ADVERTISEMENT

ADVERTISEMENT

ലഹരിവിരുദ്ധ ക്ലാസും കുടുംബ സംഗമവും നടത്തി

തൊടുപുഴ: കെഎസ്എഫ്ഇ കട്ടപ്പന റീജിന്‍റെ ആഭിമുഖ്യത്തിൽ സംഘടിപ്പിച്ച ലഹരിവിരുദ്ധ ബോധവത്കരണ ക്ലാസും കുടുംബസംഗമവും ചെയർമാൻ കെ. ദീപക് ഉദ്ഘാടനം ചെയ്തു. കെഎസ്എഫ്ഇ കട്ടപ്പന എജിഎം എൻ. കേശവൻ നന്പൂതിരി അധ്യക്ഷത വഹിച്ചു. ഡയറക്‌ടർ അഡ്വ. യു.പി. ജോസഫ് മുഖ്യ, തൊടുപുഴ എക്സൈസ് റേഞ്ച് ഇൻസ്പെക്ടർ സുനിൽ ആന്‍റോ, കെ.എം. സുമേഷ് കുമാർ, സി.എസ്. സുഭാഷ്, ജോഷി അഗസ്റ്റിൻ, നിഷാദ് ജോഷ്വാ, ബേബി ജേക്കബ് എന്നിവർ പ്രസംഗിച്ചു.

ADVERTISEMENT

അവഗണനയിൽ ചരിത്രമുറങ്ങുന്ന കല്ലാർകുട്ടിയിലെ തോട്ടാപ്പുര

അടിമാലി: ആരാലും ശ്രദ്ധിക്കാതെ കിടക്കുന്ന ചരിത്ര അവശേഷിപ്പുകളുമായി കല്ലാർകുട്ടിക്ക് സമീപത്തെ തോട്ടാപ്പുര. അവഗണനയ്ക്കു നടുവിലാണ് ഈ ചരിത്ര സ്മാരകം. കല്ലാർകുട്ടി - വെള്ളത്തൂവൽ റോഡ് കടന്നു പോകുന്നത് പാറയ്ക്കുള്ളിലെ ഈ ചരിത്രാവശേഷിപ്പിന്‍റെ മുകളിലൂടെയാണ്. പാതയോരത്തുനിന്നു പടിക്കെട്ടുകൾ ഇറങ്ങി താഴ്ഭാഗത്തെത്തിയാൽ മീറ്ററുകളോളം ഉള്ളിലേക്ക് പാറ തുരന്ന് നിർമിച്ചിട്ടുള്ള വലിയൊരു തുരങ്കം കാണാം. തുരങ്കത്തിനുള്ളിലൂടെ സഞ്ചരിച്ചാൽ മീറ്ററുകൾക്കപ്പുറം ഉപകരണങ്ങൾ സൂക്ഷിച്ചിരുന്ന വിശാലമായ വലിയ രണ്ട് മുറികൾക്കുള്ളിൽ എത്തും. ചരിത്രമുറങ്ങുന്ന തോട്ടാപ്പുരയെ പ്രാധാന്യം നൽകി സംരക്ഷിച്ച് വിനോദസഞ്ചാരവുമായി ബന്ധിപ്പിക്കണമെന്നാണ് പ്രദേശവാസികളുടെ ആവശ്യം. കൂരാക്കൂരിരുട്ട് നിറഞ്ഞ ഗുഹയ്ക്കുള്ളിൽ വവ്വാലുകൾ സ്വൈര വിഹാരം നടത്തുന്നു. ബന്ധപ്പെട്ട വകുപ്പുകൾ ചരിത്രപ്രധാന്യം നൽകി തോട്ടാപ്പുരയ്ക്ക് സംരക്ഷണം ഒരുക്കിയാൽ വിനോദസഞ്ചാരികളെ ഇവിടേക്കാകർഷിക്കാനാകുമെന്ന് നാട്ടുകാർ പറയുന്നു. പ്രവേശന ഫീസ് ഏർപ്പെടുത്തിയാൽ മെച്ചപ്പെട്ട വരുമാനം ലഭിക്കുമെന്നതിനപ്പുറം ചരിത്രമുറങ്ങുന്നൊരു നിർമിതിക്ക് അർഹമായ പരിഗണനയും ലഭിക്കും. പാതയോരത്തുനിന്ന് ഇവിടേക്കെത്താനുള്ള പടിക്കെട്ടുകളുടെ അറ്റകുറ്റപ്പണികൾ നടത്തുകയും വിളക്കുകൾ ക്രമീകരിച്ച് തോട്ടാപ്പുരയുടെ ഉൾവശം പ്രകാശമാനമാക്കുകയും ചെയ്താൽ ഈ ചരിത്രാവശേഷിപ്പിനെ സഞ്ചാരികൾക്ക് പുതിയ അനുഭവമാക്കി മാറ്റാൻ കഴിയും. പ്രവേശന കവാടം കൂടി ആകർഷണീയമാക്കിയാൽ പ്രദേശത്തിന്‍റെ വിനോദസഞ്ചാര സാധ്യതകൾക്ക് വഴിതുറുക്കും.

ഓള്‍ കേരള ടെയ്‌ലേഴ്‌സ് അസോ.‍ ജില്ലാ സമ്മേളനം

നെടുങ്കണ്ടം: ഓള്‍ കേരള ടെയ്‌ലേഴ്‌സ് അസോസിയേഷന്‍ (എകെടിഎ) ജില്ലാ സമ്മേളനം കൂട്ടാറില്‍ നടന്നു. കൂട്ടാര്‍ എസ്എന്‍ഡിപി ഓഡിറ്റോറിയത്തില്‍ നടന്ന സമ്മേളനം അസോസിയേഷന്‍ സംസ്ഥാന വൈസ് പ്രസിഡന്‍റ് സതികുമാര്‍ ഉദ്ഘാടനം ചെയ്തു. ജില്ലയിലെ 16 ഏരിയകളില്‍നിന്നുള്ള 300 പ്രതിനിധികള്‍ സമ്മേളനത്തില്‍ പങ്കെടുത്തു. ലഹരി മാഫിയയെ കര്‍ശനമായി നേരിടണമെന്നും കേരളത്തിലെ വനനിയമത്തില്‍ ആവശ്യമായ മാറ്റം വരുത്തി വന്യമൃഗങ്ങള്‍ നാട്ടില്‍ ഇറങ്ങുന്നത് തടയണമെന്നും തെരുവുനായ ശല്യത്തിന് ശാശ്വത പരിഹാരം കാണണമെന്നും പെന്‍ഷന്‍ 5000 രൂപ ആയി വര്‍ധിപ്പിക്കണമെന്നും സമ്മേളനം സര്‍ക്കാരിനോട് ആവശ്യപ്പെട്ടു. കമ്പംമെട്ട് ഏരിയാ സെക്രട്ടറി ഒ.ആര്‍. ശശിധരന്‍, പ്രസിഡന്‍റ് സാലി ഫിലിപ്പ് തുടങ്ങിയവര്‍ പ്രസംഗിച്ചു.

വനംവകുപ്പിനെതിരേ പോസ്റ്റർ പ്രചാരണവുമായി എകെസിസി

തൊമ്മൻകുത്ത്: നാരങ്ങാനത്ത് തൊമ്മൻകുത്ത് സെന്‍റ് തോമസ് പള്ളിയുടെ കൈവശഭൂമിയിൽ സ്ഥാപിച്ച കുരിശ് വനംവകുപ്പ് പിഴുതുകൊണ്ടുപോയ സംഭവത്തിൽ വനംവകുപ്പിനെതിരേ പോസ്റ്റർ പ്രചാരണവുമായി കത്തോലിക്ക കോണ്‍ഗ്രസ്. കാളിയാർ ഫൊറോനാ യൂണിറ്റിന്‍റെ നേതൃത്വത്തിൽ വണ്ണപ്പുറം, കരിമണ്ണൂർ പഞ്ചായത്തുകളില വിവിധയിടങ്ങളിലാണ് പോസ്റ്ററുകൾ പതിപ്പിച്ചത്. കൈവശഭൂമിയിൽ കടന്നുകയറുന്ന വനംവകുപ്പിന്‍റെ നടപടിക്കെതിരേയും കുരിശ് പിഴുതു മാറ്റുകയും അവഹേളിക്കുകയും ചെയ്ത കാളിയാർ റേഞ്ച് ഓഫീസർക്കെതിരേയും പട്ടയമുള്ളതും കൈവശഭൂമിയും ഉൾപ്പെടെ വണ്ണപ്പുറം വില്ലേജിലെ 4005 ഏക്കർ ഭൂമി വനമാണെന്ന് റിപ്പോർട്ട് നൽകിയ വണ്ണപ്പുറം വില്ലേജ് ഓഫീസർക്കെതിരേയും അച്ചടക്കനടപടി സ്വീകരിക്കണമെന്ന് ആവശ്യപ്പെട്ടാണ് പോസ്റ്ററുകൾ പതിച്ചത്. ഫൊറോന പ്രസിഡന്‍റ് സോജൻ കുന്നുംപുറത്ത്, സെക്രട്ടറി മാത്യു ചീക്കപ്പാറ, സജു പുളിക്കകണ്ടം എന്നിവർ നേതൃത്വം നൽകി.

ഓട്ടിസം തളർത്തിയ ജോബിക്ക് വേണം കനിവിന്‍റെ കരങ്ങൾ

ഉടുന്പന്നൂർ: ഓട്ടിസം ബാധിച്ച് ദുരിതക്കയത്തിൽ കഴിയുന്ന ജോബിക്കും വേണം ഉദാരമനസ്കരുടെ ഒരുകൈ സഹായം. തിരുവനന്തപുരം അംബൂരി പാറക്കുഴി സജോ-ബിനിമോൾ ദന്പതികളുടെ മകൻ ജോബിക്ക് (18) ഇതുവരെ ചികിത്സയ്ക്കായി ലക്ഷങ്ങൾ ചെലവഴിച്ചു. പിതാവ് സജോ നിലവിൽ കർണാടകയിൽ ടാപ്പിംഗ് തൊഴിലാളിയാണ്. ചികിത്സയ്ക്കും മറ്റുമുള്ള സൗകര്യാർഥം മലയിഞ്ചിയിലുള്ള ബിനിമോളുടെ വീട്ടിലാണ് ഇവർ താമസിച്ചുവരുന്നത്. ജനിച്ച് എട്ടുമാസം പ്രായമായപ്പോൾ കുട്ടിക്ക് മെനഞ്ചൈറ്റിസ് പിടിപെട്ടു. തുടർന്നു ഓട്ടിസം ബാധിതനായിമാറുകയായിരുന്നു. പൂനയിലുള്ള ആദിത്യബിർള ഗ്രൂപ്പിന്‍റെ ആശുപത്രിയിലായിരുന്നു ആദ്യം ചികിത്സ നടത്തിയത്. കാര്യമായ വ്യത്യാസം വരാത്തതിനാൽ വൈക്കം ഇൻഡോ-അമേരിക്കൻ ആശുപത്രിയിലേക്ക് കൊണ്ടുവന്നു. ഇവിടുത്തെ ചികിത്സയും ബുദ്ധിമുട്ടായതോടെ തിരുവനന്തപുരം ശ്രീചിത്തിര ആശുപത്രിയിലേക്ക് മാറ്റി. ഇവിടെ വർഷങ്ങളായി ചികിത്സ തുടർന്നുവരികയാണ്. മലയിഞ്ചിയിലുള്ള വീട്ടിൽനിന്നു തിരുവനന്തപുരത്ത് ആശുപത്രിയിൽ പോകണമെങ്കിൽ ടാക്സി വിളിക്കണം. വാഹനക്കൂലിയിനത്തിലും ആശുപത്രിയിൽ സ്കാനിംഗ് ഉൾപ്പെടെയുള്ള ചികിത്സാച്ചെലവുകൾക്കുമായി കുറഞ്ഞത് 30,000ത്തോളം രൂപ വേണ്ടിവരും. ബിനിമോൾ കൂലിപ്പണിയെടുത്താണ് ഇപ്പോൾ ചികിത്സ നടത്തുന്നത്. ജോബിക്ക് പ്രാഥമികാവശ്യങ്ങൾ ഉൾപ്പെടെ എല്ലാറ്റിനും മറ്റൊരാളുടെ സഹായം വേണം. കൂടെക്കൂടെ ഫിറ്റ്സ് വരുന്നതിനാൽ സദാസമയവും സമീപത്ത് ആളുവേണം. നിൽക്കുന്ന നിൽപ്പിൽ പലപ്പോഴും തലയിടിച്ച് നിലത്തുവീഴും. തലയിൽ പരിക്കിന്‍റെയും ചതവിന്‍റെയും പാടുകൾ ഒട്ടേറെയാണ്. വീട്ടിൽ മുത്തച്ഛനും മുത്തശിയും ഉള്ളതിനാലാണ് കൂലിപ്പണിക്ക് പോകാൻ മാതാവിന് കഴിയുന്നത്. ഫിറ്റ്സ് വരുന്നതു മാറണമെങ്കിൽ ഓപ്പറേഷൻ വേണമെന്നാണ് ശ്രീചിത്തിരയിൽ ജോബിയെ ചികിത്സിക്കുന്ന ന്യൂറോ വിഭാഗം മേധാവി ഡോ. ആശാലത നൽകിയ വിദഗ്ധോപദേശം. ഓപ്പറേഷനു ലക്ഷങ്ങൾ വേണ്ടിവരും. 18 വയസ് പൂർത്തിയായതിനാൽ ആശുപത്രിയിൽനിന്നു സൗജന്യചികിത്സയും ലഭിക്കില്ല. ഇതിനുള്ള പണം എങ്ങനെ കണ്ടെത്തുമെന്നറിയാതെ വിഷമിക്കുകയാണ് കുടുംബം. മാസംതോറും മരുന്നു വാങ്ങാൻ പോലും പണമില്ലാതെ ബുദ്ധിമുട്ടുന്ന തങ്ങൾക്ക് മറ്റുള്ളവരുടെസഹായം ലഭിച്ചാൽ മാത്രമേ ചികിത്സ മുന്നോട്ടുകൊണ്ടുപോകാനാകൂ എന്ന സ്ഥിതിയാണ്. ഉദാരമനസ്കരായ ആളുകളുടെ സഹായം തേടുകയാണ് കുടുംബം. ബിനിമോൾ പി.കെ. എസ്ബിഐ ഉടുന്പന്നൂർ, അക്കൗണ്ട് നന്പർ: 43395060695, ഐഎഫ്എഎസ് സി കോഡ്:എസ്ബിഐഎൻ0008681. ഫോണ്‍: 8086624869.

മുഖ്യമന്ത്രിയുടെ രാജി: കോൺഗ്രസ് മാർച്ച് നാളെ

ചെറുതോണി: വീണാ വിജയൻ, കെ.എം. ഏബ്രഹാം, എം.ആർ. അജിത്കുമാർ എന്നിവരെ സംരക്ഷിക്കുന്ന മുഖ്യമന്ത്രി പിണറായി വിജയൻ രാജി വയ്ക്കണമെന്നാവശ്യപ്പെട്ട് കോൺഗ്രസ് നാളെ ചെറുതോണിയിൽനിന്ന് ഇടുക്കി താലൂക്ക് ഓഫീസിലേക്കു മാർച്ച് നടത്തും. കരിമണൽ കമ്പനിയിൽനിന്നു കോടിക്കണക്കിനു രൂപ മാസപ്പടി വാങ്ങിയ കേസിൽ മുഖ്യമന്ത്രിയുടെ മകൾ വീണാ വിജയൻ കുറ്റക്കാരിയാണെന്ന് ഇതിനോടകം വിവിധ അന്വേഷണ ഏജൻസികൾ കണ്ടെത്തിക്കഴിഞ്ഞു. മുഖ്യമന്ത്രിയുടെ ചീഫ് പ്രിൻസിപ്പൽ സെക്രട്ടറി കെ.എം. ഏബ്രഹാം വരവിൽക്കഴിഞ്ഞ സ്വത്ത് സമ്പാദിച്ചതായി ഹൈക്കോടതിതന്നെ കണ്ടെത്തിയതാണ്. എഡിജിപി എം.ആർ. അജിത്കുമാറിനെ രഹസ്യചർച്ചയ്ക്ക് അയച്ച് സിപിഎം-ബിജെപി ബന്ധം ഊട്ടിയുറപ്പിച്ചതും വ്യക്തമായതാണ്. ഇവരെ മുഖ്യമന്ത്രി സംരക്ഷിക്കുകയാണെന്ന് കോൺഗ്രസ് നേതാക്കൾ ആരോപിച്ചു. ഡിസിസി പ്രസിഡന്‍റ് സി.പി. മാത്യുവിന്‍റെ നേതൃത്വത്തിൽ നടക്കുന്ന മാർച്ചും ധർണയും രാഷ‌്ട്രീയകാര്യസമിതിയംഗം കെ.സി. ജോസഫ് ഉദ്ഘാടനം ചെയ്യുമെന്ന് ഡിസിസി ജനറൽ സെക്രട്ടറി എം.ഡി. അർജുനൻ അറിയിച്ചു.

ബസും ബൈക്കും കൂട്ടിയിടിച്ച് യുവാവ് മരിച്ചു

തൊടുപുഴ: സ്വകാര്യ ബസും ബൈക്കും കൂട്ടിയിടിച്ച് യുവാവ് മരിച്ചു. തൊടുപുഴ മുതലക്കോടം കൊതകുത്തി അന്ത്യാലുങ്കൽ ദാസിന്‍റെ മകൻ ആദിത്യൻ ദാസ് (22) ആണ് മരിച്ചത്. ഇന്നലെ വൈകുന്നേരം ആറരയോടെ തൊടുപുഴ-കാളിയാർ റോഡിലെ ചെറുനിലം ബസ് സ്റ്റോപ്പിന് സമീപമായിരുന്നു അപകടം. തൊടുപുഴയിൽനിന്നു വണ്ണപ്പുറത്തിന് പോകുകയായിരുന്ന എയിൻസ് ബസ് എതിർദിശയിൽ വന്ന ബൈക്കിൽ ഇടിക്കുകയായിരുന്നു. ബസിനടിയിൽപ്പെട്ട ബൈക്കുമായി റോഡിലൂടെ ഏറെനേരം നിരങ്ങിനീങ്ങിയ ശേഷമാണ് ബസ് നിന്നത്. ഗുരുതരമായി പരിക്കേറ്റ ആദിത്യന്‍റെ കാൽ ഒടിഞ്ഞുതൂങ്ങിയ നിലയിലായിരുന്നു. രക്തം വാർന്ന് ഏറെ നേരം റോഡിൽ കിടന്ന യുവാവിനെ ആശുപത്രിയിലെത്തിക്കാൻ ബസ് ജീവനക്കാർ ഉൾപ്പെടെ ആരും തയാറായില്ലെന്ന് നാട്ടുകാർ പറഞ്ഞു. പിന്നീട് നാട്ടുകാർ വിളിച്ചുവരുത്തിയ സ്വകാര്യ ആംബുലൻസിൽ യുവാവിനെ മുതലക്കോടത്തെ സ്വകാര്യ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. മൃതദേഹം പിന്നീട് തൊടുപുഴ ജില്ലാ ആശുപത്രി മോർച്ചറിയിലേയ്ക്ക് മാറ്റി. ബസിന്‍റെ അമിത വേഗമാണ് അപകടകാരണമെന്നാരോപിച്ച് സ്ഥലത്തെത്തിയ നാട്ടുകാർ ബസ് ജീവനക്കാർക്കു നേരേ പ്രതിഷേധമുയർത്തി. അപകടം നടന്നതിന് ഏതാനും ദൂരം മുന്നിൽ വച്ച് അമിത വേഗത്തിലെത്തിയ ഇതേ ബസ് തന്‍റെ ബൈക്കിൽ തട്ടാൻ തുടങ്ങിയതായും തലനാരിഴയ് ക്കാണ് അപകടത്തിൽനിന്നു രക്ഷപ്പെട്ടതെന്നും പിന്നാലെയെത്തിയ ബൈക്ക് യാത്രികൻ പറഞ്ഞു.

ഹോളിഫാമിലി കോളജിൽ ഗ്രാജ്യുവേഷൻ സെറിമണി

തൊടുപുഴ: മുതലക്കോടം ഹോളിഫാമിലി നഴ്സിംഗ് കോളജിൽ ബിഎസ്‌‌സി നഴ്സിംഗ് വിദ്യാർഥികളുടെ ഗ്രാജ്യുവേഷൻ സെറിമണിയും അവാർഡ് ദാനവും നടത്തി. കോതമംഗലം ജ്യോതി പ്രൊവിൻഷ്യൽ സുപ്പിരിയർ സിസ്റ്റർ ലിസി മാത്യു തെക്കേക്കൂറ്റ് എസ്എച്ച് അധ്യക്ഷത വഹിച്ചു. മലങ്കര ഓർത്തഡോക്സ് സിറിയൻ ചർച്ച് കോളജ് ഓഫ് നഴ്സിംഗ് പ്രിൻസിപ്പൽ ഡോ. നമിത സുബ്രഹ്മണ്യം ഉദ്ഘാടനം ചെയ്തു. കോളജ് പ്രിൻസിപ്പൽ ഡോ. ജയൻ ജയിംസ്, പ്രതിജ്ഞാവാചകം ചൊല്ലിക്കൊടുത്തു. സിസ്റ്റർ ഡോ. ഷോളി ഫ്രാൻസിസ് എസ്എച്ച് മികച്ച വിജയം നേടിയ വിദ്യാർഥികളെ അനുമോദിച്ചു.

