സിവിൽ സർവീസ് പരീക്ഷ ജേതാവിനെ അനുമോദിച്ചു : Deepika.com Nattu Visesham

കുടുംബശ്രീ നഗരോത്സവം 2025 സംഘടിപ്പിച്ചു

പുനലൂര്‍ : സംസ്ഥാനത്തെ തെരഞ്ഞെടുക്കപ്പെട്ട തദ്ദേശസ്വയംഭരണ സ്ഥാപനങ്ങളിലെ കുടുംബശ്രീ സിഡിഎസുകളുടെ പ്രവര്‍ത്തനം കാര്യക്ഷമമാക്കുന്നതിന് വേണ്ടി സംസ്ഥാന കുടുംബശ്രീ മിഷന്‍ നടപ്പിലാക്കുന്ന ചലനം മെന്‍റര്‍ഷിപ്പ് ക്യാമ്പയിന്റെ ഭാഗമായി നഗരരോത്സവ് 2025 സംഘടിപ്പിച്ചു. കെ കൃഷ്ണപിള്ള സാംസ്‌കാരിക നിലയത്തില്‍ നടന്ന നഗരോത്സവ് 2025 ചെയര്‍പേഴ്‌സണ്‍ കെ പുഷ്പലത ഉദ്ഘാടനം ചെയ്തു. വൈസ് ചെയര്‍മാന്‍ രഞ്ജിത്ത് രാധാകൃഷ്ണന്‍ അധ്യക്ഷനായി. സിഡിഎസ് ചെയര്‍പേഴ്‌സണ്‍ സുശീലാ രാധാകൃഷ്ണന്‍ സ്വാഗതം പറഞ്ഞു. സ്ഥിരം സമിതി അധ്യക്ഷരായ അഡ്വ. പി.എ .അനസ്, ബിനോയ് രാജന്‍, പ്രിയ പിള്ള, മുന്‍ ചെയര്‍മാൻരായ എം .എ .രാജഗോപാല്‍, നിമ്മി എബ്രഹാം ,മുന്‍ വൈസ് ചെയര്‍മാന്‍മാരായ വി .പി .ഉണ്ണികൃഷ്ണന്‍, ഡി .ദിനേശന്‍, കൗണ്‍സിലര്‍ ജി .ജയപ്രകാശ്, റസൂല്‍ ബീവി, മോനിഷ അജീവ്, ഷാമില, ഷെമി ഗണേശന്‍, തുടങ്ങിയവര്‍ പ്രസംഗിച്ചു. മികച്ച അയല്‍ക്കൂട്ടമായി കാഞ്ഞിരമല സൗഭാഗ്യയും ഹൈസ്‌കൂള്‍ വാര്‍ഡ് മികച്ച എ ഡി എസായും തെരഞ്ഞെടുത്തു. കുടുംബശ്രീ അംഗങ്ങളുടെ വിവിധ കലാപരിപാടികളും നടന്നു.

പഞ്ചായത്ത് പ്രസിഡന്‍റിന് നിവേദനം നൽകി

കുളത്തൂപ്പുഴ: ഡിവൈ എഫ് ഐകുളത്തുപ്പുഴ ഈസ്റ്റ്,വെസ്റ്റ് മേഖല കമ്മിറ്റികളുടെ നേതൃത്വത്തിൽ കുളത്തൂപ്പുഴ ഗ്രാമപഞ്ചായത്ത് പ്രസിഡന്‍റിന് പദ്ധതി രൂപീകരണത്തിൽ യുവജനങ്ങളുടെ ഉന്നമനത്തിനായുള്ള പദ്ധതികൾ കൂടി ഉൾപ്പെടുത്തണമെന്ന് ആവശ്യപ്പെട്ടു ഡി വൈ എഫ് ഐ ഈസ്റ്റ് വേസ്റ്റ് കമ്മറ്റികൾ തയാറാക്കിയ രൂപരേഖയുടെ നിർദേശങ്ങൾ അടങ്ങിയ നിവേദനം കുളത്തൂപ്പുഴ ഗ്രാമപഞ്ചായത്ത് പ്രസിഡന്‍റ് പി.ലൈലാബീവിക്ക് ഡി വൈ എഫ് ഐ അഞ്ചൽ ബ്ലോക്ക് സെക്രട്ടറി ഷൈൻ ബാബു നൽകി. ഈസ്റ്റ് മേഖല സെക്രട്ടറി ഡോ.സനൽസ്വാമിനാഥൻ,സുബിൻ, വെസ്റ്റ് മേഖല സെക്രട്ടറി ഷെഫിൻ, രാജേഷ് , സുജിത്ത്, മനോജ് തുടങ്ങിയവർ ചടങ്ങിൽ പങ്കെടുത്തു.

ഹൈമാസ്റ്റ് ലൈറ്റ് ഉദ്ഘാടനം ചെയ്തു

കൊട്ടാരക്കര:എഴുകോൺ:പോച്ചംകോണം പാറയ്ക്കൽ ശ്രീ ഭദ്രാ ദേവീക്ഷേത്രത്തിന്സമീപം സ്ഥാപിച്ച മിനിമാസ്റ്റ് ലൈറ്റ് എഴുകോൺ ഗ്രാമ പഞ്ചായത്ത് പ്രസിഡന്‍റ് അഡ്വ.ബിജു എബ്രഹാംസ്വിച്ച്ഓൺ ചെയ്ത് ഉദ്ഘാടനം നിര്‍വഹിച്ചു.വാർഡ് മെമ്പർ സുനിൽ കുമാറിന്‍റെ അധ്യക്ഷതയിൽ നടന്ന ചടങ്ങിൽ ഗ്രാമ പഞ്ചായത്ത് അംഗം അഡ്വ .രതീഷ് കിളിത്തട്ടിൽ, പഞ്ചായത്ത് വൈസ് പ്രസിഡന്‍റ് സുഹർബാൻ,പഞ്ചായത്ത് മെമ്പർ ആതിരാ ജോൺസൺ തുടങ്ങിയവർ പ്രസംഗിച്ചു. മഹേഷ് പാറയ്ക്കൽ, ഷാബു ബലഭദ്രൻ, ഹിരൺമോഹൻ,അജീഷ്, പ്രോംജിത്ത്, അപ്പു,സുനിൽ കുമാർ, സുരേഷ് കുമാർ, പുഷ്പ, തങ്കച്ചി, പ്രേമ, സൗമ്യ, ലൈല, അനീഷാ മോൾ,കസ്തൂര്‍ബ, സിന്ധു,അമലു തുടങ്ങിയവർ ചടങ്ങിൽ പങ്കെടുത്തു.

വാളത്തുംഗൽ സ്കൂളിൽ എസ്പിസി ക്യാമ്പ്

കൊല്ലം:വാളത്തുംഗൽ ഗവ. വൊക്കേഷണൽ ഹയർ സെക്കണ്ടറി സ്കൂൾ ഫോർ ഗേൾസിലെ വേനലവധി ക്യാമ്പ് ആരംഭിച്ചു. ഇരവിപുരം എസ്ഐഅർജുൻ അജിത് പതാക ഉയർത്തി. സീനിയർ അധ്യാപികയായ .ഡി. ലീലയുടെ അധ്യക്ഷതയിൽ ചേർന്ന യോഗത്തിൽ ഇരവിപുരം എസ്ഐ ശ്യാം കുമാർ ദ്വി ദിന ക്യാമ്പ്ഉദ്ഘാടനംചെയ്തു.സ്കൂൾ പ്രിൻസിപ്പാൾ നിഷ ,സിപിഒ സിംസി സ്റ്റീഫൻ ,സ്കൂൾ ഹെഡ്മാസ്റ്റർ ബിജുഎന്നിവർ പ്രസംഗിച്ചു. ക്യാമ്പിന്‍റെ ഭാഗമായി ഡി ഡിക്സൺ മോട്ടിവേഷൻ ക്ലാസുംകുട്ടികളുടെ അവകാശങ്ങളെ കുറിച്ച് അഡ്വ.പാർഥനും ക്ലാസുകൾ എടുത്തു.ലഹരി വിരുദ്ധ ബോധവൽക്കരണഭാഗമായുള്ള ക്ലാസുകൾ ,പ്രതിജ്ഞ,സംവാദം, പരിപാടികൾ, ഡിജിറ്റൽ അഡിക്ഷൻ ക്ലാസ്, ഫസ്റ്റ് എയ്ഡ് ക്ലാസ്എന്നിവ നടത്തി.

മുട്ടത്തുവർക്കി അക്ഷര പീഠം അവാർഡ് വി.എസ്. അജിത്തിന്

കൊല്ലം: സാഹിതീസംഗമവേദി സാഹിത്യകൂട്ടായ്മയുടെ നാലാമത് മുട്ടത്തുവർക്കി അക്ഷരപീഠം അവാർഡിന് എഴുത്തുകാരൻ വി. എസ്. അജിത്തിന്‍റെ “പെൺഘടികാരം"എന്ന ചെറുകഥ സമാഹാരം അർഹത നേടി. 25001 രൂപയും, ഫലകവും അടങ്ങുന്ന അവാർഡ്. സാഹിതീസംഗമവേദിയുടെവാർഷികത്തോടനുബന്ധിച്ച് ശിവഗിരി വർക്കല ക്ലബിൽ 11 ന് ഉച്ചകഴിഞ്ഞ് നടക്കുന്ന അവാർഡ്‌ദാന ചടങ്ങിൽ സമർപ്പിക്കും. പ്രത്യേക ജൂറി പുരസ്കാരത്തിന് ടി.കെ .ശങ്കരനാരായണന്‍റെ അഗ്രഹാര കഥകളും ശശി കുറുപ്പിന്‍റെ ബുദ്ധൻ ചിരിക്കുന്നു ചെറുകഥാസമാഹാരവും അർഹത നേടി.10001 രൂപയും അവാർഡും ഫലകവും അടങ്ങുന്ന നാലാമത് മാധവികുട്ടി കവിതാപുരസ്‌കാരത്തിന് ഉമാദേവി തുരുത്തേരിയുടെപ്രണയത്തിന്‍റെ ജലവിരലുകളും പ്രത്യേക ജൂറി പുരസ്‌കാരത്തിന് ഡോ എസ്. ദിവ്യയുടെ “വൃക്ഷമനുഷ്യനും" സന്തോഷ് വാര്യർ പന്തളീയന്‍റെ "അശാന്തിപർവവും” അർഹത നേടി. പത്രസമ്മേളനത്തിൽ സാഹിതി സംഗമവേദി പ്രസിഡന്‍റ് ബാലചന്ദ്രൻ ഇഷാര, മോഹൻദാസ് എവർഷൈൻ, ശിവരാജൻ കോവിലഴികം അഡ്വ. വി. വി .ജോസ് കല്ലട എന്നിവർ പങ്കെടുത്തു.

കൊല്ലം പുസ്തകോത്സവം 10 മുതല്‍ 13 വരെ ഗവ.ബോയ്സ് ഹൈസ്കൂള്‍ ഗ്രൗണ്ടില്‍

കൊല്ലം : ജില്ലാ ലൈബ്രറി കൗണ്‍സില്‍ വികസന സമിതിയുടെ ആഭിമുഖ്യത്തിൽനടത്തുന്ന കൊല്ലം പുസ്തകോത്സവം 10 മുതല്‍ 13 വരെ കൊല്ലം ഗവ.ബോയ്സ് ഹൈസ്കൂള്‍ ഗ്രൗണ്ടില്‍ സജ്ജീകരിക്കുന്ന എം.ടി. വാസുദേവന്‍നായര്‍ നഗറില്‍ നടക്കും. കേരളത്തിലെഎഴുപതോളം പ്രസാധകര്‍ പുസ്തകോത്സവത്തിൽ പങ്കെടുക്കും. ജില്ലയിലെ ഗ്രന്ഥശാലകള്‍ക്കുള്ള വാര്‍ഷിക ഗ്രാന്‍റ് ഉപയോഗിച്ച് എല്ലാ ഗ്രന്ഥശാലകളും ആവശ്യമുള്ള പുസ്തകങ്ങള്‍ പ്രസാദകരിൽ നിന്ന് വാങ്ങുന്നതാണ്. പുസ്തകപ്രകാശനങ്ങള്‍, സെമിനാറുകള്‍, അനുസ്മരണങ്ങള്‍, കലാപരിപാടികള്‍ എന്നിവ പുസ്തകോത്സവത്തിന്‍റെ ഭാഗമായി എല്ലാ ദിവസവും ഉണ്ടായിരിക്കുമെന്ന് ജില്ലാ ഭാരവാഹികളായ കെ. ബി. മുരളീകൃഷ്ണന്‍, ഡി. സുകേശന്‍ എന്നിവര്‍ അറിയിച്ചു.

കുടുംബശ്രീയുടെ 'അരങ്ങ് 'കലാമേള അഞ്ചുമുതല്‍

ക്ഷയരോഗ ബാധിതർക്ക് പോഷകാഹാരകിറ്റ് വിതരണം ചെയ്തു

കരുനാഗപ്പള്ളി : ക്ഷയരോഗം തുടച്ചു മാറ്റുക എന്ന ലക്ഷ്യവുമായി റെഡ് ക്രോസ് സൊസൈറ്റിയുടെ നേതൃത്വത്തിൽ രോഗബാധിതർക്ക് പോഷകാഹാര കിറ്റ് വിതരണം ചെയ്യുന്ന പദ്ധതിക്ക് ജില്ലയിൽ തുടക്കമായി. കേരളത്തെ ക്ഷയരോഗ മുക്തമാക്കുക എന്ന ലക്ഷ്യത്തോടെ സംഘടിപ്പിക്കുന്ന പദ്ധതി ജില്ലയിൽ ആദ്യമായി കരുനാഗപ്പള്ളി താലൂക്ക് റെഡ് ക്രോസ് സൊസൈറ്റി ആണ് നടപ്പിലാക്കുന്നതെന്ന് പരിപാടിയുടെ ഉദ്ഘാടനം നിർവഹിച്ചുകൊണ്ട് റെഡ് ക്രോസ് സോസൈറ്റി സംസ്ഥാന ചെയർമാൻ അഡ്വ .ആർ .രാധാകൃഷ്ണൻ പറഞ്ഞു. സൊസൈറ്റി സംസ്ഥാന ജനറൽ സെക്രട്ടറി എസ് .അജയകുമാർ വിഷയാവതരണം നടത്തി. സുമംഗല അധ്യക്ഷയായി. നഗരസഭാ വൈസ് ചെയർപേഴ്സൺ ഷഹ്നാനസിം,ഡോ .ജാസ്മിൻ,കോടിയാട്ട് രാമചന്ദ്രൻപിള്ള , എൻ .എസ് .അജയകുമാർ, ജി .സുന്ദരേശൻ, സജീവ് മാമ്പറ, ശിവകുമാർ എന്നിവർ പ്രസംഗിച്ചു. ഗവ.നെഞ്ചുരോഗ ആശുപത്രിയുമായി സഹകരിച്ച് തെരഞ്ഞെടുക്കപ്പെട്ട രോഗികൾക്ക് ആറുമാസകാലത്തേക്കാണ് പോഷകാഹാര കിറ്റുകൾ വിതരണം ചെയ്യുന്നത്.

