ADVERTISEMENT

ADVERTISEMENT

റൂറൽ ജില്ലയിൽ 10 പോലീസ് ഉദ്യോഗസ്ഥർക്ക് ബാഡ്ജ് ഓഫ് ഓണർ

ആലുവ: റൂറൽ ജില്ലയിൽ നിന്നുള്ള പത്ത് പോലീസുദ്യോഗസ്ഥർ മികച്ച സേവനത്തിനുള്ള ബാഡ്ജ്ഓഫ് ഓണർ ഡിജിപി ഡോ. ഷെയ്ക്ക് ദർവേഷ് സാഹിബിൽ നിന്ന് ഏറ്റുവാങ്ങി.

വിവേക് കുമാർ (മുൻ റൂറൽ എസ്പി) എം.എം. മഞ്ജുദാസ് (ഇൻസ്പെക്ടർ) എസ്.എസ്. ശ്രീലാൽ (എസ്ഐ) എ.കെ. സന്തോഷ് കുമാർ (എസ്ഐ), ജി.എസ്. അരുൺ (എസ്ഐ), ബോബി കുര്യാക്കോസ് (എഎസ്ഐ), കെ.ബി. പ്രസാദ്' (എഎസ്ഐ),

എൻ.എം. മുഹമ്മദ് അമീർ (സിപിഒ), മാഹിൻ ഷാ അബൂബക്കർ (സിപിഒ), കെ.എം. മനോജ് (സിപിഒ) എന്നിവരാണ് ബഹുമതി ഏറ്റുവാങ്ങിയത്.

ADVERTISEMENT

ഇരുന്പനത്ത് കുരിശുപള്ളിയിലും ക്ഷേത്രത്തിലും അതിക്രമം; തമിഴ്നാട് സ്വദേശി പിടിയിൽ

ഇരുമ്പനം: കുരിശുപള്ളിയിലും ക്ഷേത്രത്തിലും അതിക്രമം നടത്തിയ ഇതരസംസ്ഥാനക്കാരനെ നാട്ടുകാർ പിടികൂടി പോലീസിലേൽപ്പിച്ചു. തമിഴ്നാട് സ്വദേശി വിജയ് (30) ആണ് പിടിയിലായത്. പുതിയറോഡ് വിളക്ക് ജംഗ്ഷനിലെ കുരിശുപള്ളിയിലും വെട്ടിക്കാവ് അമ്പലത്തിലുമാണ് ഇയാൾ അതിക്രമം നടത്തിയത്. കരിങ്ങാച്ചിറ സെന്‍റ് ജോർജ് യാക്കോബായ കത്തീഡ്രലിന്‍റെ കീഴിൽ ഇരുമ്പനം പുതിയറോഡ് വിളക്ക് ജംഗ്ഷനിലുള്ള കുരിശുപള്ളിയുടെ ഗ്ലാസ്‌ ഡോറുകളും നിലവിളക്കുകളുമാണ് അടിച്ചു തകർത്ത നിലയിൽ ഇന്നലെ രാവിലെ കാണപ്പെട്ടത്. കുരിശുപള്ളിയുടെ ഇരുവശത്തുമുള്ള ഗ്ലാസ് ഡോറുകളും തകർത്തിരുന്നു. നിലവിളക്കുകളും മറ്റും മറിച്ചിട്ട നിലയിലായിരുന്നു. ഞായറാഴ്ച അർധരാത്രിക്കു ശേഷമാണ് ഇവിടെ ആക്രമണം നടന്നതെന്നു കരുതുന്നു. കുരിശുപള്ളിയുടെ സമീപത്ത് പ്രവർത്തിക്കുന്ന തട്ടുകടയിലെ കസേരയെടുത്തു കൊണ്ടുവന്നാണ് ഗ്ലാസ് ഡോറുകൾ അടിച്ചുപൊട്ടിച്ചത്. പള്ളി അധികാരികൾ നല്കിയ പരാതിയിൽ ഹിൽപാലസ് പോലീസ് അന്വേഷണം നടത്തിവരികയാണ്. ഇന്നലെ ഉച്ചയ്ക്ക് 2.30ഓടെ ഇരുമ്പനം വെട്ടിക്കാവ് അമ്പലത്തിൽ കയറി വഴിപാട് കൗണ്ടർ അടിച്ചുപൊളിക്കുകയും കെടാവിളക്ക് മറിച്ചിടുകയും കസേരകൾ നശിപ്പിക്കുകയും ചെയ്യുന്നതു കണ്ട നാട്ടുകാർ ഇയാളെ പിടികൂടി പോലീസിൽ ഏൽപ്പിക്കുകയായിരുന്നു. കുരിശുപള്ളിയിൽ ആക്രമണമുണ്ടായതറിഞ്ഞ് തൃക്കാക്കര അസി.പോലീസ് കമ്മീഷണർ പി.എസ്.ഷിജു സ്ഥലത്തെത്തിയിരുന്നു. വിവിധ കക്ഷി രാഷ്ട്രീയ നേതാക്കളും കുരിശു പള്ളിയിലെത്തി വിവരങ്ങൾ അന്വേഷിച്ചതിന് പിന്നാലെയാണ് പ്രതിയെ ക്ഷേത്രവളപ്പിൽ നിന്ന് നാട്ടുകാർ പിടികൂടിയത്. പരസ്പരവിരുദ്ധമായാണ് ഇയാൾ സംസാരിക്കുന്നതെന്നും മാനസിക വിഭ്രാന്തിയുള്ളതായി സംശയിക്കുന്നതായും പോലീസ് പറഞ്ഞു.

കൊച്ചിയുടെ സംഗീത മനസ് കീഴടക്കി പ്രദ്യുമ്‌ന

കൊച്ചി: ഖായ്ദയും റേലയും ഇടമുറിയാതെ പ്രേക്ഷക ഹൃദയങ്ങളില്‍ വാദ്യസംഗീതത്തിന്‍റെ അലകള്‍ തീര്‍ത്ത് പ്രദ്യുമ്‌ന ഉദയരാജ് കര്‍പൂരിന്‍റെ തബല സോളോ വിസ്മയമായി. അന്തരിച്ച തബല ആചാര്യന്‍ പണ്ഡിറ്റ് എന്‍. വെങ്കടേഷ് നായകിന്‍റെ 108-ാം ജന്മവാര്‍ഷികത്തിന്‍റെ ഭാഗമായി അമരാവതി ഗോപാലകൃഷ്ണ മണ്ഡപത്തില്‍ സംഘടിപ്പിച്ച സംഗീത പരിപാടിയിലാണ് 15കാരനായ ബംഗളൂരു സ്വദേശി പ്രദ്യുമ്‌ന കൊച്ചിയുടെ സംഗീത മനസുകളെ കീഴടക്കിയത്. "വാദ്യസംഗീതത്തിലെ അദ്്ഭുതക്കുട്ടി' എന്ന വിശേഷണമുള്ള പ്രദ്യുമ്‌നയുടെ കൊച്ചിയിലെ ആദ്യ അവതരണം കൂടിയായിരുന്നു ഇത്. വെങ്കടേഷ് നായകിന്‍റെ ശിഷ്യനും പ്രശസ്ത തബലിസ്റ്റുമായ ഡീന്‍ മോഹനാണ് പരിപാടി സംഘടിപ്പിച്ചത്. വിഗ്നേശ് ഭഗവത് (ഹാര്‍മോണിയം), രഘുരാജ് ശേട്ട് (മറാട്ടി സംഗീതം), ശ്രുതി ചന്ദ്രമോഹന്‍ (വോക്കല്‍), ബാലകൃഷ്ണ കമ്മത്ത് (മൃദംഗം), ശിവരാജ് എസ്. ഭട്ട് (ഹാര്‍മോണിയം), അഭിലാഷ് രാമ (വോക്കല്‍) സന്ദീപ് (റിഥം), വില്‍സണ്‍ (കീബോര്‍ഡ്) എന്നിവരും സംഗീതാവതരണം നടത്തി. പ്രശസ്ത തബലിസ്റ്റ് ഡോ. ഉദയരാജ് കര്‍പൂരിന്‍റെ മകനാണ് ഒന്പതാം ക്ലാസ് വിദ്യാര്‍ഥിയായ പ്രദ്യുമ്‌ന.

അരുമ മൃഗങ്ങളുമായി ബാങ്കോക്കിൽനിന്ന് എത്തി; യാത്രക്കാരൻ കസ്റ്റംസിന്‍റെ പിടിയിൽ

നെടുമ്പാശേരി: അനധികൃതമായി കടത്താൻ ശ്രമിച്ച അരുമ മൃഗങ്ങളുമായി ബാങ്കോക്കിൽനിന്ന് എത്തിയ യാത്രക്കാരൻ കസ്റ്റംസിന്‍റെ പിടിയിലായി. പോക്കറ്റ് മങ്കികൾ എന്നറിയപ്പെടുന്ന മൂന്ന് മാർമോ സെറ്റുകൾ, രണ്ട് വൈറ്റ് ലിപ്ഡ് ടാമറിന്‍, ഒരു മക്കാവു തത്ത എന്നിവയാണ് പിടിയിലായത്. കൈക്കുള്ളിൽ ഒതുങ്ങുന്ന കുഞ്ഞൻ കുരങ്ങാണ് മാർമോ സെറ്റ് മങ്കി. വാലിന് രണ്ടിരട്ടിയോളം നീളമുള്ള ഇതിന്‍റെ ചെവികൾ വെളുത്തതായിരിക്കും. ഓമന മൃഗമായിട്ടാണ് പലരും ഇതിനെ വളർത്തുന്നത്. മൂന്നു ലക്ഷം രൂപ മുതലാണ് ഇതിന്‍റെ വില. ആമസോൺ കാടുകളിലാണ് ഈ കുരങ്ങുകളുടെ ജനനം. അതുകൊണ്ട് ഇതിനെ ആമസോൺ മാർമോ സെറ്റ് മങ്കികൾ എന്നും അറിയപ്പെടുന്നു. കുരങ്ങ് വർഗത്തിൽ തന്നെ പെട്ടതാണ് വൈറ്റ് ലിപ്ഡ് ടാമറിൻ. ഒരടിയോളമാണ് ഇതിന്‍റെ വലിപ്പം. വെള്ള മീശ ഉള്ളത് പോലെയാണ് മുഖം. അര കിലോഗ്രാമിൽ താഴെ മാത്രം ഭാരമുള്ള ഇതിന്‍റെ ജനനം ആമസോണ്‍ കാടുകളില്‍ ബ്രസീലിലും ബൊളീവിയയിലുമാണ്. ഉയർന്ന വിലയുള്ളതും ആവശ്യക്കാർ ഏറെ ഉള്ളതുമാണ് ഇവയോടൊപ്പം പിടികൂടിയ മക്കാവു തത്ത. വളർത്തു മൃഗങ്ങളെ ചെറിയ കൂട്ടിലാക്കി ലഗേജിൽ ഒളിപ്പിച്ചിരിക്കുകയായിരുന്നു. കഴിഞ്ഞ ഡിസംബറിൽ ഇത്തരത്തിൽ ബാങ്കോക്കിൽ നിന്നു കടത്താൻ ശ്രമിച്ച 14 അപൂർവയിനം പക്ഷികളെ കസ്റ്റംസ് പിടികൂടിയിരുന്നു. എന്നാൽ പോക്കറ്റ് മങ്കികളും വൈറ്റ് ലിപ്ഡ് ടാമറിനും പിടിയിലാകുന്നത് ഇതാദ്യമാണ്. പിടികൂടിയ മൃഗങ്ങളെയും പക്ഷിയെയും വനംവകുപ്പിന് കൈമാറി. എന്തിനു വേണ്ടിയാണ് ഇവയെ കൊണ്ടുവന്നത് എന്നത് സംബന്ധിച്ച് വനംവകുപ്പും അന്വേഷണം ആരംഭിച്ചിട്ടുണ്ട്.

ഡിജെ പാര്‍ട്ടിക്കിടെ സംഘര്‍ഷം: ചികിത്സയിലുള്ള യുവാവ് പോലീസ് നിരീക്ഷണത്തില്‍

കൊച്ചി: ഡിജെ പാര്‍ട്ടിക്കിടെ സംഘര്‍ഷമുണ്ടായ സംഭവത്തില്‍ യുവതിയെ ദുരുദ്ദേശത്തോടെ കടന്നു പിടിച്ച യുവാവ് ആശുപത്രിയില്‍ പോലീസ് നിരീക്ഷണത്തില്‍ തുടരുന്നു. ശനിയാഴ്ച രാത്രി 10.30 ഓടെ കതൃക്കടവിലെ മില്ലേനിയല്‍സ് (ഇടശേരി) ബാറിലാണ് സംഘര്‍ഷം ഉണ്ടായത്. ലൈംഗിക ഉദ്ദേശത്തോടെ യുവതിയെ കടന്നുപിടിച്ച സംഭവത്തില്‍ ഇടുക്കി തൊടുപുഴ സ്വദേശി ബഷീറിനെ വൈന്‍ ഗ്ലാസ് കൊണ്ട് യുവതി അടിച്ചു പരിക്കേല്‍പ്പിച്ചിരുന്നു. പരിക്കേറ്റ ഇയാള്‍ നിലവില്‍ ആശുപത്രിയില്‍ ചികിത്സയിലാണ്. ഇയാള്‍ നിരീക്ഷണത്തിലാണെന്നും ആരോഗ്യസ്ഥിതി മെച്ചപ്പെട്ടാല്‍ ഉടന്‍ അറസ്റ്റ് രേഖപ്പെടുത്തുമെന്നും എറണാകുളം സെന്‍ട്രല്‍ എസിപി സിബി ടോം പറഞ്ഞു. യുവാവിന് ചെവിക്ക് പിന്നിലാണ് അടിയേറ്റത്. നാല് തുന്നിക്കെട്ടുണ്ട്. വൈന്‍ ഗ്ലാസ് പൊട്ടിച്ച് യുവാവിനെ അടിച്ച സംഭവത്തില്‍ എറണാകുളത്ത് ജോലി ചെയ്യുന്ന ഉദയംപേരൂര്‍ സ്വദേശിനിയായ യുവതിക്ക് എതിരെ പോലീസ് കേസ് എടുത്തിരുന്നു. യുവതിയുടെ അറസ്റ്റ് രേഖപ്പെടുത്തി കഴിഞ്ഞ ദിവസം ജാമ്യത്തില്‍ വിട്ടയച്ചു. ഉദയംപേരൂര്‍ സ്വദേശിനിയും സുഹൃത്തുക്കളും തൊടുപുഴ സ്വദേശിയായ യുവാവിന്‍റെ സുഹൃത്തക്കളുടെ സംഘവുമാണ് ഡിജെ പാര്‍ട്ടിക്ക് എത്തിയത്. പരിപാടിക്കിടെ യുവാവ് യുവതിയെ കടന്നുപിടിച്ചു. ഒരുതവണ താക്കീത് ചെയ്‌തെങ്കിലും ദുരുദ്ദേശത്തോടെ വീണ്ടും കടന്നുപിടിച്ചതോടെ യുവതി വൈന്‍ ഗ്ലാസ് കൊണ്ട് അടിക്കുകയായിരുന്നു. ഇതോടെ ഡിജെ നിർത്തിവച്ചു. പരിക്കേറ്റ യുവാവിനെ ഉടന്‍ ആശുപത്രിയിലേക്ക് മാറ്റി. വിവരമറിഞ്ഞ് പോലീസ് സ്ഥലത്തെത്തി യുവതിയെ കസ്റ്റഡിയിലെടുക്കുകയായിരുന്നു. ഇതിനിടെ സിസിടിവി ദൃശ്യം പരിശോധിച്ച പോലീസ് യുവതിയുടെ മൊഴിയില്‍ കഴമ്പുണ്ടെന്ന് കണ്ടെത്തുകയും ചെയ്തിരുന്നു.

ആഡംബര കാര്‍ ഇറക്കുന്നതിനിടെ അപകടം : കൃത്യമായ അന്വേഷണം വേണമെന്ന് കുടുംബം

കൊച്ചി: എറണാകുളത്ത് ആഡംബര കാര്‍ ഇറക്കുന്നതിനിടെ അപകടത്തില്‍പ്പെട്ട് യുവാവ് മരിച്ച സംഭവത്തില്‍ കൃത്യമായ അന്വേഷണം വേണമെന്ന് കുടുംബം. കഴിഞ്ഞ 22ന് രാത്രി ട്രെയ്‌ലര്‍ ലോറിയില്‍നിന്ന് ഇറക്കുന്നതിനിടെ നിയന്ത്രണം നഷ്ടപ്പെട്ട കാര്‍ ഇടിച്ചാണ് കൊച്ചി സ്വദേശി റോഷന്‍ ആന്‍റണി മരിച്ചത്. ട്രേഡ് യൂണിയനിലെ ആളുകള്‍ രാത്രി വിളിച്ചത് കൊണ്ടാണ് കാര്‍ ഇറക്കാന്‍ റോഷന്‍ പോയതെന്ന് റോഷന്‍ ആന്‍റണിയുടെ ഭാര്യ ഷെല്‍മ പറഞ്ഞു. മുന്പും കാറിറക്കാന്‍ യൂണിയന്‍ അംഗങ്ങള്‍ വിളിച്ചിട്ട് റോഷന്‍ പോയിട്ടുണ്ട്. പരിശീലനം ലഭിച്ചവരാണ് ജോലി ചെയ്തിരുന്നെങ്കില്‍ അപകടം ഒഴിവായേനെയെന്നും കൃത്യമായ അന്വേഷണം വേണമെന്നും ഷെല്‍മ പറഞ്ഞു. മൂന്നും ആറും വയസുള്ള കുഞ്ഞുങ്ങളടങ്ങുന്ന കുടുംബത്തിന്‍റെ ഏക വരുമാനം റോഷന്‍റെ ജോലിയായിരുന്നു. രാത്രി പത്തേകാലോടെയാണ് ഫോണ്‍ വന്നത്. ട്രക്ക് വരുമ്പോള്‍ പോവാറുള്ളതാണ്. കാര്‍ ഇറക്കുന്നത് യൂണിയന്‍കാരാണെന്ന് റോഷന്‍ പറഞ്ഞിട്ടുണ്ട്. പരിശീലനം ലഭിച്ചവരാണ് ജോലി ചെയ്തിരുന്നെങ്കില്‍ അപകടം ഉണ്ടാകില്ലായിരുന്നു. രണ്ടു കുഞ്ഞുങ്ങളാണ്. എനിക്ക് ജോലിയില്ല. ഷോറൂമില്‍ നിന്ന് ആളുകള്‍ വന്നിരുന്നു. ബോര്‍ഡ് മീറ്റിംഗ് കൂടുന്നുണ്ടെന്നും അതിന് ശേഷം വിളിക്കാമെന്നും അറിയിച്ചു'- ഷെല്‍മ പറഞ്ഞു. അതേസമയം, സംഭവത്തില്‍ മോട്ടോര്‍ വാഹന വകുപ്പിന്‍റെ അന്വേഷണ റിപ്പോര്‍ട്ട് രേഖാമൂലം ഇതുവരെ പോലീസിന് ലഭിച്ചിട്ടില്ല. മാനുഷിക പിഴവെന്നാണ് എംവിഡിയുടെ റിപ്പോര്‍ട്ടിലുള്ളത്. സംഭവത്തില്‍ പാലാരിവട്ടം പോലീസും അന്വേഷണം നടത്തുന്നുണ്ട്. ഡ്രൈവറായ അന്‍ഷാദിനെതിരെ മനപൂര്‍വമല്ലാത്ത നരഹത്യ അടക്കം വകുപ്പുകള്‍ ചുമത്തിയാണ് പാലാരിവട്ടം പോലീസിന്‍റെ നടപടി. സംഭവത്തില്‍ ഇതുവരെ കേസ് എടുത്തിട്ടില്ല. എംവിഡി റിപ്പോര്‍ട്ട് കിട്ടിയ ശേഷമായിരിക്കും തുടര്‍നടപടികള്‍. എന്നാല്‍ സാക്ഷികളുടെ ഉള്‍പ്പെടെ മൊഴികള്‍ രേഖപ്പെടുത്തിയ പോലീസ് അപകടം വരുത്തിയതില്‍ കൂടുതല്‍ പേര്‍ക്ക് പങ്കുണ്ടോ എന്നും അന്വേഷിക്കുന്നുണ്ട്.

കാപ്പ പ്രതി അറസ്റ്റിൽ

കാക്കനാട് : പ്രവേശന വിലക്ക് നിലനിൽക്കേ ഉത്തരവ് ലംഘിച്ച് തൃക്കാക്കര സ്റ്റേഷൻ പരിധിക്കുള്ളിൽ പ്രവേശിച്ച വാഴക്കാല തീവണ്ടി കോളനിയിൽ ചാത്തൻ വേലി മുകൾ വീട്ടിൽ ഷാജി(27)യെ തൃക്കാക്കര പോലീസ് പിടികൂടി. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. മോഷണം, ആക്രമണം, സ്ത്രീകളോട് മോശം പെരുമാറ്റം, ആയുധങ്ങൾ കാട്ടി ഭീഷണിപ്പെടുത്തൽ തുടങ്ങിയ കുറ്റകൃത്യങ്ങളിൽ സ്ഥിരമായി പ്രതി ചേർക്കപ്പെട്ട ഇയാളെ കൊച്ചി സിറ്റി പോലീസ് കമ്മീഷണർ പുട്ട വിമലാദിത്യയാണ് കാപ്പ ചുമത്തി വിലക്ക് എർപ്പെടുത്തിയത്. 2025 ജൂൺ 29ന് പ്രതി തൃക്കാക്കര സ്റ്റേഷൻ പരിധിയിൽ പ്രവേശിച്ചതോടെ കാപ്പ ഉത്തരവു ലംഘിക്കുകയായിരുന്നു. എസ്ഐ എ. ഷാജിയുടെ നേതൃത്വത്തിലുള്ള സംഘമാണ് പ്രതിയെ പിടികൂടിയത്.

മോട്ടോർ സൈക്കിൾ മോഷണം: ഒരാൾ അറസ്റ്റിൽ

പെരുമ്പാവൂർ: മോട്ടോർ സൈക്കിൾ മോഷ്ടിച്ച കേസിൽ ചൂർണിക്കര കുന്നത്തേരി കാളിയാടൻ വീട്ടിൽ റിഫാസി(24)നെ കുറുപ്പംപടി പോലീസ് അറസ്റ്റ് ചെയ്തു. കഴിഞ്ഞ വ്യാഴാഴ്ചയായിരുന്നു സംഭവം. വാങ്ങാനെന്ന വ്യാജേന ബീഹാർ സ്വദേശിയായ വിജയകുമാറിന്‍റെ വട്ടക്കാട്ടുപടിയിലുള്ള വീട്ടിൽനിന്ന് മോട്ടോർ സൈക്കിൾ ഓടിച്ചു നോക്കുന്നതിനായി പുറത്തേക്ക് കൊണ്ടുപോയതിനു ശേഷം തിരികെ വരാതിരിക്കുകയായിരുന്നു. ഇൻസ്പെക്ടർ വി.എം. കേഴ്സൺ, എസ്ഐ പി.വി. ജോർജ്, എസ്‌സിപിഒമാരായ കെ.എം. നൗഷാദ്, കെ.എ. നൗഫൽ, രഞ്ജു വി. തങ്കപ്പൻ, സിപിഒമാരായ ജി. രാമനാഥ്, അരുൺ കെ. കരുണൻ എന്നിവരാണ് അന്വേഷണ സംഘത്തിൽ ഉണ്ടായിരുന്നത്.

