റോട്ടറി വേവ്സ്-ടാലന്‍റ് ഹണ്ട് നടത്തി

കൊച്ചി: റോട്ടറി ക്ലബ് ഓഫ് കൊച്ചി ലോർഡ്സിന്‍റെ ആഭിമുഖ്യത്തിൽ റോട്ടറി വേവ്സ്-ടാലന്‍റ് ഹണ്ട് ഇടപ്പള്ളി കാംപിയൻ സ്കൂളിൽ നടന്നു. റോട്ടറി അസി. ഗവർണർമാരായ ആർ.ജെ. പ്രഹർഷ്, രാകേഷ്, സ്കൂൾ ഡയറക്ടർ ഡോ. കെ.വി. തോമസ്, സീനിയർ പ്രിൻസിപ്പൽ ലീലാമ്മ തോമസ്, റോട്ടറി ക്ലബ് പ്രസിഡന്‍റ് ജോജി ഗീവർഗീസ്, സെക്രട്ടറി വിഷ്ണു ദാസ് എന്നിവർ പ്രസംഗിച്ചു.

ADVERTISEMENT

കെസിബിസി നാടകമേള 19 മുതൽ

കൊച്ചി: കെസിബിസി മീഡിയ കമ്മീഷന്‍റെ നേതൃത്വത്തിൽ 36-ാമത് അഖില കേരള പ്രഫഷണൽ നാടകമേള 19 മുതൽ 28 വരെ പാലാരിവട്ടം പിഒസിയിൽ നടക്കും. പത്തു നാടകങ്ങളാണ് അരങ്ങിലെത്തുന്നത്. ദിവസവും വൈകുന്നേരം ആറിനാണ് നാടകം. 19നു വൈകുന്നേരം 5.30ന് ഉദ്ഘാടന സമ്മേളനം. തുടർന്ന് അമ്പലപ്പുഴ അക്ഷരജ്വാലയുടെ ‘വാർത്ത’ നാടകം അരങ്ങേറും. 20ന് തിരുവനന്തപുരം നവോദയയുടെ ‘സുകുമാരി’, 21ന് കോഴിക്കോട് സങ്കീർത്തനയുടെ ‘കാലം പറക്ക്ണ്’, 22ന് കൊല്ലം അനശ്വരയുടെ ‘ആകാശത്തൊരു കടൽ’, 23ന് തൃശൂർ സദ്‌ഗമയയുടെ ‘സൈറൺ’, 24ന് തിരുവനന്തപുരം അമ്മ തിയറ്ററിന്‍റെ ‘ഭഗത് സിംഗ്’, 25ന് തിരുവനന്തപുരം നടനകലയുടെ ‘നിറം’, 26ന് കാഞ്ഞിരപ്പിള്ളി അമലയുടെ ‘ഒറ്റ’, 27ന് വള്ളുവനാട് ബ്രഹ്‌മയുടെ ‘പകലിൽ മറഞ്ഞിരുന്നൊരാൾ’ എന്നിവ അവതരിപ്പിക്കും. 28ന് വൈകുന്നേരം 5.30ന് സമാപന സമ്മേളനവും സമ്മാനദാനവും. തുടർന്ന് പ്രദർശന നാടകമായി തിരുവനന്തപുരം സംഘകേളിയുടെ ‘ലക്ഷ്മണരേഖ’ അവതരിപ്പിക്കുമെന്ന് കെസിബിസി മീഡിയ കമ്മീഷൻ സെക്രട്ടറി ഫാ. സെബാസ്റ്റ്യൻ മിൽട്ടൺ കളപ്പുരക്കൽ അറിയിച്ചു. പ്രവേശനം പാസ് മൂലം. ഫോൺ: 8281054656, 9633249382.

കഞ്ചാവ് കേസ്: പ്രതിക്ക് രണ്ടു വർഷം തടവും 20,000 രൂപ പിഴയും

കൊച്ചി: 1.120 കിലോ കഞ്ചാവുമായി എറണാകുളം റെയിൽവേ പോലീസിന്‍റെ പിടിയിലായ എം.എച്ച്. മൊയ്തീന്(മൊയ്തു) വിചാരണ കോടതി രണ്ടു വർഷം തടവും 20,000 രൂപ പിഴയും ശിക്ഷിച്ചു. എറണാകുളം അഡീഷണൽ സെഷൻസ് ജഡ്ജി സുരേഷ് ബാബുവാണ് ശിക്ഷ വിധിച്ചത്. പ്രോസിക്യൂഷനു വേണ്ടി അഡീഷണൽ പബ്ലിക് പ്രോസിക്യൂട്ടർ ജോളി ജോർജ് കാരക്കുന്നേൽ ഹാജരായി. റെയിൽവേ പോലീസ് ഇൻസ്പെക്ടർ എം.എ. മുഹമ്മദാണ് കോടതിയിൽ കുറ്റപത്രം സമർപ്പിച്ചു.

ഭീഷണിപ്പെടുത്തി 60,000 രൂപ തട്ടിയ യുവാവ് അറസ്റ്റില്‍

കൊച്ചി: ഭീഷണിപ്പെടുത്തി പണം തട്ടിയ കേസില്‍ ഫോര്‍ട്ട്കൊച്ചി ബാവാ മന്‍സിലില്‍ വൈ.ബി. നിസാമുദീ(30)നെ എറണാകുളം സെന്‍ട്രല്‍ പോലീസ് അറസ്റ്റ് ചെയ്തു. കഴിഞ്ഞ 24ന് എറണാകുളം പത്മ ജംഗ്ഷന് സമീപമുള്ള മക്ഡൊണാള്‍ഡ് ഷോപ്പില്‍ അതിക്രമിച്ച് കയറി ഇരുമ്പുവടി വീശി കൊല്ലുമെന്ന് ഭീഷണിപ്പെടുത്തി കടയുടെ സേഫ് ലോക്കറിനുള്ളില്‍ ഉണ്ടായിരുന്ന 60,000 രൂപ തട്ടിയെടുക്കുകയായിരുന്നു. തോപ്പുംപടിയില്‍ നിന്ന് അറസ്റ്റ് ചെയ്ത പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.

വയോധികരുടെ വാട്ടർമെട്രോ യാത്ര 27ന്

ചെറായി: കടമക്കുടിയുടെ മനോഹര കാഴ്ചകള്‍ കാണാന്‍ വയോജനങ്ങള്‍ക്കായി വാട്ടര്‍ മെട്രോ യാത്ര. പള്ളിപ്പുറത്തെ വയോജനങ്ങള്‍ക്ക് തണല്‍ എന്ന സംഘടനയാണ് യാത്ര ഒരുക്കുന്നത്. 27നു രാവിലെ മുളവുകാട് ബോള്‍ഗാട്ടി ജെട്ടിയില്‍ നിന്നും ആരംഭിക്കുന്ന യാത്രയില്‍ വയോധികര്‍ക്കൊപ്പം കെ.എന്‍. ഉണ്ണികൃഷ്ണന്‍ എംഎല്‍എ ഉണ്ടാകുമെന്ന് സംഘടനയുടെ ചെയര്‍മാന്‍ വി.എക്‌സ്. ബനഡിക്ട് അറിയിച്ചു.

മെട്രോ സ്റ്റേഷനുകളില്‍ സ്മാര്‍ട്ട് പാര്‍ക്കിംഗ് സംവിധാനം ഒക്ടോബറിൽ

കുറഞ്ഞ നിരക്ക് അഞ്ചു രൂപ കൊച്ചി: കൊച്ചി മെട്രോ സ്റ്റേഷനുകളോടു ചേര്‍ന്നുള്ള എല്ലാ പാര്‍ക്കിംഗ് ഇടങ്ങളെയും ഏകീകൃത സംവിധാനത്തില്‍ കൊണ്ടുവന്നു പാര്‍ക്കിംഗ് സംവിധാനം സ്മാര്‍ട്ടാക്കുന്ന പദ്ധതി ഒക്ടോബറില്‍ യാഥാര്‍ഥ്യമാക്കാനൊരുങ്ങി കൊച്ചി മെട്രോ റെയില്‍ ലിമിറ്റഡ് (കെഎംആര്‍എല്‍). ഡിജിറ്റല്‍ സാങ്കേതിക സൗകര്യങ്ങള്‍ പ്രയോജനപ്പെടുത്തി കുറഞ്ഞ നിരക്കില്‍ സേവനം ലഭ്യമാക്കുന്നതാണ് പദ്ധതി. ടെൻഡര്‍ നടപടികള്‍ പൂര്‍ത്തിയായതായി കെഎംആര്‍എല്‍ അറിയിച്ചു. മെട്രോയുടെ ഓരോ പാര്‍ക്കിംഗ് സ്ഥലങ്ങളിലും വ്യത്യസ്ത കരാറുകാരായിരുന്നു പാര്‍ക്കിംഗ് ഫീസ് വാങ്ങിയിരുന്നത്. പുതിയ സംവിധാനത്തിലേക്ക് മാറുന്നതോടെ ഇത് ഒറ്റ കരാറിന്‍റെ കീഴില്‍ വരും. തോന്നുംപടി ഫീസ് ഇടാക്കിയിരുന്ന രീതിയിലും മാറ്റം വരും. മാത്രമല്ല ഓരോ പാര്‍ക്കിംഗ് സ്ഥലങ്ങളിലും ഡിജിറ്റല്‍ ബോര്‍ഡുകള്‍ സ്ഥാപിച്ച് ഒഴിവുള്ള സ്ഥലങ്ങളുടെ വിവരങ്ങള്‍ പ്രദര്‍ശിപ്പിക്കുകയും ചെയ്യും. കാറുകള്‍ക്കും മുച്ചക്രവാഹനങ്ങള്‍ക്കും ആദ്യ രണ്ടു മണിക്കൂറിന് 15 രൂപയും ഇരുചക്ര വാഹനങ്ങള്‍ക്ക് അഞ്ചുരൂപയുമാണ് പുതിയ സംവിധാനത്തില്‍ ഫീസ്. നാലു ചക്ര വാഹനങ്ങള്‍ക്ക് ഓരോ അധിക മണിക്കൂറിനും അഞ്ചു രൂപയും ഇരുചക്ര വാഹനങ്ങള്‍ക്ക് ഓരോ അധിക രണ്ട് മണിക്കൂറിന് അഞ്ചു രൂപയും അധികമായി നല്‍കേണ്ടിവരും. നിലവില്‍, കാറുകള്‍ക്ക് ആദ്യ രണ്ടു മണിക്കൂറിന് 35 രൂപയും ഇരുചക്ര വാഹനങ്ങള്‍ക്ക് 20 രൂപയുമാണ് വാങ്ങിയിരുന്നത്. ഓരോ അധിക മണിക്കൂറിനും കാറുകള്‍ക്ക് 20 രൂപയും ബൈക്കുകള്‍ക്ക് 10 രൂപയും അധികമായി ഈടാക്കുന്നുണ്ട്. പുതിയ സംവിധാനം നിലവില്‍ വരുന്നതോടെ നിരക്ക് കുറയുകയും പാര്‍ക്കിംഗ് ശാസ്ത്രീയമാകുകയും ചെയ്യും. അതോടൊപ്പം സ്ഥിരം യാത്രക്കാര്‍ക്ക് പ്രതിമാസ പാസ് സൗകര്യവും ഉണ്ടാകും. പുലര്‍ച്ചെ മെട്രോ സര്‍വീസ് ആരംഭിക്കുന്നതിന് അര മണിക്കൂര്‍ മുന്പും അവസാന ട്രെയിന്‍ യാത്ര അവസാനിപ്പിച്ച് ഒരു മണിക്കൂര്‍ പൂര്‍ത്തിയാകുന്നതു വരെയുമാണ് പാര്‍ക്കിംഗ് സൗകര്യം. അതുകഴിഞ്ഞ് വാഹനങ്ങള്‍ക്ക് പ്രവേശനം ഉണ്ടാകില്ല. ആലുവ, അമ്പാട്ടുകാവ്, കുസാറ്റ്, ഇടപ്പള്ളി, ചങ്ങമ്പുഴ പാര്‍ക്ക്, പാലാരിവട്ടം, കലൂര്‍, ഇളംകുളം, തൈക്കൂടം, പേട്ട, വടക്കേക്കോട്ട, തൃപ്പൂണിത്തുറ എന്നിവിടങ്ങളിലാണ് ആദ്യഘട്ടത്തില്‍ സ്മാര്‍ട്ട് പാര്‍ക്കിംഗ് സൗകര്യം വരുന്നത്. മറ്റ് സ്റ്റേഷനുകളില്‍ ഘട്ടഘട്ടമായി പാര്‍ക്കിംഗ് സൗകര്യം ഒരുക്കുമെന്നും കെഎംആര്‍എല്‍ വ്യക്തമാക്കി.

വ്യാപാരികളുടെ ഉന്നമനത്തിനായി മര്‍ച്ചന്‍റ്സ് യൂണിയന്‍

മൂവാറ്റുപുഴ: നഗരവികസനത്തിന്‍റെ ഭാഗമായി തകര്‍ച്ചയിലായിരിക്കുന്ന വ്യാപാരികളുടെ ഉന്നമനത്തിനായി മര്‍ച്ചന്‍റ്സ് യൂണിയന്‍ രംഗത്ത്. മര്‍ച്ചന്‍റ്സ് യൂണിയന്‍റെ നേതൃത്വത്തില്‍ ഡിസംബര്‍ ഒന്നു മുതല്‍ ജനുവരി ഒന്നുവരെ നീണ്ടുനില്‍ക്കുന്ന ഷോപ്പിംഗ് ഫെസ്റ്റിവല്‍ സംഘടിപ്പിക്കുമെന്ന് ചെയര്‍മാന്‍ നൗഷാദ് പ്ലാമൂട്ടില്‍, ജനറല്‍ സെക്രട്ടറി പി.എം. ഇബ്രാഹിം, വര്‍ക്കിംഗ് ചെയര്‍മാന്‍ ജിയോ തോട്ടം, ട്രഷറര്‍ ഷൈന്‍ എം. യോയാക്കി എന്നിവര്‍ പറഞ്ഞു. മൂവാറ്റുപുഴ ടൗണ്‍ ഷോപ്പിംഗ് ഫെസ്റ്റ് 2025 എന്ന പേരിലായിരിക്കും ഷോപ്പിംഗ് ഫെസ്റ്റിവല്‍ സംഘടിപ്പിക്കുന്നത്. മൂവാറ്റുപുഴ നഗരത്തിന്‍റെ പുരോഗതിക്കായി ഷോപ്പിംഗ് ഫെസ്റ്റിവല്‍ മാറ്റുന്നതിനാണ് മര്‍ച്ചന്‍സ് യൂണിയന്‍ ശ്രമിക്കുന്നതെന്ന് ഭാരവാഹികള്‍ പറഞ്ഞു.

കച്ചേരിത്താഴത്തെ പുതിയ പാലം : സ്ഥലമേറ്റെടുക്കൽ നടപടികൾക്ക് തുടക്കം

മൂവാറ്റുപുഴ: കച്ചേരിത്താഴത്ത് പുതിയ പാലം നിര്‍മിക്കുന്നതിനു ആവശ്യമായ സ്ഥലം ഏറ്റെടുക്കുന്നതിനുള്ള നടപടികള്‍ ആരംഭിച്ചതായി മാത്യു കുഴല്‍നാടന്‍ എംഎല്‍എ. മാറാടി വില്ലേജിലെ 11.64 ആര്‍സ് സ്ഥലമാണ് പദ്ധതിക്കായി ഏറ്റെടുക്കുന്നത്. സ്ഥലം ഏറ്റെടുപ്പിനായി സ്‌പെഷല്‍ തഹസില്‍ദാര്‍ (എല്‍എ), എന്‍എച്ച് 1 കാക്കനാടിനെ ചുമതലപ്പെടുത്തി ജില്ലാ കളക്ടര്‍ ഉത്തരവിറക്കി. രണ്ടു വരിയായി ഗതാഗതം സാധ്യമാക്കുന്ന രീതിയിലാണ് പുതിയ പാലം. കാല്‍നട യാത്രികര്‍ക്ക് നടപ്പാതയും ഉണ്ടാകും. നിലവില്‍ നാലുവരിയോടെ ടൗണ്‍ റോഡ് വികസന നിര്‍മാണ പ്രവൃത്തികള്‍ അന്തിമഘട്ടത്തിലേക്ക് നീങ്ങുകയാണെന്നും പുതിയ പാലം കൂടി യാഥാര്‍ഥ്യമാകുമ്പോള്‍ മൂവാറ്റുപുഴയിലെ ഗതാഗതക്കുരുക്കിന് ശാശ്വതമായ പരിഹാരം കണ്ടെത്താന്‍ കഴിയുമെന്ന വിശ്വാസമാണുള്ളതെന്നും എംഎല്‍എ വ്യക്തമാക്കി. മൂവാറ്റുപുഴയുടെ ഭാവി വികസന സാധ്യതകള്‍ കൂടി മുന്നില്‍ കണ്ടാണ് പദ്ധതി തയാറാക്കിയതെന്ന് എംഎല്‍എ പറഞ്ഞു. മൂവാറ്റുപുഴയുടെ മുഖച്ഛായ തന്നെ മാറ്റുന്ന വികസന പ്രവര്‍ത്തനങ്ങളാണ് നഗരത്തില്‍ നടന്നുകൊണ്ടിരിക്കുന്നതെന്നും എംഎല്‍എയുടെ ഈ പ്രവര്‍ത്തനങ്ങള്‍ക്ക് നഗരസഭയുടെ പൂര്‍ണപിന്തുണ ഉണ്ടെന്നും, മൂവാറ്റുപുഴയിലെ ഗതാഗതക്കുരുക്കുകള്‍ ഒഴിവാക്കുന്നതിനു വേണ്ടി എംഎല്‍എ സ്വീകരിക്കുന്ന എല്ലാം നടപടികള്‍ക്കൊപ്പവും നഗരസഭ ഉണ്ടാകുമെന്നും നഗരസഭാധ്യക്ഷന്‍ പി.പി. എല്‍ദോസും വ്യക്തമാക്കി.

ദുരന്തം വിട്ടൊഴിയാതെ വട്ടപ്പറന്പിൽ കുടുംബം : ഹരിദാസും യാത്രയായി...

വാഴക്കുളം: പിരളിമറ്റം പാണപാറ വട്ടപ്പറമ്പിൽ ഹരിദാസിന്‍റെ മരണം വീട്ടുകാർക്കും നാട്ടുകാർക്കും നടുക്കുന്ന മറ്റൊരു ദുരന്ത ഓർമ. 16 വർഷം മുന്പ് ഇടിമിന്നലിന്‍റെ രൂപത്തിലെത്തിയ ദുരന്തം ഹരിദാസിന്‍റെ മക്കളുടെ ജീവനെടുത്തിരുന്നു. ഇപ്പോൾ അപകട രൂപത്തിൽ ഹരിദാസിന്‍റെ ജീവനും നഷ്ടപ്പെട്ടു. വെള്ളിയാഴ്ച വൈകുന്നേരം വീട്ടിലേക്ക് മടങ്ങുകയായിരുന്ന മേസ്തിരി ജോലിക്കാരനായ ഹരിദാസ് സഞ്ചരിച്ചിരുന്ന സ്കൂട്ടറിൽ ലോറി തട്ടുകയായിരുന്നു. താഴെ വീണ ഹരിദാസ് ലോറിക്കടിയിൽപ്പെട്ട് മരിച്ചു. 2009 ഓഗസ്റ്റില്‍ നെടുമലയിലെ സ്വന്തം വീടിന് മുമ്പിൽ കട്ടിലിൽ ഹരിദാസും തറയില്‍ കിടന്ന് കുട്ടികളും ടെലിവിഷൻ കണ്ടു കൊണ്ടിരുന്നപ്പോഴാണ് ഇടിമിന്നലിന്‍റെ രൂപത്തിൽ ദുരന്തമെത്തിയത്. സ്കൂൾ വിദ്യാർഥികളായ അരുണ്‍ദാസും കൃഷ്ണദാസും അന്ന് ഇടിമിന്നലേറ്റ് മരിച്ചു. ഹരിദാസിന് ഗുരുതരമായി പൊള്ളലേല്‍ക്കുകയും ചെയ്തിരുന്നു. മക്കൾ നഷ്ടപ്പെട്ട വീടുപേക്ഷിച്ച് ഭാര്യ അജിതയ്ക്കും മകൾ അരുണിമയ്ക്കുമൊപ്പം ഹരിദാസ് പിന്നീട് വാടകവീട്ടിലേക്ക് മാറുകയായിരുന്നു. ഇപ്പോൾ ജോലി കഴിഞ്ഞ് വീട്ടിലേക്കുള്ള യാത്രയിൽ വിധിയുടെ വിളി കേട്ട് ഹരിദാസും യാത്രയായി.

ഇന്‍റർനെറ്റ് കേബിളുകൾ നശിപ്പിക്കുന്നതായി പരാതി

കോതമംഗലം: വടാട്ടുപാറയിലേക്കുള്ള ഇന്‍റർനെറ്റ് കേബിളുകൾ രാത്രിയുടെ മറവിൽ മുറിച്ച് നശിപ്പിക്കുന്നത് പതിവായെന്ന് പരാതി. ഇതുമായി ബന്ധപ്പെട്ട് കുട്ടമ്പുഴ, കോതമംഗലം പോലീസ് സ്റ്റേഷനുകളിൽ പരാതികൾ നൽകിയതായി പ്രദേശവാസികൾ പറഞ്ഞു. സാമൂഹ്യവിരുദ്ധർ കേബിളുകൾ നശിപ്പിക്കുന്നതു മൂലം ഗ്രാമവാസികൾക്ക് ഇന്‍റർനെറ്റ്, കേബിൾ ടിവി സംപ്രക്ഷണങ്ങൾ തടസപ്പെടുന്നുണ്ട്. ഇത് പലപ്പോഴും ബാങ്കുകൾ, പൊതുവിതരണ സ്ഥാപനങ്ങൾ, സ്കൂളുകൾ, ഫോറസ്റ്റ് റേഞ്ച് ഓഫീസുകൾ, ആരോഗ്യ സംരക്ഷണ കേന്ദ്രങ്ങൾ തുടങ്ങിയവയുടെ പ്രവർത്തനങ്ങളെയും പ്രതികൂലമായി ബാധിക്കുന്നുണ്ട്. പലതവണ പരാതി നൽകിയിട്ടും നടപടി ഉണ്ടായിട്ടില്ലെന്ന ആക്ഷേപവുമുണ്ട് . കുറ്റക്കാരെ കണ്ടെത്തി ശിക്ഷ നൽകണമെന്നും പ്രദേശത്തെ ജനകീയ കൂട്ടായ്മ ആവശ്യപ്പെട്ടു.

നിര്‍മല മെഡിക്കല്‍ സെന്‍ററില്‍ സെമിനാര്‍

മൂവാറ്റുപുഴ: ലോക ആത്മഹത്യ പ്രതിരോധ ദിനത്തോടനുബന്ധിച്ച് നിര്‍മല മെഡിക്കല്‍ സെന്‍റര്‍, ഇന്ത്യന്‍ മെഡിക്കല്‍ അസോസിയേഷന്‍, നിര്‍മല കോളജ് ഓഫ് നഴ്‌സിംഗ്, വിമല സോഷ്യല്‍ സെന്‍റര്‍ എന്നിവയുടെ സംയുക്താഭിമുഖ്യത്തില്‍ ആത്മഹത്യ പ്രവണത എന്ന വിഷയത്തെക്കുറിച്ച് സെമിനാർ സംഘടിപ്പിച്ചു. 24 മണിക്കൂറും പ്രവര്‍ത്തിക്കുന്ന സൗജന്യ ടെലിഫോണ്‍ ഹെല്‍പ്പ് ലൈന്‍ സേവനത്തിന്‍റെ ഉദ്ഘാടനവും ഇതോടൊപ്പം നടന്നു. നിർമല മെഡിക്കൽ സെന്‍ററിൽ മൂവാറ്റുപുഴ എസ്‌ഐ സുമിത ഉദ്ഘാടനം ചെയ്തു. എഫ്‌സിസി അസിസ്റ്റന്‍റ് പ്രൊവിന്‍ഷ്യാല്‍ സുപ്പീരിയര്‍ ഡോ. സിസ്റ്റര്‍ റാണി അധ്യക്ഷത വഹിച്ചു. ഐഎംഎ മൂവാറ്റുപുഴ പ്രസിഡന്‍റ് ഡോ. ഏബ്രഹാം മാത്യു മുഖ്യപ്രഭാഷണം നടത്തി. നിര്‍മല മെഡിക്കല്‍ സെന്‍ററര്‍ മെഡിക്കല്‍ സൂപ്രണ്ട് ഡോ. സിസ്റ്റര്‍ തെരേസ്, വിമല സോഷ്യല്‍ സെന്‍റര്‍ ഡയറക്ടര്‍ ഡോ. സിസ്റ്റര്‍ റാണി ജോസ്, നിര്‍മല മെഡിക്കല്‍ സെന്‍ററര്‍ അഡ്മിനിസ്‌ട്രേറ്റര്‍ സിസ്റ്റര്‍ ജെസി ജോസ്, മുന്‍ അഡ്മിനിസ്‌ട്രേറ്റര്‍ സിസ്റ്റര്‍ ജോവിയറ്റ്, നിര്‍മല മെഡിക്കല്‍ സെന്‍റര്‍ ജനറല്‍ മാനേജര്‍ പാട്രിക് എം. കല്ലട, പിആര്‍ഒ രതീഷ് കൃഷ്ണന്‍, മാനേജര്‍ - ഓപ്പറേഷന്‍സ് എസ്.എസ് കുമാര്‍ എന്നിവര്‍ പ്രസംഗിച്ചു. നിര്‍മല മെഡിക്കല്‍ സെന്‍റര്‍ സൈക്യാട്രി വകുപ്പ് മേധാവി ഡോ. സിസ്റ്റര്‍ ലിന്‍സ് മരിയ, സൈക്യാട്രിസ്റ്റ് ഡോ. അജിനി ഫിലിപ്, സൈക്കോളജിസ്റ്റ് ഗുഡ്‌വിന്‍ മൈക്കിള്‍, കൗണ്‍സിലര്‍ പി.എം. മേരി എന്നിവര്‍ വിഷയങ്ങൾ അവതരിപ്പിച്ചു. നിര്‍മല കോളജ് ഓഫ് നഴ്‌സിംഗ് വിദ്യാര്‍ഥികള്‍ മാനസികാരോഗ്യ അവബോധ സ്‌കിറ്റും അവതരിപ്പിച്ചു.

