ADVERTISEMENT

ADVERTISEMENT

മലബാർ റിവർ ഫെസ്റ്റിവല്ലിന്‍റെ ഭാഗമായി സൈക്ലിംഗ് നടത്തി

കോടഞ്ചേരി: മലബാർ റിവർ ഫെസ്റ്റിവല്ലിന്‍റെ ഭാഗമായി കാലിക്കട്ട് ബൈക്കേഴ്സ് ക്ലബും, അരീക്കോട് കെഎൽ പത്തു പെടലേഴ്‌സ് ക്ലബിന്‍റെ താരങ്ങളും സൈക്ക്ലിംഗ് നടത്തി.

ഡിടിപിസി സിഇഒ ബിനു കുര്യയാക്കോസ് റാലി ഫ്ലാഗ് ഓഫ് ചെയ്തു. സീനിയർ ചേമ്പർ ഇന്‍റർനാഷണൽ വെസ്റ്റ് കോടഞ്ചേരി റാലിക്ക് സ്വീകരണം നൽകി. റാലിയിൽ പങ്കെടുത്തവർക്ക് സ്നേഹവിരുന്ന് നൽകി. സീനിയർ ചേമ്പർ പ്രസിഡന്‍റ് ജോയ് മോളത്, സെക്രട്ടറി ഫ്രാൻസിസ് മുണ്ടാട്ടിൽ, ട്രഷറര്‍ ഷാജു എന്നിവർ പ്രസംഗിച്ചു.

ക്ലബ് മെമ്പേഴ്സിന്‍റെ സഹകരണത്തോടെ സ്നേഹ വിരുന്ന് നൽകി.

ADVERTISEMENT

യൂത്ത് കോൺഗ്രസ് കോഴിക്കോട് കോർപറേഷൻ സെക്രട്ടറിയെ ഉപരോധിച്ചു

കോഴിക്കോട്: കോഴിക്കോട് ഗവ. മോഡൽ ഹയർ സെക്കൻഡറി സ്കൂളിൽ വിദ്യാര്‍ഥികളുടെ ജീവന് ഭീഷണിയായി ഇടിഞ്ഞു പൊളിഞ്ഞു വീഴാറായ പഴയകെട്ടിടം പൊളിച്ചു മാറ്റാത്തതിൽ പ്രതിഷേധിച്ച് യൂത്ത് കോൺഗ്രസ് നോർത്ത് നിയോജകമണ്ഡലം കമ്മിറ്റിയുടെ നേതൃത്വത്തിൽ കോഴിക്കോട് കോർപറേഷൻ സെക്രട്ടറി കെ.യു. ബിനിയെ ഉപരോധിച്ചു. കെട്ടിടം അപകടാവസ്ഥയിൽ ആണെന്ന് സ്കൂൾ ഹെഡ്മാസ്റ്ററും പിടിഎ യും രേഖാമൂലം അറിയിപ്പ് നൽകിയിട്ടും കോർപറേഷൻ നടപടി എടുക്കാത്തതിൽ പ്രതിഷേധിച്ചാണ് യൂത്ത് കോൺഗ്രസ് ഉപരോധം നടത്തിയത്. അനുമതി ലഭിക്കാത്തത് കൊണ്ടാണ് കെട്ടിടം പൊളിക്കാത്തതെന്ന് സെക്രട്ടറി സമരക്കാരോട് പറഞ്ഞു. സമരത്തിന് യൂത്ത് കോൺഗ്രസ് നിയോജക മണ്ഡലം പ്രസിഡന്‍റ് എം. ഷിബു, യൂത്ത് കോൺഗ്രസ് സംസ്ഥാന സെക്രട്ടറി വി.ടി. നിഹാൽ, യൂത്ത് കോൺഗ്രസ് ജില്ലാ ജനറൽ സെക്രട്ടറി പി. എം, ആഷിക്ക്, എന്നിവർ നേതൃത്വം നൽകി.

സെന്‍ട്രല്‍ മാര്‍ക്കറ്റ് സന്ദര്‍ശിച്ച് കോണ്‍ഗ്രസ് നേതാക്കള്‍

കോഴിക്കോട്: കോഴിക്കോട് സെന്‍ട്രല്‍ മാര്‍ക്കറ്റ് പൊളിച്ചു പണിയാനുള്ള നഗരസഭ തീരുമാനത്തെ തുടര്‍ന്ന് ലഭിച്ച പരിതികളുമായി ബന്ധപ്പെട്ട് കോണ്‍ഗ്രസ് നേതാക്കള്‍ മാര്‍ക്കറ്റ് സന്ദര്‍ശിച്ചു. മാര്‍ക്കറ്റ് ഒരുമിച്ച് പൊളിക്കരുതെന്നും ഭാഗികമായി പൊളിച്ച് പുനര്‍നിര്‍മ്മിക്കുകയാണ് വേണ്ടതെന്ന് ഒരു വിഭാഗം തൊഴിലാളികള്‍ ആവശ്യപ്പെട്ടു. തൊഴാളികളുടെ ജോലി സുരക്ഷക്ക് തിരിച്ചറിയല്‍ കാര്‍ഡ് ഇതുവരെ ലഭിച്ചിട്ടില്ലെന്ന് അവര്‍ പരാതിപ്പെട്ടു. പുതുക്കിപണിയാന്‍ ഉദ്ദേശിക്കുന്ന കെട്ടിടത്തില്‍ കോഴിക്കച്ചവടക്കാര്‍ക്ക് ഇടമുണ്ടാകില്ലെന്ന ആശങ്കയും ഇവര്‍ പങ്കുവച്ചു. ഡിസിസി പ്രസിഡന്‍റ് കെ. പ്രവീണ്‍കുമാറിന്‍റെ നേതൃത്വത്തിലുള്ള സംഘത്തില്‍ കെപിസിസി ജനറല്‍ സെക്രട്ടറിമാരായ അഡ്വ. കെ. ജയന്ത്, അഡ്വ. പി.എം. നിയാസ്, ഐഎന്‍ടിയുസി ജില്ലാ പ്രസിഡന്‍റ് കെ.രാജീവന്‍, കോര്‍പറേഷന്‍ പ്രതിപക്ഷ നേതാവ് കെ.സി. ശോഭിത എന്നിവരായിരുന്നു ഉണ്ടായിരുന്നത്. മാര്‍ക്കറ്റിന്‍റെ പുനര്‍നിര്‍മ്മാണത്തെ കുറിച്ച് പഠിക്കുന്നതിന് ബന്ധപ്പെട്ടവരുമായി സംസാരിച്ച് കൃത്യമായ കാര്യങ്ങള്‍ മനസിലാക്കാന്‍ ജില്ലാ കോണ്‍ഗ്രസ് കമ്മിറ്റി അഞ്ചംഗ സമിതിയെ നിയോഗിച്ചു. പത്ത് ദിവസത്തിനുള്ളി റിപ്പോര്‍ട്ട് നല്‍കാനാണ് ആവശ്യപ്പെട്ടിരിക്കുന്നത്.

മലയോര മേഖലയിൽ കനത്ത മഴയും കാറ്റും, നിരവധി വീടുകൾക്ക് നാശനഷ്ടം

കൂടരഞ്ഞി: മലയോര മേഖലയിൽ കനത്ത മഴയിലും കാറ്റിലും വന്‍ നാശനഷ്ടങ്ങള്‍. രാത്രിവൈകിയും മഴ തുടര്‍ന്ന തോടെ പലയിടത്തും വൈദ്യൂതി ബന്ധം താറുമാറായി.കൂടരഞ്ഞി, തിരുവമ്പാടി പഞ്ചായത്തുകളിലെ വിവിധ സ്ഥലങ്ങളിൽ ഉണ്ടായ മിന്നൽ ചുഴലിയിൽ വൻ നാശനഷ്ടം. കൂമ്പാറയിൽ തെങ്ങും മരങ്ങളും വീടുകളുടെ മുകളിൽ പതിച്ചു വീടുകൾക്ക് നാശനഷ്ടമുണ്ടായി. കൂമ്പാറ പുന്നക്കടവ് കെ.ടി ഹനീഫ, പരേങ്ങൽ ഹംസ എന്നിവരുടെ വീടുകൾക്കാണ് കനത്ത നാശനഷ്ടം സംഭവിച്ചത്. കുളിരാമുട്ടി മുള്ളൻപടി ഭാഗത്തു രാത്രി വീശിയടിച്ച കാറ്റിൽ കളമ്പുകാട്ട് രാജു, ചാക്കോ, വർക്കി, ജിബി എന്നിവരുടെ തെങ്ങും കമുകും ജാതിയും ഉൾപ്പെടെ കടപ്പുഴകി വീണു. തെങ്ങ് ഉൾപ്പെടെ മരങ്ങൾ വൈദ്യുതി ലൈനിൽ വീണ്‌ ഗതാഗതം തടസ്സപ്പെട്ടു. പുല്ലുരാംപാറ പള്ളിപ്പടി തീക്കുഴിവയലിൽ ജോയിയുടെ വീടിന്‍റെ മുകളിലേക്ക് തെങ്ങ് വീണ് വീടിന് കേടുപാടുകൾ സംഭവിച്ചു.വൈദ്യുതി കമ്പികൾക്ക് മുകളിലും മരങ്ങൾ വീണു. പ്രദേശത്ത് വൈദ്യുതി നിലച്ചിരിക്കുകയാണ്. പേരാമ്പ്രയിൽ മരങ്ങൾ വീണ് ഗതാഗത തടസം പേരാമ്പ്ര: പേരാമ്പ്രയുടെ വിവിധ ഭാഗങ്ങളിൽ വ്യാപകമായി റോഡരികിലുള്ള മരങ്ങൾ കടപുഴകി വീണ് ഗതാഗത തടസമുണ്ടായി. പേരാമ്പ്ര ബൈപാസ് റോഡിൽ ഇഎംഎസ് ആശുപത്രിക്ക് സമീപം മരം വീണു. വാല്യക്കോട് ഹൈടെൻഷൻ ലൈനിന്‍റെ മുകളിലേക്ക് കൂറ്റൻ തെങ്ങ് മറിഞ്ഞു വീണത് ഏറെ നേരം പരിശ്രമിച്ചാണ് അഗ്നി രക്ഷാസേന അപകടം കൂടാതെ മുറിച്ചു മാറ്റിയത്. ആവള മഠത്തിൽമുക്കിൽ ഇലക്ട്രിക് ലൈനിന്‍റെ മുകളിലൂടെ റോഡരികിലുള്ള പ്ലാവും തേക്കും വീണത് ഏറെനേരം യാത്രക്കാർക്ക് ബുദ്ധിമുട്ട് സൃഷ്ടിച്ചു.നൊച്ചാട് ചാത്തോത്ത് താഴെയിലും കായണ്ണ അങ്ങാടിയിലും മരം വീണ് റോഡ് തടസ്സപ്പെട്ടു. കോടേരിചാലിൽ വീടിന്‍റെ മുകളിലേക്ക് വൻ മരം മറിഞ്ഞു വീണു. കൂരാച്ചുണ്ടിലും കക്കയം റോഡിൽ പൂവത്തുംതാഴെ മരം വീണതിനാൽ ദീർഘ നേരം ഗതാഗത തടസം സൃഷ്ടിച്ചു. പേരാമ്പ്ര അഗ്നിരക്ഷാ നിലയത്തിൽ നിന്നും സീനിയർ ഫയർ ആൻഡ് റെസ്ക്യൂ ഓഫീസർ റഫീഖ് കാവിലിന്‍റെ നേതൃത്വത്തിൽ ഫയർഫോഴ്സ് യൂണിറ്റുകൾ എത്തി വിവിധ സ്ഥലങ്ങളിലെ മരങ്ങൾ മുറിച്ചുമാറ്റി ഗതാഗതം പുന:സ്ഥാപിച്ചു. പെരുവണ്ണാമൂഴി: കനത്ത കാറ്റിൽ ചക്കിട്ടപാറ പഞ്ചായത്ത് വാർഡ് ഒന്നിൽ പെട്ട പന്നിക്കോട്ടൂരിലും നാശം. കൈതക്കൊല്ലി പ്രകാശിന്‍റെ വീടിനു മുകളിൽ മരം വീണു. ചന്ദനത്തിൽ ഗിരീഷിന്‍റെ വീടിനു മീതെ കവുങ്ങ് മുറിഞ്ഞു വീണു.ഇരുവരുടെയും വീടുകൾക്ക് തകരാർ സംഭവിച്ചു. ചെമ്മീൻ കമ്പനിക്കു സമീപം വൈദ്യുതി ലൈൻ പൊട്ടി വീണു. പലയിടങ്ങളിലും വ്യാപകമായി വൈദ്യുതി വിതരണ തടസവുമുണ്ടായി. മിന്നല്‍ ചുഴലി നാശം വിതച്ചു നാദാപുരം : ശക്തമായ മഴക്കൊപ്പം മിന്നല്‍ ചുഴലിയും വിലങ്ങാട് , കല്ലാച്ചി,നാദാപുരം മേഖലകളില്‍ കാറ്റ് നാശം വിതച്ചു വന്‍ മരങ്ങള്‍ കടപുഴകി വീണു വീടുകളും വാഹനങ്ങളും തകര്‍ന്നു. നാദാപുരം പഞ്ചായത്ത് നാലാം വാര്‍ഡ് തെരുവന്‍ പറമ്പ് , ചിയ്യൂര്‍ , ചീറോത്ത് മുക്ക് എന്നിവിടങ്ങളിലും വാണിമേല്‍ പഞ്ചായത്തിലെ വിലങ്ങാട് ,തൂണേരി പഞ്ചായത്തിലെ കോടഞ്ചേരി മേഖലകളിലുമാണ് മിന്നല്‍ ചുഴലി നാശം വിതച്ചത്. ഇന്നലെ പുലര്‍ച്ചെ ഒരു മണിയോടെയാണ് മേഖലയിൽ കാറ്റ് വീശിയത്. വീടുകള്‍ക്ക് മുകളില്‍ വന്‍ മരങ്ങളും തെങ്ങുകളും കടപുഴകി വീണു വീടുകള്‍ തകര്‍ന്നു പല വീടുകളുടെയും ഓടുകള്‍ കാറ്റില്‍ പാറി പോയി. കല്ലാച്ചി ചീറോത്ത് തൈവെച്ച പറമ്പത്ത് ബഷീറിന്റെ വീട്ട് മുറ്റത്ത് നിര്‍ത്തിയിട്ട കാറിന് മുകളില്‍ തേക്ക് മരം കടപുഴകി വീണ് ഇന്നോവ കാര്‍ തകര്‍ന്നു. വീടിനും കേട്പാട് സംഭവിച്ചു.വിഷ്ണുമംഗലത്ത് പുത്തന്‍പുരയില്‍ സുഗതന്റെ വീട്ട് മുറ്റത്ത് നിര്‍ത്തിയിട്ട കാറിനും സ്‌കൂട്ടറിനും മുകളില്‍ മരം കടപുഴകി വീണ് കാറിന് നാശം സംഭവിച്ചു. തെരുവൻ പറമ്പിൽ കുറ്റിക്കാട്ടിൽ സുധീഷിന്‍റെ വീട് മരം വീണ് തകർന്നു. ചീറോത്ത് ഭാഗങ്ങളില്‍ മരങ്ങള്‍ കടപുഴകി വീണ് നിരവധി പതിനൊന്ന് കെ വി വൈദ്യുതി തൂണുകള്‍ തകര്‍ന്നു.പ്രദേശത്ത് വൈദ്യുതി ബന്ധം താറുമാറായി. വിലങ്ങാട് ഉരുട്ടി , വാളുക്ക് , മഞ്ഞക്കുന്ന് പ്രദേശങ്ങളിലും അതി ശക്തമായ കാറ്റില്‍ മരങ്ങള്‍ കടപുഴകി വീണ് വീടുകള്‍ക്ക് മേല്‍ പതിച്ചു.ഇടവഴികളിലും, റോഡുകളിലും ,പറമ്പുകളിലും നിരവധി മരങ്ങളാണ് കാറ്റില്‍ കടപുഴകി വണത്. ലക്ഷങ്ങളുടെ നാശ നഷ്ടമാണ് ഈ മേഖലയില്‍ സംഭവിച്ചത്. ചൂരപ്പൊയ്കയിൽ ജോബിയുടെ വീടിന് മുകളിൽ തെങ്ങ് വീണ് ഓടും , കവുക്കോൽ എന്നിവ തകർന്നു. ഉരുട്ടിയിൽ താനിയുള്ള പറമ്പത്ത് കുമാരന്‍റെ വീടിന് മുകളിൽ തെങ്ങ്, പ്ലാവ് എന്നീ മരങ്ങൾ വീണ് വീട് തകർന്നു. മഖലയിൽ ചുഴലി വീശിയ പ്രദേശങ്ങളിൽ വൈദ്യുതി ബന്ധവും താറുമാറായി മരങ്ങള്‍ വീണ് ഇലക്ട്രിക് പോസ്റ്റുകള്‍ തകര്‍ന്നു. ഇതോടെ ഈ മേഖല ഇരുട്ടിലായി. വൈദ്യുതി ബന്ധം പുന:സ്ഥാപിക്കാനുള്ള നടപടികള്‍ ആരംഭിച്ചതായിഅധികൃതര്‍പറഞ്ഞു. നാദാപുരം പരപ്പ് പാറ സെക്ഷനുകളിലായി 50 ലേറെ വൈദ്യുതി തൂണുകൾ തകർന്നതായും ലക്ഷങ്ങളുടെ നാശനഷ്ടം ബോർഡിന് സംഭവിച്ചതുമായാണ് പ്രാഥമിക കണക്ക്. അപകട മേഖലകളിൽ നാദാപുരംഅഗ്നിരക്ഷാ സേനയും , ജനകീയ ദുരന്ത സേനാ പ്രവർത്തകരും ചേർന്ന് രക്ഷാ പ്രവർത്തനങ്ങൾ എകോപ്പിച്ചു. കർമ നിരതരായി അഗ്നിരക്ഷാസേന നാദാപുരം : ശനിയാഴ്ച്ച പുലർച്ചെ ഒരു മണിയോടെ ആഞ്ഞ് വീശിയ മിന്നൽ ചുഴലി യിൽ മരങ്ങൾ വീണ് രൂപപ്പെട്ട ഗതാഗത തടസ്സങ്ങൾ നീക്കാനും രക്ഷാ പ്രവർത്തനങ്ങൾക്കുമായി പരക്കം പാഞ്ഞ് അഗ്നി രക്ഷാ സേന. പുലർച്ചെയാണ് കുറ്റ്യാടി - നാദാപുരം സംസ്ഥാന പാതയിൽ പയന്തോംഗിൽ റോഡിന് കുറുകെ മരം വീണതായി വിവരം വന്നത്. ഇതോടെ ആരംഭിച്ച രക്ഷാപ്രവർത്തനം സമാപിച്ചത് വൈകുന്നേരമായിരുന്നു.റോഡിലും , വീടുകൾക്ക് മുകളിലും വൈദ്യുതി ലൈനുകളിലുംകടപുഴകി വീണ മരങ്ങൾ മുറിച്ച് നീക്കുകയായിരുന്ന പ്രഥാന കർത്തവ്യം. നാദാപുരം , കല്ലാച്ചി മേഖലകൾക്ക് പുറമേ വിലങ്ങാട് മലയോര മേഖലയിലെ യും കെടുതികളിൽ അഗ്നി രക്ഷാ സേനാംഗങ്ങൾ പറന്നെത്തി. കുറ്റ്യാടി - നാദാപുരം സംസ്ഥാന പാതയിലൂടെ പോകുന്ന യാത്രക്കാർക്കും വാഹനങ്ങൾക്കും ഭീഷണി യായി അപകടാവസ്ഥയിൽ നിന്ന മരവും സന്നദ്ധ പ്രവർത്തകരുടെ സഹായത്തോടെ മുറിച്ചു നീക്കി.ഇതിനിടയിലാണ് ഉച്ചയോടു കൂടി അമ്പലകുളങ്ങര നിട്ടൂരിൽ കാനയിൽ വീണ പശുവിനെയും സേന രക്ഷപ്പെടുത്തുകയുണ്ടായി. നഷ്ടപരിഹാരത്തിന് നടപടി സ്വീകരിക്കണമെന്ന് നാദാപുരം : മണ്ഡലത്തിലെ വിവിധ പ്രദേശങ്ങളിൽ ഉണ്ടായ ചുഴലിക്കാറ്റിൽ നാശനഷ്ടമുണ്ടായ കുടുംബങ്ങൾക്ക് നഷ്ടപരിഹാരം ലഭിക്കുന്നതിന് നടപടികൾ സ്വീകരിക്കണമെന്ന് ഷാഫി പറമ്പിൽ എംപി .ചുഴലിക്കാറ്റ് നടന്ന പ്രദേശത്ത് നഷ്ടം കണക്കാക്കുന്നതിന് റവന്യൂ വകുപ്പിന്റെ പ്രത്യേക സംഘത്തെ നിയോഗിക്കണമെന്നും ജില്ലാ ഭരണകൂടത്തോട് അദ്ദേഹം ആവശ്യപ്പെട്ടു. കഴിഞ്ഞദിവസം ചുഴലിക്കാറ്റ് വീശിയ നാദാപുരം പഞ്ചായത്തിലെ കല്ലാച്ചി ഭാഗങ്ങളിലെ എംപി സന്ദർശിച്ചു. വീടിനു മുകളില്‍ മരം കടപുഴകി വീണു കൂത്താളി : വൃദ്ധ ദമ്പതികള്‍ കിടന്നുറങ്ങുകയായിരുന്ന വീടിനു മുകളില്‍ മരം കടപുഴകി വീണു. കൂത്താളി പഞ്ചായത്തിലെ ആറാം വാര്‍ഡ് കിഴക്കന്‍ പേരാമ്പ്രയിലെ മങ്കുന്നുമ്മല്‍ ഗംഗാധരന്‍ നായരുടെ വീടിന് മുകളിലാണ് തെങ്ങ് കടപുഴകി വീണത്. ഇന്നലെ പുലര്‍ച്ചെ മഴയോടൊപ്പം വീശിയടിച്ച ശക്തമായ കാറ്റിലാണ് വീടിന് മുകളിലേക്ക് തെങ്ങ് വീണത്. കൂത്താളി പഞ്ചായത്ത് മുന്‍ അംഗമായ ഗംഗാധരന്‍ നായരും ഭാര്യയും മാത്രമേ വീട്ടില്‍ ഉണ്ടായിരുന്നുള്ളൂ. രണ്ടുപേരും പരിക്കേല്‍ക്കാതെ രക്ഷപ്പെടുകയായിരുന്നു. ശബ്ദം കേട്ട് എഴുന്നേറ്റ് നോക്കിയപ്പോഴാണ് വീടിന് മുകളില്‍ മരം വീണത് അറിയുന്നത്. ഇരു നില ഓടു മേഞ്ഞ വീടിന്‍റെ മേല്‍ഭാഗത്തേയും വരാന്തയുടെയും കഴുക്കോലും പട്ടികയും പൂര്‍ണ്ണമായും തകര്‍ന്ന നിലയിലാണ്.