വള്ളം മറിഞ്ഞ് ഒഴുക്കിൽപ്പെട്ട ആളെ കാണാതായി

പിറവം: പിറവം പാഴൂരിൽ പുഴയിൽ വള്ളം മറിഞ്ഞ് ഒഴുക്കിൽപ്പെട്ട് ഒരാളെ കാണാതായി. പാഴൂർ കല്ലുമാരി കൊണത്താട്ടുകുഴിയിൽ കുഞ്ഞുമോനെ(കുട്ടായി-52)യാണ് കാണാതായത്. പുഴയിലൂടെ ചെറുവള്ളത്തിൽ പോകുന്പോൾ പാഴൂർ മഴവിൽപ്പാലത്തിന് സമീപം വള്ളം മറിഞ്ഞ് ഒഴുക്കിൽപ്പെടുകയായിരുന്നു. ഇന്നലെ വൈകുന്നേരം ആറിനായിരുന്നു സംഭവം. പോലീസും അഗ്നിരക്ഷാസേനയും സ്ഥലത്തെത്തി നാട്ടുകാരുടെ സഹായത്തോടെ രാത്രി വൈകിയും തെരച്ചിൽ നടത്തി യെങ്കിലും ഫലമുണ്ടായില്ല. പുഴയിൽ നല്ല ഒഴുക്കുള്ള ഭാഗമാണിത്. എറണാകുളത്ത് നിന്ന് സ്‌കൂബ ടീം എത്തിയിട്ടുണ്ട്.

പൂയംകുട്ടി പുഴയിൽ കാണാതായ യുവാവിന്‍റെ മൃതദേഹം കണ്ടെത്തി

കോതമംഗലം: പൂയംകുട്ടി പുഴയിൽ കാണാതായ മണികണ്ഠൻചാൽ വർകൂട്ട്മാവിള പരേതനായ ജപമണിയുടെ മകൻ രാധാകൃഷ്ണന്‍റെ (ബിജു-37) മൃതദേഹം കണ്ടെത്തി. അഞ്ച് ദിവസത്തെ കാത്തിരിപ്പിനൊടുവിലാണ് രാധാകൃഷ്ണൻ പുഴയിലേക്കു വീണ ചപ്പാത്തിൽനിന്ന്, ഒരു കിലോമീറ്റർ താഴെനിന്ന് മൃതദേഹം ലഭിച്ചത്. ഫയർഫോഴ്സ് എത്തി കരയ്ക്കെടുത്ത മൃതദേഹം തുടർനടപടികൾക്ക് ശേഷം മൂവാറ്റുപുഴ ജനറൽ ആശുപത്രിയിൽ പോസ്റ്റുമോർട്ടം നടത്തി. മൃതദേഹം വീട്ടിലേക്ക് കൊണ്ടുപോയില്ല. പൂയംകുട്ടി സെന്‍റ് ജോർജ് പള്ളിയിൽ പൊതുദർശനത്തിന് വച്ച മൃതദേഹത്തിൽ നിരവധി പേർ അന്തിമോപചാരമർപ്പിച്ചു. തുടർന്ന് സംസ്കാരം നടത്തി. അമ്മ: മേരി. ഭാര്യ: സിൽവി. മക്കൾ: ബിബിൻ, ബിബിന. കുടുംബത്തിന്‍റെ അത്താണിയായിരുന്നു രാധാകൃഷ്ണൻ. ഈ കുടുംബത്തെ സഹായിക്കാൻ ഇടപ്പെടൽ നടത്തണമെന്ന് നാട്ടുകാർ ജനപ്രതിനിധികളോട് അഭ്യർഥിച്ചു. കഴിഞ്ഞ ബുധനാഴ്ച രാവിലെയാണ് ഒഴുക്കിൽപ്പെട്ടത്. മണികണ്ഠൻചാൽ ചപ്പാത്തിലൂടെ നടക്കുന്പോൾ കുത്തൊഴുക്കിൽപ്പെടുകയായിരുന്നു.

പെരിയാർ സംരക്ഷണത്തിന് പ്രത്യേക അഥോറിറ്റി: അടിയന്തരമായി പരിഗണിക്കണമെന്ന് ഹൈക്കോടതി

കൊച്ചി: പെരിയാറിന്‍റെ സംരക്ഷണത്തിന് പ്രത്യേക അഥോറിറ്റി രൂപീകരിക്കണമെന്ന മുന്‍ നിര്‍ദേശം സര്‍ക്കാര്‍ അടിയന്തരമായി പരിഗണിക്കണമെന്ന് ഹൈക്കോടതി. കുഴിക്കണ്ടം തോടിന്‍റെ ശുചീകരണവുമായി ബന്ധപ്പെട്ട് അസോസിയേഷന്‍ ഓഫ് ഗ്രീന്‍ ആക്ഷന്‍ ഫോഴ്‌സ് സമര്‍പ്പിച്ച ഹര്‍ജി പരിഗണിക്കവെയാണ് കോടതിയുടെ ഇടക്കാല ഉത്തരവ്. കുടിനീരിനായി സമൂഹം ആശ്രയിക്കുന്ന പെരിയാര്‍ ഇനിയും മലിനീകരിക്കപ്പെടരുത്. വേഗത്തിലുള്ള നടപടികള്‍ കൈക്കൊള്ളാന്‍ അഥോറിറ്റി അനിവാര്യമാണെന്നും ജസ്റ്റീസ് ദേവന്‍ രാമചന്ദ്രന്‍, ജസ്റ്റീസ് എം.ബി. സ്‌നേഹലത എന്നിവരുള്‍പ്പെട്ട ഡിവിഷന്‍ ബെഞ്ച് വ്യക്തമാക്കി. നിരന്തരം മലിനജലം കുടിച്ച് ജനങ്ങള്‍ രോഗാവസ്ഥയിലാകാനുള്ള സാധ്യത നിലനില്‍ക്കുന്നു. അതിനാല്‍ നദിയുടെ മേല്‍നോട്ടത്തിനുള്ള ഒരു അഥോറിറ്റിയാണ് ഏറ്റവും ഫലപ്രദമായ മാര്‍ഗമെന്നും കോടതി ചൂണ്ടിക്കാട്ടി. ഹര്‍ജി എട്ടിന് വീണ്ടും പരിഗണിക്കും.

ലഹരിവിരുദ്ധ ഓട്ടൻതുള്ളലുമായി എക്സൈസ് ഇൻസ്പെക്ടർ

കൊച്ചി: ലഹരി വിരുദ്ധ ബോധവത്കരണത്തിന്‍റെ ഭാഗമായി എറണാകുളം എക്സൈസ് അസിസ്റ്റന്‍റ് ഇൻസ്പെക്ടർ വി. ജയരാജൻ അവതരിപ്പിച്ച ഓട്ടൻതുള്ളലിനു വിദ്യാർഥികളുടെയും മാതാപിതാക്കളുടെയും നിറഞ്ഞ കൈയടി. വടുതല ഡോൺബോസ്കോ സ്കൂളിലായിരുന്നു വേറിട്ട ബോധവത്കരണ പരിപാടി. സ്കൂൾ പിടിഎയും മാനേജ്മെന്‍റും വിമുക്തി മിഷനും ചേർന്നാണ് ഓട്ടൻതുള്ളൽ സംഘടിപ്പിച്ചത്. ജയരാജന്‍റെ 588 -ാമത്തെ വേദിയായിരുന്നു ഡോൺബോസ്കോയിലേത്. കൈകാലുകൾ ബന്ധിച്ചു പെരിയാർ നീന്തികടന്ന ഡോൺ ബോസ്കോ വിദ്യാർഥികളായ കേദാർ,തരുണി എന്നിവരെ ചടങ്ങിൽ ആദരിച്ചു. റെക്ടർ ഫാ. ഷിബു ഡേവിസ്, ഫാ. കുര്യാക്കോസ് ശാസ്താംകാല, ഫാ. മാനുവൽ ഗിൽട്ടൻ, പിടിഎ പ്രസിഡന്‍റ് പ്രവീൺ ജോളി, അധ്യാപകരായ അനിറ്റ ആൽവിൻ, മേരി ഷീജ എന്നിവർ പ്രസംഗിച്ചു.

സന്ദർശകർ വലയുന്നു; പാർക്കിംഗ് സ്ഥലത്ത് ഫ്ലോട്ടിംഗ് ബ്രിഡ്ജ് കുഴുപ്പിള്ളി ബീച്ചിൽ

ചെറായി: കുഴുപ്പിള്ളി ബീച്ചിന്‍റെ പാർക്കിംഗ് ഏരിയയിൽ ഫ്ലോട്ടിംഗ് ബ്രിഡ്ജ് അഴിച്ചുവച്ചിരിക്കുന്നത് സന്ദർശകരെ വലയ്ക്കുന്നതായി ആക്ഷേപം. കടലിലെ ഓളത്തിനു മുകളിൽ പൊങ്ങിയും താന്നും നിൽക്കുന്ന വിനോദ സംവിധാനമായ പാലമാണ് ഫ്ലോട്ടിംഗ് ബ്രിഡ്ജ്. ഇത് അഴിച്ചു സൂക്ഷിക്കുവാനും വീണ്ടും സ്ഥാപിക്കുവാനും കഴിയും. ബീച്ചിൽ നല്ല തിരക്കുള്ളപ്പോൾ ടുവീലറുകളും മറ്റു ചെറു വാഹനങ്ങളും പാർക്ക് ചെയ്യുന്നിടത്താണ് ഇപ്പോൾ ഫ്ലോട്ടിംഗ് ബ്രിഡ്ജ് അഴിച്ചുവച്ചിട്ടുള്ളത്. പഞ്ചായത്താണ് ഇതിന് അനുമതിനൽകിയതെന്നാണ് നാട്ടുകാർ പറയുന്നത്. ഇനി മഴക്കാലം കഴിഞ്ഞ് ഇതു വീണ്ടും കടലിൽ സ്ഥാപിക്കുന്നതുവരെ ഇതിന്‍റെ സ്ഥാനം പാർക്കിംഗ് എരിയയിൽ തന്നെ ആയിരിക്കുമത്രേ. അതുവരെ തിരക്കുള്ള സമയങ്ങളിൽ സന്ദർശകർ വാഹനങ്ങൾ തീരദേശ റോഡിന്‍റെ അരുകിൽ പാർക്ക് ചെയ്യേണ്ടിവരും.

ജില്ലാ ഹോമിയോ ആശുപത്രിയിൽ നവീകരിച്ച ഒപി ബ്ലോക്ക് ഉദ്ഘാടനം ചെയ്തു

കൊച്ചി: എറണാകുളം ജില്ലാ പഞ്ചായത്ത് ഫണ്ട് ഉപയോഗിച്ച് നവീകരിച്ച ജില്ലാ ഹോമിയോ ആശുപത്രിയുടെ ഒപി ബ്ലോക്ക് പ്രതിപക്ഷ നേതാവ് വി.ഡി. സതീശന്‍ ഉദ്ഘാടനം ചെയ്തു. ടി.ജെ. വിനോദ് എംഎല്‍എ അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടന്‍, കളക്ടര്‍ എന്‍.എസ്.കെ. ഉമേഷ്, ജില്ലാ പഞ്ചായത്ത് വൈസ് പ്രസിഡന്‍റ് എല്‍സി ജോര്‍ജ്, സ്ഥിരം സമിതി അധ്യക്ഷരായ എം.ജെ. ജോമി, ആശ സനില്‍, അംഗങ്ങളായ ശാരദ മോഹന്‍, ഷൈമി വര്‍ഗീസ്, മുന്‍ ജില്ലാ പഞ്ചായത്ത് പ്രസിഡന്‍റ് ഉല്ലാസ് തോമസ്, ജില്ലാ പഞ്ചായത്ത് സെക്രട്ടറി പി.എം. ഷെഫീക്ക്, ജില്ലാ ഹോമിയോ മെഡിക്കല്‍ ഓഫീസര്‍ ഡോ. മേഴ്‌സി ഗോണ്‍സാല്‍വസ്, നാഷണല്‍ ആയുഷ് മിഷന്‍ ജില്ലാ പ്രോഗ്രാം മാനേജര്‍ ഡോ. കെ.വി.പി. ജയകൃഷ്ണന്‍, ഡോ. കവിതാ മാത്യു, ബിജു ചൂളക്കല്‍ എന്നിവര്‍ പ്രസംഗിച്ചു.

ആലുവ നോർത്ത് റെയിൽവേ ഓവർ ബ്രിഡ്ജ് നടപ്പാത വെള്ളക്കെട്ടിൽ

ആലുവ: ആലുവ മഹാത്മാഗാന്ധി ടൗൺ ഹാളിനു സമീപമുള്ള നോർത്ത് റെയിൽവേ മേൽപ്പാലം നവീകരിക്കണമെന്ന ആവശ്യം ശക്തമാകുന്നു. മേൽപ്പാലത്തിന്‍റെ ഇരുവശത്തുമുള്ള നടപ്പാത പൊട്ടിപൊളിഞ്ഞ് പൂർണമായും വെള്ളക്കെട്ടിലായതോടെയാണ് വിദ്യാർഥികളടങ്ങുന്ന കാൽനടക്കാർ പരാതിപ്പെടുന്നത്. നിലവിൽ ആലുവ സൗത്ത് റെയിൽവേ മേൽപ്പാലത്തിന്‍റെ കൈവരികളും നടപ്പാതയും നവീകരിച്ചു കൊണ്ടിരിക്കുകയാണ്. അതേ രീതിയിൽ ആലുവ പാലസ് റോഡ് കടന്നുപോകുന്ന സൗത്ത് മേൽപ്പാലത്തിലെ നടപ്പാതയും പുനർനിർമിക്കണമെന്നാണ് കാൽനടക്കാർ ആവശ്യപ്പെടുന്നത്. നടപ്പാതകൾ ഇരുവശവും വെള്ളക്കെട്ടിലായതിനാൽ തിരക്കേറിയ മേൽപ്പാലത്തിലെ ടാറിംഗ് റോഡിലൂടെയാണ് വിദ്യാർഥികൾ നടക്കുന്നത്. മറ്റ് വാഹനങ്ങളെ മറികടക്കാൻ ഓവർ ടേക്കിംഗ് നടക്കുന്ന മേഖല കൂടിയാണിത്. അതിനാൽ വിദ്യാർഥികൾ റോഡിൽ ഇറണ്ടി നടന്നാൽ അപകട സാധ്യത വളരെ കൂടുതലാണ്. കോൺക്രീറ്റിട്ട് ഉയർത്തി കാൽനടപ്പാതയിലെ വെള്ളക്കെട്ട് ഒഴിവാക്കുന്നതിന് അടിയന്തിര നടപടി വേണമെന്നാണ് പ്രദേശവാസികളുടെ ആവശ്യം.

കൊച്ചി താലൂക്കിൽ ഹാജർ രേഖപ്പെടുത്താൻ ഫേസ് ആപ്പ് സംവിധാനം

മട്ടാഞ്ചേരി: കൊച്ചി താലൂക്ക് ഓഫീസിനെ സ്മാർട്ടാക്കി ജീവനക്കാരുടെ ഹാജർ രേഖപ്പെടുത്തുന്നതിന് ഫേസ് ആപ്പ് സംവിധാനം ഇന്ന് നിലവിൽ വരും. ജീവനക്കാർ കൃതൃമായി എത്തുന്നുണ്ടോയെന്ന് ഉറപ്പ് വരുത്തുന്നതിനായി ആധാർ അധിഷ്ഠിത പഞ്ചിംഗ് സമ്പ്രദായം ജില്ലയിൽ നടപ്പിലാക്കുന്ന ആദ്യ താലൂക്കാണ് കൊച്ചി. ജീവനക്കാർ ഓഫീസിൽ ഹാജരാകുമ്പോൾ ഓഫീസിന്‍റെ അമ്പത് മീറ്റർ ചുറ്റളിവിൽ നിന്ന് മൊബൈൽ ആപ്പ് ഉപയോഗിച്ച് മുഖം കാണിച്ച് ഹാജർ രേഖപ്പെടുത്താം, തിരിച്ച് ഓഫീസിൽ നിന്ന് പോകുമ്പോഴും ഇത് പോലെ ചെയ്യണം. ഈ വിധം ചെയ്തില്ലെങ്കിൽ ഹാജർ നഷ്ടപ്പെടും. ഫീൽഡ് ഡ്യൂട്ടിക്ക് പോകുന്നവർ സ്ഥലത്തുനിന്ന് മുഖം കാണിച്ച് ഹാജർ രേഖപ്പെടുത്തണം. ഫീൽഡിൽ എന്ന് പറഞ്ഞ് മറ്റെവിടെയെങ്കിലും പോകുകയോ വീട്ടിലിരിക്കുകയോ ചെയ്യുന്നത് ഈ സംവിധാനം നടപ്പിലാക്കുന്നതോടെ ഇല്ലാതാകുമെന്നതാണ് പ്രത്യേകത. ഇതിനായി പ്രത്യേകം തയാറാക്കിയ ആപ്പ് ജീവനക്കാർ ഡൗൺ ലോഡ് ചെയ്യണം. ജീവനക്കാർക്ക് പ്രത്യേക ഐഡി നൽകുന്നതിനാൽ മറ്റ് മൊബൈൽ ഫോണിൽ നിന്നും ഹാജർ രേഖപ്പെടുത്താൻ കഴിയും. കളക്‌ടറേറ്റിൽ നിലവിൽ ഈ സംവിധാനം പ്രവർത്തിക്കുന്നുണ്ട്. ഇന്ന് മുതൽ ഈ സംവിധാനം വഴി ഹാജർ രേഖപ്പെടുത്തണമെന്ന് കൊച്ചി തഹസിൽദാർ ജോസഫ് ആന്‍റണി ഹെർട്ടിസ് ജീവനക്കാർക്ക് നിർദേശം നൽകിയിട്ടുണ്ട്.

കലൂർ-കടവന്ത്ര റോഡ് കോർപറേഷനു കൈമാറണമെന്ന് പ്രതിപക്ഷം

ഫോർട്ടുകൊച്ചി: കലൂർ-കടവന്ത്ര റോഡ്, കൊച്ചി മുനിസിപ്പൽ കോർപറേഷനു കൈമാറണമെന്ന് പ്രതിപക്ഷം. കലൂരിനെയും കടവന്ത്രയും ബന്ധിപ്പിക്കുന്ന മൂന്നു കിലോമീറ്റർ നീളമുള്ള പഴയ എളംകുളം റോഡ് 22 മീറ്റർ വീതിയുള്ള റോഡായി വകസിപ്പിക്കുന്നതിന് ജിസിഡിഎയ്ക്ക് കൈമാറിയ ഇന്നത്തെ കെകെ റോഡ് വികസനം പൂർത്തിയാക്കി വർഷങ്ങൾ കഴിഞ്ഞിട്ടും കോർപ റേഷന് കൈമാറിയിട്ടില്ലന്നും എത്രയും വേഗം കൈമാറണമെന്നും പ്രതിപക്ഷ നേതാവ് ആന്‍റണി കുരീത്തറ വ്യക്തമായി. ഈ ആസ്തി തിരിച്ചുപിടിക്കേണ്ട മേയർ ജിസിഡിഎ എക്സിക്യൂട്ടീവ് അംഗമായിട്ടും ഈ ആവശ്യം ഉന്നയിക്കാതിരിക്കുന്നത് രാഷ്ട്രീയ താൽപര്യത്താലാണെ ന്നും ആന്‍റണി കുരിത്തറയും, പാർലമെന്‍ററി പാർട്ടി സെക്രട്ടറി എം.ജി. അരിസ്റ്റോറിലും പറഞ്ഞു.

‘അത്താഘോഷം 2025’ ഓഫീസ് ഉദ്ഘാടനം ചെയ്തു

തൃപ്പൂണിത്തുറ: ഓണത്തിന്‍റെ വരവറിയിച്ച് തൃപ്പൂണിത്തുറയിൽ നടക്കുന്ന അത്താഘോഷത്തിന്‍റെ ഓഫീസ് ഉദ്ഘാടനം മുനിസിപ്പൽ ചെയർപേഴ്സൺ രമ സന്തോഷ് നിർവഹിച്ചു. മുനിസിപ്പൽ വൈസ് ചെയർമാൻ കെ.കെ. പ്രദീപ്കുമാർ അധ്യക്ഷത വഹിച്ചു. ജനറൽ കൺവീനർ പി.ബി. സതീശൻ,പി.കെ. പീതാംബരൻ, കെ.വി. സാജു, ഘോഷയാത്ര കമ്മറ്റി കൺവീനർ യു.കെ. പീതാംബരൻ, മീഡിയ ആൻഡ് പബ്ലിസിറ്റി കൺവീനർ പി.എൽ. ബാബു, പൂക്കള മത്സരം കൺവീനർ വള്ളി മുരളീധരൻ, കലാപരിപാടി കൺവീനർ രോഹിണി, കലാമത്സരം കൺവീനർ രാജലക്ഷ്മി, സ്റ്റേജ് ആൻഡ് ഡെക്കറേഷൻ കൺവീനർ ഡി. അർജുനൻ, ഫുഡ് കമ്മറ്റി കൺവീനർ സി.കെ. ഷിബു തുടങ്ങിയവർ പങ്കെടുത്തു. അത്താഘോഷ സംഭാവനയുടെ ഉദ്ഘാടനവും ചെയർപേഴ്സൺ നിർവഹിച്ചു.

ലൂർദ് ആശുപത്രി "ബോധപൂർണിമ'

കൊച്ചി: എറണാകുളം ലൂർദ് ആശുപത്രിയുടെയും ലൂർദ് കോളജ് ഓഫ് നഴ്സിംഗ് എൻഎസ്എസ് യൂണിറ്റിന്‍റെയും ആഭിമുഖ്യത്തിൽ ചാത്യാത്ത് എൽഎംസിസി ഹയർ സെക്കൻഡറി സ്കൂളുമായി സഹകരിച്ച് വാക്കത്തണും ബോധവത്കരണ പരിപാടികളും ("ബോധപൂർണിമ' ) നടത്തി. ആശുപത്രിയിൽ നിന്ന് ആരംഭിച്ച വാക്കത്തൺ കൊച്ചി സിറ്റി പോലീസ് എസ്എച്ച്ഒ പി. ബാബു ജോൺ ഫ്ലാഗ് ഓഫ് ചെയ്തു. ആശുപത്രി അസോ. ഡയറക്ടർ ഫാ. വിമൽ ഫ്രാൻസിസ്, വെൽഫെയർ ഓഫീസർ ഫാ. ആന്‍റണി റാഫേൽ കൊമരംചാത്ത് എന്നിവർ പ്രസംഗിച്ചു. നഴ്സിംഗ് വിദ്യാർഥികളുടെ നേതൃത്വത്തിൽ ലഹരി വിരുദ്ധ ഫ്ലാഷ് മോബ് , മൈം, ബോധവത്കരണ ക്ലാസ്, ലഹരി വിരുദ്ധ പ്രതിജ്ഞ എന്നിവ സംഘടിപ്പിച്ചു. നഴ്സിംഗ് കോളജ് പ്രിൻസിപ്പൽ സിസ്റ്റർ റുഫീന എട്ടുരുത്തിൽ, വൈസ് പ്രിൻസിപ്പൽ പ്രഫ. ജോസി എ. മാത്യു, എൻഎസ്എസ് നോഡൽ ഓഫീസർ സിസ്റ്റർ വിജ, ഹൈസ്കൂൾ പ്രിൻസിപ്പൽ സുബി സെബാസ്റ്റ്യൻ, എൽപി വിഭാഗം പ്രിൻസിപ്പൽ സിസ്റ്റർ അലീന എന്നിവർ നേതൃത്വം നൽകി.

