സ്വദേശികളായ ദമ്പതികളെ ഈരാറ്റുപേട്ടയ്ക്കു സമീപം പനയ്ക്കപ്പാലത്ത് വാടക വീടിനുള്ളില്‍ മരിച്ചനിലയില്‍ കണ്ടെത്തിയ സംഭവത്തിനു പിന്നില്‍ ബ്ലേഡ് മാഫിയ സംഘങ്ങളുടെ ഭീഷണിയെന്ന് സംശയം. കഴിഞ്ഞ ദിവസം ബ്ലേഡ് മാഫിയ സംഘാംഗങ്ങളായ ചില യുവാക്കള്‍ വീട്ടിലെത്തി ഭീഷണി മുഴക്കിയെന്നും വിഷ്ണുവിനെ മര്‍ദിച്ചുവെന്നും പോലീസിന് സൂചന ലഭിച്ചിട്ടുണ്ട്. ബന്ധക്കളുടെയും അടുത്ത സുഹൃത്തുക്കളുടെയും മൊഴി പോലീസ് ശേഖരിച്ചു വരികയാണ്. ജോലിയുടെ ആവശ്യവുമായി ബന്ധപ്പെട്ട് ഹോസ്റ്റലില്‍ താമസിച്ചിരുന്ന വിഷ്ണുവിന്‍റെ ഭാര്യയെ അവിടെയെത്തി അവഹേളിക്കുമെന്നും ഈ സംഘം ഭീഷണി മുഴക്കിയതായും കുടുംബാംഗങ്ങള്‍ വ്യക്തമാക്കുന്നുണ്ട്. വിഷ്ണുവിനൊപ്പം ജീവനൊടുക്കിയ ഭാര്യ രശ്മി ഈരാറ്റുപേട്ടയിലെ സ്വകാര്യ ആശുപത്രിയില്‍ നഴ്‌സിംഗ് സൂപ്രണ്ടാണ്. കെട്ടിട നിര്‍മാണ കരാറുകാരനായിരുന്ന വിഷ്ണു കോവിഡിന് ശേഷം സാമ്പത്തിക പ്രതിസന്ധി അനുഭവിച്ചിരുന്നതായും ബന്ധുക്കള്‍ പറഞ്ഞു. ബ്ലേഡ് മാഫിയ സംഘങ്ങളുടെ കെണിയില്‍പ്പെട്ട ഇയാള്‍ നിരന്തരമായ ഭീഷണിക്കും വിധേയനായിരുന്നു. ചെറുകിട കരാറുകള്‍ ഏറ്റെടുത്ത് തന്നാലാവും വിധം ബ്ലേഡ് മാഫിയ സംഘങ്ങള്‍ക്ക് പലിശ നല്‍കി മുന്‍പോട്ട് പോകവേയാണ് കടുത്തുരുത്തി കേന്ദ്രീകരിച്ച് പ്രവര്‍ത്തിക്കുന്ന ബ്ലേഡ് സംഘം സമ്മര്‍ദ്ദം ശക്തമാക്കിയതും ഭീഷണി മുഴക്കിയതും മര്‍ദിച്ചതെന്നുമാണ് ബന്ധുക്കളും അടുത്ത സുഹൃത്തുക്കളും പറയുന്നത്. രാമപുരം മണ്ഡലം യൂത്ത് കോണ്‍ഗ്രസ് കമ്മിറ്റി അധ്യക്ഷന്‍ എന്ന നിലയില്‍ വിഷ്ണു പൊതുപ്രവര്‍ത്തന രംഗത്ത് സജീവമായിരുന്നു. നിലവില്‍ യൂത്ത് കോണ്‍ഗ്രസ് നിയോജകമണ്ഡലം കമ്മിറ്റി ജനറല്‍ സെക്രട്ടറിയാണെങ്കിലും സാമ്പത്തിക പ്രതിസന്ധിയെത്തുടര്‍ന്ന് പൊതുപ്രവര്‍ത്തനങ്ങള്‍ക്ക് ഇടവേള നല്‍കി ബിസിനസ് തിരികെ പിടിക്കാനുള്ള ശ്രമത്തിലായിരുന്നു ഈ യുവാവ്. ഇരുവരുടെയും മൃതദേഹങ്ങള്‍ ഇന്നു രാവിലെ ഒന്‍പതിന് കൂടപ്പുലത്തുള്ള വീട്ടിലെത്തിക്കും. സംസ്‌കാരം ഉച്ചകഴിഞ്ഞ് രണ്ടിന് വീട്ടുവളപ്പില്‍.

പ്രളയഭീഷണിയില്‍നിന്നു മീനച്ചില്‍ നദീതീരം സംരക്ഷിക്കപ്പെടണം: സിന്പോസിയം

പാലാ: മീനച്ചിലാറ്റിലെ വെള്ളപ്പൊക്കം നിയന്ത്രിക്കുന്നതിന്‍റെ ഭാഗമായി ചെളിയും മണ്ണും നീക്കം ചെയ്യുന്ന പദ്ധതിയില്‍ കൂടുതല്‍ കടവുകളെ ഉള്‍പ്പെടുത്തണമെന്ന് ജോസ് കെ. മാണി എംപി ആവശ്യപ്പെട്ടു. വെള്ളപ്പൊക്ക നിയന്ത്രണത്തിന് പുതുവഴികള്‍ എന്ന വിഷയത്തില്‍ കേരളാ കോണ്‍ഗ്രസ്-എം ജില്ലാ കമ്മിറ്റിയുടെ നേതൃത്വത്തില്‍ നടന്ന മേഖലാതല സിമ്പോസിയം പാലായില്‍ ഉദ്ഘാടനം ചെയ്യുകയായിരുന്നു അദ്ദേഹം. അടിക്കടി ഉണ്ടാവുന്ന വെള്ളപ്പൊക്കം നിയന്ത്രിക്കുന്നതിന്‍റെ ഭാഗമായി മീനിച്ചിലാറ്റിലെ പതിനൊന്ന് കടവുകളിലെയും അഞ്ച് ചെക്ക് ഡാമുകളിലെയും ചെളിയും മണ്ണും നീക്കുന്നതിന് ഇതിനോടകം ടെന്‍ഡര്‍ ക്ഷണിച്ചു കഴിഞ്ഞു. ഈ പദ്ധതിയില്‍ കൂടുതല്‍ കടവുകളെയും ചെക്ക്ഡാമുകളെയും തോടുകളെയും ഉള്‍പ്പെടുത്തണമെന്നാണ് ആവശ്യം ഉയര്‍ന്നത്. മീനച്ചില്‍ നദീതടത്തില്‍ തുടര്‍ച്ചയായി ഉണ്ടാവുന്ന പ്രളയഭീഷണികളില്‍നിന്നു പാലാ നഗരപ്രദേശത്തെയും മീനച്ചില്‍ നദീതടത്തെയും സംരക്ഷിക്കാന്‍ മുന്‍ഗണനാ പദ്ധതി ഉണ്ടാവണമെന്ന് സിമ്പോസിയത്തില്‍ പങ്കെടുത്തവര്‍ ആവശ്യപ്പെട്ടു. നിയോജകമണ്ഡലം പ്രസിഡന്‍റ് ടോബിന്‍ കെ. അലക്‌സ് അധ്യക്ഷത വഹിച്ചു. ജലസേചന വകുപ്പ് എൻജിനിയര്‍ സാം പോള്‍ ഏബ്രഹാം, മുനിസിപ്പല്‍ ചെയര്‍മാന്‍ തോമസ് പീറ്റര്‍, സെന്‍റര്‍ ഫോര്‍ കണ്‍സ്യൂമര്‍ എഡ്യൂക്കേഷന്‍ ഡയറക്ടര്‍ ജയിംസ് വടക്കന്‍, വ്യാപാരി വ്യവസായി നേതാക്കന്മാരായ ഔസേപ്പച്ചന്‍ തകടിയേല്‍, അനൂപ് ജോര്‍ജ്, ബ്രില്യന്‍റ് സ്റ്റഡി സെന്‍റര്‍ ഡയറക്ടര്‍ സെബാസ്റ്റ്യന്‍ ജി. മാത്യു, സോണറ്റ് കട്ടിക്കാനാല്‍, ജയ്‌സണ്‍ മാന്തോട്ടം, സാജോ പൂവത്താനി, ബെന്നി തെരുവത്ത് തുടങ്ങിയവര്‍ പ്രസംഗിച്ചു. വിവിധ സംഘടനകളുടെ പ്രതിനിധികള്‍, വ്യാപാരികള്‍, ജനപ്രതിനിധികള്‍ തുടങ്ങിയവര്‍ പങ്കെടുത്തു. സിംബോസിയത്തില്‍ ഉയര്‍ന്നുവരുന്ന ആശയങ്ങള്‍ കൂടി ഉള്‍ക്കൊള്ളിച്ച് സമഗ്രമായ പദ്ധതിരേഖ മുഖ്യമന്ത്രിയുടെ അധ്യക്ഷതയില്‍ നദീതട സംരക്ഷണവും വെള്ളപ്പൊക്ക നിയന്ത്രണവും ഉറപ്പുവരുത്തുന്നതിനായി രൂപീകരിച്ചിട്ടുള്ള ഉന്നതാധികാര സമിതി മുമ്പാകെ സമര്‍പ്പിക്കും.