സെൻട്രൽ ജയിൽ തടവുകാരൻ മരിച്ചു

കണ്ണൂർ: കണ്ണൂർ സെൻട്രൽ ജയിലിൽ തടവ് ശിക്ഷ അനുഭവിക്കുകയായിരുന്ന വയോധികൻ അസുഖത്തെ തുടർന്നു മരിച്ചു. ശിക്ഷാ തടവുകാരനായ കണ്ണപുരം സ്വദേശി ബാലനാണ് (84) ന്യുമോണിയ ബാധിച്ച് മരിച്ചത്. പരിയാരത്തെ കണ്ണൂർ മെഡിക്കൽ കോളജിൽ ചികിത്സയിലായിരുന്നു. പോക്സോ കേസിൽ ശിക്ഷിക്കപ്പെട്ടതിനെ തുടർന്നാണ് കണ്ണൂർ സെൻട്രൽ ജയിലിലെത്തിയത്.

സ്കൂൾ ബസിലെ സഹായി ജോലിക്കിടെ വീണുമരിച്ചു

കാപ്പാട്: സ്കൂൾ ബസിൽ നിന്ന് തെറിച്ചുവീണ് സഹായി മരിച്ചു. കക്കാട് കൗസർ ഇംഗ്ലീഷ് മീഡിയം സ്കൂൾ ബസിലെ ജീവനക്കാരൻ കാപ്പാട് പോസ്റ്റ് ഓഫീസിനു സമീപം തണലിൽ വീട്ടിൽ നാലകത്ത് ദാവൂദ് (68) ആണ് മരിച്ചത്. കബറടക്കം ഇന്ന് ഉച്ചയ്ക്ക് ഒന്നിന് താഴെചൊവ്വ ജുമാമസ്ജിദ് കബർസ്ഥാനിൽ. സ്കൂൾ കുട്ടികളുമായി മടങ്ങുന്നതിനിടെ വെള്ളിയാഴ്ച ഉച്ചയ്ക്ക് 3.30 ഓടെ പള്ളിപ്രത്തായിരുന്നു സംഭവം. കുട്ടികളെ ഇറക്കാനായി എഴുന്നേറ്റ ദാവൂദ് സ്കൂൾ ബസിൽ നിന്ന് തെറിച്ചു വീഴുകയായിരുന്നു. വീഴുന്നതിനിടെ തല കരിങ്കലിനിടിച്ച് സാരമായി പരിക്കേറ്റ അദ്ദേഹത്തെ ഉടൻ കണ്ണൂർ ധനലക്ഷ്മി ആശുപത്രിയിൽ എത്തിച്ചുവെങ്കിലും പരിക്ക് ഗുരുതരമായതിനെ തുടർന്ന് ചാല മിംസ് ആശുപത്രിയിലേക്കു മാറ്റി. ഇവിടെ ചികിത്സയിലിരിക്കെ ഇന്നലെ ഉച്ചകഴിഞ്ഞ് രണ്ടോടെ മരിച്ചു. ഭാര്യ: സുബൈദ. മക്കൾ: അറഫ, ഹാജിറ, ഹസീന. മരുമക്കൾ: അബ്‌ദുൾസലാം, ഷഫീഖ് (വ്യാപാരി, ചക്കരക്കൽ), മുഹമ്മദ് അൻവർ (ഗൾഫ്). സഹോദരങ്ങൾ: അസ്മാബി, സത്താർ, പരേതയായ സൈനബ.

ഭർതൃവീട്ടിൽ യുവതിയെ തൂങ്ങിമരിച്ച നിലയില്‍ കണ്ടെത്തി

കോഴിക്കോട്: മാറാട് ഭർതൃവീട്ടിൽ യുവതിയെ തൂങ്ങിമരിച്ച നിലയില്‍ കണ്ടെത്തി. ഗോതീശ്വരം സ്വദേശി ഷിംന (31) ആണ് മരിച്ചത്. വെള്ളിയാഴ്ച രാത്രിയിൽ കിടപ്പുമുറിയിൽ തൂങ്ങിമരിച്ച നിലയിൽ കണ്ടെത്തുകയായിരുന്നു. ഭർത്താവ് പ്രശാന്ത് മദ്യപാനി ആയിരുന്നെന്നും ഇതുമായി ബന്ധപ്പെട്ട തർക്കമാണ് മരണകാരണമെന്ന് സംശയിക്കുന്നതായും പോലീസ് പറഞ്ഞു. മരണം നടന്ന ദിവസവും ഭര്‍ത്താവുമായി വഴക്കുണ്ടായിരുന്നു. മാറാട് പോലീസ് സ്ഥലത്തെത്തി തുടര്‍ നടപടികള്‍ സ്വീകരിച്ചു.

ഡോ.എ.പി.ജെ അബ്ദുള്‍ കലാം രാഷ്ട്രസേവാ പുരസ്‌കാരം പ്രഖ്യാപിച്ചു

കോഴിക്കോട്: തൃശൂര്‍ ആസ്ഥാനമായി പ്രവര്‍ത്തിക്കുന്ന ബ്രീസ് ഫൗണ്ടേഷന്‍ ഏര്‍പ്പെടുത്തിയ ഡോ.എ.പി.ജെ അബ്ദുള്‍ കലാം രാഷ്ട്രസേവാ പുരസ്‌കാരം പ്രഖ്യാപിച്ചു. 14 പേര്‍ക്കാണ് പുരസ്‌കാരം. കലാമിന്റെ പത്താം ചരമവാര്‍ഷികത്തിന്‍റെ ഭാഗമായാണ് പുരസ്‌കാരം.27ന് കോഴിക്കോട് വ്യാപാരഭവനില്‍ അഹമ്മദ് േദവര്‍േകാവില്‍ എംഎല്‍എ, കവി പി.െക. ഗോപി, ഡെപ്യൂട്ടി മേയര്‍ മുസാഫര്‍ അഹമ്മദ് എന്നിവര്‍ സംബന്ധിക്കുമെന്ന് പ്രസിഡന്‍റ് ഡോ. ബി. ലൂയിസ് വാര്‍ത്താസേമ്മളനത്തില്‍ അറിയിച്ചു. പ്രായമായവര്‍ മുതല്‍ കുട്ടികളെവരെ ഉള്‍പ്പെടുത്തി 101 പേര്‍ എഴുതിയ കവിതാസമാഹാരം പി.കെ. ഗോപി പ്രകാശനം ചെയ്യും.

തെരുവ് നായ ശല്ല്യം അവസാനിപ്പിക്കണം: കേരള കോൺഗ്രസ്-എം

തിരുവമ്പാടി: തെരുവ് നായശല്ല്യം വർധിച്ച് വരുന്ന സാഹചര്യത്തിൽ ഉടമസ്ഥരില്ലാതെ തെരുവിൽ അലഞ്ഞ് തിരിഞ്ഞ് നടക്കുന്ന നായകളെ ദയാവധം നടത്താനുള്ള ഉത്തരവ് ഉണ്ടാകണമെന്ന് കേരള കോൺഗ്രസ്-എം തിരുവമ്പാടി മണ്ഡലം നേതൃത്വ സമ്മേളനം ആവശ്യപ്പെട്ടു. ജില്ലാ പ്രസിഡന്‍റ് ടി.എം. ജോസഫ് ഉദ്ഘാടനം ചെയ്തു. മണ്ഡലം പ്രസിഡന്‍റ് ജോയി മ്ളാക്കുഴി അധ്യക്ഷത വഹിച്ചു. സിജോ വടക്കേൻതോട്ടം, ജോസഫ് പൈമ്പിള്ളി, വിൽസൺ താഴത്ത് പറമ്പിൽ, സണ്ണി പുതു പറമ്പിൽ, ആൻസി സെബാസ്റ്റ്യൻ, അനിൽ പുതുപറമ്പിൽ, സന്തോഷ് തറയിൽ, ശ്രീധരൻ പുതിയോട്ടിൽ, നാരായണൻ മുട്ടുചിറ, ബാജി മാതാളികുന്നേൽ, സുനിൽ ചാരുപ്ളാക്കൽ, ബിജു പുളിയാശേരി എന്നിവർ പ്രസംഗിച്ചു.

കൊടുവള്ളി ടൗണില്‍ ട്രാഫിക് പരിഷ്‌കരണം

കൊടുവള്ളി: ദേശീയപാത 766ന്‍റെ ഭാഗമായ കൊടുവള്ളി ടൗണില്‍ അനുഭവപ്പെടുന്ന ഗതാഗതക്കുരുക്കു കാരണം യാത്രക്കാരും പൊതുജനങ്ങളും ഏറെ ബുദ്ധിമുട്ടുന്ന സാഹചര്യത്തില്‍ ഇവിടെ ഗതാഗത പരിഷ്‌കാരം ഏര്‍പ്പെടുത്തി. പ്രധാന തീരുമാനങ്ങള്‍: കോഴിക്കോട് ഭാഗത്തു നിന്നും താമരശേരി ഭാഗത്തേക്ക് പോകുന്ന ബസുകള്‍ ഉച്ചകഴിഞ്ഞു മൂന്നിനു ശേഷം ബസ് സ്റ്റാന്‍റില്‍ കയറ്റാതെ സര്‍വ്വീസ് സഹകരണ ബാങ്കിന് സമീപം നിറുത്തി ആളെ കയറ്റണം.ബസ് സ്റ്റാന്‍റ് മുതല്‍ എസ്ബിഐ ബാങ്ക് ആല്‍മരം വരെ ഇരുവശത്തുമുള്ള പാര്‍ക്കിംഗ് നിരോധിച്ചു. ഉച്ചകഴിഞ്ഞു മൂന്നിനു ശേഷം മാനിപുരം റോഡില്‍ ആര്‍ഇസി റോഡ് ജംഗ്ഷനില്‍ വണ്‍വേ ആയി വാഹനങ്ങള്‍ കടത്തിവിടും. ആര്‍ഇസി റോഡിലേക്ക് പ്രവേശിക്കേണ്ട വാഹനങ്ങള്‍ മുക്കിലങ്ങാടി വഴി ആര്‍ഇസി റോഡിലേക്ക് പ്രവേശിക്കണം. കൊടുവള്ളി -നരിക്കുനി റോഡില്‍ കിഴക്കോത്ത് പാലം വരെ വാഹന പാര്‍ക്കിംഗിന് ഉപയോഗപ്പെടുത്താം.

കോൺഗ്രസ് പ്രതിഷേധം സംഘടിപ്പിച്ചു

പേരാമ്പ്ര: പേരാമ്പ്ര താലൂക്ക് ആശുപത്രിക്ക് ഷാഫി പറമ്പിൽ എംപിയുടെ ഫണ്ടിൽ നിന്നും അനുവദിച്ച ആംബുലൻസ് സ്വീകരിക്കാത്ത പേരാമ്പ്ര ബ്ലോക്ക് പഞ്ചായത്ത് നടപടിയിൽ പ്രതിഷേധിച്ച് ബ്ലോക്ക് കോൺഗ്രസ് കമ്മിറ്റി പ്രതിഷേധ പ്രകടനവും പൊതു യോഗവും സംഘടിപ്പിച്ചു. ഡിസിസി പ്രസിഡന്‍റ് അഡ്വ. കെ. പ്രവീൺ കുമാർ ഉദ്ഘാടനം ചെയ്തു. ബ്ലോക്ക് കോൺഗ്രസ് വൈസ് പ്രസിഡന്‍റ് പി.എം. പ്രകാശൻ അധ്യക്ഷത വഹിച്ചു. ഡിസിസി ജനറൽ സെക്രട്ടറിമാരായ മുനീർ എരവത്ത്, രാജൻ മരുതേരി, പി.കെ. രാഗേഷ്, യൂത്ത് കോൺഗ്രസ് ജില്ലാ വൈസ് പ്രസിഡന്‍റ് എസ്. സുനന്ദ്, കെഎസ്‌യു ജില്ലാ പ്രസിഡന്‍റ് വി.ടി. സൂരജ്, എം. സൈറാബാനു, കെ.സി. രവീന്ദ്രൻ, ബാബു തത്തക്കാടൻ, അശോകൻ മുതുകാട്, ഷാജു പൊൻപറ, മിനി വട്ടക്കണ്ടി, ജസ്മിന മജീദ്, സായൂജ് അമ്പലകണ്ടി, എസ്. അഭിമന്യു, വി.പി. സുരേഷ്, പി.എസ്. സുനിൽ എന്നിവർ പ്രസംഗിച്ചു. പ്രകടനത്തിന് മോഹൻ ദാസ് ഓണിയിൽ, വിനോദൻ കല്ലൂർ, ഒ.എം രാജൻ, ഇ.ടി. സത്യൻ, കെ.പി. മായിൻകുട്ടി, രാജൻ കെ. പുതിയേടത്ത്, ഗിരിജാ ശശി, ഗീത കല്ലായി, ചിത്ര രാജൻ നേതൃത്വം നൽകി.