വിമലഹൃദയ ഐഎസ്‌സി സ്കൂളിന് വിജയത്തിളക്കം

കൊല്ലം : രജത ജൂബിലി ആഘോഷിക്കുന്ന വിമലഹൃദയ ഐഎസ്‌സി സ്കൂൾ ഇക്കഴിഞ്ഞ ബോർഡ് പരീക്ഷയിൽ പതിവുപോലെ 100ശതമാനംവിജയം കരസ്ഥമാക്കി. ഐസിഎസ്ഇ വിഭാഗത്തിൽ 78 കുട്ടികൾ പരീക്ഷയെഴുതിയതിൽ 41 ഡിസ്റ്റിങ്ഷനുകളും 31 ഫസ്റ്റ് ക്ലാസുകളും ഐ എസ് സി വിഭാഗത്തിൽ 49 കുട്ടികൾ പരീക്ഷയെഴുതിയതിൽ 34 ഡിസ്റ്റിങ്ഷനുകളും 10 ഫസ്റ്റ് ക്ലാസുകളും ഉൾപ്പെടെ പരീക്ഷയെഴുതിയ മുഴുവൻ വിദ്യാർഥികളും മികച്ച വിജയം കരസ്ഥമാക്കി സ്കൂളിന്‍റെ യശസ് ഉയർത്തി. ഐസിഎസ്ഇവിഭാഗത്തിൽ എസ്.കെ.അമോഘ, ഐഎസ് സി വിഭാഗത്തിൽ ദീപ്തി രാജ് എന്നിവർ സ്കൂൾ ടോപ്പേഴ്‌സ് ആയി. വിജയികളെക്ക് പ്രിൻസിപ്പൽ, സ്റ്റാഫ്, മാനേജ്മെന്‍റ് തുടങ്ങിയവർ അനുമോദിച്ചു. പഴയ ആറ്റിൻകുഴി വിമല ഹൃദയ സ്കൂളിൽ പരീക്ഷ എഴുതിയ മുഴുവൻ കുട്ടികളും വിജയിച്ചു.

മൗണ്ട് കാർമലിന് ഇക്കുറിയും വിജയത്തിളക്കം

കൊല്ലം: മൗണ്ട് കാർമലിന് ഇക്കുറിയും വിജയത്തിളക്കം. ഐസി എസ് ഇ വിഭാഗത്തിൽ 184 വിദ്യാർഥികൾ പരീക്ഷ എഴുതിയതിൽ 30 പേർക്ക് 90 ശതമാനവും 83 പേർക്ക് ഡിസ്റ്റിംഗ്‌ഷനും ലഭിച്ചു. ഐഎസ് സി വിഭാഗത്തിൽ 56 കുട്ടികൾ പരീക്ഷ എഴുതിയതിൽ 17 പേർക്ക് 90 ശതമാനവും 39 പേർക്ക് ഡിസ്റ്റിംഗ്‌ഷനും കിട്ടി. ഐസി എസ് ഇ വിഭാഗത്തിൽ മിത്ര ലക്ഷ്മി 97.4 ശതമാനം മാർക്കോടെഒന്നാംസ്ഥാനവും ജാനെറ്റ് ജോയ് 96.2 ശതമാനം മാർക്കോടെ രണ്ടാംസ്ഥാനവും അനഘ സന്തോഷ്, ഭദ്ര.എസ്. നായർ എന്നിവർ 95.2 ശതമാനം മാർക്കോടെ മൂന്നാം സ്ഥാനവും കരസ്ഥമാക്കി. ഐഎസ്‌സി സയൻസ് വിഭാഗത്തിൽ ഡി. ആർ. മീനാക്ഷി, ദിയ മനോജ് എന്നിവർ 96.5 ശതമാനം മാർക്കോടെ ഒന്നാം സ്ഥാനം പങ്കിട്ടു.എസ്.ആഫ്ര രണ്ടാം സ്ഥാനവും, ദിയ സജീവ്,സൂര്യ തേജ എന്നിവർ 95.25 ശതമാനം മാർക്കോടെ മൂന്നാം സ്ഥാനവും പങ്കിട്ടു. കോമേഴ്‌സ് വിഭാഗത്തിൽ എസ് .പൂജക്കാണ് ഒന്നാം സ്ഥാനം. 83.75 ശതമാനം മാർക്കാണ് പൂജക്ക് ലഭിച്ചത്. രണ്ടാം സ്ഥാനക്കാരി ജെ. ദർശനക്ക് 83.25 ശതമാനവും മൂന്നാംസ്ഥാനം നേടിയ നന്ദന അനിൽകുമാറിന് 80 ശതമാനം മാർക്കും ലഭിച്ചു.

ഐസിഎസ്ഇ/ഐഎസ്സി പരീക്ഷകളിൽ തങ്കശേരി ഇൻഫന്‍റ് ജീസസ് സ്കൂളിന് നൂറു ശതമാനം വിജയം

കൊല്ലം :അഖിലേന്ത്യാ ഐസിഎസ്ഇ/ഐഎസ് സിപരീക്ഷകളിൽ തങ്കശേരി ഇൻഫന്‍റജീസസ് ആംഗ്ലോ- ഇന്ത്യൻ ഹയർ സെക്കണ്ടറി സ്കൂൾ മുൻ വർഷങ്ങളിലെപ്പോലെ നൂറു ശതമാനം വിജയം ആവർത്തിച്ചു. ഐസിഎസ്ഇ പരീക്ഷ എഴുതിയ 235 കുട്ടികളിൽ165ഡിസ്റ്റിംഗ്ഷനും70ഫസ്റ്റ്ക്ലാസുംലഭിച്ചു.ഐഎസ് സി പരീക്ഷ എഴുതിയ മുഴുവൻ കുട്ടികളും 74 പേർ ഡിസ്റ്റിംഗ്ഷൻ നേടി പാസായി. ഐസിഎസ്ഇ പത്താം ക്ലാസ് പരീക്ഷയിൽവിഘ്നേഷ് എസ് നായർ 492 (98.4ശതമാനം) മാർക്ക്വാങ്ങി ഒന്നാം സ്ഥാനവും, നിരഞ്ജൻജി.ആർ. 487( 97.4ശതമാനം) മാർക്ക് വാങ്ങി രണ്ടാം സ്ഥാനവും,ശ്രേയസ്പ്രമോദ് 478(95.6ശതമാനം )മാർക്ക് വാങ്ങി മൂന്നാം സ്ഥാനവും കരസ്ഥമാക്കി. ഐഎസ് സി പ്ലസ് ടു പരീക്ഷയിൽ സയൻസ് ഗ്രൂപ്പിൽ ഫഹദ്. എസ്.റഹുമാൻ 394 (98.5 ശതമാനം)മാർക്കനേടി ഒന്നാം സ്ഥാനവും, അയന എസ്.കുമാർ 393 (98.3ശതമാനം) മാർക്ക് നേടി രണ്ടാം സ്ഥാനവും, ആൽഡ്രിൻ. എസ്. ജയിംസ് 384(96ശതമാനം) മാർക്ക് നേടി മൂന്നാം സ്ഥാനവും കരസ്ഥമാക്കി. കോമേഴ്സ് ഗ്രൂപ്പിൽ അഗസ്റ്റിൻ പീറ്റർ 364 (91ശതമാനം) മാർക്ക, അരുൺ ബോസ്കോ മോസസ് 360 (90ശതമാനം) മാർക്ക, ബെൻസൺ എം. 354 (89ശതമാനം ) എന്നിവരാണ് യഥാക്രമം ഒന്നും രണ്ടും മൂന്നും സ്ഥാനങ്ങൾ നേടിയവരെന്നും പ്രിൻസിപ്പൽ റവ.ഡോ. സിൽവി ആന്‍റണി അറിയിച്ചു.

ദാരിദ്ര്യ വിഭാഗത്തിൽപ്പെട്ടവർക്ക് കൈത്താങ്ങുമായി അദിച്ചനല്ലൂർ പഞ്ചായത്ത്

ചാത്തന്നൂർ: അതിദാരിദ്ര്യം അനുഭവിക്കുന്നവർക്ക് കൈത്താങ്ങുമായി അദിച്ചനല്ലൂർ ഗ്രാമ പഞ്ചായത്ത്. പഞ്ചായത്ത് പരിധിയിൽ ക്ലേശങ്ങൾ അനുഭവിക്കുന്ന കുടുംബങ്ങളെ കണ്ടെത്തി ഗുണഭോക്ത ലിസ്റ്റ് തയാറാക്കിയാണ് സേവനങ്ങൾ നൽകിവരുന്നത്. വി ഇ ഒ പ്രാഥമിക ലിസ്റ്റ് തയാറാക്കി. പൊതു മാനദണ്ഡത്തിന്‍റെഅടിസ്ഥാനത്തിൽ ഫീൽഡ് പരിശോധന നടത്തിയാണ് 47 പേരുള്ള ഗുണഭോക്തൃ ലിസ്റ്റ് തയാറാക്കിയത്. ഭക്ഷണം പാചകം ചെയ്ത് കഴിക്കാൻ പറ്റുന്ന ആളുകൾക്ക് മാസത്തിലൊരിക്കൽ പലവ്യഞ്ജന കിറ്റ് വിതരണം ചെയ്യും. സ്വയം പാചകം ചെയ്യാൻ കഴിയാത്ത ആളുകൾക്ക് ഭക്ഷണപ്പൊതി ഏർപ്പാടാക്കും. ലിസ്റ്റിലുള്ള ആളുകൾക്ക് അടിസ്ഥാന തിരിച്ചറിയൽരേഖകൾ നൽകിയിട്ടുണ്ട്. ഇവർക്ക് പ്രത്യേക മെഡിക്കൽ ക്യാമ്പുകൾ സംഘടിപ്പിച്ച് പ്രാഥമിക ആരോഗ്യ കേന്ദ്രം വഴി ചികിത്സ ഉറപ്പാക്കി. വാസയോഗ്യമല്ലാത്ത വീടുകൾ മെയിന്‍റനൻസ് തുക നൽകി വീടുകൾ നവീകരിച്ചു. വീടില്ലാത്ത മുഴുവൻ ആളുകൾക്കും വീട് നൽകുന്ന പദ്ധതി പുരോഗമിച്ചു വരികയാണ്. വസ്തുവില്ലാത്ത ആളുകൾക്ക് സ്വന്തമായി വീട് വയ്ക്കുന്നതിന് ഗ്രാമപഞ്ചായത്ത് പ്രത്യേക തുക കണ്ടെത്തി വസ്തു വാങ്ങി നൽകിവരുന്നു. വസ്തു വാങ്ങി പ്രമാണം കൈമാറുന്നതിന്‍റെ ഉദ്ഘാടനം കർമം ഗ്രാമപഞ്ചായത്ത് പ്രസിഡന്‍റ്രേഖ .എസ്. ചന്ദ്രൻ നിർവഹിച്ചു. മുൻ ക്ഷേമ കാര്യ സ്റ്റാൻ്റിംഗ് കമ്മിറ്റി ചെയർമാൻ പ്ലാക്കാട് ടിങ്കു അധ്യക്ഷത വഹിച്ചു. സി ഡി എസ് മെമ്പർ കലജാദേവി, വി ഇ ഒ ശബാന സമദ്, പ്രതിഭ .കെ. ദാസ്, കെ. രമേശൻ, കെ. കലേശൻ എന്നിവർ പ്രസംഗിച്ചു.

അഞ്ച് മാസമായി വേതനമില്ല; പാരിപ്പള്ളി മെഡിക്കൽ കോളജിൽ സുരക്ഷാ ജീവനക്കാർ സൂചനാ പണിമുടക്ക് നടത്തി

100 ശതമാനം വിജയം കൊയ്ത് കൊട്ടിയം ഓക്സീലിയം സ്കൂൾ

കൊട്ടിയം : ഓക്സീലിയം ഇംഗ്ലീഷ് മീഡിയം സ്കൂൾ 100ശതമാനം വിജയത്തിന്‍റെ ആഹ്ളാദത്തിലാണ്. 10 ാം ക്ലാസിൽ 66 കുട്ടികൾ പരീക്ഷ എഴുതിയതിൽ റേച്ചൽ സാറാ ജോൺ 97 ശതകമാനം മാർക്കോടെ ഒന്നാം സ്ഥാനത്തെത്തി. 36 കുട്ടികൾ ഡിസ്റ്റിംഗ്ഷനും 27 കുട്ടികൾ ഫസ്റ്റ് ക്ലാസും നേടി. 12-ാം ക്ലാസിൽ 17 കുട്ടികൾ പരീക്ഷ എഴുതിയതിൽ സയൻസ് വിഭാഗത്തിൽ നിന്ന് 89ശതമാനം മാർക്കോടെ സോനാ സാജനും കൊമേഴ്സ് വിഭാഗത്തിൽ നിന്ന് 76ശതമാനം മാർക്കോടെ അമൃത് എൽ . ഉം ഒന്നാം സ്ഥാനത്ത് എത്തി. അതിൽ 12 കുട്ടികൾ ഡിസ്റ്റിംഗഷനും 3 കുട്ടികൾ ഫസ്റ്റ്ക്ലാസും നേടി.

കെഎംഎംഎല്ലില്‍ 'സര്‍ഗവസന്തം' ദ്വിദിന ശില്‍പശാല

ചവറ : കുട്ടികളിലെ സര്‍ഗാത്മകതയെ പരിപോഷിപ്പിക്കുന്നതിനും വ്യക്തിത്വ വികസനത്തിനുമായി വിദ്യാര്‍ഥികള്‍ക്കായി കെ എം എം എല്ലില്‍ സംഘടിപ്പിക്കുന്ന ദ്വിദിന ശില്‍പശാല 'സര്‍ഗവസന്തം' അഞ്ചിനും ആറിനും നടക്കും. കെ എം എം എല്‍ ടൈറ്റാനിയം എംപ്ലോയീസ് റിക്രിയേഷന്‍ ക്ലബിന്‍റെ നേതൃത്വത്തിലാണ് ശില്‍പശാല സംഘടിപ്പിക്കുന്നത്. പന്മന, ചവറ പഞ്ചായത്തുകളിലെ അഞ്ചാം ക്ലാസ് മുതല്‍ പ്ലസ്ടു വരെയുളള കുട്ടികള്‍ക്കും കെ എം എം എല്‍ ജീവനക്കാരുടെ മക്കള്‍ക്കുമാണ് ശില്‍പശാലയില്‍ പ്രവേശനം. കഥാരചന, കവിതാ രചന, ചിത്രരചന, മാജിക്, വ്യക്തിത്വ വികസനം, ടി.വി അവതരണം, അഭിനയം എന്നീ മേഖലകളില്‍ പ്രമുഖരായ അദ്ധ്യാപകര്‍ ശില്‍പശാലയില്‍ പരിശീലനം നല്‍കും. കുട്ടികള്‍ രചിക്കുന്ന സ്‌ക്രിപ്റ്റിനെ ആധാരമാക്കിയുള്ള ഹ്രസ്വ ചിത്ര നിര്‍മ്മാണവും ശില്‍പശാലയില്‍ നടക്കും. പങ്കെടുക്കാന്‍ ആഗ്രഹിക്കുന്നവര്‍ മേയ് നാലിനകം പേര് രജിസ്റ്റര്‍ ചെയ്യണം. ബന്ധപ്പെടേണ്ട നമ്പര്‍: എ. ജെ.മിറാഷ് - 8547952985, ടി.എസ്. സിറാജ്-7012409013.

