ADVERTISEMENT

ADVERTISEMENT

ശാസ്ത്രോത്സവത്തിൽ മിന്നും വിജയവുമായി സെന്‍റ് ജോൺസ് സ്കൂൾ

തിരുവനന്തപുരം: നോർത്ത് ഉപജില്ല സ്കൂൾ ശാസ്ത്രോത്സവത്തിൽ മിന്നും വിജയവുമായി നാലാഞ്ചിറ സെന്‍റ് ജോൺസ് മോഡൽ ഹയർ സെക്കൻഡറി സ്കൂൾ അഭിമാന നേട്ടം കൈവരിച്ചതായി പ്രിൻസിപ്പൽ ഫാ. ജോസ് ചരുവിൽ പറഞ്ഞു. ശാസ്ത്രോത്സവത്തിന്‍റെ ഭാഗമായുള്ള സയൻസ് മേളയിൽ ഹൈസ്കൂൾ വിഭാഗം ഓവറോൾ ചാമ്പ്യൻ ഷിപ്പോടെ ഒന്നാം സ്ഥാനത്തും ഗണിത മേളയിൽ നാലാം സ്ഥാനത്തും എത്തി.

അധ്യാപകർക്കുള്ള ടീച്ചിംഗ് എയ്ഡ് നിർമാണ മൽസരത്തിൽ ഗണിതം ,സയൻസ് ,സാമൂഹ്യ ശാസ്ത്ര വിഭാഗങ്ങളിൽ ലീന ,ജോസ് ,ബിന്നി സാഹിതി എന്നിവർ എ ഗ്രേഡോടെ ജില്ലാ മേളക്ക് അർഹത നേടി. വിജയികളെ പ്രിൻസിപ്പൽ ഫാ. ജോസ് ചരുവിലിന്‍റെ അധ്യക്ഷതയിൽ ചേർന്ന യോഗം അഭിനന്ദിച്ചു. വൈസ് പ്രിൻസിപ്പൽ അജീഷ് കുമാർ പ്രസംഗിച്ചു.

ADVERTISEMENT

വലിയവിള ബിഎം എല്‍പി സ്കൂളില്‍ പച്ചക്കറി വിളവെടുപ്പ്

നെയ്യാറ്റിന്‍കര : സ്കൂളിലെ പച്ചക്കറി കൃഷി വിളവെടുപ്പ് ആഘോഷമാക്കി വിദ്യാര്‍ഥികള്‍. പുതുതലമുറയുടെ കാര്‍ഷിക താത്പര്യം പ്രോത്സാഹിപ്പിക്കാനുറച്ച് അധ്യാപകരും രക്ഷിതാക്കളും. വലിയവിള ബിഎം എല്‍പി സ്കൂളില്‍ കുളത്തൂര്‍ കൃഷി ഭവന്‍റെ സഹകരണത്തോടെയാണ് വിവിധയിനം പച്ചക്കറി കൃഷിക്ക് തുടക്കം കുറിച്ചത്. സ്കൂളില്‍ വിദ്യാര്‍ഥികളുടെ കൃഷിക്കൂട്ടം ക്ലബ് സജീവമാണ്. പച്ചക്കറി വിത്തുകളും ആവശ്യമായ മാര്‍ഗനിര്‍ദേശങ്ങളും നല്‍കിയത് കുളത്തൂര്‍ കൃഷി ഭവനാണ്. വഴുതനങ്ങ, കത്തിരിക്ക എന്നീ പച്ചക്കറികളുടെ വിളവെടുപ്പ് ഉദ്ഘാടനം പിടിഎ പ്രസിഡന്‍റ് സിജു നിർവഹിച്ചു. വിദ്യാര്‍ഥികള്‍ ചെറുപ്രായത്തിലേ കാര്‍ഷികാഭിമുഖ്യമുള്ളവരാകണമെന്ന് അദ്ദേഹം അഭിപ്രായപ്പെട്ടു. സ്കൂള്‍ ഹെഡ്മിസ്ട്രസ് കൊച്ചുറാണി, അധ്യാപകര്‍, രക്ഷിതാക്കള്‍, കൃഷി ഭവന്‍ പ്രതിനിധികള്‍ എന്നിവര്‍ സംബന്ധിച്ചു.

വിശ്വാസ സംഗമം നടത്തി

വെള്ളറട: ശബരിമലയിലെ സ്വര്‍ണം കൊള്ളയടിച്ച സംഭവത്തിൽ പ്രതിഷേധിച്ച് ഇന്ത്യന്‍ നാഷണല്‍ കോണ്‍ഗ്രസ് മാരായമുട്ടം - ആനാവൂര്‍ മണ്ഡലം കമ്മറ്റികളുടെ നേതൃത്വത്തില്‍ വിശ്വാസ സംഗമം നടത്തി. മാരായമുട്ടം മണ്ഡലം പ്രസിഡന്‍റ് ബിനില്‍ മണലുവിളയുടെ അധ്യക്ഷതയില്‍ ചേര്‍ന്ന യോഗം മുന്‍ ഡിസിസി പ്രസിഡന്‍റ് അഡ്വ.കെ. മോഹന്‍കുമാര്‍ ഉദ്ഘാടനം ചെയ്തു. കെപിസിസിജനറല്‍ സെക്രട്ടറിമാരായ നെയ്യാറ്റിന്‍കര സനല്‍ മണക്കാട് സുരേഷ് എന്നിവര്‍ മുഖ്യപ്രഭാഷണം നടത്തി. ആശംസകള്‍ അറിയിച്ചുകൊണ്ട് മാരായമുട്ടം എം.എസ്.അനില്‍, ആനാവൂര്‍ മണ്ഡലം പ്രസിഡന്‍റ് ആനാവൂര്‍ രാജേഷ്, ബ്ലോക്ക് ഭാരവാഹികളായ വടകര ജയന്‍, മണ്ണൂര്‍ ശ്രീകുമാര്‍ , കാക്കണം മധു , അനൂപ് പാലിയോട്, തത്തിയൂര്‍ സുരേന്ദ്രന്‍ , മണവാരി ശശി , ചാവടി അനില്‍, കാരക്കോണം ഗോപന്‍, ഗോപകുമാര്‍ , കുന്നത്തുകാല്‍ മണികണ്ഠന്‍, കുസുമകുമാരി , മഞ്ജുഷ ജയന്‍ , വടകര വേണുഗോപാല്‍ , കോട്ടയക്കല്‍ വിനോദ്, കോട്ടയക്കല്‍ സുകു, ശ്രീരാഗം ശ്രീകുമാര്‍ ,അനില്‍കുമാര്‍ എസ്. കെ ,വിനീഷ് കോട്ടയക്കല്‍,വിഷ്ണു ഗാന്ധി , മേച്ചേരി അനീഷ്, അഖില്‍ തൃപ്പലവൂര്‍, കോട്ടയ്ക്കല്‍ മധു , തൃപ്പലവൂര്‍ സന്തോഷ് തുടങ്ങിയവര്‍ നേതൃത്വം നല്‍കി.

പാറശാല പഞ്ചായത്ത് വികസന സദസ് സംഘടിപ്പിച്ചു

പാറശാല: പാറശാല പഞ്ചായത്ത് നടത്തിയ വികസന പ്രവര്‍ത്തനങ്ങള്‍ ജനങ്ങള്‍ക്ക് മുന്നില്‍ അവതരിപ്പിച്ചും ജനങ്ങളില്‍ നിന്ന് അഭിപ്രായങ്ങള്‍ ശേഖരിച്ചുകൊണ്ടും പാറശാല പഞ്ചായത്ത് വികസന സദസ് സംഘടിപ്പിച്ചു. ഉദ്ഘാടനം സി.കെ. ഹരീന്ദ്രന്‍ എംഎല്‍എ നിര്‍വ്വഹിച്ചു . ഗ്രാമപഞ്ചായത്ത് പ്രസിഡന്‍റ് എല്‍.മഞ്ജുസ്മിത അധ്യക്ഷത വഹിച്ചു. പഞ്ചായത്ത് നടത്തിയ വികസന പ്രവര്‍ത്തനങ്ങളുടെ റിപ്പോര്‍ട്ട് അവതരണം പ്രസിഡന്‍റ് എല്‍.മഞ്ജുസ്മിത നടത്തി .ആശംസകള്‍ നേര്‍ന്നുകൊണ്ട് പഞ്ചായത്ത് വൈസ് പ്രസിഡന്‍റ് ആര്‍. ബിജു, പഞ്ചായത്ത് സ്ഥിരം സമിതി അധ്യക്ഷരായ അനിതാറാണി, വീണ, ബ്ലോക്ക് പഞ്ചായത്ത് ക്ഷേമകാര്യ സ്ഥിരംസമിതി അധ്യക്ഷ വിനിത കുമാരി, പഞ്ചായത്ത് അംഗങ്ങളായ ഓമന, മായ, ജയകുമാര്‍, ക്രിസ്തുരാജ്, അനിത, എം. സുനില്‍, സുധാമണി, ഐസിഡിഎസ് സൂപ്പര്‍വൈസര്‍ ഡോ. മഞ്ജു. എന്‍. രാഘവന്‍ നാടാര്‍, എ. ശശിധരന്‍ നായര്‍, എസ്. മധു, ജസ്റ്റിന്‍, ഡോ. സെബി, സുന്ദരേശന്‍, കുടുംബശ്രീ ചെയര്‍ പേഴ്‌സ്ന്‍ സബൂറാ ബീവി, ജോണ്‍ സേവ്യര്‍, പഞ്ചായത്ത് സെക്രട്ടറി ജി. എസ്. ഹരി തുടങ്ങിയവര്‍ സംസാരിച്ചു. സംസ്ഥാന സര്‍ക്കാരിന്‍റെ വികസന നേട്ടങ്ങള്‍ കോര്‍ത്തിണക്കിയ വീഡിയോ സദസില്‍ പ്രദര്‍ശിപ്പിച്ചു. തുടര്‍ന്ന് പഞ്ചായത്ത് വികസനത്തിനായുള്ള ജനങ്ങളുടെ അഭിപ്രായങ്ങളും ചര്‍ച്ചകളും നടന്നു.

കാണാതായ മൂന്നംഗ കുടുംബത്തെ കണ്ടെത്തി

പേരൂര്‍ക്കട: മൂന്നാഴ്ച മുമ്പ് വീട്ടില്‍ നിന്നു കാണാതായ മൂന്നംഗ കുടുംബത്തെ ഫോര്‍ട്ട് പോലീസ് കണ്ടെത്തി തിരുവനന്തപുരത്ത് എത്തിച്ചു. സെപ്തംബര്‍ 24ന് രാവിലെ 9 മുതല്‍ വീട്ടില്‍ നിന്നു കാണാതായ ദന്പതികളേയും നാലു വയസുള്ള മകളെയുമാണ് കണ്ടെത്തിയത്. കടബാധ്യത മൂലമാണ് മാറിനിന്നതെന്ന് ദമ്പതികള്‍ ഫോര്‍ട്ട് സിഐ വി.ആര്‍ ശിവകുമാറിനോടു പറഞ്ഞു. വീട്ടില്‍നിന്നു സ്ഥലംവിട്ട ഇവര്‍ തമിഴ്‌നാട്ടില്‍ കോയമ്പത്തൂരില്‍ താമസിച്ചു വരികയായിരുന്നു. ഭർത്താവിന് കോയമ്പത്തൂരില്‍ ഡ്രൈവറായി ജോലി ലഭിച്ചു. ഭാര്യയ്ക്കും ഇതേസ്ഥലത്ത് തരക്കേടില്ലാത്ത ഉദ്യോഗം ലഭിച്ചു. ഇതിനിടെയാണ് മൊബൈല്‍ ലൊക്കേഷന്‍ കേന്ദ്രീകരിച്ച് പോലീസ് കോയമ്പത്തൂരിലെത്തുന്നത്. പോലീസാണ് ഇവരെ കാര്യങ്ങള്‍ പറഞ്ഞു മനസ്സിലാക്കി വീട്ടിലേക്കു വണ്ടി കയറ്റിയത്. തിരുവനന്തപുരത്ത് എത്തിയ മൂവരും നിയമനടപടിക്രമങ്ങള്‍ പൂര്‍ത്തീകരിച്ചശേഷം ബന്ധുക്കള്‍ക്കൊപ്പം ചേര്‍ന്നു.

ശ്മശാന ഭൂമിയിൽ മാലിന്യം കത്തിക്കൽ: കരാറുകാരന് പിഴ ചുമത്തി

വിതുര: മേമല വാർഡ് പരിധിയിലെ ശ്മശാന ഭൂമിയിൽ പഞ്ചായത്ത് ഓഫീസിൽ നിന്നുള്ള മാലിന്യം കത്തിച്ച സംഭവത്തിൽ കരാറുകാരന് പിഴ ചുമത്തി പഞ്ചായത്ത്. മേമല സ്വദേശി ശ്രീകുമാറിനാണ് സോളിഡ് വേസ്റ്റ് മാനേജ്മെന്‍റ് റൂൾ പ്രകാരം 5,000 രൂപ പിഴ ചുമത്തിയത്. ഹരിത കർമ സേനയുടെ നേതൃത്വത്തിൽ മാലിന്യ ശേഖരണവും സംസ്കരണവും നടക്കുന്നതിനിടെ ശ്മശാന ഭൂമിയിൽ മാലിന്യം കത്തിയമരുന്ന ദൃശ്യങ്ങൾ പുറത്തു വന്നതു വിവാദമായിരുന്നു. പിന്നാലെ യുഡിഎഫ് രംഗത്ത് വന്നിരുന്നു. പേപ്പർ മാലിന്യത്തിനു പുറമേ ഇലക്ട്രോണിക്, പ്ലാസ്റ്റിക് മാലിന്യം ഉൾപ്പെടെ കത്തുന്നത് ദൃശ്യങ്ങളിൽ വ്യക്തമായിരുന്നു. ഇതു സംബന്ധിച്ച് റിപ്പോർട്ട് നൽകാൻ സെക്രട്ടറി ഷിബു പ്രണാബിനെ പ്രസിഡന്‍റ് മഞ്ജുഷ ജി.ആനന്ദ് ചുമതലപ്പെടുത്തിയിരുന്നു. തുടർന്ന് നൽകിയ റിപ്പോർട്ടിന്റെ അടിസ്ഥാനത്തിലാണ് പിഴ ചുമത്തിയത്. എന്നാൽ ഇലക്ട്രോണിക്, പ്ലാസ്റ്റിക് മാലിന്യം കത്തിച്ചെന്ന വാദം തെറ്റാണെന്ന് പഞ്ചായത്ത് പ്രസിഡന്‍റ് മഞ്ജുഷ ജി.ആനന്ദ് പറഞ്ഞു. തദ്ദേശ തിരഞ്ഞെടുപ്പിനു മുന്നോടിയായി ശ്മശാനത്തിന്‍റെ പ്രവർത്തനം തടസപ്പെടുത്തി രാഷ്ട്രീയ മുതലെടുപ്പ് നടത്തി തെറ്റിധാരണ പരത്താൻ വേണ്ടി വിഷയം യുഡിഎഫ് വിവാദമാക്കാൻ ശ്രമിക്കുകയാണെന്നും മാലിന്യം കത്തിച്ച സംഭവത്തിൽ പഞ്ചായത്ത് അടിയന്തിര നടപടി സ്വീകരിച്ചുവെന്നും പ്രസിഡന്‍റ് പറഞ്ഞു.

പ്ലസ്ടു വിദ്യാർഥിനിയെ പീഡിപ്പിച്ചയാൾ അറസ്റ്റിൽ

പൂവാർ: പ്ലസ്ടു വിദ്യാർഥിനിയെ പീഡിപ്പിച്ച കേസിലെ പ്രതിയെ കാഞ്ഞിരംകുളം പോലീസ് പിടികൂടി. കരുംകുളം പുല്ലുവിള തോട്ടം പുരയിടത്തിൽ ദീപു ഗിൽബർട്ടി(23) നെയാണ് കാഞ്ഞിരംകുളം പോലീസ് അറസ്റ്റ് ചെയ്തത്. 5ന് വൈകുന്നേരം 6 ന് പെൺകുട്ടിയെ പ്രലോഭിപ്പിച്ച് പുതിയതുറയിൽ നിന്നും തട്ടി കൊണ്ടുപോയി ലോഡ്ജിൽ എത്തിച്ച് പീഡിപ്പിക്കുകയായിരുന്നു.പെൺകുട്ടിയെ കാണാനില്ലെന്ന് അമ്മ കാഞ്ഞിരംകുളം പോലീസിൽ നൽകിയ പരാതിയെ തുടർന്ന് അന്വേഷണം നടത്തി വരുന്നതിനിടയിൽ ഇന്നലെ പെൺകുട്ടിയേയും പ്രതിയേയും പൂവാർ ഭാഗത്തു വച്ച് പിടികൂടിയത്. കാഞ്ഞിരംകുളം എസ് എച്ച് ഒ പി.രതീഷിന്‍റെ നേതൃത്വത്തിൽ എസ് സി പി ഒ അരുൺ,വിഷ്ണു, സിപിഒ-മാരായ നിതിൻ,ബിനു എന്നിവരടങ്ങിയ സംഘമാണ് പ്രതിയെ പിടികൂടിയത്. ഇയാൾ കഴിഞ്ഞ വർഷം സമാനമായ രീതിയിൽ പ്രായപൂർത്തിയാകാത്ത പെൺകുട്ടിയെ പീഡിപ്പിച്ച കേസിലെ പ്രതിയാണ്. ജാമ്യത്തിലിറങ്ങിയ പ്രതിയാണ് വീണ്ടും പീഡന കേസിൽപ്പെട്ടത്. പ്രതിയെ കോടതി റിമാൻഡ് ചെയ്തു.