കളഞ്ഞുകിട്ടിയ സ്വർണ മോതിരം തിരികെ നൽകി വിജയകുമാരി മാതൃകയായി

പറവൂർ: നഷ്ടപ്പെട്ട സ്വർണ മോതിരം ശുചീകരണ തൊഴിലാളിയുടെ സത്യസന്ധത മൂലം തിരികെ കിട്ടി. പഴയ കെഎസ്ആർടിസി സ്റ്റാൻഡിലെ കെആർ വിജയൻ ഷോപ്പിംഗ് കോംപ്ലക്സിൽ വച്ച് കഴിഞ്ഞ ദിവസമാണ് മുത്തൂറ്റ് ബാങ്കിലെ ജീവനക്കാരി ടിന്‍റുമോളുടെ അരപ്പവൻ തൂക്കം വരുന്ന സ്വർണ മോതിരം നഷ്ടമായത്. ഇന്നലെ രാവിലെ കോംപ്ലക്സിന്‍റെ പരിസരത്ത് വൃത്തിയാക്കാനെത്തിയ പറവൂർ നഗരസഭയിലെ ശുചീകരണ തൊഴിലാളി വിജയകുമാരിക്ക് മോതിരം കളഞ്ഞുകിട്ടി. കോംപ്ലക്സിലെ സൂപ്പർ മാർക്കറ്റിൽ വിജയകുമാരി മോതിരം ഏൽപ്പിച്ചു. പിന്നീട് യഥാർഥ ഉടമസ്ഥയെ കണ്ടെത്തി നഗരസഭാ അധ്യക്ഷ ബീന ശശിധരൻ ടിന്‍റുമോൾക്ക് മോതിരം കൈമാറി. വിജയകുമാരിയെ നഗരസഭാധ്യക്ഷ പൊന്നാടയണിയിച്ച് ആദരിച്ചു.

അല്ലപ്ര ഗവ. യുപി സ്കൂളിന്‍റെ പുതിയ കെട്ടിടം തുറന്നു

പെരുമ്പാവൂർ: അല്ലപ്ര ഗവ. യുപി സ്കൂളിന്‍റെ പുതിയ കെട്ടിടം പ്രതിപക്ഷ നേതാവ് വി.ഡി. സതീശൻ നാടിന് സമർപ്പിച്ചു. എൽദോസ് കുന്നപ്പിള്ളി എംഎൽഎയുടെ ആസ്തി വികസന ഫണ്ടിൽ നിന്നും ഒരു കോടി രൂപ ചെലവഴിച്ചാണ് കെട്ടിടത്തിന്‍റെ നിർമാണം പൂർത്തിയാക്കിയത്. ഗവ. ഏജൻസിയായ കെൽ നിർമാണ ചുമതല ഏറ്റെടുത്തിരുന്നു. നാലു ക്ലാസ് മുറികളും, ടോയ്‌ലെറ്റ് സമുച്ചയങ്ങളും ഉൾക്കൊള്ളുന്നതാണ് പുതിയ കെട്ടിടം. ഉദ്ഘാടനത്തോടനുബന്ധിച്ച് വിപുലമായ ചടങ്ങുകൾ സംഘടിപ്പിച്ചിരുന്നു. സ്കൂളിന് 125 വർഷങ്ങൾക്കു മുമ്പ് കെട്ടിടവും സ്ഥലവും വിട്ടുനൽകിയ അല്ലപ്ര സെന്‍റ് ജേക്കബ് ദേവാലയത്തിന്‍റെ നിലവിലെ ട്രസ്റ്റിമാരെ യോഗം ആദരിച്ചു . കെട്ടിടത്തിനു മുകളിൽ ഗവ. ഫണ്ട് ഒരു കോടി രൂപ വിനിയോഗിച്ചുള്ള രണ്ടാം നിലയുടെ നിർമാണ ഉദ്ഘാടനം വരും ദിവസങ്ങളിൽ നടക്കുമെന്ന് എൽദോസ് കുന്നപ്പിള്ളി എംഎൽഎ അറിയിച്ചു.

കലൂര്‍ ഗ്രീറ്റ്‌സ് സ്‌കൂളില്‍ ഡാന്‍സ് ഫെസ്റ്റിവല്‍ നാലിന്

കൊച്ചി: കലൂര്‍ ഗ്രീറ്റ്‌സ് പബ്ലിക് സ്‌കൂള്‍ സംഘടിപ്പിക്കുന്ന അഖില കേരള ഇന്‍റര്‍സ്‌കൂള്‍ ഡാന്‍സ് ഫെസ്റ്റിവല്‍ നാലിന് നടക്കും. ചലച്ചിത്രതാരം തന്‍വീ റാം മുഖ്യാതിഥിയാകും. രാവിലെ ഒമ്പതിന് നടക്കുന്ന ഉദ്ഘാടന ചടങ്ങില്‍ ഗ്രീറ്റ്‌സ് പബ്ലിക് സ്‌കൂള്‍ ചെയര്‍മാന്‍ സാബു തോമസ് വടക്കേക്കുറ്റ്, പ്രിന്‍സിപ്പൽ (അഡ്മിനിസ്‌ട്രേഷന്‍) ബെലിന്‍ഡ വിവേര, പാരന്‍റ് ടീച്ചര്‍ ഫോറം പ്രസിഡന്‍റ് അഡ്വ. മുഹമ്മദ്ഷാ, വൈസ് പ്രസിഡന്‍റ് അഡ്വ. ഫാത്തിമ സിദ്ദീഖ് എന്നിവര്‍ പങ്കെടുക്കും. മിറാഷ് മൂവ്‌സ്, രംഗ്‌ലോക് നൃത്യ, താല്‍ ഇ ദമാക്ക, ഫാഷന്‍ ഷോഎന്നീ നാലു വിഭാഗങ്ങളിലായാണ് ടാരന്‍റ്റെല്ല സീസണ്‍ 4 എന്ന പേരില്‍ മത്സരം നടത്തുന്നത്. വിജയികള്‍ക്ക് എല്ലാ വിഭാഗങ്ങളിലുമായി രണ്ടുലക്ഷം രൂപ ക്യാഷ് അവാര്‍ഡും പ്രശസ്തി പത്രവും ഫലകങ്ങളും നല്‍കും. രജിസ്‌ട്രേഷന്‍ സൗജന്യം. യുവ പ്രതിഭകളെ കണ്ടെത്തി അവരെ പ്രോത്സാഹിപ്പിക്കുക എന്ന ലക്ഷ്യത്തോടയാണ് നൃത്തോത്സവം സംഘടിപ്പിക്കുന്നതെന്ന് സ്‌കൂള്‍ പ്രിന്‍സിപ്പല്‍ ബെലിന്‍ഡ വിവേര പറഞ്ഞു. ഷൈനി ഷാജന്‍, ഫാത്തിമ സാറ, സ്‌കൂള്‍ ലീഡര്‍ ജോയല്‍ ഏബ്രഹാം അനൂപ്, പ്രോഗ്രാം കോ-ഓര്‍ഡിനേറ്റര്‍ ആശ പേഴ്‌സി എന്നിവരും പ്രഖ്യാപന ചടങ്ങില്‍ പങ്കെടുത്തു.

ലഹരിക്കെതിരെ സിഗ്‌നേച്ചര്‍ കാമ്പയിന്‍

കൊച്ചി: ട്രാന്‍സ്ജെന്‍ഡര്‍ വ്യക്തികളുടെ ക്ഷേമ, പുനരധിവാസത്തിനായി എറണാകുളം-അങ്കമാലി അതിരൂപത സാമൂഹ്യ പ്രവര്‍ത്തന വിഭാഗമായ സഹൃദയ, എറണാകുളം ജില്ലാ പഞ്ചായത്തുമായി സഹകരിച്ചു നടപ്പാക്കുന്ന മാരിവില്ല് ട്രാന്‍സ്ജെന്‍ഡര്‍ ക്ലിനിക്കിന്‍റെ ആഭിമുഖ്യത്തില്‍ ട്രാന്‍സ് ജെന്‍ഡര്‍ പ്രൈഡ് മന്ത് ആചരണവും ലഹരിക്കെതിരെ സിഗ്‌നേച്ചര്‍ കാമ്പയിനും നടത്തി. ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടന്‍ ഉദ്ഘാടനം നിര്‍വഹിച്ചു. ട്രാന്‍സ്ജെന്‍ഡര്‍ ക്ലിനിക്കില്‍ നടന്ന സമ്മേളനത്തില്‍ സഹൃദയ ഡയറക്ടര്‍ ഫാ. ജോസ് കൊളുത്തുവെള്ളില്‍ അധ്യക്ഷത വഹിച്ചു. പോലീസ് ഇന്‍സ്‌പെക്ടര്‍ പി. ബാബു ജോണ്‍ ലഹരി വിരുദ്ധ സെമിനാര്‍ നയിച്ചു. ട്രാന്‍സ് ജെന്‍ഡര്‍ ജസ്റ്റീസ് ബോര്‍ഡ് അംഗങ്ങളായ ഷെറിന്‍ ആന്‍റണി, ആഷ്‌റിന്‍ ഇഷാക് ലൂക്ക്, മാരിവില്ല് കോ -ഓര്‍ഡിനേറ്റര്‍ വിക്ടര്‍ ജോണ്‍, കൃഷ്ണ ഷാജി എന്നിവര്‍ സംസാരിച്ചു.

കൂവപ്പടി സെന്‍റ് ആന്‍സ് സ്‌കൂളില്‍ ‘ദീപിക നമ്മുടെ ഭാഷ' പദ്ധതി

പെരുമ്പാവൂര്‍: കൂവപ്പടി സെന്‍റ് ആന്‍സ് പബ്ലിക് സ്‌കൂളില്‍ 'ദീപിക നമ്മുടെ ഭാഷ' പദ്ധതിക്കു തുടക്കമായി. പവിഴം ഗ്രൂപ്പ്, ഗോള്‍ഡന്‍ ഗ്രൂപ്പ് എന്നീ സ്ഥാപനങ്ങളുടെ സഹകരണത്തോടെയാണ് പദ്ധതി നടപ്പാക്കുന്നത്. ബെന്നി ബഹനാന്‍ എംപി ഉദ്ഘാടനം ചെയ്തു. സ്‌കൂള്‍ മാനേജര്‍ സിസ്റ്റര്‍ പുഷ്പറാണി അധ്യക്ഷത വഹിച്ചു. പ്രിന്‍സിപ്പല്‍ സിസ്റ്റര്‍ ഗ്രേസി പോള്‍, പവിഴം ഗ്രൂപ്പ് മാനേജിംഗ് ഡയറക്ടര്‍ ജോര്‍ജ് നമ്പ്യാട്ടുകുടി, ഗോള്‍ഡന്‍ ഗ്രൂപ്പ് മാനേജിംഗ് ഡയറക്ടര്‍ ബോബിന്‍ ചിറയത്ത്, ദീപിക സര്‍ക്കുലേഷന്‍ മാനേജര്‍ ബിനോ വര്‍ഗീസ്, പെരുമ്പാവൂര്‍ ലേഖകന്‍ ഷിജു തോപ്പിലാന്‍, ഏരിയാ മാനേജര്‍ നിബിന്‍ അലോഷ്യസ് എന്നിവര്‍ പ്രസംഗിച്ചു.

ടൗണ്‍ഷിപ്പ് മാതൃകയിൽ ഭവന പദ്ധതി

മൂവാറ്റുപുഴ: മാറാടിയിൽ ആധുനിക സൗകര്യങ്ങളോടെ ടൗണ്‍ഷിപ്പ് മാതൃകയിൽ ഭവന പദ്ധതി വരുന്നു. എം.എൻ ഭവന പദ്ധതിയിൽ നിർമിച്ച കുന്നുംപുറം ലക്ഷംവീട് ഉന്നതിയിലാണ് ആധുനിക സൗകര്യങ്ങളോടെ ടൗണ്‍ഷിപ്പ് മാതൃകയിൽ ഭവന പദ്ധതി ഒരുങ്ങുന്നത്. പദ്ധതിയുടെ ഭാഗമായി മാറാടി പഞ്ചായത്തിലെ ആറാം വാർഡിലെ എം.എൻ ഭവന പദ്ധതിയിൽ നിർമിച്ച കാലപ്പഴക്കം ചെന്ന 11 വീടുകളും പൊളിച്ചുമാറ്റി. കേന്ദ്ര-സംസ്ഥാന സർക്കാരുകളുടെയും തൃതല പഞ്ചായത്ത് തുക ഉപയോഗിച്ചും സുമനസുകളുടെ സഹായത്തോടെയും പഞ്ചായത്ത് പ്രസിഡന്‍റ് ഒ.പി. ബേബി സ്വന്തം നിലയ്‌ക്ക് കണ്ടെത്തിയ തുകകളും കൂടി ഉപയോഗിച്ചാണ് പദ്ധതി നടപ്പാക്കുക. 1973ൽ കുന്നുംപുറത്തെ എം.എൻ ഭവന പദ്ധതിലുടെ നിർമിച്ച ലക്ഷംവീടുകൾ ഏത് നിമിഷവും ഇടിഞ്ഞ് വീഴാറായ അവസ്ഥയിലായിരുന്നു. അറ്റകുറ്റപ്പണികൾ ചെയ്യാതെ ചോർന്നൊലിച്ച് വിണ്ടുകീറിയ ഭിത്തികളും ചിതലരിച്ച പട്ടികകളും ടാർപ്പ വലിച്ചുകെട്ടിയ മേൽക്കൂരയ്ക്ക് കീഴിലുള്ള ഇരട്ട വീടുകളിൽ ഭീതിയോടെ കഴിഞ്ഞിരുന്ന ആളുകളുടെ അവസ്ഥ പഞ്ചായത്തംഗം രതീഷ് ചെങ്ങാലിമറ്റം പഞ്ചായത്ത് പ്രസിഡന്‍റ് ഒ.പി. ബേബിയുടെ ശ്രദ്ധയിൽപ്പെടുത്തുകയായിരുന്നു. ഉടൻ തന്നെ ലക്ഷം വീടുകളിലെ ആളുകളെ നേരിൽകണ്ടു. ഗുരുതരരോഗം ബാധിച്ചവരും പ്രായാധിക്യം മൂലം കഷ്ടത അനുഭവിക്കുന്ന ഇവരുടെ അവസ്ഥ നേരിൽകണ്ട പ്രസിഡന്‍റ് ഉടൻതന്നെ അവർക്ക് വീട് പണിത് നൽകാമെന്ന് ഉറപ്പുനൽകി. വീടു പണിയുന്നതിന് ഏറ്റവും പ്രധാനപ്പെട്ട ഒരു പ്രശ്നം എം.എൻ ഭവന പദ്ധതി പ്രകാരം നിർമിച്ച ലക്ഷം വീടുകൾക്കുള്ളിലേക്ക് മൂന്നടി മാത്രം വീതിയുള്ള നടപ്പുവഴി മാത്രമാണ് ഉണ്ടായിരുന്നത്. രണ്ട് ഭാഗങ്ങളിലായി 200 മീറ്ററോളം അകലെയുള്ള വീടുകളിലേക്ക് വീട് പണിക്ക് ആവശ്യമായ സാധനങ്ങൾ തലച്ചുമടായി കൊണ്ടുപോകേണ്ട അവസ്ഥയിലായിരുന്നു. ആദ്യം തന്നെ അവിടേക്ക് വലിയ വാഹനങ്ങൾ എത്തുന്നതിന് റോഡ് നിർമിച്ച് കോണ്‍ക്രീറ്റ് ചെയ്തു. തുടർന്ന് നിലവിലെ വീടുകൾ പൊളിച്ചുമാറ്റി കുത്തനെയുള്ള പ്രദേശങ്ങളിലെ മണ്ണുകൾ നീക്കം ചെയ്ത് നിരപ്പുള്ള സ്ഥലമാക്കി മാറ്റി. എല്ലാ വീടുകളിലേക്കും വാഹനം എത്തുന്നതിന് വഴികൾ നിർമിച്ച് വീട് പണിയുന്നതിനുള്ള പ്ലാൻ തയാറാക്കി വാനം കീറി വീട് നിർമാണം പൂർത്തിയാക്കുന്നതിനുള്ള പരിശ്രമത്തിലാണ് പഞ്ചായത്ത് പ്രസിഡന്‍റ്. പദ്ധതിയുടെ നിർമാണോദ്ഘാടനം മുൻ എംഎൽഎ ജോസഫ് വാഴയ്ക്കൻ നിർവഹിച്ചു. നിർധന കുടുംബങ്ങൾക്ക് വീട് വച്ച് നൽകുന്നതിനായി രാഹുൽ കണ്‍സ്ട്രക്ഷൻ എംഡി രാജു ചാക്കോ ആടുകുഴി 25 ലക്ഷം നൽകാമെന്ന് പഞ്ചായത്ത് പ്രസിഡന്‍റിന് ഉറപ്പു നൽകി. വൈഎംസിഎ പ്രസിഡന്‍റ് രാജേഷ് മാത്യു, ഷാൻസ് പോൾ, ഫെലെക്സി കെ. വർഗീസ്, കുര്യാക്കോസ് ഇത്തുണിക്കൽ, ലയണ്‍സ് ക്ലബ് ഭാരവാഹികൾ തുടങ്ങിയവർ സഹായഹസ്തവുമായി ഇവർക്കൊപ്പമുണ്ട്. പഞ്ചായത്ത് വൈസ് പ്രസിഡന്‍റ് അജി, പഞ്ചായത്തംഗങ്ങളായ സാജു, ജിഷ ജിജോ, ബിനീഷ് ഷൈമോൻ, രമ രാമകൃഷ്ണൻ, ഷൈനി മുരളി, സരള രാമൻനായർ, ഷിജി ഷാമോൻ, ലയൻസ് ക്ലബ് ഭാരവാഹികളായ ജഗൻ ജെയിംസ്, ജയ ബാലചന്ദ്രൻ, നീന സജീവ്, എൻ.എം. വർഗീസ്, ടോമി പാലമല, സി.പി. ജോയി, വി.ജി. ഏലിയാസ്, സാജു കുന്നപ്പിള്ളി, മാത്യു ഉറുന്പിൽ, സജി പൈറ്റാട്ടിൽ, സി.വി. ജയ്സണ്‍, ബെന്നി എരപ്പിൽ, സി. പൗലോസ് മണിതോട്ടം, ജോർജ് മുടവന്തിൽ, ബിജു മണ്ണാർകുഴി, ടി.കെ. ഷിയാസ് തുടങ്ങിയവർ പങ്കെടുത്തു.

വീടിന്‍റെ വെഞ്ചിരിപ്പും താക്കോൽ ദാനവും

കോതമംഗലം: കത്തീഡ്രൽ ഹോംസിന്‍റെ ഭവന പദ്ധതിയിൽ ഒന്നാംഘട്ടത്തിൽ പൂർത്തിയായ പതിനൊന്നാമത്തെ വീടിന്‍റെ വെഞ്ചിരിപ്പും താക്കോൽ ദാനവും കത്തീഡ്രൽ വികാരി റവ.ഡോ. മാത്യു കൊച്ചുപുരയ്ക്കൽ നിർവഹിച്ചു. കത്തീഡ്രൽ ഹോംസ് ഒന്നാം ഘട്ടത്തിൽ 25 ഭവനങ്ങളിലാണ് പുതുതായി നിർമിക്കുവാൻ തീരുമാനിച്ചിരിക്കുന്നത്. ബാക്കി 14 വീടുകളുടെ പണികൾ പൂർത്തിയായിവരുന്നു. കത്തീഡ്രൽ സഹവികാരിമാരായ ഫാ. ജസ്റ്റിൻ ചേറ്റൂർ, ഫാ. മാത്യു എടാട്ട്, റസിഡന്‍റ് പ്രീസ്റ്റ് ഫാ. ജോണ്‍ മറ്റപ്പിള്ളി, ജോയ്സ് റാഫേൽ മുണ്ടയ്ക്കൽ, സി.ജെ. ബെന്നി ചിറ്റുപറന്പിൽ, ജോബി പാറങ്കിമാലി, ഡേവിസ് നെല്ലിക്കാട്ടിൽ, ബിജു കുന്നുംപുറം, ജോണ്‍സണ്‍ പോത്താനിക്കാട്ട്, ജോർജ് ഓലിയപ്പുറം, ബെന്നി വെള്ളാപള്ളികുന്നേൽ എന്നിവർ പങ്കെടുത്തു.

വാഴക്കുളം പൈനാപ്പിൾ മാർക്കറ്റിൽ പ്രവേശന കവാടം ഉദ്ഘാടനം ചെയ്തു

വാഴക്കുളം: പൈനാപ്പിൾ മാർക്കറ്റിൽ ഓൾ കേരള പൈനാപ്പിൾ മർച്ചന്‍റ്സ് അസോസിയേഷൻ നിർമിച്ചു നൽകുന്ന പ്രവേശന കവാടത്തിന്‍റെ ഉദ്ഘാടനം നടത്തി. മഞ്ഞള്ളൂർ പഞ്ചായത്ത് പ്രസിഡന്‍റ് ആൻസി ജോസ് ഉദ്ഘാടനം ചെയ്തു. അസോസിയേഷൻ പ്രസിഡന്‍റ് ജോസ് പെരുന്പിള്ളിക്കുന്നേൽ, പഞ്ചായത്ത് വൈസ് പ്രസിഡന്‍റ് ടോമി തന്നിട്ടാമാക്കൽ, പഞ്ചായത്തംഗം പി.എസ്. സുധാകരൻ, അസോസിയേഷൻ സെക്രട്ടറി ജോസ് വർഗീസ്, വൈസ് പ്രസിഡന്‍റ് ജിമ്മി തോമസ്, ട്രഷറർ ജോസ് മാത്യു മോനിപ്പിള്ളിൽ, ജോയിന്‍റ് സെക്രട്ടറി ഷൈജി ജോസഫ്, ജെയ്സൻ ജോസ്, സാലസ് അലക്സ്, ഷൈൻ ജോണ്‍, മാത്യു ജോസഫ്, എം.പി. തോമസ്, സിജോ ജോർജ്, ഡിവിൻ ജോസ് തുടങ്ങിയവർ പങ്കെടുത്തു.