ലക്ഷദ്വീപ്- ബേപ്പൂർ യാത്രാ കപ്പൽ സർവ്വീസ് പുന:സ്ഥാപിക്കുന്നത് പരിഗണനയിലില്ലെന്ന്

ന്യൂഡൽഹി: നിർത്തലാക്കിയ ലക്ഷദ്വീപ് -ബേപ്പൂർ പാസഞ്ചർ സർവ്വീസ് പുന:സ്ഥാപിക്കുന്നത് നിലവിൽ ലക്ഷദ്വീപ് അഡ്മിനിഷ് ട്രേഷന്‍റെ പരിഗണനയിലില്ലെന്ന് മന്ത്രി. എം.കെ രാഘവൻ എം.പി ഉന്നയിച്ച ചോദ്യത്തിനാണ് മറുപടിയായി കേന്ദ്ര തുറമുഖ ഷിപ്പിംഗ് ജലഗതാഗത മന്ത്രി സർബാനന്ദ സോനോവാൾ ഇക്കാര്യം വ്യക്തമാക്കിയത്. ബേപ്പൂർ തുറമുഖത്തിന്‍റെ ആഴക്കുറവാണ് പാസഞ്ചർ സർവ്വീസുകൾ നിർത്തുന്നതിന് കാരണമായതെന്ന തരത്തിൽ അഭ്യൂഹങ്ങൾ പ്രചരിച്ചെങ്കിലും, പാസഞ്ചർ സർവ്വീസുകൾ നടത്തുന്നതിന് മതിയായ ആഴം ഉണ്ടെന്ന് കാണിച്ച് ബേപ്പൂർ പോർട്ട് ഓഫീസർ റിപ്പോർട്ട് സമർപ്പിച്ചിരുന്നു. ഈ പശ്ചാത്തലത്തിലാണ്, പോർട്ട് ഓഫീസറുടെ റിപ്പോർട്ടിനെ അടിസ്ഥാനപ്പെടുത്തി സർവ്വീസ് പുനസ്ഥാപിക്കുമോ എന്ന ചോദ്യം ലോക് സഭയിൽ എംപി ഉന്നയിച്ചത്. എന്നാൽ ലക്ഷദ്വീപ് ഭരണകൂടം ബേപ്പൂർ തുറമുഖത്തെ പ്രാഥമികമായി ചരക്ക് നീക്കത്തിന് മാത്രമായാണ് ഉപയോഗിക്കുന്നതെന്നും, പാസഞ്ചർ സർവ്വീസുകൾ കൊച്ചിയിലേക്കാണെന്നും, ബേപ്പൂരിലേക്കുണ്ടായിരുന്ന സർവ്വീസ് പുന:സ്ഥാപിക്കുന്നത് നിലവിൽ പരിഗണനയിലില്ലെന്നുമുള്ള മറുപടിയാണ് ലക്ഷദ്വീപ് ഭരണകൂടത്തിൽ നിന്ന് ലഭിച്ചതെന്നും മന്ത്രി വ്യക്തമാക്കി.

മിന്നൽ ചുഴലി ; പുളിയാവിൽ കനത്ത നാശം

നാദാപുരം: ചെക്യാട് പഞ്ചായത്തിലെ പുളിയാവ് ഭാഗങ്ങളിൽ മിന്നൽ ചുഴലിയിൽ വ്യാപക നാശം. നിരവധി വൃക്ഷങ്ങൾ കടപുഴകി വീണ് വീടുകൾ തകർന്നു. ഇലക്ട്രിക് പോസ്റ്റുകൾ തകർന്നു വൈദ്യുതി ബന്ധം താറുമാറായി. ചെറുവാതുക്കൽ മഹ്മൂദിന്‍റെ വീടിന് മുകളിലേക്ക് തെങ്ങ് വീണ് മേൽക്കൂരയുടെ ഓടുകൾ തകർന്നു. അയൽവീടായ അന്ത്രുവിന്‍റെ വീടിന് മുകളിലേക്ക് പുളിമരം വീണ് ഷീറ്റ് തകർന്നു. പാലക്കൂൽ സമീറിന്‍റെ വീടിനു മുകളിൽ മരം വീണ് വീടിന്‍റെ മേൽക്കൂര തകർന്നു. ആവുക്കൽ പറമ്പിലെ നിരവധി വീടുകൾക്ക് കേടുപാടുകൾ സംഭവിച്ചു. ശക്തമായ കാറ്റിൽ വാഴകൾ വ്യാപകമായി നിലം പൊത്തി. പല വീടുകളിലും കുടിവെള്ള വിതരണത്തിനായി സ്ഥാപിച്ച പൈപ്പ് ലൈൻ മരങ്ങൾ വീണ് തകർന്ന നിലയിലാണ്. ഏകദേശം എട്ട് ഇലക്ട്രിക് പോസ്റ്റുകൾ മരം വീണ് തകർന്നതോടെ പ്രദേശത്തെ വൈദ്യുതി ബന്ധം നിശ്ചലമായി.

ആറ് കുടുംബങ്ങള്‍ക്ക് കിടപ്പാടമൊരുക്കാന്‍ ഭൂമി നല്‍കി അധ്യാപിക

കോഴിക്കോട്: സ്വന്തമായി അടച്ചുറപ്പുള്ള കിടപ്പാടമെന്ന സ്വപ്നം പൂര്‍ത്തീകരിക്കാന്‍ ആറ് കുടുംബങ്ങള്‍ക്ക് പതിനെട്ടര സെന്‍റ് ഭൂമി സൗജന്യമായി നല്‍കി അധ്യാപിക കീഴരിയൂര്‍ നമ്പ്രത്തുകര പ്രശാന്തിയില്‍ രാധ . വീട് വെക്കാനുള്ള ഭൂമി ലഭ്യമാക്കാന്‍ ലൈഫ് പദ്ധതിയുടെ ഭാഗമായി സര്‍ക്കാര്‍ ആവിഷ്‌കരിച്ച മനസ്സോടിത്തിരി മണ്ണ് ക്യാമ്പയിനിന്‍റെ ഭാഗമായാണ് ഭൂമിദാനം. ഇതുമായി ബന്ധപ്പെട്ട മുഖ്യമന്ത്രി പിണറായി വിജയന്‍റെ പരസ്യം പത്രത്തില്‍ കണ്ടാണ് സ്ഥലം വിട്ടുനല്‍കാന്‍ ടീച്ചര്‍ തീരുമാനിച്ചത്. തനിക്കിത് എങ്ങനെയെങ്കിലും കളയാനുള്ള ഭൂമിയല്ല, പാവങ്ങള്‍ക്ക് കിട്ടണം. ഇതിനായി വെറുതെ ഭൂമി നല്‍കുകയല്ല, വിശദമായി അന്വേഷിച്ച് കാര്യങ്ങള്‍ മനസ്സിലാക്കിയ ശേഷമാണ് ലൈഫ് മിഷന് ഭൂമി നല്‍കാന്‍ സ്വമേധയാ തീരുമാനമെടുത്തത്, റിട്ട. അധ്യാപികയായ രാധ പറയുന്നു. കുടുംബത്തിന്‍റെ പൂര്‍ണ പിന്തുണയും ഇതിനുണ്ട്. തലക്കുളത്തൂര്‍ ഗ്രാമപഞ്ചായത്തിലെ മൂന്ന് അതിദരിദ്രര്‍, മൂന്ന് ലൈഫ് ഗുണഭോക്താക്കള്‍ എന്നിവര്‍ക്കാണ് ഇതോടെ സ്വന്തമായി ഭൂമിയായത്. എട്ടാം വാര്‍ഡില്‍ മതിലകത്താണ് ഭൂമി. 28ന് പറപ്പാറ കമ്യൂണിസ്റ്റ് ഹാളിന് സമീപം നടക്കുന്ന മെറ്റീരിയല്‍ കളക്ഷന്‍ ഫെസിലിറ്റി സെന്‍റര്‍ ഉദ്ഘാടന ചടങ്ങില്‍ ഗുണഭോക്താക്കള്‍ക്ക് ആധാരം കൈമാറുകയും രാധ ടീച്ചറെ മന്ത്രി എം.ബി. രാജേഷ് ആദരിക്കുകയും ചെയ്യും.

വിദ്യാർഥികള്‍ക്ക് ഫൂട്ട്പാത്തിന്‍റെ കൈവരിയില്‍ നിന്ന് ഷോക്കേറ്റു

പേരാമ്പ്ര: പേരാമ്പ്രയില്‍ സ്‌കൂള്‍ വിദ്യാർഥികള്‍ക്ക് ഫൂട്ട്പാത്തിന്‍റെ കൈവരിയില്‍ നിന്നും ഷോക്കടിച്ചു. പേരാമ്പ്ര വടകര റോഡില്‍ ബസ് കാത്തു നില്‍ക്കുമ്പോള്‍ കൈവരിയില്‍ പിടിച്ച പേരാമ്പ്ര സ്വദേശികളും മേപ്പയ്യൂര്‍ ഹയര്‍ സെക്കൻഡറി സ്‌കൂളിലെ പ്ലസ് ടു വിദ്യാർഥികളുമായ നെല്ലിയുള്ളതില്‍ കാര്‍ത്തിക (17), എരവട്ടൂര്‍ പൊയ്‌ലോറ ദമയ (17) എന്നിവർക്കാണ് ഷോക്കടിച്ചത്. പ്രശ്‌നമൊന്നും തോന്നാത്തതിനാല്‍ വിദ്യാർഥികള്‍ സ്‌കൂളിലേക്ക് പോയി. എന്നാല്‍ സ്‌കൂളിലെത്തിയ കുട്ടികള്‍ക്ക് ക്ഷീണം അനുഭവപ്പെട്ടതിനെ തുടര്‍ന്ന് മേപ്പയ്യൂര്‍ ആശുപത്രിയിലും തുടര്‍ന്ന് പേരാമ്പ്ര താലൂക്ക് ആശുപത്രിയിലും ചികിത്സ തേടി. ഇതില്‍ കാര്‍ത്തികയുടെ രക്ത പരിശോധനയില്‍ വ്യതിയാനം കണ്ടതിനാല്‍ കുട്ടിയെ കോഴിക്കോട് മെഡിക്കല്‍ കോളജ് ആശുപത്രിയിലേക്ക് മാറ്റി. വിവരം ലഭിച്ചതിനെ തുടർന്ന് കെഎസ്ഇബി അധികൃതർ ഉടൻ വൈദ്യുത ബന്ധം വിഛേദിക്കുകയും സ്ഥലത്തെത്തി പരിശോധന നടത്തുകയും ചെയ്തു. വൈദ്യുത ലൈൻ ഇവിടെ റോഡിന്‍റെ മറു ഭാഗത്താണ്. അധികൃതർ നടത്തിയ പരിശോധനയിൽ ഷോക്കടിക്കാൻ ആവശ്യമായ യാതൊരു കാരണവും കണ്ടെത്തിയില്ലെന്ന് അസി. എക്സിക്യൂട്ടീവ് എൻജിനിയർ പറഞ്ഞു. പരിശോധന പൂർത്തിയാക്കിയ ശേഷമാണ് ഈ മേഖലയിൽ പിന്നീട്‌ വൈദ്യുതി ബന്ധം പുനസ്ഥാപിച്ചത്.

വിദ്യാർഥിനികൾക്ക് നേരെ തെരുവ് നായകളുടെ ആക്രമണം

നാദാപുരം: നാദാപുരത്ത് സ്കൂൾ വിദ്യാർഥിനികൾക്ക് നേരെ തെരുവ് നായകളുടെ പരാക്രമം. വിദ്യാർഥികൾ പഠിക്കുന്ന സ്കൂളിന് മുന്നിലാണ് നായയുടെ ആക്രമശ്രമം ഉണ്ടായത്. രണ്ട് കുട്ടികൾക്ക് നേരെയാണ് നായകൾ കുരച്ച് ചാടിയത്. ഒരു കുട്ടി ഓടി രക്ഷപ്പെട്ടു. പിന്നാലെ എത്തിയ കുട്ടിക്ക് നേരെ അക്രമത്തിന് തുനിഞ്ഞതോടെ വിദ്യാർഥിനി നായകൾക്ക് നേരെ കയ്യിൽ ഉണ്ടായിരുന്ന കുടയും ബാഗും വലിച്ചെറിയുകയായിരുന്നു. ഇതോടെ നായകൾ ഓടി പോവുകയായിരുന്നു. നാദാപുരം ടൗണിലും പരിസരങ്ങളിലും തെരുവ് നായ ശല്യം വർധിച്ചിട്ടുണ്ട്.

പൂവാറൻതോട്ടിൽ കാട്ടാന കൃഷി നശിപ്പിച്ചു

കൂടരഞ്ഞി: പൂവാറൻതോട്ടിൽ വീണ്ടും കാട്ടാന ശല്യം. കോഴനാതടത്തിൽ മാത്യുവിന്‍റെ പുരയിടത്തിൽ കഴിഞ്ഞ ദിവസം കാട്ടാനയിറങ്ങി കൃഷി നശിപ്പിച്ചു. ജാതിയും, വാഴയും, കമുകും, മരച്ചീനിയും ഉൾപ്പെടെയുള്ള കൃഷികളാണ് കാട്ടാന നശിപ്പിച്ചത്. കാട്ടാനശല്യം രൂക്ഷമായി വരുന്ന സാഹചര്യത്തിൽ വീട്ടിൽ നിന്നും പുറത്ത് ഇറങ്ങാൻ ഭയമാണെന്ന് വീട്ടുകാർ പറഞ്ഞു. പ്രദേശത്ത് കാട്ടാന ശല്യം രൂക്ഷമാണെന്നും വനംവകുപ്പ് അധികൃതർ അടിയന്തരമായി നടപടി സ്വീകരിക്കണമെന്നും നാട്ടുകാർ ആവശ്യപ്പെട്ടു.

നിലംപതിക്കാറായ ഗോതീശ്വരം അങ്കണവാടി : മനുഷ്യാവകാശ കമ്മീഷൻ കേസെടുത്തു

കോഴിക്കോട് : ബേപ്പൂർ ഗോതീശ്വരം ക്ഷേത്രത്തിന് സമീപം പ്രവർത്തിക്കുന്ന നവോദയ അങ്കണവാടി കെട്ടിടം നിലം പതിക്കാറായിട്ടും നഗരസഭ നടപടിയെടുത്തില്ലെന്ന പരാതിയിൽ മനുഷ്യാവകാശ കമ്മീഷൻ ജുഡീഷ്യൽ അംഗം കെ. ബൈജുനാഥ് കേസെടുത്തു. നഗരസഭാ സെക്രട്ടറി വിഷയം പരിശോധിച്ച് 15 ദിവസത്തിനകം റിപ്പോർട്ട് സമർപ്പിക്കണമെന്ന് കമ്മീഷൻ ആവശ്യപ്പെട്ടു. ഓഗസ്റ്റ് 26-ന് കോഴിക്കോട് പൊതുമരാമത്ത് റസ്റ്റ് ഹൗസിൽ നടക്കുന്ന സിറ്റിംഗിൽ കേസ് പരിഗണിക്കും. കാലപഴക്കത്താൽ നിലം പതിക്കാറായ കെട്ടിടത്തിൽ ഒമ്പത് കുട്ടികൾ പഠിക്കുന്നുണ്ട്. പത്രവാർത്തയുടെ അടിസ്ഥാനത്തിൽ സ്വമേധയാ രജിസ്റ്റർ ചെയ്ത കേസിലാണ് നടപടി.