ഡോക്‌ടേഴ്സ് ഡേ ആഘോഷവും അവാര്‍ഡ് ദാനവും

പാലാ: ഇന്ത്യന്‍ മെഡിക്കല്‍ അസോസിയേഷന്‍ പാലാ ബ്രാഞ്ചിന്‍റെ നേതൃത്വത്തില്‍ ഡോക്‌ടേഴ്സ് ഡേ ആഘോഷവും അവാര്‍ഡ് ദാനവും ഇന്നു രാത്രി എട്ടിന് പാലാ ഐഎംഎ ഹാളില്‍ നടത്തുമെന്ന് പ്രസിഡന്‍റ് ഡോ. കുര്യന്‍ ജോസഫ് പത്രസമ്മേളനത്തില്‍ അറിയിച്ചു. ഡോക്‌ടേഴ്സ് ഡേ സ്പെഷല്‍ അംഗീകാര അവാര്‍ഡ് ജോസ് കെ. മാണി എംപിക്ക് സമ്മാനിക്കും. ഡോക്ടര്‍മാരുടെ ക്ഷേമത്തിന് അദ്ദേഹം നല്‍കിയ പിന്തുണയ്ക്കുള്ളതാണ് അവാര്‍ഡ്. ഡോ. പി.ജെ. ജോസിന് ബെസ്റ്റ് ഡോക്‌ടര്‍ അവാര്‍ഡ് സമ്മാനിക്കും. കോട്ടയം മെഡിക്കല്‍ കോളജിലെ മുന്‍ മെഡിസിന്‍ വകുപ്പ് മേധാവി ഡോ. ആര്‍.എന്‍. ശര്‍മ്മ സമ്മേളനം ഉദ്ഘാടനം ചെയ്ത് അവാര്‍ഡുകള്‍ സമ്മാനിക്കും. ഐഎംഎ പാലാ പ്രസിഡന്‍റ് ഡോ. കുര്യന്‍ ജോസഫ് അധ്യക്ഷത വഹിക്കും. പാലാ മേഖലയിലെ വിവിധ ആശുപത്രികളില്‍നിന്നുള്ള ഡോക്‌ടര്‍മാര്‍, സംഘടന അംഗങ്ങള്‍, സാമൂഹിക പ്രവര്‍ത്തകര്‍ എന്നിവര്‍ ചടങ്ങില്‍ പങ്കെടുക്കും.

പാലാ സ്റ്റേഡിയം നവീകരണം ആരംഭിച്ചു; ഒന്‍പതു മാസംകൊണ്ട് പൂര്‍ത്തിയാക്കും

പാലാ: പാലാ മുനിസിപ്പല്‍ സ്റ്റേഡിത്തിന്‍റെ നവീകരണ പ്രവര്‍ത്തനങ്ങള്‍ ആരംഭിച്ചു. കായികവകുപ്പ് മന്ത്രി വി. അബ്ദുറഹ്‌മാന്‍ ഉദ്ഘാടനം നിർവഹിച്ചു. കായികവകുപ്പ് എന്‍ജിനിയറിംഗ് വിഭാഗത്തിന്‍റെ നേതൃത്വത്തില്‍ നടപ്പാക്കുന്ന ട്രാക്ക് നവീകരണം ഒന്‍പത് മാസത്തിനകം പൂര്‍ത്തീകരിച്ച് തുറന്നുകൊടുക്കാനാണ് ലക്ഷ്യമിടുന്നതെന്ന് അദ്ദേഹം പറഞ്ഞു. കായികമേഖലയുമായി ബന്ധപ്പെട്ട് തൊഴിലവസരങ്ങള്‍ ഒരുക്കാന്‍ ലക്ഷ്യമിട്ട് സ്പോര്‍ട്സ് ഇക്കോണമി പദ്ധതി നടപ്പാക്കുമെന്ന് മന്ത്രി പറഞ്ഞു. വിദേശ രാജ്യങ്ങളുടെ സഹകരണത്തോടെ പുതിയ പരിശീലന പരിപാടികളും അടിസ്ഥാന സൗകര്യ വികസനവും ഒരുക്കിവരികയാണ്. ഇതിലൂടെ കായിക രംഗത്ത് കൂടുതല്‍ മുന്നേറാനാവും. സ്പോര്‍ട്സ് ഇക്കോണമി പ്രോജക്‌ടിലൂടെ 10,000 തൊഴിലവസരങ്ങള്‍ സൃഷ്ടിക്കുമെന്നും മന്ത്രി പറഞ്ഞു. കഴിഞ്ഞ ഒന്‍പത് വര്‍ഷത്തിനിടെ സംസ്ഥാനത്ത് കായികമേഖലയില്‍ 2000 കോടി രൂപയുടെ അടിസ്ഥാന സൗകര്യ വികസനം സര്‍ക്കാര്‍ നടപ്പാക്കി. കായിക പരിശീലനുള്ള അടിസ്ഥാന സൗകര്യ വികസനത്തിന്‍റെ ഭാഗമായി സംസ്ഥാനത്ത് പുതിയ 300 കളിക്കളങ്ങള്‍ ഇതിനകം നിര്‍മിച്ചു. 467 പഞ്ചായത്തുകളിലാണ് മൈതാനങ്ങള്‍ ഉണ്ടായിരുന്നത്. 200 പഞ്ചായത്തുകളില്‍കൂടി പദ്ധതി നടപ്പാക്കുന്നതോടെ സംസ്ഥാനത്തെ മുഴുവന്‍ പഞ്ചായത്തുകളിലും കായികപരിശീലനത്തിനുള്ള അടിസ്ഥാന സൗകര്യം ലഭ്യമാകുമെന്നും ജില്ലാ സ്റ്റേഡിയങ്ങളുടെ നിര്‍മാണം പൂര്‍ത്തീകരിച്ചു വരികയാണെന്നും മന്ത്രി കൂട്ടിച്ചേർത്തു സംസ്ഥാന സര്‍ക്കാര്‍ ഏഴു കോടി രൂപ ചെലവിലാണ് പാലാ മുനിസിപ്പല്‍ സ്റ്റേഡിയത്തിലെ സിന്തറ്റിക്ക് ട്രാക്ക് നവീകരണം നടത്തുന്നത്. മുനിസിപ്പല്‍ സ്റ്റേഡിയം കോംപ്ലക്‌സില്‍ ചേര്‍ന്ന സമ്മേളനത്തില്‍ മാണി സി. കാപ്പന്‍ എംഎല്‍എ അധ്യക്ഷത വഹിച്ചു. ജോസ് കെ. മാണി എംപി, സ്പോര്‍ട്സ് കേരള ഫൗണ്ടേഷന്‍ മേധാവി വി.കെ. അനില്‍കുമാര്‍, നഗരസഭാ ചെയര്‍മാന്‍ തോമസ് പീറ്റര്‍, ഒളിമ്പ്യന്‍ ഷൈനി വിത്സന്‍, വിത്സന്‍ ചെറിയാന്‍, ലാലിച്ചന്‍ ജോര്‍ജ്, സജേഷ് ശശി, പി.എം. ജോസഫ്, പി.കെ. ഷാജകുമാര്‍, ടോബിന്‍ കെ. അലക്സ്, ബെന്നി മൈലാടൂര്‍, ഔസേപ്പച്ചന്‍ തകടിയേല്‍, മായാദേവി, ബിജി ജോജോ, സാവിയോ കാവുകാട്ട്, ബിന്ദു മനു, ജോസ് ജെ. ചീരാംകുഴി, പ്രഫ. സതീഷ് ചൊള്ളാനി എന്നിവര്‍ പ്രസംഗിച്ചു.