ഉന്നത വിജയം നേടിയവർക്ക് എംഎൽഎ അവാർഡ്

മൂവാറ്റുപുഴ: എസ്എസ്എൽസി, പ്ലസ്ടു, സിബിഎസ്ഇ, ഐസിഎസ്ഇ പരീക്ഷകളിൽ ഉന്നത വിജയം നേടിയ വിദ്യാർഥികൾക്ക് എംഎൽഎ അവാർഡ് നൽകി ഈ വർഷവും ആദരിക്കുമെന്ന് മാത്യു കുഴൽനാടൻ എംഎൽഎ അറിയിച്ചു. എംഎൽഎ മണ്ഡലത്തിൽ നടപ്പാക്കുന്ന വിദ്യ സ്പർശം പദ്ധതി പ്രകാരമാണ് അവാർഡുകൾ നൽകുന്നത്. നൂറ് ശതമാനം വിജയം നേടിയ വിദ്യാലയങ്ങളെയും ബിരുദ, ബിരുദാനന്തര പരീക്ഷകളിൽ റാങ്ക് നേടിയ പ്രതിഭകളെയും ചടങ്ങിൽ ആദരിക്കും. മുവാറ്റുപുഴ മണ്ഡലത്തിലെ സ്കൂളുകളിൽ പഠിച്ച വിദ്യാർഥികൾക്ക് പുറമെ മൂവാറ്റുപുഴ നിയോജക മണ്ഡലത്തിൽ സ്ഥിര താമസക്കാരും എന്നാൽ മണ്ഡലത്തിന് പുറമെയുള്ള സ്കൂളുകളിൽ പഠിച്ചു ഉന്നത വിജയം നേടിയ വിദ്യാർഥികൾക്കും എംഎൽഎ അവാർഡ് നൽകും. ബിരുദ, ബിരുദാനന്തര പരീക്ഷകളിൽ റാങ്ക് നേടിയവരും മണ്ഡലത്തിന് പുറമെയുള്ള സ്കൂളുകളിൽ പഠിച്ചു ഉന്നത വിജയം നേടിയവരും എംഎൽഎ ഓഫീസിൽ അപേക്ഷ നൽകണം. മാർക്ക് ലിസ്റ്റിന്‍റെ പകർപ്പ് സഹിതം മൂന്നിന് വൈകുന്നേരം അഞ്ചിന് മുന്പ് 04852834444 എന്ന നന്പറിൽ ബന്ധപ്പെടുകയോ എംഎൽഎ ഓഫീസിൽ നേരിട്ടോ നൽകണമെന്ന് എംഎൽഎ അറിയിച്ചു.

തൃക്കളത്തൂർ ശ്രീരാമസ്വാമി ക്ഷേത്രത്തിൽ നവീകരണ കലശവും പുനപ്രതിഷ്ഠയും നാളെ

മൂവാറ്റുപുഴ: തൃക്കളത്തൂർ ശ്രീരാമസ്വാമി ക്ഷേത്രത്തിൽ ശ്രീധർമശാസ്താ ക്ഷേത്ര നവീകരണ കലശവും പുനപ്രതിഷ്ഠയും നാളെ രാവിലെ ഒന്പതിനു നടക്കും. ചടങ്ങുകൾക്ക് ക്ഷേത്രം തന്ത്രി പുലിയന്നൂർ അനുജൻ നാരായണൻ നന്പൂതിരി മുഖ്യകാർമികത്വവും മേൽശാന്തി വാരണകോട്ട് വി.എസ്. ശങ്കരൻ പോറ്റി സഹകാർമികത്വവും വഹിക്കും. രാവിലെ പതിവ് പൂജകൾ, 8.30ന് ബിംബശുദ്ധി, കലശാഭിഷേകങ്ങൾ, വൈകുന്നേരം 6.45ന് ദീപാരാധന, ഏഴിന് തായന്പക. നാളെ രാവിലെ പതിവ് പൂജകൾക്ക്പുറമെ ഒന്പതിന് ശാസ്താ പ്രതിഷ്ഠ, ബ്രഹ്മകലശാഭിഷേകം, 10ന് ശ്രീരാമസ്വാമിക്ക് കളഭാഭിഷേകം, ഉച്ചയ്ക്ക് 12ന് പ്രസാദ ഊട്ട്, വൈകുന്നേരം ആറിന് പഞ്ചവാദ്യ അരങ്ങേറ്റം, 6.45ന് ദീപാരാധന.

പ്രതിഷേധ പ്രകടനം നടത്തി

മൂവാറ്റുപുഴ: നഗരവികസ പ്രവർത്തനങ്ങൾ രണ്ടാഴ്ചയായി മുടങ്ങിക്കിടക്കുന്നതിനെതിരെ വ്യാപാരി - തൊഴിലാളി കൂട്ടായ്മയുടെ നേതൃത്വത്തിൽ മൂവാറ്റുപുഴയിൽ പ്രതിഷേധ പ്രകടനം നടത്തി. റോഡിന്‍റെ നിർമാണം അടിയന്തരമായി പൂർത്തിയാക്കുക, ആവശ്യമായ യന്ത്രസാമഗ്രികളും മറ്റും എത്തിക്കുക, ഞായറാഴ്ചകളിലും രാത്രിയിലും അടിയന്തരമായി നിർമാണം നടത്തുക തുടങ്ങിയ ആവശ്യങ്ങളുന്നയിച്ചാണ് പി.ഒ ജംഗ്ഷൻ മുതൽ കച്ചേരിത്താഴം വരെ നഗരത്തിലെ വ്യാപരികളും തൊഴിലാളികളും പ്രതിഷേധ പ്രകടനം നടത്തിയത്. പി.ഒ ജംഗ്ഷൻ മുതൽ കച്ചേരിത്താഴം വരെയുള്ള കടകളിലെ വ്യാപാരികളും തൊഴിലാളികളുമാണ് പ്രതിഷേധത്തിൽ പങ്കെടുത്തത്.

കോതമംഗലത്ത് 15 കിലോ കഞ്ചാവുമായി നാലുപേർ പിടിയിൽ

കോതമംഗലം: കോതമംഗലത്ത് വൻ കഞ്ചാവ് വേട്ട. 15 കിലോയോളം കഞ്ചാവുമായി നാല് പേരെ പോലീസ് പിടികൂടി. കൊൽക്കത്ത സ്വദേശികളായ നൂറുൽ ഇസ്ലാം (25), സുമൻ മുല്ല (25), ഒറീസ സ്വദേശികളായ ഷിമൻഞ്ചൽപാൽ, പ്രശാന്ത് കുമാർ എന്നിവരാണ് കോതമംഗലം പോലീസിന്‍റെ പിടിയിലായത്. രാത്രി ഒൻപതോടെ വാഹന പരിശോധനയ്‌ക്കിടെ സംശയാസ്പദമായ രീതിയിൽ തങ്കളത്തിന് സമീപം ബസ് കാത്തിരിപ്പ് കേന്ദ്രത്തിൽ ഇവരെ കണ്ടതിനെതുടർന്ന് പോലീസ് ചോദ്യം ചെയ്തപ്പോഴാണ് ബാഗുകളിൽ നിറച്ച കഞ്ചാവ് കണ്ടെത്തിയത്. കോതമംഗലം പോലീസ് തുടർ നടപടികൾ സ്വീകരിച്ചുവരുന്നു.

സബ് രജിസ്ട്രാർ ഓഫീസിൽ കള്ളൻ കയറി

കോലഞ്ചേരി: പുത്തൻകുരിശ് സബ് രജിസ്ട്രാർ ഓഫീസിൽ കള്ളൻ കയറി. ഇന്നലെ ജോലിക്കെത്തിയ ഉദ്യോഗസ്ഥരാണ് സംഭവം കണ്ടത്. വാതിലും അലമാരകളും മേശയും കുത്തിത്തുറന്നെങ്കലും ഒന്നും നഷ്ടപ്പെട്ടിട്ടില്ല. ഫയലുകളിൽ ചിലത് അലങ്കോലമാക്കി ഇട്ടിട്ടുള്ളതായി ഉദ്യോഗസ്ഥർ പറയുന്നു. ഇടപാടുകളെല്ലാം ഓൺലൈൻ ആക്കിയതോടെ ഇവിടെ പണം സൂക്ഷിക്കുന്നില്ല. പുത്തൻകുരിശ് പോലീസ് കേസെടുത്ത് അന്വേഷണം ആരംഭിച്ചു.

വർണക്കൂടാരം പരിശീലന പരിപാടി സംഘടിപ്പിച്ചു

മൂവാറ്റുപുഴ: മൂവാറ്റുപുഴ താലൂക്ക് ലൈബ്രറി കൗണ്‍സിൽ സംഘടിപ്പിച്ച ബാലവേദി വർണക്കൂടാരം പരിശീലന പദ്ധതി ശ്രീനാരായണ ബി.എഡ് സെന്‍റർ മിനിഹാളിൽ സാംസ്ക്കാരിക പ്രവർത്തകൻ എൻ. വി. പീറ്റർ ഉദ്ഘാടനം ചെയ്തു. സംസ്ഥാന ലൈബ്രറി കൗണ്‍സിൽ അംഗം ജോസ് കരിന്പന അധ്യക്ഷത വഹിച്ചു. ജില്ലാ ലൈബ്രറി കൗണ്‍സിൽ ജോയിന്‍റ് സെക്രട്ടറി കെ.പി. രാമചന്ദ്രൻ മുഖ്യ പ്രഭാഷണം നടത്തി. താലൂക്കിലെ 73 ലൈബ്രറികളിൽ നിന്നുള്ള ബാലവേദികളുടെ ചുമതയുള്ളവരാണ് വർണക്കൂടാരം പരിശീലനത്തിൽ പങ്കെടുത്തത്.

സെന്‍റ് ഡയനേഷ്യസ് ഓർത്തഡോക്സ് ഫെലോഷിപ്പ് രൂപീകരിച്ചു

കോലഞ്ചേരി: കുന്നക്കുരുടി സെന്‍റ് ജോർജ് ഓർത്തഡോക്സ് കത്തീഡ്രലിൽ സെന്‍റ് ഡയനേഷ്യസ് ഓർത്തഡോക്സ് ഫെലോഷിപ്പ് രൂപീകരിച്ചു. ഭാരവാഹികളായി വികാരി ഫാ. ബോബി വർഗീസ് (പ്രസിഡന്‍റ്), ഫാ. ജെയ്സ് മാത്യു, ഫാ. ബിനിൽ വർഗീസ്, ഫാ. കെ.കെ. വർഗീസ്, തമ്പി മാത്യു (വൈസ് പ്രസിഡന്‍റുമാർ), ജിജി മാത്യു (സെക്രട്ടറി), സീനായി പോൾ (ജോയിന്‍റ് സെക്രട്ടറി), ജീമോൻ പി. വർഗീസ് (ട്രഷറർ) എന്നിവരെയും 15 അംഗ എക്സിക്യൂട്ടീവ് കമ്മിറ്റി അംഗങ്ങളെയും തെരഞ്ഞെടുത്തു.

സൗജന്യ ഫിസിയോ തെറാപ്പി സെന്‍റർ തുടങ്ങി

മൂവാറ്റുപുഴ: ആൽഫാ പാലീയേറ്റീവ് കെയർ മൂവാറ്റുപുഴ സെന്‍ററിനു കീഴിൽ സൗജന്യ ഫിസിയോ തെറാപ്പി സെന്‍റർ ആരംഭിച്ചു. സ്ട്രോക്ക്, നട്ടെല്ലിന്‍റെ ക്ഷതം, മസ്തിഷ്ക ക്ഷതം, പാർക്കിൻസണ്‍സ് എന്നീ രോഗങ്ങൾ മൂലം കിടപ്പിലായ രോഗികൾക്കു സൗജന്യമായി ഫിസിയോ തെറാപ്പി ഇന്ന് മുതൽ മൂവാറ്റുപുഴ ആൽഫ പാലിയേറ്റീവിനു കീഴിൽ നൽകുന്നതാണെന്ന് പ്രസിഡന്‍റ് അഷറഫ് മാണിക്യം, സെക്രട്ടറി വിൽസണ്‍ കുരിശിങ്കൽ എന്നിവർ അറിയിച്ചു. ഫിസിയോ തെറാപ്പി കൂടാതെ കിടപ്പു രോഗികളെ വീടുകളിൽ സന്ദർശിച്ചു സൗജന്യ ഗൃഹകേന്ദ്രീകൃത ചികിത്സയും സെന്‍ററിൽനിന്നു നൽകുന്നുണ്ട്. ഫോൺ: 91888916196.

അയ്യങ്കാളി പ്രതിമ അനാച്ഛാദനം ചെയ്തു

മൂവാറ്റുപുഴ: നഗരസഭയുടെ നേതൃത്വത്തിൽ പി.ഒ ജംഗ്ഷനിൽ സ്ഥാപിച്ച മഹാത്മ അയ്യങ്കാളിയുടെ പ്രതിമ പ്രതിപക്ഷ നേതാവ് വി.ഡി. സതീശൻ നാടിന് സമർപ്പിച്ചു. നഗരസഭാധ്യക്ഷൻ പി.പി. എൽദോസ് അധ്യക്ഷത വഹിച്ചു. ഡീൻ കുര്യാക്കോസ് എംപി, മഹാത്മ അയ്യങ്കാളിയുടെ ചെറുമകൻ എസ്. ഗിരിജാത്മജൻ, എംഎൽഎമാരായ മാത്യു കുഴൽനാടൻ, അനൂപ് ജേക്കബ്, എൽദോസ് കുന്നപ്പിള്ളി, മുൻ എംഎൽഎമാരായ ജോസഫ് വാഴയ്ക്കൻ, ബാബു പോൾ, ജോണി നെല്ലൂർ, ബ്ലോക്ക് പഞ്ചായത്ത് പ്രസിഡന്‍റ് കെ.ജി. രാധാകൃഷ്ണൻ തുടങ്ങിയവർ പ്രസംഗിച്ചു. തൊടുപുഴ വെള്ളിയാമറ്റം ചാമപ്പാറയിൽ ജൂബിലന്‍റ് ഉണ്ണി എന്ന ശിൽപ്പിയാണ് ആറരയടി ഉയരമുള്ള പൂർണകായ പ്രതിമ തീർത്തിരിക്കുന്നത്. കന്പി, അയണ്‍ നെറ്റ്, കളിമണ്ണ്, സിമന്‍റ് തുടങ്ങിയവ ഉപയോഗിച്ച് ഒരു ടണ്‍ ഭാരം വരുന്ന പ്രതിമയാണ് നിർമിച്ചിരിക്കുന്നത്.

സൗജന്യ മെഗാ മെഡിക്കൽ ക്യാന്പ് സംഘടിപ്പിച്ചു

കോതമംഗലം: കീരംപാറ സെന്‍റ് സെബാസ്റ്റ്യൻസ് പള്ളിയുടെയും കോതമംഗലം സെന്‍റ് ജോസഫ്സ് ധർമഗിരി ആശുപത്രിയുടെയും സംയുക്താഭിമുഖ്യത്തിൽ കീരംപാറ സെന്‍റ് സെബാസ്റ്റ്യൻസ് പള്ളി ഓഡിറ്റോറിയത്തിൽ സൗജന്യ മെഗാ മെഡിക്കൽ ക്യാന്പ് സംഘടിപ്പിച്ചു. കീരംപാറ പഞ്ചായത്ത് പ്രസിഡന്‍റ് എം.പി. ഗോപി ഉദ്ഘാടനം ചെയ്തു. വികാരി ഫാ. മാത്യു കൊച്ചുപുരയ്ക്കൽ അധ്യക്ഷത വഹിച്ചു. ആശുപത്രി അഡ്മിനിസ്ട്രേറ്റർ സിസ്റ്റർ ജോസ്മിൻ മുഖ്യപ്രഭാഷണം നടത്തി. വ്യാപാരി വ്യവസായി ഏകോപന സമിതി പ്രസിഡന്‍റ് ജിജി എളൂർ, പഞ്ചായത്തംഗം വി.കെ. വർഗീസ്, ബ്ലോക്ക് പഞ്ചായത്തംഗം ജെയിംസ് കോറന്പേൽ, ആന്‍റണി ജോസം, ജിജി പുളിക്കൽ, ഷോജി ജോസഫ് എന്നിവർ പ്രസംഗിച്ചു. സെന്‍റ് ജോസഫ്സ് ധർമഗിരി ആശുപത്രിയിലെ വിവിധ വിഭാഗങ്ങളിൽ നിന്നുള്ള ഡോക്ടർമാർ ക്യാന്പിൽ പരിശോധനകൾക്ക് നേതൃത്വം നൽകി. ക്യാന്പിൽ പങ്കെടുത്തവരിൽ തുടർ ചികിത്സ നിർദേശിക്കപ്പെട്ടവർക്ക് ആനുകൂല്യങ്ങൾ ലഭ്യമാക്കുമെന്ന് ആശുപത്രി അഡ്മിനിസ്ട്രേറ്റർ സിസ്റ്റർ ജോസ്മിൻ അറിയിച്ചു.

അനധികൃതമായി കടത്താൻ ശ്രമിച്ച സിഗരറ്റും ഐ ഫോണുകളും പിടികൂടി

നെടുമ്പാശേരി: വിദേശത്തുനിന്ന് അനധികൃതമായി കടത്താൻ ശ്രമിച്ച സിഗരറ്റ്, ഐ ഫോൺ, സ്വർണം എന്നിവ കൊച്ചി രാജ്യാന്തര വിമാനത്താവളത്തിൽ പിടികൂടി. രണ്ട് യാത്രക്കാരിൽ നിന്നായി പിടിച്ചെടുത്ത സാമഗ്രികൾക്ക് 25.44 ലക്ഷം രൂപ വില വരും. ഇന്നലെ എയർഇന്ത്യ എക്‌സ്പ്രസ് വിമാനത്തിൽ അബുദാബിയിൽ നിന്നെത്തിയ കോഴിക്കോട് സ്വദേശികളായ ഫസൽ റഹ്മാൻ, നാസർ എന്നിവരിൽ നിന്നാണ് കസ്റ്റംസ് പരിശോധനയിൽ സിഗരറ്റും മറ്റും പിടികൂടിയത്. ഇരുവരും ബാഗേജിൽ ഒളിപ്പിച്ചാണ് സിഗരറ്റും ഐ ഫോണുകളുമൊക്കെ കടത്തികൊണ്ടുവന്നത്. ഫസർ റഹ്മാന്‍റെ പക്കൽ സിഗരറ്റിനോടൊപ്പം 13 ഐ ഫോണുകളും രണ്ട് സ്വർണനാണയങ്ങളുമുണ്ടായിരുന്നു. നാസറിന്‍റെ പക്കൽ സിഗരറ്റ് കൂടാതെ ആറ് ഐ ഫോണുകളാണുണ്ടായിരുന്നത്.

പശ്ചിമബംഗാള്‍ സ്വദേശികള്‍ കഞ്ചാവുമായി അറസ്റ്റില്‍

കൊച്ചി: വിതരണക്കാര്‍ക്കായി ഒഡീഷയില്‍ നിന്നും കഞ്ചാവ് എത്തിച്ച രണ്ട് ഇതരസംസ്ഥാനക്കാര്‍ പിടിയില്‍. വെസ്റ്റ് ബംഗാള്‍ സ്വദേശികളായ അഫ്‌സല്‍ ഹുസൈന്‍ (24), റോണി സേഖ്(19) എന്നിവരെ ഡാന്‍സാഫ് സംഘമാണ് അറസ്റ്റ് ചെയ്തത്. ഇവരുടെ പക്കല്‍നിന്നും 16.678 കിലോ കഞ്ചാവ് പിടിച്ചെടുത്തു. രണ്ട് ട്രാവല്‍ ബാഗുകളിലായി കുത്തിനിറച്ച നിലയിലായിരുന്നു കഞ്ചാവ് ഒളിപ്പിച്ചിരുന്നത്. വെസ്റ്റ് ബംഗാള്‍ നിന്നും വരികയായിരുന്ന പ്രതികള്‍ ഒഡീഷയില്‍ നിന്നും കഞ്ചാവെടുത്തു അങ്കമാലിയില്‍ എത്തിച്ചു അവിടെ നിന്നും എലൂര്‍ ഫാക്ട് ഭാഗത്തേക്ക് എത്തിക്കുന്നതിനിടെയാണ് പിടിയിലായത്. കഞ്ചാവ് കടത്തികൊണ്ടുവന്നു എലൂര്‍, കളമശേരി, ഫോര്‍ട്ട്‌കൊച്ചി, എറണാകുളം നോര്‍ത്ത് ഭാഗങ്ങളില്‍ വിതരണക്കാര്‍ക്ക് കൊടുക്കുകയാണ് പ്രതികള്‍ ചെയ്തിരുന്നത്. കഞ്ചാവിന്‍റെ ഉറവിടത്തെക്കുറിച്ചടക്കം പോലീസ് അന്വേഷണം ആരംഭിച്ചു.

കടമക്കുടിയിലെ കുടിവെള്ള വിതരണം പൂര്‍ണതോതിലാകാന്‍ വൈകും

കൊച്ചി: കടമക്കുടി പഞ്ചായത്തില്‍ വാട്ടര്‍ അഥോറിറ്റിയുടെ പൈപ്പ് പുഴയില്‍ പൊട്ടിയതിനെ തുടര്‍ന്ന് കോതാട്, മൂലമ്പിള്ളി ഭാഗങ്ങളില്‍ ഉണ്ടായ കുടിവെള്ള ക്ഷാമം പൂര്‍ണതോതില്‍ പരിഹരിക്കാന്‍ സമയമെടുക്കും. ജലവിതരണം സാധാരണ നിലയിലാകാന്‍ ഏതാനും ദിവസങ്ങള്‍ കൂടി എടുക്കുമെന്ന് അധികൃതര്‍ വ്യക്തമാക്കി. അറ്റകുറ്റപ്പണികള്‍ പുരോഗമിക്കുകയാണ്. കുടിവെള്ള ക്ഷാമത്തില്‍ കുറവ് വന്നിട്ടുള്ളതായി ഉദ്യോഗസ്ഥര്‍ വ്യക്തമാക്കി. ദുഷ്‌കരമായ ജോലിയാണ് നടക്കുന്നത്. അതിനടെ കുടിവെള്ള ക്ഷാമത്തിന്‍റെ സ്ഥിതി നേരിട്ടറിയാന്‍ കെ.എന്‍. ഉണ്ണിക്കൃഷ്ണന്‍ എംഎല്‍എ സ്ഥലം സന്ദര്‍ശിച്ചു. പ്രദേശത്ത് ക്യാമ്പ് ചെയ്തു പൈപ്പിന്‍റെ അറ്റകുറ്റപ്പണികള്‍ക്കു നേതൃത്വം നല്‍കുന്ന വാട്ടര്‍ അഥോറിറ്റി ജീവനക്കാരെ കണ്ട് വിവരങ്ങള്‍ തിരക്കി. വിഷയത്തില്‍ ജലവിഭവമന്ത്രിക്കു എംഎല്‍എ നേരിട്ടു നിവേദനം നല്‍കുകയും വാട്ടര്‍ അഥോറിറ്റി എംഡിയുമായി സംസാരിക്കുകയും ചെയ്തിരുന്നു. ഡെപ്യൂട്ടി എക്‌സിക്യൂട്ടീവ് എന്‍ജിനീയര്‍ അനില്‍ ആഗസ്റ്റിന്‍, അസിസ്റ്റന്‍റ് എക്‌സിക്യൂട്ടീവ് എന്‍ജിനീയര്‍ നീതു മോഹന്‍, അസിസ്റ്റന്‍റ് എന്‍ജിനീയര്‍ കെ.എസ്. ഉത്തര, എം. രാജീവ്, കെ.എം. വൈഷ്ണ എന്നിവരുടെ നേതൃത്വത്തിലാണ് അറ്റകുറ്റപ്പണികള്‍ പുരോഗമിക്കുന്നത്.