തദ്ദേശ തെരഞ്ഞെടുപ്പ് വോട്ടര്‍പട്ടികയില്‍ കൃത്രിമമെന്ന് കോൺഗ്രസ്

കോടതിയെ സമീപിക്കുമെന്ന് കോണ്‍ഗ്രസ് കോഴിക്കോട്: നിഷ്പക്ഷവും നീതിപൂര്‍വവുമായി നടക്കേണ്ട തദ്ദേശസ്വയംഭരണ സ്ഥാനപങ്ങളിലേക്കുള്ള തെരഞ്ഞെടുപ്പ് പ്രക്രിയകള്‍ അട്ടിമറിച്ച സംസ്ഥാന തെരഞ്ഞെടുപ്പ് കമ്മീഷണര്‍ എ. ഷാജഹാന്‍ രാജിവയ്ക്കണമെന്ന് ഡിസിസി പ്രസിഡന്‍റ് അഡ്വ. കെ. പ്രവീണ്‍കുമാര്‍. വാര്‍ഡ് വിഭജനം മുതല്‍ തുടങ്ങിയതാണ് തെരഞ്ഞെടുപ്പ് അട്ടിമറിക്കുന്ന ഈ നടപടിയെന്ന് അദ്ദേഹം വാര്‍ത്താസമ്മേളനത്തിൽ പറഞ്ഞു.കേരളം കണ്ട ഏറ്റവും അശാസ്ത്രീയമായ വാര്‍ഡ് വിഭജനമാണ് ഇപ്പോള്‍ നടന്നിരിക്കുന്നത്. സമര്‍പ്പിച്ച പരാതികളില്‍ ഒന്നില്‍ പോലും നടപടി ഉണ്ടായിട്ടില്ല. പല തദ്ദേശസ്വയംഭരണങ്ങളിലെയും വാര്‍ഡ് വിഭജന നടപടികള്‍ ഹൈക്കോടതി സ്റ്റേ ചെയ്യുകയും പലതും ഹൈക്കോടതിയുടെ പരിഗണനയിലുമാണുള്ളത്. കരട് വോട്ടര്‍പട്ടിക 23നാണ് പ്രസിദ്ധീകരിച്ചത്. എന്നാല്‍ അതിന് മുമ്പ്തന്നെ പല തദ്ദേശസ്വയംഭരണ സെക്രട്ടറിമാരും സിപിഎമ്മിന് ചോര്‍ത്തിക്കൊടുത്തു. ഇതുമായി ബന്ധപ്പെട്ട നിരവധി പരാതികള്‍ കൊടുത്തെങ്കിലും ഇലക്ഷന്‍ കമ്മീഷന്‍ കയ്യുംകെട്ടി നോക്കിനിന്നു. ഇതിനും അദ്ദേഹം കൂട്ടുനിന്നു. കരട് വോട്ടര്‍പട്ടിക ഇറങ്ങിയപ്പോള്‍ അതിഭീകരമായ കൃത്രിമങ്ങളാണ് നടന്നിരിക്കുന്നത്. ജില്ലയില്‍ ആയിരക്കണക്കിന് ആളുകളുടെ പേരുകള്‍ പട്ടികയില്‍ ഇല്ല. കോഴിക്കോട് കോര്‍പറേഷന്‍ യുഡിഎഫ് കക്ഷിനേതാവായ കെ.സി. ശോഭിതയുടെ പേര് പോലും പട്ടികയിലില്ല. കല്ലായ് വാര്‍ഡില്‍ മൂന്ന് തവണ കൗണ്‍സിലറായ സുധാമണിയുടെയും മറ്റ് മുന്നൂറോളം പേരുടെയും വോട്ട് കല്ലായ് പുഴയും കടന്ന് ആഴ്ചവട്ടം വാര്‍ഡിലേക്ക് മാറ്റിയിട്ടുണ്ട്. പല വാര്‍ഡുകളുടെയും വോട്ടുകളുടെ എണ്ണത്തില്‍ ഏകീകരണമില്ല. ഉള്ള്യേരി പഞ്ചായത്തിലെ 5-ാം വാര്‍ഡിലെ വോട്ടര്‍മാര്‍ 3, 10 വാര്‍ഡുകളിലാണ് സ്ഥാനം പിടിച്ചത്. ഒരു വാര്‍ഡിലും പത്ത് ശതമാനത്തില്‍ കൂടുതല്‍ വീടുകള്‍ വര്‍ധനവ് പാടില്ലെന്ന നിബന്ധനകള്‍ കാറ്റില്‍ പറത്തി.കൊടുവള്ളി മുനിസിപ്പാലിറ്റിയില്‍ അതിര്‍ത്തികളും മാനദണ്ഡങ്ങളും ലംഘിച്ചാണ് പട്ടിക പ്രസിദ്ധീകരിച്ചിരിക്കുന്നത്. പുനര്‍വിഭജനം നടത്തിയ പഞ്ചായത്ത് വാര്‍ഡുകളുടെ വിഭജനം സംബന്ധിച്ചുതന്നെ പരാതികള്‍ നിലനില്‍ക്കെ ഡിലിമിറ്റേഷന്‍ കമ്മീഷന്‍ പ്രസിദ്ധീകരിച്ച വോട്ടര്‍പട്ടികയില്‍ യാതൊരു ബന്ധവുമില്ലാത്ത രീതിയില്‍ പല വാര്‍ഡുകളിലെ വീടുകളെ ഉള്‍പ്പെടുത്തിയിരിക്കുന്നു. നടുവണ്ണൂര്‍ പഞ്ചായത്തില്‍ നേരത്തെ പ്രസിദ്ധീകരിച്ച കരട് വോട്ടര്‍ പട്ടികയിലുണ്ടായിരുന്ന നിരവധി ആളുകള്‍ ഇപ്പോള്‍ പട്ടികയിലില്ല. വടകര, കൊയിലാണ്ടി, പയ്യോളി മുനിസിപ്പാലിറ്റിയിലെ കരട് വോട്ടര്‍ പട്ടികയിലും മറ്റ് പഞ്ചായത്തുകളിലും വ്യാപകമായ കൃത്രിമമുണ്ടെന്ന് അദ്ദേഹം പറഞ്ഞു. ഇലക്ഷന്‍ കമ്മീഷനില്‍ കേരള സമൂഹത്തിന് വിശ്വാസം നഷ്ടപ്പെട്ടിരിക്കുന്നു. ഷാജഹാന്‍റെ നേതൃത്വത്തിലാണ് തെരഞ്ഞെടുപ്പ് നടക്കുന്നതെങ്കില്‍ പൂര്‍ണമായും തെരഞ്ഞെടുപ്പ് അട്ടിമറിക്കപ്പെടും. ഇദ്ദേഹം തന്നെയാണ് തല്‍സ്ഥാനം തുടരുന്നതെങ്കില്‍ തെരഞ്ഞെടുപ്പ് പ്രക്രിയകള്‍ക്ക് ഹൈക്കോടതി യുടെ നിരീക്ഷണം ആവശ്യപ്പെട്ടുകൊണ്ട് കോണ്‍ഗ്രസ് കോടതിയെ സമീപിക്കുമെന്ന് അദ്ദേഹം അറിയിച്ചു.

ജീവനക്കാരുടെ വയറ്റത്തടിക്കരുത്: എന്‍ജിഒ അസോസിയേഷന്‍

കോഴിക്കോട് : ജില്ലാതല വിദ്യാഭ്യാസ പരിശീലന കേന്ദ്രങ്ങളിലെ (ഡയറ്റ്) അനധ്യാപക തസ്തികകളില്‍ ജോലി ചെയ്യുന്നവര്‍ക്ക് മുടങ്ങിയ ശമ്പളം അടിയന്തരമായി വിതരണം ചെയ്യണമെന്ന് കേരള എന്‍ജിഒ അസോസിയേഷന്‍ കോഴിക്കോട് ജില്ലാ പ്രസിഡന്‍റ് പ്രേംനാഥ് മംഗലശ്ശേരി ആവശ്യപ്പെട്ടു. ജീവനക്കാരുടെ വയറ്റത്തടിക്കരുതെന്ന് അദ്ദേഹം പ്രസ്താവനയില്‍ പറഞ്ഞു.പൊതു വിദ്യാഭ്യാസ വകുപ്പിനു കീഴില്‍ പ്രവര്‍ത്തിക്കുന്ന ഡയറ്റില്‍ ജൂണിലെ ശമ്പളം ഇതുവരെ നല്‍കിയിട്ടില്ല. സര്‍ക്കാരിനെ പ്രശംസിച്ച് തള്ളിക്കൊണ്ടു പോയാല്‍ ഡയറ്റിലെ ജീവനക്കാര്‍ക്ക് ജീവിതം തള്ളി നീക്കാനാകില്ലെന്ന് ഭരണ വിലാസംസംഘടനകള്‍ ഓര്‍ക്കണമെന്ന് അദ്ദേഹം പറഞ്ഞു. അധ്യാപക പരിശീലന കേന്ദ്രങ്ങളില്‍ കഴിഞ്ഞ കഴിഞ്ഞ മാര്‍ച്ചിലും ശമ്പളം മുടങ്ങിയിരുന്നു. രണ്ടോ മൂന്നോ മാസം കൂടുമ്പോള്‍ തോന്നുംപടി ശമ്പളം നല്‍കുന്ന രീതി അവസാനിപ്പിക്കണമെന്നും ഡയറ്റിലെ എല്ലാ ജീവനക്കാരെയും സ്റ്റേറ്റ് ഫണ്ടിന്റെ പരിധിയില്‍ ഉള്‍പ്പെടുത്തണമെന്നും അദ്ദേഹം ആവശ്യപ്പെട്ടു.

ദേശീയപാത നിർമാണം: ഷാഫി പറമ്പിൽ എംപി കേന്ദ്ര മന്ത്രിയെ കണ്ടു

കൊയിലാണ്ടി: ദേശീയപാത നിർമാണവുമായി ബന്ധപ്പെട്ട് ജനങ്ങൾ അനുഭവിക്കുന്ന ദുരിതങ്ങൾ ഷാഫി പറമ്പിൽ എംപി കേന്ദ്ര മന്ത്രി നിധിൻ ഗഡ്കരിയെ നേരിൽകണ്ട് അറിയിച്ചു. ദുരിതങ്ങളുടെ ചിത്രങ്ങളും വീഡിയോ ദൃശ്യങ്ങളും പത്രവാർത്തകളും മന്ത്രിയെ പാർലമെ‍ന്‍റിൽ നേരിട്ട് കണ്ടു ബോധ്യപ്പെടുത്തുകയായിരുന്നു. നിർമാണവുമായി ബന്ധപ്പെട്ട് വെങ്ങളം മുതൽ അഴിയൂർ വരെയുള്ള പ്രദേശത്ത് ജനങ്ങൾ അനുഭവിക്കപ്പെടുന്ന ബുദ്ധിമുട്ടുകൾ പ്രതിനിധികളെ അറിയിച്ചു. മന്ത്രി വിഷയങ്ങൾ ശരിവയ്ക്കുകയും ചെയ്തു. ഉപകരാർ നൽകിയിട്ടുള്ള വഗാഡ്‌ നിർമാണ പ്രവർത്തനങ്ങൾ വേഗത്തിലാക്കാതിരിക്കുകയും കുറവുകൾ തിരുത്താതിരിക്കുകയും ചെയ്യുന്നത് മൂലം അനന്തമായ കാലതാമസം അനുഭവപ്പെടുന്നതിനാൽ അടിയന്തരമായി ഇടപെട്ട് പ്രശ്നം പരിഹരിക്കണമെന്ന് മന്ത്രി അദാനി കമ്പനി പ്രതിനിധികളെ അറിയിച്ചു. അല്ലാത്തപക്ഷം നിർമാണ കമ്പനിയെ ടെർമിനേറ്റ് ചെയ്യുന്നത് ഉൾപ്പെടെയുള്ള നടപടികൾ ആലോചിക്കേണ്ടി വരുമെന്ന് മന്ത്രി മുന്നറിയിപ്പ് നൽകി. തകർന്നു കിടക്കുന്ന സർവീസ് റോഡുകൾ, നിരന്തരമായി പരാജയപ്പെടുന്ന സോയിൽ നെയ്‌ലിംഗ്, നിത്യ ദുരിതമായ ട്രാഫിക് ബ്ലോക്കുകൾ, മഴക്കാല മുന്നൊരുക്കങ്ങൾ നടത്താതിരുന്നത്, ശാസ്ത്രീയമായ ഡ്രെയിനേജ് സംവിധാനങ്ങൾ ഒരുക്കാതിരുന്നത് ഉൾപ്പെടെയുള്ള വിഷയങ്ങൾ ബോധ്യപ്പെടുത്താനായി. സോയൽ നെയ്‌ലിംഗ് ടെക്നോളജി പരാജയമാണെന്നും പരാജയപ്പെട്ട ഇടങ്ങളിൽ ബഫർ സോണായി കൂടുതൽ സ്ഥലങ്ങൾ ഏറ്റെടുക്കേണ്ടി വരുമെന്നും കമ്പനി പ്രതിനിധികൾ മന്ത്രിയെ അറിയിച്ചു.

ഒയിസ്‌ക ജില്ലാ സമ്മേളനം

കോഴിക്കോട്: ഒയിസ്‌ക ഇന്‍റര്‍നാഷണല്‍ കോഴിക്കോട് ജില്ലാ സമ്മേളനം സെക്രട്ടറി ജനറല്‍ എം. അരവിന്ദബാബു ഉദ്ഘാടനം ചെയ്തു. ജില്ലാ പ്രസിഡന്‍റ് കെ.എം.ലേഖ അധ്യക്ഷത വഹിച്ചു സ്ത്രീകളുടെയും യുവജനങ്ങളുടെയും പങ്കാളിത്തം വിപുലീകരിക്കുന്നതിനായി എല്ലാ ചാപ്റ്ററുകളിലും വനിതാ ഫോറവും യുത്ത് ഫോറവും രൂപീകരിക്കുവാന്‍ തീരുമാനിച്ചു. സെക്രട്ടറി ജി.കെ.വേണു,ഫിലിപ്പ്.കെ.ആന്‍റണി, പി.കെ . നളിനാക്ഷന്‍,വി.പി.ശശിധരന്‍, കെ. . വിശ്വംഭരന്‍ , ഫൗസിയ മുബെഷീര്‍,അഡ്വ.കെ.ജയപ്രശാന്ത് ബാബു, കെ. റനീഷ് എന്നിവര്‍ സംസാരിച്ചു.

കൊടിയത്തൂരിലെ സ്കൂളുകളിൽ സുരക്ഷ പരിശോധന നടത്തി

മുക്കം: കാലവർഷം ശക്തമാവുകയും സംസ്ഥാനത്തെ വിവിധ ഭാഗങ്ങളിൽ സ്കൂൾ കെട്ടിടങ്ങൾ തകർന്ന് വീഴുകയും ചെയ്ത സാഹചര്യത്തിൽ കൊടിയത്തൂർ പഞ്ചായത്തിലെ സ്കൂളുകളിൽ പരിശോധന നടത്തി. ഭരണസമിതി തീരുമാനപ്രകാരമായിരുന്നു പരിശോധന. പഞ്ചായത്തിലെ സ്കൂളുകളിൽ സുരക്ഷാ ഓഡിറ്റ് സമിതി കൂടിയിട്ടുണ്ടൊയെന്നും കുട്ടികളുമായി ബന്ധപ്പെട്ട് സ്കൂളുകളിലും അങ്കണവാടികളിലും അപകടമായ രീതിയിൽ സ്ഥിതി ചെയ്യുന്ന മരങ്ങൾ, ലൈനുകൾ, കമ്പികൾ മറ്റ് പ്രശ്നങ്ങൾ എന്നിവ സംഘം പരിശോധിച്ചു. ആരോഗ്യ-വിദ്യാഭ്യാസ സ്റ്റാൻൻഡിംഗ് കമ്മിറ്റി ചെയർപേഴ്സൺ മറിയം കുട്ടിഹസൻ, പഞ്ചായത്ത് മെമ്പർ ടി.കെ. അബൂബക്കർ, പഞ്ചായത്ത് ഹെൽത്ത് ഇൻസ്പെക്ടർ സി. റിനിൽ എന്നിവരുടെ നേതൃത്വത്തിലാണ് പരിശോധന നടത്തിയത്. പരിശോധന പൂർത്തിയാക്കി റിപ്പോർട്ട് ഭരണ സമിതിക്ക് കൈമാറി.

ദുരിതബാധിതർക്കായുള്ള വീടിന്‍റെ തറക്കല്ലിട്ടു

വിലങ്ങാട്: ഉരുൾ പൊട്ടൽ ദുരന്തത്തിൽ വീട് നഷ്ടപ്പെട്ടവർക്കായി വടകര എംപി ഷാഫി പറന്പിൽ നിർമിച്ച് നൽകുന്ന രണ്ടാമത്തെ വീടിന്‍റെ തറക്കല്ലിട്ടു. വിലങ്ങാട് ഫൊറോന പള്ളി വികാരി ഫാ. വിൽസൺ മുട്ടത്തുകുന്നേലാണ് തറക്കല്ലിട്ടത്. വിലങ്ങാട് മുണ്ടോം കണ്ടത്തിലാണ് എംപി പ്രഖ്യാപിച്ച വീട് നിർമിക്കുന്നത്. ബ്ലോക്ക്‌ കോൺഗ്രസ്‌ കമ്മിറ്റി പ്രസിഡന്‍റ് ജമാൽ കോരങ്കോട്, പി.എ. ആന്‍റണി, ഷെബി സെബാസ്റ്റ്യൻ, സി.കെ. നാണു, എൻ.കെ. മുത്തലീബ്, അരവിന്ദൻ, ജോസ് ഇരുപ്പക്കാട്ട്, പി. ബാലകൃഷ്ണൻ, അനസ് നങ്ങാണ്ടി, പി.എസ്. ശശി, കല്ലിൽ കുഞ്ഞബ്ദുല്ല, ബിപിൻ തോമസ് തുടങ്ങിയവർ പ്രസംഗിച്ചു.

തെരുവ് നായ ശല്യം: സെക്രട്ടറിയേറ്റിനുമുന്നില്‍ റസിഡന്‍റ്സ്‌ അസോസിയേഷനുകള്‍ സമരത്തിന്

കോഴിക്കോട്: തെരുവ് നായ ശല്യത്തിന് അടിയന്തര പരിഹാരം കാണണമെന്ന് ആവശ്യപ്പെട്ട് കോണ്‍ഫെഡറേഷന്‍ ഓഫ് റസിഡന്‍റ്സ്‌ വെല്‍ഫെയര്‍ അസോസിയേഷന്‍ ( കോര്‍വ) സംസ്ഥാന കമ്മിറ്റിയുടെ ആഭിമുഖ്യത്തില്‍ ഓഗസ്റ്റ് 19 ന് സെക്രട്ടറിയേറ്റിന് മുന്നില്‍ ശ്രദ്ധ ക്ഷണിക്കല്‍ സമരം നടത്തും. തെരുവ് നായ ശല്യം കാരണം സംസ്ഥാനത്തിന്‍റെ പല ഭാഗത്തും ജനങ്ങള്‍ക്ക് പുറത്തിറങ്ങി നടക്കാന്‍ പറ്റാത്ത സാഹചര്യത്തിലാണ് സമരമെന്ന് സംസ്ഥാന പ്രസിഡന്‍റ് മുരളീധരന്‍ പുതുക്കുടി പറഞ്ഞു. വന്യ മൃഗ ആക്രമണം, പൊതു വിതരണ സംവിധാനം മെച്ചപ്പെടുത്തി വിലക്കയറ്റം തടയല്‍, കെഎസ്ഇബി സോളാര്‍ നയം തുടങ്ങിയ വിഷയങ്ങളിലും അടിയന്തിര നടപടികള്‍ ആവശ്യപ്പെട്ടു കൊണ്ടാണ് സമരം.റസിഡന്‍റ്സ്‌ അപ്പെക്‌സ് കൌണ്‍സില്‍ ഓഫ് കോഴിക്കോട് ജില്ലാ പ്രവര്‍ത്തക യോഗം ഉത്ഘാടനം ചെയ്തു സംസാരിക്കുകയായിരുന്നു അദ്ദേഹം. ജില്ലാ പ്രസിഡന്‍റ്എം.കെ.ബീരാന്‍ അധ്യക്ഷത വഹിച്ചു. ജില്ലാ ജനറല്‍ സെക്രട്ടറി സി.രാധാകൃഷ്ണന്‍, സംസ്ഥാന വൈസ് പ്രസിഡന്‍റുമാരായ നൗഷാദ് എടവണ്ണ, കെ.പി.ജനാര്‍ദനന്‍, വനിതാ വിഭാഗം സംസ്ഥാന വൈസ് പ്രസിഡന്‍റ് എന്‍.കെ.ലീല, ജില്ലാ ട്രഷറര്‍ ടി.എം.ബാലകൃഷ്ണന്‍, സംസ്ഥാന കൗണ്‍സിലര്‍മാരായ എം.പി. രാമകൃഷ്ണന്‍, അഡ്വ.കെ.എം.കാദിരി തുടങ്ങിയവര്‍ പ്രസംഗിച്ചു.