ചെത്തിപ്പുഴ സര്‍ഗക്ഷേത്രയില്‍ ജര്‍മന്‍ ഫുഡ് ഫെസ്റ്റ്

ചങ്ങനാശേരി: കുട്ടികള്‍ക്ക് പഠനത്തോടൊപ്പം വിജ്ഞാനവും വിനോദവും പകരുന്നതിനായി സര്‍ഗക്ഷേത്ര അക്കാഡമി സംഘടിപ്പിച്ച ജര്‍മന്‍ ഫുഡ് ഫെസ്റ്റ് ശ്രദ്ധേയമായി. ജര്‍മന്‍ സംസ്‌കാരത്തെ അടിസ്ഥാനമാക്കി സംഘടിപ്പിച്ച ഫുഡ് ഫെസ്റ്റ് വിദ്യാര്‍ഥികള്‍ക്കും അധ്യാപകര്‍ക്കും രക്ഷിതാക്കള്‍ക്കും വേറിട്ടൊരു അനുഭവമായിരുന്നു. ആധുനികവും പരമ്പരാഗതവുമായ ഭക്ഷണവിഭവങ്ങളുടെ വിശദീകരണവും ജര്‍മന്‍ ഭാഷയില്‍ത്തന്നെയായിരുന്നു. പാചകത്തിന്‍റെയും ഭാഷയുടെയും ഒരുമയിലൂടെ ജര്‍മന്‍ സംസ്‌കാരത്തെക്കുറിച്ചും അതിന്‍റെ പാരമ്പര്യത്തെക്കുറിച്ചും പഠിക്കാനുള്ള അപൂര്‍വ അവസരം വിദ്യാര്‍ഥികള്‍ക്ക് സര്‍ഗക്ഷേത്ര ഒരുക്കുകയായിരുന്നു. ഫുഡ് ഫെസ്റ്റ് പൂര്‍ണമായും ജര്‍മന്‍ ഭാഷയില്‍ അവതരിപ്പിക്കാനും അതത് സ്റ്റാളുകള്‍ ജര്‍മന്‍-യൂറോപ്യന്‍ സ്റ്റൈലില്‍ ക്രമീകരിക്കാനും സാധിച്ചു. അക്കാഡമിയിലെ വിദ്യാര്‍ഥികള്‍, അധ്യാപകര്‍, രക്ഷിതാക്കള്‍, സര്‍ഗക്ഷേത്ര സ്റ്റാഫ്സ് എന്നിവര്‍ പങ്കെടുത്തു. ഫെസ്റ്റില്‍ ബ്രോട്ട് (റൊട്ടി), വുര്‍സ്റ്റ് (സോസേജ്), കാര്‍ട്ടോഫെല്‍ സലാറ്റ് (പൊട്ടറ്റോ സാലഡ്), സ്പാറ്റ്‌സല്‍ (ഒരുതരം നൂഡില്‍സ്), പ്രെറ്റ്‌സല്‍, ഷ്‌നിറ്റ്‌സെല്‍ എന്നിവയായിരുന്നു പ്രധാന ഭക്ഷണ വിഭവങ്ങള്‍. ജർമനിയിൽ പഠനത്തിനായും ജോലിക്കായും തയാറെടുക്കുന്ന കുട്ടികള്‍ക്ക് ഇതൊരു മുതല്‍ക്കൂട്ടാണെന്ന് സര്‍ഗക്ഷേത്ര ഡയറക്ടര്‍ ഫാ. അലക്‌സ് പ്രായിക്കളം സിഎംഐ അഭിപ്രായപ്പെട്ടു.

പുതുതായി നിർമിച്ച ഓടയ്ക്കു മുകളിൽ സ്ലാബുകൾ സ്ഥാപിക്കാത്തത് ഭീഷണിയായി

കറുകച്ചാൽ: പുതിയ ഓട നിർമിച്ചത് സ്ലാബിട്ട് മൂടാത്തതിനാൽ അപകടസാധ്യത. പത്തനാട്-കാനം റോഡിൽ പടനിലം സ്‌കൂളിനു സമീപത്താണ് പുതുതായി ഓട നിർമിച്ചത്. എന്നാൽ ഓടയ്ക്ക് മുകളിൽ സ്ലാബുകൾ നിരത്താത്തതിനാൽ വിദ്യാർഥികളടക്കം നൂറുകണക്കിന് ആൾക്കാർ സഞ്ചരിക്കുന്ന ഈ ഭാഗത്ത് അപകടസാധ്യതയേറിയെന്ന് നാട്ടുകാർ പറയുന്നു. റോഡിനോടു ചേർന്നു നിർമിച്ച ഓടയ്ക്കു മുകളിൽ സ്ലാബില്ലാത്തത് കാൽനടയാത്രികർക്കും ബുദ്ധിമുട്ടാണ്. വാഹനങ്ങൾ അപകടത്തിൽപ്പെടാനും സാധ്യതയുണ്ട്.