ലോറി തടഞ്ഞ് പണപ്പിരിവ്: ആർടി ഓഫീസിലെ മുൻ ഡ്രൈവർ അറസ്റ്റില്‌

വിഴിഞ്ഞം: ബൈപ്പാസിലൂടെ രാത്രികാലങ്ങളിൽ വരുന്ന വാഹനങ്ങൾ തടഞ്ഞ് പണപ്പിരിവ് നടത്തിയ സംഭവത്തിൽ ആർടി ഓഫീസിലെ മുൻ താൽക്കാലിക ഡ്രൈവറെ കാഞ്ഞിരംകുളം പോലീസ് അറസ്റ്റ് ചെയ്തു. കാഞ്ഞിരംകുളം കരിച്ചൽ രതീഷ് ഭവനിൽ രതീഷ് (37) ആണ് അറസ്റ്റിലായത്. ഇയ്യാൾ പാറശാല ആർടി ഓഫീസിൽ രണ്ടുവർഷത്തോളം ഡ്രൈവറായി ജോലി ചെയ്തിട്ടുണ്ടെന്ന് പോലീസ് അറിയിച്ചു. കോവളം - കാരോട് ബൈപ്പാസിൽ പൂവാർ - കാഞ്ഞിരംകുളം സ്റ്റേഷൻ പരിധിയിൽ രാത്രികാലങ്ങളിൽ ലോറികൾ തടഞ്ഞ് വാഹന ഉടമകളിൽ നിന്നും വൻതോതിൽ പണം പിരിവ് നടത്തിവന്ന കേസിലെ രണ്ടാം പ്രതിയാണ് പിടിയിലായ രതീഷ്. കേസിൽ ആർടിഒ എൻഫോഴ്സ്മെന്‍റ് വിഭാഗത്തിലെ ഒരു ഉദ്യോഗസ്ഥനെ ഒന്നാം പ്രതിയാക്കിയാണ് കേസ്. തമിഴ്നാട് തിരുനെൽവേലി ജില്ലയിലെ കാവൽകിണർ സ്വദേശിയായ സെന്തിൽകുമാർ നൽകിയ പരാതിയിൽ ഫോൺനമ്പർ കേന്ദ്രീകരിച്ച് നടത്തിയ അന്വേഷണത്തിലാണ് രതീഷിനെ കാഞ്ഞിരംകുളം പോലീസ് അറസ്റ്റ് ചെയ്തത്. തമിഴ്നാട്ടിൽ നിന്നും വിഴിഞ്ഞം അദാനി പോർട്ടിലേക്ക് കരിങ്കല്ല് കയറ്റി കൊണ്ടുവരുന്ന ലോറികളിൽ നിന്നാണ് ഉദ്യോഗസ്ഥരും പ്രതിയും ചേർന്ന് പണം പിരിപ്പ് നടത്തി വന്നത്. ആർടിഒ എൻഫോഴ്സ്‌മെൻറ് വിഭാഗത്തിലെ ഉദ്യോഗസ്ഥരെന്ന് പറഞ്ഞാണ് ലോറികൾ തടഞ്ഞ് പണം തട്ടിയെടുക്കുന്നതെന്ന് പരാതിയിൽ പറയുന്നു. കേസുമായി ബന്ധപ്പെട്ട് കൂടുതൽ പേരെ ചോദ്യം ചെയ്യേണ്ടതുണ്ട് എന്നാണ് കാഞ്ഞിരംകുളം എസ് എച്ച് ഒ.പി രതീഷ് പറയുന്നത്. അറസ്റ്റ് ചെയ്ത പ്രതിയെ കോടതി റിമാൻഡ് ചെയ്തു.

സംസ്ഥാനത്ത് മാറ്റം കൊണ്ടുവരുന്നതിൽ പഞ്ചായത്തുകളുടെ പങ്ക് വലുത്: മന്ത്രി കെ.എൻ.ബാലഗോപാൽ

നെടുമങ്ങാട് : സംസ്ഥാനത്ത് സാധാരണ ജനങ്ങളുടെ ഇടയിൽ മാറ്റം കൊണ്ടുവരുന്നതിൽ പഞ്ചായത്തുകളുടെ പങ്ക് വലുതാണെന്ന് ധന മന്ത്രി കെ.എൻ.ബാലഗോപാൽ. പ്ലാൻ ഫണ്ടിന്‍റെ 30 ശതമാനം പ്രവർത്തനങ്ങളും പഞ്ചായത്തുകൾ വഴിയാണ് നടപ്പിലാക്കുന്നത്. ഡിജിറ്റൽ സാക്ഷരത പോലുള്ള അഭിമാന പദ്ധതികൾ നടപ്പിലാക്കാൻ കഴിഞ്ഞത് പഞ്ചായത്തുകളുടെ പൂർണ പിന്തുണ കൊണ്ടാണ്. ഉഴമലയ്ക്കൽ പഞ്ചായത്തിന്‍റെ ആദ്യ പ്രസിഡന്‍റ് എം.പ്രഭാകരന്‍റെ സ്മരണാർഥം നിർമ്മിച്ച സ്വരാജ് ഹാൾ ഉദ്ഘാടനം ചെയ്തു സംസാരിക്കുകയായിരുന്നു മന്ത്രി. സ്വരാജ് ട്രോഫി അവാർഡ് തുക വിനിയോഗിച്ചാണ് ഹാൾ നിർമ്മിച്ചത്. രണ്ട് തവണ ജില്ലയിൽ ഒന്നാം സ്ഥാനവും ഈ വർഷം സംസ്ഥാന തലത്തിൽ രണ്ടാമതും ആയിരുന്നു പഞ്ചായത്ത്. 80 ലക്ഷം രൂപ ചിലവിൽ നിർമ്മിച്ച ഹാളിൽ 500 പേർക്ക് ഇരിക്കാവുന്ന സൗകര്യമുണ്ട്. ജി. സ്റ്റീഫൻ എംഎൽഎ അധ്യക്ഷത വഹിച്ചു. പഞ്ചായത്ത് പ്രസിഡന്‍റ് ജെ.ലളിത, ജില്ലാ പഞ്ചായത്ത് അംഗം എ.മിനി, പഞ്ചായത്ത് വൈസ് പ്രസിഡന്‍റ് എസ്.ശേഖരൻ തുടങ്ങിയവർ പങ്കെടുത്തു.

കളക്ടറേറ്റിലെ സെക്യൂരിറ്റി കാബിന്‍ നിര്‍മാണം പുനരാരംഭിച്ചു

പേരൂര്‍ക്കട: കുടപ്പനക്കുന്ന് കളക്ടറേറ്റില്‍ മാസങ്ങളായി നിലച്ചിരുന്ന സെക്യൂരിറ്റി കാബിന്‍ നിര്‍മാണം പുനരാരംഭിച്ചു. കഴിഞ്ഞ ഏഴിന് ദീപിക പ്രസിദ്ധീകരിച്ച വാര്‍ത്തയെത്തുടര്‍ന്നാണ് കാബിന്‍ നിര്‍മാണം വീണ്ടും തുടങ്ങിയത്. കഴിഞ്ഞ ഏഴ് മാസമായി കാബിന്‍ നിര്‍മാണം നിലച്ചിരിക്കുന്നതും കാബിന്‍റെ മേല്‍ക്കൂര ബലപ്പെടുത്താതെ വെറുതെ ഷീറ്റുപാകിയിരിക്കുന്നതും വാര്‍ത്തയില്‍ സൂചിപ്പിച്ചിരുന്നു. പിഡബ്ല്യുഡിയ്ക്ക് ക്യാബിന്‍റെ നിര്‍മാണച്ചുമതല നല്‍കിയതുമുതല്‍ പണി ഇഴഞ്ഞുനീങ്ങുകയായിരുന്നു. കളക്ടറേറ്റില്‍ നിലവിലുള്ള നാലു സുരക്ഷാജീവനക്കാര്‍ക്കുവേണ്ടിയാണ് ക്യാബിന്‍ ഒരുങ്ങുന്നത്. വാര്‍ത്തയെ തുടര്‍ന്ന് അധികൃതര്‍ ഇടപെട്ട് മേല്‍ക്കൂരയിലെ ഷീറ്റുകള്‍ മാറ്റി. പകരം കോണ്‍ക്രീറ്റ് ചെയ്യുന്നതിനുള്ള പ്രവര്‍ത്തനങ്ങള്‍ ആരംഭിച്ചു. എഡിഎം ടി.കെ വിനീതിന്‍റെ ഇടപെടലിലൂടെ കാബിന്‍റെ നിര്‍മാണം എത്രയും വേഗം പൂര്‍ത്തീകരിക്കാന്‍ തീരുമാനമായിട്ടുണ്ട്.

തിരുവനന്തപുരം കോർപറേഷൻ : സംവരണ വാർഡുകൾ

തിരുവനന്തപുരം: തദ്ദേശസ്വയംഭരണ തെരഞ്ഞെടുപ്പിന് മുന്നോടിയായി തിരുവനന്തപുരം കോർപറേഷൻ പരിധിയിലെ സംവരണ വാർഡുകളുടെ നറുക്കെടുപ്പ് നടത്തി. എൽഎസ്ജിഡി ഡയറക്ടർ (അർബൻ) സൂരജ് ഷാജിയുടെ നേതൃത്വത്തിൽ നന്ദൻകോട് സ്വരാജ് ഭവനിലാണ് നറുക്കെടുപ്പ് നടത്തിയത്. പട്ടികജാതി സ്ത്രീ സംവരണം 4-കാട്ടായിക്കോണം, 10- പാങ്ങപ്പാറ, 73-ആറ്റുകാല്‍, 96-അലത്തറ, 99 കുളത്തൂര്‍ പട്ടികജാതി സംവരണം 19 -കാച്ചാണി, 24-പേരൂര്‍ക്കട, 51-ആറന്നൂര്‍, 95-ചെറുവയ്ക്കല്‍ സ്ത്രീ സംവരണം 3-ചന്തവിള, 7-ചേങ്കോട്ടുകോണം, 8-ചെമ്പഴന്തി, 9-കാര്യവട്ടം, 11-ശ്രീകാര്യം, 15-അമ്പലമുക്ക്, 16-കുടപ്പനക്കുന്ന്, 18-നെട്ടയം, 26-കുറവന്‍കോണം, 30-നാലാഞ്ചിറ, 31-ഇടവക്കോട്, 33-മെഡിക്കല്‍കോളേജ്, 34- പട്ടം, 35-കേശവദാസപുരം, 36-ഗൗരിശപട്ടം, 39-പാളയം, 40-വഴുതയ്ക്കാട് , 41-ശാസ്തമംഗലം, 43-തിരുമല, 47-പൂജപ്പുര, 50-വലിയശാല, 55-പൊന്നുമംഗലം, 59-നെടുങ്കാട്, 60-കാലടി, 61-കരുമം, 62-പുഞ്ചക്കരി, 64-വെങ്ങാനൂര്‍, 67-ഹാര്‍ബര്‍, 68-വെള്ളാര്‍, 70-പൂന്തുറ, 71-പുത്തന്‍പള്ളി, 72-അമ്പലത്തറ, 74-കളിപ്പാന്‍കുളം, 76- ബീമാപള്ളി, 77- വലിയതുറ, 78 വള്ളക്കടവ്, 79-ശ്രീവരാഹം, 80-മണക്കാട്, 83-പെരുന്താന്നി, 84-ശ്രീകണ്‌ഠേശ്വരം, 90-വെട്ടുകാട്, 91-കരിയ്ക്കകം, 92-കടകംപള്ളി, 93-അണമുഖം, 94- ആക്കുളം, 101-പള്ളിത്തുറ.

ശബരിമല സ്വർണക്കൊള്ള: മഹിളാ കോൺഗ്രസ് കുറ്റവിചാരണ നടത്തി

വിതുര : ശബരിമലയിലെ സ്വർണക്കൊള്ളയിൽ പ്രതിഷേധിച്ച് മഹിളാ കോൺഗ്രസ് തൊളിക്കോട് മണ്ഡലം കമ്മിറ്റിയുടെ നേതൃത്വത്തിൽ മന്ത്രി വി.എൻ.വാസവന്‍റെയും ദേവസ്വം ബോർഡ് പ്രസിഡന്‍റ് പി.എസ്.പ്രശാന്തിന്‍റെയും കോലങ്ങളിൽ ചെരുപ്പ് മാല അണിയിച്ച് കുറ്റവിചാരണ നടത്തി. സംസ്ഥാന സെക്രട്ടറി ഷെമി ഷംനാദ് ഉദ്‌ഘാടനം ചെയ്തു. ഡിസിസി ജനറൽ സെക്രട്ടറി തോട്ടുമുക്ക് അൻസർ, കോൺഗ്രസ് തൊളിക്കോട് മണ്ഡലം പ്രസിഡന്‍റ് തൊളിക്കോട് ഷംനാദ്, യുഡിഎഫ് ചെയർമാൻ ചായം സുധാകരൻ, എൻ.എസ്.ഹാഷിം, കെ.എൻ.അൻസർ, ബി.പ്രതാപൻ, ശോഭന ജോർജ്, എസ്.സുഷമ, സൗമ്യ രാജ്, ആനപ്പെട്ടി കബീർ, പ്രീത കുമാരി, വീണ കുമരേശൻ, സത്താർ ഇരുത്തല, സജീദ് മേടയിൽ, എം.എം.സലീം, മുബീൻ മുഹമ്മദ് എന്നിവർ സംസാരിച്ചു.

യുവാവിന്‍റെ കൈയിൽ കുടുങ്ങിയ വിലങ്ങ് ഫയർഫോഴ്സ് മുറിച്ചു മാറ്റി

പേരൂര്‍ക്കട: യുവാവിന്‍റെ ഇടതു കൈത്തണ്ടയില്‍ കുടുങ്ങിയ വിലങ്ങ് ഫയര്‍ഫോഴ്‌സ് ഉദ്യോഗസ്ഥര്‍ മുറിച്ചു നീക്കി. മണക്കാട് സ്വദേശിയായ 25കാരന്‍റെ കൈകളില്‍ അണിഞ്ഞിരുന്ന വിലങ്ങാണ് ഇടതു കൈത്തണ്ടയുടെ ഭാഗത്ത് കുടുങ്ങുകയും ഏറെനേരത്തെ പരിശ്രമത്തിനൊടുവില്‍ മുറിച്ചുമാറ്റുകയും ചെയ്തത്. മദ്യപിച്ച് വീട്ടില്‍ പ്രശ്‌നമുണ്ടാക്കിയതിനെ തുടർന്നാണ് ഫോര്‍ട്ട് പോലീസ് 25കാരനെ സ്റ്റേഷനിലെത്തിച്ചത്. ഇവിടെയും ഇയാള്‍ അക്രമാസക്തനായതോടെ വിലങ്ങണിയിക്കുകയായിരുന്നു. യുവാവ് ബഹളം തുടര്‍ന്നതോടെ വിലങ്ങ് ഇടതു കൈത്തണ്ടയില്‍ കുടുങ്ങി. ഫോര്‍ട്ട് സ്റ്റേഷനിലെ പോലീസ് ഉദ്യോഗസ്ഥര്‍ ഇയാളെ തിരുവനന്തപുരം ഫയര്‍‌സ്റ്റേഷനിലെത്തിച്ചു. ഗ്രേഡ് സ്റ്റേഷന്‍ ഓഫീസര്‍ സതീഷ്‌കുമാറും ഉദ്യോഗസ്ഥരായ എം.എസ് ഷഹീര്‍, വി.എസ് സവിന്‍ എന്നിവരും ചേര്‍ന്ന് 20 മിനിറ്റ് പരിശ്രമിച്ചാണ് വിലങ്ങ് നീക്കിയത്.