ഇലക്ട്രിക്കൽ എക്സ്പോ ഇന്നുമുതൽ കൊല്ലത്ത്

കൊല്ലം: കെഎസ്ഇബി എൻജിനീയേഴ്സ് അസോസിയേഷന്‍റെവാർഷിക ജനറൽ ബോഡി യോഗത്തിന്‍റെ ഭാഗമായുള്ള ഇലക്ട്രിക്കൽ എക്സ്പോ ഇന്നു മുതൽ നാലുവരെ കൊല്ലം ആശ്രാമം ശ്രീനാരയണ ഗുരു സാംസ്കാരിക സമുച്ചയത്തിൽ നടക്കും. ഇന്ന് രാവിലെ പത്തിന് മന്ത്രി കെ.കൃഷ്ണൻകുട്ടി ഉദ്ഘാടനം നിർവഹിക്കും. മേയർ ഹണി ബഞ്ചമിൻ, ശ്രീനാരായണ ഗുരു ഓപ്പൺ യൂണിവഴ്സിറ്റി വൈസ് ചാൻസിലർ ഡോ. വി.പി. ജഗതി രാജ് തുടങ്ങിയവർ സംബന്ധിക്കും. എക്സിബിഷനിൽ അമ്പതോളം സ്റ്റാളുകൾ ഉണ്ടാകും. രാവിലെ 11 മുതൽ രാത്രി ഒമ്പത് വരെയാണ് പ്രദർശനം. പ്രവേശനം സൗജന്യമാണ്.സമാപന സമ്മേളനം മൂന്നിന് ഉച്ചകഴിഞ്ഞ് 1.30 ന് മന്ത്രി ജെ.ചിഞ്ചുറാണി ഉദ്ഘാടനം ചെയ്യും. കെഎസ്ഇബി ചെയർമാൻ ബിജു പ്രഭാകർ മുഖ്യപ്രഭാഷണം നടത്തും.

യുവജനക്ഷേമ പദ്ധതികള്‍ വേണം: പഞ്ചായത്തുകളില്‍ അവകാശ പത്രിക സമര്‍പ്പിച്ച് ഡിവൈഎഫ്ഐ

അഞ്ചല്‍ : ഗ്രാമപഞ്ചായത്തുകള്‍ പദ്ധതികള്‍ രൂപീകരിക്കുമ്പോള്‍ യുവജന ക്ഷേമ പദ്ധതികള്‍ക്ക് പ്രാധാന്യം നൽകണമെന്ന് ആവശ്യപ്പെട്ടു ഡിവൈഎഫ്ഐയുടെ നേതൃത്വത്തില്‍ ഗ്രാമപഞ്ചായത്തുകളില്‍ അവകാശ പത്രിക സമര്‍പ്പിച്ചു. ഡിവൈഎഫ്ഐ അഞ്ചല്‍ ബ്ലോക്ക് കമ്മിറ്റിയുടെ നേതൃത്വത്തില്‍ മേഖലയിലുള്ള മുഴുവന്‍ പ്രസിഡന്‍റ്മാര്‍ക്കും വിവിധ ആവശ്യങ്ങള്‍ ഉന്നയിച്ചുകൊണ്ടു നിവേദനം നല്‍കും. ഇതിന്‍റെ ഉദ്ഘാടനം ഏരൂര്‍ ഗ്രാമപഞ്ചായത്ത് പ്രസിഡന്‍റ് ജി. അജിത്തിന് നിവേദനം നല്‍കികൊണ്ട് അഞ്ചൽ ബ്ലോക്ക്‌ സെക്രട്ടറി ഷൈൻ ബാബു നിര്‍വഹിച്ചു. വാർഡുകളിൽ കളിസ്ഥലം എന്ന സർക്കാർ നിർദേശം നടപ്പിലാക്കുക, കലാകായിക സംഘടനകളെ പ്രോത്സാഹിപ്പിക്കുന്നതിന് സ്പോർട്സ് കിറ്റ് വിതരണം ചെയ്യുക, അഭ്യസ്‌തവിദ്യരായ യുവാക്കൾക്ക് സ്റ്റാർട്ട്‌ അപ്പ്‌ സംരംഭംങ്ങൾക്കുള്ള പദ്ധതി നടപ്പാക്കുക, ലഹരിക്കെതിരെയും ട്രാഫിക് നിയമങ്ങൾ സംബന്ധിച്ചും ബോധവത്കരണം നടത്തുക, വയനശാലകളെ പ്രോത്സാഹിപ്പിക്കുന്നതിനും വായന ശാല സൗകര്യം ഒരുക്കുന്നതിനും ഉള്ള പദ്ധതികൾ നടപ്പാക്കുക, പൊതുസ്ഥാപനങ്ങളിൽ പത്രവും ആനുകാലിക പ്രസിദ്ധീകരണങ്ങളും നൽകുക തുടങ്ങിയ ആവശ്യങ്ങൾ ആണ് ഡിവൈഎഫ് ഐ അവകാശപത്രികയിലൂടെ ആവശ്യപ്പെടുന്നത്. സിപിഎം അഞ്ചൽ ഏരിയ കമ്മിറ്റി അംഗം ആർ. രാജീവ്‌, ഡിവൈഎഫ്ഐ മേഖല സെക്രട്ടറിമാരായ കിഷോർ, നിഖിൽ, നജുമൽ പ്രസിഡന്‍റുുമാരായ അനന്ദ്, സന്ദീപ്, ദേവൻ ബ്ലോക്ക്‌ കമ്മിറ്റി അംഗംങ്ങളായ ശിഖ പദ്മൻ, രേവതി, ജനപ്രതിനിധികളായ അഞ്ചു, രാജി, ശോഭ, മഞ്ജുലേഖ, മഞ്ജു, എസ്എഫ്ഐ ഏരിയ പ്രസിഡന്‍റ് ബുഹരി എന്നിവർ പങ്കെടുത്തു.

ഒൻപതു വയസുകാരിയെ പീഡിപ്പിച്ച പ്രതിക്ക് 60വർഷം കഠിനതടവും 1,50,000 പിഴയും

കൊട്ടാരക്കര : ഒൻപതു വയസുള്ള കുട്ടിയെ ലൈംഗികമായി പീഡിപ്പിച്ച മൈലം സ്വദേശി ജേക്കബിനെ 60 വർഷം കഠിന തടവിനും 150000 രൂപയും ശിക്ഷ വിധിച്ചു. കൊട്ടാരക്കര ഫാസ്ട്രാക്ക് സ്പെഷൽ കോടതി ജഡ്ജി അഞ്ചു മീര ബിർളയാണ് ശിക്ഷ വിധിച്ചത്. 2023 സെപ്റ്റംബർ മാസത്തിലാണ് കേസിനാസ്‌പദമായ സംഭവം നടന്നത്. പ്രതി കുട്ടിയെപല തവണകളായി പീഡിപ്പിച്ചു . പിഴ അടച്ചില്ലായെങ്കിൽ 18 മാസം കൂടി അധികം തടവ് അനുഭവിക്കണം. പിഴത്തുക വിക്‌ടിം കോമ്പൻസേഷൻ ആയി നൽകുന്നതിനും ഉത്തരവായിട്ടുണ്ട്. കൊട്ടാരക്കര പോലീസ് സ്റ്റേഷൻ ഇൻസ്പെക്ട‌ർ ജയകൃഷ്ണൻ എഫ് ഐ ആർ രെജിസ്റ്റർ ചെയ്തു ആദ്യാന്വേഷണം നടത്തി പ്രതിയെ അറസ്റ്റു ചെയ്തു . കൊട്ടാരക്കര ഡി വൈ എസ് പി ബൈജുകുമാർ ചാർജ് ഷീറ്റ് സമർപ്പിച്ച കേസാണിത്. പ്രോസിക്യൂഷനുവേണ്ടി അഡ്വ: ഷിഗു സി തോമസ് ഹാജരായി.

വീട്ടിൽ കയറി ആക്രമിച്ച കേസിൽ യുവാവിന് കഠിനതടവ്

കൊല്ലം: അയൽവാസികളായ ബന്ധുക്കളുടെ വീട്ടിൽ അതിക്രമിച്ച് കയറി വീട്ടിലുണ്ടായിരുന്ന ഭാര്യയെയും ഭർത്താവിനെയും മക്കളെയും ദേഹോപദ്രവം ഏൽപ്പിച്ച് വീടും കാറും അടിച്ച് തകർത്ത കേസിലെ പ്രതിയെ എട്ടരവർഷം കഠിനതടവിന് ശിക്ഷിച്ച് കോടതി. പുനലൂർ വിളക്കുടി മാണിക്കാംവിള വീട്ടിൽ മാർഷൽ കോട്ടയലിനെയാണ് കൊല്ലം ഫസ്റ്റ് അഡീഷണൽ ജില്ലാ സെഷൻസ് ജഡ്ജി പി.എൻ. വിനോദ് വിവിധ വകുപ്പുകളിലായി എട്ടരവർഷം കഠിനതടവിന് ശിക്ഷിച്ചത്. ബന്ധുക്കളുമായുള്ള വസ്‌തുതർക്കത്തെ തുടർന്നുള്ള വിരോധത്തെ തുടർന്ന് പ്രതി 2022 നവംബർ 30 ന് കുന്നിക്കോട്' പോലീസ് സ്റ്റേഷന് സമീപമുള്ള വീട്ടിൽ അതിക്രമിച്ച് കടന്നു കമ്പി പാര ഉപയോഗിച്ച് വീട്ടിന് മുന്നിൽ പാർക്ക് ചെയ്‌തിരുന്ന രണ്ടു കാറുകൾ അടിച്ചു തകർക്കുകയും വീടിന് നാശനഷ്‌ടങ്ങൾ വരുത്തുകയും ആയിരുന്നു. വീട്ടിലുണ്ടായിരുന്ന പ്രതിയുടെ ബന്ധുവായ സ്ത്രീയെയും ഭർത്താവിനെയും പ്രായപൂർത്തിയാകാത്ത മക്കളെയും കമ്പിപാര കൊണ്ട് ദേഹമാസകലം അടിക്കുകയും ഗുരുതരമായി ദേഹോപദ്രവം ഏൽപ്പിക്കുകയും ചെയ്‌തിരുന്നു. ഇയാളുടെ ഉപദ്രവത്തിനെതിരെ ബന്ധുക്കൾ പോലീസിൽ പരാതി നൽകി. കേസിന്‍റെവിചാരണ വേളയിലും പ്രതി ഇവരെ ദേഹോപദ്രവം ഏൽപ്പിച്ചതിനും കേസ് നിലവിലുണ്ട്. ആയുധങ്ങൾ ഉപയോഗിച്ച് ദേഹോപദ്രവം ഏൽപ്പിച്ചതിന് മൂന്നര വർഷം കഠിനതടവും, വീടിനും കാറിനും നാശനഷ്‌ടങ്ങൾ വരുത്തിയതിന് ഒരു വർഷം കഠിനതടവും കഠിനദേഹോപദ്രവം ഏൽപ്പിക്കണമെന്ന ഉദ്ദേശത്തോടും കരുതലോടും വീട്ടിൽ അതിക്രമിച്ച് കയറിയതിന് നാലു വർഷം കഠിനതടവും പിഴയായി 60 000 രൂപ പിഴയുമാണ് കോടതി ശിക്ഷിച്ചത്. കുന്നിക്കോട് പോലീസ് സ്റ്റേഷൻ സബ് ഇൻസ്പെക്‌ടരായ എസ്.ഫൈസൽ അന്വേഷിച്ച് കുറ്റപത്രം ഹാജരാക്കിയ കേസിൽ പ്രോസിക്യൂഷന് വേണ്ടി പബ്ളിക് പ്രോസിക്യൂട്ടർ സിസിൻ. ജി.മുണ്ടയ്ക്കൽ ആണ് ഹാജരായത്.

ഭീകരവാദത്തിനെതിരെ സ്നേഹജ്വാല

അഞ്ചല്‍ : കേരള വ്യാപാരി വ്യവസായി ഏകോപന സമിതി കരുകോൺ യൂണിറ്റിന്‍റെ നേതൃത്വത്തിൽ ഭീകരതക്കെതിരെ സ്നേഹ ജ്വാല സംഘടിപ്പിച്ചു. യൂണിറ്റ് ജനറൽ സെക്രട്ടറി അനിൽ പൊയ്കവിള അധ്യക്ഷത വഹിച്ചു. യൂണിറ്റ് പ്രസിഡന്‍റ് സിദ്ദിഖ് ഉദ്ഘാടനം ചെയ്തു. ട്രഷറർ സലീം, ചന്ദ്രശേഖരൻ പിള്ള, ചന്ദ്രൻപിള്ള, സജീന ഷിബു, അൻസർ സൈഫുദ്ദീൻ, ക്രിസ്റ്റി ഷാനവാസ്, ബാബു, യാഹ്യയാഖാൻ, ഷൗക്കത്ത് കൂപ്പിൽ, ഷംനാദ്, മുനീർ, അക്ബർ ഷാ എന്നിവർ സ്നേഹജ്വാലക്ക് നേതൃത്വം നൽകി.

ഗൃഹനാഥനെ കൊലപ്പെടുത്തിയ കേസിൽ പ്രതിക്ക് ജീവപര്യന്തം

കൊല്ലം: പട്ടാപ്പകൽ ഗൃഹനാഥനെ കൊലപ്പെടുത്തിയ കേസിൽ പ്രതിക്ക് ജീവപര്യന്തം കഠിന തടവും പിഴയും.നിരവധി ക്രിമിനൽ കേസുകളിലെ പ്രതി കരുനാഗപ്പളളി തഴവ ബി.കെ.ഭവനിൽ പാക്കരൻ ഉണ്ണി എന്ന് വിളിക്കുന്ന പ്രദീപിനെ (34) യാണ് നാലാം അഡീഷണൽ സെഷൻസ് കോടതി ജഡ്ജി എസ്. സുഭാഷ് ജീവപര്യന്തം കഠിന തടവിനും രണ്ട് ലക്ഷം രൂപ പിഴയടക്കാനും ശിക്ഷിച്ചത്. തഴവ തെക്കുംമുറി മേക്ക് തട്ടേക്കോട് കിഴക്കേ അറയിൽ തുളസീധരൻ (64) ആണ് കൊല്ലപ്പെട്ടത്. 2023 നവംബർ 21 ന് ഉച്ചയ്ക്ക് 12.45 നായിരുന്നു സംഭവം. സമീപവാസി വെള്ളാപ്പള്ളി പടീറ്റതിൽ രാമചന്ദ്രൻ പിള്ളയുടെ വീടിന്‍റെ സിറ്റൗട്ടിൽ ഇരുന്ന തുളസീധരനെ പ്രതി വീട്ടിൽ നിന്ന് വിളിച്ചിറക്കി വെട്ടിയും കുത്തിയും കൊലപ്പെടുത്തി എന്നാണ് കേസ്. പിഴത്തുക കൊല്ലപ്പെട്ട തുളസീധരന്‍റെ ഭാര്യ തങ്കമണിക്ക് നൽകാനും ശിക്ഷാവിധിയിൽ പറഞ്ഞിട്ടുണ്ട്. പിഴ ഒടുക്കിയില്ലെങ്കിൽ പ്രതി ഒരു വർഷം കൂടി അധിക ശിക്ഷ അനുഭവിക്കണം. കരുനാഗപ്പള്ളി സിഐ വി. ബിജു രജിസ്റ്റർ ചെയ്ത് അന്വേഷിച്ച് കുറ്റപത്രം സമർപ്പിച്ച കേസിൽ അന്വേഷണ സഹായിയായി ഉണ്ടായിരുന്നത് എസ്ഐ എ. റഹിം ആയിരുന്നു. പ്രോസിക്യൂഷന് വേണ്ടി പബ്ലിക് പ്രോസിക്യൂട്ടർമാരായ കെ.കെ. ജയകുമാർ, എ.നിയാസ് എന്നിവർ കോടതിയിൽ ഹാജരായി.