ചങ്ങനാശേരിയിൽ തഹസില്‍ദാറെ നിയമിച്ച് ഉത്തരവിറങ്ങി

ചങ്ങനാശേരി, തൃക്കൊടിത്താനം, കറുകച്ചാല്‍ വില്ലേജ് ഓഫീസര്‍മാരുടെ നിയമനം നീളുന്നു ചങ്ങനാശേരി: ചങ്ങനാശേരി തഹസില്‍ദാരെ നിയമിച്ച് ഉത്തരവിറങ്ങി. ചങ്ങനാശേരി, തൃക്കൊടിത്താനം, കറുകച്ചാൽ വില്ലേജ് ഓഫീസര്‍മാരുടെ നിയമനം നീളുന്നു. പീരുമേട് തഹസില്‍ദാറായിരുന്ന എസ്.കെ. ശ്രീകുമാറിനെയാണ് ചങ്ങനാശേരി തഹസില്‍ദാറായി നയമിച്ചത്. നിലവിലുണ്ടായിരുന്ന തഹസില്‍ദാര്‍ പി.ടി. സുരേഷ്‌കുമാര്‍ ജൂണ്‍ ഒന്നിന് വിരമിച്ചിരുന്നു. പകരം ആളെ നിയമിക്കാഞ്ഞതുമൂലം എല്‍എ ഡെപ്യൂട്ടി തഹസില്‍ദാര്‍ നിജു കുര്യനാണ് തഹസില്‍ദാറുടെ താത്കാലിക ചുമതല നിര്‍വഹിച്ചിരുന്നത്. പുതിയ തഹസില്‍ദാറായി നിയമിതനായ എസ്.കെ. ശ്രീകുമാര്‍ പീരുമേട് താലൂക്ക് ഓഫീസില്‍നിന്നു റിലീവ് ചെയ്ത് ചങ്ങനാശേരിയിലെത്തുമ്പോള്‍ ഒരാഴ്ച പിടിക്കുമെന്നാണ് സൂചന. ചങ്ങനാശേരി, തൃക്കൊടിത്താനം, കറുകച്ചാല്‍ വില്ലേജ് ഓഫീസുകളിൽ വില്ലേജ് ഓഫീസര്‍മാരെ ഇതുവരെ നിയമിച്ചിട്ടില്ല. ചങ്ങനാശേരി തഹസില്‍ദാറുടെയും താലൂക്കിലെ മൂന്നു വില്ലേജ് ഓഫീസര്‍മാരുടെയും നിയമനം വൈകുന്നതായി കഴിഞ്ഞയാഴ്ച ദീപിക റിപ്പോര്‍ട്ട് ചെയ്തിരുന്നു. വില്ലേജ് ഓഫീസര്‍മാരുടെ നിയമന ഉത്തരവ് പുറത്തിറങ്ങിയെങ്കിലും ഇതില്‍ ഏറെ അപാകതകള്‍ നിറഞ്ഞതിനാല്‍ ഇതു പരിഷ്‌കരിച്ച് ഇറങ്ങാന്‍ കാലതാമസം നേരിടുമെന്നാണ് സൂചന ലഭിക്കുന്നത്. ഡെപ്യൂട്ടി തഹസില്‍ദാറായി സ്ഥാനക്കയറ്റം ലഭിച്ചയാളെ ചങ്ങനാശേരി വില്ലേജ് ഓഫീസറായി നിയമിച്ചതുൾപ്പെടെയുള്ള അപാകതകളാണ് നിയമന ഉത്തരവില്‍ കടന്നുകൂടിയത്. മഴക്കാലമായതിനാല്‍ ദുരിതാശ്വാസ പ്രവര്‍ത്തനങ്ങള്‍ ഏകോപിപ്പിക്കേണ്ട വലിയ ചുമതല വില്ലേജ് ഓഫീസര്‍മാര്‍ക്കുണ്ട്. വാഴപ്പള്ളി കിഴക്ക്, ചെത്തിപ്പുഴ, നെടുംകുന്നം വില്ലേജ് ഓഫീസര്‍മാര്‍ക്കാണ് ചങ്ങനാശേരി, തൃക്കൊടിത്താനം, കറുകച്ചാല്‍ വില്ലേജ് ഓഫീസുകളുടെ അധികച്ചുമതല നല്‍കിയിരിക്കുന്നത്. സ്‌കൂള്‍, കോളജ് പ്രവേശനങ്ങള്‍ക്കായി വേണ്ടിവരുന്ന വരുമാനം, ജാതി, ഇഡബ്ല്യുഎസ്, നോണ്‍ക്രീമിലെയര്‍ സര്‍ട്ടിഫിക്കറ്റുകള്‍ ഉള്‍പ്പെടെ പല സര്‍ട്ടിഫിക്കറ്റുകളും വിദ്യാര്‍ഥികള്‍ക്ക് യഥാസമയം ലഭിക്കുന്നില്ലെന്ന പരാതിയും ഉയര്‍ന്നിട്ടുണ്ട്. സര്‍ക്കാര്‍ കാര്യം മുറപോലെ മാത്രം സര്‍ക്കാര്‍ കാര്യം മുറപോലെ മാത്രമേ നടക്കൂ എന്നു പറയുന്നത് സാധാരണമാണ്. മേയ് 31ന് ഓരോ വകുപ്പിലെയും ഉദ്യോഗസ്ഥര്‍ കൂട്ടത്തോടെ വിരമിക്കുമെന്ന് സര്‍ക്കാരിന്‍റെ വിവിധ മേധാവികള്‍ക്ക് അറിയാവുന്നതാണ്. വിരമിക്കുന്നവര്‍ക്കു പകരം ആളെ നിയമിക്കാത്തത് പ്രതിസന്ധികള്‍ക്കിടയാക്കുമെന്നും സര്‍ക്കാരിനറിയാം. എന്നാല്‍ പ്രമോഷന്‍ നല്‍കിയോ സ്ഥലംമാറ്റം നല്‍കിയോ വിരമിച്ച തസ്തികയില്‍ ഉദ്യോഗസ്ഥരെ നിയമിക്കാന്‍ ബന്ധപ്പെട്ട ഉദ്യോഗസ്ഥ മേധാവികള്‍ ശ്രദ്ധിക്കുകയോ വകുപ്പു മന്ത്രിമാര്‍ ഇതിൽ കര്‍ശന നിലപാടുകള്‍ സ്വീകരിക്കുകയോ ചെയ്യുന്നില്ലെന്ന പരാതി ഉണ്ട്.

കെഎസ്ആര്‍ടിസിയുടെ മണിമല സ്റ്റേ ബസ് പുനരാരംഭിക്കണം

ചങ്ങനാശേരി: ചങ്ങനാശേരി കെഎസ്ആര്‍ടിസി ഡിപ്പോയില്‍നിന്നും രാത്രി 9.40ന് സര്‍വീസ് നടത്തിയിരുന്ന മണിമല സ്റ്റേ ബസ് പുനരാരംഭിക്കണമെന്ന ആവശ്യം ശക്തമാകുന്നു. യാത്രക്കാരുടെ നിരന്തരമായ ആവശ്യത്തെത്തുടര്‍ന്ന് ജോബ് മൈക്കിള്‍ എംഎല്‍എ, ഗവൺമെന്‍റ് ചീഫ് വിപ്പ് ഡോ.എന്‍. ജയരാജ് എന്നിവര്‍ മന്ത്രി ഗണേഷ്‌കുമാറുമായി ബന്ധപ്പെട്ട് ഈ സര്‍വീസ് രണ്ടുമാസം മുമ്പ് പുനരാരംഭിച്ചിരുന്നു. മണിമലയില്‍ ജീവനക്കാര്‍ക്കുള്ള താമസസൗകര്യങ്ങളും ഏര്‍പ്പെടുത്തിയിരുന്നു. എന്നാല്‍, ഒരു മാസം സര്‍വീസ് നടത്തിയശേഷം ഈ ബസ് നിലയ്ക്കുകയായിരുന്നു. വരുമാനം കുറവാണെന്നും ഡ്രൈവര്‍മാരില്ലെന്നും ചൂണ്ടിക്കാട്ടിയാണ് ഡിപ്പോ അധികൃതര്‍ സര്‍വീസ് റദ്ദ് ചെയ്തത്. രാത്രി 9.40ന് ചങ്ങനാശേരിയില്‍നിന്നു പുറപ്പെടുന്ന ബസ് 11ന് മണിമലയില്‍ എത്തിച്ചേരും. പിറ്റേന്ന് പുലർച്ചെ 5.20ന് മണിമലയിൽനിന്ന് ആരംഭിച്ച് 6.30ന് ചങ്ങനാശേരിയില്‍ എത്തുന്ന ബസ് സര്‍വീസ് വ്യാപാരികള്‍, വ്യാപാര സ്ഥാപനങ്ങളിലെ ജീവനക്കാര്‍, ട്രെയിന്‍ യാത്രക്കാര്‍ തുടങ്ങിയവര്‍ക്ക് ഏറെ പ്രയോജനപ്പെട്ടിരുന്നു. ഈ ബസ് ഉച്ചകഴിഞ്ഞ് മൂന്നിന് മുണ്ടക്കയത്ത് പോയി മടങ്ങിയെത്തിയശേഷമാണ് മണിമല സ്റ്റേ സര്‍വീസ് നടത്തിയിരുന്നത്. ഇതിനുപകരം ഉച്ചകഴിഞ്ഞ് മൂന്നിന് ആലപ്പുഴ റൂട്ടിലും തുടര്‍ന്ന് നെടുമുടി, ചമ്പക്കുളം വരെ ഒരു ട്രിപ്പുകൂടി സര്‍വീസ് നടത്തിയശേഷം രാത്രി മണിമല സ്റ്റേ സര്‍വീസിന് അയയ്ക്കണം. മണിമലയില്‍നിന്നു രാവിലെയുള്ള സര്‍വീസ് ആലപ്പുഴ കൃപാസനത്തിലേക്ക് നീട്ടുകയും ചെയ്താല്‍ കണിച്ചുകുളങ്ങര ക്ഷേത്രം, കൃപാസനം ഉള്‍പ്പെടെ ആരാധനാലയങ്ങളിൽ പോകുന്ന വിശ്വാസികള്‍ക്ക് ഉപകരിക്കും. ഇതു ലാഭകരമാകുമെന്നും ഡിപ്പോ അധികൃതര്‍ക്ക് പരിശോധന നടത്താവുന്നതാണെന്നുമാണ് തൊഴിലാളികള്‍തന്നെ ചൂണ്ടിക്കാണിക്കുന്നത്.