നീന്തൽ മത്സരം ‘ദി ഷാർക്ക് ചലഞ്ച്’ സംഘടിപ്പിച്ചു

കോതമംഗലം: കുന്നുകര അയൺ ഷാർക്ക് അക്വാട്ടിക് ക്ലബ്ബിന്‍റെ നേതൃത്വത്തിൽ നീന്തൽ മത്സരം ദി ഷാർക്ക് ചലഞ്ച് 2025 കോത മംഗലം എംഎ കോളജ് സ്വിമ്മിം ഗ് പൂളിൽ സംഘടിപ്പിച്ചു. ആന്‍റ ണി ജോൺ എംഎൽഎ ഉദ്ഘാടനം നിർവഹിച്ചു. മുനിസിപ്പൽ കൗൺസിലർ എ.ജി. ജോർജ്, എറണാകുളം ജില്ല അക്വാട്ടിക് അസോസിയേ ഷൻ പ്രസിഡന്‍റ് ജോർജ് ജോസ്, അയൺ ഷാർക്സ് അക്വാട്ടിക് ക്ലബ് ചെയർമാൻ മുഹമ്മദ് ഷാഫി, പ്രസിഡന്‍റ് അലക്സ് പി. ജോയ്, സെക്രട്ടറി പി.എസ്. സജിത്ത് എന്നിവർ പ്രസംഗിച്ചു.

‘തണലോണ’വുമായി ഫ്രീഡം ഓൺ വീൽ പാരാ പ്ലീജിക് അസോസിയേഷൻ

മൂവാറ്റുപുഴ: ചക്ര കസേരയില്‍ ജീവിതം നയിക്കുന്ന സഹോദരങ്ങളുടെ സംഘടനയായ ഫ്രീഡം ഓണ്‍ വീല്‍ പാരാ പ്ലീജിക് അസോസിയേഷന്‍റെ ആഭിമുഖ്യത്തില്‍ തണലോണം എന്ന പേരില്‍ മൂവാറ്റുപുഴയില്‍ ഓണാഘോഷ പരിപാടികള്‍ സംഘടിപ്പിച്ചു. കോട്ടയം, ഇടുക്കി, എറണാകുളം, ആലപ്പുഴ, തൃശൂര്‍ ജില്ലകളില്‍ നിന്നായി നൂറില്‍പരം പേര്‍ ആഘോഷത്തിന്‍റെ ഭാഗമായി. ചലച്ചിത്ര അക്കാദമി അംഗം എന്‍. അരുണ്‍ ഉദ്ഘാടനം ചെയ്തു. ഈ വര്‍ഷത്തെ ഡിസെബിലിറ്റി സ്റ്റേറ്റ് അവാര്‍ഡിന് അര്‍ഹനായ സൂരജ് കൊടുങ്ങല്ലൂരിനെ ആദരിച്ചു. എഴുത്തുകാരി ശ്രീപാര്‍വതി അധ്യക്ഷത വഹിച്ചു. ഭാരവാഹികളായ രാജീവ് ചെങ്ങന്നൂര്‍, ശരത്ത് പടിപ്പുര, ധന്യ മൂവാറ്റുപുഴ, ഉണ്ണി മാക്‌സ് കൂത്താട്ടുകുളം തുടങ്ങിയവര്‍ പ്രസംഗിച്ചു.

സിമന്‍റ് മിശ്രിതം കയറ്റിവന്ന ലോറി ചരിഞ്ഞു

കോതമംഗലം: കൊച്ചി-ധനുഷ്കോടി ദേശീയപാതയിൽ സിമന്‍റ് മിശ്രിതം കയറ്റിവന്ന ചരക്ക് ലോറി നിയന്ത്രണം വിട്ട് ചരിഞ്ഞു. നേര്യമംഗലം വില്ലാഞ്ചിറ കയറ്റത്തിന് സമീപമാണു ഇന്നലെ ഉച്ചയ്ക്ക് 12 ഓടെ ലോറി ചരിഞ്ഞത്. കയറ്റം കയറുന്നതിനിടെ നിയന്ത്രണം നഷ്ടമായ ലോറി പിറകിലേക്കു തെന്നിമാറുകയും റോഡിന്‍റെ വശം തകർന്ന് ചരിയുകയുമായിരുന്നു. ദേശീയപാത നിർമാണത്തിനായി കൊണ്ടുപോയ സിമന്‍റ് മിശ്രിതമായിരുന്നു വാഹനത്തിൽ.

സാംസ്കാരിക കലകളെ പരിചയപ്പെടുത്താൻ ഏകദിന സിന്പോസിയം

കോതമംഗലം : മാർ അത്തനേഷ്യസ് കോളജിലെ സോഷ്യോളജി വിഭാഗത്തിന്‍റെ ആഭിമുഖ്യത്തിൽ മൺമറഞ്ഞു പോകുന്ന സാംസ്കാരിക കലകളെ വീണ്ടെടുക്കുന്നതിനും അവയെ പുതുതലമുറയ്ക്ക് പരിചയപ്പെടുത്തുന്നതിനും വേണ്ടി സൻസ്കാര എന്ന പേരിൽ ഏകദിന സിന്പോസിയം നടത്തി. ഇന്ത്യൻ നോളഡ്ജ് സിസ്റ്റത്തിന്‍റെ ഭാഗമായി നടന്ന പ്രോഗ്രാമിൽ പ്രശസ്ത നാടൻപാട്ട് കലാകാരൻ അജിത് മലേരി, സോപാന സംഗീതജ്ഞനും, എംഎ കോളജ് റിട്ട. അധ്യാപകനുമായ ഡോ. കെ. മോഹനൻ പിള്ള, പുള്ളുവൻ പാട്ട് ഗായികമാരായ ഉഷ രാമചന്ദ്രൻ, പ്രസന്ന എന്നിവർ ക്ലാസ് നയിച്ചു. ഇന്ത്യയുടെ തനതു പാരമ്പര്യം വിദ്യാർത്ഥികളെ ബോധ്യപ്പെടുത്തുന്നതിന്‍റെ ഭാഗമായി പാരമ്പര്യ വാദ്യോപകരണങ്ങളും,സാങ്കേതികതയും, ആനുകാലിക പ്രശ്നങ്ങളും ചർച്ച ചെയ്തു. പതിറ്റാണ്ടുകളുടെ പാരമ്പര്യമുള്ള ഭാരതത്തിന്‍റെ കലാ, സാംസ്‌കാരിക, വിജ്ഞാന വൈവിധ്യം വിശ്വമാകെ വ്യാപിപ്പിക്കാനുള്ള ഉത്തരവാദിത്തം പുതുതലമുറയിൽ നിക്ഷിപ്തമാണെന്ന് അഭിപ്രായമുയർന്നു. വകുപ്പ് മേധാവി ഷാരോൺ വി. ബാലകൃഷ്ണൻ, ടി.കെ. ഗ്രീഷ്മ, ജിൽജിത് രാജൻ എന്നിവർ നേതൃത്വം കൊടുത്തു.

മൂവാറ്റുപുഴ മലങ്കര കത്തോലിക്കാ രൂപത പഠനശിബിരം

മൂവാറ്റുപുഴ: സഭയിലെ പ്രഥമ എക്യുമെനിക്കല്‍ സുന്നഹദോസായ നിഖ്യാ സുന്നഹദോസിന്റെ 1700-ാം വാര്‍ഷികത്തോടനുബന്ധിച്ച് മൂവാറ്റുപുഴ മലങ്കര കത്തോലിക്കാ രൂപത പഠനശിബിരം സംഘടിപ്പിച്ചു. മൂവാറ്റുപുഴ സെന്‍റ് ജോസഫ് കത്തീഡ്രലില്‍ നടന്ന പഠനശിബിരം മലങ്കര ഓര്‍ത്തഡോക്‌സ് സഭ കണ്ടനാട്ഈസ്റ്റ് മെത്രാപ്പോലീത്ത ഡോ. തോമസ് മാര്‍ അത്തനാസിയോസ് ഉദ്ഘാടനം ചെയ്തു. മൂവാറ്റുപുഴ രൂപതാധ്യക്ഷന്‍ ഡോ. യൂഹാനോന്‍ മാര്‍ തെയോഡോഷ്യസ് സന്ദേശം നല്‍കി. തൃശൂര്‍ മേരിമാതാ സെമിനാരി അധ്യാപകന്‍ റവ. ഡോ. ലോറന്‍സ് തൈക്കാട്ടില്‍, മൂവാറ്റുപുഴ ഭദ്രാസന വൈദിക സമിതി സെക്രട്ടറി റവ. ഡോ. വര്‍ഗീസ് മഠത്തിക്കുന്നത്ത് എന്നിവര്‍ ക്ലാസുകള്‍ നയിച്ചു. ബഥനി സിസ്റ്റേഴ്‌സ് മൂവാറ്റുപുഴ പ്രോവിന്‍സിന്‍റെ പുതുതായി തെരഞ്ഞെടുക്കപ്പെട്ട പ്രൊവിന്‍ഷ്യാള്‍ മദര്‍ ടോമിനയേയും വിവിധ മേഖലകളില്‍ മികവ് തെളിയിച്ച വ്യക്തികളെയും ചടങ്ങില്‍ അനുമോദിച്ചു. ബഥനി ആശ്രമം നവജ്യോതി പ്രോവിന്‍ഷ്യാള്‍ റവ. ഡോ. ജോര്‍ജ് അയ്യനേത്ത്, വികാരി ജനറാള്‍ റവ. തോമസ് ഞാറക്കാട്ട് കോറെപ്പിസ്‌കോപ്പ, പാസ്റ്ററല്‍ കൗണ്‍സില്‍ സെക്രട്ടറി ചാക്കോ ടി. വര്‍ഗീസ് എന്നിവര്‍ പ്രസംഗിച്ചു. വൈദികരും സിസ്റ്റേഴ്‌സും ഇടവക പ്രതിനിധികളും ഉള്‍പ്പെടെ 200 പേരോളം പഠനശിബിരത്തില്‍ പങ്കെടുത്തു. തുടര്‍ന്ന് നടന്ന അജപാലന സമിതി യോഗത്തില്‍ കാലിക പ്രസക്തമായ വിഷയങ്ങള്‍ ചര്‍ച്ച ചെയ്തു.

കണ്ണീറ്റുമല അങ്കണവാടി ഉദ്ഘാടനം ചെയ്തു

പിറവം: നഗരസഭയിലെ പതിനാലാം വാർഡിലെ 50-ാം നമ്പർ അങ്കണവാടി സ്വന്തം കെട്ടിടത്തിലേക്ക് മാറ്റി പ്രവർത്തനമാരംഭിച്ചു. ഇടപ്പിള്ളിച്ചിറ കണ്ണീറ്റുമലയ്ക്ക് സമീപമുള്ള അങ്കണവാടി സ്വന്തമായി കെട്ടിടമില്ലാത്തതിനാൽ വർഷങ്ങളായി ഒരു ക്ലബ് കെട്ടിടത്തിലാണ് പ്രവർത്തിച്ചിരുന്നത്. ഒൻപത് കൊല്ലം മുമ്പ് നാട്ടുകാർ പിരിവെടുത്ത് മൂന്നു സെന്‍റോളം സ്ഥലം വാങ്ങിയെങ്കിലും കെട്ടിടം നിർമിക്കാനായില്ല. നഗരസഭ 19 ലക്ഷം രൂപ നീക്കിവച്ചാണ് ഇപ്പോൾ കെട്ടിടം നിർമ്മാണം പൂർത്തിയാക്കിയിരിക്കുന്നത്. നഗരസഭാ ചെയർപേഴ്സൺ അഡ്വ.ജൂലി സാബു പുതിയ മന്ദിരം ഉദ്ഘാടനം ചെയ്തു. വൈസ് ചെയർമാൻ കെ.പി. സലിം അധ്യക്ഷത വഹിച്ചു. സ്ഥിരംസമിതി അധ്യക്ഷരായ അഡ്വ. ബിമൽ ചന്ദ്രൻ, ഷൈനി ഏലിയാസ്, ഡിവിഷൻ കൗൺസിലർ ഡോ. അജേഷ് മനോഹർ, കൗൺസിലർമാരായ മോളി വലിയകട്ടയിൽ, പി.ഗിരീഷ് കുമാർ, ബാബു പാറയിൽ, ജോജിമോൻ ചാരുപ്ലാവിൽ, രമാ വിജയൻ, ഡോ. സഞ്ജിനി പ്രതീഷ്, ഐസിഡിഎസ് പ്രോഗ്രാം ഓഫീസർ സി. സുധ, സൂപ്പർവൈസർ റീസ രമ്യാ ഫ്രാൻസിസ് തുടങ്ങിയവർ പങ്കെടുത്തു.

വിദേശിയും സ്വദേശിയുമായ പഴങ്ങളുടെ വൈവിധ്യവുമായി ഡയസ് വർഗീസിന്‍റെ തോട്ടം

കൂത്താട്ടുകുളം: വിദേശിയും സ്വദേശിയുമായ പഴങ്ങളുടെ വൈവിധ്യം കണ്ടറിയണമെങ്കിൽ കുത്താട്ടുകുളം സ്വദേശി ഡയസിന്‍റെ വീട്ടിലെത്തിയാൽ മതി. കിഴകൊമ്പ് പാറയിൽ പീടികയിൽ ഡയസ് പി. വർഗീസും കുടുംബവും നൂറുകണക്കിന് ഫലവർഗങ്ങളുടെ നടുവിലാണ് താമസിക്കുന്നത്. വിവിധ രാജ്യങ്ങളിലെ വിവിധയിനം പൈനാപ്പിളുകൾ, അറുപതോളം ഇനം ജബോട്ടികാബ, അറുപതോളം ഇനം വാഴപ്പഴങ്ങൾ, അമ്പതോളം ഇനം പേര, മുന്നൂറിൽ പരം വിദേശ ഫല സസ്യങ്ങൾ എന്നിവ ഡയസിന്‍റെ കൃഷിയിടത്തിലുണ്ട്. ഇന്ത്യയിൽ തന്നെ വിരളമായി കായ്ക്കുന്ന ആഫ്രിക്കൻ ഉദാര വരെയുണ്ട്. ഒന്പതു വർഷത്തെ അധ്വാനത്തിന്‍റെ ഫലമായാണ് തന്‍റെ 75 സെന്‍റ് സ്ഥലത്തിൽ വിവിധ പഴവർഗ സസ്യങ്ങൾ നട്ടു വളർത്തിയത്. വിവിധ രാജ്യങ്ങളിലെ വിവിധയിനം പൈനാപ്പിളുകൾ കേരളത്തിൽ ഇവിടെ മാത്രമാണുള്ളതെന്ന് ഡയസ് പറഞ്ഞു. ലോകത്തിലെ നാല് അപൂർവ ഇനം പഴങ്ങളിൽ ഒന്നായ ഇന്തൊനീഷ്യൻ കെസുസുവും ഡയസിന്‍റെ ജേക്കബ്സ് ഓർച്ചാഡ്സ് ഫാമിലുണ്ട്. ഭാര്യ ഷീബയും മകൻ ജേക്കബും പൂർണപിന്തുണയുമായി ഡയിസിന്‍റെ ഒപ്പമുണ്ട്.

റോഡ് തുറന്നുനല്കി : ട്രാഫിക് എസ്ഐക്കെതിരെ അച്ചടക്ക നടപടി

മൂവാറ്റുപുഴ: നഗരത്തിലെ ടാറിംഗ് പൂര്‍ത്തിയാക്കിയ റോഡ് തുറന്നു നല്‍കിയ സംഭവത്തില്‍ ട്രാഫിക് എസ്‌ഐക്കെതിരെ അച്ചടക്ക നടപടി. ട്രാഫിക് എസ്‌ഐ കെ.പി. സിദ്ദിഖ് നാട മുറിച്ച് റോഡ് തുറന്നു കൊടുത്തത് ഉന്നത പോാലീസ് അധികാരികളെയും മറ്റും അറിയിക്കാതെയായിരുന്നു എന്നാണ് ആക്ഷേപം ഉയര്‍ന്നിരിക്കുന്നത്. സംഭവത്തില്‍ ഡിവൈഎസ്പി സിദ്ദിഖിനോട് വിശദീകരണം തേടി. രഹസ്യാന്വേഷണ വിഭാഗവും സംഭവത്തെക്കുറിച്ച് അന്വേഷണം നടത്തി റിപ്പോര്‍ട്ടു നല്‍കി. എംഎല്‍എയുടെ രാഷ്ട്രീയ നാടകത്തിനു എസ്‌ഐ കൂട്ടു നിന്നുവെന്ന് സിപിഎമ്മും ആരോപണം ഉയര്‍ത്തിയിരുന്നു. ഇതേത്തുടര്‍ന്ന് റൂറല്‍ ജില്ല പോലീസ് മേധാവിയുടെ നിര്‍ദേശ പ്രകാരമാണ് ഡിവൈഎസ്പി പി.എം. ബൈജു എസ്‌ഐയോടു വിശദീകരണം ആവശ്യപ്പെട്ടത്. ടാറിംഗ് പൂര്‍ത്തിയാക്കിയതോടെ കച്ചേരിത്താഴം മുതല്‍ പിഒ ജംഗ്ഷന്‍ വരെയുള്ള എംസി റോഡ് വെള്ളിയാഴ്ച തുറന്നു നല്‍കിയിരുന്നു. മാത്യു കുഴല്‍നാടന്‍ എംഎല്‍എ, നഗരസഭാധ്യക്ഷന്‍ പി.പി എല്‍ദോസ് എന്നിവരുടെ സാന്നിധ്യത്തില്‍ എംഎല്‍എയുടെ നിര്‍ദേശ പ്രകാരമാണ് ട്രാഫിക് എസ്‌ഐ കെ.പി. സിദ്ദിഖ് റോഡ് തുറന്നു നല്‍കിയത്. നഗര വികസനം പൂര്‍ത്തിയാകും മുന്‍പ് റോഡ് നാടകീയമായി തുറന്നു നല്‍കിയത് രാഷ്ട്രീയ നേട്ടത്തിന് ഉപയോഗിക്കാനാണെന്നു ചൂണ്ടിക്കാട്ടി സിപിഎം രംഗത്തു വന്നിരുന്നു.

‘അരങ്ങ് ' രൂപത കലോത്സവത്തിന് തുടക്കം

മൂവാറ്റുപുഴ : യുവദീപ്തി കെസിവൈഎം കോതമംഗലം രൂപത അണിയിച്ചൊരുക്കുന്ന അരങ്ങ് 2025 രൂപത കലോത്സവത്തിന് മുവാറ്റുപുഴ നിര്‍മല കോളജില്‍ തുടക്കം കുറിച്ചു. കോളജ് പ്രിന്‍സിപ്പല്‍ റവ. ഡോ. ജസ്റ്റിന്‍ കണ്ണാടന്‍ ഉദ്ഘാടനം നിര്‍വഹിച്ചു. രൂപത പ്രസിഡന്‍റ് സാവിയോ തോട്ടുപുറം നേതൃത്വം നല്‍കുന്ന കലോത്സവത്തിന്‍റെ ഉദ്ഘാടന സമ്മേളനത്തില്‍ രൂപത ഡയറക്ടര്‍ ഫാ. സെബാസ്റ്റ്യന്‍ വള്ളോപ്പിള്ളില്‍ ആമുഖപ്രഭാഷണം നടത്തി. നിര്‍മല കോളജ് ബര്‍സാര്‍ ഫാ. പോള്‍ കളത്തൂര്‍, കെസിവൈഎം രൂപത അസിസ്റ്റന്‍റ് ഡയറക്ടര്‍ ഫാ. ആന്‍റണി വിളയപ്പിള്ളില്‍, ആനിമേറ്റര്‍ റവ. സിസ്റ്റര്‍ റെറ്റി എഫ്‌സിസി എന്നിവര്‍ പങ്കെടുത്തു. രൂപത വൈസ് പ്രസിഡന്‍റ് ആന്‍മരിയ ജോസ് പതാക ഉയര്‍ത്തി. രണ്ട് ദിനങ്ങളിലായി നടക്കുന്ന കലോത്സവത്തില്‍ 14 വേദികളിലായി 17 മത്സരയിനങ്ങളില്‍ 3000ത്തോളം യുവജനങ്ങള്‍ പങ്കെടുക്കുന്നു.

ഗാർഹിക വാട്ടർ കണക്ഷന്‍റെ ദുരുപയോഗം ചോദ്യംചെയ്ത ആളെ മർദിച്ചതായി പരാതി

ഫോർട്ടുകൊച്ചി: ജല അഥോറിറ്റിയുടെ ഗാർഹിക കണക്ഷന്‍ ദുരുപയോഗം ചെയ്തത് ചോദ്യം ചെയ്തയാള്‍ക്ക് മര്‍ദനം. മുണ്ടംവേലി റസിഡന്‍റ്സ് അസോസിയേഷന്‍ ജോ. സെക്രട്ടറി കെ.എ. ഡിക്സനാണ് മര്‍ദനമേറ്റത്. മര്‍ദനത്തില്‍ പരിക്കേറ്റ ഡിക്സന്‍ പനയപ്പിള്ളിയിലെ സ്വകാര്യ ആശുപത്രിയില്‍ ചികിത്സയിലാണ്. മുണ്ടംവേലിയിലാണ് വാട്ടർ അഥോറിറ്റിയുടെ ഗാര്‍ഹിക കണക്ഷനില്‍ നിന്ന് ഹോസ് ഉപയോഗിച്ച് പ്ളാസ്റ്റിക്ക് ജാറുകളില്‍ നിറച്ച് വില്‍പന നടത്താന്‍ ശ്രമിച്ചതായി പരാതി ഉയര്‍ന്നത്.ഇത് മൊബൈലില്‍ ചിത്രീകരിക്കാന്‍ ശ്രമിച്ചതിനാണ് ഇതര സംസ്ഥാനക്കാരനായ വീട്ടുടമയും മക്കളും ചേര്‍ന്ന് ഡിക്സനെ മര്‍ദിച്ചത്.കുടിവെള്ള ക്ഷാമം നിലനില്‍ക്കുന്ന പ്രദേശത്ത് ഇത്തരത്തില്‍ ജലം ദുരുപയോഗം ചെയ്യുന്നതിനെതിരെ പല തവണ പരാതി നല്‍കിയെങ്കിലും നടപടിയുണ്ടായില്ലെന്ന് നാട്ടുകാർ പറയുന്നു. തെളിവുസഹിതം പരാതി നല്‍കാനുള്ള ശ്രമത്തിന്‍റെ ഭാഗമായാണ് ഡിക്സന്‍ വീഡിയോ ചിത്രീകരിച്ചത്.പരിസരവാസികള്‍ വിളിച്ചതിനെ തുടര്‍ന്ന് സ്ഥലത്തെത്തിയ പോലീസ് വെള്ളം നിറച്ച ജാറുകള്‍ അടങ്ങിയ വാന്‍ കസ്റ്റഡിയില്‍ എടുത്തെങ്കിലും അല്‍പ സമയത്തിനകം വിട്ടയച്ചത് സംശയത്തിനിടയാക്കി. പിന്നീട് റസിഡന്‍റ്സ് അസോസിയേഷന്‍ ഭാരവാഹികള്‍ പ്രതിഷേധിച്ചതോടെ വാന്‍ തിരിച്ച് വിളിച്ചെങ്കിലും ജാറുകള്‍ ഉണ്ടായില്ല. ഇത് സംബന്ധിച്ച് പരാതി ഇല്ലാത്തതിനാലാണ് വാന്‍ വിട്ടയച്ചതെന്ന് പോലീസ് വ്യക്തമാക്കി. വാട്ടർ അഥോറിറ്റിയുടെ വെള്ളം ദുരുപയോഗം ചെയ്തിനെതിരെ നടപടിയുണ്ടാകുമെന്ന് അസി. എന്‍ജിനീയര്‍ പറഞ്ഞു.