നെടുമങ്ങാട്ട് 24കാരിക്ക് അമീബിക് മസ്തിഷ്ക ജ്വരം

നെടുമങ്ങാട് : ഇരിഞ്ചയത്ത് 24 വയസുള്ള യുവതിയ്ക്ക് അമീബിക് മസ്തിഷ്ക ജ്വരം സ്ഥിരീകരിച്ചു. പനി ഉൾപ്പെടെയുള്ള ശാരീരിക ബുദ്ധിമുട്ടുകൾ ഉണ്ടായത്തിനെതുടർന്ന് കഴിഞ്ഞ ആഴ്ച മെഡിക്കൽ കോളജ് ആശുപത്രിയിൽ ചികിത്സയിലായിരുന്നു. രക്ത പരിശോധനയിലാണ് മസ്തിഷ്ക ജ്വരം സ്ഥിരീകരിച്ചത്. യുവതി നിലവിൽ വെന്‍റിലേറ്ററിലാണ്. യുവതിയുടെ രണ്ട് വയസുള്ള കുട്ടിയും നിരീക്ഷണത്തിലാണെന്ന് ആരോഗ്യ വകുപ്പ് അധികൃതർ അറിയിച്ചു. എന്നാൽ രോഗ ബാധയുടെ ഉറവിടത്തെ സംബന്ധിച്ച് വ്യക്തത വന്നിട്ടില്ല.

നേമം സഹകരണ ബാങ്ക് തട്ടിപ്പ് : രാജേന്ദ്രനെ ബാങ്കിലെത്തിച്ച് തെളിവെടുപ്പ് നടത്തി

നേമം : നേമം സഹകരണ ബാങ്കില്‍ സാമ്പത്തിക തട്ടിപ്പ് നടത്തിയ മുന്‍ സെക്രട്ടറി എ.ആര്‍. രാജേന്ദ്രനെ ക്രൈംബ്രാഞ്ച് ഇന്നലെ ബാങ്കിലെത്തിച്ച് തെളിവെടുപ്പ് നടത്തി. ഉച്ചയ്ക്ക് രണ്ടരയോടെയാണ് ക്രൈംബ്രാഞ്ച് സംഘം തെളിവെടുപ്പിനായി എത്തിയത്. രാജേന്ദ്രനെ പുറത്തിറക്കിയതോടെ നിക്ഷേപകര്‍ കൂകി വിളിച്ചും മുദ്രാവാക്യം വിളിച്ചും പ്രതിഷേധിച്ചു. സ്ത്രീകളടക്കം നിരവധി നിക്ഷേപകര്‍ രാവിലെ മുതല്‍ രാജേന്ദ്രനെ കൊണ്ടുവരുന്നതും കാത്ത് ബാങ്കിന് മുന്നില്‍ നിലയുറപ്പിച്ചിരുന്നു. തട്ടിപ്പിലെ രണ്ടാം പ്രതിയായ ഇയാള്‍ക്കെതിരെ ക്രൈംബ്രാഞ്ച് കഴിഞ്ഞ ആഴ്ച ലുക്ക്ഔട്ട് നോട്ടീസ് പുറത്തിറക്കിയിരുന്നു. ഇതിനെ തുടര്‍ന്നാണ് അറസ്റ്റ് നടന്നത്. പ്രതിഷേധം ഭയന്ന് കനത്ത പോലീസ് കാവൽ ഏര്‍പ്പെടുത്തിയിരുന്നു. നേമം ബാങ്കിലെ സാമ്പത്തിക തട്ടിപ്പിനുശേഷം ഇയാള്‍ മാസങ്ങളായി ഒളിവില്‍ കഴിയുകയായിരുന്നു. ഇതിനിടെ സുപ്രീംകോടതിയില്‍ നിന്നും ജാമ്യത്തിനായി ശ്രമം നടത്തിയിരുന്നു. രാജേന്ദ്രന്‍ സെക്രട്ടറിയായിരുന്ന കാലത്ത് കോടികളുടെ ക്രമക്കേട് നടന്നതായി സഹകരണ വകുപ്പിന്‍റെ അന്വേഷണത്തില്‍ കണ്ടെത്തിയിരുന്നു. കേസുമായി ബന്ധപ്പെട്ട് മറ്റൊരു മുന്‍ സെക്രട്ടറിയും ഒന്നാം പ്രതിയുമായ എസ്. ബാലചന്ദ്രന്‍ നായരെയും , മുന്‍ പ്രസിഡന്‍റ് ആര്‍. പ്രദീപ് കുമാറിനെയും ക്രൈംബ്രാഞ്ച് നേരത്തെ അറസ്റ്റ് ചെയ്തിരുന്നു. 96 കോടിയോളം രൂപയുടെ തട്ടിപ്പ് നടന്ന ബാങ്കില്‍ ഇപ്പോള്‍ സിപിഎം നേതൃത്വത്തിലുള്ള ഭരണസമിതിയെ പിരിച്ചുവിട്ട ശേഷം അഡ്മിനിസ്‌ട്രേറ്റര്‍ ഭരണം ഏര്‍പ്പെടുത്തിയിരിക്കുകയാണ്. നിക്ഷേപം തിരികെ ലഭിച്ചില്ലെങ്കില്‍ വന്‍ പ്രതിഷേധ സമരങ്ങള്‍ സംഘടിപ്പിക്കുമെന്ന് കൂട്ടായ്മ രക്ഷാധികാരി ശാന്തിവിള മുജീബ് റഹ്‌മാനും കണ്‍വീനര്‍ കൈമനം സുരേഷും അറിയിച്ചു.

സ്കൂൾ കായികമേള: കാർഷിക കോളജ് സ്റ്റേഡിയം വേദിയാകുന്നു

തിരുവല്ലം: 21 മുതൽ 28 വരെ തലസ്ഥാനത്ത് നടക്കുന്ന കേരള സ്കൂൾ കായിക മേളയ്ക്ക് വെള്ളായണി കാർഷിക കോളജ് ഇൻഡോർ സ്റ്റേഡിയം വേദിയാകുന്നു. ശ്രീ അയ്യൻകാളി മെമ്മോറിയൽ സ്കൂളിൽ ഭക്ഷണ വിതരണം കുറ്റമറ്റ നിലയിൽ നടത്തുന്നതിനായി ചേർന്ന സംഘാടക സമിതി രൂപീകരണ യോഗം കല്ലിയൂർ ഗ്രാമപഞ്ചായത്ത് പ്രസിഡന്‍റ് എം. സോമശേഖരൻ ഉദ്ഘാടനം ചെയ്തു. ഹാൻഡ് ബോൾ ഇൻക്ലൂസിവ്, ജനറൽ, സബ്ജൂനിയർ, ജൂനിയർ, സീനിയർ ആൺ, പെൺ വിഭാഗങ്ങളിലായി ഒക്ടോബർ 22 മുതൽ 27 വരെയാണ് മത്സരങ്ങൾ നടക്കുക. പഴയിടം നമ്പൂതിരിയുടെ മേൽനോട്ടത്തിൽ തയ്യാറാക്കുന്ന ഭക്ഷണം രാവിലെ 6.30 മുതൽ കുട്ടികൾക്ക് നൽകി തുടങ്ങും. 700 പേർക്കാണ് ദിവസേന ഭക്ഷണ വിതരണം നടക്കുക. കെഎസ്ടിഎ ക്കാണ് ഭക്ഷണ കമ്മിറ്റിയുടെ ചുമതല. എം.സോമശേഖരൻ ചെയർമാനും ഡബ്ലിയു. ആർ .ഹീബ കൺവീനറുമായ വിപുലമായ സംഘാടക സമിതി രൂപീകരിച്ചു.

യൂണിയൻ ബാങ്ക് ഓഫ് ഇന്ത്യ റീജണൽ ഓഫീസ് ഹിന്ദി ഉത്സവ് ആഘോഷിച്ചു

തിരുവനന്തപുരം: യൂണിയൻ ബാങ്ക് റീജണൽ ഓഫീസ് ഹിന്ദി ഉത്സവം സംഘടിപ്പിച്ചു. തിരുവനന്തപുരം ഗവൺമെന്‍റ് വനിതാ കോളജിലെ ഹിന്ദി വിഭാഗം മേധാവി ഡോ. എം.എം.ഷംലി മുഖ്യാതിഥിയായി. ആകെ 13 മത്സരങ്ങൾ സംഘടിപ്പിക്കുകയും 79 സമ്മാനങ്ങൾ നൽകുകയും ചെയ്തു. റീജണൽ ഹെഡ് നരേഷ് കുമാർ വൈ അധ്യക്ഷ പ്രസംഗം നടത്തി. ഡപ്യൂട്ടി റീജണൽ ഹെഡ് സോണി ജേക്കബ് സ്വാഗത പ്രസംഗം നടത്തി. ഇന്‍റർ ഒഫീഷ്യൽ ലാംഗ്വേജ് ഷീൽഡ്, വ്യക്തിഗത അവാർഡ്, ഡിപ്പാർട്ട്‌മെന്‍റ് അവാർഡ്, ദ്വിഭാഷാ റഫറൻസ് സാഹിത്യം, ഡിജിറ്റൽ പേയ്‌മെന്‍റ് ആൻഡ് കളക്ഷൻ മെത്തേഡ്‌സ് എന്നിവയും പുറത്തിറക്കി. ഏപ്രിൽ 1 മുതൽ സെപ്റ്റംബർ 30 വരെ സംഘടിപ്പിച്ച ഔദ്യോഗിക ഭാഷാ ഇംപ്ലിമെന്‍റേഷൻ ആൻഡ് അച്ചീവ്‌മെന്‍റിന്‍റെ പിപിടിയും ഔദ്യോഗിക ഭാഷ സീനിയർ മാനേജർ കെ.രാജേഷ് അവതരിപ്പിച്ചു.

തകർന്ന ബാരിക്കേഡ് കാണാതെ അധികൃതർ; വാഹനയാത്രികർ അപകട ഭീഷണിയിൽ

വിഴിഞ്ഞം : വാഹനയാത്രക്കാരുടെ സുരക്ഷക്കായി നിർമിച്ച ബാരിക്കേഡ് തകർന്നിട്ട് മാസങ്ങളായെങ്കിലും തിരിഞ്ഞ് നോക്കാതെ ദേശീയപാത അധികൃതർ. കോവളം - കാരോട് ബൈപ്പാസിന്‍റെ സർവീസ് റോഡിൽ വിഴിഞ്ഞം കല്ലുവെട്ടാൻ കുഴിയിലാണ് അപകടക്കെണി. മാസങ്ങൾക്ക് മുൻപ് ഇവിടെ അമിത ഭാരം കയറ്റി വന്ന രണ്ട് വാഹനങ്ങൾ കയറ്റം കയറാനാകാതെ താഴെക്ക് ഉരുണ്ട് ഏലായിലേക്ക് പതിച്ചത് നാട്ടുകാരെ ഭീതിയിലാഴ്ത്തിയിരുന്നു. വിഴിഞ്ഞം മുക്കോല , കല്ലുവെട്ടാൻ കുഴി എന്നിവിടങ്ങളിൽ നിന്ന് കുത്തനെയുള്ള ഇറക്കം വന്നവസാനിക്കുന്ന ഭാഗത്തുള്ള സുരക്ഷാവേലിയാണ് തകർന്നത്. മുന്നറിയിപ്പ് സംവിധാനങ്ങളോ തെരുവ് വിളക്കുകളോ ഇല്ലാത്ത വിജനമായ സ്ഥലത്ത് അപകടത്തിൽപ്പെട്ടാൽ വാഹനങ്ങൾ ഇരുപതടിയോളം താഴ്ചയുള്ള ഏലായിലേക്ക് പതിക്കും. ബാരിക്കേഡ് തകർന്ന ഭാഗത്ത് ഉയർന്ന് നിൽക്കുന്ന ഇരുമ്പ് കമ്പി വഴിയാത്രക്കാർക്ക് പോലും ഭീഷണിയായിമാറി. ചതുപ്പായിരുന്ന വെങ്ങാനൂർ ഏലാനികത്തി കെട്ടിപ്പൊക്കിയ ബൈപ്പാസും ബൈറോഡും വെള്ളക്കെട്ടിനും വഴി തെളിച്ചിരുന്നു. റോഡിന് ഭീഷണിയായ വെള്ളക്കെട്ട് ഒഴിവാക്കാൻ അധികൃതർ അശാസ്ത്രീയമായി അറ്റകുറ്റപ്പണി നടത്തിയ സ്ഥലത്താണ് ബാരിക്കേഡ് തകർന്നുള്ള അപകടക്കെണി. ഇതിന് എത്രയും വേഗം പരിഹാരം കാണണമെന്നാണ് നാട്ടുകാരുടെ ആവശ്യം.

ദീപാവലി പടക്കങ്ങളുമായി പൂഴിക്കുന്നിലെ മിനി ശിവകാശി

നേമം : ദീപാവലി പടക്കങ്ങളുമായി പൂഴിക്കുന്നിലെ മിനി ശിവകാശി. ഇത്തവണയും ദീപാവലി കച്ചവടത്തിനായി പുതുമ നിറഞ്ഞ പടക്കങ്ങളാണ് പൂഴിക്കുന്നിലെ പ്രത്യേകത. ശിവകാശിയില്‍ നിന്നും നിരവധി ഫാന്‍സി ഇനങ്ങളാണ് ഇത്തവണയും വില്‍പ്പനയ്‌ക്കെത്തിയിട്ടുള്ളത്. പുകയില്ലാത്ത നാനോ കമ്പിത്തിരി മുതല്‍ മാനത്ത് പൂക്കുലപോലെ പലവര്‍ണ്ണങ്ങളില്‍ പൊട്ടിചിതറും ഗോള്‍ഡന്‍ ഐ റെഡ് ഷോട്ട് വരെ വില്‍പ്പനയ്ക്കായി നിരന്നു. കൂടുതല്‍ സമയം നീണ്ടുനില്‍ക്കുന്ന മൊജിട്ടോ പൂത്തിരി, പരിപാടികള്‍ക്കും മറ്റ് ആഘോഷങ്ങള്‍ക്ക് ഉപയോഗിക്കുന്ന 36 എണ്ണം കിട്ടുന്ന മഞ്ച് ഷോട്ട്, ദേശീയ പതാകയുടെ നിറങ്ങളില്‍ വിടരുന്ന പൂത്തിരി, ഓലപടക്ക്, കുറ്റിപടക്ക്, ഓലമാല തുടങ്ങിയ നാടന്‍ പടക്കുകള്‍ക്ക് പുറമെ ശിവകാശിയില്‍ നിന്നുമെത്തുന്ന വിവിധ കമ്പനികളുടെ എല്ലാ തരം ഫാന്‍സി ഇനങ്ങളും ഇവിടെ വില്‍പ്പനയ്ക്കുണ്ട്. റോള്‍ പൊട്ടാസില്‍ തുടങ്ങി വിവിധ തരത്തിലും ആകൃതിയിലുമുള്ള കമ്പിത്തിരി, തറചക്രം, ഫയര്‍ പെന്‍സില്‍, റോക്കറ്റ്, ആകാശത്ത് വര്‍ണമഴ പെയ്യിക്കുന്ന പടക്കങ്ങള്‍, ചെറിയ ശബ്ദത്തോടെ പൊട്ടുന്ന കുരുവി വെടി തുടങ്ങിയ നിരവധി തരങ്ങളും ഇവിടെ ലഭ്യമാണ്. ഫോട്ടോ ഫ്‌ളാഷുപോലെ മിന്നി തിളങ്ങുന്ന പൂക്കുറ്റികള്‍ തന്നെ നിരവധി ഇനമുണ്ട്. ഹരിത പടക്കങ്ങള്‍ക്കാണ് മുന്‍തൂക്കമെന്ന് പൂഴിക്കുന്നിലെ ദേവി ഫയര്‍വര്‍ക്‌സ് ഉടമകളിലൊരാളായ ജിഞ്ചു പറഞ്ഞു. കമ്പിത്തിരിയുടെ നീളമനുസരിച്ചാണ് വില. ക്രേസി ബൂം, ബോണ്‍സായ് ഗാര്‍ഡന്‍, മോറി മാജിക്ക്, ബിഗ് ഷോ തുടങ്ങി ശിവകാശിയില്‍ ലഭിക്കുന്ന മിക്കയിനങ്ങളും പൂഴിക്കുന്നിലും വില്‍പ്പനയ്ക്കായി എത്തുന്നു. വെടിക്കെട്ടില്‍ ആശാനായിരുന്ന ഗോവിന്ദനാണ് വര്‍ഷങ്ങള്‍ക്ക് മുമ്പ് പൂഴിക്കുന്നിന് ഈ പ്രശസ്തിയുണ്ടാക്കി കൊടുത്തത്. ഗോവിന്ദനാശാന്‍ മരിച്ചപ്പോള്‍ അദ്ദേഹത്തിന്‍റെ പാത പിന്‍തുടര്‍ന്ന് മക്കളായ മണിയാനാശാനും ശശിയാശാനും ഈ രംഗത്ത് പേരെടുക്കുകയായിരുന്നു. മണിയനാശാനും ശശി ആശാനും മരിച്ചതോടുകൂടി ആശാന്മാരുടെ പെരുമ നിലനിര്‍ത്താന്‍ പിന്‍ തലമുറക്കാരാണ് ഇപ്പോള്‍ രംഗത്തുള്ളത്.