ഐആർഇ കമ്പനി പടിക്കൽ അനിശ്ചിതകാല സമരം ആരംഭിച്ചു

ചവറ : കേന്ദ്ര പൊതുമേഖല സ്ഥാപനമായ ഐആർഇഎൽ കമ്പനിയിൽ സിഐടിയുവിന്‍റെ നേതൃത്വത്തിൽ അനിശ്ചിതകാല സമരം ആരംഭിച്ചു. കമ്പനിയിലെ സ്ഥിരം ജീവനക്കാർ, ഫോറം ജീവനക്കാർ എന്നിവരുടെ ന്യായമായ ആവശ്യങ്ങൾ അംഗീകരിക്കാത്ത മാനേജ്മെന്‍റ് നിലപാടിനെതിരെയാണ് ഐആർഇൽ -സിഐടിയു നേതൃത്വത്തിൽ അനിശ്ചിതകാല സമരം ആരംഭിച്ചത്. ആശ്രിത നിയമനം നടപ്പിലാക്കുക, നിയമനങ്ങളിൽ മൈനിംഗ് ഏരിയ നിവാസികൾക്ക് മുൻഗണന നൽകുക, സ്ഥിരം ജീവനക്കാർക്കുള്ളതുപോലെ മെഡിക്കൽ ആനുകൂല്യം ഫോറം ജീവനക്കാർക്കും നൽകുക, മാനേജ്മെന്‍റ്അഴിമതി അവസാനിപ്പിക്കുക, കമ്പനിയുടെ ഖനന ആവശ്യത്തിനായി ഏറ്റെടുത്തിട്ടുള്ള ഭൂമി ഖനനത്തിന് ശേഷം എത്രയും പെട്ടെന്ന് തിരിച്ച് നൽകുക, ഫോറം ജീവനക്കാർക്ക് റിട്ടയർമെൻ്റ് മെഡിക്കൽ സൗകര്യം നടപ്പിലാക്കുക തുടങ്ങിയ വിവിധ ആവശ്യങ്ങൾ ഉന്നയിച്ചാണ് അനിശ്ചിതകാല സമരം ആരംഭിച്ചിരിക്കുന്നത്. സമരത്തിന്‍റെ ഉദ്ഘാടനം സിഐടിയു സംസ്ഥാന കമ്മിറ്റി അംഗം ടി. മനോഹരൻ നിർവഹിച്ചു. സിഐടിയു ജില്ലാ കമ്മിറ്റി അംഗം ആർ രവീന്ദ്രൻ അധ്യക്ഷനായി. എസ് .സുഭാഷ് കുമാർ, ആർ. സുരേന്ദ്രൻ പിള്ള, ജെ .ജോയി, പാർഥസാരഥി, സേവ്യർ, അനിൽകുമാർ, ക്രിസ്റ്റഫർ, രാധാകൃഷ്ണൻ, വർഗീസ്, പൊന്നമ്മ, സജീവ് എന്നിവർ പ്രസംഗിച്ചു.

ശക്തമായ കാറ്റില്‍ കുളത്തൂപ്പുഴയിൽ വ്യാപക കൃഷി നാശം

അഞ്ചല്‍ : വേനല്‍ മഴയോടൊപ്പം ഉണ്ടായ ശക്തമായ കാറ്റില്‍ കുളത്തൂപ്പുഴയിൽ വ്യാപക കൃഷി നാശം. കുളത്തൂപ്പുഴ പതിനൊന്നാംമൈല്‍ കിഴക്കുംകര പുത്തന്‍വീട്ടില്‍ സുബൈറിന്‍റെ കൃഷിവിളകളില്‍ ഭൂരിഭാഗവും കാറ്റിൽ നശിച്ചു. വിളവെടുപ്പിന് പാകമായ 90 ഓളം വാഴകളും, നിരവധി വാഴ തൈകളുമാണ് പൂർണമായും നശിച്ചത്. കമുക് അടക്കമുള്ള വിളകള്‍ക്കും നാശം സംഭവിച്ചിട്ടുണ്ട്. മകളുടെ വസ്തുവില്‍ ബാങ്ക് വായ്‌പ എടുത്തായിരുന്നു സുബൈര്‍ കൃഷി നടത്തിവന്നിരുന്നത്. പാകമായ വാഴകള്‍ നശിച്ചത്തോടെ ഇനി എന്തു ചെയ്യുമെന്ന ആശങ്കയിലാണ് സുബൈര്‍. ജനപ്രതിനിധികളും പൊതുപ്രവര്‍ത്തകരും ഉദ്യോഗസ്ഥരും സ്ഥലം സന്ദര്‍ശിച്ചു. സുബൈറിന് ആവശ്യമായ നഷ്ടപരിഹാരം ഉറപ്പാക്കണം എന്നാണ് നാട്ടുകാർ ആവശ്യപ്പെടുന്നത്.

പനയം പഞ്ചാ. മാലിന്യത്തോട് വിട പറഞ്ഞു, കാവൽ പോലെ ഹൈടെക് ഹരിതകര്‍മസേന

മൈലംകുളത്ത് ഡെങ്കിപ്പനി വ്യാപിക്കുന്നു

കൊട്ടാരക്കര: മൈലംകുളം ഭാഗത്തു ഡെങ്കി പനി പരക്കുന്നു. മഴക്കാലം കൂടി ആയതോടെയാണ് രോഗം വ്യാപകമായി പിടി പെടുന്നത്. മൈലം കുളം വെണ്ടാർ റോഡിന്‍റെ സമീപത്തു കൂടിയുള്ള കാടു മൂടി കിടക്കുന്നതും വൃത്തിഹീനമായ കനാലുകളിലും കൊതുകിനു വളരുവാൻ പറ്റിയ സാഹചര്യമാണ്. റോഡിന്‍റെ ഇരുവശങ്ങളിലും കാട് കയറി കിടക്കുന്നതുകൊണ്ട് അവിടെയെല്ലാം മാലിന്യങ്ങൾ നിക്ഷേപിക്കുന്നത് പതിവാണ്. ആരോഗ്യവകുപ്പ് അധികൃതരുടെ ശ്രദ്ധയിൽ ഈ വിവരം വന്നിട്ടുണ്ടെങ്കിലും പഞ്ചായത്തിന്‍റെ ഭാഗത്തുനിന്നും കനാലുകളും റോഡുകളും വൃത്തിയാക്കുവാൻ യാതൊരുവിധമായ നടപടിയും ഇതുവരെ എടുത്തിട്ടില്ല. കുട്ടികൾ ഉൾപ്പെടെ നിരവധി ആളുകൾ ഡെങ്കിപ്പനി മൂലം ആശുപത്രിയിൽ ചികിത്സ തേടി കഴിഞ്ഞു. ആരോഗ്യവകുപ്പിന്‍റെ യും പഞ്ചായത്തിന്‍റെയും ഭാഗത്തുനിന്നും ഈ രോഗത്തിനെതിരെ പ്രതിരോധ പ്രവർത്തനങ്ങൾ നടത്തണമെന്ന് പൊതുജനങ്ങൾ ആവശ്യപ്പെടുകയാണ്.

ഏരൂർ ആലഞ്ചേരിയിൽ നേത്ര പരിശോധന ക്യാമ്പ്

അഞ്ചല്‍ : ജാതിക്കും മതത്തിനും അപ്പുറം മനുഷ്യസ്നേഹമാണ് ഡിവൈഎഫ്ഐ ഉയര്‍ത്തുന്ന രാഷ്ട്രീയമെന്ന് ഡിവൈഎഫ്ഐ അഞ്ചല്‍ ബ്ലോക്ക് കമ്മിറ്റി സെക്രട്ടറിയും ഗ്രാമപഞ്ചായത്ത് സ്ഥിരംസമിതി അധ്യക്ഷനുമായ ഷൈന്‍ബാബു പറഞ്ഞു. ലഹരിക്കെതിരെ മുഴുവന്‍ സ്ഥലങ്ങളിലും വലിയ രീതിയിലുള്ള ബോധവല്‍കരണ പരിപാടികളുമായി മുന്നോട്ടുപോകുമെന്നും ഷൈന്‍ ബാബു പറഞ്ഞു. ഏരൂര്‍ ആലഞ്ചേരിയില്‍ ഡിവൈഎഫ്ഐ വാര്‍ഡ് കമ്മിറ്റിയുടെ നേതൃത്വത്തില്‍ സംഘടിപ്പിച്ച സൗജന്യ നേത്രപരിശോധന ക്യാമ്പ് ഉദ്ഘടനം ചെയ്തു പ്രസംഗിക്കുകയായിരുന്നു ഷൈന്‍ ബാബു. സര്‍വീസ് സഹകരണ ബാങ്ക് പ്രസിഡന്‍റ് ലിനുമോൻ അധ്യക്ഷത വഹിച്ചു. ലോക്കല്‍ കമ്മിറ്റി സെക്രട്ടറി രാജീവ്, വാര്‍ഡ് മെമ്പര്‍ എസ്.ആര്‍. മഞ്ജു, നേതാക്കളായ ആനന്ദ്, നിഖില്‍, ഡോ. സനല്‍ എന്നിവര്‍ പ്രസംഗിച്ചു. പുനലൂര്‍ ഭാരത് കണ്ണാശുപത്രിയുടെ സഹകരണത്തോടെയാണ് നേത്രപരിശോധന ക്യാമ്പ് നടത്തിയത്.

ബോധവത്കരണ റാലി സംഘടിപ്പിച്ചു

കൊല്ലം : നാഷണൽ സ്റ്റാറ്റിസ്റ്റിക്സ് ഓഫീസിന്‍റെ 75ാം വാർഷികത്തോടനുബന്ധിച്ച് ബോധവത്കരണ റാലി സംഘടിപ്പിച്ചു. കൊല്ലം മേയർ ഹണി ബഞ്ചമിൻ റാലി ഉദ്ഘാടനം ചെയ്തു. നാഷണൽ സ്റ്റാറ്റിസ്റ്റിക്സ് ഓഫീസ് നടത്തുന്ന സർവേകളിൽ സത്യസന്ധവും വസ്തുനിഷ്ഠവുമായ വിവരങ്ങൾ നൽകി വികസിത ഭാരതത്തിന്‍റെ ഭാഗമാകുവാൻ പൊതുജനങ്ങളോട് ജോമോൻ കുഞ്ചറക്കാട്ട്, അസിസ്റ്റന്‍റ് ഡയറക്ടർ, നാഷണൽ സ്റ്റാറ്റിസ്റ്റിക്സ് ഓഫീസ് ആവശ്യപ്പെട്ടു. കാർഷിക, വ്യാവസായിക, സേവനമേഖലയുടെ വളർച്ചയും പ്രവർത്തനങ്ങളും തൊഴിൽ ലഭ്യത, തൊഴിലില്ലായ്മ, ജീവിത നിലവാരത്തെ സംബന്ധിക്കുന്ന ഗാർഹിക ഉപഭോഗ സർവേകൾ എന്നിവയെ പറ്റി റാലിയിൽ ബോധവത്കരണം നടത്തി. ജില്ലാ സ്റ്റേറ്റ് സ്റ്റാറ്റിസ്റ്റിക്സിന്‍റെ ഡെപ്യൂട്ടി ഡയറക്ടർ വി. വിജയകുമാറും കൊല്ലം ചിൽഡ്രൻസ് ഹോം ഡെപ്യൂട്ടി സൂപ്രണ്ട് എ. നവാബും ക്ഷീര വികസന വകുപ്പ് അസിസ്റ്റന്‍റ് ഡയറക്ടർ അനീഷയും റാലിയിൽ പങ്കെടുത്തു.