തകർന്ന റോഡ് പുനർനിർമിക്കാത്തതിൽ പ്രതിഷേധിച്ച് വേറിട്ട സമരവുമായി യുഡിഎഫ്

മുണ്ടത്താനം: തകർന്ന റോഡ് പുനരുദ്ധരിക്കാത്തതിൽ പ്രതിഷേധിച്ച് യുഡിഎഫിന്‍റെ നേതൃത്വത്തിൽ വ്യത്യസ്ത സമരപാത. കോട്ടയം -പത്തനംതിട്ട ജില്ലകളെ ബന്ധിപ്പിക്കുന്ന പത്തനാട്-കുളത്തൂർമൂഴി റോഡ് തകർന്ന് പല ഭാഗങ്ങളിലും കുഴികൾ രൂപപ്പെട്ട് കാൽനടയാത്രപോലും ദുഷ്കരമായിട്ട് വർഷങ്ങൾ ഏറെയായെങ്കിലും അധികൃതർ റോഡിനോട് തുടരുന്ന അവഗണനയിൽ പ്രതിഷേധിച്ചാണ് യുഡിഎഫ് കങ്ങഴ മണ്ഡലം കമ്മിറ്റിയുടെ നേതൃത്വത്തിൽ സമരം നടത്തിയത്. യാത്ര ദുഷ്കരമായ റോഡിലൂടെ സഞ്ചരിക്കുന്നവർക്കും കാൽനടയാത്രികർക്കും വാഹനങ്ങൾക്കും സ്വീകരണം നൽകിയാണ് വ്യത്യസ്ത സമരരീതി യുഡിഎഫ് അവലംബിച്ചത്. യുഡിഎഫ് കാഞ്ഞിരപ്പള്ളി നിയോജകമണ്ഡലം ചെയർമാൻ സി.വി. തോമസുകുട്ടി ഉദ്ഘാടനം ചെയ്തു. കോൺഗ്രസ് മണ്ഡലം പ്രസിഡന്‍റ് ഷെറിൻ സലിം അധ്യക്ഷത വഹിച്ചു. കേരള കോൺഗ്രസ് മണ്ഡലം പ്രസിഡന്‍റ് ഒ.ജെ. വർഗീസ്, നാസർ കങ്ങഴ, ജമാലുദ്ദീൻ വാഴത്തറ, സണ്ണി മുക്കാട്ട് തുടങ്ങിയവർ പ്രസംഗിച്ചു.

നഗരത്തിലെ വഴിവിളക്കുകള്‍ തെളിഞ്ഞേക്കും, വിഷയം ഇന്ന് കൗണ്‍സിലില്‍

ചങ്ങനാശേരി: നഗരത്തിലെ വഴിവിളക്കുകള്‍ പ്രകാശിക്കുന്നില്ലെന്ന പരാതിക്കു പരിഹാരം കാണാന്‍ നഗരസഭാധികൃതര്‍. നഗരസഭാ സ്റ്റിയറിംഗ് കമ്മിറ്റി ചര്‍ച്ചചെയ്ത ഈ വിഷയം ഇന്നത്തെ നഗരസഭാ കൗണ്‍സില്‍ പരിഗണനയ്ക്കെടുക്കും. വഴിവിളക്കുകളുടെ അറ്റകുറ്റപ്പണികള്‍ നിലവിലുള്ള കരാറുകാരനെക്കൊണ്ട് ചെയ്യിച്ചു പ്രശ്‌നത്തിനു പരിഹാരം കാണാനാണ് നഗരസഭാധികൃതര്‍ ആലോചിക്കുന്നത്. 37 വാര്‍ഡുകളിലെ നൂറുകണക്കിനു വഴിവിളക്കുകള്‍ പ്രകാശിക്കുന്നില്ലെന്ന് നാളുകളായി പരാതി നിലനില്‍ക്കുകയാണ്. നഗരത്തിലെ ഗതാഗതപ്രശ്‌നങ്ങള്‍ പരിഹരിക്കുന്നതിനായി ട്രാഫിക് ഉപദേശക സമിതി വിളിച്ചുചേര്‍ക്കാനുള്ള സ്റ്റിയറിംഗ്കമ്മിറ്റിയുടെ തീരുമാനവും കൗണ്‍സില്‍ യോഗം ചര്‍ച്ചയ്‌ക്കെടുക്കും. മുനിസിപ്പല്‍ നമ്പരില്ലാതെ സര്‍വീസ് നടത്തുന്ന ഓട്ടോറിക്ഷകള്‍ക്കു നിയന്ത്രണം ഏര്‍പ്പെടുത്തണമെന്നും അനധികൃത പാര്‍ക്കിംഗുകള്‍ ഒഴിവാക്കണമെന്നും ടാറിംഗ് പൂര്‍ത്തിയാക്കിയ എന്‍എച്ച് 183(എംസി റോഡില്‍) ഡിവൈഡര്‍, സീബ്രാലൈനുകള്‍ ഉള്‍പ്പെടെ യാത്രക്കാര്‍ക്കുള്ള സുരക്ഷാ സംവിധാനങ്ങള്‍ സ്ഥാപിക്കണമെന്നതും ഉള്‍പ്പെടെയുള്ള ആവശ്യങ്ങൾ ശക്തമാണ്. മുനിസിപ്പല്‍ ടൗണ്‍ഹാളിന്‍റെ ചോര്‍ച്ച പരിഹരിക്കുന്നതിനുള്ള അറ്റകുറ്റപ്പണികള്‍ നടത്തുക, സിഎന്‍ജി പ്ലാന്‍റ് നിര്‍മാണം സംബന്ധിച്ച നടപടികള്‍ക്കു വേഗംകൂട്ടുക തുടങ്ങിയ നടപടികളും കൗണ്‍സില്‍ യോഗം പരിഗണിക്കും.

ദുക്റാന തിരുനാളിന് കൊടിയേറി

ചെമ്പ്: ചെന്പ് സെന്‍റ് തോമസ് കത്തോലിക്ക പള്ളിയിൽ വിശുദ്ധ തോമാശ്ലീഹായുടെ ദുക്റാന തിരുനാളിന് കൊടിയേറി. ഇന്നലെ വൈകുന്നേരം ഭക്തിനിർഭരമായ അന്തരീക്ഷത്തിൽ മാർ ആന്‍റണി കരിയിലിന്‍റെ മുഖ്യകാർമികത്വത്തിലാണ് കൊടിയേറ്റിയത്. വികാരി ഫാ. ഹോർമിസ് തോട്ടക്കര, സഹവികാരി ഫാ. ഷൈജു ആട്ടോക്കാരൻ സിഎംഐ, ഫാ. സെബാസ്റ്റ്യൻ കോനൂപ്പറമ്പൻ, ഫാ. ജെയ്സൺ കൊളുത്തുവള്ളി എന്നിവർ സഹകാർമികത്വം വഹിച്ചു. ജൂലൈ മൂന്നിനാണ് തിരുനാൾ.