വയലാറിന് കവിത്വം വരമായി ലഭിച്ചു: മധു

തിരുവനന്തപുരം: കവിത്വം ദൈവാനുഗ്രഹമായി ലഭിച്ച പ്രതിഭാശാലിയായിരുന്നു വയലാർ രാമവർമയെന്ന് മലയാളത്തിന്‍റെ പ്രിയ ചലച്ചിത്ര നടനും സംവിധായകനുമായ മധു. ഒരു വലിയ കവിയുടെയോ ഗാനരചയിതാവിന്‍റെയോ യാതൊരുവിധ പരിവേഷങ്ങളുമില്ലാതെയാണ് വയലാർ ജീവിച്ചത് എന്നും മധു പറഞ്ഞു. വയലാർ രാമവർമ സാംസ്കാരിക വേദി സംഘടിപ്പിക്കുന്ന വയലാർ രാമവർമ സാംസ്കാരിക ഉത്സവത്തിന്‍റെ ആദ്യ ദിവസമായ ഇന്നലെ വയലാർ വജ്രരത്ന പുരസ്കാരം ഏറ്റുവാങ്ങി പ്രസംഗിക്കുകയായിരുന്നു അദ്ദേഹം. കണ്ണമൂലയിലെ മധുവിന്‍റെ വസതിയായ ശിവഭവനിൽ നടന്ന ചടങ്ങിൽ കടകംപള്ളി സുരേന്ദ്രൻ എംഎൽഎ പുരസ്കാരം സമ്മാനിച്ചു. പത്തുദിവസം നീണ്ടു നിൽക്കുന്ന ഉത്സവത്തിന്‍റെ പതാകയും കടകംപള്ളി സുരേന്ദ്രൻ മധുവിന് നൽകി ഉത്സവത്തിന് തുടക്കം കുറിച്ചു. വയലാർ രാമവർമയുടെ അൻപതാം ചരമവാർഷികത്തിന്‍റെ ഭാഗമായാണ് സാംസ്കാരിക ഉത്സവം. വയലാറിനൊപ്പം ജീവിക്കുക, വയലാറിന്‍റെ പാട്ടുകൾ സ്വീകരിക്കാൻ കഴിയുക എന്നത് ജീവിതത്തിലെ വലിയ ഭാഗ്യമാണെന്നും മധു പറഞ്ഞു. തന്‍റെ സിനിമാ ജീവിതത്തിൽ വയലാറുമായി അടുത്തിടപഴകാനുള്ള നിരവധി അവസരങ്ങൾ ഉണ്ടായിട്ടുണ്ട്. പുലർച്ചയാണ് വയലാർ കവിതകളും ഗാനങ്ങളും എഴുതിയിരുന്നത്. പകൽസമയം സുഹൃത്തുക്കളുമായി ഒത്തുകൂടുവാനും യാത്ര ചെയ്യുവാനും വയലാർ താൽപര്യം കാണിച്ചിരുന്നു. വയലാറിനെ ദേഷ്യപ്പെട്ടോ സങ്കടപ്പെട്ടോ ഒരിക്കലും താൻ കണ്ടിട്ടില്ല. വളരെ സൗഹാർദ്ദപരമായി എല്ലാവരോടും ഇടപഴകുന്ന ഒരു വലിയ മനുഷ്യൻ കൂടിയായിരുന്നു അദ്ദേഹം. മലയാള നാടും ഭാഷയും ഉള്ള കാലത്തോളം വയലാർ രാമവർമ നിലനിൽക്കും എന്നും മധു ചൂണ്ടിക്കാട്ടി. ദാദാ സാഹിബ് ഫാൽക്കേയോട് ഇന്ത്യൻ സിനിമ എങ്ങനെ കടപ്പെട്ടിരിക്കുന്നുവോ ഏതാണ്ട് അതിനു സമാനമായി മലയാള സിനിമ മധു എന്ന മഹാനായ നടനോട് കടപ്പെട്ടിരിക്കുന്നുവെന്ന് കടകംപള്ളി സുരേന്ദ്രൻ പറഞ്ഞു. മുൻ മന്ത്രി എം.വിജയകുമാർ സന്നിഹിതനായിരുന്നു. ചടങ്ങിന് വയലാർ രാമവർമ സാംസ്കാരിക വേദി സെക്രട്ടറി മണക്കാട് രാമചന്ദ്രൻ സ്വാഗതം ആശംസിച്ചു. ഗായകരായ രവിശങ്കർ, സരിത രാജീവ്, രഞ്ജിനി സുധീരൻ, ശ്രീജിത്ത് തുടങ്ങിയവർ മധു അഭിനയിച്ച ചിത്രങ്ങളിലെ തുൾപ്പെടെ പ്രശസ്ത ഗാനങ്ങൾ ആലപിച്ചു.

എൻജിനീയറിംഗ് വിഭാഗത്തിൽ ആവശ്യത്തിന് ഉദ്യോഗസ്ഥരില്ല : പദ്ധതി നടത്തിപ്പിനെ പ്രതികൂലമായി ബാധിക്കുന്നു

നെയ്യാറ്റിന്‍കര : നെയ്യാറ്റിന്‍കര നഗരസഭയിലെ എൻജിനീയറിംഗ് വിഭാഗത്തില്‍ ആവശ്യത്തിന് ഉദ്യോഗസ്ഥരില്ലായെന്നത് പദ്ധതി നടത്തിപ്പിനെ പ്രതികൂലമായി ബാധിക്കുന്നുവെന്ന് ആക്ഷേപം. പെരുന്പഴുതൂര്‍ ഗ്രാമപഞ്ചായത്ത് കൂട്ടിച്ചേര്‍ത്തതിനെത്തുടര്‍ന്ന് നഗരസഭയില്‍ 44 വാര്‍ഡുകള്‍ നിലവില്‍ വന്നിട്ട് ഏറെക്കാലമായി. അതേ സമയം എൻജിനീയറിംഗ് വിഭാഗത്തിലെ ഉദ്യോഗസ്ഥരുടെ എണ്ണത്തില്‍ മാറ്റം വന്നില്ല. 44 വാര്‍ഡുകളിലെയും പദ്ധതി നടത്തിപ്പിനായി ആകെയുള്ളത് ഒരു എഇ യാണ്. ചെറുതും വലുതുമായ പദ്ധതികളുടെ നടത്തിപ്പും പരിശോധനയും കൂടാതെ വാര്‍ഡുകളിലെ ബില്‍ഡിംഗ് പെര്‍മിറ്റ് മുതലായ ജോലികളും എഇയുടെ ചുമതലകളില്‍പ്പെടുന്നു. വാര്‍ഡ് പുന:ക്രമീകരണത്തോടെ 44 ല്‍ നിന്നും 46 ആയി വാര്‍ഡുകളുടെ എണ്ണം ഉയര്‍ന്നപ്പോള്‍ എഇ യ്ക്ക് മാത്രമല്ല എൻജിനീയറിംഗ് വിഭാഗത്തിലെ പരിമിതമായ ഉദ്യോഗസ്ഥര്‍ക്കെല്ലാം ഇരട്ടി പണിയായിരിക്കുകയാണ്.

ആംബുലന്‍സ് ഡ്രൈവര്‍മാര്‍ക്ക് സൗജന്യ പാക്കേജുമായി കിംസ്‌ഹെല്‍ത്ത്

തിരുവനന്തപുരം: ലോക ട്രോമാ ദിനാചരണത്തിന്‍റെ ഭാഗമായി ആംബുലന്‍സ് ഡ്രൈവര്‍മാരുടെ നിസ്വാർത്ഥ സേവനത്തിന് ആദരമർപ്പിച്ച് തിരുവനന്തപുരം കിംസ്ഹെല്‍ത്ത്. ആംബുലന്‍സ് ഡ്രൈവര്‍മാര്‍ക്കായി പ്രത്യേക ഹെല്‍ത്ത് ചെക്കപ്പ് പാക്കേജും അവതരിപ്പിച്ചു. തിരുവനന്തപുരത്തും സമീപ പ്രദേശങ്ങളിലുമായി തിരഞ്ഞെടുത്ത ഇരുന്നൂറോളം ആംബുലന്‍സ് ഡ്രൈവര്‍മാര്‍ക്ക് പരിശോധനകളും ഡോക്ടർ കൺസൾട്ടേഷനും ഈ പദ്ധതിയിലൂടെ സൗജന്യമായി ലഭ്യമാകും. കിംസ്‌ഹെല്‍ത്തില്‍ 'വീൽസ് ഓഫ് ഹോപ്പ്' എന്ന പേരില്‍ സംഘടിപ്പിച്ച പരിപാടിയിൽ തിരുവനന്തപുരം സിറ്റി ഡെപ്യൂട്ടി കമ്മീഷണര്‍ ഓഫ് പോലീസ് എം.കെ. സുല്‍ഫിക്കര്‍ പാക്കേജ് അവതരിപ്പിച്ചു. കിംസ്‌ഹെല്‍ത്ത് ചെയര്‍മാനും മാനേജിങ് ഡയറക്ടറുമായ ഡോ. എം.ഐ സഹദുള്ള അധ്യക്ഷത വഹിച്ചു. കിംസ്‌ഹെല്‍ത്ത് സംഘടിപ്പിക്കാനൊരുങ്ങുന്ന ട്രോമ അപ്‌ഡേറ്റ് കോൺഫറൻസ്, ട്രോമ റെസസ് 2025 ലേക്കുള്ള ആദ്യ ഇൻവിറ്റേഷനും ഈ പരിപാടിയുടെ ഭാഗമായി നടത്തി. കിംസ്‌ഹെല്‍ത്ത് എമര്‍ജന്‍സി മെഡിസിന്‍ വിഭാഗം കണ്‍സള്‍ട്ടന്റും ക്ലിനിക്കല്‍ ഡയറക്ടറുമായ ഡോ. ഷമീം കെ.യു. ചടങ്ങില്‍ സ്വാഗതവും ഓർത്തോപീഡിക്‌സ് വിഭാഗം സീനിയർ കൺസൾട്ടന്‍റും ഗ്രൂപ്പ് കോ-ഓർഡിനേറ്ററുമായ ഡോ. മുഹമ്മദ് നസീർ നന്ദിയും അറിയിച്ചു.

വിമാനത്താവളത്തിൽ മോക്ക് ഡ്രിൽ സംഘടിപ്പിച്ചു

തിരുവനന്തപുരം: തിരുവനന്തപുരം അന്താരാഷ്ട്ര വിമാനത്താവളത്തിന്‍റെ നേതൃത്വത്തിൽ ഫീനിക്സ് 25 എന്ന പേരിൽ ഫുൾ സ്കെയിൽ എമർജൻസി മോക്ക് ഡ്രിൽ സംഘടിപ്പിച്ചു. എയ്റോഡ്രോം അടിയന്തര പ്രതികരണ പദ്ധതി വിലയിരുത്തുന്നതിനും മെച്ചപ്പെടുത്തുന്നതിനുമാണ് മോക് ഡ്രിൽ നടത്തിയത്. ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ മാനദണ്ഡങ്ങൾ പാലിച്ചു നടത്തിയ പരിശീലന പരിപാടിയിലൂടെ അഗ്നിശമന പ്രവർത്തനങ്ങൾ, ജീവൻ രക്ഷാപ്രവർത്തനം ഉൾപ്പെടെയുള്ള തയ്യാറെടുപ്പുകളാണ് വിശകലനം ചെയ്തത്. വിമാനത്താവളത്തിനുള്ളിൽ രാത്രിയിൽ അടിയന്തര സാഹചര്യം ഉണ്ടായാലുള്ള പ്രതികരണ ശേഷിയാണ് കൃത്രിമ സാഹചര്യങ്ങൾ സൃഷ്ടിച്ച് എയർപോർട്ട് റെസ്ക്യൂ ആൻഡ് ഫയർ ഫൈറ്റിങ് സർവീസസിന്‍റെ നേതൃത്വത്തിൽ വിലയിരുത്തിയത്. വിമാനത്താവളത്തിലെ വിവിധ വകുപ്പുകൾക്കൊപ്പം ജില്ലാ ദുരന്ത നിവാരണ അഥോറിറ്റി, ആരോഗ്യവകുപ്പ്, പോലീസ്, സ്വകാര്യ ആശുപത്രികൾ എന്നിവരും മോക് ഡ്രില്ലിൽ പങ്കെടുത്തു. വിവിധ മേഖലകളിൽ നിന്നുള്ള വിദഗ്ധർ മോക് ഡ്രിൽ നിരീക്ഷിച്ച് റിപ്പോർട്ട് തയാറാക്കി.

ആശുപത്രിയിലെ കൂട്ടിരിപ്പുകാരുടെ ഫോണുകളും പണവും കവർന്നയാൾ പിടിയിൽ

പേരൂര്‍ക്കട: കിള്ളിപ്പാലം പിആര്‍എസ് ആശുപത്രിയില്‍ റിസപ്ഷന്‍ ഏരിയയില്‍ ഉറങ്ങുകയായിരുന്ന രോഗികളുടെ കൂട്ടിരിപ്പുകാരുടെ മൊബൈല്‍ ഫോണുകളും പണവും കവര്‍ന്നയാളെ പിടികൂടി. തിരുവനന്തപുരം വെഞ്ഞാറമൂട് രാജേശ്വരി ഭവനില്‍ എന്‍എസ്കെ എന്നറിയപ്പെടുന്ന മുരളി (59) ആണ് ദിവസങ്ങള്‍ക്കു മുമ്പ് അര്‍ധരാത്രിയോടടുത്ത് ആശുപത്രിയിലെത്തി മോഷണം നടത്തിയത്. കരമന എസ്ഐ ശ്രീജിത്ത്, ഗ്രേഡ് എസ്ഐ സതീഷ്‌കുമാര്‍, എസ്‌സിപിഒ അജി, സിപിഒമാരായ കിരണ്‍, അനു എന്നിവരടങ്ങുന്ന സംഘമാണ് തമ്പാനൂരിലെ ഒരു ഹോട്ടലിനു സമീപത്തുനിന്നും ഇയാളെ പിടികൂടിയത്. കരമനയില്‍ താമസിക്കുന്ന രണ്ടുപേര്‍ തങ്ങളുടെ ബന്ധുവിന് കൂട്ടിരിക്കാനായി എത്തിയിരുന്നു. ഇവര്‍ ആശുപത്രിയില്‍ റിസപ്ഷന്‍ ഏരിയയില്‍ ഉറങ്ങുന്നതു ശ്രദ്ധിച്ച പ്രതി നാലു മൊബൈല്‍ ഫോണുകള്‍, മൂന്ന് എടിഎം കാര്‍ഡുകള്‍, 700 രൂപ എന്നിവ ഇവരുടെ ബാഗില്‍ നിന്നു കവരുകയായിരുന്നു. പുലര്‍ച്ചെ നാലിന് ഉണര്‍ന്ന കൂട്ടിരിപ്പുകാര്‍ തങ്ങളുടെ മൊബൈല്‍ ഫോണുകള്‍ നഷ്ടപ്പെട്ടുവെന്നറിഞ്ഞതോടെ പോലീസില്‍ പരാതി നല്‍കി. 32,000 രൂപ വിലവരുന്ന ഒരു ഫോണും പണവുമാണ് പ്രതിയില്‍ നിന്നു കണ്ടെത്താനായത്. ഇയാളെ കോടതി റിമാന്‍ഡ് ചെയ്തു.