യുവതിയുടെ നഷ്ടപ്പെട്ട സ്വർണ പാദസരം കണ്ടെത്തി

നെടുമ്പാശേരി: യുവതിയുടെ നഷ്ടപ്പെട്ട പാദസരം സിസിടിവി ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിലൂടെ പോലീസ് കണ്ടെത്തി. എയർപോർട്ടിൽ ജോലി ചെയ്യുന്ന അക്ഷയയുടെ ഒരു പവന്‍റെ സ്വർണ പാദസരമാണ് നഷ്ടപ്പെട്ടത്. പലയിടത്തും തെരഞ്ഞെങ്കിലും കണ്ടെത്താനാകാത്തതിനെ തുടർന്ന് നെടുമ്പാശേരി പോലീസിൽ പരാതി നൽകുകയായിരുന്നു. സിസിടിവി ദൃശ്യങ്ങൾ കേന്ദ്രീകരിച്ച് പോലീസ് നടത്തിയ അന്വേഷണത്തിൽ ഒരാൾ വഴിയിൽ നിന്ന് എന്തോ എടുത്തതായി കണ്ടെത്തി. തുടർന്ന് ഇയാളെ കണ്ടെത്തി പോലീസ് ചോദ്യം ചെയ്തു. പാദസരം കിട്ടിയെന്നും മുക്കുപണ്ടമാണെന്നു കരുതി വാഹനത്തിൽ സൂക്ഷിച്ചിരിക്കുകയാണെന്നും ഇയാൾ പറഞ്ഞു. തുടർന്ന് യുവതിയെ സ്റ്റേഷനിലേക്ക് വിളിച്ചു വരുത്തി പാദസരം കൈമാറുകയുമായിരുന്നു. ഇൻസ്പെക്ടർ എം.എച്ച് അനുരാജിന്‍റെ നേതൃത്വത്തിലായിരുന്നു അന്വേഷണം.

ഓടിക്കൊണ്ടിരുന്ന കാർ കത്തിനശിച്ചു

അമ്പലമുകൾ: അമ്പലമുകൾ കുഴിക്കാട് ഓടിക്കൊണ്ടിരുന്ന കാർ കത്തിനശിച്ചു. ഇന്നലെ രാത്രി 7.15 ഓടെയായിരുന്നു സംഭവം. പുത്തൻകുരിശ് സ്വദേശി സഞ്ചരിച്ച കാറാണ് കത്തിയത്. കാറിൻ ഒരാൾ മാത്രമാണുണ്ടായിരുന്നത്. പുകയുയർന്നപ്പോൾ തന്നെ കാറിൽ നിന്നുമിറങ്ങിയതിനാൽ ഇയാൾ പരിക്കേൽക്കാതെ രക്ഷപ്പെട്ടു. ബിപിസിഎല്ലിന്‍റെ ഗ്യാസ് പ്ലാന്‍റിനു സമീപത്തെ റോഡിലായിരുന്നു അപകടം. ബിപിസിഎല്ലിൽ നിന്നുള്ള അഗ്നിരക്ഷാസേനയെത്തി 7.30ഓടെ തീയണച്ചെങ്കിലും കാർ പൂർണമായും കത്തിനശിച്ചു.

ലൂര്‍ദ് ആശുപത്രിയില്‍ ലോക സെപ്‌സിസ് ദിനാചരണം

കൊച്ചി: ലൂര്‍ദ് ആശുപത്രിയില്‍ ലോക സെപ്‌സിസ് ദിനാചരണം നടത്തി. ലൂര്‍ദ് ഗ്രൂപ്പ് ഓഫ് ഇന്‍സ്റ്റിറ്റ്യൂഷന്‍സ് ഡയറക്ടര്‍ ഫാ. ജോര്‍ജ് സെക്വീര ഉദ്ഘാടനം ചെയ്തു. മെഡിക്കല്‍ ഡയറക്ടര്‍ ഡോ. പോള്‍ പുത്തൂരാന്‍, കണ്‍സള്‍ട്ടന്‍റ് പള്‍മനോളജിസ്റ്റ് ഡോ. അമിത് പി. ജോസ്, ജനറല്‍ മെഡിസിന്‍ വിഭാഗം മേധാവി ഡോ. സുനു കുര്യന്‍, ക്രിട്ടിക്കല്‍ കെയര്‍ വിഭാഗം മേധാവി ഡോ. വി. ജ്യോതിസ്, സീനിയര്‍ കണ്‍സള്‍ട്ടന്‍റ് ഡോ. ഇന്ദു രാജീവ് എന്നിവര്‍ പ്രസംഗിച്ചു. വിദ്യാര്‍ഥികള്‍ക്കായി ക്വിസ് മത്സരം നടത്തി. അസോസിയേറ്റ് ഡയറക്ടര്‍ ഫാ.വിമല്‍ ഫ്രാന്‍സിസ്, ഫാ. സോനു അംബ്രോസ്, ഫാ. ആന്‍റണി റാഫേല്‍ കോമരംചാത്ത്, ഡോ. പ്രതിഭ കൃഷ്ണപിള്ള എന്നിവര്‍ നേതൃത്വം നല്‍കി.

എംഡിഎംഎ: രണ്ടിടങ്ങളിലായി രണ്ടുപേര്‍ അറസ്റ്റില്‍

കൊച്ചി: നഗരത്തിലെ രണ്ടിടങ്ങളിലായി ഡാന്‍സാഫ് സംഘം നടത്തിയ പരിശോധനയില്‍ വില്പനയ്ക്കെത്തിച്ച എംഡിഎംഎയുമായി രണ്ടു പേര്‍ അറസ്റ്റില്‍. എറണാകുളം തൃക്കാക്കര നോര്‍ത്ത് മുട്ടാര്‍ തുരുത്തുമ്മേല്‍ വീട്ടില്‍ സഫലി(33)നെ എളമക്കര പുന്നക്കല്‍ ഭാഗത്തു നിന്നാണ് ഡാന്‍സാഫ് സംഘം അറസ്റ്റ് ചെയ്തത്. ഇയാളില്‍ നിന്ന് 5.14 ഗ്രാം എംഡിഎംഎ കണ്ടെടുത്തു. 2.81 ഗ്രാം എംഡിഎംഎയുമായി എറണാകുളം തമ്മനം ചക്കരപ്പറമ്പ് കാണിയവേലി വീട്ടില്‍ തന്‍വീറി(26)നെയാണ് അറസ്റ്റ് ചെയ്തത്. നാര്‍ക്കോട്ടിക് സെല്‍ എസിപി കെ.എ. അബ്ദുള്‍ സലാമിന്‍റെ നേതൃത്വത്തില്‍ ഡാന്‍സാഫ് സംഘം നടത്തിയ പരിശോധനയിലാണ് ഇരുവരും പിടിയിലായത്.

ഭാര്യയുടെ കൈ തല്ലിയൊടിച്ച യുവാവ് പിടിയിൽ

അരൂർ: മർദിച്ച് ഭാര്യയുടെ കൈയൊടിച്ചയാൾ പിടിയിൽ. കുത്തിയതോട് പഞ്ചായത്ത് വാർഡ് ഒന്നിൽ പളളിത്തോട് മേനങ്കാട്ട് റോബിനെയാണ് (43) കുത്തിയതോട് പോലീസ് പിടികൂടിയത്. ഈ മാസം ഒന്പതിനാണ് കേസിനാസ്പദമായ സംഭവം. പിതാവുമായി വാക്കുതർക്കത്തിലേർപ്പെട്ട റോബിനെ പിന്തിരിപ്പിക്കാൻ ശ്രമിച്ചതിലുള്ള വൈരാഗ്യത്തിലാണ് ഭാര്യയെ ക്രൂരമായി മർദിച്ചത്. തുടർന്ന് തുറവൂർ താലൂക്ക് ആശുപത്രിയിൽ ചികിത്സ തേടിയ യുവതിയുടെ കൈവിരലിന്‍റെ എല്ലിന് പൊട്ടലുണ്ടായതായി കണ്ടെത്തി. യുവതിയുടെ പരാതിയുടെ അടിസ്ഥാനത്തിലാണ് റോബിനെ അറസ്റ്റ് ചെയ്തത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

വികസിത ഭാരതം എന്ന ലക്ഷ്യത്തിന് വികസിത കേരളം പ്രധാനം: ഗവർണർ

കൊച്ചി: വികസിത ഭാരതം എന്ന ലക്ഷ്യത്തിന് വികസിത കേരളം പ്രധാനമെന്നു ഗവർണർ രാജേന്ദ്ര ആർലേക്കർ. കേരളം വികസിക്കുമ്പോഴാണ് ഇന്ത്യ പൂർണമായി പുരോഗതി കൈവരിക്കുന്നതെന്നും അദ്ദേഹം പറഞ്ഞു. കൊച്ചി ജെയിൻ യൂണിവേഴ്സിറ്റിയുടെ ഫ്യൂച്വർ കേരള മിഷന്‍റെ ഭാഗമായുള്ള ലെക്ചർ സീരിസും ഐഡിയ ഫെസ്റ്റും ഉദ്ഘാടനം ചെയ്യുകയായിരുന്നു അദ്ദേഹം. യൂനപക്ഷ-ഭൂരിപക്ഷ വേർതിരിവുകളില്ലാതെ എല്ലാവരെയും ഉൾക്കൊള്ളുന്ന ഈ സമഗ്രമായ പുരോഗതിയാണ് നമ്മുടെ ലക്ഷ്യമെന്നും ഗവർണർ പറഞ്ഞു. എല്ലാ മാസവും പ്രമുഖർ പങ്കെടുക്കുന്ന പ്രഭാഷണ പരമ്പര കേരളത്തിന്‍റെ സുപ്രധാന വിഷയങ്ങൾ ചർച്ച ചെയ്യുമെന്ന് ഫ്യൂച്വർ കേരള മിഷൻ ചെയർമാൻ വേണു രാജാമണി പറഞ്ഞു. ജെയിൻ യൂണിവേഴ്സിറ്റി പ്രൊ വൈസ് ചാൻസലർ ഡോ. ജെ. ലത, പരീക്ഷാ കൺട്രോളർ ഡോ. മധു കുമാർ, ഫിനാൻസ് മേധാവി രാധാകൃഷ്ണൻ എന്നിവർ പ്രസംഗിച്ചു.

ബിൽജിത്തിന് യാത്രാമൊഴി

നെടുമ്പാശേരി: തീരാനൊമ്പരത്തിലും അവയവദാനത്തിലൂടെ നാടിന്‍റെ അഭിമാനമായ ബിൽജിത്തിന് കണ്ണീരിൽ കുതിർന്ന യാത്രാമൊഴി. ബിൽജിത്തിനെ അവസാനമായി ഒരു നോക്കു കാണാൻ ആയിരങ്ങളാണ് മള്ളുശേരിയിലെ വീട്ടിലേക്ക് ഒഴുകിയെത്തിയത്. വാഹനാപകടത്തിൽ മസ്തിഷ്ക മരണം സംഭവിച്ചതോടെ ഹൃദയമടക്കം എട്ട് അവയവങ്ങൾ ദാനം ചെയ്ത ബില്‍ജിത്ത് പാറക്കടവ് മള്ളുശേരി പാലമറ്റം വീട്ടില്‍ ബിജു-ലിന്‍റ ദമ്പതികളുടെ മൂത്ത മകനാണ്. കാലടി ആദിശങ്കര ഇന്‍സ്റ്റിറ്റ്യൂട്ട് ഓഫ് എൻജിനീയറിംഗ് ആന്‍ഡ് ടെക്‌നോളജിയിലെ ഒന്നാം വര്‍ഷ എൻജിനീയറിംഗ് വിദ്യാര്‍ഥിയുമായിരുന്നു. സെപ്റ്റംബർ രണ്ടിന് അങ്കമാലിയിൽ സുഹൃത്തിനെ കാണാനായി അത്താണിയിൽ നിന്ന് സ്കൂട്ടറിൽ സഞ്ചരിക്കുമ്പോൾ ദേശീയപാത കരിയാട് കവലയിൽ രാത്രി 8.30ഓടെ ലോറി ഇടിച്ചായിരുന്നു അപകടം. ഇടിയുടെ ആഘാതത്തില്‍ ബൈക്ക് നിയന്ത്രണം വിട്ട് പോസ്റ്റിലിടിച്ചു. ഗുരുതരമായി പരുക്കേറ്റ ബില്‍ജിത്തിനെ അങ്കമാലി എൽഎഫ് ആശുപത്രിയിലെ തീവ്രപരിചരണ വിഭാഗത്തിൽ പ്രവേശിപ്പിച്ചെങ്കിലും വെള്ളിയാഴ്ച മസ്തിഷ്‌ക മരണം സ്ഥിരീകരിക്കുകയായിരുന്നു. അതോടെ ബിൽജിത്തിന്‍റെ ഹൃദയവും, വൃക്കകൾ, കരള്‍, ചെറുകുടല്‍, പാന്‍ക്രിയാസ്, രണ്ടു നേത്രപടലങ്ങള്‍ എന്നീ എട്ട് അവയവങ്ങൾ ദാനം ചെയ്യാൻ ബന്ധുക്കൾ സന്നദ്ധത അറിയിക്കുകയായിരുന്നു. തുടർന്നാണ് വിദഗ്ദ ഡോക്ടർമാരുടെ സംഘം ശനിയാഴ്ച പുലർച്ചയോടെ അവയവങ്ങൾ നീക്കം ചെയ്യുകയും, മറ്റുള്ളവർക്ക് പകത്തു നൽകാൻ നടപടി സ്വീകരിക്കുകയും ചെയ്തത്. ശനിയാഴ്ച വൈകിട്ട് 2.30ഓടെ എൽഎഫ് ആശുപത്രിയിൽ നിന്ന് മൃതദേഹം മള്ളുശേരിയിലെ വീട്ടിലെത്തിച്ചപ്പോൾ സഹപാഠികളും, അധ്യാപകരും, ബന്ധുക്കളും, നാട്ടുകാരും, രാഷ്ട്രീയ, സാമൂഹിക, ജീവകാരുണ്യ മേഖലയിൽ പ്രവർത്തിക്കുന്നവരും, ജനപ്രതിനിധികളും അടക്കം നാടിന്‍റെ നാനാതുറകളിലുള്ളവർ അന്ത്യാഞ്ജലിയർപ്പിക്കാനെത്തി. മുക്കാൽ മണിക്കൂറോളം പൊതുദർശനത്തിനു വച്ച മൃതദേഹം വൻ ജനാവലിയുടെ സാന്നിധ്യത്തിലാണ് മള്ളുശേരി സെന്‍റ് ആന്‍റണീസ് പള്ളി സെമിത്തേരിയിൽ സംസ്കരിച്ചത്.

ആര്‍ദ്ര കേരളം : പള്ളുരുത്തിക്കും രായമംഗലത്തിനും പുരസ്‌കാരം

കൊച്ചി: ആരോഗ്യ മേഖലയില്‍ മികച്ച പ്രവര്‍ത്തനങ്ങള്‍ നടത്തിയ തദ്ദേശ സ്വയംഭരണ സ്ഥാപനങ്ങള്‍ക്കുള്ള ആര്‍ദ്രകേരളം പുരസ്‌കാരം പള്ളുരുത്തി ബ്ലോക്കിനും രായമംഗലം പഞ്ചായത്തിനും. മികച്ച ബ്ലോക്ക് പഞ്ചായത്തിന്‍റെ വിഭാഗത്തിലാണ് പള്ളുരുത്തിക്ക് പുരസ്‌കാരം ലഭിച്ചത്. മികച്ച പഞ്ചായത്ത് വിഭാഗത്തിലാണ് രായമംഗലത്തിന് പുരസ്‌കാരം. കഴിഞ്ഞ അഞ്ചു വര്‍ഷങ്ങളില്‍ നടപ്പാക്കിയ പദ്ധതികള്‍ പരിഗണിച്ചാണ് പുരസ്‌കാരം നല്‍കിയത്. പള്ളുരുത്തി കുടുംബാരോഗ്യ കേന്ദ്രത്തില്‍ ഒരു കോടിയോളം രൂപയുടെ വികസന പ്രവര്‍ത്തനങ്ങള്‍ നടപ്പാക്കിയതെന്ന് ഭരണസമിതി ഭാരവാഹികള്‍ പറഞ്ഞു. ഫിസിയോതെറാപ്പി സെന്‍റര്‍, അത്യാധുനിക ലബോറട്ടറി, എക്‌സ്റേ സംവിധാനം, 24 മണിക്കൂറും ഡോക്ടര്‍മാരുടെ സേവനം, കിടത്തി ചികിത്സ, സൗജന്യ മരുന്നു വിതരണം, സെക്കൻഡറി പാലിയേറ്റീവ് പരിചരണം, ശുചിത്വം തുടങ്ങി പ്രത്യേകതകള്‍ ഏറെയാണ് പള്ളുരുത്തി കുടുംബാരോഗ്യ കേന്ദ്രത്തില്‍. ആരോഗ്യരംഗത്തെ വിവിധ പദ്ധതികള്‍ക്കായി രണ്ടു കോടിയോളം രൂപയാണ് 2023-24 വര്‍ഷത്തില്‍ രായമംഗലം പഞ്ചായത്ത് നീക്കിവച്ചത്. പാലിയേറ്റീവ് രോഗികള്‍ക്ക് സമ്പൂര്‍ണ ആരോഗ്യ പരിരക്ഷ ഉറപ്പാക്കുന്നതോടൊപ്പം തന്നെ സഞ്ചരിക്കുന്ന ആശുപത്രി എന്ന നൂതന പദ്ധതിയും ഇവിടെ പ്രാവര്‍ത്തികമാക്കിയിട്ടുണ്ട്. ഡയാലിസിസ് രോഗികള്‍ക്കായി പ്രത്യേക ചികിത്സാ സഹായവും എറിത്രോപോയറ്റിന്‍ ഇന്‍ജെക്ഷനും ഡയാലിസിസ് കിറ്റും പഞ്ചായത്തിന്‍റെ നേതൃത്വത്തില്‍ ഉറപ്പാക്കി. നാഷണല്‍ ക്വാളിറ്റി അഷ്വറന്‍സ് സ്റ്റാന്‍ഡേര്‍ഡ് (എന്‍ക്യുഎഎസ്), കായകല്‍പ്പ്, സ്വരാജ് ട്രോഫി തുടങ്ങി നിരവധി പുരസ്‌കാരങ്ങള്‍ പഞ്ചായത്ത് കരസ്ഥമാക്കിയിട്ടുണ്ട്.

മുച്ചൂർകാവ് ക്ഷേത്രത്തിൽ കവർച്ച : ലക്ഷം രൂപയുടെ വസ്തുക്കൾ നഷ്ടപ്പെട്ടു

ഉദയംപേരൂർ: വലിയകുളം മുച്ചൂർകാവ് ക്ഷേത്രത്തിൽനിന്ന് 1,15,000 രൂപ വില വരുന്ന സാധനങ്ങൾ മോഷണം പോയി. വെള്ളിയാഴ്ച രാത്രി 7.30നും ശനിയാഴ്ച പുലർച്ചെ 4.50നുമിടയിലാണ് മോഷണം നടന്നതെന്നു കരുതുന്നു. മുറ്റമടിക്കാൻ വന്നയാളാണ് ക്ഷേത്രത്തിൽ മോഷണം നടന്നത് ശ്രദ്ധിച്ചത്. ഡോഗ് സ്ക്വാഡും വിരലടയാള വിദഗ്ധരും സ്ഥലത്തെത്തി പരിശോധന നടത്തി. ഉദയംപേരൂർ പോലീസ് കേസെടുത്ത് അന്വേഷണമാരംഭിച്ചു. ഉദയംപേരൂർ വലിയകുളത്തിന് സമീപത്തെ സപ്ലൈകോയുടെ വില്പനശാലയിലും മോഷണശ്രമം നടന്നിട്ടുണ്ട്. വില്പനശാലയുടെ ഷട്ടറിന്റെ താഴ് മോഷ്ടാക്കൾ തകർത്തെങ്കിലും ഇവിടെ നിന്ന് ഒന്നും നഷ്ടപ്പെട്ടിട്ടില്ല.

ലോറി സ്കൂട്ടറിലിടിച്ച് ‌ ഗൃഹനാഥൻ മരിച്ചു

വാഴക്കുളം:ലോറി സ്‌കൂട്ടറിലിടിച്ച് ഗൃഹനാഥൻ മരിച്ചു. കദളിക്കാട് പിരളിമറ്റം വട്ടപ്പറമ്പില്‍ വി.കെ. ഹരിദാസാണ് (58) മരിച്ചത്. വെള്ളിയാഴ്ച വൈകുന്നേരം 6.30ന് വെങ്ങല്ലൂര്‍ സിഗ്‌നല്‍ ജംഗ്ഷനിലായിരുന്നു അപകടം. ഹരിദാസ് തൊടുപുഴ ഭാഗത്തു നിന്നു വീട്ടിലേയ്ക്ക് വരുമ്പോൾ വെങ്ങല്ലൂര്‍ സിഗ്‌നല്‍ ജംഗ്ഷനിൽ പിന്നാലെയെത്തിയ ലോറി കോലാനി ഭാഗത്തേക്ക് തിരിയുന്നതിനിടെ സ്‌കൂട്ടറില്‍ തട്ടുകയായിരുന്നു. ഇടിയുടെ ആഘാതത്തില്‍ റോഡില്‍ വീണ ഹരിദാസിന്‍റെ ദേഹത്ത് കൂടി ലോറിയുടെ ചക്രങ്ങള്‍ കയറിയിറങ്ങി. സമീപത്തെ സ്വകാര്യ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. സംസ്കാരം നടത്തി. ഭാര്യ: അജിത. മകള്‍: അരുണിമ. 2009 ഓഗസ്റ്റില്‍ വീടിന് മുന്നിലെ തറയില്‍ കിടക്കുകയായിരുന്ന ഹരിദാസിന്‍റെ മക്കൾ സ്കൂൾ വിദ്യാർഥികളായ അരുണ്‍ദാസും കൃഷ്ണദാസും ഇടിമിന്നലേറ്റ് മരിച്ചിരുന്നു. ഹരിദാസിന് ഗുരുതരമായി പൊള്ളലേല്‍ക്കുകയും ചെയ്തിരുന്നു.

പെരിയാറിൽ അജ്ഞാത മുതദേഹം

ഏലൂർ: പെരിയാറിൽ അജ്ഞാത മൃതദേഹം കണ്ടെത്തി. ഇന്നലെ ഉച്ചയോടെയാണ് ഏലൂർ റെഗുലേറ്റർ കം ബ്രിഡ്ജീനു സമീപം പുഴയിൽ മൃതദേഹം കണ്ടെത്തിയത്. ഏലൂർ അഗ്നിരക്ഷാ നിലയം റബ്ബർ ഡെങ്കിൾ ഉപയോഗിച്ച് കരയ്ക്കെത്തിച്ച മൃതദേഹത്തിന് രണ്ടു ദിവസത്തിൽ കൂടുതൽ പഴക്കമുള്ളതായി ഉദ്യോഗസ്ഥർ പറഞ്ഞു. ഏലൂർ പോലീസ് മേൽനടപടികൾക്കു ശേഷം പോസ്റ്റ്മോർട്ടത്തിനായി ആലുവ ജനറൽ ആശുപത്രിയിലേക്ക് മാറ്റി.

എന്‍റെ നാട് ജനകീയ കൂട്ടായ്മ ജനസമ്പർക്കയാത്ര പിണ്ടിമനയിൽ

കോതമംഗലം: എന്‍റെ നാട് ജനകീയ കൂട്ടായ്മയുടെ ഗാന്ധിദർശൻ പദ്ധതിയുടെ ഭാഗമായി പിണ്ടിമന പഞ്ചായത്തിൽ നടത്തിയ ജനസമ്പർക്കയാത്ര പഞ്ചായത്ത് അംഗം ബേസിൽ തണ്ണിക്കോട്ട് ഉദ്ഘാടനം ചെയ്തു. ബൂത്ത്‌ പ്രസിഡന്‍റ് അസനാർ പാറക്കൽ അധ്യക്ഷത വഹിച്ചു. എന്‍റെ നാട് ചെയർമാൻ ഷിബു തെക്കുംപുറം മുഖ്യപ്രഭാഷണം നടത്തി. അഹമ്മദ്കുട്ടി എൽദോസ് മൂലേക്കുടി, ബഷീർ നെടുവഞ്ചേരി, എസ്.എം. നാസർ, ജോർജ്കുട്ടി കണ്ണംകല്ലേൽ, മോളി ജോസഫ് എന്നിവർ പ്രസംഗിച്ചു. തുടർന്ന് നടത്തിയ ജനസമ്പർക്ക യാത്ര ആലുംചുവട് മേഖലയിൽ ഭവന സന്ദർശനവും നടത്തി.