നഗരസഭയിലെ ക്രമക്കേടുകൾക്കെതിരെയുള്ള പോരാട്ടത്തിൽ പ്രതിപക്ഷത്തിന് വിജയം

പുനലൂർ : നഗരസഭയിൽ ഭരണസമിതിയുടെ ക്രമക്കേടുകൾക്കെതിരെ നാളുകളായി നടത്തി വന്ന പോരാട്ടങ്ങളിൽ വീണ്ടും പ്രതിപക്ഷത്തിന് വിജയം. 2023 ൽ ഓണം ഫെസ്റ്റിന്‍റെ ഭാഗമായി തൂക്കുപാലത്തിൽലൈറ്റുകൾ സ്ഥാപിക്കുന്നതിന്‍റെ പേരിൽ വഴി മാറ്റിയ രണ്ട് ലക്ഷം രൂപ തിരിച്ചടക്കാൻ ഓംബുഡ്സ്മാൻ ഉത്തരവിട്ടിരിക്കുകയാണ്. മരാമത്ത് സ്ഥിരം സമിതി ചെയർമാനും എൽഡിഎഫ് പാർലമെന്‍ററി പാർട്ടി സെക്രട്ടറിയുമായ ബിനോയി രാജൻ നഗരസഭയ്ക്ക് വേണ്ടി സ്വന്തം പേരിൽ കനറാ ബാങ്കിൽ അക്കൗണ്ട് ആരംഭിച്ചാണ് രണ്ട് ലക്ഷം രൂപ മാറിയെടുത്തതെന്നായിരുന്നു പ്രതിപക്ഷത്തിന്‍റെ ആരോപണം. നഗരസഭയിലും പുറത്തും നടന്നു വന്ന പ്രതിപക്ഷ സമരത്തോടൊപ്പം തദ്ദേശസ്വയംഭരണ സ്ഥാപനങ്ങൾക്കുള്ള ഓംബുഡ്സ്മാൻ മുമ്പാകെ തിരുവനന്തപുരം സ്വദേശിയായ നിലാവ് മുരളീധരൻ പിള്ള എന്നയാൾ ഹർജി നല്‍കിയിരുന്നു. ഇതില്‍ യുഡിഎഫ് കൗണ്‍സിലര്‍മാര്‍ കൂടി ഹാജരായി തെളിവുകള്‍ നല്‍കുകയുണ്ടായി. ഈ ഹരജിയിലാണ് ഓംബുഡ്സ്മാൻ ജസ്റ്റിസ് പി. ഡി. രാജന്‍ 15 ദിവസത്തിനകം 2 ലക്ഷം രൂപ ബിനോയി രാജന്‍ തിരികെ അടക്കാൻ ഉത്തരവിട്ടിരിക്കുന്നത്. ഓണം ഫെസ്റ്റിനോട് അനുബന്ധിച്ച് തൂക്കുപാലത്തിൽ ലൈറ്റ് സ്ഥാപിക്കലിനായി കൗണ്‍സില്‍ അനുമതി നേടിയാണ് അക്കൗണ്ട് ആരംഭിച്ചതെന്നും വിഷയവുമായി ബന്ധപ്പെട്ട് പ്രതിപക്ഷം മനപൂർവ്വം വിവാദം ഉണ്ടാക്കുകയാണെന്നും ഉള്ള ഭരണസമിതിയുടെ വാദമാണ് ഈ വിധിയോടെ പൊളിഞ്ഞത്. ഏതാനും മാസങ്ങൾക്ക് മുമ്പ് മണിയാർ വാർഡിൽ ആരംഭിച്ച ഹെൽത്ത് ആൻഡ് വെൽനസ് സെന്‍റർ കെട്ടിടത്തിന് പൊതുമരാമത്ത് വകുപ്പ് നിശ്ചയിച്ചതിലും അധികം വാടക ബിനോയി രാജന്‍റെ ബന്ധു കൂടിയായ കെട്ടിട ഉടമയ്ക്ക് നല്‍കാനായി കൗൺസിൽ തീരുമാനത്തിൽ തിരുത്തൽ വരുത്തി എഴുതിച്ചേർത്തുവെന്ന് ആരോപിച്ച് യുഡിഎഫ് പാർലമെന്‍ററി പാർട്ടി നേതാവ് ജി. ജയപ്രകാശ് സംസ്ഥാന സർക്കാരിനും കേന്ദ്ര ആരോഗ്യ മന്ത്രാലയത്തിനും പരാതി നൽകിയിരുന്നു. അതേ തുടർന്ന് അന്വേഷണം നടത്തുകയും അധികമായി നൽകിയ വാടക തിരിച്ച് അടയ്ക്കാൻ ഉത്തരവിടുകയും തുക തിരിച്ച് അടയ്ക്കുകയും ഉണ്ടായി. മാസങ്ങളോളം മിനിട്ട്സ് എഴുതാതെ ക്രമക്കേട് കാട്ടി എന്ന പ്രതിപക്ഷത്തിന്‍റെ ഹർജിയിലെ വിധി വരാനിരിക്കുകയാണ്. ജിയോ പോളുകള്‍ സ്ഥാപിച്ചതും, കുടിവെള്ള വിതരണം, ശ്മശാനം അറ്റകുറ്റപ്പണി എന്നീ വിഷയങ്ങളില്‍ വിജിലന്‍സ് അന്വേഷണം നടത്തുകയാണ്. നഗരസഭയുമായി ബന്ധപ്പെട്ടിട്ടുള്ള വിവിധ വിഷയങ്ങളിൽ നിയമസഭ പെറ്റീഷൻ കമ്മിറ്റി, തദ്ദേശ സ്വയംഭരണ വകുപ്പ്, പ്രിൻസിപ്പൽ ഡയറക്ടർ, ആഭ്യന്തര വിജിലൻസ് വിഭാഗം എന്നിവയുടെ അന്വേഷണങ്ങളും നടക്കുന്നുണ്ട്.

റോളർ സ്‌കേറ്റിംഗ് ചാമ്പ്യൻഷിപ്പ്

കൊല്ലം: എട്ടാമത് ദേശീയ ഓപ്പൺ റാങ്കിംഗ് സ്പീഡ് റോളർ സ്‌കേറ്റിംഗ് ചാമ്പ്യൻഷിപ്പ് മേയ് 15 മുതൽ 19 വരെ എറണാകുളം പെരുമ്പാവൂരിൽ നടക്കും. ആറു വയസുമുതൽ മുകളിൽ കേഡറ്റ്, സബ് ജൂണിയർ, ജൂണിയർ, സീനിയർ വിഭാഗത്തിൽ ക്വാഡ്, ഇൻലൈൻ മത്സരങ്ങളാണ് നടത്തുന്നത്. പങ്കെടുക്കാൻ താത്പര്യമുള്ളവർ മേയ് 10ന് മുൻപ് റോളർ സ്‌കേറ്റിംഗ് ഫെഡറേഷൻ ഓഫ് ഇന്ത്യയുടെ വെബ്‌സൈറ്റ് www. indiaskate.com ൽ ഓൺലൈൻ ആയി രജിസ്റ്റർ ചെയ്യുകയും രജിസ്‌ട്രേഷൻ നേടുകയോ പുതുക്കുകയോ ചെയ്യണമെന്ന് ജില്ലാ റോളർ സ്‌കേറ്റിംഗ് അസോസിയേഷൻ സെക്രട്ടറി പി.ആർ.ബാലഗോപാൽ അറിയിച്ചു. ഫോൺ: 9447230830.

ഗാന്ധിഭവനില്‍ ക്ലിനിക് ഉദ്ഘാടനവും സൗജന്യ മെഡിക്കല്‍ ക്യാമ്പും

പത്തനാപുരം: പൊതുജനങ്ങൾക്കു കൂടി സേവനം ലഭ്യമാകുന്ന തരത്തിൽ പത്തനാപുരം ഗാന്ധിഭവനില്‍ ക്ലിനിക്ക് ആരംഭിക്കുന്നു. നാളെ ഉച്ചയ്ക്ക് 12ന് ജില്ലാ പഞ്ചായത്ത് പ്രസിഡന്‍റ് ഡോ.പി.കെ.ഗോപന്‍ ഉദ്ഘാടനം ചെയ്യും. ബ്ലോക്ക് പ്രസിഡന്‍റ് എ.ആനന്ദവല്ലി, പഞ്ചായത്ത്‌ പ്രസിഡന്‍റ് എസ്.തുളസി, പഞ്ചായത്ത്‌ മെമ്പർ സി.വിജയ, യുഡിഎഫ്. ജില്ലാ ചെയര്‍മാന്‍ കെ.സി.രാജന്‍, കെപിസിസി സെക്രട്ടറി എല്‍.കെ. ശ്രീദേവി, കെ. ധർമരാജൻ, എസ്.സുവർണകുമാർ തുടങ്ങിയവര്‍ പങ്കെടുക്കും. ജില്ലാ ആശുപത്രി സൂപ്രണ്ടുമാരായിരുന്ന ഡോ. ഒ.വാസുദേവന്‍, ഡോ. സബീന വാസുദേവന്‍, ആരോഗ്യവകുപ്പ് അഡീഷണല്‍ ഡയറക്‌ടറായിരുന്ന പ്രമുഖ മനോരോഗ ചികിത്സാവിദഗ്ധ ഡോ.ലൈലാ ദിവാകര്‍ എന്നിവരുടെ നേതൃത്വത്തിലാണ് ക്ലിനിക് ആരംഭിക്കുന്നത്. ഉദ്ഘാടനത്തോടനുബന്ധിച്ച് നാളെ രാവിലെ ഒന്പത് മുതല്‍ പ്രദേശവാസികള്‍ക്കായി ഡയബറ്റിക് ഫുഡ് കെയര്‍, ഡയബറ്റിക് ന്യൂറോപ്പതി ടെസ്റ്റിംഗ്, പ്രമേഹരോഗ നിര്‍ണയം, പാലിയേറ്റീവ് കെയര്‍, മാനസികാരോഗ്യം എന്നീ വിഭാഗങ്ങളില്‍ സൗജന്യ മെഡിക്കല്‍ ക്യാമ്പും ആരോഗ്യ ബോധവത്കരണവും നടക്കും. ഗാന്ധിഭവനിലെ അമ്മമാർക്കായി പ്രവാസിവ്യവസായി എം.എ.യൂസഫലി നിർമിച്ചുനൽകിയ കെട്ടിടത്തിൽ പ്രവർത്തിക്കുന്ന ക്ലിനിക്കില്‍ പ്രദേശവാസികള്‍ക്ക് രോഗപരിശോധന സൗജന്യമായിരിക്കുമെന്ന് ഗാന്ധിഭവന്‍ മാനേജിംഗ് ട്രസ്റ്റി പുനലൂര്‍ സോമരാജന്‍ അറിയിച്ചു.

ധർണ നടത്തി

അഞ്ചല്‍ : തദ്ദേശ സ്ഥാപനങ്ങളുടെ ബജറ്റ് വിഹിതം വെട്ടിക്കുറച്ച് വികസനം സ്തംഭിപ്പിക്കുന്ന എൽഡിഎഫ് സർക്കാരിനും ഏരൂർ പഞ്ചായത്ത്‌ ഭരണ സമിതിയുടെ അഴിമതിയിലും പ്രതിഷേധിച്ച് യുഡിഎഫ് ഏരൂർ പഞ്ചായത്ത്‌ കമ്മിറ്റി ധര്‍ണ നടത്തി. ഏരൂർ ജംഗ്ഷനിൽ നടത്തിയ ഏകദിന ധർണ മുസ്‌ലിം ലീഗ് ജില്ല ജനറൽ സെക്രട്ടറി അഡ്വ. സുൽഫിക്കർ സലാം ഉദ്ഘാടനം ചെയ്തു. യുഡിഎഫ് പഞ്ചായത്ത് കമ്മിറ്റി ചെയർമാൻ പത്തടി സുലൈമാൻ അധ്യക്ഷത വഹിച്ചു. ഡിസിസി എക്സിക്യൂട്ടീവ് അംഗം പി.ബി.വേണുഗോപാൽ, ഡിസിസി ജനറൽ സെക്രട്ടറി അഡ്വ.എസ്.ഇ.സഞ്ജയ്ഖാൻ, യുഡിഎഫ് കൺവീനർ ദുനൂബ് കുട്ടി, പഞ്ചായത്ത്‌ കോർകമ്മിറ്റി ചെയർമാൻ സി.ജെ.ഷോം, മണ്ഡലം പ്രസിഡന്‍റുമാരായ ഗീവർഗീസ്,ഡെനിമോൻ,യുഡിഎഫ് നേതാക്കളായ ബദറുദീൻ, ഷാജഹാൻ, കൊച്ചുമ്മച്ചൻ, അനുരാജ്, മൻസൂർ, രാജശേഖരൻ പിള്ള, റെജി തടിക്കാട്, രാജേഷ്,നജീം,അരവിന്ദ്, സത്യരാജൻ,സുബാൻ തുടങ്ങിയവർ പ്രസംഗിച്ചു.

മഹാസമാധി ദിവ്യജ്യോതിരാനയനം പന്മന ആശ്രമത്തിൽ

ചവറ : പന്മന ആശ്രമത്തിൽ നടന്ന 101-ാമത് മഹാഗുരു ചട്ടമ്പി സ്വാമി സമാധിവാർഷികസമ്മേളനത്തോടനുബന്ധിച്ച് മഹാസമാധി ദിവ്യജ്യോതിരാനയനം നടത്തി. പന്മന മനയിൽ ശ്രീ ബാലഭട്ടാരക വിലാസം സംസ്കൃത ഗവ.ഹയർ സെക്കൻഡറി സ്കൂൾ പരിസരത്തെ സമാധി സ്മാരക മണ്ഡപത്തിൽ നിന്നും താലപ്പൊലി, പഞ്ചവാദ്യം എന്നിവയുടെ അകമ്പടിയോടു കൂടി മഹാസമാധി ജ്യോതിസ് ഗരുഡ ധ്വജാനന്ദ സ്വാമികളുടേയും സന്യാസിമാരുടേയും നേതൃത്വത്തിൽ മഹാസമാധിപീഠത്തിലേക്ക് ആനയിച്ചു. തുടർന്ന് മഹാസമാധി ദിവ്യ മുഹൂർത്തത്തിൽ സമാധിപീഠത്തിൽ ജ്യോതി സമർപ്പണം, കളഭാഭിഷേകം, ശ്വേത പുഷ്പാഭിഷേകം തുടങ്ങിയ പൂജകൾ തീർഥപാദപരമ്പരയുടെ പരമാചാര്യൻ പ്രജ്ഞാനാനന്ദ തീർഥപാദസ്വാമികളുടെയും മഹാമണ്ഡലേശ്വർ ആനന്ദഭവനം ഭാരതി സ്വാമികളുടെയും നേതൃത്വത്തിൽ നടത്തി.