ശൗചാലയം: അനുവാദം നൽകിയതും എതിർക്കുന്നതും ജില്ലാ കളക്‌ടർ

ഉപ്പുതറ: ബ്ലോക്കു പഞ്ചായത്തിന് ശൗചാലയം നിർമിക്കാൻ സ്ഥലം അനുവദിച്ച ജില്ലാ കളക്ടർ ശൗചാലയ നിർമാണം പൂർത്തിയായപ്പോൾ പൂട്ടിട്ടു. കട്ടപ്പന ബ്ലോക്ക് പഞ്ചായത്തിലെ അയ്യപ്പൻകോവിൽ തൂക്കുപാലത്തിന് സമീപം 30 ലക്ഷം രൂപ ചെലവഴിച്ച് ബ്ലോക്കു പഞ്ചായത്ത് നിർമിച്ച ശൗചാലയം തുറക്കാൻ കഴിയുന്നില്ല. ജില്ലാ കളക്ടർ അധ്യക്ഷനായ ഡാം സേഫ്റ്റി അഥോറിറ്റിയുടെ എതിർപ്പാണ് ശൗചാലയം തുറക്കുന്നതിന് തടസം. കരുവേൻ ശശി എന്നയാൾ സൗജന്യമായി ഭൂമി നൽകിയതിന്‍റെ സമ്മതപത്രവും നിർമാണത്തിന് ജില്ലാ കളക്ടർ നൽകിയ അനുമതി ഉത്തരവും കട്ടപ്പന ബ്ലോക്ക് പഞ്ചായത്തിന്‍റെ കൈവശമുണ്ട്. എന്നിട്ടും ഡാം സേഫ്റ്റി അഥോറിറ്റി ശൗചാലയത്തിന് വൈദ്യുതി നൽകുന്നത് തടഞ്ഞിരിക്കുകയാണ്. നിർമാണം തുടങ്ങിയപ്പോൾ മുതൽ പൂർത്തിയാകും വരെ ഡാം സേഫ്റ്റി ഒരെതിർപ്പും അറിയിച്ചിരുന്നില്ല. 2023-24ലാണ് ശൗചാലയത്തിനായി കട്ടപ്പന ബ്ലോക്ക് പഞ്ചായത്ത് 30 ലക്ഷം രൂപ അനുവദിച്ചത്. ജില്ലാ കളക്ടർ, ഭൂപതിവ് തഹിൽദാർ, ഡാം സേഫ്റ്റി വിഭാഗം ഉദ്യോഗസ്ഥർ എന്നിവരുടെ സംയുക്ത പരിശോധനയ്ക്കു ശേഷമാണ് ശൗചാലയം പണിയാൻ മുൻ ജില്ലാ കളക്ടർ അനുമതി നൽകിയത്. ഇപ്പോൾ ശൗചാലയത്തിന്‍റെ നിർമാണം പൂർത്തിയായതോടെയാണ് ഇവിടെ വൈദ്യുതി കണക്‌ഷൻ നൽകുന്നതിനെ ഡാം സേഫ്റ്റി അഥോറിറ്റി എതിർക്കുന്നത്. ശൗചാലയത്തിന് വൈദ്യുതി നൽകരുതെന്ന് കാണിച്ച് കെഎസ്ഇബിക്ക് കത്തു നൽകിയിരിക്കുകയാണ്. ഇതിനെതിരേ വകുപ്പ് മന്ത്രി, ജില്ലാ കളക്ടർ, മന്ത്രിമാരുടെ നേതൃത്വത്തിൽ നടന്ന ജില്ലാ-താലൂക്ക് അദാലത്ത് എന്നിവിടങ്ങളിൽ പരാതി നൽകിയെങ്കിലും ഇനിയും പരിഹാരം ഉണ്ടായിട്ടില്ല. വൈദ്യുതിയില്ലാതെ ശൗചാലയം പ്രവർത്തം തുടങ്ങാൻ കഴിയില്ല. വിനോദ സഞ്ചാരികളുടെ പ്രാഥമിക കൃത്യനിർവഹണം ഡാം സേഫ്റ്റിയുടെ എതിർപ്പുമൂലം ബുദ്ധിമുട്ടിലാക്കുക യാണ്. ഇടുക്കി ജലാശയത്തിന് കുറുകേ അയ്യപ്പൻകോവിൽ - കാഞ്ചിയാർ പഞ്ചായത്തുകളെ ബന്ധിപ്പിക്കുന്ന തൂക്കുപാലത്തിൽ കയറാനും ജലാശയത്തിന്‍റെ വിദൂരദൃശ്യം കാണാനും നൂറു കണക്കിന് സഞ്ചാരികളാണ് ദിനംപ്രതി ഇവിടെയെത്തുന്നത്. മുഖ്യമന്ത്രി, വകുപ്പു മന്ത്രിമാർ എന്നിവരുടെ ശ്രദ്ധയിലെത്തിച്ച് പ്രശ്നത്തിനു പരിഹാരം കാണുമെന്ന് ബ്ലോക്ക് പഞ്ചായത്ത് പ്രസിഡന്‍റ് വി.പി. ജോൺ അറിയിച്ചു.

മലങ്കര ജലാശയത്തിലെ മണലും ചെളിയും നീക്കാൻ അനുമതി

മൂലമറ്റം: മലങ്കര ജലാശയത്തിൽ പതിറ്റാണ്ടുകളായി അടിഞ്ഞുകൂടിയ മണ്ണും ചെളിയും മണലും നീക്കം ചെയ്യാൻ മന്ത്രിസഭാ അനുമതിയായതോടെ ജലാശയത്തിന്‍റെ സംഭരണശേഷി വർധിക്കാൻ സാധ്യതയേറുന്നു. വർഷങ്ങളായി മണലും എക്കലും അടിഞ്ഞുകൂടിയതിനെത്തുടർന്ന് ഡാമിന്‍റെ സംഭരണശേഷി കുറഞ്ഞിരുന്നു. അണക്കെട്ടിന്‍റെ പൂർണ സംഭരണശേഷി 36.36 ദശലക്ഷം ഘനമീറ്ററാണ്. എന്നാൽ, കാലാകാലങ്ങളിലായി എക്കലും ചെളിയും മണലും അടിഞ്ഞതിനെത്തുടർന്ന് ഇത് 48.95 ശതമാനമാനത്തോളം കുറഞ്ഞിരുന്നു. സംഭരണശേഷിയുടെ പകുതിയോളമാണ് ഇത്തരത്തിൽ നഷ്ടമായത്. 2021ൽ നടത്തിയ സർവേയുടെ അടിസ്ഥാനത്തിലാണ് ഇത്രയധികം മണ്ണും ചെളിയും ജലാശയത്തിൽ അടിഞ്ഞതായി കണ്ടെത്തിയത്. ഇവ നീക്കംചെയ്യാൻ മന്ത്രിസഭയുടെ അനുമതി ലഭിച്ചെങ്കിലും ഒട്ടേറെ കടന്പകൾ കടന്നാൽ മാത്രമേ മണ്ണ് നീക്കംചെയ്യാൻ കഴിയുകയുള്ളൂ. സർവേയുടെ അടിസ്ഥാനത്തിൽ 2024ൽ തയാറാക്കിയ ഡിപിആർ പ്രകാരം ചീഫ് ടെക്നിക്കൽ എക്സാമിനർ വീണ്ടും പഠനം നടത്തും. ഇതിനുശേഷം പരിസ്ഥിതി ആഘാതപഠനം പൂർത്തിയാ ക്കിയാൽ മാത്രമേ അന്തിമാനുമതി ലഭിക്കുകയുള്ളൂ. മൂലമറ്റം മുതൽ മുട്ടം വരെയുള്ള പ്രദേശത്തെ ഒന്പത് മേജർ പോയിന്‍റുകളിൽനിന്നും എട്ട് മൈനർ പോയിന്‍റുകളിൽനിന്നുമാണ് പ്രധാനമായും മണലും ചെളിയും നീക്കം ചെയ്യേണ്ടത്. 18 ദശലക്ഷത്തോളം ഘനമീറ്റർ ചെളിയും മണ്ണും എക്കലും നീക്കണം. ഈ പ്രവൃത്തി ടേണ്‍ കീ അടിസ്ഥാനത്തിലുള്ള ടെൻഡർ മുഖേനയാണ് നടപ്പാക്കുക. കരാർ ഏറ്റെടുക്കുന്ന കന്പനി ഡീസിൽറ്റേഷൻ പ്രവൃത്തികൾ പൂർത്തിയാക്കി സർക്കാറിലേക്ക് പണം അടയ്ക്കുന്നതാണ് ടേണ്‍ കീ സന്പ്രദായം. മലങ്കര ജലാശയത്തിനു ചുറ്റുമായി ഒട്ടേറെ കുടിവെള്ള പദ്ധതികൾ ഉള്ളതിനാൽ മണ്ണി നീക്കം ചെയ്യാൽ മൂന്നു വർഷമങ്കിലും വേണ്ടിവരുമെന്നാണ് കണക്കാക്കപ്പെടുന്നത്. മണ്ണും ചെളിയും നീക്കംചെയ്യാൻ 60 കോടി രൂപയോളം ചെലവഴിക്കേണ്ടിവരുമെന്നാണ് പ്രതീക്ഷിക്കുന്നത്. മൂവാറ്റുപുഴ ജലസേചന പദ്ധതിയുടെ ഭാഗമായി തൊടുപുഴയ്ക്കു സമീപം മുട്ടത്ത് തൊടുപുഴയാറിനു കുറുകേ നിർമിച്ച ചെറിയ അണക്കെട്ടാണ് മലങ്കര.

എന്‍റെ കേരളം ; പ്രദർശനമേള ഇന്നു സമാപിക്കും

ഇടുക്കി: കഴിഞ്ഞ 29 മുതൽ വാഴത്തോപ്പ് വൊക്കേഷണൽ ഹയർ സെക്കൻഡറി സ്കൂൾ മൈതാനത്ത് നടന്നു വന്നിരുന്ന എന്‍റെ കേരളം പ്രദർശന വിപണനമേള ഇന്ന് സമാപിക്കും. സമാപന സമ്മേളനം വൈകുന്നേരം അഞ്ചിന് മന്ത്രി കെ.എൻ. ബാലഗോപാൽ ഉദ്ഘാടനം ചെയ്യും. മന്ത്രി റോഷി അഗസ്റ്റിൻ അധ്യക്ഷത വഹിക്കും. ഡീൻ കുര്യാക്കോസ് എംപി മുഖ്യപ്രഭാഷണം നടത്തും. ജില്ലാ പഞ്ചായത്ത് പ്രസിഡന്‍റ് രാരിച്ചൻ നീറണാകുന്നേൽ മുഖ്യാതിഥിയായിരിക്കും. നൂറുകണക്കിന് ആളുകളാണ് വാഴത്തോപ്പ് ഗവ. എച്ച്എസ്എസ് ഗ്രൗണ്ടിൽ സംഘടിപ്പിച്ചിരിക്കുന്ന പ്രദർശന വിപണനമേള സന്ദർശിച്ചത്. വിവിധ സർക്കാർ വകുപ്പുകൾ ഒരുക്കിയിരിക്കുന്ന പവലിയനുകളും മേളയിൽ ജനങ്ങളെ ആകർഷിച്ചു. മനോഹരമായ കടൽത്തീരത്തോ പച്ചപ്പുനിറഞ്ഞ ഗ്രാമഭംഗിയിലോ ഫോട്ടോഷൂട്ട് നടത്തണമെങ്കിൽ അതിനായുള്ള സൗകര്യമാണ് ടൂറിസം പവലിയനിൽ സജ്ജമാക്കിയിരിക്കുന്നത്. ബീച്ചും ഡെസ്റ്റിനേഷൻ വെഡിംഗിന്‍റെ മാതൃകയും ഇവിടെ ഒരുക്കിയിരിക്കുന്നു. തിരമാലകൾ കാലിൽ തൊട്ടു തഴുകി പോകുന്ന അനുഭവം തരുന്നതാണ് ഇവിടെ ക്രമീകരിച്ചിരിക്കുന്ന കടലോരത്തിന്‍റെ ചെറുപതിപ്പ്. വിനോദസഞ്ചാരികൾക്ക് സുരക്ഷിതവും പ്രകൃതിയോട് ചേർന്നുനിൽക്കുന്ന യാത്രാനുഭവം പകരുന്നതുമായ കാരവാൻ ടൂറിസത്തെ അടുത്തറിയാനും ഇവിടെ അവസരമുണ്ട്. എല്ലാ ആധുനിക സംവിധാനങ്ങളുമുള്ള കാരവാൻ വിനോദയാത്ര ഇഷ്ടപ്പെടുന്നവർക്ക് പുത്തൻ അനുഭവമായിരിക്കുമെന്ന് സംഘാടകർ പറഞ്ഞു. ഇതോടൊപ്പം ഗ്രാമീണ ടൂറിസത്തിന്‍റെ ഭംഗി വിളിച്ചോതുന്ന ഓലക്കുടിലും നെൽപ്പാടങ്ങളും സ്റ്റാളിൽ ഒരുക്കിയിട്ടുണ്ട്. ജില്ലയുടെ ടൂറിസം മാപ്പും വിവിധ സേവനങ്ങളെക്കുറിച്ചും ഇവിടെനിന്ന് അറിയാൻ സാധിക്കും. വനവിഭവങ്ങളുടെ രുചി നുകരാം നറുനീണ്ടി ചായ, ബട്ടർ ബീൻസ് മോമോസ്, റാഗി ലഡു തുടങ്ങി വനവിഭവങ്ങളുടെ രുചി വൈവിധ്യമാണ് വനം- വന്യജീവി വകുപ്പിന്‍റെ സ്റ്റാളിൽ തയാറാക്കിയിരിക്കുന്നത്. ഒൗഷധഗുണമുള്ള പ്രകൃതിദത്ത ഭക്ഷ്യ ഉത്പന്നങ്ങളാണ് ഇവിടത്തെ പ്രത്യേകത. മൂന്നാർ വൈൽഡ് ലൈഫ് ഡിവിഷനും ചിന്നാർ വന്യജീവി സങ്കേതവും ചേർന്നാണ് സ്റ്റാൾ സജ്ജമാക്കിയിരിക്കുന്നത്. വേറിട്ട രുചികളുമായാണ് കുടുംബശ്രീ ഭക്ഷ്യ മേള ഒരുക്കിയിരിക്കുന്നത്. പാലക്കാട് അട്ടപ്പാടി ആദിവാസി ഉൗരിന്‍റെ സ്വന്തം ഭക്ഷണമായ വനസുന്ദരി ചിക്കൻ ഏറെ പേരെ ആകർഷിക്കുന്നു. അട്ടപ്പാടിയിൽനിന്നുള്ള അഞ്ച് യുവതികളാണ് ഈ രുചിക്കൂട്ട് തയാറാക്കിയിരിക്കുന്നത്. കരകൗശല വസ്തുക്കളുമായി ജില്ലാ ജയിൽ വകുപ്പ് ജില്ലാ ജയിൽ വകുപ്പിന്‍റെ സ്റ്റാളിലെ കരകൗശല വസ്തുക്കളുടെ പ്രദർശനം ശ്രദ്ധേയമായി. ജയിലിലെ കലാകാരൻമാരാണ് ഇവിടെ വിൽപ്പനയ്ക്ക് എത്തിച്ചിരിക്കുന്ന ചിത്രങ്ങളും കരകൗശല വസ്തുക്കളും നിർമിച്ചിരിക്കുന്നത്. ചിരട്ടയിൽ തീർത്ത ശില്പങ്ങൾക്കും മറ്റ് കരകൗശല വസ്തുക്കൾക്കും 100 രൂപ മുതലാണ് വില. ഒപ്പം തുണിസഞ്ചികളും ജയിലിൽനിന്ന് വിൽപ്പനയ്ക്കുണ്ട്. പെയിന്‍റിംഗുകൾ മനോഹരമായ ഫ്രെയിമുകളിലാക്കിയാണ് വിൽപ്പനയ്ക്കായി എത്തിച്ചിരിക്കുന്നത്. അലങ്കാരമത്സ്യങ്ങളുടെ വർണക്കാഴ്ച വിവിധയിലം അലങ്കാര മത്സ്യങ്ങളുടെ വിപുലമായ ശേഖരമാണ് മത്സ്യഫെഡ് സ്റ്റാളിൽ ക്രമീകരിച്ചിരിക്കുന്നത്. വിവിധ വർണങ്ങളിൽ അക്വേറിയത്തിലൂടെ ഓടിക്കളിക്കുന്ന കുഞ്ഞൻ വർണ മത്സ്യം ടെട്രാ കുട്ടികളെയും മുതിർന്നവരെയും ഒരേപോലെ ആകർഷിക്കുന്നു. ജയ്ന്‍റ് ഗൗരാമി, എയ്ഞ്ചൽ, ഗോൾഡ് ഫിഷ് എന്നിവയ്ക്കും പുറമേ കേരളത്തിന്‍റെ സ്വന്തം മത്സ്യം കരിമീനും അടക്കം മത്സ്യങ്ങളുടെ വർണ കാഴ്ചകളാണ് ജില്ലാ മത്സ്യവകുപ്പ് ഒരുക്കിയിരിക്കുന്നത്. അലങ്കാര മത്സ്യങ്ങൾ വാങ്ങാനും വിൽക്കാനും ആഗ്രഹിക്കുന്നവർക്ക് സ്റ്റാളുമായി ബന്ധപ്പെട്ടാൽ കർഷകരുടെ വിവരങ്ങൾ ലഭിക്കും. വീട്ടുമുറ്റത്ത് മത്സ്യക്കുളം നിർമിക്കാൻ ആഗ്രഹിക്കുന്നവർക്ക് സാങ്കേതിക സഹായവും നിർദേശങ്ങളും ഇവിടെനിന്ന് ലഭിക്കും. കുടുംബസമേതം റോഷി അഗസ്റ്റിൻ എന്‍റെ കേരളം പ്രദർശന വിപണന മേളയിലെ സ്റ്റാളുകൾ സന്ദർശിക്കാൻ മന്ത്രി റോഷി അഗസ്റ്റിൻ കുടുംബസമേതമെത്തി. മന്ത്രിയും ഭാര്യ റാണിയും കായികവകുപ്പിന്‍റെ കായിക കേരളം സ്റ്റാളിൽ സ്പോർട്സ് കൗണ്‍സിലിലെ കുട്ടികളോടൊപ്പം വോളിബോൾ തട്ടി. ടൂറിസം വകുപ്പിന്‍റെ സ്റ്റാളിലെ ഗ്രാമീണ ടൂറിസം വില്ലേജ് സന്ദർശിക്കുകയും ഡെസ്റ്റിനേഷൻ വെഡിംഗ് മാതൃകയിൽ സജ്ജമാക്കിയ പവലിയനിൽ കുടുംബസമേതം ഫോട്ടോ എടുക്കുകയും ചെയ്തു.

തൊമ്മൻകുത്തിൽ വീട്ടുമുറ്റത്ത് കുരിശു സ്ഥാപിച്ച് പ്രതിഷേധം

വണ്ണപ്പുറം: നാരങ്ങാനത്ത് കൈവശഭൂമിയിൽ സ്ഥാപിച്ച കുരിശ് വനംവകുപ്പ് പിഴുതുകൊണ്ടുപോയതിൽ പ്രതിഷേധിച്ച് നടത്തുന്ന സമരങ്ങളുടെ ഭാഗമായി വിശ്വാസികളുടെ വീട്ടുമുറ്റത്ത് കുരിശ് സ്ഥാപിച്ചു. നാരങ്ങാനം പുതിയാത്ത് ജോർജിന്‍റെ വീട്ടുമുറ്റത്താണ് ഇന്നലെ കുരിശ് സ്ഥാപിച്ചത്. വികാരി ഫാ. ജയിംസ് ഐക്കരമറ്റത്തിന്‍റെ സാന്നിധ്യത്തിലാണ് സമരത്തിന്‍റെ ഭാഗമായി കുരിശ് സ്ഥാപിച്ചത്. ബാക്കി ഇടവകാംഗങ്ങളുടെ വീട്ടുമുറ്റത്തും കുരിശ് സ്ഥാപിക്കും. കഴിഞ്ഞ ഏപ്രിൽ11നാണ് സെന്‍റ് തോമസ് പള്ളി നാരങ്ങാനത്ത് കൈവശഭൂമിയിൽ കുരിശ് സ്ഥാപിച്ചത്. പിറ്റേ ദിവസം വനംവകുപ്പ് കുരിശു പിഴുതു മാറ്റുകയായിരുന്നു. ഇതേത്തുടർന്ന് വലിയ പ്രതിഷേധമാണ് പ്രദേശത്തുണ്ടായത്. ഇടവകയിലെ കൈവശഭൂമിയിൽ താമസിക്കുന്ന വിശ്വാസികളുടെ വീടുകൾക്ക് മുന്നിലാണ് കുരിശ് സ്ഥാപിക്കുന്നത്. വനംവകുപ്പ് കൈവശഭൂമിയും വനംഭൂമിയുമായി ജണ്ടയിട്ടു വേർതിരിച്ച ഭാഗത്തു താമസിക്കുന്ന വിശ്വാസികളാണ് സമരത്തിന് പിന്തുണനൽകി വീട്ടുമുറ്റത്ത് കുരിശ് സ്ഥാപിക്കുന്നത്. ആറു പതിറ്റാണ്ടോളമായി താമസിക്കുന്ന പ്രദേശത്ത് ഇനിയും വനംവകുപ്പുദ്യോഗസ്ഥരുടെ ഭീഷണിയുടെ നിഴലിൽ കഴിയാൻ തയാറല്ലെന്ന് നാട്ടുകാർ പറഞ്ഞു. കുരിശ് സ്ഥാപിക്കുന്നതിന് ഇടവകക്കാർക്കു പിന്തുണയുമായി പ്രദേശവാസികൾ പൂർണമായും എത്തിയിരുന്നു. തുടർ സമരങ്ങൾ ഉണ്ടാകുമെന്നും പള്ളി കൈവശ ഭൂമിയിൽ സ്ഥാപിച്ച കുരിശ് തിരികെ എത്തിക്കണമെന്നും ഇതിന് നേതൃത്വം നൽകിയ വനംവകുപ്പ് ഉദ്യോഗസ്ഥനെതിരേ നടപടി എടുക്കണമെന്നുമാണ് വിശ്വാസികളുടെ ആവശ്യം. കുറ്റക്കാരായ ഉദ്യോഗസ്ഥരെ സംരക്ഷിക്കുന്ന നിലപാടാണ് ഉന്നത ഉദ്യോഗസ്ഥർ സ്വീകരിക്കുന്നതെന്നും ഇത് അംഗീകരിക്കൻ കഴിയില്ലെന്നും സമരസമിതി നേതാക്കൾ പറഞ്ഞു.