റബർ പുകപ്പുരയ്ക്ക് തീപിടിച്ചു : മൂന്നു ലക്ഷത്തിലധികം രൂപയുടെ റബർ ഷീറ്റുകളും കെട്ടിടവും കത്തിനശിച്ചു

കാട്ടാക്കട: റബർ പുകപ്പുരയ്ക്ക് തീപിടിച്ചു വൻനാശനഷ്ടം.മൂന്നു ലക്ഷത്തിലധികം രൂപയുടെ റബർ ഷീറ്റുകളും 700 സ്ക്വയർ ഫീറ്റിലെ കെട്ടിടവും കത്തി നശിച്ചു. കാട്ടാക്കട പൂവച്ചൽ കള്ളോട് സ്വദേശി ഷൗക്കത്തലിയുടെ വീടിനു മുന്നിലെ 700 സ്ക്വയർ ഫീറ്റിൽ ഉള്ള പുകപ്പുരയാണ് തീപിടിച്ചത്. വ്യാഴാഴ്ച രാത്രിയോടെയായിരുന്നു സംഭവം. രാവിലെയാണ് ഇവിടെ റബ്ബർ ഷീറ്റുകൾ ഉണങ്ങാനായി നിറച്ചത്. രാത്രി പത്തുമണിയോടെയാണ് തീ പിടിക്കുന്നത്. കാട്ടാക്കടയിൽ നിന്നും രണ്ട് യൂണിറ്റ് അഗ്നിരക്ഷാസേന എത്തിയാണ് തീ നിയന്ത്രണവിധേയമാക്കിയത്. മണിക്കൂറുകൾ നീണ്ട പരിശ്രമത്തിൽ തീ കെടുത്തിയെങ്കിലും റബർ ഷീറ്റ് ആയതിനാൽ വീണ്ടും കത്താനുള്ള സാധ്യത ഉണ്ടായിരുന്നു. തുടർന്ന് പുകപ്പുരയുടെ ഭിത്തിയുടെ ഒരുഭാഗം ജെസിബി ഉപയോഗിച്ച് ഇടിച്ച് വലിയ ദ്വാരമുണ്ടാക്കി ഇതിലൂടെ ഉരുകിയ റബർ ഷീറ്റുകൾ ജെസിബി കൊണ്ട് തന്നെ പുറത്തേക്ക് എടുത്തു. വീണ്ടും വെള്ളം ചീറ്റി തീ പൂർണമായും കെടുത്തി. 30 വർഷത്തിലധികമായി ഇത്തരത്തിൽ റബ്ബർ ഷീറ്റ് പുകയിട്ട് ഉണക്കുന്നത് പതിവായിരുന്നു. ആദ്യമായിട്ടാണ് ഇങ്ങനെ ഒരു സംഭവം എന്ന് ഷൗക്കത്തലി പറഞ്ഞു. കാട്ടാക്കട അഗ്നി രക്ഷാസേന സീനിയർ ഫയർ ആൻഡ് റെസ്ക്യൂ ഓഫീസർ ബിനുവിന്‍റെ നേതൃത്വത്തിൽ മനോജ്,ഷഫീഖ്,ആനന്ദ്, അനു,നൗഫൽ,വിജിൻ,സുമേഷ്,വിനോദ് എന്നിവരാണ് തീയണക്കാൻ പരിശ്രമിച്ചത്.

അജ്ഞാത മൃതദേഹം മോര്‍ച്ചറിയില്‍

മെഡിക്കല്‍കോളജ്: തിരുവനന്തപുരം മെഡിക്കല്‍കോളജ് ആശുപത്രിയില്‍ ചികിത്സയിലിരിക്കെ മരിച്ചയാളുടെ മൃതദേഹം മോര്‍ച്ചറിയില്‍‌. 70 വയസ് പ്രായം തോന്നിക്കുന്ന മെലിഞ്ഞ ശരീരവും നരച്ച താടിയും കഷണ്ടിയുമുള്ളയാളുടെ മൃതദേഹമാണ് മോര്‍ച്ചറിയില്‍ സൂക്ഷിച്ചിട്ടുള്ളത്. ഒരാഴ്ച മുമ്പ് ഉള്ളൂര്‍ ഭാഗത്ത് അവശനിലയില്‍ കണ്ടെത്തിയ വയോധികനെ പോലീസ് ആശുപത്രിയില്‍ പ്രവേശിപ്പിക്കുകയായിരുന്നു. ചികിത്സയിലിരിക്കെ ബുധനാഴ്ചയായിരുന്നു മരണം. മരിച്ചയാളുടെ പേരും വിലാസവും ബന്ധുക്കളെക്കുറിച്ചുള്ള വിവരങ്ങളും അറിയാവുന്നവര്‍ മെഡിക്കല്‍കോളജ് പോലീസുമായി ബന്ധപ്പെടണം. ഫോണ്‍: 0471 2443145 (മെഡിക്കല്‍ കോളജ് സ്റ്റേഷന്‍), 9497987008 (മെഡിക്കല്‍ കോളജ് സിഐ).

കാറിടിച്ച് പരിക്കേറ്റയാൾ മരിച്ചു

പറണ്ടോട്: വാഹനാപകടത്തിൽ പരിക്കേറ്റ് ചികിത്സയിലായിരുന്നയാൾ മരിച്ചു. വിനോഭനികേതൻ വേട്ടുവൻതോട് ചരുവിള വീട്ടിൽ അബ്ദുൽ ഹമീദ്(67) ആണ് മരിച്ചത്. കഴിഞ്ഞ 26ന് തച്ചൻകോട് സിഎസ്ഐ ചർച്ചിനു സമീപത്തുവച്ച് കാർ ഇടിച്ചായിരുന്നു അപകടം. ഭാര്യ: സുബൈദബീവി. മക്കൾ: ജുനൈദ, ദിൽഷാദ്. മരുമകൻ: ഷംനാദ്.

അനധികൃത പാര്‍ക്കിംഗ് ഒഴിവാക്കണം: ജില്ലാ കളക്ടർ

പേരൂര്‍ക്കട: സൈക്കിള്‍ ട്രാക്കില്‍ സൈക്കിള്‍ യാത്രികര്‍ക്ക് തടസം സൃഷ്ടിക്കുന്ന രീതിയില്‍ പാര്‍ക്ക് ചെയ്തിരിക്കുന്ന വാഹനങ്ങള്‍ അടിയന്തരമായി ഒഴിവാക്കണമെന്നു ജില്ലാ കളക്ടര്‍ അനുകുമാരി. വഴുതക്കാട് സ്മാര്‍ട്ട് റോഡ് മുതല്‍ തൈക്കാട് വരെയാണു സൈക്കിള്‍ ട്രാക്ക് ഫുട്പാത്തിനോടു ചേര്‍ന്നുള്ള റോഡില്‍ നിര്‍മിച്ചിരിക്കുന്നത്. ഇവിടെ വ്യാപകമായി കാറുകള്‍ പാര്‍ക്ക് ചെയ്തിരിക്കുന്നത് സൈക്കിള്‍ യാത്രികര്‍ക്ക് അസൗകര്യം സൃഷ്ടിക്കുകയാണ്.‌ ട്രാക്കില്‍ അനധികൃതമായി വാഹനങ്ങള്‍ പാര്‍ക്ക് ചെയ്യുന്നത് ട്രാക്കിന് കേടുപാടുകള്‍ ഉണ്ടാക്കുകയും ചെയ്യും. ഈ വിഷയത്തില്‍ കര്‍ശന നിരീക്ഷണം ഉണ്ടായിരിക്കുമെന്നും നിയമലംഘനം നടത്തുന്നവര്‍ക്കെതിരേ പിഴ ഈടാക്കുമെന്നും കളക്ടര്‍ വ്യക്തമാക്കി.

യുസിഎം ഇന്‍റർ സ്കൂൾ കലാമത്സരം

തിരുവനന്തപുരം : യുണൈറ്റഡ് ക്രിസ്ത്യൻ മൂവ്മെന്‍റിന്‍റെ (യുസിഎം) നേതൃത്വത്തിൽ നടത്തിയ ഇന്‍റർ സ്കൂൾ കലാമത്സരങ്ങളിൽ മുക്കോലയ്ക്കൽ സെന്‍റ് തോമസ് റസിഡൻഷ ൽ സ്കൂൾ ഓവറോൾ ചാന്പ്യൻഷിപ്പ് കരസ്ഥമാക്കി. എൽപി വിഭാഗത്തിൽ നാലാഞ്ചിറ നവജീവൻ ബഥനി വിദ്യാലയം, യുപി വിഭാഗത്തിൽ മുക്കോലയ്ക്കൽ സെന്‍റ് തോമസ് സെൻട്രൽ സ്കൂൾ, ഹൈസ്കൂൾ വിഭാഗത്തിൽ പൂജപ്പുര സെന്‍റ് മേരീസ് സെൻട്രൽ സ്കൂൾ, ഹയർ സെക്കന്‍ററി വിഭാഗത്തിൽ മുക്കോലയ്ക്കൽ സെന്‍റ് തോമസ് റസിഡൻഷ്യൽ സ് കൂൾ എന്നിവരും വിജയികളായി. ബഥനി പ്രൊവിൻഷ്യൽ സെക്രട്ടറി ഫാ. ജോർജ് തോമസ് കലാമത്സരം ഉദ്ഘാടനം ചെയ്തു. യുസിഎം പ്രസിഡന്‍റ് ബെയ്സി സഖറിയ, മുൻ പ്രസിഡന്‍റ് ഡോ. കോശി എം. ജോർജ്, പ്രോഗ്രാം ചെയർമാൻ അംബ്രോസ് പി. കുന്നിൽ, സെക്രട്ടറി ബിജു ഉമ്മൻ, കണ്‍വീനർ എം.ജി. ജെയിംസ് എന്നിവർ പ്രസംഗിച്ചു.

പൂവാർ പഞ്ചായത്തിൽ രോഗമില്ലാത്ത ഗ്രാമം പദ്ധതി

പാറശാല: പാറശാല ബ്ലോക്ക് പഞ്ചായത്ത് നടപ്പിലാക്കിവരുന്ന രോഗമില്ലാത്ത ഗ്രാമം പദ്ധതിയുടെ അഞ്ചാംഘട്ടം പ്രവര്‍ത്തനങ്ങള്‍ക്ക് പൂവാര്‍ പഞ്ചായത്തില്‍ തുടക്കമായി. പദ്ധതിയുടെ ഭാഗമായുള്ള മെഡിക്കല്‍ ക്യാമ്പ് പൂവാര്‍ പഞ്ചായത്ത് പരണിയം ട്രിപ്പിള്‍ ജൂബിലി ഹാളില്‍ പൂവാര്‍ പഞ്ചായത്ത് പ്രസിഡന്‍റ് ജെ. ലോറന്‍സ് ഉദ്ഘാടനം ചെയ്തു. ബ്ലോക്ക് പഞ്ചായത്ത് ആരോഗ്യ വിദ്യാഭ്യാസകാര്യ സ്ഥിരംസമിതി അധ്യക്ഷന്‍ ആര്യദേവന്‍ അധ്യക്ഷത വഹിച്ചു. പൂവാര്‍ സിഎച്ച്സി മെഡിക്കല്‍ ആഫീസര്‍ ഡോ. ലത റിപ്പോര്‍ട്ട് അവതരിപ്പിച്ചു. ബ്ലോക്ക് പഞ്ചായത്ത് അംഗം രേണുക, പഞ്ചായത്ത് അംഗങ്ങളായ ശരത് കുമാര്‍, ഫില്‍മ അലക്‌സാണ്ടര്‍, ഡോ. പ്രവീണ്‍, ഡോ. മണി, പൂവാര്‍ സിഎച്ച്സി പിആർഒ അഖിലേഷ്, എച്ച്ഐ ജെയിന്‍ തുടങ്ങിയവര്‍ പങ്കെടുത്തു.

ചെറിയ കൊല്ല ജംഗ്ഷനിലെ വെള്ളക്കെട്ടിനു പരിഹാരമില്ല

വെള്ളറട: മലയോര ഹൈവേയിലെ ചെറിയ കൊല്ല ജംഗ്ഷനിലെ വെള്ളക്കെട്ടിനു പരിഹാരമില്ല. ചാറ്റല്‍ മഴ പെയ്താല്‍ പോലും വെള്ളറട-പാറശാല റോഡില്‍ ചെറിയ കൊല്ല ജംഗ്ഷന്‍ വലിയ കുളമാകും. ഹൈവേ നിർമാണം തുടങ്ങിയതു മുതല്‍ ഇതാണ് അവസ്ഥ. കഴിഞ്ഞ ദിവസത്തെ മഴയിലും പ്രദേശത്തെ റോഡുള്‍പ്പെടെ പലയിടത്തും വെള്ളക്കെട്ടുണ്ടായി. മഴയില്‍ ചെറിയ കൊല്ല ജംഗ്ഷനില്‍ വാഹനങ്ങള്‍ക്ക് കടന്നു പോകാനാകാത്ത വിധത്തില്‍ വെള്ളക്കെട്ട് രൂപപ്പെട്ടുന്നു. മലയോര ഹൈവേ നിർമാണം പൂര്‍ത്തിയായ ഭാഗമാണിവിടം. ഹൈവേയിലെ ഓട നിർമാണം അശാസ്ത്രീയമാണെന്ന് നേരത്തെ പരാതിയുയര്‍ന്നിരുന്നു. ചെറിയകൊല്ല ജംഗ്ഷനിലെ വെള്ളക്കെട്ടില്‍ യാത്രക്കാര്‍ക്ക് അപകട സാധ്യതയാണുള്ളത്. വീടുകളില്‍ വെള്ളം കയറുകയും കിണറുകളില്‍ മാലിന്യം നിറയുകയും ചെയ്യുന്നു. ഇതിന് അടിയന്തരമായി പരിഹാരം കാണമെന്നാണ് നാട്ടുകാരുടെ ആവശ്യം. വെള്ളക്കെട്ടും നാശനഷ്ടങ്ങളും ഒഴിവാക്കാന്‍ പിഡബ്ല്യുഡി അടിയന്തരമായി ശാസ്ത്രീയമായി ഓട നിർമിക്കുകയും മഴവെള്ളം കെട്ടിനില്‍ക്കാത്ത രീതിയിലുള്ള റോഡ് നിർമാണം സാധ്യമാക്കണമെന്നും നാട്ടുകാര്‍ ആവശ്യപ്പെടുന്നു. മലയോര ഹൈവേയിലെ ഒന്നാം റീച്ചിലെ ചെറിയ കൊല്ല ജംഗ്ഷനിലെ വെള്ളക്കെട്ടിനു പരിഹാരം തേടി രണ്ടുവര്‍ഷം മുന്‍പ് ബിജെപി നടത്തിയ സമരത്തെ തുടർന്നു നിർമാണ ചുമതലയുള്ള കമ്പനിയുടെ ആള്‍ക്കാരെത്തി വെള്ളക്കെട്ടിനു സമീപത്തെ ഓട പൊളിച്ച് വെള്ളം ഒഴുക്കിവിടാനുള്ള നടപടി തുടങ്ങിയിരുന്നു. തുടര്‍ന്ന് ഇവിടെ ഓട നിർമിച്ചു. വെള്ളക്കെട്ട് പൂര്‍ണമായി ഒഴിവാക്കാനായിട്ടില്ലെങ്കിലും ചെറിയ കൊല്ല ശിവക്ഷേത്ര റോഡിനു സമീപത്തുകൂടി പുതിയ ഓട നിർമിച്ചു വെള്ളം വയലിനു സമാന്തരമായി ഒഴുകുന്ന ഓടയിലേക്ക് വിട്ടു. പാറശാല വെള്ളറട റോഡില്‍ മാസങ്ങളായി തുടരുന്ന വെള്ളക്കെട്ട് അവസാനിപ്പിക്കാന്‍ അധികൃതര്‍ നടപടിയെടുക്കാത്തതില്‍ പ്രതിഷേധിച്ച് ബിജെപി പ്രതിഷേധ സമരം നടത്തിയിരുന്നു.

സീനിയര്‍ ആണ്‍കുട്ടികളില്‍ കാര്‍ത്തികും പെണ്‍കുട്ടികളില്‍ എ.ആര്‍. നീതുവും ചാമ്പ്യന്‍മാര്‍

ആറ്റിങ്ങൽ: വിതുര വൊക്കേഷണല്‍ ഹയര്‍സെക്കന്‍ഡറി സ്‌കൂളില്‍ നിന്നുള്ള കാര്‍ത്തിക് കൃഷ്ണയാണ് സീനിയര്‍ ആണ്‍കുട്ടികളിലെ വ്യക്തിഗത ചാമ്പ്യന്‍. ഹാമര്‍ത്രോ, ഡിസ്‌കസ് ത്രോ, ഷോട്ട്പുട്ട് എന്നിവയില്‍ സ്വര്‍ണം സ്വന്തമാക്കിയാണ് കാര്‍ത്തിക്കിന്‍റെ ചാമ്പ്യന്‍ പട്ടനേട്ടം. മത്സരിച്ച മൂന്നിനങ്ങളിലും സ്വര്‍ണം സ്വന്തമാക്കി സീനിയര്‍ പെണ്‍കുട്ടികളില്‍ എ.ആര്‍. നീതു വ്യക്തിഗത ചാമ്പ്യന്‍ പട്ടം സ്വന്തമാക്കി. 800,1500, 3000 മീറ്ററുകളിലെ സുവര്‍ണ കുതിപ്പാണ് അയ്യങ്കാളി സ്‌പോര്‍ട്‌സ് സ്‌കൂളില്‍നിന്നുള്ള നീതുവിനെ ചാമ്പ്യനാക്കിയത്. ജൂണിയര്‍ ആണ്‍കുട്ടികളില്‍ മൈലം ജി.വി. രാജാ സ്‌കൂളില്‍ നിന്നുള്ള എ. ശിവപ്രസാദിനാണ് വ്യക്തിഗത ചാമ്പ്യന്‍പട്ടം. 800, 1500, 3000 മീറ്ററുകളില്‍ ഒന്നാം സ്ഥാനത്തോടെ 15 പോയിന്‍റുമായാണ് ശിവപ്രസാദ് ഈ വിഭാഗത്തില്‍ ചാമ്പ്യനായത്. ജൂണിയര്‍ പെണ്‍കുട്ടികളിലും വ്യക്തിഗത ചാമ്പ്യന്‍പട്ടം ജി.വി. രാജയിലെ താരത്തിനാണ്. ജി.വി രാജയില്‍ നിന്നുള്ള പി.ആര്‍. അമല ഡിസ്‌കസ് ത്രോയിലും ഷോട്ട് പുട്ടിലും ഒന്നാം സ്ഥാനവും ജാവലിന്‍ ത്രോയില്‍ രണ്ടാം സ്ഥാനവുമായി 13 പോയിന്‍റോടെയാണ് ചാമ്പ്യന്‍പട്ടത്തിന് അര്‍ഹയായത്. സബ് ജൂണിയര്‍ ആണ്‍കുട്ടികളിലും പെണ്‍കുട്ടികളിലും വ്യക്തിഗത ചാമ്പ്യന്‍പട്ടം ജി.വി. രാജയിലെ കുട്ടികള്‍ക്കാണ്. ആണ്‍കുട്ടികളില്‍ എസ്. ആകാശ് 100, 200 മീറ്ററുകളില്‍ ഒന്നാം സ്ഥാനവും ലോംഗ് ജംപില്‍ രണ്ടാം സ്ഥാനവുമായി 11 പോയിന്‍റോടെ ചാമ്പ്യനായപ്പോള്‍ സബ് ജൂണിയര്‍ പെണ്‍കുട്ടികളില്‍ ശ്രീനന്ദന, 80 മീറ്റര്‍ ഹര്‍ഡില്‍സ് ഹൈജംപ്, ലോംഗ് ജംപ് എന്നിവയില്‍ ഒന്നാമതെത്തിയപ്പോള്‍ ജൂലിയറ്റ് ഷാബിന്‍ 100, 200, 400 മീറ്ററുകളില്‍ ഒന്നാമതെത്തി വ്യക്തിഗത ചാമ്പ്യന്‍പട്ടം പങ്കുവെച്ചു.