അക്കരപ്പാടം ടര്‍ഫ് സ്റ്റേഡിയം ഉദ്ഘാടനം ഇന്ന്

വൈക്കം: സംസ്ഥാന സര്‍ക്കാരിന്‍റെ ഒരു പഞ്ചായത്തില്‍ ഒരു കളിക്കളം പദ്ധതിയില്‍പ്പെടുത്തി നിര്‍മാണം പൂര്‍ത്തീകരിച്ച ഉദയനാപുരം പഞ്ചായത്തിലെ അക്കരപ്പാടം ടര്‍ഫ് സ്റ്റേഡിയത്തിന്‍റെ ഉദ്ഘാടനം ഇന്ന് രണ്ടിന് മന്ത്രി വി. അബ്ദുറഹ്‌മാന്‍ നിര്‍വഹിക്കും. കായിക വകുപ്പിന്‍റെ 50 ലക്ഷം രൂപയും എംഎല്‍എയുടെ ആസ്തിവികസന ഫണ്ടില്‍നിന്നുള്ള 60 ലക്ഷം രൂപ അടക്കം 1.10 കോടി രൂപ വിനിയോഗിച്ചാണ് നിര്‍മാണം പൂര്‍ത്തീകരിച്ചത്. അക്കരപ്പാടം ഗവൺമെന്‍റ് യുപി സ്‌കൂള്‍ ഗ്രൗണ്ടില്‍ നടക്കുന്ന സമ്മേളനതിൽ സി.കെ. ആശ എംഎല്‍എ അധ്യക്ഷത വഹിക്കും. വൈക്കം ബ്ലോക്ക് പഞ്ചായത്ത് പ്രസിഡന്‍റ് എസ്. ബിജു, ജില്ലാ പഞ്ചായത്ത് അംഗം പി.എസ്. പുഷ്പമണി, ഉദയനാപുരം പഞ്ചായത്ത് പ്രസിഡന്‍റ് പി.കെ. ആനന്ദവല്ലി, ബ്ലോക്ക്-ഗ്രാമപഞ്ചായത്ത് അംഗങ്ങള്‍, വിവിധ രാഷ്ട്രീയ പാര്‍ട്ടി പ്രതിനിധികള്‍ എന്നിവര്‍ പങ്കെടുക്കും. വൈക്കം നിയോജക മണ്ഡലത്തില്‍ നിലവില്‍ നിര്‍മാണപ്രവർത്തനങ്ങൾ നടന്നുവരുന്ന സ്റ്റേഡിയങ്ങളില്‍ നിര്‍മാണം പൂര്‍ത്തീകരിച്ച് ഉദ്ഘാടനം ചെയ്യുന്ന ആദ്യ സ്റ്റേഡിയമാണ് അക്കരപ്പാടം ടര്‍ഫ് ഗ്രൗണ്ട്. വെള്ളൂര്‍ പഞ്ചായത്തിലെ ഇറുമ്പയം പെരുന്തട്ട് സ്റ്റേഡിയം നിര്‍മാണത്തിന്‍റെ അവസാനഘട്ടത്തിലാണ്.

ലോക ലഹരിവിരുദ്ധ ദിനം ആചരിച്ചു

കുറുപ്പന്തറ: സെന്‍റ് സേവ്യേഴ്‌സ് വൊക്കേഷണല്‍ ഹയര്‍ സെക്കണ്ടറി സ്‌കൂളില്‍ അഡാര്‍ട്ട്, ലിറ്റില്‍ കൈറ്റ്‌സ്, നാഷണല്‍ സര്‍വീസ് സ്‌കീം സംഘടനകളുടെ സംയുക്താഭിമുഖ്യത്തില്‍ ലഹരിവിരുദ്ധ ദിനാചരണം നടത്തി. കടുത്തുരുത്തി എക്‌സൈസ് ഇന്‍സ്‌പെക്ടര്‍ കെ.എസ്. അനില്‍കുമാര്‍ ഉദ്ഘാടനം ചെയ്തു. മുഖ്യമന്ത്രിയുടെ സന്ദേശവായന, ലഹരിവിരുദ്ധ പ്രതിജ്ഞ, പ്രസംഗം, ലഹരിവിരുദ്ധ ഗാനം, ലഹരി ഉപയോഗത്തിന്‍റെ ദോഷവശങ്ങള്‍ വ്യക്തമാക്കുന്ന സ്‌കിറ്റ്, ഫ്‌ളാഷ് മോബ്, കുട്ടികളുടെ ആരോഗ്യത്തിനും മാനസിക ഉല്ലാസത്തിനുമായി സുംബാ ഡാന്‍സ് തുടങ്ങിയ പ്രവര്‍ത്തനങ്ങളും പരിപാടിയുടെ ഭാഗമായി സംഘടിപ്പിച്ചു. യോഗത്തില്‍ ഹെഡ്മാസ്റ്റര്‍ ജോഷി ജോര്‍ജ്, പ്രിന്‍സിപ്പൽ അനൂപ് കെ. സെബാസ്റ്റ്യന്‍ എന്നിവര്‍ പ്രസംഗിച്ചു. അധ്യാപകരായ ഷിജിമോള്‍ എം.സി., ലിജോയി തോമസ്, ജെറിന്‍ ജോസ്, ധന്യ കെ. ബേബി, ജെയ്‌സി ജയിംസ് എന്നിവര്‍ പരിപാടികള്‍ക്കു നേതൃത്വം നല്‍കി.

യുഡിഎഫ്, ബിജെപി ആരോപണം അടിസ്ഥാനരഹിതം: എസ്. ദേവരാജൻ

തലയാഴം: തലയാഴം സിഡിഎസിനു കീഴിലുള്ള ഒരുമ പ്രൊഡ്യൂസേഴ്സ് ഗ്രൂപ്പ് സംരംഭം തുടങ്ങുന്നതിന് വായ്പ എടുത്തതുമായി ബന്ധപ്പെട്ട് ക്രമക്കേട് നടന്നുവെന്നതരത്തിലുള്ള യുഡിഎഫ്, ബിജെപി പ്രചാരണം വസ്തുതകൾക്കു നിരക്കാത്തതാണെന്ന് സിപിഎം തലയാഴം പഞ്ചായത്ത് പാർലമെന്‍ററി പാർട്ടി നേതാവ് എസ്. ദേവരാജൻ. 20 അംഗങ്ങളുള്ള പ്രൊഡ്യൂസേഴ്സ് ഗ്രൂപ്പിന് ഒരു ലക്ഷം രൂപയാണ് കുടുംബശ്രീ ജില്ലാ മിഷനിൽനിന്ന് അനുവദിച്ചത്. സംരംഭം തുടങ്ങുന്നതിനായി സെക്യൂരിറ്റി നൽകി വാടകയ്ക്ക് എടുത്ത മുറി നവീകരിക്കുന്നതിനും വൈദ്യുതികരിക്കുന്നതിനും 49,200 രൂപ ചെലവഴിച്ചു. 40, 800 രൂപ സാധന സാമഗ്രികൾ വാങ്ങുന്നതിനാണ് വിനിയോഗിക്കുന്നത്. ബാക്കി തുക അക്കൗണ്ടിൽത്തന്നെയുണ്ട്. കെട്ടിടത്തിന്‍റെ നവീകരണത്തിനും വൈദ്യുതി കണക്‌ഷൻ ലഭിക്കുന്നതിലും വന്ന കാലതാമസമാണ് പദ്ധതി ആരംഭിക്കുന്നത് വൈകാൻ ഇടയാക്കിയതെന്നും അദ്ദേഹം പറഞ്ഞു.

അങ്കണവാടി വർക്കർ നിയമനങ്ങൾ മാനദണ്ഡം പാലിച്ചാണെന്ന് എൽഡിഎഫ്

വെള്ളൂർ: വെള്ളൂർ പഞ്ചായത്തിലെ അങ്കണവാടി, വർക്കർ നിയമനങ്ങൾ നടന്നത് മാനദണ്ഡങ്ങൾ പാലിച്ചു സുതാര്യമായാണെന്ന് എൽഡിഎഫ് പഞ്ചായത്ത് കമ്മിറ്റി. ഉദ്യോഗാർഥികളുടെ സർട്ടിഫിക്കറ്റ് പരിശോധനയും അഭിമുഖ പരീക്ഷയും സാമൂഹിക ക്ഷേമ വകുപ്പിന്‍റെ നിയന്ത്രണത്തിൽ പൂർത്തിയാക്കി 2024 ഫെബ്രുവരിയിൽ 42 പേരുടെ ചുരുക്കപ്പട്ടിക പ്രസിദ്ധികരിച്ചു. തുടർന്ന് ഈ ലിസ്റ്റിൽനിന്ന് വിവിധ ഘട്ടങ്ങളിലായി വർക്കർ തസ്തികയിലേക്ക് മൂന്നു സ്ഥിരനിയമനവും രണ്ടു താത്കാലിക നിയമനവും ഹെൽപ്പർ തസ്തിയിലേക്ക് ഒരു സ്ഥിരനിയമനവും ഒരു താത്രാലിക നിയമനവുമാണ് കഴിഞ്ഞ ഒന്നര വർഷക്കാലത്തിനിടയിൽ നടന്നത്. മുഴുവൻ നിയമനങ്ങളും റാങ്ക് ലിസ്റ്റിൽനിന്ന് സംവരണ മാനദണ്ഡങ്ങൾ പാലിച്ചുകൊണ്ടാണ് നടന്നത്. 2027 ജനുവരി മാസം വരെ ഈ റാങ്ക് ലിസ്റ്റിന് കാലാവധിയുണ്ട്. തുടർന്ന് വരുന്ന ഒഴിവുകളിലേക്കും ഈ റാങ്ക് ലിസ്റ്റിൽനിന്നാണ് നിയമനം നടക്കേണ്ടത്. യാഥാർഥ്യം ഇതായിരിക്കേ ഒന്നര വർഷം മുമ്പ് പ്രസിദ്ധികരിച്ച റാങ്ക് ലിസ്റ്റിൽ നാളിതുവരെ യാതൊരു ആക്ഷേപവും ഉന്നയിക്കാത്ത യുഡിഎഫ് നേതൃത്വം ആരോപണവുമായി ഇപ്പോൾ രംഗത്തു വന്നത് തികച്ചും രാഷ്ട്രീയ പ്രേരിതമാണെന്ന് എൽഡിഎഫ് വെള്ളൂർ പഞ്ചായത്ത് കൺവീനർ ടി.വി. ബേബി ആരോപിച്ചു.