ആരോഗ്യരംഗത്തെ കെടുകാര്യസ്ഥത കോണ്‍ഗ്രസ് ധര്‍ണ നാളെ

കൊച്ചി: സംസ്ഥാനത്തെ ആരോഗ്യമേഖല വെന്‍ററിലേറ്ററിലാണെന്ന മെഡിക്കൽ കോളജ് ഡോക്ടറുടെ വെളിപ്പെടുത്തലിന് പിന്നാലെ സര്‍ക്കാരിന്‍റെ ആരോഗ്യരംഗത്തോടുള്ള കെടുകാര്യസ്ഥതയ്‌ക്കെതിരെ ജില്ലാ കോണ്‍ഗ്രസ് കമ്മിറ്റി മെഡിക്കല്‍ കോളജിനു മുന്നില്‍ നാളെ ധര്‍ണ നടത്തും. രാവിലെ 10.30ന് കളമശേരി മെഡിക്കല്‍ കോളജിന് മുന്നില്‍ പ്രതിപക്ഷ നേതാവ് വി.ഡി. സതീശന്‍ ധര്‍ണ ഉദ്ഘാടനം ചെയ്യും. സംസ്ഥാന വ്യാപകമായി കോണ്‍ഗ്രസ് പ്രതിഷേധത്തിന്‍റെ ഭാഗാമായാണ് ധര്‍ണയെന്ന് ഡിസിസി അധ്യക്ഷന്‍ മുഹമ്മദ് ഷിയാസ് അറിയിച്ചു.

ഡിജെ പാര്‍ട്ടിക്കിടെ കടന്നുപിടിച്ച യുവാവിനെ യുവതി വൈന്‍ ഗ്ലാസ് കൊണ്ട് അടിച്ച് പരിക്കേല്‍പ്പിച്ചു

കേസെടുത്ത് പോലീസും എക്‌സൈസും കൊച്ചി: ഡിജെ പാര്‍ട്ടിക്കിടെ കടന്നുപിടിച്ച യുവാവിനെ യുവതി വൈന്‍ ഗ്ലാസ് കൊണ്ട് അടിച്ച് പരിക്കേല്‍പ്പിച്ചു. ശനിയാഴ്ച രാത്രി 10.30ഓടെ കതൃക്കടവിലെ മില്ലേനിയല്‍സ് (ഇടശേരി) ബാറില്‍ ആയിരുന്നു സംഭവം. സംഭവത്തില്‍ എറണാകുളം നോര്‍ത്ത് പോലീസ് രണ്ട് കേസുകള്‍ രജിസ്റ്റര്‍ ചെയ്തു. ഇതിനുപുറമേ ബാര്‍ ഉടമയ്‌ക്കെതിരെ എക്‌സൈസും കേസ് എടുത്തു. സംഭവത്തില്‍ എറണാകുളത്ത് ജോലി ചെയ്യുന്ന ഉദയംപേരൂര്‍ സ്വദേശിനിയായ 29കാരിക്കെതിരെയാണ് പോലീസിന്‍റെ ആദ്യകേസ്. ലൈംഗിക ഉദ്ദേശത്തോടെ ഇവരെ കടന്നുപിടിച്ചതിന് ഇടുക്കി തൊടുപുഴ സ്വദേശിക്കെതിരെയാണ് രണ്ടാമത്തെ കേസ്. ആദ്യ കേസില്‍ യുവതിയുടെ അറസ്റ്റ് രേഖപ്പെടുത്തി ജാമ്യത്തില്‍ വിട്ടു. യുവാവിന്‍റെ അറസ്റ്റ് ഇതുവരെ രേഖപ്പെടുത്തിയിട്ടില്ല. ഉദയംപേരൂര്‍ സ്വദേശിനിയും സുഹൃത്തുക്കളും തൊടുപുഴ സ്വദേശിയായ യുവാവിന്‍റെ സുഹൃത്തുക്കളുടെ സംഘവുമാണ് ഡിജെ പാര്‍ട്ടിക്ക് എത്തിയത്. പരിപാടിക്കിടെ യുവാവ് യുവതിയോട് മോശമായി പെരുമാറി. ഒരു തവണ താക്കീത് ചെയ്‌തെങ്കിലും ദുരുദ്ദേശത്തോടെ വീണ്ടും കടന്നുപിടിച്ചതോടെ യുവതി വൈന്‍ ഗ്ലാസ് കൊണ്ട് അടിക്കുകയായിരുന്നു. ഇതോടെ ഡിജെ പാർട്ടി നിർത്തിവച്ചു. പരിക്കേറ്റ യുവാവിനെ ഉടന്‍ ആശുപത്രിയിലേക്ക് മാറ്റി. യുവാവിന്‍റെ ചെവിക്ക് പിന്നിലാണ് അടിയേറ്റത്. പ്രാഥമിക ചികിത്സതേടിയ ഇയാള്‍ ആശുപത്രിവിട്ടു. ഇരുവരെയും ഇന്നലെ സ്റ്റേഷനിലേക്ക് വിളിച്ചുവരുത്തി മൊഴി രേഖപ്പെടുത്തിയ ശേഷമാണ് തൊടുപുഴ സ്വദേശിക്കെതിരെ കേസ് എടുത്ത്. ഇതിനിടെ സിസിടിവി ദൃശ്യം പരിശോധിച്ച പോലീസ് യുവതിയുടെ മൊഴിയില്‍ കഴമ്പുണ്ടെന്ന് കണ്ടെത്തി. അനുമതിയില്ലാത്ത മദ്യം വിളന്പിയതിനാണ് എക്സൈസ് കേസെടുത്തത്.

മരണത്തിലും മാതൃകയായി വി.കെ. ജോസഫ്

കൊച്ചി: മരണശേഷം തന്‍റെ മൃതദേഹം വൈദ്യപഠനത്തിന് വിട്ടുനല്‍കണമെന്നതായിരുന്നു വി.കെ. ജോസഫിന്‍റെ ആഗ്രഹം. മരണം അവശേഷിപ്പിച്ച തീരാവേദനയിലും ജോസഫിന്‍റെ അന്ത്യാഭിലാഷം നിറവേറ്റാനായതിന്‍റെ ചാരിതാര്‍ഥ്യത്തിലാണ് കുടുംബാംഗങ്ങള്‍. ഇന്ത്യന്‍ നേവിയില്‍ വര്‍ഷങ്ങളുടെ സേവനത്തിനുശേഷം സാമൂഹികസന്നദ്ധ പ്രവര്‍ത്തനങ്ങളിലേക്ക് വഴിമാറി നടന്ന വാഴക്കാല സ്വദേശി വി.കെ. ജോസഫ് (79) ആണ് മരണശേഷവും വേറിട്ട വഴിയിലൂടെ മാതൃകയായത്. വാഴക്കാല സെന്‍റ് കുര്യാക്കോസ് ക്‌നാനായ കത്തോലിക്കാ പള്ളിയില്‍ ഇന്നലെ വൈകുന്നേരം മൂന്നിനു നടന്ന സംസ്‌കാര ശുശ്രൂഷകള്‍ക്കുശേഷം ബന്ധുക്കള്‍ മൃതദേഹം അമൃത മെഡിക്കല്‍ കോളജിന് കൈമാറി. ഇങ്ങനെയൊരു ആഗ്രഹം മൂന്നുമാസം മുമ്പേ പിതാവ് അറിയിച്ചിരുന്നു. അച്ഛന്‍റെ മരണശേഷം ആ ആഗ്രഹം തങ്ങള്‍ സഫലമാക്കുകയായിരുന്നുവെന്ന് മകന്‍ ക്യാപ്റ്റന്‍ ജോര്‍ജ് സോണി പറഞ്ഞു. ഇന്നലെ രാവിലെ ഒമ്പതിന് വാഴക്കാലയിലെ വീട്ടില്‍ പൊതുദര്‍ശനത്തിനുവച്ച മൃതദേഹത്തില്‍ നിരവധിപേര്‍ അന്തിമോപചാരം അര്‍പ്പിച്ചു. ഇന്ത്യന്‍ നേവിയില്‍ ഏവിയേഷന്‍ സേഫ്റ്റി എക്യുപ്‌മെന്‍റ് വിഭാഗത്തില്‍ 15 വര്‍ഷം പ്രവര്‍ത്തിച്ച അദ്ദേഹം 1965, 1971 യുദ്ധങ്ങളില്‍ ഐഎന്‍എസ് വിക്രാന്ത് യുദ്ധക്കപ്പലില്‍ സേവനമനുഷ്ഠിച്ചു. രാജ്യസേവനത്തിന് സമര്‍ സേവാ സ്റ്റാര്‍, പൂര്‍വി സ്റ്റാര്‍, പശ്ചിമി സ്റ്റാര്‍ എന്നീ അംഗീകാരങ്ങള്‍ ലഭിച്ചിട്ടുണ്ട്. കെല്‍സയില്‍ അംഗമായിരുന്ന വി.കെ. ജോസഫ് കൗണ്‍സലിംഗ് സൈക്കോളജിസ്റ്റ്, സാമൂഹിക പ്രവര്‍ത്തകന്‍, സഭയുടെ ലിറ്റര്‍ജിക്കല്‍ കമ്മീഷന്‍ അംഗം എന്നീ നിലകളിലും പ്രവര്‍ത്തിച്ചു. ദീര്‍ഘനാള്‍ സണ്‍ഡേ സ്‌കൂള്‍ അധ്യാപകനുമായിരുന്നു. അറിവ് നേടുന്നതിനും പകര്‍ന്നു കൊടുക്കുന്നതിലും ഏറെ ഉൽസുകനായിരുന്ന അദ്ദേഹം സര്‍വീസില്‍ നിന്നു വിരമിച്ച ശേഷം കുട്ടികള്‍ക്ക് മോട്ടിവേഷൻ ക്ലാസുകളും കൗണ്‍സിലിംഗും മറ്റും നല്‍കുന്നതിലും സജീവമായിരുന്നു. 70 വയസിനുശേഷം എംഫില്‍, എംഎസ്‌സി സൈക്കോളജി ബിരുദങ്ങള്‍ നേടിയ അദ്ദേഹത്തിന്‍റെ കഠിനാധ്വാനവും അറിവ് നേടാനും സേവനം ചെയ്യാനുമുള്ള താല്പര്യവും തലമുറകള്‍ക്ക് മാതൃകയാണ്. ഉഴവൂര്‍ സ്വദേശിനി മേരി ജോസഫാണ് ഭാര്യ. മറ്റു മക്കള്‍: സോയ ബാബു (ഫിസിയോതെറാപ്പിസ്റ്റ്, യുഎസ്എ), സോളി ജോസഫ് (അധ്യാപിക, യുഎഇ). മരുമക്കള്‍: ബാബു (യുഎസ്എ), അന്‍റു (യുഎഇ), ജിജി (ഇന്ത്യ പോസ്റ്റ്‌സ്).

വെല്ലുവിളികളെ അവസരങ്ങളാക്കി മുന്നേറണം: രമേശ് ചെന്നിത്തല

കൊച്ചി: വെല്ലുവിളികളില്‍ തളരാതെ അത് അവസരങ്ങളായി എടുത്ത് മുന്നേറണമെന്നും ഇത്തരക്കാരാണ് ജീവിതത്തില്‍ വിജയിച്ചിട്ടുള്ളതെന്നും രമേശ് ചെന്നിത്തല എംഎൽഎ. എറണാകുളം നിയോജകമണ്ഡലത്തില്‍ എസ്എസ്എല്‍സി, പ്ലസ് ടു പരീക്ഷകളില്‍ മുഴുവന്‍ വിഷയങ്ങള്‍ക്കും എ പ്ലസ് നേടിയ വിദ്യാര്‍ഥികളെ ആദരിക്കുന്നതിനായി ടി.ജെ. വിനോദ് എംഎല്‍എ സംഘടിപ്പിച്ച മികവ് 2025 അവാര്‍ഡ് ദാന ചടങ്ങ് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. എറണാകുളം സെന്‍റ് തെരേസാസ് കോളജ് ഓഡിറ്റോറിയത്തില്‍ നടന്ന പരിപാടിയില്‍ ടി.ജെ. വിനോദ് എംഎല്‍എ അധ്യക്ഷത വഹിച്ചു. 1512 വിദ്യാര്‍ഥികളെ ചടങ്ങില്‍ ആദരിച്ചു. അസിസ്റ്റന്‍റ് കളക്ടര്‍ പാര്‍വതി ഗോപകുമാര്‍ ഉന്നതവിജയം നേടിയ വിദ്യാര്‍ഥികളുമായി സംവദിച്ചു. ജില്ലാ കളക്ടര്‍ എന്‍.എസ്.കെ. ഉമേഷ്, സിനിമാതാരം സലിം ഹസന്‍ തുടങ്ങിയവരും പങ്കെടുത്തു. ലക്ഷ്യ ഇന്‍സ്റ്റിറ്റ്യൂട്ടിന്‍റെ സഹകരണത്തോടെയാണ് പരിപാടി സംഘടിപ്പിച്ചത്.

പത്താം ക്ലാസുകാരനെ സംഘം ചേർന്ന് മർദിച്ചതായി പരാതി

വൈപ്പിൻ: ഫുട്ബോൾ കളിയിലെ തർക്കത്തെ തുടർന്ന് പട്ടികജാതിക്കാരനായ പത്താം ക്ലാസ് വിദ്യാർഥിയെ പതിനഞ്ചോളം വരുന്ന യുവസംഘം വീട്ടിൽ നിന്ന് വിളിച്ചിറക്കിക്കൊണ്ടുപോയി മർദിച്ച് അവശനാക്കിയെന്ന് പരാതി. ഞാറക്കൽ മാരാത്തറ സാജുവിന്‍റെ മകൻ ആദിത്യനെയാണ് (15) കണ്ടാലറിയാവുന്ന മൂന്നു പേരുടെ നേതൃത്വത്തിൽ വിളിച്ചു കൊണ്ടുപോയി പെരുമ്പിള്ളി പടിഞ്ഞാറു ഭാഗത്തുള്ള ടർഫിൽ ഇട്ട് മർദിച്ചത്. ചികിത്സ തേടിയശേഷം ആദിത്യൻ ആശുപത്രി വിട്ടു. ആദിത്യന്‍റെ പിതാവ് ഞാറക്കൽ പോലീസിൽ പരാതി നൽകിയിട്ടുണ്ട്. എന്നാൽ പ്രതികൾ പ്രായപൂർത്തിയാകാത്തവരായതിനാൽ ജുവനൈൽ ബോർഡിനു റിപ്പോർട്ട് നൽകിയതായി പോലീസ് അറിയിച്ചു.

കാട്ടാനക്കൂട്ടം എണ്ണപ്പന മറിച്ചിട്ടു; പ്ലാന്‍റേഷൻ റോഡിൽ ഗതാഗതം മുടങ്ങി

കാലടി: കാലടി പ്ലാന്‍റേഷൻ റോഡിൽ കാട്ടാനകൂട്ടം എണ്ണപ്പന റോഡിലേക്ക് മറിച്ചിട്ട് റോഡിൽ നിലയുറപ്പിച്ചതിനാൽ മണിക്കൂറുകളോളം ഗതാഗതം തടസപ്പെട്ടു. കാലടി പ്ലാന്‍റേഷൻ 17-ാം ബ്ലോക്കിലാണ് 12-ഓളം വരുന്ന കാട്ടാനകൾ കഴിഞ്ഞദിവസം രാത്രി മുതൽ റോഡിലേക്ക് എണ്ണപ്പന മറിച്ചിട്ട് റോഡിലും സമീപത്തുമായി നിലയുറപ്പിച്ചത്. ഇന്നലെ രാവിലെ ഇത് വഴി എത്തിയ നാട്ടുകാരുടെയും വിനോദ സഞ്ചാരികളുടെയും നിരവധി വാഹനങ്ങൾ മണിക്കൂറുകളോളം റോഡിൽ കുടുങ്ങി. തുടർന്ന് നാട്ടുകാരും സഞ്ചാരികളും ചേർന്ന് ആനകളെ തുരത്തിയതിനു ശേഷം പനമുറിച്ച് മാറ്റി ഗതാഗതം പുനഃസ്ഥാപിച്ചു. കാട്ടാനകൾ പതിവായി ഇറങ്ങുന്ന പ്ലാന്‍റേഷൻ എണ്ണപ്പന, റബ്ബർ തോട്ടങ്ങങ്ങളിൽ തൊഴിലാളികൾ ഭീതിയോടെയാണ് കഴിയുന്നത്. പലപ്പോഴും രാത്രി ഇതു വഴി പോകുന്ന ആളുകൾ കാട്ടനയുടെ മുന്പിൽ പെടുന്നതും പതിവാണ്. ഭാഗ്യം കൊണ്ട് മാത്രമാണ് നിന്നും രക്ഷപ്പെടുന്നത്.

പരിശോധനകള്‍ കര്‍ശനമാക്കി ഭക്ഷ്യസുരക്ഷാ വിഭാഗം : പിഴ ഈടാക്കിയത് 10.6 ലക്ഷം

കൊച്ചി: കൊച്ചിയില്‍ മൂന്നുപേര്‍ക്ക് ഭക്ഷ്യവിഷബാധയേറ്റ സംഭവത്തിന് പിന്നാലെ നഗരത്തിലും ജില്ലയുടെ വിവിധ ഭാഗങ്ങളിലും പരിശോധനകള്‍ കര്‍ശനമാക്കി ഭക്ഷ്യസുരക്ഷാ വിഭാഗം. ഉദ്യോഗസ്ഥരുടെ വിവിധ സംഘങ്ങള്‍ മേഖല തിരിച്ചാണ് പരിശോധനകള്‍ നടത്തി വരുന്നത്. ഇതിനുപുറമേ തദ്ദേശ സ്ഥാപനങ്ങളുടെ ആരോഗ്യവിഭാഗവും പരിശോധനകള്‍ തുടരുകയാണ്. ശുചിത്വമില്ലായ്മ മുതല്‍ ഭക്ഷണ സാധനങ്ങള്‍ കൈകാര്യം ചെയ്യുന്ന ജീവനക്കാര്‍ക്ക് ഹെല്‍ത്ത് കാര്‍ഡിന്‍റെ അഭാവം വരെയുള്ള പിഴവുകളും പരിശോധനകളില്‍ കണ്ടെത്തിയിട്ടുണ്ട്. ഇവയില്‍ നടപടികള്‍ സ്വീകരിക്കുകയാണ്. ഭക്ഷ്യവിഷബാധ നിത്യസംഭവമാകുന്ന സാഹചര്യത്തില്‍ അനധികൃതവും വീഴ്ചവരുത്തുന്നതുമായ സ്ഥാപനങ്ങള്‍ക്കെതിരെ ശക്തമായ നടപടി സ്വീകരിക്കണമെന്ന നിലപാടാണ് മേഖലയിലെ അസോസിയേഷനുകളടക്കം ആവശ്യപ്പെടുന്നത്. നാലു മാസത്തിനിടെ 10.69 ലക്ഷം പിഴ മാര്‍ച്ച് ഒന്നുമുതല്‍ വിവിധയിടങ്ങളില്‍ നടത്തിയ പരിശോധനകളില്‍ ഭക്ഷ്യസുരക്ഷാവിഭാഗം ഈടാക്കിയത് 10.69 ലക്ഷം രൂപ. ഹോട്ടലുകളിലെ അടുക്കളകളിലെ ശുചിത്വക്കുറവ്, ജീവനക്കാരുടെ ആരോഗ്യ പരിശോധനയിലുണ്ടാകുന്ന വീഴ്ച, ഗുണനിലവാരമില്ലാത്ത കുടിവെള്ളം, അനുവദനീയമല്ലാത്ത കൃത്രിമ നിറങ്ങള്‍ ഭക്ഷ്യവസ്തുക്കളില്‍ ചേര്‍ക്കല്‍ തുടങ്ങിയ കര്യങ്ങളൊക്കെ പിഴ ഈടാക്കുന്നതിന് കാരണമായിട്ടുണ്ട്. ഇക്കാലയളവില്‍ 286 സ്ഥാപനങ്ങള്‍ക്കാണ് ഇതിനായി നോട്ടീസ് നല്‍കിയത്. 401 സ്ഥാപനങ്ങള്‍ക്ക് ക്രമക്കേടുകള്‍ തിരുത്തുന്നതിനുള്ള നോട്ടീസും നല്‍കി. 2327 പരിശോധനകള്‍ ഇക്കാലയളവില്‍ 2327 പരിശോധനകളാണ് ജില്ലയില്‍ അധികൃതര്‍ നടത്തിയത്. 565 സാമ്പിളുകള്‍ പരിശോധനയ്ക്കെടുത്തു. നിരീക്ഷണത്തിന്‍റെ ഭാഗമായി 1167 സാമ്പിളുകളുമെടുത്തു. സാമ്പിളുകള്‍ ശേഖരിച്ച് കാക്കനാട് റീജണല്‍ ലബോറട്ടറിയിലെത്തിച്ച് പരിശോധന നടത്തിയാണ് ഗുണനിലവാരം വിലയിരുത്തുന്നത്. പുതുതായി 749 സ്ഥാപനങ്ങള്‍ക്ക് ലൈസന്‍സും 4045 സ്ഥാപനങ്ങള്‍ക്ക് രജിസ്‌ട്രേഷനും നല്‍കിയിട്ടുണ്ട്.

വീടിന്‍റെ ശിലാസ്ഥാപനം

മൂവാറ്റുപുഴ: കാരക്കുന്നം ഫാത്തിമ മാതാ എൽപി സ്കൂളിന്‍റെ പ്ലാറ്റിനം ജൂബിലിയുടെ ഭാഗമായി നിർമിച്ചു നൽകുന്ന സ്നേഹ വീടിന്‍റെ ശിലാസ്ഥാപനം സ്കൂൾ മാനേജർ ഫാ. ജോർജ് വള്ളോംകുന്നേൽ നിർവഹിച്ചു. വാർഡ് അംഗം പ്രവീണ ഹരീഷ്, പ്രധാനാധ്യാപകൻ വിൻസെന്‍റ് ജോസഫ്, പ്ലാറ്റിനം ജൂബിലി കമ്മിറ്റി കൺവീനർ ജിന്‍റോ സെബാസ്റ്റ്യൻ, പി.വി. അരുൺ, ജിൻസി സോണി, ജിൻസ് ആന്‍റണി, ജോസ് കാവുംപുറം, പി. വിനീത, റമ്മി മാണിച്ചൻ, ജയ്മി മാത്യു, നിൻസി പി. ജോളി, എൽന എൽദോസ്, വി.കെ. ലൈല തുടങ്ങിയവർ പ്രസംഗിച്ചു.

ആശാ പ്രവർത്തകർക്ക് കൈത്താങ്ങായി അമേരിക്കൻ പ്രവാസി

കൂത്താട്ടുകുളം: മാസങ്ങളായി സമര പോരാട്ടം നടത്തുന്ന ആശമാർക്ക് കൈത്താങ്ങായി അമേരിക്കൻ പ്രവാസി. കണ്ണൂർ അഴീക്കോട് നിലയം എം. പത്മനാദാണ് ആശമാർക്ക് സഹായ ഹസ്തവുമായി എത്തിയത്. സുഹൃത്തായ പിറവം ബ്ലോക്ക് കോൺഗ്രസ് കമ്മിറ്റി എക്സിക്യൂട്ടീവ് അംഗവും കൂത്താട്ടുകുളം കരിമ്പന കോഴിക്കാട്ടേൽ ബെന്നി കെ. മാത്യുവിൽ നിന്നാണ് പത്മനാദ് ആശമാരുടെ അവസ്ഥ അറിഞ്ഞത്. തുടർന്ന് ഒരു ലക്ഷം രൂപയുടെ സഹായധനം സുഹൃത്ത് ബെന്നി മുഖേന കെപിസിസി പ്രസിഡന്‍റ് സണ്ണി ജോസഫിന് കൈമാറി. ഇന്ത്യൻ നാഷണൽ കോൺഗ്രസ് പിറവം മുൻ ബ്ലോക്ക് പ്രസിഡന്‍റ് വിൽസൺ കെ. ജോൺ, കോൺഗ്രസ് ബ്ലോക്ക് പ്രസിഡന്‍റ് പി.സി. ജോസ്, കൂത്താട്ടുകുളം കോൺഗ്രസ് മണ്ഡലം കമ്മിറ്റി പ്രസിഡന്‍റ് റെജി ജോൺ എന്നിവരുടെ സാന്നിധ്യത്തിലാണ് ഒരു ലക്ഷം രൂപയുടെ ചെക്ക് ബെന്നി കെ. മാത്യു പ്രസിഡന്‍റിനു കൈമാറിയത്.