ബൈക്ക് യാത്രികരെ ഇടിച്ചിട്ട് നിര്‍ത്താതെ പോയ ഗുഡ്സ് ഓട്ടോ ഡ്രൈവര്‍ പിടിയില്‍

കോഴിക്കോട്: ബൈക്ക് യാത്രികരെ ഇടിച്ചിട്ട് നിര്‍ത്താതെ പോയ ഗുഡ്സ് ഓട്ടോ ഡ്രൈവര്‍ പിടിയില്‍. പുതിയറ അമ്യതാലയം വീട്ടില്‍ അനൂപിനെയാണ് കസബ പോലീസ് പിടികൂടിയത്. 13ന് രാത്രി പാളയത്ത് വച്ചായിരുന്നു സംഭവം. കണ്ണൂര്‍ സ്വദേശിയായ യുവാവും, പെണ്‍സുഹൃത്തും ബുള്ളറ്റില്‍ വരുമ്പോള്‍ അളകാപുരി ഹോട്ടലിന് മുന്‍വശത്ത് വച്ച് പാളയം ജംഗ്ഷന്‍ ഭാഗത്ത് നിന്നു ഓടിച്ച് വന്ന ഒരു ഗുഡ്സ് ഓട്ടോറിക്ഷ ബുള്ളറ്റില്‍ ഇടിക്കുകയും നിര്‍ത്താതെ പോകുകയുമായിരുന്നു. ബൈക്ക് യാത്രികര്‍ക്ക് ഗുരുതരമായി പരിക്കേറ്റിരുന്നു. തുടര്‍ന്ന് കസബ പോലീസ് കേസ് രജിസ്റ്റര്‍ ചെയ്തു. സംഭവസ്ഥലത്തെയും സമീപ പ്രദേശങ്ങളിലെയും നിരവധി സിസിടിവി ദൃശ്യങ്ങള്‍ പരിശോധിച്ചാണ് വാഹനം തിരിച്ചറിഞ്ഞത്. ഇടിച്ചിട്ട വാഹനം പാളയത്തുള്ള സിപി ബസാറിന് ഉള്‍വശത്തേക്കായി നിര്‍ത്തിയിട്ടിരിക്കുന്ന രീതിയില്‍ കസബ പോലീസ് കണ്ടെടുക്കുകയായിരുന്നു. പ്രതിയെ പാളയത്തിന് സമീപത്തുവച്ചാണ് അന്വേഷണ സംഘം കസ്റ്റഡിയിലെടുത്തത്. കസബ ഇന്‍സ്‌പെക്ടര്‍ ജിമ്മിയുടെ നേതൃത്വത്തില്‍ എസ്ഐ രാംദാസ്, എഎസ്‌ഐമാരായ സജേഷ് കുമാര്‍ എന്നിവരാണ് പിടികൂടിയത്.

വാർധക്യം മറന്ന് പള്ളിയിൽ ഒത്തുകൂടി

കൂരാച്ചുണ്ട്: വാർധക്യ സഹജമായ ശാരീരിക ബുദ്ധികളാലും രോഗങ്ങളാലും ഭവനങ്ങളിൽ കഴിയുന്ന മാതാപിതാക്കൾ കൂരാച്ചുണ്ട് സെന്‍റ് തോമസ് ഫൊറോന പള്ളിൽ എല്ലാം മറന്നു ഒത്തുകൂടി. സെന്‍റ് തോമസ് ഫൊറോന ഇടവകയുടെ പ്ലാറ്റിനം ജൂബിലിയോട് അനുബന്ധിച്ച് ഇടവക സംഘടിപ്പിച്ച വയോജന ദിനാചരണ പരിപാടിയിലാണ് ഇടവകയിലെ വയോജനങ്ങളായ നൂറ്റിയമ്പതോളം പേർ ഒത്തുകൂടിയത്. ഇടവകയുടെ ഉന്നമനത്തിനായി പ്രവർത്തിച്ച ഇവർ പരസ്പരം സ്നേഹാ ന്വേഷണങ്ങൾ അറിയിച്ചും കുശലങ്ങൾ പറഞ്ഞും സ്നേഹം പങ്കുവച്ചു. ഇവർ കുമ്പസാരം നടത്തിയും വിശുദ്ധ കുർബാനയിൽ പങ്കെടുത്തും ആത്മീയ ഉണർവോടെ സ്നേഹവിരുന്നിലും പങ്കെടുത്ത ശേഷമാണ് ഭവനങ്ങളിലേക്ക് മടങ്ങിയത്. വികാരി ഫാ. വിൻസെന്‍റ് കണ്ടത്തിൽ വിശുദ്ധ കുർബാനക്ക് കാർമികത്വം വഹിച്ചു. അസിസ്റ്റന്‍റ് വികാരി ഫാ. മൈക്കിൾ നീലംപറമ്പിൽ സഹകാർമികനായി. ട്രസ്റ്റിമാരായ ജോയി വേങ്ങത്താനം, ജോസ് അറയ്ക്കൽ, ജിജി കോനുക്കുന്നേൽ, സജി കൊഴുവനാൽ, കെസിവൈഎം, പാരീഷ് കൗൺസിൽ അംഗങ്ങൾ തുടങ്ങിയവർ നേതൃത്വം നൽകി.

മോദി സർക്കാർ ഇന്ത്യയെ ഫാസിസത്തിലേക്ക് നയിക്കുന്നു: കെ. പ്രകാശ് ബാബു

നാദാപുരം: അടിയന്തിരാവസ്ഥയുടെ പേര് പറഞ്ഞ് മോദി സർക്കാർ 11 വർഷമായി ഇന്ത്യയെ ഫാസിസത്തിലേക്ക് നിയിക്കുകയാണെന്ന് സിപിഐ ദേശീയ എക്സിക്യൂട്ട് അംഗം കെ. പ്രകാശ് ബാബു. സിപിഐ കോഴിക്കോട് ജില്ലാ സമ്മേളനത്തിന്‍റെ ഭാഗമായുള്ള പ്രതിനിധി സമ്മേളനം കല്ലാച്ചിയിൽ ഉദ്ഘാടനം ചെയ്യുകയായിരുന്നു അദ്ദേഹം. മോദി ഇന്ത്യയെ ഫാസിസത്തിലേക്ക് നയിക്കുകയാണ്. മൗലികാവകാശലംഘനമാണ് ഇന്ത്യയിൽ തുടരുന്നത്. ഭിന്നാഭിപ്രായം പറയുന്നവരെ ജയിലിലാക്കുകയാണ്. നിരവധി മനുഷ്യാവകാശ പ്രവർത്തകർ, മാധ്യമ പ്രവർത്തകർ, പൊതു പ്രവർത്തകർ ഉൾപ്പെടെയുള്ളവർ ജയിലുകളിൽ കഴിയുകയാണ്. കേരളത്തിൽ കേന്ദ്രസർക്കാരിന് ബദലായാണ് എൽഡിഎഫ് സർക്കാർ പ്രവർത്തിക്കുന്നത്. ഓണത്തിന് കേന്ദ്രം അരി തരില്ലെന്നാണ് അറിയിച്ചത്. എന്നാൽ ഇവിടെയുള്ള സ്റ്റോക്കിൽ നിന്നെടുത്ത് വിതരണം ചെയ്യാനാണ് തീരുമാനമെന്നും അദ്ദേഹം പറഞ്ഞു. സമ്മേളനത്തിന് തുടക്കം കുറിച്ച് എം. നാരായണൻ മാസ്റ്റർ നഗറിൽ മുതിർന്ന പ്രതിനിധി കെ.ജി. പങ്കജാക്ഷൻ പതാക ഉയർത്തി. സമ്മേളനത്തെ അഭിവാദ്യം ചെയ്ത് സിപിഐ സംസ്ഥാന അസി. സെക്രട്ടറി ഇ. ചന്ദ്രശേഖരൻ എംഎൽഎ, സംസ്ഥാന എക്സി. അംഗവും ഭക്ഷ്യമന്ത്രിയുമായ ജി.ആർ. അനിൽ, സംസ്ഥാന എക്സി. അംഗം അഡ്വ. പി. വസന്തം എന്നിവർ പ്രസംഗിച്ചു.

2.188 കിലോഗ്രാം കഞ്ചാവുമായി പിടിയില്‍

കോഴിക്കോട്: ഒഡിഷയില്‍നിന്ന് കോഴിക്കോട്ടേക്ക് വന്‍തോതില്‍ കഞ്ചാവ് എത്തിച്ച് വില്‍പന നടത്തിയിരുന്ന ഒഡീഷ സ്വദേശി അറസ്റ്റില്‍. 2.188 കിലോഗ്രാം കഞ്ചാവുമായി ഒഡിഷ ഗഞ്ചം ജില്ലയിലെ മുനിഗഡി ഗംഗാപൂര്‍ സ്വദേശി ലക്ഷ്മണ്‍ നായകാ (35)ണ് കോഴിക്കോട് കോര്‍പറേഷൻ സ്റ്റേഡിയത്തിന് സമീപത്ത് നിന്ന് എക്‌സൈസിന്‍റെ പിടിയിലായത്. കോഴിക്കോട് എക്‌സൈസ് റേഞ്ച് ഓഫീസിലെ എക്‌സൈസ് ഇന്‍സ്‌പെക്ടര്‍ പ്രഹ്ലാദന്‍റെ നേതൃത്വത്തില്‍ പ്രിവന്‍റിവ് ഓഫീസര്‍മാരായ കെ.പി. രാജേഷ്, ടി.വി. റിഷിത് കുമാര്‍, സിഇഒമാരായ പ്രജിത്ത്, അനന്തു വിജയന്‍, സിഇഒ ഡ്രൈവര്‍ ഹിതിന്‍ ദാസ് എന്നിവരടങ്ങിയ സംഘമാണ് കഞ്ചാവ് പിടികൂടിയത്.

കുറ്റ്യാടി- കോഴിക്കോട് ബസ് സമരം ഒത്തുതീർന്നു : സ്വകാര്യ ബസുകൾ ഇന്നു മുതൽ നിരത്തിലിറങ്ങും

പേരാമ്പ്ര: കുറ്റ്യാടി- കോഴിക്കോട് ബസ് സമരം ഒത്തുതീർന്നു. പേരാമ്പ്ര ഡിവൈഎസ്പി ഇന്നലെ വിളിച്ചു ചേർത്ത യോഗത്തിലാണ് തീരുമാനമുണ്ടായത്. ബസ് ഓണർസ് അസോസിയേഷൻ, വിവിധ തൊഴിലാളി സംഘടനകൾ, കെഎസ്ആർടിസി ഉദ്യോഗസ്ഥർ, പോലീസ് ഇൻസ്‌പെക്ടർ തുടങ്ങിയവർ ചർച്ചയിൽ പങ്കെടുത്തു. ബസുകൾ വാടകക്ക് ഓടുന്ന പ്രവണതക്കെതിരേ കർശന നടപടി എടുക്കാൻ തീരുമാനിച്ചു. പേരാമ്പ്ര ടൗണിലെ അനധികൃത പാർക്കിംഗ് വൺ വേയാക്കും. കോഴിക്കോട് റൂട്ടിലെ വിവാഹ ഓഡിറ്റോറിയങ്ങളിലെ റോഡിലേക്ക് ഇറക്കിയുള്ള പാർക്കിംഗ് നിർത്തലാക്കും. ബസുകളിലെ സിസിടിവി കാമറകൾ നിർബന്ധമായും പ്രവർത്തിപ്പിക്കണം. ദീർഘകാല പ്രവൃത്തിപരിചയം ഉള്ള ഡ്രൈവർമാരെ നിയമിക്കുക, വേഗത കുറക്കുക, പേരാമ്പ്ര ബസ് സ്റ്റാൻഡിലെ ഏജന്‍റുമാരെ ഒഴിവാക്കുക, ബസ് ജീവനക്കാർക്ക് ബോധവൽക്കരണ ക്ലാസുകൾ സംഘടിപ്പിക്കുക തുടങ്ങിയ കാര്യങ്ങളിലും തീരുമാനമായി. കഴിഞ്ഞ ദിവസം നടന്ന ചർച്ചയിൽ ബസ് അധികൃതരെ ഉൾപ്പെടുത്താ ത്തതിനെ തുടർന്നാണ് ഇന്നലെ ബസുകൾ സർവീസ് നടത്താതിരുന്നത്.

ഫെൻസിംഗ്: ജില്ലയെ ഹിഷാമും നാൻസികയും നയിക്കും

കോഴിക്കോട്: 26, 27 തിയതികളിൽ കോട്ടയം ഇൻഡോർ സ്റ്റേഡിയത്തിൽ നടക്കുന്ന സംസ്ഥാന സബ് ജൂണിയർ ഫെൻസിംഗ് ചാമ്പ്യൻഷിപ്പിൽ പങ്കെടുക്കുന്ന ജില്ലാ ബോയ്സ് ടീമിനെ നടുവണ്ണൂർ ഗവ. ഹയർ സെക്കൻഡറി സ്കൂളിലെ ഹിഷാം നൗഷാദും ഗേൾസ് ടീമിനെ എളേറ്റിൽ എംജെ ഹയർ സെക്കൻ‌ഡറി സ്കൂളിലെ പി.കെ. നാൻസികയും നയിക്കും. ബോയ്സ് ടീം: കെ.സി. ആദിൻ ദേവ് (വൈസ് ക്യാപ്റ്റൻ), കെ.എം. മുഹമ്മദ്‌ അജ്നാസ്, എൻ.എസ്. യദു കൃഷ്ണ, നസിൻ അബ്ദുള്ള, പി.ടി. മുഹമ്മദ്‌ ഹാദി, കെ. അനശ്വർ, എൻ.കെ. ഹൃതു കൃഷ്ണ, പി.കെ. ഹിലാൽ റഹ്മാൻ, വി. മുഹമ്മദ്‌ നിദാൽ. കോച്ച്: മുഹമ്മദ്‌ റിഷാൻ, മാനേജർ: പി. ഷഫീഖ്. ഗേൾസ് ടീം: ടി. ഫാത്തിമ ഹന്ന (വൈസ് ക്യാപ്റ്റൻ), സി.പി. ആയിഷ ഇർഫാന, കെ.പി. ഫാത്തിമ നദ, പി. ആയിഷ സിയ, കെ. അനുപമ, സി. ദേവിക. കോച്ച്: സി.ടി. ഇൽയാസ്‌, മാനേജർ: രാധാമണി

വി.എസിനെതിരേ മത വിദ്വേഷ പോസ്റ്റ്; കേസെടുത്തു

താമരശേരി: അന്തരിച്ച മുൻ മുഖ്യമന്ത്രി വി.എസ്. അച്യുതാനന്ദനെ അധിക്ഷേപിച്ച് സമൂഹമാധ്യമങ്ങളിൽ പോസ്റ്റിട്ട താമരശേരി സ്വദേശിക്കെതിരേ കേസെടുത്തു. ആബിദ് അടിവാരത്തിനെതിരേയാണ് താമരശേരി പോലീസ് കേസെടുത്തത്. ഡിവൈഎഫ്ഐ പ്രവർത്തകനും അഭിഭാഷകനുമായ പി.പി. സന്ദീപ് നൽകിയ പരാതിയിലാണ് പോലീസ് നടപടി. വിദേശത്തുള്ള ആബിദ് ഫെയ്സ്ബുക്കിലൂടെയാണ് വിദ്വേഷ പ്രചരണം നടത്തിയത്. മലേഷ്യയിൽ വച്ചാണ് ആബിദ് എഫ്ബിയിൽ പോസ്റ്റിട്ടത്. പ്രതിഷേധങ്ങളെ തുടർന്ന് പോസ്റ്റ് എഫ്ബിയിൽ നിന്നും ആബിദ് പിൻവലിച്ചിരുന്നെങ്കിലും ഇതിന്‍റെ സ്ക്രീൻ ഷോട്ട് വ്യാപകമായി പ്രചരിച്ചിരുന്നു. വി.എസിനെ ഇസ്ലാം മതവിരോധിയായി ചിത്രീകരിക്കുന്ന രൂപത്തിലുള്ളതായിരുന്നു പോസ്റ്റ്. ഇയാളുടെ താമരശേരിയിലെ സ്ഥാപനത്തിനു മുന്നിൽ കഴിഞ്ഞ ദിവസം പ്രതിഷേധവുമായി എത്തിയ ഡിവൈഎഫ്ഐ പ്രവർത്തകർ പോസ്റ്റർ പതിച്ചിരുന്നു.