വിനോദസഞ്ചാര മേഖലയ്ക്ക് തിരിച്ചടിയായി കാലാവസ്ഥ

മൂന്നാർ: കൂടുതൽ സഞ്ചാരികൾ എത്തുന്ന ഏപ്രിൽ, മേയ് മാസങ്ങളിലെ അവധിക്കാലത്തു പോലും മൂന്നാറിൽ സഞ്ചാരികളുടെ വരവിൽ ഗണ്യമായ കുറവ്. പ്രതികൂല കാലാവസ്ഥയും റെഡ് അലർട്ടും മൂലം കഴിഞ്ഞ ദിവസങ്ങളിൽ മൂന്നാറിലേക്ക് പ്രതീക്ഷിച്ച ഒഴുക്കുണ്ടായില്ല. കാലാവസ്ഥയ്ക്കൊപ്പം അടിസ്ഥാന സൗകര്യങ്ങളുടെ അഭാവവും ഗതാഗതക്കുരുക്കുമെല്ലാം സഞ്ചാരികളുടെ വരവിന് തടസമാകുകയാണ്. കാലാവസ്ഥ പ്രതികൂലമായതോടെ ഓണ്‍ലൈൻ വഴിയായി ഹോട്ടൽ ബുക്കിംഗ് നടത്തിയ നിരവധി പേർ ബുക്കിംഗ് റദ്ദ് ചെയ്തു. 2018 ലെ മഹാപ്രളയത്തിനു ശേഷം മൂന്നാറിലെ ടൂറിസം മേഖലയ്ക്കു ഒരു തിരിച്ചുവരവു സാധ്യമായിട്ടില്ല. വാരാന്ത്യ ദിവസങ്ങളായ ശനി, ഞായർ ദിവസങ്ങളിൽ മാത്രമാണ് ഇപ്പോൾ തിരക്കുള്ളത്. ഹോട്ടൽ, റിസോർട്ട് മേഖലയാണ് ഏറ്റവും കൂടുതൽ പ്രതിസന്ധി നേരിടുന്നത്. ചെറുതും വലുതുമായി മൂന്നാറിൽ മാത്രം 700 റിസോർട്ടുകളും ഹോം സ്റ്റേകളും പ്രവർത്തിക്കുന്നുണ്ട്. ശനി, ഞായർ ദിവസങ്ങളിലെ തിരക്കു കൊണ്ടു മാത്രം ഹോട്ടൽ മേഖല മുന്നോട്ടുപോകില്ല. കടക്കെണി മൂലം അടച്ചുപൂട്ടിയ റിസോർട്ടുകളുടെ എണ്ണവും കുറവല്ല. സഞ്ചാരികളുടെ വരവ് പ്രതീക്ഷിച്ചു കഴിയുന്ന ടൂറിസം ടാക്സി ഡ്രൈവർമാരും വലിയ തിരിച്ചടിയാണ് നേരിടുന്നത്.

ഖാദി ബോർഡ് കെട്ടിടം മദ്യപസംഘങ്ങളുടെ താവളം; യന്ത്രങ്ങൾ തുരുമ്പെടുത്ത് നശിക്കുന്നു

രാജാക്കാട്: രാജാക്കാട് പഞ്ചായത്തിലെ കുരിശുംപടിയിലുള്ള ഖാദിബോര്‍ഡിന്‍റെ നൂല്‍നൂല്‍ക്കല്‍ പരിശീലന കേന്ദ്രത്തിന്‍റെ കെട്ടിടവും ഇതിനുള്ളില്‍ സ്ഥാപിച്ച ലക്ഷങ്ങൾ വിലപിടിപ്പുള്ള യന്ത്രങ്ങളും തുരുമ്പെടുത്ത് നശിക്കുന്നു. തദ്ദേശീയരായ വനിതകളുടെ വരുമാനം ലക്ഷ്യമിട്ടാണ് ജില്ലാ പഞ്ചായത്ത് പഴയവിടുതി കുരിശുംപടിയില്‍ ഖാദി ബോര്‍ഡിന്‍റെ നേതൃത്വത്തില്‍ രണ്ട് വലിയ കെട്ടിടമടക്കമുള്ള സംവിധാനങ്ങള്‍ സ്ഥാപിച്ചത്. നൂല്‍നൂല്‍ക്കല്‍, തേനീച്ച വളര്‍ത്തല്‍ എന്നിവയിലായിരുന്നു പരിശീലനം. പരിശീലനം കഴിഞ്ഞ വനിതകള്‍ക്ക് ഇവിടെത്തന്നെ ജോലിയും നല്‍കിയിരുന്നു. എന്നാല്‍, വേണ്ട രീതിയിലുള്ള വരുമാനം ഇതില്‍നിന്നു ലഭ്യമാകാതെ വന്നതോടെ തൊഴിലാളികള്‍ മറ്റ് മേഖലകളിലേക്ക് മാറി. ഇതോടെ കേന്ദ്രത്തിന്‍റെ പ്രവര്‍ത്തനം അവതാളത്തിലായി. പിന്നീട് വര്‍ഷങ്ങളോളം അടഞ്ഞുകിടന്ന സ്ഥാപനം വീണ്ടും ജില്ലാ പഞ്ചായത്ത് ഇടപെട്ട് ലക്ഷങ്ങള്‍ മുടക്കി പ്രവർത്തനം പുനരാരംഭിച്ചെങ്കിലും ഇതും കുറച്ച് നാളുകള്‍ക്ക് ശേഷം നിലച്ചു. നിലവില്‍ എല്ലാവിധ സൗകര്യങ്ങളുമുള്ള കെട്ടിടം കാടുകയറി മൂടി. ജനല്‍ച്ചില്ലുകളും മറ്റും സാമൂഹ്യവിരുദ്ധര്‍ നശിപ്പിക്കുകയും ചെയ്തു. തുരുമ്പെടുത്ത് പ്രവര്‍ത്തന രഹിതമായ യന്ത്രങ്ങള്‍ എടുത്തുമാറ്റി കെട്ടിടം നവീകരിച്ച് മറ്റെന്തെങ്കിലും പ്രവര്‍ത്തനങ്ങള്‍ക്കായി വിട്ടുനല്‍കണമെന്നാണ് നാട്ടുകാരുടെ ആവശ്യം. കെട്ടിടം യുവാക്കള്‍ക്ക് ഒത്തുകൂടാൻ ക്ലബ്ബിനായി വിട്ടുനല്‍കണമെന്നാവശ്യപ്പെട്ട് യുവജന സംഘടനാ നേതാക്കള്‍ ജില്ലാ പഞ്ചായത്തിനെ സമീപിച്ചെങ്കിലും ഫലമുണ്ടായില്ല. നിലവില്‍ രാത്രികാലങ്ങളില്‍ മദ്യപസംഘങ്ങളടക്കം കെട്ടിടം കൈയടക്കിയിരി ക്കുക യാണ്.

പിക്കപ്പ്‌വാനും കാറും കൂട്ടിയിടിച്ചു അഞ്ചു പേർക്കു പരിക്ക്

വണ്ടിപ്പെരിയാർ: പിക്കപ്പ് വാനും കാറും കൂട്ടിയിടിച്ചു ഒരു കുടുംബത്തിലെ അഞ്ചുപേർക്ക് പരിക്ക്. ശനിയാഴ്ച വൈകുന്നേരം നാലോടെയാണ് അപകടം ഉണ്ടായത്. കുമളിയിൽനിന്നു കോട്ടയത്തേക്കു പോവുകയായിരുന്ന കാറും തമിഴ്നാട്ടിലേക്ക് പോവുകയായിരുന്ന പിക്കപ്പ് വാനുമാണ് കൂട്ടിയിടിച്ചത്. വണ്ടിപ്പെരിയാർ 57ാം മൈലിന് സമീപത്താണ് സംഭവം. കാറിൽ ഉണ്ടായിരുന്ന കോട്ടയം കോരുത്തോട് സ്വദേശികളായ ജോർജ് (62), അന്നമ്മ (82), ജോളമ്മ (46), അഞ്ജല ജോൺ (21), ജോസഫ് (85), പിക്കപ്പ് വാനിൽ ഉണ്ടായിരുന്ന കുമളി ഒന്നാമൈൽ സ്വദേശി വിജയരാജ് (42) എന്നിവർക്കാണ് പരിക്കേറ്റത്. ഇവരെ പീരുമേട് താലൂക്ക് ആശുപത്രിയിൽ എത്തിച്ച് പ്രാഥമിക ചികിത്സ നൽകിയശേഷം കോട്ടയം മെഡിക്കൽ കോളജ് ആശുപത്രിയിലേക്കു മാറ്റി. വണ്ടിപ്പെരിയാർ പോലീസ് സ്ഥലത്തെത്തി മേൽ നടപടികൾ സ്വീകരിച്ചു. അരമണിക്കൂറോളം ഗതാഗതം തടസപ്പെട്ടു.

പോക്സോ കേസ്: പ്രതിക്ക് ഇരട്ട ജീവപര്യന്തം

ഇടുക്കി: പ്രായപൂർത്തിയാകാത്തതും മാനസിക വെല്ലുവിളി നേരിടുന്നതുമായ പെണ്‍കുട്ടിയെ മർദിക്കുകയും പീഡിപ്പിക്കുകയും ചെയ്ത പ്രതിക്ക് ഇരട്ട ജീവപര്യന്തം. വട്ടവട കോവില്ലൂർ, പഴത്തോട്ടം സ്വദേശി കുരുവി എന്ന് വിളിക്കുന്ന ആന്‍റണിക്കാണ് (32) ഇടുക്കി ഫാസ്റ്റ് ട്രാക്ക് സ്പെഷൽ കോടതി ഇരട്ട ജീവപര്യന്തവും 3,11,000 രൂപ പിഴയും വിധിച്ചത്. ഓഗസ്റ്റ് നാലിനായിരുന്നു സംഭവം. ദേവികുളം പോലീസ് ഇൻസ്പെക്ടർമാരായിരുന്ന എസ്. ശിവലാൽ, എസ്. ജയകുമാർ എന്നിവരാണ് അന്വേഷണം നടത്തി കുറ്റപത്രം സമർപ്പിച്ചത്. അതിജീവിതയ്ക്കായി പബ്ലിക് പ്രോസിക്യൂട്ടർ ഷിജോമോൻ ജോസഫ് ഹാജരായി.

ദന്പതികൾ ജേതാക്കൾ

കുമളി: നാഷണൽ മാസ്റ്റേഴ്സ് ഗെയിംസ് ആൻഡ് സ്പോർട്സ് ഫെഡറേഷൻ ഹിമാചലിലെ ധർമശാലയിൽ സംഘടിപ്പിച്ച ഏഴാമത് നാഷണൽ ഗെയിംസ്-2025 പഞ്ചഗുസ്തി മത്സരത്തിൽ (40 വയസിനു മുകളിൽ 75 കിലോ ഭാരം) ഇടുക്കി കുമളി സ്വദേശി ലിയോ ഇ. മാത്യു ഒന്നാം സ്ഥാനം കരസ്ഥമാക്കി. ഉത്തർപ്രദേശ് സ്വദേശി ഗുപ്തർ രാജിനോടാണ് ലിയോ ഇ. മാത്യു പഞ്ചഗുസ്തിയിൽ ബലപരീക്ഷണം നടത്തിയത്. ഭാര്യ എം.ആർ. അനു (ജവഹർ നവോദയ സ്കൂൾ എറണാകുളം) ഇവിടെ നടന്ന 40 വയസിനു മുകളിൽ പ്രായമുള്ളവരുടെ കബഡി മത്സരത്തിൽ ഒന്നാം സ്ഥാനം കരസ്ഥമാക്കിയ കേരള ടീം അംഗമാണ്.

മറക്കരുത് സുരക്ഷാ പാഠങ്ങൾ; ജില്ലയിൽ അപകടങ്ങൾ ക്രമാതീതമായി വർധിക്കുന്നു

തൊടുപുഴ: അവധിക്കാലം ആഘോഷിക്കാൻ കുടുംബത്തിനും സുഹൃത്തുക്കൾക്കുമൊപ്പം ഹൈറേഞ്ചിലേക്ക് എത്തുന്നവരുടെ വാഹനങ്ങൾ അപകടത്തിൽപ്പെടുന്നത് നിത്യസംഭവമാകുന്നു. കഴിഞ്ഞ ദിവസങ്ങളിൽ ഒട്ടേറെ വാഹനങ്ങളാണ് ജില്ലയിൽ വിവിധ സ്ഥലങ്ങളിലായി അപകടത്തിൽപ്പെട്ടത്. അടിമാലി, മൂന്നാർ, ബൈസണ്‍വാലി, മാങ്കുളം തുടങ്ങി വിനോദ സഞ്ചാര മേഖലകളിലും ഇവയുമായി അടുത്തുകിടക്കുന്ന പ്രദേശങ്ങളിലുമാണ് അപകടങ്ങൾ ഏറുന്നത്. മറ്റു സംസ്ഥാനങ്ങളിൽനിന്നും മറ്റുമെത്തി ജില്ലയിലെ മലയോരപാതയുടെ പ്രത്യേകതകളറിയാതെ വാഹനങ്ങൾ ഓടിക്കുന്നതാണ് പലപ്പോഴും അപകടങ്ങൾക്കിടയാക്കുന്നത്. വാഹനാപകടങ്ങളിൽപ്പെട്ട് ജീവൻ നഷ്ടപ്പെട്ടവരും നിരവധിയാണ്. എന്നാൽ വാഹനാപകടങ്ങൾ പെരുകിയിട്ടും കൂടുതൽ സുരക്ഷാ മുൻകരുതൽ നടപടികൾ അധികൃതരുടെ ഭാഗത്തുനിന്നുണ്ടാകുന്നില്ലെന്ന ആക്ഷേപവും ശക്തമാണ്. വ്യാഴാഴ്ച ജില്ലയിൽ വിവിധ മേഖലകളിലായി നാല് അപകടങ്ങളാണ് ഉണ്ടായത്. കല്ലാർ കുട്ടി അണക്കെട്ടിനു സമീപം മുതിരപ്പുഴയാറിലേക്ക് കാർ മറിഞ്ഞ് ഫോറസ്റ്റർക്ക് പരിക്കേറ്റിരുന്നു. മാങ്കുളത്തിനു സമീപം വിനോദസഞ്ചാരികൾ യാത്ര ചെയ്ത് ജീപ്പ് അപകടത്തിൽപ്പെട്ട് എട്ടു പേർക്കാണ് പരിക്കേറ്റത്. മച്ചിപ്ലാവ് സെന്‍റ് ഫ്രാൻസീസ് അസീസി പള്ളിക്കു സമീപം വിനോദസഞ്ചാരികളുടെ വാൻ മറിഞ്ഞ് നാലു പേർക്ക് പരിക്കേറ്റു. ബൈസണ്‍വാലി ടീ കന്പനിക്കു സമീപം വിനോദ സഞ്ചാരികളുടെ ബസ് അപകടത്തിൽപ്പെട്ട് ആറു പേർക്കാണ് പരിക്കേറ്റത്. 29ന് ബൈസണ്‍വാലി കോമാളിക്കുടിയിലും ഇതേ രീതിയിൽ അപകടം ഉണ്ടായിരുന്നു. മാങ്കുളം-ആനക്കുളം റൂട്ടിൽ പേമരം വളവിൽ 28ന് ട്രാവലർ മറിഞ്ഞ് വിനോദ സഞ്ചാരികൾക്ക് പരിക്കേറ്റു. കഴിഞ്ഞ മാസം 24ന് മൂലമറ്റം-പുള്ളിക്കാനം റൂട്ടിൽ വിദ്യാർഥികൾ സഞ്ചരിച്ച ബസ് അപകടത്തിൽപ്പെട്ടിരുന്നു. കഴിഞ്ഞ ഫെബ്രുവരിയിൽ തമിഴ്നാട്ടിൽനിന്നു വിനോദസഞ്ചാരത്തിനെത്തിയ വിദ്യാർഥികൾ സഞ്ചരിച്ച ബസ് മാട്ടുപ്പെട്ടിയിൽ നിയന്ത്രണംവിട്ടു മറിഞ്ഞ് മൂന്നു വിദ്യാർഥികളുടെ ജീവനാണ് പൊലിഞ്ഞത്. ഡിസംബർ 31ന് കൊട്ടാരക്കര-ദിണ്ടിഗൽ ദേശീയപാതയിൽ ഉല്ലാസ യാത്രയ്ക്കായി വന്ന കെഎസ്ആർടിസി ബസ് നിയന്ത്രണംവിട്ടു മറിഞ്ഞ് നാലു പേരാണ് മരിച്ചത്. അന്നേ ദിവസംതന്നെ കുട്ടിക്കാനത്ത് കാർ കൊക്കയിലേക്ക് മറിഞ്ഞ് കാഞ്ഞിരപ്പള്ളി ആനിത്തോട്ടം സ്വദേശിയായ യുവാവ് മരിച്ചിരുന്നു. ഇത്തരത്തിൽ ചെറുതും വലുതുമായ നിരവധി അപകടങ്ങളാണ് ഈ വർഷം ജില്ലയിൽ ഉണ്ടായത്. നഗരങ്ങളിലെയും നിരപ്പായ പ്രദേശങ്ങളിലെയും റോഡുകളിൽ വാഹനമോടിച്ച് ശീലിച്ചവർ അതേ ശൈലിയിൽ മലന്പാതകളിലും ഓടിക്കുന്നതാണ് അപകടങ്ങൾക്ക് പ്രധാന കാരണമെന്ന് മോട്ടോർ വാഹനവകുപ്പ് ഉദ്യോഗസ്ഥർ പറയുന്നു. കുത്തനെയുള്ള കയറ്റവും ഇറക്കവും കൊടുംവളവുകളുമുള്ള റോഡുകളിൽ സൈറ്റ് ഡിസ്റ്റൻസ് കുറവായിരിക്കും. ഇത് ഡ്രൈവർമാർ മനസിലാക്കാതെ പോകുന്നതും അപകടത്തിനിടയാക്കും. സൈറ്റ് ഡിസ്റ്റൻസ് കുറഞ്ഞ റോഡുകൾ ഡ്രൈവർക്ക് പരിചയമില്ലാത്തതാണെങ്കിൽ അപകടസാധ്യത വളരെ കൂടുതലാണ്. ഹിൽസ്റ്റേഷൻ റോഡുകളിൽ സൈറ്റ് ഡിസ്റ്റൻസ് വളരെ കുറവായിരിക്കും. ഇത്തരം റോഡുകളിൽ മുന്നിലെ വളവിന്‍റെയോ ഇറക്കത്തിന്‍റെയോ തീവ്രത അറിയാൻ കഴിയില്ല. എതിർവശത്തു നിന്നും വരുന്ന വാഹനങ്ങളെ കാണാൻ കഴിയില്ല. മുന്നിലെ തടസങ്ങളെ മുൻകൂട്ടി അറിയാൻ കഴിയില്ല. ഇത്തരം ബ്ലൈൻഡ് സ്പോട്ടുകളിലാണ് അപകടങ്ങൾ വർധിക്കുന്നത്. നാലു മാസം: നിരത്തിൽ പൊലിഞ്ഞത് 46 ജീവൻ ശരാശരി ഒരു മാസം ചെറുതും വലുതുമായ അൻപതോളം റോഡ് അപകടങ്ങൾ ജില്ലയിൽ ഉണ്ടാകുന്നുവെന്നാണ് കണക്കുകൾ . ജനുവരി ഒന്നു മുതൽ ഏപ്രിൽ 20 വരെയുള്ള നാലു മാസത്തെ കണക്കുകൾ പരിശോധിച്ചാൽ ജില്ലയിൽ 381 വാഹനാപകടങ്ങളാണ് ഉണ്ടായത്. ഇതിൽ 46 പേർ മരണത്തിനു കീഴടങ്ങി. മദ്യപിച്ച് വാഹനമോടിച്ചതിന് നാലു മാസത്തിനിടെ ജില്ലയിൽ പിടികൂടിയ കേസുകൾ 2292 ആണ്. അമിതവേഗതയുമായി ബന്ധപ്പെട്ട് 1841 കേസുകളും എടുത്തു. വാഹനമോടിക്കുന്നതിനിടെ മൊബൈൽ ഫോണ്‍ ഉപയോഗിച്ചതിന് 122 കേസുകളാണ് എടുത്തത്. കഴിഞ്ഞ വർഷം ജനുവരി മുതൽ ഡിസംബർ വരെ ജില്ലയിൽ 1200 ഓളം അപകടങ്ങളാണ് ഉണ്ടായത്. ഇതിൽ 85 അപകടങ്ങളിലായി 97 പേർക്കാണ് ജീവൻ നഷ്ടമായത്. ആയിരത്തോളം പേർക്ക് ഗുരുതരമായി പരിക്കേൽക്കുകയും ചെയ്തു. ഡ്രൈവിംഗിൽ ശ്രദ്ധ വേണം മുന്നിൽ ഒരു അപകടം ഉണ്ടാകാം എന്ന മുൻവിധിയോടെ ശരിയായ ഗിയറിൽ വേഗത കുറച്ച് അതീവ ശ്രദ്ധയോടെ വേണം വാഹനം ഓടിക്കാനെന്ന് ഗതാഗത വിദഗ്ധർ പറയുന്നു. ഗിയർ ഡൗണ്‍ ചെയ്യാതെ തുടർച്ചയായി ബ്രേക്ക് അമർത്തി വേഗത കുറച്ച് ഇറക്കം ഇറങ്ങുന്നത് ബ്രേക്കിന്‍റെ പ്രവർത്തനക്ഷമത കുറയ്ക്കും. ആവശ്യമെങ്കിൽ വളവുകളിൽ ഹോണ്‍ മുഴക്കുക. റോഡ് സൈൻസ് ശ്രദ്ധിക്കുക, വളവുകളിൽ വാഹനം പാർക്കിംഗോ ഓവർടേക്കോ ചെയ്യരുത്. കയറ്റം കയറി വരുന്ന വാഹനങ്ങൾക്ക് മുൻഗണന കൊടുക്കണം. വാഹനം നിർത്തിയിടുന്പോഴെല്ലാം പാർക്കിംഗ് ബ്രേക്ക് പ്രവർത്തിപ്പിക്കണം. മഴയുള്ളപ്പോഴും കോടമഞ്ഞ് മൂലം കാഴ്ച തടസപ്പെടുന്പോഴും വാഹനം സുരക്ഷിതമായി നിർത്തിയിടണം. ഗൂഗിൾ മാപ്പിന്‍റെ സഹായത്താൽ അപരിചിതമായ വഴികളിലൂടെ രാത്രികാലങ്ങളിൽ സഞ്ചരിക്കാതിരിക്കുന്നതാണ് നല്ലത്. യാത്ര തുടങ്ങും മുന്പ് ടയർ, ബ്രേക്ക്, വൈപ്പർ എന്നിവയുടെ ക്ഷമത ഉറപ്പ് വരുത്തണം. ഫസ്റ്റ് എയ്ഡ് കിറ്റ് ഒപ്പം കരുതുക, വിശ്രമം ആവശ്യമെന്ന് തോന്നിയാൽ വിശ്രമിച്ച ശേഷം മാത്രം യാത്ര തുടരുക. ഇതിനു പുറമേ മറ്റു ജില്ലകൾ, സംസ്ഥാനങ്ങൾ എന്നിവിടങ്ങളിൽനിന്ന് എത്തുന്ന വിനോദ സഞ്ചാരികൾക്ക് ആവശ്യമായ ബോധവത്കരണം നടത്തണമെന്ന ആവശ്യവും ശക്തമായി ഉയരുന്നുണ്ട്.