ജി.വി. രാജയിൽനിന്നു സംസ്ഥാന മീറ്റിന് യോഗ്യത നേടിയത് 50 താരങ്ങള്‍

ആറ്റിങ്ങല്‍: റവന്യൂ ജില്ലാ സ്‌കൂള്‍ മീറ്റില്‍ നിന്നും സംസ്ഥാന സ്‌കൂള്‍ മീറ്റിലേക്ക് മത്സരത്തിനു യോഗ്യത നേടിയ താരങ്ങളില്‍ ഹാഫ് സെഞ്ചുറിയുമായി മൈലം ജി.വി. രാജാ സ്‌പോര്‍ട്‌സ് സ്‌കൂള്‍. സ്‌പോര്‍ട് സ്‌കൂള്‍ വിഭാഗത്തില്‍ ആറ്റിങ്ങല്‍ ശ്രീപാദം സിന്തറ്റിക് ട്രാക്കില്‍ ജി.വി. രാജയുടെ അശ്വമേധമായിരുന്നു ഇന്നലെ നടന്നത്. തൊട്ടതെല്ലാം പൊന്നാക്കുന്ന പ്രകടനമാണ് ജി.വി. രാജാ താരങ്ങള്‍ നടത്തിയത്. മൂന്നു ദിവസംകൊണ്ട് ജി.വി. രാജയുടെ മിടുക്കന്‍മാര്‍ വാരിക്കൂട്ടിയത് 45 സ്വര്‍ണവും 34 വെളളിയും 10 വെങ്കലവും ഉള്‍പ്പെടെ 89 മെഡലുകളുമായി 255 പോയിന്‍റുകൾ. 54 അംഗ സംഘമാണ് മൈലത്തുനിന്നും ആറ്റിങ്ങലിലേക്ക് വണ്ടി കയറിയത്. ഇതില്‍ 50 പേരും മെഡല്‍ നേട്ടം സ്വന്തമാക്കി സംസ്ഥാന മീറ്റിനു പോരാടാനുള്ള യോഗ്യത സ്വന്തമാക്കി. മത്സരിച്ച മൂന്നിനങ്ങളിലും സ്വര്‍ണം സ്വന്തമാക്കിയ ശിവപ്രസാദിന്‍റെ പ്രകടനം ഏറെ ശ്രദ്ധിക്കപ്പെട്ടു. 800,1500, 3000 എന്നീ വിഭാഗങ്ങളിലാണ് ശിവപ്രസാദ് ജി.വി. രാജയ്ക്ക് മെഡല്‍ സമ്മാനിച്ചത്. പെണ്‍കുട്ടികളില്‍ ജൂലിയറ്റ് ഷാബിന്‍ 100, 200, 400 മീറ്ററുകളിലും ശ്രീനന്ദ ഹൈജംപ്, ലോംഗ് ജംപ്, 80 മീറ്റര്‍ ഹര്‍ഡില്‍ എന്നിവയില്‍ സ്വര്‍ണം നേടി ട്രിപ്പില്‍ സ്വര്‍ണത്തിന് അവകാശിയായി. റവന്യൂ ജില്ലാ സ്‌കൂള്‍ മീറ്റില്‍ ജനറല്‍ കാറ്റഗറിയില്‍ 12 വിദ്യാഭ്യാസ ജില്ലകള്‍ നേടിയ സുവര്‍ണ നേട്ടത്തേക്കാള്‍ ഒന്‍പതു സ്വര്‍ണനേട്ടമാണ് ജി.വി. രാജാ സ്‌കൂള്‍ മാത്രം സ്വന്തമാക്കിയത്. സ്‌പോര്‍ട്സ് സകൂള്‍ വിഭാഗത്തില്‍ അയ്യങ്കാളി സ്‌പോര്‍സ് സ്‌കൂള്‍ 65.5 പോയിന്‍റുമായി രണ്ടാമതും 11 പോയിന്‍റുമായി തിരുവനന്തപുരം സായ് മൂന്നാമതുമെത്തി.

കിരീടം നേടി നോര്‍ത്ത് ഉപജില്ല

ആറ്റിങ്ങല്‍: ആദ്യദിനം മുതല്‍ ഇഞ്ചോടിഞ്ചുള്ള പോരാട്ടത്തിനൊടുവില്‍ ചാമ്പ്യന്‍പട്ടത്തില്‍ തിരുവനന്തപുരം നോര്‍ത്ത് മുത്തമിട്ടു. ശ്രീപാദം സ്റ്റേഡിയത്തില്‍ നോര്‍ത്തിന്‍റെ കുട്ടികള്‍ ആവേശച്ചുവടുവെച്ചു. റവന്യൂ ജില്ലാ അത്‌ലറ്റിക് മീറ്റില്‍ അവസാന മത്സര ഇനംവരെ കാത്തിരിക്കേണ്ടിവന്നു ചാമ്പ്യന്‍മാരെ കണ്ടെത്താന്‍.11 സ്വര്‍ണവും 10 വെള്ളിയും 13 വെങ്കലവും ഉള്‍പ്പെടെ 125 പോയിന്‍റുമായാണ് തിരുവനന്നതപുരം നോര്‍ത്ത് ചാമ്പ്യന്‍പട്ടത്തില്‍ ചുംബിച്ചത്. 10 സ്വര്‍ണവും 12 വെള്ളിയും 13 വെങ്കലവുമായി 118 പോയിന്‍റോടെ നെയ്യാറ്റിന്‍കര റണ്ണേഴ്‌സ് അപ്പായി. അഞ്ചു സ്വര്‍ണവും നാലു വെള്ളിയും ഏഴു വെങ്കലവും ഉള്‍പ്പെടെ 63 പോയിന്‍റു നേടിയ കിളിമാനൂരാണ് മൂന്നാം സ്ഥാനത്ത്. ജനറല്‍ സ്‌കൂളുകളില്‍ അരുമാനൂര്‍ ഒന്നാമത് ജനറല്‍ സ്‌കൂള്‍ വിഭാഗത്തില്‍ അരുമാനൂര്‍ എംവിഎച്ച്എസ്എസ് സ്‌കൂളാണ് ചാമ്പ്യന്‍മാരായത്. അഞ്ചുവീതം സ്വര്‍ണവും വെള്ളിയും ആറു വെങ്കലവും ഉള്‍പ്പെടെ 46 പോയിന്‍റുമായാണ് അരുമാനൂരിന്‍റെ ഒന്നാം സ്ഥാനനേട്ടം. പേരൂര്‍ക്കട ജിജിഎച്ചഎസ്എസ് നാലു സ്വര്‍ണവും രണ്ടു വെള്ളിയും രണ്ടു വെങ്കലവും ഉള്‍പ്പെടെ 28 പോയിന്‍റ് സ്വന്തമാക്കി പികെഎച്ച്എസ്എസ് കാഞ്ഞിരംകുളം മൂന്നാം സ്ഥാനത്തുമെത്തി. മേളയുടെ സമാപന സമ്മേളനം ആറ്റിങ്ങല്‍ എംഎല്‍എ ഒ.എസ്. അംബിക ഉദ്ഘാടനം ചെയ്തു

വിതുര സ്കൂളിൽ ബഹുനില മന്ദിര നിര്‍മാണോദ്ഘാടനം

വിതുര: വിതുര ഗവ. യുപിഎസില്‍ പുതുതായി നിര്‍മിക്കുന്ന ബഹുനില കെട്ടിടത്തിന്‍റെ നിര്‍മാണ ഉദ്ഘാടനം ജി. സ്റ്റീഫന്‍ എംഎല്‍എ നിര്‍വഹിച്ചു. കേരളത്തിലെ വിദ്യാഭ്യാസ മേഖലയിലുണ്ടായ മാറ്റങ്ങള്‍ രാജ്യത്തിനാകെ മാതൃകയാണെന്നും, സമൂഹത്തിന്‍റെ ഉണര്‍വിനും വികസനത്തിനും സാമൂഹിക നീതിക്കുമുള്ള അടിത്തറയാണ് വിദ്യാഭ്യാസമെന്നും എംഎല്‍എ പറഞ്ഞു. കിഫ്ബി ഫണ്ടില്‍ നിന്നും 3.90 കോടി ചെലവഴിച്ചാണ് പുതിയ ബഹുനില മന്ദിരം നിര്‍മിക്കുന്നത്. സ്‌കൂള്‍ അങ്കണത്തില്‍ നടന്ന പരിപാടിയില്‍ വിതുര പഞ്ചായത്ത് പ്രസിഡന്‍റ് മഞ്ജുഷ ജി. ആനന്ദ് അധ്യക്ഷത വഹിച്ചു. എസ്എംസി ചെയര്‍മാന്‍ എസ്. സഞ്ജയന്‍, എക്സി ക്യൂട്ടീവ് എന്‍ജിനീയര്‍ സബിത, ജില്ലാപഞ്ചായത്ത് അംഗം സോഫി തോമസ്, ബ്ലോക്ക് പഞ്ചായത്ത് വൈസ് പ്രസിഡന്‍റ് എസ്.എല്‍. കൃഷ്ണകുമാരി തുടങ്ങിയവര്‍ പങ്കെടുത്തു.

ബിയർകുപ്പികൊണ്ട് തലയ്ക്കടിച്ച് പരിക്കേൽപ്പിച്ച കേസ്: മൂന്നുപേരെ പിടികൂടി

മലയിൻകീഴ്: സുഹൃത്തുക്കൾ തമ്മിലുണ്ടായ വാക്കുതർക്കത്തെത്തുടർന്നു ബിയർകുപ്പികൊണ്ട് തലയ്ക്കടിച്ച് പരിക്കേൽപ്പിച്ച കേസിൽ മൂന്നുപേരെ മലയിൻകീഴ് പോലീസ് അറസ്റ്റുചെയ്തു. അന്തിയൂർക്കോണം വാഴവിള റോഡരികത്തുവീട്ടിൽ വിഷ്ണു(32), മലയിൻകീഴ് പഴയ റോഡ് ചെറുതലയ്ക്കൽ അഞ്ചിതാഭവനിൽ നന്ദകുമാർ (22), മലയിൻകീഴ് കുളക്കോട് കിഴക്കുംകര പുത്തൻവീട്ടിൽ രാഹുൽ (23) എന്നിവരെയാണ് പിടികൂടിയത്. ചൊവ്വാഴ്ച രാത്രി ഇവർ അന്തിയൂർക്കോണത്തിനുസമീപം ഒരുമിച്ചിരിക്കുമ്പോഴാണു സുഹൃത്തായ അന്തിയൂർക്കോണം കാപ്പിവിള പാഞ്ചിക്കാട് മേലെപുത്തൻ വീട്ടിൽ വിനീതി(26)നുനേരേ അക്രമുണ്ടായത്. മുൻവൈരാഗ്യമാണ് അക്രമത്തിനു പിന്നിലെന്നു പോലീസ് പറഞ്ഞു.

മദ്യലഹരിയില്‍ സിഐ ഓടിച്ച കാര്‍ വാഹനങ്ങള്‍ ഇടിച്ചു തെറിപ്പിച്ചു

പേരൂര്‍ക്കട: മദ്യലഹരിയില്‍ സിഐ ഓടിച്ച കാര്‍ രണ്ടു വാഹനങ്ങള്‍ ഇടിച്ചുതെറിപ്പിച്ചു. കന്‍റോൺമെന്‍റ് പോലീസ് കസ്റ്റഡിയിലെടുത്ത സിഐയെ പിന്നീട് ജാമ്യത്തില്‍ വിട്ടയച്ചു. ബുധനാഴ്ച ഉച്ചതിരിഞ്ഞ് രണ്ടോടുകൂടിയാണ് സംഭവം. വിളപ്പില്‍ശാല സിഐ വി. നിജാമാണ് മദ്യപിച്ചു കാര്‍ ഓടിച്ച് അപകടങ്ങളുണ്ടാക്കിയത്. മഹിളാ മോര്‍ച്ച പ്രവര്‍ത്തകരുമായി സെക്രട്ടേറിയറ്റു ഭാഗത്തേക്കു വന്ന വാഹനത്തെ നിയമസഭാ മന്ദിരത്തിനു സമീപത്തുവച്ചാണ് കാര്‍ ആദ്യം ഇടിച്ചത്. ഇതു പണം നല്‍കി ഒത്തുതീര്‍പ്പാക്കിവിട്ടു. അതിനുശേഷം പുളിമൂട് ഭാഗത്തുവച്ച് മറ്റൊരു വാഹനത്തെ കാര്‍ ഇടിച്ചുതെറിപ്പിച്ചു. അതിനുശേഷം നിര്‍ത്താതെ പോയ കാര്‍ എകെജി സെന്‍ററിനു സമീപമെത്തിയപ്പോള്‍ നടുറോഡില്‍ നിര്‍ത്തി സിഐ വാഹനത്തില്‍നിന്ന് ഇറങ്ങിനിന്നു. ഇതേ തുടർന്നു ഗതാഗതക്കുരുക്ക് ഉണ്ടായതോടെ ഡ്യൂട്ടിയിലുണ്ടായിരുന്ന പോലീസുകാര്‍ കണ്‍ട്രോള്‍ റൂമില്‍ വിവരമറിയിക്കുകയും കന്‍റോണ്‍മെന്‍റ് പോലീസ് സ്ഥലത്തെത്തി സി.ഐയെ കസ്റ്റഡിയിലെടുത്ത് സ്റ്റേഷനിലേക്കു കൂട്ടിക്കൊണ്ടു പോകുകയുമായിരുന്നു. രണ്ടുദിവസമായി മെഡിക്കല്‍ ലീവിലായിരുന്ന സിഐ മദ്യലഹരിയില്‍ കാര്‍ ഓടിച്ചതിനെക്കുറിച്ച് പോലീസ് വിശദമായ അന്വേഷണം തുടങ്ങി.