വാട്ടര്‍ പ്യൂരിഫയറിന്‍റെ ഉദ്ഘാടനം

തുരുത്തിപ്പള്ളി: സെന്‍റ് ജോര്‍ജ് എല്‍പി സ്‌കൂളിലേക്ക് പിഎസ്ഡബ്യൂഎസ് സ്നാപക സ്വാശ്രയ സംഘം സ്‌പോണ്‍സര്‍ ചെയ്ത വാട്ടര്‍ പ്യൂരിണ്ടഫയറിന്‍റെ ഉദ്ഘാടനം സ്‌കൂള്‍ മാനേജര്‍ ഫാ. അഗസ്റ്റിന്‍ പീടികമലയില്‍ നിര്‍വഹിച്ചു. ഇതോടൊപ്പം പഠനോപകരണങ്ങളും യൂണിറ്റിന്‍റെ നേതൃത്വത്തില്‍ വാങ്ങി നല്‍കി. പ്രധാനാധ്യാപകന്‍ ഷൈജു പി. വര്‍ഗീസ്, പിടിഎ പ്രസിഡന്‍റ് ജോണിച്ചന്‍ പൂമരത്തേല്‍, പിഎസ്ഡബ്യൂഎസ് യൂണിറ്റ് പ്രസിഡന്‍റ് പയസ് ജോര്‍ജ് കുര്യാസ്, ജിതിന്‍ ജയിംസ്, ജസ്റ്റിന്‍ ജോസഫ്, സജിമോന്‍ സിറിയക്, വര്‍ഗീസ് പുറമറ്റം, ജോസ് പൂമരം, ജോസുകുട്ടി മേലുകുന്നേല്‍ എന്നിവര്‍ പങ്കെടുത്തു.

മറവൻതുരുത്തിൽ നിരവധി വീടുകളിൽ വെള്ളം കയറി

മറവൻതുരുത്ത്: ഡാമുകൾ തുറന്നതിനെത്തുടർന്ന് കിഴക്കൻവെള്ളത്തിന്‍റെ വരവു ശക്തിപ്പെട്ടതോടെ മറവൻതുരുത്ത്, തലയോലപ്പറമ്പ് പഞ്ചായത്തുകളിലെ പുഴയോരമേഖലകളിലും ഉൾപ്രദേശങ്ങളിലും വെള്ളപ്പൊക്ക ദുരിതമേറുന്നു. മറവൻതുരുത്തിലെ ഇടവട്ടം,പഞ്ഞിപ്പാലം, കൊച്ചുതടം, അറുപതിൽ, ചുങ്കം തുടങ്ങിയ പ്രദേശങ്ങളിലെ നിരവധി വീടുകളും പരിസരപ്രദേശങ്ങളും വഴികളും വെള്ളത്തിൽ മുങ്ങിയിരിക്കുകയാണ്. മറവൻതുരുത്തിലെ മണലേൽ, കുളങ്ങര, കൊച്ചുപുരയ്ക്കൽ കോളനികളും വെള്ളത്തിൽ മുങ്ങി. മണലേൽ കോളനിയിൽ 22 കുടുംബങ്ങളും കുളങ്ങരയിൽ 28ഉം കൊച്ചുപുരയ്ക്കൽ കോളനിയിൽ16 കുടുംബങ്ങളുമാണ് വെള്ളപ്പൊക്കദുരിതം പേറുന്നത്.