എന്‍റെ കേരളം ക്രമസമാധാനപാലനത്തിന്‍റെ ഉള്ളറകൾ തുറന്ന് പോലീസ് സ്റ്റാൾ

ഇടുക്കി: കൗതുകവും ജിജ്ഞാസയും ഉണർത്തി എന്‍റെ കേരളം പ്രദർശന വിപണനമേളയിൽ കേരള പോലീസിന്‍റെ സ്റ്റാൾ. വയർലെസ് സംവിധാനങ്ങൾ, ഫോറൻസിക് സയൻസ്, ഫിംഗർപ്രിന്‍റ് ബ്യൂറോ, പോലീസിന്‍റെ വിവിധതരം തോക്കുകളും ആയുധങ്ങളും, സ്വയരക്ഷാ സംവിധാനങ്ങൾ, സൈബർ ഡിവിഷൻ, സ്റ്റുഡന്‍റ് പോലീസ് കേഡറ്റ്, നർക്കോട്ടിക്സ് സെൽ, ഡോഗ് സ്ക്വാഡ് തുടങ്ങി പുത്തൻ അനുഭവം പകരുകയാണ് ഇവിടെ. ക്രിമിനൽ പ്രവർത്തനങ്ങൾക്കെതിരായ പ്രതിരോധത്തിൽ സേനയുടെ വിവിധ അന്വേഷണ ഏജൻസികളെ സഹായിക്കുന്ന കേരള പോലീസിന്‍റെ പ്രധാന ശാസ്ത്രാന്വേഷണ വിഭാഗമായ ഫിംഗർപ്രിന്‍റ് ബ്യൂറോയുടെ ഉപകരണങ്ങൾ, കുറ്റകൃത്യം നടന്ന സ്ഥലം പരിശോധിക്കുന്നതിന് ഉപയോഗിക്കുന്ന വിവിധ തരം കെമിക്കലുകൾ, ലൈറ്റ് സോഴ്സുകൾ, അനുബന്ധ ഉപകരണങ്ങൾ, കൃത്യസ്ഥലത്തുനിന്നു ലഭിക്കുന്ന വിരലടയാളങ്ങളുടെ മോഡലുകൾ, വിവിധതരം ലെൻസുകൾ എന്നിവയും പ്രദർശനത്തിലുണ്ട്.

പൊതുജനങ്ങൾക്ക് അവരുടെ വിരലടയാളങ്ങൾ തിരിച്ചറിയുന്നതിന് ലൈവ് സ്കാനർ സംവിധാനവും പ്രവർത്തിപ്പിക്കുന്നുണ്ട്.പോലീസിന്‍റെ വാർത്താവിനിമയ വിഭാഗമായ കേരള പോലീസ് ടെലി കമ്മ്യൂണിക്കേഷൻ ആൻഡ് ടെക്നോളജി യൂണിറ്റിന്‍റെ സാങ്കേതിക മാറ്റങ്ങൾ പൊതുജനങ്ങളുടെ അറിവിനായി പ്രദർശിപ്പിച്ചിട്ടുണ്ട്. സന്ദേശങ്ങൾ കൈമാറാൻ ഉപയോഗിച്ചിരുന്ന പുരാതന എച്ച്എഫ് കമ്യൂണിക്കേഷൻ സങ്കേതമായ മോസ്കോഡിൽനിന്നു വിഎച്ച്എഫ്യു എച്ച്എഫ് റേഡിയോ കമ്യൂണിക്കേഷനിലേക്കും ഡിജിറ്റൽ മൊബൈൽ റേഡിയോ ത്രീടയർ നടപ്പാക്കുന്ന ഇന്ത്യയിലെ തന്നെ ആദ്യത്തെ പോലീസ് സേന എന്ന പദവിയിലേക്കും വളർന്ന കേരള പോലീസിന്‍റെ വാർത്താ വിനിമയ വിഭാഗത്തിന്‍റെ ചരിത്രമാണിത്. യൂണിറ്റിൽ നേരത്തേ ഉപയോഗിച്ചിരുന്നതും നിലവിൽ ഉപയോഗിച്ച് വരുന്നതുമായ കമ്യൂണിക്കേഷൻ ഉപകരണങ്ങളാണ് പൊതുജനങ്ങളുടെ അറിവിലേക്കായി സ്റ്റാളിൽ പരിചയപ്പെടുത്തുന്നത്. വനിതകൾക്കും കുട്ടികൾക്കും സൗജന്യമായി സ്വയം പ്രതിരോധത്തിന്‍റെ പാഠങ്ങൾ സ്റ്റാളിൽ പകർന്നു നൽകുന്നുണ്ട്. ഇടുക്കി റൂറൽ പോലീസിലെ വനിതാ മാസ്റ്റർ ട്രെയിനർമാരാണ് പ്രതിരോധ പാഠങ്ങൾ പഠിപ്പിക്കുന്നത്.

വൈഎംസിഎ ഗസ്റ്റ് ഹൗസ് ഉദ്ഘാടനം ചെയ്തു

മൂലമറ്റം: രജതജൂബിലി ആഘോഷിക്കുന്ന അറക്കുളം വൈഎംസിഎയുടെ ഗസ്റ്റ് ഹൗസ് കാഞ്ഞാർ തോട്ടുങ്കൽ ബിൽഡിംഗിൽ പ്രവർത്തനം ആരംഭിച്ചു. തൊടുപുഴ സബ് റീജണ്‍ ചെയർമാൻ ബാബു ജോസഫ് ഉദ്ഘാടനം ചെയ്തു. വൈഎംസിഎ ശാഖാ പ്രസിഡന്‍റ് സണ്ണി കൂട്ടുങ്കൽ അധ്യക്ഷത വഹിച്ചു. സബ് റീജണ്‍ കണ്‍വീനർ ജോയി പാടത്തിൽ, ബിഷപ് വയലിൽ നഴ്സിംഗ് സ്കൂൾ പ്രിൻസിപ്പൽ സിസ്റ്റർ ആൻസി കുളമാക്കൽ, അനഘ, വിക്ടർ ആലനോലിക്കൽ, ജോസ് ഇടക്കര എന്നിവർ പ്രസംഗിച്ചു. സംസ്ഥാന ജിഎൻഎം നഴ്സിംഗ് പരീക്ഷയിൽ ഒന്നാം റാങ്ക് നേടിയ മൂലമറ്റം ബിഷപ് വയലിൽ നഴ്സിംഗ് സ്കൂളിലെ ഡീന മാത്യുവിനെ ചടങ്ങിൽ ആദരിച്ചു.

വ്യാപാരികളുടെ പ്രശ്നങ്ങൾ പരിഹരിക്കും: ചെയർമാൻ

തൊടുപുഴ: നഗരത്തിൽ വ്യാപാരികളും ജനങ്ങളും നേരിടുന്ന ബുദ്ധിമുട്ടുകൾ പരിഹരിക്കണമെന്ന് ആവശ്യപ്പെട്ട് മർച്ചന്‍റ്സ് അസോസിയേഷന്‍റെ നേതൃത്വത്തിൽ മുനിസിപ്പൽ ചെയർമാൻ കെ. ദീപക്കിന് നിവേദനം നൽകി. വഴിയോരക്കച്ചവടം ഒഴിവാക്കുക, നഗരത്തിൽ വെള്ളക്കെട്ടും ഗതാഗതതടസവും ഉണ്ടാകുന്നത് ഒഴിവാക്കുക, മുനിസിപ്പൽ ബസ് സ്റ്റാൻഡിന്‍റെ ശോചനീയാവസ്ഥ പരിഹരിക്കുക, ശുചിമുറികൾ തുറന്നുകൊടുക്കുക, മങ്ങാട്ടുകവലയിലെ സ്റ്റാൻഡ് ടാറിംഗ് നടത്തി വെള്ളക്കെട്ട് ഒഴിവാക്കുക, മോർ ജംഗ്ഷനിലെ ഗതാഗതക്കുരുക്ക് ഒഴിവാക്കാൻ നടപടി സ്വീകരിക്കുക, വ്യാപാര സ്ഥാപനങ്ങൾക്ക് തടസമായി നിൽക്കുന്ന ഓട്ടോ സ്റ്റാൻഡുകളും ബസ് സ്റ്റോപ്പുകളും പുനഃക്രമീകരിക്കുക, ലൈസൻസ് ഫീയുടെ മൂന്നിരട്ടി പിഴ ഉദ്യോഗസ്ഥന്മാർ ആവശ്യപ്പെടുന്നത് പരിഹരിക്കുക തുടങ്ങി വിവിധ ആവശ്യങ്ങൾ നിവേദനത്തിൽ ചൂണ്ടിക്കാട്ടി. പ്രസിഡന്‍റ് രാജു തരണിയിലിന്‍റെ നേതൃത്വത്തിലാണ് നിവേദനം നൽകിയത്. വ്യാപാരികൾ ഉന്നയിച്ച ആവശ്യങ്ങൾ ന്യായമാണെന്നും ഈ വിഷയങ്ങൾ എത്രയും വേഗം പരിഹരിക്കുമെന്നും ചെയർമാൻ ഉറപ്പു നൽകി. ജനറൽ സെക്രട്ടറി സി.കെ. നവാസ്, ജില്ലാ സെക്രട്ടറി നാസർ സൈര, എം.എൻ. ബാബു, ഹരി അന്പാടി, വി.എ. ഷംനാസ്, കെ.പി. ശിവദാസ്, സൽജൻ തോമസ്, സലിം ഫോക്കസ്, കെ.ഐ. സഹീർ തുടങ്ങിയവർ പങ്കെടുത്തു.

മണ്‍തിട്ട ഇടിഞ്ഞ് വീട് അപകടാവസ്ഥയിൽ

വെള്ളിയാമറ്റം: പഞ്ചായത്തിലെ വെട്ടിമറ്റത്ത് റോഡിന്‍റെ വശം കനത്ത മഴയിൽ ഇടിഞ്ഞുവീണ് ത്രാകണ്ടത്തിൽ ചാക്കോയുടെ വീട് അപകടാവസ്ഥയിലായി. ഇതോടൊപ്പം കുടിവെള്ള പൈപ്പും പൊട്ടി മണ്ണും ചെളിയും വീട്ടിലേക്ക് വീഴുകയാണ്. വീടിനു മുകളിലുള്ള മണ്‍തിട്ട ഏത് നിമിഷവും വീട്ടിലേക്ക് പതിക്കാവുന്ന സ്ഥിതിയാണുള്ളത്. രാത്രികാലങ്ങളിൽ മഴ പെയ്യുന്നതും റോഡിലെ വെള്ളം വീട്ടിലേക്ക് പതിക്കുന്നതും ദുരിതം വർധിപ്പിക്കുന്നു. രാത്രിയിൽ ഭയപ്പാടോടെ കഴിയുകയാണ് ഈ കുടുംബം. പ്രശ്നത്തിന് അടിയന്തരമായി പരിഹാരം ഉണ്ടാക്കണമെന്ന് കേരള കോണ്‍ഗ്രസ് മണ്ഡലം കമ്മിറ്റി ആവശ്യപ്പെട്ടു. ജില്ലാ പഞ്ചായത്തംഗം പ്രഫ.എം.ജെ. ജേക്കബ് സ്ഥലം സന്ദർശിച്ചു.

കരിമണ്ണൂർ സെന്‍റ് ആന്‍റണീസ് കപ്പേള വെഞ്ചരിപ്പ് നാളെ

കരിമണ്ണൂർ: മഹാജൂബിലി സ്മാരകമായി പുനർനിർമിച്ച കരിമണ്ണൂർ സെന്‍റ് ആന്‍റണീസ് കപ്പേളയുടെ വെഞ്ചരിപ്പും പ്രതിഷ്ഠയും നാളെ കോതമംഗലം ബിഷപ് മാർ ജോർജ് മഠത്തിക്കണ്ടത്തിൽ നിർവഹിക്കുമെന്ന് വികാരി റവ. ഡോ. സ്റ്റാൻലി പുൽപ്രയിൽ, അസി. വികാരി ഫാ. മാത്യു എടാട്ട് എന്നിവർ അറിയിച്ചു. വൈകുന്നേരം അഞ്ചിന് ബിഷപ് കൂദാശാകർമം നിർവഹിച്ച് വിശുദ്ധ കുർബാനയർപ്പിക്കും. 1949ൽ വികാരിയായിരുന്ന ഫാ. ജോസഫ് മാവുങ്കലാണ് ടൗണിലെ ആദ്യത്തെ കപ്പേള നിർമാണത്തിന് തുടക്കം കുറിച്ചത്. 1951ൽ ഫാ. ജോസഫ് നന്പ്യാപറന്പിൽ മനോഹരമായ മുഖവാരം കൂട്ടിച്ചേർത്ത് ക്രിസ്തുരാജന്‍റെയും വിശുദ്ധ അന്തോനീസിന്‍റെയും രൂപങ്ങൾ പ്രതിഷ്ഠിച്ചു. കപ്പേളയുടെ ആശീർവാദം 1952ൽ മാർ മാത്യു പോത്തനാമുഴി നിർവഹിച്ചു. നിർമാണം പൂർത്തീകരിച്ച പുതിയ കപ്പേളയുടെ അടിസ്ഥാനശില കോതമംഗലം രൂപത വികാരി ജനറാൾ മോണ്‍. വിൻസെന്‍റ് നെടുങ്ങാട്ടും ശിലാസ്ഥാപനം വികാരി റവ. ഡോ. സ്റ്റാൻലി പുൽപ്രയിലുമാണ് നിർവഹിച്ചത്. ഏറെ മനോഹാരിതയോടെ നിർമിച്ചിരിക്കുന്ന കപ്പേളയുടെ മുൻഭാഗത്തെ ഭിത്തിയിൽ പ്രാർഥനാമഞ്ജരികൾ പാടുന്ന ക്ലോക്കും സ്ഥാപിച്ചിട്ടുണ്ട്. കപ്പേളയ്ക്കുള്ളിൽ വിശുദ്ധ അന്തോനീസിന്‍റെ ജീവിതത്തിലെ രണ്ട് അത്ഭുതങ്ങൾ മദ്ബഹയിൽ കൊത്തിവച്ചിരിക്കുന്നതും എട്ട് അത്ഭുതങ്ങൾ സ്റ്റെയിൻ ഗ്ലാസിൽ വെന്‍റിലേഷനുകളിൽ ആലേഖനം ചെയ്തിരിക്കുന്നതും കപ്പേളയുടെ ആകർഷണമാണ്.

ഇടുക്കി ഡിസ്ട്രിക്‌ട് കോർട്ട് ബാർ അസോസിയേഷൻ: അഡ്വ. സിബി ജോസഫ് ബാർ അസോ. പ്രസിഡന്‍റ്

തൊടുപുഴ: ഇടുക്കി ഡിസ്ട്രിക്‌ട് കോർട്ട് ബാർ അസോസിയേഷൻ പ്രസിഡന്‍റായി അഡ്വ. സിബി ജോസഫ് തിരുതാളിലും സെക്രട്ടറിയായി അഡ്വ. ഷാജി ജോസഫ് പുളിക്കലും തെരഞ്ഞെടുക്കപ്പെട്ടു. അഡ്വ. ജിബോയി ചെറിയാൻ-ട്രഷറർ, അഡ്വ. അനന്തം-ജോയിന്‍റ് സെക്രട്ടറി എന്നിവരാണ് മറ്റുഭാരവാഹികൾ. ഇടുക്കി ഡിസ്ട്രിക്‌ട് ആന്‍ഡ് സെഷൻസ് ജഡ്ജി ശശികുമാർ ചടങ്ങിൽ മുഖ്യാതിഥിയായിരുന്നു. ന്യായാധിപന്മാരും സീനിയർ അഭിഭാഷകരും അടക്കമുള്ളമുള്ളവർ പങ്കെടുത്തു. സീനിയർ അഭിഭാഷകരായ അഡ്വ. കെ.ടി. തോമസ്, സി.കെ. വിദ്യാസാഗർ, ബാർ കൗണ്‍സിൽ മെംബർ അഡ്വ. ജോസഫ് ജോണ്‍ തുടങ്ങിയവർ പ്രസംഗിച്ചു.