വന്യമൃഗ ശല്യത്തിന് അടിയന്തര പരിഹാരം കാണണം: കർഷക കോൺഗ്രസ്

തിരുവമ്പാടി: വന്യമൃഗ ശല്യത്തിന് അടിയന്തര പരിഹാരം കാണാൻ വനവകുപ്പ് കാര്യക്ഷമമായ നടപടി സ്വീകരിക്കണമെന്ന് കർഷക കോൺഗ്രസ് ജില്ലാ പ്രസിഡന്‍റ് ബിജു കണ്ണന്തറ ആവശ്യപ്പെട്ടു. പൂവാറൻതോട്ടിൽ കാട്ടാനയിറങ്ങി കൃഷിനാശം വരുത്തിയ പ്രദേശം സന്ദർശിച്ച് സംസാരിക്കുകയായിരുന്നു അദ്ദേഹം. മലയോരമേഖലയിലെ ജനങ്ങൾ ആശങ്കയിലും പരിഭ്രാന്തിയിലുമാണ്. കാട്ടാനകളുടെ വികാര കേന്ദ്രമായി മലയോര മേഖല മാറിയിരിക്കുന്നു. ഒറ്റ രാത്രി കൊണ്ട് കാർഷിക വിളകൾ കാട്ടാനകൾ നശിപ്പിക്കുകയാണ്. അവയെ തുരത്താൻ ഒരു നടപടിയും സ്വീകരിക്കുന്നില്ല. പഞ്ചായത്തും എംഎൽഎയും കാര്യക്ഷമമായി ഇടപെടുന്നില്ലെന്നും അദ്ദേഹം പറഞ്ഞു. പുലിയുടെ സാന്നിധ്യമുണ്ടായ പ്രദേശത്ത് ഇരയടക്കം കൂടുവെച്ചെങ്കിലും ഇര ചത്തുപോയി. കൂട് അനാഥമായിരിക്കുകയാണ് വനം വകുപ്പിന്‍റെ തികഞ്ഞ അനാസ്ഥയും ഉത്തരവാദിത്വം ഇല്ലായ്മയുമാണ് ഇതിന് കാരണം. അടിയന്തരമായി ഇരയെ കെട്ടി കൂട് ഉചിതമായ സ്ഥലത്തേക്ക് മാറ്റണമെന്നും അദ്ദേഹം ആവശ്യപ്പെട്ടു. കർഷക കോൺഗ്രസ് മണ്ഡലം പ്രസിഡന്‍റ് അനീഷ് പനച്ചിയിൽ, വാർഡ് മെമ്പർ എൽസമ്മ, ബൂത്ത് പ്രസിഡന്‍റ് കുഞ്ഞുമോൻ വാൽക്കണ്ടത്തിൽ എന്നിവരും അദ്ദേഹത്തോടെ ഒപ്പമുണ്ടായിരുന്നു.

കാവിലുംപാറയിൽ കുട്ടിയാനയുടെ ആക്രമണം തുടരുന്നു

കുറ്റ്യാടി: കാവിലുംപാറ മലയിൽ ആഴ്ചകൾക്ക് മുമ്പ് എത്തിയ കുട്ടിയാനയുടെ ആക്രമണം തുടരുന്നു. ചൂരണി ഭാഗത്താണ് ഇന്നലെ കുട്ടിയാന ഇറങ്ങി നാട്ടുകാരെ ഓടിക്കുകയും നാശനഷ്ടങ്ങൾ ഉണ്ടാക്കുകയും ചെയ്തത്. ചൂരണി റോഡിൽ ആന നാട്ടുകാരെ ഓടിച്ചു. കഴിഞ്ഞ ദിവസം കരിങ്ങാട് എസ്എൻഡിപി റോഡിൽ മുട്ടിച്ചിറ തങ്കപ്പൻ, ഭാര്യ ആനി എന്നിവരെ ആക്രമിച്ചു പരിക്കേൽപ്പിച്ചിരുന്നു. കാട്ടാനകൂട്ടത്തിൽ നിന്നും ഒറ്റപ്പെട്ട ആനകുട്ടി ദിവസങ്ങളായി കരിങ്ങാട് ചൂരണി മേഖലകളിൽ വികൃതി കാട്ടി നാശം വിതച്ചതോടെ മലയോര വാസികൾ പ്രതിഷേധവുമായി ഫോറസ്റ്റ് ഓഫീസിലേക്കും പഞ്ചായത്ത് ഓഫീസിലേക്കും എത്തിയിരുന്നു. തുടർന്ന് ആനയെ എത്രയും വേഗത്തിൽ സുരക്ഷാ കേന്ദ്രത്തിലേക്ക് പിടിച്ച് മാറ്റുമെന്ന് ഉറപ്പ് നൽകിയെങ്കിലും ഒരു നടപടിയും ഉണ്ടായിട്ടില്ലെന്ന് നാട്ടകാർ പറയുന്നു. നാട്ടുകാർ സ്വയം സംഘടിച്ച് ആനയെ ഓടിക്കുകയാണ്. ഫോറസ്റ്റ് അധികൃതർ എത്തുന്നില്ലെന്നും നാട്ടുകാർ പറയുന്നുണ്ട്. കുട്ടിയാനയെ പിടികൂടണമെന്ന് കിഫ കോഴിക്കോട്: കുട്ടിയാനയെ പിടികൂടണമെന്നു കിഫ കോഴിക്കോട് ജില്ലാ പ്രസിഡന്‍റ് മനോജ് കുംബ്ലാനി ആവശ്യപ്പെട്ടു. കോഴിക്കോട് ജില്ലയിൽ കാട്ടാനയുടെ ആക്രമണം മൂലം ആളപായം ഉണ്ടാകുന്നത് വരെ കാത്തിരിക്കാതെ എത്രയും പെട്ടെന്ന് നീക്കണമെന്നും യാതൊരു നിയന്ത്രണവും ഇല്ലാതെ വനം വകുപ്പിനെ അഴിച്ചുവിടുന്ന വകുപ്പ് മന്ത്രി രാജിവെക്കണമെന്നും കോഴിക്കോട് കിഫാ ജില്ലാ കമ്മിറ്റി ആവശ്യപ്പെട്ടു.

കോഴിക്കോട്ട് 24,80,032 വോട്ടര്‍മാര്‍; തെരഞ്ഞെടുപ്പ് കരട് പട്ടികയില്‍ പേരു ചേര്‍ക്കാം

കോഴിക്കോട്: തദ്ദേശസ്ഥാപനങ്ങളിലേക്കുള്ള തെരഞ്ഞെടുപ്പിന് മുന്നോടിയായി വോട്ടര്‍പട്ടിക പുതുക്കുന്നതിനുള്ള കരട് പട്ടിക പ്രസിദ്ധീകരിച്ചു. കോഴിക്കോട് ജില്ലയില്‍ 24,80,032 വോട്ടര്‍മാരാണ് ആകെയുള്ളത്. 11,77,753 പുരുഷന്മാരും 13,02,256 സ്ത്രീകളും 23 ട്രാന്‍സ്ജെന്‍ഡേഴ്സും അടങ്ങിയതാണ് ജില്ലയിലെ പട്ടിക. സംസ്ഥാനത്ത് 2,66,78,256 വോട്ടര്‍മാരാണുള്ളത്. ഇതില്‍ 1,26,32,186 പുരുഷന്മാരും 1,40,45,837 വനിതകളും 233 ട്രാന്‍സ്ജന്‍ഡേഴ്സുമാണ്. അന്തിമ വോട്ടര്‍പട്ടിക ഓഗസ്റ്റ് 30ന് പ്രസിദ്ധീകരിക്കും. 2024ല്‍ സംക്ഷിപ്ത പുതുക്കല്‍ നടത്തിയ വോട്ടര്‍പട്ടിക പുതിയ വാര്‍ഡുകളിലേക്ക് ക്രമീകരിച്ചാണ് കരട് പട്ടിക തയാറാക്കിയിട്ടുള്ളത്. 2020ലെ പൊതുതെരഞ്ഞെടുപ്പിനു ശേഷം നിലവിലുണ്ടായിരുന്ന വോട്ടര്‍പട്ടിക 2023 ഒക്ടോബറിലും 2024 ജൂലൈയിലും പുതുക്കിയിരുന്നു. കരട് വോട്ടര്‍പട്ടിക എല്ലാ തദ്ദേശസ്ഥാപനങ്ങളിലും വില്ലേജ്, താലൂക്ക് ഓഫീസുകളിലും സംസ്ഥാന തെരഞ്ഞെടുപ്പ് കമ്മീഷന്‍റെ വെബ്സൈറ്റിലും പരിശോധനക്ക് ലഭിക്കും. ആഗസ്റ്റ് ഏഴ് വരെ പട്ടികയില്‍ പേര് ചേര്‍ക്കാന്‍ അവസരമുണ്ടാകും. 2025 ജനുവരി ഒന്നിനോ അതിന് മുമ്പോ 18 വയസ്സ് പൂര്‍ത്തിയായവര്‍ക്ക് പേര് ചേര്‍ക്കാം.വോട്ടര്‍പട്ടികയില്‍ പുതുതായി പേരു ചേര്‍ക്കുന്നതിനും അപേക്ഷ, ഉള്‍ക്കുറിപ്പുകള്‍ തിരുത്തുന്നതിനും സ്ഥാനമാറ്റം വരുത്തുന്നതിനും സംസ്ഥാന തെരഞ്ഞെടുപ്പ് കമ്മീഷന്‍റെ വെബ്സൈറ്റ് വഴി അപേക്ഷിക്കണം. ഓണ്‍ലൈനായി അപേക്ഷിക്കുമ്പോള്‍ ഹിയറിംഗിനുള്ള കമ്പ്യൂട്ടര്‍ ജനറേറ്റഡ് നോട്ടീസ് ലഭിക്കും. നോട്ടീസില്‍ പറഞ്ഞ തീയതിയില്‍ ആവശ്യമായ രേഖകള്‍ സഹിതം നേരിട്ട് ഹാജരാകണം. വോട്ടര്‍പട്ടികയില്‍ പേര് ഒഴിവാക്കുന്നത് സംബന്ധിച്ച ആക്ഷേപങ്ങള്‍ ഓണ്‍ലൈനായി രജിസ്റ്റര്‍ ചെയ്യുകയും അതിന്റെ പ്രിന്‍റ്ഔട്ടില്‍ അപേക്ഷകനും ആ വാര്‍ഡിലെ ഒരു വോട്ടറും ഒപ്പിട്ട് നേരിട്ടോ തപാലിലൂടെയോ ഇലക്ടറല്‍ രജിസ്ട്രേഷന്‍ ഓഫീസര്‍ക്ക് സമര്‍പ്പിക്കുകയും വേണം. ഓണ്‍ലൈന്‍ മുഖേന അല്ലാതെയും നിര്‍ദ്ദിഷ്ട ഫോറത്തില്‍ ഇലക്ഷന്‍ രജിസ്ട്രേഷന്‍ ഓഫീസര്‍ക്ക് അപേക്ഷിക്കാം. ഗ്രാമപഞ്ചായത്തുകളിലും മുനിസിപ്പാലിറ്റികളിലും അതത് സ്ഥാപനങ്ങളിലെ സെക്രട്ടറിമാരും കോര്‍പറേഷനുകളില്‍ അഡീഷണല്‍ സെക്രട്ടറിയുമാണ് ഇലക്ടറല്‍രജിസ്ട്രേഷന്‍ ഓഫീസര്‍മാര്‍. അപേക്ഷകളിലും ആക്ഷേപങ്ങളിലും ഇലക്ടറല്‍ രജിസ്ട്രേഷന്‍ ഓഫീസര്‍മാര്‍ സ്വീകരിക്കുന്ന നടപടിക്കെതിരെ തദ്ദേശസ്വയംഭരണവകുപ്പ്ജില്ലാ ജോയിന്‍റ് ഡയറക്ടര്‍ക്ക് അപ്പീല്‍ നല്‍കാം. ഉത്തരവ് തീയതി മുതല്‍ 15 ദിവസത്തിനകമാണ് അപ്പീല്‍ നല്‍കേണ്ടത്.

വീട്ടില്‍ അതിക്രമിച്ചു കയറി അതിക്രമം: യുവാവിനെ പോലീസ് പിടികൂടി

കോഴിക്കോട്: തലക്കുളത്തൂരില്‍ വീട്ടില്‍ അതിക്രമിച്ച് കയറി ഭീഷണിപ്പെടുത്തുകയും ലൈംഗികാതിക്രമം കാണിക്കുകയും ചെയ്തുവെന്ന പരാതിയില്‍ യുവാവ് അറസ്റ്റില്‍. തലക്കുളത്തൂര്‍ സ്വദേശി കാണിയാം കുന്ന് മലയില്‍ അസ്ബിന്‍ (29) ആണ് അറസ്റ്റിലായത്. കഴിഞ്ഞദിവസം വൈകിട്ടാണ് പരാതിക്കാധാരമായ സംഭവം നടന്നത്. തലക്കുളത്തൂര്‍ സ്വദേശിനിയുടെ വീട്ടില്‍ പ്രതി മാരകായുധവുമായി എത്തി. വാതില്‍ പൊളിച്ചു അകത്തു കയറി യുവതിയോട് ലൈംഗികാതിക്രമം കാണിക്കുകയും കൊല്ലുമെന്നും ഭീഷണിപ്പെടുത്തുകയും ചെയ്തുവെന്നാണ് പരാതി. വീട്ടിലെ ഫര്‍ണിച്ചറും ടിവിയും പൊട്ടിക്കുകയും ചെയ്തു. എലത്തൂര്‍ പോലീസ് ഇന്‍സ്‌പെക്ടര്‍ രഞ്ജിത്തിന്‍റെ നേതൃത്വത്തില്‍ എസ്‌ഐമാരായ പ്രജുകുമാര്‍, സന്തോഷ് , സീനിയര്‍ സിപിഒ രൂപേഷ് എന്നിവര്‍ ചേര്‍ന്നാണ് പ്രതിയെ കസ്റ്റഡിയില്‍ എടുത്തത്.

മലബാര്‍ റിവര്‍ ഫെസ്റ്റിവല്‍ നാളെ ആരംഭിക്കും ഓളപ്പരപ്പില്‍ തുഴയെറിയാന്‍ വിദേശ താരങ്ങള്‍ എത്തി

കോടഞ്ചേരി: ടൂറിസം വകുപ്പിന്‍റെ ആഭിമുഖ്യത്തില്‍ കേരള അഡ്വഞ്ചര്‍ ടൂറിസം പ്രമോഷന്‍ സൊസൈറ്റി, ജില്ലാ ടൂറിസം പ്രമോഷന്‍ കൗണ്‍സില്‍, കോഴിക്കോട് ജില്ലാ പഞ്ചായത്ത്, ഇന്ത്യന്‍ കയാക്കിങ് ആന്‍ഡ് കനോയിംഗ് അസോസിയേഷന്‍ എന്നിവയുടെ നേതൃത്വത്തില്‍ സംഘടിപ്പിക്കുന്ന അന്താരാഷ്ട്ര വൈറ്റ് വാട്ടര്‍ കയാക്കിംഗ് മത്സരമായ മലബാര്‍ റിവര്‍ ഫെസ്റ്റിവല്‍ 2025ന്‍റെ 11-ാമത് എഡിഷന്‍ ഇരിവഴഞ്ഞിപ്പുഴയിലും ചാലിപ്പുഴയിലുമായി നാളെ ആരംഭിക്കും. 27 വരെ നടക്കുന്ന മത്സരത്തിന്‍റെ ഉദ്ഘാടനം നാളെ രാവിലെ ഒന്‍പതിന് തിരുവമ്പാടി എംഎല്‍എ ലിന്‍റോ ജോസഫ് നിര്‍വഹിക്കും. സമാപന സമ്മേളനം 27ന് വൈകുന്നേരം അഞ്ചിന് പൊതുമരാമത്ത് -ടൂറിസം മന്ത്രി പി.എ. മുഹമ്മദ് റിയാസ് ഉദ്ഘാടനം ചെയ്യും. വിജയികള്‍ക്കുള്ള സമ്മാനദാനവും മന്ത്രി നിര്‍വഹിക്കും. ഇലന്തുകടവിലാണ് സമാപന സമ്മേളനം. നാളെ പുലിക്കയത്ത് നടക്കുന്ന ഉദ്ഘാടന പരിപാടിയില്‍ കോഴിക്കോട് ജില്ലാ കളക്ടര്‍ സ്‌നേഹില്‍ കുമാര്‍ സിംഗ്, ജില്ലാ പഞ്ചായത്ത് പ്രസിഡന്‍റ് ഷീജ ശശി, കോടഞ്ചേരി പഞ്ചായത്ത് പ്രസിഡന്‍റ് അലക്‌സ് തോമസ് ചെമ്പകശ്ശേരി തുടങ്ങിയവര്‍ പങ്കെടുക്കും. സമാപന സമ്മേളനത്തില്‍ വയനാട് എംപി പ്രിയങ്ക ഗാന്ധി, ടൂറിസം ഡയറക്ടര്‍ ശിഖ സുരേന്ദ്ര, ലിന്‍റോ ജോസഫ് എംഎല്‍എ, ഷീജ ശശി, സ്‌നേഹില്‍ കുമാര്‍ സിംഗ്, തിരുവമ്പാടി പഞ്ചായത്ത് പ്രസിഡന്‍റ് ബിന്ദു ജോണ്‍സണ്‍, അലക്‌സ് തോമസ് ചെമ്പകശ്ശേരി, മുക്കം മുനിസിപ്പാലിറ്റി ചെയര്‍മാന്‍ പി.ടി ബാബു, കൂടരഞ്ഞി പഞ്ചായത്ത് പ്രസിഡന്‍റ് ആദര്‍ശ് ജോസഫ്, കൊടിയത്തൂര്‍ പഞ്ചായത്ത് പ്രസിഡന്‍റ് ദിവ്യ ഷിബു, പുതുപ്പാടി പഞ്ചായത്ത് പ്രസിഡന്‍റ് നജുമുന്നിസ, കെ.എ.ടി.പി.എസ് ചീഫ് എക്‌സിക്യൂട്ടീവ് ഓഫീസര്‍ ബിനു കുര്യാക്കോസ് തുടങ്ങിയവര്‍ പങ്കെടുക്കും. മത്സരിക്കാനായി ചിലി, ബെല്‍ജിയം, ഇറ്റലി, റഷ്യ, ന്യൂസിലാന്‍ഡ്, യുഎസ്എ, മലേഷ്യ എന്നിവിടങ്ങളില്‍ നിന്ന് എത്തിയ താരങ്ങള്‍ ചാലിപുഴയിലും ഇരുവഴഞ്ഞിപുഴയിലും പരിശീലനം ആരംഭിച്ചു. ഇന്ത്യയിലെ വിവിധ സംസ്ഥാനങ്ങളില്‍ നിന്നുള്ള താരങ്ങളും പങ്കെടുക്കും.