പുല്ലും പായലും നിറഞ്ഞ് തോടുകള്‍ :പ്രതിസന്ധിയെ കരളുറപ്പോടെ നേരിട്ട് യുവസംരംഭകന്‍

കടുത്തുരുത്തി: പ്രതിസന്ധികളെ കരളുറപ്പോടെ നേരിട്ട് യുവസംരംഭകന്‍. പുല്ലും പായലും നിറഞ്ഞ് തോടുകള്‍. ശിക്കാര ബോട്ടിന് വെള്ളത്തിലൂടെ ഓടണം. സുരേഷ്‌കുമാര്‍ (43) പിന്നെ കാത്തുനിന്നില്ല, തനിച്ചു തോട് വൃത്തിയാക്കി. പുല്ലുവെട്ടാനോ, തോട് തെളിക്കാനോ പണിക്കിറങ്ങിയതല്ല ഇദ്ദേഹം. കല്ലറ പുത്തന്‍പുരയ്ക്കല്‍ പി.ടി. സുരേഷ്‌കുമാര്‍ ജീവിതം കരുപ്പിടിപ്പിക്കാനുള്ള ശ്രമത്തിന്‍റെ ഭാഗമായാണ് തോടും പുഴയും തെളിക്കുന്നത്. അധികാരികളോടു പറഞ്ഞിട്ട് ഫലമില്ലാതായതോടെ തന്‍റെ ജീവിതമാര്‍ഗം അടഞ്ഞുപോകാതിരിക്കാനുള്ള വഴിതുറക്കുന്നതിനുവേണ്ടി നടത്തുന്ന യുവസംരംഭകന്‍റെ പരിശ്രമമാണിത്. ഉള്‍നാടന്‍ തോടുകളിലിറങ്ങിയുള്ള മീന്‍പിടിത്തമായിരുന്നു സുരേഷ്‌കുമാറിന്‍റെ തൊഴില്‍. തോടുകളിലൂടെയും പുഴകളിലൂടെയും സഞ്ചരിച്ചപ്പോള്‍ കണ്ട ഗ്രാമീണഭംഗി മനസില്‍ പതിഞ്ഞതോടെ ഇതു എല്ലാവരെയും കാണിക്കാമെന്നായി സുരേഷിന്‍റെ ചിന്ത. നാടിന്‍റെ സൗന്ദര്യം പുറംലോകമറിയട്ടെ. ഇതിലൂടെ ടൂറിസത്തിനു സാധ്യതയുണ്ടല്ലോയെന്ന് കരുതിയാണ് ശിക്കാര ബോട്ട് വാങ്ങാന്‍ സുരേഷ് തീരുമാനിച്ചത്. പിഎംഇജിപി പദ്ധതിയിലൂടെ 10 ലക്ഷം രൂപ വായ്പയെടുത്തും സുഹൃത്തുക്കളില്‍നിന്നും ബന്ധുക്കളില്‍നിന്നും കടംവാങ്ങിയ 4.5 ലക്ഷം ഉള്‍പ്പെടെ 15 ലക്ഷം രൂപയുടെ ശിക്കാര ബോട്ട് 2024 മാര്‍ച്ചില്‍ വാങ്ങി. പത്തു പേര്‍ക്ക് സഞ്ചരിക്കാവുതാണ് ബോട്ട്. ആദ്യത്തെ എട്ടു മാസം പ്രതിദിനം 3,000 മുതല്‍ 4,000 രൂപ വരെ വരുമാനമുണ്ടായിരുന്നു. ബാങ്ക് വായ്പയും എല്ലാമാസവും കൃത്യമായി അടഞ്ഞുപോയിരുന്നു. ഇതിനിടെ ബോട്ട് യാത്ര നടത്തിയിരുന്ന തോടുകളിലും പുഴകളിലും പുല്ലും പായലും നിറയാന്‍ തുടങ്ങി. ക്രമേണ ബോട്ടിന് സഞ്ചരിക്കാനാവാതെ വന്നു. നാലു മാസമായി ബോട്ട് കല്ലറ-ഇടയാഴം റോഡിനു സമീപം വിളക്കുമരം ഭാഗത്ത് കെവി കനാലില്‍ കെട്ടിയിട്ടിരിക്കുകയാണ്. നാലു മാസമായി വായ്പ കുടിശിഖയായി. വായ്പാ തിരിച്ചടവ് മുടങ്ങിയതോടെ ബാങ്ക് നടപടികളിലേക്കു കടക്കുന്ന അവസ്ഥയാണ്. തോട് വൃത്തിയാക്കാനായി ഇറിഗേഷന്‍, പഞ്ചായത്ത് തുടങ്ങി നിരവധി സര്‍ക്കാര്‍ ഓഫീസുകളില്‍ സുരേഷ്‌കുമാര്‍ കയറിയിറങ്ങി. ഒരിടത്തുനിന്നും നടപടിയുണ്ടാകാതെ വന്നപ്പോഴാണ് ഇദ്ദേഹം ബോട്ടില്‍ തന്‍റെ സഹായിയായിരുന്ന എസ്. സനല്‍കുമാറിനെയും കൂട്ടി തോട് തെളിക്കാനിറങ്ങിയത്. ചിലയിടങ്ങളില്‍ പൂര്‍ണമായും തെളിക്കാനായെങ്കിലും അതിനു പറ്റാത്ത സ്ഥലങ്ങളില്‍ ബോട്ടുകള്‍ക്കും വള്ളങ്ങള്‍ക്കും പോകാവുന്ന വിധത്തില്‍ തോടുകളിലെ പുല്ലും പായലും നീക്കം ചെയ്തതായി സുരേഷ്‌കുമാര്‍ പറഞ്ഞു. കഴിഞ്ഞ 37 ദിവസം കൊണ്ട് സുരേഷും സഹായി ഉദയന്തറ സനല്‍കുമാറും ചേര്‍ന്ന് വൃത്തിയാക്കിയത് 14 കിലോമീറ്റര്‍ ദൂരം തോടാണ്. മണിയാപറമ്പ് മുതല്‍ കല്ലറ വിളക്കുമരം വരെ ഒമ്പതു കിലോമീറ്ററും കൈപ്പുഴയാറിനു സമീപത്തുനിന്നു (കുറുപ്പന്തറ കടവ്-മുടക്കാലി-മണിയാപറമ്പ് തോട്) മാഞ്ഞൂര്‍ പാണ്ഡന്‍കരി വരെയുള്ള അഞ്ചു കിലോമീറ്റര്‍ ദൂരവും ഇതിനോടകം തെളിച്ചു. വിളക്കുമരം മുതല്‍ പാലച്ചുവടു വരെയുള്ള ഒന്നര കിലോമീറ്റര്‍ ഇനിയും തെളിക്കാനുണ്ടെന്ന് സുരേഷ്‌കുമാര്‍ പറഞ്ഞു. അതുകൂടി തെളിച്ചെടുത്താല്‍ വീണ്ടും സഞ്ചാരികളുമായി കാഴ്ചകള്‍ കണാന്‍ പോകാമെന്നും അതിലൂടെ വരുമാനം നേടി ജീവിതപ്രതിസന്ധി പരിഹരിക്കാനാകുമെന്ന പ്രതീക്ഷയിലാണ് സുരേഷ്‌കുമാര്‍. തനിക്കു മാത്രമല്ല ഇതിലൂടെ പ്രയോജനമുണ്ടാകുന്നതെന്നും മറ്റ് തോണിയാത്രക്കാര്‍ക്കും കര്‍ഷകര്‍ക്കും മത്സ്യത്തൊഴിലാളികള്‍ക്കും തോടു തെളിഞ്ഞതിന്‍റെ നേട്ടമുണ്ടാകുമെുന്നം സുരേഷ് പറയുന്നു. ഷീനയാണ് സുരേഷിന്‍റെ ഭാര്യ.

എക്‌സലന്‍സ് അവാര്‍ഡ്

ഏറ്റുമാനൂര്‍: അമലഗിരി ബികെ കോളജ് എന്‍എസ്എസ് യൂണിറ്റിന്‍റെ നേതൃത്വത്തില്‍ നിര്‍മിക്കുന്ന 25-ാമത് സ്‌നേഹവീടിന്‍റെ തറക്കല്ലിടില്‍ നടത്തി. ഏറ്റുമാനൂര്‍ റോട്ടറി ക്ലബ്ബുമായി സഹകരിച്ചാണ് ഈ വര്‍ഷത്തെ ഭവനനിര്‍മാണ പദ്ധതി. തറക്കല്ലിടീല്‍ ചടങ്ങില്‍ ഏറ്റുമാനൂര്‍ മുന്‍സിപ്പല്‍ ചെയര്‍ പേഴ്‌സണ്‍ ലൗലി ജോര്‍ജ്, റോട്ടറി അസിസ്റ്റന്‍റ് ഡിസ്ട്രിക്റ്റ് ഗവര്‍ണര്‍ ഡോ. ടെസി കുര്യന്‍, ഏറ്റുമാനൂര്‍ ലയണ്‍സ് ക്ലബ് പ്രസിഡന്‍റ് അന്‍വര്‍ മുഹമ്മദ്, സെകട്ടറി ടോം, എന്‍എസ്എസ് പ്രോഗ്രാം ഓഫീസര്‍മാരായ മെല്‍ബി, ഡോ. സിസ്റ്റര്‍ പ്രിന്‍സി തുടങ്ങിയവര്‍ പങ്കെടുത്തു. എന്‍എസ്എസ് കഴിഞ്ഞ രണ്ടു വര്‍ഷമായി നടത്തുന്ന സേവനപ്രവര്‍ത്തനങ്ങളുടെ ഭാഗമായി റോട്ടറിയുടെ ഈ വര്‍ഷത്തെ വൊക്കേഷണല്‍ എക്‌സലന്‍സ് അവാര്‍ഡ് എന്‍എസ്എസ് പ്രോഗ്രാം ഓഫീസര്‍മാരായ മെല്‍ബി ജേക്കബ്, ഡോ. സിസ്റ്റര്‍ പ്രിന്‍സി എന്നിവര്‍ക്ക് ഏറ്റുമാനൂര്‍ മുന്‍സിപ്പല്‍ ചെയര്‍പേഴ്‌സണ്‍ ലൗലി ജോര്‍ജ് സമ്മാനിച്ചു.

കർഷകരുടെയും ടാപ്പിംഗ് തൊഴിലാളികളുടെയും കടങ്ങൾക്ക് സാവകാശം നൽകണമെന്ന്

പാമ്പാടി: തുടർച്ചയായ മഴ മൂലം റബർ വെട്ടും ഉത്പാദനവും മുടങ്ങി പ്രയാസപ്പെടുന്ന ചെറുകിട കർഷകരുടെയും ടാപ്പിംഗ് തൊഴിലാളികളുടെയും വിവിധ ബാങ്കുകളിലെ വായ്പാ തിരിച്ചടവിന് നാലു മാസമെങ്കിലും സാവകാശം നൽകണമെന്ന് എൻസിപി-എസ് സംസ്ഥാന ജനറൽ സെക്രട്ടറി കെ.ആർ. രാജൻ. എൻസിപി-എസ് പുതുപ്പളളി നിയോജക മണ്ഡലം നിർവാഹകസമിതി യോഗം പാമ്പാടിയിൽ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. നിയോജക മണ്ഡലം പ്രസിഡന്‍റ് മാത്യു അധ്യക്ഷത വഹിച്ചു. ബാബു കപ്പക്കാല, റെജി കൂരോപ്പട, രാധാകൃഷ്ണൻ ഓണമ്പിള്ളി, ബിജു തോമസ് എന്നിവർ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]