ആശ്രമം-കപ്പക്കാനം റോഡ്: ഉടൻ തീരുമാനം വേണമെന്ന് മനുഷ്യാവകാശ കമ്മീഷൻ

ഇടുക്കി: മൂലമറ്റം-അന്പലമുട്ട റോഡിന്‍റെ ആശ്രമം മുതൽ കപ്പക്കാനം വരെയുള്ള ഭാഗം ഗതാഗതയോഗ്യമാക്കുന്നതിനു മൂന്നാഴ്ചയ്ക്കുള്ളിൽ തീരുമാനമെടുക്കണമെന്ന് മനുഷ്യാവകാശ കമ്മീഷൻ ചെയർപേഴ്സണ്‍ ജസ്റ്റീസ് അലക്സാണ്ടർ തോമസ് പൊതുമരാമത്ത് സെക്രട്ടറിക്ക് നിർദേശം നൽകി. ഫയലിൽ തീരുമാനമെടുത്ത് ചീഫ് എൻജിനിയറെ അറിയിക്കണം. അനുമതി ലഭിച്ചാലുടൻ ടെൻഡർ ഉൾപ്പെടെയുള്ള നടപടിക്രമങ്ങൾ പൂർത്തിയാക്കി മൂന്നുമാസത്തിനകം നിർമാണം പൂർത്തിയാക്കണമെന്ന് പൊതുമരാമത്ത് നിരത്ത് വിഭാഗം അസിസ്റ്റന്‍റ് എക്സിക്യൂട്ടീവ് എൻജിനിയർക്ക് ജസ്റ്റീസ് അലക്സാണ്ടർ തോമസ് നിർദേശം നൽകി. സാങ്കേതിക കാരണങ്ങളാൽ കേരള റോഡ് ഫണ്ട് ബോർഡിന് നിർമാണ പ്രവർത്തനങ്ങൾ നടത്താൻ കഴിയില്ലെന്ന് കമ്മീഷനെ അറിയിച്ച സാഹചര്യത്തിലാണ് കമ്മീഷൻ പൊതുമരാമത്ത് വകുപ്പിന് നിർദേശം നൽകിയത്. 2023-24 ലെ ശബരിമല പ്രവൃത്തിയിൽ പദ്ധതി ഉൾപ്പെടുത്തിയിരുന്നെങ്കിലും ഉയർന്ന ക്വട്ടേഷൻ മൂലമാണ് തീരുമാനം സർക്കാരിന് വിട്ടത്. കോട്ടമല സ്വദേശി എം.അയ്യപ്പൻ സമർപ്പിച്ച പരാതിയിലാണ് നടപടി.

സ്വകാര്യ ബസിടിച്ച് വീട്ടമ്മയ്ക്ക് പരിക്ക്

മുട്ടം: റോഡരികിലൂടെ നടന്നുപോകുകയായിരുന്ന കാൽനട യാത്രക്കാരിക്ക് സ്വകാര്യബസ് ഇടിച്ച് ഗുരുതര പരിക്കേറ്റു. മുട്ടം പ്ലാംപറന്പിൽ അന്നമ്മ ഫ്രാൻസിസി (65 ) നാണ് പരിക്കേറ്റത്. തലയ്ക്കും വാരിയെല്ലിനും സാരമായി പരിക്കേറ്റ അന്നമ്മയെ തൊടുപുഴയിലെ സ്വകാര്യ ആശുപത്രിയിൽ തീവ്ര പരിചരണ വിഭാഗത്തിൽ പ്രവേശിപ്പിച്ചു. ഇന്നലെ രാവിലെ ഏഴോടെ മുട്ടം ടൗണിന് സമീപമായിരുന്നു അപകടം. തൊടുപുഴ-മൂലമറ്റം റൂട്ടിൽ സർവീസ് നടത്തുന്ന ശക്തി എന്ന സ്വകാര്യ ബസാണ് അന്നമ്മയെ ഇടിച്ചത്.

വാഴത്തോപ്പ് പഞ്ചായത്ത് കമ്മിറ്റി യുഡിഎഫ് അംഗങ്ങൾ ബഹിഷ്കരിച്ചു

ചെറുതോണി: വാഴത്തോപ്പ് പഞ്ചായത്തിലെ തൊഴിലുറപ്പ് എഇ നിയമനം മാനദണ്ഡങ്ങൾ പാലിക്കാതെയാണെന്നാരോപിച്ച് യുഡിഎഫ് അംഗങ്ങൾ പഞ്ചായത്ത് കമ്മിറ്റി ബഹിഷ്കരിച്ചു. പഞ്ചായത്ത് ഭരണസമിതി യോഗം ചേർന്ന് അജണ്ട വച്ച് കമ്മിറ്റികൂടി ഇന്‍റർവ്യൂ തീയതി തീരുമാനിക്കാതെയാണ് ഇന്‍റർവ്യു നടത്തിയതെന്ന് യുഡിഎഫ് അംഗങ്ങൾ ആരോപിച്ചു. ഇന്‍റർവ്യൂവിൽ പങ്കെടുത്തത് പഞ്ചായത്ത് പ്രസിഡന്‍റിന്‍റെ മകൻ മാത്രമാണ്. ഇന്‍റർവ്യൂ വിവരം പഞ്ചായത്തംഗങ്ങളെയും പൊതുജനങ്ങളെയും അറിയിക്കാതെ പ്രസിഡന്‍റ് മകനെ നിയമിക്കുന്നതിനായി തീരുമാനമെടുക്കുകയായിരുന്നെന്നാണ് ആരോപണം. ക്രമവിരുദ്ധനിയമനം റദ്ദ് ചെയ്ത് നിയമപരമായി ഇന്‍റർവ്യൂ നടത്തി അർഹരായവരെ നിയമിക്കുന്നതിന് നടപടി സ്വീകരിക്കണമെന്ന് യുഡിഎഫ് അംഗങ്ങൾ ആവശ്യപ്പെട്ടു. എന്നാൽ, ഇത് അംഗീകരിക്കാൻ പ്രസിഡന്‍റ് തയാറാകാതെ വന്നതോടെ യുഡിഎഫ് അംഗങ്ങൾ പഞ്ചായത്ത് കമ്മിറ്റിയിൽ വിയോജനക്കുറിപ്പ് രേഖപ്പെടുത്തി അംഗങ്ങളായ വിൻസന്‍റ്് വള്ളാടി, ടിന്‍റു സുഭാഷ്, ആലീസ് ജോസ്, ഏലിയാമ്മ ജോയി, സെലിൻ വിത്സൺ, കുട്ടായി കറുപ്പൻ, പി.വി. അജേഷ് കുമാർ എന്നിവർ പഞ്ചായത്ത് കമ്മിറ്റി ബഹിഷ്കരിച്ചു.

ലഹരിവിരുദ്ധ സൈക്കിള്‍ റാലി ചേറ്റുകുഴിയില്‍

കട്ടപ്പന: ദേശീയ കായികവേദിയും ജില്ലാ സൈക്ലിംഗ് അസോസിയേഷനും ചേര്‍ന്ന് നാളെ രാവിലെ 10ന് ലഹരിവിരുദ്ധ സൈക്കിള്‍ റാലി നടത്തും. വണ്ടന്‍മേട് പഞ്ചായത്ത് പ്രസിഡന്‍റ് സുരേഷ് മാനങ്കേരില്‍ ഉദ്ഘാടനം ചെയ്യും. സ്പോര്‍ട്സാണ് ലഹരി എന്ന മുദ്രാവാക്യമുയര്‍ത്തി ജില്ലാ സ്പോര്‍ട്സ് കൗണ്‍സില്‍, ചേറ്റുകുഴി നവജീവന്‍ സൈക്ലിംഗ് ക്ലബ് , ആമയാര്‍ എംഇഎസ് ഹയര്‍ സെക്കന്‍ഡറി സ്‌കൂള്‍ എന്നിവയുടെ സഹകരണത്തോടെയാണ് പരിപാടി. ക്ലബ് പ്രസിഡന്‍റ് രഘു കുമ്പളന്താനം അധ്യക്ഷത വഹിക്കും. എക്സൈസ് സര്‍ക്കിള്‍ ഇന്‍സ്‌പെക്ടര്‍ ജി. വിജയകുമാര്‍ സന്ദേശം നല്‍കും. സ്പോര്‍ട്സ് കൗണ്‍സില്‍ സെക്രട്ടറി പി.എ. ഷാജിമോന്‍ ക്യാമ്പ് ഉദ്ഘാടനം ചെയ്യും. എന്‍. രവീന്ദ്രന്‍, പ്രസിഡന്‍റ് അഡ്വ. ജോര്‍ളി കുര്യന്‍, സെക്രട്ടറി എ.പി. മുഹമ്മദ് ബഷീര്‍ എന്നിവര്‍ നേതൃത്വം നല്‍കും.

സൈക്കിൾറാലിയും പരിശീലന ക്യാന്പും നാളെ

വണ്ടൻമേട്: സ്പോർട്സാണ് ലഹരി എന്ന മുദ്രാവാക്യവുമായി ദേശീയ കായികവേദിയും ജില്ലാ സൈക്ലിംഗ് അസോസിയേഷനും ചേർന്ന് നാളെ രാവിലെ 10ന് ചേറ്റുകുഴിയിൽ ലഹരിവിരുദ്ധ സൈക്കിൾ റാലി സംഘടിപ്പിക്കും. ജില്ലാ സ്പോർട്സ് കൗണ്‍സിൽ, നവജീവൻ സൈക്ലിംഗ് ക്ലബ്, എംഇഎസ് ഹയർ സെക്കൻഡറി സ്കൂൾ എന്നിവയുടെ സഹകരണത്തോടെ നടത്തുന്ന ലഹരിവിരുദ്ധ സന്ദേശ സൈക്കിൾ റാലി വണ്ടൻമേട് പഞ്ചായത്ത് പ്രസിഡന്‍റ് സുരേഷ് മാനങ്കേരിൽ ഉദ്ഘാടനം ചെയ്യും. ക്ലബ് പ്രസിഡന്‍റ് രഘു കുന്പളന്താനം അധ്യക്ഷത വഹിക്കും. എക്സൈസ് ഇൻസ്പെക്ടർ ജി. വിജയകുമാർ സന്ദേശം നൽകും. ജില്ലാ സ്പോർട്സ് കൗണ്‍സിൽ സെക്രട്ടറി പി.എ. ഷാജിമോൻ ക്യാന്പ് ഉദ്ഘാടനം ചെയ്യും. കേരള സൈക്ലിംഗ് അസോസിയേഷൻ വൈസ് പ്രസിഡന്‍റ് എൻ. രവീന്ദ്രൻ, ജില്ലാ സൈക്ലിംഗ് അസോസിയേഷൻ പ്രസിഡന്‍റ് അഡ്വ. ജോർളി കുര്യൻ, സെക്രട്ടറി എ.പി. മുഹമ്മദ് ബഷീർ തുടങ്ങിയവർ പ്രസംഗിക്കും.

ടെയ്‌ലേഴ്‌സ് അസോ.‍ ജില്ലാ സമ്മേളനം ഇന്ന്

നെടുങ്കണ്ടം: ഓള്‍ കേരള ടെയ്‌ലേഴ്‌സ് അസോസിയേഷൻ (എകെടിഎ) ജില്ലാ സമ്മേളനം ഇന്ന് കൂട്ടാറില്‍ നടക്കുമെന്ന് ഭാരവാഹികള്‍അറിയിച്ചു. രാവിലെ ഒമ്പതിന് രജിസ്‌ട്രേഷൻ, ജില്ലാ പ്രസിഡന്‍റ് കെ.വി. രാജുവിന്‍റെ അധ്യക്ഷതയില്‍ നടക്കുന്ന സമ്മേളനം സംസ്ഥാന ജനറല്‍ സെക്രട്ടറി എന്‍.സി. ബാബു ഉത്ഘാടനം ചെയ്യും. സംസ്ഥാന വൈസ് പ്രസിഡന്‍റ് എസ്. സതികുമാര്‍, ജില്ലാ സെക്രട്ടറി ബി. മനോഹരന്‍, ട്രഷര്‍ ടി.കെ. സുനില്‍കുമാര്‍, സംസ്ഥാന കമ്മിറ്റി അംഗം അബ്ദുല്‍ഖാദര്‍ എടവിലങ്ങ് തുടങ്ങിയവര്‍ പ്രസംഗിക്കും. സമ്മേളനത്തോടനുബന്ധിച്ച് പ്രകടനവും നടത്തും. ജില്ലാ സമ്മേളനത്തിന്‍റെ നടത്തിപ്പിനായി സ്വാഗതസംഘം രൂപീകരിച്ച് ഒരുക്കങ്ങള്‍ പൂര്‍ത്തിയായി വരുന്നതായി എകെടിഎ ജില്ലാ പ്രസിഡന്‍റ് കെ.വി. രാജു, സെക്രട്ടറി ബി. മനോഹരന്‍, ട്രഷര്‍ ടി.കെ. സുനില്‍കുമാര്‍, കമ്പംമെട്ട് ഏരിയാ സെക്രട്ടറി ഒ.ആര്‍. ശശിധരന്‍ എന്നിവര്‍ അറിയിച്ചു.

പള്ളിത്തിരുനാളുകൾ

മുരിക്കാശേരി സെന്‍റ് മേരീസ് ഫൊറോന പള്ളി മുരിക്കാശേരി: സെന്‍റ് മേരീസ് ഫൊറോന പള്ളിയിൽ ഇടവക തിരുനാൾ ഇന്നും നാളെയും ആഘോഷിക്കുമെന്ന് വികാരി ഫാ. ജോസ് നരിതൂക്കിൽ, അസി. വികാരി ഫാ. സേവ്യർ മേക്കാട്ട് എന്നിവർ അറിയിച്ചു. ഇന്ന് രാവിലെ 6.15ന് തിരുനാൾ കൊടിയേറ്റ്, വിശുദ്ധ കുർബാന - മോണ്‍. ജോസ് പ്ലാച്ചിക്കൽ, അന്പ് എഴുന്നള്ളിക്കൽ, വൈകുന്നേരം നാലിന് ലദീഞ്ഞ്, തിരുനാൾ കുർബാന - ഫാ. ജോസഫ് പാറക്കടവിൽ, പ്രദക്ഷിണം കോളജ് കുരിശുപള്ളിയിലേക്ക്, തിരുനാൾ സന്ദേശം - റവ. ഡോ. ബെന്നോ പുതിയാപറന്പിൽ. നാളെ രാവിലെ 6.30ന് വിശുദ്ധ കുർബാന - അന്പ് എഴുന്നള്ളിക്കൽ, വൈകുന്നേരം 3.45ന് ലദീഞ്ഞ്, ആഘോഷമായ തിരുനാൾ കുർബാന - ഫാ. മാത്യു ചെറുപറന്പിൽ, സന്ദേശം - ഫാ. ജോയ്സ് അഴിമുഖം, 5.30ന് പ്രദക്ഷിണം. സമാപന പ്രാർഥന, ഗാനമേള - പത്തനംതിട്ട ബിബി ഓഡിയോസ്. പുറക്കയം സെന്‍റ് ജോസഫ് പള്ളി പുറക്കയം: സെന്‍റ് ജോസഫ് പള്ളിയിൽ ഇടവക തിരുനാളിനു കൊടിയേറി. തിരുനാൾ നാളെ സമാപിക്കുമെന്ന് വികാരി ഫാ. ജോർജ് കൊച്ചുപറന്പിൽ അറിയിച്ചു. ഇന്ന് വൈകുന്നേരം 4.30ന് ആഘോഷമായ വിശുദ്ധ കുർബാന - ഫാ. തോമസ് തെക്കേമുറി, സെമിത്തേരി സന്ദർശനം. നാളെ ഉച്ചകഴിഞ്ഞ് 2.30ന് ആഘോഷമായ വിശുദ്ധ കുർബാന - ഫാ. തോമസ് തെക്കേൾ, അഞ്ചിന് പ്രദക്ഷിണം, സ്നേഹവിരുന്ന്, ഏഴിന് ഗാനമേള - ഹെവൻലി വോയ്സ് പത്തനംതിട്ട. ഗിരിജ്യോതി വി. യുദാ തദേവൂസ് ആശ്രമം കുമളി: കുമളി ഗിരിജ്യോതി ആശ്രമത്തിൽ വിശുദ്ധ യൂദാ തദേവൂസ് ശ്ലീഹായുടെ തിരുനാൾ തുടങ്ങി. നാളെ സമാപിക്കുമെന്ന് ആശ്രമം സുപ്പീരിയർ ഫാ. സേവ്യർ കിഴക്കേമ്യാലിൽ സിഎംഐ അറിയിച്ചു. ദിവസവും ഉച്ചകഴിഞ്ഞ് 2.30ന് ആരാധന, വിശുദ്ധ കുർബാന, നൊവേന, വിശുദ്ധ കുർബാനയുടെ ആശീർവാദം. നാളെ രാവിലെ 6.30 ന് ജപമാല, വിശുദ്ധ കുർബാന, ലദീഞ്ഞ്, വൈകുന്നേരം 4.30ന് വിശുദ്ധ കുർബാന, ലദീഞ്ഞ്, തിരുശേഷിപ്പ് വണക്കം, സ്നേഹവിരുന്ന്. ആനവിലാസം സെന്‍റ് ജോർജ് പള്ളി കുമളി: ആനവിലാസം സെന്‍റ് ജോർജ് പള്ളിയിൽ തിരുനാളിന് കൊടിയേറി. നാലിനു സമാപിക്കും. ഇന്ന് രാവിലെ എട്ടിന് വിശുദ്ധ കുർബാന (രോഗികൾക്കും പ്രായമായവർക്കും വേണ്ടി), വൈകുന്നേരം അഞ്ചിന് വിശുദ്ധ കുർബാന, 6.45ന് പ്രദക്ഷിണം വള്ളിയാംതടം പന്തലിലേക്ക്, രാത്രി എട്ടിന് കാഞ്ഞിരപ്പള്ളി അമല കമ്യൂണിക്കേഷൻസിന്‍റെ ഗാനമേള. നാളെ രാവിലെ ഏഴിനും വൈകുന്നേരം നാലിനും വിശുദ്ധ കുർബാന, 6.15ന് ടൗണ്‍ കുരിശടിയിലേക്ക് പ്രദക്ഷിണം, 7.50ന് സ്നേഹവിരുന്ന്.

സേനാപതി പഞ്ചായത്തിലെ ഭവനപദ്ധതിയിൽ ക്രമക്കേടെന്ന്

മാങ്ങാത്തൊട്ടി: സേനാപതി പഞ്ചായത്തിലെ ഭവനപദ്ധതിയിൽ വൻ ക്രമക്കേടെന്ന് ആരോപണം. സ്ഥലവും വീടുമില്ലാത്തവർ 30 പേരുണ്ടെന്നാണ് പഞ്ചായത്തിന്‍റെ അന്തിമലിസ്റ്റിലുള്ളത്. എന്നാൽ, മുൻപ് പഞ്ചായത്തിന്‍റെ അധീനതയിലുണ്ടായിരുന്ന ഭൂമി അനുവദിച്ച് ഭവന നിർമാണത്തിനു പണം വാങ്ങിയവരിൽ പലരും വീടും സ്ഥലവും കൈമാറ്റം ചെയ്തും പണയപ്പെടുത്തിയും വാടകയ്ക്കുനൽകിയും ഇതര സംസ്ഥാനത്തേക്ക് താമസം മാറ്റിയിട്ടുണ്ടെന്നു പറയുന്നു. പഞ്ചായത്തിൽനിന്നും സ്ഥലവും വീടും അനുവദിച്ചാൽ ഉടമയ്ക്കും അവരുടെ അവകാശികൾക്കും താമസിക്കാം. അല്ലാത്തപക്ഷം പഞ്ചായത്തിനെ തിരികെ ഏൽപിക്കണമെന്നാണ് നിയമം.ഇതിനു വിരുദ്ധമായി ഭരണ സമിതിയുടെയും ഉദ്യോഗസ്ഥരുടെയും ഒത്താശയോടെ ഇടപാടുകൾ നടന്നതെന്നാണ് ആക്ഷേപം. ഈ കാര്യങ്ങൾ ഉന്നയിച്ച് എൽഡിഎഫ് നേതൃത്വത്തിനും മന്ത്രിക്കും ഉന്നത ഉദ്യോഗസ്ഥർക്കും പരാതി നൽകാനൊരുങ്ങുകയാണ് സ്ഥലത്തെ ഒരു കൂട്ടം യുവാക്കൾ.

മേയ്ദിന റാലി

കട്ടപ്പന: സംയുക്ത ട്രേഡ് യൂണിയന്‍ കട്ടപ്പനയില്‍ മേയ്ദിന റാലിയും പതാക ഉയര്‍ത്തലും സമ്മേളനവും നടത്തി. വിവിധ കേന്ദ്രങ്ങളില്‍ സിപിഎം ജില്ലാ കമ്മിറ്റിയംഗം വി.ആര്‍. സജി, കട്ടപ്പന ഏരിയാ സെക്രട്ടറി മാത്യു ജോര്‍ജ്, സിപിഐ കട്ടപ്പന മണ്ഡലം സെക്രട്ടറി വി. ആര്‍. ശശി, സിഐടിയു കട്ടപ്പന ഏരിയാ സെക്രട്ടറി എം.സി. ബിജു, പ്രസിഡന്‍റ് ടോമി ജോര്‍ജ്, നേതാക്കളായ സി.ആര്‍. മുരളി, അഡ്വ. വി. എസ്. അഭിലാഷ്, അനിത റെജി തുടങ്ങിയവര്‍ വിവിധ കേന്ദ്രങ്ങളില്‍ പതാക ഉയര്‍ത്തി.