ട്രാൻസ്ഫോർമർ സ്ഥാപിക്കുന്നതിനുള്ള ജോലികൾ പുനരാരംഭിച്ചു

കൂത്താട്ടുകുളം: അമ്പലക്കുളം റോഡിൽ ട്രാൻസ്ഫോർമർ സ്ഥാപിക്കുന്നതിനുള്ള ജോലികൾ പുനരാരംഭിച്ചു. പ്രദേശത്തെ വോൾട്ടേജ് ക്ഷാമം പരിഹരിക്കുന്നതിന്‍റെ ഭാഗമായി ട്രാൻസ്ഫോർമർ സ്ഥാപിക്കുന്നതിന് ഹൈടെൻഷൻ വൈദ്യുതി ലൈനുകൾ വലിക്കുന്ന ജോലികൾ നടന്നു വരികയായിരുന്നു. ഇതിന്‍റെ ഭാഗമായി കഴിഞ്ഞദിവസം ഹൈസ്കൂൾ റോഡിൽ വൈദ്യുതി പോസ്റ്റുകൾ പുനഃസ്ഥാപിക്കാൻ ശ്രമിക്കുന്നതിനിടെ വലിയ ഗതാഗതക്കുരുക്ക് ഉണ്ടായി. തുടർന്നു കെഎസ്ഇബി, വൈദ്യുതി പോസ്റ്റ് പുനസ്ഥാപിക്കുന്നതുമായി ബന്ധപ്പെട്ട ജോലികൾ നിർത്തിവയ്ക്കുകയായിരുന്നു. പോസ്റ്റുകൾ മാറ്റുന്ന സമയത്ത് പ്രദേശത്തെ ഗതാഗതം നിയന്ത്രിക്കാൻ പോലീസോ മറ്റ് സംവിധാനങ്ങളോ ഇല്ലാതെ വന്നതോടെയാണ് ഗതാഗതക്കുരുക്കുണ്ടായത്. എന്നാൽ ഇക്കുറി യാതൊരു ആക്ഷേപങ്ങൾക്കും ഇടം നൽകാതെയാണ് പോസ്റ്റുകൾ മാറ്റുന്ന പ്രവർത്തനങ്ങൾ നടന്നത്.

സഭയുടെ ശക്തിയാകേണ്ടത് കുടുംബങ്ങള്‍: മോണ്‍. നെടുങ്ങാട്ട്

മാറിക: വെല്ലുവിളികള്‍ നേരിടുന്ന സഭയുടെ ശക്തിയായി നില കൊള്ളേണ്ടത് ധാര്‍മികതയിലും വിശ്വാസത്തിലും അടിയുറച്ച കുടുംബങ്ങളാണെന്ന് കോതമംഗലം രൂപത വികാരി ജനറാള്‍ മോണ്‍. വിന്‍സന്‍റ് നെടുങ്ങാട്ട്. ദീപിക ഫ്രണ്ട്‌സ് ക്ലബ്, ഫാമിലി അപ്പൊസ്തലേറ്റ് എന്നിവയുടെ മാറിക ഫൊറോനതല കണ്‍വന്‍ഷന്‍ ഉദ്ഘാടനം ചെയ്യുകയായിരുന്നു അദ്ദേഹം. ക്രൈസ്തവസഭയ്ക്കും ധാര്‍മികതയ്ക്കും ഉറച്ച പിന്തുണ നല്‍കുന്ന ഏക മാധ്യമം ദീപികയാണെന്നും അദ്ദേഹം പറഞ്ഞു. ഫൊറോന ഡയറക്ടര്‍ ഫാ.മാത്യു കോണിക്കല്‍ അധ്യക്ഷത വഹിച്ചു. ഡയറക്ടര്‍ ഫാ. ആന്‍റണി പുത്തന്‍കുളം, ദീപിക ജനറല്‍ മാനേജര്‍ സര്‍ക്കുലേഷന്‍ ഫാ. ജിനോ പുന്നമറ്റത്തില്‍, ഡിഎഫ്‌സി സംസ്ഥാന ഉപദേശക സമിതി ചെയര്‍മാന്‍ ജോയി നടുക്കുടി, സംസ്ഥാന പ്രസിഡന്‍റ് ലോറന്‍സ് അബ്രഹാം, ഫാമിലി അപ്പൊസ്തലേറ്റ് രൂപത പ്രസിഡന്‍റ് ഡിഗോള്‍ കെ. ജോര്‍ജ്, ഫൊറോന പ്രസിഡന്‍റുമാരായ ജോസഫ് മൂലശേരി, ജോണ്‍സന്‍ പൊന്നാട്ട്, രൂപത ജോയിന്‍റ് സെക്രട്ടറി തോമസ് കുണിഞ്ഞി, പി.വി. ജോസ് എന്നിവര്‍ പ്രസംഗിച്ചു. സിബി പൊതൂര്‍, പൗളി താന്നിക്കല്‍, സിന്‍സി തട്ടാറ, ജോണ്‍ വാഴയില്‍, സെലിന്‍ നടുവക്കുന്നേല്‍, ജോര്‍ജ് നെടുമരുംതുചാലില്‍, പോള്‍ ലൂയിസ്, പ്രഫ. ജോര്‍ജ് ആറ്റുപുറം എന്നിവര്‍ നേതൃത്വം നല്‍കി.

കുന്നത്തുനാട് എംഎൽഎയുടെ പുരസ്കാരം കെ. നോബിയ്ക്ക്

കോലഞ്ചേരി: കുന്നത്തുനാട് നിയോജക മണ്ഡലത്തിലെ മാതൃകാപരമായ പ്രവർത്തനങ്ങൾ നടത്തുന്ന ഉദ്യോഗസ്ഥർക്ക് എംഎൽഎ ഏർപ്പെടുത്തിയ അവാർഡ് ഓഫ് എക്സലൻസ് കോലഞ്ചേരി വിദ്യാഭ്യാസ ഉപജില്ല സീനിയർ സൂപ്രണ്ട് കെ. നോബിക്ക് സമ്മാനിച്ചു. കോലഞ്ചേരി വിദ്യാഭ്യാസ ഉപജില്ലാ ഓഫീസർ പി.ആർ. മേഖലയുടെ അധ്യക്ഷതയിൽ കൂടിയ യോഗത്തിൽ പി.വി. ശ്രീനിജിൻ എംഎൽഎയാണ് പുരസ്കാരം നൽകിയത്. ഹെഡ്മാസ്റ്റേഴ്സ് ഫോറം സെക്രട്ടറി അനിയൻ പി. ജോൺ, പിഡബ്ല്യുഡി എൻജിനീയർ കെ.സി. സുമിത, സബ് ട്രഷറി ഓഫീസർ ടി.പി. അജികുമാർ, ഫുഡ് സേഫ്റ്റി ഓഫീസർ രേഷ്മ രത്നാകരൻ, മണ്ണ് സംരക്ഷണ ഓഫീസർ എം.എസ്. സ്മിത, ഫോറം പ്രസിഡന്‍റ് സന്തോഷ് പി. പ്രഭാകർ എന്നിവർ പ്രസംഗിച്ചു.

മാർക്കറ്റിഗ് സൊസൈറ്റി പ്രവർത്തനം തുടങ്ങി

തിരുമാറാടി: പാമ്പാക്കുട ബ്ലോക്ക് പരിധിയിലെ കൃഷിക്കാരെ സംഘടിപ്പിച്ച് മലർവാടി ഫാർമേഴ്‌സ് പ്രൊഡ്യൂസർ കോ–ഓപ്പറേറ്റീവ് മാർക്കറ്റിഗ് സൊസൈറ്റി പ്രവർത്തനം ആരംഭിച്ചു. കാക്കൂർ സഹകരണ ബാങ്കിന്‍റെ നേതൃത്വത്തിൽ എൻസിഡിസി, മാർക്കറ്റ് ഫെഡ് സഹകരണത്തോടെയാണ് സൊസൈറ്റിയുടെ പ്രവർത്തനം നടക്കുക. ശാസ്ത്ര നേട്ടങ്ങൾ കാർഷിക മേഖലയിൽ പ്രയോഗിച്ച് ഉത്പാദനം വർധിപ്പിക്കുക, കാർഷിക വിളകൾ മൂല്യവർധിത ഉൽപ്പന്നങ്ങൾ തുടങ്ങിയവ വിപണനം ചെയ്യുക തുടങ്ങിയവയാണ് സൊസൈറ്റിയുടെ ലക്ഷ്യം. സൊസൈറ്റി പ്രവർത്തനം ബ്ലോക്ക് പഞ്ചായത്ത് പ്രസിഡന്‍റ് സ്‌മിത എൽദോസ് ഉദ്ഘാടനം ചെയ്തു. ബാങ്ക് പ്രസിഡന്‍റ് അനിൽ ചെറിയാൻ അധ്യക്ഷത വഹിച്ചു. മാർക്കറ്റ് ഫെഡ് പ്രൊജക്ട് കോഡിനേറ്റർ വി.ജി.കണ്ണൻ പദ്ധതി വിശദീകരിച്ചു. കാസ്കോ കമ്പനിയുടെ സോളാർ പാനൽ കമീഷനിംഗ് സഹകരണ അസി. രജിസ്ട്രാർ ജെയ്മോൻ യു. ചെറിയാൻ നിർവഹിച്ചു. കർഷിക സെമിനാർ പ്രഫ. കെ.പി. സുധീർ ഉദ്ഘാടനം ചെയ്തു. മൂല്യവർദ്ധിത ഉൽപ്പാദന രംഗത്ത് എൻസിഡിസിയുടെ പങ്കെന്ന വിഷയത്തിൽ എൻസിഡിസി അസി.ഡയറക്ടർ ശങ്കര നാരായണൻ ക്ലാസ് നയിച്ചു. മുൻ എംഎൽഎ എം.ജെ. ജേക്കബ്, പഞ്ചായത്ത് പ്രസിഡന്‍റ് സന്ധ്യമോൾ പ്രകാശ്, ജില്ലാ പഞ്ചായത്ത് അംഗം ഉല്ലാസ് തോമസ്, ബ്ലോക്ക് പഞ്ചായത്ത് അംഗം സിബി ജോർജ്, വർഗീസ് മാണി, സി.വി. ജോയി, സി.എം. വാസു, ബാങ്ക് സെക്രട്ടറി എം.ആർ. ബിജു, കൃഷി ഓഫിസർ സി.ഡി. സന്തോഷ് എന്നിവർ പ്രസംഗിച്ചു.

‘സയൻസ് എക്സ്പോ-2025’ സംഘടിപ്പിച്ചു

കോതമംഗലം: ശാസ്ത്ര സാങ്കേതിക രംഗത്തെ കുട്ടികളുടെ കഴിവുകളും കണ്ടുപിടുത്തങ്ങളും പ്രദർശിപ്പിക്കാൻ വേദിയൊരുക്കി ക്രിസ്തുജ്യോതി ഇന്‍റർനാഷണൽ സ്കൂളിൽ സയൻസ് എക്സ്പോ - 2025 സംഘടിപ്പിച്ചു. ഗ്രേഡ് ഒന്നു മുതൽ 11 വരെയുള്ള 250 ലധികം കുട്ടികൾ മത്സരത്തിലും പ്രദർശനത്തിലും പങ്കെടുത്തു. കെമിസ്ട്രി ബയോളജി ഫിസിക്സ് മാത്തമാറ്റിക്സ് സോഷ്യൽ സ്റ്റഡീസ് എന്നീ വിഭാഗങ്ങളിലാണ് മത്സരം സംഘടിപ്പിച്ചത്. ഐസിഎസ്‌സി ഗ്രേഡ് 10 ബോർഡ് പരീക്ഷയിൽ 96% മാർക്കോടെ ഉന്നത വിജയം നേടിയ കുര്യൻ ടോണി സയൻസ് എക്സ്പോ 2025 ഉദ്ഘാടനം ചെയ്തു. ചെറിയ പ്രായത്തിൽ തന്നെ ശാസ്ത്രസാങ്കേതിക കഴിവുകൾ കണ്ടെത്താനും വികസിപ്പിക്കാനും കുട്ടികൾക്ക് ലഭിക്കുന്ന അവസരങ്ങളാണ് ഇത്തരം പരിപാടികൾ എന്ന് സ്കൂൾ പ്രിൻസിപ്പൽ സോജൻ മാത്യു പറഞ്ഞു. സ്കൂൾ ഹെഡ് ബോയ് ഐസക്ക് കെ. ഐസക്, ഹെഡ് ഗേൾ എയ്ഞ്ചൽ മരിയ ആന്‍റണി, കുര്യൻ ടോണി, സയൻസ് ക്ലബ് പ്രസിഡന്‍റ് ജോയൽ ജോഷ്വാ, ജോയൽ ടോം, റേച്ചൽ സാറാ ജോർജ്, ടെസ എലിസബത്ത് എന്നിവർ പ്രസംഗിച്ചു. പ്രദർശനത്തിനും മത്സരത്തിനും സയൻസ് ക്ലബ് ഭാരവാഹികൾ സയൻസ് വിഭാഗം അധ്യാപകർ എന്നിവർ നേതൃത്വം നൽകി.

തെരുവു വിളക്കുകൾ മിഴിപൂട്ടി : ഇരുട്ടിൽ കോതമംഗലം

കോതമംഗലം: തെരുവു വിളക്കുകളും ഹൈമാസ്റ്റ് ലൈറ്റും തെളിയുന്നില്ല. കോതമംഗലം നഗരത്തിന്‍റെ ഹൃദയഭാഗം ഇരുട്ടിലായിട്ട് ആഴ്ചകൾ. പിഒ ജംഗ്ഷനില്‍ ലക്ഷങ്ങള്‍ മുടക്കി സ്ഥാപിച്ച ഹൈമാസ്റ്റ് ലൈറ്റ് തെളിയുന്നില്ല. റവന്യു ടവര്‍ പരിസരം മുതല്‍ കുരൂര്‍ പാലം വരേയും കോളജ് റോഡില്‍ ജവഹര്‍ തീയേറ്റര്‍ വരേയും ഉള്ള നഗര സിരാകേന്ദ്രത്തിലെ വഴിവിളക്കുകള്‍ കേടായിട്ട് നാളേറെയായി. വിരലിലെണ്ണാവുന്ന വിളക്കുകള്‍ മിന്നാമിനുങ്ങ് പോലെ ചിലപ്പോള്‍ പ്രകാശിക്കും. സന്ധ്യകഴിഞ്ഞാല്‍ വ്യാപാരസ്ഥാപനങ്ങളുടെ വെളിച്ചമാണ് ആളുകള്‍ക്ക് ഏക ആശ്വാസം. എട്ടരയോടെ മിക്കവാറും വ്യാപാരസ്ഥാപനങ്ങള്‍ അടയ്ക്കുന്നതോടെ പ്രദേശങ്ങള്‍ കൂരിരുട്ടിലാവും. വഴിവിളക്കുകള്‍ തെളിയാതിരുന്നപ്പോഴും പ്രകാശിച്ചിരുന്ന ഹൈമാസ്റ്റ് ലൈറ്റും കൂടി കേടായതോടെ പൊതുജനം ഇരുട്ടില്‍തപ്പുകയാണ്. വെളിച്ചം നല്‍കേണ്ട നഗരസഭയും കെഎസ്ഇബിയും പരസ്പരം പഴിചാരി ഉത്തരവാദിത്വത്തിൽനിന്ന് ഒഴിയുകയാണെന്ന ആക്ഷേപമുണ്ട്.

ഹൃദയത്തിന് കരുതലായി സെന്‍റ് മേരീസ് ആശുപത്രി

തൊടുപുഴ: ഇടുക്കി ജില്ലയില്‍ ഏറ്റവും കൂടുതല്‍ ആന്‍ജിയോപ്ലാസ്റ്റികള്‍ നടക്കുന്ന സൂപ്പര്‍ സ്പെഷാലിറ്റി ആശുപത്രിയെന്ന നേട്ടം തൊടുപുഴ സെന്‍റ് മേരീസ് ആശുപത്രി സ്വന്തമാക്കി. കഴിഞ്ഞ മാസം കോഴിക്കോട് നടന്ന ഇന്‍റര്‍വെന്‍ഷണല്‍ കാര്‍ഡിയോളജി കൗണ്‍സില്‍ ഓഫ് കേരളയുടെ സമ്മേളനത്തിലാണ് ഈ പ്രഖ്യാപനം ഉണ്ടായത്. ഏഴു പതിറ്റാണ്ടിലേറെയായി ആതുരസേവന രംഗത്ത് മുന്‍നിരയിലുള്ള ആശുപത്രിയിലെ ഹൃദ്രോഗ വിഭാഗത്തിന് നേതൃത്വം നല്‍കുന്നത് സംസ്ഥാനത്തെ സീനിയര്‍ കാര്‍ഡിയോളജിസ്റ്റായ ഡോ. മാത്യു ഏബ്രഹാം, സീനിയര്‍ ഇന്‍റര്‍വെന്‍ഷണല്‍ കാര്‍ഡിയോളജിസ്റ്റുമാരായ ഡോ. മുസ്ന ജമാല്‍, ഡോ. ബിജോയ് വി. ഏലിയാസ്, ക്ലിനിക്കല്‍ കാര്‍ഡിയോളജിസ്റ്റ് ഡോ. നിതിന്‍ പരീത് എന്നിവരാണ്. ഹൃദ്രോഗ നിര്‍ണയത്തിനായുള്ള എക്കോ കാര്‍ഡിയോഗ്രഫി, സ്ട്രെസ് എക്കോ കാര്‍ഡിയോഗ്രഫി, കോണ്‍ട്രാസ്റ്റ് എക്കോ കാര്‍ഡിയോഗ്രഫി, ട്രെഡ്മില്‍ ടെസ്റ്റ്, ഹോള്‍ട്ടര്‍, ഇഎല്‍ആര്‍, എബിപിഎം എന്നീ സൗകര്യങ്ങൾ ഇവിടെയുണ്ട്. അത്യാധുനിക കാത്ത്‌ലാബും കൊറോണറി കെയര്‍ യൂണിറ്റും 24 മണിക്കൂറും പ്രവര്‍ത്തന സജ്ജമാണ്. പ്രൈമറി ആന്‍ജിയോപ്ലാസ്റ്റി, കോംപ്ലക്സ് കൊറോണറി ആന്‍ജിയോപ്ലാസ്റ്റി, സിടിഒ, ബൈപ്യൂരിഫിക്കേഷന്‍ ആന്‍ജിയോപ്ലാസ്റ്റി, ഒസിടി ഇമേജിംഗ്, ഐഎബിപി എന്നീ അതിനൂതനമായ ചികിത്സാ സംവിധാനങ്ങളും ടെമ്പററി ആൻഡ് പെര്‍മനന്‍റ് പേസ്മേക്കര്‍ സൗകര്യങ്ങളും ഇവിടെ ലഭ്യമാണ്. സൂപ്പര്‍ സ്പെഷാലിറ്റി ചികിത്സ സാധാരണക്കാരിലേയ്ക്ക് എത്തിക്കുന്നതിനായി 1963-ല്‍ ഡോ. എബ്രഹാം തേക്കുംകാട്ടില്‍ സ്ഥാപിച്ച സെന്‍റ് മേരീസ് ആശുപത്രി ഇന്ന് ഇടുക്കിയിലെയും സമീപ ജില്ലകളിലെയും ജനങ്ങളുടെ ആശ്രയകേന്ദ്രമാണ്.

കോഴിപ്പിള്ളി ജനകീയ ആരോഗ്യ കേന്ദ്രം നവീകരിച്ചു

കോതമംഗലം: വാരപ്പെട്ടി പഞ്ചായത്ത്, കോഴിപ്പിള്ളി ജനകീയ ആരോഗ്യ കേന്ദ്രം 2025-26 വാര്‍ഷിക പദ്ധതിയില്‍ ഉള്‍പ്പെടുത്തി നവീകരിച്ചു. ആന്‍റണി ജോണ്‍ എംഎല്‍എ ഉദ്ഘാടനം നിര്‍വഹിച്ചു. പഞ്ചായത്ത് പ്രസിഡന്‍റ് പി.കെ. ചന്ദ്രശേഖരന്‍ നായര്‍ അധ്യക്ഷ വഹിച്ചു. വാര്‍ഡ് അംഗം പി.പി. കുട്ടന്‍, ബ്ലോക്ക് പഞ്ചായത്ത് വൈസ് പ്രസിഡന്‍റ് ഡയാന നോബി, പഞ്ചായത്ത് വൈസ് പ്രസിഡന്‍റ് ബിന്ദു ശശി, സ്ഥിരം സമിതി ചെയര്‍മാന്‍മാരായ ദീപ ഷാജു, കെ.എം. സയ്യിദ്, പഞ്ചായത്ത് അംഗങ്ങളായ പ്രിയ സന്തോഷ്, ഷജീ ബസി, പിആര്‍ഒ മാത്യൂസ് ജോയ്, ഹെല്‍ത്ത് സൂപ്പര്‍വൈസര്‍ മനോജ് മാത്യു എന്നിവർ പങ്കെടുത്തു.

കച്ചേരിത്താഴത്തെ ഗര്‍ത്തം അടയ്ക്കൽ : മുന്നൊരുക്ക പ്രവൃത്തികൾ ആരംഭിച്ചു

മൂവാറ്റുപുഴ: വിദഗ്ധ പരിശോധനകള്‍ക്കും അന്തിമ റിപ്പോര്‍ട്ടിനും ശേഷം മൂവാറ്റുപുഴ കച്ചേരിത്താഴത്തെ ഗര്‍ത്തം മൂടുന്നതിന് മുന്നോടിയായുള്ള പ്രവൃത്തികൾ‍ ആരംഭിച്ചു. ഗര്‍ത്തം എങ്ങനെ മൂടണം എന്നതിനെക്കുറിച്ചും ഇതിനുള്ള തുക സംബന്ധിച്ചും കഴിഞ്ഞ ദിവസം മാത്യു കുഴല്‍നാടന്‍ എംഎല്‍എയുടെ സാന്നിധ്യത്തിൽ തിരുവനന്തപുരത്തു നടന്ന കിഫ്ബി യോഗത്തില്‍ ധാരണയായി. കിഫ്ബി നിര്‍ദേശം അനുസരിച്ചാകും കുഴി മൂടുക. ഗര്‍ത്തം മൂടുന്നതിനു മുന്‍പായി ബലക്ഷയം സംഭവിച്ച കല്‍ക്കെട്ടുകൊണ്ടുള്ള പഴയ ഓവുചാൽ പൂര്‍ണമായും അടച്ചുപൂട്ടാനും തീരുമാനമായി. കുഴിയില്‍ കണ്ടെത്തിയ പഴയ ഓവുചാലുകൾക്ക് പകരം റോഡരികിലൂടെ കോണ്‍ക്രീറ്റ് പൈപ്പുകള്‍ സ്ഥാപിക്കുന്നതിനുള്ള ജോലികളാണ് ആരംഭിച്ചിരിക്കുന്നത്. ഇതിനായി കുഴിയുടെ സമീപത്ത് കൂറ്റന്‍ കോണ്‍ക്രീറ്റ് പൈപ്പ് സ്ഥാപിക്കുന്നതിനുള്ള മറ്റൊരു കുഴി കുഴിച്ചു. കച്ചേരിത്താഴത്ത് ജനത റോഡിനു ശേഷമുള്ള ഭാഗം പൂര്‍ണമായി അടച്ച ശേഷമാണ് കോണ്‍ക്രീറ്റ് പൈപ്പുകള്‍ സ്ഥാപിക്കുന്ന ജോലികള്‍ ആരംഭിച്ചത്. പഴയ ഓവുചാലുകൾ ഒഴിവാക്കുന്നതിനാല്‍ റോഡിന്‍റെ ഇരുവശത്തും പുതിയതായി നിര്‍മിച്ചിരിക്കുന്ന പ്രീ കാസ്റ്റ് ഡക്റ്റ് വഴിയുള്ള ഓവുചാലിന്‍റെ തുടര്‍ച്ചയായി പുഴയിലേക്ക് പുതിയ ഓവുചാലുകളുടെ നിര്‍മാണവും ആരംഭിച്ചു. റോഡിന്‍റെ ഒരു ഭാഗത്ത് രാജേശ്വരി ഹോട്ടലിനു മുന്‍പില്‍നിന്ന് കാന നേരേ പുഴയിലേക്ക് എത്തിക്കും. മറുവശത്ത് നഗരസഭ ഓഫിസിന്‍റെ അരികിലൂടെ പുഴയിലേക്ക് കോണ്‍ക്രീറ്റ് പൈപ്പുകള്‍ സ്ഥാപിക്കും. ഇതിനുള്ള അനുമതി നഗരസഭ നല്‍കിയിട്ടുണ്ട്. കോണ്‍ക്രീറ്റ് പൈപ്പുകള്‍ സ്ഥാപിച്ച് കാനകള്‍ ബന്ധിപ്പിച്ച ശേഷമായിരിക്കും വലിയ ഗര്‍ത്തം മൂടുന്ന ജോലികള്‍ ആരംഭിക്കുക.