നാഥനില്ലാതെ അഗസ്ത്യവനം ബയോളജിക്കൽ പാർക്ക്

കോട്ടൂർ: ആർക്കും കയറാം ഈ വന ഭൂമിയിൽ... ഏതു വാഹനത്തിലും പോകാം... വേണമെങ്കിൽ ഇവിടെ തങ്ങുകയും ചെയ്യാം. അഗസ്ത്യവനം ബയോളജിക്കൽ പാർക്ക് വരുന്ന വനഭൂമിയാണു തുറന്നുകിടക്കുന്നത്. വനപാലകരും ചെക്ക് പോസ്റ്റുകളും വെറും നോക്കുകുത്തികൾ. 1992-ലാണ് പരുത്തിപ്പള്ളി വനം വിഭാഗത്തിലേയും നെയ്യാർ, പേപ്പാറ വന്യജീവി സങ്കേതത്തിലേയും വനഭൂമി ചേർത്തു ബയോളജിക്കൽ പാർക്ക് പദ്ധതി തയാറാക്കിയത്. എന്നാൽ അത് കേന്ദ്ര വനം പരിസ്ഥിതി മന്ത്രാലയം തടഞ്ഞു. തുടർന്നു സർക്കാർ പദ്ധതി ഉപേക്ഷിച്ചു. പിന്നെ ഈ വനഭൂമി വന്യജീവി സങ്കേതമായി മാറ്റുകയായിരുന്നു. പിന്നീ ടു കർശന നിയന്ത്രണങ്ങളും ചട്ടവും കൊണ്ടുവന്നിരുന്നു. കുറ്റിച്ചൽ പഞ്ചായത്തിലെ ഈ വന മേഖലയിൽ 27 ആദിവാസി സെറ്റിൽമെന്‍റുകളാണുള്ളത്. ഏകദേശം 3,000 ത്തോളം ആദി വാസികളാണ് ഇവിടെ പാർക്കുന്നത്. ആദിവാസി ഊരുകളിലേക്കു പുറത്തുനിന്നുള്ളവർക്ക് കടന്നു ചെല്ലാൻ കർശന നിയന്ത്രണമാണു വനം വകുപ്പ് ഏർപ്പെടുത്തിയിരിക്കുത്. എന്നാൽ ഈ നിയന്ത്രണങ്ങൾ പലപ്പോഴും പാലിക്കപ്പെടുന്നില്ല. സാമൂഹ്യ വിരുദ്ധരുടെ പ്രലോഭനങ്ങൾക്കു കോട്ടൂരിലെ ചെക്ക് പോസ്റ്റ് തുറന്നുകൊടുക്കുമ്പോൾ ഉടഞ്ഞു വീഴുന്നതു വനവാസി സ്ത്രീകളുടെ മാനമാണ്. ചെറുതും വലുതുമായ നിരവധി പീഡനങ്ങൾക്കും പീഡ ശ്രമങ്ങൾക്കും വിധേയരാകുകയാണ് ആദിവാസികൾ. കോട്ടൂർ സ്റ്റാൻഡിലെ ടാക്സികൾ, ഒാേട്ടാ റിക്ഷകൾ എന്നിവയ്ക്ക് ചെക്ക് പോസ്റ്റുവഴി യഥേഷ്ടം കടന്നുപോകാം. ഇവർക്ക് കാര്യമായ ചെക്കിംഗുകളില്ല. സ്വകാര്യ വാഹനങ്ങൾക്കു കാനന പാതയിലേക്ക് കടക്കാൻ ഒരു വിലക്കുമില്ല. ആദിവാസികൾക്ക് അത്യാവശ്യ ഘട്ടങ്ങളിൽ പട്ടണത്തിലേക്കു പോകാനാണ് കോട്ടൂരിൽനിന്നു ടാക്സികൾ വിളിക്കാറുള്ളത്. ഇങ്ങനെ വനത്തിനുള്ളിലേക്കു കടന്നു പോകുന്ന വാഹനങ്ങൾ നിശ്ചിത സമയത്തിനുള്ളിൽ തിരിച്ചു പോകുന്നുണ്ടോ എന്നു വനപാലകർ ശ്രദ്ധിക്കാറില്ല. അടുത്തിടെ വനവാസി യുവതിയെ പീഡിപ്പിക്കാൻ ശ്രമിച്ചവർ സഞ്ചരിച്ച ജീപ്പും ഇത്തരത്തിൽ ചെക്ക് പോസ്റ്റ് കടുന്നു പോയതാണ്. ചെക്കുപോസ്റ്റിലെ കാവൽക്കാർ യാതൊരു പരിശോധനയുമില്ലാതെ രാത്രിയിൽ ഈ ജീപ്പിനുവേണ്ടി വാതിൽ തുറന്നുകൊടുത്തുവെന്നാണ് ആക്ഷേപം. വനാതിർത്തി കടന്നു വരുന്നവരെ നിരീക്ഷിക്കുവാൻ മാങ്കോട്ടു സ്ഥാപിച്ച വാച്ച്ടവറിൽ ഇതേവരെ കാവൽക്കാരെ നിയമിച്ചിട്ടില്ല. നഞ്ചുനാഴികത്തോട് അഗസ്ത്യ വനം ബയോളജിക്കൽ പാർക്ക് റേഞ്ചിന്‍റെ ബൗണ്ടറിയിൽ സ്ഥാപിച്ചിട്ടുള്ള ക്യാമ്പ് ഷെഡിലും വനപാലകരെ നിയോഗിച്ചിട്ടില്ല. വന മേഖലയിലെ കാവൽപ്പുരകളിൽ നിരീക്ഷണ ക്യാമറ സ്ഥാപിക്കണമെന്ന എക്കോ ഡെവലപ്പ്മെന്‍റ് കമ്മിറ്റിയുടെ ആവശ്യത്തിനു വർഷങ്ങളുടെ പഴക്കമുണ്ട്. നിരീക്ഷണ കാമറ സ്ഥാപിച്ച് ഇവയെ ചീഫ് വൈൽഡ് ലൈഫ് വാർഡന്‍റെ ഓഫീസുമായി ഇന്‍റർനെറ്റു വഴി ബന്ധിപ്പിക്കണമെന്ന ഇവരുടെ ആവശ്യം അധികൃതർ ചെവികൊണ്ടില്ല. ഇത്തരം അതിക്രമങ്ങൾ തടയാൻ സർക്കാർ ഇവിടെ പോലീസ് പിക്കറ്റ് സ്റ്റേഷൻ സ്ഥാപിക്കാൻ ഉത്തരവുണ്ടായിരുന്നു. തുടർന്ന് ഇതിന്‍റെ നടപടികൾ തുടങ്ങിയതുമാണ്. എന്നാൽ അതും പാതി വഴിയിൽ നിലച്ചു. കാവൽപ്പുര എന്നത് ഇവരുടെ സ്വപ്നമായി മാറിയിരിക്കുകയാണ്.

രോഗികളുടെ ദുരിതം തുടരുന്നു : എമര്‍ജന്‍സി എംആര്‍ഐ സ്‌കാനിംഗിന് രോഗി കാത്തിരിക്കുന്നത് 20 ദിവസം !!

മെഡിക്കല്‍കോളജ്: തിരുവനന്തപുരം മെഡിക്കല്‍കോളജ് ആശുപത്രിയിലെത്തുന്ന പാവപ്പെട്ട രോഗികളോട് അധികൃതരുടെ സിസ്സംഗത തുടരുന്നു. ഉയരത്തില്‍ നിന്നുള്ള വീഴ്ചയില്‍ ഗുരുതരപരിക്കേറ്റു ചികിത്സയില്‍ കഴിയുന്ന രോഗിക്ക് അടിയന്തര എംആര്‍ഐ സ്‌കാനിംഗിന് ഡോക്ടര്‍ എഴുതി നല്‍കിയത് 2025 മേയ്മാസം 14-ാം തീയതി !! തിരുവനന്തപുരം മെഡിക്കല്‍കോളജ് ആശുപത്രിയില്‍ ചികിത്സയില്‍ കഴിയുന്ന തിരുവനന്തപുരം സ്വദേശിയായ 56-കാരനോടാണ് ഡോക്ടറുടെ ഈ സമീപനം. സ്വകാര്യ ലാബുകളെ സഹായിക്കാനുള്ള നീക്കമാണ് ഇതിനു പിന്നിലെന്നു രോഗികളും ബന്ധുക്കളും ആരോപിക്കുന്നു. ഏപ്രില്‍ 26-നാണ് രോഗിക്ക് ആദ്യ എംആര്‍ഐ സ്‌കാന്‍ ചെയ്തത്. രണ്ടാമത്തെ സ്‌കാന്‍ അടിയന്തരമായി ചെയ്യേണ്ടുന്നതായതുകൊണ്ട് എമര്‍ജന്‍സി റിക്വസ്റ്റ് എന്നു ഡോക്ടറുടെ കുറിപ്പില്‍ എഴുതിയിട്ടുണ്ട്. എന്നാല്‍ അതിനു നിശ്ചയിച്ചിട്ടുള്ളത് മേയ് 14നു രാത്രി ഒന്പതു മണിക്കാണ്! ഒരു കിടപ്പുരോഗിയായ 56-കാരനോട് അധികൃതരുടെ സമീപനം ഇതാണെങ്കില്‍ ബാക്കിയുള്ള രോഗികളോടും ഇത്തരം സമീപനങ്ങളായിരിക്കും സ്വീകരിക്കുന്നതെന്ന് വ്യാപക ആക്ഷേപം ഉയര്‍ന്നിട്ടുണ്ട്. രോഗികള്‍ സ്വകാര്യ ലാബുകളെ ആശ്രയിക്കുന്നതിനു വേണ്ടിയാണ് അധികൃതര്‍ ഇത്തരം സമീപനങ്ങള്‍ സ്വീകരിക്കുന്നതെന്നും സ്വകാര്യ ലാബുകളില്‍ എംആര്‍ഐ സ്‌കാനിനു ഭീമമായ തുകയാണെന്നുമുള്ളതാണ് വാസ്തവം. തിരുവനന്തപുരം മെഡിക്കല്‍കോളജില്‍ എമര്‍ജന്‍സി സ്‌കാനിന് നിശ്ചയിച്ചിട്ടുള്ള രോഗിക്ക് എംആര്‍ഐ സ്‌കാന്‍ തികച്ചും സൗജന്യമാണെന്നിരിക്കെയാണ് അധികൃതരുടെ ഇത്തരമൊരു തീരുമാനം.

യുഡിഎഫ് ധർണ നടത്തി

കുളത്തൂപ്പുഴ : കുളത്തൂപ്പുഴ പഞ്ചായത്തിൽ നടക്കുന്ന അഴിമതി ആരോപണങ്ങൾക്കെതിരേ യുഡിഎഫിന്‍റെ നേതൃത്വത്തിൽ ധർണ നടത്തി. അങ്കണവാടി ജീവനക്കാരെ പിൻവാതിലിലൂടെ നിയമിക്കാനുള്ള നീക്കം അവസാനിപ്പിക്കുക, തൊഴിലുറപ്പ് തൊഴിലാളികളുടെ ദൈനംദിനം വേദനവും വെട്ടി കുറച്ച നടപടി പിൻവലിക്കുക തുടങ്ങിയ ആവശ്യങ്ങൾ ഉന്നയിച്ചുകൊണ്ട് കഴിഞ്ഞദിവസം യുഡിഎഫിന്‍റെ നേതൃത്വത്തിൽ കുളത്തൂപ്പുഴ പഞ്ചായത്ത് ഓഫീസിലേക്ക് മാർച്ചും ധർണയും നടത്തിയത്. യുഡിഎഫ് കൺവീനർ റോയ് ഉമ്മൻ ധർണ ഉദ്ഘാടനം ചെയ്തു .യുഡിഎഫ് ചെയർമാൻ സാബു ഏബ്രഹാം അധ്യക്ഷത വഹിച്ചു. യോഗത്തിൽ കോൺഗ്രസ് ഈസ്റ്റ് വെസ്റ്റ് മണ്ഡലം പ്രസിഡന്‍റുമാരായ എം.സൈനബ ബീവി, കെ.കെ.കുര്യൻ ,ബ്ലോക്ക് പഞ്ചായത്തംഗം റീന ഷാജഹാൻ ,പഞ്ചായത്ത് അംഗങ്ങളായ സന്തോഷ് കുമാർ, സുഭിലാഷ് കുമാർ ,സിസിലി ജോബ്, ഷീല സത്യൻ, കോൺഗ്രസ് മണ്ഡലം നേതാക്കളായ കെ.എസ്.നിസാം, ഡാലി ബാബു ,ജോർജുകുട്ടി, ഷംസുദീൻ, തുടങ്ങിയവർ യോഗത്തിൽ പ്രസംഗിച്ചു.

വാളക്കോട് ഗതാഗത കുരുക്ക് ; പാലത്തിന് സമാന്തര റോഡ് നിർമിക്കാൻ 3.57 കോടി അനുവദിച്ച് ദേശീയപാത അഥോറിറ്റി

കൊല്ലം: വാളക്കോട് ഗതാഗതക്കുരുക്കിന് പരിഹാരം കാണാൻ നിലവിലുളള പാലത്തിന് സമാന്തരമായി റോഡ് നിർമാണത്തിന് 3.57 കോടി രൂപയുടെ പദ്ധതിക്ക് ദേശീയപാത അഥോറിറ്റി ഓഫ് ഇന്ത്യ അനുമതി നൽകി. വാളക്കോടുളള വീതി കുറഞ്ഞ പാലത്തിലൂടെയുളള ഗതാഗതം പ്രദേശത്ത് വലിയ ഗതാഗത കുരുക്കിന് കാരണമായിരുന്നു. ഗതാഗത കുരുക്കിൽ നിന്നും ഒഴിവാകുന്നതിനായി പാലം കടക്കുവാൻ വാഹനങ്ങൾ വേഗത കൂട്ടുന്നതു മൂലം പാലത്തിനും സമീപ പ്രദേശങ്ങളിലും അപകടങ്ങളും വർധിച്ചിരുന്നു. വാളക്കോട് ഒരു ബ്ലാക്ക്സ്പോട്ട് ആയി വിജ്ഞാപനം ചെയ്തിരുന്നില്ല. അപകടസാധ്യത കണക്കിലെടുത്ത് വാളക്കോട് പൊട്ടൻഷ്യൽ ബ്ലാക്ക് സ്പോട്ട് ആയി പരിഗണിച്ച് പ്രത്യേക പദ്ധതിയിലുൾപ്പെടുത്തി റോഡ് വികസനം സാധ്യമാക്കണമെന്ന് എൻ.കെ. പ്രേമചന്ദ്രൻ എംപി ദേശീയപാത അഥോറിറ്റിയോട് ആവശ്യപ്പെട്ടിരുന്നു. ഉദ്യോഗസ്ഥതലത്തിലും മന്ത്രിതലത്തിലും നിരവധി തവണ നടന്ന ചർച്ചകൾക്കൊടുവിലാണ് പൊട്ടൻഷ്യൽ ബ്ലാക്ക് സ്പോട്ട് ഒഴിവാക്കുന്നതിലേയ്ക്കായി റോഡ് വികസനത്തിന് തുക അനുവദിക്കുന്നത്.അഞ്ചര മീറ്റർ വീതിയിൽ നിലവിലുളള പാലത്തിന് സമാന്തരമായി റയിൽവേ ട്രാക്കിന് മുകളിൽ റോഡ് നിർമാണത്തിനായാണ് പദ്ധതി. നിലവിലുളള നാലര മീറ്ററും പുതിയതായി നിർമിക്കുന്ന അഞ്ചര മീറ്ററും ചേർന്ന് 10 മീറ്റർ വീതിയിൽ റോഡ് വികസിപ്പിക്കാനാണ് പദ്ധതി. നിലവിൽ ദേശീയപാതയുടെ അറ്റകുറ്റപ്പണികൾ നിർവഹിക്കുന്നത് സംസ്ഥാന സർക്കാരിന്‍റെ കീഴിലുളള പൊതുമരാമത്ത് വകുപ്പ് ദേശീയപാത വിഭാഗമാണ്. പുതിയതായി അനുവദിച്ച 3.57 കോടി രൂപയുടെ വാളക്കോട് റോഡ് നിർമാണം സംസ്ഥാന സർക്കാരിന്‍റെ പൊതുമരാമത്ത് വകുപ്പ് ദേശീയപാത വിഭാഗത്തിനെ ഏൽപ്പിക്കാനാണ് തീരുമാനം. പദ്ധതിക്കായി അനുവദിച്ച 3.57 കോടി രൂപ ദേശീയപാത അഥോറിറ്റി സംസ്ഥാന പൊതുമരാമത്ത് ദേശിയപാത വിഭാഗത്തിന് ഡെപൊസിറ്റ് ചെയ്യും. പദ്ധതിയ്ക്ക് അനുമതി ലഭിച്ച സാഹചര്യത്തിൽ എത്രയും പെട്ടെന്ന് വാളക്കോട് റോഡ് വികസനം ഏറ്റെടുത്ത് നടപ്പാക്കുവാൻ സംസ്ഥാന സർക്കാരിന്‍റെ പൊതുമരാമത്ത് ദേശീയപാത വിഭാഗം സത്വര നടപടി സ്വീകരിക്കണമെന്നു എൻ.കെ. പ്രേമചന്ദ്രൻ എംപി ആവശ്യപ്പെട്ടു.