ജനങ്ങളെ കാഴ്ചക്കാരാക്കി മൂന്നാർ പഞ്ചായത്തിൽ അധികാരപ്പോര്

മൂന്നാർ: വോട്ടു നൽകി വിജയിപ്പിച്ച ജനങ്ങളെ കാഴ്ചക്കാരാക്കി ഇടതു-വലതു മുന്നണികൾ അധികാരത്തിനു വേണ്ടി നടത്തുന്ന അടവുനീക്കങ്ങൾ മൂന്നാർ പഞ്ചായത്തിൽ ഭരണ പ്രതിസന്ധി സൃഷ്ടിക്കുന്നു. വികസന പദ്ധതികൾ ആസൂത്രണം ചെയ്യാനോ നടപ്പിലാക്കാനോ സാധിക്കാത്ത വിധത്തിൽ അധികാരപ്പോര് മുറുകുകയാണ്. ഇടതു-വലതു മുന്നണികൾ നടത്തുന്ന അണിയറനീക്കങ്ങൾ മൂലം പഞ്ചായത്തു കമ്മിറ്റികൾ പോലും മുടങ്ങുകയാണ്. പുതിയ സാന്പത്തിക വർഷത്തിൽ കൂടിയ ആദ്യ യോഗവും നാടകീയമായ നീക്കങ്ങളാൽ സംഭവബഹുലമായി. കഴിഞ്ഞ ദിവസം കോണ്‍ഗ്രസിന്‍റെ നേതൃത്വത്തിലുള്ള ഭരണപക്ഷ അംഗങ്ങൾ ഇല്ലാതെയാണ് യോഗം ചേർന്നത്. പഞ്ചായത്ത് പ്രസിഡന്‍റ് ദീപ രാജ്കുമാർ രണ്ടു ദിവസം മുന്പ് രാജി വച്ചിരുന്നു. ‌ ഇടതുമുന്നണി അംഗമായ നാഗരാജിനെ അധ്യക്ഷൻ ആക്കിയായിരുന്നു യോഗം. പഞ്ചായത്ത് സെക്രട്ടറി പ്രതിപക്ഷവുമായി ഒത്തുകളിച്ചാണ് യോഗം നടത്തിയതെന്ന ആരോപണവുമായി കോണ്‍ഗ്രസ് രംഗത്ത് എത്തിയിട്ടുണ്ട്. എന്നാൽ, കൃത്യമായി അറിയിപ്പ് നൽകിയിയാണ് യോഗം ചേർന്നതെന്നാണ് സെക്രട്ടറിയുടെ വാദം. ഇത് സംബന്ധിച്ച് കോണ്‍ഗ്രസിന്‍റെ നേതൃത്വത്തിൽ പഞ്ചായത്ത് ഡെപ്യൂട്ടി ഡയറക്ടർ അടക്കമുള്ളവർക്ക് പരാതി നൽകിയിട്ടുണ്ട്. പഞ്ചായത്തിൽ ഭരണ അസ്ഥിരത ഉണ്ടാകുന്നത് ഇതാദ്യമല്ല. കഴിഞ്ഞ നാലു വർഷത്തിനിടെ മൂന്നു തവണയാണ് പഞ്ചായത്തിൽ ഭരണമാറ്റം ഉണ്ടായത്. ഇക്കാലയളവിൽ നാലു പേരാണ് പ്രസിഡന്‍റ് ആയത്. വനിതാ സംവരണമായ പ്രസിഡന്‍റ് പദവിയിൽ കോണ്‍ഗ്രസ് അംഗങ്ങളായ മണിമൊഴിയും ദീപ രാജ്കുമാറും ഇടതുമുന്നണിയിലെ പ്രവീണ രവികുമാറും എസ്. ജ്യോതിയും പ്രസിഡന്‍റുമാരായി. ഇതിൽ പ്രവീണ കോണ്‍ഗ്രസ് ടിക്കറ്റിലാണ് ജയിച്ചതെങ്കിലും പ്രസിഡന്‍റ് പദവിക്കായി ഇടതു മുന്നണിയിലേക്ക് കൂറുമാറി. പിന്നീട് കൂറുമാറ്റ നിയമപ്രകാരം തെരഞ്ഞെടുപ്പ് കമ്മീഷൻ ഇവരുടെ അംഗത്വം അസാധുവാക്കി. ഇടക്കാലത്ത് പ്രസിഡന്‍റ് ഇല്ലാത്ത സാഹചര്യം ഉണ്ടായപ്പോൾ മൂന്നു തവണയാണ് വൈസ് പ്രസിഡന്‍റുമാർക്ക് താൽക്കാലിക ചുമതല നൽകേണ്ടി വന്നത്. 21 അംഗങ്ങളുള്ള മൂന്നാർ പഞ്ചായത്തിൽ ഭരണം നേടിയത് കോണ്‍ഗ്രസ് ആയിരുന്നു. 11 അംഗങ്ങൾ കോണ്‍ഗ്രസ് പക്ഷത്തുനിന്നു വിജയിച്ചപ്പോൾ 10 പേരുടെ പിന്തുണയുമായി ഇടതുമുന്നണി പ്രതിപക്ഷത്ത് എത്തി. കോണ്‍ഗ്രസ് പക്ഷത്ത് ഉള്ള രണ്ട് അംഗങ്ങളെ അടർത്തി ഇടതുമുന്നണിയുടെ ഭാഗമാക്കി. ഇതോടെ അവിശ്വാസ പ്രമേയത്തിനു മുന്പ് തന്നെ കോണ്‍ഗ്രസ് അംഗമായ പ്രസിഡന്‍റ് മണിമൊഴിക്ക് രാജി വയ്ക്കേണ്ടി വന്നു. ഇടതു മുന്നണിയുടെ ഭാഗമായ രണ്ട് അംഗങ്ങളെ കോണ്‍ഗ്രസ് സ്വന്തം പക്ഷത്ത് എത്തിച്ചതോടെ രണ്ടു വർഷം നേതൃത്വം നൽകിയ ഇടതുമുന്നണിക്ക് അധികാരം നഷ്ടപ്പെട്ടു. നാടകീയ നീക്കങ്ങളും അനിശ്ചിതത്വവും തുടർക്കഥയായ പഞ്ചായത്തിൽ നാലു വർഷത്തിനിടെ ആറു തവണയാണ് അവിശ്വാസ പ്രമേയത്തിനു നോട്ടീസ് നൽകപ്പെട്ടത്. പ്രസിഡന്‍റ് പദവി വഹിച്ചിരുന്ന ദീപ രാജ്കുമാർ കഴിഞ്ഞ ദിവസം രാജിവച്ചിരുന്നു. കോണ്‍ഗ്രസ് നേതൃത്വത്തിന് പ്രിയപ്പെട്ട ആളെ ഈ സ്ഥാനത്ത് എത്തിക്കാൻ സമ്മർദം ചെലുത്തി രാജിവയ്പ്പിക്കുകയായിരുന്നു എന്നുള്ള ആരോപണം ശക്തമാണ്.

പാലത്തിനു സമീപം ഒടുവില്‍ സുരക്ഷാവേലി ഒരുക്കി

അടിമാലി: അടിമാലി ടൗണില്‍ ബിഎസ്എന്‍എല്‍ ജംഗ്ഷന് സമീപത്തുനിന്നാരംഭിച്ച് കാംകോ റോഡിലേക്കെത്തുന്ന ബൈപാസ് റോഡിലെ പാലത്തിന് സമീപം സുരക്ഷാവേലി ഒരുക്കി. പാലത്തിന് സമീപം നിർമിച്ച റോഡിന്‍റെ അശാസ്ത്രീയത യാത്രക്കാര്‍ക്ക് വിനയായിരുന്നു. ചെറിയ ഒരു വളവോട് കൂടിയ ഭാഗത്താണ് പാലമുള്ളത്. റോഡിനെ അപേക്ഷിച്ച് പാലത്തിന് വീതി കുറവുണ്ട്. പാലത്തിന്‍റെ വീതിക്കുറവും വളവുമറിയാതെ എത്തുന്നവര്‍ റോഡിന്‍റെ തുറസായ ഭാഗത്തു കൂടി തോട്ടിലേക്ക് പതിക്കുമായിരുന്നു.

മേയ്ദിന റാലി നടത്തി

കോട്ടയം: സ്വകാര്യ മേഖലയിൽ ജോലി ചെയ്യുന്ന സെക്യൂരിറ്റി ജീവനക്കാർക്ക് ജോലി സമയം എട്ടു മണിക്കൂറായി നിജപ്പെടുത്തണമെന്ന് കേരള കോണ്‍ഗ്രസ്-എം സംസ്ഥാന ജനറൽ സെക്രട്ടറി സ്റ്റീഫൻ ജോർജ് ആവശ്യപ്പെട്ടു. നാഷണൽ സെക്യൂരിറ്റി സ്റ്റാഫ് യൂണിയൻ-എമ്മിന്‍റെ അഞ്ചാമതു വാർഷിക സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. മേയ്ദിനത്തോടനുബന്ധിച്ചു റാലിയും നടത്തി. സംഘടന സംസ്ഥാന പ്രസിഡന്‍റ് ടോമി ടി. തീവളളി അധ്യക്ഷത വഹിച്ചു. കോട്ടയം ജില്ലാ പഞ്ചായത്ത് വൈസ് പ്രസിഡന്‍റ് ജോസ് പുത്തൻകാല മുഖ്യപ്രഭാഷണം നടത്തി. പ്രതിമാസം 21,000 രൂപ ശന്പളം നിശ്ചയിക്കുക, അപകട ഇൻഷുറൻസ് ഏർപ്പെടുത്തുക എന്നീ ആവശ്യങ്ങളും യോഗം ഉന്നയിച്ചു. കെ.എം. മാണി ഹാളിൽ നടന്ന യോഗത്തിൽ ജോസുകുട്ടി പൂവേലി, ആർ. സുരേഷ്, ജോർജ് അന്പഴം, കെ.എൻ. ജയറാം, സന്തോഷ് കല്ലറ, റിട്ട. ഡെപ്യൂട്ടി ലേബർ കമ്മിഷണർ പി.എൻ. വിജയകുമാർ എന്നിവർ പ്രസംഗിച്ചു.

മിഷൻവയലിൽ പുലിസാന്നിധ്യം: പ്രദേശവാസികൾ ആശങ്കയിൽ

മറയൂർ: കാന്തല്ലൂർ പഞ്ചായത്തിലെ മിഷൻ ഭാഗത്ത് പുലിയുടെ സാന്നിധ്യം. മിഷൻവയൽ പെരിയവയലിലാണ് ഇന്നലെ രാത്രി ഒന്പതോടെ പുലിയെ കണ്ടത്. പ്രദേശവാസിയായ എസ്. രാജ വീട്ടിലേക്കു പോകുന്നതിനിടെയാണ് പാലത്തിനു സമീപം പുലിയെ കണ്ടെത്തിയത്. പ്രദേശവാസികൾ വനം വകുപ്പിനെ വിവരം അറിയിച്ചതിനെത്തുടർന്ന് ഇവരെത്തി പരിശോധന നടത്തിയെങ്കിലും പുലിയെ കണ്ടെത്താനായില്ല. കാൽപ്പാടുകൾ നിരീക്ഷിച്ച് പുലിയാണെന്ന് ഉറപ്പ് വരുത്തി. പ്രദേശത്ത് നിരവധി പേരാണ് കന്നുകാലി വളർത്തലിലൂടെ ഉപജീവനം നടത്തുന്നത്. പ്രദേശത്തെ പുലിയുടെ സാന്നിധ്യം ജീവനും സ്വത്തിനും ഭീഷണിയായി മാറുന്ന സാഹചര്യത്തിൽ പുലിയെ പിടികൂടി ഉൾവനങ്ങളിൽ എത്തിക്കാനുള്ള നടപടി സ്വീകരിക്കണമെന്ന് നാട്ടുകാർ ആവശ്യപ്പെട്ടു.

ജണ്ടയ്ക്ക് പുറത്തുള്ള കൈവശഭൂമിക്ക് ഉടൻ പട്ടയം നൽകണം: ബിജോ മാണി

തൊടുപുഴ: നാരങ്ങാനത്ത് വനം വകുപ്പ് ജണ്ട കെട്ടി തിരിച്ച സ്ഥലമുൾപ്പെടെയുള്ള പട്ടയ, കൈവശ ഭൂമികൾ ഡിസിസി ജനറൽ സെക്രട്ടറി ബിജോ മാണിയുടെ നേതൃത്വത്തിൽ സന്ദർശിച്ചു. തൊമ്മൻകുത്ത് ജാഗ്രതാ സമിതിയുടെ ക്ഷണപ്രകാരമായിരുന്നു സന്ദർശനം. വനഭൂമിയുടെ അതിർത്തി പങ്കിടുന്നത് പുളിക്കൽ നാരായണൻ എന്ന വ്യക്തിയുടെ കൈവശഭൂമിയുമായാണ്. ഇവിടെ വനംവകുപ്പ് ജണ്ട സ്ഥാപിച്ച് കൃത്യമായി അതിർത്തി വേർതിരിച്ചിട്ടുമുണ്ട്. 1980ലാണ് ജണ്ട സ്ഥാപിച്ചതെന്നും പിന്നീട് 2000ൽ ഇതുപുതുക്കി നിർമിച്ചതായും നാട്ടുകാർ പറയുന്നു. ഈ സ്ഥലത്ത് 60 വർഷത്തോളം പഴക്കമുള്ള തെങ്ങ് അടക്കമുള്ള കൃഷിദേഹണ്ഡങ്ങളുമുണ്ട്. ഇവിടെനിന്നു മുക്കാൽ കിലോമീറ്റർ അകലെയാണ് കുരിശ് സ്ഥാപിച്ചിരുന്ന സ്ഥലം. ഇതിനിടയിൽ പട്ടയഭൂമിയുമുണ്ട്. ഈ വസ്തുതകൾ നിലനിൽക്കേയാണ് വനംവകുപ്പ് കൈവശഭൂമിയിലെ കുരിശ് പൊളിച്ചതും ഇതിനെ ന്യായീകരിക്കാൻ വില്ലേജ് ഓഫീസർ ഈ പ്രദേശമുൾപ്പടെ 4005 ഏക്കർ വനമാണെന്ന് റിപ്പോർട്ട് നൽകിയതും. അതിക്രമം നടത്തിയ വനം ഉദ്യോഗസ്ഥർക്കെതിരേയും തെറ്റായ റിപ്പോർട്ട് നൽകിയ വില്ലേജ് ഓഫീസർക്കെതിരേയും നടപടി സ്വീകരിക്കാൻ സർക്കാർ തയാറാകണമെന്ന് ബിജോ മാണി ആവശ്യപ്പെട്ടു. ജണ്ടയ്ക്ക് പുറത്തുള്ള കൈവശക്കാർക്ക് പട്ടയം ലഭിക്കും വരെ അവരോടൊപ്പമുണ്ടാകുമെന്നും ബിജോ മാണി അറിയിച്ചു. അഡ്വ. രാജീവ് പാടത്തിൽ, ഷാനു ഷാഹുൽ, എബി മുണ്ടയ്ക്കൽ എന്നിവരൊടൊപ്പമാണ് സ്ഥലം സന്ദർശിച്ചത്. പ്രദേശവാസികളായ നാരായണൻ പുളിക്കൻ, അഡ്വ. റോബിൻ മാനുവൽ കൊല്ലംപറന്പിൽ, ആന്‍റപ്പൻ കളത്തൂർ, സോജൻ കരോട്ടുപുത്തൻപുര, ബേബി കളത്തൂർ, ജോയി തറപ്പേൽ, ജോർജ് പരുന്തനാനിയിൽ, ജോയി വിച്ചാട്ട്, തോമസ് കളത്തൂർ, ജോണി ചോലപ്പിള്ളി തുടങ്ങിയവരും ഒപ്പമുണ്ടായിരുന്നു.

കർഷകരുടെ അവകാശം സാധൂകരിച്ച് മുൻസിഫ് കോടതിയുടെ ഉത്തരവ്

തൊടുപുഴ: നാരങ്ങാനത്ത് കുരിശ് തകർത്ത സ്ഥലം ഉൾപ്പെടെ 1968 ജനുവരി ഒന്നിനുമുൻപ് ആളുകളുടെ കൈവശത്തിലുള്ളതാണെന്നു തെളിയിക്കുന്ന കൂടുതൽ രേഖകൾ പുറത്ത്. ഈ മേഖലയിൽ 1978-ൽ കുടിയിറക്കുന്നതിനുള്ള ശ്രമം നടന്നിരുന്നു. ഇതിനെതിരേ കുരിശ് സ്ഥാപിച്ച സ്ഥലത്തോടു ചേർന്നുള്ള കൈവശക്കാരനായ എം.ആർ. അഗസ്റ്റിൻ 1979-ൽ തൊടുപുഴ മുൻസിഫ് കോടതിയിൽ കേസ് ഫയൽ ചെയ്തിരുന്നു. 1981-ൽ കോടതിയിൽനിന്ന് കൈവശക്കാരന് അനുകൂലമായി സ്റ്റേ ഓർഡർ ലഭിക്കുകയും ചെയ്തു. 1968 ജനുവരി ഒന്നിനു മുൻപ് ഈ ഭൂമി ഇദ്ദേഹത്തിന്‍റെ കൈവശമുള്ളതായാണ് കോടതി കണ്ടെത്തിയത്. അഞ്ചേക്കർ ഭൂമിയാണ് ഇദ്ദേഹത്തിനും കുടുംബത്തിനുമായി ഉണ്ടായിരുന്നത്. ഇതിൽ രണ്ടേക്കർ മാത്രമാണ് കോടതി ഉത്തരവ് ഉണ്ടായിട്ടും 1983ൽ തയാറാക്കിയ റവന്യു-വനം വകുപ്പുകളുടെ സംയുക്ത പരിശോധനാ റിപ്പോർട്ടിൽ ഉൾപ്പെടുത്തിയത്. സംയുക്ത പരിശോധനയിൽനിന്നു കുറെ പ്രദേശങ്ങൾ ഒഴിവാക്കപ്പെട്ടതായുള്ള നാട്ടുകാരുടെ പരാതികൾക്ക് ബലം പകരുന്നതാണിത്. ഇതിനു പുറമേ എം.ആർ. അഗസ്റ്റിന്‍റെ സ്ഥലത്തിന്‍റെ അതിർത്തി പങ്കിടുന്നത് ഈട്ടിക്കൽ രാഘവൻ, പുളിക്കക്കുന്നേൽ പാപ്പച്ചൻ, തെങ്ങുംകുടിയിൽ സേവ്യർ എന്നിവരുടെ സ്ഥലങ്ങളാണ്. 1968നു മുന്പ് നാരങ്ങാനത്ത് കൈവശഭൂമിയുണ്ടായിരുന്നുവെന്ന കോടതിയുടെ ഉത്തരവ് വനംവകുപ്പിന്‍റെ വാദങ്ങൾക്ക് അടിസ്ഥാനമില്ലെന്നു തെളിയിക്കുന്നതാണ്. തൊമ്മൻകുത്ത് സെന്‍റ് തോമസ് പള്ളിയുടെ കൈവശഭൂമിയിൽ സ്ഥാപിച്ച കുരിശ് തകർത്ത സ്ഥലത്തെ ജോയിന്‍റ് വെരിഫിക്കേഷൻ പൂർത്തിയായെന്നായിരുന്നു ഇതിനു നേതൃത്വം നൽകിയ കാളിയാർ റേഞ്ച് ഓഫീസറുടെ വാദം. എന്നാൽ ഈ വാദമാണ് കോടതി രേഖയിലൂടെ പൊളിയുന്നത്. പ്രദേശം ജോയിന്‍റ് വേരിഫിക്കേഷനിൽ ഉൾപ്പെടാത്ത സ്ഥലമാണെന്ന് വിവരാവകാശപ്രകാരം ലഭിച്ച രേഖകളിൽനിന്നു വ്യക്തമായിരുന്നു. ഇതോടെ വില്ലേജ് ഓഫീസർ ആരുടെയൊ സമർദത്തിനു വഴങ്ങി വണ്ണപ്പുറം വില്ലേജിലെ 4005 ഏക്കർ റിസർവ് വനഭൂമിയാണെന്ന റിപ്പോർട്ട് നൽകുകയായിരുന്നു. ഇത് ഏറെ വിവാദങ്ങൾക്ക് കാരണമാകുകയും ചെയ്തു. സംസ്ഥാനത്തെ ഭൂരിഭാഗം പ്രദേശങ്ങളും നേരത്തേ വനഭൂമിയെന്നാണ് രേഖപ്പെടുത്തിയിട്ടുള്ളത്. എന്നാൽ ഗ്രോമോർ ഫുഡ് പദ്ധതി പ്രകാരവും മറ്റും സർക്കാർ തന്നെ വനഭൂമിയിൽ കർഷകരെ കുടിയിരുത്തി നിരവധി പ്രദേശങ്ങൾ കൃഷിക്ക് വിട്ടുനൽകുകയായിരുന്നു. പിന്നീട് 1977നു മുന്പ് കുടിയേറിയ മുഴുവൻ കർഷകർക്കും പട്ടയത്തിന് അവകാശമുണ്ടെന്ന് സർക്കാർ തീരുമാനിച്ചതോടെ വനംവകുപ്പിന്‍റെ പൊള്ളയായ വാദങ്ങൾക്ക് അടിസ്ഥാനമില്ലാതായി എന്നതാണ് യാഥാർഥ്യം. സർക്കാർ കനത്ത വില നൽകേണ്ടിവരും: മാത്യു കുഴൽനാടൻ എംഎൽഎ തൊടുപുഴ: നാരങ്ങാനത്തെ കൈവശഭൂമിയിലെ കുരിശു തകർത്തതിനും കൈവശ ഭൂമി റിസർവ് വനമാക്കാനുള്ള വനം-റവന്യു വകുപ്പുകളുടെ ഗൂഢനീക്കത്തിനും ഇടതു സർക്കാർ കനത്ത വില നൽകേണ്ടിവരുമെന്ന് മാത്യു കുഴൽനാടൻ എംഎൽഎ മുന്നറിയിപ്പു നൽകി. യുഡിഎഫ് മുണ്ടൻമുടി വാർഡ് കമ്മിറ്റിയുടെ നേതൃത്വത്തിൽ അച്ചൻകവലയിൽ സംഘടിപ്പിച്ച പ്രതിഷേധ യോഗം ഉദ്ഘാടനം ചെയ്യുകയായിരുന്നു അദ്ദേഹം. ഒരു കൃഷിക്കാരനെയും കുടിയിറക്കാൻ സമ്മതിക്കില്ല. കാർഷിക മേഖലയ്ക്കുള്ള ഫണ്ട് വകമാറ്റി ചെലവഴിച്ച ഇടതു സർക്കാരിന് കർഷകരോട് പ്രതിബദ്ധതയില്ല. വണ്ണപ്പുറം വില്ലേജിലെ പട്ടയ നടപടികൾ അടിയന്തരമായി പൂർത്തീകരിക്കണം. വനംവകുപ്പിനെ നിയന്ത്രിക്കാൻ സർക്കാർ തയാറാകണമെന്നും കുഴൽനാടൻ ആവശ്യപ്പെട്ടു. ബ്ലോക്ക് പഞ്ചായത്തംഗം അഡ്വ. ആൽബർട്ട് ജോസ് അധ്യക്ഷത വഹിച്ചു. യുഡിഎഫ് ജില്ലാ ചെയർമാൻ പ്രഫ. എം.ജെ. ജേക്കബ് മുഖ്യപ്രഭാക്ഷണം നടത്തി. നേതാക്കളായ നിസാർ മൗലവി, ഇന്ദു സുധാകരൻ, ബ്ലോക്ക് പഞ്ചായത്ത് പ്രസിഡന്‍റ് ടോമി കാവാലം, പി.എം. ഇല്യാസ്, ബേബി വട്ടക്കുന്നേൽ, സണ്ണി കളപ്പുര, പി.യു. ഷാഹുൽ ഹമീദ്, എം.ടി. ജോണി ഷൈനി റെജി തുടങ്ങിയവർ പ്രസംഗിച്ചു.