മൂവാറ്റുപുഴ നഗരത്തിലെ നരകയാത്രയ്ക്ക് അറുതി

നാലുവരിപ്പാത തുറന്നു മൂവാറ്റുപുഴ: നഗര വികസനത്തിന്‍റെ ഭാഗമായി പി ഒ ജംഗ്ഷന്‍ മുതല്‍ കച്ചേരിത്താഴം വരെ ആദ്യഘട്ട ഡിബിഎം ടാറിംഗ് പൂര്‍ത്തിയാക്കിയ നാലുവരി പാത ഗതാഗതത്തിനായി തുറന്നു നല്‍കി. കഴിഞ്ഞ നാലുമാസമായി നഗരത്തിലെ ട്രാഫിക് കാര്യങ്ങള്‍ കുറ്റമറ്റ രീതിയില്‍ നിയന്ത്രിച്ച ട്രാഫിക് എസ്‌ഐ സിദ്ദിഖിനെയാണ് മാത്യു കുഴല്‍നാടന്‍ എംഎല്‍എ പുതിയ റോഡ് തുറന്നുകൊടുക്കാന്‍ ക്ഷണിച്ചത്. നഗരത്തില്‍ നാലുവരിപ്പാത തുറന്നതോടെ പബ്ലിക് ട്രാന്‍സ്‌പോര്‍ട്ടുകളും, ചെറുവാഹനങ്ങളും പുതിയ റോഡിലൂടെ കടത്തിവിട്ടു തുടങ്ങി. ഡിബിഎം നിലവാരത്തില്‍ 10 സെന്‍റി മീറ്റര്‍ ഘനത്തിലുള്ള ടാറിംഗ് പ്രവര്‍ത്തികളാണ് ഇപ്പോള്‍ പൂര്‍ത്തീകരിച്ചിരിക്കുന്നത് ഇതിനു മുകളിലായി അഞ്ച് സെന്‍റീമീറ്റര്‍ ഘനത്തില്‍ ബിസി നിലവാരത്തിലുള്ള ടാറിംഗും ഉണ്ടാകും. പിഒ ജംഗ്ഷനില്‍ തൊടുപുഴ റോഡുമായും കോട്ടയം റോഡുമായും പുതിയ റോഡ് ബന്ധിപ്പിക്കുന്ന ഭാഗങ്ങളിലെ ടാറിംഗ് തുടര്‍ ദിവസങ്ങളില്‍ ഉണ്ടാകും. ഈ സമയത്ത് ചെറിയ ഗതാഗത നിയന്ത്രണങ്ങള്‍ വേണ്ടി വരുമെന്നും എംഎല്‍എ പറഞ്ഞു. ചടങ്ങില്‍ മാത്യു കുഴല്‍നാടന്‍ എംഎല്‍എ, നഗരസഭാധ്യക്ഷന്‍ പി.പി. എല്‍ദോസ്, നഗരസഭ വൈസ് ചെയര്‍പേഴ്‌സണ്‍ സിനി ബിജു, കെആര്‍എഫ്ബി എക്‌സിക്യൂട്ടീവ് എന്‍ജിനീയര്‍ ജയരാജ്, മൂവാറ്റുപുഴ ടൗണ്‍ ക്ലബ് പ്രസിഡന്‍റ് ജോണ്‍സണ്‍ മാമലശേരി, നഗരസഭ സ്ഥിരം സമിതി അധ്യക്ഷന്‍ ജോസ് കുര്യാക്കോസ്, കെ.എം. സലിം, സാബു ജോണ്‍, കെ.എ. അബ്ദുല്‍ സലാം, സുബൈര്‍, ജോളി മണ്ണൂര്‍, മേരിക്കുട്ടി ചാക്കോ തുടങ്ങിയവര്‍ പങ്കെടുത്തു.

ത്രിഭംഗി ദേശീയ നൃത്തോത്സവം; സ്വാഗതസംഘം ഓഫീസ് തുറന്നു

അങ്കമാലി: കേരള സംഗീത നാടക അക്കാദമി അങ്കമാലി സി എസ്എ യുടെ സഹകരണത്തോടെ നടത്തുന്ന ത്രിഭംഗി ദേശീയ നൃത്തോത്സവത്തിന്‍റെ സ്വാഗതസംഘം ഓഫീസ് പ്രവർത്തനമാരംഭിച്ചു. ഫെസ്റ്റിവൽ മധ്യമേഖല ഡയറക്ടർ നർത്തകി ചിത്ര സുകുമാരൻ ഉദ്ഘാടനം നിർവഹിച്ചു. സിഎസ്എ വൈസ് പ്രസിഡന്‍റ് എം.പി. രാജൻ അധ്യക്ഷത വഹിച്ചു. ഇന്ത്യയിലെ വിവിധ സംസ്ഥാനങ്ങളിൽ നിന്നുള്ള യുവ പ്രൊഫഷണലുകളുടെ ക്ലാസിക്കൽ നൃത്തങ്ങളും സെമിനാറുകളും ത്രിഭംഗിയിൽ അവതരിക്കപ്പെടും.19, 20, 21 തീയതികളിലാണ് നൃത്തോത്സവം. ഫെസ്റ്റിവൽ അസിസ്റ്റന്‍റ് ഡയറക്ടർ ദീപ കർത്ത, സിഎസ്എ വൈസ് പ്രസിഡന്‍റ് അഡ്വ. കെ.കെ. ഷിബു, ജനറൽ സെക്രട്ടറി ടോണി പറമ്പി, ട്രഷറർ കെ.എൻ. വിഷ്ണു മാസ്റ്റർ എന്നിവർ പ്രസംഗിച്ചു.

മോഷണത്തിന് തയാറെടുക്കുന്നതിനിടെ രണ്ടുപേർ പിടിയിൽ

ആലങ്ങാട്: മോഷണത്തിന് തയാറെടുക്കുന്നതിനിടെ രണ്ട് പേർ പിടിയിലായി. ആസാം മോറിഗോൺ ഗുഗാവോനുള്ള റുഹൂൽ അമീൻ (27), നാഗാലാൻഡ് ധിമാപൂര് ഘംകരിയ ഖാസിം അലി (35) എന്നിവരെയാണ് ആലങ്ങാട് പോലീസ് പിടികൂടിയത്. ആലുവ തായിക്കാട്ടുകര ചവറുപാടം ഭാഗത്ത് മോഷണം നടത്താൻ ശ്രമിക്കുന്നതിനിടെ പോലീസിന് ലഭിച്ച രഹസ്യവിവരത്തെ തുടർന്നാണ് പിടിയിലായത്. ആലങ്ങാട് പോലീസ് സ്റ്റേഷൻ പരിധിയിലെ തിരുവാലൂർ, കോട്ടപ്പുറം, അടുവാതുരുത്ത്, മാളികംപീടിക തുടങ്ങിയ ഭാഗങ്ങളിൽ ഇവർ മോഷണം നടത്തിയിട്ടുണ്ട്. കഴിഞ്ഞ ജൂലൈയിൽ തിരുവാലൂർ ഭാഗത്തെ വീട്ടിൽ നിന്നും സീലിംഗ് ഫാനുകളുടെ മോട്ടോറുകൾ, മോട്ടോർ പമ്പുകൾ, നിലവിളക്ക്, കിണ്ടി, ഇലക്ട്രിക്, പ്ലംബിംഗ് ഫിറ്റിംഗുകൾ എന്നിവ ഉൾപ്പെടെ 1,93,000 വിലവരുന്ന വസ്തുക്കൾ മോഷണം നടത്തിയിരുന്നു. കൂടുതൽ സ്ഥലങ്ങളിൽ ഇവർ മോഷണം നടത്തിയിട്ടുണ്ടോ എന്ന് അന്വേഷിച്ചു വരുന്നു. ആലുവ ഡിവൈ എസ്പി ടി.ആർ. രാജേഷിന്‍റെ നേതൃത്വത്തിലുള്ള അന്വേഷണസംഘത്തിൽ ഇൻസ്പെക്ടർ പി.പി. ജസ്റ്റിൻ, എസ്ഐ മാരായ പ്രദീപ്, മുഹമ്മദ് അൻസാർ, സാജൻ, എഎസ്ഐ പ്രതീഷ്, എസ് സിപിഓമാരായ ഷാരോ, മുഹമ്മദ് അമീർ, മാഹിൻ ഷാ അബൂബക്കർ, ശ്രീകാന്ത്, സിപിഒ അജിത തിലകൻ എന്നിവരാണ് ഉണ്ടായിരുന്നത്.

കഞ്ചാവുമായി പിടിയിൽ

ചെറായി: നാലു ഗ്രാം കഞ്ചാവുമായി യുവാവ് മുനമ്പം പോലീസിന്‍റെ പിടിയിലായി. മുനമ്പം സ്വദേശി ആഷ്‌ലിൻ(23) ആണ് പിടിയിലായത്. കഴിഞ്ഞ രാത്രി പട്രോളിംഗിനിടെ മുനമ്പം ബീച്ച് ഭാഗത്തുനിന്ന് പിടികൂടിയ ഇയാളുടെ ദേഹപരിശോധനയിലാണ് കഞ്ചാവ് കണ്ടെത്തിയത്. കേസെടുത്തശേഷം പ്രതിയെ ജാമ്യത്തിൽ വിട്ടു.

മോഷ‌ണക്കേസ് പ്രതി പിടിയിൽ‌

അരൂർ: നിരവധി മോഷണക്കേസുകളിലെ പ്രതിയെ കുത്തിയതോട് പോലീസ് ഒളിസങ്കേതത്തിൽ നിന്നും പിടികൂടി. മുണ്ടൻവേലി പാലംപള്ളി പറമ്പിൽ അഭിലാഷ് ആന്‍റണിയേയാണ് കുത്തിയതോട് സിഐ അജയമോഹന്‍റെ നേതൃത്വത്തിലുള്ള സംഘം പ്രതി ഒളിവിൽ കഴിഞ്ഞിരുന്ന എരമല്ലൂരിലെ സങ്കേതത്തിൽ നിന്നും പിടികൂടിയത്. കുത്തിയതോട് പോലീസ് സ്റ്റേഷനിൽ രജിസ്റ്റർ ചെയ്ത് അടിപിടി കേസിൽ അറസ്റ്റിലായ പ്രതികളിൽ നിന്നുമാണ് ഇയാളെ കുറിച്ചുള്ള നിർണായക വിവരങ്ങൾ പോലീസിന് ലഭിച്ചത്. പ്രതിക്ക് നിലവിൽ എറണാകുളം സെൻട്രൽ, ഹിൽപാലസ്, കൊടുങ്ങല്ലുർ എന്നിവിടങ്ങളിൽ ബൈക്ക് മോഷണക്കേസുണ്ട്. കേരളത്തിലുടനീളം 10 ഓളം മോഷണക്കേസിലെ പ്രതിയുമാണ്. ഇയാളെ പിന്നീട് ഹിൽ പാലസ് പോലീസിന് കൈമാറി.

അഖിലേന്ത്യാ ഫൈവ്സ് ഫുട്ബോൾ ടൂർണമെന്‍റ്: പൂത്തോട്ട എസ്എൻ ലോ കോളജ് ജേതാക്കൾ

ഉദയംപേരൂർ: ഷൊർണൂർ അൽ-അമീൻ ലോ കോളജിൽ നടന്ന മൂന്നാമത് പ്രഭുദാസ് മെമ്മോറിയൽ അഖിലേന്ത്യാ ഫൈവ്സ് ഫുട്ബോൾ ടൂർണമെന്‍റിൽ പൂത്തോട്ട ശ്രീനാരായണ ലോ കോളജ് ജേതാക്കളായി. ഫൈനലിൽ കാലിക്കറ്റ് മർകസ് ലോ കോളജിനെതിരെ ഒന്നിനെതിരെ മൂന്ന് ഗോളുകൾ നേടിയാണ് കിരീടം നേടിയത്. എസ്എൻ ലോ കോളജിലെ അനന്തു എസ്.കൃഷ്ണനെ മികച്ച കളിക്കാരനായും സാമുവൽ ജോസഫിനെ മികച്ച ഗോൾകീപ്പറായും തെരഞ്ഞെടുത്തു. ഇന്ത്യയിലെ 32 ലോ കോളജുകൾ ടൂർണമെന്‍റിൽ പങ്കെടുത്തിരുന്നു.

പി.പി. തങ്കച്ചന് പ്രമുഖർ അന്ത്യാഞ്ജലിയർപ്പിച്ചു

പെരുന്പാവൂർ: അന്തരിച്ച മുതിർന്ന കോൺഗ്രസ് നേതാവും മുൻമന്ത്രിയുമായ പി.പി. തങ്കച്ചന് രാഷ്ട്രീയ സാംസ്കാരിക രംഗത്തെ പ്രമുഖർ അന്ത്യാഞ്ജലിയർപ്പിച്ചു. മുൻ കെപിസിസി പ്രസിഡന്‍റുമാരായ എം.എം. ഹസൻ, വി.എം. സുധീരൻ, ഡിസിസി പ്രസിഡന്‍റ് മുഹമ്മദ് ഷിയാസ്, മുസ്‌ലിം ലീഗ് ജില്ലാ ജനറൽ സെക്രട്ടറി വി.ഇ. അബ്ദുൾ ഗഫൂർ, ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടൻ, മെത്രാപ്പൊലീത്തമാരായ മാത്യൂസ് മാർ അഫ്രേം, ഏബ്രഹാം മാർ സേവേറിയോസ്, മർക്കോസ് മാർ ക്രിസോസ്റ്റമോസ്, കുര്യാക്കോസ് മാർ ക്ലീമീസ്, മാത്യൂസ് മാർ അന്തിമോസ്, ക്നാനായസഭ മെത്രാപ്പോലിത്ത കുര്യാക്കോസ് മാർ ഗ്രിഗോറിയോസ്, സിപിഎം സംസ്ഥാന സെക്രട്ടറിയറ്റ് അംഗം സി.എൻ. മോഹനൻ, ജില്ലാ സെക്രട്ടറി എസ്. സതീഷ്, പി.സി. ചാക്കോ, കെ.ഇ. ഇസ്മായിൽ, കെ.എൻ. ശബരിനാഥ്, ടി.യു. കുരുവിള, പി.സി. തോമസ്, ടി.പി. അബ്ദുൾ അസീസ്, തമ്പു ജോർജ്, പന്തളം സുധാകരൻ, ഡൊമനിക് പ്രസന്റേഷൻ, നാട്ടകം സുരേഷ്, കെ.പി. ധനപാലൻ, ജോസഫ് വാഴയ്ക്കൻ, ബി.എ. അബ്ദുൾ മുത്തലിബ്, ടോണി ചമ്മിണി, എൻ. വേണുഗോപാൽ, ഉല്ലാസ് തോമസ്, അബിൻ വർക്കി, ജെയ്‌സൺ ജോസഫ്, ഐ.കെ. രാജു, ടി.എം. സക്കീർ ഹുൈസൻ, എസ്. ശർമ, അഹമ്മദ് ദേവർകോവിൽ, ബിജെപി നേതാവ് എ.എൻ.രാധാകൃഷ്ണൻ, എം.സി.ദിലീപ് കുമാർ എന്നിവർ വസതിയിലെത്തി ആദരാഞ്ജലി അർപ്പിച്ചു.

അങ്കമാലി മേഖലയിലെ ബസ് സമരത്തിൽനിന്നും യൂണിയനുകൾ പിന്മാറണമെന്ന് ബസുടമകൾ

അങ്കമാലി: വേതന വർധനവ് ആവശ്യപ്പെട്ട് അങ്കമാലിയിൽ സ്വകാര്യ ബസ് ജീവനക്കാർ നടത്തുന്ന പണിമുടക്കിൽനിന്നും പിന്മാറണമെന്ന് പ്രൈവറ്റ് ബസ് ഓപ്പറേറ്റേഴ്സ് അസോസിയേഷൻ ആവശ്യപ്പെട്ടു. സ്വകാര്യബസുകൾ വലിയ പ്രതിസന്ധിയിൽ ആണെന്ന് ജീവനക്കാരെ ബോധ്യപ്പെടുത്തിയിട്ടുണ്ടെങ്കിലും യൂണിയനുകൾ തമ്മിലുള്ള കിടമത്സരം കൊണ്ടാണ് പ്രശ്നപരിഹാരം നീളുന്നതെന്ന് ബസുടമകൾ പറയുന്നു. 13 വർഷമായി വിദ്യാർഥികളുടെ തുച്ഛമായ ഒരു രൂപ മിനിമം ചാർജ് എന്നത് വർധിപ്പിക്കാൻ കഴിഞ്ഞ രണ്ടു വർഷമായി സംസ്ഥാന തലത്തിൽ നിരവധി പ്രക്ഷോഭങ്ങൾ നടത്തിവരികയാണെന്നും വിദ്യാർഥികളുടെ ചാർജ് വർധിപ്പിക്കാത്തതിനാൽ തങ്ങൾ പ്രതിസന്ധിയിലാണെന്നും അസോ. ഭാരവാഹികൾ പറയുന്നു. കൂലി വർധന നടപ്പാക്കാൻ കഴിയാത്ത സാഹചര്യമാണ് ഇപ്പോൾ നിലവിലുള്ളത്. അങ്കമാലിയിലെയും കാലടിയിലെയും വൻ ഗതാഗതക്കുരുക്ക് മൂലം ട്രിപ്പുകൾ പൂർത്തിയാക്കാൻ കഴിയാത്തതും വിദ്യാർഥികളുടെ എണ്ണത്തിലുണ്ടായ വർധനയും പ്രതിസന്ധിക്ക് ആക്കംകൂട്ടി. അന്യസംസ്ഥാന തൊഴിലാളികൾ ഉള്ളതുകൊണ്ട് മാത്രമാണ് കുറച്ചെങ്കിലും യാത്രക്കാരെ ഇപ്പോൾ കിട്ടുന്നതെന്നാണ് ബസുടമകൾ പറയുന്നത്. യൂണിയൻ നേതാക്കളുമായി നടത്തിയ ചർച്ചകളിലെല്ലാം വിദ്യാർഥികളുടെ ടിക്കറ്റ് ചാർജിൽ വർധന വരുത്തിയാൽ മാത്രമേ ബസ് വ്യവസായം നിലനിർത്താനും എന്നും വേതനം വർധിപ്പിക്കാനും കഴിയുകയുള്ളുവെന്നും അറിയിച്ചിട്ടുള്ളതായി അസോസിയേഷൻ ഭാരവാഹികളായ എ.പി. ജിബി, ബി.ഒ. ഡേവിസ്, കെ.സി. വിക്ടർ എന്നിവർ അറിയിച്ചു.

സീതാറാം യെച്ചൂരി അനുസ്മരണം

അങ്കമാലി: സിപിഎം ജനറൽ സെക്രട്ടറിയായിരിക്കെ മരണമടഞ്ഞ സീതാറാം യെച്ചൂരിയുടെ ഒന്നാം ചരമവാർഷികം ആചരിച്ചു. ലോക്കൽ കമ്മിറ്റിയുടെ നേതൃത്വത്തിൽ അങ്ങാടിക്കടവ് ജംഗ്ഷനിൽ സംഘടിപ്പിച്ച അനുസ്മരണ സമ്മേളനം ജില്ലാ കമ്മിറ്റി അംഗം അഡ്വ. കെ. കെ. ഷിബു ഉദ്ഘാടനം ചെയ്തു. ഏരിയാ കമ്മിറ്റിയംഗം സച്ചിൻ ഐ. കുര്യാക്കോസ് അധ്യക്ഷത വഹിച്ചു ലോക്കൽ സെക്രട്ടറി സജി വർഗീസ് നഗരസഭ പ്രതിപക്ഷ നേതാവ് ടി.വൈ. ഏല്യാസ്, പി.എ. അനീഷ്, കെ.കെ. വർഗീസ് എന്നിവർ പ്രസംഗിച്ചു.

എഴുപുന്ന-ചെല്ലാനം റോഡിൽ വൻതോതിൽ മാലിന്യം തള്ളുന്നു

അരൂർ : എഴുപുന്ന - ചെല്ലാനം റോഡിന്‍റെ പാതയോരങ്ങളിൽ പ്ലാസ്റ്റിക്ക് മാലിന്യങ്ങൾ ഉൾപ്പടെയുള്ള മാലിന്യങ്ങൾ തള്ളുന്നത് പതിവാകുന്നു. പലയിടത്തും റോഡിനു സമീപത്തുള്ള നടപ്പാതകളിലൂടെ നടക്കാൻ പോലുമാവാത്തത്ര ദുർഗന്ധമാണ് ഇവിടെ പലയിടത്തും അനുഭവപ്പെടുന്നത്. കോഴിയുടെ അവശിഷ്ടങ്ങളും മറ്റും നിറഞ്ഞ പ്ലാസ്റ്റിക്ക് ചാക്കുകളും കൊണ്ടുവന്നു റോഡരികിൽ നിക്ഷേപിക്കുന്നതിനാൽ പലയിടത്തും മൂക്കുപൊത്താതെ നടക്കാനാവാത്ത സ്ഥിതിയാണ്. പുലർച്ചേയും രാത്രികാലങ്ങളിലുമാണ് മാലിന്യങ്ങൾ കൊണ്ടുവന്നു തള്ളുന്നത്. മാസങ്ങളായി ചെല്ലാനം-എഴുപുന്ന റോഡിന്‍റെ ഒട്ടുമിക്ക ഭാഗത്തും വഴിവിളക്കുകൾ ഇല്ലെന്ന് യാത്രക്കാർ പറഞ്ഞു. ഈ അവസരം മുതലെടുത്താണ് പലരും മാലിന്യങ്ങൾ തള്ളുന്നത്. എഴുപുന്ന പഞ്ചായത്തിന്‍റെ പരിധിയിലുള്ള പാതയോരങ്ങളിലാണ് മാലിന്യങ്ങൾ കൊണ്ടുവന്നിടുന്നത്. ഇക്കാര്യത്തിൽ പഞ്ചായത്ത് കർശന നടപടി സ്വീകരിക്കണമെന്നാണ് യാത്രക്കാരുടെ ആവശ്യം.