മൊബൈല്‍ ഫോണുകള്‍ മോഷ്ടിച്ച് കിടന്നുറങ്ങി; പോലീസ് കൈയോടെ പിടികൂടി

മെഡിക്കല്‍കോളജ്: തിരുവനന്തപുരം എസ്എടി ആശുപത്രിയിലെ വാര്‍ഡില്‍ നിന്നു മൂന്നു മൊബൈല്‍ ഫോണുകള്‍ മോഷ്ടിച്ചശേഷം സമീപത്തുകിടന്ന് ഉറങ്ങിയ മൂന്നംഗസംഘത്തെ പോലീസ് കൈയോടെ പിടികൂടി. വര്‍ക്കല മേലേ വെട്ടൂര്‍ കരിച്ചെമ്പില്‍ വീട്ടില്‍ സഹീര്‍ (29), ആലപ്പുഴ മാവേലിക്കര ആദിക്കാട്ടുകുളങ്ങര അമീന മന്‍സിലില്‍ ആഥില്‍ (21), കൊല്ലം കരുനാഗപ്പള്ളി മൈനാഗപ്പള്ളി ആശാരിമുക്ക് അയിക്കര പടിഞ്ഞാറ്റില്‍ വീട്ടില്‍ ആഷിഖ് (19) എന്നിവരെയാണ് എസ്ഐമാരായ വിഷ്ണു, ഗീതു, എഎസ്ഐ സുരേഷ്, സിപിഒമാരായ ചിത്രന്‍, ബിജിത്ത്, നൗഫല്‍ എന്നിവർ ചേര്‍ന്നു കസ്റ്റഡിയിലെടുത്തത്. ബുധനാഴ്ച പുലര്‍ച്ചെ എസ്എടിയില്‍ രോഗികള്‍ ചികിത്സയിലുള്ള വാര്‍ഡിലെത്തിയ മൂന്നംഗസംഘം കൊല്ലം പാരിപ്പള്ളി കിഴക്കനേല വേളമാനൂര്‍ സുജിത്ത് ഭവനില്‍ സുദര്‍ശനന്‍റെ മകന്‍ ഷിജിത്തിന്‍റെ സമീപത്തുണ്ടായിരുന്ന മൊബൈല്‍ ഫോണുകള്‍ മോഷ്ടിക്കുകയായിരുന്നു. ഭാര്യയുടെ ചികിത്സാര്‍ഥമാണു ഷിജിത്ത് ആശുപത്രിയിലെത്തിയത്. ഫോണുകള്‍ നഷ്ടപ്പെട്ട ഷിജിത്ത് ഉടന്‍തന്നെ പോലീസില്‍ വിവരമറിയിച്ചു. സിസിടിവി ദൃശ്യങ്ങള്‍ ഉള്‍പ്പെടെ പരിശോധിച്ച പോലീസ് സംശയകരമായ രീതിയില്‍ വാര്‍ഡിനു സമീപത്തു കിടന്നുറങ്ങുന്ന മൂവര്‍സംഘത്തെ കണ്ടെത്തി. തുടര്‍ന്നുള്ള ചോദ്യം ചെയ്യലിലാണ് പ്രതികള്‍ കുറ്റം സമ്മതിച്ചത്. തൊണ്ടിമുതലുകള്‍ ഇവരില്‍നിന്നു കണ്ടെത്തിയതായി സി.ഐ ബി.എം. ഷാഫി അറിയിച്ചു. പ്രതികളെ കോടതിയില്‍ ഹാജരാക്കി റിമാന്‍ഡ് ചെയ്തു.

പോക്സോ കേസിൽ പാസ്റ്റർ അറസ്റ്റിൽ

നെടുമങ്ങാട്: പ്രായപൂർത്തിയാകാത്ത പെൺകുട്ടിയെ പീഡിപ്പിച്ച പാസ്റ്റർ അറസ്റ്റിൽ. നെടുമങ്ങാട് പഴകുറ്റി നഗരിക്കുന്നു ബഥേൽ ഹൗസിൽ ബോബസി(35) നെയാണ് അറസ്റ്റു ചെ യ്തത്. പ്രതി സോഷ്യൽ മീഡിയ വഴി പെൺകുട്ടിയുമായി സൗഹൃദത്തിൽ ഏർപ്പെടുകയും അശ്ലീല സന്ദേശങ്ങൾ അയച്ചു വിവിധ സ്ഥലങ്ങളിൽ കൊണ്ടുപോയി പീഡിപ്പിക്കുകയുമായിരുന്നുവെന്നു പൊലീസ് പറഞ്ഞു. പ്രതിയെ ഡെപ്യൂട്ടി പോലീസ് സൂപ്രണ്ട് എ. ആർ. റാഫിയുടെ നിർദേശപ്രകാരം ആര്യനാട് പോലീസ് സ്റ്റേഷൻ ഇൻസ്പെക്ടർ ശ്യാംരാജ് ജെ. നായരുടെ നേതൃത്വത്തിൽ ജിഎഎസ്ഐ ഷിബു, സിവിൽ പോലീസ് ഓഫീസർ രാജേന്ദ്രൻ, സിവിൽ പോലീസ് ഓഫീസർ രഞ്ജിത്ത് എന്നിവരടങ്ങിയ സംഘം അറസ്റ്റ് ചെയ്തു.

വീട് കുത്തിത്തുറന്ന് ആഭരണങ്ങൾ കവർന്ന കേസിൽ യുവാവ് പിടിയിൽ

പേരൂര്‍ക്കട: വീട് കുത്തിത്തുറന്ന് സ്വര്‍ണാഭരണങ്ങള്‍ കവര്‍ന്നയാളെ മണ്ണന്തല സിഐ കണ്ണന്‍, എസ്ഐ വിപിന്‍, സിപിഒമാരായ അനീഷ്, സജീര്‍, പ്രശാന്ത്, അരുണ്‍, മുജീബ് എന്നിവര്‍ തമ്പാനൂര്‍ ഭാഗത്തുനിന്നു പിടികൂടി. തമിഴ്‌നാട് കന്യാകുമാരി തുലയാവട്ട പാലവിളൈ പുതുവല്‍ പുത്തന്‍ വീട്ടില്‍ സെല്‍വരാജ് (47) ആണ് കഴിഞ്ഞ 11ന് മണ്ണന്തല ആനന്ദവല്ലീശ്വരം ക്ഷേത്രത്തിനു സമീപം ഒരുവാതില്‍ക്കോണത്തു പൂട്ടിക്കിടന്ന വീട് കുത്തിത്തുറന്ന് 15 പവന്‍ സ്വര്‍ണഭരണങ്ങള്‍ കവര്‍ന്നത്. ഡല്‍ഹിയില്‍ ആര്‍ക്കിടെക്ടായ ശ്രീകുമാറിന്‍റേതായിരുന്നു വീട്. സ്വര്‍ണമാല, നെക്‌ലെസ്, വള, കമ്മല്‍ എന്നിവയാണ് മോഷണമുതലില്‍ ഉള്‍പ്പെട്ടിരുന്നത്. ഈവര്‍ഷം ഓഗസ്റ്റിലാണ് ശ്രീകുമാര്‍ ഡല്‍ഹിക്കുപോയത്. സംഭവദിവസം ശ്രീകുമാറിന്‍റെ ബന്ധു വീട്ടിലെത്തിയപ്പോഴാണ് വാതില്‍ പൊളിച്ചിരിക്കുന്നതു ശ്രദ്ധയില്‍പ്പെട്ടത്. വിശദമായ അന്വേഷണത്തില്‍ വീട്ടില്‍ മോഷണം നടന്നതായി വ്യക്തമാകുകയും പോലീസില്‍ പരാതി നല്‍കുകയുമായിരുന്നു. വീട്ടില്‍ സ്ഥാപിച്ചിട്ടുള്ള സിസിടിവി ദൃശ്യങ്ങളും മറ്റൊരു സ്ഥലത്തുനിന്നു പ്രതിയെ തിരിച്ചറിയാന്‍ സഹായിക്കുന്ന ദൃശ്യവും ലഭിച്ചതു വഴിത്തിരിവായി. 23 വിരലടയാളങ്ങളാണ് ഫിംഗര്‍പ്രിന്‍റ് വിദഗ്ധരുടെ പരിശോധനയില്‍ വീട്ടില്‍ നിന്നു ലഭിച്ചത്. തുടരന്വേഷണത്തില്‍ തമ്പാനൂര്‍ ഭാഗത്ത് പ്രതി ഉള്ളതായി സൂചന ലഭിക്കുകയായിരുന്നു. പ്രതിയെ കോടതി റിമാന്‍ഡ് ചെയ്തു.

അന്പൂരിയിൽ കൂൺ കഴിച്ച് ആറുപേർ ആശുപത്രിയിൽ

വെള്ളറട: അമ്പൂരിയില്‍ കൂണ്‍ കഴിച്ച ആറുപേര്‍ ആശുപത്രിയില്‍. കുമ്പച്ചല്‍ക്കടവ് സ്വദേശി മോഹനന്‍ കാണിയും കുടുംബാംഗങ്ങളുമാണ് കാരക്കോണം മെഡിക്കല്‍ കോളജ് ആശുപത്രിയില്‍ ചി കിത്സയിലുള്ളത്. ഇന്നലെ രാവിലെ വനത്തില്‍നിന്നു ശേഖരിച്ച കൂണ്‍ പാചകം ചെയ്ത് കഴിച്ചതിനു ശേഷം ശാരീരിക അസ്വസ്ഥതകള്‍ അനുഭവപ്പെട്ടതിനെ തുടര്‍ന്ന് കു ടുംബത്തെ ആശുപത്രിയില്‍ പ്രവേശിപ്പിക്കുകയായിരുന്നു. മോഹനന്‍ കാണിയുടെ ചെറുമക്കളായ അഭിഷേക് (10), അനശ്വര (15) എന്നിവരുടെ നില ഗുരുതരമാണെന്ന് അധികൃതര്‍ വ്യക്തമാക്കി. മോഹനല്‍കാണിയുടെ ഭാര്യ സാവിത്രി (60), മകന്‍ അരുണ്‍ (42), മരുമകള്‍ സുമ (34), മോഹനന്‍ (65) എന്നിവരെയാണ് ആശുപത്രിയില്‍ പ്രവേശിപ്പിച്ചത്. ആശുപത്രിയില്‍ എത്തിക്കുമ്പോഴേക്കും സുമ ഒഴികെയുള്ള എല്ലാവരും അബോധാവസ്ഥയിലായിരുന്നു എന്നാണു പോലീസില്‍നിന്നു ലഭിക്കുന്ന വിവരം. ആറുപേരും തീവ്രപരിചരണ വിഭാഗത്തില്‍ ചികിത്സയിലാണ്.

തൊഴിലാളിക്ക് മര്‍ദനം; മില്ലുടമയെ അറസ്റ്റു ചെയ്തു

പേരൂര്‍ക്കട: തൊഴിലാളിയെ ക്രൂരമായി മര്‍ദ്ദിച്ചതിന് മില്ലുടമയെ പൂജപ്പുര പോലീസ് അറസ്റ്റുചെയ്തു. പിടിപി നഗര്‍ ഇലിപ്പോട് പൗര്‍ണമി ഫ്‌ളോര്‍ മില്‍ ഉടമ തുഷാന്ത് (33) ആണ് അറസ്റ്റിലായത്. തമിഴ്‌നാട് കന്യാകുമാരി രാജഗിരി ശിവഗിരി കാമരാജ് സ് ട്രീറ്റില്‍ മാരിയപ്പന്‍റെ മകന്‍ ബാലകൃഷ്ണന്‍റെ (47) പരാതിയിലായിരുന്നു അന്വേഷണം. 10 വര്‍ഷമായി ബാലകൃഷ്ണന്‍ മില്ലില്‍ ജോലിചെയ്തു വരികയാണ്. ഇതിനിടെ ഒരുവര്‍ഷത്തോളം ഇവിടെനിന്നു വിട്ടുനിന്നു. മില്ലില്‍ തിരികെയെത്തിയശേഷമാണു തുഷാന്ത് മര്‍ദനമുറ ആരംഭിച്ചത്. ഒരുദിവസം 100 രൂപ എന്ന ക്രമത്തിലാണ് ശമ്പളം ലഭിക്കുന്നതെന്നും ഭക്ഷണം ആവശ്യപ്പെടുമ്പോഴാണ് തന്നെ മെഷീന്‍ബെല്‍റ്റ് ഉപയോഗിച്ച് മര്‍ദിക്കുന്നതെന്നുമാണ് ബാലകൃഷ്ണന്‍ പൂജപ്പുര പോലീസിനു നല്‍കിയ പരാതിയിൽ പറയുന്നത്. അതേസമയം തന്‍റെ ഭാര്യയുടെ ആഭരണങ്ങള്‍ ബാലകൃഷ്ണന്‍ മോഷ്ടിച്ചുവെന്നും ഇക്കാരണത്താലാണ് താന്‍ മര്‍ദിച്ചതെന്നുമാണ് തുഷാന്തിന്‍റെ വിചിത്രമായ വാദം. മില്ലുടമ ദിവസങ്ങളായി തന്നെ ക്രൂരമായി മര്‍ദിച്ചുവരുന്നതായി ബാലകൃഷ്ണന്‍റെ പരാതിയിലുണ്ട്. പോലീസ് നടത്തിയ തുടരന്വേഷണത്തില്‍ ബാലകൃഷ്ണന്‍റെ ശരീരമാകെ മുറിവേറ്റ അടയാളങ്ങള്‍ കണ്ടെത്തി.സാഹചര്യത്തെളിവുകളും വ്യക്തിമൊഴികളും രേഖപ്പെടുത്തിയശേഷമാണ് തുഷാന്തിന്‍റെ അറസ്റ്റ് രേഖപ്പെടുത്തിയത്. പൂജപ്പുര സിഐ പി. ഷാജിമോന്‍റെ നേതൃത്വത്തിലായിരുന്നു അന്വേഷണം. പ്രതിയെ കോടതി റിമാന്‍ഡ് ചെയ്തു.

കല്ലിയൂര്‍ പുന്നമൂട് സ്‌കൂളില്‍ പെപ്പര്‍ സ്‌പ്രേ ശ്വസിച്ച വിദ്യാര്‍ഥികള്‍ ആശുപത്രി വിട്ടില്ല

നേമം: കല്ലിയൂര്‍ പുന്നമൂട് ഹയര്‍ സെക്കൻഡിറി സ്‌കൂളില്‍ പെപ്പര്‍ സ്‌പ്രേ ശ്വസിച്ച ഒന്‍പത് വിദ്യാര്‍ഥികള്‍ ശ്വാസ തടസത്തെ തുടര്‍ന്ന് ഇപ്പോഴും ആശുപത്രിയില്‍ തുടരുന്നു. മെഡിക്കല്‍കോളജ് ആശുപത്രിയില്‍ ചികിത്സയില്‍ കഴിയുന്ന വിദ്യാര്‍ഥികളാണ് നിരീ ക്ഷണത്തിലുള്ളത്. നെയ്യാറ്റിന്‍കര ജനറല്‍ ആശുപത്രിയില്‍ ചികിത്സയിലുണ്ടായിരുന്ന അമൃത ശങ്കര്‍ എന്ന വിദ്യാര്‍ഥിനിയും ബേബി സുധ എന്ന അധ്യാപികയും ആശുപത്രിയില്‍നിന്നു വീട്ടിലേക്കു മടങ്ങി. ഇവരെ ആദ്യം നേമം ശാന്തിവിള താലൂക്ക് ആശുപത്രിയിലെത്തിച്ചു പ്രാഥമികചികിത്സ നല്‍കിയ ശേഷം ജനറല്‍ ആശുപത്രിയിലും പിന്നീട് മെഡിക്കല്‍ കോളജ് ആശുപത്രിയിലും പ്രവേശിപ്പിക്കുക യായിരുന്നു. പ്ലസ് വണ്‍ ക്ലാസിലെ ഒരു വിദ്യാര്‍ഥി ക്ലാസില്‍ വെച്ച് "റെഡ് കോപ്പ്' എന്ന പേരിലുള്ള സ്‌പ്രേ തുറന്നു നോക്കുമ്പോഴാണു ബുധനാഴ്ച സംഭവമുണ്ടായത്. സ്‌കൂളിലെ രണ്ടാംനിലയിലുള്ള ക്ലാസില്‍ അറുപതോളം വിദ്യാര്‍ഥികളുണ്ടായിരുന്നു. സ്‌പ്രേ അന്തരീക്ഷത്തിലേയ്ക്ക് വ്യാപിച്ചതോടെ പല കുട്ടികള്‍ക്കും ശ്വാസംമുട്ടലും ശരീരത്തില്‍ ചൊറിച്ചിലും അനുഭവപ്പെട്ടു. ശ്വാസതടസവും പുകച്ചിലും അനുഭവപ്പെട്ട വിദ്യാര്‍ഥികളെ അധ്യാപകരും പോലീസും ചേര്‍ന്നാണ് ആദ്യം നേമം ശാന്തിവിള താലൂക്ക് ആശുപത്രിയിലെത്തിച്ചത്. സംഭവത്തെ തുടര്‍ന്നു നമം പോലീസും ഫോറന്‍സിക് വിഭാഗവും ആരോഗ്യ വകുപ്പും സ്‌കൂളിലെത്തി പരിശോധന നടത്തി. ആരോഗ്യവിഭാഗം ഡയറക്ടര്‍ ഉണ്ണികൃഷ്ണന്‍ നായരും സ്ഥലത്തെത്തി അന്വേഷണം നടത്തി. പിടിഎ മീറ്റിംഗ് വിളിച്ചിട്ടുണ്ടെന്ന് പ്രിന്‍സിപ്പൽ‍ പറഞ്ഞു.