എല്‍എസ്ഡി സ്റ്റാമ്പുമായി യുവാവ് പോലീസിന്‍റെ പിടിയില്‍

കോഴിക്കോട്: അത്തോളിയില്‍ എല്‍എസ്ഡി സ്റ്റാമ്പുമായി യുവാവ് പോലീസിന്‍റെ പിടിയില്‍. ഉള്ളിയേരി മഠത്തില്‍ കുന്നുമ്മലിലെ മുഹമ്മദ് ജവാദാണ് പിടിയിലായത്. ഉള്ള്യേരി, അത്തോളി, മൊടക്കല്ലൂര്‍ എന്നിവിടങ്ങളിലും മെഡിക്കല്‍ വിദ്യാര്‍ഥികളെ കേന്ദ്രീകരിച്ചും പ്രതി വന്‍തോതില്‍ എംഡിഎംഎയും എല്‍എസ്ഡി സ്റ്റാമ്പുകളും വില്‍പന നടത്തി വരുന്നതായി പോലീസിന് വിവരം ലഭിച്ചിരുന്നു. ഇതിന്‍റെ അടിസ്ഥാനത്തിലാണ് മുഹമ്മദ് ജവാദിനെ പോലീസ് വലയിലാക്കിയത്. ഇയാളില്‍ നിന്നും 0.020 ഗ്രാം തൂക്കം വരുന്ന ആറ് എല്‍എസ്ഡി സ്റ്റാമ്പുകള്‍ പോലീസ് പിടിച്ചെടുത്തു. ഇയാള്‍ സ്ഥിരമായി ആഡംബര വാഹനങ്ങളില്‍ യാത്ര ചെയ്താണ് ലഹരി വില്‍പന നടത്തിയിരുന്നത്. പ്രതി ഉപയോഗിച്ച കാര്‍ പിടിച്ചെടുത്തിട്ടുണ്ടെന്നും പോലീസ് പറഞ്ഞു. അത്തോളി എസ്‌ഐ മുഹമ്മദലിയുടെ നേതൃത്വത്തില്‍ എസ്‌ഐ മനോജ് രാമത്ത്, എഎസ്‌ഐ സദാനന്ദന്‍, സീനിയര്‍ സിവില്‍ പോലീസ് ഓഫീസര്‍മാരായ ടി.വിനീഷ്, എന്‍.എം.ഷാഫി, സിഞ്ചുദാസ്, കെ.കെ.ജയേഷ് എന്നിവര്‍ ചേര്‍ന്നാണ് പ്രതിയെ പിടികൂടിയത്.

ജില്ലയില്‍ സ്വാതന്ത്ര്യദിനം സമുചിതമായി ആഘോഷിക്കും

കോഴിക്കോട്: രാജ്യത്തിന്റെ 79-ാമത് സ്വാതന്ത്ര്യ ദിനം ജില്ലയില്‍ സമുചിതമായി ആഘോഷിക്കാന്‍ ജില്ലാ കളക്ടര്‍ സ്നേഹില്‍ കുമാര്‍ സിങ്ങിന്‍റെ അധ്യക്ഷതയില്‍ ചേര്‍ന്ന യോഗത്തില്‍ തീരുമാനം. വെസ്റ്റ്ഹില്‍ വിക്രം മൈതാനിയില്‍ രാവിലെ ഒമ്പതിന് ദേശീയപതാക ഉയര്‍ത്തും. പരേഡില്‍ പോലീസ്, എക്സൈസ്, ഫോറസ്റ്റ്, ഫയര്‍ ആന്‍ഡ് റെസ്‌ക്യൂ, എന്‍സിസിയുടെ വിവിധ വിഭാഗങ്ങള്‍, സ്‌കൗട്ട്സ് ആന്‍ഡ് ഗൈഡ്സ്, റെഡ്ക്രോസ്, എസ്പിസി തുടങ്ങിയ വിഭാഗങ്ങളുടെ പ്ലാറ്റൂണുകള്‍ അണിനിരക്കും. പരേഡിന് ശേഷം സ്‌കൂള്‍-കോളജ് വിദ്യാര്‍ഥികളുടെ കലാപരിപാടികള്‍ അരങ്ങേറും. കളക്ടറുടെ ചേംബറില്‍ ചേര്‍ന്ന യോഗത്തില്‍ വിവിധ വകുപ്പുകള്‍ക്ക് നടത്തിപ്പിന്‍റെ ചുമതലകള്‍ നല്‍കി. പരിപാടിക്ക് മുന്നോടിയായി ആഗസ്റ്റ് 11, 12 തിയതികളില്‍ റിഹേഴ്സലും 13ന് അന്തിമ ഡ്രസ്സ് റിഹേഴ്സല്‍ പരേഡും നടക്കും. എഡിഎം പി സുരേഷ്, തഹസില്‍ദാര്‍മാര്‍, പോലീസ് ഉദ്യോഗസ്ഥര്‍, വകുപ്പ് ഉദ്യോഗസ്ഥര്‍ തുടങ്ങിയവര്‍ യോഗത്തില്‍ പങ്കെടുത്തു.

പുസ്തകം മാത്രമല്ല, നടുവണ്ണൂര്‍ സ്‌കൂളിലെ കുട്ടികള്‍ക്ക് ചെണ്ടയും വഴങ്ങും

കോഴിക്കോട്: കുഞ്ഞുവിരലില്‍ താളം പിഴക്കാതെ ചെണ്ട കൊട്ടിപ്പഠിക്കുകയാണ് നടുവണ്ണൂര്‍ ഗവ. ഹയര്‍ സെക്കന്‍ഡറി സ്‌കൂളിലെ കുട്ടികള്‍. വിദ്യാലയത്തില്‍ 15 വര്‍ഷമായുള്ള മഴവില്‍ കലാകൂട്ടായ്മയുടെ ഭാഗമായാണ് ചെണ്ട പരിശീലനം ഒരുക്കിയത്. ഇപ്പോള്‍ വിദ്യാലയത്തിലെ 25 കുട്ടികളുടെ പഠനത്തിലും ജീവിതത്തിലും പുതുതാളമായി മാറിയിരിക്കുകയാണ് പരിശീലനം. കുട്ടികള്‍ കൊട്ടിപ്പഠിക്കുന്നത് കണ്ടതോടെ ആവേശം കയറിയ അധ്യാപകരും രക്ഷിതാക്കളും ചെണ്ട കൊട്ടലിന്‍റെ ബാലപാഠങ്ങള്‍ സായത്തമാക്കാനുള്ള ശ്രമത്തിലാണിപ്പോള്‍. രക്ഷിതാക്കളും അധ്യാപകരുമായി 15 പേരാണ് പരിശീലനം നേടുന്നത്. രണ്ടു ബാച്ചായി സ്‌കൂള്‍ സമയത്തിന് ശേഷമാണ് പഠനം. ചെണ്ടവാദ്യ കലാകാരന്‍ സി. പി ഉണ്ണിയും മകന്‍ സുധിന്‍ നടുവണ്ണൂരുമാണ് പരിശീലകര്‍. മറ്റിടങ്ങളില്‍ വലിയ തുക മുടക്കി പഠിക്കേണ്ട ചെണ്ട പരിശീലനത്തിന് കുറഞ്ഞ തുക മാത്രമാണ് കുട്ടികളില്‍നിന്ന് ഈടാക്കുന്നത്. ഈ തുക പരിശീലകര്‍ക്ക് നല്‍കും. സ്‌കൂള്‍ എസ്എംസിയുടെയും രക്ഷിതാക്കളുടെയും പിന്തുണയില്‍ തുടരുന്ന പരിശീലനം 2026 ഫെബ്രുവരിയില്‍ അരങ്ങിലെത്തിക്കാനാണ് ലക്ഷ്യമിടുന്നത്. ലയം, വര്‍ണം, അരങ്ങ്, നടനം ഫിലിം ക്ലബ് എന്നീ അഞ്ചു വിഭാഗങ്ങളിലായി സംഗീതം, ചിത്രരചന, അഭിനയം, നൃത്തം, സിനിമ എന്നിവയിലെ പ്രതിഭകളെ കണ്ടെത്താനും പരിശീലനം നല്‍കാനുമുള്ള സ്‌കൂളിന്‍റെ തനതു പ്രവര്‍ത്തനമാണ് മഴവില്‍ കലാകൂട്ടായ്മ. സ്‌കൂളിലെ ചിത്രകലാ അധ്യാപകനായ കെ.സി.രാജീവനാണ് കൂട്ടായ്മക്ക് തുടക്കമിട്ടത്. നിലവില്‍ ഷാജി കാവില്‍, എ.കെ. സുരേഷ് ബാബു എന്നീ അധ്യാപകരാണ് നേതൃത്വം നല്‍കുന്നത്.

കുറ്റ്യാടി- കോഴിക്കോട് റൂട്ടിലെ സ്വകാര്യ ബസ് അപകടങ്ങള്‍ : കൊല്ലപ്പെട്ടവരുടെചിത്രങ്ങളുമായി യൂത്ത് കോണ്‍ഗ്രസ് പ്രതിഷേധം

പേരാമ്പ്ര: കുറ്റ്യാടി- കോഴിക്കോട് റൂട്ടിലെ സ്വകാര്യ ബസ് അപകടങ്ങള്‍ക്ക് ശാശ്വത പരിഹാരം ആവശ്യപ്പെട്ട് യൂത്ത് കോണ്‍ഗ്രസ് നടത്തുന്ന സമരത്തിന്‍റെ അഞ്ചാം ദിനത്തില്‍ ബസപകടത്തില്‍ കൊല്ലപ്പെട്ടവരുടെ ചിത്രങ്ങള്‍ ഉയര്‍ത്തി പേരാമ്പ്ര ബസ് സ്റ്റാന്‍ഡില്‍ പ്രതിഷേധം സംഘടിപ്പിച്ചു. കഴിഞ്ഞ കുറച്ചു മാസങ്ങള്‍ക്കുള്ളില്‍ രണ്ടു വിദ്യാര്‍ഥികള്‍ ഉള്‍പ്പെടെ അഞ്ചുപേരുടെ ജീവനാണ് കുറ്റ്യാടി - കോഴിക്കോട് പാതയില്‍ സ്വകാര്യ ബസുകള്‍ കാരണം പൊലിഞ്ഞത്. പ്രശ്‌ന പരിഹാര ചര്‍ച്ചയില്‍ ബസുകളുടെ സമയ ക്രമീകരണം ഉള്‍പ്പെടെ നടപ്പിലാക്കി ശാശ്വത പരിഹാരം ആവശ്യപ്പെടാനാണ് സംഘടനയുടെ തീരുമാനം. പ്രതിഷേധ സമരത്തില്‍ നിയോജകമണ്ഡലം പ്രസിഡന്‍റ് സായൂജ് അമ്പലക്കണ്ടി അധ്യക്ഷത വഹിച്ചു. ഡിസിസി സെക്രട്ടറി പി.കെ. രാഗേഷ് ഉദ്ഘാടനം ചെയ്തു. യൂത്ത് കോണ്‍ഗ്രസ് ജില്ലാ വൈസ് പ്രസിഡന്‍റ് എസ്. സുനന്ദ്, ജില്ലാ ജനറല്‍ സെക്രട്ടറി അഖില്‍ ഹരികൃഷ്ണന്‍, എസ്. അഭിമന്യു, ആദില്‍ മുണ്ടിയത്ത്, മോഹന്‍ദാസ് ഓണിയില്‍, റഷീദ് പുറ്റംപൊയില്‍, സുമിത്ത് കടിയങ്ങാട്, വാസു വേങ്ങേരി, ബാബു തത്തക്കാടന്‍, വിനോദ് കല്ലൂര്‍ എന്നിവര്‍ പ്രസംഗിച്ചു. കെ.കെ. അന്‍സാര്‍, അബിന്‍ ജോസ് കുംബ്ലാനി, അമിത് എടാണി, സജീര്‍ പന്നിമുക്ക്, അശ്വിന്‍ദേവ് മൂരികുത്തി, കെ.സി. അനീഷ്, ജെ.എസ്. ഹേമന്ത്, ജയിന്‍ ജോണ്‍, യദു കല്ലൂര്‍, സുഹൈല്‍ ഇരിങ്ങത്ത് തുടങ്ങിയവര്‍ നേതൃത്വം നല്‍കി.

മരണവീട് സന്ദര്‍ശിച്ചു മടങ്ങിയ യുവാവ് വാഹനാപകടത്തില്‍ മരിച്ചു

കോഴിക്കോട്: മരണവീട് സന്ദര്‍ശിച്ച സ്‌കൂട്ടറില്‍ മടങ്ങിയ യുവാവ് കാറിടിച്ച് മരിച്ചു. ബാലുശ്ശേരി അറപ്പീടിക തോട്ടത്തില്‍ താമസിക്കുന്ന കപ്പുറം കൊന്തളത്ത് മാറായില്‍ മുജീബിന്‍റെ (കുവൈത്ത്) മകന്‍ മുഹമ്മദ് ഷറീജ് (18) ആണ് മരിച്ചത്. ചൊവ്വാഴ്ച അര്‍ധ രാത്രി 12 മണിയോടെ പി.സി പാലം ഭാഗത്ത് ബന്ധുവിന്‍റെ മരണവീട് സന്ദര്‍ശിച്ച് പിതൃസഹോദര പുത്രന്‍ അനസിനോടൊപ്പം സ്‌കൂട്ടറില്‍ വീട്ടിലേക്ക് മടങ്ങുകയായിരുന്നു. കാക്കൂര്‍ ടൗണില്‍ മെയിന്‍ റോഡിലേക്ക് പ്രവേശിക്കവെ കോഴിക്കോട് ഭാഗത്തുനിന്നും വന്ന കാര്‍ സ്‌കൂട്ടറില്‍ ഇടിച്ചു. ഷറീജിനെ ഉടന്‍ കോഴിക്കോട് മെഡിക്കല്‍ കോളജ് ആശുപത്രിയിലെത്തിച്ചെങ്കിലും മരിച്ചു. സ്‌കൂട്ടര്‍ ഓടിച്ച അനസ് പരിക്കുകളോടെ മെഡിക്കല്‍ കോളജ് ആശുപത്രിയില്‍ ചികിത്സയിലാണ്. മാതാവ്: ഉസ്‌വത്ത് (അറപ്പീടിക). സഹോദരങ്ങള്‍: ദില്‍നവാസ് (സൗദി), റമീസ്.

അക്കൗണ്ട്‌സ് വിഭാഗത്തില്‍ തിരിമറി നടത്തിയയാളെ പിടികൂടി

കോഴിക്കോട്: മലബാര്‍ ഗ്രൂപ്പ് കമ്പനിയുടെ സഹസ്ഥാപനമായ കോഴിക്കോട് ആസ്ഥാനമായി പ്രവര്‍ത്തിക്കുന്ന എസ് 24x7 പ്രൈവറ്റ് ലിമിറ്റഡ് എന്ന കമ്പനിയുടെ അക്കൗണ്ട്‌സ് വിഭാഗത്തില്‍ തിരിമറി നടത്തിയ ആളെ പിടികൂടി. ഡെപ്യൂട്ടി മാനേജര്‍ ആയഞ്ചേരി മംഗലാട് പടിഞ്ഞാറേ തേരത്ത് ഹൗസിൽ റിനു രാജിനെ ( 37) യാണ് അറസ്റ്റ് ചെയ്തത്. ജോലി ചെയ്ത കാലയളവില്‍ കമ്പനി അക്കൗണ്ടിലെ പണം തിരിമറി നടത്തുകയും ഭീമമായ തുക തന്‍റെ സ്വന്തം അക്കൗണ്ടിലേക്കും മറ്റു ബന്ധുക്കളുടെ പേരിലുള്ള വിവിധ അക്കൗണ്ടുകളിലേക്കും വക മാറ്റി അയക്കുകയും ചെയ്തുവെന്ന കണ്ടെത്തലിനെ തുടര്‍ന്നാണ് നടപടി. റിനുരാജ് എന്നയാള്‍ കമ്പനിയുടെ പേര് ഉപയോഗിച്ച് നടത്തുന്ന യാതൊരു ഇടപാടുകള്‍ക്കും മലബാര്‍ ഗ്രൂപ്പിനോ എസ് 24x 7 പ്രൈവറ്റ് ലിമിറ്റഡ് എന്ന കമ്പനിക്കോ യാതൊരു ഉത്തരവാദിത്തവും ഉണ്ടായിരിക്കുന്നതല്ലെന്ന് മാനേജ്മെന്‍റ് അറിയിച്ചു.

മലയോര ഹൈവേ: കയ്യേറ്റക്കാരെ സഹായിക്കുന്നതിനെ നിയമപരമായി നേരിടുമെന്ന് ജനകീയ കർമ്മ സമിതി

ചക്കിട്ടപാറ: വ്യക്തമായ രേഖകൾ മറച്ച് വച്ച് ചക്കിട്ടപാറ ടൗണിൽ കയ്യേറ്റക്കാരെ സഹായിക്കുന്ന രീതിയിൽ വീതി നിർണയിച്ച് മലയോര ഹൈവേ നിർമിക്കാനുള്ള ചിലരുടെ നീക്കത്തെ നിയമത്തിലൂടെ നേരിടാൻ ജനകീയ കർമ്മ സമിതിയും ബിജെപി ചക്കിട്ടപാറ പഞ്ചായത്ത് കമ്മിറ്റിയും രംഗത്ത്. പെരുവണ്ണാമൂഴി മുതൽ ചെമ്പ്ര വരെയുള്ള അഞ്ച് കിലോ മീറ്ററിൽ ചക്കിട്ടപാറ ടൗണിലെ കേവലം 200 മീറ്റർ ഭാഗത്തിന്‍റെ ശരിയായ സർവേ രേഖകൾ കാണാനില്ലെന്ന അധികൃതരുടെ ഭാഗം ആടിനെ പട്ടിയാക്കുന്ന നയമാണ്. റോഡിന്‍റെ വീതി നിർണയിക്കാൻ ഇതുവരെ നാല് അളവുകളാണ് നടത്തിയത്. നാലും നാലു വിധത്തിലാണ് അളവ് രേഖപ്പെടുത്തിയിരിക്കുന്നത്. റോഡ് കയ്യേറ്റക്കാരെ സംരക്ഷിക്കാനാണിത്. ഇത് ജനം അംഗീകരിക്കില്ല. ഇതിന്‍റെ അടിസ്ഥാനത്തിൽ പ്രമുഖ അഭിഭാഷകരായ സുമിൻ എസ്. നെടുങ്ങാടൻ, ബെന്നി കാരിമറ്റം എന്നിവരുടെ സാന്നിധ്യത്തിൽ ചക്കിട്ടപാറ വ്യാപാരഭവൻ ഹാളിൽ റോഡിന്‍റെ വീതി അളവ് സംബന്ധിച്ച് ലഭ്യമായ രേഖകൾ പരിശോധിച്ചു. പരിശോധനയെത്തുടർന്ന് ഹൈക്കോടതിയുടെ നിയമ സഹായം തേടാൻ തീരുമാനിച്ചു. ജനകീയ കർമ്മ സമിതി കൺവീനർ രാജൻ വർക്കി, ബിജെപി നേതാക്കളായ ബാബു പുതുപ്പറമ്പിൽ, പത്മനാഭൻ പൊറോത്ത്, ശ്രീനിവാസൻ മനക്കൽ, വി.വി.രാജൻ, ചക്കിട്ടപാറയിലെ പ്രമുഖ വ്യവസായി സജി കാരിമറ്റം എന്നിവർ സംബന്ധിച്ചു.