തിരുനാൾ

തോപ്പില്‍ മേരി ക്വീന്‍ പള്ളിയില്‍ കൊച്ചി: തൃക്കാക്കര തോപ്പില്‍ മേരി ക്വീന്‍ ദേവാലയത്തില്‍ പരിശുദ്ധ കന്യകാമാതാവിന്‍റെ ജനന തിരുനാളിന് കൊടിയേറി. വികാരി ഫാ. തരിയന്‍ ഞാളിയത്ത് കൊടിയേറ്റി. ദിവ്യബലിയില്‍ കെസിവൈഎം സംസ്ഥാന ഡയറക്ടര്‍ ഫാ. ഡിറ്റോ കൂള മുഖ്യകാര്‍മികത്വം വഹിച്ചു. വികാരി ഫാ. തര്യന്‍ ഞാളിയത്ത്, റസിഡന്‍റ് പ്രീസ്റ്റ് ഫാ. സെലസ്റ്റിന്‍ ഇഞ്ചക്കല്‍, ഫാ. പീറ്റര്‍ കാരിച്ചിറ എന്നിവര്‍ സഹകര്‍മികരായിരുന്നു. വേസ്പര ദിനമായ ഇന്ന് വൈകീട്ട് അഞ്ചിന് രൂപം വെഞ്ചരിപ്പ്, കുര്‍ബാന, പ്രസുദേന്തി വാഴ്ച, തുടര്‍ന്ന് പ്രദക്ഷിണം. തിരുക്കര്‍മങ്ങളില്‍ നൈപുണ്യ ഇന്‍റര്‍നാഷണല്‍ സ്‌കൂള്‍ മാനേജര്‍ ഫാ. സൈമണ്‍ പള്ളുപ്പേട്ട മുഖ്യകാര്‍മികനായിരിക്കും. ഫാ ആന്‍റണി വടക്കേക്കര വചന സന്ദേശം നല്‍കും. തിരുനാള്‍ ദിനമായ നാളെ വൈകീട്ട് അഞ്ചിന് ആഘോഷമായ തിരുനാള്‍ ദിവ്യബലിയില്‍ ഫാ. ആന്‍റോ പാണാടന്‍ മുഖ്യ കാര്‍മികത്വം വഹിക്കും. ഫാ. വില്‍സണ്‍ തറയില്‍ സന്ദേശം നല്‍കും. ഇടവകയിലെ സീനിയര്‍ സിഎല്‍സി അംഗങ്ങളായ 86 പേരും അവരുടെ പങ്കാളികളുമാണ് തിരുനാള്‍ പ്രസുദേന്തിമാര്‍. ഗോതുരുത്ത് തെക്കേതുരുത്ത് പള്ളിയിൽ പറവൂർ : ഗോതുരുത്ത് തെക്കേതുരുത്ത് ദേവാലയത്തിൽ പരിശുദ്ധ വേളാങ്കണ്ണി മാതാവിന്‍റെ തിരുനാളിന് കൊടികയറി. ഫാ. ജാക്സൺ വലിയപറമ്പിൽ ദിവ്യബലിക്ക് മുഖ്യകാർമികനായി. ഫാ. വിജിൽ രാജ് വചന സന്ദേശം നൽകി. ഇന്ന് വൈകിട്ട് അഞ്ചിന് ദേവാലയത്തിലേക്ക് രൂപം എഴുന്നള്ളിക്കൽ, ജപമാല , ദിവ്യബലി. തുടർന്ന്‌ പ്രദക്ഷിണം ഉണ്ടായിരിക്കും. തിരുനാൾ ദിനമായ നാളെ രാവിലെ 10ന് ജപമാല. 10.30 ന് ആഘോഷമായ തിരുനാൾ ദിവ്യബലി. തുടർന്ന് പ്രദക്ഷിണം നേർച്ചസദ്യ വിതരണം എന്നിവ ഉണ്ടായിരിക്കും. വൈകിട്ട് ആറിന് രൂപം എടുത്തു വയ്ക്കൽ. തുടർന്ന് കലാസന്ധ്യയും ഉണ്ടായിരിക്കും. മറ്റൂർ സെന്‍റ് മേരീസ് പള്ളിയിൽ കാലടി : മറ്റൂർ സെന്‍റ് മേരീസ് ടൗൺ പള്ളിയിൽ തിരുനാൾ തുടങ്ങി. കാഞ്ഞൂർ ഫൊറോന വികാരി ജോയ് കണ്ണമ്പുഴ കൊടിയേറ്റി. ഇന്ന് വൈകീട്ട് ആറിന് കുർബാന തുടർന്ന് മറ്റൂർ ടൗൺ ചുറ്റി പ്രദക്ഷിണം, ആകാശ വിസ്മയ കാഴ്ചകൾ. നാളെ രാവിലെ 10ന് ആഘോഷമായ തിരുന്നാൾ പാട്ടുകുർബാന, പ്രസംഗം ,പ്രഭക്ഷിണം, രാത്രി ഏഴിന് വള്ളുവനാട് നാദം കമ്യൂണിക്കേഷൻസ് അവതരിപ്പിക്കുന്ന സാമൂഹ്യ നാടകം കാഴ്ചബംഗ്ലാവ് എന്നിവയുണ്ടാകും. മടപ്ലാതുരുത്ത് സെന്‍റ് ജോർജ് പള്ളിയിൽ പറവൂർ : മടപ്ലാതുരുത്ത് സെന്‍റ് ജോർജ് പള്ളിയിൽ പരിശുദ്ധ വേളാങ്കണ്ണി മാതാവിന്‍റെ ഊട്ടു തിരുനാളിന് കൊടിയേറി. റവ. ഡോ. ഫ്രാൻസിസ്കോ പടമാടൻ ദിവ്യബലിക്ക് മുഖ്യ കാർമികത്വം വഹിച്ചു. ഫാ. ജോസഫ് മാളിയേക്കൽ വചന സന്ദേശം നൽകി. ഇന്ന് വൈകിട്ട് 4.30ന് ജപമാല തുടർന്ന് ദിവ്യബലി, പ്രദക്ഷിണം എന്നിവ ഉണ്ടാകും. ഫാ. നിമേഷ് കാട്ടാശേരി മുഖ്യകാർമികനായിരിക്കും. ഫാ. പോൾ തോമസ് കളത്തിൽ വചന സന്ദേശം നൽകും. തിരുനാൾ ദിനമായ നാളെ രാവിലെ ഒന്പതിന് ജപമാല തുടർന്ന് ആഘോഷമായ തിരുനാൾ ദിവ്യബലിയും ഊട്ടു സദ്യ വിതരണവും. തിരുനാൾ ദിവ്യബലിക്ക് റവ. ഡോ. ആന്‍റണി ബിനോയ് അറക്കൽ മുഖ്യകാർമികനാകും. ഫാ. ക്ലോഡിൻ ബിവേര വചന സന്ദേശം നൽകും.

വീടു നിർമിച്ചു നൽകിയില്ല : ഗൃഹനാഥന്‍റെ പരാതിയിൽ കരാറുകാരനെതിരെ കേസ്

വൈപ്പിൻ : വീട് നിർമിക്കാൻ കരാർ എടുത്തയാൾ മുൻകൂർ പണം വാങ്ങിയിട്ടും വീട് നിർമിച്ചുനൽകാതെ വഞ്ചിച്ചുവെന്നാരോപിച്ച് ഗൃഹനാഥന്‍റെ പരാതിയിൽ കരാറുകാരനായ യുവാവിനെതിരേ കേസ്. പെരിന്തൽമണ്ണ കിഴട്ടൂർ കുരീക്കൽ മുഹമ്മദ് ഷാഫി(36) ക്കെതിരെ മുളവുകാട് പോലീസ് ആണ് കേസെടുത്തത്. തട്ടിപ്പിനിരയായ പനമ്പുകാട് സ്വദേശി വിനോദ് കുമാർ കൊച്ചി ഫസ്റ്റ് ക്ലാസ് ജുഡീഷ്യൽ മജിസ്ട്രേറ്റ് കോടതിയിൽ നൽകിയ ഹർജിയിൽ കോടതി നിർദ്ദേശപ്രകാരമാണ് കേസെടുത്തിരിക്കുന്നത്. മൂന്നുമാസത്തിനുള്ളിൽ 800 സ്ക്വയർ ഫീറ്റ് വീട് 14.4 ലക്ഷം രൂപയ്ക്ക് നിർമിച്ചു നൽകാമെന്ന് പറഞ്ഞ് കഴിഞ്ഞ ഡിസംബർ ഒന്നു മുതൽ വിവിധ ഘട്ടങ്ങളായി 8.5 ലക്ഷം രൂപ ആവലാതിക്കാരിൽ നിന്നും പ്രതി വാങ്ങിയിട്ടുണ്ടത്രേ. എന്നാൽ പറഞ്ഞ സമയം കഴിഞ്ഞിട്ടും വീട് പൂർത്തീകരിച്ച് നൽകാതിരുന്നതിനെ തുടർന്നാണ് വീട്ടുടമ കോടതിയെ സമീപിച്ചത്.

കണ്ടെയ്നർ ലോറികൾ അപകട ഭീഷണിയുയർത്തുന്നു

വൈപ്പിൻ: വീതി കുറഞ്ഞ തെക്കൻ മാലിപ്പുറം ബെൽബോ റോഡിലൂടെ പൊടിപടലങ്ങൾ പരത്തി അമിത വേഗതയിൽ കണ്ടെയ്നറുകൾ പായുന്നത് പ്രാദേശികവാസികൾക്ക് അപകടങ്ങളും ആരോഗ്യ പ്രശ്നങ്ങളും ഉണ്ടാക്കുന്നതായി ആക്ഷേപം. ഈ ഭാഗത്തുള്ള കണ്ടെയ്നർ യാർഡിലേക്ക് പോകുന്ന കണ്ടെയ്നർ ലോറികളാണ് പ്രശ്നക്കാർ. പഞ്ചായത്തിന്‍റെ ഭാഗത്തുനിന്നും അടിയന്തര നടപടികൾ വേണമെന്ന് കോൺഗ്രസ് വൈപ്പിൻ ബ്ലോക്ക് ജനറൽ സെക്രട്ടറി എ.എം. നവാസ് ആവശ്യപ്പെട്ടു.

വല്ലാര്‍പാടം മരിയന്‍ തീര്‍ഥാടനം നാളെ

കൊച്ചി: വല്ലാര്‍പാടം ബസിലിക്കയിലേക്കുള്ള 21 മത് മരിയന്‍ തീര്‍ഥാടനം ഞായറാഴ്ച നടക്കും. കിഴക്കന്‍ മേഖലയില്‍ നിന്നും വല്ലാര്‍പാടത്തേക്കുള്ള തീര്‍ഥാടനത്തിന്‍റെ ഉദ്ഘാടനം എറണാകുളം സെന്‍റ് ഫ്രാന്‍സിസ് അസീസി കത്തീഡ്രല്‍ അങ്കണത്തില്‍ വൈകുന്നേരം മൂന്നിന് വരാപ്പുഴ ആര്‍ച്ച് ബിഷപ് ഡോ. ജോസഫ് കളത്തിപ്പറമ്പില്‍ നിര്‍വഹിക്കും. ജൂബിലി കുരിശും വല്ലാര്‍പാടം തിരുനാളിന് ഉയര്‍ത്താനുള്ള പതാകയും ആര്‍ച്ച്ബിഷപില്‍ നിന്ന് അല്മായ നേതാക്കള്‍ ഏറ്റുവാങ്ങും. വൈപ്പിന്‍ ഗോശ്രീ ജംഗ്ഷനില്‍ ബിഷപ് ഡോ. പീറ്റര്‍ പറപ്പുള്ളി ജൂബിലി ലോഗോയും ദീപശിഖയും യുവജന സംഘടനാ പ്രതിനിധികള്‍ക്ക് കൈമാറുന്നതോടെ പടിഞ്ഞാറന്‍ മേഖലയില്‍ നിന്നുമുള്ള തീര്‍ഥാടനത്തിനും തുടക്കമാകും. തീര്‍ഥാടകരെ വല്ലാര്‍പാടം ബസിലിക്ക റെക്ടര്‍ ഫാ. ജെറോം ചമ്മിണിക്കോടത്തും ഇടവകജനങ്ങളും ചേര്‍ന്ന് സ്വീകരിക്കും. തുടര്‍ന്ന് ആര്‍ച്ച്ബിഷപ്പിന്‍റെ മുഖ്യകാര്‍മികത്വത്തില്‍ ദിവ്യബലി. കോട്ടപ്പുറം ബിഷപ് ഡോ. അംബ്രോസ് പുത്തന്‍വീട്ടില്‍ വചന സന്ദേശം നല്‍കും.

ഗോശ്രീ ബസുകളുടെ നഗരപ്രവേശനം: പ്രഖ്യാപിച്ച പെർമിറ്റുകൾ ഉടൻ അനുവദിക്കണമെന്ന്

വൈപ്പിൻ: ഗോശ്രീ മേഖലയിലെ 23 സ്വകാര്യ ബസുകൾക്ക് ഉടൻ നഗരപ്രവേശത്തിന് പെർമിറ്റ് അനുവദിക്കുമെന്ന വാഗ്ദാനം പാലിക്കണമെന്ന് ജില്ലാ കളക്ടറുടെ അധ്യക്ഷതയിൽ ചേർന്ന സ്പെഷൽ ആർടിഎ ബോർഡ് മീറ്റിംഗിൽ ഗോശ്രീ മനുഷ്യാവകാശ സംരക്ഷ സമിതി ആവശ്യപ്പെട്ടു. നിലവിൽ പെർമിറ്റ് അനുവദിച്ച കുടുങ്ങാശേരി-കാക്കനാട്, അയ്യമ്പിള്ളി-കലൂർ, എടവനക്കാട്-വൈറ്റില ഹബ് തുടങ്ങി നാലു ബസുകൾക്ക് ആർടിഒ സമയക്രമം നൽകാത്തതിനാൽ ഇനിയും സർവീസ് ആരംഭിക്കാൻ ആയിട്ടില്ല. പേരിന് അഞ്ച് ബസുകൾക്കു മാത്രമേ പെർമിറ്റും സമയക്രമവും നൽകിയിട്ടുള്ളൂവെന്ന് സമിതി ചെയർമാൻ പോൾ ജെ. മാമ്പിള്ളി ചൂണ്ടിക്കാട്ടി. ഈ സാഹചര്യത്തിൽ പെർമിറ്റുകൾ ഉടൻ അനുവദിക്കണമെന്ന് ആവശ്യപ്പെട്ട് കളക്ടർക്കും ആർടിഒക്കും സമിതി കഴിഞ്ഞ ദിവസം നിവേദനം നൽകിയിട്ടുണ്ടെന്നും ചെയർമാൻ അറിയിച്ചു.

പീഡന കേസിൽ പ്രതിക്ക് 20 വര്‍ഷം തടവും പിഴയും

കൊച്ചി: പീഡനകേസിലെ പ്രതി ആലുവ എടത്തല കാനത്തില്‍ വീട്ടില്‍ ശരത്തിനെ എറണാകുളം പോക്‌സോ കോടതി 20 വര്‍ഷത്തെ തടവിനും രണ്ടുലക്ഷം രൂപ പിഴയ്ക്കും ശിക്ഷിച്ചു. ഇന്‍സ്റ്റഗ്രാമിലുടെ പ്രായപൂര്‍ത്തിയാകാത്ത പെണ്‍കുട്ടിയെ പ്രലോഭിപ്പിച്ച് പീഡിപ്പിച്ച കേസിലാണ് പ്രതിയെ ജഡ്ജ് കെ.എന്‍. പ്രഭാകരന്‍ വിവിധ വകുപ്പുകളിലായി ശിക്ഷ വിധിച്ചത്. 2023ലാണ് കേസിനാസ്പദമായ സംഭവം. ആത്മഹത്യ ചെയ്യുമെന്ന് പേടിപ്പിച്ചായിരുന്നു പീഡനം. പ്രോസിക്യൂഷന് വേണ്ടി സ്പഷല്‍ പബ്ലിക് പ്രോസിക്യൂട്ടര്‍ പി.എ. ബിന്ദു ഹാജരായി.

വാഴക്കുളത്തെ യുവാവിന്‍റെ മരണം വാഹനാപകടത്തെത്തുടർന്ന്

വാഴക്കുളം: വഴിയിൽ അവശനിലയിൽ കണ്ടെത്തിയ യുവാവ് മരിച്ചത് വാഹനാപകടത്തെ തുടർന്നാണെന്ന് കല്ലൂർക്കാട് പോലീസ് സ്ഥിരീകരിച്ചു. കല്ലൂർക്കാട് ചാറ്റുപാറ പൊൻപനാൽ പ്രസന്നന്‍റെ മകൻ പ്രദീപ് (36) ആണ് മരിച്ചത്. ബുധനാഴ്ച രാത്രി പതിനൊന്നോടെ പാണംകുട്ടിപ്പാറ-തോണിക്കുഴി ലിങ്ക് റോഡിൽ നട്ടെല്ലിനും വാരിയെല്ലുകൾക്കും ഗുരുതരമായി പരിക്കേറ്റ് നിലയിലാണ് പ്രദീപിനെ പ്രദേശവാസികൾ കണ്ടത്. വിവരമറിയിച്ചതിനെ തുടർന്ന് കല്ലൂർക്കാട് അഗ്നിശമന സേനാംഗങ്ങളുടെ നേതൃത്വത്തിൽ പ്രദീപിനെ കാരിക്കോട് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. പെയിന്റിംഗ് തൊഴിലാളിയാണ് പ്രദീപ്. സംഭവം വാഹനാപകടമാണെന്ന നിഗമനത്തിലായിരുന്നു കല്ലൂർക്കാട് പോലീസ്. നാകപ്പുഴയിൽ ഓട്ടോമൊബൈൽ വർക്ക്ഷോപ്പ് നടത്തുന്ന പ്രദേശവാസിയായ ജോമിൻ ജോസിന്‍റെ കാറാണ് അപകടമുണ്ടാക്കിയതെന്ന് പോലീസ് പറഞ്ഞു. ലിങ്ക് റോഡിലെ വളവിൽ റോഡിൽ വീണു കിടക്കുകയായിരുന്ന പ്രദീപിന്‍റെ ദേഹത്തു കൂടി ജോമിൻ ഓടിച്ചിരുന്ന കാർ കയറിയിറങ്ങുകയായിരുന്നു. വഴിയിൽ ഒരാൾ വീണു കിടക്കുന്നു എന്ന് ഇയാൾ പലരെയും വിളിച്ചറിച്ചു. എന്നാൽ തന്‍റെ കാറാണ് അപകടമുണ്ടാക്കിയതെന്ന് ജോമിൻ തന്നെയാണ് ഇന്നലെ പുറത്തറിയിച്ചത്. കൂടുതൽ അന്വേഷണങ്ങൾക്കായി ഇയാളെ കല്ലൂർക്കാട് പോലീസ് കസ്റ്റഡിയിൽ എടുത്തു.

52 കുപ്പി വിദേശ മദ്യവുമായി മധ്യവയസ്കൻ അറസ്റ്റിൽ

പനങ്ങാട്: 52 കുപ്പി വിദേശ മദ്യവുമായി മധ്യവയസ്കനെ പനങ്ങാട് പോലീസ് അറസ്റ്റ് ചെയ്തു. പനങ്ങാട് കുമ്പളം കേളന്തറ റോഡ് മാളിയേക്കൽ വീട്ടിൽ എം.പി ഡേവിസ് (58) ആണ് അറസ്റ്റിലായത്. രഹസ്യവിവരത്തിന്‍റെ അടിസ്ഥാനത്തിൽ പനങ്ങാട് സ്റ്റേഷൻ ഇൻസ്പെക്ടർ വിബിൻ ദാസിന്‍റെ നേതൃത്വത്തിൽ വ്യാഴാഴ്ച രാത്രി നടത്തിയ പരിശോധനയിലാണ് മദ്യം കണ്ടെടുത്തത്. വിവിധ ബ്രാൻഡുകളിലുള്ള ഇന്ത്യൻ നിർമിത ഡിഫൻസ് ഒൺലി മദ്യം ഇയാളുടെ വീട്ടിൽ കട്ടിലിനടിയിൽ ഒളിപ്പിച്ചനിലയിലായിരുന്നു. കൊച്ചി നേവൽ ബേസിനടുത്ത് ഓട്ടോ ഡ്രൈവറായ ഡേവിസ് ഇവിടെ വരുന്ന വിമുക്ത ഭടൻമാരിൽനിന്ന് വില്പനയ്ക്കായി വാങ്ങി സൂക്ഷിച്ചതായിരുന്നു മദ്യം. മദ്യവും ഫോണും പോലീസ് കസ്റ്റഡിയിലെടുത്തു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

കോർപറേഷൻ മുൻ കൗണ്‍സിലറെ കുത്തിപ്പരിക്കേല്‍പ്പിച്ചത് മകൻ

കൊച്ചി: കൊച്ചി കോർപറേഷൻ മുന്‍ കൗണ്‍സിലറെ കുത്തിപ്പരിക്കേൽപ്പിച്ച സംഭവത്തിൽ പ്രതി ഇവരുടെ മകനാണെന്ന് പോലീസ്. മുൻ കൗൺസിലർ ഗ്രേസി ജോസഫിനാണ് കഴിഞ്ഞ ദിവസം കുത്തേറ്റത്. കൈയിലും വയറിലുമായി മൂന്നു കുത്തുകളേറ്റ ഗ്രേസിയെ സ്വകാര്യ ആശുപത്രിയില്‍ പ്രവേശിപ്പിച്ചിരുന്നു. ഇവരുടെ പരിക്ക് ഗുരുതരമല്ല. മകന്‍ ഷെഫീന്‍ ജോസഫാണ് അമ്മയെ കുത്തിയതെന്നും ആക്രമണം തടയാന്‍ ശ്രമിക്കുന്നതിനിടെ ഇവരുടെ ഭര്‍ത്താവിന് മർദനമേറ്റതായും പോലീസ് പറഞ്ഞു. ലഹരിക്കടിമയായ പ്രതി ആക്രമണത്തിനു ശേഷം ഒളിവില്‍പോയി. പോലീസ് ഗ്രേസിയുടെ മൊഴി രേഖപ്പെടുത്തി. ഇവർ മകനെതിരെ പരാതിയൊന്നും നല്‍കിയിട്ടില്ലെന്നും, അതിനാല്‍ ഇതുവരെ കേസ് എടുത്തിട്ടില്ലെന്നും എറണാകുളം നോര്‍ത്ത് പോലീസ് അറിയിച്ചു. 11ന് വൈകിട്ട് അഞ്ചോടെ കലൂരില്‍ ഗ്രേസി നടത്തുന്ന കടയില്‍ വച്ചാണ് ഇവർക്ക് കുത്തേറ്റത്.

യൂട്യൂബര്‍ റിന്‍സി മുംതാസിന് ജാമ്യം

കൊച്ചി: എംഡിഎംഎയുമായി അറസ്റ്റിലായ യൂട്യൂബര്‍ റിന്‍സി മുംതാസിന് ഹൈക്കോടതി ഉപാധികളോടെ ജാമ്യം അനുവദിച്ചു. സുഹൃത്തായ യാസര്‍ അറഫാത്തിനൊപ്പം കൊച്ചിയിലെ ഫ്‌ളാറ്റില്‍ നിന്ന് 22.55 ഗ്രാം എംഡിഎംഎയുമായി കഴിഞ്ഞ ജൂലൈ ഒമ്പതിനാണ് റിന്‍സി പിടിയിലായത്. സിനിമാ മേഖലയിലുള്ളവര്‍ക്ക് വേണ്ടി രാസലഹരി വില്പന നടത്തിയെന്നായിരുന്നു ആരോപണം. പിടിച്ചെടുത്തത് മെത്താംഫെറ്റമീന്‍ ആണെന്ന് ഫോറന്‍സിക് ലാബ് പരിശോധയില്‍ കണ്ടെത്തിയ റിപ്പോര്‍ട്ട് പരിഗണിച്ചാണ് ജാമ്യം.

മലിനജലം കുളത്തിൽ തള്ളി; മത്സ്യങ്ങളും ജലജീവികളും ചത്തുപൊങ്ങി

അരൂർ: ജലസംഭരണിയിലെ മലിനജലം ഒഴുക്കിയതിനെ തുടർന്ന് കുളത്തിലെ മത്സ്യങ്ങളും ജലജീവികളും ചത്തുപൊങ്ങി. അരൂർ പഞ്ചായത്തിന്‍റെ അധീനതയിലുള്ള മാനവീയം പാർക്കിലെ കുളത്തിലാണ് മലിനജലം ഒഴുക്കിയത്. ത്രിതല പഞ്ചായത്ത് ഒരു കോടി 25 ലക്ഷം ചെലവഴിച്ചാണ് പാർക്കും ചുറ്റും കൽപ്പടവുകൾ കെട്ടി കുളവും നിർമിച്ചത്. ടാങ്കിൽ അടിഞ്ഞുകൂടിയ ചെളിയും ക്ലോറിൻ ഉൾപ്പെടെയുള്ള രാസമാലിന്യവും കലർന്ന മലിന ജലം കുളത്തിൽ ഒഴുക്കിയതിനാൽ കുളം ചുവന്ന് കലങ്ങിയ സ്ഥിതിയിലാണ്. വ്യാഴാഴ്ച രാത്രിയാണ് അടിയന്തരമായി ജല സംഭരണി ശുചീകരിച്ചത്. സംസ്ഥാനത്ത് അമീബിക് മസ്തിഷ്കജ്വരം പടരുന്ന സാഹചര്യത്തിലാണ് ജില്ലയിലെ മുഴുവൻ ജലസംഭരണികളും ശുചീകരിക്കുന്നതെന്ന് അധികൃതർ പറഞ്ഞു.

വധശ്രമം: മലയാറ്റൂർ സ്വദേശിക്ക് 24 വർഷം കഠിന തടവ്

പെരുമ്പാവൂർ: വധശ്രമ കേസിൽ പ്രതിക്ക് 24 വർഷം കഠിന തടവും പിഴയും വിധിച്ച് പെരുമ്പാവൂർ കോടതി. മലയാറ്റൂർ കാടപ്പാറ സ്വദേശി വെട്ടിക്ക വീട്ടിൽ ലൂണ മനോജ് എന്നറിയപ്പെടുന്ന മനോജിനെയാണ് പെരുമ്പാവൂർ അഡീഷണൽ സെഷൻസ് കോടതി 24 വർഷം കഠിന തടവിനും ഒന്നര ലക്ഷം പിഴയൊടുക്കാനും വിധിച്ചത്. കാടപ്പാറ സ്വദേശി മണിയാട്ട വീട്ടിൽ റിതിൻ രാജനെ കൊലപ്പെടുത്താൻ ശ്രമിച്ച കേസിലാണ് വിധി. 2016 സെപ്റ്റംബർ 12നായിരുന്നു കേസിനാസ്പദമായ സംഭവം. സുഹൃത്തിന്‍റെ വിവാഹത്തിന്‍റെ തലേദിവസത്തെ ചടങ്ങിൽ പങ്കെടുക്കുന്നതിന് മലയാറ്റൂർ മന്ത്രിമുക്കിനു സമീപത്തെ വീട്ടിലെത്തിയപ്പോൾ ആണ് കൊലപാതക ശ്രമം നടന്നത്. മുൻ വൈരാഗ്യത്തിന്‍റെ പേരിലായിരുന്നു ആക്രമണം. 2014ൽ അങ്കമാലി - കാലടി റൂട്ടിലെ സ്വകാര്യ ബസിലെ ഡോർ ചെക്കറായിരുന്ന റിതിൻ രാജിനെ മുൻവൈരാഗ്യത്തിന്‍റെ പേരിൽ വാളിന് വെട്ടിക്കൊലപ്പെടുത്താൻ ശ്രമിച്ചിരുന്നു. എന്നാൽ റിതിൻ ഒഴിഞ്ഞുമാറുന്നതിനിടെ വെട്ടേറ്റ് തൃക്കാക്കര കാർഡിനൽ ഹൈസ്‌ക്കൂളിലെ പ്രധാനാധ്യാപികയുടെ തലയ്ക്കും തോളിനും പരിക്കേറ്റിരുന്നു. പറവൂർ കോടതിയിലെ വിചാരണയ്ക്കിടെ പ്രതികളുടെ ഭീക്ഷണിയെ തുടർന്ന് അധ്യാപിക പോലീസിനു നൽകിയ മൊഴി കോടതിയിൽ മാറ്റി. എന്നാൽ കേസിൽ സാക്ഷിയായിരുന്ന റിതിൻ രാജ് പ്രതികൾക്കെതിരെ കോടതിയിൽ മൊഴി നൽകി. ഇതോടെ കേസിൽ പ്രതികളെ 10 വർഷം കഠിന തടവിന് കോടതി ശിക്ഷിച്ചിരുന്നു. അപ്പീൽ കോടതിയിൽ ജാമ്യത്തിലിറങ്ങിയ പ്രതികൾ വീണ്ടും റിതിൽ രാജിനെ കൊലപ്പെടുത്താൻ ശ്രമിക്കുകയായിരുന്നു. കമ്പിവടിക്ക് അടിച്ച് വീഴ്ത്തി കത്തികൊണ്ടുള്ള ആക്രമണത്തിൽ റിജിൻ രാജിന്‍റെ നട്ടെല്ലിന് പൊട്ടലേൽക്കുകയും സ്‌പൈനൽ കോഡിനും കിഡ്‌നിക്കും ഗുരുതര പരിക്കേൽക്കുകയും ചെയ്തു. നടുവിന് താഴേക്ക് ചലനശേഷി നഷ്ടപ്പെട്ട റിതിൻ രാജിന്‍റെ ജീവിതം വീൽചെയറിലുമായി. പെരുമ്പാവൂർ അഡീഷണൽ സെഷൻസ് കോടതിയിൽ കേസിൽ ഏഴ് പ്രതികളാണ് ഉണ്ടായിരുന്നത്. മറ്റ് പ്രതികളെ കോടതി നേരത്തെ ശിക്ഷിച്ചിരുന്നു. മൂന്നാം പ്രതിയായ മനോജ് ഒളിവിൽ പോയതിനെത്തുടർന്ന് പൊലീസ് പിടികൂടി കോടതിയിൽ ഹാജരാക്കി പുനർവിചാരണ നടത്തുകയായിരുന്നു. ജഡ്ജി ആനി വർഗീസാണ് പ്രതിക്ക് ശിക്ഷ വിധിച്ചത്. സർക്കാർ ഭാഗത്തിനു വേണ്ടി അഡീഷ്ണൽ പബ്ലിക് പ്രോസിക്യൂട്ടർ എം.ജി ശ്രീകുമാർ ഹാജറായി.