സ്ഥാനാരോഹണം

വാഴക്കുളം: വാഴക്കുളം ചാവറ ഇന്‍റർനാഷണൽ അക്കാഡമിയിൽ സ്കൂൾ പാർലമെന്‍റിന്‍റെ സ്ഥാനാരോഹണം നടത്തി. സ്കൂൾ മാനേജർ ഫാ. തോമസ് മഞ്ഞക്കുന്നേൽ അധ്യക്ഷത വഹിച്ചു. മുൻ സുപ്രീംകോടതി ജഡ്ജി ജസ്റ്റീസ് കുര്യൻ ജോസഫ് മുഖ്യാതിഥിയായി. വിവിധ സ്ഥാനങ്ങളിലേക്ക് തെരഞ്ഞെടുക്കപ്പെട്ട സ്കൂൾ ലീഡേഴ്സിന് ബാഡ്ജസ് നൽകി ആദരിച്ചു. സ്കൂൾ പ്രിൻസിപ്പൽ ഫാ. ഡിനോ കള്ളിക്കാട് ലീഡേഴ്സിന് സത്യപ്രതിജ്ഞ ചൊല്ലിക്കൊടുത്തു. ചടങ്ങിൽ വൈസ് പ്രിൻസിപ്പൽ ഫാ. ജിത്തു ജോർജ് തൊട്ടിയിൽ പ്രസംഗിച്ചു. അധ്യാപക രക്ഷാകർതൃ സംഘടനയുടെ വാർഷിക പൊതുയോഗവും പ്രതിനിധികളുടെ തെരഞ്ഞെടുപ്പും ഇതോടനുബന്ധിച്ച് നടത്തി.

വെറ്റിലപ്പാറയില്‍ വീടിന്‍റെ പിന്‍ഭാഗം തകര്‍ന്നു

കോതമംഗലം: പിണ്ടിമന വെറ്റിലപ്പാറയില്‍ രാജീവ്ഗാന്ധി ദശലക്ഷം നഗറില്‍ വീടിന്‍റെ പിന്‍ഭാഗം തകര്‍ന്ന് നിലംപതിച്ചു. ആളപായമില്ല. അപകടഭീഷണിയിലായ അഞ്ച് വീടുകളില്‍ മൂന്ന് വീടുകള്‍ ഇന്ന് പൊളിച്ച് നീക്കും. നഗറിന്‍റെ തുടക്ക ഭാഗത്തുള്ള വെട്ടുകാട്ടില്‍ ശോശാമ്മയുടെ വീടിന്‍റെ പിന്‍ഭാഗത്തെ ശൗചാലയ മുറിയുടെ പുറംഭിത്തിയാണ് നിലംപതിച്ചത്. ഇന്നെലെ രാവിലെ 10നാണ് സംഭവം. വീട് തകര്‍ച്ചയിലായതോടെ വീട്ടുകാര്‍ മറ്റൊരു സ്ഥലത്താണ് താമസിക്കുന്നത്. വീടിന്‍റെ ഭിത്തി തകര്‍ന്ന് വീഴുന്ന ശബ്ദംകേട്ട് സമീപ വീട്ടുകാര്‍ ഓടിച്ചെന്ന് നോക്കിയപ്പോഴാണ് സംഭവം അറിയുന്നത്. 30 വര്‍ഷം മുമ്പ് ഭവന നിര്‍മാണ ബോര്‍ഡ് നിര്‍മിച്ച് നല്‍കിയ വീടുകളാണ് ഇവ. സിമന്‍റ് തേയ്ക്കാതെ കെട്ടിപ്പൊക്കിയ ഭിത്തികളും കനം കുറഞ്ഞ മേല്‍്ക്കൂര സ്ലാബും കാലാനുസൃതമായി അറ്റകുറ്റപ്പണി നടത്താന്‍ അധികൃതര്‍ ആവശ്യമായ ഫണ്ട് അനുവദിക്കാതെ വന്നതാണ് വീടുകള്‍ അപകടാവസ്ഥയിലായതെന്ന് ആരോപണമുണ്ട്. ശോശാമ്മയുടെ വീടിനൊപ്പം അപകടാവസ്ഥയിലായ മനയത്തുകുടി രമണി വിജയന്‍, വട്ടപ്പറമ്പില്‍ ബേബി എന്നിവരുടെ വീടുകളാണ് ഇന്ന് പൊളിച്ച് നീക്കുന്നത്. ഇതുസംബന്ധിച്ച് വീട്ടുകാര്‍ പഞ്ചായത്ത് അധികൃതരെ സമ്മതം അറിയിച്ചിട്ടുണ്ട്. പുത്തന്‍പുരയ്ക്കല്‍ രാധാ രാജു, പുന്നയ്ക്കല്‍ ശാന്ത, പുത്തയത്ത് വേലായുധന്‍ തുടങ്ങി 10 പേരുടെ വീടുകളുടെ വെട്ടുകല്ലില്‍ പണിത് സിമന്‍റ് തേയ്ക്കാത്ത ഭിത്തി നനഞ്ഞുകുതിര്‍ന്ന് നിലംപൊത്താവുന്ന അവസ്ഥയിലാണ്. ഇതില്‍ രാധാ രാജുവിന്‍റെ വീടിന്‍റെ സ്ലാബും ഭിത്തിയും പൊളിഞ്ഞ് അപകടത്തിലാണ്. ഈ അവസ്ഥയിലാണ് കഴിഞ്ഞ ദിവസം പുത്തന്‍പുരയ്ക്കല്‍ കൃഷ്ണന്‍കുട്ടി-അമ്മിണി ദമ്പതികള്‍ വീടിന്‍റെ മേല്‍ക്കൂര തകര്‍ന്ന് അടിയില്‍പ്പെട്ടത്. ഈ സംഭവത്തോടെ നഗറിലെ പല കുടുംബങ്ങളും ഭീതിയോടെയാണ് വീടുകളില്‍ കഴിയുന്നത്. നാല് വീട്ടുകാരെ നഗറിലെ എസ്‌സി കമ്യൂണിറ്റി ഹാളിലേക്ക് മാറ്റി പാര്‍പ്പിച്ചിരിക്കുകയാണ്.

വ്യാപാരി വ്യവസായി ഏകോപന സമിതി പൊതുയോഗം

മൂവാറ്റുപുഴ: കേരള വ്യാപാരി വ്യവസായി ഏകോപന സമിതി പേഴയ്ക്കാപ്പിള്ളി യൂണിറ്റിന്‍റെ 15-ാമത് അര്‍ധവാര്‍ഷിക പൊതുയോഗം പേഴയ്ക്കാപ്പിള്ളി വ്യാപാര ഭവനില്‍ നടന്നു. ജില്ലാ ജനറല്‍ സെക്രട്ടറി എ.ജെ. റിയാസ് ഉദ്ഘാടനം ചെയ്തു. ആദ്യകാല അംഗവും യൂണിറ്റ് ഭാരവാഹിയും ജില്ലാ കൗണ്‍സില്‍ അംഗവുമായിരുന്ന ടി.പി. മൈതീന്‍ ഹാജിയുടെ ഫോട്ടോ അനാച്ഛാദനം ചെയ്തു. പായിപ്ര പഞ്ചായത്തില്‍ മുഴുവന്‍ വിഷയങ്ങള്‍ക്കും എ പ്ലസ് ലഭിച്ച നൂറോളം വിദ്യാര്‍ഥികള്‍ക്ക് ബ്ലോക്ക് പഞ്ചായത്ത് പ്രസിഡന്‍റ് കെ.ജി. രാധാകൃഷ്ണന്‍ ക്യാഷ് അവാര്‍ഡും പ്രശസ്തിപത്രവും വിതരണം ചെയ്തു. 2025-26 വര്‍ഷത്തേക്കുള്ള 2.50 കോടി രൂപ വരവും 2.25 കോടി രൂപ ചെലവും വരുന്ന ബജറ്റ് യൂണിറ്റ് ട്രഷറര്‍ എം.എ. നാസര്‍ അവതരിപ്പിച്ചു. പായിപ്ര കവലയിലെ ട്രാഫിക് പരിഷ്‌കരണവും അനധികൃത വഴിയോരക്കച്ചവടവും നിയന്ത്രിക്കാത്ത പോലീസിന്‍റെയും മറ്റു ഡിപ്പാര്‍ട്ട്‌മെന്‍റുകളുടെയും നടപടികളില്‍ യോഗം പ്രതിഷേധിച്ചു.

മണികണ്ഠന്‍ചാലില്‍ കാണാതായ യുവാവിനാ‍യി അഞ്ചാം ദിവസത്തെ തെരച്ചിലും വിഫലം

കോതമംഗലം: മണികണ്ഠന്‍ചാല്‍ ചപ്പാത്തിലൂടെ നടന്നുനീങ്ങുന്നതിനിടെ ഒഴുക്കില്‍പ്പെട്ട് കാണാതായ രാധാകൃഷ്ണനായി അഞ്ചാം ദിവസം നടത്തിയ തെരച്ചിലും വിഫലമായി. മണികണ്ഠൻചാൽ വർക്കൂട്ടുമാവിള രാധാകൃഷ്ണനാണ് (ബിജു-37) ബുധനാഴ്ച രാവിലെ ആറരയോടെ ഒഴുക്കിൽപ്പെട്ടത്. സ്വകാര്യ ബസ് തൊഴിലാളിയായ ബിജു ജോലിക്കായി പൂയംകുട്ടിക്കു പോയതായിരുന്നു. കഴിഞ്ഞ നാല് ദിവസങ്ങളിൽ നേവിയുടെയും അഗ്നിരക്ഷാസേന സ്കൂബ, എൻഡിആ എഫ് ടീമിന്‍റെയും നേതൃത്വത്തിൽ മേഖലയിൽ വ്യാപകമായി തെരച്ചിൽ നടത്തിയിരുന്നു. അഞ്ചാം ദിവസമായ ഇന്നെലെ രാവിലെ 7.30 മുതൽ കുട്ടമ്പുഴ, ആനക്കയം, ബ്ലാവന, മണികണ്ഠൻചാൽ ചപ്പാത്ത് ഭാഗങ്ങളിലായി അഗ്നിരക്ഷാസേനയുടെ നേതൃത്വത്തിൽ തെരച്ചിൽ നടത്തി. വന മേഖലയിൽ കുട്ടമ്പുഴ റേഞ്ച് ഓഫീസറുടെ നേതൃത്വത്തിലുള്ള സംഘം തെരച്ചിലിന് നേതൃത്വം നൽകി. പാണിയേലി പോര് ഭാഗത്ത് കോടനാട് ഫോറസ്റ്റ് റേഞ്ച് ഓഫീസറുടെ നേതൃത്വത്തിൽ വനമേഖലയിലും ആലുവ, കൊടുങ്ങല്ലൂർ മേഖലകളിലും അഗ്നിരക്ഷാസേനയുടെ നേതൃത്വത്തിലും തെരച്ചിൽ നടത്തി. കോസ്റ്റൽ പോലീസ് സ്റ്റേഷൻ പരിധികളിൽ ബന്ധപ്പെട്ട എസ്എച്ച്ഒമാരുടെ നേതൃത്വത്തിലും ബിജുവിനായി തെരച്ചിൽ നടത്തി. ആന്‍റണി ജോൺ എംഎൽഎ, കുട്ടമ്പുഴ പഞ്ചായത്ത് പ്രസിഡന്‍റ് കാന്തി വെള്ളക്കയ്യൻ, കോതമംഗലം തഹസിൽദാർ എം. അനിൽകുമാർ എന്നിവർ പ്രവർത്തനങ്ങൾ ഏകോപിപ്പിച്ചു.

ബിഎഐ ഭാരവാഹികള്‍ സ്ഥാനമേറ്റു

മൂവാറ്റുപുഴ: കോണ്‍ട്രാക്ടര്‍മാര്‍, ബില്‍ഡര്‍മാര്‍ എന്നിവരുടെ സംഘടനയായ ബില്‍ഡേഴ്‌സ് അസോസിയേഷന്‍ ഓഫ് ഇന്ത്യ (ബിഎഐ) മൂവാറ്റുപുഴ സെന്‍ററിന്‍റെ പുതിയ ഭാരവാഹികളുടെ സ്ഥാനാരോഹണം നടത്തി. മൂവാറ്റുപുഴ വൈഎംസിഎ സെന്‍ററില്‍ നടന്ന പരിപാടി മന്ത്രി വി.എന്‍. വാസവന്‍ ഉദ്ഘാടനം ചെയ്തു. ബിഎഐ മൂവാറ്റുപുഴ സെന്‍റര്‍ ചെയര്‍മാന്‍ ജോര്‍ഡി കെ. ഏബ്രഹാം അധ്യക്ഷത വഹിച്ചു. ഫ്രാന്‍സിസ് ജോര്‍ജ് എംപി മുഖ്യപ്രഭാഷണം നടത്തി. സ്ഥാനാരോഹണ ച്ചടങ്ങുകള്‍ക്ക് ബിഎഐ സംസ്ഥാന ചെയര്‍മാന്‍ കെ.എ. ജോണ്‍സണ്‍ നേതൃത്വം നല്‍കി. ജോസഫ് ജോണ്‍ (ചെയര്‍മാന്‍), രാജു ജോസഫ് (വൈസ് ചെയര്‍മാന്‍), അബി കെ. മാത്യു (സെക്രട്ടറി), ജഗന്‍ ജെയിംസ് (ജോയിന്‍റ് സെക്രട്ടറി), ഷാജി കെ. മാത്യു (ട്രഷറര്‍) എന്നിവര്‍ പുതിയ ഭാരവാഹികളായി ചുമതലയേറ്റു. ബിഎഐ മൂവാറ്റുപുഴ സെന്‍റര്‍ യുത്ത് ഫോറത്തിന്‍റെ ഉദ്ഘാടനം മുന്‍ സംസ്ഥാന ചെയര്‍മാന്‍ നജീബ് മണ്ണേല്‍ നിര്‍വഹിച്ചു. അംഗത്വ കാമ്പയിന്‍ മുന്‍ സംസ്ഥാന ചെയര്‍മാന്‍ അലക്‌സ് പെരുമാലില്‍ ഉദ്ഘാടനം ചെയ്തു.

ഹൃദ്രോഗ പരിശോധന ക്യാമ്പ്

മൂവാറ്റുപുഴ: മൂവാറ്റുപുഴ പ്രസ് ക്ലബിന്‍റെയും നിര്‍മല മെഡിക്കല്‍ സെന്‍ററിന്‍റെയും നേതൃത്വത്തില്‍ സമ്പൂര്‍ണ ഹൃദ്രോഗ പരിശോധന ക്യാമ്പ് സംഘടിപ്പിച്ചു. വെള്ളൂര്‍ക്കുന്നത്ത് പ്രസ് ക്ലബ് ഹാളില്‍ നടത്തിയ ക്യാമ്പ് മാത്യു കുഴല്‍നാടന്‍ എംഎല്‍എ ഉദ്ഘാടനം ചെയ്തു. പ്രസ് ക്ലബ് പ്രസിഡന്‍റ് പി.ജി. ബിജു അധ്യക്ഷത വഹിച്ചു. ഈ വര്‍ഷത്തെ പ്രവര്‍ത്തനങ്ങളുടെ ഉദ്ഘാടനം നഗരസഭ ചെയര്‍മാന്‍ പി.പി. എല്‍ദോസ് നിര്‍വഹിച്ചു. സിസ്റ്റര്‍ ജെസി ജോസ്, അനൂപ് സത്യന്‍, മുഹമ്മദ് ഷഫീഖ്, പാട്രിക് എം. കല്ലട എന്നിവര്‍ പ്രസംഗിച്ചു. ക്യാന്പില്‍ പങ്കെടുത്തവര്‍ക്ക് രക്തസമ്മര്‍ദം, തൈറോയ്ഡ്, ലിപ്പിഡ് പ്രൊഫൈല്‍, ഇസിജി, കാര്‍ഡിയോ, ശ്വാസകോശ നിര്‍ണയ പരിശോധനകള്‍ സൗജന്യമായിയിരുന്നു. കൂടാതെ ആവശ്യമുള്ളവര്‍ക്ക് സൗജന്യമായി മരുന്നുകളും വിതരണം ചെയ്തു.

കുടിവെള്ള പൈപ്പ് പൊട്ടി ശുദ്ധജലം പാഴാകുന്നു

മൂവാറ്റുപുഴ: നഗരത്തിലെ കാവുംപടി റോഡില്‍ ജല അതോറിറ്റിയുടെ കുടിവെള്ള പൈപ്പ് പൊട്ടി ശുദ്ധജലം പാഴാകുന്നു. മൂവാറ്റുപുഴ കാവുംപടി റോഡില്‍ പുഴക്കരക്കാവിന് സമീപത്താണ് പൈപ്പ് പൊട്ടി ലക്ഷക്കണക്കിന് ലിറ്റര്‍ കുടിവെള്ളം പാഴകുന്നത്. വാട്ടര്‍ അഥോറിറ്റിയുടെ പ്രധാന ടാങ്കിന് സമീപത്തെ റോഡിലാണ് പൈപ്പ് തകര്‍ന്നിരിക്കുന്നത്. ഇതോടെ കാവുംപടി റോഡില്‍ വലിയ കുഴി രൂപപ്പെട്ടു. എന്നാൽ ഉദ്യോഗസ്ഥര്‍ ഇതുവരെയും സ്ഥലത്തെത്തി നടപടി സ്വീകരിച്ചിട്ടില്ലെന്ന് പ്രദേശവാസികള്‍ പറഞ്ഞു. നഗരവികസനത്തിന്‍റെ ഭാഗമായി വണ്‍വേ സംവിധനം ഒരുക്കിയിരിക്കുന്ന കാവുംപടി റോഡിലൂടെ ഇരുചക്ര വാഹനങ്ങള്‍ ഉള്‍പ്പെടെ നിരവധി വാഹനങ്ങളാണ് കടന്നുപോകുന്നത്. റോഡില്‍ കുഴി രൂപപ്പെട്ടത് ഇരുചക്രവാഹന യാത്രക്കാര്‍ക്ക് ഉള്‍പ്പടെ അപകസാധ്യത വാര്‍ധിപ്പിക്കുന്നുണ്ട്.

കാഞ്ഞൂരിൽ "ഓണം നമ്മുടെ പൂക്കൾക്കൊപ്പം'

കാലടി: കാഞ്ഞൂർ ചർച്ച് നഗർ റെസിഡന്‍റ്സ് അസോസിയേഷന്‍റെ ആഭിമുഖ്യത്തിൽ "ഈ തവണ ഓണം നമ്മുടെ പൂക്കൾക്കൊപ്പം' എന്ന പ്രവർത്തന പരിപാടിയുടെ ഭാഗമായി ചെണ്ടുമല്ലിക്കൃഷി ആരംഭിച്ചു. അസോസിയേഷൻ പ്രസിഡന്‍റ് അഡ്വ. വർഗീസ് കോയിക്കര ഉദ്ഘാടനം ചെയ്തു. അസോസിയേഷന്‍റെ കീഴിൽ വരുന്ന മുഴുവൻ കുടുംബങ്ങളിലും ഈ തവണ ഓണത്തിന് പൂക്കളം ഇടുന്നത് ഈ പൂക്കൾ ഉപയോഗിച്ചായിരിക്കും. 13 സെന്‍റ് സ്ഥലത്താണ് പൂക്ക‌ൃഷി ചെയ്യുന്നത്. ജോസഫ് പാറക്ക, ജോസ് കാഞ്ഞിരത്തിങ്കൽ, രാധാമണി സുരേഷ്, ജോസ് മൂഞ്ഞേലി, സാജു മുഞ്ഞേലി, സാജു വടക്കൻ, സജി കൂട്ടുങ്ങൽ, സജി ചിറക്കൽ, ജോണി പടയാട്ടി, ജിബി പയ്യപ്പിള്ളി, സ്റ്റീഫൻ കാഞ്ഞ രത്തിങ്കൽ, പി. കെ. ഫ്രാൻസീസ്, ജോസ് പാലാട്ടി, ഡേവീസ് മാസ്റ്റർ, ടി.കെ. ദേവസിക്കുട്ടി, ഡേവീസ് പാലാട്ടി, ഇ.ഡി. പോളച്ചൻ എന്നിവർ പങ്കെടുത്തു.

പൂക്കൃഷിയുമായി മഹിളാ അസോ.

നെടുമ്പാശേരി: കർഷകഭേരി ആറാംഘട്ടത്തിന്‍റെ ഭാഗമായി ഓണത്തിന് പൂക്കളം ഒരുക്കാൻ പുഷ്പക്കൃഷിയുമായി ജനാധിപത്യ മഹിളാ അസോസിയേഷൻ അങ്കമാലി ഏരിയ കമ്മിറ്റി. പാറക്കടവ് പഞ്ചായത്തിലെ കുറുമശേരിയിൽ ഏരിയ തല ഉദ്ഘാടനം ജനാധിപത്യ മഹിളാ അസോസിയേഷൻ സംസ്ഥാന സെക്രട്ടറി സി.എസ്. സുജാത നിർവഹിച്ചു. ജില്ലാ കമ്മിറ്റി അംഗം രംഗമണി വേലായുധൻ അധ്യക്ഷയായി. ജില്ലാ സെക്രട്ടറി അഡ്വ. പുഷ്പാ ദാസ്, സിപിഎം ജില്ലാ കമ്മിറ്റി അംഗം അഡ്വ. കെ.കെ. ഷിബു, സിപിഎം ഏരിയ സെക്രട്ടറി കെ.പി. റെജീഷ്, കെ.പി. ബിനോയ്‌, സി.എൻ. മോഹനൻ, ജിഷ ശ്യാം, റോജിസ്മുണ്ടപ്ലാക്കൽ, ജിബിൻ വർഗീസ്, റീന രാജൻ, താരാ സജീവ് എന്നിവർ സംസാരിച്ചു. കർഷക ഭേരി അഞ്ചാം ഘട്ടത്തിൽ മികച്ച അടുക്കളത്തോട്ടം സംഘടിപ്പിച്ച കറുകുറ്റി, മലയാറ്റൂർ, കാഞ്ഞൂർ കമ്മിറ്റികൾക്കുള്ള ഉപഹാരം ജില്ലാ സെക്രട്ടറി പുഷ്പദാസ് നൽകി.