വ്യാജരേഖ നിർമിച്ച് കോടതിയെ തെറ്റിദ്ധരിപ്പിക്കാൻ ശ്രമം; പ്രതി പിടിയിൽ

കൊല്ലം: വ്യാജ രേഖ നിർമിച്ച് കോടതിയെ തെറ്റിദ്ധരിപ്പിച്ച് വസ്തു കൈക്കലാക്കാൻ ശ്രമിച്ചയാൾ പിടിയിൽ. ശക്തികുളങ്ങര മീനത്ത് ചേരിയിൽ വെൺകുളങ്ങര നഗർ-73 ൽ മഠത്തിലഴികം വീട്ടിൽ സുരേഷ് ബാബുവിന്‍റെ ഭാര്യ ലളിത (64) ആണ് കൊല്ലം വെസ്റ്റ് പോലീസിന്‍റെ പിടിയിലായത്. ആലപ്പുഴ സ്വദേശിയും ഇപ്പോൾ മുംബൈയിൽ താമസക്കാരനുമായ ദീപക് ആണ് പരാതി നൽകിയത്. ദീപക്കിന്‍റെ പിതാവായ ചന്ദ്രദത്തൻ ദീപക്കിന്‍റെ ചെറുപ്പത്തിൽ തന്നെ ദീപക്കിനേയും അമ്മയേയും ഉപേക്ഷിച്ച് പോയതായിരുന്നു. എന്നാൽ ദീപക്ക് മുതിർന്നപ്പോൾ പിതാവിനെ അന്വേഷിച്ച് എത്തുകയും കൊല്ലം മയ്യനാടുള്ള അഭയ കേന്ദ്രത്തിൽ പിതാവായ ചന്ദ്രദത്തനെ കണ്ടെത്തുകയും ചെയ്തു. പിന്നീട് ഇയാൾ ഈ കേസിലെ ഒന്നാം പ്രതിയും സഹോദരന്‍റെ ഭാര്യയുമായ ലളിതയുടെ വീട്ടിൽ താമസം ആക്കിയെന്ന വിവരമാണ് ദീപക്കിന് ലഭിച്ചത്. എന്നാൽ തുടർന്ന് ചന്ദ്രദത്തനെ പറ്റിയുള്ള വിവരങ്ങൾ ഒന്നും ലഭിക്കാതായതോടെ മകനായ ദീപക്ക് അച്ഛനെ കാണാനില്ലെന്ന് കാണിച്ച് 2014 അവസാനത്തോടെ കൊട്ടിയം പോലീസ് സ്റ്റേഷനിൽ പരാതി നൽകി. പോലീസ് നടത്തിയ അന്വേഷണത്തിൽ ഇയാളെ പറ്റി വിവരങ്ങൾ ഒന്നും ലഭിച്ചില്ല. വർഷങ്ങൾക്ക് ശേഷം ദീപക്കിന് അവകാശപ്പെട്ട അയാളുടെ പിതാവിന്റെ പേരിൽ കാവനാടുള്ള 20 സെന്‍റ് വസ്തു ക്രയവിക്രയം നടത്താൻ ശ്രമം ആരംഭിച്ചതോടെയാണ് ലളിതയിലെ കുറ്റവാളി ഉണർന്നത്. അത് എങ്ങനെയും തടയണമെന്നും വസ്തു എങ്ങനെയും കൈക്കലാക്കണമെന്നുമുള്ള ഉദ്ദേശത്തോടെ മറ്റ് അഞ്ച് പ്രതികളുമായി ലളിത ഗൂഢാലോചന നടത്തുകയായിരുന്നു. കരുനാഗപ്പള്ളി കാട്ടിൽകടവിലുള്ള നിസാറിന്‍റെ പക്കൽ നിന്നും ചന്ദ്രദത്തൻ 2020-ൽ 10 ലക്ഷം രൂപ കടം വാങ്ങിയിട്ടുണ്ടെന്ന് കാണിച്ച് മറ്റ് കൂട്ട് പ്രതികളുടെ സഹായത്തോടെ വ്യാജ പ്രോമിസറി നോട്ട് നിർമിക്കുകയും അതിന്‍റെ പിൻബലത്തിൽ വസ്തു അറ്റാച്ച് ചെയ്യാൻ കൊല്ലം സബ് കോടതിയിൽ കേസ് ഫയൽ ചെയ്യുകയും ചെയ്തു. ഇതു കൂടാതെ ഈ വസ്തുവിന്മേൽ അവകാശവാദം ഉന്നയിച്ച് ലളിത കൊല്ലം മുൻസിഫ് കോടതിയിലും കേസ് ഫയൽ ചെയ്തു. ഇതോടെ വസ്തു കൈമാറ്റം ചെയ്യാൻ കഴിയാതെ കുഴങ്ങിയ ദീപക് പ്രതികൾ കോടതിയിൽ സമർപ്പിച്ചത് വ്യാജ പ്രൊമിസറി നോട്ടാണെന്നും അതിലെ തന്‍റെ പിതാവിന്‍റെ കൈയൊപ്പ് വ്യാജമാണെന്നും ആരോപിച്ച് കൊല്ലം വെസ്റ്റ് പോലീസ് സ്റ്റേഷനിൽ പരാതി നൽകുകയായിരുന്നു. തുടർന്ന് പോലീസ് സംഘം നടത്തിയ പഴുതടച്ച അന്വേഷണമാണ് സത്യങ്ങൾ പുറത്ത്‌കൊണ്ടുവരാൻ സഹായകമായത്. കൊല്ലം എസിപി എസ്.ഷരീഫിന്‍റെ മേൽനോട്ടത്തിലും കൊല്ലം വെസ്റ്റ് പോലീസ് ഇൻസ്‌പെക്ടർ ഫയാസിന്‍റെ നേതൃത്വത്തിലും എസ്ഐ സരിത, എഎസ്ഐ ജലജ, എസ്‌സിപിഒ ശ്രീലാൽ, സിപി ഫെബിൻ, അനിൽ, എന്നിവരടങ്ങിയ സംഘമാണ് പ്രതിയെ അറസ്റ്റ് ചെയ്തത്.

അഞ്ചലിൽ എണ്ണപ്പന വീണ് വീട് തകര്‍ന്നു

അഞ്ചല്‍ : എണ്ണപ്പന വീണ് വീട് തകര്‍ന്നു. പതിനൊന്നാംമൈലില്‍ സന്ധ്യ വിലാസത്തില്‍ രാധാകൃഷ്ണന്‍ - മാലതി ദമ്പതികളുടെ വീടിന് മുകളിലേക്കാണ് കൂറ്റന്‍ എണ്ണപ്പന മരം ഒടിഞ്ഞത് വീണത്. ഇന്നലെ വൈകുന്നേരത്തോ ടെയായിരുന്നു സംഭവം. മഴയോടൊപ്പം വീശിയടിച്ച കാറ്റിലാണ് എണ്ണപ്പന ഒടിഞ്ഞുവീണത്. വീടിന്‍റെ ഷെയ്ഡ്, സുരക്ഷയ്ക്കായി സ്ഥാപിച്ചിരുന്ന കമ്പിവേലി, വൈദ്യുതി ലൈറ്റ് ഉള്‍പ്പടെയുള്ളവ തകര്‍ന്നു. കോണ്‍ക്രീറ്റ് ഭിത്തികള്‍ക്കും തകരാര്‍ സംഭവിച്ചിട്ടുണ്ട്. പലതവണ ഓയില്‍പാം ഏരൂര്‍ എസ്റ്റേറ്റ് അധികൃതരോട് അപകടാവസ്ഥയില്‍ നില്‍ക്കുന്ന എണ്ണപ്പനകള്‍ മുറിച്ച് നീക്കണമെന്ന് നേരിട്ടും അല്ലാതെയും അറിയിച്ചിരുന്നതാണ്. എന്നാല്‍ ഓയില്‍പാം അധികൃതര്‍ ഇങ്ങോട്ടേക്ക് തിരിഞ്ഞു നോക്കിയിട്ടില്ലെന്ന് വീട്ടുകാര്‍ പറയുന്നു. ഇന്നലെ മരം ഒടിഞ്ഞുവീണതിന് ശേഷവും പലതവണ ബന്ധപ്പെട്ടുവെങ്കിലും ആരും എത്തിയിട്ടില്ല. ഓയില്‍പാം അധികൃതരുടെ നിരുത്തരവാദ നടപടിക്കെതിരെ നിയമ നടപടി സ്വീകരിക്കുമെന്ന് വാര്‍ഡ് അംഗം എ. ജോസഫ് പറഞ്ഞു.

സാംസ്കാരിക-നാടകാവതരണ സദസ് സംഘടിപ്പിച്ചു

കൊല്ലം : നിറവ് ക്രിയേഷൻസിന്‍റെ ആഭിമുഖ്യത്തിൽ സാംസ്കാരിക സദസും നാടക അവതരണവേദിയും സംഘടിപ്പിച്ചു. കടപ്പാക്കട ആർട്സ് ആന്‍റ് സ്പോർട്സ് ക്ലബ് ഓഡിറ്റോറിയത്തിൽ ദി ബ്ലാങ്കറ്റ്’ (കരിന്പടം) എന്ന നാടകത്തിന്‍റെ അവതരണ അരങ്ങേറ്റമാണ് കുറിച്ചത്. പരിപാടിയുടെ ഉദ്ഘാടനം അഡ്വ.കെ.പി.സജിനാഥ് നിർവഹിച്ചു. സാഹിത്യകാരൻ എ.റഹിംകുട്ടി അധ്യക്ഷത വഹിച്ചു. എം.കെ.കരിക്കോട്, കെപിഎസി ലീലാകൃഷ്ണൻ, രമാഭായി, അജിത്ത് മാടൻനട എന്നിവർ പ്രസംഗിച്ചു.

പഠന ശിബിരം സംഘടിപ്പിച്ചു

കൊട്ടാരക്കര:വിശ്വകർമ സർവീസ് സൊസൈറ്റി ശാഖ ഭാരവാഹികൾക്കായി താലൂക്ക് യൂണിയൻ നേതൃത്വത്തിൽ പഠന ശിബിരം നടത്തി. സദാനന്ദപുരം അവധൂത ആശ്രമത്തിൽ വച്ചു നടന്ന ഏകദിന പഠന ശിബിരം താലൂക്ക് യൂണിയൻ പ്രസിഡന്‍റ് മുരളി യദുകുലത്തിന്‍റെ അധ്യക്ഷതയിൽ അവധൂത ആശ്രമം മഠധിപതി സ്വാമി ചിദാനന്ദ ഭാരതി ഭദ്രദീപം കൊളുത്തി ഉദ്ഘാടനം നിർവഹിച്ചു. മൊട്ടിവേഷൻ സ്പീക്കറും വിദ്യാഭ്യാസ വിചക്ഷണനുമായ ബാബു പള്ളിപ്പാട്ട്, റിട്ടേർഡ് ഡപ്യുട്ടി കളക്‌ടർ ബി.അനിൽകുമാർ, ഡയറക്‌ടർ ബോർഡ് മെമ്പർ മുരുകൻ പാളയത്തിൽ, അഡീഷണൽ പബ്ലിക്ക് പ്രോസികുട്ടർ അഡ്വ.രാജ് മോഹൻ, യൂണിയൻ സെക്രട്ടറി മോഹനൻ ആചാരി, ജോയിന്‍റ് സെക്രട്ടറി ജനാർദനൻ ആചാരി, യൂണിയൻ ട്രഷറർ കൃഷ്ണൻ രാമസ്വാമി, ഡയറക്‌ടർ ബോർഡ് മെമ്പർമാരായ എം.അനൂപ്, ആർ.വിജയൻ, വൈസ് പ്രസിഡന്‍റുമാരായ കെ.സി.നടരാജൻ ആചാരി, ഡോ.എൻ.മോഹൻ, ബിജു പുലരി, ആദിത്യ കൃഷ്ണൻ എന്നിവർ പഠന ശിബിരത്തിൽ പങ്കെടുത്തു.

സ്വീകരണം നൽകി

കൊല്ലം : അഖിലകേരള അഭിഭാഷക കലോത്സവത്തിൽ ഏറ്റവും കൂടുതൽ പോയിന്‍റുകളോടെ അഡ്വ. വൈക്കം വി.എൻ.നാരായണപിള്ള സ്മാരക ട്രോഫി നേടിയ കൊല്ലം ബാർ അസോസിയേഷനിലെ അഭിഭാഷക കലാകാരന്മാർക്ക് കൊല്ലം ബാർ അസോസിയേഷനിൽ സ്വീകരണം നൽകി. കലാതിലകമായി പ്രഖ്യാപിക്കപ്പെട്ട കൊല്ലം ബാറിലെ അഡ്വ.പാർവതി ജയനെ അഭിനന്ദിച്ചു. ബാർ അസോസിയേഷൻ പ്രസിഡന്‍റ് അഡ്വ.ഓച്ചിറ എൻ.അനിൽകുമാർ അധ്യക്ഷത വഹിച്ച യോഗത്തിൽ ബാർ കൗൺസിൽ അംഗം അഡ്വ.പി. സജീവ് ബാബു, നാടക സംവിധായകനും നടനുമായ അഡ്വ. വി.എച്ച്.സത്ജിത്,സെക്രട്ടറി അഡ്വ.എ.കെ.മനോജ്, അഡ്വ. അമ്പിളി ജബ്ബാർ എന്നിവർ പ്രസംഗിച്ചു.

ദേവിക പ്രിയദർശനിയെ ആദരിച്ചു

ചാത്തന്നൂർ: സിവിൽ സർവീസ് പരീക്ഷയിൽ ഉന്നത വിജയം നേടിയ ചാത്തന്നൂർ സ്വദേശിനി ദേവിക പ്രിയദർശനിയെ ചാത്തന്നൂർ സിറ്റിസൺസ് ഫാറം ആദരിച്ചു. ‌ സിറ്റിസൺസ് ഫാറം പ്രസിഡന്‍റ് ജി.ദിവാകരന്‍റെ നേതൃത്വത്തിൽ വി.വിജയ മോഹനൻ, കവി ചാത്തന്നൂർ വിജയനാഥ്, വ്യാപാരിവ്യവസായി ഏകോപനസമിതി പ്രസിഡന്‍റ് എം.ശശിധരൻ എന്നിവർ ദേവിക പ്രിയദർശിനിയുടെ വീടായ ആതിരയിൽ എത്തിയാണ് ആദരിച്ചത്. പിതാവ് അയ്യപ്പൻപിള്ളയും മാതാവ് രാധികാപ്രിയദർശിനിയും ചടങ്ങിൽ പങ്കെടുത്തു.

ധർണ നടത്തി

ഐആര്‍ഇ കമ്പനി കരാര്‍ നിയമനം വ്യവസ്ഥാപിതമാക്കണമെന്ന്

ചവറ : കേന്ദ്ര പൊതുമേഖലാ സ്ഥാപനമായ ഐആര്‍ഇ കമ്പനിയിലെ കരാര്‍ വ്യവസ്ഥയില്‍ 100 പേരെ നിയമിക്കാനുള്ള തീരുമാനം പിന്‍വലിക്കണമെന്ന് ഐആര്‍ഇ പ്രാദേശിക സംരക്ഷണ സമതി ആവശ്യപ്പെട്ടു. കമ്പനിക്കായി ഭൂമിയും വീടുള്‍പ്പെടെയെല്ലാം നല്‍കിയവരെയും ഖനനം കാരണം ബുദ്ധിമുട്ടനുഭവിക്കുന്നവരെയും സര്‍ക്കാര്‍ മാനദണ്ഡ പ്രകാരം നിയമിക്കണം. പിന്‍വാതിലിലൂടെ ഇഷ്‌ടക്കാരെ നിയമിക്കുന്നത് നിലവിലെ സംവരണ വ്യവസ്ഥയ്ക്ക് ചേര്‍ന്ന നടപടിയല്ല. കമ്പനി പിന്നാക്ക വിഭാഗ സംവരണം പാലിക്കുന്നില്ല.ഖനനത്തിനു നല്‍കുന്ന ഭൂമിയുടെ വില വര്‍ധിപ്പിക്കണം.ആശ്രിത നിയമനം നല്‍കണം. കമ്പനിയിലെ അഴിമതി സിബിഐ അന്വേഷിക്കണം തുടങ്ങിയ ആവശ്യങ്ങളുന്നയിച്ച് സമരം ആരംഭിക്കാന്‍ സംരക്ഷണ സമതി തീരുമാനിച്ചു. രക്ഷാധികാരി അഡ്വ. ഫ്രാന്‍സിസ് ജെ.നെറ്റോ യോഗം ഉദ്ഘാടനം ചെയ്തു. ചെയര്‍മാന്‍ ബി. ബൈജു അധ്യക്ഷനായി.സാംസണ്‍ നൊറോണ,എസ്. ശിവകുമാര്‍,കമല, മുത്തു പുത്തന്‍തുറ എന്നിവര്‍ പ്രസംഗിച്ചു.