ഗ്രാമങ്ങളില്‍ സൗജന്യ ഇന്‍റര്‍നെറ്റ് : പദ്ധതി ജില്ലയിൽ പാളി

സേവനം ഇനിയും ലഭിക്കേണ്ടത് മൂവായിരത്തിലേറെ വീടുകളില്‍ കൊച്ചി: ഗ്രാമീണ മേഖലകളിൽ ഇന്‍റര്‍നെറ്റ് സേവനം ലഭ്യമാക്കാനായി കേന്ദ്ര ടെലി കമ്യൂണിക്കേഷന്‍ മന്ത്രാലയം നടപ്പിലാക്കിയ ബ്രോഡ്ബാന്‍ഡ് കണക്ടിവിറ്റി പദ്ധതിയിലൂടെ സൗജന്യമായി ഇനിയും ഇന്‍റര്‍നെറ്റ് സൗകര്യം ലഭിക്കാനുള്ളത് മൂവായിരത്തിലേറെ വീടുകളിൽ. ജില്ലയിലെ 14 പഞ്ചായത്തുകളിലായി 5,463 വീടുകളാണ് ലക്ഷ്യമിട്ടിരുന്നതെങ്കില്‍, ഇതിൽ 2,145 വീടുകളിൽ മാത്രമാണ് ഇതുവരെ ഇന്‍റര്‍നെറ്റ് ലഭിച്ചത്. 3,318 വീടുകള്‍ക്ക് ഇനിയും ഇന്‍റര്‍നെറ്റ് കണക്ഷന്‍ ലഭിക്കാനുണ്ട്. ഒപ്ടിക്കല്‍ ഫൈബര്‍ വഴി 25 എംബിപിഎസ് വേഗതയില്‍ ഇന്‍റര്‍നെറ്റ് ലഭ്യമാക്കുന്ന പദ്ധതിയിലൂടെ കാലടി (431), കുമ്പളങ്ങി (378), വരാപ്പുഴ (333), രായമംഗലം (265), മഞ്ഞള്ളൂര്‍ (142) പഞ്ചായത്തുകളിലെ വീടുകളിൽ 100നു മുകളില്‍ കണക്ഷനുകള്‍ നല്‍കിയപ്പോള്‍ പുത്തന്‍വേലിക്കര (92), ഉദയംപേരൂര്‍(91), വാഴക്കുളം (57) പിണ്ടിമന(55) പഞ്ചായത്തുകളില്‍ 100ൽ താഴെ മാത്രമാണ് കണക്ഷനുകള്‍ നല്‍കാനായത്. 284 കണക്ഷനുകള്‍ നല്‍കേണ്ട തിരുമാറാടിയില്‍ ഒന്‍പതും, 533 കണക്ഷന്‍ നല്‍കേണ്ട കോട്ടുവള്ളിയില്‍ എട്ടും, 397 കണക്ഷനുകള്‍ നല്‍കേണ്ട ഞാറയ്ക്കലില്‍ ഒരെണ്ണവുമാണ് നൽകിയിട്ടുള്ളത്. 266 കണക്ഷനുകള്‍ നല്‍കേണ്ട മുളവുകാട് പഞ്ചായത്തിൽ ഇതുവരെ ഒരു വീട്ടില്‍പോലും പദ്ധതിയിൽ ഇന്‍റര്‍നെറ്റ് ലഭ്യമാക്കിയിട്ടില്ല. എന്നാൽ സര്‍ക്കാര്‍, അര്‍ധ സര്‍ക്കാര്‍ സ്ഥാപനങ്ങളിലും സ്വകാര്യ സ്ഥാപനങ്ങളിലും ലക്ഷ്യമിട്ടതിനേക്കാള്‍ ഇരട്ടിയോളം കണക്ഷനുകള്‍ നല്‍കാനായി. 70 വീതം കണക്ഷനുകള്‍ ലക്ഷ്യമിട്ട സ്ഥാനത്ത് 167 സര്‍ക്കാര്‍ അര്‍ധസര്‍ക്കാര്‍ സ്ഥാപനങ്ങള്‍ക്കും, 118 സ്വകാര്യ സ്ഥാപനങ്ങള്‍ക്കും കണക്ഷന്‍ നല്‍കി. വീടുകളുടെ കാര്യത്തില്‍ പിന്നോട്ട് പോയതിന് പിന്നില്‍ ആളുകളിലേക്ക് പദ്ധതിയുടെ വിവരങ്ങള്‍ കൃത്യമായി എത്താത്തതാണ് കാരണമെന്ന് കേരളത്തില്‍ പദ്ധതിയുടെ നടത്തിപ്പുകാരായ കേരള ലൈസന്‍സ്ഡ് സര്‍വീസ് ഏരിയ (എല്‍എസ്എ) അഡീഷണല്‍ ഡയറക്ടര്‍ ജനറല്‍ ബെന്നി ചിന്നപ്പന്‍ പറഞ്ഞു. ബിഎസ്എന്‍എലിന്‍റെ ബ്രോഡ്ബാന്‍ഡ് കണക്ഷനാണ് പദ്ധതി വഴി നല്‍കുന്നത്. ഒരു ബ്ലോക്കില്‍ ഒരു പഞ്ചായത്ത് എന്ന നിലയില്‍ കേരളത്തില്‍ ആകെ 148 പഞ്ചായത്തുകളെയാണ് പദ്ധതിക്കായി തെരഞ്ഞെടുത്തിട്ടുള്ളത്.

വയോധികയെ മരിച്ച നിലയിൽ കണ്ടെത്തി

പറവൂർ: വയോധികയെ മരിച്ച നിലയിൽ കണ്ടെത്തി. വടക്കേക്കര പാല്യത്തുരുത്ത് ചേലക്കാട് പരേതനായ സുധാകരന്‍റെ ഭാര്യ സാവിത്രി‌‌യേയാണ് (88) വ്യാഴാഴ്‌ച രാത്രി എട്ടരയോടെ വീടിനോട് ചേർന്നു മുറ്റത്തു മരിച്ച നിലയിൽ കണ്ടത്. മൃതദേഹം ഉറുമ്പരിച്ച നിലയിലായിരുന്നു. പത്തിന് പകൽ ഇവരെ വാർഡംഗം കണ്ടിരുന്നു. മത്സ്യബന്ധന തൊഴിലാളിയായ മകൻ സുധീർ അന്നു രാത്രി വീട്ടിലെത്തിയെങ്കിലും ശ്രദ്ധിച്ചിരുന്നില്ല. തയ്യൽ ജോലി ചെയ്യുന്ന മരുമകൾ ശ്രീദേവി ജോലിക്ക് പോയിരിക്കുകയുമായിരുന്നു. പോലീസ് തുടർനടപടികൾ സ്വീകരിച്ചു. മൃതദേഹം പോസ്റ്റ്മോർട്ടത്തിന് ശേഷം സംസ്കരിച്ചു. സുബൈദയാണ് സാവിത്രിയുടെ മറ്റൊരു മകൾ.

വികസന സദസും അയ്യപ്പ സംഗമവും സര്‍ക്കാരിന്‍റെ ധൂര്‍ത്ത്: വി.ഡി. സതീശന്‍

കൊച്ചി: നവകേരള സദസ് പോലെയുള്ള സര്‍ക്കാരിന്‍റെ ധൂര്‍ത്താണ് വികസന സദസും അയ്യപ്പ സംഗമവുമെന്ന് പ്രതിപക്ഷനേതാവ് വി.ഡി.സതീശന്‍. മിഷന്‍ 25 ന്‍റെ ഭാഗമായി നടന്ന ജില്ലാ കോണ്‍ഗ്രസ് നേതൃയോഗം ഉദ്ഘാടനം ചെയ്യുകയായിരുന്നു അദ്ദേഹം. വികസന പ്രവര്‍ത്തനകള്‍ക്ക് പണം ചെലവഴിക്കാതെ ധൂര്‍ത്തിനാണ് സര്‍ക്കാരിന് താല്‍പര്യം. തദ്ദേശ സ്ഥാപനങ്ങളുടെ പ്ലാന്‍ ഫണ്ട് പോലും വെട്ടിക്കുറച്ചശേഷം കോടികള്‍ ചെലവഴിച്ച് മുഖം മിനുക്കാനാണ് സര്‍ക്കാര്‍ ശ്രമിക്കുന്നതെന്നും അദ്ദേഹം പറഞ്ഞു. രാഹുല്‍ മാങ്കൂട്ടത്തലിനെതിരായ നടപടി സംസ്ഥാന കോണ്‍ഗ്രസ് നേതൃത്വം കൂട്ടായി എടുത്ത തീരുമാനമാണ്. പാര്‍ട്ടിക്ക് ഒരു സംഭാവനയും നല്‍കാത്ത ചിലര്‍ വിദേശ രാജ്യങ്ങളിലിരുന്ന് സമൂഹമാധ്യമങ്ങളില്‍ പ്രചരിപ്പിക്കുന്നത് പാര്‍ട്ടി പ്രവര്‍ത്തകര്‍ ഏറ്റെടുക്കേണ്ടതില്ല. സിപിഎം സ്‌പോണ്‍സര്‍ ചെയ്യുന്നവരും ഇത്തരത്തില്‍ വ്യാജ പ്രചാരണം നടത്തുന്നുണ്ട്. പാര്‍ട്ടിയുടെ ലേബലില്‍ ഇത്തരം പ്രചാരണം നടത്തുന്നവര്‍ അതവസാനിപ്പിക്കണമെന്നും ഇല്ലെങ്കില്‍ പാര്‍ട്ടിയില്‍ നിന്ന് പുറത്താക്കുന്നതടക്കം പരിഗണിക്കേണ്ടി വരുമെന്നും അദ്ദേഹം മുന്നറിയിപ്പ് നല്‍കി. വികസന പത്രിക പുറത്തിറക്കും ആമ്പല്ലൂര്‍ പഞ്ചായത്ത് ഭരണസമിതി പുറത്തിറക്കിയ വികസന പത്രിക യോഗത്തില്‍ പ്രകാശനം ചെയ്തു. കോണ്‍ഗ്രസ് ഭരിക്കുന്ന എല്ലാ പഞ്ചായത്തുകളിലും വികസനനേട്ടങ്ങള്‍ ഉയര്‍ത്തിക്കാട്ടി വികസന പത്രിക പുറത്തിറക്കും. അടുത്ത മാസം ആദ്യം കേന്ദ്ര, സംസ്ഥാന സര്‍ക്കാരുകളുടെ ജനവിരുദ്ധ മുഖം തുറന്ന് കാട്ടി ജില്ലാ കോണ്‍ഗ്രസ് കമ്മിറ്റിയുടെ നേതൃത്വത്തില്‍ പദയാത്ര നടത്തും. ഗൃഹ സമ്പര്‍ക്ക പരിപാടിയും ഫണ്ട് ശേഖരണവും ഈ മാസം 20 വരെ നീട്ടാനും യോഗം തീരുമാനിച്ചു. ഡി സിസി പ്രസിഡന്‍റ് മുഹമ്മദ് ഷിയാസ് അധ്യക്ഷത വഹിച്ചു. ഹൈബി ഈഡന്‍ എംപി, എംല്‍എമാരായ കെ. ബാബു, ടി.ജെ. വിനോദ്, അന്‍വര്‍ സാദത്ത്, റോജി എം. ജോണ്‍, എല്‍ദോസ് കുന്നപ്പിള്ളി, കെപിസിസി വൈസ് പ്രസിഡന്‍റ് സജീന്ദ്രന്‍, ജനറല്‍ സെക്രട്ടറി മാരായ അബ്ദുള്‍ മുത്തലിബ്, ദീപ്തി മേരി വര്‍ഗീസ്, ജോസഫ് വാഴയ്ക്കന്‍, അജയ് തറയില്‍, എന്‍. വേണുഗോപാല്‍, ജെയ്‌സണ്‍ ജോസഫ് തുടങ്ങിയവര്‍ പ്രസംഗിച്ചു.

നൈട്രോസെപ്പാം ഗുളികകളുമായി നീഗ്രോ സുരേഷ് പിടിയില്‍

കൊച്ചി: വില്പനയ്‌ക്കെത്തിച്ച നൈട്രോസെപ്പാം ഗുളികളുമായി നിരവധി കേസുകളിലെ പ്രതിയായ യുവാവ് പിടിയില്‍. എറണാകുളം ഉദയാകോളനി ഹൗസ് നമ്പര്‍ 102 ല്‍ സുരേഷ് എന്ന നീഗ്രോ സുരേഷിനെയാണ്(40) നാര്‍കോട്ടിക് സെല്‍ എസിപി കെ.എ. അബ്ദുള്‍ സലാമിന്‍റെ നേതൃത്വത്തിലുള്ള ഡാന്‍സാഫ് സംഘം അറസ്റ്റ് ചെയ്തത്. ഇയാളുടെ വീട്ടില്‍ നിന്ന് 62 നൈട്രോസെപ്പാം ഗുളികകള്‍ കണ്ടെടുത്തു. വില്പനയ്ക്കും സ്വന്തം ആവശ്യത്തിനുമായാണ് ഗുളികകള്‍ എത്തിച്ചതെന്ന് ഇയാള്‍ പോലീസിന് മൊഴി നല്‍കി.

ആലുവയിൽ തുണിക്കട കത്തിനശിച്ചു

20 ലക്ഷത്തിന്‍റെ നഷ്ടം ആലുവ: ആലുവ ബാങ്ക് കവലയിലെ പഴയ ഓടിട്ട കെട്ടിടത്തിൽ പ്രവർത്തിച്ചിരുന്ന തുണിക്കടയ്ക്ക് തീപിടിച്ചു. അഗ്നിശമന സേന മൂന്നുവട്ടം എത്തിയാണ് തീ അണച്ചത്. 20 ലക്ഷം രൂപയുടെ നഷ്ടം കണക്കാക്കുന്നു. ഇന്നലെ രാവിലെ 11.30 ഓടെയാണ് തിരക്കേറിയ ബാങ്ക് ജംഗ്ഷനിലെ ബസ് സ്റ്റോപ്പിന് മുന്നിലുള്ള കെട്ടിടത്തിൽ കട കാലിയാക്കൽ വില്പന എന്ന ബോർഡ് വച്ച് വിൽപ്പന നടത്തിയിരുന്ന തുണിക്കടയുടെ പിൻഭാഗത്ത്നിന്ന് തീയും പുകയും ഉയർന്നത്. മൂന്ന് ഷട്ടറുകളുള്ള കടയുടെ പിന്നിൽ ജനലുകൾ ഇല്ലാത്തതിനാൽ പുക കാരണം തീ കണ്ടെത്താൻ ആദ്യം ഫയർഫോഴ്സ് സംഘത്തിന് കഴിഞ്ഞില്ല. മുൻവശത്തെ ചില്ലുകൾ ആയുധങ്ങൾ കൊണ്ട് പൊട്ടിച്ചും പിൻവശത്തെ മതിൽ തകർത്തുമാണ് തീപിടിച്ച ഭാഗം കണ്ടെത്തിയത്. താഴത്തെ നിലയുടെ മേൽക്കൂര മരത്തിൽ നിർമിച്ചതായതിനാൽ അപകട സാധ്യത വർധിപ്പിച്ചു. കുറച്ച് തുണി മാത്രമാണ് തീപിടിക്കാതെ ലഭിച്ചത്. ആലുവയ്ക്ക് പുറമെ അങ്കമാലി, ഏലൂർ, പെരുമ്പാവൂർ ഫയർഫോഴ്സ യൂണിറ്റുകളും തീയണയ്ക്കാൻ എത്തി. മണിക്കൂറുകൾ നീണ്ട പ്രയത്നത്തിന് ശേഷം ഉച്ചയ്ക്ക് രണ്ടോടെ തീയണച്ച് അഗ്നിശമന സേന മടങ്ങിയെങ്കിലും അര മണിക്കൂറിന് ശേഷം തീ പടർന്നതോടെ വീണ്ടും എത്തി. വൈകിട്ട് ആറോടെ വീണ്ടും തീ പുകയുന്നതായി അറിയിച്ചതിനാൽ മൂന്നാമതും അഗ്നിശമന സേന എത്തിയാണ് പൂർണമായും കെടുത്തിയത്. വാരിയത്ത് പുത്തൻമഠം വിശ്വനാഥൻ സ്വാമിയാണ് കെട്ടിട ഉടമ. കെട്ടിടത്തിൽ വാടകയ്ക്ക് പ്രവർത്തിക്കുന്ന ശ്രീമൂലനഗരം തറയിൽ നിഷാ റഫീക്കിന്‍റെ സ്ഥാപനത്തിലാണ് തീപിടിച്ചത്. ഈ രണ്ടുനില കെട്ടിടത്തിൽ ഹാൻവീവ് അടക്കം നിരവധി സ്ഥാപനങ്ങൾ പ്രവർത്തിക്കുന്നുണ്ട്. ഇതിനു പിന്നിലാണ് ഉടമയുടെ വീട്.

വൈറ്റില റെയിൽവേ മേൽപ്പാലത്തിൽ കെഎസ്ആർടിസി ബസ് അപകടത്തിൽപ്പെട്ടു : മൂന്നര മണിക്കൂർ ഗതാഗതം സ്തംഭിച്ചു

വൈറ്റില: ദേശീയപാതയിൽ വൈറ്റില പാലം കഴിഞ്ഞുള്ള റെയിൽവേ മേൽപ്പാലത്തിൽ കെഎസ്ആർടിസി ബസ് അപകടത്തിൽപ്പെട്ടതിനെ തുടർന്ന് മണിക്കൂറുകളോളം ഗതാഗതം തടസപ്പെട്ടു. രാവിലെ എട്ടരയോടെയാണ് അപകടം നടന്നത്. ഇടപ്പള്ളി ഭാഗത്തേയ്ക്കുള്ള മേൽപ്പാലത്തിന്‍റെ ഇറക്കത്തിൽ വച്ച് ഓട്ടോറിക്ഷ പെട്ടെന്ന് വേഗം കുറച്ചതിനെ തുടർന്ന് പിന്നാലെ വന്ന വാഹനങ്ങൾ സഡൻ ബ്രേക്കിടുകയും ബസ് അപകടത്തിൽപ്പെട്ടുകയുമായിരുന്നു. ബൈക്കുകളിൽ തട്ടിയ ബസ് എൽപിജി ലോറിയിൽ ഇടിച്ചാണ് നിന്നത്. ബസിന്‍റെ ഡ്രൈവർ സീറ്റിന്‍റെ ഭാഗം പൂർണമായി തകർന്നു. സ്റ്റിയറിംഗ് ലോക്കായി ബസ് പാലത്തിന് കുറുകെയായതോടെ ഈ ഭാഗത്തെ ഗതാഗതം പൂർണമായി തടസപ്പെട്ടു. ബസ് അപകടസ്ഥലത്തുനിന്ന് നീക്കാൻ സാധിക്കാതെ വന്നതോടെ വാഹനങ്ങളുടെ നീണ്ടനിര കുണ്ടന്നൂർ വരെ നീണ്ടു. ഇതോടെ വൈറ്റില ഭാഗം മുഴുവൻ ഗതാഗതക്കുരുക്കിലായി. ഉച്ചയ്ക്ക് 12-ഓടെ ബസ് പാലത്തിൽനിന്ന് മാറ്റിയ ശേഷമാണ് ഗതാഗതക്കുരുക്കിന് ശമനമായത്.

മദ്യപിച്ച് പിരിവിനിറങ്ങിയ വെഹിക്കിൾ ഇൻസ്പെക്ടർ പിടിയിൽ

വഴിയോര മത്സ്യവ്യാപാര ദമ്പതികളോട് 3,000 രൂപ ആവശ്യപ്പെട്ടതായി പരാതി കാക്കനാട്: മദ്യപിച്ച് ലക്കുകെട്ട്, യൂണിഫോമില്ലാതെ വാഹനപരിശോധനയ്ക്കെത്തിയ വെഹിക്കിള്‍ ഇന്‍സ്പെക്ടറെ തൃക്കാക്കര പോലീസ് അറസ്റ്റ് ചെയ്തു. കാക്കനാട് ആര്‍ടി ഓഫിസിലെ വെഹിക്കിള്‍ ഇന്‍സ്പെക്ടര്‍ എന്‍.എസ്.ബിനുവാണ് പിടിയിലായത്. തോപ്പില്‍ ജംഗ്ഷന് സമീപം ബുധനാഴ്ച രാത്രി ഒമ്പതരയോടെയാണ് സംഭവം. വഴിയരികില്‍ സ്വന്തം വാഹനത്തില്‍ മല്‍സ്യ കച്ചവടം നടത്തിക്കൊണ്ടിരുന്ന ദമ്പതികളെ സമീപിച്ച് താന്‍ വെഹിക്കിള്‍ ഇന്‍സ്പെക്ടറാണെന്നും അനധികൃതമായി വാഹനത്തിൽ കച്ചവടം നടത്തുന്നതായി പരാതി ലഭിച്ചതിനാൽ 3000 രൂപ പിഴ അടയ്ക്കണമെന്നും ആവശ്യപ്പെട്ടു. തുടർന്ന് വാഹനം പിടിച്ചെടുക്കുമെന്ന് ഭീഷണിപ്പെടുത്തിയതോടെ നാട്ടുകാർ തടിച്ചുകൂടുകയും തൃക്കാക്കര പോലീസിനെ വിവരം അറിയിക്കുകയുമായിരുന്നു. പോലീസ് അറസ്റ്റ് ചെയ്ത് ആശുപത്രിയിലെത്തിച്ച് നടത്തിയ വൈദ്യപരിശോധനയിൽ മദ്യപിച്ചതായി സ്ഥിരീകരിക്കുകയും ചെയ്തു . തുടർന്ന് മദ്യപിച്ച് വാഹനം ഓടിച്ചതിനടക്കം എഫ്ഐആർ ഇട്ട് കേസ് രജിസ്റ്റർ ചെയ്യുകയായിരുന്നു. മൽസ്യക്കച്ചവടം നടത്തിയ യുവതിയും കുടുംബവും തങ്ങളോട് അപമര്യാദയായി പെരുമാറിയ ഉദ്യോഗസ്ഥനെതിരെ തൃക്കാക്കര സ്റ്റേഷനിൽ പരാതി കൊടുത്തിട്ടുണ്ട്. അതേസമയം മോട്ടോർ വെഹിക്കിൾ ഡിപ്പാർട്ട്മെന്‍റിന്‍റെ അറിവോടെയല്ലാതെ മദ്യപിച്ച് വാഹന പരിശോധന നടത്തിയ ഉദ്യോഗസ്ഥനെതിരെ നടപടി സ്വീകരിക്കുമെന്ന് ആർടിഒ അറിയിച്ചു

കവര്‍ച്ചക്കേസ് പ്രതികള്‍ പിടിയില്‍

കൊച്ചി: പനങ്ങാട് കുമ്പളം സൗത്ത് ഹോളി മേരി കോളജിനടുത്തു താമസിച്ചിരുന്ന ആസാം സ്വദേശിയുടെ വീട്ടില്‍ കവര്‍ച്ച നടത്തി രക്ഷപ്പെട്ട പ്രതികളെ മണിക്കൂറുകള്‍ക്കുള്ളില്‍ പിടികൂടി പനങ്ങാട് പോലീസ്. പള്ളുരുത്തി എംഎല്‍എ റോഡില്‍ താമസിച്ചുവരുന്ന സദ്ദാം (35), അസിബ് ശിഹാബ് (38) എന്നിവരാണ് പനങ്ങാട് പോലീസിന്‍റെ പിടിയിലായത്. വര്‍ഷങ്ങളായി കുടുംബസമേതം ചെറിയ ജോലി ചെയ്തു താമസിച്ചുവന്നിരുന്ന ആസാം സ്വദേശികളായ ഇതരസംസ്ഥാന തൊഴിലാളികള്‍ താമസിക്കുന്നിടത്ത് സ്ഥിരമായി എത്തി ഭീഷണിപ്പെടുത്തി പ്രതികള്‍ ഗുണ്ടാപ്പിരിവു നടത്തിയിരുന്നു. ഇവര്‍ക്ക് പണം നല്‍കാന്‍ വിസമ്മതിച്ചതിനെ തുടര്‍ന്നാണ് കുടുംബത്തെ അതിക്രൂരമായി മര്‍ദിച്ച് 5,000 രൂപയും മൊബൈല്‍ ഫോണ്‍ അടങ്ങിയ ബാഗും കവര്‍ച്ച ചെയ്ത് പ്രതികള്‍ കടന്നുകളഞ്ഞത്. സാരമായി പരിക്കേറ്റ ആസാം സ്വദേശി പോലീസില്‍ പരാതി നല്‍കി. ഇതിന്‍റെ അടിസ്ഥാനത്തില്‍ നടത്തിയ അന്വേഷണത്തിലാണ് പള്ളുരുത്തിയില്‍നിന്ന് പ്രതികളെ പിടികൂടിയത്. കവര്‍ച്ച ചെയ്ത ബാഗും ഫോണും പണവും പിന്നീട് പോലീസ് കണ്ടെടുത്തു. പനങ്ങാട് പോലീസ് ഇന്‍സ്‌പെക്ടര്‍ വിപിന്‍ ദാസിന്‍റെ നേതൃത്വത്തിലുള്ള സംഘമാണ് പ്രതികളെ പിടികൂടിയത്. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.