കെഎൽസിഎ ജനറൽ കൗൺസിലും ആദരിക്കലും നടത്തി

തോപ്പുംപടി: കേരള ലാറ്റിൻ കാത്തലിക് അസോസിയേഷൻ കൊച്ചി രൂപത ജനറൽ കൗൺസിലും വിവിധ മേഖലകളിൽ പ്രാഗത്ഭ്യം തെളിയിച്ചവരെ ആദരിക്കലും നടത്തി. തോപ്പുംപടി കാത്തലിക്ക് സെന്‍ററിൽ നടന്ന ചടങ്ങ് കുമ്പളങ്ങി കോ ഓപ്പറേറ്റീവ് ബാങ്ക് പ്രസിഡന്‍റും കെഎൽസിഎ മുൻ സംസ്ഥാന ജന. സെക്രട്ടറിയുമായ നെൽസൻ കോച്ചേരി ഉദ്ഘാടനം ചെയ്തു. രൂപത പ്രസിഡന്‍റ് പൈലി ആലുങ്കൽ അധ്യക്ഷത വഹിച്ചു. യോഗത്തിൽ സിന്ധു ജസ്റ്റസ്, ജോയി സി. കമ്പക്കാരൻ , സേവ്യർ രാജു, എൻ.എൽ. ജെയിംസ്, പി.പി. ജേക്കബ്ബ്, ജേക്കബ് പോൾ, റിഡ്ജൻ റിബെല്ലോ, ജോസ്മോൻ ഇടപ്പറമ്പിൽ, സുജ അനിൽ എന്നിവരെ ആദരിച്ചു. ഫാ. ആന്‍റണി കുഴിവേലിൽ, ബാബു കാളിപ്പറമ്പിൽ, ജോബ് പുളിക്കൽ, സാബു കാനക്കാപ്പള്ളി, അലക്സാണ്ടർ ഷാജു ആനന്ദശേരി, ഹെൻസൺ പോത്തൻപള്ളി, കെ.ജെ. സെബാസ്റ്റ്യൻ, ജെസി കണ്ടനാം പറമ്പിൽ, വിദ്യ ജോജി എന്നിവർ സംസാരിച്ചു.

ഓണം മുന്നിൽക്കണ്ട് ചെണ്ടുമല്ലിക്കൃഷിയുമായി മരട് നഗരസഭ

കൊച്ചി: ഓണത്തിന് പൂക്കളമൊരുക്കാന്‍ ചെണ്ടുമല്ലിയുമായി മരട് നഗരസഭ. ഇതിന്‍റെ ഭാഗമായി നഗരസഭയിലെ ഗ്രൂപ്പു കര്‍ഷകര്‍ക്ക് ചെണ്ടുമല്ലി തൈകള്‍ വിതരണം ചെയ്തു. ഓണക്കാലത്ത് പൂക്കളമൊരുക്കാന്‍ പാകമാകുന്ന തരത്തി ലുള്ള തൈകള്‍ സൗജന്യമായാണ് കര്‍ഷകര്‍ക്ക് നല്‍കിയത്. ഒാണക്കാലത്ത് പൂക്കളമൊരുക്കാനും പൂക്കൾ വിൽക്കാനും കൃഷിയിലൂടെ സാധിക്കും. നഗരസഭാ ചെയര്‍മാന്‍ ആന്‍റണി ആശാംപറമ്പില്‍ ഉദ്ഘാടനം നിര്‍വഹിച്ചു. വൈസ് ചെയര്‍പേഴ്‌സണ്‍ അഡ്വ. രശ്മി സനില്‍, സ്ഥിരംസമിതി അധ്യക്ഷന്‍മാരായ റിയാസ് കെ. മുഹമ്മദ്, റിനി തോമസ്, ശോഭ ചന്ദ്രന്‍, ബേബി പോള്‍ പി.ഡി.രാജേഷ്, ബെൻഷാദ് നടുവിലവീട്, മിനി ഷാജി, എ.കെ. അഫ്സൽ, ഷീജ സാൻകുമാർ, തുടങ്ങിയവർ പ്രസംഗിച്ചു.

പട്ടിമറ്റത്ത് കിണറ്റിൽ വീണ പോത്തിനെ രക്ഷിച്ചു

കിഴക്കമ്പലം: കിണറ്റിൽ വീണ പോത്തിനെ അഗ്നിരക്ഷാസേന പ്രവർത്തകരെത്തി രക്ഷിച്ചു. പട്ടിമറ്റം അറക്കപ്പടി ഓണംവേലിയിൽ കൈലാപുറത്ത് തങ്കച്ചന്‍റെ പോത്താണ് 40 അടി താഴ്ചയും രണ്ടാൾ വെള്ളവുമുള്ള കിണറ്റിൽ ഇന്നലെ ഉച്ചയോടെ വീണത്. 300 കിലോയോളം ഭാരമുള്ള പോത്തായതിനാൽ വീട്ടുകാരും നാട്ടുകാരും ചേർന്ന് കിണഞ്ഞു പരിശ്രമിച്ചെങ്കിലും അതിനെ കരയ്ക്കുകയറ്റാനായില്ല. തുടർന്ന് പട്ടിമറ്റം അഗ്നി രക്ഷാനിലയം സ്റ്റേഷൻ ഓഫീസിൽ വിവരം അറിയിക്കുകയായിരുന്നു. എൻ. എച്ച്. അസൈനാരുടെ നേതൃതത്തിൽ സേനാംഗങ്ങളായ ഇ. സതീഷ് ചന്ദ്രൻ , ആർ.യു. റെജുമോൻ , വി.പി. ഗഫൂർ , ജെ.എം. ജയേഷ്, ആർ.രതീഷ്, പി.പി. ഷിജിൻ , പ്രദീപ് കുമാർ,രാമചന്ദ്രൻ നായർ എന്നിവരും നാട്ടുകാരും ചേർന്ന് പോത്തിനെ കിണറ്റിൽനിന്ന് രക്ഷപ്പെടുത്തുകയായിരുന്നു. വീഴ്ചയിൽ പോത്തിന് ശരീരമാസകലം മുറിവേറ്റിട്ടുണ്ട്.

കരിങ്ങാച്ചിറ കത്തീഡ്രലിൽ ലഹരി വിരുദ്ധ പ്രതിജ്ഞ

തൃപ്പൂണിത്തുറ: കരിങ്ങാച്ചിറ സെന്‍റ് ജോർജ് യാക്കോബായ സുറിയാനി കത്തീഡ്രലിൽ ശ്രേഷ്ഠ കാതോലിക്ക ബസേലിയോസ് ജോസഫ് ബാവയുടെ ആഹ്വാനമനുസരിച്ച് ലഹരി വിരുദ്ധ പ്രതിജ്ഞയെടുത്തു. ഫാ. റിജോ ജോർജ് ലഹരി വിരുദ്ധ പ്രതിജ്ഞ ചൊല്ലിക്കൊടുത്തു. ഫാ. റ്റിജോ മർക്കോസ്, ഫാ. ബേസിൽ ഷാജു, ജീവൻ മാലായിൽ, എം.പി. പോൾ, ഐ.കെ. ജോർജ് തുടങ്ങിയവർ പ്രസംഗിച്ചു. വിദ്യാർഥികൾ അവതരിപ്പിച്ച ഫ്ലാഷ് മോബും നടന്നു.

ഞാറക്കൽ താലൂക്കാശുപത്രിയിൽ ഡോക്ടർമാരെ നിയമിക്കാൻ ആരോഗ്യമന്ത്രിക്ക് നിവേദനം

വൈപ്പിൻ : വൈപ്പിൻ ബ്ലോക്ക് പഞ്ചായത്തിന്‍റെ കീഴിലുള്ള ഞാറക്കൽ താലൂക്ക് ആശുപത്രിയിൽ ആവശ്യത്തിനു ഡോക്ടർ മാരില്ലാത്തതിനാൽ ചികിത്സതേടിയെത്തുന്ന സാധാരണക്കാർ ദുരിതത്തിൽ. എട്ട് ഡോക്ട‌ർമാർ നിലവിൽ ഉണ്ട് എന്നു പറയുന്നുണ്ടെങ്കിലും ഇവിടെ ഒ.പി.യിൽ പലപ്പോഴും ഒരു ഡോക്‌ടറുടെ സേവനം മാത്രമാണ് ലഭിക്കുന്നത്. ഇതുമൂലം ഡോക്ടറെ കാണാൻ രോഗികൾ മണിക്കൂറുകളോളം കാത്ത് നിൽക്കേണ്ട സാഹചര്യമാണവിടെ. കൂടാതെ ആശുപത്രിയിൽ ഗൈനക്കോളജി വിഭാഗം വർഷങ്ങളായി പ്രവർത്തനരഹിതമാണ്. സാഹചര്യങ്ങൾ ഈ വിധമായതിനെ തുടർന്ന് കൂടുതൽ ഡോക്ടർമാരെനിയമിക്കണമെന്നാവശ്യപ്പെട്ട് ഞാറക്കൽ പഞ്ചായത്ത് പ്രസിഡന്‍റ് മിനിരാജു ആരോഗ്യ മന്തി വീണാ ജോർജിനെ നേരിൽ കണ്ട് നിവേദനം നൽകി. ഞാറക്കൽ നായരമ്പലം, എടവനക്കാട്, എളങ്കുന്നപ്പുഴ എന്നീ മേഖലകളിലെ സാധാരണക്കാർ ചികിത്സ തേടി എത്തുന്ന ഇവിടെ കിടത്തി ചികിത്സയ്ക്കും മറ്റുമായി എല്ലാവിധ ആധുനിക സൗകര്യങ്ങളുമുള്ള കെട്ടിടവും മറ്റും ഉണ്ടെങ്കിലും ഡോക്‌ടർമാരുടെ അപര്യാപ്‌തതമൂലം രോഗികൾക്ക് യഥാവിധം ചികിത്സ ലഭിക്കാതെ വരുന്ന സാഹചര്യവും പ്രസിഡന്‍റ് നിവേദനത്തിൽ വ്യക്തമാക്കിയിട്ടുണ്ട്.

ആട്ടുകല്ലിൽ ഒളിച്ചിരുന്ന മൂർഖനെ പിടികൂടി

അലുവ: വീടിനകത്ത് അടുക്കളയിലെ ആട്ടുകല്ലിൽ ഒളിച്ചിരുന്ന മൂർഖൻ പാമ്പിനെ പിടികൂടി. തോട്ടയ്ക്കാട്ടുകരയിൽ റിട്ട. പ്രധാന അധ്യാപിക ഉഷാകുമാരി ടീച്ചറുടെ വീട്ടിലാണ് മൂർഖൻ പാമ്പിനെ കണ്ടെത്തിയത്. പാമ്പുപിടുത്തക്കാരൻ ഷൈൻ എത്തി പാമ്പിനെ പിടികൂടി വനം വകുപ്പിന് കൈമാറി. വീടിന്‍റെ മുൻവാതിലിലും പിൻവാതിലിലും നെറ്റ് ഘടിപ്പിച്ചിട്ടും അത് മറികടന്നാണ് പാമ്പ് കയറിയത്. കാലവർഷമായതോടെ ഇഴ ജന്തുക്കളുടെ ശല്യം വീടുകളിൽ വർധിച്ചിരിക്കുകയാണെന്ന് പെരിയാർ തീരവാസികൾ പറഞ്ഞു.

തെരുവുനായ ആക്രമണം; ഹ്യൂമൻ റൈറ്റ്സ് ഫോറം ഒപ്പുശേഖരണം നടത്തി

കളമശേരി: തെരുവുനായ അക്രമത്തിനെതിരെ ഹ്യൂമൻ റൈറ്റ്സ് ഫോറം ഒപ്പുശേഖരണം നടത്തി. കളമശേരി ഓർത്തഡോക്‌സ് പള്ളിയിൽ നടന്ന ചടങ്ങിൽ ഫാ. മാത്യു അറയ്ക്കൽ ആദ്യഒപ്പിട്ട് ഉദ്ഘാടനം നിർവ്വഹിച്ചു. ഫാ. സ്റ്റാൻലി അലക്സ് വിഷയാവതരണം നടത്തി. ഫോറം സംസ്ഥാന പ്രസിഡന്‍റ് ടി.കെ. അബ്ദു‌ൾ അസീസ് മുഖ്യ പ്രഭാഷണം നടത്തി. സംസ്ഥാന ഭാരവാഹികളായ കെ.‌എ. ആന്‍റണി, സജി നമ്പൂതിരി, കെ.കെ. അബ്‌ദുൽ റഹ്മാൻ, വി. ഖാദർ മാവേലി, മേരിക്കുട്ടി ജോർജ്, ഓമന തോമസ്, ജെ.ജെ. കുറ്റിക്കാട്ട്, കെ.ഡി. ഫ്രാൻസിസ് , കെ.എസ്. അബ്‌ദുൾസലാം, മെൽവിൻ മിനോയ്, രമേശ് ആലുവ, ഉണ്ണികൃഷ്‌ണൻ കളമശേരി എന്നിവർ സംബന്ധിച്ചു. മുഖ്യമന്ത്രിക്കും പ്രധാനമന്ത്രിക്കും ഹൈക്കോടതി-സുപ്രീംകോടതി ചീഫ് ജസ്റ്റിസുമാർക്കും ഭീമഹർജ്ജി നൽകുമെന്ന് ഫോറം ഭാരവാഹികൾ അറിയിച്ചു.

അങ്കമാലിയിലെ ലൈബ്രറികളിലേക്കു പുസ്തക വിതരണം ഇന്ന്

അങ്കമാലി: വായനയുടെ വിസ്മയ ലോകം തീര്‍ക്കാന്‍ അങ്കമാലി നിയോജകമണ്ഡലത്തിലെ സംസ്ഥാന ലൈബ്രറി കൗണ്‍സിലിന്‍റെ അംഗീകാരമുള്ള മുഴുവന്‍ ലൈബ്രറികള്‍ക്കും റോജി എം. ജോണ്‍ എംഎല്‍എയുടെ പ്രാദേശിക വികസന ഫണ്ട് വിനിയോഗിച്ച് വാങ്ങിയ പുസ്തകങ്ങളുടെ വിതരണോദ്ഘാടനം ഇന്ന് വൈകിട്ട് നാലിന് അങ്കമാലി ബ്ലോക്ക് പഞ്ചായത്ത് ഹാളില്‍നടക്കും. ചടങ്ങ് ഡോ. സുനില്‍ പി. ഇളയിടം ഉദ്ഘാടനം ചെയ്യും. റോജി എം. ജോണ്‍ എംഎൽഎ അധ്യക്ഷത വഹിക്കും. ലൈബ്രറി പ്രസ്ഥാനത്തെ ശക്തിപ്പെടുത്തി നാടിന്‍റെ മുക്കിലും മൂലയിലും വിദ്യാഭ്യാസ, സാംസ്കാരിക, സാമൂഹിക വളര്‍ച്ച സാധ്യമാക്കുക എന്ന ലക്ഷ്യത്തോടെ നിയമസഭാ സാമാജികരുടെ പ്രത്യേക വികസന നിധിയില്‍ നിന്ന് തുക ചിലവഴിച്ച് 51 വായനശാലകള്‍ക്കാണ് പുസ്തകങ്ങള്‍ നല്‍കുന്നത്. സംസ്ഥാന ലൈബ്രറി കൗണ്‍സില്‍ അംഗീകാരം ഉള്ള ഗ്രന്ഥശാലകള്‍ക്ക് ഒരു ചെറിയ കൈത്താങ്ങ് എന്ന നിലയില്‍ മുമ്പ് 48 ലൈബ്രറികള്‍ക്ക് എംഎല്‍എ ഫണ്ടില്‍ നിന്നും പുസ്തകങ്ങള്‍ വിതരണം ചെയ്തിരുന്നു. ചടങ്ങില്‍ ത്രിതല പഞ്ചായത്ത് ജനപ്രതിനിധികള്‍, കലാ-സാംസ്കാരിക രംഗത്തെ പ്രമുഖര്‍, ലൈബ്രറി കൗണ്‍സില്‍ അംഗങ്ങള്‍ തുടങ്ങിയവര്‍ പങ്കെടുക്കും.

വൈസ്മെൻ ഇന്‍റർനാഷണൽ ഏരിയാ കൺവൻഷനും ഭാരവാഹികളുടെ സ്ഥാനാരോഹണവും

നെടുമ്പാശേരി: വൈസ്മെൻ ഇന്‍റർനാഷണൽ 43-ാം ഇന്ത്യ ഏരിയാ കൺവൻഷനും ഭാരവാഹികളുടെ സ്ഥാനാരോഹണവും സേവനപദ്ധതികളുടെ ഉദ്ഘാടനവും അവാർഡ് നൈറ്റും നടന്നു. വൈസ്മെൻ ഇന്‍റർനാഷണൽ പ്രസിഡന്‍റ് അഡ്വ. എ. ഷാനവാസ്ഖാൻ ഉദ്ഘാടനം ചെയ്തു. ഏരിയാ പ്രസിഡന്‍റ് വി.എസ്. രാധാകൃഷ്ണൻ അധ്യക്ഷനായി. അഡ്വ. ബാബു ജോർജ് (പ്രസിഡന്‍റ്)ന്‍റെ നേതൃത്വത്തിലുള്ള ഭാരവാഹികളാണ് ചുമതലയേറ്റത്. ജോസഫ് വർഗീസ് (ഏരിയാ സെക്രട്ടറി), സി.എം. കയസ് (എക്സിക്യൂട്ടീവ് സെക്രട്ടറി), സുനിൽ ജോൺ (ട്രഷറർ), ജോബി ജോഷ്വാ (ബുള്ളറ്റിൻ എഡിറ്റർ), അജിത്ബാബു (വെബ്‌മാസ്റ്റർ), ബിനോയി പൗലോസ് (കാബിനറ്റ് സെക്രട്ടറി), പ്രഫ. കോശി തോമസ്(ചീഫ് കോ ഓർഡിനേറ്റർ), സിന്ധു തോമസ് (മെനറ്റ്സ് കോ ഓർഡിനേറ്റർ), ബി. പവിത്രൻ, ലൈജു ഫിലിപ്പ് (എഡിറ്റർമാർ), ഡോ. ബിജു മാന്തറയ്ക്കൽ (മീഡിയാ ആൻഡ് കമ്യൂണിക്കേഷൻ എരിയാ സെക്രട്ടറി), വർഗീസ്‌ പീറ്റർ (പിആർഒ) എന്നിവരാണ് ചുമതലയേറ്റ മറ്റ് ഭാരവാഹികൾ. ഇന്‍റർനാഷണൽ പ്രസിഡന്‍റ് എഡ്വാർഡ് ഓംഗ് (സിംഗപ്പൂർ) സ്ഥാനാരോഹണത്തിന് നേതൃത്വം നൽകി. ഇന്‍റർനാഷണൽ സെക്രട്ടറി ജനറൽ ജോസ് വർഗീസ്‌ മുഖ്യപ്രഭാഷണം നടത്തി. സേവന പദ്ധതിയായ റിനൽകെയർ ആൻഡ് ഡയാലിസിസ്‌ പദ്ധതി വൈഎംസിഎ ദേശീയ സെക്രട്ടറി എൻ.വി. എൽദോ ഉദ്ഘാടനം ചെയ്യും. പദ്ധതിയുടെ ഭാഗമായി 50 ആശുപത്രികളിൽ ഡയാലിസിസ് ‌യൂണിറ്റുകൾ സ്ഥാപിക്കുമെന്ന് ഭാരവാഹികൾ അറിയിച്ചു. 10,000 രോഗികൾക്ക് സൗജന്യ ഡയാലിസിസ് കൂപ്പണകളും നൽകും.

പുരസ്കാരമായി ലഭിച്ച പുസ്തകങ്ങൾ നാട്ടിലെ വായനശാലയ്ക്കു നൽകി അധ്യാപകൻ

ചെറായി: വായനാ ദിനത്തോടനുബന്ധിച്ച് നടന്ന പുസ്തക ആസ്വാദന മത്സരത്തിൽ സമ്മാനമായി ലഭിച്ച പുസ്തകങ്ങൾ എടവനക്കാട് എസ്ഡിപിവൈ കെപിഎം ഹൈസ്കൂളിലെ അധ്യാപകനായ കെ.ജി. ഹരികുമാർ നാട്ടിലെ വായനശാലക്ക് നൽകി. എടവനക്കാട് ഇക്ബാൽ സ്മാരക വായനശാലക്കാണ് പുസ്തകങ്ങൾ നൽകിയത്. വായനശാലാ പ്രസിഡന്‍റ് ബേസിൽ മുക്കത്ത്, ജോയിന്‍റ് സെക്രട്ടറി പി.പി. സജീവ് എന്നിവർ ചേർന്ന് ഏറ്റുവാങ്ങി.

കടൽ ഭിത്തിക്കായി കാട്ടിപ്പറന്പിൽ നാളെ നിരാഹാര സമരം

ഫോർട്ടുകൊച്ചി: പുത്തൻതോട് മുതൽ ബീച്ച് റോഡ് വരെ യുദ്ധകാലാടിസ്ഥാനത്തിൽ ഒറ്റ ഘട്ടമായി ടെട്രാപ്പോട് കടൽ ഭിത്തി നിർമാണം പൂർത്തിയാക്കണമെന്നാവശ്യപ്പട്ട് നാളെ നിരാഹാര സമരം സംഘടിപ്പിക്കുമെന്ന് ചെല്ലാനം - കൊച്ചി ജനകീയവേദി കൺവീനർ വി.ടി. സെബാസ്റ്റ്യനും വർക്കിംഗ് ചെയർമാൻ അഡ്വ. തുഷാർ നിർമലും അറിയിച്ചു. ചെല്ലാനം - കൊച്ചി തീരത്തെ കടൽ കയറ്റം പരിഹരിക്കാൻ തീര സംരക്ഷണ പദ്ധതിയെ സംബന്ധിച്ച് ജൂലൈ രണ്ടിനു ചേരുന്ന മന്ത്രിസഭാ യോഗം ചർച്ച ചെയ്യുമെന്ന് മന്ത്രി പി. രാജീവ് പത്ര സമ്മേളനത്തിൽ അറിയിച്ചിരുന്നു. ഈ പശ്ചാത്തലത്തിലാണ് തീര സംരക്ഷണത്തിനായി നടപ്പിലാക്കുന്ന പദ്ധതി പുത്തൻ തോട് മുതൽ ബീച്ച് റോഡ് വരെ ഒറ്റ ഘട്ടമായി നടപ്പിലാക്കണമെന്ന് ആവശ്യപ്പെട്ട് കൊണ്ട് കാട്ടിപ്പറമ്പ് സമരപ്പന്തലിൽ നിരാഹാര സമരം സംഘടിപ്പിക്കുന്നതെന്ന് ജനകീയവേദി കൺവീനർ വി.ടി.സെബാസ്റ്റ്യൻ, അഡ്വ. തുഷാർ നിർമൽ എന്നിവർ അറിയിച്ചു.

ബൈക്കും പിക്കപ്പും കൂട്ടിയിടിച്ച് യുവാവ് മരിച്ചു

തൃപ്പൂണിത്തുറ: ബൈക്കും പിക്കപ്പും കൂട്ടിയിടിച്ച് ബൈക്ക് യാത്രികനായ യുവാവ് തത്ക്ഷണം മരിച്ചു. ഉദയംപേരൂർ മാങ്കായിക്കവല പേരേപ്പറന്പിൽ ആന്‍റണിയുടെ മകൻ മനു ആന്‍റണി (32) ആണ് മരിച്ചത്. ശനിയാഴ്ച രാത്രി 9.30ഓടെ മാർക്കറ്റ് റോഡിൽ മേക്കര ഭാഗത്തായിരുന്നു അപകടം. സംസ്കാരം നടത്തി. മാർക്കറ്റിംഗ് ജീവനക്കാരനായിരുന്നു. മാതാവ്: ശോഭന. സഹോദരങ്ങൾ: സാം ആന്‍റണി, ജൂബി ജിനു.