കരമനയാറ്റില്‍ അജ്ഞാത മൃതദേഹം

മെഡിക്കല്‍കോളജ്: കരമന പാലത്തിനു സമീപം കരമനയാറ്റില്‍ അജ്ഞാത മൃതദേഹം കണ്ടെത്തി. 50 വയസ് പ്രായമുള്ള പുരുഷന്‍റെ മൃതദേഹമാണ് ഇന്നലെ രാവിലെ 11.45 ഓടുകൂടി ആറ്റിലൂടെ ഒഴുകിയെത്തി മരത്തിന്‍റെ ശിഖരത്തില്‍ തടഞ്ഞ നിലയില്‍ പോലീസ് കണ്ടെത്തിയത്. മൃതദേഹത്തിന് ഒരുദിവസത്തെ പഴക്കം വരുമെന്ന അനുമാനത്തിലാണ് പോലീസ്. കറുത്ത ഷര്‍ട്ടും ലുങ്കിയുമാണ് വേഷം. മരിച്ചയാളെക്കുറിച്ച് വിവരം ലഭിക്കുന്നവര്‍ കരമന പോലീസുമായി ബന്ധപ്പെടണം. ഫോണ്‍: 0471 2343534 (കരമന പോലീസ്), 949794 7120 (കരമന സിഐ).

ഗവ. ഐടിഇ കാന്പസില്‍ ചീരകൃഷി

നെയ്യാറ്റിൻകര: ജമന്തി പൂക്കള്‍ വിരിഞ്ഞ മണ്ണില്‍ ഇനി ചീര കൃഷി. പരിപാലന ദൗത്യം ഏറ്റെടുത്ത് അധ്യാപക വിദ്യാര്‍ഥികള്‍. നെയ്യാറ്റിന്‍കര നഗരസഭയുടെയും കൃഷിഭവന്‍റെയും ഗവ. ഇൻസ്റ്റിറ്റ്യൂട്ട് ഓഫ് ടീച്ചർ എഡ്യൂക്കേഷന്‍റെയും സംയുക്താഭിമുഖ്യത്തിൽ ഊരൂട്ടുകാലയിലെ കാന്പസില്‍ നേരത്തെ ജമന്തി പുഷ്പകൃഷി ചെയ്തിരുന്നു. "ഓണത്തിന് ഒരു വട്ടി പൂവ്' പദ്ധതിയുടെ വിജയത്തെത്തുടര്‍ന്നാണ് പുതിയ പദ്ധതിക്ക് രൂപം നല്‍കിയിരിക്കുന്നത്. "ചുവപ്പിൽ തളിർക്കുന്ന ആരോഗ്യം' എന്ന പദ്ധതിയുടെ ഭാഗമായി കാന്പസില്‍ ചീരകൃഷി ആരംഭിച്ചു. നഗരസഭ ചെയർമാന്‍ പി.കെ. രാജമോഹനൻ പദ്ധതിയുടെ ഉദ്ഘാടനം നിര്‍വഹിച്ചു. വികസനകാര്യ സ്റ്റാൻഡിംഗ് കമ്മിറ്റി ചെയർമാൻ കെ.കെ. ഷിബു, വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാന്‍ ഡോ. എം.എ. സാദത്ത്, ഇന്‍സ്റ്റിറ്റ്യൂട്ട് പ്രിന്‍സിപ്പല്‍ ഡി.എസ്. ഷീലുകുമാർ, അഡ്വ. സജിൻ ലാൽ, പ്രസന്നകുമാര്‍, ടി. സജി , അനശ്വര രാജശേഖരൻ, എസ്. രതീഷ് കുമാർ എന്നിവര്‍ പങ്കെടുത്തു.

വര്‍ണക്കൂടാരം ഉദ്ഘാടനം ചെയ്തു

നെയ്യാറ്റിന്‍കര: ശാസ്താന്തല ഗവ. യുപി സ്കൂളിൽ നിര്‍മിച്ച വർണക്കൂടാരം കെ. ആൻസലൻ എംഎൽഎ ഉദ്ഘാടനം ചെയ്തു. നഗരസഭ വികസനകാര്യ സ്റ്റാൻഡിംഗ് കമ്മിറ്റി ചെയർമാൻ കെ.കെ. ഷിബു അധ്യക്ഷനായി. വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ ഡോ. എം.എ. സാദത്ത്, കൗൺസിലർ ഡി. സൗമ്യ, എസ്എസ്കെ ജില്ലാ പ്രോഗ്രാം ഓഫീസർ ബിന്ദു ജോൺസ്, ബിപിസി ആര്‍.എസ്. ബൈജുകുമാര്‍, പിടിഎ പ്രസിഡന്‍റ് കൂട്ടപ്പന രാജേഷ്, പ്രഥമാധ്യാപകൻ എൻ. രാജ്മോഹൻ, എസ്. അനിൽകുമാർ, ആര്‍.എസ്. സംഗീത, കെ.കെ. ബീന, കെ.ഐ. ബിന്ദു, ഷാജഹാൻ, അജിതകുമാരി, പത്മകുമാരി എന്നിവർ സംബന്ധിച്ചു.

പോക്സോ കേസിൽ ദഫ്മുട്ട് അധ്യാപകൻ റിമാൻഡിൽ

കാട്ടാക്കട: പ്രായപൂർത്തിയാകാത്ത പെൺകുട്ടിയെ പീഡിപ്പിച്ച ദഫ് മുട്ട് അധ്യാപകൻ റിമാൻഡിൽ. കോട്ടൂർ കൃഷ്ണഗിരി തൈക്കാവിളയിൽ ആദിൽ (27) ആണ് റിമാൻഡിലായത്. കാട്ടാക്കടയിലെ ഒരു സ്കൂളിൽ ഇയാൾ ദഫ്മുട്ട് പഠിപ്പിക്കാൻ എത്തിയതായിരുന്നു. ഇവിടെയുള്ള കുട്ടിയെയാണ് ഇയാൾ പീഡിപ്പിച്ചത്. സംഭവശേഷം എറണാകുളം വഴി വിദേശത്തേക്കു കടക്കാൻ ശ്രമിക്കുകയായിരുന്ന പ്രതിയെ കാട്ടാക്കട എസ്ഐ മനോജിന്‍റെ നേതൃത്വത്തിൽ മൊബൈൽ ലൊക്കേഷൻ കേന്ദ്രീകരിച്ച് അന്വേഷണം നടത്തി എറണാകുളം നോർത്ത് പോലീസിന്‍റെ സഹായത്തോടെ പിടികൂടുകയായിരുന്നു. സിപിഒ പ്രദീപ്, ഡ്രൈവർ അജിത് എന്നിവർ ചേർന്നാണ് പിടികൂടിയത്.

മൂന്നുവയസുകാരിക്കു നേരെ കുപ്പിയേറ്: യുവാവ് റിമാൻഡിൽ

പാറശാല: പൊഴിയൂരില്‍ ബിയര്‍ കുപ്പിയേറില്‍ മൂന്നു വയസുകാരിക്കു ഗുരുതര പരിക്കേറ്റസംഭവത്തിൽ യുവാവ് അറസ്റ്റിൽ. വെട്ടുകാട് സ്വദേശി സനോജി(33)നെയാണ് ബോട്ട് ജീവനക്കാര്‍ കീഴ്‌പ്പെടുത്തി പോലീസിനു കൈമാറിയത്. പശ്ചിമ ബംഗാള്‍ സ്വദേശിയായ ആര്‍ക്കാ ദാസിന്‍റെ മകള്‍ അനുബാ ദാസിനാണ് കുപ്പിയേറിൽ ഗുരുതര പരിക്കേറ്റത്. കഴിഞ്ഞ ദിവസം വൈകുന്നേരം ആർക്കാ ദാസിന്‍റെ കുടുംബം ബോട്ടിംഗ് നടത്തുന്നതിനിടെ കരയില്‍നിന്നു യുവാവ് ബിയര്‍ കുപ്പി വലിച്ചെറിയുകയായിരുന്നു. അമ്മയുടെ മടിയില്‍ ഇരിക്കുകയായിരുന്ന മൂന്നു വയസുകാരിയുടെ തലയില്‍ കുപ്പി വീണു പൊട്ടിയാണു പരിക്കേറ്റത്. ആറു ദിവസം മുന്പാണ് ഏഴംഗ കുടുംബം വിനോദ യാത്രയ്ക്ക് എത്തിയത്. ഗുരുതരമായി പരിക്കേറ്റ മൂന്നു വയസുകാരി നെയ്യാറ്റിന്‍കര ജനറല്‍ ആശുപത്രിയില്‍ ചികിത്സയിലാണ്. നിലവില്‍ അപകടനില തരണം ചെയ്തുവെന്ന് ഡോക്ടര്‍മാര്‍ അറിയിച്ചു. പ്രതിയെ പൊഴിയൂര്‍ പോലീസാണ് കസ്റ്റഡിയില്‍ എടുത്തത്. ഇയാള്‍ മദ്യലഹരിയില്‍ ആയിരുന്നുവെന്ന് പോലീസ് പറയുന്നു.

കാര്യവട്ടത്തിനു പിന്നാലെ ആറ്റിങ്ങലിലും കുതിപ്പുമായി അശ്വിനി

ആറ്റിങ്ങല്‍: കഴിഞ്ഞ വര്‍ഷം കാര്യവട്ടം എല്‍എന്‍സിപി സ്റ്റേഡിയത്തില്‍ മത്സരത്തിനിടെ പരിക്കേറ്റ് ബോധം നഷ്ടപ്പെട്ട് ആശുപത്രിയില്‍ പ്രവേശിച്ച് മണിക്കൂറുകള്‍ക്കുള്ളില്‍ തിരികെ വീണ്ടും സ്റ്റേഡിയത്തിലെത്തി സ്വര്‍ണക്കുതിപ്പ് നടത്തിയ അശ്വിനി ഇക്കുറി ആറ്റിങ്ങലില്‍ നിന്നും സ്വന്തമാക്കിയത് ഇരട്ട സുവര്‍ണപതക്കം. അരുമാനൂര്‍ എംവിഎച്ച്എസ്എസിലെ പ്ലസ് ടു വിദ്യാര്‍ഥിനിയായ എസ്. അശ്വിനി ജാവലിനിലും ഡിസ്‌കസിലുമാണ് സ്വര്‍ണക്കുതിപ്പ് നടത്തിയത്. ഡിസ്‌കസ് ത്രോയില്‍ 27.84 മീറ്റര്‍ പായിച്ച് സ്വര്‍ണത്തില്‍ മുത്തമിട്ടപ്പോള്‍ ജാവലിന്‍ ത്രോയില്‍ 25.98 മീറ്ററാണ് അശ്വിനി കണ്ടെത്തിയത്. 2024-ല്‍ കാര്യവട്ടം എല്‍എന്‍സിപിഇ ഗ്രൗണ്ടില്‍ ജൂണിയര്‍ പെണ്‍കുട്ടികളുടെ ത്രോ ഇനങ്ങളില്‍ മത്സരിക്കുന്നതിനിടെ ഗ്രൗണ്ടില്‍ തെന്നി വീഴുകയായിരുന്നു അശ്വിനി. തുടര്‍ന്നു ബോധം നഷ്ടപ്പെട്ട അശ്വനിയെ ആശുപത്രിയില്‍ പ്രവേശിപ്പിച്ചു. രണ്ടു മണിക്കൂര്‍ ആശുപത്രിയില്‍ കഴിഞ്ഞ അശ്വിനി തുടര്‍ന്നു തിരികെ ഗ്രൗണ്ടിലെത്തി ഡിസ്‌കസ് ത്രോ പോരാട്ടത്തിനിറങ്ങി സ്വര്‍ണനേട്ടവുമായാണ് ഫീല്‍ഡ് വിട്ടത്. ജാവലിന്‍ ത്രോയിലും ഹാമര്‍ ത്രോയിലും വെള്ളി നേട്ടവും സ്വന്തമാക്കി ജൂണിയര്‍ വിഭാഗത്തിലെ വ്യക്തിഗത ചാമ്പ്യനുമായിരുന്നു.

സ്‌കൂള്‍ വിഭാഗത്തില്‍ അരുമാനൂരിന്‍റെ കുതിപ്പ്...

ആറ്റിങ്ങൽ: ആദ്യദിനം കാഞ്ഞിരംകുളം പികെഎസ്എച്ച്എസ്എസിന്‍റെ ആധിപത്യമായിരുന്നെങ്കില്‍ ഇന്നലെ അരുമാനൂര്‍ എംവിഎച്ച്എസ്എസിന്‍റെ മുന്നേറ്റത്തിനാണ് ശ്രീപാദം സ്റ്റേഡിയം സാക്ഷ്യം വഹിച്ചത്. നാലു സ്വര്‍ണവും രണ്ടു വെള്ളിയും മൂന്നു വെങ്കലവുമായി 29 പോയിന്‍റുമായി നെയ്യാറ്റിന്‍കര സബ് ജില്ലയിലെ അരുമാനൂര്‍ എംവിഎച്ച്എസ്എസ് പോയിന്‍റ് പട്ടികയില്‍ ഒന്നാമത് നില്ക്കുന്നു. രണ്ടാം സ്ഥാനത്തുള്ള പേരൂര്‍ക്കട ജിജിഎച്ച്എസ്എസിനു സമ്പാദ്യം മൂന്നു സ്വര്‍ണവും രണ്ടു വെള്ളിയും രണ്ടു വെങ്കലവും ഉള്‍പ്പെടെ 23 പോയിന്‍റുകളാണ്. ആദ്യ ദിനം പോയിന്‍റ് പട്ടികയില്‍ ഒന്നാമതുണ്ടായിരുന്ന കാഞ്ഞിരംകുളമാണ് രണ്ടാം ദിനം മൂന്നാം സ്ഥാനത്തുള്ളത്. രണ്ടു സ്വര്‍ണവും രണ്ടു വെള്ളിയും ഒരു വെങ്കലവും ഉള്‍പ്പെടെ 17 പോയന്‍റാണ് കാഞ്ഞിരംകുളത്തിനുള്ളത്.

അമ്മ നീന്തല്‍ക്കുളത്തില്‍നിന്നും മെഡല്‍ നേടിയപ്പോള്‍ മകള്‍ നടന്നു കയറിയത് പൊന്നിന്‍ നേട്ടത്തിലേക്ക്

തിരുവനന്തപുരം: അമ്മ നീന്തല്‍ക്കുളത്തില്‍നിന്നും സ്വന്തമാക്കിയ മെഡലുകള്‍ കണ്ട് തനിക്കും മെഡല്‍ നേട്ടം സ്വന്തമാക്കണമെന്ന ആഗ്രഹം തോന്നിയ മകള്‍ തെരഞ്ഞെടുത്തത് ട്രാക്ക് ഇനങ്ങള്‍. നടത്ത മത്സരത്തില്‍ സീനിയര്‍ പെണ്‍കുട്ടികളുടെ വിഭാഗത്തില്‍ പൊന്നിന്‍ കുതിപ്പ് സ്വന്തമാക്കി ശ്രദ്ധേയയത് ഗൗതമി കൃഷ്ണയാണ്. അമ്മയാണ് തന്‍റെ പൊന്നിന്‍ കുതിപ്പിന് പ്രചോദനമെന്നു ഗൗതമി തന്നെ പറയുന്നു. സീനിയര്‍ പെണ്‍കുട്ടികളുടെ 3000 മീറ്റര്‍ നടത്തത്തിലാണ് പേരൂര്‍ക്കട ഗവ. എച്ച്എസ്എസിലെ പ്‌ളസ് ടു കോമേഴ്‌സ് വിദ്യാര്‍ഥിനിയായ ഗൗതമി സ്വര്‍ണത്തില്‍ മുത്തമിട്ടത്. ഗൗതമിയുടെ മാതാവ് ജിഷാറാണി 1992 ഗോവയില്‍ നടന്ന ദേശീയ നീന്തല്‍ മത്സരത്തില്‍ സ്വര്‍ണം നേടിയിരുന്നു. ആദ്യം ഗൗതമിയും നീന്തലിലായിരുന്നു ശ്രദ്ധ കേന്ദ്രീകരിച്ചിരുന്നത്. പിന്നീടാണ് നടത്ത മത്സരത്തിലേക്ക് മാറിയത്. അമ്മയുടെ മെഡല്‍ നേട്ടത്തിനു പിന്നാലെ മകളുടെ മെഡല്‍ നേട്ടത്തിന്റെ ആഹ്ലാദമാണ് ഗൗതമിയുടെ കുടുംബത്തിന്. ഈ ഇനത്തില്‍ വെള്ളി നേട്ടം സ്വന്തമാക്കിയ അക്ഷര എസ്. പ്രശാന്തും പേരൂര്‍ക്കട സ്‌കൂളിലെ വിദ്യാര്‍ഥിനിയാണ്. ജൂണിയര്‍ വിഭാഗത്തില്‍ പേരൂര്‍ക്കട സ്‌കൂളിലെ തന്നെ ആദിഷയ്ക്കാണ് സുവര്‍ണനേട്ടം.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]