തമിഴ്‌നാട് എംപിയുടെ സന്ദര്‍ശനം: തേവാരം-തേവാരംമെട്ട് റോഡിന് പ്രതീക്ഷയേറി

നെടുങ്കണ്ടം: അന്തര്‍സംസ്ഥാന പാതയ്ക്ക് പുതിയ പ്രതീക്ഷ നല്‍കി കേരളത്തിലെയും തമിഴ്‌നാട്ടിലെയും ജനപ്രതിനിധികളുടെ സംഗമം. വര്‍ഷങ്ങളായി ഇരു സംസ്ഥാനങ്ങളിലെയും ജനങ്ങള്‍ പ്രതീക്ഷയോടെ കാത്തിരുന്ന തേവാരം-തേവാരംമെട്ട് റോഡ് യാഥാര്‍ഥ്യമാക്കുന്നതിന്‍റെ ഭാഗമായി തേനി എംപി തങ്കത്തമിഴ് ശെല്‍വം, ഇടുക്കി എംപി ഡീന്‍ കുര്യാക്കോസ്, എം.എം. മണി എംഎല്‍എ എന്നിവര്‍ ഒത്തുചേര്‍ന്ന് നീക്കങ്ങള്‍ ആരംഭിച്ചു. തങ്കത്തമിഴ് ശെല്‍വത്തിന്‍റെ നേതൃത്വത്തില്‍ കര്‍ഷകര്‍ അടക്കമുള്ളവരുടെ സംഘം തേവാരത്തുനിന്ന് ഏഴ് കിലോമീറ്റര്‍ ദൂരം കാല്‍നടയായി സഞ്ചരിച്ച് തേവാരംമെട്ടിലെത്തി. അവിടെ ഡീന്‍ കുര്യാക്കോസും എം.എം. മണിയും മറ്റ് ജനപ്രതിനിധികളും ചേര്‍ന്ന് സംഘാംഗങ്ങള്‍ക്ക് സ്വീകരണം നൽകി. മേയ് ദിനത്തില്‍ രാവിലെ 7.30നാണ് തേനി എംപിയും സംഘവും കാനന പാതയിലൂടെ തേവാരംമെട്ടിലേക്ക് തിരിച്ചത്. പാതയുടെ നടുവില്‍ സ്ഥിതി ചെയ്യുന്ന അയ്യപ്പസ്വാമി ക്ഷേത്രത്തിന് സമീപമെത്തി പാതയെക്കുറിച്ചുള്ള വിശകലനം നടത്തിയ ശേഷമാണ് ഇവര്‍ തേവാരംമെട്ടിലെത്തിയത്. തുടര്‍ന്ന് നൂറുകണക്കിന് പ്രദേശവാസികളുടെ സാന്നിധ്യത്തില്‍ കര്‍ഷകരും ജനപ്രതിനിധികളുമായി പ്രത്യേക യോഗവും ചേര്‍ന്നു. തമിഴ്‌നാടിന്‍റെ ഭാഗമായ മൂന്നര കിലോമീറ്ററോളം റോഡ് ഗതാഗത യോഗ്യമാക്കിയാല്‍ പാത പുനരുജ്ജീവിപ്പിക്കാനാകുമെന്നും ശബരിമല തീര്‍ഥാടകര്‍ക്കും തമിഴ്‌നാട്ടില്‍നിന്നെത്തുന്ന തോട്ടം തൊഴിലാളികള്‍ക്കും ഉപകാരപ്രദമാകുന്ന പാതയാണിതെന്നും യോഗം വിലയിരുത്തി. തമിഴ്‌നാട് മുഖ്യമന്ത്രിയെയും കേന്ദ്രസര്‍ക്കാരിനെയും പാതയുടെ ആവശ്യകത ബോധ്യപ്പെടുത്തി ആവശ്യമായ നടപടികള്‍ സ്വീകരിക്കുമെന്നും ഒരു വര്‍ഷത്തിനുള്ളില്‍ പാത യാഥാര്‍ഥ്യമാകുമെന്നാണ് പ്രതീക്ഷയെന്നും തേനി എംപി അറിയിച്ചു. കേന്ദ്രസര്‍ക്കാരില്‍ സമ്മര്‍ദം ചെലുത്തുമെന്ന് ഡീന്‍ കുര്യാക്കോസും വ്യക്തമാക്കി. സംസ്ഥാന സര്‍ക്കാര്‍ എല്ലാ അനുകൂല നിലപാടുകളും സ്വീകരിച്ചിട്ടുണ്ടെന്നും ഇനിയും ആവശ്യമായ ഇടപെടലുകള്‍ ഇരു സംസ്ഥാനങ്ങളുമായും കേന്ദ്രസര്‍ക്കാരുമായും നടത്തുമെന്നും എം.എം. മണിയും പറഞ്ഞു. കക്ഷിരാഷ‌്ട്രീയ ഭേദമെന്യേ റോഡിനായി ആക്‌ഷന്‍ കൗണ്‍സില്‍ രൂപീകരിച്ചതോടെയാണ് വീണ്ടും ചര്‍ച്ച സജീവമായത്. ജനപ്രതിനിധികളെ കൂടാതെ വിവിധ രാ‌ഷ‌്ടീയ കക്ഷി നേതാക്കളായ ഇബ്രാഹിംകുട്ടി കല്ലാര്‍, പി.എന്‍. വിജയന്‍, എം.എന്‍. ഗോപി, കെ. കുമാര്‍എന്നിവരും സ്ഥലത്തെത്തിയിരുന്നു.

കെജിഡിഎ സംസ്ഥാന സമ്മേളനം ഇന്ന്

തൊടുപുഴ: കേരള ഗവ. ഡ്രൈവേഴ്സ് അസോസിയേഷൻ സംസ്ഥാന സമ്മേളനം ഇന്നും നാളെയും തൊടുപുഴ മർച്ചന്‍റ്സ് ട്രസ്റ്റ് ഹാളിൽ നടക്കുമെന്ന് ഭാരവാഹികൾ പത്രസമ്മേളനത്തിൽ അറിയിച്ചു. രാവിലെ പത്തിന് പതാക ഉയർത്തൽ. തുടർന്നു നടക്കുന്ന സമ്മേളനം വാഴൂർ സോമൻ എംഎൽഎ ഉദ്ഘാടനം ചെയ്യും. ഡി. ബിനിൽ അധ്യക്ഷത വഹിക്കും. സംസ്ഥാന പ്രസിഡന്‍റ് പി.കെ. ബിജു, നഗരസഭാ ചെയർമാൻ കെ. ദീപക്, എൻ. കൃഷ്ണകുമാർ, ടി.ആർ. സോമൻ, പി.പി. ജോയി എന്നിവർ പ്രസംഗിക്കും. ഉച്ചകഴിഞ്ഞ് രണ്ടിനു നടക്കുന്ന സെമിനാർ ജയചന്ദ്രൻ കല്ലുങ്കൽ ഉദ്ഘാടനം ചെയ്യും. ബഷീർ വി. മുഹമ്മദ് അധ്യക്ഷത വഹിക്കും. നാലിന് പ്രകടനം. തുടർന്നു നടക്കുന്ന സമ്മേളനം കെ. സലിംകുമാർ ഉദ്ഘാടനം നാളെ പാപ്പൂട്ടി ഹാളിൽ നടക്കുന്ന പ്രതിനിധി സമ്മേളനം എം.എം. നജീം ഉദ്ഘാടനം ചെയ്യും. സമ്മേളനത്തിൽ പുറംകരാർ വ്യവസ്ഥ ഒഴിവാക്കുക, റേഷ്യോ പ്രമോഷൻ അനുവദിക്കുക, ഡ്രൈവർമാരുടെ വിദ്യാഭ്യാസ യോഗ്യത ഉയർത്തുക, ടെക്നിക്കൽ വിഭാഗത്തിൽ ഉൾപ്പെടുത്തുക എന്നീ ആവശ്യങ്ങൾ ഉന്നയിക്കും. പത്രസമ്മേളനത്തിൽ സ്വാഗത സംഘം ചെയർമാൻ ഡി. ബിനിൽ, ജനറൽ കണ്‍വീനർ ബഷീർ വി. മുഹമ്മദ്, സംസ്ഥാന പ്രസിഡന്‍റ് പി.കെ. ബിജു, ജനറൽ സെക്രട്ടറി വി. വിനോദ്, കെ. സുധീർ എന്നിവർ പങ്കെടുത്തു.

മുഖ്യമന്ത്രി രാജിവയ്ക്കണം

തൊടുപുഴ: ഭരണതലത്തിലെ അഴിമതിക്കുപുറമെ സ്വന്തം മകളുടെ കന്പനി ഉപയോഗിച്ചും കോടികൾ തട്ടിയെടുത്ത പിണറായി വിജയൻ മുഖ്യമന്ത്രിക്കസേരയിൽ കടിച്ചുതൂങ്ങാതെ രാജിവയ്ക്കണമെന്നു കെപിസിസി വൈസ് പ്രസിഡന്‍റ് വി.പി. സജീന്ദ്രൻ ആവശ്യപ്പെട്ടു. രാജീവ് ഭവനിൽ ഡിസിസി നേതൃയോഗം ഉദ്ഘാടനം ചെയ്യുകയായിരുന്നു അദ്ദേഹം. കരിമണൽ കന്പനിയിൽനിന്നു കോടിക്കണക്കിനു രൂപ മാസപ്പടി വാങ്ങിയ കേസിൽ വീണ വിജയൻ കുറ്റക്കാരിയാണെന്ന് ഇതിനോടകം വിവിധ അന്വേഷണ ഏജൻസികൾ കണ്ടെത്തിക്കഴിഞ്ഞു. ബിജെപിയുമായി രഹസ്യചർച്ച നടത്തി സിപിഎം ബന്ധം ഉൗട്ടിയുറപ്പിച്ച എഡിജിപി എം.ആർ. അജിത്കുമാറിനെ ഒപ്പം നിർത്തി ഡിജിപിയാക്കാനുള്ള വഴികൾ തേടുകയാണെന്നും അദ്ദേഹം പറഞ്ഞു. ഡിസിസി പ്രസിഡന്‍റ് സി.പി. മാത്യു അധ്യക്ഷത വഹിച്ചു. കെപിസിസി ജനറൽ സെക്രട്ടറി അഡ്വ. എസ്. അശോകൻ, നേതാക്കളായ റോയി കെ. പൗലോസ്, എ.കെ. മണി, തോമസ് രാജൻ, എം.കെ. പുരുഷോത്തമൻ, നിഷ സോമൻ, പി.വി. സ്കറിയ, ജോണ്‍ നെടിയപാല, എം.ഡി. അർജുനൻ, ജി. മുനിയാണ്ടി, ഇന്ദു സുധാകരൻ, സി.പി. കൃഷ്ണൻ, എൻ.ഐ. ബെന്നി, ഷിബിലി സാഹിബ്, അരുണ്‍ പൊടിപാറ, ബിജോ മാണി, ലീലമ്മ ജോസ് തുടങ്ങിയവര പ്രസംഗിച്ചു.

ഏലക്ക മോഷ്ടാവ് പിടിയിൽ

കട്ടപ്പന: പാറക്കടവിൽ ഏലത്തോട്ടത്തിൽനിന്നു പച്ച ഏലക്ക മോഷ്ടിച്ച പ്രതിയെ കട്ടപ്പന പോലീസ് പിടികൂടി. മുണ്ടക്കയം കൂട്ടിക്കൽ കുന്നേൽപറമ്പിൽ സുബിൻ വിശ്വംഭരൻ (32) ആണ് പിടിയിലായത്. വ്യാഴാഴ്ച ഉച്ചയോടെയാണ് ഏലത്തോട്ടത്തിൽനിന്നു സുബിൻ ഏലയ്ക്ക പറിക്കുന്നതായി കണ്ടത്. തുടർന്ന് കട്ടപ്പന പോലീസിനെ വിവരം അറിയിക്കുകയായിരുന്നു. കട്ടപ്പന സർക്കിൾ ഇൻസ്പെക്ടർ ടി.സി. മുരുകന്‍റെ നിർദേശപ്രകാരം എസ്ഐ ബർട്ടിൻ ജോസും പോലീസ് ഉദ്യോഗസ്ഥരായ കെ.എ. അനൂപ്, ജോമോൻ കുര്യൻ, ബിബിൻ മാത്യു എന്നിവരടങ്ങിയ സംഘം പ്രതിയെ പിടികൂടിയത്. ഏലച്ചെടിയിൽനിന്ന് ഇയാൾ ശരം ഒടിച്ചെടുക്കുകയായിരുന്നു. 15 കിലോ ഏലക്കയാണ് പിടികൂടിയത്. സമാന രീതിയിൽ കാഞ്ചിയാർ കക്കാട്ടുകടയിൽനിന്ന് ഏലക്ക മോഷ്ടിച്ചതിന് ഇയാൾ കഴിഞ്ഞ വർഷം ശിക്ഷ അനുഭവിച്ചയാളാണ്. കൂടാതെ നരിയംപാറ ക്ഷേത്രത്തിൽനിന്ന് ഭണ്ഡാരക്കുറ്റി മോഷ്ടിച്ചതിനും ഇയാൾ ശിക്ഷ അനുഭവിച്ചിട്ടുണ്ട്. പ്രതിയെ കട്ടപ്പന കോടതിയിൽ ഹാജരാക്കി.

അനുശ്രീ സത്യന് ജന്മനാട്ടിൽ സ്വികരണം നല്‍കി

അടിമാലി: സിവില്‍ സര്‍വീസ് പരീക്ഷയില്‍ 603-ാം റാങ്ക് നേടിയ അനുശ്രീ സത്യന് ജന്മനാടായ മുക്കുടത്ത് സ്വികരണം നല്‍കി. എസ്എന്‍ഡിപി ശാഖയുടെയും വ്യാപാരി വൃവാസായി ഏകോപന സമിതിയുടെയും വിവിധ സംഘടനകളുടെയും രാഷ്ട്രിയപാര്‍ട്ടികളുടെയും ആഭിമുഖ്യത്തിലായിരുന്നു സ്വീകരണം ഒരുക്കിയത്. മുക്കുടത്ത് നടന്ന സ്വീകരണത്തിനു ശേഷം വാഹനങ്ങളുടെ അകമ്പടികളോടെ അനുശ്രീയെ ചരുതക്കള്ളിപ്പാറയിലെ വീട്ടിലേക്കാനയിച്ചു. തുടര്‍ന്ന് വീട്ടില്‍ അനുമോദന സമ്മേളനം നടന്നു. പഞ്ചായത്തംഗം ടി.പി. മല്‍ക്ക അധ്യക്ഷത വഹിച്ചു. അടിമാലി എസ്എൻഡിപി യൂണിയന്‍ കണ്‍വീനര്‍ സജി പറമ്പത്ത്, കെ.എസ്. ലതിഷ് കുമാര്‍, പഞ്ചായത്തംഗം പി. കെ. ഉണ്ണികൃഷ്ണന്‍ തുടങ്ങിയവർ പ്രസംഗിച്ചു. വിവിധ സംഘടനകളുടെ പ്രതിനിധികള്‍ അനുശ്രീക്ക് ഉപഹാരങ്ങളും നൽകി.

ക്രിസ്തീയ ജീവിതമാർഗവും ശൈലിയും വിശ്വാസത്തിന്‍റെ മുഖമുദ്ര: മാർ ബെന്നി ഇടത്തട്ടേൽ

ചെറുതോണി: കത്തോലിക്ക മിഷൻപ്രദേശങ്ങളിൽ ക്രൈസ്തവ വിശ്വാസം വളർന്നതിനു പിന്നിൽ മിഷനറിമാർ വഹിച്ച പങ്ക് വളരെ വലുതാണെന്ന് ഇറ്റാനഗർ ബിഷപ് മാർ ബെന്നി ഇടത്തട്ടേൽ. മുളകുവള്ളി സെന്‍റ് ജോസഫ് പള്ളി രജത ജൂബിലി ദിനത്തിൽ വിശുദ്ധ ബലി അർപ്പിച്ചു സന്ദേശം നൽകുകയായിരുന്നു മാർ ബെന്നി ഇടത്തട്ടേൽ. ഈ കാലഘട്ടത്തിൽ യേശുവിനെ പകർന്നുകൊടുക്കാനും പറഞ്ഞുകൊടുക്കാനും ഓരോ വിശ്വാസിയും കടപ്പെട്ടിരിക്കുന്നു. വ്യക്തികളിൽ ആരംഭിച്ച് ഇന്ന് ആയിരക്കണക്കിന് വിശ്വാസികളുടെ സമൂഹമായി ക്രൈസ്തവർ മാറിയതിനു കാരണം ക്രിസ്തീയ ജീവിത‌ശൈലിയും ജീവിതമാർഗവും കലർപ്പുകൂടാതെ പകർന്നുനൽകിയതുകൊണ്ടാണെന്ന് അദ്ദേഹം പറഞ്ഞു.