റോഡ് പുനരുദ്ധാരണത്തിന് രണ്ടുകോടി അനുവദിച്ചു

കൊല്ലം: കോർപറേഷനു കീഴിലെ ബൈപ്പാസ്- എസ്എൻ പബ്ലിക് സ്‌കൂൾ- രണ്ടാം നമ്പർ റോഡിന്‍റെ പുനരുദ്ധാരണത്തിനായി രണ്ടു കോടി രൂപ അനുവദിച്ചു. ഇരവിപുരം നിയോജകമണ്ഡലത്തിൽപെട്ട 450 മീറ്റർ റോഡാണ് ബിഎംബിസി നിലവാരത്തിൽ നവീകരിക്കുന്നതിനാണ് പൊതുമരാമത്ത് വകുപ്പ് ഭരണാനുമതി നൽകിയത്. റോഡിന്‍റെ നിർമാണ പ്രവൃത്തികൾ ടെണ്ടർ ചെയ്ത് എത്രയും വേഗം പണി പൂർത്തിയാക്കുമെന്ന് മന്ത്രി പി.എം. മുഹമ്മദ് റിയാസ് അറിയിച്ചു.

നിർധന കുടുംബത്തിന് ചങ്ങായീസിന്‍റെ സഹായഹസ്തം

കൊട്ടാരക്കര : സ്വന്തമായിട്ട് വസ്തുവോ വീടോ ഇല്ലാത്ത അഞ്ചൽ ഏരൂർ പഞ്ചായത്തിൽ അയിലറ ചരുവിള വീട്ടിൽ വിധവയും രോഗിയുമായ കെ.രാജിക്കും രോഗിയായ മകൻ രതീഷിനും ജീവകാരുണ്യ പ്രവർത്തകൻ അലക്സ് മാമ്പുഴയുടെ നേതൃത്വത്തിൽ വീടുവച്ച് നൽകുന്നു. അലക്സ് മാമ്പുഴ ദാനമായി നൽകിയ ഭൂമിയിൽ ചങ്ങായീസ് ചാരിറ്റബിൾ സൊസൈറ്റിയാണ് വീട് നിർമിച്ച് നൽകുന്നത്. വീടിന്‍റെ കട്ടള വയ്പ് കർമം വികാരി ഫാ. മോൻസി ഫിലിപ്പ് നിർവഹിച്ചു. ദിദീപ് റിച്ചാർഡ്, ലൂക്കോസ് ജോൺ,അലക്സ് മാമ്പുഴ, ഷെഫീക്ക്, മധുസൂദനൻ പിള്ള തുടങ്ങിയവർ പ്രസംഗിച്ചു.മൂന്നുമാസത്തിനകം വീടിന്‍റെ പണികൾ പൂർത്തീകരിച്ച് ഈ കുടുംബത്തിന് നൽകുമെന്ന് ഭാരവാഹികൾ അറിയിച്ചു.

കുളമുടി സെന്‍റ് ജോർജ് ഓർത്തഡോക്സ് പള്ളിയിൽ ഓർമ തിരുനാളും കൺവൻഷനും

കുളമുടി : സെന്‍റ് ജോർജ് ഓർത്തഡോക്സ് പള്ളിയിൽ മാർ ഗീവർഗീസ് സഹദായുടെ ഓർമ തിരുനാളും കൺവൻഷനും മൗണ്ട് താബോർ ആശ്രമത്തിലെ സിഐ ഗീവർഗീസ് റന്പാന്‍റെ ആറാമത് ഓർമയും ആരംഭിച്ചു. കൊല്ലം ഭദ്രസനാധിപൻ ഡോ.ജോസഫ് മാർ ദിവന്നാസിയോസിന്‍റെ മുഖ്യകാർമികത്വത്തിൽ 27ന് ആരംഭിച്ച പരിപാട‌ി മേയ് രണ്ടിന് സമാപിക്കും. ഇന്ന് സെന്‍റ് മേരീസ് മൗണ്ട് ടാബോർ ദയറാ ചാപ്പലിൽ രാവിലെ 6.30ന് പ്രഭാത നമ സ്കാരം ,ഏഴിന് ഫാ. ആൻഡ്രൂസ് വർഗീസ് തോമസിന്‍റെ കാർമിക്വത്തിൽ വിശുദ്ധ കുർബാന, വൈകുന്നേരം 6.15ന്, സന്ധ്യാനമസ്കാരം, രാത്രി 7.15ന് വചന ശുശ്രൂഷ. നാളെ സിഐ ഗീവർഗീസ് റന്പാന്‍റെ ആറാമത് ഓർമ. കുളമുടി സെന്‍റ് മേരീസ് മൗണ്ട് താബോർ ദയറാ ചാപ്പലിൽ രാവിലെ 7.30ന് വിശുദ്ധകുർബാന, 9.30ന് അനുസ്മരണ സമ്മേളനം. രണ്ടിന് രാവിലെ എട്ടിന് കൊല്ലം ഭദാസനാധീപൻ ഡോ. ജോസഫ് മാർ ദിവാന്നിയോസും ഫാ.അനു അലക്സ്, ഫാ.ഗീവർഗീസ് ജേക്കബ് എന്നിവരുടെ സഹകാർമികത്വത്തിലും മൂന്നിന്മേൽ കുർബാന. 10ന് സമ്മാനവിതരണം, തുടർന്ന് വെച്ചൂട്ട്, 11ന് കൊടിയിറക്ക്.

കരവാളൂർ നിത്യസഹായമാതാ പള്ളിയിൽ തിരുനാൾ ആഘോഷം

കുണ്ടറ മണ്ഡലം സമ്മേളനത്തിലെ തര്‍ക്കം ; മൂന്ന് സിപിഐ നേതാക്കള്‍ക്ക് സസ്‌പെന്‍ഷന്‍

കൊല്ലം: സിപിഐ കുണ്ടറ മണ്ഡലം സമ്മേളനത്തിനിടെയുണ്ടായ വാക്കേറ്റത്തിലും തര്‍ക്കവുമായി ബന്ധപ്പെട്ട് മൂന്ന് നേതാക്കൾക്ക് സസ്പെൻഷൻ. സിപിഐ ജില്ലാ കൗണ്‍സില്‍ അംഗം എ.ഗ്രേഷ്യസ്, മുന്‍ മണ്ഡലം സെക്രട്ടറി സുരേഷ് കുമാർ, മണ്ഡലം കമ്മിറ്റി അംഗം വാള്‍ട്ടര്‍ എന്നിവര്‍ക്കെതിരേയാണ് നടപടി. ഇന്നലെ ചേര്‍ന്ന ജില്ലാ കൗണ്‍സില്‍ യോഗത്തിലായിരുന്നു നടപടിയെടുത്തത്. കഴിഞ്ഞ ദിവസം മണ്ഡലം സെക്രട്ടറിയെ തെരഞ്ഞെടുക്കുമ്പോഴാണ് കുണ്ടറയിലെ സമ്മേളനത്തില്‍ തര്‍ക്കം ഉടലെടുത്തത്. കൊല്ലം ജില്ലയിലെ സിപിഐയുടെ ആദ്യ മണ്ഡലം സമ്മേളനമായിരുന്നു കുണ്ടറയിൽ നടന്നത്. സെക്രട്ടറി സ്ഥാനത്തേയ്ക്ക് ജില്ലാ നേതൃത്വം സേതുനാഥിന്‍റെ പേര് നിര്‍ദേശിച്ചതാണ് തര്‍ക്കത്തില്‍ കലാശിച്ചത്. സെക്രട്ടറിയായി പലതവണ പ്രവര്‍ത്തിച്ചിട്ടുള്ള സേതുനാഥിനെ വീണ്ടും സെക്രട്ടറിയാക്കേണ്ടെന്ന് ഭൂരിപക്ഷം അംഗങ്ങളും അഭിപ്രായപ്പെടുകയായിരുന്നു. 14 അംഗങ്ങളാണ് നിര്‍ദേശത്തോട് വിയോജിച്ചത്. ഒമ്പതുപേര്‍ അനുകൂലിച്ചു. തര്‍ക്കം ഏറെ നേരം നീണ്ടിട്ടും സമവായമുണ്ടാക്കാനായില്ല. സമ്മേളനത്തില്‍ ജില്ലാ, സംസ്ഥാന നേതൃത്വങ്ങളിലെ നിരവധി നേതാക്കളുമുണ്ടായിരുന്നു. നിലവിലെ സെക്രട്ടറി സുരേഷ് കുമാറിനെ ഒഴിവാക്കാനുള്ള ശ്രമമാണ് നടക്കുന്നതെന്ന ആരോപണവും ഉയര്‍ന്നു. കാനം പക്ഷത്തിനു മുന്‍തൂക്കമുള്ള മണ്ഡലം കമ്മിറ്റിയാണ് കുണ്ടറയിലേത്.

പുറ്റിംഗൽ കേസ് : 30-ാം പ്രതിയെ പിടികിട്ടാപ്പുള്ളിയായി പ്രഖ്യാപിച്ചു

കൊല്ലം: പുറ്റിംഗൽ ക്ഷേത്രത്തിലെ വെടിക്കെട്ട് ദുരന്തവുമായി ബന്ധപ്പെട്ട കേസിലെ 30-ാം പ്രതി അടൂർ ഏറം സ്വദേശി അനുരാജിനെ കോടതി പിടികിട്ടാപ്പുള്ളിയായി പ്രഖ്യാപിച്ചു. പ്രത്യേക കോടതിയുടെ ചുമതലയുള്ള നാലാം അഡീഷണൽ ഡിസ്ട്രിക്‌ട് ആൻഡ് സെഷൻസ് ജഡ്ജി എസ്. സുഭാഷാണ് പ്രതിയെ പിടികിട്ടാപ്പുള്ളിയായി പ്രഖ്യാപിച്ചത്. ഇനി ഇയാളെ ഒഴിവാക്കിയായിരിക്കും കേസിന്‍റെ വിചാരണ നടപടികൾ ആരംഭിക്കുക. നിരവധി തുടർ നടപടികൾക്ക് ശേഷമാണ് കോടതി ഇന്നലെ അനുരാജിനെ പിടികിട്ടാപ്പുള്ളിയായി പ്രഖ്യാപിച്ചത്. അറസ്റ്റിലായി ജാമ്യം ലഭിച്ച ശേഷം ഒളിവിൽ പോയ പ്രതിയെ വാറണ്ടിൽ പിടിക്കുന്നതിന് നിർവാഹമില്ലെന്ന് പോലീസ് കോടതിയിൽ റിപ്പോർട്ട് സമർപ്പിച്ചിരുന്നു. പിടികിട്ടാപ്പുള്ളിയായി പ്രഖ്യാപിക്കുനതിന് മുന്നോടിയായി അടൂർ ഏറം പഞ്ചായത്തിലെ പ്രതിയുടെ വീട്ടിൽ പോലീസ് പതിക്കുകയുണ്ടായി. അറസ്റ്റ് ഭയന്ന് രണ്ടുവർഷം മുമ്പ് നാടുവിട്ട് പോയതാണെന്നുള്ള ബന്ധുക്കളും നാട്ടുകാരും നൽകിയ വിവരങ്ങളും പോലീസ് കോടതിയെ ധരിപ്പിച്ചു. ഇത് കൂടാതെ പ്രതിയെ വാറണ്ടിൽ കിട്ടാത്ത വിവരം പോലീസ് ചൂരക്കോട് പഞ്ചായത്ത് വായനശാലയുടെ നോട്ടീസ് ബോർഡിലും ഏറം പഞ്ചായത്ത് ഓഫീസ് നോട്ടീസ് ബോർഡിലും പതിക്കുകയുണ്ടായി. പോലീസിൻ്റെ അപേക്ഷ പ്രകാരം പ്രതിയുടെ പേരിൽ സ്ഥാവര ജംഗമ സ്വത്തുക്കൾ ഒന്നുമില്ലെന്ന് പത്തനംതിട്ട ജില്ലാ കളക്ടറും വില്ലേജ് ഓഫീസറും റിപ്പോർട്ട് നൽകുകയുമുണ്ടായി. ഇക്കാര്യങ്ങളെല്ലാം വിശദമാക്കി അന്വേഷണ ഉദ്യോഗസ്ഥൻ കോടതിയിൽ റിപ്പോർട്ടും സത്യവാങ് മൂലവും ഫയൽ ചെയ്തു. തുടർന്നാണ് പ്രതിയെ ഇന്നലെ പിടികിട്ടാപ്പുള്ളിയായി പ്രഖ്യാപിച്ച് ജഡ്ജി ഉത്തരവായത്. കേസിൽ ആകെ 59 പ്രതികളാണുള്ളത്. ഇതിൽ 13 പേർ മരിച്ചു. 28 പ്രതികൾ ഇന്നലെ ഹാജരായി. 17 പ്രതികൾ അവധിക്ക് അപേക്ഷ നൽകി. 32ാം പ്രതി ഹാരിസിന് എതിരേ കോടതി വാറണ്ടും പുറപ്പെടുവിച്ചു. പിടി കിട്ടാപ്പുള്ളിയായി പ്രഖ്യാപിക്കപ്പെട്ട 30-ാം പ്രതിയുടെ ജാമ്യക്കാരുടെ പിഴ തുക നിശ്ചയിക്കുന്നതിന് കേസ് മേയ് മൂന്നിന് പരിഗണിക്കും. 30-ാം പ്രതിക്കെതിരായ ജപ്തി പ്രഖ്യാപിച്ച് മറ്റു നടപടികൾക്കായി കേസ് മേയ് ഏഴിനും മാറ്റി വച്ചിട്ടുണ്ട്.പ്രോസിക്യൂഷന് വേണ്ടി സ്പെഷൽ പബ്ലിക് പ്രോസിക്യൂട്ടർ കെ.പി. ജബ്ബാർ, അഡ്വ.അമ്പിളി ജബ്ബാർ എന്നിവർ കോടതിയിൽ ഹാജരായി.

Deepika.com

The Largest Read Malayalam Internet Daily

Quick Links

Rashtra Deepika LTD

Deepika.com

The Largest Read Malayalam Internet Daily

Local News

Quick Links

Rashtra Deepika LTD