ലഹരി വിരുദ്ധ ക്ലബ് ഉദ്ഘാടനം

വാഴക്കുളം: വെള്ളാരംകല്ല് ഹോളി ഫാമിലി പബ്ലിക് സ്കൂളിൽ ലഹരിവിരുദ്ധ ക്ലബ് ഉദ്ഘാടനവും ബോധവത്കരണ ക്ലാസും നടത്തി. മൂവാറ്റുപുഴ അസി. എക്സൈസ് ഇൻസ്പെക്ടർ എം.എ.കെ. ഫൈസൽ ഉദ്ഘാടനം ചെയ്തു. സി. ജ്യോതി അധ്യക്ഷത വഹിച്ചു. മാനേജർ സാലസ് കല്ലുപ്പുരയ്ക്കൽ മുഖ്യപ്രഭാഷണം നടത്തി. എം.എ.കെ. ഫൈസൽ ലഹരി വിരുദ്ധ ബോധവത്കരണ ക്ലാസ് നയിച്ചു. അധ്യാപകരായ പി.എ. സബീന, സി.കെ. റംസിമോൾ, സിബി മാനുവൽ, ഷൈജി ജോണ്‍, വിദ്യാർഥികളായ അഞ്ജന രാജേഷ്, റാം മാധവ് തുടങ്ങിയവർ പ്രസംഗിച്ചു.

കെഎച്ച്ആർഎ വിദ്യാഭ്യാസ പുരസ്കാരങ്ങൾ നൽകി

കൂത്താട്ടുകുളം: ഉന്നത വിജയം നേടിയ വിദ്യാർഥികളെ കേരള ഹോട്ടൽ ആൻഡ് റസ്റ്റോറന്‍റ് അസോസിയേഷൻ(കെഎച്ച്ആർഎ) കൂത്താട്ടുകുളം യൂണിറ്റിന്‍റെ ആഭിമുഖ്യത്തിൽ പുരസ്കാരങ്ങൾ നൽകി ആദരിച്ചു. നഗരസഭാ അധ്യക്ഷ വിജയ ശിവൻ ഉദ്ഘാടനം നിർവഹിച്ചു. കെഎച്ച്ആർഎ കൂത്താട്ടുകുളം യൂണിറ്റ് പ്രസിഡന്‍റ് പി.പി. ജോണി അധ്യക്ഷത വഹിച്ചു. സംസ്ഥാന പ്രസിഡന്‍റ് ജി. ജയപാൽ സമ്മാനവിതരണം നടത്തി. നഗരസഭാ വൈസ് ചെയർമാൻ സണ്ണി കുര്യാക്കോസ് പുരസ്കാരങ്ങൾ വിതരണം ചെയ്തു. കെഎച്ച്ആർഎ കൂത്താട്ടുകുളം യൂണിറ്റ് സെക്രട്ടറി ടി.കെ. മോഹൻ, ജില്ലാ പ്രസിഡന്‍റ് ടി.കെ. മനോഹരൻ, സെക്രട്ടറി കെ.ടി. റഹീം, ജില്ലാ വർക്കിംഗ് പ്രസിഡന്‍റ് കെ. പാർത്ഥസാരഥി, യൂണിറ്റ് ട്രഷറർ പീർ മുഹമ്മദ് തുടങ്ങിയവർ പ്രസംഗിച്ചു.

കോതമംഗലത്ത് സ്റ്റേഡിയത്തിനായി ബസ്‌സ്റ്റാൻഡിൽ ഫുട്ബോൾ കളിച്ച് യൂത്ത് ഫ്രണ്ട് പ്രതിഷേധം

കോതമംഗലം: യുഡിഎഫ് സർക്കാർ തുടക്കംകുറിച്ച ചേലാട് അന്താരാഷ്ട്ര സ്റ്റേഡിയം പദ്ധതി അട്ടമറിച്ചെന്ന് ആരോപിച്ച് കേരള കോണ്‍ഗ്രസ് ജില്ലാ കമ്മിറ്റിയുടെ ആഭിമുഖ്യത്തിൽ സ്വകാര്യ ബസ് സ്റ്റാൻഡിൽ ഫുട്ബോൾ കളിച്ച് പ്രതിഷേധിച്ചു. കോതമംഗലത്തിന് ഒരു അന്താരാഷ്ട്ര സ്റ്റേഡിയം എന്ന ആവശ്യവുമായി നടത്തിയ പ്രതിഷേധം ജില്ലാ പ്രസിഡന്‍റ് ഷിബു തെക്കുംപുറം ഉദ്ഘാടനം ചെയ്തു. എംഎൽഎയുടെ അനാസ്ഥയാണ് യുഡിഎഫിന്‍റെ സ്വപ്ന പദ്ധതിയായ സ്റ്റേഡിയ നിർമ്മാണം തടസപ്പെടാൻ കാരണമെന്ന് അദ്ദേഹം പറഞ്ഞു. യൂത്ത് ഫ്രണ്ട് ജില്ലാ പ്രസിഡന്‍റ് ജോഷ്വാ തായങ്കേരി അധ്യക്ഷത വഹിച്ചു. എ.ടി. പൗലോസ്, ജോമി തെക്കേക്കര, റോയി സ്കറിയ, സി.കെ. സത്യൻ, മാത്യു പുല്ലാട്ടേൽ, ബിജേഷ് പോൾ, ജോസ് കുര്യാക്കോസ്, ജേക്കബ് തോമസ്, ലെവിൻ ചുള്ളിയാടൻ, ജെറിൻ മാറാടി, എ. കിരണ്‍, മാത്യൂസ് ഔസേപ്പ്, ജോസ് മൂവാറ്റുപുഴ, ആദിത്യൻ കുട്ടൻ എന്നിവർ പങ്കെടുത്തു.

തൃപ്പൂണിത്തുറ-കരിമുകൾ റോഡിലെ ഡിടിപി സ്കീം പരിഷ്കരിച്ച് ഉത്തരവായി

കോലഞ്ചേരി: തൃപ്പൂണിത്തുറ-കരിമുകൾ റോഡിലെ ഡീറ്റയിൽഡ് ടൗൺ പ്ലാനിംഗ് സ്കീം പരിഷ്കരിച്ച് ഉത്തരവായതായി പി.വി. ശ്രീനിജിൻ എംഎൽഎ അറിയിച്ചു. കുന്നത്തുനാട് മണ്ഡലത്തിൽ ഉൾപ്പെടുന്ന പ്രസ്തുത റോഡിലെ ഡിടിപി വേരിയേഷൻ നടപടികൾ പൂർത്തിയാകാത്തതിനാൽ റോഡിനു സമീപം താമസിക്കുന്നവർക്ക് വീട് വയ്ക്കുന്നതിനോ മറ്റ് നിർമാണ പ്രവർത്തനങ്ങൾക്കോ പെർമിറ്റ് ലഭിക്കാത്തതടക്കം നിരവധി പ്രശ്നങ്ങൾ നാളുകളായി പ്രദേശവാസികൾ നേരിട്ടിരുന്നു. നിലവിലുള്ള സ്കീം വളരെ പഴക്കം ചെന്നതായതിനാൽ കാലാനുസൃതമായി ഇത് പരിഷ്കരിക്കണമെന്നും ഇതിനു വേണ്ടി തദ്ദേശ സ്വയംഭരണ വകുപ്പിലെ ഫയലിൽ വേഗത്തിൽ തീരുമാനമെടുക്കണമെന്നും ആവശ്യപ്പെട്ട് നിയമസഭയിൽ ചോദ്യമടക്കമുന്നയിച്ച് വിഷയം സർക്കാരിന്‍റെ ശ്രദ്ധയിൽ പെടുത്തിയിരുന്നു.

വൈഎംസിഎ ഗോൾഡൻ ജൂബിലി: ഓഡിറ്റോറിയത്തിന്‍റെ ഉദ്ഘാടനം നിർവഹിച്ചു

മൂവാറ്റുപുഴ: വൈഎംസിഎ ഗോൾഡൻ ജൂബിലി ആഘോഷവും പുതിയ ഓഡിറ്റോറിയത്തിന്‍റെ ഉദ്ഘാടനവും നടത്തി. മൂവാറ്റുപുഴ കോട്ടയം റോഡിൽ കബനി പാലസിനു സമീപം അത്യാധുനിക സംവിധാനങ്ങളോടെ ഗോൾഡൻ ജൂബിലി ആഘോഷത്തിന്‍റെ ഭാഗമായി നിർമിച്ചിരിക്കുന്ന ആധുനീക രീതിയിലുള്ള ഓഡിറ്റോറിയത്തിന്‍റെ ഉദ്ഘാടനം വൈഎംസിഎ സൗത്ത് വെസ്റ്റ് ഇന്ത്യ റീജിയണ്‍ ചെയർമാൻ പ്രഫ. അലക്സ് തോമസ് നിർവഹിച്ചു. തുടർന്ന് പൊതുസമ്മേളനം ഡീൻ കുര്യാക്കോസ് എംപി ഉദ്ഘാടനം ചെയ്തു. വെബ്സൈറ്റിന്‍റെ ഉദ്ഘാടനം ഫ്രാൻസിസ് ജോർജ് എംപിയും, കോണ്‍ഫറൻസ് ഹാൾ ഉദ്ഘാടനം മാറാടി പഞ്ചായത്ത് പ്രസിഡന്‍റ് ഒ.പി. ബേബിയും, ഡയറക്ടറിയുടെ ഉദ്ഘാടനം നഗരസഭാധ്യക്ഷൻ പി.പി. എൽദോസും നിർവഹിച്ചു. അംഗത്വ കാർഡ് വിതരണം സബ് റീജിയണ്‍ ചെയർമാൻ ബൈജു കുര്യാക്കോസ് നിർവഹിച്ചു. ചടങ്ങിൽ മുൻ പ്രസിഡന്‍റ് സി.എ ഡാനിയേൽ സ്കറിയയുടെ ഫോട്ടോ അനാച്ഛാദനം സ്ഥാപക പ്രസിഡന്‍റ് പ്രഫ. പി.ഐ. ഡാനിയേലും, അനുസ്മരണ പ്രഭാഷണം ഡോ. ജെയിംസ് മണിത്തോട്ടവും നിർവഹിച്ചു. ഡെന്‍റ് കെയർ മാനേജിംഗ് ഡയറക്ടർ ജോണ്‍ കുര്യാക്കോസ്, സാബു ജോണ്‍ തുടങ്ങിയവർ പ്രസംഗിച്ചു.

‘ഞാനും എന്‍റെ നാടിനൊപ്പം’ പങ്കാളികളായി വിദ്യാർഥികളും

വാഴക്കുളം: വാഴക്കുളത്ത് ആരംഭിക്കുന്ന സൗജന്യ ഡയാലിസിസ് സെന്‍ററിന്‍റെ നിർമാണ പ്രവർത്തനങ്ങൾക്കായി തങ്ങൾ സ്വരുക്കൂട്ടിയ കൊച്ചു സന്പാദ്യങ്ങളും നൽകി ആനിക്കാട് സെന്‍റ് ആന്‍റണീസ് എൽപി സ്കൂളിലെ വിദ്യാർഥികളും ‘ഞാനും എന്‍റെ നാടിനൊപ്പം’ പദ്ധതിയിൽ പങ്കാളികളായി. സ്കൂൾ അങ്കണത്തിൽ നടന്ന ചടങ്ങിൽ മാതാപിതാക്കൾക്കൊപ്പമെത്തിയാണ് വിദ്യാർഥികൾ തങ്ങളുടെ കൊച്ചു സന്പാദ്യങ്ങൾ കൈമാറിയത്. തുക സ്കൂൾ പ്രധാനാധ്യാപിക പ്രീമ സിമിക്സ് വാഴക്കുളം ചാരിറ്റബിൾ ട്രസ്റ്റ് ചെയർമാൻ സിജു സെബാസ്റ്റ്യനു കൈമാറി. യോഗത്തിൽ ഡയാലിസിസ് യൂണിറ്റുകളുടെ പ്രസക്തിയെക്കുറിച്ച് ജോണി മെതിപ്പാറ സംസാരിച്ചു. ആനിക്കാട് സെന്‍റ് ആന്‍റണീസ് പള്ളി അസിസ്റ്റന്‍റ് വികാരി ഫാ. തോമസ് മക്കോളിൽ, തോമസ് വർഗീസ് താണിക്കൽ എന്നിവർ പ്രസംഗിച്ചു.

ടി.എം. ജേക്കബ് എക്സലൻസ് അവാർഡ് വിതരണം ചെയ്തു

പിറവം: മുൻ മന്ത്രി ടി.എം. ജേക്കബിന്‍റെ പേരിൽ ടി.എം. ജേക്കബ് ചാരിറ്റബിൾ എക്സലൻസ് അവാർഡ് സൊസൈറ്റി ഏർപ്പെടുത്തിയ എക്സലൻസ് എംഎൽഎ അവാർഡ് വിതരണം ചെയ്തു. പിറവം നിയോജ മണ്ഡലത്തിലെ വിവിധ സർക്കാർ, എയ്ഡഡ്, അൺ എയ്ഡഡ് സ്കൂളുകളിൽ നിന്നും 10,12 ക്ലാസുകളിൾ എ പ്ലസ്, എ വൺ നേടിയ വിദ്യാര്‍ഥികളും, സര്‍വകലാശാലകളില്‍ ഉന്നത വിജയം കരസ്ഥമാക്കിയ വിദ്യാര്‍ഥികള്‍ക്കും ഉള്‍പ്പെടെ 775 വിദ്യാര്‍ഥികളെയാണ് പുരസ്കാരം നൽകി ആദരിച്ചത്. അനൂപ് ജേക്കബ് എംഎൽഎ ചടങ്ങ് ഉദ്ഘാടനം ചെയ്ത് പുരസ്കാരങ്ങൾ വിതരണം ചെയ്തു. പിറവം നഗരസഭാ ചെയര്‍പേഴ്സണ്‍ അഡ്വ. ജൂലി സാബു അധ്യക്ഷത വഹിച്ചു. വൈസ് ചെയർമാൻ കെ.പി. സലിം, വിസാറ്റ് കോളേജ് പ്രിൻസിപ്പൽ രാജു മാവുങ്കൽ, ഗുഡ് ഷെപ്പേർഡ് നഴ്സിംഗ് കോളജ് എംഡി ടോജോ ജോൺ, സുനില്‍ ഇടപ്പലക്കാട്ട്, കെ.ആര്‍. ജയകുമാര്‍ തുടങ്ങിയവർ പ്രസംഗിച്ചു.

വിശ്വാസ പൈതൃകം വിളിച്ചോതി രൂപത ദിനാഘോഷം

കാളിയാർ: വിശ്വാസ പൈതൃകം വിളിച്ചോതി കൃതജ്ഞതാ സ്തോത്രം ആലപിച്ച് കൂട്ടായ്മയുടെ ഇഴകൾ നെയ്ത് കാളിയാർ സെന്‍റ് റീത്താസ് ഫൊറോന പള്ളി പാരിഷ് ഹാളിൽ നടന്ന കോതമംഗലം രൂപത ദിനാഘോഷം പ്രൗഢ ഗംഭീരമായി. ബിഷപ് മാർ ജോർജ് മഠത്തിക്കണ്ടത്തിലിന്‍റെ മുഖ്യ കാർമികത്വത്തിൽ നടന്ന വിശുദ്ധ കുർബാനയോടെയായിരുന്നു ദിനാഘോഷത്തിന് തുടക്കം കുറിച്ചത്. തുടർന്ന് പ്രാർഥനാ മന്ത്രങ്ങളോടെ ചടങ്ങ് ആരംഭിച്ചു. മാർ ജോർജ് മഠത്തിക്കണ്ടത്തിൽ അധ്യക്ഷത വഹിച്ച യോഗത്തിൽ കാഞ്ഞിരപ്പള്ളി ബിഷപ് മാർ ജോസ് പുളിക്കൽ രൂപതദിന സന്ദേശം നൽകി. രൂപത വികാരി ജനറാൾ മോണ്‍. വിൻസെന്‍റ് നെടുങ്ങാട്ട് അവാർഡ് ജേതാക്കളെ പരിചയപ്പെടുത്തി. ഫാ. ആന്‍റണി ഉരുളിയാനിക്കൽ, സിസ്റ്റർ ആർക്ക് എയ്ഞ്ചൽ, ഡോ. ഇ.വി. ജോർജ് എന്നിവരെ മാർ ജോർജ് മഠത്തിക്കണ്ടത്തിൽ ആദരിച്ചു. ഡോ. ഇ.വി. ജോർജിനു വേണ്ടി ഭാര്യ വൽസമ്മ ജോർജ് മെമന്‍റോ ഏറ്റുവാങ്ങി. രൂപത വികാരി ജനറാൾ മോണ്‍. പയസ് മലേക്കണ്ടത്തിൽ, ഡീൻ കുര്യാക്കോസ് എംപി, ആന്‍റണി ജോണ്‍ എംഎൽഎ എന്നിവർ പ്രസംഗിച്ചു. വികാരി ഫാ. ജോസഫ് മുണ്ടുനടയിൽ സ്വാഗതവും പിആർഒ ജോർജ് കേളകം നന്ദിയും പറഞ്ഞു. ഫാ. മാത്യു മഞ്ഞക്കുന്നേൽ, കത്തോലിക്കാ കോണ്‍ഗ്രസ് രൂപത പ്രസിഡന്‍റ് സണ്ണി കടൂത്താഴെ, മാതൃവേദി രൂപത പ്രസിഡന്‍റ് ജാൻസി മാത്യു, കെസിവൈഎം രൂപത പ്രസിഡന്‍റ് സാവിയോ ജിജി, സിഎംഎൽ രൂപത പ്രസിഡന്‍റ് സജിൽ ജോർജ് എന്നിവർ നേതൃത്വം നൽകി. പ്രത്യാശയിൽ ഒരുമയോടെ മുന്നേറാം എന്ന ആപ്ത വാക്യം അനുസ്മരിച്ചായിരുന്നു സമ്മേളനം ആരംഭിച്ചത്. രൂപതയുടെ വിവിധ ഇടവകകളിൽ നിന്നുള്ള വൈദികർ, മിഷണറി വൈദികർ, കന്യാസ്ത്രീകൾ, ഭക്ത സംഘടനാ ഭാരവാഹികൾ, വിശ്വാസ പരിശീലകർ ഉൾപ്പെടെ നൂറുകണക്കിന് വിശ്വാസികൾ ദിനാഘോഷത്തിൽ അണിചേരാനെത്തി. പാരീഷ് ഹാളും പരിസരവും നിറഞ്ഞ സദസിനെ സാക്ഷി നിർത്തിയാണ് സമ്മേളനം നടന്നത്. തിന്മയ്ക്കെതിരെ പോരാടണം: മാർ മഠത്തിക്കണ്ടത്തിൽ കാളിയാർ: സമൂഹത്തിൽ വർധിച്ചു വരുന്ന ലഹരി വസ്തുക്കളുടെ ഉപയോഗത്തിനെതിരെയും അരാജകത്വത്തിനെതിരെയും ഒന്നിച്ചു പോരാടണമെന്ന് കോതമംഗലം ബിഷപ് മാർ ജോർജ് മഠത്തിക്കണ്ടത്തിൽ. കാടിറങ്ങി വരുന്നു, കടൽ കയറി വരുന്നു എന്ന ഗുരുതരമായ സ്ഥിതിയാണ് ഇന്ന് നാട്ടിലുള്ളത്. തൊമ്മൻകുത്തിൽ കുരിശു തകർത്ത സംഭവം എല്ലാവരും ഒരുമിച്ചു നിൽക്കേണ്ടതിന്‍റെ ആവശ്യകതയാണ് വ്യക്തമാക്കുന്നത്. തിന്മ നിറഞ്ഞ സമൂഹത്തിൽ യഥാർഥ സാക്ഷ്യം നൽകാൻ വിശ്വാസികൾ മുന്നോട്ടു വരണമെന്നും അദ്ദേഹം ആഹ്വാനം ചെയ്തു. സമൂഹത്തിൽ അവഗണിക്കപ്പെട്ടവർക്കും അശരണർക്കും കാവലും കരുതലുമാകണമെന്ന് കാഞ്ഞിരപ്പള്ളി രൂപത ബിഷപ് മാർ ജോസ് പുളിക്കൽ പറഞ്ഞു. സാമൂഹിക മാറ്റത്തിന്‍റെ ചാലക ശക്തിയായി നാം മാറണം. വർഗീയതയും ലഹരി വസ്തുക്കളുടെ ഉപയോഗവും വർധിച്ചുവരുന്ന കാലഘട്ടത്തിൽ ഇതിനെതിരെ ഒന്നിച്ചുനിന്ന് പോരാടണമെന്നും വിശുദ്ധ കുർബാനയിൽ നിന്നും ശക്തി സ്വീകരിച്ച് കൂട്ടായ്മയിൽ വളർന്നാലെ ഇതിനു കഴിയൂവെന്നും ബിഷപ് കൂട്ടിച്ചേർത്തു.

ഇഞ്ചിപ്പാറയിൽ ഇടിമിന്നലേറ്റ് വീട് ഭാഗികമായി തകർന്നു

കോതമംഗലം: കവളങ്ങാട് ഇഞ്ചിപ്പാറയിൽ ഇടിമിന്നലേറ്റ് വീട് ഭാഗികമായി തകർന്നു. ഗൃഹനാഥനും മാതാവിനും പരിക്ക്. ഇഞ്ചിപ്പാറ മോളത്തുകുടി വർഗീസിന്‍റെ വീടാണ് ഇടിമിന്നലേറ്റു ഭാഗികമായി തകർന്നത്. വർഗീസിനും മാതാവ് അന്നമ്മയ്ക്കും നിസാര പരിക്കേറ്റു. ഇവർ താലൂക്കു ആശുപത്രിയിൽ ചികിത്സ തേടി. മിന്നലിൽ വീടിന്‍റെ അടുക്കള ഭാഗത്തെ ഭിത്തിയുടെ സിമന്‍റെ ഇഷ്ടികകൾ തെറിച്ചുപോയി. വീടിന്‍റെ മുൻവശത്തെ കോൺക്രീറ്റ് തൂൺ ഭാഗികമായി തകർന്നു. വൈദ്യുതിബന്ധവും തകരാറിലായി. വീടിന് ബലക്ഷയവും ഉണ്ടായിട്ടുണ്ട്.

മാറാടിയിൽ പ്ലൈവുഡ് കന്പനികൾക്ക് അനുമതി നിഷേധിച്ചു

മൂവാറ്റുപുഴ: മാറാടിയിൽ പ്ലൈവുഡ് കന്പനിക്ക് പഞ്ചായത്ത് കമ്മിറ്റി അനുമതി നിഷേധിച്ചു. 13-ാം വാർഡിൽ രണ്ടു പ്ലൈവുഡ് നിർമാണ യൂണിറ്റുകൾ ആരംഭിക്കുന്നതിനുള്ള അനുമതിക്കായി ഹാജരാക്കിയിരുന്ന അപേക്ഷകളാണ് പഞ്ചായത്ത് കമ്മിറ്റി നിരസിച്ചത്. പ്രദേശത്തെ ജനങ്ങളുടെ സ്വൈര്യ ജീവിതത്തെയും ആരോഗ്യത്തെയും ഹാനികരമായി ബാധിക്കുമെന്നുള്ളതിനാലും പ്രദേശത്തെ ജനങ്ങളുടെ ശക്തമായ പ്രതിഷേധത്തെത്തുടർന്നുമാണ് പഞ്ചായത്ത് കമ്മിറ്റി അനുമതി നിരസിച്ചതെന്ന് പ്രസിഡന്‍റ് ഒ.പി. ബേബി, സ്ഥിരംസമിതി അധ്യക്ഷൻ ബിജു കുര്യാക്കോസ് എന്നിവർ അറിയിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]