പോലീസ് ലോഗോ ഉപയോഗിച്ചും സൈബർ സാന്പത്തിക തട്ടിപ്പ്

കൊച്ചി: കേരള പോലീസിന്‍റെ ഔദ്യോഗിക ചിഹ്നം ഉപയോഗിച്ചുള്ള വാട്‌സാപ്പ് നമ്പറുകളില്‍ നിന്ന് സന്ദേശങ്ങള്‍ അയച്ചും സൈബര്‍ സാമ്പത്തിക തട്ടിപ്പ്. ഇ ചെലാന്‍ ഫൈന്‍ അടയ്ക്കണമെന്നാവശ്യപ്പെട്ട് കേരള പോലീസിന്‍റെ ഔദ്യോഗിക ലോഗോ ഡിസ്‌പ്ലേ പിക്ചര്‍ ആയിട്ടുള്ള വാട്‌സാപ്പ് അക്കൗണ്ടില്‍ നിന്ന് മെസേജ് വരുന്നതോടെയാണ് തട്ടിപ്പിന്‍റെ തുടക്കം. ഇങ്ങനെയുള്ള നമ്പരുകള്‍ പരിശോധിച്ചാല്‍ ട്രാഫിക് പോലീസിന്‍റെയും കേരള പോലീസിന്‍റെയും സംയുക്ത ലോഗോ കാണാം. ഇത് വിശ്വാസ്യത വര്‍ധിപ്പിക്കും. വരുന്ന മെസേജിനൊപ്പം പണം പിഴയായി അയച്ചുകൊടുക്കേണ്ട ലിങ്കും ഉണ്ടാകും. ലിങ്ക് ഓപ്പണ്‍ ചെയ്യുമ്പോള്‍ പ്ലേ സ്‌റ്റോറിലേക്ക് പോവുകയും ഒരു ആപ് ഇന്‍സ്റ്റാള്‍ ചെയ്യാന്‍ ആവശ്യപ്പെടുകയും ചെയ്യും. ഇന്‍സ്റ്റാള്‍ ചെയ്യുന്ന ആപ്ലിക്കേഷനിലൂടെ അക്കൗണ്ടില്‍ നിന്ന് പണവും മറ്റു വിവരങ്ങളും തട്ടിപ്പുകാര്‍ കൈക്കലാക്കുന്നു. നിലവില്‍ സൈബര്‍ പോലീസില്‍ പരാതിയൊന്നും ലഭിച്ചിട്ടില്ലെങ്കിലും ഇത്തരത്തിലുള്ള തട്ടിപ്പിനെതിരെ ജാഗ്രത പാലിക്കണമെന്നാണ് പോലീസ് മുന്നറിയിപ്പ്. സൈബര്‍ സാമ്പത്തിക തട്ടിപ്പിന് ഇരയായാല്‍ 1930 എന്ന് നമ്പറിലേക്ക് വിളിക്കുകയോ www. cybercrime.gov.in എന്ന വെബ്‌സൈറ്റിലോ പരാതിപ്പെടാം.

ജീവനെ ആറായി പകുത്ത് ഐസക് ജോർജ്

ആകാശമാർഗമെത്തിയ ഹൃദയം അജിന് പുതുജീവനായി കൊച്ചി: വാഹനാപകടത്തെത്തുടർന്നു മസ്തിഷ്കമരണം സംഭവിച്ച കൊല്ലം കൊട്ടാരക്കര ബഥേൽ ചരുവിള വടവോട് സ്വദേശി ഐസക് ജോർജിന്‍റെ ഹൃദയം ഉൾപ്പടെയുള്ള ആറ് അവയവങ്ങൾ ഇനി ആറുപേർക്ക് പുതുജീവനേകും. ഹൃദയം എറണാകുളം ലിസി ആശുപത്രിയിൽ ചികിത്സയിൽ കഴിയുന്ന ഇരുപത്തിയെട്ടുകാരനും ഒരു വൃക്ക തിരുവനന്തപുരം സർക്കാർ മെഡിക്കൽ കോളജ്, രണ്ട് നേത്രപടലങ്ങൾ തിരുവനന്തപുരം സർക്കാർ റീജണൽ ഇൻസ്റ്റിറ്റ്യൂട്ട് ഓഫ് ഒഫ്താൽമോളജി, മറ്റൊരു വൃക്കയും കരളും തിരുവനന്തപുരം കിംസ് ആശുപത്രി എന്നിവിടങ്ങളിലെ രോഗികൾക്കുമായാണു ദാനം ചെയ്തത്. അവയവം ദാനം ചെയ്യാൻ സന്നദ്ധരായ ബന്ധുക്കളെ ആരോഗ്യ മന്ത്രി വീണാ ജോർജ് നന്ദി അറിയിച്ചു. കൊട്ടാരക്കര കിഴക്കേത്തെരുവ് പള്ളിമുക്കിൽ കഴിഞ്ഞ ശനിയാഴ്ച ആറോടെ ഐസക് നടത്തുന്ന പള്ളിമുക്കിലെ റസ്റ്ററന്‍റിനു മുൻവശത്ത് റോഡ് മുറിച്ചുകടക്കവേ ബൈക്ക് ഇടിച്ചായിരുന്നു അപകടം. തിരുവനന്തപുരത്തെ സ്വകാര്യ ആശുപത്രിയിൽ ചികിത്സയിലിരിക്കെ മരണം സംഭവിച്ചു. ഇന്നലെ മസ്തിഷ്കമരണം സ്ഥിരീകരിച്ചതിനെത്തുടർന്ന് കുടുംബാംഗങ്ങൾ അവയവദാനത്തിന് സന്നദ്ധരായി. ഭാര്യ: നാൻസി മറിയം സാം. മകൾ: അമീലിയ നാൻസി ഐസക്. സംസ്കാരച്ചടങ്ങുകൾ നാളെ ബഥേൽ ചരുവിള വീട്ടിൽ നടക്കും. സുസജ്ജം ടീം ലിസി അങ്കമാലി സ്വദേശിയായ അജിൻ ഏലിയാസിലാണ് ഐസക്കിന്‍റെ ഹൃദയം തുന്നിച്ചേര്‍ത്തത്. ഡോ. ജോസ് ചാക്കോ പെരിയപ്പുറത്തിന്‍റെ നേതൃത്വത്തിൽ എറണാകുളം ലിസി ആശുപത്രിയില്‍ നടന്ന ശസ്ത്രക്രിയ വിജയകരമായിരുന്നു. ബുധനാഴ്ച രാത്രിയോടെയാണു ലിസി ആശുപത്രിയിലേക്ക് സംസ്ഥാന സര്‍ക്കാര്‍ സംവിധാനമായ കെസോട്ടോയില്‍നിന്നു സന്ദേശമെത്തിയത്. പ്രാഥമിക പരിശോധനയില്‍ ഐസക്കിന്‍റെ ഹൃദയം ലിസി ആശുപത്രിയില്‍ ഹൃദയത്തിനായി കാത്തിരിക്കുന്ന അജിന് അനുയോജ്യമാണെന്ന് വ്യക്തമായി. തുടര്‍ന്ന് ആശുപത്രി ഡയറക്ടര്‍ ഫാ. പോള്‍ കരേടന്‍ മന്ത്രി പി. രാജീവിനെ വിവരം അറിയിച്ചു. രാത്രി ഏറെ വൈകിയിരുന്നെങ്കിലും അദ്ദേഹം മുഖ്യമന്ത്രിയുമായി ബന്ധപ്പെട്ട് സംസ്ഥാനസര്‍ക്കാര്‍ പോലീസ് സേനയ്ക്കായി വാടകയ്ക്കെടുത്തിരിക്കുന്ന ഹെലികോപ്റ്റര്‍ അവയവം കൊണ്ടുവരുന്നതിനായി വിട്ടുനല്‍കുന്നതിനുള്ള നടപടികളെടുത്തു. പൂര്‍ണമായും സൗജന്യമായാണ് ഹെലികോപ്റ്റര്‍ സേവനം വിട്ടുനല്‍കിയത്. ഹൃദയധമനികള്‍ക്കു വീക്കം സംഭവിക്കുന്ന കവാസാക്കി എന്ന അസുഖമായിരുന്നു ഹൃദയം സ്വീകരിച്ച അജിന് ഉണ്ടായിരുന്നത്. ഹൃദയത്തിനായി കെസോട്ടോയില്‍ രജിസ്റ്റര്‍ ചെയ്തു കാത്തിരിക്കുകയായിരുന്നു. ഹൃദയമാറ്റ ശസ്ത്രക്രിയയ്ക്ക് വഴി തുറന്നശേഷം അതിവേഗത്തിലായിരുന്നു ലിസി ആശുപത്രിയിലെ സജ്ജീകരണങ്ങൾ. ഇന്നലെ പുലർച്ചെ നാലോടെ ലിസിയിൽനിന്ന് ഡോ. ജേക്കബ് ഏബ്രഹാം, ഡോ. ജീവേഷ് തോമസ്, ഡോ. ജോ ജോസഫ്, ഡോ. ശ്രീശങ്കര്‍ എന്നിവരുടെ നേതൃത്വത്തിലുള്ള മെഡിക്കല്‍ സംഘം കിംസ് ആശുപത്രിയിലേക്ക് തിരിച്ചു. എട്ടോടെ ഹൃദയം എടുക്കുന്നതിനുള്ള ശസ്ത്രക്രിയ ആരംഭിച്ചു. ശസ്ത്രക്രിയ പൂര്‍ത്തിയാക്കി ഉച്ചക്ക് 12.35ന് തിരുവനന്തപുരത്തുനിന്നു പുറപ്പെട്ട ഹെലികോപ്റ്റര്‍ 1.30 ഓടെ കൊച്ചി ഹയാത്തിന്‍റെ ഹെലിപാഡിലെത്തി. നാലു മിനിറ്റുകൊണ്ട് പോലീസ് സേന ഒരുക്കിയ ഗ്രീന്‍ കോറി ഡോറിലൂടെ ലിസി ആശുപത്രിയില്‍ എത്തിച്ചു ശസ്ത്രക്രിയ ആരംഭിക്കുകയും ചെയ്തു. നാലുമണിക്കൂറിനുള്ളിൽത്തന്നെ ഹൃദയം പുതിയ ശരീരത്തില്‍ സ്പന്ദിക്കാന്‍ തുടങ്ങി. ഡോ. റോണി മാത്യു, ഡോ. ഭാസ്കര്‍ രംഗനാഥന്‍, ഡോ. പി. മുരുകന്‍, ഡോ. ജോബ് വില്‍സണ്‍, ഡോ. ഗ്രേസ് മരിയ, ഡോ. ആന്‍റണി ജോര്‍ജ്, ഡോ. ആയിഷ നാസര്‍, രാജി രമേഷ്, സൗമ്യ സുനീഷ് എന്നിവരും ശസ്ത്രക്രിയയില്‍ പങ്കാളികളായി. രാത്രി എഴോടെ ശസ്ത്രക്രിയ പൂര്‍ത്തിയായി. അടുത്ത 48 മണിക്കൂര്‍ പ്രധാനപ്പെട്ടതാണെന്ന് ഡോ. ജോസ് ചാക്കോ പെരിയപ്പുറം പറഞ്ഞു.

മുതിർന്ന പൗരന്മാർക്കൊപ്പം ഓണാഘോഷം

ആലുവ: തോട്ടക്കാട്ടുകര കെസിവൈഎം യൂണിറ്റിന്‍റെ ആഭിമുഖ്യത്തിൽ മുതിർന്ന പൗരന്മാരോടൊപ്പമുള്ള ഓണാഘോഷം ഓർമിക്കാൻ ഓമനിക്കാൻ തോട്ടക്കാട്ടുകര സെന്‍റ് ആൻസ് ദേവാലയത്തിൽ നടത്തി. വികാരി ഫാ. തോമസ് പുളിക്കൽ സഹവികാരി ഫാ. ഫെബിൻ കിഴവന, ഫാ. റിനോയ് തോമസ്, വരാപ്പുഴ അതിരൂപത കെസിവൈഎം പ്രസിഡന്‍റ് രാജീവ് പാട്രിക് എന്നിവർ പ്രസംഗിച്ചു.

വിപഞ്ചിക പുരസ്കാരം ഫർസാനയുടെ 'വോട്ടാള'ക്ക്‌

അങ്കമാലി: സാഹിത്യ വിമർശകനും പ്രഭാഷകനും കഥാകൃത്തുമായ കടാതി ഷാജിയുടെ സ്മരണാർത്ഥം അങ്കമാലി വിപഞ്ചിക സാഹിത്യവേദി ഏർപ്പെടുത്തിയ “വിപഞ്ചിക - കടാതി ഷാജി” ചെറുകഥാ പുരസ്കാരം യുവ കഥാകൃത്തുക്കളിൽ ശ്രദ്ധേയയായ ഫർസാനയുടെ 'വേട്ടാള' എന്ന കൃതിക്ക്. 6,666 രൂപയും ഫലകവും പ്രശസ്തിപത്രവും അടങ്ങുന്നതാണ് പുരസ്കാരം. 2025 ഒക്ടോബർ ഒന്നിന് അങ്കമാലി രുഗ്മിണി ചന്ദന ഹാളിൽ നടക്കുന്ന കടാതി ഷാജി അനുസ്മരണ സമ്മേളനത്തിൽ പ്രശസ്ത കഥാകൃത്ത് മനോജ് വെങ്ങോല പുരസ്കാര സമർപ്പണം നടത്തുമെന്ന് വിപഞ്ചിക പ്രസിഡന്‍റ് സതീഷ് മാമ്പ്ര അറിയിച്ചു.

എംഎസ്‌സി ബാങ്കിന്‍റെ പ്രവര്‍ത്തനമേഖല വ്യാപിപ്പിക്കാന്‍ അനുവദിക്കുന്നില്ലെന്ന്

കൊച്ചി: ജില്ലയിലെ അഞ്ച് അര്‍ബന്‍ ബാങ്കുകളില്‍ മൂന്നാം സ്ഥാനത്തുള്ള മട്ടാഞ്ചേരി സാര്‍വജനിക് സഹകരണ ബാങ്കിന്‍റെ (എംഎസ്‌സി) പ്രവര്‍ത്തനമേഖല വ്യാപിപ്പിക്കാന്‍ സംസ്ഥാന സഹകരണ വകുപ്പ് അനുവദിക്കുന്നില്ലെന്ന് ബാങ്ക് പ്രസിഡന്‍റ് പി.വി. ജയപ്രസാദ്. ഇതിനെതിരെ നിയമനടപടികള്‍ സ്വീകരിക്കുന്ന കാര്യം ആലോചിക്കുമെന്നും അദ്ദേഹം പറഞ്ഞു. 72-ാം വര്‍ഷത്തിലേക്ക് കടക്കുന്ന ബാങ്ക് ലാഭത്തിലാണ് പ്രവര്‍ത്തിക്കുന്നത്. വായ്പാ പദ്ധതിയുമായി ബന്ധപ്പെട്ട് ഒട്ടേറെ നൂനത പദ്ധതികള്‍ ബാങ്ക് രൂപം നല്‍കിയിട്ടുണ്ട്. 269.26 കോടി രൂപയാണ് ബാങ്കിന്‍റെ മൊത്തം പ്രവര്‍ത്തന മൂലധനം. 244.57 കോടി രൂപ നിക്ഷേപമുണ്ട്. ഒമ്പത് ശതമാനം ഡിവിഡന്‍റ് ഈ വര്‍ഷം നല്‍കും. യുപിഐ പേയ്‌മെന്‍റ് സൗകര്യവും ഉടന്‍ ഉപയോക്താക്കള്‍ക്ക് ലഭ്യമാക്കും. സാര്‍വജനിക് ലഘു നിക്ഷേപ ശേഖരണ പദ്ധതി, മരണ ക്ലെയിം ഇന്‍ഷ്വറന്‍സ് പദ്ധതി എന്നിവയും ആരംഭിക്കും. 31,952 അംഗങ്ങളുള്ള ബാങ്ക് റിസർസ് ബാങ്കിന്‍റെ എസ്എഎഫ് നിയന്ത്രണത്തില്‍ നിന്നും ഒഴിവാക്കപ്പെട്ടതാണെന്നും വൈസ് ചെയര്‍മാന്‍ വിശ്വനാഥ് ഹരി ഭട്ട്, ബോര്‍ഡ് ഓഫ് മാനേജ്‌മെന്‍റ് ചെയര്‍മാന്‍ വി.ഉമേഷ് മല്യ എന്നിവര്‍ ആവശ്യപ്പെട്ടു.

ഹെറോയിനും കഞ്ചാവുമായി പിടിയിൽ

ആലുവ: എടയാറിൽ 17 ഗ്രാം ഹെറോയിനും 10 ഗ്രാം കഞ്ചാവുമായി ആസാം സ്വദേശിയെ പിടികൂടി. ഹോജയ് ജില്ലയിലെ ഷഹബാസ് ഹുസൈനെയാണ് (27)എൻഡിപിഎസ് ആക്ട് പ്രകാരം പറവൂർ എക്സൈസ് അറസ്റ്റ് ചെയ്തത്. പറവൂർ എക്സൈസ് സർക്കിൾ ഇൻസ്പെക്ടർ എം. മഹേഷ്കുമാറിന്‍റെ നേതൃത്വത്തിലുള്ള സംഘമാണ് പിടികൂടിയത്.

ചെന്പ് തകിട് മോഷണം: ആസാം സ്വദേശി പിടിയില്‍‌

കൊച്ചി: വൈറ്റില ചളിക്കവട്ടത്തുള്ള വസ്ത്രവ്യാപാര ശാലയില്‍ നിന്ന് ലക്ഷത്തിലധികം രൂപ വിലവരുന്ന 100 കിലോയോളം ചെന്പ് തകിടുകൾ മോഷ്ടിച്ച സംഭവത്തിൽ ആസാം സ്വദേശി പിടിയിലായി. ആസാം നഗാവോണ്‍ സ്വദേശി നബി ഹുസൈനെ(21)യാണ് പാലാരിവട്ടം പോലീസ് അറസ്റ്റ് ചെയ്തത്. മോഷണം നടന്നതായി കഴിഞ്ഞമാസം സ്ഥാപനത്തിന്‍റെ മാനേജര്‍ പാലാരിവട്ടം പോലീസ് സ്റ്റേഷനില്‍ പരാതി നല്‍കിയതിന്‍റെ അടിസ്ഥാനത്തില്‍ കേസ് എടുത്ത് അന്വേഷണം നടത്തി വരവേയാണ് പ്രതി പിടിയിലായത്. നഗരത്തിലെ വിവിധ ഫ്ലാറ്റുകളിലും ബഹുനില കെട്ടിടങ്ങളിലും എര്‍ത്തിംഗിനായി സ്ഥാപിച്ചിരുന്ന ചെന്പ് തകിടാണ് പ്രതി മോഷ്ടിച്ചത്. അടുത്ത കാലത്തു നടന്ന മോഷണങ്ങളും മോഷണ ശ്രമങ്ങളും നടത്തിയത് ഇതരസംസ്ഥാനക്കാരനായ ഒരു ചെറുപ്പക്കാരന്‍ തനിച്ചാണെന്ന് സിസിടിവി ദൃശ്യങ്ങളില്‍ നിന്നും വ്യക്തമായിരുന്നു. ഇതിന്‍റെ അടിസ്ഥാനത്തില്‍ പോലീസ് വിവിധ സംഘങ്ങളായി തിരിഞ്ഞ് സമീപ പ്രദേശങ്ങളിലേതടക്കം 300ഓളം സിസിടിവി കാമറകള്‍ പരിശോധിച്ചാണ് പെരുമ്പാവൂരിലും തുടര്‍ന്ന് ആലുവ കമ്പനിപ്പടിയിലും താമസമാക്കിയ പ്രതിയിലേക്ക് അന്വേഷണ സംഘമെത്തിയത്. നഗരത്തില്‍ ആക്രി സാധനങ്ങള്‍ ശേഖരിച്ച് വഴി മനസിലാക്കിയ ശേഷം മോഷ്ടിക്കാനുള്ള സ്ഥലം കണ്ടെത്തി രാത്രി സമയത്ത് മോഷണം നടത്തുകയാണ് പ്രതിയുടെ രീതി. കെട്ടിടങ്ങളിലെ ഇലക്ട്രിക് പവര്‍ യൂണിറ്റുകളില്‍ എര്‍ത്തിംഗിനായി ഉപയോഗിക്കുന്ന ചെന്പ് തകിടുകൾ ഉപകരണങ്ങൾ ഉപയോഗിച്ച് അഴിച്ചെടുത്ത് ബാഗിലാക്കി കടത്തികൊണ്ടുപോകുകയാണ് പതിവ്. വസ്ത്രവ്യാപാര സ്ഥാപനത്തില്‍ നിന്ന് പല തവണയായാണ് പ്രതി ചെന്പ് തകിടുകൾ കടത്തിയത്. മോഷണമുതലിന്‍റെ കുറച്ചു ഭാഗം പോലീസ് കണ്ടെത്തി.

പൂത്തിരി-രാസലഹരി വില്പന; കൂട്ടുപ്രതി ഒളിവില്‍ തന്നെ

കൊച്ചി: ഓണാഘോഷം കളറാക്കാന്‍ പൂത്തിരി എന്ന പ്രത്യേക കോഡില്‍ രാസലഹരി വില്പന നടത്തിയ അറസ്റ്റിലായ യുവാവിന്‍റെ കൂട്ടാളി ഇപ്പോഴും ഒളിവില്‍ തന്നെ. കേസിലെ രണ്ടാം പ്രതി പറവൂര്‍ സ്വദേശി ഷെഫീക്ക് ഹനീഫ ബംഗളൂരുവിലേക്ക് കടന്നെന്നാണ് എക്‌സൈസിന്‍റെ സംശയം. ഓഗസ്റ്റ് 19 നാണ് കേസുമായി ബന്ധപ്പെട്ട് ആലുവ ഈസ്റ്റ് കൊടികുത്തിമല സ്വദേശി മുറ്റത്ത് ചാലില്‍ വീട്ടില്‍ മുസാബിര്‍ മുഹമ്മദി (33) നെയാണ് 9.178 ഗ്രാം എംഡിഎംഎയുമായി എക്‌സൈസ് സംഘം അറസ്റ്റ് ചെയ്തത്. ഇയാളുടെ സ്മാര്‍ട്ട് ഫോണും എക്‌സൈസ് കസ്റ്റഡിയിലെടുത്തിരുന്നു. ഇയാള്‍ റിമാന്‍ഡിലാണ്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]