പുഴയോര ബൈപാസ് സൗന്ദര്യവത്കരണം പാളി

തൊടുപുഴ: തൊടുപുഴയാറിന്‍റെ തീരം വഴി നഗര സൗന്ദര്യവത്കരണത്തിന്‍റെ ഭാഗമായി നിർമിച്ച പുഴയോര ബൈപാസിന് അധികൃതരുടെ അവഗണന. ഗതാഗതത്തിനായി തുറന്നു കൊടുത്തതോടെ നൂറു കണക്കിന് വാഹനങ്ങളാണ് ഇതു വഴി സഞ്ചരിക്കുന്നത്. എന്നാൽ, തിരക്കേറിയ ബൈപാസിന്‍റെ ഇരു വശങ്ങളും ഇപ്പോൾ കാടു കയറിയ നിലയിലാണ്. വഴി വിളക്കുകൾ സ്ഥാപിക്കാത്തതിനാൽ രാത്രിയായാൽ ബൈപാസിൽ കൂരിരുട്ടാകും. പുഴയോരം വഴി നിർമിച്ചിരിക്കുന്ന റോഡായതിനാൽ സന്ധ്യയാകുന്നതോടെ ഒട്ടേറെ പേർ ഇവിടെ വിശ്രമത്തിനും സമീപത്തെ ഹോട്ടലുകളിൽ ഭക്ഷണം കഴിക്കാനുമെത്തുന്നുണ്ട്. എന്നാൽ രാത്രിയായാൽ പാതയോരത്ത് ഇഴ ജന്തുക്കളും സാമൂഹ്യ വിരുദ്ധരുമാണ് സ്വൈര വിഹാരം നടത്തുന്നത്. കൂടാതെ കാടു പിടിച്ചു കിടക്കുന്നതിനാൽ മാലിന്യവും ഇവിടെ നിക്ഷേപിക്കപ്പെടുന്നു. വെങ്ങല്ലൂർ പാലത്തിനു സമീപത്ത് നിന്ന് ആരംഭിച്ച് തൊടുപുഴയാറിന്‍റെ തീരത്ത് കൂടി തൊടുപുഴ - പാലാ റോഡിലെ ധന്വന്തരി ജംഗ്ഷനിൽ എത്തിച്ചേരുന്നതാണ് ബൈപാസ്. നഗരത്തിരക്കിൽ നിന്നും മാറി പുഴയുടെ സൗന്ദര്യം ആസ്വദിച്ച് സഞ്ചരിക്കാവുന്ന വിധത്തിലാണ് പുഴയോര ബൈപാസ് വിഭാവനം ചെയ്തത്. പ്രഭാത വ്യായാമത്തിനും, വൈകുന്നേരങ്ങളിൽ കുടുംബമായി എത്തി സമയം ചെലവഴിക്കാനും ബൈപാസ് പ്രയോജനപ്പെടുത്താനാണ് റോഡ് വിഭാവനം ചെയ്തിരുന്നത്. 1.7 കിലോമീറ്റർ നീളത്തിലും 12 മീറ്റർ വീതിയിലുമാണ് ബൈപാസ് നിർമിച്ചത്. വാഹന ഗതാഗതത്തിന് പുറമേ, വ്യായാമത്തിനും വിനോദത്തിനും കൂടി ഉപയോഗപ്പെടുത്തുക എന്ന ലക്ഷ്യത്തോടെയായിരുന്നു രൂപകൽപന. ഇതിനായി പുഴയോരത്തോടു ചേർന്ന് ജോഗിംഗ് ട്രാക്ക് നിർമിക്കാനും പദ്ധതിയിട്ടിരുന്നു. കൂടാതെ റോഡിന്‍റെ മുഴുവൻ വശത്തും പുഴയോരത്ത് ഹാൻഡ് റെയിലുകൾ സ്ഥാപിക്കാനും പുഴയോരത്തും, മറുവശത്തും പൂമരങ്ങൾ പിടിപ്പിച്ചു മനോഹരമാക്കാനും അലങ്കാര സ്ട്രീറ്റ് ലൈറ്റുകൾ സ്ഥാപിക്കാനുമായിരുന്നു പദ്ധതി. എന്നാൽ ബൈപാസ് നിർമാണം പൂർത്തിയാക്കി റോഡ് തുറന്നു കൊടുത്തെങ്കിലും സൗന്ദര്യവത്കരണം നടപ്പാക്കിയിട്ടില്ല. സാമൂഹ്യ വിരുദ്ധരും ലഹരി മാഫിയ സംഘങ്ങളും ബൈപാസ് താവളമാക്കിയതോടെ ഇവിടെ വഴിവിളക്കുകൾ സ്ഥാപിക്കണമെന്ന് പ്രദേശവാസികൾ ആവശ്യപ്പെട്ടെങ്കിലും എൽഡിഎഫ് നേതൃത്വത്തിലുണ്ടായിരുന്ന നഗരസഭാ ഭരണ സമിതി ഇക്കാര്യത്തിൽ നടപടിയെടുത്തില്ല. ഇപ്പോഴത്തെ നഗരസഭാ ചെയർമാനും മുൻ സ്റ്റാൻഡിംഗ് കമ്മിറ്റി ചെയർമാനുമായ കെ.ദീപക് മുൻ കൈയെടുത്ത് വഴിവിളക്ക് സ്ഥാപിക്കാൻ ഇപ്പോൾ 15 ലക്ഷം രൂപ വകയിരുത്തിയിട്ടുണ്ട്. അമിത വേഗത്തിൽ വാഹനങ്ങൾ സഞ്ചരിച്ച് അപകടം കൂടിയതോടെ ഇവിടെ ട്രാഫിക് പോലീസിന്‍റെ നേതൃത്വത്തിൽ സ്പീഡ് ബ്രേക്കർ സ്ഥാപിച്ചിട്ടുണ്ട്. എന്നാൽ പൂർണമായ തോതിൽ ക്രാഷ് ബാരിയർ സ്ഥാപിച്ചിട്ടില്ല. ബേബി മെമ്മോറിയൽ ആശുപത്രിക്കു സമീപം ക്രാഷ് ബാരിയർ സ്ഥാപിക്കാത്ത ഭാഗത്ത് കാർ പുഴയിലേയ്ക്ക് മറിഞ്ഞിരുന്നു. നിലവിൽ സ്ഥാപിച്ചിരിക്കുന്ന ക്രാഷ് ബാരിയർ കാടു മൂടിയ നിലയിലുമാണ്. അതിനാൽ വാഹനങ്ങൾ ഇതിൽ ഇടിക്കാനും സാധ്യതയേറെയാണ്. കാടു വളർന്നു നിൽക്കുന്നതിനാൽ റോഡിലേയ്ക്ക് പാന്പുകളും മറ്റും കയറി വരുന്നുണ്ട്. സ്ത്രീകളുൾപ്പെടെ ഒട്ടേറെ പേർ രാവിലെ പ്രഭാത സവാരിയ്ക്കിറങ്ങുന്ന പാതയാണ് പുഴയോര ബെപാസ്. വഴിവിളക്കിന് 15 ലക്ഷം :ചെയർമാൻ പുഴയോര ബൈപാസിൽ വഴിവിളക്കുകൾ സ്ഥാപിക്കുന്നതിനുള്ള നടപടികൾ ഉടൻ പൂർത്തിയാക്കുമെന്നും ഇതിനായി 15 ലക്ഷം രൂപയുടെ പദ്ധതി തയാറാക്കിയിട്ടുണ്ടെന്നും നഗരസഭ ചെയർമാൻ കെ.ദീപക് പറഞ്ഞു. റോഡിലെ കാട് ഉടൻ വെട്ടി നീക്കും. നഗരത്തിലെ എല്ലാ റോഡുകളിലും കാടു വെട്ടി നീക്കുന്ന ജോലികൾ നടന്നു വരികയാണ്. മഴക്കാലമെത്തുന്നതിനു മുന്പു തന്നെ നഗരസഭയിൽ ഇത്തരം പ്രവർത്തനങ്ങളെല്ലാം പൂർത്തിയാക്കും. നാലു വർഷത്തോളമായി അധികാരത്തിലിരുന്ന ഇടതു ഭരണ സമിതി നടപ്പാക്കാതിരുന്ന വികസന പ്രവർത്തനങ്ങളാണ് യുഡിഎഫിന്‍റെ നേതൃത്വത്തിലുള്ള ഭരണ സമിതി നടപ്പാക്കുന്നതെന്ന് അദ്ദേഹം പറഞ്ഞു.

ബൈസൺവാലി പള്ളിയിൽ തിരുനാൾ

ബൈസൺവാലി: സെന്‍റ് ആന്‍റണീസ് ടൗൺ പള്ളിയിൽ ഇടവക മധ്യസ്ഥനായ വിശുദ്ധ അന്തോനീസിന്‍റെയും വിശുദ്ധ സെബസ്ത്യാനോസിന്‍റെയും പരിശുദ്ധ കന്യക മറിയത്തിന്‍റെയും സംയുക്ത തിരുനാൾ നാളെ തുടങ്ങുമെന്ന് വികാരി ഫാ. ജെറിൻ കുഴിയാംപ്ലാവിൽ അറിയിച്ചു. വൈകുന്നേരം നാലിന് കൊടിയേറ്റ്, തിരുസ്വരൂപ പ്രതിഷ്ഠ, ലദീഞ്ഞ്, 4.30ന് ആഘോഷമായ തിരുനാൾ കുർബാന, സന്ദേശം-ഫാ. ജോസഫ് തൊട്ടിയിൽ, സെമിത്തേരി സന്ദർശനം, വീട്ടമ്പ് എഴുന്നള്ളിക്കൽ. മൂന്നിന് ഉച്ചകഴിഞ്ഞ് മൂന്നിന് അമ്പു പ്രദക്ഷിണം, 4.15ന് നോവേന, ലദീഞ്ഞ്, 4.45ന് ആഘോഷമായ തിരുനാൾ കുർബാന-ഫാ. പ്രിൻസ് പരത്തനാൽ സിഎംഐ, ടൗൺ ചുറ്റി തിരിപ്രദക്ഷിണം. നാലിന് രാവില 9.30ന് ലദീഞ്ഞ്, ആഘോഷമായ തിരുനാൾ റാസ കുർബാന, സന്ദേശം - ഫാ. പോളി മണിയാട്ട്, തുടർന്ന് സമാപന ആശീർവാദം, സ്നേഹവിരുന്ന്. തള്ളക്കാനം കപ്പേളയിൽ തിരുനാൾ കഞ്ഞിക്കുഴി: സെന്‍റ് മേരീസ് കത്തോലിക്ക പള്ളിയുടെ തള്ളക്കാനം കപ്പേളയിൽ വിശുദ്ധ യൗസേപ്പിതാവിന്‍റെ തിരുനാൾ നാളെ ആഘോഷിക്കുമെന്ന് വികാരി ഫാ. ടോമി ആനിക്കുഴിക്കാട്ടിൽ, സഹവികാരി ഫാ. നിർമൽ കളത്തിക്കാട്ടിൽ എന്നിവർ അറിയിച്ചു. രാവിലെ 10.30ന് വിശുദ്ധ കുർബാന -ഫാ. വിനീത് മേക്കൽ. പാച്ചോർ നേർച്ച.

ദേശീയപണിമുടക്ക്: സംയുക്ത ട്രേഡ് യൂണിയന്‍ ജില്ലാ കണ്‍വന്‍ഷന്‍ നടത്തി

കട്ടപ്പന: ലേബര്‍ കോഡുകള്‍ പിന്‍വലിക്കുക, വിലക്കയറ്റം തടയുക, പൊതുമേഖല ഓഹരി വില്‍പ്പന അവസാനിപ്പിക്കുക, സ്‌കീം വര്‍ക്കര്‍മാരെ തൊഴിലാളികളായി അംഗീകരിക്കുക, കുറഞ്ഞ വേതനം 26,000 രൂപയും പെന്‍ഷന്‍ 9,000 രൂപയുമായി നിശ്ചയിക്കുക തുടങ്ങിയ ആവശ്യങ്ങളുന്നയിച്ച് സംയുക്ത ട്രേഡ് യൂണിയന്‍ മേയ് 20ന് ദേശീയ പണിമുടക്കു നടത്തും. ബിജെപി സര്‍ക്കാരിന്‍റെ തൊഴിലാളി വിരുദ്ധ, കര്‍ഷകദ്രോഹ നയങ്ങള്‍ക്കെതിരേ നടത്തുന്ന ദേശീയ പണിമുടക്കിന് മുന്നോടിയായി സംയുക്ത ട്രേഡ് യൂണിയന്‍ സമരസമിതി കട്ടപ്പനയിൽ ജില്ലാ കണ്‍വന്‍ഷന്‍ നടത്തി. സിഐടിയു ജില്ലാ സെക്രട്ടറി കെ.എസ്. മോഹനന്‍ കൺവൻഷൻ ഉദ്ഘാടനം ചെയ്തു. എഐടിയുസി ജില്ലാ പ്രസിഡന്‍റ് ജോസ് ഫിലിപ്പ് അധ്യക്ഷത വഹിച്ചു. സിഐടിയു സംസ്ഥാന കമ്മിറ്റിയംഗം പി.എസ്. രാജന്‍, ടിയുസിഐ ജില്ലാ സെക്രട്ടറി ബാബു മഞ്ഞള്ളൂര്‍, ജി. വിജയാനന്ദ്, വി.ആര്‍. സജി, സോമന്‍, കുഞ്ഞുമോന്‍, ടി. എസ്. ബിസി, മുരളി, സിന്ധു വിനോദ്, വി.ആര്‍. ശശി എന്നിവര്‍ പ്രസംഗിച്ചു.

പ്രദർശന മേള: സ്റ്റാളുകളിൽ സന്ദർശക പ്രവാഹം

ഇടുക്കി: എന്‍റെ കേരളം പ്രദർശന വിപണന മേളയിൽ പൊതുമരാമത്ത് വകുപ്പ് ഒരുക്കിയ സ്റ്റാൾ ശ്രദ്ധേയമായി. ഹൈവേ വികസന പദ്ധതികളോടൊപ്പം സംസ്ഥാന റോഡുകളും ഗ്രാമീണ റോഡുകളായ ചെമ്മണ്ണാർ ഗ്യാപ്പ് റോഡ്, രാജാക്കാട് -മൈലാടുംപാറ -പുപ്പാറ റോഡ്, മൂന്നാർ ഗ്യാപ് റോഡ് തുടങ്ങിയ ഇടുക്കിയിലെ റോഡുകൾ രാജ്യാന്തര നിലവാരത്തിലേക്ക് ഉയർന്നു. ഗുണനിലവാരം ഉറപ്പുവരുത്തുന്ന ത്രീ ടയർ ക്വാളിറ്റി സിസ്റ്റം, റോഡുകൾ അപകടകരഹിതമാക്കി നിലനിർത്തുന്ന റണ്ണിംഗ് കോണ്‍ട്രാക്ട് സിസ്റ്റം തുടങ്ങി ആധുനിക രൂപകല്പനയിൽ പ്രകൃതിക്ഷോഭങ്ങളെ പ്രതിരോധിക്കുന്ന തരത്തിലുള്ള നിർമിതികളുടെ നേർക്കാഴ്ചയാണ് സ്റ്റാളിൽ ഒരുക്കിയിരിക്കുന്നത്. കുടുംബശ്രീയുടെ നേതൃത്വത്തിൽ ആരംഭിച്ച ഫുഡ് സ്റ്റാളിന്‍റെ ഉദ്ഘാടനം മന്ത്രി റോഷി അഗസ്റ്റിൻ നിർവഹിച്ചു. കുടുംബശ്രീ പ്രവർത്തകർ തയാറാക്കിയ നാടൻ വിഭവങ്ങൾ, പലഹാരങ്ങൾ, ബിരിയാണി, തണുത്ത പാനീയങ്ങൾ തുടങ്ങി രുചികരമായ ഭക്ഷണസാധനങ്ങൾ സ്റ്റാളിൽ ലഭിക്കും. ജില്ലാ ഇൻഫർമേഷൻ വകുപ്പ് ഒരുക്കിയ സ്റ്റാളിലെ എൽഇഡി സ്ക്രീനിൽ കേരളത്തിലെ വികസന പ്രവർത്തനങ്ങളുടെ രൂപരേഖ ജനങ്ങൾക്ക് അടുത്തറിയാം. എന്‍റെ കേരളം മാഗസിന്‍റെ മുഖചിത്രമാകാൻ അവസരമൊരുക്കുന്ന ഫോട്ടോ പോയിന്‍റും ഒരുക്കിയിട്ടുണ്ട്. കാർഷികം, പട്ടയം, വിദ്യാഭ്യാസം, ആരോഗ്യം, നവകേരളം എന്നിങ്ങനെ രേഖപ്പെടുത്തിയിരിക്കുന്ന നേട്ടങ്ങളുടെ ക്യൂബും ഇവിടെയുണ്ട്. സിവിൽ സപ്ലൈസ് വകുപ്പിന്‍റെ സ്റ്റാളും മേളയോടനുബന്ധിച്ച് ഒരുക്കിയിട്ടുണ്ട്.

മൂന്നാർ പുഷ്പമേളയ്ക്ക് ഇന്നു തുടക്കം

മൂന്നാർ: മൂന്നാർ ഗവണ്‍മെന്‍റ് ബൊട്ടാണിക്കൽ ഗാർഡനിൽ മൂന്നാർ പുഷ്പമേളയ്ക്ക് ഇന്നു തുടക്കം കുറിക്കും. രാവിലെ അഡ്വ.എ.രാജാ എംഎൽഎ ഉദ്ഘാടനം നിർയഹിക്കും. മേയ് 10 വരെയാണ് പുഷ്പമേള. ജില്ലാ ടൂറിസം വകുപ്പിന്‍റെ നേതൃത്വത്തിലാണ് പുഷ്പമേള ഒരുങ്ങുന്നത്. അവധിക്കാലത്ത് മൂന്നാറിലെത്തുന്ന സന്ദർശകരെ ആകർഷിക്കുക എന്ന ഉദ്ദേശ്യതോടെയാണ് മേള സംഘടിപ്പിക്കപ്പെട്ടിട്ടുള്ളത്. പുഷ്പമേളയ്ക്കു പുറമേ മ്യൂസിക്കൽ ഫൗണ്ടൻ, ഭക്ഷ്യമേള, സെൽഫി പോയിന്‍റ്, കലാപരിപാടികൾ, വിപണനമേള എന്നിവയും നടക്കും. ജമന്തി, മേരിഗോൾഡ്, ഡയാന്‍റിസ്, വിട്രോണി, പുത്തിൻ സെത്തിയ, ക്രിസാന്തിസം, ഹിഗോണി, സലേഷ്യ, വിങ്ക തുടങ്ങിയ പതിവ് ഇനം പൂക്കൾക്കൊപ്പം വൈവിധ്യമാർന്ന നാനൂറിൽ അധികം പൂക്കൾ മേളയുടെ ആകർഷണമാണ്. വിദേശത്തുനിന്ന് എത്തിക്കുന്ന അലീസിയ, റോസ്, ഓർക്കിഡ്, ആന്തൂറിയം എന്നിവയും പ്രദർശനത്തിനുണ്ടാകും. ഒരു ദിവസം രണ്ടു തവണയാണ് മ്യൂസിക്കൽ ഫൗണ്ടൻ ഉണ്ടാവുക, വൈകുന്നേരം ആറു മുതൽ വ്യത്യസ്ത കലാപരിപാടികളും ഉണ്ടാവും. കുട്ടികൾക്ക് 50 രൂപയും മുതിർന്നവർക്ക് 100 രൂപയും ആണ് പ്രവേശന ഫീസ്.

ജില്ലാ കളക്ടര്‍ സ്ഥലം സന്ദര്‍ശിച്ചു

നെടുങ്കണ്ടം: കേന്ദ്രാവിഷ്‌കൃത പദ്ധതിയായ പ്രധാന്‍മന്ത്രി ജന്‍ വികാസ് കാര്യക്രം പദ്ധതി പ്രകാരം നെടുങ്കണ്ടം ബ്ലോക്ക് പഞ്ചായത്തില്‍ അനുവദിച്ച സദ്ഭാവനാ മണ്ഡപത്തിന്‍റെ നിര്‍മാണം നീളുന്നതായി ബ്ലോക്ക് പഞ്ചായത്ത് നല്‍കിയ പരാതിയെ തുടര്‍ന്ന് ജില്ലാ കളക്ടര്‍ വിഗ്‌നേശ്വരി സ്ഥലം സന്ദര്‍ശിച്ചു. നിര്‍മാണ ജോലികളുടെ ചുമതല സംസ്ഥാന നിര്‍മിതി കേന്ദ്രത്തെയാണ് ഏല്‍പ്പിച്ചിരുന്നത്. ഇതു ടെന്‍ഡര്‍ ചെയ്ത് കരാറുകാരനുമായി എഗ്രിമെന്‍റ് വച്ചിട്ട് മാസങ്ങള്‍ പിന്നിട്ടിട്ടും നിര്‍മാണ പ്രവൃത്തിയില്‍ പുരോഗതി ഉണ്ടാകാത്തതിനെത്തുടര്‍ന്നാണ് ബ്ലോക്ക് പഞ്ചായത്ത് ജില്ലാ കളക്ടര്‍ക്കു പരാതി നല്‍കിയത്. സ്ഥലം സന്ദര്‍ശിച്ച കളക്ടര്‍ നിര്‍മാണ പ്രവൃത്തികള്‍ വേഗത്തിലാക്കാനുള്ള നിര്‍ദ്ദേശം നല്‍കി. കേന്ദ്ര-സംസ്ഥാന സംസ്ഥാന സര്‍ക്കാരും ബ്ലോക്ക് പഞ്ചായത്തും ചേര്‍ന്ന് നടപ്പാക്കുന്ന സംയുക്ത പദ്ധതിയാണ് നെടുങ്കണ്ടം ബ്ലോക്ക് പഞ്ചായത്ത് ഓഫീസിന് സമീപം നിര്‍മിക്കുന്ന സദ്ഭാവനാ മണ്ഡപം. 1000 പേര്‍ക്ക് ഇരിക്കാവുന്ന ഓഡിറ്റോറിയമാണിത്. 1.40 കോടി രൂപയാണ് നിര്‍മാണച്ചെലവ്. 60 ശതമാനം കേന്ദ്ര വിഹിതവും 40 ശതമാനം സംസ്ഥാന വിഹിതവുമാണ്. കൂടാതെ ചുറ്റുമതില്‍ നിര്‍മിക്കുന്നതിനായി ബ്ലോക്ക് പഞ്ചായത്തിന്‍റെ കഴിഞ്ഞ ബജറ്റില്‍ 28 ലക്ഷം രൂപയും അനുവദിച്ചിരുന്നു. എന്നിട്ടും പദ്ധതി എങ്ങും എത്തിയില്ല. നിര്‍മാണ ജോലികള്‍ പുരോഗമിക്കവെ ഉണ്ടായ അപ്രതീക്ഷിത ചെലവുകള്‍ മൂലം നിലവിലെ എസ്റ്റിമേറ്റ് പ്രകാരം പദ്ധതി പൂര്‍ത്തിയാക്കാന്‍ സാധിക്കാതെ വന്നതായാണ് കരാറുകാരന്‍ പറയുന്നത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]