വാർഷികാഘോഷവും ഉന്നത വിജയികളെ ആദരിക്കലും നടത്തി

കുറ്റ്യാടി: മരുതോങ്കര സർവീസ് സഹകരണ ബാങ്കിന്‍റെ ഒന്നാം വാർഷികാഘോഷവും ഉന്നത വിജയം നേടിയ വിദ്യാർഥികളെ ആദരിക്കൽ ചടങ്ങും നടന്നു. ലാന്‍റ് ബോർഡ് മെന്പർ കെ.ടി. ജയിംസ് ഉദ്ഘാടനം ചെയ്തു. മരുതോങ്കര സർവീസ് സഹകരണ ബാങ്ക് പ്രസിഡന്‍റ് കെ.കെ. പാർഥൻ അധ്യക്ഷത വഹിച്ചു. പഞ്ചായത്ത് അംഗങ്ങളായ ബീന കൂരാറ, അജിത പവിത്രൻ, വിവിധ രാഷ്ട്രീയ നേതാക്കളായ ടി. പവിത്രൻ, വി.കെ. അബ്ദുള്ള, കെ.ജെ. സെബാസ്റ്റ്യൻ, പി. ഭാസ്കരൻ, കെ. ജിഗേഷ്, ഡയറക്ടർമാരായ പി.പി.കെ. നവാസ്, സനൽ വക്കത്ത്, ഷെർലി കെ. ജോർജ്, ജയ്സൽ കെ. സക്കറിയ, നസീമ ജമാൽ, അബിൻ ബാബു, വി.വി. വിൻസി, പി.എം. തോമസ്, അസിസ്റ്റന്‍റ് സെക്രട്ടറി ടി.ടി. ഷാജി, പി.പി. വിനോദൻ എന്നിവർ പ്രസംഗിച്ചു.

ബാറ്ററി മോഷ്ടിച്ച പ്രതികൾ പിടിയിൽ

കൊയിലാണ്ടി: നന്തിയിൽ കരാർ കമ്പനി ലോറികളുടെ ബാറ്ററി മോഷണം പോയ സംഭവത്തിൽ പ്രതികൾ പോലീസ് പിടിയിൽ. തിക്കോടി കോറോത്ത് മുഹമ്മദ് ജിയാദ് (20), തച്ചൻകുന്ന് മനയത്ത് താഴെ മുഹമ്മദ് ജാബിർ (20) കടലൂർ മനയത്ത് മുഹമ്മദ് ഹിദാഷ് (19), തച്ചൻകുന്ന് ചേരിച്ചൽ താഴെ സഹീർ (20), കോടിക്കൽ നാഗപറമ്പിൽ ഷാമിൽ (20) തുടങ്ങിയവരെയാണ് അറസ്റ്റ് ചെയ്തത്. ജൂലായ് 19നാണ് കേസിനാസ്പദമായ സംഭവം. ദേശീയപാത കരാർ കമ്പനിയായ വാഗാഡിന്‍റെ ലോറികളുടെ ബാറ്ററികളാണ് മോഷ്ടിച്ചത്. ഇതുസംബന്ധിച്ച് സെക്യൂരിറ്റി ജീവനക്കാരൻ പരാതി നൽകുകയായിരുന്നു. വടകര ഡിവൈഎസ്പി ഹരി പ്രസാദിന്‍റെ നിർദേശപ്രകാരം സിഐ ശ്രീലാൽ ചന്ദ്രശേഖരൻ, എസ്ഐമാരായ ഗിരീഷ്, പ്രദീപ്, റൂറൽ സ്പെഷൽ സ്ക്വാഡ് എഎസ്ഐ ബീനീഷ് കുമാർ, ടി.കെ. ശോഭിത്ത്, എസ്.കെ. അഖിലേഷ്, ബി.എസ്. ശ്യാം ജിത്ത്, അതുൽ തുടങ്ങിയവരാണ് പ്രതികളെ പിടികൂടിയത്.

കുറ്റ്യാടി -കോഴിക്കോട് റൂട്ടിലെ ബസ് സർവീസ് പ്രശ്നം പരിഹരിക്കാൻ ഇടപെടണമെന്ന്

കോഴിക്കോട്: കോഴിക്കോട് -കുറ്റ്യാടി റൂട്ടിലെ സ്വകാര്യ ബസുകളുടെ മത്സരയോട്ടം കാരണം റോഡിൽ ജീവനുകൾ നഷ്ടപ്പെടുന്നത് ആവർത്തിക്കപ്പെടുന്ന സാഹചര്യത്തിൽ പ്രശ്ന പരിഹാരത്തിന് ജില്ലാ കളക്ടർ അടിയന്തരമായി സർവകക്ഷി യോഗം വിളിക്കണമെന്ന് കെഎസ്‌യു ജില്ലാ പ്രസിഡന്‍റ് വി.ടി സൂരജ് ആവശ്യപ്പെട്ടു. ഈ റൂട്ടിലോടുന്ന പല ബസുകളിലെയും ജീവനക്കാരായി പ്രവർത്തിക്കുന്നത് ലൈസൻസ് പോലുമില്ലാത്ത ക്രിമിനൽ സംഘമാണ്. ഇതിന് വേണ്ടരീതിയിലുള്ള പരിശോധനയോ നടപടികളോ മോട്ടോർ വാഹന വകുപ്പിന്‍റെ ഭാഗത്തുനിന്ന് ഉണ്ടാവാത്തതാണ് ഇത്തരം പ്രശ്നങ്ങൾ വീണ്ടും ആവർത്തിക്കപ്പെടാൻ കാരണം. കുറ്റ്യാടി- കോഴിക്കോട് റൂട്ടിൽ ബസുകൾക്ക് മതിയായ വേഗത്തിൽ സർവീസ് നടത്താനുള്ള സമയക്രമങ്ങൾ അനുവദിക്കണം. പേരാമ്പ്ര ഉള്ളിയേരി ബസ് സ്റ്റാൻഡുകളിൽ സ്വകാര്യ ബസുകൾ സർവീസ് നടത്തുമ്പോൾ സമയക്രമം പാലിക്കുന്നുണ്ടോയെന്ന് ഉറപ്പുവരുത്താൻ പോലീസ് എയിഡ് പോസ്റ്റുകൾ സ്ഥാപിക്കണമെന്നും ജില്ലാ കമ്മിറ്റി പ്രസ്താവനയിലൂടെ ആവശ്യപ്പെട്ടു.

അധികൃതരുടെ നിസംഗത; സമരം വ്യാപിപ്പിക്കാൻ യൂത്ത് കോൺഗ്രസ്

പേരാമ്പ്ര: കുറ്റ്യാടി- കോഴിക്കോട് റൂട്ടിലെ ബസുകളുടെ അമിതവേഗതയും മത്സരയോട്ടവും കാരണം നിരവധി ജീവനുകൾ നഷ്ടപ്പെടുകയും ദിനംപ്രതി ഉണ്ടാവുന്ന അപകടങ്ങളിൽ യാത്രക്കാർക്ക് പരിക്കേൽക്കുകയും ചെയ്യുന്ന സാഹചര്യത്തിൽ കളക്ടർ ഇടപെട്ട് ശാശ്വത പരിഹാരം ഉണ്ടാക്കണമെന്ന് യൂത്ത് കോൺഗ്രസ് ആവശ്യപ്പെട്ടു. വിദ്യാർഥിയുടെ അപകട മരണത്തിനു ശേഷം യൂത്ത് കോൺഗ്രസിന്‍റെ നേതൃത്വത്തിൽ പേരാമ്പ്രയിൽ ബസുകൾ തടഞ്ഞിരുന്നു. ചർച്ചയിൽ പരിഹാരമാവുന്നതിന് മുമ്പ് സ്വകാര്യ ബസുകൾ നിരത്തിലിറക്കിയാൽ കുറ്റ്യാടി- കോഴിക്കോട് റൂട്ടിലെ എല്ലായിടങ്ങളിലും ബസുകൾ തടയാനാണ് സംഘടനയുടെ തീരുമാനം. കോഴിക്കോട് പുതിയ സ്റ്റാൻഡ്, എരഞ്ഞിക്കൽ, തലക്കുളത്തൂർ, അത്തോളി, ഉള്ളിയേരി, നടുവണ്ണൂർ, പേരാമ്പ്ര, കടിയങ്ങാട്, കുറ്റ്യാടി എന്നിവിടങ്ങളിൽ നാളെ മുതൽ ബസുകൾ തടയുമെന്നും യൂത്ത് കോൺഗ്രസ് ജില്ലാ വൈസ് പ്രസിഡന്‍റ് എസ്. സുനന്ദ് പറഞ്ഞു.

യൂത്ത് ലീഗ് ആർടിഒ ഓഫീസ് മാർച്ച് നടത്തി

പേരാമ്പ്ര: കുറ്റ്യാടി -കോഴിക്കോട് റൂട്ടിൽ മനുഷ്യരെ കൊല്ലുന്ന പ്രൈവെറ്റ് ബസ് ഗുണ്ടകളെ അറസ്റ്റ് ചെയ്യണമെന്ന് ആവശ്യപ്പെട്ട് പേരാമ്പ്രയിൽ മുസ്ലിം യൂത്ത് ലീഗ് ആർടിഒ ഓഫീസ് മാർച്ച് നടത്തി. പേരാമ്പ്ര ബസ് സ്റ്റാൻഡ് പരിസരത്തിന് ആരംഭിച്ച് മാർച്ച് സിവിൽ സ്റ്റേഷൻ പരിസരത്ത് പോലീസ് തടഞ്ഞു. ദേശീയ സെക്രട്ടറി സാജിദ് നടുവണ്ണൂർ ഉദ്ഘാടനം ചെയ്തു. സി.കെ. ഹാഫിസ് അധ്യക്ഷത വഹിച്ചു. മിസ്ഹബ് കീഴരിയൂർ, ശിഹാബ് കന്നാട്ടി, ആർ.എം. നിഷാദ്, കെ.പി. റസാഖ്, കെ.സി. മുഹമ്മദ്, സഈദ് അയനിക്കൽ, സലീം മിലാസ്, ആർ.കെ. മുഹമ്മദ്, എ.കെ. ഫസലുറഹ്മാൻ എന്നിവർ പ്രസംഗിച്ചു. മാർച്ചിന് നിയാസ് കക്കാട്, ശംസുദീൻ മരുതേരി, യാസർ കക്കാട്, ഷബീർ ചാലിൽ, നജീബ് അരിക്കൽ, സിദീഖ് തൊണ്ടിയിൽ, പി.സി. സാദത്ത്, ഉബൈദ് കുട്ടോത്ത്, അഫ്നാസ് തുറയൂർ, ഗഫൂർ വാല്യക്കോട്, വി.വി. നസ്രുദ്ധീൻ, ആശിഖ് പുല്ല്യേട്ട്, ശുഹൈബ് അരിക്കുളം എന്നിവർ നേതൃത്വം നൽകി. photo: മാർച്ചിന് നേതൃത്വം കൊടുത്ത യൂത്ത് ലീഗ് നേതാക്കളെ പോലീസ് അറസ്റ്റ് ചെയ്ത് നീക്കുന്നു.

"ഞങ്ങൾക്കും ഇവിടെ ജീവിക്കണം' സമര കാഹളമുയർത്തി മലയോരം

ഓഗസ്റ്റ് രണ്ടിന് കർഷക അതിജീവന സാരി വേലി റാലി നടത്തും പേരാമ്പ്ര: ഞങ്ങൾക്കും ഇവിടെ ജീവിക്കണം എന്ന മുദ്രാവാക്യം ഉയർത്തി രൂക്ഷമായ വന്യമൃഗ ശല്യത്തിനെതിരേ താമരശേരി രൂപത കത്തോലിക്ക കോൺഗ്രസ് ഓഗസ്റ്റ് രണ്ടിന് നിലമ്പൂർ, താമരശേരി, പെരുവണ്ണാമൂഴി ഫോറസ്റ്റ് റെയിഞ്ച് ഓഫീസ് പരിസരങ്ങളിലേക്ക് കർഷക അതി ജീവന റാലി സംഘടിപ്പിക്കുന്നു. പെരുവണ്ണാമൂഴിയിൽ കൂരാച്ചുണ്ട് മരുതോങ്കര ഫൊറോനകളിലെ വിവിധ സംഘടനകളെ അണിനിരത്തിയാണ് സാരി വേലി റാലി നടത്തുന്നത്. ഇതിന്‍റെ ഭാഗമായി പെരുവണ്ണാമൂഴിയിൽ സംഘാടക സമിതി രൂപീകരിച്ചു. ഫാത്തിമ മാതാ പള്ളി പാരിഷ് ഹാളിൽ ചേർന്ന യോഗത്തിൽ മരുതോങ്കര ഫൊറോന വികാരി ഫാ. ആന്‍റോ മൂലയിൽ അധ്യക്ഷത വഹിച്ചു. കത്തോലിക്ക കോൺഗ്രസ് രൂപത പ്രസിഡന്‍റ് ഡോ. ചാക്കോ കാളാംപറമ്പിൽ ഉദ്ഘാടനം ചെയ്തു. കൂരാച്ചുണ്ട് ഫൊറോന വികാരി ഫാ. വിൻസെന്‍റ് കണ്ടത്തിൽ മുഖ്യ പ്രഭാഷണം നടത്തി. രൂപത സെക്രട്ടറി ഷാജി കണ്ടത്തിൽ, ഫാ. ഡൊമിനിക് മുട്ടത്തുകുടിയിൽ, ഫാ. റോയി കൂനാനിക്കൽ, ജോസ് ചെറുവള്ളിൽ, ജോഷി കറുകമാലിൽ, നിമ്മി പൊതിയിട്ടയിൽ എന്നിവർ പ്രസംഗിച്ചു. ഫാ. റെജി വള്ളോപ്പള്ളി സ്വാഗതവും ജോൺസൺ കക്കയം നന്ദിയും പറഞ്ഞു. താമരശേരി രൂപത വികാരി ജനറൽ റവ. ഫാ. ജോയ്സ് വയലിൽ മുഖ്യ രക്ഷാധികാരിയായി 151അംഗ സംഘാടക സമിതി രൂപീകരിച്ചു. ഫാ. വിൻസന്‍റ് കണ്ടത്തിൽ, ഫാ. ആന്‍റോ മൂലയിൽ എന്നിവർ രക്ഷാധികാരികളായും, ഫാ. റെജി വള്ളോപ്പള്ളി, ഫാ. ഡൊമിനിക് മുട്ടത്തുകുടിയിൽ, ഫാ. റോയി കൂനാനിക്കൽ, ഡോ. ചാക്കോ കാളാം പറമ്പിൽ, ഷാജി കണ്ടത്തിൽ എന്നിവർ സഹ രക്ഷാധികാരികളുമാണ്. ജോഷി കറുകമാലി (ചെയർമാൻ), ജോൺസൺ കക്കയം (ജന. കൺവീനർ), ജോസ് ചെറുവള്ളിൽ, ജോൺസൺ മാമൂട്ടിൽ എന്നിവർ കോ-ഓ ഡിനേറ്റർമാരും, സണ്ണി എമ്പ്രയിലിനെ ട്രഷററായും തെരഞ്ഞെടുത്തു.

കല്ലാനോട് വീടുകളിൽ കുരങ്ങുകൾ വിലസുന്നു

കൂരാച്ചുണ്ട്: ജനവാസ കേന്ദ്രങ്ങളിലെ കൃഷിയിടങ്ങളിൽ കുരങ്ങുകളുടെ ശല്യത്തോടൊപ്പം കുരങ്ങുകൾ വീടുകളിലും കയറി വിലസുന്നു. കഴിഞ്ഞദിവസം കല്ലാനോട് ടൗണിന് സമീപമുള്ള കർഷകനായ ചെമ്പനാനി കുര്യന്‍റെ വീട്ടിലാണ് പകൽ സമയത്ത് കുരങ്ങ് എത്തിയത്. വീട്ടിലുള്ള സാധനങ്ങളും മറ്റും ഇവ നശിപ്പിക്കുന്നതായും പറയുന്നു. സമീപ പ്രദേശങ്ങളായ കരിയാത്തുംപാറ, ഇരുപത്തെട്ടാംമൈലിലും കുരങ്ങു ശല്യം വ്യാപകമാണ്. ഈ മേഖലകളിൽ നാളീകേരത്തെ ആശ്രയിച്ചു കഴിയുന്ന നിരവധി കുടുംബങ്ങളാണ് ദുരിതത്തിലായത്. കല്ലാനോട് ടൗണിന് സമീപത്തെ വീടുകളിലും കുരങ്ങ് ശല്യം ആരംഭിച്ചതോടെ നാട്ടുകാർ ഏറെ ആശങ്കയിലാണ്. ഇവ അക്രമകാരികളാകുന്നതും പ്രദേശവാസികളിൽ ഏറെ ഭീതി ജനിപ്പിക്കുന്നുണ്ട്. ജനവാസ കേന്ദ്രങ്ങളിൽ കുരങ്ങുകൾ ഇറങ്ങുന്നതിന് ശാശ്വതമായ പരിഹാര നടപടികൾ വനം വകുപ്പ് സ്വീകരിക്കണമെന്നാണ് ഇവർ ആവശ്യപ്പെടുന്നത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]